محتوى القصة
أمال: (راسها ضارها كتنعس على الارض واخا حداها الناموسية ديال خوها هزت راسها مشات بغات تحل لباب كان مسدود تزيرت لغات دخل لطواليط كاين غير سقير بقات كتشطح بييها والو تزيرات محست غير نزلات ليها واخا كانت شداها نزلات بحريق ديال نبوولة تصدمت واش بالصح بالت على راسها هنا جاتها حݣرة خاايبة جلست فالارض كتبكي مخنووقة عاد تفكرت كاين الدوش فبيتو كتحس بلفزاݣ ولكن مهمهاش بقات فديك الحالة حتى حلات مريم لبيت عليها ولقاتها جالسة)
مريم: أمال منعستيش عاود علاش جالسة هنا
أمال: (شافت فيها بعينين ذابلين) بغيت نمشي من هنا امريم
مريم: والله خوك ندم بزااف على سمو دارلك
أمال: (عضت على شنافتها شادة لبكية) خلي سوارتك بحال نسيتيهم نهرب ومتجي فين تفيقو حتى نكون مشيت
محمد: (هنا دخل محمد) هانتي هربتي (تقابل معاها) فين تمشي؟؟ لوجدة؟؟
أمال: (حركت رأسها باه) واه بغيت نرجع نقرا
محمد: للي سمعك تݣولي تقراي بحال راك جيتي نتي اللولة
أمال: الا خليتني نمشي غنجي انا اللولة
محمد: مريم سيري وجديلي فطوري
مريم: (كتستغرب من الريحة للي كتشم) واخ
أمال: (وقفت) عفاك خليني نمشي بقا تحضيني دير كاميرا ݣاع غير خليني نرجع (كتبكي) راه مكنحملش هاد الدار قتلني ومنبقااش هنا
محمد: تعودي هادي راه داركم حتى يسهل الله فولد الناس من غير هداك للي عمرلك راسك ورجعتي ممربيااش بحال هاكا لوكان كان راجل كون جا خطبك
أمال: (بعصبية) هو رااجل وورااجل مزيان ودير فية للي بغيت (ياله هز يدو جات تهرب زلقت فبولها جات على راسها كتبكي) خليني نمشي هءءء (محمد غير مغووبش كيشوف عمرو فكر يتحط فموقف ختو دافع على واحد وبكل جرأة هز جاكيطتو حيت كينعسو هو وأمال فبيتها وهاد لمرة مسدش لباب فرحت حسابلها خلاها تخرج مشات كطل لقاتو جالس كيفطر ومريم حداه ومع الضو مشعول بيجامتها الحمرا بان فيها لفزااݣ)
مريم: تزلع عليك لما؟؟؟
أمال: (شافت فراسها) كنت بغيت ندخل لبيت لما
محمد: (بعصبية) راه الدوش تما
مريم: متسدش عليها کاع لباب (ضار خنزر فيها سرطت ريقها من ديما منبه عليها مدخلش فهاد الامور غير الا كانو بجووج) اجي نعطيك بيجامة
أمال: (حاضية غير واش يعاود يسد لباب.. شافت فمريم) حشاك اختي والله متفكرت الدوش حتى طلقتها اصلا ضربني لبرد
مريم: اويييلي عليك راه كتوقع
أمال: عطيني نجفف ديك لبلاصة (سمعو باب برا تردخ) جلااااا (ضارت عند مريم) عطيني جفاف (مريم كانت بغات تجفف ولكن مخلاتهاش أمال دوزت بجافيل وسانيكروا على لبيت كامل وعينيها على لباب ياله مشات تحل لباب)
علي: اديييك لبغلة شكون حلك لباب وااااا مي
مريم: (خرجت من لكوزينة) راه محمد للي فتح ليها لباب
أمال: بغيت نطلع عند خالتي نعيمة (هنا خرجت فتيحة من بيتها عقداااهم)
فتيحة: خرجتي اوا بيا ولا بييك (أمال طارت شدت فلمرايا للي على برا.. حتى طرطقت عينها) والله تم والله وتقيسيها
أمال: (بخوف) تقيسيني نشخشخها
علي: (مشا هااجم عليها وهي جبدت لمرايا واخا تقيلة وهزاها غير بالسيف كشفة.. معندو غرااض فلمرايا باغي غير يوصل ليها) وليتي عندنا بوعو فالدار
فتيحة: علييييييي بعد ديك لفضيييحة
أمال: (بخوف حيت كيضربوها ضرب ديال تنعس بيه تفتح لباب كان محمد شافها فداك المنظر وكولشي باين تكره وهو كيزفر)
محمد: وااقلة هضرتي فهاد الدار زائدة ناقصة
أمال: انا بغيتكم غير تبعدوني ولا قتلوني
محمد: غتسكتي ولا نصمك مك.. (شاف فيهم) هاد لباب لي دخل وللي خرج يسدو أمال غترجعي لبيتك وتحركي فالدار (شاف فمو) للي هرساتولك غنشريهلك غير مضربيهاش..(شاف فعلي) ونتا فطر وتبعيني ديرها معيشاش معاك (بقات هازة لمرايا حتى تفرق كولشي وفعلا محمد وعلي خرجو وسورتو لباب من بعد مهزو سوارت التانيين بقا الدوبل غير مع فتيحة تقلات عليها ديك لمرايا وهي كضور عينيها حطاتها بشوية على ميردوها ودخلت لقات فتيحة جالسة هي ومريم كيفطرو دخلت للكوزينة لقات مسمن أتاي كلااااات حيت حسات خاصها تاكل سوا بشهية ولا بلا بييها......)
هند: (عوجت فمها وهي كتشوف صاحبتها كتقاد لبوفي ولكراسا للي حاطة فيه عائلتها كاملة شافت فلكرسا 7 ما فيهم حد حتى لبوفي كانت موجداه عصير وصواريه وشي حليوات مشات جلست فكرسي حيت صاحبتها بدات فالسوتنونص ديالها.. وهند كتشوف تفكيرها فجوج دالناس وليد للي حست براسها مقلقة منو بزاااف ومن أمال للي بقات فيها كتر من راسها حاليا... صفقات دايرة صواب وهي تشدها خلعة خفيفة ناضت هازة لبيسي ديالها برونشااتو من ديك لعيبة للي كتعطي صورة كبيرة الحجم فالحيط كانو الأساتذة جالسين كيتسناو الطالبة المتفوقة تطفا الضو والضجيج وقف بدات كتهضر وتشير بيديها وتشرح بطريقة زويينة ولكن كولشي بالفرنسية ݣاع للي وجداتو بيناتو قالت الكلمة التالية وبفاو كيصفقو عليها تشعل الضو وهي تقشع بين دوك لكراسا وليد جالس كيصفق ولكن مظاحكش تبسمت مهم جااا مشات كتسلم على الأساتذة وكتعرضهم على لبوفي وقف وليد ومشا عندها هاز لكاسك ديالو وقف حداها بصوت خافت)
وليد: ماشي بالضرورة تسلمي على رجال بيديك
هند: (شافت فيه فرحانة) فوقاش جيتي
وليد: منين بديتي كنت هنا
هند: اه زعما ݣاع هادي صدفة
وليد: مصدفاش منين خرجتي من الدار وانا تابعك مبغيت ندخل حتى يجي دورك (تعابير جامدة زعما راه مقلق)
هند: اممم (فرحانة)
وليد: (حك حدا نيفو) مبغيتش تبان باش متلفيش وانا كاين
هند: هههه اجي تشرب عصير
وليد: بلاش عطتيهلي داك نهار
هند: وصافي أوليد راه انا للي خاص نتقلق منك ماشي نتاا (وقف بروف ديالها كان صغير فابأربعينات كيهضر مع هند فالبحث ديالها ووليد كيشوف ككيشوف فيها ويتبسم مبغاش يدخل راه قرايتها هادي هو جاي يحضر معاها ماشي يدابز حتى مد يدو منين بغا يسلم على هند.. تبسم وهو مخسر وهضر بلفرونسي) راجلها
....: اه مبروووك (شاف فهند زعما مݣلتيليش)
هند: الله يبارك فيك (لاخر مشا وكتشوف فوليد للي متبع لاخر) شفتي حتى انا محملتكش تركب معاك ديك لمونيكة
وليد: (ضار عندها) ياك بخوشتك عندك ركبي فيها للي بغيتي
هند: تأ غضبة ديالك خايبة
وليد: (شاف مطولا فيها حنا لسروالها شككها فيه بحال موسخ حتى كانت غتشوف ورجع شاف جهة صدرها حنات كان الديباردور باين دغيا سدات صداافة)
هند: اممم غير تحلت
وليد: (شاف فشنايفها ومرة فعينيها وتم غادي وهي متبعااه حتى غبر وترها هزت تيليفونها وشافت فلكاميرا كانت معكرة موڤ ماط... هو خرج ركب فموطوورو ونيشان للمحال...)
هند: (جاو عندها شي بنات كتعرفهم باركو ليها ضيفااتهم كملت مع الأساتذة وجمعت داكشي داتو لطموبيلتها ونيشان للدار نوااها فحوايجها وأكترية شوفاااتو صونات على مريم وهاد لمرة جاوبات امال) أماال؟؟
أمال: توحشتك بزاف اهند حبسوني هنا ݣوليلي شنو درتي فقرايتك
هند: (بتنهيدة) والله مكرهتكش وكان كنتي معايا اختي
أمال: حتى انا هوما للي مخلاونيش
مريم: (مشات للكوزينة خلاتهم يهضرو على خاطرهم....)
وليد: (مشا كيخدم مع دراري وتفكيرو غير فهند شنو كانت لابسة وكفاش ماكية وجهها وشعرها وكفاش شاف فيها داك لبرووف حتى كيبغي يمشي عندها للدار وكيهداااا وفنفس الوقت تفكر كفاش هضرات وقدمت السوتنونص ديالها ولي بروف للي تماك عجبااااتو.... بقا ملهي مع الخدمة زهير ميمكنش يشوفوو حيت شافو فصباح كمل مع 8 بداو كيجمعو الدنيا غدا الجمعة مغيخدمش مكملو حتى ل9 ككمل وهو مسخسخ هز ساشي وركب فموطوورو نيشان للدار.. دخل دوش كان صلا ونيشان صلاتو فالخدمة عطر راسو وطلع لدار هند دق بالزربة حلات حيت كانت دايزة حداااه) علاه حالة لباب دغيا
هند: ههه حيت دقيت
وليد: ݣولي شكون بعدا
هند: ولييد اصلا حتى واحد متيدق علية من غيرك
وليد: اممم (مد ليها ساشي) واخاااا
هند: (تبسمت وشدات عليه) مزالة تنقولها راه انا للي خاصني نتقلق ماشي نتا
وليد: (قوس عينو فيها)
هند: قولي شنو دار زهير امال مسكينة حبسها محمد وزايد حابسها فالدار
وليد: وايلي؟؟
هند: وشنو تتسنى من محمد بففف مرضني محملتوش داك نهار باينة غيكون ضربها حيت هربت
وليد: هربت؟؟
هند: اه كنت بغيت نعاود ليك ولكن منين شتك مع ديك لمونيكة..
وليد: هاديك راها محامية
هند: محامية على راسها بغات تخدم تشد تاكسي وتلحق بيك ماشي ضروري تكون جنتل مان مع كولشي براكة غير معايا...
