قصة وجهان مختلفان الجزء الأول

قالو ناس زماان ...الدنيا تعلمك الحبيب من لغدار ونتي ويا دنيا اش تعلميناا

كل فولة وعندها كيالهاا ...بمعنى اخور ربيي ميخليكش بلااش ويجيب ليك ربي لي يقدر قيمتك ويعلي شاانك ويهز بمقامك

شي مرات كتفقد التقة التامة فراسك ....كتولي عايش وصافي لا هدف لا مستقبل لا احلام وردية تخلي قلبك يضرب ...عايش فدنياا خالقها ليك بوحدك مظلمة ومافيها نوور ...مخلي نااس تقول فيك لي فيك ولي مكاين ...حادر راسك بحال شي طوير جناحو قصاار مقادر يطير ويبعد ويعيش حياتو ...مقادر يزيد لقدام بوحدو

حتى كيجيب ليك الله لي يشد بيدك ويبغييك كيفما نتي ...كيفما خلقك ربيي وبغاك تكوني ... كيكون بحال الملاك رسلو ليك الله باش يفيق الحياة فداك لقلب لي دفنتيه فقلبك لي شرف ونتي مزال فالشباب ومزال ايدك ممدوة للحنة ...

شدي فديك ليد لي تمدات لييك حتى توصلي لفين بغيتي ومطلقيهاش ...حيت نهار كنتي طايحة مطلقاتكش ❤️

❦

تقديم 🥀🥀🥀🥀

لا تتعجب من أنثى تستحي ...فالاستيحياء من شيم الاميرات ..

أنا الفتاة اللتي تعاني في صمت ...تشير الناس إلي بأصابع الخيبة ...الخبث...والكراهية

لم اقترف ذنبا غير أنني أسكت عن ما يؤلمني ...رضيت بقدر لا أستحقه ....عشت ايام لا أذكر إني تمنيتها ...

لكن في قلبي أنثى تقول :

إبقي قوية حتى يتعجب من حولك من قدرتك على إبقاء الابتسامة على وجهك رغم ما يحدث.

المرأة القوية هي من يمكنها أن تبتسم في الصباح وكأنها لم تكن تبكي في الليلة السابقة.

ابتسمي كي تجعلي الجميع يتأكد أنك أصبحتِ أكثر قوة مما كنت من قبل.

كوني وجهين لعملة واحدة ...تغيري يا فتاة لا تكوني ممن أشير إليها بأصابع التنمر والخيبة !...

حتى لو كنت ضعيفة !! إجعلي من نفسك مصدر قوة و إفتخري 💞

❦

في طبع الانسان خايب و الخايب ربي ديما كيخلي ليه الدقة هي الاخيرة مكيعرفها منين كتجييه و شحال يبكي ويطلب ربي ولكن كيكون غافل على ناس قهرهم في حياتو ... فكل مرة الواحد فاش كيبغي يتكلم و لا يدير شي تصرف يضربو في مية مرة عاد يطبق شنو في بالو حيت جرح الناس ماشي ساهل ... الا ربي خلق شي انسان فيه شي عيب عرفو حسن من داك الشخص لي كيتعرض ليه في حياتو دائما الايام و الاوقات و السنوات كاتقرينا و الدنيا ما هي الا مدرسة كنقراو فيها و لي قرا مزيان راه أكيد غينجح ودايز بعينيه مغمضين اما لي تابعها و باغيها غير هي عرفو ساقط و الله يرحمنا و ينجينا من مآسي الدنيا و متاعها

************

بحال كل نهار معندهاش شي نهار لي مكاتفيقش فيه عينيها حمرين و منفوخين عليها بالبكا ... تفكيرها الطويل كيفاش غتخرج و شنو غتسمع من دارهم و في الشارع كيزيد يحطمها و يقهرها كثر وكثر ... سمعات صوت مهاا كتعيط ليها او بالاحرى كتعاير فيها باش تنووض

مهى (هزات يديها لله سبحانه و دموعها ثاني دايزين) : يا ربي دوز ليا هاد النهار على خير راني عييت و معمري نقنط من رحمتك ..." ناضت و تمات غادية لكوزينة تشوف مها اش بغات "

يزة ( ضارت شافت وفيها و خنزرات) : بسم الله الرحمان الرحيم غا جن وحسن منك نصبحو علييه ولا على خليقتك طيح الراگد

مهى :نعم اماما بغيتيني نعاونك فشي حاجة

يزة : هبطي الكوزينة كولها بطناجرها راه الصابون البلدي و الجيكس حكيهم و حكي الحيوط وحولي الثلاجة من بلاصتها و جيبيها لركنة ... ااه و متنسايش التصبين يتنشر حوايج بنتي اشراق خاصهم ينشفو غدا عندها الخدمة ... نيت نديها تكسى ونفرح بيها ..." تمات خارجة و كاتعيط لبنتها " بنتي اشراق وا زينة البنات فينك سربي قبل متسد القيسارية و يمشيو الغدا

زيرات مهى على يديها كاتنهد و الدمعة فطرف عينيها وااقفة حتى كاتقول رااه ولفت هاد المعاملة و كاااترجع تلقى رااسها كااتجرح كتر من النهار لي قبل... مسحااات دمووعها لي هبطو يجريو بدون اذن منها و توجهات تووجد فطورها، سخنات اتاااي و هو يبان ليها التفرتيت ديال الكومير فواحد الطبسيل ، بدات كااتقلب حتى دخلات عليها يزة كاتهلل

يزة : اديييك البهيييمة مزاال كااادوري ليا هنااااا انا قلت غااتكون هبطات الماعن

مهى (بلعات ريقها) : كانقلب على الكومير بااش نفطر.. فين حطييتوه

يزة(ميقات فيها) : بقى لبوووك غاا لكووومير... "غوتات" هزي الخبز ديال الباااارح و حنجري دغياااا "بتهديد" نرجع من برا نلقاااك كملتي ولا نهااارك ماااتطلع فيه شمس

كمداااتها و سكتات كييف العااادة و ضارت تجبد الخبز البايت وهي دخل ختها إشراق... الشعوورات مطلووقين و رييحتها عااطية من باب الكوزينة المااكياج فالوجه و اللبس ديال الفريع... لي يشووفها هي و مهى ماايقولش خواتات كايبانو بحال الخدامة و مولات الدار و هادشي لي كاايعتاقدو الناس لي مكاايعرفووهمش

-اشراق (عنقات ماماها و قالت بميوعة) : ويييلي اماما علااااش كاااتعصبي فراااسك على هاااد البروصي "طلعات مهى و هبطاتها باحتقار و كملات" ياااله ياله ندييرو الشووپينچ و ندورو بالحااالة و خلي عليييك الزبل

-يزة(شدات وجهها بين يديها و بااستها بحب) : احح على الغزاالة ديالي مااعرفتش كوون مااكنتي نتي كي غااندير نعيش مع هاااد وجه النحس... نتي لي مزينة حيااتي و هازة رااسي

هكا خرجو من الكوزينة وحدة كااتشكر فلاخرة و خلاو وراهم قلب مكسووور إنسانة مدارت حتى ذنب فحيااتها من غيير انها مااعندها زهر غييير سمعاتهم سدو الباب وهي طيح على الكرسي كاااتبكي و تقوول ما بكيت ماهي الحاااجة الوحيدة لي كااتعرف دير فحياتها... بكات حتى شبعات دارت بنااقص من شي فطووور و ناااضت دير داكشي لي قاالت لييها مها حيت عاارفة اش كااايتسناها الى مداارتش اشنو وصاتها.... حكاااات الطنااااجر و دازت لحيووط حتى من الثلاجة تعافرات معاها و حوولاتها ، شداااتها السخفة و العرق نااازل مع جبهتها...كلات بنانة ترد بيها الرووح شوية و مشاات لمااكينة جبدات منها الحوااايج طلعاتهم يتنشرو فالطنطييينة ديال الشمس... هادشي كااامل كاادير فييه من الصباااح حتى لعصر و حتى واااحد مجا غيير هي طاالعة هاابطة فديك الدااار هما ماارجعووش و حتى باها ماجاش... مشات نييشان لبلاصتها طاااحت مهدودة معاقلاش بالعيا... حتى كااتفيق على الصوت لي تعودات تفييق علييه و شكون من غييرها مها لي حرام يتقال عليها أم

يزة(فمها و مجاب) : وااااا غلطة حياااتي نووووضي من تما تنووض فيك العافية ان شاء الله و نتهنى منك

مهى (ناضت قافزة كاتفتف) : نعام اماما.. راه درت گاااع داااكشي لي قلتي ليا والله شووفي الكووزينة

يزة (تلاحت ليها على شعرها بنتفة) : ايييه و الحواااايج لي خليييتي فالسطاااح ابنت لحراام گااااع هادي غيرة فيك من بنتي اشراق مخليا ليها حوااايجها يكشفووو بالشمس

مهى(غوتات بالم) : ااااااي والله اماما ماادرتها بلعاااني "بغات تنوض توقف ولاخرة مزيرة ليها على شعرها دموعها هبطو" عافاك طلقيني هانا نطلع نحيدهم دابا

يزة(طلقاتها بالنترة) : غا جلسي تجلسي على الشووووك ماتنوضي طلعات بنتي مسكييينة فديك الشمس حيييداتهم لي عووول عليييك عووول على الخلا "قربات يدها لنيفها شماتها و خسرات سيفتها" اش هاد الريحة دياال الجيفة غسلي غااا ديك الحلفة لي فوووق رااسك و نتي ديييما مشوهاني مع الناااس بريحتك لي كااتعطعط و حااالتك لي تخلع... ماااعرفت علاياش توووحمت حتى ولدت كمارتك

كلام يزة القاصح واخا من نهار عقلات على راسها وهي كاتسمعو إلا انها كلما سمعاتو يأثر فيها و يضرها فخاطرها واخا ولفات ولكن الجرح كايزيد يتعمق نهار على نهار ماهي فاللخر جسد و روح عندها مشاعر و احاسيس... بغات دوز يدها فشعرها كاتنخصص ساعة وحلات بكثرة ما مخبل شمات راسها لقات ريييحة العرق كاتعطي منها.. ناضت توجد حوايجها باش تغسل حلات المااريو المخرشش صوت الباب ديالو مني كاايتحل كاايتسمع من راس الدرب... شافت فالحوايج لي عندها تما كااتحسر.. ماعمرها عقلات على راسها شرات حواايج جداد ديما كاتلبس غيير الشياطة ديال ختها و مااشي الحاجة الزوينة و النقية غير الحاجة المقطعة ولا المطبعة بجافيل اما الحاجة الزوينة واخا يعرفو يحرقوها و مايعطيوهاش ليها

هزات الرزمة ديالها و توجهات للدوش ساعة لقااتو عامر مشات لبيت ديال مها و عيطات ليها من الباب مااتقدرش دخل إلى ماعطاتهاش الإذن ممنوع عليها

مهى : ماما "لا جواب" ماما

يزة(خرجات كاتسوط) : اش كاااين اش خاااصك.. ماما ماما اشنوو

مهى (حدرات راسها) : بغيت غير نسولك شكون كاااين فالدوش... بغيت ندخل ندوش

يزة: باااك لي تما الحادگة شتي كون كنتي لالة و مالي كون راكي وجدتي لباك الدوش مني دخل من برا و لكن شكوون غاينعس مني ديري نتي هادشي... تسناي نعطيك الزمر و طلعي غسلي فالطواليط الفوق

خلاتها حالة فيها فمها لي سمعها يقول هادي النهار كامل وهي ناعسة... ماشي هي لي خملات الكوزينة و حكات المعان على قلبها و زادتها بالنشييير بلا مادوق النعمة... ياله بغات تهضر وهي دير بناقص دخلات يزة لبيت جابت لييها قرعة شمبوان مداتها ليها.... القرعة خفيفة فيها غيير شوية أو بالأحرى خاوية و هادي هي حالتها ديما مني كاتبغي دوش تعطيها الشمبوان مقاادي

