عنبر الجزء الثامن

من المؤسف حقاً أن تبحث عن الصدق في عصر الخيانة، وتبحث عن الحب في قلوب جبانة.

الحب الحقيقي لا ينتهي إلا بموت صاحبه، والحب الكاذب يموت عندما يحيا صاحبه.

إذا كنت تحب بصدق فلا تتخاذل، لأن التخاذل هو الخيانة، ولكن بحروف مختلفة.

****

- سلم على الأم ديالو وعلى باه وݣلس ݣالسة حداه لي كانت معاه من بعدما سلمات سلام عادي على والديه ..

- نادية : غبرتي بزاف أولدي كونما طلبناك ورغبناك ݣاعما ترجع

- بدر ( حك على راسو ) : ماكنتش مسالي كان عندي مايدار

- ابراهيم ( الأب ) : لا راه باين فاش كنتي مشغول ماعرفتش إيمتا ناوي دير عقلك

- بدر ( شاف فالبنت لي معاه وبلغة إسبانية ) : الواليد والواليدة كيشكرو فيك عجبتيهم ݣلتها ليك أحبيبة

- ( بإبتسامة جاوباتو ) : حتى انا عجبوني واخا مافهمتش شنو كيݣولو

- بدر : من بعد وغادي تفهمي

- نادية : شكون هادي عاوتاني كل مرة جايب وحدة جديدة

- بدر : هادي حياتي الواليدة وانا حر فيها ندير فيها لي بغيت والوقت لي بغيت

- إبراهيم ( بصرامة ) : مناويش تجي تخدم معايا عندي ولد بحال الى ماعنديش ختك وحسن منك علاش والد انا هاد الولد يبقاو عندي البنات حسن

- بدر ( ببرودة ) : وكان عليك تحبس عند خواتاتي لاش زدتيني غير فاقصك ومرضك فصحتك

- نادية : ولدي الله يهديك باباك بغا تكون فجنبو مݣاليك حتى حاجة ديال العيب

- بدر ( بنفس البرود شاف فيها ) : على اشمن خدمة فيهم كتدوي عليها خدمتو خدمتو زلا الخدمة لي على بالي وبالك الواليدة .. شتي داك الصداع والمشاكيل ماعنديش معاه ماشي نهار يغرق شي حد نمشي انا فرجلين انا كنبغي الحياة وباغي نعيشها بطول العرض مايجيش نهار نغمض عيني نلقى راسي فالحبس

- إبراهيم : قليل الترابي ، كنا كنتسناوها من البراني جاتنا من الولد

- بدر ( ضحك بإستفزاز) : بحال زعمة معارفش هادشي غايوقع ، ياك الفيلا ديال المغرب قرقبو عليها البوليس ولافير ديال الداخلة حتى هي ولافير دالبنات أش غانݣوليك أسي براهيم رحمون الله يدير ليك شي تاويل ..

- إبراهيم ( بعصبية ) : ضرݣ عليا كمارتك حسن مانبقى نشوف وجهك عمرك مغاتبدل أنت هو أنت ...

- بدر ( زاد تفطح على الفوتوي ) :

علاش لي غانضرݣ وجهي ، يحسابليك انا انبقى نونوس كيما بغيتي بالعكس تبدلت الواليد انا ماشي هو هداك لي هادي واحد 7 شهور ݣديتو قضية موتو وطلقتوه من مرتو غير حيت كنتو خايفين لا تعيق بيكم ويجي شي نهار وتحطكم بوجهكم ..

- نادية : ولدي ديك السيدة مكانتش من مقامك نهائيا لا انت لايق ليها لا هي لايقة ليك أحسن حاجة دارت انك طلقتيها وباش تخفاف عليها قلنا ليها راه متي

- بدر ( رجع راسو للور كيضحك كمختل عقلي ) :

والله حتى انتوما واعرين فاش كنفكر فيها كيفاش متلتو الدور والݣنازة بين الناس وضحكتو عليها بجوج دريال وسيفطوها لدارهم لي تحت الارض ومايطيح عليهم هاد البلانات ..

- إبراهيم : وشكون طلقها ب 3 شهور قبل وكان عايش معاها تحت سقف واحد بحال الى مزال مرتو ، وشكون لي عطا لطبيب باش يكذب ويݣول بلي راها عاݣرة مكتولدش ياك انت .. داكشي وراثي أولدي ورتيه من عندنا ..

- بدر ( بجدية ) : أنت وهي لي بززتو عليا هادشي

- نادية : ماشي بززنا حيت كون كنتي بصح كتبغيها مكنتيش غادي ديها فينا وتسنط لينا ، المشكلة ديالك اولدي كتشوف الحاجة كتقرقش عينيك عليها كتبغيها تكون ليك هي وزهرها يقد تبقى مشوق ليها وباغيها مدة طويلة ولا يمكن تمل دغية منها .. وزهرك هاد المرة خلاك تبقى كتبغيها 5 سنين كاملة كان خاصك تبدل وحنا كنا اسبب ..

- إبراهيم : وزايدون هاد الخانزة لي كدوي عليها هاك شوفها ( هز تيليفون فتحو خدم الفيديو ومدو ليه ) تفرج مع راسك فالموسخة تريكة وجه البيران ..

- شد بدر التيليفون جمع غوباشتو كيحقق فيها غمض عينيه وحلهم شعرها لي كان طويل قصار ضعافت ومابقاتش كيف كانت قبل ..

- نادية ( دايرة رجل على رجل ) :

شفتي اولدي هاباش قلت ليك ماشي من المقام ديالنا ومستوانا فأول فرصة مشات تخدم فبلاصة خانزة واخا عطيناها لي دير بيه مشروع وتعيش مزيان .. الحمد لله لي ماعطيتهاش البروش ديالي مخلياه للمرة لي تليق بيك وبينا .. شافيها بدر حاك على لحيتو بتوتر ورجع كيشوف فالفيديو لي فتيليفون ..

- رجعات للخدمة ديالها خرجات واحد الكليانة من ورا ماخدات پلاطو ديال تمر معمر بريستيج .. غير هي خرجات دخل واحد السيد هاز بوكي ديال الورد كبير فالݣرونة مع بواطة كبيرة ديال الشوكولا وقف قدامها بإبتسامة :

مدموزيل يسرى ؟

- يسرى ( شافت فالبنت لي معاها ) : وي هي انا

- هادو ليك واخا تسني ليا هنا ضروري نعلم بالاستلام

- يسرى ( مافهمات والو ) : وي مرحبا ولكن شكون لي سيفط هادشي ؟

- انا ماعرفتش اتلقاي المعلومات فالبوكي واخا تسني ليا عفاك ؟ .. خدات يسرى استيلو وسنات ليه شكرها ومشا ..

- ( أمينة البنت لي معاها ) : اوووه على بوكي شحال فن قراي شوفي شكون بليييييز ..

- يسرى ( كضحك ) : وغير صبري مالك خف من رزقك اصاحبتي .. جبدات لاكارت كتقرا فيها فجأة تبدلو ملامحها فاش قرات شنو مكتوب " أنا عارفك كتبيعي احسن انواع الشوكولا ولكن ختاريت هاد النوع حيت كيشبه ليك لا فالمظهر ديالو ولا الداخل اما الورد ماهو غير جزء منك يسرى كنبغيك بزاف وغادي نبقى كنبغيك حياتي كاملة عمر شي وحدة ادخل لحياتي سمحيليا إلى جرحتك محسن "

- امينة ( بتساؤل ) : شكون ؟ يسرى مدات ليها لاكارت وهي ساهية شداتها من عنظها قراتها ، هزات فيها راسها بحنان :

ياختي بقى فيا والله

- يسرى : قلبي مزال جرحو جديد يا أمينة والله مدازش عليا قليل

- أمينة : ولكن طلب منك السماحة واخا انا لحد الساعة ماعرفتش كيفاش وقع ليكم كنتو بحال السمن مع العسل قبل الزواج ..

- يسرى ( شافت فيها ) : ختو ختو هي السبب فهادشي كامل هي لي فرتكات لينا العش ..

- أمينة : الله ياخود فيها الحق كنتو على مزيناتكم حتى فالعرس ماشاء الله كاع العينين كانو عليكم وكولشي كان كيدوي على الدهاز وتكبيرة لي كبر بيك .. واش عمراتو عليك ؟

- يسرى ( بنفي ) : لا كون عمراتو مغانتفارقوش حيت هو مكايتيقش بلي كيسمع كان يدور فيها ولكن هي دخلاتو من الجهة لي كضرو وعرفتي شكون ختو الصغيرة ديك ختو لي كان يموت عليها ومفششها هاديك منين جاتني الدقة كنت دايراها كثر من ختي ..

- أمينة ( جرات الكرسي وݣلسات قبالتها ) : شنو دارت ؟

- يسرى ( شافت فيها ) : فاش كان كيمشي يخدم كانت ديما كتسوني دوي معايا وندوي معاها .. بعد المرات كنت كندير معاها أپيل ڤيديو وماكنتش كنكون لابسة الفولار بعد المرات كيكون الصهد كنكون لابسة غير ديباردور بوحدو راكي عارفة بوحدي فدار مامعايا حد جهة عنقي عريان درعاني المهم هي فديك اللقطات كانت كتصور فيا وانا مافخباريش نهائيا ..

- أمينة ( شدات على فمها ) : اويلي أستغفر الله العظيم واش هادي من نيتها ؟

- يسرى ( تنهدات تنهيدة طويلة كتفكر هادشي كيضرها خاطرها) :

واحد النهار جا محسن لدار طاير ، كيغوت ويخبط فالماعن وكيبكي بدموع تلاح على رجليه وكيقولي اش درت ليك علاش ديري هكا اشمن عيب صرفت فيك .. المهم نوضناها وانا معارفاش شنو وقع ومافهمت والو كنشوفيه هز ليا حوايجي وشد بيا الطريق جابني لكازا لدارنا طريق كلها كيبكي حتى وصلني لدار كان خويا طارق وبابا منين سولوه وراهم شي سكرينات ومكالمة من شي حد ، شي واحد سونا ليه قاليه طلق مراتك راه مكتبغيكش كتبغيني انا وراه مقاداش تقولها ليك انا وياها كنبغيو بعضياتنا قبل متعرفك وغير كنا مخاصمين ..

- أمينة ( حلات عينيها على تيساع من هول الصدمة ) : لا حول ولا قوة الا بالله العلي العظيم شكون هدا ؟

- يسرى : انا ماعرفتوش بقيت نحلف وكنبكي بدموع بلي مادرت والو ، لدرجة خونا جا لعندو للخدمة او وراه شي تصاور وشيفيديوات المهم شكلي فالعكلي وعاد سكرينات لي فيهم أبيل فيديو وانا بديك الحال بلا فولار ونصي عريان ..

