محتوى القصة
- رضو عليه السلام .. ݣلس جنب طارق رامي بضخامتو وظهرو اللور .. حياة لي كانت غير كتشوف بعينيها وتميز وتهندس ..
- ماجدة ( بحماس ) : عنبر راه صورات أول ڤيديو كليپ ديالها .. هو ثاني واحد فتونضونس
- عصام ( بإبتسامة ) : مبروك عليك
- عنبر ( رضات ليه الإبتسامة) : الله يبارك فيك .. بارك ليها عماد وطارق بقا هو الأخير شافيها بنضراتو ملامح وجهو الباردة داير رجل على رجل :
مبروك
- عنبر ( هزهزات ليه براسها ) : الله يبارك فيك
- عصام : ݣالت ليا ماجدة عندك 3 زيام اني فكلية الحقوق ؟
- عنبر ( بخجل ) : اه ولكن ماكملتش .. كانو سي ظروف خلاوني نحبس
- عصام : ايوا ماعليش ( سكت كيحقق فيها شاف فخوتو وفيها فنفس الوقت ) ملاحظتوش واحد البلان ؟
- الروطال : هاهو بدا
- عصام : قسما بالله المعبود حتى داوي بصح .. ملاحظتوش عنبر كتشبه لدنيا وياسمين ؟
- طارق ( شاف فعنبر كيحقق فيها عاد رض البال لشبه الكبير لي بينها وبين خواتاتو صغر عينيه وهز براسو بالإيجاب ) : فخبارك اول مرة نرض البال .. ويـــــاه كتشبه ليهم بزاف
- عنبر ( ضحكات ) : سبحان الله العظيم .. من شبيهاتي الاربعين لقيت جوج ، غير ماعرفتش واش انا لي كنشبه ليهم ولا هوما لي كيشبهو ليا ؟
- طارق ( بصوتو الرجولي المتزن ) : شحال فعمرك ؟
- عنبر : 26 عام .. درتها فشهر 12
- الروطال ( هز حاجب ونزل الثاني ) : متأكدة 26 لي عندك ؟
- عنبر ( شافت فيه وببرود وإبتسامة صفرة ) : ياكما انت هو لي كتسجلهم فالحالة المدنية وكنتي شاهد فاش سجلوني ؟
- عصام ( جاتو الضحكة بصوت شبيه للهمس ) : الرعد ابا روطال
- الروطال ( ماحركات فيه شعرة بهضرتها ) : طولتك ظالمة عمرك
- عنبر ( كتحاول تهدن .. باش ماتنوض تخشي ليه راسو وسط الطبلة لي قدامو ) : علاش كيجاتك طولتي بسلامة والعافية ؟
- الروطال( عوج فمو بلامبالاة) : الوحدة منين كتكون قصيرة مكايتعطاهاش عمرها كتبان صغر .. لي شافك يعطيك 19 عام
- عنبر ( غمضات عينيها ورجعات حلاتهم ) : دابا أنا قصيرة ؟ راه فيا 1.60
- الروطال ( تبسم حتى بانو سنانو البويض فإبتسامة رجولية محضة ) : العجب كتبان فيك ديك 1.55
- عنبر ( كورات فمها على شكل وردة مقربة للماجدة لي ݣالسة حداها ) : خوك باغي شي حد يخلي دار عشتو .. راه دايرة ابوجهكم نتوما واش جايبني لهنا يعايرني ولا مالو
- ماجدة ( بإبتسامة كتلطف الجو ) : فيه الضحك متديش عليه ( شافت فخوها ) وايلي أخويا الله يهديك يلاه قالك عصام 3 زيام اني فلافاك وكتقولها 19 عام ..
- الروطال ( حك حاجبو مناظرها بنظراتو .. من حركاتها وملامح وجها بان ليه بلي مسألة الطول خالق عندها مشكل ) : علاش ݣلت شيحاجة دالعيب .. شحال من وحدة كيعجبها الواحد يصغرها ولالا والقصر ماشي عيب
- عنبر ( بإبتسامة واسعة .. ونظرات كلها أنوثة ) : ماشي انا لي طويلة أخويا فاروق .. راه انت لي طواليتي حتى فتي القانون او ولاو كيبانو ليك كاع الناس طوال
- طارق ( دور لسانو وسط فمو عاض على شفايفو مقرب راسو من عماد) : شتك ساكت اولد العم بحال الى ناوي على خزيت كتفرج عاجبك الحال ..
- عماد ( شافيه ) : هنينا اصاحبي .. خلينا حتو نكونو راس فراس وندويو
- عصام ( حاول يكسر الحدة دالحوار ) : مغانتعشاوش حنا انا راه هلكني الجوع
- ماجدة ( وقفات ) : غادي نوض نشوف وفاء نقادو الطبلة .. ( وقفات حياة) بلات نجي معاك .. تبعات حياة ماجدة وبقات عنبر وسط الشباب
- عماد ( وقف ) : عنبر واخا ندويو شوية ( شاف فروطال حرك ليه راسو باش يتبعهم ) ..
- عنبر ( وقفات ) : واخا .. وقف الروطال وسبقاتو ضاربة على شعرها بكل غرور .. توجهو للبرا الجردة واخا كان بارد الحال ولكن المنظر مخلي الجو يكون زوين بواحد الطريقة غريبة ..
- توجهو للكلسة لي كانت قبالت لاپيسين .. ݣلس عماد وعنبر أما الروطال بقا واقف كيتمشى حداهم داير يديه فجيابو .. شافت فيه عنبر مغوبشة كتحقق فيه وبزاف التساؤلات فبالها
- عماد ( تنهد تقابل معاها وملامح وجهو الجدية كتحس فيهم بواحد الأمان ) : عنبر غادي تسمعيني مزيان وتحلي معايا ودنيك .. وقبل متجاوبي دوري هضرتي مزيان فدماغك عاد عطيني جوابي صافي ؟
- عنبر ( حسات بترعيدة غريبة فقلبها هزات ليه راسها بالإيجاب ) : واخا دوي ..
- عماد ( شبك يديه مع بعضياتهم منزل راسو باش يكون فالواجهة معاها ويقدر يوصل ليها شنو بغا بالكلام وحتى الملامح ) : مغاديش ندخل معاك فتفاصيل ديال داكشي لي وقع حيت ديجا دوينا فيه .. ودوينا على لي وقع لبنات ولي وقع فداخلة والڤيلا دالخرجة دكازا .. لافير كلها لي وقعات عاودتها ليك بتفصيل واخا لخدمة ديالي مانعة عليا ندوي فهادشي مع شي حد ولكن انتي ماشي شي حد ..
- عنبر ( تنهدات ) : حيتاش انا كنت مزوجة بواحد والديه ويقد يكون حتى هو عندو يد فهادشي ياك ؟
- عماد ( هز راسو بالإيجاب ) : الله يرضي عليك ... المرة لي فاتت ݣلتي ليا بلي لي ݣلتها ليك تݣدي ديريها .. غير باش تاخدي حقك من داك الميكروب ..؟
- عنبر ( هزات راسها فالروطال لي واقف مقابل مع لاپيسين عاطيهم بظهر .. رجعات شافت فعماد ) : ومزال عند كلمتي راه قلتها ليك لي قلتيه لي مرحبا .. غير نطفي ديك الجمرة لي فقلبي حيت إلى شتو قدامي مانضمنش ليك شنو نقد ندير
- عماد ( حرك راسو بنفي ) : لا ماشي دابا .. هادشي لي غانݣولك خاصو الهداوة وتخدمي ليا عقلك مزيان .. هادي فرصة ليك انت غاتنساي عليا عنبر القديمة انا باغي نشوف وحدة خرى
- عنبر ( ضحكات ) : شوف مديرهاش مني قلت الصواب .. ولكن راه عدويا الواحد يبقى يتمتطل فالهضرة داك سوسپانس والله ماعندي معاه .. تقد تقول انا فضولية شوية كنبغي الواحد يدخلني نيشان .. ( شاف عماد فخوه لي بدورو شافيه محرك ليه حجبانو بمعنى كنݣولها ليك ديما )
- عماد ( رجع شاف فعنبر .. تنهد وكمل كلامو كيشرح بطريقة بسيطة ) : خاصنا ضروري نخليو عائلة رحمون دخل للمغرب .. الى كانو بعدا مغانݣوش عليهم عدوك الى بغيتي تهرسو خاصك دخلو لازون ديالك
- عنبر : ولكن راه صعيب يدخلو ليك للمغرب ( سكتات وشافت فعماد وفروطال ) واش انت معاود لخوك ؟ شتو واقف علينا بحال الݣارضيان ديال المحابسية
- عماد ( بالإيجاب ) : وي فخبارو كملي
- عنبر : هوما راه سينين مدخلوش .. باهم راه من نهار طلع لطاليان باقي صغير عندو شي 20 عام .. فالاعوام لولة كان كيجي فاكونص ولكن من بعد فاش تحول لبلغاريا راه قطع الرجل .. اداك ( عضات على باطن حنكها بقوة ) ولدو هو لي كان كيجي مرة مرة .. وحتى فاش تزوجنا عمرو جا ..
- عماد ( سها كيفكر ) : واخا ݣولي ليا شي حاجة لي لاحظتيها عليهم .. ݣلتي ليا مكايتجمعوش بزاف ؟
- عنبر ( رضات خصلة من شعرها ورا ودنها ) : أه مكايتجمعوش ولكن نهار كيتجمعو .. كيبانو ليك بحال العائلة المثالية ، كيحماقو على بعضياتهم ..
- عماد ( ضحك بخبث ) : مزيـــــــان ( جبدها ) حنا هادشي لي بغينا حيت هادشي هو لي غادي يخليهم يخليو تم ويدخلو لهنا
- عنبر ( مزال مافهمات والو ) : وشنو غادي يخليهم يخليو تم ويدخلو لهنا .. خويا عماد راه بديت كنتعصب وحق مولانا .. كدير ليا بحال الافلام دوي راه شوية غانكرمو بالبرد ... قاطعهم الروطال لي تحنا قفازي شاد فليدين ديال الكرسي لي ݣالسة عليه عنبر مقابل معاها لدرجة ريحتو تخلطات مع الريحة لي كتعطي منها كيشوف فعينيها بجدية ) :
هذا مالف بالكوميساريات وداك الهيت ديالهم كيبقاو يمشيو مع الواحد شوية بشوية .. لي غادي يخليهم يخليو تم ويجيو لهنا هو الحفيد ولد ولدهم ..
- عنبر ( بلعات ريقها بؤبؤ عينيها مكايتحركش تنهدات تنهيدة طويلة كتبين على الضغط لي فخاطرها شافت فعماد ورجعات شافت فروطال حركات راسها بإستغراب وتساؤل ) :
علاش .. علاش هو عندو ولد ؟ واش ( حنحنات ) واش هو كان مزوج بشي وحدة من غيري أنا ؟
- الروطال ( محرك ليها راسو بنفي ) : الا .. ماعندو لا مرة لا جوج خاصهم يعرفو بلي انت نهار جيتي من عدهم كتي حاملة فهمتي ..
- عنبر ( خرجات فيه عينيها ) : اويلي على كنت حاملة .. والى كان كلامو بصح وكنت انا مكنولدش يلاه
- عماد : هادشي حالو ساهل نديرو ليك التخاليل ونتاكدو .. واخا انا حاس 100 فالمية ايكون اطلقها عليك باش متولديش معاه، بحال والو يكون كان كيشربك شيحاجة باش متولديش
- عنبر : ( عضات على فمها كتخرك فصباع رجلها ليمنية بتوتر وعصبية ) : ناري ناري وتكون بصح .. المهم كمل كمل .. نقولو درنا هادشي زعمة غايتيقو بلي انا جيت حاملة من عدهم ؟
- عماد : شتي هادشي كامل خرجي سوقو انت .. حتى الى ݣاع قلبو وراك باش يعرفو واش هادشي بصح .. حنا انوريوهم داكشي لي بغاو يشوفوه تصاور وانت حاملة السبيطار لي ولدتي فيه هادشي كامل ماعندناش فيه ݣرام دالمشكل
- عنبر : ايوا انا دابا 10 شهور باش جيت عندهم .. ولدي ولا بنتي شحال خاص يكون عندو دابا ؟
- الروطال ( وقف ) : شهر وشي جوج سيمانات هكاك ..