وليد: (جابتلو الظحك ولكن وجهو بقا بارد) كفاش هربت أمال وعلاش
هند: سول داك لحمق دولد عمك لاش حابسها غير للي يكلاري بيه
وليد: تكللماي ابنتي
هند: لا حيت مشفتيهاش كفاش كطلب وترغب ولا حيت زهير تشد دار فيها ما بغا
وليد: متغوتيش... ()زفر انا مصالحليش حتى كندير نمشي نجيبها والله مكيوصل الليل حتى كندووخ
هند: دخل نهضرو
وليد: لا
هند: راه غنخليو لباب محلول
وليد: واااݣتلك لا (شافها صاطت) اجي نجمعو ورااقنا نديرو لاكط على متجي حناك
هند: (شافت فيه) يعني متخطبنيش؟
وليد: وراه خطبتك من عند حناك داك نهار
هند: لا مكفياش خاص تجيب عائلتك
وليد: اممم نخطبووك وعلاش منخطبوكش ولكن اجي نسبقو لاكط
هند: ههه واش حمق
وليد: واخا هند مرة خرا متلومينيييش (جاي هابط وتبعاتو)
هند: كفاش منلومكش
وليد: (خرج عينو) واا سيري دخلي واش مراكيش تشوفي باش راكي خارجة؟؟
هند: (مع عطاتو بظهر شاف للي كان هارب منو وحتى هو عينيه كيهربو ديما تمااك ومع سبور وعانية براسها كانت عندها مقادة وواقفة ضارت منين دخلت لقاتو شبه حال فمو وعينيه نايمين) انا دخلت
وليد: (شتت انتباهو ) حسن... (سدت لباب كظحك اما هو ندم علاش ݣاع طلع... فتحت هي الساشية كان صاك ديال الجلد زوين مع شال صغير ديال العنق من الحرير عجبها بزااف...)
~~~~~~~~~~~~~~
محمد: (هز لمريم التيليفون كيحيح) تعاودي تعطيها شي تيليفون نقتل مك
أمال: هي مداارت واالو انا للي طلبتها نهضر مع صاحبتي
محمد: (شاف فامال) متشوفينيش مكنضربكش صافي راك ربحتي
أمال: هضرت غير مع هند
محمد: ها ودني منك والله يا مك حتى نحرك
أمال: (هزت كتفها بلامبلاة بشوية قالتها) نحر
مريم: (وقفت فالنص منين بغا يضربها) صافي منعاودش نعطيها التيليفون
محمد: اصلا مغنخليهلكش لا نتي لا هي (شاف فامال) هاري داك التيليفون بعدا
أمال: معرفت فينو
محمد: غتجيبيه ولا نتفاهم مع ولديك الكلبة
أمال: راه بالصح معرفتش فين راه ولا علاش كنطلب من مريم نهضر من تيليفونها..
محمد: اممم واخا نساااي صاحبتك هند ونساي ديك وجدة
أمال: علاش حشووومة عليك والله
محمد: دابا هضرت بفمي
أمال: ياك ݣلتيلي غتديني ندوز الامتحان
محمد: لا (خرج مخليها كطلبو وترغبو سورت لباب وطلع نيشان لسطح مكيجاوبش وليد للي كيصوني عليه... مع دخل وجلس فبلاصتو شاعل لݣارو سمع الحس عرفها هي ضار عندها كانت لابسة بينوار ستان حيت الجو بدا كيسخن وباينة لتحت ملبساش بزااف وحتى من الشال شدات فيديها وطالقة شعرها طلعها وهبطها بشوية وهو كيكمي)
شيماء: شنو مقلقك هاد نهار عاود امال؟ ولا ديك مرتك؟؟
محمد: علاش كطلعي عريانة عندي هاك؟؟
شيماء: (بهدوء ومتبسمة) حيت نتا محمد ماشي شي واحد للي غريب علية
محمد: (هز حواجبو بجوج) اممم ماشي زعما حيت خونا سلت وجايا تلسقي فحميدة
شيماء: (بقات محافظة على الهدوء) علاش مفخباركش انا سلت يدي منو من شحال هادي
محمد: ههه بأماارة منين کال لخوك الا ختك ݣدت تبعد اجي دير فية ما بغييت
شيماء: دوماج مبقاش عندي التيليفون باش نوريك ميساجات طليب ورغييب باش نسمحلو
محمد؛ واخا سمو المطلوب مني انا
شيماء: (قربت وباغفان ديالها كيزيد يجهاد) واالو غير منبقاوش بحال شي وحدين عمرهم تباغااو
محمد: تبغااو؟؟ كبرتي اشيماء وتعلمتي تق**** مزيان
شيماء: (طرطقت عينها)
محمد: واقلة مشفتيش الفرق بينك وبين مريم عاودي شوفي راسك فلمرايا حيت انا بالصح مكنقدش نشوف فيك راه في حيت متبعيني بالغباء للي فيك داكشي باش كنبقى نسمع ليك (لاح لݣارو عليها بقات كتنتر تحايدو وهو هبط... مخليها غطرطق... أما هو مينكرش انه شوشات عليه كيحاول يبعد الافكار الشيطانية... هبط لقا أمال جالسة مع مريم للي تحايد ليها التيليفون ونبقى عندها كيف دير تهضر حتى نعيمة هبطات ليها التيليفون لقاتو مديشارجي وفالدار مبقاتش شارجور حيت محمد مهبط ديالو وديال علي لتحت وتيليفون مها ايفون ماشي بحال ديالها.... دازت 7 أيااام والوضع بقي على ما هو عليه أمال فوقما لقات فتيحة الفرصة ضربها ولوخرا تهرس ليها ميعناتها حتى مولات قرباتلها ولكن كدير ماا كتر من الضرب السب والإهانة... حتى لواحد صباح كانت ناعسة أمال لقات شي حد كيزعزعها حلات عينها لقات مها قفزت بلاصتها واقفة)
فتيحة: (بهمس تنطقي كلمة وحدة نقتل والديييك.. مدت ليها فلوس) هاكي وباب الدار راهو محلوول سيري من هن
أمال: (طرطقت عينها شافت فلفوس وشافت فمها للي ديما دوك النظرات دالكره والاشمئزاز) فين نمشي
فتيحة: للجايحة... غير متعتبيش تاوريرت ووجدة حيت خوتك غيجيو يݣلبو عليك تم
أمال: (بلعت ريقها وشافت فيها) تاني مرة كطرديني اماما!!
فتيحة: (شدتلها يدها وحطاتلها لفلوس) ها لعاار الا ما غبري كماارتك قبل مترزيني فماعني يا المسخوطة (أمال هزت شال دارتو عليها هزت جرت بانطوفتها وهزت التيليفون تحت وسادتها مولاتش ضارت من موراها مشات بشوية لباب لقاتو محلول وحتى لباب التحتاني محلول يعني مها قدات ليها كوولشي هبطت بشوية كان صباح ياله كيطلع وصلات لاخر درجة ضارت كتشوف لقات لباب كيتسد بشوية تنهدت وخرجت من باب الدار حانية راسها وكتزرب فخطواتها...)
~~~~~~~~~~~~~~~~
زهير: (هبط من صطافيط نيشان دخلوه لواحد الحبس فالمحكمة على ميجي الوقت برا كان وليد والمحامية اما هند من داك نهار مطلع عندها ومرااقبها حتى هي مولاتش خرجات فقط كيهضرو فالتيليفون.. حتى سمعو نمرة ديال القضية ودخلو كان زهير جالس مور قضبان السجن بان فيه الضعف شوية ولحيتو مشعككة دخلت المحامية كدافع على زهير فجلسة مغلقة حتى وليد بقا برا القاضي عطا الحكم بعد المداولة..... خرجت المحامية عند وليد)
وليد: امدرا؟؟؟
صوفيا: اممم (شافتو غوبش وهي تبسم) 6 شهور حبس
وليد: (تصدم) سمو!!!!!
صوفيا: مع وقف التنفيذ ههه سمحلي خلعتك (مظحكش كيتسناها تكمل) غرامة مالية 5000 درهم وسحب رخصة السلاح 5 سنوات اممم درت ما فجهدي حيت زهير مصر سلاح يبقى عندو
وليد: كان عليك تجري فسحب رخصة السلاح نهائي
صوفيا: ههه مهم هو غيكمل شي إجراءات وغيخرج
وليد: (تبسم) واخا فين غنخلصو الكفالة
صوفيا: اجي معايا..... (مشا وليد خلص الغرامة للي كان متوقع اكتر ولكن حسن السيرة ديال زهير خلات الحكم يكون فصالحو حتى من الحبس كانو معولين علييه خرجو برا) ݣلت ليك غنجيب البراءة لموسيو زهير
وليد: (تبسم معاها بلباقة) شكرا بزاف بالنسبة للأتعاب ديالك تان..
صوفيا: نو نو ماشي وقتو الاهم دابا هو البراءة غندخل نقاد شي وراق ونجي (دخلات خلات وليد متبسم واخيييرا زهير غيخرج...)
هند: (هادي سيمانة كل نهار كتصوني على مريم تيليفون كيصوني مكيجاوبش ومرة مرة كتلقاه مشغوول بغات غير تهضر مع أمال لدرجة صونات على شيماء كتقولها مكتشوفهاش مانعين عليها لخرووج.. صونات على وليد) الوو
وليد: وي هند (كيسني وراق الغرامة)
هند: شنو دار زهير؟؟
وليد: (متبسم) شوية ويخرج
هند: وبعدا خبار زوين أمال بغيت نوصلها ووالو شنو بالك نمشيو نجيبوها
وليد: اودي (مد لوراق لصوفيا) ها هوما.. (خرج لكولوار المحكمة وهو شاد التيليفون) راك شفتي انا ويااك معاركين ندمت علاش ݣاع تشاركنا
هند: هو كيجي حتى لموضوع أمال وكيرجع لحال شي مكلخ مزال عايش فالعصر الحجري
وليد: اودي ولكن نشوف زهير راه كبقالو صبر غيدي مو ويمشيو يجيبوها
هند: نمشي معاهم
وليد: سمو هوااااا!!!!! هنيينا اديك لبنت راه شحال وانا باغي نخرجو شوية نهضرو
هند: اممم
وليد: سمو هاد اممم!!
هند: والله معرفت مع عندي بزاف دشغال
وليد: شغال کاع؟؟ مهم انا شوية نجي نهزك من الدار (شاف زهير جاي مع المحامية وداير يديه فجياابو) بلاتي اهنوودة ونهضر معاك (قطع عليها وهو ماشي حدا صاحبو)
هند: (بقات كتفرنس) هنووودة (كتجمع الظحكة بيدها) ناااري هاد الحب كيخليني بحال شي غبية (نيشان مشات كتقلب شنو تلبس..)
وليد: (سلم على صااحبو بعناق وهو ظاحك) على سلامتك
زهير: (مغوبش دار ابتسامة موصلاش لعينيه) الله يسلمك اصاحبي (شاف فيه) ولا خويا
وليد: (قرب حداه) ديرني حتى ولدك
زهير: لا غنبقى نݣولك mon bb
وليد: ههه ها با زهير للي كنعرف صافي خليها على مولانا
زهير: (حرك راسو باه) مهم انمشي دابا
وليد: صبر نوصلك
زهير: (شاف فعينيه) انمشي على رجلي شوية ومن بعد غنشد تاكسي للدار
وليد: (تفهمو) واخ
زهير: (شاف فالمحامية) شكرا اختي
صوفيا: (تبسمت) العفو هادي خدمتي (خرج من تمااك بحال كيحاول يفورطامي رااسو.. وليد حتى هو تم خارج وخارجية معاه صوفيا) نوصلك معايا؟
وليد: (من ديما كيرفض) لا عندي لموطور ديالي
صوفيا: واااااو (أول مرة يمشي بيه) شحال كشهية نركب فيه
وليد: نوريك منين شريتو (ركب ودار لكاسك)
صوفيا: الا مافيها مشكل ممكن توصلني
وليد: (هز حاجبو) لا (طرطقت عينها جامعة الابتسامة) الله يعاااون (نوض داك الصوووت وزااد مخلي غير الصوت من موراه ركبت فطموبيلتها ومشات نيشان للمكتب ديالها وهي مزالة عارفة غتولي تلقاااهم....)