مهى "حركات القرعة" : ماما راه القرعة مابقى فيها والو

يزة: اييوا زيدي فيها الما كييف مواالفة وغسلي و إلى بغيتي قرعة عااامرة خدمي على راااسك و خرجي شريها كي كادير لالاك إشراق

من ديما هدا هو جواابها مني كاطلب منها شي حاجة واخة غيير بسيطة لا شمبوان لا صابون ماعندها حتى حاجة خاصة بيها اولويز هو اللخر مكايخليوهش ليها كادير غيير الخروق... ماكرهاتش حتى هي تخدم و تكون مستقلة برااسها ولكن ماعمرها تقبلات فشي كونكور وااااخا باااها كااايضووور معاها مكاااتقدرش تشري شي حاااجة لراااسها حيت اكييييد غادي طيرها ليييها يزة ما هي كاااتقلب ليييها بيتها و ماااريوووها كااتفليه كل نهار تقوول كاتبيع الحشيش

طلعات لطواليط الفوق لي كانت بلدية ولكن دايرين فيها الرشاشة و دايز ليها التيو ديال الشوفو... دارت كرسي و جلسات غسلات شعرها بهاديك النقطة ماارغواااش بتاتا فكاتو و خوات عليه الما و دوزات على لحمها بالصابونة لي كاينة فالطواليط كايغسلو بيها يديهم... مجات فين تلبس حوايجها حتى سمعات التبراح ديال يزة ، بدات كااتلبس بالزربة و هبطات كاتعقد فزيف حياتي على راسها.... لقاتها كاتحول الماكلة للطبلة

يزة(طلعاتها و هبطاتها) :حتى الدوووش ماايبان علييك كي الناس.. سيري سخني غداك باش تسيقي دوك الدروج راه خنازو

شافت فالطباسل فيهم حووت مشكل مع صوص ديالو.... دخلات لكوزينة لقاتها حاطة ليها بقايا الغدا ديال البارح، سخناتو كاتنهد المرقة و الجلبانة و خيزو حتى اللحم مافيها عمراتو فالطبسيل و خرجات لبيت لقات باها مقابل التلفازة و كياكل الحوت و اشراق مسرحة رجيلاتها المصبووغين فوق السداري كاتكونيكطا...

مهى(باست لباها راسو) : كي درتي مع الخدمة ابابا

مجيد (حرك ليها راسو و عينو فالتلفازة) : لاباس لاباس ابنتي "نعت للطبسيل" ديري يدك معايا

مهى(باستحياء) :لا لا ابابا غير بالصحة

مزااادش أصر عليييها ولا قاااليها وتقوول غادي تااكلي معايا ركز فالتلفازة تاني مكااينش فهاد العالم...

فالوضع العادي الاب غاادي يغووت على مرااتو يقووليها علاش انا حااطة ليا الحوووت و بنتنا كتاكل الماكلة بايتة علاش عازلة بووحدها بحالا ماشي منا و فينا ولكن أب مهى كاااين غير بالسمية اما بالفعل مكاااينش فهاد العالم كاايعرف غيير ياكل و ينعس و يمشي يخدم الميزة الوحيدة لي فييه انه كااايضور معاها مرة مرة و مكاايسبهاش بحال مها و ختها يعني مايشكرها ما يعايرها

دخلات يزة كاتكووسل جلسات حدا راجلها مفيضة خيييرها فوق السدااري كل طرف يا طرف.... جامعة شعرها القصير بلاستيك صابغاه باش تخبي الشيب و وجها نقي واخا بدا يبانو عليه بعض التجاعيد غير انها مهلية فراسها

يزة(مخاطبة راجلها) : عرفتي تشهييييت ليك هااااد الخرجة لي درت انا و بنتي اشراق امجييد فوووجناااا نييت و متعنا رااااسنا حواااايج

مجيد(كااايخشي فووجهو): امممم بالصحة والراحة

يزة ميييقات فيه مااااكرهاااتش تقجووو كاتشااركو الكلام و تبحلس غييير على قبل فلووسو.... نغزاااتو فكتفووو بضحكة صفراااا باغة تحلووون بزز

يزة: اييييوا لااا تقوووول مرااااتي مكاتفكرش فياااا... مداازش ليا هاد الحوووت فالريسطووو حتى خديييت ليك حقك "حرك لييها راااسو بلا ماايجاوبها وهي تغدد اييوا وفييمن غادي تبرد فقصتها اكييد فمهى.. دورات عينها عندها لقاااتها ساااهية فطبسيلها مكايناش هنا وهي تقفزها) : ادييييك اااه... حااالة فمك فدااااك الطبسيييل كي لبهييييمة كاااتسنااايه ينوووض على رجليه لكوووزينة يغسل راااسو "غوتات" نووووضي تهزي جمعي الطبلة و غسلي هاد القجااقل يااااله

شااااافت جهة بااااها الدموووع غاااينقزوو من عينيها لعل و عسى توقع شي معجزة ساعة لا حياة لمن تنادي مسح يديه و ناض من الطبلة.... تحدرااات كاتهز فالماعن و دماغها خدااام كايفكر فداكشي نيييت فاااش سهااات... كل نهار كاااتزيد تأكد بلي زهرها منعادم فهاد الدنيا هما خرجووو فوجو و برعووو راااسهم و هي كاااضرب تمااارة فالدار كي لخدااااامة و كتر حتى لخدااامة و كاين لي كااايحن فييها و يحسبها من عائلتو...

خبطااات هااادوك الماااعن فووق الپوووطاااجي و بدااات كاتغسل فيييهم بالنطرة مااااكرهااااتش تغووووت بالجهد حتى يبح صوووتها... مااااكرهاااتش تريب هااادوك الماعن كاااملين لأرض حتى يتشتتو... ولكن هااادشي كااامل ماتزعمش ديييرو غاتكمدها فقلبها و تسكت بحااال ديما...

مهى (هزااات راااسها لسما و نطقات بقلب مجروح) : حسبي الله ونعم الوكيل فيييكم حسبي الله ونعم الوكيل

مع اخخر كلمة نطقاااات دخلات علييييها لالاهم اشراااااق كاااتعوج و تلعب فشعرها سمعااااتها اشنووو قالت و ضحكااات باستهزاء كاااتبغي غييير منين دوووز لييها

إشراق (دارت يديها على جنااابها) : مااااال طوااااسلك كاااتحسبني علييينا ياااك لاباس مجوووعينك ولا منعسييينك فالزنقة

مهى : مداااوياااش معاك

إشراق (باستهزاء) : و انا مشوووقة نهضر معاااك احبيبة

مهى (مسحات عينيها بكمها) : علاااااش كااااديري معايا هكا بااااش ضريتك... زعما راااني ختك الصغيرة

إشراق (ضحكات بالجهد) : ختي الصغيييرة ههه واااش شاااايفة راااسك فالمراااية ولا مشااايفاهش... كاتباني كبر مني بقرن و زمارة... الصغر ماااشي بالعمر الزييين "رفعات ذقنها كَتْباها بزينها" الصغر كاايتقااس بالجمااال الخاارجي و الوااحد مني كاايتهلا فرااسو كايبان دييما صغيير "بثقة" انا راااه لي شااافني كايقوول عندي عشريين ... "طلعاتها و هبطااتها" ماشي بحااالك لا زين لامجي بكري" ضربات على صدرها" اناااا لي خدمت على راسي اناااا لي فرحت وااليديا و هزيت رااسي... ديري نفس و خرجي خدمي على رااااسك واااخا غيير حلي رجليييك للمكابيت...."ضربات راسها بحالا تفكرات شي حاجة " ااااه نسييييت مكاااينش لي يشوووف فيييك مني غاايشوفو هاد الكماااارة غااايعدفوووك قبل مااايشوفو فش*لوقك الخااااامج "دفلات ليها عند رجليها" تفووو على گنس

خرجااااات ماااعطااااتهاش فرصة تجااااوبها مهى طلعاااات معاها الصهدة من كلام ختها مااااشعرااات حتى ضربات الكاااس لي كااان فيديها مع لارض و غوتات

مهى : واااااااااش انااااا كرهت نخدم وااااش كرهت ندييير لرااااسي قيييمة حتى انا "هزات عينيها ف يزة لي دخلات كاتجري مني سمعات التهراس" رحمووووووني اعباااااد الله رحمووووني حراااام علييييكم

يزة(ضربات فخاااضها) : وييييلي على بنت الحرااااام ولاااات تهرس عليااااا المااااعن "قربات عندها شداااتها من دراااعها" واااااش الحمااااارة هااااد الكاااااس لي مهرسة كنتي تشري فييييه" بغات مهى تنطق وهي تهز يدها فوجهها" غااااتنطقي شي كلمة غااادي نريب لبووووك سنانك "زيييرات عليها قربات تقسم ليها دراعها" دووووزي جمعي الزاااااج البروووصي لي تبلييت بيه و عااااودي سيقي الكووزينة عاد دوووزي للدروج بااااش نعلمك تهرسي عليا المااعن الخااانزة ولا قد القب قد السطل

بكااااات حتى شبعااااات و تقوووول واش حنااات فيييها بداااات كاتجمع فالزاج وهي تجرح فصبعها كمدااتها و كملات الجميييع و الدم من صبعها دااايز نقات الدنيا عاد مشات قطعات من واحد الزيف مورصو و دوراتو على صبعها.... سيييقات الكووووزينة من جدييييد عاد داااازت للدرووووج سيقاااااتهم و دوووزات الكرااطة بغات تطلع تجيب لما تسيق الضسيسة وهي تلقى يزة وااقفة ليها فالراس لاحت لييها الجفاااف

يزة: مني تسيقي الضسيسة دووزي الجفاااف عااااد طلعي...

خدات الجفاف بلا مااتجاوبها و كملات طريقها عمراااات الماااا و هبطات تاني كااتسيق برااا كااادوز التشطييبة وهي تبان لييها إشراق جااااية هازة ميكة. ديال السقااااطة دازت عند شي دراري صغااار عطاتهم بييموات و وشوشات ليييهم عاد دخلات دايرة ابتسامة جااانبية شوييية وهما يبداااو يضحكووو و يشوووفو ف مهى حتى نطق واااحد فيهم و تبعوه لاخريين "ستيييلو بييييك كاااايسيق هههه" "عمرك شفتي عوووود الند عندووو جوج رجليييين" "لا لا شفت غاااا لفعة عندها شوية الشعر"

ياااااله بغااات تجري علييييهم قبل مااااتنطق بااان ليها الحجر ناازل عليييهم كي الشتااااا و هما هربانين بلا مااتلفت عرفاااات شكوووون جاااا

هربوووووو البرااااااهش كاااايرددو " المشعكة جااااااات المشعكة جااات"

.... (قربات عند مهى كاتسب فييهم و تعاود) : الله ينعل تراااااابيكم اولاااااد الحرااااام... نشد فييييكم شي حماااااار نعاااااود لملتوووو لختااااانة هذا إلى كنتووو مختنين اصلا... غير البواال على خوووه "شافت فمهى مشربنة" و نتي غلبووووك براااهش لاصقييين فلارض غراااف ديااال المااا فااايتهم لدييك الجيه يااله يبردو شوية "دفلات" تفوووووو گنس قصييييف

مهى(جاااااتها الضحكة بلا هواها) : اوييييلي اايمان مااالكي شااااعلة ماتديش عليهم

إيمان ( بادلاتها العناق كاتخشي شعرها فالشال لي لاوية على راسها) : ماااتديش عليهم غا نتي اختي ... بغيييت مرة وحدة فحيااااتي نشووووفك كدااافعي على راااسك ولا مخرجة عينيك فشي حد

مهى(تنهداااات و نطقات كاتصطانع الابتسامة باغة تلطف الجو) : عندي صعصع بحاالك مانحتاجش نهضر نتي فيييك الكفاااية"طلعاتها و هبطاتها" فييين كنتي دااايعة