- عنبر : واخا هاد البنت ولا دري منين انجيبوه ؟
- عماد : كاين منين .. وغايكون دري حيت بحال هاد العائلات كيموتو يكون عندهم حفيد دري
- عنبر ( كتفكر ) : واخا والفيديوات ديالي لي مليوحين فصفحة ديالي ديال الأنستغرام ؟
- عماد : عادي تݣدي تكوني كتبوسطي فيديوات قدام فيديوات كنتي مصوراهم شحال هادي .. ماشي بضرورة
- عنبر ( هزهزات راسها ) : بصح اصلا مكنپوسطيش بزاف .. كنحط تصاور ولكن غير نصاصية ماشي كاملي .. ( بجدية ) شوف انا والله ماعندي مشكيل فهادشي كامل غير هذاك الشلاهبي ولد الحرام لا هو لا تريكتو بغيت ليهم المؤبد عمر جدهم يشوفو شمس ..
- عماد ( بإبتسامة راحة ) : هادشي لي بغيت حتى أنا لا هوما لا لي فوق منهم .. ولكن اعنبر الى درنا هادشي كامل وتأكدو بلي دري لي عندك راه ولدهم وهادشي ݣادين نديروه واخا كاع يبغيو يديرو تحاليل يتأكدو أنخليوهم يسمعو لي بغاو .. ولكن راه يݣدو يحيدوه ليك
- عنبر ( مزال كترعد صباع رجليها بعصبية ) : يفوتوها يظيروها ويفوتوها .. ياك عطاوني 50 مليون وسيفطو شيفور وصلني للمطار .. يقدو يديروها بعينيهم مغمضين إيوا شنو المعمول؟
- عماد ( شاف فالروطال ورجع شافيها ) : خاص تكون عندك الحمية .. شي حد فظهرك لي مايݣدوش يوصلو ليك ولا يقربو ليك ويخافو ݣاع يوصلو ليك
- عنبر ( شافت فروطال ) : خويا فاروق شرح ليا انت كدهل نيشان فالهضرة .. خوك مغايسالي حتى غانلݣط البرد من ݣاع جوايه
- الروطال ( ضار عندها بنفس الملامح ديال واحد مهامو حتى واحد .. وماعندوش سوق يلوح كاع لي عندو فوجه لي قدامو ) : عماد بغاك تزوجي بيا بالعربية تاعرابت ..
- حكات على نيفها تبسمات إبتسامة واسعة .. إبتسامة لي رجعات ضحكة كبيرة .. وتوالات لعدة ضحاكات كضحك حتى ݣالت براكة .. دوزات لسانها على شفايفها ( شافت فعماد ) :
واش كدوي بصح ؟
- عماد : جاتك عجب ؟
- عنبر ( رجعات كضحك ) : شوف سمحليا ومديرهاش مني قلت الصواب .. كنت كنسمع شحال هادي بلي كيطول فالمخزن مكايبقاش يزݣي .. ولكن حتى كيطول فالمخزن ويشرف وانت اخويا باقي صغير
- عماد ( شاف فروطال .. لي شافيه بنص عين ) : راه هذا هو الحل اعنبر يهديك الله
- عنبر : واش انت زنزن كيفاش حل .. هادشي لي بقا ليا انا غير زواج كولشي قمتو .. واش ناويين تخرجو ليا عقلي ياربي حبيبي هاد العائلة منين خرجات ليا كنت هانية ..
- الروطال ( شافيها محرك راسو بإستغراب ) : حتى انا بحالك .. هادشي لي ݣلت
- عنبر ( أشرات بيدها لجيهتو) : ها لي قلت .. شوف غير دابا وشنو خارج منو .. هذا راه شي نهار نخبطو نصدق داخلة عليه الحبس
- عماد ( بجدية وصرامة ) : عنبر مديهاش فيه هو راه هكا داير .. ولكن إلى عرفتيه والله متݣولي هك واش انا غير جيت وبغيت نزوجكم .. حيت عارفو هو لي غايݣد يوݣف معاك ويحميك مايݣدوش يقربو ليك وفاروق معاك
- عنبر : علاش بسلامة مالو هو الفتيت ؟
- عماد ( بجدية كثر ) : فاروق عندو بلاصتو فالبلاد .. عندو الوزن ديالو والناس كيعرفوه لا هنا فالمغرب لا على برا .. لي نݣد نݣوليك هو معاه مايݣدش شي بنادم يقرب ليك ولا يأديك ولا يمس شعرة وحدة منك .. كيما بغا يكون حيت إلى داروها هنا غاتحول لقضية رأي عام .. وهوما هادشي مغايبغيوهش فهمتي البلان كيداير
- عنبر ( ضارت عند الروطال طلعاتو ونزلاتو كتدوي مع راسها : هاي هاي زيغ انت مهم كاع لهاد الظرجة حݣلك حاس بجنابك وساكن فڤيلا يجري فيها الخيل .. شافت فعماد ) :
واخا نخليو هادشي هادشي كامل لفين غايدينا ؟
- عماد : الى ساقو الخبار بلي حفيدهم كاين معاك .. وماغيݣدوش يحيدوه ليك .. حيت هنا غايخافو ترفعي دعوة حيت عندك حيط صحيح لي واقف معاك لي هو الروطال .. اتحطي ليهم بلي كذبو عليك وهموك بلي ولدهم مات .. غايبغيو حفيدهم بلاتي هي أحسن بالعربية غادي يتحلونو ويهبطو كواريهم معاك وهنا فين غاتكون نوبتك
- عنبر ( وقفات تقابلات مع الروطال ) : كمليا انت .. خوك كون اختار يكون سيناريست ولا فالبوليس كيطول فالهضرة بزاف ..
- عماد ( قاطعها ) : هذا هو البلان لول .. دابا انت هادشي لي خاص تعرفيه فهاد الساعة .. فاش يوصل داك الوقت وندوزو لبلان جوج ولكن أعنبر نهار يوݣف عليك بدر الدين وياك وياك تغلطي وديري شيحاجة ماهياش وتخصري لينا كولشي
- عنبر : دابا انا ماضرنيش هادشي .. لي ضرني هو ماما فاطنة شنو انقوليها ؟ صباح الخير بغيت نتزوج ضروري مانعاود ليها
- عماد : ضروري خاصها تعرف ؟
- عنبر : وراه ضروري كون اكانت القضية مافيهش ولد .. نقولو هانية ولكن واش انا انكون هازة ولد صغير يسولوني شكون هو اش غانقول ؟ را لا هي لا حياة راه عائلتي الصغيرة هاديك أسي عماد ماشي البراني .. وغير كون هاني هوما راه ميقدوش يخرجو شيحاجة حيت كيخافو عليا من الهوى
- عماد : واخا حتى نجمعوهم ونعاودو ليهم ولكن بلاما ندخلو فليضيطاي الله يرضي عليك
- عنبر : واخا وهاد الزواج هذا ( شافت فروطال ) ياك غير على الوراق صافي ؟
- الروطال ( جاتو الضحكة كيحك فلحيتو ) : لا حول ولا قوة إلا بالله العلي العظيم
- عماد : غير على الوراق وݣدام الناس .. هاد تناݣير اللهم بيها الوالدين خليوه وسط الدار ، ولكن راه ضروري من عرس حقيقي
- عنبر ( خرجات فيه عينيها ) : كيفاش زعمة نطلع فوق العمارية وديك هايلالة ونبرز فالبرزة ؟
- عماد ( هزهز راسو بالإيجاب) : ضروري .. الى مادرناش هكا حد ماغيتيق بلي انتوما مزوجين ..
- عنبر ( هزات راسها فروطال ودورات عينيها فالأرجاء ديال الدار رجعات شافت فعماد ) : مزال عقلي مابغاش يستوعب هاد وحق الله العظيم .. هادشي راه جاني أنا فشكل ..
- عماد ( بالهداوة ) : عنب. أنا راه عارف هادشي ماشي ساهل .. هادشي صعيب وعارف راسي مدخلك لمعماعة كبيرة لا انت لا خويا .. ولكن هادشي راه ماش أعلى ودك انت على ود دوك الوالدين لي ضاعو فبناتهم مساكن .. بنت باقي صغيرة مزال مستقبل كبير ݣدامها مشات بحال الجغمة ديال الما .. دوك شباب لي باقي صغار ضاعو فرجولتهم وفحياتهم ومن غيرهم عدد ..
- وراه واخا ݣاع هادشي يصدق ويتشدو ݣاع راه هذا ماشي باب واحد راه منهم عدد ولكن على الأقل نقيو النص ويجي جيل ورانا وينقي النص وهي غادية .. ديري فبالك ايجي نهار تزوجي وتولدي وليداتك راه اتخافي عليهم من بحال هاد الوحوش .. راه كتعاونينا حنا وكتعاوني حتى دوك الوالدين واخا غاتݣولي ليا انا مالي خدمتكم هادي ، وراه كيما الشرطة في خدمة الشعب كيما كيݣولوها حتى حنا كنحتاجو لي يعاونا ..
- عنبر ( تنهدات تنهيدة طويلة) : شوف اسي عماد انا داز عليا الويل والعذاب .. بلا هادشي لي عرفت دابا أنا والله ماعندي غرام دالمشكل نعاونك هادشي ساهل عندي على داكشي لي دوزت .. غير هو واحد الحاجة خدمتي غادي نكمل فيها .. يقوليا لا حقا متغنيش مكانتي الإجتماعية وديك الهضرة ديال الطبقة الاستقراطية راه ماعنديش معاها ..
- الروطال ( شافيها .. ضار عاطيها إهتمامو ) : منين جبتيها نيت .. وجابتها الهضرة إلى مشا هاد الزواج حتى كمل الله يرحم بيها الوالدين .. حاجتي مسيني فراسي متمسينيش فيها
- عنبر ( بإستغراب) : اشمن حاجة مسيت أنا ؟
- الروطال ( خشا يديه فجياب السروال ) : انا كندوي اونجينيغال .. غير باش نتفاهمو على شي حوايج الله يرضي عليك .. بحال المربط ماعدك مديري فيه ، بغيتي تشوفي الخيل هانية ماشي موشكيل لدهم خليه عليك فتيقار باش نبقاو مزيانين خاطيني فريع الراس ..
- عنبر : راه ماكليتوش .. انت غير مارضيتيش حيتاش لدهم بغاني وخلاني نقرب ليك انا من دون كاع الناس ياك ؟ ( ضحكات )
- الروطال ( هز حاجب ونزل الثاني حاضي ملامحها لي كانو كيتراقصو بإنتصار ) لي عندي ݣلتو .. خدمتك ماعديش مشكيل حيت مكايهمنيش مديريش اشيحاجة لي تقلقني وتبرزط ليا دماغي خودي راحتك .. شي حوايج خرين نتفاهمو عليهم من بعد فاش نكون واكل ..
- عماد ( موجه ليه الهضرة ) : وحتى تشوفها بغات بعدا ؟
-الروطال : من هضرتها راه باينة بلي باغية .. ياك ولالا ( شافيها )
- عنبر ( بقات ساكتة ساهية .. هزات عينيها البنية فيه لي كانت عندهم لمعة ولون خاص بليل نظراتها والبؤبؤ ديالها لي وساع بحال شي قطة برية بإبتسامة أنثوية واسعة ) : اه باغية ..
- الروطال ( هزهز براسو ) : ودابا نݣدو ندخلو نتعشاو أمدام ...
