محتوى القصة
هند: (بقات جالسة معصبة راس كيقولها سيري لخدمتك راه هاكا كتبدى بلحكام الخاوي حتى يجلسك فالدار وتبقاي مقابلة شقا وتقابليه هو.. راس مابغاش يدخلها فهاد الزوبعة دالمشاكيل حيت عارفة الا حطت رجليها فداك لكلينيك مسار حياتها الزوجي غيتبدل..
هدا الا وصلو لمواصل لا هو لا هي باغيينوو...
ملقات غير تقلبها بكى حيت ملقاتش معامن تهضر ولا تغاوت مسخاتش بخدمتها ولكن.. صونا تيليفونها كانت صاحبتها مجاوباتش وموراها صونا فيصل.. بقات كتشوف فداك لابيل حتى رجع جاها ميساج)
*هند تعطلتي...*
5 دقايق رجع جاها ميساج
*يمكن صبحتي ناعسة خليك مرتاحة ولكن غير تفيقي اجي*
بقات غير كتشوف لاحت التيليفون فوق النموسية وليد بصارح العبارة بين ليها ان فيصل ماشي غير الدكتور للي خدامة معاه وان تصرفاتو معاجبينوش... تدق لباب مسحت عينها وحنوكها ونشت بيديها على وجهها حيت كتبان فيها لبكية شافت فلمرايا.. معندها متخبي
هند: شكون!!!
ام هند: هند جيت نشوف غيثة حسابلي مشيتي للخدمة
هند: دخلي اماما.. (ناضت شافت غيثة وعطاتها بظهر..) انا نجي نقاد لفطور
ام هند: لا قاديت وباباك بكري مشا جاب فطوور وليد مشااا (وقفت اونفاص معاها) مالكي؟!!
هند: (مقدرتش تحبس دموعها) وليد مخلانيش نرجع للخدمة
ام هند: وعلاش؟!!!
هند: مم.. معرفتش هداك نهار قالهالي محسابليش كان تيهضر بالصح حتى هاد صباح قالي رجليك هوما للي متعاوديش تحطيهم تماك
ام هند: ماشي معقول يحبسك من خدمتك بلا سبب.. (مشات كتعنقها) صافي احبيبة غيجي وغنتفاهمووو معاه
هند: هو متيتفاهمش قبيييح منين كيصمم على شي حاجة (بكاها وهضرتها كانت واصلة للبيت للي عطاو لباها ومها جاه الفضول خرج من لبيت وكيقرب لعندهم وهو كيسمع... وقف حدا لبيت)
اب هند: مالكم؟!!!
هند: (مسحت نيفها) والو ابابا انا نوض نحط لفطور غيكونو لوخرين فااقو
ام هند: كفاش واالو قوليلي على المشكل للي عندك مع راجلك حنا ابنتي باباك وماماك كنبغيو مصلاحتك ورااحتك...
اب هند: شنو وقع؟؟!
ام هند: وليد صبح قال لهند متمشيش للخدمة غير هكاااك.. وهادشي ميمكنش خدمتها مزيانة، وشحال وهي تتحلم تخدم وتوصل لهادشي وفالتالي يخرجها ومكاينش حتى شي سبب مقنع...
هند: (بقات كترمش الا هضرت وقالت علاش السبب غيوليو يفهموها غلط كما دارو المرة الاولى فاش تقطعت العلاقة بيناتهم وكانت غير جداها للي دخلت ودابا رجعو مزيانين معاها والحب والحنان غير مشاير الا عرفو سبب للي مخلي وليد معكس معارفاش شنو غتكون ردة فعل ديالهم!!!!
بقات غير كتشوف مكرهتش تعظ لسان للي هضر ندمت ندمت ندمت...)
هند: حم نحطو الناس لفطور
ام هند: خاصك اعبدالغافور تهضر مع وليد باش يفسر لينا علاش مبقاش بغا هند تخدم
اب هند: انا غنهضر معاه....
امال2: (منعستش الليل كامل.. مع 9 صباح محست حتى غفاات راه ليالي وهي مكتنعسش بالفرحة منين وصلات عندو منعستش بالفقصة وقلبها للي تهرس ولكن مزال كاين أمل..
بقات غير كتعطيه فالاعذار ممكن حشم منها حيت هي بنت عمتو ممكن مزال مولفها ممكن حيت كانو دراري كيتسنااو زرب عليها وتعصب.. ممكن شي حاجة للي عصباتتو ممكن تفكر مو وحزن حيت هي مكيناااش.. قلبها ضرب فواحد الاحتمال... ممكن توحش مرتو للي مزاال كيبغييها...
تدق لباب للي فيقها حلات عينها كان ظلام ضاارت كانت بوحدها للي ناعسة ولباب مسدود حتى سمعت لباب تحل.. بقات فبلاصتها سمعت هضرة بشرى وليلى.. معرفت مدير هزت تيليفونها لقاتو طافي شعلاتو مكانش مديشارجي لقاتها 12 دنهار بغات تنوض تقسحت تحتها الجرح مزال طري وعاد الزربة للي دار عليها وبكترة مكتحشم وكتبغيه مقدرتش تقاوم ولا تعبر... وقفت بالزز كانت لابسة غوب دونوي بيضة طويلة وفوقها بينوار مشبك شعلت الضو وشافت فلمرايا عينيها مجلخين بكترة لبكى وشنايفها بياضو شعرها مشعكك بنعاس بقات كتقاد شعرها بيدها دارت بونضو فلبيض فيه وريدة هزت عكر من لاتخوص ديالها دارتو فشنايفها ودارت شوية فحنوكها حتى دخل وقفت كتشوف فيه لابس شورت كحل مع تيشورت ديالو)
انوار: صباح الخير
امال2: صباح الخير
انوار: (يمكن عاد شاف فيها مخفاش عليه شحال بكات) تفطري؟!
امال2: (حركت رأسها باه فين تعناق لبوسان راه عروس جديدة... خرجت قدامو حانية راسها وهو من موراها شاف 2 بقع صغار ديال الدم فلبينوار فبلاصة ترمتها... وصلت للصالون فين محطوط لفطور كان 2 كيسان حليب براد اتاي صغير 2 كيسان عصير الليمون عسل فاكية بيض مسلوق خبز زيت أملو جبن فرماج حلوة بيض حريشات صغار ملاوي معمرين نوعو ليهم لفطور ولكن فين هي الشهية)
انوار: أمال خارج ليك الدم من حوايجك
أمال2: (اوطوماتيك دارت يدها تماك بحال كتخبع وهي حشمانة) مااا مااا (مشات للحمام وهو بقا غير كيشوف واااقف يمكن حاجة للي كتجمعهم فهاد زواج عندهم إحساس واحد كيحسوووه... زفر تبعها للحمام دق)
انوار: نجيبلك شي حاجة؟!!
أماا2: (شافت سليب كان فيه بقع دم للي يابس وللي جديد...) ها لا لا انا...
انوار: واخ (مشا جلس.. هي بالزربة خرجت من تماك مشات لبيتها حطات دوك لحوايج بدلت كاملة لبست قفطان جوهرة مخيط بالكروشي ودوك لحوايج خباتهم حتى تجي مها... خرجت حداه لقاتو كيفطر)
امال2: (جلست حداه كتشوف فيه وهو حاني راسو كياكل حتى شاف فيها وحنات عينها)
انوار: شوية؟!!
امال2: (بصوت خافت) الحمد لله
انوار: انا غنخرج حيت سمعت غيجيو عندك والدار غتكون عامرة بنسااا
امال2: واخ
انوار: (ملقى ميقول عارف غلطو ولكن معارفش كفاش يصلحو وهو اصلا وااكلها... كمل ناض غسل يدو هز بزطامو وتيليفونو وخرج مخليها جالسة بحال الأمانة شاف فيها قبل ميسد لباب) فطري أمال
امال2: (شافت فيه وشادة لبكية بالسيف) واخ (سد لباب عليها وخرج من تماااك.. نشان لبرا كيتسنى شي تاكسي يدووز من تماك يلوحو بعييييد من هاد الدار..)
سمعو تطواط ديال الطموبيلات عرفو عائلة لعروسة جاية فتقاليدنا الناس للي مكيكونوش محافظين كيجيبو لفطور بدقايقية او الغياطة وموراها لعيالات كيشطحو.. اما عائلة المومني جايين بطموبيلاتهم ومن موراهم صطافيط.. أمال طلات برويسها كتشوف لفطور.. لفطور للي مجاهاش من عند مها وجاها من عند نعيمة وليلى... صيفطاتها الحاجة لدار لتحت باش تشوف العروسة واش كملت حيت غيدخلو عندها لدارها مبغاوش يحسسوها انها غير ضيفة ويديرو كولشي فدار الحاجة او دار لكبير... كانت لكوافورة جات قداتلها ميكاب خفيف وشديدة سامبل بالشال بيض مع خيط الريح من الفوق لبسات قفطان فلغوز بيبي كان كادو ديال الحاجة... عحبها الحال بزااف يكفي انه من الحاجة...
أمال: جيتي زوينة
أمال2: براكة الله وفيك اختي حتى نتي زوينة
أمال: راه جات ماماك والعائلة وحتى الجلسة ديالك راها مقادة
امال2: (خافت تسولها على راجلها للي بصريح العبارة ممحاشيهالهاش... وهاد معارفة متقول لوخرين وشحال خايفة من الشمتة وهي للي كانت فرحانة وكتعنى بيه....) ياك معليش أنوار ميكونش
أمال: اصلا رجال ميدخلوش
امال2: ااااه حيت هو حشم وخرج
أمال: (حركت راسها باه) انا نمشي لبس بالزربة ݣالتلك مّا خليك مرتاحة فبيتك
أمال2: الا معندكش انا نعطيك قفطان
أمال: (تبسمت) عندي.. (طلعت بالزربة باش تلحق حيت اصلا كانت مقادة وجهها.. تسنات هند تجي صونات عليها والو مكتجاوبش... هزت ولدها وهبطت لتحت بداو لعيالات كيصليو على نبي رجال مشاو لدار لكبير للي كان هو وولادو من غير عريس الغفلة للي مكاينش..
أمال كتشوف الكادويات كانو زوينين أنواع الماكلة للي جات من فطور وغدا للي يوكلو عرس.. حتى من سطل الحمام باللوازم ديالو حابتولها معا بقات كتبسم كتشوف لكواش لكوفران لماعن زرابي الديكورات حتى ماكينة باش كيغسلو لماعن جايبينها بداو كيدخلو داكشي خوت أنوار وعيشة طارت هي بناتها مشاو يشوفو العروسة للي كانت حشمانة ورات لمها صباحها ودغيا خباوه... خرجت عيشة فرحانة لدببنتها للي قبل ميسولو على لعريس عطاتهم العذر للي قالت لامال.. واخا اصلا معندوش مناش يحشم حيت غير العائلة للي موالف كيظحك ويجمع معاهم... تجمعو لعيالات فالصالون والصالة تقريبا كانو 3 دالجلسات تحط لفطور للي جابو فوق طبالي للي كان انوار الحلويات مسمن بغرير حرشة كرواصة قراشل فاكية زميتة حريرة بيضا وحمرااا كولشي هو هداك دخلت الحاجة عند امال للي لبستها دبليج ذهب وشحال فرحت أمال من حناااها عاد خرجتها حدا لعيالات للي صلاو على نبي وجبدو الطارات ديالهم (بنادر) وجلسو كيزرعو ويغنييو اغاني الشرق للي معروف عليهم زريع
مثلا كيغنيو على لعروسة او لعكوزة او نسيبة
"""اياااا عيشة فرشي لمراح ولباااب"""
""”ايا عيشة غير العائلة ولحباب""
عيشة غنات على بنتها للي تزوجات
"""اااا الحْمَامَة لبِيضَاا سِيرِي وَلِّي بْغِيتْ نْوَصِّيييكْ ااااا الحمامة البيضا""
""اااا الحمامة لبيضاا نْتِي وَلَّفْتِي الغُرْبَة وَحْنَا مَا سْخِينَا بيك اااا الحمامة لبيضاااا""
(الا جيت بقيت كنكتب ليكم فزريع مغنساليش حيت شدوني لهوايش ديالهم ههه)
أشرف: (هز راسو لقا أنوار هو عارف عندو مناسبة) واش جابك لهن؟!!!
انوار: نمشي؟!
أشرف: جلس.. انا عارف عندك عرس
انوار: لبارح سالا العرس درك كاين غير نسا وصدااعهم
أشرف: (هز حواجبو بجوج ورجع كمل شنو فيدوو... شافو دخل كيشوف فلبيسيات ولكن وجهو بحال معصب وقف مشا عند لكليان) ها هو شعل.. (تخلص من عند لكليان حط فلوس فلمجر وجلس فكرسيه كيشوف فأنوار للي مفهمش اش جاابو عندو) واش بيك؟!
