محتوى القصة
انوار: (وصل لعشية لدارهم كان صقييل فدار جداه حتى ضواو ممشعولينش خلا أمال2 فدار باه ومشا لدار الحاجة طلع لباب مبلع يعني الحاجة مكيناش شوية تفكر اليوم أشرف كان غيمشي لتاوريرت اذا مشااااو جبد تيليفون صونا على زهير مجاوبوش مشا لدار باه فهم من ختو ان كولشي مشا منهم باه وليلى...)
وكان تسناو ولا علمونا نمشيو ݣاااع
جيهان: ههه زوينة دي ماشي يخطب مرتو عاود
انوار: ماشي خطبة تناقشو بجوج هي مشات لدار باها وهو دار الواجب
جيهان: شتك الوسي كدافع على خطيبتك لقديييمة (أمال2 معجبهاش الحال وشافت فانوار)
انوار: ومالها ماشي بشاار ولا نسيتي انا للي درت الديفو معاهم ماشي هوما
أمال2: وندمتي؟!
انوار: (حمر عينو فيها) كفاش ندمت نتي عاود؟!!! لبنت مدارتلي والو هي وفاميلتها عاود تزوجت الله يسهل عليها خرا على تبرهيييش (زاد مكيشوفش خلا امال2 بغات تبكي...)
بشرى؛ جيهان مكانش خاصك تجبدي هاد الموضووع
جيهان: يا ختي وخوك شحال عصبني بغينا غير نظحكو معاه صدق مهجرونا حنا وعروستو و
بشرى: أمال حبيبة متقلقيش فهاد الأمور راكي اصلا عارفة واش كان طاري هي تزوجت وراها بولادها
امال2: ولكن علاش بغا يمشي معاهم وهو عارف راسو داير لافوت
بشرى: حيت أشرف صاحبو وصافي... متبقايش العمري راسك بهاد لخوا وهو دابا ندور فيه على هاد العصبية الزاااايدة
أمال2: (حركت رأسها باه من ديما كانت كتغير من شيماء فاش كانت خطيبتو وعاد الزين والقلدة ولباس للي كانت فيه كيخليها حاقدة عليها غي حيت كانت كتبغي ومعجبة بزاااف بولد خالها...)
~~~~~~~~~~~
كولشي جالس فالصالون أشرف مجلس مريم على رجلو.. حتى بداو كيحطو فالطبلة كاس كروط واخيرا بانت شيماء للي لابسة قفطان مطروز بالطرز الفاسي ومجدول على الخصر أشرف طلعها من رجليها ببطء حتى لراسها كيبرݣݣ فكل تفاصيل جسمها ووجها والشدة دالشال زادتها نووور معرف واش موحشها ولبغو خلاه يشوفها بحال شي اميرة ولا بالصح السر نزل عليها... حطات طبسيل وجلست حدا أمال وهند وبقات كتبركك فداكشي للي كحطوووط غتسخف بالفرحة اما منين شافت ذهب فمها تشرݣ حتى لودينها مزعمتش تشوف فيه وباها وخوتها كاينين طلت عليه بطرف عينيها لقاتو كيشوف فيها وباينة الشوفة دالاعجاب.....
حنات راسها الفرحة للي فيها نسااتها لبكى للي دوزات الليل كامل وهي تبكييه هنا عرفت راسها كتبغيه ديال بالصح حب كبييير فقلبها مكرهتش تغوت وكل واحد تعاودلو باش كتحس الابتسامة مفرقاتش وجهها شافت باها لقاتو مجمع مع لكبير جالس معاهم اذا كاين رضى اذا قلبو بدا ينسى ويسااامح.. عينيها لمعووو شحال قالت مستحيل نكون بيناتهم وهاوهي بيناتهم دابا وكيحتافلو بييها... رجعت كتشوف لحوايج عاجبها الحال مكرهتش تنوض تقيس هادشي كامل وتلبس داك ذهب حتى خاتم المرياج منساهش...
لكبير: اوا سيادي للي نطولوه نݣصروووه ولدنا جينا معاه يرد مرتو الا بغا باااها ياك اسي احمد... (صقيييير وكولشي كيتسنى جوابو)
سي احمد
احمد: (مزال غضبان ولكن ماشي بكمية الحقد للي كان فيه قبل) الله يسخر.....
لكبير: والله اسي احمد ولادنا مربيين ميعرفوش يزيدو بلا رضاانا قلييل فين تلقى ولاد اليوم كما هاك.. وولدها أشرف من خير شبااب للي عرفتوو حنا معلينا ندعيو الله يتبت غرسهم
الكل: اميييين
لكبير: نقراو الفاتحة على هاد الصلح.. (كولشي بدا يقرااا وتسمعت فالتالي اميييين... ) ياله نوضو حبو على راس سي احمد (ناضت شيماء ولبكية فيها واشرف حتى هو حشمان شافت فيه دارها إشارة بعينيه باش ترتاح وتقدموو باسلو راسو اشرف)
أشرف: الله يخليك لينا اعمي احمد..
شيماء: (محست حتى حنات تبوس يد باها ونفاجرت كتبكي حتى جلس الارض بحال كتشكى منو علاش هاد الخصام والبعد وحتى هو دمعو عينييه خلات للي تماك كولشي متأثر.. أشرف شاد فيها كيسكتها حتى حط احمد يدو على رأس بانتو عاد سكتت من ديك الهستيريااا خرجها أشرف من تماك وداها لبيت...)
وليد: بقات فيه ختو صغيرة حس براسووو حتى هو مسااامحها شاف فهند للي غير حانية راسها مكتشارك موالو كولشي كياكل ويهضر الا هي كاس اتاي ديالها مزال محطوط حداها متشربش بغاها غير تشوف فيه وااالو... حداها مريم وامال جات عيب ينقز يجلس وسطهم عاد ردة فعل هند مبينااش...
اما عند أشرف للي كيواسي شيماء معنقها وهي مرخية فيييه شد راسها بيديه وتقابل مع وجهها
أشرف: نݣولو دابا الحمد الله...
شيماء: (تبسمت وسط دموعها) الحمد لله...
أشرف: مال جد زيانيتي وصحاحيتي كنت ݣاطع عليك الماكلة
شيماء: ههه بالصح..
أشرف: مزال معبرت مزيان
شيماء: اشرااااف
أشرف: توحشتك اشيماااا
شيماء: (كتذبل فعينيها) حتى انا (هبط كيبوس شنااايفها وهي منساجمة معاه حتى سمعت صوت امها كتعيط ليها دفعاتو شوية) ناااري
أشرف: مال مك راني راجلك
شيماء: ايييه ولكن حشوومة (كتمسح فمها) مباين واالو؟!!!
أشرف: ااحح امحاايني حلوة
شيماء: ههه (وشحال فرحانة خرجت عند مها متبسمة عكس كيف كانت حالتها قبيل) نعام اماما
نعيمة: اوا لباس منين ظحكتي
شيماء: (عنقات مها) كنبغيك بزااااف اماما عرفتي شحال انا فرحانة غنطييير بالفرحة
نعيمة: ههه الله يدومها ابنتي (خرج أشرف عندهم مد لشيماء جوا)
أشرف: ماشي شي حاجة مع ليام نعوضك على كولشي
شيماء: (غيسكتلها قلبها بالفرحة شدات جوا وبلا متحس جبدت لفلوس) شحال هنا؟!
أشرف: (بلا ميحس) كتستايهملي جدك
شيماء: ههه وشنو راه رزقي
نعيمة: هههه الله يخلف عليك اوليدي راك صرفتي ووفيتي الله ينعمك بخييرك ويقوي رزقك
أشرف: امييين اخالتي نعيمة (باس راسها)
شيماء: (كتحسب لفلوس) يشوفك بابا يلوحك من سرجم
نعيمة: الله ينعل حسك الحمارة
أشرف: (عجباتو عفويتها وظحكتها والفرحة للي باينة فيها... شافت فيه غمزااتو وباستو فالهواا خلاتو كيدور عينييه وهو كيهضر مع معا تبسمت ورجعت للصالون... جمعو لبنات معاها دوك لحوايج دخلوهم لبيتها من بعد مصورو داكشي.. عاد بدات تقيس وتحط وأمال وهند كيعطيو رأيهم تحط لعشاا للي كان بسطيلة دجاج لحم بالفواكه المجففة وسفة ديسير عاد حطو الطورطة وشنو جاب وليد تصورووو لبسو خواتهم ولبسو لمريم ذهب حتى هي.. قادولهم نعاس وفرقو بين دار نعيمة ودار فتيحة للي تفكروها ودعاو معاها ربي يفك سراااحها...)
أشرف: واش مبقاتش ديك العادة يكمل العرس وندي مرتي معايا
شيماء: ههه لا سير نعس حدا رجال
أشرف: نمشيو غير لوطيل
شيماء: واخا سطح منمشيش معاك بغيتي بابا يردمنا فشي بير هاد المرة
أشرف: واخا لالة شيماء (بغا يدير فيها مقلق ساعة ظحكتها وفرحتها خلاتو يتبسم) غدا مهااربش
شيماء: هههه تصبح على خير.. (باسها وخرج تلاقا مع وليد للي حتى هو ماشي ينعس فالصالون من بعد مبغى يدخل لبيتو ولقى هند بلعات لباب عليها هي وبنتها وبلا شوشرة وكل روح رياضية تقبل الأمر ومشا يقلب على شي سداري يتلاح فيه مبرع فيهم غير زهير للي شاد أمال لتحت ومكاين غير الله يعطيك صحيييحتك....)
زهير: (من بعد مكملو وكان داكشي صيلوونص بقا معنقها من اللور وهي محشية فيه) كنت حالف **** فداركم
أمال: ها!!!
زهير: نعسي نتي احبيبي راك عييتي (مكملهاش حتى نعست وتبعها...)
ناضو فصباح فطرو فطور جماعي فجو عائلي..
محمد: عندي الزيارة اليوم تبغي تمشي؟!!
أمال: (شافت فزهير بحال كتاخد الاذن ولا كتسناه هو شنو غيقول حرك راسو باه.. وشافت فخوها) ووو..واه
محمد: ياله نمشيو دابا (مع وقف وقف حتى زهير زعما راني ماشي معاكم مشات لبست جلابتها دارت شالها وخرجت... شدو طريق للحبس وأمال جاتها فشكل هاد لمشية ولكن راه كتبقى مها هي مكانتش كتعاملها مزيان ويمكن مبغاتهاش ݣاااع ولكن ربي وصى بالوالدين وفراقهم فحاجة وحدة الا شركو بيه وبغاوك تشرك بيه حتى نتا.. وصلوووو وكان سكات خرجو بتلاتة ووقفو قدام الحبس فين كاين ناس جاب محمد صاك ناظور صغير من لكوفر.. باينة كانت فيها شي حوايج ماكلة)
زهير: انا نتسناكم هنا..
محمد: واخ (درع أمال بيد ومشاو دخلووو حس بيها ممرتاحااش وزفر) هادشي للي كنا نݣولو عمرو نوصلو ليه
أمال: مكتاااب علينا
محمد: (دارو إجراءات السجن وعطاهم الصاك باش يتقلب وعاد يمشي ليها عن طريق حارس السجن.. دخلو للقاعة فين كاين العائلات كيتسناو المسجونين جلسو فكراساا شادين كرسي لمهم) داك لكلب عمرو بانلي هنا
امال؛ محمد خويا متنساش راه عندك وليدات
محمد: انا بغيتو غير بتنازل الكلب كيشوف مو كطفى وباقي مهضر
أمال: من ديما كان قاسح ولكن هي الله يسمح ليها للي ضسرااتو وبزاف حتى رجع كولشي علي.. (لباب تحل وبداو كيجيو المسجونين) بانتلك
محمد: لا
أمال: (بقات كتقلب حتى وقفت مرا حداهم شافت فيها أمال عاد عرفتها مها طرطقت عينها فين مها؟!!! مها كانت غليضة هادي بحال شي هيكل عظمي الا صطتي عليها طيييح تحت العينين كحل ولون بشرتها داااكن فوجهها... شنايفها بوويض شافت محمد عنقها ولكن هي غير كتشوف بعينيها لا ردة فعل لا حركة سلمت عليها أمال بالوجه) ماما كيف بقيتي؟!