- تجمعو على طبلة وحدة كيتعشاو .. جابدين بزاف ديال المواضيع كيدويو فيها حياة قربات من عنبر بهمس :
فين خرجتو وفاش دويتو ؟
- عنبر ( كدور فعينيها ) : من بعد وندويو .. خلي بعدا انعمة تنزل ليا وديك ساعات نهضرو ..
- سلاو العشا وتوجهو كاملين للصالون أخر .. حاطين كيسان ديال حليب بشكلاط مع الحلوة لي جابت ماجدة معاها ..
- الروطال ( شاف فعماد محرك ليه راسو ) : تدوي انت ولا ندوي أنا حسن ؟
- عماد ( هز حجبانو بإستفهام ) : باغي تلوح فهاد الليلة كولشي ؟ مكتعرفش تفراني وتخلي ديك الرمانة مجموع نصها
- طارق ( كيشوفيهم بإستغراب ) : أش تم نتوما كل واحد صاد لجيه براسو
- عماد ( شافيه ) : هنينا حتى انت الله برحم جدك
- عصام ( كيقلقل فيهم بعينيه بلع اللقمة دالحلوة لي كانت ففمو ) : هاد توشويش ديال العصابات مايكون أواحد فيكم جايب ربحة وبافي يتبع ياسمين ويتزوج
- عماد ( شاف فخوه ) : تهنيتي ها انت نوضتي الراݣد ..
- ماجدة ( كتشوفيهم بإستغراب ) : واش سيڤغي ؟ بصح شي حد باغي يتزوج فيكم نوو وايلي ؟ .. حياة منغنة بالحلوة وكدور عينيها من واحد لواحد .. عكس عنبر لي الإحراج بان على وجها وتطرجم للحمورية وسخونية طالعة من حناكها
- الروطال ( حاضيها قاني عليها بحال الفارݣو لي كتكون قانية على شي بزناز خاصو غير إيمتا يبان .. غمض عينيه بشوية ضاغط على محاجر عينيه .. دخل مورسو دالحلوة للفمو كيتلذذ بيه .. بلعو ورسم إبتسامة لي غايكون خبير فقراءة الملامح أيعرفها إبتسامة إستفزاز وجس النبض ) :
أنا وعنبر غادي نتزوجو باركو لينا ..
- حياة وحلات ليها بدات كتكح حتى خرج ليها الطشاش من نيفها .. حطات طبسيلها بزربة كتكح .. ناضت ماجدة لعندها بزربة تلفات .. عنبر كتسوس فيها وجها ولا حمر بحال شي نفاخة نفختيها وقربات تنفاجر .. :
ماجدة الما اصاحبتي سربي راه غاتجيف
- حياة ( كتأشر ليهم لظهر باش يخبطوها منو ) .. كتخبطها عنبر والو .. وقف طارق من بلاصتو حاط طبسيلو بخطوة وحدة كان عندها .. هز يدو ونزل بيها لظهرها بضربة وحدة لاحت كاع لي كان واحل ليها فحلقها ..
- جات ماجدة مدات ليها كاس ديال الما شرباتو على طولتو .. هزات راسها فطارق عينيها سايحين بدموع بصوت مبحوح :
هادوك يدين ولا مادريات .. مالك اخويا ابشوية ، جات وفاء حيدات داك طبسيل ومسحات تم .. مدات ليها كلينيكس مسحات عينيها او فمها ونيوفها ..
- عنبر ( هزات عينيها فالروطال لي مزال هاز طبسيلو كيقطع من الحلوة وياكل .. هز عينيه فختو لي كانت كتشوفيه بإستفهام ) :
زوين هاد شكلاط لي دايرين فهاد لاطارت منين جبتيه ؟
- ماجدة ( هازة يديها كتأشر لواحد الجهة ) : عند royal traiteur
- طارق ( كيشوف فالروطال ببرود ) : عاهدي بك ماعدكش مع النكات .. واش كتنكت علينا ولا كيفاش بلانك أرايس ؟
- الروطال ( هزهز راسو ) : دابا واش لي بغا يتزوج رجع كيݣول النكات ( أشر لعنبر ) هانتوما سولوها ياك غانتزوجو ؟
- عصام ( حط طبسيلو ) : راه نكتة هادي نيت .. البنت مكتعرفها مكاتعرفك يلاه عرفتيها شايفها 3 المرات فحياتك .. نهار الموسم وفعرس ياسمين ودابا
- الروطال ( شافيها ) : تلاقينا 3 ولا 4 أعنبر فكريني ؟
- عنبر ( تنفسات ببرود ) : والخامسة إن شاء الله انتجمعو فعوكاشة ( شافت فعماد ) العربون باين من دابا انا راه ماعندي مع الخاطر راه يدي كاتسبقني ..
- عصام ( جاتو ضحكة ) : مكنصحكش اختي والله القسم مانصحك تعصبيه ولا ديري معاه شي فلاش منضمنوش ليك
- عنبر : مالو ولا صعصع ؟
- طارق وعصام ( دقة وحدة ) كثــــــــــــــار ( جبدوها ) ..
- عماد ( تدخل باش يلطف الأجواء ) : عنبر وفاروق غايتزوجو على الوراق ماشي بصح .. ݣدام الناس غايكون بصح وبعراسية ديال الصح ولكن کدامنا حنا لا ..
- طارق ( غوبش ) : واش على لافير لي عاودتي لينا ولا ؟
- عماد ( هزهز راسو بالإيجاب ) : وي عليها .. الخبار فراس الواليد .. وغايكون فخبار حتى السيدة لي مربية عنبر ، شي واحد خور مخاصوش يعرف الله يرحم بيها الوالدين .. ممنوع عليا نخرج شي حاجة كتخص الخدمة ولكن ضروري متكون فخباركم باش ماتبقاوش غاديين مدفݣين ومݣلوبة عليكم الݣفة ..
- حياة : الى فهمت شيحاجة الله يعطيني السقوط .. فيلم هندي هذا ( شافت فعنبر ) كيفاش هاد زواج ثاني ؟
- عنبر : هانتي فاش نكونو غاديين انعاود ليك كولشي صافي ؟
- حياة ( مامستوعباش ) : لا سمحيليا اش فيا انا مايصبر حتى لدار .. أشمن زواج هذا اويلي واش غاتسكني معاه فدار وحدة ولا كيفاش هادشي
- طارق : وراه الى تزوجو باينة غاتسكن معاه مالها غاتمشي تحرݣ ..
- حياة ( شافت فيه ببرودة دوزات لسانها على فمها ) : وانت بعدا أخويا شكون دواك أصلا ..
- عنبر ( بصرامة ) : حياة رجوع لله
- حياة ( بإنفعال ) : كيفاش الرجوع لله .. واش عارفة اش كديري واش خرج ليك العقل ولا شنو وليتي مسيرة لي قالك شي حاجة تقولو مرحبا
- عماد ( بهدوء ) : حياة بشوية الله يرضي عليك .. هذا راه ازواج على الوراق .. هادشي على قبل داك الميكروب لي ضحك عليها الى بغاتو يتشد خاصها دير هادشي
- حياة ( ضحكات ) : تبارك الله وصلاة على النبي .. داك نهار جيتي عندنا كتݣولنا حݣا والواد .. هادوك مافيا هوما لي كيخطفو البنات يحيدو ليهم كلاويهم ويبيعهم .. ودابا جاي عند عنبر كتݣولها تزوجي بي خوك على ود هداك سلاولاو
- عنبر ( كتحاول تهدنها ) : وحياة خلينا ندويو ابلعقل
- حياة ( ضارت فيها ) : وراه مكاين عقل .. عرفتي مي تسيق الخبار وخالتي تودة يمشيو فيها ( شافت فعماد ) علاش اخويا ياك انتوما الشرطة في خدمة الشعب .. مالك اخويا لي متشدوه انتوما الى ماݣديتو عليها خليوه منو لي خلقو بانت ليك اعنبر دخلها فهاد البهلان وخرجان العقل
- عنبر : راه حتى انا مغانبرد حتى يصفى قلبي ونرتاح ونفدي دقتي
- حياة : بروسلي تي .. اتقدي عليهم واش نفكرك ولا يمكن راه نسيتي .. واش عقلتي فاش حطو ليك باليزتك فزنقة وقالو لشيفور يوصلك عقلتي اش دوزو عليك دوك البشار ، وهادشي لي سمعتي كاع لي كيديرو لناس شكون ݣال اختي يمشيو يغبروك ويلا يخطفوك انت نيت بحال دوك البنات
- عماد : وحياة وحياة واش حنا غانخليو شي حد يأديها ؟ راه حنا معاها هادشي علاش بغيناها تزوج بفاروق غايوقف معاها ومغايݣدش شي حد يحاديها
- حياة ( وقفات ماقداتش تبقى كالسة ) : انتوما المخزن فيكم أحلام الفم .. ياك كتنوض المدابزة فلش كنسونيو ليكم كتقولو لينا حتى يكون دم ونجيو .. يلاه ديوها فعنبر مسكينة راه كيهمكم اراسكم شي حد خور مكايهمكمش انا هادشي مغايدخلش ليا لراسي
- عنبر : ولاواه احياة ماقلتها كاع أنا
- حياة ( شافت فيها مغرغرين عينيها بدموع ) : أش عندك متقولي .. أنا لي كنت كنشوفك كدبالي نهار على نهار بمسبت دوك المناطح .. 6 شهور ديال العذاب داز عليك الويل الكحل ( دموعها نزلو سخان ) نهار جيتي عدنا قلت الحمد لله جات ختي لي انحط عليها الراس وترفد عليا الدقة من داك الحرايمي دسعيد .. هزيت ساكي وتبعتك لكازا واخا عمري جيت ليها ولي كتقوليه ليا كنديرو بعينيا مغمضين .. جا هذا لعب ليك بعقلك انت راه اعنبر بنت خالتي حورية وعمي سليمان ، انت ماشي ڤاندام انا راه توقع ليك شيحاجة بالله نموت فيها .. ( تخطاتهم فاتحة الباب وخرجات كتنحط بالبكا ) ..
- عنبر ( شدات راسها ورجعات هزاتو فعماد ) : شتي .. شوف احياة وشنو دارت خلي ماما فاطنة ( وقفات باش تمشي عندها ) وقفها عماد :
انا اندوي معاها
- طارق ( وقف ) : شرح لختك لي مصدومة معلرفة راسها باش مبلية .. تخرج عند البنت دور فيك وانت سباب المشكل ( خنزر فيه وخرج لعندها لقاها واقفة كتنحط عند لاپيسين ) .. قرب منها مدواش معاها وحتى هي شافتو مادواتش معاه حدها كتبكي .. البكا ديالها بدا كيخف شوية بشوية
- طارق ( واقف حداها .. بصوتو الرجولي التقيل غالبة عليه لكنة غرباوية ) :
فاروق مخايبش حتى لديك الدرجة
- حياة ( هزات فيه راسها وتنهدات ماسحة دموعها ) : انا ماشي عليه هو انا ماعديش معاه ݣرام دالمشكل .. والله وكون كانو ايتزوجو بصح حتى غانفرح حيت عنبر تستاهل .. ( مسحات خنافرها وهزات عينيها فيه مدمعين شفارها كيبريو بدموع ) انت فخبارك هادشي ؟
- طارق ( دار يديه فجياب تجاكيط ديالو ) : بلان زواج لا .. ولكن فخباري لافير لي خدام عليها عماد ( تقابل معاها ) خاصك تعرفي واحد الحاجة ، عماد واخا خدمتو مخاصوش يدوي فيها ولا يدوي عليها ولكن معانا حنا خوتو ومعايا انا كنحطو كولشي على طبلة .. حيت بعد المرات كيوݣف علينا
- حياة ( بعدم فهم ) : علاش ؟
- طارق : انا وفاروق عدنا المعارف .. شحال من أفير نݣدو نفعوه فيها بالمعارف لي عندنا
- حياة ( شافت قدامها) : انتوما بعدا عدكم بعضياتكم اما حنا ماعدنا حد من غير ربي سبحانه .. مابغيتش نخسر ختي انا براكة الي داز عليها كون تشوف حالتها كيكانت تبكي ( شافت فيه ) لايغرك هادشي لي شتيه والغنا والهيبة أجي شوفها هذا شحال وشوف مداز عليها وتفرج
- طارق ( حكات ليه على الجرح .. هز برجليه شاف فسما وسها فجهة معينة ) : لي ماعدو الكثير عدو القليل .. لا يغرك المظهر
- حياة ( شافت فيه ) : انا راه عشت الجحيم مع راجل مي .. با طلق مي عمرو ضار وشافيا تبعو مرتو دايرة ليه سميط ولميط ، وعاد داك الحرايمي دراجل مي سعيد كان ايزوجني بواحد شارف يربح على ظهري الفلوس ، فاش جات عنبر فرحت وفاش جرا علينا سعيد هزيت حوايجي وجيت معاها كانحس بيها حامياني وهي ظهري واخا مي كاينة ولكن مي كنحس بيها مغاتحمينيش فهمتيني بحالاش ياك ؟
- طارق ( كيشوفها بعينيه من الفوق كيسمع لكلامها وملامح وجها وكيفاش كدوي ) : فهمتك
- حياة : حيت مي كان عليها كاعما تزوج .. وحتى كاع الى بغات تزوج تعرف معامن كاع الناس ديال دوار كالو ليها سعيد لا وماسمعتش ليهم ..
