محتوى القصة
بدا طارق كيسمي الله هبطو الدبي**حة محاميين عليها والبنات كيطلو عليهم من الفوق كيتفرجو كولشي كان معاون من جهة الرجال .. واقف الروطال لابس سروال كيطمة وبوط دالميكة وتريكو لونو باهت شوية .. بالكشايف باش خلاوه يدخل يعاون حيت عريس واحد الاجواء كانت زوينة بزاف من ورا دبي**حة تكلفو بسليخ ..
البنات الفوق كيسمعو الغنا وتطبال .. بداو يطلو من الجهة لوخرا كانو الجرات وعيالات العائلة كيطبلو ويغنيو ويزغرتو كانو الرجال فجهة والعيالات من الجهة لوخرا .. نزلو البنات يتفرحو على المباشر متكدبش الى قالت كانت كتحس بفرحة وعاجبها الحال بزاف ناسية بلي تزوجات هاد الزواج باش تفدي دقتها نسات بدر نسات كولشي غير كنشوف فالعيالات وتفرج وتضرب الرش .. كانو كايرددو بزاف ديال الأغاني فرحانين :
الهوى الهوى وفين ماليه وجيبو الغرباويات يلعبو عليه .. وهي الباردية ويا مالين الخيل وانت تاكلي وتشربي وانا حرارت عليا وهي الباردية يا مالين الخيل وانت لابسة القميص وانا غاتحيتية وطلعي فوق القعدة ونزلي فوق القعدة .. دخلات ابتسام الوسط كدردك وتزغرت وتعشق على النبي ..
- كولشي كان فرحان مكاين فرق لا بين العائلة ولا جيران .. الداخل الغدا كان كيطيب وكيتافقو بيناتهم ..
- رقية : فاطمة سولي ليا الحاج واش دوا مع الرحماني على وديت دارو لي فمولاي بوسلهام ( مشات فاطمة دوات مع باها ورجعات )
فاطمة : غدا فالعشية إن شاء الله نمشيو باش يباتو تماك .. باش النهار دالحنة تمشي للحمام وتلقى النقاشة كتسناها
- رقية ( شافت فعنبر ) غاتمشيو ابنيتي انت والبنات الغد ليه فالعشية تباتو فواحد الدار فمولاي بوسلهام تماك تحني باش العريس يجيبك فالعشية على وديت العرس هكا ابنتي عوايدنا يجيبك العريس من داركم وحيت انتوما ماسكنينش هن شدينا واحد دار عد واحد السيد
عنبر : صافي أمي رقية ماشي مشكيل
إبتسام ( وقفات عليهم لابسة عباية منبتة بالحجر هازة ساكها ودايرة شال لايحاه عليها ) عنبر غانمشيو للقنيطرة درت مع واحد النݣافة خاصك اتختاري لباسي ومنها ندوزو لواحد الصالون نعتوه ليا البنات غزااال باش نتغدفاهمو معاهم على وديت يجيو لهنا يصايبو لك
عنبر : واش دابا ؟
إبتسام : واه دابا ( شافت فحياة ) ونوضي حتى تي باش لي بغات تكري شيحاجة تكريها ( شتفت فليالي ورجاء ) اويلي على دريات شادين ركنة ويلاه باش نمشيو ورجعو نحضرو للعلام لي غايتعلق تشوفو عوايدنا كيدايرين ..
- عنبر توجهات للبيت لي نعسات فيه جبدات جلابة ديالها وشال دارتهم هزات ساكها .. وتمات خارجة هزات راسها كان واقف قبالتها غمزها محرك ليها راسو ..
- الروطال : فين صادة ازيونات ؟
عنبر : انطلعو للقنيطرة باش نشوف النݣافة والصالون ..
الروطال : اممم مزيان ومعامن تشاورتي وشكون غادي بيك ؟
عنبر : راه إبتسام بنت عمتك لي قالتها ليا .. حيت ضروري نختار اللباسي ونشوف الصالون حتى هو راه البنات كاملين غاديين باش يكريو
الروطال ( هز حاجب ونزل الثاني ) وشكون غايديكم ؟
عنبر : والله ماعرفت
الروطال : ݣلسي لأرض نلبس عليا ونديكم
عنبر : لالا أفاروق الله يرحم الوالدين خليني نمشي معاهم انركب معاك ومعانا بنات عائلتك انتوتر ونتحرج والله ..
الروطال ( جاتو الضحكة ..غمزها) وعلاش اتحرجي مالنا خاونين راك مراتي أمدام رجوع لله
عنبر : واخا هكاك عفاك خلي هادشي يدوز بيخير .. انا بلا هادشي مخلوعة وأصلا مخاصش يكون بيناتنا تقارب حتى يدوز العرس
الروطال : انا مخي راه مريض وعوج ( حك حاجبو ) هاد يدوز العرس راه انفهمها عوجة
عنبر : عارفاك مكتفهمهاش عوجة وعارفاك داير عقلك ومغاتبغيش ندير شيحاجة بزز مني
الروطال : هاد الصوت الشتوي مكايمشيش معايا أزين ( غمزها ) كتدروشي فاش كتبغي تسلتي وتبغي تسلكيها مريݣلة مع راسك ..
إبتسام ( وقفات عليهم ) انا كنقلب عليها وانت شادها هنا تا كون تحشم .. يدوز العرس وأرا ماتشبع ..
الروطال : عطشان أبنت العميمة باغي نشرب
إبتسام ( ضحكات) والله يمسخك ، سير خلي السيدة أجي ازين متديهاش عليه راه اهبيل
الروطال ( جراها غادية بيها ) وتهلاي ليا فالمدام شوفي ليها الݣرونة تلبسو
إبتسام ( ضارت عندو كضحك ) كون هاني غاتكون خوخة وأنت غاتشدك الدوخة .. خرجات مع عنبر كانو البنات على برا ، سلمات على ياسمين لي باركات ليها كانو حتى هوما خاص يكريو .. خرجو 3 ديال الطوموبيلات ديال دنيا وديال يسرى وعاد ديال عصام ..
- فصالون عند العيالات لي بقاو بوحدهم رقية حدا تودة كتعاود ليها ..
تودة ( مركزة معاها ) مسكينة ( طلعات راسها فسعاد لي داخلة للكوزينة مع فاطمة عمت فاروق ) إيوا وشنو وقع فاش ݣالوها ليها ؟
- وصلو للقنيطرة وأول بلاصة توجهو ليها للخبازة عند النݣافة لي كانت كتعرفها إبتسام عز معرفة .. دخلو عندها رحبات بيهم رجاء عطاتها كرسي ݣلسات والبنات كيدورو على القفاطن وتكاشط كيتفرجو كل وحدة فيهم عجبها لون وعجبها موديل النݣافة ورات التكاشط للعنبر كولشي عجبها من غير الألوان لي مكتحملش هوما لي ماعجبوهاش
عنبر : واقيلة غير 4 لباسي براكة عليا ( شافت فإبتسام )
النكافة : أصلا مابقاش دابا العريسات كيديرو كترت اللباسي كيديرو 4 ولبسة الخامسة هي لاغوب
عنبر : ياختي ماعنديش مع ديك لاغوب ( ضحكات)
إبتسام ( خرجات فيها عينيها ) اويلي على ماعنديش مع لاغوب من نيتك ( شافت فنݣافة ) حنان ختي بغيتى شي كسيوة تكون فنة
حنان : غادي تبرزي بالفولار ياك ؟
عنبر : أه ضروري
حنان : صافي انوريك واحد لاغوب خطيرة عاد وصلاتني اتكوني أنتي تاني وحدة تلبسها بلات نوريها ليك .. ( خرجات من داك المحال للمحال لاخور )
إبتسام : اينا وحدين عجبوك ؟
عنبر : نكدب عليك حمقوني كاملين من غير ديك لي فزيتي ولاوخرا لي فالقهوي .. عجباتني ديك لي فيها الفوشيا وتبطينها فالموڤ والبيضة لي بنقري والحمرة هبلاتني حتى هي وعاد قلتيلي على ديك الݣرونة علاش زعمة ؟
إبتسام : ماشتيش فاروق عينو فالݣرونة .. عرفتي هبلاتني حتى لوخرا لي دايرة بحال لامينيو ومنبتة بالحجر ودخلاني ديالها غوزي ويلي شحال هماوية ياخني تجيك خاوار
عنبر ( كنضحك ) راه انصدقو ف 5 تكاشط وعاد لاغوب وعاد الخضرة دالحنة
إبتسام : ومالها لي كيتسالنا شيحاجة يجي يݣولها ايوا صافي عليا العرس راه الناس كيديروه امرة وحدة فرحي براسك ونشطي ..
عنبر : هي نزيد ديك الأورونج ( كضحك)
إبتسام : صافي ( دخلات النݣافة ) وراتها الكسوة لي كانت زوينة وشكلها راقي كسوة واسعة والفوق ديالها بحال شي كاپ مخطي الصدر وطزيل من الظهر كلو مشبك ومنبت بالحجر ..
عنبر ( عينيها كيبريو عجباتها وسلبات عقلها ) غزالة ..
إبتسام : دابا أش درنا أحنان .. ختارينا 6 لباسي كولشي عندك غزال تبارك الله
حنان : الله يبارك فيك مرحبا بيكم وريني غير لباسي باش نعرف ياكما غاتخرج شي وحدة فيهم فنفس لاضات ( وراتها إبتسام اللباسي قلبات فلاجوندا ) صافي مزيان هادو غايكونو .. العمارية أشمن وحدة عجباتك ؟
عنبر : ديك لي فيها بحال الكرسي مكنعرفش نربع هههه ..
- حياة بدات كتحسب بين لباسي وطيافر الݣلسة وكولشي حسباتو ( شافت فإبتسام ) القاعة اش درتو معاهم ؟
إبتسام : لا داكشي نضيناه غادي تبنى قاعة كبيرة عقلتي فعرس أسماء ديك التيرة لي حدا الپيسين تماك بحال المرة لي دازت .. التواسع حتى لي غايبغي يشطح يلقى راحتو
حنان : صافي مزيان .. اللباسي دالبنات راه شت كل وحدة ختارت لي بغات ادخلوهم فالحساب
عنبر : حياة ورجاء وليالي على حسابي انا مدخليهمش فالحساب أختي إبتسام
إبتسام : تي سكتي أشمن ( شافت فحنان ) كولشي جمعيه ليا من الاول الأخر وديري ليا بحساب دراري لي غايصورو لي معاك الله يرضي علك حتى هوما .. بغيت النقةدى والنضا ..
حنان : لا كوني هانية من ديك النحية .. جمعات ليها الحساب بكولشي ليه مدات ليها ابتسام لاڤونص .. كان عطاها فاروق فاش بغاو يمشيو دارت معاها النهار لي غايكون فيه العرس والوقيتة لي ايجيو فيها ..
