أحببت رجلا الجزء الرابع

عدنا..

وليد: نبغييك تحضي راااسك

شيماء: وااخا خوويا حتى نتا تهللا فرااسك بزاااااف

محمد: (شاف فختو للي واقفة حانية رااسها ومبعدة شوية عليهم) نتي ماالك مبعدا!! زيدي قربي

فتيحة: (ياله بغات تقرب) فقصااتني هاد لبنت مكتسمعش لهضرة غير الله يحفظ معاها

محمد: (بحزم) علاش ياكما سخن علييها رااسها محدنا مديماريين تزييد معاانا (هنا دار وليد وشاف فأمال للي واقفة بحال شي يتييمة وضرااتو فخااطرو شاف فمحمد للي كيخنزر فختو اما باها كيشوف فالتسبيح ومها معجبها حاال غير كتشكي عليهم عليها)

فتيحة: وانا من داااك نهااار للي ترجع فحاالها

احمد: (أب أمال) هنيونا واش غنبقااو فهاد الشمش مصطفى ياله اخويا الغراض راه تقضى (مشا بلا حتى ميشوف فبنتو للي للي شافهم يحلف عليها دايرة شي ذنب عمرو ميتغفر لييها وهي ذنبها انها كرهات حبسهم وتمييزهم وتنمرهم... ولقات لقرايا هي الحل الوحييد باش تهرب من تمااك وياا ريت كان بالسيف علييهم هوما للي صيفكوها غير مرضاش قدام خوه للي غيصييفط بنتو وبنتوهو تبقى بلا علام...)

محمد: (مد يدو لجيبو وعطا لمو جوا) عطي لبنتك هاد لفلوس

فتيحة: اش غدير بييهم راه مزال يكونو عندها لفلووس

محمد: ميييييي عطي لبنت (عصباتو شدهم ومدهم لأمال) نهار تخصك شي حاجة عيطيلي( تم راجع يركب فالطموبيل حتى قشع هند واقفة كطل عليهم حنات رااسها وهو طلع ركب فطموبيل يتسنااهم وعينو على شيماء للي باين فبها التغيير لكبييير فوجهها وحنيكاتها للي بانو قلب وجهو لقا هند مزالة واقفة كتشوف فيه غير شافتو دخلات وهو مسوقش)

وليد: (باس لمو رااسها وتمعن فأمال) تهلاي فراسك الوالدة

نعيمة: (كتبكي) حتى نتا اوليدي

شيماء: وصاافي احبيبتي علاش كتبكي؟؟

مصطفى: وصافي انعيمة نعلي الشيطان مغيدوز شهر حتى يجي ياك اولدي

وليد: (دار نظاظرو وشاف فأمال) ومغنكملهاش كااع ونجي

مصطفى: ياله زييد انعييمة هاد الوقفة هنا معجباانيش شفنا لبنت راها بيخير وزيدي نمشيو

فتيحة: (لبنتها) هاحنا مشينا احبيبة فوقاش غتجي نتي؟؟؟

شيماء: (بصوت خافت باش ميسمعهاش وليد) معرفتش حتى لمور لامتحان

نعيمة: اممم .. اجي امال ابنتي نسلم عليك (مشات كتسالم مع مرت عمها) تهلاو ابنتي (باستها) تهلاو فبعضياااتكم رااكم خوووت

أمال: (حنات وباستلها يدها وهنا فتيحة وكان صااابت تشتف على بنتها تقتلها ومتبردش ليها) كوني هانية امرت عمي

وليد: (تبسم لا اراديا وشاف فختو) خاصكم شي حاجة؟؟؟

شيماء: لا خوويا مستوورة والحمد الله هههه

وليد: (ضربها ضربة خفيفة لرااسها متبسم) للي سمعك يقوول بنت باب الله ونتي لفلووس كتشربيهم ماشي كتصرفييهم تكاايسي ابنت بوويا راه عرق كتافنا هادووك مكيصدقوهمش علينا

أمال: هههه (ظحكها)

فتيحة: ماالكي نتي كضحكي؟؟ (دارت حركة براسها حتى جمعت أمال فمها) صاافي سيري طلعي

أمال: حم واخا ماما (باستلها يدها وراسها وكتسناها تقولها الله يرضي عليك)

وليد: (متبعها وكيجاوب مو على وصيتها باش يتهلى فراسو) واه واه كوني هانية

فتيحة: ياله سيري شنو مزال واقفة ديري هنا؟؟

أمال: (بغضب مشات بلا متشوف لا فيها لا فباها للي مستخسر حتى الشوفة فيها ولا خووها للي مسولهاش حتى واش لبااس اصلا ممحتاجاش رضااها ولا حنانهم.. مع دخلتت لقات هند فلباب جالسة فوق طروطواار غير شافتها وقفااات)

هند: ماالكي كتبكي؟؟؟

أمال: (كتشهق بلبكى) واالو والو هءء هءء تفووو كرهت حياااتي والله حتى كرهتهااا..

هند: بفففف غير الشوفة فداك خووك كتخلع انا خرجت غير كنطل خنزر فية بلا شعوور دخلت يخخ ركب فية لخووف

أمال: (دارت يدها فمها ومشات بالزربة كتبكي خلات هند من موراها كتعيط دارت عندها) عفااك اخييتي خليني نبقى بووحدي..

هند: (وقفات متأزمة من حال أمال) واش هادي بنتهم ولا مربيينها؟؟...

وليد: (محملش مرت عمو واصلا من قبل مكانش عندو معاها من نهار شافها كتحرش دراري على ختهم حيت بغات تقرا فلباك كرهها وشحال من مرة طيحات عليها لباطل وخلات محمد يزرق ليها لحمها هادشي كتعاودو ليه شيماء) مهم الوالدة سيري نتي راه مزال تباعكم طريق وانا حتى الليل عاد غنمشي

نعيمة: وغتبقى بووحدك اولدي؟؟

وليد: هه عادي امي غير هاد سويعات على مرجع باش نبقى تماك بوحدي كتر ههه

نعيمة: (عنقااتو) تهلا فرااسك اولدي (ضارت عند شيماء) حتى نتي ابنتي تهلاي فرااسك متاكليش فالزنقة وعفاا بنتي من قراايتك للهنا ديها فقرايتك قراايتك للي غتنفعك وغدير ليك قيييمة

وليد: علاش بالسلامة كتمشي لشي موضع اخر؟؟؟

شيماء: ها لا اخوويا عمري فحياتي مشيت لشي بلاصة

وليد: اممم على ربي ياله سيري راه أمال مشات متخليهاش بوحدها

شيماء: (رجعات عنقات ماماها وتباوسو وخدات من عندها فلوس عاد مشات باش فلعشية غتلاقا مع خوها باش يخرجها تقدا شنو بغات نعيمة مشات فحاالها وشيماء تماات داخلة مع لباب وقفات ليها هند وهو يقشعها وليد تكره حيت كان عندو أمل ختو متبقاش تعرفها ركب فطموبيلتو ومشا لوطيل يرتاح...)

هند: (تبعاتو حتى مشى) مال أمال دخللت كتبكي

شيماء: (حيدات لفولار واخا مزال مدخلات لبافيو (عمارة فين كاينة شومبر ديالها) ومبقاتش كتحشم من لعساسة للي كيدورو تمااك حدا لباب) يخخخ ديك مرت عمي دايرة بحال شي شيطان دوك العينين عندها غير مطرطقين (عيباتها) بحال هااك

هند: هههه لا بالصح أمال دخلات مسكينة كتموت بلبكى

شيماء: وفينها؟؟؟

هند: لحقتها بالصح قالتلي بغات تبقى بوحدها

شيماء: (مشات زربات عند بنت عمها مخلية هند تابعااها لقاتها ناعسة على كرشها ودايرة وسادة على راسها وكيتسمع غير صوت شهقتها.. طبطبات فظهرها) أمااال أمااااال براااكة عليك من لبكى اختي واش باغا تحمقي راااسك مع هاد العاائلة دزبل (أمال غير كتبكي) وااااا أماال برااكة وعفااكي ياك نهار اللول قلنا مبقيناش نديوها فييهم ياك كنا بيخيير قبل ميجييو وحتى داابا ها هوما مشاااو وتهنييينا

هند: (بقات فيها أمال ومشات لشومبر ديالها حطات ديك الجلابة وبقات بووحدها وتفكيرها فللي محملهااش) بففف وعلاش كنفكر فييه أنا عمر شي ولد**** مقمعني وهدا محاملش حتى الشوفة فية وانا كندير هاد تبرهييش غير باش نشووفو تفوو خزييييت علية (بقات مضااربة غير مع رااسها أما أمال كانت كتغسل وجهها وتستغفر الله)

أمال: استغفر الله.. (حيدات شاالها ودخلات لشومبر ديالها لقات شيماء كتشوف فشعرها فلمرايا وظحك) رجووع الله

شيماء: عينيك رجعو بحال شي gلتة ديال الدم رخفي على راسك شوية شوفي شعرك شحال جايك زوين

أمال: (بابتسامة خافتة) اودييييي.. (حيدت عبايتها وبانت طاايتها للي تبدلات شوية صدر بان شويييييييية والمؤخرة رجعات بااارزة على للي كانت وجاية مع طايتها للي صحاحت على نهار جات ولكن الا تعرات باقا عندها محرووقة ولحمها من تماك زرااق متبعة غير تريتموو باش يتوحد ليها اللون ومتبقاش ديك لبلاصة عايبة عندها.. جلست كتفكر حتى نطقت) واش باقي شي واحد فهاد العصر كيفكر هاكا

شيماء: (باستغراب ضارت عندها) كفاش!

أمال: اه عارفة حنا عايشين فمجتمع ذكووري ولكن ماشي باش لبنت تلغى فمرة ويبقى الراجل هو كولشي

شيماء: (جلست حداها) صرااحة خووك كتجيني مك للي كتعمرو علييك راك شفتي منين قمعها منين مبغاتكش تشدي لفلوس

أمال: مبغييتش لفلوس بغيتهم غير يحسو بية يعتابروني بنتهم وختهم يحتارمووني شوية انا راه بناادم ماشي حيوان وماشي عبدة عندهم

شيماء: وصافي هاني انا كنبغييك

أمال: (للحظة تفكرت أنوار منين كان تابعهم وتبسمت) شفتي هداك ككان تابعنا قبيلة

شيماء: ههه نتي للي كنتي متبعاه اما انا كانت فية سريسرة

أمال: والله مسمعتكم منين قلتو راه جاو هههه

شيماء: برااكة كنتي غير كتسمعي سي أنوار ديالك

أمال: أحااي مدياالييش

شيماء: امم قولي الصراحة عجبك؟؟ وحتى وليد بقا قبيلة كيشوف فيك وطتر من داك لاخر

أمال: أ..لااااا

شيماء: ههه كولشي كتعجبيه انا بعدا كاع ملقيت للي يبغيني

أمال: (بتنهيدة) نتي عندك احسن أم كاع متحتاجي شي حد اخر...

