محتوى القصة
وليد: (رجع للدار كان صقيييير الضو مطفي داز للكوزينة حط شي تقدية مكاينش ريحة طياب ولا لعشا استغرب حيت ديما كتكون مطيبة، طلع لبيت لفوق حل لباب كان مطفي الضو وغير ضو تيليفونها للي مشعول فوجهها.. شعل الضو مشافتش فيه) هند!!!!
هند: وي..
وليد: (دخل طل على بنتو للي ناعسة مغطية مزيان واخا لبيت دافي شاف فيها هز التيليفون من يدها شاف كانت كتفرج فشي فلم عاد حطو فوق لكوافوز) مالكي؟!
هند: شنو هاد الحركة دابا!!
وليد: درك مالكي؟!!
هند: والو عادي جالسة فبيتي فامان الله شنو لقيتني تندير
وليد: باقي غضبانة من صباح
هند: مغنتناقش معاك اوليد فهادشي عفاك خليني عليك
وليد: لا منخليكش مفهمتش عصرنا صباح وسالينا ونتي مزال هاك
هند: شكون قال سالينا كلامك انا عمرني نسااااه منين نتا معمرة ليك ديك المحامية العين ومبهووور بيها وبذكائها وكنعرف شنو اخر علاش انا رابطني حداك (تحركت بنتهم)
وليد: رواحي نهضرو لتحت
هند: معندي منقوولك
وليد: هيييند ياك كلامك نهار اللول منتناقشوش ݣدام لبنت
هند: شكون قالك انا باغية نتناقش راسي ضارني بغيت غير نعس
وليد: تنعسي... (شافها تكات وغطات راسها مكان غير طفا الضو وخرج اما هي بقات كضور عينها جاب الله لقات سبة باش ترد كرامتها شوية واخا عارفة راسها غالطة فحقو وبزاف.. عاود سمعت لباب تحل مشا جيهتها بلا ميشعل الضو جلس حدا كرشها ولمس على شعرها) هند
هند: (عجبها الحال) اممم
وليد: راه قتلني الجووع
هند: (حلت عينها جاب الله الضو مطفي) شنو!!
وليد: علاش مݣاديتيش لعشا؟!!!
هند: (بغات تدفعو وشد فيها كيظحك) طلق مني
وليد: ههه واش الغضبة داخلة فيها حتى لماكلة من صباح وانا من قنت لقنت وفالتالي نجي لݣا الصحرااا
هند: (بقات غير كتشووف ناضت بنتير وهو كيظحك هبطت للكوزينة كتنݣر جبدت من لفريݣو بيتزا مقادة جامدة رشت عليها فرماج ودخلتها لفران الضو جا عندها لابس كيطمة وهي مربعة يدها مكتشوفش فيه)
وليد: راه انا للي خاص يطلعلي الدم منك امدااام
هند: الا طلع دير اولويييز (جات بغات تخرج وهو يزرب حبس عليها لباب)
وليد: سمو دالهضرة درك؟!!
هند: بعدني أوليد
وليد: باش تتعجبيني صنطيييحة دايراها ݣد راااسك وتخرجي عيينك من لفوق
هند: (خرجت عينها) شنو درت؟!
وليد: وااالو حتى لغدا منين يجيبلي أشرف داكشي ونعرفوو
هند: اسيدي مديريش متخااافش وزايدون نتا فين باغي توصل واش بنيتك كتخيل نكون كنخوونك
وليد: (هنا تقلب وجهو) اااخر مرة نسمع منك هاد الكلمة انا مشكيت مظنييت انا منوض هاد لبلبالة عليك نتي باش خدمتك تبقى نقية عرفتي طلعي تنعسي وبناقص من شي عشا ديااالك.. (ضرب كرسي برجلو حتى تهزت وخرج بقات غير كتشوف وقلبها مرعد...)
أصبحنا وأصبح الملك لله...
هند: (صونات على المساعدة سولتها واش كاين شي رونديفو اليوم ملقاتش علماتها باش مغتكونش بلا متشد شي حد جلست مخنوووقة من بعد ملعباتها عليه خرج فيها وتقليقتو خاايبة نعس بلا كلمة بلا جوج واخا الجمعة مكيخدمش صباح بكري خرج.. نظمت كان ممكن تشدو كيف ديما بكلامها الحلووو ولكن حتى هي حاسة بيه جرحها وقلقها منين بدا كيشكر فأحلام.. ناضت مغبنة بنتها مزال ناعسة هبطات للكوزينة لقاتو صاوب اتاي كلا للي قسم الله وخرج صونات عليه مجاوبش فاقت بنتها طلعت عندها ودارت روتينها جمعت بيت نعاس هبطتها فطرتها اما حتى هي تسدت ليها الشهية تفكرت جداتها شحال بكااات جاتها فكرة ناضت تقاد كسكسو صونات على أمال للي مكانتش من العاݣزين كانت قداتو وجات عند هند للي كتعاود ليها وانا كتوبخها وراتها شنو دير ورجعت كتكمل خدمتها... من مور صلا دخل وليد لقا بنتو خدا لباب فين حطاتها هند بلعابها طلت من الكوزينة شافتو كيظحك معاها ويهضر ) غييييثة شكووون
وليد: علاه شكون موالف يحل لباب عليك ويدخل
هند: انا غير سمعتها تظحك قلت يمكن تيليفوني حداها وصونات ماما ولا مك
وليد: (مجاوبهاش بقا مع بنتو حتى جات كتحط كيسان دلبن ومعالق وتمت جايبة ݣصيعة صغيرة ديال طعام والروائح الزكية ديالو استغرب ولكن فكر ان بنت عمو للي صيفطاتو) الله يخلف عليهم
هند: شكون؟!
وليد: للي طيبو وصيفطوو
هند: انا للي طيبتو (جابت كرسي مرام وحطاتها كانت ديجا وكلاتها وعطاتها ديسير تاكلو وتلهى فيه على متاكل)
وليد: (تعجب هز معلقة) يا باسم الله (كلا منو كيستطعم المذاق) طعام نييت
هند: علاش شنو حسابلك غتلقى!!!
وليد: تبارك الله عليك
هند: (تبسمت) ميغسي
وليد: (بقا كياكل وهي كتسناه يهضر حتى نطق) داك الكلب مشا تنازل فالمحكمة اليوم
هند: (تصدمت) كفاش؟!!
وليد: حتى يانا مفهمتش ولكن انا الاثنين غنمشي للمحكمة رفع دعوة عليه
هند: علاش
وليد: ودوك لميساجات وليزابيل سمووو حولي يانا ؟!!
هند: (الا هضرت هاك الكصعة غيطيرها فسما سكتت ولكن كفاش تنازل تفكرت زهير ياكما مشالو وهدا اشمن دعوة بغا يرفع الا تحرش راه غتزيد تكفاس عليها كتر هو معتابر هادشي شخصي ومن حقو ولكن هاكا الامور غتزيد تعقد) وليد كيف جاك كسيكسو ديالي
وليد: زيين تبارك الله مكنتش نحساب طيابك هاك
هند: (تبسمت) غير على قبلك نضت تنتعلم ليه عارفك تتبغيه بزااف
أمال: (غير تغداو ناضت جمعت الدنيا رغبتها امال2 تقاد معاها على حساب عيد ميلاد وزهير كيصوني عليها تمشي عندو للدار وباين شنو باغي) واخا انا جاية نمشي نتكلم لخا.. (دخل أنوار حنات راسها مهضرتش معاه طلت على الحاجة لقاتها ناعسة هي وولدها عاد مشات عند زهير)
انوار؛ وين راحت؟!
امال2: بغاها خالي مشات تشوف واش بغا وترجع
أنوار: راه باين واش بغاها.. مهم انا خارج
امال2: معاش تجي فلعشية؟!
أنوار: 8 تݣبضني هنا علاه؟!
امال2: والو غير بغيتك تجيبلي شوي لبيسطاج وكاجو واللوز
أنوار: مع ديك 7 ونص فكريني الله يهنيك (خرج ركب فطموبيلتو وزااد...)
~~~~~~~~~~~
امال2: (عيات تسنى أمال ومزال مجانا ناضت عجنت عجينة البيتزا شي ساعة ونص جات عندها مبدلة حوايجها بداو كيقادو للي قابلت لفران وللي كتزوق كملت معاها طياب وهبطو للدار جمعات معاها وزوقو بلبالونات وداك تخربيق زهير كان جاب لاطاغط خلاها فدارو غير كملو أمال مشات تكمل خدمتها هبط حداها زهير كيشوف داكشي عجبو بزاااف)
زهير: انا غنصور هادشي للي درتي والا جاتك خدمة اخرى ونصيفطو لشي ناس فبلجيكا
أمال: بالصح (فرحانة) احسن حاجة
زهير: نتي غير كملي بشوية عليك وخدمي بالنية باش ربي يسخر ليك وشوية بشوية تكبري مشرووعك
أمال: ههه علاش هدا مشرووع
زهير: واه.. مشرووع زيين ودخلو منوو فلوووس صحيحة نتي غير زيدي تعلمي والا بغيتي دخلي تعلمي شي حاجة اخرى ندخلك ليها
أمال: امممم نشووف
زهير: شوفي الآلة ولكن قبل تعلمي تحسبي الدرهم فين جاية وفين ماشية انا شريتلك السلعة وربح ديالك ولكن هاد لفلوس غيكونو هوما راس مالك وهنا نعرفك واش ݣادة بالمشروع ولا غير غترزيني فشي خطية
أمال: هههه لا لا غنعجبك
زهير: هاحنا نشوفو.. مهم انا وليد نخرجو للقهوة خاصك شي حاجة
أمال: لا غير متعطلش راك شفتي شتا برا
زهير: واخا اغزاالي (ناضت باستو عاد خرج وهي كملت خدمتها فراااحة...)
أمال: (غير جات عندها امال2 طفات الضو على لبيت فين كتخدم خرجت مسورتااه ومشات تكمل معاها التوجيدات كانت حتى بشرى لحقت الحاجة وعيالات ولاد لكبير وليلى ولوليدات صغار حتى رجال للي فالدار جاو كولشي واجد ومقاد أمال لبست غوب صواري كانت مخيطاها أمال وعطاها دوز بيها هاد المناسبة دارت شال قدات ميكاب خفيييف حيت الدنيا مخلطة غير زهير صيفط ميساج طفاو الضو سبقو باركة طموبيلتو وانوار كيقاب فين يحط ديالو حيت أمال حطا طموبيلتها عوجة بحال ديما)
أنوار: ههه بحال ديما
زهير: جيبها ورااها باش تعلم (حط أنوار طموبيلتو من موراها وهبطو) صقيييير
أنوار: بهاد النو كولشي مكمش (زربو دخلو للدار هاربين من شتا تم طالع وهو يوقف زهير) واشتا مطالعش!!!
زهير: أمال راها فداارك بغيت سوارت الدار نسيتهم
انوار: واااه... (استغرب حيت أمال مكتجيش لدارو دق) يمكن مكان حد (جبد سوارتو حل دخل ياله شعل الضو وهو يشوف كولشي وااااقف كيظحكو ومرتو طلقت ديك لعيبة للي كتطلق وريقات صغار فيما نازلين علييه تصدم شاف فالطبلة طورطة ديال عيد ميلاد الديكور تبسم كولشي كاين تمات الحاجة جات معنقااه عنقها وشاف فامال متبسمة غير جات العينين فبعضياتهم قلبااتهم لزهير جات بنتو نقزت عليه عاجبها الحال شاف فمرتو درعها بيد)
الجنية
امال2: ههه عيد ميلاد سعيد
كولشي بقا كيبارك ليه دخل وسطهم صفقو عليه بقاو فالهضرة وكيظحكو شعلت أمال الشمعة للي كانت فالطورطة خلا بنتو للي طفاتها قطعاتها وبقات كتعطيهم طروفة وشي لاخر للي بغا شي حاجة هزها زهير ناض للتلفازة شعلها دار الرݣادة ناض كيشطح ووقف أنوار حتى هو يشطح وكيصفقو حيحو ديك الليلة حتى لكبير ناض دار طرح وعاد الحاجة للي نوضت أمال ولكن شوفة زهير كافية باش تبقى غير واقفة كتصفق صاافي.. تحط لعشاا كلاو جمعو الدنيا وتفرقو لكبير وولادو وعيلاتهم مشاو الحاجة طلعت من مور يوسف للي كيسبق يمشي لتماك باش ينعس حداها بكترة مولفها جات أمال وزهير وبشرى خارجين..
امال2: حݣا مرت خالي ݣبيل فاش كنت نجمع لݣيت تصويرتك هنا
أمال: شنو!!!
أنوار: (عينييه خرجو مكرهش يقتل مرتو ويدفنها فبلاصتها)
امال2: انا ندخل نجيبها (بقا صقييير والخوف بين 3 أنوار أمال بشرى)
زهير: (ممسوقش حيت ظنها ديال شي عرس ولا شي حاجة بقا كيخرب فتيليفونو كيشوف شنو السلعة للي غيجمعها لشي كليان ويصيفطهالو لأكادير)
أمال2: (تمت جايباها أنوار مطرطق عينو) كنت لݣيتها تحت لماريو (عطاتهالها شافت فيها كانت تصويرة على غفلة فقهوة ومتأكدة هادي كانت فوقيتة للي كانت فيها مع أنوار طواتها على جوج)
أمال: شكرا
زهير: هاري نشوف
أمال: حتى للدار راني نسمع فصوت مروان دابا يهبل مّا (معرفتش كفاش رجليها هزوها وطلعت فدرووج كتجري تابعها زهير...)
