محتوى القصة
أول زواج يدوز فعائلة حيدر بلا هيلالة بلا صداع دالغنا بلا معروضين غير العائلة المقربة منهم أسماء وإبتسام مجموعين فصالة غير العيالات والرجال فالجهة لوخرا أريناس الوسط لابسة قفطان فالأخضر طالقة شعرها واىنقاشة كتنقش ليها
عنبر ( كانت بجنبها حياة ) دوا معاك طارق ولالا ؟
حياة ( بنفي ) لا من نهار دوا معاه عمي عبد الخالق مابقاش كيدوي معايا حتى الخدمة مابقاش كيجي هو ولات تسوني غير المساعدة ولا كيسيفط شي حد صافي
عنبر ( تنهدات ) واخا هكاك طارق حنين وظريف ولكن انت ما مكاتفاهموش ، حتى هو خاص يبدل من راسو شحال من حاجة الزواج ماشي هكا
حياة : المكاتيب والأرزاق ( تبسمات ليها ) اتحنا حتى انتي حتى انا بغيت ندير صبعي شهوتي فيها
عنبر : ضروري ( كدور فعينيها ) داك روطالة ديالي ماعرفت فين هو ( رخات شفايفها ) توحشتو
حياة ( شافت فيها بعدم تصديق ) اويلي على توحشتيه يلاه كنتي معاه رجوع لله ، واش وحمك تحول من طارق لراجلك
عنبر : ماعرفتش المهم شهوتي فيه كنشوفيه بحال شي كيكة معلكة بشكلاط
حياة : وختي بزاف على الوحم هذا الله يستر .. فجهة الأخرى ديال الفيلا فصالة عند الرجال كانو مشاو الطلبة وتعشاو مجموعين أرجال العائلة كيجبدو فالهضرة
الروطال ( شاف جهة طارق كان كيبان ساهي ) أمالك أشريف ( شافيه طارق ) مادويتيش مع حياة ؟
طارق : لا ( ببرود ) ومناويش خليها هي تعرف لي يسلكها
الروطال ( حنحن ببحة صوتية مميزة ) طارق خرج من رونضتك وسول راسك أصاحبي هاد البنت شنو كتحس بجيهتها
طارق ( جافيه بنفس البرود ) الله أعلم
الروطال ( هز حجبانو ) هي مكاين والو لي نݣولك الى كنتي كتحس بشيحاجة جيهتها صبر عليها .. حتى البنت مدازش عليها بزاف لي عاودات ليا عليها عنبر راه كينفخ الراس أصاحبي .. وحتى انت نقص من داك الهبال والعصبية راه حنا ماشي هوما هي ، انت مالف تقشاب معانا ومدايرين بيناتنا خط هي لا ، عاد كتعرفك وتعرفها لافير لي درتي داك نهار مجاتش ݣدامنا فهمتي ( قاطعهم الدق فالباب وشخص لي طل عليهم )
عماد ( بصوت رجولي والإبتسامة على وجهو ) هاواحد السلام عليكم
عصام ( نقز من بلاصتو ): اووووه والله الى دارها ( عنقو مطبطب على ظهرو ) ولايني نمرود درتيها بينا
عماد ( كيضحك ) مالك مريض زواج خويا ومنجيش ( سلم على جدو هو الأول معنقو )
علال : على سلامتك أولدي ( سلم باه وعلى خوه وعلى البقية وݣلس )
أدريس : كيدرتي ليها أݣبيل دويتي معانا
عماد ( كيضحك ) كنت فسطاسيون داك الوقت فاش دويت معاكم شدينا واحد سويمينة وجينا نشوفوكم ..
أدريس : أحسن مادرتي أولدي
الروطال : وشت وجهك منور العود شي نغزة زايدة فيك ( غمز طارق )
عماد : بديتي تاني نمشي نسلم على البقية
عصام : تا أجي هنا مرات خوك كتحني خلي حتى تسالي
عماد ( كيضحك مقشب عليه ) الغيرة من دابا واخا اسيدي وخياارت
عند العيالات .. نزلات يسرى من الفوق وݣلسات
سعاد : معامن خليتي نور ؟
يسرى : نعسات وخليتها مع نعيمة مقابلاها لا تفيق وأصلا هبط معايا الكاميرا ماتخافيش
تودة ( خرجات من الكوزينة هازة نص خبزة فيها الدجاج محمر بدغميرتو ) هاكي ابنيتي أنتي ماكليتيش ݣبيل
دنيا ( هزات فيها راسها بإبتسامة ) لهلا يخطيك أخالتي عذبتي راسك
تودة : اويلي مكاين حتى عذاب بقيتي بلا ماكلة
عنبر : هاي هاي وانا مناكلش ؟
تودة ( ميقات فيها ) لا حول ولا قوة إلا بالله العلي العظيم وانتي ابنيتي كليتي عرݣتيها لحم وبسطيلة هي مكتاكلش اللحم بالبرقوق وبسطيلة حيت مكتحملش المالح والحلو مخلطين
دنيا ( وقفات باستها ) الله يخليك ليا
تودة ( طبطبات على ظهرها ) اللهم آمين ابنيتي راك بحالك بحال عنبر بحال حياة كلكم بناتي والى كملتي ماكلتك ديك الرخامة لي كتعجبك راه فثلاجة خبيتها ليك ورا القرعة دزيتون
دنيا ( كان إحساسها زوين فديك اللحظة إحساس كانت كتحسو غير جهة رقية ) صافي واخا ( هزات الخبز كتاكل فيه متبعة تودة بالعين بابتسامة والفرحة فعينيها ..
عند الرجال مكملين جماعتهم حتى نطق راجل إبتسام
عبد الرفيع : والعݣوبة ليك اعماد خوتك كاع شداتهم الشبكة بقيتي أتا
عماد ( تبسم داير رجل على رجل ونطق بصوتو رجولي ) إن شاء الله قريب قريب
الروطال ( قهقه بضحكة رجولية ) ها ليݣلت ، تا را ورقت شيحاجة فيك ماهياش جديدة
عصام ( صفق بيدو ) وبرب العالي حتى كنت حاس
طارق ( كيضحك ) ݣلت ليكم شي فاسوخ مجهد هادا داز على تريكة حيدر ، شكون هاد لالات البنات شي سوسية ؟
أدريس ( بجدية ) واش بصح نيت ناوي ولا اهضرة فوݣ الطعام ؟
عماد ( هزهز براسو وبهدوء نطق ) إن شاء الله خير واش مالف ليا كنݣول شيحاجة مغانديرهاش ؟
أدريس : وداكشي لي بغينا اديرو ديوركم ووليداتكم نشوفوهم ماحدنا فالحياة
عماد ( طبطب ليه على فخضو ) بطولت العمر إن شاء الله الواليد غاتشوف ولاد ولادنا إلى بغا الله
حيدو للأريناس الحنة من ورا مانشفات ليها ، طلعات للبيت لي كان مخصص للعصام فاش كيجي كتوجد فالباليزة ديالها حيت ايسافرو بكري دخلا للدوش دوشات وخرجات قلبها كان كيضرب لبسات بيجامة قطنية من الحوايج لي خدات ديال الدهاز رشات من الريحة ديالها وتكات فبلاصتها
كانت خايفة ومزال مامستعداش خايفة دير شي غلط معاه خايفة لي وقع ليها يأتر عليها كانت عاطية للباب بالظهر مقابلة مع البالكو لي محلول وداخل منو واحد الهوى زوين تسحلاتو حتى بدا كيديها النعاس بالعيا .. دخل عصام للبيت كان ضو شاعل بانت ليه متكية قرب ليها طل عليها لقاها نعسات ، دخل للدوش خدا دوش محيد العيا وخرج لابس تيشورت او واحد الشورط طفا الضو وتكا حداها ، قرب منها كيشم ريحتها تبسم وخشا يدو فوق كرشها معنقها ماحساتش بيه كاع بالعيا لي عيات ..
الغد ليه مشاو بكري والباقي فاقو على خاطرهم ، فطرو مجموعين
دنيا : حياة انا انتسناك على برا صافي ، حياة هزات ليها براسها ناضت مستأذنة وطلعات للبيتها هزات ساكها وهبطات لقات دنيا واقفة هي وطارق ) طوموبيلتي مابغاتش ديماري غادي يوصنا طارق .. حياة مجاوباتش هزات راسها وركبات اللور ، طلعات دنيا القدام وطارق لي بدورو طلع لبلاصتو دار السمطة وديمارا
- الطريق كلها وهو كيدوي مع ختو جابدين بزاف ديال المواضيع بيناتهم ، كانو عينيها عليها من المرايا أما هي غير كتسمع وساكتة حتى وصلو لواحد العمارة وقف حتى نزلو ديمارا ومشا
حياة ( شدات فدنيا ) فيا الخلعة
دنيا : ماعندك مناش تخافي ولا تخلعي ، كولشي غادي يدوز مزيان صافي ( داخلين ) حسبي راسك بحال الى كدوي مع راسك
- دخلو تسناو حتى وصلات نوبتهم ودخلات حياة بوحدها عندو
.... : بونجوغ حياة صاڤا مزيانة ؟
حياة : الحمد لله ( بإرتباك )
.... : عرفيني على راسك أحياة فين تزاديتي حتى لاياش قريتي ؟ عاوديلي كولشي .. بدات حياة كتعاود ليه كولشي عليها من أ حتى ل زيد ) داكوغ حياة ݣولي ليا كيدازت طفولتك ؟ تنهدات حياة وبدات كتعاود ليه سهات حتى لقات راسها دخلات فحياتها مع سعيد راجل مها بقات غير كتعاود ماحبساتش .. وحتى هو محاولش يقاطعها ربع يديها ورجع بظهرو اللور كيسمع ليها هزات كاس دالما وشربات مكملة كلامها حتى سلات فالخطبة لي تفرتكات
أشرف ( د) : نسولك واحد سؤال وجاوبيني بصراحة ، بنسبة ليك انتي طارق واش شخص مناسب لي تقدي تزوجي بيه ولالا ؟ واش هو خايب واش مارتاحيتيش ليه ؟
حياة ( تنهدات وسهات نطقات وهي ساهية فديك الساعة الرملية لي قدامو ) طارق كيعجبني التصرف ديالو مع خواتاتو كيفاش حنين مع دنيا ومع عنبر كيفاش كيحاول يعوضها على دوك سينين لي مكانتش معاهم فيه .. سند لخواتاتو وحتى مع ولاد عمو بحال الى خوهم فاش كتوقف عليه كتلقاه ، مرات كنحس بلي عاجبني لدرجة واحد المرة حسيت بالغيرة من جيهتو نقد نقول بلي هو الوحيد لي حسيت براحة من جيهتو على وليد وجواد ، واخا هو مكايعرفش يدوي بعد المرات وكيبغي يفرض راسو وكلمتو هي لي تكون ومكايخليش ليك الفرصة فين تدوي وتقولي رأيك ..