- طارق ( بجدية وهالة خاصة كانت كتنباعت منو طاقة جدب خطيرة كتخلي الواحد لي قدامو يعطيه الإنتباه ويسمع ليه ) : شوفي حنا فهاد الدنيا راه غابشر ماشي ملائكة مخاصناش نغلطو .. ولكن راه كنتعلمو من داك لي كيدوز مك غلطات ولكن دابا راه تلݣاها عرفات أش دارت ونبصم لك عليها ، حياتها ولا كيفاش تفكر ايتبدل على هادي 5 سنين ولا ستسنين لي دازت واش فهمتي شنو باغي نوصل لك ؟..
- حياة ( بالإبجاب ) : إيه فهمتك .. عرفت هادشي لي باغي توصل ليا ، ولكن والله حتى خايفة على عنبر راه هاديك ماشي غير بنت خالتي راها ختي
- طارق ( كيحاول ما امكن يبعث الطمأنينة فقلبها ) : أبغيت نݣولك الى كانت مع فاروق راه برب لا وصلها شي حد .. راه واخا تسمعي دوك البلانات على دوك ولاد الكلاب والكلاب ونقى منهم .. الروطال ىاه فايتهم بدرجات مايغركش هادشي لي كتشوفي أنا نݣولك .. أول حاجة الى قلبو وراها ايعرفو بلي شيخها كان وكيل الملك
- حياة : اييه نسيت بلي بات ماجدة كان وكيل ݣالتها لينا ونسيت
- طارق ( بإبتسامة ساحرة) : ايوا شتي خاص أتخدمي عقلك شوية .. وعماد ضابط فالبوليس وعا خدمتك الروطال بوحدها قصة خليه معارفو لا لي هما لا لي برات المغرب ومقسمين بين اوروبا والخليج
- حياة ( دورات عينيها فالفيلا ) : وانا كنݣول منين جاه هادسي كامل .. داكشي باش عدو فيلا يجري فيها الخيل
- طارق ( هز حجبانو مغمغم ) : السلامة ياربي
- حياة ( شافت فيه ) : ماتخافش انا ماشي معيانة .. انا أݣلت كل واحد الله يزيدو ولي ماعدوش الله يعطيه ..
- طارق ( اشر ليها بيدو ) : دخلي وتبتي وبراكة من تنقاز ولي تعودي حتى تعرفي الهضرة فين غادية ومنين جايا عاد دوي .. شافت فيه بنص عين متخطياه راجعة لدار داخل حيدات مخدة من بلاصتها وݣلسات
- عنبر ( شدات ليها فيدها ) شوية دابا ؟
- حياة ( بإبتسامة إطمئنان ) : الحمد لله .. كان باين من ملامح الحاضرين بلي عماد دوا معاهم وفهمهم لي كاين ولي غايكون من هنا لمن بعد
- عنبر ( تنهدات ) : نمشيو وقيلة
- عماد : انا غانوصلكم .. باش ندويو فتفاصيل فطريق ..
- وقفات عنبر وحياة خداو المونطويات ديالهم لبوسهم .. خرجات بلاما تشوف وراها ولا تشوف فالروطال لي بقى كالس على نفس الوضعية
_______________ فــالـطـريـق
- عماد ( عينيه على الطريق ) : عنبر إن شاء الله بحول الله غدا ندوز عندكم لدار باش ندوي مع لالة فاطنة .. ونفهموها مزيان إن شاء الله من الاحسن تكون اهي بوحدها لي فدار الى ݣديتو تخليو البقية تخرج
- عنبر ( تنهدات تنهيدة طويلة) : واخا إن شاء الله أنحاول ..
- وصلهم للدار بقا واقف حتى تطلعو عاد ديمارا هو مشا .. دخلو لدار لقاوهم نعسو دخلات حياة لبيتها بدلات عليها حوايجها .. وخرجات لعند عنبر لبيتها لقاتها يلاه سلات تبدلات وكالسة قدام المرايا كتمسح فالمكياج .. تنهدات وݣلسات على طرف النموسية كتشوفيها :
علم الله اش غاتقول خالتي فاطنة الى ساقت الخبار
- جاهم صوت من الباب :
أشمن خبار ؟
- هزات فيها عنبر راسها راسمة إبتسامة خوف وتوتر على وجها :
ماما مزال كاعما نعستي ؟
- تودة : لا مزال خالتك سميرة ورشيدة نعسو بكري انا بقيت نساين فيكم تجيو .. أشمن خبار عدكم ؟
- حياة ( ضحكات ) : اعلى الڤيلا ديال خو ماجدة كيدايرة يا خالتي ( أشرات بيديها ) هوكا كدير فنة فنة على خضورية وعلى تواسع
- تودة : ايوا بصحتكم فوجتو بعدا ( قربات لشعر عنبر كتقلب فيه ) هاد الشعر ثاني خاصو شي تشݣيكة غدا فصباح ندوز عند العطار نجيبهم
- عنبر : خلي خالتي رشيدة وخالتي سميرة هوما يجيبوه .. باش نيت يطلقو رجليهم شوية يعرفو فين يمشيو ويجيو .. وهوما حاتلين فدار
- تودة : ايوا صافي خلي حتى لغدا ونسيفطهم .. ويلاه نعسو بقاو تاني كوتوكوتو حتى للفجر
- حياة ( وقفات ) : لا انا نيت عييت فيا نعاس .. تصبحو على خير ( خلاتهم ومشات ) .. مشات تودة لبيتها وتسرحات عنبر فبلاصتها كتفكر فهاد الليلة وكاع لي وقع فيها ( تنهدات تنهيدة طويلة وضارت على جنبها مغمضة عينيها ) ..
__________________
- الأرواح التي فيها شيءٌ منك ..تعرف كيف تخاطب روحكَ بلا كلمــــــاتٍ ..فَـ الإهتمام هو سيد البقاء ؛ وَ الإحتواء هو إجادة الحضور ..فَـ ليسَ كل من بقيَ احتوىٰ وَ ليسَ كل من حضر اهتم .. الكل يسمع صوتك ومن يحبكَ يسمع صمتك فرق كبير بينهما ..الأول يسمع حرفاً وَ الثاني يسمع نبضاً
وَ الثالث ينظر من بعيد .. لـِ يرىٰ شيئـــاً من الواقع ولكن هو حلمٌ لا أكثر .
- واقفة حياة فالكوزينة كتغسل فالماعن .. دخلات عندها رشيدة كتقاد فشال ديالها :
نخلي معاك الدراري حتى نرجع ؟
- حياة ( شافت فيها يديها عامرين بتيد ) : مي ديهم معاك نيت يفوجو شوية من نهار جاو وهوما محبوسين .. انا راه مغانردش ليهم البال انغسل الماعن وخاصني نجفف
- رشيدة : صافي صافي تݣول غاتهزيهم على ظهرك يلاطيف اللوطف .. خرجات من عندها لبسات سميرة عليها جلابتها وصابوها
- تودة ( كتعيط ) : عنبر واش كتبتي ديك الورقة ؟
- عنبر ( جاوباتها من الصالة لوخرا ) : راها فوق تلفازة .. رجعات كتسوس السدادر دايرة اخر تشقيقة من الزيت لي بقات فالقرعة عاكفة راسها وكتنفض فصالة .. سمعات الباب التسد مشات كتجري لتيليفونها هزاتو سيفطات ليه ميساج فالواتساب " فينك راه مشاو " .. جاها الرد تم تم " أنا قريب لدار عندكم " .. حطات تيليفونها ورجعات كتسوس فصالة حلات السراجم كتمسح فيهم ، جات حياة لعندها بݣندورة ديال 30 درهم عاكفة راسها حتى هي طلات عليها كتمسح بديها فطبلية :
أمضرا سونيتي ليه ؟
- عنبر ( شادة فطرف الطلميطة ) : قاليا راه قرب للدار شوية تلقايه كيسوني ..
- حياة : ايوا صافي الله يخرج هاد الطرح على خير .. ، جرات رجليها ورجعات للكوزينة أما عنبر قدات الطلامط وبدات ارجع فالخدادي لبلايصهم حتى سونا الباب
- عنبر ( بصوت عالي ) : حياة تحلي ولا نحل ؟
- حياة ( سبقاتها لدروج ) : أخليك انا غانحل .. نزلات حلات ليه كان واقف لابس كيطمة فلݣري وسبرديلة فالبيض ونظارات شمسية
- صباح الخير
- حياة : صباح الخير طلع .. داز من حداها وضار لعندها بتساؤل :
واش دايرين رفيسة ؟
- حياة ( سدات الباب وشافت فيه ) : لا علاش كتوحم عليها ؟
- عماد ( عوج فمو ) : ريحة الحلبة والثومة كتعطي ؟
- حياة ( ضحكات ) : وقيلة كتعطي من راسي دايرين واحد الخلطة انا وعنبر بغينا نمشيو لحمام .. طلع وهي تابعاه من اللور ماحسات بيه تودة حتى دخل عندها
- عماد : صباح الخير لالة فاطنة
- تودة ( ستغربات ) : صباح الخير أولدي كيداير لاباس عليك ؟ مالين دار ؟
- عماد ( ݣلس ) : الحمد لله سمحيليا على هاد الدخلة ماعلمتكمش قبل
- تودة ( جامعة راسها بزيف حياتي ) : الله اودي مرحبا بيك فأي وقت .. ( وجهات كلامها للحياة ) رضي أتاي
- عماد ( حبسها بيدو ) : لالا .. ( شاف فتودة ) انا جيت اندوي معاك وغانمشي غارق خدمة حتى لراسي
- تودة : بصح أولدي الله يحسن العوان ويخرج سربيسك على خير .. دوي كنسمعك الله يسمعنا خير ..
- سلتات حياة من حداهم ودخلات على عنبر لي لقاتها لاصقة فالكادر ديال الباب طالقة ودنيها ..