امال2: بشرى انا نݣاد ليك تنعسي
بشرى: حم لا معليش انا ندي ليلا تبات معايا اصلا تونس فية
أمال2: (هي باغية تبقى منفاردة مع راجلها تعطيه الكادو ويكملو السهرة) صافي وااخ (بقات جالسة وصقييييير حست بالجو مكهرب عاد كان كولشي ظاااحك)
بشرى: نوض انا انوار هز ليلا وجيبها عندي
(ناض أنوار هز بنتو للي ناعسة أمال لوات عليها كاشميرا وتمو خارجين ولوخرا دخلت لبيتها كتجري تلبس لباس السهرة وتقاد مكياج.. غير خرجو قبل ميشعل الضو باش يخرجو من لباب لكبير جاتو طرشة فوجهو)
واش هبلت؟!!!
أنوار: (بقا جااامد فبلاصتو مكانتش طرشة كبيرة ولكن ألماتو خصوصا من عند بشرى للي عندها مكانة خااااصة ومبغاش يفقد احترامها... بصوت منخفض) بشرى راه برووحي معارف واش صااير
بشرى: (بنفس النبرة) راه باااين واش داك اخوويا واش دااك واش باغي تفرتك هاد شمل
أنوار: نحايدو من هن ابشرى (خرجو كانت شتا) دخلي ابشرى تنعسي هنا
بشرى: انا نطلع عند مّا منها نحضر الا صغار شي بروبليييم عند ديك بنت الناس
أنوار: (بقا ساااكت مفهمش ديك التصويرة اش جابها لتماك وهو مخبعهم مزياان مصالحش يهضر هنا طلعت بشرى وتبعها أنوار هاز بنتو مكانش حس يعني كولها دخل لبيتو دخلت لبيت الخاوي جبدت لكواش من لبلاكار فرشت ليها وليلا.. سد لباب أنوار ودخل)
بشرى: عنداك تمشي تفشها فمرتك راك هكاك غير تبين راه كاين شي حاجة (حرك راسو باه) روووح أنوار خلينا نعسوو (حنا راسو وخرج رجليه داوه لباب بيت زهير حط ودنو كيتصنط)
زهير: ورينا ديك التصويرة حݣا
أمال: دابا وقت تصااور ازهير (بابتسامة)
زهير: ههه رواااحي ونتي هاربة (أنوار بعد ودنو كيحك فجبهتو بتوتر هبط لتحت دخل لقا مرتو موجدة راسها ولكن الݣانة والنشاط طااارلو دار راسو كيعرج)
امال2: مالك احبيبة
أنوار: معرفت رجلي تشدت مع لحديد فلبرد كتبقى تعطيني لحريق
امال2: رواح نديراك دوا
أنوار: انا نشرب دوا دلحريق خاص غير نتغطا مزيان امولتي سيري ديريلي قرعة لما سخون نديرو عليها يمكن يهدن لحريق (مشات أمال2 وبقا فلبيت حيد حوايجو لبس بيجامتو ودخل لفراش عقلو غير ساااااارح حتى جابت القرعة حطها فوق ركبتو وغمض عينو هي عيات تسنى ينوض)
أمال2: انوااار كيف بقيت (لا رد دخلت تكات حداه طلقت الشوفاج يسخن لبيت بقات هكاك حتى تسدو عينها بلعيا وهو حل عينو كيشوف فسقف...)
محمد: (فاق لقى مو جالسة فوق الصلاية وغير ساهية تعجب حيت شحال هادي مصلات دماغها تلاشا كفاش تفكرت دابا صلا... مشا جيهتها) مّا!!
فتيحة: (مسحت على وجهها وشافت فيه مع ظلام الضو مكانش باين فيها مزيان ولكن كاين لمعة فعينييها وصوتها لمخنوق) فين خوك اولدي؟!
محمد: علي!! راه حرݣ
فتيحة: علاه خرجوه من الحبس باش يحرݣ؟!
محمد: واه خرج ومشا حرݣ صافي هو بغا يبعد خلييه
فتيحة: (حركت راسها بلا) ݣولي اولدي فين خوووك
محمد: (زفر) مااات الله يرحمو ويغفر ليه
فتيحة: (شهقت وبقات كتبكي حسات بيها أيام وهاد الحلمة فراسها دارت يدها على وجهها كتبكي حنا على ركابيه وعنق مو للي بقات كتبكي وصوتها وصل لمريم للي جات تشوف شنو وااقع شعلت الضو ولقات داك المنظر..)
مريم: شنو واقع؟!!!
محمد: عرفت علي مات (بقات كتبكي بحرقة تفكرت كولشي تفكرت شنو دار فيها ولكن عمرها بغاتلو المووت)
فتيحة: كيف مات واش فالحبس؟! ياكما قتل راسو؟!!
محمد: حساب مع نسيبو
فتيحة: (زادت كتبكي بصوت مرتفع) من نهار اللول ݣلتلو يبعد منو ولكن فلوس عماااوه وعماوني معاااه.
محمد: دعيلو بالرحمة والمغفرة
فتيحة: كرهتيه اوليدي؟!
محمد: درت لي علية امّا معاه حدي نديعيلو بالرحمة ولكن شي حوايج مزال مبااانو
فتيحة: نسا اوليدي هو راه عاطي حنكو لترااب براكة غير دشي
محمد: ما (حتى بغا يهضر وهو يسكت ماشي وقتو مزال غيعرف شحال من حاجة) .. نوضي تنعسي شوية ولا تبغي تفطري
فتيحة: (حركت راسها غير بلا جات بغات تنوض مقدااتش مدت ليها مريم يدها عاوناتها) الله يرضي عليك ابنتي (داها محمد حانية راسها مكمشة وقلبها كيتعصر عطاها دواها للي كيرخيها شرباتو وضارت جهة الحيط كتبكي فصمت حتى غفات...)
مريم: شنو طرا امحمد؟!
محمد: فقت نصلي لفجر لݣيتها تبكي ومفكرة (زفر) سيري الله يرضي عليك ݣاديلي اتاي نفطر نمشي
مريم: واخا.. (مشات قدات لفطور حطاتولو فطر فصمت باغي ومباغيش يعرف الحقيقية للي غتكون مؤلمة ومرة... هو مشا للخدمة وهي رجعت تكات حتى ل10 عاد كتفيق....)
شيماء: (حتى هي دخلت مريم للحضانة باش تعطي وقت لمرام شوية ولقات راسها تغلبات عياات أكترية مكتخرجش من الدار نهائيا وقتها بين رضاعة سهير تبدال وعاد مقابلة مريم شقا ديال الدار واخا كيعاونها أشرف منين كيكون فالدار ولكن قنطت بغات تبدل الجو.. صونات على هند مجاوبتهاش وحتى أمال رداتها بعينيها محسداهمش ولكن مكرهتش وكان حتى هي بطموبيلتها وتحرك شوية تشوف غير بنادم وتبدل لحيوط دخل أشرف كانت وقت لغدا مصاوباتوش دخل لقاها كتبكي حدا لبوطاجي حط الخبز والديسير للي جايب)
أشرف: شيما مالك احبيبة؟!!!
شيماء: (طرطقت كتبكي بالجهد وانفاجر النيف حتى هو) قنطت وعيييييت
أشرف: قنطتي؟! مرانيش نخرجكم غي حيت مرام مزالها صغيرة فين تخرج فدلبرد ولعجاج
شيماء: وانا ماشي بنااادم؟!! بغيتني تدفن راسي وانا مزال صغيرة
أشرف: واش جاب صغر ولا لكبر الهضرة
شيماء: انا انا للي جبتو (بنتها بقات كتبكي خرجت من حداه)
أشرف: انا روح نجيب مريم تغدا راني تعطلت عليها ونتي يهديك الله مديريش فرووحك هاك
شيماء: محد نتا مكتيقش فية عمرنا نكونو هانيين ولا نعيشو مرتاحين (مشات مقهوورة حدا بنتها بدلت ليها ليكوش وبقات هزاها حيت عاد كانت رضعااتها... بقات غير ساهية بحزن سمعت صوت مريم داخلة كظحك جات لعندها لبيت عنقاتها وسلمت عليها وشيماء غير كتبسم وقف أشرف حدا لباب) مدرت غدا قضييو نتا وبنتك
أشرف: ونتي تبقاي بالجوع؟!
شيماء: معندي مندير بشي ماكلة
أشرف: الله يهديك راكي ترضعي واش باغية تخرجي على صحتك
شيماء: أشرف بعدني عليك
أشرف: ݣولي واش تحبي تاكلي نجيبولك
شيماء: بغيت نخرج
أشرف: (بقا كيشوف شحال) واخا نوضي لبسي نمشيو نتغداو برا
شيماء: بغيت نبقى نخرج أشرف عفاك متحبسنيش هنا نبقى نخرج ندي مريم ونجيبها ونتقدا الا بغيت شي حاجة
أشرف: شيماااا نوضي نروحو نتغدااو راه باقي تابعني الخدمة (مشا وهي قالت بعدا متفلتش هاد الخرجة عطات لبنتها ترضع بعدا متبرزطهاش رضعاتها شي 10 دقايق.. وزادتها غير جاكيط وهي لبست كيطمة طويلة ولبست سبرديلة لوات شالها تم جاي عندها حيت هبط بوسيت للي عمرها استعملوها وهي هابطة فرحانة هي مريم وشادة مرام ركبات فالطموبيل اللور شادة مرام وحداها مريم)
فين ازين تبغي تروحي
شيماء: (تبسمت) الحوت بغيت ناكل الحوت
أشرف: مرحبااااا غير هو لبكى لاش
شيماء: (تبسمت عاد كانت كتبكي ومكتئبة ودابا نشطاات مشاو لريسطو ديال الحوت دوموندا بلا كبير ومرام حداهم بلبوسيت غير كتبغي تغوت كدك ليها اللهاية فمها كلات حتى بغات تفرݣع ول بقا داتو معاها تعمرو بريوات دالحوت.. داز خدالها حليوات دلاكريم والي تشهات عاد داها للدار دوز مريم لاكخيش للي مشات غير تنعس حيت دوخها الحوت وحتى هي مشات تكات وهو رجع للخدمة ومصر ألف مرة شيما متخرجش وحدها....)
أمال: (الليل كامل منعساتش بالخوف وكتسائل شنو غيوقع السر واش غيتفضح زهير ناعس حداها وهي كتشوف فيها محست حتى دمعة الخوف نزلت من عينها مسخياااش بيه ندمت حيت مقالت ليه والو فاللول كانت غتختاااصر بزااف دالمشاكل والخوف حل عينو مع ريڤيي لقاها كتشوف فيه) حم صباح الخير
زهير: مالكي؟!!
أمال: والو
زهير: ولاه فايقة درك
أمال: طارلي نعاس وصاافي
زهير: اممم رجعي تكااي احبيبة (كان مسخسخ) نوض انا
أمال: (بقات كتشووف فيه وقف كيتكسل حتى دار عندها)
زهير: بالي بقا مع التصويرة اري نشووف
أمال: اشمن تصويرة؟!!
زهير: دلبارح واش دشي عرس
أمال: (خاف يسول بنت خوه) لا غير تصويرة عادية
زهير: واش كانت دير عندهم
أمال: معرفتش بلغلاط يمكن (بقات كتشوف فيه كتحاول تبين انها عادية)
زهير: اريش نشووف
أمال: معرفت فين حطيتها ازهير حتى ترجع على منقلب عليها
زهير: اممم.. واخا (خرج من تماك وهي بغات تبكي ولكن قواات راسها تبعاتو من بعد ملبست بينوارها لقات الحاجة فاقت عاوناتها فلفطور فطرت مجموعين أمال رجعت لبيت تكات وهو مشا للخدمة...)
~~~~~~~~~~~~~
هند: (كانت مشات للخدمة على حساب شي مريض غير خرج علماتها المساعدة ان فيصل كيتسناها خرجت عندو لبرا فقاعة الاستقبال) شنو تدير نتا هنا
فيصل: (وقف) انا للي باغي نفهم واش وليتي دايرة يد مع شماكرية
هند: شنو؟!! ونتا مالك ندير يدي حتى ف (جمعت لسانها)
فيصل: جاي يهدد فية ويستعرض عضلاتو وفمو صاحبي وختي انا هادشي متيخلعنيش اهند
هند: (بقات مشوكية يعني زهير للي شكت فيه هو للي دارها بقات غير كتشوف فيه) اه باينة متتخفاش نعيمة عيطي البوليس
فيصل: خدمتك ودرت ليك اكسبيريونص وهدا الجزاء ديالي
هند: كنت خدامة بذراعي نتا عارف خدمتي كيف كانت.. شوف انا مغنبقاش نبرر ليك حسن ليك نسااااا ونساااا ياله خرج علية واخر مرة تعتب هنا عندي (خرج كيݣمݣم وهي بقات كترجف... هزت صاكها ومونطوها ووخرجت من تماك...)
أمال: (بقات غير صااقرة خايفة بزااااف مشات تحرق التصويرة وتهنى وفمها يقول معقلتش فين حطيتها حتى ينسى.. قلبت بين النموسية ولخشب ملقاتهاش جاتها عجب هزت النموسية كاملة والو مكدورش زولت لفراش وسايد والو مكيناش لدرجة حيدت حتى لموكيط واالو مكاين حتى شي أثااار طلت عليها الحاجة) مّا!!
