محتوى القصة
- تالفة خايفة معارفة فين تعطي الراس .. طاحت عليها الخبار بحال الرعدة ، خلاتها تدخل لبيتها جبدات جوج بالز ديالها حطات فيهم حوايجها كاملين لاكارط ديالها والباسبور دهبها كتجمع كولشي بزربة .. خرجات للصالون هزات تيليفونها كتسوني على خوها والو تعصبات سونات للفرح او والو اخر أمل كان ليها هو تسوني ليه مدة وتحل الخط ..
خديجة : ألو عبد الحق .. الحمد لله ( كتحاول تبرد راسها ) فين كاين ؟ ( كتهزهز براسها ) اه اه فكرت غانمشي معاك .. صافي نلحق عليك لطنجة ولكن حسن كون مشينا هاد الليلة ولا صباح مابقيتش بغيت نبقى هنا .. لا لا مكاين والو صافي يلاه واخا ( قطعات ) ، تحركات من تم راجعة للبيت سدات شوانط دارت ساكها على كتفها .. طفات المݣانة ديال الضو دورات عينيها على الدار مكان حتى حاجة وفتحات الباب هزات راسها هزة وحدة فعماد لي كان كيشوفيها ببرود ..
عماد ( هز فيها الشوفة من رجليها لراسها لشوانط لي حداها تبسم بإستهزاء وبعتاب ) مسافرة الواليدة ؟ فين صادة ؟
خديجة ( بلعات ريقها بملامح باردة ) وأنت مالك شغلك نمشي فينما بغيت .. يلاه بانت ليك مك مامسالياش ليك حيد من قدامي ..
عماد ( حك حاجبو بارم شفايفو ) سبحان الله العظيم مكتخليش للواحد فين يحن فيك .. وغير مزايدة فيه دابا انا مابغيتش نصدمك ونݣوليك متݣديش تسافري ..
خديجة : وعلاش بسلامة ؟
عماد : فخبارك فرح تشدات .. شديناها لبارح فواحد الفيلا مشبوهة ( تبدل اللون فوجه خديجة بلعات ريقها بخوف ) وعرفتي شحال من واحد شدينا معاها الغراق ، وماشي غير هي وتشد واحد خونا الى كتسمعي بيه سميتو براهيم رحمون وطحنا على واحد الكلي فيها كاع المصايب لي كايدير وفيه حتى سميات ديال الناس لي مخدم معاه ..
خديجة يديها فشلو عليها رجليها مابقاوش هازينها تراجعات بخطوات اللور شادها الكرسي لي طاحت ݣالسة عليه .. دخل عماد وسد الباب واقف قبالتها كيشوفيها ، كيشوف فملامحها لي تبدلو فلحظة عيتينا لي مقاداش تزݣيهم فيه .. دور لسانو وسط فمو جار كرسي وݣلس مقابل معاها كيشوفيها لحظات وهو ساكت عاد نطق ..
عماد : علاش ( هزات فيه عينيها ) شنو كان خاصك .. شنو كان خاصك حتى بعتي راسك لناس قاطعين يديهم من رحمة سيدي ربي ماݣلتي شي نهار تحصلي ؟ ماݣلتي ولدي فالبوليس شي نهار يسيق ليا الخبار ونتشوه ماݣلتيش بأشمن وجه انشوف فولادي أممم .. دوي كنسمعك ( مجاوباتوش كتشوف فنقطة فراغ ) كتكمي ودوزناها ( شافت فيه ) خارجة مع راجل براني من ريسطو ودوزناها وسكتنا ( بدا كيضحك ) انا كنقلب على الشوك وضرك حدايا وانا مسايق الخبار ..
خديجة ( بلعات ريقها ) الفلوس حتى انا كنت بغيت نلبس ليمارك ونسافر فينما بغيت .. ونتبرع كيفما بغيت
عماد : علاش شنو كان خاصك ؟ أممم شنو كان خاصك با مكانش كيخسر ليك الخاطر لي بغيتيها كتحضر .. خويا لي ماشي من دمك كون طلبي نجوم كانو يحضرو ليك كان داير ليك شهرية خاصك أدوي ..
خديجة : مكافينيش ومقادنيش الناس طالعين لسما هاي كلاص فين عايشين وشنو كيلبسو ، فين يبان ديك الڤيلا لي عندك باك ( تبسمات بإستهزاء ) الناس فين واصلين وانتوما كتشوفو غير فجنابكم الواحد خاصو يقصح قلبو تحلو ليا العينين نهار تحولنا من ديك الدار عاد عرفت الدنيا ..
عماد ( جهلاتو ) توصلي على ظهور بنات الناس تبيعي وتشري فبنات الناس ( بإنفعال كيغوت ) تبغي لي يضحك على بنتك انتي ؟ لالا انتي موحال واش إنسانة انتي وحش انت غول انتي الكبدة ماتكسابيهاش .. مابقاوش فيك دوك الناس لي ضاعو فبناتهم اممم مالقاو حتى الكسدة ديالهم لي يدفنوها ويبقاو يترحمو عليها ويزوروها .. مابقاوش فيك دوك دراري لي مابقاو عارفين راسهم رجال ولا عيالات مابقاوش فيك البنات لي تاقو فيكم على ود غاديين يخدمو حتى لقاو راسهم غارقين فالفساد .. واش انت بنادم نيت ولا اكنتخايل ..
خديجة ( خنزرات فيه ) كدوي مع مك واقيلة ؟
عماد ( قهقه برجولة ) انا يتيم أنا مي ماتت نهار كنت باقي صغير وكانت كتشجعني ندخل للبوليس ، وكنت ترجع من المدرسة وكنلقاها دايرة طاجين وكنتجمعو عليه واخا كانت قاصحة ولكن كانت نقية ، ماشي ديك لي تبدلات فاش دخلوها الفلوس أنا ميمتي ماتت فداك الوقت ودفنتها هنا ( أشر لقلبو ) وهنا ( أشر لراسو ) الله يرحمها أما انتي مكنعرفكش ݣاع ( تنهد مدوز يدو فشعرو مقابل معاها ) يلاه معايا
خديجة : لفين ؟ ( بخوف )
عماد ( تنهد ) حمدي الله لي طلبت باش انا نجيبك .. أما كانو هوما لي غايدقو عليك يلاه
خديجة ( بترجي وقفات شدات فيه ) عفاك أولدي واش تبغي ميمتك تدخل للحباسات على أخر يامها .. ياك اولدي انت فالبوليس وعندك كلمتك عاوني أولدي الله يرضي عليك واش باغي تولي مسخوط ميمتك ..
عماد ( كيشوفيها ببرود ساكت عاد نطق بكل برود بصوت بحال فحيح الأفعى ) ݣلت ليك مي دفنتها فاش كنا ساكنين فعين السبع .. أما هاد السيدة لي ݣدامي مكنعرفهاش ..
- خرجات معاه من باب العمارة حادرة راسها شادها من دراعها .. دخلها لطوموبيل دار ليها السمطة وسد عليها ، طلع من الجهة لوخرا ديمارا وشد الطريق .. الطريق كاملة مدواتش معاه ومادواش معاها حتى وصلو للكوميسارية ، بلاصة الطوموبيل ونزل منزلها دخلو نيشان داها لواحد البيت لي كان خاص كيستجوبو فيه أي واحد .. خلاها تم وتوجه للعند يوسف ..
عماد ( حل عليه الباب ) رحمون دوا ولالا ؟
يوسف : مابغاش يدوي طالب غير المحامي ديالو حلف لا ݣر بشيحاجة
عماد : مجاش ولدو ؟
يوسف : ماشت حتى واحد من قبيلتو .. حتى مرتو عاطياها غير البكا ونواح ( هزهز راسو وأشر ليه براسو )
عماد : سير جيبو هو ومرتو وفرح ب 3 ( بلع ريقو ونطق ) الكيدار ديال خو ( بغا يݣول الواليدة ) مدام خديجة جبتوه ؟
يوسف ( مابغاش يجبد معاه الموضوع واخا كان مصدوم فاش ساق الخبار بلي ام عماد حتى هي داخلة فهاد الروينة وخالو ختار يسكت تحت أمر العميد ) جبناه هداك عتارف عليهم كاملين صدق غير هويع منونخ .. ݣال بلي كاملين خدامين لصالح كبيرهم معارفش سميتو وعمرو شافو من غير صوتو لي كان كيسمع .. الوحيد لي شايفو هو رحمون
عماد ( هزهز راسو ) واخا تبعني ( خلا باب البيرو محلول وتوجه لبيروه حيد التجاكيط ديالو بارم كمايم قميجتو جاغم من القهوة لي كانت محطوطة فوق البيرو ديالو . . تنهد تنهيدة طويلة ضاغط على مؤخرة راسو وعنقو مسح على عينيه وخرج من البيرو ..
× ڤيلا إدريس حيدر ×
كالسين كاملين من طرف .. سعاد رقية علال عبد الخالق ، ماجدة وعصام وإدريس دنيا ويسرا .. طارق والروطال كولشي ساكت عصام ملامح الصدمة باينين على وجهو ماجدة غير ساهية حس دمعة مكايناش ..
ماجدة ( ببرود ) ماعرفتش علاش هادشي ماصدمنيش ، هي بنتها وشنو دارت فيها خلي بنات الناس ( تبسمات بخيبة أمل ) تشوهنا دابا صافي
الروطال : اشمن شوهة الله يهديك .. مكاين لي غايخرج حرف واحد أتهناي
علال ( كيردد ) لا حول ولا قوة الا بالله العلي العظيم.. لا حول ولا قوة إلا بالله العلي العظيم
رقية : لفعة لفعة ( شافت فعبد الخالق ) تكون مرتك حتى تعيا متكونش بحال هاد الكوبرا هادي .. علم الله بوليدي حبيبي حالتو كيدايرة الله ياخود فيها الحق ..
أدريس ( تنهد من بعد مدة وهو ساكت نطق وهو كيتنهد ) هو لي ضارني فݣلبي .. حيت هو لي كان خدام على هاد ضوسي ونتبعو من لول ماعرفاش حالتو كيغاتكون ..
طارق : وهو لبارح حالتو كانت خايبة ، الصباح ماشناهش فاش خرج وراه ضروري غاتجيه قاصحة ...
عصام ( وقف ) غانمشي للخدمتي
ماجدة ( وقفات ) حتى انا وصلني معاك .. خرجو ماتلفتوش وراهم
سعاد : دراري مساكن مصدومين ، لا حول ولا قوة الا بالله العلي العظيم ، دابا بشحال غاتحكم خرجات على راسها ..
أدريس : قليلة عندها واحد 20 عام ديال الحبس .. هي لي كانت كتجيب البنات لي غايسيفطوهم على برا .. وهي لي كانت كضبر فالبنات لي وقع معاهم ما وقع البنات ماتو بمسبتها عندها ديك 20 حتى ل 25 ..
علال : الله يستر اولدي الله يستر ..