فتيحة: (رمشت بتقل مكتهضرش)
محمد: (من نهار شدوها منطقت حتى بحرف غير ساكتة وكتشوف) ما خاصكي تهضري
أمال: واه خاصك تهضري وتكتري الاستغفار وتصلي ربي معاك نتي مظلومة وربي مكينساش عبااادو اماما
فتيحة: (شافت فبنتها نفس الشي بحرا كترمش ولكن عينيها تضببو وغير كتنهد... عياو يهضروها واالو غير كتشوف محمد مرض معاها وأمال غير كتشووف حتى تسالات 10 دقايق وصفرووو باش الزيارة كتنتاهي ويدخل الفوج الاخر ناضت شافت فيهم وحنات راسها ومشاات خلاتهم مكسورين.. محمد دفع ان حالتها الصحية فتدهور ولكن مزال مجا شي جواب حيت مزال متحكمت محست أمال غير بقلبها تزعزع وبكات بكل إنسانية على مها عنقها محمد وتم جارها وهي كتمسح دموعها خرجو وهو باقي مدرعها غير شافهم زهير لاح الكارو للي فيدو عفط عليه ومشا عندهم)
زهير: واش طاري؟!!
محمد: (زفر) الا زادت كتر من هاد الوقت فطرا ليها شي حاجة
أمال: حاالتها تبكي الحجر (رجع عنقها محمد مزيرها وكيبوسها فراسها باش توقف من لبكى.. دار زهير يدو تحت ظهر امال للي رخفت من خوها وبقات كتمسح دموعها) بقات فية بزاااف والله معرفتها فاللول
زهير: (جارها بشوية حتى رجعت على ليمن ديالو) الحق يبان يبان.. (داها للطموبيل جلسها اللور وعطاها تشرب لما وكبو على يدو ودوز على وجهها وحنا على ركبتو شرب من القرعة وشاف فيها وهي ساهية) شوية درك؟!
امال؛ الحمد لله...
ركبو فطموبيلاتهم هند ركبت معامن جات وليد جا يركب حداها
هند: الا ركب هدا معاكم غير حطوني انا وبنتي نجي فتاكسي
زهير: روووول ابن عمي زلݣ
(سد وليد لباب..)
شد على ݣلبك درك
(هند رجعت تكات كتشوف قدامها وليد مشا ركب مع لكبير اما أشرف وشيماء قلعو من قبيلة زادو فطريق..)
ههه أشرف طاار مراهش يبان
الحاجة: ههه الحمد لله غير منين صفات لخواطر حݣا لعشا راحنا معروضين عند عݣوزت ختك عيشة
زهير: والله راني مسخسخ
الحاجة: معليش اوليدي غير نمشيو نديرو الواجب عمرها عرضتنا ومشيت معانا
زهير: نشالله... (أمال شافت فهند ووشوشت ليها)
أمال: هند شنو درتي معاه
هند: واالو.. ديك الدار والله محاملة نمشي ليها وهو فيها تتبالي نمشي لفاس نرتاح شوية فيها انا وغيثة
أمال: وهو يبغي
هند: منين وصلت كل واحد تيدير شنو قالو عقلو غنديرها.
أمال: بلاش أمال والله مصالح هادشي للي غديري جلسو وهضرووو
هند: فتنا ديك المرحلة نجلسو ونهضرو هو كبر المشكل كتر وكتر
أمال: نتي مولات لعقل
هند: حتى هو كانو تيقولو عليه مول لعقل شنو وقع دابا؟!!
أمال: غلط مفكرش مزيان وراك شفتي عيطولو على شنو وقع بين عمي احمد وشيمااا يمكن بالزربة زاد
هند: امااال كاينة شي حاجة سميتها التيليفون... بألو منو كنت نهز الطموبيل ونمشي عندو نشدو طريق بزووج
أمال: اجي جلسي عندي وفكري
هند: معرفتش أمال والله
زهير: (عيا يبعد ودنو ولكن سطولاتو مطلوقين اما الحاجة داها نعاس وحنات داك الراس... وصلو لوجدة نيشان للدار هبطوو وحتى خوه وصل من موراه جابوها مع العصر هبطو ووليد جا حدا هند)
وليد: هند نمشيو؟!
هند: لا غنبقى هنا
وليد: كفاش تبقاي هنا معندناش دارنا؟!!
هند: معتارف بيها نتا بعدا (بغات تمشي وشدها من يدها) طلق يدي بلا منديرو الشوهة هنا
وليد: (غوبش) ياله نمشيو الدار
هند: ممشياش معاك أوليد (نترت يدها وتمت ماشية بغا يتبعها ووقف زهير فالنص)
وليد: حيد ازهير
زهير: خليها تبرد راها عند مّا ماشي فشي بلاصة برانية.. هي معصبة ونتا معصب مغتلقاو حتى حل خليها تبرد شوية ومن بعد هضرووو وانا بروحي درك نهضر معاها... بدل ساعة بأخرى أوليد.. (مشا من تماك كاااعي وهي طلعت لدار الحاجة مخيخة حتى يشوفو شنو غيديرو...)
أشرف: نعسي مريم
شيماء: ههه علاش مموحشهااش مسكينة.
أشرف: موحش مك كتر
شيماء: هههه خليها معانا مسكينة
أشرف: شيمااااا (هزت بنتها وهي كظحك دخلاتها لبيت فين ولات كتخليها تنعس بووحدها وحتى هي ولفت بقات معاها حتى نعست وقفت مشات لبيتها.. لقات فوق النموسية غوب دونوي فلحمر تبسمت والفرحة عامياااها دخلت للحمام حيدت حوايجها كاملين كان قبل ميجي أشرف درات لاسيغ لحمها فالدار طرفت راسها وشدت موس لحسانة عاودات دورة خفيفة ف**** سمعت الدقان فلباب)
أشرف: شيمووووم ݣلبي طااب و*** فاااض
شيماء: ههه اويلي على حمق (شعلت الرشاشة غسلت تحتها نشفت بفوطة ودهنت بزيت جونسون للاطفال طلقات شعرها وخربقاتو ودارت ݣلوص كيخلي حمورية فشفايف خرجت لقاتو حدا لباب كيتسنى جرها عندو حتى لسقت فيه)
شوف بعدا غير كيف جاني
أشرف: (باسها فعنقها.. عاد بعدها شافها مدة 2 ثواني ورجع لسقها فيه) زيييين ونتي حليتييه كتر
شيماء: مشفتيهش حتى مزيان خاصك تمعن فية
أشرف: نتمعنو وعلاه منعنووش هانا برومو **** اللولة بيه عاد نعريك من بعد
شيماء: ههه (عنقاتو كظحك هزها وجاتو تقيلة شوية حتى حطها عاد عرف لعبار وهزها) هههه
أشرف: امحاايني وشحال طرفتي
شيماء: ههه أشرف بغيت نݣولك شي حاجة...
أشرف: اممم (ماشي بيها لبيت نعاس)
شيماء: عمرك ݣلتيلي كنبغيك
أشرف: نحبك ***
شيماء: ههه لا مكلتيهاش من قلبك
أشرف: (حطها وشاف فيها وشحال كتحماق على عويناتو للي بين العسلي والخضر ودوك الشوفات الطريقة ديال شوفاتو كتهبلها) كنخدم ونجيبلك تاكلي وتلبسي كتبين راني نحبك نعس معاك كتبين راني نحبك نتوحش فيك ومنݣدش على فراقك كتبين راني نحبك
شيماء: حتى انا كنبغيك بزاااااااااف وووو
أشرف: (قبل متهضر زرب عليها واللول كيجي بالسريع وادزم... بقا معنقها وهي متكية عليه كيتسنااو الميطا التانية)
شيماء: اشرااااااف
أشرف: وي حبيبة
شيماء: مخاصكش تبرك علية بزااف
أشرف: نبرك!! مزال حتى مبدينا فالصح
شيماء: (هزت راسها فيه وباسها فشنافتها وجرها بعضة خفيفة وتبسم) انا حاملة...
أشرف: (مبقاش مرخي توݣض ناضت من فوق صدرو وشافت فيه) حاملة؟!
شيماء: (جمعت الابتسامة) واه
أشرف: (بقا كيشوف شحال) باش عرفتيها؟!
شيماء: (جلست وجرت ليزار على صدرها) درتو فاش كنت فالدار اصلا راني روطار
أشرف: وشحال من شهر
شيماء: (بقات كتشوف فيه) واش مفرحتيش؟!!!
أشرف: لا ولكن..
شيماء: (قلبها ضرب بحرقة) ولكن شنو؟!!؟
أشرف: معرفت مريم مزالها صغيرة ونتي والدة بالعملية خاصكي شي 3 سنين بعدا وحنااا.. حنا عاد ولينا نعيشو حياتنا
شيماء: وشنو بغيتني نطيحو؟!
أشرف: استغفر الله (جلس حتى هو) واش خرجت انا من فمي هاد الكلمة نتي مريضة ولا شنو
شيماء: (سبقتها لبكية) انا حسابلي غتفرح طير بالفرحة
أشرف: انا فكرت ليك
شيماء: يمكن حتى المرة اللولة وكان جيت عندك کلتهالك كنتي غتݣول شي تخربيقة بحال هادي
أشرف: (كيشوفها كفاش رجع وجهها حمر وكتبكي بشهيييق) شيمااااا انا غير ضهشرتيني
شيماء: سير تخرا (ناضت جارة داك ليزار بغا يوقفها دفعات يدو وتلوات ليها رجلها مع ليزار جات مزدووحة مسبقة يديها وركااابيها... غوتت مخلووعة وهو تخلع ناض من بلاصتو ملط بغا يهزها بقات كتغوت وكلماتها زادو خلعوووه انه مسؤول الا مات للي فكرشها بالزربة قلب على شورطووو وليس تيشوورت)
بعععععدنيييييي
أشرف: يا ** نووضي تهزي نديك لطبييب (نوضها مشا جاب عبايتها لبسهالها ودالها شاال... طل على بنتو لقاها ناضت بلغوات) واش ݣادة توقفي
شيماء: (كتبكي وكولشي مخلط عليها واهم سبب هو رفضو للي فكرشها... حركت راسها باه وهي مكتشوفش فيه) الا وقعت شي حاجة والله منبقى على رقبتك (شاف فيها) هاني كنحلف والله منبقى.. (زادت قدامو فارقة رجليها هز بنتو وسبق حط بنتو فالطموبيل ورجع لشيماء بغا يشد فيها ومبغاتش ركبت اللور كتبكي معنقة بنتها للي كتسولها ماالكي وهو ديمارا وزاد)
أشرف: شيماااااء انا راه باغيك. وباغي بنتي وباغي ميات ولد تولديهلي... (لا رد بقا ساكت متاجه عند طبيبة نساء...)
هند: (لبست بيجامة ديال أمال جاتها هي هاديك) ترمتي يا الكلية
أمال: (شدت فمؤخرتها) حلفي حلفي
هند: ههه والله
أمال: مكرهتش نزيد نصحاح كتر
هند: لا لا منصحكش راه لكرش بغات تخرج ليك هاكا جاتك طاي زوينة خلي تݣاد الݣانة وعلمي زهير نمشيو نتسجلو فشي صال
أمال: لا يا ختي مبغيتش نضعاف
هند: ماشي نضعافوو غير باش تبقى لطاي واقفة على الصح.. الحاجة كتعيط ليك
أمال: خاص نخرجو نشريو الحوايج راه مبقالها والو وتمشي
هند: غتمشيو دابا؟!!
