محتوى القصة
- حبسو قدام باب الدار .. طلب الروطال من سهام تنزل تسوني يحلو ليها وشد عنبر فطوموبيل
الروطال ( ببرود ) اش ݣالك ؟
عنبر : بغانؤ نطلق منك ونرجع ليه وانا سمعتو داكشي لي كان باغي يسمع ( شافت فيه ساكت وساهي ) فاروق عندك تمشي دير فيه يديك .. حنا دابا محتاجينو نهار نوصلو لي بغينا وفرشخو كيف بغيتي ..
الروطال ( شافيها بقنت عينو ) وليتي دوري بجنابي الفتيلة
عنبر : حيت انا عارفاك اتبغي تفرشخو هادشي علاش قلت نوصيك .. دابا المرة فيدو زرعت ليه فكرة والديه هوما سبابنا وطيحت عليهم الباطل وخليتو دابا منو ليهم .. بينت ليه بلي هوما العقبة الوحيدة فطريقنا دابا نشوفو اش غايدير
الروطال ( كيحقق فيها بعينيه حرك راسو ) خاص نخاف على راسي منك أنتي .. داك راس عندك وشنو فيه
عنبر : لالا خوك لي عقلو تقيل .. هو لي قراني انا داكشي لي قاليا درتو ودابا صافي خليني نزل
الروطال ( جرها من يدها مزير عليها ) نبات ودوك لعيبات لا .. نسالي غانجي نهزك سمعتي ( جر وجها حاط شفايفو على شفايفها ببوسة قوية بعد منها كيشوفيها مخرجة عينيها ) هادي اواحد الوشيمة باش تعرفي راسك ديالمن ازين يلاه سيري ..
عنبر (بلعات ريقها جماعة فمها هزات ساكها ونزلات كترمش فعينيها .. دخلات بالمهل وقبل لا تسد الباب شافت فيه دار ليها باي باي وغمزها .. سدات عليه الباب ودخلات ) والله مكايحشم ..
- طلعات لعندهم لقاتهم فصالة مجموعين سلمات عليهم .. حياة مكانتش معاهم
عنبر ( كلسات كنشوف فخالتها حادرة راسها وساكتة ) فين هي حياة ؟
ليالي : فالبيت سادة عليها
عنبر : شنو وقع ليكم عاودو ليا ( حطات ساكها )
ليالي بدات كتعاود ليها من الاول .. وكملات ليها تودة على لي وقع قدام رشيدة
رشيدة : انا دابا لي مامزياناش ياك ( شافت فيها )
تودة : انبقاو انعاودو فالهضرة ݣوليها فراسك حق .. البنت غلطات اييه وكولنا كانغلطو ولكن حتى تي راك ماحنيناش فبنتك
عنبر : متقلقيش اخالتي ولكن راه مدرتي فيها مايصلاح .. ديك البنت راه كانت سحال تفكر ليك فاش كنتي مع داك الميكروب ، والله ماتلقاي بحالها حنينة وقلبها بيض ودرويشة واخا هي كتسرع وتزلق بعد الخطرات ولكن راه درويشة ..
رشيدة : وانا كنبغي ليها الخير .. واش كاين شي أم تبغي ضر لولادها
تودة : هي الى حزتيها عندك .. وقربتيها ليك وصاحبتيها ونخرج مع بنتي وندخل معاها ونتحتت معاها ونحطو راس على راس أرشيدة راه مايدومو ليك أولادك أختي ( تنهدات رسيدة وسكتات )
عنبر : انا غانوض نشوفها ( خلاتهم ومشات عندها دقات ودخلات ) لقاتها ݣالسة حالة سرجم زمقابلة معاه ما دوات معاها ماهضراتها .. جاتها من اللور وعنقاتها بيديها بجوج كدوز ليها على راسها حسات بيها كتبكي .. خلاتها على خاطر خاطرها حتى ترتاح ..
× عماد ×
يلاه دخل من برا كان كيتغدا توجه للبيرو ديالو هز الملفات لي كانو وجدو لبارح وتوجه للمكتب عميد .. دق فالباب ودخل
عماد ( عطاه التحية ) سيدي بغيتك تشوف هادو ( مد ليه الملف بدا كيعاود ليه بضيطاي شنو لقاو وكاع المعلومات لي تم شرحهم ليه بتفصيل ) ..
رضوان ( هزهز راسو ) تبارك الله عليكم .. براڤو ( شافيه ) كان خاصني نزيرك ولا شنو ؟
عماد ( بإبتسامة) لا ماشي هكاك .. كان خاصنا غير شوية ديال الوقت أسيدي
رضوان ( حط الملف ) دابا ݣوليا علاش ناوي ؟
عماد : بغينا ( قاطعو تيليفون جبدو طلعات ليه نمرة امينة ) سيدي سمحليا عفاك ( وقف يجاوب ) نعام الالة مينة ..
مينة : ولدي عاد جينا من عند الطبيب .. أريناس راه دوات
عماد : وايلي شنو ݣالت ؟ عرفتي شنو انا غانجي صافي .. يلاه بسلامة ( قطع )
كالسين الراس فراس شادة فيدها بكل حنان وحب واخا هي وياها مفاوتين غير بعام .. ولكن فهاد الوقت كتحس براسها بلي كبر منها ومن حقها تحميها من الناس ومن راسها ..
حياة ( هزات راسها فعنبر ) انا عارفة راسي غالطة من ساسي لراسي .. دويت مع واحد ومشيت تلاقيت معاه مكنعرفو مكايعرفني وكون غير تلاقينا افلمدينة هانية حنا بعدنا معاه وهانية عندنا مغانمسحاش فيهم ولكن انا لي زيدتهم .. ماعرفتش فين كان عقلي وحق الله العظيم ( برمات شفايفها بحزن )
عنبر ( كتشوفيها بأسى فملامحها قمشة حدا وجها عنقها مقموش ) حياة انا غنسولك وجاوبيني بصراحة ( شافت فيها حياة مهزهزة راسها ) واش باغية تزوجي ولا باغية تربطي شي علاقة ولا باغية تكملي قرايتك وتخدمي ؟
حياة ( بلاما تفكر ) بغيت نقرا ونخدم ولكن ( رخات عينيها ) بعد المرات كنحس براسي باغية راجل فحياتي ماعرفتش علاش ..
عنبر : كنا فولاد صالح ومكنتيش هكا .. عمرك دكرتي رجال على فمك شوفي انا نقوليك شفتي فاش تقراي راجل غايجي بوحدو واش عارفة دوك تطبيقات اش فيهم غير المكابيت شفتي فاش كدخلي لتم بحال الى كتحطي راسك للبيع واش تيندر ديال الزواج اش مكتوب فيه تعارف .. بكري كانو الناس كيتزوجو من ديك مسلمة وغيرها هادوك اه دزواج ومزال شوف تشوف واش تلاقاي بيه ولد الناس ..
حياة : والله ماكنت غادي ندخل ليهم .. غير البنات لي معايا فالقرايا عمرو ليا راسي
عنبر : مالك عندك 15 عام .. حطي هدف قدامك قرايتك ، قراي شدي الباك ديالك ومن وراه شوفي شنو غاديري وهانتي خدامة دابا .. الخدمة غاتخليك تلاقاي بناس جداد وديري معارف جداد حتى الى عرفتي شي حد فالواقع بعدا هانية شي حد بعقلو ومع ذلك متحليش ليه الباب كاع .. شتي انا كون جاب الله ماوقعش لي وقع وتزوجت بفاروق والله منقلب على شي واحد ( شافت فيها ) وحق الله انا جواد وكنت كنقوليك حضي راسك مزال هداك ولد الناس كان باغي زواج ..
حياة ( تنهدات ) والله حتى ندمت علاش دخلت لتم بالله اختي
عنبر : ماوقع والو دابا دازت الحمد لله .. وزايدون متعرفيه يكون شريف وفوسخكم بديك البولة ( شافت فيها وطرطقو بضحك ) هكاك ضحكي متخليش اهتمامك هو الراجل ، الراجل غايجي غايجي ونهار يجي غاتمشي بعزك وشانك ومرشانك فهمتيني ؟
حياة : مابقيتش غانعاود صافي اخر مرة ( تحل عليهم الباب ودخلات رشيدة .. هزات فيها حياة راسها ودوراتو متنهدة ناضت عنبر من حداها خرجات مخلياهم بزوج ) ..
رشيدة ( قربات لحياة وݣلسات حداها تنهدات تنهيدة طويلة بأسى ) وليتي تغوتي عليا أبنيتي
حياة ( شافت فيها ) أنا مغوتش عليك انا اخرجت لي فقلبي وفرغتو شيحاجة كانت ضراني من شحال هادي وخرجتها صافي ..
رشيدة : انا باغية ليك الخير واش كاينة ام تبغي ربنتها ضر ... انا خضرة مكنعرفش ندوي مكنعرفش نݣول حيت حتى انا مي مكتش نتعاود معاها داكشي كبر عدي راه انت المصرانة لولة قبل خوتك انت الكبيرة العزيزة ( بدات تبكي ) انتي باش كنشوف انا الى مسولتكش على نهار جيتو لهنا حيت عارفاك وتايقة فيك عارفة شنو مربية وبلي متخلي حد يضحك عليك .. انا شكون بقى عدي والديا الله يرحمهم الراجل مشا عدي انتوما وليداتي وهاد المرة الله يخلف عليها لي رضات هاد الدار داري ..
حياة ( رخات شفايفها بحزن وقربات منها معنقاها ) متبكيش امي .. سمحيليا الى غوت عليك انت راه عزيزة عليا وانت لي عندي فيك مي وفيك با ، انا علاش بغيت نقرا ونخدم اباش نبرعكم ومنخليكم مخصوصين ..
رشيدة ( كدوز ليها على ظهرها ) سمحيليا انتي ابنيتي الى ضربتك .. متديش عليا الله يرضي عليك انتي راه كبيدتي نبغي نشوفك فرحانة وناشطة ومايخصك خير ونهار مبارك عدي نشوفك بدارك او وليداتك ضايرين بيا ..
حياة ( باست ليها راسها ) الله يخليك ليا ( عنبر واقفة حدا الباب كتشوفيهم وتبكي )
رشيدة ( شافت فيها ) ياويلي على عويشة دميعة تي مالك تبكي أجي اكبيدتي اجي ..
عنبر ( تقدمات عندهم ) طاح عليا الضيم فاش شفتك ولاهيلة ( عنقاتهم )
ليالي ( دخلات عليهم ) تصالحتو الحمد لله ( ݣلسات حداهم ) أصلا متعرفو داك البول يكون فوسخنا انا بعدا حسيت براسي خفافيت وشعري زاد زيان ( كضحك )
رشيدة : صافي ابنيتي من هنا لقدام نولي فينما حبساتني نطوش عليك .. ( قلبوها ضحك بدات كتعيط عليهم تودة خرجو عندها محطوطة صينية ديال اتاي البطبوط والمسمن وشي حلوات ݣلسو مجموعين )
تودة : وزيري معايا راسك أرشيدة .. الماكن راه السيد ايجيبهم غدا باش نزلو لدرب سلطان على وديت توابات إن شاء الله ونتقداو تم
سميرة : انا متسالوني ندير ليكم العقاد ، حتى رجاء ݣاتليا الى بغيتوها دير ليكم الراندا
تودة : وايلي واش تعرف ليها ؟
سميرة : وعلى ماݣالت تعلمات من تيليفون .. فاش كيكون يونس فالخدمة كتبقى هي فدار تعلم فداك الوقت لي كات حاملة فيه ..
