محتوى القصة
- لبسات حوايجها وقدات راسها ودخلات للصالة بحال المعتاد الصالة كانت عامرة كثر من قبل كولشي بدا كيصفق ليها لي مالف يجي ولات ادمان عندو يسمع صوتها ولي جديد متشوق يسمع ليها .. خدات الميكرو بدات الموسيقى لي كانت تقيلة والكمانجة هي اولى الالات لي بدات فالعزف ديالها قربات الميمرو لشفايفها مغمضة عينيها وكتفني من كل قلبها :
- احياني وحدانية بلا ميمة وماعندي حد ، ولا رفيق ولاصديق ماعندي سعد
- ملي خلاتني اميمتي طال عذابي ، وضاع شبابي وفراقها سبابي اماعندي حد ..
- ملي خلاتني اميمتي نبكي والنوح .. ابسري نفوح والباكي مجروح اماعندي حد
- ملي خلاتني اميمتي لامن ايواسيني .. لامن يفكرني صورتها بين عيني اماعندي حد .
- ملي خلاتني اميمتي مايديني نوم ، وقليبي مهموم وباكي مضيوم اماعندي حد.
- ملي خلاتني اميمتي مصيبتي مصيبة ، اغريبتي غريبة امن فراق لحبيبة اماعندي حد ..
- ملي خلاتني اميمتي ماعندي خاطر نبكي مانصابر ارويسي عامر اماعندي ..
- النص لي كان فديك الصالة ومعضم بنات الصالة نوضات عليهم المواجيع وفتحات بيبان كانت مسدودة بيبان كانو باغيينها تبقى منسية ومايتفكروهاش لي طالقة شعرها وتحير ولي تردد معاها ودموعها هوادة .. خلات كاع الصالة تردد معاها وتغني معاها لا عيالات لا رجال ولي حافض اغاني فاطنة بنت الحسين ردد معاها وجاتو على ݣانتو وهواه ..
- كان خاصها ضروري تبدل الأغنية وتنشط الناس حيت عارفة لي جاي لهنا جاي ينشط وينسي الهم ماشي تزيدو هي هم على هم .. بدات الموسيقى من جديد موسيقى مجهدة عيطاوية ..
- عنبر ( كتشالي بيديها ) :
اااااه ا لله اااااه ا لله ، هزيت عيني لشراجم بلقيت الزين كايلالي اها لله ، ياو نفخة عليا وشيكي علاش عليك النسال يالحبيبة ولالة واه يالالة عليك نسال يالحبيبة ومنويت هاد الزين يمشي ويغدر ..
- كملات الأغنية على حقها وطريقها وخلات لي فصالة مايندمش على ريال لي حطو باش دخل ولا الفلوس لي لاح غارم عليها سلات الفقرة ديالها تحت تصفيقات ديال الناس ورجعات للبيت ديالها كتبدل حوايجها ..
- حياة ( وقفات ) :
تسنايني نمشي الطواليط ونرجع صافي .. مشات حياة مخلية الباب مرضوض حتى تحل على تيساع ضارت كاتبان ليها ميلودة المرا لي مكلفة بالميناج :
راه مزال مساليتش ( حنات راسها كتشوف فداكشي لي كانت هزاه فيديها )
- ميلودة ( بإبتسامة خبيثة ) :
واش فخبارك تقدي الفلوس لي كتشدي من الغنا يتضرب ليك فضوبل الى طلعتي لشومبر الفوق
- عنبر ( بإستفهام مابغاتش تسيء فيها الظن ) :
بحالاش مافهمتش ،، حطات ليها پاك ديال القراعي كل قرعة ولونها .. ماعرفاتهم عنبر واش ديال الشراب ولا ديال الريحة ولا ديالاش هزات فيها عينيها بتساؤل :
شنو هادو ؟
- ( جبدات ݣارو وبريكة من جيب الطبلية دارتو فمها شعلاتو وشافت فيها مصغرة عينيها ، ساطت الدخان ورجعات يدها لطبلية ، بصوت باح وتقيل ) :
زيدك هدا حتى هو هادو بجوج قاضيين الغراض ، أيخليو الكليان يتهلا فيك خاص أيكون عقلك صغير .. وهادشي يبقى بيناتنا انا ناخود جطي وانت تاخدي جطك قسما بالله حتى ديري الفلوس صحاح الغنا بوحدو راه ماموكل ( غمزاتها )
- رجعات عينيها للحاجة الأخيرة لي حطات لقاتو سليب سترينݣ ومعاه فنيدة صغيرة ... رجعات طلعات فيها عينيها عاكدة غوباشتها هزهزات راسها وقهقهات بعصبية تجمع عليها كولشي فهاد النهار وزادت مكملة عليها بهادشي لي طلباتو منها بطريقة غير مباشرة ولا بالأحرى بطريقة مباشرة عصبيتها عمات ليها العينين وماخلاتهاش تعرف شنو كدير نطقات من بين سنانها :
غادي نعجبك كوني هانية مرحبا ( هزات قرعة من القراعي لي حطات ليها وعلى غفلة خبطاتها لراسها طيحاتها على طولتها ) ..
- غمضات عينيها حاطة يدها على راسها كتأن بالألم وكتغوت .. جات حياة كتجري منين سمعات الغوات دخلات كتبان ليها فام دميناج طايحة وقرعة مهرسة حداها وعنبر كتخنزر فيها ضربات فخاضها مصدومة وخايفة :
أش هادشي واقع شكون ضرب هادي ؟
- عنبر ( ماحيداتش عينيها عليها ) :
انا لي ضربتها الميكروبة ، عندها الزهر لي ماسيفطهاش للقبر الموسخة غير هي موسخة ويحسابليها الناس كاملين موسخين بحالها .. تحل الباب على تيساع داخل رشيد كيدور فراسو مهلوع بانت ليه ميلودة طايحة شادة على راسها كتغوت
- رشيد : اش واقع هنا ؟
- عنبر ( شافت فيه ) :
كاين الويل الكحل إلى كان غير نسمع هاد الهضرة غير نبقى اخويا فزنقة حسن ليا ، شوف هاد للميكروبة أش جايبة ليا ( اشرات ليه لداك سليب وديك الحبة دالفانيد ودوك القراعي لي كانو عبارة عن منكهات ) ݣاتليك بغاتني نطلع لشومبر الفوق بالعربية نفسد
- حياة ( شدات على فمها ) :
أستغفر الله العظيم
- عنبر : كاتليك هي تشد الپاي ديالها وانا نشد الپاي ديالي الشوهة وتشوهت والفيديو ديالي داير بوم وجايا هاد الميكروبة تكمل عليا لي خاص اللهم اخويا الحبس ولا هادشي
- رشيد ( كيحاول يخليها تكالما ) :
غير بشوية عليك كولشي كيتحل بالعقل ( شاف فميلودة ) زعمة بعقلك الشريفة ( كانت كتان بألم كتحاول تدوي ولكن الألم كان طاغي عليها كتحاول تخرج الكلام غير بشوية :
والله ما أنا اسي رشيد راه لالة فرح لي عطاتني هادشي وݣالت ليا نسيفطها ليها للشومبر الفوق
- رشيد ( كيعيط بصوت مرتافع ) :
براهيم براهيم .. ( جا الفيدور لي كان فالكولوار ) دي ميلودة شوف ديرو ليها شي حاجة راسها ربطوه ليها وداويوه ، غادي نجي نعطيك حسابك وماتبقايش تحطي رجلك هنا .. خرجها الڤيدور كتبكي ماحيلتها لراسها ولا لخدمتها لي خرجات منها .
- رشيد ( شاف فعنبر ) :
فرح انتفاهم معاها غير تهناي هادشي عمرو مغايتعاود
- عنبر ( بإستفهام وعصبية ) :
شكون هاد فرح اخويا وفين كنعرفني ولا كنعرفها وكيفاش نطلع عندها انا لشومبر ؟
- رشيد ( حك راسو ) :
فرح هي ديك السيدة لي دخلات عليك هنا للبيت ، هي خت الباطرون ديال هاد الأوطيل شوية ماشي هي هاديك الله يعفو عليها
- عنبر ( شافت فحياة ) :
شتي كنت قلتها ليك قتليك ديك خيتي لي دخلات عليا ماهياش ( شافت فرشيد ) سمع أخويا رشيد أنا با راه كان غير على قد الحال الله يرحمو وميمتي كانت خدامة عليا وتعرق عليها وتجيبها حلال كنغني فصالة والحالة ماهي حالة وسديت فمي وسكت .. الغرامة تلاح عليا بحال شي سلعة وسديت فمي حيت درت معاك الكلمة وسكت ولكن فاش يطمعو فيا ونولي نسمع الهضرة من عند لي يسوى ولي مايسواش لا أخويا تلاقينا خوت نتفارقو خوت
- رشيد ( بتوتر ) :
لا أعنبر الله يرضي عليك حنا عاد بدينا راه هادشي ضروري فالبدية مع الوقت كولشي ايولي يعرفك وكل واحد ايلزم حدو
- عنبر : ندخل الحبس على هاد القبل انا راه كولشي نسكت ليه حتى لشي حد ينعت فيا ولا يقرب ليا أنا نقولها ليك ( ݣلسات على واحد الكرسي مقابل معاه مكملة كلامها )
- نهار تلاقيتيني تشفرت وكنت ضعيفة مهرسين ليا الجنحين حيت كنت يلاه ݣعدت الراس من حوايج خايبة دوزت فحياتي موت والديا وتابعهم موت راجلي ( بانو ملامح الدهشة على وجه رشيد عمرو كان عرفها كانت مزوجة قبل ولا مجابتهاش الظروف ومزال ماطوالتش للعشرة باش يعرف عليها هادشي ) والانسان كيدوزو عليه حوايج خايبة مكايعرف راسو من رجليه ولكن فاش كتدوز الوقت كيبدا يرجع لراسو وحالتو القديمة .
- والديا الله يرحمهم علموني عمري نحدر الراس لبنادم كيما بغا يكون نوعو أو واحد السيدة الله يدكرها بالخير كانت كتقوليا ابنتي يا عنبر الخوف من الله سبحانه ماشي من العبد واخا كنت صغيرة مزال عاقلة وعمرها تمشي من البال .
