قصة عنبر الجزء الأول

مـاء ونـار هي قـصة غـير مـتـزنـة، طـريق واحـدة وقطـعة منـها تُحـدث الفـرق، مزيـج غيـر مـتجانـس، كـل واحـد ولحـنه ؛ مـعزوفـة تتـناثر عـلى شـكل لحـن ناصـع البـيـاض ..

° بلـغـة الـضـاد خـاطـب جـمـيـع الـقـرّاء مُـعـتـرفاً :

• رحـيقها سلـب كيـاني وجـعلني مجـنونا بـها، حـادة هـي كالـسيف وتـارة أخـرى هـادئة كـهدوء الليـل، ابتسـامتها أشعـلت لهيـبي ومارسـت علـيّ طقـوس العـشق، رائحـة عـبيرها دغـدغت جِـسمي ونشـلت مـنه الراحـة ، أغرقـتني في بـحر عيـونها وحـيدا بـلا مركـب ولا مجـادف ، وكأنـني أحتـسي فنـجان قهـوة لذيـذة بيـن أمواجـه ، ملاحـتها سيَّـجتني من كل الزوايـا ، وصـوتها دق في قـلبي كالنـاي مع أنغـام الكمـان ..

ثـم قـال لـهـا : ولكـن أعلـم جيـداً أنـك تتمنّين أن أُقيّد وَحْـشَ غيـرتي داخـل أسوار البـرود، وتأمـلين منـي أن أقـول لـك ما أردتِ ... فما لا تعلـمينه سيـدتي أننـي رجـل شـرقي إن أحبـبت تمـرّدت وإن عشـقت إمتـطيت حـصان الجنـون فأصـبح مروّدًا لفرسـي إلى حد الهيجـان، ولـن تستطيـعي أن تفـلتي من قبـضة الأخطـبوط .. فمطالبك ماهي إلا أضـغاث أحـلام، فمـرحبا بـك في ممـلكة جنـون الروطـال ..

° إبتسمت وبنـفـس اللـغة خاطبـت جمـيع الـقـرّاء :

تسـألونني من يـكون؟ هو الـليل حيـن طـواه السكـون، قامـته مـعنى الشـموخ وهـامته أفـق السـحاب، يغـضب كأسـد جسـور ويـعود بهـمس العـتاب، مغـرم بالسـيطرة ويحـب التـملص ، يعـشق التـمرّد ويكـره الخضـوع، فـي الغيـرة شيـطان مـستبّد، يلقـي تعـاويذ التنـكيل، نـبرة صوتـه الخـادرة وابتسـامته الثـملة ، مـلامح وجهـه الـجـادة وحاجباه الـحادّان ؛ زوايا كتـفيه المنـحنية ومنكـباه العـريضان هم وطني المغـتربة عـنه ... سيد الخيـل وفارسـه ، فسبـحان من جـعله فـي الأعـين مونقاً، روّض قلبـي كما يروّض خيـله ، فهـو لا يـهاب شيئاً بل الخـوف يـهابـه.

ولكن أريـدك أن تستـمع إلـيّ أيها الأخـطبوط ... بمـا أنـك تريـد أن تسـتولي على قلـبي ، فلـن أخضـع لك ولن أسبح في بحر تسلـطك بلا حِـراك .. فلا غروري سيـرضى أن يقف ساكنا أمـام كبـريائك الشـرقي، ولا قلـبي سيـهدأ في إسطـبل إذلالـك .. فأنا فَـرَسٌ تحـب التـحرر وتستهويها الطـرق، فَلَقَبِي الشحـرورة خلقـت لأكـون حـرة طليقـة ..!

- نظر إلى عينيها الساحرتين مخاطبا إياها بلغتها :

يا أنا فيـن نخـبيك أنا يا من المـوت أنـا يا العزيـزة علـيا ، أنا دوقـتيني حلاوتـك يانا وسـخيتي بيا .. انا الله يا سيـدي وزلالـة العـينين كتـرشي ، أنا الهـدا لاويـن لا تلـومو حرشـة العينـين ، الله يا سيـدي حتى حبيـب مايلومـوه النـاس وأنا ياك أداتي ماصبـرتي ماكبـرتي ، وأنا ݣولو لحبـيبي بـصحة بضـاض لي عـملتي فـقلبي جديـد ...

- بادلتـه نفـس النـظرات وبنفـس اللغـة قالـت :

عينـيا وإلى بكيـت سامح ليا , سـامح ليا بضاض ورشـوق بنيا ، سـامح ليا الـغرام ماعـمل شـرعية ، تانا عيـنو كحـلة حاجـبو خروبـي .. تانـا عيـنو كحـلة حاجـبو يعلـى .. دادا يا دادا ومـي لالة الهـوى غربـاوي ومـي لالة يجـرح ويـداوي ومـي لالة جـيتي مـاجيتي وݣاعـلا تـجي والحـال يجيبك مي لالة ومابيـن العـرصة وبيـن الريـاض وطـال الميـعاد .. ومـي لالة ومـشيت نخـلف ومـابقى صـبر بضـاض يـتلــف ...

• تــحــذيــــــــر •

⚠️ روايــة من العـيـار الـثقيل، تحـتوي عـلى أحـداث حقيـقية واقـعية لـذلك لا ينـصح تـتـبـعها من طـرف مُحـبي الـروايـات الــهــادئـــة ⚠️ ..

❦

- فـبــن سليمان ، وبضبط وسط بيت مصبوغ بالبيض فيه زوج سدادر .. قدام المرايا واقفة مرأة فالخمسين من عمرها زينها كيتضرب بيها المثال ، مايمكنش تكون فشي مجمع ومتخطفش عقل الرجال .. قد طولتها قد عموريتها شعرها الكحل بحال الليل جامعاه بمقبط عنقها لي كان واقف بحال جبل مزينو ݣورميط ديال الذهب .. تحل عليها الباب على غفلة ودخلات منو سيدة فالأربعينات شعرها حارقاه بالصبايغ مكياجها مكانش متقون وكان كثير ، لابسة قفطان فلورونج على عكسها هي لي كانت لابساه فالكحل ..

- (بصوت باح ) تودة الرايس كيتسناك

- تودة (هزات من العطر ديالها رشاتو ورجعاتو حدا المكياج لي كان مشتت وضارت عندها ) :

أنا جايا سبقيني علميه .. حدرات راسها خرجات سابقاها خلاتها كتقاد حزامها تنهدات تنهيدة طويلة ، حدرات راسها هازة على جلايل قفطانها وخرجات تابعاها ..

- على برا كانو الخيام مراصة والخيل كتبورد ، الرجال فخيمة كبيرة وقبالتهم خيمة العيالات .. كولشي كيتسنى فشيخة تودة تدخل وتمتعهم بصوتها لي كان بحال الجبل ، تودة لي كانت معروفة بالعيطة .. كتقن ݣاع أنواعها الخيمة الكبيرة المباركة لي تجيبها تغني فعرسها ولا سبوعها ..

- كان هو لي ݣالس وسط الجماعة ضايرين بيه الرجال من جنابو بهيبتو وختوريتو ، لابس جلابة ديال السوسدي فالقهوي هازها على رجليه مبين سروال فالبيج .. مع بلغة صفرة وخاتم دنقرة كبير فيدو ليسيرية لي حاطها على جنبو ، رزة صفرة مدورها على راسو وتسبيح فيدو ليمنية لي حاطها على ركبتو وعينيه كيتسناو فيها دخل ..

- بدات الرباعة لي معاها كتعزف أنغام الموسيقى ، حتى تمات داخلة كيف النخلة مجردة .. غير لمحاتها عينيه قلبو تفاجى وعينيه كيبريو لي شافو يقول مراهق عندو 16 عام ماشي راجل كبير ف 58 من عمرو .. وقفات فبلاصتها شادة الميكرو كلها غرور وهيبة دورات عينيها حتى ستقرو عليه تبسم ليها محرك ليها براسو ، كايتسنى غير إشارة منها ولكن خاب ظنو فاش قلبات عينيها ورمات تبسيمات للمجمع لي حاضر ..

- بدات باول أغنية لي كانو كيطلبوها ليها فأي بلاصة كانت فيها ولي هي " عايشة " هي تغني وتهلل ولي معاها كيجاوبوها .. أما البنات لي فرباعتها كانو واخدي دور واحد وهو شطيح ويمتعو المعروضين بشطيح ديالهم ..

- أغنية تابعة أغنية ولجهتو ماتلفتاتش نهائيا مخلية نارو شاعلة تݣدي غير يبخ باغي يحماق ويتسطى ، باغي غير شوفة منها كيموت على تراب لي كتمشى عليه باغي اكليمة منها ولكن عمرها ماعطاتو لي كيحلم بيه .

- سلات الفقرة ديالها رمات تبسيمة ليحاضرين حطات الميكرو ونساحبات هي والفرقة باش يتغداو ويرجعو يكملو الخدمة لي تافقو عليها ..

- غادية حانية الراس حتى سمعات سميتها من صوت رجولي .. وقفات بشوية معطاتوش الفرصة وضارت عندو خلاتو هو يدور ويوقف قبالتها ..

- تبسم ليها وقلبو كيضرب بحال شي واحد صغير يلاه عرف معنى الحب ( بصوت رجولي بلدي ) :

مابغيتيش تشوفي فيا ، لهاد الدرجة محاملاش فيا شوفة ؟

- تودة : ( ضحكات بصوت رنان حتى بانو سنانها لي كانو بيضين بحال الجوهر ، قهقهات بصوت عالي ورجعات سكتات بحال الى عمرها ضحكات )

شنو بيني وبينك حتى منحملكش القايد المعطي ؟

- المعطي : بلا قايد أتودة غير المعطي كافية او وافية ، يهديك الله ياديك السالباني روفي عليا وشوفي من حالي .. لي بغيتيه نديرو براكة عليا وهدا لله شوفي من حال هاد المسكين .

- تودة : ( طلعاتو وهبطاتو ) هاد الكلام كتسمعو ليا غير أنا ولا حتى لديك الولية المسكينة لي حاطها فدار ؟

- المعطي : ( تبدل اللون فوجهو بإنفعال ) عاودتها ليك مامرة مازوج با لب زوجني درت ليه الخاطر وبقيت انا بلا خاطر ، رحميني هالعار باغيك من هذا زمان ..

- تودة ( قربات لعندو حنى ريحتها ضربات فيه ) وانا قلت ليك لي عندي ، زواج بشرع وبالقانون ودار تكتب بسميتي هي والأرض لي حاطين عليها رجلينا ..