الحاجة: الاااالي على بنيتي راها تخمل
أمال: امم وااه كان مرون شوي
الحاجة: الله يرضي عليك ابنتي دوزي لداك لبيت طرفيه شوي
أمال: واخا امّا غير نكمل نجي عندو..
الحاجة: انا نمشي لجييهة ليلى راها مصهووطة بسهااين ديك الضرسة للي ݣلعت صباح مرضتها
أمال: صافي واخا امّا انا نلحق عليك (كانت طيبت لغدا مشات أمال غتسطى مع خرجت لقات أنوار خارج من لبيت فين ناعسة ختو غير شافها وقف قربت عندو بصوت خاافت) واش باغي تخرج علية
أنوار: مااا مم أمال انا راه اخر واحد يبغي يآذييك
أمال: مكاينش للي دمرني ݣدك بعد مني خرج من حيااتي للي كل مرة لاسق فيها واش مكتفهمش انا راه مرت عمك تصاويري حرݣهم لاش مزالهم عندك (خرجت بشرى)
بشرى: مالكم؟!
أمال: والو (رجعت لبيتها طالع ليها الدم كترد ديك روينة متأكدة التصويرة خبعاتها قبل ميلحق زهير عليها دخلت بشرى كتعاونها فسكات) غير خلي عليك اختي
بشرى: هو راه قلب مبقات حتى تصويرة فالدار (شافت فيها امال) انا عارفة واش كان طاري من زمان
أمال: شنو؟!
بشرى: داكشي لقديم أمال
أمال: شنو هو؟!
بشرى: عليك نتي وانوار فايام لافاك
أمال: مكاينة حتى شي حاجة سميتها انا وانوار هو كان عارف بنت عمي خطبها وداكشي شغلهم انا عرفتو غير فهادشي
بشرى: صافي واخا ولكن والله حتى كيدير المستحيل باش يبعد من طريقك
أمال: الا ملݣاش كيف يدير متر دالموردة تهنييه قبل ميشعل النيران فالعائلة ويشتتها (رجعت كتكمل جمييع مستحيل تعتارف بهاد العلاقة واخا يوقع للي يوقع خلات بشرى فلبيت للي خايفة من هادشي للي قالت أمال حيت هي كتعرف عقلية عمها وباها وخوتها اما أمال مشات لبيت الحاجة جمعاتو بالزربة ومشات لحقت بالحاجة مباغية تنفارد حتى من شي فرد من عائلة الكاملة ومبقات حتى شي ثقة فييهم....)
~~~~~~~~~~~~~
زهير: (كان جالس فالمكتب ديالو من بعد مسالة مع شي كليان وكان الهدوء من غير للي بغا يتفرج ولا كيسول على الأثمنة... جبد التصويرة من جيبو كيشوف فيها باينة مخرجة من تيليفون كانت عادية تصويرة ديال أمال باينة مصورينها وهي مراداش لبال حيت كتهضر مع شي حد اونفاص ليها حاطة عصير وحلوة لباس عادي وجهها للي معروف غير كانت ضعيفة شوية.. مستغرب علاش مخبعاها موراتهالوش جاتو عادية بزااف.. بقا كيشوف وهو يبانلو ساروت ديال الطموبيل مشدود غير النص ديالو وأولو يكون ديال هند طلع حداه وليد خبع التصويرة فلمجر وبقاو مجمعين عادي....)
دازت ايام وليد حاول ينسى موضوع فيصل حيت قرأ ميساجات معلى هند واالو وفنفس الوقت محملها غلط انها كملت فالخدمة معاه محمد عايش فدوامة كبيرة مو رجعت مكتهضرش وماكلتها قليلة وغير باغية تكى أمال كملت لكموند واليوم غتصيفطوو للي شاف داكشي حماق عليه لدرجة شحال من واحد فالعائلة بغاه لبيت كمل فلفينيسيون وكما بغات دارو وزهير حول ليها ليماشين وكولشي لتماك دارو عيد ميلاد لمروان وغيثة فنفس نهار حيت تولدو قرااب أنوار مبقاش حتى كيهز عينو فييها وكل وقتو وجهدو عاديه للخدمة للي نفعااتو سمعة ديال باه وزهير باش يجبد كليان...
أمال: (واقفة كدير كل لبسة فبوشيط ديالها من بعد مدارت تيكيت فيههم فاللبسة ولبوشيط اسمها *امال* كانت طائرة بالفرحة وهند كتصورها باش تلوحها فصفحتها الرسمية للي فلفايس والانستغرام باش تزيد تشهر كتر..) عندك غير ميعجبوهاش
هند؛ نو نو غزااالين معندك متقوولي (دخل زهير عندهم باش يديهم الامانة) خويا مرتك راها ولات بيزنيس وومن
زهير: وعلاه امول قوليلة فلبلاد ولا!!
أمال: ههه متحشمونيش
زهير: ابرديييييي (وهو كيجمع شاف لكونطاكط ديال هند كان غير على للي فالتصويرة) ديالك عاد بدلتيه
هند: لا شي 6 سنين وهو عندي
زهير: مزيان.. ياله امول نتي بقاي هنا بلا متمشي حيت من موراها عندي شي خدمة
أمال: صافي وااخا
زهير؛ (هز لكرطونة لكبيرة) اللهم يسر (مشا وبقات أمال وهند جمعو الدنيا ورجعو للدار)
أمال: نسيت مݣلت لزهير كنت بغيت نمشي نشوف ماما
هند: حتى يجي (صونات عليها شيماء) شحال مشفنا عاد الجنية.. (جاوباتها) الووو... اويلي مالكي تتبكي.. نجي عندك واخا واخا انا نقولها لخوك ونجي
أمال: مالها؟!
هند: صافي ازمرة انا جاية غير فهميني لاش تتبكي (قطعت) اويلي مال هادي
أمال: ياكما دابزت مع راجلها
هند: 100٪ وبغات حتى خووها قالت مجاوبهاش (صونات على وليد للي كان فالمحال ديالو علماتو بشنو كاين) حبيبة انا غنمشي
أمال: مݣلتهاش لزهير
هند: معليش الا كانت شي حاجة كغاڨ نقولهالك.. جيبي غيثة معاك صافي
أمال: وعاد توصي..
شيماء: (حست بالخنقة بنتها عندها 3 شهور خرجت مرة وحدة غطرطق حتى لبنات مبقاوش كيخرجو بزاف باش يديرو خرجو جماعية وكلها ملهية فمشروعها قليل فين بقاو كيجيوها عاود رغبااتوو واالو خرجو بوحدها لاا... سمعت الدقان مشات طلت فالعين السحرية ديال لباب كان خوها وهند مسحت دموعها وحلت لباب) دخلووو
وليد: مالكي؟!!؟
هند: (سلمت عليها) واش صاڤا؟!!
شيماء: (بصوت مخنوق) دخلو بعدا (كتمسح وجهها جلسات شافت فيهم) خويا هضر مع اشرف شوية
وليد: علاه سمو دارلك؟؟
شيماء: ميخليني لا نخرج لا واالو مانع علية حتى نطل من لبالكون غير الا كان هو
هند: ولواااه
وليد: سكتي نتي (فرق رجلو ودار درااعو فيهم مبين حركة انه غيهضر بجدية) شيماااا واش دالراجل كيضربك؟!؟
شيماء: لا انا كنهضر على لخرووج
وليد: مكيخرجكش هو
شيماء: بغيت نخرج بووحدي الا نصوني شي حاجة نجيبها ندي مريم الروض ونجييبها
وليد: يعني نتي باغا تخرجي بلا بيه والسلام
هند: هي كنحس براسها بحال محبوسة
وليد: شيماااا هو عقليتو هكاك دايرة العيب والعار الا مكيخرجكش ݣاااع
هند: شوفي قد مطال الحال غيتهد واحد نهار وغتبقاي تقضي أغراااضك
وليد: (ضار شاف فيها ببطئ)
هند: انا فهمتها هو تيبغيها ومهلي فيها ولكن هي تتحس بالخنقة هانتا نقالتش نخرج نتسارا ولا شي حاجة اخرى هي بغات الا خصااتها شي حاجة تخرج تقضيها فحدود الحانوت وتدي بنتها مرة مرة الروض انا تنشوف هادشي حقها حيت حطيت راسي فبلاصتها
وليد: واشرف خاايف يبغيلها هادشي وتصدق تطلب مرة أخرى كتر
شيماء: بحالاش
وليد: بحال تخرجي تسارااي وحدك وكل مرة تݣولو نخرج نخرج انا مفعمتكمش نتوما لعيالات تكونو جالسين مخصكم خير حتى تجبدو شي مووشكل مضااايرش وتبداو تغردوو علينا فالتالي
هند: حيت ببساطة نتوما رجال تتبغيو ديما تبينو ان السلطة والعصمة فيدكم غير نتوما وحنا معندنا لا كلمة لا قيمة قدام سعادتكم الااا احبيبي داك الوقت مشاا
وليد: الا مشا غنصيفطك لييه (خنزر فيها تسكت حيت الهبة ديالو كتاكل الشحط قدام ختو) شيماااا نتي اكتر وحدة راهي تعرف بعقلية أشرف
شيماء: عفاك اخويا غير هضرة معاه كيحشم منك نتا
وليد: (مابغاش يجرحها ويقولها انها مخلات ليه وجه باش يهضر معاه الذبحة للي كانت ذبحاتهم نهار اللول نساوها وسامحووها ولكن الأثر مزاال) نشاالله براكة متبقاي دمعي ها هند تبقى تواليك نمشي نجيب ديرينا شي عشييوة
شيماء: خويا راه كولشي كاين (مشا حل لباب وخرج خلا دوك الجوج كيتهاضرو حتى جاب لحم وديسير وتخربيق لمريم وختو ومشا قاصد أشرف...)
أنوار: (ولاو طلبات الناس عليه بزااف وكيقلبو باش يكريو حتى لحوايج من عندو اول حاجة فكر فيها هي أمال هز سوارتو خلا الولد للي معاه مقابل ومشا عند زهير للمحال) بن عمي
زهير: واشتا!!!
أنوار: فكرت علاه منااخدش من مرتك حواايج انا نكريهم الناس وهي تزيد تشهر ويتزادو عليها لكموندات
زهير: معرفت نشوف معاها
أنوار: نتا عارف شكون للي يجي عندي وباين من دوك الناس يبغيو لحوايج نقية يعني خدمة اليد ومدايراش فالسوق بزااف
زهير: (كيفكر) واه..
أنوار: مهم حتى رجعو ونهضروو معاها
زهير: نشالله رووح درك عندي الخدمة بزااف (بقا كيكمل خدمتو حتى جاه محمد للي رجع ضعييف غير شافو تضهشر من حالتو) اماالك
محمد: واالو مساالي
زهير: واااه طلع المكتب هاني جاي
محمد: نخرجو برا حسن (خرج زهير كمل مع شي كليان وصى احمد يتكلف وخرج لقاه كيكمي اذا القضية محرحرة..) ياكما مشغول
زهير: هضر اصاحبي
محمد: والله يا خويا حرت راكو شفتو مّا كيف ولات وتفكرت كولشي وانا راسي غيتفرݣع باغي نشوفها ونعرف شحال من حاجة وفنفس الوقت مباغيش نسمع منها داكشي حيت مغيبقالها ݣعاااد معايا
زهير: راه مك هاديييك
محمد: (بنظرة حزن وانكسار) واخا للي شاك فيه ميخلينيش نحن فيها ولكن معطانيش ݣلبي الخاااطر باش نلوووحها وهي بقات وحدها
زهير: (جبد ݣارو كيكمييه) واخا هكاك نساااا متنبش على شي حاجة للي غتزيد ت**** كتر
محمد: مساهلاش
زهير: شوف نعطيك واحد لبلان ديرو جيب مك لعندنا ونتا هز مرتك وولادك سافرت لشي قنت بعااد ومنها تفكر ملييييح فواش دير وخلي فتيحة تقرب من بنتها شتي الا رجعت مزيانة غير مع بنتها عرفها راهي ندمااانة وباغا غير تعيييش ياامها
محمد: لا لا منزيدش نتقل
زهير؛ واش تقل راه دار ختك هاديك ومّا معاها وانا نتا غير خرج هاد السوق ونتا سير بدل الجو شوي
محمد: (كان محتاج هاد الاقتراح بقا زهير كيقنعو حتى جاه الولد للي خدام معاه علمو راه كاين شي كليان بغاه شخصيا) سير لخدمتك نتا اخويا حتى تسالي وندوز عندك
زهير: فكر فواش ݣلتلك...
