محتوى القصة
- بــوســكــورة 📍 .. فبيت من البيوت ديال النعاس لي فالڤيلا .. اول مكدخل ليه كتخيل راسك داخل لشي بيت مصنوع من الخشب .. الصباغة لي مصبوغة ودقة ديال التصميم كانت كتبين الصباغة بشكل الخشب .. السقف لي حتى هو كان بنفس الصباغة .. كلو بولات النموسية الوسط بلون اسود ديال الجلد بغطاء فلون البني حداها كوافوزات ديال الخشب .. بعيد على النموسية بشوية كان دروج موجين كلهم إضاؤة .. فكل جنب من الدروج كاين ڤازات من القرميد كلهم زرع ، البيت كلو كانو سراجمو كبار وديال الزاج مقابلين مع الطبيعة لي كانت على برا .. تلفازة كبيرة پلازما اونفاص معاها فوطويات ديال الدان بلون القهوي ومكتب فالقنت دالبيت .. عاد ممر صغير كيدي للدريسينݣ والحمام الخاص ..
- حل الباب ودخل كيجر رجليه لابس سروال ديال الكيطمة مع تيشورت .. شعرو على جبهتو مشعكك ، هاز التيليفون بصوتو الرجولي لي كانت زايدة فيه نغزة البحة :
ݣولي ليه يتسناني انا لي غاندوي معاه .. ( قطع التيليفون لاحو .. توجه للطبلة لي فالوسط محطوط عليها كاس ديال الما وأسپيرين .. لاحها ففمو متبعها الما ، طلع دوك الدرجات وتلاح فوق نموسية مغمض عينيه .. دازت ساعة تقريبا سمع الدقان فالباب وصوت المساعدة كتعيط :
سي فاروق .. سي فاروق
- هز راسو شافيها خاسر أشر ليها بيدو بمعنى شنو
- سي عماد التحت كيتسناك .. حدرات راسها وخرجات .. ناض راسو تقيل كيسوط كان غارق فنعاسو ، شتف جهة الساعة كانت 5 ديال العشية .. نزل من فراشو لابس صندالة ديال دار .. دخل يديه فشعرو كيقادو دخل للحمام غسل وجهو مسحو .. وخرج هابط مع دروج ..
- فصالة التحت .. لي كانت بطابع مغربي عصري ، مدورة بديكورات خشية ݣالس داير رجل على رجل ..
- الروطال ( كيخنزر فيه ) : محرشينك اخويا عليا .. ݣلنا ليك زعمة صابح عيان ..
- عماد : ومنشوفش خويا حبيبي
- الروطال ( ݣلس ) : امنين ݣلتي هاد حبيبي جايب شي مونتيف .. ولا باغي طلبني شيحاجة
- عماد : الظلم خايب أخويا .. دويتي مع السيد ݣلتي ليه مابقيتيش جاي
- الروطال ( فرق رجليه مرجع راسو اللور ) : وصيت حنان تݣولها ليه ...
- عماد : هاد العراسات كيجي منهم غير المرض
- الروطال ( شافيه بعينين دابلين ) جيني للمفيد اولدي .. مامالفاش ليك تجي عندي ، ونعار كتجي كتجي على شيحاجة دوي
- عماد ( بجدية ) : عمر المرنيسي جا ديكلارا اليوم .. بلي شي واحد تلݣا ليه ..
- الروطال ( ببرود ) : وي فخباري ݣاليا طارق بلي شي وحدين تلݣاو ليه خلاو دارو ( حط رجليه على الطبلة هاز واحد الموس صغير محطوط فوق الحيط لي حداه ) ..
- عماد ( متبع حركاتو ) ماشي وحدين ݣال واحد
- الروطال : شوف علم الله أش دار تاني ( كيدور داك الموس فيديه ) هداك كنت عارفو شي نهار يديرها ليه فمو ..
- عماد ( دار رجل على رجل كيشوف فيه ) : سبحان الله العظيم .. ياك هو لي كان نوضها معاك فاش كان نازل عندك فالاوطيل ؟
- الروطال ( بلاما يحرك راسو شاف فيه بنفس البرود القات**ل) هو ..
- عماد : ݣلتي لي تبسل على السيدة خدامة عندكم .. ودفل على سيد لي وصل ليه البالز ديالو للبيت .. وعلى هاد البلان ماقبلتيش تخدم معاه
- الروطال ( بإبتسامة باردة ) : مزال عاقل ماعندي منسالك ..
- عماد ( تشبح ) : وسبحان الله ݣاليك هدا لي تعدا عليه كان طويل .. جاه على غفلة ݣالك داير خواتم دالخشب فيديه ولابس كحل فكحل ..
- الروطال ( داز فبالو فلاش باك ) .. 🔙🔙🔙 فشارع من شوارع مدينة الدار البيضاء فوحدة الزناقي الخاوية لي كانت كتدي للمطعم من مطاعم السوشي .. كانت الساعة بضبط 8:30 وقفات طوموبيل من نوع مرسيدس فالكحل دوبل ڤي .. نزل من بكل غرور كيقاد فتجاكيط ديالو وإبتسامة على وجهو الوسيم ، السن ديالو مكانش كيتعدا 35 سنة .. هاز مشموم ديال الورد ونظرة إستهزاء على وجهو ، من نظراتو كان باين ماشي جايبو الحب جايباه المتعة ويدوز الوقت ويلعب بعقول البنات .. جاي يتحرك متوجه للجهة فين كاين مطعم السوشي .. سمع الحس وراه وقف وضار كيقلب بعينيه ، مكان والو رجع ضار غادي بكل نرجسية وغرور ولكن هاد المرة حس فعلا بشي حد جاي وراه .. رجع ضار بزربة كيبان ليه خيال وراه .. صغر عينيه كيحقق كيبان ليه شخص لابس سروال دجين كحل ݣاط كحل قبية كحلة قبها كبير مغطي ليه وجهو وغير يدو لي كتبان كلها خواتم ديال الخشب وصوت تصفار جاي من شفايفو .. قرب ليه بشوية كيسول :
- أش كاين تم ؟
ولكن كان معطل .. رجع بخطوة اللور طايح على إثر الضربة لي جاتو لوجهو مجا فين يهز راسو حتى تهز وتخبط ليه راسو مع زاج ديال طوموبيل لي كانت مبلاصية وراه .. طاح طيحة وحدة على طولتو .. عينيه لي كانو شبه محلولين كيحس بدمايتو دايزين سخونين منين نيفو وفمو وراسو .. كيبان ليه الخيال زطم على داك الورد عجنو برجليه ومشا ..
الـــحـــاضر .. نزل الروطال رجليه من فوق الطبلة كيشوف فعماد بمنتهى البراءة وبملامح عادية جدا :
ايوا خاص تشوفو خدمتكم .. شوف شكون هذا لي دار فيه هاد الفعلة علم الله ..
- عماد ( بجدية ) : فاروق انا عارفك انت مولاها .. بلاما تبقى تريݣل عليا
- الروطال : ومنين عارفني انا علاش كتسول ؟
- عماد ( فقد اعصابو ) : شد يدي اصاحبي سير شوف شي طبيب او .. واش داروك محامي ؟
- الروطال ( بإستفهام معلي حاجبو ) : وشتي حمد الله حيت جيتي خويا
- عماد ( دوز يديه على وجهو ) : الله يهديك .. علاش زعمة مكتجيهش فاص ؟ ياك ݣلتي ليا بردتي سوق معاه وطلبتي سماحة من الخدامة بنيابة عليه ..
- الروطال ( هزهز راسو ) : داكشي لي كان .. خدامين عندي انا خاص نطلب السماحة منو .. بمسبتي سمعو المعيور
- عماد : فاريتيها معاه بنهار بسلام .. وبليل خليتي دار عشو خليتيه مشمشر .. لافيشور دوجهو خسرتيه السيد شوف على شحال يرجع وجهو كيف كان .. بحال والو خاصو عملية ديال تجميل باش وجهو يرجع كيما هو ..
- الروطال ( بإستهزاء .. هاز كتافو ) : مكنبغيش الظلم أخويا .. الظلم خايب وظالم خاص ياكل خلا دار عشتو ( غمزو ) باش مرة خرى يدير داك نهار بين عينيه ..
- عماد ( بالهداوة ) : خويا راني خايف عليك .. خايف عليك شي نهار تحصل ..
- الروطال ( ناض من بلاصتو مقرب ليه .. حط يدو على كتفو ) : إلى حصلت دير خدمتك .. ( غمزو وخرج من الصالون ) .. تبعو عماد
- الروطال : واش هادشي لي جابك ؟
- عماد ( دار يديه على جنابو .. عارف النقاش مع خوه ماعندو باش يفيدو لي فراسو فراسو ) :
لا لبارح ماجدة ودنيا فاش كانو موصلين عنبر ولي معاها .. السيدة لي غنات فالعرس عنبر عرفتيها ؟
- الروطال ( خوا ليه كاس دعصير الليمون جغم منو وشافيه ) : فيا ارواح مافياش زهايمر مالهم ؟
- عماد : لبارح فاش كانو راجعين من العرس تلݣى ليهم واحد خونا ..
- الروطال حبس الشريب وشافيه بشر ببحتو الروجلية مغنغنة برواح : أشناهو ؟
- عماد : وغير تكالما ماوقع والو .. حبس عليهم الطريق ونزلات ليه عنبر فرشخات ليه راسو بقرعة دزاج ..
- الروطال ( تبسم وإبتسامتو رجعات ضحكة رجولية عالية ) ..
- عماد : مافهمتش علاش كضحك ، عجباتك هادي حيت انت وياها بحال بحال مكتفاهموش بلاتي هي أحسن عندكم مع الخبيط
- الروطال ( بنفس الإبتسامة ) : الظلم خايب أخويا .. غاهو ماتنساش راسك بلاما نفكرك دابا كمل
- ݣلس عماد فوق الفوتوي مسرح رجليه .. :
منكدبش عليك حتى انا واحد فيهم خليت عشتو
- الروطال ( ݣلس بدورو ) : هالي ݣلنا .. شكون هادو ؟
- عماد : لا اسمحليا .. يلاه خرجو لبارح من سبيطار الى ݣتليك شكون اتسيفطهم لقبر ..
- الروطال : اش درتو من بعد ؟
- عيط لدراري ودزنا للكوميسارية هي اللولة .. ݣادينا الامور دراري شافو راسهم حتى هوما غايغرقو مابغاوش يديرو شكاية .. ( سكت ساهي ورجع شاف فخوه ) عقلتي على بلان البنات لي عاودت ليك ؟
- الروطال ( كمل كاس العصير حطو ) : مالو ؟
- عماد : السيدة لي كنا شدينا فالڤيلا دالخرجة ، ورضوان السعودي كلهم دكرو سمية وحدة
- الروطال : شكون شي واحد معروف ؟
- عماد : لا سميتو براهيم رحمون ساكن فبلغاريا .. مزوج و عندو 3 البنات او ولد وجوج شركات ديال العقار فإيطاليا وسبانيا
- الروطال ( مغوبش كيفكر ) : هاد السمية ماغريباش عليا ..
- عماد : البلان ومافيه ولدو كان مزوج .. وحدة مغربية وسيدة وهموها بلي دار كسيدة ومات وهو ماميتش كيتبورض مع راسو من وحدة لوحدة ..
