محتوى القصة
تجمعو الرجال على العشا والعيالات حتى هوما فصالون لاخور .. ساهية كتاكل وتودة حاضياها
سعاد ( بهمس ) فاطنة شت عنبر ماعجبنيش حالها مالها ، بحال الى مابغاتش طارق يخطب فحياة
تودة : علمي علمك اختي مافهمت فهاد درية والو .. رجعات كتشوفيها مقابلاها
عنبر ( شافت فماجدة ) هداك الفخض كان قدامي وانا لي كنت باغية ناكلو وهزيتيه ليا
ماجدة ( بإستغراب) لا ازين راه كان قدامي هادشي علاش خديتو ماشي مشكيل حبيبتي هاهو
تودة ( بصرامة ) اويلي عنبر الدجاج عطاه الله ابنتي اويلي مالك ؟
عنبر ( شافت فمها جمعات فمها كيترعد وطلقات دموعها ) انا مابغيتش لي فطبسيل بغيت لي قدامي .. وعلاش كتغوتي عليا مافهمتش شنو درت ؟ واصلا حشومة الواحد يهز من قدام لاخور بناقص انا مابقيتش بغيت كاع هاد العشا ( ناضت بزعاف تحت نظراتهم لي ستغربو من تصرفها
حياة : اويلي مالها ؟!
تودة ( كتعيط ) عنبر عنبر .. مشات ماضرتش قدامها .. طارق جاي من الكوزينة بانت ليه شد ليها فيدها
طارق : مالك لاش كتبكي ؟
عنبر ( نطرات يدها منو ) وانت شغلك اش بيني وبينك تسولني ، بعد مني الله يرحم بيها الوالدين وشتي حياة كاعما تحلم تزوج بيها ( دفعاتو وخرجات للجردة
الروطال ( وقف على طارق ) مالها ؟
طارق ( مغوبش ) تا مال هادي ، كطلق شي هضرة بحال السم عرفتي على ضورة ضارت فيا ماعرفتهاش .. كاتلك والله لا حلمتي تدي حياة وكتبكي
تودة ( وقفات عليهم هي وسعاد ) فين هي عنبر ؟
الروطال : مالها اش وقع معاها ؟
سعاد : كنتعشاو حتى ضارت فماجدة كالت ليها هزيتي ليا الفخض ديال الدجاج وبدات تبكي مافهمت مالها .. عطاهم بظهر الروطال وخرج للعندها كيقلب بعينيه مكايناش ، مشا للجهة فين كاين الخيل كيقلب ويعيط والو مكايناش تزاد معاه الزايد رجع لعندهم كيجري
الروطال : مكايناش على برا قلبت عليها والو غابر ليها الأتر
طارق ( غوبش ) عاد خرجات ݣدامي ، اتكون دارت سلوم وطلعات للفوݣ ( الروطال دوز يدو فشعرو ) يلاه نقلبو عليها ..
- خرجو كيقلبو عليها تم والو حسها مكاينش ، مشا لعند عمر العساس سولو واش شافها
عمر : شفتها دازت من هنا ، مشات للجهة ديال دار رحال .. مشاو كيجريو كيقلبو دقو على دار رحال خرج عندهم ݣاليهم مشافهاش ، الروطال بغا يحماق لا هو لا طارق .. لوخرين فدار ساقو الخبار باه وباها خرجو يقلبو ..
طارق : نشوفو ديك الجهة ..
الروطال ( غوبش وأشر ليه بيدو ) سكت سكت ( كيحاول يطلق ودنيه يسمع ) الضحك ديالها هدا ضحكتها هادي ( كيسمع فصوت الضحك والحتيت .. بقا متبع هو وياه الصوت بان ليهم سرجم ديال الدار دزهرة مرات بوشعيب مول الحانوت .. قربو بشوية لسرجم بانت ليهم مسرحة رجليها جهة واحد الطبلة لي كان محطوط عليها العصيدة وسط منها الزيت والعسل ، ومحطوط فوق الطبلة غراف ديال اللبن .. بقا واقف هو وطارق كيتفرجو فيها كتخشي يديها فالعصيدة وزيت والعسل وتاكل بجهالة بحال شي هبيلة وتشرب من داك اللبن ..
طارق ( شاف فروطال ) هادي مالها ؟
- فبيتها شادة داك التيليفون كتبقش فيه ، كتحاول تعلم ليه حتى وصلها ميساج فالواتساب دخلات ليه طلعات ليها نمرت عماد كانت كاتبة فيها " سي عماد " رسل ليها اوديو كليكات عليه كان فيه " تعلمتي شوية ولا مزال تالفة "
ليلى ( جاوباتو ) هادشي كيتلف مكنعرف ليه راسو من ساسو يلاه الواتساب شوية " جاوباتو بالكتبة " .. تم تم سونا عليها فتحات الخط " ألو
عماد : واش ماكتعرفيش تسيفطي ڤوكال ؟
ليلى : لا هههه حتى فاش كنت كنقرا كان عندي اتيليفون عادي ، مع الكرا ولباس ماخديتوش راه يلاه كنتعلم اتجيك فشكل ..
عماد : لا حتى حاجة مافشكل ، شوفي شتي دخلي غير ليوتيوب ولي بغيتي تعلميها ديريها تم حتى حاجة ماصعيبة شوية بشوية تعلمي
ليلى : معاش خدام غدا ( عضات على لسانها ) سمحليا اخرجات
عماد ( تبسم ) علاش بغيتي توجدي ليا شي طرح دالمسمن باش نفطر ؟
ليلى : واش كيعجبك ؟
عماد : كنموت على المسمن كنحماق عليه
ليلى : والله حتى نوجدو ليك غدا انا مغانخدم حتى ل 3 العشية وغادي نصايبو ليك ديرو فالفريݣو وتولي تهز منو وتسخن وتاكل
عماد ( بقا ساكت حس بإحساس غريب شي حد يبغي يدير شيحاجة على قبلك جاتو فشكل ) غادي نعدبك ..
ليلى : بالعكس مكاين حتى عذاب بالفرحات عليا عادي والله ( عضات على شفتها )
عماد ( تبسم مع راسو ) ونوضي ترتاحي ماتبقايش سهرانة تصبحي على خير
ليلى : المسمن تدوز للخدمة تاخدو ؟
عماد : لا غاندوز نديك للخدمة وناخدو ( قبل لا تعتارض قاطعها ) تصبحي على خير ( قطع) .. بقات ساهية فتيليفون وكتبسم تنهدات تنهيدة طويلة وصورتو بين عينيها ( جمعات ضحكة ونطقات كتوبخ راسها )
ليلى : رجوع لله .. نوض نعجبنو دابا الغد صباح بكري يكون طلق ليا ( ناضت بلا عكز عجبناتو وغطاتو حكات سنانها وتخشات فبلاصتها .. كانت لأول مرة اتحس بواحد شوية ديال الفرحة لي ماحساتش بيها شحال هذا ..
الروطال ( شافيه بلاما يجاوب توجه لباب دقو مشات زهرة حلات ) سلام لالة زهرة مرتي كاينة لداخل ؟
زهرة ( بفرحة ) اه اسي فاروق كاينة دخل دخلو مرحبا ، دخل الروطال وطارق حتى وقفو عليها هزات فيهم راسها شافت فطريق وقلبات وجها
الروطال : أش كديري هنا ؟ خارجة بلاما تݣوليها هاجمة على الناس اش كاين ؟
عنبر : انا ماهجمت على حد شميت ريحة البلبولة لقيت راسي هنا ، شهوتي فالعصيدة بالعسل وزيت واللبن شنو فيها ( شافت فطارق ) لاش جايبو معاك قوليه يمشي بحالو
الروطال ( بصرامة ) عنبر راه ضسرتي تبرهيش دوالو ، راه خوك هداك مالنا اش كاين واش تزادت فيك ضلعة ؟
عنبر ( غرغرو عينيها ) ماتغوتش عليا الحݣار الاناني ، الله ياخود فيكم الحق القوم الحݣار ( بدات كتبكي ناضت بزعاف مشا بيها البيت وجا طاحت غير سداري لي شدها سخفانة )
الروطال ( طار كيفيقها ) عنبر عنبر ( شاف فطارق ) مالها طارق جيب الطوموبيل لهنا
طارق : واش تا مريض فين اندخل طوموبيل لهنا هزها نديوها سربي اصاحبي وانت تكلختي .. هزوها وزهرة تابعوهم هي وراجلها مشوشين مشا الروطال كيجري بيها وطارق سابقو تلقاو ليهم ادريس وعبد الخالق ..
تودة : اويلي مالها ؟
طارق : ماعرفناش احتى سخفات .. ركبها الروطال فطوموبيل ديمارا مكسيري بيها ولوخرين تابعينو فطوموبيلات ديالهم ، وصل بيها لسبيطار لي تم دخلها
الروطال ( بخوف ) الله يرحم الوالدين المدام ديالي كانت كتاكل حتى سخفات ماعرفناش مالها .. دخلوها للمستعجلات وطلبو منو يبقى على برا حتى يشوفها الطبيب
تودة ( بخوف جات عندو كتجري ) مالها شوقع ليها ؟
الروطال : ماعرفتش ماعرفتش ، لقيناها عند مرت مول الحانوت طايحة على غراف داللبن والعصيدة وكتاكول فاش دويت معاها حيت ضارت فطارق بدات تبكي وتعاير نوضة لي ناضت سخفت ..
سعاد ( جرات تودة ) فاطنة تي راه هادو فعايل الوحم اخويتي
تودة ( بقات كتفكر عيطات على حياة لي كانت مخلوعة عليها ) حياة بنيتي عنبر جاتها حق الشهب هاد شهر ولالا ؟
حياة ( غوبشات كتفكر ) وخالتي راه وقيلة منين رجعنا من سوق الاربعاء ( تفكرات كلام عنبر فاش قالت ليها )
عنبر : لغيكل تعطلات عليا اصاحبتي ، خاصني شي زلافة دالبيبوش والبلول داك تشلبيط فالما بارد عشش فيا )
حياة ( شافت فتودة ) زعمة تكون حاملة ؟
تودة : فعايل الوحم هدا ( بقاو كيتسناو حتى بانت ليهم خارجة مع الفرملية
الروطال ( جا كيجري عندها ) عنبر شوية مالها شنو وقع ليها ؟
.... : غانديوها الفوق تشوفها الطبيبة دير ليها التلفازة ( هي مجاوباتهمش مشات مع الفرملية وهوما واقفين على نار كيتسناو مرة يكلسو مرة يوقفو )
حياة : تعارف زين هدا باين من لولو ( خنزر فيها طارق شافت فيه ودورت وجها حتى تمات جايا عنبر ومعاها واحد الطبيبة كتدوي معاها )
روطال ( طار لعندهم ) امدرا ادكتورة مالها شنو عندها ؟
..... ( بإبتسامة ) المدام حاملة ( مدات ليه واحد الورقة ) هاد تحاليل ضروري ديرهم وتبع مع إختصاصية ومبروك عليكم مرة اخرى ..
الابوة او الأمومة واحد الإحساس زوين وإحساس غريب ، اي واح فينا كيعجبوها الوليدات الصغار وكيبدا يفكر نهار نولي اب ولا نهار نولي أم كيفاش غانكون واش غانكون أب مزيان واش غانكون قد المسؤولية وغانربي هاد البنت وهاد الولد مزيان .. كولشي هاد الحوايج كتبقى تفكر فيهم ونفس الوقت هاد الاحساس كيبدل فيك بزاف دالحوايج .. كتولي قبل لا تخطوي الخطوة كتفكر بلي راه تابعاك مسؤولية او ولات عندك عائلة صغيرة مسؤولة منك هادشي كامل وهاد الإحساس حاس بيه هو .. هو لي حاليا واقف حال فمو ومصدوم معارفش يدوي ولا شنو يݣول .. غير الكرسي لي شادة وهو ساهي التبريكات طاحت على عنبر من كاع الجوايه من غيرو هو عقلو ماستوعبش ..