- أمينة : ماقلتيش ليه راه ختو مولاتها ؟

- يسرى ( بنفي ) : ختو خرجات من بالي وماتوقعتهاش ومع حمارة كنشوف فتصاوري وكنقول منين جاوه ونسيت بلي دوك تصاور فاش كنت دايرة ابيل مع ختو .. ماخليت كيدرت والو طلبتو ورغبتو نسوني يقطع عليا بلوكاني سونيت ليها هي عايراتني وبلوكاتني مو لي مسكينة كتقولي الله يهدي النفوس ..

- أمينة : ناري شيطانة فسيفة ديال الإنسان

- يسرى : صافي عييت وليت عاطياها غير لسكات طلقت منو وماطلبت منو حتى حاجة راه شتي ورا الطلاق شنو داز عليا الخدمة لي هزات عليا الدقة

- أمينة : وباش عرف هو لي وقع ؟

- يسرى : عندو شي صاحبو فالبوليس عاود ليه لي وقع وراه سكرينات و قلبو على هداك عرفوه فين ساكن حيت الوقت لي جا عند محسن لخدمة محسن ضربو وهرب .. ايوا عاد عرفو بلي هداك كان مع ختو شي 5 سنين وهي معاه ودارت داكشي حيت خوها عرفني غير ف ضرف 4 شهور وتزوجنا حلفات حتى تخرج عليا

- أمينة : ياربي السلامة الحسد سم والغيرة وهي لي ختارت تكون مع شماتة كون بغات الرجال لي يقصدو البيبان كون جمعات راسها

- يسرى : خوها تصدم دخل فإكتئاب حيت هي صغيرة فيهم وعزيز عليها وكيدير ليها الخاطر ولي حلات عليها فمها تلقاها ، باها هلكها عصا شيخي كان درويش ختى فطلاقنا حاول يدخل بخيط بيض ولكن فاش الامور وصلات لصح سكت .. وهي راه سيفطوها لعند شي خالتها فالعروبية

- أمينة : وراه معدور الصراحة واخا هكاك بقيتو فيا بزوج والله شيطانة دخلات بيناتكم

- يسرى : قاصحة أختي والله ماعرفتش واش نقد نسمح ليه ولالا جاب دارهم وطلبو السماحة مني ومن بابا ودارنا وماخلا مدار ولكن حلفت منرجع

- أمينة : مزال كتبغيه ؟

- يسرى ( شافت فيها ونزلو دموعها ) : بزاف والله ولكن ماعرفتش واحد الحاجة فقلبي مقاداش تسمح ليه

- أمينة : عطيه فرصة راه انت ويوقع هكا راه غادي ديري بحالو وكثر كاع .. الانسان كيغلط شافوكم بيخير ودخلو بيناتكم حاولي تشوفي الكاس العامر من الكاس ولكن رجعي بشانك ومرشانك واخا تعرفي يدير ليك عرس جديد ويدبح عليك

- يسرى ( كضحك ) : بغيتي ازرود أنت

- أمينة ( هزات عينيها فالكليان لي دخل او وقفات ) :

عزيز عليا دجاج بدغميرة .. خلاتها ساهية فالبوكي لي قدامها ومشات تشوف الكليان شنو بغا ..

- ݣالسة فالبيرو ديالها شادة التيليفون كتدوي بلباقة وبكل هدوء :

ضروري الله يخليك تلقاي ليا وقت خاصني ضروري نشوفو ؟

- ( فالجهة لوخرى ) منقدش نواعدك ولكن غادي نشوف الپروݣرام ديال موسيو فاروق وباشما كان نعلمك هو دابا مكاينش ، ولكن واحد 3 جوغ غايكون هنا ..

- ماريا : داكوغ عفاك ضروري قولي ليه شركة سام داي وباشما كان علميني راه تيليفون ديالنا عندك

- داكوغ مدموزيل إن شاء الله

- ماريا : ميغسي .. قطعات التيليفون تحل البيرو ديالها وطل عليها وليد :

شنو درتي ؟

- ماريا : يلاه قطعت مع لاسوكريتير ديالهم من هنا لواحد 3 جوغ غادي يكون فكازا حيت قاتلي نسافر

- وليد : هادي عندك

- ماريا ( بإبتسامة ) : صافي دوينا .. رض عليها الباب مشا وهي كملات الخدمة لي كان قدامها .

••••••••••••••••••

- ‏"ويبقى أفضل شُعور هو التجاوز، تجاوز الظنون، وتجاوز المشاعر، تجاوز الفترات والمواقِف، وحتى تجاوز الأشخاص، أشخاص كانوا بيوم كُل شيء بالنسبة لك، ولكنك تجاوزتهم كأعمِدة إنارة مُنطفئة بنهارٍ مُضيء، شعور مُريح ومُطمئن."

- سالة خدمتو مع 9 ديال الليل كيحس بكولشي مجموع عليه العيا وستريس الخدمة لي مكاتساليش فينما يݣول شد راس الخيط يضيع من بين يديه هادشي كامل لي واقع ولي لقاوه ومزال مكافيش بنسبة ليه .. سونا التيليفون ديالو نزل عينيه لشاشة طلعات ليه سمية يوسف طلق الخط :

وي يوسف ؟

- يوسف : دويت مع السمسار لي عاودت لك عليه كاينة واحد الدار الى بغيتي تشوفها

- عماد : فين جات ؟

- يوسف : فالحاج فاتح الى بغيتي نمشيو غدا نشوفوها ؟

- عماد : صافي إن شاء الله حتى لغدا الله يحفظك ايوسف ..

- يوسف : الله أودي مرحبا يلاه تصبح على خير .. قطع معاه الإتصال ، رجع سونا شاف فشاشة طلعات ليه سمية الروطال فتح الخط :

فين احبيبي توحشناك ؟

- الروطال : مابقى والو وغانطلع ليك فراسك فين هاني أمورك غادية مزيانة ؟

- عماد : يخطيك اخويا المشاكل تعيش بيخير إيمتا ناويين ترجعو ؟

- الروطال ( حنحن بصوت رجولي ) :

3 يام وحنا معاكم ، اش كاين انت شنو تم ؟

- عماد ( دور لسانو وسط فمو .. خدا ݣارو شعرو مخرج يدو من السرجم ديال الطوموبيل ) :

كنقلب على الكرا غادي نخوي

- الروطال ( بان الإستغراب على صوتو ) :

أش تم ؟

- عماد : الواليدة اخويا قهراتني كدخل فصغيرة والكبيرة بغات تزوجني ݣالت ليك .. شافت ليا شي بنت صاحبتها انا نفاعلت کلت ليها كنبغي يسرى

- الروطال ( غوبش ) : إيوا ؟

- عماد : ياكما الواليد حداك ؟

- الروطال : لا غير دوي .. ، عاود ليه شنو ݣالت على البنات وعلى يسرى

- الروطال ( تصدم ) : واش الواليدة ݣالت هاد الهضرة ؟

- عماد : واييه حتى انا راه تصدمت قسما بالله ، وزادتها مشات لعند البنت للخدمة بغات تأكد واش بيني وبينها شيحاجة ، عاودات ليها بلان هاديك بنت صاحبتها وكتعمر فيها باش ترجع لراجلها بلعاني وضد فيا

- الروطال ( ماستوعبش ) : هادشي فشكل اخويا ، ولاش غادي تكري أجي سكن معايا الدار كبيرة

- عماد ( برفض ) : لا اخويا عارفني كيداير جيني لهاد البلان وغير قلب الله يرضي عليك

- الروطال : ماݣلت والو المهم نجي وندويو فهادشي ..

- عماد : متݣول والو للواليد عارفو كيداير مغايعجبوش الحال

- الروطال : كون هاني يلاه تهلا .. قطع معاه وصل لدار بلاصة الطوموبيل ، طلع دوك 4 درجات فتح الباب ودخل .. لقاها ݣالسة لابسة فراشة وشادة الهضرة فتيليفون كضحك ..

- خديجة : ولا أصاحبتي العراضة عندي انا لولة وعاد ديك ساع نمشيو عندكم .. إن شاء الله وعندك تنساي متقولي لسي أحمد وجيبي معاك نرجس صافي ؟ يلاه هاهو عماد ولدي نيت عاد دخل بسلامة حتى لمن بعد .. ( قطعات وشافت فيه بإبتسامة ) ولدي على سلامة تعشيتي ؟

- عماد ( ببرود ) : تعشيت الحمد لله غادي نطلع النعس بغيت غير نعلمك بلي لقيت واحد الدار غادي نكريها إلى سهل الله غادي نتحول ليها ..

- خديجة بانت الصدمة على الملامح ديالها ) : كيفاش ترحل ليها وعلاش ومعامن تشاورتي ؟

- عماد ( بهدوء ) : كيفاش معامن تشاورت تشاورت مع راسي فعمري 32 عام الحمد لله بخدمتي وݣاد نكري ونعيش بوحدي

- خديجة ( بإنفعال ) : كيفاش غادي تكري عمرك نويتيها ياك باك باغيكم تبقاو مجموعين ؟

- عماد : هادشي شحال هادي الواليدة ، الناس راه هاجرو لبرا انا راه معاكم فنفس المدينة الوقت لي بغيت انزوركم وتزوروني .. عصام راه قليل فين كيجي فاروق حتى هو راه بدارو جات عليا غير أنا وماجدة مابقا ليها والو تجي وتعمر عليك

- خديجة ( وقفات قدامو ) : بين ليلة ونهار تبدلتي أش كاين اعماد ؟

- عماد ( بنفس البرود ) :

مكاين والو الواليدة غير انا بغيت نسكن بوحدي وهدا حقي ، حاجة خرى دويت مع يسرى كيبان ليا ناوية ترجع لراجلها

- خديجة ( بإبتسامة ) : وحسن ليها مكاينش شي عزري ياخود وحدة مطلقة من غير إلى كان هبيل

- عماد : كون كانت ماجدة لي مطلقة كنتي غاتݣولي هكا

- خديجة : أعوذ بالله الله يحفظها وينجيها بنتي مابحالها حد وبنتي غاتديه سيدي ومولاي ولد القاع والباع

- عماد ( هزهز براسو ) : واخا أميمتي ، غير هو بغيت نݣوليك أنا ضربت على زواج مغاندي لا يسرى لا غيرها هكا غانبقى ( باس ليها راسها ) تصبحي على خير .. طلع حادر راسو وقلبو مهرس ألف تهريسة البكية حابسها بسنانو كيحس براسو باغي غير يغوت على حر جهدو ، خلاها واقفة متبعاه بالعين وملامح الدهشة باينة على وجها ..

•••••••••••••••

"‏‎مِن أصعبِ الفتَراتِ التي مِن المُمكن أن تمُر عليگ

هي غيَّاب شخصٍ تَعوَّدت عليه تعوَّدت على رسَائِله..، تعوَّدت على سماعِ صَوتِه..، تعوَّدت أن تعيشَ معه تفاصِيل حياتِگ..؛ سَـ تتَأثر بعد الغيَّاب..؛

لن تنسىٰ العَادات ولا المَواقف ولا الأحداث..، سَـ تبقىٰ كلُّ التَّفاصيل عالِقة بِـ جُدرانِ الذَّاکرة..!!