الروطال : خليت ليكم الراحة غادي ندوز لعنبر ( هز فيه عبد الخالق راسو )
عبد الخالق : رض ليها البال اولدي دابا كتر من الأول .. هداك ولد الحرام غايبقى قاني عليها
علال ( غوبش وشاف فولدو بإستفهام ) علاش مالها عنبر وشكون هذا علامن داويين ؟
الروطال عطاهم بظهر وخرج
علال : تا دوي توما شكاين ؟
× عــنـبــر ×
كالسة سهام حاطة تيليفونها ودايرين مكبر الصوت .. رابطين إتصال مع المديرة
م : الهضرة لي كيقول سي محمد بصح .. نهار جا عندي المرة اللولة ماتيقتش كلامو ، ولكن المرة الثانية سي محمد جا هو والجدة ديال أمير
عنبر ( كتشوفيه ) واش عندو بعدا شي وثائق ؟
م : ضروري امدام عنبر .. هادي راه شهر وهو كيجري ، بين السبيطار لي ولدات فيه المرحومة وزمرة ديال دم الوليد وديالو هو المؤسسة ديالنا راه مستحيل تعطي شي معلومة لشي واحد الى مجابش جميع الوثائق لي كتبت بلي داك السيد عندو صلة قرابة مع الطفل أمدام ، وهو كان باغي يشوف ولدو وديك الساع غانباشرو بالإجراءات باش يديه إن شاء الله .. ماعندك مناش تخافي امدام عنبر داك السيد هو فعلا باين أمير ..
محمد : كانت غاتجي معايا جداه تشوف ولد بنتها ولكن خافت من راجلها ..
م ( موجهة كلامها لسهام ) الى ساليتو أسهام تقدي ترجعي انت وأمير ( قطعات الإتصال )
عنبر ( كدور فعينيها حسات بتبوريشة طلعات معاها ولفاتو بزاف جاتها البكية شافت فمحمد ) زعمة غاتهلا فيه وترض ليه البال ؟
محمد : غلطت ومو بسبابي جراو عليها وتوفات وخلاتو .. هو فاش غنشم ريحة نورة راه ولدي هداك عينيا باش غانشوف نخدم ونضرب عليه تمارة
عنبر : ومعامن اتخليه ؟
محمد : كاينة الواليدة وكاينة ختي .. فاش نكون فالخدمة غايرضو ليه البال ( تبسم ) مزال مساقوش الخبار بلي عندي ولد واش نقدر نشوفو ؟
سهام ( وقفات ) انا غانمشي مشوفو واش فاق ( مشات للبيت لقاتو فاق هزاتو وتمات جايباه .. شافو تبسم او وقف شدو من عندها .. أي واحد تم لاحظ فعلا الشبه لي كان بينو وبين ولدو فشعرو الكحل والبيوضة وعينيه )
محمد ( باسو كيشم ريحتو عينيه جايين بدموع ) حبيبي ولدي الغالي ( شافيهم ) شكون سماه أمير ؟
سهام : حنا لي سميناه تقد تبدل ليه السمية فاش تبغي تسجلو فالحالة المدنية
محمد ( هز براسو ) نورة كانت باغية سمية غالي غادي نسميه غالي كيما بغات هي
سهام : غانمشي نجمع ليه حوايجو شي حوايج بقاو ديالو أختي عنبر بقاو عندكم
محمد : ماشي مشكيل انا غانشري ليه كولشي ( حياة كتشوف فعنبر لي غير ساكتة وكتشوف ) .. مشات سهام تجمع الحوايج رجعات هازة واحد الساك
سهام : ختي عنبر هو هذا وقيلة .. شي حوايج ديالي بقاو عندك فدار حتى ندير وندوز ليهم إن شاء الله ( عنقاتها وعنبر غير ساكتة مكتجاوبش )
محمد ( شاف فعنبر ) الله يجازيكم بالخير تهليتو فولدي .. ݣالت ليا المديرة بلي مكملتوش الاجراءات ديال التبني ولكن كنتو مهليين فيه ودايرينو فعينيكم ..
عنبر ( بلعات ريقها ) تهلى فيه راه درويش وكاعما كيغوت ..
محمد : كوني هانية والوقت لي بغيتي تشوفيه الى توحشتيه .. راه كاع ليزانفوغماسيو ديالي عند المديرة وسمحوليا على هاد الدخلة .. خرج هو وسهام وصلاتهم حياة حتى لباب بقات مقابلاهم ، بان ليها الروطال وقف بطوموبيل خارج متبع زينب ومحمد بالعين ، حتى ركبو فواحد الطوموبيل
الروطال : فين مشات سهام وشكون هداك ؟
حياة : هداك بابات أمير دخل أخويا راه عنبر الفوق كتبان ليا ماشي هي هاديك .. تم طالع مع دروج كيسمع فالبكا وسميرة كتسكت فيها ..
الروطال ( تخلع ) أش واقع ؟
عنبر ( بلاما تحس وقفات معنقات كتبكي ) داو امير صافي مشا .. جا باباه وداه افاروق داوه
الروطال ( كيسكت فيها ) صافي صافي ( كيشوفيهم ) شكون ݣاليكم بلي باه وكيفاش أنتوما مدخلين راجل براني عليكم بغيت انفهم انا
حياة ( عاودات ليه كولشي ) والمديرة قاتلك المدة لي كانت دايرة مع عماد صافي فاتت
الروطال ( شاف فعنبر كينسح ليها فدموعها ) واش انتي غير على سبة .. بالعكس خاصك تكوني فرحانة الولد عندو باه مغايرجعش للخيرية واش غاتحني عليه انتي كثر من باه ؟ ( سميرة غمزات حياة وخلاوهم بوحدهم )
عنبر : ولفتو ولفت حتى سهام بزوج بيهم
الروطال ( مسح ليها عينيها جارها بايسها من شفايفها ) الفتيلة الحنينة ديالي
عنبر ( تزنݣات ) قوليا شنو كنتي باغي تعاود ليا .. أمضرا عماد لاباس عليه كيبقى ؟
الروطال ( حك حاجبو عاض على شفتو .. دور لسانو وسط فمو وشاف فيها بجدية ) لݣاو الواليدة حتى هي عندها يد مع ديك تريكة
عنبر ( شدات على فمها مصدومة ) واش مامات عماد ؟
الروطال : واه هي بلاما نعاود ليك حالتو كيدايرة ( بدا كيعاود ليها ݣاع لي وقع ) هادشي لي كاين ( فللحظة تهزو بالدقان لي كان على الباب وسونيت والعياط بسميتها )
عنبر ( شافت فيه ) هذا بدر راه من لبارح كيسوني ومجاوبتوش ..
الروطال ( وقف ) ساخي براسو هذا .. خرجات سميرة كتجري وحياة وعنبر تابعة الروطال كتعيط عليه عارفاه هاد المرة مغايطلقو حتى يكون ميت ..
× عماد ×
كالسة قبالتو حادرة راسها مكتشوفش فيه .. جر الكرسي وݣلس أونفاص معاها فهاد اللحظة لي هو فيها كولشي مات فيه أحاسيسو قلبو ، لي حاضر هو ضميرة فقط وخدمتو ..
عماد : بغيت نعرف كولشي بغيتك تعاودي ليا كولشي ( هزات راسها كتشوف فيه بقات ساكتة مجاوباتش خلاتو يستأنف كلامو ) رحمون راه تشد وخوك تشد غير دوي حسن هكا غادي تخففيها على راسك ..
خديجة ( تنهدات ) ماعندي منقول لي كاين راه عرفتيه وشتيه
عماد ( برم شفايفو ) اهاه ماݣلتي عيب الالة .. غير هو راه براهيم داكشي لي كانت كدير فيه مرتو لصقو فيك ( شافت فيه ) عمر ليك ضوسي من ساسك لراسك باش هي تخرج ترجع لبناتها ..
خديجة ( بإنفعال ) علاش غادي يلصق فيا مالي شنو درت هو لي كان كيعطينا شنو خاصنا نديرو بتفصيل لا انا لا خالك ..
عماد ( تبسم عاض على شفتو ) وانتي مابغيتيش دوي ، الى بقيتي على هاد السكات راه غاتلبسيها انتي وخوك اما مرتو تخرج منها طيارة لولة تشدها .. الكرة عندك دابا لي بغيتي ديريه ديريه ..
خديجة : كان كيحسابلي غاتعاوني ، انا لي عمرت ليك راسك حتى دخلتي للبوليس ..
عماد ( قرب عندها ) وهادشي علاش ݣلت لك ݣولي لي كاين وعاودي ليا من لول باش نݣد نعاونك .. حتى الى شدينا ليك محامي نعرفو مانݣولو ليه ..
خديجة ( شمرات على نيفها ) خالك هو لي دخلني فهادشي .. انا ماعرفتش كيفاش تعرف على براهيم فاش رحلنا من عين السبع كان دوا معايا وعرض عليا نخدم معاه خدمة لي غاتجيب ليا بزاف ديال الفلوس لي عمري ماكنت نحلم بيهم .. وانا قبلت فديك الوقيتة كانت دخلات فرح للمغرب وهي لي جات عندي سيفطها رحمون عندي باش اي حاجة بغيتها هي تنفدها ومنبانش انا فصورة ( تنهدات ) داكشي لي كان بدينا فللول مع البنات لي باغيين الخدمة كنا كنسيفطوهم للبرا والخليج .. وكاين لي يتكلف بيهم بدينا هكاك وكبرات الخدمة ( حنحنات )
عماد ( كب ليها الما مدو ليها وهو كيشوف غير ضبابة جيهتها ) هاكي شربي
خديجة ( شدات عندو الكاس شربات وكملات هضرتها ) ولينا كنديرو حفلات وكيحضرو غير الناس لي هوما ولي حتى هوما داخلين معانا .. حيت مكناش كنبيعو غير فالبنات كنا كنبيعو فبزاف ديال الحوايج بحال البيضة والخضرة ( الكوكاي**ين / الحش**يش ) ..
عماد ( مكانش متيق كيحس براسو فحلمة وغايفيق منها ويلقا راسو فدارو ) ودايرة عصابة ( غمض عينيه وحلهم ) البنات لي غبر ليهم الأثر أش تݣولي عليهم ؟
خديجة : هادوك حتى لهاد عامين لاخرة عاد بدينا فديك الجيهة ، ولكن مانجحاتش بحال الأول
عماد : علاش المغرب بضبط ؟
خديجة : حيت ساهل تلعبي بعقل الوالدين لي على قد الحال ، وبالبنات لي همهم غير يتزوجو بواحد بفلوسو وبدارو كامل مكمول .. صعيب تلعبي على شي وحدة من اوروبا حيت كيكون اخر همها هي تزوج ماشي بحال هنا غير كتخرج من القرايا وتكلس كيولي همها غير تزوج والمهم هو يكون بفلوسو ..
عماد : دكية تبارك الله عليك وماعندي مانسالك
خديجة : بلاما تبقى تريݣل مك لي كدوي معاك ( وقف كيشوفيها )
عماد : شكون لي شادكم شكون راس الكبيرة ؟
خديجة : عمري دويت معاه .. انا كنت كندوي غير مع براهيم وخويا هذاك كيعرفو براهيم بوحدو
عماد ( هزهز راسو توجه للباب فتحو كيعيط ) يوسف ( شوية تم جاي يوسف .. ضغط على شفايفو شاد على يدو كيحس براسو فهاد اللحظة فاشل ) هبطها حتى تعرض على نيابة ..
