عنبر الجزء التاسع

"‏توجد أشياء بالحياة، العبث بها ليس له غفران،

كأن تعبث بالضوء في قلب أحدهم ثم تُطفئه .

‏مع الوقت ستنسى أسباب الخصام،

وتنقطع من ذاكرتك التفاصيل جميعها،

وسيلازمك سؤال واحد لا يفنى،

هل كان يستدعي ما حدث كل ما حدث" ؟!!

- واقفة لابسة كسوة طويلة سخونة فالكحل طالعة بالكول وبليدين مع سمطة عريضة فالقهوي .. شعرها طالقاه مع سبرديلة كحلة وساك صغير على جنبها .. واقفة حداها حياة لي كانت لابسة سروال ديال الدجين واسع مع قميجة .. وقف عليهم عزيز بطاكسي .. طلعو وشدو الطريق

- عزيز : جاب الله عيطوليا قبل مع 11 داير مع واحد الكليانة

- عنبر ( مكانتس مرتاحة فشعرها لي مطلوق عنكشها) : رشيد لي سونا ليا مع الصباح ݣاليك نجيو شوية بكري

- عزيز : العجب لي فاق اليوم بكري ..

- عنبر ( شافت فيه بإستغراب) : علاش هو مالف كينوض معطل ؟

- عزيز ( عينيه مع الطريق ) : لا كيفيق بكري أحيتاش لبارح كان عندي .. داكشي باش ݣلت ايتعطل فنعاس ..

- عنبر ( شافت قدامها ) : ايوا ماعليش لي مالف الفياق بكري واخا شنو ماوقع كينوض ..

- مدة ماشي قصرة او وصلو لواحد البلاصة بلاصة الطاكسي نزلو هي وحياة كان العنوان بحال ݣاراج كبير بابو محلول .. وقف عزيز كيعيط :

رشيد رشيد ( شاف لشارع بانت ليه طوموبيلتو واقفة ) .. شوية خرج من الباب طلع عليهم :

على سلامة يلاه دخلو

- عزيز : انا غادي عندي الخدمة حتى تساليو وسونيو ليا ..

- دخلات حياة هي وعنبر وعزيز مشا بحالو .. الداخل كان صالة كبيرة بحال شي مسرح صغير ..

- رشيد : دراري كاملين جاو .. ( بإبتسامة ) ختاريت ليك انݣعة ديال دراري دروك تشوفي بعينيك ..

- دخلات عنبر وحياة .. تقلات المشية منين شافت الرجال لي قدامها كاين فيهم لي صغير ولي كبير .. متأنقين وريحة العطور الرجالية كتعطي منهم .

- رشيد ( شاف فدراري ) : شباب هادي هي عنبر ( شاف فعنبر ) .. عنبر هذا أيوب المايسترو ديالنا والفنان ديالنا فالكمان .. ( سلم عليها شاب فاواسط العشرينات من عمرو سمر طالق شعرو لي كان داير ليه راستا كان باين فيه ستير من تويشيات لي فيديه ) : مرحبا بيك أعنبر تبارك الله عليك صوتك خطير غادي نكون فرحان باش نخدم معاك إن شاء الله ..

- عنبر ( بادلاتو السلام ) : حتى انا غانكون فرحانة معاكم ..

- رشيد ( أشر لواحد الرجل فالأربعينات داير نظارات ديال الشوف كيبان انيق وتقيل شعرو بيض على عكس سنو ) هذا منعم الݣيتاريست ديالنا .. وخدم ماشاء الله مع داودية ومع بناني والقائمة طويلة

- عنبر ( حسات بالفرحة ورهبة ) : مشرفين ..

- رشيد : وهذا رضى أحسن درابكي فيك كازا فنان فدربوكة .. سلمات عليهم واحد بواحد البيانيست والكوامانجي الثاني ومول لاباتري كل واحد تعرفات عليه وكان باين من الاشكال ديالهم بلي كيتقنو خدمتهم .. والاغلبية فيهم كانو ديجا خدامين مع فنانين قبل ..

- رشيد : أيوب عنبر حتى هي كتلعب على الكمان .. ولكن بغات تعلم نوطات ديال شعبي نخليها ليك هادي ..

- أيوب ( كيݣروز ) : كون هاني الله ياودي ..

- رشيد : اليوم تعرفتو بيناتكم إن شاء الله نديرو خدمة زوينة ونكونو عائلة وحدة .. غدا نتلاقاو هنا فنفس الوقت صافي

- الكل : مرحبا .. خرج رشيد مع البنات وشباب كل واحد مشا بحالو

- حياة : ياك خالتي تودة قاتلي عبد الرحمان لي معاها هو لي ايعلمك ؟

- عنبر ( جبدات بانضة من ساكها جمعات بيها شعرها ) :

علاش ماسمعتيش لبارح فاش جات عندنا خالتي رحيمة قاتليك مابقاوش بغاو يخدمو مع ماما فاطنة حيت ولفو الخدمة ديالهم لي كانو ملفين بيها

- رشيد ( بأستغراب ) : كيفاش زعمة ؟

- عنبر ( كتشرح بيديها ) : حيت هوما كانو كيمشيو للعراسات شعبيين وكيمشيو للعروبيات .. فاش علماتهم خالتي رحيمة بلي غانديرو فرقة جديدة ولباس جديد ونخدمو فالعراسات الكبار .. وبلي انا لي غانكون فبلاصة ماما تودة ماعجبهمش الحال .. ومابغاوش يخدمو قالو لخالتي رحيمة تقول لماما بلاما تعول عليهم مزال يبقاو معاها ..

- حياة : وشوفيلك هاد الناس .. كيموتو يبقاو فبلاصتهم زعمة يطورو من راسهم والو ..

- رشيد : ماشي هكاك .. كاين لي مكايقدش على داك الهيت كيجيه بحال الى غايبدل جلدو ..

- عنبر : رشيد اش درتي ليا فدار ؟

- رشيد : عطيني يوماين دويت مع واحد السيد وغايشوف ليا انت غير تهناي

- عنبر : راه حيتاش قربو يبيعو الدار خاصنا دار فأقرب وقت

- رشيد : وصافي تهناي دويت معاك .. يلاه نوصلكم باش نرجع بحالي بلاما تعيطو على عزيز أيكون خدام .. ركبو معاه شد بيهم الطريق حتى لبن سليمان وصلهم ورجع ..

- فجهة أخرى واقف كيشوف فبيوتة ديال النعاس لي قدامو .. عجبو واحد كان بالبيج كبير فيه العرض والطول .. مع الكوافوزات ديالو ..

- هانت هذا راه واعر وشوف انت لي بغيتي

- عماد : حتى انا عجبني الصراحة ..

- دابا تبقى ليك الزربية وعلى ود الماعن والثلاجة والماكينة دصابون انسيفطك للمحال لاخر ديالي شوف لي بغيتي .. المهم انت لي غاتحتاج ديه والحساب من بعد ..

- عماد ( بإبتسامة رجولية ) : الله يحفظك ازهير صافي شوف ( شاف فساعة ) ديك 6 تݣد تسيفط ليا دراري للادريس لي انعطيك ؟

- زهير : كون هاني المهم انت شوف لي بغيتي النص يديوه ليك اليوم ونص يديوه ليك غدا اش بان لك ؟

- عماد : وعليه حتى هذا بلان .

- الحياة كلها تقلبات وإنشغالات وكل واحد كيجري فدنيا على مستقبلو يمكن على راسو ولا عائلتو ولا يمكن يكون على ولادو ولا على والديه كل إنسان فهاد الدنيا باغي يحقق داتو وإنتصراتو .. دازت السيمانة عند عنبر بين الدار وبين ليكوغ ديال الكمان لي كتعلمهم عند أيوب ومرة مرة كانو كيرپيتيو مع المجموعة كلها .. معاهم رحيمة وحياة .. بزاف ديال العروض جاو ليها ولكن رشيد كان كيرفض مكانوش مناسبين نهائيا وماشي من مقامها .. هذا هو كلامو ليها " أنا بغيت ليك شيحاجة تليق ليك ماشي ديشي " مكانش مخلي من جهدو من جهة الدار .. فكل مرة كيقلب كتبان ليها شيحاجة كيسيفطها ليها ولكن لا تودة ولا سميرة كتعجبهم ..

- فجهة اخرى وعند عماد لي كان تحول لدارو الجديدة من بعدما أتتها وقادها بحوايج بساط بيت النعاس والكوزينة هادو هو المهمين ليه .. أما الصالون فخلاه حتى من بعد ويحيدو عليه حتى هو ... وصل نهار السبت لي كانو زوج ديال الناس كيتسناوه بفارغ الصبر أولهم عنبر لي جاتها مكالمة من عند رشيد فداك الصباح ..

- عنبر ( لاحت عليها عباية هي وشالها لبسات صندالتها وهزات ساكها ) : ماما انا مشيت

- تودة ( طلات عليها ) : هانتي ديري معايا أبيل فيديو باش نشوفها انا وخالتك سميرة

- عنبر : كوني هانية .. خرجات للشارع لقات عزيز كيتسناها بطوموبيلت رشيد ... ركبات معاه وشدو الطريق :

ماشفتيش الدار كيف دايرة ؟

- عزيز : لا ولكن جات فبلاصة مزيانة الصراحة الولفة مافيهاش الصداع والمشاكيل ترونكيل غادي يعجبكم الحال الى عجباتكم الدار

- عنبر : على الله نهار الإثنين ايتكاتبو مع الشراي وخاصنا ضروري نخويو ليه داكشي باش خاصني نلقى فهاد يوماين على الله اتكون زوينة

- عزيز : وديور فحي الوئام مزيانين وزوينين والبلاصة مزيانة وكولشي قريب ليك بغيتي سوق الحمام كولشي لي بغيتي حداك ..

- عنبر : وعلى مولانا ... دخلو لكازا وتوجهو نيشان للولفة وبضبط حي الوئام بان ليهم رشيد واقف مع واحد الراجل .. نزلات هي وعزيز من الطوموبيل

- عزيز : السلام عليكم ( سلم على الرجال )

- عنبر : السلام عليكم ( سلمات عليهم ) ..

- رشيد : سي عبد الواحد هادي هي سيدة لي دويت ليك عليها على قبل الدار ..

- عبد الواحد ( بإبتسامة ) : مرحبا ابنتي واش اسكني انت ؟

- عنبر ( ضحكات ) : لا كاينة انا وبنت خالتي وماما او واحد خالتي حنا 4 ديال الناس ..

- عبد الواحد : مزيان أجيو معايا تشوفو الدار إن شاء الله تعجبكم راه مصلوحة مقادة ماعدكم ماتخسرو عليها .. تبعوه دخلو لواحد الزنقة لي كانت كتدي لشارع دارو على ليمن كتبان ليها دار كبيرة فيها الباب الاول ديال الجردة والباب ديال الدار ..

- هزات راسها كانت الدار مصبوغة بالبيج كتبان زوينة فيها زوج إيطاج الاولى كيبان بابها بوحدو بلا جردة والثاني هي لي فيها الطاج الثاني فوقها السطح سورو عالي .. سمات الله ودخلات ..

