محتوى القصة
بقات معنقاها شادة عليها بحال الى لقات واحد المصدر ديال الأمان .. جا سمير دري لي خدام معاها وقف عليهم
سمير : ليلى ختي واش صاڤا الى مݣداش تخدمي اليوم غير سيري رتاحي ..
عماد ( شافيه ) عمر مغايݣول والو ؟
سمير : هاد يوماين محاضرش
عماد : حيدو من هنا نمشيو لشي قنت خور درنا شوهة كاع الناس كتشوف .. وقفات ليلى مزولة طبليتها جاب ليها سمير ساكها وخرجات معاهم .. ركبات اللور مع عنبر والروطال القدام هو وعماد
الروطال ( موحه كلامو لخوه ) فين غانزطم ؟
عماد : غير سير انا غانوريك واحد الكوان ( دور راسو اللور بانت ليه ليلى ساكتة وعنبر شادة ليها فيدها ) فين كتعرفو بعضياتكم ؟
عنبر ( شافت فيه ) كنا كنقراو مع بعضياتنا فلافاك وكاريات بزوج .. وكنا خدامين فالبيبوش بزوج بينا كانت صاحبتي الروح بروح ليلى هي لي وقفات معايا فموت والديا ، ولكن تفارقنا فاش كنت تزوجت بداك خونا ( هزهز عماد راسو كيوري للروطال الطريق ) ..
37 كلم وصلو لواحد الكافي فإيمي وادار كدير الحوت .. طلعو الفوق مقابلين مع المنظر ديال البحر كيريح وزوين مشات ليلى تغسل وجها رتاحت مبدأيا ورجعات للعندهم تبسمات وشافت فعنبر
ليلى : تبدلتي بزاف درتي الحجاب جاك زوين ، فين غبرتي أصاحبتي من داك الوقت مابقيتش شفتك
عنبر : شلا داز عليا أصاحبتي هههه فيلم خاصني ليلة ونهار باش نعاود ليك انتي لي فين غبرتي وشنو درتي ؟ ضعافيتي وتبدلتي
ليلى ( تنهدات تنهيدة طويلة) بسيف مانضعاف ونتبدل لي داز عليا ماشي قليل حتى نعاود ليك من بعد ..
الروطال ( وقف ) هاحنا هنا بينما وجدو لينا الغدا ( غمز عماد وخرجو لاطيراس بقات غير ليلى وعنبر ) ..
ليلى : فين كتعرفي سي عماد ؟
عنبر : عماد ولد عمي
ليلى ( بصدمة ) كيفاش ولد عمك ياك مكان عندك حتى واحد من غير خالتك رشيدة !!
عنبر( تبسمت ) علاش ماشي والديا صدقو ماشي والديا وبا صدق شافرني لمي لي ولداتني ( ليلى مجاوباتش بقات اكتشوفيها .. عاودات ليها عنبر لي وقع من لول لأخر ) ايوا هادشي لي كاين
ليلى : فيلم هدا انتي كثاار مني ، الحمد لله ربي وقف معاك وطيحك فولد الناس وفعائلة مزيانة ربي كبير
عنبر : وانتي مالك شكون تكرفص عليك ؟
ليلى ( بلعات ريقها الغصة وحلات ليها تنهدات ) عقلتي كانت فيا قاعيدة خايبة ديال النعاس
عنبر : اه كان نعاسك تقيل انا لي كنفيقك
ليلى : كنت مشيت مع ماما للبلاد عند جدي وكانو بنات خالتي راكي عارفة خالي كالس مع جدي .. وكان حتى خوهم عقلتي كنت كنقولك عينو فيا ، داك نهار كنا ناعسين حتى كيفيقوني بنات خالي بالغوات وكيضربو فخاضهم تخلعت وماعرفت باش تبليت .. فاش فقت لقيت سروالي محيد وبيجامة محلولين صدايفها ( مسحات دمعة نزلات من عينها ) قالو ليا بلي حصلو خوهم تكرفص عليا ( عنبر شدات على فمها بصدمة ) ماخلاونيش نبكي ولا نغوت ولا ندوي قالو ليا جدي الى ساق الخبار هو وبا ايق**تلوني .. سكت ورجعت فحالي العذاب عشتو فاش تعطلات عليا لغيكل عند بالي حاملة وهربت لمراكش .. غير واحد المرا لقاتني فالمحطة وعاوناتني كلست عندها وعاودت ليها من وراها جاتني لغيكل تم قاتلي راه مايمكن نكون حاملة وانا جاتني داتني لطبيب وفعلا ماكنتش حاملة وشحال قلبو عليا دارنا عاد ديك سيدة وراجلها رجعوني للدارنا .. ولكن ماقديتش نبقى تم رجعت لمراكش وخدمت فواحد الكلوب ومن داك الكلوب جيت لأكادير ( عاودات ليها كيفاش تلاقات مع عماد وكيفاش هو لي لقا ليها هاد الخدمة ) هادشي لي كاين ..
عنبر : الله ياخود فيهم الحق ، وهاد بنات خالك حتى هوما علاش ماوقفوش معاك ؟
ليلى : واش نسيتي ؟ راه مكايحملونيش لا هوما لا مهم مكايحملوناش لا انا لا ماما .. فينما مشينا كيبقاو يخشيو الهضرة غير تحت الدف
عنبر : وانتي تقتي بيهم ؟ تلقايهم هوما تافقو مع خوهم ودارو ليك ديك الفعلة وسترو على خوهم نتاقمو منك الله يخود فيهم الحق
ليلى : اودي سوى دارها هو ولا داروها معاه .. ضعت فلي كنت محافظة عليه سينين هادي صافي ، مابقيتش كنمشي لدار مكنقدش نشوف لبا فوجهو ( قاطعهم السرباي لي حط ليهم الطلبات ديالهم وعماد وروطال لي رجعو لطبلة )
عنبر : مزال عزيز على سيكوك ؟
ليلى ( تبسمات ) مزال كنحماق عليه .. وانتي مزال عزيز عليك السوسيط ؟
عنبر : العشق هداك
عماد ( بإستغراب) العجب كيفاش ماشفتيش عنبر فليغيزو سوسيو .. حيت شي يامات كانت دايرة بوم حتى عرسها تنشر
ليلى ( بإحراج شافت فيه ) انا ماعنديش تيليفون بصمة .. عندي فير تيليفون عادي بعيدة على هادشي ديال الفيسبوك والأنستغرام
عماد ( برم شفايفو ) داكشي باش ، هي كنتي دايرة القانون حتى انتي ؟
ليلى : أه
عماد : خديتي الإجازة ؟ ( شافيه الروطال كياكل وشاف فعنبر لي شافت فيه بدورها )
ليلى : أه خديتها
عماد : وعلاش لي مدوزتيش شي ستاج عند شي محامي ولا فالمحكمة ؟
الروطال ( بتهكم ) وشريف راك فقهوة ماشي فالبيرو رخف النفس فدرية وانت نازل عليها تساول .. ليلى مجاوبوتوش كتاكل وتنقب غير شوية على عكس عنبر لي كانت غارقة فجوعها دخلات فطبسيلها ..
الروطال ( شافيها ) نزيدك ؟
عنبر ( شافت فيه ببراءة ) ماكرهتش جوج حوتات ويكونو مشوات قوليه
الروطال : اهاه هي لولة ( اشر بصبعو ) خويا واحد دقيقة ..
فالمحال واقفة خدامة ، قدات واحد الپاك فيه ريحة وسبراي ومسك قداتهم على شكل كادو ودارتو فساشي مداتو لسيد لي واقف .. خلصها ومشا وقفات طوموبيل ديال راشد هزات راسها بان ليها خارج من طوموبيلتو فكامل أناقتو مع دخل من الباب ريحتو ضربات فيها ..
حمزة ( بإبتسامة ) سي راشد مرحبا بيك
راشد : شكرا أحمزة كيغادية الأمور مزيانة ؟
حمزة : لا الحمد لله كولشي هو هداك .. ضرب فليالي وتوجه للداخل تحت أنظارها ، مافهماتوش علاش كيتعامل معاها هكا واش غير حيت داك نهار ماسمعاتلوش 15 يوم دازت مادواهاش بقا فيها الحال وجاتها البكية .. قلبها تزير عليها كتسول راسها واش هو من نوع لي يعلق فيه الوحدة ويخليها تبغيه وفالاخر يخليها معلقة ، جاتها البكية ..
حمزة ( وقف عليها ) ليالي غادي نمشي نتغدا ونرجع باش تمشي انتي
ليالي ( هزهزات راسها ) واخا .. غير خرج حمزة طلقات العنان لدموعها نازلين سخان كانت باغية تغوت على حر جهدها وتقول واش هي لهاد الدرجة ماعندهاش الزهر .. ساهية حتى فيقها من سهوتها
راشد : مالك كتبكي ؟
ليالي ( مسحات دموعها بالخف ) مامالي والو
راشد : كاين شي واحد كيبكي غير هكاك ؟
ليالي ( شافت فيه ) بحال الى كيهمك زعمة راشد شنو بغيتي مني .. تدوي معايا وقت لي بغيتي وتسد عليا وقت لي بغيتي .. الى كنتي لاعب مع راسك المخاجرة طيحني وتخليني نبغيك غير بصحتك وبراڤو عليك حيت بغيتك ولي عطا الله عطاه ، فرح دابا وتبورد كيف بغيتي وعرفتي شنو دير حتى هاد الخدمة مابغيتش نكمل فيها شوف شي وحدة تبلاصيني ..