بـعــد مـرور 5أيـــام

- قدام مطار محمد الخامس .. واقف طاكسي أحمر واقف قدامو لابس سروال دجين مع سبرديلة تيشورت فالكحل نظارات شمسية وكاسكيطة .. سمع سونيت ديال التيليفون ديالو فتح باب الطاكسي هز تيليفون طلعات ليه نمرة مكتوب عليها رشيد ..

- عزيز : وي رشيد أش تم ؟

- رشيد : مادواتش معاك عنبر ؟

- عزيز : لا من نهار دويت معاها فاش غزيتها فسيد لي مات ليهم مابقاتش سونات وحتى أنا تلهيت مع الخدمة راك عارف أش وقع ليا ..

- رشيد : ايوا صافي شنو عندك دابا ؟

- عزيز : انا قدام المطار الى كان شي كليا نوصلهم بغيتيني ؟

- رشيد : صافي سير حتى تسالي حيت عنبر سونات ليا على واحد لافير حتى تسالي ودوز عندي

- عزيز صافي تهنا .. قطع معاه رجع التيليفون وبقا واقف كيتسنى ، خرجات بنت من البوابة لابسة سروال دجين مع سبادري مريحة دوني فالبيض وشوميز فالخضيضر بارد محلولة ، شعرها طالقاه عسلي بشرتها سمرة عينيها خضرين مشفرين شفايفها كبار منفوخين معكراهم بݣلوس قهوي لامع .. جارة البالز لجهتو وقفات قبالتو ونطقات بصوت أنثوي مرح وإبتسامة :

خويا خدام ؟

- عزيز ( طلعها وهبطها هزهز ليها براسو ) : وي ختي مرحبا .. خدا من عندها البالز دارهم فالطاكسي ، ضار لقاها طلعات فالجهة لي حداه طلع للبلاصتو وشافيها :

فين أختي ؟

- ( شافت فيها ) عين الذياب ڤيلا حيدر إلى كتعرفها عفاك ..

- وصلها لقدام باب الڤيلا نزل كيدور عينيه عليها .. نزل ليفا البالز ديالها او وقف كيتسناها تخلصو ، جبدات بزطامها خلصاتو وبإبتسامة :

عفاك واش ممكن تعطيني نمرتك نسوني لبك الى بغيت نمشي لشي بلاصة .. الصراحة عندي الپيرمي وكاينة طوموبيل دياليولكن مكنقدش نسوݣ فكازا كنخاف وكيبقاو يديا يترعدو ومتبقيتش سݣت من واحد نهار كنت خارجة وخرجت فشجرة حيت كان واحد تريپورتور جاي قبالتي ايوا تفافاو يدي وماعرفت كيفاش حتى ( قاطعها بصوتو لي كان باين منو بلي عصباتو ) ..

- عزيز : صافي أختي صافي مكاين لاش تعاودي قصة حياتك بغيتي نمرة نعطيها ليك قيدي عندك

- ( بقات كتشوفيه بلعات ريقها جبدات تيليفون مداتو ليه يقيد نمرتها ) قيدها

- عزيز ( بقا كيشوفيها هزهز براسو وشد عندها التيليفون قيد نمرتها ، رجع تيليفون ونطق بصوتو الرجولي ) ماتبقايش تمدي تيليفون لاي واحد عرفتي يݣد فغفرة يطيرو ليك

- ولكن أنت مبايناش عليك شفار راك شيفور ديال طاكسي

- عزيز : واخا نكون شيفور ديال الطيارة رضي البال شوية راك مكايناش فالإمارات لي مافيهاش السرقة لا حول ولا قوة إلا بالله العلي العظيم .. عطاها بالظهر غادي وهي توقفو

- شكرا أخويا اسميتي ماجدة باش الى سونيت ليك تعرفني

- عزيز ( ضار عندها ) : وأنا عزيز .. ركب فطاكسي ديمارا ومشا

- ماجدة : معصب ياربي سلامة .. جرات البالز ديالها وسونات فالباب .

•••••••••••••

- فوحدة من القهاوي لي كاينين فپرانس كالسة هي وحياة ومعاهم رشيد كيتسناو فعزيز

- رشيد : شحال من واحد تواصل معايا واحد السيدة بغاتك فواحد الإيڤينمو وكاين واحد العرس بغاوك فيه شي الناس ، الڤيديو تنشر ولا طالع الأول فطوندونس هو والفيديوات ديال المهرجان

- عنبر : دابا غير نسى أرشيد ماما فاطنة شادة حق الله عندنا واحد 4 شهور و 10 يام سير منشدو الخدمة حتى لشهر 1 إن شاء الله

- رشيد : ولكن لا إلى كانت هي شادة حق الله خدمو أنتوما بعدا دورو الحركة بعدا تلقاي ماتحطي باش الناس يتفرجو ويعيطو عليك أنت وحياة والبقية فالكافية

- عنبر : وحنا دابا مزال ناقصينا 3 ديال البنات وعاد الدراري لي قلت ليك

- رشيد : شوفي دراري خليهم عليا غانشوفليك مع دراري ناضيين وحتى لمطارييل ماضربيش ليه الهم هداك بوحدو حتى هو

- عنبر ( سهات فالفراغ رجعات هزات راسها فيه ) :

يونس السيد لي شفتيه كان مع ماما فاطنة قاليا بلي غادي يخصني منادجير انا مكنفهمش فهادشي

- رشيد : عندو الصح المنادجير هو لي كيشد ليك الخدمة ديالك هو لي كيتافق على الثمن وهو لي نمرتو كتكون فصفحة ديالك الى بغا شي واحد يتواصل معاك المهم اي حاجة كتخص خدمتك ومصلاحتك هو لي كيقوم بيها ..

- عنبر ( جغمات من العصير ديالها ) : ومنين غانضبر على هاد المنادجير انا ؟

- رشيد ( هزهز براسو ) : الصراحة ماعرفتش المهم خاص تشوفي شي حد لي ثقة لي يخدم معاك على قبل مصلحتك أنت ماشي مصلاحتو هو ..

- حياة ( شافت فيه ) : مكاين ماحسن منك انت

- رشيد ( رشف من قهوتو ) : لا انا غير عفيوني .. يلاه نقابل الأوطيل وشغالو مغانݣدش نسق بين جوج ديال الخدامي

- عنبر : خلي لوطيل ماتبقاش خدام فيه

- رشيد : ياك الالة لا منکدش .. ( السلام عليكم ) ، هزو راسهم فعزيز لي جا جر سلم عليهم وݣلس

- عزيز : عنبر لاباس عليك امورك مزيانة ؟

- عنبر : اللهم لك الحمد هاد الساعة

- عزيز ( شاف فحياة ) : شنيولة دخلتي فالعصير طول وعرض ابشوية عليك دابا تغلاضي

- حياة : مالي ݣالسة كناكل فشوا راه أعصير ياربي سلامة كيما شتيني تخليني ..

- عزيز ( شير لسرباي ) : خويا .. ( جا السرباي لعندو ) عفاك واحد القهوة نص نص ، هزهز ليه براسو ومشا ( شافيهم ) أش تم

- رشيد ( عاود ليه كولشي ) : هادشي لي كاين

- عزيز : وبلان مزيان هذا بعدا الأعراس ولا ليزيڤينمو ولا المهرجانات محتارمين ماتسمعيش شي كلمة خارجة سطر ومن بعد منين تشهري تشوفي شي كاتب كلمات وملحن وديري الألبوم ديالك تحطيه فيوتيوب ديري قناتك واربحي من جوج ديال الجوايه ..

- رشيد ( دار رجل على رجل ) : ايولي عندك الربح مضوبل من العراسات ومن القناة ديالك ، ويوليو يعيطو ليك حتى لسهرات فتلفازة ( أش براسو للعزيز ) ها عزيز ديريه منادجير

- عزيز : من نيتك لا اخويا انا كنسوݣ غير طاكسي ، خدمتي شيفور داكشي ديال سوشيل ميديا ماعنديش معاه مالك أنت ماديرها

- رشيد : والاوطيل نخليه ؟

- عزيز ( شكر السرباي لي حط ليه القهوة وكمل كلامو ) خدام ليا فأوطيل حيدر الله يهديك اصاحبي انت عارف وانا عارف

- رشيد : واخا هكاك مجاتش نخليه السيد شحال هادي وانا خدام معاه نجي ندابا نخوي بيه

- عزيز : سينين وانت خدام معاه درتي طايلة والو اشنو درتي بلاما نكدبو على بعضياتنا والواحد هو لي يبدل الحرفة بعدا تهنا من ديك وجه النحس دفرح وحتى داك الكاس لي مرة مرة كتجغمو

- رشيد ( خرج فيه عينيه ) : أيوا عزيز

- حياة ( خرجات فيه عينيه ) : ويلي يارشيد كتشرب صدمتيني طحتي من عيني ماضنيتهـــــــــــاش ( جبداتها ) فيك ..

- رشيد : ومالك كتجبدي فيها زعمة بحال الى كنقطع الريوس !!

- حياة ( كتشوفيه بنص عين ) : إيوا زعمة مكاتبانش عليك بداك شاپو على راسك وطوموبيل والحالة

- رشيد : دابا معيور معيور

- عنبر ( كضحك ) : وراه عندها الصح واحد بحالك مخاصو كاع يبقى وسط داك العفن المعفن ، الى شديتي ليا الخدمة وانت عندك المعارف والناس كيعرفوك راه اتربح وخدمة نقية أرشيد وانت ماشي براني وأنا هاد الساعة انت وعزيز لي كنتيق فيكم حيت الوقت لي تسدو البيبان فوجهي انا وحياة ..

- رشيد بقا ساكت كيفكر ، شافيه عزيز محرك ليه راسو :

فاش كتخمم اصاحبي زعم تاكل اللحم ..

- بــوزنـيـقـة 📍 وقفات طوموبيلتها فالبلاصة المخصصة .. نزلات كتقاد فلاڤيست ديالها هازة ملف فيديها وبواطة صغيرة .. لابسة سروال طويل كلوش من التحت ديال التوب مع ڤيست فالبيض ومن تحت شوميز فالأحمر شعرها طالقاه ريحتها كتعطي من بعدي كانت فكامل أناقتها ، هزات راسها كتشوف ضخامة الفندق لي قدامها الإسم لي كان متربع كبير بأحرف فرنسية ذهبية HAIDAR HÔTEL BOUZNIKA ، الواجهة ديالو كانت مصبوغة بالݣري بيبانو كلهم زاج .. أما الممر لي كيدي ليه كان كلو ضاير بشجر وربيع عاد الباب الكبير ديالو لي كان عندو إطار فذهبي بهراتها البلاصة وكونما كانت خايفة انها تعطل كانت اتبقى واقفة تفرج فجمالية الأوطيل ..