- حياة ( الخلعة راكباها من ساسها لراسها ) : فيا واحد الخلعة تقولي غاندوز الإمتحان هادشي ماوقع ليا حتى نهار اندوز إمتحان الجهوي ديال تاسعة
- عنبر ( هزات فيها عينيها ) : فخبارك انا نخرج عينيا فجقلة دناس كاملين .. جيني حتى لماما تودة كتشدني تبوريشة من صبع الصغير ديال رجلي كرشي شدني فيها الوجع تقول أنولد
- حياة : علاش انت فين جربتي الحمالة والولادة اعنبر أقولي ليا ..ياربي ياربي تستر اويلي وكنحس بتبوريشة ركباني من ترم**ي
- عنبر ( طالقة ودنيها ) : علاش مكنسمعش مزيان شنو كيقولو ؟ كون اقربنا شوية
- حياة ( شادة فظهرها ) : باش تحصلنا تلوحنا انا وياك من السطح ماشي حتى من سرجم نجيو قراب شوية .. سمعات سميتها بصوت عصبي ( شافت فحياة قلبها غايسكت تقادات فالوقفة وقالت بصوت مرعود ) :
هانا جايا .. ( شافت فحياة واشرات بيديها بمعنى قفرتها حدرات حوايجها وتمات غادية للصالون رجل تديها خطوة للقدام ورجل ترجع خطوة للور حتى وقفات عليهم ) .. ملامح تودة لي كانت مغوبشة وكتخنزر فيها :
اش هادشي كيݣول اشمن زواج ولا طنز العكري ؟
- عنبر ( بإبتسامة إطمئنان كتشوفيها وتسبل فعينيها ) : راه ماشي زواج زواج اماما هانتي نفهمك ..
- تودة( بإنفعال ) : فهامني هو ودوا وݣال لي عدو .. واش انت تخوطرتي فداك العقل ولا مال حسك ؟
- عنبر : واش نخلي حقي يضيع هوكاك بلاما ندير والو .. واش سمعتي شنو وقع ليا وشنو دار معايا داك لجلافاج
- تودة ( شدات فجنابها ) : وسمعتي باه شكون وطاسياتو شكون هي ؟ ياكما يحسابلك سويعيد هدا ؟ ولا شي واحد على ݣدك وݣدو واش بغيتيهم يغبرو حسك ولا مالك
- عماد ( بصوتو الجوهري كيحاول يهدنها ويلطف الجو لي تكرهب ) : الالة تودة .. واش حنا غانكونو عارفين بلي عنبر غاتكون فالخطار ونخليوها ، واش انا أجيت وغانزوجها هي وخويا
- تودة : ماشي شغلي أنا ( بعصبية ) انا ماشي شغلي الله يرضي عليك ماتهلينيش نغلط معاك .. انا مغانلوحش بنتي فالعافية بيديا ونݣول الصهد منين جاني .. الا هي لا مغانعطيهاش بيدي لحفار قبرها
- عنبر ( ݣلسات جنبها ) : ماما فاطنة سمعيني الله يخلي لك ماعز عندك ( شافت فيها تودة ) انا راه والله مغانرتاح الى ماخديت حقي .. حسي بيا الله يرحم الوالدين راه اكنبان ليكم ضاحكة وناسية راه ربي عالم بلي فقلبي وباش كنحس .. كنعس كيبقى يدوز كولشي ݣدام عينيا لي دوزت مع داك السيد وصدق ضاحك عليا راه متسرطش ليا
- تودة ( شافت فيها كتحاول تستوعب كلامها واخا ماقداتش قلبها مامهنيهاش ومامطواعهاش ) :
أنا حاسة بيك واش كاينة شي ام ماتحس بنتها .. ولكن أبنيتي راه حتى وحدة ماتکد تفرط بكبدتها وتعطيها لحفارين قبرها .. واش ماسمعتيهش اش ساير يݣول على البنت لي لݣاوها مفصلينها لاواه لاواه طلبو مني لي بغيتو حتى لهادشي لا
- عماد ( قرب منها كيحاول معاها بالهداوة مباغيش شيحاجة لي تعرقل الخدمة ديالهم وداكشي لي ناويين عليه ) :
لالة فاطنة سمعيني .. تعرفي على دارنا بعدا خوتي الواليد جدودي وغاتعرفي بلي عنبر غاتكون فالأمان ، راه لي مسها يمسنا كاملين .. ماحدها مع خويا والله حد لا کد يقرب ليها ولا يحاديها
- تودة ( كتحرك راسها يمين وشمال) : راه بحال الى كتݣولو ليا عطيهم كبدتك يشويوها لك
- عنبر : ماما الله يرحم بيها الوالدين .. الى كنت عزيزة عليك بصح ديري ليا خاطري
- تودة ( شافت فيها بعينيها الكوحل المكحلين ) : كتحكي على الضبرة أعنبر كتحكي عليها بغيتيها تسيح
- عنبر ( عنقاتها ) : والله مغاتسيح امني بالله .. راه ربي الى بغا ليا شيحاجة راه غادي تكون .. راه نكون فدارنا وتوقع ليا راه ماتمشي غير فينما مشاك الله وختارها ليك الله
- تودة : ونعمة الوكيل ونعمة النصير
- عماد ( بصوتو الرجولي الخام ) : عنبر فعينينا كاملين .. عمر شيحاجة تقيسها ولا تاديها ولا ضرها بحالها بحال ماجدة كنعطيك كلمة ديال الرجال ونعطيك العهد ماتقيسها شيحاجة ، يعسفو عليا الى بغاو يقربو ليها ..
- تودة ( تنهدات تنهيدة طويلة مغمضة عينيها موركة عليهم ) :
لا حول ولا قوة إلا بالله العظيم
- عماد : فهاد السيمانة إن شاء الله غانجيو نخطبوها من عندك .. وديك الساع تجمع وريقاتها باش نديرو العقد
- تودة ( ماعجبهاش الحال دايرة الخاطر لبنتها وهي بلا خاطر ) :
بهاد الزربة ياك لاباس ؟
- عماد : مكاين لاش نتعطلو كلما سربينا حسن .. وكيف ݣلت ليك الالة فاطنة هادشي غير بيناتنا حنا .. حتى الى خالتها سولات على دري ݣولي ليها بلي خويا مات ليه المرة وخلات ليه الوليد عندو شهر
- تودة : على أخر يامي نولي سايرة نكذب ، وداركم ؟
- عماد : الواليد فخبارو .. ولكن العائلة لا جدودي وعمي والواليدة لا ومخاصهمش يعرفو ، من غير خوتي او ولد عمي فخبارهم حيت كانو لبارح معشيين معانا
- تودة ( هزهزات راسها ) : الله يصاوب .. وقف عماد مستأذن منهم مشا .. طلعات عنبر من بعدما سدات الباب وراه خرجات حياة واقفة بعيدة كتشوف بعينيها ..
- تودة ( هزات عينيها فيهم ) : درتو شواركم ولي ݣالها ليكم داك الصندوق المتقلين بيه .. هاعلاش مكنحملش نتفرج فدوك تواركة خرجو عليكم لا هونا لا دوك المسلسلات ديال مجبدين العينين ( الكوريين )
- عنبر : اش جاب شي لشي دابا ؟
- تودة : لا مجابش وليتي باغية تاخدي حقك بيدك .. وعاريتي وخرجو رجليك شواري .. ( تحل الباب التحت )
- عنبر : صافي اماما ( كتحاول تسكتها) ماشي دابا .. لي عطا الله عطاه دابا صافي ..( ضارت غادية للبيت تبعاتها حياة) جمعي الماعن دالحمام يلاه نلقاوه خاوي يعمر تاني نصدقو مدابزين على البلايص ..
• عــنــدو •
- فمطعم la sqala مطبع مغربي دو طابع مغربي جميل مختص فجميع الأكلات المغربية .. الديكور ديالو كان كيريح القلب بالزليج كتحس براسك ݣالس فشي رياض من الرياضات العتيقة المتواجدة بمدينة الرباط .. بلاصة الطوموبيل ديالو وخرج منها بسروال ديال الدجين فالكحل مبين عضلات فخاضو القوية .. مع ݣاط فنفس اللون تريكو طالع بالكول بنفس اللون وتجاكيط ديال الكوير مفتوحة مبين قوة عضلات دراعو وكتافو وظهرو .. نظارات شمسية مغطية عينيه واخدة من اللون السواد لي لابسو .. مشيتو المهيبة رامي تقلو على رجليه كيمشي بالميزان والعبار ثقالة وهالة كدور بجنابو بحال شي مغنطيس كتجدب ليه أنظار البعض من الناس لي عندهم حب الإستطلاع والفضول وخصوصا العنصر النسوي أكثرية ..
- وقف كيسكاني الناس لي ݣالسين حتى بانت ليه فأخر طبلة ݣالسة توجه نيشان لجيهتها .. شافتو وقفات بإبتسامة سلمات عليه من الحناك وݣلسات .. حيد تجاكيط علقها فالكرسي وݣلس مزور نظاظرو حطهم على جنب :
عطلت عليك ؟
- ماريا ( حركات راسها لي كان مغطي ببيرية فالبيج ) : لا لقيتيني يلاه ݣلست نيت .. صاڤا انت أمورك مزيانة ؟
- الروطال ( مربع يديه رجع بظهرو لور ناشر رجليه تحت الطبلة ) : الحمد لله .. لي عندو صحتو يحمد الله
- ماريا ( هزهزات راسها بإبتسامة لاعب عليها التوتر ) : بصح داكشي لي كاين ( قاطعهم السرباي لي وقف عليهم ) :
سلام مرحبا بيكم ( مد ليها هي كتيب راقي فيه قائمة بالمأكولات ديال مطعم ونفسو مدو للروطال ) .. هز ديك القائمة كيشوفيها هز راسو فيها من بعد مدة فيقها من سهوتها :
أش غاتاخدي ؟
- ماريا : أنا غاناخود طويجين بدجاج والفريت .. مع شلاضة وزعلوك
- الروطال ( هز حاجبو بإستغراب ) مزيان .. ( سد ديك القائمة شاف فسرباي لي جا عندو ) :
طاجين ديال الدجاج بالفريت مع صلاد ماغوكين .. وزعلوك .. وانا جيب ليا طاجين باللحم والبرقوق ، وجيب ليا معاه غير زعلوك ( شاف فماريا ) تشربي شيحاجة ؟
- ماريا ( بنفي ) : لا
- الروطال ( شافيه ) : صافي شكرا .. مشا السرباي من ورا ماخدا منهم الطلبات ديالهم .. فلحظة خيم الهدوء وسكات من طرفهم بزوج حتى هرسو هو بكلام ماتوقعاتوش يݣولو :
أول مرة تاخدي ماكلة بلدية العجب !!
- ماريا ( بإبتسامة كتلعب بظفارها الطوال المصبوغين بالبوردو ) :
عزيزة عليا الماكلة البلدية حيت انا بلدية .. أنا من الجديدة دكالية ماعنديش مع هادشي العصري قليل ..
- الروطال ( هزهز راسو حاك على جنب حاجبو ) : أول مرة تݣولي ليا انت من الجديدة
- ماريا : غير مجابتهاش الوقت وصافي ( هزات فيه عينيها ) شحال من حاجة مزال معافهاش عليا .. مايغركش اللباس والمظهر انا عروبية حتى النخاع ( ضحكات ) أنجيك فشكل ياك ؟
- الروطال ( ببرود محرك راسو بإستفهام ) : علاش غادي يجيني عجب .. نازلة من شي كوكب خور
- ماريا : لا ماشيش هكاك .. غير انت تبارك الله زعمة مكانتك الإجتماعية مقارنة بالبيئة لي جيت منها انا أتجيك فشكل ..