راشد ( ببرود ) وراه الخدمة نيت بصح خاصك تݣلسي منها ، مانبغيش مرتي تخدم مع العزارة
ليالي ( بقات كتشوفيه مافهمات والو ) مافهمتش ؟
راشد : المشكلة ديالك فهمك قليل ، مامرة نازوج ݣلنا ليك ابنت الناس كنبغيوك فهميها دخليها لموخك ( بصرامة ) هاد الهضرة لي ݣولتي دابا اندير راسي ماسمعتهاش )
ليالي ( بعصبية ) وعلاش 15 يوم منخلني ؟
راشد : باش نشوف راسي معامن .. حيت هاد الوقت كانل لي كندويو فيه انا لي كنعبر وانت بحال داك الكونتوار .. مكندي منك لا حق ولا باطل والله مرارتي إنفج*رت من تحت راسك يا بنت الناس ( ليالي كضحك ) وتضحكين بعد
ليالي : كضحكني فاش كتقلبها خليجية
راشد : كتبغيني ؟ ( هزات راسها فيه والحشمات طغات على خدودها حركات راسها بالايجاب ورجعات حدرات راسها ) يسلملي الخجلان .. دابا ندويو فالمعقول ( شافت فيه ) دوي مع داركم باش نقصد الباب إن شاء الله
ليالي : باغي تخطبني ؟
راشد : ومالنا غانبقاو بحال هكا ؟ ليالي زيري معايا
ليالي : وداركم يبغيو ليك .. راشد انا راه خويا فالحبس وبابا سامح فيا و
راشد ( قاطعها ) ومن بعد انا غانتزوج خوك وباك ولا انتي .. ليالي انا بغيتك من نهار شفتك فالعرس ، والى على دارنا انا والديا ميتين الله يرحمهم وعندي اخت وحدة عايشا فسويسرا زوجة تم ، ولي بغيتها انا كتبغيها هي .. شنو ݣلنا ؟
ليالي ( هزات راسها فرحانة ) واخا نمشي لدار وندوي معاهم إن شاء الله
راشد : هكاك مزيان الله يرضي عليك ، خلينا نديرو شي فشي ونجمعو كولشي
ليالي ( بدات كضحك ) انت باينة فيك شي عرق مغربي ( قاطعهم كليان دخل هو ومرتو ليالي جمعات الضحكة وستقبلاتهم تشوفهم شنو بغاو ..
كملو الغدا ديالهم .. ناضت عنبر هي وليلى هبطو يتمشاو فالبحر شوية مخليين عماد هو وروطال كيدويو ..
الروطال : مناويش يهديك الله ترجع بين حبابك وخوتك ؟
عماد ( هز فيه راسو ) نبقاو غير نلعبو افاروق مرة هنا مرة لهيه .. الخدمة هي هادي كل مرة وفين كديك
الروطال : كتديك ولكن انت لي باغي تحول ، حتى واحد مادوا معاك ديك الهضرة ديال كلام الناس غير كولها
عماد : الناس افاروق الى مدواوش حيت حتى واحد معارف بلي الواليدة كانت داخلة فديك الروينة ... ولكن لي معايا عارفين وانا نفسي هنا
الروطال : لي كيعرف باك يمشي يدعيه كل واحد يعاود لجهة ضاراه جاي لهنا ماعندك حد اصاحبي بحال الى مقطوع من شجرة
عماد : الله يهديك افاروق ، مالي جاي سياحة راه جاي خدامة وبالعكس هنا واخا هكاك مرخةفة القضية
الروطال : لالا مرخوفة نيت يحسبلك مافخباريش ، داك البزناز لي تشد وتسدو كاع الكلوبات ديالو أنوض أجمي
عماد ( كيضحك ) البق مايزهق اصاحبي العفو ( تنهد ) والله حتى مرتاح فاش غانحس براسي ݣاد انا نتقبل راسي نشوف ليها شي حل ونرجع دابا يلاه بديت كنݣاد النفسية شوية
الروطال ( كيلعب بكاس لي قدامو ) عندك عليها شي خبار ؟
عماد ( بنفي ) لا من نهار دوا معايا عصام مشا يشوفها ݣالك هي هي ماتبدلات حتى شوية
الروطال : شنو لافير ديال هاد خيتي منين كتعرفها ؟
عماد : شكون ليلى ( بدا كيعاود ليه )
الروطال ( كيشوف فخوه بشك ) أممم مزيان أسيدي .. اللهم يسر ( سكت ) فكر فالبلان اخويا ورجع ها خوك غايتزوج مغاتحضر ليه باك تزوج ماحضرتي ليه
عماد ( بمزاح ) حتى لسبوع ديال ولادك ونحضر
الروطال ( تبسم ) ولاد كاع لا اواحد ولا زوج الله يجعل البركة اخويا مانبغيش المدام تعيا ليا
عماد : الله اكبر ( ضحك ) سبحان مبدل الأحوال ..
~~~~~~~
عنبر ( وقفات مقابلة مع البحر ) ايوا شفتي اش داز عليا هادشي وغير ختاصرت عليك
ليلى : حتى أنتي كتر مني وشوفي ليك ولد الحرام كاعما كان باينة عليه نهار جا للعندنا كان كيبان ظريف
عنبر ( سافت فيها وتبسمات ) هاد الدنيا علماتني بلي حتى واحد ما ظريف لي فيه الكثير فيه القليل .. فين وفين فاش كتلقاي مع الناس الملاح لي قلبهم بحال قلبك وفنفس الوقت تعلمت بلي كل مكان قلبك زوين ونيتك زوينة راه ربي مغاينساك غير خاص حاجة وحدة ماتقطعيش الخيط لي بينك وبينو ولي هو صلاتك ، شتي واخا ماتكونيش متحجبة واخا تكوني دايرة ذنوب واخا بزاف ديالحوايج صلاتك اليلى ماتفرطيش فيها حيت هي الخيط ديال تواصل بينك وبين الله سبحانه ..
ليلى ( هزات راسها ) عندك الصح ياربي تسمح ليا كنت نصلي وقطعت ومع الخدمة كنطيح دودة
عنبر : صلي فخدمتك عادي يأدن طلبي بوز تصلي وكملي خدمتك راه ساهلة اكتصعبيها على راسك
ليلى ( تنهدات ) إن شاء الله ( تبسمات ) الحاجة زوينة هي تلاقيتك وربي عوضك
عنبر : مزال حتى انتي ربي غادي يعوضك ونفرح بيك ( تبسمات ليلى وشافت قدامها ) خليها فيد الله حاشا واش يخيبك ( كملو المشي ديالهم جابدين شلا مواضيع كيسترجعو أيام زمان لي فاتت ) ..
- جات ليالي من الخدمة دخلات بدلات توضات صلاة وتوجهات للصالة .. هزات تيليفونها كدوي مع حياة حتى تمات داخلة رشيدة حاطة طاجين .. تجمعو كاملين عليه ولاو قلال تنهدات رشيدة تنهيدة طويلة ساهية ونطقات ..
رشيدة : الدار كانت عامرة ولا خالية تودة كانت معمرة علينا هي والبنات
سميرة ( شافت فيها ) مديريهاش مني قلت الصواب أختي رشيدة ولكن انتي سباب لي بتك هزاتها قشها وخوات كتلاوح عد الناس
رشيدة ( شافت فيها ) مالي انا لي جريت عليها ؟
سميرة : وراه هضرتك لي بحال السم هي لي طججاتها .. كاينة شي وحدة تݣول لبنتها علم الله اش كتي ديري تم ؟ وطعنيها فشرفها ݣدام عباد الله ماحشوماش عليك الى كتي انتي لي مها ودرتي فيها هوك اش خليتي للبراني ؟
رشيدة ( تنهدات ) ماحسيتش لسان مافيها عظم مكنعرفش ندوي انا خضرة .. ولكن راه بنتي هاديك كنبغيها وكنبغي ليها مصلاحتها مارخيصاش عليا
سميرة : الى كانت بنتك دبصح هي تحوزيها عندك وتصاحبي معاها وتبغيها ودافعي عليها من عباد الله ومن الوحوش بنتك راه بديتي تخسريها الى ماخسرتيها نيت ..
ليالي ( قاطعاتهم ) انا بغيت ندوي معاكم نيت ( شافو فيها ) السيد لي انا خدامة عندو باغيني لزواج
رشيدة : حلفي شكون واش دتك الخليجي ؟
ليالي : اه هو راه سينين وهو فالمغرب ، الصباح قاليا باش ندوي مع دارنا باش يتقدم ليا
سميرة ( بالفرحة ) مبارك ومسعود ابنيتي .. تستاهلي الحنينة يا دريويشة تستاهلي الله يكمل عليك بالخير
رشيدة : مرحبا بيه ابنيتي ، خاص نݣولوها لفاطنة ونديرو شي نهير يكون كولشي مجموع دابا عنبر مسافرة باش تكون حتى هي
ليالي : إن شاء الله ..
~~~~~~~~~~~~
فعين الذياب يلاه كتجمع فسلعة ديالها .. شمات ريحة رجولية وظل واقف عليها هزات فيه راسها لقاتو واقف ومبسم فوجها
دنيا ( قلبات عينيها ) لا حول ولا قوة الا بالله العلي العظيم .. أش باغي اخويا صافي جمعنا
عز الدين : دوماج كنت مشي شي كريب بكريمة البيستاج
دنيا ( تبسمات فوجهو ) سير ضرب لك المسمن بزبدة والعسل حسن ليك
عز الدين ( مزال بنفس الإبتسامة ) وصراحة حتى هو زين وكيشبع .. ولكن الكريب ديالك يا سلام
دنيا ( كتجمع وكتهضر ) بسبابك غانبدل الحرفة ونولي نبيع سيكوك ( وقفات وشافت فيه ) أش بغيتي ؟
عز الدين : مالك قويصحة ، مافهمتش انا بلانك ماحملانيش
دنيا : حيت انا مكنحملش الباسلين ، لي طلع هبط لطوموبيلاتهم لي ماعندهم شغل غير البنات
عز الدين ( دور لسانو وسط فمو وبجدية وشوفات غامضة شافيها ) كون شي حد بلاصتك لي خرج هاد الهضرة وكان راجل كون عطبتو .. الحمد لله لي انتي دنيا خت صاحبي ندوزوها بجغمة ديال الما
دنيا ( توترات من لافاصو باش دوا معاها مالف يدوي بطنز اول مرة يدوي بهاد الطريقة ) عرفتي انا لي بحالك كيجيوني مامربيينش حيت لي مربيينو والديه تربية مزيانة مغايبقاش يركب فالبنات وعينيه فبنات الناس اخرين ، ولي عندو ختو فدار وكيخاف عليها مغاتلقهاش بولعيالات سير فحالك أعز الدين انا راه منصلاح ليك ..
عز الدين ( تنهد داير يديه فجياب القبية ديالو من لباسو كان باين بلي كان فدار وعاد خرج ملامحو كانت باردة من كلامها عض على شفتو مدة طويلة عاد نطق) انا لي كنعرف شنو يصلح وشنو مايصلاح ، وقبل لا دوي عرفي شنو كتخرجي من فمك صلحي فمك ابنت حيدر راه ماشي لي شافتو عينيك تيقيه ونعاود نݣوليك حمدي الله خوك صاحبي وجيتيني بنت ( غمزها ) تهلاي ..