- حدرات راسها ورسمات إبتسامة على وجها وتوجهات نيشان لباب الفندق تحل فورما وصلات عطاها تحية السيد لي واقف حدا الباب هزات راسها فالاوطيل لداخل لي كان أكثر روعة من برا لي فوتوي لي كانو فالݣرونة ديال الموبرة وتريا الكبيرة لي مدلية من السقف الحيوط لي كانت خليط بين البيج وبين الذهبي .. فكل قنت كانت شجيرة صغيرة وعلى جميع الحيوط كانو معلقين ديكورات ديال الخشب منحوتين .. مشات نيشان للإستقبال :

سلام عفاك ماريا رشدي عندي رونديڤو مع موسيو حيدر

- مرحبا اتاخدي لاسانسوغ الطاج 3 اتلقاي الإدارة

- ماريا : ميغسي .. توجهات لاسانسور دخلات ليه ضغطات على الزر 3 لاسانسور كان ديال الزاج كيبين ليك الاوطيل ولي فيه وصلات لطاج خرجات .. كل طاج كيبهرها على الثاني وطاج ديال الإدارة كتحس براسك فشركة منفصلة على الأوطيل بموظفين خاصين ..

- سولات فالإستقبال ديال الإدارة وجهوها للبيرو ، قدات لاشوميز ديالها لايحة بشعرها وصلات فين وراوها كانت ݣالسة لاسوكريتير ديالو لي كانت فنفس السن ونفس الاناقة ديال ماريا

- ݣلسي أنا نشوف موسيو فاروق واش سالة الإجتماع ديالو .. ݣلسات ماريا كتسنى كدور عينيها حداها فديكور ديال المكتب حتى رجعات عندها :

موسيو فاروق أيكون واجد باش يشوفك من هنا ل 5 دقايق واش نجيب ليك سيحاجة تشربيها ؟

- ماريا ( بإبتسامة ) : لا شكرا .. بقات كتسنى مرة مرة تشوف فساعتها ݣالسة على أعصابها تجمع عليها التوتر والخلعة ديما كتكون تايقة فراسها ومن خدمتها داكشي باش ولات من احسن ليكوميرسيال لي فشركة ديالهم ..

- شعلات بولة صغيرة حدا البيرو باللون الأخضر وقفات لاسوكريتير بإبتسامة :

مدموزيل ماريا اجي معايا .. هزات ماريا الملف وديك الكارطون الصغيرة وتبعاتها حلات باب فاللون القهوي مغلف بجلد وقفات كتسناها تدخل دخلات وهنا زادت نباهرات بكمية المنحوتات الخشبية لي فداك البيرو لي كان كبير ..

- تفضلي هاهو غايجي .. خلاتها وتخرجات سادة الباب وراها حطات الملف وديك الكارطونة على الطبلة ماقداتش تݣلس وهي كتشوف هاد الفخامة والجمالية وتنسيق الألوان لي كيجمع بين القهوي وذهبي والبلو مارين ، مكتب كبير فوق منو زوج ديال الپيسيات واحد كبيرة ولاخر صغير عدة اوراق منظمين محطوطين .. تيليفون كرسي كان مصنوع من الجلد نوعية المريحة لي مكايضرش فظهر ، عدة مداليات ذهبية مزينين واحد الأطار مذهب ..

- اما الجهة الأخرى مصور بلباس الخيالة كيسلم على مولاي رشيد .. وصورة اخرى هو والبارضية فوق الخيل وعدة صور ليه فمهرجانات منحوتات خشبية خاصة بالخيل مزينين الطبلة لي وراه عاد تلفازة كبيرة پلازما معلقة الحائط لي كان وراه ..

- عجبوك ؟ .. تنفضات من بلاصتها بصوت القوي الغارق التقيل لي جا وراها هذا اول إنطباع خدات من صوتو الصوت لي كان لايق على مولاها مكانتش كتخيلو بهاد الوسامة وكمية الرجولة لي كتشوف قدامها من نوعية الرجال لي غير الحضور ديالو كافي يخليك تحس بواحد العبة او واحد التبوريشة طالعة معاك غير صوتو كتحس بدقات قلبك دايرين سباق بيناتهم .. فكامل اناقتو واقف قدامها ببدلة رسمية فالأخضر وشوميز محلولين ليه الصدايف فالبيض ونظرات عملية تبسمات بتوتر :

الصراحة البيرو ديالك تحفة اموسيو حيدر كنحس براسي بحال الى كاينة فمتحف تبارك الله ..

- الروطال ( فلاها بنظراتو صدرات منو إبتسامة خلابة أشر ليها بيدو ) : ݣلسي

- ݣلسات على الكرسي كتحس بيديها باردين بلعات ريقها مراقبة حركاتو .. مشا للجهة لي فيها الطبلة الطويلة كانت محطوطة بواطة ديال الزاج حلها وقربها ليها تبسمات ليه وخدات منها شوكولا وحدة .. رجع البواطة للبلاصتها كحز الكرسي ديالو وݣلس كيشوف فيها هزهز براسو للجهة الشوكولا :

مغاتحليهاش ؟

- ماريا : اه ( حلاتها كلاتها مكمشة على الكاغط بيديها )

- الروطال ( مركز نظراتو مع حراكتها ) : كيجاتك ؟

- ماريا ( كتحرك فمها بإبتسامة ) : زوينة بزاف وبنينة الصراحة

- الروطال ( رجع بظهرو اللور حاط يدو على فمو مراقبها ) :

شكون حسن هدا ولا النوع ديالكم ؟

- ماريا ( تصدمات من الدكاء ديالو عطاها شوكولا باش يجس النبض ديالها ويحصلها يعرف رايها واش شكلاط ديالهم يستاهل ولالا ) :

الصراحة حتى هذا زوين ولكن الشوكولا ديالنا كثر ديجا شبعت معايا شونتيو باش دوق

- الروطال ( وقف ) : مكاناكلش الحلاوة وانا جيعان

- ماريا ( بلعات ريقها هاد السيد لي قدامها كيوترها ) :

ولكن خاص ضروري دوق

- الروطال ( ضار من ورا البيرو ) : ناكل وندوق تغديتي ؟

- ماريا ( فاجأها السؤال ) : الصراحة لا ماش( قاطعها )

- الروطال : الريسطو ديالنا كدير ماكلة بنينة غاتعجبك .. بقات كتشوفيه مصدومة من تصرافاتو وشخصيتو مافهمات فيه والو

- الروطال : اتبقاي كتفكري بزاف ؟

- ماريا ( ستوعبات راسها وقفات هازة ساكها ) : لا واخا .. خرج قبل منها مخليها تبعو غادي بتجاه لاسانسور وهي وراه كتحاول تجيري خطواتو السريعة ، دخلات معاه لاسانسور شادة على قلبها ريحتو الرجولية مع ريحة العطر ديالو كان مزيج كيدمرحواس وخلية كل مرأة .. الصمت كان هو سيد المكان تحل لاسانسور وخرجو جميع المواظفين ماعطاوش حتى اهنية كانو مكملين شغالهم بحال الى ماشي هو مول الشي حاجة لي ستغربات ليها ماريا بينها وبين راسها .. هو سابقها وهي كتمعن فرجليه الطوال لي كيخليوه يدير خطوات واسعة ويسبقها ولا ظهرو العريض ودرعانو القويين لي كانو واضحين لأي واحد .

- دخل للمطعم توجه للطبلة لي خاوية مكانش من النوع لي يبقى يعزل ݣلس وهي بدورها ݣلسات قبالتو .. هز القائمة ختار شنو غادي ياكل وحتى هي بدورها جا السرباي خدا طلابتهم ومشا ..

- الروطال ( هز فيها راسو ) : مالك ؟

- ماريا ( تنهدات تنهيدة طويلة) : لا غير فلعادة الى مول شي كيدخل لشي بلاصة كتلقى كاع الموظفين كيسلمو عليه جاتني عجب

- الروطال ( ببرود ) : علاش غادي يضربو ليا السلام مالي ولي عهد النمسا ؟

- ماريا ( ضحكات ) : لا ماشي هكاك المهم اجاني عجب وصافي

- الروطال ( متبع حركاتها والإبتسامة ديالها ملامحها وشعرها بتموجاتو وخصلاتو الرقاق الذهبية ) :

انا لي طلبت منهم يحيدو ديك العادة مكنرتاحش فيها ..

- ماريا : اه مزيان واش ندويو على الخدمة غير باش منضيعش ليك وقتك

- الروطال : كون كنت زربان كنت غادي نشوفك فصباح مزال الحال نتغداو بعدا

- ماريا ( بلعات ريقها ) : واخا

- الروطال ( من بعد مدة من السكات ) : علاش لي مندويوش عليك انت مثلا ..

- فالحاج فاتح أونفاص حدا جامع وقريب من المارشي .. خارج عماد او يوسف ومعاهم السمسار او واحد السيد

- السمسار : أش بان ليك اسي عماد ؟

- عماد : الدار زوينة عجباتني المهم غير مايكونوش الجيران فيهم الصداع الخدمة ديابنا صعيبة كنبغي نجي نرتاح ..

- مول الدار : أسي عماد داري انا هي الفوقانية كنضمن ليك وضامن هو الله الجيران شادين تيقارهم مافيهمش المشاكل وصداع وقليل فين تسمع حسهم ..

- عماد : حتى انا داكشي لي بغيت حسن غير الهنا وراحة البال وحتى انا راه ماتلقاش معايا المشكل دابا شنو درنا فثمن مغاتنقصش شوية ..

- حسن : والله العظيم الى 3000 درهم هو الجهد راه كنت داير ليها 3200 ولكن حيت شكركم سي جمال ݣلت ندير معاكم ثمن مزيان

- عماد : وغير شوف كيفاش دير غادي نوليو جيران إن شاء الله وحتى أنت الى حتاجيتي شيحاجة مرحبا

- حسن : الله يكبر بيك ( سكت كيفكر ) واخا اسيدي 2800 درهم هذا هو الجهد

- عماد : واخا اسيدي مرحبا .. ركبو فطوموبيل عماد باش يكملو الإجراءات كتبو عقد الكراء وقادو امورهم خلصو عماد تم تم ودور مع السمسار تدويرة ديالها رجعهم للحاج فاتح وشد الطريق هو ويوسف للخدمة

- يوسف : مبارك ومسعود اسيدي

- عماد : الله يبارك فيك وصراحة فهادي خدمتي معايا فيها مزيان

- يوسف ( كيضحك ) :

وشنو حنا عسكر ولا زمر ، أشنو غادير فالفراش ؟

- عماد ( عينيه مع الطريق ) : كاين واحد السيد كنعرفو عندو هادشي ديال ليموبيليي ، غادي نهز من عندو المهم ونخلص ليه من بعد المهم الحوايج لي مهمين بيت النعاس تلاجة ماكينة الصابون ، ( شافيه ) وياك الى شتي الروطال ولا الواليد تݣولها ليهم مابغيت حد يعطيني فرتيتة ديك الأخرة

- يوسف : عرفناك مكتبغي حد يعطيك واخا مخاصكم خير

- عماد ( شافيه ) : سلامة ياربي ݣول غير تبارك الله

- يوسف ( كيضحك ) : تبارك الله تبارك الله ولكن بيني وبينك خوك تبارك الله راه أوم دافير وعصام بخيرو ولد خالتك باك تريكتك وباغي تهز الفراش

- عماد ( غوبش ) : ماشي شغلي لي عندو الله يزيدو وحتى انا خيري غادي بيه .. واخا تكون عائلتي من الطبقة المخملية كيعجبني حاجتي نديرها لراسي

- يوسف : صافي ماكلت ليك والو ( سكت مدة ورجع شافيها ) هاد السكات ماعاجبنيش

- عماد ( بإستفسار ) : من أشمن نحية ؟

- يوسف : من جهة لافير لي شادين من البنت لي لقينا مابقيناش لقينا شي ضحية أخرى .. العائلة ديال البنات كيسونيو مامرة ماجوج ماعندنا مانݣولو ليهم ..

