محتوى القصة
- حياة حازت الساك وݣلسات حداها :
وعدك الصوت ياختي صدمتيني أنا بعدا ، ولاهيلة صوتك داير بحال دنيا باطما نهار غنات خربوشة والله حتى بورشتي ليا لحمي ..
- عنبر : ( كضحك) دنيا باطما ݣاع زدتي فيه لا
- حياة : قسما بالله الله يعطيني سوقوط شتي فاش غنات خربوشة وصوتك بحال بحال سبحان الله العظيم .. ديك البحة وديك الهيبة راه انا واخا كت ساكنة أفلعروبية راه عندي ودن سماعة كتعرف تميز بين صوت زين والخايب
- عنبر : ( سرحات بعينيها ) وغير البركة وصافي ( شافت فيها ) كنموت على العيوط وكنحماق على العيوط كنت مبلية بيهم فصغري العرس لي كان عندنا ديك ساع فالبلاد تلقايني مخشية فيه إيه على الأيام (تبسمات )
- حياة : ربي ربي راه كنت كنعقل ديك الساعات فاش كنا صغار كنتي تموتي على العراس
- عنبر : (ضحكات) واييه كانو يݣولو ليا لالا أنت غاتكوني غير شي شيخة ولا مع العونيات ( ضحكات) .. كانت ماما الله يرحمها ديك ساعات خدامة وكانت كتخليني مع خالتي فاطنة ( غوبشات بحال الى تفكرات شيحاجة ) أجي عقلتي على خالتي فاطنة ؟
- حياة : ( كتحاول تفكر ) لا شكون ؟
- عنبر : أويلي خالتي فاطنة لي كانت مع حْمْد ورباعتو كدير تاشياخت نسيتي .. ماعرفتش فين هي كانت ماما كتمشي للخدمة وكانت كتخليني معاها كترض ليا البال مع ماما كانت كتخرج بكري وكانت خالتي فاطنة تديني المدرسة وتجيبني وتغديني .. وفاش كتكون خدامة كتديني معاها راه بسبابها باش وليت نموت على العيوط ( سرحات بتفكيرها لزمان ) كان كل عرس ولا سبوع كتديني معاها جنبي لجنبها كانت تهلا فيا ماعرفت فين مشات ؟
- حياة : والله ياختي مابقيت عاقلة كنت صغيرة ديك ساعات ، كنا كنجيو عندكم انشوفوكم ونرجعو لسطات قبل ماطلق مي من با .
- عنبر : ( كتحاول تفكر ) اخر مرة كنت شتها فاش كانت عندي 12 عام فاش كنا تحولنا لمحمدية من تم مابقيت عرفت عليها خبار .. علم الله فين هي مسكينة شحال كانت عزيزة عليا .
- حياة : دابا ماعرفنا فين غانمشيو ؟
- السلام عليكم .. ، هزات عينيها فصوت الرجولي لي رما عليهم السلام كان راجل فالأربعينات من عمرو لابس قميجة فالأبيض مع كوستيم فالأزرق بلو مارين .. داير طربوش فالابيض فيه سينتة فالأزرق بحال لون الكوستيم مع سروال ديال الدجين .. صباط موكاسان رجالي فنفس لون الكوستيم .. مزين عنقو بتسبيح حتى هو فنفس اللون .
- عنبر : ( بشك ) وعليكم السلام
- ( مد ليها يدو ونطق مع إبتسامة ) أنا رشيد
- خلات ليه يدو ممدودة ولات خايفة من خيالها من ݣاع داكشي لي داز عليهم :
ومن بعد أخويا أش كاين ؟ ياك لاباس ؟
- رشيد ( تم جاي عندو خو العروسة ) راه دوينا معاك اصاحبي ( شاف فعنبر ) سمحيلينا اختي هدا رشيد صاحبي خدام فواحد الاوطيل سمع صوتك وعجبو وبغاك تخدمي عدهم ( رجع شاف فرشيد ) ورشيد ورشيد
- رشيد : ( مداهاش فيه ) صوتك واعر قسما بالله صوتك خطير ( خشا يدو فجيب لاڤيست ومدها ليها ) هادي نمرتي سوني ليا وحق الله حتى صوتك فن .. الى قبلتي تخدمي عندنا اندير ليك صالير مخير .
- بقات واقفة كتشوفيه مدات يدها للاكارط شداتها جرو صاحبو ومشا وهو كيتلفت ويشوف فيها .. خشات ديك الكارطة فساكها او وقفات هي وحنان
- حياة : واش غاتسونيليه بصح ؟
- عنبر : نديها فهبيل راه اشديتها من عندو يبقى واقف علينا تماك .. زيدي نشوفو فين نحطو راسنا نتوسدو الحيوط حتى للغد
- حياة : مانطلبوش دار العروسة يخليونا نباتو عدهم واخا غافسطح
- عنبر : (خشات يدها تحت دراع حياة) مدخلينا وموكلينا ويبيتونا .. سمعو العياط وراهم وقفو فدقة وضارو ، كانت السيدة لي ݣلسات حداهم هازة جلايل التكشيطة ديالها وتابعاهم حتى لحقات عليهم ، شافت فعنبر بإبتسامة :
تبارك الله وصلاة على النبي على صوت عدك غزال
- عنبر : ربي يخليك
- ماݣلتوش ليا واش عدكم شي واحد هنا ؟
- عنبر : ( شافت فحياة ورجعات شافت فيها ) لا ماعندنا حتى واحد يلاه غانشوفو فين نباتو
- ايوا شتي ربي جابني ليكم كي لميمون المهم أنا سميتي سعاد تݣدو تݣولو ليا خالتي سعاد ولا طاطا سعاد
- عنبر : ( بشك ) مشرفين اخالتي أنا نادية وهادي ختي صفاء
- حياة شافت فيها بإستغراب حيت كذبات .. جراتها سعاد من يدها غادية بيها وكدوي من وراهم كان واقف خو العروسة لي كان دخلهم عاقد غوباشتو شاف فصاحبو ونطق :
هاديك الميكروبة أش كدير مع دريات ؟
- ماعرفتش كتعرفهم انت بعدا ياك بنات تعشاو ومشاو أش بغيتيهم تا وشكون عيط ليها العرس بعدا ؟
- الواليدة ݣاتلك حشومة كانت صرفات فيها شي خير شحال هادي ..
- وصلو لواحد الزنقة بعيدة على الزنقة لي كان فيها لعرس بزوج زناقي .. هزات عنبر راسها فدار كانو ضواوها شاعلين واقفين قدامها زوج طوموبيلات ..
- سعاد : ( كتجبد الساروت من ساكها ) اتبقاو معايا هاد الليلة مرحبا بيكم منݣدش نخليكم فزنقة الذياب عطاهم الله أبنتي ..
- عنبر : ( كانت مقروصة ونفس الوقت ماعندها حتى حل كانت خايفة من البيانة فزنقة ونفس الوقت باغية شي سداري لي ترتاح فوق منو من ورا نهارها لي داز مكفس هي وحياة ) مغاديش نبرزطوك ياك ؟
- سعاد : ( ضحكات ) بالعكس مكاين حتى تبرزيط دخلي الكبيدة مرحبا بيك .. مع تحل الباب وحطات عنبر رجلها فالعتبة اول حاجة ضربات فيها هي ريحة الشيشة لي كانت كتعطي او واصلة حتى لعند الباب ..
- واقف ساهي عقلو معاها صوتها مابغاش يتنسى ليه من بالو .. شاف فصاحبو ونطق :
ݣلتها ليك أعزيز ݣتلك كون غير ماجيتش
- عزيز : تبت الارض اصاحبي عرس الخوادرية ومتجيش من نيتك ( كيفكر ) انا ݣلبي واكلني على دوك الدريات
- رشيد : مافهمتش انا شكون ديك خيتي لي ماحملتيهاش ؟
- عزيز : ( دوز يدو على لحيتو ) واحد الفاسدة ديال الخلا .. فاتحة دار وكتلݣط فالبنات من كل بلاصة وتجيب ليهم الرجال كل ليلة وتضرب الفلوس لجيبها على ظهرهم .
- رشيد : واش جابها لعندكم ؟
- عزيز : ( خشا يديه فجيابو ) الواليدة الله يسمح ليها كتفكر ليا واحد الخير دارتو فيها عام الحلبة كنت باقي صغير وبقات عاقلة عليه ، ݣاتلك جاتها عيب متعيطش ليها وفعايلها منها لي خلقها
- رشيد : ( غوبش ) وغادي نخليو دريات عدها تنوض تبيع فيهم وتشري مݣطوع بيهم الحبل ... شافرينهم وتزيدهم حتى هاد الميكروبة اصاحبي
- عزيز : ( بقا ساكت كيفكر حيد يديه من جيابو وشافيه ) مابلانش ( سبقو غادي خلاه تبعو بخطوات سريعة ) .
°°°°°°°°°°°°°°°
- حسات بالبرودة طلعات معاها من صبعها الصغير واحد الرجفة تخلطو عليها من ݣاع النواحي .. قالت يمكن مزال الخير فناس واخيرا أتنعس وترتاح ولكن نهارك لي مابغاش يسالي مزال ، بلعات ريقها قدام داك المنظر لي كانت كتشوف قدامها صالة كبيرة فيها زوج طوابل كبار محطوط فوق منهم بلاطويات عاملين بديسير والمكسرات بالأنواع .. مع قراعي ديال الشراب والبكيات ديال الݣارو مع الطفيات وزوج ديال الشيشات محطوطين .
- الصالة كانو فيها 8 ديال البنات كلهم فالعشرينات اللباس لي لابسين كانت كتشوفهم حنان غير فشي فيلم عمرها شافتهم فاص .. الݣلسة كانو متربعينها 4 دسال الرجال كاين لي لابس الكلاص وكاين لي لباسو عادي
- عنبر شافت فحياة وحياة شافت فيها .. عينين الرجال كانو عليهم واخا ملامحهم كانت مغبرة وجلالب ساترينهم ولكن كان زينهم البلدي باين للي ݣالسين .
- طاطا سعاد شكون هاد الفنون ؟ ( وحدة من البنات كانت هي لي بادرات بتسوال )
- سعاد : ( حطات يديها على كتف عنبر ) هاد الفنون غادي توجدي ليهم الدوش يدوشو ويرتاحو والهضرة من بعد
- عنبر : ( سحبات كتفها بشوية من يد سعاد وشافت فيها ببرود ) لا براك الله فيك حنا غاديين بحالنا .. حياة يلاه أختي
- سعاد : ( بإبتسامة ) ويلي على يلاه فين غاتمشيو فهاد الليل الزنقة راه مكاترحمك الحبيبة ..
