محتوى القصة
مقابلة مع المرايا لي جات حدى الباب .. طالقة شعرها الخفيف لي كيتخللوه خصلات صفرة دارت الريسيل لعينيها وختماتها بعكر أحمر هزات بيديها وظفارها المصبوغين بالأحمر رشات من الپارفان ديالها شانيل .. كانت لابسة سروال فالكحل فيه زوج خطوط من الجناب ذهبيين مع شوميز فالكحل حطات فورير فوق كتافها وهزات ساكها فاللون الكحل البزيم ديالو ذهبي ، سونا تيليفونها شافت النمرة وتبسمات حلات الباب وهبطات فسانسور خرجات من الباب ديال الموبل طوموبيلتو كانت كاتسناها خرج الشيفور فتح ليها الباب اللوراني وطلعات حداه ضاربة فيه ريحتها ..
.... ( باس ليها يدها ) متعطلتش عليك ؟
....( تبسمات ) لا بالعكس الوقت هو الوقت
.... ( طلعها ونزلها ) الأناقة هي عنوان لالة خديجة ، لي يشوفك مغايݣولش بلي عندوك جوج عزارة
خديجة : هذا من دوقك ( حدرات راسها ) ، شد بيهم الشيفور الطريق .. الطريق كلها وهوما كيدويو فمواضيع عادية حتى وصلو نزلو شادة فدراعو ودخلو للمطعم مستقبلهم السرباي وصلهم للطبلة لي ريزيرڤا قبل ..
.... : مدة طويلة هادي أخديجة توحشتك
خديجة ( برمات شفايفها ) المكاتيب
.... : ماشي المكاتيب أنتي لي قصحتي راسك بلعاني درتيها زكارة وشديتي الضد بلعاني .. كون درتي عقلك مغاتكونيش هنا
خديجة ( حركات راسها بشوية ) الطيش دارها ( قاطعهم السرباي جا ياخود طلباتهم خلا ليهم الموني وبقا واقف حداهم حتى ختارو لي بغاو عاد مشا ) وحتى انت كانت عينك طويلة ضامن لي معاك وعينيك على لي مع الناس ..
.... ( ضحك ) ولكن أنتي كنت باغيك مرتي .. وكونما كنتش كنحط عينيا على لي عند الناس ماكنتش غانوصل لهادشي لي انا فيه .. الطيش ديالك أخديجة خرج عليك ( بجدية ) زعمة تستاهلي تكوني فهاد البلاصة من ورا هاد الوقت كاملة ، اخرتك فبارطمة بوحدك ..
خديجة ( شربات من الما ورجعات شافت فيه ) مايغركش هادشي مزال نضرب ضربتي .. مزال الدقة غاتجيهم على الغفلة ..
.... : خليك من هاد صداع الراس .. هادشي غير تخربيق الى بغيتي ضربي ضربتك ضربيها على الصح براكة السينين لي دوزتي فابور
خديجة : ونخلي دريس او ولدو يربحو .. داك المكلخ ديال ولدو لي فتحت ليه بابي ورضيت نربي ولد المرة اللولة ياك وندور ظهري من نيتك ..
.... ( بصرامة وجدية ) الى درتي راسك فروطال غير غاتجبدي النحل على راسك ، دابا مزال ݣلتي جا يشوفك وداير بوجه العشرة أنتي عارفاه كثر مني انا دقتو كيفديها هو عارفينو الناس أخديجة إلى قرباي ليه ماشي غير البوليس لي غايكون عندك مشكيل معاهم ايكون عندك مشكيل مع ولادك ومع الصحافة ..
خديجة ( قلبات عينيها ) ولادي انا خسرتهم نهار وقفو مع باهم مابقى عندي ولاد ومابغيت نشوف كمارة شي حد فيهم .. الولاد لي مايجيوش مع مهم لي عارفة مصلاحتهم فين كاينة غانحسب هاد الكرش عمرها هزاتهم ..
.... : خوي هادشي من راسك ماشي الوقت ديال ترضي ضقتك الوقت ديال تعوضي شوية على ليفاتك ..
خديجة : وباش غانعوض ؟
.... : تمشي معايا خلي هنا وسوسيه بحال الى عمرك عشتيه ويلاه معايا ، أحسن دار غاتسكتي فيها ولي بغيتيه غايكون تحت رجليك
خديجة ( دورات لسانها وسط فمها هازة حاجبها ) اهاه ومرتك طلقها ؟
.... ( حك جنب نيفو ) منݣدش أخديجة مراتي غادي تبقى فتيقار مغاتوصلكش مغاتوصليها
خديجة ( ضحكات ) ونعيش معاك بلا زواج ياك ؟
.... : غير بينما تݣادو الأمور وداكشي لي بغيتي هو لي غايكون ، أنا مزال مطول شوية هنا عندي شي مطارق خاصني نطرقهم فكري فهضرتي مزياان مابقى عندك مايدار .. وغاتكوني قريبة من خوك أما هنا شنو كيتسناك الوالدين لي كيشدو الواحد دفنتيهم ..
خديجة ( تنهدات ) خاصني نفكر وديك الساع نرض عليك ( سكتات ) ماقلتيش ليا شنو عندك هنا ؟
.... : من بعد ونݣوليك مغاندوزوش هاد العشا الزوين غير على الخوى الخاوي ( خشا يدو فجيب لافيست وجبد بواطة كحلة كحزها ليها ) على الله دوقك مايكونش تبدل ..
خديجة ( خدات البواطة بإبتسامة فتحاتها كان فيها ݣورميط ديال اليد منبت بدياموند هزات فيه عيتيها وتبسمات ) لا متبدلش مزال هو هو ( مدات ليه يدها ) تركبو ليا
.... ( ضحك ) بكل فرح ( خدا يدها وركب ليها الكورميط خدا يدها للشفايفو بايسها ) بصحة وراحة ..
خديجة ( بغرور ) الله يعطيك الصحة ..
كانت الفوق فبيتها كنقاد اخر اللمسات كانت نسات ماصبغات ظفارها طلعات صبغاتهم باللون البوردو ، سمعات الحس ديال طوموبيلات عرفاتهم هوما لي وصلو ، دهنات يدها بكريم باش تبقى رطبة ورشات رشة من ريحتها من جديد تقابلات مع المرايا وتبسمات من المظهر ديالها ، هزات تيليفونها وخرجات من بيتها توجهات للبيت سهام دقات ودخلات ..
عنبر ( توجهات نيشان للنموسية فين كانت منعساه سهام على كرشو ) ويا زين ويا الفن ياختي اش هاد الحلاوة ( باستو وقلباتو على ظهرو كتلعب معاه )
سهام : عنبر بغيت نسولك
عنبر ( شافت فيها ) سولي
سهام : ايمتا غادي يسالي هادشي .. خفت غير يوصل الوقت لي غايجي فيه راجلي ومغانقدش نبقا مع أمير ، وحتى المديرة غادي تضطر ترجعو دابا 4 شهور ومزال مكاين حتى جديد
عنبر : قريب أسهام لهلا يحاشمنا إن شاء الله مايجي راجلك حتى نكونو قادينا الأمور ، واخا مغانسخاش لا بيك لا بأمير وليتو بحال إلى من العائلة ..
سهام ( بإبتسامة ) حتى أنتوما ولاد الناس ، عمرني شفت منكم العيبة براكة غير مهليين فهاد الوليد مسكين ( سمعو العياط ) ..
عنبر : فاروق هذا لي كيعيط ضيافو جاو أنا ندير وغادي نجيب ليك العشا .. ياكما فيك الجوع دابا ؟
سهام : لالا حتى وكان تجيبيلي العشا ، انا نيت ايسوني ليا راجلي دابا ندوي معاه شوية ..
عنبر ( وقفات ) صافي مزيان .. خرجات من عندها لقاتو خارج من بيتها كيقلب عليها ..
الروطال : انتي تم وانا كنقلب عليك ( طلعها ونزلها مطول فيها الشوفة )
عنبر ( ببرود ) وصلات الضيفة ديالك ؟
الروطال ( كمش فيها عينيه ) وصلو
عنبر ( بنفس البرود ) غادي نبقاو هنا ولا غانزلو ( عطاتو بظهر )
الروطال ( جرها من دراعها مقابلها معاه ) مالنا ياك لاباس ؟ تي مال مك كتݣلبي بحال زمان ؟
عنبر ( نصلات يدها بشوية منو ) ماماليش انا هي أنا بحال ديما شنو تبدل ؟
الروطال : كتمرݣني ولا مالك ؟
عنبر ( تنفسات بعمق ) حشومة وعيب تخلي الضياف بوحدهم كتبين ليهم بلي ماحملهم وماعندهم قيمة ..
الروطال : ويمشيو يق** ݣاع دوي مالك ؟
عنبر : وماماليش واش انت هبلتي رجوع لله , مالي كيف غانكون ( عطاتو بظهر نازلة مامسوقاش ليه تابعها ) ..
- نزلو للتحت كيبان ليها السرباي خرج من الصالون وفيدو صينية خاوية .. هزات صدرها علاتو راسها فخط مستقيم وابتسامة على شفايفها .. دخلات لصالون وأول ماطاحت عينيها هو على السيدة لي كانت ݣالسة طلعاتها من الكسوة لي كانت لاصقة عليها مبينة جسدها لي كان منحوت ، جهة صدرها كان شبه باين مع اكسسوارات فعنقها او ودنيها شعرها لي كان قوي ومطلوق .. لون بشرتها خمري وملامح وجها الجميلة لي كان باين دايرة ليهم روتوشات من تكساش والفيلر والبوطوكس .. مكانتش بوحدها كان راجل معاها فنفس سن الروطال .. بلباس كلاص رجولي وريحة العود الرجالية عاطية منو ..
الروطال : عبلة عنبر مراتي ..
عبلة ( وقفات بغرور مدوزة ليها السكانير بعينيها ) أهلا وسهلا تشرفت فيك ..
عنبر ( مدات ليها يدها ) الشرف ليا
عبلة : أحمد إبن عمي وشريكي
أحمد ( خدا يد عنبر وطبع عليها بوسة ) إتشرفت فيك وأخيرا إتشرفنا بزوجة فاروق ، والله من حݣك ماتخبرنا ..
الروطال ( ببرود عينو معاه ) الزواج كيحضرو فيه غير العائلة .. ݣلسات عنبر وحداها الروطال ..
عبلة ( عينيها عليهم ) بس إحنا أصحاب يا فاروق مو شركة وبس
الروطال : خيرها فغيرها ..
عنبر ( شافت فيه وشافت فيها بإبتسامة ) كولشي جا على غفلة سبحان الله أه واش كتفهمي المغربية بعدا ؟
عبلة ( بإبتسامة ) طبعا أكيد هاي مو اول مرة إلي بالمغرب .. أنا ضيفي دايمي ..
عنبر : هممم مزيان مرحبا بيك فكل وقت
عبلة : طبعا أكيد حبيبتي من غير ماتݣولين ..
عنبر ( بينها وبين راسها ) الله يدوز هاد الليلة على خير ..