إيمان (عرفاتها كاتقلب الموضوع) : كنت فالحمام يا لالة و دابا هااابطة نتقدا "فينما دخلات گصتها كاتخرج تاني" تفوووو على خرااا هاد العزااافة لي عندي غيير كااتبدا تنشف و تبدا طل من الزيف

مهى : سيري نشفييه كامل و طلقيه بحال ديما

إيمان : ماقدنيش الوقت داكشي علاش لويت زيف و خرجت "حطات يدها على كتفها" نتي كي دوزتي نهااارك

مهى(تنهدات) : كي غاااندوزو راااك عااارفة لي كاااااين...."شافت الفوق لا يكون كايطل شي حد و يسمعها و قالت بصوت خافت" مكانلقى حتى الوقت فييين نراااجع و الامتحان ديال الماستر قرب

إيمان (ضربات رجلها مع لارض) : مطااااحوش فياااا هاد اللفعات اما كووون طوووفتهم.... هانتي ولي تحفظي بالليل و تهنااااي

مهى: حتى القراية وليت نقرا بالتخبية بحالا كاانفسد" عينيها غرغرو "

إيمان : فخباااارك مني كاانشوووفك هكااا مكااانكرهش غيير تجي عيني فعيينهم نطييير عليييهم

إيمان من ديييما كاااضربها النفس على صاااحبتها و كاااتجي عليييها هادشي ولفوووه مني كانو كايقراااو فنفس المدرسة و ساكنة قريبة ليها واخا ايمان صغر من مهى بعام مفاهمة هي وياها بزااف لدرجة ولاو كتر من الخواتات مااايمكنش يخطاااو بعضيااتهم... بيناتهم اختلاف واااحد هو ان ايييمان كااطير و مكاتسمحش فحقها واخا يكون ففم السبع على عكس مهى السكووتية لي دييما سااامحة فحقها و هاادشي لي مخلي الكبير و الصغيير يضسر علييها.... هاد الاخيييرة يااله بغاات تنطق وهي تقفز من الغووتة ديال يزة من الشرجم

يزة :اديييييك اااه طلعييي من تماااا ونتي سكنتي فجوج درجااااات "قشعااات إيمان" العزااافة اش كاااديري هنا ياااك تبرييت منك و قلت ليييك فووووتي بابي نبقى غييير نعاااود فالهضرة

ايمان(بين سنانها) : داابا هاد مك علاياش كااتقلب نتشووه انا وياها فهاد الدرب

مهى: لعار ميكي راه غااتخرج غيير فيا انا

إيمان (هزات راااسها فالشرجم و قالت بطنز) : من قبييييلة و انا وااااقفة هنا اخااالتي العزيزة غيير باااش نشوووف وجهك الزوييين كي شتي إلى ماااشفتكش مااايدووزش عليا النعاااس والله مااايدووز "غمزات مهى و صيفطات ليها بوسة. فالهوا" تهلاي الحب

مشااات ايمان خلاات يزة كاااتنبح من الشرجم و مهى حادرة رااسها و كااضحك واخا عارفة بلي مها غاتصبنها... كرطات المااا لي برااا و غيير دخلات للدروج لقاتهم عاامرين غيس بسبب إشراق لي طلعات بلا ماتمسح رجليها فالجفاف تنهدااات و هي تحدر شللات الجفاف و عاااودات دووزاتو على الدرووج... طلعاتو للسطح نشرااتو عاد هبطاات ماااحسات غيييير بشعرها مجرور و الزيف مفكوك...

يزة : اجيييي الخاااااانزة لهنا ياااااك قلت لبووووك مااااتبقاااايش توووقفي مع دييييك الشاااايطة "قرصاااتها من دراااعها" هضرتي ولااات زاااايدة ناااقصة عندك ياااااك الحماااااارة الله يغبر ليييك الشقف نتي ويااااها قوولي آميييين

مهى غيييير كاااتغوووت و كااتحاول تفك راااسها من بين يدين مها لي ردخاتها مع الحيييط و هبطات كاتسب و دعي فيها...

مهى(دخلات لدوش كاتبكي.... شاافت فالمراااية و بدااات كااتخبط فحنااااكها بهستيرية) : ياااااااربي نمووووت و نتهنى يااااااربي تعطيني شي موووصيبة نتهنا من هاد العذااااب

بقااااات تما كاااتبكي و ضرب فراااسها حتى بردااات قلبها... ضحك غير شوية يهجرووه ليييها و باااغين يحرموووها من صاااحبتها الوحييييدة لي كاااتفوج عليها و تهز معاها الهم.... شااافت حتى عيااات وهي تستغفر الله و خرجات من تما من بعد ما توضات... صلات لي فاتها و هبطات لكووزينة قبل مايطلعو ليها لقاتها تاااني عااامرة بالماااعن منين جاااو الله اعلم....

يزة دخلات عند راااجلها لبييت لقااااتو كااايلبس حوااايجو ناااوي يخرج... طلعاتو و هبطاتو وهي تنطق بفضول

يزة :راااجع لمحال

مجيد (طلعها و نزلها و نطق ببرود) : و من ايييمتى كااانقووليك فييين غادي و منين جااااي

يزة(زييرات على يديها كاتحاول تبرد راااسها و نطقات) : غيير باااش مانبقااااش مشوشة علييييك ازمااااني

مجيد(دار ضحكة جانبية) : علاااامن باااغة ضحكي بهاد الهضرة "حط صبعو على صدرو" علياااا انا؟؟؟؟ "هز سوااارت الطموبيل" الله يعاااااون ابنت العربي

خرج من البيييييت خلاااها كااااتغلي حيت عااارفاه فين غااايمشي و فين كااايمشي كل نهار مني كاايسالي خدمتو.. غييير سد البااااب ضربات بوااااحد القرعة ديال الزاج مع لارض حتى تشتتات

يزة :الله يعطييييك مووووصيبة نتاااا و بنتك فنهاااار واااااحد نتهنى منكم.... خرجتوووووو ليا على حياااااتي "غوووتات بصوووت مبحوووح" خرجتوووووو عليااااا خرجتوووو

يزة الزوووجة لي عاااايشة مع رااااجلها على قبل فلوووسو و حيت ماااعندها فيين ترجع أما هو باااقي معاها غير على قبل العهد لي عطا فزماااانو... كااايجمعهم الفرااااش مرة مرة كااايبردو شهوتهم لا غييير مني كاايكملو كاايعطيو لبعضياتهم بالظهر.... مكاااين حب مكاااين حنان مكاااين هضرة مكاااين مناقشة يعني زوااااجهم مامبنيش على المودة و الرحمة كيفما قال الله سبحانه و تعالى<< وَمِنْ آيَاتِهِ أَنْ خَلَقَ لَكُمْ مِنْ أَنفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآيَاتٍ لِقَوْمٍ يَتَفَكَّرُونَ>>..... يزة و مجيييد غييير مسميين مزوجين اما مابينهم و بين الزواج ديال بالصح غير الخير و الاحسان

اعصااااب الدنيااااا و الدييييين ركبووووها وهي كاااتفكر اشنووو داااز عليييها من نهار تزوووجاتو حتى لداابا.... بهاادووك الفقااايص لي فيييها نااااضت كااااطير من البيت كاااتقلب بعينيها على مهى بحااال المجنووونة باااغة غييير فيييمن تبرد سمها... غييير بااانت لييها فالكووزينة كاترد الماعن لبلاصتهم جراااتها من دراااااعها و جمعات معاها بطرشة حتى باااانو ليييها النجووووم مهى لي كااانت كاتشقى في أمان الله ماعرفات بااااش تبلاااات غوووتات من حر الطرشة بغاااات تنطق وهي تقاااطعها يزة....

يزة (عينيها حمرييين كااايطلقووو الشرار) : بغييييييت ليييييك غااااا لموووووت ابنت الحرااااام.... من نهار هزيتك فكرشي و انا فالنحس"شنقات علييييها" شربت علييييك لي مااااايتشرب و بقيتي لاصقة ليا فكرشي كي العلگة....كرهتك و كرهت رااااااسي حيييييت ولدتك "دفعاتها بالنترة حتى لصقات مع الپوطاجي" غبري علياااااا كمااااارتك مااااتبااااانيش قداااااامي اليوووووم.... يااااالااااااه غبريييي

بدووووون رحمة ولا شفقة طلقاااات فوجهها كلام بحال السم... الام لي زعما ممكن تمووووت بااااش يعيشو ولادها هاهي كاتقتل بنتها بالكلاااام الجاااارح لي مااايدوزش نهار و مااااتسمعوووش لييييها.... الام لي كاااضحي على قبل ولادها بالغالي و النفيس و تديييير المستحيييل بااااش تشوووف الضحكة مرسومة على وجههم نفسها الام لي الى مشااافتش دموووع بنتها الصغييرة مااايبردش قلبها.... اه هي نفسها حيت يزة هي الام لي طييييح فالعافية على قبل بنتها إشراق و تلووووح بنتها مهى فالعافية بدم باااارد

بطبعنا مووولفييين انه الام هي الحناااان ولكن هادشي مكااايكونش دييييما كاااينين شي أمهات كاانشوفو تعاملهم مع ولادهم كاانقولو حرااااام عليهم الامووومة ولكن كانساااو بلي ربي داااير كل حاااجة لسبب و الانسااان كااايتخلص على أفعاااالو فالدنياااا قبل الآخر.... حق المظلوووم عمرو يضيع و الظااالم طال الزمان ولا قصااار غياااخد جزااائو

فهاااااد الدنياااا مكاااينش شي وااااحد فيييينا مااعندووووش مشااااكل و ضغووووطات فحياااتو .... مكااااينش فييينا لي مهاااازش هم او حزن فقلبووووو، ولكن رغم هااادشي كاااااين وااااحد الجاااانب مضيء كاااايخلينا نستمرو..... خاص يكون إيماننا بالله سبحانه و تعالى قوي و بأنه قدما ضاااقت غادي تفرج بإذن الله زااائد العائلة لي كاايكون ليهم فضل كبير حيت هما لي كااايخليونا نصبرو و نكاااافحوووو بالدعم ديااالهم لييينا...

هدا هو الجااااانب لي كاااتفتاقدووو مهى و هادي هي الفجوة لي عمرها تعمر عندها حيييت هي هاااد العائلة لي غادي تخليها تزيييد لقداااام هي سبب دمااارها و حزنها و فشلها فالحيااااة دااااكشي علاش كاااتردد جملة وحدة وهي لي مخلياها صااابرة "أنا معايا ربي" هازة كفوووفها لرب العبااااد كاااتطلب منو الفرج و الدمووع من عينيها شلااال، مني جرات عليييها يزة من الكووووزينة و هي سااادة عليييها فبيتها مااابقاااتش عندها الطااااقة لي تسمع كلمة جااارحة أخرى هاد النهاااار.... بقات كاااتصلي حتى وصلات عليها الجوج ديال الليل و الجوووع كااايقطع فييييها ، جمعات الصلاااية و التنخصيصة طااالعة ليييها من القلب... توووجهات لسداااري لي كاااتنعس عليييه و تحدرات خشات يدها من تحت الخشبة كاتبقشش حتى جبدات تليفون سامسونغ طاكتيل صغييير لانكاصااابل عندو گاع مشقق من عام الفيل.... شعلاتوو كااااتنهد باغة تلاهي بيه راسها حتى يديها النعاس واخة مااعندها فيه لا فايس لا واتساب عندها لعبة وحدة تما تلاهي بيها راسها حتى تنعس... موالفة كاتبقى تقرا ولكن مغااتقدرش تركز وهي مدايقاش النعمة

مع شعل التليفووون وصلوووها جوج ميساجات واحد فيه روشارج ساعتين و لاخر من ايمان كاتبة فيه "بب مني تشعلي تليفونك صوووني ليا راني اليووم خدااامة مع واااحد لعروسة مغاانسالي حتى لصباح الوقت لي عيطتي غاتلقااايني".... دوزاااات ليييها لاپيل فالبلاصة

