محتوى القصة
زهير: (سد باب بيتو شاف فلكالوندري للي متبع معاها على وقت الإباضة للي كياخدو احتيطاتهم باش ميكونش حمل مرة الواقي مرة القذف الخارجي.. شد لبريزيرفاتيف هز إبرة وبقى كيتقب فيه من برا لغشا... وحطو فبواطة حدا لكوافوز ديالو..)
**هانا نوري لجدك نعطيك 5 سنين باش عاد تفكري تحملي.. **
(خرج برا لقاها عاد داخلة بطموبيلتها كدندن وتحرك رويييسها شافت زهير فرنست كانت ياله جايبة يوسف وغيثة من لاكخيش.. بقا وااقف ناافخ صدرووو حتى وقفت معندهاش فقاموسها شي حاجة سميتها تباركي مزيان ضروري تحطها عوجة وبعيدة على طروطوار هبطت قرب حداها كيقشع لعكر للي باين )
واش داكشي؟!!!
أمال: شنو؟!!!!
زهير: نحي علية ديك تبهدييلة!!!! واش لمك بعقلك دايرة هاد ل.. (خمس يدو على وجهها حتى رجعو اللور)
أمال: آااااااااااااي زووهير شنو درت؟!!!!
زهير: أمال ها ودني الاخر مرة لݣااااك دايرة دزبل فكمااارتك
أمال: (خربق ليها وجهها مشات هزت بنت هند وهو هز ولدو كينݣر مابغاش يسكت طلعو للدار حطت غيثة ودخلت الحمام تمسح داك لعكر للي تجخلط ليها فكمارتها وحمدت الله مكان حتى وااحد.. خرجت ملقاتوش) مّا مشا زوهير؟!
الحاجة: مشا ابنتي
أمال: ݣلتيلو على تاوريرت؟!!!
الحاجة: واه ابنتي ݣالك هو يدينا
أمال: الا مصلاحلوش هو نمشيو انا وياك حتى يلحݣ
الحاجة: رواحي ابنتي جلسي حدايا (جلست حداها شدت رجليها بقات كتماصي ليها من بعد محيدت تقاشر ودهنت ليها كريم) الله يرضي عليك ابنتي
أمال: امييين امّا.. (ناضت وجدت لعشا حتى طلعت امال2 كتجري) اماالكي؟!!
أمال2: أنوار انوااار جاي (مفرنسة حتى لودنيها) حمدتك يا ربي وشكرتك
أمال: (بقات واقفة مكرهة كانت عايشة بيخييير وها هو غيرجع.. تبسمت) على سلامتك
امال2: الله يسلمك هههه غدا ره يجي معرفت واش ندير
أمال: جمعي الدار مزيان وتݣادي وووصافي
امال2: لا خاص ندير شي حاجة كتر
أمال: هزي بندير وسيري لمطار بقاي تشطحي بيه حتى يوصل للدار...
هند: (ودعت لكليانة بابتسامة ماشي مدة كبيرة باش حلت المحال ولكن كسبت كليان وواحد كيقولها لوااحد لدرجة ولات مطلوبة حتى تمشي لديور بقات كطابي شي حاجة فلبيسي ديالها على كيدخل لكليان التالي باش تسد لكلينيك هاد السيمانة حيت غتمشي تحضر لسبوع ديال بنت شيماء.. دخلت وجلست هبطت هند لبسي وهي تبان ليها احلام... وكفاش غتنسااها)
بونصواااغ
احلام: بونصواااغ هند لباس عليك
هند: الحمد لله.. ونتي؟؟!!
احلام: الحمد لله الله يكبر بيك (دورت عينها) مبروووك المحال
هند: ميغسييي... (شافت فيها ديك الشوفة ديال شنو جابك )
احلام: عندك شي مشكل نتي ودكتور فيصل؟!!
هند: (5 الثواني عاد جاوبت) علاش؟!!
احلام: كنت فالمحكمة اليوم منين جا كياااخك استشارة قانونية باش يرفع عليك دعوة
هند: دعوة ديالاش موصلني واالو
احلام: مكملتيش الكونطرا ديال خدمتك فلاكلينيك ديالو
هند: هو غير دكتور تماك
احلام: سي عندو الملك حتى هو تماك
هند: موصلني والو
احلام: الا وصل حتى الاثنين الا كان بالصح دار شي إجراء قانوني هو جا كيسول على محامية صاحبتي وكنت فلبيرو ديالها منين هضر
هند: ولد الق***
احلام: (خرجت عينها) وكان هضرتو وديا حسن من شي محاكم أكترية نتي عاد بادية فالمسيرة ديالك
هند: معندي منهضر معاه للي بغا يديرو يديرو ميمكنش انا نبقى فشي بلاصة بالسيف علية
احلام: وليد عارف هادشي؟!!
هند: كنا ماشيين انا وياك مزيان لاش تدخلي راجلي فالموضوع
احلام: انا غير سولتك
هند: متسوليش الموضوع تيعنيني انا وشكرا اختي حيت جيتي قلتيلي دابا نشوف شنو ندير
احلام: انا غير بغيت نعاونك
هند: ميغسي.. الا بغيت شي حاجة انا غنجي حتى لعندك.. (وقفت بمعنى كملنا وحطت الطابلية ديالها)
احلام: بووون.. اما نمشي وانا فرهن الإشارة الا حتاجيتي شي حاجة قانونية
هند: ميغسي احلام... (تبسمت معاها وهي كتلبس مونطو ديالها خرجت لوخرا وكشرت) ولد لحراااام بغا يحرم علية شغلي.. (قدت فولارها تالفة واش تقولها لوليد للي عندو حساسية اتجاه فيصل ولا شنو دير الا وصلت للمحكمة اكيد غتقولهالو... خرجت من تماك مكرهة.. نيشان مشات عند وليد باش غيخرجو يتقداو شي حاجة لسبووع... )
زهير: غير تقطع معندك مناش تخافي...
أمال: (ناعسة فحضنوو) منخافش غير سولتك وصافي
زهير: نتي مبغيتيش تعاودي تحملي
أمال: لااااااااا... نتا للي وليت غير معصب علية
زهير: ماشي معصب وليت خايف عليك راه منين نرووح للمحال وانا عقلي معاك منين جابلك خوك اللوطو ونتي متحطيهاش
أمال: غي حيت فرحانة بيها
زهير: فرحي وااااه... ولكن ماشي كل شوي تهزيها وتزيدي لخرووج بلقيااس
أمال: اممم (كتلعب بصبعها فكرشو لعرياانة للي مجموع شوية ديال زغب فسرتوو) واخا منبقاش نخرج غير الا خاص شي حاجة ضروووووري
زهير: غير لبارح ݣلتي دلهضرة
أمال: ههه والله والله... زووووهير
زهير: واش تاني؟!!!
أمال: كنت حطيت داك نهار الخدمة ديالي فواحد السيت واحد الخليجية عجبووها داكشي للي كندير وبغاتني نخيط ليها شي حاجة ونصيفطها (هزت تيليفونها ووراتو لكونفيرساسيون) ها هي
زهير: (كيقرا داكشي واهم حاجة الدفع قبل التسليم) مزيااانة
أمال: بالصح تخليني نخيط
زهير: بحال هاكا منمنعكش شوفي واش خاصك فصوالحك غدا يكون عندك.. لبيت لتحت خاااوي وحتى وتبغي مووضع كبير نبني ليك فجنان شي بيت كبير
أمال: (بفرحة) حلف!!!!
زهير: واش راحنا نكذبو اهم حاجة عندي تكوني فدارك قريبة لمّا ولولدك وتحت جناحي
أمال: ههه ديما تنكون تحت جناحك
زهير: وعلى هادي رواحي نݣولك حاجة مليييحة حسن من دصواالح كاملين (هربت من تحتو زبطة ووقفت) رواااحي ياااا جدك
أمال: نجيبلك القران حلف حتى غتبنيلي لبيت وتخليني نخدم
زهير: يالا محياانك واشاا نحلف وانا مجوونب يا ملتك واش باغا نوض لوالدييك
أمال: (مشات كتقرب حتى شدها ناترها لجيهتو) زوووهي..نةنلنننلعلةمطشبصرنمظع .....
أمال2: (فاقت من لفجر وهي طيب وقدات الدار للي خملاتها وكانت مشات للحمام ودازت قدات راااسها مزيااان... جات مها من مور لغدا لقات غير بنتها كتخبط فلكوزينة) ماما
عيشة: فينها مرت خالك؟!!!
أمال2: خرجت.. سمعتها كتݣول لمّا مشات تجيب شي حاجة من لفيلاج
عيشة: بوحدها؟!
أمال2: واه عرفتي إماما ولات كتصووݣ مزياان
عيشة: وعاد تݣولي راني شايفها كيف صايݣة خويا للي كان سبع وݣدامها يولي ضبع صايݣة مّا وحتى نتي راكي فطريݣ
أمال2: حشومة عليك اماما والله مرت خالي حتى ضريفة.. بسبابها تصالحنا انا وانوار ورجع كل نهار يهضر معايا
عيشة: اممم بسباب بسالتها ݣولي..