- الجردة كانت زوينة تجي فيها ݣلسة مبهجة على شارع انت كالسة لداخل وبرا كيبان ليك .. حل ليهم الباب ودخلو طلعو مع الدروج لي مكانوش كثار قلال شي 8 درجات واسعين ومقادين فيهم خشبة منقوشة علاش تشدي اول حاجة حساتها عنبر وهي الراحة فاش دخلات للدار .. كانت مصبوغة بالبيض وكبيرة الصالون كبير والسقف بالݣبص وترية فيه سرجم على الشارع وسرجم للمراح ..

- الزليج ديال الأرض مزالو جديد .. وعاد فيها 4 ديال البيوت وحد زوج موايان مكبارش بزاف وزوج كبار ، كلهم مصبوغين بصباغة جديدة .. عاد الكوزينة لي كانت كبيرة ومصلوحة من كاع البلايص

- عنبر ( بأبتسامة ) : هاد البوطاجي اديال المسمن وتريد

- عبد الواحد ( كيضحك ) : فاش كنا كنجيو انا مالين دار ليها مولات دار مكتبغيش تخرج من الكوزينة كتعجبها حيت كبيرة عندها البالكو كيطل لزنقة ..

- دخلات للحمام لي نصو كان طواليط بطاسة رومية ونصو حمام .. حتى هو كان كبير ومتيسع ..

- عبد الواحد : أجيو تشوفو السطح .. طلعو مجموعين لسطح لي كان حتى هو كبير وفيه كوزينة ولكن باين مكايطيب فيها حد فيها غير شي كراطن ..

- عبد الواحد : هاد الكوزينة كنت غير زدتها مع كنت بغيت نزيد الطاج الثاني ومزدتوش الدار التحتانية بعتها شحال هادي صافي ودابا ݣلت نبيع حتى هادي إن شاء الله ناويين نخرجو برات كازا مانبقاوش هنا الى بغا الله ..

- عنبر : واش السطح مشارك ؟

- عبد الواحد : لا السطح بوحدو والناس لي ساكنين فسفلي عندهم لاكور فين كينشرو حوايجهم .. وراهم ناس الله يعمرها نقلة وسلعة متسمعيش حسهم ݣاع الله يعمر ليهم الدار ..

- رشيد : أش بان ليك !

- عنبر : وصراحة انا دار عجباتني واخا مكناش عوالين على شي حد يكون ساكن فسفلي

- عبد الواحد : اباش تعرفي واحد الحاجة الدار راه بلانها فشكل .. راه واخا هوما فسفلي وانتوما فالفوقي راه حد مايسمع حد هكا مديور ليها فبلانها .. حيت جهة لي جاي عدكم توما المراح ماشي فين كاين عدهم هوما البيوت ... اخودي راحتك من هاد النحية مكاين حتى تبرزيط بحال الى ساكنين راسكم ..

- عنبر : واخا بلات نسوني لماما ندوي معاها ... سونات لتودة فالواتساب فنمرة حياة شوية وجاوباتها ..

- عنبر : حياة دوزي ليا ماما .. دوزات ليها تودة وجاو حداها تجمعو باش يشوفو دار ، وراهم بلاصة بلاصة كولشي حتى سطح وراتو ليهم ..

- تودة : ودار غزالة عجبات حتى خالتك سميرة ..

- عنبر : حتى انا عجباتني غير هو ( عاودات ليها لي كاين )

- تودة : ايوا صافي الى كانو مغايسمعونا منسمعوهم راه مزيانة خطينا المشاكيل وصداع الراس ..

- عبد الواحد ( كيهضر باش تسمعو ) : مكاين حتى مشاكيل الالة .. النمرة تبقى عندكم الى لقيتو شي صداع انا ندير لازم

- تودة : وشحال الثمن ؟

- عبد الواحد ( حك جبهتو ) : واش غانݣولك الالة انا طالب فيها 120

- تودة : اويلي على 120 مالها فيها 3 يطاج راه اطاج واحد وسطح

- عبد الواحد : راه خسرت عليها زبالة دالفلوس .. صلحتها وعاودت الكوزينة هذا هو الجهد

- رشيد : لاواه اسي عبد الواحد نقص شوية زعمة راك معرفة وجايب ليك ناس عايلتي الله يرضي عليك شوف كيف دير

- عبد الواحد ( بقا كيفكر ) : ايوا اش غانݣولك اسي رشيد مانرضهاش فوجهك نخليوها 100

- تودة : ايوا اللهم يسر أسيدي على مولانا .. نهار الإثنين ايجي عدك نسيبنا وبنتي وسي رشيد ينضيو معاك الأمور

- عبد الواحد : واش العقد بسميت البنية ؟

- سميرة ( من بعيد ) : لاواه بسمية هاد السيدة تودة ..

- تودة ( شافت فيها ) : تي أش سايرة تݣولي الدار راه اتكتب بسميتك راه دوينا ..

- سميرة : يكتبها بسمياتنا بجوج بينا ولا بسميتك باش تكون بسميتي يانا لاواه ..

- تودة : واش انجيو حتى لدابا ونتخاصمو تي رجوع لله ..

- سميرة : لا إله إلا الله محمد رسول الله دويت لي عدي راه ݣلتو

- تودة ( بقات اكتشوف ) : صافي اسيدي بسمياتنا بجوج

- عبد الواحد : ايوا راه خاص توما بجوج تجيو تسنيو ضروري ..

- رشيد : صافي الالة تودة نجي نجيبكم ونرضكم

- تودة : بلاما تعدب اسي رشيد ايجيبنا يونس نسيبنا ونلݣاوك نيت انت تم ..

- عبد الواحد : ايوا الله يجعلها مباركة ومسعودة عليكم

- تودة : اللهم أمين اهو نجيو عندك مع ديك 2 حيت صباع مزال عندنا مايدار مع الشاري لي انبيعو ليه هاد الدار ..

- عبد الواحد : ماعندك مشكيل الوقت لي بغيتو يسوني ليا رشيد يلݣاني ..

- تودة : ايوا الله يرحم الوالدين .. قطعات مع عنبر من بعدما تفاهمو مع السيد ، عزيز وعنبر خلاو رشيد معاه ومشات مع عزيز باش يرجعها للدار ..

- واقفة كتشوف فالمرايا لابسة كسوة بالكمايم واسعة فاللون الموڤ بارد وفيه وريضات خفاف خضرين مع سبرديلة فالأخضر وساك غنفس اللون ..شعرها جمعاتو على شكل سفنجة أما وجها فكتافات بواقي شمس مع ماسكارا بلاش وݣلوس فالغوز .. رشات من ريحتها لي كانت بعطر الڤانيلا سونا تيليفونها طلعات ليها نمرتو فتحات الخط وبصوت انثوي :

ألو وي .. وصلتي داكوغ واخا انا نازلة .. رجعات التيليفون لساكها هزات سوارت الدار وخرجات نزلات فلاسانسور من بعدما رمات السلام لكونسييرج خرجات لعندو كان واقف حدا طوموبيلتو لي كانت من نوع جيب فالكحل دوبل في .. تقدمات منو ماعرفات تسلم عليه من اليد ولا من الوجه فالأخير ستسلمات وسلمات عليه من وجهو .. لابس شوميز فتيركواز مع سروال فالبيض داير نظارات الشمس مكتعرفيه فاش كيشوف ولا كيفكر واش عاجبو الحال ولالا ..

- الروطال ( بصوت رجولي ) : تعطلت عليك ؟

- ماريا ( بإبتسامة ) : لا بالعكس انا وقيلة لي وجدت راسي قبل

- الروطال ( هز حجبانو بإستغراب ) : مشينا ؟

- ماريا : واخا .. خلات باب الطوموبيل طلعات سدات الباب ودارت السمطة .. طوموبيل الداخل كانت مخنوقة بريحتو

- ماريا : عرفتي والله حتى متحمسة بزاف نشوف الخيل ، هاد سيمانة لي دازت كلها وانا متحمسة وزدت كاع فرحت حيت داز الاجتماع مزيان وسنينا على الوراق ديال الخدمة ..

- الروطال ( عينيه على الطريق ) : غير هو الخدمة غاتبقى خدمة وهادشي لي بيناتنا ايبقى أپار

- ماريا : ولكن حنا مزال مابيناتنا والو !!

- الروطال ( شافيها بإبتسامة ) : إلى مكانش دابا غادي يكون ..

- ماريا تنهدات تنهيدة طويلة وبإبتسامة شافت قدامها .. الطريق كلها مرة تدوي مرة تسكت كانت بحال شي بنت صغيرة غادي بيها باها لمدينة الألعاب ..خرجو من كازا وشدو الطريق لبوسكورة مخدمين موسيقى هادئة حتى دار لتجاه أخور جا بين الشجر وقف قدام باب ديال الحديد مصبوغ فالݣري كلاكسونا شوية وتحل الباب اول ما دخل ماريا حلات فمها من قمة الإنبهار لي هي فيه .. عمرها خطات خطوة وحدة داخل شي فيرما وهاد الفيرما بضبط كانت ففقمة الروعة .. حبس الطوموبيل قدام ڤيلا كبيرة مصبوغة بالبيج فاتح وخطوط من الرمادي ، وقف بطوموبيلتو ماتسناتوش حتى ينزل نزلات قبل منو مفرغة فمها من جمالية الڤيلا ولي ضاير بيها

- دورات راسها كتشوف المساحات الخضراء لي ضايرين بالڤيلا حلات عينيها فاش شافت زوج ديال العودان واقفين بعيد كيتمشاو ...

- الروطال ( مبسم كيشوف فيها ) : عجبوك ؟

- ماريا ( ضارت عندو كضحك ) : واش غير عجبوني وسكتي راه مايمكنش شحال فنين .. أصلا البلاصة كلها فنة عشقتها حمقاتني مايمكنش والله ..

- الروطال ( مد ليها يدو ) : أجي تشوفي .. شدات ليه يدو بلا تردد غادية معاه فرجها على الفيلا من برا الپيسين والكليسة البلدية لي كان داير انت ݣالس ولبيسين قبالتك .. عاد داها لواحد الارض حدا الفيلا فيها كاع الخضروات البيو ونعناع وشيبة فينما داز كيلوح السلام على الناس لي خدامين عندو ، وأخر وجهة هي المربط فين كانو كاع الخيل ديالو ..

- طلقات من يدو غادية لعند الخيل منباهرة كدوز عليهم بيدها كل واحد ولونو السيد لي مقابلهم سلم على الروطال وبعد شوية إحتراما ليهم .. هي قدامو وهو موراها مقابل ملامحها الطفولية وكيفاش كتصرف مرات كتبان لي متسرعة وخفيفة ومرات كتصرف بعفوية .. فللحظة وقفها بصوتو لي بحال الرعد :

ماتوصليش لتم ؟

- وقفات وضارت عندو وعلى ملامحها أدصدمة وإستغراب :

علاش بغيت نشوفو ؟!

- مشا لجهتها بخطوات سريعة .. قرب من الجهة لي كانت غادية ليها تمع صوت تجلجيل وطل براسو مقرب وجهو من مولاه مستقبلو أحسن إستقبال .. كيعبر ليه على الحب ديالو وفرحتو بيه .. بقات واقفة منباهرة بالجمال ديال هاد العود .. شعرو الطويل المموج الكحل عينيه الكحلين ولا لونو الكحل الغري .. نطقات بلا هواها :

سبحان الله ماشاء الله كيحمق

- الروطال ( معنقو كيدوز ليه على راسو ) : هذا عودي الأدهم ( شافيها ) فدبلهجة البارضية كيݣولك لي عندو لدهم عمرو يشوف الهم ..