- يمكن خافت ( ضحكات ) شتي هادشي غايجيك فالاول فشكل ولكن من بعد غايولي عندك ساهل ، ايولي عندك بحال الروتين كاع لي كتشوفيها قدامك هكا بدات
- عنبر : تبدا ولا تݣلس شغلها هداك وحتى واحد مدار ليها السيف على عنقها ولا بزز عليها فهمتي ولا مافهمتيش .. وكل شات كتعلق من كراعها إلى ساهل عندك انت وجاتك طريقو ساهلة شغلك هداك حتى حد ماحاسبك ولا عارفك من دزتي .. متحسبيش عليا لومتك
- سعاد : ولاواه لاواه راه ݣاع لي كتشوفيها هنا ݣالسة مرتاحة وفرحانة وعاجبها الحال .. اللهم دار تسترهم ولا زنقة
- عنبر : فالاخر تسترهم الروضة لا تاعي بقى لا وجهي تنقى .. اخرتها مدايرين مزيان فحياتهم مدايرينها مع ربي وسيري تقاي الله راكي كبيرة زعمة بحالك راه تصلي وطلب ربي يسمح ليها ..
- سعاد : ( غوبشات ) هاديك هاه ماشي دخلتك من زنقة طلعي ليا فوق راسي ودوزي تركني حسن لك
- وقويصحة السليعة لي جايبة اسعدوش منين جبتيهم ؟
- سعاد : ( شافت فيهم ) من واحد العرس
- عنبر : ( بصوت عالي ) قسما برب الكعبة ومتخلينا نخرجو بحالنا كنقسم ليك بالله لي شانو عظيم حتى غادي نضرب ليك اكبر طر يتسمع فكازا ونواحي .. لا يحسابليك شي بوجادية عاد حطها الكار احنينتي ولا شي وحدة مكلخة قسما بالله حتى نسيفطك لحبس لا انت لا هادو لي معاك نوريك الحريزيات اش كيسواو ..
- بدا الخبيط فالباب بجهد .. سعاد تنفضات من بلاصتها شافت فالبنات ونطقات بزربة :
جمعو هادشي دغية وخويو صالون .. بداو البنات كيتجراو خواو الصالون واخا الريحة كتكوخ مشات سعاد كتعطر فجلايلها حلات الباب جا وجها فوجه عزيز
- عزيز ياك لاباس اولدي ؟
لاح عينيه كيقلب عليهم رجع شافيها ببرود :
- البنات فيناهوما ؟
- سعاد : ( بلعات ريقها ) إينا بنات ؟
- عزيز : شوفي الله يرحم باك الليل هذا وليل سماع .. على وجه الجورة القديمة ديال شحال هدا متخلينيش نغلط فك وانت كبيرة ونجمعو الجيران .. واخا راه ريحتك عطات فالحومة من شحال هادي وريحة راها عاطية مع حليتي الباب البنات لي ديتي من العرس فيناهوما ؟
- تمات خارجة عنبر جارة حنان معاها هازة ساكها دفعات سعاد وخرجات لعندو :
خويا هاني
- عزيز : ( حيد ليها الساك هزو ) زيدي اختي الواليدة كتسناكم ( شاف فسعاد ) واخر مرة الله يرحم جدك رجليك يوصلو لدارنا ولا هاد المرة اتلݣاي البوليس وسط دارك انا علمتك .
- خلاها كتفتف معصبة وزاد معاه البنات ورشيد الطريق كلها وهوما ساكتين حتى وصلو حدا القاعة لي كانو ناسها شي مشا وشي مزال محيح مع الجوق شافيها عزيز ونطق بصوت رجولي :
ختي ماتبقاوش تيقو فالبراني هاد سيكتور راه صعيب شوية على لي عاد حط رجليه فيه
- عنبر : ( تنهدات بإرتياح ) أخويا كنا عوالين نشوفو اش زنقة هنا نعسو فيها حتى للغدا احتى تبعاتنا .. راه مباينش عليها كاع دوك الخصايل احتى دخلنا واحد المنظر كيعيف
- عزيز : وغانتوما لي زدتو مع طريق جيت نضور لقيتكم طرتو الصراحة ماكنتش غادي ندخل .. ولكن ماݣديتش باينة فيكم بنات داركم واصلا كون بقيتو هنا كنا نشوفو ليكم شي تصريفة فين دوزو الليلة
- عنبر : ( هزات شال لي طاح على كتافها غطات بيه راسها ) :
الله يرحم الوالدين أخويا الله يجازيك بيخير .. حنا مع العيا مافكرناش كنا باغيين غير نرتاحو
- رشيد ( تدخل ) : الدار ديال ختي خاوية الى بغيتو فين تباتو نديكم ليها .. هي مكتجي حتى للعيد الكبير وكتخلي ليا السوارت
- ضارت لجهتو عنبر شافت فيه بشك وشتفت فعزيز
- عزيز : ( بإبتسامة إطمئنان ) :
رشيد راه الله يعمر ليه الدار صاحبي وكنعرفو مزيان .. ماعندكم مناش تخافو منو راه بحالي بحالو الى كنتو معاه بحال الى كنتو معايا ماتخافو من والو .
- رشيد : الى بغاو راه تاخود نمرتك باش ترتاح كثر
- عنبر : لا مكاين لاش مدام ضمنك واخا الضامن هو الله ماشي مشكيل حنا نباتو هاد الليلة والغد نشوفو حل لراسنا إن شاء الله
- رشيد : واخا لي بغيتي نمشيو ؟
- عنبر : ( شافت فعزيز ) :
شكرا بزاف اخويا خيرك عمري نساه
- عزيز : الله اودي أختي هذا واجب راه عندنا خواتاتنا الحمد لله مانبغيوش ليهم الأدية .. والى خصاتك شيحاجة شدي نمرتي عند رشيد وسونيليا قيديها بعزيز
- عنبر : ( بإبتسامة إمتنان ) :
انا عنبر وهادي بنت خالتي حياة
- عزيز : مشرفين اختي سيرو تصبحو على خير ومتفكرو فوالو مايكون الخير .. مد الساك للرشيد شدو سابقهم حطو فطوموبيل طلع هو للقدام وطلعات هي وحياة اللور ، تبسم مهزهز براسو ديمارا وشد الطريق .
- بـــن ســلـيـمان📍
- فاش مكتلقايش الراحة فدار اهل راجلك وكتعرضي للضغط وللمعاملة الخايبة فاش كترجعي لداركم جنب الام ديالك كتحسي بواحد الراحة شحال هادي ماحسيتيها ... رجاء حسات براسها مرتاحة ولأول مرة من نهار تزوجات اتبغي تحط راسها على المخدة وتنعس وترتاح وحتى واحد مايفيقها .
- سميرة : ( كدوز ليها على ظهرها ) ݣاع هادشي دوزاتو عليك ديك اللفعا الله ياخود فيها الحق
- رجاء : ( تنهدات تنهيدة طويلة) تخايلي امي انا ناعسة ومامرتاحاش ناعسة وخايفة كنبقى نݣول الصباح ثاني خاص نفيق على نبوري نوجد الفطور ليهم ونفيقها تفطر .. وكون غير بنادم يعاملك مزيان كنجي غير نفيقها كتعطيني من المنقي خيارو
- سميرة : بحالك بحال مك ابنتي سبحان الله ماعندك سعد
- رجاء : أجي نسولك ( بتساؤل) شفت مرات با ظريفة وكتعامل زوين واش هي هكا نيت ولا ناوية على الغدر ؟
- سميرة : أش غانݣوليك من نهار جات عنري شت فيها شيحاجة خايبة الصراحة تݣال كتعامل زوين ، خلات باك جاب واحد السيدة تعاون نعيمة فالكوزينة ومنعاتني ندخل انا ݣاتلك مولات الدار خاصها ماتحطش يدها فالما ..
- رجاء : ( بإستغراب)
العجب شتيها كيفاش دوات مع مرات عمي ماقداتش تهز فيها الراس ، الصراحة وحق الله حتى عجباتني فيها وبردات ليا ݣلبي هي نيت لي تليق للبا
- سميرة : راه كتب ليها هاد الدار فسميتها وكتب ليها الارض حتى هي
- رجاء : ( ضربات فخاضها ) اويلي ستغفرت الله العظيم حلفي بالله امي وحنا ؟
- سميرة : إيوا حنا لينا الله سبحانه أبنتي هاد الساعة راه حنا ݣالسين ساعة اخرى يحن الله ، كون ايبغي راجلك يكري ليك بعدا انتهنا عليك معاه حتى الى شي نهار بغاو يجريو عليا نطلع عند خوك للطنجة نݣلس معاه
- شكون لي غادي يجري عليك أسميرة ؟ ... هزو ريوسهم بزوج جهة الباب لقاوها واقفة لابسة واحد البيجامة طويلة وجامع شعرها يديها مزيانهم بخاتم ديال الزواج وزوج براصليات .. جرات رجليها ودخلات ݣلسات على الكرسي مقابلة معاهم
- رجاء : ( شافت فمها ورجعات شافت فتودة بتردد ) حتى واحد غير كنا كندويو
- تودة : ( بصوت تقيل بارد ورزين ) عرفناكم كتو دويو .. راه سمعي مزيان ماشي سماكيت سولتكم شكون لي غايجري عليكم .. سمعتك اسميرة كتݣولي ليها طلعي لعد ولدك
- سميرة : ( شافت فيها بقلة حيلة ) ايوا منكدبوش على بعضياتنا أتودة .. الدار راه كتبها ليك المعطي بسميتك وكتب ليك الارض حتى هي من غدا الى درنا هاشيحاجة ماهياش تحطيلينا حوايجنا فزنقة
- تودة : ( بلعات ريقها ومدة وهي ساكتة ) عند بالي ولينا هل وحباب ساعة انتوما نيتكم بحال القطران الكحل
- رجاء : مي لي فݣلبها على لسانها اخالتي كنشوفو بلي الضرة ديما مكتحملش لوخرا .. مي غير درويشة وبيناتنا علاش با مكايتبش الدار لينا حنى اولادو وكتبها ليك انت وسمحيليا .
- تودة ( بجدية ) :
حيت انتوما كو كتو مطورات كون كتبها ماشي انت انت غير بنتو ( شافت فسميرة ) مك كون كانت ݣوطة ولالة ومولاتي كون كاع ماتزوج بيا .. وكون مايدورش بساحتي ݣاع كون ضرب ليها ألف حساب ولكن هي خلاتو دار عليها البردعة وركب عليها
- رجاء ( كتشوف بعينيها جهة الباب لا يكون جاي ) :
خالتي انت مكتعرفيش با .. راه كان شعرها كيلويه على يدو ويجرجرها عرفتي مي مسكينة شحال ديال العصا كلات عندو على جهد ، والى جينا ندويو كيخلطنا معاها واش خويا مسكين اجا وهز راسو ومشا لطنجة يخدم طججو وخلاه مشا بلا ميجال .. وانا لاحني لولد عمي وعارف مرتو ماتسوى ريال وشرانية بلاما ندوي على الناس لي شحال من واحد كلاه فرزقو .
