محتوى القصة
- مجموعين فصالة كيدويو على زواج عنبر .. رشيدة كانت كتخمم حتى هزات راسها فتودة :
عندي شي ذهب غانبيعو بغيت نشري ليها شيحاجة مغانسيفطوهاذ هكاك
- تودة : تي تلسي اويلي على تبيعي من نيتك .. ايوا وديك البنت لي عندك نهار يجيها رزقها ؟
- رشيدة : مغانبيعش كولشي .. عندي واحد شرتلة كنت مخبياها لدواير زمان او واحد سلسلة وحلقاتها الذهب القديم منين تزوجت بباين حياة ربي دار تاويل وخبيتهم على سعيد .. غانقسمهم مناصة باش ندير لبنت ولعنبر راه بنتي هاديك أفاطنة واخاماشي من دمي
- تودة : عارفة لي كاينة عارفاها عزيزة عليك .. ولكن تابعك المحامي وعاد قراية وليداتك راه غايخرج ليك الطلاق خاص تجيبي ليهم الانتقال
- رشيدة : واه عارفة تخمامي دايراه فدماغي .. وليداتي ليهم حقهم وبناتي عندهم الحق ، ضروري نفرحو بيها بشيحاجة مانسيفطوهاش هكاك
- تودة : انا كنت باغية نشري ليها شي سلسلة وخاتم .. يتحطو مع دهازها واخا الراجل راه تبارك الله مامخلينا فين ندويو
- رشيدة : انا غانحني ليها إن شاء الله داكشي دالحنا نتكلف بيه كنت بغيت نديرو هنا ساع منين كولشي غايكون تم غانديرو ليها تم الى بغا الله ..
- سميرة : دابا مغانديروها هنا والو ؟
- تودة : والو ماشتيش جدو كالك العرس وكولشي غايكون تم ماخلاو لينا منديرو هنا .. كنا باغيين نحسو بحلاوة العرس ولكن ماعدنا مانديرو
- سميرة : كيف هنا كيف الهيه الله يجيب غير الصحة وسلامة .. بقاو مجمعين كل مرة جابدين حتيت جديد والبنات فالبيت لاخر مجمعين .
~~~~~~~~~~~
- طارق : على هاد الحساب راه غاتعاود تشوفها غاتكون معروضة للعرس
- راشد : علاش هوما معرفة كثر من الخدمة ؟
- طارق : انا غاݣلت ادويت .. الروطال غمز عماد للكوزينة ناض الاول وتبعو لاخر
- عماد : عاود ليا طارق على بلان داك خونا .. واش هو لي سيفط ليك ديك خيتي ؟
- الروطال ( حرك راسو بنفي ) : ولد الجروة دار ليا قالب من نوع الرفيع .. خيتي امݣدمة لاحها عليا صيدني بيها ولاحها سلات ساعتها
- عماد : باش عرفتيها انت مشيتي ليها ياك ؟ ( بقا ساكت) عارفك مغاتبقاش بلاصتك وتفكر بعقلك اصاحبي
- الروطال : قولبوني اعماد .. عارفني دم سناني شي واحد يدير فيها عايق معايا هادشي انت خرج سوقو ماباغيكش على هادشي عيني فحاجة خرى
- عماد : فاروق ( بتحدير ) متكبرش عقلك اصاحبي كولشي كيمشي بالقانون
- الروطال ( ببرود) : حتى انا غانخدم بالقانون .. انت ماعليك غير فاش نسوني ليك تكون على القرص نعكيك الضيطاي وانت بالي
- عماد : علاياش واش خونا مصافيش ؟
- الروطال ( تبسم بإستهزاء ) : هداك كيعرف شي قانون عندو وزين خور فطريق بوسكورة علم الله شمن عجينة كيعجن فيه .. غانجيب ليك خبيرة نلوح ليك الصنارة وانت غيز
- عماد : غير انت ماتبانش فصورة عرسك قرب أفاروق .. مابغيناش شيحاجة توقف لينا حسكة الله يرضي عليك
- الروطال : ماتخممش حافض سوارية العزيز انت خرج سوقي .. نعطيك الورقة ضمس ونضي الامور احبيبي
- عماد : دابا كيفاش بلان هاد الزواج ؟ واش انت عاجباك السيدة ؟
- الروطال : وهانت وليتي كدخل ليا مابين الجلدة والعظم .. درنا معاك المزيان بدلها مكنحملش لي يبقى تابعني بحال ظلي الله يرضي عليك
- عماد : السيدة راه داير معاه اليد أفاروق .. مابغيت نبزز عليها حتى حاجة بحال الى جامعني بيها خدمة خرجتي ليها انت ببلان زواج بشرع والقانون
- الروطال : هادشي كان خاصك تخمم فيه نهار حطيتي الزواج فراسك تقلب فيه مزيان وتعرف حكامو والى ضاراها شيحاجة راه هي غادوي مغاتحتاجش ليك انت تدوي عليها ماشي زيزونة
- عماد : انت دويتي معاه .. باش جاوباتك ؟
- الروطال : داكشي بيني وبينها ديها انت اخويا فخدمتك وخلينا زوينين ( غمزو ) .. عطاه بظهر وخرج عارف خوه مكايبغي حد يدخل فيه ولا يبحت وراه ولا يملي عليه يدير شيحاجة ، تبعو خارجين عند لوخرين مكملين سهرتهم الرجالية مع بعضياتهم ..
~~~~~~~~~~~
- الصباح ناضت بكري هي ورشيدة وحياة فطرو وخرجو لقاو رشيد كيتسناهم دوزو عنبر للعند الطبيبة وهوما توجهو للعند المحامي .. عطات عنبر لاكارط ديالها كتسنى حتى وصلات النوبة ديالها دخلات لعند الطبيبة التوتر والخلعة غالبين عليها .. كلسات الطبيبة مرحبا بيها ..
د : مدام عنبر شنو المشكل لي عندك ؟
- عنبر ( بلعات ريقها ) : دكتورة انا كنت مزوجة 5 سنين وانا مزوجة بلا ولاد .. راجلي كان قال دار تحايلي وبلي كولشي عندو مزيان .. فاش مشيت انا عند الطبيب لي دوز نيت عندو هو قالي بلي أنا مكنولدش داك سيد طلقت انا وياه ودابا بغيت نتأكد واش بصح مكنولدش ولا غير كدبو عليا
د : عطاك التحاليل درتيهم عندك الملف ولالا ؟
- عنبر ( بنفي ) : لا ماعنديش .. كنت درت غير تلفازة الصراحة ماعطانيش التحاليل قالي بلي عندي تكيسات وبلي هاد التكيسات حميدة ولكن الى حاولت ناخد دوا على قبل الحمالة ايرجعو خبيثة وغاينتاشرو وبلي نسية الحمل عندي شبه منعدمة
د : ولكن ضروري من التحاليل ( بإستغراب) اول مرة فحياتي المهنية كنسمع هاد الحالة قولي ليا مدام عنبر لغيݣل كيف كتجيك ؟
- عنبر : الصراحة هي كتجيني فالوقت ولكن كتجيني بالوجع كتهلكني الى ماخديتش شيحاجة تكالميني كدوزها عليا صافي
د : كتجيك كثيرة ولا قليلة لونها كيف داير ؟
- عنبر : اللون عادي أحمر مكاتجيش كثيرة بزاف عادية .. وعمري حسيت بشيحاجة ماهياش بحال صداع فالݣرون ولا والدتي زعمة عادي
- د : ( وقفات) واخا اجي معايا .. وقفات عنبر تبعاتها طلبات منها تكا فالباياص تكات ) عري عفاك على كرشك ونزلي شوية سروال .. دارت داكشي لي طلبات منها زادت نزلات ليها سروال دهنات ليها الجيل لكرشها ودارت ليها التلفازة كتشوف عوجات فمها :
كيبانو ليا الݣرون ديالك مزيانين .. ( غوبشات) مكاين لا كيس لا جوج الوالدة ديالك كتبان نقية من أي كيس مافهمتش انا شكون هاد المكلخ لي قالك هكا ..
- عنبر ( تزاد معاها الزايد ) : واش زعمة كذبو عليا كنولد ياك أدكتورة ؟
- د : دابا انا مكايبان ليا عندك حتى مشكيل بالعكس كولشي الامور عندك مزيانة .. واحد شوية ديال الوسخ ( أشرات ليها ليه ) كيتعالج غير بدوا الكيس مكاينش نهائيا هادشي لي قلتي انت انا ماشتوش وباش نزيدو نتأكدو اديري ليا شي تحاليل أنعطيهك ليك داكوغ
- عنبر ( بقات غير ساهية فكلام الطبيبة كتحاول تستجمع شتات راسها ) واخا ( خدات الپاپيي مسحات كرشها وقفات كتقاد فحوايجها رجعات للكرسي ديالها ݣلسات
- د : واش طليقك كان عندو شي مشكيل لي كذب عليك ؟ هاد الطبيب هذا لي عاطي هاد الهضرة بلا تحاليل بلا والو خاصك دعيه
- عنبر : مكاين هنا ادكتورة كاين على برا .. ماعرفتش طليقي كان عندو مشكل الصراحة يمكن هادشي لي خلاه يكذب عليا باش يغطي على داكشي لي عندو هو ..
- د : ( كتبات ليها التحاليل ) غاديري ليا هاد التحاليل يخرجو غاتجيبيهم ليا داكوغ .. ومن بعد انعطيك دوا على ود الميكروب لي عندك
- عنبر ( شدات الورقة) : واش ميكروب خايب ياكما هو لي مايخلينيش نولد ؟
- د : نونو ( تبسمات) كون كان خايب انا انقولها ليك .. ففترة من حياتنا مكنديرهاش فراسنا كنتمشاو حفيانين مرات ممكن يطلع معانا البرد ممكن يكون حتى ميكروب من راجل لي كيكونو عندو علاقات كثيرة الميكروب لي عندك .. خاصو غير دوا وغايمشي إن شاء الله ماشي شيحاجة لي ݣغاڤ البويضات عندك مزيانين الݣرون وكذلك من غير داك الوسخ لا اكثر ولا أقل
- عنبر ( براحة ) : شكرا بزاف ادكتورة ، خرجات من عندها من ورا ماخلصات .. هابطة فلاسانسور راسها مرفوع بدا تيليفونها كيسوني هزاتو كان هو قلبات عينيها وفتحات الخط :
نعام ؟
- الروطال : ساليتي من عند الطبيبة ؟
- عنبر : شكون قالها ليك ؟
- الروطال ( دار راسو بحال الى ماسمعهاش ) : فينك انتي ؟
- عنبر : انا فالحي المحمدي .. حدا الدكتورة الودغيري
- الروطال : خليك تم انا جاي .. ماخلاش ليها الفرصة تدوي قطع عليها .. غمضات عينيها بالعة اعصابها كتحس بجوع واخا فطرات فدار ولكن ماكلاتش بزاف حدها لاحت جوج دغمات وخرجو بقات واقفة فشانطي كتسنى حتى وقف عليها توجهات للطوموبيل فتحات وطلعات ، ضربات فيها ريحتو ضارت عندو :
واش بغيتي شيحاجة ؟
- الروطال : تي مال مك مكايناش صباح الخير فقبيلتكم
- عنبر : فاروق قسما بالله العظيم الى مافيا لي يدوي طالعة ليا جنية لسطح بدلها عفاك بغيت اناكل ونمشي نعس
- الروطال ( بجدية ) : اشريفة واش نسيتي خاص تجمعي وراقك على وديت لاكط .. ( شاف فملامحها لي مكانوش هوما هادوك) اش ݣاتلك الطبيبة ؟
- عنبر ( رجعات راسها اللور ) : كاذب عليا كيما كذب فشلا حوايج . ماعندي والو نقد نولد الحمد لله غير هو كذب عليا عطاتني الطبيبة شي تحاليل
- الروطال ( عينيه مع الطريق ) : ايمتا خاصك ديريهم ؟
- عنبر : دابا انا فاطرة خاص حتى الغدا نكون مواكلاش باش نديرهم ..