- نصبر على كولشي ولكن تمسني وتجي لجيهتي اسمحليا منك انت وجبد لي كالس عليا زين ديالي اخويا بأشمن حق تقولها ليا ختك مرتك كنجيك انا والله يرضي كلها يشد تيقارو
- رشيد ( بهدوء ) :
لي ݣلتيها عندك الصح فيها وسمحيليا انا والله ماقصدت ربي شاهد معزتك عندي اعنبر لا انت لا حياة منبغيش شي حد يغلط فيكم ولا يقرب ليكم ، كنواعد قسما بالله لا قرب ليك شيحد غير متخليش الخدمة وانا جايب ليك خبيرة زوينة بغيت نفرحك بيها
- حياة ( ݣلسات كتشوفيهم ) .. شافت فيه عنبر ونطقات ببرود :
أشمن خبار ؟
- بسباب الڤيديو ديالك المدير ديال المهرجان لي غايكون فمولاي عبد الله أمغار بغاك تكوني إن شاء الله من الناس لي غادي يغنيو وهادي راه حاجة مزيانة
- عنبر ( جاتها الضحكة ) :
صافي من الأوطيل للمهرجانات زيد لاباقيش
- حياة ( شافت فيها ) :
المهرجان راه محتارم على هاد القنت بعدا ماشي بحال .. ضار عندها رشيد شافيها وعلى وجهو علامات الصدمة من كلامها
- حياة ( شافت فيه ) :
وبلاما تشوفيا اخويا مالني كذبت هالمقزبات هالبرهوشات يلوحو عليهم الرجالة فالفلوس رجال شارفين بلا حشمة جاي يشرب ويلوح فالفلوس ، كون كان يديهم لشي جمعية ويعاون بيهم الناس ودوك لي ينعسو فزنقة كون راه دار خير تجازى عليه من عندي ربي سبحانه .. راه هادشي كامل حرام فحرام الى فخبارك ماتعرف كاع انت هاد خدمتك مخلياك حتى لدابا بلا زواج ..
- رشيد : هاي هاي هاي على حياة دريويشة وحتى انت تسرح ليك اللسان
- حياة : ومالني مندويش راني عارفة وقارية واخا حدي الكاطريام سير بدليك الحرفة حتى تا ماتعرف ربي يسهل عليك ويتسݣد ليك السعد طريق الحرام راه مادوم .
- رشيد ( شاف فعنبر ) :
عنبر شنو درنا ؟
- عنبر ( بقات ساكتة مدة كتشوف فالفراغ هزات عينيها فيه ونطقات بجدية ) :
أنضرب معاك هاد البريكول بوحدو ارشيد وباش نرجع لهاد الاوطيل غابلاما تحلم .. وغانقلب على الكرا انا وحياة ونعطيك سوارت البارطما الله يكثر خيرك درتي معانا فوق الجهد ولكن باش نبقى هنا أسمحليا .
- حالة باليزة صغيرة خداتها مع الحوايج لي كانت تقدات هي وحياة كتجمع فيها حوايجها وتستف فيهم ..
- حياة ( بدورها كطوي حوايجها وكتحطهم فواحد الساك كحل خداتو عندو روايض ) :
عندنا نهار واحد فالجديدة وإلى رجعنا فين غادي نمشيو ؟
- عنبر ( ݣلسات ) :
دابا انا مخبية عندي 3000 درهم الغرامة ديال اليوم كان تقيلة شوية على هاد الأيام وعاد إلى مشينا للجديدة المهرجان ماشي هو الاوطيل غايخلصنا رشيد مزيان .. وعاد خاصو يخلصني فهاد الأيام لي خدمت فيهم نجيو نشدو شي أوطيل ونقلبو على الكرا
- حياة : مغانشوفوش الدار لي قالينا عزيز ؟
- عنبر : نشوفوها حتى هي الى كانت مزيانة ودارت معانا شي ثمن مزيان راه داكشي لي بغينا
- حياة : خاصني ندفع لاكارط وغايخصني ليزيكسطري نجيبهم من ولاد صالح
- عنبر ( كملات الطويان ) :
ديك ساعات نسونيو لخالتي رشيدة تسيفطهم لينا فالبوسطة
- حياة : مكايبغيوش كيقوليك خاص المعنية هي لي تجي برجليها
- عنبر : ديك الساعات واخا نعرفو نركبو نمشيو نجيبوهم ونرجعو بلاما نمشي لدار ونتلاقاو مع داك المنطيح ديال سعيد
- حياة : معاش غادي يجي عدنا رشيد ؟
- عنبر ( سدات الباليزة ) :
غايجيو هو وعزيز حنا غنمشيو مع عزيز
- حياة : اويلي وعلاش طاكسي الحمر هانية يفوت كازا ؟
- عنبر : الا أصاحبتي راه طاكسي دمولاه غايشوف شي صاحبو ايخلي ليه شي طوموبيل هو يدينا ويجيبنا .. انا هاد الساعة عزيز بوحدو لي وليت دايرة فيه الثقة واخا رشيد ماشفنا فيه الخير ولكن لي خاف نجا .
- حياة : كوراه رشيد مابغيتيه لوالو فاش قلتيها ليه ؟
- عنبر : يضبر لمحاينو خدمتو خديت منها اشوهة وسمعان الهضور وعلى شوية كت انمشي فيها للحبس ..
- كملو طرفو الدنيا وستفو البالز ديالهم باش من جديدة يرجعو نيشان يشوفو شي أوطيل وشقة ايخليو السوارت للرشيد ..
•••••••••••••
- فجهة أخرى ومن ورا ماكملات داك العرس تخلصات هي وجماعة وكل واحد فيهم خدا حقو جرات باليزتها وشدات الطريق .. وصلات فداك الليل الدنيا كانت خاوية والكلاب كتنابح توجهات لواحد الدار لي كانت مصبوغة بالبيض وفيها بولة شاعلة حدا العتبة .. دقات زوج دقات بقات مدة رجعات دقات جاها صوت نسوي من بعيد :
ابلاتي .. قبل لا تحل الباب سولات " أشكون "
- هادي أنا تودة افتيحة .. تحل الباب من طرف سيدة لابسة بيجامة نص كم طويلة كتعكف فراسها باينة فيها كانت ناعسة :
أهلا اهلا صحايبتي ( عنقاتها ) دخلي .. دخلات تودة جارة ديك الباليزة الصغيرة سدات لوخرا الباب وتوجهو للواحد البيت ݣلسات تودة محيدة الشال لي كانت لايحاه على راسها
- غير سمحيليا مساليتش واحد العرس بكري أما كنت أنجي قبل المغرب
- فتيحة : أويلي أصحايبتي جي وقتما بغيتي الحمد لله الدار دارك واش حنا بيناتنا هادشي
- تودة ( كتقلب بعينيها ) :
فيناهما الدراري ؟
- فتيحة : بايتين هاد الليلة عند جداهم داهم بوبكر بقيت غير انا عيا معايا نمشي اختي عاد تهنيت انرتاح شوية من كترت اللغيط حيدي جلابتك
- حيدات تودة جلابتها شداتها من عندها فتيحة علقاتها فالباب
- فتيحة : أنا جايا
- تودة ( عرفاتها بغات تمشي توجد شيحاجة حبساتها ) :
غير رجعي انا راه مافياش الجوع عاد واكلة فالعرس حتى شبعت مابقى عندي فين نزيد مزال ..
- فتيحة : وغير بريرد ديال أتاي ؟
- تودة : الله يهديك أتاي مع 12 دليل ݣلسي الارض ، ݣلسات فتيحة شافت فتودة :
كيغادة مع داك الزواج الزين النايح ؟
- تودة ( تنهدات تنهيدة طويلة ) :
عد بالي غاينفعني ساعة مانفعني فشاي ، من غير بنتو لي بغيت نرجع ليها شوية من حقها مسكينة هي وديك المرة أما انا غراضي علاش تزوجتو والو ماقضيتوش .
- فتيحة : علاش ماتقضاش ليك الغراض ؟
- تودة ( بنفي ) :
والو وتݣول لقيتو مغرق الضواسة مع الناس وحتى واحد مكايحملو اكيعرفوني مرتو كيسربيوني دغية هاد التزويجة ماتنفعت بيها بوالو كيݣلت لك من غير ديك الارض ودار وداك الصداق ودوك شراوط
- فتيحة : وعلاش ناوية ؟
- تودة : عدي واحد المشية للجديدة نرجع إن شاء الله نݣوليه يعطيني براتي والله يعاون العونات
- فتيحة : ودار ؟
- تودة ( شافت فيها ) :
ماشي داري هاديك افتيحة دار ماليها غانكتبها لسميرة بسميتها هي لي ضربات تمارة والكرفي مسكينة أما انا كاعما هامني لا دار لا دوار لي هامني مزال كاوي ليا الݣلب أختي ( سكتات ورشافت فيها ) ماكاين حتى خبار والو
- فتيحة ( تقادات فالكلسة ) :
كاينة واحد السيدة كنعرفها كتجي تسوق ديما كنلݣاها فسوق غدا انمشي فصباح نتسوق وغادي نسولها هي اتجيب ليا الخبار الصحيحة
- تودة ( هزات يديها وراسها للفوق ) :
ياربي ياربي دير شي تاويل دالخير وتسمعني خبار الخير وتريح ليا قلبي ياربي الحبيب .
- واخا تمشي وتزور بلدان كثيرة كتنباهر بثقافتها ومدنها بماكلتها وبناسها ولكن مع ذلك مكاتحس براسك رجعتي للحياة حتى كترجع للأصلك واخا مرات كيبقى فيك الحال على شحال من حاجة خاصة بلادك ولكن كتبقى منك وفيك كتحس براسك كتنتامي لديك البلاصة كتكون فرحان وانت مجموع مع العائلة بين ناسك هلك وحبابك ..
- الخيام كانت عامرة كيتوسطها طبالي كبار وكل طبلة عليها مالذ وطاب صواني كبار مع برارد منقوشين والكيسان مدهبين الطباسل عامرين بالبطبوط والمسمن والبغرير العسل وزيدة وزيت البلدية .. كل طبلة بحال ختها مجموعين عليها قايد السربة و رباعتو أنت كالس وكتسمع فتحنحينة العود بحال شي مقطع موسيقي ..
- فطرو الناس لي كانو جايين من كاع البلدان ماخلاو بلاصة منين جاو شي كايشري معرفة مع شي وشي عارف شي حيت ماشي هادي أول مرة غايشاركو ولا غايعرفو بعضياتهم .. وعاد الخيمة ديال البنات بوحديتها .. الخيمة لي كانو مجموعين فيها عائلة حيدر عصام وفاروق أدريس وعبد الخالق ومعاهم الدراري البارضية ديالهم كيفطرو فجو عائلي ولي شافهم مايحلفش عليهم بلي كل واحد فيهم عندو خدمة زينة فالبلاد ..