- سميرة : هضري بشوية دابا يسمعك .. انت بعدا كيبقى باك مادويش فيه
- رجاء ( كانت مغلغلة باغية تفرݣع) با واش با غير بسمية داخلت عليك بوجه الله .. انا بعدا راه عمري عقلت عليه عنقني ولا ݣاليا أنا راضي عليك ولا عمرو حن فيا ولا دافع عليا ، وشتي عمي عمي وكنسمع منو كلمة الله يرضي عليك وكنسمع منو رتاحي ( بدات كتبكي ) مي الله يرحم الوالدين البو هو لي كيحن فولادو ماشي كيتكرفص عليهم عقلتي نهار حبسني انا وكريم فالكوري نسيتي ولا نفكرك ؟
- سميرة ( بترجي ) :
براكة أبنتي دابا يسمعك ونصدقو واحلين باركة عليك
- تودة : ناعس خلي البنت تخرج لي فݣلبها ترتاح
- رجاء ( شافت فتودة ) :
مادرت والو قسما بالله العظيم لا انا لا خويا درنا شيحاجة غير جيت من القراية ولقيتو كيلعب مع دراري صحابو وجيت بغيت نلعب معاهم وانا معارفة والو .. جا وخلطنا انا وخويا ليلة كاملة منعسنا فالكوري والغد سيفطنا للمدرسة بدوك الحوايج .. القسم كامل كيشوف فينا ومبعد منا حيت خانزين هدا أب هذا أقولي ليا ؟
- ( شافت فمها ) عقلتي نهار سيفطني نجيب المونادا وانا صغيرة عندي 11 عام ومشيت نجيبها ولقيت نورة بنت خالتي ربيعة حدا دارهم او وقفت غير سولتها على واحد التمرين تعطلت غير 5 دقايق .. فاش رجعت ضرب ليا القرعة دالمونادا مع جبهتي الحمد لله لي متهرسات القرعة ودخليا زاج فجبهتي وعيني ، وقاتليك باك ماتدويش فيه .
- ياك الحوايج بنات عمتي لي كيعطيوني لي قدامت عليهم يعطيوها ليا ، لي سمع با قايد يݣول انا عايشة فالخير والخمير وانا مانكساب مانعلام .. ݣراناتي عدهم تيليفونات المخيرة وانا مزال لاصقة فتيليفونات دهادي شحال ، الناس كملو قرايتهم وانا خرجني من تاسعة عييت نزاوݣ ونطلب ونرغب شدني سلخني كمدتها لݣلبي وسكت ..
- واش فخبارك أش مشا ݣال ليونس ويونس ݣالها ليا وحلفني منݣولها لحد ( دموعها ماحبسوش من البكا ) ݣاليه سير ديها للطبيب هاديك راه واحد الخفيفة منها مكاين سير شوفها واش بنت ولالا ، وعباد الله وعباد الله البو لي يدافع على شرف بنتو كيطعن فيه ..
- وقفات تودة وݣلسات حداها جاراها للصدرها معنقاها دموعها هابطين .. كلامها ضرها فقلبها ومقدات عليه حسات براسها كتغلي :
صافي ابنتي راك حاملة صافي ، الله ياخود فيه الحق براكة عليك
- رجاء (بعدات عليها عينيها حمرين ) :
نكذب عليك مكنحس بوالو جيهتو بحال شي واحد براني يوقع ليه لي يوقع .. حيت كنعرف البو هو لي يحن فولادو ومايخلي حاجة ضرهم وانا ضرني بزاف .
- تودة ( كدوز ليها على كتافها ) :
طوال زمان ولا قصار الظالم غادي ياخود حقو سمعي ( شافت فيها ) اتݣلسي هنا معززة مكرمة حاجة ماتقيصك .. هادي ميمتك ( أشرات لسميرة ) وأنا ديريني ميمتك ( هبطو عينيها بدموع دغية مسحاتهم ) ديك دار ديال مرت عمك والله لا مزال حطيتي فيها الرجل هنا تبقاي
- سميرة ( بهدوء) واش غانديرو فالمعطي وراجلها ؟
- تودة : راجلها خليه يرجع من السفر وانا غاندوي معاه اتهناي اما المعطي خليه عليا ماترفدي هم ( وقفات شافت فسميرة ) نوضي بغايتك وخلي البنت ترتاح تلݣاها شحال هدا ماشفت النعاس
- خرجات تودة ومعاها سميرة اما رجاء طفات الضو وحطات راسها على المخدة براحة خارجة منها تنهيدة طويلة .. دغية تقالو عينيها ونعسات .
- وصلو لواحد الحي كان كالم ونقي فيه بزاف ديال البارطمات ، عنبر مكانتش عارفة البلاصة فين بزاف ديال الحوايج تبدلو من زواجها للوقت الحالي واخا المدة لي دوزاتها فكازا مكانتش كتخرج بزاف مرة مرة هادشي لي خلى بزاف ديال البلايص غراب عليها وعمرها شافتهم البلايص لي كانت كتعرف معدودين على رؤوس الاصابع هادشي لي خلاها برانية من جديد وسط هاد المدينة الكبيرة .
- وقف رشيد الطوموبيل قدام الموبل نزل هو الاول ونزلو البنات ، رما السلام للعساس ديال العمارة شاف فعنبر وحياة لي واقفات بتردد :
رشيد : هدا علال الكونسييرج ديال العمارة الى بغيتو شيحاجة يجيبها ليكم راه هو يتكلف ( شاف فالكونسييرج ) علال هادو بنات من العائلة الى خصاتهم شيحاجة جيبها ليهم
- علال : الله اودي اسي رشيد مرحبا
- طلع رشيد وتبعوه البنات الشقة كانت فطبق الثاني الرقم 3 حل الباب ودخل شاعل الضو .. ضار لقاهم واقفين اشر ليهم باش يدخلو وخلا الباب محلول باش يعطيهم الأمان دخلات عنبر هي اللولة كدور عينيها فشقة لي كانت زوينة مفرشة فراش عصري
- رشيد : هذا الصالون وهدا بيت النعاس الكوزينة هي هادي والحمام هو هدا الى فيكم الجوع نهبط نجيب ليكم متاكلو
- عنبر : ( بنفي ) لا تعشينا وجايبين معانا العشا من العرس .
- رشيد : صافي مزيان إن شاء الله فصباح غادي نجيب ليكم الفطور حيت الثلاجة خاوية مافيها والو مع الدار كتبقى مسدودة داكشي باش
- عنبر : واخا الله يرحم الوالدين
- رشيد : مكاين حتى مشكيل انزل نجيب ليكم روشارج الى بغيتو تدويو مع عائلتكم اعلى وديت مايبقاوش مشغولين معاكم ايطلعها ليكم علال
- حياة ( شافت فعنبر ) مي ايكون مشغول بالها نهار كامل مادويناش معاها
- رشيد : داكشي باش ݣلت نجيب ليكم باش تدويو ياك عندكم التيليفون ؟
- عنبر : انا عندي ولكن حياة تشفر ليها التيليفون
- رشيد : صافي ماعليش نمرتي راه عندك انا مغانجي حتى تفيقو سوني ليا وقطعي انسوني ليك باش نجيب ليكم الفطور إن شاء الله
- عنبر : الله يجازيك بالخير اخويا وسمح لينا عذبناك معانا وسمحليا على قبيلات
- رشيد ( تبسم )
مكاين ݣرام دالموشكيل كتوقع أنا مشيت دابا ها سوارت ( مدهم ليها ) تصبحو على خير
- عنبر : تلقى الخير .. خرج رشيد وسدات الباب وراه ݣلسات حياة على السدادر لي كانو موريحين :
الله على راحة ياربي حسن عوان الناس لي كايباتو فزنقة مساكن شوف هنا انهار وشنو وقع لينا
- عنبر ( حطات السوارت جنب التلفازة فوق الطبلة ) :
واياه مساكن الله يحسن العوان ، ماشتيش انا السيد كيضرت فيه ݣبيل وكونما هو علم الله أش غايوقع كاين لي يتيق فيك يدخلك لدار ختو ويخلي ليك السوارت
- حياة : واياه أختي ولاهيلة باينة فيه الضريف
- عنبر : ماعرت واش دوش فيه شومبوان وصابون والما سخون اندوشو علينا
- حياة : من نيتك فهاد الليل ( وقفات كتحيد جلابتها ) انا انغسل ارجليا ونعس واصلا مامزياناش راه 12 دليل هادي اش بقا من دوش بغيتي يضربوك المسلمين
- عنبر : اصلا مافياش حتى انا نغسل أرجليا بحالك ونعس .. سبقات حنان دخلات تغسل رجليها مخلية عنبر كتكتاشف الدار الكوزينة كانت كلها مجهزة وزوينة الثلاجة كانت خاوية وطافية ، بيت النعاس مقاد ومأتت من كولشي .
- الماريو كانو فيه شي يزور ومانط سمعات السونيت فالباب مشات بخطوات السريعة او وقفات ورا الباب :
شكون ؟
- انا علال الكونسييرج سي رشيد سيفط ليكم هاد السخرة .
- حلات الباب كان راجل فالخمسينات من عمرو مد ليها ساشية وروشارج فيدها تبسم ليها ونزل ، سدات الباب موراه ودورات الساقتة ودخلات حلات الساشية كان فيها السقاطة بيموات ودانون ورايبي .
- حياة ( خرجات من دوش ) :
شكون دق اش داكشي فيدك ؟
- عنبر : غير رشيد سيفط مع الكونسييرج بيموات ورايبي وروشارج باش زعمة الى ضرنا جوع نلقاو مناكلو
- حياة : مسكين ياختي ( حلات شعرها كتعاود تجمعو) ظريف مسكين رفد لينا الهم الله يخلف عليه .. انا غادي ناكل من الخبز لي جبنا من العرس جاني جوع عاد نݣد نعس
- عنبر ( حطات ديك الساشية) :
انا اندخل روشارج نسونيو للخالتي هي لولة بعدا .. حلات الساك ديالها وجبدات التيليفون دخلات الروشارج وسونات لخالتها ، جاوباتها تم تم كانت مخلوعة عليهم لا يكون وقع ليهم شيحاجة طمناتها عنبر ودوزات ليها حياة حتى طمناتها وريحات بالها .. مادكروش ليها السرقة نهائيا حاولو يغطيو على لي وقع باش مترفدش الهم من جهتهم ..
- قطعو معاها جبدو داك الخبز لي فيه دجاج واللحم .. كلاوه كولو وتبعوها شوية من ديك السقاطة سبقاتها حياة لبيت النعاس عاد تلحقات بيها عنبر من مورا ماغسلات وجها ورجليها و طفات الضواو لقاتها سبقاتها للنموسية جرات الغطا ونعسات حداها ، العيا وتمارة لي دازو منها خلاوهم غير غمضو عينيهم وكانت هاديك هي نعستهم .