وليد: (غير وصل للمحال صونا على مو سمع صوتها ماشي هو هداك) ماالكي؟؟
نعيمة: (بتنهيدة) بنت عمك هزت راسها وزاادت ولدابا ملݣااها حد
وليد: اماال؟؟ وفين زادت
نعيمة: معرفت خوتها راهم يݣلبو مشاو لوجدة وهوما حالفين فينا وأكترية داك علي
وليد: (بقا كيحك من مور ودنيه) الا جات هنا غتكون جاية للدار هنا ولا لسيتي انا نخرج نقلب عليها قبل ميوصلوها هوما
نعيمة: (بصوت خافت) اولدي الا لݣيتها ديها للبوليس تماك ميݣدوش يقربولها ويبعدووها تكمل قرايتها ولا تشوف شنو دير تا صاحبك مولاش جا
وليد: هو راه ياله دخل للمغرب مهم صافي قطعي انمشي انا وهند نݣلبو عليها.. (فلبلاصة صونات هند حيت شيماء صونات عليها وصلاتلها لخبار) راه عرفت عاد کالتهالي مي
هند: وشنو نديرو؟؟؟
وليد: احمد احمد (جا عندو) انا نغبر ساعتااين خلي لكتاب عندك
احمد: كون هاني اخاي وليد
وليد: لبسي حوايجك اهند نمشيو لسيتي!!!
أنوار: (كان فاسبانيا خرج كيتسارا من بعد مخلا دعاء ناعسة كيتمنظر فالاجواء الساحرة ممتيقش هاد الأيام للي كيدور فاوروبا كبغى جلس فقهوة للي فيها غير التيتيز ولعرا ساوي ريال.. ولكن ملقى لمن يهضر فقط تصور ولاحهم فانستغرام باش يكمونتيو ويقرا شنو باغي يسمع... صونا تيليفونو كانت مو قطع ورجع صونا عليها) ويي
لكاملة: (كتفايش على عيلات ولادها) اوليدي لباس عليك؟
أنوار: الحمد الله الوالدة هاني فسبانيا
لكاملة: (ظحكت) صبانيا!! ياك مشيت لفرنسا
أنوار: هه كولشي بحال بحال كجاتك مرتي؟؟
لكاملة: غزاااااااالة يا وليدي وهااا الزين والطولة
أنوار: (تبسم) علاه ولدك ݣليل
لكاملة: ولدي مزييينو وميات وحدة تهبل عليه
جهان: منهم ديك شيماء غتكون كتاكل راسها ههه
نزهة: ههه وييه
لكاملة: بغيتها فيييها
أنوار: (كيسمع مزال داير اطونسيو تمشي تعطي لفيديو للي عندها) اوا حتى لبلاتي ونصوني
الكاملة: اولدي مصونيتيش على باك؟؟؟
أنوار: شي جوج مرات مجاوبش خليه حتى يبرد.. خوتي كيهضرو معايا عادي من دون الناس مفرحليش
الكاملة: وحناك اوليدي؟؟
أنوار: مساالي نهضر معاها حتى هي... زهير مبانش؟؟
الكاملة: لا راه خرج لبرا
أنوار: (بلا ميحس وقف) فين؟؟
الكاملة: شكون عرف لوالديه الحاجة حدها ݣالت خرج يجيب شي سلعة هادي شي سيمانة
أنوار: (سيمانة نيت باش جا لاسبانيا ولكن اليوم لخر) ومزال مرجع؟؟
الكاملة: لا
أنوار: (حط فلوس معرفش حتى شحال) انا اناااا مهم انا نقطع من بعد ونهضر معاك (قطع زربان يوصل لوطيل حيت فبالو زهير جا يقلب علييه.....)
~~~~~~~~~~~
علي: والله يا مها لا باقي زادت شي نهار ݣوول جاية تݣلب على صاااحبها
محمد: يا تسكت يا نهبطك
علي: هبط نديرو اوطوسطوب ولحݣ علييها.. هانية ندوز الحبس مهم منبقاوش مسكة ففام الناس
محمد: (شاف فيه) سكتنا من داك تبرهيش ديالك
علي: والله يا مها حتى ندبحها خليني حتى نوصلها (بقا يتحلف طريق كاامل واي بنت دازو من حداها فطريق يدور يقلب واش هي ختو... وصلو لوجدة ومحمد نيشان مشا عند الدار فين كاريين لبنات طلع محمد كيقلب وعلي وجد بونقشة (داك اموس للي كديرو طراق وكيتحل ههه معرفتش نوصفو مزيان) جبدو تخبية على محمد موجد راسو فاي لحظة يذبحها.. عياو يدقو حتى علي بغا يفرع لباب)
محمد: ودااك لمريض راه ساكنة مع بنت هنا
علي: وهاديك **** هي للي خرجت عليها شوف بنت عمك بقات فوجدة وختك طايرة تجي هنا عندها
محمد: سكتنا (والو محلووش حك راسو بعصبية نيشان عقلو مشا لدار الحاجة مشات عند زهير للدار هبط كيجري تابعو علي ونيشان شدو طريق لعند الحاجة هبط محمد من الطموبيل طل فالشق ديال لباب مكانش محلول قشع طموبيلة ديال هند تماك وهنا محمد تأكد ختو راه كاينة تمااااك بقا كيدق بالجهد معمر لباب تسد هاكا....)
نعيمة: (كانت مفقووسة جالسة فطابل مونجي للي فلكوزينة وحداها شيماء كتقاد لغدا وتزوق وتقاد شلايض.. سمعت لفيكس) شوفي ابنتي شكون راه يصوني
شيماء: واخا (مشات كدندن وتغني جاوبات) وييي
أمال: عطيني خالتي نعيمة
شيماء: ههه الوو الوووو (قطعت عاد هزت لباراي محطاهاش مزيان) بسلااات معرفت شكون كيتفلى
نعيمة: شكون ابنتي
شيماء: معرفت اماما مع هزيت سمعت شي صوت شي راجل كيݣولي توحشتك ما توحشتك هدا باينة داك لكلب من نهار مشى وهو بصيفطلي
نعيمة: بلوكيه مݣدينا على شي صداع ابنتي
شيماء: بلوكيتو داكشي باش كيصوني فلفيكس (رجعت كتقاد فشلايض حتى دخلت سناء ومها للي مشات لطبيب) واا فين اصاحبتي
سناء: هه خليتكم
نعيمة: دخلي اختي السعدية
السعيدية: مريضة الآلة نعيمة
نعيمة: مشكيت عليك غير الراس وصاافي دخلو جلسو شيماء ردي الغلاي
السعدية: با جيبي لمونادا راه قربتي تولي جدة
نعيمة: (تبسمة) ااو؟؟
سناء: (حشمت) عاد ݣالتهانا طبيبة فصباح
نعيمة: (ناضت فرحانة عنقاات مرت ولدها كدعي معاها بالذرية الصالحة وحتى شيماء بركات ليها ودارت صواب واخا عقلها كيانبها علاش قطعات اووموان تعرف غير علاش صونات أمال صوتها كان ماشي ديال إنسان مرتاح.... أما نعيمة فرحانة بحفيدها ولكن غصة امال مزالة واحلة ليها.. كما واحلة للي لتحت مريم غير كتمشي وتجي معرفت حتى تخدم مقاد فالدار)
فتيحة: خاايلتيني جلسي شوي
مريم: غيقتلووها الا لݣاوها
فتيحة: لا لا حدهم يضربووها هاااو يضيعو عمرهم فلحبااسات على ود هربااانة
مريم: (شافت فيها لقاتها مبردة) خالتي واش مبقاتش فيك
فتيحة: ولاه تبقى فية مكفاتش دالشوهة للي غدير وعلم الله لاه هرباانة باينة هزت وغير خاايفة مشتيهاش غير معصبة وظل تاكل
مريم: ولكن هي مثقفة
فتيحة: ويلا شربت
مريم: كفاش شربت؟
فتيحة: بعدي نتي من هاد الهضرة وسمعيني شتك مزال محملتي؟؟
مريم: هاء (حشمت) راه محمد للي مباغيش داابا
فتيحة: مباغيش حيت شيماء ها هي جلست وحدااه
مريم: لا لا محمد مكيفكرش کاع هكاك
فتيحة: اوا للي ظهر ليك خليه حتى يجيب للي تحملو الا كتشربي شي كينة حيدييها
مريم: (كانت فهم رجعت فجوج) داابا نشوفو أمال
فتيحة: اوا جلسي تخممي فديك الهاربة وخلي ولدي يجيبلو لي تهزلو ولادو فكرشها (وقفت) هاني طلعت عند نعيمة شوي....
زهير: (من بعد مرجع لدارو مضار لا هاك لا هاك دخل نيشان لداارو سد لباب وطلع لبيتو نيشان للدوش حيت حس براسو مݣلݣ بلمزيان من بعد دوش سخون خرج لبس حوايجو وصلا ولكن مطولا... )
فدار الحاجة طلعت هند ووليد كانت هي وبناتها وليد بقا فدروج وهند طلعت عندهم من بعد مسلمت
هند: حم الحاجة اجي معايا جبت ليك شي شوكة على ود رجليك
الحاجة: (فهمتها بغاتها بوحدها فشي حاجة) الله يرضي عليك ابنتي منسيتينيش فيييها (ناضت لبيتها وتبعتها هند هنا وليد منو راسو مشا سد لباب دبرا خاف تكون أمال وتخاف يرجعوها وتهرب.. كيصوني على زهير طافي مزال مشعل تيليفونو فضل يبقى تماك يتسنى شنو كاين)
الحاجة: (من بعد مسدت لباب) باك لباس ابنتي
هند: الحاجة قوليلي واش أمال جات عندك
الحاجة: لا بنتي
هند: عفاك غير قوليلي راه منقولها لحد عفااك
الحاجة: (خلعتها) ابنتي والله مجاات علاه فين مشات مسيكينة حتى من تيليفونها كان مطفي
هند: بفففف كان حسابلي لقاها هنا (بتنهيدة شافت فالحاجة بحزن) هربت من دارهم وهي مكتعرف حد كتعرفني غير انا ونتي
الحاجة: هربت؟؟؟؟
هند: خوتها كانو حابسينها مخلاوهاش ترجع تقرا وهربت والله معرفت
الحاجة: (بقات غير كتشوف) حتى زهير مزال مرجع من برا
هند: (اذا زهير مزال مجا) الله يجيبو على خير ونخليك الحاجة عفااك الا جات خبيييها وعيطيلي
الحاجة: الله على بنيتي يكونو عاود تكرفسو عليها الله يهدي ديك مها
هند: هاديك عمرها تبدل ولا تحن فبنتها (خرجت والحاجة من صواب وصلت معاها لحدا لباب سمعو غواات.. هند هبطت كطييير فبالها جات ولا تلقاو ليها خوتها لقات وليد ومحمد كيتغاوتو مشات برا والحاجة حدها بقات حدا باب دارها لتحت كتحنزز شكون)
هند: مالكم مالكم؟
وليد: سيري اهند
محمد: اوالله حتى ندخل نجيبها
هند: هي مكينااش غير كون هاني بسباابك غتكون فشي خلا ولا معرفت مسكينة فين كيضربووها لحيوط والطرقاان
علي: نتي بعدا ال*"*** غير سكتي
وليد: (طرطق عينو فعلي حتى مشا شنق عليه بيد ويدو ضربو ببونية لكرشوو محمد كيفااك وهند كتقلي السم لعلي وحبات ياكل لعصى)
محمد: (كيفك حتى فاارقهم ضار عند وليد للي شادو على علي) سير جيبها أوليد ختي ممنحقكش تخبيها
وليد: غنخبيها ونيشان للبوليس تهنى منكم ومن عقليتكم
علي:ا والله وتكون تحت ارض حتى نحر والديها
وليد: حسابلك داركم باش تستقوى على ولية (بقاو فلغوات من وليد من محمد من علي هند مولاتش هضراات.. هنا زهير كمل صلا حل السرجم دبيتو للي شاد الشوفة فكولشي وحتى من لباب قشع غير طموبيلة ديال هند اما هوما لمدابزتهم بقاو كيبعدو حتى كانو من مور الصور.. هو مشا بالو نيشان تكون أمال منين قالولها راه يكون خرج كان غير بتيشورت حيت سخون الحال خرج مو هنا طلعت لسطح باش تبرݣݣ مزيان حيت بعدو منين كيكون الامر فيه تبرݣيݣ رجليها كيوليو فيهم 60 خيل... محدو كيقرب لطموبيلة هند كيسمع غوات مشا لباب كيلقاهم بتلاتة مطايفين وهند واقفة بقا واقف حدا لباب)
زهير: اييييييييييه (ضارو) سمو وااقع؟؟؟
محمد: (مشا لجيهتو وتابعو علي) فينها؟؟؟ فييينها؟؟
زهير: (مفهمش تسناه وصل حداه وهو يجبدو من كول تيشورت ديالو)
محمد: فينها أمال؟؟؟
زهير: (غير سمع أمال طرطق عينو وحتى هو شنق عليه) عاود!!