- ماريا : واش بصح عمرك شي الهم ؟

- الروطال ( كيشوف بحب فعينين العود ديالو ) : من نهار دخل لحياتي عمري شتو ..

- ماريا قربات خطوات قليلة وهو يبعد الأدهم على الروطال مجلجل بصوتو لي قوي بحال مولاه .. كيحرك راسو ويلعب برجليه ..

- الروطال ( حبسها بيدو ) : متقربيش ليه ..

- ماريا ( تراجعات خطوة لور ) : علاش مالو .. جرها الروطال من يدها مبعدها عليه ..

- الروطال : نݣد نݣوليك هدا هو العود الوحيد لي خدا مني بزاف ديال الوقت باش ندريسيه .. مكايخليش شي حد يركب فوق منو من غيري والى قربتي ليه يݣد يهرس لي ݣدامو مكايعرف البراني ..

- ماريا ( تبورشات كتخايل كون قربات ليه وهرس الباب وزطم عليها كوراها ميتة ) :

ناري خلعتيني ..

- الروطال : حتى خوتي مكايقربوش ليه كايعرفني غير أنا وسي عمر العساس .. ( شافليها فوجها ) صفاريتي ..

- ماريا : تخايلت كون قربت ليه وماكلتيهاش ليا وهرس الباب وخبطني فين انوصلو

- الروطال : من نيتك .. اجي نݣلسو الغدا غايكون وجد .. داز نهارها معاه زوين تعامل معاها بكل إحترام ولباقة وللحظة مافكرش يقلل عليها الاحترام وهادشي عجبها .. مكانش بوحدو فالڤيلا كانت حتى المساعدة لي وجدات ليهم الغدا بالخضرة لي كانت فالفيرما ..

- كان كيسولها على أي حاجة وكتجاوب بلا تردد حسات براسها كتدوي كتر مكايدوي هو وهو لي كيسول اما هي مكانتش كتسول نهائيا مرات كيقوليها راسها راها كتصرف ببلاهة ومرة كتجري على دوك الافكار ..

- وصلها لدارها مع 7 ديال العشية .. سلمات عليه من الوجه وبإبتسامة :

شكرا بزاف على هاد النهار داز زوين ..

- الروطال : مزيان منين عجبك تهلاي فراسك ..

- ماريا : حتى أنت .. حلات الحزام ونزلات ، دخلات للعمارة وهو ديمارا ومشا ..

•••••••••••••••••

عوّد نفسك على الفرحةِ في حياتك حتّى تعتاد هي عليك، أشعر نفسك بِالأمل حتّى تجد الدنيا بين يديك، افرح بما لديك حتّى يأتيك أكثر مما تتخيل. التفت إلى ما حولك، وانظر له بنظرة مُشرقه ومُتفائلة، وحتماً ستجد الجمال، والرّضا، والسّعادة .. فأجمل ما في الأيام الماضية أنّها مضت، وأجمل ما في الأيام الحاضرة أنّها ستمضي، وأجمل ما في الأيام التي ستأتي أنّها لم تأتِ، وأجمل ما في الحياة أنّ هناك أمل يتجدّد ولا ينتهي.

- خرجات من بيتها لابسة سروال ديال الدجين مع بوتيو ومونطو شعرها جامعاه كتعيط بصوت مرتافع :

حياة وسربي خلاص واش غادي نبقاو هنا ؟

- خرجات حياة من بيتها لابسة عليها بوليرو طويل دصوف مع سروال دجين كحل وتريكو كول مونطي فالكحل :

منبرة عليها اصاحبتي البرد كيطير كون خليتي أحتى ل 1 بعدا

- عنبر ( شافت فيها ببرودة ) : كتموت على النعاس والمانطة .. يلاه ندوزو لصالون راه 8 ديال العشية خاصنا نكونو فالقاعة

- تودة ( طلات من كوزينة ) : مغاتفطروش ؟

- عنبر : لا اماما حتى نشوفو شي بلاصة نفطرو فيها هاحنا مشينا

- تودة : ايوا الله يسر ليكم .. مشاو البنات حطات تودة الفطور ݣلسات هي وسميرة كيفطرو

- تودة : هاد 3 شهور لي ݣلست بلا خدمة حسيت براسي فشكل والله العظيم

- سميرة : بقات شهر و 10 يام نحيدو حق الله وترجعي للخدمتك

- تودة ( هزهزات براسها ) : مافهمتينيش ، حسيت براسي بحال كيف خدمت بحال كيف ݣلست كت نݣول موحال نصبر على الخدمة ساعة هانية عدي ..

- سميرة : ايوا فيها خير .. حدا الدار كان واقف عزيز كيتسناهم ، عنبر ستغربات حيت الكرسي القدام كان عامر فتحات الباب دخلات هي وحياة :

صباح الخير

- عزيز : صباح الخير ، أسمحوليا .. كانخاصني ضروري نجيبها معايا نوصلكم وعاد نوصلها .. عنبر كتشوفيها وهي بدورها دارت عندهم وتبسمات ليهم .. نطقات عنبر بإبتسامة :

ماشي مشكيل .. ديمارا الطوموبيل بسكات حتى نطقات وهي مزال كتشوفيها :

أنا بحال الى شفتك فشي بلاصة أنت هي ديك البنت لي تلاح الڤيديو ديالها عنبر ياك ؟

- ݣالسة فالبيرو ديالها خدامة بيديها وعقلها خدام مكاينش معاها نهائيا .. جمعات يديها وتنهدات تنهيدة طويلة كتخمم فداكشي لي دارت لبارح كانت متسرعة فقرارها غلطاتها غلطة لي ندمات عليها .. تدق الباب وتحل ودخلات صاحبتها لي كانت خدامة معاها فنفس الشركة ..

- صوفيا : صباح الخير جيتي ݣاعما شتك سولت قالو ليا كابنة فالبيرو

- ماريا ( مورالها نازل ) : جيت نيشان للبيرو أصلا كنت معطلة ب 10 دقايق جاب الله جيت لقيت سي وليد مكاينش ..

- صوفيا ( غمزاتها ) : شنو تم مالك ماشي حتى لهيه ؟..

- ماريا : بعد المرات غير كنبقى نرݣع وحق الله العظيم .. حتى كندير الحاجة عاد كنقول ندمت

- صوفيا : مالك ياكما تخاصمتي انت وفاروق ؟

- ماريا : تخاصمنا وماتخاصمناش .. نهار عتارف ليا بلي كنعجبو وبغا تكون بيناتنا شيحاجة لي تكون جدية وصاني منخلطش بين الخدمة وبين داكشي لي بيناتنا بمعنى منجيش عندو للبلاصة خدمتو من غير إلى كان عندنا إجتماع بين شركة ديالنا وهو ..

- صوفيا : ايوا راه عندو الصح السيد بروفيسيونيل ماعندوش الوقت لداكشي ديال تبرهيش .. مزال ماعرفتكش اش بغيتي توصلي ؟

- ماريا : انا لبارح بحال الهبيلة .. غادية ليه بواحد البواطة فيها كعب غزال جابتو ماما وجايبة ليه حقو للبلاصة الخدمة .. وقالت ليا المساعدة ديالو راه عندو إجتماع قلت ليها نتسناه فالبيرو ديالو .. وهي ماخلاتنيش حيت هادشي لي موصيها اي واحد مايدخل لبيرو سيري انت يا ماريا قولي ليها راه جايبة ليه كعب غزال ..

- صوفيا : أويلي يا ماريا واش انت هبيلة مافهمتش انا بعد المرات كتكلخي .. أصلا تلقاي فالخدمة حد معارفك معاه مشيتي انت غادية ليه بالحلوة بغيتي تشوهيه .. أي حاجة خاصها تبقى مستورة حتى نهار تزوجو ..

- ماريا : غير سكتي ( دوزات يدها فشعرها ) بلاما تزيدي عليا والله .. بقات كتشوفيا شي شوفات فشكل وفاش سالى الاجتماع دخلات عندو وقاتليه مادموزيل ماريا بغات تشوفك وعلى حسب مقالت بلي جايبة ليك شي حلوة ..

- صوفيا : وشوفليك حتى هي البروالة خاصها تقوليه بغات اتشوفك وصافي ..

- ماريا : شتي وراه هادشي باش تعصبت .. وعصبني حتى هو بدا كيغوت متقوليش بلي راه هو داك السيد الرزين الحنين خلعني قسما بالله شداتني البكية .. خليت ليه الحلوة تم وخرجت بحالي ..

- صوفيا : وحتى انت درتي الغلط اماريا صراحة تقال كديري تصرفات ديال وحدة فعمرها 14 عام ماشي وحدة عندها 30 عام رجوع لله ..

- ماريا ( سهات ، رجعات شافت فصوفيا ) : بيني وبينك انا مامرتاحاش فهاد العلاقة وحق الله العظيم كنحس براسي مخنوقة كنحس براسي كنتصنع .. خاصني ناكل بتاويل خاصني نضحك بتاويل خاصني نكون فالمستوى ديالو ..

- صوفيا : والله حتى راك حمقة وشنو فيها عادي

- ماريا : لا أصوفيا معاديش انا مكنرتاحش فهادشي ومامرتاحاش معاه كنخاف ندير ابسط حاجة تقلقو علاقتنا كتحسي بيها ستابل عادية .. مندابزو بحال الناس منوضوها بحال الناس باش يحزرني .. جاني الملل

- صوفيا ( كتشوفيها بنص عين ) : ماشي جاك الملل .. أنت عينك فحد خور مزال مابغيتي تنساي رشيد .. 3 شهور وانت مع سيد تخرجو تاكلو فالبلايص الواعرة .. كيجيب ليك ليكادو باغيك للمعقول شنو بغيتي مزال ، واش عارفة شحال من وحدة كتمنى تكون فبلاصتك .. ديري عقلك لا تفلتي السيد وديك الساعات تبقاي تندبي

- ماريا ( بإنفعال ) : أنا ماشي شغلي تبغيه وحدة ولا ألف .. انا خاص نحس براحة فالعلاقة نتصرف كيف بغيت مانبقاش نضرب الحساب .. هاد 3 شهور كامل كنت كنحاول نسى رشيد ماقديتش كنبغيه اعباد الله فهميها ودخليها لراسك الله يرحم الوالدين .. ماتبقايش تزيديني لشيحاجة أنا مباغياهاش ..

- صوفيا : دابا أنا كنزيدك ؟

- ماريا : أنت عمرتي ليا راسي وخليتيني نقبل بواحد العلاقة أنا مامرتاحاش فيها .. اللهم نبقى كنبغي واحد السيد وانا مرتاحة ولا ندخل فعلاقة شادني فيها الملل ..

- صوفيا : أنا بغيت ليك الخير .. شنو اتقولي ليه نتفارقو الله يعاون ويعاونك وهو سيد باغي يجي لداركم ..