- المعطي ( بلع ريقو ) : الدار والأرض أتودة ماشي بزاف ؟

- تودة (بغرور ) :

هداك هو صداقي ، بغيتي مرحبا راه كتعرف داري فين جات ( شافيها بإحراج ) عارفاك كتسيفط السخار ديالك يتبعني لي عندي قلتو ليك القايد المعطي .. بغيتي على العين وراس نكون مرتك من غدا مابغيتيش اتعطيني بشبر ديال تيساع ولا ندير ليك علامك فوق الجامع ، ومبروك مدارت البنية ..

- ضربات فيه وكملات طريقها مخلياه كيغزل فصوفو ويفكر فمحاينو ..

____________****____________

- الــدار الــبـيــضــــاء ، شــارع الـزرقـطوني ، ولايـــة الأمـــن الكــبــرى📍

- ݣالسة على الكرسي مرأة فالخمسينات من عمرها شادة ساكها لعندها يديها باين عليهم الشقا مزينين بخاتم وتحد وهو خاتم ديال الزواج .. عينيها عمرين وباين عليها شحال بكات ، وصلاتها ريحت عطر رجولي صوت خطوات عالية هزات راسها كايبان ليها شاب فثلاثينات من عمرو .. سمر وطويل لحية خفيفة شعر رطب وكحل وعينين جبارة او باردة ، لابس سروال ديال دجين فالكحل مع شوميز كحلة محلولة تحتها تيشورت فالبيض .. عطاها البوليسي لي كان واقف عند المكتب التحية ، حتى دخل عاد دخل موراه .

- كطل براسها مترقبة إيمتا تدخل عندو وبحال الى ربي ستاجب لدعواتها خرج عندها البوليسي وما ليها بيدو :

تݣدي دخلي .. تبسمات ليه بشكر ودخلات للبيرو ، كان بيرو كبير فيه ريحة النقاوة صورة الملك متوسطة البيرو وراية المغرب فجنب البيرو .. وفوق من المكتب محطوط بزاف دالملفات ، ورا المكتب ݣالس كان عندو حظور بطولتو ورجولتو قدامو محطوط بلاكة فالكحل ومكتوبة بذهبي " عماد حَيْدَر ضابط شرطة ممتاز "

- نظارتو تحولو لنظرات عطف أشر ليها بيدو للكرسي وبصوت رجولي مدبدب نطق :

ݣلسي الالة رتاحي .. تقدمات بخطوات مترددة وݣلسات تنهدات تنهيدة طويلة وهزات عينيها فيه قبل لا تكلم سبقا ونطق بنفس الصوت :

ياك لاباس أش حبات الخاطر ؟

- ( بصوت مغنغن كتحاول تمالك راسها ) أسيدي هادي سيمانة وبنتي غبر ليها الأثر ماخلينا فين قلبنا والو مكايناش .. ديكلارينا فالكوميسارية لي حدانا فعين السبع ولكن أسيدي مدارو معانا والو قالو لينا خاص حتى تفوت 48 ساعة وهادي سيمانو او والو داكشي باش قلت نجي لهنا عندكم ..

- عماد (صغر عينيه حال معاها ودنيه ) :.

إيمتا بضبط بنتك غبرات شحال فعمرها ؟

- تنهدات بقلة حيلة ورجعات شافت فيه :

عندها 22 عام وغبر ليها الأثر نهار الثاني للزواجها أسيدي ، كنا مابينا ماعلينا حتى جا راجلها لعندنا قالينا بلي فاق ولقاها مكايناش .. قالينا بلي خلات ليه ورقة مكتوب فيها بلي مغاتقدش تكمل فهاد الزواج وبلي كتعرف شي حد كتبغيه ومشات معاه .

- عماد : ( حك على لحيتو بفضول ) وعلاش مجاش هو وديكلارا ؟

- قال أسيدي بلي عندو الخدمة برات المغرب ومايقدش يعطلها بسباب بنتي ، وبلي الى مابانتش من هنا لشهر غادي يطلقها غيابي ( تقادات فالکلسة كتشوفيه بترجي ) شوف أسيدي قسما بالله العظيم الى بنتي بنت دارهم مكتعرف حتى واحد أنا عارفة بنتي وعارفاها شنو كتسوى .. الى ماخرجت معاها متخرج حتى صحابات ماعندهاش ..

- تماطى للقرعة دالما كبو ليها ومدو ليها ، خداتو من عندو نزلات عليه ماخلات فيه قطرة ..

- عماد (بإهتمام ) واخا وهاد السيد لي تزوجات بيه فين عرفاتو ؟

- الصراحة اسيدي مكتعرفوش .. كيف قلت ليك انا وياها ديما كنخرجو مع بعضياتنا كنا باركين حتى دقو علينا كنحل كنلقى زوج رجال وزوج عيالات محملين ومجملين سولتهم شكون انتوما قالو ليا طالبين ضيف الله .. فاش دخلتهم على ما قالو بلي كانو جايين عندي شي ناس فزنقة الثالثة لي ورانا وشافوها كانت خارجة معايا وعجباتهم ..

- سولو علينا وتوكلو على الله قصدو الباب

- عماد : ( عض على باطن حنكو) وانتوما مݣاليكمش راسكم تسولو على هاد الناس ؟

- (حدرات راسها حشمانة ) الصراحة لا الولد باينة فيه زلد عائلة قالينا خدام مهندس بدارو بكولشي ليه .. قلنا منحتاجوش نسولو وحتى ناس لي جاو عدهم مكنعرفوهمش حيت مامخالطينش مع ناس ديك زنقة .

- عماد : ( ببرود) البنت ياكما بززتو عليها ؟

- لالا أسيدي بالعكس باها كان خايف من هاد زواج ، وهي عجبها هي لي قالت لباها غير يوافق مع كانت خرجات من القراية ومالقات خدمة .. كانت باغية تزوج ودير دارها .

- عماد ( جر المجر خرج منو بكية ديال الحلوة ديال فليو ) عندك تصويرتها ؟

- أه أسيدي كاينة ( حلات ساكها وجبدات تصويرتها مداتها ليه ) .. حط الحلوة ففمو وشد الصورة دالبنت بين يديه ، بنت محجبة ملامحها بريئة وزوينة .. دوز صباعو على شفايفو كيخمم ويشوف فصورة .. هز عينيه فالسيدة ونطق :

درتو احفلة صغيرة ولا عرس ؟

- لا أسيدي درنا عرس بقوامو وهو لي دار العرس ودار كولشي من عندو

- عماد : عندك تصاور العرس ؟

- ( بلعات ريقها ) لا أسيدي حيت هو لي دار كولشي هو لي جاب المصور وجاب حتى دوك الناس لي ولاو دابا كيمنعو التصوير .. قبل مايدخلو الناس للقاعة كيحيدو ليهم التيليفونات وكايديروهم فبوشيط ويكتبو فيهم السميات بقاو عندهم حتى سالى العرس .

- عماد : ( دوز يدو على وجهو) دابا حتى واحد فيكم ماصور شي حاجة من العرس ؟

- لا اسيدي صورنا النهار دالحنة

- عماد : هاد راجلها كان نهار الحنة ؟

- لا أسيدي قال بلي من عداتاهم مكايبرزوش مع العروسة نهار الحنة ، وفعلا ماحضرش حظرات غير مو هي لي كانت ولكن ماتشداتش فتصاور

- عماد : ( بدا كيحس بدمو كيفور ) زواج زين هدا ، تصويرة وحدة ماعندكم لراجل بنتكم عندكم تيليفون ديالو ولا حتى هو ماعندكمش ؟

- لا لا أسيدي كاين غير هو كاين عند مول الدار .. خليتو فدار عيان كان غايجي معايا .. شوف أسيدي كنقسم ليك بالله ( غلبوها دموعها ) بنتي والله مامن داك نوع لي تعرف على شي واحد بنتي كانت فرحانة وعاجبها الحال .. راها تربية يدي ..

- بقا مدة شاد الصورة بين يديه كيحقق فيها .. عيط بصوت عالي بإسم رجالي ، تدق الباب ودخل البوليسي لي دخلها المرة الأولى ..

- عماد : خود السيدة ديها لهشام ياخود الأقوال ديالها والمعلومات الخاصين بيها .. (شافيها ) سيري معاه

- ( وقفات كتشوفيه بترجي مغرغرين بدموع ) ياك غادي تلقاو ليا بنتي اسيدي ؟

- عماد : ( تنهد تنهيدة طويلة ) إن شاء الله على مولانا ..

- حنات راسها وتبعات البوليسي لي كان لابس اللبسة .. رجع بظهرو اللور كيشوف فديك الصورة حطها فوق البيرو وهز التيليفون الخاص بالخدمة .. حنحن قبل ماينطق بصوت متحشرج :

دوز عندي للبيرو كنتسناك .. قطع الخط حاك على راسو منزل يدو من جبهتو مرورا بوجهو وحاجة وحدة لي شاغلة بالو ..

____________****

- الوحدة ديال الليل دخلات لدار .. عيانة ومسخسة العظم الصحيح ماعندهاش ، هكا كيوقع ليها فاش كتكون الخدمة عندها متابعة مكاترتاحش ، الوقت لي كترتاح فيه هو فاش كيكون البرد أما غير كيدخل الصيف مكتحكش راسها يا عرس يا سبوع .. ݣلسات على سداري مرجعة راسها اللور مغمضة عينيها ماكرهاتش تنعس فوق داك سداري ولكن كان خاصها ضروري تصلي لي فاتها عاد تنعس ..

- شيخة أه ولكن صلاتها مكاتفوتهاش .. مكاتعرفش لشي حرفة من غير هادي متقدش تفرق عليها كتحس براسها مخنوقة إلى بعدات بحال الد/م كتجري فعروقها .. جمعات الوقفة حيدات جلابتها دخلات للحمام توضات وخرجات لبيتها ، لاحت عليها عباية ديالها وتوجهات للقبلة صلات صلاواتها كاملين هزات كفوفها لسما كطلب الله فسرها وتبكي دموعها هابطين سخان ..

- لي يشوف هاد العبدة لي ضعيفة قدام الله مايقولش هادي هي تودة المرة الجبارة لي كيخاف منها الكبير وصغير وكيضربو ليها ألف حساب .. سالات ومسحاتها دموعها وقفات محيدة العباية عليها رجعات للمراح طفات الضو ورجعات للبيتها ، مشات لصندوق ديال الخشاب الصغير لي فوق الكوفوز حلاتو وهزات صورة بشوية بحال شي حاجة غالية خايفاها الضيع منها .. باستهت بكل حب صادرة منها تنهيدة طويلة .. رجعات الصورة لبلاصتها سادة على الصندوق طفات الضو وتخشات فبلاصتها مستسلمة للنعاس لي دغية غلبها ..