تودة : ايوا صافي إن شاء الله .. ندوز نيت عند النݣافة لي كاينة فبورݣون لي كنا نلبسو عدها اتوريني معامن كتعامل على وديت اللباسي والعمارية والميدة ..
عنبر : ايخصكم العيالات لي يخدمو معاكم
تودة : نبداو بعدا بالخياطة والكرا .. حتى نديرو بلاصتنا إن شاء الله ونوليو نخرجو ديك الساع ونشوفو العيالات لي يخدمو ودراري ديك الساع شوية بشوية إن شاء الله ..
عنبر : الله يسخر .. والله ماكرهت نحرك يدي حتى انا ولكن فاروق مغايبغيش ليا
تودة : ݣلسي ابنيتي فدارك ديري وليداتك اش بغيتي شي خدامي ( بقاو يقرقبو الناب مجمعين حتى سونات سعاد عليهم )
× عماد ×
خرج من خدمتو نيشان شد الطريق للعيادة عند الطبيب .. أريناس وأمينة مشاو لدار قرر يقصد الطبيب هو الأول عاد يمشي للدار دخلاتو المساعدة سلم عليه وݣلس ..
عماد : دكتور عز الدين انا المفتش عماد حيدر ، انا لي جبت مدموزيل أريناس للعندك
عز الدين : اه وي مشاو واحد الشوية هذا
عماد : دكتور ݣالت ليا مها بلي دوات ؟
عز الدين : بصح دوات ولكن اسي عماد منݣدش نݣول شنو ݣالت كيبقاو هادو أسرار المريض
عماد ( بجدية ) دكتور أريناس ماجبتهاش لهنا غير على وديت داوا وصافي .. هاديك البنت امانة عندي وديك البنت تعرضات للخطف وتکد تكون تعرضات لإعتداء من طرف شخص لي تعدا على بنات غيرها لاليست طويلة او وقيلة شفتي المقال لي نزل فصحافة على هاد القضية ؟
عز الدين : وي بصح شفت ولكن اسي عماد ( قاطعو )
عماد : هادشي جاي من الجهات العليا اسي عز الدين ماشي من عندي غير أنا .. الى بغيتي ندوز ليك العميد مرحبا ..
عز الدين ( تنهد ) شنو غانݣوليك .. اسرار المرضى أمانة ولكن فهاد الحالة ماعندي منݣوليك ( فتح المجر وجبد واحد تسجيل صغير مدو ليه ) هنا غادي تسمع الحوار لي دار بيناتنا ..
عماد : نݣد نديه معايا ؟ ( عز الدين بإستسلام هزهز راسو ) شكرا بزاف على تفهم ديالك ( وقف سلم عليه ) خليت ليك الراحة ( خرج من عندو ) ..
- نزل لطوموبيلتو طلع فيها .. تم تم خدم التسجيل كيسمع فيه ... اول صوت كان ديال الدكتور ..
عز الدين : ݣولي ليا شنو سميتك ( مدة ديال السكات حتى تسمع صوت أنثوي بريء كان باين فيه التردد والخوف )
أريناس : أريناس أريناس المالكي
عز الدين : مشرفين شحال فعمرك ؟
أريناس ( بقات مدة وهي ساكتة ) عندي 22 عام
عز الدين : مزيان عاودي ليا اريناس عليك على حياتك واش عاقلة شكون أنتي شكون ماماك باباك ؟ واش كتقراي ؟
أريناس ( بقات ساكتة ) ماما أمينة ( تغنغن صوتها ) بابا مشا خلانا او مشا .. كنقرا على الحلويات
عز الدين : مزيااان كولي ليا اريناس شنو ضارك شكون ضرك .. شكون وصلك لهاد الحالة !
اريناس ( مدة وهي ساكتة كان باين عليها الخوف وتوتر بحال الرجفة فصوتها ) هو هو حناو ليا زغاريت كنسمع الزغاريت فودنيا .. والناس بزاف دالناس هو كان زوين كان كيشبه لابطال القصص ولكن هو وحش وحش خايب ( بدات تبكي ) هو هو هجم عليا هجم عليا ودݣ ليا برا .. كنشوف بزاف ديال الماس والمقوصة بزاف والفاصمات بزاف كان باغي يبنجني وانا مكايشدش فيا البنج مزيان ( زادت فوتيرة البكا ) ضربتو انا ضربتو حيت بغا يهجم عليا انا ضربتو قت**لتو اه اه انكون قتل**تو ضربتو بالڤاز ..
عز الدين ( كيحاول يكالميها ) صافي أريناس براكة عليك ..
أريناس ( جاها إنهيار ماقداتش تسكت كتبكي على حر جهدها ) انا ضربتو ضربتو وهربت حفيانة حفيانة ونزلت كنجري وبقيت غادية حفيانة اه حفيانة ويدي فيها دم .. ولكن دوك رجال تبعوني تبعوني وهربت ونقزت فالبيكوب وتخبيت نعست صافي نعست ماعرفتش فين انا جا صباح كنشوف شمش .. اه كنت كنشوف شمش ماعرفت ماعرفت شكون انا شكون انا ( زادت فوتيرة البكا وتقطع التسجيل ) ..
جوايه المغرب وقف قبالت باب دار خوه .. سونا بقا شحال وهو يحل ليه ..
عصام ( طانز ) دخل مرحبا الدار دارك أخويا وحنا ضيافك .. أش حبات خاطرك شي براد اتاي لا ماشي وقتو شي عصير ؟
عماد ( خنزر فيه ) براكة من الطنز مغانتعطلش .. تا مالك أبنادم تحزينا وجينا عندك بكري..
عصام ( بالهمس من تحت سنانو ) ماداويش عليك .. داوي على الخطية لي مخلي عندي فداري أصاحبي واش انا مكافي مع مخي جايب ليا مونتيف ..
عماد : السيدة دوات اليوم ( كيقلب بعينيه ) فين هوما ؟
عصام ( هز براسو ) السطح ، شنو ݣالت ؟
عماد ( عاود ليه )
عصام : هالي ݣلنا مونتيف كحل جايبو ليا لباب داري ..
عماد ( كيشوفيه ) واش خايف ؟
عصام : من نيتك ، انا باغي تيقار وراحة داك تخربيق ديال البسالة خليتو نهار تزاد عندي عمران ..
عماد : مكاين لا صداع لا والو اهني راسك مابقاش لينا بزاف .. ݣطعنا نص الواد بقا غير نص
عصام : صݣعة هاد ختنا ( ݣلس ) كنت كنݣول غير انا لي راس المحاين ساعة داكشي لي كنت طايح فيه .. فين يبان ݣدام هادشي تخلويض لي غارقة فيه سيدة ..
عماد : وهادشي لي وقع معاها وقع مع بزاف غيرها غير هي عندها زهر عاشت وهوما لا .. ( سونا الباب شاف عصام فعماد باش يحل الأخير لي ناض محرك راسو بلا حول حل .. دخلات أمينة وأريناس لي كانت منزلة راسها مشات نيشان لبيت لي كتنعس فيه بلاما تشوف فحتى واحد فيهم )
عماد : لالة امينة لاباس ؟
أمينة ( هازة سلة دالبلاستيك ) الحمد لله اولدي طلعت نشر شي حوايج وطلعتها معايا يضربها البرد شوية .. منين رجعنا من طبيب مابقاتش دوات وقيلة عطاها طبيب شي حاجة لي كالماتها ݣاليا جاتها بحال الطجة ..
عماد : داكشي باش جبت نسولك ، واش أريناس مكايشدش فيها البنج ؟
أمينة ( صغرات عينيها وحلاتهم ) أياااه مكايشدش فيها دغية على شحال .. كان ݣالها لينا طبيب فاش كانت فتحات على المصرانة زايدة ..
عماد ( تنهد مكانش باغي يݣوليهاأشنو وقع ومابقا عندو لاش يسول أريناس لي كان راه عرفو فتسجيل ) ماعليش ألالة امينة نسولك ديك دار لي ساكنين فيها كاريينها ولا ديالكم ؟
أمينة ( تنهدات ) لا أولدي أكاريين
عماد : صافي إن شاء الله انشوفليكم شي دويرة فقونت خور وتحولو من تم حسن ليكم
أمينة : واخا أولدي لي درتيها حنا معاك فيها .. الله يكتر خيرك وخير خوك ( شافت فعصام ) عذبناه ودخلنا عليه وزيرنا عليه سمحلينا أولدي ( غرغرو عينيها بدموع )
عصام ( وقف ) مكاين لا زيار لا والو اميمتي مرحبا بيكم دار داركم ..
أمينة : الله يكتر خيرك اولدي وينقي طريقك من الشوك ( حدرات راسها وتوجهات للحمام )
عماد ( شافيه ) سبحان الله ( عطاه بظهر )
عصام : بديتي تاني صافي غادي ( محاوبوش شير ليه بيدو بإشارة بسلامة وخرج من عندو ) ..
"أجمل
شعور في هذه الدنيا
أن تشعر أنگ لا تهون
أن تشعر أنگ بِـ مأمن و لو أخطأت
وأنگ لا تُستبدل و لو كنت في مزاجٍ سئ
وأنگ لا تُغادَر و لو شعرت أنت بِـ رغبةٍ في أن تغادر نفسگ..؛ أجمل من أنْ تعرف أنَّ خاطرگ سَـ يُشترى على الدَّوام..، وأنَّ دمعتگ سَـ تُمسح مهما گان الظَّرف..، وأن يدگ لن تُترگ مهما بدا الوضع معقداً ..
- ݣالسة فوق الكرسي كتحاول ترتاح .. عيات من كترت مشي وجي مابين هنا وهنا واقفة على شغالها هي ورشيدة .. تمد ليها كاس ديال اتاي برزتو شداتو وتبسمات
تودة : الله يرعطيك الصحة اسي حسن .. سمحليا عذبتك
حسن : الله الالة تودة على راس والعين مدرنا شاي ( رشفات من كاسها ) كيغادية الامور عندك فالمحال ؟
تودة : الحمد لله هاحنا غاديين مابقاش ليا بزاف ، السيمانة جايا إن شاء الله نكونو حليناه وبدينا ..
حسن : الله يكمل بالخير الله يسخر .. الى كانت شيحاجة انا موجود لي تقالت عليك خفافت عليا ..
تودة : الله يعطيك الستر اسي حسن الله سخلي ليك صحيحتك ..
حسن ( حك حاجبو بيد ويد هاز بيها واحد تسبيح ) لالة تودة كنت بغيت ندوي معاك الى جات على خاطرك ومديريهاش مني قلت الصواب ..
تودة ( دورات راسها كتشوف واش رشيدة جايا من عند العطار ولالا رجعات شافت فيه ) الله يسمعنا خبار الخير اسي حسن ياك لاباس .. ياك دوزات ليك رشيدة الفلوس ديال جوج كيلو داللحم لي خدينا سيمانة لي دازت ؟
حسن : لالا ( ضحك ) شوفي الالة تودة انا عارف بلي يلاه ولينا جيران .. او وليتي من الكليان العزاز المهم انا المرا ديالي الله يرحمها ويوسع عليها الوليدات مزوجين وكل واحد فين داتو الوقت وبقيت انا بوحدي الحمد لله عندي خيري وخميري وبغيت لي يعمر عليا ..
تودة ( تقرصات ) الله يكون معاك اسي حسن ولكن علاش كتݣوليا هادشي ؟
حسن ( شافيها ) انا سولت وݣالو ليا كنتي مزوجة وراجلك مات والى جات على خاطرك وقبلتي عليا باغيك على سنة الله ورسوله ..
