عنبر الجزء الثاني

- بدات تنزل وتعاون خالتها وحياة فشغال الدار .. نهار على نهار كتحس براسها كترتاح .. لابسة صندالة ديال الميكة وكتسيق فم الباب حتى وقف عليها سعيد هاز جلابتو لايحها على كتفو عاقد غوباشتو وكيدوي من تحت نيفو :

ايوا الالة عنبر شتك وليتي بيخير وعلى خير .. وصيف قرب يسد بيبانو ودراري قربو يدخلو للسكويلة .

- عنبر : ( لابسة طربوش مضرقة بيه على الشمس ) والله يدخلهم على خير اعمي سعيد وعلاش كتقولها ليا أنا ؟

- سعيد : ايوا الحر بالغمزة والعبد بدبزة .. اتبقاي سارحة ليا هنا بحال المعزة تالفة ماتحني مادني .. ماعديش الخيرية هنا

- عنبر : ( حطات يديها على عود الشطابة كتشوفيه من تحت حجبانها لي عمر حديد قاسهم ) وهاد 6 شهور لي كنتي تاكل وتشرب على ظهري ماشتيهاش .. ياكما يحسابلك غير كنت مغيبة مغانعيقش بيك كنتي دخل وتهز ليا الفلوس ..

- سعيد : ( غوبش وبصوت عالي ) تي أشمن فلوس يالمݣردة ؟

- عنبر : ( ضحكات ) زيد علي فصوتك باش خالتي تسمعك .. وتسمع بلي كنت كنعطيك بريكة كتنطح بريكة راه 50 مليون هاديك اشريف لي جبت معايا .. ومن نهار نزلت من الطيارة جيت عندكم نيشان للدار ..

- ماكنت نخرج ماكنت نضرج حدي دار وانت كل شوية داق داق خاصني .. وكنت نعطيك بلاما نحسب ولكن انت واحد شلاهبي ماتاقيتيش وجه الله فهاد اليتيمة .. ومكافاكش هادشي كتي تخليني نخرج من البيت من هنا تلوح يدك من هنا ..

- سعيد : ( بلع ريقو ولون وجهو تبدل ) ومالك كتي اتسكني عدي هنا فابور ؟

- عنبر : لا غير هو خالتي مسكينة الى ساقت ليك الخبار بلي 49 مليون و20 ألف ريال ديتيها كلها وعلم الله فين خسرتيها وراه باين فين تخسرات .. ماعرفتها شنو غادي تݣول ؟

- هزها من راسها لرجليها وبدا كيضحك بحال شي واحد خرج ليه عقلو .. كتشوف فهاد الراجل لي قدامها ݣرام ديال الرجلة ماعندوش .. حبس من الضحك وشافيها بملامح باردين هز صبعو الغليض لي كان مفلح بتمارة ونطق بصوتو المدعدع :

عد بالك خالتك أتخلعني .. خليها دوي تشوف شكون ايصرف على دوك الولاد أنا راه زايد ناقص عدي صحتي ومكنحن فيها خلي نحن فشي حد ولايني هويعة .. جري طوالك أبتي وإلى ماݣداتك خالتك ݣوليها لدوار كامل ديري البوق تي ݣاع .. ولا طلعي لرباط شكي

- وزايدون دوك الفلوس لي عدك كاملين منين جاوك ؟ ماعرفناك شافراهم ماعرفناك ناصبة على ناسك فيهم وشكون عارف منين جاوك .. ݣاع هداك خير خلاه لك راجلك وكتي غاتخسريه فالخوا الخاوي يالاه نفكو بيه الكريديات لي عدنا تبغي راجل خالتك يدخول الحبس ؟

- عنبر : ( بلعات ريقها كتحاول تحكم فأعصابها ) دوك الفلوس ماشي شغلك منين جاو .. يكونو جايين من جايحة الكحلة كاع هداك همي وشغلي وراجل خالتي الى بغا يخلص كريديه يضرب عليهم تمارة .. مايرزينيش ف 50 مليون كاملة غير حيت عقلي مكانش حاضر معايا .

- سعيد : ( كلامها دخل مع ودن وخرج مع ودن ) وحتى دابا سمعي ابتي أعنبر .. حمدي ربي وشكريه خليت ليك الفتات دوري بيه الناعورة والمخير فحميرك سرجيه وركبي عليه .. وهو غادي دابا نهار نرجع لخيمتي منلݣاكش كدوري ليا بجلايلي ..

- ضرب فيها ودخل للدار .. بقات واقفة مفقوصة كتحس براسها غادي طرطق هزات داك السطل دالما كباتو وتبعاتو بشطابة ..

- راحت العشية الجو كان زوين خرجو قدام الباب كانو مفرشين حصيرة وزوج بونجات .. حاطين طبلة فوقها صينية ديال اتاي وطباسل فيهم اللوز وكاوكاو تمر وزبيب ..

- حياة : ( طالقة شعرها كيلعب بيه البرد ) أحسن حاجة هو فاش سعيد كيدرق كمارتو الراحة والله العظيم

- عنبر : ( مسرحة رجليها دايرة رجل على رجل ويد حاطاها فطبسيل كل مرة كتنقب حبة ديال اللوز وسارحة بعينيها بعيد ) :

شحال كيݣلس عاد كيرجع ؟

- حياة : على حساب بعد المرات راه كيغبر ب 15 يوم مرات شهر عاد كيتم راجع .. هاد المرة باينة ايݣلس فيها ديك شهر ونص ولا شهرين

- عنبر : ( شافت فيها ) مشا يطرق الفلوس لي دا مني باينة ..

- حياة : وراه هادشي لي معنيت ليك عليه .. شكارتو هاد المرة عامرة مالف يعمر الثلاجة ويمشي .. هاد المرة دور مع مي عمرو دارها.

- عنبر : ( ببرود ) كنت بغيت نقولها لخالتي ولكن ماعندها مادير غير غاتزيد تفقص كتر ماهي مفقوصة ..

- حياة :

غير غادي تخوي الما فرملة أختي .. مي مسكينة تكول ساحر ليها الله يستر ... غير يخنزر فيها ولا ينهض فيها تبدا تسايس معاه وهو ماعدو سوق لا فيها لا فولادو يصاوب الله .. ( تسمع صوت خطوات ) صافي ݣلبي الهضرة .

- ݣلسات رشيدة كبات ليها كاس ديال أتاي وقربات ليها طبسي كاوكاو .. هزات راسها فبنتها بتساؤل :

شنو كنتو كتݣولو ؟

- حياة : والو ( جمعات شعرها بالقراص )

- رشيدة : من صباح وانتوما وش وش او والو ( بشك )

- حياة : وغير سولت عنبر كيفاش حتى كانت تعرفات على راجلها .

- رشيدة : ( ضارت عند عنبر بتساؤل ) واييه ابنيتي اعنبر كيفاش حتى عرفتيه وفين .. أنا احتى سونيتي ليا فاش ݣلتي ليا تزوجتي وبلي غاتمشي مع راجلك لديك البلاد اسميت بوها ( كتحاول تفكر )

- عنبر : ( تنهدات ) بلغاريا

- رشيدة : أييييه هاديك .. وݣلتها نيت مع راسي جاتني عجب حيت كتي مابغياش تزوجي كتي باغية تكملي قرايتك وتولي محامية عقلتي ؟

- عنبر : ( شريط حياتها كلو داز قدامها ) عقلت أخالتي سبحان الله العظيم .. بنادم كيقول كلام وكيدير الضد ديالو شكون يݣول انا انا نخلي لافاك ونتزوج

- حياة : (بحماس ) كيدايرة ديك البلاد ؟

- عنبر : زوينة ( بإبتسامة باهتة ) البحر ضاير بيك والخضورية الصراحة زوينة بزاف .

- حياة : وباش كتي كتفاهمي معاهم ؟

- عنبر :

فدار كنت كندوي بدارجة حيت هوما مغاربة ستاقرو تم بكري .. ولكن فاش كنخرجو كندوي بالإنجليزية تم اللغة ديالهم الرسمية هي البلغارية .. ولكن كيدويو حتى بروسية وتركية والإنجليزية والفرنسية وحتى بسبليونية وطاليانية .. لي عندو شي لغة من هادو مايلقاش المشكل

- رشيدة : كانو لاباس عليهم ݣلتي ليا فاش كتي وصلتي تم ؟

- عنبر : ( كتسترجع جيع الذكريات ) لاباس عليهم أخالتي وسكتي .. الدار لي كنا فيها ماشي دار هاديك راه بحال القصر ڤيلا قدها قداش الخدامات لي كيطيبو عاد الخدامات لي كيقابلو دار من تجفاف وجميع

- رشيدة : ( قلبات فمها ) بقات فدار والقلب كحل أحيانة أبنتي .. على معاودتيليا شنو دوزو عليكم دارهم ماحملت فيهم الشعرة من داك الوقت مابقيت سمعت عليك خبار كيتك بقت في ݣولبي ..

- عنبر : ( جمعات رجليها لعندها ) كنت صابرة على قبلو هو حيت كان مزيان معايا وكيبغيني .. وراه أخالتي بطبيعة الحال مغايبغيونيش واش انا سهمي من سهمهم

- رشيدة : فديك الدار مكايبقى لا سهمي لا سهمك كلنا كنتساواو

- حياة : كيفاش حتى عرفتيه ؟

- مشا بالها لبعيد هادي 5 سنين أول مرة شافتو كانت عندها 21 عام .

قـــبــــل خـــمــس ســنـــــوات

- فوق الكرسي حدا جامع الحسن الثاني .. ݣالسة وساهية جامعة شعرها سفنجة لابسة سروال ديال الدجين مع تجاكيط ديال الكوير وسكادو فظهرها ..

- عنبر واش غادي تبقاي بحال هكا اصاحبتي الموت علينا حق .. والديك عامين هادي باش ماتو وانت الى زدتي شوية على هادشي غادي تبعيهم

- عنبر : ( شارت عندها بملامح باكية ) ماشي ساهلة اليلى والله مساهلة بين ليلة ونهار تلقاي راسك الله كريم ماعندك علامن تحطي الراس ..