ايمان (بصوووت مرح) : اهلااا الحيبان فييين غبووورك حتى لهاد الوقت "بجدية" ماااتقووليش ليا بقيتي كااتشقاااي حتى لهاااد الساعة

مهى (بصوت منغنغ) : لا لا طلعت قبيلة لبيتي... شكرا على الرووشارج احبيبتي

ايمان(من صوتها عرفاتها باكية) : خليينا من هاد شكرا دياالك و قولي ليا ماالكي "تنهدات" صوووتك مااايخفاش عليا اختي غييير فشي قلبك رااااني عارفاك عااايشة مع وحوش ماااشي بشر... قوولي اش ضرك و ماتخليهش فقلبك

مهى(غييير سمعاتها اش قااالت رجعوو الدمووع ينزلو من عينيها تاني و نطقات بصووت متقطع) : عييت اختي عييت و ماابقاش عندي الجهد... فالعشية مني مشيتي و انا طلعت " عااااودات ليييها گاااع دااااكشي لي طراااا و مااااسكتااااتش من البكاااا حتى ولااات لاااخرة كاااتبكي معاها"

إيمان (كاتمسح دموووعها) : الله يعطيييها مووووصيبة على هاااااد فعاااايل لييهود لي فييها حرااااااام وااااش تكوون أم هااااديك "بعصبية" دااابا بقيتي بالجووووع تمااااا اصااااحبتي" ياله بغات تنطق مهى قاطعاتها بالزربة" مهى العرووسة رجعاااات نخليييك دابا شوية غانخرج و نعييط ليييك

قطعاااات معاها و ناااضت كااتسلت طلعات لطوااليط حييت تزيييرات بزاااف قضات حاااجتها و رجعات لبيتها كااااتحمد الله مااتلاقاتش مع وحدة فييهم حيت غاايندمووها تاني.... دخلات لفراااشها كاتلف بالتليييفون مابغاش يجيها النعاااس حتى كااايڤييبري ليييها فاليد تاااني مع جاااوبات نطقات ايمان بالزربة

إيمان : حلي الشرجم دغياااا قبل ماااتفيق يزة العقرووشة

مهى (ناااضت كاطيير حلات الشرجم وهي تبان ليها ايمان وااقفة التحت التليفون فودنها و هازة قفيفة صغيرة فيدها) : اويييلي اصگعة اش كديري هنا فهاد الليل دابا يگريسيك شي وااااحد

ايمان : ايييوا هي لا فهمتي رااااسك و لحتي ليا الشبيكة نحط ليك فييها هادشي لي فيدي

مشااات مهى هزات الشبيكة لي رابطاها بحبل موولفة دييما تلووحها لييها مني كاتبغي تعطييها شي حاااجة ولا العكس.... لاحتها لييها معااارفاش اشنووو بااغة تعطييها مع حطات ليييها فيها القفيفة طلعاااتها بالزربة.... حلاتها لقاااات فييها نص خبزة فييها الدجاج و نص فييه اللحم مع كاانيطة ديال الموووناضة فمها تلجم مااعرفااتش اش غاااتقووول ماظناتهاش تجييب ليها تاااكل، نهار على نهار كااتصدمها بتصرفاتها الغير متوقعة و كاتأكد ليييها بلي هي ختها مااشي غييير صااحبتها... ايمان وااقفة التحت و ابتساامة فرحة مرسووومة على شفااايفها كاتبغي تفرح صاااحبتها واخا بأبسط حااااجة

ايمان (شافتها مكواانسية) : اهيا غاااتقوولي ليا شي شكرا غاانتقاااس عليك من هنا.... ناااس العرس دووقوني و انا دوووقتك يعني مااادرت واالو..... "تحركات من تما" ياله تلاااحي غانمشي نتكمش حتى انا فبلاصتي

مهى : بسلامة تصبحي على خييير احبيبة

سدات الشرجم ، دارت التليفون يتشارجا و جلسات لدووك النصوووصة بالجووووع لي فيييها ضرباااتهم بجوووج و خشاات الزبل ديال الالمنيوم لي كان فيه الخبز و الكاانيطة تحت السداري حتى تشووف فين تلووحهم بلا ماايشوفوهم... حيدات التليفون من الشارج و ريگلاتو مع التمنية باش تفيق قبل منهم لا يسمعوها الهضرة حطاتو عند راسها بعد ما تسرحات فبلاصتها فكرة تديها و فكرة تجييبها حتى داااها النعااااس.....

أصبحنا وأصبح الملك لله

من بعد ما صلاة الصبح ناضت نيشان لكوزينة لقات الماعن ديال العشا كايتسناو فييها.... ردات المقراج لأتاي وهي تبدا كاتغسل فيهم.... وجدات الفطور على حقو و طريقو طبلة كاتشهي غيير من الشوف فيها و بدات كاتفطر بالزربة قبل مايفيقو

و هي كتاكل دخلات عليها يزة عينيها مزال منفوخين بالنعاس بغات تقوليها صبااح الخير وهي ترجعها لفمها قبل ماتخرج مني تفكرات بلي مكااين خير من وراهم مدام فاقت يزة إلا و غايبدا الهم و النگير... هزات فيها عينيها لقاتها معوجة فمها و كاتبرگم

يزة ( بصوت منخفض) : صبحنا على الله تاني و ماصبحنا على هاد الكمارة تفووو " شافت فيها" نوووضي تهزي من تم من قبيلة ونتي تسرطي كوون غيير كان يبان علييك... نوووضي شووفي ليا بنتي إشراق واش فاقت لا يدوز عليها وقت الخدمة

ياله ناضت باش تخرج وهي دخل اشراق كاتقرقب بطالونها لابسة سروال مقطع و الكرش عريااانة... طالقة شعرها و دايرة المكياج كيف العادة مشات باااست يزة و نطقات فودنها

إشراق :اوييلي اماما مصيفطاها تفيقني و نحل علييها عيني بغيتي نهاري يدووز فاالصو حفظ الله فقت قبل اما كوون كحالت ههن "بداات كاضحك و كاتشوف فمهى زعما فهمي رااسك راني داوية عليك"

يزة(ضحكات حتى هي) : ايوا سمحي ليا ابنيتي اليوم دازت طريفة مرة أخرى عمرها تعاود باااش بنتي يدووز عندها النهار مزوهر ان شاء الله "باستها فحنكها"

إشراق :يخليك ليلي اميمتي

هبطات مهى عينيها بحزن و ناضت خاارجة من الكوزينة قلبها كااايضرها مني كااتشوف هاد اللقطات نهار على نهار... ختها واااخدة الاهتمام كامل بحيث هي عمرها سمعات شي كلمة زوينة من عند مها غييير كلمة بنتي عمرها سمعاتها من عندها من نهار عقلات على راسها

يزة(شافتها خاارجة) : ادييك اااه فيين غادية

مهى(بغصة) : غادية نصبن الحواايج لي حيدت البارح مني دوشت

يزة: صبنيييهم بيدك عنداك ديري الماكينة راه خدمناها غير لبارح مكااين لاش نبقاو نضيعو فالضو... اااه و زربي دخيا باااش تسوووسي الصاالون اليوووم غاايجيو خواتاتي و عيالات خووتي " خرجات مهى و هي دوزات يدها على شعر إشراق" كبيدتي حاولي ترجعي دغيا فالعشية باش تجلسي شوية مع خوالاتك

اشراق (ناضت) : واخة احبيبتي غانجي بكري

خارجة كاتقرقب و ريحتها سااابقاها... ركبات فطموبيلتها طالقة الموسيقى و نطالقات لخدمتها وصلات لعمااارة فين كاين السونطر داپيل و هي تپاركي هبطااات كاااضور عينيها بين الطمووبيلات حتى قشعاتها و هي تبتاسم بخبث.... مشات كاطير ركبات فالسانسور غير وصلات خرجات زربانة تصاادفات مع صااحبتها فالباب

اشراق (بدون مقدمات) : الهام جمال فالبيرو ديالو؟؟

الهام (ضحكات) : جمال حرفية الصگعة ههه يسمعك شي حد ماحنا فخير

إشراق : إلهام حبيبي فالبيرو راني كاعما مسووقة لشي حد قوولي ليا خلاص

إلهام : ايييه فالبيرو راه سولني عليك قبل مايدخل

الهام : اححح علييه "توجهات لبيرو و وقفات عند السكرتيرة" لپاطرون بووحدو ؟؟

السكرتيرة (كاطلع فيها و تهبط) : اممم بوووحدو

إشراق (دقات دقة خفيفة فالباب باش ماتيرش الشبهات مابغاتش دخل مدرمة... غير سمعات دخل دخلات بالزربة و سدات الباب... هز فييها عينيه و هي ضحك لييه حتى لودنين) : حبيييييبي توووووحشك بزاااااف

جمال( طلعها و هبطها ريووگو قربو يسيلو) : كووون تشوووفي انا "رجع بالكرسي اللور و نعت ليها لرجليه" سوورتي داك الباب و اجي عندي الزيين ديالي

إشراق (دارت اشنو قااليها و مشات جلسات فوق رجليه و كرشو فاصلة بيناتهم) : عرفتي دااااز عليا هاااد الويكاند طوييل بلا بيييك احبي

جمال (قرب لشفايفها باسها) : حتى انا الكبيدة شتي كوووون جيتي عندي لوطيل مني قلتها ليك كوون بردنا الوحش "خشى راسو فعنقها"

إشراق (عوجات فمها و نطقات بتحلوين كاتلعب بشيباتو) : اممم ماكتابش"شدات وجهو بين يديها" ايوا فييين الكاااادو لي قلتي ليا عليه فالتليفون

كااايقوول واحد المثل قلب البرمة على فمها تطلع البنت لمها... الطمع لي فيزة ورتاتو منها إشراق لي كااااتمووووت على الفلوس لدرجة ممكن تضحي بأي حاااجة على قبل الفلووس.... النهار اللول جااات لسووونطر داپيل غييير سطاجيير ايييوا بالنصااائح ديال الام المصووونة مشات تلوات على الپاطرون الشااارف و ولات هي الكل فالكل دااارت الطموووبيل و شبعات حوااايج و مكياااج و حيييت مها مسااانداها مكاضرب حساااب لحتى حاااجة عااايشة حيااااة النصااارة لي يشوووفها كااتفووح على ختها يقوول هادي ماااعرت فين قااارية و اشمن پوسط شاااادة وهي فقرايتها كانت كاضور بالاساتذة باااش تنجح و فالخدمة ضارت بالپاطرون... رخيصة و فاااسدة و جمااالها مساااعدها فهادشي

الشارف غييير كاااتبدا تحلوون عليه كااايتحل و يبدا يقووول غييير واخا بحال الكلب.... دور يديه على خصرها العريان باغي يخشيها فيييه و كرشو حااابساه، حل لمجر جبد منو بوااطة حمرة مربعة غييير شافتها اشراق عينيها خرجو منهم القلوبة

جمال (مدها ليها و بدا يدوز يديه على فخاضها) : هانا الزيييين حلي و ردي عليا الخباااار

إشراق (عضاات على شفايفها و حلات البواااطة غيير شاافت اشنووو فيها تلاااحت عليييه تبوس و تعنق) : اححح عليييك احبيبي نموووت فييك أنا

جمال : بصحتك الكبيدة عجبك بعدااا؟؟

اشراق(هزاتو داارتو فيدها كاان برااصلي ديال الذهب غليض و وااازن) : اكيييييد عجبني اصلا لي جات منك سمن و عسل على قلبي

جمال(كايضغط على مؤخرتها و عينيه معسلين فيها) : باااش تعرفي رااسك غالية عندي "عينيه هبطو لشفايفها" ماندوقوش العسل