أمال: (كانت جالسة على اعصابها مكفاتش الرعب ديال التصويرة وعرفت بشرى عارفة حتى هي.. جاتها لبكية حست بحݣرة خاايبة من صغرها حتى تبغي ظحك تخرج مشكل اكبر ومعقدة كتر شافت فليلى للي كتهضر معاها) نعام مسمعتكش
ليلى: اش مغرقاك لبابر
أمال: لا واالو
ليلى: خاصك تشديلي لعبار وبغيت تكشيطة بحال ديك ثليجة التالية راه سطاااتني
أمال: مرحبااا وفااابور فيدي
ليلى: درتي لفلوس بكري يسمعك زهير يمشي يريب داك لبيت
أمال: هههه
امال2: أمال نسولك ومتقلقيش (شافت فيها امال للي كرهاتها) ديك التصويرة ديال لبارح كان معاكم أنوار فيها وديك شيماا
أمال: واش هبلتي نتي؟!! (ليلى بقات كتشوف وامال2 صدمتها بردة الفعل) معرفت واش كتسمعي شنو متخرجي من فمك ولا لا
امال2: انا غير سولتك
ليلى: ولاه أمال نتي مزال تسولي على شيما السيدة عندها جوج بنات وبراجلها ونتي براجلك
أمال: (حمرت عينها فيها) ݣوليهالها دابا هادي يسمعها راجلها كتسول على شي حاجة دازت عليها 3 سنين ولا كتر ومنين يغوت عليها تجي تبكي حݣلو كل مرة غضباان منك مبغيتيش ديري عقلك
امال2: (غير كيتجبد ليها أنوار كيتخرقو ليها سلوكة)
أمال: ياك رجعت مزيان لاش مزال تسولي على شيماااا سمعي نتي قنت خت راجلي وعزيزة عندي وهاديك راها بنت عمي من لحمي ودمي اطوونسيووو أمال تعاودي تجبدي هاد المواضيع لا ݣدااامي لا ݣدام شي حد ااخر
ليلى: عندها الحق ابنتي راه هبش نجبد حنش خلي عليك هاد الهضوور غير عمك يسمعك كتهضري هااك يتنيرڤا منك
أمال2: والله مقصدت شي حاجة
أمال: وانا غير ݣلت ليك نساي شيماااا ونسااي المواضيع وخلينا من هاد الهضوور ديال دراري صغاار (وقفت) انا نطل على لبز (ناضت أمال رجليها كيترعدو ولكن مبينت واالو بلعكس بينت القوة وأنها الا زعفت غتنوووض لاي واحد.. (مشات شافت لبز لقات ولدها جايب شطابة جالس كيعصي فيهم وهوما مساتفين مشات حيداتهاالتوو حتى بغات نضربو وهي تنادم الحال معاها.. بقات جالسة معاهم بلا عقل حتى جات عندها ليلى) نمشي نطل على مّا
ليلى: راها جات رواحي جلسي حدانا
أمال: واخ..
ليلى: (بقات كتشوف فامال ولحقت عليها...)
من بعد عشا قولها وظحك عليها جمعت هند وشيماء لمعان ومشاو كيتجمعو فالكوزينة وليد حااار معرفت باش يدخل مع اشرف فالهضرة كيشوفو منعس بنتو صغيرة على صدرو ولكبيرة ناعسة فوق رجلو حيت كتغير من صغيرة..
وليد: رخف شوية على شيماااا
أشرف: (بإستغراب حط كاس اتاي) فاش؟!!
وليد: شوف انا عارفك مهلي فشيما وللي حلت فمها عليها تحضر
أشرف: ولخروج وحدها أبن عمي مكاينش انا هاكا عقلي دااير نخرجها يانا باها وخوها وحدها لا وألف لااا مدام ݣاد بيها ومجيبلها كولشي بين يدها لاش تشكى
وليد: (ملقى ميقول) حيت خوها ولا دايرها مݣطوووعة من شجرة
أشرف: حاااشا وانا بروووحي حاسب راسي واحد من فاميييلتكم
وليد: هاديك مافيهاش النقاش نتا منا وفينا
أشرف: غير فكرة تخرج وحدها متعجبنيش حسبني مريض فهاد النقطة وباش نتفدى بزااف دصدااع كنخليها حتى نخرجها
وليد: واخا متافق معاك ومن حقك مدامها مداامتك دير للي يريحك ولكن على الاقل حاجة وحدة للي نبغي نقتارحها ماشي فاارض دأيي هند وبنت عمي أمال نهار السبت يخرجو دراري يلعبو فشي بارك وحنا كنلحݣو بيهم لعشا سمو بانلك يدوزو على مرتك وهي مغتكونش وحدها يخرجو لوليدات يلعبو وحنا لحݣو عليهم اصلا كنخليوهم غير ساعة ولا ساعة ونص وحدهم
أشرف: (سكت كيشوف فوليد)
وليد: هدا اقتراح وكنشوفو عادل هي متخرجش وحدها ومنها ماباقش زن زن زن عليك ونتا تكون مرتاح راها مع مرت خوها وبنت عمها.. مهم فكر على خااطرك
أشرف: نشالله خويا
وليد: (وقف) نمشيو حنا
أشرف: هانتوما مݣصرين
وليد: بحرا لحݣو نوصلو ولالة غيثة خلينها غير مع بنت عمي
أشرف: هاد المرة ممحسوباش راكم نتوما للي عرضتونا
وليد: واش بيناتنا اخاااي.. هييييييند (جات اصلا كانو كيتصنتو عليهم) مشينا
شيماء: (دارت حق غيثة فطاسة وعطاتهالهم) متغبروووش راكم وليتو تغبرو علينا
وليد: وحتى نتوما بااانو
أشرف: نشالله.. شيما هزي مراام (تسالمو معاهم ومشااو هو مجبدش هاد الهضرة مع شيماء تصرف عادي وهي كانت كتسنى غير يولمها ولا يجيد معاها الهضرة ولكن وااالو..)
دازت ايام أمال فعلا خدمات تكاشط لمجال أنوار الا الا عتارضات غتلقى تسائلات ديال زهير هند رجعت لخدمتها عادي مكاين حتى شي تشويش من طرف فيصل والحاجة للي تبدلت هو السبت للي دازو لبنات على شيماء حيت راجلها خلاها تخرج ولكن نهار كامل وهو كيحلف فيها وهي دايااه على قد عقلو حيت كولشي من غيييرتو عليها وداروها كل سبت او احد يخرجو مجموعين باش يفوجو شوية...
محمد: (قتانع باقترااح زهير للي أصر عليه هو والحاجة للي جاو يديو فتيحة للدار وهو جمع حوايجو هو ومرتو وكانت رحلة للصحراء وبالظبط لمدينة الداخلة مشاو فالطيارة غير وصلو الجو تبدل خلاو فوجدة باقي لبرد وجاو لقاو الصيف وعالم ااااخر كان مريزيرڤي الاوطيل للي داير بحال شكل اوطيلات المالديف مريم طاارت بالفرحة وهما الحزين ماشي لبحر قد مكاين يتسرااو باش تشري ملاحف واهم اهم حاجة اللحسة الصحراوية لڤري حيت مع تربية توام رجعت بحال شي سفووود وكانت غير راضية بالوضع وبغات تبدل..
خلاهم يرتاحو حيت مبغاوش يهبطو لبحر لبس شوورطو دار فوطة على عنقو ونظاظر على عينو جار كلاكيطة وهبط منظر الصحرااا والبحر كتسحر وتخليك فعالم اااااخر مشا لكرسي وكانت بحال شجرة نخل مظللة عليه جلس كيشوووق ويمتع عينيه بهاد الجمار الرباااني رجليه كيغرقهم فديك الرمال الدااافئة محس حتى ناض ونعس على ظهرووو مستسلم لهاد الطبيعة الخلابة لدرجة عظااامو ترخاااو واعصااابو مبقاوش مزيرين عليه ناااسي وهاااامل كولشي فقط مستمتع...)
كريمة: وفين بقات خاالتك
مريم: جات عݣوزة أمال وراجلها داوها معاهم للدار
كريمة: اممم وكان خلاوها تجي لديوانها وهي مليوحة من دار لدار اييييييه يا ختي تلات بيك ليااام
مريم: (طلت جاع يكون محمد جا) سمو تلات بيها اماما راه منين أمال مزال قابلة عليها تحمد الله ولا نسيتو سمو دوزت عليها
كريمة: لقوااا يا الكلبة
مريم: كلام الحق ميبغيه حد
كريمة: تبغيك جنية عمية يا الكيدارة واخا على مك حمارة تهضري على خالتك هاك!!!
مريم: مݣلت والو وزايدون حتى هي بغات تمشي نتي عارفة خالتي مكيبزز عليها حتى شي حد شي مووضع
كريمة: اممم... خرجت تسراو ولا مزال
مريم: مزال ياله فقنا من نعاس ومحمد هود يعووم
كريمة: متخليهش وحدو مسكين رجع سفوود
مريم: دابا نݣلب على ديك اللحسة الصحراوية نديروها انا وياااه ههه
كريمة: اوا تخافي هو تݣر فيه ونتي لا
مريم: ههه باش يقتلني مسكين هو خاصو غير راحة لبال
كريمة: الله يرضي علييه تهلاي فيه
مريم: واخ.. ياله اماما نوض لبس صفواء وصفا نلحقو بيه
كريمة: عنداك تلفي
مريم: لا لا راحنا فاوطيل وهو غيكون غير هنا
كريمة: صافي بسلامة سلمي عليه ومنين تكوني خارجة عيطيلي نوصيك على شي حاجة...
أمال: (تلاقات مها فباب الدار سلمت عليها ولكن فتيحة هي هي وجه بااارد مع كولشي الا الحاجة) لباس عليك اماما كيف بقيتي؟!
فتيحة: الحمد لله..
زهير: انا نمشي للخدمة وهلاو فنسييبة
الحاجة: وعلاش فتيحة عندنا ݣليلة وهادي راها داارها
فتيحة: الله يكتر خيركم..
أمال: تبغي تمشي تشوفي لبلاصة فين كنخدم
فتيحة: كتخدمي؟!
أمال: وااه رواحي معايا نوريك (جراتها من ذرااعها) وليت نصاوب تكاشط ونبيعهم ماشي غير فالمغرب حتى فبرا وعند الامارات
فتيحة: هاااو!!
فتيحة: تبارك الله عليها خدمتها متقووونة وعليها الطلب
فتيحة: (مستغربة بقات كتشوف فيها صحاحت وزيانت بشرتها تبدلت بزااف يمكن اول مرة تمعن فيها هاك دخلاتها وكانو شي لبيسات مقادين محددين وشي حاجة مزال كتخيط فيها خلاتها تسرح وتشوف فدوك لمانكان والحاجة دايرة فيها مرشد سياحي وكل تكشيطة او قفطان كتبقى تقولها لمن وديالمن وبشحال غتبيعها ونوع الثوب ولخيااطة أمال بقات غير كظحك..)
فتيحة: هادشي زين نتي للي مݣادة هادشي
أمال: (بفرحة) واااه.. ودابا نشدلك لعبار باش نخيطلك نتي ومّا قفاطن
الحاجة: انا بغيت بلووزة
أمال: مّا نديراك قفطان ومن بعد بلوزة ماريووك غيطيح غير بييهم انا بغيت نݣادلك قفطان
الحاجة: للي بانلك ابنتي
فتيحة: ديري لعݣوووتك سمو باغية
أمال: واخا اماما كلامك هو اللول
فتيحة: (بقات كتشوف فيها هي كانت كتقول هاد لبنت عمرها تعاود تشوف فيها ولا حتى تعتارف بيها ولدابا مزال مسمعت منها كلام العيب عكس للي وݣفت معاه فالظلم وفكولشي وفالتالي شهد شهادة الزووور عليها وصيفطها الحبس وهي مظلوومة.. داخت وشدت غير فالحيط)
الحاجة: فتيحة مالكي؟!
أمال: مالكي اماما؟!!! (قاست ليها جبهتها كانت دافية عادي) واش عييتي ترجعي للدار
فتيحة: وااه
الحاجة: ياله نروحو حنا ونتي ابنتي شوية ولحݣي علينا
أمال: واه غير نكمل شي حاجة ونجي.. (مشاو وهي رجعت جلست حدا ماكينتها وتفكيرها فهادشي لي دارت وكان من اقتراح زهير باش تعطي لعلاقتها مع مها فرصة أخرى يمكن فتيحة دير عقلها رجعت كتكمل باش تزرب حيت خاص هاد لكوموند اليوم فلعشية تمشي لعند مولاها للي ميتسمى أنوار...)
أنوار: (تم ماشي لعند أمال وليلى غير شافتو كانت ماشي لدار الحاجة وهي تبعو غير دخل عندها هي بقات برا) أمال
أمال: شنو باغي؟!
أنوار: مالكي ياك عارفاني غنجي على حساب لباسي
أمال: وعلاه جاي نتا زهير يجيبهم لييك
أنوار: حتى لامتى غتبقاي كارهاني انا صافي تقبلتك نتي مرت عمي
أمال: بلا جميييلك وأصلا شكون نتا للي تقبل ولا لا وشكون اصلا سوق ليك
انوار: أمال...
أمال: مرت عمي
انوار: ههه كتجيني صغيرة على هاد الكلمة مهم انا جاي على لباسي
أمال: (ناضت) خرج برا اول حاجة انا نجيبهم لعندك
أنوار: ههه (ظحكاتو) ههه خاص نݣلبهم الا كانو مقطعين ولا شي لعبة
أمال: وبناقص ݣاع من هاد لبيعة وشرية
أنوار: صافي صافي انا برا ههه (خرج ليلى دارت من مور البيت حتى جابت ليه أمال 4 دلباسي للي كانو وجدو) تافقنا على 10
أمال: مزال مكملو
أنوار: غير بشوية عليك (دخلت مخلياه هاضر بووحدو هو مشا كيتبسم وليلى دخلت)
ليلى: زييين
أمال: جات ماما
ليلى: واه راني شفتها كملت شي شغال وݣلت نمشي نطل عليها سدت لباب.. شوفي قبل كنكون مرت باك ݣلتلك ديريني صااحبتك
أمال: واه!!