هند: هو راه عاد جا من برا
الحاجة: (قشعت ولدها وهبطت ماشية لعندو)
محمد: فينها ختي؟؟
علي: (حتى هو بغا يشنق وجاه زهير طوييل حيت كان قصير عليهم شوية بقا حاضي غير جيبو وحدو كيهلل ويتحلف فأمال اما زهير دفع محمد)
زهير: بنيتك جاي تسولني على ختك؟؟ علاه نتا فين كنتي باش جاي تسول (عرفها تكون هربت عاود) الطفلة من ݣدام عينيكم طج وجااي تسول رااجل اخر عرفتي دااابا نتا ماشي واحد للي يݣد على المسؤولية.. حابسها فالدار باش تبان رااجل هانتا طلعتي شماااتة تسمعني وبربي لكبييييير وملݣهاااش وجد تدفن حدا بااااك.....
نعيمة: (بقات فلكوزينة بوحدها وتفكيرها فأمال هزت تيليفونها كتصوني على نمرتها طافية دخلت شيماء) علم الله مسكينة فين راها دابا
شيماء: دابا شكون فينا لمرزنة وشكون للي خفيفة جلست تنفخو فيها حتى هربت من دارهم وشو علاش
نعيمة: (باستغراب) علاش متحمليهاش؟؟
شيماء: (شافت فمها كظحك) ههه لاااا
نعيمة: وا بااز متشفاايش ابنتي
شيماء: متشفييتش (هزت الصينية ومشات جلسات حدا لوخرين) اوا خالتي فتيحة مزال مصوناو دراري
فتيحة: (كتجاوبها ناقص) علاش بغيتيهم فشي حاجة
شيماء: اممم اوا راكي عارفة علاه نسول
فتيحة: سيري قضيبك شي شغل واش کدي ݣدك باش نجي نتعاودو انا وياك
شيماء: ههه اوييلي واش مزال غضبانة على ديك لمرات
فتيحة: (صارت عند السعدية عطياها النخال)
سناء: (ردت لبراي دلفكس) تلݣاي شحال من حد صونا ولݣاه مشغول
شيماء: انا للي درتو هكاك
سناء: علاه؟
شيماء: كفاش علاه حيت بغيييت
سناء: (مرضاتي قدام مها) خالتي نعيمة راه شحال كنسول لفيكس واش خداام خلييه هااكا (دخلت مكرهة للكوزينة حطت شنو باقي رجعت نعيمة حتى هي جلسات....)
~~~~~~~~~~~~
الحاجة: (وصلات حداهم) زهير جييت اولدي؟؟
زهير: (بقا كيشوف فمحمد بتحدي) يااو رد بالك معاايا مݣادش عليها نهار اللول عطيوهالي نجيبها عندي
علي: (كيهز يدو) ااااا شتك نتا جالس تهز علينا ختنا ومنعطيوهااالكش
محمد: علييييييي
زهير: تحرك من هنا البرهووش ݣبل منردك خت أمال
محمد: (فاش سمع ديك جيت اولدي مفهمتش واش بالصح مكانش هنا) عطييييتك وقت تجي فيه وتم..
زهير: (بملامح باردة قاطعو) سير ݣلب على ختك الوقت للي جاي تهز ختك علم الله فين عاطية المرة اللولة غبرت نص ساعة مشات ليها سنة داابا راه سواايع ولا علم الله وشحال وهي هربااااانة
علي: (شاف فهند لي كتخنزر فيه متصرطش ليها محملاتوش) شوفي فية نتي
هند: (جاوباتو وهي كتهضر بقرف) تشوف لعمى
وليد: راه كتݣلب علية نتا
زهير: (جاي ضااير ماشي وعلي وقف عليه)
علي: دخل عيط لها
زهير: دخل نتا باش نطرق على مك لبيبان ونفصل ***
علي: (جبد داك بونقشة) وجبدها هي جات هربااانة هنا داابا تجبدها ولا يطييحو رݣابي فيها
الحاجة: (غوتت) اولدي الله يهديك أمال والله مجااات هنا
علي: مهضرتكش نتي ابناااااادم (هود عليه زهير ببونية لوجه حتى طاااح دخل محمد يفاااك وقف لاخر ووليد مشا عندو وهو بقا كيهيب عليه) وسيير اشمااااتة مخلي بنت عمك مع راجل ما بينو بينها واالو وجالس ترجل
هند: (بخوف على وليد) ولييييد بعد من حداه..
علي: سير تكلم لل*** ديالك وبعد راك من ديما خواااف (وليد مسوقش لموس باغي غير يشدو ومحمد كيتغاوتو هو وزهير.. هند كتجر وليد حتى لاخر ضربها ليديها تريكو للي كانت لابسة تشرݣ)
هند: (كتنقز وتغوت ربي للي خلقها) الدم الدم هءءء (مخلوعة غتسخف عيات تشوف فضرابي ودمايات منين كتكون عندها مناوبات فليرجونص وهاد الألم عمرها جرباااتو... وليد طرطق عينو اصلا كولهم تصدمو وهند كتغوت ودمايات كتشرشر من يدها الحاجة مشات عندها كتشدها وهي كتنقز وليد هز داك لموس ماشي عند علي)
محمد: هرب هرب الحمااااار وليد (لاخر شدها جرية)
زهير: سيير عند هند انا نجيبو (مشا يجري ومحمد تعرضلو)
محمد: داكشي بيناتنا
زهير: (ياله ماشي محمد دفع زهير خلاه مشادش توااازنو وهو يجري تابع خووها لطموبيلتهم زهير حتى هو كيجري ولكن لوخرين سبقووه بدا فينما كان شي حجر كينيش عليهم ويسب ويجري ݣاع الزاج للي اللور شخشخو عليهم مخلي محمد تالف فالصوݣان والطموبيل كتلعب حتى بعدو وزاد لڤيتييس مبعد مزياااان....)
هند: (عينيها كيتشقلبو) غنموووووووت
الحاجة: لا بنيتي مغتموتييش الله يعطييييه لݣطع
وليد: (بشوية مدخلين هند لطنوبيلتها) لاش خليتييه يمشي..
زهير: شماااايت هربووو دابا زيد ندييو لبنت تخيط
هند: (غير سمعت لخياطة بقات تبكي)
وليد: صافي اهند راه الجرحة ممغرقاش
زهير: (طلع معاها وليد اللور.. ضار عند مو وباس ليها راسها) مّا سيري طلعي للدار
الحاجة: لا حول ولا قوه الا بالله العلي العظيم عيطلي اوليدي وݣولي سمو كاين
زهير: وااخا ولكن راه مغرجعش نمشي نشووف أمال
الحاجة: (بتنهيدة) واخا اوليدي رد لبال راسك وبعد من خووتها (طلع ديمارا طموبيلة ديال هند للي متكية راسها على صدر وليد وكتوجع ووليد حاس بالشمتة من ولد عمو لبرهووش متوقعهاااش منو يسدو يقتلوو فهاد اللحظة.. زاد زهير هند كتغوت يديوها المصحة ماشي سبيطار المخزن داوها فين بغات ودخلها وليد ليرجونص ولاخر بقا برا.. حتى تيليفونو مجابوش معاه مكانش متوقع هاكا كان داير يخرج أول حاجة يديرها يصوني على محمد يکولو شي عذر بلا ديال الحبس ومن بعد فلعشية يمشيو لدار أمال ولكن هرووبها من الدار ضيع كولشي فين غيلقاها داابا وفين غتكون عطات الرااس... دخل ليرجونص كيسمع هند كتغوت عرفها من النوع للي لحمها عزييز عليييها بقا واقف ساهي.. حتى خرج وليد) امدرا؟؟؟
وليد: دارولها 3 ديال لغرزات ولد ***** والله منخليها ف****
زهير: هادشي غير للي شفنا سمو يكونو دارو فأمال باش هربات
وليد: أمال كانو حابسينها فشي بيت
زهير: وعلاه ممشيتش جبتهاا أوليد لاش تخليها ليهم سد ديلمو داك المحال وسيير جيبها هي
وليد: (براسو مظنهتش تهرب شاف فرملية خرجت دخل عند هند للي وجها تنفخ بلبكى حس براسو هو سباب معاه واخا هكاك كلاتتتها) نديك للدار
هند: (مزالة كتبكي حركت رأسها باه) اممم
وليد: بففف (مشا حداها أول مرة يقيس يديها حصنم بين يدو وهو كيشوف فعينيها) سمحيييلي اهند انا سبااب
هند: (على سبة عنقااتو وهي كتبكي نقطة ضعفها لحمها مكتقدش للي يقيسها ولا حتى جرحة صغيرة هنا دخل زهير للي دغيا جبد راسو وخرج ووليد بشوية وقف هند مبعدها عليه.. وقفااات حايد لفيست للي لابس لبسهالها وهو بقا بتيشورت وتم مخرجها)
زهير: هند كبقيتي اختي؟
هند: الحمد الله هانا (كتمشى بشوية وهي ضور) وأمال
زهير: نتي غير سيري ترتاحي وليد مهم هانتا مع هند والمحال زيد ݣابلو على ݣلبك
وليد: (اكيد مغيخليش هند حيت عارف زهير غيدير جهدو مضوبل وكتر أول حاجة داروها مشاو داو زهير لدارو هز تيليفونو وراقو بيرميه فلوس وزادو هو وصلوه لفين أشرف نعت لزهير على حساب طموبيلة كراها ووليد رد هند للي دغيا طلعات ليها سخاانة.... زهير شد طريق هاد لمرة لتاوريرت وغير كيتحلف....)
