محتوى القصة
لا تثق بالوجه الأول لأي إنسان، فغالبًا خلف كل وجه عدة وجوه.
الحياة مليئة بالتجارب التي تُظهر لنا أن الناس قد يتصنعون أو يتظاهرون بما ليسوا عليه. فهم يظهرون وجهًا لطيفًا في البداية، لكن مع مرور الوقت، يمكن أن يكشفوا عن جوانب أخرى قد تكون مفاجئة.
الذكاء الاجتماعي والقدرة على قراءة الأمور بعناية هما مفتاح التعامل مع الآخرين. علينا أن نتخذ الوقت الكافي للتعرف على الناس على حقيقتهم، ومدى صدقهم وأخلاقهم، بدلاً من الانجرار خلف الانطباعات الأولية.
لنتعلم أن نحمي أنفسنا من الخداع وأن نكون حذرين في اختياراتنا. فكل إنسان يحمل داخل قلبه وجوهًا مختلفة، ولا بد من التأني قبل الوثوق ..
يدها يبسات على تيليفون عماد .. مامتيقاش بلي الشخص لي فصورة هو نفسو حسن لي شافتو فمحال مها لي طلب منها الزواج ..
الروطال : تي ريحي ايكون اتشابه ليك
عنبر ( هزات فيه راسها ) قسما بالله حتى سي حسن هذا الݣزار هو لي قلت ليك عليه بغا ماما لزواج ( شاف فعماد ) الى ماتيقتونيش وريه لماما تودة وشوفو شنو غاتقوليكم ..
عماد حيد ليها ابتيليفون وتم غادي راجل للدار بخطوات سريعة .. تابعو الروطال وعنبر دخل بحال البرد متوجه للصالون ديال العيالات عينيه معمسين حتى وقف على تودة هزات فيه راسها ..
عماد : خالتي فاطنة ( مد بيها تيليفون ) كتعرفي هدا ؟
تودة ( شدات من عندو التيليفون بإستفهام ) أيام هذا سي حسن الݣزار علاش ؟
عنبر : وراه هدا هو مول هاد الفعايل لي وقعو كاملين ، هو سباب البنات لي ماتو هو لي كان كيبيع فيهم ويشري
تودة ( ضربات فخاضها ) اويلي .. خرج إدريس وعبد الخالق ، طارق وكاع رجال خرجو من صالة كيسولو على شنو واقع .. بهيجة مكانت فاهمة والو شي فاهم وشي لا
علال : أش كاين ؟
عماد ( موجه كلامو لتودة مكان كيسمع لحتى واحد كان خاصو يعرف بزاف دالحوايج ) شحال وانتوما كتعرفوه ؟ فين عندو المحال ؟
تودة : وشحال هذا اولدي راه شي طالعة فشهرين دابا .. عندو محال ديال تاݣزارت فالحي الحسني حدا واحد العطار وماعندوش غير داك الحانوت راه عندو بزاف دالحوانت ياكما غير تشابه ..
عماد : حنا غانعرفو تشابه ، ايمتا عرض عليك الزواج ؟
تودة : وراه مدة باش عرض عليا ومابغيتش .. وجا عدي للمحال بارك ليا وعرض عليا زواج نوبة خرا ومابغيت ومن تم ماشتو .. مشيت للحانوت لقيت ادراري لي خدامين تم ݣالو ليا مسافر ..
عماد ( عض على باطن حنكو ) واخا ( هز تيليفون وسونا لليوسف ) وي يوسف وجد ليا دراري أنا جاي .. من بعد ( قطع ورجع عندها ) خالتي فاطنة انعذبك ولكن بغيتك تمشي معايا توريني الحانوت ..
تودة : ماعديش مشكيل اولدي بلات نلبس عليا جلابتي ( مشات تلبس جلابتها )
علال : توما فهمونا
الروطال : أجي ابا معايا .. يلاه ؤجعو لصالون
عبد الخالق : ومتمشي معاه بوحدها ؟
عنبر : نمشي معاها
الروطال ( خنزر فيها من تحت سنانو ) تعتبي العتبة غانتفاهمو
عنبر : وراه ماما خاص نمشي معاها
أدريس ( تدخل ) نمشيو معاها انا وعمك عبد الخالق ونرجعو معاها أبنتي غير خليك ..
حياة ( مصدومة ) أويلي دابا حنا كنا كنتقداو اللحم من حد راس الحربة .. عندك ايكون كان كيبيع لينا لحم الحمير ( شافيها طارق محرك راسو بلحولة ورجع لصالة لوخرا )
ليالي : وأنا لي كنت كنقول الله يعمر ليه الدار .. ياختي مابقاتش تقة والله العظيم ، .. وجدات تودة راسها وخرجات هي وعماد ومعاها أدريس وعبد الخالق .. ركبو مع عماد فطوموبيلت الروطال لي عطاه السوارت ديمارا وخرج مكسيري ..
فاللحظة وصلو العناصر للعنوان لي عطاهم عماد .. الناس خرجو كيطلو كيشوفو شنو واقع نزل عماد مانزلاتش معاه تودة .. توجه للمحال
عماد : الباطرون ديالك فين هو ؟
.... ( بإستغراب) مكاينش أسيدي مسافر ؟
عماد : مسافر !! لفين مسافر ايمتا سافر ؟
.... : شي سيمانة دابا ، وعلى مݣال غادي يتعطل وصانا غير نساليو صݣايط لي عندنا ونسدو المحال .. حتى من الحساب ديالنا خلصنا ..
عماد ( دور راسو فالمحال ورجع شافيه ) واش أول مرة تخدمو معاه ولا ديجا خدمتو معاه قبل ؟ عندو غير هاد المحال ولا عندو شي واحد خور ؟
.... : على مݣال عندو واحد فالحي المحمدي .. وعاد هدا أول مرة اسيدي غانخدمو معاه ..
عماد ( أشر لواحد من الفرقة ) خود من عندو لاكارت ( شاف فدري ) لاكارت ديالك جي وخودها من ولاية الأمن دزرقطوني فين ݣلتي المحال الثاني ؟
.... : الحي المحمدي حدا ( ....) ( أشر عماد لي معاه طلعو وشدو الطريق للمحال الثاني وكان نفس الهضرة من عند دري لي خدام تماك ) .. تودة رجعات مع أدريس وعبد الخالق اما عماد توجه مع البقية للمديرية ..
عبد الخالق : شفتي فاش كنتي غادي تحطي راسك .. على قلت الݣزارة هدا كان دايرك فراسو بلعاني داكشي باش طلبك لزواج
تودة ( شافت فيه) وانت شغلك أش حرق شطاطك نتقدى كن عندمن مابغيت .. يطلبني لزواج ولا مايطلبنيش دخول شبوقات هذا
عبد الخالق ( بإنفعال ) كيفاش دخول شبوقات الالة ، راك مت بنتي اشريفة ولا نسيتي جمعي راسك شوية راه عيقتي ..
- وقف ادريس بطوموبيل ، نزل وخلاهم بزوج وهو دخل ..
تودة : كيفاش عيقت ياكما مزوج بيا ، ياكما تيقتي راسك بديك الفاتحة كان زمان احنيني حكم راسك متحكمنيش انا وها الهبال
عبد الخالق ( بتهديد ) غانݣولك جوج كلمات .. ماخلينيش نرجع لايام الخوالي كبرنا وشرفنا على دوك البلانات .. فاش غاتعرف بنتي بلي انا باها غاتوجدي راسك أشريفة حيت انا وانت غانتزوجو بنتي خاص والديها يكونو مزوجين طرتي ولا نزلتي غانتزوجو .. هاد ضسارة نقصي منها شوية راك كبرتي عليها وهاد صبايغ ديال شوفوني وهاد ظفار حيديهم عليا .. بنتك الى حملات راه اتكوني بحفايدك الضحك مغانبقاش نعاود فالهضؤة الله يرضي عليك ..
تودة ( بقات كتشوفيه ) راه كيݣولوها الشيب والعيب .. بنادم كيكبر كيهبل ، الى تزوجت بيك اجي وشم ليا سير سير الله يعفو عليك ( فتحات الباب ونزلات شاداها الضحكة ) ..
توجهات لصالة دالعيالات .. كولشي كيسول اش وقع
تودة : السيد سافر يمكن ساق الخبار لي وقع وخوى .. مشاو ليه للمحالات بزوج ومكاينش ( عاودات ليهم لي وقع ) ..
عنبر : غير منين خوى هداك هو ربح غير يبعد من هنا ويعطينا بتيساع .. دابا منين تعرف راه مغايبقاش يدخل للهنا مزال ايخاف ..
رقية : والله يبعد علينا وعليكم أبنيتي شر الخلق ياربي ..
الكل : امـــــــــــــــــــــــين ..
- فالجهة اخرى توجه هو ويوسف للمطار ، ماعندوش الإسم ديالو الحقيقي لي عندو هو إسم حسن ومتأكد بلي ماشي سميتو الحقيقية .. كانت عندو غير صورة فقط .. عرض الصورة على الامن لي رجعو للكاميرات وفعلا كان فيها ..
عماد : بغيت نعرف لفين مشا ( بقاو مدة كيقلبو )
.... : روما ( إيطاليا)
يوسف : شنو غانديرو دابا ؟
عماد : غانشوف مع العميد .. خاصو يشوف مع السلطات ديال تم بلي خونا مطلوب ( تمو راجعين )
يوسف : طلبت العميد على ود الإنتقال لأكادير ( شافيه ) بلاما تشوفيا ماتحلاش ليا الخدمة وانت مكاينش اجمي
عماد : مزوج بيك اخويا ، دير عقلك خليك فخدمتك
يوسف : العميد ديجا مابغاش .. مابغاش يضحي بينا بزوج ولكن كون عوال مرة مرة نضرب سلتات عندك شهادة ديال المرض ونجي نريح نشوفو أزين سوسي ..
عماد ( جاتو الضحكة ) باز وجهك .. رجعو للمديرية عماد حط يوسف ورجع للدار الروطال مكملين نهارهم دارو كاسكروط وتعشاو عندهم ..
× فوقت متاخر من ديك الليلة ×
الروطال : هاد السيمانة وجدي راسك نمشيو لإفران إن شاء الله
عنبر : ياك قلتي حتى يولي عماد بيخير ؟
الروطال : مابقاش كيف كان .. اللهم نمشيو نبدلو الجو شوية صافي ؟
عنبر ( بإبتسامة ) واخا ..
الروطال ( بانت ليه مبدلة ) مالك ؟
عنبر ( تنهدات وشافت فيه ) بعد المرات كتخلعني أفاروق بحال قبيلات .. حيوان ضرتي فيا على ودو انا راه مامالفاش هاد الحماق وماعنديش معاه الواحد يدير عقلو الله يرضي عليك .. والحيوان وصانا عليه ربي نتهلاو فيه ونحنو فيه
الروطال : هادشي عارفو .. نحنو فيه ولكن منمدوش ليه شلاقمنا نبوسوه
عنبر : انا كنحماق على الخيل هوما والمشاش والكلاب .. كنحن فيهم مغاتمنعهاش عليا الغيرة بالقانون كون تجاوزت حدي ماشي من الحيوان ( وقفات وخلاتو متبعها بالعين ) ..
في بحر الحياة المتقلب، نمضي جميعًا بين موجات الفرح والحزن.. لا حزن يدوم، ولا فرح يبقى، فكل شيء عابر كالسحاب. وإن الألم ليس نهاية، بل مجرد فصل في قصة لم تكتمل بعد. تذكر أن الظلام لا يطرد النور، بل يفسح له الطريق. اصمد، فالغد قد يحمل لك نورًا لم تتخيله بعد ..