- ليلى : ( حطات يدها على ظهرها ) والله أختي حتى حاسة بيك ولكن راه ماعندك ماديري ، ربي بغاهم واش بغيتي ضاربي مع قدرة الله دابا خاصك تشوفي شنو ديري

- عنبر : ( تنهدات تنهيدة طويلة ) عارفة أختي تقلقت عليك وليتي تخلصي كراتك وكراتي معاك انت لي وليتي هزاني .. حتى عمتي مرة مرة كتجود عليا بديك البركة وغير بتخبية من راجلها

- ليلى : متقوليش هكاك .. والله حتى عزيزة عليا حاسباك ختي ماشي غير صاحبتي داكشي باش مابغيتش ليك هادشي .. عرفتي البنت لي كانت خدامة معايا مابقاتش اش بان ليك تخدمي بلاصتها منها تصوري مصيريف تعاوني راسك ومنها تبدلي الجو

- عنبر : فالكروصة دالببوش أليلى شحال انصورو ݣاع ؟

- ليلى : والله القسم أختي كنصور مصيريف بالله .. يحسبليك فلوس لي كيسيفط ليا بابا كيقدوني عارفة مع لافاك والكرا يلاه كنطرق فيهم دوك الفلوس لي كيسيفط ليا .. وداكشي لي كنصور فالكروصة كنخسرو عليا راه هو باش كنت كنخلص عليك الكرا هاد المدة

- عنبر : ( بتساؤل ) عمري سولتك شكون كيصيبو ليك ؟

- ليلى : خالتي نادية كنجيب ليها كاع داكشي لي كتحتاج وهي كتصايبو فالعشية كنديه للكروصة عدي البوطة باش يبقى سخون والله العظيم كيحماقو عليه الناس أما انا مكنعرفش نطيب راك عارفاني ( ضحكات)

- عنبر : اهاه والى خدمت معاك انا شنو ندير ؟

- ليلى : ( وقفاتها كتشرح ليها وهوما غاديين فطريق) عرفتي عدنا الطوابل والكراسة راه شتي الديكور .. انا نكب فزلايف وانت دي للناس حطي .. هادشي لي كنت دايرة مع درية لي كانت معايا .. حيت كانو كيجيو الكليان بزاف كيجيني صعيب نكب ونحط راه ساهل وفالعشية فاش نساليو دايرة مع نور الدين ولد خالتي كيجيبني بالهوندا ديالو مسكين .. هو لي كيديني وهو لي كيجيبني ..

- دخلات ليها الفكرة ديال الخدمة لراسها .. بقات معاها حتى قبلات كتشوف راسها تبقى ݣالسة شكون ايخلص ليها الكرا وهوما 4 البنات كاريين دار فيها زوج بيوت صغار كل زوج بنات فبيت دايرين فيه حوايجهم وبلاصة صغيرة عندهم فالمراح كيطيبو فيها وطواليط

- تافقو على البروݣرام ديال الخدمة وبدات معاها منين كيكونو عندهم حصص فلافاك راه كيقراو والوقت الخاوي كيقادو فيه أمورهم وكيبداو الخدمة والاغلبية كيبداو مع ستة ديال العشية .. بدات كتأقلم الخدمة وكتحاول تنسي موت والديها لي داز عليه عامين وخلى أثر كبير فحياتها ..

- فديك العشية كان البرد محرك لابسة قبية فالكحل وسروال دجين مع سباط طالع .. شعرها جامعاه سفنجة يلاه حطات لواحد الراجل ومراتو زلايف دالبيبوش وكيسان ديال البلول ورجعات للكروصة عند ليلى ..

- ليلى : ( هزات تجاكيط لبساتو ) ياختي السم دالبرد هاد العشية ياربي سلامة

- عنبر : دابا دخلو الليالي داكشي باش .. كنتسنى غير نساليو فيا واحد نعاس تقول مانعست عام

- وهوما كيهضرو حبسات جيپ فالكحل .. نزلا الزاجة دالجهة لي حدا جهة الشيفور كان ݣالس شاب يكون فأواسط العشرينات .. رفع صوتو بتساؤل :

ختي بشحال البيبوش ؟

- عنبر : ( ببرود ) من الصواب والأداب الواحد الى بغا يسول ينزل ويسول اخويا ( وركات على الكلمة الأخيرة )

- بغا يرض عليها وحبس ضاير عند الشخص لي حداه .. طفا الطوموبيل حل الباب ونزل .. كتحقق فيه كانو ملامحو عكس الشخص لي حداه سمر وعينيه فيهم واحد الاريحية غريبة ، نظراتو كانو حنان وفيهم لمعة خاصة .. طولتو كانت مزيانة وسموريتو واضحة .. من شكلو ولباسو باين بلي لاباس عليه .. تقدم عندها بخطوات واسعة او وقف قبالتها ..

- بصوت رجولي هادئ وعينيه لي مفيكسيين عليها نطق : بشحال البيبوش امولات البيبوش ؟

- عنبر : ( ريحتو وصلاتها خلاتها تنهد تنهيدة طويلة غير مسموعة ) 5 دراهم لزلافة

- تبسم وحدر راسو .. رجع شاف لعندها :

نݣدو ناكلو هنا ؟

- عنبر : ( أشرات ليه براسها لناس لي ݣالسين ) بحالك بحال ݣاع الناس لي هنا .. هزهز ليها براسو وتوجه لواحد الطبلة جر الكرسي وݣلس .. شافو الشخص لي معاه ݣلس نزل من طوموبيل ونظم ليه حتى هو

- ليلى : ( بهمس ) شفتي لحسك على حديدة راكبين هاد الطوموبيل انا راه النعس فيها

- عنبر : ( مامسوقاش واخا حاسة بعينيه غادي يح/رقوها مم اللور ) إيوا صافي طوموبيل والعياقة على الخوا الخاوي ..

- هزات الزلايف مع العواد وكلينيكس حطاتهم فالبلاطو وداتهم للطبلة لي كانو ݣالسين عليها .. حطات لكل واحد زلافة قدامو شافت فيه بنفس النظرات :

تبغيو البلول ؟

- تبسم ليها نفس الإبتسامة : والبيبوش بلا بلول هي والو ولالا ؟

- عنبر : كاين لي ماعندوش معاه داكشي باش سولت

- (جاها الرد منو) لا أنا عندي مع كولشي ماتلقايش معايا المشكل .. مداتهاش فجوابو ضربات الدورة ورجعات عند ليلى باش تعطيها البلول .. رجعات عندهم حطات لكل واحد كاسو ومشات هزات الزلايف الخاوية من طبالي لوخرين ..

- فكل خطوة كديرها كتحس بعينيه عليها .. إحساسها كان فمحلو حيت فعلا ماقدرش ينزل عينيه عليها مع كل حركة كديرها وكل خطوة .. عيا ينغز فيه صاحبو ولكن مكانش فهاد العالم سالى الزلافة ديالو وماقدرش ينوض كون صاب يبقى ݣالس ومقابلها ..

- وقف وتوجه للعندهم باش يخلص وقف قدامها والإبتسامة مزينة وجهو :

شحال عندي بالبلول ؟

- عنبر : 14 درهم .. عطاها الفلوس خداتهم من عندو ورضات ليه الصرف

- شكرا بزاف وسمحيليا على داكشي لي دار صاحبي

- عنبر : ( حسات بقلبها كيضرب واحد الإحساس غريب تسلل لداتها ماقداتش تنزل عينيها وتهرب من نظراتو ) ماشي مشكيل ماوقع والو ..

- عطاها بظهر غادي وهو يوقف ضار لعندها ورجع بخطوة قريب ليها :

واخا نعرف شنو سميتك ؟

- عنبر : وعلاش ؟

(ضحك) غير بغيت نعرف وصافي باش إلى جيت المرة الجايا ولقيتك نكون عارف سميتك

- عنبر : ( جاب ليها الضحكة تبسمات وردات عليه ) سميتي عنبر

- (تبسم ساهي ) سميتك قليل فين يقدر الواحد يسمعها .. تهلاي فراسك أعنبر أنا سميتي بدر

- عنبر : ( حسات بلي هاد السمية اتبقى محفورة فبالها) مشرفين .

- بدر : بسلامة نشوفك مرة اخرى

- عنبر : إن شاء الله .. بقات متبعة ليه العين حتى حل باب طوموبيلتو قبل لا يركب شافيها .. تبسم ليها مسيفط ليها غمزة طلع فطوموبيلتو ديمارا ومشا .

________ الــرجــوع للــحــاضــــر ________

- عنبر : ( تنهدات تنهيدة طويلة) وداكشي لي قلت مع بالي هو لي وقع ولا ديما يجي ياكل البيبوش .. والى ماكلاه يشد كرسي ويبقا مقابلني كان حنين عليا بزاف ومبرعني واخا انا مكنقولش بغيت وكيحس بيا الى كنت مضرورة واخا منقولهاش ليه .

- حياة : (ساهية كتبسم ) شحال زوين هادشي وايمتا تزوجتو؟

- عنبر : ماݣلسناش بزاف شهر من بعد تعارف طلبني لزواج وتزوجنا

- رشيدة : داكشي باش خلاك سمحتي فقرايتك

- عنبر : ( شافت فيها ) فديك شهر اخالتي خلاني نبغيه خلاني نسا داكشي لي كنت عايشة وماكنتش قادة نتفرق عليه تفرقت على والديا وهو عمر ديك الخوية لي كانت فحياتي ..

- غير قاليا نتزوجو وافقت وحيت كانت خدمتو فبرا مكانش يقد يخليني ايوا سمحت فكولشي تزوجنا ومشيت معاه ..

- رشيدة : وتريكتو؟

- عنبر : ( كتفكر نهار عرفها على دارهم فاش وصلو ) بطبيعة الحال حتى واحد فيهم ماحملني ( ضحكات) لا باه لا مو لا خواتاتو لاباس عليهم بخ وشويكيات جايب ليهم وحدة تعرف عليها شهر تزوجها بلا عرس لاا والو ومدخلها عليهم

- رشيدة : اويلي ياويلي يا بتي يا عنبر مشيتي رخيصة ابنتي وسمحيليا عليها كلمة ( كانت محر//وقة من جيهتها )

- عنبر : ( سرحات رجليها تنملو عليها) والله ماندمت اخالتي حيت العيشة لي كان معيشني تحلم بيها اي وحدة .. داكشي باش متسوقتش لا لعرس لا لمعاملة والديه كان كيهمني غير هو (رجعات بتفكيرها اللور كتفكر شنو دوزات معاه شافت فعمتها وتبسمات)

- اللباس الواعر كنت كنلبسو انا .. دخلني للمدرسة ديال الموسيقى تعلمت فيها نضرب على الألات الموسيقية (شافت فعمتها كتشرح ليها حيت عارفاها عمرها قرات ) عرفتيهم اخالتي ياك ؟

- رشيدة : ( ميقات فيها ) واخا عمري قريت ولكن راه ماشي هبيلة وأصلا كنت داخلة لمحو الامية العام لي فات علماتنا القرآن والحساب

- عنبر : مزيان اخالتي احسن مدرتي (تبسمات ليها ) مو كانت كتبغي تحماق كانت كتقوليا واخا يغلفوك بالحرير اتبقاي بنت العروبية واحد المسيميمة مݣردة ..