خديجة ( خرجات فيه عينيها ) ياك قلتي ليا اتعاوني ، دابا بغيتي تهبطني تهبط مك المسخوط .. سير يالمسخوط ديال مو عمرك طفرو فحياتك لا انت لا خوتك ولا تريكت باك ( وقفها يوسف غادي بيها ) بسباب باك درت هادشي .. داير ليا فيها العفاف والكفاف شبهتي ليه ( جمعات الدفلة ودفلات عليه ) .. بقا واقف مادواش كيسمع فصوتها كتعاير فالكولوار حتى غبر ..
× جهة أخرى ×
- خرجو الناس كيتفرجو الصداع والغوات واصل لكاع الحومات ، جايا رشيدة كتجري هي وتودة .. عنبر شادة على فمها حياة مصدومة دخلو الناس كيجرو الروطال من فوقو .. كان مليوح كلو دمايات خارجين ليه من نيفو ومن فمو ..
الروطال ( كيلهت ) وديني وديني وما أعبد مزال طوف بجيهت مرتي العصب ديال رجليك نݣطعو بسناني وبرب العالي ( كيسترجع أنفاسو ) برب العالي ندفنك وسط اللفاع وانت كتشوف .. انا هو حفار قبرك حفار قبرك هو انا نعاود لك الطهارة ، نرضك بحالك بحال لي كيفرقو طباسل فسويرتي ..
بدر ( كيحاول يسترجع أنفاسو بصوت تقيل مقادش حتى يدوي ) بغيت ولدي
الروطال ( دفع واحد خونا شادو ) وفرقو عليا هاد الجوقة لي عندو شي دار يقصدها يلاه ( بداو الناس كيتفرقو ميشوفو فيه مصدومين )
تودة ( بصوت عالي ) أشمن ولد الله يݣطع ولادك من دنيا يالميكروب يالمسخوط يا ولد الحرام أنت وتريكتك ، ضحكتو على بنتي اشمن ولد ماعندك ولاد اباش تكون فخبارك هداك ماشي ولد بنتي عمرها حملات منك ..
الروطال : الميكروب كاعما تجاوبيه زيدو بحالكم خليو الجلاخة مغط تم ..
عنبر ( طلقات من مها تحت أنظار الروطال توجهات للعند بادر تحدرات للعند وجهو ناطقة ببرود ) أنا عمري حملت منك كنتي ضاحك عليا بلي مكنولدش ( تبسمات ) هادشي كامل اوليدي ابلان درناه لك باش تحط داركم فالحبس .. انا عمري حملت حتى دري لي شتيه غير جبناه من الخيرية وشحال مكنحملكش وشحال ميكروب الله ياخود فيك الحق الموسخ الوسخ ( عمرات فمها حتى عمراتو ودفلات عليه ) مزال توريني وجهك انتبعك لتريكتك وفوتني عليك ( جرها الروطال مدخلها دخلو كاملين مخليينو مليوح كيستوعب الكلام لي تقال ليه بدا كيجر فرجليه حتى وقف حابس البكية ماتسرطاتش ليه مصدوم من كاع هادشي لي وقع معاه ركب فطوموبيلتو بالكشايف باش كيشوف قدامو ) ..
فدار دخلو ݣلسو كاملين
تودة : توما أش وقع ؟
عنبر ( بدات كتعاود ليها ) هادشي لي كاين
تودة : سهام دات أمير مسيكين دريويش .. ولكن مزيان يتربى مع باه ماشي مع البراني ..
حياة : عنداك هاد خونا يدير شيحاجة ؟
الروطال : ماعندو مايدير بحال هاد ميخي مكايدير ، النفخة على الخوى ( شاف فعنبر ) نمشيو ؟
عنبر ( شافت فيه ) اليوم الافتتاح ديال المحال دماما نسيتي ؟
الروطال ( وقف ) غانمشي نجيب ليك نمرة جديدة وحيدي عليا هاديك .. نعيط عليك هبطي خوديها
تودة : مغاتكونش اولدي ؟
الروطال ( بابتسامة) هادشي ديال العيالات ماعنديش معاها أخالتي فاطنة ، ولكن غاندوز نشوف ومنها ندي عنبر مبارك و مسعود
تودة : الله يبارك فيك اولدي الله يرضي عليك ( خرج خلاهم كيتعاودو حتى عيط ليها نزلات خدات الكارطة وطلعات ، حيدات هاديك هرساتها وركبات الجديدة )
~~~~~~~~
إيـــــطــــالــــيــا 📍
فوحدة من الڤيلات الكبار لي كانو بعاد على المدينة .. فوحدة من الغرف وبضبط مكتب عريق ، كتب فكل بلاصة شوميني طافية .. محطوط حداها صورتو مكتب كبير بالخشب العرعار المحفور ، كرسي مبطن بالݣرونة وراه واقف شخص فالستينات من عمرو مقابل مع المنظر لي على برا شاد سيݣار فيدو وغارق فتفكيرو .. كان باين فيه إيطالي الأصل تدق الباب وبلغة إيطاليا نطق " Entrare " تحل الباب ودخل رجل فالثلاثينات من عمرو ملامحو عربية لابس سروال كحل تريكو فنفس اللون وتجاكيك فنفس اللون ..
.... : Ho una brutta notizia per te ، Il signor Ibrahim Rahmoun .. Fu arrestato. In Marocco ( عندي لي خبار خايبة براهيم رحمون تشد فالمغرب )
- ضار للعندو مغوبش هز حاجب ونزل الثاني بصوت رجولي تقيل مرزن .. هزهز كتافو ..
.... : Non mi interessa di lui, ciò che conta per me è ciò che ha ( مكايهمنيش الى تشد المهم عندي هو داكشي لي عندو ) ..
× عند ليالي ×
والفات خدمتها وكانت عاجباها ومرتاحة فيها .. من اخر مرة شافت راشد مابقاتش شافتو وكانت مرتاحة ، كانت خدامة مع واحد الكليان عاطياه الخاطر ..
ليالي : دابا داخل الصيف احسن واحد هو هذا ، هذا ديال البرد قاصح شوية ..
.... : صافي يلالة ناخدو على دوقك ، دواقة فالعطور تبارك الله عليك
ليالي : مرحبا ( قدات ليه العطر دارتها فالبوشيط ديالها شدات الخلاص ورجعاتلو الصرف )
.... : هاد المرة انجيب الواليدة تختاري ليها شي ريحة على دوقك
ليالي ( تبسمات على إتر دخول راشد للمحال ) مرحبا فيك فأي وقت ..
.... : تهلاي فراسك وشكرا ( هزهزات ليه راسها تحت أنظار راشد ..
راشد ( موجه كلامو للحمزة ) حمزة إلى بغيتي تمشي سير
حمزة : شكرا بزاف اسي راشد .. انا يوماين بالحساب وغانرجع إن شاء الله
راشد : زيدك السبت والأحد الإثنين تكون هنا إن شاء الله
حمزة : واخا ربي يخليك ( هز واحد سكادو ديالو مد ليه راشد شي فلوس خشاهم فجيبو توج عند ليالي ) ليالي انا غانمشي لدارنا الواليدة عيانة شوية تهلاي فراسك
ليالي : شكون غايرومبلاصيك ؟
حمزة : سي راشد ( حسات باطرافها بردو بحال الى تخوى عليها الما بارد مابقاتش دوات ) يلاه بسلامة .. خرج من المحال مخليها مزال واقفة فبلاصتها على نفس الملامح ..
× ڤيلا إدريس ×
رقية شادة راسها وكتبكي .. ماجدة معنقاها كتسكت فيها حداها علال لي كان مغوبش كيخمم وساكت مادواش غير ساهي هز راسو فولدو
علال ( بصوت مجلجل تقيل غالبة عليه الرزانة والهبة والعصبية فنفس الوقت ) كاع هاد الوقت وأنت ساكت ( شاف فيهم ) ݣاع هاد الوقت محيمرينا وجداكم بلا حشمة بلا حيا وتشوفو فينا بوجهكم حمر ..
أدريس : الواليد راه مكناش ݣادين ندويو على هادشي لي وقع .. خايفين لا الواليدة شي نهار تزلق ليها وتبينها للبنت وهي مافخبارها مايتعاود
رقية ( كتبكي ) كنت حاسة بشيحاجة فديك البنية .. دخلات ليا لقلبي بحال نقطة العسل ݣول هي بنت ولدي وانا مسايقة خبار ( شافت فولدها ) حݣل السيدة سخفات داك نهار .. عرفاتك انت هو لي سمحتي فيها وخليتيها
عبد الخالق : واش انا خليتها الواليدة راه فخبارك لا انت لا الواليد .. انا براسي ماكرهت نعنق بنتي ونݣوليها انا باها راه عاودنا ليكم شنو كاين الى مشات حتى ساقت الخبار يݣد واحد فدوك المكاريب يتلݣاو ليها ..
علال : انا هادشي مضارنيش لي ضارني هو تخبيوها .. ولينا دراري صغار مغانݣدوش نسكتو ؟ ݣالسين معانا واكلين ناعسين واحد فيكم مادواش حشمت تديو سخطي فهاد العمر ..
عبد الخالق : غير سمحلينا الواليد ، حتى حنا راه ماشي بعيد باش عرفنا غير مؤخران ..
علال : وانت مادرتي شاي ؟
عبد الخالق : شنو غاندير ، عرضت الزواج على تودة ولكن مابغاتش وضارت فيا ݣدامهم
علال : من حقها انتوما البنت معارفاش بلي والديها وبغيتو تزوجو وتحضر ليكم .. حتى لاخر عاد اجيو ابنيتي حنا والديك تريكة المضهصين ..
رقية : ايمتا غاتݣولوها لدرية انا بغيت نشوف حفيدتي اعلال
علال : هنينا ارقية راه هادشي علاش سكتو على ودك تي حيت عارفينك ماتصيبيش تسكتي
رقية : واخا واخا اعلال هاهي سكتات ..
أدريس : يتسد هاد ضوسي ويتحكمو وديك الساعات نݣولوها ليها إن شاء الله ، باش مايبقاش الخطر على البنت ..
عبد الخالق : سمحوليا والله مابغيت نخبي ولكن هادشي لي عطا الله الواليد
علال : مغاندويش اولدي دابا ( وقف شاف فدنيا ) بنتي ديري ليا شي كاس دلويزة وجيبيه ليا لجردة ( مابغاش يدوي مع واحد فيهم خلاهم وخرج لجردة ) .. دخلات دنيا للكوزينة كانت المساعدة وراتها فين كاينة اللويزة حتى سونا التيليفون .. جبداتو من الجيب دسروال كانت نمرة عثمان ..