- الروطال ( مسرح رجلو فوق واحد البوفة ) : وميكروب هذا
- عماد : وزيدك هادي قبل مايوهموها بموتو طلقها ب 3 شهور قبل
- الروطال : وهادي مكلخة معاقتش ؟
- عماد : كركبوها ورا الݣنازة المزورة ورجعات المغرب .. نزيدك الكبيرة عرفتي شكون ؟
- الروطال : شكون ؟
- عماد : عنبر ..
- راجع لكازا طريق كاملة وهو كيدور كلام خوه فراسو .. ماعرفتش كيفاش خاصو يواجه عنبر بالحقيقة ولكن من الواجب ديالو او واجب خدمتو أنو يݣولها ليها ..
- هز عماد تيليفون ديالو كيشوف شحال فساعة .. كانت عندو خدمة خاصو يقضيها .. قرر يأجل الهضرة مع عنبر حتى للمن بعد ..
••••••••
- من ورا العشا تجمعو ݣالسين كيقرقبو الناب مع بعضياتهم .. دنيا لي كانت كتدوي فتيليفون رجعات لعندهم والابتسامة على وجها .. ݣلسات حدا يسرى :
سلمات عليهم ياسمين
- رقية : كي وصلو ؟
- دنيا : وصلو بيخير وعلى خير .. الصراحة العرس داز غزال
- أدريس : البنت لي غنات شفتها فالموسم لي كنا مشينا ليه ..
- ماجدة : وايلي !!
- أدريس : مزال عاقل ݣلسات حدايا .. تعكلات فرجلي ، سمعتها كتكول بلي بغات تصور مع الخيل ..
- ماجدة : عنبر الله يعمر دار وزوينة .. وتبارك الله قارية كان عندها 3 زيام أني فكلية الحقوق
- عصام ( بإستغراب) : وايلي واش لاحها للغنا ؟
- ماجدة ( كتلعب برجليها ) : الظروف لي حكمات عليها .. كانت تعرفات على واحد السيد بغاها وتزوجات بيه وخرجات من القرايا ومشات معاه لبرا .. ولكن مسكين مات ورجعات هي لهنا وكاع الفلوس لي عندها سرقهم ليها راجل خالتها .. جات لكازا وتعرضو ليها شفارة ݣريساوها هي وبنت خالتها ..
- رقية : الله مسكينة تكرفصات ماعدها زهر
- ماجدة : وايييه بسباب الفيديو لي تلاح ليها كتغني دخلات لتاشياخت .. أما هي كاعما كانت باغية
- أدريس : علاش فين والديها ؟
- ماجدة : توفاو فكسيدة مساكن الله يرحمهم ... عبد الخالق كان باغي يسول على شخص واحد وهي تودة .. باغي يعرف شيحاجة ماعرفش كيفاش يجبد الهضرة من ماجدة..
- عبد الخالق ( مالقا مايݣول اول حاجة جات لبابو نطق بيها ) : حتى رباعة لي معاها رائعين تبارك الله
- ماجدة : اه تبارك الله .. أصلا خالتي فاطنة كانت شيخة شحال هادي ..
- عبد الخالق ( شاف فأدريس تزاد معاه الزايد ) : شكون هي فيهم ( سول بلاما يحس خلا أنظار مو تمشي ليه
- ماجدة : لي كانت لابسة الكحل وݣالسة الوسط .. كانت كتعرفها عنبر شحال هادي .. فاش ماماها كتمشي للخدمة كتخليها معاها حاسب هي لي رباتها .. ولكن دار عنبر رحلو فاش كانت عندها 12 عام ويلاه مأخرا تلاقاو قاتلي عنبر فالموسم ديال مولاي عبد الله ..
- عبد الخالق رجليه كيحس بيهم كايترعدو والبرودة طالعة منهم .. بلع ريقو شاف فخوه كان فالموسم وحتى هي كانت وماعمرهم تلاقاو ..
- ماجدة : حتى هي عاد ݣلعات حق الله
- عبد الخالق ( بتساؤل ) : كانت مزوجة ؟
- ماجدة : اه هادشي لي قاتلي عنبر .. قاتلي بلي كانت مزوجة فبني سليمان .. أصلا دابا عايشين كامل عنبر وخالتي فاطنة وحياة وخالتي سميرة الضرة ديال خالتي فاطنة ..
- علال : سبحان الله قليل لي تلقى ضرايرات عايشين مع بعضياتهم
- ماجدة ( بإبتسامة ) : ايه خالتي فاطنة مرة حرة عزيزة عليا .. مرة بألف راجل تخايلو هاد راجلها كان واحد طاغية الله يسمح ليا منو .. وفاش تزوجات رضات لكاع ولادو ومراتو حقهم لي تحرمو منو هادي سينين تبارك الله كتعجبني مثال للمرأة المغربية القوية ..
- عبد الخالق هزهز راسو وتتنهد تنهيدة طويلة : ماعندهاش مع الولاد ؟
- ماجدة : نووو أعمي أصلا هي يلاه 6 شهور باش تزوجات بيه .. وهو كان مريض على ماسمعت كان مامزيان الله يرحمو .. أما هي ماعندهاش ولاد ولكن راه كتحماق على عنبر وتموت عليها لي شافها يقول واش بنتها من دمها ..
- رقية : ايوا فيها الخير لي كتهلا فبنت يتيمة ربي ايجازيها ..
- ماجدة ( وقفات ) : بابا مغاتمشيش لدار ؟
- أدريس ( ببرود ) : اسيري أنت أبنتي انا حتى لغدا ونجي إن شاء الله ..
- ماجدة : تصبحو على خير .. عطاتهم بدار ومشات لدارهم أما هو بقا ݣالس مع العائلة .. مابقاش حامل يدخل لديك دار ولات كتبان ليه بحال شي حفرة مخنوق فيها ..
••••••••••••••••
- فصباح دالغد دخلات من برا سجلات اخر التسجيلات من الفيديو ديالها لي ايتلونصا فلافان ديال شهر 1 .. زولات العباية ديالها بقات غير بواحد التشامير بحال شكل مخور وجمعات راسها بزيف حياتي وݣلسات بإبتسامة :
خالتي سميرة كنشم فريحة الرفيسة
- سميرة ( كضحك من الكوزينة ) : عارفاها عزيزة عليك .. الى ساقت الخبار رجاء طيح بالعظام
- عنبر : علاش واش خايبة ليها ؟ نعيطو ليها تجي تاكلها ولا نمشيو عندها ونديو قصريتنا معانا ..
- تودة خارجة من البيت : لا راه سخونة عليها فيها الحلبة والمساخن .. سونا الباب جات توقف عنبر تحل وقفاتها حياة لي خرجات من الطواليط :
أخاليك أنا غادي نحل .. مشات حلات الباب تسمع صوت خطوات فدروج سبقات حياة وعلى ملامحها الدهشة والاستغراب .. هزات عنبر راسها فيها هي وتودة يلاه ايسولوها شكون حتى بان ليهم عماد وراها ..
- ݣالسين مجموعين فالصالون .. كيشوفو فيه بإستغراب وخوف من طرف تودة .. :
ياك شيباس مكاين اسيدي ، ياكما رجعو دوك رجال تشكاو ولا شيحاجة ؟
- عماد ( لابس سروال دجين كحل مع شوميز وتجاكيط فنفس اللون .. ݣالس بأريحية وتقالة ) : لا الالة مكاين حتى حاجة من هادشي جيت غير ندوي مع عنبر .. وبغيت ندوي معاها الراس فراس
- عنبر : الى غادوي اسي عماد ادوي قدامهم .. مكنخبي والو على عائلتي .. ماما تودة راه فمقام ماما وبنت خالتي مكنخبي عليها والو وحتى خالتي سميرة ..
- عماد ( دوز لسانو وسط فمو وشاف فعنبر بجدية ) : عنبر بغيت نسولك وجاوبيني بصراحة
- عنبر ( بإستفهام) : مرحبا سول !
- عماد : غير هو ماتسولينيش علاش .. حيت فللخر غادي نݣوليك لي كاين ، غير هو هادشي لي غادي نݣول مابغيتوش يخرج من هنا .. ولي عرفو يخليه عندو ومايديعوش .. نرومال هادشي خاص ندوي فيه غير أنا وياك ..
- عنبر : كيف قلت ليك هادو لي هنا راه عائلتي .. مستحيل يبغيو ليا شيحاجة خايبة .. غير دوي
- عماد ( حك حاجبو ورجع شافيها ) : بغيت نعرف كيفاش تعرفتي على راجلك بدر الدين .. بغيتك تعاودي ليا من الأول .. وبلاما تسولي علاش حيت غاتعرفي اتعرفي ..
- عنبر ( بلعات ريقها شافت فمها ورجعات شافت فيه ) : تعرفت عليه فعين الذياب .. كنت انا واحد صاحبتي دايرين كروصة ديال البيبوش .. كنقراو ونفس الوقت خدامات واحد الليلة جا هو وصاحبو خداو البيبوش .. ومن تم ولا كيجي يوميا صافي ولينا كنبغيو بعضياتنا وتزوجنا
- عماد ( هزهز راسو ) : واخا مزيان .. واش درتو شي عرس ولالا ؟
- عنبر : الصراحة لا .. هو مكانش عندو مع العراس وأنا مكانتش نفسيتي تخليني ندير شي عرس .. غير تزوجنا وسافرنا
- عماد : فين سكنتو ؟
- عنبر ( كتجاوب واخا ضرها راسها تعرف شنو واقع ) : سكنا فبلغاريا .. فدار ديال والديه
- عماد ( صغر عينيه غادي معاها دقة دقة .. وكيحاول يعرف كثر ديال المعلومات ) : واخا مزيان .. عاودي ليا كيف كانو كيتعاملو معاك دارهم .. كيف كانت العيشة ديالك معاهم ؟ حاولي تعاودي ليا كولشي ..
- عنبر ( بلعات ريقها وشريط زواجها كيدوز قدام عينيها ) : الصراحة مكانوش كيحملوني باش نكون معاك صريحة .. حيت هوما ناس لاباس عليهم ، ولدهم جايب ليهم وحدة فشهر بغاها تزوج بيها ماتقبلوهاش .. ماعندها عائلة كبيرة وماشي من مقامهم ماتقبلونيش وعمرهم تقبلوني ..
- عماد : حاجة باينة واخا بحال داك النوع كتكون عندهم هاد العقلية حيت كيخافو ..
- عنبر ( جمعات غوباشتها بإستفسار ) : كيفاش كيخافوش ومناش غادي يخافو ؟
- عماد ( تخطى سؤالها ) : وخواتاتو كيفاش كيتعاملو معاك ؟
- عنبر : الصراحة واحد زوجات ظريفات .. عمرهم لحݣوني بشيحاجة شادين تيقارهم .. بيناتنا غير سلام سلام ولكن وحدة خدامة مظيفة طيران .. هاديك مكدويش معايا نهائيا ومكتعمرش الدار لا هي لا والديها
- عماد : بحالاش ؟
- عنبر : انا والله ماعرفت علاش كنجاوبك وانا لدابا مافهمتش علاش كتسول .. ومافهمتش علاش تصاورهم عندكم ؟!
- عماد ( تنهد وشافيها بإبتسامة إطمئنان ) : عنبر أنا عارفك انت وختي ماجدة صحابات ( شاف فحياة وتودة ) وكتجي لعندكم ودايرينها ختكم وعزيزة عليكم ... دابا فنظرك انا انبغي الادية لصاحبت ختي ، وديجا هي لي عطاتني لادريس باش جيت اليوم عندكم .. انا خاصني نعرف شي حوايج مهمين بزاف .. وديك ساع غانݣوليك علاش غير تيقي فيا صافي ؟
- عنبر : واخا المهم كيف قلت ليك ختو مكتعمرش الدار وحتى والديه .. كيغبرو واحد 15 يوم مرات 20 يوم بلاما نشوفوهم .. مثلا كيكونو معانا اليوم غدا مكايصبحوش مكيقولوش لينا راه حنا مسافرين لا يباتو مايصبحو .. والى رجعو كنفيقو كنلقاوهم فوق الطبلة كالسين ..