- حدر راسو وتم غادي متبعاه بالعين ، رجعات كتجمع فكروصتها حتى تسمع صوت الفران وشيحاجة تخبطات ... تسمع صوت الناس والغوات خلات كروصتها ومشات طل كانو ناس مجموعين ولي كيغوت ويردد " عيطو لومبيلونص " " الله الله مسكين " " خويا فين كانو عينيك حتى ضربتيه " " راه هو لي منو لافوت كان قاطع ومشافش على يمين ديالو ماشي أنا " .. الحيحة نايضة قربات كتر تشوف حتى كيبان ليها عز الدين مغط وحدا راسو كلو دمايات .. غوتات على جرهدها مشات كتجري دفعاتهم وتحنات عندو
دنيا : عز الدين عز الدين ( كيسولوها الناس واش كتعرفيه جبدات تيليفونها سونات للطارق لي جاوبها ) ألو طارق عتقني اخويا عز الدين دار كسيدة .. هاهو قدامي مغط ماعرفتش ماعرفتش انا فعين الذياب ( شافت فيهم ) واش عيطو لومبيلونص ؟ اه اخويا اه عيطو ليها واخا واخا .. مشات كتجري للكروصة خلاتها للعساس ورجعات كتجري ، شوية جات لومبيلونص جاو البوليس .. طلعوه اللور
دنيا : انا انمشي معاه انا من فاميلتو .. خلاوها تمشي طلعات حداه كتشوفيه مغمض عينيه حدا ودنيه هابط منهم الدم وهدا جبهتو وعنقو ..
أكــاديـــر
وصلوها حدا للحومة فين ساكنة .. نزلات عنبر معاها بقاو واقفين دورات عنبر عينيها فالحومة ورجعات شافت فليلى
عنبر : الحومة كتبان ليا بعدا طرونيكل مافيهاش الصداع
ليلى : لا الحمد لله مافيهاش ديك البسالة ، وحتى مولات البيت ظريفة ( تبسمات ) غادي نتوحشك
عنبر : فالكونجي اجي عندي وتيليفون بيناتنا انبقا ديما نسول فيك وندويو .. وشري شي تيليفون مزيان نبقاو ندويو كاميرا صافي
ليلى ( ضحكات ) كوني هانية والله حتى نشريه على قبلك ( عنقاتها ) تهلاي فراسك بزاف واش متقديش تزيدي شي سيمانة ؟
عنبر : فاروق خدام .. راه كلسنا 15 يوم فمراكش كون فخباري غاتكوني هنا كون جيت من نهاري لول ولكن راه أيام الله طويلة تولي تجي للعندي إن شاء الله
ليلى : إن شاء الله ( ضارت شيرات لعماد وفاروق بيديها ومشات بقات عنبر واقفة حتى مشات عاد ركبات فطوموبيل ديمارا فاروق وشدو الطريق
الروطال : وعزيزة عليك هاد صاحبتك
عنبر ( تنهدات ) بزاف ظريفة هي لي كانت وقفات معايا فاش توفاو والديا زعمة لي كنت كنحسبهم والديا .. ماخلاتنيش وكانت كتخلص عليا الكرا والماكلة حتى هي مسكينة ماعندهاش الزهر الله ياخود الحق فلي غدروها
عماد ( بتساؤل ) شكون هادو ؟ ( عنبر بقات كتشوفيه ماعرفات تقوليهم ولا تسكت مجاتهاش تخرج الهضرة لي قالت ليها )
عنبر : مانقدش نقوليكم أسمحوليا ، هي لي خاصها تقول المهم هو بسباب بنات خالها كانت هربات وخوات دارهم وخلاتها وهاهي دابا مليوحة هنا بلا حنين بلا رحيم ( بترجي ) عماد خويا عفاك رد ليها البال راه ماعندها حد هنا وعزيزة عليا انا ماكرهت كون ديتها معايا ولكن الغالب الله ، راه وصيتها تاخود تيليفون باش نبقى ندوي معاها ..
عماد ( هز براسو ) يكون خير ( شاف فخوه ) مغاتباتوش اتشد الطريق فهاد الليل ؟
الروطال : عندي الخدمة اخويا هاد سيمانة مبوربيا عندي ، خاصني نشوف ديك المݣازة لي كنت ݣلت لك عليها وشلا مطارق فراس اللهم نشد الطريق دابا
عماد : وعلى مولانا ( وصلو عماد للمديرية كان خدام بليل تسيفط معاهم ومشا وهوما شدو الطريق )
عنبر ( ركبات القدام شدو الطريق وشافت فيه ) ديالاش هاد المݣازة وانا مافخباري والو ؟
الروطال ( شافيها ) وانتي كنتي حاضرة بعدا .. عاد رجعتي امدام كولشي غاتعرفيه اشوية ديال الصبر ( رجع شافيها ) وماسخيتيش بصاحبتك مابقيناش بنا لك
عنبر ( شافت فيه بنص عين غوبشات بإستغراب وتبسمت ) لا ماتقولش ليا غرتي ( مجاوبهاش ملامحو باردة ) واش من نيتك أفاروق ؟ واش اتغير من البنت شفتها غير اليوم
الروطال ( بنفس البرود ) ماݣلناش لك ولكن ماشي تحطيني بلاكة حداك .. غادية معاها لجهة البحر فينما ضرت لاصقة عليها حنا أصلا كنا عوالين نشوفو عماد سويعة ونضربو دويرة مع يعضياتنا ونزيدو خلفة مع طريق
عنبر : ايوا المكتاب هو هدا ، البنا صاحبتي وقفات معايا توحشتها راه جايا ل 6 سنين ماشتهاش وتشوف اش وقع ليها كاعما تدوي مسكينة .. باز والله حتى باز بعد المرات مكنعرفكش
الروطال ( عض على شفتو مباغيش يقلقها مكايهموش تݣول عليه هبيل ولا زانزان ولكن مكايحملش تنخلو كيبغي يحس بقيمتو او وقتها ليه حس براسو ماعجبوش الحال نهار كلو منخلاه ) مزيان الالة انتي تعرفي
عنبر ( شافت فيه ) دابا بغيتي تنغصها علينا ياك ؟ فوجنا هاد 15 يوم جيتي اليوم بغيتي توحلها فينا ( مجاوبهاش ) رجع ليا عفاك هاد الكرسي اللور نعس حسن ليا .. مجاوبهاش رجع ليها الكرسي حطات راسها وغمضات عينيها معصبة ..
- مع صباح خلاها ناعسة فبلاصتها دخل دوش يحيد العيا دخلو مع 6 ديال الصباح لكازا ، كانت ناعسة عيانة هزها ودخلها للبيت وغطاها .. خرج من دوش لبس عليه حوايجو سد عليها الباب وهبط التحت عطا للعمر باش يتقدا كولشي لدار وتوجه للخدمتو ، سونا على طارق مجاوبوش تنهد ودخل للبيرو ديالو ..
فجهة أخرى وفكلينيك شيخ زايد حاطة راسها على الحيط مغمضة عينيها عيات حداها طارق لي حتى هو مغمض عينيه .. حتى وقف عليهم الطبيب لي فيقهم من نعاسهم ..
..... : واش انتوما العائلة ديال ( شاف فالملف ) عز الدين قسام ؟
طارق ( باللهفة ) انا صاحبو امضرا أدكتور كيبقى ؟
.... : واش مكايناش عائلتو ماعيطوش ليهم ؟
طارق : والديه ميتين عندو خو واحد ولكن عايش على برا ( كلام لي طاح على دنيا بحال الرعدة تصدمات )
.... : غادي ندخلوه لسكانير باش نتاكدو واش ماعندوش نزيف داخيلي فراس ، خدا دقة خايبة فيدو لي نتج عليها كسر وضربة فرجلو لي غادي نضطرو نديرو ليه الحديد هادشي لي كاين فهاد الساعة ( دنيا شدات على فمها وݣلسات على طولتها شادة فمها مصدومة حابسة البكية )
طارق ( باغي يحماق ) دكتور الله يرحم بيها الوالدين غير صارحني واش كاين شي خطر على حياتو ؟ واش ايولي بيخير ؟
.... : منݣد نݣوليك والو دابا حتى نشوف سكانير نتمناو مايكونش نزيف ( ربت على كتفو ) نتمناو خير .. ، طارق ݣلس حدا دنيا شاد على راسو هزات دنيا فيه راسها فاش سمعاتو كيبكي عمر خوها بكا دخلها العجب كيفاش كيبكي
دنيا ( نزلو دموعها ) خويا رجوع لله دابا يولي بيخير
طارق ( شافيها دموعو نازلين ) مايستاهلش والله مايستاهل عرفتي شنو داز على هاد السيد ، راه لاباس عليه لي ماحماقش مو وباه وختو صغيرة ماتو كاملين فكسيدة .. كان كيحماق على والديه وعلى ختو كانت مسكينة من دوي الاحتياجات الخاصة كان كيهبال عليها ويدير ليها خاطرها عينيه يعطيهم ليها عرفتي شحال وهو داخل فإكتئاب ومتبع مع طبيب راه الحمد لله لي وقف على رجليه .. بقا غير هو وخوه الكبير والله مايستاهل ولد الناس هو لي كنت كنلقى فجنبي من ورا ولاد عمي والله مايستاهل ..
دنيا بدات كتنحط صدمها بهضرتو حسات بتأنيب الضمير وبلي هو السباب ، كيفاش قالت ليه والديك مارباوكش وقالت ليه كون عندك ختك .. أداتو بهضرتها هي سبابو حتى وصل لهنا دموعها ماحبسوش حتى بدا طارق كيصبرها هي بغاها غير تسكت مابغاتش ... خرجها من تم للبرا باش يضربها البرد ماقدات تقول والو لخوها شنو اتقول انا سبابو انا لي وصلتو لهاد الحالة انا لي عايرتو بأشمن وجه اتقوليه انا سباب صاحبك عطاتها غير لبكا ولنواح كانو هوما عنوان هادشي لي كتحس بيه ..