إشراق (ضحكات بدلع) : تغمس نتا گاااع ماشي غيير دوووق

لصقااات شفااايفها مع شفااايفو و دخلووو فقبلة عمييييييقة ماطلقها حتى صوونات ليه السكرتيرة كاتعلمو بلي جا عندو شي حد... ناضت من فووق منو كاتهبط فتريكوها و تسد صدفة سرواالها أما هو تخشى كااامل فلبيرو كاايغطي فضييحتو و العرق هابط مع وجهو تقول كان كاايجري... ما خرجات إشراق من تما حتى قادات شعرها و حااالتها.. تصادفات مع السكرتيرة فالباب دازت من حداها بثقة باش ماتثيرش الشبهة ساعة غيير المكلخ لي ماايفهم بلي رااه كانو كايديرو شي حاجة لداخل

******

مني فطرااات ماحطات قزييبتها لارض فركات حوااايجها و نشراتهم عاد هبطات ردات لغدا و مشات للصالون ساستو و مسحات الغبرة و شطبااات خلاتو كااايشعل باش ماتخلي ليزة منين دووز ليها ساااعة هي معامن واخا دير لي دااارت تسمع الهضرة تسمع

يزة(وقفات فباب الصالون كاادور عينيها) :شفتك زربتي على هاد الصااالون... عاودي شطبي الزربية ماشطبتيهاش مزيااان"دارت يديها على جنابها" باااغة تشوهيني مع خواتاتي و عيالات خووتي يااااك؟؟ "مهى مجااوباتهاش" مني تسااالي تبعيني لكوووزينة تووجدي اش نحطو فالعشية

دارت اشنو قالت ليها و تبعاتها لكوزينة غا دخلات بدات علييها ديري هادي و هادي و هادي وهي داايرة رجل على رجل بحال الملكة ماتهز ماتحط حييت كاااين علامن تحرت

طفات على لغدا و خلطات كيكة دارتها فالفران و بدات كاتعجن فالمسمن يزة غيير اذن عليها الظهر عمراات لرااسها لغدا بدات كتاكل و تنگر مارداتش لسانها لفمها.... مهى بدات كاطيب فالمسمن و ريحة الزيت گهماتها بسهوة منها تحرقااات فيدها ماحسات براسها حتى غوووتات

يزة(قفزات) : الجهل ان شاء الله "ناضت عندها" مااال بووووك عووورة خداااامة بلا عقل الله يعطيك العماااا قوولي اميين

مهى (كاتوجع) : اييييي اربي كاااضرني بزااااف

يزة(خنزرات فيها) : وااا دوزي تكملي الطياااب من التبوووحيط مزال كااايتسناك البغرير

مهى(بصووت منغنغ) : نمشي ندير لييها غيير سينيال يبرد عليا شوية

سااااطت يزة و مجاااوباتهاش مشات رجعات لبلاصتها جلسات... طفات مهى البوطة و مشات لدووش كاتسووط على الحرقة دارت ليها سينيال و رجعات.... كملات مع المسمن ودااازت لبغرير بقات واقفة عند البوطة حتى ولا العرق نازل مع ظهرها بالحرارة، طييباتو بالزربة حيييت قتلها الجوووع مع كملات غسلات المقلة بالزربة باش دوز تغدا وهي توقف عليها يزة هازة فيدها جلابة مبهدلة و فاليد لاخرة الفلوس

يزة (لاحت عليها الجلابة) :شدي عليا جلاابتك على اخر ايامي وليت نتسخر علييك "حطات ليها الفلوس فوق الپوطاجي" خرجي للمخبازة لي فالشاريع جيبي الپتي پان و الباگيط و كروااصة... "هزات صبعها" اااه و نوووعي نوووعي ماتجيبيش ماركة وحدة

****

لبساااات جلابتها و خرجااات جامعة شعرها سفنجة و الجلابة كااتلعب بكثرة ما واااسعة علييها....لقات الدرب عامر شوية و شي عيالات مجمعين عند العتبة غير شاافوها خرجات گاع الانظااار تووجهات علييها و بدا كاايتغاامزو و نممو دازت من حدااتهم جاتها كلمة نييشان لودنها

الجارة 1 :تي مااال هادي مضعفنة هكا بحالا كتاااكل السم

الجارة 2(خلات مهى حتى بعدات من حداهم عاد نطقات بأسف) : علاااه مااافراسكش اش كااايدوز علييها مسكينة كل نهااار كلما طلعت للسطح تبان ليا مقنزعة فسطااحهم هاهي كاااتنشر الحوااايج هاهي كااتغسل الزرااابي علم الله اش كاايدوز عليها فالدار لداخل هادشي غا لي شفت

الجارة 3(ميقات): نتي هاد النية ديالك الزااايدة هي لي غااتخرج علييك.... علم الله اشمن مووصيبة دايرة حتى كاايعاملوها هكا... علاش الكبيرة عاااايشة بخير و ظل تخرج هي و مها دايرين بحال الصحابات

الجارة 1 : انا قلت موووحال وااااش بنتهم غييير مربيينها

الجارة 3:اشمن مربينها انا نهااار جاو سكنو هنا جبت خبااارهم من اللول حتى اللخر بجوووجهم بنات يزة و مجيد الكبيرة عندها 28 عام و الصغيرة هاد السفود لي دازت من حدانا عندها 26 عام....مني تشووفيها هي وختها تقوولي موحال تزادو من كرش وحدة

الجارة2 : اااه فالصراحة إشراق غزاااالة عكس ختها مسكينة لا زين لا فورمة

الجارة1: و قااارية شي ولا لا زين لا قراية

الجارة 3: قاارية گالاك ولكن وصلات لليصونص و حبسات حتى خدمة ماقبلاتها.. شوفو اشراق قرات غير عامين ورا الباك وهاهي خدامة و بطموبيلتها

بقااااو واقفين تما كيااااكلو فلحمها و كل وحدة تلغي بلغاها حتى وحدة فيهم معااارفة اش كاااين بالصح.....

مهى تعقداااات بكثرة ما سمعات الهضرة على شكلها و وجهها التنمر كاتعاني منو فييينما مشااات ماشي غييير فدارهم مني دخلات لپاتيسري و هما كااايتغامزو علييها هادوك البنات لي خدامين تما و يضحكو

تزيييرات و تزنگات خاااشية راااسها فلاارض مقااادراش تهزو ، خدات دغيااا سخرتها و رجعات كاتزرب للدار باغة غييير ايمتى توووصل واخا الجحيم لي كااايتسناها فالدار كفس من الزنقة و كتر.... دخلات لقات السقيييل عرفات يزة مشات تكى شوية بينما جاااو... سخنات الغدا تغدااات و بدات كاتستف داكشي لي جابت من الپاتيسري فالطباسل باش مني يجيو غير تسخن المسمن و البغرير و دير اتاي و القهوة.... غطات داااكشي و جلسات فالكوزينة دايرة يديها على حنكها كاتخمم فهمها داز الوقت وهي سااهية حتى قفزها صوت الصونيط فالباب هبطات كاااتجري لقات جوج خالاتها و عيالات خوالها مع بناتهم كلهم لابسين مزيان و مأنتكين على الحالة

مهى(بدات كاتسلم عليهم) : مرحبااا بيييكم مرحباااا دخلو دخلووو

خالتها (سلمات عليها) : خلي الباب محلول راه مزال جايين

دخلاتهم للصالون و مشااات كاااطير فيقات يزة لي غيييبات ماشي نعسااات.... رجعات للكوزينة ردات الما يطيب و جبدات لحليب باش تفيضو حتى كااايقاطعها صوووت حنين

.... اشنو كادير الزين ديال خالتها

مهى(عينيها لمعوو) :خااالتي أميييينة "مشات كاتجري تلاحت عليها بتعنيقة" توووحشتك بزااااف بزاااف

أمينة(بادلاتها العناق) : حتى أنا احبيبتي "شااافت فيييها" اش خباااارك الامور بخير

مهى :الحمد لله بخييير... ماشفتكش مني دخلتي

أمينة (بابتسامة) :مادخلتش معاهم ياله لحقت عليهم "ضورات عينيها فالكوزينة" جاالسة كاادمري تاني بوووحدك فهاد الكوزينة فييينها مك

يزة (دخلات كاضحك حتى لودنين) : انا كااانقووول مااال الداااار نوورات هي ختي لحبيبة رجعات و جات تشووفني

أمينة (ببرود ) : جاااااية نشوووف مهى صححي معلوماتك "خنزرات فيها" كنت جاية و كااانطلب الله نلقى شي تغيير فيييك ساااعة لي ماااعندو قلب ماااعندو

يزة بحالا صرفقتيها ، باش تقمع قداااام مهى لي هي مواالفة تقمعها رااه أكثر حاجة ممكن ماترضاش بيها هي هادي... خصوصا أنها ماتقدرش تخرج عينيها فختها و تجاوبها بخو كلامها واخا صغر منها.. وهاد النقطة لي ستغلات و قالت بعدم رضا

يزة: اش هاد الهضرة اامينة راااني ختك الكبيرة زعماا

أمينة : ختي الكبيرة غا بالعمر أما العقل الله يجيب "جابت مهى قدامها" واااش كااااين شي حد فهاد الدنيا عندو هاد البلارة و يفرط فيها تمنيييت كوون ربي عطاااني بنت بحااالها كاتقرا و كاتسمع الهضرة و الاهم من هادشي داااخلة سووق راسها مكااتهزش العييين... اش بغيييتي كتر من هااادشي غاااا قووولي لياااا

يزة (زيرات على يديها و نطقات بانفعال) : نتي عاااارفة السبب مزيااااان و كلشي داز على عينيك "دارت يدها على جنبها" و مزااال كاتسولي

أمينة (ضحكات باستهزاء) : عذر أقبح من زلة ابنت مي و بويا

يزة (باغة غا تفك حيت عارفة ختها مني كاتبدا الهضرة. فهاد الموضوع مكاتسكتش) : ماشي وقت هاد الهضرة داابا عيالات خوتك برا واااش بغيتي تشوهيني

أمينة(باستفزاز) : راااك مشوووهة خلوووق عاد غاتشووهي...."هزات صبعها" الهضرة مغااتوقفش هنا حييت هادشي زاد عن حدو يمشيو الناس و نتفاهمو... سيري جلسي معاهم انا و مهى غانجيبو هادشي

مزادتش معاها الهضرة و خرجات كاتحلف من الكوزينة.... ماتقدرش تجابه مع ختها حييت عندها فيييها مصااالح كثييرة ماهي عااايشة غييير بالمصاالح مكااادير حتى حاجة لله فسبيل الله كاااتموت على المظاااهر و خصوصا مني كاتوقف لييها أمينة الرينج قدام الباب بحكم ان أمينة لاباس عليها مات راجلها خلا لييها ثروة كثيرة من غيير بنتها و ولدها لي مامخليينها مخصوصة من والو

غير خرجات يزة وهي تنطق مهى بتساؤل مافهمات والو من حوارهم لي عامر ألغاز

مهى: اشمن سبب كانت كاتهضر علييه ماما اخالتي

أمينة : مك مسببة غير مع راااسها ماتديش على هضرتها "بغات تقلب الهضرة" گاااعمااا سوليتيني على وفاء

مهى (بتاسمات) : ولاهيلا كنت غانسولك علييها غير دخلات ماما... كي خليتيها لاباس عليييها

أمينة : لاباس علييها غير كتر فيها الفشوش داك الراجل عندها قربات تصطييه... فلوسي ضيعتهم غا على الطيارة خيطي بيطي لفرنسا نصالحهم

مهى(ضحكات) : حجة و زيارة صالحيهم و فووجي

أمينة: ولاهيلا "دازت لبوطا" انا غانعمر اتاي نتي سخني المسمن

تعاونو هي وياااها حتى وجدو كلشي و بداو يحطوو فوق الطبلة... جلسات أمينة و جلسات حداها مهى بداااو مجمعين حتى تسمع الصووونيط ناضت مهى حلات الباااب لقات إشراااق بلا سلام بلا والو ضربات فييها و دخلات خلات مهى متبعة لييها العييين كاتنهد تبعاتها لصالون لقاتها مليوووحة على امينة معنقاااها