أمال: واه
هند: صافي خلي مروان معايا وسيرو قضييو غراضكم
أمال: ياله تخرجي اصاحبتي معانا شنو تبقاي جالسة هنا
هند: والله ما فيا أمال غير خليني عفاااك
أمال: تبغي شي حاجة من برا؟!
هند: لا.. (خرجت أمال مشاو هي وزهير وحتى ليلى يتقداو حوايج للي تحتاج فالمقام.. شراو ݣاع للي تحتاج وتمو راجعين دغيا على حساب لعراضة للي عندهم فالليل... اما هي بقات كتلعب مع لوليدات ناضت قدات ليهم ياكلوا ونعسوا بجوج بقات كتشوف فيهم وتبسم.. تفكرت وليد واخر جست دار معاها كان قاااصح بزاااف وبحال رد ليها الصرف كما ستصغرتيني قدام داركم حتى انا ستصغرتك قدام دارنا... سمعت لباب تحل دخل أنوار وامال2 باينة كانو برا)
انوار: السلاااااام عليكم...
هند: (دارت شالها) عليكم السلام (حنات سلمت عليها مرتو) صافا أمال
أمال2: الحمد لله اختي ونتي
هند: الحمد لله
انوار: (كيدور عينو) خرجو؟!
هند: اه
انوار: فين مشاو عاود؟!
هند: معرفتش... (شاف فيها وهي تخنزر) علاش كتقلب
انوار: غير مّا... راه عمتي معيطا لينا لعشا
هند: شوية وتلقاهم جايين..
انوار: اممم انا غير هنا منين يوجد كولشي صوني علية أمال
أمال2: واخا (خرج وبقاو كيهضرو سطحي حتى سكتوو حيت مجامعهش تعاويد وهضرة... حتى صونا تيليفون هند كانت شيماء ناضت من حداها باش تهضر من بعد ماعتاذرت...)
أشرف: (تأكد خبر الحمل للي المدة ديال 9 السيمانات وكانت الامور بيخير وعلى خير وشيماء معندهاش مشكل فالحمل حيت فاتت عماين على الولادة ديال بنتها.... رجع شيماء للدار للي مكتهضرش معاه وبراسو كيفهم انه غيتزاد عندو ولد ولا بنت... فلحظة تبسم وصلو للدار هبطت زادحة باب الطموبيل مهضرش هز بنتو ومطلعش تبعها داها تلعب شوية فالحديقة ديال العمارة وكاين حتى وليدات صغار...)
~~~~~~~~
شيماء: (عاودات ليها شنو وقع حيت بقا فيها الحال حتى بقات كتبكي...) كان يحسابلي غيفرح ويطير بالفرحة
هند: يمكن غير زربتي عليه اجي نقوولك نهار فاش عرفتي طرتي بالفرحة؟!
شيماء: هو كيبغي يكون عندو لبز
هند: وشكون لي متيبغيش لوليدات ولكن عادي فاللول يتدهشر ونتي قلتي شحال رغبك وقالك خايف عليك علاش غتزيدي تصعبيها على راسك وياله لبارح السيد مخلا مجاب ليك وفرح بيك وكبر بيك قدامنا كاملين... دابا قوليلي أشرف اشمن غرض عندو باك يقبل هاد زواج ولا لا ياك هو مزوجك ووالد معاك غيقول بيناتكم او لا؟!
شيماء: غير نتي كتجي معاه
هند: هههه بانلي هاد الوحم هاد المرة غيكون على اشرف
شيماء: فقصني والله حتى فقصني
هند: غير نتي باغية تفقصي راسك دابا عرفتي شنو غديري غتمشي ضربيها بدوش وجبدي عليها بنعسة حيت بقات ليك غير 7 شهور واراااا متسهري
شيماء: ههه كتشجي زعما
هند: يا ختي حسن عوااانك
شيماء: هههه والله متبقى فييه
هند: شوفي انا نشجعك تغضبي الا كانت شي حاجة تستاهل صافي منين يجي دابا يهضر معاك تفاهمووو
شيماء: بقا فية الحال
هند: غير معرفش يعبر ليك وصاافي هانتي شوفي غير تعامل ديالو مع مريم يعطيك لخباار
شيماء: (بتنهيدة)
هند: واا سيري دابا براكة من تهرنين وديري شنو قلت ليك غدا الا صلاح نجيو عندك اما وأمال.. ياكما مشهية شي حاجة؟!!
شيماء: (نسات التقليقة وبقات كتقلب على شنو مشهية تفكرت وحمها اللول شحال تشهات ومكلات واالو..) بغيت لفريز
هند: اشمن فريز فشهر 5
شيماء: ومغمس فالشكلاط ولا مدردر عليه سنيدة
هند: هههه نقلبو عليه الآلة... (بقات كظحك معاها حتى سمعو لباب تحل كان أشرف وقطعت معاها رجعت لقات أمال مكيناش وبقات جالسة حتى جاو لوخرين ...)
جابو لحوايج للي شرااو جمعوهم ليها فلباليزا ديالها ووجدو راسهم يمشيو واخا هند مبغاتش تمشي الا بقاو عليها حتى مشات حس وليد مكاااينش كانت حتى بغات تصيفطو ميساج تعلمو بلمشي ديالها وهي دير بناااقص منين كتفكر شنو دار فيها... تفاجئت هند ان زهير مبغاش يمشي وحتى مرتو متمشيش..
الحاجة: ولدي تا
زهير: مّا نتوما فيكم الكافية انا كنحس بروحي مريض وبغيت مرتي تݣابلني
أمال: (مكرهتش تعنقو وتبوسو كانت جياها مشية تقيييلة على القلب وغير حشمت تهضر وترفض طلب الحاجة..)
لكبير: عاد كنتي صحا وسلام
زهير: اوا سبحان مبدل الاحوال هاني طلعت
انوار: راه الا ممشيتوش منمشيش
زهير: يا خويا انا ومرتي مبغيناش نمشيو نتا لاه حاضي رووحك معانا هادوك دار نسااابك درك تغييض مرتك باه تبقى معانا؟!!
انوار: (ضهشروو) انا ݣلت غير باش تمشيو معانا
بشرى: ههه رديتوها قصة عمي مابغاش يمشي عندو شي حاجة ونتوما جالسين ديرو لونكيط
زهير: هانتي تشوفي ابنت خويا اموول روااحي
هند: حتى اانا منمشيش يمكن تعدا صاحبتي ومتلقاش للي يوقف معاها ههه
الحاجة: واخا يا الهراابة (طلعو للدار لبنات فرحانين ولوخرين مشااو)
أمال: وكان غير علمتي قبل منلبسوو
زهير: بقاو لابسين نخرجو نتعشاو برا عارضنا أشرف
هند: هي تصالح مع شيماء
زهير: (مكيدخلش فهاد الهضرة دخل للحمام وأمال وهند بقاو كيتعاودووو خرج صلا لعشاا) أمال شتك مكتصليش
أمال: عندي عذر
زهير: ابردييييي ويامحييايني (بقا كيلبس سبرديلتو)
هند: واش جاي وليد؟!
زهير: درك نهضرووو ولا لا؟!
هند: خويا زوهير راه هو للي غالط
زهير: بجووجكم مدرتو فيها ميصلاااح باش حسيتي نتي هو حس وهادشي مخاصش يكوون بيناتكم قربلووها ولكن ݣدام الغاشي مخاص يعرف عليكم واالو...
هند: اه غلطت وبزاف ولكن بعدا حوالت شحال من مرة نهضر معاه ونفهموو واالو مبغاش يسمع لية ودرت داكشي للي بغا اااه مسخييتش بخدمتي ومسخيتش بالناس للي لدابا مزال تابعني بالتيليفون باش نكمل معاهم الخدمة هو بين ليلة ونهار حبسي الخدمة
زهير: معليش ديما صبر كيكون على واحد
هند: معرفت والله بقا فية الحال بزااف على شنو دار معايا
زهير: ها نتوما تلقاو وتفاهمو
هند: (بقات ساااكتة.. دازو عليه ركب كانت كتسنى يجي يركب حداها ولا يطلب من امال ترجع القدام ويجي هو يجلس حداها يراضيها ساعة حدو لاح السلام وبقا مجمع مع زهير....)
وليد: (مشاو لريسطو للي قالهم أشرف لقاوه كيتسنى هو وشيماء ومريم كتلعب حداهم سلمو عليهم وجلسووو... هز عينو فهند لقاها كتهضر مع شيماء ومجمعين مينكرش شحال توحشها ياله ضارت لجهة أمال تلقاو عيونهم وشاف فبنتو كتلعب) غيثة اجي ابنتي عندي...
هند: (عوجت فمها واخا بقا فيها الحال على هاد البرود للي راه معاها فيه... غلطت وصححت غلاطها وبغات تقربو ليها ولكن هو غير زاد بعد أشرف قالهم على سبب العرضة صدق غير بوحدو للي ياله عرف كولشي شدها فيه كيظحك تعشاو مجموعين وحيت لوليدات صغار خاصهم ينعسوو ناضو باش يمشيو فحاالهم هنا هند توترت واش وليد غيديها بالزز ولا شنو؟! ركبو مجموعين.. قربت يوصلو حدا الدار الجو تكهرب والاعصاب مفورة)
وليد: لوحني هنا يانا (هند بقات غير كتشوف... ضار عندها) هودي نتي
هند: لا.. وكفاش هاد نتي؟!!!!
زهير: هود أوليد بلا متفيق لبز (هبط وليد معصب وزهير زاد فطريق هند كترجف كفاش هو غالط ومزال منفخ وكيهضر معاها بهاد الطريقة!!! وصلو للدار طلعو لدار الحاجة بلا ميهضرو دخلت البيت وجلست معصبة المشكل كبر ولا خانقها.. متقدرش دابا تهضر معاه مستحيل حست براسها كتكرهووو كفاش هاد الجرأة كاملة مع انه هو للي غالط ومزال كيتنفخ ويتبوبا عليها... جات عندها أمال)
هند: أمال عفاك اختي غير سيري عند راجلك
أمال: راه خاصكم تهضرو
هند: أمال عفااك..
أمال: واخا ختي تصبحي على خير.. (مشات عند زهير للي متكي حدا ولدوو) وليد زاد فيه بزااف
زهير: (سمعو الحس لوخرين جاو) لبسي فولارك جاع يطلعو هنا.. (خرج كانت الحاجة وداخل معاها أنوار وأمال2 باس راس مو) بكرتي؟!
الحاجة: ههه وراك عارف جماعة اوليدي كنتي ناقص غير نتا ولبنات
زهير: نتجمعو فساعة الخير
انوار: درتوها ناقصة اصااحبي وبقيتو ووحدكم هنا
زهير: لا حتى حنا غير دابا شوي باش جينا من عراضة أشرف
انوار: اشرف؟! مزياااان
زهير: مّا دوزي تشربي دوااك (دخل مو نعسها وبقا واقف عليها وهي كتعاودلو حتى عطاها دوا تكات طفا الضو خرج لقاهم مزال تم) ݣلت هبطتو
امال2: (مفاهماش لاش مزال جالسين هنا والناس ناعسين)
انوار: منݣصرووش!! راه الصيف قرب يدخل ولݣصارة زينة فهاد الجو
زهير: عيااان أنوار خليها لغدا وزايدون سير ݣصر مع مرتك راك مزال عريس جديد شتي نهار كنت عريس سيمانة مخرجتش من داري
امال2: (حشمت معرفت فين دير وجهها وفنفس الوقت بغات أنوار يفهم شوية انه عرييييس.. خرجو كيظحكو هبطو سد لباب ومشا لبيتو... )
أصبحنا وأصبح الملك لله..