أمال: نتي عندك أحسن أم كاع متحتاجي شي حد اخر يدخل لحياتك وحتى خوك مهلي فييك بزاف ودايرك كيف بنتو ماشي حتى ختو معندك مديري بلبراني دخليه لحياتك يخربقك

شيماء: واه ولكن انا بااغا نبغي شي واحد ويبغيني ماشي ماما ولا خويا لا باغا شي حد اخر

أمال: دابا يجي رزقك

شيماء: كنتسناه هههه اجي نمشيو عند هند ونكملو هضرتنا عندها

أمال: واخ صبري غير نلبس حوايجي

شيماء: وغير ياله هاكا راه غير بنات بيناتنا

أمال: ألاااااا (هزات عبايتها وشاالها ولبساتهم بالزربة) زيدي

شيماء: قاعدتك هي قاعدتك عمرك طوري (أمال معجبهاش الحال وجمعات الظحكة وتبعات شيماء دخلو عند هند للي كانت كتنشف شعرها وباينة عاد دوشات) بصحتك ازيين

هند: الله يعطيك الصحة.. أمال شوية؟؟؟

أمال: الحمد الله اختي (جلست معجبهاش كلام شيمااء وحلفات متخليه كياكلها بوحدها) شيماء ماشي حيت لبست هاكا كتعني انا ممطورااش

هند: شنو واقع؟

شيماء: ويلي اصااحبتي واش تقلقتي؟؟

أمال: نتي ديما كتقولي هاكا

شيماء: ولا زعما قلتلك عادي الا بقيتي بحوايج لتحت زمرا عليك دغيا كتقلقي حتى نتي

هند: اولا نتي ماشي مكلخة وعندك شخصية قوية

أمال: انا عندي شخصية هه كظحكي علية؟؟

شيماء: غير كتبغي تنقصي من راسك وصاافي

هند: راه صعييبة تجي هنا وتعيشي بوحدك من بعد مكنتيش كتخرجي فمرة من دااركم.. وزيد جاية ناوية تبدلي من رااسك ماشي هاكا جيتي نهار االلول وباغا تقرااي ويكون عندك مستقبل

أمال: (عجبها لحال) غير مكانش عاجبني رااسي

هند: وهانتي تهليتي فيييه وحتى قشااوش لعرس منسيتيهمش هههه

شيماء: هههه هادي كاااينة قداات شغل لأنواار

أمال: (دارت يدها على وجهها حشمانة) أحاااي!! انا درت كولشي حيت انا بااغا ماشي على قبل شي حد

شيماء: امممم تقتك أنا نتي مدرتي هاكا غي حيت بااغا رجال تعجبيهم (قرساتها هند) أي حم زعما باش تكوني زوييينة كتر

أمال: (حيدت يديها) لا انا مبغييتش رجال يبغيوني

هند: متحتاجيش حيت بلا ميشوفو والو منك بغاوك وبالدليل أنواار للي بالصح بانلي طااح فيك طيحة ****

شيماء: وحتى وليد

هند: خوك؟؟

شيماء: واه قبيلة كيشوف فيها والا هضرات كيعجبو الحال ومنين مرت عمي غوتات عليها (هنا أمال قندشات) معجبوش الحال وقالنا صافي سيرو فحاالكم

هند: واش هو قالك أمال كتعجبو؟؟

شيماء: لا ميقدرش ولكن قالي الا كانت مكتابة لية أمال نبغي نتزوجها

أمال: واش بالصح؟؟

هند: متدييش على هاد الحمقة وليد راه يقدر تكون كتبقى فيه أمال وغتكون عزيزة علييه غي حيت هي ضرييفة وزيد راه بنت عمو بحال ختو

أمال: (غير كتفكر فهضرتهم بجوج)

شيماء: وزعما أنوار للي كيبغيها متعرفي حتى هو غير عزيزة عندو وصاافي

أمال: (بحال ضرب الضو فقلبها) زعما!!!

هند: انا كنعرف فهادشي وأنوار عجبااه أمال وبزااف ووليد مشفتش كفاش كيتعامل معاها باش نحكم ولكن الا كان بالصح كيفكر بعقلو مغيكونش كتعجبو أمال حيت أولا عارف خووه باغي أمال لزواج وتانيا مغيبغيش يجبد لعدااوة مع كولشي باش يتزوج أمال وتالتا راه هو الا تزوج أمال من هنا نتي غتزوجي بخوها من هنا والا غينوض الدم بين ولاد العم ونتوما قلتولي عائلتكم ممعهاش اللعب وكتهضر غير بلقتيلة...

أمال وشيماء بقاو غير كيتشاوفو بيناتهم وكيفكرو بجدية فكلامها وخصوصا شيماء للي غتاكلها أما أمال حتى الا تزوجات وليد غتعييش مزيااانة أما شيماء غتعييش الوييييل والجحيييم مع محمد.. فهاد اللحظة كانت هند كتمشط شعرها لفاازك وكتشوف ردة الفعل ديالهم غير من لمرايا وفنفسها كتحااول تقنع أمال بعمرها تفكر فوليييد للي حاسة برااسها مايلة ليييه بزاااف

شيماء: لا لا ميمكنش نتزوج داك لكيدار

هند: شفتو قبيييلة غير مخنزر يا ربي السلاامة ولكن منكذبش علييكم عندكم التيتيييز فالعائلة غير ممهليش فرااسو بحال خوك وليد وصااافي

شيماء: محمد زوين؟؟؟ ههه واقلة مشفتيهش مزيان

هند: لا لا فيه زيين حرش خاصو غير يتهلى فرااسو وصاافي

شيماء: اوا شووفي معااه باش يقييلني انا عليه (ضرببات بكتفها لكتف أمال) وأمال تزوج وليد ونصدقو فمعاادلة مرضية لجميع الأطرااف

هند: اهاااه (هزت حاجبها فيها) ونتي شنو غتربحي من هادشي كاامل؟؟؟

أمال: هي تربح أنوار ههههه هو للي بقا

شيماء: هاي هااي هااي تحلك لفم ههه

أمال: ههه وغير نظحك انا هند كاع منبغيلها بحال خوويا يقطع ليها جناحها ويكرهها فعيشتها

هند: (تبسمت مع أمال للي نية) ضرافاات يا لالة.. عرفتي أنوار محبسش من الصونيط

شيماء: وياله نخرجو نتغدااو ونيت نفرحو برااسنا (لمست على شعرها) كاع مخلاونا نفرحو بيه

أمال: واش نتي حمقة وخووك للي مزال مساافر؟ والا صونا عليك وبغا يتلقااك

شيماء: هيييء والله حتى نسيتو

هند: اممم هي غيجي هنا

شيماء: بحال واالو... هند غتخرجي نتي؟؟

هند: لفين؟؟

شيماء: ههه عند شي صاحبك من صحاابك

هند: عفا الله احبيبة (هزت تيليفونها كان أنوار كيصوني جاوبات) وي أنوار صافا!!!

أنوار: هند فين أمال!!

هند: (شافت فأمال للي باينة من عينيها فرحانة) ها هي حداايا

أنوار: دوزيهالي

هند: ول..

أنوار: هند!! ضروري بغيت نهضر معاها (هند مدات لأمال التيليفون للي مبغااتش وهي كتبززو عليها حتى ناضت ودارتولها فودنها) أمااال كتسمعيني،؟؟

أمال: (حست براسها غتسخف وكتعرق غير بوحدها منين سمعت صوتو وسميتها كفاش نطقها) حم امم

أنوار: (تبسم) شنو وقع قبيلة علاش مشيتو كتجرييو واش عائلتك غوتات عليك بقا بالي معااك

أمال: ها... ( شحال فرحات لسؤالو ولاهتمامو) لا مزيان موقع واالو

شيماء: (حطت ودنها على التيليفون كتصنت)

أنوار: نشووفك؟؟ (سكتات) بغيت نشووفك أمال

أمال: (بعفوية) لا

أنوار: علاش لا؟ غنتلقااو فبلاصة فيها النااس نهضرو ونرجعك للدار باغي نزيد نتعرف عليك أمال

أمال: (بحرا كتقدر تجاوبو) لا

أنوار: (معاها مكيقدرش يتعصب ولكن صبر بدا يتقاادا) واخا عطيني غير نمرتك راه صدعت لبنت كنصوني علييها كتر مكيصوني عليها صاحبها

أمال: (حشمت وحنات راسها بحال كتفكر واش تعطيه ولا لا) معرفت

أنوار: (كيحاول يرطب معااها) أمااال غادي غير نهضرو ياك مباغاش نتلقااو خليي على الأقل نهضر معاك فالتيليفون ميكونش رااسك قااسح

أمال: (تفكرت معندها للي يسول فيها وهو شايفة فيه اهتمام كبيير ليها) حم واخ

أنوار: ههه (حاسها كتخرج لكلام من فمها بالسيف) كتعجبيني ل... (سمع طيط طيط غوبش وشاف فالتيليفون لقاها قطعات بقا كيضور فعينييه مفااهمهااش رجع التيليفون لجيبو وهو كيفكر فييها وعلاش هاد الحشمة كااملة ولا هادي طرييقتها باش تخلي الواحد متعلق بيها.. شوية رجعات عندو سهام وجلسات) شنو اسهام جبتيني باش تبقاي تنوحي حداايا اختااصري راه مضيع هاد الوقت للي جالسو معاك هنا..

سهام: (شافت فيه كتحاول بعينيها تستعطفو على الله يحن) علاش كتعامل معايا هااكا واش صافي نسيتني؟؟ كتهضر مع شي وحدة اخرى ياااك!!!

أنوار: بفففف رجعتي كتعصبيني اسهام نهار اللول دوينا حنا كان بيناتنا هاك وأرا عطيتك وعطيتيني صاافي هنا حبسنااها متعاوديش ضوريلي حيت كتخصريلي مجاجي

سهام: كفاش كفاش هاد هاك وأرا واش انا بنتلك خارجة طرييق

أنوار: واه خاارجة لتورووت كاع سهااام!! (هز حاجبو) خوك راه مدوز ونتي رااااك مررقة ماشي غير مدوزة وفووتيني بلا متسمعي كلام يخليييك كتاكلي فرااسك

سهام: (الدمعة لسقات ليها فشفاارها وبربقات عينيها فييه مخلالهاش فين تزييد تهضر لاح 100 درهم فوق الطبلة دار نظاظرو وزاد مخليها متبعااه بعينيها ومصدوومة فالانسان للي كان كيبان ظريييف ودمدوومة فلحظة تقلب عليييها...)

أمال: (غير قالها كتعجليني حيدات التيليفون دغيا من ودنيها وبتوتر كتقلب تقطع حتى قطعات ومداتو لهند)

هند: ههه شنو قاالك باش قطعتي عليه؟؟

أمال: هء مكيحشمش

هند: ههههه ربي شنو قاالها

شيماء: مسمعتش مزيان هاد الزمرة دغيا قطعاات وهو كيهضر بشوية تحت لسانو

أمال: (فرحااانة وكتحس بكرشها كتفيفري ومكرهاتش تبقى ظحك وتعاود لكوولشي على فرحتها ولكن شي حاجة فيها لدااخل كتقمعها وتفكرها بخووتها وواليديها والمجتمع بحال راها غدير شي ذنب عظييم) مgال والو

هند: ههه لا بااينة قاال غير الله يهديك عليييه ههه شي نهار غتسطيييه

شيماء: (هزت تيليفونها كتخرب فييه وتلف الوقت ولفقسة للي فييها ان لدابا حتى واخد مسوق لييها صونات عليها ماماها وعلماتها بللي وصلات ووصاتها على رااسها قطعت وشافت فهند) من قبيلة ونتي كتزيزي ومخرجااش!!!

هند: حبييبة تعلمي واحد الحاجة الا قاديتي شي حاجة فييك وتهليتي فراسك خاص يكون على قبلك نتي ماشي على قبل شي حد اخر

شيماء: كفاش!!

هند: متسنايش تعجبي شي حد باش تقاديلو المهم تكوني تايقة فرااسك نتي وتعجبي برااسك وتبغيييه عاد شوفي الناس ويقولو للي بغااو متسوقيش مدام نتي عاجبك راسك

شيماء: (لوات شنايفها ممسوقاش ورجعت كتسييلفا أما أمال كتفكر فكلام هند)

أمال: أنا كنتgااد غير باش نعجب راسي كنت من ديما فاش كنشوف أفلام بتخبية كيعجبوني لبنات كنبغي نعري شعري ويكون مgااد

شيماء: والترمة لاش هههه ربي متكذبيش على رااسك وعليينا نتي درتيها باش تعجبي الناااس

أمال: ألاااا ياك نتي عاارفة ماما ديما كانت كتعايرني بييها وكتgولي طاي ديالك بحال ديال رجاالة وهي للي عقداتني بييها حتى درت هادشي وهانا باقا محروgة فيها انا درت هكاك غي حيت انا بغيتها وكان ماشي هند للي gالتها كاع منعرف راها كدااار

هند: سي أنا مولات الفكرة وأمال عندها الصح هي قداتها ليها وحتى حوايجها مستورين مكتبانش كااع باش شي واحد يلاحظها

شيماء: (خرجت عينه) كتباااااان فرق كبيير ككانت وكولااااات

أمال: (معجبهاش الحال) حم هند صيفطي لهدااك نمرتي

شيماء: هاااي هااي صافي بغييتي!!!

