محتوى القصة
عنبر ( عضات على فمها ) ألو عمي ( ݣلسات )
أدريس ( تبسم ) وشحال هاد عمي خارج من فم بنتي بحال العسل .. على سلامتك ابنتي كيدايرة ؟
عنبر ( بلعات ريقها ) الحمد لله اعمي انا بيخير مبروك عليك أنت وخالتي سعاد فرحت ليكم
أدريس : الفرحة الكبيرة ابنتي هي نهار تكوني بيناتنا الله يحنن القلوب
عنبر : اللهم آمين أعمي تهلاو فراسكم خليت ليكم الراحة ( قطعات ساهية كترمش بعينيها مجرية على دموع
حياة ( ݣلسات حداها ) علاش كتبكي دابا ؟
عنبر : انا مابكيتش
حياة : بغيتي تبكي واش توحشتيهم ولا مالك ؟
عنبر ( شافت فيها ) كنت كنقول ماعندي حد أحياة من غيرك أنتي وخالتي رشيدة .. ودابا عندي عائلة على قدها واحد الإحساس فشكل والله العظيم
حياة ( عنقاتها ) دابا ربي يسخر الأمور وتصلح إن شاء الله هادي غير سحابة ودايزة .. أي واحد فهاد الدنيا كيغلط حنا ماشي ملائكة المهم هو نتعلمو من داكشي لي وقع لينا ولي داز علينا
عنبر ( شافت فيها ) سبحان مبدل الأحوال أنتي كتهضري هكا تبدلتي
حياة ( ضحكات ) وراه اي واحد فينا كيتبدل من راسك وجبد .. امشيتي لمصر رجعتي كتحلوني بحالهم علموك تحلوين
عنبر ( وقفات ) زيدي نكملو التخمال .. كملو الشقا الديالهم تسخسخو ، دارو تابيخة لشعرهم جامعين الحوايج ديال الحمام لبسو عليهم سادين الدار ومتوجهين للحمام يغسلو عظامهم ..
فڤيلا حيدر صوت ديال الطلبة كيقراو القرآن .. ريحة العود كتعطي وريحة الطياب خرجات ماجدة من الصالة غادية جهة الكوزينة حتى عيط ليها
الروطال : ماجدة ( شافت فيه ) أجي .. جات عندو وعلامة الإستفهام على وجها
ماجدة : نعام أخويا ( عنقها من كتافها مخرجها لجردة )
الروطال ( بصوتو الرجولي التقيل ) كدوي معاك عنبر ؟
ماجدة ( بنفي ) لا أخويا كدوي معابا غير حياة علاش ؟
الروطال ( دور لسانو وسط فمو ) انتي لي ݣلتي ليها على بلان الواليد وخالتي سعاد ؟
ماجدة : حياة لي سولاتني .. واش عندنا شي مناسبة فدار ماعرفتش واش شي حد خور قالها ليها ، وأنا جاوبتها
الروطال ( حك جهة حاجبو مبسم عرفها شافتو من فوق السطح وجاها الفضول ) مزيان ( شافيها ) بغيتك أزين دخوها فواحد البلان تقضيه ليا حسي مسي بلا مايعرف شي قندوح ..
ماجدة ( بفضول ) واخا أخويا قولي
~~~~~~~~~
خرج من الشقة ديالو بكامل أناقتو بارفانو كيضرب .. ركب فطوموبيلتو ديمارا شاد الطريق حتى وصل للحومة .. بلاصة طافي الطوموبيل هز التيليفون مدوز نمرة ديالها لي سجل مدة عاد جاوبات بصوتها الرقيق ..
ليلى : ألو
عماد : نزلي أنا كنتسناك
ليلى ( بإستغراب) شكون معايا
عماد ( بصوت بارد ) عماد نزلي كنتسناك ( مجات فين تستوعب حتى كان قطع عليها بالخف لبسات واحد القميجة وسروالو ديال ݣاطيفة فالكحل شعرها بقا مطلوق ونزلات كتجري سوارت فيدها وتيليفونها لي كان من النوع القديم بعيد على السمارت فون .. بانت ليها طوموبيلتو وهو واقف كيشوفيها ..
ليلى( بحشمة وتوتر ) سلام عليكم
عماد : طلعي( ضاير باش يركب )
ليلى : فين ؟
عماد ( حبس وشافيها ) ياك بغيتي تخدمي ( هزهزات راسها بالإيجاب ) ايوا طلعي .. بلعات ريقها وطلعات حداها دايرة السمطة .. ديمارا الطوموبيل وشد الطريق .
وصلو قدام واحد المطعم شامي خاص بالشوارما والأكل سوري بلاصة الطوموبيل نزل هو الأول وهي تبعاتو بقات واقفة حداه كتسنى والتوتر غالب عليها .. هز التيليفون سونا بعد عليها كيهضر ورجع التيليفون للجيبو شوية خرج عندو واحد السيد فثلاثينات من عمرو زعر شوية عنقو .. طلقات ودنيها كتسمع ليهم ..
عماد ( بإبتسامة ) شحال هدا ماتلاقينا راه شي 4 سنين دابا من كازا لأكادير كيدرتي ليها ؟
.... : وخويا الأرزاق اتا نوينا نبظلو المدينة ݣلنا نشوفو أݣادير جينا لهنا صدقات ولاهيلة .. دخلت انا واحد سيد شركة منين تزوهرات القضية هو مشا البرا وباع لي نصيب ديالو وهانت كتشوف
عماد : خاصنا ݣلسة أنا وياك أبا عمر ( خبطو لكتفو ) المهم هادي هي البنت لي عاودت ليك عليها ( شاف فليلى وأشر ليها تجي حدرات راسها وجات لعندهم ) هادي هي ليلى ( شافيها ) هدا عمر صاحبي من شحال هدا وهدا المطعم ديالو غادي تخدمي عندو ..
عمر ( مد ليها يدو ) مشرفين مرحبا بيك ندخلو الداخل ونكملو ( دخلو للمطعم الداخل كان على الطراز الشامي زوين ونقي وحتى لي خدامين فيه نقيين فيه الفوق والتحت .. توجهو لداخل لواحد الطبلة فالقنت ݣلسو تم فيها ) ليلى واش فايت خدمتي فشي بلاصة بحال هكا ؟
ليلى ( كتلعب بصباعها ) أه خدمت سرباية فواحد الكلوب فمراكش و ( هزات عينيها فعماد لي أشر ليها بحجبانو باش متزيدش تݣول على الكلوب لي هنا ) و خدمت فواحد السناك صافي
عمر ( هزهز راسو ) مزيان يعني راه ديجا عندك تجربة المهم أ ليلى الخدمة مكاتبدا هنا حتى ل 10 عاد كتبدا .. بنسبة للسربايا أما لي مكلفين بطياب وغيرو راه كيجيو قبل .. بنهار كتكون الخدمة خفيفة شوية ولكن بالعشية لا كتكون دنيا هنا عامرة وبنسبة لصالير 3500 درهم والپوڤوار هداك راه ديالك انتي حتى واحد مكايدخليك فيه وحتى من الماكلة راه كتديها معاك ..
عماد ( شافيها ) مزيانة ؟
ليلى ( تنهدات حيت فالكلوب كانت كتشد 5000 درهم ) الصالير شوية قليل حيت قبل كنت كنشد 5000 درهم والكرا غالي .. دابا كارية داك البيت ب 1000 درهم وعاد كنسيفط لي قسم الله لدارنا
عمر : شوفي هاد الثمن راه فالاول من بعد راه يتزاد والبوفوار راه الى جمعتيه راه يجيك كثر من ديك داكشي لي كانو زايدينك .. وكيف ݣلت ليك ضروري مع الوقت كيتزاد كيما هادو لي كتشوفي تزادهم ولكن مع المدة حيت كاع لي هنا راه معانا من نهار بدينا
ليلى ( هزهزات راسها ) فهمتك والوقت فالعشية زعمى معاش انخرج ؟
عمر : فين ساكنة ؟
ليلى : الباطوار
عمر ( بقا كيفكر ) 9 مزيانة ليك ؟
ليلى : أه مزيانة ( تبسمات )
عمر : صافي كولشي مزيان ؟ تݣدي تبداي غدا ؟
ليلى ( بحماس ) أه نبدا إن شاء الله شكرا بزاف
عماد ( وقف ) سبقيني أنتي للطوموبيل .. خرجات هي وهو بقى مع عمر كيدويو ويجبدو القديم وجديد دايرين باش يتلاقاو من بعد وصلو حتى للعند الباب ..
عمر : ودوز دوق ماكلتنا
عماد ( حل باب طوموبيل ) ضروري كون هاني انولي من الكليان عارفني مع هاد النوع ديال الماكلة الخبار فراسك .. شير ليه بيدو وطلع لطوموبيل مديماري راجع بيها .
ليلى ( بحشمة ) شكرا بزاف اسي عماد الله يجازيك بيخير خيرك عمري نساه
عماد ( عينيه على طريق ) ماشي موشكيل ..
راجعين فالعشية كيجرو رجليهم من الحمام سخفانين .. ݣلسات عنبر عند واحد الدار حاطة حداها السطولة حداها حياة حاطة ساك عياو من التخمال للحمام الجهد مابقاش عندهم
عنبر : تشهيت رايبي بارد والله
حياة ( شافت فيها ) واش هبلتي بغيتي تزواي .. حتى لدار ونديرو شي براد ديال اتاي بنعناع وشربي حتى تشبعي ماعرفت اشنو نديرو للعشا والله
عنبر ( شافت فيها ) والله ماعرفت أختي بالله عيانا داك العشا كل مرة كنخممو ليه .. نديرو البيض تاني انقربو نبيضو
حياة ( كضحك ) هههه والله ماكدبتي ونوضي دابا مايطلعش معانا البرد .. ناضو من بعدما رتاحو غاديين جارين رجليهم حتى وصلو للحومة مع وصولهم مع وصولو هو .. بلاصة طوموبيل من بعيد وتم جاي هاز واحد ساشية كبيرة فيدو عنبر داخلة للدار حاضية بقنت عينيها ..
الروطال ( صفر وعيط ) حياة ( ضارت عندو أشر ليها باش تجي حطات ساكها وعنبر ورا الباب كطل وقفات قبالتو ) شدي حقك وحقها سيفطاتو ليكم الواليدة ( سعاد )
حياة ( بإبتسامة ) شكرا أخويا ( شدات عندو ساشية ومشات دخلات سادة الباب )
عنبر ( شدات فيها ) شنو عطاك ؟
حياة : قاليا حقي وحقك سيفطاتو لينا خالتي سعاد مسكينة ، ياختي ربي جاب لينا باش نتعشاو رزقنا جا حتى لعندنا مكنا كاع عالمين عليه ..
- طلعو للدار زولو عليهم جلالبهم .. فتحات ديك ساشية كان فيها اللحم والبسطيلة ديال الدجاج وديسير والحلوى ، ناضو بزوج تعاونو سخنو العشا وعمرو أتاي حطو العشا وتجمعو عليه ..