فتيحة: (خلات مرت ولدها كتغسل لماعن لبست جلابتها لبيضة وقصدات دار ليلى فين نعتولها لعيالات واصلا الدار جات باينة بوحدها للي مبنية فداك السيكتور حيت حي جديد وياله كيتبناو حدااه ديور.. طلعت بدوك تلاتة دريجات كدق فلباب بالجهد وشحال متأكدة هاد الدار غيكون بانيها ليها راجلها حيت ياله باش كانو عطلة لبني فهاد البقع طلت ليلى لقاتها فتيحة عوجت فمها)
ليلى: اش باغا مسا الله
فتيحة: حلي لباب
ليلى: (قادت الوقفة كتعوج) علاه؟
فتيحة: (بعصبية) حلي دلبااااب
ليلى: ااااااهيا شتك حتى هنا مخرجة دوك لݣروون وتغوتي حݣل مصطفى مكان يحملك مكان يقبلك
فتيحة: انا بغيت نعرف غير وقتاش تجوجك وجا عندك
ليلى: هههه منين كنتي مݣابلة الشواافات هو كان يجي عندي وكان ماشي ولادك وكان راه طلݣݣ من شحال مرا للي متحمل مواالو اشمن نفع كان عندو تفوووو غير الشوفة فيك تعيف (تنهدت طانزة) الله يرحمو تعذب فالدنيا ݣبل لااااخرة
فتيحة: وبزااااااف علييك وايييلا سمييتك مرا حلي لباب وهضري ݣداامي
ليلى: ههه هي اللولة (هبطت لابسة بيجامة طويلة غير نص كم ولكن مزيرة على طايتها ولمريشة خارجة شوية حلت ودارت ابتسامة على وجهها) زييدي (سبقتها ليلى كتعوج وفتيحة غير مطرطقة عينها فالي قدامها وصلت حدا لباب ومخلاتهاش دخل وقفتلها فلباب) اش بغيتي القردة
فتيحة: القردة هي نتي يا خطااافت رجال
ليلى: ههه راني مجوجاه احبيبتي (دارت يدها) عشر سنيييين بسلامتك ونتي مساايقة خباااار
فتيحة: سقتلك لخبااار ونهار عرفت صيفطتو النووبة فيك
ليلى: هههه خلعتيني حقي وحق وليدي غنشدو غنشدو
فتيحة: هاهااااو الا لحݣتي ودنييك عضيها
ليلى: يطواااال ويعجبك ااااا القردة هههه عبر عليك بهاد الكلمة باش كان يذكرك والله الا ههههه (جات تطرشها وشدت ليها يديها) ههه تيقتي راسك والله يا **** حتى نشرݣ لمك داك لوجه
فتيحة: حتى ميكونوش عندي رجاال
ليلى: (كظحك كتقليلها السم) سيري تمشي فحاالك
فتيحة: دار راجلي
ليلى: (تشرملت عليها) وتي سييييييري ت**** من هنا ولا نوريك اش سااوية ليلى
فتيحة: انا للي نوريك سمو سااااوية
ليلى: عااارفااااك شنو سااوية براكة غير بنتك ملقياااش الخير معاك عاد يلقاااه شي حد معااك تفووو ݣاطعة يدك من يد الرحماااان (فتيحة نيشان بوناااات ليلى لكرشها للي دغيا كانت ردة فعلها تدفع فتيحة بالجهد فدرووج للي حسبااتهم بݣنتها كتغوت ربي للي خلقها موصلت لاخر درجة حتى عينيها تقلبوووو ليلى هبطت درووج شادة فكرشها للي كتحرقها لقات دمايات فدروج لبويض طلعت عليها كان راسها مقلووب هبطت ففخاضها هزت عينها كانو شي بناية كيشوفو حيت سمعو غوااتها ليلى طلعت كتجري والخلعة ركباااااها هزت تيليفونها وصونات على لبوليس اول حاااجة..... )
زهير: (كان طااير ماشي غير صااايݣ تشد جوج مرات من عند الجدارمية مخلصش لبروسيات حيت معندوش لفلوس كاش خداهم حتى يخلص فالمحكمة.. وصل لتاوريرت نيشان لدار أمال لقا طموبيلة ديال محمد وجاجها اللور مهرس.. خرج من تمااك هاز عصى جابها معاه من دارهم بدا كيشخشخ فالطموبيل حتى كولشي للي تماااك خرج ومنهم محمد للي تصدم مخلى لا زاج لا بولات شاف محمد خرج وهو وقف هاز عصااتو) غتعاود تصلحها اللهم تصلحها كاملة
محمد: (كيقلب على وليد) هادووو مخصايلش رجال
زهير: رجال يهضرو مع رجال وكون لݣيييتك رااجل وكون هضرت بفمي.. فين امال؟؟؟
محمد: صليييب مع رااسك جاي هنا تهرس وتشخشاااااااااااخ
زهير: ݣاااد... فينها أمل.. فينها ختك امحمد للي حبستيييها بحال شي مشة
محمد: (شاف الناس كيتجمعو وهو كيضور عينييه)
زهير: هادشي علاش كنتي حابسها وكان!! ياك بغييتها فلحلااال عطيييهاالي
محمد: (مكيهضرش.. زهير ضار كيشوف الناس خنزر فمحمد ومشا ركب فطموبيلتو صااݣ ووصل حداه)
زهير: خلي خوووك مخبع مزيااان... (مشا نيشان قصد المحطة الطرقية دخل هاز تيليفونو صونا على وليد) شوف مع هند تصيفطلي شي تصويرة ديال أمال
وليد: وااخ (هي كانت فطواليط... هز تيليفونها دخل هز تصويرة تكون باينة صيفطها لراسو عاد صيفطها لزهير للي غير وصلاتو شاف فيها شحال لدرجة زوما كيشوف فيها مزيان عاد ردها مقاادة ودخل للمحطة كيقلب بحال تالف ليه شي بيبي....)
~~~~~~~~~~~~
هند: (خرجات من الحمام بحرا كتقد تمشا لقات وليد خرج) فين مشاا؟؟ (دخلت لبيتها كتجر رجليها شافت فيديها وفلفاصمة تنهدت) الله يعطيييك موصييييبة يا لهماااجي الله يااخد فيك الحق نتا وطاسيييلتك كاملة.. (تكاااات) الله ياااا ربي فين تكوني مشيتي يا أماال نهار خرج زهير هربتي نتي... (دقايق دخل وليد هاز ساشيات رجع طرق لباب)
وليد: هند هند
هند: انا فبيتي أوليد
وليد: (دخل عندها كان هاز بيتزا وعصير لقاها متكية لابسة تيشورت فلكحل وسرواالو دايرة بونضو ومخلية شعرها مطلووق) صاڤا؟؟
هند: شوية
وليد: لواحد الا بغا يعذبك غير يقرسك
هند: هههه لحمي عزييز علية بزااف راه الا تجرحت بالصح تنبكي
وليد: (تبسم بلا نفس) مبيناش فيييك
هند: عفااك متقلقش رااسك راه داك لكلب الي حماار
وليد: (زفر) كولي
هند: لا لا مافيااش والله
وليد: (جر كرسي لحدااها كيشوف فخاضها وليهونش باينين وقف) نغطييك
هند: واخا (وراتلو بيديها) راه تماك
وليد: (غطاها فرجليها هو مابغاش يشوف ولكن عينيه ماشي خوت عقلو هو مديرونجي ولكن عينيه كيهربو يفليييوها..حل كرطون بيتزا وحطها قدااامها) هانتي كولي نشوف زهير فين وصل
هند: خليك هنا
وليد: واخا (بقات كتهز تاكل وهو كيصوني على زهير للي كيقطع علييه صونا على محمد تيليفونو طاافي حط التيليفون وشاف فيها) كضرك
هند: ماشي بزااااف...
هند: ماشي بزاااف تخلعتي علية؟؟
وليد: (شاف فيها مطولا) غتيقي الا ݣلت ليك كنحسك أمانة فعنݣي حتى نموت
هند: (تبسمت بحب) الله يطولي فعمرك يااا رب
وليد: كولشي فيك يعجبني... (زفر) علي حسابو معايا تقيييل بالله منخلييها فيك مواالف ديما نبعد على داك تبرهيش وتصوڤاجيت ديالهم ولكن بربي المعبووود لا نسيتهااالو
هند: الا كنت عزيزة عندك غير بعد منهم لقاااو غير أمال وبعد منهم
وليد: (تبسم بشمتة) شفتيه جاي يذبحها ݣاالك (صونات مو جاوب) وييي مي
نعيمة: (كتجري فصبيطار) ولدي مرت عمك كتمووت
وليد: (متهزش ولكن فضول منو فقط) مالها
نعيمة: معرفت اولدي الله يا ربي ݣاع المشاكيل جاااونا فدقة
وليد: مشاكلهم هوما نتي ديري صواب ورجعي لدااارك
نعيمة: ولدي!!!!!
وليد: علي ضرب هند شماااتة (غير كيتفكرها كيوقف ويبقا ياكل فشنايفو بلفقصة) غرز ليها يديها وݣداامي
نعيمة: (وقفت) أوييييلي
شيماء: (ضارت) مالكي اماما؟؟
نعيمة: وفينها وكبقات؟؟
شيماء: لݣااو هاديك
وليد: ها هي فداارها شماااتة والله ونلݣاه حتى نتبالا بيه شحال ݣدني نبقى هنا راجعلو راجعلو
نعيمة: ارالي هند
وليد: راها عيانة شوية عاد جينا من طبيب غرزلها يدها وطلعت ليها سخانة
نعيمة: الله يا ربي على بنتي حتى حنا عيط محمد خارجلو لعقل جابو مرت عمك لبوليس قطع مفهمت وااالو
وليد: هادوك غير ذنووب بنتها للي علم الله فين مليووحة
نعيمة: (تنهدت) لباس اوليدي على هند انا نمشي نشوف مرت عمك
وليد: شوية ونولي نصوني عليك (قطع وشاف فهند ورجع جلس مقابل معاها) غلطنا نهار مشينا لربعين من تماك وكولشي مشتت
هند: حتى أنا قلتها والله
وليد: بففف هدا مكيجاوبش
هند: شنو قالت ليك خالتي نعيمة
وليد: ݣالت فتيحة لݣاوها لبوليس مليوحة والله مفهمت ومبغيتش نفهم (صونا زهير دغيا جاوبو) الوووو امدرا؟؟؟
زهير: (كان جالس لداخل) واالو مبااانتش (كان ظلام لحال) هي فوكاش خرجات
وليد: منين ناض محمد صباح ماݣاهاش ومحمد كينوض جوايه 7
زهير: دابا حتى كار مكاين والمحطة ݣلبتها مزيان غنضرب دورة المدينة ونرجع هنا
وليد: لا اله الا الله مي عيطاتلي ݣالتلي مها لݣاوها لبوليس مليوحة
زهير: ميتة؟؟
وليد: لا.. اممم يمكن لا
زهير: لا حولة ولا قوة الا بالله العلي العظيم انا نمشي نݣلب فقنت اخر.. (قطع داز فصاكة خدا ݣارو وبقا كيقلب بشوية فلمدينة رجع حدا دارهم مكانتش طموبيلة ديال محمد بقا واقف تمااك شحال معرفش ربما ترجع حيت من صباح وهي غابرة... قشع شيماء هابطة هي وشي وحدة ومرا بقا متبع بنص عين حتى قشعاتو شيماء ووقفت حداه.. كان مهبط الزاج)
شيماء: سلام واش وليد معاك اخويا؟
زهير: لا
شيماء: اممم جيت تقلب على أمال؟
زهير: (مشافش فيها بحال کاع مكاينة)
شيماء: انا غير بغيت نعاون حيت صونات جوج دلمرات فلكس
زهير: (بالزربة شاف فيها) فينها؟؟؟
محمد: (عقلو خارج ومو لداخل فالعمليات مشا خارج طاير شد تاكسي نيشان لدار ليلى للي مزال لبوليس تماك شاف دمايات للي يبسو حدا باب الدار.. تم طالع كانو شي 4 دلبوليس تماك عاد عائلتها وهي ناعسة فوق سداري كتوجع فكرشها غير شافتو)
ليلى: كبقات مك امحمد
محمد: عليها جاي نسول سمو وقع؟
ليلى: جات عندي الدار كلمة مني كلمة منك الله يسمح لها ضرباتني لكرشي للي نهرب زلقت ليها رجليها وطاحت مع دروووج
محمد: (مطرطق عينو) طاحت ولا دفعتيها ؟؟؟
ليلى: الله يسمح ليك بنت ليك قتالة
محمد: وما يانا بانت ليك قتالة منين ݣلتي ضرباتك فكرشك (شاف فلبوليسي) واش مي مليوحة كتكون وهي جايين لدارها وتستجوبوها وهي جالسة توحوح علييكم
....: احترم راسك اشرييف
ليلى: (كتبكي) الله يسمح ليكم
محمد: (شاف فيها محمد) علاه دفعتيها؟
ليلى: سول مك هي لاش جات مهجمة علية كولشي شاهد من لبنايا شحال كانت تغوت
محمد: لعبتيها مزيان ولكن مدوووزلكش اليلى
....: لا نتا جي قتلها ݣدامنا ݣاااع
محمد: (تم خارج من تماك عارف مو للي غتكون هجمت وتيق انها تكون مدت يديها ولكن متيق ان ليلى دفعتها غيحماق كانت زوينة معاه وخايبة مع لوخرين كتبقى مو ومومو عينو... رجع كانت ݣاع العائلة تماك بقا واقف تماااك عاصر ونفس الوقت بالو مع أمال للي فين غبرت كلام زهير كان بحال شي بوق فودنيه بحال شي CD كيتعاود فرااسو... خرج فرملي طار عندو) امدرا اخويا مي كبقات؟
فرملي: راه كيركبو ليها لحديد فرجليها
محمد: لحديد؟؟ وهي فااقت؟؟
فرملي: اخويا راه خاص نرجع نمشي نجيب سمو بغات طبيبة (مشا كيجري ومحمد رجع وقف كيتسنى غير يݣولو راه مكاينش شي حاجة خطيرة...)