أشرف ( هزهز راسو ونطق ) مزيان ولكن علاش بعدتي ؟ واش خايفة ولا مزال مواجداش ؟
حياة ( شافت فيه ) ماعرفتش ( بإنفعال بدات كتشرح بيديها ) خايفة خايفة بزاف لا يكون بحال سعيد طارق شوية عصبي خفت تكون يدو سابقاه خفتو يجي نهار ويضربني .. خايفة من بزاف خايفة من بعد يسد عليا ويمنعني من قرايتي انا خايفة من شحال حاجة
أشرف ( مد ليها كاس دالما ) شربي أحياة ( خدات من عندو الما شرباتو يدها كترعد بقات على داك الحال حتى بدات كتهدن شافيها وبكل هدوء نطق ) حياة أنتي ماشي مابغيتيش تزوجي وتكملي حياتك ولا تبداي حياة جديدة أنتي عندك رهاب من الإرتباط .. داكشي لي داز عليك ودزتي منو خلاك تخافي من الجنس ديال الرجال واخا كتفاحي مجال لتعارف ولكن منين كتوصل لصح كتراجعي بحال مثلا جواد تحججتي بماماك وخوتك ومابغيتيش تخرجي من المغرب وهادووغير حجج فارغة لا أساس ليهم من الصحة ، حيت الرهاب لي عندك هو لي خلاك تݣولي لا .. نجيو للطارق وحتى هو نفس الحاجة كون كنتي فحالة طبيعية اتشوفي بلي أنتي ديجا كتعرفي طارق مدة طويلة حيت من نفس العائلة وديجا جمعاتكم المواقف كنتي اتقبلي بالخطوبة وكنتي ممكن تناقشي بلاتي هي أحسن واخا راه حتى هو غالط وبزاف .. ولكن خوفك ورهاب لي عندك والعقدة لي عندك من الارتباط خلاتك تهربي فهمتي ؟
حياة ( هزات براسها وتنهدات ) فهمتك أدكتور واش هادشي غايبقى معايا ؟
أشرف ( تبسم ) لا بطبيعة الحال أنتي علاش هنا ؟ غير باش تعالجي وترجع حالتك طبيعية منقدش نݣوليك ترجعي كيف كنتي حيت أصلا المتضي ديالك خايل ولكن إن شاء الله انبنيو شخصية جديدة وغادي نساو هاد حياة ديال دابا واخا ؟
حياة : إن شاء الله
~~~~~~~~~~~
الـجــديـدة
الفرحة لي كانت حاسة بيها وهي وسط والديها وخوتها مابحالها فرحة ، شحال هادي ماحسات بهاد الإحساس .. محموعين على الفطور لي كملوه ناضت جمعات مع مها واخا ماخلاتهاش بغاتها ترتاح ولكن صممات تعاونها وجدو الغدا وݣلسو مجمعين ..
ليلى ( شافت فباها لي دخل ݣلس ومها تنهدات ونطاق ) ماما بابا بغيت نقوليكم شيحاجة ( شافو فيها ) غادي تسنطو ليا حتى نكمل
أحمد ( الأب ) أش تم أبنتي ؟
ليلى : عرفتو علاش كنت خويت هنا المهم ( بدات كتعاود ليكم كولشي مع كل كلمة كتخرجها من فمها مها كتحط يدها على فمها مصدومة ) هادشي لي كاين
أحمد ( شد راسو ) الله ابنتي الله وعلاش مادويتي وماخرجتي لي عندك هادشي كامل داز عليك وأنتي ساكتة
ليلى : كنت خايفة ومابغيتش توقع ليكم شي حاجة خايبة
سعدية ( الأم ) نوضي دابا غانركبو عند جدك بالله واش تبقى فيهم
ليلى : ماما غير بلاتي
سعدية ( بإنفعال ) دابا مكاين حتى بلاتي والله لا بقات فيهم الزلموميات لا هوما مهم زيدي ( وقف باها حتى هو غايمشي معاهم لاحت عليها مها جلابة وزيف أما هي كانت لابسة كيطمة خشات رجلها فواحد لبالغين هزات ساكها دارتو على جنب وتيليفون .. سيفطات ليه ميساج تم تم " عاودت ليهم كولشي حنا غاديين لدار جدي دابا " ( جاها الجواب من بعد ثواني " واخا الله معاك وباشما كان علميني " ..
خلاها فدار دوالديها وخرج هو لخدمتو .. كانت کالسة مابيها ماعليها حتى طلقات نيوفها كتشمشم ..
تودة : مالك أبنتي كتشمشمي بحال السلوݣي ؟
عنبر : ريحة فاروق ، واش جا ولا مامشاش ؟
تودة ( شافت فسعاد ) اويلي رجوع لله أبنتي راجلك فين هو خرج ݣبيل مع باك وعمك
عنبر ( ناضت من بيناتهم تحت أنظارهم هزات تيليفونها ودورات ليه ) ألو فينك ؟
الروطال ( ستأدن من الناس لي عندو ) الله يهديك أعنبر أنا خدام واش بيك شيحاجة ؟
عنبر ( بلعات ريقها ) أه واش مكايناش شي وحدة كتوحش راجلها ، توحشتك رجع لدار خلاص
الروطال ( بالهمس ) حبيبة عندي مايدار وعندي الناس الله يهديك أصباح كنت معاك
عنبر : وماشغليش انا بغيت نشوفك قدام عينيا اعباد الله
الروطال ( كيحاول يسايس معاها ) حبيبي دابا خدام نسالي ونجي صافي وديري عقلك ( قطع عليها )
عنبر : ألو ألو واخااا تقطع عليا والله فيك لا بقات ، تسلتات من جهتهم طلعات للبيت هزات ساكها وبزطامها وخرجات بلاما يشوفوها .. وقفات كتشير لطاكسي حتى وقف ليها عطاتو سمية الأوطيل ديال الروطال واخا عمرها حطات فيه الرجل ، لبستها كانت عبارة على سروال وتريكوه عبارة على كيطما مع سبرديلة وزيف وساكها دايراه على جنب
وقف بيها طاكسي قدام الأوطيل طالب منها ثمن لي كثير ماهمهاش خلصاتو ومشا هزات راسها فالأوطيل لي كان قدو قداش برمات شفايفها وتبسمات
عنبر : دابا انا مرات مول الشي ويتك ويتك .. حدرات راسها وتوجهات للباب دخلات غادية مݣدمة حتى وقفوها فالاستقبال ..
.... : فين غادية الالة ؟
عنبر : غادية عند فاروق واش كاين ؟
.... : وي شكون نقوليه ؟
عنبر : مراتو
.... : داكوغ مدام انا نعلم لاسوكريتير مرحبا بيك ، توجهات مع الشخص لي كان واقف تم طلعو لاسانسور ، الأوطيل عجبها من الداخل كان كيحمق .. وصلو للبيرو ديال لاسوكريتير مع وصلات مع تحل الباب ديال البيرو ديالو
الروطال : أنا غادي نفكر وباشما كان نعلمك ( دور راسو بانت ليه واقفة كتشوفيه تصدم ماعرف باش تبلى ) عنبر ( شاف فدوك الأشخاص لي معاه ) التيليفون بيناتنا .. هوما مشاو وهو جرها مدخلها للبيروه ) أش كديري هنا شنو جابك واش انتي حمقة ؟
عنبر ( جراتو من الكول ديال القميجة حاكة شفايفها على شفايفو مخلية عقلو يغيب على شنو كان باغي يݣول منغامسة معاه فقبلة طويلة قاطعة أنفاسو ) توحشتك
الروطال ( صدرو كيطلع ويهبط ) حبيبي ماشي بلاصتها واش هبلتي ؟
عنبر ( كتشوفيه بعينين ناعسين كتشمشم فعنقو بحال شي وحدة مبلية وخاصها البلية ديالها ) أه انت سبابي جاتني عليك ولدك بغاك شنو اندير
الروطال : واش حطيتي وحم طارق جيت بلاصتو ( كيضحك بصوت رجولي ) عنبر عنبر عنبر حبيبي واش نسيتي أش ݣالت الطبيبة ؟
عنبر : وانا شنو كندير ( كطبع قبلات خفاف على عنقو مبورشاه )
الروطال ( وقفها ) أنتي باسلة أجي معايا ( جرها وهز كارطة كانت معلقة حدا البيرو ديالو ذهبية وخرجها من البيرو ديالو ..
فوق النموسية معانقين فشومبر راقية فالأوطيل ديالو .. كيدوز على شعرها ، مغوبشا وماعجبهاش الحال هبط عينيه للجهتها مقوس حواجبو بإستغراب
الروطال : مال الكريمبوشة ديالي ؟
عنبر ( هزات فيه راسها ) لا مامالي والو غير شرݣتي ليا فمي أستغفر الله العظيم ، زيغ أنت واحد المومسيخ هادشي كامل خرج منك فين تعلمتيه ؟
الروطال ( جاتو الضحكة هز حاجب ونزل الثاني ) كيفاش فين تعلمت تي مال مك بحال الى نازلة من ورا شمس بحال الى هادشي زعمة معارفاهش !!
عنبر ( قوسات حواجبها ) أنا هادشي عمري جربتو فحياتي حتى جربتو معاك أنت ، وراه اتكون حسيتي
الروطال ( زاد دخلها فيه ) عارف أزين ديالي بلي هادشي جديد عليك ولكن لي خاصك تعرفي هادشي عادي بين راجل ومراتو كيبغيو بعضياتهم خاصك تقراي على هادشي وتعلمي وتكوني دماغ ( غمزها ) أي حاجة فداتك ديالي وأي حاجة فيا ديالك تمتعي فيا كيما بغيتي وأنا هوكاك لي حرام وخارج القانون راه باين
عنبر : واخا هكاك جيتيني على غفلة انا هادشي عمري فحياتي جربتو وانت اصلا تبارك الله احم ( تزنݣات وهبطات راسها )
الروطال ( قهقه برجولة ) انتي ازين لي عندك هاد الفم صغير ( جمع ليها يديها بصوتو الغليض الرجولي ) دابا مال مك اديري لينا العصا فرويضة أش وقع ؟
عنبر ( قلبات وجها) لي وقع انت فرحان وانا نخبط راسي مع الحيط انتوما رجال أنانيين ، خاصنا يا نصومو كاملين يا ناكلو كاملين
الروطال ( تبسم ) هاي هاي هاي ، وحبيبي مالقيت ليك جهد خاص نتكايس عليك سمعتي طبيبة وشكون لي هاجم على لاخور أنا ولا أنتي
عنبر : أه هجمت ولكن وماشغليش خاص نصومو بزوج واخر مرة دير معايا هادشي
الروطال ( بعد عليها كيشوف فيها بإستفهام ) واش كتعيفي واش عفتيني ؟
عنبر ( بزربة شافت فيه ) أنا عمري فحياتي مانعيفك أباش ديرها فبالك ، ولكن راه جاني فشكل وديجا ماقديتش عليك
الروطال ( تبسم نايض من فوقها باغي يدخل يدوش ) كيفاش هاد بلان ماقديتيش عليه ، هادشي جديد أمدام ياك كان عاجبك الحال شحال هدا وكضحكي من عينيك ؟
عنبر ( خرجات فيه عينيها ) وباز علاش ماشي كتلقى معايا صعوبة بعد المرات كون ادرتي شي حل
الروطال ( حبس كيشوفيها ) اشمن حل نمشي نݣطعو ولا بغيتي نݣزرو ، أمدام شتك وليتي كدخلي وتخرجي فالهضرة ؟
عنبر ( عطاها بظهر غادي للحمام ) المهم غادي نصومو بزوج ماشي شي حلال عليه شي حرام عليه ( سد الحمام ماجاوبهاش بقى مدة عاد خرج لابس بينوار )
الروطال : دخلي خودي ليك واحد دوش دافي ازين ، هادشي لي طرا اليوم كانو خاصو يطرا شحال هادي وغادي يولي يطرا من هنا للݣدام أنتي ديالي وأي حاجة فيك ديالي تفاهمنا ( غمزها )
عنبر ( ناضت وقفات طلعات ونزلاتو ) أنت شاكة فيك كنتي كتفرج فالمواقع الزرقاء المومسيخ ( قبل لا يجاوبها دخلات للدوش )
الروطال : لا حول ولا قوة إلا بالله العلي العظيم
- خرجو من الأوطيل ركبات معاه الطريق كلها حلفات متدوي معاه حتى وصلو للدار
الروطال : هادشي كامل دايراه حيت مازغرتيش ( راشقة ليه عليها ) غير صبر أزين موال تزغرتي وتجبدي ( تبسم كيضحك)
عنبر ( خنزرات فيه ) ضحك انت لي جات معاك حربش توصلني
الروطال ( متبعها خارج وراها ) بلا هواك متحلفيش .. دخلات ضاربة فسعاد وتودة لي شافو الروطال داخل بإستغراب
تودة : اويلي هادي فين كانت ؟
دار كبيرة مفرشة بفراش بلدي زين ݣالسة حادرة راسها ، واونفاص معاها زوج بنات كيشهقو بالبكا من الضرب لي كلاو
الجد ( راجل كبير وعندو هيبة من ملامح وجهو كان باين دا فزمان وجاب النور على وجهو ) : تبارك الله وصلاة على نبي مربي لفعات فقلب داري انتوما انتوما إبليس ويخاف منكم ماحشمتوش ماݣلتوش البنت مسكينة لي تكرفطات فبلادات الناس بغيتو تخرجو تا على خوكم دويو اللفعات ..