مجمعين فصالون .. رجعات سميرة لدار حاطين واحد طارطة كان منقوص منها النص كل واحد فيهم حداه طبسيل .. فرحانين برشيدة لي خدات براتها ورتاحت من هم سعيد وتهنات منو
حياة : خالتي قطعي ليا طرف ( قطعات ليها طرف عطاتو ليها جرات طبسيل كتاكل منو ومجمعة فنفس الوقت مع البنات ديال المدرسة فكروب ديال الواتساب ) ..
البنت 1 : البنات جاني الملل شكون فيكم كتعرف شي تطبيق نتيليشارجيه ديال التعارف من غير تيندر فيه المزعزع على خوه ..
حياة ( جاوباتها ) أصاحبتي ماصدقو حتى ديال الواقع بقا غير المواقع داكسي غير تخربيق
البنت 2 : لالا والله حتى كاين لي كتصدق ليه انا بنت خالتي يلاه تزوجات بيه باكستاني وعايش فبريطانيا العرس لي دار ليها كيداير ..
البنت 1 : وايلي كيفاش تعرفات عليه ؟
البنت 2 : تعرفات عليه فواحد التطبيق ، صاحبتي كانت وراتوليها تزوجات فيه بواحد المصري عايش فكندا .. وصاحبتي كتعرف بنت خالتي كنا بزوج مجمعين وقالتها لينا وبنت خالتي تيليشارجاتو وتزوجات منو ..
حياة ( بلعات دغمة من الكيك مربعة رجليها ) وايلي زعمة ؟
البنت 2 : والله العظيم حتى انا تيليشارجيتو لبارح نيت .. سميتو مازماتش كدخلي معلوماتك وكديري صورتك ، وراه كتكون فالأمان وممكن تمسحي الكونط كتمشي منو الصورة ..
البنت 1 : وريه ليا وريني كيفاش ندير ليه ( سيفطات ليهم سكرين على شكل ڤيديو فيه كولشي )
حياة ( بقات كدورها فراسها .. جهة كتقوليها تيليشارجيه مخاسرة والو وراس كيقوليها لا كانت كتحس بالملل وباغية تعمر وقتها هي مغراضهاش فلي فبرا هي باغية شي واحد لي يكون فالمغرب بقات كتفكر وفالاخر دخلات لپلاي ستور كتيليشارجيه ..
رشيدة : مادويتيش مع عنبر ( لا إجابة ) واااا صمك و حياة اويلي امالك اكاتشدي داك المشقوف كتغيسي فيه ..
حياة ( شافت فيها ) وكندوي امع البنات لي كيقراو معايا ، اه هضرت معاها الصباح اليوم يمكن جايين عندهم الضياف ..
تودة : شكون ؟
حياة ( عينيها مع التيليفون ) قالت الضياف ديال راجلها شي وحدة خليجية عندها معاه شي خدمة وجات المغرب وغاتعشى عندهم ( عمرات المعلومات دارت صورتها سيفطو ليها تحققو من صورتها ونمرتها وقبلو ليها البروفيل عطاوها فرصة ديال ساعة يبقى كونطها طالع لكولشي ) ..
- كاع لي كيديرو ليها قلب ماعجبوهاش كاين لي عجبها رضاتها ليه وكاين لي لا .. مرة تحط تيليفون مرة تهزو طل واش سيفط ليها شي حد وكاع لي سيفطو ليها ماعجبوها حتى جاها قلب من عند شخص كان سميتو وليد طلات على بروفيلو كتقلب فتصاورو مبسمة عجبها زوين وباينة فيه راقي .. المدينة كان كاتب فاس .. رضات ليه قلب وتم تم جاها اوديو منو " سلام مدموزيل حياة صافا أمورك مزيانة نورتينا "
حياة ( تبسمات كتبات ليه ) " الحمد لله بيخير أنت صاڤا شكرا بزاف ربي يخليك..
- بقاو كيتعرفو قاليها بلي سميتو وليد وفالعمر ديالو 31 سنة فاسي والديه ففاس ولكن هو خدام فمدينة مكناس كوميسير ، طلب منها نمرة الواتساب عطاتها ليه ونتاقلو من التطبيق للواتساب ..
- سيفط ليها تصاورو وحتى سيفطات ليه زوج تصاور ، عجبها صوتو وكيفاش كان كيهضر بواحد الإحترام او واحد الرقي كان باين فيه نيڤو فالوعي من خلال هضرتو معاها والمواضيع لي كان كيدوي فيها .. عاودات ليه عليها وشجعها على القرايا وعلى تكمل قرايتها وتستقل بذاتها ..
وليد : حياة واش ممكن نتاصل بيك ؟
حياة : بلاتي ندخل لبيتي ونقولها ليك ( ناضت من حداهم )
رشيدة : فين غادية ؟
حياة : عييت انمشي نعس
رشيدة : عمرك نعستي هاد الوقت كيدرتي ليها ( بشك )
حياة : اويلي امي واش حتى الى بغيت نعس ممنوع .. راه كنفيق بكري وعييت وعاد ضربتها كعطة للبيرو ديال داك خينا ديال طريق فالأخر مسوني عليا حقا والواد جاتو خدمة فالمحمدية ومأجلها لغدا راه عييت بغيت انحط راسي ..
تودة ( شافت فرشيدة ) اويلي تي رجوع لله خلي البنت ( شافت فحياة ) سيري ابنتي تصبحي على خير ..
حياة : تصبحو على خير ( دخلات لبيتها ) خرجات ليالي من طواليط جات عندهم
ليالي : فين هي حياة ؟
تودة : مشات تنعس عيات ..
حياة ( فبيتها ) ألو وليد ..
عنبر كانت مثال ديال .. البرود من برا والعافية شاعلة الداخل دايرة رجل على رجل ومقابلة مع عبلة مبسمة وهي كتشوف فتصرفاتها كيفاش هضرتها كانت غير للروطال ومعاه بحال الى هي مكايناش ..
أحمد : مدام عنبر شاركينا صوتك وحديثك نريد نسمع رأيك
عبلة : أكيد هي مابتعرف بشؤون شغل جوزها ، أنا بعرف كثير زوجات بيهمهم بس الميكاب وشوبينݣ وبس مايدهلون فشغل أزواجن ..
عنبر ( تبسمات ) لا احبيبة ديالي انا الحمد لله كنعرف كولشي على الخدمة ديال فاروق ، فنظرك علاش غادي يعرض عليك لهنا عندنا لدار كونما كنت كنعرف والو على خدمتو كان ممكن يعرض عليكم فشي ريسطو مطعم يعني .. أنا من النوع لي كيضرب على زوج جوايه الشوبينݣ كيف قلتي وحتى لجانب العملي ( عبلة ملامحها كانو خاليين من اي شعور مجاوباتهاش ) ..
أحمد : والله براڤو ( بإعجاب ) أنا كولي إعجاب بالمرأة يالي يكون عندها عݣل تفكر بيه ، كلها انوثة وبنفس الوقت تهوى عالم الأعمال ، شنو دارسة مدام عنبر ؟
عنبر ( كتلعب برجلها عينيها مع أحمد ونفس الوقت حاضية ملامح عبلة ) انا القانون كنت غانكون محامية ، ولكن ماكتابش خويت المغرب فداك الوقت ( شافيها الروطال إحساس كان عايشو غريب عليه ݣالس بحال الى كالس على شوك جاه هاد الحوار وهاد الݣلسة حامضين ماعندهم معنا )
أحمد ( بإعجاب ) أممم زيين لأي بلد رحتي ؟
عنبر ( نافخة ريشها ) بلغاريا
أحمد : اوووه والله امنيتي ازورها هي واليونان بس ماعندي وݣت
عنبر : غادي تعجبك هي زوينة .. وسياحية
أحمد : والله أعشݣ هاي الأماكن كثير ، شو كنتي تشتغلين ؟
عنبر ( شافت فروطال ) شيخة
أحمد ( بإعجاب ) هو أبوك كان شيخ نائب ݣبل ، والله زين ( شاف فالروطال ) والله مو كنت عارف إنك تزوجت شيخة زواجت السعد يا فاروق والله براڤو ..
عبلة ( ماعجبهاش الحال كيفاش خرجات من دائرة الإهتمام ) أشم ريحة الاكل المغربي جعت ..
الروطال ( وقف ) نتعشاو ( شد يد عنبر حابسها بين يدو مخليهم هوما اللور )
عنبر : هذا مالو فرحان حيت قلت ليه كنت شيخة ؟
الروطال : الشيخة ديالهم ماشي هي شيخة ديالنا الشيخة عندهم باها شيخ نائب رئيس دولة ، وزايدون لاش شادة معاه الجماعة شكون هو باش يعرفك شنو كديري وانت مجاوباه مالك مالݣيتي ماتݣولي ..
عنبر : نهار ديتيني كنت شيخة ( ببرود) ولا مارضيتيش حيت لالاهم عبلة كالسة ، انا بعدا كنت شيخة مافياش الكذوب والنفاق والحمد لله رجعت لطريق وتبت الحمد لله وزايدون السيد كيسولني جاوبتو شنو بغيتي نݣوليه كنت رئيسة بلغاريا ..
الروطال ( بتحدير ) جلايلك مايدوروش حداه متجاوبيهش خليه داوي مع *** حتى يعيا ، اش جاب بلغاريا ولا لخرا للهضرة على اشمن كذوب داوية تي ؟
عنبر : انا غير كندوي ( خلاتو وعطاتو بظهر تابعاهم ) ..
- تجمعو على الطبلة لي كانت مقادة بداو السربايا كيحطو العشا ، اول حاجة تحطات البسطيلة بالحوت مع شلايض .. الماكلة كانت بنينة بزاف رجعو كيدويو ومن خلال كلام عبلة كان باين بلي عندها بيزنيس مع الروطال من شحال هذا كيفاش كانت كدوي على مشاريعو خلاها تستغرب من داكشي لي عندو ولي كايدير ، أحمد اغلبية كلامو كان متوجه ليها مستغلة فرصة الروطال وكلامو مع عبلة كانت حتى هي مشاركة الحديث مع أحمد ..
أحمد : والله عندي فضول كيف تعرفتو
الروطال ( عاݣد غوباشتو شافيه ) هادشي كيبقى بيناتنا أسي أحمد ( شاف فعبلة ) ماقريتيهش بلي مكنحملش لي يدخل ليا فعظامي
عبلة : والله وانا كمان أريد اعرف كيف تعرفتو ، وكيف تزوجت وإنت كنت رافض فكرة الزواج
عنبر ( تبسمات ) عادي أحبيبة حتى انا ماكنتش كنفكر فزواج حتى تلاقيت مع فاروق ( شافت فيه ) بدل ليا الفكرة وخلاني نبغي نتزوج اليوم قبل غدا
أحمد ( بحصرة ) حبكم لبعض ظاهر والله بحسدك يا فاروق على هاي الجوهرة ، انا لو منك أسجنها وما أخلي أحد يلقي نظرة وحدة عليها ..