- عماد ( دوز لسانو على شفايفو ) :

الصباح خرج تقرير الطب الشرعي

- يوسف ( شافيها بإستغراب) : ماݣلتيهاش ليا ؟

- عماد : عقلي عامر وكنا بغينا نشوفو الدار ، الجثة كان فيها كمية من المخدر محيدين ليها القلب والكلاوي وحتى طيحان

- يوسف : دابا كيشدها كيبنجها وكيفتح ليها ياخود لي بغا وكيخيطها ويلوحها ، بعدا لي لقينا راه لاحها يݣد البقية حرق**هوم باش مانلقاوش لجثة ديالهم ..

- عماد : ماشي بضرورة هذا لي كيتزوج بيهم هو لي كيفتح ليهم ( شافيه ) غادي يكونو مخدمين معاهم واحد إختصاصي فالجراحة فهمتي

- يوسف ( جبد ݣارو شعلو ) : غادي يبقاو فيا غير العائلة ديال البنت منين غاتمشي تعلمهم بلي لقيتي الجثة ديال بنتهم

- عماد ( تنهد تنهيدة طويلة زافر بقوة ) :

هادشي لي مابغيتش ومݣادش عليه ، كون غير درتيها انت وعفيتيني والله

- يوسف : علاش أنا ؟

- عماد : راه خدامين بجوج اشريف ، ماشي غير انا غادي نوصلك علمهم ورجع فطاكسي

- يوسف : ماتسنانيش ؟

- عماد ( شافيه ) : واش انا مسالي عندي عرمة مايدار ، والعميد كينقب فوق راسي ومزال مكاينة حتى شي شقة دخل ضو

- يوسف : صاف واخا ..

•••••••••••••

- رشيد ( كمل كاسو دالقهوة ) : واخا غادي ندوي مع السيد نتفاهم معاه خاص اشوية ديال الوقت باش نقاد معاه اموري بينما لقى لي غادي يرومپلاصيني

- عزيز : ايوا دابا دويتي ( شاف فعنبر ) وانا علاش عيطو عليا ؟

- عنبر : إن شاء الله ماما فاطنة غادي يبيعو الدار لي فبن سليمان وبغاو يشريو هنا بغيت غير نوصيك على شي دار ولا على شي پارطما

- عزيز : وهادي راه ايعرف ليها رشيد راه دار دختو هو لي ضبر فيها

- عنبر ( شافت فرشيد ) : تشوف ليا ؟

- رشيد : بارطما مغاديش تقدكم شحال نتوما ؟

- عنبر : كاينة انا وحياة وكاينة ماما تودة وخالتي سميرة

- عزيز : وبارطما تقدهم يكون فيها ديك 3 البيوت وصالون ، بيت راه تقاسمو حياة وعنبر وبيت لتودة وبيت لسميرة وصالون يفرشوه والحمام وكوزينة ، اما الى خاصهم بيت بيت الواحد راه خاصهم دار فيها 2 إيطاج

- رشيد : الى كانو الفلوس راه ياخدو دار فيها جوج إيطاج اشوف شحال اتجيب ليهم دار ديال بن سليمان ..

- عنبر : الصراحة انا ماعرفتش شحال غادي تجيب ولكن الدار راه كبيرة بزاف

- رشيد : واش غاتكتبت بسميت تودة ولا ضرتها ؟

- عنبر : هدا عليا والله ماعرفت مزال مامأكداش المهم انت غير شوف ليا بعدا غير تكون بلاصة مزيانة مايكونوش فيها الناس ضاسرين وخايبين ، مقادين على صداع

- رشيد : صافي نشوف ليك

- عنبر ( شافت فعزيز ) : وأنت اعزيز بغيتك تخدم معانا تولي توصلنا تدينا وتجيبنا ، انا مامخالطاش كازا مافياش كل مرة نبقى نتسنى فطاكسي ومتعرف معامن تلقى

- عزيز : انا ماتلقايش معايا ݣرام ديال المشكل .. (شاف على برا فطاكسي لي كيسوك وتبسم رجع شاف فعنبر ) ديما غاتلقاي طاكسي 7117 فالخدمة

- عنبر : صافي وخلاصك راه على حسابي

- عزيز : انا غير نوصل الروسيطو لي متافق عليها مع الباطرون حتى حاجة خرى منضرب ليها حساب

- عنبر : الى سخر لينا الله وتزوهرات الوقت ، راه تدي روسيطة وفوق الروسيطة لهيه بغيت يضورو بيا الناس العزاز لي ثقة .. راه لا انت لا رشيد والله القسم الى خليتوني نرتاح شوية ونعرف بلي الخير مزال كاين ..

- عزيز : ولاد الناس مزال كاينين اختي الله يلاݣينا مع ماحسن منا

- عنبر : اللهم أمين ياربي ( شافت فرشيد ) إيمتا غادي نبداو ارشيد ؟

- رشيد : من غدا الوقت لي بغيتي ، خاصك بعدا تبداي دربي باش تبداي الخدمة بينما حيدات ماماك حق الله ..

- عنبر : صافي إن شاء الله

- رشيد ( شاف فحياة شاد فيها ) : هاي هاي على شنيولة والبندير إكرام العبدية صافي

- حياة : بقا تريݣل عليا لي تعجب يتبلا دابا نحنتك وتشوف فين تبان شي إكرام

- رشيد ( كيضحك ) : لالا باين العربون

- عنبر : انت وياها مكاتقاداوش ، يلاه خاصنا نمشيو عزيز توصلنا ؟

- عزيز ( وقف ) : يلاه ( شاف فرشيد ) الخلاص على حسابك ( غمزو )

- رشيد : كندم علاش كنتقهوى معاك سير سير .. خرجو البنات وعزيز ورشيد خلص وشد الكريق للخدمة ..

••••••••••••••••••

- واقف شاد تيليفونو بيدو وكيتفرج فالفيديو ديالها ، دخل ليوتيوب وكتب سميتها طلعو ليه فيديوات أخرين ديال المهرجان .. كيعض على شفايفو بعصبية معصب حس بيدين رطبين على عنقو وبوسة تطبعات على طرف ودنو بعد راسو مبعد ..

- ( باللغة الإسبانية) حبيبي مالك ؟ من قبيل وانت شاد التيليفون وماشي على برجك ؟

- بدر ( مكايشوفش فوجها نسى راسو كيدوي بدارجة ) : عند بالي غادي تكون سادة عليها وكتعدب السيدة عايشة ليا الحياة ݣاعما مسوقة تبارك الله عليها ..

- ( مافهماتش شنو كيݣول ) بدر شنو كاين مالك ؟ شنو كاين فداك التيليفون ؟

- بدر ( شافيها ) : الطليقة ديالي ألويز ولات كتغني

- لويز ( هزهزات كتافها ) : ومن بعد عادي كل واحد من حقو يعيش حياتو كيف بغا

- بدر : لا مخاصنيش ندوز من حياتها بحال جغيمة ديال الما ، بحال الى ماعندي قيمة انا ماشي اي واحد ألويز ..

- لويز ( كتحقق فيه بحال الى اول مرة تشوفو ) : واش يحسابليك الدنيا خاصها تكون كدور عليك ، مارضيتيش حيت عاودات حياتها من جديد بغيتيها تبقى كتبغيك وعمرها تنساك تسد عليها وتبقى تبكي على فراقك انت مريض والله ..

- بدر ( بإنفعال هز يدو وطرشها) : اخر مرة تݣولي انا مريض ( رموشو تابتين البؤبؤ ديال عينو تابت مكايرمش ) تعاود تخرج من فمك غادي نوريك هاد المريض اش غايدير خليني مبرد واخا ( جرها من راسها باسها فشفايفها ودفعها راجل لدار ) ..

••••••••••

- ماريا ( وهي كتاكل ) : صافي هادشي لي كاين وهادشي هي حياتي ( بإبتسامة )

- الروطال : هي كيعجبك الخيل ؟

- ماريا : بزاف والله داكشي باش عجبني المكتب ديالك

- الروطال ( هز عينو فيها ) : هي تبغي شي نهار تشوفيهم

- ماريا ( بحماس ) : واش بصح والله ماكرهت

- الروطال ( مسح على فمو ) : خليها عليا الى كنتي السيمانة جايا مسالية نديك شنو بان ليك ؟

- ماريا ( صدرها كيطلع وينزل من الحماس ماتيقاتش راسها ) :

والله ماكرهت صافي واخا

- الروطال : نخليوها السبت حيت مغاتكونيش خدامة

- ماريا : اه صافي واخا

- الروطال : دابا نݣدو نرجعو للمكتب ندزيو فالخدمة .. ناضو من على الطبعة سبقها وهي تابعاه فرحانة دقات قلبها سريعة من التوتر والفرحة بنسبة ليها حاجة كبيرة شخص بحالو يعرض عليها مكانتش ناوياها ، رجعو للمكتب ݣلسات ونطقات بحيوية :

دابا تقد دوق من الشوكولا ديالنا

- الروطال : مرحبا .. مدات ليه مورصو صغير الپاكدجين ديالو كان زوين وملفت عض عضة صغيرة كيتمدق بالمداق ديالو هزهز راسو بالقبول :

زوين المداق كاين والكاليتي كاينة

- ماريا ، بدات كتعاود ليه على المنتوج وتعرف بيه بكل حب كاين باين كتبغي خدمتها ومتمكنة منها كتدوي بكل شغف واريحية حاولات تقنعو من جميع الجهات .. :

الى خدمتو معانا اموسيو حيدر غادي نكونو فرحانين وبطبيعة الحال المصلحة اتكون مشتركة بيناتنا لا ليكم لا لينا

- الروطال ( مبعد راسو ساهي هز عينيه فيها ونطق بدبدبة صوتية تقيلة ) :

لاسوكريتير غادي تحدد رونديفو بين المجموعة ديالنا ومجموعتكم وديك ساع غادي نشوف

- ماريا ( بإبتسامة ) : وحنا غانتسناو الإتصال ديالكم موسيو حيدر

- الروطال ( وقف ) : فين غادي تمشي الى خرجتي من هنا ؟

- ماريا ( جاها سؤال مفاجئ ) : نيشان للدار إن شاء الله

- الروطال : صافي نوصلك منها نعرف لادريس ومنها ناخود نمرة ديالك

- ماريا : ولكن طوموبيلتي لتحت ..