انوار: شحال هاد لبسي خاصني شي واحد صغير بحال هاكا
أشرف: 11000 درهم
انوار: (ضار عندو) وايلي
أشرف: كنتمازح معاك لماركة راه باين بغيتي رخا راه قنتهم
انوار: لا لا بغيت هدا كاين فلݣري
أشرف: واه (ناض جابو ليه وحطو فوق المكتب ديالو فين كيكون كيخدم) غتبغيه اليوم
انوار: واه نمشي نجيب لفلوس
أشرف: واخ (انوار تسنى يقولو حتى لمن بعد ودوزهم خرج مشا تيرا فلوس وجابهم خلصو لقا اشرف قادو ليه) بالصحة
انوار: بغيت حتى شي كاميرات
أشرف: بحال لي كنت جبت لزهير
انوار: واه بحالهم.. فينها مرياامة
اشرف: مع مها
انوار: علاش مجبتيهمش للعرس
أشرف: مراهمش هنا
انوار: فتاوريرت؟!!
أشرف: (هز حاجبو فيه) أنوار لاش كتسول فشي حاجة مشغلكش فيها
انوار: شحال غتبقى حااقد اصاحبي؟!!! براسي كنت غير ضاااهص هضرت معاك مرة وجوج وعشرة غلطت وندمت وخلصت حسااابي راه ما مشات ݣدام عيني هي ومرتي صحتي كانت مشاات وطلبت سماحة منكم واحد واحد ربي وكيسامح اصاحبي علاش نتا مزال لاوي وجهك علية
أشرف: ملاويش أنوار..
انوار: انا الا جيت كنسول حيت نتا صاااحبي راه ذاااقت بيا ورجلي لݣيتهم جايبيني عندك
أشرف: (بقا غير كيشوف حيت عارف أنوار موصل لهاد الحالة الا واصلة بيه الطريقة باش كيهضر باااينة.. نعل الشيطان حيت عقدة أنوار تخاطااااها...)
واش للي صاري بيك؟!!!
انوار: (زفر وشاف فبراااا)
أشرف: (شاف فالساعة كانت 1 ونص) انا نعيط على لولد للي معايا يجي نمشيو لشي قنت
انوار: (حرك راسو بأه وهو كيصرط الغصة للي فحلقووو....)
شيماء: مبقى والو ويجي حبيب القلب كانت فرحانة توحشاااتو بزااف وعاد كلامو معاها للي رجعو بحال شي مراهقين مزال مصاحبين... وعاد كانت فوسط عائلتها للي توحشااتها واخا باها وخوتها مكيهضروش معاها الا مها مصبرااااها وبكلامها كتخليها متفائلة غيجي نهار وكولشي غيتقااد..
شيماء: (كانو كيخملو الدار والحلوى عطاتها لشي مرا تقادها ليها) مبقى والو العيد لكبير اماما مكرهش نجيو ندوزوه هنا
نعيمة: شوفي مع راجلك ابنتي الا صالحلوو
شيماء: داك العام دوزناه مع الحاجة يعني هو مكيمشيش عند دار عمو
نعيمة: حݣا غيجيو دار عمو؟!!!
شيماء: لا... الا جاو غيبقاو يسولو كفاش وكيف طرا واحد مرت عمو وبناتها شاطة ماطة
نعيمة: عييييب تݣولي هاكا ابنتي
شيماء: (عاوداتلها شنو دلرولها عندهم وفاش جاو فرمضان) باينة كانو طامعين فيه
نعيمة: ويييل الشيطان واخا هكاك متقهريش راجلك...
~~~~~~~
محمد: (جالس هو ومريم ووليداتو فالدار لتحت ولات العيشة معاه قبيحة مكيهضر مكيجمع غير ساهي حتى من ماكلتو رجعت قليلة مبقاش عندو الخاطر لولادوو بحال جالس على الشوووك ماشي محمد للي كيكون فدارو ناشط وهاااني وعاد طلعو الدم من الجلسة للي تأجلت حتى لشهر جاي يعني مو غتجلس شهريين فالحبس...)
مريم: محمد واااا محمد
محمد: نعام
مريم: غير بغيت نسولك على خدمتك فوجدة سمو غدير فيها؟!!
محمد: معرفتش امريم براسي حاااير مباغيش رجع نسكن هنا كولشي تشتت ولكن رزقنا للي هنا الدار المحال لتحت وانا عاود بنيت حياتي لهييييه
مريم: دير للي يريحك انا معاك فاشما بغيت (باغية ترجع لوجدة)
محمد: نشااالله نشااااااالللله.... سيري طلعي عند مرت عمي متجلسيش وحدك هنا
مريم: واخا نعاونهم نيت راه قرب يجي راجل شيماااا يعاود يخطبها ههه
محمد: (تبسم وما فيه ميظحك) هوما للي عبرو
مريم: نعاودوها حتى حنا
محمد: (شاف فيها بحب) الا خاصك شي حاجة عيطيلي
مريم: والا توحشتك
محمد: عيطيلي... (ناض لبس سبرديلتو) مكتخرجلك الهضرة غير فالوقت الغلاط
مريم: ههه (باس ولادو للي كيلعبو وخرج وهي لبست شالها وجرت ولادها للي كيتمشاو وطلعوو لفوق عندهم....)
وليد: (كان فالمحال ديالو ماشي مع زهير وباين هند معاه.. تقرس بزااااف) ممنعتش عليها الخدمة
اب هند: الا كانت شي حاجة اخرى اولدي قولي باش نفهم انا تنعرفك راجل معقول والهضرة عندك مرزنة ومحسووبة
وليد: (هز حواجبو بجوووج اخر حاجة تسناها هي هادي من عند هند) غير داك لكلينيك كيمرضها كتجي معصبة انا ݣلتلها بدلي داك لكلينيك الحاجة للي تجي منها صداع نسدووها او لا
اب هند: كااااينة ومقلتي حتى عيب انا باغي نعرف حاجة واش نتا ضد الخدمة دهند؟!
وليد: نهائيا بلعكس غير غتݣاد أموري كنت باغي نفتح ليها عيادة ديالها باش حتى حد ميتحكم فيها وتخدم فراحتها
اب هند: (هنا سكتوو.. هو وعمرو فكر يفتح ليها عياادة) هنا معندي منقوووول وحسيت براسي صغير قدااامك
وليد: لا.. لا حاشااا (صوتو كان غلييض ماشي كما موالف كيهضر)
اب هند: نمشي انا دابا نخليك فخدمتك (حس براسو تدخل فشي حاجة ماشي بعيدة عليه ولكن قنعووو وليد بلعكس عاد عطااااه وبينلو بنتو شحال غالية عندو...)
وليد: لا لا جلس
اب هند: معليش بحرا نشد طريق لسعيدية الواليد شوية عياان
وليد: ماااا مفخباريش درك نجيو نشوفووه نشالله
اب هند: ان شاء الله... (توادع معاه وخرج... بقا وليد شحال كيشوووف حتى تم داخل زهير جايب معاه بلاطو فيه لغدا ديالهم للي صيفطووه ليهم من الدار وكانت فكرة أمال... حطو فلبيرو)
زهير: واش بغا نسيبك لعزيز؟!!!
وليد: شتيه؟!
زهير؛ حاضيك من الكاميرات ابن عمي
وليد: (حرك راسو وحض شنافتو لفوقانية) شكون جاب دالخير
زهير: صيفطوووه... زيد باسم الله.. (بقاو كياكلو ووليد مسقووم زهير مهزش الراس حتى كمل) الحمد لله.. مالك!!!!
وليد: (زفر) مشاااكيل اصاااحبي (عاودلو بلان للي وقع حيت مدام جاو يهضرو معاه ممكن هو يكون غاالط) نتا وتكون واش دير
زهير: مرتي مع واحد كيدريبلي يا والله يا مو حتى يلݣاوني كلعب برااسو ݣدام داارو
وليد: وانا اخويا غير هضرت بفمي وشوف واش طراااا!!
زهير: هرمونات
وليد: خلييينا ازهير واش نتا كتدي على شي هورموونات
زهير: واش نݣوولك انا للي نعرفك داك لكلينيك بݣطيع الراااس
وليد: هي عارفة الا مشات سمو غيطرااا
زهير: انا خوها ومنين كانت عندها عماين ومكرهتش نقتل ***
وليد: كتشعلني؟!!
زهير: مالك بريكة صافي ياك كلمتك ماشية
وليد: وهاد تبهديلة للي دارت ݣدام واليديها..
زهير: (الا هضر غادي غير يشعلو على والو هند عزيزة عليه ولكن حتى هو مكيتفاهمش فهاد الأمور والا نصح بالعكس غيكون غير كيطنز.. )
هند: (كانت على اعصابها دخل باها وهي متشوقة تعرف شنو تقاال... ولكن كان مع العائلة حتى عيطلها وطلعو لبيت فهمها شنو مطلب وليد وعلاش ولكن هي كتسنى واش قال السبب الحقيقي لقاتو مقال واالو... هادشي زاد مرضها حيت ميساج قوي من عند وليد اموورنا الخاصة كتبقى خااااصة!!!! ودعت عائلتها وبقات بوحدها مع بنتها بغات تصوني على وليد مقدرتش حيت عارفة فيكون معصب صونا تيليفونها هزاتو بالزربة حسابلها وليد حتى كتلقاه فيصل تعصب قطعت عليييه ورجع صيفطلها ميساج)
*هند ياك لباس علاش متتجاوبيش؟!
واش مغتجيش اليوم عاود*
هند: سير ت*** نتا عاود (لاحت التيليفون وبقات هازة بنتها وكتفكر شي تخريييجة من هاد المشكلة للي دارتها راسها كانت ممكن تكون هي المظلوومة وكان ماشي فمها للي هضر....)
~~~~~~~~~
وليد: (كانت كيتجسس على تيليفونها كيتسناها تجاوبو مجاوبتش... ولكن معجبووش الحال ترمي عليه الباطل وتبين صورتو خايبة قدام نسااابووو...)
~~~~~~~~~~
أمال: (بقات حتى هي كتغني معاهم عاجبها داك الجو الحاجة غير كتبسم وتشوف واخا لسانها وااكلها تغني وعندها غيواااان ديال زمان زريع على حقو وطرييقو ولكن راها حاجة.. بداو كيحطو لغدا دجاج محمر ولحم واخر حاجة بركوكش الوجدي.. تحط الديسير وبدات العائلة كتمشي بقات غير مها وعمتها ولبنات وللي فالدار....
أمال بقات جاالسة أنوار مجااش بغاااتو يشوفها وهي هاكا زوينة ومقادة رااسها على الله تعجبوووو)
امال2: حم أمال تصوريني اختي
أمال: اهاااه (صوراتتها ولوخرا كتبووزا حتى جاتهم عيشة)
عيشة: مالكم غير تصورووو
أمال: هي بغات تصور
عيشة: براكة نتي من تصاور راه العين حق ابنتي
أمال2: غير بغيت نصيفطها لأنوار ݣالي تصوريلي نشوفك
عيشة: اااه اوا الا هاك تصوري حݣا مالو لدابا مجااش
أمال2: (بلعت ريقها) شدوه شي صحاابو جاو من برا وحشم يخليهم ويجي (حنات كتشوف تصاورها هضرتها معقولة يعني تاقوها عادي مشات عيشة كتستف لماعن دبنتها وهي صيفطات تصويرة لأنوار وقلبها كيضرب طلعولها جوج شراطي ولكن مزراقوش بقات متبعة غير واش شاافهم)
بشرى: (غير كتشوف بعينيها اصلا خوها من لبارح بانلها مغير) اموولة (دارو بجووج) ههه دابا كيف غنديرو ليكم
الحاجة: وحدة نعيططولها أمال دزوهير ولوخرا أمال دأنوار
بشرى: هههه
أمال: نوضي اما تشربي دواك وخليه يجي زهير ديالي ونعاودلو على لحم ودجاج للي ضربتي ݣبييل (كتحك فبلاصة الفخض فين كانت قرستها صبااح حيت لقاتها ممقاداش شي شغل مقاد)
الحاجة: اجي يا بنتي حبيبتي هاري يدك مݣديت نوض
أمال: اممم غير صبغي دابا... (ناضو طلعو)
بشرى: اموال اجي جلسي حدايا (جلست حداها عطاتها سنسلة) هادي ديال ماما الله يرحمها (أمال فرحات راه شبعت كادويات عنقات بشرى ولبساتهالها) أنوار مهلي فيك
أمال2: (تبسمت حانية راسها) الحمد لله
بشرى: انا راه ختك دابا الا بغيتي تجي تشكي منوو اجي عندي والله حتى نجبد ليه ودنيه
أمال2: ههه صافي واخا..
امال2: (سمعت صوتو كيهضر قبلها تهز من بلاصتو شافت فتيليفونها مزال مشاف تصاور تفافااات معرفت مدير كضور راسها وتشوف جهة لباب واش دخل ولا مزال.. كانت قدامها امال كتشوف فيها حست بيها بغات تقولها لهند لقاتها حانية راسها وغير ساااهية)
امال: رجووع الله ابنتي منين جيتي ونتي هاكا
هند: مكنتش باغية نجي أمال وكان غير مبززتيش علية
أمال: سمعي وليد راه ݣال لداركم باغي نديرلها صبيطار وحدها اش بغيتي
هند: صبيطار!!! ربي الا مسكني ما فيا للي يهضر
أمال: وݣوووولي
هند: منين مغوت مقال والو معيطلي محتى حاجة راه موصيييبة (رجع جاها ميساج من عند فيصل حلاتو شافتو)
*كوكو هند تخلعت عليك اليوم بزاف مجيتيش ومقلتيش مغتجيش.. واش عندك شي مشكل.. تبغي نجي*
هند: خرا (طفات التيليفون فمرااا) هدا غيجيبلي التهمة وصاافي
أمال: شنو؟!