°°°°°°°°°°°°°°°°°°°
إيـــاك أن تــميلي فلا سند لك إلا نفــسك ، فلا تفلتي يدك من يد نفسك فتسقطين تمسكي به جيدا كوني قوية وإن جدبــتك الحــياة نحو أرض الظــلام .. إصنــعي من الألــم جســـراً تعـــبرين به إلـــى بر الأمـــان وكوني سندا تتكئيــــن به على ذاتك إذا تعبت فلا حائـــط سميلك فقط .. دعمك لذاتك هو منـــجاتك ولا فهم سينصر ضعفك إلا نصـــرك لذاتـــك فأنت أصلب حــصـــانــة تحيط القلب من وهن الخذلان وكيد البشر ومكر الأنـــا .
- نعسو على واحد الجنب من كثرت العياء فاقت فصباح شافت فساعة لي معلقة فبيت النعاس كانت ل 10.30 نساحبات من حدا حياة .. دخلات لطواليط قضات حاجتها وغسلات وجها خرجات لقات حياة فاقت حتى هي بدورها دخلات مخلية عنبر غادي تسوني لرشيد .
- ݣالسة فصالون شادة تيليفون فيديها وكتخمم
- حياة ( شادة الفوطة كتمسح فوجها ) :
فاش كتخمي ؟
- عنبر ( هزات فيها راسها ) :
ماعرفنا فين غنمشيو أصاحبتي ؟ الفلوس مشاو ساكك انت مشا ماعدنا الريال حاجة وحدة لي بقات عندي غالية ولكن راه مغاتباعش الى مشيت حتى حطيتها عد شي ذهيبي يݣدو يشدوني بلي سارقاها
- حياة (كتشوفيها بشك ) :
أويلي تي شنو هادشي لي عدك لي يݣدو يشدوك بمسبتو ؟
- فطريق الوطنية رقم 1 لي كتربط بين الرباط والمحمدية فدخلة ديال مدينة الصخيرات فتجاه بوزنيقة .. وبضبط فغابة واد الشراط ، واقفة فارݣو فاللون الازرق الداكن بلو مارين مكتوب فيها " الــشــرطــة الـعـلمـــية " حداها واقفة فارݣو أخرى مكتوب فيها " الأمـــن الـــوطــنـي" ، واقف يوسف ومعاه راجل فالاربعينات من عمرو قصير داير كاسكيطة كيدوي معاه وكينعت ليه بيديه لجهة من الجهات لي فالغابة .. وكيرجع ينعت ليه للجهة الواد .
- وقفات طوموبيل فالكحل ونزل منها عماد لابس سروال ديال دجين مع شوميز زرقة وسبرديلة فنفس اللون مع ساعة رياضية رجالية ونظرات شمسية فالكحل .. داز من حدا البوليس لي كانو لابسين اللبسة عطاوه التحية أشر ليهم براسو وتوجه للعند يوسف ..
- يوسف ( اشر لسيد لي معاه ) :
هدا هو السيد لي سونا وعلم البوليس
- اياه اسيدي انا غالݣيت داكشي وانا نسوني للبوليس أول مرة نشوف هادشي الصراحة
- عماد ( عنقو من كتافو حركة دارها باش يعطيه الأمان ويقدر يسولو كيف بغا ) :
أش سماك الله ؟
- سميتي بوشعيب أسيدي .. خدام عد واحد السيد كنعس ليه على الفيرمة ديالو غير فهاد النواحي كنبدا الخدمة مع 8:30 دصباح وكنبغي زعماكين نتمشى على رجليا وهادي هي طريݣي
- عماد ( بصوت رجولي تقيل ورزين ) :
واش مالف نيت كتمشي من هنا ولا هادي المرة اللولة ؟
- بوشعيب : ألا انا مالف كندوز من هن من الغابة زعمة ، ولكن كندوز من ديك طريݣ اليوم ݣلت ندوز من هنا ، وعدي الكلب ديالي هو هداك لي ݣالس تم ( اشر ليه فين ݣالس واحد الكلب فالقهوي مخرج لسانو )
- عماد : كمل
- بوشعيب : وسيدي جاي في اماني الله .. احتى بدا الكلب ينبح وطلݣ من يدي ومشا لهاد الجهة تاكتبانلي ميكة كحلة ومحلولة هي فاش ݣربت ليها كتبان ليا يد ديال بنادم محنية ... انا ماݣربتش ليها ديك ساع علمت البوليس
- عماد : واخا ݣوليا أبوشعيب ( زول النظاظر وشافليه فعينيه ) الواد واش كيوصل لهاد الجوايه ؟
- بوشعيب : وكيوصل الى كانت صابة شي شتا نيت اما الى كانت صابة اشوية قليل
- عماد ( هزهز براسو ) :
عمر بانت ليك شيحاجة ماهياش هنا ؟
- بوشعيب ( هزهز براسو بنفي ) :
واش غانݣوليك اسيدي شيحاجة بحال هادشي عمري شفت ، ولكن هادشي ديال تشعويد كنشوفو منو عدد بعد المرات راه كنشوفو شحال من مشعوذ هنا وكنلݣاو السحور ݣاع الله ياخود فيهم الحق .. ولكن بحال هادشي لا وأصلا أسيدي راك عارف هاد البلاصة قليل لي كيدوز منها وكيݣولو عليها خطار .
- عماد : واخا المهم سير كمل مع داك السيد لي تم خلي ليه لادريس ديالك ونمرتك وديك الساع الى بغيتي تمشي سير .
- مشا بوشعيب للعند واحد من رجال الأمن وبقا يوسف هو وعماد لتاحقو بعناصر الشرطة العلمية كانت من بينهم بنت عطاتهم التحية ونطقات بصوت جدي :
درنا الفحص الخارجي البنت غادي تكون فالعشرينات وباينة عروسة من الحنة لي فرجليها ويديها .. عندها خياطة عشوائية جهة الكلاوي وجهة القلب مابغيتش نعطي تقرير غالط حتى نديرو الفحص الداخلي باش نعرفو الأسباب ديال الموت ديالها ..
- عماد ( شاف فيوسف ) :
لقيتو شيحاجة ديالها معاها ؟
- يوسف : لا مالقينا والو .. لابسة حوايج عصريين ديال الخروج مكاين معاها حتى حاجة لي كتبت الهوية ديالها
- عماد ( رجع شاف فالبوليسة) :
إيمتا غادي يخرج تقرير الطب الشرعي ؟
- على حسب الى مالقينا حتى شي تعقيدات راه الماكسيموم واحد 60 يوم
- عماد ( دوز لسانو وسط فمو مدوز على شعرو بنرفزة ) :
دابا انا غادي نتسنى 60 يوم باش يخرج هاد التقرير ، يموت لي بغا يموت يعيش لي بغا يعيش يهرب لي بغا يهرب ياك ؟
- ماعندنا منديرو على حسب الحالة اسي عماد .. غير كون هاني اي حاجة جديدة راه غادي نعلمك بيها قبل مايخرج التقرير
- مجاوبهاش توجه للفارݣو ديال الإسعاف لي واقفة مشا للباب اللور فتحو فوق الباياص حاطينها ومغطيينها بإيزار بيض .. طلع لحدا راسها وزول الليزار فعلا كان باين عليها فالعشرينات فمها بيض وكلها بيضة لونها غادي للزروقية سد على نيفو من الريحة لي بدات كطلع منها خدا تيليفونو بالخف صورها ورجع غطاها ونزل ، توجه للعند يوسف :
يوسف شوفليا واش كاين شي ناس ساكنين فهاد الجوايه الى كاينين بغيتك تسول واش شافو شيحاجة ماشي حتى لهيه تصاور راه غانسيفطهم ليك لتيليفونك خرجهم وشوف ݣاع الدوائر الأمنية واش وصلاتهم شي ديكلاراصيو بشي بنت بنفس المواصفات ديالها .
- يوسف : واخا كون هاني هادشي لي كنت ناوي ندير
- عماد ( تزير ) :
نهار على نهار كنزيد نتأكد من داكشي لي كيدور فدماغي ، وهادي ماشي غير وحدة شتي ݣاع دوك البنات أيكون واقع ليهم كيما وقع لهادي .
- يوسف : منحكموش دابا حتى يخرج بعدا التقرير ديال الطب الشرعي ، على الله غير مايتعطلش
- عماد : مايجي فين يخرج حتى غانلݣاو وحدة خرى مليوحة فشي قونت ودابا تشوف ، شتي أمنين لݣينا هادي هنا انلݣاو وحدة خرى
- يوسف : المكاريب عارفين هاد القنت مكايوصل ليه حد داكشي باش لاحوها هنا
- عماد : باش تعرف بلي هاد خونا لي دار فيها هك حافظ وعارف مزيان القنات
- يوسف ( كيفكر ) :
فخبارك حتى انا دخلتي ليا الشك لراسي كيفاش بلان الخياطة لي جهة الكلاوي والقلب ؟
- عماد( حنحن ببحة صوتية ) :
عاد عقتي وفقتي اش كنخبرو عليك من الصباح اصاحبي ، كنݣوليك نقص من الكاس شوية باش يصبح دماغك خفيف ( لبس نظاظرو وتقدم سابقو )
- يوسف ( بعدم رضى ) :
جوج كيسان مازدتش عليهم الثالث وبسيف اصاحبي واش لي عندو داكشي لي عندي أيبقى ليه شي راس
- عماد ( شافيه قبل لا يركب فطوموبيلتو ، ناطق بجدية ) :
يوسف الدار بوحدها وخدمتك بوحدها .. هادشي كيخص ليه دماغ صافي الله يرضي عليك ... انا مشيت نتلاقاو من بعد ، ركب فطوموبيلتو وديمارا مخلي يوسف لتاحق بالعناصر لوخرى ..
- حياة كتشوف فالبروش لي مداتو ليها عنبر كان عبارة على بروش بحال الشكل ديال ذيل طاووس منبت كلو بالحجر اللون لي فالحجر كانو بحال اللون لي كاين فذيل ديال الطاوس .
- حياة : تقيل بزاف ياختي غزال فن منين جاك ؟
- عنبر ( تنهدات تنهيدة طويلة) :
كان عطاه ليا بدر ب 3 شهور قبل مايموت الله يرحمو او وصاني باش نخبيه على والديه وعلى خواتاتو
- حياة : وعلاش زعمة مكايبغيوهش يجيب ليك الكادوات ؟
- عنبر : بالعكس مالف كيجيبهم ليا غير هذا ݣاليا مايشوفو حد على مݣال بلي مو كانت مخبياه لمرات ولدها عليه هو ، وقيلة كيورتوه من جيل لجيل ولا ماعرفت ليه ومنين تزوجني انا حلفات لا عطاتو ليه
- حياة : السامة العقروشة واش عمرك سولتي عليه شحال ساوي ؟
- عنبر (بنفي) :
لا راه قلت ليك عطاه ليا ب 3 شهور قبل موتو وعلى ماقال هو بلي ساوي الملاين ، حيت فيه احجار كريمة حرة والحجر لي فيه مكاينش فالمغرب قليل فين تلقاي شي حد عندو هاد الحجر من غير دوك الذهيبية القدام الحريفية ديال بصح ..