أدريس ( حط يدو عليه ) فاروق ولدي رجوع لله تبت عقلك
عبد الخالق ( كيضحك ) كلنا وقع لينا بحال هكا نهار عرفنا راسنا داخلين على دخلة جديدة
عنبر ( كلسات حداه حطات يدها على كتفو كطبطب عليه ) مالك ؟ ناعرفتك فرحان ماعرفتك مصدوم ولا ماعجبكش الحال شنو واقع ( ضحكات )
الروطال هز راسو فيها حلات عينيها على تواسعهم فاش شافت دموع فعينيه ، عض على شفتو ناسي دارهم لي معاهم جرها وعنقها نازلين دموعو
عنبر ( معنقاه كدوز على ظهرو ) ماتبكيش ماتبكيش خاصك تكون فرحان صافي ( هزات راسها فيهم سعاد كتبكي هي ومها ضحكوها ) أنتوما على سبة بحالو
الروطال ( مسح دموعو بعد عليها بايس ليها راسها ويديها ) الله يحفظك ليا الله يقدرني نفرحك ونكون كيما بغيتي ونتهلا فيك لا انتي لا لي فكرشك ..
عنبر : اللهم أمين يارب ( باست ليه جبهتو وهو بدورو باس ليها يديها )
طارق : وشحال زوين تكون خال
عنبر ( هزات راسها فيه خسرات سيفتها ) انت بعدا اتحيد من قدامي منشوفك منشمك ومكنحملكش اعباد الله
عبد الخالق ( كيضحك ) كيبان ليا هاد دري ولا البنية غير اتسخرو نتوما ايجي فوطوكوبي خالو
الروطال : تبارك الله واحد يولد او ولدي يجي يشبه لك ، 9 شهور غاتخرج منك اودا العود مع ختك
طارق ( كيضحك ) هانية كولشي زين من عند الخوادرية ، بحال الى انت اطفرو غير صبر ( قلبوها ضحك وخرجو من تم كل واحد قصد دارو ، فبيتهم ناعسين معنقها كيدوز يدو على كرشها هي نعسات بالعيا وهو حلف النعاس مايجيه .. ناض من حداها بشوية توجه للحمام توضى خرج ونزل للتحت حط صلايتو وصلى هز كفوفو لله كيدعي وكيحمد الله ويشكرو على النعم لي عطاه ..
- سلا الصلاة بدا تيليفون ديالو كيصوني كان تيليفون الصغير ، هزو وفتح الخط
.... : سلام خويا روطال سمحليا الى سونيت علك فشي وقيتة ماهياش غير كان خاصني ندوي معاك
الروطال ( كيجمع صلايتو بيد وحدة ) أش تم ؟
.... : خونا صاحب دعوتك لي كنتي موصيني الى بان نعلمك ، سيد كيعمر هاد الايام فواحد الحفرة فعين الذياب هو واحد تشيواوة
الروطال ( غوبش ) ديما ولا غير الويكاند ؟
.... : ديما مكايخرجش ساحي ، الى بغيتي نبالي بيه انا وماتوسخش يدك فيه نبالي بيه عطيني غير الأوكي ..
الروطال ( كيفكر ) ماتحطش فيه يدك حتى نݣولها لك ، واخا مشهي نوسخ ليه كمارتو ندويو من بعد ( قطع معاه حط تيليفون فجيبو ضاير لقاها واقفة قبالتو ببرود كتشوفيه ) الزين أش مفيقك ؟
عنبر ( بإستفهام ) شكون هذا لي توسخ ليه وجهو ( بقا كيشوفيها ) علاش كنحس بيك مخبي عليا شحال من حاجة وداك الباب لي فلاكاب لي مسدود بعد المرات مكنعرفكش كتجيني انت ماشي هو السيد لي بغيت وتزوجت مرة تكون مزيان مرة كتجيني فشكل ..
الروطال ( صغر عينيه ) كنجيك وحش !
عنبر : انا ماقلت والو انت لي قلتي دابا ، راجلي ومكنعرف عليه والو ومن هنا ل 9 شهور الى بغا الله انكونو 3 ومزال كتخبي عليا ..
الروطال : واخا الالة انا نݣولك ..
جرها من يدها غادي بيها نزلو مع الدروج وقف قدام الباب حط صبعو على البوانيين تسمعات " طاق" وتحل الباب ودخل هو وياها شعل الضو فالارجاء .. كان بيت كبير بحال شي کاراج لاحت عينيها فشي ماكن وفالخشب لي كان مستف انواع ديال الخشب وبزاف ديال التحف الخشبية .. طلقات من يدو وبدات كدور جاها راسها بحال الى كاينة فشي متحف خشبي كدور فعينيها يمين وشمال وتمس كل حاجة مشات لواحد الڤيترينا فيها المجورة توجهات للجهتهم وهو مقابلها كيشوف شنو كدير مادواش .. حلات دوك المجورة ديال الزاج كانو عامرين بالخواتم ديال الخشب شكلهم غريب .. هزاتهم كدوز صباعها على القمقوم لي ممدود فيهم بحال شكل ديال شي سهم جاوها فشكل .. كانو بزاف دالخواتم بحال نفس الشكل ..
عنبر : علاش عندك بزاف ديال هاد الخواتم ( مجاوبهاش ) ... مشات عينيها نيشان لواحد طارو محطوط تم نزلات هزاتو كانو فيه بحال دوك الخواتم ولكن هادو كانو مطبعين بالحمر كتحقق عاد عرفات من ديك المادة الحمرة لي يابسة بلي هداك دم .. تزاد معاها الزايد ضارت كان قبالتها خلعها كتشوفيه بشك وخوف ..
الروطال ( ببرود ) مالك خفتي ؟ كيجاك الأتوليي ديالي ؟
عنبر ( دوزات لسانها على فمها ) زوين
الروطال : داكشي لي حمر لي كتشوفي فيه وكتسولي راسك شنو هو ( هزهز براسو ) أه هداك دم ( بلعات ريقها وهي مزال كتسنى فشي توضيح ) تخلعتي ؟
عنبر : علاش غادي نتخلع ؟ ضروري تكون شيحاجة مزال كنتسناك تݣول شيحاجة وتعاود ليا ( حيد من يدها الطارو وطرها داها ݣلسات على واحد الكرسي وهو ݣلس قبالتها فبحال الكرسي لي كالسة عليه
الروطال : الحبس وراني وعلمني مانحنيش الراس ، ولي دار الذنب يستاهل العقوبة وليت غادي بهاد المبدا لي ادا ليا عاىلتي ولا ناس لي ضارين بيا ولي ظلم لي معايا وتحت جناحي كنعطبو وكنخليه قبل لا يزطم يخمم ..
عنبر : كمل
الروطال : العطبة لي عطبوني فصدري علماتني لي جبد شري يلݣاه ، والى درتي فيها ولد الناس مع الكيادر يحسبوك دمدومة ويلرفوس
عنبر : واش هداك لي سونا عليك وكنتي دوي معاه قبيلات كان كيقوليك على شي واحد اداك ؟
الروطال ( عض باطن فكو ) واحد شماتة كان نازل عندنا فالأوطيل وتحرش بواحد درية خدامة تم فالميناج
عنبر ( بعصبية ) ولد الحرام الله يعطيه مصيبة انا من عندي غير عطيه شي ملخة عمرو يحط يدو على بنات الناس
الروطال ( تبسم قارصها من نيفها ) شميكيرة ديالي .. ولكن لا احبيبي دابا جاي وليد ولا بنية فطريق مابقيتش بغيت نحط يدي فشي موسخ
عنبر : ولدك ولا بنتك مغايجيو من هنا ل 9 شهور .. ديك بنت الناس لي خلعها وعلم الله واش نفسيتها مزيانة ولالا واش خايفة ولالا لي دار ذنب يخلص علمو نيت باش عمرو يعاود
الروطال : مامقلقاش مني ؟
عنبر ( وقفات وعنقات راسو مدور يديه على كرشها ) لا مامقلقاش منك بالعكس انا كنبغيك كيما انت بايجابياتك وبعيوبك بكولشي كنبغيك ( شافت فيه وباستو بقوة من شفايفو ) غير هو فاش يكونو عندنا الوليدات خاصك تنسى هادشي حيت خاص تفكر فوليداتك أما انا معاك فكلشي ( رجعات عنقاتو ) ..
صابحة على صباح عجنات طرح ديال المسمن والملوي بزوج قداتهم على حقهم وطريقهم دارتهم فسولوفان ولواتهم فواحد الشال ودارتهم فساشي دخلات للطواليط .. كان مسخنودة الما دوشات توضات خرجات صلاة كيف وصاتها عنبر لبساتها حوايجها سالوبيط فالغوز مع شوميز بيضة تحتو ، شعرها نشفاتو بفوطة مزيان قسماتو من الوسط ودارت جوج ݣرينات .. اما وجها دارت ليكغو وريسيل كلوس خفيف ورشات من البارفان لي شرات ديال العبار ديال إيڤيدونص جاتها باردة وزوينة .. لبسات سبرديلة فالبيض وجدات ساكها بدا تيليفون كيسوني عليها هزاتو طلعات ليها نمرتو تبسمت وفتحات الخط ..
ليلى : ألو صباح الخير
عماد : 2 ونص هادي امدموزيل اشمن صباح بقا ( بدات كضحك ) واجدة انا فراس الحومة
ليلى : اه واجدة انا جايا ( قطعات متنهدة تنهيدة طويلة ) هزات الساشي وساكها وخرجات والإبتسامة على وجها .. دازت من حدا مول الحانوت رمات ليه السلام والضحكة مزينة وجها كتشم الهوى وسارحة بعينيها بإحساس جديد .. بانت ليها طوموبيلتو غير وصلات فتح ليها الباب طلعات سادة الباب شافت بيه ومدات ليه يدها ) سلام ياكما تعطلت عليك ؟
عماد ( مع طلعات ضربات فيه ريحتها كانت ريحة فريش ريحة نقاوة كيشوف فوجها وملامحها والغوز كيفاش جاها كانت كتبان بريئة والإبتسامة لي مزينة وجها خلاه يسهى فيها تبسم ونطق ) لالا ماتعطلتي والو كيصبحتي مزيان ؟
ليلى : الحمد لله وانت ( مدات ليه ساشي ) ها الامانة بعدا غير توصل ديرها فالفريݣو
عماد ( شد عند الساشي طل عليها كيقلب فيها ) هاي هاي الملوي والمسمن الحداݣة ولمن عطاها الله ( هز راسو فيها ) تبارك الله عليك الالة
ليلى : الله يبارك فيك ( ديمارا الطوموبيل غادي ) بغيت نسولك ومديرهاش مني قلت الصواب
عماد ( شافيها بنفي الابتسامة وبصوتو الرجولي ) سولي الالة شنو تم طلقي لي فقراجتك
ليلى : ههههه دابا أنت أصلك غرباوي ؟ تزاديتي فالغرب ولالا حيت عنبر قاتلي بلي أصلكم غرباوة
عماد : أياه الالة الاصل ديالي غرباوي وزيادة وخلوق فكازا ( قاطعهم صوت تيليفون ديالو طلعات ليه نمرة عصام فشاشة ) سمحيليا ( فتح الخط ) أش تم العريس ؟
عصام : صباح الخير اخويا انا بيخير الحمد لله وبااز تݣول معشيين معاك ، بغينا انݣولو لك اتولي عم ولكن تا ماشي وجه هاد الخبار
عماد ( ضحك ) وايلي هي غايجيني رويطيل صغير ( عصام عاود ليه لي وقع ) ههههه صݣع فاروق ولدو ولا بنتو ايجي اطارق هو ومو اتسخرو
عصام : وغاهاد الصباح جاتنا خبار يسرى ولدات تزادت عندها بنية
عماد ( بنفس البرود والابتسامة ) مزيان مبارك ومسعود هي نوجدو الكادو ديال السبوع ؟
عصام ( دخلو العجب كيفاش خوه تقبلها ومدارش ردة فعل كيف مالف جاتو عادية ) ايوا غير وجد الكادو أصديقي
عماد : وانت إيمتا العراسية ؟
عصام : عولو عليا تما تبقاو ، أنا والخطيبة نوينا نجيبو الطلبة ونديرو كلسة بين العائلة والله يعمر والله يخلف .. سلام عليكم سي مصطفى لاباس الحمد لله الله يجازيك بيخير عماد سير اخويا سير ( قطع )
عماد ( تبسم وشافيها ) صݣع هدا خويا صغير قريب يتزوج .. ويسرى بنت العم تزادت عندها بنية
ليلى : مزيان مبارك ومسعود ، ومبارك ومسعود على قبل عنبر العقبة للعندك إن شاء الله
عماد ( هز حاجب ونزل الثاني ونطق بشبح إبتسامة ) آمين وليك حتى انت ( سكتات وشافت قدامها ) هي تمشي معايا نختار الكادو نسيفطو ليهم من دابا انا مكنعرفش فهاد الهيث
ليلى : واش دابا حيت 3 انخدم
عماد : ندوز عندك مع 9 ايكونو مزال حالين أش بان لك ؟
ليلى ( هزات براسها ) واخا صافي
عماد : على مولانا ( برونشا اليوتيوب وطلق الموسيقة سايݣ مرة مرة يشوفيها ويلعب فالڤولون بيديها أما هي كانت شادة على ساكها وقلبها كون قرب منها كان غادي يسمع دقاتو ) ..