- حياة : ياختي وصبرتي ليها باز ليك

- عنبر :

قليل فين كيكونو فدار حياتهم فشكل .. الاغلبية مو وباه غايبين على الدار كيفوتو جوج سيمانات شهر .. حتى كتفيقي وتلقايهم ݣالسين على الطبلة

- حياة : خواتاتو مزوجات ؟

- عنبر : (ضحكات بإستهزاء ) فين مزوجات .. كل وحدة عايشة علامها الخاص بيها وحدة راه تبارك الله عندها محال قداش ديال الاكسسوارات كتعامل أمع الناس هوما هوما ، او وحدة مهندسة لوخرا الصراحة ولوخرا يمكن مضيفة طيران هاديك قليل فين تشوفيها بحال الهلال ... الله يستر كلها مركبة نافخة الفم والصدر دايراه حتى هو مكنرتاحش ليها مزال لوخرينات مرة مرة يلوحو ليك شي كلمة يعبروك هاديك لا .

- حياة : ( شافت فمها مرددة تدوي ) ياختي ماعرفتش ولكن كت سمعت شحال هدا بلي ديك بلغاريا الاغلبية دبناتها هوما لي خدامات فدوك الأفلام الإباحية

- رشيدة : وراه مزيان تكون ممثلة .. حسن من دوك لي يظلو واقفات فطيارة كيطيبو ليهم رجليهم

- حياة :

واش عارفة امي شنوهوما الأفلام الإباحية (شافت فمها ) راه بحال الى قلتي الفساد وكيصوروهم فيديو ويبيعو دوك الفيديوات بالفلوس

- رشيدة : (خسرات سيفتها ) ياربي تسترنا حتى تدينا

- عنبر : لالا منضنش دارهم لاباس عليهم عرفتي الفيلا كيدايرة نهار شتها بقيت هاحالة فمي كتحمق .. والبيوت قدهم قداش موحال

- رشيدة : وانت براسك ݣلتي ليا ماكتيش عارفاه فاش خدام لا هو لا دارهم نسيتي

- عنبر :

هو خدمتو الاغلبية أمن دار حاضي غير بيسي صافي كيخرج ولكن قليل ماشي بزاف .. فالاول ماكنتش عارفة طبيعة خدمتو ولكن من بعد لا ، كيشري شيحاجة لي قديمة ولكن غالية وكيبيعها بثمن غالي بزاف .. مابغاش يتبع حرفة باه على مݣاليا باه عندو شركة ديال البني فبلغاريا وشي وحدة أخرى فطاليان ..

- رشيدة : وحݣلهم يكونو لاباس عليهم وشامين ريحة بيطانهم على الناس

- حياة : الحمد لله اختي لي ماولدتيش صعيب تهزي الحمل ديال الولاد بوحدك

- رشيدة : ربي دار فيها خير

- عنبر :

كنت بغيت نحمل الصراحة (تنهدات) ولكن مجابش الله مشينا للعند الطبيب وقال بلي المشكل عندي أنا .. وإلى بغيت نحل داك المشكل كيخصني واحد العملية نديرها .. وهو مابغاش كاليك خاف وبلي ماعندو مايدير بدراري ..

- رشيدة : الله يرحمو ولهلا يسمح لوالديه لي مداز حتى يوماين على موتو هزو ليك حوايجك ورجعوك ..

- عنبر : هوما الصراحة ماشي ݣالوها بحال هكا ، باه ݣاليا غانعطيك لي يقدك تبداي حياتك فالمغرب وسيري بحالك باش زعمة مانطلبش حقي فداكشي لي غايخلي ، حيت راه بالقانون عندي حق فيه ، او أصلا أش عندهم مايݣجدرو بيا ولدهم لي كنت مجموعة بيه وصابرين عليا على ودو مات الله يرحمو ..

- رشيدة ( بتساؤل ) :

ايوا وعلاش ماعطاوكش هاد الفلوس ؟

- عنبر ( بلعات ريقها خافت تقوليها عطاوني 50 مليون وتسولها فين مشات وإلى عرفات بلي راجلها داهم ليها وخسرهم فالقصاير توقع ليها شيحاجة ) :

ماقبلتش ماعندي ماندير بفلوسهم ، براكة عليا اداكشي لي عشت والݣرحة ديال بدر فقلبي .

- حياة : (بأسف ) كوراه جاتك حارة فاش سقتي الخبار

- رشيدة ( خنزرات فحياة )

اللقوة العسرية إن شاء الله البت يلاه بدات تنسى كتفكريها يابنت الهم مال فمك مراجل خضرة

- عنبر :

انا عمري نسيت ولا غادي نساه اخالتي .. ربي لي عالم نهار جاو كالو لينا كان راكب مع صاحبو ودارو كسيدة هو مات فالبلاصة وصاحبو دخل فغيبوبة .. كنت بغيت نحماق ربي جا من جيهتي

- رشيدة :

وبراكة عليا براكة .. الله يرحمو ياربي الواحد مغايبقاش ابنتي واݣف فبلاصتو العمر كيفوت كلنا غادي نمشيو لديك الدار حتى حد مغايبقى ݣالس فيها

- عنبر : الحمد لله على كل حال .. ناضو جمعو الطبلة ودخلو للدار رشيدة مشات للبيتها تنعس وحياة غسلات الماعن وطلعات للبيت لي كتنعس فيه مع عنبر

- دخلات عندها سادة الباب كالية عاكفة راسها بزيف حياتي وحاطة لاكارط ديالها وعقد الزواج وشي وراق .. هزات راسها فحياة لي دخلات :

قربات تسالي ليا لاكارط ناسيونال غادي تسالي هاد الشهر داخل خاص ضروري نقادها

- حياة : خاصك تنزلي لبرشيد الى بغيتي تصايبيها

- عنبر : ( كتجمع فدوك الوراق ) مالنا حنا غادي نبقاو هنا سعيد يرجع ايجري علينا خاصنا نمشية قبل لا يجي

- حياة : ( مسرحة شعرها كتمشط فيه ) وفين غادي نمشيو أختي ؟

- عنبر : ماتبقايش تمشطي شعرك فليل .. كيقوليك الويل سير عند مشاطات الليل

- حياة : غدا غادي نعوم وبغيتو يكون مسرح .. تي دابا خلينا من شعري وݣولي ليا واش خممتي فين غادي نمشيو ؟

- عنبر : بانت ليا غير كازا هي لي تقبل علينا أنا وياك ..

- حياة : الله ياختي كازا قدها قداش تخافي ايخطفونا ولا يديرو فينا شي مصيبة

- عنبر : ( كتشوفيها بعدم تصديق) من نيتك احياة واش تي هبيلة مالك مومو ݣغة يخطفوك توݣضي شوية الى بغيتي تخدمي راه خاصك تكوني مجبدة

- حياة (ݣلسات )

مديش عليا احيتاش عمري مشيت ليها اكنسمع عليها .. ولكن فاياش انخدمو غير جي ولقاي الخدمة أختي وسط مدينة كبيرة

- عنبر : عطا الله ( تكات مغطية باليزار ) نشوفو لوزينات لي تم المشكل خاصنا نلقاو الكرا هو اللول عاد نشوفو الخدمة

- حياة (تكات فبلاصتها )

واييه هادشي وكيغانديرو ليها نلقاو الكرا من الاول خاصك 6 تصباح تلقاك تم

- عنبر : (تنهدات ) على مولانا يصاوب الله

- حياة ( هزات يديها للفوق ) ياربي تسهل علينا وتلݣي لينا الخير ياربي ..

الـــدار الـــبــيـــضـاء

عـيـن الــذيــاب 📍

- فڤيلا راقية بأثات مغربي تقليدي راقي .. وبضبط فصالون ݣالس راجل كبير فالسن شعرو رطب بعض الخصلات القليلة لي كانت كتبان كحلة فشعرو الباقي اما باقي شعرو كان فرمادي .. لحية مزينة دقنو مع موستاج لي خداو حقهم من الشيب لي عاطي للمظهر ديالو هيبة او وقار ... السن ديالو كان كيترواح ف 60 سنة ݣالس على السداري لابس قندريسي مع فوقية فالبيج وبلغة فاللون الكحل .. يدو مزينة بساعة وصبعو مزين لخاتم ديال النقرة .

- ملامحو رجولية وكان واضح الطول ديالو واخا ݣالس

- كان ساهي او ودنيه مع الهضرة لي كيقوليه ولدو .. كيدقق فأبسط التفاصيل ومع اي حاجة كيݣولها باش متفلت عليه حتى حاجة .. وهادشي مجاش من فراغ حيت خدمتو كوكيل الملك خلاتو يكسب هاد الحس ويكسب مهارة الإستماع للي قدامو .

- هادشي لي كاين الواليد ..

- (دور لسانو وسط فمو قاد نظاراتو ديال الشوف وهز عينيه الكحلين الصغار فولدو ) خدمتنا كيخصها دليل ملموس واخا ݣاع هادشي لي ݣلتي .. (تقابل معاه وبنبرة جدية نطق ) عماد سمع اولدي هادشي كامل لي ݣلتي أنا معاك فيه ماݣلتش ليك لا ولكن راه الى ماكنش عندك شي حجة وبرهان صحاح هادشي كيف والو

- عماد : الواليد راه كنݣولك اليوم جوج ديال الدريات وقع ليهم نفس البلان ... متݣولش ليا الحجة والبرهان هادشي راه مورق باين بلاما يحتاج

- واخا من هادشي كامل انت عارف شكون مولاها ؟

- عماد : ( دوز يدو فشعرو معصب ) لا معارفش

- (تبسم) وهاحنا رجعنا للهضرتي .. شتي واخا تغبر 20 بنت الى ماعندك حجة على كلامك راه مكاين والو .. النيابة عطاتكم لوردر باش تبداو لونكيت ؟

- عماد : (رجع براسو للور بعياء) غير دخلت لدار سوناو ليا ݣالك بلي وصل .. من غدا إن شاء الله غانبداو (رجع شاف فباه ) الواليد راه مايمكنش 3 البنات دقة وحدة وبنفس الطريقة مايتقبلهاش العقل هادي .. وهادشي غير لي علمنا عليه حنا .

- هادشي مافيهش الݣولان هادشي فيه خدم قلب وجيب الدليل شيحاجة اخرى غير نساها

- عماد : زعمة والو ماتعاوناش أنت ؟

- سمحليا (هز يديه) أنا وليت متقاعد دابا ماعندي باش نفيدك واش عاد رتاحيت باغي دخلني فخدمتك كل يݣد بخدمتو

- عماد : ( هز حاجب ونزل الثاني ) ياك أبا أدريس شتك أكلستي فدار وليتي بحالك بحال الواليدة ..

- علاش مالي شنو درت ليه (جاه الجواب من الصالون لاخر )

- أدريس : هادشي لي بغيتي وتلݣى هاهيا سمعاتك ..

وقفات عليهم مرأة .. طالقة شعرها لي كان مصبوغ بالزعر كانت فأواسط الخمسينات .. لابسةجبادور منزلية متناسقة مع جسمها النحيف إبتسامتها كانت جدابة وملامحها مريحة ..