الأم ( بلعات ريقها ) أعمي راه عقل الصغر
الجد ( خنزر فيها ) عقل الصغر بناتك الالة كون تزوجو شحال هذا كوراهم بولادهم الكبيرة فيهم عدها 28 ولا نتي فخبارك ومݣيداهم تخرجو ليا على بنتي
( وحدة فيهم كتبكي ) أنت سباب ديما كتفضلها علينا وكتبغيها كثر من ليلى فسما ليلى فالارض بحال الى غير هي لي كاينة
الجد ( وقف بسخط ) مزال كدوي هداك الليان خاصو يتݣطع ليك من جدر ، عرفتي دابا علاش هي العزيزة حيت حنينة وݣلبها بيض ماشي بحالكم الݣلب ݣطران داكشي باش ربي ماعمرو سهل عايكم لا فقرايا لا فزواج كو كتو صافيين كون ربي يسر ليكم ( شاف فولدو لي غير ساكت ) محمد ( هز راسو فيه ) دارك دزرتي ليها السور وسقفتيها ومابقاتش عريانة ..
محمد : ياه أبا
الجد : اتهز مرتك وتريكتك والله يعرضك السلامة
الأم ( كتخنزر فسعدية ) فين انمشيو اعمي بلا فراش بلا والو وصافي حتى دابا ماوقع ليها والو راها صحة سلام
سعدية ( مكشكشة ) كيفاش صحة سلام البنت مشات من دار كونما سيدة لقاتها فالمحطة ودخلاتها لدارها انتي فرحانة وعاجبك الحال ياك ألطيفة كون انا بنت الحرام كون حطيتك بوجهك لا انتي لا بناتك على خويا نور الدين لي طججتيه هو ومرتو بلعاني والباطل لي حطيتي عليها نسيتي ولا نفكرك
لطيفة ( اللون تبدل فوجها ) أش كتݣولي باغية تحطي عليا الباطل أهوكاك
سعدية: ومنين هكا الالة وصلات بيكم ضرو ليا بنتي وسمع أخويا حنيني ( شافت فخوها ) الذهب ديال مي لي كان خازن با راه لطيفة لي هزاتو ومشات بيه لعرس ختها وطاح ليها دبليج وسباتو فمرات نور الدين مسكين ، وحوالق ميمتي باعوهم بناتها وفرقوهم سمعتهم بودنيا وسديت فمي مابغيتش الروح الطيح ..
الجد ( كيشوفيها كيفاش سكتات وحدرات راسها ) أحمد هز حوايجك وحوايج مرتك وسير لدارك ، داري محلولة فوجهك اوليدي على راس والعين ولكن لا مرتك لا بناتك مابقاوش يحطو عندي رجليهم فخيمتي
لطيفة : عمي
أحمد ( قاطعها ) تزيدي كلمة اتهزي قشك تي وبناتك ودراكم منشوفش وجهك ( حدرات راسها جارة بناتها بقاو ساكتين حتى خرج أحمد وبناتو ومرتو من دار )
الجد ( شاف فليلى ) سمحيليا ابنتي كون هاجيتي وݣلتيها ليا وتحميتي فيا مايوقعش هادشي
ليلى : الخوف أبا كنت خايفة الحمد لله لي خرجات هكا ( تبسمات ) با بغيتك تمشي معانا لدار ( شافت فوالديها ) واحد السيد ناوي إن شاء الله يتقدم ليا
الجد ( بإستغراب) الله أكبر شكون هذا ابنتي وفين عرفتيه ؟
ليلى : شافني غير فالخدمة وطلبني لزواج خدام فالبوليس ، والديه أصلهم من الغرب تبارك الله ناس الله يعمر ليهم الدار ومعروفين عندهم حتى دار هنا فجديدة كيݣولو ليهم حيدر
الجد ( كيفكر شاف فيها ) واش كدوي على الحاج علال
ليلى : يمكن كاليا جدو سميتو علال نيت وباغي يشوفكم ، إن شاء الله بعد غدا غايجي
سعدية ( جاتها الخلعة ) الله أبنتي علمينا أقبل نوجدو على تيساع ( الجد وقف )
الجد : وصبرو نوجد راسي ونرجعو جميع ..
خرجات عندو لابسة جلابة هماوية فالغوز بارد مع الشال ديالها وساكها وصباط پلا ، كان واقف على بلا بتريكو فالبلو مارين كول ڤي من تحتو شوميز وسروال توب فنفس اللون مع سباط فالمارو خاتمو دزواج وساعة رجالية ..
عنبر ( طلعاتو ونزلاتو ) بحال الى انت لي عريس ماشي خوك ، علاش زعمة مالبستيش شيحاجة لي عادية وريحتك كضرب من عند الباب
الروطال ( بإستفهام ) وحم زين هذا واش غير ماهف عليك انا دبنا مبوكص
عنبر : مبوكص شكون شكرك العروسة مي وخالتي والحزارة جارتي أجي علاش عماد مابغاش يقولينا شكون هاد البنت ؟
الروطال : علمي علمك زيدي انتعطلو ( طلعات حداه الطريق كلها وهي حاضياه بعينيها وكتشمشم فيه ماحيلتو للطريق ماحيلتو ليها سونا ليه التيليفون كان عماد ) وي هاحنا شادين الطريق.. واس وصلتو انتوما كاينين تم أياه اسيدي مزيان .. صافي يلاه واحد 15 دقيقة هكاك ونكونو تم يلاه قطع ( قطع معاه )
عنبر ( كتشوفيه ) واش وصلو ( هزهز ليها براسو ) فخبارك ( شافيها ورجع شاف فطريق) كيعجبوني عويناتك زوينين كبارين ومشفرين ونيفك ( تبسم عاض على شفتو)
الروطال : مال نيفي ؟
عنبر : منݣاد وكيعجبني وفمك ( شافيها ) يا قلبي ياقلبي شحال كنبغيه انا اجي نبوسك
الروطال ( كيضحك ) حبيبي راه سايݣ
عنبر : أبِيسَّة اوحيدة احميمتك الكوينيدي ديالي ( فشلاتو بضحك قرب ليها وباسها ) الله الحلاوة صافي ناكل حسك ماكلة ومنشبعش ( عنقاتو من يدو حاطة راسها عليه حتى دخلو الجديدة
الروطال ( سونا لعماد ) سيفط ليا لوكاليزاسيو يلاه ( قطع معاه مسيفط ليه لوكاليزاسيو فالواتساب تبعها حتى دخل لواحد الحومة شعبية كيبان ليه طوموبيلت خوه وديال عمو وديال طارق ، بلاصة طوموبيلتو ونزل هو وعنبر شاد ليها فيدو خرج عندهم عماد
عماد : تعطلتو
الروطال : أخويا المرة عندي حاملة مابقاش داك طيران فطريق رخاها الله
عماد : يلاه دخلو .. دخلو للدار كانت مزلجة وزوينة ستقبلاتهم السعدية مرحبا بيهم عنبر مشات للعند العيالات للصالة والروطال هو وعماد توجهو للعند الرجال لصالة لوخرا
سعدية : مرحبا ليكم
تودة : ربي يخليك اختي سعدية ترحب بيك الجنة ونعايمها
عنبر ( بهمس ) واش العروسة شتوها ؟
حياة : لا مزال
سعاد : وفين عي عروستنا ؟
سعدية : أنا غادي نعيط ليها .. مشات مخليهم كيدويو ويسرقو النظرات فالدار
تودة : تعطلتو أبنتي
عنبر : فاروق جاي بشوية وماخرجناش من الدار بكري يلاه يلاه ( قاطعاتهم السعدية لي تمات داخلة او وراها ليلى لابسة واحد القفطان ديال ماماها فالموڤ بارد وشعرها مطلوق ومشدود بمقبط مع مكياج خفيف عنبر ترفعات من بلاصتها فاش شافتها ) أويلي ليلى ( وقفات كتضحك شادة على فمها ) ماقلتي ليا والو أجحمومة ( عنقاتها خاشياها فيها )
تودة : واش كتعرفو بعضياتكم ؟
عنبر ( بعدات على ليلى ومزال معنقاها من ظهرها ) ليلى صاحبتي هي اول صاحبة ليا وقرينا مع بعضياتنا وكنا كاريين بزوج فاش كنا كنقراو فلافاكو وخدمنا بزوج بينا ( رجعات شافت فليلى ) هي لي كانت وقفات معايا فديك الوقيتة
سعدية : وخبار الخير هادي شتي سبحان الله العظيم.. سلمات ليلى على البقية وݣلسات وحداها عنبر
عنبر : إيمتا هادشي العفريتة وبلا خباري ( بالهمس ) انا وصيتو عليك يرد البال وهو داك فمرة ݣاع
ليلى ( كضحك ) والله مافهمت هادشي كيفاش وقع هانتي تشوفي
عنبر : أحسن مادرتي عماد ظريف الله يعمر ليه الدار انا نقولك زينة ماختاريتي
فالجهة للوخرا وفصالة الرجال ، عماد شاف فباه واشر ليه باش يدوي ..
أدريس ( حنحن وشاف فأحمد وفالحاج عبد القادر جد ليلى ) سي أحمد بلا شك عارفين سر هاد المجية .. الى بغا الله جايين مع ولدي عماد نطلبو يد بنتنا ليلى ليه ، ومانحتاجش نشكرو ليكم الحاج عبد القادر راه كيعرف الواليد وصدقو معرفة قديمة
أحمد ( تبسم ) أييه اسي أدريس مرحبا بيكم الله أودي منلݣاوش ماحسن منكم وماحسن من نسوبية الحاج علال
علال ( بكل وقار ) الله يكبر بيك أسي أحمد لهلا يحاشمنا والله يجعل نسوبية زينة وفيها الخير ، البنية راه اتكون بنتها ولي ضرها ضرنا ومنحتاجش نشكر ليك ولدي عماد ولد الوقت ويتعول عليه ، والى عطيتيه بنتك راها فالأمان ..
أحمد : لهلا يحاشمنا هادشي لي كنتمناو
أدريس : وهي نقراو الفاتحة أسي أحمد ؟
أحمد : اياه ، ناض طارق علم العيالات باش يقراو الفاتحة حتى هوما من بعد الفاتحة تعلات الزغاريت .. متافقين على الخطبة الكبيرة والعقد فشهر 1 فاش يكون عند عماد الكونجي ..