دنيا : وي عثمان ( بعدات من الكوزينة كدوي بشوية ) لا راه حتى للغدا إن شاء الله .. لا صافي وجدت كولشي الحمد لله وشديت الرخصة أه لا شديتها لبارح .. صافي غدا انزل لعين الذياب مع ديك 5 العشية غادي نبدا .. صافي لهلا يخطيك المهم تيليفون بيناتنا صافي واخا ( قطعات )
- معامن كدوي ؟
دنيا ( ضارت على غفلة مخلوعة مخرجة عينيها فطارق ) ن نعام ؟
طارق ( ببرود وصوتو القوي خلا الخلعة تهزها من رجليها ) معامن كدوي ؟
دنيا ( تصنعات البرود ) كندوي غير مع ماجدة شفتها كيبقات علاش ؟
طارق : وماجدة غاتݣولي ليها تنزلي لعين الذياب ؟
دنيا : أه كاينة واحد الكوموند بغات تسيفطها ، قلت ليها انا توصلها ليها بلاما تسيفط ليڤرور ..
طارق ( ضرب على لحمة ودنو ) الله يعميها ليكم انتوما بجوج ، علم الله أش طابخين مع بعضياتكم توشويش وغير ساهية هي نيت ..
دنيا : لا مكاين والو ( توترات )
طارق : شتي امنين كتولي تهربي دوك العينين .. كنعرف شي بلان مافيه مايتشم أش تم ؟ واش ماجدة واقعة ليها شي حاجة دوي ؟
دنيا ( عرفات عاق بيهم فاش وقع مع ماجدة لي وقع مع حياة ويوماين وهي كتبات عندهم فدار ) وراه أخويا قل
طارق ( بصوت زعزعها ) كتخرجي ديك خويا فاش كتكوني مق**ة السوايع دوي اش تم .. خرجي من رونضتك ادنيا متجهلينيش ..
دنيا : حلف متقوليها والو الله يعطيك الستر اخويت راه انا واعدتها وال( مقاطعها )
طارق : وطلقي راسك واش غانباتو هنا ولا ( شاف فالمساعدة ) مريم الله يرضي علك دي لبا لويزة للجردة ..
مريم : واخا
طارق ( جر دنيا وخرجها على برا من الجهة الأخرى لاجردة ) يلاه دوي
دنيا ( حبسها مكان عندها حتى حل ) دابا داك نهاريات خرجات ماجدة هي وحياة وليالي يدورو .. وحياة كانت تعرفات على شي واحد فداك تطبيق ديال تيندر ديال تعارف ( غوبش ) كاين فمكناس وجا لهنا ودار مع حياة ياك ( كتشوف الشر فعينيه ولات كترعد ) هانت ..
طارق ( زمجر بتهديد ) دوي طلقيني
دنيا : ومشاو تلاقاو معاه وركبو معاه .. ويمكن خرج بيهم على برا المدينة صدق سيد هبيل ( عاودات ليه لي دار فالبنات ) هادشي لي كاين ..
طارق : وليتو ديرو فالبلانات غادية ايباهم وساكتة انت هي شيفورة ديالهم وضاربة طم
دنيا : وهادشي راه مافيه مايتقال .. شنو غانقول فيه وهوما معارفينش حياة اهبيلة ودارت بيها الحمد لله لي سيد صدق مزعزع و متكرفصش عليهم ..
طارق : هادشي كامل ومتكرفصش ( حك على نيفو ) سيري ادنياسيري غانفوت فاصلك شي ضقة سيري ( مشات كتجري من قدامو هاربة ) .. رجع للداخل جاب سوارت طوموبيلتو وتيليفونو وخرج ..
~~~~~~~~~
مع 6:30 ديال العشية صوت ديال الدقايقية كيتسمع شي ناس مجموعين جايين كيتفرجو وكيطلو على المحال .. واقفة حياة وعنبر كيضربو الرش معاهم رجاء سميرة وخوت حياة وتودة واقفة فرحانة ومتحمسة ..
.... : حيدو حيدو هي جايا فقصو العدو حيدو حيدو زين كلو شكون لي ولدو حيدو حيدو تودة جايا فاقصو العدو .. محميين الطرح كيضربو الرش بداو الناس كيدخلو للمحال ، عنبر هازة تيليفونها كتصور هي وحياة ..
- البوفي فيه الحليب العواصر الحلوة وتمر .. لي دخل كيهز ويدور فالمحال لي كلو تكاشط هماويين وقفاطن هماويين مع العمارية والميدة والاكسسوارات ديال العريسات اي حاجة كتخص العروسة محطوطة كولشي راقي وكيجلب العين ..
- وقفات طوموبيل ديال الروطال نزل منها ، بعض الاعين مشات ليه شافتو عنبر .. خرجات من المحال وتوجهات عندو
عنبر : ساليتي دغية !!
الروطال : بغيت نشوف عماد ݣلت ندوز عندك هو لول ، خصاك شيحاجة ؟
عنبر : لا مخاصني والو الحمد لله
الروطال ( قرص ليها نيفها ) كنا ناويين على المشية للإفران زهر زين عندك
عنبر ( ضحكات ) هانية ودابا مجاتش أصلا نمشيو وخوك مسكين فهاد الحالة خلي حتى تبرد القضية ونمشيو ..
الروطال ( قرب منها ) يخليلي الزين لي كيفهم ومقدر الظروف .. متعطينيش شي بيسة نرضو بيها المجاج
عنبر ( خرجات عينيها مبعداه من صدرو ) اويلي نعل شيطان الناس كتشوف اقبيلات خديتي بوسة
الروطال : ومال مك ( بصوتو الرجولي ) نبوسك ݣدما بغيت كتساليني ياك انتي ديالي أمدام
عنبر : وصافي سير عند عماد حتى تسالي ورجع ديني صافي ..
الروطال : كاين شي ولا أنشوف معاك غير الفرشي ؟( تزنݣات وسكتات ) واخا الالة ماندوي معاك حتى تكون فيك الأناكوندا ونتفاهمو ( بدات كضحك ) يلاه هو هدا ودخلي لداخل ماتبقايش على برا وبعدا من رجال أعنبر محشية حدا دقيقية خلينا مزيانين ..
عنبر : وصافي ( خلاتو ودخلات طلع فطوموبيلتو ومشا )
واقف يوسف وعماد قبالتو .. كان بحال شي واحد لي كان عالي فوق جبل وطاح طيحة وحدة ليلة فالكوميسارية خلات ليسيغن تحت عينيه كيشوف قدامو مكايشوفش فيهم غير مصدوم ساعتين 3 السوايع وهوما معاه كيخليوه ويرجعو لعندو .. وهو حلف لا يدوي كان باين بلي عندو صراع داخلي خصوصا فاش خرج من عندو المحامي صادمو بالهضرة لي قاليه بالحرف " سي براهيم انا راه ماعندي مندير ليك إلى معاونتي انت راسك الى مادويتيش غادي تصعبها غير على راسك "
براهيم : انت محامي ديالي خاصك تخرجني علاش غانعطيك الفلوس الى ماخرجتينيش ؟
.... : واش نخرجك وانت غارق من ساسك لراسك ، البوليس جامعين عليك الغرق ديال دلائل لا انت لا لي معاك الى مادويتيش ، غاتلبسها انت بوحدك وراه فيها المؤبد ومغايكونش عندك فرصة انك تستأنف .. ومغاتقد تشري حد اباش تكون عارف
براهيم ( يديها كيترعدو كينش على راسو كيحس بلي فأي لحظة ممكن يطيح ) منݣدش ندوي غانجبد عليا النحل
.... : النحل مجبود عليك مجبود اللهم نص حاجة ولا كلها تلبق ليك انت لي خاسر فهادشي ، انا غانحضر فالمحكمة ولكن ماعنديش كيفاش غاندافع عليك والتهم كلها لابسها هادشي لي عندي منݣولك ( هز واحد المحفظة دارها على ظهرو وخرج )..
عماد ( فيقو من سهوة ديالو ) أش درنا اسي براهيم انباتو هنا ؟ ( هز فيه راسو كيشوفيه ) اباش تعرف واحد البلان شتي كاع دوك ضواسة لي كانو عندك فالبيسي جاو حتى لبين يدينا وسبابك هو ولدك ( خرج فيه عينيه مصدوم كيرمش ) من تجارة فالبنات وفالممنوعات من كولشي من نهار دخلتي لهاد الضومين شناه .. الطمع طاعون اسي براهيم اش فيها كون بديتي من زيرو ولد عائلة محتارمة علاش مال البني والعمران ماشي مزيان ؟
براهيم ( الصمت )
عماد : عرفتي من شحال وحنا كنبلانيو ليك ولا ، قربنا نقفلو عام .. حتى داك الحفيد لي فرحانين بيه راه ماشي حفيدك راه اكريناه باش دخلو لمغرب على ودو ( صدرو كيطلع وكينزل ) تصدمتي بغيت غير نسولك الروح عندكم رخيصة ، بناتك كتموت عليهم وبنات الناس سراق الزيت عندكم ياك ؟
براهيم ( كيحاول يتنفس ) ب ( دوز لسانو على شفايفو ) بغيت نشرب
يوسف كب ليه الما ومدو ليه .. شرب كيحاول يسترجع انفاسو .. حس براسو صافي هادي الأخرة ديالو كان كيقولها لمرتو بلي أخرتو اتكون على يد ولدو
براهيم : و واش بدر هو لي ديكلارا بيا ؟
عماد : لا غير لحس ليك داك بيسي ودارو وسط واحد الكلي وداك الكلي وصلنا مكايهمش كيفاش وصل ..
براهيم : شنو باغيين تعرفو وانتوما ݣاع لي كاين شتوه وعرفتوه مابقى مايتخبى
عماد ( قرب منو كيشوف فيه بنظرات باردة ) شكون لي مخدمكم ؟ شكون هذا لي خدامين ليه ؟
براهيم : منݣدش نݣول ( بنفي ) الى دويت انحكم على راسي
عماد : اتلبسها انت بوحدك فخبارك ؟
براهيم : لي خاصك تعرف الى تشدينا حنى ولا هو .. كاين ما كثر منا فبزاف ديال البلايص برات البلاد
عماد ( بصرامة ) وانا مكاتهمني حتى بلاد من غير هاد البلاد .. تبقى فالامن والأمان شباب ديالها وبناتها يكونو بيخير وعلى خير هادشي لي كيهمني وكل بلاد عندها ماليها لي يتحكمو فيها ويدافعو عليها وينقيوها دابا دوي شكون مخدمكم ؟
براهيم ( هز فيه راسو ) سميتو مكنعرفهاش عمرو ݣالينا سميتو ولكن وجهو شايفو
عماد ( تبسم ) مزياااان ( شاف فيوسف ) عيط على خالد ايوسف وݣوليه يجيب معاه الماطريال ..
- مشا يوسف ورجع وهو مع خالد لي مسؤول على الرسومات ݣلس حط دفتر كبير بيض
عماد : عطي المواصفات ديالو للخالد وماتنساش ليا بزقة وحدة .. بدا براهيم كيعطي فالمواصفات بقلة حيلة كان صافي وصل لأخرو مابقا عندو حتى حل كان حاس بلي نهار ايدخل للمغرب غادي تكون هادي هي الأخرة ليه وفعلا إحساسو ماكدبوش ..
خالد ( عطا الصورة للعماد )
عماد ( دورها للبراهيم ) واش هو هذا ؟
براهيم : أه هو هذا
عماد : واش طالياني ؟
براهيم ( بنفي ) لا مغربي .. وكيجي للمغرب مامرة ماجوج عندو حتى مشاريع فدول عربية هادشي لي كنعرف عليه ..
