محتوى القصة
بداو كيوصلو الضياف الدار اول مكدخل مع بابها كاينة صالة مونجي ديال الزاج مع الكراسة ديالها فالكحل .. فوق منها محطوط ڤاز اما مع دخلة حدا الباب معلق بنت لابسة تكشيطة شادة فيد راجل لابس جلابة مول جلابة كان كيعلق فيها عماد سوارتو وبلاصة مولات تكشيطة كانت بلاصة سوارت ليلى ..،، اونفاص معاك كاين صالون كبير حداه صالون أخور وعاد بيت النعاس وبين نعاس اخور ، الكوزينة كانت كبيرة ومجهزة كلها على حقها وطريقها أما الفراش كان بلدي عصري غزال ختارتو ليلى على دوقها ..
- النسا ݣلسو فصالون ورجال فصالون أخور ، حطو الكادويات ديالهم فوق طبلة ديال صالة مونجي .. كل واحد شنو جاب بلا داكشي لي عماد عاونوه بيه خوتو وباه فالخفاء
سعاد ( بالهمس ) امضرا ابنتي مشا شاف مو ؟
ليلى ( تنهدات ) مشا لقاها مريضة ، بحال الى مزال ماتقبلاتش الحبس
سعاد : لا حول ولا قوة إلا بالله العلي العظيم ، ووليدي مسيكين كيبقى ياربي امتكونش خسرات ليه الخاطر
ليلى : بحال كل مرة أخالتي ، غير هاد المرة مع مريضة ماحكراتش واخا کاليها على وديت ماجدة تزوجات وعصام والله متسوقات دارت راسها ماسمعاتوش
سعاد : هاد نوعية ابنيتي مكتقبلش الغلاط ، كتحسبليها راسها راه مدايرة والو وناس هوما لي غالطين ( شافت جهة عنبر ) ديري ليها المخاد ورا ظهرها
ليلى ( وقفات ) بلات انا نقاد ليها ( وقفات ليلى كتقاد ليها وتوجهات للكوزينة تعمر أتاي )
فالصالون ديال الرجال کالسين مجمعين ، كيدويو على شحال من حاجة سونا الباب يلاه عماد اينوض حتى حبسو يوسف
يوسف : اخليك انت فجماعتك انا انوض نحل ، مشا حل الباب كيشوف فالبنت لي قدامو واقفة هازة فيديها طرح ديال بوشيار كانت دايرة فولار وعباية حروفها كحلين بشرتها بيضا خالية من أي مسحوق ديال التجميل ، معاها مرة لابسة جلابة وهازة واحد الكادو فيدها
.... : السلام عليكم كاينة بنتي ليلى ؟
يوسف ( شاف فسيدة لي دوات معاه ) سمحوليا ياه كاينة ( بدا كيعيط ) عماد عماد ( شوية خرج عندو عماد غير شافيهم وتبسم )
عماد : لالة شافية مرحبا دخلو ( بدا يعيط ) ليلى ( طلات ليلى من الكوزينة تبسمات وجات سلمات عليهم مرحبا بيهم
ليلى : كلفتي راسك اخالتي
شافية : مكاين لا تكليفة لا والو ابنتي ، جاو داركم ؟
ليلى : أه راه ماما الداخل دخلي ( شافت فالبنت لي معاها ومن الشبه كان باين لي بنتها ) أسية دخلي ازين مرحبا بيك ( مشات معاهم للصالون دخلو سلمو على الجميع ) هادي خالتي شافية جارتنا فدار لي الفوق وهي لي مسكينة وراتني فين خديت الفراش وراتني فين نتسخر فهاد الجوايه ، وهي لي داتني معاها لسويقة وعرفاتني على الحوانت لي وليت نتقدى منهم
سعدية : عاودات ليا بنتي عليك الله يجازيك بالخير ويخلي ليك البنية
شافية : بلا جميل أختي راه بحالها بحال أسية وربي شاهد عليا
ليلى : مرحبا بيكم انا جايا
حياة : بلاتي نعاونك صبري ( ناضت حياة وناضت حتى اسية تعاونهم فالكوزينة )
- تحط كاسكروط عماد تكلف برجال وليلى والبقية تكلفو بالعيالات ، كان حتى العميد ومراتو حتى هي كانت حاضرة العائلة مجموعة فرحانين .. وصل وقت العشا خرجو الرجال صلاو فجامع رجعو عاد تحط العشا ..
جا الوقت لي يخرجو من عند عماد من الدار ، كل واحد ركب فطوموبيلتو توجه لدارو وعماد وليلى سدو عليهم بابهم
ليلى ( ݣالسة هي وياها عيات نعار كامل وهي واقفة مادة رجليها فوق فخاضو وهو كيماصي ليها فرجليها ) عماد نسولك ( هز فيها عينيه بمعنى سولي تبسمات رامية شعرها ورا ظهرها ) واش يوسف صاحبك قلتيلي مطلق ياك ؟
عماد ( غوبش ) اياه علاش كتسولي ؟
ليلى ( قهقهات بأنوثة ) مالك محسوس هانا جاياك للهضرة ، فخبارك أسية بنت خالتي شافية كانت مخطوبة لواحد شماتة الله ياخود فيه الحق
عماد ( كيتسنط ليها ) مالو أش دار ليها ؟
ليلى : مشا طاح مع صاحبتها وهو مزال خاطبها والبنت كتقدى لدهازها وسيد مشا خطب صاحبتها ، وشوليك الصدفة جارت خالتي شافية كانت حاضرة تماك هي لي قالتها ليهم
عماد ( حنحن بصوتو ىجولي وتقابل معاها ) دابا من لاخر قصري اش جاب يوسف لهاد البلان ديال بنت خالتك شافية ؟
ليلى : وانت قلتي ليا بلي دوزات عليه مرتو الحر ، وشكرتيه وبلي ظريف اش فيها الى درنا هاد الخير
عماد : ݣلبتيها خطابة ولا كيفاش بلانك ؟
ليلى : دابا كونما جات عنبر او وصاتك عليا كنتي اتبغيني أم ؟
عماد : علاش انا فين عمري عتارفت ليك بلي انا كنبغيك ، وزايدون بلا عنبر كنتي كتجي للبال مرة مرة
ليلى ( ببرود ) دابا 3 شهور دالخطوبة و 6 شهور ديال الزواج ومزال ماولؤتي كتبغيني ياك ؟
عماد ( عض على شفتو مدور لسانو وسط فمو ) ماشي موضوعنا هذا دابا ( جمعات رجليها على غفلة او وقفات )
ليلى : انا عييت غادي نعس ، وماحدك فايق مزال دير الماعن فالماكينة وخدمها حتى لصباح ونستفهم تصبح على خير ( ضربات فيه ومشات )
عماد ( جامع الضحكة ) وليلى يهديك الله حنا مزال داويين ( ضربات بالباب ) هرسيه راه خاسر فيه زبالة دالفلوس ( فتحاتو ورجعات خبطاتو تبسم كيضحك ) ولايني معكسة ..
كتجمع فحوايجها فالباليزة شعرها الرطب لي اللون بدا يطير منو وبدا يبان لونو الأصلي لابسة اونصومبل بارد مع مع اكسسوارات فذهبي
دنيا ( كتشوفيها كتجمع حوايجها ) علاش متخليش حتى نمشيو كاملين مجموعين
ياسمين ( شافت فيها دايرة يديها على جنابها ) دنيا راه اتبعوني من هنا ل 3 يام منها ندي معايا مي وبا ونرتاح شوية مع راسي دازت العدة مسافرت ماضرت مامشيت فين من الخدمة لدار ( ݣلسات ) وانتي مالك شفتك تبدلتي مابقيتيش بخال شحال هدا مزال كتفكري فيه ؟
دنيا ( تبسمات بعياء وإستهزاء ) علاش انا نسيتو باش منفكرش فيه ؟ راه غير كنحاولو نتناساو وصافي ..
ياسمين : مقاليكش طارق بلي سول فيك ؟
دنيا ( بنفي ) لا مقاليا والو واصلا مايقدش يسولو يخافو لا يشك من داكشي لي دار معاه نهار ساق ليا الخبار على الكروصة حتى انتي نساي ( تبسمات ) شفت الزين بدلتي نيولوك كيفاش البلان ؟
ياسمين ( تنهدات ) والو غير مليت نفس اللبسة اغلبية سراول سراول وليڤيست قلت نبدل الستيل كيف جا بعدا ؟
دنيا : جاك زوين ، الى مشيتي اتسناينا حتى نجيو نهبطو عند النݣافة لي كتعرفي باش نشوفو عندها
ياسمين : وضروري ، راه خي لي اتخدم لحياة إن شاء الله ( سمعو العياط ) يلاه خليني نوض ( كتقلب ) سارجوري هاهو طابليت ديالي
دنيا : واش نجوى اتبقى ليك فالمحال ولا منار ؟
ياسمين : وهوما بجوج ولكن انا وصيت منار ، عارفة نجوى واخا كتخدم من نيتها ولكن داك التيليفون ايخرج عليها منار بعدا موݣضة ، والمحال تحت عينيا متخافيش ( هزات ساكها واحد طربوش ديالها وجرات باليزتها تابعاها دنيا )
عبد الخالق : سوݣي بشوية ابنتي الله يرضي عليك
دنيا ( كضحك ) ياسمين هي الوحيدة لي ماعندهاش مع السرعة ابابا بلاكا توصيها
علال ( وقف ) ويلاه ابنيتي بلاه نوصلو على خاطرنا
تودة : طريق السلامة ( سلمات عليهم ) نتلاݣاو فساعة الخير
رقية : إن شاء الله الحبيبة ، وعداكم تنساو شيحاجة فاش تكونو جايين ورضو البال لبنيتي عنبر راه واحلة فروحها جيبوها توما داك بوراس راه كيتعصب فطريق
عبد الخالق ( كيضحك ) لاواه امي مابقاش من نهار عرف مرتو حاملة مابقاش ، ولا مكايس هي لي ولات تݣوليه اش هاد سوݣان ديال الفكرون
ياسمين ( رجعات من ورا ماحطات الباليزة فالكوفر ورجعات عندهم ) خالتي ( باست تودة ) يلاه خليناك على خير ( باست باها ) بابا بسلامة
تودة ( عنقاتها ) تهلاي فراسك وتهلاو فبعضياتكم ( سلمات على ختها وخرجو من تم ركب علال القدام وربية لور ديمارات ياسمين وشدات الطريق )
فاقت الصباح وجدات الفطور حطاتو ، فاق عماد دوش لبس حوايجو دخل للكوزينة لي كان فيها البالكو كانت مخدمة الراديو دايرة فيه مومو كيعجبها تكون تفطر وتشقى وتسمع مادواتوش كيف موالفة .. كانت تفيقو وتعنقو تبوسو دابا والو واقف كيشوفيها لابسة شورط وديباردو ديالو جامعة شعرها فازݣ كانت مدوشة .. جات تخطاه جرها من يدها رجعها للعندو
عماد ( كيشوفيها قالبة وجها ) دابا مالنا ؟
ليلى ( شافت فيه ببرود ) لا ماماليش علاش شنو بان ليك ؟
عماد : ياك تافقنا الى كان شي مشكيل نحلو شنو وقع ؟
ليلى : لا والو غير انا فاش نقولك شكون قاليك كنبغيك شوف باش اتحس
عماد ( زاد جرها خشاها فيه ) واش انا داوي بصح واش مامالفش كنضحك معاك أممم ، واش كاين شي واحد انتي مايبغيكش غير شي مسخوط واش انت دخلتي عليا مباركة مسعودة وليت فرحان وليت خارج من دار وعارف بلي كتسناني مرة كتبغيني وخاصني نكون حمار باش منبغيكش
ليلى ( قلبات عينيها ) أممم صبغني
عماد : واش انا نقد ؟ ليلى لي بيناتنا كان كبر من الحب كنت كنحس براسي مرتاح وفرحان كنحس بلي عندي دور فالحياة .. ومنين تزوجنا زدت تشبت بيك وبغيتك بغبتك من قلبي وديني وما أعبد حتى كنبغيك وكنموت عليك الله ( سدات ليه فمو حيت كان باغي يدعي على راسو )
ليلى : ششش الله ينجيك ( تنهدات وهزات عينيها فيه حتى انا كنبغيك وكنموت عليك ( عنقاتو ) الله يخليك ليا
عماد ( جرها ) يلاه اجي تفطري ، جرها وکلسها فوق رجليه كيوكلها وهي كتوكلو خاتمينها بقبلات مرة مرة ..