~~~~~~~~~~~
فالعيادة ديال الطبيبة ديالها کالسة هي وياه هاز فيديه ملف فيه التحاليل ديالها ، وصلات النوبة ديالهم دخلو عندها بزوج
.... : مرحبا مدام عنبر صاڤا ؟ كيكتحسي مزيان ؟
عنبر : الحمد لله مرة مرة كتجيني الدوخة ولكن الحمد لله
الروطال ( مد ليها الملف ) دكتورة هادو هوما التحاليل ديال 3 شهور لي طلبتي
.... ( شدات من عندو الملف وحلاتو دايرة النظارات ديالها وكتقرا فتحاليل صغرات عينيها زولات نظاظرها وشافت فيهم بجدية ) الحمد لله التحاليل ديال فقر دم مزيانين ولكن عندك السكر ديال الحمالة
الروطال ( غوبش ) بحالاش ؟
.... : ديجا وصيتك على الحلاوة امدام عنبر وصيتك ديري الاحتياط ديالك هي والملحة ، وتحاليل لي جبتي كيبينو بلي عندك السكر ديال الحمل
عنبر ( شافت فروطال بخوف ورجعات شافت فيها ) واش واعر واش عمرو يمشي مني ؟ واش ندير اريجيم صافي ؟
.... : هو ضروري من الريجيم الحلويات وسكريات ودقيق الأبيض حتى هو هادشي مغاندويش فيه انا هادشي اتشوفيه مع الطبيبة ديال السكر بنسبة لدوى اتدݣي لانسولين
عنبر (غرغرو عينيها بدموع ) لانسولين واش انا انولي ندݣ البرا انا كنخاف من البرا منقدش
الروطال ( بجدية ) واش اتبقى حياتها كاملة ولا كيفاش ادكتورة ؟
.... : لي كيبقى معاها هي لي كيكون فيها السكر ديجا حتى قبل الحمالة .. ولكن فهاد الحالة عنبر عندها سكر ديال الحمالة غير الدوا وريجيم وتديها فالماكلة ديالها الصحية وإن شاء الله راه من ورا الحمالة مغاديش يبقى ( جمعات الملف وهزات ورقة كتباتها ) هاد الملف اتديوه لدكتورة بشرى انا راه كتبت ليها واحد رسالة وغانسوني عليها سيرو دابا حسن باش تبدا دواها
الروطال ( وقف موقف عنبر لي دمعتها نزلات ) شكرا ادكتورة
.... : ماتبكيش اعنبر راه عادي وصحتك نفسية مهمة على قبل البيبي منبغي حتى حاجة تقلقك داكوغ ( هزهزات ليها براسها وخرجو بزوج من عندها متوجهين للعند طبيبة ديال سكر )..
خرجو من عند الطبيبة ديال السكر وهي غير ساهية طلعو للطوموبيل وهي على داك الحال
الروطال : مالك دابا ؟
عنبر ( شافت فيه ) واش سمعتيها ؟ قاتلك فصباح خاصني نعبر وندݣ وعاد نفطر ونقيد العبار والغدا تاني هكاك والعشا تاني هكاك انا كنخاف من البرا
الروطال ( شد ليها فيديها ) وعادي هادشي مغايبقاش معاك حياتك كاملة غير حتى تولدي ، الالة انا لي غانتكاف واخا نعرف نشد بوه شب كونجي حمالتك كاملة انا ندݣ ليك ونعبر ليك
عنبر : واش زعمة هادشي مايأترش ليا على البيبي ؟
الروطال : وعنبر وعنبر واش كون غايأتر غتعطيك لانسولين السكر لقاوه طالع عندك ضروري مخاصو يهبط وفهاد الحالة الفنيد مايصلاحش ، هادشي باش كتجيك ديك دوخة وتزغليلة دالعين والماكلة فنفس الوقت تهلاي فراسك وفلي كرشك وتبعدي على لي يضرك
عنبر ( تنهدات ) انا لي درتها راسي
الروطال : دابا صافي لي عطا الله عطاه ، ندوزو للمرجان ناخدو كاع لي غادي تحتاجي للريجيم ديالك وعاد ندوزو للفرمسيان ( باسها ) ماتبقايش مقلقة وماتنسايش بلي نفسية ديالك هي لولة تفاهمنا ..
عنبر : واخا .. دازو للمرجان وتقداو اي حاجة تخصها دقيق الشعير الطوست ديال الخبز الكامل لي باط ديال الدقيق الكامل ، الحليب ديال الكوك وباش مايحرمهاش خدا ليها حتى البيسكوي وشكلاط زيرو سكر ، من بعدها دازو للفارمسيان خداو الماكينة ديال العبار ولانسولين عاد توجهو للدار ..
- وصلو للدار كانت كالسة سعاد وتودة ، ݣلسات تستاراح وبدات كتعاود ليهم كولشي
سعاد : ماتخافي والو ابنيتي راه عادي ( شافت فروطال ) إبتسام نيت نهار حملات جاها السكر دالحمالة وفاش ولدات مشا منها عادي
الروطال : ݣوليها ليها مخلوعة ( ناض وقف ) انا جاي
عنبر ( شافت فيه ) بعدا غدا ضريب الصداق ديال عزيز وماجدة
الروطال : ومن بعد الى على الحلوة انا انشوف شي حد لي كيدير الحلوة ديال صحاب سكري راه أي حاجة عندها الحل ديالها ماتبقايش تخممي بزاف
سعاد : متعطلش اولدي باش نتغداو
الروطال : لا مغانتعطلش
عنبر : فاروق ( شافيها ) خاصك تجيبليا البيسي لي قلتيلي على وديت الدروس
الروطال : نكون جاي انجيبو معايا أنا مشيت
تودة ( حتى مشا ) أنتي ابنتي دابا خاصك الراحة وديها فصحتك كون غير أجلتي القرايا حتى تولدي
عنبر : وفاش نولد تقولو أجليها على وديت تربية ، لا صافي دفعت وقاديت أموري ودرت مع البنت ، راه يلاه عندي اماما 3 شهور ماشي شهري
تودة : وانتي تعرفي ( سونا ليها تيليفون ) باك هدا ( فتحات الخط ) ألو عبد الخالق.. أه راه جاو
~~~~~~~~~~~~~~~~
- ݣالسة فالبيرو ديالها خاشية راسها فالبيسي خدامة حتى دخل على غفلة رما السلام ودخل للبيرو ديالو تبعاتو بالعين حتى سونا ليها التيليفون دالبيرو
طارق : جي واحد الدقيقة ( قطع ) .. ناصت من كرسيها توجهات للبيرو دقات عاد دخلات زقفات قدامو بكل هدوء
حياة : وي سي طارق
طارق : ݣلسي ( ݣلسات كتشوفيه ) لاسوكريتير لي فالبيرو لاخر تزوجات بلاصتها خوات ، مافيا لي يبدا يقلب على وحدة جديدة داكسي باش غادي تحولي لتم
حياة ( هزهزات راسها ) واخا ( دخلو العجب بقا كيشوفيها مدة كانت مالفة كتجاهد دابا طاوعاتو بكل سهولة ) ايمتا نبدا ؟
طارق : غدا كملي هاد العشية وقادي أمورك وغدا اتبداي لهيه ( هزات براسها غادية حتى حبسها ) تسجلتي على ود الباك ؟
حياة ( ضارت بزربة حاطة يدها على فمها بصدمة ) أويلي اويلي نسيتو والله جتى نسيتو
طارق ( هز ملف حداه مدو ليها ) هاكي شدي راه سجلتك ( شدات عندو الملف مصدومة كتشوفيه وترجع تشوف فالملف )
حياة ( وحلات ليها الهضرة ) ايمتا سجلتيني ؟
طارق ( بنفس البرود وقف ) سجلتك وصافي أنا مشيت ( خرج وخلاها واقفة فالبيرو مزال مامستوعباش واش طارق سجلها فالباك وهي لي نساتو لي كيهمها الأمر هو كاعما نساه جرات الكرسي وݣلسات ساهية فالفراغ وعقلها كيدي ويجيب ..
فجهة أخرى وفالمديرية ديال أݣادير ݣالس فالبيرو ديالو خدام حتى تدق الباب دخل سفيان هاز ملف بلاستيكي فيدو هز فيه عماد راسو .. ݣلس مبسم وحط ليه الملف عماد أشر ليه براسو بمعنى شنو هذا ؟
سفيان : على سلامتك الموافقة خرجات ليك مبارك ومسعود من دابا
عماد ( تبسم بأريحية ) وعلى سلامتنا
سفيان : دفعني للكونجي بعدا ؟
عماد : دفعت ليه ، عندي فيه 20 يوم بضبط وبيني وبينك كيبان ليا غادي نرجع لكازا
سفيان ( غوبش ) وايلي أصاحبي حتى ولفناك
عماد ( تبسم ) شوف ( حك جنب حاجبو ) أكادير ولافة ورتاحيت فيها وأحسن حاجة جيت ليها منكذبوش ولكن كازا تم تزاديت وكبرت لافامي كولها تما نهار جيت جيت بواحد شكل وبواحد الݣلب دابا تبدلات شحال من حاجة
سفيان : واش غانݣولك انت ولي رتاحيتي فيه ( وقف ) يلاه انا مشيت
عماد : سفيان شكرا بزاف أخويا ( تبسم ليه سفيان وخرج غير هو خرج هز التيليفون مدة تحل الخط ) وي سيادة العميد
رضوان : اهلا اهلا بسي عماد
عماد : الله يكبر بيك اسي رضوان بغيت غير نسولك ، على وديت داكشي لي كنتي ݣلتي ليا نرجع للكازا
رضوان ( تبسم ) هي فكرتي ؟
عماد : أه فكرت بغيت نرجع إن شاء الله
رضوان : وخبار زينة هادي المهم خلي ليا هادشي ، ومبروك عليك اسيدي
عماد ( قهقه برجولة كيلعب بواحد ستيلو ) وصلاتك
رضوان : ضروري ( نطق بهدوء ) أحسن مادرتي وقررتي ترجع
عماد : شكرا سي رضوان
~~~~~~~~~~~~
تودة ( كتدوي مع عبد الخالق ) واخا واخا لا راه خرج .. صافي غادي نتسناوك كون هاني واخا بسلامة ( قطعات معاه شافت فعنبر ) باك جاي ݣالك واياك دݣي لانسولين دابا
عنبر : علاش ؟
تودة صبري عليه غايسوني اطبيب ديالو ويجي لهنا ، ݣاليا مايمكنش يعطيوك لانسولين من لول انا مافهمتش حتى يجي هو ويفهمك
- طلعات للبيتها دوشات لبسات بيجامة سخونة مع تقاشر الجو كان مغيم وقطيرات خفاف ديال الشتا ، نزلات للعندهم كيتسناو فروطال حتى تم داخل هو وعبد الخالق دقة وحدة كيدويو
عنبر ( عنقاتو بايساه من حناكو ) ماجبتيش ليا هاديك معاك ؟
عبد الخالق : والله حتى نسيتها
الروطال : أش بغات ؟
عبد الخالق : واحد شوارما كيديروها تم حدا القهوة بنينة واعرة تشهاتها ونسيت مع سونيت لدكتور عيسى ( ݣلس ) توما هاد طبيبة لي مشيتو عندها مريضة عاطياها لانسولين من ديبار
الروطال ( ݣالس حدا عنبر ) وعمي واش انعرفو حسن من طبيبة شافت تحاليل ديالها خرجات ليها لانسولين
عبد الخالق : سمع اولدي الطبيب بفمو ݣاليا تحليلة الاولى كيعطيو فيها الريجيم الماكلة الصحية مدة عاد من بعد كتعاود تحليلة لانسولين كتعطى فالحالات ديال الى سكر مابغاش يهبط نهائيا وديما طالع ديك 2 ولا 2:30 والى تعطات لانسولين غير زوج مرات فنهار وقد البزقة قطيرة فهمتي واش السيدة ماعطاتهاش لا ريجيم لا والو من ديبار هاكي دݣي مكايناش شي طبيبة بعقلها ادير هاد التخربيق
سعاد : كاين سي أطباء حاشة واش يكون طبيب وعاطي القسم والو
عبد الخالق : عطاتك شي ڤيتامينات طبيبة ديالك ؟
عنبر : لا ماعطاتني والو
عبد الخالق (تعصب ) واش هادو طبة هادو بزوج بيهم ماطبيبات ماحتى وزة تخربيق الخاوي ، ابنتي خاصها تعطيت ڤيتامينات لي يعاونوك وبرنامج ديال الماكلة اش هاد روينة
الروطال : ومال جدهم الكلب باغيين يخرجو عليها غادي نرجع عندها نشوهم بجوج ماعندي فين نتݣيل أنا
عنبر ( شافت فيه ) لا اش بغيتيهم نشوفو شي طبيبة مزيانة
عبد الخالق : غدا نمشيو عند دكتور عيسى لي متبع معاه انا دكتور معروف ونديو ليه التحاليل ديالك ، وشوفو شي جينيكو أخرى تكون مزيانة تبعي معاها
عنبر ( هزات تيليفونها ) اندخل دابا نيت نحطها فواحد المروب نسولهم على شي طبيبة مزيانة ..