- الروطال : ماشي مشكيل عطي لادريس ديالك للإستقبلال هوما غادي يوصلوها ليك مشينا ؟

- ماريا ( مالقات ماتقول من غير انها كانت فقمة الفرح والحماس فالداخل ديالها ) :

واخا ..

- فالڤيلا ديال حيدر ݣالس أدريس وخديجة وسط منهم ماجدة ..

- أدريس : عماد مغاديش يجي ويبغي يكري الى مكانتش شي حاجة تم متݣوليش ليا

- خديجة ( دايرة رجل على رجل شادة حنكها ) : مالي انا لي جريت عليه ؟

- أدريس ( شافيها بإستغراب ) : مالي انا ݣلت ليك جريتي عليه أنت مالك فمك يبخ غير السم

- خديجة ( تبسمات بإستهزاء ) : عاد ولا فمي يبخ السم فاش كتي مع خوك فالموسم سمعوك الكلام الحلو دابا جيتي عند الفم لي كيبخ السم

- أدريس ( بصرامة ) : خديجة نقصي شوية راه زدتي فيه بلا قياس ديري بوجه بنتك لي يلاه جايا مارتاحت حتى الراحة من الطريق

- خديجة ( قلبات عينيها ) : انت لي شوف شنو كتݣول ولدك بغا يخوي دار راه دار لي قالها ليه راسو ماهزينا ليه السيف على عنقو ماسوطناه ..

- ماجدة : انا بعدا كنشوف بلي من حقو عادي اي واحد فالسن ديالو مزيان يستقل مع راسو

- خديجة ( خنزرات فيها ) : يستقل هي الى ناض يتزوج ماشي مقابل ليا أنا الخدمة ليل ومطال

- أدريس ( شافيها ) : شتي غير منين ݣولتي هك باينة انت مولاتها باينة جبدتي ليه الزواج داكشي باش بغا يهز راسو ويكري

- خديجة ( تقابلات معاه ) : من حقي انا مو ماقلت ليه حتى عيب قلت ليه نعرض على صاحبتي وراجلها وبنتهم ويشوفها مافيها باس

- أدريس ( ببرود ) : ومعامن الالة تشاورتي حتى دخلي ليا لداري ناس انا مكنعرفهم ماعرفتهم نصابة ماعرفتهم سراقة والثقة الالة مابقاتش فهاد الزمن تدخلي من والة لدارك ..

- خديجة : هانت قلتيها داري وحتى انا من حقي ندخل ليها شكون ما بغيت

- ادريس ( بإنفعال ) : انا مامانع عليك حبابك ولا عائلتك راه نهار كيجيو كنحطهم على راسي ، ولكن صحاباتي ولا رجال صحاباتي لا الالة هاد خيتي بعدا منين عرفتيها ؟

- خديجة : تعرفت انا وياها فلاصال وراجلها عندو وزين دالكيسان فالخرجة دكازا وبنتها عاد جات من فرنسا بغات دير مشروعها هنا

- ماجدة : أويلي اماما وحدة يلاه عرفتيها باغة تعرضي عليها ماشي من جيرانك القدام ماشي معرفة قديمة ماشي صحبة قديمة

- خديجة : انت بعدا غير سكتي انت غير خبز ربي فطبݣو

- أدريس ( بصرامة ) : غادي نݣوليك جوج كلمات اخديجى ومغانعاودهمش معاك ( اشر لماجدة ) قدام بنتك كنتبرا منك حيت هادشي ديالك كثر كنغمض عينيا حتى عييت وداير الما منين يدوز حتى عيات ضارب حساب العشرة داير كثر من جهد متاقي فيك وجه الله ، عمر داري دخلي ليها البراني سمعتي ولالا وعطي لدراري بتيساع وخليهم يعيشو كيما بغاو انا كنعلمك من دابا هادي المرة الثانية لي كندوي فيها الكاس إلى عمر كيفيض هاد المرة ذنوبك على راسك أنا علمتك .. ( ناض وقف خارج من دار لبرا ) ..

- خديجة ( كتحرك فنيفها بإنفعال يديها كيترعدو تعصبات ) :

كيغوت عليا بلا حشمة بلا حيا ويهدد فيا تبارك الله عليا وصلاة على النبي .. ( شافت فماجدة ) كون سيقت لحبيبك الخبار كوراه غايخرجو من عين البرا ..

- ماجدة ( هزهزات راسها ) : فين هو خالي كنشوفوه بعدا انا ماعقلت عليه كاع اخر مرة شتو فاش كانت عندي 9 سنين الله يهديك أماما كيدوي معاك بقا اتشكيلو

- خديجة : شفتك بحال الى كتراضي معايا .. عندو مشاغيل ديالو خالك مكايساليش حتى باش يحك راسو تبارك الله وصلاة على النبي الله يزيدو علاش هو قليل فألمانيا ( بالفشور تبسمات ) داكشي لي عندو خويا حبيبي يتحرق مايتم فين يبان هادشي لي عند باك وعايلتو

- ماجدة ( ماعجبهاش الحال ) : وديك ساعات اماما كون تزوجتي بشي واحد لي من مقام خالي علاش خديتي بابا ؟

- خديجة ( تنهدات تنهيدة طويلة) : قلت العقل أبنتي قلت العقل كنت هبيلة وصغيرة وبغيت باك من نهار شفتو لصقت عليه واخا والديا مابغاوش .. وحتى خويا مابغاش ليا كان باغي يديني معاه للألمانيا ، كان جا فالعرس وجا معاه صاحبو حماق عليا قاليهم زوجوها لي ولكن انا مع هبيلة درت لي فراسي .. ( شافت فيها ) واياك تجري ورا الحب وداك تخربيق خودي شي واحد ولد الشان والمرشان يكون لاباس عليه يبرعك ومايخلي بيك حتى قنت يغرقك دهوباتك انا نݣوليك تمشي تجيبي ليا شي مݣرد

- ماجدة ( وقفات شافت فيها ببرود ) : 24 عام وانا كندير لي كيسلكني بابا عمرو بزز عليا شي حاجة ولا سمعت منو ديري ولا مديريش عكس انت سبحان الله من صغري كتبغي تمشيني كيف بغيتي انت دابا حتى زواج بغيتي دخلي ليا فيه أماما .. يلاه قلتي بلي جدودي مابغاوش بابا وأنت لصقتي عليه يعني درتي داكشي لي بغيتيه انت ورتاحيتي فيه انت ، وزايدون اماما غير تهناي انا هاد الساعة مكنفكر فزواج كنفكر غير فمستقبلي وشنو غاندير فيه ..

- خديجة ( بنرفزة ) : ياك الالة حتى انت ؟

- ماجدة : كنبغيك وربي شاهد عليا ونعطيك عينيا ولكن اماما باش تحكمي فيا لا ، عفاك ماتخلينيش ندم علاش رجعت بحالي أنا انطلع نرتاح ونستف حوايجي ..

- خديجة ( ماعجبهاش الحال ) : هاد لي بقا خاصني لا راجل راجل والولاد بحالو وزادتني البنت حتى هي ..

••••••••••••••

- وصلها لادريس لي عطاتو .. وقفها قدام الموبل حيدات السمكة وشافت فيه بإبتسامة :

شكرا بزاف وسمحليا عذبتك

- الروطال ( بهدوء وبإبتسامة خفيفة ) : العفو نهار السبت إن شاء الله نسوني ليك

- ماريا : إن شاء الله ، بسلامة .. نزلات من طوموبيل شيرات ليه بيديها ديمارا طوموبيل مشا وهي بقات واقفة مبسمة .. تنهدات تنهيدة طويلة ضارت كان الكونسييرج ݣالس ..

- ماريا : سلام سي علال

- علال : سلام أبنتي .. تخطاتو وطلعات فلاسانسور وصلات للشقة ديالها حلات ساكها جبدات منو السوار خشاتهم فالباب حلاتو ، تحل الباب لي قبالتها هزات راسها وبإبتسام :

سلام رشيد صاڤا ؟

- رشيد ( بإبتسامة ) : أهلا ماريا صاڤا ربي يخليك أنت أمورك مزيانة الحاجة ؟

- ماريا : الحمد لله تيليفون وصافي عييت معاها تجي ومابغاتش مكاتوالفش كازا بزاف ..

- رشيد : خليها على خاطرها

- ماريا : مونية مجاتش ؟

- رشيد : لا هاد الصيف مجاتش العام الجاي إن شاء الله

- ماريا : إن شاء الله إلى دوات معاك سلم عليها

- رشيد : بلغ الله سلامك يلاه تهلاي فراسك .. تخطاها ودخل لسانسور بقات متبعاه بالعين تنهدات تنهيدة طويلة غمضات عينيها وسدات الباب ..

- سايݣ بيد ويد دوز بيها الخط للطارق .. بقى مدة عاد جاوبو :

وي

- الروطال ( عينيه مع الطريق ) : شحال من مدينة فيها البحر ؟

- طارق ( داير يديه على جنابو عرݣان ) : معيط عليا باش تسولني شحال من مدينة فيها البحر بنت ليك وزير السياحة أنا ؟

- الروطال ( قهقه بصوت رجولي ) : لا غير ݣلت الى ماݣدك بحر كازا تعوم فيه نشوفو ليك بحور خرين

- طارق ( جاتو الضحكة ) : حامض أصاحبي والله ، طلقني عندي ماتش دابا

- الروطال : معاش غادي تسالي ؟

- طارق : واحد ساعة ونص علاش ؟

- الروطال : باغيك فواحد البلان منين تسالي تجي عندي ولا نجي عندك ؟

- طارق : جي انت اما انا العظم الصحيح ماعنديش

- الروطال : صافي قطع .. قطع مع لابيل دور طوموبيل وشد الطريق لدارهم ..

••••••••••••••

- فحي كاليفورنيا ، فوحدة من الڤيلات الراقية لي كانت مصبوغة فالبيض الجردة كبيرة محطوطين فوطويات ساسهم خشب ومبطنين بجلد كتويطهم طبلة كبيرة محطوط عليها كيسان ديال القهوة وبلاطو فيه الحلوة وبلاطو فيه الفاكية ، ݣالس بطولتو لابس سورڤيت داير رجل على رجل وأونفاص معاه الروطال من ورا مابدل حوايجو دالخدمة بدلهم بسروال ديال التوب فالبيج واسع مع شوميز ديالو .

- طارق ( بإستغراب ) : عمرها كانت ليك زعمة مالف مكتعرض على الوحدة ولا تخرج معاه حتى كدوز مدة كيفاش بلانك ؟

- الروطال ( رجل منزلها ورجل طاويها محطوطة على فخضو كيلعب بيها وكينقب فلوز ) :

عقلتي على كريمي ؟

- طارق ( كيحاول يتفكر ) : بلاتي ماشي مول الوزين ديال السكر ؟

- الروطال : الرضى هو هداك

- طارق : عقلت عليه مالو ؟ هو لي كنتي واحد المدة كتاخود من عندو ومن بعد ولات كتوصلك السلعة فازݣة ..