- الصحافة كانت كدور وتستجوب الناس وتستجوب كل سربة بالبارضية ديالها والقايد ديالها كتنقل من خيمة لخيمة ، حتى من عطير كان لي كان البرنامج ديالو معروف بعيوط ومكاحل وقف عند الخيمة لي كانو كالسين فيها ادريس وعبد الخالق ومعاهم واحد السيد سميتو الركراكي شيخ الكلام المعروق بالقيرع ..
- عطير : هاواحد السلام عليكم .. الكل رد عليه السلام ݣلس حدا داك السيد معنقو من ظهرو
- عطير : كيݣوليك الشيخ بلا شيخ
- الركراكي : جبحو خاوي
- عطير : حنا كنعرفوك هادي زمان وحلي فيك عينينا او والدينا كيعرفوك من هادي شحال
- أدريس : الله اودي الشي الركراكي راه معلمة اسي عطير
- عطير : ياك بعدا أسي أدريس هدا راه عزيز عليه الخيالة والباردية فينما مشيت لشي موسم نلݣاه
- ادريس : وراه البلية صعيبة إلى عشقتي الخيل وتبوريدة صعيب تفرق عليها كتولي تجري ليك فدم
- عطير : وهادشي منطابق عليك حتى تا انت وسي عبد الخالق ياك اسي عبد الخالق
- عبد الخالق : حنا جبناها من جوج جوايه اسي عطير
- عطير : كيفاش ؟
- عبد الخالق : وحنا الواليد غرباوي والواليدة دكالية عدنا نغزة من هوك وهوك
- عطير ( كيضحك ) :
وتوما تبارك الله العائلة كلها دحيدر معروفة بالعشق ديالها للخيل ( كيقلب براسو ) :
فين هو القايد ديالنا .. هز راسو كيبان ليه فاروق واقف مع مجموعة من الرجال السن ديالهم من العشرينات لتلاثينات كيدوي معاهم ، ناض من حدا عبد الخالق وأدريس وتوجه لعندو ..
- عطير : سي فاروق
- الروطال ( ضار عندو وبإبتسامة رجولية مبين على سنان كيف الجوهر بصوت رجولي تقيل وغارق) :
سي عطير مرحبا
- عطير : قبل مكاتبدا الفقرة ديالكم ضروري كتجمع انت والباردية ؟
- الروطال ( هزهز براسو ) :
حاجة ضرورية ، الواحد مايخرج للساحة حتى يكون واجد وعارف لي ليه ولي عليه الحر بالغمزة اسي عطير
- عطير : ماعدي مانتسالك الواحد هو لي ينضم شغلو
- الروطال : قايد السربة فيها معاني كثيرة اسي عطير خاصو يحصي الكبيرة وصغيرة مكايهموش يكون هو الأول كيهموه جوج دالحوايج الخيالة والعود هاد زوج من تسالي تبوريدة يخرجو منها سالمين غانمين ..
- عطير ( عطاه التحية ) :
أسيدي تبارك الله علك وخلاص الله يعاون اسيدي .. هزهز ليه الروطال براسو خلاه ورجع للعند طبلة عبد الخالق وأدريس وجماعة
- تودة : واش ديك السيدة لي ݣاتليك هادشي يكون بصح نيت ولا اسايرة تكدب ؟
- فتيحة : من نيتك اصاحيبتي السيدة كنعرفها مزيان وزايدون راها جارتهم كتعرفهم
- تودة ( كتخمم ) :
دابا ماعديش الوقت غدا إن شاء الله انزل لجديدة ندوز واحد 10يام تم غير نرجع وانمشي نقلب اما داكشي دالمعكي نخليه من بعد
- فتيحة : اتكريو وراه كان علك توصي قبل اتلقاي كولشي عمر
- تودة : لا دويت مع نجاة دارها خاوية اتخلي ليا الساروت عند مول الحانوت انا جديدة كاع منحير فيها دوزت فيها سينين حتى الى مالقيت كاين الحباب
- فتيحة ( بان ليها الكار ) :
هالكار جا ( عنقاتها ) تهلاي فراسك والله يطمن بالك ياربي ويهني قلبك وباش مكان رضي عليا
- تودة : اللهم امين ياربي الله يخلف أختي فتيحة سلمي على دراري .. شيرات للكار وقف ليها عطاتو باليزتها دارها فالكوفر وطلعات وراها بلاصتها وشد من عندها الخلاص وشد الطريق .
••••••••••••
- فالطوموبيل لي كرا عزيز شادين الطريق للجديدة غاديين مجمعين فكاع المواضيع
- عنبر : عزيز الدار لي كنتي قلتي ليا عليها شحال فيها من بيت ؟
- عزيز ( عينيه على الطريق ) :
فيها زوج بيوت هي ماشي كبيرة صغيرة شوية والبني ديالها قديم الصراحة ماتصلاحش ليكم اختي انا نݣولك
- عنبر ( بإستفهام ) :
وعلاش ؟
- عزيز : قريبة لدار ديال اديك الميكروبة ، ماكرهتهاش تهز من تم اليوم قبل غدا خاص انلݣى ليها الوجيبة
- عنبر : انا ماعندي سوق داك نهار أجاتني فواحد الوقت لي ماهواش راه عاودت ليك لي كاين اما قسما بالله العظيم حتى نضرب ليها الطر ويجمعونا البوليس كاملين
- حياة : بشحال باغي مولاها يكريها ؟
- عزيز : واش غانݣولك طالب فيها 2000 درهم
- حياة ( بصدمة ) :
أويلي ستغفرت الله العظيم مالو بغى يكري لينا شقة فكاليفورنيا
- عزيز ( شافيها من المرايا كيضحك ) :
حفضتي غير كاليفورنيا بوحدها ، تما بعدا كاين الفيلات وهداك هو الثمن بغيتي الرخا اتشوفي شي ݣارسونيير وحتى الكارسيونيير اتلقايها بديك 1500 درهم كازا راه غالية واخا المعيشة فيها رخيصة شوية ولكن الكرا غالي .
- عنبر : وحتى نرجعو ونشوفو ( شافت فعزيز ) مكالكش رشيد شحال انفوتو ؟
- عزيز : اليوم وغدا ، إن شاء الله غدا عاد اطلعي اليوم اترتاحي ودورو الى بغيتو
- عنبر ( شافت قدامها ) :
على مولانا ..
- ريزيرڤا على 4 ديال لي شومبر وحدة لحياة والثانية لعنبر وحدة ليه وحدة العزيز الاوطيل كان زوين ونقي والبيت غزال ومتيسع النموسية كبيرة والبالكو كتحلي كيبان ليك البحر منظر كان زوين كيريح القلب ..
- أول حاجة لاحظاتها فاش دخلات للاوطيل هي جميع الموظفين لي تم كانو كيشوفو فيها وكيوشوشو مع بعضياتهم متأكدة بلي الكل شاف الفيديو كلما دخلات ليه من تيليفون عزيز كيبانو ليها ليڤي طالعين .. وقفات فالبالكون تنهدات تنهيدة طويلة ..
- مشات للحمام كان كيشهي وكيعيط عليها تدخل دوش وداكشي لي دارت جبدات الكيس من ساكها شومبوان وحوايجها حطاتهم وجداتهم ودخلات للدوش بقات معاه حتى عرفات ليه .. فركات راسها مزيان شللات راسها وجمعات الحمام لقات واحد البينوار لبساتو وخرجات نشفات راسها ولبسات عليها .. سمعات الدقان فالباب مشات تحل لقاتها حياة لي من حالتها حتى هي باين فيها دوشات لابسة كسوة طويلة فالبيض وفيها وريقات شجر فالازرق ..
- حياة : حتى انت دوشتي بصحة وراحة
- عنبر : الله يعطيك الصحة ، شوية غايجي عزيز ورشيد باش نمشيو نتغداو
- حياة : وراه جايا باش نقوليك يلاه هزي ساكك حيت عزيز كاين على برا كيتسنانا .. هزات عنبر ساكها دارتو على كتفها .. لبسات صندالة صيفية فالبيج مع كسوة بحال ديال حياة غير هي فالباج سدات بيتها وخرجو لعند عزيز
- عزيز : رشيد لتحت كيتسنى فينا .. هبطو لعندو لقاوه كالس كيتسنى فيهم
- رشيد : البنات اش مشهيين تاكلو ؟
- عنبر : أنا مشهية الشوا نكدب عليك
- حياة( كضحك ) :
حتى انا الصراحة شهوتي فيه ..
- رشيد : هي لي ماتعاودش يلاه .. خرجو بربعة بيهم طلعو فطوموبيلت رشيد وشدو الطريق للسوق
- رشيد : انتغداو هو الأول ونمشيو ندورو فالموسم ومن تم نمشيو نتلاقاو مع المدير ديال المهرجان ومنها نيت نتفرجو فتبوريدة
- عنبر ( تبسمات تبسيمة لي حساتها من قلبها كتحس بفرحة كبيرة بحال شي حد كان غايب وعݣوبتو للأرضو ) :
عرفتي شحال عاهدي بالتبوريدة كنموت على الخيل ( شاف فحياة ) عقلتي على عمي عبد السلام جارنا فاش كنتو كتجيو انت وخالتي رشيدة كيركبنا على واحد العود عندو رمادي مايل لزرق منقط بالبيض
- حياة : اه كان سميتو طاح الريال
- رشيد ( بإستغراب) :
طاح الريال عمري سمعتها ؟
- عنبر : طاح الريال كيقولوها للعود لي كيكون رمادي مايل لزروقة وفيه دواور بيضين داك البياض كيبقى ينتاشر فيه حتى كيولي كلو بيض سبحان الله العظيم ، كيقولو ليه طاح الريال ولا الموسمة
- رشيد ( دار شافيها ورما عينيه ليديها لي كانو مبرݣعين بالحمورة ) :
واش شي حساسية عندك فيديك ولا اش داكشي ؟
- عنبر ( شافت فيديها ) :
لا توحيمة مي شحال هدا كانت توحمات على الشهدية ولكن ماكلاتهاش ودابا فينما وصل الوقت ديالها كتبرݣع ليا يدي بالحمورية وغير دوز وقتها وترجع ليا يدي عادية
- عزيز : سبحان الله العظيم ، انا هادشي ديال الوحم كاعما كنت كنتيق بيه
- حياة : لالا اخويا غير تيق واش حنا نعرفو حسن من جدودنا اللوالة
- عزيز ( كيضحك ) :
الله اودي علاش حنا نوصلو ليهم .. تقابلو مع الطريق والبنات حاطين جبهتهم على الزاج كيتفرجو الدنيا كانت عامرة لوح البيضة متهرس حط رشيد طوموبيل فواحد الباركينغ وخرج هو وعزيز والبنات متوجهين للسوق لي كان عامر.. كواشي كاين الخضاري البال الفاكية ريحة الشوا وتشنشيط كتعطي الألعاب كولشي كاين ..