عماد ( شاف فيوسف ) ديه حتى يتعرض على النيابة
براهيم ( بعياء ) مرتي راه مدايرة والو .. وحتى بناتي معارفينش هادشي لي كندير
عماد : هادشي عارفينو ولكن مرتك فخبارها بلاناتك .. واقفة معاك فهادشي عندها الزهر ماكاين حتى دليل ضدها يوسف ديه هبطو ..
مشاو دقايقية وبقاو غير هوما مجمعين .. لي دخلات كدوق من داكشي المحطوط كتاخود كارت ڤيزيت وكتخرج ..
حياة ( شافت فساعتها ) ليالي تعطلات دارت معانا 8 هادي 8:30 ومزال مجاتش ..
عنبر : وراه الخدمة أصاحبتي ، واش هي يلاه بدات وغاتولي تقوليهم بغيت نخرج بكري .. حتى ديري او وريها الفيديوات
حياة : وراه دارو معاها 8 تولي تخرج حيت بعيد الحال ( نغزات عنبر مأشرة ليها لجهة الباب ) شوفي شوفي هداك هو الݣزار حسن لي طلب خالتي تودة للزواج ..
عنبر ( ضارت شافتو داخل وجايب الورد وشكلاط فيديه ) هاي هاي تبارك الله واخا كبير زين شوفي عينيه زورق ..
حياة : وايااه شوفي جليليبة لي لابس .. كيبان هماوي ( شافت فيها ) علاش زعمة خالتي مابغاتوش راجلها الله يرحمو مكانتش كتبغيه كون خدات هدا والله حتى يتهلا فيها ..
عنبر : وهي مابغاتش مغانبززوش عليها ، الصراخة كون بغات والله حتى غانفرح ويعجبني الحال ( شافت فيه ) خاصو غير يكون مزيان وماشي من داك النوع لي يقوليها ممنوع هلك يجيو عندك ..
حسن : لالة تودة مبارك ومسعود المحال الجديد الله يدخلو عليك بصحة وسلامة
تودة ( حشمات وتزنݣات ) الله يبارك فيك أسي حسن مكانش علك تعذب راسك ( شدات من عندو داكشي حطاتو فوق الطبلة )
حسن ( دور عينيه فالمحال ) تبارك الله المحال كبير ومتيسع ، الله يجعلو باب الخير وتيسير إن شاء الله ( شافيها ) هادوك بناتك ..
تودة : أه بحال بناتي ݣول .. العائلة وصافي ( حسات بيه قجر عليها مكتحملش لي كيبقى تابعها )
حسن : مزيان الالة الله يخليكم لبعضياتكم ( تبسمات ليه ) لالة تودة انا ماشي من عوايدي نبقى تابع شي حد .. ولكن ربي شاهد عليا غراضي شؤيف انا سولت عليك ( شافت فيه بإستفهام ) والناس على مݣالو من نهار سكنوي هنا مشافو منك عيب الله يعنر ليك دار أنتي وعائلتك وانا راه منلقاش ماحسن منك ..
تودة : سي حسن انا راه جوابي عطيتو ليك انا راه مابغيا زواج .. ومكنبغيش لي يبقى يحكر عليا
حسن : غير ݣولي ليا علاش واش ماعجبتك ؟
تودة : الله اودي الله يعمر ليك الدار .. ولكن راه انا ماباغياش نتزوج صافي عشت حياتي بغيت لي بقا ليا فعمري ندوزو فهاد المحال ومع عايلتي
حسن : وغير عاودي فكري الله يرضي علك .. انا منشكرش ليك راسي راه مايخصك معايا خير
تودة : انت مول الدار الكبيرة هادشي عارفاه .. ولكن انا راه لي عدب ݣلتو لك ومكتعاود غير صلاة على النبي ، الله يرحم الوالدين اسي حسن متحشمنيش متخلينيش نݣطع الرجل من داك الحانوت وديك طريݣ ..
حسن ( هزهز راسو عاض على شفتو تنهد وتبسم ليها ) واخا ماݣلتي عيب الالة تودة خليت ليك الراحة ( حدر راسو وخرج )
رشيدة ( جات عندها ) أش ݣاليك ؟
تودة : يمشي يعاود لمخو الهبال هو هذا لاصق ليا فجنابي .. مابغا كاع هو يحشم على شيبو خلاوها ماليها العيب وشيب ..
فجهة أخرى .. وصلات 9 تعطلات هاد المرة المحال كان عامر وماقداتش تحضر لإفتتاح هزات ساكها دارت فيه تيليفونها وجداتو .. بدات كتوجد باش تسد الباب ديال الزاج سداتو ورجعات هزات ساكها كان هو الداخل ، كتسنى فيه تعطل كان خاصها تسولو واش هو لي يسد الباب دالحديد ولا هي تعطل عليها تفقصات وحسات بيه دارها بلعاني ..
راشد ( خرج كيشوفيها واقفة ) كتسناي شيحاجة ؟
ليالي ( ببرود ماشعراتش ) نهار خدمني سي طارق تافق معايا نولي نخرج مع 8 .. حيت بعيدة على الدار يلاه كنشد طاكسي ونوصل بحالي ودابا 9 هادي مشا الحال شوف واش نلقى طاكسي هنا ولالا فهاد الوقت ..
راشد ( برم شفايفو ) ݣوليها فاش وصلات 8 علمي .. انا ماكنتش حاضر نهار خدمك طارق ݣلت واش هدا هو الوقت ..
ليالي ( غمضات عينيها وحلاتهم ) الباب ديال البرا تسدو انت ولا أنا ؟
راشد : لا غير سيري ( مزادتش معاه الهضرة عطاتو بظهر وخرجات ) ..
- بقات واقفة على برا كتسنى فطاكسي وداكشي لي خافت منو هو لي طاحت فيه تعصبات ورضات ليه هو اللومة .. مدة وهي على ديك الحالة حتى وقف بطوموبيلتو الرونج نزل الزاج ونطق بصوتو الرجولي :
راشد : ليالي ( ضارت عندو ) طلعي نوصلك
ليالي ( برفض ) لا شكرا دابا يجي طاكسي
راشد ( بأمر ) طلعي اليالي براكة من البسالة .. مغاتلݣايش طاكسي وحنا غاتبقاي وانا ماعنديش الوقت نبقى نحزر فيك ..
ليالي ( بقات كتشوفيه بلعات ريقها وتوجهات لباب حلاتو وطلعات غير سدات الباب دارت سمطة ديمارا ) .. الطريق كلها وهي ساكتة حاءة بتوتر والحشمة كولشي تخلط عليها .. وصلها لباب دار وقبل ماتنزل نطق :
راشد : هاد المرة بقاي دوي .. ماتبقايش ساكتة كانت شيحاجة ضاراك ولا معاجباكش خرجيها ..
ليالي ( تزنݣات ) واخا وسمحليا الى خرجت شيحاجة ماهياش
راشد : ما وقع والو ، تصبحي على خير
ليالي : تصبح على خير ( حلات الباب سداتو بقا واقف حتى دخلات لدار عاد ديمارا كيدوز على شعرو ولحيتو حاط ؤدو على قلبو )
راشد : إيش فيك يا ݣلب إيش فيك ( هز قرعة دالما شرب منها وتوجه نيشان لدارو )
~~~~~~~~~~~~~
- متكية على صدرو شاد ليها يديها كيلعب بيهم ساهية كتخمم ..
عنبر : زعمة مو ولا خواتاتو مايبغيوش يفديو فيا دقتهم ؟
الروطال : تي اشمن دقة فدقات .. هربوش شي ميكروب مزغرتا عليه مو يوصل ليك
عنبر ( هزات فيه عينيها ) هههههه كضحكني وحق الله المعبود ( تنهدات تنهيدة طويلة) علم الله شنو غايجي من بعد أفاروق والله
الروطال ( زول خصلة من فوق عينيها ) شنو باغية ديري فاش كتخممي ؟
عنبر : اول حاجة ( رجعات هزات عينيها فيه ) بغيت نمشي نزور قبر والديا ( غرغرو عينيها ) كنحس براسي توحشتهم بزاف
الروطال ( تقرص بالع ريقو) صافي نديك تزوريهم ( سكت ورجع فيقها من سهوتها ) بعد المرات كيجيني شي حماق فشكل
عنبر ( تقادات فالݣلسة وشافت فيه ) بحالاش ؟
الروطال : بعد المرات ( تبسم إبتسامتو لي كتخليها تبقى تشوفيه بلا هواها حنحن بصوتو الرجولي ) كنبقى نݣول وتخايل دابا نكون انا ماشي ولد عاىلة حيدر ..
عنبر ( ضحكات ) أويلي على هبيل . زعمة يكونو لقاوك فطارو دزبل ولا فم شي باب دجامع
الروطال : وماتعرفي ( ضحك ) دابا أتخايلي كون بصح منكونش ولدهم ويكونو والديا شي ناس خرين وعندي خوتي وخواتاتي
عنبر : واخا تكون عائلتك دبصح كيما كانت متكونش بحال هاد العائلة يتمناها اي واحد متكدبش
الروطال : وبصح انا اكنݣول حنا دابا أضاحكين ( شافيها ) زعمة انتي عمرك مافكرتي فيها ابينك وبين راسك ؟
عنبر ( بقات كتفكر وتبسمات ) لا الصراحة عمري فكرت فهادشي مكتجينيش على بالي
الروطال : واخا دابا فرضنا مثلا شي نهار يالالة سقتي لخبار بلي والديك لي ماشي والديك
عنبر ( هنزرات فيه ) ياربي سلامة ماحنا على فالك أش هاد الهضرة هادي
الروطال : تي مالكي راه غير داويين حنا ݣلنا غير فالمثل
عنبر : متجينيش نفكر فيها مانبغيهاش لعدويا توقع ليه ياربي سلامة ( وقفات) نشوف طاجين واش وجد جاني جوع ..
الروطال ( سكت حتى وصلات لنص الطريق او وقف ) أنا جاي نعاونك ..
~~~~~~~~~~
في بحر الحياة المتقلب،
نمضي جميعًا بين موجات الفرح والحزن.
لا حزن يدوم، ولا فرح يبقى، فكل شيء عابر كالسحاب. وإن الألم ليس نهاية، بل مجرد فصل في قصة لم تكتمل بعد. تذكر أن الظلام لا يطرد النور، بل يفسح له الطريق. اصمد، فالغد قد يحمل لك نورًا لم تتخيله بعد ..
- دخلات للخدمة ديالها شادة بلاصتها .. شعلات البيسي وبدات على واحد الضوسي كان قدامها كتنقل جميع المعلومات لي فيه للبيسي لضوسي لي قدامها .. حالة عينيه مرة مرة تغمضهم بالعيا وترجع تحلهم مركزة باش مادير حتى غلط ..