- الروطال : بقا فيك الحال حيت كذب عليك ولا حيت كنتي باغيودة تولدي معا داك ****
- عنبر ( شافت فيه ) : أهي اويلي رجوع لله هضر مأذب وليتي كتنقز معايا السطر
- الروطال ( ضار شافيها ) : دوي !!
- عنبر : بقا فيا الحال حيت كذب عليا ولكن شتي فاش كنفكر فيها كنقول الحمد لله لي ماحملتش منو ومولدتش معاه .. حيت دراري لي كيبقاو فتكرفيص بحال هداك كاعما يولدو معاه الناس
- الروطال : يلاه ݣلتي كليتي وفيك الجوع ؟!!
- عنبر : خرجت دغية لحت لقمة لفمي .. ودابا جامي الجوع كان لاعب عليا الخوف الصراحة ( ضارت عندو كان لابس كيطمة فالݣري وداير نظارات ديال الشمس مع كاسكيطة دارت ليه السكانير ( ضار لعندو غمزها ) ساليتي ؟
- عنبر ( حنحنات ) : ساليت شنو وفين غادي ؟
- الروطال : خاصك شهادة الخطوبة والازدياد وعاد خاصك فطوكوبي ديال لاكارت والورقة ديال الطلاق ديالك
- عنبر ( حلات عينيها بدهشة) : كيغاندير ناخود ورقة ديال الطلاق ؟ وهوما ضحكو عليا بلي راه مات ؟ وحتى وكان مات ايطلبو ليا شهادة الوفاة
- الروطال : ماتصدعيش راسك انتي بهاد الهيث .. الورقة نجيبوها من المحكمة ديال تم عماد غايتكلف دويت انا وياه لبارح .. وجدي الوراق لوخرين
- عنبر ( تنفسات بأريحية ) : غدا غانبدا بالوراق لوخرين .. لبارح شريت النص فالحوايج وباقي ليا النص لاخر خليتو حتى لليوم ( سكتات ورجعات دوات ) حتى انت خاصك تشري الحوايج ياك ؟
- الروطال ( شافيها ) : سميتي فتيحة ياك انتوما لي حوايجكم كيدارو فطباسل
- عنبر : طباسل .. اسمهم طيافر اشمن طباسل ، شافتو وقف قدام واحد القهوة محيد السمطة :
نزلي تعالجي نزلي .. نزلات تبعاتو ݣلسو فديك القهوة كانو كيديرو فطورات بلديين خداو اتاي مع الحرش والفرماج ليها وهو خدا مقيلة ديال البيض بالخليع
- عنبر ( جاها سؤال لبالها لاحتو ليه ) : فاروق حتى لاش قريتي ؟
- الروطال ( فمو عامر بلع اللقمة كيوجد فتانية ) : الباك .. بقات كتشوفيه مصدومة حسبها كيتفلا عليها هز عينو شافيها أشر ليها بشنو مالك ؟
- عنبر : كتدوي بصح ولا كتريݣل عليا ؟
- الروطال : علاش زعمة .. غير لي واصل لشي نيڤو فالقرايا هو لي كيوصل وكيكون بخيرو ، زعمة لي كيكون قل كيبقى محكوك
- عنبر : لا ماشي هكاك غير متوقعتهاش يحسابليا
- الروطال ( مقاطعها ) : السحاب فسما أمدام .. مجاتش بالقرايا راهم بشواهد عليا ومقنتين الدروبة ، بقات فهاذا ( أشر لراسو ) خدمتيه صحيح تمشي بعيد كتي تفكر فالخاوي اتبقى دور فبلاصتك .. من بعد كلامو سكتات مكملة ماكلاتها ، دورات راسها كان واقف واحد السرباي كيسربي الناس لي فالقهوة صغرات عينيها كتشوفيه جاها تشاش البالها بلا متفكر وتحس حساب وقفات متوجهة لعندو تحت انظار الروطال لي حبس الماكلة كيشوفيها شنو باغية تصنع ..
- وقفات قبالت السرباي لي وقف كيشوفيها حابسة عليه الطريق باش بدخل :
وي الالة نجيب ليك شيحاجة ؟
- عنبر : دابا يلاه وليت لالة .. انتوما قوم حݣار عقلتي نهار كنت انا وصاحبتي هنا فليل ، وعندنا 10 دراهم وجريتي علينا ورضيتينا من رواسيات اه بالامارة قلتي لينا كترتو
- س ( تحرج كيحاول يتفكرها ولكن نسا ) : سمحيليا ولكن والله ماعقلت
- عنبر : بنادم مايكونش حݣار ( الناس كانو كيشوفو وهو منهم لي تحرج كان عارف فايت شايفها ولكن عاقل غير فالانترنت بلي كتغني ) أش تم ؟ ( وقف عليهم الروطال ) .. رجعات لطبلة هزات 50 درهم من ساكها ورجعات ليه جرات ليه يدو وحطات فيها 50 درهم
- هاد المرة ماتبقاش تحݣر بنادم .. راه كاين غير لي مقطع بيه الحبل ماشي غير لي ماعندوش راه من أيت هوكا عطاتو بظهر ورجعات جرات الكرسي وݣلسات خلط عليها الروطال كيحنزر فيها :
فعايل هادو واش انت مكتركنيش ؟
- عنبر ( بيدها ) : والله مدوز ليا الحݣار لاخور نهار حطيت رجلي هنا وماعندنا ريال انا وحياة وتݣريسينا وجينا نرتاحو جرا علينا عند بالو حنا ماعرت شكون .. والله ماتبقى فيا ولا دوز
- الروطال : نكون معاك ويتعاود هاد البلان متلومي غير راسك ( بتهديد) خليني معاك كالم الله يرضي على بنتي .. سكتات عاد وعات على راسها شنو دارت ولكن مكانتش قادة تصبر منين شافتو قبالتها جاتها ديك الليلة هي وحياة لي نوضوها سباط معاه .. كملو ماكلتهم فسكات ناض خلص وهي سبقاتو لطوموبيل ركبات خلط عليها داير سانتير حتى سولها :
مالفة تجي لكازا ؟
- عنبر ( شافت فيه ) : زعمة قبل منسكن هنا ؟ ( هزهز ليها براسو وعينيه على الطريق) قريت هنا دارنا كانو فالمحمدية وانا كنت كنقرا هنا ( تنهدت فاش تفكرات والديها) فاش توفاو بقيت هنا حتى تلاقيت ب ( قاطعها)
- بانت ليك اهي ترجعي ليها ؟
- عنبر : حيت فيها الخدمة ، ولكن من نهار الاول صرفقاتني كنت تݣريسيت من ديبار
- الروطال ( شافيها ) : كتوقع ( مابغاش يحسسها بلي لي دارها بيها واحد ولعب عليها راه ساهل تݣريسا ) شافت فيه مزݣية فيه الشوفة ملامهاش مقالش عليها منونخة وهبيلة وفين كان عقلها حدو قاليها كتوقع وسكت .. دورات راسها كتشوف فطريق وعقلها سارح حتى حبس قدام دارهم حيدات السمطة فاتحة الباب مدواهاش ولا زاد كلمة غير حلات الباب ديمارا ومشا
- عنبر : والله مكايتفهم ليا هاد السيد بالله .. هزات تيليفونها وسيفطات ميساج للعماد فالواتساب على قبل شنو قالت ليها الطبيبة ، بقات مدة جاها الرد من عندو " لقيتيني عافط لجمعية الإحسان باشما غانعلمك " .. قرات الميساج جاوباتو ب اوكي وطلعات مع دروج
- لقات حياة ورشيدة جاو من عند المحامي .. كانو ملامح خالتها مبهجين وباينة فيها مرتاحة المحامي واعدها الامور غاتكون مزيانة ودوز على خير وماعندها مناش تخاف ، الشهود كاينين جيرانها لي كانو مواعدينها الى بغات الشهادة ديالهم يشهدو معاها ..
~~~~~~~~~~~
- فالمكتب كالسة سيدة فعقدها الخمسين .. قبالتها كالس عماد كيشرح ليها بيديه ويفهمها
.... : ولكن أسي عماد هادشي راه فيه خطر وانا منقدش نغامر ببيبي عندو شهر .. ولاو كاع يكون كبير منقدش نخاطر بيه
- عماد : مدام جميلة من سابع المستحيلات نلحقو الضرر بالبيبي ( جبد ورقة ) هادي رسالة من عند وكيل الملك قرايها على خاطرك والى عندك أي تدخل مرحبا .. هزات ديك الورقة كتقرا فيها وكتمعن
- جميلة : ماعرفت منقوليك اسيدي عماد بغيت نعرف المدة المحددة لي ممكن ترجعو فيها البيبي وضروري مايكونو إجراءات .. وضروري ما كل مرة غاتكون زيارة من الطرف ديالنا نعرفو واش مزيان واش بيخير ولالا
- عماد : هاد الحوايج ضروريين الالة ماعندي حتى مشكيل ممكن تجيو فاي وقت .. بقات ساكتة كنفكر حتى نطقات :
كاين واحد البيبي للأسف الام ديالو توفات أثناء الولادة ماعرفناش شكون لي حطو قدام المقر الى بغيتي تجي معايا تشوفو
- عماد : مرحبا .. وقف وتوجه معاها للبلاصة المخصصة للوليدات لي باقين صغار توجهو لواحد الكونة كان ناعس فيها بيبي لابس طقية فزرق ولبيسة سخونة .. كان بيبض وعويناتو عسليين مشفرين شعرو كان كحل كيلعب برجيلاتو ويديه
- جميلة : سميناه أمير حيت داير بحال الامير ( تنهدات ) مافيهش الصداع كاع كنعطيوه الرضاعة ديالو وكينعس مسكين
- عماد ( بلع ريقو متحصر كيفاش الناس كيتخلاو على وليداتهم دور راسو فداك البيت الكبير واصوات لي بيبي عالية ماقدرش يبقى واقف بزاف دغية سبقها خرج تسناها حتى خلطات عليه ) :
شنو هوما الإجراءات باش نخرجوه أمدام جميلة ؟
- جميلة : تفضل معايا ..