الروطال( ببرود جر يدها حبسها بين يدو قدامهم ) لا هادشي لي ناوي ندير من هنا للݣدام
عبلة ( بغل كتشوفيهم ) مو لهاي الدرجة الأمر مو مستاهل
عنبر : لا أحبيبة حنا المغاربة عندنا العيالات بحال الجوهر الحمد لله .. كيغيرو علينا رجالتنا ومكايبغيو حتى واحد يشوفينا شي شوفة ماهياش ، دابا حنا المغربيات المأصلات مانقدوش نبينو جزء من داتنا ولا شعرنا للبراني وكنحشمو من لي كبر منا ومثلا شي واحد مزوج وعندو مراتو كنحتارمو الشوفة مكنطلعوهاش فيه ( بإبتسامة خبث )
عبلة : هاي الأفكار متخلفة إحنا هلا ب 2025 هاي الافكار ماتت
عنبر : وكل إنسان وكيفاش كيتعامل وكيفاش كيفكر وكل إنسان كيتعامل بتربيتو وبأصلو ( وصل وقت الطبق الثاني اللحم بالبرقوق والأنانس ولوز ) البنة ديال هاد الشاف غزالة غادي تعجبكم ..
بداو بطبق الثاني وهاد المرة عبلة لي دوات :
ماݣلتو لنا كيف تعرفتو .. إنت بالمغرب وهيي ببلغاريا ؟
عنبر ( سبقاتو) حبيبي ممكن نقوليها انا ، حيت عارفاك مغيار ومكتبغيش تعاود بتفصيل ( هز حواجبو بإستغراب منها كانت كلها برود وكلها ثقة فنفس وكتدوي بالعقل واخا كلامها عامر حشيان هضرة ولكن بشكل غير مستفز ، كتخلي الإنسان لي معاها ميقدش يجاوب بشي جواب خايب حيت كلامها مكانش نهائيا مبتدل ولا هركاوي على عكس كيف كانت كيقارن كيفاش كانت تصرفات مع فرح وكيفاش كتكون متسرعة فشي مواقف ولي جا فمها كتخرجو دابا غير كتبان راقية فهضرتها وكلامها موزون وبالعبار كتبقى ساكتة عاد كتدوي وكل حاجة فبلاصتها كيحس بيها بحال شي وحدة ماشي هي عنبر ستغرب من هاد الشخصية لي خرجات فهاد الليلة .. كالس كيتسناها لا تقلب متوقع منها شي مفاجأة لي تجي على غفلة وتخرج عنبر القديمة دخلات ليه الشك ) انا وفاروق مكناش كنحملو بعضياتنا كان كيجيني عاجبو راسو بزاف ، كنت كنعرف ختو وفعيد ميلادها كنت حاضرة وتلاقينا لتاني مرة تما وفاش بغيت نرجع خسرات ليا طوموبيل ديالي ( هز حواجبو مخرجة عينيه من كدوبها هز كاس دالما شرب منو )
- ايوا هو قتارح يوصلني ، تناقشنا فطريق على شيحاجة بسيطة وتخاصمنا وكان هو لي غالط .. وصلني ودازت سيمانة وصلني منو بوكي دالورد ..
عبلة ( دورات رسانها ففمها ببرود ) فاروق والورد غريب ، كنت اݣول بيتي وبين نفسي إنك مو رومانسي !!
عنبر ( ماخلاتوش يدوي ) حتى أنا ولكن صدق رومانسي وحنين وتما بدات علاقتنا ولقينا راسنا كنبغيو بعضياتنا وتزوجنا ( شدات فيدو كتشوفيه) الله يخليه ليا ومايحرمنيش منو ( كيبادلها نفس النظرات)
عبلة ( كانت ݣالسة على شوك بغات غير إيمتا يدوز هاد العشا ترجع بحالها تبسمات بإستفزاز ) والله غريب يا فاروق .. على حد علمي عنبر مو ستايلك أقصد مو من النوع الي تريده في البنات
عنبر : علاش انت عارفة اشمن نوع كيبغي ؟ ( شافت فيه ) كيبان ليا بيناتكم صداقة قوية ( تبسمات ببراءة )
الروطال : غير كيبان لك الواحد منين كيݣا راحتو كيحط راسو ويدݣ وتادو
عبلة : كيف مافهمت
عنبر : قصدو بلي منين لقا راحتو معايا عطاني قلبو وتزوجنا ماشفتيهش من الصبح وهو بيطلع عليا من لما نزلت من الدرج ( ضحكات بأنوثة )
عبلة ( بلعات ريقها شاربة الما شافت فساعتها ) إتأخر الوقت وانا عندي سفرة على طنجة الصبح ( شافت فأحمد ) نمشي أحمد
عنبر : مزال ماكليتوش ديسير هادي ماشي دخلتكم
عبلة ( وقفات ) ما باكل حلو حبيبتي مسوية ريجيم ( توجهات هزات ساكها وفورير ديالها وقف أحمد شكر الروطال ضار عند عنبر خدا يدها باسها )
أحمد : أتمنى ماتكون هاي اخر مرة نلتݣي مدام عنبر تشرفت بمعرفتك
عنبر ( بإبتسامة خفيفة ) شكرا .. سلمات عبلة على عنبر ببرودة وصلات عند الروطال ، سبقات وجها ولكن بدورو شد يدها مسلم عليها .. تحرجات وماعجبهاش الحال كيفاش تفادى يسلم عليها بالوجه
عبلة : شكرا على العشا وعلى هاي السهرة ( موجهة كلامها ليه) دورات راسها عند عنبر كانت مبسمة ببرود حدرات راسها مغززة وخرجات هي وأحمد وصلهم الروطال لعند الطوموبيل لي جاو فيها ديمارا الشيفور بيهم مشاو وهو رجع للداخل .. لقاها واقفة كتعمر الطبسيل للسهام ..
الروطال ( بعصبية ) شايطة عندك ديك اليد ، باغياها تݣطع من جدر ؟
عنبر ( بلاما تشوفيه كتعمر فطبسيل ) علاش ؟ ( هزات فيه راسها ) شنو درت ؟
الروطال : دايراها بلعاني شاداها زكارة أبنت الحاج
عنبر : أشمن زكارة مكتبقاش دوخ ودور جيني نشان وݣوليا شنو درت ؟ العشا داز مزيان الناس مشاو فرحانين من غير الضيفة ديالك لي بانية ماعجبهاش الحال ..
الروطال : وتمشي تق** ديك اليد لي مادة بحال الى كيبوس ليا القبة الخضرة أشريفة راك مرت الراجل
عنبر ( شافت فيه بنفس البرود ) انا خفت عليك غير أنت لا تخسر معاهم .. انا مديت ليه يدي باش نسلم عليه هو لي باسها
الروطال ( دار يدو على جنبو مدوز باليد لوخرا على شعرو ) متمديهاش متسلميش عليه ، واش انا وياه مشاركين الدم باش تمدي ليه يدك عنبر راه غانخلط جدك كنكالمي راسي باش نصعرش عليك خلينا زوينين ..
عنبر ( تبسمات ببرود ) هاد الهضرة غير عليا أنا ولا عليك حتى أنت أسبع ؟
الروطال : أش كتبرݣمي خرجي من رونضتك منين جيت وانت كتلواي بحال اللفعة
عنبر ( بنفس البرود ) ديك اللفعة غايجي نهار وغدور على عنقك وتخنقك .. هاد الديسك لي خارج من فمك دير بيه انت لول عاد قول لناس يديرو بيه ( جات تخطاه شد ليها فيدها بجهد )
الروطال : غاتركني ( بصرامة ) وغاتخرجي لي عندك شكاين ؟
عنبر ( غمضات عينيها وحلاتهم ) نهار لول قلتيلي داخل بنية صافية لهاد تزويجة غادي تحتارمها ، ودير بحسابي ولكن باش تجيب ليا مونيكة ديال الخلا عريانة النص فصدرها باين ݣالس بلا حشمة بلا حيا كتلمح بلي كتعرفك وعارفة عليك الشادة والفادة لا أخويا ، كان بينك وبينها شيحاجة ولا عينك فيها عرض عليها لتيساع متجيبهاش ليا لقبالت عينيا مالك ماضرتيش فيها امممم منين سمعتيها كتسول وكتعجب كيفاش انت تزوجتي علاش مادويتيش ولا خايف لا تفضي انت وياها البيعة وشرية ( تبسمات ) ماتبقاش تقولي شنو ندير وشنو مندير راسي لي غايقولها ليا وهاد المرة منين تكون غادي عندها جي قولها نيشان .
الروطال ( مركز معاها حتى سلات ) غرتي ؟
عنبر ( رجعات راسها اللور كضحك ) نغير منمن غادي نغير غير قولي من شكووووون غادي نغير من شكوووون غادي نغير من هاديك لي معاودة من ساسها لراسها .. تايقة فراسي الحمد لله الزين المغربي القح عاطيها ليا سيدي ربي حتى حجباني مصايبين من عند الله عمري قصتهم قالك غرتي ( بدلات شوفتها ) مكنحملش الكذوب قبيلات قلتي هي لي غاتجي ماشي انت لي اتمشي تجيبها وراه قلتها ليك شحال من مرة مكنحملش الكذوب ولي يستحمرني ..
الروطال ( تبسم ببرود وخبث ) كونما غرتيش مغادويش بزاف
عنبر : ومنمن غانغير وعلامن عليك انت ههههه ضحكتيني
الروطال ( تبسم ) بديتي تميلي الفتيلة ، باينة من دوك القراطس دعينيك
عنبر : اه بديت كنميل للمخدة حيت عييت وفيا النعاس ( عطاتو بظهر )
الروطال : كونما كنتيش كتحسي بشيحاجة من جيهتي مغاتقلقيش على الخوا الخاوي وديري من الحبة قبة ، لي مكايهمناش مكنتسوقوش ليه ولي ضاير بيه ..
عنبر ( ضارت عندو ) مغانجاوبكش خليك كتبرول بوحدك ( رجعات عطاتو بظهر هازة الطبسيل حتى غبرات على الأنظار ) ..
الروطال ( دار يديه فجيابو مبسم ) ݣد ما دفعتي كبير طرتي ولا نزلتي غايجي نهار لي تهبطي فيه كواريك ( هز التيليفون من جيبو دخل للواتساب مدور لراشد ) فين أجمي .. بغيتك فواحد البريكول تنضيه ليا ..
- دخلات للسهام عشاها وخرجات من عندها مشات لبيتها نيشان .. لاحت داك الطالون لبعيد حيدات الحوايج لي كانت لابسة بدلاتهم ببيجامة ديال الدار مسحات وجها دارت روتينها توجهات للبالكو وقفات فيه مقابلة مع السما ونجومها حتى بدا تيليفونها كيسوني .. هزاتو كانت نمرة بريڤي ستغربات فتحات الخط :
ألو سلام عليكم ..
.... : تبدلتي بزاااف مابقيتيش ديك البنت لي عرفتها نهار لول كتبيع البيبوش ، البنت لي بغيتها من نهار لول فاش شفتها ودات ليا عقلي ..