- شنو كنتي كتقوليه ؟

- أدريس : أنا قسما بالله ماݣلت شيحاجة هاهو سوليه

- مكندويش عليك انت ، كندوي عليه هو راه سمعتو كيفاش زعمة غير ݣلس معايا فدار ولا بحالي مالي كيجيتك ؟

- عماد : ( كيضحك ) والله الواليدة مانويت فيها شيحاجة .. غير الواليد مكانش فيه كترت الهضرة دابا وليتي دوي معاه يعطيك خو جوابك

- باباك ديما هكا ( ݣلسات ) ماشي يلاه ولا فيه هادشي غير حيت الخدمة كانت لاهياه

- أدريس : (شافيها بصدمة معلي حواجبو ) ياك ألالة خديجة ماݣلتي عيب دابا نخليها ليكم وزرعو فيها الحبق

- خديجة : ( كضحك) فين غادي ؟

- عماد : شهر 8 هدا ( تبسم ) فنظرك فين غادي يمشي غايتجمع هو او ولادو وخوه ويقصدو الموسم تاني بحال ديما .

- خديجة : ( بترجي ) كون اديتيني معاك الحاج هاد المرة نفوج شوية كانبقى قنطانة .. كتخويو عليا الدار كنبقى كيالحنش لي ماعندو راس ، اتمشي تاني تبقى قبل مايبدا الموسم تبقى ساكن حتى يكمل شهر على قدو عاود

- أدريس : ها ماجدة بقات ليها سيمانة إن شاء الله وترجع بحالها ومغاتبقايش تقنطي

- خديجة : دابا انا قسما بالله مافهمتش ، فينما نكوليك ديني كتبقى تسبب علم الله أش كتشوف فداك الموسم ؟

- أدريس : أعوذ بالله واش حنا ديال هادشي يهديك الله يا هاد المرة .. ولادي ݣدهم ݣداش معايا ومعايا خويا وندير .. مادرت حتى فاش كت صغير خلي دروك وعاي شوية .

- خديجة : وعلاش مابغيتيش تديني فينما نݣولها ليك تبدا تحجج ( هزات عينيها فعماد لي وقف كيتسلت مخليهم بزوج ورجعات كتشوف فراجلها

- أدريس : حنا غاديين غا رجال وكنكونو تم غير رجال مع الحباب والأصحاب .. ݣيطون ݣدو ݣداش عامر ابرجال ها مقدم الصربة وها البارضية ونديك تي معايا وندخلك وسطهم واش من نيتك اخديجة نوضي تنعسي ونعلي شيطان من الهبال

- خديجة : كون ايتزوج ليا عماد بعدا مانبقاش بوحدي

- أدريس : ( وقف) دابا راه اقلت مايدار هي لي كتخليك تفكري فشي حوايج مكاينينش كاع دابا وليتي باغية تزوجيه أخديجة عطا الله مديري باش تشغلي راسك وتبدلي هاد الروتين راه غانتي لي مكتفكريش وصافي

- خديجة : فينما دويت تلقى ليها تصريفة حتى ولد ولدي قليل فين كنشوفو .. عرفتي كيبان ليا انرجع لاصال إن شاء الله

- ادريس : و هانتي بديتي تفكري .. يلاه دوزي ترتاحي وبراكة من تخربيق وصفي عقلك بعد المرات عقلك كيجيب ليك غير الحماق

- خديجة : ( ضحكات ) راه واخا كبرنا مزال كنغير عليك

- أدريس : ( وقف قدامها كيشوفيها بحب ) واش انت هبيلة .. واش هاد العينين لي عشقوك وانا صغير يجيو حتى لدابا ويغدروك ادوي .. الݣلب دليل ݣدامك يا هاد المرة

- خديجة : (ضحكات ) أح عليك انتوما الغرباويين كضربو هنا وهنا المرة تخليها فدار وانت تبورض ليا فالموسم وتنشط مع راسك

- أدريس : والله يهديك هادشي لي غانݣوليك وتساليني .. كتدوي بحال هاد المدة كاملة كنخليك فدار ، وأنت زعمة عارفة هاد الموسم سينين ومينين وحنا كنحضرو ليه انا او ولادك مكاين شي عام ماحضرناش ليه .. هادي عادة والعادة مكتبدل ، حدر راسو وخلاها واقفة ماعجبوش الحال تشك فيه ..

- رشيدة : ( حابسة البكية بسنانها ) دابا ماحشوماش عليك ربي فين غادي يمشيو هاد زوج بنات أݣوليا ؟

- سعيد : أرض الله واسعة وعريضة ( مامسوقش) ماعديش الخيرية هنا (خنزر فيها ) انا علمتكم قبل منمشي عدهم الزهر لي بقاو شهر كيتبوردو ليا هنا

- رشيدة : هاديك لي مجري عليها راها بنتي وهاديك بنت ختي واش أنت بعقلك مالك مكاتخاف الله ( كتبكي )

- سعيد : ( وقف ) الى بقاو فيك هزي ولادك وتبعيهم يلاه نتهنا من كمامركم دلويل .. داك شوية دنشاط لي نشطت تحرريه عليا بنݣير

- هبطات حياة لابسة جلابة وشال مغطية بيه نص شعرها هازة واحد الساك .. سمعات كولشي وداز على ودنيها ، حطات الساك وقربات من مها معنقاها :

صافي امي مدير والو فراسك مايكون غا لخير إن شاء الله متخافيش عليا

- رشيدة : ( قلبها كيتحر/ق وكبدتها مشوية ) كون ادرتي ليه ابنتي خاطرتو وتزوجتي بسي المحفوظ بعدا تبقاي حدايا وسيد بخيرو وخميرو

- حياة : واش من نيتك امي ( بإنفعال) على أخر يامي ندي داك مهدوم السنان مرتو الاولى سيفطها لروضة جاب الثانية وبغا يكمل بيا ليستة أنا والله لا كانت ليه

- سعيد : ( خنزر فيها ) بيك هبيلة وسايط ليك الريح فودنيك .. عرفتي الارض لي عدو ݣداش كان يشبعك أدهوبات ويبرعك اش قداو الناس بصغر

- حياة : ( ماحملاتوش ) بغيتي تبرع انت ماشي انا باغي تدفني وتبيعني وتصور ورايا مصيريف .. شتي نݣولك الله يعملني نفرش الأرض نضرب الكرفي ولا نديه

- سعيد : ( كيطلعها وينزلها عينيه خارجين ماكره يسد عليها ويشبعها عصا حتى تهز يديها لسما ولكن مها كانت واقفة بيناتهم ) وهي لا خويتي عليا سربي

- حياة : هاهي غادية وغاتهنى منك .. قاطعاتهم عنبر نازلة لايحة عليها عباية فالكحل وشال لايحاه على راسها .. هازة ساك ثغير وجارة باليزتها ..

- رشيدة : ( عطاتها لنواح مراضياش على هادشي لي كيوقع قدامها ) الله ياربي الله وفين غاديين ولين غاتصديو ياربي الحبيب الله

- عنبر : أرض الله واسعة وعريضة اخالتي متخافيش علينا (عنقاتها ) اللهم خبزة كارمة والهنا ولا دواز وكترت النقيب لي كيهرس الراس ..

- سعيد : اتحليك الفم أديك المنحوسة ( قرب ليها ) كيبان ليا ناقصك تربية

- عنبر : ( ضارت عندو بملامح باردة ) وحربش قرب ليا الى كانت مزغرتة عليك مك او والداك فكتانة بيضة حط عليا يديك .. ياكما يحسابليك خالعني نطيح ليك هنا ونجيب عليك الباطل ونݣولهم بغا يتعدا عليا الى ماسيفطك ب 30 عام دالحبس .

- بلع ريقو مخرج فيها عينيه .. صدرو كيطلع وينزل ماقدش يرض ليها جواب ، ضارت عند خالتها ورجعات عنقاتها ناطقة بصوت سمعاه غير هي :

عضي فصبر أخالتي يسهل عليا الله أنجي نديك من هنا غير كوني هانية والله لا خليتك معاه

- رشيدة : (دموعها ماحبسوش) الله يسهل عليكم تهلاو فبعضياتكم .. لي درتوها ݣولوها ليا تهلاو فبعضياتكم راكم خواتات دروك تحانو الله يرضي عليكم .

- عنقاتها حياة وماقداتش تحكم فراسها بكات حتى شبعات .. تفارقات مع مها ومع خوتها غادية وكتشهق كتحس بروحها تݣلعات منها حالفة بحلوفها ماتخلي مها مع سعيد .

- عنبر : طيبتي عينيك بالبكا .. ماشي وقت البكا ونواح هادي اختي حنان زيري معايا الله يرضي عليك

- حياة : واخا اختي ( كتمسح دموعها بكمايم جلابتها ) دابا فين غادي نمشيو ؟

- عنبر : أنشدو الطريق للكازا إن شاء الله نشوفو شي أوطيل يكون رخيص نحطو حوايجنا ونزلو لوزينات نقلبو ماتعرفي نلقاو

- حياة : نشدو أبيت واحد .. ونتقاسمو ناموسية هكا مغاطلعش علينا القضية غالية اش بان لك ؟

- عنبر : إن شاء الله نوصلو بعدا ونشوفو شنو كاين( وقفو فشانطي كيتسناو طاكسي ولا كار يكون دايز ) .. دايز كار شيرات ليه بيديها

- كازا أختي ؟

- عنبر : أه أخويا ..

- ( خبط فالباب ) حبس حبس .. نزل خدا من عندهم الباليزة وسيكان .. خلصاتو عنبر وطلعات هي وحياة عيون الركاب عليهم غاديين ورا الكريسون حتى وراهم زوج بلايص اللور ݣلسو شادين بلايصهم تسد الباب وديمارا الكار .

°°°°°°°°°°°°°°°°°°°

- فبن سليمان 📍

- وقفات طوموبيل القايد المعطي قدام الباب ديال الدار نزل فرحان والإبتسامة منورة وجهو .. تحل الباب ونزلات من جهة لوخرا بجلابة فالأحمر براندة وقفطانها بالبيض حتى هو براندا .. لابسة سباط فالأحمر بريو دومي طالون شعرها كحل غري جامعاه بقراص وساك حتى هو فالكحل ..

- ظفار يديها مصبوغين فالأحمر اما صباعها مزينين بخاتم ديال الزواج عامر وتقيل مع ساعة ذهبية لي شافها مايعطيهاش عمرها ..

- المعطي : (بغا ياكلها بعينيه ) مرحبا بيك فدارك

- تودة : (تبسمات برقة ) الله يبارك المعطي اراجلي وزماني (ضحكات)

- المعطي : (هايم فيها وفكلامها ) أنت داكشي لي بقا فيا غادي تساليه المعطي مشا عد الله مسكين ..