~~~~~~~~
داز داك النهار تقيل عليهم بزوج .. كان ݣالس عند الروطال فالبيرو مغمض عينيه بالعيا
الروطال : كيبقى دابا ؟
طارق ( شافيه وتنهد ) الحمد لله غير منين ݣالينا الطبيب ماعندوش نزيف راه هداك هو ربح
الروطال : على سلامتو ، خلاوكم تشوفوه ولالا ؟
طارق : ݣالك حتى للغدا .. لبارح واليوم ناعس فالانعاش غدا عاد يحولوه لشومبر عادية بغيت غير نعس والله عييت يوماين شفت فيهم العذاب بغيتك تشوف حالة دنيا رضات لينا الكلينيك کنازة
الروطال : ديك المخنة عارفها هشيشة .. طارق ولد الناس وظريف ربي معاه ( حك حاجبو ) أش بان ليك فالبلان لي عاودت لك ؟
طارق ( تقابل معاه ) واش غانݣولك البلان مخير عجبني ولكن كيغادير ليها اتحل شي حدا شي وشنو غادير مع خونا لي عطيتيه الكلمة وكنتي غاتكري ليه المݣازة الثانية ؟
الروطال ( رجع لظهرو اللور ) يعاود لجهة ضاراه مالي تكاتبت معاه .. انا کلت ليه غانشوف واش داك الثمن مسلكني ولالا ، مغانخليش مرتي يجاريها ( = يكون جارها ) راجل براني واخا هي مغاتكونش تم
طارق : وصافي زطم
الروطال : خاص ندوي معاها هو اللول
طارق : خاصني غير نتهنا من جهة عز الظين عندي واحد المشية للقلعة
الروطال : على مولانا
دازت يوماين على سفرية وهي منخلاه وفݣعانة عليه مكدويش معاه .. بوحدها فالدار حياة حلفات تودة ماتخليها تمشي بغاتها تبقى معاها ومنها مونسة دنيا ، كانت معصبة حيت ماحزرهاش هو لي غالط وهو لي مغيار ومعيق وهو لي خاصو يحزر ، خرجات من الدوش ملوية فالبينوار نشفات راسها ودهنات داتها بكريم مرطب دايرة المخمرية ديالها ومسك الڤاني لبسات كسوة لاصقة عليها كانت شراتها من مصر عجباتها وخداتها فيها فتحة جهت الفخض لونها احمر وفتحة جهة الصدر نص كم .. فيها الموزون جهة الكميام وفالحافة التحت واصلة فطولها تحت الركبة .. فتحات المجر وجبدات منو خلخال دارتو فرجلها و كلسات كتصبغ فيديها ورجليها باللون الأحمر .. شعرها مانشفاتوش خلاتو هكاك دارت ليه بونضو اما وجها ظارت ماسكارا وعكر حمر كيشعشع شافت فالمرايا وتبسمات
عنبر : والله حتى نخرج منك الزيت البلدية غير بلاتي ..
نزلات التحت دخلات للكوزينة كانت مقادة الكفتة دخلاتها الفران وموجدة صلاد بروز ، مشات للتلفازة مخدمة الموسيقى سمعات صوت الطوموبيل .. زادت جهدات الصوت بلعاني ودارت راسها منغامسة مع الموسيقى .. كانت مخدمة أغنية حبيبي يا عيني " وكتمايل بيديها ..
قبل لا يدخل سمع الموسيقى غوبش مستغرب .. فتح الباب غير بشوية ودخل كيطل براسو رض الباب بشوية ودخل بانت ليه كتلوى بحال شي لفعة لابسة كسوة لاصقة عليها حبس فبلاصتو كيشوفيها عمرها شطخات ليه وعمرها لبسات هاد الكسوة ..زول صباطو بشوية وݣلس فوق الكرسي مقابلها وهي كتمايل مع الموسيقى .. كانت حاسة بوجودو ومبسمة كتحل حتى تخرجها منو خلاتو حال فيها فمو متبع حراكتها وكيفاش كدير بلع ريقو مدوز لسانو على شفايفو ..
وقف وتوجه للعندها بخطوات تقال كان واقف وراها ، ضربات بشعرها قاستو بروديو عرفها يلاه مدزشة ريحتها تغلغلات ليه مع عظامو وحركاتو .. هز يديه وحطهم على المؤخرة ديالها غير قاصها تنفضات ضارت دايرة راسها مصدومة
عنبر ( شهقات ) جيتي كاعما حسيت بيك
الروطال ( عينيه معسلين دايب فيها فاش شافها وشفايفها المعكرين ) ماشي مهم تحسي المهم انا حسيت
عنبر ( لوات شفايفها وتملصات منو طافية الموسيقى ) نمشي نحط العشا ايتحرق
الروطال ( جرها خاشي نيفو فنعنقها ) تي ريحي مكاين لي محروݣ ݣدي فهاد الساعة
عنبر : بعد مني مابغيتش ندوي معاك يلاه بنت ليك ( بدلع )
الروطال : وصافي احبي المسامحة مايكونش ݣلبك قاصح ، راه كنموت على جدك مكنبغيكش تلهاي عليا
عنبر ( كتلعب بصباعها فصدايف قميجتو) ماشي تغير من صاحبتي ولا من العائلة .. غير من البراني هانية ولكن القراب لا راه كتخلعني
الروطال ( باس جنب شفايفها ) معاش لي يقلقك احبيبو ولا يخلعك انحاول كوني هانية كنواعد والله حتى نحاول
عنبر ( تبسمات بايسة شفايفو بوسة مخطوفة ) وهكاك نبغيك ( دفعاتو وهربات للكوزينة ) ناكلو فيا جوع
الروطال ( تبعها كيزول فلاڤيست ديالو ) بغيتينا انتعراو فالكوزينة والله مانخسر ليك الخاطر نمغطك فوݣ البوطاجي .. تسمع صوت ضحكتها فالكوزينة وكلامها " وحيد بلات انطفي الفران فاروق " حتى تحول كلامها لصمت وكلام كلو حب لا ليه لا ليها ..
لبسات كسوة طويلة فاالغوز كمايمها ماطوالش بزاف ، مع سبرديلة فالبيض وشعرها طالقاه على راحتو ركبات فطوموبيلتها وتوجهات للعند ختها لشوكولاتغي ديالها دخلات سلمات عليها وبقات واقفة كتسناها ..
يسرى ( خرجات من واحد الباب هازة بواطة ومداتو ليها ) هاكي لمن غادية بيه بعدا ؟
دنيا : حتى لمن بعد ايسرى تيليفون بيناتنا ( سيفطات ليها بوسة فالهوى وخرجات من عندها توجهات لطوموبيلها حطات البواطة وطلعات ) .. فطريقها دازت لمحال ديال الورد خدات بوكي وكملات طريقها وصلات للكلينيك سولات على البيت لي دايرينو فيه وطلعات فلاسانسور .. كانت متخوفة من ردة فعلو بلعات ريقها وقبل لا دق كتسمع الهضرة حلات الباب ودخلات هز فيها خوها راسو اما هو دور راسو عندها يدو مجموعة مديور ليها الݣبص )..
طارق ( بإستغراب) مافخباريش بلي جايا كون جبتك معايا
دنيا : ماشي مشكيل ( تقدمات حطات الورد وشكلاط بتردد شافت فيه جهة عينو فيها الفاصمة ) ع على سلامتك
عز الدين ( بهدوء ) الله يسلمك
طارق : لي بكاتو عليك دنيا موحال واش بكاتو على شي حد
عز الدين ( بنفس النظرات ) العجب هادشي غير مكتحملنيش
دنيا ( بلعات ريقها ) لا بالعكس مكاين علاش مانحملكش ( ݣلسات فواحد الكرسي )
طارق ( وقف ) أنا خاصني نمشي ها دنيا معاك ترض ليك البال فبلاصتي ( شاف فختو ) صاحبي فأمانتك
دنيا : فين غادي ؟
طارق : شاد الطريق عندي مايدار ، واحد 4 يام إن شاء الله ونكون هنا ( خلاهم وخرج بقات ساكتة خايفة تدوي ولكن كان خاصها تدوي )
دنيا ( هزات راسها فيه لقاتو كيشوف فيها ) على سلامتك ، س سمحليا كون ماتخاصمناش ماكانش غادي يوقع لي يوقع
عز الدين : بغيتي تݣولي كونما عايرتينيش ، مديريش فبالك بلاما يعذبك ضميرك مكتاب عادي
دنيا ( عضات على شفتها حبسات البكية حتى عيات وهبطو دموعها ) أنا والله ماقصدت وماكنتش عارفة شنو وقع ليك والله انا ماهكا عمري جرحت شي واحد ..
عز الدين : دابا انتي حيت عرفتي لي وقع ليا جايا لهنا ؟ الى كنتي جايا غير حيت بقيت فيك اسيري ادنيا حسن والله ماعندها معنى تبقاي
دنيا ( هزات فيه راسها ) ماشي بقيتي فيا ولا شفقت عليك بقا فيا راسي حيت انا ماشي هكا عمري اديت شي واحد قول لي بغيتي والله منمشي هنا .. الى انت راسك قاصح انا راه كثر منك ولي كيقولي خويا كنديرو .. دخلات عليهم الفرملية دقات ليه واحد البرا وعبرات ليه الطونسيو وخرجات ) دوق الشكلاط غايعجبك جبتو من عند ختي
عز الدين : بلاش اختي ، شوفي اكلامك وشنو دار تكوني باغية تصفيها ليا
دنيا ( بزعاف حلات البواطة هزات جوج حلات ليه فمو بزز خشاتها ليه ) كول وسكت ( وخشات وحدة فمها
عز الدين : واش جايباه ليا ولا ليك ( كيمدغ ) حاݣرة على المريض
دنيا : باش تيق بلي مدايرة فيه والو .. هذا سر لي مكايتسنطش ..
~~~~~~~~
حياة خرجات من الخدمة بكري مستغلة فرصة طارق مسافر شدات للطريق للعند عنبر ، خرجو للجردة قدام لابيسين مجمعين
حياة : شوفي سبحان الله فين مكتاب ليك تلاقاي معاها
عنبر : وياه والله العظيم سبحان الله ( شافت فيها ) أحسن حاجة درتي رجعتي للخدمة والله
حياة ( كلات مورصو من الكيكة ) فخبارك راشد باغي يخطب ليالي قاليها دوي مع دارهم ، فرحت ليها والله تستاهل
عنبر : فخباري والله الى احسن حاجة هو ولد الناس يعوضها على داكشي لي داز عليها .. مكاين حتى خبار على ( تنهدت ) خالتي رشيدة قالت ليا ماما بلي دوات معاها صباح على قبل ليالي باش تكون حاضرة
حياة : لا ماعندي حتى خبار ( بخيبة أمل ) ماسولات ماعيطات ماحسات بغلطها مقالت نصالح بنتي ونرضي الخواطر ( عضات على شفتها مابغاتش تبكي ) ماشي مشكيل ( قاطعهم وصول الروطال بلاصة الطوموبيل وتوجه للعندهم سلم على حياة رحب بيها دخل للدار وعيط )
الروطال : عنبر أجي واحد دقيقة ( خلات حياة وتوجهات لعندو)
عنبر ( شافت ليه فوجهو بتساؤل ) مالك ةاقعة شيحاجة ؟
الروطال ( دور لسانو وسط فمو ونطق بجدية ) شي ناس دواو معايا على ود حياة
عنبر : كيفاش ؟
الروطال : واحد سيد باغي حياة للزواج ..