- فعين الذياب واقفة ورا كاروصتها دايرة ليݣات فالكحل .. واقفين عندها جوج بنات وجدات ليهم جوج كريپات بشوكولا مع البنان ، عطات لكل وحدة ديالها خلصوها مشاو كانت فرحانة بهادشي لي كدير .. كتحس بواحد الحرية غريبة بدون قيود
الإقبال كان عندها وفرحانة بهادشي لي بادية بيه .. وقفات قبالتها طوموبيل ميرسيدس فالكحل .. نزل منها جاي قاصدها حتى وقف عليها ..
عز الدين : السلام عليكم ( رضات عليه) شحال أختي ؟ ( كيشوفيها )
دنيا : كل واحد وهو هاهو المينو ( مداتو ليه خداه من عندها )
عز الدين ( شاف لطوموبيل كانت معاه وحدة ) ختي واخا ندي نشوف شنو بغات
دنيا ( هزهزات كتافها ) مرحبا ( مشا لعند لي معاه من بعد مدة رجع )
عز الدين : عطيني واحد بأوريو .. وعطيني واحد بالكونافة وپات بيستاج
دنيا ( بإبتسامة ) مرحبا .. بقا واقف متبعها بالعين حاضيها تبسم ونطق بصوتو رجولي
عز الدين : أول مرة نشوف درية كتبيع فهاد القنت الكريپ
دنيا ( شافت فيه ببرود ) ايوا هانت شفتيها ( سكتات ) علاش كيجاتك البنت تبيع هنا ياكما ممنوع .. ولا محتاكر هاد القنت غير على رجال حتى داك القنت فيه صحابات البيبوش ..
عز الدين : حس الدفاع عندك عالي أ أنسة تكالماي .. العصاب خايب كيدير لي غيد
دنيا ( حبسات وشافت فيه ) كنموت على ليغيد انا .. وزايدون ماشي أنا لي نتعصب على شيحاجة تافهة كاعما تستاهل غير جاوبتك حيت كلامك بحال الى كتقول بلاصتي ماشي هنا
عز الدين ( هز حاجب ونزل الثاني ) وصراحة بنت زوينة بحالك ماشي بلاصتها هادي .. ولكن برافو ماعندي مانسالك ..
دنيا ( دورات لسانها وسط فمها كتحاول تضبط أعصابها ماحملاتوش ) بوپية لي ديالك حاضياك .. كيبان ليا غاتفرتكها فهاد الساعة اجي غخبارها بلي راجلها ولا ماعرفت شنو كتكون عينيه زايغة ولسانو طويل ..
عز الدين ( ضحك ضحكة رجولية قوية ) فخبارها .. موالفة ماشي شيحاجة جديدة عليها
دنيا ( خنزرات فيه مادة ليه الطلب ديالو ) هاك اخويا المجموع 50 درهم
عز الدين ( تبسم) مرحبا ( مد ليها 100 درهم رجعات ليه 50 ) الى عجبني غنولي كليان ديالك
دنيا ( بإبتسامة بريئة مستفزة ) وانا غادي نجلب الله مايعجبكش بصحة وراحة أسيدي ( دورات راسها طلعها ونزلها مبسم عاطيها بظهر راجع لطوموبيلتو )
دنيا : الله يخليها سلعة ويخليها ماركة ..
~~~~~~~~~
- هبط ليها الباليزة ديالها .. عاد نزلات هي بكسوة صيفية دافية فالبيض فيها وريدات مع شال طويل مغطي ليها جهة صدرها مع ساك وصنديلة فالغوز ، كان كيتسناها على برا لابس سروال دجين مع تيشورت فالبيض ..
عنبر : علاش ماشديناش طريق الصباح ؟
الروطال : العشية تكون بردات الشمس غادي غير تكرفصي ، فكرت ليك انتي نوصلو بليل غايعجبك الحال
عنبر : غانشوفو سبيطار بن صميم ؟
الروطال ( جارها لعندو خاشيها فيها بايسها بوسة طوسلة قاطع فيها النفس ) غانشوفو لي بغيتي .. دوماج مكاينش ثلج أما نوريك تيقشبيلة ديال الثلج واعرة ..
عنبر ( ضحكات ضارباه لصدرو ) باسل والله كوينيدي لاخر ، ضارت راكبة للجهة لوخرا .. سد الدار وطلع حداها دار السمطة مديماري وشدو الطريق .. يد سايݣ بيها ويد شاد يدها وحاطها على بوات أڤيتاس مطالقش منها ..
× مطار محمد الخامس ×
خارج بباليزة كحلة .. طولتو كانت باينة ومثيرة لابس كحل فكحل ساعة رجالية مع خاتم دنقرة فصبعو ليمن .. مع تسبيح نازل من عنقو .. بقا واقف حتى وصلات طوموبيل كحلة رونج ركب فيها اللور فاتح السرجم كيسقي عينيه ويشم هو بلادو لي زمان مجاش ليها ..
- سونا ليه التيليفون خرجو كانت نمرتو حنحن وجاوب بصوت رجولي تقيل وبإيطالية متقونة
.... : نعام أسيدي ( جاه صوتو الإيطالي التقيل المرزن من بعيد ) اه أسيدي وصلت ( هزهز راسو ) ضروري غادي نشوفو ( تبسم ) إلى مابغاش غادي يكون حكم على راسو يتحكم قبل المحكمة .. كون هاني أسيدي واخا ( قطع ) ..
دخلو لإفران مع 8 ديال الليل .. الجو كان زوين واخا كان بغات تشوفها فثلج ولكن كانت فرحانة بأول زيارة ليها ..
الروطال : راسك قاصح انخليو الاوطيل ونشوفو دار ..
عنبر ( بدلال ) وعفاك انا مابغيتش نمشي الاوطيل أمنيتي نشوف دوك ديور بحال ديال النصارة
الروطال : ودابا نبداو نقلبو فبلاصة مانمشيو ناخدو راحتنا ندوشو نخرجو نبداو نقلبو ..
عنبر : هاهوما سماسرية ( أشرات براسها ) شوف شي واحد وكري عندو
الروطال : مكنتيقش فهاد الناس انا .. ماباغيش نطيح فشي دار مافبوها مايتشاف
عنبر : وناري شحال فيك .. براكة من الفشوش شوف شي واحد من هادو نشوفو دار عجباتنا مرحبا ماعجباتناش صافي ( شافيها شوفة طويلة سلم امرو لله ونزل عند واحد السمسار .. كيدوي معاه تمو راجعين بزوج السمسار رنى السلام وطلع اللور كيوري فيه حتى وقفو فواحد شارع خاوي وفيه شحال من دار مشابهين من نحية العمران ) ..
.... ( نزلو ب 3 ) الدار هي هادي أسيدي اجيو تشوفو ، شد الروطال لعنبر فيدها وتبعو السمسار ، فتح الباب نزلو مع دريجات ديال الدار وصلو للجردة طبلة حديدية فالأبيض مع الكراسي ديالها ..
.... : هادي هي الجردة ديال الدار أسيدي أجيو معايا ( تبعوه فتح باب الدار ودخلو ) هدا هو الصالون ( الصالون كان كبير الزليج بلدي وسدادر بلديين هاد شوميني فالقنت مع سراجم كبار ) أجيو تشوفو الكوزينة ( كانت كبيرة واسعة وغزالة ونقية ) ..
- من الكوزينة مشاو لبيت نعاس كبير ونقي فيه سرجم كبير وتلفازة بلازما .. عاد الحمام حتى هو مجهز ونقي وعصري
.... : الفوق كاين السطح وراه كاين حتى الكود دالويفي
الروطال ( دار فدار ماينكرش عجباتو شاف فعنبر لقاها كتفرنس بوحدها عرفها عجباتها ) واخا كاين غير هاد الطابق والسطح ؟
.... : أيااه كاين غير هاد الطابق والسطح
الروطال : شحال الثمن ؟
.... : 200 درهم اسيدي ( شافيه الروطال بإستغراب صدمو الثمن عند بالو أيقوليها كثر )
الروطال : مرحبا معامن انتفاهمو معاك ولا مع مول الدار ؟
.... : لا معايا مول الدار كاين على برا .. كاين غير أنا لي مكلف ( تفاهم معاه الروطال خدا من عندو لي كارط او عقد الزواج تفاهم معاه على يوماين حتى لمن بعد الى غايزيدو راه ايعلمو )
الروطال ( دخل البݣاج ديالهم .. وقف شافيها كدور فالدار عاجباها ) عجباتك تهنيتي ؟
عنبر ( شافت فيه بفرحة ) والله حتى حمقاتني ديك شوميني كنتخايلها بليل شاعلة فيها العافية .. وكنتفرجو بحال الى كاينين فسويسرا
الروطال ( جرها ملاصقها معاه ) مال سويسرا غاتخلعني .. نديك من غدا الى بغيتي ، الباسبور لي عليه العمدة راه دفعتيه لبارح يخرج ليك نمشيو
عنبر : ماكرهتش نمشيو ليونان ( كترمش بعينيها بدلع )
الروطال ( عض على شفتو ) أحح عليك الفتيلة فاش كتبغي حاجتك كتبداي تزغللي عليا فعينيك
عنبر : هههه نمشيو نخرجو ؟
الروطال : نخرجو علاش لا .. جرها من يدها هاز سوارت طوموبيلتو وتيليفون وخرجو بزوج راكبين فطوموبيل مديماري ، كيدورو يكتاشفو المدينة طاحو على واحد المطعم زوين وديكور ديالو حجري دخلو ليه ..
سلاو العشا ديالهم خلص وخرجو كيتمشاو .. عطاتو تيليفونها صورها ومرة مرة كيصورها بتيليفونو .. عجبها الحال وماسخاتش ترجع لدار ولكن عيات وكتحس براسها ترخات .. جرها من يدها ركبو فطوموبيل ورجعو دخلو للدار توجه الروطال لبيت نعاس حط حوايجو وخرج عندها لقاها شاعلة تلفازة ..
الروطال : اندخل ندوش ونخلي ليك الحمام سخون ..
عنبر : صافي مزيان .. بينما رتاحيت نيت مزيان جبدتي حوايجك ولا نجبدهم ليك ؟
الروطال : جبدتهم الكبدة أرتاحي ، مشهية شيحاجة نجيبها ليك قبل مندوش ؟
عنبر : لالا غير سير دوش باش ندخل حتى انا .. ( هز الروطال بينوار دخلو معاه ودخل للحمام .. هزات تيليفوها وسونات للتودة دوات معاها خبراتها بلي وصلو على خير ومن وراها سونات لحياة ) الحب كيدايرة ..
حياة : الحمد لله جيت مهدودة قبيلات من الخدمة .. عييت والله تمارة بزاف
عنبر : تمارة ولكن راه فيها صالير مزيان أصاحبتي وكتخدمي العشية وصباح كدوزيه فالقرايا
حياة : كيجاتك إفران ؟
عنبر ( تنهدات ) غزالة إفران بحال أوروبا وهادشي غير صيف خلي كيف غادي تكون فالشتوا ( تسمع الدقان فالباب ) حياة شي واحد كيدق
حياة : اويلي شكون غايدق عليكم فهاد الليل ؟
عنبر : ماعرفتش خليك معايا ( ناضت جارة بانطوفتها وقفات حدا الباب ) شكون ؟ ( حتى واحد مجاوبها ) شكووون ( حتى واحد مجاوب ) ياختي حتى واحد مجاوب
حياة : اصاحبتي ايكون اتهيء ليك ولا دقان عند الجيران
عنبر : أويلي على عند الجيران .. هنا راه كل باب دار بعيد على لاخر ماقرابش المهم .. ليالي حداك ؟
حياة : جات قبيلات كلات وراه كتفرج حداهم فالمراح تعشيتو ؟
عنبر ( توجهات لسرجم ) ويااه تعشينا عاد جينا بلاتي نحل السرجم (ورات البوانيي فتحاتو السرجم كان قبالت الجردة وديك الݣليسة زوينة كانت واحد المرجوحة فالبيض ومبطنة بشيبي وزرق داكن ، هبطات عنبر رجليها وݣلسات قبالت السرجم مكملة هضرتها مع حياة )
حياة : قلت ليك داك الدري الله يعمر ليه دار .. كيجي مرة نرة يطل عليا فالخدمة خدا نمرتي مسكين ديما كيسول فيا ..