- دخلو لواحد الݣيطون حداه واحد الكزار مشا عندو رشيد كرض ليه اللحم والكفتة والكبدة خلصو وعطاها لمول الشواية عاد دوموندا على أتاي .. وصل عندهم أتاي للطبلة هو وشوا والخبز الجو لي كانت عنبر كتحماق عليه هي وحياة .
••••••••••••••••
- فبن سليمان واقفين على برا وعلامات الاستغراب باينين على وجهم ..
- سميرة : ياك كنا غدا هيلي غانمشيو للجديدة لاش مسيفطنا دابا اويلي هدا مالو فبرل ؟
- تودة : مزال مارتاحيت من طريق مرجعنا نشدوها هادو مالو حالو ماعجبنيش .. خرج المعطي معيط على تودة جات للعندو
- المعطي ( مد ليها فلوس ) :
هاكي لا خصاتك شيحاجة .. هزات فيه راسها كان باين فيه عيان او واقف غير بزز وجهو عرقان
- تودة : المعطي مالك واش مريض ؟
- المعطي ( بتوتر ونفي ) :
مامريض والو علاش ؟
- تودة : ومزال مارتاحيتش من الطريق ومسيفطنا هاد النهار ياك ݣلنا حتى لغدا ؟ مالنا على هاد الزربة
- المعطي ( مكانش باغيهم يشوفو عليه علامات المرض باغيهم يمشيو باش يداوي راسو بعيد عليهم يرجعو يلقاوه بدا يبرا ) :
اتلقاو الطريق عامرة والموسم ايبدا من اليوم لاش اتسناو حتى للغدا ، سيري حتى لتم ورتاحي مالك حتى انت كنتي فداخلة العزيزة ديالي سيري فوجي ليا مع راسك .. شدات عندو دوك الفلوس بشك عطاتو بظهر وتوجهات لطوموبيل لي كان سايݣها يونس حداه رجاء وهي طلعات حدا سميرة سادة الباب وبالها مهانيش .. شدو الطريق للجديدة رجاء مرة يشد ليها يونس فيدها مرة يطلقها فرحان وهي كثر منو لأول مرة تحس براحة غريبة ..
- كتحس براسها بدات كضحك ليها الدنيا وربي كيكافيها كطلب من الله يدوم فرحتها وتجمع هي وراجلها بزوج تحت سقف واحد .
__________________
- سلاو الغدا وتوجهو للجهة لي كان فيها الموسم .. كان بنسبة ليهم بحال شي حلم الجهة لي كانت خاصة بإدارة المهرجان واقفين لي ݣارد عطاهم رشيد ليبادج ودخلهم كانو واقفين غير طوموبيلات لوكس وغير الناس الهماويين ستقبلهم واحد السيد فالخمسينات من عمرو :
مرحبا مرحبا بسي رشيد وغبور هذا أصديقي
- رشيد ( كيضحك ) :
ايوا شنو غانديرو الخدمة داتنا .. شاف فعنبر وبإبتسامة سلم عليها :
لالة عنبر زارتنا البراكة .. تبارك الله عليك وعلى صوتك فاش شفت الفيديو انا بعدا بهرتيني ومايمكنش يدوز الموسم ومايتسمعش هاد الصوت الجبار
- عنبر ( هزهزات ليه راسها بثقالة ) :
الله يكبر بيك أسيدي
- زيدو تفضلو مرحبا .. غادي بيهم والعينين عليهم كل مرة كيعرفو على شخصية شكل والاعلام داير خدمتو فتصوير وصلو للصف الأول وراهم فين يݣلسو سبق رشيد وعزيز تبعاتو حياة ݣلسات .. تبعاتها عنبر لي تعطرات على شوية طيح كونماشي اليد لي شداتها هزات راسها فرجل سيتيني ونطقات بإبتسامة :
سمح ليا اعمي
- أدريس : ما وقع والو أبنتي .. خدات بلاصتها فالكرسي لي جنبو وݣلسات ..
- تسمع بصوت مجهد صوت رجولي قوي :
سربة الروطال الغرباوية كتقدم .. برئاسة قايد السربة فاروق حيدر .. علات عينيها كتشوف كيبانو ليها الباردية مستفين بلباسهم جلابة فالبيج ورزة صفرة مع الخناجر كيتوسطهم عود كحل قايدو باين بطولتو وهيبتو مركزة معاهم ماحيداتش عينيها عليهم ..
- يا بسم الله ( مع ݣالها تحرك فاروق بالعود ديالو كيمشي ويجي قدامهم بحال العلام كيلعب بالعود ديالو كلو هيبة ) .. تسمع " والحفيض الله وا المكاحل .. تحركو البارضية صف واحد كيلعبو فوق الخيل ديالهم ، تعلات المكاحل وفخط واحد تعطات الإشارة صوت البارود لي زعزعز كاع لي تم وفعفعو من بلاصتو طار الدخان فسما وتسمعو التصفيقات مجهدة ..
- هزات يدها مبسمة كتصفق شافت فحياة ونطقات :
واعرين تبارك الله بغيت نتصور معاهم ولكن نركب على داك العود انتصور معاه
- حياة ( كضحك ) :
واش انت هبيلة ؟
- عنبر ( تنهدات ) :
عرفتي من ايمنا مابقيت شفت الخيل راه منين كنا صغار شنو فيها الى تصورنا معاهم مالنا غادي ناكلوهم ؟
- بغيتي تصوري معاه ؟ ( جاها الصوت من حداها ) ..
- شادين الطريق وتودة ساهية عقلها خدام كيدي ويجيب حتى سولاتها رجاء على غفلة منها :
خالتي تودة ݣولي ليا إيمتا بديتي تغني ؟
- تودة ( عطاتها إهتمامها ) :
وراه أبنتي منين كان عندي 21 عام حتى لدابا
- رجاء ( ضارت عندها ) :
ماعمرك درتي شي ألبوم ولا شيحاجة تبارك الله راه سينين وانت فهاد الضومين
- تودة ( بنفي ) :
ماعنديش مع داكشي ديال سيديات والكاسيط انا عندي امع البلدي شي عامين قبل مندير العيطة كنت نزلت مع خالي الله يرحمو للكازا وكان دانا لواحد ريسطورا ديك ساعات اول مرة ندخل لشي ريسطورة .. ايوا غاماكاليا عقلي ونضت غنيت وتم كان واحد خونا للبناني منتج لصق فيا لصقة وحدة والو تمشي لبنان وغادي نشهرك وداك تخربيق الخاوي .. وكنت زينة وعاطية العين داك الوقت
- رجاء ( بحماس ) :
متكوليش ليا مامشيتيش ؟
- تودة ( ضحكات ) :
بقا معايا خالي حتى قبلت وفعلا صايبت الوراق ومشيت لبنان ودار ليا البوم لبناني ولكن ماعجبنيش داك الهيت ورجعت بحالي انا كبرت على العيطة ماشي على روح روح
- يونس ( كيضحك ) :
وشوف لك خالتي تودة ولبنان لالا وعاريتي
- تودة ( كضحك ) :
ومال حسك حنا كنلعبو هنا كنعقل الاغنية كانت فيها " مين اصدق قولي مين .. قلبي وروحي واحساسي ولا كلام الحلوين .. ولا اجرب حواسي ؟
كلامك والله كذاب .. نظراتك تسحر الألباب وبحسنك ماحدا جاب .. كيف اشيلك من راسي ، لو مره شاعر مجنون .. حب بشعره يغازلني ما اسمع له لو مهما يكون .. احبك انت تدللني احبك تهمسلي وتقول .. همساتك شي مش معقول جنبك حياتي بتطول .. بتنسيني مأسي ( تنهدات تنهيدة طويلة بالعة غصة فحلقة رمشات بطرف شفارها كتجري على الدمعة لي كانت مهددة باش تنزل ) ..
- رجاء ( مبهورة بيها ) :
والله حتى صوتك واعر اخالتي فهاد الأغاني المشرقية
- تودة ( كضحك ) :
ولكن العيطة بوحدها هاد الاغنية فياماتها راه دارت بوم هادشي راه فتسعينات ديك 97 هكاك 96
- سميرة : مكاين ماحسن من غنا البلاد أما داكشي كيجيني انا تخربيق
- رجاء : لا أمي عاوتاني كل بلاد وهي وكل ناس وغناهم
- سميرة ( ميقات فيها ) :
حيدي عليا حتى هداك غنا كيخلاتها تودة الغنا زين هو دشحال هدا دبكري فاطنة بت الحسين والحمونية وبوشعيب البيضاوي خليني من هادشي تاعكم توما ..
- رجاء ( بتردد ) :
خالتي فين هوما داركم عمرني سولتك ؟
- تودة ( بحال الى قاست ليها الجرح وفيقاتو ) :
والديا فنواحي دالخميسات انا قريت حدي الجامع وخرجني با من القرايا وبركت عمري شت المدرسة .. ومنكدبش عليك ابنتي انا كنت حويرة نموت على العراس العراس والغنا وبا كان راجل ديݣوردي ماعدوش مع هادشي وكان واعر مكايتفاهمش درت 16 عام بان ليه يزوجني لواحد السيد صاحبو كبير مني ماكبير غالله وانا نهرب ومشيت لعد خالي لجديدة ايوا تم بقيت وتم كبرت وتم تربيت بقيت عند خالي حتى كان جاتو واحد الكونترا لبرا ومشا دا مرتو او ولادو عاد تحولت من تم لدار بيضة ..
- سميرة : وعمرك مشيتي لعدهم ؟
- تودة : هاي هاي مشيت مامرة ماجاج با عمرو بغا يشوفني تايݣولهم ماعندي بنت عندي أدكورة ، خوتي راه كبار مني بولادهم دابا وحفايدهم تزوجو بكري ماعيطو ليا جتى لنهار با مرض وطاح فالفراش ومشيت نشوفو الحمد لله لي مشا عند ربي وانا مسامحة معاه .. ميمتي كانمشي نطل عليها وندوي معاها فتيليفون الله يخلي ليها صحيحتها .
- سميرة : حتى انت وشحال داز عليك أخويتي
- تودة ( بلعات ريقها كضحك ) :
شكون فينا لي مدازو عليه الغرايب لي مداز عليه الكثير داز عليه القليل الحمد لله المعروضة من الخير ولي جات من عند الله مرحبا بيها .