- حياة (شافت فيها بعدم تصديق) :
العار شحال يجيب دابا هاد البروش ؟
- عنبر : والله ماعرفت قاليا فيه 5 ديال الانواع ديال الأحجار وعاد راه الذهب الحر هداك مامخلطش بنحاس ولكن الصراحة عمرو قالي سمية الحجر لي فيه .. وفخبارك بالليل هاد الحجر لي كتشوفيه خضر كيولي حمر
- حياة : بسيف ݣلتي إلى لݣاوه عدك يحسابليهم غير شافراه ، الحمد لله لي مالقاهش عدك سعيد كون وا شفرو حتى هو
- عنبر ( خداتو من عندها رضاتو للبواطة ديالو ورجعاتو لواحد صندوقة مع حوايجها ) :
كت مخبياه فهاد صندوقة القديمة هو كانو عينيه اعلى الفلوس ، راه هادشي باش دابا مغاينفعنا بوالو ، حيت مكنعرف حتى شي دهيبي يكون حرايفي لي نݣد نبيعو ليه ونخاف اختي مع حنا نيت سعدنا زين نصدقو فالحباسات
- حياة (سهات كتخمم) :
كون غير سولتي هاد رشيد على شي خدمة كيشتيه الراجل الله يعمر ليه الدار وحنا مابقا عدنا الريال اللهم نقضيو بلي كاين
- عنبر : ماشتيهش لبارح ݣالك بغاني نخدم عدو
- حياة ( هزات فيها عينيها الكوحل وتبسمات بللطف بصوتها الحنين نطقات بتردد ) :
كون اختي غير خدمتي معاه شنو فيها الخدمة ماشي عيب ، غير بينما ݣادينا أمورنا ولقيت حتى انايا خدمة ونكريو شي دويرة وماحدك فيها وانت كتقلبي فجهة خرى ..
- عنبر ( شافت فيها بعدم تصديق ) :
واش تخورجتي فعقلك احياة نخدم عندو ماعرفت واش عدو بار ولا اش داك العجب داكشي لي بقا ليا فالحساب زوينة هادي
- حياة : وغير شوفي بعدا وديك ساع حكمي واش حنا لݣينا البديل وݣلنا لا ؟ لبارح شوفي اش وقع لينا تشفرنا جوج دالمرات وديك خيتي كانت ناوية تزيدنا للفساد كونما داك دري مسكين .. وحتى هاد رشيد جابنا لدار ختو بعدا تسترنا فيها لا تزربيش ..
- قاطعهم صوت الصونيت ديال الباب ، ناضت عنبر واقفة ورا الباب ( شكون ) جاها صوت رشيد من ورا الباب دورات الزكروم وفتحات ليك
- رشيد ( دخل هاز فيديه ساشيات فيهم الحليب والكومير والفرماج والكوفيتير وكرواصة مع كراطن دالعصير ) :
صباح الخير كيصبحتو نعستو مزيان ؟
- عنبر : الحمد لله نعسنا مزيان ربي يخليك أخويت بلاتي نعاونك ( شدات من عندو وحدة من الساشيات )
- رشيد : أندخل للكوزينة نحطهم باين فيكم الجوع واش عاد فقتو ؟
- عنبر : اه يلاه شوية دابا .. دخل للكوزينة وتبعاتو عنبر جبد الصينية والكيسان شللهم من الغبرة بغا يزيفهم وهي تحيدهم ليه من يديه :
لا خويا حشومة أنا غانزيفهم .. مسحاتهم وقداتهم فالبلاطو
- رشيد : أتعديو بالحليب خضر البوطة سلات يلاه انسيفط علال يجيبها
- عنبر : لالا هانية ( كتعيط على حياة ) أجي تفطري ، جرات الكرسي فصالة مونجي لي فالكوزينة .. جات حياة ݣلسات وݣلس حتى هو
- رشيد : ( بإبتسامة وصوت مزروب ) انا فطرت أفطرو أنتوما بصحة وراحة
- عنبر : الله يعطيك الصحة .. كبات للحياة وبداو كيفطرو السكوت كان مخيم على الأجواء حتى هرس رشيد هاد الصمت :
اش جابكم للكازا ؟( هزات فيه عنبر عينيها وكمل كلامو ) كازا مدينة كبيرة وصعيبة وصعيب الحال جوج ديال البنات يجيو لشي مدينة ماعندهم حد فيها الوقت مابقاتش بحال شحال هادي ، دابا راه اي مدينة بغيتي تحط رجليك فيها خاص يكونو عندك المعارف لي يوقفو معاك أما باش تجي وانت زيرو درهم وبنات راه صعيب الحال ..
- عنبر ( سرطات الدغمة لي فحلقها ونطقات بصوتها التابت ) :
بحالنا بحال عباد الله جينا نقلبو على خدمة ، ولكن زهر ماساعفناش مع حطينا رجلينا وحنا فشفرة تشفرو لينا فلوسنا وساك كولشي مشا بقينا الله كريم .. كنا جايبين معانا باش نشدو لوطيل ونقلبو على خدمة على خاطرنا دابا لا اوطيل لا غيرو لاكارط ديال حياة مشات مع ساكها صافي .
- رشيد ( بهدوء وصوت رجولي رزين ) :
الأفات كتوقع فينما مشيتي وكتوقع مع اي واحد ، انا نيت براسي وقعات معايا فاش يلاه حطيت رجلي فهاد البلاد السعيدة ماعندك مدير من غير صبر الى ماصبرتي راه عمرك توصل
- حياة كانت كتاكل وكتسمع ليهم مكتجاوبش ، عنبر هزهزات براسها :
الحمد لله من الخير حنا جينا للهنا مدايرينش فبالنا راه انلقاوها بيضة عارفين ماشي من الأول انلقاوها واجدة
- رشيد ( بإبتسامة ) :
داكشي لي كاين وأنا داكشي لي ݣلت ليك البارح ماكتش كنضحك فيه ، صوتك واعر أعنبر وإلى بغيتي من غدا تبداي عندي الخدمة وبصالير مزيان أنكون فرحان
- عنبر ( سكتات كتشوف فحياة لي بادلاتها نفس النظرات رجعات حركات عينيها لجيهتو ) :
فاش غادي نخدم عندك ؟
- راجع لكازا وصورت البنت لي لقاو بين عينيه ضرو خاطرو واخا هاد الخدمة علماتو يكون قاصح ولكن الجانب الإنساني عندو ديما حاضر يد سايݣ بيها ويد مخرجها من السرجم شاد بيها ݣارو فعز تفكيرو بدا تيليفون ديالو كيسوني هبط عينيه للتيليفون بان ليه إسم " عصام " طالع فشاشة خدا الكيت دارو فودنيه وفتح الخط :
عاد فايق ولا ؟
- ( جاه صوت رجولي من الجهة لوخرا ) :
مالي هبيل نوض حتى لهاد الوقت فطرتي ولا صابح تسف فالݣارو ؟
- عماد ( مركز مع الطريق ) :
بكترت ماوليتي ساكن ولاصق فالعروبية فاتك بزاف
- عصام : وايلي هي بدلتي العادة ؟
- عماد : تبدلات مابقيناش كنفوتو 4 الݣوار فنهار انبقى غادي حتى نحيدو
- عصام ( قهقه بصوت رجولي ) :
وصدمتيني فيك ماعرفتكش ، مناويش تجي مع الواليد ؟
- عماد ( لاح الباقي دالݣارو ) :
واش انا خدمتي بحالكم ، انتوما حرين ديال راسكم تمشيو وقتما ݣالها ليكم طانطو ديال راسكم أما انا خدمتي مفشكلة ، ياك الواليد غايكون هو والعم ؟
- عصام : وضروري بحال كل عام غاݣلنا زعمة تكون حاضر تحضر هاد المرة تفوج ودوز الوقت
- عماد : غير بصحة والراحة حتى تسيفطو ليا التصاور ، ݣاليا الواليد لبارح الروطال ضبر فهوتة واعرة
- عصام (جغم من كاسو ديال اتاي ) :
عرفتي على عود كيداير بابابابا واحد لاراس قليلة طاح عليها ولكن مجهد
- عماد ( كيضحك) :
حتى حاجة مامجهدة على خوك هو الثور ودريساه خلي العود عقلتي ؟
- عصام ( كيضحك ) :
عمرها تنسى ليا قسما بالله اتبقى محفورة فالبال ، ندمني على النهار لي مشيت معاه لسبانيا .. انا ݣلت صافي هاديك هي الاخرة ليه
- عماد : الله يحفظو كيموت على شيحاجة فيها الريسك (دخلات عندو دوزيام أپيل ) عصام قطع عندي دوزيام أپيل
- عصام : يلاه تهلا نتشاوفو من بعد .. قطع معاه الإتصال وقبل الاپيل الثانية مجاوب بتساؤل :
وي شكون معايا ؟
||||||||||||
- رشيد ( شافيها بجدية ) :
أنا خدام فواحد الأوطيل هنا فكازا فسونطر الاوطيل ماشي ديالي ولكن أنا هو لي شادة ومكلف بݣاع الناس لي خدامين فيه حيت مولاها مكاينش فالمغرب .. هو فيه أوطيل وفيه مطعم ريسطو بار
- عنبر ( غوبشات فاش سمعات كلمة بار ) :
كيفاش اخويا البار ؟ باغيني نخدم فبلاصة فيها الشراب والمسخ ياك ؟
- رشيد ( ضحك ) :
أعنبر الله يهديك ريسطو بار راه عادي ، مطعم كيجيو الناس يتعشاو فيه يسمعو للموسيقى لي كيبغي يشرب راه كياخود مشروب مع الماكلة .. ولي مابغاش راه عادي كيتعشى ويستمتع بالوقت ديالو وكيمشي بحالو كيجيو عندنا بزاف ديال الفنانين كيغنيو مغنيين كيغنيو الشعبي وشرقي مايمشيش بالك للبعيد راه ماشي بحال دوك البيران لي كتعرفي لي كينوض فيهم السكوندار
- عنبر ( حكات حاجبها ) :
زعمة مكايتبسل عليك حتى واحد ؟
- رشيد ( بنفي ) :
مكايتبسل عليك حتى واحد الفنانين لي عندنا كيجيو يغنيو يتخلصو يمشيو بحالهم .. وعاد كاين لي ݣارد ݣور على برا وحتى لداخل مايقد حد يقرب ليك ولكن كاين البنات كيجيو مع صحابهم كيسهرو وكاين لي كتجي مع صاحبتها تسهر المهم هو انت راه مكايقرب ليك حد والصداع ممنوع حيت الاوطيل معروف عندو السمعة ديالو
- عنبر ( ميقات فيه ) :
لا تبارك الله عندو السمعة منين كيتحط فيه الشراب راه سمعة نيت
- رشيد ( كيضحك على صراحتها ) :