أمال: شيماء نتي كتحشيلي الهضرة من نهار درت ديك الكدرة ونتي هاكا

هند: (خنزرت فشيماء حيت عيقات على أمال)

شيماء: أناااا !!!! حشومة عليك أمال

أمال: نتي للي حشومة علييك زعما انا بنت عمك وكتعرفيني عندي غير نتي وعارفة من ديما كنت مقموعة معرفتش علاش نتي كديري هاكا بحاالهم تبدلتي

شيماء: (متوقعاتش أمال تنفاجر فيها هااكا مواالفاها كتحني الرااس) انا كنقمعك؟؟

هند: لبنات نعلو الشيطان

شيماء: لا بلاتي حتى نشوف هادي شنو كتعني

أمال: كفاش هادي؟؟

شيماء: شنو كتقولي زعما أنا كنغيير منك ولا داك سيهم أنواااااار نفخك

أمال: (تصدمت ناضت وخرجت بلا متجاوب شيماء)

هند: واش حمقة دوري دورة وتجبدي أنواار

شيماء: (جمعت يدييها عندها وقندشت) صافي اهند..

هند: (مشات جلست حداها) كلمة ديال الصح نتي للي فاالطة مكنبغيش ندخل باش منزيدش نشعل لعواافي بينااااتكم ولكن أشيمااء راه زدتي فييه لبنت نية وظرييفة وكتبغييك بحال ختها ونتي شفتها مها للي يا حسرة وكفاش كتعااملها أما خوتها وبااها كاع ممعتابرينها كااينة علاش حتى نتي تزيدييها

شيماء: ومسمعتيهاش قالتلك كنقمعها

هند: وراه بالصح كتقمعيها اكترية الا هضرت على انوار وعلى على شي حاجة فييها زوييينة حنا كاع كنبغيو ريووسنا ونشكرو فرااسنا وفشي حاجة عجبانا منك نتي ياك من صباح ونتي فرحانة بشعرك وهي تابعاك بحال النكاافة كتشكر فييك والا هي بغات تشكر وتفرح براسها كتقمعيها وتزيدي تقوليلها كديري هادشي غير باش تعحبي رجاال راه اهاانة هادي اصاااطة وحتى وحدة مغتقبلها حيت بلمعنى كنقوليلها نتي ق****...

شيماء: غير كنبغي نظحك معاها

هند: شيماااء علاقتك ببنت عمك حسن من أي علاقة حيت فاخر نهار هي للي غتجي ليها تشكي وتبكي وتفرحي وهي تسمعك ياا ريت وكان كانت عندي شي بنت عمي بحال أمال والله منحتااج شي صحابات ولا شي بو****

شيماء: هي انا خاايبة

هند: مخيباااش ازمر ولكن متقجريش على لبنت انا كتعز علية والله شوفي غير صباح فاش داازت (وقفت) انا غنمشي عندها (خرجت وخلات شيماء جالسة جامعة رجليها عندها وكتلعب بخصلة من شعرها ومعرفااش شنو للي مخليها معصبة وشااعلة غير بوووحدها وأكترية من موضوع أمال وأنوار....)

محمد: (كان كيفكر فشيماء وشحال زادت زياانت منين شافها وهو تفكييرو غير فييها لدرجة مغابتش على باالو فمرة.. كفاش كانت كظحك وكفاش كتهضر وباينة عليها فرحاانة ومرتااحة معرف ميديير باش ينساها مو عيات توريه تصاور لبنات باش يمشي يخطب وهو رااافض مباغي حتى وحدة ومن جهة اخرى رجوولتو متسمحلووش يعاود يمشي يطلب بنت عمو لزواج وهو ترفض من قبل .. هبط ريدو ديال لكرااج) دراري هو هدا غدا خاص السلعة تفرق على لهريااات.. (خلاهم وطلع للدار مسخسخ من بعد نهار طوييل لقا مو جاالسة عاكفة درة ديال حياتي على رااسها ودايرة جوج حامضات فنواظرها باس ليها رااسها) مي ياك لباس؟؟

فتيحة: عيااانة أوليدي مبقيت قادة على شي طريق نشدها الله يااخد فيها الحق بمسبتها وليت نشد عليها طريق من بلاد لبلاد

محمد: الله يهديك امي واش جاب لبنت للهضرة

فتيحة: احيااني اوليدي علاه وكان ماشي هي كنا غنشدو طريق

محمد: (جلس عيان حيت هو للي ساق بيهم ورجع نيشان للخدمة) على سااعة دلمكانة منين شفتيها وشي لاخر راه بيقيتو كضوروه فالسوق بحال هنا مكاينينش توااب ولمواعن وزايدون قلتلك متمشيش ونتي للي لسقتي بغيتي تمشي

فتيحة: (كترجعلو لسيرة ديال أمال) عرفتي يا وليدي تبدلات مبقاتش تحشم فمرة هنا بعدا حتى كنا حاكمينها

محمد: أمال ووو!!

فتيحة: هااااديك

محمد: لباسها باقي هو هو ولبنت مكتهزش عينيها من الارض ومشينا على غفلة وكانت فين خليتها مشفت حتى حاجة تبدلات.. ونييت اجي gبيلة عاطيك لفلوس تعطيهم ليها ونتي كتحشمينا gدام عمي وعائلتو منين بغيتيها تجييب لفلووس الا معطيناهم ليها حنا هااا!!

فتيحة: اش بغات دير بشي فلووس

محمد: كفاش اش غدير بلفلوس وباش بغيتيها تعيش وتقرا تماااك بحال كتgولها خرجي gلبي علييهم فجهة اخرى

فتيحة: شتك بحالا عاجبك الحال بداك الشوهة للي داارت ياك حتى نتا مبغيتيهاش تمشي تقرا

محمد: الشوهة للي دارت نتوما سبابها نهار gلت لا ممتقراش مسمعتولي ورجعت gلت متمشييش لتمااك gلتو لا واش نتحشمو مع عمك هو يقري بنتو وحنا لا وباش هوما فايتينا للي بنتهم تقرا وحنا لا شتي المعاااندة ديالكم

فتيحة: وشنو بغيتي نعيمة تشفا فينا

محمد: هضرة لعيالات (ناض مكره) كاين مناكلو ولا نمشي نركد

فتيحة: لوااه اولدي تبات بالجوع غير على ميجي باك وخووك ونحط راه طلعو غير عند عمك.. (مشا مخليها كدور فراسها وتفكر أمال للي جاتها تبدلات فوجهها وحتى لحنيكات خرجو شوية ومبقاش لعضيمات كيباانو خاافت غير من شي شووهة ولبنت المغبونة الا شماات ريحة الحرية كتدير مبغااات هزت تيليفونها ودوزات نمرتها الي 5 الثواني وجوبات) الو

أمال: (كتمسح دموعها) الو

فتيحة: كتهضري مع نعييمة؟؟

أمال: (تفافاات) مرت عمي؟؟؟

فتيحة: وشكون من غييرها

أمال: لا غير مرة مرة منين كيكونو كيهضرو مع شيماء ابيل فيديو كتسلم علية

فتيحة: هاااا ودني عنداك تبعيها هي وبنتها راه غير كرعة محزمة بفكوسة وجالت ليها زيدو نشطحو

أمال: (ظحكات على نيتها) هههه

فتيحة: تهجريييه (ضربات الطم) سمعي منبغييكش تبقاي مقابلة ديك لكماارة نهار تجوجي وديري مبغيتي مع رااجلك ولكن دابا لاااا

أمال: حم مكندير والو

فتيحة: وريني فيك انا للي كنت كنشوفك نهار ومطال ونتي حاضية لمراايا

أمال: واخا ماما

فتيحة: وحتى ديك لبنت منبغييكش ترااافقي معاها

أمال: واخا ماما

فتيحة: الله يهنيك (قطعت وناضت لكوزينتها توجد لعشا حتى خلطو تعشاو بكري ونعسو حيت عيااو....)

شيماء: (صونا عليها وليد) واخا خويا انا دابا نزل عندك ياك راك فلباركينغ؟

وليد: لا انا برا مخلاونيش ندخل هاد لمرة يمكن مشا الحال

شيماء: واخ انا نجي عندك انا وأمال

وليد: امم متعطليش (قطع وبقا كيتسنااها أما شيماء وهند مخلاو فين قلبو على أمال ومكانتش كتبغي حتى تجاوبهم فالتيليفون)

شيماء: هند ياله معايا نتي حتى رجعو نقلبو عليها

هند: (تفافات ولكن مبيناتش) واخا صبري لبس شي كيطمة (دخلات بالخف لبسات كيطمة كولون مطرطق ولكن القبية هابطة حتى لفوق الركبة مع سبردبلة عالية وسعر جمعاتو كعكة مقاادة منزلة شي خصلات منها وبالزربة دارت عكر مااط خفيف وفاغاجو رشات برفانها لخفيف وخرجت عند شيماء للي كتعبرها) شنوو

شيماء: يا ختي للي لبستبه كيجييك زويين ماشي بحالي ديما كنبان صفرة وشنايفي بحال لاحسة لكبص

هند: هههه وكان دابا نعطيك برودوي تخلي حنووكك وفمك حومر هههه

شيماء: ههه واخ.. بففف هاد لهبيلة معرفت فين زاادت

هند: زيدي وكاان راك نتي للي عيقتي علييها (خرجو مشادين لبرا وهند كتقلب بعينيها حتى بانلها واقف) راه

شيماء: (مشاو ووقفو حداه) خويا واش مجبتيش اللوطو ديالك

وليد: (محملش يشوفها مع هند) رديتها لاجونص.. (شاف فهند للي حتى هي محيداتش عينها علييه) ماالك كتشوفي نتي

هند: (حرجها متوقعاتش سؤال بحال هدا حتى طرطق عينها) ها لا عادي مكنشوفش..

شيماء: هه ويلي خويا غتحشم لبنت

وليد: غتحشم؟؟ هه (ظحك باستهزاء) مهم مزيان.. فين هي بنت عمك قلتي غتخرجي معااها

هند: (بحال شي واحد طرشها قلبت وجهها وهي تبانلها أمال قاطعة طريق) أماااال!!! (ضارو بجوج شافوها) أمااال

أمال: (غير شافت معاهم وليد تسعقات خافت يوصلها لخوتها ولا هو يقول هادي فين كاانت وصلات حدااهم وهي كترعد) كك ككنت غير هنا فواحد الجردة والله مكنت فشي بلاصة خاايبة

وليد: بشوية عليك!! (شافها كترعد) فين كنتي؟؟ وعلاش خرجتي فهاد الوقت

أمال: (بغات تبكي) والله كنت غير هنا

وليد: أمال متخاافيش انا غير كنسولك لوقيتة خاايبة 9 دالليل هادي مخاصكش تخرجي هنا ونتي مكتعرفيش وجدة مزياان

أمال: (عاد رتاحت) غير تخنقت ولقيت راسي تمشيت والله غير دابا شوية سول كااع لبنات متعطلتش بزااف والله

وليد: (بقات فيه) انا ماشي كلوومك غير حيت خفت علييك هاد لوقيتة كتكون خاايبة متعاوديش مرة اخرى

هند: (للي تمعن فمومو دعينيها غيلقى لعاافية فييهم وزادت تأكدت أن ولييد ماايل لأمال) حم خلعتينا عليك اصااحبتي عرفتي شحال قلبنا علييك

شيماء: أمال واش غير تقلقتي مني تمشي وتخليني كنقلب عليك بحال لحمقة

وليد: شنو وااقع؟؟ واش دابزتو

أمال: لا لا غير متفهمناش فلكلام عفااك اخويا متgول لحتى واحد لقيتني برا والله معادا كنت كنتمشى هنا غير هنا (كتشير بيديها لبلاصة)

وليد: لمن نgولها (حك ذقنو ومسح على فكو) متعاوديش تخرجي فهاد لوقييتة (شاف فشيماء) ونتي متبقايش داابزي مع بنت عمك راكم خواتات زعما

هند: ماشي داابزو غي

وليد: (دار فيها) انا كلامي معااهم هوما ماشي معااك نتي

هند: (فنفسها قالت ز***** لاااخر تفووو.. طلقات من ذراع شيماء ودخلات مكرهة)

شيماء: خويا حشومة علييك لبنت مقالت حتى شي كلمة ديال العييب

أمال: (حنات رااسها وخووفها غير يوصل لدارهم أنها كانت على برا فهاد لوقيتة)

وليد: شيمااء انا كلامي عليكم نتوما بجوج هضري علاش داابزتو؟؟

شيماء: (مشات شدات فذراع أمال) وراه غير تناقشنا وصاافي وأمال كانت مقلقة غير على حساب مرت عمي شنو دارتلها صباح قبل منخرجو عندكم

أمال: (شافت فيها) حشوومة سكتي

وليد: متعاودووش داابزو رااكم كبارااات

شيماء: (تبسمت وباست حنك أمال) منعااودش وصاافي ظحكي

أمال: (تبسمت ووليد كيشوف فيها) الله يسامح

وليد: خاصكم شي حااجة؟؟؟

شيماء: جيبيلي اخويا شي تيليفون وااعر من برا

وليد: ياك شريتلك واحد جديد وصيفطتو ليك

شيماء: مافيهش لفلاش من لقداام

وليد: هه واخا ونتي أمال بغيتي تيليفون

أمال: (فنفسها كتقول اااااااه) لا عندي

شيماء: اش عندك لعساااك (جبدات من جيب عباايتها...)