~~~~~~~~~~~~~~
واقفين قدام واحد المحال كتحس براسها كيوفر والعصب لي فيها كيضرب
حياة ( كتحل عينيها وتسدهم ) واش انبقاو كندورو من قهوة لقهوة ولا شنو ؟
طارق : أنتي عاجبك خونا لي دايرة عندو شوتينݣ ولا ماعرفت لجد بوه ؟
حياة : وراه زمان وزمااااان اعباد الله قرن وزمارة اش ندير ليه انا الى عقل عليا
طارق ( جرها ) زيدي أحياة خلينا نفطرو احبي بخاطرنا ندوزو نشوفو لي بقا ليك فداك دهاز شنو بقا ليك بعدا ( دخلو لواحد القهوة شدو بلاصتهم )
حياة : شي لعيبات ديال كيتلبسو من التحت ، او وشي بيجامات ديال النعاس
طارق ( قاطعهم السرباي خدا لي بغاو ومشا ) خديتي ليشوميز ودوبياس ( شافت فيه مخرجة عينيها ) ومالك هادوك راه مهمين ( غمزة ) خاصني ناخد ليك شي جوج كسواري ولا 4 كاع ديال الشطيح دوك لي كيلبسو المصريات
حياة ( هزات حواجبها فيه ) راه انا غير حياة ماشي فيفي عبدو
طارق : فيفي عبدو ديالي والله يا موك حتى تلوزي ليا ، والله منتفاك حقي أنا نݣولك ، اجي شيري سليپات عاديين ولا طانݣة
حياة ( جاتها الضحكة ) داكشي لي بقا ليا ادوك صرافق ديال الصبع
طارق : وشتي ازين رجلي برجلك عند الحوانت انا بغيت مرتي تلبس ليا صرافق ديال الصبع وتبقى تمشى عليا هكاك فدار ( شافت فيها ) وحنزي ..
~~~~~~~~~~
- الشمس تݣلݣلات .. هادشي ماخلاهش مايخرجس للخدمتو يمارس حبو للفلاحة لابس تيشورت وداير ترازة وراكب فوق تراكتوت ، شخص فالأربعين من عمرو يدو حرشين مكتاسحهم شعيرات طولت عنقو كتعطي انطباع اولي على قامتو الطويلة شعيرات بيضان متخللين لحيتو الخفيفة وشعرو ، خبس التراكتور فاش شاف واحد من الخدامة جاي
.... : وسي بوبكر ( نزل منقز بانت طولتو وقوتو الجسمانية وبصوت رجولي غارق تقيل )
بوبكر : أش تم أعبد جليل ؟
عبد الجليل : العجل ماعرفنا مالو اسي بوبكر خاصك تجي تشوفو
بوبكر ( غوبش ) بريتي لطبيب ؟
عبد الجليل : وايه سونيت ليه راه جاي فطريݣ ، ݣلت نجي نعلمك
بوبكر ( بخطوات سريعة ) يلاه زيد ..
دخلو للمحال ديال البيجامات ختارت 3 دالبيجامات كانو خاصينها ززينين ديال النعاس بساتان ، من وراها دازو للبوتيك اخور خدات صندالة عالية ديال الحضور وصندالة ديال الخرجات وسباط ..
طارق : انا مافهمتش لاش هاد كترت البيجامات وانتي مغاتلبسيهمش
حياة ( شافت فيه ) كيفاش مغاديش نلبسهم مالي انبقى ندور عريانة فدار ؟
طارق : واش يحسابليك ازين ( غمزها )
حياة : نقولو الصيف هانية الواحد يلبس خفيف ايوا والبرد نبقى ندور عليك عريانة انت راه حماقيتي وبافي تحمقني معاك حتى أنا
طارق ( قرب لحدا ودنيها مبورشها ) لهلا يحوايجك ازين ديالي كاينة الكليمة كل حاجة وعندها الحل ديالها ..
حياة : وانا شهوتي فهاد البيجامات ( كتفكر) بقاو ليا روايح )
طارق : خليهم على حسابي هادوك أنا لي غانجيبهم ( جرها من يدها ) دوزي نشوفو ذهب
حياة ( قلبات عينيها ) سميتهم الخواتم اكبيدة
طارق : مي مي على كبيدة كي طالعة من داك الفم
حياة ( شدات ليه فيدو مخشية فيه ) قولي شهر العسل فين غانمشيو خليتيني ندفع للباسبور وماقلتي ليا والو
طارق : واحد القنت غايعجبك بلاما تزربي الحب كولشي بالمهل ( ركبو فطوموبيل شدو الطريق عند الذهيبي لي تعامل معاه الروطال قبلو لا ينزلو نطقات )
حياة : شوف انا متاخدش ليا داك الخاتم ديال الديامو مكايعجبنيش كيجيني بحال شي خاتم دنقرة، انا بغيت خاتم ديال الذهب
طارق ( زول نظاظرو دشمس مشمر على نيفو بيديه القاصحين الرجولين ) واودي غير زيدي .. نزلات معاه دخلو عند الذهيبي ستقبلو مسلم عليه سلام رجولي مرحب بيهم
.... : أش حب الحاطر أسي طارق ؟
طارق : بغينا نشوفو خواتم ديال المارياج وشي اونصومبل بالبراسلي ديالو ( شافت فيه حياة بمعنى لاش خرج فيها عينيها كإنذار الى دوات اتجيبها فراسها ..
.... : اهاه مرحبا ( توجه للڤيترينا جبد خواتم ديال المرياج حطهم قدام حياة وعاد جاب ليزونصومبل ديال الذهب ) هاد الموديلات كلهم جداد
طارق : شوفي لي عجبك
حياة ( بقات كتشوف فكل حاجة بوحدها حمقوها الخواتم خصوصا واحد سطاها كانو فيه زوج منبت بالحجر وفيه وردة فيها حجرة الدق ديالو كان صحيح وغليض وحتى من الأحجار لي فيه كانو مدقوقين مزيان ) هدا عجبني بزاف ( هزاتو قيساتو جا قدها عبارها )
طارق : الى عجبك ناخدوهم شوفي لونسومبل ( هزات فيه عينيها وسلمات امرها لله تفكرات كون كانت ماماها معاها اتکوليها خوديه بلدي تلبسيه مع التقليدي تبسمات وختارت واحد بلدي فيه حجيرات فالأخضر ) صافي شوفلينا هادو وبغيت خاتم ديال النقرة درجال
.... : أياه مرحبا ( عطاه يختار الخواتم ختار واحد رجالي عادي )
طارق : الله يرضي عليك تݣد تحفر ليا سميت المدام ( شافت فيه حابسة تبسيمة )
.... : اياه مرحبا
طارق : كتب سمية حياة
حياة : حتى انا بغيت سميتو فخاتمي ( شافيها مدور لسانو وسط فمو عاجبو الحال )
.... : أياه مرحبا
سايݣة بشوية عليها دايرة واحد طربوش ضاير على الشمس ، وقفات فسطاسيون نزلات تاخود شيحاجة لجدودها وليها ياكلوهم عاودات ليكغو حيت الجو كان سخون والشمس حارة .. رجعات بطوموبيلتها ديمارات وكملات الطريق رقية كانت مغمضة عينيها نعسات وجدها كان مرة يفيق مرة يغمض عينيه حتى هو ..
- كانو قربو يوصلو دخلات مع الطريق لي كتدي للدار جدها هي داخلة وبيكوپ جايا ، غوبشات وكلاكصونات
ياسمين : هذا واش مريض ولا مالو على قلت الطرقان ولا شنو
علال ( بصوتو الرزين الوقور ) يݣد ابنيتي الطريق لوخرا عامرة داكشي باش
ياسمين ( كتكلاكصوني ولي فالبيكوب حتى هو كيكلاكصوني ، كانت بيكوب كبيرة فاللون الكحل طلات عليه من السرجم ) واش انباتو هنا رجع ( حلات الباب ) هدا واش صمك ولا مالو
علال : بلاتي ابنتي ماتخرجيش بوحدك .. لي سايݣ حتى هو خرج مغوبش وباينة فيه معصب
ياسمين ( بعصبية ) واش معارفش بلي هاد طريق ماشي عمومية اشريف وخليتي الطريق الرئيسية وجاي لهادي
بوبكر ( جاي قاصدها حتى شاف علال نازل ) الحاج ( خلاها هي واقفة پلاكة وتوجه لعند علال ياسمين عاد رضات لبال لشخص اخور كالس حداه )
علال : اهلا ولدي بوبكر لاباس عليك أش واقع ؟
بوبكر : العجل عدي شوية عيان بغيت نحولو للكوري ديال دار لوخرا بعيد على خوتو ، الطريݣ لهيهة محبوسة كاينة شي كسيدة تم وخاصنا نوصلو دغية
علال : ايه ماشي عيب اوليدي
ياسمين ( قرهاتها الشمس) واش غادي نبقاو هنا أبا ؟
علال ( بتباتة ) بنيتي الله يرضي عليك حاولي ترجعي بلور خلي بوبكر يدوز
ياسمين : كيفاش نرجع اللور ابا ، العيا وصهد وشموشات ونرجع علاش مايرجع هو ( شاف لجيهتها مطلعها من لونوسومبل ديالها مشمر على نيفو بعصبية عاض على شفتو مباغيش يݣوليها شي حاجة لي ماتعجبهاش على وجه الحاج لي كيعرفو )
علال ( بنفس الهدوء ) غير على وجهي ابنتي صبري ، عندو واحد العجل مريض خاصو ضروري يحولو الله يرضي علك
ياسمين ( ببرود ) واخا ابا واخا على وجهك ( رمات ليه شوفة باردة ورجعات ركبات فطوموبيل
بوبكر : الله يرحم الوالدين الحاج وسمحلنا ( رجع لبيكوب ركب فيها وعلال بدورو ركب حداها رجعات بطوموبيل مخلية بوبكر يدوز داز من حداها عاطي تحية للعلال) ..