- الروطال ( تبسم بجنب محرك راسو بخيبة ) : هادشي لي خايب بين جوج .. واحد فيهم مكايعرف شي حاجة على لاخور أمݣدمين وغاديين بحال لي مݣطع بيه الحبل ، انت معارفاش حتى فين تزاديت ومنين جاي
- ماريا ( بإحراج ) : الصراحة عمر جا لبالي نسولك
- الروطال ( حدر راسو وطلعو مصغر عينيه فيها وفنظراتها ليه ) : كون كنتي كتحسي بالفضول غير شوية جيهتي كون سولتي
- ماريا ( كتحرك يديها بتوتر ) : مابغيتش نسول حيتاش خفت لامايعجبكش الحال
- الروطال ( تقاد فالݣلسة حركة دارها حسيها بلي باغي يدخل معاها فموضوع جدي ) : ماشي خفتي ( بنفي ) انت ماهمكش باش تسولي لي كيكون تطاپا عندنا هنا ( أشر لراسو ) كنبغيو نعرفو عليه الشادة والفادة انت هاد لاغولاسيو دخلتي ليها أجبهة
- ماريا ( تنفسات بصعوبة قلبها كيضرب ) : كيفاش جبهة ؟
- الروطال ( حرك يديه بلامبالاة ) : أحيت ماعندك مايدار حياتك العاطفية خاوية ، ݣلتي مع راسك اجي نجرب نشوف فين غاتديني هاد الطريݣ .. وحتى اليوم جايا على غرض واحد
- ماريا ( بلعات ريقها حسات بيه بحال الى عراها بكلامو .. بحال الى كيقرا أفكارها تصدمات فيه ماعرفات راسها باش تبلات تململات فبلاصتها بعدم راحة حركة لاحظها تم تم ) :
أشمن غرض افاروق يهديك الله ؟
- الروطال ( عوج عنقو عاطيها نظرة خالية من أي مشاعر كلها برود ) : باش نفاريو هادشي لي بيناتنا وكل واحد يقصد خروب بلادو
- ماريا ( هزات كاس ديال الما شربات منو وهو متبعها بالعين حافظ حركاتها وعلاش بدرو منها ) : ماشي ب
- الروطال ( مزال على نفس الوضعية قاطع الكلام لي اتخرج من فمها ) : أياه ألا ؟ .. ( بقات ساكتة .. عاود كلامو ) أيـــــاه ألا ؟
- ماريا ( تنفسات بصعوبة حسات براسها كيتمارس عليها ضغط من نوع اخر ) : أه بصح
- الروطال ( رجع بظهرو اللور بإبتسامة رجولية ) : كيعجبني لي يجيني فاص .. داك تلاوي ديال الحنوشة ماعنديش معاه
- ماريا ( كتحاول دافع على راسها ) : انا ماشي ضحكت عليك ولا تفليت عليك أفاروق قسما بالله ( حبسات الهضرة فاش صدرات منو قهقهة رجولية تسمعات فالقهوة خلات شحال من واحد ضار لجهتهم )
- الروطال ( دور لسانو وسط فمو ) : ضحكي عليا .. واش فخبارك كون شكيت اشوية بلي كتلعبي معايا حابة مغاتكونيش هنا ؟ مداروها معايا حتى الرجال بشلاغمهم ديريها معايا انت
- ماريا ( ولات باغية غير إيمتا تهرب منو ) : انا مكنتش مرتاحة كنحس براسي كنتصنع باش نرضيك وراسي هملتو منقدش نكون فشي علاقة وانا مضغوطة فيها
- الروطال : حطيت ليك السيف على رقبتك ؟ انت لي بغيتي حيت كون كنتي تايقة فراسك غير شوية مكتيش غاديريها .. انت لي بغيتي حصدتي لي زرعتيه
- ماريا ( حدرات راسها مابقا عندها ماتقول مزال .. هزات فيه راسها وتمتمات ) :
ياك الخدمة ..
- الروطال ( رجع قاطعها وهاد المرة عينيه تغلغلات فيهم مسحة من العصبية ) :
ماشي برهوش يلاه كيعرف العيالات باش نخلط الخدمة مع حياتي
- ماريا ( بلعات ريقها بتوتر حناكها حمارو بالحشمة ) :
سمحليا والله ماقصدت .. قاطعهم السرباي لي حط ليهم الغدا ستأذن منهم ومشا
- الروطال ( بجدية فصوتو بؤبؤ عينيه الشبيه للون العسل ماتزعزعش ) :
تغداي دابا وحسي بدغمة منين غادوز .. والله يعرضك السلامة هاد المرة عرفي شنو بغيتي ماتبقايش غير ترطاي .. طحتي فيا انا هاد النوبة جايا تلݣاي بشي ميكروب يندمك على نهار خرجتي فيه من غارك ..
- سلاو داك الغدا فجو مسالم بنسبة ليه هو وكلو توتر بنسبة ليها هي .. غير سلاو وقف بلاما يدوي معاها هز سوارت طوموبيلتو تجاكيط لبسها توجه نيشان لاكيس خلص مخلي الپوغڤواغ لسرباي وخرج .. وقف جنب طوموبيلتو هاز تيليفون ديالو دوز نمرة ديال عماد ، طلع لطوموبيل مديماري وكيدوي :
صافي مزيان .. أنا غاندوز عند الواليدة لدار
- عماد : وايلي غاتݣولها ليها دابا ؟ خلي حتى نكونو بجوج
- الروطال ( حاضي مع الطريق ) : مالي كنخون .. الزواج هذا امعلم ماشي اللعب يلاه سير حتى نعلمك بلي وقع ..
- عماد : غير بالخاطر افاروق وبشوية عليها عارف الواليدة دماغها كيداير ؟
- الروطال ( دور الڤولون ) : وسويرتي أنت وزهرك .. يا نعيط ليك وانا راجع بحالي ولا نعيط ليك من les urgences واحد فجوج ..
- فرحتها بيه كانت بدنيا ومافيها شداتو لغدا باش يتغدا معاها .. كانت موحشاه واخا كيزورها ولكن كانت كتمنى كون كان ساكن معاها .. الخدامة عمرات الطبلة وحطات فيها كاع لي يتشهاه الخاطر ..
- الروطال ( كيشوف فطبلة لي قبالتو عامرة ) : الواليدة راه يلاه تغديت الله يهديك .. شكون غياكل هادشي كامل ؟
- خديجة ( جرات الكرسي وݣلسات طالقة شعرها مكياج خفيف وأنيق .. سروال ديال لولان فالبيج مع تريكو فنفس اللون ، ياعة أنيقة فيدها وسلسلة ذهبية فيها سميتها نازلة من عنقها ) :
ماكلة الدار هي ماكلت لي غيستو أولدي كول كول .. شوف وجهك كيف ضعاف كيبان لي ديك وفاء مابقاتش كدير خدمتها
- الروطال ( هز فيها عينيه محرك راسو رجع عينيه على طبسيل لي قدامو كينقب فيه داير ليها الخاطر باش ماتقلق ) :
الواليدة وفاء انا لي كنݣوليها شنو بغيت ناكل ماشي هي لي كتفرض عليا
- خديجة ( شافت فيه بإبتسامة ) : أممم كدير لخاطر حتى للخدامات وكدافع عليهم ..( سكتات هازة راسها مراقباه ) دويتي مع باك ؟
- الروطال ( كان حاس بيها غادي تجبد الموضوع ديال باه ) : وي كندويو
- خديجة ( ببرود ) : على أخر يامو باغي يطلق .. هزاتو النفس على خوه وبنات خوه .. مفضلهم على مرتو ام ولادو
- الروطال ( خرج نفس طويل وشافيها ) : زعمة بان ليك عادي تعايريهم وتشدي فيهم النميمة ومايݣول والو .. راه كلنا ماعجبناش الحال الواليدة وحشومة ماعتبتيش راسك زعمة على هادشي ؟
- خديجة ( شافت فيه مصغرة عينيها ) : حتى انتوما تبعتوه .. ومالي كذبت ماقلتش شيحاجة جايباها من برا واش ولادي أنا هوما بنات عبد الخالق ( تبسمات ) زوينة هادي لي يقول الحق كيتسمى خايب
- الروطال ( غمض عينيه مورك عليهم بنسبة ليه الوالدين مقدسين ومايقدش يغلط فيهم .. ولكن أعدى حاجة عندو هي الإنسان يكون ظالم ، هز راسو فيها ) :
حتى ولد راه مزوج ومطلق وعندو ولد .. وبنات اليوم كيخافو من الرجال المطلقين الواليدة ، لي دارو من جاج مايرميش الناس بالحجر
- خديجة : خلاص عليا أفاروق .. ولدي كيبقى راجل وإلى بغدا من غدا نزوجو بأحسن بنت خاص غير يحط صبعو ويأشر .. كتموتو على عائلة باكم الله يستر كون تشوفو العائلات ديال صح يمكن تباتو بلا نعاس
- الروطال ( مسح فمو .. حاس بدمو كيفور عينيه تغطاو بمسحة من الغضب عض باطن فكو مبرد فيه الحر باش مايغلطش ويݣول شيحاجة لي ممكن يندم عليها شافيها ببرود وإبتسامة مجردة من اي إحساس ) :
سمعي الواليدة هادوك عائلتنا ونتلاحو على ودهم فالعافية .. انا غرباوي وكيجري فيا دم ديال ديك العائلة لي انت مكتحمليهاش علاش الله واعلم واخا عائلتك انت عمرنا شفناهم ولا وݣفو معانا فشي حريرة .. هادوك البنات لي كطعني فيهم راه عندك بنت وقيلة حيت كيبان ليا أنا نسيتي
- خديجة ( خنزرات فيه ) : كطعن فختك ولا شنو ؟
- الروطال ( بإنفعال ) : هاديك ختي نعطي عليها دمي ولي ݣال عليها كلمة وحدة نحيدو من جدر .. وكيما هي ختي حتى هادوك خواتاتي ، الواليدة نعلي شيطان وفيقي قبل لا تغرقي الواليد صافي راه خوا راه هاد الفعايل اتخسري حتى ولادك كيما خسرتيه هو رجوع لله هذا راه طغيان حال عينيه وزايدون انا مجايش على هادشي
- خديجة ( بلعات ريقها ماعجبهاش الحال كلها كترعد بحال شي وحدة مريضة نفسيا ) : وعلاش ؟
- الروطال ( نقص من إنفعالو ) : جيت على ود نشوفك ونݣولك بلي إلى كمل الله غانتزوج
- خديجة ( تفاجأت ) : غاتزوج صافي ختاريتي البنت وفضيتي ؟
- الروطال ( دوز يدو على لحيتو ) : دابا مافهمتش انا بحال الى ماعجبكش الحال ؟
- خديجة ( كتحرك ففمها ) : كنت نقول ولدي الكبير يخليني انا نختار ليه ، انا لي أنعرف لي تواتيه
- الروطال ( عݣد غوباشتو ) : الواليدة عندي 37 عام وقيلة مماشي ولد 18 عام لي تختاري ليه المرا وتجيبيها ليه .. انت نهار تزوجتي بالواليد حد مابزز عليك ولالا
- خديجة ( قلبات عينيها بهمس ) : كون ادرت بكلامهم وماديتوش
- الروطال ( سمعها ولا كيحس براسو كالس على شوك وقرب ينفاجر ) : وهانتي غاتهناي منو .. وغايطلقك وترتاحي مع راسك اش بغيتي .. انا لي عليا جيت نديرو معاك باش تمشي تخطبي معايا
- خديجة ( جمعات يديها مربعاهم ) : شكون هادي بعدا لي ناوي تخطبها ؟
- الروطال ( كيشوف ليها فعينيها ) : عنبر
- خديجة ( حركات راسها ) : وشكون هاد عنبر ؟
- الروطال ( رجع بظهرو اللور ) : عنبر البنت لي غنات فعرس ياسمين ..