محمد: (عيطلو المحامي وقالو ان علي عتارف أن مو مكان عندها حتى يد فالاعتداء عليه ودارو طعن باش تخرج فتيحة من الحبس فرح بزااف مكرهش يتواصل مع مو يفرحها ويخليها تخرج من داك الجو ولكن مكان حتى وسيلة تواااصل... والخبار غيوصلها وهي تماااك )
مريم: الحمد لله يا ربي الله يفرجها عليها مسكينة
محمد: اميييين امييين.. بفففف واخيرا داك الكلب دار شي حاجة مݣادة
مريم: دابا سمو يديرو معاه؟!
محمد: الله يجعل يردموه حي مشغليش فيه اصلا علي نهار دخل مو الحبس درتو ميت
مريم؛ الله يهدي ما خلق وصااافي
محمد: انا نهضر مع أمال نݣولهالها (صونا على أمال) الوو أمال لباس عليك؟!
أمال: (كانت كتشطب الدار) الحمد لله اخويا ونتا لباس عليك ومريم وليدات
محمد: الحمد لله اختي مروان كيف بقا؟!
أمال: الحمد لله مبقاتش فيه سخانة راك عارف سنان
محمد: وييه.. سمعي ما راه غتخرج داك الكلب عتارف ݣال ماشي هي للي ضرباتو
أمال: (تبسمت) الحمد لله يا ربي فوكاش تخرج؟؟!
محمد: معرفت المحامي کالي شي سيمانة على ميكملو الإجراءات
أمال: انا نجي انا وزهيير تكون النيت مّا وعمي لكبير مشاو للحج
محمد: الله يديهم على خير حتى يانا غير ترتاح ما شوية نديرلها شي عمرة ولا نمشيو انا وياها
أمال: ان شاء الله اخويا
محمد: ياله بسلامة حتى رجع من عند المحامي ونعيط ليك
أمال: واخا خويا (قطع ضورات عينها مكان حد جمعت ديك التشطيبة نيشان تحت بلاكار ديال صباابط ومشات زفات الخبر على الحاجة للي جالسة فوق نموسيتها وهند حاطة راسها على حجرها كتشكي عليها على وليد)
الحاجة: الحمد لله يا ربي والله يا بنتي فكل صلا كنت ندعي ليها
هند: على سلامتها مسكينة
أمال: (كتبسم) شي سيمانة وتخرج
الحاجة: نشالله ابنتي حتى هي نجيبلها عباية وتسبيح
أمال: ههه يسمعك زهير يتݣنوا عليك الناس تفكر تمسح ذنوبها ونتي جالسة تفكري فشنو تجيبي ليهم
الحاجة: نتي بعدا نساي ديك الليستا للي عطيتيني نجيبلك
أمال: الا مّا غير نتمازح معاك احاااي نتي وولدك ممعاكم ظحك...
وصلت العشية كانت أمال غير كتقفز وناشطة حتى هند جاتها غرييبة واش هادي الفرحة ديال مها ولا شنو ومولااش جات سولتها على وليد ولا وسااتها فمحنتها...
أمال: نوضي اصاحبتي نخرجو ونديو حتى هاد لبز يلعبو شوية
هند: أمال معنديش الݣانة بغيتي تخرجي غيثة معاك ها هي ديها معاك
أمال: عفاااك قنطت والله..
هند: باااز والله واش كتشوفي حالتي ديال وحدة تخرج تفوج
أمال: دابا تقاد الامور بيناتكم سحابة ودااايزة
هند: (بقات كتشوف فيها) مفياش أمال لي يخرج
أمال: معقلتيش درنا مع شيماء نمشيو نشوفوها هي حاملة متقلة ووصاتك زعما على لفريز واخا تكوني مدابزة مع خوها هي تبقى فجنب
هند: واخا أمال... (ناضت بقا فيها الحال ولكن طمرت) على وجه وحم شيماء (لبست الكسوة للي جابت ليها امال) هادي جديدة؟!
أمال: لا كنت شارياها داك نهار
هند: امتى عمرني شفتها عندك
أمال: نهار كنتي فاس
هند: اممم (لبست هند الكسوة للي جاتها عبار كانت كسيوة فستيل تركي فالكحل وفيها وريدات من لتحت فلكرونة لوات شال عليها من بعد مقدات وجهها يمشيو اثار دموع وسهير الليل.. جات أمال رشت عليها بارفانها وهي كتفرنس) وهاد الفرحة؟!!
أمال: وااالو غير رشقاالي
هند: مزيان الآلة... (لقاتها ملبسة بنتها خرجوو لقاو أنوار خارج من دارو قال السلام ولا وحدة رداتها عليه... زادو ومشاو مخليينو غير كيشوف.. مشاو لدار هند مدخلوش خداو غير طموبيلتها) حتى الطموبيل مبقاش قاد يهزها... (ركبو وزادو فطريق)
أمال: فين لقاو هاد لفريز؟!
هند: كاين واحد كيبيع les fruits كاملين كيسميوه حانوت الموحمات
أمال: ااااه.. فين جاي؟!
هند؛ معرفتش نعت ليك مزيان (كانت غير كتسب فالي مكيعطيهاش دوز وصلو للمحال خداو ليها فريز) صوني عليها واش راها فالدار
أمال: صونيت راها تماك .. اندوزو بعدا نشريو ليها الشكلاط واحد النوع وصاتني عليه
هند: شنو هو؟!
أمال: من مور محال زهير غير زيدي انا نوريك...
أمال: ...غير زيدي انا نوريك... (دارت ليها خاطرها حيت ما فيها للي يهضر وخصوصا كتشوفها هي فرحانة وعند باين عليها مفقوووووسة... وصلو لتماك) هبطي
هند: هبطي غير نتي أمال جيبي شنو باغيا وياله نمشيو
أمال: وهبطي اصاحبتي معايا
هند: واش نعاودو نهبطو بولادنا صافي شكلاط دخلي جيبيييه واجي باش رجعو دغيا الا بنت ليك مزيان فتفهمني معندي الݣانة
أمال: والله إن تهبطي معايا وطلقيها اصاحبتي شوية.. (هند عصبتها أمال هبطت دايرة ليها خاطرها...
هند: ..(ياله فتحت لباب على ولاد باش يهزوهم حست بيد محطوطة على عينيها... وقفت مخلووعة وهي طلع معاها بارفان ديال وليد... بقات جامدة فبلاصتها وقلبها كيزدح وكتسمع أمال كظحك وبنتها كتقول *با بابا بااباا* زادت تأكدت بحال جارها ومتعكساتش معاه أمال جبدت تيليفونها كتصور لفيديو وزهير هز لولاد بجوج وطير لكونطاكد من يدها وسد الطموبيل.. )
شنو وااقع؟!
وليد: خاطفك.. شي مانع
هند: اه كاين مانع..
وليد: شحال عنيييدة
هند: ونتا معفر
وليد: ههه (بقا مزيدها وهي خايفة حتى وقف حيد يدو من عليها.. وكتبان ليها بلاكة فالكحل مكتوبة بالذهبي عيادة هند الادريسي للترويض
رمشت تلاتة ديال لمرات بحال كتمسح ضبابة من على عينيها.. ممتيقاش شنو كتقرا عاودت هاد المرة وهي كتهجاها مكتوبة ب4 ديال اللغات العربية الأمازيغية الانجليزيه والفرنسيه.. ضارت عندو كتشوف فيه ممتيقاش وهو متبسم حتى لباسو كان كلاص.. شافت أمال للي كتحنقز وهي كتصور وفرحانة عاد فهمت شحال من حاجة.. رجعت شافت فوليد للي حنا عندها)
وليد: العيادة ديالك لفوق تبغي تشوفيها ولا ندابزو قبل
هند: حتى نشوفها
وليد: ههه واخا لالة
هند: (جارها وهي مصدووومة وفلحظة القلب كان كيموت بالحزن والقنوط والحنقة الفرحة غيراااتو كامل طلعو فلاسانسور كان الدور الاول تقابلت معاه) امتى هادشي!!!
وليد: (غير متبسم مكيهضرش مع تفتح خرجو كانت العيادة اونفاص ليهم ونفس لبلاكة لباب محلول والهضرة كتيرة دخلت كتلقى مها باها وحتى نعيمة واحمد زهير واشرف وشيماء واولاد كيلعبو كانت كتصفر من غير طابلة عالية فيها ايزار بيض وبوفيييه متوااضع... الكل كيبارك ليها وللي كتعنقها)
وليد: اولا مبرووك عليك امادمتي العيادة جبتك هنا باش متقنطيش وتݣولي خرجتك من الخدمة وجلستك فالدار الماتريال قرب يجيك على ميخرج التصريح للي بقالو امضاء واحد من عند العامل... ونشالله تبداي خدمتك ولكن ونتي مرتاحة فعياادتك دياالك
هند: (دارت يدها على فمها مصدووومة من الفرحة وعينيها عامرين دموع الفرح مقادراش تهضر عنقاتها ماماها)
وليد: تݣادينا داابا امداااام؟!!! (مشات حداه عارفها غتجي تعنقو خلاها على خاطرها واخا جاتو حشوومة قدام الناس هو معنقهاش كما موالف غير بيد طبطب على ظهرها وهي دغيا تداركت الامور ووقفت حداه ودرعها بيد...)
أمال: (نغزت زهير من بعد مكملت التصوير) واحد محال دلخياطة شفتك ما شفتو هو...
زهير: (حك لحيتو دار راسو مسمعهاش) وليد رواااح لهن
أمال: بلا متهرب راك سمعتني شنو ݣلت
زهير: واشتا.؟!!!
أمال: محال لخياطة ازهير
زهير: اشمن محال
أمال: للي ݣلتي ديرلي 3 سنين دجواج مزال مشفنا شي محال
زهير: حتى ندير
أمال: للي غديرو ديرو دابا
زهير: ها شومبرة تبقى خاوية صاحبتك داوي هنا ونتي خيطي ليهم جوج فخييييط ماشي مليحة!!؟ ولا لا اخالتي نعيمة
نعيمة؛ هههه كولشي زييين
أمال: زوهييييير
زهير: (بقا كيقلب فجيابو اللور) مهم انا نروح للمحال بقا وحدو.. زين منين تكملي (هزت حاجبها فيه) روحي للدار نيشان... ختي هند مبرووك المحال خاصنا الزردة
هند: (فرحانة) ان شاء الله اخويا
أمال: (مع مشا تبعاتو فدرووج وقف شاف فيها وقلبت وجهها للبراءة) وانا منديرش محال دياالي
زهير: أمال حبيبتي خلي للدار ونهضرو فدشي
أمال: (كدلع وترقق دوك شنيفات بحال شي بنيتة صغيرة) نتا غير كتكذب علية
زهير: امااااال (قرسها من شنايفها) صافي خلي نجي ونهضرو كولشي ديالك احبيبي دابا المحال خليتو وحدوو
أمال: واخا انا نتسناك ولا حتى انا نغضب ليك
زهير: ههه واخا الآلة لݣيتوها سبة وخدامة ليكم
أمال: (هزت كتف) وماشي خدمة نقية هادي
زهير: ههه دخلي (دخلات وهو مشا للمحال... )
بقات هند كدور فديك العيادة بحال شي فراشة وكتقاد الديكور فمخيلتها وتعطي اراااءها وحتى للي تماك عطاوها اراااءهم وهي كتسمع كانت الدار فيها 2 الغرف وحدة كبيرة وحدة صغيرة وصالون كبير كوزينة صغيرة حمام وطواليط.. الصالون غديرو صالة الاستراحة فين لكليان غيتسناو.. وحدا لباب غيكون مكتب صغير للاستقبال الشومبر لكبيرة فيها غتكون الخدمة بالمعدات ديال الترويض والشومبر صغيرة المكتب ديالها تحمست بزااف وغير دور تعنق وليد أكترية منين شافت ان الدار مشرية بثمن 56 مليون حيت جاية فموقع مركز وجدة عرفت راه حط لفليسات للي كانو عندو كاملين كان موقف رجولي دارو معاها بغات تقرا العقد حيت خبا لكتابة ووراها غير المبلغ للي حطو كاش... مخلاهاش شافت فيه دار بإشارة بعينيه زعما من بعد... تبسمت مشات هزات كاس عصير هبطت عليه وتجمعت مع لبنات أمال وشيماء
هند: كنتي عارفة؟!