~~~~~~~~~~~~
فجهة أخرى کالس فالقهوة من القهاوي الإيطالية داير طربوش ضاير شاف فساعتو هز راسو بانت ليه جايا والابتسامة على وجها شعرها العسلي فيه خصلات خفاف زوعر .. سلمات عليه بالوجه وݣلسات بلهجة إيطالية نطق :
تعطلتي عليا هادشي غير وصيتك تجي بكري
.... : سمحليا كان عندي مايدار ديجا قلت ليك عندي ڤول لفرنسا عندي ساعتين ديال المݣانة قولي شنو واقع ؟
.... ( تبسم ) فخبارك الحب ديالك القديم قرب يضرب الكحل فالبيض
.... ( جمعات الابتسامة ونطقات بصدمة ) واش طارق ؟
فجهة أخرى وبضبط باريس شاد التيليفون ديالو كيدوي معاه ، كيحاول يفهمو ولكن والو واش بغا يفهم
عز الدين : دابا واش باغي ضرب صحبة ديالنا فزيرو على هاد البلان ، صافي أصاحبتي نهار نزل انجي نبارك ليك كبر عقلك
طارق : اياه ماݣلتي عيب أسيدي الله يسخر ، غير هو غاتݣلب على ملتي وجرتي خطيها ابا عز الدين
عز الدين : طارق و ( قطع عليه ) ناري على بلان
حكيم : كعا عليك ولا ؟
عز الدين ( لاح تيليفون وݣلس ) دار ليا تأنيب الضمير وانا معوالش نهبط هاد الوقت
حكيم : وسير أش شادك الحديد ياك حيدتيه والخدمة غادية مت مزيان
عز الدين ( شاف فخوه ) ماشي وقيتها احكيم انا كنت داير بلان فراسي فهمني
حكيم ( وقف ) وأنت تعرف طارق عارف كيداير فعقليتو ، الى مشا حتى دار عليك الكروا هزك الما ( هز سوارتو ) وبيني وبينك جات ناقصة صاحبك روح بروح ماتحضرش ليه للعرسو
عز الدين ( خنزر فيه ) زيد كمل عليا حتى انت نوبتك ..
حكيم : انا أݣلت لك وانت تعرف ، يلاه نتشاوفو من بعد ( خرج خلاه حاير فهضرتو وهصرة طارق )
~~~~~~~~~~~
تبسمات فاش سمعات كلامو سهات ورجعات بيها الداكرة ديالها 10 سنين اللور فاش كانت عندها 20 عام المشهد مزال قبالت عينيها فالقهوة لي قبالت البحر
فلاش باك
كانت بنت زوينة وضعيفة وانيقة ولكن ملامحها لي نتاقلو من ملامح الفرحة لملامح الصدمة ، نظراتها كينتاقلو بين الشاب لي كان ݣالس قبالتها الشاب لي كان نوعا ما انيق يدو مزينة بساعة ديال الجلد وجهو خالي من اي لحية .. هاز يفيدو بواطة فيها خاتم ديال الخطوبة
طارق ( بتساؤل ) مالك شتك مجاوبتينيش ؟
ليليا ( كتحرك راسها ) باش غادي نجاوبك ؟ طارق واش من نيتك واش بصح باغيني لزواج سيپا ڤغي !!
طارق : شنو لي جاك عجبك 3 سنين وحنا مع بعضياتنا ݣلتي تشدي الباك وشديتيه ݣلتي لافاك وصبرت شنو دابا عندك شي عدر خور ولا كيفاش اليليا ؟
ليليا : انا مكنفكرش فزواج حاليا اطارق نهائيا
طارق ( غوبش ) وهادشي لي بيناتنا كنا انا وياك كنقرقبو الناب ولا شنو ؟
ليليا : نو ماشي هكاك انا كنبغيك اه ولكن زواج نو ، بعيد من بالي وزايدون انا غادي نمشي لإيطاليا نكمل قرايتي تما
طارق ( رانت عليه الصدمة ) إيطاليا ومن إيمتا هادشي اشريفة ؟ وعلاش هادشي ماݣلتيهش النهار الأول ؟ حتى جرجرنا رجلينا وجرينا الوقت عاد بان ليك لهيه ؟
ليليا : انا قلت ايعجبك الحال وزايدون انبقاو اونصومبل ، تولي تجي عندي فالعطل وانا هكاك ( تبسمات )
طارق ( بإنفعال ) ياكما سميتي جاك ، وفيقي أشريفة هدا لي ݣدامك غرباوي عروبي مخري فدماغي هاد سابهلالا وسريق العواد ماعديش معاها .. عندي ليك جوج كلمات ياتشدي معايا الطريق وتبتي الأرض ولا كل واحد يقصد خروب بلادو
ليليا : اش هاد لافاصو باش كدوي بيها واش مزال شي واحد كيتزوج دابا مالك قديم .. وانا منقدش نبقى مع واحد عقليتو بحال هكا سمحليا ( هزات ساكها وضربات فيه خارجة من القهوة ) ..
رجعات بداكرتها للواقع شافت فيه ودارت رجل على رجل مفيكسية عينيها مع عينيه
ليليا ( بلغة إيطالية مطلوقة ) وانت علاش باغي مني هادشي ، لي تزوج الله يسهل عليه وانا مالي ؟
... ( تبسم ) والو بغيت نلعب شوية وبغيتك تلعبي معايا ، نسيتي خيري ازين ولا نفكرك ؟
ليليا ( بنفس البرود ) لا مانسيتش بغيتينا نلعبو نلعبو مرحبا ، غير هو علاش خاصني نعرف هو اللول .. وانت شنو بينك وبين طارق وبين عائلتو حتى بغيتي تلعب معاهم
.... ( قهقه برجولة ) الصراحة بيني وبينك بغيت نكدها عليهم واحد الشوية ، عندهم واحد دياموندا كنت طحتي فيها عما ساعة ماكتابش وانا منݣدش ندخل للمغرب محرم عليا مكاين ماحسن منك
ليليا : هممم ( دورات لسانها وسط فمها كتفكر ) حتى انا شحال هذا مامشيت للمغرب شهوتي فيه ، وشكون قال سي مكسيم بقدو وبقامتو يبغي هاي هاي هاي ( هزات كاسها دالقهوة ) ولكن عجبني هاد البلان هدا مشات انت تأمر وأنا غانفد
مكسيم ( تبسم إبتسامة جدابة ) الله يرضي عليك هكاك نبغيك
~~~~~~~~~~~~~
الــمــغـرب
اخر نهار عندها فالإمتحان غير خرجات وهاد المرة توجهات لدار لي فيها مها ... جات طاحت دودة فبيتها نعسات نعسة وحدة ماعرفاتش شحال الوقت كتحس برشيدة كتفيقها
رشيدة : ونوضي ابنتي اويلي ستغفرت الله العظيم نوضي تغداي
حياة ( حلات عينيها غير بزز ) شنو دايرين ؟
رشيدة : الرفيسة نوضي الله يرضي عليك ( ناضت حياة بزز كتجر فرجليها ، كانو خوتها وسميرة
حياة ( كتلعب مع خوتها ) شديتو العطلة ؟
عمران ( هزهز براسو ) اه شديناها ماما قالت لينا انسافرو
حياة : اه اوجدو راسكم إن شاء الله نسافرو ( حطات رشيدة الݣصعة ) الله جات فوقتها فيا الهيمري ( بداو كياكلو دخلات فديك الݣصعة طول وعرض ) توحشت ماكلتك اماما والله
رشيدة : بصحة وراحة ابنيتي ( شافت فسميرة ) رجاء لاباس عليها مشات لطبيب ؟
سميرة : ويااه اسوكتي ماشي لقات راسها حاملة ( ضحكات ) ماعجبهاش الحال حيت ولدها مزال صغير
رشيدة : وبروك عليها جابو ليها الله ماعدها مدير
حياة : قلتي ليها توجد راسها على وديت العرس ؟
سميرة : واه ݣلتها ليها تهناي
- خشات رجليها فصالة بلا رجليها منفوخين لاحت عليها ݣندورة من توب ديال الملحفة باردة وشالهت .. دارت ليكغو ديال الشمس وسبقاتو لطوموبيل كتجر فرجليها متقلة طلعات بشوية عليها جاب البالز دارهم فالكوفر وطلع حداها
عنبر : خدم الكليمة الشاليمو صافي
الروطال ( لابس شوميز لولان بيج مع سروال فنفس اللون وتوب وكاسكيط مع نظارات شمسية وساعة رياضية ) كون تشوفي الشاليمو لي راكبني انا
عنبر ( ضحكات بأنوثة ) واش انت على دوام حامي ؟
الروطال : ومال مك راه خاصني نعاونك على الولادة نسيتي
عنبر : خاصك تجيب ليا الاناناس حتى هو قاتلي الطبيبة فاش نقرب ناكلو
الروطال : تي راه خفناك اتاكلي تولي والدة لينا بلا ميجال ، نكايسي يفوت عرس خوك ونجيبو ليك حتى الى ولدتي هانية
عنبر : ( كتخمم ) ايوا صاف حتى يدوز عرسو وجيبو ليا أصلا بسلامة راه مابقاش بزاف هذا الى ماولدت ليهم فعرسهم ( شافيها هاز حاجب ونزل الثاني ) ههههه بلاما تبقى تشوف راه غير ضحكت هو قربت ولكن ماشي لدرجة نولد فعرسهم
الروطال : وماعرفت راه وليتي كتخلعيني .. ديمارا وشدو الطريق ، كولشي سبقهم للسوق الاربعاء بقاو غير هوما مرة تكا عليه مرة يرجع ليها الكرسي اللور وتكا كل مرة هيت طالق ليها الكليما
عنبر ( وقف فسطاسيون ) الحب ديالي الى لقيتي ليا الكلاص زيرو سكر جيبوليا
الروطال ( هز بزطامو دارو فجيبو ) ديال العود ولا لاخور ؟
عنبر : لا لاخور دالعود ماعنديش مع الفغومبواز .. (خلاها فالطوموبيل خدمات الموسيقى حتى رجع جايب زوج قراعي دالما وبواطة ديال لاكلاص زيرو سكر مضاف مدو ليها وركب خداتو من عندو حلاتو بدات بيه كتبرد شافت فيه على غفلة ونطقات ) فاروق قوليا ( شافيها بنص عين مخنزر فيها تبسمات ونطقات ) بغيت نقول حبيبي كبيدة ديالي
الروطال : وهكاك ( دار نظاظرو وكمل السوݣان ) شنو كنتي بغيتي تݣولي ؟
عنبر : فين هي الكمانجة ديالي قاتلي ماما خديتيها من عندها ؟
الروطال ( مركز مع طريق ) لاش بغيتيها ؟
عنبر : غير سولت وصافي
الروطال ( شافيها مقرب منها واكل المعلقة دالݣلاص لي مداتها ليه مسحات ايه جنب فمو ) حتى نرجعو وتعرفي ..