- تدق الباب ( هزات راسها طايحين عينيها على شخص داير نظارات شمسية مع تيشورت فالݣري وتجاكيط فالكحل وقف قدامها مزول نظاظرو بصوت رجولي غارق )
.... : السلام عليكم
حياة : وعليكم السلام
.... : كاين طارق أنا صاحبو ݣولي ليه عز الدين
حياة : لا هو راه مكايكونش هنا بزاف .. كاين فالبيرو ديال المعاريف
عز الدين : او سمحيليا ( غوبش ) واش مابقاش شيماء هنا ؟
حياة : لا مابقاتش حاليا كاينة غير انا
عز الدين : بوراس حطك هنا علاش مايديك عندو تم ( يلاه اتجاوب دخل طارق )
طارق ( شافيه وفيها ) إيمتا جيتي انت ؟( سلم عليه سلام رجولي )
عز الدين : من المطار للعندك اخويا .. ݣلنا غانلݣاوك هنا
طارق ( ببرود ) خويا خليك هنا شوية وراجل ( شاف فحياة ) حياة اجي معايا
حياة وقفات تبعاتو مافهمات والو مستغربة من هاد البرود ماقال لا سلام لا كلام .. دخلات معاه للبيرو ردخ الباب حتى قفزات من بلاصتها
طارق ( تسيف عليها ) كيفاش بلانك انتي .. الكلاخ نازل عليك ولا مرة مرة كيهرب ليك الفرخ
حياة ( غوبشات ) مالي شنو درت ؟
طارق : نهار شفتك عرفتك خفيفة كطيري مع الطيور .. ولكن ماݣلتش داك طيران لي فيك يخليك تمشي تشوفي قو** مكتعرفيه مكايعرفك ومݣدمة معاك البنات ( بلعات ريقها ) الالة انت حرة فحياتك ولكن تݣدمي غيرك فهبالك لا الشريفة .. كون تعدا عليكم فين كتو غاتوليو واش كتفكري ولا داك العقل عندك غير متقلة بيه ( خبط البيرو حتى قفزها مغرغرين عينيها بدموع ) متبكيش ( غوت ) وياك تبكي واش هكا مالفة كديري كتمشي تلاݣاي برجال مكتعرفيهمش ؟
حياة ( هزات فيه راسها ) اش كتقول واش حماقيتي شكون انت بعدا لي دوي معايا بحال هكا .. با ولا والدني وناسيني ماشي شغلك
طارق ( خرج فيها عينيه خالعها ) شغلي الالة شغلي منين دهلة معاك بنت عمي شغلي .. الى انتي مهامكش راسك شغلك هداك
حياة ( بإنفعال كتبكي ) انا معارفاش معارفاش السيد نقي اي وحدة كتعارف .. غلط أه ولكن عمري وقع ليا هكا انا ماشي هكا انا مكنتعرف على حد شفتو نقي قلت هانية ماضنيتهاش باش تغوت عليا بحال هكا انت ما با ما والدني سير شوف راسك عاد اجي دوي معايا ( عاطياه بظهر جرها )
طارق : شكون هاد الز*** منين هو وشنو سميتو عندك مزال نمرتو كونطو
حياة ( دفعاتو) بعد مني ، ربح بهاد الخدمة شدها عندك ( حلات الباب وخرجات كتبكي تحت انظار عز الدين
عز الدين ( شاف فطارق ) اش درتي البنت ( خرجات من الشركة بلا ساك بلا والو )
طارق ( شد على راسو ) زبل ( ضرب يدو مع الحيط )
عز الدين : نمشي نتبع البنت ، نقص شوية من هاد العصبية اصاحبي
طارق ( شافيه ببرود ) شوفو شكون كيدوي ( عز الدين مداهاش فيه خرج تابعها ) ..
توجهات لواحد الجردة كتجري ݣلسات على اول كرسي كتشهق بالبكا .. حسات بشي حد کلس حداها هزات فيه راسها لقاتو عز الدين
عز الدين : طارق راه غاهبيل واش بنادم يديها عليه
حياة ( كتمسح دموعها ) ماشي من حقو يغوت عليا .. هو مكايعرفنيش مزيان ݣاع ولد عمو مزوج بنت خالتي ولكن هدا ماشي حق يغوت عليا ..
عز الدين ( بإستفهام ) أنت بنت خالت عنبر مرت فاروق ؟
حياة ( شافت فيه ) أه كتعرفها ؟
عز الدين : لا مكنعرفهاش مرة وحكة كانت تقهوات هي وفاروق فالقهوة لي عندي برات كازا .. غاتعجبك الى شتيها ( شافها ماتبسماتش ) طارق راه فيه غير ديك النوضة ولكن ݣلبو بيض ..
حياة : قلبو بيض ويغوت عليا ويطعن فيا ؟
عز الدين ( حك حاجبو ) شنو وقع بيناتكم الى بغيتي تعاودي ( تبسم ليها ) حسبيني خوك
حياة : تنهدات بلاما ندخل فتفاصيل عارفة راسي غلط حيت تعرفت على واحد السيد .. واول لقاء بيناتنا خديتي معايا ختي وماجدة بنت عمو ولكن والله مكنت عارفة بلي داك خونا مزعزع فعقلو وغايدير مدار ولكن الحمد لله خرجات طريقة وانا عرفت راسي غلط وعمري نعاود ولكن باش يغوت عليا ويتاهمني بلي انا كنخرج مع رجال ومالفة لا عمر شي حد غلط فيا قالي خفيفة ماخلا مقال مانساش هو راسو سكايري لاخور تفو ..
عز الدين ( جاتو ضحكة دور لسانو وسط فمو ) هو ماشي سكايري ( شافت فيه ) داوي معاك
حياة : حيت صاحبك كدافع عليه
عز الدين : لا ماشي كيستيو ديال صاحبي .. أكنوضحك ليك كيما هو غلط فيك انتي غالطة فيه ، بنادم احياة راه مغايجيش ويعرفك الى مكان قريب منك فهمتي البلان ..
حياة : لا راه باين كيفاش تصرف .. الانسان راه كيوقع فالغلط وكيتعلم وانا عارفة راسي غلطت وتعلمت خديت قرار نديها فخدمتي وقرايتي راه حنا بنادم
عز الدين : الإنسان فهاد دنيا راه الى ماتحك مكايعرفش شلا حوايج كيكون غافل عليهم .. وأولهم مايتيقش فالواحد كيما بغا يكون نوعو انا ومتيقيش فيا ( شافت فيه جاب ليها ضحكة ) داوي معاك انا كامل عيوب من ساسي لراسي بو بنات مكنسواش وكنݣولها لبنادم نيشان بغيني ولا كرهني ولا عاود ل( حبس الهضرة شافت فيه عرفاتو كان غايخسر الهضرة )
حياة : فهمتك
عز الدين : طارق غير مكتعرفيهش ، فشكل داك السيد هو أه عصبي ولكن ماشي على الخاوي على العامر .. كون كانت هامو غير ماجدة ايصبنها هي حيت مشات معاك ولكن هو جاك انت حيت مابغاكش تعاودي نفس البلان .. غير ماعرفش يدوي ..
حياة : جرحني والله القسام حتى ديك الخدمة ماعندي مندير بيها ..
عز الدين : اتي نوضي نعلي شيطان .. الالة انا نصبنو ليك نݣوليه ختي ماتبقاش توصلها ( تبسمات ) ضحكتك زينة العفريتة دوماج خوك زهواني اما نصيد حسك ..
حياة : لا صافي توبة من طريق رجال اخر مرة نطوف جيهتهم ..
عز الدين : حسن فينا افريع الراس ، زيدي كملي خدمتك ماتلقايش خدمة بحال هادي وطارق سهي فصالير ..
حياة ( تنهدات تنهيدة طويلة او وقفات ) واخا اعلى وجهك ..
عز الدين : الرضا ..
- رجعات مع عز الدين للمكتب .. لقاو طارق ݣالس ، تنهدت ومشات للبيرو ديالها
عز الدين : دير عقلك أصاحبي ، البنت مكانتش عارفة تغلط فيها حشومة
طارق ( هز فيه راسو ) عاودات ليك ؟
عز الدين : معاوداتش معنات وانا فهمت .. بحال الى انت زعمة مكتغلطش
طارق ( بتحدير ) عز الدين بعد من السيدة من العائلة ( قاطعو )
عز الدين : البنت حسبتها ختي ، عارف اش كندير كنفرز بين بنات ديورهم وبين الخفيفات لي باغيين يديروها خاوية فعامرة
طارق : انا غادويت الخبار فراسك ( وقف ) خليك هنا
عز الدين : طارق ( بتهديد ) دوي مݣاد مع البنت ( شافيها بإستغراب) سمعتيني دوي مݣاد
طارق : السيدة يلاه عرفتيها وليتي دافع عليها
عز الدين : داكشي ديال الله .. عطاه طارق بظهر ومشا للعندها ماهزاتش فيه راسها جر الكرس وݣلس مقابل معاها
طارق ( ببرود ) مزال عندك نمرتو كونطو ؟
حياة ( شافت فيه ) كونطو لا حيت مسحت تيندر
طارق ( عض على شفتو ) واش كاين شي واحد كيدخل لدوك تطبيقات ، راه فيهم غير الهوبال غير المرضى لي باغي يفرغ كبتو فبنات الناس
حياة : ماكنتش عارفة .. سمعت شي بنات معايا فالقرايا قالو بلي فيه ناس مزيانين وكيتعرفو فيه انا قلت غير نجرب مانويتش شيحاجة خايبة ..
طارق : شتي داكشي ديال شحال هذا ابنتي راه مابقاش .. دابا بنادم ولا مريض شتي لي خدام وبعقلو مكاتلقايهش داخل لهاد التخربيق الخاوي حيت عقلو عامر
حياة : الواحد كيغلط السيد كيبان نقي وقال بلي هو فالبوليس ، مجانيش لبالي ݣاع ايكون هبيل خرجها منا خلعة راه شحال وانا مريضة بليل كنفيق قافزة كنحلم بيه واقف عليا ..
طارق ( عض على شفتو ) واخا عطيني نمرتو ( حلات ساكها جبدات تيليفون وجبدات نمرتو لي كانت مبلوكياها ) فاش تعارفتو انتي لي عطيتبه نمرة ولا هو ؟
حياة : لا هو عطاني نمرتو وقالي نسيفط ليه فالواتساب
طارق : صافي مزيان ( بقا ساكت ) جمعي هادشي هزي ساكك واجي
حياة ( هزات فيه راسها ) لفين !
طارق : غاتخدمي معايا فالبيرو ديال المعاريف .. ( بقات كتشوفيه تحت سنانو كمل ) تحت عينيا ، أنت خاصك تعمري وقتك بخدمتك وقرايتك باش ماتبقايش تفكري فالخوا الخاوي .. خرج من البيرو خلاها متبعاه بالعين ساهية فكلامو ..
بعد مرور أسبوع
- فحي من الأحياء الشعبية المتوسطة .. وصلات واحد الپيكوپ محملة بالرحيل .. وراها كانت طوموبيلت عماد نزل منها هو ومعاه أمينة وأريناس ، حل عماد الباب ودخلو للدار لي كانت خاوية ومبهجة سراجم كيطلو على الزنقة كانت عبارة على بارطما ودار جات فطبق الثاني والسطح مشروك ..