- وصلو للجديدة مع جوايه 6 ديال العشية ، بقات تودة كتنعت لليونس جتى وصل للبلاصة لي كاينة فيها الدار لي شداتها من عند واحد الجارة قديمة ، قصدات مول الحانوت نيشان خدات من عندو الساروت .
- نزلات سميرة ورجاء مخلين يونس بلاصة الطوموبيل .. حلات تودة الدار ودخلو الدار كانت كبيرة فيها زوج بيوت والمراح ، بيت كان ديال النعاس فيه نموسية كبيرة مع ماريو وكوافوزات وبيت لاخر فيه سدادر وزوج طبالي وعاد المراح فيه السدادر وفيه تلفازة پلازما والكوزينة كانت كبيرة بماعنها عاد الحمام وطواليط .
- رجاء ( موجهة كلامها ليونس ) :
دخل دوش بعدا تحيد العيا ديال الطريق .. داكشي لي دار يونس دخل يدوش وجدات ليه رجاء حوايجو اما تودة وسميرة مشاو للبيت ديال السدادر خلاو بيت نعاس ليونس ورجاء ، تكاو على السدادر كيرتاحو خصوصا تودة لي عيات يوماين وهي كتشد طريق وطلقها طريق ..
- فجهة أخرى فالموسم .. ضارت عنبر عند صاحب الصوت وبإبتسامة ضات عليه :
لالا الله يكبر بيك ماشي مشكيل ماشي اليوم
- أدريس ( بإبتسامة ) :
الى بغيتي تصوري مع الخيل مكاين حتى مشكيل
- عنبر : الله يكبر بيك أعمي ربي يخليك .. هزهز ليها براسها وكملات الفراجة حتى سلاو وبداو الناس كيتفرقو ، ناض رشيد أشر ليها براسو باش ينوضو تبعوه من اللور حتى خرجو من تم
- رشيد : غانرجعو للأوطيل فالعشية نخرجو نتعشاو خاصك تنعسي بكري ، غدا دراري غايجيو خاصك تنعسي بكري باش تريپيتي انت وياهم قبل ماطلعي فالعشية
- عنبر ( غادة بجنبو ) :
أشمن وقت غانطلع ؟
- رشيد : مع 11 دليل هو كيبداو مع 9 ودايرين بلي اطلعي مع 11 غالبا كيتعطلو ديك نص ساعة ايسبقو الفرق المحلية وتابعهم وليد الرحماني عاد انت نورمال خاصك تكوني انت الاولى على ود اول مرة ليك ولكن سير رضوان درجك فلاليست تكوني انت 3 إن شاء الله
- عنبر : عاهدي بلالييت كتوجد قبل
- رشيد : بنادم فاش كيبان ليه الربح من شي حد لي دار بوم فالانترنت كيبغي يدخلو بأي طريقة اباش تعرفي وناس دالمهرجان هوما لي غايلبسوك ويقادوك
- عنبر ( قبل لا طلع لطوموبيل ) :
انا بعدا راه شيحاجة معيقة والله منلبسها اباش تكون فبالك وصافي ..
- الأجواء الليلية كانت غير الأجواء ديال الصباح الخيالة غاديين يبدلو عليهم ويرتاحو فغرفة من الغرف ديال الدار لي كانو فيها أدريس والبقية حال البالكو وݣالس كيخمم سيناريو حياتو داز قدام عينيه تنهد تنهيدة طويلة هز راسو فأدريس لي دخل عندو ݣلس حداه حط ليه كاس دالقهوة ..
- أدريس : من الصباح وأنت كتسف فأتاي قاد مجاجك بهاد الكويس .. هز عبد الخالق رشف منو رشفة وحطو
- أدريس ( شافيه بقا مدة ساكت حنحن ونطق بكل هدوء ) :
التخمام كيرشي أخويا
- عبد الخالق ( تنهد وتبسم نصف إبتسامة ) :
وشكون لي غادي يخمم إلى ماخممت أنا كتشوف حياتك مشات هكاك ماعشتي ماتحبيتي ما والو
- أدريس : وأنت أخويا لي مابغيتيش كاع الناس كطلق وتعاود حياتها من جديد حتى ليك أنت
- عبد الخالق : الله يهديك اخويا واش كاينة شي وحدة اتقبل دخل على دري و3 ديال البنات الله يهديك ندويو بلوجيك
- أدريس : مكندويش على داك الوقت كندوي فاش الوليدات كبرو كان خاصك تم تعاود حياتك تشوف شي مرة توالمك .
- عبد الخالق ( هزهز براسو ) :
فات الفوت درنا 62 عام دابا مابقا زواج ( شاف قدامو كيخمم ونطق وهو كيشوف فالفراغ ) كنحس بحال الى كنخلص فذنوبي
- إدريس ( تنهد ) :
الله غفور رحيم أخويا .. مادرتيهاش بلعاني ، تحيد الرواق ودخل عليهم الروطال جر كرسي وݣلس :
انتوما هنا
- أدريس : ماخرجتيش انت وعصام ؟
- الروطال ( هزهز براسو ) :
خرج يتلاقى مع طارق جاي فطريق
- عبد الخالق ( شافيه ) :
وايلي عݣب جا ياك كالك عندو شي خدمة ؟
- الروطال ( مفرق رجليه لابس سروال سوفيطمة وضوني طويل ) :
سالة لافير لي عندو هاد الصباح ومافيه لي يبقى فدار كال يجي يدوز هاد الأيام معانا
- أدريس : مادويتيش مع خوك ؟
- الروطال ( هزهز ليه براسو بالإيجاب كيلعب فلحيتو ) :
سونيت ليه ݣبيل غارق حتى لودنيه
- عبد الخالق ( طانز ) :
تبع حرفت باه هدا هو لي كيخدم فالمخزن مكايحكش راسو كون دار ابحالك أنت ولا خوك
- الروطال ( شافيه هاز حاجب ومنزل الثاني ) :
عمي طانز عليا .. خدمتي خاص نبقى حال عينيا مع الكبير وصغير
- أدريس : بسيف المحال لي حطو عليه العين كطيرو ليهم
- الروطال ( رجع راسو اللور مقهقه بضحكة رجولية نزل بالجسد ديالو على الكرسي مربع يديه ) :
حتى حد مݣاليهم يبقاو كالسين الخدمة هي هادي
- عبد الخالق : هي شي محال جاي فطريق ؟
- الروطال : مخبازة فالمعاريف إلى بغا الله
- أدريس ( شافيه بعدم تصديق ) :
علاش أولدي شحال من مخبزة عندك ؟
- روطال ( كيحسب ببرود ) :
شي 3 هكاك وهادي الرابعة علاش ؟
- أدريس ( شاف فعبد الخالق ) :
هذا راه تفربل براكة ستتمر فشيحاجة أخرى ماعرفتو فين باغي يزيد ؟
- الروطال ( بنفس البرود ) :
أوطيل فمراكش
- أدريس ( عصبو ) :
ياك عندك واحد فمراكش على الثاني لي فبوسكورة ولاخر لي عاد درتي فأكادير واش انت ڤن ولا ضاربك تران
- الروطال ( شاف فعمو ) :
عمرك شتي شي حد حاسد ولدو على خدمتو ؟
- عبد الخالق ( كيضحك ) :
لا الصراحة عمري
- أدريس ( بجدية ) :
داوي بصح مكنتريݣلش ، دخلتي مع ولد عمك شريك هانتوما تبارك الله كتستتمرو فالخيل مع صحاب الخليج دزتو للبيض وليتو تفرقوه على المغرب كامل .. ݣلتو بغيتو توليو تبيعو وتشريو فالحوالة والحمد لله نجحات ليكم وباركة أولدي تبارك الله درتو سميتكم فسوق خبع فلوسك
- الروطال ( بجدية ) :
شنو فيها الى درت اوطيل خور اي حاجة كندخل عليها كنستافد منها الحمد لله وكترجع عليا بربح .. الواليد انا فينما شفت مصلاحتي كنحط الرجل مغانبقاش نتعامل غير الناس لوكس راه حتى دوك لي ماعدهم خاصهم محالات ومخبازات على قد جيبهم الله يهديك ..
- عبد الخالق كيشوفيهم وكيضحك
- أدريس : ضحك انت شي نهار يجي يݣولك نحل شي اجونص ديال طوموبيلات ولا شي محال دروايح
- الروطال ( ببرود دار رجل على رجل ) :
لا طوموبيلات دومين دعصام الروايح مزال نشوف
- أدريس ( هز واحد الڤاز ) :
قسما بالله حتى ندلقشك
- الروطال ( كيضحك ) :
كنموت عليك أبا ادريس ( سيفط ليه بوسة فالهوى ) ..
- فقهوة من القهاوي لي فالجديدة .. تعشاو بالحوت واحد الجو كان زوين بنهار كيكون سخون الحال ولكن بالليل كيكون واحد البرد زوين
- رجاء ( كتحس بواحد الفرحة كبيرة عمرها حسات بيها فحياتها كلها ) :
اول مرة نخرج ونسافر ونتعشى على برا الله يخلف عليك اخالتي تودة انا بغيت ربي عمرو يخيبك
- تودة ( بإبتسامة شادة شعرها بمقبط الفوق والݣصة الكحلة كيلعب بيها البرد ) :
اللهم آمين الله يرضي عليك ابنتي بصحتك وراحتك
- سميرة ( عنقاتها من دارعها ) :
هادي راه ختي لي جزاني بيها ربي الله يخليها لينا ياربي
- تودة ( طبطبات ليها على يدها ) :
حتى انت اختي سميرة ..
- يونس ( جبد تيليفونو ) :
وبلات نتصورو ، تصورو 3 تصاور وعاد تصور هو ورجاء بوحدهم .. ناض من حداهم خلص العشا ناضو من تم غاديين فتجاه الدار دخلات سميرة وتودة ويونس هو ورجاء مشاو يتمشاو شوية جنب البحر ..
•••••••
- فبيتها ݣالسة معاها حياة كتلعب برجليها وتخمم شافت فعنبر :
شنو اتغني غدا إن شاء الله ؟
- عنبر ( كتفكر ) :
عطا الله مايتغنا شيحاجة لي تجي مع المواسم وتحرك الناس من تما لتما يحن الله
- حياة ( كتخمم ) :
كاكرهتش نتزوج بشي واحد من دوك لي شنا ݣبيل دوك الپارضية شتي كيدايرين
- عنبر ( كضحك ) :
واهي البارضية يا مالين الخيل انت تاكلي وتشربي وانا حرارة عليا واهي البارضية يا مالين الخيل وانت لابسة شربيل وانا غاتحايتية .. وطلعي فوق القعدة ودردكي فوق القعدة فين معانا ياك اتاما وانا حمالة تحملو وينا ركابة تركبو وعنق عنق لا تعنقشي من والا وعنق وشوف من هنا حتى لصباح الحال اه هو اه هو وايه وايه وايه ..