هند: أأمااال بفففف عصبتيني نتي عاود ݣاع محاسة بية
أمال: وا ݣولي ونحس انا للي فهمت نتي كتسناي من وليد يغوت عليك والا جا وغوت غتغضبي اوا هادي هي فهم تسطى شنو باغية نتي بالظبط وزايدون عندو الحق
هند: يااااك!!
أمال: اه عندو الحق شنو هي تخدمي مع هداك للي غير شافني جا يسولني على جرحى دازت عليها عامين ولا كتر.. شتي هدا تخافي منو واش نتي مزال مبغيتي تعرفي عقلية رجال راه يبغيك حتى يشبع ويكون حنين حتى يشبع ولكن توصليه لهادشي ميعقلش عليك
هند: هو مغيعرف والو بغاني نخرج انا ممشيتش
أمال: وعلاش دايرة هاد لمندبة بلعكس خاصك تفرحي شوفي مݣال لباك واالو
هند: وهادشي للي مرضني بفففف مبغيتش وليد ياخد مني شي موقف انا براسي حسيت براسي كلبة مكانش علية نقول لماما وبابا شي حاجة مفهمتش كفاش قلتلهم شي حاجة فحال هاكا.. هوما جاو سولوني شفتهم خايفين علية وأنا ديك اللحظة مشعرتش براسي حتى بقيت تنسرسب ليهم
أمال: معليش الواحد كيغلط ووليد درك يفهم نتي وصليهالو غير بشوية
هند: (تنهدت) الله يدير للي فيها الخير...
أمال: حقا غدا غنخرجو ندهزو شيماء ههه تمشي معايا
هند: حتى نفك حريرتي بعدا
أمال: هزاها منين تقالت وصافي.. شتي نتي راكي كتعرفي لوليد دغيا حضمصيه
هند: مصااب تجي هكاك..
عيشة: (خرجت برا بفواطتها كان انوار مجمع مع زوهير وخوتو وكاين حتى وليد.. وراجل بنت ختها.. مشات فالاتجاه ديالهم ووقفت متبسمة سلمو عليها) اوا مولاي السلطان منين خرجتي مدورتي وجهك لينا
انوار: (متبسم) خليتكم تاخدو رااحتكم
عيشة: الله يعطيك ما يريحك اوليدي ياله طلعو لعشا شوي ونحطووه (مشااو طلعو وهي مشات لدار بنتها لقات جموع دلعيالات وبينهم أمال للي جالسة حتى هي فقستها حيت هي لعروسة ديال ديك الدار وهي للي خاص تكون كتشقى وواقفة معاهم على كولشي مقدرتش تهدر حيت مزال الفرحة ديال بنتها مخلياها ممسوقالهاش... )
هاهنانحطو لعشا تݣادو جوج طبالي نصدعووك شوية اعروستنا وتجي تهبطي الشلال
أمال: (بغباء) انا ولا بنتك
عيشة: ياه على بنتي!!! وباااز الا طامعة فيها تخدم عليك وهي عروسة
أمال: (بغات غير ظحك ندماتها قدام الحضوور) غييي حيت ݣلتي عرووستنا وانا عارفااك معمرك درتيني عرووستك داكشي باش تلفت
عيشة: زيدي زيدي باركة من هاد لفهامات الخاوية هادشي متمشيو تعلموه فديك الجامعة
أمال: (لوات شنايفها وهند تعصبت بغات ترد عليها ولكن.. ناضت أمال باينة فيها تحرجات تبعات عيشة للي كتنݣر عليها فدروج.. ) وااا باااركة من نݣير ماشي حتارمتك قدام الناس تبقاي مشرعة فمك علية
عيشة: (ضارت عندها عيشة مطرطقة عينها) واشتا!!!
أمال: واشتا نتي مالي سارقالك الورث ولا قاتلالك شي حد مكتحملينيش متهضريش معايا شنو درت ليك ݣاع فملك الله منين تشوفيني ونتي تسممي فية بالهضرة وتعايري تبغي للي يدير لبنتك هاكا؟!! ولا غير علية ياانا حيت حاسباني برانية عليكم
انوار: (كان خرج من لحمام وسمع صوت أمال قرب سمع الحوار للي ضاير وبقا وااقف)
عيشة: لهلا يحيييك يا الخانزة حتى تبداي تغوتي علية
أمال: للي فجهدك ديريه بغيتي تمشي تشكمي بية لزوهير سيري
عيشة: حيت فيها عارفة معندك واليدين للي نشكيلك منهم (رمشت امال عينها جوج مراات وغصة كبرات فحلقها كتر وكتر) دايرة زوهير خاتم فصبعك وعلم الله بااااش وجاية تقللي حياااك يا الخانزة على للي كبر منك
انوار: عمتي واشتا صااري؟!!!
أمال: (حنات راسها وهبطت من درووج خارجة حيت قاستها فنقطة الضعف ديالها)
عيشة: جلا تفوو على موصيبة تبلينا بيها
انوار: واااا عمتي.. راه عيقتي على الطفلة واش دارت لك باش جالسة تسمي فيها بكلامك حشوومة بالله الا حشومة لبنت يتيمة
عيشة: اما للي عارفة هاد النووع هااااا ودني تخلي مرتك معاها
انوار: (حتى بغا ينطقها وقالها فسرو *يا ريت تكون بحالها*) الله يهديك اعمتي هادشي الا وصل لزوهير راه ميعجبو حاال (دخل مكره مكرهش يتبعها ولكن مصااالحش... اما هي طلعت كملت شغلها بحال مدايرة واالو...)
هند: (شافت أمال مجاتش لعشا قالت ربما بقات مع الحاجة لفوق.. براسها غير نقبت وكتعطي لبنتها تاكل كملو غسلو يدهم وبقاو مجمعين وللي ناضت باش تمشي فحالها حتى نطقت وحدة)
بشرى: كنت بغيت نتعرف على شيماء
هند: نعام!!!
بشرى: شيماء لووستك ياك نتي مرت وليد
هند: اه.. شيماء فداارهم
بشرى: مكتابش نتعرف عليها ݣاع
هند: دابا تجي ان شاء الله هاد الايام ومرحبا بيك تعرفيها
أمال2: (تقرست كفاش هادي كتسول على شيماء خطيبة راجلها لقديمة وللي كانو كيقولو كيموت عليها وغير لوراق للي خلاوه يخليها وكان داير يرجعلها غير هي تزوجت صاحبو زكارة فيه...)
بشرى: (كانت كتهضر معاها مرة مرة حيت أنوار عرفها بيها حيت علاقتها هي وخوها زوييينة وهضرت عفوية لا غير...) نوض انا نمشي تلقاي لعريس كيحسب لينا فدقايق باش نخرجو
هند: ههه وي عندك الصح حتى انا نمشي (سلمو على أمال وخرجو وكولشي ناض منين سمع بشرى شنو قالت باش يخليوها فراحتها وتوجد لراجلها.. نمو خارجين)
بشرى: نتي هي لي داويتي أنوار.. براكة الله وفيك شحال شكر فيك والطاقة الإيجابية للي عطيتييه
هند: (تبسمت) خدمتي
بشرى: تبارك الله عليك والله هاد الخدمة كتحمقني شرييفة وكتعتابري من ملائكة الرحمة
هند: (بغات تجيبلها لبكية حيت هند فالمصحة للي كانت خدامة كانت كيتعطى بيها المثل خدمتها متقونة وكانو كيبغيوها المرضى وكان للي كيجي مخصوص كيسول عليها باش تعالجوو كانت دايرة اسمها تماك.. داكشي باش مسخاتش.. اكتفت بابتسامة وتنهييدة شافت وليد عاطي بظهر واقف مع زهير..)
نخليك دابا احبيبة حتى لغدا ان شاء الله ونجي
بشرى: بسلامة حبيبة خليت ليك الراحة (تسالمو ومشات عند راجلها بخطى بطيييئة خايفة بزااف من تقليقتوو اما بشرى طلعت لدار الحاجة تقلب على أنوار...)
هند: حم سلام
وليد: (مضارش حتى وقفت اونفاص ليه حنا عينييه وهز بنتو) ياله
هند: (شافت فزوهير دارلها إشارة باش بسيري على الله زاد قدامها وليد بلا حتى ميسلم على صاحبو.. بصوت خافت) مالوو!!!
زهير: القضية ابنتي عندك مق*** (هند رمشت بالزربة مزال هي وامال مكيسوعبو هاد الكلمة ديال ق** ولا م**** عند زوهير عادي)
هند: الله يبشرك ابّا زوهير (تبعت وليد كتزرب فالخطوات ركبو فالطموبيل وزادو للدار مقدرتش تكلم مخلية حتى تحط لبنت فنموسيتها ويهضرو...)
انوار: (كان بقى جالس فالصالون مع راجل عمتو كيهضرو فداكشي دالخدمة وحيت هو عندو معارف غيسهلو فبزاف ديال لوراق.. دخلت بشرى)
بشرى؛ أنوار حسابلي مشيت لدارك
انوار: انا مع راجل عمتي باقيين لعيالات لتحت
بشرى؛ لا بقات امال وحدها...
انوار؛ (فهم والا بقا غيسمع خل ودنيه) اااه اوا خليت ليكم الراحة نهود رتاح شوي (قبل متهضر بشرى هبط دخل لقا عيشة تمااك) عمتي... ماشي حشوومة واش درتي للبنت ݣبيل
امال2: واشتا؟!!
عيشة: صافي راه ساعة الغضب وداازت تمسووو بخيير (خرجت سادة لباب من موراها)
انوار: هاد مك راه مريضة فراسها !!!
أمال2: (بقات كتشوف فيه وقلبها كيضرب كتخاف من للي كيغوت ولكن قلبها ضاارها واش مكيشوفش شنو لابساالو وشعر والمكياج!!! كتشوفو كيغوت وهي ودنيها كيصفرووو وعينيها طالعة معاهم ضبااابة للحظة بغات تطيح غير شدت التوازن وسكت من العصبية وشاف فيها)
انوار: مالكي؟!
أمال2: (بصوت خافت) والو واالو...
انوار: سيري تنعسي
أمال2: (زاد صدمها حتى شافتو شدها من ذرااعها داايها تنعس دخلت تكات فبلاصتها ولبكية شادااها)
انوار: واش تبغي شي دوا؟!!!!
امال2: (حركت راسها بلا)
انوار: تكااي انا دابا نجي (خرج من لبيت وبقات كتبكي وهو جلس فالصالون عصبااتو عيشة بزااف مكرهش يسبها ويغوت عليها.. طل من السرجم حتى حد مكاين برا يعني زهير غيكون مع أمال طفا الضو دخل للحمام عاد رجع لبيتو لقاها كما خلاها ولكن اثار دموع باين وبقوة...) منعستيش
امال2: حم لا كنت نتسناك
انوار: اممم (بدل حوايجوو وتكى حداها هاز التيليفون دخل نيشان الفايسبوك وهي كتشوف هز راسو فيها) مغتنعسيش أمال
امال2: علاش مبغيتنيش نبقى مونساك
انوار: غي حيت عييتي نهار كامل ونتي مع العائلة وصافي
أمال2: معليش انا راحتي كتكون معاك (مدار حتى ردة فعل بقا وجهو فالتيليفون.. بقات ساكتة شحال حتى هضرت) حم فوكاش نسافروو
انوار: من بعد
أمال2: وشهر العسل!!
أنوار: هاديك راه هضرة الافلام.. وزايدون انا خاص نوݣف على المشروع للي باغي نحل سفر ملحوووݣ من بعد
أمال2: (مالقات متقول من غير تردها على عينها عطاتو بظهر وبقات كتبكي... ياك هو ولد الوقت ماشي شي واحد للي مواعيش.. )
زهير: (استغرب مكيناش فدار الحاجة ومكيناش فدارها كولشي تفرق مشا ينعس وهو كيقلب عليها تيليفونها بقا عند الحاجة مفهم واالو... هند ووليد شافهم مشاو بووحدهم مقال لحتى واحد شي حاجة.. بقا كيقلب بووحدو حتى من ولدو نعس مع الحاجة للي كلات ليه النموسية بلوسايد ونعسوا معانقين حيت كيبغي جداه بزااف ومولفها... بانتلو يمشي لجنان شاعل لبيل ديال التيليفون حتى بااانتلو وقفت فطريقوو خالعاااه...)
يا ر** واش باغية تسكتيلي ݣلبي
أمال: عرفتك غتكون كتݣلب علية
زهير: (بعصبية طفا لبيل) ومال ديل مك جالسة هنا شي نهار يسكنك شي جن.. هضري يا *** واش جابك هنا فهاد الليل
أمال: (بصوت مخنوق) غير تخنقت وجيت هنا محسيتش براسي ݣاع
زهير: واش خانقك الآلة!؟؟!