- ‏الحياة ستحطِّمكِ عدة مرات ، وسترين أمورًا لا تريدين رؤيتها وقد تحزنين وتفشلين وتُخذلين من أقرب الناس لكِ ، ولكن انهضي ولا تفقدي الأمل أبدًا فيجب أن تتجاوزي خوفكِ وندمكِ وهزيمتك .. فإنَّ الحياة لن تقف لتُراعي حزنك .. إمَّا أن تقفي أنتِ وتكمليها رغم انكسارك أو أنَّكِ ستبقين طريحة للأبد ..

***

- فبن سليمان وبضبط فدار القايد المعطي .. دار جات ففيرما كبيرة يجري فيها الخيل فيها 3 إيطاج قدام بابها واقفة طوموبيل كات كات فالكحل .. نزل من طوموبيلتو بكل هيبة رامي سلهامو على ظهرو دخل للدار ، لي كانت من الداخل كلها أثات بلدي كبيرة كل صالة فايتة ختها فالعرض والطول .. ݣلس على الكرسي داير رجل على رجل وبصوتو المدعدع بدا كيعيط :

سميرة سميرة .. تسمع صوت خطوات مزروبة وقفات قبالتو مرأة تكون فالخمسين من عمرها زينة وزينها مدفون بتمارة لي باينة عليها شعرها لي خارجة من الزيف لي على راسها كان كحل غري مافيه شيبة وحدة ورطب تبسيمتها الزينة لي مزينة وجها .. مهبطة راسها كلها كترعد والخوف باين على وجها .. بصوت أنثوي ضعيف :

نعام أسي المعطي ، الغدا شوية ويكون واجد

- المعطي : ( طلعها ونزلها بإشمئزاز محاملش يشوفيها ) سمعي اديك هاه الى حصلتك زرتي رجاء ولا دويتي معاها ، العصب ديال رجليك نݣطعو ليك .. بنتك تزوجات مابقاتش محسوبة لا عليا لا عليك وداك تيليفون بوه انحيدو فهمتي .

- سميرة : ( غرغرو عينيها بدموع ) واش كاين شي واحد مكايدويش مع بنتو اسي المعطي ، راه بتي هاديك مسيكينة تزوجات بزز ومعمرها هزات راس مافيها باس الى سولنا فيها مرة مرة ..

- المعطي : ( عݣد حجبانو او وقف فايتها فطول ، كشاكشو خارجين ) تي شتك بحال الى سايرة كتراضي معايا .. توحشتي السمطة توحشتي يزراݣو ليك الركاني .. بغيتيها تخوخ عندي هنا حتى دير 20 عام .. جوج كلمات ݣلتهم ولا برب الجليل تا نبيتك مربوطة فالكوري توحشتي ريحة الخنز الخنز .. العفن مكايعرفو ليه أماليه

- وديري فبالك قريب نجيب لالاك لهاد الدار حتى الى صبحت نصبح على وجه الربح ماشي الخطية تفو ..

- سميرة : ( ساحو دموعها حارين ، دموع القهرة والظلم والطغيان والحݣرة ) الشيخة تودة ؟

- المعطي : ( رجع ݣلس مبسم ) لالاك تودة وشللي بيها فمك .. متلحݣي ليها حتى فزطمة ديال رجليها ، باغية دخل لهاد الدار بعزها ماشي بحالك باك باعك ليا رخيصة لاحك بحال السلعة الدليلة ..

- سميرة بقات ساكتة ودموعها نازلين حارين ، حدرات راسها وعطاتو بظهر غادي حتى دخلات للكوزينة وقفات وطلقات سراح الشهقة لي كانت سادة عليها بين ضلوعها .. حسات بيد تحطات على كتفها وصوت متسائل :

مالك الالة ياك لاباس ؟ واش غوت عليك عزيزي عاوتاني ؟

- سميرة : ( طلعات راسها مخرجة تنهيدة طويلة من جوفها ، عينيها الصغيرة المكحلة حمرة بحر وناري الكية ) ماكفاهش زوج بنتو لولد خوه بزز منها .. ماكفاهش لاحها لوحة ديال الغدايد وعارف مرات خوه شرانية وأتخرجها من العين لبرا .. ماكفاهش هادشي لي عيشنا فيه باغي يتزوج انعيمة ..

- نعيمة : ( ضربات فخاضها ) أويلي على يتزوج واش عزيزي تسطى ولا مالو فين غادي يلقى شي وحدة بحالك صبارة وزينة وكولشي فيك ؟

- سميرة : ( قلبها بغا يخرج من بلاصتو ) لقى أنعيمة لقى ، لقى الشيخة الشيخة تودة .. أنا مابقاش فيا هو شتي غاهو برد قلبي عليه هدا شحال لي دوزو عليا نموت مانساه ، كنت كنهز الحر وكنقول تجي فيا ومتجيش فبنتي مسيكينة ..

- مكان عندها بيت بحال ݣراناتها خرجها من القراية بكري وفالأخر زوجها ولاحها تݣول ربيبتو ماشي بتو أش انكوليك انعيمة ولكن عرفتي شنو خاصو نيت شي وحدة بحال تودة لي تخرجو من عين البرا ، أما بحالي انا حد مابقا باغيها ..

- نعيمة : ( عنقاتها كتخفف عليها ) مايبقاش فيك الحال صياد النعامة يلقاها يلقاها .. مزيان نيت الالة يتلهى مع العروسة الجديدة نرتاحو امن النݣير وصداع الراس

- سميرة : ( تنهدات تنهيدة طويلة ) سيري حطي الغدا أبنتي مافينا لي يسمع كترت اللغى وصداع ..

قلبها كان مكوي بنار الكية والحر .. سينين ديال الصبر وديال القهرة وديال تمارة خرجات منهم بزوج ولاد ، كريم لي هز راسو خوا وطلع لطنجة هارب من طغيان باه .. ورجاء لي زوجها لولد خوه .. لاحها كيما لاحها باها هادا شحال .

( الدار البيضاء المدينة القديمة ) متكية فسداري ديالها حالة السرجم وساهية .. جوج سيمانات هادي ماخدامتش فيهم ماشي حيت مجاتهاش الخدمة حيت هي مابغاتش بغات ترتاح ، رجل هازاها عندها ورجل مسرحاها وكتفكر مامرة مازوج مشات سولات ولكن الجواب هو هو مكاين حتى خبار ..

- هزات راسها فايقة من سهوتها على صوت نسوي غليض :

واش اختي أتبقاي هوك جوج سويمينات وحنا ݣالسين الله كريم براكة اخويتي من الراحة الفليسات لي كانو عدنا قربنا نساليوهم ..

- تقادات فالݣلسة وتقابلات معاها شافت فيها ببرودة ونطقات :

رحيمة واش انا منعتك ماتخدمي ، من غدا الى بغيتي تخدمي راه تخدمي ݣاع الشياخ باغيينك معاهم أنت اختي لي لاصقة ليا فركاني ظهري ..

- رحيمة : ( ضحكات حتى تسدو عينيها الصغار هازة زوج خصلات من شعرها الصفر لي حرقاتو بصبايغ ) عارفاني مانصيبش منقدش نبدلك يا هاد الخطية ، واش حنا صوحبة ديال عام تي راه عشرة عمر أمحنتي ..

- تودة : ( هزات كاسها ديال اتاي جغمات منو ) منبغيش نقطع رزق شي حد .. داكشي باش كتليك نوضي ضبري على مخك ماتبقايش تتبعاني أنا .. علم الله إيمتا ترشق ليا على الخدمة من دا وجديد

- رحيمة : ( شافت فيها بشك ) وعداك اتكوني اخويتي بغيتي تعتازلي خلاوها ناسها .. تي وهاد الحرفة بحال الظفر مع جلد الى تفرقو يسيل الدم

- تودة : هاد الساعة مكاين فراق ( تسمع الدقان فالباب ) نوضي الله يرحم بوك شوفي شكون ..

- ناضت رحيمة حلات الباب .. رجعات هازة حاجب ومنزلة الثاني وقفات مقابلة مع تودة :

القايد المعطي على الباب ، بغا يدخل وماخليتوش

- تودة : (حطات كاسها وناضت ) خليك أتي انا نشوف اش بغا ..

- خرجات لعندو كيبان ليها واقف بسلهامو ونظاظرو دشوف وتسبيح فيدو ، مبسم وكيشوف فيها مغروم .. مقدي محمل ومجمل وشيفورو واقف كيتسنى ..

- تودة : ( وقفات بطولتها المجردة حاطة يدها على الباب كتشوفيه ببرود ) أش كاين أسي المعطي ؟ ياك لاباس ؟

- المعطي : ( حنحن ) وزعمة حشومة تخليني واݣف على الباب ، تي مولات الصواب الالة تودة ..

- تودة : ( ربعات يديها كتشوفيه من ساسو راسو محطوط فوق قلبها خانقها ) اسمحلينا اسي المعطي حنا غير وليات مامعانا راجل .. وجيران شي حاضي شي عارف هنا تعطس فدارك تسمع فدار جارك .. قول لي بغيتي والله يعرضك السلامة ..

- المعطي شاف فجنابو بلع ريقو ماعجبوش الحال .. ولكن مكان عندو مايدير هز راسو فيها مبسم ونطق :

فكرت فݣاع لي ݣلتيه اتودة ، وأنا موافق عليه عتابري الدار دارك وحتى الأرض ديالك .. غير قبلي تكوني مراتي على سنة الله ورسوله ..

- تودة : ( صغرات عينيها صدمها ، مكانتش متوقعة بلي غادي يوافق على داكشي لي طلبات منو) اهاه ومراتك عطاتك الموافقة ؟

- المعطي : ( ضحك بغرور ) وعلاش هي تݣد تݣول لا ولا تفنفن ، ماعندها لين من غير تحني الراس ولا تلقى راسها فزنقة .

- تودة : ( عضات على شفايفها ماكرهات تهنشر ليه وجهو وتخليه شفاية قدام ݣاع الرجال ولكن تبسمات ونطقات بدلال ديال بنت فالعشرينات ماشي وحدة فالخمسين ) واخا اسي المعطي ماقلتي عيب السبت الماجي ادير الواجب وتجي تخطبني من عند الرباعة بشان والمرشان .. وديك الساع يصاوب الله ..

- عطاتو بظهر ودخلات مسيفطة ليه رحيمة تاخود المقدية من عند الشيفور ديالو ، عاونها حتى دخلات المونى ورضات عليهم الباب ..

- رحيمة : ( ݣلسات مقابلة تودة بعينيها لي غاياكاهم الفضول ) واش بصح غاتزوجي بهاد عوج الدلقوش ؟

- تودة : ( كتخمم ) إلى بغيت نوصل لداكشي لي بغيت ارحيمة خاصني نزطم على قلبي ونتزوج بيه .. أما أنا ماكرهتش نشتف على ريتو ونوريه العيالات الحرات أش ساويات ولكن غير بلاتي .. الى ماندمتو على نهار فاش تزاد مانتسماش فاطنة الكابو ..