امال2: تا... وشوفي كيف راه هادشي بعدا راه من مور العصر يكون هنا... (ݣفضت عيشة وبقات كتعاون بنتها وقدات حتى لعشا وبنتها مشات تلبس حوايج تلفت مكرهتش تلبس قفطان ولكن ولات كتعرفو معندوش مع لبلدي فكرت شحااال ولبست كسوة ولبست شالها وقدات المكياج مزيان ريحت راسها وطلعت تسناه حيت جات حتى عمتها وبناااتها وكولشي تجمع... وصلت طموبيلة ديال لكبير هو للي مشا يجييبهم مع وقف هبطت امال2 تسلم عليه وهدا كانو من توصيااتو فوقما شافتو تجي تسلم عليه متحشمش...) على سلامتك
أنوار: (جاتو زويينة وحتى الصحة صحااحت وروايح) الله يسلمك (طارت من حداه عنقات لولا وهو سلم على عمتوو للي عزيزة عندو ومن ديما دايرة ليه قيمة كبيرة... حتى كيشوف طموبيلة حمرة داخلة وقشع أمال فيها تضهشر حيت عمرو شافها ولا تخيل شي نهار أمال غتكون كتصوݣ.. تبسم منين شافها باركاتها عوجة وقريبو تزدح طموبيلة ديال لكبير)
لكبير: عاود ابنتي عاااود
أمال: هههه (هبطت وشافت مضرباتوش) مقستكش هاد المرة اعمي لكبير
لكبير: ههه (طبطب على كتفها وهضر مع انوار) ها سباب الضربة للي عندي
أنوار: (تبسم مد يدو) مبروووك امرت عمي
أمال: (كمشت يدها) حم (جمع أنوار يدوو بالزربة) على سلامتك اخويا
أنوار: ديزوولي كنسى
لكبير: واش بيك اولدي غير ترووح لهيه تنسى
أنوار: ههه لا غير حيت أمال تجيني صغيرة على كلمة مرت عمي
لكبير: ݣولها ختي
عيشة: اوا فين العروسة
أمال: غير شي غراض ديالي على سلامتك.. (مشات الكوفر هزت الساشيات ومتوجهة لدارهاا.. وهو طلع وتبعووه.. ممسوقة دابا لا لأنوار لا لغيرو براكة غير هاد الفرحة حيت غتبدى الخدمة 10 جلالب و10 تكاشط للي غتخدم عاد وجاها النص ديال فلوس اي التسبيق من عند اول كليانة خلاها فرحانة.. زهسر للي تقدا ليها ثواب لعقيق الخيط ݣاع للي تحتاج وفلوس بقاو ديالها.. حطت داكشي فلبيت للي فيه المكينة.. دخلت لواتس لقات لكليانة صيفطات ليها المقاسات.. وبغاتهم من دابا 40 يوم.. يعني كافيااها.....)....
زهير: (دخل للدار شاف طموبيلة ديال أمال محطوطة عوجة شادة جوج بلايص..) هاد لبنت شي نهار طير لجدي هاد لعقل للي بقى...
(سد عليها طريق وهبط كان الضو فدارو مشعول عرفها غتكون تماك باينة الدار عامرة اصلا اليوم السبت كولشي كيكون مجموع مشا طلع عند مو سلم عليها لقاها مقابلة يوسف سلم على أنوار)
هانتا عاد !!!
أنوار: كنت ݣاديت شي صواالح دلولا
زهير: ياك الامور هانية!!
أنوار: الحمد لله.. (زهير هز ولدو للي جا عندو كيتعنكش فيه) غير نتا يا خويا
زهير: (باسو) راه ولدي.. فين ماماك البطل (كيهضر معاه بلغة الاطفال) نمشيو عندها اولدي؟!! (مشاو عندها لقااها غااارقة كتفصل دوك ثوااب) زين..
أمال: (حطت داك المقص ومشات باستو) والله مرديت لبال واش وصلت 8؟!
زهير: راها 9 درك ابنت مّا
أمال: أحااااي!!!
زهير: باركة عليك احبيبة ياله نروحو للدار.. (حطت داكشي سدت لباب بالساروت) خايفة نسرقووك
أمال: ههه لا غير هاكا جاتني وصاافي.. (لبست بينوارها ومشاو للدار بغات تعاون ساعة مكاين فاش حطت معاهم لعشا تعشااو تجمع وغسلت هي لمااعن ناااشطة واهتمامها كولو غير للخياطة وكفاش غيطلع داكشي.. واش لكليانة غتعجبها هاد الخدمة للي غتكون الانطلاقة ديالها... وتثبت لزهير انها تستاهل مشرووع وتحقق ذااتها...)
~~~~~~~~~~~~
أنوار: (عجبو الحال هاد المرة مع أمال2 للي دارت شنو كيبغي بلا حتى ميطلب ولا هي تحشم.. يعني فهمت الدرس والاولوية عندو فزواج هو نعاس الرومانسية عاد شي لاخر يجي من بعد.. بقاو جالسين مجمعين اول مرة من مور زواجهم كينعس معاها ومكيعطيهاش بظهر بقا حاضنها وكتاكل الشكلاط للي جابلها)
دابا عرفتك تحبييني
أمال2: ونتا؟!
أنوار: حتى انا احبيبة
أمال2: (غطيير بالفرحة) حاسة براسي فرحانة
أنوار: (باسها فراسها) مليييح.. وليتي تفهمي واش خاص
أمال2: عرفتي شكون شجعني بزااف ومتقلقش انا اصلا منݣدش نخبع عليك واالو
أنوار: واشتا!!
أمال2: أمال مرت خالي هي للي وراتني شحال من حاجة وبيناتلي راك تبغيني غير انا للي مكنتش فاهماك مليح
أنوار: (جمع الابتسامة وقلب وجهو) اممم
امال2: متنيرڤيتيش مني؟!!
أنوار: لا.. لا عادي اصلا نتي خاصك صحابات هنا ومرت زوهير فعمرك
أمال2: لا هي كبيرة علية بشي 7 سنين
أنوار: كتبان ݣدك..
أمال2: واااه بالصح عرفتي شحال زيينة والله
أنوار: اممم ياله حبيبة نرݣد شوي عييت من طريݣ.... (لبس تريكووه وضار للجهة الأخرى حال عينيه مطرطقهم حتى دخلت يديداتها معنقااه.. غمض عينو مباغيش يفكر صافي راه خدا قرااااااار...)
أصبحنا وأصبح الملك لله...
هند: (كانت على اعصابها واخا فتاوريرت الظحك والنشاط وعاد الفرحة ديال زيادة بنت شيماء خلاها ممرتاحااش ماشي ذنبها هي اذا خاص تهضر وتشارك... وهي تنطق من بعد تفكير عمييق) وليد بغيت نقولك شي حاجة
وليد: انا حبيبة نمشي نبدل البوطات ونجي عندك
هند: اه.. اوكي (مشا هو وخوه وبقات وااقفة حتى شافت أشرف طالع مع درووج جايب شي ميكات تبسمت معاه وطلعت لسطح صونات على المساعدة ديالها للي بقات فلبيرو) مجاش شي عون قضائي ولا شي واحد من المخزن... اممم صافي دابا راها 2 الا بغيتي تمشي غير سيري.. اوكي حبيبتي ميغسي حيت زدتي هاد نهار.. بسلامة.. اه الا كانت شي حاجة غنقولهالك.. (قطعت) ياكما هاديك ختنا تتفلى علية ولكن علاش هي اصلا متتعرفنبش باش تعرف فيصل بفففف... (قلبت على نمرتو للي مبلوكياها حتى بغات تصوني ورجعت خطوة.. مديرش شي حاجة بلا خبار وليد براكة غير المشاكل للي كانو قبل على ودو...
هبطت للدار كان جابو دجاج ينقييوه هبطت نعيمة وشي عيالات من لافامي وحتى سناء هبطت تعاونهم هي حدها تقدر تغسل جوج دجاجات وكتبقى معاهم مدة وللي سمعت الدفعة للي جات دابا 60 ومزال الدفعات.. ريحتو كتغيلفها طلت فلكوزينة لغدا ناصبينو الخبز عاجنينو مشات لبيت شيماء لقاتها كترضع)
معرفت مندير اشيماء
شيماء: ههه شنو تلفك؟!
هند: مبغيتيش نغسل دجاج متنحملش رييحتو
شيماء: وهانتي جالسة حدايا متهوديش
هند: غيبقاو يقولو شوفو عروسة نعيمة مرت وليد فنيانة ومكديرش شقا معاهم
شيماء: ومالهم كذبو!!! ههه
هند: ياك الحمارة!!
شيماء: ههه هانتي جالسة حدايا راه مرات عماني وخوالي ݣادين بدجاجهم
هند: وشنو ندير انا منين جيت لبارح مغسلت كاس
شيماء: هههه والله ظحكتيني حتى وجعوني لغرااز
هند: عرفتي شنو كملي رضاعة واجي نقلب ليك لغراز واش براو
شيماء: سيري اختي غسلي دجاج حسن وانا لاش تجي فية
هند: مال مك نسيتي شحال كنت نديرلك لاسيغ ****
شيماء: صافي صافي اصلا خاصني نداويهم
هند: وقوولهم راه تتقابلني مرت خويا وهي للي تداويتي وتداوي حتى هاد لفنكووشة لغزييولة واش مزال متافقتو على سمية
شيماء: ݣلت مرام تكون عندي مريم ومرام
هند: ويييي عجباتني بزااف...
أنوار: (فاق بكري مشا للمحال للي فكر حتى عيا فالمشاريع ودار فالمحال جوج مشاريع وحدة اجونص ديال كراء السيارات وكان كراج صغير وكرا 10 ديال لبلايص فلكاف فين يتحطو... الطموبيلات كان صيفطهم تديونوو ووقفو معاه شي وجوووه.. للي خاصها تصلح وللي قادها والي عاود صباغة فيها باش للي جابتلو البيع يبيعها.. والمجال التاني للي كان كبير غيديرو تريتور شرا اللوازم كاملة من معاالق لمراسلة طوابل هو يكري القاعات ولا الناس وصافي على ميشوف كيف يتمشى ليه هادشي... دخل زهير عندو من بعد متاصل بيه) دخل ازهير ...
زهير: باسم الله.. (كيشوف فداكشي للي فارق بيناتهم غير زاج) هادشي زين تبارك لكم
أنوار: كولشي من افكارك
زهير: فلوسك كانو يمشيو خلا وكان درتي واش فباالك
انوار؛ ههه معليش راك عارفني منين نفكر
زهير: بلا متفكر.. تبع للي سابقك بليلة وبحيلة
أنوار: كاااينة.. السيمانة الجاية نفتح على منشوف للي يخدم معايا
زهير: مهم نتا بعد من الكريدي باش متحاشمش وتوكل على الله
انوار: داكشي نيت
زهير: انا اليوم غنمشي لتاوريرت ندي أمال ومّا
أنوار: على سبوع ديال بنت اشرف؟!
زهير: واه
أنوار: ݣاع معرضنا
زهير: صاحبي واش مغتفييقش نتا دوك الناس داير معاهم العيب زيد مرتو كانت خطيبتك وين ماشي اصااحبي بهاد عقلية درلݣور لي عندك
أنوار: وانا نسيت داكشي
زهير: نتا للي غييييرك لا انا للي 18 عام وانا لهيه عقلي هو هو ومنرضاش على روحي
أنوار: معالينا حتى يجي ونمشي انا ومرتي نديلو الكادو
زهير: نشالله... (خرج من عندو داز عند صاحبو بنااي تافق معاه على لبيت لي يبني لأمال فالجنان.. ودار معاه وقت باش يجي عندو يشوف باش يعرف شحال دالوقت والماتريال للي يتقام عليه.. كمل ومشا لعند دراري للي علهم بالغياب ديالو هاد نهار ويتكلفو يسدو المحال مع 8 دالليل..