- تودة : ماشي بزاف غير شوية وكان .. قاطعهم صوت رجولي :

سي المعطي على سلامتك

- المعطي : ( شافو وخنزر ) اش كاين اش كدير انت هنا ؟

- الله يرحم بيها الوالدين ( بترجي ) والله اسي المعطي مالقيت فين نخدم ولا فين نصد ونعطي راس وعدي وليدات الله يرحم بيها الوالدين

- المعطي : ( بنرفزة ) وأنا بنت لك كنفرق الخدامي هنن ... والله ومزال توطح عندي هنا حتى نجيب لي جدارمية يديوك فين تربا يلاه عطيني التيساع ..

- حدر راسو والبكية حابسها فسنانو عطاه بظهر وهو كيتمتم ب " حسبي الله ونعم الوكيل "

المعطي (رجع للإبتسامتو) يلاه ازين ديالي ندخلو اتكوني عييتي

- تودة : لا ماعييتش غير سبقني انت بغيت نجيب باليزتي

المعطي : من نيتك دابا يجيبها ليك الصافي

تودة : يجيب البالز لاخرين هادي فيها شي حوايج بغيت نجيبها انا سبقني دخل وانا جايا . .. ماقدرش يخسر ليها الخاطر بقات واقفة حتى دخل وتحركات كتمشي بزربة تابعة السيد

- تودة : سيدي تسنى .. وقف وشافيها عينيه حمرين :

نعام الالة !

- تودة : (وقفات نقابلة معاه ) أش بينك وبين المعطي ؟

- ( تنهد تنهيدة طويلة وشافيها بنظرات ديال إنسان مهرس ) هداك السيد مكايخافش الله .. كيشوفك كبرتي فالعمر كيكركبك ويجيب خدام جديد مكايعوضك حتى تعويض مكايدير بحساب السينين لي دوزتي عدو وأنت خدام كضرب الكرفي .

- سمحيليا الالة مخاصنيش نݣولك هادشي وانت مرتو ولكن رضي بالك منو راه مايسواش .. مكايخافش الله شحال من واحد جرا عليه ماشي غير انا مني عدد غير كاين لي ربي وقف معاه ولݣا فين يخدم ولي بحالي راه عندو الله ..

- تودة : ( زيرات على ساكها ) حتى واحد مكايبقا بلا خدمة اسيدي .. الرزاق هو الله سبحانه هانتا غدا مع ورا العصر دوز عندي صافي

- ولكن الالة وسي المعطي ( شافيها بخوف وتردد)

- تودة : مكاينش سيك المعطي كاينة تودة دابا المعطي نساه ... انت غير دوز عدي ومايكون الخير

- واخا الالة ( تبسم براحة ) الله يكثر خيرك ... حنا راسو وعطاها بظهر ، ضارت بزربة ورجعات حدا طوموبيل جبدات شانطة صغيرة ودخلات بيها لدار .

°°°°°°°°°°°°°

- ݣالسة فصالون دايرة رجل على رجل .. لابسة القفطان ديال الجلابة محيدة الصباط ولابسة بلاصتو بلغة ديال الصم كتشوف بعينيها ودورهم فدار لي ولا دارها بسميتها ..

- المعطي : ( مغوبش كيعيط بزعاف) سميرة واش غادي نباتو هنا ولا كيفاش هاد الغدا مزال كاعما بغا يوجد ..

- فالكوزينة واقفة على الغدا بيدها حابسة البكية بسنانها .. ماحيلتها لبنتها لي من نهار عرفاتها حاملة مابقات ساقت ليها خبار ولا للراجل لي مدخل عليها الضرة وهي لي كتخدم عليهم .

- نعيمة : لالة سيري انت ݣلسي انا غادي نكمل

- سميرة : ( مسحات دمعة سخونة نازلة من عينها دموع القهرة وظلم وطغيان ) لا غير كملي انت لي فيديك ..

- وصلهم ريحة پارفان مجهدة أنثوية .. هزات نعيمة عينيها بانت ليها تودة واقفة فباب الكوزينة .. حدرات راسها وكملات الشلاضة لي كانت كتوجد فيها .. تمشات تودة للعند سميرة بخطوات تقيلة توسدات البوطاجي وربعات يديها ، هزات فيها سميرة عينيها ومانطقاتش بكلمة كتشوفيها كيفاش مقادة ومصايبة وهي وجه القهرة وتمارة لي عمر بانت عليها الفرحة ولا صحة ديما مغبونة وحادرة الراس .

- تودة : ( نطقات بتقالة ورزانة ) وزعمة مولات الدار خاصها تكون ݣالسة مريحة ومعطرة وتشالي بدهوباتها وتفطح فخيرات راجلها

- سميرة : ( تنهدات تنهيدة طويلة خايفة تقول شي كلمة وتغلط ) براكة غير انت تكوني مرتاحة وعلى خير

- تودة : ( هزهزات براسها ) لا سمحيليا انا مانرتاحش وانا كنشوف ضرتي غارقة فالكوزينة وراجل يلعب عليها العشرة راضها عبدة عدو

- نعيمة : (لسانها سابقها ) لالة من ديما هي هوكا ماشي عاد

- سميرة : نعيمة ( خنزرات فيها )

- تودة : مالك غمزتيها خفتيها تخرج لي مخبي ؟

- سميرة : ( شافت فيها ) مݣادين على صداع أتودة .. انت مكتعرفيش المعطي حسن ليك تخلي داك الجمل راݣد

- تودة : ( تقابلات معاها ) وحتى ليمتا ايبقا راݣد ؟ حتى يرݣدك تي فالقبر .. كون لݣاك حرة غرة اخويتي ݣاعما يجيبني ضرة عليك

- نعيمة : ( كان خاصها الي يجبدها ) عزيزي ماحن حتى فولادو خلي يحن فلالة .. مسكينة بتو رجاء زوجها لولد خوه واخا عارف بلي مرتو لفعة ماتسوا ماتصلح .. ومامخليش لالة تدوي معاها حتى فتيليفون .

- سميرة : ( بنهيض ) نعيمة تي دخلي سوق راسك

- نعيمة : ( حطات الموس من يديها ) لا مداخلاش خليها تعرف عزيزي اش كيسوى يحسابليها راه قايم بالواجيب .. هداك راه واحد الذيب

- سميرة : يا هاد البنت دروك يسمعك

- تودة : ماعدو مايسمع جا عندو المقدم وراه خرج عندو (شافت فسميرة ) فخبارك كتب ليا الارض لي كاينة فنواصر بسميتي وحتى هاد الدار لي حنا فيها بسميتي

- سميرة : ( شافت فيها مصدومة ) ك كيفاش هاد الدار هاد الدار ؟!

- تودة : ( ضحكات) إيه هاد دار هادي ولات ديالي اش بان لك ؟

- سميرة : ( طاح ليها الما فركابي تقدر من غدا تجري عليها ) بغيتي تݣولي لي ماعجبو الحال يضرب الباب ياك ؟

- تودة : ( ضحكات ) حاشا نجري على ولية بحالي .. غير هو اسميرة أختي كل واحد خاصو يرجع ليه حسابو النقي .. ( ݣفضات على كمايمها ) خليونا نساليو هاد الغدا ويصاوبها الله من عدو .

- نعيمة كتشوفيها بشك مافهمت فيها والو ماعرفاتها ناوية على خزيت .. ولا بصح جايا من جيهتهم ماقداتش تيقها فرحانة ونفس الوقت خايفة اما سميرة كيتها كانت كبيرة رزق ولادها مشا .. الى ضرك المعطي هي او ولدها بلاصتهم الزنقة .

- تحط داك الغدا وتجمعو عليه .. الضحك والكلام الحلو كيدوز على ودنين سميرة وكتسرطو بحال القطران حتى سلاو الغدا ونطقات تودة بصوتها الحنين وكلامها الحلو لي كيداوي قلب كل راجل عطشان .

- المعطي نهار السبت إن شاء الله نتقداو ونمشيو نشوفو بنتك رجاء

- المعطي : ( حط الكاس دالمونادا من يدو بالع ريقو ) وعلاش العزيزة ؟

- تودة : ( هزات حاجب ونزلات الثاني ) كيفاش علاش ؟ البنت راه خاص تكبر بيها وتمشي تشوفها وتشوف أش خصها وتشوف ناسها واش دايرينها كي بنتهم ولالا

- المعطي : ( ضحك بإرتباك ) لا ماشي هوكاك اهو الوحدة فاش كتزوج راه كتولي محسوبة على دارها ولالا ؟

- تودة : ماݣلنا شاي .. ݣلنا نشوفوها ونشوفو البنت كيف هي مناش خايف ؟

- المعطي : لا والو مايكون أخاطرك

- تودة : (تبسمات ليه ) وهكاك نبغيك ، اه انشوف شي وحدة لي تعاون نعيمة فكوزينة .. ماشي من سوم القايد المعطي عيالاتو يدخلو للكوزينة ترضاها لراسك اراجلي العزيز ؟

- المعطي : لا الصراحة ( ضحك ) ديري لي بغيتي دار دارك

- تودة : وراني عارفة وبشرع والقانون ( ضحكات ) .

- متأنق بحال عادتو .. جلابة فالݣرونة مع طربوش فنفس اللون بلغة حتى هي فنفس اللون مريح كيشوف فالمرايا بعجرفة وغرور ، كانت وراه مراقباه بعينيها مكاتحس بحتى حاجة من جيهتو من غير الكره كتمقت أصناف الرجال لي بحالو .. حاسب راسو شاد الدنيا بيديه حتى هي مكانتش أقل أناقة منو بجلابة فسومو مع ساك فنفس اللون وصباط فالبيج وشال مزوق فيه رشيشات من البيج والسومو والكحل دايراه على عنقها ..

- شعرها كانت جامعاه وعينيها مكحلاهم أما ريحتها كانت كتعطي فكاع ركاني ديال البيت ضارت عندها وتبسمات ليها إبتسامة صفرة :

تي راه وليت ندوخ بنعاس بكري مابقيتش نعقل على راسي .. قربات ليه كتقاد ليه القب تبسمات بإبتسامة خجولة :

وبسيف ماتنعس وطيخ دودة والله لي يشوف داكشي لي كدير ياما يݣولش هدا عدو أ ستين عام (ضحكات)

- المعطي : ( كيضحك ) وهي كولشي طاق اماراش ؟

- تودة : أويلي يا سي المعطي ترا مكاتقاداش الله يعطيك الصحة وخلاص

- المعطي : والعجب انا والله مكنعقل على حاجة

- تودة : والمهم نكون انا عاقلة .. ويلاه زيد بلاما نتعطلو على الناس حشومة

- المعطي : هي لي ماتعاودش العزيزة .. تبعاتو من اللور نازلين لقاو سميرة كتسناهم مشافش فيها حتى شوفة ومكانش حامل تجي معاهم كونما تودة لي حكرات عليه ..

- ساگ هو هاد المرة تودة حداه وسميرة ݣلسات اللور .