أمال: (حطت راسها على صدرووو كتبكي.. هو مفهم واالو بعدها من كتاافها مكتبتنلووش مزيان)
زهير: لاه راك تبكي؟!!!
أمال: (معرفت تعاودلو ولا تسكت تكمدها فقلبها مباغية ضيع لا عرس لا فرح بغات ترجع تعنقوو ومبغاااش كتشوف غير اللمعة فعيينو وباينين عينين مكشرييين) عفاااك ازوهير خليييني
زهير: ياااو ومتهضري يا بنت مصطفى حتى نلووح مك فداك لبير تعقلي عليييه
أمال: غير تناقشنا انا وخالتي عيشة
زهير: واش هاد تناقشتو واش دابزتو واش ݣالتلك هاد المرة!!!!
أمال: غير هضرة عيالات (كتمسح دموعها ونيفها) وصاافي عفاك ازوهير متزيدنيش حتى نتا
زهير: ياااا هضري ݣولي واش صااار نيشااان...
أمال: ݣالتلي.. معندكش واليدين للي يربيوك وݣالتلي نتا... انااا ساحرة لييك
زهير: (بقا كيشوف فيها شحاال.. رجع عنقها وواحد الراس كيقولو وكان ماشي مك للي ناعسة فديك الدار يردمها كاملة عليهم...)
يصبح ويفتح أمووول مسحييها فية احبيبي (باس راسها)
أمال: بلا متݣول والو ازهير
زهير: انا عارف صواالحي.. كما هي ختي كبر مني ونحتارمها نتي مرتي حبيبتي مكانش للي يقهرك ويغبنك وانا حي... (جارها معاه كيرطب الجو حتى مشاو لدارهم)
~~~~~~~~~
هند: (جو مكهرب وصلو للدار هزت غيثة طلعت زاربة باش ميهضرش قدام لبنت... وطلعت لبيتها اما هو سد الطموبيل ضربلو ݣارو فرااسو كان قااطعووو مقدرش يعاود يكمي دخل للدار ساد لباب من موراه ودخل الحمام...
اما هي بقات على اعصابها بدلت لبنتها ليكوش والحوايج عطاتها رضااعة حتى نعست حطات حداها اللهاية وغطاتها..
عاد مشات بدلت حوايجها لبست بيجامة كولوون وصميطات من لفوق جمعت شعرها سفنجة دهنت لحمها دارت کلووص تسناتو يجي صونا تيليفونها هزاتو كانت بريڤي عرفاتو غيكون فيصل قطعات وطفات التيليفون.. بقات كتسنى ربع ساعة نص ساعة وقفت وقررت هي تمشي عندو راه هي للي غالطة هاد الساعة... هبطت لتحت مكاينش استغربت قلبت عليه فݣاع الدار طلت على الطموبيل كاينة)
وليييييد ولييييييد...
طلعت لفوق دخلت لبيت نعاس ديال ضياف حتى كتلقاه مجبد تماك ناعس وطافي الضو عليه... تصدمت وقلبها زدح
هند: وليييد علاش ناعس هنا؟!
وليد: لا رد
هند: وليييد ولييييييييد تنهضر معاك علاش ناعس هنا ومخلي بلاصتك
وليد: سدي معاك لباب تابعني خدمة غدا
هند: (بقات كترمش عينها وتشووف جاتها لبكية) وليد نووض نهضرو ويتحل كولشي
وليد: بلا منق*** مها هاد الليلة طفي الضو وسيري تنعسي (مضارش ݣاع عندها..)
هند: (بحرا كتنفس.. مالقات غير تخليه يتهدن شوية واخا جاتها قاااسحة بزاف يفرق لفراش عمرها ظنات شي نهار يفرق فراشها ويبعد منها.. مشات كتجر رجليها لبيتها وعرفت القضية كما قال زوهير مق*** ديال بالصح....)
وليد: (الليل كامل مجاهش نعاس مكرهش يتواجه معاها يفهم علاش لاسقة فخدمة وعارفة واحد النية ديالو ناااقصة ميمكنش هاد المدة كامل هو بوحدو للي كيسول واخا هي مكتجاوبش!!.. هنا الشيطان دارلو طرن كفاش مكتجاوبش وهو كيصيفط كان متكي حتى جلس كيدور عينيه خايف تكون عندها شي نمرة اخرى!!!! استغفر الشيطان حيت اخر حاجة يفكرها فهند هي هادي.. رجع تكا داير يديه تحت راسو كيشوف فانعكاس الݣمرة للي مضوي لبيت.. حاااير معرفش هادشي فين غيوصل وهو فالاعماق ديالو مساخيش بيها من غير الا دارت شي حاجة للي ميقدرش يسامحها عليها....)
~~~~~~~~~~
انوار: (طل على امال2 كانت ناعسة من الجخرة للي كديرها مرة مرة دخل للواتس عاد شاف التصويرة للي صيفطاتلو بقا كيزوومي فيها وخرج منها بغا غير يفهم علاش أمال مخرجتش من بالو کاع لدرجة مرتو مقادرش يقيسها عاف ݣاع نسااا هو من شحال هادي كان كيبغيها ولكن فاش كان كيتباوس مع شيماء كان عادي فاش كان كينعس مع دعااء عادي علاش دابا!!! واش حيت قريبالو بزاف كيشوفها صباح وعشية صوتها ديما كيسمعووو.. معرف ميدييير سمع تنهيدة فوسط نعاس مرااتو غمض عينووو عارف هو سباب ولكن حتى هو ملقى جهد كيعيى يقول صافي اخر مرة نفكر صافي نزيد القدام اصلا من ساااابع المستحيلات يكون شي مرة مع أمال حتى كيبقى راسو غاااارق فالتفكير فيها ومقادرش يزولها من بالو...)
~~~~~~~~
زهير: (متكي أمال على صدرو العريان وكيخشي صبااعو فشعرها برفق..) امووووول
أمال: هممم
زهير: مزال مقلقة احبيبي
أمال: معرفت مالها معايا والله حتى كنحتارمها سول ݣاع للي كانو حاضرين تماك
زهير: واش انا عاد نسول عليك راك ترابي يدي
أمال: من ماما لفتيحة لختك والله شي مرات كنݣول انا للي منحوسة
زهير: متݣولي هاكا.. (ضور وجهو مكشر) انا غدا غنتفاهم معاها
أمال: بلاش والله
زهير: خرجي نتي داك السوق
أمال: واش بسبابي غتݣاطع مع ختك وكتݣولي نخرج داك السوق
زهير: بغات لݣطيعة شغلها داك انا مکاطعش ولكن باش نخليها تغبنك كل مرة بربي لكانت ليها نعرف حاجة يانا احترم تحترم ماشي نتي کاطعها فيك وهي نخليك دير فيك واش بغات
أمال: (زادت تمخششات فيه) لهلا يخطيك علية ازوهير ربي جابك لية بحال درهم دلحلال
زهير: درهم!! ياو راني حاط على جدك دم جووفي وتݣولي درهم (طلعها فوقو مزير عليها) رواحي نوريك درهم وصرفها كيف داااير
أمال: لااا هههه لا زوهير عفااك راني حزينة
زهير: ياو حتى دابا نفرحووو لقريييد ديالنا....
أصبحنا وأصبح الملك لله...
زهير: (خلا أمال ناعسة باسها فحنكها غطاها دور الريدويات على سرااجم دخل دوش بالزربة خرج لبس تيشورت وسروال كيطمة هز كاسكيطتو سوارتو وتيليفونو البزطام هبط لبس سبرديلتو وسد لباب من موراه...
مشا لدار الحاجة كان الجو مبرد شوية حيت مغيم دخل شم ريحة لمسمن طلع كانو فايقين خواتاتو ومو وشي عيالات)
سلام عليكم.. مّا رواحي بغيتك
عيشة: (من لبارح كتسناه يهضر مزال مهضر مشات عند ليلى للكوزينة لي كانت كتحط الزبدة فطباسل) صافي نحطوو
ليلى: صافي راه كولشي واجد
عيشة: اييه وماشي كولشي حاضر
ليلى: (كتكون زوينة فكولشي الا موضوع امال) الا على بنتك راه مزال عرووسة تفيق فوقما بغات (جات تهضر وهي تكمل) الا على بنتك ولا بنت مينة راه مزال صغار حتى يفيقو على خاطرهم راه عياو هاد ليامات والا على أمال مرت زوهير راها ناعسة فديوانها داارها واش نمشيو نفيقوها ونکولولها علاه مزال ناعسة فداارك هنا راه قلة لحياااا وكنقلبو نيت على لي يسمعنا على ݣلبنا
عيشة: لا لا انا مݣلت واالو..
الحاجة: (من بعد معاود ليها زهير للي كان معصب شنو دارت ختو لمرتو) انا غنتفاهم معاها اولدي
زهير: واش راها مزال صغيرة باش تفاهمي تعيق برووحها هاد لبارح جوجت بنتها وشوي ويتزاد عندهم ولد ولا بنت وهي مزااال دايرة روحها فبنت ݣد بنااتهاا عيطي لها اما انا جيتك نتي اللولة باش تعرفي حيت مكندووزكش
الحاجة: عفاااا وليدي سكت راه يوسف نااعس
زهير: (عاد رد لبال لولدو للي ناعس فوق النموسية.. خرج تبعاتو الحاجة حسابلها غيمشي حتى شافتو كيقلب ودخل لاكوزينة) عيشة واش داك لكلام ݣلتي لأمال؟!
عيشة: غير سلم بعدا اخويا
زهير؛ (بنبرة عالية) يااااو واشا داك لكلام ݣلتي لأمال لبارح
عيشة: (خافت من الشوهة وكاين لوايساتها برا) صافي اخويا غير سكت لميييمة متشوهنيش ݣدام لويساتي يݣولو خوها صغير قاعد يبهدل فيها
زهير: اوا ومني كنتي تبهدلي فمرتي مفكرتيش فيها
عيشة: درك نطلب منها سماحة
زهير: سمعي اعيشة نحتارمك وااه حيت انا وياك خوت للي درتيه معايا جات معاك أمال مرتي بينك وبينها السلام متهضري معاها متجمعي معاها وشغل للي خالعك مديريهش وبلعي فمك عليها... (جات تهضر وهز صبعو) اااخر مرة نعاود كلامي وحسبيها كما جات جات ولوكان عندك شوي دلعقل متقهريش بنت الناس وبنتك ياله لبارح كانت عرووسة وغتكون ديما معاها مرة أخرى متجيش تشكاااي
عيشة: (هنا بحال طرشها) اش دخل بنتي
زهير: داكشي للي دخل مرتي... رووحي وقيلي عليك الطفلة لا هي فعمرك لا نتي ݣرينتها... (خرج معصب ومو تابعاه غير يفطر)
ليلى: هدا هو لكلام للي ݣلتلك غتسمعيه الا مبعدتيهاش اعيشة.. (مشات تحط لفطور وعيشة داخت فلكوزينة...)
بنات الا كملت شغالي غتزيد نكتب ليكم
هند: (مقدرتش تنعس کاع ضربت 7 دصباح طلت على بنتها ناعسة لبست بنطوفتها مشات لبيت فين كاين وليد حلت لقاتو كيشوف فسقف) وليد.. (مشاافش فيها) صباح لخير وليد
وليد: مبانلي خير
هند: حشومة عليك علاش تتقول هاكدا؟!!
وليد: (تم نايض عينو مجااتش فعينها من لبارح.. وقف باغي يدوز سدت لباب ووقفت اونفاص ليه) حيدي
هند: وليييد عفاك نهضرو والله مقدرتش نعس حشومة عليك على هادشي لي تدير فية
وليد: (حنا راسو وشاف فيها وكانت شوفات كولهم عتاب لدرجة حشمت وحنات عينها) سمو بقا ميتݣااال
هند: (هبطو دموعها) عارفة راسي غلطت
وليد: مزيان (هز راسو بغا يدوز تكات على لباب وشافت فيه) خلي يدوز هاد صباح على خير
هند: وغتبقى مقلق مني ياك درت ليك خاطرك وخرجت من الخدمة شنو كتر؟!
وليد: رجعيلها.. الا معندي انا غير رجعي ليها دابا الا بغيتي ݣااع مبقاش يهمني
هند: (غوبشت) كفاش مكيهمكش
وليد: كيف سمعتيها.. انا مبقات هضرة ديالي عليك عندك واليديك وهوما ادرى بمصلحتك
هند: واش تقلقتي حيت مشيت عاودت ليهم
وليد: (هز حاجبو رمش 3 دلمرات متابعين) مكتحشميش؟!!!
هند: (بلعت ريقها) علاش؟!
