محتوى القصة
أمال: (تحط لغدا مجاش زهير وانوار بقات غير امال وليلى وعيشة وبنتها كلاو فسكات حتى صونات الحاجة ابيل فيديو طارت أمال كتهضر معاها وعطاتها اخر الاخبار عاد خدات عيشة التيليفون من عندها دخلت البيت وهضرت معاها) والله بقا موضعها
ليلى: بزاااف
امال2: ݣاع مجاش أنوار لغدا واش جا دا غداه؟!
أمال وليلى تشاوفو.. ليلى فخبارها لبلان حيت أنوار عيطلها وتشكى
ليلى: مجاش ابنتي الا بغيتي طيبي ليه شي حاجة يبغيها وخليها ليه حتى يجيو من الخدمة وياكلها كما كدير امال منين يقرب زهير يجي
امال2: واش يبغي؟!
أمال: (هزت تيليفونها كتخرب فيه وكتاكل الديسر مكتبغيش دخل فموضوع كيكون أنوار فيه لا من قريب لا من بعيد...)
ليلى: اودي هو كيبغي ماكلة فشكل ماشي المرقة وهادشي
أمال2: واش يبغي انا غير ݣولولي واش نديرلو وندييير (طرطقت كتبكي) هو غضبان مني حتى الشوفة مراهش يشوف فية
أمال: (هزت عينها معجبهاش هاد الديكور.. بغات تهضر ولكن شدت فمها ملقات غير ناضت عند ولدها للي كيلعب خرجااتو لجنان كما كيوصيها زوهير تدي الولد يلعب فتراب ويتمشى ويلعب فربيع.. داتو وبقات جالسة معاه حتى صونا عليها زوهير باش تجي للدار حيت غيمشيو يشوفو فتيحة هزت يوسف للي تمرمد فتراب نفضاتوو كظحك ومشاو بجوج طلعت لدارها نيشان دخلات دوشاتلو دوش خفيف وحتى هي حيدت حوايجها تحايد العرق وريحة طياب خرجت لقات زهير دخل متكي فوق النموسية...) زوهير جيت؟!!!
زهير: امحاايني وشحال راني مدݣدݣ
أمال: (تبسمت حطات ولدو فوق صدروو عرياان وهي جلست حداه ببينوارها دلحمام) الا مݣديتش خلي حتى لغدا
زهير: لا نديك تشوفي مك.. (جبد حزام لبينوار حتى تحل) نرجعو بالليل؟!
أمال: (تبسمت) نرجعو (هربت وسدت لبينوار بقا كيلعب مع ولدو وهي ناضت لبست حوايجها وجبدت حوايج ولدها لبساتو لبيسة زوينة وختارتها بحال حوايج زهير باش يلبسو بحال بحال) فاش تكون عندي بنيتة غنبقى لبس انا وياها بحال بحال ونخرجو بجوج ونديرو كولشي
زهير: واه
أمال: حلف
زهير: على واش نحلف؟!
أمال: نخرج انا وبنتي
زهير: ها جنان خرجو تشقلبو حتى تشبعوو
امال؛ (كيعصبها) واش بنتي غنحبسها فالدار ولا نتا الراجل عندك يخرج ولبنت لا.. انا بنتي والله متعيش لغبينة للي كنت فيها
زهير: (شاف فيها ديك الشوفة ديال لا حولة)
أمال: هي مسكينة شنو دارت ليك باش تغبنها
زهير: يا بنت مّا واش عمري غبنتك نتي ولا حبستك باش نخلي بنتي هنا ونحبسها!! (حركت راسها بلا) اوا مال *** هاد لعشية (غير عرفاتو غيحيح دخلت للدوش هربت طلات وجهها ميكاب كتسمعو كيزعرط ويحيح حتى سكت عاد خرجت حانية راسها رشت بارفان خفيف دارت تش وحدة باش مينݣرش خرجو بجوج كانت ليلى حتى هي غتمشي ولسق فيه أنوار للي مقلهاش لمرتو.. مشاو فطريق مسافة ساعة وشي دقائق وصلو لتاوريرت.. هبط زهير تقدى شي حاجة عاد طلعو كاملين للدار ...)
شيماء: (صونات على اشرف) الو أشرف راه خرجت مرت عمي من الحبس
أشرف: على سلامتها
شيماء: واش منمشيوش راه مشات أمال وراجلها
أشرف: درك؟!
شيماء: غير نشوفوها راه ݣالتلي ماما ولات حالتها
أشرف: واخا شي ساعة ونجي غير هو راه غدا تابعني خدمة كتيرة وسلعة غدخل باش رجعو بالليل
شيماء: صافي واخا.. (قطعت مشات لبست هي ومريم وجمعت الدنيا باش تلقى الدار نقية جمعت تبديلة لمريم ودواها وبيجامتها جا نسات راه منفخة عليه مشاو لتاوريرت فجو الظحك مع بنتهم وكيخططو لعيد ميلاد يديرووه ويجمعوا العائلة حيت ولا كيعجبو داك الجو ديال العائلة..)
~~~~~~~~~~~
امال2: (شبعاتو بكى منين جا أنوار ومداهاش معاه)
عيشة: وا شوفيلك ولد النييفر غضبتو حارة هاد الولد
بشرى: دابا نهضر اعمتي
عيشة: دابا جاتني قاسحة نمشي لديواني ونخليةبنتي وحدها
بشرى: ها هي معايا اعمتي وراها فداارها غير سيري غنبقى معاها حتى يرجع
عيشة: ݣولو راني مقلقة منو والله مدار بوجه حد لبارح نوض الروووعة واليوم دار دشي حشمها مع مرت خالها... مدار بوجه حد
بشرى: درك نهضر معاه اعمتي
امال2: (تفقست بلمزيان حتى وجعها راسها تسالمت مع مها للي جا راجلها يديها وبقات مع بشرى راسها وجعها فاش مرض كان كيهتر غير بسميتها حتى فنعاسو معاها كيكون كينطق سميتها بطريقة فشكل كيوصل بحب لقلبها.. وشي مرات فنعاسو كيعيط باسمها... شافت فبشرى للي كتواسيها ) يمكن باقي يبغي مرتوو
بشرى: مرتو احبيبة منساهاش راه ماتت بواحد الطريقة خاايبة غتبقى عزيزة عندو وصاافي.. ولكن نتي راه مرتو وخاصو يبغيك ويقدرك
امال2: واش ندير باش يبغيني
بشرى: بقاي كيف ما نتي انا نهضر معاه....
أمال: (مع دخلو للدار جاتها فشكل دخلت للحمام للي جاي فالدخلة زهير دخل هاز ولدو تعرضات ليهم نعيمة ومحمد كولشي.. حتى شافت لباب تحل دخل وطرق لباب خرجت عينها ودموع فيهم) شنو كدير نتا؟!!!!
انوار: بغيت نهضر معاك
أمال: (بصوت منخفض) حل ولا غنغوت حل لباب...
انوار: أمال عفاك راه مݣاااادش نعيش فراااحة غير نغمض عيني نشووفك نعس نشووفك نتقلق نفرح عيييييت (عينييه برقووو) هادشي راه من نهار تفاارقت معاك (دمعو عينيه) والله مكنت باغي نتفارق معاك كنت باغيك غير تبعني (ضرب راسو بحال شي حمق) كنت حمااار حيت تبعت كلااامها واخا كنت عارفك كيف دايرة (بغات تحل لباب بغا يشدها وهي ترجع اللور خاايفة ولكن مخرجة عينها) انا غلطت معاك بزاااف
أمال: وشنو كتسنى نخلي سييدك ونجي عندك
انوار: لا... (حنا راسو كيحاول يجمع هاد المشاااعير وشاف فيها مقهووور) عارف صافي انا ويااااك مستحيل نكونو بجووج
أمال: عمرنا كنا شي حاجة سميتها انا ويااااك
انوار: كنت نبغيييك نتي اول وحدة بغيتها وعمرني نسيييتك ولا عمرني نسااها
أمال: (معصبة) حل لباب
انوار: (بقا كيشوف فيها وقلبو كيتقطع.. وقف جامع انفااسو بعد من حدا الساقطة بالزربة حلات لباب وخرجت مكان حتى واحد خرجت نعيمة من الكوزينة)
ليلى: مالكي
أمال: واالو فينها ماما واش فبيتها كيف راها
ليلى: حالتها ابنتي غير دخلي طلي عليها (مشات أمال وهي كترجف خافت بزاااف جات ليلى باغا دور ترجع للكوزينة تكمل توجد كاسكروط حتى كتشوف أنوار خارج من طواليط ونيشان خرج.. بقات غير كتشوف وتكذب عينها ان أمال خرجت من داك طواليط للي مكملاتش حتى 2 دقايق وخرج هو!!!!!)
انوار: (هبط لتحت دخل لصاكا كان نبيل هو للي كيبيع حط 40 درهم) مالبورو
نبيل: (كيتأكد منو) نتا ولد خو زهير
انوار: واه.. (قلب وجهو معندو خااطر مفهمتش كيف دار ولا علاش وكفاش... خدا لباكية جبد ݣارو) بريكة الله يحفظك (عطاه شعل وخرج براااا مكانش بغا يدير هادشي وندم علاش دارها....)
أمال: (دخلت للصالون كانو مجموعين فيه وحتى شي وحدين من العائلة كتقلب بعينيها بانتلها مها فالوسط ضعيييييييييييفة لابسة جلابة جاياها كبيرة وجاتوبحال شي مدربلة.. خلاها أنوار كترجف معرفت مدييير حتى جات عندها نعيمة للي قاستها بكتفها وتماش حدا مها حنات سلمت على مها بربعة دلبوسات) الحمدلله على سلامتك اماما
فتيحة: (غير كتشووف.. هزت عينها فامال شافت فيها شحال حتى توترت معرفت مدير وحنات عينها)
أمال: حم واش راكي لباس؟!!! (لا رد) اممم نجيبلك تشوفي مروان؟!
لعيالات تماك كيشوفو اصلا مجاوبت حد حتى محمد ولدها مجاوباتوش جات نعيمة نوضتها وداتها لبيتها حيت جابو ليها طبيب... أمال معرفت مدير كولشي تجمع عليها تبعاتهم لبيت شافتهم نعسووها دخل طبيب وبقا معاها محمد كيشرح الحالة حيت مرة مرة كتجيها السخفة بقلة الماكلة... بقات واقفة برا حتى جا زهير
زهير: وين كنتي؟!!
أمال: (شافت فيه والخلعة فيها وعينيها غير مزعزعين) ها
زهير: مالكي؟!
أمال: معرفت بقات فية (بلعت ريقها)
زهير: (دار يدو على كتفها كيواسيها) نشالله كولشي يكون بيخيير
أمال: ان شاء الله.. (بقات غير صااقرة حتى شافت أشرف داخل هو شيماء) جاو.. (بقاو مجمعين حتى خرج محمد علمهم باش غيدير فتيحة لصبيطار باش يدوزو ليها السيروم.. جاتها لبكية تخنقت حست براسها خانت زهير واخا هي مدارت واالو رجع هاد السر تقيييييل على قلبها ولكن ميمكنش تقولو واالو راه غتخرب حياتها وحياة ولدها وزهير والحاجة هاد العيشة والحياة للي عايشااها ميمكنش تفرط فيها ولو بالمووووت..
شنو للي غيخلي أنوار يبعد عليها وسوس ليها الشيطان تقتلو تهنى ركب فيها الاعصاب كفاش عطاه خااطرو يشدها فطواليط لتاني مرة كيعاودها... المرة اللولة فاش كانت صاحبتو والمرأة التانية وهي مزوجة... زهير شافها تلفت وصفووريا طالعة معاها... بقات فيه جا محمد من صبيطار ودا خالتو تبات معاها)
أمال: نمشيو؟!
محمد: جلسي بقاي معانا
أمال: (شافت فزهير معرفتش علاش مقداتش تفرق عليه) حتى رجعو مرة أخرى اخويا
محمد: غير خليك
زهير: تبغي تبقاي؟!!