خرجات من الحصة من عند الطبيب تنهدات تنهيدة طويلة كانت باغية تمشى ( هزات تيليفونها من ساكها وسونات ليه )
حياة ( فتح الخط ) وي سي طارق .. عفاك واش نقد نتعطل شوية واحد نص ساعة .. لا مكاين والو غير كاينة عند الطبيب .. واخا شكرا ( قطعات ) وشيرات لطاكسي ) عفاك ديني لحدا الجامع حسن الثاني ، عينيها مع الطريق كتمنضر كتحس بنفسيتها مرتاحة على قبل واحد الاحساس جديد وغريب عليها .. وصلها لفين بغات خلصاتو ونزلات
- خداوها رجليها كتمشى مقابلة مع البحر البرد كان محرك وقطيرات خفافين وقلال كينقطو الجو لي كيعجبها وكتحماق عليه ، خشات يديها فجياب ديال المونطو وكتمشى هزات راسها للسما وجها كيقطرو عليها قطيرات خفاف غمضات عينيها كتستنشق ريحة ديال الأرض مع قطيرات ديال الشتا حسات براسها رتاحت مزيان والفرحة تشبعات بيها داتها كلها ، توجهات للطريق وقفات شيرات للطاكسي عطاتو العنوان ديال البيرو ..
- نزلات من طاكسي من ورا ماخلصاتو هزات راسها فالموبل فين جات الشركة حدرات راسها يلاه طلعات زوج خطوات سمعات سميتها ، ضارت كيبان ليها راجل فأواسط الخمسينات من عمرو لابس سروال توب مع تريكو وفوق منو مونطو فالكحل مع صباط ، شافت فيه بإستغراب
حياة : نعام أسيدي ( صغرات عينيها ) كتسول على شيحاجة ؟ ( رجعات نزلات دوك زوج درجات وتقابلات معاه
.... ( تقدم لعندها بتردد بالع ريقو كان باين عليه خايف ومتردد ) واخا ندوي معاك شوية ابنتي
حياة ( مافهمات والو ) علاش تدوي معايا واش كتعرفني ؟
.... ( دوز يدو على وجهو بتوتر ) أنا ( تنهد ) أنا موسى باك أبنتي .. بقات برهة كتشوفيه مامتيقاش اش كيقوليها قلبها كيضرب
حياة ( بشفايف مرعدين ) ب ب با !!
.... : الله يرضي عليك واخا نكلسو اهنا ندويو ( شافت فدروج دالموبل وݣلسات جا كلس حداها من بعد مدة وهي ساهية وساكتة مزال مامستوعباش الصدمة لي طرات ليها دابا ) عارف راسي صدمتك شحال وأنا كنقلب عليك سمعت بلي تناسبتو مع شي حد كيکولو ليه حيدر وبقيت نݣلب حتى لݣيت هاد شركة كت داخل باش نسولهم حتى بنتي ليا
حياة ( شافت فيه ) ب باش عرفتيني ؟ وعلاش جيتي لاش جاي دابا هاد سينين كاملة وانت سامح فيا وماشي غير فيا حتى فليالي بنتك سمحتي فيها لاش دابا جاي
موسى : انا ابتي عارف راسي غالط عارف راسي دايرها ݣدها کد راسي ولكن اسمعيليا الله يرضي عليك
حياة : اش غادي نسمع ؟ واش عارف بلي هادي 3 شهور وانا كنتعالج عند طبيب نفساني ، واش عارف بلي ماکديتش نبدا حياتي ولا نتزوج حيت لي داز عليا ماشي قليل واش عارف ؟
موسى : عارف والله حتى عارف
حياة ( قاطعاتو ) لا أنت معارف والو ( فجهة أخرى كان نازل من البيرو حتى يتوقفو المنظر ديالها وشخص لي معاها وقف كيسمع للكلام لي ضاير باغي يعرف شكون هداك لي واقف معاها ) أنت معارف والو كنتي عارف بلي سعيد راجل مي كيضربني وكيسد عليا فبيت الخزين ؟ لا ماكنتيش عارف كنتي عارف بلي حاول يزوجني شحال من مرة برجال قدك فخبارك بلي كان ايتكرفص عليا العريس الشارف لي كان جاب ليا لا .. وانت حادݣ غير فزوج طلق تزوجتي مي تزوجتي مت ليالي ، وشوية دزتي للنرة الثالثة لي تلفاتك على القبلة
موسى : كنت مسحور ابنتي كانت موكلاني مكنتش كنشوف ݣدامي ݣاع مكانتش مخلياني نتفنفن ولا نهز الراس ، جيت قلبت علك وتي صغيرة ومك جرات عليا
حياة : جرات عليك عاود جي وجي وجي ، حضن عليا حسسني بلي عندي با فجنبي مسخن ليا كتافي وليت نقلب على با فناس خرين ، راجل جا البارح وطبطب عليا وبغاني بحال بنتو هو لي حاضن عليا مكايفرقش بيني وبين بناتو بسبابك يالي كتقول با ماقديتش نعيش حياتي ونتزوج بحال قراناتي حيت خايفة لا لي درتيه لمي ولي دارو سعيد يدار ليا ، يلاه وليت كنحس براسي نورمال وبحال بحال البشار ودابا جاي تقلب عليا علاش ؟
موسى ( تنهد ) ناوي نحج الى بغا الله نغسل ذنوبي الموت والحياة هادي ماعرفنا شكون سابق ابنتي
حياة ( دموعها هابطين ) حتى بغيتي تحج عاد تفكرتيني وانا كنقول توحشتيني زجاي تعوضني على لي فات أودي ياودي ( بدات كضحك ضحك هستيري ) والله الى انا هبيلة وماعندي عقل
موسى : واخا ماتربيتيش معايا كتي عزيزة عليا ، هزيتك فاش كتي لحيمة بين يديا
حياة : هزيتيني ولحتيني بزوج ( الشتا بدات كتزيد تنقط ) لحتيتي ابا وكونما لقيت ختي عنبر بجنبي وكونما لقيت عائلتها بجنبي علم الله بحالي سير أ با سير الله يعرضك السلامة
موسى : سمحيليا ابنتي الله يرضي عليك سمحيليا
حياة ( بقات كتشوفيه ساكتة ونطقات ببرود ) الحاجة زوينة فتربية مي ليا هي هاد الݣلب ، فخبارك والله مابقيت كنحس بشيحاجة من جيهتك كنت مكنحملكش دابا لا والله كتبقى فيا ، تبعتي زوج طلق حتى خسرتي بناتك وحدة تخطبات قربات تزوج تمشي لدارها وانا الحمد لله خدمت وكنقرا وغانجح انا مسامحاك دنيا واخرة حيت أصلا ماعشت معاك ماحسيت بوالو جيهتك سير ابا الله يعرضك السلامة الله يكون معاك ( حدرات راسها بين رجليها )
موسى ( وقف قرب ليها تحنى باس ليها شعرها ) الله يرضي عليك ( بقات موركة على يديها كترعد رجليها البكية محبوسة فالحلق ماطلقاتها حتى عطاها بظهر ومشا نفاج*رات كتشهق بالبكا من قربو ليها كتشهق حتى حسات بيديت حتواوها هزات عينيها فيه زايدة فوتيرة البكا مرمية بين يديه معنقاه كتشهق )
طارق ( بهدوء معنقها خاشيها فيه ) شششش صافي ( زوج كلمات اما الباقي كان كيدوز على ظهرها كيحاول يهدنها مدة وهي على داك الحال بالبكا لي بكات خرجات كاع لي كتحس بيه الداخل طلقات نفس طويل وبقات ساكنة بين يديه بعدها عليه بشوية ونطق وهو كيشوف فعينيها ) كتكوني زوينة وانتي كتبكي
حياة ( طلقات ضحكة بين شفايفها ) بااز ( شافت فحوايجو ) عمرت ليك حوايجك بالخنونة ( جبدات كلينيك من ساك كتمسح ليه
طارق : اودي هانية راه كيݣولك لي يبغيك يبغيك بخنونتك ( حبسات من المسيح وشافت فيه تنهدات تنهيدة طويلة ونطقات بصوت غالبة عليه بحة البكية )
حياة : سمعتي كولشي ؟
طارق : اه سمعت وأحسن مادرتي هي سمحتي ليه ، باش هكا ترتاحي وتكملي حياتك وانتي مرتاحة ، انتي نقية من الداخل وصعيب وحدة بحالك تحقد على شي واحد
حياة ( كترمش بعينيها مقابلة مع عينيه ) وباش عرفتيها ؟
طارق : لي فيه كترت البلابلا وكيجي للواحد فاص ويخرج لي عندو مكايحقدش كيقولك خاف من السكوتي الى دوا ( ضحك حتى تحركات تفاحة أدم فحلقو ) هادشي باش دابا غادي ترتاحي
حياة ( خرجات نفس طويل ) عندك الصح
طارق : تغديتي ؟
حياة ( بنفي ) لا مزال الحال يلاه 11 ونص
طارق : انا بعدا فيا جوع نمشيو ناكلو ( كتشوفيه بشك ) غادي تعجبك البلاصة حتى المنظر منعاودش لك
حياة : ولكن الخدمة
طارق ( موقفها ) تي نوضي المدير براسو وغادي سالت ياكل معاك أنا ماعندك مناش تخافي ( جملة خرجات من فمو بشكل عفوي ولكن هي حسستها بالأمان توجهو للطوموبيلتو حل ليها طلعات وطلع هو بدورو مديماري وشاد الطريق ) ..