وليد: كتكذبي عيني فعيينك (رفع صوتو حتى تخلعت عاد كان مهدن وفجزء من الثانية تحول) مصيفطااالي بااك بحال انا عندي 12 العااام ولا انا جاي من تحت شي حجرة... مصغرااااني ݣدااامهم وانا من ديما داير ليك عتبااار... واش درت معاك ابنت الناس ناااقص حتى تبقاي تبكي وتشكي لواليديك بلكذوووب (ضرب فصدرووو) انا منعتك من الخدمة (كتبكي وتحرك راسها بلا) اوا وعلاش كااااذبة ولا غير باغية تبيني رااااسك محݣووورة بحال ديما هاااكا باغياااهم يشفقووو عليك بالكذووب على الراجل للي بغاك وداير ليك بحال لما لقليل... سموووو درت ليك اهند خاايب باش تكذبي علية هااااك
هند: والله منعاود عفاااك
وليد: لا راك كتعاودي وراك كتوصلينا لمواصل خايبين
هند: كفاش مواصل خايبين
وليد: كما سمعتي درك حايدي من حدا داك لباب حيت مباغيش نحايدك وتمشي تكذبي على الناس وتكولي لاحني ولا ضربني...
هند: وليييد (حل لباب بالجهد.. وخرج بقات كتبكي عرفاتو مخيخ ماشي غير معصب خلاتو متبعاتوش حيت غيبقى يخصر الهضرة وكما قال يوصلو لكلام للي مباغيينوش.. بقات هكاك طلات لقات حتى الطموبيل مهزهاااش.. رجعت جلست كتبكي صونا تيليفونها مشات لبيتها لقاتو فيصل نيت هزت التيليفون وخبطاتو فوق الزربية حتى تطفااا...)
وليد: (طلعلو إشعار انها جاتها ابيل من عند نفس النمرة.. فيصل!!! مكرهتش يرجع ليها يقتلها عصى الحاجة الوحدة للي كيفكر فيها هو يعطيها لعصى على الله يبرد شوية.. بقا كيتمشى حتى شي واحد كلاكصونا عليه ضار مخنزر خاصو غير معامن لقاه زوهير مشا ركب وزدح لباب) فين
زهير: المرة جاية علݣ خامية فداك لباب
وليد: اوديييييي....
زهير: (زادو فطريق) فين وصلتي فحريرتك
وليد: (زفر باينة واصلة ليه لعظم) معرفت هادشي فين يوصل!!
زهير: نتا فين بغيتيه يوصل غتشد مرتك سولها كفاش وعلاش هي تجاوبك مكاينش لاش هاد التجبااد
وليد: غندوز نحط ليها لاديميسيون فالخدمة
زهير: الخدمة ولا بيك داك طبيب
وليد: بية هو.. (زهير قلب طريق ومشاو لكلينيك وليد كان موجدها جبد جوا للي فيه لاديميسيون سول على الإدارة طلع وزهير بقا برا كيصوني على الحاجة للي شحال صونات عليه..
دخل لمكتب المدير لقا فيصل نيت للي جالس تمااك.. تمشى المكتب ديالو حط جوا فوق البيرو)
لاديميسيون ديال مرتي
فيصل: علاش؟!! نعرف السبب علاش؟!
وليد: وعلاه باغي تعرفو
فيصل: مدام هند إنسانة مجتهدة فالعمل ديالها وكتبغي خدمتها وكتعطي فيها بزااف من حقنا نعرفو السبب علاش؟!! زايدون شحال وهي متغيبة ومعطاتنا حتى شي تبرير ولا عذر الغياب ديالها
وليد: (تبسم كيلعب بلسانو فوق سنانو كيكتم داك الغضب ديالو) تعطيك عذر (حك لحيتو) بصفتك اش؟!!!
فيصل: راني قلت اما واحد من الإدارة
وليد: ونتا بوحدك للي كاين فالادارة؟!
فيصل: لا كاين ولكن انا طبيب للي كانت كتخدم معايا
وليد: اممم.. هادي لاديميسيون ديال مرتي
فيصل: فلكونترا مزال 6 شهور عليها (قوس عينو فيه وليد) قانونيا ميمكنش ليها ديميسيوني بلا حتى شي عذر
وليد: هي غتجيبها بالزز تخدم معاك
فيصل: شنو المشكلة اموسيو نقدر نفهم شنو كاين؟!!
وليد: ضروري تكون مشكلة؟! هي مبغاتش تكمل
فيصل؛ مااا تفهمش غلاط ولكن هي للي خاصها تحط لاديميسيون وتعطي السبب علاش باش متابعش قانونيا راني قلتها ماشي بوحدي للي فالادارة مدام هند عندها بزاف دالالتزامات وناس كداويهم للي بادية معاهم للي قربات تكمل معاهم واش فهمتي اموسيو
وليد: لا.. وعندكم المعلومات الكافية باش تابعوني قانونيا.. (تبسم) انا بغيتك تابعني قانونيا
فيصل: واش عندك شي مشكل معايا
وليد: واه.. المشكل للي كاين هو نمرتك مرة أخرى إلى بانتلي طالعة فتيليفون المدام غيكون وجه ااخر
فيصل: امم تنصوني عادي
وليد: حتى انا من بعد غنتعامل معاك فوݣ عادي.. ونتا واش باغي...
فيصل: (حرك راسو باه) انا مغنقبلش هاد لاديميسيون خ.. (تدق لباب حتى كدخل هند لي عرفت من زهير راه وليد هنا) تفضلي
وليد: (كيشوف فنظرات فيصل ليها.. اكيد ماشي نظرات للي كان كيشوف فيه.... صار عند هند شاف فيها لقاها جايبة ورقة معاها وحطاتها) مدام
هند: (شافت فوائد بترجي وشافت فلاخر) هادي لاديميسيون ديالي
فيصل: (هز ديالها وديال وليد) مبقاتش عاجبااك الخدمة معانا امدام هند لدرجة جبتي جوج استقالات
وليد: والتالت نطبقوه الا بغيت
فيصل: لا مكاينش لاش غير هو كاين اجراءات قانونية
هند؛ (هنا كانت خايفة) دير للي بغيت
وليد: سمعتيهاا!!
فيصل: مدام هند نتي عارفة بديتي خدمة مع ناس كبار فالعمر هوما معولين ع
وليد: اااه ابنااادم بلا مدير فيها مصلح اجتماعي وتنوض الضمير هنا مكيناش غير هند كاين شحال من واحد كيدير خدمتها (شافت فيه وهادشي للي مقدرتش تشرحلو وسبب للي خلاها بغات تكمل الخدمة...) داك تخربيق زيدو فراسك
هند: ياله أوليد.. (زادو ماشيين تحت انظار فيصل للي بقا غير كيشوف وتأكد 💯 قرار الاستقالة جاي من راجلها وبالسيف عليها...)
~~~~~~~~~~
هند: (تمو خارجين والبكية فيها هو سبقها وهي دازت للبيرو فين كانت خداامة هزت شي نماري قيدتهم فورقة خرجت لقات وليد دخل كيقلب عليها) هاني أوليد
وليد: فين بقيتي؟!!
هند: غير فالمكتب ديالي بغيت نهز شي حوايج ديالي... (جات عندها صاحبتها للي تماك دخلو لشومبر عيات صاحبتها كتقنع فيها تجلس وهي حدها كتقول مكتاابش.. هزت داكشي ديالها فصندووق ورقي تعانقات مع صاحبتها مخبعة دموعها ولكن باينة فيها مزيرة خرجت كان وليد واقف حدا لباب حنات راسها وزاادت.. تبعها لقا زهير جالس فطموبيلتو مشات نيشان لطموبيلتها حطات الصندوق ورجعت عند وليد)
وليد
وليد: روحي للدار
هند: مزال خاصنا نهضرو أوليد
وليد: حسن لك بلعي حيت انا ماشي فݣانة نهضر
هند: (بقات كتبكي) انا راه كنت خايفة غير من هاد الإجراءات القانونية ودوك الناس للي غنخليهم فوسط طريق
وليد: هادشي كامل درتيلو لحساب وانا فين فهاد لحسااب؟!!
هند: علاش تتقول هاكا انا غلطت بزااا (تم جارها للطموبيل حتى جا زهير دفعو بشوية كان حسابلو كيدفعها ولا بغا يضربها)
زهير: غنوضووها انا ويااااك
وليد: زوهيررر
زهير: مكان لا زهير لا (سكت) ختي هند سيري نتي دابا للدار ونتا تحرك للخدمة
وليد: (هو مكانتش فنيتو يدفعها ولا يضربها غير فهمو صاحبو غلاط) مكنت غندير واالو
هند: (طلعت كتبكي وديمارااات وزادت فطريق)
وليد: صااحبي راه كنعرفها منين كتصوݣ هاكا بفففف.. هند هــــ.ييييييييــند (موقفتش وزادت فطريق اصلا مسمعاتوش...) بفففف
زهير: ياك دارت داكشي للي بغيت
وليد: وداكشي للي دارت مع واليديها؟!!
زهير: فهمها غلاطها وسدو هاد الموضووع راه بيناتكم بنت هادشي مكنتش كديرووه حتى ونتوما ديال رااسكم
وليد: الهضرة سااهلة
زهير: طلع العميق طلع...
امال2: (كالعادة فاقت ملقاتش أنوار حداها مفهمتش واش هي دارت شي حاجة غالطة معاه ولا شنو يمكن قلقااتو بلا متحس... سمعت الدقان للي فيقها جهاد وناضت لبست بينوار شافت فلمرايا دارت عكر بالخف وقدات شعرها مطلووق معاه بوندو حيت كل لبيسا شارية ليها بوندو ديالها جرت بانطوفتها للي فيها الريش وخرجت من لبيت ممكن يكون هو تنهدت تنهيدة طويلة حلت لباب كتلقى مها...) ماما
عيشة: (هازة بلاطو فيه فطورها وباينة مرشقاش ليها...) صباح الخير عاد فقتي
أمال2: واه..
عيشة: راجلك فاق ݣبيل وخرج مع باه
أمال2: حم.. واه ݣالهالي
عيشة: شتكم مزال مسافرتوو مخرجتوو بجوج
أمال2: کلتلوووو راني عياانة.. عرفتي تجمع علية لعيا بزاااف
عيشة: (مكيهضروش فداكشي الحميمي حيت عييب) مهم نتي مزيانة
أمال2: (جاتها لبكية ولكن الا شكات على يمكن متفهمهاش ولا تمشي عندو وميعجبوش الحال.. تبسمت) الحمد لله.. كولشي فاق؟!
عيشة: امممم
أمال2: وأمال جات من دارها شحال ضريفة اماما ݣاع مخايبة كما كتݣولي
عيشة: (خرجت عينها) لݣاك معاها شي نهار ولا حاطة راسك عليها نݣطع ليك راسك
أمال2: علاش اماما
عيشة: بنت لحرام مشات عند لمݣنوي كتشكيلو وجا صباح طلاني وطلطلني ݣدام ليلى جب الله عماماتك مسمعو والو
امال2: (بقات ساكتة حيت براسها طلاها أنوار على شنو دارت مها) بعدي منها اماما
عيشة: الله يبعد عليها ليام الزيينة الكلية الموسخة الخاانزة ولكن هاااااه الا طفراااتو باغية تشتت الخوووت... فطري نتي
أمال2: (بقات كتاكل بشوية)
عيشة: لبسي قفيطينك ابنتي طلعي لفوݣ جلسي حدا مّا انا نݣاد ليك الكادويات ونجمع الدار
أمال2: غير خليك اماما انا نݣادهم
عيشة: تݣاديهم ونتي عرووسة.. صافي نتي طلعي وعماماتك غيجيو ويݣادو معايا وهاااااه هاااا ودني الا لݣيتك تسااااري ولا تعاودي لديك الجحمومة
أمال2: والا جات هي هضرت معايا
عيشة: ضوري فيها باش متعاودش ضور بساااحتك باش تعرف قيمتها راه نتي للي مولات الدار ومن لحمهم ودمهم ماشي هي للي جات لبارح المسخوطة لوخرا وجاية دير فيها مولات الدار وكولي عقل حناك راه لحساتو ليها ديك المسخوطة....
وليد: (كيصوني على هند تيليفونها طاافي) بفففف ها تيليفونها طفا
زهير: خويا راه الطموبيل هزها لحݣ بمرتك وعرف فين مشات
وليد: (صونا على امال) اختي أمال صافا.. الحمد لله.. غيثة راه عندك؟؟.. امم جات هند ولا مزال؟!... مزال.. صافي غير توصل صوني علية.. صافي اختي...
زهير: شنو ݣالتلك؟!
وليد: مزال
زهير: اممم (جاتو خدمة وليد مشا للمحال ديالهم وهو بقا خداام حتى عرفو راه هند وصلات للدار وراها مع أمال فدارها.... عاد رتاح وليد... دخل عندو أنوار هاز شي وراق فيدوو) مولاي السلطان مزرووب على الخدمة
انوار: ضروووري
زهير: سافر ليك شي يوماين خرج مرتك كولو براا راك ولد الوقت ماشي جواج دالواليدين
انوار: ولد الوقت واه جواج لواليديك واه
زهير: واشتا!!!!