- عصام ( على برا ) اختي كون أخليتكم تجيو راسكم وناري سخرة العيالات تخليك بلا شغل
إبتسام : وخويا متجيش كون سحابلي نݣولها لطارق .. دوماج على مول داري لݣيتيه خدام ماݣد يجي وتفرج
عصام ( هز يدو ) صافي وصافي ادوينا ساليتو ؟ ( قاطعاتو دنيا واقفة حدا طوموبيلتها ) إبتسام ندوزو لصالون دابا ولا ناكلو سيپيا جينا جينا
إبتسام ( بحماس ) فكرتيني فيها ياختي تشهيتها نيت .. ركبو مع عصام عنبر وابتسام وحياة والبقية ركبو مع يسرى ودنيا
حياة : ختاريتي؟
عنبر : كون شتيهم يديو ليك العقل كيحمقو .. ديري صفحة ديالها نوريهم ليك ..
- بلاصاو الطوموبيل متوجهين للعند مول سيپيا خداو سوندويتشات كلاوهم .. ومن بعد قررو يضربو دويرة فالخبازة الوسط ماحدهم جاو جاو .. رجاء بقات فطوموبيل ديال يسرى حيت عيات ومتقلة عصام دخل لواحد القهوة تم مخليهم يضورو على خاطرهم ..
- دخلو للخبازة الوسط كالسات النقاشات ولي كيبيعو الخبز فينما دزتي كيعيطو ليك تحني .. عاد كاين صحاب التوابات العطارة مالين الحلويات .. دخلو للداخل وبضبط زنقة الورد كانو تم ماليات بيجامات والملابس الداخلية ، وعاد محال كان خاص بالبيجامات ديال العريسات كيحمقو ..
إبتسام : عنبر شوفي هادي كتحمق
ليالي ( كتقلب فيها ) غزالة تبارك الله شوفي توبها رطيطب
حياة : خوديها دوك لي خديتي ماشي بحال هاد الشكل ..
إبتسام ( بإبتسامة ) فخبارك كتغالطي ليا انت وهاد البنت اسميتك ؟ ( كتشوف جهة ليالي )
ليالي : ليالي ( ضحكات )
إبتسام : اياااه ليالي سميتك فنة بحالك .. والله كتغالطي ليا انت وحياة
دنيا : وراه قلتها ليهم داك نهار كيتشابهو سبحان الله العظيم
إبتسام : بحال عنبر كتشبه ليك انت وياسمين
ياسمين ( كضحك ) ونهار غنات فعرسي قالتها دنيا سبحانه الله العظيم يخلق الله من الشبه أربعين فهاد الدنيا كنتلاقاو ببزاف دناس كيشبهو لينا
إبتسام : انا ياختي مزال مالقيت شي حد يشبهلي
ماجدة : ولكن أسماء كتشبه ليك أماشيغي
إبتسام : هاهي بدات ماشيغي ماشيغي ( كيضحكو) وأسماء من دمي بغيت شي واحد ماشي من دمي بحال كيما توما مشابهين ..
يسرى : دابا تلقاي .. عنبر اتاخديها فنة كتحمق
عنبر ( عجباتها ) صافي ناخودها .. ختارت ديك بيجامة لي كانت مع بانطوفة ديالها
دنيا ( بالهمس ) الشوميزات لي خدينا للعنبر فين درتيهم ؟
ماجدة : عند مي خليتهم فباليزتي حتى نستفوهم فدهاز
دنيا : لا مايتحطوش فدهاز حسن منين يتعاود يرجع الدهاز لبالز ديالها نديرهم ليها تم هادوك راه حشومة يتحطو قدام الناس ..
ماجدة ( كضحك ) أه بصح .. مكملين الدوران ديالهم ابتسام وعنبر القدام حياة لور مخشية مع ليالي كيدويو وماجدة ودنيا وياسمين ويسرى كيدويو على محسن راجل يسرى ..
~~~~~~~~~~~
- كتمشى هي ورقية وسعاد وسط الطبيعة عاجبها المنظر والخضورية لي ضايرة بيهم
سعاد : المرة لولة هادي لي تجي فيها لهاد النواحي وقيلة الالة تودة ؟
تودة : وصراحة حدي الخميسات هاد الجوايه عمري ماوصلت ليهم أول مرة
رقية : فاطنة بنتي راها أصلها شلحة من الخميسات
تودة : تزاديت وكبرت فالخميسات واحد دوار تم وفاش درت 16 عام مشيت عد خالي لجديدة واحد دوار تم كان ياكن فيه هو ومرتو او ولادو الله يرحمو مسكين
سعاد : سبحان الله العظيم والديك مزال بالحياة ؟
تودة ( بحزن ) با الله يرحمو ومي مزال بالحياة بيناتنا اتيليفون ( بلعات ريقها ) عايشة مع خوتي مامخلينهاش تشوفني ولا نشوفها
سعاد : اويلي أختي وعلاش ؟
تودة ( تفكرات فاش عيطات لمها وقالت ليها بلي حاملة نهار خوتها حلفو عليها الى حطات رجلها عندهم يدب**حوها عمرها تحلم تشوف مها ولا مها تشوفها ) كان با الله يرحمو بغا يزوجني بواحد الراجل كان كبيير عليا وانا مابغيتش هربت لعند خالي ..
سعاد : ياختي الله يسمح لهم حشومة عليهم حارمينك من ميمتك
تودة ( ساحو دموعها مسحاتهم ) الحمد لله لي مزال كنسمع صوتها بتخبية أحيانة توحشتك انشوفها ونعنݣها ( ماقداتش تصبر بدات تبكي )
سعاد ( كدوز ليها على ظهرها مصبراها ) صافي أخويتي اش داني كاع نجبد ليك هادشي ( ݣلسو فواحد الݣليسة تحت الشجر )
تودة : علاش انا نسيت باش تفكريني أختي أحيانة كيتهم فقلبي حتى لغدا قدام الله .. الحمد لله على كل حال
رقية : حتى دابا ابنيتي حنا عائلتك دابا غانشاركو دم الحمد لله لي تقالت عليك خفافت علينا الله يبعد علينا أولاد الحرام وبنات الحرام
سعاد : مي رقية مال خديجة مجاتش ؟
- كملو المسارية وتوجهو للجهة فين كانو طوموبيلاتهم محطوطين .. سونات ماجدة للعصام علماتو 10 دقايق كان عندهم شدو الطريق متوجهين لاڤيلوت للصالون رجاء بقات للتحت كتسناهم وهوما طلعو للفوق ستقبلاتهم مولات الصونتر ديال التجميل حطات ليهم القهوة ..
.... : دندونة زارتنا البراكة ياختي مابقيتيش تجي لا برية لا تيليفون كنشوفوك افستوريات
دنيا ( كضحك ) والله أختي حدي كازا .. كنجيو لدار جدودي غير فالمناسبات والأعياد راكي عارفة
.... : شكون العروسة ؟ ( شافت عند عنبر ) كيبان ليا وقيلة أنت هي العروسة ؟
عنبر ( هزهزات براسها ) أه هي أنا
دنيا : فاتن بنسبة للميكاب ولاصيغ وعاد المشيطة مع الظفار
فاتن : وي ديجا دويتي معايا فهادشي .. ( شافت فعنبر ) غادي ديري لوجيل ؟
عنبر : لالا مكنرتاحش فظفار أصلا بغيت ظفار ندوز بيهم الحنة والعرس نتصور بيهم ونحيدهم
فاتن : صافي واخا قبل منرجع من عندكم نزولهم ليك ماشي مشكيل ( وقفات كتقلب وجه عنبر ) تبارك الله البشرة ديالك زوينة حسن نديرو سوان اليوم باش غدا يرتاح وجهك
عنبر : ولكن بعد غدا غانمشي للحمام
فاتن : نونو ماشي مشكيل .. فاش تمشي للحمام وجهك بوحدو متوصليش ليه داكوغ .. وعلى هاد الحساب لاصيغ نخليوها فاش تجي من الحمام
دنيا : علاش ؟
فاتن : با ماينوضش ليها الحبوب ويتحبب الدات ديالها تجي من الحمام نعملو لاصيغ وتبدا نقيش ديالها
عنبر : علاش هاد لاصيغ بلاش ادنيا
دنيا ( شافت فيها بإستغراب) ومالك باغية تبقاي بزغبك اويلي رجوع لله ضروري ( شافت ففاتن ) صافي مزيان اتجي بكري نجي نجيبك
فاتن : نونو عندي طوموبيلتي
دنيا ( شافت فالبنات) شكون لي اتبغي تصايب ظفارها باش ترجع معايا غدا ؟
حياة : انا ويمكن ليالي حتى هي
ياسمين : انا لا ظفاري عاد رتاحو مساكن شوفي يسرى
يسرى ( شافت فيها ) على أساس أنا مالفة كنلصقهم أصاحبتي نوو بلاش
فاتن : نهار العرس اتصايبو راسكم ولالا باش نجيب معايا البنت لي كتكون معايا .. باش انا نركز مع العروسة
دنيا : لا اجيبيها معاك حيت انا زرقة فالميكاب ماجدة لي كتعرف تصايب لراسها ( شافت فيها ) انت مغاتصايبيش ظفارك ؟
ماجدة ( وراتها صباعها ظفارها طوال) طبيعيين اماشيغي شوفي ابتسام
إبتسام : لالا أختي انا ماعنديش مع هادشي .. تفاهمو مع فاتن على كولشي وحتى الثمن عكاتها ابتسام لاڤونص والباقي حتى يسالي العرس وتعطيه ليها ..
- العشية من ورا مارجعو من القنيطرة وريݣلو جميع الأمور .. كانت طوموبيل جديدة واقفة جنب الطوموبيلات ..
ماجدة : شكون جا ؟
عصام : طوموبيلت راشد هاديك .. نزلو وليالي جرات حياة غاديين
ليالي : هاداك راشد مكنرتاحش ليه فخبارك
حياة : واش هو لي كان فعرس ياسمين طلب ليك النمرة ديال التيليفون ؟
ليالي : أه هو وكان باغي يوصلنا نهار عقد عنبر ومابغيتش أكيحوم عليا
حياة : ومال حسك مدوي معاه متعرفي يكون باغي المعقول
ليالي : من نيتك احياة بحال داك النوع مكايبغيوش المعقول كيبغيو ايتفلاو على بنات الناس .. وانا هاد الساعة أختي ماعندي عائلة ماعندي جاه ولا مال شرفي هو لي كنكساب
حياة : واش تي هبيلة مالو ايجرك بزز الى بغا الزواج مرحبا مابغاش الله يعاونو وزايدون راه صاحب راجل عنبر مايمكنش يدير هك ولا هك عارفك منا ومن العائلة ..
ليالي : نهار العرس شافني كنلوز علاياش أيبغيني فنظرك حتى انت
حياة : ودابا غايشوفك على حقيقتك داك نهار راه كنتي لابسة اشورط ديال البونج باش خرج ليك ليهونش وتراتر
ليالي ( كضحك ) ضربتو على شعا مسكين
حياة : الى بقا لاصق عرفي نيتو مزيانة شتيه ݣلب صافي الله يعاون مالك انت .. دخلو للدار الداخل داكشي لي تقداوه دخلوه للبيت رقية ، عنبر مشات للبيت بدلات توضات وصلات لبسات حوايجها ورجعات للعندهم باش تحضر للتعلاق العلام ..