- رحيمة : إلى تزوجتي بيه ايعرف سميتك فاطنة ماشي تودة

- تودة : ويعرف شكون كاع كيعيط عليا فاطنة ، فاطنة سمية تنسات ارحيمة منين كانت عدي 19 عام حياتي كلها والناس كيعرفوني بتودة .. فاطنة راه غير فالحالة المدنية وفلاكارط .. هادشي كاعما تخمي فيه .

- رحيمة : وهي اتݣلسي فدار مابقات خدمة ؟

- تودة : وشكون ݣالها لك .. وتي غير خلي يوصل السبت ويجي يخطب ويحن مولانا ..

- رحيمة : ( هزات كاسها ديال اتاي ورجعات بظهرها اللور ) ايوا يصاوب الله ..

- تودة : ( تنهدات ) اللهم آمين هادشي لي كنتمناو لهلا يحاشم ..

ــــــــــــــــــــ****ـــــــــــــــــــــــ

- ݣالس فالبيرو ديالو الپيسي قدامو وقهوة كحلة ضرب فيها النص .. تدق الباب ودخل عندو شاب فاواسط الثلاثينات شاد ملف فيدو جر الكرسي وݣلس ، هز فيه راسو كيتسناه يدوي .. مد ليه الملف بلاما يهضر وأشر ليه بعينيه للملف ..

- فتح الملفات وعلى وجهو نظرات الشك ، بدا كيقرا مغوبش وفأخر الملف كانت صورة لبنت فالعشرين من عمرها .. حنحن بصوت رجولي هاز عينو فشخص لي قدامو :

بلات مافهمتش ؟

- [ بصوت رجولي مرزن ] فعين الشق واحد السيد مديكلاري بلي بنتو غبر ليها الأثر نهار الثاني لزواجها ..

- عماد : ( حك حاجبو كيحاول يستوعب ) متحمقنيش اصاحبي ، جوج ديال البنات بنفس البلان ومايمكنش ..

- كان ضروري خاص نݣولها لك ، وصلاتنا الشكاية غير الصباح

- عماد : يوسف غادي تشوفليا واش كاينة شي شكاية بحال هادي وصلات فهاد 15 يوم ، تأكد ليا دابا الله يحفظك ..

- يوسف : وإلى كانت ؟

- عماد : الى كانت أسي هاد الملف خاصو يتدفع للنيابة العامة ، باش نݣدو نفتحو تحقيق ونبداو خدمتنا انبقاو نتفرجو هنا حتى نص فالبنات يطير سير اصاحبي دير لي ݣتليك ..

- يوسف : واخا دابا .. خرج من عندو خلاه كيخبط أخماس فأسداس ، حاجة مايتقبلهاش العقل كيفاش زوج ديال البنات يباتو مايصبحو وفنهار الثاني لزواجهم مايمكنش ..

- مكانش قاد يبقى كالس مايدير والو ، مكانش عندو الصبر يتسنى لوردر من النيابة العامة باش يبداو الخدمة كان خاصو ضروري يدير شيحاجة ..

- نزل على القهوة لي بقات فالكاس ، هز سوارت طوموبيلتو وتيليفونو وخرج من البيرو .. دخل على بيرو اهر لقا يوسف هاز التيليفون كيهضر ..

- عماد : ملي عليا لادريس ديال هاد الناس .. فوق البيرو كان مكتوب بخط ذهبي يوسف الرهوني مفتش شرطة ممتاز ..

- يوسف : زربان أصاحبي صبر شوية ..

- عماد : ( خنزر فيه ) وملي عليا .. هز يوسف الملف وملا عليه العنوان مكانش محتاج باش يسجلو حيت تحفر فدماغو .. خرج من البيرو خابط الباب ، نزل مع دروج بجرا حل طوموبيلتو لي كانت من نوع نيسان فالكحل .. ركب ديمارا وكسيرا شاد الطريق للادريس لي عطاه يوسف ..

ـــــــــــــــ ****ـــــــــــــــ

- دار فحي كالم .. ݣالسة الأم حاطة يدها على خدها وكتخمم يديها فيهم الحنة لي كانت جديدة .. كالسين حداها زوج بنات حتى هوما محنيات شادين تيليفوناتهم ، تحل الباب بساروت ودخل رجل فستينات من عمرو معاه شاب فالعشرينات من عمرو ..

- وقفات المراة وعلى وجها باين القلق والامل فنفس الوقت :

أمضرا كاينين شي خبار ولا والو ؟

- الرجل : ( حط السوارت وݣلس بعياء ) والو مكاين حتى خبار ماخلينا حد ماسولناه صحابتها ضرنا عليهم وحدة وحدة ، كاع البنات لي كانو معاها فسونطر كلهم كيݣولو هضرة وحدة ..

- الشاب ) كولشي كيݣول بلي هضرتها فالمدة الأخرة غير على عبد الصمد وبلي كانت فرحانة حيت غادية تزوج بواحد بحالو ، كولشي كيݣول بلي مكان عندها حتى علاقة مع حتى شي حد خور ..

- الأم : (كتبكي ) قلتها ليكم قلت ليكم بنتي وعجينة يدي وعارفاها متحني مادني شيحاجة واقعة لبنتي وأنا حاسة ..

- بدا الباب كيتدق .. وقف الشاب ومشا حل واقف كيشوف بإستغراب فشخص لي قدامو :

السلام عليكم ..

- الشاب : وعليكم السلام .. زول لي قدامو النظاظر ديال الشوف ومد ليه يدو :

الضابط عماد حيدر نݣد ندخل ؟

- خلا ليه فين يدوز ) أه اسيدي مرحبا دخل .. حيد نظارات ديالو دارهم فجيب تجاكيط دوز عينيه على لي ݣالسين ورما السلام ..

- الضابط عماد .. الأم غير سمعات البوليس من فم ولدها جمعات الوقفة والخوف باين فعينيها :

كاين شي خبار على بنتي أسيدي واش لقيتوها ؟

- عماد : (بلغ ريقو ) لا مزال هاد الساعة جيت غير نسولكم شي أسىلة لي يݣدو يعاونونا باش نلقاو بنتكم إن شاء الله ..

- الاب : ݣلس أسيدي ماتبقاش واقف .. ݣلس عماد فارض وجودو بطولتو وهيبتو .. شاف فالأب ونطق بصوتو الرجولي التقيل :

شحال عندك ديال الولاد أسيدي ؟

- الأب : 4 .. 3 البنات او ولد واحد .. (أشر بصباعو) ريم او وداد وبنتي لي تزوجات لمياء وهدا ولدي الكبير وليد

- عماد : واش لمياء هي الكبيرة فالبنات ؟

- الأب : أه اسيدي عندها 22 عام كانت دايرة الفندقة ومنين جا هاد ولد الناس قلنا اللهم تزوج حسن ليها ..

- عماد : ( حط يديه على ركابيه وشافيهم بجدية ) واخا هاد السيد واش كان كيعرفها ، ولا زواج تقليدي ؟

- الأب : لا أسيدي مكانش كيعرفها .. كانت خارجة هي ومها وتبعهم ماطلب لا يخرج معاها لا يݣلس معاها نيشان طلب منهم نمرتي .

- عماد : ( غير مكايزيد يطيح ليه الشك فراسو من هادشي لي كيسمع ) وأنتوما ماسولتو عليه ماعرفتوه منين ما والو غير جيتو ولحتو بنتكم هكاك ..

- الأب : ( بلع ريقو بتوتر عرفها فراسو حق ) ݣاليا بلي جا عند شي ناس فزنقة الثالثة لي ورانا .. كيعرف ولدهم وشاف البنت كتجي من القرايا وعجباتو وبغاها للحلال ، على مݣال بلي عائلو كلها على برا .. ومرة مرة هو كيجي للمغرب ڤاكونص وبلي خدام مهندس مدني تماك .

- عماد : ( هزهز براسو ) مهندس مدني فين بسلامة ؟

- الأب : ݣال فبريطانيا الأب ديالو ݣال مغربي والأم بريطانية وفعلا فاش جاو داكشي لي كان

- عماد : ( حك حاجبو بشك ) ملاحظتو عليه حتى حاجة ماهياش ؟

- الأب : انا بعدا مالحظت عليه حتى حاجة الصراحة ..

- ريم : ( وحدة من الأخوات) الصراحة مو لي فشكل نهار الحنة ولا نهار العرس مابغاتش تصور كاع .. وختي لمياء قاتلينا بلي عمرو سيفط ليها شي تصويرة ديالو وكان مزروب على الزواج ..

- وليد : عندها الصح .. لدرجة راه حنا مادرنا والو من عندنا هو لي دار كولشي من نهارها من عرسها صدقاها كولشي هو لي قام بيه حتى المصور هو لي جابو

- عماد : ( سكت للحظة ورجع نطق ) شكون لي ݣاليكم بلي البنت غبرات ؟

- الأم : ( بحسرة ) هو أسيدي جا على صباح كيعاير ويخاصم وعلى مقال بلي خلات ليه ميساج بلي ماتقدش تكمل معاه وبلي كتبغي شي واحد أخور وهربات معاه ..

- عماد : ( غوبش ) ويݣد يكون كلامو بصح وتكون كانت كتعرف شي حد وانتوما بززتو عليها هاد الزواج .. دارت ليكم الخاطر وهربات مع السيد لي هي معاه ..

- الأب : ( بجدية ) شوف أسيدي انا حياتي كلها ربيت بناتي عمرهم يديرو شيحاجة بزز منهم .. ونهار جا هاد السيد ݣلست معاها وسولتها وݣلت ليها الى بغات مرحبا مابغاتش الله يعاونا ويعاونو .. ولكن هي وافقات وفرحانة وعاجبها الحال ها خواتاتها يݣولي ليك ..

- ريم : بابا عندو الصح خاي لمياء مكانت كتعرف حتى واحد كتعاود لينا كولشي حتى صحاباتها داكشي لي قالو

- عماد : فين هو تيليفونها ؟

- الأب : ( تنهد ) بقا مع راجلها .. وراجلها مشا رجع للبرا .. على ماݣال الى مارجعاتش من هنا للشهر غادي يطلقها .

- عماد سها وتزاد معاه الزايد وقف وتبسم للأم بإطمئنان ونطق بصوت مريح :

إن شاء الله مايكون غير الخير ، غير نصيحة ماتبقاوش تلوحو بناتكم بلاما تسولو فين غاتحطوهم .. الى كانت شيحاجة غادي يوصلكم الخبار السلام عليكم ..

- عطاهم بظهر وخرج ضارو راسو .. كيدي ويجيب كيسول راسو ويعطي الإجابة مايمكنش هادشي يكون صدفة زوج ديال حالات إختفاء عرايسات بنفس الطريقة ةنفس طريقة الزواج جاتو شيحاجة ماهياش ..