عنبر : وعندك عاوتاني تولي تبغيه .. داك القلب عندك راه بحال الكار
حياة ( ضحكات ) لا ويلي هاد المرة لا والله حتى بحال خويا .. حسيت بحال الى عندي خويا الكبير عز الدين ظريف وهو نهار الأول قالي انا زهواني عرفتي قالي حتى طارق قالو عندك دور ببنت العائلة ضحكني .. قلت ليالي كون امشينا شفنا خويا ولكن خافت الدري ولا شمكار الله يستر كانت قالت لينا خالتي رحيمة رجع كيݣريسي ..
عنبر : الله يعفو عليه مسكين لا حول ولا قوة الا بالله العلي العظيم .. المهم انت مدام بحال خوك وصديق راه مزيان ديها فقرايتك وخ ( سكتات قاطعة كلامها ساهية قبالتها بان التوتر على ملامح وجها والإستغراب ورهبة )
حياة : مالك سكتي ؟
عنبر ( وقفات ) حياااة ( بلعات ريقها ) واحد الزعلولة فجردة كتحرك بوحدها
حياة : عنبر براكة من الضحك عارفاني مكنحملش هاد الفعايل
عنبر ( بخوف ) قسما بالله العظيم أختي الزعلولة كتحرك بوحدها اويلي ، بحال الى شي واحد لي راكب فيها كتحرك والله حتى كتحرك أحياة ( قطعات على حياة ومشات كتجري كدق على الروطال بخوف ) فاروق فاروق حل فاروق ( بغات تحيد الباب )
الروطال ( من الداخل ) بلاتي بلاتي ( حل الباب كيلبس فحوايجو ماداتهاش واش عريان ولالا الخوف وصل معاها للاخر ) شواقع مالنا مالك
عنبر ( كتشير ليه ) الز ( بلعات ريقها ) الزعلولة لي على برا كتحرك بوحدها
الروطال : من نيتك !؟
عنبر ( جاتها البكية ) قسما بالله مكنكدب والله حتى كتحرك بوحدها ، راه مكاينش كاع البرد كتحرك بجهد بحال شي حد كيحركها
الروطال ( تخطاها غادي لصالة توجه للسرجم كيطل ) فين هاد كتحرك هاهي تابتة مكاين حتى لعبة معمرة راسك بتخربيق .. دايرة عقلك مع داك سبيطار دالويل رجوع لله سيري دوشي سيري ..
عنبر ( بقات ساكتة كتسول راسها واش غير تخيلات ولا بصح داكشي لي شافت ) واخا ..
- دخلات الدوش وهي مشوشة كتحس بلحمها مبورش عليها وشيحاجة انورمال ضايرة بيها .. كبات عليها الما دغية لبسات عليها بينوارها وخرجات لقاتو واقف قبالتها كيشوفيها شوفات فشكل ..
عنبر : مالك ؟
الروطال ( مدة وهو ساكت عاد نطق ) واش وجدتي شي قهوة وأنا فدوش ؟
عنبر ( بإستغراب) لا ويلي أشمن قهوة غانوجد علاش ؟
الروطال ( هز طاس فيدو فيه قهوة سخونة ) هدا لقيتو فوق طبلة فبيت النعاس
عنبر ( هنا صافي كمل على لي بيها ) قلتها ليك قلت ليك قبيلات الزعلولة كتحرك ودابا الطاس ديال القهوة فبيت النعاس ..
الروطال ( بتهديد ) عنبر ماعنديش مع هاد البلانات الله يرضي عليك واش أنت لي وجدتيها شادة فيا ؟
عنبر : قسما بالله ما أنا .. انا بقيت كندوي مع حياة فتيليفون سير قلب الكوزينة وشوف واش كاينة شي قهوة .. فعلا دخل لكوزينة قلب مكان فيها والو حتى ثلاجة خاوية ( ضار لعندها لقاها وراه الخلعة باينة على ملامح وجها )
الروطال ( بعصبية ) أش هاد الويل عاوتاني .. أعوذ بالكلمات الله التامات من شر ما خلق .. أعوذ بالكلمات الله التامات من شر ماخلق أعوذ بالكلمات الله التامات من شر ماخلق ( نقزات عنبر من بلاصتها مغوتة شادة فيه على إثر الباب لي تخبط ) ششش متخافيش شششش
عنبر ( بدات كتبكي ) يلاه نمشيو بحالنا والله لا بقيت هنا دقيقة وحدة بالله
الروطال : ياك كنتي باغية تمشي لداك سبيطار النايح دابا وليتي كتبكي مخلوعة
عنبر : كنت انمشي بنهار ماشي بليل بغيت انشوفو .. مناوياش على هادشي انا
الروطال ( تعصب ) نهار زين هدا .. شوفي ماعندك مناش تخافي انت كتصلي وانا معاك دوز هاد الليلة نمشيو بحالنا ( هو مزال كيهضر قفزات حداه هازة راسها للسقف كيسمعو بزوج فدرديك بحال العرس شافيها وتبسم ) مالك حتى هوما من حقهم ينشطو غير انتي لي تفوجي ..
عنبر ( بتهديد ) كنقسم ليك بالله لا بقيت فيها دقيقة وحدة .. نعس فزنقة ومنعسش هنا انا قلت ليك ( جراتو من دراعو غادية بيه )
الروطال : تي فين غادية بيا ليل هدا
عنبر : زيد نبدل عليا نمشيو بحالنا
الروطال : ياك باغية دار بشوميني وتعيشي رومانسية مع راسك .. شتي لي مكايتسنط كيجيبها فعظامو
عنبر : وصافي ( بدلات عليها لبسات واحد الكيطمة توبها صيفي مع بالغينة وشالها .. جمعات الحوايج لبس عليه حتى هو جمعو ليفاليز طفاو ضواو وتمو خارجين غير وصلو لجردة بدات الزعلولة كتهز وتحط .. زير ليها على يدها مأمرها ) ..
الروطال : ماتسوقيش حدري عينيك .. دارت لي قاليها وتمات سابقاه كتزرب .. دخلو لطوموبيل وسونا على داك السمسار حتى جاوب.
الروطال : خويا اجي عندي دابا هاك سوارتك ، وسمع اسي اتجي دابا ولا نقصد الكوميسارية .. يلاه انا كنتسناك ..
عنبر : شنو قاليك ؟
الروطال : هاهو جاي ( دخل لواحد السيت خدا واحد نمرة ودوز الخط ) وي سلام عليكم .. معاك فاروق حيدر كاين واحد ريزيرڤاسيو بسميتي من عند عماد حيدر ( بقا كيتسنى ) أياه واخا شكرا ( قطع )
عنبر : واش الاوطيل ؟
الروطال ( شافيها ) شتي لي دير راسو فيك اش كيوقع ليه ؟ اللعب هدا كون حنا مسنطين مع مخنا وهاحنا كنطوطحو ..
عنبر : وصافي أفاروق صافي ( بدات كتقلب على الما هزات قرعة شربات شوية جا السمسار خلاها الروطال فطوموبيل ونزل لعندو ) ..
من بعدما سبطو على الدار توجهو للوطيل لي كان عماد مريزيرڤي فيه عماد ليهم .. كان بعيد على إفران ب 8 كلمتر جا فزاوية بن صميم سميتو rise in valley .. بنسبة للعنبر كان احسن اوطيل شافتو عينيها من النوع لي كيعجبها بالقرميد وشوميني بيت النعاس كيحمق حتى هو بالقرميد واسع ومقابل مع لاپيسين وشجر وطبيعة ..
- ليلتهم الاولى ماعقلوش على راسهم نعسو غير حطو راسهم على المخدة ماعقلوش .. الغد ليه فاقو فطرو فالمطعم ديال اللوطيل وخرجو كيتمشاو مع بعضياتهم معنقاه من ظهرو وهو معنقها من كتفها ..
عنبر : الجو كيحمق الصراحة ، واخا الليلة دالبارح دازت منحوسة ولكن رتاحيت .
الروطال ( باسها فحنكها ) مدام انت مرتاحة داكشي لي بغيت ، كتهمني راحتك قبل من راحتي
عنبر ( هزات راسها فيه بإبتسامة كتمعن فتفاصيل وجهو كتحس بإحساس غريب جيهتو إحساس ماكرهاتش تشدو وتخشيه فقلبها وتخبيه شدات وجهو وباستو فحنكو بعدات كتشوفيه متمتعة بملامحو ) الله يخليك ليا
الروطال ( عض على شفتو ) أناكل مك هنا ، تي رصاي وهداي هنينا لا نصدقو مشوهين ..
عنبر ( ضحكات وتنهدات تنهيدة طويلة مكملين المشية ) عرفتي أحبيبي شنو بغيت ( حبس المشية جارها حتى وقفات ) مالك ؟
الروطال : تي كيفاش مالي واش ديك الكلمة كنسمعوها ديما راه غير مرة وحدة فالحياة .. عاودي عاودي
عنبر ( كضحك ) شنو غادي نعاود رجوع لله مالك ؟
الروطال : والله مانتفاك عاودي اش ݣلتي براكة من الضحك
عنبر ( تبسمات ) حبيبي
الروطال ( شد وجها وباسها طالقها حتى رجع راسها اللور ) هاد الفم غناكل مو
عنبر ( كضحك ) والله يسر اويلي قصحتيني ماخليتيني حتى نكمل كلامي ولايني كوينيدي
الروطال : كملي ازين دكوينيدي
عنبر : ماكرهتش يكون عندنا شي وليد ولا بنية
الروطال ( هز حاجب ونزل الثاني ) هاي هاي على الفتيلة ، نديروهوم الولاد يغلبونا .. دابا نيت ( جرها ) دابا نديروهم
عنبر ( جراتو ) اويلي هدا ماشي دابا هنينا ( جراتو مكملين الدوران ديالهم مرة مرة كيوقفو كيصورها مقررين يتغداو على برا ويوضورو فسونتر ديال إفران ) ..
~~~~~
لماذا لا نكتب في خانة إنجازاتنا
كيف غادرنا الأماكن
واضطررنا للبدء من جديد
كيف تجاوزنا عثرات الطريق
كيف أننا نسعى رغم أننا منهكون
لماذا لا نضع في خانة لإنجازات
الصبر والثبات والعزيمة رغم البأس والألم
هذه المواقف وحدها التي صنعتنا.
لذلك أريد أن أقول لك لا أريدُ أن يحبني أحدٌ غيرك، ولا أريدُ أن أحادثَ أحدًا عن أحلامي غيرك، ولا أن أكشفَ جانبيّ السخيف لأحدٍ سواك،
ولا أن أبنيّ أحلامًا وأؤسسَ منزلاً وأتخيلُ فيه عائلة إلا معكَ أنت
أريدكَ أنت ..
ليسَ لأنني لا أملك اختياراتٍ أخرى
كلا ..
لو وضعوا لي العالم في كفةٍ، وأنتَ في الكفةِ الأخرى
حتمًا
وبأعينٍ مُغمضة
سأختارك ..