عنبر( بقات مشوكية مستغربة ) شكون هاد السيد وفين شافها وباش عرفك انت كتجيها باش يقولها ليك ؟
الروطال : وقيلة أشريفة حياة راه خدامة فالبيرو لي مشارك فيه انا وطارق .. السيد شافها سول راه كاين العساس لي سول وقصدني ولد الناس بخدمتو بدارو بخيرو شافها فالبيرو عجباتو نݣوليه لا
عنبر : حياة المشكل مابغياش تزوج
الروطال : اكتݣول الى جاها ولد الناس مغاتݣولش لا ، هو شرطو ماتخدمش ݣلت ليه على القرايا ماعدوش مشكيل المهم انتي دوي معاها علميها الناس غايجيو السبت الجاي باش يتعرفو علينا
عنبر ( شدات فيدو ) واش انت عارفو مزيان ؟
الروطال : الى كنتي كتيقي فيا الدري ولد الناس كنعرفو مزيان وكنعرف دارهم مغاتلݣاش حسن منو وراجل ديال بصح ، كيݣلت ليك بدارو بخيرو بخميرو ومايخسرش ليها الخاطر علميها بعدا وعلمي مها .. وݣوليها لواليدة ديالك ولعمي ، أنا نعلم البقية
عنبر : لاش اتعلم الناس جايين ايتعارفو
الروطال : مالهم غايجيو يلݣاوك غانتي وأنا وسيد جاي مع عائلتو ، حتى حنا خاص العائلة تكون مجموعة
عنبر : طارق مزال مغايرجع من القلعة ؟
الروطال : مزال معطل المهم غادي نعلمو الى سالا راه يحضر مسالاش راه ماعندو مايدير سيري علميها ... طلع هو الفوق وهي رجعات عند حياة ساكتة وكتفكر
حياة ( شافت فيها ) مالكي واقعة شيحاجة ؟
عنبر ( هزات فيها راسها) شوفي ماعندي منخبي عليك .. شي واحد شافك فالخدمة وعجبتيه سول عليك ومشا لعند فاروق للخدمة طلب يدك لزواج
حياة ( غوبشات ) وايلي وشكون هذا ؟
عنبر : ماعرفتوش كيعرفو فاروق .. قاليه بلي شافك فالخدمة وبلي ماعندوش مشكل تقراي الخدمة لا وبغاو يجيو السبت هو ودارهم يتعرفو علينا .. قالي بلي بدارو وخدمتو زوينة ولد الناس وكيعرفو وكيعرف دارهم ( حياة بقات ساكتة وكتخمم مشا بالها نيشان نهار مها قالت ليها بالحرف " علم الله شنو كنتي كديري فديك أݣادير وطعنات فشرفها " ) فاش كتفكري ؟
حياة ( تنهدات وتبسمات إبتسامة باهتة ) يجيو ونشوفو ويكون خير ماتعرفي يعجبني ويكون مزيان نتزوج حتى انا ندير داري ونرتاح
عنبر : على هادي ماشي دارك ؟
حياة ( شدات فيديها ) داري ماقلتش لا ولكن مغانبقاش كل مرة فدار كون عندي دار والديا فين نكون ااه ولكن معامن اعنبر ، والى سمعات مي بلي قلت لا اتبت عليا اختي تهمة اللهم خليني نشوف السيد متعرفي يكون فيه الخير ويصدق ولد الناس ونبغيه ..
عنبر : ماعرفتش كيجيني انا زواج تقليدي فيه المشاكل
حياة : ماشي ديما الزواج دالحب يصدق .. هانتي ابسط مثال فالاول زواجك بفاروق كان مصلحة وصدق ولد الناس وبغيتيه ، مافيها باس نتزوج حتى انا زواج تقليدي متعرفي يصدق هههه حنا دابا اكندويو نشوفوه ويحن الله ( دارت ضحكة مصطنعة ) واش خاصني نكري قفطان للتعارف ولا نشريه ؟
عنبر ( تنهدات بقات فيها بغات تشوفها فرحانة مابغاتهاش تزوج احيت خاصها تبرهن لمها على شرفها ولا باش ماتبقاش من دار لدار بغاتها تبغي شخص لي اتزوج بيه وتعيش فرحانة ومرتاحة معاه حيت تستاهل ومكاينش شي حد لي يستاهل الحاجة زوينة من غيرها ) أحسن قفطان اناخدو ليك ( غرغرو عينيها بدموع) والى كمل ربي أحسن عرس انديرو ليك حتى تمشي لدارك انتي راه ختي ( عنقاتها وحياة بدورها طلقات سراح دموعها السخان ) ..
فصباح هازة بواطة دارتها فطوموبيلتها وتوجهات للكلينيك .. دخلات نيشان مشات للبيت ديالو كان فايق وتلفازة شاعلة وهو ساهي فالسرجم
دنيا : صباح الخير كيصبحتي كيبقيتي ( كتدوي وكتقرب فطبلة ليه )
عز الدين ( مراقب حراكاتها ) صباح الخير الحمد لله ، شنو داكشي جايبة ؟
دنيا : الفطور وجدت ليك الحسوة على مزيناتها ديال إيلان كيجبر العظم وجبت ليك الخبز ديال الشعير وزيت البلدية والحليب
عز الدين : هادشي انتي لي موجداه ولا الخدامة ؟
دنيا ( شافت فيه ) كطنز عليا ، بطبيعة الحال انا لي مصايباه مالي كيجيتك ياكما يحسابليك كنقاد الكريب تقول هادي البلدي مكتعرف ليه ، الله يخلي ليا مي رقية علماتني كولشي ..
عز الدين ( غمض عينيه بتعب ) صافي صافي مكاتقادايش عطيني اناكل خلاص هادو راه عطلو عليا الفطور .. حطات كولشي او وقرباتو ليه كلسات حداه هزات الحسوة شافيها باستغراب ) أش كديري ؟
دنيا : نوكلك
عز الدين : تي هداي توكليني مومو أنا ، ناكل راسي
دنيا : راه انت لي مسطي انت يدك معطوبة اتاكل بليسرية ، براكة من الفشوش والبخ الخاوي حل فمك يلاه ( كيشوفيها ) وحل .. حل فمو وبدات كتشربو فالحسوة حتى كمل الزلافة .. كبات الحليب وبدات توكلو حتى دخلات عليهم الفرملية ..
.... : حنا جبنا ليه الفطور
دنيا ( شافت فيه ) مايحتاجش شكرا أصلا هو فيه الجوع وانتوما تعطلتو عليه ، والماكلة ديال دار مكاينش ماحسن منها شكرا بزاف ( دورات راسها كتكمل ليه ماكلتو
عز الدين : شوية وتنوضي تاكليها تي مالك ؟
دنيا : ماشتيهاش كيفاش شافت فيا ماحملاتنيش ( سكتات ) مقالوش ليك ايمتا غايخرجوك ؟
عز الدين : يمكن بعد غدا إن شاء الله
دنيا : مزيان باش نديوك لدار عند طارق تما غانقابلوك مزيان نولي نجي انا بنهار نكون معاك .. وطارق يكون معاك بليل حتى تولي مزيان إن شاء الله ..
عز الدين : شتك كتقرري راسك !؟
دنيا : كنقوليك لي كاين ( خدات خرقة ومسحات ليه فمو جبدات واحد لانجيت من ساكها وقفات وبدات كتمسح ليه فوجهو مكايسة عليه على الجرح ماتقيسوش وهو متبعها بالعين .. جبدات مشطة وبدات تمشط ليه بشوية قدات ليه لحيتو .. رجعات هزات ريحة بغات ترش ليه
عز الدين : كون اجبتي الحجام معاك نيشان ، ديالمن هاد الريحة ؟
دنيا ( كترش وتقاد ليه تيشورت ديالو ) ديال طارق كان مخليها عندنا فدار فالبيت لي كيبات فيه جبتها معايا ( رجعات خطوة لور شافت فيه وتبسمت ) ودابا مزيان جيتي زاز لوز
عز الدين ( هزهز براسو ) شكرا
دنيا : العفو مابيناتناش ( شافت فساعتها ) أنمشي دابا حتى العشية قبل لا تحبس زيارة ونجي نجيب ليك دانونات معايا
عز الدين : دري صغير انا ، ( غمض عينيه بقوة وحلهم ) ماكرهتش شي ݣارو حاس براسي ضارني
دنيا ( غوبشات ) البعابع لي اتكمي ، الݣارو لي خاصك كلك معطوب قالك الݣارو مالقيتي لي يخشيه ليك فالعين
عز الدين : ولايني ضاسرة
دنيا : راه انت لي تفروحتي .. هدا هو الوقت لي تقطعو نيت يوليو دوك شلاقم عندك زرقين زوينة هادي ( جمعات داكشي كامل او شافت فيه ) انسيفط ليك الفرملية تعطيك دوا وتهلا فراسك وماضسرش حتى نرجع انا مشيت .. خرجات من عندو مخلية عينيه متبعينها تنهد تنهيدة طويلة ورجع راسو لور مغمض عينيه ..
~~~~~~~~~~~
خرجات معاه من دار لايحة عليها العباية ديالها مابغاش يقوليها فين غاديين حتى وقفو فواحد الشارع لي كان فوسط المدينة قريب من المعاريف .. بلاصة طوموبيل ديالو وشافيها
روطال ( تبسم ) مالك بحال الى مخلوعة ؟
عنبر : لا اضرني راسي نعرف فين جايبني !!
روطال : هبطي وتعرفي .. هبطات كتشوف فشارع كدور فراسها مافهمات والو بقات كتشوفيه بإستغراب
عنبر : شنو ؟!!
الروطال ( أشر براسو للقدام ) كيجاك المحال ( شافت فين اشر ليها وقربات كيبانو ليه زوج ديال المحالات حدا واحد صالون ديال التجميل كانو محالات كبار ) ماجاوبتيش ؟
عنبر ( شافت فيه ) شكون فيهم كيبانو ليا زوج ؟
- ݣالسة فالبيرو خدامة على شي ضواسة ، سونا التيليفون ديال البيرو هزاتو وعينيها على البيسي ..