أمال: نمشي.. (محمد بقا فيه الحال ولكن سكت زهير عجبو الحال وأمال مكانتش مرتاااحة بغات تبقى غير مع زهير... )
زهير: ياله نهبطو (هبط محمد ميمشيو حتى يتعشاو) معليش راه مزال مخربقة فدمااغها انا الجمعة فصباح نجيو
محمد: نشالله الدار دارها تجي فوكما بغات... كولشي ديالها
زهير: عااارف.. غير عذرها وصاافي.....
أمال: عفاك أنوار بغيت غير نهضرو راني ݣاع مفهمت شنو هادشي كدير معايا
انوار: (ببرود مكيشوفش فيها) معرفت واش للي مفمفهومش عندك انا هادشي ديالك ممرتاحش فيه
أمال: (كتبكي) ياك نتا نهار اللول کلتلي كتعجبني هاك مبغيتكش تبدلي
انوار: واه ݣلتها.. ولكن منين مكنتيش تبغيني ولكن دابا منين وليتي تبغيني خاصك تريحيني
أمال: (قلبها بحال كيتقسم على طرووفة وكتشوف فيه) منݣدش ندير معاك شي حاجة
انوار: علاه؟!
أمال: (نفسها كيبغي يتقطع) حيت حراام ياك ݣلتي غنتجوجو
انوار: جواج جواج واش دوك العقد للي فحيااتك مخلاوكش تكرهي جواج
أمال: (غير كتبكي)
انوار: صافي روحي دخلي فحاالك حتى نصوني عليك بلاتي
أمال: (عارفاه مغيصونيش حيت مبقاش كيهضر معاها بحال اللول.. والا هضر كيهضر غير على السكس ومكيكونش تجاوب معاها وكيطلعلو الدم حتى كيقطع.. هنا قررت صافي هو معمرو غيرجع يبغيها ويكون ضريف معاها بحال اللول... حنات راسها ودخلت لسيتي ضارت لقاتو مشا فحالو.. بقات غير كتبكي مسخاااتش بيه وبنات عليه بزااف دالاحلام الوردية)
غوت يوسف وهي ترمش عينها بزااف دلمرااات شافت فولدها ساااهية تفكرت شنو دوز عليها أنوار ودابا الدور للي عاشتو كيعيشو هو بقات كتراري بولدها وطبطب على ظهروو حيت بغا ينعس.. شافت زهير ومحمد مزال كيهضرو... تنهدت اخر حاجة باغيااها هي تولي تشوف أنوار.. جات ليلى جلسات حداها شافت فيها وتبسمت...
عييتي
ليلى: (مدارت حتى شي غياكسيون) شوي ابنتي خليت جاد وراه هبل بشرى
أمال: (حركت راسها باه وبقات ساااكتة)
زهير: (طلع للطموبيل صونا على انوار) فينك اصاحبي ؟!!! شحال وحنا نصونيو تيليفونك طفا
انوار: جيت للدار
زهير: فوجدة؟!
انوار: واه... (كان كيشخر بنيفو بحال ضاربو البرد) راكم جايين
زهير: واه.. (قطع ضار عند امال دارها إشارة تجي حداه شدات ليلى يوسف وجلست أمال حداه) راح فحالو
أمال: امم
ليلى: وعلاه جا من اللول
زهير: اودي من اللول مبغيتوش يجي ولكن مجاتش كل مرة نݣولو لا ومخلي مرتو وحدها
ليلى: اوا الله يهديييه وصاافي...
محمد: (بقى فيه الحال على أمال للي مبغاتش تجلس فبالو ياك عتاذر وتبدل علاش مبغاتش تبقى وطلبها يعني كان باغييها ومحتاجها تبقى.. جلس هو ومريم كيهضرو) معرفت علاش مبغاتش تجلس واش ماشي دارهم حتى هنا
مريم: عذرها امحمد حتى هي مسيكينة مدازش عليها ݣليل
محمد: ولكن دابا راها معايا مكان للي يهضر معاها وأصلا مبقى حد يهضر معاها كان غير يانا وهي
مريم: معلييش غير مع الوقت تولف
محمد: نشاالله...
~~~~~~~~~~~
هند: معرفت ابابا منقدرش نقولك واش اه ولا لا
اب هند: علاش ابنتي واش ممنحقيش نعاونك حتى انا
هند: ماشي هكاك ابابا غير هو وليد بغا يتكلف بكولشي راك شفتي المشكل للي وقع قبل
اب هند: انا نهضر معاه
هند: لا.. مدخلنيش فهادضي ابابا وليد نفسو حارة بزااااف
اب هند: راك بنتي وعندي الحق فيك حتى انا متقولوش شي حاجة ديال لحماق
هند: (بقات غير ساااكتة حتى عيطولهم لعشا خرجو كان وليد مجمع مع خوها من باها للي عايش فسويسرا...)
~~~~~~~
أمال2: (غير شافت أنوار من السرجم طارت خرجت برا) انوااار
انوار: (ضار عندها) وي
امال2: مالك؟!
انوار: مالي!!
امال2: مشيتي وخليتيني بوحدي
انوار: مالكي بزة؟!
امال2: لا.. حم نوجد ليك لعشا؟!
انوار: لا غير روحي تنعسي
أمال2: أنوار واش درتلك شي حاجة خايبة؟!
انوار: (معندو خااطر) لا
أمال2: اوا مالك معايا؟!
انوار: أمال عفاك قيليني عليك درك بغيت غير رتاح شوي.. روحي لدار انا درك نجي.. (خلاها واقفة جبد تيليفونو صونا على صاحبو لي ساكن قريب) منعم طير جيبلي 2 قراعي... واه.. لا جيبها للدار مݣادش نجي عندك ونعطيك فلوسك.. (قطع وعول يكبتها هاد الليلة...)
انوار: (شد دوك لقراعي مد ليه 200 درهم) حتى لغدا ونضور معاك.. (دخل هاز ميكة (بلاستيك) كحلة مشا لجنان نيشان.. جلس فوق ربيع بطريقة عشوائية طالع ليه الدم.. محملش داك الديكور كفاش دار داك الجييست وكان شافها شي واحد خوها ولا زهير ولا ولاد عمها كفاش تجرأ.. همو الوحيد هو غتزيد تكرهوا كتر وكتر فتح لميكة باغي يجبد قرعة وهو يسمع خطوات خبع داكشي وهي توقف عليه ختو)
بشرى: خويا واش راك دير هنا فظلام
انوار: باش عرفتني هنا؟!
بشرى: مرتك لي عقلها غيسكت بلبكى واش أنوار مزوجها باش تعذبها
انوار: نطلݣها
بشرى: (سكتت شحال) شحال ونتوما عاقدين شهر ولا كتر دابا عاد بانلك طلاݣ
انوار: واااا الرب العااالي ياو تسكت شوي راه طلعتلي فصحتي بداك لبكى ونوااااح كلمة جوج تبكي شافتني طالعلي الدم تقيلني غير شوي عليها وهي للي هامها غير المظاهر وتبان راها مزووجة
بشرى: ومكتسولش راسك علاش هاد لبنت غير تبكي؟!
انوار: وانا سباب؟!!!!!
بشرى: واه اخويا نتا سباب فهمني حاجة واش باغي منها!! الطفلة تبغيك علاش باغي ضيعها واش باقي كتفكر ف
انوار: هي مزوجة واش نفكر فيها
بشرى: راني نهضر على دعاء الله يرحمها
انوار: (بقا سااكت مضور وجهو مخنووق حاس برووحو قاجاااه فحلقوو) واش مرانيش مهلي فمرتي؟!
بشرى: لا عرفتي تعطي مال الدنيا والدين ولكن باش عقلك يبقى مع غيرها راه الموووت ونتا حي
انوار: حتى يانا ميت حي ومبلع.. (زفر زفرة طويييلة) فينها ليلا
بشرى: راها مع مرتك كتنعسها مرتك للي مݣادش حتى تشوف فيها مراعية لبنتك من ماكلتها وشرابها وتبع ليلى وتسولها شنو بغات وشنو كتبغي ونتا هادشي مكتشوفش عااايش غير الماضي
انوار: بشرى ختي خليني وحدي
بشرى: انا نخليك اخويا غير الله يهديك على بنت عمتك متستاهلش هادشي (مشات وبقى تماك غير كيشوف لاح راسو على تراب كيشوف فسما سمع طموبيل عرفها ديال زهير ناض خبع ديك الميكة ورا دارهم من مور غريسات ديال البسباس.. مشا كينفض شورطو لقاهم هبطو شاف فامال مع هبطت حنات راسها طلعت للدار ولدها وسمحت فيه)
زهير: هيييييي هييييييه (شاف فليلى) سمحت فكولشي
ليلى: ههه مسكينة عقلها عاامر (طلعات الولد وتبعها زهير) امااال
أمال: انا فالدوش اخالتي ليلى
ليلى: (شد عليها الولد) تمسو بخيير نمشي نلحق خووك (بقاو كيظحكو هي مشات وزهير دخل الولد لنموسيتوو حطو فيها طلق الريدو عليه المشبك وهو دخل الكوزينة شرب كأس دلما وهي خرجت جات حداه تشرب)
زهير: واش بيك اعمري (جارها شادها من خصرها)
أمال: (فيها لبكية) واالو
زهير: بيك شي حاجة
أمال: معرفت بقات فية ماما ودخلت للدار جاتني فشكل
زهير: الجمعة رجعو نشالله (قرسها فحنكها) سيري رتاحي انا جاي (وصلها لبيت) جبت ليك داكشي للي يعجبك
أمال: (تبسمت شافتو مشا) سد معاك لباب بالساروت...
هند: وليييد (كان بغا ينعس اول مرة مشا لدار نسابو فسعيدية رتاح حيت لقا اجواء كما بغا ماشي بحال فاس للي كيحس بعائلة ماماها محاملينوش وكيحسسوه انه اقل اقل قيمة ومتخلف وهند غير تزطمت فهاد التزويجة) وليييييد
وليد: سمو اهند!!!
هند: نعست؟!
وليد: (باقي مغمض عينيه) هند واش مفيقاني من نعاسي باش تسوليني واش نااعس
هند: صافي غير نعس... (عطاتو بظهر وبقات كتفكر فكلام باباها وليد تزير شوية أكترية المحال شراه ماشي غير كاريه ولا راهنو والماتريال غالي شوية مبغاتش يحط فلوسو كاملين فيهم راه باقي تابعو شحال من حاجة.. غمضت عينها ونعست على أمل تقنعو فصباح...)
~~~~~~~
امال2: (كانت فحيرة خاايبة وخوف كبير من أنوار وعلاقتها معاه للي من نهار دخلتهم مشافت نهار مقاد معاه لقاتو صعييييب فذوقو بزااف حتى حاجة مكتعجبو فيها كيشكر زينها ولكن تعاملها معاه ديما مكره منو لدرجة مبقاتش كتعرف تصرف على طبيعتها وحتى التمثيل باش تعجبو معرفااتش... سمعات لباب تحل مدة عاد دخل لبيت نعاس مكانتش هاد المرة قدات راسها بقات بيجامتها صيفية عادي حيد تيشوورت بقا عريان لفوق وتكا مكيشوفش فيها) انواااار
انوار: أمال يرحم والديك بلعي فمك شوي
امال2: (شدات لبكية) غير ݣولي واش ندير ونديرو
انوار: (حط يدو على راسو بمعنى صدعاتو) بفففف.. (ضور راسو عندها) واش خاصك درك
امال2: (طاحو دموعها) بغيت غير نعرف مالك معايا منين محاملنيش هاك لاش تزوجتني
انوار: (بقا كيشوف فيها حدر راسو جلس وتقابل معاها) سمعي انا غير الخدمة للي راهي مبرزطاني
امال2: (دغيا مسحت دموعها) ولكن نتا تغوت وتعصب علية
انوار: هدا هو زواج نهار ظحك ونهار عصااب
امال2: (فنفسها من نهار تزوجنا ونتا هاك) انا بغيت غير نعيشو مرتاحين انا (حدرت راسها) نبغيك بزاااف
انوار: هي الا مبقيتيش تبكي كل منهضر معاك وداكشي ديالنا متبقايش تشكي على الناس هادشي للي كيمرضني حتى تخليني منعاودش نشوف فيك
امال2: (بقات كتشوف فيه) نتا باقي تبغي مرتك
انوار: (رمض ببطئ متفكر صورة دعاء ظحكها وحيويتها ورومانسيتها) الله يرحمها مجاتش تغيري من وحدة ماتت
امال2: لا
انوار: صافي نعسي درك غدا جمعي حوايجك نتي وليلا نمشيو نحوسو شوية
امال2: بالصح؟!!