تودة ( حشمات وغرقات بيها الدنيا ) سمحليا اسي حسن ولكن انا شحال هذا مابقيتش كنفكر فزواج من شحال هادي ..
حسن : وعلاش الالة تودة ؟
تودة : هكاك اسي حسن انا كليانة كنجي .. وحنا جيران كنجيو عندك غير انت من دون الݣزارة حيت معقول ولكن زواج لاواه وزايدون اسي حسن يلاه هادي 15 يوم باش كتعرفني ونعرفك سمحليا ( وقفات حطات كاس من يدها ها رشيدة جايا ) تعطلتي اصاحبتي اويلي عام باش تجيبي العطرية ؟
رشيدة ( ستغربات ) وراه عامر اش غاندير
تودة ( هزات تقدية ديالها وجرات رشيدة ) الله يهنيك اسي حسن .. ماعطاتوش الفرصة يدوي جرات رشيدة ومشات
رشيدة ( فطريق ) اويلي تي مالكي ؟
تودة ( معصبة ) داكشي لي بقا خاصني غير زواج ، ݣاليك باغيني لزواج الهبال والهترة
رشيدة : واش حسن الݣزار ؟
تودة : ايااه والله لا بقيت تقديت عندو لا لحم لا خضرة صافي .. عطا الله الݣزارة فينما مشيتي داكشي لي خاصني نيت ..
رشيدة ( كضحك ) وا( قاطعاتها قبل متكمل )
تودة : بلاما دوي وداك ضحك الباسل ديالك ماعدي مندير بيه ( سكتاتها )
فجهة أخرى خرج عندو المتعلم لي عندو
.... : سي حسن بغيتيني لشيحاجة ؟
حسن ( كيفكر ) ݣوليا لالة تودة عدها شي وليدات ؟
.... : والله ماعرفت بغيتي نسوليك نسول ؟
حسن : سول ليا وغير تحت دف مايسيق حد الخبار
.... : كون هاني اسي حسن تهنا ..
- النهار كلو دوزاتو غير فدار جاها القنط .. بدلات عليها حوايجها لبسات سروال ديال التوب واسع مع شوميز ديالو جمعات شعرها ودارت ليه بوندو فيه بابيون .. ودخات للكوزينة بدات كتجبد فالمقادير بغات دير البراونيز مخدمة الموسيقى حداها وهي كتصايب فيه دارتو فالمول ودخلاتو للفران ..
- وجدات الݣلية غير وجدات وحطاتها حتى هي خرجات كولشي للجردة حطاتهم على الطبلة .. بقات غير البراونيز حتى طاب خرجاتو خلاتو حتى برد وزوقاتو بالشكلاط وحطاتو حتى هو دارت القهوة حتى هي .. حطات البلاطو حطات من كل داكشي فبلاطو طلعاتو للسهام لي كانت فبيتها كدوي مع راجلها ..
رجعات للجردة کلسات وقفات طوموبيلت الروطال نزل منها .. دخل قبل مايدخل للدار بانت ليه كالسة فجردة توجه عندها مطلع حجبانو باستغراب حط سوارت الطوموبيل وݣلس ..
الروطال : هاي هاي على الحداݣة دومونديتي على هادشي ولا وجدتيه !
عنبر ( طلعاتو ونزلاتو ) باز بحال الى اول مرة ندهل للكوزينة .. سير بعدا دوش باش ترتاح وتحيد عليك العيا واجي
الروطال : هاي هاي على الفتيلة ديالي رافدة ليا الهم وكتفكر ليا هي لولة الالة ( وقف )
- بقات هازة التيليفون حتى بان ليها داخل لابس كيطمة نقية كورميط غليضة نازلة من يدو شعرو مرجعو اللور بقات كتشوفيه ساهية .. فتفاصيلو ݣلس مبسم ملاحظ نظراتها ليه جاتو الضحكة وعجبو الحال ..
عنبر ( داركات الموقف لي هي فيه ) شحال من سكارة ندير ليك فالقهوة ؟
الروطال ( مد راسو وقابل عينيه معاها ) خشي فيها غيرصبعك غادي تحلا ( غمزها )
عنبر ( عضات على شفتها ) باز ( جاتها الضحكة ) حسن تاخودها مسوسة حيت أصلا البراونيز حلو بلات نحط ليك ..
الروطال ( وقف وقرب حداها وݣلس ) بغيت جوج مورصويات الكبدة ( جاتها الضحكة حطات ليه وعطاتو الطاس دالقهوة )
عنبر : كيداز نهارك فالخدمة ؟
الروطال ( هزهز براسو ) مزيان الحمد لله هاد الساعة كولشي غادي مزيان غامتخرجش شي حاجة من الجنب ( كيتبنن ) واعرة العفريتة
عنبر ( تبسمات ) وشنو حنا ساهلين
الروطال ( شافيها كيفكر ) خاصك تعطيني الوصفة
عنبر : علاش زعمة ؟
الروطال : جاني المداق مختالف الصراحة ، ݣلت نعطيها لشاف لي عندي فالاوطيل
عنبر : لا بلاش انا بغيت هاد البراونيز يدوݣو غير الناس لي عزاز عليا .. حاجتي مكنبغي حد يشاركني فيها
الروطال ( هز حواجبو وتبسم ) هي انا عزيز ؟
عنبر : وصافي كول وعرفها منين دازت وتمدق ( كمل المورصويات مع القهوة مسح فمو وتݣاد فالݣلسة لايح يدو وراه راسها )
الروطال : ايمتا ماماك غاتحل المحال ؟
عنبر : سيمانة جايا إن شاء الله ، بغيت نمشي نشوف مي رقية وبا علال حشومة من نهار جاو مامشينا عندهم ولا نعرضو عليهم ونتجمعو كاملين ..
الروطال : غادي نشوف ليها بلان ( حنحن بصوتو الرجولي ونطق بجدية ) خاصنا ندويو شوية
عنبر ( بإستفهام) علاياش ؟
الروطال : علينا انا وياك ..
عنبر (تقابلات معاه عنبر عاطياه إهتمامها بالكامل ) دوي كنسمعك
الروطال : غانسولك شي اسئلة عليك انتي ولكن متجاوبيه حتى نعطيك انا جوابي على السؤال
عنبر ( بإبتسامة كتلعب بخصلة من شعرها ) صافي واخا
الروطال : نبداو بساهل اللون لي كيعجبك انا غانݣول الموڤ والخضر وزرق والݣرونة وشوية الحمر حيت مكتلبسيهش بزاف ..
عنبر : الرضا هههه هادو هوما لوان لي كيعجبوني زيد كمل
الروطال : دوقك فالماكلة كنعرفو كتموتي على البلدي ، وفاش كتكون فيك العدوة كتبغي تفششي وتاكلي بيتزا ولا شوارما ودوك لعيبات
عنبر ( ضحكات ) كاينة زيد
الروطال : ايمتا تزاديتي ؟
عنبر : 20/12/1998 غاندخل ل 27 فشهر 12 الماجي ..
الروطال : البعيليكة ( تبسم ) مبيناش عليك
عنبر : حيت قصيرة ( ضحكات )
الروطال : مغانسولكش شنو كنتي باغية تكوني ديجا ݣلتي ليا محامية ياك ؟( هزهزات براسها بالإيجاب ) واخا فين كتشوفي راسك من هنا ل 5 سنين ؟
عنبر : ناري قصحتي معايا طلعتي المستوى دالأسئلة .. هممم شنو غانقول
الروطال : وصاحبتي السؤال راه باين فين كتشوفي راسك من هنا ل 5 سنين .. غمضي عينيك وتخايلي شنو باغية ديري فين تكوني ؟
عنبر ( تنهدات وغمضات عينيها كتخايل ) ماكرهتش كون نرجع نقرا ناخود الإجازة واخا مانخدمش بيها ماشي مشكيل نحيد غير داك شوق وشهوة .. ماكرهتش ندير شي مشروع ديالي ماعرفتش شنو بضبط ولكن مشروع ديالي خاص ( فتحات عينيها وشافت فيه ) ماكرهتش نعيش كيما بغيت انا نعكي راسي فرصة فالحياة وفالحب ( تبسم ) نولد وليدات مع شخص كيبغيني وكيقدرني ويحتارمني ويكبر بيا ..
الروطال ( تقاد فالكلسة بصوتو الرجولي تقيل ) هادشي علاش بغيت ندوي معاك وهدا هو المفيد اعنبر ..
عنبر : قوليا
الروطال : يݣد زواجنا يكون اغرب زواج فتاريخ .. حيت تزوجنا على حاجة وحدة ودخلنا ليه بنية صافية باش الخلوة لي تكون بيناتنا تكون خلال ، مكانش عارفين واش غانشاركو فراش واحد مغانكرش بلي كتعجبيني فيك شي حوايج كينغموني فاش ݣلت ليك ماعندك فراق عليا ماسولتكش وماتشاورتش معاك .. دابا كنشاورك واش باغية تعطي فرصة لينا بجوج نكملو بجوج نكتافشك تكتاشفيني نشاركو كولشي مرة وراجلها ديال بصح ، تحلي ليا قلبك نحل ليك قلبي تسكنيه وتسكنيني ..
عنبر ( بقات ساكتة كتشوفيه وكتفكر فكلامو عجبها كيفاش حاورها .. كيفاش قبل كان هضرتو هي لي كتكون ودابا كيتشاور معاها )
الروطال ( بجدية كيشوفيها بتركيز ) خودي وقتك ابنت الناس حتى حاجة مابزز ، باش هكا كولشي يعرف بلي زواجنا واقف على صح حتى حاجة مابزز ..
عنبر : أصلا انا هادشي علاش قلت ليك باغية هادشي ديال بدر يسالي دغية .. بغيت نعطي فرصة لراسي حيت كنشوف راسي نستاهل نبغي ونتبغى ونعيش كيفما انا بغيت ونكون فرحانة ومرتاحة ويكون راجلي فكتافي وسند ليا ، فللول لا كنت مركزة امع بدر وتريكتو دابا لا باغية نشوف راسي انا ونعطي فرصة لينا ( تنهدات ) منكرش بلي حتى انا كنكون مرتاحة معاك وكنحس براسي فالأمان ومغاتقيصني حتى حاجة وكنكون فرحانة .. عزيز عليا مغانقولش بلي هذا حب حيت الحب ممكن يجي فاي وقت من بعد على غفلة ... ولكن واحد الإحساس زوين كنحس بيه إحساس لي مخليني باغية نعكي فرصة ليا معاك ونكملو بجوج ..
الروطال ( هزهز راسو بالإيجاب ) هادشي لي بغيت نعرف ولكن خاص تعرفي واحد البلان .. قلبي خايب أعنبر الى مشيت حتى بغيتك ماعندك فكاكة معايا واخا طيري وتنزلي بضاض ديالي خاسر ومرييييض ( مورك عليها ) مغانبقاش انا هو أنا هادشي لي كان مخليني مندخل شي مرة لحياتي ( راجع بداكرتو للبنت لي كان تعرف عليها فبداية حياتو وخوات المغرب وهربات رجع بتفكيرو للعند عنبر ) كنحطك فصورة باش تعرفي ..
عنبر : الراجل لي مايبغيك ويتحدى اي حاجة على قبلك ويغير عليك راه غير كيتفلى عليك ..
الروطال : هذا اخر الكلام ؟
عنبر : أه
الروطال : صافي هادشي لي بغيت نسمع نديرو شي وقيت ونعرضو فيه على دار إن شاء الله .. أنت ماعندك متسولي ديجا عاودت ليك من طاق طاق لسلامو عليكم حياتي كتاب مفتوح لي كاين عاودتو ليك ..