خلات دار عنبر ومشات للعند تودة ستاقرات عندها واخا تصالحات مع مها ولكن كانت مرتاحة فدار تودة كثر خصوصا قريبة ليها لقراية ديالها وللخدمة .. فاقت فصباح قضات حوايجها لبسات واحد لونسومبل فالازرق سموي وخلات شعرها مطلوق على راحتو قدات وجها غير شوية خفيف وهبطات التحت لقاتهم مجموعين على الفطور ..
حياة : صباح الخير ( جرات الكرسي ݣلسات ) فين هي دنيا ؟
تودة : خرجات ݣبيل نصاوب ليك مسمنة ؟
حياة : لا وقيلة ناكل الخبز براكة عليا ، خفت يتلوى ليا على معدتي ( بدات كدهن فالخبز) مغاتمشيش أخالتي للمحال ؟
تودة : والله الى وليت كنعݣز على المحال ، مخلية سميرة ورشيدة تم مكلفات وانا وليت معݣازة بحال والو نمشي هاد العشية نيت ..
عبد الخالق ( كياكل ) أنا عندي واحد الغراض انا وأدريس ، غانطلعو لطنجة إن شاء الله على وديت شي سلعة للقهوة
تودة ( شافت فيه ) ماݣلتي ليا والو ماجمعت ليك حوايجك
عبد الخالق : بلاما تعدبي راسك العزيزة مايحتاجش حنا غاديين هاد العشية ونرجعو إن شاء الله مع صباح الى بغا الله
تودة : والله يديكم على خير ( تسمع سونيت فالباب مشات المساعدة حلات الباب ، حتى تم داخل طارق هزات فيه حياة راسها ورجعات هبطاتو )
طارق : صباحكم مبروك ( باس راس باه وتودة أما حياة مدات ليه يدها هز حاجب ونزل الثاني وسلم عليها باليد جار الكرسي ديالو وݣلس ) كيصبحتو ؟
تودة : الحمد لله اولدي مسمن ولا ملوي
طارق : مسمن الله يحفظك ( شاف فباه ) مشيتو عند يسرى ولا مزال ؟
عبد الخالق : انمشيو انا وفاطنة نشوفوها من تم نوصلها للمحال وغانمشي عند عمك عندنا مشية للطنجة هاد العشية
طارق : اللهم يسر
تودة : شنو سماوها ؟ صورتيها ؟
طارق ( هز تيليفونو ) واحد السمية مشكلة مافهمتش كيخليو سنيات زينين وينقزو لشي سميات .. سماوها ريماس
حياة ( بهدوء ) سمية زوينة قريبة لسمية ديال البنت لي ايتزوج بيها عصام
تودة : اه سميتها اريناس كيسميوها الشلوح ، ايوا وليدي كل واحد كيسمي لي بغا ولي جاه على الهيث ديالو ( وراهم التصويرة ) ويني ويني على الزين الله يكبرها على طاعة الله ..
حياة ( كملات الفطور ديالها أو وقفات ) الله يخلف خاصني نمشي للمدرسة
طارق : صبري نوصلك
حياة : بلاما تعذب راسك کلس فطر غادي نشد طاكسي ( خنزر فيها )
تودة : لاواه ابنتي خلي خطيبك يوصلك ( شاف فحياة بمعنى سمعتيها وݣلسي ) .. ݣلسات حتى سالا وناضت هي وياه مخليين تودة وعبد الخالق غايمشيو للعند يسرى يطلو عليها .. خرجات حياة وطارق ركبات دارت السمطة وهو بدورو ركب حداها ديمارا وخرج من الڤيلا
طارق : جيتيني بحال الى مزال ماولفتيش بلي حنا فحكم المخطوبين امدموزيل ؟
حياة ( شافت فيه ) انا غير بنتي ليا كتفطر مابغيتش نعذبك هادشي لي كاين
طارق ( عض على شفتو وشاف فيها ) ايوا لابيل لي سونيت ليك لبارح ومجاوبتيش مالها حتى هي ولا ماشتيهاش ؟
حياة : كنت ناعسة سونيتي عليا مع 10 داك الوقت انا راه نعست حيت عييت نسيتي بلي عطيتيني زوج ديال ضوسيات لبارح وطلبتي مني نحولهم لضوسي واحد بغيت خدامة عليهم حتى عييت ..
طارق : ياك أنتي الالة لي کلتي منݣلس من الخدمة حتى نضربو الكحل فالبيض ولا نفكرك ؟
خارج هو وياها من عند الطبيبة ، عاݣد غوباشتو معاجبوش الحال ونفس الوقت متفهم الوضعية لي هي فيها طلعو للطوموبيل وشافيها
الروطال : مرتاحة مخاصك خير أمدام ؟
عنبر ( شافت فيه بإستفهام ) مالني شنو درت اويلي دابا مالك كاعي ؟
الروطال : لا والو غير الطبيبة الزينة ديالك بغاتني نصوم 3 شهور كاملة بحال داك المش لي ݣدامو حوتة ومݣادش يوصل ليها
عنبر ( ضحكات ) وحبيبي وراه واعر عليا سمعتيها ݣالت ليا خاصني الراحة ف 3 شهور لولة .. ونبقى مرتاحة وعاد ماتقربش ليا
الروطال ( تبسم بخبث ) عطا الله ازين الحلول برب لا تفاكيت معاك نموت انا زوينة هادي ( ديمارا )
عنبر ( بفرحة ) باز دابا إيمتا غادي تجيب ليا المشة ، سمعتيها قاتليك خاصني مشة فدار على وديت مناعتي قليلة ، جاب الله بعدا فاش كنت ساكنة مع ليلى كنا مربيين زوج مشات 3 سنين وهوما معانا يعني ديجا عندي تيكسوپلازموس مرتافع يعني منخاف والو
الروطال : غانشوف فين نتبناها ونجيبها ليك كوني هانية ، خاصني نشوفها ليك تكون معقمة
عنبر : معقمة من الأمراض اه ولكن متكونش دايرة عملية خلي المشة تولد لينا الفيلا واسعة وتواسع والفيرما كبيرة تولد لينا قطيطات زينين انا نيت كان عيني فشي قطة ..
الروطال ( شافيها بنص عين ) صافي تولي مݣابلاها ويجي ولدي ولا بنتي حتى هو تݣابليه وموت افاروق ولا طرضݣ انت کاع
عنبر ( قربات منو باستو فحنكو ) انت هو الخير والبركة الكبيدة ديالي ولد قلبي روح روحي .. ودينا نشوفو ختي راه ولدات نقولو ليها على سلامة ونشوف بنت ختي راه اول مرة نجرب شعور الخالة .. حرك راسو بلا حول دغية كتغمق عليه ..
~~~~~~~~~~~~~
دخل لدار هاز الخبز سخون وكرواصة والحليب ، حطهم فالكوزينة كيسمع صوت ديال الضحك جاي من الحمام بخطوات بطيئة توجه للجهة الباب كان مبسم كيشوف فولدو ݣالس فالبانيو ورغاوي ضايرين بيه وهي كدير ليه باندوش .. لابسة كسوة فالبيج هازة ليها كمايمها بشرتها البيضة كتبان شعرها مرة مرة كيجي على عينيها كتحيدو وكضحك معاه ..
عمران : طاتي ريناس انتي ثوينة بزاف وفنة والله الى كبرت بحال بابا انتزوج بحالك
أريناس : هاي هاي هاي وحتى تكبر وتقرا وتخدم وتزوج وحدة زوينة وتكون ظريفة بحالك
عمران : تاتيا ظليفة وثوينة والله انا عزيزة عليا وعزيزة على بابا وبابا عزيز عليك ؟
أريناس ( كضحك ) أه عزيز عليا وانت عزيز عليا وأجي نشلل ليك احبيبي ( شللات ليها ولبسات ليه البينوار عصام خلاهم ومشا للكوزينة دات عمران للبيت نشفات ليه ولبساتو ورشاتو بريحتو ونشفات ليه شعرو مشطاتو ليه عاد خرجات هي وياه من البيت غاديين للكوزينة لقاتو كيوجد فالفطور ) كون خليتيني انا نوجد الفطور كنت كنلبس للعمران حوايجو ..
عصام : مكاين لاش غير سيرو نتوما لطبلة انا الالة مفوبر عليكم هاد النهار نوجد ليكم الفطور .. سبقاتو هي او ولدو حط الفطور على الطبلة وكلسو كيفطرو ، كانت عينيه مرة مرة كيمشيو ليها فاللحظة وهي غافلة هز يدو وزول ليها شعر لي كان لاصق على جهت عنقها .. تفافات وشافت فيه طالعة معاها رعشة ) شعرك فزک ولصق على عنقك ( هزات ليه براسها مكملة فطورها قلبها كيضرب ، كان حاضيها وحس بردة فعلها تبسم مدور لسانو وسط فمو حس بنغزة فرجولتو تحركات وغرورو كرجل تحرك حاجة لي نساها من زمان ، جاه كلام خوه فبالو " مالك اتحط فدار بحال ختك ياتعاملها بحال مراتك وتعطي فرصة راسك ولا خليها عليك " شافيها ونطق :
اش بان لك السبت الجاي نجيب مالين الدار نديرو الخطوبة ، وديك الساعات نجمعو وريقاتنا على قبل العقد ؟
حياة : راه حتى أنا ماقلت ليك والو اطارق ، وانا مانويت فيها والو انت الله يهديك على نقشة وصافي .. وتيليفون راه بصح كنت ناعسة
طارق : واخا الالة ماݣلنا والو ( حك جنب حاجبو ) معاش غاتخرجي من الحصة ؟
حياة : مع الوحدة ( قاطعهم صوت تيليفون طلعات ليها نمرة فيها هبة ) جاوب
طارق ( فتح الخط ) وي هبة !!