انوار: ومالي نكذب!! ياله طفي علية داك الضو راه داز عندي نهار م*** (خرجت عينها من تخصار الهضرة طفات الضو وهو غمض عينو ودار ذراعو على راسو وكيتعاود فمخيلتو غير شنو وقع....)
انوار مع صبح زرب على امال2 جمعت حوايجهم دغيا عيا مع ختو تمشي معاهم مابغاتش بحكم راجلها جاي عندها مشا هو ومرتو وبنتو متوادع مع ليلى فقط للي مبينت واالو..
هند ووليد شدو طريق لوجدة غير بدات معاه موضوع تعصب وهي تسكت حتى تلقى وقت يكون بيييس مع راسو...
أمال غير عرفت أنوار سافر تنفست شوية وبقات كتصرف على طبيعتها مقابلة الدار ولدها وراجلها
محمد كان مقابل مو للي عايشة غير بالسيرووم مكتهضر موالو اليوم كانت عندها جلسة عند طبيب نفساني دخلت عندو وبقا محمد على برا دازو جوج سوايع خرجت
محمد: ما شوية درك؟!
فتيحة: (تنهدت وحركت راسها باه.. خرج طبيب شاف فمحمد زعما كولشي مع الوقت يعني هضرت شوية... جارها محمد طلعو للطموبيل) فين علي؟!
محمد: (شاف فيها شحال.. مهضرتش شحال ومنين هضرت سولت على للي خاصها تنكرو) علاه تسولي عليه؟!
فتيحة: بغيت نعرف
محمد: تاكلي ونݣوولك؟!!! (حركت راسها باه صونا على مريم باش توجد الماكلة) سمو تبغي تاكلي؟!
فتيحة: للي كان
محمد: (بقا كيجبد معاها الهضرة مرة تجاوب مرة غير تحرك راسها حتى وصلو للدار طلعها معاونها كانت وقيتة ديال لغدا كانت مريم مطيبة المرقة) صافي انا نمشي نجيب شي حاجة متخليهاش ترݣد.. (خرج بالزربة للشوايات جاب الكفتة مشوية وداز خدا الديسير)
مريم: خالتي واش لباس؟!!
فتيحة: (شافت فيها وتبسمت) فينهم ولادك
مريم: راهم ناعسين انا نمشي نوضهم
فتيحة: (هزت يدها بشوية وحركت راسها بلا) غير خليهم مرتاحين.. بلاتي ونشوفهم.. بنتي فينو علي؟!
مريم: علي؟!!!!
فتيحة: واه علي
مريم: (بقات كتشوف مفهمتش واش فقدت الذاكرة ولا شنو كفاش كتسول عليه وداك نهار فالمحكمة دخلو بجوج الحبس) انا جاية خالتي نطفي على لبوطة (مشات مريم صونات على محمد قالتهالوو وصاها متجاوبهاش بقا شي 10 دقايق وجا جلس حداها وبقا كيوكلها كلات شي 5 دالكفتة وحبست عطاها بنانة كلات نصها عطاها دوا وشي فيتامينات)
محمد: ما رتاحي شوي
فتيحة: محمد ݣولي فين خووك
محمد: خويا راه فين خاصو يكون اما دابا نعسي ترتاحي راكي شربتي دوا (داها لبيتها ظلم الدنيا سد لباب وخرج لقا مريم كتسنااه)
حرت يا مريم
مريم: يصاوب الله امحمد..
دازت سيمانة زهير تشطن مع السلعة ديال العيد لكبير وحتى وليد هكاك فالمحال ديالهم أمال وهند مرة مرة كيخرجو يتقداو شنو بغاو يدورو شوية
هند: علاش مبغيتيش تمشي لتاوريرت
أمال: معرفت اختي غير كندخل لديك الدار كنبقى نحسب دقايق باش نخرج
هند: ولكن ضرووري تمشي تشوفي ماماك وخوك مسكين شحال رغبك
أمال: (تنهدت) دابا زهير ممساليش باش يديني
هند: مديريش السبة بزوهير سيري غير ليلة باتي تماك
امل: حتى الجمعة
هند: شوفي واخا ماماك كانت قبيحة معاك نتي واجب عليك تشوفيها (بقاو كيدورو دازو عند شيماء للي مزال ممنوع عليها تخرج الا والا كانت مع اشرف.. جلسو معاها شوية عاد دازو عند زهير تعشاو مجموعين عيطو لاشرف وشيماء بقاو مجمعين حتى 12 دالليل عاد كولها تفرق لدارو.. مع الدخلة لقاو طموبيلة ديال أنوار لقديمة أمال قلبها زدح ميمكنش تنسى هاد الطموبيل وهي دوزت فيها اسوأ الكوابيس ديالها... )
زهير: واش جاب طموبيلتو لقديمة.. يا الرب العااالي واش هاد المخلوق يتفدر يظل يدير فلكساايد وميخاافش
أمال: واش جاو؟!
زهير: واه.. سيري طلعي انا نجيب يوسف
(أمال حنات راسها هبطتت نيشان حلت لباب لقات أنوار خارج من دارو غير شافها قلب وجهو وحتى هي طلعت كتجري وقلبها كيضرب خايفة من شي حركة طائشة منو... تلاقاو حدا لباب)
فين نتا واش جبتي طموبيلتك
انوار: واه.. شحال ݣدني نبقى فالتاكسياات
زهير: ورجلك ݣاد تصوݣ بيها
انوار: جاي غير ب80 و60
زهير: رد لبال اصااحبي فينها مرتك؟! كدوزتو كونجيكم مزيان؟!!
انوار: مزيان الحمد لله
زهير: إوا مزيان.. ندخل يوسف ينعس حتى لغدا..
(دخل وانوار بقا برا شي نص ساعة شاف فالدار الفوق فين الضو مزال مشعوول دخل لدارو لقا أمال2 نعست بنتو فبيتها وهي لبست داكشي مقااد والبسمة فوجهها حيت دوزو ايام زوينة عكس كيف كان.. واخا ولات كدير شي حوايج كتجيها الحشمة بزاااف ولكن باش تريحوو....)
مع طلع زهير أمال رغباتو تمشي لتاوريرت مبغاش حيت غتكرفس فطريق حتى يكمل ويديها هو.. رجعت كتكره الجلسة فبلاصة للي جالس فيها أنوار مبقاتش مرتاحة كانت عايشة مستقرة فحياتها حتى بان والحركة للي دار مؤخرا خلاها مريضة فراسها اخر حاجة تبغي ديرها هي خياانة زهير ولو ماشي هي الغالبة ولكن الا بقات ساكتة على هادشي هو غيتمادى.. براكة غير مخبية عليه سر غيفرقهم فلبلاصة راجلها ورجعات حافظاااه... صونات الحاجة لقاتها ماشي فمودها وقالت لها غير حيت توحشااتها بقات ليها 10 ايام وتجي...
~~~~~~~~~
هند: غير سمعني احبيبة بابا بغا يعاوني ماشي زعما يعاوني حيت انا محتاجة للي يعاون لا هو بغا يبين لية زعما راه تيفكر فية كنا تيفكر فولادو واش فهمتي؟!
وليد: لا مفهمتش ومغنفهمش
هند: هو تيقول حتى هو عندو الحق يفرح بيا
وليد: يفرح بيك كيف بغا اهند ولكن هاد العيادة الوعد ديالي من زمااان
هند: براكة غير شريتيلي لوكال وفبلاصة زويينة فالصونطر راه نتا للي درتي كولشي غير دوك لوراق وطلع وهبط راه كلفووك بزااف
وليد: خرجي هاد السوق اهند
هند: عفاك احبيبة بابا تيحس بالذنب وبغا يدير شي حاجة للي تخليه مرتاح... عرفتي كانت أمنيتو تكون عندي عيادة غير الفرق كان بغاني نكون طبيبة
وليد: انا كنشوفك حسن من طبيبة ݣاع
هند: (تبسمت معنقة ذرااعو للي غير كتشدها كيبدى يقسح يدو باش يبرزو العضلات.. كتعيق بيه وتطمر) تنبغييييك بزااف
وليد: حتى حنا كنبغيو داكشي باش ݣلنا هضرة وحدة خلينا فيها وخلينا انا وياك مزيانين
هند: الا جا بابا هضر معاك متقوليش انا سباب ولا وصلت ليه شي حاجة بيناتكم نتا وياه
وليد: ميجيني منجيييه هادشي ديالنا انا وياك
هند: بيناتكم احبيبة انا منقدرش نمشي عند بابا ونقولو حقا ابابا متمشيش عندو
وليد: (زاد فصوت التلفاازة زعما مركز معاها ناضت هي مشات تشوف لغدا) لباااكووور الشتوي هو هدا....
محمد: (كان جالس حدا مو للي كتسول فولادو ورجعت كتاكل شوية ولكن باقي كتسول على ولدها بحال جزء من ذكرة تمحى ليها .. كان كيوريها فالتيليفون لحوالة باش غيعيدو حتى جاتو مكالمة من إدارة السجن جاوب مستغرب) الو السلام عليكم... واه هو انا.. واه (منين سولو واش نتا خو فلان ناض من حدا مووو للي لقطت اسم علي) وااااه.. (حل عينو مصدوووم مجاوبش على شحال.. شاف فمو ودغيا خرج مخليهاعخ كتعيط) كفاش اخويا؟!!!!... مفهمتش واش مات!! (بقا قلبو كيضرب عينييه تضببو دار يدو على راااسو) لا حول ولا قوه الا بالله العلي العظيم... ممشا معاك باس اخويا واه.. واه.. واه غنجي فين للتشريح؟!!! واااه.. (قطع وبقا مكوانسي مغمض عينو وشريط علي كولو داز قدااام عينيه منين كانو صغار حتى كبرو وكبرو المشاكيل ديالهم.. كما كان الحال خوووه مات مقتوول من رجال اب مرتو السااابقة للي وشى بيه وقال اسمو ولاخر عتارف انه قتلو حيت كانو مشادين... واخا الكره للي كرهو وكولشي الا تخيل خووه وهو محݣووور وكيشوف الموت بعينيييه) الله يغفر ليه والله يسمحلو ويرحموو
مريم: محمد محمد!!! خالتي كتعيط ليك
محمد: رواحي امريم (دخل لبيت غير دخلت سدت لباب شاف فيها مألم متحسر لوضع هاد العائلة وفين وصلت) علي مات
مريم: خوك؟!!
محمد: واه.. قتلووه فالحبس من طرف دوك العصابة حيت حط سميااتهم
مريم: اييييه... (معرفت متقول) الله يرحمو فهاد نهار
محمد: الا ݣديتي متسامحي غير سامحي انا نمشي للتشريح متݣولي والو لمّا
مريم: غتصدم مسكينة وهي كل مرة تسول فيه
محمد: اودي موتو حسن من حيااتو الله يرحمو فهاد نهار (بغا يخرج وهي تعنقو مريم حست بيه تأثر وكفاش الواحد ميتاثرش فموت الخوو واخا يكون ظاالم اما محمد غمض عينو كتجيه صورة علي وهو صغير كيلعبو كيحفظوو كيقابلو المحال كفاش باه من كيوريهم الخدمة ولا يمشيو يصليو معاه قلبو زاد تزير كتجيه غير صورة علي وهو صغيييير...)
محمد قالها لعمو وكولشي رجع عاارف الا مو.. صونا على زهير قالهاالو عزاااه وخلاه هو يقولها لامال.. اما هو مشا يكمل الإجراءات باش يتدفن واحسن قرار داار متابعش القضية حيت حس ان الموت ديالو كان رحمة اب مرتو السااابقة عمرو كان غيخليه عاايش مرتاح اللهم صفحة وتطوى... وحتى وكان خرج من الحبس فين كان غيمشي حيت اكيد محمد مكانش غيحن فيه بلا ان كولشي كااارهو...