- العشية خرجو كملو التقدية ديالهم خدات جوج باليزات كبار يلاه غايجمعو ليها حوايجها وحتى الى ماكفاوهاش غتاخود وحدة أخرى .. خرجو من تم دخلو لواحد القيصارية بانو ليها شيلان زوينين ولبيسات ديال المحجبات شافت فحياة ومها :
سبقوني انتوما لداك السناك لي كيدير البيتزا لي مالفين كناكلو فيه انا غانجي
- حياة : فين غادية ؟
- عنبر : وغير سيرو اصاحبتي خلي هاد الباليزة ودي انت هاديك .. مشات حياة وتودة لي ضروها رجليها عيات اما هي دخلات لداك المحال كدور حمقوها الشيلان كاين لي بالألوان ولي سامبل جات عندها البنت لي خدامة تم :
مرحبا بيك ( كتشوفيها ) واش انت عنبر ؟
- عنبر ( بإبتسامة ) : اه هي انا بشحال هاد الشيلان ؟
- .... : كاين هادو 60 درهم وهادو 100 درهم وكاين هادو دايرين 50 درهم انت شوفي لي بغيتي وانا غانتصايب معاك فثمن مرحبا بيك عندنا
- عنبر : ربي يخليك الصراحة ماعرفتش شنو ندي ... الى بغا الله بغيت ندير الحجاب وماعرفتش شنو ناخود وشنو لي لا ؟؟
- .... : مرحبا انا غانوريك ديال الخروج ونوريك شيلان عمليين وعاد ديال المناسبات ، حطات ليها الشيلان كتحل وكتجرب ليها شافت راسها فالمرايا عجبها راسها بالحجاب جات كتحمق كثر من شعرها عريان حسات بواحد الفرحة ماكرهاتش تنقز وتغوت ..
- عنبر ( كدور عينيها على اللبيسات لي ملبسين للمانكينة ) : وهادي شحال ؟ ( كان سروال ديال البرد مع تريكو طويل فالكحل ولاحمر ) ..
- .... : هادي 250 درهم وفيها لوينات ... جاونا حتى لبيسات اخرين انا نوريهم ليك ، خرجات ليها لبيسات حمقوها فنين ديال الحجاب وعاد كساوي ، قاتليها تجمعهم ليها وتجمع ليها كولشي .. خلصاتها محملة بدوك الحوايج وهي فرحانة .. دازت لبوتيك اخور خدات تريكوات حيت كان البرد مقررة حتى يسخن الحال عاد تبدا تشري حوايج صفييين من غير شي قويمجات لي خداتهم دافيين تحسبا الى تقلب الجو ..
- تيليفونها بدا يسوني كانت حياة .. قطعات عليها حيت كانت قربات ليهم دخلات للعندهم لسناك لقاتهم دومونداو .. دوموندات حتى هي كلاو وخرجو يشدو طاكسي لي مالقاوهش سونات لعزيز كان قريب من تم جا هزهم داهم لدار مشا هو وهوما طلعو لدار بدات كتوري لرشيدة وسميرة الحوايج حتى وصلات لاخر حوايج خدات
- حياة ( بصدمة ) : واش غاديري الحجاب ؟ ( هزهزات عنبر راسها والفرحة باغية تنقز ليها من عينيها ) عرفتي كيغادي يجيك فن فن
- رشيدة : وديري عقلك حتى انت وديريه
- حياة ( قلبات عينيها ) : إن شاء الله
- تودة : مزيان أبنتي الله يتبتك ويهدينا حتى حنا ياربي
- رشيدة ( ميقات فيها ) : وحتى تي اخويتي راه خاص تستري راسك الخمسين راه دخلتي ليها
- تودة ( خنزرات فيها ) : شتك سايرة اخويتي تحشي ليا فالهضور مالك انت صغيييرة زعمى .. وقيلة راه حنا ݣد ݣد ارشيدة
- رشيدة : خاصني اندوي تلقمني .. انا ماݣلت ليك شاي غير ݣلت ليك حتى انت خاص تغطي راسك الصغار وولاو يدير الزيف وانت لا
- تودة : دخلي سوق راسك أرشيدة بيني وبين مولايا .. وانا عارفة ودايراها فراسي شعري غانغطيه مانتسنكشاي انت تݣوليها ليا ايوا ها تعاويد النصارة
- عنبر : وصافي هنيونا اويلي ستغفرت العظيم ، حياة نزصي أختي نستفو هادشي فالبالز بقا ليا الخياط ناخود عندو جلابة ديال العقد وجوج جلابات على وديت الدهاز وزوج طفاصل أجيو واش هوما لي خاص يشريو ليكم شيحاجة ولا حنا ؟
- سميرة : بزوج هوما خاص يشريو لماين العروسة وانت خاص تشري يمكن لباه ومو
- عنبر : انشري لجداه اما مو فين شفتها باين العرس ومغاتجي ليه ... غدا منين نسالي ندوز للقصارية ناخود لباه وجدو وجداه اش ناخود ليهم بعدا ؟
- تودة : بلغة جداه خودي ليها شي تفصيلة .. غدا راه خاص تفيقي بكري على وديت عقد الإزدياد ( شافت فرشيدة ) عندك الحالة المدنية ارشيدة ياك خلاتها ليك المرحومة ؟
- رشيدة : ايه عندي انا قبل منعس غانحطها ليكم فوق الطبلة شكون غايديكم ؟
- عنبر : درت مع رشيد ايدينا ويجيبنا .. هزو دوك الحوايج ستفوهم فالبالز كان مزال خاصها باليزة اخرى الدهاز ديالها دارتو فالبالز وحوايج الحجاب حطاتهم فالماريو كاع لي مابقاتش غاتحتاجو ومصالحش للحجاب عطاتو للحياة .. سونات عليها ماجدة دوات معاها علماتها بلي مزال ليها المكياج وروايح والكريمات هوما لي ماخداتش ..
- ماجدة : شوفي بلاما تاخديهم دابا .. حتى تسالي جميع الوراق وغانديك عند واحد السيد كيبيع غير لوكس ديال الميكاپ والعطور نديروها خرجة بنوتية نيت تكون معانا حياة ويسرى ودنيا
- عنبر : صافي انا غدا مغانكونش مسالية على وديت الوراق .. نخليوها السبت اش بان لك ؟
- ماجدة : صافي ماشيغي إن شاء الله يلاه بيزو سلمي على طاتي فاطنة والبقية
- عنبر : مرحبا بسلامك .. مع قطعات معاها مع سونا عليها تم تم :
ألو ؟
- الروطال : علاش ماݣلتيش ليا الواليدة جات عندكم ؟ ..
- عنبر : راه مكنتش انا فاش جات هي لقات غير ماما فاطنة وخالتي رشيدة
- الروطال : كنݣولك لي كاين ݣوليه جات ݣوليها سوا لݣاتك سوا مالݣاتك أش ݣالت ؟
- عنبر ( حنحنات ) : ماݣالت والو ماݣالوش ليا وأنا ماسولتش
- الروطال : مكتعرفيش تكدبي الوقيدة شنو ݣالت ؟
- عنبر : وانت مك عارفها مابغياش ليك هاد الزواج مابغاتكش تاخود وحدة شيخة ومطلقة من الفوق راه باين اش غاتقول
- الروطال ( دور لسانو وسط فمو بعصبية ) : غدا غاتمشي تجيبي ليزيكستري ديالك ؟
- عنبر : اه فصباح انا وماما فاطنة انمشيو فالكار ونجيو ( بلعات ريقها حيت كدبات)
- الروطال : متأكدة ( بشك )
- عنبر ( رمشات بجهد ) : علاش غانكدب .. انمشيو فصباح بكري لولاد صالح وغانرجعو .. عاد غانزلو للدرب السلطان نكمل الكمالة ديال الدهاز
- الروطال : وتحاليل ؟
- عنبر : نأجلهم حتى للنهار الأربعاء إن شاء الله
- الروطال : رضي البال بيناتنا ألو .. ( قطع ) شدات على قلبها لي كيضرب مابغاتش تقوليه راه رشيد لي غايوصلهم :
علاش ماقلتهاش ليه وشفيها ياك رشيد بحال خويا .. واصلا هو مالو شغلو فيا يوصلني رشيد ولا حميد .. حطات تيليفونها دخلات للحمام باقي ليها يوماين باش تمشي للحمام دوش من الغيݣل ..
°°°°°°°°°°°°°°°°°°°°°°
- الصباح فاقت هي وتودة لبسات عليها واحد الجلابة ودارت شال مع الكاپ وبوتيو .. هزات الحالة المدنية لي حطات ليها رشيدة وخرجات هي وتودة لقاو رشيد كيتسناهم ركبو معاه وشدو الطريق وصلو فطرو فواحد القهوة عاد شدو الطريق للمقاطعة
- خدات عقد الإزدياد ديالها من بعد إنتظار تطويل .. وشهادة الخطوبة خرجو من تم وهي مرتاحة نسبيا دارت فوطوكبي للكارت ديالها زادتها على باقي الوراق بقات ليها شهادة طبية او الورقة ديال الطلاق لي غايتكلف بيها عماد ..
- عنبر( رجعو للكازا سيفطات ليه ميساج علماتو بلي نص ديال الوراق راه واجد مجاوبهاش ) : وشوف ليك راس تيمومة مخليني پلاكة حرام واش جاوبني الى مزال سيفط ليه رامي بحالو ..
- فالعشية خرجو تقداو لي باقي ليهم .. خدات باليزة متوسطة ورجعو لدار كانت جابت معاها العشوب ديال التبريمة من عند العطار .. غير دخلات رتاحت ودارت كاسكروط هي وياهم معطل من عشا منو كاسكروط وبدات كطحن ..
- الخزامة / الشيح / العرعار / الورد البلدي / اوراق السدر هادو كامل طحنات منهم دارتهم فبواطة زادت عليهم عرق السوس مطحون وأداد مطحون والحنة ديال الجسم والخرقوم بلدي مطحون قدام عينيها ونقيطة من الدوا الأحمر بودر .. خلطاتهم فقرعة وطرفاتهم حتى تبغي تمشي الحمام وتهز منهم تزيد عليهم الصابون البلدي والحامض ..
~~~~~~~~~~~~~~~
- كيما دار معاه الكلمة طلب منو يوماين وغايجاوبو بلي كاين .. دوز نهار فالخدمة كيحاول ما أمكن يغطي على داكشي لي خرج عندو الزهر لي ماتنشرش الخبر عماد كان دوا مع مول الصفحة ودوا مع الصحافي لي نشر الخبر وتمسح كولشي حالف حتى يفدي دقتو وياخود حقو بضوبل مايخليهاش عندو .. وصلو ميساج فتيليفون لاخر من عند نفس الشخص داير معاه من الورا العشاء فنفس السيكتور
- من الخدمة داز لدار مزول عليه دوك الحوايج لبس سروال ديال الدجين فالكحل مع ݣاط قبية كحلة هاز كمامة كحلة دارها فجيبو .. حل واحد المجر كانو فيه ربعة ديال الخواتم ديال الخشب منحوتين بشكل هندسي متميز من تحت ضايرين ومن الفوق مقمقمين بحال شي سهم دارهم فجيبو هز تيليفون العظم ديالو دارو فجيبو وسوارت السكوتر وخرج من الدار .. شد الطريق نيشان لمولاي رشيد بلاصة مقنت سونا على السيد شوية هاهو خارج من واحد القهوة ديال الشيشة قطع الشانطي حتى وقف عليه مسلم عليه سلام رجولي ..