هبة ( بصوت انثوي ) صباح الخير موسيو طارق ، كنت بغيت غير نطلبك واحد طليبة الى جات على خاطرك وسمحليا على ديرونجمو
طارق : وي دوي شنو تم ؟
هبة : كنت خديت كونجي على قبل عرس ختي ، ودابا بابا قالي ضروري سي طارق يجي حتى هو عارضك انا عارفة ماعندكش مع المناسبات ولكن كان باغي يشكرك على قبل الكادو
طارق : لالا مايحتاجش يشكرني هدا واجب ( شاف فحياة لي كانت كتشوفيه هازة حاجب ومنزلة الثاني وملامحها باردين ) غير سمحوليا مغانݣدش نجي
هبة : سي طارق بابا حدايا بغاك ( عطات لباها )
.... : اسي طارق سمحلينا أولدي ، ولكن بغيتك تكون حاضر الله يرضي عليك
طارق : الخوادرية يلاه ولدات داكشي باش صعيب شوية ( شاف فحياة لي كون كان القرطاس فيدها كون وا تيرات فيه ) ولكن نشوف نشوف نقد ندوز واحد سويعة ندير الواجب
.... : الله يجازيك بيخير شكرا اسي طارق ( قطع )
حياة : لا سوكريتير ديالك هادي ياك ؟
طارق ( شافيها بملامح هادئة ) اياااه باش عرفتيها هي برافو عليك
حياة : مزيان بصحة صافي حبس هنا عفاك ( حبس قدام ليكول قبل لا يدوي حلات سمطة ونزلات خابطة الباب فوجهو خلاتو مبسم عاجبو الحال )
طارق : برب حتى شنيولة كنعجبها ، غارت الصݣعة ( كيضحك ) ديمارا وشد الطريق للخدمة
- الحصة كلها دازت وهي دماغها خدام كتفكر فهبة .. كتحس براسها ماكرهاتش تشدها تنتفها زغبة زغبة ديجا ماحملاتهاش من نهار كانت مشات عندو ، عقلها مكانش حاضر ايمتا سلات ديك الحصة والو ماعقلاش ، هزات كتوبها وخرجات كان واقف كيتسناها قلبات عينيها وطلعات حداه بلا سلام ولا كلام ..
طارق : نتغداو ؟
حياة ( قالبة وجها ) مسدودة شاهيتي اديني للبيرو نيشان ..
طارق : انا بعدا محلولة ليا الشهية وفيا الجوع ناكلو ونديك ( ديمارا مامسوق ليها ) ..
~~~~~~~~~~
خرجو من الكلينيك من عند يسرى لي طلو عليها كانت بيخير لا هي لا بنتها دازو تغداو عنبر كانت جيعانة .. عاد رجعو للدار
الروطال : زين انا غانمشي للخدمة ، انتي رتاحي الى خصاتك شيحاجة سوني ليا صافي
عنبر : ومتعطلش ، هداك لوطيل مزال مناويش توريه ليا ، غير سير شينهار حتى تلقاني حاطة رجلي عندك فالبيرو
الروطال ( تبسم ) ماديريهاش ازين عارفك ( باسها ) أنا مشيت .. هز سوارتو وتيليفون ورجع خرج خلاها كدور فدار بحال الهبيلة جاتها القنطة تنهدات ودخلات للدوش دوشات وخرجات تكات غير بشورط وديباردو لايحة عليها الكوڤرلي ونعسات ..
فجهة اخرى كياكل مسرح رجليه وهي ساهية وقالبة وجها .. مكتشوفش جيهتو كان حاضيها بنص عين حتى سالا ناض غسل يديه ورجع مخلص
طارق : مشينا ؟ .. مجاوباتوش ناضت وخرجات قبل منو وهو تابعها والابتسامة على وجهو حتى طلعو للطوموبيل شد الطريق حتى شافت حبس قدام واحد المحال كبير كان خاص بالقفاطن وتكاشط
حياة ( شافت فيه ) مغاتدينيش للخدمة ؟
طارق : غير نساي الخدمة هاد النهار ادخلي تختاري شي قفطان ولا شي تكشيكة لي عجبك ، ومن بعد نوصلك لصالون وديك ساع نرجع ليك
حياة : ولاش هادشي ، كاين شي عرس ولا معروضة ؟
طارق : ومالي غانمشي العراضة بلا بيك ؟
حياة ( خرجات فيه عينيها ) ومال ديك الكروڤيتا لي خدامة عندك عرضاتني باش نمشي ، تلقاها اصلا مافخبارهاش راك خطبتي بغيتيها تكحل بالعما
طارق ( عض على باطن حنكو وتبسم ) واش كنشم ريحت شواط دالغيرة ولا جاب ليا الله وحشومة تݣولي على سيدة كروڤيتا منويتهاش فيك
حياة ( غمضات عينيها بجهد كتكالمي راسها ) طارق ماطلعهمش فيا الله يرحم باك مامعروضاش مغادياش ..
طارق : غاتمشي مع راجلك ( شافت فيه ) مالك مريضة ، وديري عقلك ونزلي ختاري باش نديك لصالون يلاه ازين سيري ومتبقايش تعصبي باش ماتزراݣيش
حياة : واصلا انا ماغرتش عليك
طارق ( بهدوء هزهز راسو ) أممم واخا مزيان يلاه نزلي ( قلبات عينيها هزات ساكها ونزلات وهي من الداخل عاجبها الحال حيت باغي يديها معاه ) ..
ختارت تكشيطة فالموڤ كلها منبتة بالحجر كتحمق تقيلة هماوية ، ختارتها وهي دايرة فبالها بلان عيطات عليه خلص المرا ديال تكشيطة وخرجات هي وياه هزاها فالبوشيط تاعها حطاتها اللور ..
حياة : واش انلبسها فصالون وتجي تديني من تم ؟
طارق ( عينيه على طريق ) أه علاش ؟
حياة : وحيت مجايبة لا سباط لا ساك لا ريحة
طارق : داكشي حالو ساهل حتى أنت ( شافيها وغمزها ) وقفها عند محال خاص ببيع سيكان وصنادل وسبابط ديال المناسبات ، دخل هو وياها عاطيها الاختيار تختار طاح إختيارها على واحد الساك فدوغي مع سباط راقي فنفس اللون وشكل دساك .. خلص كاش ومن تم لمحال ديال العطور
حياة : كون مشينا غير للمحال ديالك براكة
طارق : ݣانتي على واحد الريحة بغيت نشمها فيك عندك شي مشكيل ؟
حياة ( هزات كتافها بلامبالاة ) لي بغيتي .. دخلو للمحال كدور فعينيها ، حطات ليها السيدة العطور لي طوندونس وزوينين كتشم حتى وحدة ماعجباتهاش
طارق : مامدوزيل بغيت شيحاجة تكون فيها ريحة ديال الكراميل
.... : كاينة سكوندال الحمرة وكاينة لوف دونت بي شاي هادو زوج فيهم الكراميل او واعرين ( جبداتهم شم وحدة فيهم وطاح اختيارو على سكوندال الحمراء )
طارق : اناخدو هادي ( بقات حياة كتشوفيه ) .. خلصها تم تم ومد ليها الساشي ناطق بإبتسامة) هاكي ازين بصحتك وراحتك مزال شيحاجة ؟
حياة : لا الاكسسوارات عطاتهم ليا السيدة لي كرينا عندها
طارق : ويدك تبقى خاوية ؟ نديك معايا بصيفتك خطيبتي فين هو الخاتم دالخطبة
حياة ( بإحتجاج ) ولكن ( قاطعها )
طارق ( بصرامة ) دوينا احياة ماغنبقاوش نعاود فالهضرة ( جرها دخلها لطوموبيل متوجه للدهايبي ) .. كانت مݣيدة بحال شي صنم حداه فينما بغا كيديها دخلها عند دهايبي لي سلم عليها ورحب بيه بحال الى كيعرفو من شحال هذا ..
طارق : سي الوزاني بغيت شي خاتم دالخطوبة يكون واعر دالعيالات او واحد ديال الرجال
الوزاني : مرحبا انعطيك شي تشكيلات مهيرين من طراز رفيع يليقو المدام ( حط ليه الصف الاول والثاني وثالث ) شوفي الالة لي عجبك تخيري وقيسي ..
حياة ( هزات راسها فيه كانو فالغدا وتعارف حتى صدقو فالخواتم دورات عينيها كتشوف طاحو عينيها على خاتم زوين راقي تقيل الحجرة ديالو مدقوقة مزيان ) انشوف هدا ( هزاتو قيساتو كان جايها عبار واحد مع صبعها
طارق : جاها هو هداك وقيلة نديوه عجبك ( كيسولها بعينيه هزهزات ليه راسها بالايجاب ) صافي ديرو ليا فالبواطة ديالو وعطيني خاتم ديال الرجال .. عطاه يختار وفعلا ختار واحد سامبل دارو ) سي الوزاني بغيتك تشوفليا شي براسلي مع سلسلة ديالو خاتمو وطوانݣو وبغيت نشوف ديك الساعة لي لهيه عجباتني
حياة ( قرصاتو ) نعل شيطان
طارق ( قرب شفايفو من ودنيها ونطق ) دخلي سوق راسك ..
فجهة أخرى راكبة معاه فطوموبيل شادة يديها حشمانة هزات راسها فيه لقاتو حاضيها بنص عين بلعات ريقها ونطقات بصوت غالب عليه التوتر ..
أريناس : كون غير جبنا عمران معانا ، جاتني حشومة خليناه لمرات باباك وهي فالكلينيك مع ختك
عصام : مكاين حتى حشومة غاديين ناخدو دهازك نديوه مجاتش .. وزايدون راه غاديه معاها للمحال ديالها
أريناس : بقا فيا
عصام ( حبس طوموبيل فواحد القنت وضار شافيها كيطلعها وينزلها كيدور لسانو وسط فمو هاز حاجب ومنزل الثاني ) جيتيني بحال الى خايفة مني ؟ وقيلة راه حنا داخلين على زواج !
أريناس ( كترمش بعينيها ) علاش غادي نخاف منك ؟ انا كنكون معاك فدار وحدة علاش غادي نخاف انا مادرت فيها والو
عصام : شي حوايج خاص تفهميهم الله يرضي عليك .. انا وانتي غانتزوجو على الصح غايجمعنا دار والحمام وبيت النعاس ( شاف الحمورية طغات ليها على حناكها ) راه غاتشوفيتي لحمة وغانشوفك لحمة
أريناس ( هزات راسها فيه باينة الصدمة على ملامح وجها ) ك كيفاش اويلي ياك نهار الاول قلتيلي بغيتيني على قبل عمران حيت عمران كيبغيني
عصام : انا ماݣلتهاش ( نكر ) أنا ݣلت لك ختاريتك حتى على وديت عمران كيبغيك واش انا انتزوج بيك نجيبك لدار نديرك ديكور بنت لك بارد ماعمدي نفس ( زمجر برجولة وبصرامة ) كون بغيت انمشي لزنقة عطا الله ولدي راه انخلي معاها مربية حتى يكبر شتك مشيتي غالطة ؟ ( بقات غير كتشوف مصدومة كتبلع فريقها بقا كيشوفيها هزات عينيها فيه غمزها ) اش تم ياكما تراجعتي ؟
أريناس ( تنهدات تنهيدة طويلة) ماشي هكاك غير صراحة خايفة خايفة منكونش مزيان معاك .. انت عارف داكشي لي داز عليا
عصام : هادشي عارفو حتى حاجة مكتجي دقة وحدة كولشي بشوية نعطيك الخاطر حتى تولفي غير تهناي ، غير هو حتى انتي عطي راسك فرصة تعيشي ونساي لي داز وحمدي الله لي ماوقعش ليك كيما وقع لغيرك ( هزهزات راسها ) نمشيو ؟
أريناس : واخا
~~~~~~~~~~~
مع 8 ديال العشية كانت واجدة فصالون مبسمة كتشوف فالمشيطة الخفيفة لي خلات شعرها مطلوق لي كانو فيه تموجات زعرين .. طلبات من السيدة لي تم تصبغ ليها خصلات ديال ليميش المكايج لي دارت ليها كان موڤ فوق العينين وݣلوس نيود ..