زهير: منين كتوصل للموت ابن عمي كتنسى كولشي
وليد: زعما صافي؟!!
زهير: واش راح نݣوولك نبقى ندعي فيه داابا براكة غير شحال من ذنب جمع فهاد الدنيا نتبعو يانا بدعاوي ومنسامحووش لااه.. كولنا تاليتنا مووت وللي راه يساامح كيااخد اجر كبييييييير
وليد: حتى لوكان مكنتش نعرفك نتا تسمح هكاك
زهير: فالمووووت!!! نسمح ونزيدها بدعوة الخير ربي يرحمهم
وليد: مزياان
زهير: اوا دفينة مع العصر نرووحو نديرو الوااجيب
وليد: (حرك راسو باه سدو المحال بجوج مشاو للدار زهير مشا عند امال للي لقاها كتخمل الصالون بوحدها حيت ليلى سافرت مع بناتها وولدها تشوف عائلتها قبل متجي الحاجة..)
زهير: زين واش راك ديري
أمال: كنخمل العيد بقاتلو يوماين وراك عارف شحال تعمر وعاد خاص التخميلة لكبيرة
زهير: هاديك مترفديش ليها الهم نجيب شي جوج عيالات يعاونوووك نتي ݣابلي شي لاخر وولدك
أمال: واخا.. علاه جيت دابا؟!!!
زهير: غير (حك حنكوو) خاص نروحو لتاوريرت
أمال: ياك ݣلت حتى الجمعة
زهير: خوك مات
أمال: (طلقت لوسادة من يدها) محمد!!!!
زهير: لا علي.. شي حد صفاها ليه فالحبس
أمال: احااااي... وعلاه قتلو؟؟
زهير: داكشي ديال نسيبو شكا عليه ولاخر صيفط للي قتلو الله يرحمو فهاد نهار
أمال: (جات صوورتو ولكن معاها مكاين حتى شي ظحكة ولا هضرة مقادة) الله يرحموو
زهير: (جارها عنقها...) نمشيو دابا احبيبة
أمال: (نفس الاحساس مكتحملش تمشي لتماك... حركت راسها باه) نمشي لبس.. (مشات لبسات وزهير لقاها غير ساااكتة عاونها لبس يوسف جمعت حويجات ولدها وخدات بيجامة هو غير كيشوفها يعني معوالاش حتى تجلس معاهم.. خرجوو كان وليد وهند كيتسناوهم عزاوها وشدو طريق لتاوريرت... وصلو كانت لخزانة كيصاوبوها حدا باب الدار تفكرت موت بااها قلبها تزعزع احساس خايب معرفت تحزن ولا شنو دير مخلاوش ليها حتى احاسيس من جييهتهم وكان كان شي واحد براني مكتعرفوش ممكن تحزن عليه وتعاااطف ولكن علي!!!
تنهدت لقات محمد عابد فدروج بلحية عشوائية ضعااف غير وصل حداها كانت اول مرة تلاحت عليه عنقااتو وحتى هو هكاك هند غير كتبكي من هاد الاجواء خبرهم أن مو معارفة والو حيت مزال مصدوومة طلعوها لدار حنينهم ومع دوايات كتنعس بزااف... مع 4 جابوه من المشرحة محمد تعهد يديرلو جنازة حيت كيبقى خووه فأخر الأمر وماشي هو للي يحاسبوو.. صلاو عليه صلاة العصر وداوه المقبرة يدفنوووه....)
قليل للي بقى فيهم علي حيت كولشي فتاوريرت عرف شنو دار فمو وشهادة الزور للي شهد فيها رغم انه كان هو عينيها... أمال كانت فالاول بحال شي ضييفة جالسة حدا لعيالات للي بداو كيدخلو ويشوفو فيها كأنها وأكلة ليهم حقهم عاد تزعزعت وناضت للكوزينة كتغسل لكيسان دأتاي من ديما كانت كنحس براسها غير ضيفة فهاد الدار ولات كتجيها من موت لمووت لدرجة شكت ان وقتها قرب وجا دوورها اول مجانا فبالها ولدها وزهير متسخاااش بيهم تخيلت موتها وغتخلي ولدها بووحدو بقات كتبكي جات نعيمة جبتها عنقااتها وأمال تحبس من لبكى وخرجت من دائرة الاكتئاب للي رسمت فمخيلتها.. بقات كتعاون ضربت ليها مها فراسها مسحت يدها فوطة حطت الفواطة ودازت هزت ولدها من عند هند وطلعت لدار حنينها.. كان جدها سلمت عليه هدا اكتر واحد كان غريب عليها شي مرات مكيعرفهاش حتى شكون هي اما مرت حنينها كانت ظريفة حدوودية وراتها فين مها دخلت عندها كانت ناعسة بقات كتشوف فيها غير كمييشة وصلت مرحلة الضعف للي كانت فيها أمال من قبل حتى وجهها كحال وبان طراس ديال الموسطاج وزغيبات فالذقن كبار وكووحل شحال كانت كتاكل عليهم لعصى حيت كانت شي مرات فاش كتحايدهم ليها بالنتاف كتهرسهم ويبقاو يدݣووو للي غيسلم عليها... غوت ولدها باغي يهبط يرجع حدا غيثة يلعب وحتى ولاد خاالو صفوان وصفاء نوض بيهم فتيحة للي حلت عينها
امال؛ ششششت اولدي ميمة ناعسة
فتيحة: (قوست عينها باغية تعرف شكوون) امال؟!!
أمال: حم واه اماما
فتيحة: فينو خوك علي؟!!!
أمال: ماااا... مشتوووش
فتيحة: شكون داك للي معاك
أمال: ولدي مروان معقلتيش عليه؟!
فتيحة: علاه نتي تجوجتي؟!!
أمال: (بقات كتشوف فيها) واه ياك نتي للي ختاريتيلي لعريس وتجوجت وعجبك الحال
فتيحة: (حركت رأسها باه زعما تفكرت) واه واه... فينو محمد؟!
امال؛ راه خدام
فتيحة: وفينها شيماااا؟!!
أمال: راها حتى هي فالدار واش بغيتيها
فتيحة: لا.. خليها مهبلة خوك ياك عاجبااه يطليها... (وجعها راسها) ݣول لباك يجيبلي شي دوليبران ولا اسبروو راه وجعني راسي
أمال: (بقات غير كتشووف هي غير كدخل وتخرج فالهضرو) نجيبلك شي حاجة تاكليها اماما؟!!!
فتيحة: عاد كليت جيبيلي غير دوا نروح شوي.. (أمال شافت فبلاطو دلماكلة للي كان هو هو متقااسش مزعمتش تنوضها تاكل من ديما كانت بيناتهم فجوة كبيرة للي ميمكنش بسهولة وبسرعة تعمر براكة غير هاد الحديث.. مشات كتقلب على محمد باش يعرف شنو غيدير...)
محمد: (مبغاش يخرج مو حيت الدنيا عمرت وباين عزووو استاشر طبيب طلع عندها وكلها وعطاها دوا كيرخي حتى نعست.. شاف فامال) كيف هضرت معاك
امال: ماشي بحال ديما
محمد: (زفر) سيري للدار لتحت انا نوصي مرت حنين ترد ليها لبال
أمال: معليش غير خليني يانا نبقى نحضيها.. (هبط وقف على عشا خووه صغييير وهي بقات شادة ولدها حتى شافت مريم طلعت ليها لعشا ديالها لي صيفطو ليها محمد كلات ووكلت ولدها ونعس فحضنها حطاتو فوق سداري وبقات حداه حتى كتسمع مها كتعيط باسم باها خاافت تدخل عندها بقات واقفة حدا لباب كتهضر معاه بحال راه كاين معاها.. ركب فيها الرعب.. لعشا كمل وللي مشا فحالو طلع زهير ومحمد عند امال للي رجعت صفرااا عاودات ليهم شنو وقع محمد قرر صباح يديها لوجدة حسن...) جلسو تباتو
زهير: معليش ابن عمي ياك نتوما غدا تكونو عندنا نمشيو حنا صباح بكري خاص نحل المحال على جال شي ساعة خاصها تخرج لماليها
محمد: (شكرو على الحضور وحتى الوقفة للي كل مرة كيبين ليه انه احسن اختيار لختو وقف وقفة رجل معاهم فأي حزن حيت الفرح الوحيد للي داز عندو هو زواجو بامال.. هبطو لتحت توادعو مع البقية ومشاو بربعة كما جاااو.. كولها مشا لدارو...)
~~~~~~~~~
أصبحنا وأصبح الملك لله...
امال2: (ناضت بكري حيت موجدة شنو دير تحت توصياات مها.. دخلت للحمام دارت تيست لحمل وبقات كتسنى وتمحات ابتسامتها منين لقات غير شرطة وحدة) يعني محملاش!!!! بففففق (لاحت داك التيست معصبة كان عندها امل تكون حاملة على الله أنوار يزيد يتربط بيها كتر ويبغيييها مشات للكوزينة كتقاد فطور لأنوار دارت فيوتيوب بان كيك حيت هو كيبغي هاد لعيبات ماشي الملوي وبغرير والحرشة...
حتى سمعاتو ناض ودخل للدوش شوية حتى تنترت من ذراعها ضارت عندو) اوييلي مالك
انوار: واش دشي (هاز تيست لحمل)
امال2: (كانت نسااتو بالفقصة عاود شافت فيه يمكن يكون حمل) ها
انوار: (هد عليها بغا يضربها وهي تخبع) ياو دوي واش دا؟!!!!
امال2: ديال لحمالة
انوار: ياك كنݣولك شربي كينتك
امال2: لا... راه غير شكيييت وصاافي
انوار: ها ودني منك أمال راه من اللول هضرنا فدشي وݣلنا تفوت غير عام بعدا
امال2: واه حتى انا كنݣول هكاك
انوار: الله يعميها ليك حسابلك تشديني بالبز!! ياو راه بالله العااالي يكون 10 بيناتنا منحن
امال2: علاش تݣول هاك
انوار: باش تسمعي الهضرة خلينا بعقلنا وسمعي لكلام براسك تعرفي رووحك فين حاطة رجليك ماشي بيه فيييه... (لاح داك التيست وخلاها...)
أصبحنا وأصبح الملك لله...
محمد صباح بكري هز مو وحتى مرتو وولادو ومشاو لوجدة اصلا مكاين للي يجي يعزي فخوه للي مات براكة غير شنو دار معاه... فتيحة غير كتشوف لدابا معرفاش ولدها مات وتدفن مريم مهلية فيها بزاااف وصلو لوجدة حط مريم فالدار هي وولادو وهو داها لعند طبيب نفسي للي شداتلو هند رونديفو معاه.. بقا كيتسنى مو صونا على عمو يشوفلو هوندا يصيفط الحولي حيت قرر يعيد فوجدة واخا مابغاش ولكن قنعووان داك لبلاصة ممرتاحش فيها حاليا وحتى مو تعالج شوية هنا حيت الا كان تماك يقدر تسمع بخبر موت علي للي طبيب وصى متعرفش حاليا...
خرجت فتيحة وهو دخل عند طبيب للي بين ان فتيحة كتعاني نوع ما من الخرف والايام غتزيد تبين يعني الواحد ياخدها على قد عقلها وصفلو شي دوا وداها للدار للي كانت مريم سيقاتها وحلت سراجم تشمش وتبدل الجو وقدات بيت للي كان دلجلاس صيبات فيه نموسية بجوج سدادر ودارت كوفر فيه جديد باش ترتاح فيه خالتها.. دقت أمال عليهم كان معاها زهير جايبين معاهم لغدا
فتيحة: (كتاكل وتشوف فزهير) فوكاش جيت اوليد؟!!