- الروطال : أمضرا ؟
- .... : جايب ليك خبار مق**ة مغاتجيكش على البال .. واش فخبارك اللوزين لي نعتات ليك ختنا كيدوزو منو الحشيش ؟
- الروطال ( هز حواجبو ) : مريݣل ليا هادشي ولا غير هضرة لافير ايدخلو فيها البوليس أمعلم
- .... : واش انا مالف نجيب ليك المزور ، الناس لي جابو ليا الخبار عارفين اش كيݣولو .. واحد كاع راه الكليان ديالهم عندك الزهر دارو ليك شكلاط غامل مالبقوش ليك شي مونتيف
- الروطال : ولاد الق***
- .... : ودابا سمع ليا الكبيرة ، مع 12 دايرين مع واحد البزناز معروف عندنا هنا فسيكتور كيسيفط اليكانيش دياولو وهوما نيت لي كيبيعو لدراري ديال الحومة .. هاد ولد الهاريبة دخل حتى البوفا للحومة اسيمانة لي فاتت مات فيها واحد عشيري ماكرهتوش يتشد الى عرفتي كيفاش تريݣلها يجمعوهم جملة .. ياخويا مضور بيها الحريمية مابقاوش الدراري لي كيتقداو وحتى البنات
- الروطال : وباش غانعرفو بلي غايمشي هو راسو ؟
- .... : لا هاد الليلة غايمشي هو كاين واحد خونا كيجيب ليا الخبيرات ديالو كاملين الحومة مكايوصلوش ليها المخزن لقى السيبة داير مابغى فالبشري .. دايرينها خلية أصاحبي فداك الوزين من برا ضارب ليك على الشعا وهوما لاعبينها تم باقشي تربح
- الروطال : 12 دليل ݣلتي ليا ( كيفكر ) مكاينش الطرافيك أودني
- .... : دوينا أصاحبي ، راه وݣفت عليها بيدي كاين جوج غايكونو حاضرين تم يوقفو على سلعتهم بيدهم .. انا السيد منين دكر ليا القنت فين ناويين طاح لبالي البلان لي عاودتيليا ، وݣاع منين عطاني النعت ودكر ليا مول الشي تيقنت بالمزيان ..
- الروطال تسنى ( هز داك تيليفون وسونا للعماد بقى مدة عاد جاوب ) عماد .. ويييه انا .. ودابا تسنط من نمرة ولا جوج عقلتي على لافير لي دوينا فيها أنا وياك وسمع أصاحبي( مد التيليفون لداك خونا ) عطيه من أ لزيرو ( بدا كيعاود ليه نيش ليه البلاصة فين عاطيه كولشي بضيطاي كيما عاود للروطال .. رجع ليه لتيليفون ) الكورة عندك دابا لعبها معلم ... تلاح اعماد هداك السوق ديالي انا دابا .. ( قطع مع عماد وشاف فلاخور )
- فيك مايتحرك ؟
- .... : ماعديش ݣرام دالمشكيل عفط .. ( ركب معاه فسكوتر شادين الطريق لواحد البار بلاصة السكوتر ودخل هو وياه داير القب ديال القبية على راسو خداو واحد القنت فيه واحد الطبلة ضايرة وزوج كراسة .. ݣلسو جا السرباي
- الروطال : خود وماتقلش .. ( عارف لاخور كيشرب ) خدا مشروب كحولي .. والروطال خدا مشروب البيرة لي مكانش ناوي يشربو احاطو وعينيه كيدور حتى سمع ضحكتو هز راسو بان ليه مقنت هو او واحد ، بقا قاني عليه حتى بان ليه ناض خلصو وتم خارج ضار عند لاخر :
راجع ليك ماتقلش باغيك تكون ساحي ..
- .... : صافي سير ، .. خرج تابعو حتى بان ليه غادي متوجه لطوموبيلتو دور راسو لݣاع الجوايه الدنيا كانت خاوية شوية قطع الشانطي متوجه عندو وقف وراه يلاه ايحل طوموبيل حط يد على فمو ويد عنݣو بيها باش ميهربش جارو للواحد القنت لي مكانش فيه الغاشي ومظلم ..
- رجع للبار كيتمشى بشوية .. مشا للحمام زول دوك الخواتم لي كانو كلهم حمرين بد**م دارهم فجيبو غسل يديه متنهد تنهيدة طويلة تنهيدة راحة تبسم ماسح يديه ورجع للداخل ݣلس حداه ..
.... : أش درتي ؟
- الروطال ( ببرود) : دابا تشوف بعينيك .. كلس مبرد حتى تسمع صوت صداع فداخلة ديال البار ، الرجال لي تم شي عاقل شي مزال ساحي والهضرة كدور
- .... : الله وأعلم واش شي واحد ݣريساه السيد موحال يعيش أصاحبي كلو مجندغ ... أه راه عيطو على لومبيلونص تجي تهزو الله يستر أنا غادي .. واحد بواحد بدا يخرج .. الروطال شير لسرباي جا ياخود الحساب
- الروطال : أش تم ؟
- السرباي : واحد السيد لݣاوه حدا طوموبيلتو كلو مفرشخ وجهو مباينش أخويا شوف تشوف واش يعيش .. وقيلة شي واحد كان باغي يݣريسيه والله أعلم ..
- الروطال ( دور معاه ضارب على لاخر لكتفو باش ينوضو ) .. خرجو من تم هز راسو للجهة فين خلاه طايح كانو محموعين عليه الناس ، بقا واقف هو ولاخر مدة حتى بانت ليه لومبيلونص جايا والبوليس .. عطاهم بظهر وتوجه هو ولاخر للسكوتر دار الكاسك ديالو ركب لاخر وراه وشدو الطريق وصلو للحومة جبد من جيب القبية الدخلاني جوا مدو ليه
- بحال ديما كانلݣاك على القرص
- .... ( شد من عندو الجوا ) : عارف بلاصتي بلاما نوصيك .. طبطب على ظهرو ديمارا وشد الطريق غادي وكايحس بواحد الراحة نشوة غريبة كيحس بيها كلما خدا حقو .. يمكن هو كيما كيݣولو خوتو خاصو طبيب نفساني ولكن بنسبة ليه مكايدير حتى حاجة عيب .. ماشي بمثل تحك على نحاسي تلݣى باسي وقف جنب واحد الجرف كيطل على البحر نزل مزول القب كيشوف فسما ونجومها جبد دوك الخواتم من جيبو رماهم للمواج واحد تابع واحد هاد البلاصة وهاد البحر لي شحال خدا من خواتم من شحال هادي .. غمض عينيه رامي الذكريات القديمة رامي شنو داز عليه رجع ركب فوق سكوتر ديالو والوجه كان دارو ..
- أخبرونا بأن لا نبكـي أمام الأهل كي لا يحملوا همًّا فوق همومهم ... قالوا لنا لا تبكوا أمام الآخرين كي لا تكونوا ضعفاء ، ولا تبكوا أمام أعدائكم فلن تحتملوا شماتتهم ، وأن لا نبكي أمام أنفسنا كي لا يصيبنا انهيار..!
أخبِرونا إذن متى نبكـي ، لقد حبَسنا آلاف الدمعات حتى أبَت في أصعب اللحظات أن تسقط ، لقد عجزنا حقًّا عن البكاء وأصابنا هذا الإختناق..!
- زادت تأكدات بتحاليل بلي هي سليمة مافيها والو من غير داك شوية ديال الميكروب لي عطاتها الدوا ديالو .. رجليها غاديين بيها وهي ساهية مكايناش هكا .. غمضات عينيها وجاتها الدوخة ..
- .... : الله الله ابنتي بشوية عليك ( شدات ليها فيدها ) تعالي ابنيتي ݣلسي تعالي .. كانت سيدة حاطة طبلة وكتبيع الملوي
- عنبر (شافت فيها ماحساتش براسها فاش جاتها دوخة تجمع عليها كولشي كتحاول تنسى وتكمل حياتها بحال إلى حتى حاجة ماوقعات ولكن صعيب عليها ) سمحيليا أخالتي
- .... : هانية ابنيتي واش فطرتي وقيلة طاح ليك طونسيو
- عنبر ( غرغرو عينيها بدموع ونزلو سخان من عينيها مكانتش باغية تبكي وكانت حالفة متبكيش ولكن ماتقدش ) : لا اخالتي ( صوتها تغنغن ) الغدر اخالتي بنادم خايب وغدار مكايسواش
.... : أحيانة أبنتي ( تنهدات) بكي وزيدي بكي بنادم خايب أكبيدتي مايسواش
- عنبر ( كانت محتاجة تفرغ لشي حد مكتعرفوش تحط كولشي وتزيد بحالها .. حطات ليها كولشي دقة وحدة تبكي وتشهق ) : مضرورة اخالتي قلبي غايطرطق
- .... : أبنيتي حمدي ربي وشكريه مامشات ليك صحة مامشا ليك رزق حمدي ربي اكبيدتي لي ماولدتي معاه مادرتي دراري راه يبان ليك هادشي صعيب .. ولكن فاش تكلسي مع راسك اتلقاي ربي حكمتو كبيرة ربي مكايجيش ويدوزنا من شيحاجة الا كاينة حكمتو تماك
- عنبر : عارفة اخالتي ( هزهزات راسها ) ولكن صعيبة بزاف تبغي شي حد وتلقاي راسك مغدورة ومدوز عليك بموس حافي
- .... : عارفة اكبيدتي عارفة ولكن حمدي ربي وشكريه عدو سبب .. متعرفي ربي دوزك من هادشي ويكون مخبي ليك الخير ويعوض صبرك خير .. انا ابنيتي راه تزوجت صغيرة ووقفت مع راجل وبعت ذهبي عليه وولدت معاه جوج دالوليدات وفالاخر لݣيتو طايح مع ختي إيه ختييييي وجرا عليا ومشا تزوج بيها بعت لي ورايا ولي ݣدامي باش نعاونو فالبني ديال دار الولد الصغير راه مسيكين فأكادير خدام والكبير ساكنة معاه .. واخا مكايبغينيش نخرج نبيع دايرة لي ݣالو ليا مخي هو يخرج لخدمتو من هن وانا نخرج من هن كنبغي نتلف مع هاد العيالات .. شتي ابنيتي كاع هاد العيالات لي سايرة تشوفي ( دوزات عنبر عينيها على العيالات لي فديك سويقة) مساكن الحمل لي عدهم والهم لي هازين ماهازو حد لي ماعندو كثير عندو القليل اكبيدتي .. حمدي ربي وشكريه جاتك فهوك واخا صعيبة ولكن سرطيها بجغيمة الما
- عنبر ( سرحات رجليها كتحس بالعيا جهد نفسي كانت دايراه باش تسيطر على راسها رتاحت فاش فرغات وخرجات كاع لي عندها ) :
غانحاول أخالتي .. رتاحيت فاش دويت معاك ( بإبتسامة) الحمد لله
- .... : ( لوات واحد الملوية ومداتها ليها) هادي من خالتك عيشة الوقت لي جيتي مرحبا ليك أبنيتي ( خدات من عندها عنبر ديك الملوية عضات منها بدا تيليفونها كيسوني هزاتو كان هو ) والله مافيا لي يدوي معاك بالله العظيم (خلاتو كيسوني او وقفات) الله يخلي ليك صحيحتك أخالتي سمحيليا برزطك معايا
- عيشة : الله اودي يا بنيتي مكاين بوعداب مرحبا بيك الوقت لي تحسس براسك ماهياش انا هادي بليصتي حتى ل 1 وكنمشي بحالي .. باست ليها راسها وتحركات من تم طالعة مع شارع بانت ليها طوموبيلتو جايا دارت راسها مشافتوش كلاكسونا عليها مداتهاش فيه غادية مشا حتى لروپوان ضرب دورة وتبعها كيكلكسوني وقفات وشافت فيه كان مهبط الزاجة :
فاروق سير بحالك الله يرحم الوالدين مريضة فمخي ومافياش لي يدوي ولا يتعاطى .. الله يرحم الوالدين خليوني فتيقار واه ( ضارت مكملة طريقها) حسات بيدها تحيدات من بلاصتها من جرة لي جرها ..