مشا للدار لقى أمال والحاجة لابسين كيتسناوه جامعين باليزاتهم
امال2 مكرهتش تمشي معاهم ولكن مزال عندها حساسية اتجاه الخطيبة السابقة لراجلها...)
هند: (بقات مقابلة هند وللي دخلت تبارك تقابلها تعمر اتاي تحط حليوات والزميتة وصلت أمال فلعشية هي والحاجة وليلى غير وصلهم زهير ورجع فلبلاصة قبل متظلام الدنيا داير معاهم نهار سبوع الا كتاب ويرجع... دازو اجواء زوينة كل نهار يغنيو فيه الغيوان ويزرعو فيه الغنايات لدرجة هند تعلمت وولات حتى هي تغني وأكترية وحدة عجباتها)
"""علالي يااا علالي يانا للي هبيلة ربيت الكبدة على ولد الناس هااا علايلي وااه يا يامنة"""
علالي ياااا علالي هو فخيمتو مهني وانا ݣلبي شاعلة فيه النار وااااا علالي وااه يامنة""""
كان غير يسمعها وليد يتبسم لدرجة خلا ختو تصورها فيديو وصيفطاتهاالو كل مرة يكون بوحدو متكي يجبدها يبقى يسمعها ويشووفها كانت مكتكمل زريع هاد الغيوان حتى كتزنݣ عاد كيتبعوها لعيالات يقولو من موراها ديك رنة ديال الطارة "البندير" كتخلي دغدغة فالاحاسييس باقي عاقل عليها كانت غير كيليميني وها هي دابا كتعلم زريييع... دخلت عندو مسخسخة خرج من لفيديو
وليد: مال حبيبة ديالي !!
هند: تسخسخت أوليد وعاد غدا سبوع مك قالت لينا 6 دصباح نفييقو
وليد: مك!! ههه مبقاتش خالتي حبيبتي نعوومة
هند: وراه الحݣرة علاه متيفهموش اصلا واخا نفيق بكري ولا لا معندي فاش نفعهم تنبقى غير واقفة على راسهم بحال شي مخازني
وليد: (تبسم بحب) رواحي يا لمخازني دياالي
هند: ولييييييد مجبتش حتى السيشوار باش نشف شعري
وليد: نصوط عليه زغبة زغبة حتى ينشف
هند: هههه ولييييييد ماشي اليوم حتى رجعو..و
وليد: لا واالو درك هي درك
هند: (وقفت كتبسم حدا لمرايا) نتوما رجال متتفهموناش
وليد: (وقف عندها معنقها من اللور كيشوف انعكاسهم فلمرايا) وكان مكنتش نفهمك احبيبة وكان ݣاع مدييتك نتي راه خاص الواحد يقرا من مور الماستر سنين باش يديييك
هند: اووو وشنو قريتي علية!!!
وليد: اممم مثلا!! علاش بنتنا مبيتاش اليوم معانا!!! حيت رغبتي بنت عمي تنعسها حداها باش نتي تكوني لية ليييبر
هند: تتصنت علية
وليد: ههه لا غير ݣلبت عليها وملݣيتهاش
هند: غير حيت عيانة متفهمش غلاط
وليد: لا باغي نفهم غلاط************........
أصبحنا وأصبح الملك لله....
أمال: (عقلها غير مع تفاصل وتكاشط للي خاصها تبدا فيهم جاب الله داتهم يتقادو عند شي خيااط وللي عطات لمولات الراندة وهي مزال تحط لمستها بعدا منين ترجع تلقى نص الخدمة تخدمت... صونا عليها محمد للي بغا يجيب مو لتاوريرت) والله معرفت اخويا خفتها تجي هنا وتفكر وحنا مݣلنا نسات
محمد: راه تافقنا كلمة وحدة علي حرݣ ومشا لطاليان
أمال: صافي جيبها اخويا بحرا تفوج شوية
محمد: درك نهضر مع مرت عمي باش حتى وحدة متمشي تعزيها ونتي ومريم راكم مݣابلينها ونيت لنرا للي مݣابلاها هنا راها مسافرة هاد 15 اليوم
أمال: بالصح!! اوا خليها ترتاح
محمد: ياله حنا شي نص ساعة ونشدو طريݣ ..
أمال: (قطع معاها ومشات عند مرت عمها قالت ليها كولشي بغات تدخل عند شيماء دفعت لباب بلا دقان لقات شيماء واشرف كيتشقلمو هربت بالزربة) احاااي يعطيني لݣطع...
شيماء: هههه اليوم متبانش
أشرف: ههه.. وليتو مݣادين
شيماء: ماشي بحال اللول ولكن حسن مدرتش قليل فيها
أشرف: (مباغيش يعرف التفاصيل واخا عارف ومكيسولش..) معليش كولشي دااز
شيماء: واحد مريم معرفتها فين مشاات
أشرف: راها مع خالها لتحت فالمحال ولايني نتوما مطورين حالين المحال نهار سبوع باش تبيعو السكر لعيالات للي غيجيو عندكم نيت
شيماء: ههه سميتها الماركوتينغ ههه هاكا يݣول وليد
أشرف: نييشان ههه... (سكت مدة) يمكن كان علية نعيط على عمي ومرتو
شيماء: حتى دابا مزال الحال على الاقل عمك يجي يحضر فرجال
أشرف: والله معرفت اخر بلان دارتو هي وبناتها كرهوني فيهم
شيماء: ولكن عمك مدار والو
أشرف: نعيط ليه؟!!
شيماء: واه هضر معاه نتا ووليد
أشرف: داكشي نيت للي نوض ندير.. ياكما خاصك شي حاجة؟!!
شيماء: لا لا... (خرج كيقلب على وليد وهي بقات كتشوف فبنتها للي مݣمطة وعلى رأسها القران.. تبسمت وكتفكر وليت أم ديال جوج بنات كل مكتزيد اكبر كل مكتزيد مسؤوليتها للي متقبلاها بكل حب... )
زهير: (كان عتاذر ميصلاحلوش يجي فسبوع على حساب الخدمة.. كان فجنان جالس كيشرب الدكة يدوز بيها الݣارو للي رجع قليل ماشي بحال اللول شاف من موراها مكاين غير طاق طاق والبناية خدامين من حسن حظو كانت الطبلة فالقنت كاينة حيت كانت بيت قديما ودابا سيمانة قربو يوصلو للضالة كيخدم خدمتو ويجي يعاونهم أمال بنت ختو للي عارف ممكن يكون اتصال بينها وبين مرتو مخلاهاش تقولو شنو كيدير واخا اصلا حتى واحد معارف لاش كيتبنى داك لبيت ولاد لكبير غيتفرݣعو كفاش برهووش شاد دار بحال كما شاد باه والحاجة وزيد جنان نساو انه شاريه بفلووسو وعمرو تحاااسب معاهم يجلسو فيه ياكلوا من ديك الارض وياكلو تماك كيف بغاو ولكن هاد السووسة انه كيدير مبغى متصرطتش ليهم... أنوار عيا يعرف لاش داك لبيت حدو زهير كيقول بغيت أرضي نبني فيها حتى جامع... لاح داك الݣارو ورجع للبناية يكمل معاهم باغي يوصل غير يلوحو الضالة على متجي مو وأمال للي بقات ليهم 4 ايام ويمشي يجييبهم... وديك الساع هي نختار صبااغة وشي لاخر...)
~~~~~~~~~~~
داز سبووع مطقطق جا عم أشرف للي تقلق عليه علاش يخبي انه تزادت عندو بنت وبقا فيه الحال ولكن سااامحو حيت عارفو وحييد معندو لا حنين لا رحيييم..
استقبل احسن استقبال من عند عائلة شيماء ورحبو وعتاذرو نيابة على اشرف للي فهموه انه مكانش خاصو يدير هكاك وفنفس الوقت كبرو بيه قدام عمووو حتى من ادم ونبيل تقادو بامر من باهم وخوهم وليد
فتيحة شطحت وغنات مع لعيالات للي كاين للي بقات كتقارا فيها ويظحكو عليها شي كيقول ولدها مدورش حتى العام وناضت تشطح للي كتقول هبلت ناضت أمال كتشطح معاها ومنين سمعت وحدة كظحك عليها ومجمعة بيها طرشتها حتى دااارت قلبوها مدابزة فداك سبووع للي بعقلو ناض يفاك وللي موالف كيشعل لعوافي.. تفرقت الحلوة ولعيالات خرجوو حتى واحد مغوت على أمال حيت لقاو عندها الحق اما فتيحة مخلاتش ليها انها شوهتها ونسات حتى علاش ناضت كتغوت عليها وهادشي رجع عادي عند امال حتى واحد مبقى كيدي عليها... فالليل رجال جاو تعشاو وكانت الطلبة والقران ودازت سلمية كما العادة عندهم...
~~~~~~~~~
أمال2: ديني نشوف أنوار المحال ديالك
أنوار: واش ديري فيه؟!
أمال2: غير نشوف وصاافي
أنوار: حتى يجي كولشي ونديكم تشوفووه.. (شاف فالسرجم زوهير ماشي لدارو بدوك لحوايج ديال البناية) وجدتي لغدا لخالك؟!!
أمال2: واه
أنوار: وجديهلي نديهلو يتغدى.. نعرف غير داك لبيت للي راه يبني فيه ديالاش
أمال: (بقاو من مور سبوع شي يوماين صونات على زهير يجي يديهم ولا ترجع مع وليد مبغاش...)
علاش؟!
زهير: صافي حتى نجي يانا ونجييبكم
أمال: (بقا فيها الحال) واش متوحشتينيش؟!!
زهير؛ امول بلاتي ونصوني عليك.. (قطع وبقات غير جالسة نقطة ضعفها هو زهير الا حست غير باهتمامو نقص كديبريما فلبلاصة... اما هو راه فاللمسات الأخيرة ديال الضالة حس بلعيا مجلسش ݣاع من الخدمة المحال لمقابلة دلبناية..)