عنبر ( قطعات عليه ) الݣنس دالويل ( دورات نمرة عماد بقات مدة جاوبها ) عماد
عماد : سونا ليك مزيان منين قطعتي عليه
عنبر ( بإستغراب) بلات كيفاش عرفتيه سونا وعرفتيني قطعت عليه ؟
عماد ( تبسم ) غاندخلوك وسط هاد تيقشبيلة وغانخليوك منك ليها .. مغانرضو ليك البال مغانعسو عليك مغانتبعوك ، اي حاجة كدار اعنبر كتوصلنا تهناي
عنبر : واش حتى نهار لي وقف عليا ؟
عماد : حتى داك النهار غير فاروق الله يهديه ديما يدو سابقاه ، مغاديش نخليو شيحاجة توصلك تهناي غير هو دابا الله يرضي عليك غايسوني المرة الثانية متجاوبيهش ولكن المرة ثالثة جاوبي وديري لي كنت ݣلت ليك ..
عنبر ( برمات شفايفها ) صافي واخا ..
مجموعين على الطبلة ديال الفطور كيفطرو ، حياة لبسات حوايجها هي وليالي خرجو للخدمة وبقاو البقية ..
تودة : غادي نمشي نتقدى الثلاجة خوات تمشي معايا أرشيدة
رشيدة : خاصني نمشي لولاد صالح نجيب الإنتقال ، عرفتي حتى لغدا ونمشي نفيق بكري خاص 7 نخرج من الدار
تودة : ايوا يلاه لبسي ويلاه .. جمعات الماعن مشات لبسات جلابتها لاحت عليها جلابتها وشالها هزات بزطامها تسنات رشيدة لبسات عليها خلات دراري مع سميرة .. هزات تودة الكروصة وخرجو مجموعين غاديين كيتمشاو فطعو الشانطي لسوق لي حدا مالين الحوت ..
- دخلو لداخل تقداو الخضرة خداو حتى الحوت ودجاج
تودة ( جارة الكروصة ) بقا لينا اللحم ماعرفتش واش ندوز عندك داك السيد لي مالفة ناخود عندو ولكن اللحم ديال هاد المرة ماهواش ..
رشيدة : وشوفي شي حد خور
تودة : بلاتي ناخدو العطرية بعدا .. مشاو للعند العطار لي كياخدو عندو ديما وقفو عندو حداه كان محال كبير محلول ديال تاݣزارت رمات عينيها ليه كيبان نقي وكبير واقفين الناس كيتقداو عندو .. وجنبو كان محال كبير ديال خضار وكيبيع حتى ديسير ..
تودة ( دخلات عند العطار ) حميد لاباس عليك
حميد العطار : الحمد لله الالة فاطنة تي لاباس ، غبةر هادي
تودة : غير مع الوقت دير ليا الله يرضي عليك بحال ديما .. القزبر يابس عطيه ليا حبوب ماتعطيهش ليا مطحون ( بدا كيعبر ليها وهي كدور فعينيها ) حميد ݣوليا مكتعرفش شي حد كيبيع المسكة الحرة تكون حرة حقيقية ..
حميد ( كيعبر ) أش غانݣولك انا عندي ولكن ماشي حرة ، خاص تشوفي شي حد لي كيبيع دوريجين ولا لي كيبيع داكشي دصحراء تكون عندهم
رشيدة : أش بغيتيها ؟
تودة : سميرة هلكاتها المعدة والمسكة الحرة زينة ليها
حميد ( سمعهم ) وايلي واش بصح مزيانة كت سمعت شي عيالات كيدويو عليها
تودة : زييينة للمعدة وجرثومة المعدة ݣالك حتى لقولون مزيانة ليه ، تجيب ايطرو دالما ودير فيه جوج حبيبات حتى يدوبو وتشرب منو حتى تكمل داك ليطرو فداك نهار راه دقة بطلة ..
كانت واحد البنت فالمحال كتسناه يسالي ، لابسة عباية وشالها وصندالة ديال صبع .. ملامحها بريئة وضعيفة متوترة باغية تسولها وحشمات بانت ليها عارفة ودايا فزمان وجايبة قزدرات وجها ونطقات :
خالتي ربي نسولك مديريهاش مني قلة الصواب
تودة (ضارت عندها ) مرحبا ابنتي سولي
.... : شفتك كدوي على المسكة الحرة ( قربات عندها حشمانة بصوت ناقص ) بغيت انسولك واش مكتعرفيش شي حاجة للغلض ضعيفة بزاف ومخطوبة بغيت نغلاض اشوية قبل مايوصل العرس مابغيتش ندير داكشي داللحسة خفت وسمحيليا اخالتي ..
تودة : لا هانية ابنتي مكابن حتى موشكيل هانتي سمعي .. غاتجيبي غير زنجلان وحبة حلاوة ونافع هادو تسخنيهم غير شوية كل حاجة بوحدها .. وطحني كل حاجة بوحدهم ديريهم فشي قريعة كل حاجة فقريعة ، ومن ليل ليل جيبي داك دانون دشكلاط ولا داك لي بحال جبن سميتو كاع ..
.... : بيرلي ؟
تودة : اييه هداك غاتجيبي معلقة صغيرة وهزي من زنجلان ومن نافع ومن حبة حلاوة معلقة معلقة صغيرة من الحاجة وخلطيها مع دانون وكولي راه كتغلض خاصك المداومة .. ويلى بغيتي تزيدي معاهم حتى حب العزيز وصوجا مطحونين مزيان المهم تي هاد 3 راهم كافيين ..
.... : خالتي وعلى شحال تبان النتيجة ؟
تودة : مكتعطلش ولكن تبعيهم ومن ليل ليل بقا سخني واحد تويمة ودهنيها بزيت بلدية وديريها على شكل قويلب راه كتحيد البرودة وكتعمر طراف ولكن فاش تزوجي لا حيت هي تنقي المصران كتبقاي تنفسي بزاف ..
.... : الله يخلي ليك صحيحتك أخالتي لهلا يخطيك .. ربي عطيني نمرتك نعرض عليك لعرسي
تودة : والله ابنيتي محافضاها وتيليفون خليتو كتبي نمرتك نوصل دار نصوني لك ( كتبات ليها النمرة فورقة عطاتها ليها بقات كتشكر فيها حتى عبرات ومشات )
تودة : حميد هاد المحال لي حداك واش حل جديد ؟
- حميد ( جمع كولشي فساشية كبيرة ) أيااه هذا المحال ديال سي حسن هو والمحال ديال الخضرة لي حداه بجوج .. كان عندو محال فالحي المحمدي ودابا حل هدا هنا ..
تودة : واش عندو اللحم مزيان ؟
حميد : وكولشي كيقدا عندو عندو كولشي النقي صراحة تݣال
تودة : شحال عندي ؟ ( خلصاتو وخرجات هي ورشيدة وقفات عند الݣزار كانو جوج ديال الرجال لداخل خدامين كيعبرو وشخص ݣالس من الجهة لوخرا على المحال ) عفاك دير ليا واحد 3 كيبو ديال اللحم شحال بعدا للكيلو ؟
.... : الغنمي ولا البݣري ؟
تودة ( كتفكر ) دير ليا كيلو غنمي وجوج بݣري
( بصوت رجولي تقيل ) دير ليها اولدي جوج غنمي و3 بݣري
تودة ( ضارت عند مصدر الصوت واقف راجل كبير فالسن مربوع القد شعرو فيه خصلات بيضة مع خصلات كحلة خاتم ديال النقرة فيدو اليمنية فيه حجرة فالخضر داكن )
.... : واخا سي حسن
تودة : لا اسيدي انا بغيتي غير 2 كيلو منهم بجوج
حسن : الالة انا بغيت نزيدك كيلو ، اول مرة تجي لعندنا حسبيه كادو من عندنا ( كيناظرها بعينيه ) باش تولي كليانة ديالنا وعمرك تبدلينا ( شاف فدري لاخر ) سير اولدي عبر خضرة كسكسو لسيدة
تودة ( غوبشات ) لا اسيدي خدينا الخضرة ربي يخليك انا بغيت ندي اربعة كيلو ماشي 5
حسن ( بإبتسامة ) كيلو الالة مادة مجاب .. حسبيها معرفة زينة تولي كليانة دايمة على المحال ..
- عبرو ليها اللحم وماخلا ليها ماتݣول ، جبدات الفلوس باش تخلص ..
حسن : الالة ݣتليك حسبيهم معرفة بيناتنا صافي الله يسخر
تودة : ولكن لا 5 كيلو داللحم منخلص والو مجاتش اسيدي ݣلتي تزيد كيلو ݣلنا مرحبا ولكن ماتشد لا ( نغزاتها رشيدة باش تقبل مداتهاش فيها ) شد أسيدي الله يرحم الوالدين ..
حسن ( موجه كلامو لخدامة ) تخلصو فكيلو ورجعو ليها الصرف ( شافيها بجدية وصرامة ) والله منشد عليها الريال الالة صافي .. بقات مستغربة من هاد الشخص رضو ليها الصرف رضاتو للبزطامها خشات ساشية فالكروصة وتخطاتو بلا كلمة بلا جوج مخلياه متبعها بالعين ..
رشيدة ( مبسمة ) العفيريتة عاطية العين وتجيبي العرسان غير لاما بغيتيش هانتي بخيرو وخميرو
تودة ( ميقات فيها ) يشويني فيه داكشي لي بقا خاصني ، احيت ناس تماك مابغيتش نحشمو أما مانشد عندو
رشيدة : باين تبارك الله سلعتو زينة ، اللحم باينة فيه فتي
تودة : حتى يطيب ونشوفوه واش فتي ولا مكنزز ، زيدي نشوفو مناخدو لرشيد ، يلاه نيت نوجدو راسنا للعشية إن شاء الله..
- من تم شدو لعند واحد السيد كيبيع الماعن راقيين ، خداو حامل حلويان بالبيض وذهبي او واحد صينية فيها مبيخرة وبواطة ديال الزاج فيها الذهبي .. من تما شدوها للدار ..
~~~~~~~~~~
خرجات من القرايا خدات طاكسي داها نيشان لسيدي معروف .. خلصات ونزلات توجهات للموبل لي فين جا المكتب أول مكتب للطارق والروطال كان هو هذا بنسبة ليهم كان فاتحة خير عليهم بزوج طلعات فلاسنسور ودخلات ..
- ريحة رجولية كانت عاطية باب البيرو ديالو كان مفتوح .. وقفات قدام الباب ودقات
طارق ( هز راسو ) دخلي ( أشر ليها براسو .. حياة دخلات أشر ليها تݣلس ݣلسات ) هانية دار لاباس عليهم ؟
حياة : الحمد لله بيخير
طارق : سمحيليا على لبارح جبتك حتى لهنا على والو .. جاتني خدمة على غفلة كان خاصني نمشي ليها ..
حياة : ماشي مشكيل
طارق ( بجدية ) المهم ݣاليا فاروق بلي قريتي حتى لكاطريام وخرجتي ودابا كتقراي اللغة فشي مدرسة ؟؟
حياة : ياه واحد المدرسة كاينة فالحي الحسني دسال اللغات كنقرا الإنجليزية باش هاد العام إن شاء بغيت. ندفع لباك ليبر ..
طارق ( هزهز براسو ) مزيان الله يسر .. شوفي حياة الى كان راسك خفيف راه دغية تعلمي خاص غير عقلك يكون صغير وكيشد كولشي .. من بعد الخدمة غاتجيك ساهلة ، المكتب ݣدام عينيك هدا هو نݣيطة باش بدينا عندي المكتب الكبير ولكن هذا عزيز وبجهد والأغلبية ديال الكليان كيجيو لهنا ..