- خديجة حسات بالبرودة طالعة ليها من رجليها خرجات فيه عينيها وبإنفعال صدر صوتها عالي من حلقها :
أويــلـــــي الشيخة ؟
- الروطال ( كيحاول يبقى محافظ على التبات ديالو ) : البنات لي معاها لي شيخات الواليدة .. هي غير كتغني ماشي شيخة
- خديجة ( كتغوت ) : وكتشرح ليا اويلي واش ياغيين تسيفطوني للروضة قبل الوقت .. على أخر يامك تاخدها شيخة الملقطة كون عندها الوالدين كاعما يخليوها تغني
- الروطال ( بصرامة كيحرك راسو بعصبية مدوز لسانو على شفايفو ) :
غاندير راسي ماسمعتكش وماخرجتيش هاد الهضرة على فمك .. حيت ديك بنت الناس غاتكون مرتي ومت ولادي لي غايكونو حفايدك إن شاء الله
- خديجة ( كلها كترعد ) : والله لا كانت والله لا كانت افاروق والله مانقبلها .. واش بغيتو تخرجو ليا عقلي واش هبلتو عائلة باكم غاتخرج عليكم اعباد الله لي دارتو بنت عمك بغيتي دير كثر منو
- الروطال : البغو الواليدة .. من نهار شفتها مكنشوفش النعاس بغو من اول شوفة
- خديجة ( جاتها البكية ) : هادي اتكون لاحت عليك شيحاجة ولا سحرات ليك
- الروطال ( مربع يديه مبرد للأقصى درجة ) : ياك انت مكتأمنيش بهاد التخربيق .. البنت ظريفة الله يعمريها الدار ، صبارة دازو عليها مشاكل مع راجلها لول طلقات منو وهي حاملة مسكينة
- خديجة ( خرجو عينيها صافي كتحس بنواضر ديال راسها كيزدحو ) : اويلي اويلي اويلي على مطلقة اويلي اعباد الله كنت نتعنا بولادي حتى ولادي ايرجعوني شفاية لناس والعدو .. واش تخورجتي فعقلك ولا مالك واش تلحس ليك المخ اعباد الله
- الروطال : بالعكس الحمد لله كنفكر مزيان بيخير وعلى خير ..
- خديجة : فاروق واش كتفلا عليا الضحك الباسل ماعنديش معاه
- الروطال : انا مكنتفلاش .. الزواج مافيهش التفلية هادشي لي عطا الله
- خديجة : والله لا كانت ليك اولدي أ والله لا ديتيها واخا نموت
- الروطال ( بنفس البرود لي مكتاسح ملامح وجهو ) : مي على العين وراس ولكن هادشي مكايعنيش تحكمي فيا ، راه عمرك ماتحكمتي فيا وقيلة لي بغيتها كتكون انا راه ماشي عصام .. انا راه جيت انعلمك باش تمشي معايا
- خديجة ( كتغوت ) : وا والله لا مشيت واخا نموت لا ضربت فيها العتبة ولا خطبت ليك .. ولا حضرت ليك بغيتي تزوج الشياطة درجال سير تزوج بيها انا بعدا متعرفنيش عمرك تشوف كمارتي مزال دير لي عجبك
- الروطال ( وقف ) : ماݣلتي عيب .. حتى انا جيت نديرلي عليا ونعلمك .. بغيتي تجي وتحضري مرحبا وألف مرحبا مابغيتيش انت تعرفي ، ديك بنت الناس هي لي غادي ندي ارضاي بلي كاين الواليدة .. ( تخطا الطبلة تحنا على راسها باسو وخرج ) ..
- بقات كالسة راسها كلو كيترعد كتشوف غير ضبابة قدامها جفونها مكايتحركوش .. البؤبؤ دعينيها واقف يديها كيترعد عليها ، وقفات بهستيرية جارة الناپ ديال الطبلة بماكلتو بماعنو كتغوت لربي لي خلقها تهز فطباسل وتشير بيهم وتهرس ، جات الخدامة كتجري شافت داك المنظر تخلعات ماعرفات تقرب منها ولا تبقى واقفة خافت منها رجعات للكوزينة كتجري هزات التيليفون سونات للماجدة :
- الو ختي ماجدة ، خاصك اختي تجي دابا لدار لالة خديجة قلبات الدار سفاها على علاها .. صافي واخا واخا اختي ..
__________________
- لابسة تحتية مع سروال فالبيض قصير واسع مطروز من الرجلين مسرحة رجليها وݣلسة فالأرض .. حداها البوطة الصغيرة فوقها مقلة تقيلة وميكة عامرة بالكواغط عامرين .. هزات شوية دزنجلان سخناتو وحطاتو فطبسيل كبير على جنب ، وكيما سخناتو سخنات شوية ديال الخزامة حتى هي وشوية ديال الحرمل كل واحد فيهم دارتو فقنت ديال الطبسيل ..
- تودة : جيهان بنيتي الله يرضي علك قربي ليا ديك رويضة لهنا ( لارونج) .. ناضت جيهان جراتها لحداها خشات فيها البريز حيدات ليها الغطا وبدات كطحن فالعشوب لي ماسخناتهمش .. طحنات السانوج شوية وحطاتو فطبسيل .. زادت عليه الخزامة لي سخنات طحناتها وزادتها الزنجلان حتى هو طحناتو زريعة البصلة طحناتها حتى هي زادت منها الحرمل حتى هو طحناتو اليازير حتى هو طحناتو .. خدات قرعة دزاج كبيرة كبات فيها الزيت البلدية حرة وزادت عليها كاع المكونات لي طحنات ، زادت عليهم قشور البصلة وتومة مقطعة طراف وحبيبات ديال الحلبة حتى هوما خلطاتهم مزيان فالقرعة ودارتهم فحمام مريم ..
- رشيدة : اتزيدي عليهم القطران الرقيق ؟
- تودة ( وقفات كتجمع فداكشي ) : إيه بلاتي تسخن وتطلق عاد نزيد شوي .. مغانكترش داك القطران تبارك الله حار وزين
- رشيدة : عدمن خديتيه ؟
- تودة : داك العطار نيت واحد البجعدية كتسيفطو ليه حر زين .. سخنات الزيت وزاد عليها راس معلقة صغيرة من القطران الرقيق شدات ديك القرعة ولواتها فتريكو كحل ودارتها تحت البوطاجي فالكوزينة مغطية من الضو باش تخمر وتطلق .. تحل الباب ودخلات عنبر هي وحياة بجلالبهم هازين سطولة دالحمام طالعين كيلهتو حناكم حمرين ..
- رشيدة : بصحة وراحة كي لݣيتو الحمام ؟
- عنبر ( هزات كاس دالما شرباتو عاد قدات تجاوب ) : هو زوين ولكن عامر ( شافت فحياة ) هاد البوحاطية شوية ماتدابز
- حياة ( شافت فيها ) : هي لي جبداتني الفشوش الخاوي دوالو .. بغات تغسل بوحدها تمشي للحمام تركي لاش جايا للبلدي حݣا والواد قستيني بالما فيه ريحة القطران طررر
- عنبر : متجاوبيهاش عطيها النخال مكتعرفيش ؟
- حياة : لا اختاي انا مكنعرفش نعطي النخال ومكنعرفش نسد درقوشي ، مكنجبد حتى واحد كالسة ترطى عليا وتشوفينا بنص عين ياك اودي شيباس مكاين ..
- رشيدة ( كتشوفيها بنص عين ) : هاد المجنونة راه هوك دايرة .. لسانها فيه ميترو مبري منها
- تودة : تاعداك أبنيتي هكا بغات الوقت .. كوني ݣوطة وعودة يضربو ليك الف حساب وعداك يغروك ولاد الحرام أودني منك كوني فحلة
- حياة : كوني هانية اخالتي والله لا دارها بيا شي حد كنت بهلولة دابا لا سندور جديد
- تودة ( شافت فيها وتنهدت ) : نصحك بحالك بحال عنبر .. عداك تخلي شي ولد الحرام يديرها بك أنا نݣولك ولا ديرها بيك شي بنت لمرا الدنيا راه فيها الصالح وطالح متعرفي معامن تلاݣاي
- رشيدة : عدها الصح المدينة راه فتنة بماليها يمشي يضحك عليك شي حد .. حنا يماتنا راه الراجل كاي يحفي صبابطو كاملين عليها يتبعها بليل وبنهار والله لا شد عدها كلمة وحدة كيشحف ويسهر الليالي .. والله لا خدا من عدها كلمة كايشوف ماليه ماليه كيقصد دارهم بحال دروك الخفة لي ولات فبنات اليوم بحال طيكوك الله يستر
- حياة : دابا من الحمام ولينا فرحال أش وصلنا لهاد الماصل ݣاع اويلي ستغفرت الله العظيم
- رشيدة : وغير جابتها الهضرة وصافي ( شافت فعنبر ) ياك كوت نݣوليك ربي كبير وغايجيب ليك ولد الناس وها رزقك جا لعدك ابنيتي
- عنبر ( بلعات ريقها عرفات تودة ݣالتها ليها ) : داكشي لي كاين اخالتي .. لهلا يحاشمنا ياربي ( كدور فعينيها ) فين هي خالتي سميرة ؟
- تودة : مشات تبات عد رجاء سونات عليها طلباتها تبات عدها .. يونس مشا يشوف باه عيان شوية غايبات تم وخافت تبات بوحدها
- حياة ( كتشمشم ) : ريحة الحريرة
- رشيدة ( بإبتسامة ) : ݣلت غاتكونو توحشتو حريرتي
- عنبر ( بإبتسامة عريضة ) : وصراحة اخالتي توحشناها .. بنتها مزال ففمي ، ناضو البنات حيدو جلالب ديالهم عنبر نشرات الحوايج ديال الحمام ينشفو وصابون دارتو فالمكينة .. دخلات لبيتها دورات باتشا للشعرها جبداتو مزيان ودارت ليه الزيف ..
- رجعات للصالة تجبدات فوق السداري هزات تيليفونها مسيفطة ميساج للرشيد .. دايرة معاه غدا يتلاقاو كان خاصها ضروري تقوليه بلي غاتزوج مكانش عاجبها الحال أنو تكذب عليه ولكن ضروري دير لي قاليها عماد ..
__________________
- فالفيلا ديال عبد الخالق ، ݣالسة دنيا ويسرى مع جدودهم وباهم .. ݣالس إدريس حتى هو عماد والروطال
- دنيا ( ملامح الاستغراب ) : وصراحة انا وتصدمت .. ولكن نجيكم لصراحة ديك البنت حبيتها ودخلات ليا لقلبي أحسن مغادير اولد عمي
- علال ( بصوت تقيل ليه هيبة او وقار ) : لي هرب لزواج هرب لطاعة أولدي .. مكايهمش واش كتغني ولا متغنيش لي يهم هو تكون بنت الناس حيت غاتكون فراشك وغطاك ، هي لي اتولي تهرب ليها كل ليلة تحط راسك وتخوي عليها همك ، مطلقة ولا بولادها ولا بلاش المهم اولدي تلݣى معاها راحتك
- الروطال ( عقلو خدام ) : بقات فالواليدة سونات عليا ماجدة شخشخات الماعن كاملين ..
- رقية ( ميقات فيه ) : علاش مالها كانت باغة تزوجك بنت پوتين
- دنيا ( جاتها الضحكة ) : مي انت منين كتعرفي بوتين ؟
- رقية : باك يظل شادو فالاخبار ( شافت فروطال ) تاعداك اولدي ديك زينة وعجباتني خودها ديها فمك ، هاديك راها هبلت الله يستر
- علال ( شافيها ) : رقية يهديك الله
- رقية : مالني شنو ݣلت .. ماحشوماش عليها فاقصة ولادها ، دري باغي يتزوج فرحان خسرات عليه فرحتو طججات ولادها كاملين ، بتها مسيكينة ماحيلتهت لراسها ولا ليها والهبال هذا وخرجان لعقل
- عماد : غدا ندوز ندوي معاها
- أدريس ( حرك راسو بنفي ) : مغاتسنطش ليك واش ماكتعرفش ماماك .. لي فراسها فراسها واخا تنطابق السما على الارض كدير ألي ݣالو ليها راسها
- يسرى : مانمشيش انا ندوي معاها ؟
- الروطال : لا ( بشكل قاطع ) متدويش معاها انا لي عليا درتو والصلاة على النبي
- عبد الخالق ( بفضول ) : إيمتا اتمشيو تخطبوها ؟ ومن عندمن ؟
- الروطال ( شاف فعماد كان خاصو ضروري هو لي يدوي باش يبان بلي راه ديجا داوي معاها ) :
كاينة خالتها ولكن هي بغاتنا نخطبوها من السيدة لي مربياها فاطنة .. هي لي كانت معاها فالعرس نيت ديال ياسمين
- عبد الخالق ( بلع ريقو شاف فأدريس ) : مزيان وإيمتا ؟
- الروطال : الجمعة إن شاء الله نمشيو ورا العصر ..
