محتوى القصة
- تغدات على خاطرها غسلات يديها او وجها .. دخلات لبيتها جبدات مونطو طويل حتى ل ركبة ديال الجلد فالكحل .. مع كولون فالكحل لاصق حلات جهة الماريو الثانية نزلات هازة كارطونة حطاتها على نموسية فتحاتها كان فيها پوت فالكحل قصير من الجهة الفوقانية درجل فيه لفعة ملوية فذهبي .. العلو ديالو كانو دومي طالو معاليش بزاف .. تحل الباب ديال الدار ودخلات حياة تلاحت على سداري محيدة الطاݣية مليوح شعرها مسبسب كان باين فيه مصاوب بطريقة إحترافية ..
- تودة ( طلات عليها من الكوزينة ) : هاي هاي على الزاز تي اش هاد الزين ياختي بناتي زينات .. طلات عليها رشيدة كتشوفيها
- حياة ( عجبها الحال ضربات بشعرها ) : أكيجيتك أمي ؟
- رشيدة : أزين زينة خاص اتنقصي من الملاغة تولي تحمقي
- تودة ( نغزاتها بمرفقها ) : تي هنينا الفم لي يݣول الزمر يݣول التمر
- حياة ( هزات ساكها قاصدة بيت عنبر وقفات قبالتهم فباب الكوزينة) :
انا والله ماندي عليك امي راشقة ليا .. الحمد لله شديت مانضة ديال شهر فنهار واحد نمشي نعاود لعنبر .. حلات الباب عليها لقاتها حاطة حوايجها ، شافت فيها عنبر من المرايا :
ياختي على الزاز واللوز تي فين كنتي مخبية عليا هاد التشقشيق
- حياة ( كضحك حيدات مونطوها وݣلسات ) : ياختي داز الشوتينݣ على مزيناتو .. وخلصوني تم تم
- عنبر ( مقابلة المرايا كدير فليكغو لوجها ) : بصحة وراحة الحب .. متخرجيش معايا نشوفو رشيد
- حياة ( تلاحت على ظهرها) : لا ياختي اسيري انت بصحة وراحة .. انا مافياش لي يمشي فايثة بكري أنضربها بنعسة
- عنبر : باقي شي نعاس دابا العصر هذا
- حياة : واخا غير ساعة دالمݣانة نرتاح فيها .. حتى ترجعي كاع وفيقيني ( وقفات )
- عنبر : ݣلسي معايا حتى نكمل ونخرج ونعسي .. رجعات حياة ݣلسات متكية فنموسية عنبر .. ناضت من الكرسي لبسات تريكو من التحت مع المونطو والكولون .. معصم يدها زيناتو بزوج براصليات حلقات فودنيها مشطات شعرها طلقاتو سامبل ، خشات رجليها فسباط هزات ريحتها " أنغام " رشاتها هزات ساكها تيليفون بزطامها دارتو فساك ضارت عند حياة :
كيجيتك ؟
- حياة ( بإعجاب ) : أخوخة وغادية على الأرض .. عطاتها بوسة فالهوى وخرجات ريحتها تابعاها طلات على مها وخالتها علماتهم بلي مشات .. لحݣات للبرا بدا تيليفونها كيسوني خرجاتو من الساك طلعات ليها نمرة غريبة .. نفس النمرة لي لقات البوات ڤوكال شداها 2 المرات فتحات الخط وبصوتها الأنثوي نطقات :
ألو ..
- الروطال ( ݣالس فالبيرو ديالو كيلعب بالموس لي ݣدامو ) : الناس لاش كيديرو التيليفون ؟
- عنبر ( عرفاتو شكون من صوتو .. دورات لسانها وسط فمها ) : شكون معايا بعدا ؟
- الروطال ( صوتو الرجولي الغالبة عليه نبرة الإستهزاء محكمة فيه دبدبة صوتية خطيرة ) :
سحت الليل
- عنبر ( شيرات لطاكسي ) : عاهدي بيه كيخرج غير بالليل بنهار كيكون ناعس ..
- الروطال ( تقاد فالݣلسة ) : فينك ؟
- عنبر : خارجة علاش ؟
- الروطال ( بدون مقدمات ) : 6 ندوز نهزك
- عنبر ( طرطقات صباعها موجهة كلامها لمول طاكسي ) : ستوديو بيلڤيدير عفاك ( رجعات وجهات كلامها للروطال ) : فين اتهزني ؟
- الروطال ( طانز ) : لتلت الخالي أشريفة وقيلة راه غاتولي مرتي وخاصنا ندويو فشلا حوايج
- عنبر : ولكن انا راه ...
- الروطال ( بصرامة وتصميم فنبرة صوتو ) : 6 نجي نديك ( قطع عليها ) ..
- عنبر ( بلعات ريقها كتشوف فتيليفون دورات شعرها ورا ودنها وتنهدات تنهيدة طويلة كتحاول تكالمي راسها ) ..
’’ بــلــغــاريـــا ’’
- واقف قبالتو بحال شي تلميد حل الإمتحان بنجاح .. إبتسامة فخر على وجه باه .. :
إبراهيم ( ݣالس على الكرسي داير رجل على رجل كيشوفيه بإبتسامة غرور وفخر ) :
ودابا غانݣول ولدت ولد ماشي خطية
- بدر ( ݣالس على الكرسي لي قبالتو رجلو كترعد كيشوفيه بنظرات غراب .. نظرات ديال إنسان معصب متوتر ومضطارب ) :
سلعتك او وصلات .. جا الوقت لي توفي بكلمتك
- إبراهيم ( عوج فمو بإستغراب) : إينا كلمة هادي لي غانوفي بيها ؟
- بدر ( عاض على فمو بعصبية .. ملامح وجهو خالية من اي إحساس ) :
أنزل للمغرب ..
› عـنـــد عــصــام ‹
- فأجونص خاص للطوموبيلات اللوكس .. متكون من زوج طوابق فطابق الفوق كيتواجد المكتب ديالو ، ݣالس ورا البيرو عينيه على الپيسي خدام .. تدق الباب على غفلة ودخل ولدو كيجري
- عصام ( عنقو ) : اوه اوه اوه شوف شوف شكون جا عندي اليوم .. عمران بعد عليه وݣلس على رجليه بصوتو الطفولي وملامح وجهو لي غير باه :
توحشتك بزاف بابي .. قلت لمامي تجيبني عندك ، هز عصام راسو فيها كانت واقفة بكل شياكة ريحة العطر ديالها كيعطي .. هزهزات راسها كتشرح بيدها :
كان مشهي بيتزا خرجتو ياكلها .. بغا يشوفك وجبتو لعندك ..
- عصام ( بملامح خالية من أي إحساس ) : أحسن مادرتي .. ( شاف فولدو ) هاي هاي على الناس مبوݣصين اش هاد الزين هدا ( كيهر فيه )
- عمران ( كيضحك ) : وبابا صافي بابا صافي عييت ( شافيه ببراءة ) بابي إيمتا تديني لپاغك ؟
- عصام ( باسو فحنكو كيشم فريحتو بكل حب ) : الوقت لي بغا ولدي حبيبي نديه
- عمران ( كيلعب بالݣورميط لي نازلة من عنق باه ) : نمشيو samedi prochain ؟
- عصام ( عنقو بجهد كيحيد منو الشوق ) : صافي أحبيبي شوف غير ماماك واش اتبغي (شافيها )
- عمران ( شافيها ) : ماما نمشي مع بابا لپاغك ممكن ؟
- هدى ( بلعات ريقها ) : واخا إن شاء الله اولدي .. يلاه نمشيو دابا باش متشدناش الشتا فطريق أماما ...
- عمران ( هزهز راسو وضار عند باه عنقو وباسو ) : جوتيم بابي
- عصام : حتى انا احبيبي كنبغيك .. ناض عمران من فوق رجليه شد فيد ماماه ضار لعند باباه شير ليه بيدو وخرج مع مو ..
______________________
› عـــنــبــر ‹
- جالسة قبالتو فالكرسي من ورا مالاحت ليه الخبار كتسنى فيه شنو غايقول .. تبسم وهز حاجب ونزل الثاني :
هاي هاي هاي على البانضية وطحتي على هوتة مكنة ماعندي مانسالك
- عنبر ( قهقهات بأنوثة ) : وباز لي يسمعك يقول انا لي بغيت نطيحو داكشي راه جا أهكاك .. حتى أنا ماعرفت راسي باش تبليت فاش قالتها ليا ماجدة
- رشيد : واش غانݣولك وسيد راه بوكو فلوس .. ماشي غابوكو بــــــوكو نيت
- عنبر : علاش انت كتعرفو مزيان ؟ انا ىاه حتى لهاد الساعة معارفاه شنو كيدير
- رشيد ( عوج فمو ) : پاخ عرفتي داك البيض لي كضربي وكيضربوه فأي دار مغربية ودوك الكاميوات لي كيوصلوه لكل مدينة راه هو او ولد عمو ماليهم وماشي غاهادشي ..
- عنبر ( تقادات فالݣلسة عاطياه ودنيها مركزة مع اي حاجة كيݣولها ) : ايوا وشنو خور ؟
- رشيد : عندو أوطيل ݣدو ݣداش فبوزنيقة وعاد شي واحد خور يمكن فمراكش او واحد فطنجة وب 3 بيهم 5 نجوم .. وعاد 3 المخبازات فالمعاريف وشي ريسطو فعين الذياب
- عنبر ( حالة عينيها مبهورة مكانتش كظن غايكون لاباس عليه حتى لهاد الدرجة ) : تبارك الله وسيد راه مساهم فإقتصاد البلاد ݣوليا
- رشيد ( دار رجل على رجل مرجع ظهرو اللور) : واش يحسابلك .. راه دكرو مامرة ماجوج ݣدامك انت عقلك مكايأكسيبطيش .. وهادشي بوحدو عاد كيبيع ويشري فالخيل
- عنبر ( بلعات ريقها) : وعرفتي بشحال كيتباع الخيل ولا ؟ راه كنسمع كيتباعو بالملاين وقيلة واحد كيوصل ل 90 مليون واش عندنا ناس يشريو بهاد الثمن ؟
- رشيد ( ضحك بإستهزاء ) : كاين ولكن هو مكايتعاملش مع المغاربة كيتعامل مع الخليجيين .. كيموتو على الخيل وكيشريوه عندو بثمن لي بغا .. وكيتعامل حتى مع الاوروپيين .. كيطيح على الهوتات شي عود كيكون لاراس ديالو قليلة ومطلوبة كيروديه يتهلا فيه ويداويه ويبيعو بضوبل ديال الثمن باش خداه
- عنبر ( مع اي حاجة كيقولها كتزيد تنباهر وتصدم ) : هاي هاي هاي هادشي كامل ( بينها وبين راسها عاد عرفات علاش عماد ختار خوه من دون الناس يتزوج بيها )
- رشيد : إيـــــه اشريفة اش يحسابلك .. فاروق حيدر معروف فالمغرب وفعالم الأعمال علاشما جيتيه التجارة وفأي حاجة .. عاد تابعو ولد عمو طارق هو اول واحد بدا بتجارة فالحوالة هو لول ومنين نجحات معاه دخل معاه فاروق شريك ومن الحوالة لدجاج من تم جاتهم الفكرة ديال البيض ودارو شركة والشركة كبرات ليهم او ولاو هوما لي مسؤولين على توزيع البيض ودجاج فالمغرب ومن هادشي فاروق توجه للخيل
- عنبر ( بتساؤل ) : وانت منين جبتي هاد الخبارات كاملين ؟
- رشيد : كون كنتي كتقراي الكتوبة غاتعرفي .. ( وقف توجه لواحد الفيترينة فالبيرو .. فيها صورتو وصورة عنبر من مهرجان الجديدة وبعض الديكورات ومن الجهة الاخرى فيه عدة كتب مستفين جبد واحد بيناتهم ومدو ليها ) هاكي ..