أمال: (كتلعب بحواجبها) من لبارح
هند: بنت لحراااام ومقلتيلي والوو ونتي حتى نتي كنتي عارفة؟!
شيماء: والله اختي مفخباري حتى عيطلي وليد لعشية وݣالها لينا
هند: واخا على حسك نتي
أمال: هههه
هند: وشنو درتي مع زهير فالمحال
أمال: ݣالي يكون خير
هند: انشاء الله.. ناري شحال فرحت بزاااف
شيماء: (تبسمت غير كتشوف هوما كملو فرايتهم وهي حملت بلا وقت وبلا زواج.. تزوجو بالفخامة وهي تزوجت بمذلة دابا كيشوفو مستقبلهم وها هي حاملة للمرة الثانية.. رجعت تبسمت متقبلة الأمر هي للي ختارت من اللول طريق غاالطة تعيا توب وتندم ضروووري غتخلص غتخلص... ضروري الواحد قبل ميخطي شي خطوة متهورة يقرا ليها لحسااب ديال من بعد.. تنهدت ورضات بالمكتاب اما لقرايا ولا الخدمة تنساها مع اشرف حيت عارفاااه مزيااان كفاش كيفكر.. براكة غير تربي وليداتها وتعيش حياااتها للي عمرها كانت هاد الحياة من اختيارتااها.... زعزعاتها مها)
نعيمة: كيف بقيتي ابنتي
شيماء: الحمد لله اماما... حتى نتي مكرهتينيش وكان كنت فرملية بحال هند ولا كملت قرايتي بحال امال
نعيمة: كولشي بالمكتاب ابنتي
شيماء: (تنهدت) ونعم بالله
نعيمة: ربي شنو مكتب لينا ماشي ݣاع للي قرا خدم وماشي ݣاع للي خدم مرتاح ربي كل واحد وشنو يعطيه ومدام راجلك قاد بيك وبدارو ݣولي الحمد لله... الا بديتي تفكري علاش وكان حتى انا وكان كدا غير غتمرضي ابنتي فراسك وتمرضي للي معاك
شيماء: معليش ماشي للي بغيناه ديما كنلقاوه (أشرف ضار شاف فيها حيت جات الجملة فودنو وهو كيقرب ليها رجع بعد باش ميتسماش كيتصنت عليهم...)
نعيمة: سنة الحياة هي هادي ابنتي ديما كتلقاينا مطاردين مع شي حاجة....
هند مشات مع لوخرين للي كولشي مشا لدار الحاجة للي عارضاااهم وجاو باش يتصيفطو معاها نيت ووليد رجع مرتاح للخدمة قابل المحال لكليان هو توقيت ديالو كيسد مع 7 ونص... واخا سخن الحال حيت هاكا تقريبا ݣاع محالات ديال الاليكترونيات.. مشا عند زهير للي لقاه خدام مع شي ناس كيشرح ليهم ويوريهم موديلات ويتفاهم معاهم فالاسعار بقا وليد كيشوف شي صاالة واخا هي اخر حاجة خاصو يفكر فيها... الماتريال ديال الترويض غالي ولكن غيتقاال معاها حتى يجهز ليها كولشي من اخر حاجة لاكبرها...
كمل زهير وجاي قاصدو
زهير: واشتا باغي تنوض علينا الحرب يا ر**
وليد: ههه مݣادش على كلمتك متݣولهالهاااش
زهير: غنفرع *** تعاود تݣولي مݣادش على كلمتي
وليد: اوا هي الا وريتينا سمو دير باقي عاقل بالحرف ݣلتلها المحال انا نديرو ليك
زهير: ق** من حدايا هاد الساع... (مشا وليد كيظحك طلع المكتب كيشوف داكشي للي دموندا فين وصل وكيقلب على بزاف دلحوايج...)
وليد: (لقا ميساج من عند هند مكتوب فيه je t'aime... تبسم وصونا عليها مع قالت الو) توحشتك
هند: (تبسمت بحال اول مرة تسمعها من عندو) حتى انا... سمحلي على شنو وقع
وليد: حتى انا مكنتش نفكر مزيان منويتش شي حاجة خايبة غير الشيطان دارها بية اما المكتب ديالك ماشي غير باش نصالحك لا.. هدا كان حلم من احلامي معاك وبغيت نحققوه بجووج
هند: اممم امتى شريتي الدار
وليد: لبارح
هند: عجبني الحال بزاااف أوليد عمرني غنسى هاد الكادو
وليد: الا معندكش علاش تحشمي نسايه
هند: هههه خاصني ندير انوونص فالانترنت باش يبان للناس للي تيقلبو على الترويض
وليد: حتى نجيبو الماتريال
هند: اه ماشي دابا
وليد: فينك دابا؟!!!
هند: عند الحاجة
وليد: خاصنا نهضرو
هند: وي خاصنا نهضرو ولكن ماشي اليوم حتى لغدا نكونو بوحدنا
وليد: واااخا
هند: مزال احبيبي مغتجي راها 9 ونص
وليد: انا غنجي مع زهير
هند: واخا.. (قطعت ياله راجعة من دروج حتى كتلقى زوهير طالع) مجاش وليد ههه عاد كان تيهضر معايا وقالي غيجي معاك
زهير: يشوف درك معامن يجي هو ݣاد شغل معاك وانا نوض علية الصهد
هند: ههه حشوومة عليك ازهير معندوش حتى الطموبيل
زهير: راه طاكسيات
هند: ههه انا نمشي نجيبو
زهير: واشتا!!! روحي فحاالك تمشي فهاد ليالي باش تجيبي لبغل
هند: متقولوش لبغل
أمال: (غير سمعت صوتو طلت من لفوق) جييييت (بابتسامة عريضة)
زهير: ها مݣاااال طببيب....
امال: (كترقص بكتافها) طلع طلع احبيبي
زهير: أمال نعشاااو بعداا
أمال: ههه واخا غير بقى تهرب
زهير: (طلع فدرووج قرسها فجنبها كظحك وتم داخل هند صونات على وليد للي عرف زهير مشا عليه ولقاتوو كيقلب فالتاكسياات وحتى هي مخلاهاش تلحق بيه... دخل مسخسخ من بعد نهار طويييل أنوار كان نافخ عليه حيت مداهش لا لتاوريرت لا حضر لعشا لا داوه للمفاجئة ديال هند ووليد ناسي انه منبوووذ من عند هاد الناس للي طالب يكون معاهم ففرحهم... مسوقلوش زهير بقا شاد التيليفون كيخرب فيه حتى بان وليد كيتحلف فيه مداهاش فيه تحط لعشاا هز هند وهز ونسابو وواليديه ومشاو للدار.. مع دخل وراوهم فين ينعسوو لعيالات بوحدهم ورجال بوحدهم بطلب منهم.. اما هند ووليد دخلو لبيتهم..
هند حشمانة بحال أول مرة تجمع معاه ولكن فترة مدابزتهم كانت طوييييلة حيدت شالها وطلققت شعرها مدوزة يديها وصباعها كيتخللو فكل خصلة ومتبعاه دخل للدوش معرفتش علاش مزال كتحس بيه مقلق منها ولكن هي واالو داك الغضب لكبير للي كان فيها تلاشى حيت لمست حب كبير واحترااام منو.. خرج لابس شورط وتيشورت تبسم معاها وجا عندها كيماصي ليها كتافها)
وليد: زين ديالي
هند: (حطت يدها على يدو) صاڤا!!!
وليد: (حنا باسها فوق شعرها) باقية مقلقة؟! (حركت رأسها بلا) مزيان.. ولكن مرة أخرى اهند اسرار بيتنا ومشاكيلنا متوصلش الواليدين خليههم بعااااد على هادشي مشاكلنا ماشي هوما مشاكلهم
هند: نتا غير مفهمتنيش فاللول
وليد: لا.. ومغنفهمكش وماباغيش نهضر فداك الموضووع ياك تسد بيغييتوو يتسد عندك حتى نتي فمرة
هند: (ضارت عندو جلس فجنب النموسية شنو للي مخليه كاره حتى لهاد الدرجة) واش على د.فيصل؟!
وليد: (لعب بلسانو فوسط فموو) هند نتي قبل حتى منتزوجو حسيت بيك ديالي ومنين تزوجنا راك سنيتي انك ديالي شرفي من شرفك رجوولتي فيييك منبغيهاش تهز ولا تزعزع ولو قد هاكا.. خدمي خرجي ديري للي بغيتي عندك الحرية الكاملة من عندي ثقتي فيك كتر من الثقة للي داير فراسي (متبعة معاه) ولكن هاد الثقة خاصك تقدريها كما انا مقدر الثقة للي عاطيااني ومحتارمك فوجودك ولا فغياابك
هند: انا متنحتارمكش أوليد
وليد: بدوك لميساجات.. لا
هند: (بقات كترمش عينها عارفااه صرييح) اشمن ميساجات
وليد: هييييند!! (شاف فيها ديك الشوفة ديال خلينا فالصراحة)
هند: كان تيجيوني عادي
وليد: وهادشي للي قلقني منك مخاصش يجيوك عادي خدمتي مع شي ݣروب كيكون كروب فواتس الهضرة كتكون للجميع تعطلتي مدير للي غيسول ماشي دكتور..
هند: فهمت...
وليد: نتمنى حيت المرة جاية مغنتفاهمش اهند (اول مرة يهدر معاها وهو كيهدد حنات راسها..) هند حبيبة انا كنبغي نكون معاك صريييح هادشي للي ضرني كنت غنݣولو سوا اليوم سوا غدا (حركت راسها باه.. مشا حنا على ركبتو هز راسها شافت فيه) حيت كنبغيييك اهند وكاين شي حوايج خاصين بية غير انا غيييييير انا (عنقااتتو وبقا كيطيب خااطرها حتى دخلو لفراش تكات على صدرووو مهضرووش حتى نعسو حيت عارف عندها عذر.....)
أمال: (جمعت الدنيا وقداتها ومشات باش تلحق زوهير كانو ناعسين عند مو.. دخلت لقاتو نعس مروان ومتكي حداه ساااهي... دخلت بدلت حوايجها كاملين ودخلت حدااه كتظحك) نهضرووو؟!
زهير: ههه منسياش!!
أمال: زووهير بحال رجعتي فكلامك
زهير: ابدااااا واش رجع.. غير نهضرو بالعقل شوية
أمال: اووو فيها العقل اذا بلا منحلم
زهير: سمعي مني اديك الطفلة وشوفي نتي واش حااابة... (ربعت رجليها وبقات كتشوف فيه جلس بجدية كيهضر) هاني فتحت ليك المحال باش غتبداي ؟!