ليلى: شنو كان بينك وبين أنوار ولد هو زهير
أمال: ووالو والو هو كان مع شيماا
ليلى: أمال الا كانت شي حاجة ݣوليهالي نعاااونك
أمال: اواااالو اصاحبتي هو كان مع شيما ومنين دارلها هكاك مبقيناش نحملوه صافي داكشي باش فاش سمعتي ݣبيلة مبقيتش نحمل نهضر معاه
ليلى: واخا بنتي مهم انا نتسنااك فوكما بغيتي اجي عندي
أمال: اجي ناخد ليك لعبار جيتي جيتي (مبقاتش كتقدر تيييق حتى فشي حد من غير هند للي عاشت وشافت كولشي بدلو الموضووع شدو المحال ومشاو عند فتيحة للي مستانسة مع الحاجة.. كما العادة سلمت على ليلى سلام باااارد من ديما غتبقى هي ذرتها للي فضلها راجلها عليها وضرب سنين العشرة فالزييرو على ودها...)
فتيحة دوزت 3 ايام رجعت تهضر ماشي كما كانت ولكن فرق كبير كيجمعو هي والحاجة للي كتعطيها نصااائح على بنتها وعاودت ليها شنو وقع ليها فالحمل دبنتها والحاجة لامتها حيت أمال مكان عندها حتى شي دور فمعاناتها وان مصطفى هو للي كان خاصو يتحااسب كتمشي مرة مرة عند بنتها كتشوف خدمتها يجمعو مرة مرة ولات كتقرب لمروان وتلعب معاه هادشي عجب أمال وحتى زهير..
~~~~~~~~~
بعد مرور عام......
وليد: (تصدم منين عرف ختو كانت حاملة ومعرفاش وطاح ليها مشا عندها للدار وكانت نعيمة كتقابلها) ختي وش راكي تعاندي مع شي قنية
شيماء: ههه (حشمت حنات راسها)
نعيمة: راك كتحشم ختك واش هضرة هادي تݣال
وليد: خلي غير بنتك مرام تكبر
شيماء: اخويا راه مكنت عارف....
وليد: حتى بدا يرطاب معاك شوية ويخليك تخرجي مع لبنات ملݣيتي مديري ارا نحمل راكم مزال صغار نتي الجسم ديالك خاصو يرتاح شوية ماشي ولدة من مور ولدة
شيماء: مامااااا (حشمها)
نعيمة: خرج.. خرج لمك (خرج مشا جلس حدا أشرف وباه) عندو لحق ابنتي تكايسي شوية على راسك
شيماء: والله اماما مكنا دايرين على شي حمل راه ݣالتي طبيبة لكينة مشداتليش حيت كانت فية لاديااري دوك ليامات وبالصح النيت
نعيمة: واخا هكاك ابنتي حضي راسك لولاد زينين ولكن حتى نتي متهمليش راسك باش متعياايش دغيا والا رديتي ولا جاتك لاديااري عاودي شربي لكينة ولا شيري ديري اللولب للي كنت ندير يانا
شيماء: كنخاااف
نعيمة: متخافي واالو نتي ديري السبة والا كان مكتاب راه مكاين للي يمنعو.. (كان الصونيط تحل لباب كانت هند وأمال للي خدمتها ولات شااايعة ويفضل أن ارى للي عرسااتو كيكونو شي حاجة هاي كلاص ولاو تماشطها مطلوبين ماشي غير لكرا لا ولات لعروسة كتجي تكري من عندو وفنفس الوقت تخيط من عندو للي بدورو كتكون أمال كتاخد لقياس ترسم الموديل للي بغات لعروس والعائلة يختارون كولشي وهي تمشي للمحال ديالها تخيط وتقااد ملفات تدخل حتى شي وحدة معاها حيت مزال مكتوش جا الوقت لعويين وهند كذاالك رجعت كتخدم فالعيادة وخارجها....
دخلو عند شيماء جايبين الشكلاط والورد سلمو على للي برا عاد دخلو عندها شادين فيها والكلمة المتعاودة هي واش باغية تولي قنية...)
~~~~~~~~~
أمال: (كانت شاكة فراسها من بعد متعطلت ليها الدورة اكتر من 15 اليوم وكل نهار تقول اليوم تنزل ووالو.. ولكن تأكدت منين دارت التيست بقات فطواليط لشي ربع ساعة تبسمت كتشوف ولدها عندو عمااين والصرف وراجلها كان باغي خرجت براا اول وحدة قالتها ليها هي الحاجة للي فرحت حتى بقات كتبكي طلت عليهم امال2 قالتها ليها الحاجة حوت على راسها حيت حتى هي بغات تحمل ولكن أنوار مزال مبغى لولاد.. باركات لامال للي فكرت ديرها مفاجئة لزهير فالليل...)
زهير: (رجع من الخدمة بقا مو شوية وكيلعب مع يوسف حتى جاه ميساج من عند امال.. قراااه وتبسم كيزوني فالتصويرة وهو يكتب ليها) ابرديييييي... (وقف) مّا يوسف بايت معاك ياك
الحاجة: هههه سير اوليدي راني راضية عليك
زهير: (باستغراب) واش راه صااري
الحاجة: مااااااعرفت سير وشوف نتا
زهير؛ امحاايني ياكما التصويرة للي جاتني جاتك
الحاجة: ها!!!
زهير: والو واالو (مشا نيشان لدارو وعيوون مراقبينو بحزن كبير.. دخل لداارو طلع مع خل لباب لقا ضو حمير خفييف تبسم كانت هي لابسة غوب دونوي فالاخضر الملكي تبسم جايها زويين) متݣوليش غتعرضي علية النشيد الوطني
أمال: (جمعت التبسيمة) زوووهير
زهير: (تبسم مقرب ليها داير يدو على خصرها) توحشتك اغزاالي
أمال: عاد كنا بجوج
زهير؛ ولكن شحااال مشت هاد الزين خاصكي تخلصي الحق
أمال: خلصت وبزاااف (شافها باستغراب عنقااتو ودارت راسها على صدروو) عرفتي مروان ݣالي ݣاع الناس عندهم خووتهم الا يانا
زهير: (تبسم مفكر انها باغية تحمل) ندوورو خوه هاد الليلة
أمال: هاء مجايااش
زهير: واش هاد نهار نتي ومّا دايريني فرااسكم كلامكم منفهم فيه واالو
أمال: هههه يا ربي ولادو ميكونووش بالذكاء دياالك
زهير: يااا بربي حتى نطوي مك هاد الليلة نوريك الذكاء
أمال: (بعدت منو) كولشي بلغوات
زهير: (رجع معنقها) نرجعو لموضووعنا باغية تحملي ازين
أمال: لا الزين سي ديييجا في ههه (شاف فيها) يا ݣلييييع ݣلبك راني حااااملة (محس حتى هزها فرحان كيدورها كانت فرحة كبيرة وهي كظحك كتعاود ليه لبلان ختمووها بنعسة حميييمية وبقات فحضنو كيهضرو ويظحكوو حتى غفااو فنعاس فايقين مفزوعين على صوت غواات ناض زهير وأمال غير كتشووف طل من السرجم كان انوااار)
أنوار: (كيتماايل يطيح وينووض وبغوت باسم) اماااااااااااال......
وليد: متفكريش زعما تزيدي
هند: ههه نتا تتفكر؟!!
وليد: بغيت نحايد علية واحد لكريدي
هند: اشمن كريدي عمرك قلتيلي عليه؟!!
وليد: كريدي من عند با
هند: اممم نعاونك انا جامعة شي براكة
وليد: ديك البراكة ديالك
هند: نوو فلوسنا انا وياك واحد احبيبة
وليد: (حرك راسو بلا)
هند: شنو بانلك بغيت نعاود نصلح الدار
وليد: ههه ديري بحال واحد عمتي كل عام عندها الاصلاح راه الا تبعتي داكشي عمرك توݣفي
هند: عفاااك تنشوفةشي ديكورات تنتشهاهم فداري
وليد: صبري علية شوي
هند: راه عندي فلوسي أوليد ولا زعما ماشي داري انا
وليد: واخا لالة خودي راااحتك ولكن ديما خلي تحتك فلوس
هند: علاش؟!
وليد: متعرفيش لكابيني امتى تعاودي تصلحيها ولا تزيدي شي ماشين غاليين ميكونوش عند كولشي
هند: (سكتت كتشوف فيه وترمش)
وليد: ههه درهم منحطهاش فيها كوني هانية (ناض كيظحك مشا يطل على بنتو للي فرقات ليها نعاس وبقات كتنعسها فبيتها بووحدها لقاها نعساات طفا الضو عليها خرج دخل لبيتو لقى هند مزال جالسة فوق لفوتوووي) مزال تخممي؟!!
هند: لا غير تنشوف منين نبدا الدار
وليد: (زول عليها لغطا من رجلها) بداي بمولاها (جارها من رجليها وهي ظحك حتى وقفت وهو يدفعها فوق النموسية......)
~~~~~~~~~~~
أشرف: (بقا مع شيماء فلبيت) شيماااا بالصح مكنتيش عارفة رووحك حاملة
شيماء: والله
أشرف: ݣلت زعما بغيتي ديريهالي مفاجئة بحال ديك المرة
شيماء: لا لا والله مكنت عارفة ولا علاش غنشرب ديك قوة القرفة راه حسابلي فية لحريق وهاديك مابغاتش تهود
أشرف: متعاوديش تشربي للي كان خافي على صحتك
شيماء: (حركت رأسها باه) ان شاء الله
أشرف: راه بالصح نهضر خافي على صحتك راه هي للي عندي اهم (تبسمت معاه) غير تصحاي شوية نشالله تدخلي لاصال
شيماء: (خرجت عينها) حلف!!!
أشرف: ولاه موالف نكذب
شيماء: (قاست جبهتو) راك صحيح؟!
أشرف: ههه صحتك عندي اشيماااا بكنوز الدنيا (باس يدها جرها منعسها على حضنو وهي غير كضور عينها)
شيماء: ياكما باغي تجوج راه نحفظ 60 حزب نمشي الحج نصلي نصوم نزكي ولكن التعدد هو للي ميكونش ليك
أشرف: ههه نعسي رتاحي (نعست وهو بقا كيفكر غير فكلام طبيب ان الوالدة عندها فيها التهااب وغير تصفى خاصها دير شي فحوصات هادشي خلعوو وخلاه عايش الرعب....)
الحاجة: (ناضت تنعس حداها حفييدها وأمال هبطت لتحت مهمومة صونا على مها)
امال2: الووو... لباس عليك اماما
عيشة: (كانت غتنعس) الحمد لله ابنتي ونتي؟!
أمال2:.. الحمد لله اماما (تبعتها بتنهيدة)...
عيشة: لݣلب عدووك ابنتي مالكي على هاد التنهيدة
امال2: وااالو.. عرفتي اماما مرت خالي حاملة..
عيشة: شكون؟؟! امال؟!!! (ناضت من حدا راجلها وخرجت من بيتها)
أمال2: واه أمال وعلاه شكون كاين من غيرها!!..
عيشة: بالحݣ؟!
أمال2: والله الا حاملة..
عيشة: همممم.. راجلك حداك؟!!
أمال2: لا مزال مجا.. خالي من ݣبيييل جا من الخدمة ومشا يحتافل مع مرتو وهو لدابا مزال مجا مصونا مواالو كيجي على خاااطرو
عيشة: درك يجيبو الجووع
امال2: كيجي واااكل من برا مرة مرة يجيبلي معاه
عيشة: راني نهضر على الجوع لاخر ياك هو ݣالك مزال صبري... صبري حتى نتي
أمال2: ݣاع ݣرنااتي حملو الا يااانا تݣول ماشي مجوجة قربت نكمل عماين...
(أنوار كان دخل للدار وكيتصنت عليها)
عيشة: نعلي الشيطان ابنتي واش نتي كتݣرني راسك مع مرت خالك راها شاارفة طالعة فثلاتينياات ونتي مزال صغيرة
امال2: واااا ماما حتى يانا بغيت نحمل بحالي بحال أمال شوفي خالي زوهير كيف طاير بيها وفرحان علاه حيت يبغيها وتبغييه ماشي بحالي يانا وعاد من صباح وهي توجد الحفلة باش يحتافلو وتفرحو راني شفتها واش وجدت واش لبستلو
أنوار: (تصدم ماشي من كلامها ولكن من حمل أمال كتن كولشي ماشي مزيان ولا يتعايش انها مرت عمو وهو مركز على مشاريعوو ودابا حس بحال اول مرة يعرفها مزوجة عمو حس بخيااانة احساااس مكيتفسرش حس بعقلو وقف مكيفكرش دخل لبيتو ومرتو غير شافتو هكاك تخلعت قطعت على مها)
أمال2: أنوار رجعتي؟!! مسمعتش لباب ينحل... (شافتو هز جاكيطتوو وخرج تبعاتو بغات تهضرو والو دخل لبيت لاخر حل بلاكار فين منبه عليها متقربش حيت كاينين وراق مهمة هز ساشي كحلة وقفاتلو فلباب دفعها وخرج بقات كتبكي وتعيطلو اما هو مشا للطموبيل بقا فيها حل القرعة اللولة كانت نيشان من نوع ڤودكا هبط عليها متكي على لڤولون كيتفكر شحال من حاجة واهمها كفاش تخطااتو وعاشت حياتها ممعبرااهش ومرخسة حبو للي ممعتارفاش بيه اصلا..