- خدات الكتاب لي كان فاللون الابيض فيه صورة ديال الروطال لابس الكلاص فللون الكحل .. كيشوف للجهة معينة ، كان كيبان فمنتهى الوسامة .. وعنوان الكتاب كان هو " الأخطبوط octopus " هزات حاجبها بإستغراب شافت فرشيد :
دايرين كتاب عليه السيرة الذاتية ديالو
- رشيد : ايااه الالة من نهار بدا فعالم الاعمال حتى لدابا كاين فهاد الكتاب
- عنبر ( خدات الكتاب دارتو فساكها ) : صافي غادي ناخدو معايا نقراه نيت
- رشيد : ايوا يلالة مبروك والله حتى فرحت ليك .. والغنا اش غاديري معاه ؟
- عنبر ( تنهدات ) : غانبازي غير على يوتيوب انا اصلا قلتها ليه .. نهار راسي يقولي نحبس أنا غانحبس العراس انبعدهم عليهم على ود صحتي السهير واعر عليا راك عارف اش قاليا طبيب
- رشيد ( هز واحد الملف ) : شوفي ليا هاد الاغنية وتنغمي ليا على الكلمات فاش تمشي لدار .. وباشما كان علميني اه حݣا كاينة واحد البنت يلاه بانت جديدة ولكن تبارك الله صوتها خطير غير هي مكتغنيش الشعبي .. شي واحد شكرني ليها يݣد نولي منادجير ديالها مزال ماتفاهمتش معاها على هادشي
- عنبر ( بإبتسامة ) : والخيانة هادي دابا ؟
- رشيد : تي أشمن انت الأصل .. ولكن البنت واعرة الصراحة الفيديو ديالها داير بوم هاد الايام
- عنبر ( بجدية ) : رشيد .. اي حاجة فيها مصلاحتك بالي بيها اباش نكون معاك صريحة انا طوال زمان ولا قصار راه مغانبقاش فهاد الضومين خاص انطرق شي مسامر فراسي وغانسلت
- رشيد : هي الموسيو مابغاش ؟
- عنبر ( بنفي ) : لالا داكشي مكاينش ݣاع راه قلتها ليك .. انا راسي لي غايقولها ليا ماشي شي حد ولكن انا وياك عارفين هاد ضومين مادخلتوش حيت كنموت عليه .. اه بصح كايعجبني الغنا كنعشق العيطة ولكن ماشي نغني قدام الناس انا هادشي ماختاريتوش هو لي ختارني ولكن مغاندومش فيه ، داكشي باش كنقولك لقيتي مصلاحتك ضرب ضربتك فيها ..
- رشيد ( بإبتسامة ) : انت راه البخوشة دخوها ( قرص ليها حنكها ) الله يسهل عليك فاي حاجة بغيتيها إن شاء الله ..
- عنبر ( تنهدات ) : اللهم آمين ( وقفات دايرة الملف فساكها ) المهم انا ندخل لدار ونقرا الكلمات وباشما كان نعلمك صافي ؟
- رشيد : صافي سيري ( تمشا معاها حتى لبرا بقا واقف معاها حتى وقفات طوموبيل نيشان فالكحل ) ..
- عنبر ( شافت فرشيد ) : يلاه انا مشيت حتى دير وسيفط ليا البنت لي قلتي نشوفها
- رشيد ( كيضحك ) : مغيارة صافي واخا .. حركات ليه حجبانها ومشات لجهة الطوموبيل حلات الباب وطلعات ، اول ماكلسات ضربات فيها ريحتو دورات راسها لعندو مسكانياه بشوفاتها .. كان لابس نفس اللبسة ديالها بطريقة مختلفة ، سروال كحل مع ݣاط تيشورت فالكحل وكويرة فنفس اللون كورميط مزينة عنقو العريض وساعة رياضية رجالية فاللون الكحل مزينة معصم يدو
- عنبر ( بإبتسامة ) : زوجي قرة عيني مساء الخير .. عرفتي توحشتك كيداز نهارك ؟ .. الروطال ماتسناهاش دير السمطة ديمارا وكسيرا ، ضار عندها وبنظرات خبث كينباثقو من عيونو العسلية ) :
بلا بيك زيرو
- عنبر ( ضربات بشعرها كتشوفيه بميوعة وأنوثة ) :
كون تشوف انا يلاه حسيت بالأكسجين رجع ليا
- الروطال ( تبسم مهزهز راسو شافيها بنص عين ) :
كنتي كتجففي ؟
- عنبر ( بإستغراب ) : علاش زعمة ؟ مافهمتش أش غانجفف كاين شي حد كيجفف بحوايج الخروج ؟
- الروطال ( مركز مع الطريق شافيها ورجع شاف فطريق ) :
ريحتك
- عنبر ( بنفس البرود والملامح ) : مالها ريحتي ؟
- الروطال ( مدور لسانو وسط فمو ) : ريحة سانيكروا ديال الڤاني ..
- عنبر ( قهقهات بكل أنوثة وببرودة قات**لة ) : كولشي زوين أراجلي قرة عيني .. ياك فيا ريحة النقاوة متكونش فيا غير ريحة المازوط لي منين دخلت وانا كنشمشم فيها ..
- الروطال ( عض على شفتو التحتانية ) : يمكن خاص نبدلو ياك ؟
- عنبر ( بالإيجاب ) : حسن .. منين نشريو الدهاز نختار ليك شي رويحة تجي معاك
- الروطال ( بصوتو الرجولي الغالبة عليه رنة الإستهزاء ) : لهلا يخطيك عليا امراتي .. بلا بيك هزني الما
- عنبر : بيان سييييييييييييييغ عنبر وحدة لي كاينة فزتي بيها يالبانضي ..
- الروطال ( شافيها ) : هاد الزواج كيبان ليا مخايبش حتى لديك الدرجة
- عنبر ( جبدات باندة من ساكها جمعات شعرها على شكل سفنجة ) :
الصراحة ماشي حتى لديك الدرجة .. ( شافت لطريق لي غادي فيها ) فين غادي ؟
- الروطال ( شافيها بإستهزاء ) : حشومة نخطف مرتي قبل العرس مجاتش .. نديك غير تعشاي
- عنبر : الله يرضي عليك غير دوك لي ريسطو بلاش .. ماكرهتش ناكل لحم الراس
- الروطال ( شافيها بنص عين ) : علاش مال ليريسطو ؟
- عنبر : الريسطو نمشي ليها منين نكون واكلة وشبعانة .. حيت عارفة ايحطو ليا بزقة لاروب ، نكلس وناخود تصيورات نلوحهم فالأنستغرام .. وانا دابا فيا جوع بغيت ناكل ونعمر كرشي
- مجاوبهاش دور الڤولون على ليسر شاد الطريق .. مخرج يد من السرجم ويد سايݣ بيها ، حتى وصلو وقف الطوموبيل اونفاص مع محال كبير كتعطي منو ريحة الشوا .. حيد السمطة وشاف لعندها :
تاكليه هنا ولا لداخل ؟
- عنبر ( دورات راسها فطوموبيل لي كانت جديدة كضوي ، تبسمات بخبث وشافت فيه ببراءة ) : لا البرد مافيا لي يدخل الداخل ناكل غير هنا ..
- الروطال ( فيكسا عينيه مع عينيها كان حافظ مزيان نظراتها حرك راسو وتبسم شبه إبتسامة ) : واخا ( حل الباب جا نازل حتى وقفاتو )
- عنبر ( مرققة صوتها ) : اجي بلاتي شنو غاتجيبليا بعدا ؟
- الروطال ( هز حاجبو الغليض تقابل معاها ) : سوندويتش ديال لحم الراس
- عنبر : واش كيعطبو نص خبزة ؟ ( حرك ليها راسو بالإيجاب بلاما يدوي ) واش كيبيع اللحم الراس صافي ؟
- الروطال : لي حبات خاطرك دوي
- عنبر ( هزات يدها كتحسب ليه بصباعها ) : هانتي جيب ليا نص خبزة فيها صواصيصو ياك .. مايديرش ليا صوص دمطيشة يدير ليا معاه البصلة ياك ( هبطات الصبع الصغير داز للثاني ) ونص خبزة خور فيه الكفتة ياك ( هبطات الصبع الوسطاني ) ونص الثالث يكون فيه اللحم الراس الى كان اللسان يدير منو
- الروطال ( بقا حابس كيشوف فيها ) : ماݣدكش هداك لي عندك باغية تزيدي ؟
- عنبر ( مداتهاش فيه ) : ختار الخبز يكون كبير راه كيديروه قد كف يدي ..
- نزل من الطوموبيل خابط الباب مقابلاه غادي بطولتو الفارعة مهيمن بمشيتو .. صادرة منها إبتسامة شيطانية غابت فاش دخل للمحال ، تكات بظهرها متنهدة تنهيدة طويلة من قلبها بكل راحة ..
✓ فشقة من الشقق المتواجدة بالمعاريف ✓
- فبيت من الاثاث لي فيه وديكور المتواجد بيه كان باين بلي مخصص لدري صغير .. مصبوغ بشيبي تصاور ديال الرسوم كيلعبو الكرة .. النموسية لي كانت على شكل سيارة سباق فوق الكوافوز صورتو محطوطة مع باه .. وقفات هدى مغطياه من ورا مانعس باس راسو وخرجات من عندو ساد الباب .. توجهات لبيت الݣلاس لي حتى هو مفرش بفراش عصري .. الشقة كانت كبيرة وراقية ݣالس رجل يكون فالأربعينات من عمرو حاط قدامو البيسي ومركز معاه ..
- هدى ( ݣلسات حداه دايرة رجل على رجل بصوت خافت نطقات ) : مزال مساليتيش ؟
- ( جاتها الإجابة من عندو ببرود ) : مكتشوفينيش غارق ( شافيها ) الى بغيتي تنعسي سيري
- هدى ( بلعات ريقها بالعة القمعة لي عطاها ) : واش مغاندويوش شوية .. النهار كامل وأنت خدام افؤاد وحتى دار وزايدون يلاه 8 واش انعس انا دابا ؟
- فؤاد ( حيد نظاظرو وشافيها بعطف ) : عارف راسي مقصر من جيهتك والله .. ولكن راني غارق خدمة حتى لودنيا ( شد يديها باسهم ) غادي نعوضك كوني هانية السيمانة جايا كلها ديالنا
- هدى ( بإبتسامة ) : بصح ؟
- فؤاد ( باسها فشفايفها بوسة طويلة مبعد كيشوف فعينيها ) : وانا فين عمري كذبت عليك ؟
- هدى ( تنهدات ) : عمرك لهلا يخطيك عليا .. واش متيقن مابغيتيش تعشى ؟
- فؤاد : لا اصلا تغديت معطل الى فيك جوع تعشاي انت ؟
- هدى : لا مافياش( وقفات ) انا غانسبقك ندير شي فيلم صافي متعطلش
- فؤاد : نو قربت نسالي .. خلاتو ودخلات لبيتها حيدات البينوار الفوقي بقات غير بسروال النعاس ولاشوميز ديالو دهنات بالكريم يديها ورشات من العطر ديالها .. توجهات نموسية تخشات فيها هزات تيليكوموند دارت فيلم ، ناضت من بلاصتها توجهات للكوزينة جابت سقاطة حطاتها حداها .. متبعة الفيلم وكتاكل منغامسة معاه .. جاتها لقطة فبالها حركات راسها بحال الى كتحاول نسوسو ورجعات تركيزها مع الفيلم ..