حياة : ألو ( جاها صوتو من الجهة لوخرا بلعات ريقها ) نعام اسي طارق
طارق : خدمتي على ضواسة لي عطيتها الى ساليتيهم الله يرضي عليك سيفطيهم ليا فالإمايل ديالي مزال شاديني هنا وخاصيني
حياة : اه راه خدمت عليهم وساليتهم واجدين واش نسيفطهم ليك دابا ؟
طارق : مزيان الله يرضي عليك واه سيفطيهم دابا .. هزات لي ضوسي وسيفطاتهم تم تم للإيمايل ديالو ، كان مزال على الخط
حياة : راه سيفطهم شوف واش وصلوك
طارق ( بقا ساكت ) صاف مزيان يلاه الله يعاون ( قطع التيليفون ) .. حطات التيليفون وسهات تفكرات نهار باسها بلعات ريقها عاضة على شفايفها .. نعلات شيطان هي معارفاش راسها يقد السيد لي غايتقدم ليها يعجبها وترتابط بيه وحرام تفكر فحاجة دازت فاللحظة وغالطة وهي مع واحد السيد خور ، رجعات للبيسي خدامة ناسية تفكيرها ..
~~~~~~~~
- حل ليها الباب ديال المݣازة الأولى ، دخلات ليها مصبوغة بالبيض كبيرة فيها الفوق والتحت بدروج نازلين بالحديد تصلاح تكون شي سوبير مارشي كبير ..
الروطال : هاد المݣازة راه بحال هادي لوخرا ݣد ݣد ونفس الديكور
عنبر ( كدور فعينيها مبسمة ) واعرة بزاف ديالمن هاد المݣازات بعدا ؟
الروطال ( كان محطوط واحد البيرو وقف حاط ظهرو عليه وداير رجل على رجل ) ديالي
عنبر ( هزات حجبانها بإستغراب) وايلي على ديالك كاعما فخباري من إيمتا ؟
الروطال : من شحال هادي ، كولشي غاتعرفيه
عنبر : كتخبي عليا ؟
الروطال ( قرب منها شدها من كتافها ) حاشا احبيبي ولي ديالي راه ديالك انا وياك واحد ، وحتى حاجة ماتغلا عليك انتي غير أمري وانا عينيا ليك
عنبر ( حطات يديها على عنقو وتبسمت ) الله يخليك ليا احبيبي ( دورات راسها فالمݣازة ) حمقاتني عرفتي نصبغوها بللون البيج بحال الكافي والحليب.. شنو بان ليك ؟
الروطال : لي بغيتيها نديروها الالة ، حتى حاجة ماتغلى على حبي لي مكايخصر ليا الخاطر وعامي ليا العين على البشرية
عنبر ( ضحكات بأنوثة عارفاه أش قاصد ) وانا شحال عندي منك غير واحد يخليك ليلي البضاض ديالي
الروطال ( عض على شفتو ) ناكل مك أنا
الخبار وصلات لرشيدة متكدبش بلي فرحت قد حقها فدنيا ، كل شوية تسوني للتودة وتسولها على الناس شكون هوما واش كتعرفهم وتودة كتجاوبها بلي علمها من علمها هي ، لي عارفة بلي ولد الناس وكيعرفو الروطال .. رجعات حياة لعند عنبر لدار باش هكا نهار يجيو الناس تكون عندها ..
فكل مرة كيخرجهم الروطال يوصلهم يتقداو ويرجعهم .. خدات ليها قفطان خفيف فالبيج زوين ودارت مع الصابون باش تديها ليه نهارها دوزو تم من سوان لشعر لكولشي حياة كانت غير مسيرة وغادية مع عنبر فهواها وحتى حاجة محالية ليها .. كيفاش اتكون فرحانة وهي مامشاركاش مها هاد الفرحة وهي قاطعة اللغا معاها ناقصة من الجانب ديال الوالدين بزاف ..واخا ليالي معاها وكتحاول تخرجها من داك المود ولكن والو ..
تودة تكلفات بالحلوة حلفات بحلوفها لا شراوها ، دارو مع الطيابة لي اتجي طيب فداك النهار
حياة : غير تعارف ويݣلسو يتعشاو الحماق هذا يديرو كاسكروط ويمشيو
عنبر : اويلي على الضحك حشومة .. السيد دارهم ناس الكبرانية قاليا فاروق مجاتش أصاحبتي
حياة ( تنهدات ) ولي بغيتو ديروه ، نوض نلوح عليا غير جلابة انا عاد مدوشة يضربني البرد
عنبر : سيري باش يلاه تسالي ليك تنعسي بكري باش غدا تكوني مرتاحة ، راه فاروق خدا ليك روبو من طارق
حياة ( شافت فيها ) واش قاليه جايني عريس ؟
عنبر : اه قالها ليه
حياة ( بفضول ) وشنو قاليه ؟
عنبر ( هزات كتافها ) مقاليه والو ، قاليه الله يكمل بيخير يلاه سيري ، هزهزات حياة راسها وطلعات لبسات عليها جلابتها ونزلات .. وصلهم عمر للمدينة للصالون دخلو حياة تكلفو بيها وعنبر قطعات غير ليبوانت لشعرها دارو ليها سوان وصايبوه ليها
أما حياة دارو ليها مساج وسوان لوجها وغسلو ليها شعرو بدلو ليه اللون ردوه عسلي فاتح .. قادو ليها ظفيراتها صباغة وبردوهم ليها ، رجعهم عمر تعشاو مجموعين كاملين حياة طلعات لبيتها وعنبر كتقاد وتصايب فداكشي لي وجدات ..
نهار كان غير نهارات مقبوط عليها قلبها والبكية غالباها غير تمسيها دير باع بالبكا .. كتشوف فالقفطان المعلق وساهية تحل الباب عليها ودخلات عنبر لابسة جبادور بسروالها فالغوز مع شال فيه وريدات خاتمها وبارسلي ديالها
عنبر : مزال مالبستيش ؟
حياة ( حطات يدها على قلبها ) قلبي مقبوط عليا وفيا البكية
عنبر : رجوع لله اختي نعلي شيطان .. خالتي رشيدة راها التحت هي وليالي ، وماما راه جايا فطريق هي وبابا
حياة : قلتوها لدنيا وماجدة حشومة ماجدة عرضاتنا فالتعارف ديالها
عنبر : فخبارهم حتى هوما راه جايين خاص انتي توجدي ، كولشي واجد خاصك تلبسي وتقادي باش يجيو الناس ( تدق الباب وتحل وطلات عليهم رشيدة شافتها حياة هبطات راسها عنبر مشات للبالكو خرجات تم وخلاتهم خايفة لا تجرحها بشي هضرة )
رشيدة ( قربات من حياة وݣلسات قبالتها كانت مترددة عارفة الحجم ديال الحاجة لي دارت قداش خايب ) درتها معاك ابنيتي لمرة لولة وهادي لمرة تانية عارفة راسي مكنوزنش ومكنعرفش ندوي ولساني طويل ومكايعرف شنو ݣال حتى يخرجها من فمو ولكن الݣلب بيض ابنيتي نبغي ليك الخير ونبغيك تكوني فرحانة ومرتاحة ( بدات تبكي ) أنا عارفاك نقرة صافية وعارفاك ݣادة ومتخلي حد يضحك عليك ولكن كت معصبة منك حيت نفرتيني وحيت تيقتي داك الرعواني دسعيد وكذبتيني
حياة ( دموعها هابطين ) بيني وبينك عاتبيني ماطيحيش بيا ݣدام الناس أمي وكعنيني فشرفي ، جرحتيني بقات ضبرة فقلبي طلع وتنزل
رشيدة ( شدت يدها ) قلبك سميح وانا طالبة منك سماحة مك امية مقارياش مفاهماش أنا براسي مالݣيت لي يحن فيا ، كنتعلم الحنانة من ولادي ولاد كرشي ومن ناس لي كيرضو ليا عقلي سمحيليا الله يرضي عليك ( جراتها باست ليها راسها ويديها كتبكي ) سمحيليا
حياة ( تنهدت واخا جرحاتها ولكن ماقدت تقول والو كتافات غير بادلاتها العناق بلاما تجاوبها
رشيدة ( مسحات دموعها ) انا نزل وجدي راسك ابنيتي الله يفرحك ويكمل عليك ( خرجات من عندها ورجعات عنبر عند حياة عاوناتها حتى لبسات وتقادات سمعو طوموبيلات طلات عنبر كانت تودة وعبد الخالق ودنيا وماجدة رجعات للعند حياة كتقاد ليها وجها .. سمعات الطوموبيل وقفات ولكن ماقداتش تبركك ، بقات مكملة لحياة حتى سمعات عياط الروطال حلات الباب طلات عليه هازة البيوتي بلاندر فيديها
الروطال : ويلاه الناس راه وصلو ( كان لابس شوميز تريكو خفيف فالبيج مع سروال دجين وسباط )
عنبر : حلف جاو هاحنا جايين دابا .. وهي داخلة كتسمع الصلاة والسلام التحت ، رجعات عند حياة ) الناس وصلو ) كملات ليها دغية
حياة : الخلعة فيا
عنبر : انا كثر منك اسكتي ( قدات ليها اخر روتوشات .. فتحات الباب وخرجو بزوج لقاو ماجدة طالعة عندهم ( عنقات حياة )
ماجدة : الله يكمل عليك بالخير ( زغرتات فرحانة ) .. نزلو مع حياة وهي قلبها ايخرج من فمها .. تمو داخلين لصالون هزات راسها فالعائلة لي مجموعة حسات بدنيا ضارت بيها وقلبها زادو دقاتو فاش لمحاتو ݣالس بأناقة لابس شوميز بيض وسروال كحل كلاص مع صباط كيبري ومبسم حداه عبد الخالق وتودة ودنيا حاط قدامو مشموم كبير ديال الورد وكيشوفيها ونظراتو كانو غراب مامفهومينش مكتعرفو فاش كيفكر ولا شنو كيدور فراسو نفس الصدمة لي على وجها كانت على وجه عنبر لي كتشوفيه وفروطال لي حرك ليها حجبانو بحال الى كيقوليها من بعد ونشرح ليك .. حياة بلاما تحس ولا تشعر نطقات بصدمة وبصوت مسموع
حياة : أويلي طارق ..