دازت ساعة وهو على ديك الحال كانت القرعة التالتة ياله كيقدر يشربها كولشي تقاال عليه تم خاارج والقرعة فيدو شاف فدار أمال فين مطفيين ضوااو بقا كيتمااايل يطيح وينووض ويغوت باسم)
أماااااااااااااال.... (يشرب جغمة للي نقاطي فمو وللي على لحيتو وللي على حوايجو ويغوت) امااااال وعلاااااه ياااااا أمااااااااال....
زهير: (طل من السرجم) مال دلبغل (صوتو كان عالي ولكن الكلمة موضحاااااش ناضت أمال بغات طل مخلاهاش حيت لابسة خفيف) روحي لهيه غيضربك لبرد
أمال: مالو؟!!!
زهير: انا نهود باين الكلب سكراان (جا تحت داارو تقريبا وكيغوت)
أنوار: علاااااااه درتيييي هااااك علاااه
زهير: (شاف فدار خوه تشعل الضو مشا دغيا يلبس قبل ميزيد يكبر الموضووع) متبانبش فالسرجم
أمال: شنو واقع؟!! (شافتو لبس وهبط وهي حلت السرجم غير شوية كطل تفهم شنو كيقوول حتى كنسمع بصوت أعلى)
أنوار: اماااااااااااال (طرطقت عينها) كنتي ديااالي غير يااانا ووضيعتك
امال؛ (هنا قلبها وقف وبحرا كتقد تنفس جاتها دوووخة وجلالة جاتها فعيينها شدت غير فلكرسي باش مطييييحش قلبها كيزدح حتى حست برووحها غتزهق) لا لا أمال ماشي وقتها متخليييش هاد الكلب يضيعلك حياااتك (مشات بيدها كترجف حلت لماريو جبدت سارووت صغير مخبيه زهير حلت قجر صغير كان فيه باسبور ديالو وديالها وديال ولدها وشي وراق ملقاتش لفردي بحرا كتنفس تجننت لبست بينوارها وجرت بنطووفتها هابطة من درووج وشادة فلحديدة باش مطييييحش وصلت لتحت فبلاكار لا بابط جبدت هرااوة كان لباب محلول ومزال كتسمعو)
أنوار: هي دياالي ياانا (كيضرب فصدروو ويشوف فباه)
لكبير: لعنة الله وهليييك يا المسخووط سكرتي فقلب الدار الله ينزل عليك النعلة
زهير: (باغي يشد أنوار يبعدو غير من علل خوه وكيشوف بنت ختو كتبكي وتعيط باسمو)
أنوار: (بصوت سكايرية) كانت معايا شحال دي ودابا ݣلبت وجهها علية كانت تبغيييني أبا وداااابا (بغا يطرشو باااه وهرب حتى بغا يطيح ويطيح زهير للي بالسيف شد التواازن) كانت معاايا وݣلبت وجهها
زهير: انوووض يا ال*** تݣعد واش دلهباال راك داااير
أنوار: محااااس بية حد كل نهار نتعذب ومكااان للي حاااس بية
أمال: (فاتت مرحلة الكره بزااااف لأنوار شادة فديك لهرااوة كتشوف زهير موقفو وهو مزال باغي يسرسب دفع زهير من صدروو وهز القرعة باغي يشرب وهي تجي أمال هزت ديك لهرااوة وعطاتهالو للقرفاادة شااف فيها مصدووم حتى غيبة عينييه ورجليه لواااو طااايح على وقفتو... كولشي تصدم وشاف فيييها ومنهم زهير للي محس حتى جا قدامها طرشها محاول يخبيها دفعها للدار وسد لباب وهي بقات غير مصدووومة واقفة وعينيها خااارجين شعرها مطلوق غوب بغوب دونوي وبينوار ستان للي كولو مشبك.....)
بشرى: (كولشي تصدم من تصرف أمال بقا صقييييير وحدة للي مكتفرجش فهادشي هي الحاجة للي فساااابع نوومة.. مشات كتزرب وانوار طااايح فالارض وتبعتها ليلى اما لكبير وخوتو وزهير وااقف حدا لباب وبعينييه وتخنزييرتو كيقول للي راجل يجبد مرتي.. واخا عقلو سررررررررررررررررح)
انواااار انوااار
ليلى: كان غيضرب زهير بالقرعة اودي اش دااه لشي سم
بشرى: (شافت فليلى وحركت راسها باه بمعنى متافقة) عبد الله عبد الوافي هزوو خوووكم
لكبير: (حتى هو رجع فالسيناريو منين هز يدو فيها القرعة مرتو ضرباتو) هزو لكلب حسابي معاه منين يفيييييق
عبد الله: ويلا قتلاتو؟!!
زهير: غتحاسبها نتا؟!!
ليلى: لعنو الشيطان زهير عيط على وليد نصدعووهم يجيب مرتو تشووف أنوار
امال2: (هي غير شافت أنوار طاح من ضربة امال سخفت ولكن بقات مليوحة حدا لباب بوحدها حيت مشافها حد.. اما نسا خووتو غير كيتفرجو من سراااجم والرؤية غير واضحة حيت بيوتهم جايين مقنتيين وبالكو دار زهير جاي خارج معكل الشوفة..)
زهير: هزووه دايينو لدار بااه مخلي بقعة صغيرة ديال الدم قدام داارو شاف فيها خاااف تكون وقعت ليه شي حاجة ولكن أمال غالبة تفكيرو علاش هبطت وعلاش ضربااتو وكفاش خارجة عريانة وشنو علاقتها اصلا باش تهبط كلام ليلى كيتعاود فودنو خافت على راجلها واش غيكون هدا سبب!!!!!!! مشا تبعهم رغبوو باه تجي هند هو مشا قاس النبض ديالو حدا عنقو لقا مزال العرق يضرب.. (رجع من تمااك حل باب دارو طلع نيشان لبيتو غير حل لقاها جالسة ولعصا مزال فيدها والمشكل كانت واحدة ضرب شافت فيه والخوف مسيطر عليها اما هو كانت شووفتو حارة)
حسااااابي معاك كبييير (هز تيليفونو واخا مكرهش بديك العصا يعطيها للراس باش متعاودش مرة أخرى تفكر تهبط عريااانة.. بقا كيصوني على وليد وكلام أنوار كيتذبذب لودنييه وينعش الذاكرة هي كانت دياالي افكاارو تخربقات)
وليد: الو الووو..
زهير: (عاد رد لباب) وليد هند فايقة؟!!
وليد: لا ناعسة ياك لباس؟!
زهير: مممم.. معرفت منعاودش ولكن بنت عمك ضربت أنوار غيبااتو الا صلاح تجي تشوفوو راه سكران وباه خاف عليه يديه لصبيطار
وليد: كفاش
زهير: (تخنق بافكار خااايبة)
هادشي للي كاين أوليد الا صلاح تجييو
(قطع وبقا حدا لباب قرد دار يدو على حنكووو كيحاول يفهم حتى كيقشع بنتو ختو مليووحة ناض بالزربة مشا لجيتها حسابلو أنوار للي ضربها ولا دار شي حاجة باش كان سكران هكاااك اي حاجة يسبها فهادشي للي وقع مهم ميكونش متعلق بمرتو.. جا بغا يهزها وهي تحل عيينها)
امال2: انوااار انوااار هئ هئ
زهير: أمال امااال (حلت عينها بتقااتل) توݣضي واش صااار بينااتكم؟!
امال2: كيف راه انوار؟!!
زهير: (بنبرة حادة كيزعزعها بشوية) واش صرااا بيناتكم؟!
امال2: زعف مني بزاااااااف مكاانش علية نݣول عليه هكاك
زهير: (بقا كيشوف فيها وهي كتبكي وقفها حتى مبقاتش داايخة) شوية دابا؟!
امال2: بغيت نشوف رااجلي (حرك راسو باه ودااها لعندو دخلت وهو بقا براا...)
هند: (بطليب ورغيب خلاها وليد تمشي بوحدها مكاين لاش بفيقو لبنت وبقا مقابلها وهي مشات عندهم بطموبيلتها دخلت لقات زهير برا خرجت ومشات عندو) سلام شنو واقع؟!!
زهير: من فوكاش ونتوما تعرفو انوار؟!
هند: (بقات كتشوف فيه وتربط الأحداث أمال ضربت أنوار غيبااتو ودابا راجلها كيسول على هاكا) عرفناه منين كان مع شيماء علاه؟!
زهير: منين خطبها ولا قبل؟!
هند: فدوك الايام.. علاه تتسول هاكا شنو واقع باش نعرف نجاوبك
زهير: والو والو رواحي معايا (بقات كدور عينها خاايفة توقع شي حاجة مشات دخلات رحب بيها لكبير بقات كتقلبو بمساعدة ليلى وبشرى دواتلو الجرحة للي كانت عمييقة وخاص ضرووري تخيط)
هند: حاولو توݣضووه يمشي لصبيطار
ليلى: شوفي ابنتي كديري نتي تخيطييه عمك مبغاش يديه لصبيطار وهو فهاد الحالة
هند: ليلى نتي عارفة الا لخياطة نخيطها عادي ولكن راه ضرووري خاصو يدوز عند طبيب شوفي من قبيلة وحنا نحركو فيه والو مفااقش واش فهمتي السيد مغيب بالصح (زهير كان متكي حدا لباب كيسمعهم جا حدااهم)
زهير: عيطو لخوتو يجيو يهزووه نديه يانا لطبيب
هند: نشوف واش شي وحدة من لبنات بيرمانونص نصيفطكم عندها نيشان (خرجت برا كدير الاتصالات ديالها طاحت فواحد برومو ديالها نعت ليها صبيطار فين كاين مشات معاه بشرى وزهير ومرتو اما خوتو بقاو كيݣمݣمو وكولها دخل لبيتو.... غير شافتهم مشاو مشات بالزربة كدق على أمال والو حتى بقات كتعيط ليها عاد هبطت فتحت ليها غير دخلت هند لوخرا بقات كتبكي بخوف كبير)
أمال: غيقتلني غيقتلني... (بقات كتهدييها هند عاد عاودات ليها شنو وقع) وكان مضربتوش وكان معرفت شنو ݣال اخر
هند: ولد **** (وطولاتها) وشنو غديري داابا
أمال: نهرب
هند: غتزيدي تأكدي راه زهير مع السلام مع فوقاش عرفتو أنوار وتيسول
أمال: حلفي احاااي (رجعت كتغبن) مسخييييتش بيه يا ختي الا مطلݣنيش غيقتلني
هند: سمعي خاصك تكوني قوية وسنطيييييحة قولو ضربتو حيت خفت عليك وياااك ويااااك تعتارفي بشي حاجة داكشي للي فات مسحيه بليييݣة عمرووو وقع أنوار كان مع شيماء كما كولشي كان عارف
أمال: (بقات كتشوف فيها) زهير قاااسح
هند: متنسايش راكي حاملة وهادشي نقطة ضعف زهير عرفي كفاش تستاغليها
أمال: (بلعت ريقها كتستاااعد لهاد القوة للي الداخل ديالها كتكون) علاش يانا نتحاسب على شي حاجة مدرتهاش
هند: voilà نتي مدرتي والو الي يتحاسب هو داك الكلب ولكن غبرتي على مو لقليلة عندو 20 غرزة فراسو هادشي الا مخربقتيش لمو سلووكة
وليد: (صونا على هند عاودات ليه شنو كاين حيت دابا جا الوقت باش يوقف معاها) صافي رجعي نتي للدار
هند: ولكن راه خفت عليها تبقى بوحدها
أمال: غير سيري رجعي اختي، سمعي لراجلك
وليد: رجعي اهند باش نعرف سمو ندير (هند استسلمت ودعت أمال للي كانت بحال شي عصفوور مسجوون ومهرس من جناحو حتى الان طلقوه مغطييرش ومصيرو وااحد.. مشات هند لدارها) متخرجش
هند: شنو غدير راني خفت عليها وانا للي شفت حالتها وعاد حاملة
وليد: حاملة!! وزير عارف
هند: اه غتكون قالتها ليه داك الكلب ضيع عليهم الفرحة وكولشي
وليد: هداك غلاط ديالكم نهار اللول واش هداك يتعرف عليه بناااادم ومنين عرفااتو راه عمو كان عليها تصااارحو ماشي يخليه ساكن جنبهم سمو كنتو متوقعين الا مكانش اليوم غداا واحد شماتة بحال هداك غيسوق ليها
هند: ولييييد متزيدش حتى نتا
وليد: غنزييييد ݣد لبزقات وعندكم اسرار ݣد لخصااارة بغيت غير نعرف واش كانو صيفطووكم تقرااو ولا سمو؟!!
هند: (سكتت حيت الا بقات كلمة مني ومنك غيصدقو فشي حاجة اخرى ودابا همها أمال عارفة وليد كيكره أنوار كره اعمى...) صافي احبيبي دابا قولي شنو غدير؟!!