_______________________
- جاب ساشية فيدو طلع للطوموبيل ومد ليها ساشية ديالها وخدا هو ديالو .. جبدات النص الأول عضات منو صادر منها صوت إنسان كيتلذذ بداكشي لي كياكل .. شافت فيه بإبتسامة رضى :
اش غانقولك الله يرضي عليك .. سير أنا راضية عليك دنيا واخرة البنة البنة اخويا
- الروطال : بصحتك وراحتك اختي تاكلي وتعاودي .. دوݣي اللسان يعجبــــاك ( مطولها )
- عنبر ( شافت فيه ) : واخا ترجع ليا هاد الكرسي اللور ؟ .. برك على واحد البوطون ورجع بيها الكرسي اللور .. مدات يديها وفكات سباطها محيداه من رجليها ، هزاتهم وقلشاتهم وحطاتهم للقدام قدام انظارو لي كانو مراقبينها .. حبس من الماكلة ضاغط بسنانو على باطن فكو وكيشوف فرجليها لي تحطو على الطوموبيل
- عنبر : رجليا راه نقيين غير ضرني السباط .. مجاوبهاش حدو كيشوف فرجليها رجع هاز راسو فيها بقمة البرود مكتعرفو علاياش ناوي وشنو باغي يدير
- عنبر ( كتلعب برجليها بكل راحة ) : ولاهيلة هاد سوندويتش بنين .. اتولي ديما تجيبني ناكل فيه ( شافت فيه كضحك )
- الروطال ( بملامح خالية من أي إحساس ) : نجيبك علاش لا ( كيحاول ما أمكن يبقى مكالمي ) الجمعة غانجيو عندكم
- عنبر ( خرجات فيه عينيها ) : اويلي ستغفرت الله العظيم .. بقات 3 يام بالحساب لاش هاد الزربة ؟
- الروطال : علاش مدويش مع لوسك العزيز وتݣوليها ليه ؟
- عنبر ( بإستفهام ) : شكون لوسي ؟ ( عاد تفكرات عماد ) اه عماد .. بصح نسيت بلي زربان على هاد التزويجة الزينة النايحة ( موركة على الكلمة الأخيرة )
- الروطال : ورا الخطبة غانعطيك باش تشري دهازك وتاخدي الخاتم لي عجبك
- عنبر ( حبسات الماكلة ) : علاش كاينة شي عروسة كتاخود الخاتم لراسها .. خاص تكون معايا باش نختارو الخواتم بزوج وتكتب سميتي وسميتك فالخاتم باش لي يشوفك يعرفوك مربوط وعندك ماليك ..
- الروطال حبس كم الماكلة وضار عندها .. نظراتو كانو كلهم خبث كيتراقص منهم وميض شيطاني ) : مالي ݣاع ( ضحك على جنب مسكاني ملامحها بإستهزاء ) هي نبداوها من دابا شنو بان لك ؟
- عنبر ( سرطات الدغمة لي كانت فمها مهزهزة راسها بتساؤل ) : زعمة يكونو الذهيبية مزال حالين ؟
- الروطال ( تبسم إبتسامة واسعة من الجواب ديالها لي كدل على انها فهماتو شنو قصد ومامشاش عقلها لبعيد .. بجملة تيستاها وتيستا عقلها وكيفاش كيفكر ) :
مكايسدوش دابا حسن نطرقو هاد المسمار دابا
- عنبر ( كملات السوندويتش الأول ) : واخا سير غير سوݣ بشوية باش ناكل ماكلتي بخاطري .. مسح فمو سايس رجليه وتيشورت ديالو .. ديمارا الطوموبيل وتوجه نيشان للمحال معروف فكازا بلاصة الطوموبيل اونفاص معاه .. كان محال كبير وراقي مكتوب فلافتة الفوق bijouterie merveilleuse ، مسحات فمها وساست حوايجها من الماكلة فتحات السمطة ونزلات معاه ، وقفات كتشوف فالواجهة الأمامية ديال المحال لي كان معروف من عند المشاهير المغاربة ..( شافت فيه بإستغراب) :
واش مغانمشيوش عند ذهيبية ؟
- الروطال ( اشر ليها براسو للمحال ) : بان ليك هذا كيبيع الزعبول دخلي .. سبقها وهي تبعاتو من اللور الداخل كان بحال متحف للمجوهرات الراقية والقيمة كان مول المحال وجوج ديال البنات خدامين معاه ، بإبتسامة ستقبلوهم مول المحال غير شافو بابتسامة جا لعندو ..
- اهلا وسهلا سي فاروق زارتنا البركة
- فاروق ( سلم عليه سلام رجولي ) : سي حفيظ لاباس عليك
- حفيظ : الحمد لله ( شاف فعنبر مد ليها يدو ) مدام مرحبا بيك
- عنبر : شكرا
- الروطال : حفيظ بغينا خواتم ديال الزواج
- حفيظ ( اشر ليهم يݣلسو ) : مرحبا عندك الزهر ، اخر كوليكسيو يلاه تحطات .. ( شاف فوحدة من البنات ) دعاء لاكوليكسيو جديدة فليپاك دو ماغياج .. مشات البنت جابت التشكيلة الجديدة حطاتهم قدامهم
- عنبر ( كدوز عينيها على الخواتم ديال الذهب لي قدامو عجبوها كانو سامبل وراقيين )
- الروطال ( داير رجل على رجل كيشوف فتشكيلة الخواتم لي قدامو شاف فحفيظ ونطق ) : بغينا شيحاجة ديال ديامو .. هزات فيه عنبر راسها بإستغراب وصدمة ..
- حفيظ : لا هادي راه غير دفعة الاولى ديال الذهب دابا غاتجيب دفعة الثانية تشكيلة رائعة ديال ديامو ..
- عنبر ( شافت فروطال بحب ) : فاروق واخا ندويو شوية ( ذافت فسيد ) سمحلينا واحد الدقيقة ، ناضت غادية لجهة الباب تبعها وقف قبالتها بإستفهام :
اش تم ؟
- عنبر ( خرجات فيه عينيها) : واش انت هبيل باغي تاخود خاتم ديال ديامو .. هذا راه غير زواج مزور نهار نتفارقو ماتقدش تبيعو حيت كيتشراو بالغلا ولكن كيكونو رخاص فالبيع ، ومتقدش تخبيه لمراتك المستقبلية حيت ايكون فال خايب .. خاتم سامبل والله يجعل البركة
- الروطال ( دوز لسانو على سنانو وسط فمو ) : ساليتي دخلي قيسي ( يلاه أيعطيها بظهر ورجع لعندها بنظرات خُبث وإستهزاء ) متعرفي هاد الخاتم نهار يدخل لصبعك عمرو يتحيد ( غمزها)
- عنبر ( بجدية ) : فاروق راه مكنضحكش ( مداهاش فيها ) فاروق ( من تحت سنانها ) ياربي صبر من عندك .. رجعات للكرسي ݣلسات قدامها كانت تشكيلة من الخواتم راقيين كيلمعو كيسلبو العقل مشاو عينيها لواحد الخاتم سامبل رقيق فيه حجرة متوسطة عجبها هزاتو قيساتو جا قدها نيشان ..
- حفيظ ( عينيه على الخاتم ) : هذا خاتم ديال الخطوبة هاد الموديل لي فيدك خرج الشهر لي فات تݣدي تشوفي هاد الموديل هاو لي تحط اليوم ..
- عنبر ( كتشوف فيدها ) : الصراحة انا عجبتي
- الروطال ( شاف فسيد ) : حفيظ بغيت شي واحد يكون أونيك مزال ماتحط ومزال مشافتوش العين
- حفيظ ( حنحن بإحراج ) : هو الصراحة كاين واحد ولكن خاص السيدة لي مدومونديا باش يتصاوب مزال مجات ليه
- الروطال ( بإبتسامة عملية) : السيدة تݣد تسنى ويتصايب ليها واحد جديد ولالا ؟
- حفيظ ( بإستسلام ) : منݣدوش نخسرو ليك الخاطر ( دخل لداخل ورجع وهو فيدو بواطة زرقة حطها قبالت الروطال ) .. هزها فاروق فتحها فعلا كان خاتم خاص واقل مايقال عليه روعة .. السُمك ديالو غليض على عكس باقي الخواتم .. منبت كلو بالديامو عاد حجرة كبيرة الوسط أما الداخل فكان عبارة على ذهب أحمر حر ..
- عنبر ( كتشوف فالخاتم وكتشوفيه .. مامستوعباش تفكير هاد السيد لي قبالتها بلعات ريقها وبإبتسامة مصطنعة ) : كيبان ليا كبير بزاف على صبعي .. أنا هذا عجبني ..
• بدون مقدمات جر يدها وركب فيها الخاتم لي كان قياس صبعها بحال الى مصايب خصيصا ليها .. شافيها بإنتصار :
هاهو جاك .. عجبني ( شاف فحفيظ ) بغيت واحد رجالي .. هزهز ليه راسو وعطاه بزاف ديال الخواتم ختار منهم واحد السمك ديالو عريض قيسو جا قدو مدو ليه ونطق بجملة لي صدمات عنبر وخلاتها تهز راسها مخرجة عينيها فيه ..
- الروطال : حفيظ بغيتك تكتب ليا فيه سمية عنبر ( وقف حفيظ فيدو الخاتم بعد عليهم .. شاف الروطال فعنبر وبإبتسامة إستفزاز ) ياك ݣلتي باش يعرفوني الناس مربوط
- عنبر ( عضات على باطن حنكها بعصبية ) : واش شي حد محرشك عليا مافهمتش أنا علاش هادشي كامل ؟
- الروطال ( بتنهيدة راحة ) : بغيت كندير لي ݣالو ليا طانطو ديال دماغي مريض انا شوية الله ينجيك
- عنبر ( هزهزات براسها ) : واخا اسيدي ماقلتي عيب ..
- خرجو من عندو ركبو فطوموبيل الخواتم دارهم فالكرسي اللور .. ديمارا الطوموبيل مكسيري الطريق كلها وهي ساكتة هازة ساشية لي بقا فيها داك السوندويتش الاخير قالبة وجها لزاجة حتى هو محاشاهش ليها ولا دواها حتى سولها على لادريس ديال دارهم .. شافت فيه ببرود ونفاخة منعتة ليه فين حبس قدام الباب طافي الطوموبيل ببحة الرجولية ناظرها بعينيه ناطق بجدية :
غدا غانكون مسافر نهار الجمعة وجدي راسك .. موراها غانمشيو ناخدو الدهاز .. نجمعو الوراق على قبل العقد وراها غاتكون عراضة فداري تم باش ندويو مزيان على شحال من حاجة منها تشوفي البيت لي عجبك باش يكون بيتك
- عنبر ( بإبتسامة صفرة ) : بغيتي تقول باش تعطيني لاليست ديال الممنوعات لي خاصني نتفاداهم ياك ؟
- الروطال : برافو المجتهدة .. فكات السمطة فتحات باب الطوموبيل قبل لا تسدها نطق ناشط عليها :
مغاتسلميش على راجلك ؟
- عنبر ( بإبتسامة ) : علاش لا .. سدات الباب وضارت من الجهة لوخرا عندو قربات للوجهو ونطقات بسم :
تسلم عليك عيشة مولات المرجة ، تصبح على خير أراجلي عطاتو بظهر مخلياه متبعها بالعين مبسم حدها حلات الباب ديمارا ومشا ..