عنبر : الله ياختي يلاه رجعات فيا الروح والله العظيم هلكني الجوع
حياة ( فمها عامر ) ياختي بنين الله يعطيها الصحة مسكينة ݣاعما نساتنا ( بقات كتفكر ) أجي باش عرفاتو غايشوفنا يكون قاليها راه سكن حدانا ؟
عنبر ( برمات شفايفها حاكة قنت حاجبها براس صبعها الصغير ) والله ماعرفت بحال والو شكون عرف .. المهم ياختي ربي جاب لينا عشانا
حياة : دابا غير نغسلو الماعن ونعسو ياختي .. عييت والله العظيم كنحس بداتي كلها كتزدح ، عنبر خلات حياة تغسل الماعن وهي خرجات للسطح تنشر الحوايج ديال الحمام .. هزات عينيها للجهة الدار فين كاين البالكو كان محلول بقات واقفة كتبرݣݣ واش يبان ليها .. حتى بان ليها دايز لابس غير سوفيطما كحلة وهاز التيليفون كيدوي فيه صغرات عينيها كتبرݣݣ ، بالخف طفات الشو ديال السطح وتخبعات حاضياه بعينيها ، بان ليها خرج للبالكو هاز فيدو كاس ديال أتاي وليد لوخرى التيليفون دايرو على ودنو كيدوي ويتبسم
عنبر : معامن كيدوي ويتبسم !!
حياة ( وقفات عليها ) شكون هذا لي كيدوي ويتبسم ؟
عنبر ( جراتها تخبع ) ششش شوفي فاروق .. واقف فالبالكو وعلم الله معامن ياختي كيدوي وكيتبسم
حياة : والله علم يقدر شي صاحبو ولا معرفة
عنبر ( شافت فيها ) فاروق فاش كيدوي مع شي حد خدام معاه ولا شي معرفة ولا صاحبو مكايبقاش يشد الحتيت ويتبسم فتيليفون ( رجعات شافت فيه كان مزال على نفس الوقفة ) هاد الوقفة هادي وديك الضحكة ديال شي واحد داوي مع وحدة ..
حياة ( هزهزات كتافها ) وختي الى دوا مع وحدات ماشي وحدة راه حقو ( شافت فيها عنبر ) وانتي سمحتي فيه او واخا قلت ليك بلي داكشي لي قالت ليك ديك خيتي كذوب ماتقتيش بيا .. وشحال وهو كيقلب راه واحد بلاصتو يقلب 6/9 وانتي كل شوية طلقني طلقني بغيتيه يبقى يجري وراك ..
عنبر : باغية تعصبيني ياك ؟ ولاش جاي ساكن حدايا يلاه ؟
حياة : هاديك غير زكارة فيك وصافي .. شي نهار تسمعيه خطب وجي تخنني
عنبر ( بتحدي ) والله لا كانت ليه بالله ، والله لا تفك مني انبقى لاصقة فيك بحال العلقة حياتو كاملة .. يدير هاه ولا هاه بلابز عينيه نحيدهم ليه ..
فاقت من النعاس هزات التيليفون شافتو شافت الساعة وعينها مشات للشهر ونهار كان 29/8 حلات عينيها على تواسعهم جامعة الݣلسة شافت فبلاصة حياة كانت خاوية .. طلقات نيوفها كتشم فريحة اتاي عرفاتها فاقت كتوجد الفطور .. دخلات للطواليط قضات حاجتها وخرجات للكوزينة لقات حياة عمرات اتاي وجدات المسمن ..
عنبر : ايمتا وجدتي هادشي ؟
حياة : صباح الخير بعدا فقت قبيلات ومدانيش نعاس ، قلت ندير مسيمنات توحشناهم
عنبر ( ݣلسات ) عيد ميلاد فاروق غدا فخبارك ، ماكرهتش ناخود ليه شيحاجة
حياة ( حطات صينية) ياك انمهبطو اليوم لجوطية ، كيكونو بياسات واعرين شوفي ليه شيحاجة
عنبر ( هزات راسها فيها ) زعمة ناخد ليها حاجة قديمة حشومة والله
حياة : وعندك فلوس الغالي ؟ ياك كارط ݣيشي لي عاطيك خازناها وحلفتي لا هزيتي منها ، وزايدون مابقاتش فالغالي ولا الرخيص بقات فلوجيست أصاحبتي
عنبر ( كتخمم) بصح عندك الصح ، لبارح مدانيش النعاس والله داك المنظر ديالو وهو كيدوي فتيليفون بين عينيا
حياة : خوي بالك ودوزي تفطري باش نمشيو .. داكشي لي كان فطرو الدار دوزو عليها تشطيبة خفيفة لبسو عليهم وخرجو ..
~~~~~~~~~~~
كيفطرو مجموعين .. حتى دوات بهيجة موجهة كلامها للعزيز
ولدي الدار وكملتيها ، ومشروعك اوليدي غادي مزيان الله يزيدك ياربي من عندو .. علاش لي متشوفش شي بنت الناس
عزيز ( هاز تيليفون ديالو طالع نازل فصفحة ديالها كيشوف ستورياتها كانت مباركاجية واحد الڤواياج أوغݣانيزي للشفشاون وأصيلة فيه 4 يام ومطاݣية بنت او ولد وكاتبة "The trip we have been waiting for for a long time " غافل على الكلام لي كتقول مو ..
عبد العالي : عزيز
عزيز ( هز فيه راسو ) نعام الواليد ݣلتي شيحاجة ؟
عبد العالي : مك داوية معاك وانت خاشي راسك فداك التيليفون .. دتك العجب متلفكم حتى وليتو كالسين معانا وعقلكم مرفوع
عزيز : حاشا أبا ( شاف فمو ) شنو ݣلتي الواليدة ؟
بهيجة : ݣلت ليك اوليدي خاصك تزوج ، دارك وكملتيها والمشروع ودرتيه غادي مزيان أش كتسنى اولدي حتى دير 40
عزيز : إن شاء الله الواليدة يكون خير
بهيجة ( شافت فعبد العالي ) ديما كيقوليا هاد يكون خير مافهمتش انا ( شافت فيه ) اولدي الى حاط العين على شي وحدة قولها نمشيو نديرو اللازم ولا خليني انا نشوف ليك
عزيز ( وقف ) الواليدة ريحي بالك ، هاد الساعة مكاينة حتى وحدة ومتشوفي حتى وحدة نهار تكون شيحاجة راه غانجي انا نݣولها ليك .. ( باس ليها راسها وخلاهم غادي لبيتو وتيليفون فيدو هو براسو مفاهمش راسو شنو بغا شنو هاد الإحساس لي كيحس بيه دابا جيهتها .. كيفكر فيها بزاف الى شافها مع شي حد كيركبو ألف عفريت كيدوز قدام المحال ديالها مامرة ماجوج كيبقى واقف بعيد مقابلها ، ودابا فاش شافها مطاݣية دري وبنت باغي يحماق ومابقاش مرتاح ، مالقى راسو حتى رسل لي مكلف برحلة ومريزيرڤي معاهم ..
غارقة وسط السطوك ديال الحوايج كتقلب ، كتعزل پياسات ليها ومرة مرة تلوح للحياة شيحاجة .. كتقلب على شيحاجة للروطال ولكن والو واش لقات .. حياة تمات جايا عندها هازة شيحاجة ديال الصوفة وكضحك
حياة : عنبر ( شافت فيها ) ياك فاروق كيعيطو ليه الروطال شوفي اش لقيت ( وراتو ليها كضحك كانت لبسة ديال البرد عبارة على أخطبوط فيه العينين )
عنبر ( جاتها الضحكة شداتو عندها ) ههههه والله حتى نشدو ديال البرد هدا .. خليه عندك ، كملو العزيل كتهز من التحت مسات يدها شيحاجة فيها الخيوط جراتها غير خرجاتها قلباتها خرجو عينيها وجاتها الفوغيغ ، شافت فيها حياة جبدات حناكها باش تخبيها ..
حياة : اويلي
عنبر ( كضحك بدموع ) والله حتى نشدو بالله نعطيه ليه
حياة : ولايني راك ممسوخة مالقيتي غير هدا
عنبر ( كتقلب فيه كان بحال سليب ولكن مافيهش اللور نهائيا فيه القدام ومخدوم بالكروشي وفيه سيةر باش كيتشد ) ومالو هدا يغطيه من البرد مايلفى منين يدخل والله حتى نشريه اش فيها ياك راجلي عادي ..
حياة ( حركات راسها وكملات تقلاب ) هبيلة وقالو ليها زغرتي .. كملو التقلاب ، طاحت على واحد الكشكول عجبها خداتو حتى هو جمعات كولشي مداتو للسيد جمع ليها كولشي ، خلصاتو وحياة خلصات حوايجها ورجعو لدار .. غير وصلات جبدات تيد ورقدات دوك الحوايج وصبناتهم شللاتهم ونشراتهم ..
عنبر : ايخصني شي باپيي كادو .. ولا عرفتي شنو كاينة عندي واحد البواطة انديرهم فيها ونعطيهم ليه شنو بان ليك ؟
حياة : حتى هادي مزيانة ، عطيهم ليه مع 12 باش تكوني انتي اول وحدة تبارك ليه
عنبر : أياه عندك الصح ( تبسمات وتنهدات تنهيدة طويلة) ، وصلات العشية كانو الحوايج وا نشفو مع الجو لي كان مزال سخون .. هزات الكشكول طواتو هو وداك السليب لي خدات دارتهم فواحد البواطة كانت عندها ديال واحد الريحة قداتهم وهي كتسنى متشوقة ، هزات تيليفونها وسيفطات ليه ميساج فالواتساب " مع 12 بغيت نشوفك حدا الزنقة لي حدا مول معقودة لي فشارع الثاني "
- طلع ليها بلي قرا الميساج ، مجاوبهاش سرطاتها وسكتات صابرة وعاطية مبررات مدام هو دار على قبلها بزاف .. حتى هي دابا خاصها ترجعو ليها ..
حياة : أمضرا جاوبك ؟
عنبر : مالو هبيل دافع عليا كبير كوينيدي لاخر
حياة ( ݣلسات كتاكل شيبس ) وليتي تلاقاي براجلك فزناقي بحال المصاحبين
عنبر ( شافت فيها ) وطلبي تسليم ولي تعجب يتبلى ..
فپتيت ڤيلا فعين الدياب ، فراشها راقي وعصري متولة ونقية وكل حاجة فبلاصتها محطوطة .. واقف فالكوزينة لابس سروال ديال الكيطما والفوق لايح عليه سوفيطما واسعة عضلاتو لي بارزين مبينين بلي مواضب على لاصال والحديد فكتفو كان واشم وجه ديال الذيب وشام لي مكانش باين للاغلبية من غير ولاد عمو الى مبحرين ولا كانو فدار وحدة .. وجد صالاد معاها دجاج فالفران حط كولشي على الطبلة مع عصير ديال الحامض .. هز تيليكوموند شعل التلفازة وݣلس كيتفرج وياكل حتى سونا الباب غوبش وقف متوجه لباب حل كان عصام واقف ..