بعد مرور 6أيام
ليلة الاخيرة ليهم فلوطيل .. واقفة قبالت لاپيسين ساهية ومبسمة دوزات أحسن 6 أيام فحياتها معاه حاسة بإحساس زوين فقلبها باغية الحياة وفرحانة وباغية فكل لحظة تكون مع روطال .. حسات بيديه على كتافها معنقها ..
الروطال ( مقرب شفايفو من ودنها ) انا كنقلب عليك وأنت نابتة هنا .. فاش ساهية ؟
عنبر ( تبسمات وضارت عندو ) فوالو غير فهاد الأيام لي دوزنا ماسخيتش بيهم والله .. أحسن أيام دوزت فحياتي
الروطال ( باس جبهتها ) مزال ندوزو ماحسن منهم الله يجيب الصحة وسلامة .. مزال نديك شي بلايص غايعجبوك ماكثر من هادو ونعرفك على شي ناس عزاز عندي ..
عنبر ( بإستغراب) وايلي شكون هادو ؟
الروطال : حتى لداك الوقت وتعرفي الفضولية .. دابا ماشي الوقت ديال الهضرة
عنبر ( تبسمات بخجل ) وديالاش ؟
الروطال ( غزمها ) ديال الدق وسكات ( هزها بين يديه كتلعب برجليها داها نيشان لبيت نعاس .. حاطها فوق نموسية سد الباب لي كيدي للابيسين ورض الخوامي .. طفا الضو وخلا غير الضو ديال الڤيوز غارق .. بيت لي شهد على أيام زوينة وليالي عمرها تنسى غارق بملداتهم لا هو ولا هي ..
فسجن عكاشة وفغرفة لزيارات .. دخلو الحارس لي مسؤول شادو من يدو .. دخل للغرفة هز راسو فشكون لي جاي يشوفو وقف مبلوكي مصدوم كيشوف فنظراتو والإبتسامة على وجهو .. قرب منو بخطوات بطيئة كيجر فرجليه بلع ريقو وݣلس قبالتو ..
.... : الله يفك سراحك على خير ( بدارجة )
براهيم : آمين ( هز فيه عينيه ) سيفطك كارلو ؟
.... : وشنو بان ليك ؟
براهيم : الأمانة كاينة عند نادية ، ولكن هي راه مافخبارهاش بلي كاين زوج الاصلي لي خبيت عندها .. والمزور لي كاين فالكوفر فور
.... : انا ماشي شغلي ( ببرود ) المهم عندي هو الامانة ترجع لماليها ( تبسم ) حيت الى مشا حتى تقاس ولا ضاع غير حفر قبرك فهاد الحبس أبا رحمون ( مسح الإبتسامة ) الملاينر كاينين تم ( غمزو ) كل حبة ساوية زبالة دالفلوس والى طاحت فيه غير حبة مشيتي فيها أوليدي لا انت ( سكت ) لا ولدك ( وقف ) انشوفو هاد المدام عندك والى درتي ليا خاوية فعامرة ( غمزو ) الزيارة ديال هاد المرة غاتقبط روحك ( خلاه ݣالس اللون مخطوف من وجهو كيحرك يدو بصعوبة من الخوف ) ..
~~~~~~
- فجهة اخرى وصلو للكازا قبل الظهر بطاقة جديدة الفرحة باينة فعينيها .. خدات تيليفونها ودورات للحياة ..
عنبر : فينك .. فدار ( تبسمات ) أه المكتبة شوفي هانتي نلقاك حدا الفارمسيان لي قريبة لدار .. ويااه جيت جيت فاروق ايدوز لدارهم وانا انجي نشوفكم ..يلاه واخا ( قطعات ) هانت حطني حدا الفرمسيان القريبة لينا لي فشوكة ..
الروطال : أتغداي معاهم ؟
عنبر : اه غادي نتغدا العشية دوز ليا
الروطال ( غمزها ) ندوز للكبدة علاش لا فجميع الأوقات
عنبر ( ضحكات ) باسل .. ( وصلها لفين بغات باستو عاد نزلها ومشا هو بانت ليها حياة جايا .. جات عندها كتجري عنقاتها
حياة : ولاهيلة توحشتك
عنبر ( كتفرنس ) انا لا ( شافت فيها ) هههه غير كنضحك عرفتي أحسن ايام دوزتهم والله .. حتى نوصلو ونعاود ليك فين كنتي انتي ؟
حياة : خرجت قبيلات للمكتبة كانت عامرة راك عارفة اليوم الأحد .. كنت بغيت ندير شي فوطوكوبيات ساعة وانا تم ..
عنبر ( وقفات ) اجي طوموبيلت من هاديك لي قدام الباب ؟
حياة ( هزهزات كتافها ) والله ماعرفت .. توجهو لدار دورات حياة ساروت وتمو طالعين ..
تودة ( معصبة واقفة قبالت عبد الخالق) واش انت هبيل شنو غادي نݣوليها غاݣوليا واش تا جاتك ساهلة نݣول للبنت ، راه هادوك لي رباوك ودفنتيهم وكتبكي عليهم ماشي والديك ؟ وبلي عم راجلك هو باك وانا هي موك واش بغيتي عنبر يهرب ليها العقل ( تسمع صوت ساك طاح ضار هو وهي دقة وحدة .. بزوج كانو قبالتها قبالت وجها لي كتشوفيهم مصدومة وساكها طايح من يديها وحياة واقفة وراها حاطة يدها على فمها مصدومة ) ..
عنبر ( تبسمات ) كيفاش ؟ ( مسحات الإبتسامة من على وجها ) كيفاش والديا وأنت وانتوما ؟
عنبر : واش فخباركم كنت جايا دايرين فيا مقلب كاميرا خفية هادي ( بدات كضحك كتشوف فتودة ) ماما فاطنة كضحكو ياك شادين فيا فاروق علمكم وشادين فيا ..
عبد الخالق : لا ابنتي
تودة : عبد الخالق
عبد الخالق ( مداهاش فتودة ) أنا باك وهادي هي موك .. دوك لي رباوك سرقوك وانتي مزال لحيمة
عنبر ( فقدات اعصابها كتحرك فراسها ) لالا لا لا لا لا لا لا (بدات تبكي ) ولا ولاااااااا أعباد الله لا كضحكو عليا لا ( بدات كتغوت ) ولاااا كيفاش هادشي مافيهش الضحك الله يرحم الوالدين ( شافت فتودة لي كتبكي ) ماما فاطنة ماضحكوش عليا انا بنتك ربيتيني عقلتي ( شافتها غير كتبكي ) ولاااااا ( كتغوت على حر جهدها خرجات رشيدة كتجري وسميرة من بيوتهم كيجريو غير شافت عنبر رشيدة بصوت مرتافع كلو رجاء ) خالتي رشيدة خالتي رشيدة كضحكو عليا دايرين فيا كاميرا خفية هادشي مافيهش الضحك ..
رشيدة : اش واقع ؟ بسم الله علك ( شافت عبد الخالق وتودة كتبكي حسات بلي لي فبالها تفضح )..
عنبر ( كتأشر ليهم بصباعها وكتبكي ) كيقولو ليا انا بنتهم سمعتهم بودنيا سمعتها كتقوليه عنبر الى ساقت لخبار حنا والديها ولي ماتو غير رباوها اتمشي فيها كيكدبو عليا شادين فيا ( غوتات نادبة وجها كتنقز بإنهيار ) كتكدبو عليا
تودة ( شافت فرشيدة برجاء تسكت ) رشيدة
رشيدة ( تنهدات تنهيدة طويلة عينيها تغرغرو بدموع ) باك الله يرحمو ابنتي هو لي دار هادشي .. سليمان الله يسمح ليه .. غير ولداتك فاطنة وسرقك ليها ( تودة طاحت على سداري كالسة كتبكي )
عنبر ( كتبكي كتشهق كتحاول تسد ليها فمها تسكت ) لا ولااااا با حنين لا بابا وبا هداك وباااااااا ومي ومي هاديك حشومة عليكم اويلي ولا اعباد الله وغانموت وغانموت ..
رشيدة ( عينيها جايين بدموع ) ابنيتي رجوع لله خلينا ندويو ابالعقل الله يرضي عليك
عنبر ( جاتها سخفة حطات ظهرها على الحيط نزلات معاه مسرحة رجليها مع الأرض ) أشمن عقل أشمن عقل اعباد الله .. كضحكو عليا انتوما كضحكو عليا ( غوتات على حر جهدها غوتة زعزعات بيها الدار كلها وعلى برا ناتفة وجها وزيفها كتشهق)
تودة ( طارت عندها جاراها كتسكت فيها ) لا ابنيتي لا ابنيتي هالعار ابنيتي ماديريش هكا الحنينة ماديريش هكا
عنبر ( كتنين ) ماما و ماما وماما ولا اعباد الله ماما هاديك ماما هاداك بابا بابا هداك الحنين بابا .. كيغطيني بابا كيشري ليالي بغيت بابا ( كتنحط فاشلة ( مشات رشيدة كتجري جابت كاس ديال الما خدات منو ورشاتها حتى شهقات حلات عينيها فيهم بحال شي وحدة غارقة فشي حلمة)
تودة ( خنزرات فرشيدة ) بشوية على البنت
رشيدة : خاصها تفرح تحمد الله وتشكرو لي واليديها مزال بالحياة
تودة : سكتي ارشيدة
رشيدة : مغاديش نسكت خاصها تعرف ( عنبر مكتجاوبش غير كتنين وتبكي بحال شي تربية صغيرة ) شحال وانا ساكتة ساكتة على المنكر شكون لي شد الدقة من غيرك تي .. أنتي لي حملتي بيها أنتي لي ضحكو عليك وحيدوها ليك لحيمة وكذبو عليك وݣالو ليك راها ميتة بلا رحمة بلا شفقة حرموك من كبدتك .. ونهار ربي جابك لحداكهم وعرفتيها بلي مزال بالحياة هزوها وغبروها وحرموك منها 13 عام .. حورية ختي واخا مكانتش عارفة ولكن مكانش عليها تعاون فسليمان ويبعدوها انت لي تشويتي وخديتي دقة ..
عنبر ( هزات فيها راسها كتبكي مامتيقاش لي كيتقال ليها مخلطين دموع بالخنونة بكولشي ) اانتي هي ديك لي عاودتي ليا داك نهار .. كتي كتقصديني أنا ياكي اماما أنا ..
تودة : والله ماكنت بغيت نݣولك شيحاجة ( كتبكي وتشهق )
عنبر : بنت الحرام أنا ( ضحكات ) صدقت بنت الحرام @tout le monde
عبد الخالق ( ݣلس قفازي ) لا ابنتي انا وتودة كنا مزوجين على سنة الله ورسوله بالفاتحة ..
تودة ( بدات كتعاود ليها وعنبر ساهية وكتمشي وتجي براسها منتوف زيفها مليوح عاودات ليها كولشي وهي غير كتسمع وكتنين وتبكي كتبكي ربي لي خلقها وكلما زادت كملات كلامها كتزيد مقاداش تقبل بلي والديها سرقوها والديها لي كتحماق عليهم لي دفناتهم لي كانت حياتها عذاب بلا بيهم ماشي والديها وشفروها سلات تودة كلامها وهزات عنبر فيها عينيها بعياء بصوت باح عيان بقلة حيلة )
عنبر : علاش السكات علاش سكتو ؟
عبد الخالق ( كيبكي ) كنا خايفين عليك ابنتي مابغيناش نݣولوها ليك حتى يتشدو دوك ولاد الهم .. خفنا لا توقع ليكم شيحاجة
عنبر ( هزات راسها بعياء فحياة لي كانت واقفة كتنخصص بالبكا ) كنتي عارفة ؟
حياة : والله ماكنت عارفة ( كتنخصص ) والله اختي ماكنت عارفة ولا عارفة
عنبر ( رجعات كتشوفيهم ببرود دموعها محابسين ) عارفين أنتوما ولا كلكم عارفين ؟
تودة ( كتسمح فدموعها ) دنيا هي لولة عرفات وعاد ݣلتها لباك ولعمك وخوك ( بدات عنبر كتحرك راسها بعدم تصديق ) كولشي ابنتي كنا باغيين نݣولوها ليك ولكن ..