~~~~~~~~~~~~
ݣالسة على برا فکليسة بالپراصول ، لابسة كسوة نص كم فالغوز مع صندالة ديال الصبع .. ظفيراتها مصبوغين بالأحمر دايرة طربوش ديالها قدامها بيسي وقرعة دالما وعصير وليكغو حطاها وخدامة ودايرة الكيت فودنها كدوي مع دنيا لي كانت سايݣة شادة الطريق لعندهم
ياسمين : عرفتي لقيت واحد ليسپاص هنا غزال عجبني ، ماكرهتش ندير محال هنا ونولي نبيع فيه هادشي ديال الكوسميتيك نجيب لي برودوي من عند ماجدة
دنيا : فكرة واعرة عجباتني
ياسمين : العيالات هنا كيطيبو بشمس ويديهم ناشفين الى تحل محال هنا ديال ليبرودوي كوسميتيك مزيانة
دنيا : والمحال ديالك ؟
ياسمين : ماشي مشكيل منار ونجوى تما ومرة نكون انا هنا ومرة لهيه ، ومنها نبدل الجو وانا ديجا كنرتاح مع با ومي بغيت ندير داكشي لي كيعجبني وكنرتاح فيه ( رمات عينيها لدخلة ديال الباب فاش شافت بيكوپ فايتة شايفاها داخلة مع الباب بلاصة وترجل منها غوبشات متبعاه بالعين رما عينيه ليها فلمحة بصر طلعها وهبطها دور راسو وتبسم للعلال لي خرج مستقبلو )
علال : مرحبا بيك اولدي
بوبكر ( باس يدو ) الله يبارك فيك اسي علال
علال : اجي نمشيو لديك جيه تحت ديك شجيرة نحيدو من الشمس
بوبكر ( هزهز براسو ) مرحبا ( شاف لجهتها كانت متبعاهم بالعين قلب وجهو تابع علال ..
دنيا : وديك البنت انتي فين مشيتي ؟
ياسمين ( عطاتها الانتباه ديالها للدنيا ) أنا معاك مامشيت فين ، المهم قلت ليك انشوف مع ماجدة وندخل حتى لي پرودوي ديال الجنوب كنعرف واحد البنت ساكنة فالعيون تشوفليا مع شي واحد كيدير الجملة ويكون داكشي مضمون وزوين ولا تشوفليا شي وحدة لي كتخدم المنتوجات الصحراوية
دنيا : مزيانة صافي المهم يلاه سيري ، اجي قلتيها لبا سيدي بعدا ؟
ياسمين : اه قلتها ليه دويت معاه هو الأول ، ايشوفليا شي ݣاراج هنا يكون خاوي
دنيا : صافي مزيان يلاه بسلامة .. حطات تيليفون هزات واحد سبراي رشاتو على وجهو وحطاتو مكملة خدمتها ، أثار إنتباها جدها لي تم جاي لعندها هو وبوبكر
علال : بنتي ( هزات فيه راسها ) هدا سي بوبكر ولد الحاج عاطيف لي كنا خدينا دارهم فعرس فاروق
ياسمين ( بلاما تشوفيه ) أياه عرفتو
علال : عندو واحد المحال كبير هنا عيط عليه على ودو ، خاوي وباغي يكريه يعجبك وجاي قريب ماشي بعيد
ياسمين : واش زعمة يقدني ؟
بوبكر ( بصوت رجولي تقيل غالبة عليه اللكنة الغرباوية ) الى بغيتي تشوفيه مرحبا
علال : اياااه سيري شوفيه ابنيتي وعينك ميزانك
ياسمين ( شافت فبوبكر ورجعات شافت فجدها ) واخا ( سدات البيسي ديالها ) بلات اندخل هادشي لدار ونرجع ( دخلات البيسي دارت نظاظرها وهزات التيليفون ورجعات لعندهم ) نمشيو
بوبكر : يلاه ( شاف فالحاج ) خليتك على خير الحاج ..
علال : واخا ولدي في أماني الله ( تم غادي سابقها بشوية واخا كانت طويلة 1.70 ولكن هو كان فايتها بطول توجه لبيكوب ديالو )
ياسمين : مغانمشيوش على رجلينا ؟
بوبكر ( حبس وشافيها ) الى بغيتي تکلاي فهاد الشمش الله أعلم ( طلع لبلاصتو خلاها ركبات سدات الباب .. ديمارا وتم راجع باللور عاد شد الطريق ) ݣاليا الحاج بغيتي ديري شي مشروع ؟
ياسمين ( تنهدات ) أه إن شاء الله الى يسر الله
بوبكر : ديالاش ( عينيه على الطريق )
ياسمين ( شافت فيه ورجعات شافت فطريق ) البروديوات ديال التجميل ، كيبانو ليا هنا العيالات وجهم لشمس يديهم فحالة وجهم فحالة الشمس كتشوطهم
بوبكر : العيالات ديال هنا مولفين هادشي ، ماعندهمش مع داك البروتوكول ديال المدينة مكايبقاوش حاصيين غير زواق
ياسمين ( حسات فنبرة صوتو نوع من الهجوم ) الزواق هو المكياج وبنادم كيطلي وجهو وعينيه ويعكر ، أما الواحد يتهلا فوجهو ويدي بومادا ديال الشمس ولا بومودا لي يديه يرطابو ماشي عيب .. حيت الى مكانش فخبارك راه كاين أمراض ديال الجلد وكيجيو من الشمس حروق والكلف وكتولي الوحدة تبان كبر من عمرها ولي باغي يتهلا فوجهو ماشي عيب
بوبكر ( برم شفايفو خاسر عليها كلمة وحدة ) مزيان
ياسمين قلبات وجها ماحملاتوش وقف قدام واحد المحال مسدود بيبانو ديال الحديد مصبوغين بالقهوي نزل ونزلات هي تسناتو حتى جبد السوارت وفتح البيبان ديال المحال وقف بعيد مخليها تدخل تقدمات المحل كان غير بالبوصلانا ناقصاه الصباغة وكان كبير بزاف ..
بوبكر : كيجاك ؟
ياسمين : الصراحة هو هداك ( كدور عينيها ) ايخصو غير صباغة والباب حتى هو يتصبغ ( شافت فيه ) شحال طالب فيه ؟
بوبكر ( دور لسانو وسط فمو متفادي يشوفليها فعينيها ) واش عجبك ؟
ياسمين : أه عجبني داكشي باش سولتك شحال طالب فيه ؟
بوبكر ( شمر على نيفو جابد كلينيكس ماسح وجهو غوبش وشافيها ) الهضرة مع الحاج ، هو غايݣولك
ياسمين : واش الحاج هو لي ايكريه راه انا
بوبكر : وانا مكنديش ونجيب فالهضرة مع العيالات ، الهضرة مع رجال
ياسمين ( ضحكات بعصبية ) لا واش انت من داك النوع ديال الهضرة ماشي العيالات ، والمرة وقيلة خاصها متخدمش حدها السادس وتخرج وبلاصتها الكوزينة ؟
بوبكر : من أشمن نوع انا مكايهمش ومغادي يفيدك بوالو ولكن باش نهنيك .. عندي جوج خواتات ووحدة استاذة وثانية مهندسة نمشيو دابا ( سد الباب وهي كتشوفيه طلع لطوموبيل كيتسنى فيها .. عصبها وفقصها ماكرهتش تشدو تشتف عليه
ياسمين ( حلات الباب ) انت غير سير انا انمشي على رجليا
بوبكر ( برم شفايفو ) ضبري راسك انتي لي اطيحك المكلفة وعرس ولد عمك مغاتحضريش ليه ( بقات كتشوفيه طلعات وخبطات الباب ديمارا وشد بيها الطريق وصلها مع وقف نزلات خابطة الباب فوجهو تمتم بين شفايفو ) لا حول ولا قوة إلا بالله العلي العظيم ..
~~~~~~~~~~~~~~
العائلة كلها مجموعة برات الدار فالجردة الكبيرة بليل برد الحال حاطين صينيات ديال القهوة والفاكية والبقايا ديال بوشيار
علال ( بصوت وقور كلو هبة وحكمة ) الحمد لله الإنسان ديما يحمد الله ويشكرو على النعم ، نعمة دالهوا وديال الطبيعة وديال اللمة دالعائلة .. غير إلى شفتي شي طير حمد الله وشكرو على نعمة البصر لي عاطيك اي حاجة فهاد دنيا ربي عطاها ليك سوا كانت مزيانة سوا كانت خايبة حمد الله عليها ، حيت كلما حمدتيه الله غايزيدك فنعم على عكس الى ماعجبكس الحال وكتݣول مالي انا هكا ومال ماصدقات ليا هادي الحمد هو ومن النعم الكبيرة وانا كنحمد الله على هاد العائلة لي عطاني الله الحمد لله على هاد الجماعة وهاد النعمة ..
عبد الخالق : الحمد لله
عبد العالي : ماكذبتيش اسي علال الحمد لله عليها نعمة ، اللهم أدمها يارب وحفظها من الزوال
الكل : اللهم آمين يارب .. كملوها جماعة فشلا حوايج
تودة : عنبر نعسات مسكينة ( كانت حاطة راسها على كتف علال جدها كتحماق عليه واخا ماكبراتش معاه داك الحب لي كانت محتاجاه من الجدود وكان عندها خصاص من جيهتهم طلقاتو فرقية وعلال )
علال ( كيدوز ليها على راسها ) تقالت بنتي مسيكينة
الروطال ( وقف ) نهزها نديها لبلاصتها ولات دغية كتعيا
رقية : و وليدي راه شهرها هدا الله يحسن العوان ، ديها اوليدي ( تخطاهم الروطال هزها من حدا علال وتوجه بيها للدار دخل بيها للبيت لي كان مخصص ليهم حطها بشوية غطاها بليزار وبسم عليها السرجم مهبط الرواق باش يبقى البيت عندها مهوي ) ..
عند النکافة کالسة حياة فوق الكرسي ، هازة طابليط فيديها وكتقلب
دنيا : شكون لي عجبك ؟
حياة : عجباتني الصراحة النقرية المنبتة للدخلة ، وعجباتني الفوشيا حتى هي والخزية ( شافت فيها ) وأنتي ؟
دنيا : زيدي حتى البلو غوا غايجيك خطير
حياة : صافي مزيان ربعة دلبسات براكة مع لاغوب هي الخامسة مزيانة ، ولاغوب ندير بلاصتها داك القميص لي على شكل غوب
حنان ( النݣافة ) خطييير هداك ، يجيك فن
حياة ( شافت فعنبر ) ختاريتي صافي ؟ ( عنبر مسرحة رجليها هازة قرعة دالما )
حنان : ختارت هي تكشيطة شهوة منها فالأحمر
حياة : ختارت اوحدة ماشي زوج ؟
عنبر ( كتمسح فمها ) لا اوحدة بلاكة مافيا لي يبقى يبدل هدا الى ماولدت ليكم تم ( كضحك )
حياة : حشومة عليك أصاحبتي هههه
عنبر : اكنضحك بجهد الله يدوز كولشي على خير ( شافت فجهة لوخرا ) ليالي عطيني ساكي اختي راه خليتو حداك ( مداتو ليها ليالي ورجعات تقيس هزات عينها فليلى ) ختاريتي ديك البلو مارين ؟
ليلى ( كتنش على راسها من الصهد ) اه هاديك لي عجباتنا
ياسمين ( خرجات عندهم) كيجاتني ؟ ( تكشيطة فالبيسطاج )
دنيا : جاتك كتحمق
ياسمين : حتى انا عجباتني ( تبسمات ) شعري بغيت نردو عسلي ايجي زوين مع اللون
حياة : ايجيك فن .. كل وحدة فيهم وشنو ختارت عطاو العربون للنکافة ودارو معاها النهار لي كان 4 يام من بعد هداك النهار ، من تم توجهو للصالون عند الميكاب أرتيست لي قدات للعنبر المرة لي فاتت تفاهمو معاها على كولشي حتى هي .. أما النقاشة فتكلفات إبتسام عيطات على النقاشة لي نقشات للعنبر
عنبر : جاني جوع تشهيت الحوت
ياسمين : لهلا يحوجك الحب نمشيو لمولاي بوسلهام ناكلوه تم
عنبر ( باستها ) انتي راه زين ديالي بلاتي نعلم روطالي ( هزات تيليفون دورات ليه ) ألو .. الحمد لله هانت بغيت انقولك انمشي مع البنات لمولاي بسلهام ( برمات شفايفها ) انت مالك كطير صبر ندوي ، توحشت الحوت وتشهيتو انمشيو ناكلوه فيا الجوع .. وصافي واه مالي غادة نتعزرا بوحدي راه حنا قشلة تبارك الله ، صافي واخا يلاه بسلامة
- قطعات معاه وشدو الطريق لمولاي بوسلهام ، وصلو ختارو واحد القهوة ݣلسو فيها .. شدو الحوت شواية عرݣوها عاد شدو الطريق للدار ، وصلو مع الخدامة لي غايقادو القاعة لي انبقى من دابا حتى للعرس وتكمل 4 يام لوخرا لي ورا العرس
دخلو طلعو نيشان خداو دوش دافي كل وحدة فيهم تكات ، الدار بدات تعمر بالعائلة اسماء وابتسام ولادهم ورجالتهم .. شيخ إبتسام وعدوزتها وكءلك شيخ أسماء وعدوزتها كاع الأهل والأحباب تجمعو كيما تجمعو فعرس الروطال تجمعو دابا ..