عنبر ( دورات لسانها وسط فمها كتلعب فخصلتها بدلع ) فاروق اجي نسولك
الروطال ( مركز مع حراكتها ) دوي ومتبقايش تلوكي لا نوض نوض نشبح حسك فوݣ هاد الفوتوي شنو ؟
عنبر ( ضحكات ) هههه واش كانت شيحاجة بينك وبين عبلة ؟
الروطال ( هز مورصو خور كلا منو منغم عليها ) علاش شنو جاك حتى سولتي ؟
عنبر : لا عادي غير سولتك وصافي ماشي شيحاجة
الروطال : واه كان ( شافت فيه ببرود ) كان بيناتنا الخدمة شيحاجة خرى لا .. مكنخلطش الخدمة مع داكشي الشخصي ازيونات ( قرص نيفها )
عنبر : هممم وعمرك حبيتي ( بإهتمام بغات تعرف ضارها راسها ترضي غرورها )
الروطال ( برم شفتو ) شي تخربيق عشناه فالعشرينات
عنبر ( كدور عينيها ) هممم بحالاش اينا وقت زعماكينات ؟
الروطال ( شافيها بقنت عينو ) هاد زعماكينات كتخرجيها فاش كيكون عقلك خدام .. وشيطانك كيوسوس لاش باغية توصلي ؟
عنبر : مابغيتيش تجاوب عادي جدا ( قلبات عينيها )..
الروطال ( جرها من يدها تخشات فصدرو بين يديه ) هاي هاي على تفݣنين .. شوفليا على الفتيلة فݣعانة وليتي بحال الحراقية دعاشورة لي كتبغي طرطق
عنبر ( هزات فيه عينيها ) بزاف عليك
الروطال ( عنقها بجوج يظين وهي متكية فحضنو ) الالة هادشي كان فاش كانت عندي 23 عام كنت بغيت واحد البنت .. مكناش كانتلاقاو بزاف مع الخدمة وهي كانت كتقرا ولكن ماكتابش نكملو وصافي داكشي ديال شحال هذا تخربيق
عنبر : علاش تفارقتو ؟
الروطال ( ببرود ) خنقتها ومݣداتش عليا وهربات لبرا خوات المدينة والمغرب بالعربية
عنبر ( هزات فيه عينيه بإستغراب وعدم إستيعاب ) كدوي بصح ؟
الروطال ( شافيها ببرود مبسم ) مالك شتك تخلعتي ؟
عنبر ( تنصلات من يديه وقفات ) براكة من طنز كتفلى عليا مالك وليتي غول
الروطال : راه ݣلت ليك حبي مريض
عنبر ( هزهزات راسها ) امم تيقتك تيقتك( تبسمات ) انمشي لحمام ونرجع .. خلاتو ݣالس عند بالها غير كيتريݣل عليها وشاد فيها بضحك ديالو ..
× بدر ×
متكي فالبيت كان كيحس براسو عيان .. مكايحملش نهائيا يمرض ، ناض كيجر فرجليه لابس بانطوفة ديالو مع سروال ديال بيجامة وتيشورت ، خرج من البيت نازل حبس عند الدروج كيسمع فيهم شنو كيݣولو طلق ودنيه كيسمع فباه ..
براهيم : غادي يبقى معكلنا داك الحم*ار ديال ولدك .. واش انا غانبقى نابت فهاد البلاد ماعندي شغل موݣف كولشي باش نجي معاه ..
نادية : وشنو غانديرو نسمحو فولد ولدنا ونرجعو ؟
براهيم : انا مغانبقاش كنتسنى فداك ولدك ، شتو بحال الى حن وباغيتا ترجع ليه
نادية : شنو ترجع ليه والله لا كانت ليه ولا ليها .. هاديك نرجعها لداري والله حتى نكرها فحياتها ولدي والله لا كان ليها ..
براهيم : حتى تشوفيني انا شاد يدي ، داك دري انا لي غانديه واخا نطيح عليه الروح .. والله لا خليتو ليها الملقطة لي ولدها ..
نادية : ويكون خير وحط من يدك داك بيسي ويلاه وجد راسك للعراضة
براهيم : فيه ݣاع خدمتي مكنبغيش نتفرق عليه ، راكي عارفة هدا ( طبطب على البيسي الصغير لي فوق رجليه ) فيه كولشي الى مشا حتى خسر ضربنا الخلا كاملين ..
نادية : حطو فدريسينغ ديالي ، المساعدة مشات ماعندك علاش تخاف عليه .. ويلاه خلاص وجد راسك ..
بدر شافت وقف رجع بخطوات زربانين وكلام عنبر كيضور ليه فراسو تعصب وحقد حقدة وحدة مغمضين ليه العينين ، بقا عاس حتى شاف باه دخل لبيت تبعو كيطلع عليه بان ليه حل دريسينغ وحط بيسي ديالو الفوق حاط عليه واحد شبيكة كحلة منبتة بالأحجار .. تبسم ورجع ادراجو للبيتو ..
- في هذا الكون الواسع، تعتبر الحياة نسيجًا فريدًا من الأحداث والتجارب، ترسم مسارنا بألوان متعددة وأشكال متنوعة، وفي هذا الرحلة، نتعلم أن الحياة ليست مجرد مجموعة من الأحداث، بل هي مغامرة نتخذ فيها قراراتنا ونبني حكايتنا الخاصة، فكل منا يحمل قصة فريدة تحمل بصماته الشخصية، وتعكس رؤيته وأحلامه وتطلعاته، وعلى الرغم من التباين في خيوط هذا النسيج، فإننا جميعًا متصلون بخيوط الحب والإيمان والأمل، إن الحياة تعلمنا الصبر والقوة والتفاؤل، وتذكرنا دائمًا بأن الأمل هو الضوء الذي ينير دروبنا في أصعب اللحظات، لذا دعونا نستقبل كل يوم بابتسامة وقلب مفتوح، مستعدين لمغامرات جديدة وتحديات مثيرة، ففي نهاية الأمر، إن الحياة ليست مجرد وجهة بل هي رحلة نستمتع بها وننمو من خلالها ... عندما نعيش لذواتنا فحسب، تبدو لنا الحياة قصيرة ضئيلة، تبدأ من حيث بدأنا نعي، وتنتهي بانتهاء عمرنا المحدود .. أما عندما نعيش لغيرنا، أي عندما نعيش لفكرة، فإن الحياة تبدو طويلة عميقة، تبدأ من حيث بدأت الإنسانية، وتمتد بعد مفارقتنا لوجه هذه الأرض ..
- أي واحد بان فالكلي لي عطا ياسين لعماد .. كان مراقب من بعيد تحركاتو فين كيمشي وفين كيجي وشنو كيدير ، حدا اوطيل المامون كانت المراقبة من بعيد فرح لي كانو كيتبعوها بالحس من بعيد .. فينما مشات وشنو كدير جميع تحركاتها كانو كيوصلو للعماد وليكيپ لي معاه كيتسناو الوقت يوصل لي غايداهمو فيه الڤيلا .. إحساسو كان غريب إحساس بالبرود واحد جهد والحماس باش اي واحد كان سبب فلي وقع لبنات اي واحد كان سبب فدموع دوك الوالدين لي خسرو بناتهم وعمرهم مزال مغايتلاقاو معاهم ياخود الجزاء ديالو .. بنات مشاو ضحايا الفساد وعمرهم مارجعو لبلادهم بنات تغرو بالمظهر ومشاو بإسم زواج وتردمو تحت تراب ، ولاد خسرو حياتهم ماهوما رجال ماهوما عيالات شباب ضاع ومشا فرجلين ، ولي كان السبب عايش حياتو ولادو كيقراو فأحسن المدارس واخدين أحسن البوسطات ..
- جميع هاد الافكار وهاد السيناريو داز قدام عينيه وهو واقف قبالت يوسف لابس سروال فالكحل بجياب ديالو مع سمطة فالكحل ، تيشورت فالكحل فوق منها واقي الرصاص عاد تريكو فوق منها .. خشا فردي فجيبو مغوبش نفس اللبسة لي كان لابس لبسوها حتى يوسف وربيع .. والبقية لي كانو زايدين حتى كاسكات فالكحل وهازين فرادة فيديهم ..
- فرقو المهام بيناتهم وكانو كيتسناو غير الةقت يوصل ..
فجهة اخرى ݣالس أدريس هو وعبد الخالق ، دخل طارق حط سوارت ديالو كيشوف فيهم بإستفهام
طارق : أش تم ؟
أدريس : ولد عمك مكايجاوبش على تيليفون عندك عليه شي خبار ؟
طارق ( هزهز راسو ) لا ( مصطانع البرود ) ايكون خدام
أدريس : عرفناه خدام عماد مكايطفيش التيليفون عمرو طفاه عمرو دارها من صباح وهو طافيه اطارق .. واش فخبارك شيحاجة ؟
طارق ( ببرود ) لا مافخباري والو انا من لبارح مدويتش معاه .. تم داخل الروطال عاݣد غوباشتو بإستفسار
الروطال ( كيشوفيهم ) أش تم مالكم ؟
أدريس ( بخوف ) خوك مكايجاوبش فتيليفون ؟
الروطال : واش عماد دويت معاه غير لبارح
أدريس ( بإنفعال ) هداك لبارح واليوم اليوم .. نهار كامل تيليفونو طافي فين عمرك خوك كيطفي تيليفون ، مولفين قاعيدة من بكري كندويو كل نهار مع بعضياتما فتيليفون جوج مرات أفاروق مديرش فيها بحال الى عادي ..
الروطال ( شاف فطارق بشك ) والواليد الله يهديك اش غايكون واقع ݣاع خوي راسك ( كيقلب بعينيه ) فين با ومي والواليدة ؟
عبد الخالق : خارجين .. ( بدا تيليفون الروطال كيسوني )
الروطال ( وقف هز تيليفونو كانت عنبر خلاها عند دارهم غادي تبات معاهم على قبل الإفتتاح ديال الغد دالمحال دمها وجا لدار والديه ) نعام
عنبر ( بتوتر ) فاروق بدر باغي يشوفني قاليا عندو شي حاجة باغي يعطيها ليا
الروطال : أش عندو مايعطي ؟ عنبر انا مامساليش دابا
عنبر : شوف درت معاه فواحد القهوة هنا قريبة .. غادي تمشي معايا حياة ماتخافش انا عارفة شنو كندير راه بحال والو باغي يعطيني شيحاجة ..
الروطال ( ماحيلتو لباه وخوه ولا ليها ) رضي البال اعنبر ( بتهديد ) مكادش نجي عماد مكايجاوبش فتيليفون والواليد هنا مرفوع
عنبر : وايلي ( بخوف ) شوفو صحابو ولا شيحاجة
الروطال : سيري دابا تيليفون يبقى مفتوح .. دي حياة وديك حتى ليالي بجوج يكونو معاك ، دي حتى سهام كاع ..
عنبر : صافي واخا ولي كان قولو ليا ( قطع ) ..
رجع عندهم أشر لطارق براسو جا لعندو
الروطال ( شاد جنابو ) عارف انت شيحاجة شتك اكدور فعينيك ؟
طارق ( كيطل لا يسمعوه ) هاد الليلة غايدخلو على الڤيلا لي عاود ليه عليها داك خينا .. ديك خيتي ولي وكيكونو معاها فالقصاير كانو قانيين عليهم هاد الأيام ، داكشي باش طافي التيليفون ..