- عماد ( بتعمق كثر ) : مكتعرفيهمش فين كيمشيو ؟
- عنبر : الصراحة لا .. بدر كان كيقولي راه عندهم مشاريع فإيطاليا وفإسبانيا ومقابلينهم
- عماد : وهو تعامل ديالو كيفاش كان معاك ؟
- عنبر ( بإبتسامة تفكرات المعاملة لي كان كيعاملها ) : كان كيتهلا فيا .. بالحوايج كيساريني وكان كيبغيني ..
- عماد : وخدمتو ؟
- عنبر : فدار كان كيقولي كيبيع ويشري فأي حاجة مستعملة واونيك .. والأغلبية خدمتو أمن دار مكانش كيخرج معايا ديما 24 ساعة على 24
- عماد ( عض على شفايفو كيحك بسنانو على دبانة دلحيتو) : واخا نهار موتو كيفاش تعاملو دارهم معاك ؟
- عنبر ( حدرات راسها وتنهدات تنهيدة طويلة) : حطوليا حوايجي باش جيت .. وكاع لي شراه ليا خلاوه عندهم وعطاوني 50 مليون قالو لي باش تبداي حياتك فالمغرب
- عماد ( هز حجبانو بإستغراب ) : اهاه وهاد الفلوس هوما باش بديتي فالغنا ؟
- حياة ( قاطعاتها ) : لا راجل ماما سرقهم ليها وخسرهم فشيخات وشراب .. هادشي علاش دخلات لهاد الدومين ... عنبر شافت فيها مخرجة عينيها
- حياة : بلاما تشوفي فيا قلت ليه اليكاين ( رجعات شافت فعماد ) أنا ماكرهت كون تشدو داك سعيد بتهمة السرقة يدخل فيها واحد 20 عام دالحبس نتهناو منو ..
- رجع شاف عماد فعنبر وسولها : هادشي لي كاين مانسيتي والو ؟
- عنبر : لي كاين قلتو ليك بالحرف
- عماد هز كاس دالما لي كان قبالتو شرب منو ورجع حطو .. كان الكل على اعصابو كيتسنى ..
- تودة ( بإستفسار) : مازال ماݣلتي لينا والو أوليدي
- عماد ( شافيها ) : لي كاين الالة .. هادي 5 شهور بضبط وحنا خدامين على واحد القضية .. جاونا شكايات من عند عائلات بناتهم غبر ليهم الأثر نهار الثاني لزواجهم .. والمشكل بلي غبرو كاملين بنفس الطريقة ( عاود ليهم ) لحد الساعة جثة وحدة لي لقينا ومحيدين ليها القلب والكلاوي والكبدة
- تودة ( ضربات فالطبلة ) : ياربي سلامة ياربي سلامة .. اعوذ بالله اعوذ بالله واش هادو وحوش لا هادو موحال واش بشار مايمكنش ..
- عماد : وماشي غير هادشي .. المشكل الكبير هو لقينا واحد السيدة ( عاود ليهم على بلان الڤيلا وعلى بلان الداخلة )
- حياة ( ضربات فخاضها ) : اويلي اعوذ بالله من الشيطان الرجيم اش هادشي ؟ ..
- عماد ( شاف فعنبر بجدية ) : واحد السيد كان عندو كلينيك مشبوه وكان تشد .. فاش ستجوبناه ݣال بالحرف بلي لي كيعطيهم لوردر سيمو مصطفى رحمون ..
- عنبر ( حسات بلسانها فشل عليها بلعات ريقها وقلبها كيضرب بجهد يديها بردو عليها فاش سمعات السمية ) : و ولكن هاد هاد السمية راه سمية ديال جد بدر الله يرحمو وماسدت سينين هادي ..
- عماد : عرفت .. براهيم رحمون هو لي قصد
- عنبر : مافهمتش ؟
- عماد ( بجدية كثر ) : عنبر سمعي انا عارف هادشي لي غانݣولؤك قاصح عليك .. وصعيب تقبليه ولكن راه هادشي لي كاين ، راه شحال من واحد كنكونو غالطين فيه .. وكيصدق ميكروب مايسواش ..
- عنبر : دابا غير ݣول هادشي انا راه عرفتو فاش جيت لهاد الأرض السعيدة
- عماد : براهيم رحمون .. داير سميت باه باش يولي يتواصل مع الكراكيز .. باش يعطيهم لوردر لأي حاجة بغاوها ..
- عنبر : دابا ( تنفسات بصعوبة ) بغيتي تݣوليا بلي بات بدر هو مول هاد الفعايل .. هو السبب ديال هاد البنات لي تخطفو وحيدو ليهم الأعضاء ديالهم .. وديال هادشي دالفساد ياك واش متأكد ، لا بلاتي الله يرحم الوالدين ابشوية ..
- عماد : لا ماشي هو لي كيعطي الاوكي ولكن هو الوسيط بين الشاف الكبيرة .. وبين هاد البوكيمونات
- حياة : وراه هي هي وسيط راه بحال الى نيت هو ( شافت فعنبر ) ياك قلت ليك مارتاحيتش لديك ختو لا تكون حتى هي خدمتها ماهياش ..
- عماد ( نقل انظارو بين حياة وبين عنبر ) : علاش مالها ؟
- عنبر ( بإنفعال ) : ماعرفتش .. كاع خواتاتها كيبانو طبيعيين .. حتى ليها هي بحال الى معاودة راسها من نيف وفم وكولشي .. كتجي مكتعطينا وقت مدة قصيرة وتمشي قريبة من والديها بزاف على خواتاتها لوخرين ..
- عماد ( بلع ريقو كيخمم ) : زعمة مايكونش بدر كان فخبارو هادشي وهباه عليك ؟
- عنبر ( سكتات كتفكر .. كانت كلما سولاتو على دارهم كيبدل ليها الهضرة .. فلحظة حسات بسخونية طلعات معاها ويديها كيترعدو صدرها كيطلع وكيهبط شافت فيه بخوف ) : ماعرفتش ؟ زعمة يكون كان عارف وضحك عليا ( شافت فتودة ) زعمة يكون ضحك عليا اماما ومعاودش ليا على دارهم ؟
- تودة : مابقيت عارفة والو ابنيتي .. انا هادشي لي ݣال خلعني والله حتى خلعني
- حياة : داكشي باش دارهم مكانوش باغيينك .. ماشي حيتاش انت ماشي من مقامهم حيت خافو تعرفي شيحاجة عليهم وتفضحيهم .. راه عندك الزهر لي مدارو ليك شيحاجة خايبة
- تودة ( دقات فطبلة ) : شكيكو ياربي السلامة برات الباس
- عنبر ( ضارت بيها الدنيا يديها عرقو ليها والخوف تسلل لقلبها ) : راه عندها الصح .. ربي كون حتى انا قتل*وني وحيدو لي بغاو مني ولاحوني .. جاب الله ولدهم كان كيبغيني اما كون فناوني .. الله ياربي الله ( شافت فمها ) كنت مع المافيا أماما فاطنة أنا راه گالها سعيد راجل خالتي ومتيقتوش انا متعوسة ماعندي زهر ..
- تودة : هداك أخرتو اتكون على يدي أنا ( شافت فعماد لي شافيها تبسم ورجع شاف بجدية فعنبر .. بصوتو الرجولي ) :
مزال كاين شيحاجة خاصك تعرفيها ..
- عنبر ( حيدات الزيف فوق راسها حسات بيه سخن عليها ) :
شنو هو .. هادشي كامل ومزال
- عماد ( كيضرب برجلو بتوتر .. تنهد وشاف فعنبر ) : غير هو تكالماي .. ومتعصبيش ومتوتريش ومديري حتى ردة فعل
- عنبر ( كتشوفيه بشك وخوف .. بللات شفايفها ) : شيحاجة خايبة ياك .. غير ݣول انا راه وليت ضد الصدمات .. شنو كاين الله يرحم الوالدين
- عماد ( شافيهم كيشوفو فيه .. ورجع شافيها ) :
بدر الدين ماماتش مزال عايش ..
- عندما تتحمل شيء فوق طاقتك من الطبيعي ستتغير شخصيتك و نفسيتك من دون أن تشعر أنت بذلك على نفسك .. لا أحد يكرهُ شخصًا كان يحبه، نحن نكره الإستغفال والإنتظـار و الخذلان، خيبات الأمل وعدم الإهتمـام و كل شيء مشابه لذلك .. وخصوصا غدر الحبيب ..
- جمد ليها الما فركابيها كتحس براسها غارقة وسط شي بير .. بحال شي واحد لاحها وباغية تغوت تطلب الناس يعاونوها ولكن حتى واحد مكايسمعها .. وركات على الحاشية ديال السداري مزيرة عليها .. وجاتها الضحكة فمها نشف كتشوفيه وكضحك :
وايلي على مزال حي يهديك الله اخويا عماد .. ولا حتى لهادي لا عاوتاني ولاهيلة قاليك حي ( شافت فمها ) سمعتيه .. تودة كتشوفيها مصدومة مالقات ماتقول هي براسها ماعرفات اش تكول ماعرفات اش هاد الوحلة واش هاد المصايب لي نزلو عليهم دقة وحدة مكانو دايرين ليهم حساب ..
- عماد ( بهدوء ) : عنبر انا عارف هادشي صعيب عليك .. ولكن خاصك تشدي فراسك هادشي راه مافيهش الضحك
- عنبر ( بإنفعال ) : واش انت هبيل واش كتݣوليا بلي راجل لي لبست عليه البيض مزال عايش ؟ واش شوية لاباس شوف كوراه تشابه ليكم ولا الله اعلم .. بظر الدين كون عايش كون وا جا قلب عليا مغاديش يخليني مشوية عليه رجوع الله اسي عماد
- عماد ( جبد التيليفون ديالو .. مشا نيشان ليݣالوري وجبد واحد الڤيديو .. مد ليها التيليفون ) : ياك هدا بدر ولا ماشي هو ؟
- عنبر يديها كانو كيترعدو مقاداش تهز تيليفون وتشدو .. خايفة يكون كلامو بصح خايفة تصدم بلعات ريقها وشدات التيليفون تحت انظارهم .. سميرة مشات بزربة للكوزينة طفات البوطة ورجعات ݣلسات .. طاحو نظراتها على الڤيديو كتحقق ، حبيبها حياتها روح قلبها هكا كانت كتقوليه وكيقوليها .. رجعات بداكرتها لور نفس المشية وتعنيقة لي داير للبنت لي فالڤيديو كان كيدير معاها فاش كانو كيخرجو ويدورو فشوارع بلغاريا .. شحال من مرة باسها فشارع وهي حشمانة :
الــمــــــاضــــي
- عنبر ( حشمانة كضحك ) اويلي أبدر الناس كيشوفو فينا
- بدر ( كيضحك ) : أنت مراتي الحب ديالي الروح وكنموت عليك ( كيغوت حال يديه والناس كيشوفوها ) وكنبغيــــــــــــــــك وكنبغيهـــــــــــــــا أعباد الله ..
- عنبر ( دارت يدها على فمو كتسكتو ) : اويلي شششش ههههه هبيل والله حتى هبيل ..