هادشي عادي فلوطيلات المعروفين ولي كيكونو فيهم السهرات أعنبر مزال تشوفي العجب
- عنبر : لا أخويا انا مابغيت نشوف حتى عجبك بغيت انعيش مستورة وهانية مع راسي ( سكتات ورجعات كلمات كلامها) الى قبلت نخدم عندك شحال دير ليا فصالير ؟
- رشيد : إلى بغاوك الناس وعجبهم صوتك وخليتي الريسطو يعمر راه نوصليك الخلصة ل 5000 درهم حتى ل 6000 درهم وكلما تزاد الكليان نزيدك
- عنبر ( مابغاتش تبين صدمتها من الثمن باش مايستغلش الفرصة ويقول راها ملهوفة على الخدمة ، ببرود نطقات ) :
ݣاع الفنانين لي كيجيو يغنيو عندك كدير ليهم هاد الثمن ؟
- رشيد ( ضحك ) :
دكية مع راساتك ، بطبيعة الحال لا ولكن أعنبر هادوك راه معروفين إلى طلبو ثمن طالع جات معاهم عندهم جمهور كيعرفهم ولكن انت راه يلاه غادي تبداي .. هادشي باش ݣلت ليك الى الناس عجبتيهم وعجبهم صوتك أو خليتي بنادم يولي جاي غادي باش يسمع ليك راه صاليرك أيبقى غادي وكيطلع أش بان ليك ؟
- عنبر بقات مدة وهي ساكتة كتخمم شافت فحياة ورجعات شافت فرشيد :
بشرط
- رشيد (هزهز براسو ) : مرحبا
- عنبر : مغادي نسني معاك حتى عقد مابغيتش نطيح فداك المشكل ديال ممنوع تمشي لهنا ولا تجي لهنا ولا ممنوع الى ماعجبك الحال تمشي بحالك حيت سانية عقد معانا سمعني أخويا رشيد انا نيشان بحال التران نهار شي واحد يفوت حدو معايا راه نضرب الباب عمرك تشوف كمارتي أش بان ليك ؟
رشيد ( بقا ساكت جاه قصحات معاه فالأخير ستسلم حتى يكسب ثقتها وتعرف المهدن ديالو وبلي عمرو غايأديها وديك الساع ينضي معاها الأمور القانونية ) :
واخا الالة ماݣلتي عيب مرحبا
•••••••••••••
- راجعين من عند الطبيب رجاء ݣالسة اللور وتودة حدا المعطي لي كانو عينيه على الطريق ، ضارت تودة عند رجاء وبإبتسامة :
ودابا راه خاصك الراحة مخاصكش تنوضي من بلاصتك سمعتي الطبيبة شنو ݣالت
- رجاء ( تنهدات ) :
مكاينة راحة أخالتي مرت عمي جاي ولدها إن شاء الله ، الى عمرات الدار ضروري خاص نوض
- تودة ( غوبشات ) :
يجي ولدها ولا يجي عمها وحنا شغلنا وها ضحك .. والله لا خرجتي ابنيتي من دار حتى تولدي إن شاء الله
- المعطي ( شافيها ) :
أش كتݣولي أتودة يهديك الله البنت زوجناها تمشي لدارها ماشي تبقى عدنا
- تودة : البنت لي كتكون مكرفصة كتبقى فدار باها ، وباها لي كيجيب ليها حقها المعطي مكايبقاش يتفرج فيها وبنات العيالات كيتبوردو عليها .. ( ضارت عندها ) غادي تبقاي ابنتي عندنا معززة مكرمة نوحموك ونخنتوك ونتهلاو فيك ونديرو ليك السابع حتى تولدي
- رجاء ( بإبتسامة باهتة ) :
ماعرفتش يونس واش يبغي ولالا ؟
- تودة : حتى يرجع من السفر وندوي معاه أصلا بغيتو فشي كلام
- المعطي ( شافيها بتساؤل) :
شنو بغيتيه ؟
- تودة ( طلعاتو ونزلاتو) :
غانݣوليه لي ماقدرتيش انت تݣولو أزماني .. أه نسيت العشية اتجي عندي الرباعة نهار الخميس عدي واحد العراسية فالمحمدية
- المعطي ( بلع ريقو ) :
غير بغيتي تبقاي خدامة فديك الخدمة وصافي ، مخاصك خير الوحدة الى تزوجت كتبرك فخيمتها
- تودة : علاش مالها ديك الخدمة ياك كنتي تموت وتحماق أباش تسمع صوتي ولا نسيتي ؟ مجاتش بالفلوس الغنا كيجري ليا فدم هو والعيطة بحال كاس دتاي لي كينغمني فهمتي واخر مرة الله يرضي عليك تݣول هاد الهضرة نهار الاول راه رضيتي بلي كاين
- المعطي : ودابا تزوجتي اش غايݣولو عليا؟
- تودة ( ببرود) :
أيݣولو المعطي مرتو الثانية شيخة ؟ ويݣولوها ولا عرفتي مايجيك مليح طلقني ومغايݣولو عليك والو أش بان لك ؟
- المعطي ( تفعفع شافيها بعدم تصديق) :
كتفلاي عليا ( تحت أنظار رجاء لي مراقباهم ) واش هذا لعب الدراري الصغار عاد تزوجنا ونطلقك من نيتك أش وصلنا للطلاق ؟
- تودة ( بنفس الملامح والبرود ) :
إيوا هي هادي ، أنا راه هانية عندي بحال كنتي بحال ماكنتيش لايحسابلك بلا بيك نتوسد خديتي ونعطيها لشكا ونواح .. أنا احبيبي الغالي صحتي وراحتي وراحت بالي هي لولة عدي مغانعصبش راسي على وديت شي حد أباش تكون عارف ياتقبلني كيما انا يا باي باي يا شيري باي باي .
- المعطي ( تزاد معاه الزايد ، حنحن بالو مع الطريق ) :
الله يهديك حنا غادوينا ، تاتي دغية كطلع ليك النقشة وتعصبي كلمة العيب سابقة عدك الالة تجي رباعة مرحبا بيها حد مايݣوليك حاجة خدمتك راك تي فيها ماݣلنا شاي العزيزة .
- تودة : حتى انا ماݣلت ليك والو .. فاش نوصلو احبيبي الغالي سيفط لينا على شي دوارة توحشنا الشوا وحتى بنتي رجاء خاصها تشم تشنشيط وتاكل راه الطبيبة وصاتها .. ( شافت فرجاء وتبسمو لبعضياتهم )
- المعطي ( هزهز راسو ) :
واخا لي بغيتي .
- وصلو لدار دخلو يرتاحو ، عاودات رجاء لسميرة على داكشي لي قاليها الطبيبة وراتها دوا والڤيتامينات لي عطاتها طلعات تودة للبيتها ترتاح ، ستغلات الفرصة رجاء وعاودات ليها لي وقع فطوموبيل
- سميرة ( بإبتسامة ) :
باك مكاين لي عرف ليه قدها عبرات عليه ، ݣاع لي دارو فناس وفينا غايخلصو عدها هنا فدنيا عاد يخلصو عند مولانا .
- رجاء : عرفتي كيفاش كانت كتدوي عليا ، تݣولي اما من دمها ولحمها والله حتى فرحت لي مالقيتو فبا لقيتو فيها هي اهو ماعرفت فاش بغات تدوي مع يونس !!
- سميرة : الله أعلم يمكن أعلى وديت طلبو يخليك هنا إيمتا هو راجع ؟
- رجاء : غدا يكون هنا إن شاء الله ، أنطلع نرتاح بينما وجد الغدا
- سميرة : سيري أبنتي رتاحي ، وقيلة كون اتحولتي للبيت ديال الضياف لي هنا تحت باش ماتبقايش هابطة طالعة .
- رجاء : كنت غانقولها ليك حيت قاتلي مانبقاش نطلع ونزل فدروج خاصني الراحة
- سميرة : صافي حتى نقولها لنعيمة نحولو ليك حوايجك ليك سيري رتاحي دابا .. طلعات رجاء للبيتها وسميرة دخلات للعند نعيمة وسيدة لي جابو توصيهم يوجدو الشلايض حيت أيديرو شوا للغدا .
•••••••••••••••••••••••
- مع جوايه ديك 7 جاو الرباعة لي خدامين مع تودة ومعاهم رحيمة ، عنقات تودة عناق حار دخلو كاملين ݣلسو فصالة معاهم المطريال ديالهم باش يتمرنو على ود العرس لي عندهم ..
- دايزة سميرة وهي توقفها تودة شاداها من يديها مدخلاها عليهم .. كانت رحيمة وزوج عيالات فتقادة ديالها ونفس الطول والعمورية ، وعاد 4 ديال الرجال 3 يكون فحدود بين الأربعينات والخمسينات او واحد يكون فثلاثينات :
الجماعة هادي سميرة مرات المعطي ( شافت فسميرة ) سميرة هادو الرباعة ديالي هادي صحايبتي رحيمة شتيها داك النهار .. وهادي بديعة هادي نورة وهادي نجاة ، هدا عبد الرحمان شتيه داك النهار هدا نور الدين وجمال وزكرياء .
- سميرة ( بإبتسامة) :
مرحبا بيكم
- كل واحد فيهم رد عليها بطريقتو ، شافت فيها تودة :
أجي ݣلسي معانا وجيبي رجاء تݣلس تفوج شوية
- سميرة ( بتردد ) :
اختي المعطي مغايبغيش راكي عارفاه يبدا يغوت
- تودة ( بأمر ) :
سيري جيبي البنت وأجيو إلى دوا خرجي داك السوق ، نمشي نشوف دريات واش وجدو أتاي .. حدرات سميرة راسها وتوجهات للبيت الضياف لي ولا بيت رجاء أما تودة فمشات للكوزينة تشوفهم فين وصلو فتوجاد .
- كلهم مجموعين فصالة رجاء وسميرة وحتى نعيمة لي كانت حاطة كرسي فعتبة الباب ساهية فتودة وصوتها لي كيبورش وهي كتغني وتهلل مستشعرة كلمات الأغنية بحال إلى قاصدة شخص فبالها وبحال الى القصة كتعاود راسها :
” وا خايتي عليك آ ليام وليام ياليام ايام القهرة والظلام،
وا فينك يا عويسى فين الشان والمرشان، شحال غيرتي من عباد شحال صفيتي من سياد، بلا شفقة بلا تخمام، حرقتي الغلة وسبيتي الكسيبة يتمتي الصبيان بالعرام … كي شيخ كي للعبد كي المقدم كاع منك طالبين التسلام ، تعديتي وخصرتي الخواطر ظنيتي القيادة للدوام والجيد ماتبقالو شان والرعواني زيدتيه للݣدام وايـــلـــــي ..