أمال: مفهمتش
زهير: انا نشري ليك كولشي للي خاصك الماتريال تواب كووولشي للي خاصك... ولكن نتي مزال ممعرووفة يعني ضرووري خاصك تباني شوية
أمال: بحالاش؟!
زهير: تباني يعني خاصك تكوني معرووفة
أمال: زوووهييييير راه أي واحد كيبقى فالمحال ديالو عاد كيبدا شوية بشوية
زهير: غتقنطي نهار اللول بووحدك
أمال: معليش
زهير: أمولة حبيبة شنو نااقصك معايا انا ماباغييكش تخرجي وتصدعي رااسك مع بنادم ولكوموندااات ورويينة بغيتك تكوني اميييرة فدااارك
أمال: انا باغيا نخدم
زهير: هانتي قرااي ديري ديبلومات تعلمي اللغات ولكن مبغيتش نخرجوو انا ووياك من صباح ورجعو فالليل ݣد ݣد
أمال: حيت انا مرا؟!!
زهير: واه حيت نتي مرتي حبيبتي منفرطش فيك دخلي لتماارة هانتي خيطي هنا واش بغيتي ولكن بغيت نجي لݣاك فدار كتسنايني انا نخدم ونجيبلك فلوس وللي بغيتي حتى لعندك
أمال: والخدمة!!
زهير: بغيتي فلوس؟! واش عمرني حرمتك من شي حاجة كولشي دياالك
أمال: ماشي بحال انا نخدم
زهير: راكي كتخدمي مݣابلة مّا وماكلتي ومنقية حالتي وكتربي ولدي متحݣريش رووحك انا نشووفك اميييييرة
أمال: (بقا فيها الحال) وانا كنت باغية نخدم
زهير: نديرلك شهرية ديالك.. (باغي يقنعها بكل الطرق) مراني نبزز عليك والو احياااتي كولشي ديالك
أمال: (بقات غير كتشووف شد يدها)
زهير: فكري فهضرتي وانا معاك فأي حاجة وانا باغي راااحتك فوݣ كولشي متنسايش انا خدام عليكم نتوما ما ونتي وولدي...
أمال: (مقالت والو بقات غير كتشوف) كنت كنحلم نخدم
زهير: خدمي... غتخدمي أمال انا غير ݣلت وصاافي
أمال: علاش نتا منيرڤي ياك نتا كان عاجبك نخدم
زهير: حتى دابا احبيبي غتخدمي جربي الا رتاحيتي انا معاك فاشما بغيتي.. (جارها عنقها) صافي ديري بحال مݣلت والو
أمال: نتا مباغيش نخدم وانا منݣدش ندير حاجة نتا مباغيهاش
زهير: نخلصك والله حتى نخلصك للي طلبتيه يجي عندك هانتي شوفي غير فاش كتقراي والامتحانات يهبلووك وكتبقاي منيرڤيا
أمال: (دارت ملامح الحزن وحنات راسها هزو) صافي
زهير: لا مصافيش انا غنديرلك للي بغيتي... (باسها فيديها بجوج) انا وااعدتك وغنوفي بأي حاجة واعدتك بيها
أمال: (سكتت معرفت متقول.. جارها عندو معنقها.. تكاو بجوج كل واحد وشنو فكر حتى نعس زهير وهي بقات غير كتفكر وتخمم.. حتى اذن الفجر عاد عطات بظهرها ونعست.. )
~~~~~~~~~~~
أصبحنا وأصبح الملك لله...
زهير: (فاق بكري شاف فامال وهو كيلبس حوايجوو خرج كانت مو موجودة لفطور حيت هي من النوع للي مع كينوض من لفجر كتبقى فايقة.. فطر معاها فسكوووت) صافي فالليل تروحي
الحاجة: الا كتاب اوليدي
زهير: نشالله المرة الجاية نروحو جميييع
الحاجة : نشالله اوليدي الا طول ربي فالعمر (بقا كياكل) تهلى اوليدي فمرتك وتهلى فمرتك وتهلى فمرتك
زهير: (هز عينو شاف فيها أكبر فوبيا عندو هي فقدان مو غووبش) تجي نتي وتهلاي فيها
الحاجة: ههه وتهلى حتى نتا اوليدي راه نتا فهاد العين وهي راهي فهاد العين
زهير: (حط شدݣ الخبز للي كان هاز وشاف فيها) مّا نشالله تمشي ديري الواجب ديالك ورتروحي لعندنا نشالله صافي
الحاجة: (تبسمت) صافي...
زهير: انا نمشي نشوف شي حاجة فالمحال ورجع
الحاجة؛ سير اوليدي الله يعرضك الخيير... (مشا وجا مروان كيتمشى بخطوات بطيئة وكيظحك لابس حويجات نقيين ماشط شعرو وبلهاايتو) ويا وليدي وياوليدي كيف ندير نمشي ونخليييييك
أمال: الله يجيبك امّا على خير (باست راسها وجلست متنهدة) كصبحتي
الحاجة: الحمد لله ابنتي بت نتݣلب نخمم ونفكر لديك الطيارة
أمال: ههه راكي مولفة
الحاجة: ههه شوي... واش نجيب لحبيبة ديالي
أمال: مّا بغيتك غير دعي معايا يديرلي ربي للي فيها الخير
الحاجة: يا بنتي بغيتك فينما تحطي رجليك تربحي وربي مينساااش عبدو ابنيتي.. (كبت ليها كاس اتاي) واش للي منيرڤي بنتي؟!
أمال: واالو
الحاجة: واالو!! انا ݣلت غير واحد التشطيبة راها تباان تحت داك لبلاكار (طلعت معاها بقرسة حتى غوتت) هاد القاعدة مابغاش تحايد منك
أمال: ماشي يانا راه هند (كتحط فبلاصة القرسة) والله حتى نݣولها لزهير
الحاجة: غير تكملي فطورك غتنوضي تجمعييهاا.. وتوݣضي راني مخلية ليك الدار وراجلك وولدك فمسؤووليتك توݣضي راكي مرا ونص ونعول عليها... (غمزتها) باش نجيب لبنتي داكشي للي بغات...
أشرف: (كان كيفطر مع شيماء كيهضرو على التحاليل للي خاص دير ودار معاها غدا يديها لابوراطوار)
شيماء: علاش منمشيش بوحدي نجر مريم ونمشي
أشرف: تخرجي وحدك؟!
شيماء: وشنو فيها؟!!
أشرف: من نهار تزوجنا خليتك شي نهار تخرجي وحدك؟!
شيماء: داكشي باش ݣلت ليك نخرج نتا خدام ميمكنش كل مرة تخلي خدمتك وتجي تخرجني كاين شي مرات نحتاج نخرج ونتا ممساليش
أشرف: حتى يجي داك نهار اما دابا انا باغي نخرج معاك
شيماء: مكتيقش فية أشرف
أشرف: حسبيها كيف بغيتي.. للي مهم عندي انا نهار تبغي تخرجي انت نخرجك ااه ولقرايا ممنوعة
شيماء: انا مݣلتش باغية نقرا
أشرف: ݣلتيها لبارح لمك سمعتك اشيماء.. عارف زواجنا كيف كان فاللول درتي جهدك ودرت جهدي باش نجحو دشي ولكن باش تخليني ندير شي حوايج مباغيهمش لا
شيماء: باسم الله عليك انا ماااا بغيت والو لا قرايا لا والو
أشرف: غير باش تنحيها من بالك
شيماء: انا مباغياااش واش مكتفهمش
أشرف: مترفعييش صووتك
شيماء: نتا كتعصب نتا عارفني كنتأزم من هاد لقرايا ونتا كتزيد تعاودها.. انا للي طلبت منك هو نخرج نقضي شغلي مرة مرة
أشرف: لا
شيماء: نبقى محبوسة؟!!
أشرف: ممحسوباش.. كل ويكاند نخرجك نتي ومريم وحتى فالايام العادية نخرجو شي مرات وناكلو برا ونحوسو.. فين هاد الحبس للي راكي تهضري عليه ياك حتى السلعة دابا ولينا نخرجو كاملين نتقداوها
شيماء: ولكن مرة مرة كنبغي نخرج انا ومريم نديها جريدة ولا شي محال دلماعن ولا نخرج مع لبنات
أشرف: شكون دلبنات
شيماء: أمال وهند
أشرف: لا الخروج معايا وصافي.. دابا غروح للخدمة.. (باس بنتو هز سوارتو ومشا...)
وليد: (خرج مع زهير كيقضيو شي شغل تابع للمحال ديالو.. دازو لقهوة جلسو عاودلو زهير على موضوع امال) امممم فهمت
زهير: وهي واش راه تفهم؟!! ولفتها بزااف ووولفت داك الاهتمام وعاد مهلية فمّا.. مهلية فيها كتر مني ومن بناتها.. مهلية فية داكشي للي كنت باغي لݣيتو فييها
وليد: أمال حنينة
زهير: على هاد الهضرة ماباغيهاش تخرج للسوق وتحاك مع الناس.. هي بحال شي ملاك والله شي خطرات نحس بيها كيف بنتي خاصني نتهلى فيها ونخنتها ونجيب ليها واش حب خاااطرها
وليد: وهي سمو ݣالت
زهير: عارفها باغية تخدم وماشي على ود لفلوس باغية تخدم حيت كانت كتݣول عمرها تخدم الا بقات تحت جناح فاميلتها ومنين واعدتها يانا تااقت فية وهادشي للي ذابحني.. مݣلتش غنولفها ݣد هاك... مݣلتش غنغير عليها ومنعييش فراحتي الا عرفتها خرجت للسوق وخدمت
وليد: ولكن أمال راه ثقة
زهير: نتيق فيها كتر منتيق فعيني للي راني نشوف بيهم
وليد: صراحة منبغيهاش تقهر أكترية على سمو عااشت
زهير: واش ندير مع نفسي؟!!!
وليد: الواحد مرة مرة كيكون أناني
زهير: نديرلها لبريمي؟!
وليد؛ ههه عاود منين تشد لبيرمي تجي تغني علية وتݣولي الا صاݣت غتحاك مع الناس وتمشي سطاسيون وتلݣى رجال تم
زهير: لا لا ماشي لديك الدرجة اصلا خاصها مروان يكبر وهي غتبقى تخرج تديه يقرا ولا تشريلو للي خاصو..
وليد: خليها هي تجاوبك ولا دير حاجة مليحة نشهرووها فالانترنت وتخدم من الدار
زهير: هادي حاجة مليحة واخا منبغيهاش تشغل علينا
وليد: أقل الاضرار ولا لا
زهير: (حرك راسو باه...) نوض رجع نتا للمحال انا خاص نمشي للدار نبقى مع مّا على منوصووهم للمطار فالليل
وليد: نشالله يديها وبجيبها على خير
زهير: اميييين... (مشا شرا شكلاط النوع المفضل ديال أمال ومشا للدار.... مع دخل قلب على أمال لقاها دخلت دوش.. جلس حدا مو وكانو حتى خواتاتو جالسين حداها بقات كتوصييهم على بعضيااتهم وعلى امال..)
يا صافي ياما حدك شي 20 يوم وترجعي بلا متخليني ندير بناقص ومنصيفطكش...
مع 8 دالليل تجمع كولشي سلم عليها وتسامحات معاهم للي بقى فالدار واللي مشا معاها للمطار كانت لابسة لباس أبيض هي ولكبير وجهها البشووش كيخليو الناس يبغيوها بلا حتى ميعرفوها.. اما للي عرفها كيحبها وكتولي عزييزة عندو.. زهير غير واقف حداها وكيشوف كانت أمال نافخة عليه مكتهضرووش ولكن بقى فيها مشات حداه هزت عينها فيه واالو ساااهي نغزاتو حدا كرشو وشاف فيها
أمال: مالك؟!