- بدر : لي كيعرف با يدعيه .. مرتي وكنموت عليها وكنحماق عليها .. جرها معنقها غادي بيها وهي فرحانة كتحس براسها مالكة الدنيا ومافيها ..
الـــــحــــــــاضـــر
- حسات بالماس كيتكوها فقلبها .. يديها كيترعدو ودموع هابطين بحال الحبة من عينيها .. جاتها الهستيرية ديال الضحك .. كضحك بدون انقطاع تودة تخلعات نقزات لحداها محيدة ليها التيليفون كتشوفيه .. حطات يدها على فمها مصدومة شافت فبنتها لي قطعات ليها قلبها :
أيكون اكيشبه ليه أبنتي اكيشبه ليه ماشي هو ..
- عنبر ( كتهزهز براسها بحال الهبيلة ) : هو هو .. لا لا هوهو راجلي راجلي هو .. هو امي هو هو ، لي خليت قرايتي عليه هو هو امي راجلي
- تودة : ضروري متكون شيحاجة ؟ ولكن ماعرفت ( عنقاتها ) صافي أبنيتي صافي الكبيدة صافي ..
- عماد : هادشي كيأزم ولكن راه خاصك تعرفي لي واقع اعنبر
- عنبر ( شافت فيه لداخل محروق كتشوفيه بجسد خالي من روح ) : أش غانعرف .. علاش زعمة مافهمتش ، واش دارو هكاك بلعاني أيكون اخاف عليا من دارهم ( شافت فمها ) ايكون اعرف دارهم خباث ودار راسو مات باش زعمة منتأداش .. ولا يكونو هوما بززو عليه
- عماد : ولكن هو طلقك 3 شهور قبل مايݣولو ليك مات ..
- عنبر هزات راسها فيه .. بحال الى كب ليسانس وشعل فيها العا**فية .. شعور الموت دالوالدين صعيب بزاف وشعور أنك تفقد إنسان غالي عوضك ففترة زمنية حتى هي صعيبة بزاف .. ولكن باش تعرف راسك كنتي مكلخ وكامبو ومكلخ وتعرضتي لأكبر إستغلال على وجه الكرة الأرضية وكاع داكشي لي عشتيه كدبة وحلم .. كتكون خايبة بزاف
- ههههههه ( كضحك بهستيرية ) واش كتفلا عليا .. واش شي واحد محرشك عليا ولا سيفطك ليا واحد فجوج ( وقفات كتغوت ) كيفاش طلقني كيفاش ، بغيت تقول 3 شهور وانا عايشة معاه فالحرام وهو مطلقني كيفاش طلقني وانا ماسنيت لا على ورقة لا على جوج ..
- عماد ( ببرود وهدوء ) : متأكدة عمرك سنيتي على شي ورقة أعنبر .. راه يݣد غير بالإمضاء ديالك يطلقك ومتدي متجيبي ؟
- عنبر صدرها كيطلع وينزل .. كتفكر تفكرات نهار جا لعندها حط ليها واحد 4 الورقات قدامها :
حبيبة سني ليا على هاد الوريقات ، بغيت نفتح ليك كونط فالبنكة
- عنبر : أش بغيت انا بشي كونط حتى أنت
- بدر : لا أحبيبي ضروري .. مد ليها الستيلو سنات ، باسها فمها وخرج من بيت النعاس ... فيقها من هاد الذكرى السرجم لي تحل بريح وشوطة ديال الشتا لي كتصب ..
- ناضت سميرة سداتو ورجعات ݣلسات .. حياة كتشوف فعنبر ضرها قلبها من جهتها .. كتشوف حالتها رجعات حالة ولات بحال الهبيلة .. هزات عنبر راسها فعماد ونطقات بشوية :
انا دابا حمارة ( كضحك ) ولاهيلة انا انا حمارة ( شافت فمها ) شتي شحال انا مكلخة جاب ليا الوراق قاليك سني نحل ليك كونط فالبنك ( كضحك ميتة بضحك ودموعها نازلين وشعرها نازل على وجها حالتها ولات حالة ..( شافت فمها ) :
فرحي يلالة وسعدي يلالة وبنتك مكلخة .. وبنتك لي ربيتي كانت عايشة الحرام 3 يام ( بدات ضرب فخاضها ) هاي هاي على عنبر النخوة على الخوى طلقها وعايش معاها فالحرام .. ( بدات تجدب وتنتف فراسها وتغوت ربي لي خلقها .. وقفات تودة كتعنقها وتصبر فيها و تبكي لبكاها ) :
لا ابنتي لا لا احبيبي لا استغفر الله العظيم ، حياة جيبي الريحة سربي ..
- اخيب إحساسك ممكن تكون تعرضات ليه هو هذا .. كتسول راسها شنو ذنبها علاش هي علاش هي لي يوقع ليها هادشي .. علاش يستغلها ويعيشها الحب مدة 5 سنين ويطلقها وهو عايش معاها .. كتفركل فيدين مها ، جات حياة هازة فيديها الريحة .. ضرباتها ليها لاحتها :
ومتبردونيش متبردونيش .. ( شافت فحياة ) حياة حياة ( كضحك ) عقلتي اختي قطعت شعري شعري الطويل وزوين قطعتو على قبلو عقلتي كيجيت عقلتي ( شافت فتودة ) ماما فاطنة مشيت نحماق والله فاش مات مشيت نحماق ( شافت فعماد ) واش فخبارك 6 شهور وانا حازنة وعايشة فإكتئاب والله .. بسباب الاكتئاب ضحك عليا راجل خالتي ودا لي 50 مليون شاطت منها 80 ألف ريال هي لي سرقو ليا فاش جيت لكازا .. ( شافت فيهم كاملين وتودة غير كتبكي ماعرفات متقول ) وعباد الله وراه دفنت راسي على قبلو .. عمري شفت فشي حد ولا هزيت فيه العين اعباد الله وعمري كنت ناوية نتزوج ولا يجي شي حد فبلاصتو ..
- وشعري كان طويل وزين وقطعتو بمسبتو حيت كان كيعجبو شعري طويل والله .. كان كيتوسدو والله العظيم مكنكذب عليكم ( شافت فمها ) والله حتى كان كيتوسدو وقطعتو حيت كيفكرني بيه .. وهو ضحك عليا امي ضحك عليا ( شافت فحياة ) كان سعيد كيقوليا انت منحوسة قتل**تي والديك وتبعتيهم راجلك ( ضحكات ) خاص نسوني ليه نقوليه راجلي لا طليقي ههههه راه كاعما مات عايش كيتبورض مع العيالات وانا دافنة راسي ولاهيلة ..
- تودة ( كتحاول تݣلسها ) : صافي اكبدتي صافي براكة عليك .. براكة عليك الله يري عليك ..
- عنبر ( نطرات يدها ) : أبلات أبلات اصبرو بعدو مني هالعار ( كتغوت ) وهالعار .. خرجات فطبلة قلباتها ومشات كتجري نزلات مع دروج بديك الحالة .. تودة كتجري كتعيط وحياة تابعاها ، عماد ناض وقف بغا ينزل مع دروج عكلوه تودة وحياة ..
- فتحات باب الدار الشتا خيط من السما والريح .. محاساش بيهم عينيها معميين مكاتشوفش قبالتها نهائيا .. قطعات الشانطي بداك التشامير وشعرها مطلوق وصندالة الميكة فرجليها مع التقاشر بيضين .. شيرات لطاكسي وقف ليها ركبات وديمارا مخلياهم كيعيطو وراها باحين عقلهم بغا يخرج ..
- مول طاكسي كيشوفيها .. حالتها مكانتش كطمن جمعات شعرها بجهالة بلا باندة بلا والو .. وجهو مافيه حتى تعبير كتحس براسها خاوية لدرجة ماسمعاتش شنو كان كيقوليها مول طاكسي .. شافت فيه بإستفسار :
أش قلتي اسيدي ؟
- مول طاكسي : فين غادية ؟
- عنبر : ديني عفاك للبحر ديني جيهت الجرف الله يرحم الوالدين .. مول طاكسي كيشوفيها بشك ، حرك راسو وشد الطريق للوجهة لي عطاتو ..
_______________
- ݣالسة تودة فوق السداري كتبكي وتخبط ففخضها : والله على بنتي والله على بنتي فين مشات وفين عطات الراس ( شافت فحياة جايا ) أمضرا ؟
- حياة : رشيد مامشاتش عندو كاع .. وحتى عزيز واصلا مداتش تيليفونها ولا فلوس .. حتى طاكسي لي ركبات علم الله باش اتخلصو .. خرجات سميرة من كوزينة هازة كاس دالما فيه السكر مداتو لتودة :
هاكي أختي شربي دابا تجي .. راه لي سمعاتو مسيكينة صعيب راه مساهلاش مسيكينة
- تودة ( هزات يديها ) : انا بغيت ليه مصيبة تصيبو فالعظام تفرق ليه جلدة على العظم .. كيما ضحك ليا على بنتي ونغصها فحياتو بغيتو يهزوه مرابعة للقبر
- حياة : راه رشيد خرج يقلب عليها .. وكالها حتى لعزيز يكون خير ياربي يكون خير .. تودة مابغاتش تسكت من البكا قلبها مشوي على بنتها ونارو شاعلة مابغات تهدى ..
****** فجهة أخرى نزلها فالبلاصة فين قالت ليه .. هزات راسها كتشوف فين كانو .. عاد عرفات بلي ماخرجاتش بالفلوس ، شافت فالخاتم لي فصبعها الخاتم لي عمرها حيداتو من نهار خداه ليها وهو فيدها.. حيداتو مداتو ليه :
نسيتي اسيدي الفلوس ، هدا راه خاتم ديال الذهب خودو بيعو حلال عليك
- مول طاكسي : لا ابنتي اشديه .. الله يكون معاك ، تبسمات وحطاتو ليه قدامو :
ماعندي مندير بيه اعمي حلال عليك بيعو وفلوسو فرح بيه وليداتك .. خرجات من طاكسي كتشوف قدامها ، غادية بحال شي حمقة وسط داك الجرف نازلة الشتا لي خفافت كضرب فوجها وريح كيلعب بشعرها .. نازلة دوك الحجر مرة تعكل حتى كتبغي طيح حتى وصلات لرملة توجهات نيشان لقبالة البحر واقفة وماجو كيضربو ليها فصندالة متغلغلين لتقاشرها ..
- سترجعات جميع دكرياتها معاه حبها ليه .. كلامو ليها كيفاش كان كيتعامل معاها كاع لي دوزوه سترجعاتو دموعها نازلين سخان مع الشتا لي كتصب على وجها وشعرها لي فزݣ .. ولات بحال جرتيلة ، تنهدات تنهيدة طويلة غادية بخطوات بطيئة شوية بشوية كتقرب من البحر كثر وكثر عقلها غايب .. كانت محتاجة دير هاد الخطوة تطفي الجمرة شاعلة فقلبها محتاجة تخرج وتبرد وتغوت .. كتحس براسها مخنوقة وممكن دير شيحاجة لي تندم عليها فاللحظة سهوة منها حسات بيد قوية جراتها من يدها غادية بيها لجهة الرملة مفيقاها من سهوتها .. هزات فيه عينيها كان شخص لابس سروال كيطمة كحلة وسبرديلة مع قبية ديال الميكة داير القب ديالها كان باين من المظهر ديالو كيدير الرياضة فداك الجو وفديك الشتا ..