خرجات من عند الطبيب هي وباها وروطال فرحانة ومرتاحة باغية تزغرت كانت خايفة فالأول دابا لا العكس
الروطال : والله كون غير خليتوني نمشي لجدها نوريها ضحك على البشار
عبد الخالق : لا أولدي بلاش صافي دابا الحمد لله لي الأمور مضبوطة تبع ريجيم ديالها والماكلة الصحية وتديها فراسها ونفسيتها
عنبر ( شافت فروطال ) سمعتيه قاليك هانية دجاج مشوي وبولفاف والكفتة ولحم مشوي سمعتيه ؟
الروطال : وقيلة ماسمعتيهش فاش ݣالك بولفاف والكبدة حتى ل شهر سابع عاد تݣدي تاكليها حيت غاتشوه الجنين حيت فيها ڤيتامين A مجهد وكيدير تشوه أنتي هادشي فاش حادݣة ، وسمعتيه الخبز البيض ممنوع وبديل الخبز هو لي غاتاكلي والماكلة صحية وريجيم خاص ندوز ناخود لك دݣيݣ اللوز والقاطونة
عنبر ( رخات شفايفها ) سمعتو سمعت. المهم الكفتة ودجاج هانية ناكلهم دابا قولي أش غانديرو لديك لانسولين لي خديتي ؟
الروطال ( حل الطوموبيل ) كاين واحد سيد مسكين محتاج غانعطيهم ليه زيدو نوصلكم ( طلعو مدوز عمو للقهوة مشا تقدا ليها دقيق لوز ودقيق الكوك والقاطونة عاد وصلها للدار موصي مها وخالتو عليها وعلى ريجيم لي عطاها طبيب ) فاش نكون جاي انجيب ليك معايا الڤيتامين لي عطاتك طبيبة ( باس ليها راسها وخرج )
تودة : طبيبة ديال الولادة اش قاتلك ؟
عنبر ( ݣلسات حاجة مخدة ومتكية ) ظريفة الله يعمر ليها دار شافت تحاليل ديالي وعطاتني ڤيتامين وطلبات ليا تحاليل اخرين بحال الى غاتعاود معايا من الأول ، قاتلي عطيتك اواحد باش حتى ندير تحاليل لوخرين وتشوف واش تزيدني
تودة : مزيان ابنتي
سعاد : مزال مغاتعرفوش شنو عندكم ؟
عنبر : مزال ولكن مابغيناش ، خلي حتى يجي على خير ياربي
سعاد : اباش الى قربتي زعمة تشريو حويجات تعرفو اشمن لون
تودة : حتى تي اختي سعاد هادشي ولا ادابا ݣبل كان كولشي يلبس كيف كيف
عنبر : إن شاء الله ديك ساعات نشوفو لون محيد حتى يتزاد كاع وراه عطا الله الحوايج ، ايجي بيخير وعلى خير هداك هو رباح
سعاد : إن شاء الله ابنيتي الله يعطيك فكاكة ساهلة
عنبر : آمين ياربي
~~~~~~~~~~~
ففيرما لي كانت كبيرة مولاها خداها خصيصا باش يدير فيها هاد المشروع ، كانت فالخرجة ديال كازا المطعم لي دار فيها مولاها خلا الكل يبغي يجي وياكل فيها المنظر لي فيها كيحل الشهية واحد ، بالبحيرة لي كان فيها البط والمنظر ديال الطبيعة الهوا نقي وزوين ..
طارق ( كيشوف فعينيها كيفاش كيبريو والفرحة لي مزينة ملامح وجها بحال شي بنت باقي صغيرة ) عجباتك ؟
حياة ( شافت فيه ) كتحمق فنة فنة ماكرهتش شي بلاصة بحالها نسكن فيها
طارق : أجي ندخلو ( مد ليها يدو نزلات بعينيها ليدو لي ممدودة ليها وشدات فيه تبسم ليها ودخلو بزوج ستقبلهم مول المطعم مرحب بيهم ) سي عبد الرزاق لاباس عليك
عبد الرزاق : والله الى الحمد لله غبور هادي مابقيتيش كتجي لا انت لا العائلة
طارق : غير مع العمل وصافي ، غادي نطلعو لاطيراس ( طلع هو وحياة للفوق فين كان واحد المنظر كيبهر غير انت وطبيعة )
عبد الرزاق ( مد ليهم القائمة ) مرحبا بيكم شوية ويجي دري يشوف طلبات ديالكم ( حدر راسو ومشا )
طارق ( شافيها ) عبد الرزاق هو مول الشي أصلو سوسي من نواحي ديال تزنيت وجا لكازا وستتمر هنا ودار هاد الريسطو عندو الماكلة البلدية واعرة نکدي تاكلي هنا احسن طواجن فيك يا كازا
حياة ( تبسمات ) تنا مكانش فيا جوع ولكن دابا جاني جوع ( نزلات راسها على القائمة كتشوف هزات راسها فيه ونطقات ) ماكرهتش طاجين ديال دجاج وزيتون والحامض مصير ..
- جبد التيليفون ديالو كيصورها وهي كتبسم وتبوزا بعفوية ، للحظة مقالتش ليه لا هاك صورني بتيليفوني انا إحساس حس بيه زوين وعجبو
طارق : حتى نكير ونسيفطهم ليك ياك نمرتك هي هي مابدلتيهاش ؟
حياة : لالا هي هي ( بينما وجد طاجين رجعات شافت فيه وبتساؤل نطقات ) طارق ( هز فيها راسو ) شنو كيعجبك دير شنو الهوايات ديالك ؟
طارق ( حط التيليفون وعطا كامل تركيزو ليها ) كتعجبني الطبيعة والبحر كنعمر فهاد البلايص بزاف منين كنبغي نخوي راسي كنمشي لشي قنت نرتاح فيه بعيد على الناس
حياة : لا بغيت نعرف شنو كيعجبك دير شيحاجة بلا خدمتك
طارق ( تبسم ) نݣولك وماضحكيش
حياة : والله مانضحك
طارق : كنموت على دخشيش القديم ، مبلي بسواق هادشي راه معارفينوش غير القراب
حياة : واش داكشي القديم بحال الأثات وطابلويات ؟
طارق : أياه هادوك كنموت على داك الهيت ( شافيها بنفس تساؤل ) وأنتي ؟
حياة ( تبسمات ) كتعجبني لاباتيسري ، نصايب الحلويات وطارطات والكيك ديزاين
طارق : وراه مزيان هاد البلان تݣدي طوري من راسك وتزيدي تقراي عليه وعلاش لا ديري المشروع ديالك ..
حياة ( عينيها كيبريو ) بصح ؟ نݣد نديرها عمري فكرت فيها
طارق : فكري فهاد البلان ولكن خودي الباك ديالك بعدا هو اللول انا نقلب لك على شي مدرسة دوزي واحد 6 شهور وتشدي فيه ديبلوم ديالك
حياة ( ماقادتش تدوي كانت فرحانة حاسة براسها مهمة كيفاش انسان كيفكر ليها وباغي يدير شيحاجة على قبلها ) لهلا يخطيك ( قاطعهم السرباي لي حط ليهم الغدا ديالهم بداو كياكلو غمضات عينيها ) الله الله الله على الحلاوة مايمكنش
طارق : ݣلتها ليك .. جاب ليهم حتى الشلايض والروز مشرمل كان مداقو واعر من غيرو هو لي ماخداش الروز
حياة ( كتأشر بيدها ) الروز واعر واعر هاك دوق ( مدات ليه المعلق خدا من يدها ) كيجاك ؟
طارق : خطير ( الجو بيناتهم كان زوين جو مافيهش التصنع وتكبر كل واحد كان على طبيعتو مستمتع بداك الوقت لي كيدوز مساخيش بيه يسالي )
حياة : عمري دقت شي طاجين بحال هذا
طارق ( كياكل ) سواسة تبارك الله معروفين بطواجن خصوصا فأݣادير وتزنيت ودوك نواحي كيصرعو طواجن خصوصا الرجال
حياة : ماكرهت يقولي كيفاش قادو وقيلة السر فهاد الطواجن لي كيكون لونهم مايل للخضورة
طارق ( هز براسو ) كيجيبو الماكلة خطيرة واخا تكون غير الخضرة .. كملو الماكلة ديالهم فجو زوين سلاو خداو ديسير من وراها خرجو من تم كيتمشاو فطبيعة
طارق : تمشي للبحر ولا شنو بان ليك السندباد
حياة : وايلي ( كضحك ) والخدمة ؟
طارق : عاطيك هاد نهار عطلة شنو بان لك ؟
حياة : والله منقولك لا ( مد ليها يدو ضحكات ليه وشدات فيه توجهو لطوموبيلتو وشدو الطريق للسندباد ..
العشية دازت عندها بحال ألف ليلة وليلة حسيها بحال شي أب خرج بنتو للألعاب لعبات ضحكات غوتات وهو كان كيدير ليها بحال شي بيبي صغير ولا شي وردة خايفها تهرس ، هدفو كان يخرجها من المود لي هي فيه كيحس براسو خاصو يحميها ويبعدها على أي حاجة تخسر ليها الخاطر
رجعها للدار حتى ل 8 كانت عيانة ومسخسخة باغية غير تنعس ، وقف طوموبيلتو حيدات السمطة وشافت فيه
حياة : شكرا بزاف على هاد نهار عمري نساه فحياتي
طارق ( كيشوفيها ) العفو مرحبا فأي وقت تهلاي فراسك حتى لغدا إن شاء الله
حياة ( حتى أنت تهلا فراسك فتحات الباب بغات تنزل حبسات بحال الى كانت كتصارع شيحاجة فالداخل ديالها ولكن عفويتها هي لي نتاصرات فالأخر رجعات للعندو وبزربة خدات وجهو بيدها وباستو فحنكو ونزلات سادة الباب غادية كتجري كدق فالباب .. خلاتو مبسم وكيشوفيها حنى دخلات تنهد مديماري متوجه للدارو ..
فقاعة قدام دار عبد العالي الناس كيجيو وكيدخلو ، عبد العالي واقف بجلابة فالقهوي كيستقبل الناس اما بهيجة لي كانت الداخل فدار لابسة تكشيطة بالخضر مع شال فالبيج مزينة يديها بشرتلة ديال الذهب الدك القديم .. خرجات عنبر من القاعة لابسة تكشيطة فالݣرونة مع شال فالكحل منبت بالحجر هازة على تكشيطتها دخلات للدار الداخل حتى وقفات على بهيجة ..
عنبر : خالتي فيا جوع
بهيجة : لهلا يحوجك أبنتي سيري للبيت عزيز كلسي فيه انا نمشي للعند طيابة ونجي عندك ( مشات لهيجة للعند الطيابة للكوزينة لي كاينة فدار الفوق طلباتها على عنبر عمرات ليها واحد نص خبزة ورجعات للعندها عطاتها ليها ) هاكي بغيتي الديسير ؟
عنبر ( خدات عندها ديك نص خبزة ) لا أخالتي براكة عليا ، هلاتها كتاكل فراحتها وخرجات للعند الناس كتستقبلهم
الضيوف كولشي حصر عائلة العروسة كولشي كان فرحانين بهاد نهار الكبير ، خوت العروسة كانو على برا من غير عماد بوحدو لي مكانش حاضر
طارق ( داير يديه فجيابو ) كيجاك الزواج أولد عم ماݣلتيش لينا ؟
عصام ( تبسم ) حياتك ضايعة احبيبي هزك الما وضربك الضو.. مشيتي خلا
الروطال ( واقف بكل هيبة ورجولة مربع يديه ) هدا هو لي كان ݣالك انعيش انا وياها بحال الخوت .. انتزوج اعلى ود ولدي طررر
عصام : الولد وباه بزوج بيهم فرحانين ، السعادة أخويا والله واحد الراحة مابحالها راحة
طارق : ومتقوسش على راسك هدى كانت ظريفة فالأول نهار ولدت تسيفت
عصام ( برم شفايفو ) واخا كانت ظريفة ولكن مكانتش درويشة مكانتش كتصلي وعارفة لي ليها وعليها .. نسيتي بلي انا لي كنت كنجي ونجفف ونشقا بحجة ظفاري طوال غايتݣرضو فلوسنا كيمشيو غير فماكلة الزنقة
طارق ( غوبش ) بغيت غير نفهم علاش زعمة راجلها حياتها معاه مزيانة بيخير سيدة تبدلات على اللول
عصام : مابغاتش تعاود دير نفس الغلط ، انا وياها قرينا مع بعضياتنا عاشرنا بعضياتنا قبلتها كيما هي اما هو معرفة دشهرين متکدش تعاود نفس الغلط
الروطال ( بصوتو الغليض الغارق حبس هاد الموضوع بصفة نهائية ) كل واحد الله يسهل عليه مامكتابينش لبعضياتهم ( سونا تيليفونو كان عزيز ) وي عزيز دابا ( تقابل مع خوتو ) اهاه واخا صافي ( قطع ) علم الاوركستر قربو يوصلو ..