.... : جيتي فنة كتحمقي وتاتك التكشيطة والاكسسوارات
حياة ( شافت فيها ) ربي يخليك حبيبتي لهلا يخطيك .. بدا تيليفون ديالها كيسوني هزاتو وفتحات الخط ) ألو .. أه ساليت واخا انا جايا هزات على تكشيطتها وتمات خارجة بالعبار كان واقف عند طوموبيل ديالو دور راسو تكوانسا فاش شافها غوبش ورجع طلق غوباشتو ماجا عندها متحرك
حياة ( وقفات قبالتو كتشوفيه حاسة بالغرور واحد الفرحة فالداخل ديالها ) ياكما تعطلت عليك ( رجعات شعرها اللور ريحتها ضاربة فيه )
طارق ( حنحن بالع ريقو ) لالا خودي راحتك .. تعطلي ݣدما بغيتي لهلا يدينا حنا كاع للهاد العرس مالنا اش خاسرين
حياة ( تبسمات ) ويلاه نمشيو لا نتعطلو على سكريتيرة ديالك مسكينة ( ضربات فيه وطلعات للطوموبيل ماكرهاتش تغوت من الانتصار لي كتحس بيه فالداخل ديالها ) ..
خرجات من الخدمة كتخشي سارجور فساكها هزات راسها بان ليها واقف على طوموبيلتو مقابل معاها .. بلعات ريقها وتبسمات ليه مشات قبالتو وقفات عليه ..
ليلى : واش جيتي بكري ؟
عماد : واحد 5 دقايق هوكاك يلاه ساليت خدمتي ، كنحس براسي مسخسخ وعيان
ليلى : خاصك الحمام كيفتح المسام ومزيان ، وحتى زيت الخزامة
عماد ( برم شفايفو واشر ليها بيدو ) طلعي وعاودي ليا هاد البلان ديال هاد الخزامة ( طلعات للطوموبيل وطلع هو مديماري ) كملي ليا
ليلى : هانت اتجيب زيت الأساس ديال الخزامة وفلش تبغي تشلل فدوش شلل بيها والمخدة لي كتنعس عليها دير فيها كموسة ديال الخزامة زوينين كيرخيو وكيهدنو الاعصاب وكتنعس مزيان ..
عماد ( شافيها ورجع شاف فطريق ) وهادشي فين كيتباع ؟
ليلى : فالپارا والخزامة كانة عند العطارة وكاينة حتى عند لي كيبيعو هادشي البيو منقية
عماد : نعطيك تاخديهم ليا ؟
ليلى : واخا ماعنديش مشكيل .. هزهز ليها راسو وتوجهو لواحد المحال كبير كيبيع هادشي ديال الزيادة دخلو بزوج خلاها كدور وهو حاضيها كتقلب فالحوايج وعاجبها الحال الفرحة والاعجاب باين على وجها شافت فيه لقاتو كيشوف فيها .. جا لعندها ونطق وهو كيناظرها بعينيه الحرشين لي مكتعرفو فاش كيفكر مكاتقدش تزݣي فيه الشوفة
عماد : شنو بان ليك ؟
ليلى : كولشي عجبني ولكن أحسن حاجة ناخدو ليها بروديات ديال البيبي تكون شي ماركة مزيانة وشي زوج لبيسات
عماد : ناخدو تلاتة حسن .. ختارو اللبيسات وبروديات ماركة زوينة ومعروفة دارتهم ليهم السيدة فبواطة خاصة بالكادويات خلصها وخرجو ( عماد بدون سابق إنذار ) كيعجبوك الدراري صغار ؟..
ليلى : عزاز عليا بزاف كنحماق عليهم ، البنون زينة حياة الدنيا كنتمناو من الله يرزقنا الذرية الصالحة ( شافيها حنحنات خافت يفهمها غلط) زعمة يرزقني ويرزقك ويرزق جميع المسلمين
عماد ( بإستهزاء ) آمين وانا ݣلت شيحاجة ( تحرجات ودورات راسها سكتات ) كليتي شيحاجة ؟
ليلى ( هزات براسها ) اه تعشيت فالخدمة
عماد : مزيان يلاه نوصلك غدا خدامة بلاما تعطلي .. رجعات معاه لطوموبيل وصلها قربها ، حلات السمطة وشافت فيه ..
ليلى : عماد ( شافيها ) قررت واحد القرار هو كان خاصني نديرو شحال هادي ولكن مع الخوف والخلعة العقل كيتلحس
عماد ( غوبش كيتسناها شنو غاتݣول ) دوي
ليلى : بغيت نمشي للعند طبيبة ندوز نشوف نشوف زعمة ياكما تفلاو عليا بنات خالي
عماد ( هز براسو ونطق بصوتو المريح ) مزيان سيري على وديت راسك أليلى باش تريحي انتي راسك ماشي على وديت شيحد ولا على ود الناس فهمتي .. ماشي اي وحدة فقدات العذرية ديالها راه بنت الزنقة كاين لي تكرفص عليها شي حد فتريكتها ولا شي حد فزنقة عطا الله فهمتي خاصك تبغي راسك كيما انتي ..
ليلى ( تنهدات وتبسمات ليه ) شكرا بزاف على كاع هادشي لي كدير معايا جابك ربي بحال الميمون فطريقي ( عضات على شفايفها فاش عرفات راسها شنو قالت بزربة حلات الباب ونطقات مزروبة ) تصبح على خير ( سدات الباب وهربات )
عماد ( مبسم ) كون تشوفي انتي ( بقا مقابلها حتى طلعات ديمارا وشد الطريق لدارو ) .. غير وصلو حط داك المسمن لي عطاتو فوق الطبلة دخل دوش عليه توضى صلى صلاتو .. هز من داك الملوي زوج سخنهم والباقي دارو فالفرݣو ..
- عمر ليه اتاي وحط المسمن زبدة والغسل شعل التلفازة كيتفرج وكياكل ، هز التيليفون سونا على عصام
عماد : وفين انت ؟
عصام : خويا يلاه دخلت لدار جبت عمران من عند خالتي فاطنة داتو معاها للمحال ، وانا كنت مع أريناس
عماد : تسرح ليك اللسان مابقيتيش تغلط فسميتها وبسيف اتولي المدام دابا .
عصام : معيط عليا تبقى تريݣل ؟
عماد : ومزال داوي خاصك تشكرني ليل ونهار ضبرت ليك فعروسة شكون بحالك ، المهم ݣوليا الكادو دبنت خالك بغيت نسيفطو واش نسيفطو على سميتك انت تديه ليها ولا على سمية ماجدة ؟
عصام : سيفطو على سميت ختك مالي انا واش مسالي ، انا يلاه كنوجدو لدهاز العروسة وخاص نشوف واش تبغي تبدل شي لعبة فدار
عماد ( سرط لقمة ودوز بأتاي لي بقى فكاسو ) صافي انسيفطها على سمية ماجدة حسن
عصام ( كيخمم ) أجي انت بحال الى بريتي شتك مامسوق ماتحرك فيك والو !!
عماد ( بإستفسار) بحالاش ؟
وصلو فين كاين العرس ، كتسمع الموسيقى طوموبيلات واقفين وناس غاديين جايين بنات بتكاشطهم .. نزل طارق كيتسناها تنزل نزلات حتى هي بشوية ضار لجهتها مد ليها يدو ، بقات كتشوف فيدو مدة عاد شدات فيه غاديين بزوج دايرين يد فيد .. كان بات هبة على برا تقدم عندو طارق وقف وعيط عليه بسميتو ..
.... : اهلا أهلا سي طارق مرحبا زارتنا البركة ونهار كبير هدا ( بدا يعيط على هبة حتى خرجات لابسة تكشيطة فزرق طالقة شعرها تبسمات فاش شافتو ودغية مسحات الابتسامة فاش شافت حياة )
هبة : سي طارق مرحبا بيك ، شكرا بزاف محشمتينيش انا وبابا وجيتي مرحبا بيك
طارق ( بإبتسامة ) سمحوليا ماعرفت شنو نجيب معايا ( مد واحد جوا لباها ) هادي واحد البركة
.... : علاش تعدب راسك المجية ديالك بدنيا ومافيها مرحبا بيكم ( كيشوف فحياة )
طارق : ربي يخليك ( شاف فحياة ) حياة المدام ( هبة بلعات ريقها جاتها ساكتة تصدمات عينيها بغاو يخرجو من بلاصتهم وجها ولا صفر .
.... : سمحلينا اسي طارق مافخبارناش كاينة المدام اما منعرضوكش بوحدك وماديروهاش منا قلت الصواب ( شاف فهبة ) ماکلتيهاش لينا ابنتي ؟
هبة ( كطلع فيها وتهبط ) مكانش فخباري ، عند بالي بلي غير من العائلة
حياة ( دوات ) من العائلة وعاد تزوجنا غير سيمانة هادي
هبة ( بغات تبخ دم ) مبروك عليكم اسي طارق ، الله يكمل عليكم بالخير ومديروهاش منا قلت الصواب دخلو مرحبا ..
دخلات حياة هي وطارق مشادين ݣلسو فواحد الطبلة ، كانت كتحس بالفخر وعاجبها الحال دايرة رجل على رجل وكتشوف بعينيها حاضية هبة ونظراتها .. كانت واقفة هي ومها كيدويو وكيشوفو فبعضياتهم ويرجعو يشوفو لجهتهم ..
.... : ايوا انتي شحال هادي وانا كنݣولك ديري شيحاجة جيبيها طيري بيه ، ايوا دابا كلسي هاهي جات وحدة من تريكتو وداتو وبقاي انتي تقرقي فعينيك ..
هبة ( مغزفة ) وصافي اماما ماتزيديش عليا ، راه واحلة ليا فقراجطي شنو شافيها لا زين لا مجي بكري ..
.... : لاواه براكة من الهضرة الخاوية ، زين زينة هي قصيرة شوية ماطويلاش ولكن زين زينة .. وديري عقلك وعطي لخالتك الكلمة وتزوجي بولد خالتك لا طير بيه شي نصرانية حتى هو وتصدقي لا تيتي لا حب الملوك ..
طارق ( نزل براسو للعند ودنيها مستنشق ريحتها ) ولايني راك زلمومية كتلوحي السم امن تحت الدف( شافت فيه ) من إيمتا تزوجنا أمدموزيل ؟
حياة ( قلبات عينيها وتبسمات ) من الوقت لي قلتي ليهم بلي أنا هي المدام .. كان عليك تقوليها راه غير مخطوبين وماشي خطوبة بيناتنا غير تعارف ( عض على شفتو هز حاجب ونزل الثاني ) بلاما تشوف فيا الى بقا فيك الخير على ودها نوض دابا نخطبها ليك شنو بان ليك ؟
طارق : ياك الالة وديريها ؟
حياة : جربني ، عند بالك انقوليك لا راه واخا تشوفني هكاك راه نفسي اولا قبل اي واحد انا نقوليك
طارق : تبتي الارض ترطاي دوك رجلين لي عاجبينك نکرضهم ليكم .. نص ساعة وغانوضو بحالنا
حياة : وعلاش ( خرجات فيه عينيها ) بغيت ناكل دجاج ولحم بالبرقوق
طارق : نديك تاكلي حولي على ݣدو ، مكنحملش نبقى فشي قنت مامرتاحش فيه انديرو صواب ونمشيو بحالنا. .