- ماريا : اللهم نوقفوها ولا نصدق مزوجة ونادمة أصلا مناوي يجي لدارنا حتى يدوز عرس بنت عمو

- صوفيا : وشنو اتقولي ليه ؟

- ماريا : حتى يرجع من طنجة وندوي معاه فهادشي .. انقوليه يعطيني شوية الوقت نفكر فعلاقتنا وبلي مامرتاحاش وقضية زواج خاص نفكر فيها مزيان ..

- صوفيا : اهاه والى قاليك خودي راحتك .. وبقى كيتسنى فيك ؟

- ماريا : موحال ماشي من داك النوع هو واخا لحد الساعة مكتعرفيه فاش كيفكر ولكن ماشي من داك النوع .. كيجيني مريح

- صوفيا : وأتبقاي معلقاه ؟

- ماريا : ديك الساعات غانشوف شنو ندير المهم عندي دابا هو نرتاح شوية .. حيت بصح نفسيتي عيات والله العظيم ..

- صوفيا ( وقفات ) : ايوا أش غانقوليك انت تعرفي ضبري راسك ... غير ماتجيش عندي نادمة .. ، خرجات من عندها خلاتها كتخمم فالحوار لي دار بيناتهم ..

________________

- تبسمات ليها عنبر وهي كتشوف فعزيز :

اه هي أنا

- ماجدة : تبارك الله عليك صوتك مانيفيك .. وحتى انت زوينة بحالك بحال صوتك

- عنبر ( بإبتسامة ) : الله يكبر بيك ..

- عزيز : عنبر مادواش معاك رشيد ؟

- عنبر : لا من لبارح فصباح .. سيفط ليا لادغيس ديال القاعة وعطاني توقيت

- عزيز ( هز تيليفونو شاف فساعة ورجع حطو ) : حتى انا ماتاصلش بيا من لبارح بحالك نيت عطاني لادريس باش نديكم ..

- عنبر : هاد مولات الصالون بعدا كتصايب مزيان ولا أكور وعطي العور ؟

- عزيز ( كيضحك ) : واش غانݣولك انا انعتو ليا شي ناس .. هي لي كتصايب ݣالك لبنات ديال الدرب

- عنبر ( خرجات فيه عينيها) : كتفلى اعزيز ؟ اويلي أخويا كون سحابلي كون قلبت فالأنترنت كاعما ندي عليك حتى انا دايرة فيك عقلي ..

- حياة : ياك قلتها ليك قلت ليك بلاناتو لاروب .. والمشكيل ايصايبو عندها حتى رحيمة وليالي ولبنات .. اتلبسيهم الموضة والوجه اترضو ليهم حموضة ..

- عزيز : ولايني تحل ليك الفم اديك الفلفلة الحارة انا بلاناتي لاروب ..

- حياة : ماشي ديما ولكن فهادي عݣرتيها ..

- عزيز : وأنتوما دابا اسبقتو العيب متعرفوها تكون خطيرة ..

- عنبر : عزيز راه العرس لي غاديين ليها ماشي ديال الدرب الله يهديك .. راه الناس حاطين زبالة دالفلوس .. واش نمشيو مبهدلين

- ماجدة ( شافت فيهم ) : أنا كنعرف واحد صالون فالمعاريف خطير .. الى بغيتو نديكم ليه وكيعرفني مزيان مولاه ..

- عزيز ( خنزر فيها ) : كيفاش مولاه ؟

- ماجدة : وي مولاه علاش ؟

- عزيز : واش انت أجايا من بلاد نصارة يحسابك كولشي متحرر ؟

- ماجدة ( بإنفعال ) : أولا أنا زايدة وكابرة هنا وقريت هنا ، كان خاصني اواحد ديبلوم ومشيت خديتو من فرنسا وجيت داكوغ .. وزايدون ماتبقاش تهز وتحط عليا راه عيقتي بزاف ..

- عزيز : ( بعصبية ) : حتى واحد الالة ماضربك على يدك باش تركبي معايا ..

- ماجدة : كنركب معاك على زينك ولا كحل عينك .. غير حيتاش كنخاف نسوݣ فكازا .. ومافيا لي يبقى واقفة نتسنى فطاكسيات وزايدون راه ماكتدينيش فابور راه كنخلصك ..

- عزيز : انا ندمت على النهار فاش هزيتك من داك المطار ولا ركبتك نكذب علك

- ماجدة ( بصدمة ) : يــــــــــــاك ..

- عنبر : عزيز ويلي حشومة اويلي نعل شيطان

- عزيز : الله ينعلو ويخزيه .. ولكن راه حمقاتني واش ماسمعتيهاش ؟

- ماجدة : انت لي كطير بحال أنمشي بيهم لدار دعارة ... الصالون معروف وسيد لي فيه كيعرفني ومخدم معاه طون دالبنات كلهم بروفيسيونيل فخدمتهم صالون سمير معروف ..

- عنبر : عطيه اختي لادريس يدينا ..

- ماجدة ( براحة ) : سوݣ انا نقوليك فين .. خنزر فيها ورجع إنتباهو للطريق .. وصل للعنوان لي عطاتو او وقفهم قدام الصالون الواجهة ديالو كحلة ومكتوب بذهبي ..

- عزيز : واش نتسناكم ؟

- عنبر : لا غانتعطلو .. حتى نساليو كولشي وجي دينا ، يلاه نساليو من صالون خاص نمشيو ناخدو اللباسي عند النݣافة ..

- عزيز : هي حتى نجي ديكم فمرة وحدة ؟

- عنبر ( كتفكر وتضرب الحساب للوقت ) : صافي ديك ساعات تجي انت ورشيد باش تديونا فمرة وحدة ..

- عزيز ( شاف فماجدة بنص عين ورجع شاف فعنبر ) : يلاه الله يعاونكم ..

- ماجدة ( بإبتسامة ) : انا ماجدة

- عنبر : انا عنبر راكي عرفتيها وهادي بنت خالتي حياة ..

- ماجدة : مشرفين اجي ندخلو .. دخلو للصالون كان كبير من الداخل ومجهز بأحسن المعدات بنات خدامين لابسين لبسة موحدة فالكحل وعاد كاين واحد السيد فالبيرو ..

- ماجدة ( بحماس ) : سمير

- سمير ( خرج سلم عليها ) : اهلا اهلا صاڤا ماجدة أمورك مزيانة الواليدة ؟

- ماجدة : كولشي بيخير الحمد لله ، المهم هادي عنبر وحياة صحاباتي ..

- سمير ( ضار عندهم بإهتمام ) : مرحبا عنبر شكون مايعرفها الفيديو ديالها دار بوم ..

- عنبر ( كضحك بإستهزاء ) : بغيتي تݣول دار شوهة داك الفيديو سباب البلا ..

- سمير ( كيضحك ) : بالعكس .. صوتك خطير مرحبا بيكم عندي إن شاء الله توليو كليانات دائمين .. شنو حبات الخاطر ؟

- عنبر : انا بعد شعري كلا الدق كنت صبغتو بالعسلي وبدات كطير .. ومقطع تقطيعة ملاوطة .. وعاد خاصني سوان لوجهي واليوم بليل عندي واحد العرس ..

- سمير ( صفق بيديه ) : هادي عندي انا لي غانقوم بيك ( شاف فحياة ) وأنت أمدموزيل حياة ؟

- حياة : انا شعري مامقطع هو هداك غير الى يتحيدو ليه دوك ليپوانت وصافي ومكياج على قبل العرس ..

- عنبر : مزال 4 البنات او واحد السيدة معايا فالمجموعة حتى هوما خاصهم مكياج يكون زوين وخفيف ..

- سمير : كوني هانية من ديك نحية .. الصالون صالونكم ( شاف فماجدة ) وانت منديرش ليك شي بروشينݣ ؟

- ماجدة : منقوليكش لا ( كضحك ) .. عنبر سيفطها مع واحد البنت دير ليها سوان هو الأول لوجها هي وحياة عاد ايتولى هو مهمة شعرهم ..

___________________

- سلا الخدمة هو وطريق وخرجو للواحد من المطاعم لي جا قريب من لوطيل لي نازلين فيه .. طلبو الماكلة بينما وصل جبدو بزاف ديال المواضيع منها الخدمة ..

- طارق ( بتساؤل ) : مالك اش تم ؟

- الروطال ( هزهز ليه راسو ) : شنو ؟

- طارق : شنو انت جيتيني ماهواش

- الروطال : لا والو مديرش فبالك

- طارق ( رجع بظهرو اللور ) : إيوا إيمتا ناوي تزعم حتى انت دير لينا شي عرس من الطراز الرفيع

- الروطال ( تنهد تنهيدة طويلة) : الله أعلم .. تناقشنا انا وماريا لبارح

- طارق : وايلي وعلاش؟

- الروطال : كنحس اصاحبي بالعلاقة ستابل كتحس بالبنت ماعندهاش شخصية ݣاع .. لي ݣلت ليها تحرك راسها بواخ خرجنا نتغداو أش تاخدي بحالك أش تشربي بحالك زعلوك أصاحبي أو ..

- طارق ( غوبش ) : ماعديش اخويا مع البنات لي ماعندهم شخصية كتمشي معاك على هواك

- الروطال ( بنرفزة ) : إيوا هدا هو البلان .. السيدة ظريفة قارية واعية عفوية .. ولكن بعد المرات كتصرع بزاف كتحس بيها كتصنع كدير شي حوايج لي هي ماباغهمش أباش دير ليا خاطري انا ..

- طارق ( كيضحك ) : كون عرفاتك اش ساوي تهرب ماتوݣف حتى للݣويرة

- الروطال ( قهقه برجولة ) : ماشي مع كولشي .. ولكن راه بصح عدويا بنادم يتصنع ويدير ليا الخاطر .. مديريهش ليا أنا خليك كيما انت ودوي خليني نسمعك ..

- طارق : ودوي معاها

- الروطال : دوينا نبقاو حنا اندويو .. كناكد عليها واش هادشي لي باغا نيت كتݣولك اه .. مابقيت فاهم والو ..

- طارق : وقيس أصاط قبل لا تغيس زواج هذا امعلم ماشي تفلية

- الروطال ( حاط صباعو على فمو كيخمم ) .. داكشي نيت .. تحطات الماكلة بداو كياكلو وسكات كان كيعم المكان .. هز فيه طارق عينيه ونطق :

فخبارك ݣالو ليا عمر دخل لسبيطار

- الروطال ( بلاما يشوفيه ) : الله يشافيه مالو مسكين ؟

- طارق : ݣالو بلي شي وحدين يمكن تلݣاو ليه دݣدݣوه ..

- الروطال : خاصنا نزوروه نديرو معاه الواجب

- طارق : انت درتيه معاه

- الروطال ( ببرود ق//اتل ) : لا انا مكانش فخباري حتى ݣلتيها دابا

- طارق : فاروق ، هز فيه الروطال راسو بإستفهام :

شنو كاين ؟

- طارق ( تحولو عينيه لصباع الروطال طول فيهم الشوفة ) : والو ..

- ففيلا حيدر .. ݣالسة فجردة دايرة رجل على رجل هازة مجلة خاصة بتكاشط وجلالب .. خرج ادريس من باب الفيلا توجه للعندها .. وقف عن راسها ونطق بهدوء :

ماهداكش الله تمشي للدار خويا تعاوني بنتو بقات ليها لعرسها شهر و20 يوم .. حشومة كتنزل وتطلع راسها مها لي توقف معاها مباغياش تجي ..