وليد: نمشي لحݣ صبيطار فين كاينين
هند: (عطاتو سمية صبيطار ونعتات ليه فين حيت زهير فيقولو بلاش عليك) رد بالك فطريق احبيبي (خرج وليد باغي يدعي على لاخر بشي عااهة ولكن غتجي غير فالدرويشة ديال بنت عمو.. مشا لصبيطار المستعجلات لقاهم تماك كيساينووه)
زهير: (زاد تنوى وهو فوسط افكارو) وليد؟!!!!
وليد: فين... كيف بقا ولد خوك!!
زهير: مزال مخرج طبيب عاد غرزوه ودارولو سكانير (جا حداه) علاه جيت
وليد: رجع فحالي
زهير: وغير عذبت رووحك
وليد: سمو وقع وكفاش أمال ضرباتوو
بشرى: كانت خافت على راجلها حيت كانو يوݣضوووه (ضارت عند امال2 بالزربة) واش صرا بيناتكم غواتكم كان يتسمع حتى لينا
امال2: (,حنات راسها حشمااانة)
بشرى: حتى هاد أنوار معندو عقل شحال وانا نوصي يبعد من هاد زمر
زهير: هو مكااانش يحاديه
بشرى: ݣول كان مبلي راه غير فاش صرالو داكشي للي ريض اما كان كل نهار (كتحاول تقنعو باش ميفكرش انه كان سكران على مرتو)
زهير: معرفت
وليد: ختو عارفة كتر الله يهديه انا براسي هاد ليامات شفتو كينشط
زهير: فين؟!
وليد: غير نهار حل المحال كان هو وصحابو ناشط حتى من أشرف عيطلو ومبغاتش
زهير: (غير ساكت كيسمعلهم..)
بشرى: (دارت راسها كتهضر بشوية مع أمال ولكن قصدها تسمعهم ليهم) ظحكني عليك بعدا مدابزين وفضحك على شنو كنتو دوزتو قبل ميتزوج ويمشي لفرنسا
امال2: ها!!
بشرى: ماشي وقتو أمال حشومة خالك هنا (امال2 حنات راسها زوهير غير كيدور دوك لعينين للي بحال صقر....)
خرج عندهم طبيب قالهم انه مزيان مكاين مناش يخاافو ولكن خاصو الراحة وكان عدد لغراز 24 ومساهلينش وأكترية فالراس وصف ليهم شي دوايات خلص زهير طبيب بقات معاه بشرى تبات معاه وصبفطات أمال2 معاه حيت عيانة
زهير: (فتحلها الطموبيل) سيري هاني جاي (مشات هي ركبت كتأزم وخايفاه يعاود ليهم الهضرة للي ضارت مع مها وأنها حسدات أمال على الحمل وقالت عليه ماشي راجل وهو بقا مع وليد برا والبرد كيخبط فيهم ولكن حتى واحد ممسوقلو) عذبتي روحك بااااطل
وليد: درك سمو دير؟!
زهير: (غمض عينو جاه هادشي كتييير غير قبل كان ناعس فرحاان ناشط تفكر حمل أمال والطرشة للي عطاها) استغفر الله
وليد: ݣولي سمو عندك فداك الراس
زهير: منين نعرف نݣووولك
وليد: دابا نتا باه مكبرها
زهير: تكبر خااص تكبر لله تهود ضرب الراجل وعرياااانة!!!!!!!!!
وليد: وسولتيها؟؟
زهير: مزال عاد رايح لعندها
وليد: متنسااش الهرمونات راه كيكونو مخربقين شوية
زهير: (مشا مخنزر للطموبيل وليد حتى هو ركب باغي يعرفو غير شنو غيدير ولكن للي مهديه مشافوش كيهلل ويربب ويحلف تبعو وصل لدار. ووقف حيت الا تبعو عاد يزيد يشك... لقى خوه كيتسنااه عاودلو شنو وقع امال2 صيفطها لدارها وهو مشا لدارو.. طلع عندها لقاها متكية مغمضة عينها شعل الضو وعينيها مسدودين بالسيف كيرجفو دليل على انها منعساااتش مشا عندها حيد لغطا واخا هكاك بقات مغمضة عينها) تݣعدي
أمال: (لا ردة فعل المشكل عينيها مطاوعوهاش وبقات كترمش وهي مغمضة بقوة الخوف)
زهير: أمااااااااال (حلت عينها) واش داكشي للي درتي
أمال: (جلست هاربة منو جالسة فوق وسادتها) خفتو يضربك بديك القرعة ومع سكران مغيعرفش
زهير: هو مكانش باغي يضرب
أمال: كان باغي يضرب
زهير: (زاد خرج عينو مغدد) مكانش باغي يضرب انا للي كنت جنبوووو
أمال: وانا خفت عليك محسيت حتى هودت نجري
زهير: (طار شدها من شعرها وكانت هادي اول مرة يضربها ويتعامل معاها بهاد الخشوونة) وهاودة عريااانة ݣدام رجال
أمال: طلق هئ هئ طلق مني كتعدمني (يدو بحال ماتو فشعرها) طلقني ازهير
زهير: (مكيرمشش كيشوف فعينيها) علاه هودتي؟!!!!
أمال: (بقات كتبكي وتعصر فعينيها حتى رخف وطلقها ناضت بالزربة تقنتت فلبيت دايرة حركة الخوف منو يضربها) حيت خفت عليك وندمت علاه هودت محسيت براسي حتى كنت ضربتو ولكن باش ضربني وانا حااملة وديرلي هاكا عمرني نساااامحك (بقات كتبكي وتزيد فاالصوووت حتى بقات كطلع شهقاات وكأنها كتخنق وقف اول مرة يشوفها هاكا مشا لجيهتها هي غير قشعااتو قرب ترخااات وحيت عارفااه غيشدها حاولات ما أمكن تقن الدور مع هاد محقق كونان للي عطاها الله وترخات مزيان جات فيدوو غمضت عينها بهدوووء متخيلة بزااف دلحوايج للي يخليوها ترولاكساااا وفنفس الوقت كتقمش بين عنقها وصدرها كأن الاكسيجين مبقاش فلبيت حطها فوق النموسية وهو حاول يوݣضها هز كاس دلما دار فيدو حتى عمرها وبقا كيرش عليها ولا ردة فعل منها حاااولةيشربها ودار يدو تحت راااسها لما كينزل من فمها بقات كتحل عينها بشوية ومرة يتقلبوو حتى رجعت غمضااتهم كأنها متعبة... طفا الضو عاد رتاحت ولكن حست بيه جالس غير حداها...)
أمال منعستش وحاسة بعينين عليها محست حتى تنهدت تنهيدة ديال جبااااال قالت فنفسها "علاش حتى فرحت وتهنيت فحياااتي رجع هاد الرعب للي رجع كتر من أي رعب عاشتو فحياااتها واخا ولات ناجحة وشحال من حاجة تبدلت فشخصيتها ولكن بلا زهير متقدرش💔
مدام متكاش حداها ونعس الا دمااغو خدام حست بتأنيب الضمير حيت مكيستاهلش هاد الحيرة فين عاااايش... "
حست بيه ناض من بعد متسمع صوت اذان الفجر.. بقات مغمضة عينها دخل للحمام عاد حلت عينها ودمووع دغيا نزلو منها كان ممكن تكوني هادي من بين احسن الليالي للي دازو عندها وفسااعة تقلب كولشي وللي خايفة منووو هي النهاية.. رجعت تكات كتشوف فسقف غير تحل لباب سدت عينها كتعيش فحزن وخوووف كبيييييير قلبها غيسكت الا زهير قرب غير يسمع دقات قلبها غيعرفها فاايقة وخايفة راس كيقولها نوضي عاوديلو كولشي من اول مرة تلاقات فيه بأنوار حتى لدابا تقولو على كولشي على الحݣرة ولغدر للي عاشت فيه تعاودلو على الشمتة للي دار ليها تعاودلو على العفة للي بقات محتافظة بيها وأنها عمرها غلطات معاه ولا دارت شي حاجة خاايبة معاه محست حتى خرجت ليها صوت انييين ودموعها هوادين شعل الضو شاف فيها
زهير: اماال امااال (مشا كيقيسها فوجهها هي مقدرتش تحبس وفات الفوووت باش تجمع قوتها وتظاااهر ان مكاين واالو تكمش وجهها وبقات كتبكي بكل حرقة وعينيها مسدوديييين مقدراااش تشوف فيه بقات غير كتغوت بهستيرية وهو غير كيحاول يفيقها ويسكتها يعيط باسمها وهي وااالو فقط كتلوووم علاش انا؟!!!! حطها فوق حجروو كيلمس فشعرها وحاني عليها كيقرا القران ويديه شادين يديييها حاضنها بكل قوتو حتى ترخااات وحيت بعيااااء كبيييير وهنا فعلا غفلها نعاااس بقا كيشوف فيها بقات فيه وفبالو شنو للي وصلها لهاد الحالة الخااايبة!!!! شاف عنقها فين جرحاتو بظفاارها حطها فوق لوسادة غطاها وطفا الضو جبد صلايتو وصلا الفجر وهاد المرة طول بزاااف وهو فوق السجااادة...)
~~~~~~~~~~~~~
أصبحنا وأصبح الملك لله..
هند: ولييييد وليييد نوووض
وليد: بففف شحال الساعة
هند: 7 ونص خاص تلحق داك الكلب قبل كيمشي ليه زهير
وليد: (ناض داايخ دارو روتينو الصباحي مشا بلا فطوور قاصد أنوار كما توقع طموبيلة زهير تمااك بقا برا صونا على زهير) فينك
زهير: فصبيطار
وليد: امم.. حتى يانا خرجت بكري كانت هند بغات شي حاجة من باتيسري ومن النبووري فيقاتني
زهير: مزيان
وليد: نتقدا وندوز عندك (قطع مشا باتيسري خدا شي تخربيق وداز لسبيطار لقا زهير برا واقف كيكمي) فين
زهير: واش جابك فهاد صباح
وليد: راه ݣلت ليك ولا قاسك زهايمر
زهير: قايسني **** هاد الساااع رووح رووح معندك مدير بهاد القنطة للي هنا
وليد: زهير ݣولي سمو عندك فداك الراس
زهير: (قوس عينو ودار عندو) درك جاتك بنت عمك تهود ضرب الراجل عادي!!!!
وليد: شكون هاد الراجل!!
زهير: أنوار!!
وليد: اممم حسابني شي رااجل.. هي سمو ݣالت ليك
زهير: بحال مݣالت واالو
وليد: يعني متيقتيش سمو ݣاالت مزيااان سير دابا تيق سمو ݣال ولد خوك لحبيب (مشا وخلاه وزهير غووبش بقا متبع ليه العين ضار وهو كيحل باب الطموبيل) للي معندو زهر معندو حتى مع خلا داار بوووه عاد بقا الناس لوخرين (لاحلو هادي خلاه شااعل ومشا فحااالو...)
بشرى: واش درتي يا أنوار وااااش درتي؟!!
أنوار: (راسو عاطيه لحريق بحرا كيقد يحل عينييه هز يدو حطها فوق جبهتوو) واالشتااا!!!!
بشرى: علاه شربتي لبارح علاه؟!!!!
أنوار: (كيغمض عينيه ويرجع يحلهم كيحاول يتفكر) فين انا؟!!!
بشرى: واش معاقلش!! تا.. (صونا تيليفونها جاوبت) وي..
هند: حم الو بشرى انا هند
بشرى: صاحبة امال؟!!
أنوار: (غير ذكرت أمال بقا كيتفكر شنو داار وعينيه كيخرجوو)
هند: اه كنت بغيت نسولك واش فاق انوار؟!!
بشرى: واه عاد
هند: (حركت راسها باه وخطف ليها التيليفون) وليييد
وليد: سلام عليكم ختي دوزيه لية
بشرى: واا واخا.. (عطات لأنوار التيليفون غير سمعت تخصار الهضرة بعدة شوية وكتشوف أنوار كيتفتف وكيحاول يهضر ولكن لاخر مكيخليش ليه مجال....)
خرجت ورادة اللومة لكبيرة لخوووووها فقط.. بقات شي 10 دقايق مع شافت زهير جاي دخلت لقات انوار غير سااقر..)
ها زهير جاي
أنوار: خرجي نتي ابشرى (دخل زهير)
بشرى: صباح الخير
زهير: صباح الخير (شاف فانوار) مبقيت نتا؟!
بشرى: انا نمشي نجيب قهوة تشرب اعمي؟!
زهير: هاد شربت وحدة غير هبطي فطري لتحت (خرجت عارفة غتنوض الݣيييرة... شاف فيه ديك الشوفة ديال وا هضر) هضر!!
انوار: معرفت منݣول (دار راسو طالع ليه الدم) مفهمتش لاش ضارباااني
زهير: حتى نفهم يانا علاه كنتي سكران تحت دااري
أنوار: واش انا واعي واش كنت ندير (بانت فيه معصب وكيهضر بطريقة ديال واحد واصلة ليه لعظم) داابزت مع ديك لخطية للي تبليييت بيها أنا ماشي راجل يانا جالسة هي وعمتي ياااكلو فلحمي واش درت يانا ݣاااااع لهاد لبنت من نهار اللول عرفت راه زواجنا ديال لفااميلة وغياااخد وقت باش نتعود عليها ونعاود نكووولها بزااااف عليها توصلها
زهير: لشكون؟!