زهير: (شاف فيهم ورجع شاف فيها) غير درك
فتيحة: مك مݣالتلي والو (شافت فبنتها وولدهم كتحاول غير تفكر عرسهم ووالو) وجعني راسي عييت نتفكر عرسكم ومقلتش... نعيمة مݣالتليش غتجيو اليوم
زهير: غير نسات
فتيحة: اممم (بقات كتاكل حتى داخت بقوة مكتبغي تفكر فوقاش بنتها ووليد تزوجو دخلها محمد ترتاح عطاها دوا وتكات)
محمد: هادشي للي ݣال طبيب
زهير: خاص غير تسايرووها وصافي.. مهم غدا غدوزووه معانا حتى حنا مّا مكيناش ونتجومو كاملين معندها معنى نتوما معيدين وحدكم هنا وحنا وحدنا لهييه
محمد: نشالله... (مشاو زهير وأمال تقدى شنو باقي خاص ومن للي وراتها ليلى حيت 3 ايام من مور العيد غتجي الحاجة.. وتم مرجعها للدار)
أمال: خاص ندير بيرمي باش متبقاش كل مرة تعذب حتى لهن وترجع الفيلاج..
زهير: نشالله
أمال: لا خاص نديرو
زهير: با وراه ݣلنا نشاالله
أمال: عارفة ديك نشالله ديالك بحال المحال
زهير: امم... لا هدا خاص ضرووري
أمال: غير تجي مّا وترتاح غنتسجل نديرو ياك
زهير: مممم.. (حطها حدا لباب وتم رااجع هي دخلت هازة ميكات خفاف مع طالعة كانت عيشة خارجة من دار بنتها دارت راسها مشافتهاش وطلعت للدار حتى لحقت بيها هي وامال2)
عيشة: واش بالصح خوك مات؟!
أمال: (حطت ولدها ودوك لميكات) واه
.عيشة: ولاه مكلتووها
أمال2: لبراكة فراسك اختي والله هاد صباح عاد ݣالهانا أنوار
أمال: معليش حتى حنا لبارح دغيا مشينا باش لحقو دفينة
عيشة: (مكتشوفها لا بكات لا والو مكاين حتى شي تاثير تخلعت منها وجاتها وحدة قااادرة) اوا نمشي يانا حتى لغدا ونجيو بالليل
أمال: مرحبا بيكم.. (اول مرة متجاوبهاش عيشة وتعطيها القاصح مشات وبقات أمال كتجمع الدار وكتعاونها لوخرا أنوار مبقاتش كتشوفو وتهنات داز العيد فسلام وليد وهند مشاو يعيدو فتاوريرت ومحمد عيد معاهم دازو اجواء زوينة كان معاهم أنوار للي عتاذر من محمد على شنو كان دارلو ولكن مكيشوفش فامال... )
دازت 3 ايام أمال وليلى وقفو على الدار خملوها وجابو جوج عيالات عونووهم وطيبو ملاوي نص طيبة حطوهم فلفريكو الحلوى دمونداوها من مخبزة قراشل كعك... ولاو ذبحوو حولي جابو دجاج تغسل حطوه فلفيرݣو أمال خيطت قفطان ليها وحتى الحاجة فلبيض مشاو للمطار كانو اجواء حماسية بزاف دالعائلات كيتسناا الطيارة ديال الحج تنزل كولها وشنو كيتسنى هبطت الطيارة من بعد ساعة ديال الإجراءات فالداخل بانت الحاجة خارجة هي ولكبير للي دافعين الشاريوو للي محمل بخطوات سريعة منها لابسة كولشي أبيض كتقلب بعينيها حتى شافتهم كيشيرو ليها باي باي تعلات فرحتها كتر وكتر زهير مكرهش ينقز ديك لحديدة مع وصلت نقزت عليها أمال دافعااه مخليله كيشوف فيها جااات للي دات بلاصتو هز ولدوو باسو وطمر عاد جات نوبتو عنقها بحراارة سلم عليها عاد خوه وتمو خارجين مخليين زهير للي حار داك الشاريووو برا كانو بقية العائلة سلمو عليهم ركبو فالطموبيلات وطوووط طووط طووت حتى لدار الحاجة.. فين كان استقبال لباقي العائلة بناتها ورجلاتهم وناسهم وشي جيران والعائلة محمد وفتيحة حتى من عائلة هند كانو تمااك فرحت بزاااف بهاد اللمة... حتى هي لدابا مفخبارهاش اخر الاخبار حيت مبغاوش يديرونجيوها تمااك... للي بدا كيمشي الحاجة دخلت للصالون للي فيه رجال وتبعوها بناتها وحفايدها جلست حدا زهير للي مدرعها بيد
زهير: جا معاك الحج ازيينة
الحاجة: هههه وشكون للي ميجيش معاه داك لمقاام اوليدي عݣبالك نتا ومرتك
زهير: اميييين
الحاجة: اونولي نمشي معاكم نشالله
زهير: المرة الجاية يعطيوك شهادة السكنة ولا ترجعي نتي لݣيد تم
الحاجة: ههه مزينها بلاصة يا ولدي (بقات كتدعي مع الحضوور تماك حتى عيات مشات لبيتها تنعس تحولها تفرق ينعس زهير عاد حس بالراااحة شاف فامال للي نعسات وهو يزعزها)
أمال: امممم
زهير: نوضي ياا جدك
أمال: شنو ازووهييير
زهير: باغي ****
أمال: (ردت ليزار على وجهها وهو كيخبط فتر** مرة فخاصها جنابها حتى نوغشها ونوضها) زوووهير
زهير: كتعرفي غير طيري على مّا تعنݣيها انا لا لية غير الله!!!
أمال: حتى لغدا عفااك
زهير: درك ومكرهتش تنوضي تشطحيلي ديك شطييحة للي كيكون بحال ضاربك الضو
أمال: بزااف عليك هداك سميتو الرقص الشرقي
زهير: ههه هداااك
أمال: (حطت راسها على صدرو) عفاك لزهير انا عياانة والله وندعي فيك حتى تبات الملائكة كدعي عليك
زهير: عندك كولشي بالمقلبوب (سمعها جخرت.. تبسم وبقا متكي حتى نعس ...)
دازت الصدقة للي دارت الحاجة ولكبير فرقت شنو جابت وزهير كينݣر فوق راسها على شراا للي شرات مداتهاش فيه كالعادة كل واحد باش تفكرااتو وامال تهلات فيها للي عطاتها قدام الكل وللي عطاتها بتخبية خلاتها غطير بالفرحة
الحاجة: شحال دعيت معاك ابنتي وحتى مع خوك يهديه الله
أمال: (شافت فلمرايا وهي كتقيس توب اثليجة للي جابتو ليها فالكحل والدوغي) محمد!!!
الحاجة: لا للي فالحبس
أمال: (شافت فيها من لمرايا) قتلووه امّا... ودفنوه
الحاجة: (بقات غير كتشوف) اويلعداااا... استغفر الله بالحݣ ابنتي؟!
أمال: (مشات حدا وحطت الثوب فوق ركابيها) والله وماما لدابا مفخبارهاش اصلا عقلها ولا فشكل مرة تهضر معاك على هاد الوقت مرة ترجع 10 سنين ولا كتر اللور مرة لقيتها كتهضر مع بابا كل مرة وكيفاش ودابا حاسبة زوهير هو وليد حتى بنادم ولات كتنساه (عنقاتها الحاجة كتوااسيها وأمال غير متكية على صدرها كتشوووف مبقاتش بغات تلوم شي واحد من عائلتها للي مبقاوش باها مات خوها تقتل مها فطريق الخرف وكتهبل خوها هاز هم الدنيا والدين... شكون غتلوم حتى واحد وحتى ديك الفكرة ديال بغات تعرف هاد المره علاش مبقاتش حاملاها وعمرها باقي تسول لا نفسها لا الاشخاص حتى وكان الإجابة غتكون من مور لباب للي تفتح غتفضل يبقى مسدود وتحل باب اخر... قصة طفولتها وداكشي للي عاشتو سدااتو وقلبت الصفحة فين كاينة أمال جديدة أمال للي مبقاتش غير ابنة واخت.. رجعت مسؤوولة زوجة وأم وكنة... ناضت شكراا الحاجة خبعات لحوايج تحت لماريو حيت عيشة وختها بايتين فالدار وحشومة تخرج شي حاجة موصلاتهمش هوما عطات الحاجة دواها شرباتو عمرات ليها قرعة دلما وخرجت لقات كل واحد شد قنت... هزت يوسف للي ناعس وهبطت لتحت لقات زهير وانوار واقفين حدا النافورة.. تبسمت لزهير ممعتابراش أنوار للي حداه وجات عينو فعينيها ومشات لدارها تنعس حيت الدار عامرة)
انوار: روح ترݣد خلاص
زهير: ياله تمسااا بخييير.. (مشا زهير وانوار بقا شي 10 دقايق تماك عاد مشا لداارو لقا أمال2 موجدة راسها ليه رجعت شوية كتعجبو فنعاس حيت فهمت ووراها شنو بغا...)
هند: (صونا عليها وليد معاجبوش الحال بغات غير تفهم شنو كاين حتى لاخر مكالمتو عاد فهمت باها شرا المتريال للي تحتاج فالعيادة ديالها وكملاتها مها شرات ليها مكتب فوتوي للاستقبال مكتب ديال الاستقبال يعني كولشي شرااوه.. قطع عليها وهي طارت بالفرحة ماشي حيت تجهزات العيادة ديالها بقد مفرحت ان تخفف عليه شوية دالحمل والنفقات للي كانت غتكون بالملايين... صونات ليه مكيجاوش عذرااتو حيت فأخر المطاف هاد العصبية والغضبة كانت غير حبو لكبير ليها.... لبست كاب ديالها وشالها هزت بنتها ومشات عند امال بالفرحة تعاود ليها على المفاجئة للي دارو واليديها ليها... )
~~~~~~~~~~~~
شيماء: دابا ولد عمي عاد مات مجايااش نجي لتم ندير عيد ميلاد لمريم
نعيمة: لا بنتي مجايااش
شيماء: اممم اوا نديرو هنا ويجي بابا وتجيو كاملين
نعيمة: ديريه غير نتي وراجلك ابنتي مرت عمك راها حالتها مجاياش حنا نتجمعو نظحكو ونشطو وولد عمك هز هموم الدنيا والدين على كتاافو
شيماء: شحال اماما وانا باغية نديرو ليها وواعدتها
نعيمة: عرضي على بنت عمك ومرت خوك يجيبو ولادهم ونشطو مجموعين انا ابنتي مجاياش نجي وباك موت ولد خوه مرضو وتفكر موت خوه
شيماء: (بتنهيدة) صافي واخا.. (كملت معاها وقطعت وقفت شادو فكريشتها للي خرجت شوية عندها فضوول كبير باغيا تعرف غير شنو عندها ومخلاهاش أشرف ولكن حالفة فالموعد جاي عند طبيبة غتشوف شنو كاين باش تبدى توجد رااسها وتشري لحويجاات....)
~~~~~~~~~
انوار: (خارج من عند باه طالع ليه الدم قطع طريق وهو كينݣر مكره ودخل محال زهير كان المحال فيه غير شي 4 دلكليان طلع عند زهير للي كان كيبرد وليد للي شااعل غير شاف أنوار خرج حتى السلام مقالهااش..) كولشي محيح دنهار
زهير؛ مالك نتا عاود؟!
انوار: داك خوك غيهبلني يا خويا منين جيت للي ݣالو درتو ولكن باش يجي يݣولي جيت من الحج ومالݣيتش مرتك حاملة!!!
زهير: ههه غير ديك النغزة دالحج
انوار: لا ميݣولهاش وبالعربية والتاعراابت مشغلووش ياك زوجنا بييها ودرت واش بغا صاايي هنا وصطوووب
زهير: درك نهضر معاه حتى لهن وماشي شغلوو
انوار: كيبرك علية بزااف
زهير: مدييرش فرووحك انا معاك غير نتا متردش الهضرة معاه.. الا مسمعش منا نݣولها لمّا تسمعلو شي زوج كليمات
انوار: (حرك راسو باه... اصلا من نهار عقل على راسو وزهير هو ظهر ديالو كتر من خوتو واخا يكون غالط شي مرات كيجي منوو.. وهادشي كيزيد يمرضوو) غرووح لفرنسا هاد ليام انا ولولا على شي وراق ديالها
زهير: واه باقي عاقل عندكم الرونديڤو من دابا شي 10 ايام
انوار؛ واه.. منها ندوزو نترحمو على دعااء
زهير: ومها؟!
انوار: معندي حتى شي خبار اصلا راك شفتي كولشي كارهني تم...