طارق ( خلا الباب محلول ودخل ) كتجي ديما فوقت الماكلة سبحان الله العظيم
عصام ( سد الباب مزول القبية ديالو وݣلس مسرح رجليه ) أكول بصحة انا ماعنديش ݣانتو .. دوزت عمران للدار الواليد وجيت لهنا نيشان كنحس بالمورال هابط
طارق ( كياكل ) نوض تزوج حسن لك ، عمر الظار هي دارت دارها وحياتها وانت ݣلس دور
عصام ( شافيه بنص عين ) حتى انت , ومالك انت ب *** متزوج لي مابغيتيهاش باغيها لناس
طارق : انا مطايحش ليا المورال بحالك .. وانت راه خاصك مرأة لي تقابل ليك الولد ، دابا مو حاملة مرة عندك مرة عندها يلاه تكافا مع التربية جديدة
عصام ( سكت وسرح كيخمم ) بصح
طارق ( هز فيه راسو كيشوفيه تبسم ونطق بصوتو رجولي المدبدب ) كاينة شي وزة ؟
عصام ( دار رجل على رجل مصغر عينيه كيخمم من بعد مدة شافيه ) وهو مكايناش شي وحدة وحدة .. ولكن فبالي واحد ختنا واحد دريويشة
طارق ( هز حاجب ونزل الثاني بارم شفايفو ) بلااان شكون هادي ؟
عصام ( دوز لسانو على شفايفو ) البنت لي كتݣابل عمران .. درويشة بنت الناس حتى مها ظريفة ، ولي مزيان فهادشي عمران عزيزة عليه وحتى هي دايراه فعينيها هي لي ݣابلاتو نهار مرض
طارق : وايلي داوي على ختنا لي ضبر ليك فيها عماد ، سميتها ؟
عصام : هي أريناس ، انا الراس لتعارف وداك الهيث والبغو مابقاش عندي ليه الراس شي بنت الناس درويشة دير عمران فعينيها وتبغيه تعمر الدار والله يجعل البركة ..
طارق : ايوا وتجنديخ شنو دير فيه اتعيش انت وهي بحال الخوت ولا ؟
عصام ( تبسم ) والله حتى ميكروب برب الجليل
طارق : داوي بمنطقية يا أخي .. بين المرا وراجل ديما حاضر الشيطان هادي مافيها لا إن ولا حتى ( عصام بقا ساكت كيخمم واش هادشي لي كيدير فيه منطقي وصحيح ولا غير كيدبز ) أجي شي توتة ولا والو ؟
عصام ( كيتفكر ملامحها ) والصراحة الكذوب على الله حرام .. بومبا البنت طبيعية حتى حاجة فيها مزايدة كولشي فبلاصتو ، عارف الشلحات فنات
طارق ( هز الماعن ) ضرب الحديد ماحدو سخون ، وسخن فراشك اولد العم .. وانت داير بحال ديك المراة الشارفة لي وصلات ل 70 عام
عصام ( هز مخدة شير عليه ) فمك ناضي ( سكت وكمل كلامو ) غدا غانمشي نشوف الواليدة
طارق ( هزهز راسو ) الله يسخر ( تبسم ) انا من نهار خرجت يدها ومابغيتش نتزوج بلي بغا راجلها سدات عليا سدة وحدة
عصام : حياتك كاملة وانت عايش بيخير بلا بيها وكنتي كدير مجهود على الخاوي ، انا غادي اباش نرضي ضميري معاها وصافي .. بيني وبينها مابقيت كنحس بوالو ..
طارق ( لاح ليه واحد البكية ديال زريعة وشد وحدة وݣلس ) الحياة تستمر أحبيبي ( غمزو ) ..
وصلات 12 ديال الليل .. طلات على الزنقة كانو الناس مزال غاديين جايين ، مابغاتش تخرج حتى تشوفو خرج من الدار بقات مدة عاد بان ليها فتح باب الدار وخرج لابس واحد التيشورت فالكحل فوق منو شوميز كحلة مفتوحة طاوي ليها الكمايم مع واحد السروال ديال لولان فالكحل من شعرو باين يلاه خرج من الدوش .. مشات بزربة لاحت عليها العباية ديالها وشالها هزات ديك البواطة فيدها رشات ريحتها هزات سوارت دار وتيليفون ..
عنبر : أنا مشيت
حياة : وسيري الله يسخر .. ، خرجات عنبر من دار غادية كتشوف فجنابها والخلعة فيها تبسمات ضاحكة على راسها .. كتحس براسها مراهقة بحال شحال هادي فاش كانت بنت الحومة كتمشي تلاقى بولد الحومة فتسعينات ، لي شافها يقول غادية تشوف شي واحد معاها وهي غادية تشوف راجلها قطعات الشانطي للجهة لوخرا داخلة لزنقة لي حداها سناك ديال معقودة .. بان ليها واقف بعيد داير يديه فجيابو شافها وتقاد فالوقفة حتى وصلات عندو ..
الروطال ( بإستفهام ) أش تم ؟
عنبر ( ريحتو ضاربة فيها تيشورت مبين عضلاتو وقرفادتو والقميجة لي مطويين يديها مبينين يديه لي مطراسيين ماكرهات تشدو تعنقو وتخشيه فيها ..) لاباس عليك مبروك مدارت خالتي سعاد وعمي
الروطال ( ببرود دور لسانو وسط فمو ) الله يبارك فيك .. ياك سونيتي ليها وباركتي ليها فالكفاية أبنتي عمي
عنبر ( كتحاول تضبط اعصابها بقات على نغس الابتسامة ) عيد ميلاد سعيد بلي تمنيتي إن شاء الله بصحة وسلامة واي حاجة زوينة
الروطال ( هز حاجب ونزل الثاني) سبحان الله لي شافك مفكرة عيد ميلادي يݣول ميتة فيا ( هزهز راسو ) الله يبارك فيك الالة
عنبر ( مدات ليه البوشيط ) هاك واخا شيحاجة بسيطة ياربي تعجبك
الروطال ( نزل عينيه للبواطة خداها منها حلها ، هز الكاشكول هو الأول ماينكرش انو عجبو اي حاجة منها غادي تعجبو ، رجعو للبلاصتو وهز لاخر غوبش مدورو فراسو عض على شفتو التحتانية جاتو الضحكة حابسها غير بزز هز عينيه فيها كانت كتشوفيه بإشارة من راسو ) شنو هذا ؟
عنبر : كادو
الروطال : عارفو كادو شنو هدا ؟
عنبر : ݣارصون
الروطال ( بزز باش حابس راسو ) اش باغة توصلي ليا بهذا ؟
عنبر : مزيان فالبرد مغايخليش ليك البرد فين يدخل ..
الروطال : **** تبقى عريانة طابلية هذا ولا شنو ؟ أنا كاعما تخافي عليا ازين من البرد ماعندو منين يدخل .. كاين لي يسخن الركاني اتهناي
عنبر ( تزاد معاها الزايد ) كيفاش كاين لي يسخن الركاني ؟
الروطال : هادشي مكايهمكش ، ولكن هادشي زين عجبني تفكيرك الفتيلة غادي يجي نهار وينفع
عنبر ( جراتو من يدو مبعداه على الناس لي تمو غاديين جايين حتى جراتو لواحد القنت مظلم ) كيفاش كاين لي تسخن الركاني فاروق هاد الفعايل انا راه ماعنديش معاهم
الروطال : اشمن فعايل انت كديري لي عجبك ولي يريحك وانا غاندير بحالك .. كل واحد يعوم بحرو فهمتيها هادي
عنبر ( عضات على شفتها مغرغرين عينيها ) ايوا منين هكا طلقني وكل واحد يعوم بحرو نيت الى لقيتي انت شي وحدة تسخن ليك ركانيك حتى انا ألف واحد يتمناني
الروطال ( ضحك ) ياك المرضية وشكون هاد المسخوط لي ساخي بعمرو وباغي يتدفن حي فتلت الخالي
عنبر : ولد الحومة شهوة منو .. ولد مول الدار مو بغاتني بالعشق وانا لي مابغيتش ، نيت سير انت يسخنو ليك الركاني وانا نسخن عشي
الروطال : ساخي عليك عمرك ابنت زطاط .. أم انا راه مرييييض ف*** نشوهك وسط الحومة ونݣوليهم مرتي وفينما بغات توصل توصل
عنبر ( قربات ليه ) والى كنتي حتى انت ساخي بعمرك هاد العينين باش كتشوف نحيدهم لك .. نعاود ليك الطهارة من دا وجديد انا نݣولك ( ساحو دموعها ) والى وصلتي ودنك عضها بغيتي تشوه شوه (ضربات فيه وتمات غادية وهو تابعها كيعيط والناس كتشوف قطعات الشانطي بزربة وهو تابعها كيجري تمات تجري داخلة للحومة كانو دراري تم مجموعين وهو ضارب فيهم تابعها حتى وقفو واحد فيهم )
.... : اخويا فاروق اش تم تابع بنت الحومة ياك لاباس ؟ ( وقفات كتشوف بعينيها مدمعين كطل براسها )
الروطال ( غمض عينيه بجهد وحلهم عاض على شفتو مبرد فيها الحر .. نطر ليه يدو دافعو ناطق بصوتو رجولي من تحت سنانو ) بنت الحومة مرتي ( هز الخاتم لي فصبعو وراه ليه بدا كيغوت بأعلى صوتو بداو الناس كايطالو ) هاد السيدة ( كيورك على كل كلمة ) لي ساكنة فهاد الدار فالفوقي مرتي انا ويلها مدابزين وجيت نسكن هنا نحضي رزقي واش حرام ولا حلال ( كيغوت باعلى صوتو ) واش حرام واحد يجي يحضي مرتو لي كيبغيها ويموت عليها ( صدى كلمات ترددو فودنيها قلبها ترفع كتسمع غير كلمة كيبغيها كتعاود فشلات قلبها كيخبط بين ضلوعها عينيها غرغرو بدموع شادة على فمها ) غانعاودها ونكررها السيدة لي الفوق ديالي مرتي ولي شاف لجيهتها نحش ليه الركابي وندخل عليه الحبس ( طلعات كتجري لدار فرحانة وحياة كطل وتنقز وتضحك ) لي عندو شي دار يقصدها ..
جراتها حياة من يدها مدخلاها للبيت شادة على قلبها والحمورية طاغية على حناكها
حياة : تي اش درتي ليه حتى هاج هاد الهيجة كلها اويلي واش سمعتيه .. السيد قدام ناس كاملين كالس يقول كيبغيك
عنبر ( كتفرنس ) سمعتيه ، عرفتيه والله مامتيقة بلي قالها .. ولكن مزيان خليه يتعلم انا يحكني
حياة : علاش اش قاليك ؟
عنبر : عطيتو الكادو كلس كيتريݣل وقالي بلي عندو لي تسخن ليه جنابو
حياة ( خرجات عينيها ) حلفي وشوفلك كيفاش زعمة ، يكون كيعرف شي وحدة ؟
عنبر ( شافت فيها ) لا موحال ايكون قالها اباش يقلي ليا السم وصافي ( بقات ساكتة كتشوف فحياة وكدورها فراسها ) ولكن هو قال قدام الناس كيبغيني واحد كيبغيك يعرف عليك شي وحدة !؟
حياة : وهو ايكون كيبغيك ولا فاش خليتيه وسمحتي فيه يمكن كان ايشوف حياتو ( شدات على راسو ) ماعرفتش والله العظيم دخلتي ليا الشك .. ولكن علاش بدا كيغوت ؟
عنبر : قلت ليه الى انت عندك لي تسخن ليك ركاني حتى انا باغيني ولد مول الدار .. وسيد هاج وصعر راه شتيه ، جا ولد جيران ولا خالتي فتيحة قالو اش بغيتيها وضار فيه هههه
حياة : ولكن دابا بقات فالبلان ديال هاد خيتي شكون هي ( كتفكر ) عرفتي شنو غادي نقلق ماجدة نعرف شنو تحت راسها ( هزات تيليفونها وبدات داوية مع ماجدة فالاول بداوها غير بأمور عادية مجمعين طلعو ليها ستوريات عند ماجدة دخلات لقاتها مبارطاجية شي تصاور واخر صورة لفتات الإنتباه ديالها وصدماتها ) عنبر عنبر شوفي العار ( مدات ليها التيليفون)
عنبر ( شداتو عندها الصورة كانت فيها ماجدة وحداها الروطال الوسط وحداه كاينة بنت زوينة ملامحها عسليين حاطة يدها على كتفو ( اويلي شكون هادي ؟
حياة : وباش غانعرف أنا ( حيدات ليها التيليفون ) انا والله حتى نسولها ..