- الروطال (بصرامة) : كنݣولك منين نسوني جاوبي ابنادم مغانبقاش نعاودها الف مرة ..
عنبر ( نطرات يدها بجهد ) : وبعااااااد البشااار بعاااادني وقيلوني هالعار عطيوني شبر ديال تيساع وبغيت نرتاح ( طرطقات بالبكا ) هلكتوني فصحتي هلكتوني ( هزات يديها لي فيهم التحاليل مغطية بيهم وجها وكتبكي .. من الوراق لي فيديها عرف بلي داكشي لي ݣال خوه بصح واخا طبيبة كانت ݣالت ليها مابيها والو ولكن التحاليل كيعطيو تأكيد .. زفر مدوز يدو على شعرو حط يدو على ظهرها معنقها خاشيها فوسط صدرو كانت بحال شي بنت صغيرة حاضن عليها الاب ديالها.. لأول مرة غايوقع إحتكاك بيناتهم بقا كيدوز على ظهرها حتى سكتات تنهدات فوسط صدرو حنحنات وبعدات عليه كتمسح فعينيها والحمرة طاغية على خدودها تبسم ونطق :
شحال فيك فطول الݣرادة ؟
- عنبر : 1.60 زعمة انا قصيرة راه انت لي حنطويل .. شحال فيك شحال؟
- الروطال ( غمزها) إينا طول فيهم ؟
- عنبر: والله حتى باسل بالله شحال فيك فطول طولتك ( أشرات ليه بيدها )؟
- الروطال : اه 1.98 يلاه زيدي وانت شادة مسمنتك بحال ديك ليتيمة .. جرها بحال البنت الصغيرة حل الطوموبيل وطلعها .. ديمارا الطوموبيل وحيد من داك القنت ( ضار شافيها كانت ساكتة وساهية ) فيك لي يغوت
- عنبر ( ضارت عندو ) داك القنت تاني لا بلاش هالعار عندي مايدار اصلا .. اجي عماد جاب الورقة ؟
- الروطال ( رجع إنتباهو للطريق) : كون بغيتي تعرفي كون جاوبتي على تيليفونك
- عنبر : وصافي دوي دابا ..
- الروطال : جابها راه عندو .. كنت باغي نݣولك تجيبي وراقك كاملين يكونو عندي مع الوراق ديالي
- عنبر : حتى دابا وصلني ونزلهم ليك .. هزات تيليفونها دخلات لأنستغرامها كانت مسحات كاع تصاور ديالها والفيديوات كان عندها 670 الف أبوني والميساجات كتار كيسولو علاش مسحات تصاورها شنو السبب الاغلبية من عند البنات والمعجبين بالاغاني ديالها وصوتها .. دخلات كتقلب فالأخبار وداكشي لي كينزل حتى دخلات لواحد الباج مكتوبة فيها الفاسية .. كانت محطوط زوج تصاور كتقرا البوسط لي محطوط .. مركزة معاه شافيها بانت ليه خاشية وجها فتيليفون ( خطف ليها تيليفون من يدها )
- عنبر : اويلي رجوع لله عطيني تيليفوني
- الروطال ( بصرامة ) : من قلت الأداب ابنادمة تكوني مع لي واشمك وانت هازة هاد الخرشاشة
- عنبر ( جاتها الضحكة) كيفاش الواشمني وعطيني انقرا راه شي وزين قرقبو عليه البوليس لبارح بليل .. وشي واحد لقاوه مشمشر فعين الذياب حدا شي بار
- مجاوبهاش حبس الطوموبيل كانت شاشة مزال شاعلة بدا كيقرا داك البوسط لي كان محطوط بضيطاي وسمية مول الوزين .. وشكون كان فالوزير والبزناز لي تشد متلبس هو وجوج اخرين .. عاد منزلين التصاور ديالهم مخرجينهم البوليس وتصويرة كانت مضببة والى بغيتي تشوفها خاص تكليكي على الجملة ديال السماح .. كليكة عليها كانت صورة وليد كولو دمايات مشخشخ دور لسانو وسط فمو متنهد تنهيدة طويلة لايح تيليفونها اللور ..
- عنبر ( كتشوف فتصرفاتو) : واش هبلتي ؟ ضارت باش تهز تيليفونها شد يدها
- تهزيه انلوح مو من السرجم .. توصلي لخيمتكم هزيه ( طلق يدها) خاصني جلابة وماعنديش مع التقليدي مكاينش ماحسن منك أمدامتي تختاري معايا ( غمزها)
- عنبر : اشايطة عليك ديك العين وتغمز .. مجاوبهاش بقاو ساكتين مدة
- الروطال : هي غاتولدي لينا فرقة دالكورة ( تبسم إبتسامة جانبية )
- عنبر ( شافت فيه ) : معامن معاك انت ؟
- الروطال : ومال مك شكون بحالك نكون أنا باهم ونحط عليك ( سكتاتو)
- عنبر : صافي سكت سكت .. انت خاصك متدويش فمك خاسر
- الروطال ( شافيها ) : ولكن حلو خاص غاتجربي
- عنبر : وفارووووق وصافي عيقتي والله
- الروطال : ومالي كذبت .. تجربي ؟
- عنبر ( دورات عينيها ) : حلم بالألوان اكوينيدي أبقى تخايل تم حتى لغدا
- الروطال ( كيهزهز براسو ) : شتي إلى حطيتك فدماغي مانتي فخير بلاما تجربي الله يرضي عليك لا نحنتك
- عنبر ( شافت فيه ودورات راسها ) .. وصلو للقيسارية نزل وهي نزلات معاه دخلو للمحال خاص بتقليدي رجالي ..
- عنبر ( كتشوفيه ) : عرفتي يجيك الݣرونة زوين تكون جلابة فابيج ومخيطة بالݣرونة .. ءمعهم السيد لي كان رجل كبير بإبتسامة :
كاينة الالة .. مشا جبد الجلابة بسروال ديالها وتحتي توبها كيترعرع غزالة حطها قدامهم .. هزاتها بالعلاقة ديالها كتشوفيها وقفاتها عليه كطلعو وتنزلو هبطات راسها رجليه :
غايخص غير شي بلغة فنفس اللون ( هزات راسها فيه لقاتو حاضيها شنو كتصنع ) شحال كتلبس فرجليك ؟
- الروطال : 45 ..
- عنبر ( ضحكات ) : خاصنا نصنعوها ليك اما موحال تلقى قدك
- الروطال ( قرب لودنيها ) : قيسي ابنت المرضية .. داك ضحك ݣدام الرجال ، .. بعدات عليه مخنزرة حطات ديك الجلابة وسكتات
- الروطال : جمعها لينا اشريف .. جمع ليهم الجلابة فواحد البوشيط خلصها وخرجو من تم قصدو مول البلاغي خدا جوج وحدة فالݣرونة او وحدة باج ..
- كانت حجة وزيارة دازت خدات الجلابة ديالها ديال العقد .. رجعو من القيسارية مدوزها نيشان للدار وقف الطوموبيل محيد لاسنتير :
غاطلعي تجيبي ليا الوراق خصاك شيحاجة ؟
- عنبر : لا مخاصني والو ( هزات البوشيط لي فيها الجلابة ونزلات طلعات لدار جابت ليه الملف لي فيه كاع الوراق عطاتو ليه ) غدا غانخرج مع البنات
- الروطال : شكون هاد البنات ؟
- عنبر : ماجدة ودنيا وحياة ويسرى حتى هي دايرين نخرجو حنا البنات .. والعشية بلاما تسونيلي حيت انمشي الحمام
- الروطال : مالك اتسكني فيه .. عنبر نسوني بقاي جاوبي ( تفكرات تيليفونها خشات راسها وهزاتو )
- عنبر : بسلامة ..
- الروطال : داك الراس مزال مابغيتي تغطيه ؟
- عنبر ( ضارت لعندو ) كتحكم فيا بحال الى كتبغيني وكتغير عليا رجوع لله
- الروطال ( هز حواجبو قوسهم ) : حمدي الله لي ݣلبي مطايحش عليك منبغيهاش ليك أزينة تبريحة سيري دخلي .. ضارت دخلات سدات الباب سمعاتو مشا شمات ريحة فشكل هزات يدها كتشمها كانت فيها ريحتو .. حدرات راسها وطلعات
- حياة ( كتشوفيها ) : فيك ريحة الرجال !!
- عنبر : وغير دخلنا لمحال ديال الحوايج تقليدية ولصقات فيا الريحة وصافي ( حادرة راسها كتبدل فحوايجها )
- تودة ( من الصالون ) : أش ݣاتلك الطبيبة ؟
- عنبر ( رجعات تفكرات التحاليل تنهدات ) : مافيا والو بيخير وعلى خير نولد حتى 10 .. عندي شوية دالميكروب عطاتني شي قويلبات وفنيد
- رشيدة : ولد الهم الله ياخود فيه الحق كان كاذب عليك ولد الحرام الله يلݣيها ليه
- تودة : وراه خاصها دير شي ݣصرية ديال الكسكسو تسيفطها لجامع صدقة .. حيت ربي دار السبب وماولدات معاه كون ولدات اتعود عليها بشفاية العدو والفضيحة بحال هداك يولدو معاه الناس
- سميرة : عندها الصح .. تحمد الله ودوزها بجغيمة الما وترتاح مع راسها لي ربي دار ليها السبب
- عنبر ( حاطة ساك فوق النموسية دارت فيه حوايجها ) : والله لا بقات فيا والله لا نسيها العزيزة (موجها كلامها لتودة) لي دار فيا ماشي قليل نوريه ديك الهبيلة الهويعة أش كتسوى
- رشيدة : وقفات عليها ) تي علاياش ناوية .. ياك هو كاين لهيه وانت هنا خرجي راسك من صداع الراس وانت داخلة على زواج
- عنبر ( خرجات من الحمام هازة سطولها ) : يكون خير إن شاء الله انا دابا مدايرة والو .. ولكن يجي نهار يوقف قدامي غاندير والله لا بقات فيا أخالتي انا نݣولك
- حياة : ( خرجات من بيتها عطاتها رزمتها ديرها ليها فساكها) خديتي صابون البلدي ؟
- عنبر : خديتو .. جمعو حوايجهم خرجو للحمام دوزو فيه 3 ديال السوايع 20 دقيقة ديال اللباس وعاد 15 دقيقة ديال الجماعة مع الطيابة رجعو لدار مسخسين ضربو الرفيسة لي خبات ليهم من الغدا وجبدو عليها بالنعاس ..