- خديجة ( ببرود ) : هانت ݣلتيها مها لي ولداتها ومابغاتش خلي انا لي غير مرات عمها .. وزايدون خالتي رقية غاتكون تم وانا وياها مكانتفاهموش فينما تلاقينا كنتخاصمو ..

- أدريس ( ݣلس تقابل معاها ) : خديجة الله يهديك راه هادشي ديالك مابقاش كيعجب أنا قسما بالله حتى مرضت .. راه حشومة وعيب

- خديجة ( شافت فيه ) : أنا مامسالياش ومافياش راه عندها خواتاتها يوقفو معاها مالهم شنو كيديرو تعول عليا أنا ..

- أدريس : واخا الالة ماݣلتي عيب .. غير منين هاد العبد الضعيف لي ݣدامك تجي منو شيحاجة مغاتعجبك ماتلوميه ..

- خديجة ( هزهزات كتافها ) : لي عجبك ديرو .. دير بحال خوك باش يلاه تشابهو ..

- أدريس ( وقف كيشوفيها بصدمة حرك راسو بالإيجاب ) : واخا الالة ماݣلتي عيب .. تخطاها ودخل لدار هز سوارت طوموبيل وتيليفونو وخرج ..

•••••••••••••

- مابعيدش بزاف على ڤيلا أدريس كتواجد بتيت ڤيلا دعبد الخالق فصالون الكبير لي كان مأتت بأتات بلدي جميل .. ݣالسة الحاجة رقية .. إمرأة باينة كانت صغرها زينة بملامحها وعينيها المكحلين والوشام لي فجبهتها ودقن ديالها ..

- رقية : وياسمين وكاس دتاي ابنيتي ݣلستي فيه عام سربي الله يرضي علك .. هاودي ودي على بنات اليوم طيباي لراجل لغدا بكري ..

- خرجات بنت من جهة الكوزينة .. لتبسة سروال فالكحل وتريكو بيبيض والكحل طالقة شعرها عسلي متموج .. إبتسامة على وجها وحفرات فحنكها كيبينو على جمالها وعلى براءة وجها ..

- ياسمين : هاني أمي متعطلت عليك والو .. حطات البلاطو ورجعات جابت بلاطو فيه الفاكية حطاتو ..

- رقية : كبي كبي لبا راني شحفانة داك اتاي لي دارت ديك البنية الصباح كي الما ماعجبنيش .. انا نموت غلى اتاي بنعناع العبدي ياك درتيه بعداك ؟

- ياسمين ( هزهزات راسها ) : درتو ..

- رقية : تي فين مشات ديك الهويعة دختك

- ياسمين ( كتعيط ) : دنيا دنيا .. نزلات بنت تكون فأوخر العشرينات لابسة سروال دجين وتيشورت فالابيض هازة تجاكيط دجين كتلبس فيها .. طالقة شعرها كان عند كتفها عسلي .. ملامحها هي وياسميت كيتشابهو بزاف على عكس يسرى لي كانت زعرة وعينيها خضرين بحال ماماها .. أما هوما طلعو لباهم عبد الخالق ..

- دنيا ( عنقات رقية ) : هاني أمي كنت غير كنلبس

- رقية ( كطلعها وتنزلها ) : مالك على هاد السروال هوك مقطع جيبي ليا الخيط نخيطو ليك وجيبي ليا نظاظري ..

- دنيا ( كضحك ) : راه هو هكا داير وهكا كيتلبس .. أمي راه هادي هي لامود

- رقية ( ميقات فيها ) : تخربيق وكنز العكري هو هذا .. كاتلك المود بسعي مني مدي مدي ديك الفامية لهنا نݣاد بيها المجاج ونبرد فيها كيتي وفقصتي ..

- ياسمين ( جاتها الضحكة ) : مالك أمي عاوتاني ؟

- ياسمين ( خدات عندها التيليفون كتشوفيها وفدنيا .. هزات كتافها ) :

عادي شحال من واحد كيشبه لينا حتى أنت ..

- رقية : ايوا منعرف لا يكون عمكم محمد الله يرحمو حات عندو شي مرة والد معاها

- ياسمين ( كضحك ) : ولاواه امي عمي محمد الله يرحمو فين عمرو تزوج ..

- رقية ( كدور فراسها ) : علاش خاصو يكون مزوج تي راه روجالة أنا منتيقش بيهم .. كيضربو هوك وهوك خلي واحد عزري ..

- دنيا : أذكرو أمواتكم بالخير أمي ..

- رقية ( شافت فيها ) : ومالي سايرة نعاير فيه أنا غي ݣلت .. ( شافت فياسمين ) أجيبي هاد البنية عجباتني ..

- دنيا : حتى أنا عجبني صوتها غزال ..

- ياسمين : صافي غانشوف نتاصل بنمرة لي حاطين ونشوف معاهم إن شاء الله..

- رقية ( بتساؤل ) : واش وذن الظهر ؟

- دنيا ( كتبقشش فتيليفونها ) : وذن امي فاش كنت الفوق ..

- رقية ( دفعات ليهم رجليهم ) : حيدو عليا نوض نصلي حيدو ..

- ناضت رقية تصلي وخلات البنات بوحدهم .. دنيا شافت فياسمين وتقادات فالكلسة :

يسرى بحال والو ترجع لمحسن .. قاتليك على الورد لي سيفط ليها وشكلاط .. والكاديوات لي ولاو كيوصلوها كل نهار ..

- ياسمين ( دارت رجل على رجل وتنهدات تنهيدة طويلة ) :

اه قالتها ليا .. ماشتيش دابا ولا كينبت ليها عند المحال .. مكايبغيش يتفرق من قدام الباب ..

- دنيا : صراحة بقا فيا كولشي من ديك المسمومة دختو .. وحتى يسرى راه كتبغيه ..

- ياسمين : عطيها يوماين بالكثيرة اتجي تقوليك انرجعو انا وياه ..

- دنيا ( هزات يديها كتدعي ) : ياربي ترجع معاه .. بغيتهم يرجعو عزيز عليا محسن انا ..

- ياسمين : إن شاء الله ( بدا تيليفونها كيسوني ) نور الدين كيسوني .. فتحات الخط وناضت للجردة تدوي معاه .. هزات دنيا تجاكيط ديالها لبساتها دارت تيليفون فجيبها هزات سوارت طوموبيلتها وخرجات ..

•••••••••••••••

- سلاو البنات السوان دڤيزاج .. جاهم الجوع دومونداو على الماكلة جاتهم للصالون تغداو تم .. تلحقات بيهم ليالي هي ورحيمة وباقي البنات .. رحيمة شعرها لي بدلات ليه لونو من صفر لعسلي قدات ليه التقطيعة جاها زوين وحتى من حجبانها خلاتهم طبيعيين ..

- عنبر ( شافت فماجدة ) : شنو بان ليك تمشي معانا العشية للعرس إلى ماعندك والو تفوجي .. حيت قلتي كنتي على برا إلى بغيتي..

- ماجدة ( بحماس ) : وايلي بصح واش نقدر نمشي معاكم .. عرفتي راه كيحمقوني العراسات .. شحال هادي مامشيت لشي عرس واخا جاي عرس بنت عمي ..

- عنبر : اه الى بغيتي يلاه معانا ..

- ماجدة ( بفرحة ) : أيخصني نكري .. ويخصني اكسسوارات وصباط وساك ايمتا نضبر فهادشي ..

- عنبر ( هزات ليها براسها ) : هادشي حالو ساهل الى سالينا من هنا .. غادي نمشيو عند النݣافة لي كنتعاملو معاها ... وخودي من عندها راه معروفة فبروݣون وعندها لباسي غزالين ..

- ماجدة : صافي .. أنا انسوني لماما أنقوليها بلي معروضة ومغانجيش لدار ..

- عنبر : صافي حتى إلى تعطلنا وبغيتي تباتي عندنا ماشي مشكيل ..

- حياة ( نغزاتها ) : كيفاش تبات واش انت مزال كتيقي ؟ ( بهمس )

- عنبر : السيدة كليانة ديال عزيز وكيعرفها .. شوفب أصالون لي جابتنا ليه .. ماسمعتيهاش قاتليه بطوموبيلتها اتكون بنت عائلة ..

- حياة : انت راه هبيلة .. دابا راه صحابات الحال وشفارات وعندهم طوموبيل ..

- عنبر ( بنفي ) : لالا مبايناش عليها ..

- ماجدة ( حسات بيهم ) : شوفو متخافوش انا راه بنت عائلة ودارنا معروفين .. خويا الوسطاني فالبوليس ضابط شرطة .. وعاد عندي خويا الكبير معروف كيعرفوه الناس فاروق حيدر .. وبابا كان وكيل ملك وعاد عندي خويا لي صغر مني .. يعني ماعندكم مناش تخافو مني ..

- عنبر ( بإبتسامة ) : تبارك الله واخا انا أول مرة نسمع هاد السميات .. متديش على حياة حنا مكايهمناش انت بنت من .. غير هو نهار جينا لكازا وقعو لينا شي حوايج متقباهمش العقل ..

- حياة : وياااه من نهار لول لينا تلقاو لينا الشفارة ݣريساونا .. بلاما ندوي على ديك خيتي لي بغات دخلنا على الرجالة ..

- ليالي : كيحسابلي غير انا لي واقع ليا الوقايع ساعة كلنا فكفة وحدة ..

- حياة : أودي حتى واحد فينا ماخطاتو لولة ..

دوزو العشية كلها فصالون ماخرجو حتى ل 6:30 ديال العشية لقاو عزيز ورشيد كيتسناوهم ..

- رشيد : عنبر عنبر كاع هادشي فصالون .. عنبر طلعاتو ونزلاتو مغطية شعرها بشال باش مايخسرش ليها .. :

شوف الله يرحم بيها الواليدين تبقى تزرب فيا هنا .. بشوية عليا ولي بغا يربح العام طويل ياك العرس مغايبدا حتى ل 9 دراري سيفطهم يتأنسطالاو هوما الأولين بحال قبل ..

- رشيد ماݣلنا والو دابا غير يلاه .. ( شاف فماجدة ) شكون هادي ؟

- عنبر : ماجدة هي لي وراتنا الصالون .. وغادي تمشي معانا للعرس عرضت عليها .. شافيها عزيز هزهز راسو وركب فطاكسي ..

- رشيد ( كيزربهم بيدو ) : يلاه يلاه .. طلعات عنبر حداه وحياة وماجدة وليالي اللور أما رحيمة والبنات ب 3 طلعو مع عزيز فطاكسي .. ديمارا رشيد الطوموبيل وشد الطريق للعند النݣافة ..

- رشيد ( عينيه على الطريق ) : سونات ليا واحد السيدة .. بغاتك تغني ليها فعرسها

- عنبر ( منزلة المرايا كتنقص من العمر لي كتروه ليها ) : إيمتا ؟

- رشيد : نهار 31 فشهر 12 ليلة راس العام .. دايراه فالقاعة ديال پالاص ليالي .. لي فبوسكورة

- عنبر : ماعرفتهاش !!

- رشيد : واحد القاعة واعرة كيتقامو فيها أعراس كبيرة وحفلات من طراز الرفيع ..

- حياة : وعلى هاد الحساب ايكونو مالين العرس همة وشان ..