طارق ( داير يديه فجياب الشورط على برا واقف مع عصام وعماد والروطال عزيز وراشد ) هاد 4 مزال كاعما بغاو يدوزو
الروطال : مالك طايب أصاحبي هذا شوية حسن عوان البنت معاك
طارق : بلاما نفكرك أولد العم خلينا ساكتين ( غمزو ) كاملكم درتو ليا ديك خاوية فعامرة جات حتى ليا أنا
عصام : ومن حقو ( شاف فالباب كانت واقفة أريناس لابسة كندورة كتعيط ليه مشا لعندها ) خصاك شيحاجة ؟
أريناس : خاصني أولويز
عصام : جاتك الحرامية الى مالݣيتها ليك شوفي ابتسام تعطيك شي كوشة من ديال ولدها حتى لغدا ونزل نجيبو ليك
أريناس : صافي الى مالقيتيه انقولها ليها ، هي دخلات وهو توجه للحانوت .. فنفس اللحظة تمات داخلة طوموبيل توجهو ليها كاع الأنظار ديال الولاد العائلة بلاصات ونزل عز الدين كان معاه شي حد ، ماتسناهش ينزل توجه نيشان للعند طارق .. بحال الى باغي يسبق للعندو وقف قبالتو بلاما يسلم على لوخرين شيء لي ستغربو ليه مالو باين بلي معصب ومعاجبوش الحال
عز الدين ( بدون مقدمات وبلاما يسلم ) لقيتها فالمطار فكازا لصقات فيا لصقة وحدة .. ݣالت بلي أنت عارضها
طارق ( غوبش ) تا علامن داوي ومالك داخل هاد الدخلة ( شاف ورا عز الدين فاش سمع الروايض ديال الباليزة زاد غوبش تهز وتحط فبلاصتو فاش لمحها جايا قبالتو والضحكة على وجها ..
جمد ليه الدم فعروقو شمر على نيفو فاش شافها بلا مقدمات توجه لجيهتها او وقف ببرود هاز حاجب ومنزل الثاني
طارق ( بزمجرة رجولية قوية ) أش كاين لاش جايا؟
ليليا ( ببراءة ) حشومة عليك اطارق هكا الناس كيرحبو بضيف ؟
طارق ( بنفس البرود) لا ولكن انتي ماشي ضيف ، لاش جايا ݣلت لك عيط عليك شي واحد !
ليليا : وانا سمعت بلي غاتزوج قلت ضروري ندير الواجب ونجي نبارط ليك مادوزناش قليل أطارق
طارق ( ملامح وجهو كانو مبدلين بحال شي واحد مدمن ديال المخدرات عينيه مقلوبين طل شوية كيشمر على نيفو تسيف ) ادوري مية وغات***ي ولا انتعرا عليك ونحيدك عليك سروالي وانتي عارفاني نديرها
ليليا ( شافت فالقاعة الكبيرة لي تقادات وتصايبات والطبالي الكبار تبسمات وقربات ليه ) كان هاد العرس غايكون عرسي كونماشي انا لي مابغيتكش
طارق ( تبسم ) الحمد لله لي مابغيتيش كنت غاندوي لوسخ ، ماشي بحال دابا غاندي لالاك
ليليا : كتبرد على قلبك احبيبي ، كنتي كتموت عليا كيفاش تقد تنساني اممم ماشتينيش كيفاش تبدلت أممم زعمة ماتوحشنيش
الــداخــل
حياة ( خارجة من الحمام دايرة ماسك لوجها ) لاش هاد الحالة انا راه بيضا من عند الله تزيدوني بهادشي ماليها معنى
عنبر : سوكتي اش كتعرفي باش نهار عرسك تكوني قوقة
حياة : نسيت لپاك ديال لي كونت اناخود على ود الجسم واعر داك لي شفنا عجبني وجاني صيفي
أريناس ( حلات عليهم الباب هازة اولويز فيدها وساهية شافت فعنبر ورمشات ليها بمعنى أجي ناضت عنبر جهتها مبعدين شوية على حياة ) عنبر جاب ليا عصام دابا الوزيز فاش خرجت ناخدو عندو بانت ليا واحد ختنا واقفة مع طارق طويلة لابسة واحد شورط ديال الدجين وجارة باليزة وقريبة ليه ماعرفتهمش شنو كيقولو ولكن باينة عليه معصب ...
حياة ( نباتها من ورا عنبر ) شكون هادي ؟
عنبر ( ضارت عندها ) مالك اختي طالقة سطولاتك سيري رتاحي ازين
حياة ( قلبها كيضرب صدرها تزير عليها تنفس مابقاش منتاضم عندها ) قلت ليك شكون هادي ( هزات واحد فوطة محطوطة مسحات وجها ضربات فأريناس لي شوية طيح على عنبر وخرجات مكتشوفش قدامها
عنبر : كون اجريتيني لبرات البيت واخا هاد البنت كانت اتحس وتسمع شكون هاد جحمومة ( خلات أريناس وتبعات حياة شادة كرشها )
على برا الروطال كيطل على طارق باغي يتدخل وفنفس الوقت باغي يخلي طارق يحل المشكل
عز الدين : بنت الكلب لݣيتها واقفة فالمطار ݣاتلك طارق لي عرضها مورياني الميساج وانا تكلخت مارضيتش البال لنمرة .. ودخلني العجب كيفاش هو عرضها ݣلت يمكن رجعو كيدويو بحال الصحاب
عماد : من نيتك اصاحبي ، انت عارف طارق كيفاش داير ماعندوش مع الحساب القديم ( شاف جهة طارق لي جارها من يدها باغي يخرجها كان قريب يأذن العشا ) شباب بان ليا غاتشبك
ليليا ( بصوت عالي قاصدة تعليه ) واش نسيتي لي كان بيناتنا نسيتي بلي كنا كنبغيو بعضياتنا وكنتي كتموت عليا وبلي كنتي ميت باش تزوج بيا .. انا انا لي خليتك انا لي مابغيتكش انت باغي تزوج غير باش تنساني أنا ( ضحكات بميوعة ) زوجوك والديك شي بنت باب الله مسيكينة ياك ( كانت واقفة وراهم حاسة برجليها مقادينش يهزوها سمعات كولشي سمعات كاع لي تقال ياك هو قاليها عمرو بغا وعمرو عرف شي وحدة كيفاش دابا واش هادشي كاملو كذوب واش ضحك عليها ) هاي هاي هاي هادي هي عروستك يمكن ( تسمع الخصام خرجو البنات خرجات تودة وسعاد ورقية خرج الحاج العائلة كلها خرجات ) ..
حياة ( تقدمات ببرود لجيهتها ) عاودي اش قلتي حيت ماسمعتكش مزيان
ليليا ( تبسمات ) اه انتي هي العروسة المسكينة لي ضحك عليها وطلبها لزواج .. حبيبتي طارق كان كيبغيني انا وكيموت عليا أنا والى ماتيقتينيش ها ولاد عمو وصاحبو فخبارهم بلي كان كيحماق عليا وأنا لي مابغيتوش
عنبر ( حيدات حياة من طريقها وشافت فيها ) ومن بعد ازين كان فعل ماضي والى ماهزيتي قلوعك ايولي انتي هي المفعول عليه المضروب فجوج
طارق ( باغي يجر عنبر من يدها خايفها تعصب ) ختي الله يرضي عليك
ليليا ( طلعاتها ونزلاتها ) اوووه انتي هي عنبر وأنا كنقول كيفاش مكسيم طاح حبو على وحدة مغربية ..
طارق ( شاف فليليا ) ادوري مية ولا أقسم لك يمينا وبرب العزة انسى راك بنت وأنقسم موك على جوج ..
ليليا ( شافت فعلال لي كيخنزر فيهم ماعجبوش الحال ) عمي واش تخلي وحدة جات ضيفة لداركم تمشي فهاد الليل ؟
عنبر ( بإنفعال ) شحال هذا وانا ميتة ندابز ونبرد جنوني وهرموناتي نيت طالعين مابغيتيش تحشمي ، محرشك شي واحد جاي تخسري لدرية عرسها ( بدون سابق إنذار جراتها من شعرها ) اعوجة الركابي كنقولك سيري فحالك وانت مابغيتيش جايا مشروطة علينا يحسابلك مخك فميامي
الروطال ( طار باغي يجرها خايف لا لوخرا تجيب ليها شي ضربة فكرشها ) هداي هداي ( شاف فعز الدين ) دي هاد الميكروبة كيما جبتيها ديها حطها فشي قنت ولا ضبر لمحاينها
عز الدين ( جرها من يدها تحت يدين عنبر لي ولات كلها كترعد ) زيدي ( جر ليها الباليزة لاحها فطوموبيل وقبل لا يدخلها الطومويبل هز يدو حتى لسما وصرفقها
طارق ( كلو كيترعد ) هادي باش متعاوديش طوفي بساحتي برب تباني ݣدامي العصب درجليك نݣطعهم ليك دي عليا الوسخ لوحو فشي بركاصة ديال الزبل ( عمر فمو ودفل عليها جابها ليها فوجها ولات حالتها وكتبكي مارضاتش وماتسرطاتش ليها ) حاولي تباني ݣدامي ويسخن عليك عليك راسك هاد المرة التيكي ديال قبرك انا لي انݣطعو ليك
عز الدين ديمارا الطوموبيل داها والبقية شي كيشوف فشي طارق صدرو كيطلع وكينزل .. وقف عليه علال كيحنزر فيه
علال : اش هادشي اطارق ؟ ولينا ضحكة
طارق ( هز يديه كيشرح ليه ) با السيظة كنت كنعرفها 10 سنين هادي ولا كثر كنت بغيتها لزواج وهي مابغاتش سيدة عقليتها ديال ايت هوكا .. باغيا تعيش بلا زواج فضينا نسيتها باح اش جابها اليوم الله وعلم
عصام : سمعتيها جبدات شي واحد سميتو مكسيم !!