- طارق علم الاوركسترا باش يبداو على قبل الدخلة ديال ماجدة .. دقائق قليلة حتى وصلات الطوموبيل فيها عزيز لي نزل ببدلة فالكحل أنيقة محسن وجهو ومقاد حالتو توجه للباب فتحو ماد ليها يدو ، مدات ليه يدها لي مزينة بنقش وخاتم ديال الزواج لابسة لبسة نقرية منبتة مع مشيطة وتاج جات راقية وسلطانة فليلتها ..
خرج الكاميرا مان يوثق اللحظات ديال دخول العروسة .. او الدقايقية كيلعبو خرجو البنات كاملين كيصورو منهم حياة لي كانت دايرة مشطة خفيفة ولابسة تكشيطة فالحمر جاتها فنة سعاد وأدريس حدا بعضياتهم كيضربو الرش ماجدة الخلعة راكباها كترعد وعينيها كيدورو على الجميع
الروطال ( جر عنبر هامس ليها ) فين كنتي ؟
عنبر : كنت كناكل كان فيا الجوع
الروطال : وبداي تحنقزي راه معاك الزايد تبتي جنبك مايفوتش جنب مك
عنبر ( قلبات عينيها ) صافي واخا
دخلوها نکافات للعمارية ݣلسوها ، وبدات الاغنية الخاصة بدخلة ديال العروسة العائلة تابعينها من اللور كيضربو الرش ولي كان كيصور ياسنين ويسرا مكانوش أقل أناقة من البقية .. من ورا ماکلسو العروسة فبلاصتها جا دور العريس لي دخل مع دهاز وعيساوة كان دهاز كيحمر الوجه بدورو ݣلس حداها دايرة يدها فيدو ..
دخلو البنات للوسط كيشطحو حياة شادة يد دنيا وكيشطحو مع بعضياتهم حتى وقف عليها طارق شد يد ختو ويد حياة لي ضربها الضو حسات بزايد تزاد معاها
دنيا : خليتي عز الدين مسكين كالس بوحدو حشومة عليك
طارق ( خنزر فيها ) بقا فيك ولا ، رجلو مزال ضاراه باركة عليه غير يشوف بعينيه
دنيا ( همسات ليه فودنو ) ومالك شاد يد البنت حشمتيها
طارق ( قرب من ودنيها) تعلمي دخلي سوق راسك ازين ديال خوها ( كملو الشطيح وحياة غارقة فحوايجها )
عنبر ( كتخنزر فيه ) انت والله حتى اكبر مسموم على وجه الكرة الأرضية لبارح النخضة لي نخضتيني فادي فيا هاد 3 شهور لي دازت ودابا لا نتنوضيش تشطحي
الروطال ( بزمجرة تقيلة ) تبتي الأرض ولا نخلي دار عشتك راه بديتي ضسري تاني
عنبر : الى مزال حطيت فمي عليك اجي وشم ليا
الروطال ( طانز عليها) الوشام حرام احبيبة ( غمزها بمعنى ماتبقايش تحلفي على واحد الحاجة غادي ديريها )
عنبر : واخا دابا نشوفو ( قلبات وجها )
حبسات الموسيقى وكل رجع لبلاصتو .. کالسة يسرى ودنيا وياسمين حداهم حياة
يسرى ( شافت فياسمين ) واش تخاصمتي انتي ونور الدين ؟
دنيا ( شافت فيها ) والله ماقلت شيحاجة لا تلصقي فيا ، قلت ليها غير بلي جيتي تݣلسي عندنا شي يامات هي ستنتجاتها راسها
ياسمين ( هزات بكتافها بعدم إهتمام ) مالي مخبياها اصلا غاتعرف غاتعرف ( شافت فيسرى ) أه مخاصمين وجبت حوايجي كاملين ومناوياش نرجع وغاندفع لطلاق
يسرى ( بصدمة ) أويلي علاش ؟
ياسمين : صافي طلعات ليا ديك العشية فمخي واش انا مزوجة بيه هو ولا بدارهم بزاف أختي ، ختي جايا متخدميش عطيها وقت لي قالتها ليك ختي ديريها غلاضيتي بزاف خواتاتي خفافات خاص تكوني بحالهم لدرجة أسرار ديال الفراش بيني وبينو كيقولها ليهم
حياة ( خرجات عينيها ) أويلي واش هذا هبيل ؟
ياسمين : هانتي تشوفي ختو جراتني للكوزينة قاتلي حاولي على خويا راه رشيتي ليه ركابي وهادي هضرة أش بقا منين اسرارك بينك وبين راجلك يخرجو لبرا ..
دنيا : وهي ربي من نهار الاول والله مارتاحيت ليه بالله العظيم وانتي شوية وتولي بحالهم وليتي تخافي منهم
ياسمين : كنت مابقيتش طلع ليا داكشي فصحتي تفكرت اهضرة عنبر وحياة فسطح مالي عليها انعيش فيها ديما امرة وحدة خاصني نقلب على راحتي ، مزال مادرت معاه ولاد راه يمشي يشوف ليه شي مونيكة يجيريها كيف بغا هو ودارهم ..
يسرى : ديري لي ترتاحي فيه الحمد لله مالك ناقصك يد ولا رجل
حياة : بصح الله يقويك وينصرك إن شاء الله
ياسمين : اللهم آمين يارب
هزات قفطانها خرجات على برا دخلات لدار عزيز متوجهة لطواليط قضات حاجتها شافت فالمرايا عاودات الݣلوس ورشات من ريحتها وتمات خارجة هازة على قفطانها .. كانو واقفين ولاد الحومة لي كانو من المعروضين كيعرفو عزيز ملامحها لي كانو بحال شي فليبينية لفتو الإنتباه بهمهمات وإبتسامة ونظرات كان واقف على برا شاهد على داك المنظر مجات فين تدخل للقاعة حتى جرها من يدها غادي بيها للورا القاعة ..
حياة ( كتشوفيه بإستغراب فملامحو الباردة والغوباشة لي بين حجبانو الغلاض ) مالك ؟
طارق ( هاز حاجب ومنزل الثاني ) شتك غادية جايا عاجبك قفطانك ورجليك ؟
حياة ( بعدم فهم ) مشيت لطواليط وزايدون قفطاني مالو ورجليا ماعريانينش لابسة كولوني
طارق ( بصوتو الغليض واقف على راسها معلية فيه عينيها) مكاتشوفيش البشار كيف خالو فمو فيك ، بنادم جاهل مخري ف*** كتبان ليه البنت بحال شي حلوة باغي ياكلها
حياة ( ببراءة ) انا ݣاعما رضيت ليهم البال ، وكل واحد كتحكم فيه تربيتو واش انا انبقى غير حاضية جنابي ( تقادات فالوقفة ) وانت علاش معصب وماعجبكش الحال ياك مابقيناش مخطوبين ؟
طارق ( دور لسانو وسط فمو كيتنقل بين عينيه وعظمة فكو كتحرك ) غادي تمشي حد مك وتركني وداك تلواز ديال شيخة تراكس خليه حتى تزوجي وديريه أزين ( غمزها )
حياة مجاوباتوش طلعاتو ونزلات وضربات بشعرها على وجهو عاطياه بظهر مبسمة داخلة للقاعة
طارق : بنت العبد ولا يخرج منها السم ( دوز يدو فشعرو معصب قاصد الطبلة ديال خوتو ݣالس وعينيه عليها مكانتش مسوقة لنظراتو لي كانت حاسة بيهم بلعاني مابغاتش تشوفيه أما الداخل ديالها كانت فرحانة وعاجبها الحال )
حياة ( شافت فدنيا ) بعد غدا إن شاء الله السبت نخرجو بغيت نشري حوايج جداد وبغيت نقص من شعري ونصبغو وندير سوان دڤيزاج بغيت نبدل شوية اللوك
دنيا ( كتفكر كانت دايرة مع عز الدين ) صافي واخا إن شاء الله
ياسمين : حتى أنا غانمشي معاكم ، بغيت نقطع شعري تقطيعة قصيرة ( شافت فيها يسرى بإستغراب ) مالك كتشوفي فيا ؟
دنيا : كتشوفيك هكاك حيت كتموتي على شعرك الطويل دخلها العجب
ياسمين : بغيت نبدل اللوك كيف قالت حياة ، نفسية جديدة وحياة جديدة إن شاء الله باش نجمع الوراق ديالي وندفع لطلاق
دنيا : والى مابغاش ؟
ياسمين ( هزات بكتافها ) الى مابغاش غانسمح فكولشي مابغيت والو منو الحمد لله بمشروعي بخيري مامحتاجاش ليه ولا لفلوسو ايشدهم عندو المهم انرتاح ونعس على جنب الراحة ..
داز العرس زوين ماجدة لبسات 3 ديال اللبسات مكانتش بغات تزيد غرضها فعرس خفيف ظريف .. مسالى العرس حتى ل 2:30 ديال الليل ماجدة وعزيز توجهو للدارهم كانو دايرين يسافرو واحد سيمانة للأفران خصوصا الاجواء الشتا والبرد مناسبة ليه ..
- رجعو للدار كتجرفرجليها عيات وفيها النعاس ضارت عندو ميلة راسها ببراءة
عنبر : الحوبينو تهزني ؟
الروطال ( تنهد تنهيدة طويلة ) على هاد الحوبينو نديك المرزوݣة على رجلبا ونجيبك ازين ديالي ( هزها بين يديه حتى لبيت النعاس حيدات السمطة وبغات تغمض عينيها ) غاتنعسي بتكشيطك ؟
عنبر ( بصوت ناعس ) مافياش ( رخات يديها شاف حتى عيا محرك راسو يمين وشمال توجه للماريو هز واحد البيجامة دافية بدا كيزو ليها حوايجها حطهم فوق واحد الفوتوي تم .. لبسها بيجامتها وطلق ليها شعرها على راحتو نزل بشفايفو طبع قبلة على شفايفها هزات يديها عنقات عنقو كتشوفيه بعينين ناعسين ) كنبغيك بزاف ، أنت أحسن حاجة وقعات ليا فحياتي من بعد عائلتي او والديا
الروطال ( تبسم عاض راس نيفها ) وانا كنموت أصلك رتاحي ( باسها فعنقها وتوجه للدوش مخليها مغمضة عينيها حتى نعسات ..