عنبر ( بدات من جديد كتنوح ) كولشي عارف كولشي عارف حتى لحمارة لي معارفاش انا بوحدي لي ماعرفاش انا انا انا الحمارة انا ضاحكين عليا لاعبين عليا كادبين .. داكشي باش كولشي ضاير بيا زيغ انت ما كلكم عارفين
تودة ( حطات يدها عليها ) أبنتي الله ( تنفضات منها واقفة )
عنبر : ماتݣوليهاش ليا مزال متبقايش تݣولي ليا بنتي صافي عنبر ماتت .. عنبر ( بدات كتنحط ) عنبر دفنتوها حدا دوك الناس لي شفروها تدفنات صافي غير ديرو ليها العشا وقراو عليها وحسبوها بلعاتها الارض ومشات .. ( ضربات فيهم وخرجات جارة زيفها وخارجة .. تابعاها تودة كتغوت وتعيط وعبد الخالق مجاوباتهمش طاحت تودة فدروج هازها عبد الخالق وسميرة رشيدة تبعات عنبر مالحقاتهاش مشات كتجري قاطعة الشانطي ..
غاديين بيها رجليها بين زناقي زنقة تديها وزنقة تجيبها دموعها هابطين سيناريو حياتها كيدوز قدام عينيها .. كتفكر طفولتها مع والديها مها لي كانت حنينة كانت كتحماق عليها وكتبغيها .. واخا كانت كتحس بحب مها كثر من باها ولكن حتى هو كان حنين فيها ماتنساش نهار كان كيجيبها من المدرسة وكيديها ليها .. وقفات فواحد الزنقة حاطة يدها على الحيط دموعها نازلين ..
.... : مالك ابنيتي ياك مكاين باس
عنبر ( هزات فيها راسها ) عفاك بغيت شريبة ديال الما
.... : واخا أبنيتي .. دخلات السيدة لدار جابت ليها الما شربات رجعات السيدة لدار جات ترجع عندها مالقاتهاش لقاتها مشات ..
- داوها رجليها للجردة بقات كالسة فيها مسرحة رجليها كتشوف فالأرض وكتبكي دموعها نازلين .. عقلها طاير وحاير مقاداش تقبل بلي والديها ماشي هوما لي رباوها .. ماقداتش تقبل بلي العائلة لي كانت حاسباهم عائلة راجلها يكون هوما عائلتها جداها وجدها .. خوها بين ليلة ونهار عندها خواتات وخو ولاد العمام والأهم هو راجلها لي صدق ولد عمها عقلها ساهي وسارح ..
~~~~~~~~~
- الدار لي كانت خاوية رجعات عامرة عندهم .. كولشي جا الروطال وطارق خرجو كسقلبو والبقية كالس مع تودة كيصبرو فيها ..
علال : حسن ابنتي منين هادشي تفرتك وكولشي عرف الحاجة الى بقات مخبعة بزاف كترجع على مولاها بندامة ..
تودة : بنتي ضاعت مني أبا علال .. ماشتيش حالتها هادشي علاش مابغيتش نݣولها ليها هادشي علاش سكت فمي وكمدتها لݣلبي وسكت على هاد الحالة نفضات مني وݣالت ليا حسبوني مت
رقية : اعوذ بالله من الشيطان الرجيم .. ابنيتي اكتݣول هكاك غير جاتها قاصحة بنيتي مسكينة
رشيدة ( حطات يدها على كتف حياة لي غارقة فدموعها ) وبراكة ابنتي اويلي
حياة ( هزات فيها عينيها ببرود ) براكة كيفاش براكة .. أنتوما ناس انتوما انتوما بشار انتوما لا موحال .. عنبر كنت حاسباها بنت خالتي وختي دابا صدقات مكتجيني والو ، عيشتونا فكدبة بجوج بينا رضيتونا حمارات شكون عرف واش انا نيت بنتك ولا مربياني حتى انا ..
رشيدة : حياة ديري عقلك
حياة ( وقفات ) مكاين عقل ماتبقاوش دويوني وتهضروني فوتوني عليكم .. انتوما العيشة معاكم حرام مادويونيش هالعار مدويونيش ، ختي مشات ليا بسبابكم حسبي الله ونعم الوكيل ( مشات كتجري لبيتها ردخاتو عليها ) ..
ماخلا زنقة ماقلب فيها لا هو لا طارق ، ساكها خلاتو فدار بسباب تيليفونها باش عرف لي واقع .. طارق عيا مايقلب او والو .. دخل الروطال مع كاع الزناقي كيقلب عليها عقلو غادي يخرج خرج لشارع قاطع الشانطي متوجه للجهة الجردة لي كانو وليدات كيلعبو الكرة ، كتبان ليه ݣالسة حادرة راسها ماشعرش على راسو حتى طار لعندها ..
الروطال ( تحنا عندها ) انتي هنا وانا ݣالب عليك الدنيا ( هزات فيه راسها ريسيل سايح فمها بيض غير شافتو بدا فمها كيترعد ودموع تجمعو فعينيها نطقات بصوت مرعود )
عنبر : ب با هو عمك .. سرقوني وانا صغيرة اداك نهار قلت ليك نزور قبرهم عقلتي كذبو عليا كانو امربيني ( نفاجرات بالبكا كتشهق )
الروطال ( جرها معنقها ) صافي احبيبي صافي ششش ( تخشات فيه بحال شي بنية صغيرة كتشهق وكتنين لي داز كيشوف فيها .. الانين ديالها كان كيضر فالخاطر ضرو فخاطرو وقلبو حس بروحو غادي تزهق كيحس براسو مقادش يتحمل دموعها .. محاملش شيحاجة تبكيها الدموع ديالها دبح*وه بحال الماس كيتغرزو ليه فقلبو ماكرهش يسد عليها ويبعدها من كولشي يخليها بعيدة على الحوايج الخايبة لي غايضروها ) .. وقف عليهم طارق كيشوف ديك الحالة لي فيها ختو بقا فيه الحال حس بالخناجر كيدخلو ليه لقلبو ..
عنبر ( بعدات عليه كتشرح بعفوية بحال شي بنت صغيرة وكتشهق فنفس الوقت ) بين ليلة ونهار نلقى عندي والدين جدود عم ولاد عم وخواتات وخو ( شافت فطارق لي واقف زادت طرطقات بالبكا ) خبازها عليا كولشي عارف وأنا لا أنا لا أعباد الله أنا لا .. ( شوية سكتات هزات راسها فيه كترمش كلامو كيدوز بحال سيناريو تخايلي تعرفي بلي داركم ماشي هوما والديك ) ك ك كنتي عارف حتى انت كنتي عارف ( بدات كتغوت وتركل وهو كيشد ليها فيديها هو وطارق )
الروطال ( بإنفعال ) مكناش خاصنا نݣولو لك .. حياتك راه كانت فخطار واش كتفهمي ، هاد الحالة كون درتيها داك الوقت ودوك ولاد الها**** كانو يݣدو يأديوك كولشي كنتي غاتعرفيه وبالعقل .
عنبر : بعدو مني تريكة المنافقين كلكم تريكة منافقين بحالكم بحال بدر وتريكتو .. الكذوب عندكم فدمكم أكبر تريكة المنافقين هوما أنتوما
الروطال : عنببببببر ، وعاي كنا خايفين عليك مك داز عليها الويل لا هي لا عمي داز عليهم الويل الكحل .. خصوصا مك شفروك ليها وهموها بلي متي الى بغيتي تعاتبي عاتبي دوك الناس لي مدفونين لي داوك لمك وكدبو عليها وخلاوها مليوحة معارفة راسها من رجليها ..
عنبر ( بالغوات ) ماشي شغلك ماشي شغلك شكون انت شكون انت لي تخبي عليا شكون انت .. تقت فيك انا عطيتك روحي وداتي كدبتي عليا كلهم يكذبو حتى ليك انت لا متكدبش عليا أنت لي وقفتي معايا فشحال من حاجة وكنتي معايا شاركنا شحال من حاجة تكذب عليا ( كتشهق ) منافقين عطيوني تيساع هالعار عطيوني تيساع خليوني عيييييت عيييييت من الكذوب ونفاق والغدر عييييت ( وقفات وقف معاها )
طارق : عنبر ختي
عنبر ( بفشلة ) اييييه على هاد ختي شحال كنت بغيتها فحياتي شحال كنت بغيت يكون عندي خويا نحط عليه راسي ونشكي ليه همي وياخود ليا حقي ( تنهدات تنهيدة طويلة) جات معطلة اطارق جات معطلة بزاف ..
الروطال ( جرها من يدها ) فين غادة عنبر ( زمجر بشراسة )
عنبر ( نفضات يدها من يدو وتمات غادية تبعها واقف قبالتها )
عنبر : ديري عقلك الله يرصي عليك نحيدو من هنا أحبيبي ( دوز يدو على وجها ماسح دموعها ) سمعي ليهم بعدا ويكون خير
عنبر ( تنهدات تنهيدة طويلة مهربة وجها من يدو شافت فيه بعياء وخيبة أمل مهدودة بحال شي ورقة يبسات وبدا كيلعب بيها الريح شافت فيه شوفة طويلة ونطقات بصوت مبحوح ) من هاد النهار أولد الناس دفنوني حسبوني مت لا انت لا هوما .. وأكبر خير غادير فيا ( سكتات مطولا شافت فيه ودموعها نازلين محابسينش ) طلقني أولد الناس وحسب راسك عمرك ماعرفتيني ..
الروطال ( هز حاجب ونزل الثاني كيحاول يكالمي راسو ) مغاديش ندي عليك .. زيدي نمشيو لدار وندويو ( شدها من دراعها)
عنبر ( حيدات دراعها منو ) راه دويت معاك واش يحسابليك نݣد نشارك الفراش مع واحد كاذب عليا .. شنو الفرق بيك وبين بدر بحال بحال
الروطال ( زمجر بصوت تقيل ) متصعريش ملتي اعنبر ( غوت خلاها طارت من بلاصتها مخشية ورا طارق )
طارق ( بتحدير ) فاروق
عنبر : ياك انت كتقول خويا .. غادي تخليه يغوت عليا غادي تخليه يحݣر عليا ؟ ( شافت فروطال ) لي عندي قلتو ليك جري طوالك الى بغيتي
طارق ( ضار عندها بهداوة نطق ) تمشي معايا ندويو شوية ؟ الى بغيتي مترجعيش لدار تمشي معايا لداري ؟
عنبر ( هزهزات راسها بالإيجاب ) واخا غير هو نسيت ساكي تم عندهم
الروطال ( بصدمة وإستغراب ) طارق واش من نيتك أصاحبي ؟
طارق ( شافيه ) غيرها أفاروق بدل ساعة بخرا ... جر عنبر غادية معاه بلاما تشوف ففاروق بقا كيشوفيهم كيشوفيها كيفاش غادية مع طارق .. تعصب تابعهم هوما غاديين او هو وراهم العصاب واصل معاه للحد .. وصلو للحدا دار فتح طارق الباب ديال طوموبيل دخلها وطلع عندهم للدار ..