" الواتساب " حياة : جاوك تصاور واعرين ازين شكون ديك البنت لي معاك انتي وفاروق غزالة
ماجدة ❤️ : اه هاديك بنت خالت بابا كاينة ففرنسا كانت هنا فالمغرب مشات غير سيمانة لي فاتت
حياة : زاعمة على فاروق هههه حاجة عليه يدها عادي عندهم
ماجدة ❤️ : وي عادي أصلا كانت كتبغيه وكانت ماماها باغياه ليها راه كانو فالعرس غير يمكن ماعقلتيش
حياة ( كتوري لعنبر الميساجات ) شوفي يلالة على عينيك الخير عندك وباغية تسمحي فيه وتعطيه فابور ، كوراه ساقت ليه الخبار مرتو سمحات فيه وجات تجرب حضها وهاكي ( قلزات ليها)
عنبر ( وحلات فيها ركبها ألف عفريت ولات بحال الى باركة على الجمر ) تبارك الله على السيد تبارك الله والله لا حلمات بيه بالله ..
فجهة أخرى ݣالس مسرح رجليه على الكرسي حداه البواطة لي جابت ليه شاد التيليفون فيدو وصلو ميساج من عند ختو :
" داكشي علاش وصيتي راه درتو ، وسيفطات ليا حياة وسولاتني هههه وجاوبتها بلي قلتيلي "
الروطال ( تبسم وجاوبها ) : الرضا ..
كل نهار كيكون غير على النهارات لوخرين .. تودة كل نهار كانت كتاصل بعنبر طمن عليها تسول على أحوالها كتحاول متقجرش عليها وتخليها على هواها .. ليلى بدات الخدمة فالمطعم الشامي كيفاش غادية الخدمة وكيفاش كيتعاملو معاها لي تم عجباتها ولقات راحتها كتحس براسها بنادمة ومحترمة ماشي كيف كانت قبل ، مالقاياش راحتها واللهم قليل ومداوم ولا كثير ومقطوع من داك نهار فاش وصلها لدار مابقاتش شافتو ولا سمعات عليه شي خبار ..
عماد لي كان غارق فخدمتو مع دراري كيوجدو للدهلة لي ايدخلو على عبد الغني وكيفاش يحاصروه من الكلوب حتى المرصى ، الإتصال مع خوتو عمرو ماتقطع ولا مع باه لي كان فرحان ليه حيت واخيرا خدا السيدة لي بغاها حياتو كاملة وغادي يعيش حياتو مرتاح ..
فالغدا فڤيلا حيدر مجموعين جامعهم عصام على الطبلة ديال الغدا نطق بخبار لي كلهم ستغربو ليها وفرحو ليها فنفس الوقت ..
عصام : الى بغا الله بغيت نشوف واحد بنت الناس ونتزوج
أدريس ( هز حواجبو ) وخبار زينة هادي اولدي الله يكمل بالخير
سعاد : الله يكمل عليك بالخير احبيبي برفاه والبنين ياربي الهراري ودراري
ماجدة : هاي هاي وشكون هاد الفنة لي خلات خويا حبيبي يتواضع ويبغي يتزوج
عصام : البنت لي كتقابل عمران أريناس ، انا مزال ماݣلت ليها والو بغيت نسبقكم أنتوما الأولين
أدريس : واش ديك البنت لي كان خوك خدمها ، لي كانو من دوك البنات ؟
عصام : هي درويشة وبنت الناس ظريفة والمهم كيبغيها عمران
أدريس : مزيان اولدي الله يسخر ، دوي مع البنت وتدوي مع مها وديك ساع نقومو بلازم إن شاء الله
عصام : إن شاء الله على مولانا
~~~~~~~~~
دوزات نهارها مع عمران فدار .. كان عزيز عليها وكترتاح معاه ، ياماتها معاه نساوها فكاع داكشي لي داز عليها بكلامو وحركاتو وفعايلو ، دارت هي وياه البراونيز فالكوزينة طيبات الكوكيز دارت الحليب بشكلاط وحطات كولشي فالبالكو .. قدات طبيلة وݣلسات هي وياه ..
عمران ( هاز كاسو دالكاكاو فرحان كيلعب برجليه ) طاتي ريناس انتي ماعندكش ولاد ؟
أريناس ( كتشوفيه بحب) لا احبيبي ماعنديش ولاد
عمران : وعلاش ؟
أريناس : حيتاش أنا مامزوجاش احبيبي داكشي باش ماعنديش وليدات
عمران : ديريني ولدك
أريناس ( كضحك ) راه انت ولدي حبيبي الله يحفظك اكبيدتي
تحل الباب ودخل عصام بلا حس .. حط واحد الساشية فيها واحد اللعبة كبيرة ، كيشمشم ريحة زوينة دخل كيقلب كيسمع فيهم من البالكو
عمران : طاتي اريناس انتي زوينة أنا كنبغيك بزاف بحال ماما حتى هي كنبغيها وكنبغي حتى بابا
أريناس : حتى انا كنبغيك
عمران ( شافيها بعويناتو البريئة ) وبابا كتبغيه ؟
أريناس ( شوية وتوحل ليها غافلة عليه لي كيتسنط ليهم ) حتى هو عزيز عليا راه باباك
عمران ( كياكل فالكوكيز ) وعلاش متزوجيش بيه وتجيبو ولاد ويكونو عندي خوتي .. انا عندي عمي فؤاد وانتي تكوني طاطا أريناس مرات بابا ماما اتجيب بيبي وانتي تجيبي بيبي
أريناس ( كيحمقها بعفويتو وقفات باستو ) أنت راه ازين والفن والكبدة وكولشي
عمران ( بعفوية ) والله تزوجي بابا واش مكايعجبكش بابا ؟ ( مالقات متقول ) واش بابا خايب ؟
أريناس : لا اولدي باباك زوين وأنت زوين ( قاطعهم الدخول ديال لي خلاها توتر وتخلع خافت يكون سمعهم )
عصام : هاي هاي على حبيب باباه كياكل الكوكيز ( باسو وكلس )
عمران : انا وطاتي ريناس صايبناه وصايبنا البراونيز ودارت ليا حليب بشوكولا
عصام : مزيان اولدي الله يرضي عليك ، سير شوف اللعبة لي جبت ليك ( مشا كيجري وخلاهم بجوج شافيها عصام ) كيداز نهار مزيان ( هزهزات ليه راسها ) دوات هدى اليوم ؟
أريناس : اه دوات معاه ابيل ڤيديو شحال وهوما كيدويو ( شافت فساعتها ) منين جيتي نمشي انا
عصام ( حبسها ) بلات بغيت ندوي معاك ( طل على عمران لقاه كيفك اللعبة ديالو ويركب فيها رجع شافيها ) أريناس انا ماعنديش مع كترت الهضرة بزاف انتي مدة وانتي معاشرانا انا وعمران وشاهدة على كولشي وعارفة مو مزوجة وحاملة ( هزهزات راسها متوترة فاش كيكون فدار كتجيها تفتافة والخلعة والحشمة وكولشي كيتجمع عليها ) عمران عزيزة عليه أنتي وكيبغيك وهادشي عارفاه بلاما نݣولو لك ( حك حاجبو ) لي بغيت نݣولك ( شافت فيه ) أنا طالب يدك لزواج إلى قبلتي
أريناس ( بقات مصدومة كلامو كيتعاود فودنيها ) شناهو ؟
عصام : طالب يدك لزواج شنو جاك فشكل ؟
أريناس : أنا ؟
عصام : لا هو واش كاينة شي وحدة من غيرك هنا .. متجاوبينيش دابا فكري ودوريها فدماغك مزيان وباشما كان ݣوليها ليا ، وبلاما تخافي ولا تبززي على راسك راه الى مابغيتيش غاتبقاي خدامة بحال دابا بحال من بعد ..
أريناس : ولكن علاش انا ؟
عصام : انا ماباغيش ندخل البراني على ولدي .. وانتي عمران كيبغيك وانتي كتبغيه انا باغي وحدة لي يرتاح معاها ولدي ونرتاح من جيهتو بنت الناس فهمتيني ؟
أريناس ( هزهزات راسها هي باغي لي يأمن ولدو عليها ماشي حيت كتعجبو تبسمات ) فهمتك إن شاء الله يكون خير ( وقفات ) أنا غانمشي ( خرجات للمراح هزات ساكها باست عمران ومشات بحالها وهي كتفكر فكلامو )
- خدات الطاكسي وصلها لدار ، فتحات الباب ودخلات مها كانت فالكوزينة كتوجد البغرير ، دخلات عندها عنقاتها ومشات تبدل دخلات لاحمام توضات وصلات ومشات للبيت الكلاس شعلات التلفازة وكلسات .. جات أمينة حطات الصينية وبغرير والفاكية وݣلسات
أمينة : بنتي ، مالك ماشي حتى لتما عينيك جاوني ماخواتات
أريناس ( تقادات فالكلسة وشافت فمها ) مي عندي منقوليك ( شافت فيها أمينة وبدات كتعاود ليها كولشي من الاول ) هادشي لي كاين
أمينة : وبنتي الولد ولد الناس شوف غير اش دار معانا فاش كنتي فالمحنة لا هو لا خوه ماتلقايش بحالو .. مربي ولد العايلة
أريناس : والله ماعرفت أمي هو بغا لي يأمن ولدو عليها
أمينة : ومالها مع الوقت راه يبغيك وتبغيه ابنتي ، راه والله ماتلقاي بحالو ولد الناس الله يعمر ليهم الدار
أريناس : والله ماعرفت
أمينة : نوضي صلي ابنتي جوج ركعات ستاخري الله فهاد ولد الناس وربي يوري ليك الطريق الله يسهل عليك ويفرحني بيك مع لي يستاهلك ياربي
أريناس ( تنهدات تنهيدة طويلة) أميــــــــــــن ..
جنب الواد حاطين الطبلة ديالهم خدامات بزوج ، يديها خدامين وعقلها غايب تفكيرها كولو فتصاور لي شافت وفكلام ماجدة تعصبات وماعجبهاش الحال قدما هي فرحانة بكلامو وبلي عرفاتو كيبغيها .. قدما معصبة من لي معاه فصورة وكلام ماحدة كيتعاود فودنيها
حياة ( نغزاتها ) فين سارحة بخيالك اهاد البنت ؟
عنبر ( شافت فيها ) ماعنديش المورال قسما بالله العظيم .. مرضت فصحتي فاش شفت تصاور ديك خيتي ولكن هادشي خاصو يدار ليه الحد صافي براكة عليا ، يا نتصالحو بحال الناس ويسمح ليا على لي وقع يا كل واحد يشد طريقو ومريضنا ماعندو باس نبكي عليه شهورة ونجمع راسي
حياة ( عمرات كاس القهوة لواحد سيدة مداتها ليها وكملات كلامها ) أحيانا غير كتقولي هكاك ، الروطال هو لي عمرك تنسايه كتموتي عليه عمرك عشقتي ولا غادي تعشقي شيحد بحالو
عنبر ( شافت فيها ) عندك الصح داكشي باش هادشي خاصني ندير ليه الحد يا يشد معايا طريق ولا الله يعاون العاونات
حياة : حتى هادي هضرة ، دوي معاه وهني راسك باش تعرفي راسك من رجليك ..