الروطال ( حس بالخوف على خوه ) مݣاليكش فين جات ؟
طارق ( شافيه بإستغراب ) مالك ناوي تمشي لتم من نيتك شوية لاباس انت ؟
الروطال ( من تحت سنانو ) واش عارف فين جات يااه لا ؟
طارق : لا معارفش ( عطاه بظهر غادي ) فاروق فاروق فين غادي ( تبعو كيجري ركب الروطال فطوموبيلتو طلع حداه طارق .. ديمارا الطوموبيل وكسيرا خارج ) ..
- خارجة بالبانطوفة وكيطمة ديال الخروج لاوية عليها فولارها وفوق من الكيطمة لابسة كاپ طويل .. معاها حياة وليالي كل وحدة فهاد الزوجات كانت خايفة لاول مرة غايشوفو الشخص لي كان مزوج بعنبر القهوة كانت قريبة كايݣلسو فيها الرجال بزاف قليل فين كيكونو فيها العيالات .. كيبان ليها واقف لابس قبية داير القب ديالو كيبان عيان شافها وتقاد فالوقفة مقابل معاها حياة وليالي بقاو واقفين قراب ليه وهي وقفات مقابلة معاه ببرود
عنبر : ياك لاباس ؟
بدر ( تنهد بتعب كيحاول يبلع ريقو بصعوبة خرج صوتو باح ) نݣلسو مقادش نوݣف
عنبر ( شافت فيه بنص عين كتحاول تبين الإهتمام وهي اخر همها ) مالك واش مريض ؟
بدر ( برجاء ) نݣلسو بعدا ( توجهو لواحد الطبلة ݣلسو فيها تحت انظار ليالي وحياة .. هز راسو شافهم وشافيها ) صحاباتك ؟
عنبر : لا بنات خالتي مالك ؟
بدر ( كيحس بحريق فظهرو وتجمع عليه مع رواح ) عيان شوية ظهري ورواح حلاقم ( شافيها ) توحشت البيبوش لي كنت كناكل عندك ..
عنبر ( سدات عينيها وحلاتهم ) واش جبتيني على هادشي ابدر
بدر ( قاطعها ) داكشي لي ݣلتي ليا طلع بصح .. دارنا باغيين يفرقونا اعنبر ، كيخططو يبعدونا على بعضياتنا ( تبسم ) ديما كنت كنشوفهم مفضلين خواتاتي عليا ولكن اليوم زدت تأكدت ..
عنبر : ايوا على سلامة لي عقتي وفقتي وعرفتي بلي هونا سبابنا انا وياك .. كونماشي هوما كوراه حنا مع بعضياتنا مع ولدنا الله ياخود فيهم الحق ..
بدر ( جبد من جيبو واحد الكلي دايرة بحال الݣيتارة ) باش نتجمعو خاص الواليد يحيد من طريقنا ماما عندها دوا ولكن هو لا عندو القت**يلة بحال شريب الما من شحال هادي .. لي كيوقف ليه فطريق كيصفيها ليه ( سهى ) عرفتي شحال من واحد دفنو تحت تراب حسي مسي ، لي ݣالها ليها الباطرون كيديرها ..
عنبر ( الخوف طلع ليها من صبعها الصغير ) واش كاين شي واحد فوݣ منو ؟
بدر ( شافيها ) واش يحسابليك .. الواليد خدام غير بوحدو كاين لي فوݣ منو كيمشيه كيما بغا دايرو بوكيمون عندو
عنبر : كتعرفو انت ؟ عندك يدير ليك شيحاجة ؟
بدر ( تبسم ) كتخافي عليا .. متخافيش ماعندو مايدير ليا مكنعرفوش عمري شتو لي كنعرف عليه بلي مغربي هادشي لي كنعرف ( اشر لكلي ) هاد الكلي هزيت فيها كاع لي كاين فالبيسي ديال براهيم رحمون ، كاع داكسي لي كيدير كاع الخطط الضوسيات خدمتو كلها هنا الكلوبات لي عندو على برا نهارهم غيسطو وليلهم كلوب وفساد .. هنا فين كيديو البنات من هنا ، وعاد كاينين شي وحدين فالإمارات كاين حتى سميات ديال الناس لي خدامين معاه كولشي كاين هنا هاد الكلي كافي يديه ورا الشمس ..
عنبر ( دارت راسها مامهتاماش ) واش بغيتو انا ؟
بدر : غادي تخليه عندك احبيبة .. باش منين نبغيو نرجعو لبعضياتنا ومايبغيش غادي تهدديه بيه ، انا منقدش نهددو بيه غايعرف كيفاش يدير ليا عمري ݣديت نهز الراس فالواليد ونݣوليه لا كيعرف يلعبها عليا انتي لا فهمتيني ..
عنبر : زعمة ماعلياش شي خطر ياك ؟
بدر : لا حبيبة ديالي .. انت فيديك العنق ديال براعيم رحمون بين يديك دابا ( مدو ليها شداتو ) حاولي مايشوفوش شي واحد لا يلعبها ضدو حنا بغينا انا وانتي نلعبو عليه باش هكا يخلينا بزوج ومايوقفش فطريقنا وغايخوي راسو منو حيت غانكونو شادينو من ليد لي كضرو ..
عنبر ( شداتو خشاتو فالكيطما شافت فيه وتبسمات ) دابا بينتي ليا بلي كتبغيني بصح .. لهلا يخطيك عليا دابا ايخصني نكلس مع فاروق ونطلب منو الطلاق باش نتجمعو انا وياك ..
بدر : كنتسنى داك نهار اليوم قبل غدا
عنبر ( وقفات ) خاصني نمشي راك عارف المغرب ماشي هو أوروبا والقهوة كيݣلسو فيها الرجال ..
بدر ( فرحان ومرتاح حاس براسو حقق واحد النجاح كبير منين رجع عنبر لحياتو حس براسو رضا غرورو واحد الاحساس غريب كان عندو الداخل مكان هامو والو لا باه لا مو لي هامو هو رضا الغرور لي عندو مخلي بصمة فحياة عنبر بإسمو تبسم بحال شي إنسان منوم مغناطيسيا ودور راسو فيها ) واخا حبيبة تيليفون بيناتنا بوسي ليا ولدنا ..
عنبر : كون هاني بسلامة ( عطاتو بظهر ) الله يغبر ليك الشقف انت وتريكتك كلها
حياة ( تقدمات عندها ) أمضرا
عنبر ( جراتها ضارت بان ليها مشا ) خاصني نعيط على فاروق سربيو ( كيتمشاو زربانين ) .. هزات تيليفونها كتسوني ليه والو ) اوووف البعر مكايجاوبش علاش ..
وقف الطوموبيل ديالو قدام المديرية .. نزل هو وطارق طالع وقفو البوليسي لي فالباب ..
الروطال ( ببرود ) بغيت نشوف عماد حيدر انا خوه فاروق حيدر ..
.... : مرحبا سيدي ولكن سي عماد مكاينش لا هو لا سي يوسف
الروطال : واخا والعميد بغيت نشوف العميد رضوان الله يخليك ( عيط البوليسي لي فالباب على واحد البوليسي اخور طالب منو يوصلهم للمكتب العميد ) توجهو معاه للمكتب دق ..
.... : سي فاروق حيدر فالباب اسيدي
رضوان : ݣوليه يدخل ( دخل الروطال وطارق ) أهلا وسهلا زارتنا البراكة سي فاروق ( وقف سلم عليه وسلم على طارق ) مرحبا ݣلسو ..
الروطال : سي رضوان واش واقعة شي حاجة لخويا .. عمرو ماطفى تيليفون عارف بلي الخدمة هادي ولكن ماشي عوايدو ..
رضوان ( تنهد ) عماد عندو مداهمة هاد الليلة ، مكاين علاش تخلع وتشوش .. هادي هي الخدمة اسي فاروق كنتسناو الإتصال فيه أي خبار بحالنا بحالكم ( تيليفون الروطال كيڤيبري مابغاش يسكت مداهاش فيه ) ..
فجهة اخرى ..عنبر مابغاش يجاوبها تعصبات
عنبر : مغاديش نبقى انا كنتسنى فيه حتى يجاوبني هو الحماق هذا ، هاد الكلي راه خاصها توصل البوليس هاد الليلة الى باه ساق الخبار ولا شيحاجة يقد يهرب ..
حياة : شنو غاديري دابا ؟ ( كانو قدام الباب هزات عنبر عينيها بانت ليها طوموبيل لي كانت ديما تابعاها فيها البوليس شافت فحياة )
عنبر : طلعي لعندهم قةليهم جا فاروق وداني نضربو دويرة انا جايا ..
حياة : فين غادية رجلي برجلك والله منخليك مالكي هبيلة فين بغيتي تمشي ؟
عنبر ( شافت فليالي ) ليالي شوفي كلعي عندهم قوليهم جا فاروق وداني انا وحياة نضربو دويرة وانت مافيك لي تمشي صافي .. خاصني نمشي لكوميسارية صافي اختي عفاك ..
ليالي : واخا صافي رضو البال لراسكم الميمة
عنبر : كوني هانية تيليفون بيناتنا .. طلعات ليالي وحياة وعنبر قطعو شانطي حياة تابعة عنبر حتى وقفات عند طوموبيل ، شافها البوليسي لي سايݣ بإستغراب ونزل عندها :
.... : ياك لاباس امدام ؟
عنبر : ديني لكوميسارية لي خدام فيها عماد عفاك .. ضروري خاصني نشوفو ندوي معاه نعطيه شيحاجة ..
.... : ولكن سي عماد راه مكاينش
عنبر ( تلفات ) غير ديني نشوف العميد ، راه خاصني نقوليه شيحاجة ضرورية ( شاف البوليسي فلاخرين )
.... : واخا مرحبا ( دوا مع دوك زوج لي لور نزلو بقا اداك لي راكب حداه ) طلعو امدام .. طلعات عنبر وحياة ديمارا الطوموبيل وشد الطريق ، خاشية يدها فجيبها مزيرة على داك الكلي الخلعة راكباها والعقل غايب على وعيو ولكن كان هدفها هاد الكلي ماتباتش عندها هاد الليلة بغات تهنا من هاد صداع الراس .. وهادشي لي واقع او وقع ليها تسد ضوسي ديال بدر وتنساه بحال الى عمرو كان ..
- وصلو لقدام المديرية .. نزلو بجوج مع البوليس ودخلو .. متوجهين نيشان لبيرو دالعميد حياة غير كتشوف فجنابها لابسة بيجامة ديال الدار مع بانطوفة شعرها شاداه بواحد القراصة ودايرة عليها واحد القبية بحال الى مسخرة للحانوت .. شادة فدراع عنبر وتابعاها حتى حبسهم البوليسي لي جاو معاه دق الباب سمع الإذن ودخل ..
فوحدة من الڤيلات الراقيات لي جاو فالخرجة دكازا .. صوت الموسيقى الراقية فيلا كظم النخبة الراقية من رجال الأعمال الاغلبية جاي مع المرافقة ديالو مخلي مراتو فدار وهو سهران بعيد عليها .. فرح كانت هي المضيفة لي كترحب بيهم هازة كاسها ديال المشروب لابسة كسوة قصيرة فالكحل كدور عليهم الضحك والنشاط ديالهم كان باين .. منهم دكاترة ومنهم اصحاب مشاريع والقائمة طويلة بزاف بنات لي كانو باقيات صغارات فالعشرينات من عمرهم مرافقات ليهم .. كاينلي عايش الحب وكاين لي كيحاول يبرم صفقة جديدة وكاين لي طالع الفوق مستمتع بلحظات جنسية ممتعة ، وكاين لي كيستمتع بلحظات شادة مع نفس جنسو .. على برا كانو بزاف درجال واقفين حاضيين وعاسين .