إشراق : خاااالتوووو رجعتي "باستها" اش خبااار فرنسا

أمينة (بطنز) : لاباس عليها كاتسلم علييك

إشراق (بضحكة صفرا) : هههه ايوااا كااين شي كااادوات شي شوكولا

أمينة : واالو ابنتي مشيت نجري قضيت علاش مشيييت و رجعت الوقت فيين نخرج مالقيتو "شافت فمهى لي جلسات فالقنت بوحدها... طبطبات حداها فين جالسة إشراق" اجي رجعي لبلاصتك مالك جلستي تما

أمينة حااافضة ترييكتها واااحد بواااحد عااارفة لي بااغيها بالصح و لي بااغيها على قبل فلوووسها و عارفة مزيان بلي يزة و إشراق سلعة وحدة يموتو على الفلوس اي وااحد لاباس علييه كااايلحسووو ليه الكاپة باااغين غا فيييمن يپروفيتيو.... عيطات على مهى بحالا كاتقول لاشراق نوضي من حدايا هاد الاخيرة تزنگات و ماااحملاتش راااسها ناضت من حداها جلسات حدا يزة مع مدات يدها تهز كاس ديال أتاي قشعات أمينة البراسلي لي فيدها ماااعطلاتهاش و نطقات فالحال

أمينة :بصحة البراااسلي حاجة تقيلة يا لالة

كلهم شافو فيها و يزة كاتشوف فيها بتساؤل زعما منين جاك... بداااو عليها عيالات خوالها و بناتهم هاااري نشووفو هادشي زوييين بااااينة فيييه غالي عاطي لعييين كملاتها واحد خالتها مني قالت : واااا مهلية فرااااسك ابنت ختي باينة هاد الخدمة عندكم كاااايخلصووكم مزياان

إشراق (بتوتر) : عطااااوني واااحد الپريم هو باااش شريت هاد البراااسلي

أمينة (بهدوء) : اممم مبرعيينك پريمات باااينة كاااديري خدمتك على أكمل وجه "حشات لييها الهضرة بالريط خلاتها ضاااربة الطم و معاوداتش نطقات من وراها"

بحال اي جلسة بين العيالات ديال العاااائلة لي كاااادخل فيييها النميمة و الضحك و التقشااااب و مانساااوش التسوااال كل وحدة دخل فعظااام لاخرة و تسووولها اش كااادير و اشنو مكاديرش و هادي هي أكثر حاااجة لي فعيالات هاد المجمع... هما مكااايتنمرو على مهى مكاايسبووها لي فييهم هو التسواال.... هضرة تجبد هضرة وهي تنطق مرااات خااالها بفضووول من بعد ماسكت كلشي

مرت الخال: اييوا امهى كااااين شي خديييمة كاااين شي مااااستر ماابقينا سمعنا وااالو

واحد خالتها: اش غااادير بشي خدمة ضبر لييها على شي راااجل تمشي ديير وليداتها رااه 26 عام الله يجعل البركة

مهى ماعرفات بااااش تجااااوب تقوووليهم مي لي واالداني محااااملاش تشوووفني ناجحة فحياتي مامخليانيش نكمل قرااايتي و نهار كايجيني شي اونتوخيان كااتبقى دعي مانتقبلش باش تبقى دااايراني تحت الصباط و تبرد فيا سمها.... هزات عينيها فيهم وهي تغمزها خالتها أمينة زعما انا غانتكلف ولكن شكووون خلاها نقزات يزة فالهضرة بحزن مصطنع

يزة: منيييين اختي لا خدمة لا رااااجل ولاهيلا قلبي كاايتقطع على هاد البنت..... الخدمة لي مشات لييها يردوووها و الخطااااب عمرهم دقوووو بابنا يدويو فيييها بحالا مديوورة ليها شي حااااجة

مرات الخال : ايوا نصحك اختي يزة فوووسخي الدرية هاادشي مااشي معقوول زهرها كااامل دااتو ختها

خالتها 2: حتى اشراق خاصها تفووسخ راه هي الكبيرة و مزالة بلا زوااج

اشراق تقرصات و ماحملاتش راسها يجمعووها فحوااار واااحد هي و مهى و يردوهم متساوين... حيت من ديما كااتشوف رااااسها الفوووق و مهى التحت هادي حاجة زرعاتها فيها يزة من الصغر بالفرزيات لي كادير بيناتهم

إشراق (رجعات شعرها لجهة وحدة و نطقات بثقة) : والله اخااالتي ماشي تكبر ولا شي حاجة ولكن راااه الخطاب كااايدقو الباب كل سييمانة غييير انا مزاال مداايراش بالي فالزواج حاااليا

يزة(عنقاتها) : حتى انا مساااخياش ببنتي مني تمشي عليا شكووون يونسني

أمينة(من قبيلة وهي صابرة نطقات بجدية خلات كلشي ساااكت و كاايتسنط ليها) : اش كاااتخورو من قبيلة مالها جااات بالخطااااب ولا بالتفووسيخة غااا قولو ليا شكوون مزال كااايفكر هكا فهاد الوقت راااه نتووما لي خاااصكم تفووسخو.... شفتووو الخدمة إلى ماااجبتيهاش بدراااعك و بالحلال بناااقص منها و الزوااااج بالمكتاب ربي كل واااحد داير ليه شريكو نهار يكتاب راه غايتلاقاه و يتزوجو "شدات فيد مهى" و بنتي مهى عييت فيها ندوي ليها مع معارفي ولا معارف ولدي باش تخدم و رفضاات حييت باغة نهار تخدم تخدم بدرااعها ماايتوسط لييها حد "باست ليها راااسها" بهكاااا زادت كبرات فعيني واخا ماكرهتهاش تسمع لكلامي

مهى (قلبها دق بفرحة من كلام خالتها..نطقات بصوت منخفض) : لهلا يخطيك اخالتي

من دييييما مهى كاتشوووف خالتها هي المنقذ ديااالها واخا كاتجي غييير مرة مرة كاتحسسها بقيمتها الحقيقية و كاترفع لييها المعنوياات حتى لأعلى درجة....بحكم ان أمينة كلشي كااايدير ليها حساااب و كاايحتارموها فالعائلة من الكبير للصغيير مكااايهزوش فييها العين هادشي كامل حيت حنا عايشين فزمان الماديات قدما عندك فجيييبك قدما يحتارموك الناااس...

ناااضو تكركبو من بعد ماقرب المغرب يأذن بقااات غييير أمينة لي غير جلسات حداها يزة نطقات بدون مقدمات

أمينة : غاندي معايا مهى دوز عندي واااحد السيمانة ترتاح شوية من الهم ديالك و تمااارة لي مدووزة علييها

يزة (بعبوس) : ماااعندها فييين تمشي باها غااايجي يسوول عليها و مغاايبغييش

إشراق (نقزات فالهضرة) : نمشي معاااك انا اخاالتو تشهيييت شي عووومة فداك الپيسين عندك

يزة(بلا ماتشعر) : اااه دي معاك إشراق "دارت فيها أمينة شوفة ديال منيتك عاد قلتي لا على مهى و هي تنطق بتلعثم" زعما راه إشراق كبيرة مانخافوش علييها إلى باتت برا الداار

أمينة : هاد الهضرة ماااشي عليااا انا راااني عااارفة الفيييلم كاااامل و اشنوو فييه مكااين لاش نحط كلشي فوق الطبلة تاني.... و مهى غادي نديها معايا مكانتشاااورش معاك" شافت فاشراق " ونتي حيدي ولدي من باالك حيت دم سنانو يشوووفك قدامو

إشراق وصلات ليها لعظم و نااااضت كاااطير من تما و تبعاتها يزة معاجبهم حال....امينة ناضت لكووزينة عند مهى لقاتها كملات الماعن و كااضور تما بحال التالفة غير دخلات عندها نطقات

مهى (سمعات هضرتهم) :خااالتي بلا ماتبرزطي راااسك معايا انا بخييير

أمينة :ماتعااود غير الصلاة على النبي غاتمشي معايا هي غاتمشي مكاين لاش نعاود لهضرة... سيري جمعي الحوايج لي غايخصوك ياله "مهى مشات لبيتها و هي تابعاها فطريقها سمعات الهضرة فبيت يزة وهي تحل لباب لقات يزة معنقة اشراق لي معبسة... جاتها الضحكة و قالت" والله ياااختي كووون ماااحضرت لزياادة مهى نقوول موحال واااش ولدتيها من كرشك

مجاااوباتهااااش إشراااق و ناااضت خرجات من تما زعما راني مقلقة حزريني أما يزة رااه وجها زراااق بالاعصاااب غييير خرجات بنتها نطقات مغددة

يزة :واااش حالفة تفقصيني اليوووم غااا قوولي ليا اش درت ليييك فاااش ضريتك نتي "بغات تنطق و قاطعاتها" ماااتقوليش ليا على مهى حيت داااكشي كاايبقى بيني و بينها

أمينة (بانفعال) : وااااش بغيتيني نشوووف الظلم و الحگرة قداااام عيني و نسكت علييييهم.... صحاااابليك ماااعندي ضمييير بحااالك ؟؟؟ انا كااانستغرب ديييك البنت كيييفاش مزااال صااابرة للعييشة معاااك ماااطجاااات مااا نتاااحرات

مكااااينش النهاااار لي تجي فيييه أمينة و ماااتخوضش هاد الحوااار مع ختها كاااتمنى كل مرة كلامها يأثر فيييها ومني ترجع تلقى شي تغيير ساااعة وااالو حيت لي مااعندو ضمير مكااايتأثر بحتى حاااجة و عمرو يتبدل كقوله تعالى <<لا يغير الله ما بقوم حتى يغيروا ما بأنفسهم >>

يزة الخبث ديالها و الشر لي فيها طغى على اي حاجة زوينة ممكن تكون فيها النقيطة الكحلة لي كاتكون فقلب كل وااحد فيينا وسااعت عندها و ستحوذات على القلب كاامل.... مابغاتش تخلي مهى تمشي مع ختها و ترتاح بحاال الناااس باغة تخلق اي عذر المهم ماتسيفطهاش

يزة(ميكات على هضرة أمينة) : أمينة مجييد غايجي و إلى مالقاهاش فالدار غايخاصم خلي حتى يجي بعدا و قوليها لييه هو ديك السااع

أمينة(ضحكات) : دابا حييت نتي عاارفة مجيد مغاايعتبهاش عندك داكشي علاش كاتقولي ليا نتشااور معاه هو... زعما انا معارفاش بلي راجلك مامسوق لا ليك لا لبناتك

يزة (مشات لييها لوتر الحساس وهي تنطق بانفعاال) : اااااه ماااامسوووقش ليييينا و معاااارفناااااش فييين حااااطين كااايطل علييينا الوقت لي رشقات ليييه... الواااااجب لي كااايدير معانا هو شاااري لييينا دااار نسكنووو فيييها و كاااايعطيييينا الفلووووس باش نصرفووو الله يعطيييييه مووووصيبة نتهنا منو" جرات حناكها بهستيرية" انا بغيت نلبس علييييه البييييض و بالفرحات علياااا من نهاااار دخل لحياااتي و انا اللور اللور

أمينة ماتحرك فيييها واالو مني شافت حالة ختها حييت عارفاها اش كااتسوى و بلي هادشي لي داز ولا كاايدوز عليها ماهو غيير نتيجة أفعالها ولكل واااحد كااايتخلص على حسب أفعالو... و بااااش ترد شوية الصرف على قبل مهى قااالت ليييها الجملة لي جااابت لييها التمام و خلات الدمعة تنقز من عينيها

أمينة: حمدي الله قبل علييك و نتي متقوبة و سترك

العااافية شعلااات فيزة كووون كانت شي وحدة خرا من غيير أمينة لي قااالت هاد الهضرة كااان ممكن طييير علييها و ماااطلقها حتى تخرج روووحها... مااااقدراتش تحكم فدموووعها لي هبطووو بدون إذن منها شهقاااات بصوووت مسموووع و نطقات بضعف