~~~~~~~~~~~~~~
- دارو يخرجو بالسبت يتغداو على برا ويدوزو العشية مجموعين ومنها عنبر تقدا داكشي لي كان خاصها من ناحية الكريمات والمكياج ..
فرحة كبيرة كتحس بيها ورهبة كولشي تخلط عليها وهي حاطة اللبيسة لي غاتخرج بيها كسوة فالݣري ديال الشتا توبها غليض وسخون الوسط فيها بحال سمبطة فسومو مع شال فسومو وبوتيو قصير .. هزات الكسوة لبساتها وجها دارت ليه غير ليكغو وريسيل فقط حطات تيليفون قدامها متبعة الخطوات ديال الحجاب كانت كتعلم بقات معاه مرة تعوجو من ليمن مرة ليسر بقات حتى قداتو .. وقفات مقابلة مع المرايا كتشوف فراسها حلات الباب وتوجها لعندهم للصالون وقفات :
كيجيتكم ( كدور فرحانة )
- تودة ( تنهدات ) : تبارك الله وصلاة على نبي .. فنة ابنتي الله يحجبك جاك على مزيناتو
- رشيدة : مزينك بنت الله يبارك ابنتي
- سميرة : بصحة وراحة جاك على مزيناتو .. خرجات حياة من بيتها طتقاد فصدايف ديال تريكوها وتشوف فعنبر بإعجاب :
ياختي على زين ياختي حبيتك انا حبيتك ..
- رشيدة : والعݣوبة ليك تستري ديك شعكاكة لي عاجباك
- حياة ( قلبات عينيها ) : عرفتي دابا منين درتي الحجاب وناري .. مغاتفاكش معايا يلاه نمشيو انتعطلو
- رشيدة : وبقاي تبغمي تم راني سمعتك .. رشات من بارفان ديالها هزات ساكها وتيليفونها وتمو هابطين وتودة تابعاهم :
ومتعطلوش ابنتي راه الاثنين عندك ضريب الصداق الله يرضي عليك باش يبقى السر طايح علك ..
- مع خرجو مع وقفات طوموبيل رونج كحلة سايݣاها دنيا حداها يسرى وماجدة اللور سلمو البنات على بعضياتهم وطلعو
- حياة : طوموبيل جديدة هادي
- دنيا : وغير خلاها ليا عصام حيت ديالي انا صغيرة .. اصلا مكنحملش نسوݣ بحال طوموبيلات الكبار
- يسرى : وحضي اختي مع الطريق .. مزال تابعني نتجمع مع زماني
- عنبر : حقا مبروك عليك قالتها ليا ماجدة بلي اترجعي للطليقك هنية عليك ازين
- يسرى : الله يبارك فيك حبيبتي .. ويااه المكتاب سبحان الله العظيم مزال ربي مقسم لينا نرجعو لبعضياتنا
- دنيا : الله يبعد عليكم ابنادم الخبيت والبشار لي قلبو كحل هذاك هو الفضل وراس المال
- يسرى : وياااه داكشي لي كاين ديك سميموية راه نفاوها لعند شي خالتها حلفو لا طافو بيها .. أحسن حاجة هو خويا طارق لي خلاه يحول خدمتو لهنا حسيت بيه خدا ليا حقي
- ماجدة ( ضحكات) : والله طارق مامنو زوج .. عجبني لوجيست لي دار الاخ نعمة الصراحة
- عنبر ( تقرصات) : بصح سعداتكم بخوتكم والله .. تمنيت كون كان عندي خويا ولا ختي ولكن المكتاب ربي عوضني بحياة ( شدات فيدها) فيها بنت خالتي وختي
- دنيا ( شافت فيها من المرايا ) : ياك اختي وحنا مونيكات قدامك دابا .. راه صافي انوليو عائلة حتى حنا خواتاتك ماشي غير حياة
- عنبر ( ضحكات) : عارفة لي كاينة حبيبتي لهلا يخطيكم ..
- ماجدة ( شافت فحياة ) : فين دايرة مع السيد لي قولتيلي ؟
- حياة : ماعرفتش انا قلت ليه انكون خارجة مع البنات قالي بلي فينما كنت يجي لعندي ..
- ماجدة : البنات نمشيو ناكلو هو الاول عاد ندوزو نتقداو ومنها نمشي للمول صافي ؟
- دنيا : صافي مزيانة .. تبغيو تاكلو الحوت نمشيو لسناك امين لي فالولفة اش بان ليكم ؟
- عنبر : انا مشهية الحوت نيت ..
- يسرى : صافي ندوزو ناكلو الحوت ..
- بـــلـــغـاريــا 📍
- نزلو من الطيارة بملامح جامدة باينة على وجهو معاجبوش الحال .. دوزو الإجراءات خرج سابق مو جار باليزو لقاو طوموبيل كتسناهم سبق الشيفور طلع ليڤاليز لطوموبيل طلع هو ماد ليها يدو ركبات قبالتو كتشوفيه مرجع راسو للور وكيخمم
- نادية : حبيبي من البارح وانت ماشي هو هذاك شنو كاين ؟
- بدر ( حدر راسو شافيها ) : ماعرفتش علاش شاك بلي هادشي دايراه انت وهو غير باش تربطوني حداكم اماما
- نادية : هداك سميتو باباك ماشي هو .. شتي علاش مكنبغيكش تنزل للمغرب على قبل هادشي كتصاحب ليا غير مع جلافاش الناس هكا كيدويو ؟
- بدر ( تبسم بإستهزاء ) : وقيلة راه حتى انتوما مغاربة سبحان الله نسيتو اصلكم ؟
- نادية ( دارت رجل على رجل ) : دوزنا عمرنا كلو هنا وفإيطالي مكايتحسبش احبيبي .. باباك باغي ليك غير الخير وشنو فيها الى شديتي خدمتو
- بدر ( خرج فيها عينيه من تحت سنانو ) : على اشمن خدمة فالخدامي حيت هو عندو بزاف .. واش نفصل فالبنات ونݣزر فيهم كيما بغيت ؟ ولا نبيع البيضة ؟ ولا الخضرة ولا نمشي للكبيرة لي كيتحيدو فيها الريوس حسن باش منين ندير هاه ولا هاه نلݣى راسي فشي قنت وكسدتي فقنت خور
- نادية ( خنزرات فيه ) : بدر شششش واش هبلتي ولا مال حسك ؟
- بدر : راهم أنتوما لي هبلتو( بإنفعال) انتوما لي طغيتو وبغيتوها كاملة .. ولي كيبغيها كاملة الواليدة كيخليها شي نهار كاملة شبوقكم بعدوني منهم كندير لي ݣاليا مجاجي وراسي
- نادية : وراسك كيقولك تنزل للامغرب تشوف ديك الشيخة لاروب .. نهار الاول قلت ليك شوف فرح بنت سي موسى قارية ففرنسا وعندها شركة ديالها ماشاء الله وغزالة ولكن انت كتموت على العفن
- بدر ( رجع راسو لور كيضحك بهستيريا وطريقة غريبة .. رجع سكت وشافيها ) العفن حيتاش ماعندهاش مع الق**تيلة ودب***يحة بحالكم وبحال لي فوق منكم كيلعب بيكم كيما بغا .. داكشي باش بقى فيك الحال امامي الحبيبة ( قرص خدها )
- نادية ( بعدات راسها ) : دير عقلك ابدر ماتبقى تدوي بزاف تجيبها فراسك وفينا .. مابغيتش ندير بكلام باباك ونعطيه لوردر يسيفطك لشي بلاد ماتخرجش منها
- بدر ( ضحك طانز) : متخافوش مني امامي .. ماشي انا لي غانجيب ليكم التمام وماشي انا لي انطيحكم فالحفرة الأخرة وطلع الكتابة .. يديكم لي غايديوكم لورى الشمس وديك الساع انا مغانقد ندير ليكم والو باش نعتقكم ..
- نادية : انت واحد ..
- بدر : بغيت غير نعلمك المغرب هابط ليه هابط الى مكانش هاد السيمانة اتكون سيمانة جايا .. شديتوني بمسبة مرض الواليد .. هاد المرة فكرو فشي بلان خور ..
- نادية : واش .. ( قاطعها داير نظاظرو دشمس بمعنى الكلام صافي سالى ) ..
^^^^^^^^^^^^^^^^^^
- تغداو مجمعين بضحك ولعب .. سلاو غسلو يديهم معاودين رتوشات خفاف من المكياج خصوصا حياة لي كانت اتلاقى مع جواد .. خرجو من تم شدو الطريق للپاغفومغي لي كانت ماجدة كتعرف مولاه ، كولشي حمقها وكولشي كان دوريجين .. ماجدة دور دور وتجبد وتقولها هادي لي خاصاك خودي هادي ... حطات ليها لي سپراي ديال اللحم ديال ڤيكتوريا سيكريت حليب ديال اللحم ديال يڤ روشي .. عاد زيوت العطرية ومخمريات 3
- عنبر ( بهمس ) : لاش هادشي كامل تقول انبات مخاشة انا وياه اويلي ستغفرت الله العظيم
- حياة ( ضحكات) : وكولشي ممكن ماتعرفي تخاشي أنت وياه .. انا بعدا هداك تجمعني بيه دار وحدة نقولو كولني شبيك لبيك
- عنبر : الخر** لاواه ( خنزرات فيها) باسلة أنت قالك شنو خاصك أشريفة قاتلهم غير الخ** فوق القطيفة داكشي لي خاصني
- حياة ( كتستفزها) : وإلى ماحملك شي نهار أجي وشمي ليا ياودي يا عنبر الى ماوليتي تموتي عليه وتهترفي بسميتو انا ماشي حياة ..