__________________
^ عـــزيــــز ^
- فصالون مغربي بلدي قديم .. ݣالس مجبد شاد تيليكوموند حداه باه واحد خوه يكون عندو 17 عام .. مركزين مع الماتش لي بادي فتلفازة
- أسامة ( الأخ الأصغر ) : وناري ضيعها اصاحبي دابا هذا شنو خاصو العصاب
- عزيز ( معصب) : ميتين ݣاع تݣول واكلين شمندر العصاب أصاحبي أو
- عبد العالي ( الأب ) : لالا اليوم مداىو فيها مايصلاح لاباس عليهم إلى خرجو بتعادل ..( كيعيط ) بهيجة افين داك العشا هلكنا جوع
- خرجات من الكوزينة مرأة فالخمسينات من عمرها النور كيبان على وجها هازة طاجين فيديها حطاتو ، رمات عينيها لتلفازة او وقفات :
مزال ݣاعما سلاو ؟
- عزيز : بقات ليهم 10 دقايق وغايساليو الى مداروها فالأخر راه غايبقاو فتعادل .. رجعات مو للكوزينة جابت شبكة فيها الخبز حطاتو وݣلسات :
سير أ أسامة جيب القرعة دالما الله يرضي عليك .. أسامة طار للكوزينة جاب قرعة ديال الما والكاس حطهم وݣلس مخرج عينيه فشاشة مركز مع الماتش .. حتى سالة بتعادل
- بهيجة : شي خبار على عنبر ؟
- عزيز ( بإبتسامة بالع اللقمة لي ففمو ) : غاتزوج العفريتة
- بهيجة ( بفرحة ) : تبارك الله مبروك عليها تستاهل ديك البنت مسكينة
- عبد العالي : الله يرضي عليها .. عزيزة عليا من نهار شفتها ديك البنت ..
• تعشاو مكملين الجماعة ديالهم ، بهيجة ناضت لبيتها ترتاح ولادها تكلفو بطبلة وغسيل الماعن .. عبد العالي نظم لمرتو عزيز دخل لبيتو لي كان فيه نموسية ديال شخص واحد ماريو وكوافوزات لي محطوط عليهم روايحو ، بدل حوايجو تكا فبلاصتو شاد التيليفون ..
- داخل للأنستغرام كيدور حتى طلع ليه كونط ماجدة .. دخل ليها كيتفرج فتصاورها تصاور لي كانو عفويين عاكسين مكانتها ، صدرات منو إبتسامة خفيفة ناطق بصوتو الرجولي :
كون غاكنتي كتسكتي مكدويش غايكون حسن .. كانت لايحة ستوريات دخل ليهم شافهم كانت مبرطاجية صورة وحدة وتصاور ديال الغروب .. تم تم طلع ليه ميساج ديالها فالواتساب ..
" عزيز فخبارك خويا غايتزوج بعنبر "
- عزيز : ودابا شوف هاد البنت هادي ( جاوبها ) " ياه فخباري مبارك ومسعود العݣوبة ليك "
- ماجدة ( جاوباتو ) " 😂 لا مزال الحال عليا أنا حتى نجح مشروعي "
- عزيز : مزيان الالة الله يسهل عليك
- ماجدة : اللهم آمين أجي وانت ؟
- عزيز ( تقاد فبلاصتو ) : مالي أنا ؟
- ماجدة : زعمى مكاينة حتى وحدة فحياتك .. واخا هو الجواب راه باين اتقولي لا
- عزيز ( هز حجبانو بإستغراب ) : وعلاش زعمة ألالاهم ماجدة ؟
- ماجدة ( كانت فبلاصتنا شداها الضحكة ) : حيت انت صعيب الصراحة الوحدة صعيب تصبر ليك وتأضابطا معاك ومديرهاش مني قلت الصواب زعمة ..
- عزيز ( بطنز ) : لالا مكاين حتى قلت الصواب الله اودي .. انت دويتي دابا ولي عطا الله عطاه ، مابغيتش نضرب كلامك فزيرو ولكن السيدة لي معايا عاجبها الحال وفرحانة ݣاع ..
- من ورا كلامو ليها سكتات طلعات ليه vu وسكتات مدة 5 دقايق حتى قال صافي راح نعسات .. عاد جاه ميساج من عندها فيه " اه اوك مزيان سمحليا حيت تدخلت خليت ليك الراحة bonne nuit " تبسم فاش شاف الميساج ورض عليها " لا خودي راحتك اختي ماجدة تصبحي على خير " ... حط التيليفون طافي الضو ونعس .
__________________
- خرجات من دارهم بكري من ورا ماعلماتهم بداكشي لي قاليها الروطال .. شدات طاكسي وقفها فشارع خلصاتو مشا ، وتوجهات للحومة ساكها على جنبها ملوية فالمونطو وسروال دجين واسع مع سبرديلة .. وقفات قدام الباب دورات راسها فأرجاء الحومة لي بدات فيها حياتها اول نهار اتحط رجليها فكازا .. هزات يدها ودقات جوج دقات بقات مدة عاد تحل الباب .
- عزيز ( شافيها بإستغراب ) : عنبر
- عنبر ( بإبتسامة ) : صباح الخير .. واش يلاه فايق ولا فين هي خالتي بهيجة .. ( دفعاتو ودخلات كتعيط ) خالتي بهيجة
- بهيجة ( خرجات من الكوزينة دايرة طبليتها هازة الصينية ديال اتاي ) : عنبر دخلي ابنتي جابك الله .. دخلات عنبر باستها من حناكها وشدات عندها الصينية داتها للبيت حطاتها فوق الطبلة محيدة ساكها حاطاه
- عنبر : هي شي مسيمنات كيتسناوني ؟
- بهيجة ( كضحك ) : ومݣرملين بحال كيكيعجبك .. رجعات للكوزينة جابت الطبسيل ديال المسمن حطاتو .. دخل عبد العالي وقفات عنبر باست ليه راسو ويدو
- عبد العالي : الله يرضي عليك أبنتي .. كيدايري الدار ؟
- عنبر : الحمد لله بيخير كاعما شت اسامة فين هو ؟
- بهيجة : مشا لقرايتو فاق الصباح كاعما حشاها ليا دار شرع يديه سخن ملوي ديالو .. راكي عارفاه مكايحملش المسمن المربع هو ..
- جاب عزيز الكرسي ݣلس وتجمعو على الفطور .. حتى نطق عبد العالي :
مبارك ومسعود أبنتي ݣاليا عزيز غاتزوجي ان شاء الله
- عنبر ( ساست يديها) : الله يبارك فيك اعمي هادشي علاش جيت اليوم .. منها نشوفكم حيت شحال هادي ماجيت توحشتكم ومنها بغيت ندوي معاك فشيحاجة ونطلبك الى جات على خاطرك
- عبد العالي ( شافيها بجدية .. كان إنسان باين عليه الوقار والحكمة ) : مرحبا ابنتي
- عنبر ( مسحات يدها بسربيتة وشافت فيه بإبتسامة خفيفة ) : عمي أنا راه خيرك عمري نساه لا انت لا عزيز .. حاسباكم عائلتي وحاسباه خويا لي ماعطاهش ليا الله وانت كنشوفيك بابا الله يرحمو (شافت فبهيجة ) وخالتي بهيجة خلاص بلاصتها بوحدها ..
- عبد العالي : حتى انت ابنتي راه بنت الدار بحالك بحال لبنى بنتي .. كيف كيف لي تقالت عليك خفافت علينا
- عنبر ( شافت فيه وتنهدات تنهيدة طويلة) : العريس هو ودارهم غايجيو نهار الجمعة إن شاء الله يخطبوني .. غانديرو خطبة رسمية وكاينة غير خالتي وماما فاطنة وخالتي سميرة غير العيالات ، واخا كاين حتى راجل بنت خالتي سميرة يونس ولكن بغيت يكون شي راجل كبير معانا يكون فمقام بابا ( بلعات ريقها حابسة البكية واخا هاد الزواج مزور بنسبة ليها وماشي حقيقي نهائيا ولكن فكل مرة كنفكر والديها كتجيها نغزة فخاطرها .. مسحات الدمعة لي كانت مهددة باش تنزل ) الى بغيتي وجات على خاطرك ..
- عبد العالي : الله اودي ( بإبتسامة ) بالفرحات عليا على العين وراس ابنتي .. معاش غايجيو إن شاء الله ؟
- عنبر : من ورا صلاة العصر إن شاء الله ..
- عبد العالي ( بإطمئنان ) : كوني هانية ابنتي .. إن شاء الله نجي ونقوم بلازم شحال عندنا منك
- عنبر ( براحة ) : لهلا يخطيك أعمي ( شافت فبهيجة ) عنداكم متجيوش معاه أخالتي ( شافت فعزيز ) انتوما اصلا بلاما يوصيكم راكم عائلتي
- بهيجة ( دوزات يدها على ظهر عنبر ) : غانجيو ونفوتوك لهيه ابنتي .. الله يسهل عليك ويكمل عليك بالخير ويسر امورك ياربي
- عزيز : غايخليك تكملي فالغنا ؟
- عنبر : انا قلت ليه فاش يقولها ليا راسي انا غانحبس .. مايمكنش يبزز عليا شيحاجة هو
- عبد العالي ( تقابل معاها النور ساطع من وجهو وملامح وجهو المريحة لي كتخلي الواحد يسمع ليه ويرتاح لكلامو وصوتو ) : سمعيني أبنتي واخا متبغينيش نݣوليك هاد الكلام .. ماتبدايهاش زكير من الأول وديك شد ليا نقطع ليك مكاين لاش الصبر ابنتي والانسان يكون متفهم شي حاجة لي تأديك بلاش بيها ولكن شيحاجة لي تخص مصلاحتك مافيها باس نحدر راسي ونتسنط .. وطريق الغنا أبنتي طريق خاوية نسولك وجاوبيني بلا كذوب
- عنبر : مرحبا اعمي سولني
- عبد العالي : واش كتصلي ؟
- عنبر ( الدم طغا على خدودها وتحرجات بلعات ريقها داخت وكون صابت الأرض تحل وتسرطها حركات راسها بنفي ) : لا أعمي
- عبد العالي : وعلاش ابنتي شنو مانعك ؟
- عنبر ( عمرها سولات راسها هاد السؤال ) : والله ماعرفت أعمي نكذب عليك .. الشيطان ولد الحرام كنجي من الخدمة عيانة كيبان ليا غير نعس كنفيق مدكدكة كنخرج تاني للخدمة مرات كنخدم سيمانا متابعة داكشي باش ..