عنبر ( مغلغلة ) خليني نريشها لاش جاي هازني ، وانت كنتي ساتر على ولد عمك ياك اشلاهبي
الروطال : وداكشي ماضي أبنادم ماضي واش تي شوية لاباس ، باغية دابزي فكري لي فكرشك
عنبر : عود سبسي ميتر مربع كارية متعرفها غادية ولا جايا
الروطال ( غوبش شافيهم ) سمعتوها اش کالت شطون هاد مكسيم وكيفاش بلان عاد عرفات علاش طاح حبو على مغربية
عنبر (بدون وعي مغلغلة الستريس لاعب عليها ) هو داك اليه**** لي كان باغي البروش
الروطال ( ضار عندها بالعرض البطيء فكو كينبض ) ياك المرضية هو لي كان عينو فيك
عماد : دابا فهمت البلان ، حيت تمنع يدخل المغرب دار هاد البلان باغي ينغصها علينا
علال ( شافيهم ) ديرو عقلكم ديرو عقلكم الله يهديكم هادشي منبغيهش يتعاود لي عندو شي حساب قديم يصفيه
طارق ( كيدور راسو ) فين هي حياة خاصني ندوي معاها
عنبر ( وقفات ) قفرتيها معاها سمعات كولشي ( شافت فالروطال ) وانت ديرها فين تجيك .. خلاتهم ودخلات كتعيط ) حياة حياة خالتي رشيدة فين هي حياة
رشيدة ( كانت خارجة من الحمام ) كنت كنتوضى فالحمام ماشتهاش سمعت صداع اش واقع ؟
عنبر : لا والو اخالتي ( كتقلب ) دنيا ماشتيهاش
دنيا : لا ماشتهاش كانت معاكم فاش كانت ديك خيتي .. بدات تعيط ولا مجيب ، دخل طارق طاير كيقلب عليها طلع جرية وحدة الفوق سطح والو مكايناش
عنبر : مكايناش الدار كلها مكايناش فيها ..
غادية مكتشوفش قدامها كتبكي عشرة للقلب .. كتشهق مقاداش تصور بلي طارق كذب عليها كان عليه يصارحها واش هي ادخليه فالماضي ديالو ، ولكن باش يوقع هادشي اليوم وأيام عرسها لي فرحانة بيه ماتقبلاتهاش زاد هادشي على الستريس لي كان راكبها .. المنظر ديال طارق ويد ليليا لي تحطات على دراعو وضحكتها مابغاوش يتحيدو ليها من بين عينيها كلام ليليا كيتردد فودنيها عاد زادت حسات بعنبر نهار عبلة سيفطات ليها تصاورها مع الروطال .. بان ليها واحد الپوطو ݣلسات حداه حادرة راسها كتبكي كاع الستريس ديال الامتحان برداتو فالبكا شافت فجنابها الدنيا خاوية حدرات راسها كتشوف فيديها كيترعدو مع هزات راسها مع حسات بشيحاجة قاصحة ضرباتها للجبهتها غوتات شاد على راسها الضربة كانت مجهدة جابت ليها الدوخة حسات بشيحاجة سخونة تحت يديها طتبكي لربي لي خاقها من الحر شافت يديها لقاتها كلها دمايات .. وقفات مشات بيها دنيا وجات سمعات الغوات وصوت شي راجل كيغوت ويجري على شي حد والباقي مابقاتش فرزاتو حيت كانت طايحة على طولتها ..
فجها اخرى خرج راكب فطوموبيلتو يقلب عليها اما الباقي لي فدار كولشي كيقلب ، رشيدة عاودو ليها كتبكي بقات فيها بنتها لي ماعندها زهر فالفرحة حتى قالت تهنات عليها ودنيا ضحكات ليها وهادشي خرج ليها من الجنب
عنبر ( جارة رجليها خارجة ) تسناني نمشي معاك
الروطال ( تݣرع عليها ) انت راه تزادت فيك نغزة لا ، رجليك يفوتو الباب نکلعهم ليك من جدر دوزي تركني الله يرحم جدك ( بقات كتشوفيه بصوت عالي خلعها ) ودخلي
عنبر : اناني الحݣار .. رجعات دخلات وهي على أعصابها ، دنيا وياسمين خرجو كيقلبو
رقية : شي عين صحيحة هادي الله يحفظ كنا صحة سلام جات ديك سوسة نوضاتها الله يلݣيها ليها
تودة : اللهم آمين بنيتي مسكينة علم الله بحالها اسمعات داكشي زادت خلفات طجاتها .. رجع عز الدين للعند الدراري
عماد : فين ديك ***** ؟
عز الدين : وصلتها للشانطي بان ليا واحد الكار غادي للرباط وقفتو راه داها اش تم ؟
عماد : حياة مالݣيناهاش حنا غاديي نقلبو .. مشا معاهم عز الدين حتى هو يقلب كولشي تفرق كيقلبو ..
فدار بوبكر .. دار لي كبيرة مفرشة فراش بلدي ݣالس لابس سروال توب مبرد مع واحد تيشورت هاز البيسي خدام فيه حاط براد ديال أتاي كيشرب فيه حتى كيسمع الدقان حط البيسي او وقف توجه للباب خلو
بوبكر : فتاح أش تم ؟
فتاح ( بتوتر ) هداك المسخوط ديال عبد المنعيم ، يمكن ناض عليه الحال عاود دمغ واحد البنت مسكينة بحجرة لݣيتها طايحة هزيتها وجبتها للدار عدنا وانا مكنعرف طبيب اسي بوبكر
بوبكر ( غوبش ) واش هدا غايبقى لي لݣاه يدمغو .. باه عندو باش يشي ليه دوا يديهم لقصاير ومخلي ولدو زيد ݣدامي .. تبع فتاح لدارو لي كانت لاصقة على دار بوبكر سبقو فتاح على مرتو دير عليها زيفها دخل بوبكر كتبان ليه حياة جبهتها كلها دم ) منين غانجيبو طبيب فهاد الوقت جيب الما دافي بعدا ݣول لمرتك تنقي ليها انا نجيب دوا ونجيب
فتاح : وسخفانة
بوبكر ( غوبش ) انا جاي افتاح انا جاي .. رجع لدارو جاب الدوا ورجع لݣا مرات فتاح نقات ليها الجرح مكانش شي جرح كبير بزاف .. ولكن كان خاصو الخياطة ) سخفات غير حيت شافت الدم الجرح ماكبيرش بزاف اهو خاصو الغراز دوا ليها الجرح ودار ليها الفاصمة ابينما صبح الحال ويشوفو طبيب ..
فتاح : مامعري شت هاد درية باينة ماشي بنت الدوار
بوبكر ( برم شفايفو ) تݣد تكون جات عند شي واحد أنا غانشوف .. خلا فتاح مع مرتو مݣابلين حياة وهو خرج من عندهم كانت طوموبيلت ياسمين جايا راكبة معاها دنيا ، حبسات الطوموبيل ونزلات متوجهة جيهتو وقف كيشوفيها بإستفهام ) أش تم ياك لاباس ؟
ياسمين : كنقلبو على ( ماعرفاتش كيفاش تقولها ليه كنقلبو على خطيبة خويا جاتها فشكل تنطق حتى سبقاتها دنيا
دنيا : سلام عليكم اسيدي ، عفاك واش مبانتش ليك واحد البنت لابسة ݣندورة نص كم فشيبي
بوبكر ( غوبش كيخمم ) واش كتجيكم ؟
دنيا : اه خطيبة خويا ، خرجات تمشى وتجلات ومالقيناهاس مع هي مامخالطاش
بوبكر ( تنهد ) واخا اجيو معايا .. تبعو بوبكر وعلى وجهم علامات الإستفهام رجع للعند فتاح دق وعيط ودخل وهوما تابعينو ) هاد البنات كيجيو للبنت لي لݣيتي ( شافيهم ) راهي فالبيت اهو ماتخافوش اضربة صغيرة
ياسمين : اويلي كيفاش ( دفعاتو ومشات دخلات كتبان ليها حياة مغطة وجبهتها عليها الفاصمة ) اويلي مالها ( كتحرك فيها ) حياة حياة ختي حياة
فتاح : لا تخافيش راه ضربها واحد دري مسكين شوية فعقلو بحجرة وسخفات
بوبكر : الجرح ماكبيرش ولكن خاصو الخياطة حيت غارق شوية
ياسمين ( شافت فدنيا ) وعيطي على طارق سوني ليه سوني ..
جاتو الأپيل ترفع من بلاصتو عفط عفطة وحدة ماوقف حتى للعندهم .. نزل كيجري داخل فبوبكر وفتاح
طارق ( بلا عقل ) فين هي فين ( بانو ليه مغطة حس بقلبو تقسم على جوج من المنظر ديالها ، مشا لجيهتها مكوانسي عينيه كيناظروها لون وجها مخطوف ومغمضة عينيها ، ݣلس شاد على راسو كيشوفيها مانطق كلمة وحدة شاد على راسو بدون وعي نطق ) انا سباب انا لي وصلتها لهادشي كان خاصني نعاود ليها أنا لي كذبت عليها ..
دنيا : ولكن أخويا داكشي فات
طارق ( كيحرك راسو بنفي ) واخا فات كان خاصو يتعاود ليها تعرف ، أنا مسحت سما باليݣة ݣلت ليها عمري عرفت بنت الما
بوبكر ( جا لعندو حط يدو على كتفو ) أجي معايا شوية على برا ، خليها دابا ترتاح جرح ماشي كبير غير خاصو الخياطة ( جر طارق لي كان مزال عينيه عليها وهرجو على برا ) وعا أصاحبي
طارق ( تفكيرو كان غارق كيدوي بلا تفكير ) انا لي درتها كون عاودت ليها مغايوقعش هادشي
بوبكر ( حنحن ) مابغيتش ندخل ولكن واش تخاصمتو ؟ سمعت بلي غاتجي دير عرسك هنا ..
طارق ( تنهد داير يديه فجيابو ) عوالين العرس من هنا ل 4 يام هاد العشية جات واحد الموسخة كنت كنعرفها ألي پوك كنت بغيتها لزواج ساع هي باغية الوسخ .. علم الله شكون حرشها جات كتخربق وتملق ومتجي اهي وسمعات كولشي
بوبكر : ولكن داكشي داز عليه مدة مخاصهاش دير فخاطرها المهم انتي شكون بغيتي وشكون لي اتكمل معاها حياتك
طارق ( شافيه ) المشكل الكبير انا كذبت ݣلت ليها عمري عرفت شي وحدة ولا بغيت شي وحدة .. وزيد ديك الميكروبة بدات كتسمعها شي هضور جريت عليها جيت نقلب لݣيتها طارت
بوبكر : عبد المنعم لي ضربها بحجرة راك عارفو شوية فعقلو والى ماشربش الدوا كينوض عليه الحال ..