- حياة : الصحة ( كضحك )
- عنبر ( تجبدات فبلاصتها ) :
ياك نشطك وسيري اختي لبيتك خليني نعس غدا عندنا مايدار نوضي .. ناضت حياة طفات عليها الضو وسدات الباب مشات لبيتها وخلات عنبر لي غيات فنعاسها .
_____________
فطرو فالأوطيل سبقهم رشيد لفين كاينة المنصة لي ايكون فيها المهرجان باش يتلقى لدراري ديال الفرقة لي كيخدمو مع عنبر .. غير سلاو الفطور طلعات عنبر لبيتها لبسات عليها سروال ديال التوب واسع من التحت فلون بيض بارد مع تيشورت عادي فلون كحل شعرها خلاتو مطلوق باين من التحت مامقادش فتقطيعة .. دارت ماسكارا وايكغو لوجها هزات ساك صغير دارتو على جنب وخرجات مشات لحدا شومبر دحياة كتعيط :
حياة ( دقات ) .. حلات حياة الباب لابسة كسوة طويلة فالأوغونج مع صندالة صيفية كتجمع فشعرها سفنجة :
هاني صافي ساليت لا بلات ( رجعات كتجري رشات من واحد ريحة صيفية كانت خداتهاهي وعنبر وعاد رجعات بعندها وسدات الباب ) ..
- نزلو لتحت فين كان عزيز كيتسناهم ، تبسمات ليها البنت لي فالاستقبال ونطقات :
تبارك الله عليك شفت الفيديو ديالك غزال صوتك وحتى انت فنة
- عنبر ( توترات وحشمات ) :
ربي يخليك
- واخا نتصور معاك الى جات على خاطرك
- عنبر : اهاه واخا .. جبدات البنت تيليفونها وتصورات معاها حدها بعدات وجات البنت لوخرا لي كانت خدامة معاها وحتى هي طلبات تصور مع عنبر ، إحساس جاها غريب لأول مرة فحياتها تعيشو كانت كتشوفو غير فتفلفازة مع الفنانة لي معروفين ..
- حل ليها السيد لي عند الباب الباب بإبتسامة ، بانو ملامح الاستغراب على وجها .. شافت فحياة وتبسمو بزوج لقاو عزيز كيتسناهم كيكمي واحد الݣارو غير شافهم ولاح الباقي ، حنحن بصوتو الرجولي :
اتبارك الله على لي كيعيش ليا أجواء الشهرة
- عنبر : اجواء الشوهة هادي ماشي شهرة انا راه هادشي جاني فشكل بحال الى كنحلم ..
- عزيز طلع لطوموبيل طلعات حداه عنبر وحياة اللور ديمارا وشد الطريق للبلاصة لي كانو فيها البارح ..
- بحال الصباح ديال البارح صابحين فالخيمة غير هاد هاد المرة لي زايد عليهم هو الطارق
- عصام ( واقف عليه ) :
فيك مايتحرك واحد الشوية فاروق كاعلا تعول عليه ماتشوفو حتى الليل
- فاروق ( هز فيه راسو ) : غاسير معاه راه والله مايتفاك معاك وايبقى فارع ليا راسي
- طارق ( وقف بطولتو نافش صدرو وكتافو ) :
باغي غير تهنى مصدرنا
- فاروق : وراه ماعندكم مايدار هنا الفراجة مغاتبداحتى ل 5 دالعشية ..
- طارق : ماݣلتي عيب أمعلم .. هز تيليفونو وسوارت طوموبيلتو وخرج هو وعصام غاديين كيتمشاو باغيين يخرجو من ديك الجهة لجهة السوق يتمشاو فيه .. وصلاتهم دندنات موسيقية لودنيهم هز عصام راسو لجهة المنصة ديال المهرجان أشر للطارق براسو :
الفيجطة غاتكون هاد الليلة
- طارق ( مصغر عينيه كيحقق كتبان ليه وحدة طالقة شعرها عاطياه بظهر وصوت الشعبي واصل لعندو ) :
الواليد وعمي كاعما عندهم مع هادشي شوف أمع خوك واش يبغي يحط رجلو هنا
- عصام ( جرو غادي بيه ) :
بالله مانتفاك معاه اخليه عليا .. تحركو من تم غاديين الشمس كانت حارة والجو كان سخون نوعا ما كيدورو راسهم يشوفو منين يخرجو باش يتوجهو لسوق .. على إثر الدفعة لي تدفع ضار باش يطلب السماحة ..
- ( بصوت انثوي قوي ) تراكتور دايز كتفي كلعتيه من بلاصتو اخويا شوف ݣدامك اويلي ستغفرت العظيم
- طارق ( طلعها ونزلها ) :
سمحيليا ماشفتكش ؟ وغير بشوية الناس كيدويو بأداب
- ( غوبشات فيه مطلعة راسها فيه طولتو كانت باينة مقارنة مع قصوريتها ) :
لا نغنيها أخويا راه كتفي فكيتيه من بلاصتو واخا تكون كتاكل الحجر ياربي السلامة العفو
- طارق ( مصغر عينيه كيدور لسانو وسط فمو مابغاش يغلط فيها خصوصا هو منو لافوت بصوت رجولي وببورد ) :
سمحيلينا مزيانة دابا ؟
- حياة ( دارت للجهة لي سمعات فيها العياط كيبان ليها عزيز واقف كيعيط ليها ويشير ليها بيدو ) .. مشات كتجري زربانة منخلا طارق والاعتذار لي عتادر ليها
- طارق : بنادم مامربيش
- عصام : زيد اصاحبي تديها فوحدة برهوشة .. جرو غاديين خارجين من واحد الجهة كانت خاوية متوجهين للسوق ..
_____________
- دازت التبوريدة فالاجواء لي موالفينها تدوز سلاو مع 7 ديال العشية الباضية راجعين بحالهم وعاىلة حيدر رجعو للدار
- عصام : وصاحبي مالك معقد اش فيها الى مشينا تفرجنا شوية او ؟
- روطال : واش أنا شديتك ( كيحيد فحوايجو ) راه الباب ݣدامك سير فرقني الله يرحم باك خليني نرتاح
- عصام ( عصبو ) :
اكبر معقد شتو فحياتي هو انت قسما بالله المعبود
- الروطال ( ببرود غمز طارق ) :
هذا فاش عينو ؟
- طارق ( مجبد فوق النموسية ) :
وراه عندو الصح ماعييتيش من الخدمة خلينا نفوجو شوية نتفكرو الليالي الملاح
- الروطال ( داخل للحمام ) :
تحاميتو شارجاك .. طلق الما كيدوش كيحيد فالعيا ديال النهار كاملو ، بقا كيتسنى فيه حتى خرج لاوي عليه الفوطة شعرو كيقطر بالما مشا للجهة الماريو داير ديودورو ديالو جبد حوايجو كيلبس فيهم
- عصام : اش درنا ؟
- الروطال ( شافيه هاز حاجب ومنزل الثاني عصبو ) :
خليني نعسو واحد ساعتين ديال المݣانة ونخرجو بردتي
- عصام ( عنقتو ) :
العز
- الروطال : لي عندو شي بيت يقصدو خليوني نخمد ..
- طارق : وليتي تجري علينا على عينك ابن عدي ، ماكلتي عيب .، خرج هو وعصام سادين عليه الباب طفا الضو وتلاح على النموسية مغمض عينيه كيحاول يرتاح .
- على برا .. كالسين مجموعين عصام وطارق وأدريس مع عبد الخالق
- عصام : متخرجوش تفوجو شوية ؟
- أدريس ( هاز يديه ) :
لالا أخرجو انتوما شباب مك من صباح وهي تسوني تسيق الخبار ليا خارج نتفرج فالمهرجان غدا نلݣاها هنا
- طارق ( كيضحك ) :
الله يعز الحكام
- ادريس : نهار تجرب غادي تعدر دابا توصل نوبتك
- عبد الخالق ( بتساؤل ) :
دويتي مع ياسمين ؟
- طارق : دويت معاها لبارح كتجري مع التريتور غير تالفة ديك البنت ومفعفعة ..
- أدريس : وراها عروسة بسيف ماتفعفع ، وقف طارق :
انمشي نحط راسي شوية حتى انا حتى دير وفيقني ( موجه كلامو للعصام ) :
- عصام : انا هو سرسار ديالكم الله يخليها قاعيدة فيكم . متسوقش ليه طارق توجه للبيت محيد تيشورت ديالو تلاح عريان فوق النموسية مغطي راسو بالمخدة ..
••••••••••
- على برا كيتسناو تودة لابسة عباية فالكحل منبتة بالحجر شعرها جامعاه بقراصة ومخرجة الݣصة شادة شال ديال العباية لي حتى هو منبت لايحاه على راسها مخلية الݣصة كتبان كحلة غرية دايرة خاتم كبير فصبعها وساعة بسيطة فنقري مع صندالة صيفية فالكحل ظفارها صابغاهم بالݣرونة ..
- ورجاء اويلي ساعة وانتوما توجدو
- سميرة ( لي كانت لابسة جلابة فالكرونة مع شال فنفس اللون وساك فالكحل ) :
هدا راه هو حالها رحيلها تقيل
- تودة : وباش ناخدو بلايصنا للقدام جاب الله تلاقيت مع الخليفة عطاني 4 البادجات باش ندخلو باش بلاما نبقاو واقفين ورجاء ماتقدش على الوقيف
- سميرة ( بإبتسامة ) :
لهلا يخطيك علينا وخلاص ، خرجات رجاء لابسة كسوة طويلة فالبلو مارين مع زيف فالبيج وساك نفس اللون فهاد الايام بانت ليها الراحة على وجها .. تبعها يونس حتى هو لابس قميجة جامع ليها كمايمها وسروال الدجين
- تودة : وتعطلتو زيدو خلاص ، طلعو فطوموبيل ديمارا يونس وشدو الطريق للمهرجان ..
- فجهة أخرى وفالصالة المخصصة للتبدال كالسة عنبر لابسة تكشيكة فالأخضر السفيفة ديالها عريضة فالذهبي حزامها فوق الطبلة حتى تسالي ليها الميكاب ارتيست المكياج .. شعرها جامعاه ليه بمشيطة راقية كتوضع ليها اخر اللمسات ..