زهير: (حرك راسو بمكاين والو.. وشاف فمو للي غير كظحك مع خوتاتو شاف فالساعة بقات شي 10 دقايق شد أمال من يدها وجارها معاه مشاو حداها عنقها وهي فوسط كلامها) تهلاي فراسك امّا للي خصاتك عيطي
الحاجة: ربي يتهلى اوليدي تهلا فمرتك وولدك وخوتاتك
زهير: متبعديش على خويا بقاي حدااه
الحاجة: واش راك توصي فبزة؟!
زهير: وااياااه نتي لبزة ديالي سمعي مني الله يرضي عليك
لكبير: ههه ياله امّا روااحي
زهير: تهلى فمّا اخويا ديرها فعينيك
لكبير: واش هي مك وحدك ولا؟!!!
زهير: واه (كولشي عارفو تزير ضوعارفين مو شنو كتعني ليه كولها كفاش كيبغي واليديه بطريقتو وكانت هادي هي طريقة زهير... أمال عنقات الحاجة جاتها لبكية ولكن خايفين من داك المݣنوي للي من الدار كيوصي دمعة مطييحش.. بقات غير ساااكتة والحاجة كتوصي فيها مشااو بقاو كيشيرو ليها باي باي.. حتى غبرت بقاو كيخرجوو من تماك.. زهير مشا لطموبيلتو موراه أمال وهند جايين وشي لاخر لقا أنوار تماك كيبكي بلا صوت غير دموعو للي هوادين)
واش بيك؟!!
انوار: (مسح دموعو بالخف) والو والو
زهير؛ (عاق بيه اصلا منين مدخلش معاهم لداخل.. بقا فيه هاد اللحظة حيت هو غير كيتخيلها كيبغي يموت وكيدخل فحالة حزن اعسااك لاخر للي مجربها وماتت مو) ربي يرحمها
انوار: (بحزن كبير) امييين (سالو دموعو بتنهيدة) امييييييييين
زهير: (أمال وقفت حداه هازة ولدها شدو من عندها) رحنا؟!!
أمال: واه (شافت فأنوار للي كيمسح دموعو ووجهو حمر كان جالس اللور هز عينو فيها لقاها كتشوف فيه وهي تهرب عينها)
زهير: رواح أنوار تركب الݣدام (خرج ضربو شوية الهواا وتبادل مع أمال للي جلست االلور هي ويوسف وجات هند عندهم وهو بقا شحال برا عاد طلع جلس حداهم.. مشاو للدار نيشان فجو سكاات وصلو كانت الدار عامرة طلعو لبنات وبقاو هوما لتحت)
أمال: (دخلات للدار لقاتها عامرة مشات لبيتها تبدل حوايجها.. وهي توقف عليها عيشة وسدت لباب) مالكي؟!
عيشة: ݣادي لعشا
أمال: عفاك اخالتي والله مݣادة (فيها لبكية)
عيشة: (خسرت كمارتها) وعلاه مݣادة محنية ولا عاد والدة؟!
أمال: (مكيناش حتى الحاجة للي تدافع عليها) حتى وحدة
عيشة: سيري تݣادي لعشا ونتي دايرة رووحك صغَيرة ݣدك راه كنت عندي 2 ولادي وهازة دار على ݣدها ونتي غير الا طيبتي لغدا تشدي لفراش
أمال: خالتي راه ݣلهالك زهير ميات مرة بعدي مني وديري راسك مكتعرفينيش
عيشة: كفاش نبعد منك راه نتي للي خلاتك ما هنا منين نجيو لݣاو ماكلتنا وشرابنا واجدين ولا باغية تݣطعي علينا المجية لدار منا
امال؛ هادي داركم ديرو ما بيغيتو فيها ياك نتي حادݣة ݣاع متسناي وحدة فنيانة بحالي تخدم عليك والا عييتي نوضي بنتك
عيشة: بنتي مزال عرووسة تݣارني راسك معاها؟!!!
أمال: اه نقارن علاش بنتك باش حسن مني
عيشة: براكة غير واليديها دايرين ليها العز ماشي مذلوولة كييفك
أمال: (بقات كتشوف فيها) الا غير واليدين بحالك اللهم نبقى يتييمة
عيشة: تفووو معرفت ربي منين سلطك علينا زهير عيا يدور ويشوف فالزين وفالتالي طاح على جرانة كيفك
امال: (تبسمت خلات لوخرا معصبة ومخرجة عينها) معرفتش باش فقسااك لا نتي ݣدي لا انا ݣدك
عيشة: فاقساني هااهااااااو على فقساني والله الا تحل ليك الفم
أمال: وعلاش ميتحلش عييت وانا حانية عيني عليك ومحتارماك ولكن نتي بزاااف (باستفزاز) شنو للي ضارك من جيهتي
عيشة: الله يعطيك موصييبة كما مكتوقرينيش
أمال: كنوقر غير الناس للي بعقلهم وحدة هبيلة بحاالك من دابا لفووݣ كلمة بكلمة والشااايطة (هزت حاجبها مكملاتهاش.. (التكملة هي الشايطة عند الق***))
عيشة: (بغات تضربها وهي طلع أمال فوق النموسية) والله ي..
أمال: (كتغوت) زوووووهييييير وعتقنييييييي زووووهيييير (خرجت عيشة كتجري من تماك وبقات أمال غير كتشوف فهاد المصيبة عاود...)
زهير: (بقا مع أنوار للي كان مقصح وتفكر موت الام ديالو.. تحط لعشاا عيطولهم تعشاو وكلها شد داروو عيشة خافت من أمال تعاود لزهير ويحشمها هبطت لدار بنتها تنعس...
دخل لبيت مو وتكا تمااك كيشوف فسقف بملامح جامدة وكيدعي للي خلقو ترجع الام ديالو ساالمة وهادشي كانت نقطة ضعف زهير طلع أنوار هارب من عمتو للي غير تعاير فامال وجلس حداه... بقا شي ساعة ونص تمااك كل واحد كيفكر فمو غير واحد داير ليها من الدنيا عشرة ولاخر كيحس بتانيب الضمير انه كان اناني مع مو وفضل الحلم الاوروبي ولݣور والمراهقة وخلاها من موراه.. حتى دخلت أمال عليهم للي شحال قلبت على زهير.. لقاتهم تمااك.. دخلت وكتشوف فيه)
روحي تنعسي اموول
أمال: شحال وانا كنقلب عليك!!
انوار: (بقا كيشوف فيها وكيشوف كفاش بانت مخلوعة على راجلها)
زهير: رواحي..
انوار: انا نهود
زهير: توݣض ابن عمي... وطلب الرحمة ليها
انوار: (زفر) الله يرحمها...
أمال: حم الله يرحمها
انوار: اميين.. تصبحو على خير (تم خارج ياله كيسد لباب بشوية لقا أمال مشات تكات حدا زوهير على صدرو وهو عنقها.. غمض عينو وتم نازل كيحس بوحدة قاااتلة دخل للدار كان مأزم بزااف دخل لقا أمال مزال كتفرج فالتلفازة هي ومها..)
انوار: انا ندخل نعس...
امال2: تصبح على خير.. (قرستها مها باش تنوض من موراه وناضت تبعاتو لبيت فين تكا على نموسيتوو كيشوف فسقف غمض عينيه تفكر منظر زهير وأمال.. تمنى لوكان عندو شي حد يقلب عليه يبغييه ويسول فيه.. حل عينو فامال2 لقاها حدا لمرايا لابسة غوب دونوي وكتعكر طلعها وهبطها هو فييين وهي فيييين.. دار وسادة صغيرة على وجهو حتى حسها جلست حداه..) حم أنوار
انوار: طفي الضو أمال
أمال2: (تصدمت) الضو!!! ولكن.. واش غتنعس؟!!!
أنوار: واه.. (بقا فيها الحال وهو كتر حيت لعشية كاملة كان ماشي هو هداك مكلفتش راسها حتى تمشي معاه للمطار بقات مع بنات خالتها وعاد فاش رجع مقلبتش عليه كما كدير أمال.. ) طفي الضو.. (ناضت طفات الضو وتكاات حداه كتبكي....)
زهير: (بقا معنق أمال مباغيش يهضر غير كيشوف حتى كيسمع الجخرة ديالها.. طل عليها نعست ناض بشوية حيدها من ذراعو نعسها فوق لوسادة شاف الساعة كانت 3 دصباح.. طفا عليها الضو وخرج برا مراقب تيليفونو خرج برا مع بغا يحل باب برا سمع غوات فدار أنوار.. خرج ومشا جلس فديك النافورة للي اونفاص مع الدار جبد ݣارو كماه حس براسو بدا كينقص منو كان كيكمي باكية فنهار حتى لجوج دابا 4 فنهار الا كتر... صونا لكبير مكملش داك الݣارو لاحو وجاوب) اخويا وصلتو؟!!
لكبير: هاحنا فلوطيل اخويا راك مزال فايق
زهير: واه.. فينها مّا؟!
لكبير: ها هي حتى هي ݣادية فيها العافية (دوزو ليها) حرام واش شي بغل من دوك دراري واش فايق....
الحاجة: اوليدي لباس عليك؟!
زهير: الحمد لله... كيف وصلتي ياكما عييتي؟!
الحاجة: لا لا وليدي كولشي بيخير نحمدووه ونشكرووه
زهير: الحمد لله عنداك تجاهدي على راسك وديما ديري لمظل على الشمس
الحاجة: واخا وليدي
زهير؛ ياله سيري تنعسي غير تلݣاي الوقت صوني لية
الحاجة: واخا وليدي ها الدار امانة عندك اوليدي
زهير: الا متبعتيش كلامي نكركب مها ونبيعها ونخلي راسك مݣطوع
الحاجة: ههه ديريها كيفك كيف باك
زهير: الله يرحمووو روحي ترݣدي غدا غتبداي تغسلي عظاامك من ذنووب
الحاجة: ههه الله يهنيك اوليدي وسلم على أمال ويوسف
زهير: الله يهنيك امّا.. (قطع وعاد رتاح شاف أنوار زدح لباب وتم جاي جيهتو صااعر هز داك الكارو من الارض وبقا كيكميه) واش صااري؟!!
انوار: تفو على هاد زواج دالفاميييلا تزطمت وبربي الا تزطمت
زهير: واش طاااري؟!!!
انوار: كل دقيقة تبقى تندب وتبكي علية فيها غير تهرنين متعرف تهضر متعرف والو لبكى وشكى غير نعطي ظهر تبدا تبكي علية تݣول نظل نقتلها عصى ولا مخليها بالجوع
زهير: (كيشوفو عرووقو باغيين يخرجو جروو من تم حيت شاف ختو خرجت كتويل باش يسكتو... مشاو لجنان) بشوي عليك درك وهضر...
انوار: طلعتلي فصحتي حتى حاجة فيها ممݣادة
زهير: ونتا كولشي فيك زين؟!!
انوار: مݣلتش زيين غير هو زواج عندها هو تعرا وتزوق مكاين هضرة مكاين والو داخل عندها مخنووق وربي للي عالم بية وهي عقلها واالو سايط فيه الريييح...
زهير: راها مزال صغيرة
انوار: واش صغيرة للي تفكر فجواج صاافي مداامها تزوجت الا تفييق وتعرف واش هو زواج
زهير: نتوما غابنين رووحكم وجالسين هنا علاه متمشيوش تسافرو شوي على ميوصل عيد لكبير
انوار: واش نسافر معاها ولغى قليل بيناتنا القنطة تشدني وانا معاها كتر متشدني وانا وحدي
زهير: فهمها.. كولشي يجي بالعقل ماشي بتشنتير
انوار: نتا للي تهضر على تشنتير؟؟
زهير: واه حيت فااايتك راه ݣالوها للي فات بليلة فاتك بحييلة مرتي نحبها تمشي على مجاجي ولكن ماشي بلغوات وزعييق بالعقل نوريها واش نحب واش نكره
انوار: (قاطعو) مكنبغيهاش
زهير: (شاف فيه) واشتا!!!