أمال: (دخلت حدا شيماء للي أشرف مشا حتى يرجع) احسن حاجة درتيها جيتي تولدي هنا
شيماء: ويييه اختي ديك لولادة اللولة دازت علية شفت الموت بين عيني عاد حد مكان حاملني اوديييي..
أمال: داكشي دااز
شيماء: واخا داز راه عمرو يتنسى.. متخيليش شحال كنت نكره راسي وحتى داك شماتة
أمال: انوار؟!!!
شيماء: وشكون من غييرو دخل فتنة بيناتنا الله ياخد فيه الحق
أمال: نساي اشيماااا داكشي حنا فتنا داكشي كبرنا وولدنا وليداتنا وخلينا كولشي من مورانا
شيماء: هو ساكن حداك تقريبا معاكم جاااتك عادي!!!!
أمال: (حست بالسم طلع معاها) مكنديهاش فيه
شيماء: كولشي كان عارف أنوار كان يبغيك بزاااف
أمال: شيمااااا
شيماء: كاين غير انا ويااااك
أمال: (ناضت سدت لباب وسورتات وهضرت بشوية) شيماااا هادشي مكتبغيش نهضر فيه شي حاجة دازت صاافي دازت للي فات مات.. متبقايش تهضري فهادشي
شيماء: والله مكنهضر غير عارفة راسي شحال ضيعتها معاك وجبدت ليك صدااعااات
أمال: داااز اشيماااا نتي راكي براجلك وانا براجلي راه غيب وحشومة نهضرو فهادشي
شيماء: براسي راه مزال شي مرات كيتجبدلي صداع مع اشرف بسبابو
أمال: (هي راه زهير ماشي غيجبد ليها صداع راه غيجبد رووحها الا عرف شي حاجة واخا كانت من الماضي..) واش جبدو بيناتكم وهو بعيد عليكم
شيماء: حيت الكلب باغي يرجع صحبتو باشرف بحال مواقع والو
أمال: كيدير راسو بحال مكاين والو عندو عقل مخري
شيماء: معرفت كفاش طحتا فيه هههه
أمال: ههه كنا فاقدين الامل هههه اوديييي شيماااا صافي سدينا هاد الموضووع.. (قلبو الهضرة حتى خرجو تعشااو.. هند ووليد غير فاقو مشاو فحالهم وأمال بقات تغبن اما الحاجة عاجبها الحال جموع والدار ديما عامرة وعندها فين تكلم..)
فتيحة: أمال امااااال اماااال..
(كتقلب تحت المخاد تحت الطبلة والحاجة غير كضور عينها مخلووعة خايفة تصليها معاها وأكترية كنشوفها معصبة وكتغزز فسنانها بقات بحال شي دري صغيير مربعة يدها وكتشوف مالها وكطلب الله غير تجي أمال دغيا.. )
أمال: مالكي امامااا!!!
(واقفة كتشوفها حيدت لكواش ولاحتهم وحتى ديال الحاجة للي ناعسة حداها لايحاهم) مّا
فتيحة: شكون جاب دلمرا نعسها حدايا شحال فيها شخيييير غنقتل مها الا بقات حدايا
نعيمة: (كتقاد درتها جاية تجري مخلوعة) فتيحة ماالكي؟!!!
الحاجة: (غير كضور عينها جاب الله جاو يحاميو عليها)
فتيحة: اجي نتي لهنا يا الكلبة لله مخلياانا نعسو هنا
أمال: ها!!
نعيمة: فتيحة رواحي معايا.. الحاجة متدييش عليها
أمال: واش مشربتش دواها (جات طرشتها فحنكها حتى ضاارت شدت فحنكها وشافت فيها) ماما!!
فتيحة: الغمة يا بنت لحرام يانا تݣولي علية مشرباش دوا راني نشير بالحجر
نعيمة: هربي نتي (مشات أمال عند الحاجة جراتها وهربو بجوج مشاو لبيت للي كتنعس فيه وهو بيت هند.. )
الحاجة: يابنتي مالها مسكينة
أمال: (مشات كتشوف فلمرايا كانت جرحة كبيرة من نيفها حتى لعينها يمكن كان الخاتم مقلوب والحاجة للي كانت فالكف) بفففف (شعلت الضو شافت فلمرايا وشافت فالحاجة)
الحاجة: يا ربي السلامة (ناضت عندها شافت الجرحة) سيري ديري فيها زبدة بلدية ابنتي
أمال: (بعصبية) بغيت غير نمشي فحاالي وزهير محاملنش رجع
الحاجة: لا يا بنتي متݣوليش هاكا
أمال: وشنو بغاني نبقى هنا عااود نرجع لهاد الحبس ياك صافي جينا نحضرو لسبوع ونمشيو لاش باقين حنا هنا (هزت موشوار كتمسح بيها الدم ومزيراه على الجرحة)
الحاجة: درك يجي ابنتي راه غير مع الخدمة
أمال: اشمن خدمة امّا ياك غير غيجي يدينا ويرجع بحال داك نهار (مبكاتش بقات غير معصبة جات نعيمة عندها كتبرد وسوانات ليها الجرحة) فينها؟!
نعيمة: طلع ليها محمد عطاها دواها وهبطها تنعس.. نسا معطاهاش دوا لبارح
أمال: (تنهدت.. وبقات غير كتشوف اللومة كاملة رجعاتها لزهير للي مزال مخليهم تمااك..)
الحاجة: (حرام واش جاها شي نعاس غير يتقرقب لباب ولا يدوز شي حد من حداهم كطلق ودنها خايفة من هجوم فتيحة ركبت فيها الرعب وخافت على أمال كتر راها شافت شوية من الشونتيو للي كانت عايشة فيه وزادت عزت عليها كتر وكتر... بقات هكاك طلت على أمال للي معنقة ولدها وناعسة شافت فالسرجم معارفاش الساعة ولكن كتسنى غير طلع شميسة باش تعيط على زهير يجي يديييهم مبقات بغات جموع وهضرة خرجتها من فمها) الله يخلف ويجعل البراكة...
~~~~~~~~
أصبحنا وأصبح الملك لله...
وليد: (فاقو بكري هو وهند فطروو وبقاو مجمعين مشاو فيقو بنتهم فطراتها هند لبستها حوايجها دازو حطوها فلاكخيش هو وصل هند لخدمتها وهو مشا لخدمتو.. ياله لقا احمد كيحل المحال عاونو مكيحطو برا حتى شي ديكور من غير زريية طويلة فلحمر على دروج مع فاز كبير وتقيل.. دخلت فام دميناج للي كانت كتسنى واليوم عندها تنقي المحال دخلت ووليد طلع للبيرو يقلد شي خدمة وكموند حتى كتصوني احلام عليه مجاوبهاش عاودت صونات قطع عليها.. كمل شغلو حيت زهير مغيجيش حيت قالو عندو شي خدمة.. صونات هند) وي هنوودة
هند: (معصبة) وليد داك لحمار شماتة لكلب
وليد: شكون هادو؟!!!
هند: فيصل للي كنت خدامة معاه
وليد: (قلشو ودنيه) سمو دارلك؟!!
هند: مشا شكا بية قالك بقاتلي فالكونترا 3 شهور مجيتش فيها ومعطيتش مبرر
وليد: ياك حطيتي الاستقالة ديالك
هند: قالك مشدهاش شماااتة الله يعطي لمو لغرااق
وليد: (عاد عرف علاش لوخرا صونات عليه) اممم متخافي مواالو انا نݣادها
هند: شنو بغا مني هاد لحمار
وليد: نسولك نتي للي كنتي لاسقة تخدمي تم
هند: (عضت لسانها وسكتت) تجي عندي؟!!!
وليد: شوفي الا مكانتش عندك الخدمة رواحي لعندي راني بوحدي فالمحال
هند: خاصني محامي
وليد: هند ماشي شي حاجة.. صافي كملي خدمتك وروااحي
هند: (حست براحة نسبية منين شافتو مكالمي) والخدمة زعما ميضيعليش لكليان
وليد: هييييند كملي خدمتك وروااحي رزق على الله ماشي على العبد.. (قطع وبقا شحال كيشوف جا احمد جابلو القهوة ديال كل صباح) لعز أخاي احمد... (خرج لاخر وهو بقا مقوس عينيه باين عقلو سرح ومشا بعييييد ومرة مرة كيدك بالقهوة...)
أمال: (فاقت شافت وجهها فلمرايا لقلت الجرحة فحنكها ودايرة بيه حمورية مكانتش غير نجرة خفيفة اصلا كانت باينة من دوك دمايات زادت تكرهت) هادشي للي بقا نيييت... (شافت فالحاجة كتجخر كلات ولدها بدوك لمخاد وخرجت سادة لباب عليهم، لقات عمها فوجهها باسلو يدو) صباح الخير أعمي
احمد: الله يرضي عليك ابنتي... (شاف فوجهها) معليش ابنتي صبر مك درك راها مريضة
أمال: ماااعليش اعمي مهضرت حتى فاش كانت بعقلها عاد نهضر دابا منين مرضت
احمد: الله يرضي عليك ابنتي الله يرضي عليك... خوك دا مك بكري ومشاو لوجدة
أمال: (غير كنسمع شي حد مشا لوجدة ورجع لدارو كيبقى فيها الحال، توحشت زوهير وتوحشت دارها والاستقرار للي ولفت عايشاه تماك) يمكن يردها لطبيب للي كيدوز ليها
احمد: واه.. فين راجلك لباس عليه
امال: لباس الحمد الله خلانا هنا ومولاش رجع ههه (ختمتها بظحكة)
احمد: راكي فدااركم ابنتي ولا صافي وليتي تقنطي بينا
أمال: لا لا اعمي لا والله ما هكاك غير ظحكت وصافي
احمد: (تبسم) ݣالتلي نعيمة الحاجة تخلعت
أمال: ههه بقات فالركنة بحال شي بز هههه
احمد: ههه لا حول ولا قوه الا بالله العلي العظيم.. (مشا كيتبسم وأمال دخلت للكوزينة كانت نعيمة وسناء كيقادو لفطور دخلت تعاون شادين فامال كيظحكو حتى جات شيماء..)
شيماء: ماما غدا غنمشيو لوجدة
نعيمة: زيدو ابنتي هاد السيمانة ݣاع منسخاو بمريم ومرام
شيماء: وانا؟!!