- ركب فطوموبيل ديالو يلاه غادي يديماري سونا ليه التيليفون فتح الخط مجاوب :

وي يوسف

- يوسف : الشاف كيبان ليا داخلين على حريرة كبيرة

- عماد : قطع أنا جاي .. قطع معاه مديماري مخلي وراه العجاجة ديال التراب .

•••••••••••••••••••••••

- واقف وحاط يديه على البيرو كيشوف فالوراق لي قدامو قبالتو يوسف واقف يد مربعها ويد كيدوزها على وجهو وكيعاود فنفس الحركة بزاف ديال المرات ..

- هز فيه راسو كيشوف فيه دايخ .. وكيرجع يشوف فالوراق لي منين تحطو قدامو وهو كيقرا فيهم ويحقق فيهم ويعاود ..

- يوسف : ربعة ديال البنات غير فهاد 15 يوم واقع معاهم نفس البلان ، بربعة مزوجين بنفس الطريقة وغبر ليهم الأثر بنفس الطريقة .. والاقوال لي عطاو الوالدين كاملة مشابهة ..

- عماد : ( وقف هاز قرعة ديال الما جغم منها وحطها ) مابغاش يمشي بالي مع دوك المكاريب لي كيديو البنات يسفروهم للخليج ويغبرو ليهم الأثر ..

- يوسف : وعلاش مايمشيش بالكم ليهم .. هادوك هوما الاوليت تشك فيهم ، يغبر ليها الاثر يديها لتم مابقاش والديها يقفلو عليها ساهلة ..

- عماد : (زول دجاكيط ديالو مبين على يدين قاصحين بالحديد وصدر رجولي شاد بلاصتو ) واشتا مريض بعد المرات كينزل عليك واحد الكلاخ سبحان الله العظيم .. حضر معانا عقلك أصاحبي ..

- يوسف : شرح ليا المدام كترات المساخن فرفيسة مابقيتش كنأدابتي مزيان ..

- عماد : ( بجدية دور ليه تصاور البنات قدامو وأشر ليه بعينيه ليهم ) دابا فرضنا مثلا انا باغي نپروفيتي فهاد البنات ونديهم للخليج على وديت الفساد ونصور من وراهم البينݣة .. واش غادي نختار هاد الشكل ؟

- يوسف : ( كيحقق فالبنات زوجات كانو محجبات ولوخرينات كانو معريين شعرهم زينهم طبيعي وجد عادي أجسامهم عادية بلا منحنيات ولا مأهلات أنثوية ، كانو بنات عاديات وبساط ) الصراحة لا .. الى بغيت نبروفيتي فشي وحدة خاصني المليح شي وحدة تكون هازة بحال العودة ..

- عماد : ( خنزر فيه محرك راسو بإستسلام )

- يوسف : وغير ݣلنا ليك زعمة بلاما تنويها عوجة .. وراه بصح إلى بغيت شي وحدة نخدمها فداك دونين خاص شي وحدة نيت نيت لي تجيب ليا الكليان وتعجبو ..

- عماد : ودابا بديتي كتوعى

- يوسف : واخا وإلى مكانوش داك الݣنس ، شكون غايكونو هاد الناس لي كيختارو عائلات على قدهم يخطبو البنت وصباح ديال الدخلة كتغبر ؟

- عماد : ( جمع الوراق لي قدامو فملف واحد ومدهم لليوسف ) دفع الملف للنيابة العامة الى متعطاناش الأوكي من عندهم مانکدوش نتحركو ..

- يوسف : صافي تهنا ..

- فجهة أخرى .. زواجها مكانش عادي فوق خاطرها كانت كتقول يمكن هاد الزواج يعود عليها بنفع وتهرب من طغيان باها وتلقى قلب حنين يطبطب عليها .. ولكن من نهار حطات رجلها فهاد الدار مشافت غير الويل والحݣرة غير فدارهم كانت مع باها وهنا مع مرات عمها وعدوزتها .. بحال كل صبحية فاقت بكري عجنات البطبوط كيفما كان مطلوب منها ممنوع يفطرو بالخبز بارد ضروري من الخبز السخون عجناتو ودلكاتو مزيان خلاتو يرتاح لولاباتو كويرات وبدات تسرح وتخبز ..

- قربات تسالي عمرات أتاي قدات الصينية وحطاتها فصالة وبحال ديما أول واحد كيفيق هو عمها .. كتوجد ليه الما يسخن للوضو وكتحط ليه يفطر هو الأول .. قدات الطبلة وحلقات عليها قربات ليه كولشي للقدامو يفطر ..

- عبد الكبير : الله يعطيك الصحة ابنتي الخبز بحال الشهد الله يرضي عليك

- رجاء : ( بحشمة او وقار ) بصحتك وراحتك أعمي أنا نطلع نفيق خالتي راضية ونفيق حتى يونس .

- عبد الكبير : واخا أبنتي سيري ... طلعات كتجري فدروج طولها كان واضح بلي ماشي شي طول كانت مربوعة القد .. ملامحها بحال شي فيليبينية وشعرها جامعاه بزيف حياتي ..

- وقفات قدام باب بيت عدوزتها ودقات بشوية وهي قلبها باغي يسكت بالخلعة .. كتحس براسها مامرتاحاش باغية تهرب من هاد العيشة ديال الويل والقهرة ..

- تحل الباب على مرة كبيرة فالعمر ولكن مهلية فراسها يديها كلهم مزرورين دهوبات ، لابسة قفطان فالموڤ وشعرها كولو زعر بليميش لايحة عليه شال خفيف .. طلعاتها ونزلاتها بإستحقار ونطقات من تحت سنانها :

مكتعرفيش دقي بشوية هادشي معلموهش ليك فداركم .. تريكة العروبية وربندج ، كون زوجت لوليدي بنت ختي حياة الطولة كيف نخلة والقرايا وزين .. كون كنت كنصبح على خير ماشي بحال كمارتك العوجة ..

- رجاء حابسة البكية بسنانها باغية طرطق كتحس براسها الى زادت مزال شوية فهاد الدار غادي تنتا/حـــر مجاوباتهاش حدرات راسها بحال كل مرة يلاه عطاتها بظهر باش تفيق راجلها او وقفاتها بكلامها ..

- راضية : ( من تحت نيفها بتعالي) سمعي هاديك هاه داك البيت لي انتوما فيه بغيتك تخويه ليا

- رجاء : ( ضارت عندها بإستغراب ) كيفاش أخالتي وفين غانمشيو ؟

- راضية : الله يخوي ليك الضراس راه دوينا معاك بقاي تعيطي ليا لالاك راضية ، تمشي لتلت الخالي أما ولدي حبيبي مزال انرجعو ليا غير بلات .. طلعي حوايجك وحوايجو للبيت دالخزين لي فوق السطح .. ولدي سيدك توفيق جاي هاد السيمانة وخاصو فين يكون ..

- رجاء : وعلاش لي ماطلعش نجلاء ؟ ( مرات لوسها الكبير )

- راضية : ( خنزرات فيها ) وأنت شغلك ياكما هاد الدار بانيها باك وانا مافخباريش .. شتك وليتي كتراضي معايا ياكما كياكلك جلدك ؟

- رجاء : ( كتحس براسها الموت حسن ليها من هادشي لي هي فيه ) واخا مايكون غير خاطرك

- راضية : ( ضربات فيها هابطة مع دروج كتبرݣم ) معلوم مغايكون اخاطري وبلهلا يطريه ليك .. دخلات رجاء لبيتها وقفات مقابلة معاه ناعس .. ملامحو بريئة وهادئة مغاتكدبش بلي ولد الناس معاها حنين .. هو لي كيداوي جرحها بالكلمة الزوينة ، عارف بينو وبين الله مكايئدي حد وعمرو عݣرها بكلمة ..

- رجاء ( تنهدات تنهيدة طويلة وقربات ليه محنية عليه .. حاطة يدها على كتفو كتحركو ) : يونــس يونس فيق تفطر تمشي لخدمتك .. حل عين وتبعها الثانية مبسم فوجها .. تقلب على ظهرو كيشوفيها ..

- يونس : صباح الخير

- رجاء : صباح الخير كيصبحتي مزيان ؟

- يونس : ( تقاد فبلاصتو) الحمد لله شتك مزال بحوايجك مادوشتيش ؟

- رجاء : ( ضحكات بمرارة ) لقيت الما مسدود عارف خالتي ، لقيتها معمرة مقراج بالحساب منو عجنت ومنو عمرت أتاي .. وجهي مسحتو غير بلانجيت ..

- يونس : ( دوز يدو على شعرو ) أستغفر الله العظيم ياربي تهديها مديريش فبالك غادي نهبط نحل الما دوشي هو الاول عاد نزلي تفطري ..

- رجاء : أصلا خاصني نخمل البيت

- يونس : ( غوبش ) غير والبارح خملتيه واش اتبقاي مقابلة غير الشقا ارجاء ؟

- رجاء : ( وقفات ) واش انا كرهت فيه أيونس .. خالتي قالت بلي خوك توفيق جاي وبغاتني نخوي هاد البيت ونطلعو للبيت ديال الخزين لي فسطح ..

- يونس : ( جمع الوقفة او وقف ) واش داوية من نيتك ولا كتريݣلي عليا على الصباح ..

- رجاء : ( ݣلسات بعياء جوج سيمانات على زواجها دازو بحال عامين ) أنا هذا لله جهدي تحد وحق الله كون غير ماتزاديت فهاد الدنيا من صغري وانا كنشوف الويل .. راه نزل وسول ماماك اما غير عبد مأمور ..

- يونس : ( خطف تيشورت ديالو لاحو عليه ) دابا نيت .. تخطاها فتح الباب ونزل للتحت ..

- رجاء : ( تكات على ظهرها ) حسبي الله ونعم الوكيل ياربي ياربي تاخود فيها الحق ياربي .. لا هي لا با لي لاحني هاد اللوحة وعمرو حن حسبي الله ونعم الوكيل .

•••••••••••••••

- واقفة قدام المرايا لابسة قفطان من الدق القديم بطرز الرباطي فلخضر .. شعرها مشطاتو وجمعاتو ولاحت عليه غير شال مبين خصلات قلال من شعرها ..

- رحيمة : ( مقابلاها) تبارك الله عليك اختي كيف الغزالة فجبال .. والله مايستاهلك المعطي .. لي يشوفك مايعطيكش 50 عام

- تودة : ( ضحكات كتمسح جنب عينيها من الكحل البلدي لي مكحلة بيه ) ماشي غير المعطي يارحيمة ، ݣنس الرجال ݣنس حار .. ياويلك وتعطي قلبك وكبدتك لشي حد .. يعفس عليها بحال الى عفس على كمشة من التراب وشتك اخويتي دغية زدتيني عام راه يلاه 49 عام لي عدي حنا على أبواب الخمسين أمزال مالحݣناش ليها مزال لينا واحد لعام هوكاك .. عبد الرحمان وصل ؟

- رحيمة : وايه جا هو ونݣاش وسعيد

- تودة : صافي مزيان سيري خلطي عليهم شوفي واش خاص شيحاجة دروك يجي داك المنطيح .. مع اخر كلمة سمعو الدقان ..