- الروطال ( حنحن بالع ريقو ) : ايوا راه مول الشركة لي بغات تسني معانا ولدو

- طارق ( هز حجبانو متفاجئ ) : العار وكيفاش زعمة باه ماتسرطاتش ليه مابقيتيش كاتعامل معاهم سيفط ليك ولدو

- الروطال ( كيخمم ) : الصراحة ماعرفتش البنت مباينش عليها بلي شي حد مسيفطها واخا شوية جاتني كيفاش انشرح ليك

- طارق ( بإستفهام ) : مالها ؟

- الروطال : لي كنݣوليها كتݣول عليه واخا تݣول مبرمجة على كلمة وحدة ، مع عرضت عليها من ديبار كاتليك واخا

- طارق : وأنت علاش عرضتي عليها ؟

- الروطال : خرجات ليا من فمي قبل متوريني لپرودوي ديالهم .. كنت شاك فيها نكذب عليك ولكن من بعد جاتني البنت جايا بنيتها وظريفة

- طارق ( شافيه بنص عين ) : ظريفة ، حتى واحد ماظريف فهاد الوقت أخويا

- الروطال ( خبط على فخضو ) : لالا مزال كاين خاصك غي تفلي مزيان ..

- طارق : واخا الى صدق هاد ولد كاريمي ماعندو حتى علاقة بباه وكل واحد فيهم وخدمتو وهادي غير صدفة اش غادير ؟

- الروطال : البرودوي ديالهم زوين صراحة الكاليتي ديالو مزيانة .. الى صدق السيد ناوي على الخدمة بصح نيت ماعديش مشكيل نزعم .

- طارق : اهاه وماريا شنو غادير معاها ؟

- الروطال ( دور لسانو وسط فمو ) : مغاندير والو غانكمل على العراضة ومتعرف شنو غايكون من بعد ماتنساش عندي 37 عام هذا هو الوقت لي نديرو فيه وليدات ولالا ؟

- طارق ( كيضحك ) : هاي هاي هاي أيااه أسيدي ماعندي مايسالك إيوا الله يسخر والله يجعل فيها الخير وتكون من نصيبك واخا خالتي خديجة مغايعجبها الحال ..

- الروطال ( بإستفهام ) : علاش زعمة ؟

- طارق : ونكونو واقعيين ومتقلقش خالتي خديجة كتموت على المظاهر زيدها على الواليدة حتى هي

- الروطال ( حط رجليه وشافيه بجدية ) : هادشي كامل لي وصلت ليه ضربت عليه تمارة ( خبط على كتافو ) كت نقرا ونضرب تمارة واخا با بخيرو وجدي بخيرو ولكن ماكنتش كنشد عندهم سنتيم الى وصلت لهادشي لي أنا عليه ضربت عليه تمارة ماجيتش لهاد الدنيا ولقيتها واجدة ..

- طارق : واش غاتوريني ، وراه جدي براسو كان مسكين يضرب تمارة فليل ونهار يهز على كتافو الخناشي ديال السيما

- الروطال : وليديا روحي بغاوها نحطها ليهم ولكن باش يدخلو ليا فحياتي لا واخا نغلط ، حيت مزيان نغلط باش نتعلم خاصهم يخليوني نغلط باش نتعلم ترا كون تزوجت بكري كوراه ولدي عندو 10 سنين انا يلاه نتسنى الواليدة تݣوليا دي هادي ولا مديهاش

- طارق : أصلا مغاتقدش تݣولها ليك أنت

- الروطال : مالي كنخلع ؟

- طارق ( كيضحك ) : ندوي ولا نسكت ؟ ..

- الروطال ( خبط ليه على كتفو ) غير مع لي كيجبدني ( غمزو ) يلاه إلى اللقاء اعزيزي

- طارق : أش درنا فبلان راشد ؟

- الروطال : دوينا فيه مغانبقاوش أندويو ..

- طارق : زعمة راه مجامعاناش معاه غير الخدمة صاحبنا ومعرفة قديمة

- الروطال : وحيت صاحبنا عارفني ماعنديش مع داك الهيث .. يلاه أنا مشيت هز السوارت وتيليفون ديالو وخرج ..

- فبيت عماد بيت دو طابع رجولي من جميع النواحي ، عندو البالكو محلول على الجردة ݣالس حاط قدامو سوندويتش كلا فيه النص شافيها بإبتسامة :

والله الى العفريتة كتصرعي السوندويتشات

- ماجدة ( كضحك ) : غير هاد الوجبات السريعة اماالبلدي الله يجيب راك عارفني بيني وبين الكوزينة الخير والإحسان ..

- عماد : حتى أنت مع الأنترنت دابا كولشي تعلميه حتى حاجة مابقات صعيبة ..

- ماجدة ( طولات فيه الشوفة) : ماكملتيش ليا أخويا شنو غادير مع يسرى ؟

- عماد ( شاف فالفراغ ) : شنو غادي ندير فنظرك غادي نمشي نݣولها ليها ماعندي مندير السيدة مزال كتبغي راجلها وبحال والو ترجع ليه

- ماجدة : واخا دار معاها لي دار ؟

- عماد ( شافيها ) : منين كتبغي شي حد كيتغمضو ليك العينين مكاتبقاش تشوف ݣدامك ، سوء تفاهم وقع ماخلا مدار باش ترجع ليه مدام كيبغيها وكتبغيه راه غايرجعو وݣاع الواليدة زادت ليها فيخرات كملات

- ماجدة : أخويا هادشي ديالك من الاول باين كيفاش غادي يسالي ، غير انا فاش طلقات قلت ممكن تكون شيحاجة ولكن دابا غير نساها ..

- عماد ( ضحك بإستهزاء ) : بحال إلى عندي بديل ( عض على باطن حنكو ) كيخليتيها انت من الأول باين البلان

- ماجدة ( بإبتسامة ) : مزال ربي يجيب ليك شي بنت الناس لي تبغيك .. وتبغيها وتنسى ݣاع هادشي

- عماد ( دار رجل على رجل ) : مخاصنيش .. ماعندي مندير بشي وحدة أنا هكا مرتاح وهاني ماتبرزطيش راسك معايا .. خليني من هادشي أنت علاياش ناوية ؟

- ماجدة : خاصني نشوف شي محال يكون كبير ، ونشوف بنات لي يبغيو يخدمو معايا .. وعاد لي ماطرييل ..

- عماد : صافي بغيتي تبداي فاليبرودوي كوسميتيك ؟

- ماجدة : وي علاش مشيت انا للفرنسا ؟ ديبلوم ديال المغرب مكانش كافيني ودابا عندي ديبلوم الثاني ديالي إن شاء الله خاص نبدا

- عماد : المهم انت لي خاصك ݣوليها ليا صافي ؟

- ماجدة ( وقفات عنقاتو من عنقو ) : الله يخليك ليا أخويا حبيبي انت راه الحيبان فالقيلبان ديالي ( باست ليه راسو )

- عماد : الله يخليك ليا حتى انت .. يلاه سيري لبيتك خليني نرتاح راني عيان

- ماجدة : تصبح على خير

- عماد : تصبحي على خير .. مشات يلاه اتخرج من البيت ورجعات :

إيمتا غادي ترحل لدارك الجديدة ؟

- عماد : واحد السيمانة هكاك إن شاء الله

- ماجدة : صافي إن شاء الله أنا مشيت .. سدات عليه الباب ودخلات لبيتها ..

- هزات تيليفونها مشات ليزابيل ودوزات النمرة .. بقات مدة كتسوني مجاوبها حتى واحد حتى تقطع بوحدو ، رجعات سونات او والو حدات التيليفون مشات للحمام غسلات وجها خرجات ݣلسات مقابلة مع المرايا هزات الكريم ديالها كدير سكين كير ديالها الليلي .. بدا تيليفونها كيسوني حطات لي فيدها وهزات التيليفون كانت نمرتو :

ألو عزيز

- عزيز : وي سلام عليكم

- ماجدة : وعليكم السلام صاڤا

- عزيز : الحمد لله ياربي ياكما كاين باس أختي بغيتي شيحاجة ؟

- ماجدة ( هزات حجبانتا بإستغراب ) : نو مكاين والو علاش ؟

- عزيز ( بنفاد الصبر ) : ختي واش انت شوية لاباس ؟ راه وقيلة انت سونيتي ليا لا ومنين سونيتي اتكوني سونيتي على شيحاجة ؟

- ماجدة : أه وي ( ضحكات ) بغيت انقوليك واش غدا اتكون مسالي مع الصباح ؟

- عزيز ( كيفكر ) : أشمن وقيتة ؟

- ماجدة : دابا انا مكنفيقش بكري ، نديرو مع 11 شنو بان ليك ؟

- عزيز ( تفكر بلي عندو رونديڤو مع عنبر وحياة ) :

ولكن عندي مايدار فداك الوقت

- ماجدة : غير شوف كيفاش دير عفاك

- عزيز : صافي حتى نشوف يلاه تصبحي على خير .. قطع عليها مزال مجاوباتوش ، بعدات التيليفون كتستغرب من تصرفاتو حطات التيليفون وناضت تكمل سكين كير ديالها .

•••••••••••••

- فبيت ديال الݣلاس فيه 3 السدادر بطلامط عصريين بلون الموڤ بارد والبيج وذهبي ... محطوطين كراطن ديال الپيتزا والمونادا كاس خاوي وكاس اخور فيه النص .. ݣالسة ماريا لابسة بيجامة ديال الدار متكونة من جوج ديال القطع سروال خفيف بالبيج وفيه فريزات مع شوميز ديالو نص كم .. قبالتها ݣالسة بنت فنفس السن ديالها شعرها جامعاه فيه ليميش ، لابسة سروال كحل وتيشورت ديالو فالاورونج ..

- انا مزال لحد الساعة والله مافهمتك اختي بالله

- ماريا : شنو لي مافهمتيش انا براسي مفاهماش راسي أصوفيا والله

- صوفيا : وراه خاصك تفهمي باش متغلطيش باغية طريق وبغيتي تشدي فطريق أخرى راه مجاتش ..

- ماريا : وانا راه براسي مخربقة .. فتي عليا انت الراي باش انت صاحبتي ؟

- صوفيا ( حطات البيتزا من يدها ) : صاحبتك وكايهمني مصلاحتك .. السيد كتبغيه ولكن هو راه عمرو شافيك ولا عبرك مامسوقش ليك ݣاع واش كاينة .. كيتلاقى معاك كيرمي ليك السلام وكيمشي بحالو ..

- ماريا ( تنهدات تنهيدة طويلة) : قسما بالله حتى كنحاول نساه كنحاول نحيدو من بالي .. ولكن راه ماقديتش اصوفيا والله ماقديت أول مرة توقع ليا واول واحد يدخل لقلبي ومايبغيش يخرج ..

- صوفيا : اختي ماعرفتش شنو عجبك فيه .. كتقارني فاروق حيدر اويلي غاندب ، فاروق حيد الزين وطولة وتجريدة والفلوس والجاه والكاريزما مع هداك .. سمحيليا انت واقعة ليك شيحاجة ..