نعيمة؛ نتي هزك لما
امال: حّووو فييك
شيماء: مسمومة لووخرا
سناء: زيدي معانا اختي شيما غير شوي
شيماء: والله اختي مكرهت ولكن أشرف خاصو يمشي يݣابل شغلو وهو مكيݣدش يتفارق مع بناتو
سناء: وااه يا ختي شفتو صراحة تخرجي ونتي هانية من جيبتهم
شيماء: (عوجت فمها) منين يجيني لخروج وحدي
نعيمة: معندك خرووج بلا بيه ابنتي
أمال: ههه عقلتي كنتي طلبيها كظلي تݣولي انا مكرهتش نتجوج ويحجبني فالدار الا بغا
شيماء: لا راه من موراها طلبت بزااف
أمال: دوماج هاد الدعوة الوحيدة للي كانت مستورة وربي شدها وحققها ليك
شيماء: ههه يا ختي نتي ولينا خاص نعرفو شنو كنݣولو عاد نطقوه معاك
أمال: ههه هانا امرت عمي جالسة مونسااك راجلي ولفها بوحدو تم
نعيمة: ههه يرتاح من نݣييييرك اه اه شحال وليتي نݣارة....
زهير: (مع فاقت الحاجة صونات عليه عاودات ليه اما حتى أمال مبقاتش كتجاوبو فالتيليفون لبس حوايجو خلا الخدامة كيديرو اخر لمسة كيحرشو لبيت عندهم لعشية يساليو هو شد طريق لتاوريرت.. وصل مع 11 كان فطريقو صونا على محمد للي قالو راه فوجدة ولكن كان وصل هو.. لقى أشرف مع احمد برا) السلاام عليييكم..
أشرف: وعليكم السلام..
احمد: وعليكم السلام اولدي على سلامتك مكانش فخبري راك جاي
زهير: (سلم عليه) مكان فخبر حد.. مبرووك عليك زيادة ابا أشرف
أشرف: الله يبارك فيك... (بقاو هضرة فهضرة حتى طلعو أمال تصدمت من صوتو ولدو غير شافو مشا كيتمشى عندو ويظحك.. هزو كولشي خرج يسلم عليه ونعيمة فرحت بيه.. الا أمال للي بقات اللور مقلقة منو بزااف الحاجة طارت عليه عنقااتو، رجعت أمال للكوزينة بوحدها مربعة يدها وكتفكر كفاش تغضب منو حيت متأكدة جوج كلمات غيخليها كتفرنس وتنسى ݣاع هاد لحلوف والغضبة وطلع ليها فاالصوو.. دخلت نعيمة كتزرب باش تزيد ظ دير دجاجة تحمر وتقاد حتى السفة لقاها تم)
نعيمة: خرجي حدا راجلك
أمال: لا (نفخت حنوكها)
نعيمة: (هزت مغرف) خرجي حدا رااجلك ولا نشير عليك الحنك لاخر راه يسول فيك
أمال: اووووففففف... (خرجت كتصووط لقاتو فالصالون دخلو سناء كتجري وحتى شيماء تعاون يحكو اتاي حلوة سفوف... غير شاف فيها تبسم من عينيه عارفها مقلقة منو ولكن دغيا جمعها منين شاف ديك الجرحة فوجهها)
زهير: مالكي؟!!! (خلا كولشي كيشوف فيه وفأمال)
أمال: (تضهشرت ومشات زعامة.. حطت يدها على الجرحة) غير تجرحت
زهير: وشكون للي جرحك
أمال: ها.. غير تجرحت وصافي
الحاجة: غير مها مسيكينة لبارح تزاد عليها الحال وضربتها
احمد: (جابتلو الظحك معطلاتش ولا سترت)
زهير: (سكت.. بقا هاز ولدو ومشا حدا أمال للي حشمت قدام عمها وراجل شيماء.. تسلتت وهو تابعها حتى دخلت لبيت دلجلاس) وݣفي اديك لبنت
أمال: بعدني
زهير: مال مك؟!!! وݣفي
أمال: متغوتش علية قدام ولدي
زهير: (تبسم شاف فيها وهي مخرجة عينها) مكان لا سلام لا مرحبا براجلي حبيبي واالو الدعوة ناااشفة عندك ابنت مّا
أمال: متستاهلش
زهير: ݣاع!!!!
أمال: اه
زهير: انا بعدا توحشتك
أمال: (كتهرب من دوك الشوفات للي كيرطبووها) اممم عاودها رااسك
زهير: مال حبيبي طالعلو الدم (قاس بكفو الجرحة) وكان ماشي مك!!
أمال: نتا للي خليتني هنا
زهير: مخليتكش مع لبراني احبيبة راكي فوسط فاميلتك ومعاك مّا
أمال: لا انا بغيت دااري
زهير: درك رجعو ليها احبيبة.. مشريتيش شي بومادة
أمال: كنت غنخرج نشريها
زهير: (حنا باسها فوق الجرحة..) انا نخرج نشريها ليك...
هند: (مبقات عندها ݣانة لشي خدمة عتاذرت من لكليان للي عندها وواعداتو الحصة جاية غتكون فابور.. حطت طبلية ديالها لبست مونطووها هزت مرايا صغيرة من صاكها قدات لعكر رشت بارفان وتمت خاارجة علمت السكرتيرة باش تلغي شنو عندها فلعشية.. وهبطت مع درووج مبقاش خووفها من القضية ولا فيصل ولا الشكوى ولا حتى شرف المهنة للي كتازولها بقد خوفها الوحيد اخر جملة نطق بيها وليد شنو للي كان ضادك تخدمي معاه!!! صونات على أمال وهي ماشي حيت قريب ليها والجو مساعف تخرج فيه) الوو أمال واش مزال متجي؟!
أمال: ياله لقيتي زوهير جا اليوم يمكن نتغداو ونشدو طريق
هند: اليوم داك الكلب دار بية شكاية ومشا الملف المحكمة
أمال: ولد لحراام
هند: ماشي غير ولد لحرام راه اكبر ولد **** عرفتووو
أمال: شتي اهند شحال من مرة اصاحبتي ݣلتلك خرجي من تم
هند: بففف دابا للي وقع وقع المشكل وليد للي رجع لشنو كان تيقول شنو للي كان شادني نخدم تمااك ومدام داك الكلب رفع دعوة عادي نتقبل يمشي عند وليد ويقولو شنو بغا
أمال: لا لا يخاااف
هند: اه يختلف ولكن مغيحشمش تنعرف نووع فيصل تفووو تفوووو درتها لرااسي (وصلت المحال) أمال انا نقطع من بعد ونصوني عليك وربي على زهير باش تجيو دغيا
أمال: واخا ختي.. بسلامة (قطعت ورجعت خرجت كان زهير جا وعطا لنعيمة لبومادة شدتها ومشات للحمام دهنتها كانت ديال سيكاتريس خلاتها فوق حنكها ومشات للكوزينة كتعاون فلغدا وعقلها بقا مع صاحبتها...)
~~~~~~~~~~~
محمد: (كان طبيب عطاه كينات قاسحين لفتيحة كيدوخو ويكالميو والا حالتها تزادت خاصها دخل لصبيطار وهادي للي ميتقبلهاش محمد مو دخل لصبيطار الهبل.. اه كان غيحاسبها على شنو وقع لامال وكان كيتسنى تفسير وكان ناوي يغضب ويقطع كلامها ولكن دابا تحط امام امر الواقع ميمكنش يخليها... دخل عندها للبيت وشاف فلمرا للي فالاربعينات كتقابلها من ماكلتها لباسها تبدال وحتى مريم كتعاون بداكشي للي قدت عليه هادي كانت فكرة زهير للي أصر باش غيقسمو فلوس المساعدة وباسم أمال يعني خوت متعاونين فيها واخا أمال مفراسها والو...
دخل عندها لقاها غير كتشووف خرجت لمرا)
ما!!!
فتيحة: (قوست عينها) علي؟!!!
محمد: ... واه علي اما
فتيحة: عرفتي من ݣبييل وانا نخمم باك نتا للي عطيتيه دوا باش مات؟!
محمد: (بقا مصدووم)
فتيحة: انا ݣلت ليك لوح ديك الكينة وشريلو كينة جديدة يا المسخوط خليتيه شهر وهو يضرب فكينة بيرمي دايرزها الوقت
محمد: (قلبو بقا كيضرب ورجليه مهازينوش لدرجة جلس فوق السداري كيشوفها) سمو!!!
فتيحة: معليييش حتى هو يستاهل مدارش ݣليل معاك ولا معايا من نهار تزادت ختك وعرفني منعاودش نولد وهو مشربني لمرار تݣول يانا كنت باغيا منعاودش نولد... (تنهدت وبقات كتبكي) حݣرني وشحال عايرني بلعاݣرة ݣدام خوتي ونعيمة وخوتو هادشي حيت مقبلتش الضرة تجي علية واخا هكاك مشا تجوجها وولد معاها لبنات (محمد فشل خااايف مزال يسمع شي فضييحة اخرى... حتى شافها نعست بقا غير حال فمو وكيشووف فيها فين يمشي وفين يجي ولمن يعطي الراااس.....)
هند: ولييييد!!
وليد: (هز راسو كان كيسني على شي شيكات شاف فيها وعينيه نايمييين مفهمتش هاد الشووفة) دخلي
هند: (دخلت وسدت الزاج من موراها وجلست كتشوف فيه وهي على اعصابها وهو حنا يكمل خدمتو شي 2 دقايق عاد هز راسو من بعد مسد دفتر الشيكات) مالك؟!
وليد: والو... خاص نهضرو مع المحامية احلام
هند: احلام علاش احلام كاين غييرها وعلاش هي بالظبط
وليد: حيت ذكية فخدمتها للي تخرج زهير من الحبس وهو كان غيتحبس ب10 سنين راه قاادرة
هند: (طرطقت عينها والغيرة شعلت معاها كفاش راجلها يشكر مرأة اخرى من غيرها!!!!) ذكية!!! عاجباااك
وليد: فخدمتها واه
هند: مبقيتش باغية ندخل الحبس وهاديك من... شوف بلا متعصبني ماشي حلال عليك وحرام علية كيفما نتا تتحكم فالي نهضر معاه وللي نقاطعو حتى انا هكاااك
وليد: اري تيليفونك اهند
هند: علاش؟!!