- رحيمة : ( كضحك هازة حجبانها المرسومين بالكحل ) بحال الى كان كايسمع فيك نمشي نقول لسعيد يحل الباب .. خرجات من عند تودة خلاتها كتشوف فراسها فالمرايا وكتفكر هاد الوقفة لي هي واقفة لي بحالها دازت عليها 26 عام ..

- كالس القايد المعطي مسرح رجلو بكل هيبة فرحان والضحكة واصلة ليه لودنيه .. جنبو سميرة لابسة جلابة لي شافها مايقولش بلي راجلها قايد وبفلوسو شادة ساكها حاطاه على رجليها وحادرة راسها .. ذلات راسها حتى لرجلين مابقا عندها فين تزيد مزال اش بقا ليها ، الحاجة لي ماتقبلهاش مراة دارتها وهاهي جايا مع راجلها تخطب ليها .. أشمن حل كان عندها يا تقبل وتحني الراس ولا تضرب الباب وتلقى راسها فزنقة .. حياتها كلها وهي حانية راسها بحال الميتة وعاشت كيف الميتة وغادي تبقى هكا حتى لأخر نهار فحياتها ..

- المعطي : ( بضحكة جنب ) إيوا فين هي العروسة اسي عبد الرحمان ؟

- عبد الرحمان : ( رجل فأواسط الخمسينات ) أياه اسي المعطي دابا تكون هنا ( شاف لعند رحيمة ) رحيمة ݣولي للتودة تجي ..

- وقفتات رحيمة وتوجهات للبيت لي فيه تودة ، فتحات الباب ودخلات عندها :

عيط عليك عبد الرحمان باش تجي .. عرفتي ياختي باز لديك مرات المعطي جايبها تخطب ليه ، بقات فيا الله يعطينا غير شوية من قلبها .

- تودة : ( نكزاتها بيدها باش تحيد من الطريق ) أنت غير زيدي يصاوب الله ... خرجات لعندهم رمات السلام وݣلسات .. طلعاتها سميرة كتحقق فيها زينة ومسرارة بحال النخلة طولة وتجريدة ..

- شافت فراجلها بنص عين لقاتو كيشوفيها بغا ياكلها بعينيها وتبسيمتو باينة .. هي لي عمرها ضحك فوجها ولا رضا عليها ولا شكر شيحاجة دارتها ، ماكرهاتش فهاد الساعة تهز خنجر وترشݣو فيه .. ولكن ماعندهاش جهد وماعندها وجه ولا قوة ، كون كانو عندها كون خلات ولدها حداها ودافعات على بنتها وماتخليهاش ترمى ديك الرمية الحارة ..

- عبد الرحمان : ( شاف فتودة ) تودة أسي المعطي اليوم جاي طالب راغب فيك لزواج على سنة الله ورسوله أش بان ليك واش ݣلتي ؟

- تودة : ( هزات فيه راسها كتحقق فيه ، حركات عينيها لجهة سميرة لي غير حادرة راسها ) ولالة سميرة قابلة بعدا ؟

- سميرة : ( هزات فيها راسها فاش سمعات سميتها .. قلبها كتحس بيه غادي يخرج من بلاصتو .. شافت فالمعطي لي كيخنزر فيها ، رجعات شافت فتودة وتبسمات ) وعلاش أنا نلقى ماحسن منك اتودة تكوني مرات اسي المعطي .. وانا علاش جيت لهن .

- المعطي : ( ضحك) ايوا أش ݣلتي الالات العيالات ؟

- تودة : ( بصوت أنثوي تقيل ) وانا مانلقاش ما حسن منك أسي المعطي غير هو راه عندي شروط ؟

- المعطي : أنت غير أمري ..

- تودة : الغنا وجماعة راه منفرقهمش .. خدمتي غانبقى فيها إيوا والباقي انت راه عارفو بلاما نحتاج نقولو ليك

- المعطي : ( حنحن ) ولكن الالة تودة انا قاد بيك لاش زعمة اتعدبي راسك وتخدمي ..

- تودة : ( بتقالة وجدية ) مكايهمونيش الفلوس اسي المعطي .. العيطة كتجري ليا فدم والبلية صعيبة الى مشات حتى سرحات ليك فالعروق ، وانا بحال ديك الحوت وسط الما الى خرجات للبر تموت ..

- لي عندي راني قلتو ليك بغيتي مرحبا وألف مرحبا مابغيتيش منعطلوكشاي .. ( مراقباه بعينيها لي بحال الصقر كيتسنى ردة فعل من الفريسة ديالو ..

- المعطي : ( دوز يدو على لحيتو كان بين نارين .. مايقدش يقوليها لا سينين وهي مجرجراه ويجي دابا يقول لا من بعدما قلبها حن ) واخا الالة لي بغيتيه يكون مايكون أخاطرك وهي نقراو الفاتحة ..

- تودة : ( طلعاتو ونزلاتو مبسمة ) نقراوها علاش لا .. هزو يديهم قراو الفاتحة .. وقفات رحيمة كتزغرت حتى جراتها تودة وݣلسات شافت فالمعطي ونطقات .. :

- نهار الإثنين نتلاقاو عند النوطير باش نريݣلو أمورنا وديك الساعات نجمعو وريقاتنا باش نديرو الكاغط ديالنا ..

- المعطي : ( كان فرحان ) ماقلتي عيب إن شاء الله ( شاف فسميرة او وقف ) أنا كنتسناك على برا .. خرج ماكرهش ينقز وقفات سميرة هزات ساكها وهي كتفكر فشنو بغاو يديرو عند نوطير .. حتى شداتها يد تودة ..

- وقفات كتشوفيها بإستفهام .. وزادت ستغربات فاش تودة عنقاتها وهمسات ليها فودنها بصوت سمعاتو غير هي :

كانت ميمتي الله يرحمها كتقوليا ، صياد النعامة يلقاها يلقاها وݣاع لي حنقزاتو المعزة فراس الجبل كتخلصو فدار دباغ .. تبسمي يا لهبيلة ولبسي قفطان من الحرير الأيام زينة عاد غاتبدا .

- بعدات عليها مطبطبة على كتفها خلاتها ومشات لبيتها .. سميرة مافهمات والو فكلامها هي قليلة العرف والمعرفة خرجات للعند المعطي وركبات حداه فطوموبيل شافيها مخنزر ناطق من تحت سنانو :

فين تعطلتي ؟

- سميرة : ( هزات فيه راسها ) غير دخلت لحمام .. ديمارا الشيفور وشدي طريق الرجعة .. الطريق كلها وكلام تودة كيدور ليها فدماغها شكون هدا ولا هادي لي شبهاتهم تودة بالمعزة وقالت غايخلصو .. وعلاش قالت ليها لبسي قفطان من الحرير الأيام زينة عاد غاتبدا اش قصدات !! .

*********

- ݣالسة مع نعيمة كتحتت معاها فوق السطح .. نعيمة بنت فالتلاثينات قصيرة ورقيقة وكانت خفيفة فشقاها وفكلامها :

وراه الالة باينة بلي داخلة لهاد تزويجة غير باش تكشطو وتبيعو لي قدامو ولي وراه ..

- سميرة : ( مقابلة مع الݣمرة ) وباش عرفتيها ؟

- نعيمة : سمحيليا الالة ولكن أنت فهمك تقيل وعلى قدك .. نوطير راه كيمشيو ليه الناس غير الى بغا يبيعو شي حاجة ولا يشريو شيحاجة ولا سكتبو لشي حد شيحاجة .. بحال والو يكون سي المعطي باغي يكتب ليها شي ارض ولا هاد الدار ..

- سميرة : اويلي على دار تي واش من نيتك النعطي يكتب ليها هاد الدار واخا تكون موكلاه التقاشر ، مزال الارض اه ولكن دار لا

- نعيمة : ودابا تشوفي وتݣولي هاد الهويعة ݣالت .. وصراحة عبرات عليه داكشي باش يمكن كاتليك ليام زينة انا من عدي بغيتها تجمع ليه حب وتبن

- سميرة : والى جمعاتهم ليه فين أنمشي انا أنعيمة ؟

- نعيمة : ( عصباتها ) والله الالة بعد المرات كطلعي ليا حجيبة للسطح .. تي توݣضي شوية راه اتي لي فشكل أما ولدك راه خدام فطنجة .. شتي أنا كون كت منك والله حتى نطلع عد ولدي نكري معاه ابيت هو خدام وانا نطيب ليه ونشقى ليه .. ونعس مرتاحة واخا نفرش في الأرض ..

- سميرة : ( تنهدات تنهيدة طويلة) أحيانة .. صعيب الطير يبعد على عشو .. نوضي نوضي ترݣدي دابا نسمعو لغاه شوية وتلݣايه جاي ، بغيتو يجي يلقاني نعست مافيا لي يشوف خنشوشو ..

- نعيمة : حتى أنا ايبدا يسخر فيا فليل وانا عظامي ضاريني .. تصبحي على خير الالة .

- سميرة : تلݣاي الخَيْر ..

- على بعد 20 كلم من مدينة برشيد وبضبط بولاد صالح .. دار متألفة من زوج طبقات بحال أي دار مغربية كيوصل وقت كاسكروط كتعمر الطبلة .. ݣالسة مرأة فربعينات من عمرها طويلة وعامرة لابسة بيجامة طويلة ، حداها راجل فالخمسينات من عمرو لابس سروال ديال توب فالݣري وجيلي مسرح رجل ورجل طاويها .. مدات ليه كاس ديال أتاي .. وبدات تعيط بصوت عالي :

حياة و حياة تعالي .. خرجات من الكوزينة بنت فالعشرينات من عمرها جامعة شعرها بزيف حياتي .. لون وجها باين سمر من الشمس على عكس لون عنقها لي كان بيض .. لابسة صاية وتيشورت ودايرة طبلية يديها عامرين بزيت ..

- حياة : نعام أمي

- داك المسمن مزال كاعما ساليتيه ؟

- حياة : ( بصوت مهدن ) بقات ليا وحدة فالݣصعة او وحدة فالمقلة

- وخفي يديك وعيطي على خوتك يدوزو تعݣباو ( كاسكروط ) وطلعي عيطي على بنت خالتك تنزل تاكل

- قاطعها بصوت غليض كيزرع الخوف فنفوس :

لي بغا يهبط ياكل يهبط .. نبقاو حنا نحزرو فبنادم هنا لي بغا يتجغدد ينزل .. حدرات حياة راسها وقصدات الكوزينة شافت فيه مرتو ونطقات :

- سعيد نعل شيطان أخويي مسكينة البنت راه مزال مصدومة وشادها سميت بوه داك تيكاب( الإكتئاب)

- سعيد : ( هز عينيه الكبار بكترت مكانو كبار كانو خارجين شوية تحت حجبان غلاض ) سمعي أرشيدة .. انا راه اطالب معاشو ماعديش خيرية هنا سمعتي ..