- عبد العالي ( بصرامة ) : لا أبنتي هاديك اهضرة وكلام وحجة باش تعطيها على صلاتك لي مكتصليهاش .. باش بغيتي ابنتي ربي يسهل عليك ؟ وباش بغيتيه يعاونك ويوقف معاك ويحميك وانت مكتصليش ؟ راه حنا لي محتاجين لله سبحانه ماشي هو لي محتاج لينا راه حنا لي خاص نصليو ونطلبوه ونتضرعو ونلحو فدعاء باش يسهل علينا ويكون معانا .. ديري لي بغيتي ديري مغانحاسبكش ولكن صلاتك لا ابنتي باش انت مسلمة ومؤمنة الى مكتصليش سولتي راسك ؟ باش وانت مكدكريش الله لا هادشي خاصو يكون من شحال هادي راه كبيرة وبعقلك أبنتي وسمحيليا الى قصحت معاك
- عنبر ( حسات بتأنيب الضمير وقداش هي صغيرة وبحال الى ماعندها قيمة طول حياتها عمرها حسات هكا .. لي وقع ليها مع بدر وماوصلش لهادشي لي حسات بيه من كلام عبد العالي ليها ) : لا اعمي بالعكس .. انا عمر شي حد دوا ليا على الصلاة واخا ماما فاطنة كتصلي وخالتي سميرة وخالتي رشيدة ولكن عمرهم دواو ليا على الصلاة ولا عاتبوني .
- عبد العالي : ابنتي الواحد خاصو يتفق فدينو .. واخا يدير لي دار الكمال لله سبحانه وتعالى ولكن الصلاة .. الصلاة ابنتي بيها ربي يغفر ليك ويعاونك وشوية بشوية اتولي تعرفي شحال من حاجة منها داك الغنا راه ماهواش
- عزيز : ولكن هي الواليد ماكديرش شيحاجة لي عي خايبة
- عبد العالي ( شافيه ) : اولدي راه كتكون فدارك وكتغني وتسمع لغنا بين ربعة دالحيوط ومامزيانش خلي تغني ݣدام عباد الله ، انا راه كونما كانت بحال بنتي راه مندخلش ولا ندوي
- عنبر ( بتساؤل ) : عمي بغيت نسولك منين جبدتي هاد الهضرة .. انا الغنا انخليه انخليه حيت ماشي انا لي ختاريتو واخا كيعجبني نسمع العيوط من صغري الصراحة
- عبد العالي : كلنا ابنتي تربينا على العيطة الأصيلة الإنسان ماحدو كيكبر وكيعرف شحال من حاجة ماهياش نطلبو ربي الهداية من عندو سولي
- عنبر : انا كنت ناوية دوك الفلوس لي صورت من الغنا ندير بيهم مشروع ونخلي الغنا بصفة نهائية ، دابا اعمي هاد الفلوس لي غاندير بيهم المشروع واش حرام ولا حلال ؟
- عبد العالي ( بإبتسامة ) : بغيتي الصح ولا نافقك ؟
- عنبر : انا كون بغيتك اعمي تنافقني كاعما نسولك ..
- عبد العالي : حرام ابنتي باش نجيك لصراحة .. بغيتي ديري مشروع ديريه بفلوس حلال
- عنبر : واش حتى دوك لي كيعلقو لينا الناس فالعراس ؟
- عبد العالي : لا هادوك خليهم عندك انا كندوي على دوك لي كتشدي من الاغاني لي كتحطي فداك اسمو هو اليوتيوب .. وحتى ديال العراس كتأدي خدمة وكتخلصي عليها اما لي كيعطيوك ولا كيعلقو ليك كيف ݣلتي مكاين باس
- عنبر ( داخت ) : وشنو غاندير بيهم .. اعمي انا جامعة بزاف دالفلوس مقارنة بدوك لي لي كيعلقو الناس هادوك القلال لوخرين كثار ؟
- عبد العالي : صدقيهم على الناس لي مافحالهمش .. شوفي العائلات لي عندهم ناس مراض ولا الجمعيات دار الأيتام ، ودوك الفلوس القلال زيدي عليهم وديري مشروع ديالك اللهم ابنتي قليل ومداوم ولا كثير ومقطوع .. المهم دابا الله يرضي عليك صلاتك ثم صلاتك نعاودها كوني كيما بغيتي تكوني ولكن صلاتك والفجر أه ابنتي الفجر وتشوفي ربي كيفاش غايزين طريقك
- عنبر ( وقفات وتحنات على راس عبد العالي باستو ) : لهلا يخطيك اعمي والله يخلي ليك صحيحتك إن شاء الله ياربي غادي نبداها كون هاني ..
•• سلمات عليهم وخرجات من عندهم هي وعزيز وصلها لدار ومشا هو للخدمتو .. دخلات لبيتها نيشان وهي كتفكر تزاد معاها الزايد مابقاتش كتفكر لا فحريرتها مع هاد الزواج ولا فبدر ولا فوالو همها ولا فالكلام لي قاليها بابات عزيز وتجبيدة لي جبد ليها ودنيها ..
- واحد تأنيب الضمير نزل عليها واحد الحالة نفسية ولات فيها ماحسات براسها حتى طرطقات بالبكا .. كتبكي حتى قلبها قال بركة تبكي وتقول مابكيت حلات السرجم كانو قطرات ديال الشتا بداو كينزلو تقابلات مع السما وبدات كطلب فالله يسمح ليها ويغفر ليها على أي حاجة دارت واي صلاة فوتاتها .. تحل الباب ودخلات تودة غير شافتها فديك الحالة تخلعات :
مالك ابنتي ياك لاباس أعوذ بالله من الشيطان الرجيم .. مشات للعندها دغية عنقاتها ماقداتش تجاوب ولا تقول مالها بقات وسط حضنها كتبكي .. جات حياة وسميرة ورشيدة كيسولو مالها اشرات ليها تودة باش يسكتو ..
- بقات كتبكي حتى بدا التنفس ديالها كينتاضم وكترتاح شوية بشوية حتى سكتات فرغات كاع طاقتها .. بعدات على مها وشافت فيها هي ورشيدة بتأنيب سولاتهم :
عمر شي وحدة فيكم نهاتني على الصلاة لي مكنصليش علاش ؟ إلى كان انا ماعندي عقل وغادية مع الدنيا وتايهة نورمال أنتوما تنصحوني وتنبهوني وغوتو عليا وخاصموني ماشي ديرو ليا خاطري ومخليني غادية على هواية
- حياة ( سولاتها ) : واش هادشي علاش كنتي كتبكي ؟
- عنبر ( شافت فيها ) : مكايناش شيحاجة كتستاهل البكا قد الصلاة .. عرفتو اليوم فاش كان عمي عبد العالي كيدوي ليا على الصلاة وكيلومني وحسيت براسي قد النمرة .. حسيت براسي مكنسواش الريال بصلة خامجة مكنسواهاش وانتوما كان خاصو توعيوني ( شافت فحياة ) حتى انت انا وياك غاديين للهاوية بسيف نيت ماعندنا زهر اختي بسيف جبهتنا مكنحطوهاش للارض منقراو قرآن منقراو ادكار ما والو أشمن حياة عندنا داخلت عليك بوجه الله
- تودة ( شافت فرشيدة ) : عندها الصح حنى كنصليو وبناتنا مكايصليوش خايبة حتى لمعاودة ارشيدة .. يجي البراني يوريهم وحنا ساكتين حشومة وعيب علينا مع ربي ..
- عنبر ( بجدية ) : غادي ناخود لبسة دصلاة وصلاية ونبدا نصلي إن شاء الله .. ودوك الفلوس لي كت غاندير بيهم مشروعي غادي نصدقهم
- حياة ( خرجات فيها عينيها ) : علاش ؟ اويلي شحال وانت تجمعي فالبنكة وتصدقيهم
- عنبر ( بإصرار ) : حيت فلوس الغنا حرام .. عمي عبد العالي قالها ليا مزال دوك لي كيعلقو ليك الناس هانية ولكن فلوس الغنا لا منقدش ندير بيهم مشروع حرام اختي حرام
- تودة : مالنا ابنتي كنزنيو ولا كنفسدو ، كنخدمو بحالنا بحال عباد الله ونرجعو بحالنا
- عنبر : عارفة ولكن اماما فاطنة حرام الغنا حرام .. حنا عارفين بلي مكنديرو حتى حاجة خايبة ، ولكن راه حرام أماما ، المشروع انشوف كيفاش ندير ليه
- رشيدة ( تنهدات ) : البنت عدها الصح أفاطنة ماݣالت كلمة العيب .. ݣالت لي كاين الله يكملها بعقلها ويسمح لنا كاملين ( شافت فعنبر ) تاعداك ابنتي هوكاك الله يرضي عليك ( شافت فحياة ) وحتى انت ادوزي تبداي صلاتك داك البندير نسايه ولا نشتف على ريتك انا نيت ماكنش عاجبني هادشي الحمد لله لي ربي فيقكم بكري ( انت نيت افاطنة خرجات فيها عينيها ) حتى لين اخويتي براكة غنيتي حياتك كاملة
- تودة ( خنزرات فيها ) : مالي انا أرشيدة مالي شتيني دروك هازة طعريجتي وندور فسواق ولا ؟
- رشيدة : ماݣلتش هكا ولكن براكة .. خاص توݣفي مع بنتك فهادشي لي ݣالتو
- تودة ( نفاعلات ) : واش شتيني دابا ݣلت ليها لا .. وزايدون انا إلى بغا سيدي ربي غاندير مشروع ، والى بغات تخدم فيه حتى هي هانية وعدي ونعاونها كاع فداكشي لي بغات ديرو
- تودة ( كتحاول تكالما ) : ياربي ترحمنا ياربي حبيبي ( شافت فعنبر ) شوفي ابنتي لي درتيها حنا معاك فيها .. انت بعدا راه قارية لا تي لا حياة بعدا راكم قريتو ودخلتو لمدرسة ماشي بحالنا حنا عمرنا قرينا
- حياة ( شافت فتودة ومها وسميرة ) : انتوما ب 3 ماقريتوش علاش مديروش محو الأمية ؟
- رشيدة ( خنزرات فيها ) : على اخر يامي نولي هازة ساكي فيها تيلاوة ( لوحة ) وستيرو ونبقى نقرا ألف باء
- عنبر ( مسحات دموعها ) : عندها الصح شنو فيها تعرفو تقراو القرآن .. تعرفو تكتبو سميتكم تشدو النوامر ديال التيليفون تكونو امسافرين تعرفو الپلايك ، راه ماكدباتش عليكم ديرو شيحاجة بدلو بيها الروتين
- تودة ( شافت فرشيدة ) : تي ولينا سايرين نتعايرو
- سميرة : عدهم الصح اختي ، حنا حافظين اسور قلال فالقرآن .. انا والله ماكرهت نقرا القرآن كامل ونحفظ كاع السور ونكتب سميتي ونعرف فين نمشي ونمشي اش فيها
- حياة : القراية مكاتنقصش من الواحد بالعكس .. غادي تحسو براحة وتحسو براسكم عندكم قيمة كبيرة ، وماتبقاوش غير مبهوضين قدام الناس
- تودة ( سكتات كتفكر ) : إن شاء الله
- حياة : دابا ندوي مع ماجدة ونقلبو على شي مقر ولا مؤسسة كدير محو الامية ونسجلوكم إن شاء الله
- رشيدة : زربانة الله يستر
- حياة : خير البر عاجله .. اش غاتبقاو ككالسين ديرو ، وحتى فاش ديرو المشروع تخدمو وتقراو وغاتنفعكم حتى فالخدمة ..