وليد: باقي عندك ميساجات داك الكلب
هند: (كمشت ملامح وجهها) نفكرك راك فورماطيتي التيليفون
وليد: اممم اري التيليفون (لاحتو حدا يدو بنتير طلع عينو شاف فيها هاز حواجبو) ضربيني بيه للكمارة حسن
هند: مكرهتش
وليد: الله يعميها ليك
هند: متهضرش معايا هاكا
وليد: هند!!! الغلط ديالك نهار اللول وبلا مندخلو فسين وجيييم للي مغتسلاش والا بدات غتبدا بخزيييت وااحد بحال هداك متكمليش معاه نهار فالخدمة هضرت مع حدك المرة اللولة التانية التالتة ونتي مسمعتيش ودابا جاية تعصبي علية
هند: شوف بلا متعاوني انا قادة بشغلي
وليد: شغلك هو شغلي وبلعي فمك من داك التخراج للي راكي تݣووولي
هند: احلام متجيش
وليد: كتغيري منها اهند!!!!
هند: (شافت فيه شوفة ديال لقتيلة وقفت هزت كونطاكط ديال طموبيلتها بغات تهز تيليفونها وبعدو عليها)
وليد: جلسي
هند: (تمت خارجة معصبة زاد تعصب حط التيليفون فالقجر وتبعها ممعيقش قدام لكليان اما هي وصلت لطموبيلتها ياله غتخشي الساروت ݣلعو ليها) عطيني نمشي
وليد: بلا تبرهيش اهند
هند: لبرهوش هو نتا هاد الساعة عطيني خرايا نمشي
وليد: هيييييند!!
هند: (غمضت عينها صارطة لكلام للي فطرف لسانها) عطيني أوليد
وليد: (هز الساروت ورجع للمحال وهي بقات تماك فطموبيلتها متصرطاتش ليها واش كتغيري منها!!!!!)
زهير: (غير البناية علموه انه كملت خدمتهم دابا باقي لفينيسيون وقف) اوا هدا هو الشرفاااا نوضو بحرا نوصلو بكري
احمد: جلس تبات اولدي الدار داركم حنا مزال مسخينا بامول والحاجة
زهير: الله يكبر بيك اعمي مرة أخرى
اشرف؛ حتى حنا نوضو
احمد: بغيتو تخليو علينا الدار خاالية
أشرف: (عاجبو الحال حاس روحو وسط فاميلتو الحقيقية داكشي للي كان باغي ناس معقولين ملتازمين وجاوهم على الݣانة واخا دابا غير العائلة مكاينش الاختلاط..) دابا نوووبتكم رواحو عدنا
احمد: نشالله اولدي نشالله...
زهير؛ أمال سيري وجدي رووحك وجمعي صواالحك
أمال: (مزال دايرة فيها غضبانة مكتشوفش فيه) حم مجموعين
زهير: ههه على سبة حتى نتي
احمد: ههه ياك أمال سخيتي بعمك
امال؛ (تزنݣت) لا عمي والله ما هكاك مّا للي جمعتهم انا ݣاع مكنت عارفاه غيجي
زهير: اممم تيقناك وكااان (بقا شاد فيها حتى حشمت ومشات لقات نعيمة كتفرق الكادويات مع شيماء للي نعاود شداتو باش تديه مباركة الا تعرضت فشي سبوع لقات شيماء بزاف دلكادويات)
أمال: هاري نديو معاك
شيماء: زعما.. خفت يكون كوفر دراجلك عامر
أمال: هاحنا نهودو ونشوفو (جمعو حوايجهم بداو رجال كيهبطو نعيمة عطات لشيماء سطل ديال الحلويات والزميتة لشيماء حيت أشرف باغي يعرض صحابو فوجدة.. تسالمو مع العائلة أمال جلست هي ومروان اللور وحداهم شي كادويات وطموبيلة ديال أشرف من مورااه)
زهير: (صايݣ) اوا شكون توحشني
الحاجة: هههه والله يا وليدي حتى دوزنا هاد لياام زييينة فوجنا فيها
زهير: بصحتكم.. (قاد لمرايا شاف فامال) ونتي امراتي لحبيبة
الحاجة: بحال كانت جالسة على الشووك غير تنݣر علاه مجيتش
زهير: ههه للي يعجبني فيك امّا معندكش شي حاجة سميتها السترة
الحاجة: ههه فوݣ الطبلة
أمال: مّااااااااااا
زهير: نعاام المعييزة ديالي
أمال: (قلبت وجهها شادة الظحكة بالسيف ولكن مجاوباتوش مع وصلو لوجدة بدات لعجاج عاد تبسمت وحسن بالراحة مشاو للدار هي هبطت هزت راسها زعما بتكبر وطلعت للدار مخلياه كيظحك عليها هو والحاجة كان لباب محلول يمكن كان فيه شي حد ونيت لقات عيشة ومينة مطيبين لعشا وجالسين كيقادو ملاوي حيت علمهم زهير غيجيب الحاجة) سلام عليكم... (سلمو عليها مينة بدات تسولها على احوال العائلة وعيشة رجعت تخبز وغير كتسمع عاد دخلت الحاجة وناضو يسلمو عليها)
زهير: (جر أمال من قب مونطوها) رواحي يا جدك لهن..
أمال: زوهير غنطيح مروان (وقفت وشافت فيه مخرجة عينها) شنو!!
زهير: ابردي على خضييرة ديالي ولات حتى هي تسيكانريسة فالحنك
أمال: اوا رد باالك ولا نخرج فيك
زهير: هههه خرجي فية انا باغيك تخرجي فية
أمال: مااااسخ...
زهير: انا ماسخ لمك؟!
أمال: (كتعوج) متجبدش ماما على فمك الماااسخ
عيشة: (جات فودنها نيشان منين جات خارجة من لكوزينة.. شافت فزهير كيظحك خرجت عينها وفراسها اييييه فينو داك سبع للي كان يخرج فالي قلل منو) علاه تݣولي عليه مااسخ!!!
زهير: (حنحن..) ختي عيشة (شاف فامال بمعنى سيري) كيراكي؟!!
عيشة: كيراك نتا اخويا للي جالس تعاير فديوانك!!
زهير: ختي عيشة (حك قرفادتو) واش نݣوولك انا ومرتي نتمازحو نظحكو بيناتنا هادشي عادي بيناتنا
عيشة: معاديش من امتى أمرا تقلل لحيا على راجلها عيني عينك وݣدام اهلو ونااسوو..
زهير: حم لا لا مكان منها والو هاد الهضرة
عيشة: (بقا كتشوف شحال جراتوومن ذراعو وداتو لقنت كتهضر بشوية) خويا نتا برزقك تبارك الله علاه متعاودش تزوج؟!
زهير: (صدماتو فين كانو كيهضرو ودابا فين كتهضر) واشتا!!!!
عيشة: نتا ميسر عليك الله لاه متزيدش التانية وتكبر الفاميلة ويكونو وليدات عندك بزااف راك برزقك وݣاد تفتح دار وجوج وتلاتة
زهير: (هز حواجبو بجوج مصدوم فختو وهاد الكره كامل لامال علاش!!)
واااه صراحة مفكترش فيها ولكن درتيهالي فالراس!!
عيشة: (تحولو ملامحها لفرح) واه اخويا انا نبغيلك غير الخير أمال غتبقى مرتك اللولة ووحدة منا حنا غير بغينا فاميلة تكبر.. وراك غدير غير شرع الله
زهير: صافي درك نهضر مع أنوار
عيشة: انوار؟!! علاه؟!
زهير: الحمد لله انا ميسر علية الله وحتى ولد خويا راك شفتي ورث ورثة صحييحة وحنا خاص نتبعو الدين ديالنا نشوفو شي نهار بجوجنا نضربو فيه لكحل فلبيض
عيشة: (بقات كتشوف فيه لسانها معقوود)
زهير: نزيدو التانية التالتة وعلاش لا الرابعة فكريني حتى راجلك عبد الغني نهضر معاه راه حتى هو ميسرة عليه وحتى ختي مينة حتى هي راجلها ميسر عليه.. صراحة مزيان هاد الفكرة عندك
عيشة: واش راك تݣول
زهير: ماشي ياما شرع الله.. (خلاها مصدوومة وهو كان كتر منها بغا يدي أمال للبيت ولكن طيراتولو طلع لسطح كيكمي يبرد جنونو فلݣااارو حسن ميبردو فختو لكبيرة للي هربلها مع مرتو وغير حاضيااها...)
هند: (بقات فطموبيلتها كتحلف تبان ليها احلام طير عليها وللي بغا يوقع يوقع اصلا تحدي الا جابها بلا هواها.. تدق الزاج دالسرجم ديالها هزت راسها مكرهة كان هو) عطيني سوارتي نمشي
وليد: مكتشوفيش ماشي وقت هاد تخربيق ديالك
هند: وقتو ونص مزال متزادتش هادي أوليد للي نغيير منها
وليد: انا معنيتهاش هكاك
هند: كما بغيت تعنيها الميساج وصل دابا عطيني سوارتي ومشاكيلي قادة نحلهم بيدي ممحتاجاش ليك ولا المحامية ذكية ديالك
وليد: دابا رجع الفرق فالمشاميل كاين ديالي وديالك
هند: اه كاين ديالي وديالك منين وليت كدخل هادشي بيناتنا وجالس بكل جرأة تتشكر فيها قدامي ونتا عاارف مزيان شنو المشكل للي كان وقع بيناتكم
وليد: اشمن مشكل!! لبنت عاونات صاحبي وحتى منين درت كسيدة جات عاونات
هند: (صعرت عليها) واااا عطيني لخرااااا ديالي نمشي فحاالي ولا عرفتي ها هي (خرجت دافعة لباب) ربح بيها دابا
وليد: (قوس عينو فيها جا المحامي للي دار معاه) خالد تسنى فالمحال انا جاي.. (مشا تبع هند للي صعرها شدها من ذرااعها بغات تنتر منو وورك عليها) هداي
هند: طلق مني حسن ليك!!
وليد: (ببروود) هادشي شوية من بزااااف باش كنت كنحس بييه منين كنت كل مرة نݣولك متمشيش لتماك ديميسيوني انا غنعوضك ونتي واالو هضرة دخل من ودن وهضرة تخرج من ودن اخرى
هند: اش كتخربق!