- ماريا ( غوبشات ) : مكايهمنيش انا هادشي لي كدوي عليه انت .. حتى رشيد مالو شنو لي فيه خايب بالعكس ولد الناس وظريف والله يعمر ليه الدار .. نهار أول مرة حطيت رجلي هنا هو لي عاوني وهو لي لقا ليا هاد الدار ..

- صوفيا : ماݣلنا شاي عاونك الله يجازيه بيخير .. هو دار معاك الخير وانت طحتي على زنافرك بغيتيه .. خوي قلبك السيد عرض عليك سيري وستغلي الفرصة عرفتي شنو تكوني مرت فاروق حيدر الروطال مي مي .. كاع البيبان يتحلو ليك ..

- ماريا ( بقات كتفكر هزات عينيها شافت فيها ) : وقيلة عندك الصح .. عييت مانبين لرشيد او والو بحال الى مكاينش هنا كاعما مسوق ولا حاس بيا واش كاينة على وجه الارض ..

- صوفيا : ايوا قوليها لراسك .. واش انت اتبقاي كتسناي فيه حتى يشوفيك ولا يحس بيك ، والى سيد كيبغي شي وحدة ماشتيهاش .. صافي خوي بالك وشوفي مع فاروق وشدي فيه بيديك وسنانك ..

- ماريا ( هزهزات راسها وهي عقلها غير مع رشيد كان صعيب تخرجو من بالها كتبغيه من قلبها عمرها دخلات شي حد لحياتها كتحس براسها خاصها تبقى مخلصة ليه .. ولكن حتى ليمتا فكرات مع راسها وفكلام صاحبتها لقات بلي عندها الصح مغاتبقاش بحال هكا على دوام العمر كيفوت خاصها تشوف حياتها ، شافت فصوفيا وبتاسمات ليها ) :

داكشي لي غادي ندير يكون خير ..

••••••••••••••••••

- بــلغــاريـا 📍

- ݣالس فالبيرو ديالو ساد عليه .. كان عبارة على مكتبة كبيرة كثر ماهي بيرو فيها جميع انواع الكتب المنظر ديالها كان زوين وكيفتح النفس مصبوغة بالأبيض الأعمدة ديالها مصبوغة بالبيض وفيها خط عريض من اللون الذهبي .. برك على واحد الزر وتحلات واحد الخزانة لي كشفات على شاشة تلفاز شافت فساعو .. بحال الى كيتسنى فشي واحد ..

- ربع يديه كيتمشى غادي جاي كيتسنى .. حتى سمع صوت رجولي تقيل من مولاه كيبان بلي شخص عندو هبة دا منو الزمان وجاب بللهجة الدارجة المغربية :

براهيم .. ضار براهيم على غفلة وتبسم :

- سلام سيدي

- وصلوني الخبار

- براهيم ( هز يديه بإستسلام ) : ماعرفت منݣوليك اسيدي ماكناش ضانين هادشي غادي يوقع

- المغرب تطورات مابقاتش بحال شحال هادي

- براهيم : هادشي لي كنشوف البوليس مزيرين الوقت دابا مغانݣدو نتحركو حتى ترخف القضية

- ماشي مشكيل كاين جوايه أخرين

- براهيم : المهم غير انت متكونش مقلق علينا وصافي اسيدي

- ( ببرودة ) دابا مامقلقش ولكن هادشي إلى كول غادي نتقلق وتقليقة ديالي صعيبة شوية أبراهيم فهمتيني

- براهيم ( بتوتر ) : عارف اسيدي ولهلا يجيب شيحاجة لي تقلقك

- ( هزهز براسو ) مزيان .. تقطع الإتصال وشاشة رجعات كحلة كيفما كانت .. تنهد تنهيدة طويلة ضاغط على نفس الزر لي رجع الخزانة كيف كانت ، توجه للباب فتحو باغي يخرج كان بدر واقف وجه لوجه معاه ..

- براهيم ( مغوبش ) : أش تم

- بدر ( ببرود ) : بغيت نزل للمغرب ..

•••••••••••••••••

- خارج عزيز من الدار لابس كلاكيطة وسروال ديال كيطمة مع تيشورت .. كيبان ليه رشيد واقف عند الطوموبيل وقف عليه كيشوف فعينيه الحمرين وريحة الشراب كتعطي منو :

هاد الهم مغاتفرقوش عليك عاد صباح دوينا اصاحبي تا مالك غارقين ليك البابر؟

- رشيد ( بصوت تقيل ) : غارق ليا قلبي أعزيز قلبي

- عزيز ( بإستغراب ) : كيفاش بلانك اش تم شيحاجة كاينة معارفهاش انا ؟

- رشيد ( تنهد تنهيدة طويلة سايط دخان الݣارو لي كان شادة بصبعو .. شاف فيه بعينيه لي ناعسين ونطق ) : وقيلة كنبغي عنبر ..

- عزيز ( خنزر فيه ) : واش من نيتك ولا تقلتي فالكاس وجاي تبوهل عليا ولا مالك أصاحبي ؟

- رشيد ( رجع راسو اللور كيضحك حتى دمعو عينيه ) : واش من نيتك تيقيتيني داكشي لي كان خاصني أبغيت نشوفك شنو غاتݣول حيت كيبانو ليا عينيك ماشي خواتات فاش كتكون عنبر

- عزيز : كنقسم ليك بالله الى عزيزة عليا لا هي لا حياة بحال خواتاتي .. بالعكس عمري شفت فيهم شي شوفة ماهياش

- رشيد ( طبطب على كتفو ) : حتى أنا هكاك دوك دريات بحال ختي مونية نفس المعزة ..

- عزيز : وأنت مالك على هاد الحالة ؟

- رشيد ( ورك على محاجر عينيه ) : خاصني نبيع طوموبيلتي

- عزيز : أو علاش ؟

- رشيد : دويت مع الباطرون على ود الخدمة ، ݣالك أسيدي حط ليا ديك 3 المليون لي كانتسالك وإلى بغيتي ضرب الباب ضربو

- عزيز (تبسم ) : هــــــا شتي أش كنت كنݣولك وكتݣوليا لا الله يعمر ليه دار حشومة نخليك .. كان لاقي فيك غير تيݣري شاد ليه لوطيل ومهنيه أش بغا مزال

- رشيد ( تكا على الطوموبيل ) : نوضناها أنا وياه .. ݣتليه نضبى ليك فيها وديك ساع نعطيها ليك صبر عليا .. ݣالك متخرجش من داك لوطيل حتى تقور ليا فلوسي ..

- عزيز ( كيخمم ) : وعلاش انت ماضربو بسلاحو .. ياك ݣالك حتى تعطيه فلوسو عاد تخرج بحال الى شادك بيهم .. علاش ماتشوف مع ديك الميكروبة دختو

- رشيد : من نيتك هاديك اش عندها مدير ؟

- عزيز : أنت مجامع والو ؟

- رشيد : واحد مليون ونص مخبيها الباقي لي كان عندي كملت بيه داري ..

- عزيز : انا مخبع واحد 5000 درهم نعطيها ليك حتى ضور الحركة ورضها ليا ، وهاهي 2 ديال المليون كاينة

- رشيد ( حط يدو على ظهرو ) : الله يحفظك أخويا .. اتبقى مليون

- عزيز : شوف أنت دير بلان دوي مع ختنا ݣوليها باغي نخلي لوطيل ولكن خوك زيرني فشي فلوس والى ماعطيتهم ليه مغايخلينيش نخوي .. هي عينها فالأوطيل تشدو ضروري مدير معاك شي بلان ..

- رشيد ( كيخمم فكلامو ) : زعمة ؟

- عزيز : جرب انت مخاسر والو ، عطاتك مرحبا ماعطاتك حنا تقوروها فينما كان .. بلاما تبيع طوموبيلتك ..

- رشيد : وكونما تزيرت مانبيعها .. راك عارف لا هي لا داري درتهم بفلوس الاوطيل داك الورث لي كان جاني وكنت نجمع من الخدمة لولة .. أما خلصت لوطيل كاعما كتبقى الله يستر ..

- عزيز ( بصرامة ) : وقطع عليك هاد الويل .. حيدو براكة علك ..

- رشيد : اليوم تعصبت منين تراݣعت مع داك الميكروب ، مابقيتش أنطوف من جيهتو ..

- عزيز : سير رتاح وغدا رض عليا بلي كان .. أصلا غدا انوصل دريات للقنت لي عطيتيني لادريس ديالو ..

- رشيد : صافي حتى انا أنكون تم إن شاء الله.. أنا مشيت تهلا .. ركب فطوموبيلتو ديمارا ومشا .. بقى عزيز واقف مݣابلو حتى غبر ورجع لدار .

•••••••••••••••

- فبن سليمان ݣالسين مجموعين .. كيتناقشو على مسألة البيع

- تودة : شحال قاليك بغا فيها ؟

- يونس : الدار 180 مليون وهاد الارض 160 .. ولارض لوخرا عاطي فيها 130 مليون ..

- تودة ( شافت فكريم ) : أش بان ليك اولدي فثمن ؟

- كريم : أخالتي 180 مليون جاتني قليلة الدار راه فيها 3 يطاج عاد دويرة لي على برا ديال العساس ودار جات على الطريق وزايدون السيد راه خانز فلوس اغير يحسابليه بقاو العيالات وعد بالو ولد المرحوم مكاين كال بلات نعطي فيها هادشي ..

- يونس : وهو بوحدو لي عطا هاد الثمن البقية عطاو نص ثمن

- كريم : واش عرفتي الارض أش غايصور منها الخير والخمير .. راه مجاتو فوالو يزيد او10 المليون .. هاديك البنت مسكينة نعيمة خاصنا نضورو معاها سيتين وهي خدامة حشومة ترجع لدارهم سديها خاويين ..

- رجاء : حتى العساس مسكين عندو وليداتو وعلى شحال عاد يلقى خدمة

- كريم : ديك 10 لي غايزيد نقسموها ليهم بزوج هي 5 وهو 5

- تودة ( بإبتسامة ) : الله يرضي عليك أولدي ( شافت فيونس ) يونس الى بغا يزيد 10 ݣوليه مرحبا مابغاش ݣوليه راه كاين واحد شاري غايعطي كثر ..

- يونس : صافي كوني هانية

- عنبر : شحال جهد ديالكم باش تاخدو دار فكازا

- تودة ( شافت فسميرة ) : أش بان لك ناخدو دويرة ولا شقة ؟

- سميرة : لاش أختي دوك الشقق كيكونو صغار ماعندك فين تحركي دغية يتشققو تلقاي القطرة كتقطر عليك

- تودة : وديور على حسب الى لقينا بديك 80 يكون فيها أسفلي مقادين على دروج سفلي والسطح براكة .. الى فيها دوك 4 البيوت مزيانة لينا ..

- عنبر : انا راه وصيت رشيد هو غايشوف لينا .. وديك ساع نشوفو

- تودة : خاصو مايتعطل باش الى بعنا نمشيو نيشان ندفعو مانبقاوش كنتلاوطو ..

- عنبر : إن شاء الله ..

يتبع...