عماد ( وقف بإبتسامة باهتة ) لالة امينة هاهوما سويرتات 3 شهور ديال الكرا مخلصين والى بغيتي شيحاجة وخصاتك شيحاجة ݣوليها ليا ..
أمينة : لهلا يخطيك اولدي كيفما وقفتي معانا بغيت ربي يوقف معاك ويعلي مقامك والله يسهل عليك ..
عماد ( تبسم ) اللهم آمين ( شاف فأريناس ) تولي أريناس لاباس ونشوفو ليها شي خديمة إن شاء الله وعلاش لا دير باك ليبر إن شاء الله هاد العام تشد الباك ديالها ..
أريناس ( بإبتسامة دافية وصوت باهت ) إن شاء الله ..
عماد ( رجع شاف فأمينة ) نهار 20 فشهر غادي تكون واحد الندوة ، غادي نجي نديكم إن شاء الله بغيتكم تحضرو ليها صافي ؟
أمينة : إن شاء الله اولدي
عماد : تيليفون عندك لي خصاتك علميني ، يلاه خليت ليكم الراحة السيد لي مكلف برحيل راه مخلص وغاتلقاو حتى الماكلة فثلاجة ..
أمينة : الله يسهل عليك الله يرضي عليك الله ينقي طريقك من الشوك ( بقات تابعاه بدعاوي حتى مشا .. اما هي رجعات مقابلة الرحيل لي كيدخل باش تبدا تستف هي وبنتها كل حاجة فبلاصتها ) ..
~~~~~~~~~~~
فالكوزينة ديال الفيلا دروطال واقفة فالكوزينة هي وحياة وليالي كيمسحو فطباسل ويقادو فيهم ، ويحطو فوق البوطاجي ..
حياة : هادوك الوحوش إيمتا غايتحكم عليهم ؟
عنبر : واحد شهرين هادشي لي قال عماد للفاروق .. الصراخة بقا فيا مسكين عماد والله غير فهاد السيمانة ضعاف .
ليالي : لي داز منو راه ماشي ساهل عرفتي شنو تعرف مك مع العصابة راه خايبة حتى لمعاودة
عنبر ( تنهدات ) وايااه ياختي .. كنا غادي نسافرو انا وفاروق ولكن قلت ليه ماشي دابا ، حتى يدوزو لوخرين فالمحكمة نشوفو بشحال غادي يتحكمو ونتهناو ويكون خوه ولا شوية ونمشيو ..
حياة (بإبتسامة ) مزيان الله يسخر نيت ترتاحي وتكون اول تسافيرة انتي والموسيو ( غمزاتها كضحك )
عنبر : كيجاتك الخدمة فالبيرو جديد ؟
حياة ( خسرات سيفتها ) متفكرينيش تمارة والله مكنحك راسي بالله ، من القرايا لخدمة كندخل لدار مهدودة
ليالي ( ضحكات ) وليت كندخل لدار كنلقاها صلاة مع كنحطو العشا كنشوف سيدة كتاكل وكتكمع بنعاس ..
حياة : كولشي من داك بوراس ديال طارق ، مكايخليش ليا الوقت فين نتنفس ( شافت فعنبر ) شكون جاي اليوم بعدا ؟
عنبر ( كتكمل فالمسيح ) العائلة كلها عمي ادريس وعمي عبد الخالق وبا علال ݣولي العائلة كلها .. عيطت حتى على عزيز وعمي عبد العالي وخالتي بهيجة .. سونيت لرشيد ولكن قاليا كاين فجديدة هو وماريا ( حبسات المسيح وفاللحظة غرغرو عينيها بالعة ريقها ) فخبارك رشيد غايتحول من كازا ..
حياة ( خرجات فيها عينيها) حلفي بالله فين غايمشي ؟
عنبر : جاتو كونطرا لألمانيا وغايمشي غير غايتأنسطالا وغادي يدي مرتو ، بقا فيا الحال واخا مابقيناش كنتلاقاو بحال لول ولكن ضرني قلبي عمري نسا خيرو ولا وقفتو معانا ( غرغرو عينين حياة بدموع عنقات عنبر وبداو كيتبكاو )
- أش واقع ؟ ( ضارو على صوت الروطال لي دهل لكوزينة .. عاقد غوباشتو كيشوفيهم بإستغراب) مالكم .. ؟
ضارو بجوج لعندو كيشوفو فيه .. مسحات عنبر دموعها وتبسمات ..
عنبر : والو غير تفكرنا ليام لي دازو وصغر ودارنا هادشي لي كان ( بدلات الموضوع ) قربو يجيو ولا مزال ؟ التريتور مزال كاعما وصل ..
الروطال : غادي نسوني ليهم نشوف ( خلاهم وخرج )
عنبر : كون قلت ليه كنبكيو على رشيد كون خشانا بزوج فلاڤابو .. قلبوها ضحك مكملين توجاد دخلات عليهم تودة شافت واش خاصهم شيحاجة ورجعات لعند رشيدة وسميرة للصالون شادين جماعة والحتيت ..
- وصل التريتور جايب الماكلة الغدا و العشا وديسير حتى هو .. حط كولشي فالكوزينة كان خاص غير يوصل الوقت وتسخن كل حاجة وتحط ..
- وصلات العائلة كلها كل واحد فطوموبيل .. خرجات عنبر من الكوزينة لابسة فراشة فالبيج مع شال ديالها وساعة فيدها فتحات الباب وكانت أول وحدة تسلم عليها هي رقية
عنبر : مي رقية ( عنقاتها ) توحشتك بزاف والله العظيم..
رقية ( شنقات عليها شنقة وحدة مدخلاها فصدرها كتعنق فيها وكتبوس ) حتى انا العزيزة توحشتك أكبيدتي ( نغزها علال بعكازو من رجلها باش تفهم راسها )
عنبر ( باست ليها راسها ) حتى أنا امي توحشتك
رقية ( شافت فيها بحب ) كلمة مي خارجة من فمك كي شهدة كبيدتي ( دخلات )
علال ( عنق عنبر بايس ليها راسها باست ليه يدو ) كيدايرة أبنتي لاباس عليك
عنبر : الحمد لله أبا بيخير انت لاباس ؟
علال : غير شتك وليت كيسبع ( تبسم بايس راسها خلاها فرحانة بهاد كمية الحب لي كتشوفها من هاد الناس )
أدريس : بنتي لاباس عليك على سلامتكم
عنبر ( باست ليه يدو ) الله يسلمك اعمي دخل .. توجهات للعند ماجدة سلمات عليها هي ودنيا) قفرتيها من عند حياة أصݣعة
دنيا : ياختي هو لي زيرني انا جيني حتى لطارق كنݣر بلا عصا .. وهوما كيتسالمو كان عبد الخالق كيتسناها تسلم عليه ..
عبد الخالق ( عنقها مزير على ظهرها ) بنتي على سلامتكم
عنبر ( عنقاتو بايسة ليه يدو ) واش فخبارك ( بإستغراب)
عبد الخالق ( مدارك الموقف ) يلاه سقنا الخبار انت مزيانة ؟
عنبر : الحمد لله .. وصلات طوموبيلت طارق جاي معاه عماد وراشد وعصام ، سلمو عليها ومشاو للعند الروطال لي خرج للعندهم ، خلاهم حتى دخلو وتوجه لعندها
الروطال :كتسناي شي واحد خور ( بإستفهام )
عنبر : عزيز دارهم تعطلو
الروطال ( بملامح باردة طلعها ونزلها ) الى جا عزيز انا غانتلݣا ليه دخلي اعنبر
عنبر ( شافت فيه ) اويلي مالك؟
الروطال ( من تحت سنانو ) ودخلي انبقى جاري معاك فالهضرة أعنبر .. والى بغيتو تحطو العشا ݣوليها لحياة ولا دنيا وماجدة يسخنو ويحطو تبقاي تلواي غادية جايا ݣدام صالة درجال دخلي ( خلعها ) ..
عنبر ( طلعاتو ونزلاتو ) الله يستر ( ضربات فيه ودخلات ) ..
تجمعو الرجال فصالة وحدة من بعد ماجا عزيز وتجمعو العيالات فجهة وحدة .. تودة مخشية حدا رقية كيتحتو ..
رقية ( بالهمس ) علاش ابنيتي سكتي وخبيتي عليا علاش ماݣلتيش ليا انتي هي ديك العويتقة لي بغاها ولدي ، وعندك معاه بنية
تودة : اش غانݣول أمي رقية ، البكا من ورا الميت غير خسارة ماعندي مندير ولا نݣول الشكوى لله سبحانه ..
رقية ( غرغرو دموعها ) والله حتى فرحت فرحتي بدنيا عزيتي عليا من نهار شتك ، شوفي ربي كبير سبحانه .. من وسط هاد دنيا عنبر تاخود ولدي فاروق وتصدق حفيدتي ربي كبير الحمد لله وشكر لله ..
تودة : الحمد لله امي رقية ، ربي كبير سبحانه غير هو خايفة نهار تعرف بنيتي خفتها غير ماتحملنيش وانا راه مادرت لا بيدي ولا برجلي
رقية ( طبطبات على يدها ) ربي كبير ماتخافي من والو دابا ربي يصاوب إن شاء الله .. بالفرحات عليها تكون عندها حنينة بحالك ..
كملوها بالهضرة وجموع جابدين كاع المواضيع .. حتى نطقات رشيدة
- توما ماشتوش تودة جاها عريس ( شافت فيها تودة مصدومة ماكرهانش تقوليها اللقوة العسرية )
عنبر ( كضحك ) ايه ماما راه زينة مازال يجيو فيها الخطاب ، وزينة رجال العينين زرقين وبرزقو
تودة ( تزنݣات ) داكشي لي خاصني غير زواج الضحك نايض حتى شاب عاد علݣو ليه حجاب ( رقية شافت فسعاد ماعجبهاش الحال هي ناوية تزوج تودة لعبد الخالق وربي كبير لي تحرم منو هدا شحال بغات تعوضو ليه )
عنبر : اويلي على شاب مزال الحال قالاك اماما الله يهديك .. انتي راسك قاصح ومابغيتيش
بهيجة : عندها الصح مزال صغيرة قالاك
تودة : الله يكبر بيك أختي بهيجة لاواه ، أنا براكة عليا انتوما هلي وحبابي ماعندي مندير بشي زواج
رقية : ياويلي توما خليو سيدة عليكم .. هي لي عارفة تاعداك ابنتي الحاجة لي تقلقك ماعدك مديري بيها .. ( ناضت عنبر عند سعاد )
عنبر : خالتي سعاد تقدي انت وحياة تسخنو الغدا ؟ فاروق حرم عليا ندوز من حدا صالون درجال .. ماعرفت مالو حتى هو معايا بقا ليا انزحف باش مايشوفني
سعاد ( ضحكات عاجبها الحال ) هديك الغيرة ابنيتي ، خليك انا نوض ( وقفات ) بنتي حياة انتي ودنيا وماجدة أجيو معايا الله يرضي عليكم .. تبعوها للكوزينة والبقية بقاو مجمعين ..