- يلاه نتكافى مع ولادك تزيدي ببنت ختك دوك لي كنا مشاركين معاهم الدم وا ماتو وهي سبابهم .. كون مامشات للمدينة تقرا كاعما يتݣلب بيهم الكار كوراها بحالها بحال ݣراناتها منحوسة .

- رشيدة : ( ضربت فخاضها ) تا ݣول أعوذ بالله من الشيطان الرجيم .. الموت راه قضاء وقدر تاشساير تݣول ستغفرت الله العظيم عليها كلام .

- سعيد : ( تقاد فالݣلسة ) ومالني كذبت سيفطات والديها للقبر .. ايوا راجل لي داتو وݣلنا تݣاد ليها الميمون وغايتݣاد لينا معاها هاهي دفناتو ورجعات لينا .. تلصق فينا كيف الخطية .

- رشيدة : ايوا من نهار جات وحنا نحلبو فيها كل سيمانة تخرجهم زرقات يدبحو وتعطيك ولا ديك الساع حبيبتك ..

- سعيد : ( خبط الكاس مع الطبلة) وتي شتك سايرة تراضي معايا مالها غاتسكن عندي فابور كلها يضرب على عرامو .. ديك بنتك والى مالݣاتش ليها شي راجل لي يهزها تهز عليا شاكوشها وتشوف ليها شي موضع يقبل عليها .

- رشيدة : ( جاتها البكية ) باغي تجري ليا على بنتي أسعيد هادي هي بنتك هي بنتي ؟

- سعيد : ( وقف ) لي عندي ݣلتو لي بغا يبقى فهاد الدار ياكل ويشرب ( كيغوت كيسمع ليهم ) يضرب على عرامو ويجبدهم صحاح ماعديش الخيرية هنا انا راسي وطالع ليا فراسي خلي بنادم .. تفو تريكة مصمكة يخ .

- خرج ضارب بالباب .. خرجات حياة من الكوزينة هازة طبسيل دالمسمن البكية حابساها بزز فحلقها .. حطات داك الطبسيل فوق الطبلة وساحو دموعها السخان ..

- رشيدة ( كطبطب ليها على ظهرها تسكتها ) ماتديش عليه ابنتي عارفة عمك سعيد لسانو خضر مكايعرفش يدوي ..

- حياة : ( هزات فيها عينيها العسليين ) ݣلتها ليك امي ݣتليك خلينا ابجوج .. نخدمو بجوج ونبقاو بجوج دخلتي بيناتنا البراني ودابا الزنقة كنشوفها هي بلاصتي .

- رشيدة : مالك هبيلة واش انا نلوحك ؟

- حياة : انت ماعندك جواب .. تسمحي فخوتي صغار وتبعيني ، انت امي غير يجي بليل تحلي ليه وضحكي واخا يمرمد ليك راسك فالغيس ..

- رشيدة : ايوا وشنو ندير أبنتي .. ماعندي عليه لاين

- حياة : ( وقفات ) إلى انت ماعندك عليه لاين أنا عندي عليه .. أنمشي نكلم عنبر باش تاكل .

- طلعات فدروج وعقلها كيخمم فهضرة راجل مها .. كانت عارفة وحاسة يجي نهار ويلوح ليها حوايجها فزنقة وماعندها فين تهز راس ولا تمشي .. حتى القراية حدا الكاطريام وخرجها .. لا ديبلوم لا والو حتى باش تهز راسها للمدينة فين اتمشي والمدينة كبيرة وذياب كيتسناو الفريسة تبان وينهشو ليها لحمها ..

- وقفات عند باب فالقهوي ودقات .. دورات الپوانيي ودخلات عينيها مشات للسرجم لي كان محلول على منظر الطبيعة والخضورية لي كتريح النفوس ..

- ݣالسة بنت ساهية تكون فأواسط العشرينات .. ملامح وجها مابينينش كانت مقابلاهم مع الطبيعة ، حياة عينيها مشاو ليدها لي كانت هازة بيها مقص .. وحدا رجليها كان كلو غارق بشعر كحل ..

- حياة : ( ضربات فخاضها صادرة من حلقها شهقة ) أويلي اويلي اويلي على الهويعة الهبيلة أويلي .. تي أش درتي واش هداك السالف اعباد الله يقطعوه الناس ؟ ( مشات كتجري زولات ليها المقص من يدها وهي مكايناش فهاد العالم غير ساهية )

- حيدات ليها حطاتو ومشات بجرا كتجمع فداك الشعر لي كان كلو طايح بحال شي ضاية ديال الفاخر دايب فالما .. بجرا مشات كتعيط للمها تجي طلعات رشيدة مخلوعة غير وقفات عند الباب وشافت داك المنظر خبطات حناكها

- رشيدة : اويلي على بنت الحرام أويلي .. أش درتي ؟ مجاوباتهاش كلام راجل خالتها كلو داز فودنيها وسمعاتو .. جراتها رشيدة كتغوت وتهلل عليها وهي مرفوعة .. مافقت من سهوتها غير بطرشة لي نزلات ليها بيها على وجها خلاتها تشهق ..

- رشيدة : ( بتأنيب ) واش باغية تموتي ؟ و باغية تبعي دوك لي ماتو أش هاد خرجان العقل وهاد الكو//فر لي انت فيه أݣولي ليا أعنبر ؟

- دموعها ساحو على وجها لي كان لونو قمحي .. كتبكي وبكاها تحول لنحيط كتنحط حتى كانت غادي تسخف .. بدات رشيدة كتمسح ليها على راسها وتقرا فالقرآن .. جراتها خرجاتها من البيت ودخلاتها للطواليط ݣلساتها على طاسة طلقات روبيني فسطل حتى عمر وكباتو عليها بارد حتى شهقات ..

- زادت السطل الثاني وخدات شامبوان دارتو ليها على راسها غسلات ليها شعرها مزيان .. وشللاتو ليها بالما البارد شافت فحياة لي واقفة كتفرج فيهم :

سيري جيبي ليا الفوطة وحطي ليها حوايجها .. طارت حياة جابتها ليها الفوطة هي لولة ورجعات لبيت حطات ليها حوايجها .. خرجاتها عمتها من طواليط ݣلساتها على السداري مسحات ليها وتعاونات هي وحياة لبسوها ..

- رشيدة : ( بأمر ) دي دوك الحوايج الموسخين ريحتهم كيديال الݣط ودي داك شعر حتى نحرݣوه .. لي قالتو ليها مها دارتو بالحرف .. خلاتها غير هي وياها فالبيت ..

- رشيدة : شوفي فيا .. هزات فيها عينيها لي كانو حمرين بكترت البكا .. البؤبؤ لي لونو كان بحال لون حبة القهوة فغموقيتها كيتحرك مزاݣيش ..

- رشيدة : واش عارفة بفعايلك راكي كتشركي بالله وكتكف//ري بيه ؟

- عنبر : ( بصوت باهت مخنوق ) أستغفر الله العظيم

- رشيدة : وبزاف أبنتي بزاف ، ماعدك معاه لا تالي ولا والي دوزو عليك هلو الحر ودكاكة ومزال تبكي عليه ست شهور هادي ..

- عنبر : (تنهدات تنهيدة طويلة ونطقات بصوت بح من كثرت البكى ) أنا منحوسة كيما قال عمي سعيد .. سيفط والديا القبر وتبعتهم الراجل لي بغاه ليا قلبي اخالتي

- رشيدة : ( عرفاتها سمعات كولشي ) واش غادي على داك الهبيل ديال سعيد ، تي شوفي غير انا واش كيدير معايا شوفي احياة مسكينة واش كيدير معاها .. وهو رجليه كيضاربو مع يديه

- عنبر : ( ساحو دموعها سخان ) مابقا عندي لا حنين لا رحيم أخالتي بقيت بوحدي فهاد الدنيا .. كون اسمعت لمي ومامشيت لمدينة نكمل قرايتي ، كون غير تسنط لبا وجيت عندهم فالعيد خليتهم جايين عندي محملين ومجملين كونماشي بسبابي كاعما يتقلب بيهم الكار ويموتو .. أنا سباب راه عمي سعيد عندو الحق انا مانلوموش ..

- رشيدة : ( شدات ليها يديها ) سمعي ابنيتي الموت راه علينا حق .. راه كلنا غانموتو دابا ربي سبحانه كون بغاهم يبقاو حيين مغايݣدش عليها راه كيݣول كون فيكون علاش مكتسمعيش شحال من كسيدة كتوقع ومكايطرا ليهم والو .. وشحال من كسيدة وقعات كولشي مات كيبقى اواحد ..

- داكشي راه ديال الله ربي بغاهم واش تي حسن من الله ؟ واش هادشي لي يستاهلو من عندك بلاصة متصلي وتدعي ليهم فصلاتك كتبكي وديري فراسك هاد الحالة .. وزعمة تي راكي قارية ماشي بحالي خاص هادشي تكوني عارفاه زعمة .. وعارفة الوالدين الى ماتو كيبقى ليهم فعالهم وعمالهم او وليدات يدعيو ليهم .. حشومة عليك ابنيتي أعنبر حشومة وعيب وعار عليك

- عنبر : ( دوزات يديها على وجها كتمسح دموعها .. تنهدات تنهيدة طويلة ) أخالتي بدر عوضني على كاع داكشي لي عشت ورا الموت ديال والديا بغاني من قلبو تحدا والديه على قبلي ..

- راه صعيب الحال نسى داكشي لي دوزنا ..

- رشيدة :

حتى حد مݣاليك حاجة ولكن هاد الفعايل ديال الحمقين لاواه ابنيتي .. وهاد الوقت راه قصاحت ماشي ديال هاد الفعايل .. خاصك تكوني ݣوطة وحادݣة الواحد يتحرك يكمل حياتو يشوف مستقبلو وحشومة وعيب ، نوضي ابنتي توضاي وصلي وستغفري مولاك ..

- درتي حالة لهاد للشعر خرجتي عليه .. مك الله يرحمها كون كانت بالحياة كون علقاتك من شفار عينيك .. الظل طلي فالحنة وشݣوݣ والعشوب حتى ربات ليك داك السالف لي يشوفك كيحسدك عليه شو كيرضيتيه لا حول ولا قوة إلا بالله العلي العظيم ..