شيماء: اش عندك (جبدت من جيب عبايتها تيليفونها) الريزو وقليل فين كيشدو لعسااك اخويا خاصها شي واحد جديد

وليد: نعطيك ديالي!! (توgد) زعما الا بغيتيه وكنتي محتاجاه ضرووري انا غير نوصل لداري عندي واحد تمااك ولا تصبري نصيفط ليك شي واحد ولا الا بغيتي ياله نخرجو نشري ليك شي واحد (تلف وهو كيشوفها غير مكتزيد تحشم وتحني راسها)

شيماء: عطيييهلي أنا عفاااااااك

أمال: (حشمت) لا لا مبغيتووش

وليد: نتي سكتي راه عندك واحد من بعد ونجيبلك اخر

أمال: (تشجعت) شكرا خويا وليد

وليد: (باستغراب) علاش؟؟؟

أمال: حيت نتا ظريف معايا

شيماء: هههه وحتى انا ظرييفة معاك

وليد: (تبسم) تهلاو فراسكم وفبعضيااتكم ونتي أمال راك بحال ....... بحال شيمااء

أمال: (تبسمت وشافت فيه) ياك متgولهمش لقيتني خارجة؟؟؟

وليد: ههه اه gولي كترشييني بنتا ظريف وكدا باش منشكمش بيك

أمال: (ظحكت حتى بانو سنانها) هههه لا والله

وليد: هه واخا لالة غير متعاودش مرة اخرى هنا الدنيا خايبة كلامي ليكم بجوج ماشي كولشي تييقو فيه (شاف فختو) ماشي كووولشي

شيماء: اصلا مكنخرجو مكندرجو

وليد: حسن ياله دخلو فحاالكم راه لبرد تحرك

أمال: الله يدييك على خير اخويا

وليد: (تبسم معاها) شكرا

شيماء: حم خويا حشومة شنو درتي مع هند

وليد: (تعصب) ندخل نبوسلها يدها باش تسمحلي ونتي تبردي!!

شيماء: هييء مقلت واالو (مشات كتعلق فيه وتباوسو بلحنك قبل مبقول شي حاجة اخرى أما أمال عبات صابرة وبقات كظحك بشوية) غير توصل صوني علية اخويا الله يديك على خير وطريق سلامة

وليد: ياله دخلو (تشادو لبنات ودخلو تحت انظاارو بقا وااقف حتى غبرو وهي تخرج هند من مور الشجرة للي حدا لباب وخرجات لقاتو تحرك على رجلو والدنيا خااوية كيتسمع غير صوت الريح للي كتلعب بشجر.. لحقات بيه حتى وصلات عندو)

هند: وليييد

وليد: (ضار مستغرب لقاها هي دار يدو فجياابو وجوبها) وي

هند: (بغيرة) ماالك معاايا

وليد: شكون نتي؟؟

هند: (غززت سنانها كتشوف فيه وهي كااعية وهو مبررررد) انا ماشي خاايبة كما كتفكر فية

وليد: بنت الناس انا اصلا معلاباليش بييك باش نظن ولا منظنش فيك ولكن شوفتك مع ختي مهيااش

هند: انا لبنات راه بحال خوتاتي للي معندييش

وليد: هوما ماشي بحاالك ونتي عاارفة من الاحسن بعدي من طرييقهم

هند: (بعصبية) علااااش كتقول هاكا شنو الفرق بيناتنا علاش كتحكم علية ونتا اصلا مكتعرفنييش

وليد: (حنا عندها مقرب لوجهها وعينيها نايمين) صووتك ميعلاش.. اول.... واخر مرة تعاود

هند: (تبسمت باستهزاء) هادشي باش كتقولي بعدي من طرييقهم خفتي حتى هوما يبقاو يهضرو على حقهم وميبقااوش بحال لعبييد عندكم

وليد: (هز حاجبو) عبيد!!!

هند: (عاد طلعات معاها شنو قاالت) ماشي هاكا ق..

وليد: (ببرود وقف منتاصب وقلب وجهو جهة اخرى) عمرني ضربت ولا فكرت نضرب شي مرا بعدي من طريقهم

هند: ضربني أنا!!!!

وليد: (شاف فيها شوفة ديال استهزاء من راسها لرجليها وضار ماشي حتى رجعت قداامو واخا معرفتش علاش كديير هاكا ومتحااربة مع رااسها باش توقف علييه) من اللخر اش باغا؟؟

هند: (معرفت متقوول وحست بكواريها نزلو بزااف وهدا غيحدهم لييها مواالفة هي للي كتكون فبلاصتو وتعفر على كوولشي شافت فعينييه ملقاتش ذرة ديال الإعجاب من جهتها عكس ككان كيشوف فأمال وعاد حساات بشيماء ككتحس منين كيكون أنوار باغي أمال.. فنفسها مرضااتش على شنو كديير ولكن شي حااجة لدااخل كتخليها دير هااكا يمكن حتى هي متشوقة شي واحد يعاملها كما كتعامل شيماء وأمال شي واخد يخاف عليها ينهرها الا دارت الغلاط محسات بيه حتى زاد وخلاها قلبها كيضرب ف 100 مخلالهاش لوجه للي يخليها تمشي توقف عليه مرة اخرى مشات جلست فوق طروطوار وجمعت رجليها لعندها ودخلات راسها فيهم محملاش هادشي للي كدير وفتفس الوقت كتحس بغيرة خاايبة وكرامتها تمرمدات مزيااان فالأرض وصراع كبييييير بين قلبها وعقلها وكرامتها وقليييل فالأقلية فين كانت جربات هاد الإحساس كتحس بالضيااع وممتقبلاش ان وليد ممسوقش لييها)

وليد: (رجع ووقف عليها... بقا كيشوف فيها) وعلاش باقا لداابا فالزنقة منين نتي ماشي كيف كنظن؟؟؟

وليد: وعلاش باقا لداابا فالزنقة؟

هند: (هزت رااسها لقاتو هو قلبها ضرب فل100 وعينها كتشوف فوجهو للي كيشوف فالجهة الاخرى رجع شااف فيها ببرود) هم علاش تبعتيني؟؟؟؟ (وقفت ونفضت جنابها وشافت فيه زعما راني تقلقت) بسلامة (تماات ماشية فحاالها وكتسنااه يوقف عليها ولا يعيط عليها مهم باش ترجع ولو جزء صغيير من كراامتها للي تجرجرات.. كتمشى بشوية وكتقول ها هو كيشووف فية ها هو تابعني بكترة التوتر كتحس براسها مكتعرفش تمشي قداامو ورجليها كيعواجو وهي متأكدة كيشوف فييها والا علاش غيرجع عندها وصلات لباب الدار مستغربة كضوور كتلقى غير لهوى ديال شجر وبوطو ديال الضو ولعساس كيشوف فيها ويفرنس بحال شي كاامبو وكيتسناها دخل باش يك*** عليها وعلى داك الطرف... حلت فمها ممتيقاش) والله حتى مشى (ضحكت على رااسها) هه فشكل هاد خينا ولكن دارتك لفاسية فرااسها وتجييبك تجييبك... (دخلات وهي كتفكر غير فييه وكفاش داز هاد اللقاء المحرج للي خلالها اكبر VU فحياتها ومشا ممعبرهاشا وممكن يكون كيفكر فيها)

وليد: (غير وصل للشاريع شد تاكسي لوطيل هبط الشنطة ديالو ونيشان للمطاار تفكييرو فخدمتو ولجييست للي وقع مع هند وعاد أمال للي شهد على الحكرة للي حكراها مها وعائلتها واخا هو كيشووفها بحال شي ملااك مفهمش علاشمها كتعاملها خاايب وهي العكس.. تبسم منين تفكرها كتزاوgو باش ميشكمش بيها عرفهاطووب ديال البراااءة...)

~~~~~~~~~~~~

أنوار: (مل من كل مرة يصوني على هند ويبقا يرغبها على أمال باش تهضر معاه كمل خدمتو للي عطاه باه وركب فطوبيلتو نيشان لدار الطالبة صونا على هند للي كانت مزال مدخلات وجالسة غير فالجردة كترتب أفكاارها) هند مسالية؟؟

هند: اممم وي.. علاش؟؟؟

أنوار: انا حدا لباب واخا تخرجي عندي شوية

هند: واخ انا قريببة (قطعت معاه وخرجت لقاتو كيتسناها دارلها اشارة براسو باش تركب ركبت معاه وشافت فيه) مالك!!

أنوار: (باينة فيه كاعي) طايرالي بالجهد وفكعاااان من هاد صااحبتك

هند: ههه أماال

أنوار: (كيشوف قدامو) علاش كااين من غييرها؟؟

هند: (بتنهيدة) عرفتي أماال داكشي للي كتعيشو خاايب

أنوار: (باستغراب) كفاش

هند: عائلتها قااسحة بزااف جاو هاد نهار مها كتلومها على واالو السيدة حوايجها مستورين مكتهزش الراس فلواحد سوا راجل ولا بنت كلمة العيب مكتسمعش منها محتارمة صلاة والعبادة واخا هكاك مقيلينهاش باها مسولهاش حتى كبقيتي ولا شنو كديري ابنتي.. مسلمش علييها كاااع انما واحد خوها غير معفر كيشوف فيها غير بنص عيين

أنوار: وعلاه؟؟ واش ديجا دارت شي زبلة

هند: للي كنعرف لا ولكن مبغاوهاش تجي هنا تقرا بحكم زعما مدينتهم بعيدة على هنا بزااف وراك عاارف دوك لمتزمتيين

أنوار: ومنين مبغاوهاش علاش صيفطووها

هند: ههه حيت مرضااوش بنت عمها بغات تقرا حتى هي خاصها تقرا بحال لمعاندة وصاافي

أنوار: (عوج شنايفو مستغرب) ميمكنش عائلتها يديرو معاها هااكا غير هكاك

هند: حيت محافظيين بزااف ونتا سييتيها هادي كتر من 20 يوم ولا كتر.. كلمة مكتسمعهاش من عندها وكان كانت شي وحدة خفيفة دغيا طييح

أنوار: كاينة ومحدها كتعكس وانا لاسقها حتة نعرف حرييرتها ولكن الا عرفتها مباغاش هادشي للي كندير غنكيتي...

هند: واااا هو الصراااااااااحة (تبسمت بحال بغات تقولو شي خبر زوين)

أنوار: (غمزها) شنو

هند: هي قالتلي قبيلة صيفطيلو نمرتي راه بغااها

أنوار: وماشي حشومة عليك مخليااني بوطو كنتسناها حسابلي غير مصدراني

هند: هههه وراه فكرت، حتى لغدا على متشري شي تيليفون مقاد وشي نمرة مسكينة دارهم عاطيينها تيليفون مخرشش زيد ممنوع عليها تعبئ وعاد حاضيينها بزااف يلقاو غير الخط مشغول يجيو يهزوها يرجعوها راه قلت لييك ممصيفطينهاش بخااطرهم كيتسناو ليها غير خطأ بسييط ويجيو يهزوها نيشان للعدوول

أنوار: كفاش لعدول

هند: حيت خاطبها ولد عمها

أنوار: هي مخطووبة؟؟؟؟

هند: هههه واخا سرسبت ليك كولشي مجاتش على هادي ونسكت اسيدي أمال وشيماء ساكنين فدار وحدة اممم قول بحال موبل ديال العائلة مجموعين بيناتهم خو أمال بغا يتزوج شيماء وخو شيماء بغا يتزوج أمال منين شيماء مبغاتش خو أمال حتى عائلة أمال عائلة مبغاوش خو شيماء لأمال باش ميبقى العيب حتى من وااحد (زفرات كترتاح) فهمتي؟؟

أنوار: (حرك راسو باه ولسانو كيلعب فضرووسو) اممم

هند: عاودت لييك كولشي وبالتفااصيل لبنت راه بنت داارهم مربية ماشي بنات كيليميني والريح للي جا تدييها

أنوار: (غير كيحرك رااسو وكيفكر فكلام هند.. ضار شاف فيها) بغيت نشووفها!!

هند: بلاش هاد نهار راه دازت عليها مسكينة راه غير شوية باش لقييناها خرجت كتبكي ولا معرفت

أنوار: (بنظرة ترجي) شوفي كفاش ديري

هند: موحال تبغي انا عاارفة عقليتها كداايرة ال بغيت نعطيك تهضر معاها منين ندخل واخا

أنوار: وااخا.. (بغات تنزل) شكرا اهند

هند: (تبسمت) عزييييز (دخلات وتفكيرها فولييد مشات عند شومبر لبنات نيشان دقت عاد حلات لباب) نسيتووني....

أنوار: (صاايك بيد ويد مخرجها لرييح وتفكييرو فكلام هند على أماال وكفاش داايرة وربطها مع عقليتها للي مزاال مبغات تفهملو انها ترفضو ومتبغيش حتى تشوفو ولا تسمعو نيشان صااك لداارهم للي جاية فاخر لمدينة وجاية دار حدا دار حدا دار غير كل داار كبيرة وشادة مساحة كتكون من جنان صغير و3 ديور ملاسقين على شكل U جوج ساكنين فيها ووحدة خاوية ومسدودة.. فتحلو باه لباب دخل الطموبيل للوسعة فين كيحطو الطموبيلات نزل ومشا سلم على باه باسلو يدو وكتفو) بااا هانتا مزال لتحت لبرد علييك

أب أنوار: كنت مع خوتك عمك صيفط شي سخرة ومشاو جابووها

أنوار: امم مزيان كتافقو غير بوحدكم انا مخرجييني من هادشي

أب أنوار: ولدي نتي براكة عليك بيموات وزيت وداكشي دلحوانت خلي شي لاخر لخووتك لكبار

أنوار: اممم انا غير مومو فهاد الدار عاطييني لهااية ونتوما داخلين فالصح (زاد كااعي حيت مبغاوش يدخلوه فداكشي ديالهم)

أب أنوار: لا حولة ولا قوة الا بالله العلي العظييم (دخل تابع ولدو للي كيعربط) اولدي نعل الشيطان الا جيتي نتا تخدم فهادشي شكون يقابل داك دييبو؟؟

أنوار: شوف عبد الله ولا الواافي

اب أنوار: (كيساسيو وجرو مشاو للصالون للي كبير ومفرش بطلامط البهجة والخشب محفر وكولو ضوااو بتريات كريستال نازلين) جلس اولدي.. هوما مقريينش بحاالك مكيفهموش فلحساب مزيان ونتا اولدي صعيبة عليك هاد الخدمة جيب سلاح وسير للعمالة ديرلهم التراخيس وعاد يفرقوه براكة نتا نافعني فلحساب ديال الديبو

أنوار: واخا ولكن حتى انا باغي سلاح

أب أنوار: (خرج عينو) اش بغيتيه؟؟؟؟ خوتك ومعندهمش وزايدون سلاح ديال الصيد باش ينفعك نتا

أنوار: با راني عاارف كتجيبو لبيسطولي (سلاح صغير) وكتعطيه لدوك التجار لكبار وحتى نتا عندك واحد وحتى خووتي عندهم

اب أنوار: (وقف معصب) وهانتا عاارف نتا معندك مديير بهادشي خدمتك بعييييدة على هاد تخربيق قريييتك باش ترجع قطااطعي انا الا عندي كنمشي نصيد بييه ونتا لاش بااغيه؟؟؟ (منين كيكعا كولشي كيحني الراس) ياله نوض تعشا

أنوار: (خرج كاعي من تمااك حيت باغي واحد بحال خووتو وداكشي للي كيجيبو كيغبروه وكيكون بلحسااب مشا جلس حدا خووتو شوية وتحط لعشا فالطبلة...)