- كملو الخدمة ديالهم وهي على نار باغية غير ايمتا تمشي وتشوفو لأول مرة من نهار بدات خدمتها .. كانت باغية ترجع لدار بكري غير سلاو الخدمة ركبو فطاكسي سيفطات ليه ميساج " نلقاك فالبلاصة فين تلاقينا داك نهار " .. بقات مدة عاد جاها جوابو " مافيا لي يخرج " قرات ميساج عصبها رضات عليه " والله ومتحي حتى نجيك للحومة ندير ليك الشوهة انا علمتك "
كانت غافلة على طوموبيلتو لي كانت تابعاهم من اللور ، قرا ميساجها وتبسم جاتو الضحكة
الروطال : الشميكيرة ( وصلهم الطاكسي ، حياة سيفطاتها للدار وهي مشات للحومة فين تلاقاو بقات واقفة غادة جايا وناس دايزين حتى تم جاي للعندها وقف مد ليها يدو ) السلام
عنبر ( رضات عليه السلام ) وعليكم السلام ( كتشوف فجنابها ) يلاه نمشيو للجردة حسن مانبقاو هنا ..
الروطال ( حرك راسو بلاحولة ) زيدي على أخر يامي بغيتي ترجعيني ل20 عام اللور ( شافت فيه مخنزرة سابقاه وهو وراها متبعها بالعين كيدور فاللسانو وسط فمو حتى وصلو للجردة ݣلسات بقا واقف عند راسو رجل حاطها جنبها فالكرسي ) أش تم ؟
عنبر : شوف أفاروق انا هادشي راه مابقاش عاجبني ، يا تݣاد معايا وتشد معايا الخط يا دير شي حل
الروطال ( هز حاجب ونزل الثاني حنحن ) بحالاش مافهمتش ؟
عنبر : راه شفت تصويرتك مع بنت عم عمي أدريس ، راه حشومة وعيب داكشي لي كدير فيه مايبغيه لا ربي ولا عبدو ..
الروطال ( ببرود) ومن بعد مافهمتش انا شنو ضارك ؟ ( وقفات مقابلة معاه الجهة لي كانو فيها كانت مظلمة شوية )
عنبر : كيفاش شنو ضارني ؟ أنا مرتك
الروطال : وهاد مرتي كنتي دايراها فبالك نهار خويتي ورجليك ݣطعو البلاد ولا يلاه تفكرتيها ؟
عنبر : حس بيا واش انا مشيت حيت انا باغية نفوج .. عاودت ليك شنو داز عليا صدمة من ورا ختها لاباس عليا لي ماحماقيتش ، جاو متابعين موت والديا ولي وقع مع بدر الدين ( قاطعها بزمجرة رجولية )
الروطال : ماتجيديش حسو على فمك .. فمك مايدكرش سميتو
عنبر : حنا غير كندويو .. وعاد باش نعرف والديا عايشين راه مساهلش ، وختنا كذبات عليا حالتي كانت خايبة ماتيقتيش ( هزات تيليفونها وهو كيشوفيها شنو بغات تصنع دوزات خط حياة وكبرات الصوت )
حياة : ألو
عنبر ( قاطعاتها ) حياة عاودي بالحرف على لي وقع ليا فاش كنا فأکادير بالحرف شنو كان كيوقع ليا
حياة : كنتي كتغوتي بالليل ومكتخلينيش نمشي نعس فالبيت كنعس حداك ، وكتشوفي بحال شي حد واقف عليك وكتبقاي تهلوسي
عنبر : شنو وقع ليا فلاكوت ؟
حياة : لقيناك دخلتي وسط البحر ، غير سيرين وانا لي جبدناك
عنبر : صافي سيري ( قطعات ) سمعتيها دابا ولالا ؟
فجهة أخرى ݣالس فوق الفوتوي لابس بيجامة ديال الدار رجولية ، التلفازة شاعلة وهو هاز البيسي خدام .. خرج عمران من البيت هاز واحد الدب ديالو غير شافو نزل رجليه من الفوتوي وحط البيسي
عمران ( كيحك عينيه ) بابا ( عنقو )
عصام : أولدي أش فيقك ؟
عمران ( حاط راسو على صدرو ) طار عليا النعاس وجيت عندك .. بابا ( شافيه ) علاش ريناس ( اريناس ) ماتكون معانا حتى فليل ؟
عصام ( كيدوز ليه على شعرو ) حيتاش اولدي عندها دارهم كيما حنا عندنا دارنا .. وحشومة تبقى معانا بليل
عمران : وعلاش حشومة ؟
عصام : حيتاش اولدي من تقاليد والعادات البنت مكتبقاش مع راجل فدار وحدة الى مكانوش مزوجين..
عمران ( هزهز براسو ) وتزوج بيها باش تبقى معانا فليل وفنهار
عصام ( باس ليه راسو وتبسم ) انت مزال صغير على هادشي احبيبي ( تم جاه ميساج فتيليفونو ، هزو لقا نمرتها دخل للميساج لي كان عبارة على " سي عصام انا موافقة " بحال الى ربي ستاجب ليك أولدي ( هزو فيدو ) اجي نعسو اجي ( هزو فيديه وداه للبيت باش ينعسو ) ..
~~~~~~~~
الروطال ( حك جنب نيفو ) هادشي كامل فاهمو ودايز لي مغادوزش هي المشية ديالك للمصر مع ديك خيتي مغادوزش أعنبر ، كيما انا محاسبتكش حتى انت مغاتحاسبينيش معامن نتصور ومعامن لا ..
عنبر : هانية عندك ظرني ياك ؟
الروطال : انتي الضر ديالك بتريبل أبنت فاطنة ، انت ضريتي هاد الݣلب بضوبل ، عرفتي شنو كنت كنکوليهم انا بلا عنبر راه غانتوضر انا منكدش نعيش بلا بيها .. فخبارك دار مادخلت ليها منين مشيتي ، جرحك غارق بزاف ..الضرورة لي تضريت انا موحال تضريتيها انتي
عنبر ( بإنفعال ) الضرورة لي تضريت انا التريبل ماشي غير ضوبل ، حتى كتقولي ربي جزاك وجاب ليك ولد الناس حليتي ليه قلبك وبغيتيه ( شافيها حركات راسها كترعد ) أه جاتك فشكل بغيتيه حيت بصح بغيتك بصح عقلي بغاك وقلبي عشقك نقد نقوليك عاد عرفت الحب ديال بصح معاك انت .. العذاب لي شفت فاش سفت تصاورك مع ديك خيتي وكلامها ليا دبح**ني ألف مرة لهلا يدوقك داكشي لي عشتو لهلا يدوقو ليك ( دموعها نزلو ) ( مسحات دموعها بالخف ) كنتي باغينا نكملو مرحبا كنتي ناوي تكمل فهادشي وتخلي قلبك قاصح ( شافت فيه ) اللهم كل واحد يمشي فطريق حسن من هاد العذاب ..
قرب ليها بملامح باردة مخوفها حتى ݣلسات كتشوفيه بعينيها كيبريو نازل بطولتو كلها عليها
الروطال ( هاز حواجبو ) كتبغيني ؟
عنبر ( بلعات ريقها ) كثر ما ماتخيل
الروطال : من إيمتا ؟
عنبر ( قلبها كيضرب ) من نهار خرجت من دار ( نزلات دمعة من عينيها ، قبل ماتمسحها نزل بلسانو لاحسها مخلي قلبها غايخرج بتصرفات لي كيدير بنظراتو عينيه لي كيخليو حواسها كلهم يتحركو )
الروطال : اخر مرة نسمع كلمة الفراق على فمك .. حيت داك اللسان انݣطعو من جدر ونديرو ݣديد أبنت العم ( تنهد ) مصيبة كحلة طاحت على راسي ( جرها خاشيها فصدرو تبسمات خشات يديها معنقة ظهرو ) غادي نخرجها منك
عنبر ( شافت فيه بعويناتها لي كيبريو ) باش ؟
الروطال ( شافيها ) حتى تكوني تحتي وتشوفي ( غامزها )
عنبر : ممسوخ والله مكاتحشم
الروطال : وانتي لي جايبة ليا داك السليپ بوخيوط مامسوخاش باز ( عنقها ) توحشتك يا جدك احححح شحال كنموت على طواسلك
عنبر ( ماكرهاتش تغوت ) وانا كنحملق عليك وكنبغيك وكنموت عليك ( مزيرة عليه وناس دايزين كيخنزرو فيه )
الروطال ( رض البال بصوت عالي نطق كيشوفيهم ) مراتي مراتي البشار مابقى حد يعنݣ مراتو .. زيدي انتي ولينا عايشين معاك المراهقة على أخر يامنا ( جرها خاشيها فيه غاديين مع بعضيتهم منظرهم كيخلي لي داز من حداهم يشوف فيهم ) ..
راجعة هي وياه بحال الى كانت مسجونة وعينيها لمسو النور معانقين حتى وصلو للحومة وبعدات شافيها بإستغراب
عنبر : حشومة معانقين والحومة وناس هنا كيحتارموني
الروطال ( صغر عينيه كيدور لسانو وسط فمو ) علاش اش كنصنعو بسلامة حنا مزال مابديناش بعدا رجوع لله أعنبر
عنبر ( شافت فيه ) فاروق نعل شيطان حنى يلاه دابا تصالحنا مجاتش ( شافت فجنابها شي عايالات ديزات وكيشوفو فيها ) المهم انا انطلع دابا اصلا عييت ومشا الحال ( تبسمات ) تصبح على خير .. هربات ماخلاتش ليه الوقت فين يدوي دخلات لدار طايرة ..
حياة ( حلات ليها الباب ) على سلامتك ( كتشوفيها كيفاش حنيكاتها حمرين وفرحانة ) هاي هاي الحناك حومر وختي لاش جايا لدار كون انا منك كون واجريتو لدار نيشان ..
عنبر ( كتزور فولارتها ) انتي مدودة انا لا
حياة ( كلسات ) ياربي نتيق والله يعطينا وجهك ماعرفتش شكون جراتو داك نهار انا ولا انتي
عنبر : ومتندمينيش حيت عاودت ليك البشار ( بدات تفرنس ) يلاه رتاحيت والله عرفتي أحياة كنبغييييه كنحماق عليه الحب زوين والله العظيم
حياة ( بفرحة باينا فعينيها ) الله يكمل عليكم بالخير ويبعد عليكم كل حاجة خايبة ياربي
عنبر : العݣوبة ليك نفرح بيك إن شاء الله
حياة ( ببرود ) انا لالا اختي حجارك يشدوك .. انا نكمل قرايتي داك تخربيق خزيت بالي منو ( وقفات متوجهة للكوزينة )
عنبر ( تبعاتها ) كيفاش خويتي بالك مالك هبيلة
حياة ( كتغسل فالماعن ) كنقوليك لي كاين انا ورجال منصلاحوش ( تفكرات لي وقع ليها مع وليد ) ..