تودة ( غير شافتو وقفات ) أمضرا ولدي لقيتوها ؟
طارق : كاينة معايا فطوموبيل .. غانديها عندي الدار ترتاح شوية خليوها دابا راه ماشي ساهل لي وقع ليها .. فين هو ساكها ( مداتو ليه رشيدة ) أنا مشيت رتاحي اخالتي يكون خير
تودة ساحو دموعها محركة راسها بشوية وبعياء .. نزل طارق داز من حدا روطال بلاما يدوي معاه مخليه كيشوفيه شوفات عمرو شافهم فولد عمو حتى لليوم .. طلع فطوموبيل عاطيها ساكها ديمارا ومشا ..
- الطريق كلها مادواتش معاه غير ساهية فسيناريو حياتها حنحنات ونطقات بصوتها الباح
عنبر : دينا عفاك للدار
طارق ( شافيها ) اينا دار ؟
عنبر : ديال بوسكورة ( دار الروطال ) ديني بغيت نكلس مع راسي عفاك ( هزهز راسو مابغاش يحكر عليها ) .. شد الطريق بيها وصلها لدار مادواتش معاه قبل لا تنزل شافت فيه ونطقات بملامح خالية من أي مشاعر
عنبر : شكرا .. سدات الباب توجهات لباب الدار فتحاتها ودخلات سادة الباب وراها ، ساحو دموعها سخان غير سمعات صوت طوموبيل طلعات للبيت البيت لي شاركوه بجوج وشاركو الفراش لأول مرة بيت شهد على لاحاظاتهم على أحاسيس زوينة بيناتهم .. نزلو دموعها متابعين ماتقبلاتش يكدب عليها يكدب كولشي حتى ليه هو لا ، مشات للجهة فين كاين بالزها محطوطين مزال .. حلاتهم وزادت حوايج اخرين ديالها مشات لواحد البواطة حلاتها كان فيها البروش مزال كيلمع هزات دارتو فساكها جمعات كولشي سينيال شيتة ديالها كولشي دارتو فباليزة كبيرة ديالها سداتها وهبطاتها من فوق النموسية غادية خارجة شوية وقفات شافت فيدها وفخاتم زواجها .. حيداتو وبلاما تفكر حطاتو فوق الكوافوز وخرجات ..
~~~~~~~
بدا تيليفون ديالو كيسوني كانت نمرة طارق حل الخط وبصوت معصب نطق
الروطال : شكاين ؟
طارق : فاروق ماتهزش فخاطرك كان ضروري خاصني ندير ليها خاطرها .. هي فواحد الوقت حساس فهمتيني
الروطال : فين انتوما ؟
طارق : وصلتها لعندكم لدار ورجعت ..
الروطال : خليتيها بوحدها مكلخ أنت أطارق اصاحبي ( ديمارا طوموبيلتو ) السيدة كركباتك راها ناوية على خزيت وانت تيقتيها ( قطع عليه)
تودة ( عاكفة راسها الكل ضاير بيها كتحرك فراسها ) انت سباب اعبد الخالق ( نزلو دموعها بعياء ) أنت السباب أنا بنتي كنت بغيت ندوي معاها غير بالهدى وتاويل .. لاش جاي اخويا لاش
عبد الخالق : مانويتهاش تجي وتسمع أفاطنة .. البنت كان ايجي نهار وتعرف سوا بالهداوة ولا بهكا ، هادشي لي دارت كان باين غادي ديرو ..
تودة ( كتبكي ) انا بغيتها غير تسمع ليا ونفهمها لي كاين نعاود ليها مداز عليا .. مشات وخلاتني انا بغيت غير بنيتي كبيدتي ..
رقية ( كدوز ليها على ظهرها ) دابا ربي يصاوب اكبيدتي ربي غادي يصاوب سبحانه .. ربي كبير ومكايخيبش عبادو ابنيتي ..
- الدار عندهم كانت بحال الى فيها ݣنازة كولشي ساكت وساهي وكيخمم فهادشي .. تودة قلبها غايسكت بالبكا خايفة ضيع فبنتها بنتها لي شحال وهي كتقلب عليها تمشي ضيع من بين يديها بين ليلة ونهار ..
فجهة أخرى وصل لدار دخل كيعيط بسميتها حتى واحد مجاوبو .. طلع نيشان للفوق درجة كينقزها ودرجة لا لقا بيتهم محلول مشا نيشان لدريسينغ مالقاش حوايجها .. قلبو تضرب بخنجر حافي رجليه فشلو عليه تم راجع كيقلب فالكوافوزات بان ليه الخاتم هنا فشل صافي داخت بيه الدنيا حس بواحد الإحساس خايب بزاف ..
- شد داك الخاتم ورك عليه .. فتح الكوافوز هز واحد البواطة حط فيها وسد عليه فللحظة ولا بحال شي تور هايج ..
الروطال : دخول الحمام بحال خروجو امدام ( هز يدو حتى لسما ضارب ڤاز مطيحو مهرس .. خرج من البيت جاعر مكايشوفش قدامو نازل كيجري دوز الخط ديال طارق جاوبو ) مكايناش ݣلت ليك بيدقاتك ومشات هزات حوايجها وغبرات أطارق غبرات ..
طارق : تكالما أفاروق تكالما أصاحبي
الروطال ( بالغوات ) وماتݣولش ليا تكالما راها مرتي أبنادم مرتي .. بغات الطلاق ( ضحك ضحكة رجولية خطيرة ) تكشي لمحكمة والى ماقداتهاش المحكمة ديال المغرب دوز المحكمة لاهاي ولا طلع لبرلمان فرباط برب الكعبة لا طلقتها أقسم لك برب العزة الطلاق لا شماتو أنا نݣولك ( قطع عليه )
قدام باب دار عزيز .. دقات الباب زوج دقات تسمع ( بلاتي أنا جايا ) تحل الباب وبهيجة هي لي حلاتو شافت فيها بإستغراب وجه صفر حالتها حالة
بهيجة : عنبر مرحبا بيك دخلي ( عنقاتها دخلات الباليزة حطاتها ودخلات الداخل الصالة خاوية ) مرحبا بيك اكبيدتي
عنبر ( بتعب ) سمحيليا اخالتي على هاد الدخلة ( تغنغنات بالبكا ) مالقيت فين نمشي رجليا جابوني لهنا ..
بهيجة ( غوبشات ) اويلي استغفر الله العظيم أبنتي رجوع لله ماتݣوليش هكا ( ݣلسات حداها جراتها عنقاتها كطبطب عليها ) بسم الله عليك ابنتي .. اعوذ بالله من الشيطان الرجيم
عبد العالي ( خرج من البيت حط القرآن فبلاصتو وتوجه للصالون ) بنتي عنبر مرحبا بيك
عنبر ( كتبكي ) ربي يخليك اعمي الله يكبر بيك .. سمحوليا على هاد الدخلة
عبد العالي : الله ابنتي دار داركم .. أش واقع ابنتي ياكما كاين باس ؟
عنبر ( كتشهق ) ضايرين بيا المنافقين اعمي الكذابين .. حياتي كلها كذبة أعمي كلها مقاداش نتخيلها كون غير مت وتهنيت ..
عبد العالي : اعوذ بالله من الشيطان الرجيم ابنتي .. ستغفري مولاك متݣوليش هاد الهضرة المؤمن مصاب ابنتي ربي كيختابر عبادو لي جات من عندو مرحبا بيها ..
عنبر : عييت اعمي عييت والله حتى عيييت ( بدات كتبكي وتشهق بدموع وبهيجة كدوز على ظهرها معنقاها مخليها تفش قلبها عليها تحل الباب ودخل عزيز حط السوارت موجه للصالون كيشوف فالباليزة تخلع عند بالو ختو حتى شاف عنبرلي طايحة بين يدين مو وكتبكي )
عزيز : السلام عليكم .. أش واقع عنبر مالك اختي ياكما شي حد تعدا علك ؟
بهيجة : مزال ماعرفناش مالها اولدي .. كتبكي مابغاتش ترض حلقها لفمها شواتني فقلبي وكبدتي
عبد العالي ( شاد تسبيح ) سير اولدي لداك البيدو لي فبيتي كب واحد الغراف وجيبو .. عزيز دار داكشي لي قاليه باه كب من الما المرقي وجابو مدو ليه ) هاكي ابنتي شربي من هاد الما سمي الله ..
عنبر شداتو من عندو يدها كترعد شربات على 3 دفعات حتى كملاتو .. تنهدات تنهيدة طويلة وبدات كدوي بلاما تحس بغات غير تخرج شافت فيهم ونطقات بصوت مهزوز
- اخيب حاجة تعرفي بلي والديك لي رباوك ماشي والديك .. او والديك لي ولدوك حداك وكولشي عارف ومخبي عليك حتى من الراجل لي واعدني عمرو يكذب عليا صدق كاذب عليا حتى هو عارف وساكت .. كانو مضوريني محيمريني
عزيز : الله يرضي عليك بشوية كيفاش ؟!!
عنبر ( بدات كتعاود ليهم ) واش هادشي يرضي ربي أعمي
عبد العالي ( بالهداوة ) الى كان لمصلاحتك ابنتي مافيها باس ..
عنبر : ياك اعمي علاش الكذوب ولا حلال ؟
عبد العالي : الى كتحسبيني عمك وفمقام باك كيكتݣولي غادي تسمعيني الله يرضي عليك ( حدرات راسها دموعها غير هابطين ولات كتحس بيهم باردين حيت خدودها حمارو ) ربي كيختابرنا ابنتي كيعطينا اختبار واش نقبلوه ولالا واش اتخاصمي مع الله سبحانه .. مك ماعندها حتى ذنب الذنب هزوه دوك لي تحت التراب ( هزات فيه عينيها ) ماجربتيش ابنتي تكوني أم وحاملة فرحانة بحمالتك ويحيدو ليك التيلاد ويكدبو عليك بلي مات .. مك صبرات وقاصات مسكينة ونهار لقاتك بعدوك عليها وداوك .. أما باك معدور مكان فخبارو مايتعاود
عنبر : واخا اعمي وخالتي ؟ وعمي او ولادو لي كذبو عليا ؟
عبد العالي : لي عاوتي ليا على دوك الناس بلي واعرين وخايبين .. وانتي كنتي متبوعة من عند راجلك الأول كون وقع هادشي قبل وݣالو ليك لي كاين وخرجتي بهاد الحالة خطفوك ولا غبروك ولا اداوك ابنيتي فين غانكونو .. ماعدرهم يخبيو عليك ومايݣولوهاش من محبتهم ماشي حيت هوما خايبين ولا منافقين على الأقل خلي غير ميمتك تدوي معاك وتدوي معاها ..
عنبر ( تنهدات ) ماشي دابا اعمي غير نرتاح شوية
عبد العالي : بهيجة ديها لبيت نرجس .. ديري ليها اللويزة الله يرضي عليك خليها ترتاح
بهيجة : أجي ابنتي معايا .. تبعاتها عنبر خلات عزيز وعبد العالي غير ساهيين وكيشوفو ..
مابغاتش تغدا بغات تبقى غير متكية موسدة يديها السرجم محلول ساهية .. دموعها نازلين كينشفو ويرجعو ينزلو تيليفونها طفاتو عيا يسوني عليها طفاتو من بعد مابرزطها .. تنهدات تنهيدة طويلة ، تحل الباب وتمات داخلة تودة لابسة جلابة وجها صفر رجليها مهازينها غير شافت حالتها غرغرو عينيها بدموع هزات عنبر فيها عينيها .. زادت من وثيرة البكا عاضة على شفايفها مغرقة وجها فالمخدة كتبكي حسات بيها ݣلسات حداها حطات يدها على كتفها ، أذان المغرب كيأذن تسناتو حتى كمل حطات يدها على شعرها كدوز عليها بقات عنبر دافنة وجها فالمخدة وكتنحط بدموع ..