ݣالس فالبيرو ديالو خدام حتى سونا عليه التيليفون .. طلعات ليه النمرة ديال العميد فتح الخط وجاوبو بصوت وقور غالبة عليه نبرة الإحترام
عماد : سي رضوان مرحبا .. الحمد لله اللهم لك الحمد
رضوان : ايوا والفتي سوس ؟
عماد : والحمد لله كنحاولو نتأضبطاو ونولفو بزز منا ، الامور تم مزيانة
رضوان ( تنهد ) مزيانة ( بجدية ) مغاديرش عقلك وترجع ؟
عماد : انبقاو لعبو اسي رضوان سير وأجي ، صافي بدلنا ولب عطا الله عطاه
رضوان : انت غير عطيني لأوكي نرضك من غدا فكر مزيان اعماد .. الوقت لي رجع ليك عقلك علمني يلاه الله يعاون ( قطع ) .. بقا عماد ساهي وكيفكر شاف فساعتو كانت وصلات الوقت لي غادي يخرج فيها هز سوارت وتيليفون تم خارج ..
سفيان ( داخل ) هي صافي هذا هو الوقت ولا ؟
عماد : الله يجعل البركة تعطلتي لا ؟
سفيان : والمدام مسكينة يلاه وجدات لينا مندي معايا لعشا ( ورا ليه البواطات )
عماد : بصحة وراحة هي الاخ مزوج ؟
سفيان : وزوج وليدات ، أخويا زواج زين والبنون مكاين ماحسن منو الله يطعمنا حلال
عماد ( هز ليه براسو ) الله يعاون .. خرج من تم ركب فطوموبيلتو وديمارا ، تنهد تنهيدة طويلة لقى راسو كيدور فالمدينة غير غادي من قنت لقنت مباغيش يدخل لدار .. اخر بلاصة شد ليها الطريق هي ايمي ودار جاه الجوع تشهى ياكل الحوت وصل بلاصة الطوموبيل ديالو ونزل ..
- دخل للنفس القهوة لي كان تقهوى فيها مع روطال اخر مرة تم داخل كيقلب على شي بلاصة .. حبس فبلاصتو كيحقق واش هي ولا كيتخايل زول نظاظرو وتم جاي عندها كانت ݣالسة وساهية لابسة قميجة محلولة مخطط مع تيشورت من التحت ونظاظر دايراهم فوق شعرها وحاطة ساك ديالها قدامها
عماد ( بصوتو رجولي ) ليلى ( هزات فيه راسها بان الإرتباك على وجها)
ليلى : سي عماد
عماد ( دور راسو فالأرجاء ) واش بوحدك ؟
ليلى ( هزهزات راسها ) اه اليوم عندي روپو مافقتش بكري ، تفكرت هاد البلاصة وخديت طاكسي وجيت ليها تشهيت الحوت ..
عماد ( أشر للكرسي ) واخا نݣلس ؟
ليلى : اه سمحليا ݣلس مرحبا ( جر الكرسي وكلس )
عماد : طلبتي شيحاجة ؟
ليلى : اه عاد دابا ( جا السرباي للعند عماد شاف شنو بغا عطاه الطلب ديالو ومشا ) واش حتى انت ماخدامش ؟
عماد ( حط نظاظرو وتيليفون وسوارت ) يلاه خرجت ومافياش لي يدخل لدار وفيا جوع تفكرت هاد الكوان شديت رجل ليه
ليلى ( كتلعب بصباعها ) مزيان ( دورات راسها للجهة البحر والبرد كيلعب بشعرها مقابل معاهم منظر زوين )
عماد ( كان ساهي كيشوفيها فتفاصيلها وملامحها كتبان ليه بريئة بزاف مافهمش شنو لاحها لداك القنت ) فخبارك خونا لي كتي خدامة عندو تشد ؟
ليلى ( شافت فيه) بصح ( تبسمات بهدوء ) يستاهل لا هو لا لي بحالو شحال من واحد خاصو يتشد
عماد : وانتي اش لاحك عندو شكون توسط لك ، حيت هداك مكايخدم غير المعرفة
ليلى ( بلعات ريقها ) كنت خدامة فمراكش ، واحد دري كان خدام معايا هو لي توسط ليا أصلا داك القنت لي كنت فيه قبل فين يبان هدا .. هدا بعدا الباطرون مكايقربش ليك وحتى واحد من الكليان مكايحاديك عاطيينك تيساع ماشي بحال الأول
عماد ( مركز معاها ) كان كيتحرش بيك ( شافت فيه ) الباطرون اللول ؟
ليلى ( تنهدات وحدرات راسها ) ماشي هو ولا كان باغي يبيع فيا ويشري داكشي باش هربت من تم للهنا
عماد ( كيفكر ) بغيت انعرف شنو لاح بنت بحالك قارية ودارهم فقنت لهاد القنات ؟
- فجهة أخرى .. بقات واقفة على نفس الملامح مصدومة فيه حسات بالأرض تحتها كتمشي بيها والصالون كلو كيدور ماعقلاتش على راسها حتى طاحت على طولتها ..
عنبر ( بالغوات ) اويلي حياة حياة ( تحنات كتحرك فيها ) .. نقزات رشيدة مخلوعة كتفيق فيها والو ديك الفرحة لي فالبنات تحولات للخلعة ..
طارق ( بصرامة ) بلاتي خنقتوها ( هزها بين يديه داها لصالون لاخر فتح السراجم .. جات عنبر كتجري هازة ريحة فيدها كتشم ليها فيها ) حياة حياة ( كيحرك ليها فوجها )
عنبر ( خنزرات فروطال وفخوها ) انتوما السباب علاش ماقلتيش ليا طارق هو لي جاي يخطب واش انتوما مسطيين ؟ ( شافت فمها وباها ) واش حتى انتوما فخباركم ؟
عبد الخالق : والله ابنتي الى حتى لاخر لحظة عاد سقنا الخبار وهو لي علمنا
عنبر : اويلي اش هاد الضحك ( خبطاتو لدراعو ) علاش ماقلتيش بلي انت لي جاي تخطب فيها واش هبيل ها لبنت سخفات
طارق : و عنبر وعنبر من بعد وندويو نفيق بعدا .. بدات حياة كتحرك فراسها غير شافتها عنبر هزات كاس دالما حطات يدها تحت راسها وݣعداتها كتشرب فيها حتى فاقت .. ) شوية دابا كيكتحسي براسك ..
رشيدة ( كطل عليها ) شوية ابنتي ؟
حياة ( هزات براسها ) الحمد لله ، بقات كتشوفيه بفضول مافهمات والو
طارق ( شافيهم ) غير رجعو لصالون انا ندوي مع حياة ونجيو .. الكل توجه للصالون من غير عنبر لي واقفة كتخنزر فيه ) وعنبر اتبقاي واقفة ؟
عنبر ( شافت فحياة ) عندك يبزز عليك راه واخا خويا راه انتي ختي قبل منو .. انا مافهمتش واحد مكايبغيش وحدة وعمر زنقة جمعاتهم وجاي يخطب فيها ( حسات بيد جراتها بجهد ) لاش جارني ؟
الروطال : دوزي أشواوة دوزي انتي منين كطفاي ؟
عنبر : حسابك معايا أنت هو الاخر ، يمشيو ناس مايديوش خبارنا ونتفاهمو ..
طارق ( شاف فحياة لي كتشوفيه ) ندويو على برا ( هزات براسها وتبعاتو خرجو للجهة لابيسين او وقفات كتسناه يدوي ) شتك مصدومة ؟
حياة ( ببرود ) واش كتفلا عليا ؟ كيفاش شتك مصدومة واش خاصني نكون فرحانة ؟ انت الباطرون ديالي مابيني وبينك والو وجاي تخطب فيا هادي راه مايتقبلهاش العقل ..
طارق : وعلاش شنو فيها عادي
حياة : وعباد الله زوج دناس كيتزوجو الى كان اعجاب بيناتهم ، وحنا داك الاعجاب مابيناتناش لا انا كنقد عليك لا انت كتقد عليا .. انا منقدش نتزوج بواحد طعن فيا وعايرني وبكاني
طارق ( واقف كيشوفيها ) وتݣدي تزوجي بواحد باسك ؟
حياة ( وحلات ليها الهضرة ) هاديك اتخربيقة تزربيقة وفاتت ، وماشي بمسبتها غانتزوجو ( تنهدات ) طارق جيني نيشان لاش جاي تخطبني ؟ لا انا من سومك ولا انا قدك ومجاياش معاك فعقليتك ..
طارق ( بجدية ) بالعكس انتي انسب وحدة ليا ، بجوج بينا ناقصينا شي حوايج نكملو بعضياتنا بيهم ..
حياة ( بهدوء) شنو هوما ؟
طارق : ناقصين من جهة الوالدين .. انتي ناقصة من جهة مك وباك وانا من جهة مي ، وهادشي لي ناقص غانعوضوه فبعضياتنا ..
حياة ( بقات ساكتة بانت نظرت كسر فعينيها تبسمات بهدوء وهزات براسها ) سمعتيها ياك ؟ سمعتيها داك نهار شنو ݣالت داكشي باش جاي اليوم تخطب فيا .. وعلاش اتربط حياتك بيا على ود شي حاجة تݣالت ليا أنا ..
طارق ( بنفس البرود ) انا ماسمعت والو
حياة : براكة من كنز العكري ، عارفاك سمعتي كولشي هادشي علاش جاي تخطب فيا واش طلبك فاروق ؟
شافت فيه وسهات تنهدات تنهيدة طويلة مقاداش تدوي شنو غاتقوليه ، غرغرو عينيها بدموع حاجة لي لاحظها ..
عماد : الى مابغيتيش تعاودي غير نساي ( قاطعهم السرباي جاب ليهم الماكلة )
ليلى : والله مساهلة اسي عماد مساهلاش ، لي داز عليا انا غانبغي نتخشا فاي بلاصة ونبعد ونهرب بجلدي
عماد : نتفاهمو على ديك سي حيديها بعدا ( قرب ليها طبسيل هاز الحامض عصر ليها شوية وقرب ليها لاصوص وشلاضة ) كولي بعدا قبل لا يبرد
ليلى ( هزات براسها ) واخا ( بدات كتاكل بشوية عليها كانو ساكتين بزوج حتى كملو ماكلتهم .. خلص عماد كولشي ماخلاهاش تخلص ..
عماد : نتمشاو شوية ؟
ليلى ( هزهزات راسها ) واخا .. نزلو من القهوة للبحر كيتمشاو البرد ديال البحر كيضرب فيهم وريحتو خلاها تنهد تنهيدة طويلة ) سبحان الله العظيم كنت عايشة بيخير وفرحانة وكنقرا وحتى انا باغية نكون شي محامية ولا خدامة شي خدمة زوينة ولكن سبحان الله كيدور بيك شي بنادم لي كيحسدك على ضحكة ديالك وكيبقى يحفر ليك حتى كطيح ..