••••••••••••••••

- ملامحها البريئة الزوينة دبالت بشرتها لي كانت صافية ولات مطبعة بالكلف .. ضعافت حتى قالت بركة تمارة لي كضرب وزيد عليها الحمالة لي مكانتش معولة عليها ولا ضاربة ليها الحساب كرفصاتها مكانتش باغية تحمل وهي فهاد الحالة تمارة واللغيط من عدوزتها لي مكترحمهاش ولات حاسة براسها موتها حسن من حياتها ..

- واخا كتحس بالوجع وحريق فظهرها ماقداتش تقولها كانت خايفة خصوصا لي جاي باها ونها ومرات باها الجديدة هي لي خاصها تقوم بيهم وتوجد كولشي .. كانت سلات الملوي بقا ليها غير تقاد مل حاجة فبلاصتها وتمشي باش تبدل عليها ، غسلات يديها ومسحاتهم ومشات للطواليط يلاه ݣلسات على طاسة كتبان ليها الكحولة فالسليب ديالها ..

- رجاء : ( قلبها تهز) ياربي سلامة اشنو هادشي ؟

- قضات حاجتها وخرجات من طواليط لقات عدوزتها واقفة عند الكوزينة .. لابسة قفطان ومحزمة بحزام ديال الصم يديها مزرزراهم دهوبات :

فين كنتي ؟

- رجاء : كنت غير فلحمام .. خالتي عرفت

- راضية : تي واش وقت الحتيت هدا ( نهضات فيها ) سربي دروك يوصلو تريكتك وجدي كولشي وݣاديه ماعرفت لاش جايين الناس راه مكايشوفو ولادهم على عام هادشي لي ݣلت ليه اتولي تريكتك كل شوية جايا حارݣة لينا الطريق .

- خرجات مخلياها كتغلي .. أصعب إحساس هو الحݣرة والظلم وطغيان وتكون ضعيف ومقاد دير حتى حاجة والحمل غادي وكيتقال عليك ، دخلات للكوزينة وحريق الظهر غير مغادي وكيتجهد عليها .

- تفكرات كلام الطبيبة فاش داها راجلها دوز قالت ليها بالحرف " خاص تاكلي مزيان وهاد الڤيتامين ولي تشربيه باش يعاونك والحركة لا الله يرضي عليك فاش ديري 3 شهور رجعي عندي باش نعطيك شي تحاليل ديريهم "

- بقات ساهية وكتفكر كلام عدوزتها " تخربيق ديال الطبة هو هدا حملتي اتي والمشة ، أنا فاش كنت كنحمل وكنت عند عدوزتي المانط كنشتف عليهم وانا كرشي لفمي ، الزرابي وكنحكهم وديها فدوك الطبة راه كيبغيو ياكلو أبنادم "

- رجاء : ( تنهدات بقلة حيلة ) حسبي الله ونعم الوكيل .. كملات تستاف ديال الحلوة كولشي حطاتو وجداتو باش ايوصل وقت الكاسكروط تحطو واجد .. طلات على الطنجرة لي فيها اللحم ورجعات غطاتها ..

- خرجات من الكوزينة متوجهة لبيتها يلاه حطات رجلها على الدرجة وهو يسوني الباب .. جاها صوت راضية من الصالة :

رجاء شوفي شكون

- كانت كتمنى مايكونوش دارهم وهي مزال فيها ريحة الطياب مزال مابدلاتش عليها ماطرفات حالتها .. كطلب فخاطرها يكون يونس لي جا .. ولكن فاش فتحات الباب خاب أملها

- سميرة غير طاحو عينيها على بنتها رجليها فشلو عليها حالتها كتشفي العدو وكتخلع .. ولكن مكانش الوقت ديال انها تسول فاش ترمات رجاء بين يديها معنقاها أصعب إحساس ممكن يحسو الإنسان لي معرض للظلم الحݣرة وكتجمع وتخزن فقلبك ، وكيجي إنسان حنين فيك كيبان ليك بحال طوق النجاة وهادشي لي حساتو رجاء فاش شافت مها ..

- ترمات بين يديها ودموعها سايحين ݣاع لي كانت خازناه فقلبها لاحتو مابقاتش داتها فباها لي واقف مغوبش وكيشوفيها ولا فمرات باها كان هامها غير مها مصدر الأمان القلب الحنين لي كيحط عليه الراس أي واحد سوا كنتي كبير ولا صغير .

- تودة قلبها ضرها فاش شافت حالتها عرفات كلام نعيمة كان بصح والبنت مكرفصة شافت فالمعطي بعتاب قربات ليه ونطقات من تحت سنانها :

اتبارك الله على القايد المعطي .. هادي هي بتي عاطيها لخويا دار الكبيرة مهلي فيها لا تبارك الله باين التهلو نيت غسلت عليك يدي ..

- سميرة : ( بعدات عليها رجاء ) أش هاد الحالة ابنتي مالك هكا ؟ .. قاطعاتهم راضية لي خرجات عندهم راسمة إبتسامة صفرة :

مرحبا مرحبا أويلي يا رجاء خليو تعناݣ حتى لمن بعد لي شافكم يݣول متشاوفتو عامين ( ضحكات)

- تودة : (ببرود وإستهزاء ) إيوا ربي راه ميز عبادو قليل لي يعطيه قلب سميح وحنين ..

- راضية : ( طلعاتها ونزلاتها ماحملاتهاش حساتها ماشي ساهلة بحال سميرة ) ايوا الله يخليهم للبعضياتهم ( سلمات عليها ) ومبروك عليكم بعدا واخا ماحضرتو حد

- المعطي : سلم عليها ) مادرناش شيحاجة غير طلبة وصافي فين هو خويي

- خرج عندو عبد الكبير عنقو عناق حار رجولي .. اما راضية مارضاتش يشوفو بنتهم فديك الحالة وماعجبهاش الحال

- دخلو مرحبا بيكم .. رجاء سيري أبنتي بدلي عليك (ضحكات) من الصباح مسكينة وهي فالكوزينة راه من كبيل وانا نغوت عليها سيري تبدلي الشغل مغايطيرش او والو

- تودة : ( دخلات لصالون ݣلسات دايرة رجل على رجل ) وزعمة هي حبلة راه مخاصهاش توقف فالكوزينة

- راضية : تاتي فيامنا كنا نديرو كولشي هاد الجيل لاوي الله يستر

- تودة : ايوا زمانا شكل وزمانهم شكل وكل واحد كيعيش فجيلو ( تبسمات ليها )

- رجاء مشات طلعات للبيت متبعاها تودة بعينيها دخلات للبيتها فرحانة .. بحال شي واحد كان كيغرق وعطيتيه يدك وجبدتيه طرفات حالتها ولبسات عليها بيجامة طويلة رشات واحد الريحة ولاحت عليها واحد الشال ونزلات .. كتحس بالماس فظهرها ..

- ݣالسة بحال الاميرة عينيها على راضية بانت ليها لفعة سماوية متعاشرش .. مادة يديها على ركابيها مبينة دهوباتها ، اما راضية مكان عاجبها الحال غير كتخنزر فيها .. المعطي خرج هو او عبد الكبير للجردة وخلاو العيالات ، سميرة غير ساهية وكتخمم فحالة بنتها كبدتها مشوية من جيهتها

- راضية : سبحان الله العظيم عمري شت شي ضرايرات مفاهمين ماعرت كيدرتو ليها

- تودة : وعلاش لي مانتفاهموش ( نزلات رجلها متكية بظهرها على الحيط) سميرة شهوة منها الله يعمر ليها الدار نديرها فعينيا بحالها بحال ختي

- راضية : ايوا الله يخليكم لبعضياتكم ويدومها محبة ( تنهدات ) وشكون ݣال المعطي يدي شيخة ( ضحكات ) حنا واخا هكاك فالعائلة عدنا عيب ..

- تودة : ( ضحكات ) أحبيبة مايݣد على الشيخات غير لي بفلوسو وبزطامو عامر عائلتك عدهم عيب تدي شيخة ولكن فاش يخليو عيالاتهم فديور مساكن ويدوزو لماسم ويلوحو لي ݣدامهم وراهم على شيخات ماشي عيب

- ( كملات على كلامها ببرود ) الله يجيبك على خير دابا راه ولاو الرجال كيهربو من المرة النݣارة ولي لسانها ماضي ودراعها ݣاضي ويديو الشيخات يديوها حتى من البار هانية ..

- راضية : ( تقرصات عمر شي حد عطاها خو جوابها سميرة كانت كتحني راسها ولكن تودة كانت مساهلاش ) ايوا المهم الواحد امايديرش الحرام ومايمشيش للبلية

- تودة : فخبارك راه كاينين الشيخات لي مايوصلوهم شي نقيميات حتى فزطمة درجليهم .. الله يستر تلݣايها اتنݣر وتحيض وتبيض ومنين تكون فشي مجمع تبدا تفتي تݣول متنوض دجاجة على بيضة الله ينجيك

- تمات نازلة رجاء دخلات للصالون ومشات عينيها للتودة نسات ماسلمات عليها .. دورات راسها فصالون مبانش ليها باها .. مكانش هامها يتزوج ولالا كانت كتهمها غير مها بوحدها

- تودة : ( ضربات للبلاصة حداها ) أجي أعروستنا زيدي كنت باغية نشوفك ، حدرات رجاء راسها وتوجهات لفين نعتات ليها تودة قبل لا تݣلس سلمات عليها وݣلسات حداها

- تودة : تبارك الله وصلاة على النبي ( هزات عينيها فسميرة ) ولدتي وعرفتي اش ولدتي أسميرة تبارك الله كتشبه لك الله يحفظها ليك من شر الخلق ( شافت فراضية بنص عين )

- سميرة : ( تبسمات ) اللهم امين

- تودة : ( فتحات ساكها وجبدات بواطة حمرة حلاتها وجبدات منها سلسلة ديال الذهب ) هدا الكادو ديال زواجك وشوف سبحان الله انا غنيت فعرسك وليوم هاني مرات باك

- رجاء : ( بإبتسامة باهتة) المكاتيب اخالتي مكانش لاش تعدبي راسك

- تودة : هاكيلي نعدب راسي تي وقيلة مكتعرفينيش أحبيبتي (شافت فراضية ) دابا راه ماعدكش غير سميرة عدك حتى انا ( ركباتها ليها فعنقها تحت انظار راضية لي كلهم سم ) بصحتك وراحتك

- رجاء : الله يكبر بيك نوض نشوف الغدا ونرجع

- تودة : ( زيرات على يدها خلاتها تݣلس بزز منها وشافت فراضية ) انت حاملة من صباح وتي فالكوزينة .. لالة راضية تكلف ولالا ؟

- راضية : ( وقفات مفقوصة) إيه عدك الصح .. خرجات خلاتهم باغية تاكل جنابها

- سميرة : ( ملهوفة ) مالك فهاد الحالة كي كنتي وكي وليتي واش كيتكرفصو عليك ؟

- رجاء : ( بحال داك المسجون لي طلقو سراحو ) مورياني الويل أمي قاهراني الله ياخود فيها الحق .. عطاتنا البيت لي فسطح لي كيديرو فيه داكشي لبالي احيت ولدها ايجي من برا ..