انوار: بحال معارفش
زهير: ايييه وراه تجوجت وجبتيها عندك ولات مسؤوليتك ماشي من مسؤولية لكبير ولا شي حد اخر
انوار: دابا خلينا من هادشي.. غنمشي لفرنسا السيمانة جاية على حساب ديك السلعة.. (متبسم) وجدة كاملة الشرق كامل مدايرش هاد السلعة للي راني جايب
زهير: لا كاينة غير قليلة
انوار: يا خو قمة الاحباط
زهير: ونتا قمة التكبر... السلعة ديال action واصلة هنا غير قليلة نتا الحاجة المخيرة للي درتي مع الشركة هو غيكون عند ديبو وتفرق على المحالات والمدن
انوار: (عاجبو الحال) تمشي تغدا؟!
زهير: فالدار؟!
انوار: لا برا
زهير: غتهز قلووعك وغتمشي لعند مرتك.. لبارح ݣلتي الدار عامرة درك واش كاين؟!!!
انوار: (حك نيفو متبسم) جاتني فشكل بنت عمتي للي كنت حاسبها ختي معرفت كيف ندير
زهير: هي كتجي فشكل ولكن نتا متحسبهاش هاكا تعارف معاها خرجوو باش تعارفو كتر
انوار: والله معرفت.. نتا واش برݣرامك
زهير: غنخرجو مع اشرف انا وأمال على شي غراض فلعشية
انوار: مليييييحة نخرج أمال ونتعشاو مجموعين برااا
زهير: نشاالله.. ياله خرج تابعني خدمة...
زهير: (خرج هو وأمال عياو فهند تخرج معاهم ومبغااتش.. بقاو مجمعين كيهضروو) حݣا نكملو مع اشرف ونتعشاو برا غيجيب أنوار مرتو ونجلسو مجموعين
أمال: ماشي حسن يبقى مع مرتو الراس فالراس
زهير: مزال متوالفوو بجوج... (سدو الموضوع هنا وكيهضرو فحوايج اخرى كان أشرف كيتسناهم حدا القسارية نزلو عندو وبداو من اول محال ديال ثواب..)
أشرف: ختي أمال تكلفي نتي وعيطيلي نخلص
أمال: واخا.. (دخلت بقات كدور عينها خداتلها جوج تواب ديال الجلابة اخر مكاين وجوج تواب قفاطن عيطاتلو يخلص)
زهير: خودي لمها ومرت خوها
أشرف: واه واه وحتى ليك
أمال: لا انا عندي والله
زهير: سيري تاخدي السيزي يعجبك فية غير انا (دخلت كظحك خدات جوج تواب ديال جلالب وخرجت دخلات لاخر عزلت باكية ديال الشيلان فيهم 15 لون خدات ليها 4 دلكولونات بتريكوياتهم وديباردورات بشورطهم و4 دوبياس حتى تقاشر خداتهم ليها حشمت تاخد غوب دونوي خلات حتى تاخدو هي... دخل خلص مكيهضر مكيدير حتى ردة فعل...)
أشرف: ختي خودي حتى لمريم
أمال: راه جوج تواب خديتهم كبار وقطعهم على حساب أمولة.. (تبسمت زايدة قدامهم وهو غير محملين داكشي.. دخلت خدات 4 الصيكان وصبيبطات حيت ممنوع عليها الطالون وخدات حتى سبرديلة ليها ولمريم وصباط.. دازت العصري كان حتى هو كيختار خدا لبيسات مستورين وعصريين ولمريم خداو ليها 2 لبيسات دازت لمكياج خدات اتروس عمراتها بداكشي للي كتعرف خدات دهاني ديودورون شرات ليها عطر ديال SI فالاحمر ب 800 درهم حتى سوشوار ولاصير سبايغ خدااهم ليها.. دخل خلص تخلع حيت اغلى بلاصة خلص فيها.. أمال بقات كضور عينها)
زهير: عندك شي عقدة من رجال كتنتاقمي منهم
أمال: ههه حسابلك هادشي سااهل
زهير: ابردييييي وشحال راك طانزة على الوقت.. (بقاو كيتمشاو حتى وقف حدا ذهايبي) ها الدق صحيح
أشرف: ختي أمال برجولة متفوتيش 10000 درهم
أمال: ههه 10000 درهم راه الخير والبركة.. (دخلت خدات ليها اونصوبل ب8000 درهم وعاد شافت خاتم لمرياج ماشي كبير ولكن سامبل وزوين قيساتو على صباعها جاها كبير شوية وهدا هو عبار شيماء.. خدات طوانݣ وبراسلي لمريم وسنيسلة رقيقة فيها حرف M جاتها 12000 درهم ضارت شافت فزهير)
زهير: (قوس عينو فيها) ݣوليلي قارية لحساب فظلام ولا زحام
أشرف: ههه لهلا يخطيك اختي أمال عجبني الحال تفكري فمرياامة نسييتها (عجبو الحال خلص ذهايبي من بعد مقاد داكشي فبواطات وخرجوو فاتجاه الطموبيل داشرف يحط داكشي)
أمال: زهير عجبني واحد الخاتم
زهير: والله يا ر** ومتزيدي حتى نوريك الخاتم
أمال: عفاااك (كتذبل فعينيها)
زهير: حتى لشهر جاي
أمال: وعد الحر!!!!
زهير: بروصي فوݣ راسو
أمال: ههه باااز.. (صونا أنوار عليهم للي كان كيتسناهم مع مريم فريسطو ديال الحوت كان اول ريسطو كيدي معاه أمال فاش تعارفو....)
أشرف من بعد مشكرهم مشا لدارو يدخل شنو شرا... بقالو غير لحم دجاج وداكشي لاخر... اما لوخرين شدو طريق لريسطو واخا أمال مبغاتش تمشي ولكن خافت تبينها وزهير مكيبقاش ساكت حتى يعرف علاش وكفاش...
~~~~~~~~~~
هند: (بقات جالسة فالصالة كتخمم وبنتها كتلعب حداها.. كانت اول مرة تصرف بغباء كبييير مع وليد كان ممكن هي تكون المظلومة والضحية وبزلقة لساان كانت هي الظااالمة... لدابا ممتخيلاش ان وليد قاالب عليها لدرجة عزل لفراش مكيصوني مكيسول عليها حتى منين عرفها صاکت وهي كتبكي مرجعش سول فيها..
حست بيه عاقبها عقاب قاااسي اه غلطت مكانش خاصها تشكيه لواليديها وبالكذوب ولكن محسش بيها وهي كتودع بلاصة دارت بلاصتها فيها... جات بنتها عندها كتهضر بكلماتها الطفولية باغية تاكل ناضت كتنهد مشات للكوزينة كتقاد ليها تاكل....)
~~~~~~~~~
شيماء: (كانت دارت التييست وكما كانت متوقعة حيت مها قنعاتها بالامر.. طلع كاين حمل جوج شرطات وااااضحييين. بقات فطواليط جالسة فوق لاشاص وكتشوف فداك التيست) واش انا فوقما قاسني كنحمل!!!!
(مشاعرها تخربقو واش تفرج ولا تحزن!!!!
دازت عليها معاناة كبيييييييرة فحمالتها اللولة بين الحمل والولادة ورضاعة وسهير...
واخا الوضع تبدل ورجعت حميمية كبيرة بينها وبين راجلها ولكن كفكرة الحمل مكانتش عندها ومكانتش باغياااهاااا كل ما هو سلبي كتفكر فيه.. كانت باغية عاد تزيد تقرب من راجلها ولو يعتارف غير بحبو ليها .... زفرت ناعلة الشيطان... زيرت على كرشها بذراااعها كتحاول تقبل الفكرة ماشي كما وقع فالحمل الاول.. وبفارغ الصبر باغية تعرف ردة فعل أشرف للي معارفاش كفاش غتكوون... ناضت شعلت لما خبعت داك التيست فجيب سروال بيجامتها وخرجت حتى واحد مقالتلو غدير التيست.. دخلت لبيتها خبااات هداك التيست مزيان وخرجت...)
أمال حلفت متوريني شنو ختارو
نعيمة: صبري على رزقك حتى يجي
شيماء: ههه شكون ݣال أمال تختارلي جهاجي ههه الله يسمحلي من ديك لبنت
نعيمة: طلبي سماحة منها نيشان باش ربي يقبلها منك
شيماء: كنحشم من راسي
نعيمة: متحشمي والو أمال الله يرضي عليها قلبها زيييين..
شيماء: بزااف ماما واش متأكدة هي بنت فتيحة
نعيمة: عيب اشيما!!!
شيماء: والله شي مرات كنݣول فدماغي بدلوها ليها فصبيطار
نعيمة: مبدلو والو مع جابونا أمال انا للي بقيت شداها وجبتها معايا للدار حتى خرجت فتيحة من صبيطار من مور العملية للي دارت رضعتها شوي ومشالها الحليب نهار تزاديتي نتي حيت كانت بيناتكم غير 5 شهور كنت نرضعك ونرضعها....
انوار: (جلس فنفس لبلاصة فين كانو جالسين أمال مسوقااتش ومداتهاش فهاد الجزيئات جلسو مجموعين أمال كتهضر مع أمال ودراري بيناتهم) هي أشرف حط دم جوفووو
أمال: ماشي مرااتو وبنتو الواحد الا متهلاش فمرتو فيمن يتهلى
زهير: مزال مجا خونا ناخدو واش ناكلو
انوار: (جاتو بحال حشاتلو الهضرة) واه ضروري يتهلى فيها
أمال: راه هدا هو الراجل للي يدير اعتبار لمرتوو ويديرلها قيمة والا غتحس براسها مجوجة برهووش
زهير: واشتا؟!!!
أمال: والو والو انا مشيت الحمام... (ناضت مشات خلات أنوار كيدور كلامها فراسو هاد كمية الكره موحال واش غتنقس حيت شافها غير كتزاد شاف فمرتو للي غير حانية الراس ) امووول مالكي ساكتة؟!
زهير: ياكما هاد لبغل قلقك
أمال2: هه لا لا غير كنسمع لكم وصاافي
زهير: مناويينش تسافروو
انوار: نمشيو لشي قنت مجموعين؟!!!
زهير: معرفت هاد ليام الخدمة غتزير على حساب عيد لكبير سيرو نتوما بعدا ومن موراها نديرو شي مشية مجموعين (جات أمال جلست وسمعت الهضرة)
انوار: حتى انا غنحل المحال
أمال: (تبسمت باستهزاء قاصدااها حيت كان كيشوف فيها)
أمال2: (حزنت وحنات الراس حيت كان أمالها فعمها يقنعوو)
أمال: مالكي امال؟!
أمال2: ها!! واالو
أمال: (دارت ديك الوفرة ديال مسكييينة وكتكملها بدوك الشوفات.. رجعت شافت فزهير وتبسمت بحب هادشي تحت أنظاارو مصيفطا ليها ميساج ان أمال مسكينة تزوجت بيه وان زهير احسن زوج هاكا هو قراها...
غوبش حتى نطق..)
انوار: فكرت نمشيو شي 3 ايام للحسيمة.. واش بانلك اموولة
امال2: (تبسمت حركت راسها باه) واه نمشيو
زهير: (تفوه) حسن سيرو تبدلو الجو راكم مزال عرسان جداد
أمال: سفر ضروري يكون منو سوا يكون جديد ولا قديم الواحد ماشي يدفن راسو فالحيااة
زهير: ياك العميقة
أمال: ههه وشنووو راه هضرتك هادي اشريف
انوار: (فرق كبييييير بين هادي وبين أمال لقدييمة.. تحط لعشا كلاو زهير وأمال كيهضرو فداكشي ديال العيد لكبير عيا حاضي وهو يركز فماكلتو حتى شاف فمرتو لقاها كتشوف فيه ودغيا حنات راسها قاسها برجلو شافت فيه تبسم ورداتهالو بكل حب..
رجعو للدار كل واحد مشا لدارو.. أمال2 بغات تدخل لبيت نعاس وهو يعيط ليها)
انوار: أمال واش باقية مقسحة؟!!
لأمال2: (حشمت حنات راسها)
أنوار: حيت للي عارف مخاصش نقيسك 3 ايام من مور الدخلة فهمتي
أمال2: (حركت راسها باه ودخل لبيت نعاس قلبها كيضرب فرحت منين جبد عاد الهضرة وخاف عليها وسفر.. خلاها تنسى كولشي شنو دااز...)
هند: (نعست بنتها وبقات بوحدها كتسنى وليد.. 10 دالليل ومزال مجا مقدرتش تصوني عليه دازت ساعة حتى سمعت الساروت بقات متكية كتسنى يدخل.. شحال تسنات عاد دخل ونيشان للحمام..فكرت شحال واخا عنادها وكبرايائها كيقول لا ولكن ناضت جبدت ليه حوايج شنو يلبس باغية هادشي يسالي 3 ايام وهي فحرب باردة معاه وهاد المرة الغلط ديالها وبشدة...
خرج لاوي فوطة حتى كتبانلو واقفة هازة حوايجو مطويين شاف فيها هز لحوايج من عندها وبقا كيلبس وهي عاطية بظهر)
نسخن ليك لعشا؟!!
وليد: (ببرود) واخ.. (مشا كيطل على بنتو للي ناعسة وهي هبطت للكوزينة وقف شاف فلباب باغي يسامحنا ولكن حس براسو وكرامتو ورجولتوو تهاانو معاها مقدرش يخطي خطووة كما كيدير كل مرة غلطت معاه حيت هاد المرة حس بقلبو تضر..