- رشيدة ( ݣلسات ورا مكانت واقفة ) : بعدا خاص داك المنطيح يعطيني براتي .. نفك معاه الجرة او ولادي يدخلو يقراو نجيب ليهم الانتقال ونشوف راسي بعدا ..
- عنبر : إن شاء الله هادشي يتحل ، غير بشوية كولشي غايكون مزيان الله يصاوب ..
__________________
- فنواحي طنجة .. الطبيعة الخضراء كتحسسك بواحد الراحة عجيبة ماتلقاهاش نهائيا فالمدينة ، الجو النقي والناس طيبة وقلبها بيض الإبتسامة على الوجوه واحد البشاشة وراحة فالكلام .. مكاينش لي يخنزر فيك ولا يعطيك كلمة قاصحة .. البنات مزينين بالحشمة وشباب برزانة اما الرجال الكبار بالوقار والعيبة والحكمة ، فكل مرة كيطلع لطنجة كيدوز وقتو هنا يستمتع بطبيعة ويرتاح من الصداع ديال المدينة ومن الخدمة وستريس ديالها ..
- واقف لابس جلابة قصيرة فالقهوي مع سروال ديال الدجين واسع وصباط عادي داير يديه وراه ومقابل مع الجبل وضبابة لي مزيناه .. لي يشوفو مايقولش واش هدا هو رجل الاعمال فاروق لي فالمدينة لا من المظهر ديالو لا من الملامح ديالو ، خرج واحد الراجل كبير فالسن من واحد الدار لي كان فيها طبقة وحدة مصبوغة بالبيض ، لابس جلابية وداير القب توجه عندو حاط يدو على ظهرو مفيقو من سهوتو .. وباللهجة شمالية قحة نطق :
ماحسيتش بيك فاش فقتي
- فاروق ( بإبتسامة وصوت رجولي مرزن تقيل وهادئ ) : منعستش ݣاع اصلا قرب يأذن الظهر
- بغيتك اترتاح من الطريق ، وكنت غانوضك تصلي
- فاروق ( شاف بعيد ) : حتى ليل ونرتاح من طريق .. مابغيتش نضيع الوقت فنعاس وضاير بيا هاد الخير أعمي محمد ..
- محمد ( بإبتسامة ونظرة فخر ) : الوليدات فرحو بداكشي لي جبتي ليهم .. الناس مساكن ماعرفت فين غايديرو الخير لي كدير معاهم
- فاروق ( شافيها ناطق بهمهمة رجولية ) : حقهم هداك اعمي .. ضروري نخرجو من رزقنا للناس حقهم هداك واجب علينا
- محمد ( هزهز براسو ) : الله يرضي عليك اولدي .. خيرك الناس عمرهم ينساوه
- فاروق : مادرت والو اعمي كيݣلت لك رزقهم هداك
- محمد ( ضحك ) : لاواه أولدي لاواه ، داك الجامع لي كيصليو فيه الناس شكون بناه غير انت .. هادشي علاش ربي مفيض عليك رزقو لي صلى فجامع كيدعي مع لي بناه .. ودوك الوليدات لي الادوات يوصلوهم وحوايج البرد وحوايج الصيف احيانة لا تݣولش هكاك
- فاروق ( بجدية ) : حتى واحد مافخبارو ياك أعمي ؟
- محمد ( كيحلف ) : لا اولدي وربي شاهد ماخرجات من فمي .. حتى خالتك شامة مافخبارها كيما وصيتيني
- فاروق : الله يخلي ليك صحيحتك .. خلي الحوايج مستورة مايعرفها حد ( بدا المودن كيأذن عنق الحاج محمد من كتفو ) نمشيو نتوضاو الظهر كيأدن ..
- محمد : على مولانا ..
- واخا كان زواج مزيف ولكن التوتر لي كان غالب على تودة عمرها عاشتو فحياتها .. رشيدة وسميرة كانو مكلفات بالحلوى البلدية اما الحلوى العصرية فكانو غادي يجيبوها من عند واحد تريتور .. سونات عنبر على عزيز باش يوصلها هي وحياة وتودة للدرب السلطان باغية تشوف قفطان خفيف لي تلبس نهار غايجيو بقا ليهم نهار واحد ومابقاش عندهم الوقت نهائيا .. القفطان لي ختارت كان فاللون البيج فيها واحد الحزام خفيف يديه كانو واسعين ، دازو لعند واحد المحال كيبيع البلاغي ختارت بليغة مطروزة بصم دومي طالون قصير ..
- وراها دازو لعند محال خاص بتمور خداو تمر معمر بريستيج عاد شدو الطريق للدار ، رجليها كيزدحو ومدݣدݣة .. ولكن كانو ضروري خاصها تصلي المغرب لي ادن عليهم وهوما فطريق دخلات توضات وحياة بدورها حتى هي ، وكل وحدة مشات لبيتها تصلي ..
- مع سلمات هزات القرآن قرات بعض الاحزاب وحطاتو تنهدات تنهيدة طويلة تنهيدة راحة غريبة ولات كتحس بيها فهاد اليوماين لي بدات فيهم صلاة ، واحد الحلاوة غريبة عجيبة عمرها فحياتها ماحسات بيها .. هزات راسها حسات بشي حد عند الباب لقاتها حياة واقفة وفيدها طبسيل صغير ، وقفات كتجمع فصلاية وبإستفهام سولاتها :
أش داكشي فيدك ؟
- حياة ( هزات المعلقة كتهز فالخليط لي كان قهوي ) : ماسك .. من العصر وحنا خارجين اليوم الشمس مݣلݣلة تقولي ماشي البرد هذا وجهك ولا حالتو
- عنبر ( بعياء ) : والله مافيا لي يدير شيحاجة اصاحبتي ديريه انت
- حياة : واش انا لي غانتخطب غدا ولا انت رجوع لله .. ومافيه والو راه هو لي كندير لوجهي شوفي وجهي كيف ولا ؟
- عنبر ( كلسات فوق النموسية كتزول فلبسة ديال الصلاة .. هزات فيعا عينيها كتحقق ليها فوجها وبشرتها لي ولات صافية كثر ) : شنو دايرة فيه ؟
- حياة : صفار بيضة عادية وقهوة سريعة الذوبان .. وفرماجة ومعلقة دنشا ومعلقة دحليب بودر صافي
- عنبر ( تكات مغمضة عينيها ) : هاكي دوزي ديريه ليا انت .. ݣلسات حداها حياة دارتو ليها لوجها كولو حتى لتحت عينيها
- عنبر : ياك الماسك مخاصوش توصليه لتحت العين ؟
- حياة : لا هانية حيت فيه القهوة .. والقهوة فيها الكافيين عندك هذا وديال البطاطا هانيا حيت البطاطا زوينة لتحت العين .. ( سلات ليها وبعدات ) غير ينشف مزيان وحربليه بحال الݣوماج باش يحيد ليك الوسخ من وجهك ، صابونية النيلة مزال عندك ؟ .
- عنبر : اه مزال قربات تسالي نيت .. خاص ندير ونشريها
- حياة : اش درتي مع رشيد ؟
- عنبر : والو قلت ليه عجباتني الاغنية الصراحة .. عطاني الفلوس لي خرجو من الاغنية لي فاتت خلص الدراري والملحن والموزع ، وانا الفلوس لي عطاني خبيتهم مع لاخرين حتى يدوز هادشي ونبدا بناس لي مساكن ماعندهمش ونشوف حتى دار العجزة ودار الايتام
- حياة : نمشي معاك ، والله حتى بغيت نزور دار العجزة كيبقاو فيا دوك الناس كنحس بيهم بحال جدواتي وجدودي
- عنبر ( تنهدات ) : خالتي حورية وليالي لي كيغانديرو معاهم فاش انحبس العراسات .. هوما دابا وبلا خدمة اماما فاطنة لي كتعطيهم داكشي لي كنعطيها انا .. ليالي الى ماخدمات ماعندها متاكل اصاحبتي ترجع للخدمة ديال ديور عاود ؟
•• حياة : علاش متعطيها نيت هي واحد البركة .. ياك غاتصدقي على المسكين ولي مايكسابش
- عنبر : كاين فرق احياة .. بين واحد ماعندوش مسكين ، عندو شي إعاقة ولا عندو المريض فدار .. ليالي ماشاء الله بصحيحتها عرفتي شنو ( بقات كتفكر ) ياك ماما فاطنة غادي مشروع ديالها تخدم معاها ليالي ، حسن من داك تلواز يبقاو رجالة حالين فيهم فامهم بحال الضبوعة بغيت ليهم الجهل
- حياة ( ݣلسات ) : عقلتي على داك الكيدار لي كان فديك الݣالة لي حضرنا ليها .. عدو الزهر كنت انخبط بوه نفلقو بغا ياكل البنت بعينيه تمينا خارجين باغي يجرها من يدها
- عنبر ( تنهدات ) : مقالوني انا لي كنت غير نغني وساترة راسي ومحتارماه .. خلي هي لي كتشطح راه فهاد البلاد السعيدة يسمعو شيخة بحال الى راكي باركة اعلى زهو والفساد كون كنا فأوروبا مزال اه هنا ولا بلدان خرى لا الشيخة يجيبوها تغني ولكن كينعتو فيها
- حياة ( تنهدت ) : بصح حيت كاين نيت شي شيخات راه شطيحهم ديال صحابات الحال .. تحك على الرجال وتزلل عليهم بسيف نيت ، وشوفي من الخبر نيت ليالي تخدم مع خالتي فاطنة والبنات لاخرين الله يسهل عليهم فقت خور
- عنبر : انا هاد علمت رشيد قبل ، بلي إن شاء الله هاد الاغنية لاخرة ليا ونجمع ونطوي ، عرفتي اش قالي قالي علاش منولي نغني فأعراس نسوية بحال العدايات
- حياة : ماعرفتش الصراحة .. ولكن يمكن راه هي هي اعنبر تخسري صحتك وصوتك وفالاخير دوك الفلوس اتعطيهم اتعطيهم وانت مناقصكش ، سمعتي الطبيب اش قاليك
- عنبر : اه عندك الصح وزايدون فهاد الحريرة لي غاندخل فيها راسي فين غايبقى ليا الوقت لشي غنا يلاه نتكافى مع المكاريب لي غايدخلو للمغرب
- حياة : واييه خرجولي بالي كاع .. المهم دابا اتدوي مع خالتي فاطنة ؟
- عنبر : حتى ندوي معاها على ليالي وهي دوي مع خالتي رحيمة تعلمها بلي كاين إن شاء الله
- حياة ( وقفات ) : صافي ماتبقايش دوي دابا راه الماسك غايكمش ليك وجهك .. خرجات من عندها خلاتها وخرجات عندهم تشوف واش محتاجين شيحاجة ..
•••••••••••••
"جزء كبير من الراحة النفسية.. تجدها في المصالحة مع نفسك، أن تتقبّل وضعكَ أيًا كان، أن تتعامل مع ظروفك بواقعية، وأن تؤمن أنّ الدنيا ليست جنة، لكنها ليست جحيمًا كذلك، فلا تجلد ذاتك ..هكذا هي الحياة ...
تحمل في طياتها الكثير من الأقدار ..