حياة : فهمتك
طارق : انا غانكون فالمكتب لاخور .. لي كيجي لهنا كتوصليه ليا هاد المكتب تابع للعقار ، لي باغي يشري ولا يبيع كتشدي سميتو وكنيتو نمرتو وكتوصليهم ليا وأنا كنتكلف .. من بعد كيجيب ليك الضوسي ديالو كتوصليه ليا يالعربية انت هي الخط لي بيني وبين الكليان ..
حياة : مافهمتش واش حتى البيرو لاخر تابع للعقار .. علاش لي متخلي بيرو واحد وتخدم فيه مساعدة جاني بحال الى فين هي ودنك هاهي ..
طارق ( رجع بظهرو اللور كان شاد الكرسي كلو بطولتو وقلدتو ) المكتب لاخور بوحدو هداك تابع لشركة حيدر لتربية الأغنام .. وكاين بيرو اخور تابع لشركة البيض ( هزات حواجبها كتستوعب هاد الخير وهاد الأملاك )
حياة : والخيل ؟
طارق ( صغر عينيه من فضولها ) الخيل كنبيعو فيه ونشريو غير حيت باغيين .. ماشي خدمتنا فيكس ، هداك بيزنيس غير مع الحباب وصحاب عندك شي سؤال خور ؟
حياة ( حنحنات ) لا ماعنديش ، والكليان لي غايجي لهنا واش مغاديش يتلاقى بيك ؟
واقف حدا طوموبيلتو داير رجل على رجل شاد تيليفون ديالو حتى وقفات طوموبيلت باه ، نزل منها أدريس وعبد الخالق .. قطع الشانطي ومشا لعندهم باس لباه راسو ولعمو راسو ..
أدريس : فين هو سمسار ؟
الروطال ( تبسم ) شكون طارق .. طارق مامساليش غايسيفط اسيد لي خدام معاه
عبد الخالق ( كيدور عينيه فداك الشارع لي جا فبورݣون ) فين جات القهوة ؟
الروطال ( داير يديج فجياب السروال ديال الكيطمة لي لابس ) علمي علمك يوصل ونشوفو .. وقفات طوموبيل فورد زرقة بلاصات نزل منها شخص يكون فالأربعين من عمرو .. توجه عندهم بإبتسامة
.... : سمحوليا تعطلت عليكم
الروطال : لا فالوقت حنا يلاه تحطينا
.... : القهوة راه هنا نيت فداك الشارع ( نعت ليهم فين ) (توجهو للبلاصة لي وراهم ) سيد عطاني السوارت ديالها باش نوريها ليكم حيت هو محاضرس هاد النهار فكازا الى عجباتكم تفاهمو إن شاء الله ..
- ضارو لشارع كانو فيه بوتيكات .. وكراج كبير وقفو قدامو ، فتح الكراج هزو عاد فتح البيباب لي كانو ديال الزاج .. هز الروطال عينيه للفوق كان طيراس وسراجم كبار ديال الزاج .. دخلو للقهوة الداخل كبيرة نقية ومفينية ومقادة مصبوغة بشيبي بارد بالكراسة ديال الموبرة وفوتويات ..
.... : الطواليط لديك الجيه وعاد كاين لاطيراس من هنا .. (تبعوه الدروج كانو بزليج لي كان بحال شكل خشب المحابق فالقنت وعاد لاطيراس كان شكل ديالو زوين بطبالي راقيين ) هذا هو لاطيراس
فلاو القهوة بلاصة بلاصة وقنت بقنت عبد الخالق وأدريس عجباتهم القهوة بزاف ..
الروطال : شحال طارب فيها مولاها ؟
.... : راه ݣلتها لسي طارق طالب فيها 90 مليون
عبد الخالق : باخ باخ باخ 90 مليون كاع
.... : راه كان داير ليها 100 وعشرة ولكن هو كيعرف سي طارق داكشي باش نزلها ل 90 وبيناتنا القهوة راه خسر عليها بزاف ، كونما كان غايخوي المغرب مكانش غادي يبيعها ..
أدريس : ماينقصش شوية طلع الثمن بزاف
.... : والله أسي ادريس الى هاد الثمن مخير وماتلقاوهش خصوصا فهاد القنت .. الى بغيتي الرخا خاص تشوف الجوايه لوخرين بحال سيدي عثمان والبرنوصي ولكن راه حتى تما غادي تلقاو كاع ب ديك 60 مليون ..
الروطال ( كيدور عينيه فالقهوة شاف فباه وعمو ) واش عجباتكم بعدا ؟
أدريس : والقهوة صراحة تݣال مزيانة بلاصة زوينة .. وقريبة أش بان لك أعبد الخالق ؟
عبد الخالق : حتى انا عجباتني
الروطال ( شاف فسمسار ) صافي أصديقي زطم .. شوف لينا مع السيد نريݣلو معاه الأمور الله يرضي علك وباش ماكان علم طارق الله يحفظك ..
.... : بكل فرح أسي فاروق الله يسخر
الجميع : آمــــيـــــن..
~~~~~~~~~~
خارجة بجليليبة فالأزرق فاتح مع شال لايحاه على راسها .. باها حاها وخوها ورشيد معاه خوه وعزيز فرحانة الحلم ديالها تحقق وأخيرا تزوجات بشخص لي بغاتو من قلبها وعمرها بغات غيرو دعواتها ستاجبو من عند الله .. يدها مزينة بخاتم الزواج وصبع ديال الحنة فيدها وفرجلها خفيف ..
الأب : الله يكمل عليكم بالخير
رشيد : اللهم آمين أعمي لهلا يحشمنا معاكم ياربي .. ركب الأب او ولدو فطوموبيل ورشيد وماريا سلقو وعزيز وخو رشيد فطوموبيل وراهم توجهو نيشان للبارتما لي كانو ساكنين فيها ..
رشيد : مبروك علينا ، الله يجعل فيك الخير ليا تكون فيك عائلتي ياربي
ماريا ( حشمانة ) اللهم آمين ياربي ( سكتات مدة ) فيا الخلعة
رشيد ( تبسم شد يدها وسط يدو بايسها ) وعلاش ؟
ماريا ( ضحكات ) والو غير الخلعة وصافي
رشيد : ݣولي ليا فين تبغي تسافري ؟
ماريا ( شافت فيه ) نطلعو لشمال ماكرهتش نمشي ليه عمري وصلتو
رشيد : نمشيو أحبيبي نمشيو .. حتى حاجة ماتغلا عليك وتبقى فݣلبك خاطرك ولي يريحك
ماريا ( تنهدات ) الله يخليك ليا
رشيد : اللهم امين .. يدوز العشا تجمعي حوايجك وصباح زطمة وحدة للشمال
ماريا ( جاها الوجع ) غاتجي العشية عنبر مزال (شافت فيه )
رشيد : ضروري غاتجي هي وعائلتها راهم عائلتي
ماريا ( بلعات ريقها ) غايجي معاها حتى راجلها ؟
رشيد : ضروري يجي علاش ؟
ماريا : لا غير سولتك وصافي .. رجع باس يدها وسايݣ بيد حتى وصلو نزلو كاملين دقة وحدة وهي قلبها مقبوط والخوف طاغي عليها ..
- فالمحال الخاص بالعطور بلاكة فذهبي مكتوب فيها " عطور الإخوة " الدخلة ديال المحال كيتشم فيها ريحة البخور وريحة العطور مكاتسخايش تخرجي منها .. الصباغة دالمحال كانت خليط بين الباج وءعبي ولون القهوي .. مقسوم لجوج اقسام بلاصة فيها العطور النسوية وعطور الشعر والجهة لوخرا فيها عطور رجالية وعاد كان قسم خاص بالعبايات .. جهة الرجال كانت خدامة فيها ليالي واقفة كتدوي مع واحد الكليان ختار واحد البارفان دارتو ليه فساشي ومشا ..
حمزة : ليالي نمشي نتسخر غير للمخبازة لي حدانا ونرجع صافي
ليالي : صافي واخا
حمزة : بغيتي شيحاجة نجيبها ليك معايا ؟
ليالي : شي پتي پان أخويا الله يسهل عليك ( خرج وهي بقات ) .. هزات تيليكوموند دارت موسيقى خفيفة فتلفازة وݣلسات شادة تيليفونها دخلات لتيك توك للصفحة لي كانو مشاركين فيها هي او حمزة بزوج كيطلقو لايفات بخصوص المحال وفيديوات باش يبيعو حتى اونلاين ..
( صوت رجولي ) السلام عليكم
ليالي : وعليكم السلام ( هزات راسها بإبتسامة لي سرعان ما مسحاتها )
راشد ( دور راسو فالمحال بلاما يشوفيها .. رجع راسو للعندها ببطئ ) فين هو حمزة ؟
ليالي ( جاتها عجب يعرف حمزة وكيفاش كيسول عليه رجعات قالت يمكن كيعرفو حيت صاحب طارق ) مكاينش مشا غير للمخبزة ويرجع ..
راشد ( هزهز راسو ) ماشي مشكيل .. بقات كتشوفيه مراقبة تحركاتو .. حل الباب ودخل تقرصات وتنكرات تخلعات كتشوفيه بشك ، كيبان ليها مشا للجهة فين كيكون حمزة حتى دخل حمزة هاز ساشية شاف راشد تفاجئ وتبسم ..
حمزة : سي راشد مرحبا بيك ، سمحليا مشيت غير للمخبزة وجيت
راشد ( حرك راسو ) ماشي مشكيل كيغادية الخدمة مزيانة ؟
حمزة : الحمد لله كولشي غادي مزيان واخا يلاه حلينا .. ولكن بدينا كنشدو الكليان
راشد : الحمد لله ، السيمانة الجايا غادي دخل سلعة جديدة ركز ليا الله يرضي عليك على الأونلاين ، ليلايڤ والفيديو تيكتوك فيسبوك وحتى الأنسنغرام ..
حمزة : كون هاني اسي راشد أنا وليالي كل نهار كنحطو فتيك توك .. حتى الأنستغرام ماناسيينوش
راشد : مزيان هاد ليامات طارق مشغول .. أنا لي غانبقى نجي صافي
حمزة : مرحبا
- خرج راشد من جهة الكولوار بلاما يتلفت لجهة ليالي ، بقات متبعاه بالعين حتى خرج كتسمع صوت الطوموبيل عاد سمعاتو مشا ..
حمزة ( مد ليها ساشي فيه بتي بان ) هاكي خودي ، جبت ليك رايبي باش دوزي .. كنت باغي نعمر أتاي لقيت البوطة سلات ..
ليالي : حمزة شكون هذا ( دارت راسها مكتعرفوش ) ؟
حمزة ( كيشوفيها بعدم إستيعاب ) من نيتك كتسولي هذا سي راشد مول المحال رجوع لله أليالي !!