على مسافة قريبة كانو بزاف ديال طوموبيلات زاج فيمي محملين بفرقة بوليسية مسلحة كانو على اتم الإستعداد خاصهم غير ضو الخضر من الشاف ديالهم .. فوق من الڤيلا كانت هيليكوبتر دون صوت طالعو مكتبانش نازل منها سلم بحبل نزل منو عماد بشوية تبعو يوسف وربيع فوق السطح ..
- غير وصلو الهيليكوبتر بعدات ..
عماد ( ضاغط على سماعة الأذن ) واجدين ؟ ( سمع وي شاف ) نݣوليك اوكي بغيت الڤيلا تطرق من القنت لقنت .. السلاح ستعملوه للضرورة تشوفو السلاح من الطرف الثاني ستعملو السلاح .. مابغيتش القتي**لة مفهوم ..
.... : وي شاف ( شاف فربيع ويوسف ) اوكي ( عطاهم الاوردر خرجو كيتجاراو من طوموبيلات بحال شي جيش ) .. لي ضار من اللور والقدام كل واحد لفين دار اما عماد ويوسف وربيع نزلو بشوية بشوية الصوت غادي وكيزيد يجهاد حتى كانو لتحت ..
عماد ( بإبتسامة وراه يوسف وربيع هازين السلاح بصوت عالي ) ونهار كبير هذا ( ضارت فرح شافتو تخلعات ماعرفات باش تبلات ) العزيزة الغالية فروحة وعرفتي شحال توحشتك ( ضار جيهة ديدجي بصوت عالي مغزف ) سد عليا داك الخ**را ( طفا الموسيقى ولي تم ضارو مستغربين شي كيشوف فشي ) ..
.... : اش واقع أش هاد الضسارة شكون انت ( شاف فرح كان رجل فالخمسينات ) شكون هادو افرح ؟
عماد : البوليس ( ضحك ) معاك البوليس اموسيو العلامي .. لي تم سمعو البوليس شي كيشوف فشي كيبان فيهم الخوف ) وعرفتو شحال وانا كنتسنا نجمعكم بحال البخوش ..
.... : أعرف معامن كدوي اسي
عماد : مع المكاريب ، مع الوسخ ( تسمع الرصاص وصداع على برا .. فللحظة تحول داك الجو لغوات من طرف البنات لي تم كيتغاوتو .. بداو البيبان الفوق كيتحلو نازلين رجال كيتجاراو كيسدو فصدايف القوامج )
فرح ( بالغوات ) عماد غاتجبد على راسك النحل ( ماحسات بيدو حتى نزلات على حنكها صمراتها ) .. لي تم محاولين يهربو حتى تمو راجعين على إثر الرجال لي تمو داخلين .. دخلو من الموزينة ومن كاع الجوايه ..
عماد : هزو الزبل عليا طلعوه .. كولشي كيتجرجر والغوات من طرف رجال الأعمال ودكاترة لي تم كولشي كيهدد فعماد ، فغفوة منو كتبان ليه فرح سالتة ( شاف فيوسف ) حضي انا جاي ( مشا كيجري تابعها وهي هاربة من اللاكاب ) ..
فرح ( كدور بان ليها تابعها ) بعد مني بعد مني والله حتى غاتندم انا نݣولك غاتندم .. ماجاوبهاش حدو تابعها وهي خارجة من باب لاكاب كتجري لطوموبيلتها حلاتها جابدة فردي مشيرة بيه لوجهو ..
فرح : تقرب مني نتيري فيك خليني نمشي بحالي أعماد .. والله حتى نتيري بالله ..
- خرج البوليسي من مكتب سامح ليهم يدخلو .. دخلات هي وحياة طاحو عينيها عليه ، شافيهم طارق هز الروطال راسو شافيها بإستغراب واقف مغوبش جاي لقبالتها ..
الروطال : شنو كديري هنا ؟
عنبر : وعييت منسوني عليك مكتجاوبنيش ، مالقيت مندير مشيت لدوك البوليس لي تماك مخليهم عماد .. هوما لي جابوني كان خاصني ضروري نجي لهنا قالة ليا عماد مكاينش ..
الروطال ( بخوف ) واش دار ليك داك الميكروب شيحاجة ؟ ( واقفة حياة كتشوف كيشوفيها طارق وديك الحالة لي هي فيها وقف مأشر ليها تݣلس )
عنبر ( باللهفة ) لا لا مادانيش مدار ليا والو ماتخافش ..
رضوان : مدام تفضلي ( شافت فيه تفادات الروطال وكلسات فبلاصتو كتستراح )
الروطال ( تحنى قفازي عندها مقابل معاها ) واش دار ليك شيحاجة ؟
طارق ( تقدم لعندها بخوف كيشوفيها ) ياكما توشاك هداك خونا ݣولي( هزات فيه عينيها مصدومة من ردة فعلو متوقعاتهاش جاتها غريبة ) ..
عنبر : اويلي مالكم راه مدار ليا والو
طارق : عنبر الى دار ليك شي بلان ݣوليها بالله حتى نخسر ليه وجهو ( ناسي العميد لي ݣالس )
عنبر ( كتشوف فروطال لي كيشوف فطارق بمعنى من نيتك وكترجع تشوف فطارق ) واش انتوما توام ؟ وراه والله مدار ليا والو كانت معايا ليالي وحياة ..
طارق ( عاق على راسو ) راك بحال خواتاتي داكشي باش أختي دويت
رضوان : خليوها ترتاح بعدا هجمتو عليها
عنبر ( شافت فالعميد ) راه تلاقيتو وجاب ليا كلي فيها كاع المعلومات كولشي على براهيم رحمون .. كاع لي كيخصو وكتخص خدمتو والكلوبات لي عندو وكاع لي كيخدمو معاه .. هو قالي نخليها عندي باش نولي نهدد باه باش يخلينا نرجعو لبعضياتنا وبلي هاد الكلي فيه رقبة باه يعني بهاد الكلي غايمشي فيها ..
رضوان : انشوف ( مداتها ليه فتحها وخشاها فبيسي ) ..
برونشاه مع البيسي ودخل لضوسيات ..
× جهة اخرى ×
عماد ( حاضي معاها ومع الفردي لي فيدها ) رخي من يدك أفرح رخي
فرح : واش يحسابلك الى مشيت انا انمشي بوحدي ( ضحكات ) غانمشي انا والعزيز عليك اعماد ، واش فخبارك انا ماشي بوحدي لي فهاد المعماعة غانمشي وغاندي معايا دمك ولحمك ..
عماد : هبطي الفردي وندويو متغرقيش راسك كثر مانتي غارقة ، راك مبلبلاها افرح بلاما نحط ليك ضواسيك ومعامن خدامة ومعامن حاجة راس وندويو على البنات لي مهربة للخليج فضوسي ديال الدعارة
فرح : واراه انت اول واحد غادي ضر .. عرفتي علاش راه انا ماشي بوحدي ( كان يوسف وراها ) عرفتي شكون معايا معايا ماماك ازين لالاهم خديجة هي لي كندير بكلامها هي لي كتعطيني ضو لاي حاجة بغيت نديرها الى فخبارك ، نزيدك ولا مزال ماماك ديما كتكون معانا فتجمعات وماماك هي لي وصاتني نجيب ليها البنات لي مافحالهمش هي لي عطاتني الفلوس باش نخلص لي معايا ( تلاح عليها يوسف يزول ليها الفردي خرجات رصاصة من منو جات فكتف عماد ) ..
فرح ( كتغوت ) طلقني وطلقني ( جاو البوليس كيجريو شدوها يوسف جرا عند عماد ) وطلقوني والله حتى تندمو كاملين كاملين غاتندمو طلقوني ( كتركل )
ساعة ديال المݣانة وهوما قدام داك البيسي .. العميد شاف فروطال وفطارق مدوز يدو على راسو بتوتر .. شافيه الروطال بإستغراب
الروطال : أش تم ؟
العميد ( وقف ) تݣدو تبقاو هنا انا راجع ( خرج من البيرو توجه لواحد من البيروات تم تم صونا تيليفون ديالو فتح الخط ) ألو .. اهاه شيحاجة ݣراڤ ( تنهد بإرتياح ) الحمد لله يوسف خلي ربيع معاه بغيتك دابا تحضر انت ونص ديال ليكيپ غادي نعطيك لاضريس نلقاكم تم صافي .. يلاه ( قطع )
الروطال : هذا فين مشا وخلانا هنا ( شاف فعنبر ) ݣلتيها لداركم ؟
عنبر : وصيت ليالي ( تنهدات ) جاني الجوع
حياة : حتى انا ( بعياء )
الروطال : وماعرفناش هاد خونا فين مشا حتى هو .. حيد ديك الكلي ومشا بحالو ، عماد ماعرفناهش اش دار انا دخت برب العالي ( كيدور فالبيرو غادي جاي )..
طارق : السيد تبدل ليه لون دوجهو شتي ، علم الله اشمن بلان بان ليك فداك الكلي ضرني راسي
الروطال ( شاف عند عنبر ) ياكما مبرادة ( فيك البرد )
عنبر : انا هاد الساعة فيا الجوع مافياش البرد .. امنين حيدت عليا داك الهم ديال دوك ولاد الحرام غانعس منفيق حتى لعصر ( طارق شافيها كيضحك شافيه الروطال كيخنزر فيه دار ليه شنو بعينيه )
الروطال ( بالهمس ) زير أساط عيقتي
طارق : ماشي بيدي أصاحبي راه ختي
الروطال : وانا مرتي ( غمزو ) وزير
طارق ( كيشوفيه بإستغراب) تا كيفاش بلانك كنشم شي ريحة ماهياش
الروطال : ݣلب عليا الله يرحم جدك .. هدا لي شدنا هنا مرهونين ( خلاهم وخرج كيقلب عليه ) عفاك العميد كان هنا وخرج !!
.... : راه وصى تبقاو تسناوه فالبيرو .. هو راه خرج
الروطال : خرج ( رجع لعندهم معصب ) السيد خلانا هنا وخرج تا أش هذا العصاب .. بدا تيليفون الروطال كيسوني كان أدريس فتح الخط ) وي الواليد .. دوا معاك فين هو واخا واخا ( مع قطع سونا عليه عماد ) فين اصاحبي شوشتينا امضرا ( بإرتياح ) مزيان فين ؟ ( شاف فطارق ) واخا واخا ( قطع )
طارق : أمضرا ؟
الروطال : ݣال بلي لاباس عليه .. ولكن غايدوز عندي بليل لدار عندي ( شاف فعنبر وحياة ) يلاه نوصلكم مشا الحال اصلا اتكون مك مشوشة
عنبر : راه قلت ليها انت جيتي وديتينا ندورو ( شافيها ) ومالك راه هادشي لي جاني لبالي ( شدات فيدو خارجين من البيرو تحت انظار حياة لي كتشوف فداك المنظر ديال عنبر وروطال لا هي وطارق) فيا جوع افاروق والله محلولة شهية دابا شهوتي فشي شواية دالكفتة ..
الروطال ( شافيها كان رتاح مبدئيا من جهة خوه واخا بان ليه صوتو فشكل وبارد ولكن رتاح من جيهتو .. ومن جهة هادشي لي وقع وعاشوه ) غانخود ليك لي بغيتي خودي لدار وكولو كاملين انا خاصني نمشي لدار غايجي عماد لتم أحبيبي ..