- كملات على غناها .. سميرة هازة كاسها ديال أتاي وساهية سيناريو حياتها كلو داز قدام عينيها حسات بحال الى تودة كتغني على الظلم وطغيان لي جاها من حر المعطي .. ومن فعايلو الخبيثة تنهدات تنهيدة طويلة كتعبر بيها على كاع داكشي لي كاتماه فخاطرها وحاساه .
- اغنية تابعة أغنية حتى وصلات العشرة ديال الليل ، الرباعة غير تعشاو ومشاو وبقات تودة هي ورجاء وسميرة ..
- رجاء ( بإبتسامة راحة ) :
شحال هادي مافوجت بحال هاد التفويجة وحق الله العظيم ، حتى عرسي مافرحت فيه بحال الناس ماعرفتو كيف داز
- تودة ( دايرة رجل على رجل بإبتسامة ) :
أنت غير ولدي إن شاء الله ، وندير ليك أحسن سبوع
- رجاء : خالتي تودة ربي علاش مدرتيش شي سيدي ؟
- تودة ( هزهزات راسها برفض ) :
لاواه انا ماشي ديال داكشي ، داك تخربيق ديال سني كونطرا دير فعل لاواه ماعديش معاه أبنتي انا كنبغي نبقى حرة فخدمتي .. الوقت لي ݣالها ليا مخي نخدم والوقت لي ݣاليا مخي نݣلس نݣلس .
- سميرة ( مبدلة الموضوع ) :
العجب المعطي ماشي من عوايدو يتعطل على الدار
- تودة : لي فيك مامهنيك ، تلقايه بايت قصار فشي قنت وأنت مزال رافدة همو
- سميرة ( شافت فيها ) :
مرافدة ليه هم ، غير جاتني عجب يتعطل مالفة ليه 9 يكون هنا من نهار تزوج بيك
- تودة ( وقفات ) :
نوضي ريحي بالك الغد تلقايه داخل من الباب
- رجاء ( ماعطاتش للأمر شي أهمية ) :
أنا غانوض نرتاح عييت غدا فصباح أيدوز يونس عندنا باغي يشوفني ، دوا معايا فتيليفون راه ݣلت ليه بلي بغيتيه .
- تودة : صافي مزيان يلاه تصبحو على خير ( خلاتهم تودة وطلعات ورجاء بدورها مشات لبيتها من غير سميرة لي بقا بالها مشوش وخاطرها كتقوليها شيحاجة ماهياش واقعة ) .
•••••••••••••••••••••
الـــغـــد
- الــدار الـبيضــاء 📍
على بعد مارشي سونترال ب 6 دقايق .. كيتواجد HÔTEL AL MAMOUN ، قبل مدخل كيبان ليك الحائط لي عليه لافتة بجميع الفنانين لي غايكونو فديك الليلة ، عاد كاين الباب الكبير لي كلو كان منقوش فلون قهوي باب مغربي قديم ، عاد كدخلي الداخل وأول طابع كيجيك البالك هو طابع رياضات المغربية الفاسية بزليج ديالو ودروجو والݣبص لي كان فسقف .. ألوانو لي كانت مابين الأحمر الأخضر وزرق وصفر ، الترية الكبيرة لي نازلة من السقف أما طبالي ديالو لي كانو بحال شي صالون مغربي حر .. لي بغا يريزيرڤي شي شومبر كان كيتوجه لعند السيدة لي خدامة فالإستقبال ، وعاد كاين السيد أخور فالبلاصة لي خاصة بالمطعم والشخص الثالث لي كان مكلف بالبار .. أوطيل المامون كان من بين الأوطيلات المعروفين فكازا بليل ماتلقاش بلاصتك نهائيا خصوصا الى كان شي فنان معروف ايحيي ديك السهرة .
- أول ماحطات رجليها فصباح فهاد الأوطيل حلات فيه فمها حسات براسها كتواجد فشي رياض من الرياضات لي فمدينة فاس واخا عمرها زارتها ..
- دخلها رشيد لواحد البيت هي وحياة ، حتى دخل عندها راجل هاز كاميرة او واحد سيدة هازة فيديها زوج تكشيطات ..
- رشيد ( كيفهمها بالمهل ) :
عنبر هذا مهدي السيد لي غادي ياخود ليك تصيورات باش نختارو وحدة وهي لي اتكون فباب الأوطيل إن شاء الله ، وهادي حنان اتلبسك التكشيطة لي اتصوري بيها ، وتكشيطة الثانية لي غادي طلعي بيها الليلة صافي ؟
- عنبر ( هزهزات ليه راسها ) :
واخا .. خرج وخلاهم وخرج معاه مهدي حتى توجد باش ياخود ليها التصاور لي خاصينو .. خلاتها حياة كتوجد فيها حنان وخرجات كتكتاشف الأوطيل ، سلات حنان مع عنبر ودخل عندها مهدي طلبها باش تجي معاه لسطوان لفين غادي ياخود ليها تصيورات صورها بزاف ديال التصاور عطاها إبتسامة ومشا بحالو .. رجعات للبيت لقات حياة كالسة بدلات عليها وݣلسات
- حياة ( بحماس ) :
الاوطيل غزال ياختي فن عرفتي بحال دوك رياضات لي كيبانو فتلفازة بحال هوكاك
- عنبر ( ساهية هزات عينيها فحياة ونطقات ) :
عمري كنت كنظن نولي نغني فشي قنت بحال هذا ، وشوفي ليك قراي القانون باش تولي شيخة فالأخر
- حياة : وياه هاد الدنيا فشكل والله ، والمهم اباش بعداك مانبقاوش فزنقة راه حتى انا خاص نخدم كون ايشوفليا شي سرباية
- عنبر : سيري تكمشي انا دابا خدامة نجمعو صريفة ونشوفو شنو نديرو من بعد ( قاطعهم صوت الدقان فالباب ) ، دخل رشيد والإبتسامة على وجهو :
عنبر وصلو الدراري لي ايخدمو معاك خاص تخرجي باش دربي ودربي صوتك باش تكوني واجدة بليل إن شاء الله
- عنبر : واخا رشيد شوف
- رشيد ( بتساؤل ) :
نعام ؟
- عنبر ( وقفات) :
دابا راه مغانبقاوش نخرجو بكري من هنا ، الى كتعرف شي مول طاكسي لي يولي يوصلنا ويولي يدينا ويجيبنا
- رشيد ( بإستغراب) :
علاش أنا لي انولي نديكم ونجيبكم
- عنبــر ( برفض ) :
لا أخويا رشيد أسمحليا ، ولكن دابا حنا عندك فدار ختك تولي توصلنا الهضرة تولي دور وحتى لي خدامين هنا يوليو يدويو دابا انت الباطرون ديالي مابغيتش شي حد يدوي فينا داكشي باش عفاك تشوفلينا شي واحد يولي يوصلنا وانا نولي نخلصو
- رشيد ( بقى كيفكر سكت مدة وشافيها ) :
واخا ماقلتي عيب انا انشوفليك واحد السيد كنعرفو ظريف يولي يديكم ويجيبكم والخلاص عليا انا أعنبر ماشي عليك أنت
- عنبر : واخا الله يجازيك بيخير .. خرج وتبعاتو هي او وراها حياة .. توجهو لواحد القاعة فين كانو واقفين دراري وقدامهم الالات موسيقية ، عرفهم رشيد على بعضياتهم بداو دراري كيقادو فالماطريال وكيروكورديوه ، عطاتهم عنبر واحد لاليست مكتوبة بالأغاني لي ايتغناو فديك الليلة دقائق وبداو فتدريبات ديالهم .
- الطريق كلها وهو كيخمم هاز ملف فيدو وعقلو سارح ماعجبو الحال وفنفس الوقت خايف .. كيتفكر الكلام لي قاليه الطبيب :
سي المعطي التحاليل خرج فيهم بلي مع الأسف تصابيتي بمرض الزهري .. هاد المرض هدا كيجي عبر الإتصال الجنسي الغير محمي
- المعطي ( مافهمش كلامو وشنو بغا يݣوليه ) :
سمحليا حيت مافهمتش ؟ اول مرة نسمع هاد المرض واش واعر وكيفاش هادشي لي ݣلتي الجنسي مات الجنسي مافهمتش أسمحلنا وصافي
- الطبيب ( حاول يبسط ليه ما أمكن ) :
هاد المرض لي فيك كيجي من النعاس إلى فرضنا نعستي مع شي وحدة من غير زوجة ديالك ، ولا مثلا دݣيتي شي برة دݣ بيها شي واحد فيه هاد المرض هذا أنت مزوج اسي المعطي ؟
- المعطي ( تحرج حك حاجبو كيحاول يتفادى نظرات الطبيب ) :
أياه أسيدي مزوج ، عدي جوج عيالات اللولة والد معاها جوج والثانية عاد تزوجنا
- الطبيب : قبل متزوج بثانية كنتي فايت عاشرتي شي وحدة ؟ ( كيتسنى الإجابة منو بان ليه حدر راسو حشمان ) غير دوي أسي المعطي هادشي لي راه مافيهش الحشمة حيت كيخص صحتك
- المعطي ( بإحراج ) :
والله يسمح لنا أسيدي هو بصراحة ياه كان غرني شيطان فشي يامات قبل منتزوج ، ولكن راه من داك الوقت مابقيت قربت للحرام
- الطبيب ( هزهز براسو ) :
مابقيتيش قربتي ليه حتى فات الفوت ، راه المرض مكايبانش فديك الساعة راه حتى كدوز مدة عاد كيبان وراه كيعدي ، ودابا برتك راه حتى هي خاص دير تحاليل لا تكون تعادات ( هز ورقة وبدا كيكتب فيها ) غادي نكتب ليك الدوا مضاضات حيوية باش العدوى ماتنتاشرش وحتى دوك التقرحات لي عندك فالعضو ديالك وفرجليك مايبقاوش يتزادو .
- المعطي ( تلف ) :
ولكن أسيدي نخاف نݣولها لمرا عدي وتبدا تغوت وتنفرني كيغاندير ؟
- الطبيب ( هز فيه راسو ) :
أنت ݣوليها بغيتي منها دير تحاليل على ود صحتها ، نوصيك حاجة وحدة ممنوع تقرب ليها ولا تعاشرها خليك بعيد الفوطة ديالك تمسح بيها بوحدك الماكينة ديالك اي حاجة كتخصك مايقرب ليها حتى واحد ، ونقى أسي المعطي نقى الله يرضي عليك
- المعطي : على شحال مانقربش لمرا عدي ؟
- الطبيب : العلاج راه كيطول شوية راه من 6 ديال سيمانات حتى ل 6 شهور
- المعطي ( جبهتو كلها عرقات ) :
ياك غانبرا ؟
- الطبيب ( مد ليها الورقة والملف لي فيه التحاليل ) :
إن شاء الله دير دوا ديالك وحنا عند الله .. ناض المعطي من فوق الكرسي شد عندو الملف شكرو وخرج تحت انظار الطبيب لي مكانش باغي يخلعو ويقوليه بلي المرض عندو واصل للمرحلة الثانية .