- كانت كالت ايجي سيمانة لي فاتت ومزال مجاش حولاتنا اهكاك .. والله مكنخرج من الكوزينة واخا طبيبة مانعة عليا الوقيف

- تودة : ( تعصبات من هادشيلي كتسمع ) ومال داك رويجل عدك مايدير ليك حل ؟

- رجاء : هو ظريف حنين ولكن مكايقدش يتجاوب مع مو وخلصتو قليلة ماعندو كيدير يكري ليا .. الوجع والحريق فظهر وقبيلات لقيت دم كحل

- تودة : ( ضربات فخاضها ) اويلي ستغفرت الله العظيم .. راه الله يستر بحال هكا تيلاد يݣد يموت

- سميرة : ( حابسة البكية بسنانها ) الله ياخود الحق فباك هو لي لاحك هاد اللوحة ..

- تودة : ( غمزاتها ) سكتي شيطانة جايا .. رجعات راضية وݣلسات حاسة بيهم كانو كيدويو عليها رجع المعطي وعبد الكبير ودخل معاهم يونس سلم على تودة بارك ليها وسلم على سميرة بايس ليها راسها .

- تحط الغدا وتجمعو عليه فصالة وحدة دارو زوج طوابا وحدة للرجال وتانية للعيالات .. مجموعين كياكلو وهضرة كتجبد هضرة جابدين سيرة ولد عبد الكبير لي جاي من برا

- راضية : ( بتباهيى) تبارك الله شاف نيت واحد بنت الناس أستادة تبارك الله ناوي يجي يديرها زيارة ونخطبو ليه

- تودة : ايوا مبروك عليه .. انا نيت كنت بغيت نݣول للحاج نديو معانا رجاء ترتاح

- راضية : ( تزاد معاها الزايد ) كيفاش ترتاح مالنا كنهزو عليها الخناشي ديال البوصلانة ؟

- تودة : لالا اخويتي حاشا ودابا الدار غادي تعمر والبنت حاملة وطبيبة ݣالت ليها مخاصهاش تحرك .. وعاد الحريق لي ولا يشدها راه خاصها الراحة وخاص لي يݣابلها ..

- يونس : ( ضار شاف للعندها بخوف ) اشمن حريق إيمتا هادشي ؟

- رجاء : هادي 3 يام الحريق فظهري والوجع

- راضية : وهادشي داز منا كاملين الله يهديك

- تودة : وأنت كتي دوزي بدم كحل الالة راضية ؟

عبد الكبير حشم وحدر راسو لا هو لا المعطي لي مايقدش يقول كلمة ورا كلام تودة بحال شي واحد ماعندو راي ولا شوار كيجي حتى لقدامها ويتلجم ليه اللسان

- عبد الكبير : ابنتي علاش ماݣلتيها نديوك للطبيب ؟

- رجاء : بغيت نݣولها لخالتي ولكن كانت مشغولة ويونس كيجي عيان كينعس .. ݣلت راه عادي

- تودة : لا معاديش راه هكا واعر راه يموت تيلاد فكرشها وهي مسايقة خبار .. البنت نهار كامل وهي فكوزينة مكاين لي يعاونها اويلي وغير عدوك وتحن فيه راه هي لي خاص لي يݣابلها حتى تصح بعدا دير ا ربع شهور اويلي ستغفرت الله العظيم .

- راضية : ( تسدات ليها الشهية ولات كلها كترعد شكون غايقوم بدار وشكون ايوقف على الخطبة دولدها ) ايوا الالة تودة راه راجلها عدها شوار شوارو هو لي ري عدو الى بغا يخليها

- رجاء هزات فيه عينيها بترجي كانت محتاجة تمشي وتخوي وتبدل الجو ترتاح وترتاح نفسيتها

- يونس : نديها لطبيب غدا فصباح إن شاء الله ومن تم ندوزها عندكم

- رجاء : علاش غدا مغاتمشيش للفقيه بن صالح ؟

- يونس ( صفق بيدو) والله حتى نسيت نأجلها ماعنديش مشكل صحتك هي لولة

- تودة : انت اسير اولدي ݣابل شغالك حنا غانديوها معانا وغدا إن شاء الله نديوها انا وباها للطبيب ياك المعطي ؟

- المعطي : ( هز فيها راسو ) أه إن شاء الله .. رجاء شافت فتودة وتبسمات ليها .. كانت خايفة منها ولكن من هادشي لي شافت فيها رتاحت ليها حسات بواحد الراحة واخا نسبية ولكن المهم عندها هو تهرب من هاد الدار ومن راضية لي كتبخ غير السم .

- النهار ليه ناسو لي كيقلب على طرف ديال الخبز كيتجارى مع الوقت ولي خدام كيضرب تمارة يا باش ياخود جوج فرانكات يا لي غادي يشد صالير يكفيه فأخر الشهر .. ولا لي غادي يتخلص خلصة تكفيه وتفوتو لهيه ، عاد كاين الليل وماليه الشارع لي كيعنق الصباغ ودباغ لي ناوي على الخير ولا لي عقلو خبيث وناوي على خزيت ..

- جارين سيكانهم الجوع وصل معاهم للأخر ورجليهم طابو كان باين من حالتهم بلي ماشي من تم وبلي مقطوع بيهم الحبل وجهم ولا حالة بالعرق ديال النهار ديك الشمس الحارة ديال شهر 8 ضربات فيهم وزادت كملات عليهم ، وصلو لواحد القهوة وݣلسو فطبلة على برا مسرحين رجليهم كيرتاحو من تمارة ونهار لي بنسبة ليهم داز كحل ..

- حياة : دابا داخلت عليك بوجه الله اختي فين غادي نمشيو الفلوس ومشاو باح شفروهم لينا ، واش دابا حنا وجهنا وجه هاد التكرفيص هذا ( جاتها البكية )

- عنبر : ( كتحس بالفشلة كتفكر غير فديك 4000 درهم لي مشات ليها بعينيها مغمضين ) تلفات بيا الجرة قسما بالله العظيم ماحدها تقاقي وهي تزيد فالبيض

- حياة : (شافت فيها بتأنيب وعتاب ) وحتى انت اختي واخا تكوني واكلة مخ الضبع واش كاين لي كيهز 80 ألف ريال فيديه واخا تكوني واكلة تبن

- عنبر : ( خاصها امعامن ) واش انا كت عارفة بقات فيا السيدة بغيت زعمة نصدق فسبيل الله

- حياة : واش عارفة شنو هي دار البيضا ولالا غفلت طارت عينك وزعمة راكي قارية وكتي فيها هدا شحال ، كان علك تحسبي فلوس المركوب وفلوس طاكسيات والباقي تخبيه .. ماشي هازة معاك الفلوس كاملين (ضارت عندها ) فالكار جبدتيهم ݣدام الكريسون والله متاتفكري بالله .

- عنبر : كازا كت فيها شحال هادي .. وكنت من القرايا للدار من دار للقرايا كنعرف فيها أجامع وحدا المول والمدينة القديمة ، ماكنتش كنتخالط مع الناس ليلى بوحدها لي كنت كنعرف .

- حياة : ( تفقصات ) وعباد الله وتي واخا تكوني جايا من جبل ماتهزيش 80 ألف ريال كلها معاك .. عنبر تي ديري عقلك وزيري معايا راه هادشي باش داك الكيدار ديال سعيد ضحك علك وضرب ليك فالحصيصة لي كانت عدك كاملة .

- عنبر : ( راسها زند عليها ) شوفي هاديك هاه لا تزيديش على مابيا براكة لي فيا كافيني .. راه مدازش عليك لي داز عليا الحمد لله لي راني مزال بعقلي وجات افلفلوس ، هدا شحال راه 100 درهم وكنت نديرها فسوتيامات وعدري بنادم راه عاد بدا يرجع ليه عقلو .

- حياة : ( تنهدات تنهيدة طويلة ) ودابا اش غانديرو رجلينا طابو اختي بدوران وانا فيا جوع من ديك نص خبزة بالفرماج لي كلينا .. وفين غانعسو ؟

- قاطعهم السرباي لي وقف عليهم :

نعام الالة أش حب للخاطر تشربو شيحاجة تاكلو شيحاجة ؟

- عنبر هزات فيه عينيها .. حلات يديها كانت عندها 10 دراهم بوحدها رجعات هزات فيه راسها :

خويا الحاجة الرخيصة عندكم هنا شحال كدير ؟

- سكت كيشوف فيها ببرود هز يدو ونعت لواحد الجهة :

سيرو اختي لديك المحلبة تݣدو تلݣاو شيحاجة لي تݣدو عليها ..

- عنبر : شتك بحال الى كتعايرنا ( هزات حاجب ونزلات الثاني ) راه غير شفرو لينا الفلوس اما ݣاعما نݣلسو فهاد القهوة المݣردة الفانطازية والبخ الخاوي

- ونوضي ليا من هنا راكم كترتو

- عنبر : ( وقفات ) تا كيفاش كثرنا اش يحسابليك راسك عوراج لي حطك .. وقفات حياة بيناتهم :

عنبر صافي اختي يلاه نمشيو

- عنبر : ماشتيش كيف كيدوي ( تغلغلات ) بنادم حݣار راه اليوم ليك وغدا عليك ميكروب لاخور تفو

- قسما برب وماتمشي تانديك فين ترباي

- عنبر : ( كتشالي بيديها ) ويلاه ديني الى سميتك راجل ومزغرتة عليك امك او والداك فكتانة بيضة وريني اش غادير .. يلاه جري طوالك ولي ماعدو سيدو عندو لالاه .. حرنا غير فدحوشة كون كنا نخافو من دجاج كاعما نريشوه هاكيلي ݣالك يربيني كتحيري أمع القماقم دالويل ..

- تجمعو الناس كيفكو فيهم وحياة كتفك حتى صوتها ولا نواح وبكا وغوات كتردد بتتابع :

عنبر عنبر الساك مشا وداو الساك داوه .. هزات عنبر راسها كيبان ليها واحد يكون فاوائل العشرينات طار بساك ديال حياة .. طلقات رجليها لريح شادة ساكها وكتجري تابعاه وحياة كتجري وراها

- عنبر : ( كتغوت ) وقف وقف اولد الحرام وقف .. شفار شفـــــــار .. ناس قليلة كيشوفو داك المنظر ومدارو والو ، سخافت بجرا وحياة وراها فشلو عليها رجليها وقفات مبلوكية مابقاش بان ليها فحتى بلاصة .