فتيحة: (بلغوات) اماااال امااااال
مريم: (ناضت مفزووعة وحتى محمد، شافو فلباب الي تحل بالجهد عليهم شعل الضو وهي تبانلهم فتيحة مخرجة عينها) خالتي!!
فتيحة: (هبطت حنووكها) اويييييلي على المسخووك سمو راك دير حدا بنت خااالتك؟!
محمد: (بقا كيشوف لاح ليزار من عليه مغطي مريم للي لابسة غير ديرباردوور) ما واش فيقك؟!!
فتيحة: سمو راك ديييير مع بنت خالتك ونتي متحشمييش يا الحمارة
مريم: (بقد متحرجت بقد مجاها الظحك)
محمد: (مݣيدها لبلاصتها) راه مرتي واش معقلتيش نتي جوجتيهالي وانا ݣاع مكنت باغي
مريم: سمعتتتتك....
محمد: سمعتي ها هي غدابز معايا
فتيحة: حسن من ديك اللفعة ديال شيماااا
محمد: واه اما حسن داكشي باش جوجت بيها
فتيحة: وفينها امال؟! عييت نعيط ليها تجيبلي غير نشرب عمرها حنات ولا شافت فيا بحالها بحال باها
محمد: معلييش انا نجيبلك لماا حتى لعند واخا راني عمرت ليك قرعة (دخلها بلاصتها وعطاها تشرب وعطاها دوا للي كيرخي اعصابها حتى غمضت عينها عاد طفا الضو عليها ومشا لبيتو..) خاص نبداو نسورتو لباب
مريم: حشومة عليك
محمد: ويلا دخلت علينا وحنا مزبطين وراكب
مريم: متݣولش راااكب
محمد: مووهيم راه مجااياش منين تحل لباب غنعرفوها هي ونخرجو عندها
مريم: ههه
محمد؛ (شد يدها باسها) كتعياي معاها
مريم: لاااااا راه خاالتي بعدا راه ختارتني على اللفعة ديال شيماااا ههه
زهير: (راجعين للدار) درك مال ملتك راهي كما هي مرتك راهي بنتهم
وليد: المشروع انا بديتو وانا نكملو
زهير: لا تعيقش اصاااحبي وخلي الفرحة تكمل هند راه ماشي شي وحدة للي غتحيح وتصعصع وتسكت
وليد: درك دا معيااار
زهير: ههه يااو بالرب العاالي حتى طيحاااتلك زناافرك لارض ݣاع لاديرها علية راني صاااحبك من زمااان
وليد: قييلني عليك ازهير
زهير: الارض للي كنت دايرها فالبيع درك ريض وخليها ليك شتي الواحد الملك ميندمش عليه انا وكان ماشي الزياار نشري فشي قنت جيهت بنتي ملال ولا صفرو
وليد: طلعت لتاونات ولا كتامة
زهير: اححح على ديك الجيييه هههه
وليد: وبااااز مزال عندك ركابي للي يوصل لتماااك
زهير: (تبسم) حݣا بغيت نبدا لبنت عمك بيرمي
وليد: ورييها تصووݣ بعدا عاد دخلها
زهير: انا ݣلت دخل تقرااا وتعلم تم وديك الساع نبقى نعلمها
وليد: الحاااازق خاايف على لحديييدة
زهير: (عنق لڤولون) مرتي وعارفها فيها بوورجااف للي شداتووكتشخشخ والديييه
وليد: بصحتها
زهير: حتى تكون كتحطهم نتا على ݣلبك
وليد: انا واعدت بمشروع وفيت فيه
زهير: بزعطااا انا باغي مرتي حدايا متخدم متزمر براااكة غير نخدم يانا ورجع لݣاها تسناني
وليد: (ميق فيه وكملو نكيييرهم.. كولها وعقليتو وكولها وكفاش كيفكر وكفاش كيشووفها وداير للي مخرجووو... لاحو حدا دارو ودخل لقى هند موجدة شموع وروايح وموسيقى خفيييفة عرفها باغيا ترااضيه واخا هي مدااايرة واالو وحتى واليديها مدارو واالو... مشا عندها متبسم وهي لابسة غوب فلموڨ عنقها) بصحتك اعمري
هند: الله يعطيك الصحة ma chéri (باسها فراسها) ممقلقش
وليد: لا.. للي تكون عندو هاد لقطييطة يتقلق!! (باسها فشفايفها) حلوة يالا جدك
هند: ههه اجي تعشى قبل ميبرد
وليد: نغسل يدي وانا معاك ...
انوار: (كان جالس كيتسالم مع عمتو للي جات تساالم معاه حيت غيمشي لفرنسا واحد شهر وفوسط كلامهم لاحتلو ان مرتو خاص تبقى تمشي معاه يعني قاد ليها وراقها) مرتي نهار اللول ݣلتلها مشياان لهيييه مكانش الا بنتي بنتي للي تزادت تم غتكبر هنا وتقرا هنا مغتمشيش ندي مريم للي عمرها مفااتت حتى وجدة لفرنسا
عيشة: واش فيها مرة مرة تمشيو لتم
انوار: عمتي يرحم باااك لاتزيدينيش
عيشة: صافي اوليدي حبيبي انا غير هضرت راه واخا عمتك راني يانا للي مربيااك
انوار: عارف وداكشي باش خليني مني لمرتي عاارف صواالحها تم معندها مدير براسي هاد المشية فوݣ عيني واش انا باقي نزطم فين ماتت ما ومرتي
عيشة: الله يرحمهم صافي مديرش في روووحك
انوار: ياله نوصلك ونسلم على رااجلك (شاف أمال خارجة لابسة كسيوة زوينة بحال غوب صواري حجاابية دازت من حداهم وروايحها عطات وابتسامتها على وجهها)
أمال: سلام عليكم
انوار: وين رايحة؟!!!
عيشة: عليكم السلام...
أمال: (دارت راسها ݣا مسمعااتو شافت فولدها للي ملبسااه صالوبيط دجين مع شوميز بيضة وشابو على راسو..) اوليدي حبيبي
انوار: اااااا مرت عمي وين رايحة
أمال: (ضارت عندو محافظة على الابتسامة) عمك زهير يتسناتي
انوار: زعما الا كنتي خارجة وحدك نوصلووك
أمال: براك الله وفيك اولدي (تبسمت مع عيشة وتمات ماشية كتنݣر.. لقات زهير برا طلعت ركبت حداه) تعطلنا خاص نمشيو نجيبو لكاادو
زهير: مزال الحال.. واش هاد الزيين للي راه يتدفݣ سبحان الله يبان غير فاش نبغيو نخرجو فالليل ميفرقو بيناتنا غير بالطولة ولكتاف
أمال: زووهييييير
زهير: ݣادينا شي حاجة ابنت مّا راه الصحرااا وحميد زااهير معاااك
أمال: ههه زوووهير صافي سير والله تعطلنا حتى ندير ونݣاد
زهير: كتردي الصرف
أمال: هههه لا...
دازو خداو كادو لمريم هند ووليد كانو خارجين حتى هوما دازو عند سناء وادم للي جاو مع الدار وجابو ولاد محمد ومريم ومشاو لوكال فين صيفطلهم أشرف يجيو... كانت شيماء فرحانة واخا تصايب هادشي فالدار ميتقادش كما هاكا كولشي مقاد مصااوب كيكة مدارتهاش فقط لبست ولبست لبنتها والمكيااااج ممنوع واخا غير كحل واكيد هي دارت ايلينر خفيف وفوندايشن وحمرت لحنيكات شوية مجاتش معيقة واخا عيا يسكاني شنو الفرق.. لبست شميز واسعة مع صاية طويلة وحزام فالخصر ممزيرش باش ميعزلش طايتها وفولار كبير نازل على كتافها وظهرها وصلو مع بزهم وحطو الكادويات قدام مريم للي كانت لابسة غوب ديال الاميرات مع تاج لاسق فشعرها.. كانو فواحد لكوان مكيشوفهم حد وموسيقى ديال الاطفال رجال تجمعو كيهضرو ولبنات حتى هوما دوزو وقت زوين منين طفات مريم شمع قطعو لكيك وبقاو كياكلو ويلعبو معاهم مرة مرة... كملت سهرتهم ولعسا معروضين عند محمد للي حتى دار عمو كاينين تماك كيطلو على فتيحة... وصلو زهير مطلعش حيت مشا يجيب مو.. دخلت أمال والبقية
فتيحة: (جالسة مجمعة مع نعيمة للي هبلاتها وكيتعاود ليها على عرس داز ف1992 بحال داز لبارح.. غير دخلو شافت هاد قوة لبز للي دخل) سمو دشي!!!! وهاد لبز
شيماء: حم سلام مرت عمي
فتيحة: شكون دو؟!!!! (شافت فامال) واخا على مك نتي
أمال: انا؟!!!
فتيحة: باك حاالف فيك هو وخوك غير صبري يرجعووو اما علي الا شدك يذبحك
أمال: الا شدني يدير فية للي بغا
فتيحة: ها!!!
أمال: (نعيمة دارتها إشارة باش تسايرها) والو اماما كيف بقيتي؟!!!
فتيحة: دخلي للكوزينة حتى نجيييك .. (بانلها وليد وهند داخلين يظحكو وهند شدت فذرااعو كلات راسها حيت عترت وهو دار يدو على خصرها) اوييييييلعداااااا ولييييييد
وليد: ها... نعام امرت عمي
فتيحة: ياكما تجوجت على امال؟!!!
وليد: (بقاو كيتشاااوفو وفنفسو مال هاد زمر غير جاها زهيمر من جيه وقوة فيها الهضرة وبلا بلا بزااف) اوا اش دير امرت عمي
هند: ولييييد!!!
فتيحة: (حركت راسها كدورو وتبجق) مجبتيهاش من بعيييد.. (عاد طلعت معاها وفكرت مصطفى ماات) الله يرحمو خلا الورثة من مورااه... (بقاو كيظحكووو عاد دخل محمد جايب ديسير معاه مشا سلم على رجال فالصالة صغيرة عاد مشا للكوزينة كان محتاج تعمر الدار شوية يتبدل الجو حيت كان قنطااان من بزاااف دلحوايج واخا ممبين والو.. عاد تم جاي زهير والحاجة... )
امال2: (شحال بكات على مشيان أنوار كان شرط عليها تبقى مع الحاجة ونعاس الا قدرت تنعس بوحدها فالدار تنزل.. خلا ليها شي براكة ومشا هو وبنتو.. من بعد عام وشهووور رجع الجرح تفتح وهوما فالطيارة...) بشرى خفت يمشي ومريجعش
بشرى: اعوووذ بالله ابنت عمتي واش راكي تݣوولي
امال2: انا هضرت على تخطفولي شي وحدة
بشرى: أمال نفهمك حاجة الراجل ميتخطفش الرااجل الا قليل الاصل وميخااافش للي خلقوو بغا يرووح يرووح هو لراااسو ميستناش للي تديييه هو يݣلب عليها
امال2: (زادت خافت) وانا محبيتوش يرووح من يديييا
بشرى: ههه واش شفتيييه رااح هو مشا على حسااب ورااقو هو وبنتو ويرجع وزايدون شكون يسخى بهاد الزين ولحنااانة
امال2: (تبسمت) هو خير مني
بشرى: منين جاااه!!!! نتي خير منو بألف درجة عمرك طيحي من روووحك ديما في باالك نتي خير منو (أمال عجبها الحال.. بقات كتسمع ليها تحط لعشاا تعشاو ناضو يجمعو كاملين....)
~~~~~~~~~~~~~
دازت ايااام حالة فتيحة غير مكتزيد والا مشربتش دوا كتصعر شي مراات خرجولها دوا اخر للي كيكالميييها ويهدأها مريم قائمة بالواجب هي ومحمد وأمال مرة مرة كتجي طل عليها.. كانت بغات شي مرات تديها عندها وتبدل الجو ولكن غير شي مرات كتبان ليها أمال كتبدى تغوت عليها....