عنبر ( دوراتها عندها ) واش اتخلي لي وقع ليك مع داك جلاخة توقفي حياتك ولا اش هاد البهلان
حياة : عنبر الحب قليل ماشي غير لقيتيه انتي ضروري نلقاه أنا .. دازو زوج علاقات خايبين فحياتي مابقى عندي مندير بحس رجال وهادي حريتي انا ( قاطعهم صوت التيليفون لي كيسوني ديال عنبر هزاتو بلاما تشوف شكون فاتحة الخط ) الهضرة معاك مزال مسالاتش نشوف انا هاد تخربيق ديالك فين غايوصل السيدة بغا تعقد راسها براسو وي ألو ...
الروطال ( مغوبش ) أش تم ؟
عنبر ( خرجات للسطح معصبة ) والو امع حياة باغية تمرضني
الروطال ( بإستفهام ) مالها ؟
عنبر : السيدة باغية تدفن حياتها بالحياة .. غير دازت من زوج تجارب فاشلة مافيهم مايتشاف حالة لا مزال طافت بشي راجل
الروطال : هادي غير هضرة غير مزال مقصحة خليها حتى تفش وتنسى .. تعشيتي ؟
فبيتها كتجمع فحوايجها فواحد لاڤاليز صغيرة لي غادي تكفيها فهاد 5 يام لي غايدوزوها فشمال .. قداتها وقفاتها حدا نموسية فبيتها هي وشنو غادي تلبس .. تنهدات تنهيدة طويلة وݣلسات فوق الفوتوي لي عندها فبيتها كتشوف فسرجم خيالها سرح بيها ومشا لنهار حطات رجلها فالمغرب فاش شدات طاكسي .. تفكرات اول مرة شافت عزيز تبسمات كيفاش تصرف معاها كان كيبان عصبي عمرها حسات بإحساس الإعجاب حتى لنهار لي حساتو جيهتو إحساس لي قمعو فيها نهار بين ليها بلي كاينة شي وحدة فحياتو .. نهار لي شافتو مع بنت حومتهم فالحومة واقف شاد جماعة وكيتبسم كيفاش الغيرة نهشاتها من الداخل ..
- تدق الباب ودخلات عليها دنيا لي كانت لابسة بيجامة ديال دار بايتة معاها
دنيا : جمعتي حوايجك ( مدات ليها كاس دالقهوة ) هاقهوتك الناس يشربو حليب بلويزة وانتي قهوة
ماجدة : لويزة باش نعس ويمشي عليا ترونسبور
دنيا ( ݣلسات مسرحة رجليها فوق النموسية ) أنا قلت فاش وداد وعثمان مابقاوش غاديين اتݣلسي
ماجدة : لالا وداد كانت غادية ولكن خوها جا من برا وعثمان باه مرض ، اما كانو غاديبن مساكن وانا محتاجة لهاد تسافيرة نرتاح شوية
دنيا ( كتشوفيها ) مزال كتفكري فعزيز ؟
ماجدة ( شافت فيها من بعدما رشفات من كاسها ) علاش باينة فيا حتى لهاد الدرجة ؟
دنيا : والصراحة أه باينة فيك .. حاولي تنساي الحاجة لي كيحس بيها غير واحد كضر فالخاطر والله العظيم بتجريب
ماجدة ( غمزاتها ) هاي هاي
دنيا : مديريش فبالك داكشي قديم ديال القرايا تخربيق وصافي المهم ديها فراسك ونساي ( وقفات ) انا نمشي نعس غدا انفيق بكري نتقدى السلعة
ماجدة : تصبحي على خير .. خرجات من عندها دنيا مخلياها كتفكر فكلامها ، تنهدات تنهيدة طويلة هزات تيليفون دخلات لكونطها طلات عليه وعلى تصاورو بلعات ريقها وخرجات ، الحاجة لي كتفرحها هي مكايجاوبش على التعليقات كيخليهم هكاك ..
~~~~~~~~~
مع 6 ديال الصباح كانت واقعة بلاڤاليز ديالها قدام الأجونس .. طوموبيلتها خلاتها فالباركينغ دخلات باليزتها وطلعات للكار خدات بلاصتها بداو الناس كيطلعو ياخدو بلاصتهم ..
( صوتو رجولي ) هاد البلاصة عامرة ؟
ماجدة ( ضارت شافت فيه تهز قلبها من بلاصتو تصدمات كتحس براسها واش كتحلم ) عزيز !!
عزيز : اهلا اهلا صباح زين هذا حتى أنتي غادة ؟ واش خاوية هاد البلاصة بعدا ؟
ماجدة ( هزهزات راسها ) اه خاوية ( مع قالتها ليه ݣلس حداها شافيها وتبسم ناطق)
- طريق السلامة ازين ..
خرجات تسخر غادية لسويقة هازة واحد القفة وساك على جنبها .. كتحس بالحس درجلين تابعينها ، وقفات ضايرة كيبان ليها وراها غوبشات وقفات كتشوفيه ..
عنبر : فاروق واش انت هبيل ؟ واش غادي تبقى تابعني بحال ظلي رجوع لله
الروطال ( واقف عليها هازة راسها فيه ) فين غادية على صباح امدام ومعامن تشاورتي وعلاش معيطيش وماݣلتيش انا خارجة هي 20
عنبر ( شاكوها ) أول حاجة انا غادية نتقدى وها القفة قدام عينيك ، مالك جهلتي اويلي رجوع لله اش كاين ؟
الروطال ( زاد قرب منها ) امدام منين تخرجي اتعلميني واخا تكوني غادية للحانوت لي ݣدام دار اتعلميني ..
عنبر : معايقتيش شوية لا ؟
الروطال : ومنين جابتها الهضرة نيت احبيبة وحنا داويين داويين ، ديك الكروصة غاتشوفي لمن تبيعيها وترجعي لدارك
عنبر : واش نسيتي وقيلة انا مكنحملش لي يجي ويفرض عليا الحاجة وبلي خاص يتشاور معايا وندويو فهاد الحوايج ، واش باغي تخنقني ولا كيفاش ؟
الروطال ( مزال بنفس البرود) أنا مكنخنقش انا دوي من نيتي ، مغانخليش مرتي تسرح حدا الواد ورجال غاديين جايين عليها ماتخلينيش نعطب شي كيدار ، يلاه تصالحنا ازينة تبريحة الله يرضي على حبيبي .
عنبر : لا راه كتهدد فيا ( عصبها وصدمها جاها زاد فيه ) كي قلتيها عاد رجعنا وتصالحنا شوية بشوية ، وزايدون واش سولتيني انا شنو باغية لا ؟ واش سولتيتي فاش رجعت فاش كنفكر واش دوينا بحال ناس انت مزال ماعرفتي حتى شنو بغيت وفاش كنفكر ..
الروطال ( بنفس الهداوة ) غاندويو احبيبة غاهو دابا اتعطيني ديك الݣفة وانا لي غانتقدا وانتي غادخلي لدار وتبقاي فيها .. ومتعوليش تمشي للخدمة هاد تلليلة الله يرضي عليك
عنبر ( ذافت فيه بعصبية ضاربة بديك القفة حدا رجليه ) أنتي راه جهلتي وصعرتي بزاف عليا هادسي وهالحماق ( خبطات فيه ورجعات بحالها )
- دخلات لدار معصبة طالع ليها الدم خرجات عندها حياة كتشوفيها بإستفهام
حياة : اويلي مالك مشيتي ورجعتي فين هي القفة ؟ وفين تقدية
عنبر : الخرا ديال فاروق الويل الكحل .. قطع عليا الطريق ماخلانيش نمشي نتقدى وباش كملها قاليك متبقايش معولة على الخدمة وترجعي لداركم ماسولنيش شنو بغيت انا ولا فاش كنفكر ولاةشنو مقررة لا والو صافي غير تصالحنا خاصو يمشيني على هواه ..
حياة : واش بصح ؟ شوفي انتي عارفاه كيف داير ابلهداوة
عنبر ( بإنفعال ) مكاينة هداوة ، ماشي اتصالحنا يحط عليا السيف على عنقي أنا مايزيدش فيه .. اويلي باغي يخنقني السيد وها الهبال .. حنا مزال ماكلسناش مادويناش معاودناش ولا وضحنا شحال من حاجة زرب عليا زربة ديال الغدايد .. انا واخا كنبغيه ولكن انا ماشي من نوع لي تحني الراس وتقول نعام اسيدي ، لي متجي بالخاطر متجيش بزز ولاواه ..
حياة : صافي ماتبقايش معصبة أصاحبتي حتى دويو بالخاطر
عنبر : الى مدارش عقلو راه مكاين خاطر
حياة : عندك اعنبر تبغي تخوي تاني ؟
عنبر ( شافت فيها ) تعلمت منهربش ونواحه مشاكيلي والى مابغاش يدير عقلو وايبقى خانقني بهاد الغيرة زايدة ( سكتات مطولا كتفكر متنهدة ورجعات شافت فيها ) غادي نقولها لبابا وجدي هوما يتفاهمو معاه ..
تدق الباب مشات حياة تفتح مخلية عنبر فسطح .. مع حلات لقاتو واقف قدامها .. حط الݣفة رامي عينيه للداخل
حياة : عنبر فسطح .. هزهز ليها راسو وتوجه للسطح لقاها حاجة يديها على الحيط ومقابلة السما ساهية وكتخمم حتى قاطعها بكلامو
الروطال : ومنين انتي عاجباك العيشة هنا ومابغياش ترجعي مع راجلك لدارك لاش هاد المصالحة ؟
عنبر ( شافت فيه بلاما تحرك من بلاصتها ) انا ماشي هبيلة ولا ماعنديش العقل وسايط ليا البرد فمخي لي غانبقى خاوية داري .. ولكن واش انت طلبتيني نرجع ؟ واش درتي الصواب ولي كيدار باش ترجع مرتك لدارها بشان والمرشان وقدام عباد الله ؟ ألا واخا واش دزينا بحال الناس سولتيني الناس لي كنت معاهم شكون وكيفاش عرفتهم وشنو عشت وكيدازت ديك 4 شهور الا .. واخا واش سولتيني شنو تبدل فيا وشنو بغيت واش فخبارك انا باغية نرجع نقرا
الروطال ( صغر عينيه ) تقراي !! وتولي غادية جايا لافاك مرتي اما تخالط مع دراري فلافاك وتولي تبادلو الدروس ياك امدام
عنبر ( تبسمات ) هاليقلنا .. بحال زعمة مافخباركش بلي ممكن نقرا امن دار حتى لنهار الامتحان ، شفتي كيفاش كتصرع ومكتعرفش تحاور وتسمع للطرف لاخور شفتي لي كيمرضني فيك هو هادشي ..
الروطال : انا لي كنعرف مرتي ترجع لدارها معززة مكرمة وهادشي كامل ندويو فيه من بعد
عنبر ( بجدية ) وحتى انا مغانرجع لديك الدار حتى دير لازم وترجعني بشان والمرشان
الروطال : واش انا لي جريت عليك ؟
عنبر : ماتخليناش نرجعو للور ونقوليك بلي خبيتي عليا وحسيت بالغدر .. حيت هادشي دفنتو ورايا ، وبلاما نقوليك بلي سباب شريكتك خويت المغرب وسمحت فجمل وماجمل ، درتي القانون وجيتي رضيتيني مرحبا نرجع وبالفرحات عليا مادرتي لازم هاني فداري ..