- لاپيل ديال جواد عتقاتها من يدين عنبر .. خرجات على برا دوات معاه نعتات ليه فين هي ورجعات دخلات للعندهم
- حياة : عنبر جواد هاهو جاي للعندي ( مرجعة تيليفون لساكها)
- عنبر : ديري بالك مع تيليفون باش الوقت لي غانكون ناوية نرجع للدار نسوني ليك صافي .. ورضي البال بلاما نوصيك صافي ؟
- حياة : دايرة حسابي فراسي .. اصلا مغانتسناش حتى تسوني عليا انا قبل انقولو خاصني نمشي باش مايقولش هادي سايبة وديال راسها وماعليها حكام
- عنبر : هكاك نبغيك .. ( شافت فماجدة) براكة اماجدة اويلي واش انا انفتح صالون
- ماجدة : سكتي سكتي اشمن .. حمادة عفاك ݣليتر سپراي كاين
- حمادة : وي كاين عندي 2 ماغك كاين ديال شي ݣلام وعندي واحد لاماغك ديال ألمانيا بلات نوريه ليك .. جبد كرطونة ديال شيݣلام جرباتو فيدها عجبها عاد جبد ليها بواط أخرى جرباتو كان غزال كثر
- ماجدة : عرفتي شنو اناخدهم بزوج ولكن هدا بدلولي بذهبي اناخود الݣولد وسيلڤر .. حياة سونا ليها جواد مشات عندو عنبر قربات كتشوف فماجدة شنو كتصنع
- عنبر : واش انا غانمشي لشي كباري .. اويلي اش هاد كترت البريو ؟
- دنيا : واختي كولشي فسبيل إسعاد ولد عمي الحبيب
- ماجدة : برعي ليا خويا حبيبي الكبيدة ديالي (شافت فيسرى) قولي ليها نهار تزوجتي بمحسن شنو خديتي ؟ هادي راه وقيلة شوميزات وماخداتهمش
- يسرى ( كتقدى لراسها حتى هي) : الى ماخداتش ناخدو ليها حنا ( غمزاتها) كون تشوفي انا شنو خديت اكبيدة هادسي كامل غادي ينفعك فرحي براسك وبداتك قبل من الزوج الكريم
- دنيا : وسمعتي الخبرة ..
- ماجدة : حمادة بغيت شي پلاك يكون زوين ومكايحرقش الزغبة عفاك .. خداو كاع لي غايحتاجو ماخرجو من تم حتى طرقات مسمار لي بغودوي ديال لوكوغ والميكاب كولشي خداتو ..
- خرجو من تم حطو داكشي فطوموبيل ورجعو مكملين الدوران على رجليهم .. دخلو للمحال خاص بالملابس الداخلية فين يبان داك لي دخلات ليه هي هدا كان فيه هيث اخور حوايج معريين كثر مامخطيين ولكن توبهم كان غزال وكاليتي .. حلفات ماجدة حتى تاخود ليها لا هي لا يسرى هي تحلف وهوما يحلفو .. بقات واقفة وساهية كتشوفيهم فاش كتجي تفكر كتلقى بلي الدنيا صرفقاتها بزاف ديال المرات خدات والديها منها وسيد لي بغات غدرها ولعب بيها ..
- ولكن منين كتجي تشوف من منظار اخور كتلقى بلي نفس الوقت عطاتها سحال من حاجة زوينة .. اولهم فاطنة وخالتها وبنت خالتها عزيز ورشيد لي ربي عوضها بيهم ودابا ماجدة وبنات عمها لي حاسبينها ختهم بحال الى كيعرفوها زمان .. تبسمات بلاما تحس طالعة منها تنهيدة طويلة من اعماق قلبها ..
- خداو التقدية للطوموبيل ركبو وشدو الطريق للمول .. بلاصات دنيا الطوموبيل وخرجو من تم ، شادة لماجدة فدراعها لاول مرة غادخل للمول هزات راسها فيه كيفما توقعات كبير المحالات اشكال وانواع لي بغيتيها وحليتي عليها فمك تلقايها تم ..
- يسرى : اجي ندخلو لسويس أربيان عندهم الروايح غزالين .. دخلو للمحال كان مكتوب فالواجهة ديال سويس اربيان مختص بالعطور كدخل كتعطي واحد الريحة كتحمق ..
- طلقات من ماجدة كدور وكتشمشم .. شي روايح عجبوها ولكن شي وحدين جاوها مجهدين .. كان تم حتى البخور لي كانت كتعشقو وهو من بين البليات لي عندها لي متقدش تستغنى عليهم
.... : كاينة سرغينة والعود لي مسقيين الى بغيتي تشمي تركيبة غزالة غادي تعجبك .. وعندنا حتى بخور خاص بشعر
- عنبر : واخا مرحبا .. جابت البنت مبيخرة دارت فيها شوية ديال البحور لي تطلق وعطا كان كيحمق غمضات عينيها وهي كتشم فيه .. واخا ثمنو كان طالع ولكن حمقها خدات منو باش تبقى تطلق البخور فبيتها
- يسرى ( واقفة هي وماجدة كيدويو ) شوفي هي عروسة جديدة خاصها شي ريحة لي تكون خطيرة واخا دوك لي جبنا فالخطبة واعرين ولكن هادي راه رائعة بمعنى الكلمة راه والله حتى يولي لاصق فيها ليلا ونهارا
- ماجدة ( قهقهات بانوثة ) : انت والله حتى مكتسوليش .. بغيتي السيدة مسكينة تحمل من ليلتها وريها ليا .. هزات يسرى كارطونة فالتيركواز مكتوبة فيها CASABLANCA .. جات عندهم البنت لي خدامة تم بإبتسامة ولاباقة :
الى بغيتو تشموها مرحبا .. ولكن بلاما تشموها سمعتها سابقاها
- يسرى : نو بلاش بغينا نخليوها مفاجاة بلاما تشم .. اناخدو زوج الى ممكن تجمعيم ليا عفاك ..
- .... : مرحبا خدات من عندها هاديك وخدات لوخرا كان مكتوب الثمن 890 درهم
- ماجدة ( كضحك بشر ) : الله يسمح لينا من خويا وصافي
- يسرى : حنا مادرنا الخير .. وقفات عليهم دنيا دايرة يديها فجيابها :
واش مزال مغاتساليو سربيونا خلاص نطلعو الفوق .. جمعو داكشي لي خداو ولي خدات عنبر من البخور وخرجو من تم ونيفوهم عامرين بروايح وقفو قدام الدروج الأوتوماتيك حتى وقفاتهم عنبر :
واش بغيتو طلعو فهادي للفوق ؟
- دنيا ( كتشوفيها بإستغراب) : متقوليش ليا كتخافي منهم ؟
- عنبر : والله اختي منركب فيهم عندي رهاب منهم ( تراجعات) انا فاش جيت داك الوقت من بلغاريا ركبت فلاسانسور منركبش فيهم ابدا ..
- ماجدة : واش بصح كتهضري ؟
- فكافي أونفاص مع البحر حاطة قدامها حليب بشكلاط وكيك بشوكولا كلات فيها يلاه شوية .. اونفاص معاها كان كامل بكامل أناقتو تريكو طالع بالكول فالݣري مع تجاكيط كويرة فالكحل سروال دجين كحل وݣاط عطرو الرجولي كيعطي منو .. قدامو قهوة مقابل معاها بإبتسامة على وجهو
- جواد : مزيان أمدموزيل حياة .. ودوزتيها نيت بدية زينة هادي
- حياة ( كضحك) والله بغيتك تشوفنا داك الوقت راه مايمكنش أنا ماعرفتش شنو ندير تلفت بقيت غير كنبكي .. كنغوت كنقولها شفار شفار تبعناه ولكن كان زهق ولد الحرام
- جواد ( مقابلها بعينيه بدون ردة فعل ) الحياة تجارب بحال سميتك .. مزيان الواحد يدوز باش يتعلم ويعرف
- حياة : بصح فعلا ( جغمات من كاسها) ربي لي كيلطف كونماشي دوك الناس لي عتقونا من ديك خيتي علم الله شنو غايوقع لينا
- جواد : هي لالة حياة صدقات فنانة ( ضحك) ماعندي مانسالك من الموسيقى للشوتينغ علم الله شنو جاي من بعد متعددة الموهب
- حياة : القرايا هي لي غاتجي هاد المرة .. انا قريت حدي الكاطريام إن شاء الله غاندفع للباك ليبر العام الجاي .. مابغيتش نضيع الوقت فهاد الايام يدوز عرس بنت خالتي كاينة واحد المؤسسة كتقري اللغات غاندخل ليها
- جواد ( رشف من قهوتو) : برافو عليك ماعندي مانسالك .. مزيان الواحد يكون طموح ومايشوفش عند رجليه يبقى محدود .. كلما زدتي كثر غايكون حسن وغايكونو عندك فرص كثر فهمتيني
- حياة ( بإبتسامة) : اه بصح عرفت .. وداكشي علاش انا بغيت نقرا كنشوف لبعيد
- جواد ( قرب منها ) : حياة أنت بنت ظريفة وكتباني حنينة ودغية كتعزي على الواحد ودخلي ليه الخاطرو واخا خليتيني منشور كنسوني ليك وبلعاني مكتجاوبيش
- حياة ( خرجات عينيها بنكران والحمرة طاغية على خدودها ) ناري انا والله العظيم ...
- جواد ( مقاطعها كيضحك) : حافظ هاد اللعيبات ياهاد البنت راني محفي ضرورسي يهديك الله متحلفيش على الكذوب .. ولكن هانية هاد الݣلسة كتسوى مليون والله حتى حاس براسي فرحان ومرتاح .. مليت من داك تبوزيق وكترت البروتوكول الخاوي طلع ليا فف .. فف راسي من الأخر
- حياة ( كلات مورسو من الكيك ) : حتى انا ماعنديش مع داك البروتوكول وداك التخربيق والله العظيم كنبغي ناخود راحتي
- جواد ( بجدية ) : ولكن كاينة واحد الحاجة بغيت نݣولها لك ومتاخديهاش بحساسية الله يرضي عليك .. كنحس براسي بحال الى داوي مع نفسي داكسي باش بغيت نݣولها لك
- حياة ( مركزة معاه ) : اهاه مرحبا قول
- جواد : مكندويش عليا ... ولكن على اي واحد من هنا للقدام كيما بغا يكون نوعو وكيفما كان متبقايش تعاودي ليه من ديپار اسرارك خليهم ليك
- حياة( تقرصات بلعات ريقها حسات بسخونية طلعات معاها .. حسات براسها صغيرة قدامو) ولكن .. انا ماقلت والو ومعاودت والو اعلى نهار تحطينا هنا
- جواد : ولو احياة كاين بنادم مريض منين غايشوف بلي من نهاركم تكريسيتو غايبغي يستغلك ويطوف بيك فهمتي البلان لي بغيت نوصلك .. بنادم مايعرف عليا ݣرام حتى نهار نعرفو مزيان ويعرفني مزيان نعرف مصارنو شنو مخزون فيهم وهو هكاك وعاد نعاود وشوف تشوف .. حسبيها نصيحة من صديق وليتي عزيزة عندو ومايبغيش شي حد يأديك
- حياة : فهمتك
- جواد : ناري وتقلقي مني انوض نخلط مك أنا نݣولك .. انا مابغيتش شي ميكروب يلعبها ضدك منعاودش نخلي داك بنادم هو ينبش ويقلب ورايا ويعرف راسو انا منݣولش فهمتي
- حياة حسات براسها صغيرة رجعات للكلام عنبر من ديما كتقوليها " عمرك تعاودي أسرارك عمرك تبقاي اتبلابلي ضربي وقيسي متخرجيش كلشي لوحي حاجة وحدة وخلي داك الشخص راسو ضارو متحطيش لي عندك " .. عاد حسات بكلام مها منين كتقولها لسانك مبري منك غير كتبرولي وتنقزي ولي عندك الداخل كتعاوديه وتخرجيه ماحملاتش راسها كون صابت الأرض تحل وتبلعها ولا هاد الاحراج لي تعرضات ليه دابا .. تسدات نفسها وشهيتها هزات الما وبلعان بيه الفقصة هزهزات ليه راسها :
عمري غانعاود كون هاني ..