هند: (مشات دوزت مقابلة فالعمالة حيت غتفتح مشرووع وضرووري مدوز من اختبار يشوفو كفاءتها فالضومين.. كملت وخرجت نيشان مشات العيادة ديالها لقلت وليد واقف على الخدامة للي كيعلقو لبلاكة للي مكتوب فيها بالخط العريض بالاحمر عيادة هند الادريسي تخصص تروييض... شحال فرحت وعجبها الحال وحتى غبار العمارة كاين لوحات فالكحل مكتوب عليهم العيادة واسمعت ورقم الهاتف وحتى العنوان بالعربية والامازيغية والفرنسية.. كملو ومشاو تغداو بجووج بحماس كبير كتهضر على الخدمة وشحال من حاجة وليد شرط عليها دخول مع 9 ولا 10 والخروج مع 3 سبت وحد روبو.. قبلات حيت راه هي مولات شي دخل وتخرج فوقما بغاااات...)
أمال: (كان عندها اول نهار ديال براتيييك فلبيرمي جلست وشدت لفولون كما قال ليها لمونيتور.. شافت فزهير للي مربع يدو وواقف من لبعييد تبسمت معاه وشافت قدااامها حط يدو لاخر على لفولون قريب ليدها) بعد يدك
لمونيتور: راني مبعد اختي
أمال: (كتهضر وتشوف اونفاص معاها) عارفة اخويا غير زيد راه راجلي قاسح (بعد يدو وشافت فزهير عاودت تبسمت حيت الوقفة والحضية للي داير ديال وااحد على سبة..)
شكرا اخويا (بدات التعليمات وديمارات الطموبيل بقا معاها خطوة بخطوة من بعيييد حتى تحركت بيها وهي فرحانة.. كان عقلها خفيف متبعة معاه كل خطوة حتى كملت الساعة ديالها هبطت وجا عندهم زهير درعها وزادو)
عطيني نصووݣ للدار
زهير: ها!!!
أمال: ههه (خطفاتلو سواارت مشات كتجري)
زهير: وݣفي يا جدك (حلت لباب ودورت الساروت مجا فين يوصل حتى سدت لباب وسورتاتو) هودي الزاج... (دارت إشارة انها مكتسمعوش بغا يكعا وغلباتو الظحكة بحركاتها وعفويتها.. دار إشارة باش تنزل الزاج.. نزلاتو شوية) مزال احبيبي متصوݣي
امال: (دارت إشارة بيديها ملاقياهم بحال لهنود..) عفاااك عفاااك طريق خاوية
زهير: (بقا مدة كيشوفها كترغب) واخ رجعي اللور (صفقت ووهي ديمااري حطت يدها على لفولون كتشوف اللور ولكن الطموبيل كتحسها زايدة القدام... جاتو هيستيريا ديال الظحك حتى حنا دار يديه على ركابيه) ريضي ريضي هههه
أمال: (وقفت مغوبشة وتحولت لبلاصتها جا زهير طلع شاد فيها مشاو للدار وفطريق ديال ديك الطوالة عطاها تصوݣ... طلعو للدار عاودها الحاجة للي شحال ظحكت عليها وهي مرضيااش.. وكتفهمهم راه غير تلفت..
هاكا دازو الايااام هند مزال مجاتها الورقة من العمالة باش تبدى ولكن لونصاات الاعلان ديالها فݣوووݣل.. )
امال2: (كانت كتشوف علاقة عمها ومرتو زوينة كيظحكو وينشطو ويخرجو مرة مرة ويمشيو لدارهم وينعسو.. كان كيبقى فيها الحال وتسول علاش انا أنوار مكيديرش معايا هاكا تبقى غير كتنهد حتى التيليفون قلييل فين كيهضر معاها مرة بدا الهضرة معاها فنعاس وهي تقلب الهضرة حشمانة من تماك مولاش هضر معاها فداكشي...)
دازت شهر أمال كان عندها الامتحان مشات دوزااتو ونجحت فرحت بزاااف ورجعت صايݣة بطموبيلة ديال زهير واخا كانت ماشية غير ب60 حتى هو عجبو الحال وهي لاسقة فلڤولون مكتشوف لا يمين لا والو..
أمال: واخييييرا دابا شنو خاصني
زهير: واش؟!
أمال: (بابتسامة) طممووبيل
زهير: حتى ندير
أمال: للي ديرو ديرو داابا انا بغيت طمووبيل
زهير: ههه واخا لالة جاااتك غير صبري علية هاد ايااام....
واخييييرا جاء الفرج لهند وخدات لوطوريزاسيون وغتبدى خدمتها حلت العيادة ديالها للي قبل ب4 اشهر وهي دايرة اشهار كانت تفاهمت مع بنت للي تجي تشد الاستقبال وفنفس الوقت دوز ميناج خفيف على العيادة نهار اه ونهار لا بثمن للي رضى حتى لبنت للي كتقلب بالريف الناشف على خدمة وعندها ديبلوم بالاعلاميات جات هند مع 8 للعيادة ديالها قبل الوقت باش تساعد قلبها كان غيسكت بالخلعة والفرحة خايفة متنجحش ومتحمسة كولشي مجموع فيها... جات المساعدة ديالها وراتها شنو خاص يداار كان المكتب نقي مقاد وصلت 9 بقات هند فالمكتب ديالها على اعصابها كتسنى شي حد يجي واالو دازت ساعة مكاين حتى شي كليان شوية سمعت الصونيط فرحت بقات كتسنى حتى دخلت عندها المساعدة ديالها علماتها باول كليان
هند: اه دخلييه.. (كمشت يدها كنوع من التوتر قدات ابتسامتها جبدت ورقة وستيلو دايرة راسها كتكتب حتى تحل لباب هزت راسها وهي تجمع الابتسامه) فيصل؟!! شنو تدير هنا
فيصل: قلت نجي نبارك ليك (سد لباب كيشوف فالمكتب ديالها للي مأنتك.. محرك راسو منبهر) باقي عاقل شحال قلتيلي غيجي نهار للي نحل فيه العيادة ديالي وتكون نتا اول كليان (تبسم) هانا حققت ليك هاد الحلم وجيت حتى لعندك
هند: (شيرت للباب متعصبة) خرج ت** عليا نتا وداك الحلم ديالك
فيصل: ت ت ت اش هاد لقباحات ولات فيك امداام
هند: متعصبنيش افيصل خرج من هنا انا وياك داك نهار منين حطيت الاستقالة ديالي مبقات حتى حاجة كتجمعنا.. قالك جاي نحقق ليك الأمنية ديالك وتا نووووض وعيييق برااسك راني مزوجة واش متتفهمااش
فيصل: فهمت... غير نتي واش غفلتي على شي حاجة ولا لا؟!!
هند: شنو هي؟!
فيصل: باقا حسباني تنبغييك ميمكنش انا حاس بشي مشاعر عندك لية
هند: صبحنااااا على الله
فيصل: وباش زدت تأكدت هو صافي حطيتي الاستقالة واخا نتي سنيتي معانا والعقد مزال فيه 4 شهوور يعني درتي فباالك صافي ميمكنش فيصل يتابعني قضااائيا (تصدمت) انا عاجبااااه وممكن يكون كيبغيني ݣاع
هند؛ نوريك طريق المحكمة!!!
فيصل: نو عارفها انا ضربت صورة باش نتأكد حتى من العنوان
هند: للي فجهدك ديرو ودابا ضور ت** فحاالك (ناض بابتسامتو المستفزة خرج خلاها كترجف واخا مبيناتش ليه وعاد منين قال العنوان اذا مشا دار شي حاجة الفرحة كاملة تضربت ليها فالزيييرو.. دخلت المساعدة وقالت ليها على كليااانة بغات دخل) 5 دقايق وقولها دخل.. (بقات كتحاول تكالمي راسها واستقبلت لكليانة وحاولت تركز معاها.... وصلت وقيتة ديال لغدا جا وليد جايب بنتو معاه حيت بقات معاه سلم عليها بلبيز وسدت بنتها كتعنقها وتبوسها)
وليد: كيف داز نهار
هند: (بابتسامة) مزياان.. مزياان الحمد لله
وليد: شحال من كليان جا؟!
هند: (حطت الطابلية ديالها) 3 وعندي 4 بلاتي
وليد: اممم ماشاءالله.. ياله نتغدااو
هند: اه باش رجع دغيا.. (فيصل نغص فرحتها.. خرجوو مشاو تغداو)
وليد: سمو بانلك نحطو غيثة وحتى زهير بغا يحط ولدو فداك الروض للي حدانا
هند: اه زوين بزاااف صراحة
وليد: مالكي؟!
هند: لا والو ههه غير مزال مضهشرة شوية (بقات كتعاود ليه على لكليان هي رجعت للخدمة وهو خلا معاه بنتو مشا حدا زهير طلقو مشا لدارو يتغدا على مجال ورجع عند مو للي كاينة فدار محمد...)
الحاجة: بنتي راجلك مزال مجااي؟!
امال2: مزال أما ݣالي باغي يزيد شي شهر (صونا على الحاجة ابيل فيديو) ها هو يصوني عليك انا ݣاع ميصوني عندي بزااف
الحاجة: (جاوبت) اوليدي (بقاو كيتهاضروو) وفوك تجي اوليدي؟!!
أنوار: مزال أما جدات لولا بغاتها تبقى شوية عندهم
الحاجة: وكيف بقات اوليدي
أنوار: حالتها اما... تشللت ونص وجهها عواج مكانتش كتهضر ولكن منين شافت لولا وهي تبكي رغبتني نخليها ليها شوي
الحاجة: ما فيها باس اوليدي راه قاسحة عليها ماتت بنتها وبنت بنتها مغربة عليها
أنوار: ويييه عيات ترغبني نرجع لفرنسا
امال2: (بقا فيها الحال هادشي ݣاع مفخبارها) واش ݣلت!!!
أنوار: (الحاجة صورت الكاميرا وعطاتها لمرتو شاف فيها) أمال صاڤا!!!
امال2: الحمد لله ونتا؟!
أنوار: الحمد لله.. (مكاين ميتقال)
امال2: أنوار واش مزال مترجع
أنوار: راك سمعتي واش ݣلت لمّا
امال2: وانا علاه مراك تݣولي والو..
أنوار: حتى نصوني عليك بالليل دابا نمشي نشوف شي سلعة على حساب المحال (قبل متجاوب قطع... مينساش هادي 4 ايام منين عاود جبد عليها حس المعاشرة وقالتو مالي مكبوتة حتى نهضر معاك فهادشي.. حس بهاد زواج فاااشل بامتياز ندم ندم علاش طااوع باه كان ممكن يصبرووو ويخليوه يختار استغلو داك الضعف للي كان فيه وغيقبل على للي كان هو مزال باغي يعيش الرومانسية يسمع توحشتك حبيبي كنبغيك وهادشي مكاينش مع مرتو التقليدية البلدية للي عارفها كتبغيه ولكن الحوار معدوووم مكاين لا تعبير لا والو حاول معاها مرة جوج وسد حتى هو.. والتعدد اخر حاجة يفكر فيها وطلاق صعيييب فحالتو حيت ماشي غيطلقها غير هي راه عائلة غيشتتها... حاار ومعرف شنو يدير كان كيقول غتبدل الا أمال كانت كتر منها فالحشمة وفكوولشي ودابا كيشوفها إنسانة اخرى مع عمووو للي حتى هو زهوااني يعني ممرتاح معاها الا لقى فيها شنو بغا وهو اكتر واحد كان كيعرف زهير شنو باغي من لمرااا... علاش هي لدابا محيدت دوك الافكار للي عندها فبالها التقليديين وتعيش معاه كيف بغا هو ماشي كولشي عندها حشومة وعييب....)
دازت شهرين اخرى هند كل نهار كتسنى شي عون قضائي يجي واالو مكاين حتى شي جديد الخدمة بدات كتحرك عندها والبرد دخل سجلو وليداتهم فلاكخيش باش يندامجو مع لوليدات أمال الطموبيل للي تحطت حداها كتسبق تبغي تصوݣ ولات طالقة يدها شوية فااصوكان فوسط لمدينة ولات حتى هي كتغوت على للي يعمر عليها ولا يكلاكصوني والا خافت كتسكتها توقف وللي حداها يتكلف.. الامور ماشية مزيان شيماء كتوجد فسبوع ديال بنتها التانية للي قررو يديرو سبوع فتاوريرت كانت خايفة بزااف من الولادة الطبيعية وغير كتفكر شنو داز عليها مع حسن كتفيق مخنوووقة وشي مرات كتحلمو كيعذبها وتبقى تبكي حتى كيفيقها أشرف مخلوع عليها ومعصب حيت مزال اسمو مبغى يتمحى من ذاكرة مرتو...