- ( بصوت رجولي ، كيحقق فملامحها عاݣد غوباشتو وملامح وجهو ظاهر عليهم بلي كان متفاجيء ) علاش ناوية هبلتي ؟
- عنبر (نطرات دراها من يدو ) : مغاديش نت*احر حتى واحد مايستاهل نق*تل راسي ونغضب ربي على ودو واش اخويا انت شغلك
- وعلاش كتي ناوية ؟ غادية بحوايجك وصندالتك دالميكة حالتك تعطي الخبار ، عندك الزهر لي جريتك واش ماشتيش البحر باغي ياكل جنابو ..
- عنبر ( ببرود كتحس براسها جسد بلا روح ) : كيما انت كدير سبور فشتا كنت بغيت نعوم .. وهاد المرة تعلم دخل سوق جواك .. هز حاجب ونزل الثاني محيد القب ، شعرو فازݣ وملامح وجهو حادين وسيم وسامة رجولية قات*لة ..
- اهاه مفزݣ سبرديلتي على ود وحدة ماعندهاش ݣرام ديال العقل ..
- عنبر ( كتحقق فيه فملامحو بنفس البرود والصوت المهرس نطقات بإستفهام ) : ماشي أنت هو خو ماجدة ؟
- فصالون الكبير ݣالسة دايرة رجل على رجل .. لابسة كيطمة سخونة مع بانطوفة فرجليها .. شعرها جامعاه بقراصة دايرة نظاظر ديال الشوف .. هازة التيليفون ديالها وكتدوي والابتسامة على وجها
- خديجة ( ضحكات ) : إيوا صافي خلاص عليا أشمن عرس يهديك الله حالتو وأيامو .. ( سكتات كتسمع لكلام لي السيدة لي معاها فتيليفون ) شتي لي عروبي كيبقى عروبي أماشيغي .. واخا يكون عندو مال الدنيا كلها دوقو كيبقى هابط .. ( جاها الرد من الجهة لوخرا ديال الاتصال ) ..
- ويلي الناس كيجيبو الداودي يجيبو بناني ولا طهور لاكلاص .. ماشي جايبين ليا الشيخات الشوهة الحمد لله لي مكانتش الصحافة .. كون وا ضربات ليهم الطر بالبندير ( ضحكات بصوت عالي )
- ماشي زين ازين ديالي راه غير بان ليك هكاك فتصاور .. كترت المكياج واخا هكاك جات عادية فالعرس ، البنات الحادݣات كيضبرو على الرجال فالعشرينات مايبقاوشاي حتى تولي عندها 35 عام
- ( جاها الرد ) : ولكن الحبيبة هادشي ديال الله والمكاتيب .. السن مافيه حتى مشكيل ، هاهي رجوى تزوحات عندها 36 عام
- خديجة ( كتلعب برجلها ) : يهديك الله خلاص عليا .. أش جاب رجوى لياسمين رجوى تبارك الله بنت القاع والباع والف واحد يتمناها .. أما ياسمين تحمد الله وتشكرو لقات لي يقبل عليها .. واش كاين شي واحد يبغي يتزوج بوحدة سمحات فيها مها ( سمعات الرد وتنهدات ) دابا تشوفي ديك الفلفلة الحالة ديال دنيا واش ايديها فيها شي حد هي بلا والو لسانها مبري منها .. ( وقفات مقابلة مع السرجم ) شوفي انا مكايهمني حد من غير ولادي يكذب عليك الكاذب .. أصلا ندمت قد الزغب لي فراسي نهار مافرتكتهاش وتزوجت بصاحب خويا كوراه الخدم عليا كينغلو .. كل مرة راني فبلاد
- ولكن راه وليداتك يقدو يسيفطوك فينما بغيتي أخديجة ولالا ؟
- خديجة : وي بطبيعة الحال .. حبيبي فاروق الى بغيت نمشي لشي بلاصة مايخسرهاش فوجهي ، ولكن واش انا مزوجة بولادي أصاحبتي خلاص عليا .. الراجل لي خاص يكون منو الكاينة بحالي خاصها تكون تسارات كاع مدن العالم .. وعندها يخت ديالها خاص والخدامات وزيد وزيد اودي خليني ساكتة ( ضحكات ) واخا زين ديالي بسلامة حتى لمن بعد ونتشاوفو .. قطعات الإتصال متنهدة ساهية
- كنت كنݣول النعل الشيطان ( ضارت بزربة مخلوعة ومتفاجئة ) ولكن مكاين شي شيطان ݣد بنادم
- خديجة ( بلعات ريقها ) : عمرك كنتي كتسنط ورا البيبان
- أدريس ( بنفس البرود ) : وقيلة هادي راها داري .. وناري مكتهديش مكتساليش انت هي انت الفشور على الخوا الخاوي .. بلا حشمة بلا حيا تعايري فالبنات مدارو ليك والو .. مابغيتيش تبدلي عاجبك راسك كتي كتݣولي راه ندمتي ؟ قسما برب العزة مكاين شي حد لي نادم ݣدي انا .. ندمت على نهار لي عرفت وتزوجت وحدة بحالك كايحسابلي درويشة وكتبغيني ساعة انت مريضة وخاصك داواي
- خديجة ( كضحك بنرفزة ) : انا نيت مريضة حيت رضيت بالهم والهم مارضى بيا
- أدريس : غادي نطلع نجمع حوايجي .. غادي تبقاي فهاد الدار حتى تاخدي براتك .. وديك الساع الى بغيتي سيري لدار لي شريت ليك ( ورك على الكلمة ) وكتبت ليك بسميتك عقلتي عليها الدار لي اول مابعت الأرض ديال مولاي بوسلهام شريت ليك الدار .. كان خاصني نشري ليك قصر باش ترضاي
- خديجة ( تزاد معاها الزايد ) : اشمن ورقة فالوراقي ؟
- أدريس : ورقة طلاقك .. حيت راه مابقات بيناتنا عشرة ابنت الناس ، الولاد راهم كبرو وكل واحد فيهم دار حياتو .. أنا وانت مابقات حاجة تجمعنا الله يعاونا ويعاونك .. خلاها واقفة وطلع لفوق
- خديجة ( كتغوت ) : باغي طلقني حسي مسي ، والله لا كانت ليه والله حتى تندم على نهار فاش تزاديتي .. انا غادي نوريك خديجة اش كتسوى وتعرف راسك معامن .. يحسابليك اتخلعني بطلاق الما وشطابة حتى لقاع البحر .. رضيت بيك وبعائلتك اتريمة العروبية تريكة جلافاش
- ماجدة كانت واقفة الفوق سمعات كولشي .. نزلو دموعها سخان حدرات راسها ودخلات للبيتها لقات تيليفونها كيسوني كان عماد ..
وي خويا .. ( مسحات دموعها ) لا ماجاتش عندي وماسوناتش ليا .. علاش واخا انا غادي نمشي لعندهم .. ، هزات ساكها دارتو على جنب لاحت مونطو عليها ودارت بيرية لبسات ليبوط ديالها هزات بزطامها وتيليفون دارتهم فساك توجهات للبيت ديال باها .. لقاتو كيجمع فحوايجو هز فيها راسو وتنهد ..
- أدريس : هذا هو الحد أبنتي .. منين توصل للمعيور وتعايل عائلتي وخويا وبناتو وتعايرني مابقات عيشة ..
- ماجدة : سمعت النص ديال الهضرة .. ( عنقاتو) بابا انا كنبغيك ومعاك فاي قرار غادي تاخدو كنشوفو كولشي بعينينا .. ماما مابغاتش تبدل وعمرها مغادي تبدل حيت مكايتبدل غير لي كيعتارف بالغلط ديالو .. اما لي عند بالو مغالطش عمرو يتبدل
- أدريس : الله يرضي عليك .. بغيت نعيش مرتاح فهادشي لي بقى ليا فحياتي .. الله يهنينا ويهنيها هذا الله ابنتي ماديريش فبالك ركزي على مشروعك وعلى حياتك حنا دوزنا حياتنا انتوما لي مزال الطريق قدامكم ..
- ماجدة : انا غانمشي لدار ديال عنبر ، قالي عماد كان عندهم فدار ماعرفت لاش مشا وشنو السباب ولكن قالي بلي خرجات فهاد الشتا بحوايج دار طجات .. انمشي نعرف اش واقع
- أدريس ( غوبش ) : واخا سيري الى كانت شيحاجة ݣوليها ليا
- ماجدة : واخا ( باستو وخرجات ) .. نزلات مع الدروج بلا حس مافيها لي يتغاوت مع مها لي فيها كافيها .. فتحات الباب بشوية وخرجات ، وقفات فشانطي هزات تيليفونها سونات لعزيز :
ماجدة : وي عزيز فين كاين ؟ وراه داكشي لي فراسي بغيت نمشي للعندهم لدار .. واخا انا نتسناك صافي بسلامة ..
- الروطال ( بنفس الملامح وصوت الرجولي ) : وي هو هذا
- عنبر ( تنهدات تنهيدة طويلة) : خوك ݣبيل وانت دابا .. الله يرحم بيها الوالدين واخا تمشي بحالك ، واش هو لي مسيفطك
- الروطال : ماعندي مايدار يسيفطني مسالي قبي انا .. ( شاف فالانحاء ) كيعجبني نجري هنا
- عنبر ( شافت فيه بدبول ) : فهاد الجو؟
- الروطال : كيما انت باغية تعومي فالبحر فهاد الجو .. حتى انا عندي عادة نجري فهاد الجو
- عنبر ( شافت قدامها ) : بغيت نعوم بغيت نطفي العافية لي شاعلة فيا .. حرمتيها عليا اعباد الله خليني يضربوني غير الماج نرتاح ..
- الروطال : كو تي فشي قونت خور عومي كيما بغيتي .. هاد البلاصة خطار اشريفة اتريسكي ، البحر بغا ياكل جنابو .. تمي داخلة وماعقلاش حتى لقاي راسك غرقتي
- عنبر ( شافت ليه فعينيه بعينيها البنية لي كيشبهو لحبة القهوة فلونهم ، تبسمات ببرود ) : غير نغرق أنا اصلا غراقت ولي عطا الله عطاه ..
- الروطال ( تقابل مع البحر ) : كلنا كيجي وقت وكنغرقو ( ببحة رجولية مميزة ) ولكن العيب الى غرقنا وماعرفناش كيفاش نطلعو .. العيب الى طحنا وماعرفناش كيفاش نوقفو هذا هو العيب
- عنبر ( كتشوف فالفراغ ودموعها هابطين ) : أخيب حاجة ممكن توقع ليك .. هي تعرف راسك كنتي عايش فأكبر كذبة 5 سنين كلها دازت كذوب فكذوب .. ( شافت فيه ) انا كنت هانية كنت بنت كتقرا كتبيع البيبوش كنحاول نسى موت والديا ونكمل قرايتي .. كان بقى ليا شوية ونكمل قرايتي ( ضحكات ) جا واحد يقلب ليك حياتك وهمك بالحب خلاك تخلي قرايتك وبلادك وتمشي معاه فالاخر تعرفي بلي داروهم من المافيا وهو كان عارف ، وطلقك ب 3 شهور وخلاك عايشة معاه .. وفالاخر يوهموك بموتو .. تعيشي 6 شهور فإكتئاب عليه وهادشي كامل تلقايه كذوب فكذوب داخلت عليك بوجه الله واش كاين ماصعب من هادشي ..