ليالي ( تصدمات متوقعاتهاش ) ياك سي طارق هو مولاه حيت هو لي خدمني انا !!؟
حمزة : بجوج بيهم ماليه سي طارق وسي راشد شركة بجوج بيهم مالين الشي .. احيت كان سي راشد مسافر مجاش فالإفتتاح داكشي باش ماشتيهش
ليالي ( بلعات ريقها ) اااه فهمت ( ماعجبهاش الحال كتسول راسها واش عنبر وحياة كان فخبارهم ولا حتى هوما بحالهم بحالها هزات تيليفونها ظخلات للواتساب سيفطات ميساج للحياة ) " واش كان فخبارك بلي راشد شريك طارق فالمحال "
- بقات كتسنى فالجواب طلع ليها بلي قرات الميساج كيبان ليها كتكتب " لا مافخباريش والى كان شريكو ومن بعد "
ليالي : انا هاد السيد مكايدخلش ليا للخاطري ومكنرتاحش ليه مكايعجبنيش
حياة : مالك غاتزوجي بيه أنتي خدامة كديري خدمتك وكتخلصي عليها .. وفهاد الوقت الخدمة راه ماتلقايها ابريق الناش وبالمعرفة حمدي الله لي لقيتي هاد الخديمة وبداك الصالير سيري حتى تجي لدار وندويو " ..
- حطات ليالي تيليفونها .. كتعض فديك بتي بان ودوز برايبي وتنهد كتفكر واش تكمل فهاد الخدمة من ورا ماعرفات بلي هو شريك وغايبقى يجي بزاف ولا تشد فخدمتها لي صاليرها مزيان وغايخليها تجمع شوية لدواير زمان ..
واقفة قدام المرايا كتحط اخر روتوش ، لابسة جلابة دوبياس تحتي فالبيج والفوقي فالأحمر مع شال فيها الكحل والبيح والأحمر والأخضر مدارتش نقطة دالمكياج من غير مرطب لوجها ومركب لشفايفها بلا لون .. هزات ساكها لبسات صندالة پلا وخرجات من بيتها دخلات عند سهام علماتها ونزلات التحت .. كان واقف كيتسناها لابس سروال توب فالبلو مارين مع سمطة كحلة وشوميز فالبيض هاز لاڤيست ديالو فيديه .. طاعها ونزلها مطول فيها الشوفة الشوفة لي كتوترها وكتخربقها مكتخليهاش تزݣي فيه الشوفة ..
عنبر ( حركات راسها ) شنو ؟
الروطال : هاد اللون مشعشع بزاف كون غابدلتيه
عنبر ( بقات واقفة كتشوفيه بمعنى واش من نيتك ) كدوي بصح واش هادي المرة لولة لي غادي نلبسها ..
الروطال : ماشي المرة لولة ولكن هاد اللوان كيأتيريو ، ياك عندك شي جوج تم
عنبر : سبحان الله حافظ جلالبي ، فاروق انتعطلو يلاه نمشيو الكادو حطيتيه فطوموبيل ؟
الروطال : دابا انا هضرتي كدخل من ودن وتخرج من ودن ؟
عنبر : انا مغانرجعش ونبقى نبدل تم ، جلابة مستورة ماعرياناش متزيدش فيه
الروطال ( ببرود ) وحتى حنا مازربانينش الالة ديك جلابة ماتلبسيهاش
عنبر ( بنفس البرود ) وحتى انا مغانحيدهاش وهي لي غادي نلبس ، راه حنا غاديين لعشا رجال بوحدهم والعيالات بوحدهم كل واحد فبيت بلاما تزيد فيه الله يرحم الوالدين وخلينا هانيين ..
الروطال : غادي نتفاهمو على هاد قصوحية الراس امدام
عنبر ( بجدية ) كون بانت ليا الجلابة فيها شي عيب مغاديش نلبسها بلاما تقولها ليا أنت .. الجلابة واسعة وديال العرايض مخارجاش بيها لزنقة ندير بيها عرض الأزياء ( تخطاتو وخرجات ) .. تبعها ساد الباب طلعات لطوموبيل بلاما تسناه دارت السمطة وقلبات وجها .. طلع حداها حاضيها بنص عين ديمارا الطوموبيل وشد الطريق ..
~~~~~~~~
- شدو جوج طاكسيات وصلهم لادريس فين عايش رشيد .. نزلات تودة من طاكسي لول هي وحياة وسميرة حياة هازة الكادو لابس سروال ديال الثوب فالكحل مع شوميز فنفس اللون وكيمونو كحل مطروز وجامعة شعرها سفنجة ..
حياة ( واقفة حتى خرجات مها وخوتها من طاكسي ثانية ) يلاه طلعو ( شافت فالعساس ) عمي علال لاباس عليك
علال ( الكونسيرج ) الحمد لله ابنتي كيدايرة انتي واحد بنتي عنبر لاباس عليها غبورات هادي
حياة : غير مع الوقت أعمي كولشي بيخير هاد الساعة ( تمو طالعين )
رشيدة : فين كتعرفي انتي الكونسييرج ؟
حياة ( شافت فيها بإستغراب ) مي واقيلة راه قلت ليك بلي كنا ساكنين فدار ديال خت رشيد ، قبل متبيعها ليه واش نسيتي ؟
رشيدة : وطلعي طلعي .. تمو طالعين فسنسور وصلو للقدام الشقة ديال رشيد الباب محلول والهضرة كثيرة والباب دشقة لوخرا حتى محلول ريحة الطياب كتعطي ، دقات حياة فالباب جا رشيد ..
رشيد : اهلا اهلا ( سلم على تودة باس ليها راسها هي وسميرة ورشيدة ) نص ميترو غبرتي علينا ݣالو ليا وليتي كطيري فلونݣلي
حياة : باز تريݣل دابا نولي خطيرة فاللغة وتشوف
سميرة : مبارك ومسعود مادرتي أولدي
رشيد : الله يبارك فيك أخالتي ( باركو ليه كاملين بدا كيعيط ) ماريا ماريا ( خرجات ماريا لابسة قفيطين ديال جوهرة لايحة عليها واحد الشال
رشيد : ها عائلتي هادي حياة وهادي خالتي تودة وخالتي سميرة وخالتي رشيدة
ماريا ( بإبتسامة ) مرحبا بيكم ( سلمات عليهم باركو ليها وعطاتها تودة الكادو ) زيدو دخلو مرحبا بيكم .. دخلو معاها للشقة لي كارية تم فين ايتجمعو العيالات وفين كطيب الطيابة .. دخلاتهم ماريا عرفاتهم على مها وعلى عمتها وزوج خلاتها ، وبنات خالتها وخطيبة خوها كانت حتى بهيجة ماين عزيز او بنتها المزوجة ..
حياة : واحد عزيز شتو غبر غبرة وحدة .. ياكما حتى هو ناوي يضربها بتزويجة ويقولينا كولشي جا على غفلة ..
بهيجة ( كضحك ) مصاب أبنتي كون غير يبغي ليا ، داك الولد عندي راسو قاصح حالف مايتزوج حتى يكمل دارو ويدير مشيريع على قدو ( بنات خالت ماريا وحدة شافت فوحدة وتبسمات ) ..
إبتسام ( وحدة من بنات خالتها شافت فخالتها ناضت ) خالتي أمال نوض نعاونك
أمال : لا ابنتي بغيت انشوف عمك يتسخر ليا
إبتسام : نتسخر ليك انا
أمال : علاش انتي ابنتي عارفة هنا .. تمشي تجلاي لا غير ݣلسي ( ماعجبهاش الحال شافت فيهم وتبسمات ) ..
غادي سايݣ طوموبيلتو .. تقهوى فالقهوة لي مالف كيݣلس فيها بعيدة على المدينة شوية حتى كتحبس بيه الطوموبيل حاول معاها مامرة مازوج حلفات واش بغات تحرك ليه ..
عماد : الزهر ديال البعر ( نزل منها كيقلب فيها خبطها برجلو معصب جبد التيليفون ديالو ) ألو عصام فينك ؟ تجي ديني وقفات بيا طوموبيل أخويا انا غادي نسيفط ليك اللوكال صافي العز ..
سيفط ليها لوكال ، قطع وسونا لديپاناج .. بقا فطوموبيلتو كيتسنى حتى وقف عليه عصام بطوموبيل .. بقاو بجوج حتى جاو ديباناج داو طوموبيل ..
عصام ( سايݣ عاݣد غوباشتو مركز مع طريق )
عماد : اتبقى راهي عليا براطمك أحيت جاي توصلنا ؟
عصام ( شافيه ) مراخيهمش عليك أعماد بلاما تخرج ليا حتى انت من جنب
عماد : شكاين ؟
عصام : مشيتي عند الواليدة طليتي عليها ولالا ؟
عماد : لا مامشيتش كنسوني ليها كتقطع عليا ، مكانساليش اخويا راه الخدمة كتاكل فيا
عصام : دزت عندها بقا ليها غير تهز شي هراوة وتعطيني .. ريحة الݣارو فدار كتكوخ فاش ݣلتها ليها جرات عليا ، الواليدة راه غير مغادية وكتجهل
عماد : حتى فاروق مشا عندها وجرات عليه .. ونزيدك دخلات ليه الشك بلي ماشي خونا ( شافيه عصاب ) وحق ربي المعبود دخلات ليه التناوي وتبعاتو حتى لدروج
عصام : واش من نيتها !! مالها معاه أش دار ليها مافهمتش انا شنو درنا ليها كاملين باش تݣلب علينا هاد الݣلبة بحال الى حنا ماشي ولادها ولا غي خورجني هو ريحة الݣارو راه راسي داخ عليا
عماد : بحال والو تكون شي وحدة من صحاباتها جات عندها وكمات عندها مايمكنش الواليدة تكون كتكمي مغادخلش ليا لراس ..
عصام : وراه حتى أنا راسي داخ عليا ݣلت لك راه منين جيت من عندها وانا غير غارق .. خدام وماخدام حابس فبلاصتي ونخمم بغيت اشي حل مالݣيتوش ماعرفت الواليدة شنو بغاتنا نديرو ؟
عماد : بغاتنا نݣطعو مع الواليد ومع العائلة ، ولي ݣالتها نديروها وتزوجنا بيمن بغات كراكيز وصافي ماشي ولاد الله يهديها الله يهديها علينا وعلى راسها ، انا ماحيلتي للخدمة ماحيلتي ليها ماحيلتي لراشي عييت برب العالي ..
عصام ( بقا ساكت مدة ضار شافيه ورجع كيشوف قدامو ) فخبارك بنت عمك حاملة ؟
عماد ( شافيه ) شكون فيهم ؟
عصام : يسرى
عماد ( دور لسانو وسط فمو ببرود عكس الإحساس لي تحرك قيه لداخل ) مزيان الله يسخر ليها ..
- سونا تيليفون ديال عماد مقاطعهم
عماد ( كيشوف فتيليقون نمرة مامسجلاش فتح الخط ) السلام عليكم .. لا ماشي مشكيل شكون معايا ؟ ( حل عينيه مزيان مقاد فالݣلسة بتركيز ) اياااه .. صافي واخا خليك معاها الله يجازيك بيخير ، عينيك متغفلش عليها أنا جاي دابا عندك ( قطع شاف فخوه ) عصام شد طريق جديدة
عصام : تاكيفاش طريق جديدة .. أخويا عندي مايدار
عماد : تنزل وتشد طاكسي ولا تسد بيا طريق أش ݣلتي ؟
عصام : صافي صافي ( بدل الطريق شاد طريق الجديدة ) ..