يزة : كاتعايريني بالماااضي ديالي و فقلب دااااري

أمينة(بجدية) : بغيييتك غا تحسي بشوية من داااكشي لي كاااتحس بييه بنتك كل نهااار و كل دقيقة و كل ثااانية.... شفتي احسااااس شحال خاااايب يبقى الواااحد يسب و يحشي لييك فالهضرة و نتي مقااادرة ديييري واالو حيت داك الشخص قوى منك.... هاااد الدموووع لي نزلووو من عييينك دابا رااه مكااينشفوووش من عيين مهى لي مداااارت حتى حاااجة فحيااتها غييير انها بنت ام مااتستااهلش تكووون ماماها... كتبات تبكي و تصبح تبكي حتى عينيها دخلو و وجهها زراااق بالفقصة.... هااااا لعاااار ابنت مي و بووويا فييييقي و ضربي الفگد فراااسك "سمعات مهى كاتعيط علييها" هاني مشيت هاد الساعة

خرجاااات من عندها خلاتها كاااتجدب بااغة تموووت بالفقصة... لقات مهى هازة صويك صغير و كاتسناها عنقااتها و هبطووو من الدااار حلات ليها باب الطمووبيل حتى ركبات عاد داازت لبلاصتها خدمات المووسيقى عاد نطاالقو... رووحها مرحة واخا كبيرة ولكن ضاااربة الدنيا بركلة و عايشة حياااتها، غادية كااتدندن مع الاغاااني و تضحك و مرة مرة تقلبها شطيييح غيير بااااش تشوووف الضحكة على وجه مهى... وصلووو لڤيلا مع الحال مظلم

أمينة(هبطات من الطموبيل) : الفيلااااا نووورات اليوووووم

مهى (حشمات) : بنووورك اخااالتي

أمينة(عنقااتها) : يخليلي خااالتي خااارجة من فمك عسل "غاديين فالجردة فاتجااه باب الفيلا وهما يسمعوو التشلبيخ فالپيسين... ضربات أمينة جبهتها و نطقات بتذمر" هاااد الولد غااايسطيني اعباااد حتى الليل يليل عاااد ينوووض هو يعوووم كي الجن

مهى (تزنگات مني سمعات حس ولد خالتها و نطقات بتلعثم) : و و واش ج جاا حتى هو

أمينة (جراتها جهة الپيسين) : ماالو غاايخليني نجي بوووحدي السيد حاااكم فيا تقوول هو لي با ماشي انا لي مو

مع وصلووو كايبااان ليهم جسد رجوووولي خااارج من الپيسين غير بشوورط قصير لونو الاسمر كاايبان كااايبري مع الاضاءة الليلية...شعرو كاايقطر على صدرو و الماااا هابط مع جسمووو المطراسي حتى كااايغبر مع السمطة ديال الشورط... هز فووطة من فووق الرولاكس ينشف راسو و غير سمع الحس نطق بصوت رجوولي خشن قبل ماايدور عندهم

.... الوااليدة مزاال الحال كون زدتي شوية حتى لعشى و جي

مهى غير شافت السيد مسفح خشات عينيها فلارض اما هو بقى واقف عاطيهم بالظهر كاااينشف راسو بالشوية عليييه عند باالو مو جات بووحدها... أمينة بقات ساااكتة مجاااوباتوش و هو يضووور عندها هاااز حااااجبو حتى كايتفاجئ بووجووود مهى

زهير (دار الفوووطة على عنقووو و تووجه عندها بابتسامة جانبية مدات ليه يديها لي غير جات فيديه حس برجفتها و بغفلة منها جرها سلم عليها بالوجه حتى جا ذقنو الخشن فووق خدها" اهلا صااافا لاباس عليك؟؟

مهى(بعدات عليه بالزربة كاتلولب عينيها و بصووت منخفض نطقات غاتموت بالحشمة) : لاباس الحمد لله اخويا

زهير (شاف فأمينة قالبة عليييه وجهها) : مااال الزييين مكشر

أمينة (تنهدات) : شي نهااار غااتقتلني اولدي دييما كانقووليك ماتعوومش بالليل

زهير(قرصها من حناكها) : اش بغا يطرا ليييا الحنااانة اممم "شافها مزال معبسة جاايبة عليه فشوشها" نتي مكاااينفعش معاك التحزااار "هزها بين يديه حتى غوتات و طاح ليها الصااك... ضار عند مهى غمزها و نطق" جيبي معاك الزين داك الصااك و تبعينا

مهى(شادة الضحكة) : واخا

أمينة (كاتغوت) : هبطني الصگع

هبطني... ديييماااا كااانقوووليك ماااتهزنييييش وا حطني حط

هااازها دااااخل بيييها لداااخل كااايموت بالضحك و ضحكتو كايتردد صداها فالفيلا... ماحطها حتى لوسط و ماعطاهاش فرصة فييين تشد فيييه ولا تهضر مشى كااايطير لدروج طالع لبيتو و كايهضر

زهير: ندووووش و نهبط عندكم التيتيز

أمينة (شادة على قلبها) : شي نهار يسكت ليا القلب هاد المسخوووط "شافت مهى شادة الضحكة و بتاسمات" ضحكي الكبيدة ضحكي راااني جاايباك معايا باش تفووجي و تشبعي ضحك عليا انا و هاد الهبيل لي عطاني الله

مهى :الله يخليييه لييك

أمينة :آميييين و يخليك ليا حتى نتي "شداتها من يدها" اجي معايا نوريك اشنو جبت ليك معايا و اشنو صيفطات ليك وفاء

مهى(باستغراب) : ياااك قلتي لاشراق مكانش عندك الوقت باش تجيبي شي حاجة

أمينة :ايوا خلاص عليا إشراق غاتسناني أنا نجييب ليها الكااادو... راها شااابعة پرييمات مع راسها

طلعوووو لفوق لبيت وفاء بنت أمينة لقاتها جااايبة لييها جوج كساااوي و جوج روااايح مع الشوكولا و الحلوة عينيها خرجو منهم القلوبة بالفرحة... قيسات الكساوي لي جاوها واسعييين واخا طاي صغيرة حزنو ملامحها فالبلاصة كااتشوف فجسمها الضعيييف و أمينة كااتحسر عليييها مني حيييدات حوااايجها شاافت كيييفاش عظوومها باينين و صحتها مقااادية لعنات ختها فسرها و ناااضت عندها بإبتسااامة ماباغاش تزيييد تكمل عليييها

أمينة(عنقاتها) : بالصحة و الراحة احبيبتي تلبسيهم بالهنى ان شاء الله

مهى : الله يعطييك الصحة ربي يخليك ليا

نطقاات بابتسامة مصطنعة حتى كااتفرح شوية و تهجرو مني تفكر فاش عاايشة و اشنووو كايتسناها.... عارفة راااسها مغاتفرحش بهاد الكااادوات ولكن مااتقدرش تقوول هادشي لخالتها حيت عااارفاها غاااتعصب و تمشي تقربلها عليييهم تاني و فاللخر هي لي غادي يخرج فيييها هادشي كااامل...داكشي لي وقع فالدار عندهم و المجية ديالها عند خااالتها مني غاااترجع غادي تخرجهم لييها يزة من عينيها و تندمها على حياااتها... تنهدااات كاتطرد هاد الافكااار من رااسها ماباغاش تنكدها على خاالتها

أمينة (شافتها غاترجع لمود الحزن وهي تنطق) : ياااله بدلي حوااايجك و ياله معاايا لبيتي نبدل عليا باش نهبطو نتعشاااو

داااكشي لي داارو بدلات عليييها و مشاات معاها بدلات حتى هي عاااد هبطوو لقاااو السيدة لي كاااتعاااون أمينة فالدار حطاااات العشى

أمينة : السعدية زهير هبط ولا مزال

السعدية : مني طلع قبييلة ما هبط

زهير(هابط بالشوية علييه فالدروج كايخربق فالتليفوون) : هاهو هاااابط "تجمعووو على الطبلة باش ياااكلووو و مهى مقاادراش تهز فيه العين كاتحشم منو بزاااف كتااكل و حادرة راااسها ضاااربة الطم... شافها هكاك وهو ينطق باااغي يدخلها فالجو" اش خبااارك لالة مهى كي داايرة مع الدراااسة... ليصوونص ولا مااستر؟؟؟"حط يدو على صدرو" سمحيلي نسييت فاش كنتي وااصلة

مهى (جاها لنقطة الضعف مااعرفات باااش تجاااوبو و هي معاارفاش واااش غادي تكمل مزاال قرااايتها بحال الناااس ولا غادي تبقى على حاالها.. كتافات تجااوبو على قد السؤال) : الماستر ان شاء الله

أمينة (شافت فييها) : اجي جلسي معايا و قراااي على خاااطرك نوولي انا ندييك و نجييبك نتسوانسو شوية

زهير : فكرة مزيانة

مهى (باحراج) : مانقدرش اخالتي راك عارفة

أمينة(ساطت) : من نهاااار عقلت و انا تاااابعاك باااش تجي تجلسي معايا و مكاااتبغيش غاااا قولي ليا علاش؟؟ ياااك عارفاني نهزك على كفوف الراحة

حدراااات مهى راااسها حشمااانة من خاالتها معارفة بااش تجااوب وهو ينطق زهير باغي يلطف الجو

زهير : مسألة عااادية البنت مسااخياش بماماها داكشي علاش

أمينة (ميقات فيه) : اممم

زهير : صاافي الوليدة لقييت ليك الحل "امينة شافت فييه بمعنى اشنو" نزووجوها و نتهناااو منها مااعندها ما دير بشي قراية

خنزراااات فيييه أمينة و دورات عينيها لمهى لقاتها حطات المعييلقة من يدها تخشات فالكرسي ماااكرهاتش لارض تحل و تبلعها.... مافهمات واالو السيد عاااد كااان كااايهضر بأدب و بالشوية فجأة تقلب... زهير شااااف تعااابير وجههم كيييفاش تقلبو وهو يطرطق بالضحك خلاهم غا كااايشوووفو

زهير : عاااااالااام نتووووما ولاهيييلا عاالام كلشي كااتيقووه "شاف فأمينة" الواليدة نتي عااارفة ولدك يقووول بحااال هاد الهضرة و يقلق ضييفة عندو فالدااار

أمينة (زفااات علييه بسربيتة) : سيييير الله يمسخك فييين غااانعرفك واااش ضاحك ولا داااوي بالصح.. نتا كل مرة فشكل هانتا كاااضحك هااانتا مخنزر

زهير : حسيييت بييك باااغة طيري علياااا "شاف مهى مزال حادرة راااسها وهو يمد يدو شد فيدها حتى قفزات و نطق بهدوء" مهى واااش تقلقتي راني غير ضااحك

مهى (بصوت متقطع) : ل لا ه هاني ية

أمينة :مسحيها فيا ابنتي راه هاد الولد عندي ضحكوو خضر

بتاسمات لخااالتها بلا ماتنطق ياله بغا يهضر زهير صوونا لييه التلييفون و ناض من تما يهضر و حتى هما ناااضو من وراه جمعو الماااعن داوهم الكوووزينة وهي تنطق مهى

مهى:أنا غانغسل المااعن اخااالتي و نلحق علييك

أمينة (خرجات فيها عينيها و جراتها): زيييدي قدااامي اشمن ماااعن وااش مكاتعيايش... هاهي السعدية غاتكلف راه غاديرهم فلاماشين و صافي "طالعة هي وياها فاتجاه بيتها" اجي باااتي حدايا باااش نتحتتو انا وياك شوية "دخلو لبيت و مشاااو تخشاااو نييشان فالفراااش" عرفتي شحااال كااانفرح مني كاااتجي عندي و تعمري عليااا الدااار