رقية ( موجهة كلامها لبهيجة ) ايوا لالة بهيجة الولد ايمتا ناوي يكمل دينو حتى هو ؟
بهيجة : والله ماكرهت الالة رقية ، يلاه كمل دويرتو الحمد لله ودابا كاين واحد الݣاراج ديال باه .. راه بغا يعمرو بالمواد الغذائية
رقية : مزيان الله يسخر نهار ينوي ݣوليها ليا .. انا نزوجو نشوفليك بنت الناس يستاهل وليدي زينة البنات عزيز عليا داك دري الله يرضي عليه مرضي ..
بهيجة : اللهم آمين ياربي الله يخلي ليك صحيحتك الالة رقية ..
× عند الرجال ×
الروطال ( موجه كلامو لعزيز ) انت عمر المحال مزيان يكون مغيز من كولشي .. وباش تصرعها دير شي ڤيترينة فيها الخبز وبتي پان
عزيز : أخويا خاص نشوف شي قنت منين نجيب هادشي ماعنديش لي غايوجدو فهمتي البلان
الروطال : ضربها عليا ايولي دري يوصل لك .. حتى دير الكليان ولي تخلص
عزيز ( تبسم ) الله يكبر بك ولكن اخلي حتى يتمشى المحال ونزيد هاد اللعبة .. يكونو الفلوس موجودين ..
الروطال ( عجبو عزيز وعزة النفس لي فيه ) الي بغيتي المهم نمرة عندك الوقت لي بغيتي سوني ونداكرو
أدريس ( من الجهة لوخرى ) مالك اخويا داخل ساخط ؟
عبد الخالق ( مغوبش ) سمعتهم كيدويو تودة جا شي حد خطب فيها
أدريس : وايلي !! ..
- يكذب عليك الكاذب لي يقولك الحب دصح تݣد تمحيه السينين .. الحب عمرو مايتمسح ولاو يدوزو اعوام وأعوام وهادشي لي كان حاس بيه عبد الخالق ماحيلتو لبنتو لي مقادش يقوليها بلي راه هو باها ولا لتودة لي جاو فيها الخطاب ݣالس بحال الى ݣالس فوق الشوك ..
تحط الغدا كان بنين .. الكل مشارك جو واحد كيحاولو يخرجو عماد من داك الإكتئاب لي عايش فيه ماجبدوش موضوع خديجة حسبوها بحال شي وحدة ماتت كيحاولو يداويو بعضياتهم ..
دنيا ( كتحلف ) والله اختي ماكنت غانخرجها من فمي راه هو لي حبسني .. أنا مالقيت منقول ليه وحصلني كندوي فتيليفون صافي طلقت كولشي
حياة : عرفتي اش دار ليا بحال الى انا مالفة ، عصبني وجابني للبيرو حداه نخدم باش يبقى عاس عليا بحال الى ولدني ونساني ..
دنيا : واش خدا عندك نمرتو ( حطات المعلقة من يدها )
حياة : أه خداها ولكن ماعرفتوش شنو بغاها .. زعمة يكون دوا معاه !!
ماجدة : غايكون دار كونط بسميت بنت باش ينتاقم منو بحال والو ( شافت فدنيا ) عقلتي فاش كنا صغار وكان واحد ديما كيتبعني وقلتها ليه .. لبس جلابة ودار النݣاب وتبعني غير بان ليه شنق عليه هلكو عصا خلاه مجبد فطريق ..
دنيا ( كضحك ) أه عقلت عمرها تنسى ليا
حياة : انا غير يفوتني عليه .. ندير خدمتي ونمشي بحالي ، مزال هضرتو محفورة ليا فراسي
دنيا : سمحيليا ماقصدتش وحتى طارق راه مخايبش بالعكس ( تنهدات ) فالوقت لي بدا كيكبر وكيكون بابا خدم كان كيرض لينا الباب والله .. همل راسو من داك نوع لي مكانش يخرج ويݣلس مع صحاب ولا يتصاحب مع البنات كان راض معانا حنا البال ..
ماجدة : وايااه مسكين طارق والله مكاين بحالو ( شافت فيها حياة ) ماشي كنشكرو حيت ولد عمي ولكن هو راه حاسب خويا دازت عليه وكافح لا هو لا فاروق بحال بحال .. وحنين ها دنيا تقوليك هو الوحيد لي كان يمشي يشوف مو ..
دنيا ( ببرود ) وكون غير تستاهل عند بالو تبدلت وهي كانت بغات غير تپروفيتي فيه ، وتلبقو لشي وحدة كيعرفها راجلها فاش عاودها لينا بغيت نحماق مارضيتش هادشي علاش انا عمري مشيت عندها ولا دويتها ..
حياة ( بعطف ) شحال من واحد خاصو ام وشحال من واحد خاصو اب انا نيت هاني با مكنعرف عليه والو من نهار سمح فينا ولكن ربي يخلص كل واحد
× عند الرجال ×
كالس وعقلو مامعاهش .. دايز سيناريو بين عينيه كيشوف فعينين لي خدامين معاه نظراتهم ليه ، دارت بوم فالمديرية بلي أم عماد كانت من ضمن العصابة لي تشدات .. واخا كان فارض إحترامو عليهم ولكن نفسو وكرامتو مكتسمحش ليه يشوف دوك الشوفات وتوشويش بين الموظفين ( خلاهم كيخضرو وناض تحت انظار الروطال لي غير شافو خرج وتبعو ) ..
- توجه لجهة المربط كيتمشى كيضرب فيه الجو الدافي .. هز راسو بان ليه الروطال جاي قبالتو
الروطال ( حط يدو على كتفو ) شوية كيكاتحس ؟
عماد ( تنهد) شوية الحمد لله ( بقا ساكت مدة وشافليه فعينيه ) مغاديش نبقى فكازا
الروطال ( غوبش ) بحالاش ؟
عماد : دفعت للإنتقال ، تفوت المحكمة ديال ( بغا يقول الواليدة وماقدش يخرج ) ديالها ودوك لي معاها غادي نتحول لأݣادير إن شاء الله ..
الروطال داخ نزل عليه هاد الخبار بحال شي سطل دالما متلج .. بقا كيشوفيه بإستفهام
الروطال : تا كيفاش اتمشي واش تفربلتي ولا مالك .. زير معايا اجمي ، واش انت لي باغي ولا هوما مسيفطينك ؟
عماد : انا لي باغي الى بغيت نكمل فهاد ضومين خاص نبدل المدينة .. لنادم ولا داوي عليا فالخدمة توشويش ورا ظهري شي نهار نفخ شي حد اللهم نخوي ..
الروطال : شكون جد مت بات هاد الق*** لي غايدوي علك ولا ينعت فك .. واش مريض باغي ديها فكوانب رعاوين
عماد ( بجدية ) ندويو بلوجيك أفاروق ، راه مي هاديك لي مع العصابة راه الواليدة أصاحبي تا عارف شناهي مك تلقاها مع غراقة مغرقينها فضايح .. من حقهم يدويو مفتش الشرطة عماد حيدر مو غاطسة للقاع ..
الروطال : ومن بعد راجل وزايدون كنيتك حيدر ولا كنيتك رابح ، تا حيد عليا من ضسارة
عماد : صافي أخويا انا بلانيت غانخوي .. دوز المحكمة مغانبقاش إن شاء الله ، غاتكون عندي واحد 15 يوم فرباط من وراها غانزل نيشان لأݣادير بديت كنقلب على شي دويرة تم ( تبسم بعياء ) عمركم وصلتو لدوك الجوايه توليو تجيو لعندي إن شاء الله ..
الروطال ( تعصب ) برب هادشي مكايضحك ݣلتيها لواليد ؟
عماد ( هزهز براسو ) فخبارو فخبار حتى عصام وطارق
الروطال : وشنو ݣالو لك ؟ والعميد أش ݣال لك ؟
عماد : داكشي لي ݣلتيه ݣالوه .. ولكن صافي اخويا خليوني مرتاح والله واصلة بيا لهنا براكة ، العميد تفهم واخا راه لحد الساعة الراس الكبيرة ماتشدش ولكن تصويرتو كاينا عندنا مغايݣدش يدخل للمغرب دابا ..
الروطال ( أشربيدو ) صبر ( كيسمع لتوشويش ) أنا جاي .. توجه للجهة فين كاين الأدهم كيسمع صوت انثوي او بالأحرى صوتها ..
عنبر ( كتوكلو ) هاك كول أحبيبي ، هداك الجحموم كاعما وكلك من الزردة ديال اليوم ( حرك راسو ليها ) ياك انا راه كنفهمك ازين صافي والݣد الوافي قطيب الخزران عطيني بوسة ( حرك ليها فمو بحال الى فهمها .. باستو ) انت راه زين ..
الروطال ( مقفزها ) داكشي لي كان خاص غاتمدي ليا شلاقمك ليه ..
عنبر ( تفات فكمها ) بسم الله الرحمن الرحيم .. غير بشوية خلعتيني ومالك ياك نقي وزين شنو فيها ( تبسمات ) هدا راه الكبيدة
الروطال ( كيدوي بجدية ) زدتي فيه شوية لا ؟
عنبر : علاش
الروطال : ݣتلك خطي جيهتو ، دويت يمكن غانبقى غير نعاود فهضرتي ؟
عنبر ( بإستغراب ) مافهمتش وقيلة نهار الاول كنتي قلتيها حيت انا وياك كنا جوج .. دابا ولينا واحد !!
الروطال ( مكايحركش البؤبؤ دعينيه ) وأنا هادشي علاش داوي مكنبغيش الشريك امدام فحاجتي وانتي ( مورك عليها ) ديالي تمدي شلاقمك للحيط نريب مو ديري عقلك ( بصوت خطير أشبه بتهديد ) ديري عقلك أعنبر ..
عنبر ( بقات كتشوفيه بعدم إستيعاب ) فاروق هذا راه غا حيوان واش داوي من نيتك !
الروطال : داوي من ريتي ( ببرود ) وكلتيه زيدي ݣدامي ( حطات لي فيديها وتبعاتو ساهية فهضرتو جاها بحال شي حمق هز عماد راسو فيها وقفات قبالتو )
عنبر : خويا عماد كيبقيتي ؟
عماد ( هزهز راسو ) الحمد لله ، الله يرضي عليك على مادرتي مجابتهاش الوقت حتى لدابا
عنبر ( بإبتسامة تحت انظار الروطال لي كيحقق فيها ) ماشي مشكيل .. المهم هو الحمد لله تشدو وتهنينا
عماد : الراس الكبير مزال ماتشدش .. ولكن الساس مشاو فرجلين
عنبر : وايلي واش راس الكبيرة ماتشدش ، علاش هداك ماوراكمش فين كاين ؟
عماد ( بنفي ) لا ولكن عطانا المواصفات ديالو ، السيد مغربي كيدخل ويخرج للمغرب ( هز التيليفون ديالو جبد صورتو المرسومة لي صورها بتيليفونو ومدها ليها ) هاهو ..
عنبر ( حطات يدها على فمها بخوف وصدمة هزات عينيها فعماد ناطقة بصوت مرعود ) أويلي هذا سي حسن الݣزار ..
يتبع...
اويكويك تي كيفاش حسن الجزار!! 😱