- عيالات العائلة كلهم مجموعين وحتى من جيران .. كانت ݣالسة رقية حاطة حداها قصبة نقية جديدة ويزار بيض جديد دارت فيه القمح والفاكية ݣرݣاع والبيسطاج اللوز كاوكاو المسكة والفانيد .. بداو العيالات كيتجارو وكل وحدة شحال جمعات من الفاكية ومن الفانيد والمسكة بضحك ولعب ..
- هزات رقية ديك الݣصبة حزمات فيها ربطة ديال النعناع خضرة باقية نقية .. وحزمات فيها الرايا وزيف بيض مدات القصبة للإبتسام لي عطاتها لواحد من ولاد الجيران طلع لسطح وعلقها باش أي واحد يشوفها ولي جاي من بعيد يشوفها ويعرف بلي دار حيدر فيها عرس .. كملو بضحك واللعب ومن وراها تفرتكو العيالات رجعو بحالهم باش يرتاحو ..
- العائلة بقاو مجموعين تعشاو على الضحك والجماعة سميرة ورشيدة لقاو راحتهم مع عمت فاروق شادين الجماعة مع بعضياتهم كيتعاودو ، أما تودة كانت محشية مع سعاد ورقية ب3 بيهم مجمعين لقاو الراحة مع بعضيتهم تعاودو وتفاشو القلوب ولي عندها شيحاجة قالتها وكل وحدة لقات راحتها مع الثانية ..
- عنبر ( بصوت شبه مسموع ) ماجدة أجي نقوليك كتعرفي شي وحدة سميتها عبلة ؟
ماجدة ( كتفكر ) شكون هادي ؟
عنبر : سمعت فاروق كيدوي عليها مع طارق
دنيا ( حاطة راسها على رجلين ماجدة كتحك ليها ) واش عبلة الإماراتية ؟ ( هزات فيها عينيها )
عنبر : والله ماعرفت كنا راكبين وسونات ليه المساعدة .. قالت ليه بلي مدام عبلة غاتجي وبغات تشوفو
دنيا ( تقادات فالكلسة شافت فماجدة ) عبلة ديك الفنة عقلتي عليها لي كانت جات العام لي فات .. فاش عرض عليها وكنا حتى حنا
ماجدة ( حلات عينيها على تواسعهم ) متقوليش ليا هاديك ( شافت فعنبر ) واش بغات تجي سيپا ڤغي مكنقدش عليها السيدة بحال سكوتش ..
دنيا : ولكن راها فنة والأنوثة كتقطر منها
ماجدة : وي بصح ( شافت فعنبر ) واحد السالف عندها وراقية فلباسها ومشيتها
عنبر : وعينيها على خوك ياك ؟
دنيا : شكون قالها ليك ؟
عنبر : كان طارق كيدوي معاه وانا سمعت كولشي بوديناتي قاليه كتحماق عليه ، والى سمعاتو تزوج غاتحماق
دنيا : ماديريش فبالك أصاحبتي فاروق مدامو تزوجك الا وراه باغيك .. فاروق راه مودو فشكااال والله العظيم راه مايديرش شيحاجة لي ماباغيهاش خوي بالك وتعاود لمخها ..
عنبر : انا مادرتش فبالي ݣاع اجاني الفضول نعرف ..
دنيا : غدا غايدوز واعر عند الدراري ( شافت فعنبر ) غدا فالعشية كيكون ديال العزارة الشطيح ورديح وكيمثلو ونكات كيدوز عندهم فن مالفة كنتخبع ونتفرج دابا مغانقدش كلنا غانمشيو لمولاي بوسلهام .. ، رجعات حياة من برا كتبسم مع التيليفون ݣلسات حداهم ..
دنيا : ازين كيفرنس شي حب هذا العفريتة
حياة : نص نص مزال ماعرفنا شنو كاين ( بإبتسامة )
الروطال ( بصوت رجولي تابث ) عنبر ( هزات عنبر راسها كان واقف قبالت باب الصالون فالمراح
عنبر : نعام ؟
الروطال ( براسو ) أجي بغيتك ..
- ناضت من حداهم خرجات تابعاه للبرا الليل والݣمرة مضوية وقف داير يد فسروال ديال الكيطة قبية محلولة تحتها تيشورت او واحد البانطوفة رجالية جارها فرجلو ..
عنبر ( شافت فيه بإستغراب) ياك لاباس ؟
الروطال ( بجدية ) غدا غاتمشيو لمولاي بوسلهام ؟
عنبر ( هزهزات راسها) أه إن شاء الله علاش ؟
الروطال ( بصرامة ) الله يرضي علك فاش تمشيو حدك الدار يݣولو ليك أجي نتمشاو نطلو على البحر ولا شي قنت لا ..
عنبر : ولكن علاش ؟
الروطال : دوينا أعنبر الله يرضي عليك ديري لي ݣلت لك كوني تسمعي
عنبر : أصلا راه مغايكونش عندنا الوقت .. غدا مغانمشيو حتى العشية وبعدو عندي الحمام والحنة ..
الروطال : خففي سيري طلي رجليك ويديك نلوح مك من داك البحر
عنبر ( كتشوفيه بإستفهام ) علاش زعمة وباش كتسمى الوحدة عروسة الى ماحنات .. والحنة من الجنة
الروطال : ريحتها كتغيلف
عنبر : مالي غانخشي ليك يديا فنيفك زوينة هادي
الروطال ( بتهديد ) عنبببر دويت
عنبر ( حركات راسها ) صافي واخا أصلا ماعنديش معاها ( كانت حامقة تنقش وحالفة تنقش ودير النقش الفاسي ) صافي نمشي دابا ؟
الروطال : كريتي الݣرونة مع داكشي لي غاتلبسي ؟
عنبر ( ببرود ) أه كريتو شكون غايوصلنا غدا أنت ؟
الروطال : غايوصلكم عماد وبَّا( علال) كيما وصيتك ديري عقلك ورضي البال لتيليفون
عنبر ( بإستفسار ) وعلاش انت زعمة ماتوصلناش ؟
الروطال ( حط يدو على الحيط لي حاطة عليه ظهرها ) وعلاش أزين بغيتيني نوصلكم ( غمزها )
عنبر ( تفافات مصطانعة البرود) انا غير سولتك حيت مالف كتقولي انا نوصلكم هادشي لي كاين
الروطال : نهار العرس وغانجي نديك فالعشية مع ديك 8 العرس غايبدا مع 9 إن شاء الله
عنبر ( هزهزات راسها ) إن شاء الله انا مشيت ( عطاتو بظهر حسات بيدو جراتها ورجعاتها لبلاصتها ملصقاها مع الحيط كتشوفيه بإستفهام متوترة من داك القرب خايفة يدير مدارو فالبيت ) شنو ؟
الروطال : مالنا ؟
عنبر : مالنا مالك انت انا مامالي والو
الروطال ( كيشوفيها مصغر عينيه فملامحها ) تلاݣيتي مع الخالة ؟
عنبر : اه تلاقيت معاها ظريفة ( سكتات وشافت فيه ) علاش ماقلتيش ليا بلي ماماك توفات الله يرحمها
الروطال ( حك جنب حاجبو ) علاش كنا كندويو بحالنا بحال البشار ؟ مرة وحدة انا وياك دوينا فيها بحال البشري فالقهوة
عنبر ( خشات يديها فجياب الپينوار ) خالتك ظريفة وزوينة وكتبان حنينة
الروطال ( بحب ) هاديك الروح هاديك هي الكبدة
عنبر : كثر من مرات باك ؟
الروطال ( تنهد مدوز يدو على شعرو ) الواليدة رباتني .. تكون كيما بغات تكون ، تعاملات خايب ولا زوين منها لضميرها ولكن كتسنى رباتني أما الخالة هاديك بلاصتها بوحدها بلاصتها بلاصة الواليدة الله يرحمها ..
عنبر : كتشبه ليك شوية فعينيك
الروطال ( هز حاجبو ) علاش عينيا كيديرين ؟
عنبر ( تداركات الموقف هربات من تحت يدو ) تصبح على خير
الروطال : أجي أديك الفتيلة معاك داوي .. مداتهاش فيه دخلات لدار خلاتو متبعها بالعين ..
- تفرقو وكل واحد دخل بيتو ينعس .. توجهات للبيت لي فيه سهام تعلمها باش تمشي معاهم غدا للمولاي بوسلهام دقات فتحات ليها ودخلات رمات عينيها لنموسية كان ناعس مسيكين
عنبر : سهام ختي غدا إن شاء الله غانمشيو للواحد الدار فمولاي بوسلهام
سهام : وقيلة غايكون البرد مجهد تماك على وديت أمير الديور كيقولو تم مقابلين مع البحر
عنبر : بصح ضاير بيها البرد ولكن مغاتكونش باردة تݣد تكون فيها الشوفاج
سهام : الى فيها شوفاج مزيان الى مافيهاش نبقاو هما حسن مابغيتوش بمرض وهو مسيكين يلاه عندو شهر وسيمانة دغية كيمرضو ..
عنبر : بغيت زعمة حتى انت تحضري للحنة وتشوفي دوك الأجواء
سهام ( بإبتسامة ) لا ماشي مشكيل أنا بيني وبينك ماعنديش مع العراسات حتى فالعائلة مكنحضرش .. ماعنديش مع صداع وديك الحيحة نبقى هنا حسن ومنها امير نيت مايمرضش ليا .
عنبر ( قربات من النموسية كتشوفيه ناعس بحال الملائكة وزوين نزيلات لعندو باستو فجبهتو و حنيكاتو ناضت من حداه بشوية ) صافي واخا لي بغيتي خاطرك وفين لقيتيه ..
سهام : الله يكمل عليكم بالخير
عنبر ( هزهزات راسها ) اللهم آمين يارب العقبة ليك
سهام ( ضحكات ) لا انا مزوجة راجلي كاين على برا وانا كنشغل راسي بهاد الخديمة .. بينما قاد ليا الوراق ديالي ونمشي عندو إن شاء الله
عنبر : الله يكمل عليكم ويجمعك معاه فالقريب
سهام : اللهم آمين يارب .. خرجات عندها من البيت توجهات لبيتها قدات بلاصتها وتخشات فيها ساهية كتخمم .. كتحس بعقلها مسدود ومخربق وفيه بزاف ديال المطارق ..
~~~~~~~~~~~~
الغد من ورا الفطور توجهو البنات للدار ديال مولاي بوسلهام .. عنبر مشات مع علال وعماد وصلو للدار لي كانت بنسبة ليها فاش شافتها ماشي دار عادية اقل مايقال عليها رائع بإمتياز مصبوغة بالابيض وزرق كطل على البحر عندها جردة كبيرة ..
- بحال ڤيلا صغيرة .. علال من بعدما خدا السوارت عطاهم للإبتسام لي جات مع البنات ومع تودة وباقي العائلة النص بقا فدار العريس ونص جا مع العروسة ..
عنبر : عماد اجي نسولك
عماد ( بكل تركيز ) سولي مرحبا
عنبر : فاروق قاليا ممنوع نخرج البحر ونعتب باب الدار كيوصي ويعاود .. دخلني الشك واش واقعة شيحاجة ياكما داك الميكروب دخل للمغرب ومابغيتوش تقولوها ليا ؟
عماد ( حك حدا نيفو ببرود ) لا مكاين والو من داكشي ايكون غير خاف عليك
عنبر ( حسات بشيحاجة ماهياش من كلامو ) عماد واش من نيتك يخاف عليا شنو بيناتنا واخا مزوجين ؟!!