الروطال ( دور لسانو وسط فمو ) واخا الالة ماݣلتي عيب دابا نشوفو واش غاترجعي ولالا ( عض على فمو محكم فأعصابو عاطيها بظهر وزايد خلفة ) .. خرجات عندها حياة من ورا مامشا
حياة ( كتشوفيها حابسة البكية ) اويلي اش وقع واش كتبكي
عنبر : السيد ماعطاني حتى فرصة المريض المصعور العصبي .. نوريه انا ( بدات تبكي ) قالك تقراي مع دراري ماسولني ماعطاني اعتبار والله حتى نخرج منو هاد تعفار وهاد البوخ الخاوي الى ماوريتو يولي يدير ليا ألف حساب مانتسماش عنبر أبلات ..
حياة : علاياش ناوية ؟
عنبر ( هزهزات راسها ) حتى لغدا وتعرفي إن شاء الله علاياش ناوية ..
- وصلو لأصيلة هي اول وجهة ليهم نزلو باش يفطرو .. المدينة كانت صغيرة وزوينة وكالم توجهو لواحد القهوة لي كوبل شدو كل واحد فيهم طبلة ݣلسو فيها .. أما هي توجهات لواحد طبيبة جا سرباي خدا شنو بغات تنهدات تنهيدة طويلة متفادية تشوف فوجهو ..
عزيز ( جر الكرسي وکلس تحت أنظارها لي كانت كلها إستغراب ) زين ݣالس بوحدو
ماجدة ( مصغرة فيه عينيها ) شكون قاليك على هاد الرحلة ؟
عزيز ( تبسم حيت كون طلات على ستوري وشكون شافو ايبان ليها بلي شايفو ومن تم عرف ) علاش الرحلة سرية ياكما عندكم شي مهمة بوليسية وانا مافخباريش ؟
ماجدة : انا ماقصدتش هادشي غير جاني عجبك .. ولي جاني عجب كيفاش جاي بوحدك
عزيز : علاش معامن خاصني نجي ؟
ماجدة ( كتدوي ببرود وتشرح بيدها ) الى شفتي شحال من واحد جاي مع خطيبتو ولا مع البنت لي كيبغيها هادشي علاش جاني فشكل
عزيز : وعلاش انتي جايا بوحدك ( كيسكانيها بعينيه خصوصا عينيها الخوضر لي كيبريو )
ماجدة : حيت انا ماعندي حد فحياتي ، ومامحتاجاش شي حد يكون فحياتي باش نسافر معاه ..
عزيز ( لوا شفايفو ) وحتى انا بحالك هاد الساعة ماعندي حتى وحدة فحياتي لي نجيبها معايا .. وكاع الى فكرت نسافر مع شي وحدة غاتكون مرتي ( قطع كلامو فاش جاب السرباي فطورها وفطورو مخليها كتخمم فكلامو كتحاول تستوعب )
ماجدة ( حتى مشا السرباي ) ياك كنتي قلتي بلي كاينة شي وحدة فحياتك !!
عزيز ( كيقلب فأتاي ) أنا عمري ماݣلت شي حاجة بحال هادي .. انت لي خممتي فيها وخرجتيها من راسك وانا ماعندي مندير ليك الى انتي فكرتي هكاك .. ( غمزها )
- بلعات ريقها كتحاول تصنع البرود وهي عقلها سرح لبعيد .. كيفاش زعمة غير هي لي فكرات فهادشي وألفات قصة من راسها
عزيز ( قاطع أفكارها ) فطري قبل لا يبرد التفكير الخاوي ماعندك متعمري بيه مجاجك ( غمزها ) .. بلعات ريقها نظاراتو كيوتروها كتحس براسها بحال الى كيقراها ولا معريها بشوفاتو .. بدات فالفطور ديالها وعقلها خدام حتى كملو الفطور ناضت تخلص كان سبقها وخلص هو ، خلاتو وتوجهات للكار ݣلسات فبلاصتها ..
- بداو كيطلعو الناس طلع وݣلس حداها ماد ليها ساشية فيها بيموات
ماجدة ( شداتها عندو ) شكرا .. تحرك الكار مرة مرة كيلوح ليها كلمة كتحاوبو غادي تكون كتكذب الى قالت بلي هي حاليا ماكتحسش بالفرحة وعاجبها الحال .. خصوصا منين عرفات بلي مكاينة حتى وحدة فحياتو زادت رتاحت كثر ..
الوجهة ديالهم كانت شفشاون .. من بعد مدة وصلو ليها الكار بلاصة فواحد الجهة ونزلو باش يدورو وحتى لي بغا يتصور ولا يتقدا شيحاجة .. نزلات ماجدة غادية بوحدها كتاخود تصيورات حتى قفزها من بلاصتها فاش وقف عليها ..
ماجدة : حشومة عليك خلعتيني
عزيز : قلبت عليك طرتي ياك لاباس ؟ واش كتهربي مني مباغياش تمشاي معايا ولا كيفاش بلانك ؟
ماجدة ( تنهدات تنهيدة طويلة ) اش هاد الحماق اعزيز والله حتى غير كتخربق
عزيز : وشنو هاد البلانات لي كديري بحال الى مكتعرفينيش .. واش لهاد درجة محاملانيش جايك تقيل ؟
أݣـاديــر
خرج من الخدمة ديالو عيان باغي ياكل ويمشي لدار يدوش عليه وينعس يرتاح .. ركب فطوموبيل ديالو سايݣ مخدم الموسيقى باش يتوݣض شوية حبس طوموبيلتو ونزل وقف عند باب الريسطو رامي عينيه كتبان ليه واقفة عند واحد الطبلة .. جامعة شعرها ومطلعة كمايم القميجة لي لابسة .. كتبسم فوجه الكليانة لي كالسة مع راجلها عاطياهم الخاطر .. فاللحظة سها فيها عابرها بعينيه حتى ضارت وشافت فيه بقات واقفة كتشوفيه تبسمات وتمات جايا عندو ..
ليلى : سي عماد مرحبا بيك
عماد : شكرا ( حك جنب عينو ) أنتي مزيانة ولفتي شوية ؟
ليلى ( بنفس الإبتسامة ) الحمد لله ولفت .. دراري والبنات لي معايا ظريفين وعاطييني الخاطر بحال الى شحال هذا وانا معاهم
عماد ( هزهز براسو ) الحمد لله مزيان الله يوفقك
ليلى : اللهم آمين بغيتي شيحاجة تاكل شيحاجة ؟
عماد : شي شوارما الله يحفظك وجمعيها ليا نديها معايا ..
ليلى : اهاه مرحبا كلس بينما وجدتهم ليك .. خلاتو ݣلس ومشات للعند دري لي كيوجد ليكوموند عطاتو الكوموند لي بغا ، حاط تيليفونو وساهي جهتها كيشوفيها كتدوي مع الشاف ومع البنات لي معاها .. وجدات لاكوموند ديالو دارتها فساشي خرجات من الكولوار وقفات عندو ومداتها ليه ) هاهي اسي عماد ..
عماد ( شافيها ) عماد ( شافت فيه بعد إستيعاب ) عماد بلا ديك سب عماد شحال عندي ؟
ليلى : 40 درهم .. ( عماد جبد 50 درهم من جيبو مدها ليها او وقف ) بلات نرد ليك الصرف
عماد ( وقف مقابل معاها ) خليهم ليك تهلاي فراسك .. تخطاها وخرج متوجه للطوموبيلتو ، بقات واقفة ساهية مشات لاكيس حطاتها ورجعات 10 دراهم لجيبها راجعة للخدمتها ..
ركب فطوموبيلتو مسوني عليه عصام
عماد : وفين ابوراس لك وحشة يا أخي فين هاد الغبابر ؟
عصام : وخويا امشيتي ولينا مقطوعين فهاد البلاد .. خوك قاني على مرتو فالقنيطرة ، ولد عمك مابقيتش كنشوفو من اخر مرة
عماد : ݣلنا لك تزوج اصاحبي عمر الكانون
عصام : وداكشي علاش مسوني عليك .. بغيناك توسط لينا
عماد ( ضحك ) هاي هاي هاي هي هضرة الواليد صدقات بصح
عصام : وصلها ليك سخونة .. واش بان لك أنت ؟
عماد : من عندي غير زعم وزطم ماتلقاش حسن منها .. اللهم بارك الله يكمل بالخير
عصام : هي انقصد ؟
عماد : على مولانا ..
ماجدة كترمش فيه .. جاها تسطى بهاد الهضرة لي كيقول ومنين نزلات عليه
ماجدة : اش هاد الهضرة اعزيز .. علاش مغاديش نحملك ( عضات على شفتها حيت نيرڤاها ) عزيز فاش عينيك جيني نيشان حيت قسما بالله هاد الهضرة مكدخلش ليا لراسي ..
عزيز : عيني فيك ( كيناظرها بعينيه )
ماجدة : كيفاش عينيك فيا .. انا هاد تخربيق ماعنديش معاه مرة تدوي معايا مزيان مرة كتنخلني واش كاينة شيحاجة ؟
عزيز ( بجدية ) لي كاين هو كتعجبيني ، نݣد نکوليك شيحاجة فايتة الإعجاب لديك جيه وليتي معششة ليا هنا ( أش لراسو ) وهنا ( أش لقلبو ) ..
ماجدة ( بقا واقفة كتشوفيه ساهية مصدومة حركتها مشلولة ماعرفاتش باش تبلات ) كي كيفاش ؟
عزيز ( قرب منها ) كيف المشاش باغيك المرض باغيك البلا .. باغيك أهاد البنت فهمتيها دروك
ماجدة ( حابسة تبسيمة كتحس بالفرشات كيلعبو ليها فكرشها ) اهاه وديك خيتي لي كنتي واقف معاها فالحومة .. ونهار لي ضرتي فيا فتيليفون
عزيز : انا حمار حسبيني هوكا حمار .. وداك الوقت ماشي هو هاد الوقت وديك خيتي بنت الجيران كابرة مع ختي وبحال ختي
ماجدة : وشنو لي تبدل دابا ؟
عزيز : لي تبدل ابنت الناس هو وليت بداري ومشروعي .. حتى الى بغيت نقصد شي بنت الناس كتافي عامرين ماشي خاويين
ماجدة : بحال الى انا زعمة مغانقبلش بيك الى كانت عندك غير طاكسي .. حتى لهاد الدرجة كتشوفني سطحية ومادية ولا شنو
عزيز : ماشي هكاك ابنادم ولكن انا مغانرتاحش .. الى بغيت البنت خاص نݣد بيها
ماجدة ( عصبها ) ياك اسيدي ، وكون مثلا حا شي حد خطبني شنو كنتي غادير ؟
عزيز : والله يا مك لا كنتي لشي قمقوم خور .. محفي عليك سباطي وكنتبع فيك وحاضيك اهكاك
ماجدة ( جاب ليها الضحكة ) هاد الڤواياج شفتيه عندي ياك ؟ شفتيني فاش طاݣيت عثمان وجيتي ؟
عزيز ( بصرامة ) أجي انتي شكون هاد عثمان ؟
ماجدة ( ببرود ) ماشي شغلك ( عطاتو بظهر غادية جرها من يدها موقفها
عزيز : ماجدة مكنحملش هاد الفعايل .. انا ماشي من داك نوع لي نبقى نخبي ونخيط معاك دروبة الله يرحم جدك نبغيك نقصدك نيشان ونقصد داركم .. واكل ماكلتكم ومعلشر باك وخوتك مغانجيش نطعنهم فدار ݣولي عليا بلدي ولا لي عجبك .. كنتي كتحسي بشيحاجة جيهتي غير صغيرة کوليها نيشان دابا نفاريوها ..