هبط لتحت لقاها كتحط لعشا ديارة لازانيا اكتر أكلة كيحبها.. جلس حطاتلو حقو وحداه كاس عصير ديال لافوكا بفروي سيك..) نتي متاكليش
هند: مافياش.. (تسانتو يرغبها تاكل ساعة حنا راسو كياكل وهي كتشوف فيه.. كمل شرب العصير وناض غسل فمو وتم طاالع) ولييييد
وليد: (طالع فدروج) ماشي دابا اهند
هند: وفوقااااش راه عييت بهاد البرود ديالك وليييييد ولييييييد
(تمت طالعة تابعاااه دخل لبيت ديال ضياف) واش مغنهضرووش
وليد: (جلس فوق النموسية) معندي منݣول للي غيخرج من فمي غير العصبية وانا مزالني معاك ولد الناس وماباغيش نݣول شي حاجة للي ضرك
هند: وانا ماشي بنت الناس معاك
وليد: متݣولينيش شي حاجة مݣلتهاش
هند: نتا معندك متقول انا عندي منقول
وليد: ݣولي
هند: اولا ممنحقش تعزل لفراش ديالك انا ماشي حرام عليك باش تفرق فراشي وهدا كان اتفاقنا نهار اللول الله غلطت معاك وبزااف ولكن ماشي لهاد الدرجة... حتى نتا شحال غلطت معايا وسامحتك
وليد: متݣلبيش كولشي علية ولا خديتيها عادة وولفتي
هند: مقلبت والو انا غلطت اه ولكن
وليد: مكاينش ولكن غلطتي ونقطة ورجعي لسطر..
هند: منستاهلش هادشي كامل منك
وليد: (حرك راسو باه) كما العادة نتي ديما مظلومة وانا للي ظالم
هند: (تنهدت) حتى لمتى نبقاو هاكا
وليد: معرفتش
هند: خاصك تعرف حيت نتا دابا للي متحكم فنوع العلاقة للي بيناتنا
وليد: هند... انا دابا معصب منك متخلينيش نغلط فيك بشي هضرة متعجبكش ومتعجبنيش
هند: (مشات من تماك.. وهي كتنهد دخلت لفراشها مفقوسة مخنوقة حتى كتسمع لباب تحل.. دخل طفى الضو وتكى فبلاصتوو عاطي بظهر.. عاد رتاحت شوية كل واحد عاطي بظهر وكيفكر...)
أصبحنا وأصبح الملك لله... (فاقت أمال لقات زوهير مشا للخدمة مشات لدار الحاجة كانت خوات واخيرا تهنات أمال من عيشة جمعات الدنيا سيقاتها من لفوق لتحت اما لغدا غيتغداو فدار لكبير.. وصلت لتحت باش تسيق بلا متحس قاست باب الدار بالكراطة كملت التسياق حتى حل أنوار لباب لقاها كتسيق)
انوار: صباح الخير
أمال: سلام
.أنوار: كيف صبحتي مليحة؟!!
أمال: (مكتشوفش فيه مكملة التسياق) الحمد لله
انوار: لبارح دازت خرجة زوينة ياك عاقلة على داك ريسطو
أمال: (شافت فيه) واه عاقلة مشيتلو انا وزهير قبل.. قبل منتزوجو
انوار: اممم مكانش زواج تقليدي
أمال: لا..
انوار: مزيان الله يكمل بالخير
أمال: امين ويبعد علينا ولاد لحرام (قالتها وهي كتشوف فيه.. تبسم وهنا كنحس باستفزاز كبير منو) أماااااااال امااااال
انوار: مالكي؟!
أمال: مالي كان فلبانكا والله يخلف على شي شفارة جاو جمعو فليسات للي كانو وهربوو
انوار: (بصوت خافت) انا ݣلتلك نرجعلك فلوسك حتى مضوبلة الا بغيتي غير كفاش؟!!!
أمال2: (جات عندهم من بعد نبدلو ولبست قفطان) سلام ختي أمال ياكما نعاونك
امال: صباح الخير.. لا معندك فين تعاونيني غير عيطتلك أنوار ݣالي فين تبغي يديك هاد لعشية زعما بلايص كنا نمشيو ليهم انا وعمكم (قالتها وهي متبسمة) ݣلتلو مكانش ما حسن من سعيدية سيرو لعشية وغدا عاد رواحو عجبو الحال وݣالي نݣولهالك انا
امال2: (فرحت) مزيااان
أمال: اوا هانا اخويا ݣلتهالها شتي هاد لغزييولة متلقاش معاها المشكل راه ربي عطاك جوهرة فين تخبع نحاااسك
انوار: (درع أمال2 بيد وهي حشمت فرحانة) عارف
أمال: (ميقت فيه وكملت التسيااق قبل ميجي زوهير يحيح عليها... وهوما دخلو لدارهم)
انوار: نتغداو ونروحووو..
امال2: هه عجبني الحال بزاااف
أنوار: (تبسم طلعها وهبطها) سالة العرس لاش مزال كتلبسي فلقفاطن
امال2: (تحرجت) ها... حييت حيت زعما الا جا شي ضييف
انوار: القفطان لبسيه للضيف ماشي لية انا.. مهم انا غنمشي للمحال عند بّا نقضي شي صواالح ونرجع معاهم
امال2: واخا الله يسهل أموورك
أنوار: امين... (دخل لبس حوايجو وهي كتشوف فيه مبهوورة بوسامتو ولكن باش نافعاها هاد الوسامة وهو ساد عليها مكيتغزل مكيحب فيها رش بارفان للي وصلاتلها للرية ديالها كتسناه يبوسها هز سوارتو بزطامو وزاد.. مخليها غير كتشوف جمعت شعرها دارت شالها وهزت سوارت ديال الدار ومشات لدار عمها تونس مع بشرى للي عيطات ليها تجي...)
أمال: (عيات ترغب وتفنع هند باش تجي تبدل الجو عندهم مابغاتش) واش تبقاي وحدك وليد حتى الليل عاد يجي
هند: والله اختي مرشقالي الا جيت غير غنمرضك معايا حيت مابغية حتى ذبانة تزنزن علية والله غير خليك
أمال: اجي وجديلو شي حاجة راكي عارفة وليد
هند: معرفت... المشكل هاد المرة مفيتحلش بداكشي
أمال: والله زوهير كنكون موصلهالو لعظم وغير داكشي كيقضي الغراض
هند: (تنهدت) والله معرفت عرفتي دوك الناس للي كنت بادية الخدمة معاهم كيصونيو باش رجع بقاو فية مساااكن
أمال: وهاكا شرحي لوليد شتي هو متفهم
هند: وراه تنعرفو متفهم هو المشكل ماشي فالخدمة ولا ففيصل المشكل للي عندو علاش قلتها لبابا وماما وغير كذبت يعني ماشي حتى قلت الحقيقه
أمال: انا فاهماااك عمرهم سولو فيك ومنين سولو جرااتك العاطفة وبقيتي غير كتهضري
هند: الله يرحم ليك الواليدين بعدا كاين للي فاهمني..
أمال: وراني فاهمااك نتي خاصك تفهمي هادشي لوليد وطالب سماحة منو
هند: نشوفو هاد العشية.. يمكن ندير داكشي للي قلتي
أمال: وانا نجي ناخد غيثة تبات معايا
هند: زعما؟!!
أمال: باش تنفاردي على خاطرك هههه
هند: هههه مكاين غير ******
أمال: احاااي على هاد الماسخة.. (متهنات حتى ظحكتها شوية.. ناضت لبست حوايجها خدات الاذن من عند الحاجة مشات لعند هند جابت البنت عندها وخلات هند كتوجد راسها لوليد وتقاد الاجواء الحميمية باش يتناقشوو ويحدووو هاد السلبية للي ولات بيناتهم...)
زهير: (كان جالس مجمع مع وليد للي سد المحال مع 7 دلعشية) شي خبار على محمد
وليد: واالو مسكين راسو غير كيدووور
زهير: الراس للي ميدور كدية
وليد: قاسحة يا خويا تجمعتلو من كل جيييه... (كان جاه اشعار هادي 2 سوايع بابيل من امال لهند ولكن مقدرش يسمعو حيت كيبقى حرمة ديالهم وفنفس الوقت كان بغا يعرف شنو غتقول هند خطفلو زهير التيلليفون) اراااااا اصاااحبي
زهير: (قلب على ديك الابليكاسيون دارلها ديزانسطالي وعطاه التيليفون) كالما شوية
وليد: علاه مسحتيه راه صعيب دابا باش نعاود نݣادو
زهير: واش غتݣاد؟!! هادشي للي راك ديرو غير لحمااق الطفلة مبقاتش خدامة تم صااافي لاش باغي تغرق
وليد: (بقا سااااكت) ݣلبي مصفاااش
زهير: فهمناك مرضيتيش وشحال من حاجة ولكن راه بزاااف لا نتا مرتاح لا هي مرتاحة والمشكل مجلستووش تحلو امووركم
وليد: دابا مݣادش حيت ݣلتلك ماااا مزال كتحرݣ فية.. (بقاو كيهضرو حتى ناض وليد مشا فحاالو زهير ضربت 9 سد المحال.. داز خدا شي سخرة كانت موصياه أمال عليها ومشااا طلع لدار الحاجة لقى غير أمال والحاجة غيثة ومروان كيلعبو حدااهم)
زهير: السلاااااام عليكم (داز باس الحاجة فراسها ويدها وأمال مداتلو حنكها.. داز لوليدات باسهم) هند هنا؟!!
أمال: لا جبت غيثة تبات معانا
زهير: الدار داارها ويا لالة غيثة (هزها كيلعب معاها ويظحكها) مزيينها بنية.. نوضي امول حطينا لعشا.. اجي وكفاش هند تبقى وحدها وكان جات حتى هي تبات
أمال: لا ماشي بوحدها
زهير: معاها مالين دارهم؟!!! (تبعها للكوزينة حط الميكة)
أمال: ولااااا راه بغات تجمع هي ووليد باش يتصالحو
زهير: وليد راه درك فدارهم مشا لتاوريرت ݣبيييييل
أمال: احاااي؟!! تاوريرت؟!!
زهير: مفخباريش هند؟!
أمال: مݣالتليش وكان فخبارها وكان عيطاتلي... تأ... (حطات يدها على خدها حيت عارفة صاحبتها غتقلق) وعلاش مشا ياك حتى لغدا عاد ݣلنا نمشيو مع اشرف وزعما خلاها هي ولا مبقاتش محسوبة عليه كا دار فيها ميصلاح
زهير: (بقا غير ساكت حيت للي فهمو وليد ان هند فخباارها.. حيت عارفو مكيخبع والو عليها) عيطيلها نجيبها تبات
أمال: موحال واش تبغي بففف (هزت تيليفونها من الجيب وصونات على هند)
هند: وييي أمولة
أمال: جا وليد؟!!!
هند: مزال يا ختي تعطل جا زوهير؟!
امال؛ (دارتلو حركة انها مفخبارهاش) وليد مشا لتاوريرت عاد ݣالهالي زهير... الووو... هند.. هند
هند: انا معاك
أمال: ها هو زهير يجيبك تباتي معانا
هند: لا لا.. غير خليني مهم خلي حتى غيثة معاك (بغات تهضر امال) أمال مقابل للي يهضر اختي حتى نولي نصوني عليك... (قطعت شافت داك شمع لي شعلت والطبلة للي كولها ورد حمر وبيض وطباسل كيسان كولشي مأنتك.. شعلت الضو وبقات غير كتشووف....)
انوار: (كان مشا لديسكو ديال لوطيل فين جالس هو وامال2 شيش مزيااان.. شيش وعقلو خداام عقل للي كيقولو بدا حياة جديدة وقلبو للي ممطاوعووش ولكن خدا قراار حيت أمال كتكرهو ديال بالصح شيفاه واحد ماااسخ حداها معندو حتى شي قيمة... خلص وطلع لشومبر ديالو مع دخل كان الضو مشعول وأمال2 متكية فوق النموسية مكمشة حيت باينة عيات وهي كتسنااه وللي لفت انتباهو اول مرة يشوفها لابسة شي حاجة قصيرة شاف فرجيلاتها لعريانين شعرها للي على وجهها حتى فالدخلة ومحنززش فيها هو براسو ديك الدخلة معرف كيف دار ليها..
تفكر دعاء كانت سيكسي بزاف شحال من مرة نساااتو فامال ولكن كانت كتعرف ومتعودة جلس كيشوف فيها حيد شعر من على وجهها قاسها فحنكها وهي تنوض قافزة جلست... هز يدو بحال مستسلم وتبسم) غير انا ابنت عمتي
امال2: أنوار!! شحال تسنيتك
أنوار: تلاݣيت شي دراري ومبغاوش يطلݣوني جيت غير مخبع
أمال2: هه مزيان
أنوار: وݣفي نشوف؟!