- رقية : غاتمشيو كاملين ؟
- الروطال : ضروري
- يسرى : الله يكمل عليك بالخير ياربي ( بفرحة ) علم الله شكون غايسبق فينا انا ولا انت
- الروطال ( بإستفهام ) : علاش ؟
- دنيا : محسن دوا مع بابا وغايرجع هو وياها إن شاء الله .. جملة ساهلة ولكن كانت كفيلة باش تخلي ملامح عماد يتبدلو ، عينيه حمارو ويديه بردو عليه كايخس براسو الى بقا ݣالس ممكن تصدر منو شيحاجة خايبة وقف وشافيهم :
نخليكم دابا خدام بكري غدا تصبحو على خير .. عطاهم بظهر هاز سوارتو وتيليفون ديالو وخرج .
- الروطال بدورو تمنى لليسرى السعادة هز سوارت طوموبيل وخرج وقف عند طوموبيلتو ، جبد التيليفون ديالو مدوز نمرة ماجدة .. طلع للطوموبيلتو :
وي ماجدة .. أمضرا كيبقات الواليدة ؟
- ماجدة ( شادة على راسها ) : سادة عليها مابغات تدوي معايا راسي غاينفاجر أخويا والله ..
- الروطال ( خرج بطوموبيلتو من الڤيلا شاد الطريق لدارو ) :
خليها على خاطرها تعشيتي انت ؟
- ماجدة : لا الوقت فين هو .. خلاتني ماما بلا عقل
- الروطال ( عينيه مع الطريق ) : دخلب لبيتك ، انا غانكوموندي ليك بيتزا فغوي دميغ ياك ؟
- ماجدة ( بإبتسامة ) : اه الله يخليك ليا
- الروطال ( حك حاجبو كيشوف على ليمن ديالو باش يدور ) :
دخلي للواتساب وسيفطي ليا نمرة عنبر نسيت ماشديتها
- ماجدة ( تبسمات إبتسامة بريئة ) : وعلاش ماشديتيهاش عندها وزعمة راه اتولي المدام
- الروطال ( بصرامة ) : مــاجـــدة
- ماجدة ( كضحك ) : وغير ضحكت معاك .. صافي واخا انا انسيفطها ليك دابا .. واخا يلاه تصبح على خير ..
__________________
- سونا ليها التيليفون حلات عين وحدة شافت فالساعة لقاتها 8:30 صوت الشتا كيتسمع والجو صبح بارد مݣلاصي .. كانت عوالة تفيق بكري ولكن حسات بعظامها مسخسخين عليها .. دخلات للواتساب بزربة كاتبة ليه :
" صباح الخير رشيد خلينا نتلاقاو مع 5 صبحت مافيا العظم الصحيح لي يتحرك " .. وراها طفات التيليفون وجبدات عليها المانطة تكلكمات فيها خاضياها تحت رجليها دغية رجعات نعسات ..
- على برا فالمراح فاقت تودة ورشيدة وجدو الفطور حطوه .. حياة فاقت بكري لبسات المونطو ديالها والبوتيو وطاݣية ، هزات ساكها وخرجات لعندهم
- رشيدة ( طلعاتها ونزلاتها ) : فين غادية ؟
- حياة : راه اليوم خاصني نمشي نصور الاشهار لي ݣتليكم عليه نسيتو ؟
- تودة ( كتحط فطبسيل دالمسمن ) : عنبر مغاداش معاك ؟
- حياة : لا ( اشرات براسها ) دخلا عندها بغيت نفيقها كانت دايرة مع رشيد فصباح دوز عدو لستوديو .. قالت ليا بلي خلاتها حتى ل 5 الحمام دݣدݣها ..
- تودة ( ݣلسات ) : خليها ترتاح .. وݣلسي تفطري
- حياة ( بنفي ) : لا أخالتي حتى ندوز لشي محلبة نفطر .. مخاصنيش نتعطل سونيت لعزيز ايجي يديني
- رشيدة ( كتوصي فيها) : وعداك حضي جنابك بلاما نقرصك
- حياة : كوني هانية عزيز ايديني ويجيبني أكوني هانية هاني مشيت .. تبعوها تودة ورشيدة بدعوات ديالهم حتى سمعو الباب تسد ..
- مــديـريـة الأمــن 📍 .. بلاصة الطوموبيل ديالو ، خرج منها هاز فيدو واحد الملف ، لابس سروال ديال الدجين كحل سامبل مع صباط طالع فالكحل وتريكو كولمونطي فنفس اللون واسع شوية ، سد الباب وحدر راسو طالع كيجري مع الدروج ..
- دخل للبيرو ديالو ݣلس فاتح البيسي ديالو .. تدق الباب وتحل داخل يوسف ساد الباب وراه
- عماد ( حك شفرو ) : كنتي عاس عليا ؟
- يوسف ( بإبتسامة ) : ضروري جبت ليك شي خبيرات من قاع الخابية ..
- عماد (صباعو حبسو ضار شافيه غامزو) :
أش تم ؟
- يوسف : الكانيش كاين فكولومبيا ..
- عماد ( عݣد غوباشتو ) : اش عندو تم ؟
- يوسف : وشنو غايكون تم ( دار رجل على رجل ) باش معروفة كولومبيا والمكسيك و غينيا بيساو غير بالحشيش والبيضة مونامور
- عماد ( حك لحيتو ) : هادشي حنا عارفينو .. ولكن هو اش غادي يدير تم وهو مرعود أدمن هضرة البنت باينة فيه منونخ .. من داك النوع لي النفخة على الخوى
- يوسف : وراه هاد النوع هو لي منو الكاينة ، مكايشك فيه حد يمشي ويجي هانية بلا حسيب ولا رقيب ..واش انت تيقايه كيبيع ويشري فالبالي
- عماد ( تدق الباب دخل منو راجل فالاربعينات حط ليه قهوة كحلة وخرج ) :
لالا متݣولش ليا ( رشف من قهوتو ) واخا باه بوبريص .. ولكن هو ماشي من هاد النوع انا عارف شنو كنݣول
- يوسف : شوف شتي كاع دوك ريوس الحربة ديال الكوكا مونامور كيبداوها هك .. ومنهم عداد بابلو إسكوبار وميغيل انخيل ومانويل نورييغا وزيد وزيد .. عقلتي على الضون ديال مولاي رشيد ؟
- عماد ( رجع بظهرو اللور يد على يد الكرسي ويد كيلعب بيها بواحد الستيلو ) :
ولد الهم خرجها منا عمرو يتسنى ليا
- يوسف : ياك كان فالݣنازة ديال السيد وكيبكي عشرة لضس ويݣوليهم هذا لي ق**تل نعرفو نحيه .. وصدق هو مولاها هو ومرتو
- عماد : كونما القفطان لي لبسات مرتو فالعرس ديال الجيران مايتشدش .. خدمها حمار داخل لدار السيد شافر وسارق حوايج مرت السيد عاطيهم لمرتو ..
- يوسف : والناس تصدمو ، كولشي كان يشكر فيه ݣالك ماينوض دجاجة على بيضها .. وفالاخر إبليس فصفة إنسان
- عماد : انا مغانݣولكش ولد رحمون مافخبارو مايتعاود ومحاطش يدو .. ولكن ماشي 100 فالمية
- يوسف : متݣولش ليا غادي لكولومبيا سياحة وهي مافيها مايدار أعماد .. الى باغي يمشي يدور عطا الله البلايص هادي منخليهاش لك أصاحبي
- عماد : انا دابا مغانݣول والو ( بجدية ) جيبليا الفيكس ابا يوسف باش تݣوليا مشا لهنا ورجع من هنا هاد الهضرة ازايدة ماعندها باش تفيد ، المفيد دابا هو الجيران
- يوسف ( بإستفهام ) : جيران من ؟ واش جيران ديال عائلات البنات ؟
- عماد ( بصوتو الرجولي مصغر عينيه مركز مع يوسف بكل كلمة كيخرج من فمو ) :
لي مادرناش هو ناس الحومة ، غاتمشي غير انت متديش معاك دراري ولا ربيع .. سول ليا مول الحانوت وجيران الناس دالحومة اونجينيغال واش مشافوش شيحاجة فسيكتور ماهياش شي حد براني على تم كان كيجي ويمشي شاك فواحد البلان فراسي وخاصني نتأكد
- يوسف ( وقف ) : دابا نيت
- عماد : الرضا وشحال كتعجبني فاش كتكون عالقرص .. يوسف عطاه التحية وخرج .
_____________________
- فدار من الديور المتواجدة بالبير الجديد .. مجموعين العائلة على الضحك واللعب يلاه سلاو قصرية ديال الرفيسة .. ختموها بديسير والملاغة كيفما مالفين .. ناض واحد منهم رجل فالاربعينات من عمرو لابس جلابة فالبيج وداير رزة فالأورونج بارد الجلابة من تحتها قميجة فالبيض سروال ديال التوب مع سباط .. خاتم كبير فصبعو وساعة هز سوارت الطوموبيل ديالو عطاهم السلام مودعهم وخرج ركب فطوموبيلتو من نوع داسيا كبيرة فالكحل ديمارا وشد الطريق لي كتدي لكازا ..
- حبس حدا واحد مول سيكوك .. الجو كان مغيم ونقيطات خفاف ديال الشتا .. نزل وتوجه لعند مول سيكوك لي كان كيبيع حتى اللبن ورايب الحليب وزبدة البلدية :
- السلام عليكم شحال هاد الزبدة ؟
- السيد : 100 درهم للكيلو .. راه المليح أسيدي
- ( خشا يدو فجيبو جبد بزطامو ) : واخا عطيني كيلو وعطينو 2 إطرو ديال اللبن .. عبر ليه الزبدة مد ليه اللبن ، خلصو ورض عليه الصرف حط داكشي فالكوفر ديال طوموبيل .. رجع خدا عندو البلبولة خلصو فيها وطلع لطوموبيلتو .. ديمارا يلاه ايتحرك حتى فرانة بجهد غوبش محيد السمكة ونازل كيعرعر :
واش تي عورة واش مريضة ولا مالك .. قبالتو كانت بنت تكون فالعشرينات من عمرها لابسة قفطان ديال جوهرة كولو موسخ .. حالتو من التحت كان مقطع يديها موسخين وشعرها موسخ فيها جرحة فجبهتها باينة قديمة ، ساهية ومكدويش
- جا مول سيكوك لعندهم كيقلب فيها .. مخلوع :
وياه هاد البنت أش خرجك فهاد الوقت
- شكون هادي واش كتعرفها ؟ واش هبيلة خارجة ݣدام طوموبيل باغية تموت ؟
- عقلها مامعاهاش مسيكينة .. داكشي باش راه مكدويش ابوهالية وغادية (كانت فعينيها نظرة حزن عميق غير كترمش وساهية)
- واش كتعرفها ؟
- أش غانݣولك .. مكنعرفهاش احتى لݣيناها واحد النيبة دور هنا شحال هادي ، كانت مضروبة راسها .. ايوا كل خطرة وفين تبات وكيعطيوها الناس ديال دوار لي قسم الله .. كدخلها واحد المرة دوش ليها وترجع تكركب فالغيوس وتهرب تبات حدا واحد البير
- ( هزهز راسو ) : الله يشافيها ماوقع باس .. طلع فطوموبيلتو ديمارا ومشا .. مول سيكوك جرها ݣلسها على واحد الكرسي حدا الكروصة ، هز زلافة دار فيها البلبولة واللبن رشة الملح خلطهم ومدهم ليها :
هاكي كولي .. وماتبقايش دوري فشانطي تجمعها معاك شي طوموبيل يا هاد البنت الله يهديك .. هزات المعلقة كتاكل غير بشوية وساهية فنقطة فارغة .
يتبع...
التعليقات
لا توجد تعليقات بعد، كن أول من يعلق.