عماد ( ضحك ) هاديك جاري بيها العمل ماشي شيحاجة لي مكايناش .. حتى واحد معايش هاني وبيخير ومرتاح لي مدوز الكثير مدوز القليل
ليلى ( شافت فيه ) ولكن صعيب الحال اعماد يدوز عليك لي يدوز ولكن باش يتكرفصو عليك صعيبة والله
عماد ( وقفها كيشوفليها فعينيها ) كنتي كتبغي شي واحد ؟ واش تفلا عليك ؟
ليلى ( غرغرو عينيها بدموع ) كون أكان بصح ولا كنت معاه ، راه ولد خالي ومكان بيناتنا والو هو كان باغيني وانا لا حتى جا واحد نهار لي فقت لقيت خواتاتو ( عاودات ليه كولشي ماحساتش كيفاش عاودات ليه كانت باغية تفش وترتاح تعاود بلا حدود ومتحبسش )
عماد ( طبطب على كتفها ) صافي سوكتي ماتبكيش ( سكت وكمل كلامو ) ولكن البلان ناقص اليلى حيت هاد سيد كون تكرفص عليك غادي يكون دليل عدريتك على الفراش ، وزيد عليها فاش غاتفيقي راه غاتكوني حسيتي مايمكنش ..
ليلى ( مسحات دموعها كتفكر ) والله ماعقلت بالله ( شافت فيه ) زعمة يكونو ضحكو عليا لا مايمكنش
عماد : انا ماݣلت لك والو ، ولكن كون تغتاصبتي كنتي غاتحسي اليلى انتي بنت وانتي اتعرفي ، ضروري غايكون خلا شي طراس فيك
ليلى ( تنهدت ) ماعرفتش
عماد : يلاه نمشيو ، نساي هادشي دابا فهمتي هادشي غايبان من بعد ( تحركو من تم ركبات معاه الطريق كلها وهي ساكتة حتى نطقات )
ليلى : لبارح تخلصت وبغيت ناخود تيليفون باش نبقى ندوي مع عنبر ابيل فيديو .. مكنعرفش فتيليفونات هادو لي ولاو دابا
عماد : نمشيو نشوفو .. توجه لسوق الأحد ونزل هو وياها ، مشاو عند واحد تم دخل عندو ) خويا سلام عليكم عفاك شي تيليفون .. يكون خدمتو مزيانة وتصوير مزيان ..جبد ليه واحد تيليفون نوع أوپو قلبو عماد مزيان وعجبها تاوا معاه على الثمن حتى نقص ليه وعطاه بوشيطة بنوتية فالغوز .. ( وهوما راجعين مدو ليها ) بصحتك
ليلى : الله يعطيك الصحة
عماد : بغيتي شيحاجة أخرى ؟
ليلى ( بخجل ) كنت بغيت ناخود غير ريحة وشومبوان ، خفت غير نعطلك وانت عيان
عماد : لالا ماشي مشكيل .. توجهو لعند مول المكياج خدات من عندو ريحة بربري وشومبوان ، او دازت لپارا خدات منها إكغو ورجعو لطوموبيل شدو الطريق وصلها للدار ..
ليلى ( شافت فيه ) شكرا بزاف اعماد وسمحليا عدبتك معايا
عماد ( شافيها ) مكاين حتى عذاب تهلاي فراسك ، راه تيليفون فيه الواتساب حتى ديري واتعرفي كيفاش تحلي الفيسبوك ..
ليلى : واخا تصبح على خير ( نزلات من طوموبيل بقا واقف حتى بغات طلع شافت فيه شيرات ليه وطلعات ) .. ديمارا طوموبيلتو وشد الطريق لدارو
~~~~~~~~~~
طارق ( غوبش ) بنت ليك برهوش غايݣودوني الناس .. وشكون ݣالك الالة بلي معاجبانيش شايط عليا فمي وشلاقمي نبوس من والا ، كونما كنتيش عاجباني وكتعصبيني وكتجيني على الݣانة منحطش عليك فمي
حياة ( تزنݣات ) عفاك ماتبقاش تفكرني فداكشي
طارق ( تبسم ) شتك تزنݣتي هادي غابوسة واشدارت فك ، خلي ندوزو لصح ( خنزرات فيه ) قرايتك وغانخليك تكمليها الخدمة اتكلسي منها ماتحتاجيش ليها .. والحاجة زوينة هي غاتبقاي قريبة من داركم ومن عنبر مكايناش شيحاجة تخصر ليك الخاطر انا عصبي منكدبش ولكن على العامر ماشي على الخاوي .. مغانشكرش ليك راسي ومغانݣولش نتزوجو من دابا نديرو خطوبة وانتي حكمي ابنت الناس حد مايخصر ليك خاطرك وحتى حاجة ماتقيسك ولا توصلك ..
حياة ( شافت فيه ) وإلى مابغيتكش أطارق ؟
طارق : شحال من واحد كيتزوج زواج تقليدي ، العشرة هي لي كتحكم واش غاتبغيني ولالا خمي فيها ، وإلى على نهار عايرتك الالة سمحي ليا ماشعرعتش ومابغيتكش تكوني نية وتخلي شمايت ينقزو عليك
حياة ( ݣلسات كتشوف بعيد تفكرات كلام مها ليها مزال كيتردد كلامها فودنيها واخا طلبات منها سماحة ولكن جرحاتها قدام كولشي كان عندها تخوف تقول لا وتولي متبتة عليها تهمة قدام كولشي ونفس الوقت خايفة من راسها وتايهة تنهدات تنهيدة طويلة ) مغانتزوجوش دابا ياك غير انتخطبو ؟ ..
طارق ( تبسم ) لا زربة على صلاح الالة ، حتى وكان ترتاحي ونضربو الكحل فالبيض طلقينا الله يرضي عليك كيتسناو وختي حاضيانا من سرجم
حياة ( حركات راسها ) واخا ( تبسم مد ليها يدو عطاتو يدها وتمو راجعين حتى وقفاتو بسؤال ديالها) طارق بغيت نسولك ( وقف شافيها بمعنى شنو ) هداك وليد شنو كنتي درتي معاه مزال ؟
طارق ( تبسم بخبث ) عاودت ليه الطهارة ..
ݣالسين كاملين فصالون .. حنحن عبد الخالق ةشاف فرشيدة ونطق ..
لالة رشيدة انتوما عارفينا مزيان ، عاشرتونا وشاركنا الطعام وحياة بنتنا ، كنعرفوها مزيان وعزيزة وغالية بحال بناتي وطارق ولدي كتعرفوه .. الى بغيتو وبغات بنتنا حياة حنا طالبين راغبين فيدها ليه على سنة الله ورسوله ..
رشيدة ( شافت فبنتها ) واش غانݣولك اسي عبد الخالق مانلݣاوش حسن منكم .. ولكن نسولو حياة الى كانت موافقة انا منزيدهم الخير
عبد الخالق ( شاف فحياة لي حادرة راسها وساكتة ) أش ݣلتي أبنتي حياة ( هزات راسها فيه)
عنبر ( بهمس ) شوفي الى مابغيتيش ثولي مابغيتش ، حتى واحد مايبزز عليك فهمتيني
الروطال ( جرها ) واش انت مكتحشميش
عنبر ( تنطرات منو ) ختي هاديك بعد مني ، ( بهمس ) يحسابليك غادي نساها ليك واحد مكايتحاملش مع وحدة جاي يخطب فيها اكبر تخربيقة
حياة ( هزات راسها فيهم كيشوفو فيها تنهدات تنهيدة طويلة) أنا موافقة .. شافت فيها عنبر مصدومة .. دنيا وماجدة كيزغرتو فرحانات تودة حتى هي كتزغرت
عبد الخالق : ومبارك ومسعود إن شاء الله نتفاهمو من بعد على نهار دالخطوبة وضريب الصداق
الروطال ( باغي يهرس داك التوتر ) ونقراو الفاتحة بعدا ( كولشي هز يديه يقرا الفاتحة قراوها وكملو وزغرتو العيالات كيباركو لبعضياتهم ) ودابا نوضو للصالة لوخرا ضرنا الجوع الخوت ( كيضحك )
توجهو للصالة وعنبر غير مغوبشة جاها هادشي تبرهيش فتبرهيش وتخربيق
طارق ( جرها من يدها ) مافهمتش انا واش خوك ولا عدوك ؟
عنبر ( خنزرات فيه ) بااز بحال الى انا معارفاكش شنو داير راه فخباري البلان يحسابليك حياة اتخبي عليا .. ودابا جاي بلا حشمة ومخبي علينا وجاي تخطب من ايمتا باغيها يلاه ؟
طارق ( بتقزدير ) من نهار شقمتها ( خنزرات فيه ) وياك عاودات ليك البلان لاش كتخنزري ، وحدة حاط عليها شلاقمي وبغيتيني منديهاش حشومة فحق ولد حيدر
عنبر ( طلعاتو ونزلاتو ) سير بسع مني سير المومسيخ لاخور ( ضربات فيه ومشات حتى تجرات من يدها ) لاش جارني هاد جرة
الروطال ( مغوبش ) تي مال مك كطرطاي بحال الݣلية اش كاين ؟ خوك كان خايف لامتقبلش بيه درية داكشي باش ݣال يدير هوكا مالنا دابا اش أكاين ؟
عنبر : كان عليك تݣولها ليا ماشي تخبي عليا ، اصلا طارق مايصلاحش للحياة
الروطال ( كيشوفيها بإستغراب) واش انتي مريضة ؟
عنبر ( مغوبشة ) كنقول لي كاين طارق مونسيخ مخاصوش حياة حياة قطة مغمضة ماشي بحالو هو .. اصلا انا طارق معاجبنيش حالو كيجيني قجر وفشكل داير ماكرهت نشدو نغزو بسناني
الروطال (كيشوفيها بعدم تصديق ) راه خوك هداك واش انتي شوية لاباس اداك نهار دوري وتعنݣيه خويا حبيبي ودابا قجر
عنبر ( خرجات فيه عينيها ) اه مابقيتش حاملاه ومابغيتوش يتزوج ليا بختي تهنيتي ( ضربات فيه ومشات ..
يتبع...
التعليقات
لا توجد تعليقات بعد، كن أول من يعلق.