~~~~~~~~~~~~~~

هند: نسيتوني الطحبااات منين كنغبر مكيناش فيكم للي كتسول ولا تحاشيه لية

أمال: لااا ختي كاع متgولي هاد الهضرة

هند: اوا عليها سولتو فية ياك شي ساعة ولا كتر باش دخلتو

شيماء: انا حسابلي خرجتي تعشاي برا مع شي واحد حيت اليوم الاحد

هند: ياك شحال من مرة قلتلك مبقيتش كنخرج.. أمال صافا؟؟؟؟ (كتشوف فيها وكتفكر غير فوليد ككان كيهضر ويشوف ويظحك معاها)

أمال: الحمد الله اختي

شيماء: متبقايش تدي على هضرتي أمال ومتهاوديش تمشي هاكا وتبكي انا راه غير هبييلة مكنعرفش شنو كنخرج مع فمي

أمال: ههه واخا حتى نتي متبقايش تجرحييني

شيماء: ويينو على تجرحيني يخليلي نعيمة سمااااح الحساسة

هند: هههه سميتخا سمييييح (سهات) واخا حساسة كولشي كيبغييها..

شيماء: فين كنتي حقا السلكوطة

أمال: أحاااي حشووومة

هند: (قوست عينها) ككنبان ليك أمال بلا نفااق كتبان علية سلكووطة

أمال: لا ختي انا كاع مكنشوفك هااكا والله نتي بنت الناس ظرييفة وحنييييينة

شيماء: امالكي ابنت عمي هاد نهار ها الاحساسيس ها الحناان ها تجرحيني ههه

هند: سكتينا اشيماء شحال فيك ديال لفرييع

شيماء: يااااااك

هند: اااه وسيري قادينا منحنجرو راه دوورك اليوم وبلا متبقاي تغاباااي نهار كتجي نووبتك كيجيك زهاايمر

شيماء: (عوجت شنايفها وناضت كتشطح بشعرها للي فرحانة بييه دازت هزاات شنو خاصها ومشات للكوزينة اما هند بقات كتشوف فأماال)

هند: أنوار كان هنا وبغا يشووفك...

هند: أنوار كان هنا وبغا يشووفك

أمال: (توردو حنيكاتها) أحاااي لاااااا

هند: داكشي للي قلتلو ولكن فالليل بغا يهضر معااك

أمال: (بلعت ريقها) معرفت

هند: (تبسمت) ككيجيك ولييد؟

أمال: هانتي بلا متقلقي نتي عارفة كدايرين ووليد كان نهار اللول شاافك وحكم عليك غلاط ولكن نهار يعرفك غيندم ويجي يطلب سماحة منك

هند: يطلب سماحة ههههه مستحييل هداك يتنازل ويدييرها ولكن بالصح بقا فية الحاال

أمال: حسيت بيك وحتى انا معجبنيش الحال ولكن غير صبري

هند: انا مكنصبرش أمال

أمال: (سكتت معرفت متقوولها وفبالها غير أنوار للي كل نهار وكل سااعة كتجبد سبرتو بكترة ما كيلح باش يهضر معاها)

هند: نتي ككتعتابريه

أمال: (طرطقت عينها) حتى حااجة..

هند: ابااار زعما ولد عمك

أمال: حم (حسابلها كتهضر على أنوار) اه وليد هو ولد عمي وبحال خوويا وكل مرة كيكبر فعييني ظريف ومتوااضع وحنييييبين بزاااااف

هند: عاوتاني حنين ههه

أمال: انا راه للي غير ظحك فوجهي كنعتابرو حنين هههه

هند: اممم وشنو اخر ككتعتابريه حيت شيماء كتقول نتي كتعجبيه وكدا

أمال: هاديك راها حمقة هو بفمو قالي كنعتابرك بحال شيماء

هند: ويمكن بالصح تكوني كتعجبيه

أمال: (غوبشت) انا ختي مكنعمرش راسي بهضرة شيماء حيت راه غينوض صداع كبيير وعاد بين لخووت والشيطان يحضر وبحال والو خوتي يقتلوني حيت انا سباب لبلا

هند: ويلا هو تقااتل علييك

أمال: (حركت راسها بلا مكتبغيش دخل هادشي لراسها) لا لا لا وليد بعقلو مغيفكرش فهادشي

هند: باش عرفتي

أمال: معرفت ولكن كما كنفكر انا غيفكر هو

هند: ونفتارضو حتى نتي بقا كيعجبك وكان داكشي متبادل بيناتكم

أمال: ههه لا انا كنشوفو بحال خوويا وكيعجبني حيت كنشوف ككيدير مع ختو مكرهتوش وكان كان خويا حتى أنا وحتى هو راه قالي نتي بحال شيمااء وكان كانت شي حاجة غيقولهالي هههه ونتي دغيا رديتيه كنعجبو

هند: كولشي ممكن

أمال: لا ماشي ممكن هو راجل متاقي الله مغيبغيش وحدة خوه كان باغيها تكون ليه مرا

هند: وكان ماشي هاد الحاجز كنتي ممكن تفكري فييه

أمال: (تبسمت) معرفت

هند: وهنا غنات أم كلثووم منين كتقولي معرفت كتعني عندك هي اه

أمال: ولا ولاااا عفااك مدخليليش هادشي لراسي ونبقى نفكر فييه

هند: اخر وحدة تبغييك تفكري فهادشي كوني هاانية انا غير كنت بغيت نعرف باش كتحسي منين كتشوفيه وباش كتحسي منين كتشوفي أنوار

أمال: (هاربة ليها الظحكة) نقول؟؟

هند: قولي

أمال: منين كنشوف وليد كنشوف فيه بحال خوويا وكنتمنى محمد يكون بحاالو يخاف علية يظحكني ويديني نفوج ويشريلي لحوايج ويحن علية بحال ككيدير مع شيماء ومنين كنشوف هداااك (مزال مكتقدر تنطق سميتو) كنفرح وكنخاف

هند: هه الفرحة فهمناها والخوف لاش؟

أمال: يكون غير كيكذب ياك كتقولي رجال ولاد لحراام كيبغيو حاجتهم ويسلتو

هند: ماشي كولشي هانتي بفمك قلتيها وليد رااجل ومتاقي الله

أمال: وليد راه ولد عمي وكنعرف أخلاقو مزياااان أما هدا مكنعرف عليه واالو معرفت واش باغي يتزوجني ولا لا

هند: زواج؟؟ كتفكري فزواج دغيا

أمال: هاااء وعلاش كيتبعني منين مباغيش زواج غير الا كان كيتفلى

هند: ونتي حيااتك رخييسة عندك باش تزوجي أي وااحد خااصك حتى تكوني نتي مقتانعة بييه وعارفة عقليتو عاد فكري فزواج

أمال: زعما نتصاحب؟؟؟

أمال: وشنو زعما الا مبغاش جواج نتصااحب معاه؟؟

هند: اممم سميها تعاارف حسن.. انا كنعرفك ماشي ديال تفلية والحدوود نتي للي غتفرضيييهم على أي وااحد بغا يتجرأ يفووت الخطوط الحمراء

أمال: (بتنهييدة) راه صعيييب ندير هادشي لا ختي مبغيييتش

هند: اوك ديما ديري للي غيريحك

أمال: (قلبت وجهها كتشوف فلبالكو) صافي انا مبغييتش صدااع الرااس براكة غير هاد الحرية للي غنعييشها انا الا عااقو بية هضرت مع شي واحد غينحرووني وانا نخاااف من بنادم اخيتي

هند: وباش غيعيقو انا مكنقلكش دخلي وخرجي معااه لديوور ولكن على الأقل سمعيه شنو بغا بحال والو ترتاحيلو وتلقاي شنو كنتي كتقلبي علييه للي هو الحنان الااااالة هه

أمال: هه (دارت يدها على وجهها كنوع من الحشمة) احاااااي حشمي...