- قرب للدار وهو كيخمم مايقدش يكولها لتودة ولا يݣوليها خاصها تمشي للطبيب خاصو شي حل ، دخل لدار كانو مجموعين على الفطور هزو فيه راسهم سميرة طلعاتو ونزلاتو مكانش هو هداك
- تودة : فين كتي ؟ من البارح وأنت غابر ياك لاباس ؟
- ݣلس المعطي كيرتاح على الكرسي أما الملف خلاه فطوموبيل :
كنت فالمدينة كان عندي كونترول عند الطبيب اليوم فصباح ، وكت بايت عند واحد السيد كان عندهم واحد السبوع
- تودة : ايوا مزيان ( ماسولاتوش نهائيا على الكونترول ) فطرتي ؟
- المعطي : لا مافياش أنطلع نرتاح شوية ، ناض من حداهم وطلع للفوق دخل لبيتو وتكا فبلاصتو كيخمم حتى داتو عينو .
- سميرة ( بشك ) :
وجهو مخطوف ماعرفت مالو ؟
- تودة : تلقايه كان بايت قصار فشي قنت وحنا كيكذب علينا
- سميرة ( بنفي ) :
لالا المعطي كنعرفو فاش كيبات قصار فشي قنت ، لون وجهو مخطوف ..
- تودة ( ماعطاتش للأمر أهمية ) :
رجاء معاش غايجي يونس على ود نوجدو الغدا ؟
- رجاء : مع الظهر راه يكون هنايا
- تودة : صافي مزيان باش نديرو حسابو للغدا ، داز داك الصباح عادي وروتيني الخدامات فالكوزينة كيوجدو فالغدا ، أما رجاء دخلات للبيتها طرفات حالتها وقدات راسها .
- غير أذن الظهر بواحد الشوية وسمعو الدقان ، مشات نعيمة حلات دخل يونس هاز التقدية فيديه خرجات عندو رجاء لابسة قندورة مبردة وجامعة شعرها مدوزة الكحل فعينيها وبين ليلة ونهار اللون بدا يرجع للوجها ..
- باس ليها راسها ويدها ودخل معاها للصالون :
كيبقيتي شوية رتاحيتي شوية ؟ جبت ليك الدوا لي سيفطي ليا
- رجاء ( تنهدات ) الحمد لله دابا مزيان كيدرتي مع الطريق مزيان ؟ راه خديتو راه قلتها ليك
- يونس : ماشي مشكيل خليه عندك باش الى سالى هداك تبداي هدا ، سونات ليا الواليدة
- رجاء ( تروع عليها خاطرها ) : كوراه كتغوت ياك ؟ أنا عييت ايونس وحق الله هذا لله
- يونس ( ببرود ) :
أنا كثر منك أرجاء راه كنشوف الفرزيات لي كدير بيني وبين خوتي ، بغيت ندوي مع عمي المعطي يخليك هنا عندي واحد الخديمة الى يسر ربي فيها ونشوفو شي بيت وكوزينة نكريوه إن شاء الله
- رجاء ( بفرحة وصدمة ) : حلف بالله ؟
- يونس ( بإبتسامة ) : وحق الله العظيم ، راه كولشي كنشوفو بعيني هاديك كتبقى دارها هي والواليد وانا مابقى عندي ݣلاس تم ، منين توصل بيها تعطيني البيت ديال الدبش سالات الهضرة . ( قاطعهم دخول تودة )
- أهلا أهلا ولدي ( ناض سلم عليها ) كيداير كيدرتي مع الطريق ( ݣلسات )
- يونس : الحمد لله اخالتي بيخير كيدايرين فين عمي المعطي ؟
- تودة ( أشرات ليه براسها ) جا عيان شوية راه ناعس .. دخلات سميرة سلم عليها وݣلسات حتى هي
- تودة : وجابك ربي بحال الميمون عدي نيت شي كلام بغيت نݣولو ليك
- ضارت عندها رجاء وسميرة بترقب باغيين يعرفوها شنو غاتݣول
- يونس( بتساؤل ) : أياه مرحبا الله يسمعنا خبار الخير ..
- فجـهة الغـرب الــشـراردة بـنـي حـسـن , ســوق الأربــعـاء الغــرب 📍تخطات طوموبيل من نوع فورد الپلاكة ديال المدينة شادة الطريق ديال الخرجة على بعد كيلومترات قلال ضارت على ليمن غادة فطريق لي كانت ضيقة شوية .. كانو كيبانو ديور قلال شي عيالات كيسرحو فالبهايم ديالهم ، ولي واقفة مع جارتها دايرة الطبيلة وشادة الجماعة وكتحقق فطوموبيل .. الرجال لي كيدوزو كيهزو يديهم راميين السلام على لي سايݣ ، الريحة ديال الماكلة وريحة الخبز طايب كتعطي او واصلة حتى لطوموبيل ..
- بانت دار كبيرة وعالية واقفين قدامها 3 ديال طوموبيلات وحدة من نوع جيپ كحلة والثانية رونج فنفس اللون ديال الجيپ اما الثالثة كانت نوع ميرسيديس فالبلو مارين .. وقفات الطوموبيل ونزل منها إدريس لابس سروال ديال الدجين وسبرديلة من النوع الموريح وقميجة فشيبي مع نظارات شمسية .. تحل الباب وخرجات مرأة كبيرة فالعمر لابسة قفطان فتيركواز او شال فنفس اللون هازة المسبح فيدها لون بشرتها سمرة وعينيها زينين مكحلين ، هازة يديها مستقبلاه بحضن كبير :
وياوليدي حبيبي وعلى سلامتك وغيوب هادي ( بعدات عليه كتحقق فيه ) ديك دار البيضا ( مع ترقيق حرف الضاض) كتغبركم كيجمعكم المشية الموسم العفارت
- إدريس ( كيضحك ) :
دابا مع التقاعد اتولي تشوفيني كل شوية أتهناي الواليدة ( جراتو مدخلاه ) .. مع الدخلة الدار كانت عكس برا كلها مزلجة واسعة وكبيرة بصالوناتها لي كانو مفرشين بفراش مغربي تقليدي وزرابيها الكبار وطباليها لي كيتوسطو الصالة ريحة الطياب البنين عاطية فدار كلها .. كان ݣالس راجل فعقدو الثمانين لابس سروال فالبيض قندريسي وقميجة معاها جيلي .. شعرو كلو بيض ولحيتو بيضة إدريس واخد من الملامح ديالو ، تحنا على يدو باسها ليه وݣلس حداه ..
- إدريس ( بصوتو الرزين ) :
الحاج كيدرتي ؟
- الحاج ( بصوت وقور باين من ملامح وجهو دا فزمان وجاب وشحال داز عليه حتى وصل لهاد الݣد ) :
وهاد الساعة اللهم لك الحمد أتا ليبتي ليا ضعافيتي مكتجيش معاك المدينة
- أدريس ( ضحك ) :
امع تقاعد الحاج كتجي معايا الخدمة ( دور راسو ) فين هو عبد الخالق ؟
- الحاج ( أشر براسو ) :
راه هو ودراري فالمربط .. طارق ضبر على شي عود جديد ماعرفت فين طاح عليه ݣالت بغا فاروق يدريسيه ليه باش يدخلو مع الخيل ديالو كاملين تجمعو تم
- أدريس ( وقف ) :
أنشوفهم ونرجع ..
••••••••••••
- مجموعين بزاف ديال الرجال الأغلبية مزال شباب واقفين عند واحد السياج مستفين لابسين سراول من نوع القندريسي وكيتفرجو فشخص لي كان الوسط .. تزادو رجال أخرين كبار شوية فالعمر كيتفرجو ، واحد من دوك الرجال كان معاه شاب فأوائل العشرينات (شاف فالرجل لي جا معاه ) :
واش هذا مكايخافش راه والله حتى كيريسكي براسو دابا يلوحو يشتف عليه
- ( ضحك ) :
ݣاعما تخاف عليه الروطال مكايخافش فينما كان شي عود هايج هو لي كيدريسيه دابا تشوف كيفاش أيولي داك العود بحال المش تحت يديه .. واقفين كيتفرجو فيه مبهورين ونفس الوقت خايفين ، خايفين عليه لا يطيح شي طيحة خايبة من غيرو هو لي ماعندوش ݣرام ديال الخوف .. هادشي لي كيدير فيه عندو عادي بحال شريب الما ݣالس بطولتو لي كانت واضحة لكاع الناس لي تم عضلاتو البارزة تحت من سليپ سماطي لي كان لابس ، عنقو الشديد العريض لي مزين بݣورميط غليض ، يديه القاسيح لي مكتاسحهم شعيرات كثيرة رجولية وعروق بارزة على يديه .. عاقد غوباشتو وجبهتو كتقطر بالعرق من حر الشمس لحيتو الرجولية وفمو هو وعنقو لي كانو مجموعين بحاجة وحدة الحدة ديالهم بحال الى مرسومين ومنحوتين سبحان لي صورو بابهى صورة وعطوه مظهر وهالة رجولية تقيلة .. كيمشي ويجي فوق بالجسد ديالو العريض فوق داك العود لي ماكرهش يلوحو من فوق ظهرو ويهرب يرجع لفين كان ..
- قبالتو كان واقف شخص فنفس طولتو ونفس البنية الجسمانية ديالو .. ملامح حادة وشعر طويل جامعو بواحد لاستيك كحل لابس سوفيطمة كحلة وكيتفرج فيه وإبتسامة رجولية معلية ملامح وجهو .. حس بيد على ظهرو ضار بزربة زادت توسعات الإبتسامة ديالو ويقهقهة رجولية نطق :
عمي على السلامة ( عنقو )
- أدريس ( معنقو بدورو ) :
عمك كون بغيتيه كون جيتي عدو دابا يلاه عمك وباز لوجهك
- والله أعمي إلى غير الخدمة سول فاروق وعصام يݣولو لك
- أدريس : هادوك خلاص بحالك بحالهم ( هز فيه راسو ) نقس اطارق شوية من هاد الطول دير بحساب باك وعمك توما فين غاديين بهادشي ؟
يتبع...
حبيييييييييت 😩❤️🩹 الصراحة من بين احسن القصص لي قريت فحياتي ايلا قلتي وازنة بصح قصة من العيار التقيل وتستاهل ❤️🩹