عماد : وراك مرتو واخا مزال مابيناتكم والو ولكن مرتو عرضو شرفو اعنبر خويا كنعرفو .. البراتي وشنو كيدير معاه خلي شي حد منو
عنبر( بقات كتشوفيه مدة مدخلش ليها كلامو لدماغها ) امم مزيان واخا ماقلنا شاي .. عطاتو بظهر ودخلات مخلياه واقف هز تيليفون من جيبو مدور النمرة
- مكتعرفش أخويا دوي نيشان متوصليش البحر متعتبيش باب دار .. الدخل الشك لي مداير والو
الروطال : علاش سولاتك ؟
عماد : وايااه اصاحبي ( كيشوف فجدو كيدوي مع مول الدار) طاح ليها الشك كتسول ياكما داك خونا دخل المغرب
الروطال : نمسة صافي .. وباش جاوبتيها انت ؟
عماد : ݣلت ليها ايكون أخايف عليك
الروطال ( قهقه بضحكة رجولية غارقة ) دوزها على ديك الفتيلة مالݣيتي متݣول
عماد : داكشي لي جا لدماغي غانبقى نخطط أش غانݣول .. المهم سير دابا اندور ليوسف ..
~~~~~~~~~~
- راكب فطوموبيل عاقد غوباشتو كيحس بدمو كيفور كيسول راسو واش هادشي لي فيدو بصح ولا غير كيتخايل .. كيزومي ديك الصورة كيفليها قنت بقنت معصب كلو كيترعد ماكرهش يخبط شي حد يفصل شي حد باش يبرد هادشي لي فيه .. بدا تيليفونو كيسوني كانت مو فتح الخط معصب
بدر : شنو ؟ ..ماعرفتش واش كتسوليني وانا كنت معاك شفناها انا وأنتي ... واحد لوطيل هنا ... لاش غاتجيو لاش ؟ ... نتأكد بعدا بابا بعدا غايبغي يدخل المغرب بعدا ؟ كتݣولي شيحاجة مزال متيقناش منها الواليدة ... صافي غير قطعي دابا .. وصااافي الواليدة صافي ..
- تجمعو رجال العائلة الكبار فقط فالصالة الكبيرة .. تحط ليهم الغدا كيتغداو ومجمعين على الحديث كل مرة جابدين حاجة مرة يدويو على الزرع مرة على الخضرة مرة على البهايم كل مرة حديثهم غادي فجيه ..
راجل فاطمة : خاصنا أسي حمد وسي مصطفى ؟
علال : وراني ضورت ليه ودويت معاه كانو عوالين اليوم يجيو ولكن ماكتابشاي حتى لغدا إن شاء الله
( واحد من العائلة ) عرضتو على العائلة كاملة ؟
علال ( بوقار ) وانا ݣلت ليه يجي هو وعائلتو كاملين .. وعلى ماݣال غايجي ولدو مصطفى ومرتو والحسين ومرتو او ولادهم ..
راجل فاطمة : ايوا لي جا الله يخلف عليه ولي ماجا راه معدور
علال : داكشي لي كاين .. ، كملو الغدا ديالهم الدار مقلوبة سفاها على علاها شي داخل شي خارج الكوزينة عامرة كولشي معاون ..
- فالعشية ومن ورا صلاة العشاء تجمعو كاع العزارة ولاد العائلة او ولاد الجيران مكاينش حس راجل كبير بيناتهم .. الروطال وسط منهم دخل واحد من ولاد الجيران لابس الجلابة ونݣاب وداير بلعاني الحدبة وهاز العكاز مرقق صوتو بحال المرة ..
- والمعطي والمعطي تا فينك يا هاد الراجل ؟ .. تم داخل عصام لابس جلابة جدو ورزة وملصق لحية طويلة وشايبة ولايح سلهام على كتفو ..
- تي شكاين واش حنا منرتاحوش فهاد الدار يا هاد المرة واش بغيتي نتزوج عليك ؟
.... : وتسخا بيا يالمعيطي ؟
.... : ونشوفليا شي توتة مليحة نكمل بيها مابديت
.... : وديك توتة المعيكي خاصها منجل صحيح .. وانت قرشالك حفا احنيني ( الكل ضحكو ) ..
.... : تي اشمن حافي راه تي لي غيرانك سكناتهم الرايلة وعشات ..
.... : وانا مزال ندك وندردك ونجيب الزين والمليح مول الخيمة الكبيرة
.... : هاي هاي هاي على شيبة العاصية وشت رجليك خرجو شواري تي علامن حاطة العين ..
.... ( أشر للجهة الروطال ) الطويل العريض مول العين زينة .. اكنتسناك أضرك ويديك ربي لدو ونبالي بيه يا لعرس الزين نديروه
.... : وشتك باغية تسيفطيني للروضة يا كرشة الجحش منعرفو نيفك من عينيك مبجوغة بحال شي بطاطة لاوية ..
- بقاو على داك التمثيل والضحك وطنز .. شوية هزو الدراري البندير وبداو يغنيو أغاني وموسيقى دالحلوف شوية قلبوها هيث ، تجمعو الظراري فصف واحد وكلهم برجل والكتف الأجواء بيناتهم كانت زوينة ومعروفة بنهار ديال العزارة لي كيتجمعو فيه غير العزارة لا من العائلة لا من الجيران ..
- حطو ليهم العشا تعشاو ومن ورا العشا بقاو قصارين ݣولها وضحك عليها وشدان فالعريس ، لي شافو دابا مغايݣولش هذا هو الروطال مع العائلة او وسط الحباب كيكون واحد أخور كيحس براسو كينتمي للهاد البلاصة كتر مكايكون فكازا .. حتى نفسيتو كتبدل كيحس بلحب منهم ليه حب مافيه شروط مافيه مصلحة .. كاتحس بناس كتبغيك وكتعزك بلا طمع بلا والو حب ديال الله من القلب .. بنادم واقف معاك حيت هو بغا وحيت كيعزك وكيقدرك ...
- واقفة فالبالكو اونفاص معاها البحر عجباتها الدار طيرات ليها عقلها ماكرهاتش تسكن فيها ديما .. بدا تيليفونها كيسوني كان هو سظات ااباب ديال البالكو حيت البنات كانو كاصرين دنيا بجماعتهم .. فتحات الخط وبصوتها الأنثوي جاوبات :
نعام
الروطال : مزال مانعستيش ؟
عنبر : لا مزالهم مجمعين كاسرين الدنيا
الروطال : وأنتي فينك ؟
عنبر : فالبالكو ݣالسة الدار كتحمق فنة واحد المنظر زوين مقابلة مع البحر
الروطال ( دور لسانو وسط فمو ) وعنداك تعتبي باب الدار اعنبر بلاما نعاودها
عنبر ( بتساؤل ) فاروق واش دخل للمغرب جا ياك داكشي علاش كتوصي فيا ؟
الروطال ( ببرود ) تي شكون هذا لي دخل امدام ؟
عنبر : فاروق بلاما تبقى دوخ عليا الله يرحم باك .. كتوصي فيا ماشي حبا فيا كتوصي فيا على وديت شيحاجة تمت متݣولش ليا انا حاسة ..
الروطال : انا هاد الساعة حاس ابلبرد خاصني اشي صدر حنين نحط عليه راسي ونعس ..
عنبر ( جاتها الضحكة ) فاروووق براكة من البسالة والله حتى باسل
الروطال : كاين بعدا علاش نحطو الراس ونغطيو .. ولا صدر فراكة وغير البونج لي كيضرب على الشعا ؟..
عنبر : راه انقطع عليك دابا جاوبني .. واش دوك المكاريب لي دخلو للمغرب والله مانتخلع اتهنى شتي كاع الى وقف قدامي مقلة تقيلة ديال طيفال تفاريها ..
الروطال ( ضحك حتى تكمشو عينيه ) هاي هاي على شميكيرة .. خوي راسك مكاين والو
عنبر : فاروووق وقول ..
الروطال ( بجدية ) رتاحي غدا نهارك .. تغرقي وتقلي فديك الحنة نݣرض ليك دوك ليديك ورجلين نرضك زحافة ..
عنبر ( قهقهات بأنوثة ) واخا دابا نشوفو بونوي ( قطعات عليه ) ..
- النهار الثالث فاق الروطال بكري هو وطارق بحكم كان هو الوزير ديالو .. كانو كاريين الحمام مع العشرة غير فطرو وشدو الطريق هوما والعزارة ديال العائلة مقادين البروغرام ديال النهار باش يجيبوها مع العرس هي هاديك ..
- فجهة اخرى وعند العروسة حتى هي نالت نصيبها من الفياق بكري متوجهين للحمام .. إبتسام ماخلاتش الكسالة تحاديها هي تكلفات بيها غسلات ليها رضاتها كتشعل اما شعرها غسلاتو ليها بالغاسول فيه الرود مقاداه على يديها .. حماوها للغنا والزغاريت خرجات من الحمام منورة وحناكخا حومر .. وصلات للدار كانت النݣافة وصلات هي والنقاشة ..
عنبر بقات الداخل فالبيت مع فاتن لي جات هي وبنت اخرى .. باش دير الواكس للعنبر ونقاشة دخلات للكوزينة كتقاد فالحنة
إبتسام : واش نجيب ليك شيحاجة أخرى ؟
كريمة ( النقاشة) الى كان السواك جيبيه ليا .. خرجات إبتسام سيفطات على السواك ورجعات حدا كريمة مقابلة شنو غادير وحاضية باش حد مايوصل للحنة ديال العروسة ، جات تودة للعندها للكوزينة لقاتها واقفة على النقاشة .. شافت فيها إبتسام وجات عندها
إبتسام : خالتي أسيري بدلي تي انا هنا ماخفتي شاي ..
تودة : الله يرضي عليك أبنتي .. مشات تودة وإبتسام رجعات للعند كريمة ، لي هزات كاسرونة دارت ليها حبوب أتاي ودارت فيها الكاركاديه وزادت عليها السواك لي جابو ليها وسكر .. تبخاتهم مزيان وصفاتهم وبدات كتخلط فالحنة لي غربلاتها .. دوزاتها فليبا وزادت عليها الريحة ديال ليطرو مع " ميسو " قريعة صغيرة معروفة فالمناطق الجنوبية كدار بلاصة الدوليو كتغمق الحنا ..
إبتسام : صافي ازين انا غانجمع هادشي ..
كريمة : صافي اندي الصينية للبلاصتها غاتكون سالات ولا مزال ؟
إبتسام : غاتكون سلات ليها .. جمعات إبتسام داكشي بالخف طرفاتو ومشات للعند كريمة لي كانت حاطة الصينية وكتقاد فالكليسة لي كانت باللون الاخضر مطروزة بصم ..
حياة : ختي إبتسام الحزام لي عطيتيتي قبيلات مبانش ليا
إبتسام : شوفي فالبيت لي نعسنا فيه راه فوق ديك الباليزة الصغيرة ..