- رشيد ( هز بكتافو ) : وصراحة أه .. ناس معروفين الأب ديالها مدير الأكاديمية العسكرية لي فمكناس مدير سابق .. كيݣولو ليهم حيدر

- ماجدة ( بصدمة رتافع صوتها ) : أويلي واش دوات معاك ياسمين ؟

- رشيد ( شافيها بإستغراب ورجع ركز مع الطريق ) : واش كتعرفيها ؟

- ماجدة : راها بنت عمي .. ( شافت فعنبر ) هي لي قلت ليك عرسها مزاليها شهر و20 يوم ..

- رشيد : واش أنت خت طارق حيدر ولا فاروق ؟

- ماجدة : واش كتعرفهم ؟

- رشيد : لا عمري تلاقيت بيهم ولكن كنسمع عليهم .. كنسمع بفنادق حيدر والمخبزات ديالو .. وعاد طارق كيصدرو البيض للمغرب .. وعاد كاين خوهم لي عندو اجونص ديال طوموبيلات ..

- ماجدة ( بإبتسامة ) : فاروق وعصام خوتي .. وطارق ولد عمي هو خو ياسمين لي دوات معاك ..

- رشيد ( بإبتسامة وإستغراب فنفس الوقت ) :

مزيان فرصة سعيدة هادي ..

- ماجدة ( شافت فعنبر ) : والله حتى كنت انرجع ونقول لياسمين علاش متعيطش ليك تغني ليها فعرسها .. شوفي سبحان الله على صدفة فرحت الصراحة ..

- عنبر : إيوا ذتي راه كولشي بالمكاتيب .. وصلهم رشيد لعند النݣافة .. :

أنمشي نبدل عليا خفا زربا نلقاكم ساليتو متعطلوش اعنبر اودني منك ..

- عنبر ( حيدات السمطة ) : صافي غير سير .. أجي ماعرفتيش واش غايدير بسطيلة دجاج ولا دجاج محمر لا نبقى بلا عشا ماعنديش مع بسطيلة الدجاج انا ..

- رشيد : الى مكان دجاج كاين لحم وعارفك كتموتي عليه .. عنبر واش كتسطاي عليا ولا مالك واش انا كنت مخشي مع طيابة ولا ݣالو ليك كانو كايتشاورو معايا ..

- عنبر ( بيديها ) : صافي سير سير ياربي العفو العافية أجا مايسكتك .. نزلو البنات رشيد هو وعزيز مشاو باش يلبسو والبنات دخلو عند النݣافة ، المحال ديالها كان كبير وأنيق وݣاع اللباسي لي عندها غزالين ..

- نجاة : بزين ديالنا ( سلمات عليها) كيدايرة كيدايرة واحد تودة شي خبار عليها ؟

- عنبر : الحمد لله .. اليوم جبت معايا واحد الضيفة بغيتك تعطيها شيحاجة تكون غزالة اما البنات وأنا وحياة راه ديجا تفاهمنا على اللباسي ..

- نجاة ( شافت فماجدة ) : مرحبا قولي ليا غير نوع لي كيعجبك واش بغيتي قفطان ولا تكشيطة .. واش بغيتي سامبل ولا شاغجي ..

- ماجدة : كيعجبني تكون سامبل وانيقة بغيت غير قفطان ..

- ماجدة : داكوغ اجي معايا .. بقاو البقية مع البنات لي خدامين مع نجاة حطو ليهم اللبيسات ديالهم مع الاكسسوارات وسبيبطات لي غايلبسو .. البنات وليالي لبسو قفاطن فالݣرونة منبتين بالحجر .. أما حورية لبسات تكشيطة فالاورنج كلها منبتة .. وحياة لبسات قفطان فالكحل والݣرونة الكور ديالو طالع وعصري جاها زوين على فورمتا ومع المشطة لي دايرة لشعرها مجموع على شكل ذيل حصان ومجبد من القدام ..

- أما عنبر فلبسات تكشيطة فالبيج مطروزة بالغوز وذهبي وشيبي .. شعرها بقى مطلوق لونو رجع لأصلو صبغو ليها سمير بالكحل وزاد ليها خصلات خلا شعرها يبان طويل .. عطاها واحد القراص فذهبي باش فاش توصل للقاعة تجمعو وتخليه مطلوق على راحتو على ظهرها ..

- خرجات ماجدة لعندهم لابسة قفطان فالأحمر سامبل وانيق :

كيف جاني ؟

- حياة : غزال فن شهوة منو جاك مع شعرك ومع عينيك ..

- رحيمة : تبارك الله أبنتي على مزيناتك جاك غزال ...

- ماجدة : هي صافي ناخدو ؟

- عنبر : بعينيك مغمضين ..

- نجاة : أجي نكملو الاكسسوارات وتشوفي ساك وسباط لي بغيتي .. رجعات ماجدة معاها خدات سباط شفاف عالي مع ساك ديال المناسبات ... حوايجهم دارتهم ليهم فاليبوشيط المخصصين للبيسات فاش يبدلو يرجعو لباسي لبلايصهم ..

- بقاو شي 20 دقيقة هوما كيتسناو .. بدا تيليفون عنبر كيسوني كانت نمرة رشيد فتحات الخط :

وي فينك ؟ اه سالينا أنتوما على برا ؟ .. صافي واخا هاحنا جايين .. :

يلاه راه كيتسناونا ( شافت فنجاة ) شكرا انجاة حتى لغدا إن شاء الله ..

- نجاة : إن شاء الله وبصحة وراحة مسبقا ..

- البنات : الله يعطيك الصحة ..

- تعشات سميرة هي وتودة .. صلاو العشا وݣلسو كيتفرجو فتلفازة فبرنامج ألف مرحبا .. هزات تودة عينيها فسميرة ملامحها مكانوش بحال نهار الاول شافتها كانت دابلة دابا رجع فيها النور .. :

سميرة بغيت نسولك ..

- سميرة ( شافت فيها ) : سوليني اخويتي ياك لاباس ؟

- تودة ( نقصات من صوت التلفازة ) : عمرك سولتيني على راسي واش كنت مزوجة قبل ؟

- سميرة : وعلاش انسولك ؟ حشومة ندخل فشي حوايج مالياش وزايدون ياك داك نهارتيين دويتيلينا على داركم .. صافي من تم

- تودة : احيت جاني عجب وصافي .. ݣلت غايكون عندك الفضول

- سميرة : وراه هو عدي الفضول ولكن لاواه اخويتي منسولشاي ..

- تودة : وإلى ݣلت ليك بلي عندي بنت بلا زواج .. أتدي عليا شوفة ماهياش ؟

- سميرة ( تقادات فالݣلسة ) : علاش أخويتي ندي عليك شوفة ماهياش .. تي شكون فينا مكايغلطش تيراه لي درتيه تكون عدي ختي مديروش .. خوتي عمرهم سولو فيا ولا عرفوني لا ففرح ولا فقرح .. وانت جيتي فشهرين رضيتي لولادي حقهم ورضيني ليا حقي ودرتي لي مايدارش .. كوماشي تي كاع متكون بنتي رجاء بدويرتها دابا والحمد لله داك المحال لي خرجو من دار دايرين فيه المواد الغدائية .. داكشي لي عطيتيهم ولي جاها فحقها .. او وليدي حتى هو الحمد لله وشكر لله .. وانا هاني فهاد الدويرة مخاصني خير ..

- تودة : أنا مادرت والو .. انا ارجعت ليكم حاجتكم وحقكم وحتى هاد الدار راه ديالك ادرت ليك الخاطر وكتبتها مناصة ..

- سميرة : فاش تحط يد يتحطو جوج ..

- تودة ( بهدوء ) : هادشي علاش أختي سميرة بغيت نقاسمك سري ... ونعاود ليك باش يخفاف الحمل عليا كنحس بيه متقل ليا على كتافي ..

- سميرة : لهلا يمحنك أخويتي ݣولي ليا

- تودة ( تنهدات تنهيدة طويلة) : عنبر أختي بنتي .. من دمي ولحمي

- سميرة : يااااك .. سبحان الله العظيم وراه كتديليك واحد شوية ݣلتها مع راسي ݣلت كون كانت عنبر بنتها تكون كتدي ليها ..

- تودة : عنبر مافخبارها والو .. غير انا ورحيمة لي فخبارنا هادشي .. منݣدش اختي سميرة نݣولها ليها نخاف على بنتي ضيع مني وانا 13 عام كنقلب عليها ( بدات كتعاود ليها كيفاش و قع ليها من الأول حتى عرفات وتأكدات من عنبر بنتها ) ..

- سميرة : سبحان الله العظيم أختي .. لي يشوفك داك الوقت تبارك الله بطولتك بغناك بوقفتك يݣول هادي ماعدها مشاكيل وانت لي داز عليك قد زغب الراس ..

- تودة : إيه أختي شلا داز على هاد الراس ..

- سميرة : ولكن سمحيليا .. لي يشوفك دابا مايݣولش يديرها بيك شي حد تيكدرتي حتى خليتي هاداك المنطيح يضحك عليك اويلي ..

- تودة ( تنهدات تنهيدة طويلة) : بغيتو أختي سميرة .. كنا مشينا لموسم مولاي عبد الله .. وكان جا مع شي ناس والله يما عقلت .. وكنا حنا مخيمين اشتو ياختي سميرة بغيتو بحال الى عمري شفت الرجالة فحياتي .. وحتى هو كان زين كنعقل ..

- سميرة : كملي

- تودة : كان تبارك الله طويل وشخصية عدو الهيبة نهار دوا معايا تلفت على القبلة .. وليت أغادية وساهية ..

- سميرة : كان عارفك شيخة ؟

- تودة : لاواه كت كذبت عليه ݣتليه جايا مع دارنا للموسم مارضيتش .. ديك الساع مكانوش يعيطوليا تودة كان سميتي لي فلاكارط فاطنة .. كنت نݣلس حداه ونغني ليه كيݣوليا صوتك زين .. وانا الصراحة مكتش راضية نݣوليه انا شيخة واخا زعمة عمري درت شيحاجة خايبة ..

- سميرة : إيه على ݣلبنا ومداز عليه ..

- تودة : كنا كل نهار نتلاقاو .. عرفتي داك الحب لي مكتسولي على داك السيد منين ولا شنو كيدير ولا واش مزوج ولا والو كت غادية أمدفݣة هوكاك الحب والغرام لحس لي المخ وليت بحال شي هبيلة .. حتى بقات للموسم واحد يوماين ومابقاش يبان سولت عليه واحد الراجل معاه درت وجه قزديرة ݣاليا مريض .. وحيت كت عارفة البلاصة لي كاريين فيها مشيت لعدو بلاما نشعر

- سميرة : ناري علك حتى تيا

- تودة : مشيت ودقيت وحل ليا حالتو حالة دخلت عندو بحال الى ضارب بيا الكاغط .. ايوا اش غانݣولك حضر شيطان او وقع لي وقع .. ايوا هو شتو بحال تصدم فاش وعى على ليدار وبلي كنت بنت .. من وراها مابقيت شتو الغد ليه مبانش رجعت لديك دار ݣاليا واحد مول حانوت راه مشاو .. ايوا وحنى رجعنا بحالنا لدوار من تم ماشتو لهاد نهار

- سميرة : وتي معارفة عليه والو واش حتى سميتو مݣالهاش لك ؟

- تودة ( تودة سهات وتنهدات ) : لا ݣالها ليا .. كان ݣاليا سميتو عبد الخالق ..