هند: ههه لا ختي انا مكنحشمش انا مقزدرة

أمال: اممم صافي

هند: (كتعيبها) شنو صااافي

أمال: وااا حم عطيتيه نمرتي صااافي؟؟

هند: لا

أمال: (مزعمتش تقولها علاش؟ وياك هي للي قلتلك عطيه..) اممم

هند: (عرفتها فاش كتفكر) معطيتوش ومغنعطييهش حيت فكرت هاد النمرة فأي وقت مك ولا خوك محمد يقوللك نشوفوها ولا يصونيو يلقاوها مشغولة قلت حتى تشري تيليفون للي مشهية وشي نمرة اخرى

أمال: واه بغيت تيليفون gبيلة وليد بعا يعطيني دياالو مسكين

هند: (هزت حاجبها) وغيير بغا يدوزها عليك

أمال: لا لا لااا والله حتى بغا يعطيهلو جبدو كاااع

هند: ههه شنو هو

أمال: (ببراءة) التيلييييفون

هند: امممم اوا وكان شديتيه

أمال: لا يا ختي حشووومة انا غدا نخرج ونشريه (فرحانة) راه مزال عندي لفلووس قلبانكا (قالتها مع ابتسامة عرييضة)

هند: (غمزتتها) الااالة جاااك وفاابور

أمال: (مفهمتش) هه كفاش فابور لا هند راه عندي فلوسي متشريهش لية عندي والله

هند: ههه ماشي انا وميغلاش عليك ازين... غير هو نشوفو السيد واش سخي ولا مكرزز على الحبة

أمال: والله مفهمتك

هند: (بدلات الموضوع) يااله نشوفو ديك لفريفرة شنو كتقااد ليينا وهي سكنات فديك لكوزينة

أمال: هه نصلي ونجي

هند: وييلي انا نسيت كاع مصلييت اليووم

أمال: اوا سيري توضااي واجي تصلي معايا.. (مشات هند وبقات امال بووحدها كتفكر فكلام هند ) ولكن هادشي ممزيانش أمال (قلبها: وشنو غتبقااي هاكا بووحدك.. دااركم ومحملينكش ولكن هدا كيهتم وبااغي يتعرف علييك وحتى منين غبرتي بقا مشوش علييك واخا نتي مباغاهش هو مزال لاسق فييك... هادو اسباب كاافية باش تخلي أي بنت محرووومة من حنان عائلتها تقلب فبلاصة اخر..

عقلها: لا ماشي كاافيين برااكة غير هوما تايقين فيك ومصيفطيينك هنا

قلبها: ههه فين عمرهم تاقو فية هوما صيفطوني هنا وقبلو غي حيت كيتعاندو ومرضااوش ولا نسيتي لعصى وتبهديل وللي ناض ليك يمسح رجلو فييك

عقلها: (كان كاافي باش حضر ليها لقطات معاملة ماماها الخاايبة وخووتها للي مكيكملوش الشوفة فييها وهادشي عند باالهم باش يربيوها ومتفكرش تزيييغ))

هند: أماال مزال مصليتي؟؟؟

أمال: (قفزاات) هاا لا لا gلت نتسنااك

هند: (كتقاد فولارها) هاد زمر كيزلقلي

أمال: ههه (وقفت وقداتولها) هاكا مزيان

هند: وكفاش كتسنايني ونتي تابعك غير لعشا انا راه من الصبح

أمال: اااه اوا صافي انا غنصلي ونتي صلي للي علييك (صلات صلاتها عاد هند بقات كتصلي مشات أمال للكوزينة لقات شيماء دايرة ليزيات وكتهضر مع مها وتظحك حست بنغزة فقلبها هي مها بقات كتهددها قبييلة ولكن نعييمة عكسها كظحك مع بنتها وتشكر فيييها وتزييدلها من المعنوياات) حم كملتي

شيماء: وااه نحطو؟

أمال: خلي هند تكمل صلاتها

شيماء: هاي هاي سبحان مبدل الأحوالمن سلكووطة لمسلمة

أمال: راه ماشي عمرها صلات غير كتقطعها بزااف حشومة تgولي عليها هاكا

شيماء: اممم ودابا تولفها ومتقدرش تبقى تقطعها بحالنا ... (حطو داك الطاجين وسخنو الخبز وتجمعو علييه كملوه جمعو الدنيا أمال مشات تغسل الطاجين مع جاات لقات هند عطياها التيليفون)

أمال: (عرفاتو أنوار مسحات يديها لفازكيين فبابي والظحكة هاربالها بصوت خاافت) نحشم

هند: وغير هضري راه كيتسناك

أمال: (عضت على شنايفها شدات التيليفون ودارتها فودنها) سلام

أنوار: (متبسم وهو كيسمعها وشحال كان باااااااغي يسمعها....) وأحلى سلااااااام لأغلى أموووولة..

وليد: (راكب فالطياارة للي غترجعو لبلاد للي مكيحملهااش وكتجييه خاااوية ومخلي دفئ عائلتو للي مكيسخااش بيه.. وفنفس الوقت فكر فأمال للي ليوم شافها مقلقة وشافها خاايفة وشافها كظحك.. كره مرت عمو للي مكتعاملش معاها مزيان وكره رااسو للي كيفكر فييها خصوصا من بعد ما سمع نبيل خوه مزاال كيعااود يقول انه باغي يتزوج بأمال وخاص ختو تقبل بمحمد.. ندم علاش مفكرش فيها من قبل يمكن مكانتش كتباانلو وقلييل فين كيتلقها بحكم ممنوع الاختلاط فالعائلة عكس هاد المرة شافها مزيااان كل تفصيل فوجهها عجباااتو ااه عتاارف بأنها عجبااتو يمكن بكترة مبقات فييه ويمكن بكتر ما سمع محاسينها من عند شيمااء ويمكن أول مرة يشووفها ويتمعن فيها مزيااان.. قلب وجهو كيشوف فسما للي كولها ظلام فظلام واااعد رااسو ميفكرش فييها وخاص يشووفها كما كيشووف ختو شيمااء.. من ديييما كيخدم كوولشي بعقلو مجااتش على احسااس رهييف ياله بادي بداايتو.. غيتحكم فرااسو ومغيخلييش شي حااجة للي تنوض الفتنة بينو وبين خوه صغيير...)

~~~~~~~~~~~~~

أمال: (تزنكاات وغير كدور عينها وكتشوف فلبنات بحال كتقولها عتقوووني.. أول واحد من الجنس الخشن غيقولها أموولة مواالفة يا سمييتها يا هاديك ولا يعيطو ليها بأنواع الحيوانات...)

أنوار: (سد باب بيتو) أماال كتسمعيني؟؟؟

أمال: اممم

أنوار: لباس علييك؟؟؟

أمال: حم (بصوت خافت) لباس الحمد الله (بعدات من حدا لبنات للي كيظحكوها وخرجت لبرا ياله غتبعها شيماء كتهر فيها حتى شدتها هند مجلساها حداها أنا أمال كتزرب ووصلت لسرجم كاين فاخر الكولوار كيطل على الجردة) و...ونتا؟

أنوار: منين سمعت صووتك راني طووووووب دلباس

أمال: ههه

أنوار: يخلييلي ظحيييكة اححح يا جدك شحال باغي نشوفها

أمال: (كتنش على رااسها واخا لبرد الا حااسة بالشووم والعرق والصهد)

أنوار: ولفتي هنا شوية؟؟

أمال: شوية

أنوار: شنو راكي تقرااي فلفاك؟؟

أمال: دايرة علم الاجتماع

أنوار: مزيان كنعرف صحابي بزاف كانو دايرينها الا احتاجيتي شي حاجة فالتلخيصات gوليهالي

أمال: (بحرا كتقدر تهضر) شكرا

أنوار: (سكت شحاال) علاش مبغيتيش تهضري معايا من قبل (مجوباتش) أمااال

أمال: هم... هي كنحشم

أنوار: (تبسم) هند عوداتلي بزاف علييك ولكن هادشي باغي نشوفو ونعرفو راااسي (والو مكتجاوبوش) نتلgاو غدا

أمال: (بسرعة) لا

أنوار: الله يهدييك اديك لبنت واش دييما لا فكري غير شوية عاد جاوبي راه شهر وانا تابعك

أمال: هه حم أنوار

أنوار: اووو صدقتي عارفة سميتي

أمال: هههه نgولك؟؟

أنوار: (مع ابنسامة) كنسمعك

أمال: انا راه خوتي وعائلتي قاسحيين معندهمش لبنت للي تلاقا رجاال وتبقى عاطياها لدخول ولخروج وانا براسي ميعجبنيش الحال ومنكونش مرتاحة

أنوار: مباغيش ناذييك ابنت النااس بغيت نتعرف علييك كتر وصاافي

أمال: (زعمت) علاش؟

أنوار: واحد باغي يتعرف على وحدة للي شحال وهي قامعااااه وواخا هكااك صمم يبقى حتى تحن وتهضر معااه علاش فنظرك

أمال: انا منفهمش فهادشي

أنوار: واخا نخلييوها للأيام؟؟

أمال: (كانت كتسناه يقولها بغيت نتزوجك.. هاكا مقالها رااسها)

أنواار: أماال كتسمعييني

أمال: امم

أنوار: كتغبريييييييي واخا انا نسولك؟؟

أمال: واخا

أنوار: نتي باغا تعرفييني؟؟ عنداك تغبري عااود ههه

أمال: ههه عفاك كنحشم

أنوار: واه ولا لا؟؟ ضرووري نعرف

أمال: (كتعرق بوحدها) معرفت

أنوار: نعتابرها وااه؟؟

أمال: (لا رد غير كضور عينيها وتبسم)

أنوار: اذا نعتابرها وااااه

أمال: ههه

أنوار: وشنوو منشووفكش؟؟

أمال: راني gلتلك

أنوار: وااخا لالة المهم قبلتي وتكرمتي تسمعيني هاد صويت لغزاال (بقات كتفرنس) براااكة... معاش داخلة غدا؟

أمال: 8

أنوار: مزيان تبغي تجي ندييك (هو استغرب من رااسو منين قال هاكا حتى حك جبهتو)

أمال: لا

أنوار: هههه (طانز) سبحان الله متوقعتش منك تgولي لا

أمال: هههه (صافي مبقاتش قادة) بسلامة

أنوار: اهياا فين بسلامة عاد حنا كنهضرو

أمال: نمشي نعس ونرد التيليفون لمولاتو جاع تكون باغاه

أنوار: اممم واخا لالة

أمال: بسلامة (حيداتو من ودنيها وقطعت مخلياه كيبربق فعينيه ياله باغي يتغزل ويودعها بطريقتو باش تلين شوية حتى سمع طيط طيط مفهم واالو.. اما هي كانت فرحاانة كتفرنس بووحدها مشات لشومبر ودخلات مدات لهند تيليفونها وهي شادة التبسيمة) شكرا

هند: هاي هاي على التزنيييكة عاوديينا شنو تقاولتو

أمال: (جلسات) والو

شيماء: كفاش والو هو شنو gالك

أمال: بقا كيgولي بفيت نشوفك وباغي نتعرف عليك وتعرفي علية

شيماء: (بالزربة) ونتي شنو gلتيلو

أمال: gلتلو لا انا ماشي ديال لخروج ودخول وعائلتي صعييبة

هند: براافو علييك

شيماء: مباغاهاش تكون معاه؟؟

هند: (هزت حاجبها) لا باغاها تعزها أكبيييدة..

أمال: (تبسمت) هو ظرييييييف

شيماء: (معرفتش كفاش غتسمي هاد الاحساس للي حاابسلها دمووع فعينيها واش غيرة واش حسد.. ناضت بالزربة) نمشي طواليط... (ناضت بجرا هااربة منهم وقفت فاخر الروااق كاين سرجم كبير فين كانت واقفة أمال (كنحاول نوضح ليكم الصوورة ديال لبلاصة فين عايشين حيت هاد لبلاصة داخلة فالأحداث جاية...) طلات منو ودمعة نزلات لييها مسحاتها بجرا) اوييييلي شنو كدييري واش حماقييت؟ بفففف تفوووو علاش كنحس هااكا أمااال كتعزني بزااااف وانا كنغير منها على شوية دلفرحة للي فرحتها فحياااتها لا شيماااء ديري عقلك أمال راها ختتك وكان كانت هي بلاصتي غتفرحلي ماشي تغير مني متكونيش برهووشة اشيماااء هو راه ممعتابركش مطيعرفكش حتى باش ديري هادشي... (بقات كتصاارع فرااسها ووتلومو وصورة أنوار محيدااتش من باالها... رجعت للشومبر لقات هند مشات وأمال كتقاد لشيماء بلاصتها) نتي لحووب

أمال: (كتفرح منين يتقالها هاكا) مدرت والو

شيماء: (دخلت لبلاصتها وحتى أمال) تصبحي على خير يا أحلى اخت

أمال: هه تصبحي هلى خيير اخيتي

~~~~~~~~~~~~~~

أصبحنا وأصبح الملك لله....