أسماء ( هابطة مع الدروج ) إبتسام نجاة المراكشية وصلات انخرج لعندهم نجيبهم
إبتسام : صافي سيري .. كل واحد كان كيوجد راسو لي كيلبس لي كيقاد شيحاجة خفيفة باش تقيل يديرو فالعرس البنات كل وحدة دايرة جهدها مع راسها لي كتشارجي فتيليفونها باش تصور
عنبر كانت فالبيت شعرها خلاتو مطلوق حيت كانو غير البنات .. بوكلاتو وطلقاتو مع تكشيطة ديالها فالأخضر ملكي واكسسوارات فالفوشيا ..
حياة ( واقفة كتشوفيها بإعجاب ) تبارك الله كتحمقي الله يحجبك ياربي ( شافت ففاتن) مغاتركبيش ليها الظفار ؟
فاتن : غانركبهم ليها غير تݣلس فبلاصتها غاندير ليها وحدين لي ساهل الى بغات تحيدهم تصور بيها غير بالحنة وفعرسها وتزولهم .. ، البنات لي لبسات كتدخل للبيت اسماء دخلات هي ورباعة ديال اللاعابات تقادو فصالة مكحزين الطبالي حاطين عليهم الماطريال ديالهم ..
خرجو عنبر من البيت غاديين بيها لصالة بصلاة على النبي وزغاريت .. مها وراها هي ورشيدة وسميرة رحيمة وليالي وحياة كتصور فيها هي وماجدة ودنيا ويسرى وياسمين كلهم كيصورو فيها ويصليو مع البقية على النبي .. ݣلسوها فبلاصتها النقاشة حاطة واحد الطبق باش يبيضوها لي حاضرين البياض لي كيكون من نصيب النقاشة ..
جابت فاتن المطريال ديالها وبدات كتلصق ليها فظفار كانت الكولة ديالهم كتلصق مزيان ونفس الوقت دغية تحيد .. اللاعابات بداو تسخينات وبداو الغنا تودة حداها كتفرج وتشوف فعنبر بالفرحة والحب كتنهد حيت ماكرهاتش تعاود ليها وتفتح ليها قلبها ولكن مكانتش قادة فضلات تسكت هكا حسن ليها ولبنتها ..
- قدام الحمام لي فيه العريس مصافين الطوموبيلات فيهم الرايات .. خرجو كاع العزارة معاهم الروطال وقف كيشوف فيهم بضحك نطق وبصوت مهيب رجولي :
سيزيتوني اتخلصوها مضوبلة قيدو عندكم
عصام : وراه انت العريس أخويا العادة كتݣول العريس يتكلف بالحمام وترونسبور حنا نجيبو احوايجنا ياك أشباب ؟
( الكل ) أياااه اخويا عدك الصح .. تمو جايين الغياطة ملقيين ليهم ركبو فطوموبيل وشدو الطريق لدار غاديين وسط الشطيح والغنا كل شوية كيوقفو يشطحو ويكملو طريقهم حتى وصلو للدار ، أهل العريس كانو كاملين على برا باش يستقبلوه .. واقفة وحدة من البنات ديال العائلة مزال بنت مامزوجاش ومفايتش ليها الزواج هازة بلاطو فيه الحليب وتمر ، كلا منو الروطال ودخل تابعو طريق والبقية ، دخل هو لواحد فالبيوت يرتاح ولي كانو معاه فالحمام دخلو للصالة باش يتغداو ..
- الغدا كان عبارة على الجناوح بدغميرة والطبق الثاني هو التقلية تحطو الطباسل عامرين ورجعو خاويين بنتهم تاكل عليها صباع يديك .. بقاو كالسين كيرتاحو حتى للعصر غير أدن ناضو كل واحد قصد دارو صلى صلاتو ورجعو للدار العريس .. خرج طارق من البيت لابس جلابة قاصد ورا الدار فين كان واقف عود فالݣلي والبيض مسرجينو ومقادينو تم جارو وجايبو لقدام باب الدار ..
- خرج الروطال من البيت بلغة بالبيج جديدة وجلابة وعاد فوق منها السلهام ..
رقية : اجي أوليدي تبارك الله وصلاة على النبي ( قدات ليه القب على راسو مهبطاه ليه على وجهو ) سير اولدي الله يحفظك وينجيك
الروطال : اللهم آمين .. خرجوه بصلاة على النبي مركبينو فوق العود طارق محاديه والبقية من وراه متوجهين للجامع وصلو لجامع حط العود ديالو ودخل يصلي هو وطارق جوج ركعات ..
- عادة كانت ضرورية لي هي التزوار من ورا الزيارة خرجو من الجامع راجعين .. كاع الديور لي كيدوزو عليهم ماليهم خارجين ، كل واحد وشنو مخرج لي ماعندوش ومافحالوش كتلقاه مخرج ليهم البيض ولا سكر ضروري من البياض .. لي مخرج الحلوة ولا مخرجين الصواني ديال اتاي مضايفين العريس ولي معاه .. بقاو هكاك حتى رجعو للدار
- الجردة الكبيرة لي كانت فيها جوج قاعات قاعة محلولة على قاعة كلها بيضة الكراسة كانو بيضين هوما وطوابل مزينين بتوب رقيق فالبيض راقي .. المساخة كانت كبيرة او واسعة بلاصة الاوركيترا بوحدها وتيساع لي بغا يشطح بوحدها .. مع وصل الروطال لقا جداه كتسناه شدات فيدو غادية بيه لواحد الجهة من القاعة محطوطة فيها طبلة خاصة وكليسة خاصة بيه هو بوحدو ..
- فالجهة لوخرا كانو اللعابات منشطينها .. كولشي نايض يشطح .. كل وحدة علقات كتغني عليها نجاة المراكشية ، النقاشة كانت دايرة خدمتها بدات ليها برجليها كانت كملاتهم ليها عمراتهم ليها دايرة ليها نقش فاسي حتى الرجل من التحت نقشاتها ليها
عنبر ( كتأشر بحجبانها للحياة ) صوريهم صوريهم ( الفرحة باينة فعينيها كانت متوحشة الحنة ومشهياها ريحتها كتنشويها وتقاد ليها المجاج كتحماق على شيحاجة سميتها الحنة .. كملات ليها رجليها ودازت ليديها نقشاتهم ليها ورشات ليها عليهم البريو ..
تودة ناضت كتشطح معلقة للعابات منوضة رحيمة مشادين ليدين لي كانو منقوشين ناقشين هوما قبل العروسة بنهار نقش خليجي ݣرونة .. ناضت ليالي تحزمان وطلعات فوق طبلة صغيرة كتشطح وتلوز ، الطرح كان حامي مكاينش لي ماشطح .. حتى من ماجدة لي كانت عسرية شطحات ..
- النقاشة كلات تخلصات وخدات البياض لي حطو ومشات .. أما إبتسام طارت بالزلافة طرفاتها معيطة على تودة للكوزينة .. أما عند عنبر لي غير نشفات ليها الحنة جات أسماء زولاتها ليها بدبليح ديال الذهب مسحو ليها يديها ورجليها ملبسينها بلغتها موقفينها ..
- اللعابات كلاو خداو خلاصهم ومشاو .. طلعات عنبر لبيت لي بدلات فيه قدات ليها فاتن البروشينغ وجمعات ليها شعرها مزيان باش تبدا توجدها ..
فدار العريس حاطة رقية الزلافة دالحنة ودبليج دنقرة وقالب ديال السكر .. الروطال كان دخل لدار ورجع مخرجينو طارق او عصام موقفين جوج قصبات على شكل V بداو يصليو على النبي صلاة والسلام عليك الروسول الله العاشق فنبي صلو عليه .. كانت هادي هي الجملة لي كيرددو ، توجهو بيه فين ݣالسة رقية ݣلس جنبها شدات يدو وسمات الله وبدات تحني ليه وصلاة على النبي وزغاريت واصلة لمسمع أي واحد .. كدير ليه دورة بالحنة وترجع تمسحها بدبليج كتعاودها وترجع تمسحها بدبليج .. على ليمنو وليسر ديالو كانو جوج بنات باقيات صغار من بنات العائلة هازات سبنيات فالأحمر والأصفر وكينشو عليه وحدة من ليسر او وحدة من ليمن ..
حدا رقية كانت كالسة فاطمة بنتها هازة صينية مغلفة بتوب بيض جديد .. وحداها راجلها هاز ميكرو والجهة لوخرا وحدة من بنات العائلة هازة ستيلو او واحد الدفتار ..
عبد الجليل ( راجل فاطمة ) الله مصلي عليك الرسول العاشق فنبي صليو عليه .. الي جانا للحنة يجيه الخير ولدنا ولدنا طارق .. ( طارق حط جوا فصينية هزها عبد الجليل كانت فيها جوج ديال المليون ) جوج دالمليون هدية من عند الوزير يرضها ليك فساعة الخير .. ( حط عماد سوارت طوموبيل جديدة ) هادي من عند خو العريس عصام طوموبيل دوبل ڤي فين هو واحد عماد ودوز الهنا ( بداو كيضحكو )
عماد : انا لي زوجتو اش بغا مزال يقنع ويشبع
الروطال : أحط من التسقريم ݣلاك
عماد : 5 يام على حسابي فإفران حطها تم
الروطال : انتوما صحاب المخزن البق مايزهق ..كملو بتبراح وكل واحد فحباب العريس وشنو حط وشنو عطا حتى عمرات ديك الصينية ..
عبد الجليل: الله من عند صاحبك امولاي السلطان من عند راشد من هنا حتى للإمارات .. ( مكمل فتبراح ) الله من عند عم العريس سي عبد الخالق من هنا حتى لدار البيضا ..
فاطمة كانت كتحس كتحط الزرقات مع زرقات الخضرات مع الخضرات القرفيات مع القرفيات والبنت كتقيد كل واحد وشنو جاب وشحال عطا .. باش نهار يكون فرحو داكشي لي عطا كيترجع ليه بكثر منو .. رقية بقات كدير فالحنة وتزولها حتى سلات الحنة لي فزلافة العائلة كلها كانت فرحانة وناشطة يبرحو ويعشقو ويصليو على النبي .. غير سلاو حزمو داك الثوب بفلوزو ومدوه للرقية دخلاتو لبيتها ..
- دخل الروطال للبيت لي غايوجد فيه راسو ويبدل عليه .. باش غير يوصل الوقت يمشي ويجيب العروسة من مولاي بوسلهام ..
- خرجات تودة بتكشيطة فالأزرق ملكي مع شال فاللون الفضي قاداتو ليها إبتسام بشدة زوينة يديها صابغاهم بصباغة فاللون الݣرونة مع صابو أنيق فرجليها مزينة يديها ببراسليات وليد لوخرا فيها ساعة عينيها الكحلين مكحلاهم مع عكر خفيف على شفايفها جات كتحمق .. هازة على تكشيطها متوجها لبيت بنتها دقات حلات الباب ودخلات ، ݣالسة مقابلة مع المرايا بتكشيطة فالفضي مع فولار فنفس اللون مقاداه ليها بشكل زوين .. مكياج مكانش مشارجي بزاف بين ليها ملامح وجها وبرز ليها عينيها جات بحال شي أميرة الحنة زادت نصاحت ليها لابسة صباط معاليش بزاف فنقري والڤوال جات كتحمق ..