- حياة ( دخلات عندها فرحانة ) :
عرفتي على برا مبوربي بالناس تبارك الله انا وجاتني الخلعة
- عنبر ( مابغاتش تحرك ) :
ماتخلعينيش وانا اصلا مخلوعة .. بعدات البنت لي كتقاد ليها ونطقات مع إبتسامة :
ماعندك علاش تخلعي تبارك الله صوتك فن غزال شفت الفيديو ديالك وشافتو واحد جداتي سمعاتني مخدماه قالت ليا شحال ماسمعات بحال هاد صوت يغني العيوط
- عنبر : لهلا يخطيك .. على برا دخلات تودة هي والبقية تلقى ليهم الخليفة سلم على تودة لي كان كيعرفها عز المعرفة من غناها والعراس لي كانت تحيي .. شدو بلاصتهم كالسين الجهة لوخرا فيها الناس واقفين بلاصة الرجال وبلاصة العيالات ، من الجهة اللوخرا دخل طارق وعصام معاهم فاروق مشاو لواحد الݣايطون لي كان كيظم مدير المهرجان والقايد والمقدمية ومدير الجهاز الامني لي مكلف بالمهرجان ومعاهم بعض الظيوف المهمة ، الصحافة كلها مشتتة والاضواء الكبيرة كلها مسلطة على المنصة ديال المهرجان ..
- رجاء : معاش ايبداو ؟
- تودة : دابا نيت ..
- طلعات المجموعة الأولى غنات فرق محلية من وراها جات نوبة ديال عبيدات الرمى خريبݣة برئاسة قايد الفرقة رضوان من الجهة لورانية للمنصة واقفة عنبر مع رشيد حتى وقفات عليهم الإداعة التلفزية المغربية عنبر مصابت ماتقول تفافات وجاها الستريس والخلعة ، سولوها على الفيديو لي تنشر ليها جاوبات بصريح العبارة بلي كان غير صدفة أما برايها على مرورها فالمهرجان قالت :
الصراحة فرحانة تجريبة جديدة بنسبة ليا وإن شاء الله نعجب الجمهور الكريم .. خداو الكلمة من رشيد حتى هو وتوجهو للفانين اخرين ، رشيد كان عارف الاغلبية ديال الفنانة لي كانو تم همس للعنبر :
كاع هادو لي كاتشوفي دازو فأوطيل المامون وشوفي دابا فين وصلو
- عنبر ( كدور بعينيها ) :
هداك وليد الرحماني ياك ؟
- رشيد : هو هداك واش كيعجبك تقدي تصوري معاه
- عنبر : علاش انتصور معاه زوينة هادي ، صوتو كيعجبني وصافي كيطربني ( كتقلب بعينيها ) فين هي حياة وعزيز ؟
- رشيد : كاينين على برا جهة لاسين خليت ليها التيليفون باش تصورك منين طلعي
- عنبر ( كضحك ) :
حياة خطيرة فتصوير والله الى ماعدك ماتسالها كتبقى مركزة مع لقطات
- رشيد ( كيضحك ) :
هادشي علاش عطيتها تيليفون شتها كيصوراتك داك النهار فاش كنتي كتغني مع ماكتش مسالي مديت ليها تيليفون وللهيلة ماعندك ماتساليها واخا عمرها شدات السمارت فون
- عنبر : ماشي بضرورة نكونو مولفين شيحاجة باش نتقنوها خاص تخدم أهدا ( أشرات لراسها ) انا عييت بهاد الطالون بغيت أنݣلس
- رشيد : رتاحي بقات ليك نص ساعة وطلعي
•••••••
- فاروق كان مجمع مع واحد السيد حداه عصام شاد التيليفون اما طارق كيشوف فجهة وحدة الجهة لي قدامو .. واقفة لابسة سروال فالكحل مع قميجة ديال الستان فالكحل سميطة راسها مذهب مزينة بيها السروال اما شعرها هازاه على شكل ذيل حصان شادة جماعة مع شخص لي كان حداها .
- طارق ( نغز عصام ) :
ماشي ديك خيتي هي لي دخلت فيها ݣبيل ؟
- عصام ( طفا التيليفون وطلع راسو للجهة لي أشر ليه ليها طارق ) :
ماعرفتش يمكن
- طارق : هي هي عقلت عليها المزعزعة ، اش كدير حدا لاسين ودايرة حتى هي البادج
- عصام : كتسولني انا مالي كنت معاها الله وأعلم ..
- طلع لاسين زوج ديال الأشخاص بنت لابسة تكشيطة هازة ميكرو او كارت ومعاها رجل لابس لباس رسمي حتى هو هاز ميكرو وكارت ..
- البنت : كيما ستمتعنا بصوت الفنان ديالنا وليد الرحماني لي متعنا بأغانيه الجميلة نورنا فهاد المهرجان وفهاد المدينة الجميلة المحبوبة ..
- الرجل : موسم مولاي عبد الله أمغار الغني عن التعريف لي كيظم مختلف الثقافات والفنون الجميلة نورتونا كيما حنا نورناكم
- البنت : والآن مفاجأة السهرة مولودة العيطة صوت جبار ( شافت فالرجل لي معاها ) أنا بعدا افيصل فاش شفت الڤيديو ديالها وسمعت صوتها خدات ليا العقل ماشاء الله
- فيصل : حتى انا بحالك أزينب ماشاء الله صوت جبار وغايكون عندها مستقبل زاهر فالعيطة ( شافو فالجمهور وفدقة وحدة ) بلاما نطولو عليكم كنقدمو ليكم مولودة العيطة عـــــــــــنـــــبـــــر ..
- حياة ( كتصفق دارت صباعها ففمها وبدات كتصفر ) عنبر كانت خايفة ومتوترة كلها كترعد هزات الميكرو وطلعات بشوية فدروج بصندالتها العالية المذهبة الأغلبية لي تم شاف الڤيديو ديالها كولشي كان متحمس يشوفها مباشرة وقفات على المنصة مبهورة عمرها شافت بهاد المنظر هزات يديها شيرات ليهم تحت تصفيقاتهم ..
- بدات الموسيقى تقيلة ومن الدخلة كانت معروفة الأغنية لي كانت مشهورة على شفاه بزاف دالفنانين كاين لي تقنها وكاين لي لا .. الودنين كاملين متوجهين للعند عنبر وحتى العينين ديال الترقب وعينين الشك هزات يدها لي قبل كانت مبرقعة بالأحمر اما دابا كانت عادية بفعل كريم الاساس لي دارت ليها البنت وغكات ليها التوحيمة لي فيدها غمضات عينيها ونطقات بصوتها الباح الجوهري :
آنا وأنا وأنا وأنا وأنا وأنا وأنا وأنا واعادا عادا
وبا هيا با مولاي عبد الله الوالي راحنا جينا نزورك
نضنا فرحانين آلالة مشينا مجموعين، أهيا الوالي الحنين
وتعالى تشوف الزين، آرا السوالم جايين زايرين
واولدي جاو خيل العونات، آلالة جاو خيل ولاد فرج
جاو خيل جعيدان، جاونا القواسم آلالة حكامت الطير الحر .
آمولاي مولاي عبد الله، وهيا بني مغار
ياك اللي زاروك كانه شاف الجنة بنهار
عندو تسع شراجم آآآآه عندو تسع شراجم
تلاتة صاضين البحر، تلاتة للجرف الصفر، تلاتة صاضين لقبلة
اللي هو مولوع أسيادي را الجامع تما .. صوتها خلى الكل ستهي معاها رجال وعيالات ليدين تشالي واخدة ليهم العقل .. دندنة ورا دندنة حتى وصلات لاخر فصل فالأغنية الموسيقى تنقلات من الريتم التقيل لريتم الخفيف لي خلا لي كالس يوقف وأولهم عصام لي كان هاز التيليفون ديالو كيصور وكيتنغم فنفس الوقت ..
بانت الكتبية مدوحة تفاجي عالغراس يا با
هيا ودي كاليكوم العيادي بلغو سلامي لولاد الرحامنة دوار بدواركل قديم سلامو جديد، يا واللي كرهنا محبة الله تكافينا معاه ودعيو معانا ويا الناس ملي توكنو مجمعين عالكاس أ ناس الهوى يرحمكم الله آهيايوا ويوا يوا سير وكان (يوا يوا يوا يوا)
ويوا يوا سير وكان (يهاه) وا خويا بان أوا ساعف يا الهوى ..
- سالات الأغنية الأولى تحت التصفيقات الناس وتصفار كولشي عجباتهم عنبر .. فجهة أخرى وفصف الاول اونفاص مع عنبر ݣالسة على وضعية وحدة مقابلة معاها منين طلعات وهي كتحقق فيها وفصوتها سميتها لي كان عندها أثر كبير عليها لي ماسمعاتهاش هادي 13 عام ، ملامحها لي مغرابش عليها إحساسها كيقوليها راه هي هادي واحساس باغي يكذبها مكانتش دايرة مكياج تقيل كان مكياجها خفيف نوعا ما واخا الشفار او واخا المشطة إحساسها كيقوليها راه هي .. قلبها لي قرب منها ممكن يسمع دقاتو ولي شد ليها فيديها ايلقاهم باردين وأحس وصف ممكن نقولوه على يديها جامدين لسانها ناشف ماكرهات تنوض عندها وتحقق منها تسولها واش انت عنبر لي ربيت على يدي واش انت هي ؟
- كانت محتاجة دليل يبرهن ليها بلي لي قدامها عنبر مايمكنش تنساها واخا دوز حتى 30 عام ولكن كانت محتاجة شيحاجة بسيطة بحال الفتيلة تأكد ليها الشك ديالها ، العيطة هي علماتها ليها ولكن لي بغا يتعلم العيوط راه ايتعلم ليهم داك الكرسي تحت منها ولا بحال الشوك بنسبة ليها وقفات هزات فيها رجاء راسها :
خالتي فين غادية ؟
- تودة ( هزهزات ليها براسها ) :
انا جايا .. توجهات للجهة لي قريبة لاسين او وقفات تم قريبة بزاف من الصحافة والناس لي كانو قراب لاسين وكيصورو .. ضارت عنبر وراها كتقاد فالقفطان ديالها أشرات براسها للموسيقيين باش يبداو بالأغنية الثانية ، فجهة اخرى كان ݣالس ومركز مع لاسين ساهي فيها وكيسمع ليها كان على ماقربة من لاسين كاتبان بشكل واضح فالقفطان لي لابسة فورمتها لي كانت زوينة كل حاجة بقياسها حتى حاجة مزايدة على حدها .. شاف فطارق لي مرة كيشوف فجهة لاسين ومرة كيشوف لجهة حياة لي منين بدات عنبر وهي كتصور فيها مرة تشطح وتشالي ومرة تصور نزل رشيد للعندهم واقف مع عزيز وحياة قدامها ب 3 بيهم لابسين البادجات الخاصين بالمهرجان ..