- سميرة : ماكديتيش تسولي مارجعتيش ؟

- تودة : تي اش انسول كان محيلتي لبنتي لي طارت ولا ليه هو كت كنشوف ابنتي بين عينيا .. يحسبليك كنت نكول نطيحها لا .. كنت نݣول نكبرها باشما كان حتى توصل لفين بغيت ..

- سميرة : الله يعطيك الصحة أخويتي .. ماعدي منسالك والله .. وهو علم الله بيه ..

- تودة : انا لي يهمني هو بنتي معايا .. نشوفها ݣدامي واخا متعرفنيش مها ماعدي مشكيل منين كنشوفها فصباح والعشية هداك هو رباح عدي ..

- سميرة : سرك فبير أخويتي .. وبنيتك بخال بنتي ولي يمسكم يمسني .. بقات فيا اديك بنت خالتها مسكينة ..

- تودة : حياة درويشة واخا مها مدارت معايا مايصلاح .. ولكن درويشة وكتبغي عنبر بحال ختها ..

- سميرة : والله يدومها محبة ياربي .. أنا أخويتي أنوض نعس .. هادو راه عولي على الفجر عاد يدخلو ويصبحو ناعسين ..

- تودة : حتى انا انوض نعمر ساعة باش نوض للفجر إلى بغا الله ..

- سميرة : ديري فيا خير نوضيني معاك .. ناضت سميرة مشات للبيتها ، وتودة بدورها طفات التلفازة ومشات لبيتها .. تكات فبلاصتها مدة وهي كتسبح وطلب الله يحمي ليها بنتها ويسهل عليها ويرزقها بلي كتمنى ويبعد عليها ولاد الحرام وبنات للحرام ..

••••••••••••••••••••

- الساعة كتشير ل 4 راجعين وعنبر دايخة خاطرها مروع عليها راسها كتحس بيها كيضرها مزال ماولفات على الأجواء ديال السهير .. :

رشيد حبس حبس .. حبس طوموبيل حلات الباب ونزلات من الطوموبيل ، كانت بدلات حوايجها فالقاعة .. بعدات عليهم كترض ، كاع لي كلاتو رضاتو .. تبعات حياة وماجدة كيدوز. ليها على راسها :

شوية دابا ؟

- عنبر ( عينيها مدمعين ) : ياربي واشداني ولاش مشيت .. هاداك الدجاج ماعجبني عامر بزيت وليدام ..

- حياة : كلتها ليك اختي ( شافت عند رشيد ) يكون شي حانوت حال دابا ؟

- رشيد : وغير طلعو ونشوفو .. كانو بوحدهم معاه فطوموبيل الدراري مشاو كل واحد مع تاني فطوموبيلتو أما عزيز سبق رشيد دا ليالي ورحيمة وباقي دالبنات .. طلعات عنبر للبلاصتها رضات راسها لور وغمضات عينيها .. بقا كيدور بيهم عاد لقا محال واحد حال ..

- حياة : جيب ليها والماس باش تݣرعها حيت ليدام ضرها فمعدتها ..

- رشيد : واخا .. نزل من طوبيلتو دهل جاب ليها والماس ورجع عندهم .. حلاتها حياة وعطاتها ليها :

هاكي نزلي عليها دقة وحدة حتى تݣرعي ويدمعو عينيك .. داكشي لي دارت نزلات عليها حتى بدات كتݣرع من نيفها وفمها ودموعها نازلين .. ديمارا الطوموبيل وشد الطريق ماوصلهم حتى بدات كتحس براسها كتنفس ..

- رشيد : الله يشافيك .. الى مدازك الحال سوني ليا نجيب ليك الدوا ولا تسوني ليا حياة

- حياة : تا أشمن دوا ندير ليها ازعتر تولي لاباس ... ن لات حياة وماجدة وعنبر الحوايج خلاوهم فطوموبيل رشيد حتى يرجعهم عزيز للنجاة ..

- دخلات ماجدة وعنبر وحياة للدار ، يلاه حلات حياة الباب تحل وفتحات ليهم تودة شافت ماحدة وإستغربات ..

- تودة : مال عنبر ؟

- حياة : ضرها دجاج فمعدتها خيت فيه ليدام دابا راه مزال ولات لاباس

- تودة : سيري ديها للبيت انا نوجد ليها زعتر

- عنبر : لا اماما لا مافياش بغيت انعس شوية ونعس واقفة .. عييت ماما هادي ماجدة صاحبتنا مشات معانا للعرس اتبات معانا حيت مشا الحال ..

- تودة ( شافت فماجدة ) : مرحبا بيك أبنتي .. تنعس معاك ولا مع حياة بلات نجيب ليها المانطة .. تبعات ماجدة عنبر دخلات معاها للبيت لي كان فيه جوج نوامس ديال بلاصة وحدة .. رجعات تودة فيديها مانطة جديدة بالبلاستيكة ديالها ..

- هاكي ابنتي ...

- ماجدة : سمحوليا اخالتي جيت على غفلة ..

- تودة : لا متݣوليش هكاك ، مرحبا بيك ابنتي بحال داركم .. دازت عند عنبر قدات ليها الغطا :

تصبحو على خير رتاحو ..

- تصبحي على خير .. خرجات سدات عليهم الباب مشات للعند حياة لقاتها تخشات فبلاصتها سدات عليها السرجم والباب .. ومشات للبلاصتها تقرا القرآن بينما أذن الفجر ..

- فاقت تودة وسميرة فطرو اما البنات مفاقو حتى ل 2 ديال النهار عاد فاقو .. ماجدة حلات عينيها بصعوبة هزات تيليفونها لقات طاشمة ديال ليزاپيل من مها .. من بعدما دخلو الحمام طرفو حالتهم تجمعو على الفطور فطرو .. اما عنبر فطرات ابخبز الزرع وبراد ديال الزعتر ..

- ماجدة ( وقفات ) : خاصني نمشي ماما من الصباح زهي كتسوني .. وسمحوليا برزطكم معايا ..

- حياة : ويلي من نيتك .. دابا راه وليتي صحايبتنا ياكي ( شافت فعنبر )

- عنبر : إيه عندها الصح .. الشطيح لي شطحتي لبارح ماشطحو حد .. سكتات ليالي وسارة وبشرى وزينب .. بقاو اكيشوفو فيها

- ماجدة ( كضحك ) : بردت غدايدي والله ..

- تودة : بصحتك وراحتك ابنتي ... ودار داركم وقتما بغيتي تجي مرحبا بيك .. خرجات معاها عنبر وحياة لبرا تبادلو النوامر مع بعضياتهم ، بقاو واقفين حتى شيرات لطاكسي جات داتها عاد دخلو ..

- عنبر ( من ورا ماݣلسو ) : ماما إيمتا اتحيدو حق الله ؟

- تودة : نهار 20 فشهر 12 إلى بغا الله علاش ؟

- حياة : كاينة واحد العرس نهار 31 فشهر 12 ديال بنت واحد السيد مدير الأكاديمية العسكرية دمكناس .. هو عم نيت ماجدة كيقولو ليهم حيدر

- تودة ( بإستغراب) : عمري سمعت بهاد السمية !!

- عنبر ( هازة كاسها ديال زعتر كتشرب منو ) : حتى انا ولكن رشيد عرفهم ناس لاباس عليهم .. بات ماجدة راه وكيل الملك كان وكيل شد التقاعد .. وخوتها حتى هوما يمكن شي حد عندو اوطيلات ولا ماعرت ..

- سميرة : تبارك الله وبنتهم كاعما باين عليها ظريفة جاتني

- حياة : اه ضريفة وضحوكية ونية .. بنت عمها هي لي غاتزوج ودايرين العرس ( شافت فعنبر ) فين قاليك رشيد ؟

- عنبر ( شدها تنفاس ) : بلات انا جايا حشاكم .. مشات لطواليط حتى تنفسات ورجعات .. :

كاين فپلاص ليالي قاعة فبوسكورة

- تودة : إيه كنسمع بيها غزالة ديك القاعة .. كيديرو فيها العراسات اناس لي هوما هوما ..

- عنبر : هادشي لي قال رشيد .. غدا يمكن ايتلاقى مع خو العروسة باش يعربن ليها .. فاش كنا فالقاعة سونا ليه دار معاه ..

- تودة : خوها لي معرس ليها ؟

- عنبر ( هزهزات حجبانها ) : إيه بسلامتك أماما هو او ولاد عمها هوما لي دايرين ليها العرس .. وراتنا ماجدة النݣافة لي اتنݣف ليها بسلامتك داكشي غزال تبارك الله ..

- سميرة : إيوا العݣوبة ليك أبنتي أنتي او حياة والبنيات ..

- عنبر ( بنفي ) : أنا دوزت فريضتي أخالتي الله يخلف .. بلاصة المرحوم مايقد شي حد يعمرها نفرحو بحياة إن شاء الله ..

- تودة : لاواه أبنتي مزال صغيرة .. لي مات الله يرحمو ماعندك لا تالي ولا والي علاش متزوجيش ..

- سميرة ( نغزاتها .. بهمس ) : ماعطيتيهاش داكشي ؟

- تودة : اويلي نسيت الله يتبتنا على شهادة .. بلات انا جايا .. مشات للبيتها ورجعات وهي فيديها ساشية ديال الكارطون .. مكتوبة عليها your parfum .. حطاتو ليها قدامها ..

- عنبر ( بإستغراب ) :

أشنو هذا اماما ( هزات حجبانها ) عيد ميلادي اليوم نسيــــــــــــتو ..

- تودة ( عنقاتها ) : العقبة لميات عام أبنتي نشوفك كيف بغيت .. ياربي تسهل علك وتبعد عليك كل حاجة خايبة ياربي ..

- عنبر ( عنقاتها ) : لهلا يخطيك عليا والله حتى نسيتو .. مابقيتش كنعقل عليه كن نهار توفاو والديا .. مزال فاش كنت مع بدر كان كيتفكرني .. أحسن حاجة وقعات معايا هي لقيتك والله ..

- حياة : عيد ميلاد سعيد بلي تمنيتي ياربي .. ضارت عندها عنبر عنقاتها وعنقات سميرة .. :

والله أحسن حاجة هاد الجمعة ديالنا .. كنحس بربي جزاني وفرحني بيكم ..

- حياة : وحلي خلاص خلينا نشوفو .. حلات الساشية وجبدات 3 الكراطن كبار و3 صغار .. الكراطن وحدة مكتوبة عليها bella glacier وثانية bella dolce وثالثة شفق .. أما البواطات الصغار كانو عبارة على أمساك مركزة وحدة ديال الرمان او وحدة فانيلا .. ولوخرا مسك الفواكه ..

- مدات لحياة تفتح معاها وكل ريحة من روايح كانت كتحمق مثيرة وحلوة وكتسلب العقل .. أما الأمساك كان عندهم عبير خاص ..

- تودة : حياة تاتي راه خديت ليك اتلقايهم فالماريو ديالك بحالك بحال عنبر

- حياة ( عنقاتها ) : لهلا يخطيك علينا أخالتي ..