واقفة فالكوزينة مقابلة الطاجين لي كتوجد فيه ديال الدجاج البلدي ، كانت دايراه بزبيب والبصلة معسلين حالة السرجم ديال الكوزينة كيضرب فيها الغربي ديال الخريف .. قدامها كانت حاطة خيزو خضر وليمون دارتهم فالمكينا دالعصير وطحناتهم خلات العصر على جنب او وجدات شلاضة .. سلات وغسلات الماعن هزات طبسيل دارت فيه الكسرات وخرجات لعندو كانت متكي فوق الفوتوي وكيتفرج حطات الطبسيل قدامو وݣلسات ..
دنيا : كول بعدا شوية ديال اللوز والكركاع راه مزيانين
عز الدين ( كيشوف فداك طبسيل وفيها ) فاش مزيان مافهمتش لاش كيصلح ؟
دنيا : كيجبر العظم كول بينما طاب الطاجين ( تبسمات ) دايرة ليك واحد طاجين ديال دجاج بلدي على مزيناتو
عز الدين : الدجاج بلدي واللوز والكركاع ( سكت وكمل كلامو ) باينة ليك فيا سيري تقاي فيا وجه الله ..
دنيا ( بإستغراب) مافهمتش علاش زعمة ؟ براكة من ضسارة وزيد كول وأرا ديك تيليكوموند لهنا ( حيداتها ليه من يدو وضارت كتبظل فالقنوات )
عز الدين ( كينقب من داك الطبسيل) علاش زعمة كديري معايا هاد البلانات ومݣابلاني بقيت فيك ؟ سمعتي شيحاجة ولا عاود ليك طارق شيحاجة ؟
دنيا ( شافت فيه بملامح باين عليهم الصدمة والاستغراب كتسول راسها علاش جاه هادشي لبالو هي فعلا بقا فيها ولكن مكاتشفقش عليه ) بحالاش ؟ مافهمتش ؟
عز الدين ( برم شفايفو ) الله وعلم بحال يݣولك بلي والديا ماتو قكسيدة هوما وختي مثلا ، وانتي يققى فيك الحال
دنيا ( تقادات فالݣلسة وبرودة) انا هاد البلان فخباري شحال هدا ، منين طارق خويا كيعاود عليك قبل كاعما نتلاقى بيك ولا نعرفك ( كذبات باش متحسسوش بإحساس لي مكاين وهو شفقة لي مكانتش كتحس بيها هي كانت كتحس بلي ظلماتو فقط ) غاباش تعرف بلي هادشي لي فبالك مامنو والو ..
عز الدين : ومنين فبالك كالك ݣلستي تعايري داك نهار ، والديك مامربينك كون عندك ختك ؟!!
دنيا ( كترمش حيت حاصرها فالقنت ) حيت منين كنتعصب كنولي جيبها فم وقول وانا هادشي كنعتارف بيه فراسي وكنقوليك سمحليا حيت زلقات ليا من فمي ماحسيتش ونسيت ، وبقا فيا الحال على داكشي لي خرجت من فمي كنحس براسي انا سباب فلي وقع ليك
عز الدين ( بقا كيشوفيها ) هي شفقة عليا ؟
دنيا : تا علاش غانشفق عليك مالك هبيل ، داكشي لي وقع ليك قضاء وقدر كيما انا مكتاب ليا نعيش بلا ماما ، انت بعدا دفنتيها وبقات واحد دكرة زوينة بيناتكم رباتك مزيان وخلات بلاصتها زوينة أما انا راها عايشة وعمرها عرفاتني وعمري شفتها ليومنا هدا .. باغية غير مصلاحتها هادشي لي بغات من ولادها ، انت بعدا اتهز يديك وتدعي ليها برحمة أما انا داك الاحساس بين الام وبنتها حسيتو غير مع مي رقية ( وقفات ) انمشي نطفي على طاجين ( خلاتو متبعها بالعين وتوجهات للكوزينة هابطين دموعها بقات واقفة ساهية شحال حتى رتاحت مسحات وجها وغسلاتو وطفات على الطاجين ) ..
~~~~~~~~~
خرجات هي وياه من العرس عصبها طلعات لطوموبيل رادخة الباب مدورة وجها عليه طلع بلاصتو كيشوفيها بإستغراب
طارق : مالك كتخبطي فالبيبان ياك لاباس ؟
حياة ( شافت فيه ) خاسرين زبابل دالفلوس على الخاوي اخويا منين انكلسو انص ساعة لاش ها تكشيطة ها ساك وسباط والصالون مالنا .. كون قلتي ليهم لا مجايش بلاش ولا هاد تسخسيخة ديال والو
طارق : وانتي مالك خسرتيهم من جيبك ياك انا لي خاسرهم ، الالة انا باغي نشوفك بيهم عندك شي مانيع والى بقات فيك الماكلة نديك تاكلي غير هنينا ..
حياة : عرفتي شنو غير بلاش عفاك بغيت انعس انا عييت .. ماكليت ماشربت مانشط تسخسيخ نهار كامل جبد ملس على الخاوي ( خنزر فيها وديمارا مبعدين على المدينة شافت فيه بإستغراب ) فين غادي بيا ؟
طارق ( شافيها ) خاطفك ازين ، ياك انتي مرتي حلالي ندير فيك مابغيت
حياة : لالا وقيلة لا هترتي ؟
طارق : وتشوفي الهتور دصح 36 عام دالهتور انخرجهم فك اشحايمتي ( عض على شفتو ) مداق فمك مزال فمي حلوة لمك
حياة ( توردو حناكها وشداتها الخلعة ) طااارق والله حتى نقولها لعمي عبد الخالق
طارق ( ببرود مستمتع بردة فعلها ) ݣوليها ومتنسايش تݣولي ليه على البيسة لي عطيتك فوق اصخر وهنا مݣابلين البحر لا يرحل ( شافيها بانت ليه كتشوفيه بخوف طلق ضحكة رجولية رنانة مخليها على أعصابها والخوف راكبها ) ..
وقف بيها قدام واحد الريسطو كبير جا بعيد على المدينة كان معروف بالمشويات .. هزات عينيها كدورهم فجنابها وفطوموبيلات لي كانو واقفين وناس لي كانو شي داخل شي خارج شافت فيه ، كان مسكت الطوموبيل وكيشوفيها مبسم مستمتع بالعصبية والخوف لي خلعها ..
حياة ( ماكرهات طير عليه تقجو ) درتيها بلعاني ياك ، بلعاني باغي تعصبني وتخلعني ؟
طارق ( بنفس البرود والملامح ) غير انتي لي مخلوعة لراسك .. حد ماقرب لك خاصك اتعرفي واحد الحاجة الغزال مكنديش شيحاجة بزز ولا بلا قانون مزال غاتكوني ديالي وبجنبي بشرع وديك الساع ماعندك فين تهوربي اشوية دالوقت ( فتح السمطة ) نزلي تاكلي نزلي
- نزلات بدورها تابعاه دخلو لريسطو تحت انظار الناس لي كيشوفو فيها بديك التكشيطة ، خداو واحد البلاصة ݣلسو فيها مكانتش باغية تشوفيه .. سخسخها على الخاوي وخالعها وداير معاها الفعايل ، جا السرباي عطاهم يختارو خدات هي طويجين ديال اللحم بالبرقوق ودجاج مشوي كانو مدخلين فل menu حتى طواجن .. نفس الاختيار ختار هو ولكن كتافى غير بدجاج بوحديتو
طارق ( بدون سابق انذار) عمرك بغيتي ؟
حياة ( شافت فيه بإستفهام ) كيفاش بغيت مافهمتش ؟
طارق : زعمة واش عمرك بغيتي شي واحد ؟
حياة ( بقات كتشوفيه تفكرات جواد بقات كتسول راسها واش جواد بغاتو بقات كتفكر وتوصلات لجواب لا جواد مابغاتوش جواد غير لقاتو حنين وظريف وتقيل ومرزن حركات راسها بنفي متنهدة ) لا عمري بغيت
طارق ( بشك ) بقيتي عام وانتي كتفكري العجب !!
حياة : كنفكر وكنسول راسي ، لقيت راسي عمري بغيت نقد نكون دويت فتيليفون ولا حتى تلاقيت ولكن عمري خليت شي حد يفوت معايا الحد ولا يقلل العفة عليا
طارق ( برم شفتو ) بحال داك خونا زعيعر لي كنتي تلاقيتي بيه ولا داك المزعزع ؟
حياة ( صدمها تفكرات نهار تلاقات بجواد فالافتتاح ديال ماجدة وبلي خلاتهم ومشات تلاقات بيه مافخبارهاش بلي طارق شافها ) غير باش تفهم وليد مكانتش كنبغيه وليد كنت كندوي معاه فتيليفون عمرو قلل عليا العفة ولا خليتو اصلا يقللها عليا وكان اول نهار نتلاقاو فيه هو داك النهار الصكع ..
طارق ( هاز حاجب ومنزل الثاني جاري معاها فهضرتها وفكل كلمة قالتها ) ولاخور ؟
حياة : كنت تعرفت عليه فواحد شوتينݣ درتو لواحد النكافة كانت خالتو ، وكان باغيني لزواج ماخيط معاه دروب تلاقيت بيه مرة وحدة وفقهوة ومع الناس وفاتحني فزواج من ديبار
طارق ( دور لسانو وسط فمو ) وعلاش مابغيتيش ؟
حياة : حيت هو كاين فأوروبا وانا مكنتش نقد نخلي ماما وخوتي ونمشي لبرا وفداك نهار لي قلت ليه لا بدلت نمرتي
طارق : وبغيتيه ضروري يكون عجبك ؟
حياة ( بجدية وصرامة ) طارق نعاود نقولها تيق ولا متيقش شغلك هداك انا عمري بغيت شي واحد لا داك وليد لا جواد حتى واحد فيه قلبي ماتحرك جيهتو ، نقد نقوليك كنت لقيت ديك المعاملة المزيانة وديك المحنة لي مالقيتهاش فبا حيت مكانش عندي بو حنين نحط عليه راس ومكانش عندي بو حنين لي يحميني من راجل مي لي مكايرحمش راجل مي لي كان مكرفص عليا ولي كان باغي يزوجني براجل شارف ويشد عليا الفلوس وفاش مابغيتش جرا عليا لزنقة شتي كون لقيت بو حنين ولا خو حنين يبغيوني ويحنو فيا كاعما نتعرف على دوك زوج كون راني قارية وخدامة شي خدمة زوينة حتى نهار لي نتلاقى بولد الناس لي يبغيني ونبغيه ، فهمتي دابا ولا نزيد نشرح ليك ( وقفات ) انوض نغسل يدي ... خلاتو متبعها بالعين ، مشات نيشان للطواليط بانت ليها دخلات مقابلة مع المرايا كتشوف فراسها عاضة على شفتها مابغاتش تبكي طلقات روبيني وكبات الما على وجها مداتهاش فالمكياج لي ممكن يخسر .. خرجات بنت من طواليط حالة ساكها وجابدة لانجيت ..
حياة ( شافت فيها ) عفاك سمحيليا ( شافت فيها ) ممكن واحد لانجيت قلقني هاد المكياج هههه
.... : مرحبا هاكي هادي ديجا عندي لوخرا دايرة ريزيرڤ فالساك هههه
حياة ( شداتو عندها ) شكرا بزاف ( بدات تمسح فالمكياج وحيدات دوك شفار لاحتهم حتى نقات وجها ورجع طبيعي تنهدات تنهيدة طويلة وخرجات من الحمام فتجاه الطبلة ديالهم ..
دخل من الزنقة فوقت معطل كان مالف 8:30 تلقاه فدار ولكن هاد المرة دخل مع 11:30 دليل كان لابس سروال كحل وݣاط فالكحل مع قبية فنفس اللون مغطية راسو توجه نيشان للأتوليي ديالو دخل بخطوات بطيئة كيتمشي ونفس الوقت كيحيد فدوك الخواتم لي كانو فيدو زطم برجو على طارو ولاحهم تم .. حط يديه بزوج على ديك الطبلة الكبيرة لي قدامو صدرو كيطلع وكيهبط كايحس براسو فيبل ، دخلات عليه بلاما يحس بيها حتى حطات عليه يدها وجابت راسها قدامو كتشوفيه ..