طارق ( غوبش ) أنعطب مو نوريه تخلخيل
بوبكر : مغاتصور والو أصاحبي سيد بوراقيه .. خاصها اشي غرزات ودابا مكاين حد
طارق : انديها للقنيطرة تم يديرو ليها لازم مغانتسناهاش أنا حتى لغدا ، الله يحفظك ابوبكر ( خلاه ودخل هزها وخرجها دارها فطوموبيلتو تبعات. دنيا وياسمين )
ياسمين : فين اتمشيو ؟
طارق : نديها لكلينيك غانبقى كنتسنى حتى لغدا ولا سيري أنت ودنيا للدار
ياسمين : نمشي معاك اخويا ( وقفات طوموبيل الروطال )
طارق ( شافيها بحزم وبصوت تقيل غالبة عليه نبرة الصرامة ) ݣلت لك سيرو لدار ( هبط الروطال ) فاروق يمشي معايا
الروطال : شنو واقع ؟
طارق : غانديوها لكلينيك تخيط جرح .. ركب طارق وحداه الروطال عاطي سوارت لدنيا شكرو بوبكر .. ياسمين ركبات فطوموبيلتها ودنيا فطوموبيلت الروطال ورجعو لدار ..
عصام وعماد وعز الدين رجعو للدار .. بقاو مجموعين مع البقية برات الدار اما العيالات كانو الداخل رشيدة كان ربي عالم بحالتها مخلوعة والبكية شداها على بنتها
راشد : كتحسو بشي لعبة داخلة فهاد التخلويض ، ختنا جات لايحة قنب**ولتها ومشات بحال الى شي حد كان موصيها
عزيز : ماسمعتيهاش شنو ݣالت لعنبر البلان راه باين أصاحبي
عماد ( شاف فعصام ) هادو بغاو يرجعونا ليامنا
عصام : ماعندهم مايرجعو خونا امتسرطاتش ليه البلان ديال مابقاش يدخل لمغرب.. وسيفط الجروة ديالو كون فجهدو شيحاجة كون دارها
راشد : عندو الصح ، مابغاش يريسكي خايف على راسو عارف راسو معامن ..
خيطو ليها الجرح وعقموه ليها .. فاقت كانت متكية وساهية حتى دخل عندها الروطال بقا على برا دورات وجها شافتو ورجعات قلباتو كتشوف فسرجم ..
طارق ( تقدم لجيهتها تنهد تنهيدة طويلة ) شوية كيكاتحسي ؟
حياة ( تنهدات ) بغيت نمشي بحالي لدارنا
طارق : واخا حنا غانمشيو دابا
حياة ( شافت فيه وبهدوء نطقات ) بغيت نمشي لدارنا بغيت نرجع بحالي لكازا
طارق ( غوبش ) حياة كتفلاي ؟ رتاحي دابا وندويو من بعد صافي الله يرضي عليك ( قاطعهم الروطال لي دخل )
الروطال : على سلامتك ( شاف فطارق ) مشينا من ݣبيل وهوما كيسونيو
حياة ( تݣعدات جا باغي يعاونها طارق بعدات يدها ) قادة نوض بوحدي ( تنفس بصعوبة عادرها وعادر عصبيتها وقفات كتجر فرجليها وهوما تابعينها حتى خرجات من الكلينيك ، سبق فتح ليها الباب اللوراني طلعات فيه طلعو هوما وشدو الطريق ..
~~~~~~~~~~~
رشيدة ( غادية جايا ) تعطلو بزاف هادشي كامل فلكلينيك اويلي ياكما بنتي عندها شي دقة خايبة
ياسمين ( كانت كدوي فتيليفون ) هاهوما قربو راهم فدخلة .. كولشي كان على أعصابو فرحاهم تقلبات مابقات عندهم ݣانة لوالو دازت 15 دقيقة حتى دخلو ..
رشيدة ( غير شافت حياة طارت لعندها كتقلب فيها ) بنتي شوية كيكاتحسي كي بقيتي ؟ حياة هزات فيها عينيها ترمات بين يديها كتبكي فهاد الموقف بضبط كتبغي تكون بين يدين الأم ديالك تحس بالحنان ديالها .. كتبكي وتشهق ورشيدة كدوز ليها على ظهرها وطبطب عليها طارق واقف وكيشوفيها قلبو متحصر ربي لي كان عالم بيه دموعها بحال الماس كيتغرسو فقلبو
حياة ( تنفسات بإرتياح خرجات كاع طاقة الخايبة لي فقلبها بعدات على رشيدة مشمرة على نيفها وشافت فيها ) ماما بغيت نرجع فحالي لدار ماعندي مندير هنا
رشيدة ( شافت فطارق ورجعات شافت فحياة ) أجي نݣلسو بعدا أرتاحي
رقية : أجي ابنيتي على سلامتك هداك المسلسع الله يسر اكينوض عليه الحال مكايعرف مايدير ، كولشي جا يطمن عليها
حياة : بغيت نرجع لكازا
رقية : اويلي ابنتي رجوع لله كيفاش ترجعي وعرسك ؟
حياة ( شافت فيها ) مابقا عرس امي رقية ، راجل لي يكذب عليا ماعندي مندير بيه
رقية : ولاواه لاواه هو مكذبش علك ابنيتي ، وليدي طارق مافيهش الكذوب
حياة : مي رقية راه قاليا عمرو عرف شي وحدة فحياتو ولا بغا شي وحدة ولا خطبها
علال ( تدخل الكل حدر راسو كيسمع هزات فيه حياة راسها وحدراتو کلس حداها وبكل وقار نطق ) سمعيني أبنيتي انا الغلط الى كان فولدي يخلص الحق ، وعدك الصح فݣاع لي ݣلتيه ولكن ابنيتي حنا ماخطبنا حد وانا هاديك درية عمري شتها مغاتحاسبيهش على وحدة عرفها منين كان عندو 26 عام علاش هو كون كان مزال مفكرها ولا عدو بيها غراض ولا بغاها نيت من ݣلبو كان غادي يکولك مكنعرف حتى وحدة ( شافت فيه )
حياة : كلامك هو الكبير ابا علال ، ولكن مافيها باس الى قالي كان عندو شي وحدة فحياتو كيما هو عارف عليا كولشي ..
علال : أنتوما العيالات قصة وحنا حتيت ابنتي .. حنا الوحدة لي كتكون دازت فحياتنا بحال طرشة مكنتفكروهاش كنساوها وكنساو حتى كمارتها كيدايرة ماشي بحال الى بغينا نيت شي وحدة بحال عمك أدريس ( شاف فولدو لي ݣالس ) عمرو نسا سعاد وتصويرتها من ديما كاينة عندو حيت الظروف لي فرقاتهم وعمك عبد الخالق عمرو نسا خالتك فاطنة ولدي طارق انا لي كنعرفو كون كان يبغي ديك خيتي كون تبعها وقلب عليها وبقا عليها حتى بغات وتي راه تعرفيه مزيان شحال وهو يتسنى فيك حيت بغاك ديال بصح شوفي الون وجهو مخطوف منين مالݣاكش مشا يهبل
عماد : ولا كيلهبيل وسكتي ترا عمرنا شناه هك
علال ( كمل كلامو ) طارق ابنيتي ماشي شي واحد لي مغاتلکايش المشاكل معاه ولكن ماشي منو هو لا من لي كيدورو حداه لا هو لا فاروق خدمتهم معروفة راه نݣد نݣولك بلي سمية حيدر هوما ابنيتي لي كبروها ولات معروفة فسوق خاصك تكوني صبارة وتيقي بيه .. ومتخلي لسوسة فين دخل بيناتكم ماحدكم مزال مادرتو فطاجين مايتحرݣ الزواج راه ماشي ساهل خاصو صبر وتكوني مرأة وݣادة .. وانا لي كنشوفو او وراني زمان راه داك حنطويل كيبغيك ومعششة ليه فݣلبو خمي مزيان ابنتي الله يرضي عليك ، نوضي ترتاحي وفيقي للفجر صلي وستعيدي من الشيطان الرجيم ..
- تنهدات حياة او وقفات بلاما تشوف جهة طارق طلعات تبعاتها عنبر كتمشى بشوية .. دخلات حياة لبيتها كتحس براسها كيضرها ݣلسات فوق نموسية ساهية
عنبر ( دخلات لعندها ݣلسات حداها بلاما تدوي جراتها عندها معنقاها ) انا قلتها ليك قلت ليك راه طارق واحد بوراس متزوجيش بيه اش عجبك فيه ، واخا الصراحة غزال شهوة منو الطولة وتجريدة والقلدة والعينين زينين كيشبه ليا سبحان الله ( حياة جابت ليها الضحكة ) وهو الصراحة امبقيتيش واقفة وتفرجي اش دار ليها ( وقفات كتقلدو ) قال لعز الدين دي عليا هاد الوسخ لوحو فشي بركاصة وقالها توريني وجهك عصب رجليك نحيدهم ليك وقالها لهلا يحييك ولا يتمنيك توصلي لالاك حياة ( شافت فيها حياة بعدم تصديق ) وهو الصراحة انا لي قلت ليها هاد لهلا يحييك ولكن هو جا حتى لحداها وعمر فمو دفال ودفل عليها على وجها
حياة ( تنهدات ) وفين مشات ؟
عنبر : الجايحة لي ضربها داها عز الدين لاحها فواحد الكار غادي للرباط .. ونزيدك الخبار لاخرة ماشي داك اليه*** هو لي سيفطها لي كان تابعنا هو لي سيفطها باش تخربقنا حيت ماتسرطاتش ليه كيفاش يتمنع يدخل للمغرب
حياة : قبيلات ربي بوحدو لي علم بحالتي كيف كانت والله ، حسيت بروحي غاتزهق
عنبر ( غمزاتها ) هدا كلو حب فخويا حبيبي ، اييييه نوضي غسلي وجهك ( تدق الباب ودخلات دنيا هازة ساشية فيها دوا )
دنيا : هادي عطاها ليا طارق ، فيها دوا دراس ودوا على حسب جرح ..
حياة : راسي غايتهرس ( هزات دنيا كاس دالما دارت ليها الفانيدة وعطاتها تشرب .. غير دابت شرباتها ) مافيا لي يغسل وجهي انحط راسي ( تكات فبلاصتها غطاتها دنيا وخرجات هي وعنبر من ورا ماطفاو عليها الضو ..
~~~~~
"كلمتك الطَّيبة لها أثر، اعتذارُك له قيمة، تفهُّمك لغيرك أدب، التَّغاضي عن الأخطاء وعي، مُراعاة المشاعر نُبل ،
صون الودِّ ودٌّ، ما تقدِّمه لغيرِك عائد لك،
تعاملك مع الآخرين يؤثِّر على شخصيِّتك أكثر مما يؤثِّر عليهم، أمور عاديَّة تُحدِّدُ مَن أنت ،
لا تبخل بالجمال فتصبح خاليًا منه .."وإكرام النفس هو أن تختار لها ما يليق بها في كل شيء..
أطيب الرفقة.. وأصدق الحب.. وأرحب المجالس..
وأعمالاً ترضى عنها.. وعطاءً بقدر الاستطاعة ..
ومنعًا لا يُورث الندم.. وأملاً يمكن بلوغه...
فمن عرف قدر نفسه..
أبى أن يمضي بها في طرق لا تشبهها."