- الروطال ( هزهز راسو ) : كاين ماصعب .. دوري اعلى سبيطارات ديال القصور الكلوي وشوفي الناس كل سيمانة كيديرو تصفية مساكن وماعندهمش .. بغاو أصحتهم .. وليدات مراض بسرطان صغار ماعندهمش باش يديرو الكيماوي .. باغيين غير صحتهم .. وغيرهم فغيرهم فغيرهم مدامك كتمشي مافيك حتى مرض كتعالجيه مزال ضايرين بيك ناس كيبغيوك راك فنعمة شي حاجة خرى والله ماتستاهل ..
- عنبر ( شافت فيه ماسحة دموعها ) : قلبي محروق عارفة هادشي لي كتقول عندك فيه الصح .. ولكن علاش يدير فيا هكا شنو بغا عندي ؟
- الروطال ( ببرود قا**تل ) : الضربة لي كتقصح كتقوي .. ياك لݣيتيه عايش وجاتك خبارو عايش ، فدي ضربتك ودقتك ورضيها ليه بضوبل
- عنبر ( بقات ساهية فكلامو وفيه ) : بحالاش ؟
- الروطال : عطا الله مايدار .. يرجع ليك مجاجك وترتاحي وتعرفي بلي حتى واحد مايستاهل تبكي على جدو .. اتعرفي كيفاش ترضي دقتك
- عنبر ( مسحات دموعها بظهر يدها ساهية حتى بنات إبتسامة باردة على شفايفها .. شافت فيه ) : كنقسم ليك برب العزة حتى غادي نخليه يحفر القبر لي ضحكو عليا بيه بيدو .. ويدفن راسو فيه الى مادرتهاش مانتسماش انا عنبر .. ( سكتات ورجعات شافت فيه ) شكرا بزاف
- الروطال ( مجاوبهاش على شكر ديالها ) : شنو كتمناي ديري فهاد اللحظة ؟
- عنبر ( شافت بعيد ) : ماكرهتش نغوت على حر جهدي .. بغيت انبرد والله
- الروطال ( شافيها ) : وشنو خور .. شيحاجة كتمناي ديريها عمرك درتيها ؟
- عنبر ( سهات كتفكر وتبسمات ) : نمشي لشي بواط نشطح حتى نشبع ( شافت فيه كيشوفيها ) حياتي كلها كنقول كيدايرين ليبواط من الداخل عمري شفت داك الهيت منديرش حاجة خايبة اهو عمري دخلت وشفت كنت كنشوفهم غير فالافلام المغربية
- الروطال ( خاشي يديه فجياب تجاكيط ) : بحالي عمري كليت الكرعين .. باغي نعرف مداقهم كيداير
- عنبر ( شافت فيه جاب ليها الضحكة ) : وايلي على عمرك كليتيهم واش بصح ؟ ولا بغيتي اتوريني بلي شحال من حاجة كنكونو باغيين نكتاشفوها ومكنقدوش
- الروطال : داوي معاك بصح ( حك نيفو ) عندك هو والراس مبخر
- عنبر ( تنهدات بالعة ريقها ) : شكرا بزاف والله .. سمحليا شديتك معايا الى بغيتي تمشي غير سير ..
- الروطال ( شافيها ) : ياك ݣلتي باغة تمشي تردحي ؟
- عنبر ( شافت فيه ) : بمعنى كيفاش ؟
- الروطال ( عطاها بظهر ) : أجي .. وقفات كتشوفيه بإستغراب
- الروطال ( وقف ضار شافيها بإستفسار ) : اتبقاي واقفة جامدة تم بحال تمتال الحرية ؟ دوينا يمكن ..
عطاها بظهر غادي تبعاتو غادية وراه رجل فيها صندالة ورجل فيها غير التقشيرة .. كانت مشات صندالتها داها الما .. هازة على التحتية ديالها الكولون باين وغادية تابعاه رجلها كتغرق فرملة نرة مرة .. الشتا سحات بقات غير الضبابة ، تابعاه مدة حتى لأخر ديال الجرف طلع وخلاها الطلع بوحدها بلاما يعاونها .. وقفات كتنهج وكتشوفيه تعصبات علات صوتها :
مد ليا ايدك بعدا نطلع مع هاد الجرف وانت مشيتي مخليني مافهمتش ؟
- الروطال ( وقف عند طوموبيلتو غير طوموبيل لي كان راكب فالعرس من نوع نيسان فالكحل دوبل ڤي ، حل الباب ديالها محيد تجاكيط الفازݣة لبس وحدة اخرى ناشفة .. شاف لعندها ببرود ) :
فاش هبطي عاونك شي حد ؟
- عنبر : لا هبط بوحدي
- الروطال ( سد تجاكيط داير القب ) : ايوا مالك دابا متي ؟ ( كان بإمكانو يعاونها ولكن هو اكسپري دار ليها هكا حتى عقلها الباطني يجيري الطلعة والعيا وينسى لي واقع معاها ولا الحرقة لي فقلبها )
- عنبر ( توجهات لقبالتو وقفات قدامو ) : واش انت شوية ڤيو واقيلة كيبان ليا بسيكوباط
- الروطال ( هز حجبانو بكل برود ) : يمكن .. عطاها بظهر غادي للجهة ديالو ..
- عنبر : اجي شنو سميتك بعدا ؟ مجاتش نبقى نعيط ليك اهي .. ، حل ليها الباب شافيها مأشر للكرسي :
طلعي وسدي الباب وديري السمطة ( شاف فرجليها ) حسن تحيدي دوك تقاشر لوحيهم
- عنبر ( شافت فرجليها لي ولات حالتهم حالة ) : واش نبقى حفيانة ؟
- الروطال : انت حفيانة حفيانة .. كيف كيف ويلاه الله يرضي عليك ماعنديش الوقت
- عنبر ( حيدات شعرها من على وجها ) : كاعلا يكون اخويا سير بحالك الى بغيتي
- الروطال ( حك لحيتو ) : بلاما ديري فيها تقلقتي .. حيدي دوك تقاشر وزيدي .. بقات واقفة ساكتة ، تنهدات تنهيدة طويلة كانت عيانة نفسيا مافيها لي يبقى تناقش .. حيدات تقاشر لاحتهم وخلات حتى ديك صندالة سمحات فيها وطلعات سادة الباب ، خدم الشوفاج مديماري الطوموبيل .. دورات عينيها فوسط الطوموبيل كاتبان جديدة فكل قنت من قنات الطوموبيل عجباتها وبهراتها .. ريحتو الرجولية لي كانت كتعطي منو كانت فطوموبيل ، فيقها من سهوتها بصوتو التقيل :
هزي واحد القبية اللور لبسيها ..
- ݣالسين فدار مجموعين رشيد وعزيز معاهم وماجدة .. رشيد وعزيز ساهيين فالكلام لي عاودات ليهم حياة .. عزيز نفاعل وقف :
هاد ولد الك*ب خاص لي يدفنو وهو حي
- تودة ( عاكفة راسها بزيف حياتي غير كتبكي ) : انا دابا بغيت غير بنتي اعباد الله .. فين اتكون عطات الراس لا تيليفون لا فلوس بحوايج الدار والبرك وشتياني هادي
- رشيد ( وقف ) : ماخليت فين قلبت مالقيتهاش .. المشكل ماعندها حتى شي حد كتعرفو لي تصد لعندو ..
- عزيز ( بإنفعال ) : انا غانمشي نشوف نقلب عليها زنقة بزنقة مغانبقاش مكتف يدي كنتسنى هنا
- تودة ( هزات فيه عينيها الحمرين بدموع ) : الله يرضي عليك اولدي الله يسهل عليك
- ماجدة ( وقفات هازة ساكها ) : انمشي معاك نقلبو بجوج .. مجاوبهاش نزل مع دروج وهي تابعاه ، طلع للطاكسي وطلعات حداها ديمارا مكسيري راش الما لي فالأرض على تريطوار ..
_______________
- سدات القبية لي عطاها كانت كبيرة عليها .. رجعات ضارت كتشوف بزاف الحوايج فوق الكرسي .. شافت فيه بفضول :
واش كتبات فطوموبيل ؟
- الروطال ( عينيه على الطريق ) : لا ولكن كنبدل بزاف .. مكانرتاحش فالحوايج الكلاص
- عنبر : اه فهمتك ..
- الروطال : فاروق
- عنبر ( شافت فيه بإستفهام ) : مافهمتش ؟
- الروطال ( مازعزعش عينيه على الطريق ) : سولتيني على سميتي ݣلت ليك فاروق
- عنبر : اه مشرفين وانا عنبر
- الروطال ( بنفس الملامح ) : فخباري ... بقات كتشوفيه ، حتى وقف قدام واحد المحال ديال السبابط ..
- الروطال ( طفا الطوموبيل محيد السمطة .. شافيها ) : خاصك شي بوتيو تلبسيه البرد هذا وشتا .. عاد ندوزو تاخدي شيحاجة تلبسيها
- عنبر ( شافت قدامها ) : غير صندالة دالميكة كافياني .. الحوايج مابغيتهمش اصلا مع شوفاج بديت كنشف أخليني
- الروطال ( هز كتافو بعدم مبالاة ) : لي عجبك .. شحال كتلبسي فرجليك ؟
- عنبر : 38 .. ماعطاهاش الفرصة تزيد تهضر نزل من طوموبيل ساد الباب بجهد .. تبعاتو رالعين حتى دخل للمحال ، بقا فيه واحد المدة وخرج هاز ساشي فيديه .. حل الباب ومدو ليها
- الروطال : هاكي لبسي .. شدات عندو الساشي بتردد لقات فيه بوتيو طالع شوية جلد فالكحل زوين .. لبساتو جا قدها هزات راسها فيه ونطقات بصوت مرتعش :
شكرا بزاف .. حتى تقوليا شحال ثمنو ونخلصو ليك
- الروطال ( هز حاجب ونزل الثاني كيدير السمطة ) : فيك الجوع ؟
- عنبر ( تفكرات الرفيسة ) : كنا دايرين الرفيسة ، كنت مشهياها كاعما كليتها
- الروطال : نمشيو نتغداو هو الأول .. ديمارا الطوموبيل شاد الطريق ، بنص عين كتشوفيه جاها فشكل .. ماشي بحال عماد وماشي بحال ماجدة جاها مسيطر ماعندوش مع تخرشيش .. ولا مع الحزارة مكايعطيكش فرصة حتى تدوي كيدير لي ݣالها ليه راسو ..
- الروطال ( خدم الموسيقى وبضبط العيطة ديال نسيم حداد ) : مكنبغيش نضيع الوقت فشد ليا نقطع ليك ..
- عنبر ( بإستغراب) : كيفاش ؟
- الروطال : كتݣولي مع راسك مال هذا مدايرش بحال ختو وخوه ياك ؟
- عنبر ( صغرات عينيها) : باش عرفتيني كنعرف خوك ؟ ݣالها ليك ياك ؟
- الروطال ( ضار على الرومبوا حتى ضارت مع طوموبيل ) : شنو عندو مايݣول ؟
- عنبر : باش عرفتيني كنعرف خوك ؟
- الروطال : ياك دمغتي السيد لراسو .. وكنتي فالكوميسارية ، ضروري غانعرف ( شافيها ) لي كانت معاك ختي يمكن ..
- عنبر ( تنهدات ) : ماشي مشكيل .. ولكن باش عرفتي بلي كنت كنفكر بلي انت وخوتك مكاتشابهوش ؟
- الروطال ( عوج فمو) : حسيت وصافي .. فايت مشيتي لسوق جميعة ؟
- عنبر ( حركات راسها بلا ) : لا عمري مشيت ليه ، شحال من بلاصة مامشيتش ليها هنا شنو فيه ؟
- الروطال : نوصلو وتشوفي شنو فيه ..