عنبر ( بتساؤل ) ماكنتيش فالخدمة ياك ؟
الروطال ( شافيها بعياء ) وباش عرفتيها ؟
عنبر ( مدات يدها ليدو وطلعاتها باستها ) يديك حمرين وجاي معطل ومكتجيش بهاد اللبسة وعمرني شفتك لابسها .. ومالف فاش كتجي كطلع عندي مكدخلش لهنا
الروطال ( جر الكرسي كلس عليه وجابها هي كلسها على رجلو ) وراك دماغ الفتيلة ( تنهد ) سويرتي يبقى عايش
عنبر ( غوبشات ) هي شخشختيه ؟
الروطال ( عݣد غوباشتو بصوتو الرجولي التقيل ) ماكنتش ناوي عليها ولكن فاش سقت الخبار شنو دار الق*** تعمات ليا البضيرة مابقيتش كنشوف ݣدامي ..
عنبر : ياكما ( حطات يدها على فمها )
الروطال ( هزهز راسو بالإيجاب ) البنت مسكينة كانت خايفة نجري عليها داكشي باش كدبات وݣالت غير تحرش بيها .. السيدة رزاها فشرافها فقلب الاوطيل ديالي
عنبر ( طاح عليها الضيم ) الله اكبر مسكينة علم الله بحالتها ، كيفاش غادي تعيش وكيفاش تكمل حياتها. الى جا شي ولد الناس والله مغايتيق بلي شي حد تكرفص عليها .. وعلاش تسكت راه هكا اتخليه يطغا كان خاصها ديكلاري بيه
الروطال : واش تي مريضة ، واحد بوكو لعاقة ايحير يخرج منها بحال شعرة من العجين وحدة كدير الميناج يلبقو ليها شي تهمة
عنبر ( تنهدات ) القةي ياكل ضعيف ، والى كان على هكا عبرتي عليه ( شافت قيه بخبث ) وانا كالس عليا عندي الخدمة وجهك قاصح
الروطال ( حط راسو على كتفها ) ماكرهاش شي مساج عيان
عنبر ( وقفات ) أجي ( جراتو من يدو مخرجاه من تم طلعو للفوق للبيت ) دخل دوش رعدا رتاح انجبد ليك حوايجك ( دار لي قاليها حتى وقفاتو بهضرتها ) ياكما شافك شي واحد ولا شافك هو ؟
الروطال : ماتخافيش عمر شي حد شد عليا شي حاجة اتهناي ابنت ݣلبي ( تبسمات ليه مشا للحمام وهي بدات كتجبد ليه حوايجو ) ..
خرج من الحمام لاوي عليه الفوطة .. لقاها جابدة ليه حوايجو لبس حوايجو من غير الفوقي بقا عريان ، جراتو بلاما تدوي ݣلساتو على الفوتوي لي حدا النموسية .. وجابت واحد زيت ديال الخزامة دارتو على ظهرو وبدات كتماصي ليه ، كتمشي ليه لدوك النقط لي فظهرو وفعنقو كان كيحس براسو مرخي وفيه غير نعاس بلمسات يديها حتى بدا كيكمع ، وقف على غفلة وزول ليها الزيت حطو وجرها ..
الروطال : أجي لهنا أجي
- جرها تكاها على نموسية وتكا حداها خدا يدها دارها تحت راسها وحط راسو على صدرها عنقاتو ليها بحال شي بيبي صغير كدوز على شعرو .. طلات عليه بانو ليها عينيه مسدودين وتنفس ديالو منتظم عرفاتو نعس بقات على داك الشكل حتى داها حتى هي النعاس ..
~~~~~~~~~~~
وصلها للدار نزلات بتكشيطتها باغية غير تنعس عيات .. قبل لاتدخل لدار وقفها ضارت عندو
طارق ( بهدوء وبصوتو الرجولي لي فيه بحة مميزة ) مزال مقلقة ؟
حياة ( بنفي ) عادي مامقلقاش بغيت غير نعس
طارق : شوفي حتى واحد فينا مكامل ، وحتى واحد ماتزاد وففمو مغرفة ديال الذهب ( هزات فيه راسها ) كلنا داز علينا الويل لا يغرك هادشي لي وصلنا ليه من راسي وجبد .. حتى واحد فهاد تريكة مجا ودار هادشي كونما تحكش ولكن ماتخليش هادشي يأتر عليك وزايدون راه باك لي خاسر ، باك لي ضيع وقيت زوين مع بنتو بنت بحالك نقية وحنينة وݣلبها بيض وفيها جعرة
حياة ( خرجات فيه عينيها ) انا فيا جعرة ؟
طارق : ومالك ( بتسلية ) عقلتي نهار لول فاش خرجتي فيا ولا نفكرك ؟
حياة : انت لي خرجتي فيا ماشي أنا ، انت لي طويل كتر من القياس حيدتي ليا كتفي من بلاصتو
طارق : وهاد طويل اتولي مقاسمة معاه نموسية وحدة ( غمزها حتى حمارو خدودها ) سيري ترتاحي وخوي راسك
حياة ( عطاتو بظهر وقفات ورجعات ضارت عندو بهدوء نطقات ) كيقوليك فاقد الشيء لا يعطيه .. خفت غير منخليكش فرحان ولا مرتاح وتندم على نهار لي تزوجتي بيا
طارق : بالعكس فاقد الشيء هو لي كيعطيه ومضوبل ، وغير تهناي عمري ندم على نهار لي تزوجت بيك فيه عارف راسي انكون فرحان انكون ناعس ونوض نزغرت ونرجع نعس ..
حياة : هههههه ( ضحكات حتى تغمضو عينيها ) باز
طارق ( قرب منها كتشوفيه بعينيها كيبريو وخصلات من شعرها تحلو من المقبط نزل بشفايفو على جبهتها باسها وبعد ) سيري تصبحي على خير
حياة : تصبح على خير ( حدرات راسها ودخلات ) ..
- صباح كان غير صباحات .. فاق بكري دوش صلى وجد القهوة ديالو سخن وحدة من الملويات لي دارت ليه كان مشلتت وزوين كيوجد فالفطور ديالو وكيدند ، مخد واحد راديو ديالو كان عندو من شحال كان فيه مومو حط الفطور ديالو فالبالكو وكلس كيفطر بإستمتاع .. سرح بتفكير ديالو وتنهد مبسم بلاما يحس ، هز التيليفون ديالو وسيفط ليها ميساج فالواتساب " صباح الخير فقتي ولا مزال ؟ " حط التيليفون حتى سمع صوت الميساج جاه .. فتحو لقاها كاتبة ليه " صباح الخير فقت قبيلات ودابا كنلبس حوايجي مغانبدا الخدمة حتى لديك 11 هكاك "
عماد ( بإستغراب جاوبها ) وعلاش ؟
ليلى ( جاوباتو ) غادي نمشي لعند الطبيبة قلتها ليك نسيتي ؟
عماد ( مسح يدو وجاوبها اوديو ) ماتمشيش بوحدك انا غانجي نديك صافي ، وجدي راسك انا جاي ( ناض ماعطاهاش فرصة تقول لا ولا تعتارض هز سوارت طوموبيل ودار وتيليفون رش من ريحتو وخرج .. طلع لطوموبيلتو وشد الطريق للعندها .. غير وصل سونا عليها علمها بلي كايتسناها ، نزلات من دار لابسة سروال دجين مع شوميز فالبيض واحد جيلي بالكروشي فاللون البلو ماغين ..
ليلى ( حلات الباب وطلعات سلمات عليه باليد ) علاش عذبتي راسك كنت انشد طاكسي عادي ونمشي ..
عماد : مكاين حتى عذاب طريقي هاديك ( ديمارا عطاتو العنوان غاديين وكيدويو فشحال من حاجة حتى وصلو )
ليلى ( حلات السمطة بغات تنزل ) شكرا بزاف المهم انا مشيت ( حلات الباب ومشات ) .. طلعات الفوق كانت ديجا واخدة رونديفو من تيليفون .. بقات كتسنى حتى عيطات عليها البنت ليتم ودخلاتها عند الطبيبة ..
.... : قولي ليا واش قريبة تزوجي داكشي علاش بغيتي تأكدي ؟ واش ديجا كانت عندك شي علاقة ؟
ليلى : لا دكتورة مكانت عندي حتى علاقة ، غير كان وقع ليا مشكل مع واحد السيد فالعائلة تعدى عليا هادشي لي قالو ليا حيت كنت ناعسة وماحسيت بوالو غير الخوف خلاني مانمشيش ندوز ودابا بغيت نتأكد ..
.... : واخا اجي معايا ( ناضت معاها تكاتها على الباياس دارت ليها رجليها فوق واحد الحديدات وفرقات ليها رجليها ) بغيتك بحال الى اطلقي بيبي ماشي تقبطيها بحال الى اتزحمي ( دارت لي قالت ليها ) مزيـــــان ( جابت واحد اللعيبة ضوات بيها حتى قلباتها مزيان برمات شفايفها وشافت فليلى ) العجب البكارة ديالك فبلاصتها مكاين حتى شي تواصل جنسي ابنتي .. بالعكس والبكارة ديالك من نوع لي صعيبة تفض دغية ماشي مطاطية ولكن مثلا فالمستقبا خص الزوج ياخدو الوقت باش يقد يفض البكارة ..
ليلى ( قربات تبكي بالفرحة كتقاد حوايجها ) دابا ادكتورة مكاين والو حتى واحد ماقرب ليا ؟
.... : لالا ابنتي مكاين والو حتى واحد ماقرب ليك لي قالك هكا اضحك عليك ، غير هو نهار إن شاء الله تزوجي ضروري تجي مع زوج ديالك باش نفهمو نوعية البكارة لي عندك باش هكا يعرف يتعامل معاك ..
ليلى : شكرا بزاف ادكتورة لهلا يخطيك ، خرجات من تما بغات تنقز وتغوت وتقول لناس كامل بلي مافيها والو هبطات كتجري مع دروج حتى حبسات عند الباب ديال الموبل فاش لقاتو مزال واقف كيتسناها مامشاش تبسمات وغرغرو عينيها وبلاما تحس مشات لعندو كتجري .. تلاحت بين يدين معنقاه وهو بدورو دور يدو على ظهرها معنقها كتردد ) ماوقع ليا والو اعماد مافيا والو غير كذبو عليا انا بيخير مقاصني حتى واحد مزالني بشرفي ..
عماد ( كيدوز على ظهرها ) الحمد لله على سلامتك هكا غاترتاحي وتعيشي حياتك بحال الى حتى حاجة ماوقعات ( عاقت براسها وبعدات عليه حشمانة حدرات راسها متوترة )
ليلى : سمحليا ( بلعات ريقها ) فرحاتني والله عاد رتاحيت وحسيت براسي تزاديت من جديد كنت عايشة فغبينة وماقاداش نشوف فعينين دارنا وديما كنفكر فداك نهار لا نتفكر او والو
عماد : ودابا علاياش ناوية ؟
ليلى ( بإستغراب) علاياش زعمة ؟
عماد : مغاتمشيش تفضحي بنات خالتك على لي دارو فيك ؟
~~~~~~~~~
فاقت من النعاس قضات اغراضها فالحمام لبسات حوايجها ونزلات للتحت لعند تودة دخلات عليها للكوزينة كانت المساعدة وتودة كيوجدو الفطور باستها وكلست ..