- وقفات حياة كتنهج سخفانة .. صدرها كيطلع ويهبط وعنبر حداها كيشوفو فالفراغ

- حياة : فين مشا ؟

- عنبر : ( هزهزات راسها ) طار مشا ماقديتش نتبعو وبنادم واقف كيتفرج فيك

- حياة : (دموعها نزلو سخان ) اش هاد الزهر المكوز حوايجي كلهم مشاو لاكارط ناسيونال ديالي وتيليفون ديالي باش ندوي مع مي ..

- عنبر : ( هزات راسها لسما دورات عينيها على البلاصة فين كاينين حسات بواحد الرهبة ونوع من الخوف اخيب حاجة ممكن توقع للإنسان يكون فمدينة كبيرة ومافجيبو حتى درهم من غير 10 دراهم لي يلاه تكفيه فجوج مصوص بالفرماج والكاشير تسد جوعو ) قالها سعيد وماتيقتوهش النحس تابعني فينما مشيت وضاير بيا وهانتي كتشوفي فيه بعينيك ..

- حياة : ( فعز نفسيتها قربات من عنبر) ماتݣوليش هكاك هادشي راه مكتاب علينا .. ومكتاب عليا نعيشو سوا كتي انت سوا ماكنتيش ، حتى مي ماعطاتني والو ماخلاهاش سعيد كون عطاتني كون لقينا اباش ناكلو

- عنبر : الله يلݣيها ليه ( تعصبات ) هو السباب فهادشي لي واقع لينا دا ليا رزقي ومجري علينا بغيت النهار البيض عمرو يشوفو

- حياة : دابا فين غانصدو اختي أݣولي ليا ؟

- عنبر : حتى جوامع مابقاو كيخليوهم محلولين غير نلقاو فين نباتو بعدا ..

- حياة : ماعدك حتى خبار على ديك صاحبتك ؟

- عنبر : ( بنفي ) لا من نهار تزوجت مابقيت عرفت عليها شيحاجة ، زيدي نتمشاو شوية الى لقينا اشي بليصة مدرقة فين نباتو هاد الليلة ( كدور عينيها فالبلاصة لي هوما فيها والخوف بدا كيتسلل للقلبها ) ..

- غاديات حاضيات جنابهم من الغاشي وصوت الغنا كيقرب منهم كان سوت مجهد بحال شي عرس .. عنبر لاحت ودنيها الصوت كان جاي من واحد الزنقة وريحة ديال الدجاج المحمر وصلات لمناخرها حركات الجوع لي كانت كتسكت فيه ..

- عنبر : ( شافت فحنان ) ربي اجيو نشوفو هاد العرس

- حياة : اويلي ستغفرت الله العظيم بغيتيهم يجريو علينا ماحنا من حباب العريس ماحنا من حباب العروسة .. غير حالتنا تعطي الخبار

- عنبر : ( جراتها ) وغير أجي نديروها فيد الله ، جراتها غادية بيها حتى وصلو للزنقة لي كانت مبنية فيها قاعة شي دراري واقفين ومعاهم شي رجال لابسين الجلالب واقفين وصوت الشعبي مجهد ..

- بقاو واقفات مترددات ، عنبر شافت فحياة وبلعات ريقها صافي كتحس بالعيا وسخفة وجوع مابقاتش قادة .. خلاتها وتحركات جهة دوك الدراري وقفات عليهم :

السلام عليكم

- ضارو للعندها وعلى وجهم ملامح التسائل :

وعليكم السلام

- عنبر : سمحوليا خويا الله يعطيك الستر .. حنا ماشي من هنا تعرضو لينا الشفارة وسرقو لينا فلوسنا من صباح وحنا كندورو ما واكلين والو انا وختي فينا الموت ديال الجوع ( شافت جهة الرجل الكبير ) الله يرحم بيها الوالدين بغينا اشيحاجة فالخبز لي كان

- شافيها داك الراجل لي كان لابس جلابة فالبيج وشاف جهة حياة .. رجع ركز نظراتو عليها :

منين جايين ؟

- عنبر : من ولاد صالح نواحي برشيد .. جينا نخدمو والفلوس لي كانو عندنا مشاو

- كيفاش حتى شفروكم اختي فين وقع هادشي ( سولها واحد من دوك دراري )

- عنبر : فاش خرجنا من المحطة واحد السيدة كانت كطلب فاش جيت نعطيها طيرو ليا بزطامي من يدي

- وختي يهديك الله راه هادوك ولاد الحرام كيديرو ديك سيهلة وكيطلبو وهي راه متافقة مع صحايبها .. واش تي مكايناش فهاد العالم معايشلش ؟ كازا اختي راه صعيبة خاصك تكوني حارة ومطورة الى بغيتي تحطي رجلك فيها

- سيري ابنتي عيطي للختك ودخلو مرحبا بيكم .. تبسمات فوجه داك الراجل :

الله يرحم بيها الوالدين أعمي .. مشات بزربة واخا رجليها ضارينها :

أجي ندخلو نتعشاو راه ݣاليا نعيط عليك قلت ليه بلي راه حنا خواتات عداك تزلقي فالهضرة

- حياة : لا كوني هانية ( عياة وكانت باغية غير تاكل وتنعس )

- دخلهم داك الدري لي كان هو خو العروسة او ولد السيد لي لابس الجلابة .. عيط على واحد البنت وشوش ليها فودنيها وخلا ليها عنبر وحياة امانة

- زيدو اختي مرحبا بيكم .. داتهم لواحد الطبلة حدا شي عيالات ݣلسو ورجعات خرجات من القاعة شوية ورجعات فيدها بلاطو فيه اتاي والحلوة حطاتو قدامهم :

كولو بعدا هادشي عميو جوع بينما تحط العشا

- عنبر : واخا اختي الله يسهل عليك .. حطات ساكها بين رجليها وهزات اتاي والحلوة دخلات فيهم عمية هي وحياة .. سلاو هزو قرعة ديال الما نزلو عليها كانو عطشانين جابليهم الله هاد العرس بحال الميمون .

- هزات حياة كلينيكس غطساتو فالما او ومسحات وجها .. شافتها عنبر ودارت بحالها حيدات عليها العرق والغبرة من وجها .

- أنتوما من أهل العريس ولا العروسة ؟

- عنبر شافت فسيدة لي سولاتها لابسة تكشيطة كحلة وشال فذهبي ، مرة لي غليضة وبيضة وخارجين ليها خصلات قلال زعرين تحت شالها .. :

حنا مامن حباب حتى واحد حنا غير جينا طالبين ضيف الله وهاد الناس فتحو لينا الباب

- طلعات عنبر ونزلاتها وعينيها ضارو على حياة وتبسمات :

ومرحبا بضيف الله تلاݣيتو مع خيرة الناس ، منين انتوما ؟

- عنبر : حنا من جوايه برشيد .. قاطعوهم السرباية لي بداو يجمعو فطبالي باش يحطو الماكلة .. بداو بالخبز هو الاول عاد بداو يحطو فطباسل ديال الدجاج بنسبة ليهم كانت رحمة ربي رحمهم من الجوع ..

- مادارو بحساب لي ݣالس حداهم ولا حتى واحد من الناس لي حاضرين .. كلاو حتى شبعو ولحسو الصباع حامدين الله على هاد النعمة .

- تهزو طباسل الدجاج وتحطو طباسل ديال اللحم .. وبحال اي عرس لي كلا كلا ولي دار فالخبز راه دار وخبع وهادشي لي دارت عنبر خبعات فالخبز ودارت فساكها حتى الى ضرهم الجوع يلقاو مياكلو ..

- من بعد تفرق الديسير وحتى هو خداو منو خباتو عنبر فساك ديالها ، فرقو ليهم لي لانجيت مسحو يديهم وطبالي تجمعو باش تخوا القاعة حيت غايبدا الشعبي باش لي بغا يشطح يلقى فين ..

- الأوركسترا كانت عبارة على راجل كيضرب الكامنجا ومرا هي لي كتغني .. بداو التسخينات ونغمات الاغنية لي كان كولشي عارفها وحافظها .. ݣالسة بحالها بحال الناس كتسمع ودماغها مشا لبعيد تجمعو عليها كاع المحاين والفقايص لي دازت منهم ، من موت والديها وراجلها سعيد وسرقة لي سرقها رزقها لي ساط فيه .. جرية لي جرا عليها هي وحياة تكرفيص هاد النهار وشفرة دالفلوس لي بقاو عندها كولشي تحمع وخلاها ماحسات على راسها حتى تهزات من بلاصتها وقفات كتشالي بيديها اغنية لي حركاتها من الداخل خلاتها تخرج وتفرغ كاع لي كتحس بيه ولي مخزون :

- وهيه الله الله الله الله الله الله دابا يحن مولانا ، وهيه الله الله الله الله الله الله دابا يحن مولانا ..

- عنبر كانت بحال النقطة لي فيضات الكاس غمضات عينيها ودموعها هابطين سخان محاساش على راسها .. كانت كتغني وتردد من قلبها مخلية لي كتغني قربات ليها او واقفة حداها معنقاها بيد ومقربة الميكرو من فمها :

يالميمة وهادا حالي لا إله إلا الله فهاد الدنيا واش جرالي لا إله إلا الله ، يالميمة وشحال بكيت لا إله إلا الله على الغربة وتابرانيت لا إله إلا الله يالميمة ورانا غادي لا إله إلا الله تهلاي ليا فولادي لا إله إلا الله ..

- حالتها قلبات المواجيع على لي حاضرين وكاع لي ميتة ليها ميمتها بدات كتبكي .. صوتها كان صوت موزون حنين وقوي كيبورش اللحم مخلية الكل مركز معاها لدرجة لي كتغني خلات الميكرو حدا فمها ماحيداتوش عجبها صوتها والبحة لي فيها لي كتخلي لي يسمعو يتبورش ..

- شالها تلاح على كتافها وبان شعرها كانت بحال شي وحدة ماشي فالوعي ديالها وفعلا كان عقلها غايب غير الأحاسيس لي لاعبين فديك اللحظة .. لي مناضش كان ݣالس فبلاصتو وكيشالي بيديه .

- صوتها رجعات فيه الشهقة والكلام ولا يخرج بصعوبة من حلقها .. حدرات راسها وخرجات من القاعة كتناخض تحت أنظار شخص كان واقف عند باب القاعة كيشوفيها بإهتمام .. فنفس اللحظة تبدلات الموسيقى لموسيقى شعبية كتنشط مغطية على الأحاسيس لي تحركات عند المعروضين .

- هزات حياة الساك لي خلاتو عنبر وخرجات تابعاها لقاتها واقفة عند واحد العتبة ديال واحد الدار كتشهق بقات واقفة مخلياها حتى سالات البكا على خاطرها ، ݣلسات على الدرجة وتنفسات براحة حلات شعرها وعاودات جمعاتو لايحة عليها الشال .. تنهدات تنهيدة طويلة وشافت فحياة نطقات مبحوحة :

درت الشوهة ياك ؟

يتبع..