سايݣ الطوموبيل ديالو داير مكبر الصوت والتيليفون كيسوني ولا مجيب .. قطع ورجع صونا مدة عاد تحل الصوت
ليلى : ألو
عماد ( عينيه مع الطريق ) على السلامة فين كنتي ؟ التيليفون من ݣبيل وهو كيسوني
ليلى : يديا كانو فدوك الكرات لي قلت ليك بغيت نصايب ليك عامرين ، ماجيت فين نغسل يدي حتى قطعتي لاباس عليك ؟
عماد : الملل نكذب عليك كنتسنى نسالي هاد شهير نرجع بحالي خليتي عليا الخوا امو عينين
ليلى ( كضحك ) وشفتي باش تعرف بقيمتي
عماد : عارف ماشي يلاه غانعرف كيدايرين الدار ؟
ليلى : الحمد لله بيخير ماما خرجات مشات تسخر وبابا كاين فصالة وخوتي قاريين
عماد : محتاجة شي حاجة ؟
ليلى : لالا مامحتاجة والو داكشي لي عطيتيني مزال عندي منو
عماد : عطيوك باش تقداي كاع لي خاصك اليلى ماتركدديش على الفلوس ، لي شهوتك فيه خوديه والى خصاتك شيحاجة ݣوليها ليا باش نسيفط ليك
ليلى ( تنهدات مبسمة ) لهلا يخطيك عليا والله حتى خديت كولشي بقات ليا اجلابة ديال العقد والخاتم
عماد : الخاتم حالو ساهل فنهارو حتى نجي وناوه بزوج إن شاء الله الجلابة خودي شيحاجة زوينة عارفك كتبقاي تخممي بزاف
ليلى ( كضحك ) لا والله ماهكاك راه قلت ليك خديت كولشي والى خصاتني شيحاجة غادي نقولها ليك كون هاني ( بقات ساكتة مترددة )
عماد ( حنحن مبسم ) خرجيها راه من صباح وأنا كنتسناك تݣوليها
ليلى ( خرجات عينيها ) ناري باش عرفتيني كنفكر فيها ههههه
عماد : واش غير جينا وختارينا هاد ضومين مريضة أنتي ويلاه راه ولينا كنشوفو منك الجفاف .. مزال فاش كتي هنا كنا نشوفو فعينيك كنفهمو لراسنا
ليلى ( بلعات ريقها حادرة عينيها ) توحشتك بزاف ، وحتى انا كنحس بالملل بلا بيك كنبقى انشوف تصويرتك
عماد ( قهقه برجولة مبين على سنيه البيضين ) وهذا هو الكلام الزين دابا نݣدو ندوزو نهارنا مزيان حتى انا توحشتك احبيبي
ليلى ( خرجات عينيها من الكلمة لي قاليها طول المدة ديال تعارف ديالهم و 3 شهور لي دازت ديال خطوبتهم عمرو قاليها كلمة بحال هكا حسات بدوخة وقلبها كيضرب ودنيا ضارت بيها هزات يدها كتنش ) تحرك الصهد
عماد ( تبسم راشقة ليه عليها عرف راسو زعزعها بكلامو ) تي اشمن صهد السم ديال البرد وشتاوات وصهد
ليلى : عماد بابا كيعيط انا مشيت قطعات عليه
عماد ( كيضحك ) قاطعة عليا هبيلة هادي ( حرك راسو بلاحولة سايݣ راشقة ليه للخدمة )
فڤيلا حيدر واقفة قدام المرايا كتسد فسروالها ديال ݣاطيفا فالقهوة لبسات معاه واحد البوتيو پلا فنفس اللون مع مونطو بيج تحت منو تريكو فنفس اللون طالع بالكول شعرها جمعاتو على شكل ديل حصان دارت ليكغو ديالها واخا الجو مضبب ونقاطي دشتا ..، رشات من الپارفان ديالها black opium over red لي كانت خداتها ليها دنيا كادو فعيد ميلادها كتافات غير بكلوس لشفايفها هزات ساكها وتيليفونها ونزلات التحت ..
حياة : خالتي دنيا مانزلاتش ( جاوباتها من اللور )
دنيا : هاني فين هي ياسمين ( بدات تعيط ) ياسمين ياسمين ( جاوباتها من الفوق ) ويلاه ديما رحيلك تقيل ( سونا الباب حلات نعيمة السيدة لي كتعاونهم دخل طارق )
طارق ( كيشوفيهم ) السلام عليكم ( باس لتودة راسها ) فين غاديين ؟
دنيا ( باستو ) الحمد لله اخويا حتى أنا توحشتك ( كتشوفليه فعينيه لي كيسكانيو حياة ) خارجين اخويا
طارق : فهاد الجو هذا ؟ ( شاف فحياة ) وأنتي أمدموزيل ماعندك خدمة ماعندك صونتر ؟
حياة ( بصوت كلو أنوثة وبراءة ) واش نسيتي أطارق بلي اليوم السبت مكنخدموش ونسيتي بلي الصونتر السيمانة لي فاتت دوزت الامتحان وساليت ( هزات راسها فياسمين ) هاهي ياسمين
دنيا : خالتي هاحنا مشينا
تودة : نتسناوكم للغدا ؟
دنيا : لا انتعطلو وانتغداو على برا ، مزال غادي ندوزو عند ليالي باغية تقدا شيحاجة خصاها على قبل دهازها
تودة : ديك البنت حتى هي ماعرفت ايمتا دير عها تمشي لدارها
حياة : عطلاتهم غير خت راشد لي ولدات او الولادة كانت صعيبة راه مزال كاعما رجع من عندها الحمد لله بعدا ولات بيخير ودازت الأمور على خير
ياسمين : ويلاه .. خرجو راكبين فطوموبيلت ياسمين وتودة حاضية طارق لي تبعهم بالعين کلس وهو منكري أمع راسو
تودة ( تبسمات ) أوليدي الشوف مايبرد الجوف ( شافيها ) لا ديرهاش مني قلت الصواب الى دخلت
طارق ( بنفي وصوتو الجوهري ) بالعكس انتي فمقام الواليدة
تودة ( ضارت عندو ) كتبغي حياة ياك أوليدي ( عض على شفتو سارح بعينيه رجع شافيها مهزهز راسو بالإيجاب ) كت عارفاها ( تبسمات ) كت حاضياك فعرس ماجدة كيكتي تشوفيها وحاضيها ماحيدتيش عينيك عليها
طارق : ولكن شتيها كيكتعطيني فنخال
تودة ( ضحكات ݣالسة بنخوة بشربيلها وقفطانها وشال على راسها ) أوليدي الى مافهمتيش حياة اݣلب الطريق زعمة مافهمتي والو ؟
طارق : اش غانفهم ؟ نجي ندوي معاها دور عليا عينيها
تودة : حنا نسا أوليدي مكنديرو هاد الخصايل غير الى بغيتا لي كنبغيو يغير ، والكامون مايعطي ريحتو حتى يتحك وهادشي لي كدير ليك باش تخرج من رونضتك وتقصدها
طارق ( كيفكر ) زعمة تكون تا هي كتحس بشيحاجة من جيهتي ؟
تودة : وا وليدي انت راه بعقلك وغاتفهم أهو تحرك لا يفوزو بيها القومان
طارق ( مخزز ) شناهو برب لا داها شي قمقوم وݣول لشي ( عض على شفتو واقف ) خاصني نمشي أخالتي ( نزل على راسها باسها عاطيها بظهر ورجع شافيها ) فخبارك ماشي غير الواليد لي عوضو ربي بيك حتى حنا عوضنا معاه .. تبسمات ليه
تودة : الله يرضي عليك ( خرج ركب فطوموبيلتو وعقلو خدام كيبلاني ) ..
أول حاجة دارو توجهو للصالون لي كانو مريزيرڤين فيه قبل كل وحدة فيهم تكلفات بيها وحدة .. حياة بداو ليها بصباغة كان شعرها قهوي داكن بدلوه ليه للون عنابي بحال لون الكركديه عجبها ، غسلوه ليها وعاد دازو للمرحلة الثانية لي هي الوجه كتحس براسها فرحانة ومرتاحة وعاجبها الحال .. وجها رجع ليه الحياة وعجبها النقاوة والبيوضة لي ولات فيه
.... : خاصك تقادي لافوغم ديال حجبانك
حياة ( بإبتسامة ) لا اخليهم مكنقيصهم ، مرة وحدة لي قصتهم وندمت عمري نعاود
.... : باش يبان وجهك كيعطي جمالية
حياة : لا حبيبتي شكرا انا عاجبيني هكا طبيعيين كنمشطهم وكيجيو زوينين مع عينيا
.... : داكوغ لي بغيتي ، .. جات المرحلة ديال يصايبو ليها شعرها نقصو ليها من البلايص لي ضعاف وعاد قادوه ليها جا ويڤي كيحمق ولات كتبان بحال شي وردة لي تفتحو وراقها
أما ياسمين لي قطعات شعرها حد الودن من بعدما كان شعرها واصل لظهرها مابقاش فيها ، بالعكس عجبها راسها خلات الفوق فالعسلي والتحت دارت ليه ليميش فلون الپلاتيني اما دنيا دارت غير سوان لوجها وقادات شعرها
ياسمين ( من ورا ماخرجو من الصالون ) الله الحياة السعيدة
دنيا : كنحس بنفسيتي تبدلات والله العظيم
حياة ( كضحك ) حتى أنا عجبني راسي ( سونا لبها تبليفون ) ألو فينك ؟ صافي كملتي واخا .. هاحنا جايين ( قطعات ) ليالي راه واجدة نمشيو نجيبوها
دنيا : صافي نمشيو نهزوها ونتغداو عاد نمشيو نتقداو ( داكشي لي دارو مشاو هزو حياة دازو لواحد ريسطو تغداو فيه مجموعين بشوية عليهم ، خلصات ياسمين عاد شدو الطريق لواحد البوتيك كتعرفو ياسمين ..
ختارت لبيسات بدوق ياسمين ولي جاو معاها ومع فورمتها كانو راقيين .. حتى من ليالي وياسمين ختارو ليهم حويجات شكون قال خريجة مع الحباب وتشري شيحاجة عاجباك مكتبدلش المود ديال الإنسان ..
ياسمين : انتي فاش وحلتي دابا ؟
ليالي : فاللون بغيت واحد الموڤ بحال هذا ( جبدات تيليفون وراتها ) هدا ومالقيتوش وانا حامقة على هاد اللون مابغيتش ندير كيما كيدير كولشي جلابة
ياسمين : وجلابة ضرورية فالعقد أصاحبتي
ليالي : لا راه ديال العقد حطيتها تخيط صافي ، انا هاد اللبيسة بغيتها مثلا الى كنا خارجين أو معروضين وعاجباني كيكون الفوق مطروز وبسروال والحزام ولكن هاد اللون مالقيتوش كاع ..
ياسمين : عرفتي شنو انا انشوف واحد السيدة كنعرفها كتجيب الثواب واعرين عندها واحد الأتوليي ديالها ندوزو عندها وتشوفي بعينيك
ليالي : صافي لهلا يخطيك
ركبو فطوموبيل حياة اللور هي ودنيا وليالي راكبة حدا ياسمين .. وصلها ميساج تم تم هزات تيليفون وقراتو كان من عندو " فينكم "
حياة ( عضات على شفتها بإبتسامة كتبات ليه ) كندورو علاش ؟ ( جاوبها ) " ماتعطلوش الجو راه تبدل رجعي شوية بكري باغي ندوي معاك ( ردات عليه ) " فاياش ؟ ( جاها الجواب ) " حتى تجي وتعرفي ماتعطلوش " " ردات عليه بواخا .. صورات راسها ولاحتها فستوري انستغرام كاتبة عليها " نيو لوك " لايحاها بلعاني تشوف ردة فعلو
بقات عاسة حتى طلع ليها بلي راه شافها عضات على شفايفها فرحانة .. طلع ليها ميساجو فالواتساب مكتوب فيه " أش داك ستوري الزين أزين ؟ " رضات عليه " عجبك كيجيتك ؟ كانت بغات طرطق بضحك
دنيا : مالك ؟
حياة ( شافت فيها ) لحت ستوري فيه صورتي وشافت طارق
دنيا ( كضحك ) جنية بغيتي تعصبي ليا خويا ولكن سرو نيت خليه نيت باش يفيق .. قاكعهم الميساج لي وصلها من عندو " كتعرفي تحطي ستوري ازين الصافي براڤو وريني كاع واش كتعرفي تمسحيه ولا نجي نعلمك .. ( طرطقات بضحك رادة عليه ) " علاش غادي نمسحو وعلاش اتجي تمسحو ليا المهم حنا دابا اندخلو لواحد المحال حتى لمن بعد ( سدات الكونيكسيو ديك ساعات ) نزلو من الكوموبيل وهو يبدا تيليفونها كيسوني
دنيا : واش هو ؟
حياة ( كضحك ) أه هو ششش انا نجاوب ( رققات صوتها وأكتيڤات مود البراءة والأنوثة الطاغية وصوت الشتوي ونطقات ) وي ألو ..
يتبع...
التعليقات
لا توجد تعليقات بعد، كن أول من يعلق.