- تودة : تبارك الله الصلاة على النبي ( عينيها غرغرو بدموع ) الله يحجبك ابنتي الله ينور طريقك ( شافت فحنان النݣافة او فاتن ) تبارك الله عليكم البنات
فاتن : تبارك الله عليها هي أصلا فنة المكياج غير زاد برز ليها الملامح الله يكمل عليها بالخير
تودة : اللهم آمين ياربي العݣوبة ليكم الى كتو مزال مامزوجاتش ولبنات كاملين لي مادين يديهم للحنة ..
حنان : اللهم آمين ياربي .. دخلات حياة هازة تكشيطتها لي كانت فسومو منبتة بحجيرات مع سباط عالي شعرها طالقاه وشاداه بمقبط خفيف فذهبي مع مكياج خفيف ..
حياة : ياختي تبارك الله ( سيفطات ليها بوسة فالهوى ) ..
عنبر ( رجعاتها ليها ) فيا الخلعة وحلقي نشف
حياة : نجيب ليك تشربي بلاتي .. خرجات جابت ليها الما ورجعات عندها ..
ماجدة ( خارجة من البيت التيليفون فودنها لابسة تكشيطة فتيركواز منبتة شعرها راضاه بوكلي ) راه عندها النݣافة اتكون غير ماسمعاتوش .. واش صافي جاي ؟ فين وصلي ؟ .. صافي واخا يلاه بسلامة .. ( دخلات عليهم للبيت شافت فعنبر عجباتها جات فنة ) فاروق راه جاي فطريق
حنان : صافي مزيان حنا ديجا كملنا نوال جمعتي كولشي ياك ؟
نوال ( بنت معاها ) اه كولشي درتو فطوموبيل
حنان : صافي ( هزات تيليفونها ) ألو وي صافي كاينين تم حنا انجيبو العروسة ... نقرب نوصل نعلمكم دراري جاو .. صافي مزيان يلاه سيري ( قطعات الاتصال ) البنات سبقوني قلت يكونو فدار العريس صعيب يجيو لهنا ونرجعو تاني لهيه اللهم نتفرقو
ماجدة : صافي مزيان .. كولشي كان واجد ليالي بتكشيطة فالموطارد منبتة اما دنيا كانت لابسة الموڤ .. سميرة تكشيطة فيها لوين موڤ داكن مع خضر ودهبي ، أما رجاء فكانت لابس تكشيطة فالكاشيري وياسمين فلبلو مارين ديالها ديال زواجها ويسرى فالخزي .. أما لحيمة ختارت تلبس قفطان موبرة فالغوز مع فولار ..
دخلات إبتسامة مزرزرة دهوبات بتكشيطة فالأخضر الملكي مع مكياج خفيف من العينين وتقيل من جهة العكر لي كانت دايراه ݣرونة وشعرها طالقاه مصايب قصير ..
- وصلات طوموبيلت العريس .. كيكلاكسوني .. هبطوها مع دروج بصلاة على النبي كان واقف حدا طوموبيلتو مراقب الباب بوسامة طاغية كومبلي فالكحل مع شوميز بيضة شعرو راضو اللور ريحتو الرجولية الممزوجة مع عطرو الرجولي وعطر مابعد الحلاقة كيعطيو صبعو مزين بخاتم الزواج ومعصم يدو مزين بساعة رجالية نقرية .. سبقات ختو معاها بنات عمها ورجاء لي مادة كرشها عاد حنان لي شادة ليها فيدها تابعاها هي هز عينيه فيها .. كانت بحال شي أميرة من الأميرات المغربيات مكاينش لي يحط عليها عينو وماتعجبوش بقا واقف كيشوفيها من رجليها لراسها حتى تقدمات لعندو شد فيدها لي مزينة بخاتم وبالحنة .. قرب لودنها وهمس :
كون ݣلت ليك كتري كون خففتي ..
عرفاتو علاياش معنى مداتهاش فيه متوجهة معاه لطوموبيل فتح ليها الباب دخلات ساد الباب عاد توجه هو لبلاصتو أما البقية كل واحد طلع فطوموبيلت لاخور كانت طوموبيلت يسرى وياسمين ودنيا وعاد ديال النݣافة وديال فاتن الميكاب أرتيست .. كلهم شدو خط واحد ورا طوموبيلت الروطال ..
- فجهة اخرى الجردة عمرات بالناس لي جايين .. كل واحة جايا تشالي بدهوباتها العائلة والمعارف والصحاب والحباب كل واحد شاد بلاصتو من غير طبالي لي قراب للبلاصة العرسان كانت مخصصة للحباب العريس والعروسة ..
- على برا واقف علال بجلابة فالبيج تقيلة كيبان عليه الوقار والهيبة .. حداه عبد الخلاق بجلابة فالݣرونة ساعة رجالية وبلغة كيدوي مع رجال ومن الجهة لوخرا واقف إدريس حنى هو بجلابة فالقهوي مع بلغة وساعة رجالية لي كيسلم كيدخل يݣلس بلاصة محلولة على بلاصة العيالات كيݣلسو بوحدهم ورجال بوحدهم قاعة محلولة على قاعة .. فدخلة دالقاعة واقفات 4 العيالات طوالات وعامرات بتكشيطة موحدة واقفات حدا العمارية لي كانت محطوطة وحداها 4 دراري طوال بلباس موحد هوما لي غايهزو العمارية .. بلاصة الاوركيترا دخلو دراري لابسين شوميزات بويض وسراول كحلين كيأنسطاليو فالمطاريال ديالهم ..
- خرجات سعاد تحت أنظار إدريس لي متبعها بالعين مشافتش جيهتو ݣاع .. لابسة تكشيطة فالبيستاج بارد مع صابو عالي ، وقفات حتى خرجات عندها فاطنة لي حتى هي كانت مقادة الحالة لابسة فراشة منبتة كلها فالصفر تسناو رقية حتى تمات خارجة لابسة تكشيطة فالبيج منبتة ودايرة كاپ على كتافها من البرد توجو للقاعة لداخل ݣلسو فبلاصة قريبة من العرسان ..
- على برا تستفو الطيافر لي فيهم الدفوع .. ودقايقية واقفين حتى تسمع الكلاكسون .. ناضت سعاد وفاطمة خرجو على برا .. واقفين خوت العريس عماد وعصام كلهم بأناقة كاملة مع طارق وراشد شباب عائلة حيد الكل كان فمنتهى الاناقة والهيبة .. خرجات النݣافة سابقة حتى وقفات طوموبيلت العريس .. خرج من طوموبيلتو فاتح الباب ليها شاد فيدها وهي مبسمة قلبها باغي يخرج بالخلعة .. بداو النݣافات كيصليو على النبي كولشي كيشوف ويبرݣݣ ولي ماحضر قبل حاضر دابا باش يشوفو العروسة لي تزوج بيها حفيد عائلة حيدر ..
- ݣلسات فالعمارية وبداو الدقايقية بالغنا .. هزوها الدراري داخلين بيها للجردة الكبيرة كيلعبو بيها كيف بغاو وهي كتشير بيها الخلعة شداها لاول مرة فحياتها تجرب هاد الركبة .. مكاين شي بنت مكتبغيش تجرب هاد الركبة وهاهي جرباتها دخلو الطيافر ستفوهم فبلاصة وحدة والكاميرامان كيصور لحظة باللحظة ولقطة باللقطة .. واقفين مقابلين معاها والروطال قدامها بإبتسامة رجولية خفيفة حاط يدو على صدرو كيرمي تحية لأي واحد عينو جات عليه ..
- ضارو بيها دورة شرفية وكل واحد كيرمي ليها فسلام بيديه .. حطو العمارية وخرجوها منها شد ليها فيدها وتوجهو للبلاصتهم ݣلسو فيها كل واحد شد بلاصتو وتبرݣيݣ خدام ..كلسات إبتسام واسماء فطبلة وحدة ..
.... : زوينة العروسة تبارك الله
.... : ݣالو ليا مطلقة وعد ولد عدو شي شهر هوكاك
.... : اويليييي بولدها ، وكون تزوج ليه غير بوفاء على مزيناتها بنت واخا مها فلفاطة
.... ( تنهدات ) ايوا زهر لمن عطاه الله ، طاحت على دجاجة بكامونها
إبتسام ( ضورات راسها جهة وحدة من دوك النسا ) ربيعة كيدايرة مرحبا بيك ..
ربيعة : ترحب بيك الجنة مبروك مادرتو لفاروق الله يكمل عليه بالخير
إبتسام : اللهم آمين .. والله يطلق سراح حبيبة مسكينة حتى هي وجها وجها المحاين ، يلاه شهرين باش تزوجات وهاهي رجعات
ربيعة ( تقرصات اللوان بانو فوجها شافو فيها جراتها لي كانو معاها شادين النميمة ) ايوا الحمد لله على كل حال
إبتسام : أختي ݣلتها ليكم داك نهارات بلي مصالحشاي ليها .. باين فيه رعواني وهلو ياكلو من العينين ولكن مداتهاش فريي دابا ربي يعوضها بولد الناس حسن منو ..
ربيعة ( كتحرك غير راسها ماكرهات الارض تحل وتبلعها ) آمين آمين
أسماء ( بالهمس) ناري ياختي اش بغيتي عدها ؟
إبتسام : باش تعلم دخول سوق راسها وتشد فمها ومتبقاش تنعت فبنات الناس .. ولي ضحك يتبلى تنعت فالمطلقة وعندها ولد وهي بنتها رجعات ليها وخازناها على الناس البشار مكايعرفش يدخل سوق راسو السمطة كدور أ أسماء مكنحملش هاد الفعايل أنا ..
- قاطعهم دخول سلطان الاغنية الشعبية " ســعــيــد الــصــنــهــاجـي " .. داخل بالبشاشة وضحكة على وجهو بدات الموسيقى ومع ديبار حما الطرح داخل مجهد .. شوية بشوية بداو ينوضو يشطحو واحد بواحد .. العيالات الكبار ولي شابات كولشي نايض نوضة وحدة منوض فيهم الهوايش ..
- على برا وقفو زوج طوموبيلات .. وحدة كحلة نزل منها راجل كبير فالعمر مهيب غير شافو علال تقدم عندو معنقو ومسلم عليه سلام رجولي ..
علال : زارتنا البراكة أسي أحمد والله كونما جيتي كت غانتقلق منك ..