حلم يتحقق ... وحلم يتعثر...
لقاء بلا موعد...وفراق بلا سبب...
لا البدايات التي تتوقعها.. ولا النهايات التي نريدها..
- وتستمر الحياة ...
- نهار الجمعة نهارها نهار لي كتسناه اي بنت بفارغ الصبر باش ترتابط بشريك حياتها .. ولكن بنسبة ليها هي نهار لي مزيف ومع ذلك كان غالب عليها الخوف والخلعة وتوتر لي راكبينها منين حلات عينيها وفاقت .. فطرات معاهم ودخلات لبيتها توجد لي غاتلبس ودخل للحمام دير الخرقة وصابون دغية باش تخرج تصايب شعرها حتى وصلها ميساج فتيليفونها ..
- كان ميساج من عند رشيد فيه بلي غايتعطل واحد 5 دقايق يقضي غرض وعاد غايجي .. رضات عليه بجملة وحدة :
عنداك تعطل .. حطات تيليفونها ودخلات لدوش دوشات عليها خرجات لبسات كيطمة وتقاشر فرجليها وبانطوفة .. شعرها جمعاتو بزيف حياتي ودارت عليه الشال هزات بزطام ديالها وخرجات من البيت كتعيط على حياة خرجات عندها ملوية فالمونطو ديالها مع سروال كيطمة وصندالة الميكة وتقاشر :
- ساليتي باش نمشيو
- حياة : سبقيني لتحت نجيب بزطامي ونجي .. نزلات عنبر لتحت عاد تبعاتها ، الصالون مكانش بعيد على دار شدوها ارجل .. غاديين عنبر خاشية يدها فدراع حياة وكيتحتو مع بعضياتهم ، المحابات محلولين حتى بان ليهم محال ديال الشباكية ، توجهو ليه خداو وحدة وحدة حيت تشهاوها عاد كملو الطريق للصالون .. الباب ديالو كان محلول مصبوغ بالبيض ومكتوب بالكحل والغوز پلاكة الفوق بالكحل وذهبي مكتوب فيها salon louby حيدو الرواق ودخلو ..
- الصالون كان كبيرفيه فوتويات ديال الجلد فالغوز .. مصبوغ بالبيج ومكتوب بالغوز ، فيه دروج للطبقة الفوقانية مجهز من صبايغ دشعر ليدين لوجيل سوان فيه كولشي .. كان فيه 5 ديال الكراسة عامرين و5 البنات بلبسة فالغوز .. عاد مولات الصالون شعرها أكاجو عامرة لابسة يونوفورم ديال الصالون غير الفرق بينها وبين البنات التحتي كحل والفوقي غوز
- لبنى ( شافتهم جات عندهم ) : ياختي زارتنا البراكة .. تي ياختي فين غبرتي البارح قلتها لخولة
- خولة ( وحدة فالبنات كانت منغامسة مع شعر الكليانة كتقطعو ) : والله حتى جبدناك لبارح قلت ليها واحد عنبر وحياة مابقاوش بانو
- عنبر ( حيدات الشال ) : والله ياختي أدار والخدمة صافي راكي عارفة
- لبنى ( دورات راسها ) : أحيانة عليكم أشيطانات .. ݣلسو البنات لبنى هزات بواطة فيها الشكلاط حللتهم وحطاتها ليهم .. هوما وشي كليانات كالسات كيتسناو
- حياة : مدازتش عندك فاطمة الزهراء ، تلاقيتها داك نهار فالحمام قاتلي انخرج من هنا نيشان عند لبنى
- لبنى ( ݣلسات فواحد الفوتوي ديال بلاصة وحدة هازة نبرض كتبرض فظفارها ) :
دازت عندي وكون غير مدازت كنت غانتشاد أنا وياها ( شافت فوحدة فالكليانات ) كنتي أهاجر
- هاجر (كضحك ) : واه كنت .. هاديك راه هبيلة والله مسالية قبها باغية كولشي فابور
- حياة : وايلي أش دارت ( بفضول )
- لبنى : السيدة هادي شهرين درت ليها ليغوفلي ماخلاصتنيش فيهم قاتلك تسالي .. دازت سيمانة رجعات كانت معروضة ( شافت فخولة ) فين قالت معروضة ؟
- خولة ( عينيها مع شعر الكليانة ويدها خدامة ) : عرفت ولد عمتها فخريبݣة
- لبنى : ايــــاه ودارتو ليديها ورجليها وعاد السوان لوجها وشعرها .. ومشات السيدة للعرس وحاطة ستوريات كل شوية تكشيطة فشكل .. وفاش رجعات جايا لعندي حيدت ليها لوجيل وصايبات شعرها قاتلك تسالي
- حياة ( خرجات عينيها بصدمة ) : اويلي ستغفرت الله العظيم ( عنبر كانت اكتسمع وساكتة)
- خولة ( كضحك ) : وحق الله انا ونسرين بقينا كنشوفو فبعضياتنا
- نسرين ( وحدة من البنات لي خدامات ) : أنا صدماتني بقيت كنشوف فلبنى تزيرات وبانت على وجها
- لبنى : ومااي غانسكت ليها .. خرجت فيها طول وعرض قلت ليها لا سمحيليا .. كنتسالك زبالة دالفلوس دابا حطي ليا فلوس عاد خرجي حيت كت عارفاها غادي تخرج مابقيتش نشوف وجها
- نسرين ( ضحكات ) : وقفات ليها عند الباب وسداتو قاتلها والله ماتخرجي من هنا حتى تخلصيني فكاع لي كانسالك
- لبنى ( شافت فيهم ) : وياختي عصباتني بنادم إستغلالي كايلقاك ظريف كيبغي يركبلك فوق ظهرك زوينة هادي
- حياة : وشنو دارت ؟
- لبنى : عيطات على راجلها قالتها ليه وجا خلص كاع لي عليها .. وسيد مارضاش سمعهم ليها ماخلاش ليها .. بنادم فيه كترت الفوحان وبوخ الخاوي ، بغات تبوخ الدم مارضاتش يا صݣعة ..
- حياة ( شافت فعنبر ) : عقلتي كانت ظل تحشي الهضرة فينما بنا ليها وتقلبها ضحك
- عنبر ( بعدم إهتمام ) : بحال هادوك كاعما كنديها فيهم .. فيهم اللسان كتلقايها مسكينة ناقصة من شي قنت وكتبغي تخرج داك النقص لي فيها
- لبنى : هي راه مع كولشي هكاك .. عرفتي فاش راجلها كيغوت عليها ماكرهات تحل الأرض وظخل فيها
- نسرين : عمرها دور بالصالون
- لبنى ( شافت فيها ) : ادور بيه نيت وتفرجي ( شافت فعنبر ) أش بغيتو تصايبو بعدا ؟
- حياة : بروشينغ انا بعدا
- عنبر : انا صايبي ليا بعدا تقطيعة ديري ليا ديݣراضي إيفيلي طويلة وصايبيه لي على حسب تقطيعة
- لبنى : شي عراضة فاعلة تاركة هادي عاود ؟ ( غمزاتها )
- عنبر ( ضحكات ) : خطبة ..
- لبنى ( تقادات فالكلسة ) : وايلي شكون انت ولا حياة ؟
- حياة : هي هي ( كضحك) .. لبنى وقفات ضرباتها بتزغريتة حارة ( شافت فالبنات ) ايوا البنات عطيونا واحد الصلاة على النبي ..
- البنات وقفو الخدمة وبداو يصليو على النبي ويزغرتو .. الكل لي تم بارك ليها
- لبنى ( حيدات واحد المخدة ثغيرة وكلسات حدا عنبر ناغزاها ) :
شكون هذا اعينين القهوة ؟
- عنبر ( كضحك وتلعب برجليها ) : ناري على فضولية .. ( سكتات وشافت فيها ) كتسمعي بحيدر ؟
- لبنى ( رفعات حواجبها بصدمة وعدم الإستوعاب) : ..
كتفلاي عليا ياك ؟
- نسرين ( يدها فيها مشطة ) : واش مول لوطيلات ؟
- عنبر : هو هداك
- خولة ( حلات عينيها على تواسهم ) : متقوليش ليا ، تي فين عرفتيه أجنية ؟
- عنبر ( كتضحك ) : غنيت فعرس بنت عمو تما فين شافني وديجا ختو صاحبتنا كنعرفوها
- لبنى ( بنظرات حب ) : تستاهلي يا عنبر والله ( شافت فالكليانات لي تم ) تستاهل هاد البنت والله قلبها بيض ، وبنت الناس
- ( وحدة فالكليانات ) : كنت كنشوفها فالانستغرام وكنتفرح فالفيديوات ديالها غزالة ماشاء الله كنت كنقول باينة هاد السيدة ظريفة امن وجها
- عنبر ( الحشمة طغات على خدودها ) : لهلا يخطيك ربي يخليك .. باركو ليها لي التم ، زوج كليانات خرجو ناضو زوجات كانو كيتسناو ، حتى وصلات نوبتهم ناضت حياة صايبات وعنبر قطعات ليها لبنى شعرها هي لي تكلفات بيها .. صايبات ليها شعرها جاها فن وجاها مع تضويرة ديال وجها
- عنبر ( خلصاتها ) : وعولي على راسك انت لي غاتصايبي ليا الى بغا الله إن شاء الله فعرسي
- لبنى ( عنقاتها ) : الله اودي ازين .. احسن مكياج فيك يا كازا وفالعالم نصايبو لحبيبتي
- عنبر : يلاه بسلامة البنات الله يعاونكم .. خرجات عنبر هي وحياة من الصالون لايحين عليهم شيلانهم على البرد ..
- وصلو لدار ريحة البخور كانت عاطية من المسكة الحرة وسرغينة .. وقفات عنبر قدام الصالة مغمضة عينيها كتستنشق ريحة البخور لي كتنت كيحمقها كانت كتعشقو .. كتحس بنشوة وهي كتشمو نطقات من أعماق قلبها :
الله على رويحة كتحمق .. ( حلات عينيها الصالة كانت مجموعة .. فيها زوج طبالي كبار وحدة فيها بلاطويات ديال الحلوة مع الفاكية وتمر او وحدة فيها رشوش صحراوي وروايح ديال لترو فالمريشات والمبيخرة كطلق ريحة البخور ..
- الكوزينة كانت جايا منها ريحة ديال الطياب ريحة دجاج بدغميرة كتعطي ..
- تودة ( خرجات من الكوزينة لابسة طبلية فالخضر مطروزة هازة كمايمها مشمرة عليهم ) :
تي دوزي وجدي راسك ݣلستو عامين فصالون
- حياة : راه لقيناه عامر ، بالكشايف باش وصلات نوبتها فين هي خالتي سميرة ومي ؟
- تودة : مشاو يتسخرو للمخبازة لي حدانا .. ومن تم يدوزو على رجاء تجي معاهم
- عنبر : هاي هاي طوالو رجليهم
- تودة ( كضحك ) : ولاو حافظين الطريق ، يديرو يد فيد ويتسخرو بجوج وسيري ابنتي سيري راه قرب يأذن العصر وناس ايصليو ويجيو
- دخلات عنبر للبيتها ، اول حاجة بدات بيها هي وجها .. دارت مرطب مع كريم اساس كيناسب البشرة ديالها عينيها زيناتهم بالايلاينر خفيف مع ماسكارا وشفتيفها عكراتهم بعكر كاشيري خفيف .. لبسات كولون فالبيج مع القفطان لي ختارت الحزام الخفيف المدهب مع الشمار ذهبي جاها غزال .. البلغة لي ختارت دارتها فرجليها وتات ليها اللبية ، اما شعرها جمعاتو بشديدة خفيفة ماخلاتوش مطلوق من غير الݣصة لي خلاتها جايا على الجناب ، ودنيها زيناتهم بحلقات واخر لمسة هي المسك الإستواىي وعطر Bella Dolce ..