تودة ( ماتسناتهاش تشوفها ) نهار شفت عبد الخالق نهار الاول بغيتو عمري بغيت شي حد من غيرو ، تݣدي تݣولي ابنيتي لي بيناتنا وقع ف 10 يام بحال الخف بغاني وبغيتو كان واقف على طلاق مع مرتو .. تزوجنا بالفاتحة بيما طلق ونرسمو زواجنا وقف معايا خالي حيت كنت هاربة من دارنا كانو باغيين يزوجوني لواحد سيد كبير فالعمر .. عبد الخالق جاتو خبار بنتو مرضت مرة خايبة ومشا بلا ميجال وفاش مشيت نقلب عليه مالݣيتوش عد بالي سمح فيا رجع لمدينتي وخرجت كنتوحم ( بدات كتعاود ليها على فترة حمالتها او وحمها ) سليمان كان خدام معانا فالفرقة ربي ماعطاهش الولاد .. طلبني نعطيه لي فكرشي أنا مابغيتش وضرت فيه ولكن الله يسمح ليه دار يدو مع يد مليكة كات معانا وكات كتولد العيالات فنفس الوقت ( بدات تبكي وعنبر مزيرة على المخدة كتنحط ) ولداتني مليكة ودارت يدها معاه وسرقوك ليا ( عنبر زادت فوتيرة البكا ) وهموني بلي ولدت دري ومات وبلي دفنوه حرموني من كبدتي وشواوني ( كملات ليها المعاودة حتى وصلات لنهار لي عرفات بلي راهيا بنتها وبلي داوها وحرموها منها ) وهادشي لي كاين ابنتي انا ماعندي يد انا تزوجت بالمعطي غير باش نلݣاك ماديتها فراسي كنت كنقلب عليك غير انتي .. ماهليت مدينة ماغنيت فيها كنت نݣول نݣد نلݣاك ولا ربي يلاݣيني معاك حتى نهار لݣيتك الى شفتيني كنت ظالمة ( كتنحط دموعها شلال ) عمرك ابنيتي تشوفي وجهي أنا نبغيك اتكوني فرحانة سليمان وحورية مسامحاهم واخا اداوني .. وانتي تعرفي ابنيتي راحتك من راحلتي وسمحي( قاطعها تصرف عنبر لي دارت تهزات وتلاحت فحجر تودة كتبكي حتى روحها غادي يزهق تبكي وتقول مابكات وتودة معنقاها عندها كدوز ليها على راسها وتبوس فيها ) صافي ابنيتي صافي اكبيدتي وشميستي روح ديال روح فاطنة وعينيها باش كتشوف ..
عنبر ( تهزات من حجرها عينيها منفوخين بدموع ) دابا انا عندي ميمتي لي نحط عليها راسي ونذكي ليها همي .. عندي ميمتي لي نحط عليها راسي ميمتي لي حرموني منها عندي عتبة لي نتسند عليها دافع عليا وديرني فكمها ومتخلي حد يوصلني ..
تودة ( عنقاتها ) روحي نعطيها ليك ابنتي ومنفرطش فيك أنتي بنتي بنت كرشي .. تعدبت وتوحمت علك تعصرت وولدتك انت بنتي انا مابنت حد
عنبر : كدبتو عليا علاش كدبتو عليا
تودة : كنبغيوك خفنا عليك أحبيبتي ، كنت خايفة عليك واش انا عاد لݣيتك ونفرط فك كنت خايفة من دوك ولاد الحرام هالي خلاني نسكت ومندويش
عنبر ( بعياء ) ماعرفت نحقد على والديا لي رباوني ولا شنو ندير
تودة ( مسحات ليها دموعها ) ابنتي دوك الناس ماتو الله يسمح ليهم .. واخا دارو جريمة بالحق ميمتك مكانتش عارفة مسكينة ماعليها لومة الله يسمح لسليمان على لي دار ، ولكن ابنتي متدعي عليهم متحقدي هوما عند الله يتكلف بيهم ..
عنبر : انتي ماليك لومة براكة غير لي داز عليك ولكن منݣدش نسمح لي كذبو عليا ( جات تدوي تودة ) خاص اماما حتى نبرد ونطفى مݣداش نشوف فوجه شي حد صعيب عليا اميمتي صعيب لي دزت منو صعيب ( نزلو دموعها ) كنحس بالعيا كنحس بداتي ماشي مني
تودة : نمشيو لدار ابنتي ؟
عنبر : لا أماما فاطنة غير خليني هنا .. منݣدش نشوف فخالتي رشيدة كدبات عليا منݣدش نسمح ليها مݣداش انا ماشي ملاك الى غانشوف نشوفك انتي وحياة ديك البنت ختي مايحيدها ليا حد أما شي حد خور مابغيت نشوفو مابغيت نراه
تودة : وباك ؟
عنبر ( شافت فيها ) ماعرفت معارفاش باش كنحس والله حتى ربي عالم بيا ( بدات تبكي من جديد)
تودة : ربي كبير أبنتي ، غير هو لا باك لا جدودك مساكن راه ماعندهم يد وحتى ولاد عمامك وخوتك وراجلك كيبغيوك داكشي باش مݣالو ليك والو
عنبر : ماتجبديش ليا راجلي اماما .. انا وداك ولد الناس كل واحد يسرح فطريقو الله يعاونا ويعاونو الكذاب لاخور المنافق
تودة : اويلي ابنتي رجوع لله
عنبر : الى كنت عزيزة عليك متجبديهش ليا .. بغيت غير نحط راسي عليك ونعس ونسا راسي ونسا شكون أنا ..
- ضرباتها الفيقة مع الفجر كتحس بالوجه كيقطع فيها وراسها غادي تهرس .. النفس كطلعها بصعوبة وعنقها من اللور مزير عليها عرفات بلي طونسيو هو لي طالع ليها .. شعلات الضو دالبيت مشات لباليزتها حلاتها لقات جوج كوشات بقاو ليها من دورة لي فاتت جرات رجليها فتحات الطواليط ودخلات كانت دايرة البروطيج كونماشي هو كون وا عمرو ليها حوايجها .. مالف الجوع كيكون فيها وكتكون مزال ماتسرحات عليها ودابا الوجع وتسرحات لاحت داك البروطيج دارتو فميكة ولاحتو فطارو دالحمام كلكماتو مزيان باش مايبانش دارت ديك الكوشا وخرجات من الحمام تلاقات ببهيجة لابسة لبسة ديال الصلاة ..
بهيجة ( شافتها ماهياش ) مالك ابنتي ؟
عنبر : هلكني الوجع جاتني ، وعاد راسي غايتهرس يمكن طالع ليا طونسيو
بهيجة : سيري رتاحي اندير ليك السالمية .. ونجيب ليك واحد الكاس نطحن ليك خيارة معاها التومة
عنبر : واخا اخالتي الله يخلي ليك صحيحتك .. مشات عنبر للبيت ، جاب ليها بهيجة كاس ديال الخيار مطحون مع تومة هو الأول شرباتو بقات متكية حتى رجعات ليها بكاس فيه السالمية سخون
بهيجة : خليه يدفا غير شوية وشربيه ونعسي ، تولي بيخير إن شاء الله ( تنهدات ) فاش مشات ماماك لبارح ونعستي جا راجلك ابنتي دق ولكن خرج عندو عمك دوا معاه ..
عنبر ( بعياء ) أنا وداك السيد أخالتي سالينا يعطيني أبراتي .. قلتها ليه نهار الاول قتلو الكذوب مكنحملهمش .. كاع خافو عليا لا هو لا غيرو يدورو بيا يتجمعو عليا وبالهداوة يشرحو ليا غاتكون قاصحة عليا ولكن مغاتكونش بحال هكا ولات عندي فوبيا من الكذوب عييت والله .. ماما فاطنة لي تعذبات وتكرفصات ودازت عليها هي لي تستاهل مسكينة وحتى ( ماقداتش تقول با ) عمي عبد الخالق ولا دوك الجدود لي قاتلي ماما مكان فخبارهم والو شي حد خور لا كيما كانو هذا شحال يحسبوها دابا ..
بهيجة ( هزهزات راسها مابغاتش تقجر عليها ) والله يصاوب ليك ابنتي رتاحي ( خلاتها شربات داك الكاس حطاتو حدا راسها وتغطات كتحاول تنعس احسات بالوجع بدا يخفاف شوية وهوما يتغمضو عينيها بالعيا ..
فصباح مجموعين على طبلة وحدة .. تدق الباب حل عزيز ودخلات تودة ومعاها حياة لي غير شافت عنبر مشات كتجري تلاحت عليها معنقاها كتبكي ..
عنبر ( دموعها نازلين كدوز ليها على ظهرها وخاشياها عندها كتهمس ليها فودنها ) أنتي راك ختي وغادي تبقاي ختي وحتى واحد مغادي يفرقنا لا اليوم لا غدا ..
حياة ( بعدات عليها كتبكي ) مابقيتش قادة نكلس فديك دار من البارح فاش مشيني وانا سادة عليا مرضت .. ماقديتش نشوف فمي مقاداش نتخيل بلي كانت عارفة وساكتة عارفة شنو دارو ختها وراجل ختها وسكتات والله مابغات دخل ليا راسي ..
عنبر : شغلها هداك انا انتي لي كتهميني .. انت راه ختي انا وفيك صاحبتي وكولشي
حياة ( عضات على شفتها ) واخا عرفتي عندك خواتات ؟
عنبر : انت هي ختي أنا كنعرفك غير انتي ، شكون لي هز ساكو وجا معايا لكازا .. شكون تشفرت انا وياها وكنا على الحارة والحلوة ودوزنا كولشي بزوج بينا شكون كانت معايا من صغري شكون تربات معايا وكانت تهز ليا هبالي ونهز ليها هبالها من غيرك انتي ..
عبد العالي : والله يخليكم ديما مجموعين
تودة ( عنقات بنتها ) كيصبحتي ابنتي شوية ؟
عنبر ( تنهدات تنهيدة طويلة ليسيغن تحت عينيها شفتها مقشرة من واحد الجنب صوتها مبحوح ) شوية اماما فاطنة شوية ..
عزيز ( حنحن ) صباح بكري سونا ليا فاروق ( شافت فيه عنبر ) بحال والو شوية يكون هنا
عنبر : يكون ولا يݣلس ( ببرود ) انا مابغيتش ندوي معاه اعزيز ( ذافت فعبد العالي ) عمي انا راه مابغيتش نشوفو يخليوني عليهم فتيقار مايبقاش يحكر عليا انا ربي عالم بحالتي ( شافت فمها ) ماما فاطنة نطلبك طليبة
تودة : عينيا نعطيهم ليك
عنبر : بغيت نزور قبر ( بغات تقول با ومي وماقداتش تخرجها تجرحات منهم بزاف ) الناس لي رباوني واش تمشي معايا ؟
تودة : نمشي أبنتي نمشي
عزيز : فطرو بعدا انا نديكم ( بداو كيفطرو عنبر غير كتنقب الشهية ماعندهاش سلات فطورها ناضت للبيت بدلات عليها لاحت عليها عباية صابو وشال وهزات ساكها وخرجات لعندهم .. يلاه خرجو من الباب وقفات فاص افاص فوجه الروطال ..
إدارة السجن كانت مقلوبة كولشي كيجري خارج للإستراحة .. السجناء كولشي مجموع كيطلو كان مسرح رجليه حاط يدو على كرشو لي كلها غادية بدمايا من طعنات لي شد كان باين بلي مغاديش يطول .. جا طبيب الفراملية هزوه ولي تم كلهم دازو للإستنطاق ..