مهى :حتى انا والله كااانرتاح معاااك بزاااف

أمينة (برجاء) : ايييوا ديري ليا خااااطري و اجي سكني معااايا ماااعند يزة ماتقووول

مهى : ولكن ولدك

أمينة(قاطعاتها) : وااااش على قبيييلة راااه هو ضحكو هكاك داااير

مهى(شدات لييها فيدها و نطقات بصراحة ) : لا ماااشي على قبييلة ولكن انا اخااالتي كااانحشم من ولدك بزاااف مكانقدرش نهز فييه العين و مانقدرش نعيش معاه فدار وحدة.... و كاتساافرو عند وفاء كل مرة مانقدرش نبقى بووحدي ففيلا كبييرة

أمينة (تنهدات) : و اشنو غاانديرو ابنتي راااه مااابقيتش قااادرة نخليييك وسط داااك القووم

مهى (برزانة) : شووفي احبيبتي لي بغاها ربي هي لي غااتكون و أنا كانآمن بلي قدما ضااااقت غااادي يفرجها ربي مسألة وقت وصااافي

ماااخلات لييها ماااتقوول مزااال من غييير انها تجرها عندها تعنقها و تعطييها ولو شوية من الحنان لي كاتفتاقدو

****

مني خرجات مهى من الداار خلاااتهم غاادي يموتو بسمهم إشراااق غاادي تاااكل رااااسها بسبب القمييع لي عطاااتها أمينة أما يزة خلااااص آخر كلااام قاالت لييها تغرس بحال الموووس فقلبها.... بجووجهم كااايتووعدو لمهى مني ترجع يبردووو فيها هادشي كااامل لي طرا ليهم اليوم

يزة (خبطااات جنااابها) : بنت الكلب من نهااارها قااالبة عليا ختي اشنوووو دااارت لييها الله اعلم

إشراق :بااااينة كااتبقى تلحس ليييها الكاااپة و تغبن حتى تشفق علييها هاااديك انا لي كااانعرفها اش كااتسوى

يزة : حتى تجي إلى ماااحكيييت لبوووها زنااافرها مع لااارض ماااسميتيش يزة

إشراق (بحقد) : هاااادي حاااجة قليييلة قدااام داااكشي لي تستاااهل.... خليييها تضحك شوية هاد السيييمانة مني تجي غاااتهجرو مزياااان

كااايهضرو و الشر كااايقطر من عينيهم... هما مااارضاااوش مني شبعاااتهم أمينة قرطاااس و قمييع ولكن مهى هااانية يمسحووو فييها رجلييهم كي بغاااو هي ماااشي بشر و حتى هي كاايبقى فييها الحااال و كاتأثر مااافكرووش بهاد الطرييييقة بتاتا.... اشنوو ممكن نتسناااو من ناس انانيين و كااايفكرو غيير فراااسهم باااغين غييير حاااجتهم و لي مااعندهم فييه مصلحة يلوحوه تقطعات الرحمة من قلوووبهم و الضميير منعادم عندهم

أصبحنا و أصبح الملك لله

لالاغم كااااتصوووني عند راااسها وهي مكاااايناااش فهاد العاااالم حااالة فمها و غاااطسة فالنعااااس وجهها مكااايبااانش بسبب شعرها المجعد لي طاايح علييه... تحل علييها الباااب و دخلات عندها مرا كبيييرة فالسن بغات تحيييد ليييها شعرها على وجهها لقاتو مخبل وهي تنطق

... اييمان نوووضي ابنتي نووضي رااااك غاااتجيفي بهاااد الشعر لي ضااااير ليك على الوجه

إيمان (كاتقلب) : امممم الميمة خليني غييير شوية

الميمة (جرات عليها الغطا) : نووووضي راااك خمرتي نووضي راه الخدمة كااتسناك

إيمان (ساااطت مساااخياااش تنوض من الفراااش... تقلبات على ظهرها كاتبعد شعرها على وجهها و نطقات بصوت نعسان) : شحااال السااعة

الميمة :التسعووود هااادي نووضي خلاص

إيمان (خرجات عينيها كان كاايصحااب لييها فات الحااال) : اويييلي امي يااله التسعوود و كاتقوليلي فات الحااال.... "جرات الغطا" خليني نعس شوية غانعييط لبنات يحلوو السوونطر بينما فقت و مشيت

الميمة(عاودات حيدات ليها الغطا) : واااا نوووضي من تماااا اشمن بناااات كااتهضري علييهم نوووضي قااابلي خدمتك برااسك و وقفي على شغلك.. ماتخلييش حاااجتك بين يدين عباااد الله ياااله تهزي

نااااضت بزز مكاااتقدرش تفيييق فالصباااح و مكااتسخاااش بالدفىء ديال الفراااش نعسات فالطواليط ساااعة كاتكمل النعاس بالجلسة ماتهزات حتى خبطات عليها جداها الباب... دااارت روتينها الصباااحي و لبسات حوااايجها عاد هبطاات فطرات و خرجات ركبات فطموبيلتها فاتجاه السوونطر بيووتي لي داخلة فيه شريكة مع واحد السيدة كاينة فبرا هي لي مقااابلاه و الارباح كااتصيفطهم لييها كل شهر.... وصلات مع الحداش بانت ليها الدنيااا عااامرة قبل مادخل و غيير حطاات رجلها فالسونطر جااات عيينها نييشان علييها... جااالسة بكل أريحية كاااضحك و تعوووج باينة ياله دخلات حيت مزال مداارت حتى حاجة لا فشعرها لا فوجها... توووجهات عندها بابتسااامة شريييرة وقفات وراها و حااوطات الكرسي لي جاالسة عليه هاااد نطقاات كانشوفيها من المراية

إيمان : مرحباااااا بلالة اشرااااق و انا كااانقوول مال السونطر منوور "غمزاتها" الضيااافة على حسااابي الزييين"بضحكة صفرا" غانتكلف بيك بنفسي

إشراااق هرب اللوون من وجهها عاااارفة إيمان صاااحبة ختها ولكن معارفاش بلي هاد السوونطر دياالها بغاات تنوووض وهي ضغط عليييها ايمان من كتافها

إيمان :جلسي الزوييينة اليووم غانتهلا فيييك

صاحبة إشراق (هي لي جابتها هنا حيت مولفة تصاايب عندهم) : اححح سعداااتك ياااختي موولات الشي شخصيا غاتكلف بييك عرفتي خدمتها متقووونة و زويييينة

إيمان: الله يكبر بييك احبيبة "شافت فاشراق" باااش بغيتي نبداااو

صاحبتها (جاوبات قبل منها) : كانت بااغة دير لاصيغ و تصااايب شعرها

إشراق ماعرفات مادير باغة تفك ولكن مباغاش تبين قدام صاحبتها هي عارفة إيمان مكاتحملهاش و باغة غير منين دوز ليها ولكن قالت مع راسها قدااام أمة ديال البشر مغاتقدر توصلها بوالو حيت هي لي غاتخسر كليانها و سمعتها.... مفاقت من سهوتها غير على يد ايمان لي جراتها

إيمان :ياله غانبداو بلاصيغ "دخلاتها لواحد البيت معزول خاص بالناس لي كايديرو ليهم لاصيغ و نطقات بهدوء" حيدي حوايجك

إشراق(هزات صبعها) : شوووفي راااني عااارفة اشنو كاايدور فراسك ولكن ماتنساايش غوتة وحدة مني نضرب لييك هاد الخدمة فالزيرو و نهرب ليك الكليانات

إيمان (دارت براسها ماسمعاتهاش) : فيين باغة ديري لاصيغ

إشراق (مازعماتش تعطييها كلشي وهي تنطق) : غييير رجليا

إيمان (مطمرة عليها... خدمات الماكينة و دارت فيها الواكس باش يذوب) : ياله حيدي سروالك و تسرحي هنا "دارت داكشي لي قالت ليها و مع ذاب الواكس هزاتو هكااااك طايب و حطااتو ليها على رجلها حتى غوتات لربي لي خلقها.... أما ايمان مدارت حتى تعبير" اووبس سمحيلي صحابلي بردات

إشراق (كاتغوت) : ااااي وااش نتي حمقة كييفاش بغيتيه يبرد و نتي ماطفيتيش الماكينة

نترات ليها داك الواكس من رجلها بلا ماتهضر خلاتها غيير كاتوجع بقات مرة تحطووو علييها سخوون مرة تحييدو ليها بطريقة عشوائية حتى كاتقلع معاه الجلدة كل شوية تقفز و تغوت بغات ديير بنااقص و تنوض ولكن ايمان لصقات عليها و ماخلاتهاش.... منااضت من تما حتى شوووطاتها و طييبات لييها لحمها ولا گاع مطبع بلاصة فيها الزغب و بلاصة مشوطة

إيمان (باسف مصطنع) : ماعرفت ماالي اليووم غيير كاانرون.... اشنووو بغيتي ديري دابا

إشراق (كاتسب و تلعن فييها فخاااطرها لي حاابسها هو صااحبتها لي برا مباغاش تبان مصووفجة قدامها) : بغيت ندير غيير الپلاك ولكن مااديريهش ليا نتي لا تمشي تحرقي ليا شعري حتى هو

إيمان (هزات ليها صندالتها بلا ماترد ليها البال حيت كانت مزال مكسلة و خرجات) : ماايكون غيير خاطرك" اول حاااجة مشات لپلاك لصقات فييه المسكة لي كانت ففمها و هضرات مع وحدة من البنات لي تما" تكلفي نتي بالبنت لي درت ليها لاصيغ و صايبي ليها بهاد لپلاك" خلاتهم تما و مشات كاطير لڤيستيير لقات واحد البنت من لي خدامين عندها هازة صاايتها حتى لفووق و كاتحك فرجليها بهستيرية... فخاضها و سيقانها فييهم حبوب كاينزف بالدم بكثرة ما حكاتو اما رجليها گاع مقشرين وبين صبااعها كايسيل بالما.... إشراق خسرات سيفتها" مزال كاتعاني الصگعة واش الدوا مدار ليك والو

البنت : الدوا بديتو غير البارح مزال ماعطا المفعول... كون يصحاب ليا هكا گاعما نجي و نبرزطكم معايا

إيمان : ماشي موشكيل الله يشاافيك" لاحت ليها الصندالة عند رجليها " هاكي لبسي هادي شووفي واش غاتجي قدك بغيت نشري ليكم صنيدلات بحال هاد الشكل بمناسبة عيد ميلاد السونطر

البنت:اييه مرحبا ولكن ماتلبسو حتى وحدة من ورايا حيت غاتعادا

ايمان :مغايلبسو حد من وراك غير لبسي و سيري و جي بيه نشوف كي كايجي فاللبسة

البنت مزاادتش معاها الهضرة لبساتها و بدات ضووور بيها و كل شوية تهبط تحك فرجليها.... وصلات ل مبتغاها و خدات من عندها الصندالة لي كانت ديال الصبع و شكلها أنيق خرجات لقات اشراق حفيانة و كاتقلب على صندالتها لاحتها ليها عند رجليها و نطقات

إيمان : لقييت فوق منها سراق الزيت قتلتو عليها و مشيت غسلتها لييك "سيري عند البنت هي غاتكلف بيك"

غبرات من تما دخلات لبيروها كاتشوف فيها من الكاميرا حتى دوزات ليها البنت لپلاك فشعرها و لصقات فيييها المسكة لي ذابت بالسخونية و بدات تجبد ليها بين خصلات شعرها.... تكرشخااات بالضحك وهي كااتشوفها باغة تفك المسكة من شعرها فاللخر بالصعرة هزات المقص قطعات الخصلة كاااملة و وقفات كاتغوت كلها مشنتفة و مبهدلة عيطات إيمان لسكريتي خرجوووها بحال الحشرة من تما كاتركل و تجبد... برد قلبها شوية و نطقات بانتصار

إيمان :بصحتك البروشينچ و الجربة ابب

يتبع...