ماجدة ( بقات ساكتة حتى قال موحال تدوي ) كون كنتي كتفهم وعندك المخ لي يخمم .. كون فهمتي من زمان باش كانحس ولكن لي كامبو راه كامبو ..
عزيز ( عجبو الحال تبسم ) ندوزو هاد الكامبو بحال العيل ازين شوفي فيا
ماجدة (ورات وجها حشمانة ) سير براكة من البسالة ..
عزيز : يلاه نرجعو بحالنا نقصد داركم
ماجدة ( شافت فيه ) واش انت مسطي ، أصلا مزال ماطلبتيش مني زواج ومزال ماعرفتينيش واش موافقة او واش كنبغيك ولالا دير مجهود وخليك رومانسي شوية وانت خضر عيقتي ( عطاتو بظهر غادية وهو تابعها كيعيط وهي مبسمة وغادية طايرة من الفرحة ..
ماجدة : ( ضارت ) راه لي عندي قلتو بين ليا ويكون خير ( ضربات فيه وتمات راجعة ) ..
- 4 يام لي بقاو فرحلة دازو بيناتهم بحال المش مع الفار هو فكل لحظة كيحاول يبين ليها بلي باغيها وهي عاطياه النخال ومكبرة مخرجة منو داكشي لي دوز عليها .. حدا لاجونص نزلو من الكار ضرب فيه الهوا ديال كازا جارة باليزتها للجهة فين خلات طوموبيلتها حتى وقف عليها ..
عزيز : بغيتي غير رومانسية واخا الالة ولكن عولي والله وبرب المعبود لا داك شي حد غيري .. وداك عثمان صديق ولا الوعاوع احيديها انتي خاص نتوالاك وحضي جنابك ابنت أدريس ( ضرب فيها ومشا خلاها باغية تنقز من بلاصتها )
ماجدة ( خرجات تيليفونها مدورة لدنيا ) .. دنيا فينك .. اه وصلت خليك تما انا انجي عندك نعاود ليك ( قطعات طايرة بالفرحة متوجهة للطوموبيلتها حطات فيها الباليزة طلعات مديمارية شادة الطريق عند دنيا ..
- وقف قدام باب الدار كيخبط الباب حتى حلات عليه .. دفع الباب دافعها ودخل كيقلب وهي تابعاه كتشوفو شنو باغي يصنع رجع للعندها مخرج فيها عينيه
الروطال ( بجهالة ) فين هي عنبر أحياة كنسولك بالخاطر ؟
حياة ( كتحلف ) قسما بالله ماعرفتهاش فين هي .. انا راه فقت مالقيتهاش راه قلتها ليك لبارح وكنسوني عليها تيليفونها طافي ومغاتكونش مشات عند مها
الروطال : حياة ( بتهديد ) نسيق الخبار مخبية عليا مغايعجبك حال وديني وما أعبد واصلة بيا لهنا ( أشر لعنقو )
حياة : وحق الله ماعرفتها فين هي .. كانت مقلقة منك من لي وقع بيناتكم أنا فقت مالقيتهاش سونيت ليها والو ، وانا اصلا لي عيط ليك وسولتك
الروطال ( داخ شاد على جنبو او راسو تعصب قلب عليها مالقاهاش سونا والو .. ماعرفها فين هزات الراس وفين صدات شاف فحياة ) الى عيطات علميني احياة
حياة : كون هاني .. خرج هايج من عندها ) ݣلسات للأرض كتفكر ) فينك اعنبر فينك عاوتاني عنداك تكوني درتيها أختي .. كانت كالسة على أعصابها معارفة ماتلي ولا ماتوخر دايخة ..
~~~~~~~~~~
كالس فجردة كيخمم سارح فتفكير ديالو .. تنهد تنهيدة طويلة مغبون وخاطرو مزير عليه .. عنقاتو دتيا من اللور وكلسات حداه
دنيا : بابا حبيبي مالك شتك مهموم بحال الى هاز جبل على ظهرك
عبد الخالق ( طبطب على يدها ) مكاين والو ابنتي غير توحشت ختك قلبها ماعرفتو ايمتا غادي يحن من جيهتي الله يهديها
دنيا : دابا ربي يحن ابابا غير شوية ديال الوقت
عبد الخالق : فين كنتي انت ؟
دنيا : كنت مع ماجدة يلاه جات من السفر تلاقينا تغدينا وجيت للدار اليوم مغانمشيش للخدمة بغيت نكلس نرتاح شوية
عبد الخالق : مزيان ابنتي مزيان ( بدا تيليفون ديالو كيسوني هزو بانت ليه نمرت مو ) ألو مي ( تخطف لونو ) وايلي .. ومالو واخا صافي انا جاي انعلم ادريس ونجيو .. الله ينجيه الله يطول عمرو واخا واخا ( وقف لونو مخطوف ) جدك عيان بغانا نحضرو كاملين ..
دنيا ( تسمكو ودنيها ) ك كيفاش جدي ( غرغرو عينيها جاتها الفشلة ) بلات ابابا انا نديك بلات
عبد الخالق : علمي خوك دغية ( هوما غاديين سونات للطارق وهو سونا لأدريس عالمو .. سوناو للعصام لي بدورو خلا عمران مع أريناس وشد الطريق حتى هو ) .. مكانت جدهم كبيرة عندهم والى قاستو حاجة وحدة غايحماقو هو لي مربيهم ومكبرهم وهاز هبالهم وهوما يفديوهم بدم جوفهم ..
كل واحد فيهم شد الطريق .. طارق هز التيليفون كيسوني للروطال والو .. ضرب النص فطريق عاد جاوبو مكشكش ، علمو بلي واقع ركب فطوموبيلتو طاير ماحيلتو للعنبر بي غبر ليها الأثر ولا لجدو لي مرض حاس براسو غادي يحماق ويتسطى ..
أصعب حاجة ممكن يحس بيها الواحد هو الشخص لي كايبغيه ولي ساس ديال عائلتو ممكن يضيع من يدو او يكون مريض .. كاتحس بدنيا ضايرة بيك وماعرف مادير ماتقدم ولا متوخر الاعصاب لي شدوه فاش وقفات بيه طوموبيلتو اومبان عمرهم شدوه .. عيط على ديباناج بقا تم حتى جاو .. شافو ليه طوموبيل قادوها بالخف من زهرو الطوموبيل لي ساݣ ماشي لي مالف كيسافر بيها كانت طوموبيل عادية على قبل بروتوكول الحومة فين ساكن ..
- وصلات العائلة كلها قد قد بلاصاو قدام باب الڤيلا .. عاد وصل الروطال ، نزلو كيتجراو مخلوعين مفافيين ربي لي عالم بحالتهم .. خرجات رقية من باب ظار ملقية ليهم .
عبد الخالق ( سلم عليها ) أمضرا امي با كيبقى مالو أش عندو جبتو ليه الطبيب شافو ؟
أدريس : مي الله يرحم الوالدين كيبقى واش نديوه لكلينيك
رقية ( بالغوات ) أبلاتي اويلي ستفغرت الله العظيم بشوية مالنا توما مالكم مصعورين .. باكم مكاينش فدار
دنيا ( طاح ليها الما فركابي بغات تبكي ) ديتوه لسبيطار با مالو امي واش مرت ؟
رقية : برات الباس عليه .. راه هو ورا الدار ݣالس تماكين عد الشطرة الكبيرة ( ماخلاوش ليها الوقت فين تشرح ليهم مشاو كيجريو سابقهم الروطال لي حبس المشية واقفة بارد ليه الما فركابي .. وقفو كاملين مستفين كيشوفو فباهم ) ..
علال ( متكي فوق واحد الفوتوي عكازو حداه كيحس براحة بالمساج لي كدير ليه ) هيوا فين خليناها ؟
عنبر ( كدلك ليه كتافو ) عرفتي ابا داك العود لي عندو قاليا الى مشيتي حتى ركبتي عليه ولا قستيه غادي نتفاهم معاك
علال : هاي هاي هاي على الحيماري لاخور .. ضد فيه جاك لدهم ابنيتي
عنبر ( طلات عليه براسها ) حلف بالله أبا اتشريه ليا ؟
علال ( شافيها ) أنعطيك ديالي ماخساراش فبنتي حبيبتي .. ماحدي فهاد الدنيا مكاينش لي يخسر ليك الخاطر
عنبر ( معنقاه بايساه فوجهو وراسو ) انتي لي كاين ابا ومكاين ماحسن الله يخليك ليا وصبر عليا نكمل ليك ابا .. السيد مابغانيش نكمل قرايتي وغوت عليا ودار ليا حالة وماسولنيش كاع شنو بغيت ندير فحياتي واش هادسي معقول ابا سيدي
الروطال ( جاي قاصدها ) واش انتي عندك شي مخ ولا ماتكسابيهش
عنبر : ( شافت فيه كترمش ببراءة ) شفتي ابا شفتيه ( غرغرو عينيها بدموع شافت وراها ) شفتي أخويا ختك شفتي ولد عمك أش كيدير ليا ؟ .. لوخرين مافهمو والو .. عبد الخالق فشل سعاد مافهمات حتى حاجة من لي واقع
علال : انا ݣدامك وكتحل فمك .. كبرتي وتݣادو الكتاف
الروطال : با يوماين هادي كنقلب عليها طافية تيليفونها .. وانت كاذب علينا جايبنا للهنا مخلوعين
علال : وليت انا كذاب دابا يالبحمار لاخور .. الى كتي روطال على الناس انا لا اوليدي
الروطال ( بلع ريقو ) حاشا أبا
علال : جات عند جدها وجداها .. شوفو مكم اش دارت ولاش جايين هنا الى كانت شي تنوعيرة راه من دماغها .. ومنين تدوي مع بنتي دوي بشوية
سعاد ( تقدمات عندها معنقاها ) على سلامتك ابنتي توحشناك
عنبر : الله يسلمك اخالتي سعاد ( تقدمات عند أدريس باست ليه يدو ) عمي مبارك و مسعود
أدريس : الله يبارك فيك أبنيتي على سلامتك .. بتردد وقفات قبالت باها كان موحشها وخايف يدير شي تصرف تنفر منو
عنبر ( تنهدات تنهيدة طويلة شافت فيه وفعينيه ) بابا متوحشتينيش ؟
عبد الخالق ( غرغرو عينيه بدموع حس بالفشلة والبكية وسخفة بشهقة تطلقو دموعو جارها عندو ) يزاف ابنتي بزاف توحشتك بزاف ابنتي سمحيليا سمحيليا
عنبر ( بلاما تحس طلقات دموعها كتنخصص مخشية فيه معنقاه كتستنشق ريحتو هذا باها باها من لحمها ودمها سند ديالها ) المسامحة أبابا حتى انت سمحليا ( جرات يدو باستها بايسة راسو وحناكو راجعة معنقاه مخشية فيه ) ..
طارق : وشريف خلي ليا ختي واحد شوية واه ( جرها للعندو خاشي فيه تحت انظار الروطال .. عنقاتو مخششة فيه حاسة باحساس غريب غير لبارح كانت مقطوعة من شجرة ودابا عندها عائلة كبيرة )
دنيا : وأنا ؟ .. جرها طارق خاشيهم بزوج فصدرو وهوما بزوجات مشادات ليدين معنقين قاطعهم صوت من وراهم ..
- تودة : عمي علال ..
يتبع...
التعليقات
لا توجد تعليقات بعد، كن أول من يعلق.