وليد: هادشي مزال نهضرو فيه حيت بانلي هادشي متسدش عليه كما بغينا دابا ويدي المحامي جا
هند: محامي؟! راني قلت ليك مشاكيلي قادة عليهم
وليد: مدام محسوبة علية مشاكيلك هوما مشاكيل ديالي درك زيدي بلا منضيعو للسيد وقتو
هند: (كانت معصبة بزااف منو حست براسها تجرحت وفنفس الوقت خااافت تورق العلاقة لقديمة للي هو قال ممنحقيش نعرف ماضيك ولكن هي ناضت ومشات الماضي وردااتو حااضر... نترت يدها محافظة على الكرامة وزادت قدامو وهو تابعها دخلت لقات المحامي للي كان واقف معاهم فتاوريرت.. طلعو المكتب الفوق وبدات كتشرحلو شنو كاين ووليد غير كيشوف فيها لدابا مذكرتش الميساجات وليزابيل واخا هادشي غيمسووو ولكن خاصها متاذااش هي وصمعة خدمتها للي الحمد لله ماشي كما بغاو...)
خالد: مدام هند دكتور فيصل كان كيميزك على باقي الممرضات تماك؟!
هند: انا مكنتش تنشوف شي تمييز كنت تندير خدمتي لا أقل
خالد: وليد كانت ݣالي كيصدعك برا الخدمة فالتيليفون
هند: حم هادشي للي لاحظ وليد
وليد: لا حتى نتي امدام لاحظتيها
هند: متنبغيش نظلم شي واحد
خالد: ولكن هو غيظلمك الا ربح القضية وأكترية نتي مزال جديدة فالمشوار ديالك وخدمتك أكترية كتعتامد على السمعة
هند: انا اه بالصح ديميسيونيت حيت راجلي مبقاش مرتاح فخدمتي فداك لكلينيك ودكتور فيصل كان تيسول بزاف فالتيليفون الا تعطلت شي نهار ولا نت..
وليد: انا غنجيبلك ميساجات بالوقت بكولشي هادشي غينفع
خالد: واه بزااف
هند: (بقات حانية راسها خايفة يتجبد عليها نحل وفيصل برواال اصلا طاالب عليها...)
هند: خرج المحامي وهي بقات جالسة كتفرك يديها مع بعضياتهم بحال شي تلميذ داير شي زبلة كبيرة وكان فاجتماع تأذيبي كيتسنى مصيرو واش يتطرد ولا يكمل لقراية... هو هبط مع المحامي كيهضرو وهي الخلعة كانت غتسكت ليها القلب هنا عرفت زائد الاحترام للي كتعطيه لوليد كتاشفت انها كتخاااف منو واخا شخصيتها للي كتحس بيها قوية الا الخوف للي الداخل ديالها مسيطر عليها وكتحاول تبين العكس... خايفة من ردة فعل ديالو حيت عارفة كاراكتير ديالو تفكرت أمال منين كتقولها زهير الا عرفت بعلاقتها لقديمة مع أنوار غيقتلها وهي كانت كتستصغر هاد المشكل وتقول الثقة ولكن دابا هي فنصف موقف أمال.. مع التنهيدة دخل وليد كيشوف فيها ويفهم دوك الملامح... وقفت وملامحها مكرهة)
انا غنمشي
وليد: جلسي اهند
هند: لا.. (هزت صاكها بغات تخرج ووليد وقف فلباب مانع عليها لخرووج شافت فيه مغووبشة) شنو باغي مني دابا
وليد: انا نوصلك
هند: مبغييتش أوليد باغيا نتمشى شوية
وليد: لا.. انا نوصلك ونتي مديري فرووحك والو المحامي غيتكلف
هند: مدايرة واالو ومهزاش الهم صافي داكشي اجراءات قانونية كما قال المحامي ونتا عندك النسخة ديال الاستقالة بالوقت سووو معنديش مناش نخاف
وليد: (قوس عينو فييها مركز فيها... حرك راسو باه) بقاي شوي نهود نكمل مع شي كليان ورجع
هند: بالسيف نبقى!!!
وليد: واه.. (خرج بغات تحل من موراها جبد سوارت وسورت لباب خلاها كدق عليه من باب الزاج يجي يحل دارها اشارة) انا جاي (هبط وفراسو شحال من مطرقة وهي بقات تمااك باش تفكر مزياان جلست فكرسي ديال لبيرو حتى من تيليفونها عندو بقات مراقبة الكاميرا وكتشوفو كيخدم مع الناس... حتى جا عندو أشرف جلس فوق كرسي حل بيسي وشد تيليفون من عند وليد)
هند: ويلي على فضييييحة حتى من أشرف داخل فيها!!!! (بقاو شي 10 دقايق ناض أشرف دا بيسي ديالو ومشا وهي بقات تويل وعارفة أشرف هاكر خطييير.. تم طالع وليد ناضت بالزربة جلست فكرسي اخر دارت رجل على رجل وصنعت ملامح باردة فوجهها دخل وليد)
وليد: هنووودة نتغداو
هند: بغيت نمشي فحالي أوليد
وليد: مبغيتش نخليك مقلقة مني
هند: معليش ولفت هادشي دياالك
وليد: رواحي نمشيو نتغداو ونديك للدار
هند: لا تابعني نجيب غيثة
وليد: غيثة أمال تجيبها (جات بغات تمشي وشدها كيرطب معاها وهي واالو حتى تم جارها معاه ولكن بلا فرطة...)
أمال: (بقات فلبيت معصبة باغيا تفهم غير هاد عيشة مالها معاها ماذاتها مواالو باغية بنتها تعيش حياتها ولكن هي لا خاصها تعيش كما عاشو لكبااار.. ديما كترجع لنقطة وكان كانو عندها واليديها واقفين معاها مكانتش غتجرأ لا هي لا غيرها وعاد مكتبغيش مشاكل الخوووت وتكون هي سباب فشي خصاام بقات ساهية حتى هزت تيليفون كتشوف لقات بقات غير 4 ايام على عيد ميلاد ولدها وزهير لدابا مذكر واالو وهي مكرهتش دير لولدها عيد ميلاد زوين تدق لباب وعرفت مغتكونش عيشة للي دقت ماشي من عوايدها كانت أمال2) أمال دخلي
أمال2: (دخلت سدت لباب وجلست حداها) على سلامتكم بقيتي بزاف فداركم
أمال: كنبدلو الجو شوي
أمال2: مال وجهك
أمال: (قاست الجرحة للي فحنكها) واالو غير تجرحت
امال2: عرفتي دوزت أحسن ايامي أنوار تبدل ورجع كيديها فية
أمال: مزيان، هادشي للي بغينا
أمال2: (متبسمة) عرفتي عيد ميلادو غدا مكرهتش نديرلو شي مفاجئة
أمال: اممم ديريها
أمال2: ݣلت نعرض ݣاع لفاميلة
أمال: راه عيد ميلاد ماشي طهارة هه داكشي يكون بيناتكم
أمال2: واشمن ربح عندي انا بغيت نعرض على لبنات وخالتي وعمتي
أمال: نتي تعرفي اختي
أمال2: ݣلت الا بغيتي نخرجو نضومونديو شي حلوة وداكشي
أمال: اممم نشوف مع خالك
أمال2: عفاك عفاك عفااااك اختي متردثهاش فوجهي عندي غير نتي للي تعاوني وانا بغيت نديرلو مفاجئة باش يعرف شحال نبغيييه
أمال: والله منقد نجاوبك تسناي نݣولها لزوهير (تم داخل نيت لقاهم جالسين) زهير كنت نتسناك
زهير: هانا... اموول لباس
أمال2: الحمد لله اخالي ونتا لباس عليك؟! (كان وصاها متقول والو على حساب لبني.. كتقرس أمال تهضر)
أمال: زهير أمال بغات تݣولك شي حاجة
زهير: واش؟؟!
امال2: (حشمت وحنات راسها)
أمال: عيد ميلاد راجلها غدا بغات ديرلو مفاجئة وبغاتني نديها لفيلاج تضوموندي حلوة وشي حاجة
زهير: انا نوصي صاحبي نتي باغيك
امال2: شكرا اخالي بزااف (وقف) هالي متݣول والو لأنوار
زهير: واخا اجنية كبرتي وليتي تسخري خاالك
امال2: هههه (مشات كظحك حشماانة هو سد لباب وجلس حدا أمال للي قلبت وجهها زعما مقلقة)
زهير: ابرديييي ودورت وجهها علية.. لهاد الدرجة توحشتي كمارتي
أمال: (الضحكة للي كتشدها كضيع ليها الهبة)
زهير: نوضي معايا نوريك شي حاجة قبل ميطيح ظلام
أمال: لا.. انا جيت هنا غير حيت عندي خدمة دناس خاص نݣادها فوقتها اما نبقى فتاوريرت فدار عمي
زهير: اممم بعدا مّا ݣالتي غير دوري وتبكي باغية ترجعي لعندي
أمال: (قوست عينها كتحلف فالحاجة للي مكتستر واالو)
زهير: (شد يدها باسها) هانتي غتعرفي علاه مجيتش نجييبك (والو مكتشوفش فيه دورها بالسيف ونوضها من بلاصتها وهي كتعنت معاه خرجها من لبيت وتصرفت عادي هبطو فاتو ديور مع دخلو لجنان كيبانلها شي حاجة فشكل هو جارها من ذراعها وهي تابعااه حتى وقفو قدام بيت طوييل عاد مبني بعد منها وهي كتشوف) هنا فين لاتوليي ديالك وغتبداي تخيطي وتفصلي على رااحتك.. (غير مبلقة عينها) بقا غير يتفينا على ذوقك ونجيبلك لماتريال والسلعة للي تحبي
أمال: (مصدومة فمدهشرة شافت فيه بصوت خافت) حلف!!
زهير: ومرة مرة نضرباك فيه شي **** بنكهة الغرزة والراندة...