- بدات الموسيقى بشوية وبشكل عصري غادية بريتم طالع حتى تحولات للهيت ، موسيقى لي مايمكنش شي حد يسمعها ومايوقفش يهز بكتافو عصام بدون شعور هاز التيليفون وكيهزهز بكتافو تحرك فيه دمو الغرباوي طارق لي بدورو وقف وقرب من عصام واقف حداه واخا مكانش كيشطح ولكن داتو من الداخل تحركات من غير فاروق لي بقى كالس وكيسمع بكل اذان صاغية..
- عنبر ( هازة يدها لي مزينة بخاتم وساعة كتشالي بيها وليد لوخرا هازة الميكرو والابتسامة على وجها ) :
طاحت نقطة فالوطة واش يوصلني ليك وا فاطنة وخليني بيني وبين ݣرينتي ، هي غادة لدارهم وانا فين غادي نمشي .. هاديك هي المالكاني هاديك هي جوارحي يا وسالوني يانا ونخدم انا كريريب حتى نقضي حاجتي ناري عمالة واوا هاوانيا مادوم ودايم هو الله واوا هاوا جات الموت داتو والواد شما دامعاه ..واواها وا بنا قصر فجنة وجهنم حداه ، كانت فمود عالي كاتحس براسها طايرة غافلة على الجسد لي وقف قدامها التحت كيشوفيها بعينين مغرغرين بدموع دموعها هابطين سيالين سخان علاش ماتبكيش وهي براسها حفظاتها هاد الاغنية ومكاينش لي كيغنيها من غيرها ولا يعرف ليها غير تودة لي كانت تكلسها حداها وتغنيها ليها وهي كدندن معاها بصوتها الصغير الحنين الباح اللبيب ، دموعها ماحبسوش كتحس بنخاصي فقلبها وسخفة بغات تشدها ركابيها مابقاو هازينها ..
- زلق الشال من على راسها مبين على شعرها الكحل الغري ، فوق لاصين كانت كتشطح بيديها مدورة عينيها على الناس لي كانو كيشطحو ويشاليو ويغنيو معاها نزلات راسها لحياة لي حلات شعرها كتدب ليها مرورا بعزيز ورشيد واخر من زار عينيها هي المرة لي واقفة ومقابلة معاها قريبة ليها على بعد خطوة منها كتشوف دموعها صغرات عينيها كتحقق فيها ، مايمكنش تكون هي ومايمكنش تنساها عارفة راسها كتعقل مزيان على اي حاجة دازت فحياتها خصوصا السيدة لي رباتها وكترض ليها البال وكانت كتبغيها بحال مها ، حسات بقلبها رف الرعدة شداتها من رجليها وعينيها غرغرو بدموع مافكراتش جوج المرات ضربات الدورة ونزلات بخطوات سريعة تحت انظار الناس والحضور كتجري بحال الهبيلة مرمية فحضانها الموسيقى ماحبساتش مغطيين على هاد العطب ..
- عنقاتها تودة بكل قوتها مدخلاها فضلوعها وكتبكي الكحل كلو نزل كتشهق بالبكا مامتيقاش راسها البنت لي كانت صغيرة لي كانت كتبغيها وكتحماق عليها لي رباتها وكانت فمرتبة مها هاهي قدامها مرأة .. عنبر لي حسات براسها بحال الى مها حياة من جديد وهاهي بين يديها كتبكي وتقول مابكات كولشي تجمع عليها الفرحة ورهبة اي إحساس زوين تحط فقلبها بحال الى الدنيا ضحكات ليها من جديد ، بعدات تودة شادة ليها فوجها كتحقق فيها وتبسيمة على وجها باست ليها راسها ماسحة ليها دموعها همسات ليها فودنها :
كملي دابا حتى تسالي .. هزهزات ليها عنبر براسها جاراها من يديها مطلعاها معاها فوق لاسين بحال الى لقات شيحاجة كتخصها وخايفاها تهرب منها ..
- عنبر مدات الميكرو لتودة بايساها فوجها باش تكمل ، شدات عندها الميكرو بإبتسامة تحت نظرات الاستغراب وتساؤلات لي على وجوه الناس وتوشويش هزات تودة يدها الغليضة المصبوغة بالݣرونة مغمضة عينيها كتردد :
طاحت نقطة فالوطة واش يوصلني ليك وا فاطنة وخليني بيني وبين حبيبتي ، هي غادة لدارهم وانا فين غادي نمشي .. هاديك هي المالكاني هاديك هي جوارحي يا وسالوني ياناو ، ونخدم انا كريريب حتى نقضي حاجتي ناري عمالة واواهاوا حبو فصلا ونحمة ديما مݣابلاه واواهاوا ماتنفعني لامي لا صحايبي نبقى معاه .. كملات الأغنية فبلاصة عنبر لي كانت كنشطح بيديها ماقاداها فرحة بنسبة ليها أحسن حاجة وقعات ليها هي هادشي بدنيا ومافيها عندها سلات الموسيقى وكانت بقى ليها اغنية وحدة وتختم الفقرة ديالها همسات لتودة فودنيها ضاحكة تعلات براسها باست ليها جبهتها شادة فيديها مابغاتش طلقها .. ضارت للفرقة الموسيقى لي بداو فعزق الاغنية الأخيرة مشات طلقات من تودة توجهات للمديعة همسات ليها بشيحاجة هزهزات ليها راسها مشات ورجعات ليها بميكرو ثاني لي مداتو لتودة ..
- بداو بالأغنية الثالثة الاغنية لي خلات لي كان كالس ينوض يهتف ويغني ولي فيها الحال تنوض تجدب كولشي تحرك كان واحد الهتاف جماهيري كبير عمرها شافت بحالو .. بدات الموسيقى لي بدات تودة كتشالي بيديها شادة فيد عنبر كتحرك فنصها وتحرك كتافها وراسها تبسيمة منورة وجها وشافيفها ..
- تودة : وا هااااااااااا و محمد يا وليدي ، واهااااااااااا ومحمد ياوليديو ، خايمتو قبلية وفرانو يشالي بلغتو زيواني تمشي بالمعاني رزتو حياتي من عشرين قالة وهاااا وايلي يايلي يايلي ومحمد يا وليدي ..
- عنبر ( هزات يدها معنقة تودة من ظهرها ) :
أرا كان محمد قايد العزارى ارا كان محمد محارب النصارى ارا كان شمعة بنهار فرجالي يختار وهااااااا ومحمد يا وليدي .. نشطو الناس وبغاوهم الناس وغطاو على شحال من واحد غنا قبل منهم ولا غايجي من وراهم سلاة عنبر الفقرة ديالها متمتمة بجملة ( شكرا شكرا بزاف ليكم على الإستماع وتبارك الله عليكم) ..
- حطات الميكرو جارة تودة من يديها نازلين مخطية الصحافيين لي باغيين يدويو معاها باغية غير تحيد شوقها من تودة وتستفرد بيها
- غير وصلو لداك البيت فين كان مخصص لتبدال ترمات بين يديها معنقاها وكتبكي تودة بدورها كدوز على ظهرها معنقاها خشاها فيها وكيتباكاو بجوج
- عنبر ( كتنحط ) :
مشات ميمتي أخالتي فاطنة مشات مشات صاحبتك مشاو وخلاوني بوحدي ومشيتي حتى أنت
- تودة ( حرق**ات ليها قلبها ) :
الله يرحمهم أبنتي الله يرحمهم ياربي ماديريش فراسك ابنتي ( زادت دخلاتها فيها بين ضلوعها حاضنة عليها ) .. جات حياة ورشيد وعزيز كيطلو مفهمو والو من لي وقع فوق لاصين
- عنبر ( بعدات كتشوف فتودة وفملامحها تبسمات ) :
عرفتي شحال توحشتك ؟
- تودة ( كتمسح ليها عينيها ماكرهاتش تخبيها وسط منها ) :
وكون تشوفي انا فين مشيتو ابنتي ماخليت عليكم قنت فين قلبت تحلات الارض وبلعاتكم
- عنبر : حديث طويل اخالتي ( شافت فحياة ) حياة هادي هي خالتي فاكنة لي كنت قلت ليك عقلتي عليها دابا ؟
- حياة ( قربات منها سلمات عليها كتحقق فيها ) :
هههه قلت وماعقلت
- تودة ( بإستغراب ) :
هادي هي حياة بنت رشيدة المخنة هاي هاي تبارك الله وصلاة على النبي فنة
- رشيد : عنبر اش واقع ؟
- عنبر ( تنهدات تنهيدة طويلة) :
خالتي فاطنة هي لي علماتني العيوط كانت كتديني معاها وانا صغيرة وفاش درت 12 عام كنا رحلنا من تم مابقيت شتها ، قبيلات اشفتها عقلت عليها مانسيتهاش ماحسيتش براسي حتى نزلت عندها
- جا رضوان مدير المهرجان معيط على رشيد لي تقرص خايف لا يكونو دارو شيحاجة مخاصهاش دار ولا يفرض عليه شي غرامة مالية ..
- تودة ( شافت فعنبر بكل حب ) :
فين مشيتي ابنتي واش درتي فهاد السينين هادي وفين كاينة دابا عاودي ليا ( معنقة يدين عنبر فوسط يديها )
- عنبر ( تنهدات ) :
قصة طويلة هاديك أخالتي شحال داز عليا لا انا ( شافت فحياة ) لا حياة
- تودة : وفين كاينين دابا ؟
- عنبر : جيت انغني فالمهرجان وغادي نرجعو للوطيل دابا كنقلبو على الكرا فكازا
- تودة ( بصرامة ) :
غاتمشيو معايا رجليا برجليكم
- تودة : لفين اخالتي واش تزوجتي بعدا ؟
- تودة : من بعد ونعاود ليك دابا غاتمشيو معايا واش انا لقيتك ونفرط فيك مزال هاديك هي لي عمرها تكون رجلي برجلك فينما كنت غاتكوني حتى يهزوني للقبر
- عنبر ( باست ليها راسها وعنقاتها ) :
الله يطوليا فعمرك لهلا يخطيك عليا ..
يتبع...
التعليقات
لا توجد تعليقات بعد، كن أول من يعلق.