أحمد : مبارك ومسعود مدار الدري وانا نکد منجي ( سلمو عليه إدريس وعبد الخالق )
الحسين ( بايس يد علال بإحترام ) سي علال مبارك ومسعود .. خرجات فاطمة بنت الحاج مستقبلة سعاد والشافية وبهية لي كل وحدة فيهم مزرزرة فدهوباتها .. وقفات بهية كتسنى فبنتها لي خرجات من الطوموبيل الثانية كانت بنت غزالة الملامح بجمال طبيعي لابسة تكشيطة فالكحل منبتة كتبري مع سباط عالي وساك فنفس اللون .. من النفس الطوموبيل نزل شاب فأواخر العشرينات فيه كل ملامح الوسامة والرجولة .. قبل لا توجه لعند الأم ديالها جرها من يدها هامس فودنها بصرامة :
مهيرة بلاما نبقاو نعاودو الهضرة الله يرضي علك .. اتبتي وتحصني نلقاك مخالطة الكتاف وسط الرجال منعقلش علك
مهيرة ( بدلع ناصلة دراعها من يدو ) وصافي أقاسم عاودتيها شحال من مرة .. وصيتي صافي راني فهمت ولكن ماتعيقش ، عطاتو بظهر متوجهة عند مها داخلين للقاعة مع فاطمة وقاسم توجه لعند جو وباه مسلم على الحاج علال بإحترام مخلي الكبار بوحدهم شاق طريقو للطبلة لي فيها عماد وعصام وطارق والبقية ..
- الكل كيشطح دخلات دنيا الوسط هي ويسرى وياسمين .. فطبلة قريبة للبلاصة العرسان ݣلسات سعاد مرات الحاج أحمد هي وشافية وبهية حداها بنتها مهيرة .. كتشوف بإعجاب فالعرس والعروسة لي عجباتها مرة مرة كتقول كلمة فودن مها وتضرب بيدها الرش كانت باغية تنوض تشطح يديها وكتافها كيترعدو بوحدهم ولكن عينين قاسم كانو حاضيينها ..
- مجمع هو وعصام وعماد قولها وضحك عليها رشيد وعزيز من الجهة لوخرا مجمعين عبد العالي كان كالس مع رجال العائلة الكبار بعاد شوية على صداع .. ناضت سعاد خالت الروطال هي وتودة كيشطحو شادينها بخط واحد كيشطحو بتقالة وعنبر كضحك عينيها عليهم ..
عنبر : خالتك تفاهمات مع ماما فاطنة
الروطال : الخالة عندي حلوة مكاينش بحالها ( مجاوباتوش ) ݣلنا لك زعمة متكتريش الحنة راسمة لي تم الطرز الفاسي ..
عنبر ( شافت فيه مبسمة عكس البرود لي متصناعه ) ومالو كيف جاك ؟ الحنة زينة وانا كتعجبني
الروطال : وأنا كتخنقني أمدام
عنبر : حياتك هاديك وانت حر فيها .. انا كنموت على الحنة مغاديش نخنق شهوتي فيها غير حيت انت بغيتيني ندير بزقة لاروب فيدي ( قاطعهم وقوف قاسم ومهيرة قبالتهم ) ..
فاروق تبسم او وقف معنقو عناق رجولي كيخبط ليه على ظهرو كيضحك :
السبع زارتنا البراكة .. وكون عرفنا انشوفوك كون عرسنا شحال هذا
قاسم ( بإبتسامة رجولية ) الخدمة ياخويا هي لي داتني مبارك ومسعود الله يكمل بالخير
فاروق : اللهم آمين
مهيرة ( مسلمة على عنبر بالوجه ) مبروك عليكم الله يجعل كولشي مبارك ومسعود
عنبر : اللهم آمين .. مهيرة مدات يدها سلمات على الروطال وبدورو قاسم سلم على عنبر ، رجع كل واحد فيهم للبلاصتو
عنبر : شحال فنة تبارك الله هاد البنت شكون هادو اول مرة نشوفهم مكانوش هاد الايام لي دازو ؟
فاروق : لا هذا قاسم حفيد الحاج أحمد معرفة قديمة ديال با .. وديك البنت بنت عمو مولات شيبي مها والوسطانية مو هو ولي حداها مرات الحاج أحمد ماتت مراتو وخلات ليه 3 الدكورة وبنت .. سي مصطفى بات هاد البنت لي جات سلمات عليك سميتها مهيرة .. وكاين الحسين باين قاسم وعاد رشيد هداك هز راسو لبرا شحال هدا وإسمهان
عنبر ( هزهزات راسها ) تبارك الله راك حافظهم
الروطال ( ببرود ) معارفنا وصحبة قديمة بيناتنا .. وجدهم كي ݣلت لك معرفة دالحاج قديم ، وعاد قاسم كان كيجي عندنا وهو صغير كيشوفني كيفاش كنروض الخيل عزيز عليه ومن بعدا فاش كبر ولا كيجي يشريه ..
عنبر : ݣلتي صغير بحال الى انت عندك 50
الروطال : وراه فايتو ب 9 سنين أشريفة ، 37 عام راه حنا دايريها طالعين ف 38 ..
عنبر : مزيان ..
- جا الوقت للبسة الثانية ولي كانت فالأورونج حتى هي كانت شهوة منها .. هاد المرة لبس كومبلي فالبلو مارين جا مع طولتو ومع سموريتو توجهو لبلاصتهم وبدا الصنهاجي كيحمي الطرح من الجديد .. هاد المرة ناض عصام وحتى عماد ناض وراشد دنيا ويسرى وياسمين كيشطحو منوضة دنيا طارق مدخلين معاهم حياة وليالي ، كولشي كان كيشطح ..
عنبر : صاحبك باغي ياكل الدرية بعينيه ياربي سلامة ..
الروطال : وانت اش مشا ليك ؟
عنبر : معرفة ديالنا وحاسب من العائلة واصلا دوك الخوالجة كيبغيو غير يزهاو ويدوزو الوقت
الروطال : راشد ماشي من داك النوع ( شافت فيه ) تي مالنا على دوك الشوفات داوي معاك عشيري من بكري
عنبر : ايوا الى بغا المعقول مرحبا .. ديك خيطي بيطي ماعندناش معاها وزيد عليها اتولي ساكنة معانا لهيه فدار بيتي انخليه للحياة وبيت حياة اتولي فيه هي
الروطال ( بتساؤل ) وعلاش ؟
عنبر : دابا خالتي رحيمة عرفتيها ( بقا كيشوفيها ) لي كانت كضرب البندير راهي حدا ماما ( شاف فين كتشوف ) غاتزوج إن شاء الله وليالي غاتبقى بوحدها قلنا تسكن معانا
الروطال : واش ماعندهاش العائلة ؟
عنبر : متسولنيش أخويا مكنبغيش نشد النميمة فبنادم ونعاود عليه .. الى بغا هو يعاود يعاود
الروطال ( شافيها بإستغراب ) سبحان الله العظيم وداك الفضول الزايد عندك ماشي نميمة
عنبر ( كدور عينيها على القاعة وتشطح برجلها كلها كتڤيبري ) فاروق بغيت نوض نشطح ..
الروطال ( شافيها بقنت عينو ) غاتغرزي فبلاصتك بحال محبق النوار حتى يسالي هاد الهيث
عنبر ( شافت فيه بكل برود ) ماقلتي عيب .. واخاااا
- جا الوقت ديال الماكلة ، ݣلسات فطبلة ديال العائلة هي وياه بتكشيطة فالفوشيا تبطينها فالموڤ .. بداو السرباي كيسربيو فالماكلة اول طبق عو الدجاج محمر 4 دجاجات فطبسيل من وراه تسربا اللحم مشوي ومحمر مع الخضرة مسوطية ، تبعهم الديسر ..
عنبر ( بهمس ) ماما تكون شاطت الحلوة كاعما دقتها
تودة ( كضحك ) هاد الحمقة تهناي وصيت إبتسام .. كانت بقات ليها زوج لبسات وحدة نقرية مطروقة تبطينها غوز .. فكل مرة كتبدل كيدخلوها بصلاة على النبي وشطيح والرضيح والصنهاجي محمي الطرح لي مكيعرفش يشطح نايض يشطح ..
اخر تكشيطة كانت هي الحمراء .. جاتها شهوة منها دخل هو وياها هو بجلابة فالݣرونة لي كان شرا مع البلغة العينين كانو عليهم من كاع الجوايه .. كتشوف طيفور محطوط قريب من بلاصتهم ݣلسوه هو فداك الطيفور مفاهم والو جر طارق بحكم الوزير :
متافهمنهاش على هادشي أصاحبي
طارق ( كيضحك ) والعرس هو هذا تبت اساط .. بعد عليه كيضحك هي بدورها ݣلسات فطيفور .. تقدم الصنهاجي لقبالتهم منوض كولشي .. بدا كيغني محمي الطرح من الجديد تجمعو عليهم كاملين ، هزوهم كيدورو بيهم .. دوروهم على القاعة كلها فلحظة وقفوه كتأشر ليه النݣافة باش يبوس العروسة بالمهل تحنا بايسها فجبهتها مبعد ..
- نزلوهم موجهينهم للبلاصتهم .. جابو القعدة حطوها قبالتهم راجع عندهم الصنهاجي منوض عنبر والعريس .. شد يدها وقفها على القعدة كيغني شادة فيدها حياة كتشطح معاها مع تزاد الريتم تزادت معاه هازة على جلايلها كتركز وهو معلي حواجبو كيشوف فيها مامسوقاش .. الأجزاء شخضات ولا كولشي كيشطح ويركز ويجدب عطاوها واحد البندير شداتو فيدها كتشطح وطبل فيه ناسية كولشي ناسية حتى هاد العرس علاش دار من الأساس ..
- عيات وتهدات جرها من يدها غير تحت الدف مرجعها للبلاصتها ..
- ݣالسة فوق الكرسي فجردة البرد كيضرب فيها .. حاطة حداها قرعة ديال المشروب .. كتشرب عينيها حومر حاسة بسخونية فداتها مهامها لا برد لا والو معصبة ومتحصرة على الروطال مابغاتش تسرط عليها تزوج ودار كولشي بلا شوارها ومن تحت يدها ماهمها كان كتبقى هي لي رباتو واخا يقولو لي قالوه كتبقى هي رباتو .. بنسبة ليها هي لي دارتو صحيح وتربيتها ليه صحيحة وبلي عمرها دارت شي حاجة خايبة واخا كانو كيعاتبوها على المعاملة ديالها معاه ولكن مكانتش كتسوق .. طلاقها من إدريس لي كانت اخر جلسة ليه نهار الثاني من الشهر الجاي ..
- بلعات أخر جغمة من كاسها حطات الكاس القرعة كان مزال فيها النص .. بدا تيليفونها كيسوني هزاتو كتشوف فشاشة فتحات الخط وبصوت شبه تقيل :
نعام ... لا مكاين والو ماشي شيحاجة كثيرة حتى انت ... إيمتا اشمن وقت ؟ .. امممم صافي واخا غير هو ياك كنتي حابس ؟ صافي واخا تهنى بسلامة .
~~~~~~~~~~~~~~
- صلحات التكشيطة الݣرونة لي كانت تراجعات على اللبسة ديالها فاخر اللحظة طاح عليها الزيت دشعر صلحوها بالخف ولبساتها .. كانت عيات وتهدات ومابقاتش قادرة تزيد تكمل الكسوة البيضة بالكشايف باش لبساتها .. دخلوها بأغنية هادية شعبية عكس الأغاني الشرقية جات كتفتن بالكسوة وهو حداها بكومبلي فالبيض حتى هو خداو ليهم التصيورات وجا الوقت ديال تقطاع لاطارط ..