أمال: (لبسات دجين سليم وفوقو كابيتشو طوييل فلموطارد فيه كتابة فلمارو تحت الركبة مع ميني بوط فلمارو وقفات قدام لمرايا وهزت شال كحل مورد بلمارو ولموطارد لواتو عليها كوراتها شيماء.. شافت رااسها وعجبها الحال اول مرة يعجبها رااسها وتلبس بحال هاكا شافت راسها جاو لحوايج معاها)

شيماء: (كانت لابسها بحالها غير الألوان مختاالفة ولكابيتشو مطويلش وواسع بحاالها وشالها غير لاوياه عشوائي مخلية شعرها باين شوية.. ودايرة فوندوتان فاغاجو ومسكاارا) جيتي زويينة أمال

أمال: حتى نتي تهبلي والله.. عرفتي اول مرة لبس دجين وهاكا فشكل

شيماء: ههه الحياااة اختي ديري لمكياج

أمال: لا بلاش

شيماء: (بقات كتعكر عكر خفيف) هاكي غير عكري شوية شنايفك راهم بوويض

أمال: (فكرت وشدات من عندها ودارت صبعها فلعكر قاستو بصبعها عاد طلسات فشنايفها باش ميجيش معيق مصات بشنايفها وشافت فلمرايا زاد عجبها رااسها بزااف شافت شيماء كدير لعطر.. تفكرت)

فلاش باك

أمال: (جالسة فوسط الدار كما ديما مكاين ميدار مشات تستأذن من عند مها باش طلع عند شيماء دخلات لقاتها كترش العطر عليها ولابسة جلابتها جديدة للي مخيطة اخر موديل ولابسة صابو) ماما فين ماشية؟؟

فتيحة: وجدي لغدا لخووتك انا معروضة عند خاالتك بنتها عندها لملاك ليوم

أمال: بالصح مبروك علييها

فتيحة: اوا لعقبة لييك

أمال: (تبسمت) امين.. ماما خليني نمشي معااك عفااك راني قنطت راه شحال مخرجت

فتيحة: داكشي للي بقاالك غير لعرااسات كاع لاليااتك صغاار تزوجو ونتي بقيتيلي هنا فراااسي ندير ندير الظحك فراسي وفيييك يبقاو عليك علاه متجوجتيش علاه مخطبوكش

أمال: (غوبشات وقلبات وجهها)

فتيحة: (بفقصة) كاع بنات لعايلة تجوحو على 16 ونتي فتي 24 عام ولا كتر وباقالي هنا محدك تكبري ونتي تخياابي يخخخ معرفت ربي لاش سلطك علية

أمال: نتي للي مكتخلينيش نتهلا فراسي بحال شيماء ومكتبغيش تشري لية داكشي للي يزيني

فتيحة: (ميقت فيها) سيري جيبيلي صباااطي بقالك غير الزين وني فصاالتك منعرفوك جاية ولا ماشية ييييخ على سييفة

أمال: عفااك اما ما ديني معااك والله تقهرت فهاد الدار

فتيحة: (طنزت عليها) اوا خرجي شكون منعك هه gالك تقهرت سيري جيبيلي صبااطي وردي لغدا لخووتك بقالك غير لخرووج ونتي متشوف فيك لا موحمة ولا شادة

أمال: (فنفسها...حيت كنشبه لييك...)

عدنا

شيماء: (كتزعزع أمال) وااااااا لبنت ديري لباغفان دياالك

أمال: ها واخا (مشات لاتروس ديالها وجبدات عطر مبدل على ديال شيماء la belle vie رشات جوج دلمراات على شاالها.. وشماتها) زوييينة

شيماء: ولكن دياالي حسن هه

أمال: واه ديالك زويينة بزااف (خرجو مشادين لقاو هند فاخر شياكتها لابسة كلاس كولشي مقااد فييها خلات شيماء غير كتشووف فيها) مكرهتش نحايد هاد الزييف

أمال: أحاااي!!

هند: نتي بزااف زيدو راه مشا الحال (كما العادة مشاو فطموبيلت هند خالقين الجو بالظحك ولموسيقى لمجهدة وصلاتهم حدا لفاك وهي مشات للكلية ودارو يتلقااو مع 12 يتغداو مجموعين..)

مع 12 جات هند عندهم لقاتهم واقفين مجمعيين هبطات زاج الطموبيل

هند: هييييييييه (ضارو عندها) واا طلعو دغيا

شيماء: (ركباات حداها) نااري مت بالجووع هاد نهار بقا داك لبرووف تيو تيو تيو حراام واش بغا يسكت

أمال: حتى يانا جعت بزااف

هند: ههه صفاريتو بالجوع كتشفو... انا غنديكم بلاصة واااو زويينة (كسيرات وزادت شافت شيماء جبدات عكر وبقات كتعكر وهاد لمرة عكرات مزيان) هاي هاي لالة شيماء مبقيتيش سااهلة بقالك غير داك الزييف تحايديييه

شيماء: هي للي متعاودش (حيدات شاالها وطلقات شعرها والريح كيظرب فييه مخلييه واخد رااحتو دوزات صباع يدها على فروتها) كجييبتك

هند: ههه تووتة غير ردي شاالك

شيماء: لا يا ختي مشهيااه هااكا (مدات لعكر لأمال وشداتو عليها بحالا مدوزالها جوان) ديري شوية راه تمسح لييك

هند: جالسين كضورو جوانات هه

أمال: هه (دارت شوية فشنايفها وبلا متحس دارتو حتى لحنوكها شوية باش بتحمرولها شوية ورشات حتى من عطرها للي محمقها) وضورات وجها كتشوف فالدنيا كيف عاامرة كتمووت على هاد الاجواء للي شحال وهي محروومة منهم حطات راسها على الزاج متبعة النااس للي مزروبة للي كيظحك للي ساكت للي كيهضر للي كيداابز دراري رجال بنات عيالات طموبيلات مااتر طوليسات كولشي كتشووفو وتخيل رااسها كتمشي بكل حرية لابسة شنو بااغا تكون مستقلة مخايفة حتى من شي واااحد.. مفيقها غير سبان هند للي ولفات بييها منين تسوك وهي تسب وتعرق.. حبسات الطموبيل ونزلو

أمال: هند مقرياش لعشية؟

هند: لا حتى نتوما ياك؟؟

أمال: لا (شافت فين رااهم كانت قهوة كبيرة)

شيماء: وكان غير مشينا لداك سناك للي حدا لفاك عندو سوندويتشات زوينة

هند: حتى هنا عندهم ماكلة زويينة ونقية وجليسة زويينة

أمال: (عاجبها الحاال محدها كتستكشف لمديبنة وهي فرحاانة دخلو كانت كافي زويينة تبعو هند طلعات للطبقة التانية كانت مختاالفة على للي تحت جلسو ففتويات ضايرين) وااو زوينة هنا

هند: (غمزتها) ونيت كنتسناو ضيااف

شيماء: شكون؟؟

أمال: (بحال عاقت تبسمت عاضة شناافتها وقلبات وجهها حتى نيت كيبان ليها طالع مع درووج لابس كويرة فلكحل وتريكو بيض سروال دجين وكاط كحل مع نظاظر كووحل طلعاتو من رجليه لرااسو وقلبت وجهها شافت فهند للي كظحك)

أنوار: (وقف حدا أمال) واحد السلاام عليييكم

شيماء: (غير شاافتو بقات حالة فمها) سلام

هند: وعلييكم جلس

أنوار: (شاف فأمال) لا لا غير خلييكم على خااطركم اما غرااضي ف(شافت فأمال لي حانية راسها) أموولة تجي معاايا؟؟

أمال: (صم بكم مكتجاوب مكتشوف حتى ركلتها هند تحت الطبلة)

أنوار: (حنا قريب شوية) غنكونو حداااهم مغنسرقكش

أمال: (تبسمت عقلها كيقولها لا وقلبها كيقول اه.. محست غير وقفت دار حركة كان جنتل فيها بمعنى نتي اللولة مشات لطبلة قريبة)

أنوار: رواحي هنا حسن (تبعاتو كانو فطبلة بوحدهم بعييييدة على شيماء وهند للي مكيبانوش ليهم مزيان جلست وهو جلس اونفاص لييها.. حط نظاظرو وتهجا الكلمة) وااااااخييييرا...

أمال: (هبطت راسها بحال نعاامة هاربة من شوفااتو)

أنوار: أماال هه أماااال (هزت راسها فيه) باقا غتفكري هاد الحشمة من هنا لقدام وظحكي على راااسك مزيااااان

أمال: هههه

أنوار: (سهى فظحكتها واخا مبيناتش حتى سنانها) لباس علييك؟؟

أمال: الحمد الله (هزت عينها فيه) ونتا؟؟

أنوار: (ربع يديه فوق الطبلة) فوg فgييg

أمال: ههه

أنوار: بوون أنا أنواار اممم 28 عام اجازة مهنية فالاقتصااد مدفعتش مع الدولة حيت شديت لاكيس ديال خدمة العائلة.. امم باغا تعرفي شي حاجة اخرى؟؟

أمال: (حركت راسها بلا.. سرقت الشوفة فيه لقاتو كيشوف فيها)

أنوار: (حك فحنكو) ههه انا صغير فخوتي مفشش شوية (امال غير كتفرنس) عندي 2 خوتي ولا 3 عندي واحد عمي كان خطأ تقني من جدة وجدي هه

أمال: (حشمت وقلبت وجهها)

أنوار: وووووانا مكنحشمش بحاالك..

أمال: (تشجعت) انا كنحشم ومكنقدرش نهضر مع شي واحد مكنعرفووش

أنوار: (زاد مقرب ليها) هانتي عرفيني باش طلقي معاايا (قوس عينو فيها ) صراااحة بااغي نبقى معااك ابنت النااس..

أمال: (توشاها بالغزل ديالو محسات حتى نطقت) علاش انا؟؟؟

أنوار: (هز حاجبو) القلب هو للي كيختار منين كنسولو علاش هي؟؟ ياك مبغاتش حتى تهضر ولا تشوف فيك؟؟ مكيجااوبش حدو كيقولي من لحشوومية ممراطيش

أمال: ههه

أنوار: اممم ونتي أمال هضري لي علييك

أمال: حم ياك هند gالتلك

أنوار: فهاد اللحظة مكنعرف حتى وحدة من غييرك.. باغي نسمع منك نتي

أمال: (حنات راسها كتلعب بصباعها) انا أمال

أنوار: (بنفس نبرة صوتها) وأحلى أموووولة

أمال: هه ساكنة فتاوريرت كتعرفها؟

أنوار: الا كتاب نعرفها معاك نتي

أمال: (بقات كتفرنس مقال هاكا غير الا كيفكر فزواج يعني يعرفها معاها هي يمشي يخطبها ويتزوجها)

أنوار: كملي كانت gالتلي هند عائلتك...

أمال: (مبقاتش كظحك) واه عائلتي صعييبة وبزااااف

أنوار: بحالاش؟؟؟

أمال: (نسات رااسها وبقات كتهضر) مكيبغيونييش نخرج فمرة حتى هاد لقرايا للي جيت على قبلها لهنا مبغاوهااش

أنوار: وعلاش؟؟

أمال: معرفتش واخا خوتي بجوج وحتى ولاد عمي قرااو غير لبنات للي مكيخليوهمش يقرااو

أنوار: اممم مهم نتي هنا داابا

أمال: (خاص غير للي يجبدهاباش تفضفض وأنوار واخا هاد شهر للي تبعها فيه مبغاتش تهضر معاه الا شد موضع فحيااتها) ولكن كنحسهم كرهوني (غرغرو عينيها) من اللول gلتلهم منمشيش الا مبغيتوش ولكن هوما مكيسوقوش للري ديالي مداام عمي صيفط بنتو تقرا الا خاص يصيفطوني باش حتى واحد ميفوت وااحد

أنوار: (شد فيدها كنوع من المواساة.. دغيا هربتها.. حك فجبهتو) سمحيلي كنسى (شافها سكتات من بعد محس بيها تطلقات شوية) كملي

أمال: (مبغاتش تحكر وطلعات معاها مخصهاش تعاودلو هادشي) عمرني هضرت مع شي راجل غريب علية

أنوار: أنا أول واحد؟؟

أمال: (حركت راسها باه) وهادشي عندي عييب بزااف ممرتاحااش فمرة والله ممرتاحة

أنوار: عيب الا درت معاك حوايج خايبيين أما انا مغتشوفي مني حتى حاجة غتخسر خااطرك غير تيقي فية وغتكوني مرتااحة حيت انا باغيك على طبيبعتك متحتاجيش تصنعي معاايا كما شفتك نهار اللول

أمال: (متبسمة) معرفت

أنوار: (شاف السرباي جاي) شنو تغدااي بعدا؟؟

أمال: ها والو شبعانة

أنوار: (ظاحك) الا شبعانة شري كار (ضار عند السرباي وقالو شنو يجيب وضار عندها) حتى لماكلة غتحشمي فييها ازين؟

أمال: (خرجت عيينها بهاد لكلمة ضورت وجهها كتقلب على لبنات لقات غير شيماء بوحدها دايرة يدها على حنكها وكتشوف فييهم) هيييء شيماء بقات بووحدها

أنوار: (هز حواجبو) نعام؟؟

أمال: بنت عمي بقات بوحدها معرفت هند فين مشات

أنوار: (لعب بلسانو فوسط فمو معجبوش تجاهلها لييه قلب وجهو لحيط ورجع شافها كتشير لشيماء) أمال

أمال: (ضارت عندو) ها

أنوار: (بقا كيشوف فييها شحاال وجها زويين حواجب دوريجين كوحل عينين فقياسهم مكبار مصغاار تحتهم هالات خفااف ولكن ممعيقينش نيف هو هداك شنايفها مطبيزين شوية ومتأكد هي معندهاش مع زواق يعني هدا الجمال للي باغي اما الا تقادات غتكون واااو وترها بشووفتو) مبغيتيش تبقاي معايا؟؟ بغيتي تمشي حدا شيماء؟...