حياة ( شافت فطارق بلاما تحس نطقات ) واش قاليها حبيبي
طارق ( شافيها جاتو الضحكة ) بقا فيك الحال اللسان الموس ؟
حياة ( خنزرات فيه ) كيفاش لسان الموس حتارمني شوية راني موظفة عندك
طارق : ربي ربي زيدي ݣدامي زيدي .. خرجو من تم دازو لواحد البلاصة كدير شواية شد ليهم الروطال 3 شوايات لي غاتقدهم كاملين لعشا خدا ليهم المونادا والخبز وصلهم لدار.. بقا واقف حتى طلعو ومشا هو وطريق ..
طارق : مالك ؟ حالتك معاجبانيش واش عماد مزيان ؟
الروطال : ماعرفتش نكذب عليك صوتو ماعجبنيش .. نمشيو ونشوفو على مولانا
طارق : اجي واش انت وعنبر صافي وليتو سمن على عسل
الروطال ( شافيه ) عندك شي مانيع ؟
طارق : خوها ابنادم انا خوها .. عرفتي املعم تقلق ليا الخوادرية نݣطعو انا وياك الورقة انا نݣولك
الروطال : وتا نوض انتسناك انت توريني اجي امي وريني دار خويا تݣعد ( شدوها عفطة وحدة للدار الروطال )
فجهة أخرى قدام باب الڤيلا دإبراهيم رحمون سونا الباب .. مدة فتحات المساعدة شافت فالعميد لي واقف مع ربيع ومع ليكيب دالبوليس عطاتو التحية ..
.... : سيدي
رضوان : هاجر تقدي تمشي ( تبسمات عاطياه التحية زولات ديك طبلية لاحتها ومشات ؤكبات فطوموبيل لي جاو فيها .. كتشوفيهم دخلو ، كانو كالسين كيتعشاو هو ونادية وبدر حتى دخلو عليهم ..
رضوان : سي براهيم رحمون ( وقفو كاملين مخلوعين كيشوفو )
براهيم ( مخرج عينيه ) أش واقع هنا ؟
الڤيلا لي كانت كلها نشاط رجعات كلها خاوية .. بقايا ديال الدم لواحد من لي ݣارد البلاصة لي كانت عامرة بالبوليس رجعات خاوية ليلة كانت غاتخرج بروح شي واحد .. ولكن البوليس وتدخلات الخاصة كانو من أحسن العناصر ديال الشرطة وتدخل السريع دغية قدو يسيطرو على الوضع ويخرجو باقل الاضرار واخا تضرب عماد ولكن كانو مرتاحين حيت غير تجرح فيدو ..
عماد (خارج من المستعجلات معاه يوسف ، دراعو مربوطة بالفاصمة ملامح وجهو باردة غير ساهي شاف فيوسف ) توصلني للدار فاروق مافيا لي يصوݣ ..
يوسف : ݣتليك بلي رحمون تشد هو ومرتو وبلي العميد براسو تدخل .. ومرات خوك هي لي دات ليهم الكلي شتك ماحرك فيك هادشي والو كيفاش بلانك زعمة !!
عماد ( ببرود ) شنو بغيتيني نݣول صافي كل واحد دار خدمتو ياك تشد نوض نزغرت أيوسف .. واش غاتوصلني الله يرحم باك ولالا( بعصبية ) .. خلاه وراه طلع لطوموبيل زادح الباب ..
يوسف مافهم فيه والو .. طلع لطوموبيل سايݣ مكانش باغي يدوي كيشوفيه داك الحماس لي كان فيه طفا طفية وحدة كان متوقع فاش يعرف بلي رحمون تشد غادي يفرح وغايمشي باش يحقق معاه .. روينة كانت عندو فعقلو من جهة عماد كان سمع شوية من كلام فرح ولكن ماعرفش شنو كانت كتقوليه فرانة فاش حبسو عماد
عماد : تسناني ( نزل متبعو يوسف بان ليه قاصد البيسري دخلو العجب عمر عماد ماشرب اش واقع لي باغي ياخود الشراب فهاد الليلة لي وصلو فيها لداكشي لي بغاو .. شكون غايكمل لونكيط مع دوك لي تشدو سونا ليه العميد فتح الخط وجاوب )
يوسف : نعام اسيدي .. اه انا معاه ولكن راه ماعرفتش مالو مافرحانش اسيدي كاع دخلني العجب .. وحتى دابا باغي يمشي لدار خوه شكون غايكمل لونكيط ( غوبش بإستغراب ) اهاه واخا اسيدي واخا ( قطع ) هادو مالهم كيفاش وصلو ومتسولوش واجي انت كمل معاهم لونكيط أش هاد الروينة لي مفاهم فيها أنا تا وزة ( تم راجع عماد هاز ساشية طلع وسد الباب ساشية باينة فيها قراعي كيتقرقبو غمض عينيه حاط راسو على الكرسي )
يوسف كمل الطريق .. حتى وصلو لدار الروطال حط نزل مشا وخلاه سونا عماد فالباب فتح ليه طارق دخل ..
- طارق كيشوفيه ماسلم عليه ما والو حدو مشا لصالون ݣلس وحط ديك الساشية شاف فطارق ونطق بعياء :
شي كاس عفاك يكون خاوي .. وجيب ليا شي لعيبة نفتح بيها ( فتح ساشية وجبد القراعي خلا طارق كيشوفيه مصدوم عمر عماد شرب )
طارق : تا مالك اصاحبي اش كترون باغي تشرب ( كيعيط ) فاروق فاروق .. تم نازل الروطال كيشوف جا عند عماد بزربة ..
الروطال ( بإهتمام ) كيبقيتي علاش ماخليناش نجيو لعندك ؟
عماد : غير جرحة صغيرة راه خيطوها الحمد لله ماشي شيحاجة ݣراڤ
الروطال ( رض البال لشراب ) أش هادشي ( بجدية ) جاي تقصر ولا كيفاش بلانك
عماد : جاي نسا ( تبسم ) جيب ليا شي كاس مابغيتش شي حد يفرع ليا راسي الله يرحم باك .. بغيت غير ءكات باغي نسا وبغيت ندوي ولا انمشي لشي قنت خور
طارق ( شاف فروطال بإستغراب ) واخا اتكالما ( مشا لكوزينة جابلو كاع او باذ كيتحلو القراعي .. مدهم ليه فتح القرعة لولة وݣلس كيشرب وطارق وروطال مقابلين معاه مفاهمين فيه والو ..
الروطال : شكون تيرا فيك ؟
عماد (كينزل على الكاس دقة وحدة ويرجع يعمر خوا القرعة دغية داز لثانية ) عشيرة الواليدة لي تيرات فيا لالاهم فرح ..
الروطال : تشدات ؟ ( عماد هزهز ليه براسو وتبسم كاب من القرعة الثانية )
عماد : عرفتي اخويا ( شافيه الروطال كان باينة فيه بلي ماشي نورمال او واقعة ليه شيحاجة شنو هي معارفهاش عمر شاف خوه فهاد الحالة كان خاصو يكون فرحان حيت داكشي لي بغاه وصل ليه ) أخيب بلان يݣد يوقع لواحد بحالي هو يكون كيقلب على اللفاع والحية الكبيرة عندو فقلب دارو ومسايق ليها الخبار ، كيقلب على صهد منين جاه والعافية شاعلة فعنقو ( ضحك هاز كاسو نازل عليه دقة وحدة )
طارق ( بالهمس ) هذا بان ليا بدات تشد فيه السكرة ..
الروطال ( متفادي كلام طارق ) عماد خويا ( بحنان ) واش واقعة معاك شي حاجة عاود ليا خوك أنا
عماد ( شاف فيه مطول فيه شوفة ) وانت علاش جيت لهنا حيت انت لي بنتي ليا ( رشف من كاسو ) سعداتك اخويا سعداتك اللهم مك كتمسي تزورها تحت تراب ولا تسيق لخبار لمك هي لي جاي منها الصهد أه مك مك هي لفعة لي كتقلب عليها .. ودابا شتي على بلان انا غانحط مي فالحبس وتخايل على بلان ( كيضحك )
طارق : كيفاش ؟
الروطال : عماد دوي مݣاد اش كتخور ؟
عماد ( كمل كاسو ببرود مكتاسح ملامح وجهو ) الواليدة هي لي كتعطي لوردر للفرح باش تجيب ليها البنات .. الواليدة براسها دايرة يدها مع براهيم رحمون وتخايل معايا على بلان ( كيقهقه بهيستيريا ) .. كلام نزل على الروطال وطارق بحال شي سطل عامر بالما البارد .
تيليفون عنبر ماسكت من سونيت والو .. كنشوف شكون ومكتجاوبش حسات بلي شيحاجة واقعة داكشي باش كيسوني ليها بزاف ديال المرات اخر حاجة وصلاتها منو هو ميساج فيه " درتيها اعنبر ديكلاريتي بالواليد " مجاوباتوش عرفات بلي البوليس غايكونو قرقبو عليه تبسمات فرحانة ..
تودة : مالك كضحكي ؟
عنبر : البوليس قرقبو على تريكة بدر ( حطات كاس دالمونادا من يدها )
تودة : وايلي باش عرفتيها ؟
عنبر : من قبيلات وهو كيسوني ودابا سيفط ليا ميساج تهنينا منهم تفو سلعة ناقصة
رشيدة : متݣولي والو دابا ابنتي خاصك ترضي بالك من هنا للقدام متعرفي يخرجو منها بحال زغبة من العجين ..
عنبر ( بنفي ) موحال أخالتي داكشي لي جمع عليهم ولدهم غادي يخليهم يغيسو فالحبس .. من غير الى باه مسح كولشي فراسو وخلا مرتو تخرج منها انا ديك خيتي مكنخافش منها حيت كدير لي كيقوليها راجلها ..
حياة : غير منين تشد هداك هو الربح .. مغايطلعش منها وهو مغرقها مايمكنش ..
تودة : يعطيو لينا غير تيساع ويعومو بحرهم يديرو مابغاو .. عنبر حسات براحة ونفس الوقت شيحاجة فيها كانت مخلياها غير ساهية وكتفكر ..
فجهة اخرى الصدمة كانت مزال مسيطرة عليهم بزوج منواوهاش جاهم غير كيغربق .. ولكن فنفس الوقت عماد عمرو فحياتو ماشرب الݣارو وقطعو ، هز الكاس لي قدامو طاح عليه طيحة وحدة ..
عماد : الݣارو ودوزناه ( تبسم ) تخرج تلاݣا مع رجال دوزناها ولكن لي ماضنيتوش هو حدايا لفعة وانا مافخباريش وتا ورقو ليا على بلان ..
الروطال ( طلع ليه الدم وعصبو وقف محيد ليه داك الكاس والقرعة ) والخرا دوي مݣاد وحيد عليا من هاد تبرهيش دوالو ..
عماد : خليها ( بصوت تقيل ) خليها ولا غانوض ندير شيحاجة فراسي ( بالغوات ) خليها
الروطال : والله لا حطيتيها فدرݣومك اجي معايا ( جرو من يدو منوضو بزز غادي بيه مخرجو على برا وطارق تابعهم .. وصلو لعند لابيسين ولاحو ) ودابا برد العافية لي شاعلة فك وخدم معايا دماغك ..
- عماد شهق بحال شي حد طرشو مفيقو من شي حلمة .. بقا كيعوم فداك لابيسين ساهي حتى شبع ما وتم طالع
طارق : كان ضروري تلوحو اصاحبي يدو مجرحة
الروطال ( خنزر فيه ) غير مجروحة مامحيداش ليه اليد ... يتوݣض وهو كيݣطر علينا فالهضرة بحال ديك الولية بحال الى خديجة عمرها كامل وهي كدير الخير شلا ماشنا وضربنا الطم أطارق خلينا ساكتين الله يرحم باك وانت براسك ..