- شدو الطريق غاديين فسكات عصام سولو شنو واقع ..
عماد : من بعد .. (كان عقلو غير مع السيد لي سونا عليه بقاو شادين الطريق حتى وصلو فين كان السيد ) وقف هنا
عصام وقف فين ݣاليه .. نزل عماد بزربة ونزل عصام تابعو ..
عماد : السلام عليكم ( وقف عليه ) فين هي ؟
.... : مع مولات الدار أجي معايا أسيدي ..
عماد : كروصتك !!
.... : لا ماتخافش ، تبعو عماد ومعاه عصام غاديين كتبان ليهم واحد الدار .. دخل السيد سبق عاد خرج معيط على عماد ..
دخل عماد الدار كانت صغيرة مفرشة على قدهم .. مراتو تلقات ليهم مرحبا بيهم دخلو لواحد البيت ، كانت ݣالسة ساهية باينة فيها يلاه مدوشة لابسة بيجامة وتقاشر وساهية مكدويش شعرها عسلي وملامحها هادئين وباينة عليهم البراءة غير كترمش وساكتة ..
.... : راه دوشات ليها مولات الدار غير هاد الصباح
عماد ( ݣلس وعصام واقف ) إيمتا رجعات ؟
.... : لقيتها صباح بكري ݣدام الباب ديال الدار ناعسة ، دخلاتها مولات الدار ومشيت انا للخدمة رجعت لدار تغديت وبقيت كنقلب على النمرة ديالك سونيت ݣبيل ومجاوبتيش ..
عماد : كنت خدام مارضيتش البال ( تقابل معاها ) لبنى ( شافيهم ) ياك سميتها لبنى ؟
مراتو : كل مرة اسيدي وشنو كتقول مرة نسولوها تقول لبنى .. مرة كتقول لمياء مرة كتقول إيمان والله ماعرفنا سميتها ديال بصح ..
عماد : هادشي لي كتݣول مكدويش كاع ؟
.... : لا اسيدي والو مكدويش غير مصدومة تعطيها تاكل تاكل ماعطيتيهاش متاكل الله يكون بيها ..
عماد : خاصني نديها معايا ، انا معارفش شكون والديها بضبط ولكن شاد فشي ناس تݣد تكون بنتهم ..
.... : تهلاو فيها اسيدي راه درويشة مسكينة
عماد : تهناي الالة
.... : انجيب ليها واحد جلابة ديالي تلبسها .. عصام جر عماد مخرجو
عصام : تا فين غاديها شكون هاد البنت ؟
عماد : غاتكون وحدة من دوك البنات لي عاودت ليك البلان ديالهم ، شاك اتكون وحدة منهم تكون زهقات ليهم
عصام : باش عرفتيها وفين غاتݣلسها هي 20 غاتديها لدار عند باك ولا عندك ؟
عماد : واش حنا فهادشي أجمي ، نديوها ويحن الله تا مالك ( تخطاه ورجع لعندهم لقاها لبساتها جلابة خرجوها طلعها فطوموبيل اللور ، شكر السيد ودور معاه واخا مابغاش عاد ركبو ) بلوكي البيبان اللوراليين لا تبغي تحلهم ( خنزر فيه عصام وبلوكا البيبان ديمارا الطوموبيل شاد الطريق مغوبش عينيه مرة على الطريق ومرة عليها كانت حاطة راسها على الزاج ديال الطوموبيل وساهية كتشوف بعينيها ) ..
× عـنـد رشــيـد ×
- وصلات طوموبيل الروطال بلاصاها بإستغراب ( ضار عند عنبر لي مدواتش معاه منين ركبو ) واش هنا فين ساكن رشيد ؟
عنبر : اه هنا .. نزلات ضايرة الباب اللور هزات الكادو تسناتو حتى تبعها سلمات على علال وتمو طالعين ..
الروطال : فين كتعرفي الكونسييرج ؟
عنبر : حيتاش الدار ديال رشيد كنا ساكنين فيها انا وحياة ، قبل ماتبيعها ليه ختو فاش مالقيناش فين نكونو جابنا مسكين للدار ختو خلى لينا السوارت ومشا هو لواحد الكارسيونيير كان كاريها ( شرحات ليه باش عقلو مايمشيش بعيد ) .. طلعو فلاسانسور وهو مزال كيستفسر واش هادي صدفة يكون رشيد وماريا ساكنين فموبل واحد ..
فاش تحل لاسنسور سولها :
شنو سمية هادي لي خدا رشيد ؟
عنبر ( ستغربات من السؤال ) سميتها ماريا علاش ؟
- خرج رشيد لعندهم لقاهم واقفين كيدويو ، ضارو عندو بجوج ..
رشيد : واش تجليتو شتكم ݣالسين هنا ( ضحك مسلم على الروطال سلام رجولي وعلى عنبر باليد تحت نظرات الروطال )
الروطال : لا اكنا داويين مبارك ومسعود
رشيد : الله يبارك فيك (شاف فعنبر ) لاش الكادو زعمة ؟
عنبر ( بإبتسامة ) تستاهل أخويا أحسن حاجة هادشي وقليل فحقك
رشيد : هادشي مكاينش بين الخوت ( كيعيط ) ماريا ماريا .. تمات جايا ماريا خرجات من الشقة ديالها هازة راسها فيهم وأول واحد جات عينيها عليه هو الروطال بلعات ريقها وركباتها الرعدة من ىجليها لراسها النفس تقطع فيها ..
رشيد : وهاد البنت ( ضحك ) يلاه شادة فيها الخلعة ديال زواج أجي تعرفي على عنبر
ماريا ( تبسمات والخوف طاغي عليها ) مشرفين مرحبا بيكم سمحوليا غير الخلعة كولشي تجمع عليا ..
عنبر ( سلمات عليها ) مشرفين ومبارك مسعود
ماريا : الله يبارك فيك لهلا يخطيك
الروطال ( بملامح عادية ) مبروك عليكم أختي الله يكمل عليكم بالخير
ماريا ( تنفسات بإرتياح ) الله يبارك فيك أخويا أجي اعنبر دخلي كلهم كاينين الداخل ..
- دخلات مع ماريا لدار عند العيالات والروطال دخل لعند الرجال .. سلمات عليهم كاملين وݣلسات بين مها وحياة مجمعين كيدويو مرة مرة كيشركو الهضرة مع مامات ماريا ..
إبتسام ( كتحقق فيها ) سمحيليا بغيت غير نسولك واش انتي هي عنبر لي كاتغني ؟
عنبر ( بإبتسامة ) لا ازين ماشيش أنا
إبتسام : مايمكنش حتى هي سميتها عنبر راه انتي والله حتى انت
عنبر : رجوع لله شككتيني فراسي .. أختي راه ماشيش انا يمكن أكتشبه ليا ( حياة شادة الضحكة بزز )
إبتسام ( شافت فختها ) وئام ياك هي والله حتى هي ( رجعات شافت فيها ) راه كنت شفت واحد البوسط فالأنستغرام بلي تحجبتي بالأمارة حطو العرس ديالك وقالو عتازلتي
عنبر : راه قلت ليك أختي غير شبه واش اتعرفي في كتر منعرف فراسي الله يهديك راه ماشي أنا ( شافت فماريا ) ماريا ختي دوي معاها هههه شككاتني فراسي كاع ..
ماريا ( تبسمات ) لا راه ماشيش هي هاديك عنبر كان خدام معاها رشيد منادجر ديالها تزوجات وخوات المغرب .. راه دابا عايشة فإيطاليا مع راجلها
إبتسام ( مقاداش تستوعب ) العجب والله حتى العجب
بهيجة : وبنتي الشبه راه كاين وفاش غاينفعك ݣاع تكون هي ولا ماشي هي ( ضحكات )
إبتسام : احيتاش جاتني ديك السيدة اجات او وصلات ، سبابها أفيديو فبار
حياة ( ضحكات ) بار ݣاع مابقاش اوطيل وكيجيو ليه الناس رضيتيه بار .. حݣلهم قالك منين كطيح البݣرة كيكترو الجن*اوة
إبتسام : وانا قلت غير لي شفت ( عوجت فمها)
حياة : احبيبتي هداك اوطيل كاين هنا فكازا كيغنيو فيه بزاف ديال الفنانين معروفين ماشي بار .. والواحد مايبقاش يتقلد ويدوي فأعراض الناس لي ماحضرينش معاه فالمجمع ( عنبر قرصات حياة باش تسكت )
الخالة ( غمزات بنتها ) هنينا أنتي ݣاتليك ماشي هي هنينا .. ماعجبهاش الحال كيفاش مها ضارت فيها مارضاتش ..
حياة ( بالهمس فوذن عنبر ) كونما سكتاتها مها كنت انوص نسكتها درت ابوجه عند الناس ، كترطا بحال لاستيك ..
عنبر : عطيها النخال خليها طرطق ماديهاش فيها .. كون بغيت انا كون جاوبتها ولكن منحفيش راسي معاها النخال والبارد .. مابقاوش مسوقين ليها بحال الى مكايناش خالقينها مع بعضياتهم ..
تودة : مزال مارجعاتش سعاد ؟
عنبر : لا مزال كاينة فدار عمي عبد الخالق ، حيت كاينة مي رقية وبا علال
تودة ( حركات راسها ) مزيان على خاطرها ..
عنبر ( ذافت فحياة ) أجي أش درتي مع طارق على قبل الخدمة ؟
حياة : فهمني كيفاش كتمشي الخدمة وعطاني الساروت ديال البيرو .. دار معايا 4000 درهم وغايديكلاري بيا فلاسينيسيس والى مشات الخدمة مزيان يقد يتزادني من بعد
عنبر : وراه مزيانة أصاحبتي تقدي الى خيتي الباك ديالك وخديتي شي ديبلوم يزيدك توصل ليك كاع ل 4500 ولا 5000
حياة : إن شاء الله .. وراه 4000 ومزيانة ليا وانا ماعندي ديبلوم ماعندي والو راهم قاريات وبديبلوماتهم وعندهم الإجازة وكيشدو غير 4000 عندي الزهر دزت فوجهك ..
فوحدة من الڤيلات الكبار لي جات مابين برشيد وكازا ، وقفات طوموبيل فالكحل حل ليها العساس الباب دخلات الطوموبيل بلاصات خرجات منها خديجة بجلابة هماوية فالمحل الابتسامة مزينة وجها فرحانة .. سونات فالباب فتحات ليها المساعدة ودخلات مشات نيشان للجردة عارفاه غايكون تم بحال عوايدو فاش كيجي للمغرب ، خرجات للجردة وتم فين لقاتو كيسقي فالغرس رجل فأواسط الستينات من عمرو لابس شوميز فالبيض هاز الكمايم ديالها ساعة رجالية فيدو سروال ديال التوب فرمادي مع بانطوفة مريحة ، شعرو رطب رمادي مع لحية خفيفة ومسطاج كبير ..