~~~~~~~~~~~
زهير: فينها؟؟
شيماء: شوف حنا مزروبين مرت عمي راه كتموت
زهير: (بعصبية) وهضري فينها؟؟؟
شيماء: معرفتش
سناء: (كتويل خايفة يشوفهم ادم ومنها غير كضور عينيها معارفااش زهير) شيماااا زيدي نمشيو
شيماء: صبري اصاحبتي راه ملقاوش تاكسي
زهير: (عصباتو) وهضري فينها
شيماء: معرفتش جوج دلمرات كتصوني فلفيكس ودغيا كتقطع
زهير: (كيضور عينو كتصوني اذا تيليفونها شاعل هز تيليفونو كيصووني والو طافي عاود عاود ضار لقااهم مشاااو.. صونا على وليد للي كان رجع للمحال من بعد منعست هند...) الوو
وليد: امدرا لقيتها؟؟؟
زهير: ***** لواااه
وليد: بفففف الا مبانتش غدا متحلش نهبط نݣلب عليها
زهير: ݣولي صوني على واحد فخوتك نطلع لداركم
وليد: (باستغراب) زعما تكون تماك؟
زهير: لا (مفيه ميشرح حيت معصب) نتا غير کولها لشي وااحد
وليد: واخ (قطع صونا على ادم للي كان فالمحال) ادم زهير راه تماك
ادم: عارف راه شخشخ طموبيلة دمحمد واش داك صاحبك مريض فراسو
وليد: راه ولاد عمك للي شماايت مهم هو بغا يطلع للدار طلع معاه وبلا متزايد معاه فالهضرة من بعد ونݣولك علاه
ادم: واااخا.. (قطع خرج لقاه تماك واقف سلم عليه عادي وطلعو للدار من سكات دخلو كان ظلام اصلا مكان حد دخلو وهو مفاهمش شنو بغا) واش تصلي؟؟
زهير: لا ݣولي فين لفيكس؟؟
ادم: (باستغراب وراه فين مشا زهير كيقلب على نماري لدللي صوناو كانو جوج وحدة ******0535 ووحدة *******0539 قيدهم زهير صونا تيليفونو وهو كيفكر ديالمن هاد نوامر..... صونا تيليفونو وهو يطرطق عينو دغيا دارو فودنو) فيييينك؟؟؟؟؟
أمال: (... داك صباح غير هبطت من دارهم فكرت وفكرت مها طردتها جوج مرات خوها علي مكيعتابرهاش بنادم واخا محمد نقص تعاملو المتوحش بزااف ولكن باقية حالتها هي هي وعاد محبووووسة معندها مدير هنا وزهير للي ينقذها فوقاش غيخرج وحتى الا رجعت لوجدة متأكدة غيتبعوووها وصلت لباب دلمحطة كانو ناس قلال بقات واااقفة ساهية شافت كار خارج ولݣريسو مزال معلق)
....: طنجة اختي؟؟؟
أمال: (بلعت ريقها وحركت راسها باه طلعت مشات نيشان اللور جا عندها قطع ليها ورقة وجلست كتفرج فمدينتها للي محرومة حتى باش تسارااها ولكن كتكرهها كما كتكره دارهم خرجو من تماك حطت راسها على الزاج للي كان كيتزعزع وكفكر فزهير نهار تبعها وبغا النمرة ومبغاتش تبسمت تابعاها دمعة حاارة من عينها كدعي معاه من قلبها باش الله يفك سرااحو... شافت تيليفونها طافي كانت على الاقل تعلم صاحبتها للي كتيق فيها... وصلو لمكناس وقلبها كيضرب فكرة انهم غيلقااوها مسيطرة عليها.. شافت الناس هبطو حتى هي هبطت شرات رايبي ومادلين) خويا غتقلع دابا؟؟؟
....: شوية اختي
أمال: (فكرت تشري شارجور ولكن فين غدير مشات كتقلب على تيليبوتيك مكاينش خاصها تخرج حيت خافت يمشي عليها لكار.. طلبت ورغبت غير مول القهوة للي عطاها تصوني ونمرة وحدة للي حافضة هي فكس ديال دار عمها..) الووو الووو (سمعت طيط طيط.. مفهمتش بغات تعاود تصوني ولكار كلاكصونا ضارت لقاتو هو) شكرا اخويا الله يجازيك بالخير (مشات طلعات للكار وزاد بيهم كتمنظر فطرييق حسبت لفلوس كان لأكبر مبلغ تشد من عند مها كانت بقات ليها 66 الف ريال وربعميا وصلو للقصر لكبير ووقف كتشوف غير دخاخن وكتشم غير روايح زويينة معدتها غرغرت شافت أغلبية هبط هبطت حتى هي كتقاد فشالها جلست فطابلة حتى جات لمرا عندها) اممم جيبيلي كفتة
....: شحال اختي
أمال: (كضور عينها) نص كيلو
....: صافي اختي؟؟
أمال: كاينة بطاطا مقلية؟
....: اه كاين حتى شلايض
أمال: جيبيلي بطاطا مقلية ووو حتى شوية ديال لكوطليط زعما شي نص كيلو (مشات لمرا وامال كتفكر فكلام نعيمة خاصها تهضر معاها هاد بنت عمها للي كاينة فطنجة من ديما كانت كتهضر عليها وديجا شافتها مرة وحدة جات لعندهم ومها كانت كتقول عليها غير ***** ولكن مها كانت كتقولها على كولشي حتى نعيمة اي وحدة متفتحة كانت كنقولها عليها.. وعاقلة حتى على الحي للي كانت كظل تهضر عليه جابتلها لمرا بقات غير كتاكل وللي شاط جمعاتو فخبز دارتو فميكة وطلعت للكار... وصلات لطنجة حسات لإحياء غريييب بلا الخوف والرهبة هبطت بميكتها كضور عينها محطة كانت فوسط لمدينة خرجت بحال شي وحدة جاية من الفضاء لقات مرا جالسة بولادها كتسعى مشات عندها)
....: صدقة يرحم والديييك
أمال: (عطاتها لميكة) اختي نسولك
....: سول العايلة
أمال: ها...
....: سول اختي
أمال: واحد الحي سميتو بنمݣاد هنا؟
....: شنييي؟؟؟؟
أمال: حي كاين هنا فطنجة سميتو بنمݣاد
....: اختي معرفتوشي فاينا موطع كاين؟؟
أمال: (بحزن) هنا فطنجة ياك هادي طنجة
...: هي هاادي العائلة واش نتي تايهة؟؟
أمال: (تنهدت وقالتها بشوية) لا هاربة...
....: (بقات كتشوف فيها ديك لمرا) شبر تاكسي وعطيه لادريسة يوصلك للموطع للي بغيتي تمشي ليه
أمال: (أول مرة تسمع لكنة بحال هاكا وحتى شي كلمات ممفهومينش عندها بقات كتشوف الدنيا عامرة وضواو كتتااار ميمكنش تبقى فالمحطة وهي من ديما كتسمع الكوارث كتكون تمااك قطع الشانطي لقات تيليبوتيك دخلت صونات على نعيمة نفس للي وقعلها صباح لدرجة شكت واش النمرة للي حافظة بالصح ولا لا بقات زايدة شحاال حست راسها غتلف كتهز راسها كتلقى سهم ديال المنار ظناتو شي حي بقات واقفة حتى حبست حداها تاكسي.. طلعت ركبت وشافت فيه) بنمݣاد اخويا
....: (شاف فيها) فاين؟؟
أمال: (حست براسها كتݣولها غلاط) يمكن يݣولولها بنمݣاد
....: نتينا ماشي من طنجة؟؟؟
أمال: هم لا عندي العائلة هنا كيتسناوني فف بنمݣاد؟
....: يمكن اختي تقصد بني مكادة؟؟
أمال: واه واه هي (تبسمت) كنت معاك فسمية
....: مرحباا (زاد بيها وهي كتمنظر فلمدينة للي أقل ما يقال عنها راااااائعة سااحرة بكل معنى الكلمة داز الرومبوان اللول الثاني طلع بيها على ليمن كتشوف فلخضورااات حتى زعزعها) اشمن موطع بالظبط
أمال: حدا مول التيليفون (عرفها ماشي من هنا وحتى هي حست بالغباء ولكن شنو غدير كولشي واقف على نعيمة للي مكتجاوبهاش حطها حدا للي كيقادو التيليفونات كان حي عااامر ومزال الروااج فيه خلصاتو وزاد وهي نيشات على للي خاوي مشات قصدااتو) خويا عطيني شارجوور ونيت شارجيلي تيليفوني غير 5 دقايق طفالي وضرووري محتاجاااه
....: مرحبا (عطاتو التيليفون وبقات واقفة ساهية والخوف غيخليها تسخف واخا كتحاول تبان مهدنة وكان كانت عندها غير لماارت ناسيونال تشد اوطيل تفكرت نهار مشات عند زهير باش تقولو نتزوجو ووصلت حداه مقادة تنطق بحتى شي حرف وخداها ليها وكان عرفت غتوقع فهادشي وكان زعمت وقالتهااالو... بقات كتشوف فالناس واللكنة ديالهم وفينما تسمع شي غوات ولا مطايفاات لداخل ديالها كيتكمش... حتى حطلها داك الدري تيليفونها فوق لكونوار) ختي غنشد المحال (خلصاتو فالشارجور ودخلات 2 سوايع فنمرتها هاد شعلاتو لقات الغراق ديال ميساجات دبواط فوكال ولكن نيشان صونات على نعيمة للي مجوباتش ورجعت صونات على هند للي تعطلت باش تجاوبها)
هند: (كانت ناعسة بسخااين صدعها التيليفون للي غالبا فيكون وليد حلت عينيها بتقااالة غير شافت Amoula طرطقت عينها لدرجة سكان تكون غير كتوهم بسخانة جاوبات) الوو الو أمال
أمال: هند
هند: (شهقت حتى ناضت من بلاصتها) فينك نتي كولشي تيقلب علييك
أمال: (جاتها لبكية) انا هربت من الدار
هند: عاارفة راه كولشي تيقلب عليك حتى زهير
أمال: زهير؟؟ ياك هو فالحبس
هند: خرج خرج هاد صباح
أمال: (تصدمت)
هند: فينك نتي يجي عندك راه غيحماق عليك بالتقلاب فتاوريرت
أمال: انا فطنجة
هند: طنجة شكون داك تماك؟؟
أمال: بوحدي ركبت فلكار وجيت هنا انا فبنمكادة
هند: شنو كديري تماااك؟؟
أمال: بففف عقلتي بنت عمت خالتي نعيمة للي كانت جات فعرس ادم وحتى محمد
هند: بديعة؟؟
أمال: واه هي ساكنة هنا وجيت عندها
هند: وعندك نمرتها؟؟؟
أمال: لا كانت عندي فالتيليفون اللول
هند: وعلاش مجيتيش لوجدة
أمال: راه خفت من خوتي
هند: شوفي عيطي على زهير بعدا راه غيحماق تماااك ونتي حاولي تمشي لشي بوسط دلبوليس على ميجي عندك متيقي فحتى شي واحد امال
أمال: (تنهدت اصلا ميتة بالخوف قطعت مع هند ودوزت نمرة ديال زهير وقلبها كيضرب كولشي تخلط عليها واش تفرح لخرووجو ولا تندب على زهرها نهار خرج هي هربت ولا بالاصح مها طردتها مع ياله بغا يدير طيط جاوب)
زهير: فييييينك؟؟؟؟
الشماليات ديرو عين ميكة على اللكنة
زهير: (خارج من تماك) فييينك؟؟؟
ادم: (مشا كيطل فدوك نماري مفااهم وااالو ولكن محد وليد تحلف فولاد عمو ودافع على صاحبو الا كاينة شي حااجة... سد لباب وتم هابط)
أمال: (غير سمعت صوتو جاتها لبكية) انا فطنجة
زهير: سمو كديري تما؟؟؟؟
أمال: هربت محسابليش غتخرج
زهير: (بعصبية) وملݣيتي تمشي غير تم وفينك وعند من؟؟؟ وشكووون داك؟؟
أمال: لكار
زهير: (زفر) معاك شي واحد؟؟
أمال: (بلعت ريقها) لا
زهير: انا دابا نشد طريݣ لعندك واش باقية فالمحطة ولا زدتي لشي بلاصة
أمال: انا كنت جبت لبني مكادة كنݣلب على وحد السيدة من العائلة و (غوتت)
زهير: أمال أماااال (شاف فالتيليفون كيسمع غير صوت موطوور حتى تقطع)
أمال: (مزالة مصدومة من التيليفون للي تهز ليها من جوج دراري مريشين فشعرهم فموطور ݣاع سلوكاتو خارجين.. عرفت راسها تݣريسات بقات غير كترمش فعينيها شافت فالناس للي كانت كتشوف وللي زاد ممسوقش جاري بيه العمل وحتى هي مغوتت مواالو هنا بقات كتبكي بالخلعة حنات راسها وزاادت كدور ببيجامتها حتى شافت تاكسي مشات كتجري هو شافها ووقف حلت لباب وجلست) عفاك ديني للكوميسارية
....: اشمن كوميسارية؟؟
أمال: ديال لبوليس
....: عرفت ديال لبوليسي اشمن موطع؟؟
أمال: (منين كيكترو عليها الأسئلة كتخاف شاف فيها كان راجل كبير وباينة عليه موقر)
....: مالكي ابنتي؟؟
أمال: انا تشفرت (بقات كتبكي) داولي تيليفوني ديني للكوميسارية عفاك غيجيو يديوني دارنا راهم غير هنا
....: لا حولة ولا قوة الا بالله العلي العظيم واخا بنتي (زاد بيها) فين تشفرتي ابنتي هنا بنتي مكادة ولا لعزيب ولا كسباراطا
أمال: غير هنا
....: واخا انا نديك لبوسط لي هنا (صاݣ بيها وهي خايفة متايقة حتى فشي واحد حاضية مناش دايز حتى حطها حدا لبوليس خلصاتو من لفلوس للي مخبعاهم فجيب لبيجامة للي هابط الفوقاني عليه ووقفت كتشوف وكان غير كانت حافضة نمرة زهير ولا هند...)