- نوضي نعلي شيطان وصلي وبكي على مولاك أما هادشي راه مغادي فيك لين ابنيتي ..

- ناضت رشيدة نزلات خلات عليها الباب محلول .. بقات مدة وهي ساهية كتفكر فكلامها .. وقفات وخرجات لطواليط كتجر فرجليها توضات وخرجات لاحت عليها جلابة او واحد ليزار فرشاتو وبدات كتصلي ..

- كانت كطول فسجود دعي ربي يقويها ويصبرها ودموعها نازلين .. مع كل دمعة ودعوة كتحس بقلبها كيتفاجا حتى كملات صلاتها ، هزات كفوفها للفوق كتدعي وتضرع فدعاء باش ينعم عليها ربي بنعمة النسيان ويبرد قلبها ويتبتها ..

- ناضت من فوق الصلاية توجهات للساك ديالها لي كان محطوط فوق المانط حلاتو وجبدات سكادو متوسط فتحاتو وجبدات لي فيه ... بقات كتشوف فدوك الفلوس حسباتهم لقات فيهم 4000 درهم بلعات ريقها وݣلسات كتخمم وهوما بين يديها .. ماحساتش بحياة لي دخلات عليها وجات ݣلسات حداها ..

- حياة : صافي قربو يساليو ؟

- شافت فيها عنبر بهدوء حدرات عينيها للدوك الفلوس وهزات عينيها ففراغ :

لي خسرتو فهاد 6 شهور كان يدير ليا مشروع ونعيش قايدة مع راسي كولشي مشا

- حياة :

وشتي أختي اش كنت نظل نقوليك .. وانت كنتي غير سادة عليك فينما دق عليك داك الوحش دسعيد تعطيه بزرقات ..

- عنبر : ( رجعات دوك الفلوس للساك وشافت فحياة ) وشنو كان خاصني ندير .. ماكنتش حاسة كاع ولا فهاد العالم كنت غير فهمي ..مابقيت عارفة مندير

- حياة : ( بتساؤل) شحال كنتي جبتي معاك ؟

- عنبر (تنهدات ) 50 مليون

- حياة : ( ضربات فخاضها ) أويلي وحدي على 50 مليون أويلي ، كوراه درتي بيها شي مشيريع أختي وشحال بقا ليك دابا ؟

- عنبر : 80 ألف ريال

- حياة : ( وقفات هازة يديها على راسها ) اويلي على الفلوس كاملها مشات فهاد 6 شهور شحال كنتي تعطيه ؟

- عنبر : ( كانت كتعطيه بلاما تحسب ماكنتش فالوعي ديالها نهائيا بحال شي وحدة غير مسيرينها تقد تكون كتعطيه كتر من مليون بلا حس ويقد يكون كاع كان كيدخل ويهز ليها وهي مكايناش فهاد العالم )

- قسما بالله اختي مابقيت عاقلة .. راه شتي كيكانت حالتي .. كان يجي يدق عليا يقول ليا ماخدمش دراري خاصهم وخاصهم انا ماكنتش كنسمع لداكشي لي كيقول كنت كنعطيه شحال الله وأعلم ..

- حياة : (مغزفة) ولد الحرام من فعايلو الله ياخود فيه الحق .. لي لقا الضحك وماضحك كتلزمو العقوبة بسيف لقا بنكة مع راسو راه كلس يحلب فيها .. وماشي بعيد يكون كيخليك دخلي لطواليط ويهز ليك متعرفي ..

- عنبر : ( بتعب) بحال والو منين 50 مليون مشات ليا فهاد 6 شهور راه باين كانو كيتهزو .. لي عطا الله عطاه دابا .. ماعند الميت مايدير قدام غسالو

- حياة : علم الله أش دار بدوك الفلوس كوراه خسرهم فالقصاير وسواق على الشيخات وزهو ..

- عنبر : علاش هو كيقصر ؟

- حياة : ( بإبتسامة باهتة ) وعلاش فين كيكون حتى مكايدخل لدار حتى ل 2 دليل كيجي ريحتو تكوخ .. راه شافوه الناس فالقصاير وفسواق نهار السبت .. فلوسك مشاو فلالة ومالي أبنت خالتي .. غير وجدي راسك هداك من غدا يجري علينا أنا وياك .

- عنبر : عليا انا أما انت كتبقاي بنت مرتو

- حياة : ( ضحكات مفقوصة ) كضحكي عليا اعنبر .. ماسمعتيش قال لمي الى مالقيتش شي راجل فيمن نشد نخوي عليه دار .. كنفكر اشمن حل ندير لراسي اختي من غدا نلاقى حوايجي لزنقة .

- عنبر : ( بقات كتشوفيها ) حتى واحد مضامن أش غايوقع ليه من هنا للغدا أختي يصاوب الله ..

- وصل الإثنين او وقفات على شغلها بيدها خارجة من عند النوطير مجردة بجلابة وصندالة عالية زادت من علو راسها .. مبسمة وفرحانة شادة وريقاتها فيديها من صباح وهي خارجة معاه حتى قادو كولشي او وقفو على كولشي .. داز غداها فواحد القهوة كيديرو الشواية ودوزها للدار .

- المعطي : ( مبسم عينيه مسدودين بحر الهوى ) ودابا خاصنا نجمعو وريقاتنا انا بغيت السيمانة لي داخلة نديرو الكاغط

- تودة : ( بتبسيمة غمضات عينيها الكوحل المكحلين ورحلاتهم بشوية ) وحتى انا داكشي لي بغيت الى عليا كون هاني .. ݣاع وريقاتي غادي نجمعهم خاصني نهبط للبلاد عدنا نجيب عقد الإزدياد ، وماتنساش صداقي او دهازي اسي المعطي .

- المعطي : ( كيضحك ) وعلاش أنا نقدر .. كوني هانية غدا نسيفط ليك حميد ايوصلك ومنها يعطيك شي بركة باش تاخدي بيها حوايجك ..

- تودة : وعطيه حتى باش ناخود الخاتم انت ماتقدش تمشي معايا غانمشي انا ورحيمة ناخود الحوايج وناخود الخاتم وصداقي تعطيه ليا عند العدول

- المعطي : تهناي من ديك النحية .. لي بغيتيها هي لي تكون .

- تودة : ( دفعاتو بيديها خلات عقلو مسلوب من اللمسة ديالها ) ويلاه سير الناس فيهم الهضرة .. وانا وانت مزال مادرنا فطاجين مايتحرق ومافيا لي يسمع شي حد كيدوي ..

- المعطي : واخا امرضي هاهو غادي .. ركب فطوموبيلتو وهي دخلات للدار تلقات ليها رحيمة :

أمضرا ؟ أش درتو ؟

- تودة : ( قلبات ملامحها ) البلاصة لي كيكون فيها هاد السيد كتخنقني ارحيمة قسما بالله العظيم .

- رحيمة : ايوا وعلاش أخويتي قبلتي تزوجي بيه .. راه اتولي تنعسي معاه على نفس الفراش وتشاركيه نفس الخدية ولا نسيتي ؟

- تودة : سيرو دنعاس يفاريني معاه ( كلسات حطات ساكها حداها )

- رحيمة : ( ݣلسات مقابلة معاها ) اويلي واش باغية تمشي على أخر يامك للحبس ولا ؟

- تودة : ( خنزرات فيها ) مالي غانعطيه السم تي مالك هبيلة ولا اش قاليك راسك .. عطا الله مايدار باش مايقرب ليا مانحاديه .. حتى نشوف بعدا هاد الخطية واش مريض بشي عجب عاد نعرف مندير مكنحملش فيه الشعرة خلي نخليه يقرب ليا .

- رحيمة : بغيت انعرف علاش قبلتي بيه منين مكتحمليه ؟

- تودة : ( رجعات بظهرها اللور ) حياتي كلها وراتني هاد الرعاوين بحال المعطي اش كيسواو .. كيدوزو على المرا الدكاكة منين كيلقاوها درويشة ماحن فرمتو مت ولادو وماحن فولادو خلي يحن فيا أنا ..

- رحيمة : ( جرات المخدة حطاتها على رجليها ) وانا بان ليا كيموت عليك اخويتي واش كاين شي حد يكتب ليك دارو ويكتب ليك أرضو لاواه اتودة اخويتي ..

- تودة : ( ضحكات بجهد مبينة على سنان بحال جوهر ) والله الى راه هويعة وهبيلة .. شتي تي خاص مزال تقرصي وتجبدي وتعلمي يلاه يلاه .. شتي هاد المعطي من يمتا وهو تابعني قبل متخدمي معانا احنينتي ..

- يحسابلك اجا وطلبني للزواج ( ضحكات ) فالاول راه كانو عينو فيا للحرام بغاني نكون صاحبتو. ماخلا شكون سيفط .. وماخلا مدار كان باغي المرا لدار وأنا للقصاير عد بالو انا بحال دوك شيخات ديال جوج دريال .. معارفنيش شنو كنسوى ..

- رحيمة : (بصدمة) ويلي على ولد الحرام منو فعلو وشوفليك والله مايحسابلي غير كان باغيك للزواج من الاول ..

- تودة : الله يجيبك على خير .. عيا يدور عليا ويطلب ويرغب ماخلا مادار حتى نهار بغا يحط عليا يديه وݣرضتهم ليهم عاد جاني من باب زواج .. بحال هادو كيبغيو ايبردو حر الكية كيبقاو تابعين الحالجة لي حاطين عليها العين حتى يديوها ..

- ومنين كيديها كيبردو من جيهتها حيت لي بغاوه وصلو ليه .. مكايهموش هو دار ولا الأرض ولا كاع مالو يعطيه غير يديك وطفا الكية لي في ݣلبو ..

- رحيمة : وزيدك للمعطي حتى هو .

- تودة :

دابا هو عد بالو راه هادشي كامل لي كتبلو ليا بسميتي ايجي نهار ويرجع ليه فاش نكون مراتو ويلحس ليا مخي .. يحسابلو سميرة هادي .. عطيني أشهر معاه نݣادو قبل لا تفوتو الزعطة ..

- رحيمة : الى بحال هدا اعطيه من عدي انا .. تغديتي بعدا ؟

- تودة ؛: ( مدات ليها واحد الساشية ) وتغديت راه حقك تم من كولشي

- رحيمة : الله يخلف عليك ( هزات الساشية ومشات للكوزينة وهي كتدوي ) ولكن اتودة راه مزال مجاوبتيني علاش قبلتي بيه كون خليتيه بحال الهبيل .

- تودة : نحيا علاش .. شلا حوايج خاص نطرقهم وخاصني الحمية فظهر وهو قايد شحال من واحد يدير ليه الحساب ، ويديرو الحساب حتى لمرات القايد .. أما على ݣليبي انا سديتو هدا شحال ورميت ساروتو فقاع البحر ..

يتبع..