أمال2: شنو تشوف
أنوار: راه عطيناك 3 ايام ماشي معناتها صافي غنبقاو نعسو بحال لخوووت
أمال2: (حشمت بزاف) اويلي
انوار: هه وݣفي نشوف (وقفت مترددة وهي كظحك بحال لهبيلة ممتيخلاش ولد عمها كيشوف لحمها.. كانت لابسة بينوار ولكن مشبك) حيدي لبينوار
امال2: هاا... طفي الضو
انوار: ههه هدا غير لبينوار ونطفيو الضو اوا الا ݣلتلك حيدي سليب واش ندير؟!!
أمال2: انوااااااار..
انوار: (تكى على النموسية) حيدي لبينوار نشوف لطاي (حيداتو بشوية وهي حشمانة بقات بغوب دونوي بخويطات مشبك فجناب جاي مسانتري من لفوق والفخصر بحال شي صاية طلعها وهبطها كيشوف صدر للي كان صدددر نيت والفرقة باينة... لفخيضات حتى هو عامرين كانت طايتها زوينة.. اللون ديال لحمها كان ما بيض ما سمر عاد شعر كحل مطلوق واصل لنص ظهرها ودايرة غير عكر.. شاف فرجليها صباغة وحتى فيدها يعني مقادة ليه مزيان)
بوݣوووصة ابنت عمتي
أمال2: ههه (دارت يدها على وجهها حشمانة وكظحك.. هنا هو جمع الظحكة حيت هاد الحشمة وهاد التصرفات نفسهم نفس تصرفاتها...
واخا هكاك كيحاول ميفكرش فشي حاجة اخرى من غير مرتووو.. ناض اتجاهها باغي يخدم طريقتو فالغزل فين خاصو يحط يدو شنو كيقول خلاها عجينة بين يدو ناسية الحشمة وكولشي حتى لبوسة كان اول واحد وبااااينة نعس معاها واخا معدمة ولكن دغيا كتنسى داك الألم وكتستمتع بداك الحب للي عطاااها... كمل وبقاو مرخيين بجووج عاد هي وعاات ولكن نعاس غلبها...)
نعيمة: (استغربت مجية وليد بلا هند للي قالها غتلحق مع أمال وزهير والحاجة.. تيقااتو صونات على هند مجاوبتهاش ظن منها انها نعست.. اما وليد دخل عند باه للصالون حيت حيح عليهم هاد نهار على هاد زواج للي كيسميه فاااشل ومعندو معنى وديك لبنت على شيماء معتابرها ميتة...)
وليد: بّا راه ربي سبحانو هو وكيسامح العبد على ذنوووب كبيييرة ونتا للي بنتك ندمت واه هي غلطت وبزاااف ولكن راه خدات حقها ومزيااان
احمد: (بانفعال) واش خدات؟!! هي بقات فوجدة مرحة تم وحنا هنا حانيين راسنا ݣدام عيبااااد الله واش خدات؟
وليد: خدااات وداك شمااتة
احمد: متݣولش عليه شماتة سمو دارلك باش تاهمووو بلعكس طلݣ ديك المسخوطة بلا شوهة حتى دارهم معارفينش السبب ولدااابا مزال يسولو علاش ولدهم تجوج ووالد وهوما مزال باغيين يعرفو غير علاش
وليد: واه هو شماتة نكولك سمو دار حسن اولا مطلݣ لبنت وكاتب قبل البناء وهو داااخل عليها ومكرفس عليها
احمد: (غير كيسمع واخا وليد جاتو فشكل يهضر مع باه فهاد المواضيع ولكن خاصو يفهمو شنو داز على شيماء على الله وعسا يحن شوية فبنتو للي سخفت ليهم بلبكى وداوها لصبيطار فين عرفوها حاملة تماك باهم صعر بحال الفلم تعاود من اللول..)
وليد: ضربها بمووس دارت كتر من 20 غرزة وشقفها فراسها دارت 3 دلغرزات بلا الضرب ولحمها للي لدابا مزال لاطراس فيه..
احمد: وعلاه ضربها؟!
وليد: شنو ما كان سباب ميضربهاش سبب ياك كان بغا طلاݣ يطلݣها يدير الشوهة ولكن ميضربها ضرب للي خلاها مشوهة (مبغاش يقول فين)
احمد: وعلاه ضربها؟! وليييد نتا راجل وهو رااجل راه باين وواضح كولشي
وليد: انا والله منضرب داك الضرب وبّا راه خلاها عمرها تولد عادي ديما خاصها العملية
احمد: (فهم الضربة فين وهادي غير زادها وليد من راسو)
وليد: راه بنتك وخدام للي راك دافع عليه كان بغا يقتلها.. عطيني شي اية فالقران كتبين شيما خاصها لقتيلة وخلاه مليوحة فدمها وزاد..
احمد: ولبنت؟!
وليد: كفاش لبنت راه تجوجت وحملت من راجلها وولدات قبل الوقت بالخوف ولعصاب للي ركب فيها كانت غتموت جوج مراات ومن داك الوقت وهي باغيا تصالح وترضى عليها..
احمد: (بقا سااكت وليد عيا بالكذوب ولكن عيا حتى من هاد لخصااام هنا فكر فهند هي دارت غلطة ولكن راه كيبغيييها نسا موضوع ختو وبقا كيفكر فيها.. مزاد حتى كلمة مع بااه للي بقا جالس شحال وناض من حدااه... )
أصبحنا وأصبح الملك لله
نعيمة: (كنبغي تصوني على هند كتلقاه طافي عرفات كاين إن حتى ولدها متعشى مكلاه.. صونات على أمال لي عاودات ليها داكشي سطحي وللي مهم وليد وهند مناقشين باش دخل هي.. قلبت على وليد مكاينش صونات عليه كان لتحت مع باه طلع عندها شافها مكشرة)
مخلي مرتك وجاي؟!!
وليد: مّا!!!
نعيمة: شنو ما كان بيناتكم متخليهاش وراك هادشي للي علمتك
وليد: هي للي هضرت معك؟!
نعيمة: علاه مجربتيش تصوني عليها؟!
وليد: معرفت واش طافياه ولا مبلوكيااني.. بففف راسي غيتفركع
نعيمة: سمع اولدي المشاكيل كيكونو بين جوج والمشكل اللول للي كيكون هو كل واحد داير التاني انه ميثالي مكيغلطش ولا غلط كنحشبوه غلاط كبيييير... كنساو المحبة والمودة للي جامعانا وكنضربو كولشي فالزيييرو
وليد: هي غلطت معايا
نعيمة: ونتا غلطتي منين مخلي مرتك وجاء تحضر لمناسبة عائلية وهي مكيناش شنو زعما بغيت تنفيها!!
وليد: والله محسبتها هاكا
نعيمة: بااااز نسيت ݣاع شنو دارت معاك والوݣفة للي وݣفت معاك موݣفهاش خووك داوي وتديرلك خاطرك وسمحت فشحال من حاجة على ودك
وليد: (دارتلو تانيب الضمير ومقدرش يقول لمو شنو دارت هند مكيبغيش يضيع صوورتها ومقتانع المشاكل ديالهم كتبقى دياالهم هي عندها حق فامال صافي وهو زهير هدا كان اتفاقو نهار اللول..)
نعيمة: سير جيب مرتك وبنتك (خسرت كمارتها) محسابليش نتا هاك اولدي
وليد: مااااا
نعيمة: سير قبل مندعي فيك سامح فمرتو وبنتو وجاي يجري
وليد: (يتعصب من كولشي الا هي...) دابا يجيبها زهير وأمال
نعيمة: انتاااا للي غتجيبها ودرك
وليد: موحال واش تبغي تجي
نعيمة: ياك عارفها بعدا.. (صونات على أمال طلباتها تمشي عند هند للدار وفعلا مشاات عطات التيليفون لهند.. هضرت معاها نعيمة رغبتها وطيبت بخاطرها واخا هند بكات حتى شبعت ووليد كيسمع بكاها.. بغا يهضر ومخلاتوش مو حيت حساتها مقلقة.. رغبتها لدرجة الا مكانتش هي غتعيط لاشرف ميجيش حتى تكون هي... بقات غير كتشوف ووافقت تجي قاتلها يجي وليد يجيبك مابغاتش..)
وليد: نتووووما نساااااا ميݣد عليكم غير للي خلقكم... لحكاية انا للي مظلووم
نعيمة: غبر من ݣدامي درك أوليد
وليد: لا حول ولا قوه الا بالله العلي العظيم...
(صونا على زهير علمو باش يجيب هند معاه ورجع جلس حدا باااه للي مزال كيقنع فيه...)
أشرف: (كان فاق وجاب مرا خملات الدار مزيان فرش الكوفر جديد للي جاب وستف لي غوب دونوي للي شرا فبلاصتها داكشي للي شرا داه لواحد كيقادهم فصواني بحال طيافر غير هوما بلا قبة.. كولشي قادو وشرا الحنة الورد والفاكية والشكلاط للي لمحلو مول المحال.. شرا بوكي دالورد كبير خلا داكشي يقادولو بين صواني وبواطات مشيكين وحتى ذهب يقادو ليها ولبنتو على ميرد ليه الخاوي.... ومشا غسل طموبيلتو داز لسطاسيون عمرها بالمازوط ومشا عند مول المحال جاب الباليزات للي وصاه عليهم وحدة كبيرة وحدة صغيرة عاد داز خدا داكشي مشا للدار لبس كومبلي وهو كيموت على راسو بالظحك ماشي يخطب مرتو وبنتو للي قربت تقفل عماين حاضرة..
كانت فرحة غير طبيعية مخلطة بالدهشة والخلعة جبد مليون دارها فجوا زعما صداقها كان حط فهادشي فلوس ولكن عتابرو وااجب ودين على رقبتو.. وحس ان شيماء تستاهل وتستاهل كتر وكتر... صونا عليه زوهير انهم كيتسناوه لتحت هبط عندهم كانت طموبيلة ديال زهير فيها الحاجة أمال وهند وولادهم وطموبيلة ديال لكبير ومعاه ليلى كان اكتر حاجة مباغيهاش هو أنوار يمشي معاهم... بدا كيهبط داكشي وزهير مطلعها عليه بقا كيهبط معاه عمر الطموبيل لداخل وحتى لكوفر زهير حل لكوفر ديالو وراه جايب 18 دجاجة مذبوحة والزييت فورص مونادا وديسير كرطونة سكر قوالب... منو ومن الحاجة محس حتى عنقو بامتنان وعاد داك لكوفر ديال لكبير فين كان حولي مربوط تماك تفاااجأ بزاااف حيت مكانش داير يشري هادشي مكانش عارف شكرهم كاملين وبان انه عجبو الحال حتى لمعو عينيه فعلا لقا فيهم العائلة ومحسسوهش انه غير صاحب ولادهم... بقا غير كيشكر فيهم ويدعي معاهم)
زهير: بقالك شوي وديرنا طرح دالفقهة... تا سير خلينا نديماريو نحوسووو شوية حتى حنا
أشرف: انا ندوز لباتيسري نجيب شي حاجة.. (مشا لباتيسري كان دموندا طورطة و2 بلاطويات حلوة مشكلين وعاد دا كرواصة قراشل.. عمر الطموبيل وزادو فطريق بشوية حيت لكبير قاطعها فيهم اما وكان كانو بوحدهم وكان دارو الرالي فطريق... وصلو لتاوريرت بنشاط زهير والحاجة للي كتغني وتزرع كولشي ظاحك ناشط الا هند للي حظها كتبسم وكتحس براسها غير دخيلة عليهم.. هاكا وليد حسسها... وصلو لتماك كان وليد وخوتو ومحمد وحتى احمد للي هبطو وليد وأكترية منين قالو حتى لكبير جاي... أشرف مدهشر وبحال شي دمودومة غير مݣدمو زهير حيت خايف من ردة فعل باها... واخا هكاك سلم عليه وهبطو داكشي للي الجيران كيطلو مفاهميينش هاد دهااز لمن ومنين عرفوه من راجل شيماء للي شافوه مؤخرا.. سولو علاش واش غضبانة واش طلقها وبغا يردها.. بزااف دالأسئلة للي مغيجاوبهم حد حيت فتيحة للي كانت كتساار ومعارفة معاهم راها فالحبس..
وليد قشع هند مشا حداها بغا يهضر مشافتش فيه حطاتلو بنتو فحضنو)
هند: مجاياش عندك جاية لعند خالتي نعيمة لي طلباتني نجي
وليد: هادي راها داركم تجيلها بلا طل... (زادت وخلاتو تبسم وشاف فبنتو) شفتي احبيبيتي ماماك واش راهي دايرة فباباك
طلعو مݣدمين أشرف وكل واحد وشنو هاز من داكشي للي جايب والحولي دخلوه للݣراج وحتى احمد انتابه لهاد الخير للي جاب راجل بنتووو... وصلو لدار نعيمة للي استقبلاتو بالحليب وتمر فرح بزاااف وحشم دخل للصالون جلس وكولشي دخل مستفين شنو جاب معاه وكولشي كان مأنتك ومتييول ومشيك.. والريڤيطايما دخلوها للكوزينة... نعيمة عجبها الحال ولكن للي شاغلها بزااف هو هند للي دخلاتها لبيت وعنقااتها كتواسيها...
يتبع...
التعليقات
لا توجد تعليقات بعد، كن أول من يعلق.