- جواد ( قرص نيفها) : هكاك نبغيك أسنفورة .. نمشيو دابا للمول ونشري ليك غزل البنات للبنتي الفنة
- حياة ( ضحكها بالعة ديك الغصة لي حسات بيها ) : واخا .. ناض من تم خلص هي مشات للحمام كتشوف فالمرايا حناكها حمرين .. دوزات الما بارد على وجها عاودات الݣلوس للشفايفها ورشة من ريحتها وخرجات للعندو ..
- كملو باقي الخرجة بضحك ولعب .. خرجها من داك المود لي كانت فيه عارفة بلي هو ماعندو ذنب ومدار والو وكون شي حد إستغلالي مغايفيقهاش بعيبها غادي يسكت ولكن هو العكس .. عجبها الحال وعز عليها وفنفس الوقت ماكرهاتش تخبط راسها مع شي حيط كتحلف على فمها تحك ليه السودانية على الخفة لي فيه وكتخرج منو ..
- حتارمو الرأي ديالها وطلعو فلاسنور دارو مزيان الفوق ومن وراها سونات حياة للعنبر سولاتها فين كاينين لقاو راسهم كاين فنفس البلاصة خلات جواد مشا وهي توجهات عندهم .. كملو الدورة ديالهم ورجعو لدار وصلاتهم دنيا ومن تم كملات طريقها للدار ..
~~~~~~~~~~~~~~~
عند رشيد .. رجع من الستوديو هاز بواطة كبيرة طلع للدار وقبل مايتوجه لدارو دق فدارها المرة الاولى تسنى حتى سمع صوت رجليها كتجر فيهم فتحات ليه الباب حناكها حمرين ملوية فااپينوار طلعها ونزلها عينيها مدمعين
- رشيد : واش عيانة ولا ؟
- ماريا ( خلات الباب محلول وتمات راجعة داخلة مافيها لي يوفق توجهات للصالة .. نيشان للسداري لي كان معنكش كانت ناعسة فيه والمانطة لي حدا رجليها دوليبران فوق طبلة والما او واحد طبسيل وتلفازة خدامة ) :
مريضة من البارح الرواح والحلاقم هلكوني ( كتدوي وصوتها مغنغن مخنوق )
- رشيد ( حط ديك البواطة لي كان جايب فيها السوشي ليها هي كان عرف منها بلي كيعجبها توجه عندها ناسي راسو حط يدو على جبهتها كانت سخونة ) واو واو واو تي اش هذا اصاحبتي سخانة طالعة واش ماخديتي والو
- ماريا ( تكمشات تحت المانطة ) : دوليپران بوحدو .. ماقديتش نوض نتسخر عيط على علال مجاوبنيس يمكن كان مسخر لشي حد وسونيت لصاحبتي صوفيا ( تغنغنات ودموعها نزلو ) حلفات متجاوبني .. دخلت للواتساب لقيتها ( شهقات بالبكا) بلوكاتني تخايل صاحبتي بلوكاتني باينة خدات بلاصتي كانت ميتة فداك البوسط داكشي باش بلوكاتني
- رشيد ( دوز على راسها ) ششش متفكريش فهاد تخربيق دابا .. غانمشي نجيب ليك الدوا مشهية شيحاجة .. ديجا جبت ليك السوشي ولكن خاصك شيحاجة سخونة تشربيها
- ماريا ( ماعندها جهد ) : لي بغيتي ارشيد ديرو .. السوارت ديال الدار راهم حدا المرايا باش تحل وتسد مافيا لي يوقف والله .. بقات فيه هز السوارت ديال دارها ونزل مكانش علال الكونسييرج توجه للفارمسيان ..
- عفاك الله يجازيك بيخير بغيت شيحاجة ديال الحلاقم وسخانة .. حلاقم منفوخين وسخانة طالعة
- عطاه فانيد انتيبيوتيك وعاد فانيد ديال السخانة كلهم من مورا الماكلة .. خلصهم ورجع لريسطو لي خدا منها السوشي خدا لاسوب ديال الحوت دارتها ليه فبواطة خلصها خرج متوجه للحانوت خدا 5 لتر ديال الما عاد رجع للدار
- كانت متكية هازة كلينيكس كل مرة كتمسح نيوفها وعينيها المدمعين .. شافتو حتى دخل سد الباب توجه للكوزينة حط فيها لي جاب هز داك سوشي ستفو فطبسيل وديك لاسوب حطها فزلافة حط كولشي فالبلاطو وجابو حداها .. يلاه بغات تكلس حبسها :
غير خليك بلاصتك .. قاد ليها المخاد ورا ظهرها تقادات فالكلسة ديالها هز لاسوب هي لولة كيشربها بحال شي بنت صغيرة .. كان عاجبو الحال مغاديش ينكر وهي كثر واحد الفرحة كبيرة كانت كتحس بيها واخا المرض وجهد مكاينش وكولشي تجمع عليها الخدمة لي مشات ليها وعاد صاحبتها لي بلوكاتها بلا سبب ..
- ماريا ( بعياء ) : رشيد كيبان ليا نطلق الدار ونرجع فحالي لدارنا
- رشيد : نساي عليا هادالتخربيق دابا كولي وشربي دواك حتى تصحي وندويو صافي ..
- هزهزات ليه براسها وتنهدات بقا عليها حتى سلات ديك لاسوپ كلات من السوشي لي عجبها كان بنين .. عطاها الدوا ديالها قاد ليها الغطا
- ماريا : وانت مغاديش تاكل ؟
- رشيد : كليت فالخدمة .. رتاحي انت ، تنهدات تنهيدة طويلة عينيها عليه عينيها كانو كيقولو شحال هي كتبغيه ولكن هو معارفش واش نظرات عياء ولا نظرات شكر بقا كالس حداها مدة حتى نعسات .. حيد ليها تيليكوموند من يدها طفا التلفازة والضو دا كولشي للكوزينة خرج سد الباب ولاح ليها السوارت فلابواط ديال الرسائل ..
~~~~~~~~~~~
"كلُّ
شيءٍ
في هذه الحيَاة مُؤقت..؛
فإذا
سَارت الأمور
بِـ شَکلٍ جيِّد ٱستَمتِع بِها..،
وإذا جرَت علىٰ نحوٍ سيءٍ فلا تَجزَع..؛
لأنَّ ذلگ لن يکونَ إلىٰ الأبَد"..
- الحياة غريبة مرة تعطيك مرة ضور عليك وترضخك مع اكبر حيط .. ومرات تلاقي ليك بالاحضان وتعنقك مكتفهميش راسك واش صافي اخيرا أضحك ليا ولا غير عطاتني أمل ومن بعد اتقلب عليا قلبة ديال الغدايد ..
- قدام المرايا لبسات قفطان طالع بالكول فالأبيض زادت الفوقي ديالو جلابة عريضة شوية فاللون بيج لي كان مغادي لخزي مغادي للݣري .. هزات الشال لي كان فنفس لون الخياطة ساعة ذهبية لي جاب ليها دارتها فيدها وخاتم الزواج وجها كان خالي من أي أثر ديال المكياج واحد الرهبة واحد الخوف كانت كتحس بيه .. رشات من العطر ديالها لبسات البلغة لي كانت مطروزة بصم ..
- خرجات من بيتها مفاجئينها بصوت عالي :
صلاة والسلام على رسول الله الى جاه الى جا سيدنا محمد الله مع جاه العالي روروروروروروروروروروييييييييييي .. تودة والبقية كانو كلهم كانو واجدين بجليلبات تقليديين ، غايجي رشيد وعزيز يديهم مع عنبر للعند العدول ومن تم يتوجهو للفيرما ديال الروطال ..
- عنبر : خالتي سميرة فين هي رجاء ؟
- سميرة ( دارت الكاب على كتافها ) غاتخلط علينا هي وياه ابنتي .. خرجات حياة من بيتها كتشوف فعنبر بكل حب كتشوفيها بفرحة تقول ماشي بنت خالتها تقول بنتها
- نزلو كاملين التحت كان طوموبيل ديال رشيد او وحدة شادها عزيز من عند صاحبو مركب مو وباه ، وصلو لشارع كيصليو على النبي العيالات .. كل واحد معامن ركب شادين الطريق للعند العدول لي تافقو يعقدو عندو ..
~~~~~~~~~~~~~~~~~~~
- فالفيرما ديال الروطال .. العائلة كلها كاينة تم عندو علال ورقية إدريس وعبد الخالق طارق عصام وعماد الكل كان مجموع عندو .. ريحة ديال البحور فدار وريحة الطياب
- عصام : با ( علال ) معلش غايجيو الطلبة ؟
- علال ( بصوتو المهيب القوي التقيل ) : اولدي درت معاهم من ورا العصر إن شاء الله يكونو هنا
- طارق : ماجبتيش عمران أصاحبي ؟
- عصام ( هز حواجبو ) : مسافر مع مو دتكشي باش ماجبتوش .. وحتى العرس مغايكونش حيت القراية
- طارق : وعلاش دابا مكايناش القرايا ؟
- عصام : لا مكايناش عندو عطلو فيها سيمانة .. ودارهم راجل مو لأكادير ..
- طارق ( هزهز راسو ) : مافيها باس .. البنات كانو قايمين بالواجب موجدين كولشي باش يدخلو العرسان الحليب بزعر والتمر كولشي كان واجد
- عبد الخالق : علاش مامشيتيش معاه ؟
- إدريس : وافقت الصباح تالقيت السيد طار مكاينش هنا كاع ..
- عبد الخالق : شي خبار على خديجة ؟
- إدريس : مافخبارهاش بلي اليوم عندو ضريب الصداق .. كنا خايفين دير شي مصيبة كحلة راك عارفها بلاما نعاود ليك ..
- عبد الخالق : أودي الله يهديها النهار لي ماتكون فيه الام مع ولدها والله مانهار
- إدريس : ها ياسمين ماحضراتش ليها مها نقصها يد ولا رجل .. الام لي ماتوقف مع ولدها وتفرح ليه وتعطيه رضاها ماشي ام هاديك اخويا ، غادية مهجمة على الناس بلا حشمة بلا حيا راه امدار فيها ولدها راسو وانا شديتو ومنا كان ناوي يدوي معاها انا ماخليتوش
- عبد الخالق : السلاك .. الكل كان فرحان كولشي كان باين ليه الفرحة من عينيه واولهم علال ورقية كان عاجبهم الحال وفرحتهم بدنيا ..
- سونا الباب .. مشات المساعدة فتحات الباب حتى تدفعات جات طايحة ماحسو بيها حتى وقفات وسط الدار بصوت عالي :
اتبارك الله عليكم أتريكة الشلاهبية ..
يتبع...
ففاروق فايت دخل لحبس!؟ 😯