.... : والله ماعرفنا اسيدي كنا مجموعين حتى بان لينا طاح غارق فدمو .. ( كولشي كان كيقول نفس الهضرة حتى واحد فيهم مشاف شيحاجة )
📍 المديرية
فمكتب العميد .. دخل عماد ويوسف بزوج على وجهم علامات الإستفهام
رضوان : ݣلسو ( ݣلسو مقابلين مع بعضياتهم ) فخباركم لي وقع اليوم ولالا ؟
عماد ( ملامحو باردة باين عليه الضعف ) لا كاينة شيحاجة ؟
رضوان : براهيم رحمون تضرب فالحبس فاش كانو فساحة ( هز عماد حجبانو بإستفسار ) الضرابي كانو غارقين مجاو فين يعتقوه حتى مات
عماد : ماعرفوش شكون دارها ؟
رضوان : كاع لي معاه ݣالو هضرة وحدة .. كانو مجموعين مشافوش شكون دارها ، باين بلي شي واحد منهم لي كيدير هاد الخصايل كيكون ديجا محكوم عليه بالمؤبد معندو مايخسر غارق فيها غارق فيها .. السيمانة لي دازت شي واحد زارو فالحبس شكون هذا ماعرفناش ..
يوسف : هنا البشرية من كمارتو وفعايلو منݣدش نݣول الله يرحمو الله يسمح ليه ويغفر ليه على لي دار مشا عند الله بلاما ياخود حسابو
عماد ( تنهد ) حسابو ياخدو عند الله سبحانه هو حسن من اي واحد ( شاف فالعميد ) بحال هاد النوع كيكون عندو حساب مع بزاف ديال الناس ماشي غير واحد
رضوان ( عض على باطن حنكو ) غادي ديرو محامي للواليدة ديالك ؟
عماد ( هزهز راسو ) عصام وماجدة مكايجبدوش هاد سيجي ݣاع .. لي عليا غاندير ليها محامي واخا راه مغرقاها ( تنهد ووقف ) شيحاجة خرى اسيدي ؟
رضوان : لا تݣدو تمشيو ( خرجو من عندو وكل واحد فيهم توجه للبيروه .. عماد هز سوارتو وخرج قاصد دار عندهم .
~~~~~~~~~
الروطال ( ببرود صوتو القاصح كيتردد على المسامع ديالها ) أشمن جايحة كحلة فين غادية أمدام ؟
عنبر ( ببرود كتشوفيه ) غادية فين غادية علاش كتسول ( تودة نغزاتها مداتهاش فيها )
الروطال ( عض على شفتو كيحاول يكالمي راسو ) باغي ندوي معاك اجي معايا
عنبر : مجاياش
عزيز : انا غانتسناكم اخالتي ( طلع لطوموبيل داسيا تبعاتو حياة وتودة وبقات غير عنبر )
الروطال ( جر عنبر من يدها تنطرات منو ) واش غاتبقاي ترطاي عليا بحال جرانة عنبر ( بتهديد ) غادي نغمض عيني على المشية لدار حوايجك لي هزيتيهم الخاتم لي حيدتيه
عنبر : راه دويت معاك ، انا منݣدش نحط جنبي مع واحد كذب عليا انا وياك مغانرجعوش كي كنا ( غرغرو عينيها ) كنتي تقد تجي وتشرح ليا ابشوية ناعس حدايا وعارفني بنت عمك وساكت بحال الى مخاصكش خير
الروطال : واش انتي مريضة ولا مال ملتك أتجعريني .. كنا خايفين عليك البشار الى خبينا حيت كنبغيوك ابنادم ماكدبناش علك حنا غير غطيناك من الخطار واش باغية تجهلي جدي ..
عنبر : فاروق الله يرحم الوالدين كيما تلاقينا خوت نتفارقو خوت ، انا عييت خليني نرتاح الله يرحم بيها الوالدين ( بإنفعال ) ماضغطوش عليا ومضغطوش عليا حسو بيا هالعار ماتبقاش تنقز كل شوية عليا راه لي ݣلتو اليوم انݣولو غدا ..
الروطال ( بإنفعال مدوز يدو على لحيتو قرب وجهو من وجها ونطق ) غانخليك على خاطرك غاندير بوجه هادي لي انتي فيك غانخليك ترتاحي واحد 3 يام يرجع ليك عقلك وغانجي نديك وسمعي مزيان ابنت فاطنة الطلاق ( تبسم بشر ) اقسم لك برب العزة لاشفتيه ولا شميتيه .. طيري حتى طيري والله لا شديتيه انا مرييييييض فمخي وغانمرضك والله لا تفكيتي مني ..
عنبر : واش انت هبيل انا مابغيتكش مابغيتش نكمل معاك ياك لي تزوجنا على ودو سالا وصلاة على نبي ..
الروطال ( كيشوفليها فعينيعا فيكس ) غير كيبان ليك ازين ديال فاروق .. ديتك أنا وغاتبقاي معايا انا وغادفني حدايا أنا مني مكاينة فكاكة مزال مكتعرفينيش مزيان اعنبر حسن ليك الكبيدة متشوفيش دوبل فاص منبغيهاش لك ( بقات كتشوفيه بشك عطاتو بظهر وطلعات اللور حدا حياة ديمارا عزيز خارج من الزنقة .. طلع الروطال لطوموبيل وتبعهم ) ..
بعد المرات ممكن نتجزاو على قبل داكشي لي دارو والدينا .. كناخدو ذنب شي حد وحنا مدايرين والو بحالو هو دابا كيتجازا على شيحاجة لي مدارهاش نيفو كلو دمايات فمو جبهتو شعرو كلو فازݣ .. رجليه كلاو الدق حتى مابقاش حاس بيهم لا هوما لا ظهرو ولا سلسولو لي كلى فيه بزاف ديال العصا بغا يحرك غير رجليه ولكن مكايحسش بيهم .. طايح سخفان بداك الضو لي دارو ليه كيحس بالعيا وبلي روحو صافي غادي تزهق ..
.... : ماعنديش الوقت اصاحبي سربيني
بدر ( صافي سلم امرو لله لأول مرة فحياتو كيحس براسو ضعيف ومابقاش قاد بصوت تقيل بحال شي حد غادي يسلم امرو لمولاه ) انا ( بصوت مقطع ) أنا مكايحسبليش بلي البروش لي هزيت لماما هو البروش ديال كارلو .. يحسابلي بلي ديال عائلتها داك البروش لي عادي عندو غير قيمة عائلية
.... ( تبسم ) وشتييي هانت بديتي كتجيني لطريق ، شتي بسبابك باك مات مسكين مسخوط الوالدين انت ( ضحك ورجع جمع الضحكة ) فين هو البروش اولد براهيم ؟
بدر ( دوز لسانو على شفتو الناشفة المنفوخة ) ع عنبر مرت مرتي لولة و ولكن حنا مطلقين و وأنا معارفهاش فين هي ( نزل عليه بصوت لظعر حتى غوت لربي لي خلقو حتى بدا كيبكي ) والله معارفها فين هي .. لي فخباري تزوجات بشي واحد لاباس عليه كنيتو حيدر هادشي لي فخباري ..
.... ( حرك راسو ) اممم مزيان ( شاف فدوك لي معاه ) ديوه لدارهم ( خلاه يتكلفو بيه رجالو وخرج ) ..
~~~~~~~~~
- حدا راس القبر فين مدفون باها ݣالسة قفازي .. وراها عزيز ومها ومن بعيد واقف الروطال حاضيهم ..
عنبر ( دموعها نازلين ) واش فخبارك أبا كنت كنحماق عليك وكنبغيك بزاف .. كنتي انت هو كولشي فحياتي عقلتي اول مرة ديتيني للمدرسة ( تبسمات وسط دموعها ) عقلتي فاش قتليك بلي ديك البنت ملاك دات ليا بيمويا وشريتي ليا جوج .. أي حاجة بغيتها كنت كنلقاها ، عمر جاتني لبالي تكون شفرتيني لمي لي ولداتني ( نزلو دموعها سخانين ) كون غير بقيتي فالحياة نغوت عليك ونعاتبك ولكن توسدتي التراب شكون غادي نعاتب ومعامن غادي ندوي وشكون غادي نلوم كنحاول نتفكر شيحاجة خايبة درتيها ليا ولكن والو كنتي كتعاملني زوين .. تحن فيا وكنتي كل مرة تجي عندي لداخلية وتجيب ليا كاع داكشي لي بغيت عمرك حرمتيني من شيحاجة ولكن حرمتيني من مي وعائلتي ( تنهدات تنهيدة طويلة) الله يسمح ليك منقدش نعايرك حيت انت ميت ربي غادي يحاسبك ربي غايحاسبك على لي درتيه وربي هو لي اياخود حقو .. ( توجهات لقبر مها ) ماما ماشفت منك غير الخير ماكنتيش عارفة ولكن فاش عرفتي حرمتي هاد السيدة من بنتها عيشتوني فكذبة اماما كذبة كبيرة ربي غادي يحاسب كل واحد فيكم الله يسمح ليكم ( كتبكي ودموعها غير نازلة حطات تودة يديها على كتافها نوضاتها )
تودة : صافي ابنيتي الله يرضي عليك .. وقفات معايا كتحس براسها مهدودة بعو على تم غاديين ساكتين الشمس ضاربة فيهم ديال الصيف ..
عنبر ( وقفات وشافت فمها ) ماما فاطنة خاصني نبقى شوية بوحدي خاصني نبعد وا شوية خاصني نبرد كنحس بواحد العافية فقلبي الداخل بغيت نفكر فهادشي كامل لي وقع معايا ..
تودة ( بقلق ) فين غاتمشي ابنيتي ؟ تخليني حتى أنا ؟
عنبر ( تنهدات تنهيدة طويلة) ماما فاطنة ماتنسايش راه انتي وعماد لي ݣلتو لكاع دوك الناس يسكتو ويسدو فامهم .. عارفة لمصلاحتي ولكن حسي بيا عفاك راه غالبارح عرفت بلي انتي مي ولي معايا عائلتي واش غانجي ونشطح ونشط .. راه حياتي كلها كذبة عايشة فبالي بلي والديا ميتين حتى كنلقاهم قبالتي .. خليو ليا شوية دالوقت عفاك نرتاح الى مابعدتش راه مغانرتاحش .. تيليفون ايبقى بيناتنا مرة مرة ندويو واخا الله يعطيك الستر
تودة : مغاتجيش كاع لدار ؟
عنبر : دابا لا من بعد الله أعلم داكشي نخليوه لوقت منكدبش عليك ( ببرود ) مابغيتش نشوف خالتي رشيدة تقصحت منها بزاف مغانقدش نشوف فوجها ولا ندوي معاها ولا نتصادف معاها
تودة : فين غاتمشي ؟
عنبر ( سونات لرشيد بليل على ود البارتما ديالو تاخود سوارتها من عند خوه ) غادي نشوف شي اوطيل غير هنا متخافيش عليا ( تنهدات ) قادة براسي صافي ( شافت فعزيز ) نوصلو ماما فاطنة وتديني اخويا عزيز سمحليا برزطناك ( على غفلة بان ليها الروطال تنهدات بنفاد صبر وتوجهات لعندو ) فاروق الله يرحم بيها الوالدين عطيني واحد المساحة خليني نرتاح راه والله حتى ربي عالم بحالتي غير كنكابر ( بدات كتبكي )
الروطال ( بالهداوة ) ترتاحي هي تبعدي وتهزي حوايجك وطلبي الطلاق .. الطلاق عندك ساهل ؟
يتبع...
عنداك فاش تبغي تبقا بوحدها يتلقاو ليها هداك لي مع كارلو 😭