أمال طارت بالفرحة بقات غير كتنقز بحال لهبيلة وهو كيظحك عليها غاافل على العينين للي متبعينهم فسطح وكانو براسهم كيتسناو شنو هي هاد المفاجئة وعلاش مبني هداك لبيت واخا مفهمتش ولكن من فرحة أمال باين شي حاجة ليها... ضارت عندو تعنقو وهو يردها ليها كما دارت ليه فتاوريرت
زهير: بنادم ݣلبو شين وماا فيييه نية
أمال: (عنقاتو كظحك) فرحت بزااااف ربي يخليك لية احبيبي
زهير: غير ݣوليها زييينة
أمال: (شافت فيه) وغي حيت توحشتك والله ودازت علية خايبة بلا بيك ولفتك ولفت ديما نكون حداك وقسما بالله
زهير: اممم تيقتك الآلة غير هو لحوايج جبتهم من عند الخياط وخاصك تكمليهم (فرحت حيت مهتمة بخدمتها عكس شنو كان متوقعة منو) بقات 20 يوم
أمال: ان شاء الله نكملهم
زهير: وهنا على ميتفينا ويتݣاد تكون جاتك خدمة وهانتي تبداي تلونصاي شوي بشوي
أمال: (بابتسامة عريضة) ان شاء الله
زهير: ولكن من دابا عندك 3 دالناس من اولوياتك اولهم انا واعوذ بالله من قول انا ولكن حقي منزݣلوش كما جبت أمال نهار اللول نبغيها تبقى وتزيييد ݣاع ولادك ومّا (حركت راسها باه فرحانة) وربح النص بالنص
أمال: (جمعت الظحكة) شنوهووا!!!
زهير: كيسمعتي
أمال: كفاش بالنص بالنص
زهير: ومالك تخلعتي ولا داخلة على طمع فية
أمال: وشنو يتشاف فيك اخر من غير فلووسك
زهير: *** ولا هداك ممقنعكش
أمال: زووووهيييييير!!!
زهير: دخلي يا طميميييعة عقت بيك من نهار اللول غير ݣلبي مساعفنيش
أمال: هههه
زهير: (حل لباب وضربها فترمتها دخلت كان لبيت كبير وبالطول فيه غير السيمة جوج سرااجم كبار وبيت للي فهمات طواليط صغيرة متر على جوج عاد غيتقاد من بعد كان اول اقتراح لباب يزيد يكبر ريكون كوليس بالزاج على باب حديد مشبك من برا ولفينيسيون يدير شنو ما بغا حيت للي مهم هو الديكور دخلت الحاجة وبناتها كيشوفو فهمو سبب علاش تبنى لبيت وتنشر الخبر للي خرجاتلو مبروك من القلب وللي حداها قالها من حلاقمو.. )
هند: (بقات على اعصابها مابغاتش تصالح معاه حتى طلعو الدم وصلها ورجع للخدمة حست براسها تجرحت منو منين شكر فوحدة قدامها وماشي اي وحدة بنت كانت حاطة العين عليه بينتها مرة جوج وعشرة وللي مرضها كلامو صحيح حيت باينة متمكنة فخدمتها وبدليل قضية زهير للي كان غيضرب فيها اعوام دالحبس ومكملش شهرين فيها... ولكن المشكل العويص هو خافت تفضح العلاقة القديمة ديالها التيليفون كانو فيه ميساجات منو فاللول فاش كان فيصل مرة مرة كيصيفط ميساج ديال واش عقلتي فاش كنا بجوج ولا منين كنت كنقريك ونخرجو نسهروو وهي كانت كتمسح كولشي راس كيقولها تمشي ترغب أشرف للي غيجبد كولشي على الاقل يخبع هاد الميساجات وراس كيقولها هاد الميساجات هوما للي غيخليو فيصل ميربحهاش بلعكس ممكن يتقلب عليه كولشي بتهمة التحرش لمتزوجة وخدامة عندو.. وهنا وليد مغيسكتش وينوضو مشاكل كبااااار هي فغنى عنهم تحطت فموقف خااايب وندمت على نهار للي خدمت فيه فديك المصحة... بقات كتفكر وراسها غيطرطق هزت بنتها بغات تخرج تمشي عند امال حتى كتلقى ظلام مزعمتش تخرج فهاد الوقت للي كتكون الدنيا خاااوية.. صونات على أمال فلفكس جاوب زهير فلبلاصة طاحت عليها فكرة زهير يعاونها) حم زهير واخا تجي نتا وأمال عندي الدار
زهير: ياك لباس اختي؟!
هند: لا واالو غير بغيت نستسار معاك فشي حاجة
زهير: واااه.. وليد جا؟!
هند: مو بغيت نستاشر معاك قبل ميجي وليد
زهير: صافي هاحنا جايين.. (قطع معاها مشا خبر أمال للي كانت فدارها كتخدم لبست كبوطها وزادو مخلية ولدها عند حناه للي مكيتفرقش عليها...)
هند: (ندمت علاش عيطت لزهير عارفااه ميخويش بيها ويقولها لوليد ولكن خافت يفهمها غلاط... وكان امرها حلات ليهم لباب حيت عارفة المشاكل للي جاية من بعد دخلو جلسو معرفت منين تبدا)
أمال: هند مالكي اختي!!!
هند: خويا نتا عارف المشكل للي عندي وداك لحمار شنو مشا دار
زهير: واه كان ݣالي وليد ولكن متخافيش
هند: نخاف حيت بالصح كان مممم مبسل شوية علية
زهير: هااااه ولاه مݣلتيهاش؟!!
هند: شنو غنقول نتا تتعرف وليد
زهير: واه تݣوليها ومكاش خاصك تبقاي خدامة تم شوفي هند نتي راكي ختي غنݣولك نيشان واش كاااين
هند: المشكل انا بالصح كنت تنعرف فيصل قبل (شافتو خرج عينو تخلعت) كنت تنعرفو حيت هو للي قراني صافي
زهير: اممم.. ووليد عارف
هند: (توترت وحشمت) لأ
زهير: خاصو يعرف
هند: بففف خفت بزاااف (بغات تبكي) خفتو يفهمني غلاط وانا عايشة مرتاحة معاه والامور تقادات
زهير: (زفر) واش نݣولك اختي الغلط طرا وانا منبغيش ليكم طيحو فشي مشكل بحال دا
هند: خفت من لميساجات نفضل نخسر خدمتي ولا نخسر وليد
زهير: نسولك جاوبيني ݣود (حركت رأسها باه) نتي درتي شي غلاط
هند: حيت قبلت نخدم تماك شي حاجة اخرى اقسم بالله مدرت شي حاجة قبيحة ولا حتى عمري جاوبتو بلعكس ديما تنقمعو (غير كتشوف فيه كيكون داير شوفة بحال كيسكامي ويميزي هضرتها واش بالصح ولا كتكذب كتحني عينها من الحشمة وفهمت أمال)
زهير: (وقف ووقفت امال) انا نوصل أمال للدار ونمشي نشوف واش نݣد نديرو
هند: (وقفت) والله اخويا زهير عمرني اذيت ولا درت شي حاجة قبيحة لوليد
زهير: عارف اهند وعارفك مزياان ولكن فبحال هاد الامور خاصك تعرفي واش ديري (حركت راسها بندم وأمال غير ساكتة متخيلة الا عرف شي نهار علاقتها لقديمة... ودعو هند وصل أمال للدار وهو مشا يشوف واش كاين ميتݣاد...)
أشرف: (هز عينو لقى زهير دخل للمحال) بن عمي!!
زهير: داز تواليك وليد؟!
أشرف: عاد ݣطع شي نص ساعة يكون هنا.. (باغي يهضر ومتردد) على شي خدمة غيجي هو واحد المحامي
زهير: وريني
أشرف: (بتردد شاف فيه) علاه!!
زهير: (بقا كيفكر شحال) ولا عرفتي شنو وريني لميساجات ونݣولك منين غتعطيه نتا
أشرف: (براسو جبد ميساجات مبين ان هند كانت فعلاقة معاه وهادشي مغيعجبش وليد حيت اصلا هو باغي يبين انه ديميسيونات وتقبل الاستقالة ديالها..) زهير واش نجبد ميساجات ديال 5 هادي
زهير: واش داك نتا ليهم جبد غير منين خدمت
أشرف: (وراه زهير فهم شنو كاين واخا مابغاش يعرف شنو ماضي هند حيت مكيعنيهش وكتبقى حاجة خاصة.. دار عين ميكة وصل منين بقا كيصيفط ليها ""علاش مجيتيش واش كاين شي مشكل..."" على الاقل 10 دلميساجات كان كيصيفط ليها فنهار حتى ليزابيل للي مكانتش كتجاوب عليهم ومنين جاوبات قالتلو عيقتي وانا غنديميسيوني حيت نتا خنقتني مهم جبدو ميساجات وابيل للي غيخليو وليد ميقتلش فيصل زهير مشا وهو يدخل وليد مع المحامي... )
~~~~~~~~~~
أمال: (دايرة ابيل فيديو مع هند كيتعاودو وفنفس الوقت كتخيط لحوايج.. سمعت الدقان) هند انا نحل
هند: صافي اخيتي انا نقطع غير يوصل زهير قوليهالي والله حتى حشمت بزاااف
أمال: واخا ختي.. (قطعت مشات حلت لباب كانت بشرى خت انوار) سلام دخلي مرحبا
بشرى: فين غاطسة ابنتي جيت ݣبيل نسلم عليك ملݣيتكش
أمال: كنت خرجت انا وزهير
بشرى: اوا الحمد لله على سلامتك خليتو بلاصتكم نتي ومّا وداك لغزاال
أمال: (تبسمت معاها يمكن هي الوحيدة من بعد الحاجة ومينة للي كتحس بيها مكتكرهاش فعائلة الكاملة) دخلي (دخلات جلسو فالصالة مداتهاش للبيت فين كتخدم مشات للكوزينة حلت التلاجة جبدت غير بيسكوي وعصير حطاتو حيت أغلبية لماكلة فدار الحاجة عندها غير سقاطة)
بشرى: علاش جالسة بوحدك هنا
أمال: غي جالسة وصافي
بشرى: متديش على عمتي عيشة راه واخا هكاك ݣلبها زين وتبغينا
أمال: غتبغيكم نتوما للي من دمعا ماشي يانا.. والله عمرني حتى هزيت العين فيها
بشرى: عارفة وراه باين المعدن ديالك مربية ومخلقة علاش عمي غير جا وطااح فيك
أمال: (تبسمت وشحال كيعجبها للي يشكرها حيت اصلا قلال للي كيشكروها) ربي يخليك
بشرى: متديش عليها ديري كلامها غير ظحك.. (بقاو مجمعين حتى جا زهير ومشاو لدار الحاجة حيت غيتحط لعشا..)
يتبع...
التعليقات
لا توجد تعليقات بعد، كن أول من يعلق.