تودة : كيداز العرس لبارح ؟
حياة : زوين جيت طحت دودة ، عمي عبد الخالق مزال مجاش ؟
تودة : مزال ابنيتي ݣلت نفطر ونمشي للمحال اجي تفطري ، خرجو الفطور للفوق الطبلة حطوه وݣلسو كيفطرو مجمعين .. حتى تسمع الباب تحل وصوت عبد الخالق كيردد :
دخلي الالة مرحبا بيك ، تودة دورات راسها كطل بإستفهام حتى كتبان ليها مرأة كبيرة داخلة شادة عكاز وكتمشى غير بشوية وقفات بلاما تحس لايحة الكرسي وراها طاح للأرض قلبها كيضرب بجهد ويديها كيترعدو وعينيه عمرو بدموع بغات تغوت خرجات شهقة من شفايفها .. وسيدة لي دخلات بدورها وقفات كتشوفيها وعينيها تسرسرو بدموع ملامح وحها كانت زوينة كتشبه لتودة خطوط الكبر وقساوة زمن باين على وجها بصوت رقيق وباح نطقات :
فاطنة بنيتي ..
الأم نعمة الأم هي داك الصدر الحنين لي كتهرب ليه فاش كضيق بيك الدنيا كتحط عليها راسك وكتنساه وتنسى كاع الهموم ولي تحرم منها هو لي كيعرف بحقها .. تلاحت بين يديها كتبكي وكتنحط بواحد الصوت كيبورش صوت فيه نوع من النواع وضيم والعتاب ، العتاب على الخوت لي مارحموهاش وحرموها من مها العتاب ديال باها لي مسامحاه دنيا واخرة حيت كان باغي يزوجها براجل قدو .. العتاب للحياة لي ظلماتها وكرفصاتها ومكانتش عادلة معاها فشحال من حاجة واخا كانت كتبان قوية ومرأة وقادة .. ولكن الداخل كان عالم بيه مولاه عالم بيها شحال توحشات تعنق مها وتشم ريحتها وتعطيها شعرها ظفرو ليها كيف كانت كدير .. توحشات تخليطات لي تعلمات منها وكلام الحنين وضحكتها واي حاجة فيها ..
نوضهم عبد الخالق وحياة ݣلسوهم ، مدة وهوما مخشيين فبعضياتهم غير كيبكيو مكايدويوش ، حتى بعدات تودة عليها كتشوفيها وتنهدات كانت كتشبه لمها بزاف فولة وتقسمات على زوج ..
تودة : كيدايرة ميمتي كيبقيتي توحشتك اميمتي توحشتك كيتك فݣلبي يعلم ليها اربي بوحدو ( نزلو دموعها )
يامنة : وكو شتي انتي اكبيدتي ، نظل نبكي زربي عالم بحالتي أحيانا ابنتي الله يسمح لي كان حيلة وسباب
تودة ( تنهدات ) لهلا يسمح ليه ، منسمح ليهم حتى لغدا قدام الله سبحانه
يامنة ( جرات يدها طبطبات عليها ) ماتݣوليش هكا ابنيتي خلي ݣلبك سميح واخا هكاك خوتك مابقاوش كيكانو تهدو وكبرو
تودة ( تبسمات بألم ) بحال عوايدك امي كدافعي عليهم ، كون بصح تبدلو كون قلبو عليا مايحرموش بنت من ميمتها الله يهديك الى ماسمحت ليهم ماعندهم فين يحطو جنابهم الى سمح ليهم الله انا مسامحة ليهم ربي فوق منهم الله ياخود فيهم الحق ..
عبد الخالق : وقيلة داكشي لي ݣالت لالة يامنة كاين ، حيت فاش جيت لعندهم لدار ماجراوش عليا الصراحة تݣال
تودة : هههه احيتاش شافوك بطوموبيلتك كون كنتي شي مكحط وتشوف ، دوك الناس هوما لي خلاوني كنتلاوح من قنت لقنت هوما سبابي حوما لي بعدوني على مي وهوما لي بمسبتهم ماحضرتش لݣنازة با انا ماعندي خوت براكة امي حدايا هداك هو الرباح دابا ( تبسمات ) اتبقاي معايا اميمتي
يامنة ( تنهدت ) مانصيبش ابنيتي انا بحال ديك الحوتة الى خرجات للبر تموت .. مانکدش نخلي داري ونخلي فراش باك ونجي للمدينة
تودة (تقلقات ) مابغيتيش تخليهم ياك واخا كبرو ودارو ولادهم ، انا ماشي بنتك حلال عليهم وحرام عليا انا ؟
يامنة : الله يهديك ابنتي ، خوتك راه بديورهم مع حفايدهم ، وانا معايا نادية بنت عبد الله هي لي كالسة معايا او وليداتها طلقات مسكينة وسكنات معايا مݣابلاني ومونساني هي وليداتها
تودة : ايوا منين مكاينينش معاك لاش اتبقاي تم ؟
يامنة ( سرحات بعينيها وغرغرو عينيها بدموع ) كنشوف باك فكل بلاصة فديك دار ، داري كتبها ليا باك قبل لا يموت واخا كان قاصح شوية ولكن انا كان حنين فيا .. فينما ضرت فدار كنشوفو ( نزلو دموعها ) مخدتو الركينة لي كان يكلس ويتصنط للراديو الكرسي لي يكان يبرك فيه ( تبسمت وهي كدوي عليه ) جلابيتو المعلقة وعكازو وسلهامو كانحس بيه معايا
تودة ( بدات كتبكي ) ماتسامحتش معاه امي غدتو بقات فݣلبي
يامنة : رضا عليك أبنيتي وسمح ليك ، کالها ليا وهو على الفراش بالحرف الى كان رضا فالأرض يطلع لفاطنة والى كان فسما ينزل ليها وطلب منك السماحة .. وخلا ليك واحد الارض لي كتي ظلي تلعبي فيها خلاها ليك فسميتك بقات هوكاك وريقاتها جبتهم معايا نيت ..
تودة : الله يرحمو ياربي خلينا من الوراق ، اتبقاي معايا دابا ماترجعيش حتى نشبع منك واخا عمري نشبع ..
يامنة : إن شاء الله ( شافت فنسيبها ) الله يرضي عليك اولدي جبتؤني حتى لهنا ( شافت فتودة ) فين هي بنيتك ؟
تودة : كاينة فدارها دابا نݣوليها تجي ( عرفاتها على حياة ومن بعد ناضت للعند حليمة المساعدة علماتها باش توجد الغدا يكون هماوي حيت اتعرض على العائلة فرحتها كانت كبيرة مقاداها فرحة ) ..
فدار عند أدريس ، واقفة ماجدة هي وسعاد حاطين بلاطويات هماويين ديال الفضة وحاطين كترت البيجامات والحوايج الداخلية الروايح لي غايشوف هاد المنظر غادي يعرف بلي لي قدامو دهاز
ماجدة : ربي مالو مايمشي دقة دقة ، يدير الخطبة بعدا وعاد العقد زربان
سعاد : خلي عليك خوك حنا المباركين لي غايتزوج لينا الحمد لله ، يدير كانونو حتى هو طليقتو راه شافت حياتها وحتى هو جا الوقت لي يشوف حياتو
ماجدة : وراه عرفت غير زرب علينا اخالتي ماوجدناش على تيساع ، ياك كان قالك يخطب هو الاول بغيت انعرف اش تبدل
سعاد ( ݣلسات كتقاد فالحوايج وتستف فالبلاطو بتاويل وتبسينة على وجها ) احيانا عليك غرتي حيت سبقك
ماجدة ( كتقاد فروايح ولي پاك ) والله اخالتي ماهكاك .. غير زعمة ماوجدناش كولشي بتاويلو وأصلا انا قصة وهو حتيت انا باغية العرس هو لا مابغاهش باغي يدير العشا بين العائلات ..
سعاد : خليه ضبر راسو هو قاد على هادشي دهازها هاهو واجد والوريقات راه كيجريو عليهم
ماجدة : واش انتي شفتيها أخالتي ؟ انا جحموم ماوراهاش ليا
سعاد ( تبسمات ) مزينها بنت ابنيتي تبارك الله راكي عارفة سوسيات زينات فنة تبارك الله ، وعلى لي ݣال عصام مها الله يعمرها سلعة
ماجدة ( حطات البلاطويات لي قدات ) حتى عصام يستاهل مسكين براكة غير لي داز عليه مع ديك جحمومة ديال هدى .. دوزاتها عليه يجي لدار يشقى يجفف يصبن وعاد يلقى عمران مسكين طايب بالبول وكاكا ويبدل ليه ماخلا بيها طبيب نفساني عند بالو عندها الاكتئاب ..
سعاد ( تنهدات ) وليدي ماعندو زهر ياربي تخلفها ليه فهاد البنية ياربي ، داك الولد كان خاصو يبقى مع باه ماشي معاها
ماجدة : مابغاش يحرم دري من مو وهو مزال بيبي ، وسبحان الله حتى كدب عليها ديك الكدبة عاد تسکدات مع راجل الثاني وداتها فولدها
سعاد ( شافت فيها وزݣات ) أشمن كذبة ؟
ماجدة ( تبسمات ) واحد نهار تعطل فالمجية وبقات محكرة عليه وقاليها كنت مع لالاك ، وهي عند بالها بصح فداك الوقت صافي نوا يطلقها وعي باقي لدابا عند بالها راه خانها وهو قاليها هكاك ابلعاني حيت كانت عيقات بزاف لاش كانت باغية توصل اللهم أعلم ..
سعاد : ايوا مامكتابين يكملو وصافي هي مكتاب تزوج غيرو ، وهو مكتاب ليه هاد بنت الناس .. بقاو على الحتيت وجموع حتى تاصلات بيهم تودة دوات مع سعاد قطعات معاها وشافت فماجدة ) فاكنة عارضانا للغدا ݣالت بلي عبد الخالق جاب ليها مها وبغاتنا نتجمعو كاملين .. مسكينة كوراه ربي عالم بيها دابا وميمتها معاها
ماجدة : اه مسكينة على سلامتها ..
~~~~~~~~~~~~~
واقفة قدام المرايا لابسة واحد لونسومبر ديال الدجين مع فولار فالبلومارين وشيبي بارد .. دارت ساعة ومكياج خفيف لبسات سبيبيط مريح ونزلات التحت عندو
الروطال : هاد التعطال شتك وليتي انتي وياه بحال التوام
عنبر : ولاواه لا تزيدش فيه ( جرها عندو معنقها كتشوف فعينيه ) ويلاه انتعطلو على ماما
الروطال ( بخبث ونظرات شيطانية ) توحشتك ضربيها بشي شطيحة مليحة الفتيلة شحال هادي مابرعتي راجلك حبيبك وسمعتيه داك صويت ازينة تبريحة ( غمزها )
عنبر ( ضحكات ) وراني حاملة أحنيني تكايس عليا ، خلي حتى تفوت 3 شهور اللولة دالحمولة ونبرعك كبيدتي
الروطال ( زاد ملصقها عليها عاض على شفتو كيشوفيها غارق فعينيها ) التبريعا غاتكون مضوبلة ازين اوجدي ليا راسك ( تبسمات بأنوثة عض على باطن حنكو مكمل كلامو ) شهوتي نشوف داك الكولون لي كتي لابسة المنمر اشميكيرة ديالي
عنبر : النمر راه كيلبسوه الكلاص الى فخبارك
الروطال : واخا اشريميلة ديال الروطال زيدي لا نسرح مك هنا ، كنسى بعد المرات بلي خاص نعطيك شبر ديال تيساع
عنبر ( قهقهات بأنوثة وتملصات منو ) وتكايس على راسك احبيبو ( ميقات فيه وخرجات )
الروطال : وليتي كتلغبي عليا العشرة البعلوكة نتفاهمو من بعد لي خلص يودي حسابك غادي وكيتقال الفتيلة ..
يتبع...
التعليقات
لا توجد تعليقات بعد، كن أول من يعلق.