- تفرقات لاطارط على الكل وبدا المجمع كيتفرق شوية بشوية .. على برا واقف عماد كان كيدوي مع يوسف قطع معاه الاتصال وجا وقف مع البقية
قاسم : خدمتكم صعيبة اخويا انا يحسابلي كاع مكتشدو كونجي
عماد : نكدب عليك بعد المرات كيطلع ليا الخز من هاد الخدمة كنݣول بناقص
عصام : وخويا كتولي ماشي ديال راسك وفينما سمعتي شيحاجة وقعات خاصك طير ماعبر غير ناصر ، داير الفلاحة مبعد على المدينة وصداعها وبيخير
ناصر ( من العائلة فالأربعينات ) وخويا ديك المدينة فيها اصداع الراس والبلا وتا كو شتي الشهر لي داز .. كت جاي من البير الجديد دزت عد واحد السيد يبيع اللبن وزبدة اتا خرجات ليا واحد السيدة ..
عصام ( طانز ) امتݣولش ليا من هادوك لوخرين
قاسم ( كيضحك ) تاهنينا أصاحبي
ناصر : واتا سمع البنت باقي صغيرة يكون عدها شي 21 عام بحال هوكاك .. لابسة قفطان بحال دوك القفاطن دالعريسات ومضروبة لجبتها وكلها مرمدة فالغيس ..
عماد ( بتساؤل ) او والديها طالقينها هكاك مسكينة ؟
ناصر : وتا لا .. ݣاليا السيد اتالݣاوها فدوك النواحي لݣاوها مسكينة بحنتها واش هاربة من شي عرس ولا الله أعلم ، وبقات تم فداك القنت كيروفو عليها بالماكلة مرة تنعس عند داك السيد ومرتو ومرة تنعس فالخلا
قاسم : وعلم الله مسكينة يݣد يكون شي حد تكرفص عليها وهربات ليه الله وعلم
ناصر ( حك على راسو ) الله اعلم هادشي لي كال السيد لكاوها بحنتها فرجليها ويديها ومن تم وهي فداك القنت
عماد ( بفضول ) فأشمن جيهة ؟
ناصر : تكون راجع من البير الجديد .. كاين واحد مول سيكوك ديما كيكون تم انا راه كونما شتها كونت انخرج فيها ..
طارق ( غمزهم ) ها عماد تحركات فيه النغزة دالبوليس .. ياكما اتمشي تقلب عليها .. قلبوها ضحك الضياف بداو كيمشيو خرجو عائلة سي أحمد تسيفطو معاهم ركبو فطوموبيلاتهم وشدو الطريق .. القاعة لي كانت عامرة خوات والكل خدا حسابو وشد طريق الرجعة للمدينة لي جا منها ..
- طلعات للبيتها لابسة قفطان جوهرة .. راسها كيزدح عينيها كيتغمضو بوحدهم باغية غير تحط راسها وتنعس .. تنهدات تنهيدة طويلة بدلات عليها غاسلة وجها محيدة دوك الظفار قبل لا تنعس توضات وصلاة صلاتها دعات وتضرعات فدعاء ديالها .. سالات مزولة لبسة الصلاة توجهات للبالكو فتحاتو ووقفات ساهية فسما ونجومها البرد كيضرب فشعرها كانت 4 دصباح تدق الباب تحل ودخلات تودة كطل عليها ..
- بنتي مزال منعستي ؟
عنبر : لا صليت بعدا وغانعس راسي غايتهرس
تودة ( لمسات فكلامها نوع من الحزن ) مالك ابنتي وجهك معاجبنيش اش واقع ؟
عنبر ( ݣلسات حادرة عينيها ) كنشوف غير هاد العرس وهاد الناس كيفاش عاملوني بحال الى بنتهم ماشي مرت ولدهم .. هاد الاجواء لي كانت على حقها وطريقها ( هزات فيها راسها )
تودة : ومالها ابنتي هاد الاجواء انت تستاهلي قلبك كبير وبيض وربي كيعوض عبادو .. وحتى فاروق ولد الناس متعرفي ربي باغي يعوضك بيه
طالع للبيتو بغا يدوز عندها يعلمها بلي غايزيدو الغد .. وزيدو 3 يام أخرى على وديت السبعيام كان بابها مفتوح وقف بالفضول باغي يسمعها باش غاتجاوب كلام مها ..
- عنبر ( تبسمات ببرود ) هاد العراسية كنت تمنيتها مع بدر ، كنت تمنيت والديه يبغيوني كيما هكا وعرسنا يدوز كيما هكا .. ونبقاو كنبغيو بعضياتنا بغيتو اماما بغيتو من قلبي كنت بغيت وليداتي يكونو منو من دمو ولحمو نكبرو بزوج ونشيبو بزوج ( سمع لي سمع بملامح باردة خالية من أي إحساس نساحب ضاير راجع منين جا ) هادشي كان شحال هذا كنت باغية نعيش معاه هاد الحوايج ولكن دابا كنكرهو كره العما فظلمة فاش كنتفكر داكشي لي داز كنسول راسي كيفاش كنت قابلة على ميكروب بحال هداك .. اليوم فاش شفت هادشي وعشت هادشي كنسول راسي واش كنت فغيبوبة ولا كنت كامية العفيون واحد فجوج سميتو مابقيتش حاملاها تجبد حيت مايستاهلش حتى نتفكرو لا هو لا تريكتو تريكة العفن المكاريب ..
تودة : نساي عليا الويل ربي جاب ليك هاد العائلة .. متعرفي ربي بغا يعوضك بيها كنتو دايرينها بضحك حتى تولي واقفة على الصح هاد الناس ، والله أبنتي متلقاي بحالهم خاص انتي ديري عقلك وتفتحي هاد القليب عدك .. الله يرضي عليك
عنبر : إن شاء الله لهلا يحاشم ياربي ( عنقاتها وباستها ) سيري ترتاحي اماما حتى انت عييتي
تودة : تصبحي على خير ، تكاي نغطيك .. تكات عنبر فبلاصتها مغطياها سادة البالكو عليها وطافية الضو موراها .. ماتسناتش بزاف حتى نعسات معاقلاش على راسها .
- فالكوزينة واقفة مشمرة على درعانها خرجاتهم ياسمين بكري تقداو ورجعو باش هي طيب الفطور ديال بنتها بحكم مساكنينش فسوق الأربعاء .. ريحة الرفيسة كتعطي مجهدة ورزيزة على جنب كتسخن
إبتسام ( داخلة للكوزينة تحت عينيها زرق بسهير والعيا وصوتها باح ) تبارك الله ريحة الرفيسة كتشهي ..
تودة : ايوا حتى دوݣو وتحكمو ( بإبتسامة )
إبتسام ( جرات الكرسي جاي ولدها معنقها عطاتو شوية من الرزيزة ومشا ) لالا باين المعنى امن الرويحة ..
تودة : شربتي شيحاجة صوتك مبحبح ضاربك البرد نيت
إبتسام : وايااه والله العظيم خديت واحد دوليبران وشوية العسل .. والله ماݣديت النوض ابلكشايف ..
تودة : وسيري ابنتي رتاحي
إبتسام : مانقدش اخالتي اخليني انا هوكا والله مكنعس ليه .. ضروري تنوضي راكي عارفة مع دراري الصغار وراجل شكون ايطيب ويطرف
تودة : وجه تمارة حنا ( كضحك )
إبتسام : والله الى بصح ( شافت فأسماء لي دخلات ) جا طارق ؟
أسماء : ويااه جا جايب جوج قصريات كسكسو بتفاية
إبتسام : علم الله لمن عطا لي صايبوهوم ليه
تودة : وعلاش جايب كسكسو وحنا دايرين الرفيسة ؟!
أسماء : حيت هكا العادة اهل العروسة يديرة الرفيسة .. والوزير دالعريس كيجيب الكسكسو بتفاية
تودة : هكااك دابا عاد فهمتك .. عادة زينة صراحة ، شكون بقا فهاد الوقت شا فالعادات احيانة ابنتي
أسماء : ويااه اخالتي ولكن حنا ضروري من هادشي فعراسنا كاملين كنديرو هكا ( جرات الكرسي ݣلسات ) .. دخلات عليهم سعاد كتشمشم
سعاد : ريحة زينة هادي اختي فاطنة
إبتسام : خالتي واش سميتك فاطنة ولا تودة ؟
تودة ( كضحك ) دابا سمية لي عدي فلاكارط ولي مسمييني دارنا هي فاطنة .. ولكن من بعد فاش تحولت لعد خالي الناس لي كت خدامة معاهم كانو يعيطو ليا تودة وتسمات عليا قليل لي يعيط عليا فاطنة ..
إبتسام : هوكاك ودابا عاد فهمت ..( قاطعهم بنت أسماء )
ماما عمي عبد الخالق ݣاليك .. عطيه داك دوا ديالك ديال الراس ..
أسماء : واخا ابنتي أجي .. ، خرجات مع بنتها وبقاو البقية
سعاد ( موجهة كلامها للإبتسام ) ديك اللفعة المسمومة ماعندكم عليها خبار ؟
إبتسام ( كتحزم فراسها ) شكون هادي ؟
سعاد ( أشرات بحجبانها ) الريفية
إبتسام : ياويلي لا ياختي ماعدنا عليها خبار .. ماشتيش طارق مشا مسيكين لعدها عرضات عليه عد بالو راه بغات تصلي الرحم معاه .. ساعة هي معيطة ليها اعلى حاجتها
سعاد : علاش هي يمتا بغاتو من ݣلبها كتبغيه اعلى حاجتها
إبتسام ( شادة حنكها وتودة ݣالسة خاشية يديها فجيب الطبلية وݣالسة .. محلول السرجم دالكوزينة وصوت الرجال على برا ) مضبرين ليه فشي وحدة كيعرف راجلها عائلتها ساعة ضار فيهم ورجع بقا فيا والله ..
سعاد ( تنهدات ) اودي عبد الخالق مسكين ماعندو زهر والله ( شافت فتودة ) عاودو ليك على ديك اللفيعة لي كان مزوج بيها ؟
تودة : عاودات ليا مي رقية .. كانت بغات تزوج يمكن بولد عمتها ولا خالتها وسمحات فيه وفولادها
سعاد : ويااه مسيكين حتى من السيظة لي كان بغا ماعندو زهر فيها
تودة : كان باغي شي وحدة لزواج ولا ؟
إبتسام : شكون واش ديك لي عاودات لينا عليها مي ؟
سعاد : وايه لي كان عرفها فالموسم دمولاي عبد الله لي فجديدة
إبتسام : مرض دنيا خرج ليه من جنب كوراه تزوج بيها دابا من ݣالت ليا مي كان قرا عليها الفاتحة واقيلة بينما طلق ( تودة قلبها تقبط حسات بالبرودة طالعة ليها مع رجليها ) ..
تودة ( بلعات ريقها كدور فعينيها رجليها واخا لابسة تقاشر كتحس بالبرودة طالعة معاها منهم ) علاش هو كان يمشي للموسم ( كتحاول تزيد تعرف ترضي فضولها شي حوايج قالوهم جاوها بحال الى كيعاودو عليها .. ) ..
يتبع...
التعليقات
لا توجد تعليقات بعد، كن أول من يعلق.