داز من حداهم عماد مدواهمش طلع نيشان للبيت لي كان مالف كيبات فيه الى جا عند الروطال .. زول دوك الحوايج ولبس وحدين خرين كانو تم ديال خوه سالا وهبط لعندهم بخطوات بطيئة مهرس من قلبو على كاع الاطراف ، ݣلس قبالتهم بالع ريقو مرجع راسو اللور كدوي بلاما يشوفيهم ..
عماد : فرح عتارفات على الواليدة ( حل عينيه شافيهم ) منين شافت راسها حصلات حطات كولشي .. ݣالت لك هي لي كتعطيها لوردر لكولشي هي لي كانت كتسيفطها تجيب ليها البنات ..
الروطال : وباش عرفتيها داوية بصح ( كيحاول يبردو )
عماد : مالقات غالواليدة لي تلصقها فيها من دون الناس ( تبسم ) انا كنقلب على الذيب وهو معايا وانا مسايقش ليه الخبار ( سكت وشافيهم ) باشمن وجه تشد مك ودخلها لحبس أمم بأشمن وجه ..
الروطال ( شاف فطارق ورجع شاف فخوه ) كيفاش بلان كتخرج مع رجال حتى هادي ݣالتها ليك ديك ال****
عماد : مݣالها ليا حد شتها بعينيا فاش كونت خارج من الخدمة .. كانت خارجة هي واحد خونا من واحد ريسطو وضربت الطم ومدويتش ، شنو غانݣول لولادها لماجدة ولعصام
الروطال ( قصح معاه باش يتوݣض ) دير عقلك أنتوما اصلا عارفينها كيدايرة ، عارفين الطمع عامي ليها العين من بكري ( غمزو طارق ) ماتبقاش تغمز كانݣوليه لي كاين باش يفيق ويعيق .. كيحس براسو بحال الى داير الذنب ضروري فشي عائلة كتخرج شي ضلعة عوجة .. راه راجل واخا يكون باه لي ولدو هو لي دايرها كيبقى فراجل مايحير فحتى قو** ..
عماد ( عارفو كيحاول يفيقو ويقصح ليه قلبو ) انا نسرطها وختي وخويا .. والى دارت بوم وعرفو الصحافة وناس باشمن وجه انبقى خدام
الروطال : مغاتكونش هي مولات شي ، غتكون غير مݣيدة شي حد لي كيعطيها شنو دير .. عاميين ليها العين ومطمعينها حتى مشات مدفݣة الواليدة واخا هكاك مكانتش هكا شحال هذا هادشي غايكون جديد ..
عماد : مزالك كدافع عليها سبحانك يا عظيم ( تنهد ) فخباركم تشد رحمون ؟
ليلة دازت تقيلة عند البعض وعند البعض دازت مخيفة .. لي حصل كيقلب لراسو على شي تخريجة باش يخرج منها المديرية كانت مقلوبة سفاها على على ، يوسف فجهة مع ربيع كيستجوبو النص دماغهم طافي والعيا دا منهم النص وعند البعض لي كان غارق فتفكيرو ومنهم عماد ..
- الغد ليه فاق لبس حوايج جداد لي حط ليه خوه مافطرش مداقو .. هز سوارت لي خلا ليه الروطال فوق الكوافوز ديال وحدة من طوموبيلاتو ، نزل قبل مايفيق الروطال وطارق خرج ركب فطوموبيلتو وشد الطريق للمديرية نيشان .. دخل بملامح باردة توجه نيشان للمكتب ديال العميد دق سمع الإذن ودخل
رضوان ( هز فيه راسو ببرود أش ليه للكرسي ) كيبقيتي شوية ؟
عماد ( هزهز راسو ) الحمد لله .. ( رضوان وقف مشا لواحد الكوفر فور عندو فالبيرو حلها جبد منها الكلي رجع لبلاصتو برونشاها مع البيسي وحطو قدام عماد ، بقا مدة وهو كيتفرج فداك الضوسي فكل دقيقة كتزيد صدمتو وكيزيد يمرض فخاطرو تحكم فراسو وشاف فرضوان ) شديتوها ( بلع ريقو )
رضوان : مزال ( تنهد ) عماد عارف الضومين ديالنا صعيب ، ومكنعرفوش فيه لا هاديك مي ولا هداك خالي
عماد : وحتى انا ماݣلت والو اسيدي ( عض على باطن حنكو ) لي دار الذنب يستاهل العقوبة
رضوان : الواليدة ديالك وخالك كانو غير كراكيز كيلعب بيهم رحمون كيما بغا ، ولكن المشكل الكبير دابا هو لمن خدامين وشكون تابعين .. رحمون الليل كامل حلف مايدوي طالب يدير محامي وهذا من حقو ولكن كاع الادلة مغرقاه المحامي ماعندو مايدير ليه ..
عماد : هوما ماشي دراري صغار لي يلعب بيهم كيما بغا اسيدي .. الى كنتي كتݣول هكا غير باش تخفف عليا بلاش حتى واحد مامضروب على يدو هاد ضوسي شديتو انا نهار لول وغادي نساليه انا غير هو بغيت نطلبك طلب شخصي ..
رضوان : مرحبا
عماد : ماتسيفطش لي يشدها ، خليني انا نجيبها لراسي بوحدي عفاك الى ممكن
رضوان ( حط ستيلو من يدو وشافيه ) واخا اعماد ولكن بنسبة لخالك ، غايكونو قرقبو عليه دابا
عماد ( ببرود مكتاسح تعابير وجهو ) ماعندي سوق فيه .. عمري عرفتو ولا شتو منين كانت عندي 8 سنين ، معارفوش كاع ايمتا دخل المغرب هداك السيد خالي غير بسمية اما بحالو بحال غيرو اسيدي ورحمون هداك انا لي غانتوالاه ..
رضوان : فرح عتارفات على مدام خديجة وجبدات شحال من واحد من دوك لي تشدو ولي نكرو بلي عندهم يد .. وبلي كايجيو يسهرو غير باش يزهاو ويبدلو الوقت ..
عماد : نقصات علينا شحال من حاجة حسن ( وقف ) خليت ليك الراحة سيدي
رضوان ( وقفو ) دوك لي كانو كيطيحو البنات وكيديرو راسهم عرسان للاسف مكاينينش هنا فالمغرب .. على ماشفت فلكلي الاغلبية ففرنسا وفإيطاليا غا ندوي مع الجهات المختصة تم نعلمهم بلي مطلوبين داخل المغرب .. واخا انا عارف بلي ماعمرهم غايحطو الرجل هنا ولكن نعلمهم وندير لي عليا ..
عماد : هادوك أبوكيمونات المهم هو الساس لا هوما لا البناجة لي كانو معاهم ، ماعمرهمش غايدخلو لهنا (حدر راسو وخرج من البيرو كان جاي يوسف بغا يوقفو) من بعد ايوسف ( دار نظاظرو وخرج من تم ) ..
× عنبر ×
- ݣالسين كيفطرو مها ورشيدة نزلو للمحال بقاو غير هوما .. راجعة عنبر من البيت هازة تيليفون فيدها
حياة : اش قاليك فاروق ؟
عنبر : ماعرفت مالو ( بإستغراب) قاليا حتى يجي ويدوي معايا فاص .. عماد لبارح ضربوه ليدو ( شدات حياة على فمها ) ولكن الحمد لله اجرحة ضرباتو ديك بنت الهم دفرح بالفردي
حياة : اويلي هاديك بنت الحرام وشوفلك اش خرج منها انا كل مرة كنتصدم فواحد وحق الله العظيم
عنبر : انا حاسة براسي كنحلم ( سونا الباب )
حياة : بلات نشوف شكون كيدق
عنبر : عنداك يكون داك ولد الحرام دبدر طلي هو الاول ( طلات حياة عقدات حواجبها بإستفهام ) شكون واش هو ؟
حياة : لا واحد واقف عمري شتو !!
عنبر ( وقفات ) انا انشوف
سميرة ( حتى هي وقفات ) بلات ابنيتي انا جايا معاك .. نزلات عنبر هي وسميرة فتحات الباب ، قبالتها واقف رجل فتلاثينات من العمر ديالو
.... : سلام عليكم هادي دار ديال مدام عنبر
عنبر ( بإستفسار) اه اخويا شكون انت ؟
.... : عطاوني جوج ديال لادريسات هادي او وحدة ديال بوسكورة ، ݣلت نسبق هادي هي اللولة
عنبر : اياه شكون معايا عفاك انا ماعرفتكش !
.... : انا محمد بات أمير
عنبر ( شافت فسميرة بإستغراب وصدمة ) واش امير أمير ؟ ولكن أمير ماعندو والدين
.... : حتى انا ماكنتش عارف بلي عندي ولد ( بخجل ) واش نݣدو ندويو عفاك ( شافت حتى عيات وخلاتو يدخل طلعو وهو تبعهم دخل هزات فيه حياة راسها بإستغراب وسهام لي كانت مخلية أمير فالبيت ناعس ) ..
عنبر : هاد السيد قال بلي هو بابات أمير
سهام : أمير أمير ماعندوش والدين مو ماتت الله يرحمها وحطوه قدام الخيرية
محمد : حتى انا مكنتش عارف بلي عندي ولد ، لبارح كنت عند المديرة وهي لي عطاتني لادريس ݣالت ليا بلي ولدي كاين معاكم ..
سميرة : ݣلس بعدا اولدي وشرح لينا ..باش انعرفو بلي تايا باه
محمد ( ݣلس متنهد تنهيدة طويلة) انا ونورة الله يرحمها كنا كنبغيو بعضياتنا بزاف .. عامين وحنا مع بعضياتنا منكدبش عليكم ( بخجل ) غلطنا وانا مشيت عند باها وطلبتها لزواج ولكن مابغاش يعطيها ليا حيت زعمة انا سرباي فالقهوة مشيت مرة وجوج او والو ، وجا للقهوة لي خدام فيها وشوهني وجرا عليا الباطرون تعميت هزيت راسي وخويت المدينة ومشيت لمدينة اخرى وبدلت النمرة ..
عنبر : وسمحتي فالبنت ماقلتي تقد تحمل مني ماقلتي والو ، ديتي ليها شرفها وخويتي
محمد : وشنو غاندير قصدت دارهم مامرة ماجوج باها سباب
عنبر : راه انتوما سباب لي سبقتو الفرح بليلة ، كان عليك تقصد الباب من الاول ماشي حتى طاح الفاس فراس .. حتى بعدا باها مابغاش البنت تبقى بشرفها ودابا شكون ضاع البنت ماتت وهاد دريري ..
سهام : ولكن كالو لينا ماعندو حد ومو والديها ماتو
محمد : انا عارف راسي غلطت مانكدبش ، دوزت عام ورجعت وسولت وݣالو ليا ماتت وبلي كانت حاملة وتوفات فالحمالة هادشي كالتو ليا مها تلاݣيتها فسوق كتعاود وتبكي وبلي باها الدري حطو ݣدام شي خيرية ، ومن داك الوقت ماخليت خيرية ماسولت فيها وتلاݣيت مع مها مرة خرى وجابت ليا سمية الخيرية غير بالفن من راجلها .. وهادشي لي كاين
عنبر ( شافت فيهم ورجعات شافت فيه ) باش غانعرفو بلي هادشي بصح ؟ وبلي فعلا الولد ولدك يلاه ؟!
يتبع...
التعليقات
لا توجد تعليقات بعد، كن أول من يعلق.