خديجة ( عنقاتو من اللور بحب وشوق مخشية فيه ) توحشتك اخويا توحشتك بزاف
.... ( تبسم لايح التيو من يدو ضاير عندها معنقها خاشيها فيه ) أنا كثر ( عنقها بقوة كيبوس ليها راسها ويرجع يعنقها محيد منها الوحش جرها غادي بيها حتى ݣلسو فالفوتويات لي حدا لاپيسين )
خديجة : إيمتا جيتي ؟
.... : شي 15 يوم
خديجة : ياك اخويا ويلاه ݣايلها ليا علاش ؟
.... ( شد ليها يدها ) متقلقيش العزيزة ، كان عندي مايدار ضروري كان خاصني نقضي شي شغال نتهنى منهم باش نخوي وقتي ليك
خديجة : تعطلتي أخويا عليا بزاف والله .. كنحس براسي بوحدي راه عاودت ليك كولشي
.... ( دوز على راسها ) ݣلتها ليك شحال هادي ، ولكن راسك قاصح الله يهديك ولكن ماشي مشكيل حتى دابا مزال مامشا الحال ..
خديجة ( تنهدات ) فات الفوت اخويا فات .. راسي مخربق واحد الراس كيقوليا ندمهم كاملين نغرقهم مايهزوش الراس ، او واحد الراس كيقوليا نخوي هنا ونكمل لي بقا فحياتي كيما بغيت انا وبداكشي لي كنستاهل ومنتلفتش اللور ..
.... ( ضحك ضحكة رجولية ) غاتخوي هنا ماعندك ماديري بيه ولا ديري فيه ، انا غادي نطلب مول الشي وغانديك معايا ..
خديجة : فخبارك كاين هنا البشير ، هو لي قالك بغاني نمشي معاه للبرا واخا هادشي مادخلش ليا لراسي أحمد ..
أحمد : ماعندك ماديري بالبشير أخديجة ( بصرامة ) مزوج باغي غير يدوز وقتو .. ماتسرطاتش ليه حيت ماقبلتيش بيه نسايه هادشي خليه عليا غير أنت ماديري والو فهمتي ، خليك كالم الله يرضي عليك انا غاندوي مع مول شي الى طلبتو مغايرضهاش فوجهي وغانديك وتعيش ختي كيما بغات ..
خديجة : وأدريس وتريكتو ندوزها ليهم غير هكاك أخويا ؟
أحمد : خلي عليك تريكة حيدر أخديجة ( بصرامة ) مݣادينش على صداع الراس .. الى مشيت حطيتهم فراسي غايمشيو كاملين ومنهم ولادك ، غاتنوض البلبالة على الروطال ربيبك مݣادينش على الصداع عندنا شلا حوايج فين يبان هادشي الله يرضي عليك ، خاصنا نزيدو القدام نشوفو الخدمة والبيزنيس ديالنا لي باغيين نزيدو نعليوه هاد تخربيق كيضيع الوقت ، ويخلي ناس خرين يوصلو قبل منا فهمتي ؟
خديجة ( تنهدات ) فهمتك أخويا ، منين جيتي وشفتك هذا هو الرباح ماجبتيش معاك الدراري وحبيبة ؟
أحمد : مرة أخرى إن شاء الله .. دابا القرايا ماشي الوقت ديال العطلة حتى للمصيف ( شافيها بجدية ) بغيتك فواحد الخديمة الله يرضي عليك
خديجة : الله أودي أخويا مرحبا ..
~~~~~~~~~
الـــمــديـــريــة 📍
يوسف وعماد واقفين ورا البيرو لي عندو سرجم ديال الزاج .. مراقبين البنت لي كالسة وساهية وساكتة ..
يوسف : أصاحبي هادي راه خاصها طبيب بعدا تعالج عاد تݣد تدوي معاها
عماد ( شاد على جنابو كيفكر )غاتعيط على الناس لي جاو ديكلاراو هو لول .. حيد غير الناس لي بناتهم ماتو عيط عليهم كاملين نشوفو واش شي حد فيهم غايعقل عليها خصوصا السيدة لي ديكلارات النهار لول ..
يوسف : واش عارف شحال الوقت دابا أجمي ولالا راه 9 هادي خلي حتى لصباح
عماد ( شافيه ) وفين غانخليو السيدة فين غاتبات ؟
يوسف : بلاما تبقى تشوفيا انا دار طلقتها فاش تفكيت مع ختنا ساكن امع دار شوف انت ، خليها فداركم ولا دار عمك خاصها شي بلاصة لي يرضو ليها البال هاد الليلة لا تزهق ..
عماد ( كيفكر ) ماعرفتش الواليد كاين هو وماجدة فدار عمي حيت با كاين هو ومي تم .. ومانݣدش نديها عندهم راك عارف با ومي مافخبارهم مايتعاود نݣلب ليهم مجاجهم فهاد الليل ..
يوسف : إيوا ( كيشوفيه كيخمم عاض على شواربو )..
عماد (شافيه ) كاين واحد الكوان ( هز التيليفون دوز النمرة بقا مدة تحل الخط ) عصام ..
نزلو من عند رشيد مجمعين كيدويو داز العشا زوين ، توجهات لعندو كان كيتسناها حدا الطوموبيل داير رجل على رجل وكيتسنى فيها ..
عنبر : فاروق بغيت نبات فدارنا هاد الليلة .. كلهم مجموعين
الروطال ( هز حاجب ونزل الثاني ) عاوتاني البياتة دوينا داك نهار يمكن ؟
عنبر : كيفاش دوينا واش باغي تحرم عليا دارنا نبات عندهم ولا كيفاش ، من ليلة العيد مابت عندهم شي جوج سيمانات هادي ولا كثر ولاواه ..
الروطال :عنبر ( بصرامة وبحة رجولية تقيلة ) خلينا هانيين الله يرضي عليك ودوزي تركبي
عنبر : راه هادشي لي كدير فيه ماهواش ، راه من حقي نبات فدارنا مكنخرج مكندرج مكتخرجتي مكنسافرش بحالي بحال الناس غير الخدمة الخدمة الخدمة ومخليني بين ربعة ديال الحيوط .. وساكتة مكندويش كنقول خليه حسن عوانو ولكن باش تمنع عليا نبات فدارنا لا وهادشي متافقناش عليه..
الروطال : شلا حوايج شرطناهم عند العدول امدام ومداروش بلاما نجبدو دوك العقود ( غمزها ) باغي تاني يخرج ليك ديك الميكروب ؟
عنبر : واش نسيتي عماد أش قال لينا ، قالي الى سونا هاد المرة جاوبيه والى وقفك دوي معاه ( هز حاجب ونزل الثاني ) فاروق ماشي غير تزوجنا راه غانسى مدار فيا نهار اللول ݣلتها ليك ݣتليك داك خونا مغانرتاح حتى نعطيه حسابو النقي ، الى نسيتي أنت انا مناسياش حيت انا لي تضريت منو ماشي انت ..
الروطال : أش باغية توصلي ليا ( ببرود )
عنبر : مابغيت نوصليك والو انا لي كاين انقولو ليك فاص .. حيت نسيتي شنو درت مع عماد وبلي بالعكس خاصني نخلق فرص فين يشوفني باش نوصلو لداكشي لي بغينا ، ماشي وقت الغيرة أفاروق او وقت لا متخرجيش ايتلقى ليك ولا ايدوي معاك حيت حنا اصلا باغيينو يدوي معايا والى خايف عليا راه البوليس حاضييني من بعيد ماعندك مناش تخاف .. نهار ياخود حسابو النقي وديك ساعات دير لي بغيتي وحاسبني كيما بغيتي مكاين لي غايقوليك شحال فساعة وانا عارفة شنو كندير ماتخافش عليا ..
الروطال ( دور لراسو وسط فمو ) أنا خايف على بنادم منك انت فتيلة وتشعلي فمهم العافية ..
عنبر ( جاتها الضحكة ) صافي نبات ؟
الروطال : واخا ولكن عنبر تيليفون مايطفاش غانطفي جدك الى طفيتيه ..
عنبر ( بالفرحة تعلات على رجليها وباستو فحنكو ) لهلا يخطيك عليا .. كون هاني انخلي تيليفوني حدايا انا مشيت ..
الروطال : دوزي نوصلكم من الطيران يلاه اتبقاو تقلبو على طاكسيات
عنبر : حنا بزاف
الروطال : خلي ماماك القدام تشد واحد فدراري وانتوما ركبو اللور راه يݣدكم يلاه .. مشات علماتهم جاو ركبو معاه فطوموبيلتو ركبات تودة القدام شادة جيهان ، وعنبر وحياة ورشيدة وسميرة ركبو اللور ماتزيروش بزاف أما عمران شداتو حياة فوق رجليها ..
- وصلهم للدار ، نزلو وهي بقات
عنبر : اتمشي لدار دابا ؟
الروطال : وشنو بان ليك ازين ؟ ( شافت فيه بمعنى دوي ) بحال والو نعفط عند دار نشوف الخالة ومي وبا .. الى شدوني نبات نبات عندهم ونحي صباح نديك
عنبر : وخليني انتغدا معاهم
الروطال ( خنزر فيها ) ماعيقتيش ؟
عنبر : واشفيها انت اصلا ككتجي للدار حتى المغرب كنبقى غير انا وسهام .. انا نسوني ليها راه كولشي فدار والباب مسدود والعساس تم ومريضنا ماعندو باس ..
الروطال : دغية كتغمقي على بنادم
عنبر ( ضحكات ) سلم على مي رقية وعليهم كاملين انا مشيت ..
الروطال ( بتهديد ) تيليفونك
عنبر : وصافي عرفت .. ( نزلات من طوموبيلتو ، بقا واقف حتى طلعات معاهم عاد مشا تحت انظار بدر لي كان مقابلهمو من طوموبيلتو من بعيد .. ) ..
- فالجهة أخرى وقف بطوموبيلتو فالباركينغ التحت .. نزل هو فاتح ليها الباب شد فيها منزلها بالخاطر تخطى الطوموبيلات تفتح لاسانسور دخلو فيه هو وياها .. طلع بيهم لطابق الثاني خرجو منو توجه لوحدة الشقق سونا كيتسناه يفتح مدة عاد حل ليه الباب ..
عصام ( هز حاجب ونزل الثاني فاش شافهم ) ماݣلتيش ليا أخويا جايب ليا معاك هاد المونتيف واش انت مريض ؟
عماد ( تخطاه داخل ومدخلها معاه مݣلسها فوق الفوتوي .. الدار كانت كبيرة مجموعة فيها زوج بيوت كبار وبيت ديال السدادر عاد صالون والكوزينة طواليط ودوش وريحة ديال الطياب عاطية ) داير المقارونية بالكفتة مشهيها نيت ( كيحيد فتجاكيط ) ..
عصام ( وقف قدامو لابس تيشورت وسروال كيطما ) وبنادم داوي معاك ، لاش جايبها معاك عندي ؟
عماد ( ݣلس داير رجل على رجل ببرود ) جايين انا وياها طالبين ضيف الله
عصام ( كمش فيه عينيه ) شناهوا ؟
يتبع....
التعليقات
لا توجد تعليقات بعد، كن أول من يعلق.