~~~~~~~~~~~
هند: (كانت علمات وليد راه أمال كاينة فطنجة جا عندها دغيا)
وليد: انا نمشي عندها
هند: نمشي معاك
وليد: (ياله بغا يرفض وتفكر علي للي يقدر يرجع ولا معرفت معندو ميتوقع من ديك العائلة) وااخا (أول حاجة فكرت فيها مشات هزت كيطمة ولباس تحتاني ديال امال وشي تخربيق ديالها دارتهم فصاك هزاهم باليد للي ممجروحاش وهبطت لتحت من بعد مشربت فيتامين C باش توݣض شوية لقات وليد هز وراق بيرمي وتمو ماشيين لطموبيلة ديال هند ديمارا الطموبيل ودوز الخط لزهير) فيين
زهير: هاني شاد طريݣ
وليد: حتى حنا
زهير: تشفرت يا صاحبي كطيير كطييير ديك الطفلة
وليد: دابا لݣاوها وصاافي
زهير: ياله سير انا نشد شي قهوة ونزييد (داز لقهوة خدا نص نص حيت راسو غيطرطق عاد نهار كامل موااكلش ولكن اشمن شهية بقاتلو هز مادلين من القهوة وشد طريق لݣرسيف باش عاد من تم يدخل لوتورووت...)
شيماء: (كانت متوقعة زهير يلحق عليها ولا يتبعها يسول على أمال ولكن مجاااش تمناات غير يكون ممسوقش ولكن مجا هنا وكفاش سولها باينة طااايح كتفكر غير علاش حتى هي ملقاتش للي يبغيها هكااك ويخاف عليها وعلاش أمال بالظبط بقاو كيتسناو وكتشوف فمحمد للي كيهضر مع مرتو لوات شنايفها... جا ادم وقف حدا مو)
ادم: كان جا زهير طلع للدار
نعيمة: زهير صاحب وليد؟؟ وخليتيه بوحدو
ادم: لا كان خرج طااير شاف شي نماري فلفيكس وطاار
نعيمة: (باستغراب) نماري؟؟؟
ادم: واه وليد للي ݣالي نخليه يدير للي بغا حتى انا مفهمت منو والو ݣبيل جا شخشخ لمحمد طموبيلتو وشوية طلع كيݣبلب فلفيكس
شيماء: (طرطقت عينها) شنو كانو دوك نوامر
ادم: كانت نمرة ديال فيكس وحدة ديال فاس ولا ميسور ولا مكناس ووحدة 39 يمكن طنجة
نعيمة: (ضربها الضو عرفت أمال للي كانت كتصوني حيت غير نهار الربعين هضرو على هادشي وكانت كتݣول الا مجاش زهير تهرب)
شيماء: (تحليل بسيط من كلام خوها زهير شاف دوك نوامر وطار واخر نمرة كانت صونات فالدار هي ديال 39 إذا أمال هربت لطنجة مرداتش لبال كانت كتقول راها غير فتاوريرت.. بلا متحس عاونااتها تمشات شوية مسلتة من حدا مها شافت فمحمد ودارتلو إشارة بعينيها باش يتبعها وهنا مريم قشعتهم.. شافت فمحمد ممشاش قلب وجهو دازت 5 دقايق)
محمد: نخرج ونجي (كان باغي يخرج غير يكمي لقا شيماء واقفة فالدورة)
شيماء: تأ تعطلتي؟؟
مريم: (تبعاتوو)
محمد: واش مريضة نتي فراسك؟؟
شيماء: سمع ختك راها فطنجة
مريم: (كتصنت)
محمد: (طرطق عينو) باش عرفتيها؟؟
شيماء: (قالتها كتعوج) حيت زهير مشا لتماك واصلا سمعتو كيهضر معاها من ݣبيلة بغيت نهضر ولكن مصلاحش
ممحمد: (بقا غير كيشوف حتى قشع خيال طل كانت مريم) مريم
مريم: (قصدت شيماء للي جىدتها من شعرها) وهااااااا هي مشاااات لطنجة لاااش كتݣولييها علاش ناوياالها يااا لكلبة (شيماء بقات كدافع على راسها ومحمد كيفك دخل وسطهم)
شيماء: الله بنعل ديلمك يا لكلبة يا الخاانزة لحماارة
مريم: بعدي منا واش مكتفهمييييش بعدي منا وبعدي من أمال وبعدي من محمد ونتا امحمد نهار جيت تخطبني ݣلتيلي انا ختاريتك نتي
محمد: سكتونا الله يحرق ديل ملتكم كاملين
مريم: (عينيها غرغرو)
شيماء؛ محمد كيموت علية بغيتي ولا كرهتي (جا يطرشها وهي تبعد)
محمد: شتي ح*** ومدايزااش فيك و**** علية خليني محتارم مك
شيماء: (بقات كتشوف فيه)
محمد: (ضار عند مرتو) مريم (طارت وخلاتو ) بفففف (شاف فشيماء بقرف) والله مفهمتك نتي سمو بااغا
شيماء: باغااك نتا علاش مبغيتيش تفهمها
محمد: انا راه منشوغش فشياطة ديال غيري واش كتفهمي ككنشوفك مريم هي مرتي ولݣيت فيها كولشي زوين نتي كنتي عاجباني من شحال هادي غير شكلا اما حتى دابا كنشوووفك بحال شي خر** بعدي مريم وعطيها التيقار هاد لفعايل ديال ل**** هي مكتعرفش ليهم (هز صبعو) بعدي عليك مريم حسن ليك.....
كانت 12 دالليل
أمال: (مسحت بيديها الردان للي رداتو هي فاش كتخاف كتبقى ترد معرفت متقول لداخل حتى لبوسط كان صغير ماشي كبير وشماكرية كتاار جا خارج بوليسي شافها وااقفة)
....: بغيتي شي حاجة؟؟
أمال: (بلعت ريقها وحنات راسها)
....: اشريفة معاك هاضر بغيتي شي حاجة دخلي ولا تسوخري من هنا
أمال: (كانت اللكنة ديالو ماشي بحال كسمعت هاد لعشية) انا كنتسنى دارنا هنا
.....: كفاش داركم نتي مسكناش هنا
أمال: لا انا جيت تخبعت هنا حيت كنتسناهم
.....: (بانتلو مؤذبة) قربي
أمال: (قربت جوج خطوات وحابسة دموعها معرفت كفاش فكرت غتلقى لمرا دغيا كفاش كانت مسهلة الأمر صافي غير توصل تصوني على نعيمة للي تݣولها لبنت عمها وتجي تهزها ولكن فينما كانت غتمشي غتكرفس براكة غير زهير للي خرج وݣالها غيجي)
.....: هنا راه شوية ويسدو لباب
أمال: (تخلعت) ياك بوليس مكيسدوش
....: واش نتي درتي معاهم يجيو عندك لبني مكادة بالظبط حيت هنا غير بوسط صغير شوية ويسدو حسن سيري ديال السونتر
أمال: فين؟
....: (شاف فيها) منين نتي؟؟
أمال: وووجدة
....: وجدة واش كديري هنا
أمال: غي جيت عند شي عائلة ومعرفتش نولي
....: (باين الخوف فيها) شكون جرحك فوجهك
أمال: (حطت يدها على حنكها فين حسات بالشفار جرحها) غير انا
....: اممم مهم الا كانو غيجيو عندك سيري للكوميسارية ديال مرشال تعرفيها
أمال: (معرفت باش تبلات منين غتعرف هاد سميات) لا
....: شدي تاكسي يوصلك انا نعيط لواحد يجي يدييك
أمال: شكرا بزااف براك الله وفييك
.....: (قوس عينو فيها) معندكش تيليفون باش تݣوليهالهم؟؟
أمال: (حست بيه انسان مزيان) راه تشفرت (تضببو عينيها)
....: اممم ديري شي محضر
أمال: لا لا بغيت نمشي غير فحاالي
....: سمعي اختي واش نتي جاية عند شي عائلة ولا باغية ترجعي لوجدة الا بغيتي ترجعي زيدي نوصلك المحطة نصيفطك
أمال: لا والله الا جايين (كانت عندها فكرة خايبة على لبوليس من نهار تشدت على حساب أنوار وكفاش تعاملت خايب ولكن هدا ها هو ميعاونها شوية صوت داخلي كيقولها واش نتي مزالة كتيقي!!)