- ݣالسة حدا واحد الݣزار .. بتشامير ديالها والقبية ديالو غاطية فيها شعرها مطلوق مشعكك .. جر الكرسي وݣلس حداها محيد واحد البراسلي ديال البلاستيك بلون الصفر مكتوب بالإنجليزية من يدو مادو ليها :
هاكي جمعي بيه شعرك .. شافت فيه وفيدو بتردد ، بلعات ريقها وخداتو من عندو جمعات شعرها سفنجة دايرة القب من فوق راسها ..
- عنبر ( بتردد ) : نقد ناخود تيليفون ديالك ، بغيت نسوني لدار حيت خليتهم فحالة خايبة ايكونو مشوشين عليا .. ، جبد التيليفون ديالو ليكان من نوع Samsung s25 ultra فرمادي فتحو ومدو ليها .. هزاتو فيديها ورجعات شافت فيه ، ركبات نمرة ديال عزيز هي الوحيدة لي حافظة ..
_________________
- فجهة اخرى سايݣ بلا عقل عينيه مع الطريق ومع الزناقي مارابانا تبان ليه .. بدا تيليفون كيسوني شاف لشاشة بانت ليه نمرة غريبة مامسجلاش .. فتح الخط داير مكبر الصوت :
ألو ؟
- عنبر : ألو عزيز
- عزيز ( تفاجئ قلبو كيضرب ف 90 ) : عنبر فينك اختي فين شوشتينا عليك .. خالتي تودة غاتحماق كولشي كيقلب بحال المسطي
- عنبر ( بصوت هادئ عيان ) : عزيز سمعني .. انا بيخير أخويا قوليهم راه ماواقع والو
- عزيز ( حبس طاكسي وماجدة معاه ) : وغير ݣولي ليا فين انت نجي نجيبك ..
- عنبر : عزيز بغيت نبقى بوحدي الله يرحم بيها الوالدين .. انا ىاه بيخير وغير قول لماما فاطنة بلي انا بيخير وعلى خير ، وغير رتاحو راه انا ماشي هبيلة ندير شيحاجة فراسي ونضيع راسي على المكاريب ..
- ماجدة : ياك انت مزيانة مخاصك والو ( بإطمئنان ) ؟
- عنبر ( تنهدات تنهيدة طويلة) : ماتخافيش أماجدة انا بيخير وعلى خير قوليها لماما فاطنة وخالتي سميرة وحياة .. انا بغيت أنبقى بوحدي فهاد الوقيتة مابغيتش نبقى نعاود ونتسول صافي ، غير نولي مزيان راه نرجع لدار .. ( قطعات )
- عزيز ( كيشوف فشاشة ) : قطعات ، اتحمقنا صافي فين كاينة ومعامن وشكون عطاها تدوي ؟
- ماجدة ( كتحل فسرجم يدخل الهوى ) انا فاهماها اعزيز فهاد الوقت اتبغي تبقى بوحدها .. وكون مكانتش بيخير راه مغاديش تسوني نهائيا .. خليها ترتاح لي سمعاتو راه ماشي ساهل
- عزيز ( بعصبية ) : انا بغيت هاد الكيدار يكون ݣدامي اقسم لك بالله .. العصب ديال رجليه نݣطعهم ليه نخليه زحاف
- ماجدة : سير لدار دابا باش نقولوها ليهم مايبقاوش مشوشين ..
_______________
- تحط قدامهم طبسيل عامر بالكبدة واللحم مشوي والكفتة .. مع الخبز والكامون وسودانية والملح ، ماتسناتوش ولا عطاتو وقت باش يقوليها تاكل .. دارت شرع يديها .. كتدردر الملح والكامون وتاكل مع راسها ، جاب ليهم الصينية فيها 3 الكيسان وبراد ديال أتاي ونعناع ..
- هزات داك البراد حلاتو دارت فيه النعناع او السكر كتقلب فيه تحت أنظارو مكايحركش راسو غير عينيه لي كيتحركو .. غاديين معاها وجايين معاها ، حطات ليها كاس وحطات ليه كاس شافت فيه لقاتو مزال مامس والو :
كول قبل لا يبرد .. الحاجة الى مشات حتى بردات كتبسال ..
- هزهز ليها راسو ، هز من داك الكاس شربو وبدا كياكل حتى هو بدورو .. كلات حتى شبعات تݣرعات ورجعات اللور واقفة :
أنمشي نغسل يديا .. عطاتو بظهر كيشوفيها بنص عين .. غسلات يديها ومسحات فمها ورجعات عندو شافتو وقف :
واش براكة عليك ؟
- الروطال : الله يجعل البركة .. هزات كاع لي شاط وبدات كتعيط :
بش بش بش بش .. تجمعو عليها المشاش بدات كتلوح ليهم حتى خلات الطبسيل خاوي وحطاتو ، جا لعندها : مشينا ؟ ..
- تبعاتو حلات الباب قبل مايحلها هو .. ضار طلع لبلاصتو شافيها بنفس الملامح لي مكايتبدلوش :
ݣلتي محتاجة تغوتي ؟
- حاط الباليزة ديالو قدامو كيشوف فيها .. باه ومو ساهيين فالفراغ كيخممو فهادشي لي قاليهم .. هز فيه علال راسو ، بصوت كلو حكمة او وقار راجع لسينين خبرتو :
سمع أولدي أش نݣولك .. كيما مابززتش علك فهاد تزويجة مغانبززش علك ونݣوليك حتى شاب عاد بغا يطلق ويبقى بلا وتد صحيح ، حيت داك الوتد لي مكاليك أولدي وتد راشي .. والوتد الراشي دغية كتاكلو السوسة وكيتقسم على جوج وأخرتو كيتلاح ولا كيديه مول الفران يشعل بيه العافية باش يطيب بيه خبازات الناس .. وهكا كيولي محروق ماعندو قيمة أما الوتد الصحيح مايݣر فيه لا شتا لا صيف ولا ريح كيبقى واݣف .. حيت تحط على صح من اولو صحيح أصيلي ماشي مزور
- أدريس ( تنهد تنهيدة طويلة) : الدار لي بنيتها أ الواليد هزيت ساسها راسي .. ودابا الضالة تقالت عليا مابقا عندي فين نزيد نهز الحمل
- رقية ( عاقدة غوباتشها ) : سبحان الله من نهارها مدخلاتش لي للݣلب .. كت نݣولها ليكم ولكن انتونا كتو تسكتو فيا بحال الى أنا مانسواش ، أنا راه نميز بنادم من شوفة رتاحيت رتاحيت مارتاحيت مارتاحيت ..
- علال ( شافيها بحزم ) : صافي الحاجة بلاما تزيدي ليسانس على العافية وتخليها تزند
- رقية ( شافت فيه بوقار ) : زاندة الحاج من نهار اللول .. أحيانة ساكتة ومخلياها في ݣليبي ، ولادي ماعدهم زهر فالعيالات ( تنهدات تنهيدة طويلة) أحيانة كون كان الحكام فيدي كون زوجتهم خيرت العيالات ..
- علال ( بصرامة ) : رقية دوينا يا هاد المرة
- رقية ( هزات راسها للجهة لوخرا ) : هاهي ساكتة ..
- أدريس : فين هو عبد الخالق ؟
- علال ( هز براسو ) : خرج ݣالك عندو شي شغال .. وقف أدريس حط يدو على الباليزة :
أنا انطلعها للبيت الفوق .. نمشي نتوضى ونصلي
- الحاج ( بنفس الهدوء ورزانة ) : سير أولدي الله يتقبل ..
_______________
- وقف الطوموبيل فالپاركينݣ .. خرج وخرجات حتى هي بدورها هازة راسها فسندباد ، كان خاوي حيت الجو كان مغيم والشتا عاد صابة .. واخا هاد الجو كانو حالين ولكن مكان حد من غير شي بعض الأشخاص لي كان باين فيهم كوبل حمقين .. جايين يلعبو واخا الجو مامساعدش ..
- الروطال ( شافيها ) : فايتلك جيتي لهنا ؟
- عنبر ( بنفي ) : لا أول مرة .. كانت الطاكسي كدوزني ولكن عمري دخلت ليه .. سبقها غادي وهي تابعاه ، دخلو شد البراصلي ليها بوحدها كان فالغوز رجع عندها مدو ليها :
هاكي ديريه فيدك .. شداتو من عندو دارتو فيديها غادية معاه فنفس الخطوات كتشوف بعينيها ، وقفات كانت تجاوزها بجوج خطوات :
فاروق .. ( ضار عندها .. أشرات ليه بيدها لواحد اللعبة عالية كتقلب راسك كيرجع التحت ورجليك الفوق ) بغيت نركب فهاديك .. أشر ليها بيدو باش تسبقو ، توجهات للجهة اللعبة كانو واحد الكوبل .. وراها الدري كيفاش تكلس سد ليها السماطي قادهم مزيان .. الحماس كان لاعب عليها ، الادرينالين داير خدمتو مخليها ماتفكر فوالو ناسية بلي هي لي فهاد الصباح تلقات صدمة حياتها ..
- عنبر ( شافت فيه عينيها كيبريو عاقدة السيور ديال القب على راسها وسادة القبية معلية كمايمها حيت كبار عليها ) : مغاديش تركب ؟
- الروطال ( واقف أونفاص معاها بطولتو وهيبتو مفرق رجليه حرك راسو بلا ) : بصحة ..
- بدات اللعبة كتحرك شوية بشوية ، حتى على غفلة طلعات حتى للفوق .. كتبان الأرضية بعيدة قلبها تخطف شادة فالحديدة لي قدامها ، بلعات ريقها بخوف صدرها كيطلع وكينزل .. مع حلات عينيها مع تقلبات بيها خلاتها تغوت لربي لي خلقها وتعيط ( مــــــامــــــا ) .. تنفسها ولا سريع حلات عينيها كيبان ليها راسها التحت وكسدة ظيالها الفوق ، شوية بدات كتقلب بحال شكوة فالهوا .. بدات كتردد ( ياربي ياربي ياربي ياربي .. وصافي صافي مابقيتش بغيت .. وبغيت نزل )
- رجعات تهزات بيها حتى لسما خلاها ترجع تغوت .. وغواتها ماوقفش هنا .. تبعاتها غوتة تابعة ختها حسات بالبكية والخلعة كولشي تخلط عليها .. كتشوف فراسها كطير فسحاب وكتقلب راسها داخ عليها وتروعات عليها خاطرها ..
- ماحبسات اللعبة حتى صافي حسات بروحها غادي تزهق .. ودوخة الدنيا كدور بيها حلقها تجرح بالغوات لي غوتات .. فتح ليها الدري السماطي شاد ليها يدها تهبط ، قوسات ظهرها كتحرك بشوية شدات فواحد الحديدة وبقات حابسة ..
- الروطال ( ببرود ملامحو مامفهوماش ) : لݣيت ليك واحد اللعبة غاتعجبك .. ( هزات راسها فيه كتشوفيه بعدم تصديق ) :
واش ماباناش ليك حالتي ؟ بلاتي انرتاح راه عييت الظوخة وخاطري مروعة ..
- الروطال ( هز حجبانو بإستهزاء ) : منين غاتولفي اتجيك عادية .. أجي ( جرها من دراعها ) غادي بيها وهي القوة باش تنصل يدها ولا تدوي ماعندهاش .. ماخلاش ليها الفرصة حتى ترتاح .. وقفها قدام واحد الباب كانت قدامو واحد الكروصة ، جا داك دري لي خدام تم حلها
- الروطال ( أشر بحجبانو للكروسة ) : دخلي
- عنبر ( شافت فيه وفداك الباب ) : أش هاد اللعبة تاني ؟
- الروطال ( جرها بحال شي بنت باقي صغيرة كدير الضسارة ) انبقاو نشرحو ليك هنا .. دخلات لديك الكروسة ݣلسات ، سد عليها الدري ..