°° عــنـد عـائـلـة حـيــدر °°
- لا فالفيلا ديال إدريس ولا ديال عبد الخالق .. كان ضروري من بيوت ديال الضياف الى جاو عائلة إدريس عندو عندهم بيوت ديالهم .. وحتى فالفيلا ديال عبد الخالق نفس الحاجة فالبيت لي كان مخصص لطارق واخا كان بدارو ، واقف بكامل اناقتو شوميز فالبيض انيقة مع سروال كحل انيق شعرو راضو اللور ساعة رجالية فيدو .. هازة تيليفون ديالو دايرو على ودنو غادي جاي بعصبية .. تحل الباب عليه ودخل طارق عندو
- طارق : امضرا جاوباتك ؟
- الروطال ( شافيها بملامح باردة ) : اش بان لك انت ؟
- طارق : راه غير كتعذب فراسك والله لا جات
- الروطال ( قطع ولاح التيليفون فوق نموسية ) : لي عليا انا درتو .. بغات تجي مرحبا
- طارق ( هز واحد لاڤيست ديالو دارها فوق تريكوه ) : يلاه اصاحبي راه تعطلنا على الناس
- الروطال ( بتساؤل ) : كولشي واجد ؟
- طارق : كولشي واجد .. هز الروطال تيليفون رش من ريحة طارق ونزل هو وياه كان عماد داخل من الباب وقف قبالتو .. شافيه الروطال بتساؤل :
امضرا ؟
- عماد ( بخيبة امل ) : مابغاتش ، حلفات وقسمات لا مشات لا دابا لا فعرسك
- الروطال ( دور لسانو وسطو فمو بالع ريقو بعصبية مايكذب الى قال بقا فيه الحال .. حس بإحساس فشكل تقدم بخطوات القدام ناطق ببرود قات*ل :
يلاه .. ، توجهو لبرا الطوموبيل الاولى ديال الروطال كان راكب القدام إدريس واللور راكبين علال ورقية .. ساك انيق وإكسسوارات أنيقين .. أما رقية فكانت لابسة جلابة هماوية مع سباط مريح وشال شاداه من تحت الدقن ديالها ومخلياه من تحت مطلوق ..
- فطوموبيل ديال عماد كان سايݣ وبجنبو عبد الخالق اللور كان عصام وطارق .. عاد الطوموبيل ديال دنيا فيها هي حداها يسرى ولور ماجدة لي كانت لابسة سروال توب بيج مع شومبز طويلة مطروزة بالقهوي مع حزام ساك انيق وإكسسوارات أنيقين .. كل وحدة فالبنات كانت متأنقة بطريقة خاصة .. وحتى شباب العائلة خداو حقهم من الأناقة على رؤوس كبار العائلة ..
- إدريس ( شاف فالروطال لي سايݣ وعاقد غوباشتو حط يدو على فخض ولدو ) :
ماديرش اولدي فبالك .. من الخير
- الروطال ( تنهد ) : انا هاد الواليدة ماعرفتش اشمن حل غاندير معاها
- إدريس : ماعندها حل اولدي .. لي 56 عام فعمرو وهاد العمر كامل وهو هو ماݣدش يتبدل ماعندك ماتبدل فيه
- رقية : لاتخسرش نهارك اوليدي ، لي بغا يجي مرحبا بيه لي مابغاش لهلا كاع يجيبو
- علال ( شافيها بصرامة وبصوتو التقيل الوقور ) : تي زعمة والو ماتصيبيش تسكتي يا هاد المرة
- رقية ( شافت فيه ) : ومالني أش ݣلت ؟ ماشي عيب تخسر نهار ديال وليدي حبيبي .. مالها بغات ليه بنت الرئيس دميريكان وزوينة هادي بحال الى هي من عايلة السيدة الحرة
- الروطال ( جاتو الضحكة مد يدو ليها ) : أري ديك اليد أميمتي .. مدات ليه يدها لي مزينة بخاتم ديال النقرة فيه حجرة خضرة وصباعها المكمشين مزينين بالحنة ( عبود )
- الروطال ( باسها ليها ) : الله يخليك ليا ميمتي
- رقية ( كضحك ) : الله يحفظك أوليدي ، أنا بغيت ربي عمرو يخيبك الله يحفظك وينجيك لشبايك ضحك ونشط فنهارك اوليدي ماتفكر فحتى حاجة شينة .. تنهد وكمل السوݣان حتى وصل للشارع فين كاينة دار عنبر وقف فسطوب غير شعلات البولة الخضرة كمل الطريق وبلاصة أونفاص مع دارهم وموراه طوموبيلت خوه وطوموبيلت دنيا ..
- حياة كانت كطل من السرجم غير بانو ليها نقزات من فوق السداري خرجات عندهم كترعد بكل حماس :
جاو جاو وكثار تبارك الله
- سميرة : هاعلاش كتليكم نوجدو جوج صالات وحدة درجال وحدة دالعيالات
- رجاء ( لابسة قفطان جوهرة واسع فالغوز بارد وكرشها ممدودة وشال فنفس اللون دالقفطان فوق راسها ) :
خالتي تودة شكون غايحل ليهم ؟
- تودة ( لابسة قفطان هماوي فالموطارد مطروز بالتيركواز وزيف أنيق مغطية بيه شعرها خاتم ديال الذهب فصبعها وساعة أنيقة فيدها كانت فمنتهى الأناقة ) :
غادي يفتح ليهم عزيز .. وحنا نستقبلوهم بالرشوش وريحة
- رشيدة ( خارجة من الكوزينة ) : هادوك العطور ديال الصحراء زينين حمقوني
- رجاء : حتى أنا ندور ندور ونشم
- تودة : تقداتهم عنبر من عد واحد السيد من الأنترنت ( تسمع السرسار ) جاو سيرو سيرو .. الصالة لي أيݣلسو فيها الرجال كان ݣالس رشيد سروال ديال الدجين مع شومبز فشيبي تقاشر فرجليه وتجاكيط .. حداه عبد العالي بجلابة فالبيج وطقية مشبكة نظارات ديال الشوف النور عاطي من وجهو .. عاد عزيز لي بدورو لابس سروال بيج وتريكو طالع فالكول فنفس اللون ، غير تسمع السرسار وقف عزيز لابس البلغة ديال باه ونزل باش يحل ليهم ..
- تسمعات الهضرة كثيرة عند الباب ، حياة كطل بغات تبركك .. بانو ليها بزاف ديال البواطات او الروطال واقف هو الاخر داير يدو وسط جيبو ، طارت كتجري عند عنبر للبيت حلاتو حليها وسداتو .. لقاتها غادية جايا
- عنبر ( خرجات فيها عينيها ) : جاو ؟
- حياة : انت نيت سمعتي السرسار وكتسولي زعمة ماطليتيش (غمزاتها )
- عنبر : باش نحصل من نيتك .. هادشي واخا ماشي ديال الصح ولكن راه راكباني واحد الخلعة ماركباتنيش نهار تزوجت
- حياة : وراه ضروري أصاحبتي راه تشوفي أش جايبين معاهم .. أشمنك يا كادويات واش اليوم أتركبو الخواتم ياك ؟
- عنبر ( هزهزات راسها بتوتر مزولة خصلة من شعرها من على عينيها ) :
ياه داكشي لي قال هو الله يصاوب ..( حلات عينيها ) وقيلة دخلو ياك ؟ .. تسلتات حياة حلات الباب بسماتو أشوية كطل بانت ليها سميرة ورشيدة هازين الرشوش والمرشة لي فيها الريحة مستقبلين عائلة فاروق رقية لي كانت فرحانة ومبسمة هازة على جلابتها وهازة واحد الساك كتجر فرجليها .. دخلو العيالات للصالة الصغيرة والرجال للصالة الكبيرة .. رجعات حياة براسها سادة الباب :
دخلو الرجال للصالة الكبيرة والعيالات لصالة لوخرا
- عنبر ( خرجات فيها عينيها ) : ماتكوليش ليا ايتقابلو مع الكولوار اويلي انبغي نخرج نتم دايزة عليهم
- حياة : نعيط على عزيز نݣولو يخلي فاروق يݣلس من الجهة لوخرا باش حتى الى دوتي دوزي مرتاحة ..
- عنبر : لالا .. وزايدون مالي شغلي يݣلسو فينما ݣلسو انا مالي ..
°°°°°°°°°°°°°°°°°°
- فصالة ديال العيالات .. ݣالسين كاملين شي غالبة عليه الحشمة وشي غالبة عليه الرهبة وتوتر
- تودة ( بإبتسامة ) : مرحبا بيكم نهار كبير هذا
- رقية ( كطلعها وتهبط بعينين المحبة ) : ربي يخليك الحبيبة .. ترحب بيك الجنة ونعايمها
- ماجدة ( وقفات ) : خالتي عنبر فبيتها ؟
- تودة : أه ابنيتي فبيتها .. خرجات ماجدة متوجهة للبيت عنبر ، دقات تحل الباب من طرف حياة ودخلات سادة الباب وراها ..
- رقية ( أشرات للبنات ) : هادي دونيا ( دنيا) وهادي يوسرى( يسرى) بنات عم ولدي فاروق ..
- سميرة : تبارك الله ( كتشوفيهم بإعجاب ) غزالات الصلاة على النبي الله يحجبهم ياربي
- رقية : اللهم آمين الله يخلي لك ماعز عليك .. كيشتي أنا عدي جوج ولاد وجوج بنات ، البنات مزوجات لهيه عدنا فمولاي بوسلهام .. وعاد عدي جوج ولاد دريس بات عصام وعماد او ولدي فاروق ، وعاد عدي عبد الخالق عدو ولد واحد طارق و تلاتة دالبنات ، وحدة هي لي تزوجات داك نهاراتيات ويوسرى حتى هي قريب إن شاء الله تزوج ( ترجع لراجلها ) ودنيا هي الفرتوتة صغيرة
- تودة ( هزهزات راسها ) : الله يخليهم ليك ياربي ..
- رقية ( بعينين المحبة ) : الله يخلي ليك كل عزيز ياربي
- تودة ( أشرات لسميرة ) : هادي سميرة ضرتي منين مات الراجل سكنا مع بعضياتنا .. وهادي بنتها رجاء راه حاملة دخلات فشهرها الثامن دابا .. وعاد عدها وليدها كريم
- رقية ( كتحرك فراسها ) : تبارك الله الله يخليهم ليك ( موجهة كلامها للسميرة )
- دنيا : سبحان الله اول مرة نشوف ضريرات متافقين وساكنين مع بعضياتهم واخا راجلهم مات
- تودة ( ضحكات ) : الى كان أبنيتي قلبك حليب صافي ..ربي كيلاقيك امع الناس الملاح ولالا الالة رقية ؟
يتبع...
التعليقات
لا توجد تعليقات بعد، كن أول من يعلق.