- عنبر : منين خديتيهم وأنت فدار مكتخرجيش ؟

- تودة : ݣلتها لرجاء وهي لي دموندات عليهم من الانترنت وجابتهم ليا ..

- عنبر : فنين خطيرين حمقوني والله العظيم الله يعطيك الصحة .. ناضت حياة مشات لبيتها وتبعاتها عنبر هازة روايحها ..

بعد العلاقات ممكن تنجح وانا مدوزش فترة طويلة وعلاقات كثيرة ممكن تنجح واخا تكون مدتها قصيرة .. وهاد الكلام كينطابق بالحرف على علاقة ماجدة مع عنبر وحياة .. علاقة خالية من الغل والمصلحة .. ماجدة لي كانت كتفتاقر لصداقة مكتعرف حد من بعدما كانت حدودية وحدها دار ولات أغلبية الاوقات معمرة مع عنبر فينكا كانت هي وحياة تكون .. خارجين مع بعضياتهم داخلين مع بعضياتهم .. حتى من المحال لي كرات ختاروه معاها وحتى من اللون الصباغة حتاروه معاها .. ولكن هاد العلاقة لي كانت زوينة كانت منوضة ليها الصداع فجهة اخرى ..

- خديجة ( بإنفعال ) : هادشي انا راه طلع ليا فرلس هادشي لي بقا خاصني غير بنتي تصاحب ليا مع شيخة .. باك ولا معمر فدار خوه ولينا نشوفوه غير الى بغا ينعس اما واحد خوك قرق ليا فديك سوق الاربعاء .. عماد لقا ليا راحتو قدارو بوحدو للدار مابقاش هو يعتب فيها كاع .. وانت لقيتي لي بغيتي ..

- ماجدة : حتى انا من حقي نتصاحب معامن ما بغيت وندوي معامن ما بغيت .. البنت مكدير حتى حاجة عيب بنت الناس ظريفة قارية .. ديك البنت لي كدوي عليها راها قارية القانون

- خديجة : قانون ديال الشطيح ورديح .. خاصني ندزي مع خوك يدوي معاك انت راه مابقيتيش كتسنطي ..

- ماجدة ( وقفات دموعها هابطين سخان من عينيها ) :

كان عاجبك الحال نبقى بوحدي كيف الغولة فدار بوحدي .. خوتي يظلو فخداميهم وانا مقابلة پيسي انت كتخرجي تمشي لاصال .. وانا بوحدي ودابا فاش لقيت بنات ظريفات معامن كنفرح وندوز الوقت ماعجبكش الحال هادي كتسمى الأنانية اماما .. حيت كون كنتي باغية ليا الخير بصح اتفرحي ليا حيت انا فرحانة ..

- خديجة : انا لي حابسة راسك مابغيتي تسجلي معايا فلاصال تغرفي على ناس جداد .. كنبغي نعرفك على بنات صحاباتي مكتبغيش ..

- ماجدة : ماعنديش مع دوك المبجقات لي عاجبهم راسهم .. كل واحد كتفشر من جيه .. مكنرتاحش معاهم اصلا .. والله يخلي ليك صحيحتك خليتي على راحتي وراه اباش ترتاحي اماما راه دوك البنات هوما لي مغانفرقش ..

- خديجة : واخا حتى يدوز عرس بنت عمك ونشوفو واش غاتعطيهم تيساع ولالا .. داكشي بقا خاصني فالحساب تبارك الله ..

••••••••••••••••••

- ف palace layali أجمل وأروع قاعة فبوسكورة .. النفاخات فالأحمر والابيض مليوحين فلاپيسين .. وكلمة love شاعل فيها الضو .. القاعة كبيرة مزينة من برا بأحسن تزيين .. فالداخل الطبالي بيضين كبار والكراسة فنفس اللون مغلفين بجلد أبيض .. أجواء على برا براس العام كانو بحال الأجواء فالقاعة ..

- المنصة كبيرة لي كانت حتى هي فالابيض منبتة بالأحجار والأضواء .. محطوط فيها المطريال ديال الاوركسترا .. لي كانو جاو قبل انسطلاوهم ورجعو للبيت لي مخصص فين أيلبسو حوايجهم زيوجدو راسهم ..

- التريتور لي كان قايم بالواجب على أكمل وجه ... الفرقة ديالو لي فيها دراري والبنات بلبيسات خاصين .. بداو كيوصلو الطوموبيلات ديال الضيوف .. من عائلة العروسة لي جاو من الغرب خصيصا باش يحضرو لياسمين لي كانت عزيزة وغالية لا هي لا هي لا باقي البنات .. لي جا كان كياخود البلاصة ديالو .. والامور كانت غادية على أتم واجب ..

- فجهة أخرى وبضبط عند الكوافرة لي وضعات اخر اللمسات على ياسمين .. بظفيرة لشعرها وبالبستها الاولى البيضة لي جات فيها كتحمق .. جمعات الميكاب الماطريال ديالها باش توجه معاها للقاعة على حسب الروتوشات مع اللبيسات .. دخلات دنيا لعندها مقادة ظفارها ولابسة بيجامة مكانت غاتبدل حتى للقاعة ..

- دنيا : تبارك الله ماشاء الله فنة فنة ..

- ياسمين : شاداها الخلعة ) جا طارق ؟

- دنيا : اه هاهو على برا .. خرجوها النݣافات بصلاة على النبي ستقباها طارق لي بدورو كان مزال مالبسش .. باس ليها راسها وعينيه كلهم حب دخلوها لطوموبيل ركبات معاهم دنيا والميكاب أرتيست ونݣافة مشات هي واابنات فطوموبيلتها ..

- واقفة قدام المرايا بتكشيطة هماوية فلون الكحل مطروزة باللون الأحمر والأبيض ورمادي .. شعرها الاسود جامعاه وݣصة خفيفة نازلة من الجناب كحل بلدي فعينيها مبين لوحهم وكحوليتهم .. أما شفايفها كانت معكراهم باللون خفيف فالقهوي بارد .. صباع يديها مصبوغين بالأحمر ومزينين بخواتم وساعة خفيفة صغيرة مدهبة ..

- تحل عليها الباب ودخلات عندها واقفة حابسة كتشوفيها بإنبهار وحب :

ماما فاطنة ماشاء الله كتحمقي كتحمقي ..

- تودة ( ضارت عندها بإبتسامة ) : راه انا لي عندي الزين أش هاد الفن هذا ياربي عطيتيه ليا .. الله يحجبك من العين ..

- عنبر : بغيت ناخود من عندك داك البروش ديرو حياة مع تكشيطة حيت عندها الخضر وهو خضر ..

- تودة : واخا بلات ( حلات الماريو وجبدات واحد البروش مداتو ليها ) هاكي .. وسربيو خلاص

- عنبر : واخا .. خرجات لعند حساة لي كانت فبيتها لابسة تكشيطة فالأخضر ملكي منبت مع مشيطة لشعرها خفيفة وزوينة .. اكسيسوارات فذهبي وحجيرات فالأخضر .. عطاتها عنبر البروش دارتو فوق التكشيطة من الوسط ..

- حياة : سربي لبسي وعنداك تخسري شعرك ..

- عنبر ( كانت طالقة شعرها لي كان موج .. طويل بشعر الزايد لي ركب ليها سمير من جديد .. مكياج كان خفيف من العينين ولون العكر كان تقيل فالݣرونة .. ) :

لا مغانتعطلش .. مشات لبيتها هزات تكشيطها لي كانت هماوية فالبيج .. مطروزة من نفس التوب .. ومن الحناب فيهم الأحمر بتوب ديال الموبرة مع السمطة ديال الموبرة فالأحمر مع اكسسوارات طوانك طوال وبروش فوق الحزام .. هزات المسك دارتو ورا ودنيها وفمناطق النبض مع بيلا ݣالسيي هي أخر لمسة دارت لبسات صباطها العالي ..

- فتحات الماريو وجبدات منو صندالة دالميكة من نوع حنيقزة دارتها فساشية باش منين تسالي العرس تلبسها .. هزات ساكها خرجات لقات سميرة ملقية ليها عاطياها كاس ديال الما دافي فيه العسل الحر ..

- عنبر ( شرباتو ) : لهلا يخطيك عليا أخالتي .. علاش مابغيتيش تمشي معانا ؟

- سميرة : لا ابنتي أسيرو واش انتوما غاديرن معروضين راه غاديين خدامين .. قاطعهم صوت سونيت تيليفون .. كان رشيد :

ماما يلاه حياة يلاه .. خرجات حياة وتودة .. هبطو مع دروج .. طلعات تودة حدى رشيد والبنات من اللور ..

- عنبر : عزيز دا البنات ؟

- رشيد : أه راه سبقونا .. ديمارا رشيد وشد الطريق للبوسكورة ..

- تودة : على مولانا ياربي ..

••••••••••••••••

- فبوزنيقة واقف قدام المرايا كيشوف فراسو .. لابس سروال ديال التوب فالبلو مارين مع شوميز فالابيض وجيلي وفالبلو مارين .. مع سبرديلة فالأبيض .. كان فكامل الأناقة ديالو .. والرجولة وكامل الحضور والهيبة لي كانت ضايرة بيه

- دوز على شعرو ماشطو .. بدا تيليفون ديالو كيسوني هزو كانت ماريا .. تنهد تنهيدة طويلة وجاوب فاتح مكبر الصوت .. :

- ماريا : بونسواغ فاروق صاڤا أمورك مزيانة ؟

- فاروق ( بإستهزاء ) : سبحان الله حتى لدابا عاد كاتسولي

- ماريا : ديجا افاروق قلت ليك عطيني شوية ديال الوقت وجات مع الكونجي ديالي مشيت لدارنا

- فاروق ( هزهز براسو بالبرود ) : الكونجي يخليك ماتجاوبيش على تيليفون اماريا .. هاد البلانات ديال البراهش أنا ماعنديش معاهم .. ماشي برهوش يا تݣودي معايا يا جمعي وطوي ..

- ماريا : الله يهديك أفاروق .. راه دار عامرة وكيكونو دار هادشي باش

- فاروق ( بلاناتها حافظهم ماشي صغير وديرها بيه ) : ماريا من بعد صافي من بعد .. قطع عليها رش من الريحة ديالو هز سوارت طوموبيل وتيليفون وخرج ..

•••••••••••••••••••

- خرج من الشقة ديالو بكامل أناقتو بكومبلي بالكحل وشوميز بيض فائق الرجولة .. دخل لطوموبيلتو .. يلاه ايديناري سونا ليه تيليفون فتح مكبر الصوت وجاوب :

وي عماد ؟

- يوسف : عندي ليك شي خبار على بدر الدين رحمون ..

- عماد ( غوبش ) : شنو تم ؟

- يوسف : السيد كان مزوج .. دوز مع المرا 5 سنين من وراها دارو شي ݣنازة ماعرفتش البلان بضبط مزال كنتسنى المعلومات فيكس .. المهم مرتو دخلات للمغرب 10 شهور دابا ..

- عماد : شكون هادي ؟

- يوسف : مزال كنتسنى ليزانفوغماسيو واحد نص ساعة أيوصلوني ..

- عماد : صافي باشما كان علمني .. ولا عرفتي شنو يسالي العرس اندوز عندك البيرو ..

- يوسف : صافي سير بصحة وراحة مسبقا ..

يتبع...