انوار: (حرك راسو بإشارة الفشل) كانت حياتي فشكل مع (بتنهيدة) الله يرحمها.. كانت على الاقل تفهم واش نحب تمشي معايا وين حبيت بنت عمتي الا ݣلتلها نخرجو تݣولي الناس يجيو رواحي نديرو شي حاجة حشومة لا طفي الضو لا عييب كولشي عيب وحشومة ولا تݣلبها بكى
زهير: حتى حاجة ما فيها زينة؟!
انوار: مݣلتش هاك
زهير: بدا معاها من اللول بحال راك تربي فلولا الطفلة باينة تحبك غير نتا ساايس معاها
انوار: معرفت
زهير: خاصك تعرف زواج ماشي لعب أنوار نتا تزوجت ومكتابش يكمل داك زواج دابا راك بادئ صفحة جديدة وديك المقارنة للي كدير بين اللولة والتانية ماشي ملييحة لا ليك ولا لمرتك.. هادي اول حاجة تبدى بيها
انوار: صعيييب راه واخا مكانتش عاجباني العيشة اللولة وكانت اووبن بزااف محلوولة... ولكن كنت نلݣى راحتي فشي حاجة تسمع كلام زين ماشي لحفا فلحفا
زهير: اوا بدا نتا
انوار: بديت ووالو
زهير: عاود.. اسبحان الله اشريف مزال حتى مكملتو شهر وجالس تشكى دير حاجة مليحة هز مرتك وطلع لشي قنت
انوار: فين؟!
زهير: انا نݣولك وين؟! نتا راك عارف لبلايص الزينة
انوار: (بقا سااهي...) والله معرفت
زهير: هاكا الامور ماشية بغيت ترتاح وتعيش مليييح بني ليها
انوار: نشالله.. (بقاو كيهضرو حتى اذن لفجر مشا كل واحد لدارو أنوار دخل توضى لقى عيشة نعست صلا ودخل لقى أمال ناعسة نعس عاطي بظهر)
زهير: (مشا نوض أمال صلاو بجوج وهي دايخة بنعاس عاد رجعت نعست من بعد معاودلها راه الحاجة وصلت على خير.. كان باغي يهضر ولكن لعيا سخسخها) نعسي احبيبي حتى لغدا ونهضرو
أمال: كنبغيك.. (باستو فحنكو وخشات راسها فعنقوو وجبدت عليها وحتى هو نعس مرتاح حتى سمعت يوسف ناض هنا دار راسو كااو) زوهييير.. زوهيييير... عقل فيها حتى لصبااح والله منساها زووهير عفاااك خرا (حل عينو خنزر فيها) خزيييت زعما!! هادي للي فيقااتك (غمض عينو وهي قربت حداها مروان رضعاتو عطاتو لهاية ورجع نعس...)
أصبحنا وأصبح الملك لله..
محمد: (كان جالس فكرسي حدا المحال وولادو كيلعبو حداه حاضيهم) صفوان رواح اولدي هنا متمشيش لطريݣ.. (بقا مقابلهم حتى وقف عليه اب مروى) نبيييييل نبيييييييل
نبيل: (خرج من لمحال شاف فلاخر عرف غتشبك) سمو كاين اولد عمي
محمد: هزهم طلعهم لمهم لفوݣ (هزهم نبيل وهو كيشوف رجال اب مروى فالطموبيل خاف على ولد عمو طار بدوك لبز باش يرجع حداه...
بقا جالس..)
ياك لباس
اب مروى: خوك هاد نهار جبدني
محمد: وانا مالي؟!
اب مروى: غنخرج فيه الا ݣال شي حاجة ضدي
محمد: (زفر) ياك الحبس دايرو نتا هو دارك التانية لاه جاي انا تصدعلي مخي
اب مروى: هاني علمتك انا للي باعني كندفلو قبر حدا خوتو
محمد: (ببرود) لباس بعدا راك تدفنهم..
اب مروى: (شافو ممسوقش يعني معندو ميربح معاه..) سي دوماااج طحتي فعيلة بحال دي
محمد: (بقا مدور راسو ممسوقلووش حيت مخاصوش يسوق كاين ناس أهم من علي باش يخرج على حياتو عليه باطل...)
اب مروى: (مكان حتى رد دار نظاظرو ومشااا ركب فالطموبيل..) زيد وعلم اورطيݣاااا...
محمد: (بقا متبع طموبيلتو مشا ناض من الكرسي حتى كيلقى ولاد عمو اللور هازين هراواات.. تبسم) دايرين فيها عصابة ولا سمو؟!!!
ادم: مشا شماااتة سمو بغا منك؟!
محمد: معندو ميبغي هنا.. (صونا عليه المحامي) اخوياا... واش ڤري؟! دابا؟!!!!... واه واه درك نجي.. مااانحتاحو حتى شي وراااق... الله يرحم ليك الوالدين اخويا.. (دخل للمحال هز سوارت تبعو ادم) غنمشي نجيب مّا
ادم: على سلامة اخويا محمد انا نطلع نݣولها للواليدة.. (طلع ومحمد مشا للحبس...)
محمد: (دخل فرحااان عاجبو الحال.. كيتسنى الإجراءات يكملو باش تخرج... بقا شي نص ساعة عاد جابوها لابسة جلابتها للي جابوها بيها من صبيطار غير كانت كتجيها ففصالتها ودابا الجلابة جات لابسااها خارجة ضعيفة بحال ككانت ختو أمال... كتبان بحال بنتو ماشي مو مشا باسلها راسها ولكن هي لا ردة فعل ملامح جامدين.. عينيها ذابلين وجها كحل بحال عايشة تحت الشمس فمها بيض والتجاعيد معمرين وجهها بحال كبرت فالحبس 40 عام...)
ما كيرااكي؟!!!
(لا رد غير ساهية الا هزت عينها كتبان مصدوومة.... جارها محمد خرجوو غير ضربت فيها الشمس كمشت عينها دار يدو على راسها مزربها للطموبيل دخلها وسلم على المحامي وشكروو بزااف كان مخلص المستلزمات ديالو مشا المحامي لسيارتو ومحمد هز تيليفونو كيصوني على أمال حنا شاف فمو وتبسم وهي مكيناش فهاد العالم...)
الووو.. لباس عليك... كي راه يوسف مروان خربقتوونا معرفنا باش نعيطولو... هههه.. لباس الحمد لله اختي.. ها هي فالطموبيل دايها للدار... واه عاد دابا... صافي درك نهضر مع زهير الا لݣى شي وقيتة يجيبكم.. واخا ختي الله يهنيك...
(قطع صونا على زهير مجاوبوش كان خدام صونا على وليد جاوبو قالو شنو كاين عاد صونا عليه زوهير.. علمو بشنو كاين ودارو لعشية يجيو لتاوريرت...)
ركب ومشاو للدار عيا يهضرها ووالو لا رد ولا تعابير من جييهتها..
~~~~~~~
شيماء: (كان جو مشحون حست بيه كينافقها متقبلها وصافي الثقة مكاااينش.. جات وقيتة ديال لغدا دخل أشرف جاب لعبة لمريم عطهالها بقا كيلعب معاها عاد ناض دخل للكوزينة لقا شيماء كتقاد فصلاد)
أشرف: سلام عليكم
شيماء: (منفخة) عليكم السلام
أشرف: شربتي دواك؟!!
شيماء؛ منشربش ياك انا مكنهمكش للي نتا باغي غير نطيب ليك ونقاد ليك حوايجك
أشرف: ون***
شيماء: (بغضب شافت فيه.. كان موس حدااها هزاتو وقربت ليه) سير تبعدني حسن ليك
اشرف؛ خرجتيلها نيشان ابنت احمد!! (بغا يحايدو ليها بغات تجبدو وقاستو فيدو ومع ماضي جرحااتو حتى طوش دموو)
شيماء: ويلي ويلي ويلي....
أشرف: (مشا للحمام وتبعاتو كتويل وتبكي معرف واش يشعل معاها ولا يظحك على ردة فعلها ولا شنو يدير لهاد الوحم للي خرج فيه....) صافي سيري حطي لغدا
شيماء: بسبابك بسبابك نتا لاه جاي تحايدووو بسبااابك
أشرف: صافي غير روحي درك حطي لغدا راه تابعني للخدمة
(شدت يدو دارت بيطادين لوات عليه فاصمة.. غضبت منو ومشات للكوزينة بقا فيها بزااف حطت لغدا مغوت مقالها والو بلعكس غير كيظحك ويلعب مع مريم ومرة مرة يحط يدو فكرش شيماء...)
عيشة: (فاقت بكري طلعت للدار لفوق تقاد لفطور لقلت ليلى تماك كتوجد) فين لعروسة
ليلى: الا بنتك راكي خليتيها لتحت والا على أمال بعدي سووقها.. بعدي سوقها اعيشة وماشي كل مرة تمشي تسمميها بمها وباها حرااام وحشوومة عليك
عيشة: فضحتني بنت لحرام؟!!
ليلى: هي ماشي بنت لحرام راه كان عندها باها ومها... شتي وكان تعرفي قصة ديك لبنت تبكي عليها على معااشت الا الحاجة مخنتاااها حيت عرفات وشااافت شنو كانت عايشة
عيشة: انا مكنحملش فعاايلها
ليلى: وشكون نتي باش تحمليها ولا لا نتي بدارك وهي بداارها الا راجلها وعكوزتها عاجبهم الحال نتي لاه دايرة لعصى فروييضة
عيشة: اوا وشغل
ليلى: وعلاه شكون هاز مك ماشي هي اعيشة.. نعلي الشيطان وبلا متنوضييها خوك راه كيجي مع الحق وحتى مك راه كتشوف بعينيها قيلي عليك ديك ليتيمة وخليها ترتاح شوي..
(خرجت من لكوزينة كانت أمال كتشطب...)
أمال: ليلى راه خرجو ماما هاد صباح
ليلى: اوا على سلااااامتها خاص نمشيو نطلو عليها
أمال: واه راه زوهير بلاتي يدينا
ليلى: اوا مزية عليها مسكييينة.. لا حول ولا قوه الا بالله العلي العظيم باش نفعها داك الدحش دابا
أمال: اوا هادي ديرلها الراس
ليلى: على الله ابنتي... سيري كملي انا نمشي نطل على ليلا وجاد
أمال: (حركت رأسها باه وبقات كتكمل التشطااب توحشت الحاجة صونات عليها لقاتها طافية الكونيكسيون اذا راها فالحرم.. صونات على هند كانت مشات من صباح مع واليديها لسعيدية تبدل الجو شوية خبراتها على مها خرجت عيشة لقاتها مزال واقفة حدا التشطيبة مهضرتش أمال قطعت وبقات كتكمل تشطاب..)
امال2: (طلعت للدار عينيها منفوهين بلبكى غير شافتها مها جراتها ودخلو للبيت) مشا اماما ݣاع مهضر معايا ولا سوقلي
عيشة: معليش ابنتي حتى نتي نقصي من لبكى شوية من صغرك ونتي بكاية
أمال2: مدرتلو والو (كتشهق) والله مدرت وااالو
عيشة: هو يا لهبيلة ميبغيكش تبكي
امال2: واش ندير درك؟!
عيشة: درك فطري وسيري جمعي دارك راه توصل وقيت لغدا ويجي ونهضر معاه....
يتبع...
التعليقات
لا توجد تعليقات بعد، كن أول من يعلق.