- عنبر : دابا غير .. ( مجات فين تكمل كلامها حتى تحركات بيها الكروسة ودخلاتها لوسط داك الباب ..
- دخلات فكهف مظلم .. كتحاول تستوعب حتى تشعل الضو وبان قدامها وجه ديال سحارة كتخلع وصوت ضحكة كتبعت الرعب .. خلاها تغوت لربي لي خلقها .. قلبها كيضرب والخلعة راكباها من صبعها الصغير ، بدات كدور بيها الكروسة وكل مرة كتصادف حاجة كتخلع كثر من الحاجة لي قبلها ، حسات بالقوة ديالها غادية وكتنقص كتر ماهي ناقصة .. خرجات عندو واقف مربع يديه كيتسناها وكيشوفيها بنفس البرود ..
- عنبر ( هزات يدها بعياء ) با ( تحركات بيها الكروصة من جديد مقاطعاها ) عاشت نفس الرعب بالأشكال لي كيخرجو ليها .. الأصوات لي ركبو فيها الرعب .. دايرة يديها على ودنيها مغمضة عينيها وكتغوت لربي لي خلقها .. حسات بحلقها صافي تجرح من كترت الغوات ماسلات الجولة ديالها حتى مابقاتش قادة تهز الراس ..
- وصلات للعندو حل ليها الدري الكروصة نزلات منها .. حادرة راسها ، وقفات كتحاول تستنشق الهوا النقي كتستوعب هادشي لي كانت فيه .. فيقها من سهوتها بصوتو الرجولي :
تزيدي ؟
- عنبر ( هزات فيه عينيها كتشوفيه ببرود ) : عندك الزهر طحتي معايا فنهار ماشي نهاري ..
- الروطال ( بلاما تحرك فيه شعرة ) : ݣلتي بغيتي تغوتي .. وهانتي غوتي ماشي شيحاجة صعيبة
- عنبر : واش انت شوية لاباس ؟ ديني اخويا الشي جرف نغوت ولا هاد الحالة
- الروطال ( عوج فمو ) : خايف على مخي .. تبداي تغوتي يݣولو كنتعدا عليك .. أنا مفضي مع مخي بغيتي تغوتي هانتي غوتي
- هزات راسها فسما بدات الشمس كتغرب وقرب المغرب .. عطاها بظهر وهو داوي :
غادي يسدو دابا .. كنت باغيك تجربي كثر ولكن ماجيناش بكري .. تبعاتو حتى خرجو من السندباد باغية تسولو :
واش غاتوصلني لدار ؟
- الروطال ( وقف قبالت طوموبيلتو ودار عندها ) : ياك باغة تمشي لبواط .. تدخلي لدار وانت مزال ماجربتيهاش خايبة حتى لمعاودة أزينة تبريحة
- عنبر ( غوبشات ) : زينت اش ؟ كيفاش ؟
- الروطال ( حل باب الطوموبيل .. وشافيها بنفس الملامح والعينين الحادين ) : الى فاتك الكلام ݣولي سمعت والى فاتك الماكلة ݣولي شبعت ( ركب فبلاصتو ساد الباب كيتسناها تركب ..
- توجهات بخطوات بطيئة جهة باب الطوموييل وعقلها معاه .. كتشوفيه بنص عين جاوها تصرفاتو غراب .. كتسول راسها واش انا غلطت لي ركبت معاه .. فين عمري قحياتي ركبت مع شيحد براني ، واخا يكون خو صاحبتي مكنعرفوش شكون قالي هذا هبيل ولا شي مزنزن ..
- راس اخر كيقوليها واش واحد هبيل اتكون عندو بحال هاد الطوموبيل ، ياك ماجدة كانت قالت ليها خوها لاباس عليه واخا نسات فاش خدام ، ولكن تصرفاتو كانو غراب خصوصا باش عيط ليها غير دابا .. دارت السمطة وهي حاضية معاه ..
- حط يدو لي كانت مزينة ببراسلي فيه أول حرف من إسمو ، يديه كانو قويين كيتخللهم شعرات رجولية دور االڤولون عينيه على طريق .. حتى قفزها ببحة صوتو الرجولية :
كتفرجي فالخراز ؟
- عنبر (شافت فيه بنص عين ) : لا عمري تفرجت فيه .. كنت اكنسمع بيه
- الروطال ( عوج فمو بلامبالاة ) : مزيان كيعجبك تسمعي للجرائم ؟ عالم الجريمة .. واحد خطف وحدة داها للغابة شرݣها وحيد ليها كلاويها
- عنبر ( بلعات ريقها مغوبشة ) : لا مكنحملش هادشي
- الروطال ( شافيها بإستغراب ) : العجب .. عند بالي كتموتي على هاد الهيت
- عنبر : علاش زعمة ؟
- الروطال ( يد مخرجها من السرجم ويد سايݣ بيها ) : شوفات ديالك من هنا لشوية .. بحال شي وحدة راكبة مع شي حد مفربل خاطفها
- عنبر ( حلات عينيها على تواسعهم .. غير مكتزيد تصدم فهاد السيد لي كيقرا افكارها بلاما تنطق ) : لالا من نيتك أكيبان ليك
- الروطال ( بتاسم ليها إبتسامة باردة غامزها بعينيه بجوج ) : حسن .. ، بدا تيليفونو كيسوني هزو شاف نمرتها طالعة عنبر شافت فيه وفالإسم لي كان مكتوب " ماريا " لاح التيليفون مخليه كيسوني حتى تقطع بوحدو ..
* دار عنبر *
- تودة كتشوفيهم .. وجها ناشف من الدموع كتشوف فعزيز :
ولكن علاش ماݣلتش لك فين هي ؟ عدمن غاتكون ومعامن غاتكون هاد البنت هادي ؟
- عزيز ( هزهز كتافو ) : ماعرفتش ؟ هادشي لي ݣالت بلي هي بيخير وعلى خير .. وبلي ماشي هبيلة ولا سايط ليها البرد فراسها دير شيحاجة فراسها ..
- تودة ( أشرات ليه بصبعها ) : لاواه لاواه واخا تݣول لي ݣالت مغايهنينيش خاطري ..
- حياة : عنبر راسها قاصح وكدير لي قالها ليها راسها .. كاعما تحاولو معاها فاش اترتاح وتحس براسها بيخير هي غاترجع .. راه انا ليكانعرفها
- تودة ( شافت فيها ) : دابا انا نبقى شادة حناكي وكنتسنى هنا حتى ترجع ؟
- ماجدة : خالتي تودة كيف قالت حياة ، من الأحسن منبززوش عليها براكة غير لي وقع ليها ولي سمعات نزيدوها حنا .. الواحد فهاد الحالة كيبغي يبقى بوحديتو يفكر فحياتو وفلي داز ولي جاي .. كيعرف شنو غايدير من هنا لمن بعد
- سميرة : ماتحكريش أخويتي خليها ، ترتاح وترجع كيݣاتلك مجيدة خلي درية بوحدها ترجع مجاجها وترتاح حتى هي مسيكينة .. تنهدات تودة تنهيدة طويلة شدات حنكها وسكتات كتخمم فكلامهم ..
- بدا تيليفون حياة كيسوني .. شافت فيها تودة :
وقيلة عنبر سربي ابنتي شوفي شكون .. هزات حياة تيليفونها شافت فشاشة ورجعات شافت فيهم :
لا هادي مي .. فتحات الخط :
ألو مي .. الحمد لله لاباس وأنت لاباس ؟ م مالك كتبكي ؟ أش واقع وهي بشوية نعرف أش تݣولي ( بقات كتسمع ليها حتى كملات كلامها )
- حياة ( بعصبية ) : أنا بغيت ليه مصيبة تصيبو فعظامو ياربي يهزوه مرابعة للقبر ( شافت فتودة لي كتشوفيها تنهدات تنهيدة طويلة) واخا أمي صافي غير توصلي قوليها ليا نجي نجيبك .. بسلامة ، قطعات مع مها وشافت فتودة قربات لحداها وݣلسات ..
- تودة : مال مك ( ببرود )
- حياة ( بلعات ريقها حشمانة وخايفة من ردة فعل تودة .. حيت فالأول والأخير الدار دارها هي وسميرة وكتبقى هي وعنبر برانيات ) :
سعيد راجل مي .. باع الدار وخرجها هي او خوتي لزنقة ، مي ماعندها حد اخالتي ( نزلو دموعها ) ودابا بغات تجي لكازا اتركب دابا لهنا .. ( تنهدات ماسحة دموعها ) انا عارفة بلي هاد دار دارك انت وخالتي سميرة الله يكتر خيركم مسكنيني معاكم بحال الى بنتكم لا أنا لا عنبر ولكن مي راه ماعندها فين تمشي ..
تودة ( شافت فيها بعدم استيعاب ) : بنت ليك أنا بنت الحرام لي انجري عليها .. الدار لي تهز ربعة تهز حتى 10 مرحبا بيها ، معاياش اتوصل ؟
- حياة ( مسحات دموعها ) : واحد ساعة ونص هكاك يكونو هنا
- تودة ( شافت فعزيز ) : وصلها أوليدي وجيبهم الله يرضي عليك ، المغرب أدنات والحال ظلام صعيب تلݣى طاكسي ..
- عزيز : كوني هانية أخالتي
- ماجدة ( وقفات ) : أنا انمشي لدار ، غدا ونرجع إن شاء الله ندير ونسوني عليك أحياة ( شافت فيها ) باشما كان طمنيني على عنبر
- تودة : هاد البنت لي المغرب أدن وهي مزال مادخلات والليل هذا كيتجراو فيه الذياب وهي علم الله بيها فين هي
- سميرة : دابا تجي شوية تلݣايها هنا ..
____________________
- واقفة هي وعزيز فالمحطة ديال ولاد زيان كيتسناو فمها .. حتى تمات خارجة جارة واحد الباليزة كبيرة او وليداتها زوج معاها لابسة جلابة فالݣرونة مع كولون صابو وتقاشر وشال .. شافتها حياة مشات كتجري عندها تلاحت بين يديها معنقاها بجهد
- حياة ( كتبكي ) : توحشتك أمي توحشتك بزاف
- رشيدة ( معنقاها كتبوس فيها ) : حتى أنا أبنيتي حتى أنا .. بعدات عليها حياة تحنات باست خوتها ( جيهان 8 سنين ولقمان 10 سنين ) هزات راسها فمها :
على سلامتك أمي .. أجي راه طاكسي كيتسنانا .. تقدم عندهم عزيز بإبتسامة :
على سلامتك أخالتي
- حياة : ماما هذا عزيز .. دري لي عاودت ليك عليه
- رشيدة ( باس ليها راسها ) : الله يرضي عليك أوليدي .. ( شافت فحياة ) مجاتش معاك عنبر ؟
- حياة ( بلعات ريقها خايفة من ردة فعل مها الى عرفات شنو كانو كيخدمو ) : لا جيت غير أنا حتى لدار ونهضرو نحيدو من هنا ..
- طلعو الدراري مع رشيدة الفوق .. حياة ركبات القدام طلع عزيز البكاج للور ورجع للبلاصتو ديمارا وشد الطريق ..
يتبع...
التعليقات
لا توجد تعليقات بعد، كن أول من يعلق.