ماعرفاتش شحال دالوقت نعسات فيه حتى ضرباتها الفيقة فيها الجوع .. ناضت بشوية من بلاصتها حلات الباب هازة تيليفون مضوية بيه هبطات مع الدروج الصقيل دخلات الكوزينة كتسمع الصوت جاي من برا من الجردة تمشات على ريوس صباعها وقفات عند الباب طالقة ودنيا ..
الروطال ( كياكل فكاوكاو ) أش مفيقك حتى لهاد الوقت ؟
طارق ( كيشوف فالݣمرة وساهي ) ݣلبي عامر مجاني رݣاد ( تبسم) حتى كتݣاد من ݣاع جوايه وكترجع تعواج .. مكنأمنش بهادشي ولكن كنحس بجدي ماعندي زهر
الروطال : وايلي أصاحبي من نيتك وعا شوية
طارق : داوي معاك أولد عمي داوي معاك .. الأم سمحات فك وانت بعلوك باغية غير تپروفيطي فيك مكتهمهاش انت ݣاع ونهار كتبغي وحدة من ݣلبك كتجي موسخة كنت معمي نهار عرفتها تربج لك حياتك برب كون مزال ݣدامي ندفنها حية
الروطال : تا اش بغيتي الوسخ ، انا نهار عاودتي ليا بلي سيدة باغية تعيش معاك بلا زواج عرفت من اش من نوع حاول تدوي مع حياة داكشي كيبقى ماضي
طارق : متضي ولكن كان عليا نݣولها ليها .. أنا ماݣلتهاش ليه حيت داك الويل مكنحملش نتفكرو كنكره راسي حيت عطيت وقت لداك نوع ( شافيه ) عرفتي تفرقني حياة برب حتى غاندير شي مصيبة فراسي ماعندي حياة انا نݣولك
الروطال ( ضحك ) وسعداتك أحياة أجي تسمعي ، وشكون ݣال طيح هاد طيحة
طارق : كنموت عليها .. نݣد نكون بغيتها نهار شفتها فليفلة حارة ولكن على ݣلبي بحال العسل كنعشقها منݣدش نتخيل حياتي بلا حياة نموت أخويا نموت
الروطال ( طبطب على كتفو ) يكون خير هادي أسحابة ودايزة ودوز ترݣد نمشي قبل لا تفيق الفلفلة ديال بصح وهي خاصها امعامن ..
طارق : سير شوية ونطلع .. دخل الروطال مخليه واقف عاطي وجهو للسما كيحس بالغما على قلبو ، تمشات حفيانة بلاما يحس بيها وقفات وراه زادت قربات شوية وخشات يديها تحت درعانو حاطاهم على صدرو العريض القاصح .. ماعرف راسو باش تبلا بالخف ضار لعندها مامتيقش بلي راه واقفة قبالتو
حياة ( شافت فيه بعيون بريئة فيهم دموع ) فيا الجوع .. تشهيت داك الفرماج والكشير لي كنتي كتصايب ليا فاش كنت كنحفظ ..
طارق ( تنهد جارها خاشيها فحضنو خرج أنين من قلبو كتأنيب ) أش بغيتي عندي أش درتي ليا عمرك تعاوديها كت غانحماق ..
حياة ( ملوية وسط منو مكتبانش ) وانا جيت نسعاك كون طليتي على قلبي كون شفتي العافية شاعلة فيه
طارق ( بعدها شاد وجها بين يديه ) عمرك تفكري بلي اتجي شي قمقومة فبلاصتك كيما بغات تكون ماتوصلش حتى لزطمة ديال رجليك خر*ك متوصلش ليه ( جاب ليها الضحكة ) كنموت على موك
حياة ( كتشوفليه فعينيه ) حتى انا كنبغيك وبزاف ( قرب شفايفو لشفايفها وهي ضربو بريوس صباعها ) درتيها وحدة عمرك تعاودها حتى نتزوجو يلاه زيد وجد ليا مناكل
طارق ( تبسم ) واخااااا شحال قدك ازين ديالي ( جرها من يدها داها للكوزينة ݣلسات وهو سد الباب وجد ليها السندويتش لي كيعجبها وعطاها تاكل ݣالسة وهو مقابلها ) كيغادي ديري مع ديك الضربة ؟
حياة : ماشي مشكيل ، حتى انت المكياج يدرقو ( وقفات) نمشي نكملو فالبيت ونعس
طارق : انا تابعك ( طفا الضو وتبعها حتى لبيت بقا واقف حتى دخلات للبيتها ودخل هو لبيتو .. عاد حس براحة فقلبو ونعس ..
ليلة دازت عندهم كحلة وعوض ها من بعد علام الفرح تهز من جديد فدار الحاج علال .. ݣالسة وسط من البنات كتشوفيهم لا هي قادة تدوي ولا تحرك لابسة ݣندورة فزرق منها للحمها اللحم ديالها لي كانو دايرين ليها التبريمة .. أما وجها كانت دايرة ليها ماسك ديال الروز ونشا ودانون مسوس
دنيا ( كتدهن فيديها ) أش درتي فهاد التبريمة ؟
عنبر ( كدهن لياسمين لشعرها ) فيها الحنة والعرعار مطحون وأداد مطحون وشيح مطحون وعرق السوس وشوية دنيلة الحرة والخرقوم ديال اللحم مطحون مع الورد البلدي مطحون وخلطتهم وزدت عليهم الحامض وصابون البلدي وخلط بالما سخون ..
دنيا ( شافت فياسمين لي حابسة البكية بسنانها ) عبرات عليك داك الشعر بغيتي طيحيه بصبايغ
ياسمين : مكتعجبنيش الحنة اعباد الله ريحة العشوب اتبقى ليا فشعري
عنبر ( كتعيبها ) العشوب تبقى ليا فشعري تي نوضي هاشعري انا شميه مافيه والو .. كندير القهوة الما ديالها كنشلل بيه ولا خل تفاح مكايبقاش الريحة وشعري زين وصحيح ومالي اش درت ليك فيها
ياسمين : ايولي شعري ليموني
عنبر : البعر ماشي ليموني ايخرج ليك أكاجو حسن من هاد اللون .. راه تبخت فيها قشور رمان والكاركاديه والقرنفل وأتاي وقشور الباربا ودباغ ، ودرت ليك الكاكاو مع الحنة والعكر الفاسي سوكتي سوكتي ( جراتها من راسها باش تسكت وكملات ليها التلبيخة لراسها )
أريناس ( دخلات عليهم سدات الباب ) كون غير درناها فسبعيام تعطي اصاحبتي
عنبر : كولشي زين حتى انتي ( هزات فيها راسها ) خاصك تعطي راسك لشمس
ليلى ( كنشوفيهم ) هاد الليلة انعسو مجموعين هاد الحالة ماشي ديال نعسو مع رجالاتنا
عنبر ( كضحك ) طارق وراجل أبتسام راه غطاو فوق السطح وفرشوه نعسو تماك
إبتسام ( دخلات عليهم ) عنبر داك المقص لي هزيتي قبيلات فين هو ( أسماء كتعيط ) وبلاتي انا جايا وهي ربي العالي
عنبر : خليتو فوق المكينة ديال الصابون ( خلاتهم ومشات للعند أسماء ريحة الطياب كتعطي ودار كتنغل بالعائلة كل واحد وشنو كيدير ..
بالليل مجموعين البنات فسطح بوحدهم كلهم لابسات ݣندورات وليمونيات بالحنة وشعرهم ملوي فزيوف قدام وريحة الحنة كتعطي منهم .. أما الرجال كانو مقصرين ورا الدار على الضحك ونشاط ونزاهة
ياسمين : شتك انتي منين جا عز الدين ماديتيهاش فيه متسوقتيش ليه ؟!!
دنيا : يمشي يعاود لمخو .. يمشي وقت لي بغا ويجي وقت لي بغا وجايب معاك ديك المونيكة ديال عشرة دريال لي ماعجبتو نفقصو ونطرطق ليه المرارة
ياسمين : بااز مادواش معاك ؟
دنيا : لا مدواش مكانش الوقت شفتي أش وقع لبارح .. حنا بعدا مساليناش ومغاندويهش
ياسمين : قبيلات دزتي من حداه بغا ياكلك بعينيه السيد كيبان ليا كيبغيك أصاحبتي غير وقيلة مقادش يقولها حيت خت صاحبو
دنيا ( شافت فيها ) متبقايش تعمري ليا راسي بشيحاجة مكايناش وإلى جا راه جا على صاحبو ماشي عليا أنا
ياسمين : وأنتي تعرفي
دنيا ( تبسمات ) فخبارك عز عليا هداك بوبكر تبارك الله أختي على رجولة وعلى طاقة والله كونما هاد القلب والديه كيبغي داك بوراس .. كون طاح حبي عليه
ياسمين ( ميقات فيها ) باز اش عجبك فيه ؟ خضر مكايعرفش يدوي ماشي واحد راقي
دنيا : سيري تنعسي كيغروك المظاهر حتى طحتي فداك الويل دنور الدين هو وتريكتو .. ياك كان هو ملك الأناقة ولاباقة والكلام الزين فالاخر اش صورتي والو نرجسي بوزبال
ياسمين ( تنهدات ) وهو فصراحة عندك الصح ماصورتو منو الغمة والهم
دنيا : وقوليها لراسك شكل ديال بوبكر ، ماعندوش مع الزواق ونفاق عندو انيشان راجل لي تعولب عليه كنحماق على هاد النوع
ياسمين : هادشي كامل عرفتيه امن لبارح باز ( بدات سعاد كتعيط )
سعاد : واش مغاتهبطوش تعشاو ؟
عنبر ( متكية فوق بونجا ) شي وحدة فيكم تجيب لينا ناكلو هنا مافيا لي يهبط .. مشات أريناس ورجعات هي وإبتسام جايبين العشا بيبي قطبان شوايا والروز بتشرميلة تعشاو عرݣوها ليلى ودنيا جمعو الطبلة وجابو ليزور باش يتغطاو
ياسمين : قاتليكم مي رقية غاتصبح علينا الشمس وصهد
عنبر : نتوما أصلا خاصكم تنوضو بكري تمشيو الحمام سعداتكم .. انا ممنوع عليا
دنيا : دوشي أفدار براكة عليك
عنبر : ابتسام مسكينة قاتلي اتحوك ليا الله يسهل عليها وغادي طرفني متعرفي نبلز ليكم فالعرس
حياة : هادي تالت مرة كتقوليها غير سلامة ياربي
عنبر : صافي اقلتها اتكون الوقت لي مكتاب غادي نولد فيه إن شاء الله ( كتفوه ) غطيوني غطيوني ( لاحت عليها ليلى ليزار ) دويو دويو باش نعس
ليالي ( كضحك ) ولينا دابا حنا هوما لي غانراريو بيك باش تنعسي ؟
عنبر : كيعجبني شي حد يبقى يعاود وانا كنسمع حتى يديني نعاس .. الى سونا فاروق جاوبيه ادنبا قولو نعسات هو دابا راه شاد جماعة مايفيق حتى تفرتك جقلة ..
بقاو البنات مجمعين وهي كتسمع ليهم حتى داها نعاس ..
يتبع...
التعليقات
لا توجد تعليقات بعد، كن أول من يعلق.