أمال: (تقادات فالجلسة معاه وحنحناات) حمم انا غير شفتها

أنوار: (قوس عينو فيها) علاش انا نااسي كوولشي وانا معااك

أمال: انا غير شفت والله

أنوار: خلييك معايا أموولة عرفتي شحال تسنيت هاد نهار باش نشووفك راه بحال شي واحد كان محبوس وتطلق سراااحو

أمال: (ملقات متقوول ونيت جا السربااي وحط صلاد غيش لكل وااحد هي غير شاافت حلات فمها صلاد كبييرة متنوعة من كل حوت او جبن او فواكه او خضر أنواع حط عواصر وبيتزا ومشا هي بقات غير كتشووف وكتحسر جيعاانة وهادشي كيشهي ولكن مغتقدش تااكل قداامو على خاطرها.. شافت فييه لقاتو هز فرشييطة وبقا كيااكل)

أنوار: اموولة معجبكش هادشي؟؟ نطلبلك شي حاجة اخرى؟؟

أمال: ها لا زوين الله يخلف علييك

أنوار: (قوس عينو فيها بحال فهمها) مغنشوفش فييك غير كولي على خاااطرك

أمال: (تبسمت هزت فرشيطة هزت كروفيطة معرفاتهاش ولكن شافتو كلا منها دارت فمها مضغاتها وهي كتبنن.. بلا متحس) شنو دي؟؟

أنوار: شنو؟؟

أمال: (باحراج حنات رااسها وبقات كترون فداك لبلا) ها واالو والو

أنوار: (تبسم هز كروفيطة من عندو بفرشيطة وقربها لييها باش تحل فمها يوكلها وهي غير كتشوف مفهمااش شنو كيصنع) هاكي كولي

أمال: (حشمت بغاتتمديدها افرشيطتو هربها ودارلها اشارة باش تحل فمها.. حلاتو غير بشوية دخلها ليها لفمها صرطتها بلا مديغ بلحشمة) حم شكرا

أنوار: هدا حووت سميتو كروفيط (كيوريها هدا كلمار هدا... بقا كيوريها كل حاجة محطوطة تمااك وهي متبعة معاه.. فجهة اخرى شيماء غير متبعاه ها هو كيهضر ها هو كيظحك ومنين مد ليها تااكل بقات غير متبعااه رجعت هند حيت خرجت كتهضر برا ورجعت لكرسي فبلاصة فين كانت جالسة)

هند: رجووع الله

شيماء: وكان غير قلتيلي اصاحبتي غيجي

هند: شكون؟

شيماء: أنوار زعما نخليوهم يجيو بووحدهم وحنا نمشي بلاصة اخرى

هند: ونتي تعرفي أمال تمشي معاه بوحدهم!! راه درنا هاكا غير باش ياله يهضر معااها

شيماء: اممم معرفت شنو يكون كيgوولها

هند: بينااتهم كولي قبل ميبرد

شيماء: (بتنهيدة بقات كتااكل وتهز عيينها كتلقاه كيشوف فأمال كيهضر ويظحك وهي مكتبالهاش مزيان ولكن باين تطلقات معااه..)

~~~~~~~~~~~

أنوار: (تيليفونو صونا فوق الطبلة مسح يدو وهززو شاف شكون كيصوني وحطو قاطع الصوت) لالة أموووول مسخييتش نمشي ولكن با كيعيطلي على قبل شي خدمة

أمال: (حركت راسها باه) واخا

أنوار: عارفك سااخية بية انا للي مزاال باغي نبقى معااك هه

أمال: (تبسمت ووقفت)

أنوار: اهيا فين ماشا؟؟

أمال: ياك gلتي غتمشي؟

أنوار: ههه (ظحك ساارط الفقسة وبيناتلو كانت على سبة وكتسناه غير امتى يمشي ولكن هو حطها فراااسو.. وقف حتى هو) اولا غتجلسي تاكلي مزيان حيت مكليتي واالو ويمكن حتى فطور مفطرتييش مزيان (قرب منها وستنشقات لعطر الرجوولي للي تلفها وبقات غير حالة فمها فيه.. جبد من جيبو تيليفون (ريدمي 10) وهدا تيليفون فيه puce مسجل نمرتي فيه (فجيبو التاني جبد شارجور بيض ولكيت ديالو) هادو الا عياو يدين لالة اماال ديري ليكييت باش متلقايش لية السبة حقا يدي عيااو ولا كندير شي شغل حيت مزاال هضرة طويييلة بيناتنا (ياله جات تمتانع) غير نكمل لخدمة نصوني علييك (بنظرة اعجاب) الا مجاوبتينيش (ياله باغي يهدد وهو يتبسم) غنجي عندك فينما كنتي (بابتسامة) انا مشيت.. (مشا زربان ممخليهاش حتى فين تهضر داز من حدا شيماء غمزها عاادي مع نص ابتسامة ومشا زربان حيت الخدمة واقفة علييه وكولشي كيتسنااه..)

أمال: (تبعاتو بعينيها حتى مشا عاد طلقات تفرنيستها شافت فالتيليفون هزااتو حتى بوشيطة للي فيه ديال لبنات فلغووز فيها ودينات مذهبين.. شعلاتو لقات داير فالشاشة الخلفية تصويرتو كان جاي فيها زوين بزااااف وكانت حركة مقصوودة منو باش يخليها فوقما نسااتو التيليفون يفكرها بيه جلست فرحااانة عندها باش تشري تيليفون ولكن كمبادرة منو عجبها الحاال وكان أول كاادو غتشدو فحياتتها شافت فلمااكلة شهيتها تحلات مزياان طلات على لبلا ديالو لقاتو واكل منو النص معرفت كدار كلاها وهو مسكتش من الهضرة بقات غير كتخشي فمها وتبنن حتى جلسو لبنات حدااها)

هند: (هزت التيليفون) هاي هاي هاي السيد فاااهم... معندي ميتساالو

شيماء: شرالك تيليفون؟ (قالتها بحزن)

أمال: (فرحانة) ظريف بزاااااف ابنااات عرغتو ككيهضر معاايا

هند: بصحتك الالة تستااهلي

شيماء: بصحتك

أمال: الله يعطيكم الصحة كولو معاايا

هند: كليت احبيبة حتى حنا طلبنا بحاالكم شيمااء نتي مكليتيش مزيان وها لبيتزا للي كتعجبك

شيماء: مفياش (شافت فأمال كفاش فرحاانة.. قلبها ضرها تبسمت معاها مشركاعا فرحتها) سعدااتك أمال مكرهتش لقا شي واحد نعجبو بحال هااكا يبقى يدير لبلانات معاكم غير باش يشوفني ويشريلي كادوات

أمال: دابا ربي يجييبلك شي ولد النااس اختي راكي فنة وتستاهلي أحسن واحد فالدنيا

هند: وااا لحمقة تسنااي رزقك غيجي وزايدون نتي للي سادة على شحال من واحد بغا يهضر معاك ومكتبغبش

شيماء: وحتى أمال سادة على شحال من واحد وهو بقا لاسق غير فييها هاكا بغيت حتى يانا...

أمال: (كتاكل وكتسمع ليهم ويزيييد بعجبها الحال منين كتسمع أنوار معجب بيها قد هاكا للي لبنات عاجبهم الحال...)

هند: على اساس لقيتو انا صبري الالة شادة النوبة معااك ههه

شيماء: هااحنا نشووفو نتي تجيبيه غير بصبعك صغيير

هند: لا حبييبة مااتلي الحوت حتى انا غير هني ***

شيماء: امم علية.. (هزت فرشيطة وبقات كتنقب وكتحااول تخوي دمااغها للي أيام وهي فصرااع معااه شافت أمال كتاكل وتخرب فتيليفونها جديد حتى فافاها منين صونا) باسم الله عليك

أمال: هيييء هدا أنواااار

هند: وجاوبي السيد

أمال: (بقات كتبغي دوز الخط ومعرفاتش حتى وراتها هند حطاتو فودنييها)

أنوار: زين دياالي

أمال: (فرنسات)

أنوار: ههه حمق كنتسنااك تجاوبيني مهم غير باش زعما متشوشيش علية انا وصلت لخدمتي عاارف لماكلة مغدوزش ليك الا مهضرتيش معايا بدليل دابا مكتاكليش

أمال: (وقفهالها) كح كح كح هههههه

أنوار: هااااديك علاش كنقلب ياله بسلامة بلاتي ونهضر معاك (قطع معاها وهي بقات كظحك)

هند: يا لالة ولاالة مزيان منين بقيتي كتجاوبيه بعدا

أمال: (شبعات) الحمد الله عجبني بزااف هادشي واكترية الحووت اول مرة ناكل بحال هادشي

شيماء: بصحتك الا كملتي ياله نمشيو

هند: انا نهبط نخلص

شيماء: شحال جايانا حنا؟؟؟

هند: لا انا للي عرضاكم هاد لمرة (مشاو هبطو جات هند تخلص لقات أنوار مخلص طبلتهم وطبلة ديالو ومخلي 3 ديال قطع تشيز كيك اومبوغتي.. شدو فأمال مزياان وخلاوها غير كتكركر أول مرة يشوفوها كظحك لهاد الدرجة مشاو نيشان لدار الطالبة وكل وحدة حيدت حوايجها وطرفت رااسها ودخلات تكمشات بلاصتها.. هند مشات لشومبر ديالها أمال كتخرب فتيليفونها جديد ولا حت لقديم فصاكها.. وشيماء كتشوف فيها وتفكر لغمزة لخفيفة وشيطانها كيأولها كما بغات فأعمااق أعمااقها..)

أمال: شيمااااااااء فين سهييتي

شيماء: لا واالو.. gوليلي عجبك أنوار؟؟

أمال: (تقدات معاها) ومتgوليها حتى لواحد

شيماء: ههه زعما نgولها لمحمد

أمال: عارفااك مديريهاش هه.. هو زيين.. زييييين بزااف وظرييف ولكن مكمعرفش نهضر معاه مكلقى منgول والا هضرت كنبقى نسرسبلو كوولشي

شيماء: معرفتش اختي للي كنعرف للي بغاك يبغيك كما نتي بلا تصنع

أمال: (بحماس) وهو هاكا gالي gالي مبغيتكش تصنعي وعرفتي شنو (بفرحة) gالي نتمنى نعرف تاوريرت وانا معااك شنو كيقصد

شيماء: (نفس عقليتها) زعما يتجوجك

أمال: هه معرفت

شيماء: وتكااي راه عيني بداو يتغمضو (ضارت للحيط مخلية أمال فرحانة بتيليفونها ما فيه لا اغاني لا والو ياله تصويرة ديال أنوار للي كاينة ونمرتو شنو كتخرب فيه منعرف كدخل وتخرج فلباراميتر حتى عيات عينيها وغمضااتهم..)

يتبع...