....: للي بان ليك واش داركم من ݣبيبة قلعو؟؟
أمال: لا غير دابا شوية
....: وحدة راه بعيدة بلوتوروت 7 سوايع ولا كتر
أمال: (طرطقت عينها)
....: ودابا راها علاين 1 يعني حتى لصباح عاد يوصلو
أمال: (قلبها كيضرب باالخلعة)
....: (خرج عندو شي صاحبو كيخسر الهضرة ويظحك هي حنات راسها وكتمسح دمعتها دغيا حست ببرد خفيف حيت تاوريرت أو وجدة سخانين على طنجة كتفكر غير فين تمشي باش يجيو عندها محست غير وقف عليها داك لبوليسي) تمشي نوصلك؟؟ (بقات كتشوف فيه) راه غير خير مني ابنت الناس اما انا مدابية غير نوصل لداري رتاح
أمال: (حركت راسها باه... (تصدمت منين شافت صطافيط وقفات)
.....: ياله طلعي (طلعات وهي كترجف كانت مظلامة جلس هو اونفاص ليها وحايد كاسكيط ديال ليونيفورم وتجبد طالق رجلو قوس عينو فيها مطلعها ومهبطها وهي كانت جالسة كازة حانية راسها ويديها مربعااهم) ݣلتيلي نتي وجدية؟؟؟
زهير؛ (مكرهش شي دفعة تجيبو فطنجة صونا على وليد جاوباتو هند) فين وصلت؟
هند: هانا اخويا فتنا تازة
وليد: (كيشعل الشوفاج باش ميبقاش داك ضباب) سوليه فين وصل هو
هند: فين وصلتي
زهير: راني موراكم للي سبݣ مزيانة.. ختي مولاتش صونات
هند: لا واالو داك الشفار دغيا طفااه
زهير: (بفقسة كتخليه يزيد بكسيري) اممم ياله الا ولات صونات عيطولي (قطع كيحك فهيمة ويجغم من القهوة باش يبقى مصحصح....)
هند: (صونا تيليفون وليد) وليد محمد تيصوني
وليد: (شد من عندها التيليفون قطع عليه وكمل ااصوݣان بقا كيصوني شحال جاوبو) وي
محمد: وليد دابا غنتفاهمو
وليد: صافي امحمد ساليينا وداك لبرهوش دخووك للي هربتو وهو ضاارب بنت والله متبقى فييه
محمد: دابا غير سمع وكان خليتو ليكم فين كنتو توصلو
وليد: نوصلو الحبس غير خليييه
محمد: وليد نتا مول لعقل
وليد: دابا سمو باغي؟؟؟
محمد: مفخباركش مي راها فصبيطار
وليد: لا فخبااري غير ختك تالفة ونتوما كتݣلبو ذبحوها
محمد: مكنتش نخليه يقيسها كنت باغي رجعها للدار (كيسمع صوت طريق زفر) راك ماشي تجيبها من طنجة
وليد: واه قبل متوصل ذبحوها راه عندكم عادي ضربو وليات
محمد: (عيطلو واحد لبوليسي) مهم ياك هند مزيا (سمع طيط طيط عرفو قطع مشا عند صاحبو) سمو تما
....: كبقات الوالدة مزيان؟؟
محمد: (زفر) الحمد الله راه فاقت واخا مهرسة
....: مهم ليلى مرت بااك راه كتاهم مك للي قتلت بالك
محمد: (غوبش) سمو؟
....: هادشي للي كتݣول فلونكيط للي درنا ليها ݣالت مك للي عتارفات وكانت جاية تقتلها باش ميتزادش ولد وحتى الضربة فكرشها باينة
محمد: اوا!!!
....: واش نݣولك اخاي محمد مك راه دخل فيها الحبس
محمد: الحبس؟؟؟؟
.....: راه هي هاجمة وعاد غتنوض روينة ويقلبو على تحاليل دياك هادشي الا مجبدوهش يعاودو البحث عليه بشنو مات
محمد: اممم
....: سير هضر معاها تجمع وتطوي وحتى نتوما متبقاوش داعيينها حتى وتكون مك معندها يد فموت باك غتشد حيت هجمات على لوخرا واخا هي لي كلاتها ولكن كتبقى هي للي هاجمة
محمد: (الارض كدوور بيه... زفر کاع المشاكل تجمعو عليه فهاد اللحظة حسد أمال حيت هربات منهم ومن هم عائلة للي مكيتسالاش..)
مريم: (كانت كتشوف فتيحة وهي كتبغي تحرك راسها ولكن مقادااش حيت دايرين ليها لبراي على عنقها) خالتي بغيتي شي حاجة
فتيحة: (كتهضر سخفانة) فينو محمد
محمد: (دخل مكره ومريم مكتشوفش فيه بلا مقدمات) لاش مشيتي عندها!؟؟
فتيحة: (بحرا كتقد تهضر) مشيت نݣلب على ختك
محمد: کلبي على شي سبة حسن من هادي تݣوليها لبوليس
فتيحة: واش انا للي كنت نموت ونتا تکولي لبوليس
محمد: الآلة راه هي داعياك راك نتي للي مهجمة عليها بسبااابك غنمشي نطلبها باش مدخلكش الحبس تفووو على عائلة (خرج زادح لباب ومريم متبعاه شافت فيها)
فتيحة: شتي ابنتي شتي انا كنموت وهو كيهضر معايا
مريم: (حركت راسها وحتى هي تفكيرها فأمال ولكن ما فجهدها مديييير وحتى فتيحة ماشي خافت عليها ككانت من شحال هادي....)
~~~~~~~~~~~
أمال: لا انا من تاوريرت
....: اممم ولاش ݣلتي وجدة
أمال: کلت ماعرفها
....: نعرفها راها قريبة لمدينتي ميسور
أمال: (فبالها وكان غير هربت تماك قريبة بعدا... حبست صطافيط حل لباب وشافت فيه)
....: لكوميسارية هنا راه كتبقى محلولة حتى لصباح
أمال: (بخوف وقف خرجت وهي تشوف فيه) شكرا بزاف اخويا الله يجازيك بالخير
....: (بقات فيه ولكن باش يدخلها على دراري مجاياش براسو غير ساكن مع عزارا) واش جايبة كارت ناسيونال ديالك
أمال: (بحزن) لا
....: (معندو ميدير ليها) انا نهضر مع صاحبي يخليك بعدا لداخل واخا سمو سميتك؟؟
أمال: أمال (حرك راسو باه سد باب صطافيط ومشا أما هي ضارت شافت فلكوميسارية للي كانت كبيرة طلعت دوك دريجات ودخلت من لباب كانو مشغولين مع شي مطايفاات وجلست كتحسب الثواني فوقاش يصبح الحال.....)
شيماء: (كانت مشات لدارهم كولها دخل ينعس وهي بقات مكونيكطية طاير عليها نعاس مرضياش بالنتفة للي عطاتها مريم دمعا ميفوور وهي كتحس براسها رخيسة للي جا يضربها ينتفها يسمعها كلام الرخص وحتى من محمد عيات تحاول معاه واالو ديما ميصدها... جات تخرج تشرب وتهز شي حلوات تاكلهم وهي كتسمع نعيمة كتهضر مع بنت عمها وكتسولها واش وصلات عندها أمال كانت 5 دصباح.. مشات حداها) اويلي واش مزال فايقة؟؟
نعيمة: (قلبت وجهها)
شيماء: حتى نتي اماما؟؟
نعيمة: سيري دخلي لبيتك ولا نوض نكمل على والديك تفوو وليتي غير مشوهاااني
شيماء: راه ديك الخرية دمريم للي كيحساب ليها كنضور بداك لمجرتل
نعيمة: سيري دخلي ولا نوض لوالديك ونتي عارفة الا نضت كولشي يدير يدو فيك
شيماء: بفففف صيفطوني نقرا وهنيوني من هاد الحبس دلويل (دخلت معطيهاش خاطرها مها تبقى مقلقة منها...)
~~~~~~~~~~~~~~
أمال: (كانو خرجوها وجا لبوليسي للي وصاه اللي وقف معاه دخلها لداخل وبقات تماك بدات تعمر شوية جلس حداها واحد الراجل) عمي شحال الساعة
....: 7 ونووص
أمال: (حركت رأسها بلا وعينيها ذابلين الليل كامل وهي حالة عينيها واخا ونسوها لمطايفات الا خايفة تبقى فهاد لمدينة وتلف عليهم... أما زهير ووليد وصلو قد قد حيت تلقااو فلوتوروت ديال سيدي قاسم)
هند: هي غتكون فشي كوميسارية
زهير: متأكدة؟؟ (بخوف) تكون تحركات ولا شي حاجة
هند: مممم انا قلتلها تمشي لشي كوميسارية وحنا نقلبو عليها ولبارح كانت فبني مكادة ممكن تكون بقات تماك
زهير: بففف واخا
وليد: باقي عاقل على طريق شوية
زهير: انا ندير Waze (أبليكاسيون ديال طريق) نشوف لكوميساريات للي قراب الله فين ݣلتي
هند: بني مكادة
زهير: بني مكادة صافي (هو ركب وزاد وهند شافت فوليد)
هند: ضعاف شوية
وليد: بالسيف ياله نمشيو حنا (مشاو كيقلبو تماك واالو مكينااش ومدازتش عندهم اصلا للي خدمو الليل نبدلو مع 6 دصباح رجعو كيقلبو فبلايص اخرين بحال كدار زهير للي تم داخل للكوميسارية واول من شاف هي.. كانت ساهية قرب ليها كيحس بدمو كيفووور وهي بديك الحااالة)
زهير: أمل
أمال: (غير سمعاتو هزت راسها لقاتو هو وقفت فرحانة من لدااخل) جيت
زهير: ياله (ملامحو مكيتفسروش خلالها طريق زادت قدامو وهي خايفة من ردة فعلو هز تيليفونو كيشوف فيها) لݣيتها
وليد: وايلي مزيان فين؟
زهير: انا غير ندخل لوطيل نݣولك سمية واجيو (هي كتسمع شنو قال ضارت عندو) مدن كاااملين بانت ليك غير طنجة
أمال: (حنات راسها)
زهير: (بعصبية ولكن محافض على نيرة صوتو) سمو كان عندك فداك الطنطون منين جيتي هنا؟؟
أمال: (بشوية كتهضر) انا كنت بغيت غير نهرب
زهير: (غوت عليها) وبانت ليك غير طنجة وكان تلفني وكان شحال من حاجة (شاف حنكها للي مجروح والدم بيابس) وكان وقعت ليك شي حاجة ولا ملݣيتكش سموووو ندير ديك الساع!؟؟؟
أمال: (بقات كتبكي) راه معرفت مندير مشيت للمحطة اول كتر ركبت فيه
زهير: متبكيش هضري فهميني لاش هااربة؟؟ علاه متسنييتنيش امل مكنتش غنتشد حياتي كاملة مبغيتكش تجي غير باش مدخليش لكوميساريات تماك باش فالتالي دوزي ليلة فيها؟؟؟ سيري هربي عند مّا (كيهضر معصب وهي كتبكي) بفف ودابا لاه تبكي؟؟
أمال: (كتشهق) راه ماما للي طرداتني فداك صباح وݣالتلي الا لقيتي فتاوريرت ولا وجدة ولݣاوك خوتك يقتلوك
زهير: (سكت كيشوف فيها كتبكي بنيتها) صافي أمل انا راه غير خفت عليك
أمال: لا غوتي علية
زهير: (تبسم عاد بقا كيشوف فيها غير شاف ديك الجرحة زاد كعى) ياله نمشيو
أمال: (تمشات حداه مرتاحة كتمسح فعينيها كتشوف فيه حتى ضار عندها فاتح ليها لباب حنات راسها)
زهير: سمو دابا نهرب بيك يانا؟؟ (شافت فيه لقاتو كيشوف فيها بشوفة فشكل) ركبي بعدا
يتبع...
التعليقات
لا توجد تعليقات بعد، كن أول من يعلق.