أنوار: لشيماااا.. للي ظل تحفر عليها وتسبها وكل مرة شاكة فية ولكن انا للي ضيعتها وانا للي عطييييتها
زهير: واش راك تخرط وتخور
أنوار: زهير لا نتا لا غير راه يفهمني
زهير: 3 سنين ولا كتر باش مفارق معاها لبارح عاد بانت ليك
أنوار: وشكون ݣالك عاد بانت لي شوووف انا ندمت على شي كلام ݣلتو هي مرة الراجل مخاصش نݣوول عليها هكاك
زهير: (بقا غير كيشوف فيه)
أنوار: انا مفهمتش لاه ضربتني مرتك
زهير: (كيربط الأحداث وشحال من حاجة وانوار كيتسنى منو شي كلمة دخل لكبير وليلى بقا كيغوت عليه نوضووه باش يخرج زهير مشا للمحال باغي يبقى بووحدو واخا مكانت عندو ݣانة لشي خدمة...)
كولشي تجمع فالدار عند الحاجة للي عاد كيعاودو ليها محاسبة خبار جاو بناتها ونسا ولاد لكبير نساو السكرة ديال أنوار وكلامو لاسقين غير فضربة أمال لانوار..
عيشة: الخانزة المسخووطة صيفطات لكبيرة وبغات تبع ليها الولد
امال2: مفهمتش لاه ضربااتتو مسيكيييين
عيشة: كون كنت منك نشدها ريشها نوريها تهز يدها على رجال
الحاجة: سكتي ݣالك تريشها ولينا فالسييبا
عيشة: مّا ياكما بغيتينا نعبدوووها منݣدو لا نهضرو عليها ولا نهضرو معاها دير زبلة على زبلة ونتي وخويا لهبيل واݣفين لينا شوووكة
الحاجة: واݣفين مع الحق واش دارت ليك هاد لبنت باش راكي حاݣراها زكرهاااهاا هاك
عيشة: تربيتها الناااقصة
الحاجة: بانلي يانا للي مربييتكش
عيشة: هااا واش ݣلنا مّا كوني معاها مزيان الا بغيتيلها ديك المسخوطة ولكن الا جبدتيها تنكرك
الحاجة: بعدووني نمشي عندها
عيشة: الا حلت ليك لباب (ديجا مشات عندها ومحلاتش ليها خرجت الحاجة هازة مروان للي خاف من داك لغوات مشات عند امال دقت عليها ووالو محلاتش)
مينة: فرقي عليك مّا اعيشة راكي تعصبي فيها
عيشة: وهادشي للي راحنا فيه
مينة: ونسيتي ولد خوك للي سكر وجالس يغوت فليالي
عيشة: راااجل يدير واش بغا يكبر ويدير عقلو
مينة: لا حول ولا قوه الا بالله العلي (تمت داخلة الحاجة) مّا رواحي تجلسي
عيشة: محلاتش ليك القايدة؟!!!
الحاجة: ها عار الله الا ما فرقيني عليك (دخلت لبيت معصبة من كلام بنتها حتى سمعت الهضرة كترت جابو أنوار لدارو هبطو كانو قرعوولو فوق للقرفاادة مغرزين ليه جلس فوق السداري وأمال مرتو كتقاد ليه وهو مكيشووفش فيها.. زهير دخل من اللور بشوية كانت حركاتو بطيييئة ماشي كما موالف داك الحماس والخفة بحال شي واحد برݣاݣ باغي يعرف غير يجبد خبيرااات) ولدي واش صراااا؟!!
أنوار: واالو امّا غير متخلعيييش
عيشة: على سلامتك احبيبي كانت الضربة واااعرة بفففف الله يهدي مااا خلق وصاااافي
أنوار: هضري مع بنتك اعمتي راه كترت علية
امال2: (هربت من حداهم مكانتش متوقعاه يحطها بوجهها وحشمت قدام البقية وحتى الله مزال مجات الفاميلا كولها)
عيشة: معليييش اوليدي صغيييرة ودرك دير عقلها
زهير: (فبالو يعني مدابز مع مرتو بالصح مدام كولشي كيهضر هاكا ولكن!!)
أنوار: راه بزاااف من نهار تزوجنا اما لكلام دلبارح (حرك راسو بحال كيتحلف وشاف بنص عين زهيير)
لكبير: (كولشي راد معاه لبال فالهضرة باش يفهمو شنو وقع لبارح للي يخليه يسكر بييييلا) واش صراااا
عيشة: واالو ااخووويا راك عارف المشاكيل صغاار ديال زواج
أنوار: كبار اعمتي كباااااااار الواحد راه يتزوج باش يرتاح ويعيش مهني (كولشي شنو بقا كيأولها)
الحاجة: حتى مرتك مهلية فيك وتبغيك واش خاااصك معاها الا كانت نݣارة شوية غي حيت رادة بالها معاك..
زهير: مجاتش أمال امّا
الحاجة: لا وليدي مجااتش روح طل على مرتك تكون عياانة؟!!
زهير: (طلع للدار نيشان لبيتو لقاها جالسة مظلمة عليها وضواو مطفيين.. شعل الضو وشاف فيها حاس بشي حاجة مخبية احساس مابغاش يتفاااارق معاه ومن طبيعتو ميقدرش ينااافق خاصو يعرف وأكترية على أمال مرتو ولف كيعرف عليها كولشي جلس حداها وشاف فيها) كيف بقيتي!؟!
أمال: لباس
زهير: نعاود نسولك علاه هودتي لبارح منين سمعتي أنوار يغوت
أمال: (شافت فيه وعينيها كيبريو) هادشي للي هامك؟!!
زهير: جاوبي أمال
أمال: (بقات كتشووف فيه) انا غنݣولك وانا عارفاااك مغتييقش فية انا هودت خفت عليك
زهير: خفتي علية لدرجة مشيتي تݣلبي على لفردي تقتليه؟!! نتي أمال ديري هادشي؟! وعلاه؟!
أمال: (بعصبية) حيت خفت عليك
زهير: غير خفتي هودتي ضربي ضربة الموت؟!!!!
أمال: (سكتت قالبة وجهها نادمة علاش هبطت ولكن وكان مهبطتش كان غيقول شي حاجة للي يا يصدق قااتلو يا ما كفس...)
زهير: من فوكاش ونتي تعرفي انوار؟!
أمال: (شافت فيه هزت يدها طرشااتو ولكن كانت خفيفة صدماااتو ردة فعلها وقفت فوق النموسية وحتى هو وقف مصدوووم) لاش باغي توصل؟!!!
زهير: (جا بغا يشدها وهي تهرب ليه دغيا درب الدورة حكمها وهي تشد فكرشها متوجعة خلاه يتراااجع خطوة) علاه!!!
أمال: (كتبكي) هدا جواابي حيت من لبارح ونتا باغي تسمعو منين مراااكش تيق فية والله منجلس هنا (كتخبط فصدرها) انا هربت من دارنا من كولشي باش نكون معاك حيت حسيت بيك كتيقني وتبغيني حلفت ليك لبارح والله خفت عليك داكشي باش هبطت وأصلا والله مفهمتش شنو للي خلاني نهبط (كتبكي بحرقة) حتى واحد مكيبغيني فهاد الدنيا بقات عليك نتا (جات ماشية وهو يوقفها مخنزر فيها) طلق مني
زهير: اخر واحد فكر يديرلي هادشي للي درتي يدو تكرضت
أمال: (مدت ذراعها) هاك ݣرضها كمل كمل شنو بداو لوخرين عادي ولفت غير كمل
زهير: (مفهمش هاد قوة درااما حتى كتشد فكرشهعاد كيتفكرها حاملة وسؤالو واش الحمل للي داير ليها هاكا!!!) واش عمري ضربتك
أمال: (بعصبية) واااه لبارح طرشتني ونتفتني ودابا باغي ضربني وعاد وانا كنشوف حااااملة نتا منااافق شحال ونتا تسنى نحمل ودابا كتعذب فية هاكا
زهير: انا منافق؟!!!
أمال: خليني نمشي فحاالي مبقيتش حاملة نجلس فموضع معاكم
زهير: (بقا كيشوف فيها ݣلبااتلو رااسو)
أمال: (حاسة بيه ممتيق حتى خرية ولكن كنحس بعياء خطييير) شنو باغية تسمع ودنك ازهير باش نهنيك حيت عارفاااك مشكاك على واالو ولكن اخر حاجة ظنيتها هو متييقش كلامي للي نتا عارفني ذبانة الا دازت من حدايا كنجي نعاودها ليك
زهير: راكي تغلطي بزااف أمال وراكي تحرفي هضرتي اولا انا مشكيتش فيك حيت عارفة يديها منتحكمش فيهم
أمال: من التالي
زهير: مكتشوفيش روووحك غالطة؟؟!
أمال: لا
زهير: حتى وهبطتي عريانة وضاربة السيد من لفوق وضارباني يانا نيييت
أمال: ݣلتك محسيتش براسي لبارح خفت عليك خفت توقع ليك شي حاجة وغلطت منين هبطت عريانة صاافي شي لاخر مغلطتش فيه...
زهير: من نهار اللول مكنتيش تحملي أنوار
أمال: ولدابا مزال هاكا وعمري نبغييه وغير كنافقو منين كنهضر معاه ولا حتى نسلم عليه كنكرهوو انا للي شفت واش دااار انا للي شفت لعبووو والشمتة للي دارلها انا للي شفت روينة للي خلا من مورااه
زهير: وعلاش كنتو نتي وبنتوعمك مكتهاضروش
أمال: عليييييه حيت هضرت ونصحتها وفضلاتو علية الا بغيتي نفرتكوها قدام كولشي جيبو هو وشيما هند للي بغيتي (بقا كيشوف فيها) زيد شنو اخر..
أمال: زيد شنو اخر!!!! شيماااا كانت مع أنوار ومحمد فنفس الوقت نهار خطبها أنوار محمد خويا تصدم بسبابها ضربني زدت كرهتها وكرهت لكلب للي تشفى فخويا مرة وجوج واخا مكنتش نتحاملو ولكن خويا خويا واخا يكون شكون ما بغا جاتني النفس عليه..
زهير: هادشي علاش ضربتيه حيت مكتحمليهش
أمال: ضربتو ازهير حيت كنعرفو خبييث خفتو يضربك راه ديجا غدرك انا مكنتيقش فيه هاكا ݣالي عقلي الا مشيت نتا لمن تخليني انا ومروان وللي فكرشي لمن تخلي مّا جاوني شي افكار خاااايبة
زهير: (كيسمع من نيتو نسبيا هضرت فالحق) صافي درك حاولي على راسك
أمال: بغيت نمشي؟!
زهير: وين باغا تروحي؟!!
أمال: بغيت نخرج (وجهها تكمش باش تبكي)
زهير: معندك وين ترووحي انا غنخرج نجيبلك تاكلي من بعد ونكملو هضرتنا (خرج هي زادت خافت اش باغي يهضر عااود تنهدت قلبها غيطرطق حاسة براسها غتفرݣع مشات لبست حوايجها هزت كارت ناسيونال وكارت ݣيشي ديالها هزت سوارت طموبيلتها وخرجت فسكاات هزت طموبيلتها وزادت مع طريق حتى من تيليفونها طفااتوو......)
زهير: (كتقاد ليها الحاجة الماكلة فصينية وهو عقلو غيخرج)
الحاجة: ولدي مال أمال مجاتش طلت علية نهار كامل
زهير: (زفر) اودييييي خليها حسن راكي شفتي هنا كولشي راد ليها السبة
الحاجة: بشرى للي كانت حداه ݣالت كان غيضربك بالقرعة
زهير: هادشي للي ݣالت حتى هي
الحاجة: مسيكيييينة خافت عليك
زهير: تيقتيها نتي اماّ
الحاجة: وعلاش منتيقهاش حتى من ليلى ݣالتها وأمال مكتحادي حد يمكن شافتو بغا يضربك راه كان سكران ومعارف ميدير
زهير: حتى لوحم كيلعب على مرت ويخليها غير تبكي!!
الحاجة: بزااااف وحمها اللول داز سكوتي يمكن هادي شي بنية غتعذبها وتعذبك ههه
زهير: مخلاااونا حتى نفرحوو من صباح ربي وهي تبكي (قرب حدا مو) راه طرشتني
الحاجة: ههههه الله يعطيها صحيييحتها
زهير: عجبك الحال
الحاجة: الا درتي علاه؟! جيبها اوليدي متبقاش مخلوية تم وللي هضر انا نتبالة بييه
زهير: (هو بيه غير كلام أنوار كانت ديالي وانا ضيعتها حتى كيبغي يتناسااا وكتجي فودنو هاد الجملة) غير خليها غدا وتجي.. (هز ديك الصينية داز من حدا دار أنوار تفكر كلام أمال هو خبيث وانا مكنتيقش فيه ومنساش شنو دار فيك وفخويا محمد وشيما.. مشا عندها لبيت ملقاهاش حط داكشي وبقا كيقلب عليها والو مكيناش كل على طموبيلتها مكيناش بقا يربب ويسب هز تيليفونو دوز نمرتها والو مطفي.. زاد تعصب زدح ديك الصينية بالي فيها وخرج صاااعر فين غتكون دازت اول وحدة صونا على هند والو محمد حتى هو مشافهاش بقا مربووط معارفها فين مشات ولا فين زادت صاااعر حيت عصااات كلمتو وخرجت وخاايف على حالتها وعاد حاملة من الفووق..)
يتبع...
التعليقات
لا توجد تعليقات بعد، كن أول من يعلق.