أمال: (كانت كتوجد لعشا حيت عارضين وليد وهند وخا مرتو ومها.. جات حداها أمال2 للي ضعاافت وغير مهموومة) مالكي؟!!!
امال2: ميجاوبنيش
أمال: ههه عاود دابزتو نتوما دايرين بحال المش والفار
أمال 2: خايفاه يكون تزوج عليا راه 5 شهور باش مشا حتى من السلعة سمعت من خالي جات.. علاه يكون مزال مجا؟!!
أمال: معرفت اختي
امال2: هو زوين اي وحدة تعشقووو
أمال: (محست غير ميقت فيها عاد نتابهت وقدات شوفتها) أمال راكي حتى نتي زوينة وغزاالة والا جا ولقاك هاكا مغيعجبووش الحال
أمال2: بالصح!! خاصني نغلاض؟!! عرفتي مكرهتش نمشي ندير الݣديرة
أمال: (بدون شعور) ويااااك!! أمال راه هو لي غاالط فحقك وبزااف ولكن هو بطريقتو ولا معرفت كيبينك نتي للي غالطة ومعرفت شنو دايرة...
أمال 2: خايفااه يطلݣني ونرجع شووهة بين لبنات
أمال: اولا نتي مدرتي والو باش طلقي.. تانيا ستي أمال الا مبغيتيش راسك نتي هو عمرو يبغييك.. بغي راسك وعزييها تعزك..
أمال 2: راه سباب باش ميهضرش معايا ݣالي خاصك تبقاي تهضري معايا فداكشي
أمال: هضري راه راجلك بلعكس يا الهبيلة الا جات على هاكا وغير هضري وصيفطيلو توحشتك وتوحشت كدا وكدا (فنفسها أنوار ومن لا يعرفه هضري معاه فهادشي يشد معاك حتى لصباح)
أمال 2: يا ختي نحشم
أمال: لا لا عادي راه راجلك وغايب عليك كتر من 5 شهور وبراكة متبيني ليه راكي طايحة على زنافرك وخنونتك ديما هابطة عليه كولشي برزامة كيكون زييين مرة هاك مرة هااك وحيدي دااك كترة التسوال راه زهير عمك كيعاود لمّا شي حوايج انا معارفاهمش وعادي راه هاكا كبرو واش عاد نجي نوريك فحناك
امال2: شنو نكتب لو
أمال: داكشي للي كتحسي وبلا متحشمي ݣوليلو شنو ودنو بغات تسمع وعينو شنو بغات تقرا...
أمال2: (جاو العائلة للي معروضين كولشي مجمع كيظحك الا هي مقنتة مرة ظحك مرة تصوط على راسها بيدها باش تبرد شوية وحنوكها مزنݣين حتى صونا عليها ابيل فيديو منين سخنااتو مزيااان بغا يشووفها ويشوف هادشي للي لابسة مجاوبااتش حتى وقف عليها زهير) خالي!!
زهير: هانتي جالسة وحدك (شاف تيليفونها كيصوني) انوار داك!!!
أمال2: هااا!!!! واه
زهير: (شد التيليفون وشد كان وجهو قريب مزنݣ) لداك لبغل
أنوار: (رجع راسو داير يدو على شعرو مرجعو اللور متوتر) زهير!!! صافا!!
زهير: الحمد لله ونتا معوالش ترجع؟! كتر من 5 شهور باش مشيت
أنوار: قريب قريب.. فينها امال؟!!!
زهير: (شاف فبلاصتها ومالقاهاش) كانت هنا..
أنوار: اممم... الدار عامرة
زهير: واه، مهم نهضرو من بعد (قطع عيط لامال2 جات عندو مرتو) ابردي على الزين ديالي
أمال: ههه شنو بغيت؟!! (جات بنت ختو)
أمال2: نعام اخالي (عطاها التيليفون ورجعت للكوزينة تحط لعشاا... )
محمد: ختي امال كيف راكي مع الصوكان
أمال: مزيااان نضرب بيك شي ضويرة
زهير: روحي أمال
أمال: كولشي يݣولي كتعرفي تصوݣي حتى ليك نتا
زهير: اممم ياله رووحي (بقات كتشوف فيه)
محمد: هههه لا خاصني نشوف الصوݣان ديالك (ولات كتموت تركب فشي طموبيل وتصوݣها.. كملو السهرة مشاو فحالهم المعروضين...)
أمال2: (دقت على امال فبيتها) مرت خالي رواحي نݣولك
زهير: متعطليش
أمال: نشوف لبنت شنو بغات ازهير... (خرجت عندها وجراتها لبيت صغير فين كتنعس حيت كتخاف تنعس بوحدها وطلعت لدار الحاجة.. حطت بينوارها وكانت غير بغوب دونوي) اختي لبرد عليك
أمال2: وراه أنوار ݣالي لبس هاكا وبغاني نهضر معاه عريانة حشمت بزاف
أمال: شوفي هو راجلك عادي
أمال ص: زعما!!!
أمال: واه... عادي كما ݣلتلك سمعيه ووريه شنو باغي ياك نتي باغية تجبديه عندك (لوخرا حركت رأسها اه بالزربة) اوا صافي.. (خرجت أمال مشات لبيتها وامال2 دارت شنو كان باغي أنوار من شحال هادي وشافت التغيير لكبييير فيه... وكانت اول مرة يتكلم معاها حتى ينعسو بجوج...)
أصبحنا وأصبح الملك لله...
محمد: (كان ديجا موجدها واليوم تقادات الامور... عرف زهير غيكون فلوقيتة ديال لغدا مشا عندهم لقاهم كيتغدااو مدخلش حيت أمال مرة أنوار دخلت تلبس حوايجها اما أمال بدات تولف تجلس حدا خوها بلا فولار...)
زهير: دخل امحمد (دخل محمد متبسم) زيد اصااحبي واش عاد نعرضووك
أمال: (مشات سلمت عليه) دخل اخويا فين ماما؟!!
محمد: فالدار... بالصحة والراحة
الحاجة: دخل اوليدي (جلس) زيد اوليدي مرحبااا الدار داركم (كلا جوج شدوووݣ مقادرش يصبر)
محمد: بالصحة والراحة والله عاد كليت.. (بقاو عليه حتى تغدا معاهم كملو جمعو لبنات الدنيا ولوخرين كيشربو فأتاي) أمال هودي معايا نوريك شي حاجة
زهير: واشتا!!!!
محمد: هبطو وتشوفو (هبطو معاه حتى كتبانلهم Ford Fiesta قدم لغزال)
زهير: بدلت لحديدة؟!!
محمد: هادي ديال أمال.. (طرطقت عينها وحلت فمها) لكاادو ديالها
زهير: (شاف فيه شوفة ديال لقتييلة يديه كيااكلوه على داك لحجر للي فقنت كامل يردمو بيه)
أمال: (مصدومة) حلف بالله!!!!
محمد: ههه والله بقات واحد السنية من عندك وهاوهي دياالك
أمال: (مشات عنقاات الطموبيل للي تماك كيظحكو على الفرحة ديالها محمد ظحك عاجبو الحال وزهير ربع يدو عااارف اش تااابعو كان باغي يشري ليها طموبيلة ولكن كان داير مزال تطلق يدها كتر.. كانت فرحة كبييييرة حلت الطموبيل كتبان نقية بزاااف كان شراها ديجا مستعملة ولكن نقية ركبت فيها عاد تفكرت ورجعت عند خوها عنقااتو وباستو فحنكوو زهير كيشوف فيها بحال حصلها كتخوونو اول مرة يشوف أمال فأحضان شي واحد بحال هاكا... تزير ولكن بقا مبين مبرد.. كولشي بارك ليها الا هو ركبت فيها لاح ليها محمد الساروت ديمارااتها وضارت على النفووورة والحاجة كتصفق ليها وهي كطوط عليهم شافت فزهير ظاحكة طلق ابتسامة بلهلا يطريها ليه.. حطتها وهبطت معنقة خوووها)
محمد: تبارك الله عليك راكي تصوݣي مزيان
زهير: علاش كذبتي راسك أخاي محمد كنت ناوي نشريهالها
محمد: بحال بحال وهدا راه غير رزقها
أمال: شكرا بزاف بزااف اخويا والله فرحت.. (راسها فراسها وزهير غير متبعها) نوصلك لداارك!!!
زهير: لاااااا.. لوااه لواه مزال متݣادو لوراق
محمد: ههه سني فهاد الورقة نديها لعدول وفبالعشية نجيبلك الطموبيل ووريقاتك
أمال: ههه دابا (طارت كتخلف درووح بتلاتة الدرجات لجوج سنات ورجعت عندهم الفرحة باينة فيها مشا محمد وحتى زهير رجع للخدمة وأمال طلعت بالفرحة ناضت طيبت ملاوي مسمن بالشحمة وردات كسكسو لعشااا...)
وليد: (كيظحك على زهير والطريقة باش كيعاود شنو دار محمد) عقلت منين ݣلتلي راه باها وحتى هو من حقو وكدا
زهير: ماشي بحال
وليد: راه خوها هداك وزايدون راه حقها شحال وهي مسكينة كتݣولك بغيت طمووبيل
زهير: قيلني عليك أوليد راه ريتي غطردݣ
وليد: (جمع الضحكة) زهير بالمعقول اصاحبي خوها شرا ليها طموبيل نتا راه كدير كتر من جهدك معاها ومعيشها احسن عيشة خوها شرا ليها طموبيل خليه راه حاس براسو مقصر بزااف من جيهتها
زهير: غنضربها لمها باحسن تحميلة
وليد: ها!!!!
زهير: ديها فرووحك وروووح قضي ليك غرااض
وليد: هههه وبااااز (ناض كيظحك عليه كملو خدمتهم.. حتى عيط ليه أشرف شيماء جاها لحريق وداها لاكلينيك تولد طلع عند زهير بالخف قالهالو خرج داز عند هند للي كانت سالات مع الكليانة وخرجت معاه.. وصلو عندو كان هاز بنتو فيدو كيمشي ويجي بيها مخلووع...)
هند: امدرااا أشرف
أشرف: دخلوها لحريق جاها مجهد وهي خاايفة
هند: بففف الا بقات هاكا غيݣزروها بشي سيزاغيان
أشرف: الله يلطف وصاافي (كان على اعصابو وليد شد بنت ختو كيلعبها ويظحكها.. صونا على مو قالها على شيماء باش تجي هي وباه ولا يجيبها ادم.. هند كتصبر فاشرف للي قرب يبكي وغواتها كيتسمع... وليد خرج مريم حيت كتسمع غوات مها وكتخلع دازت مدة هند طلعت عندو حيت مكاينش الريزو لتحت.. بشرااو ان شيماء ولدات مزال معرفو جنس لبيبي او بالاحرى غير أشرف للي معارفش اما شيماء عرفات وخبرات لبنات وشي قالها لشي... طلعو للشومبر تسناوها حتى جابو لبنيتة فنموسيتها وشيماء فكرسي متحرك بقاو صابرين بالبنت وشيماء بحرا كتحل عينها بالحريق للي كان فيها وتمارة دالولادة وعاد لغرااز لحق كولشي تقريبا)
أمال: وكان كانت طموبيلتي عندي وكان جيت ݣبيييل
زهير؛ (شاف فيها ديك الشوفة ديال ها مقااال الفقييه) وااااه
كولشي فرح وبارك ليها حتى لحقت مها وباها فرحانين اما أشرف محطش لبنت من يدو يعطيهالهم يشوفها ويبقى حداهم حتى يردوها ليه بقا بايت معاها كولشي مشا واخا نعيمة كانت عوالة تبات مع بنتها تقابلها ولكن منين راجلها أصر بلعكس عجبهم الحال زااامتها بزااف وكتشكى منو ولكن باين شحال كيبغيها ومقاابلها من كولشي..
يتبع...
التعليقات
لا توجد تعليقات بعد، كن أول من يعلق.