محتوى القصة
- ماجدة ( شوية وتوحل ليها دوزاتها غير بجغمة ديال أتاي ) : كتفلاي أدنيا ياك والله حتى كتفلاي
- دنيا ( بقات كتشوفيها بلاما يتبدلو ملامحها ) : جيت كنتفلاى أماجدة ( بجدية )
- ماجدة : مايمكنش يكون دماغك صافي وكتفكري فهادشي .. كروصة ادنيا كروصة خايبة حتى لمعاودة شنو غاتقولي لداركم عمي خوك خواتاتك ؟
- دنيا : كل واحد حر فحياتو يدير فيها لي بغا انا حياتي هادي وندير فيها لي بغيت بغيت نخدم ونضرب تمارة ونعرق على فلوسي .. من كروصة للكيوسك للمحال إن شاء الله وهي غادية
- ماجدة ( تنهدات ) : واخا ديالاش هاد الكروصة لي بغيتي ديري ؟
- دنيا : غاندير كريپ بأنواعو إن شاء الله .. دابا دايرين واحد تراند ديال شوكولاطة دبي ، واندخل حتى مداقات مغربية بحال أملو وكريب بالعسل الحر حتى هو .. ومن بعد إلى تمشى ليا ندخل حتى المشروبات الساخنة
- ماجدة ( هزهزات براسها ) : صراكة بون أفيغ .. عجباتني الفكرة وخا قضية الكروصة جاتني بيزاغ ولكن انت ولي رتاحيتي فيه جامعة شيحاجة بعدا ؟
- دنيا ( مسحات فمها ) : واحد براكة قليلة وصافي .. عرفتي شحال هذا ماتكسيت كنلبس غير سروال يسرى حيت هي كدير الحجاب راك عارفة
- ماجدة : وخاصك ضربي حسابك وتساومي وشوفي داكشي باش غايطلع عليك .. والكروصة حتى هي هادشي راه خاصو ݣلسة وتفكري ليه
- دنيا : دايراها فبالي السلعة كاين منين وغانخود حاجة جديدة على السوق .. الكروصة غانقلب فالانترنت بعدا مالقيتش نمشي لشي سوق كيكونو تماك الكرارص باغيين يبيعوهم ماليهم فيا منصايبها عند النجار ولكن غاطلع عليا غالية وانا الفلوس زايدين فيا
- ماجدة : طارق يعاونك اصاحبتي ولا فاروق خويا
- دنيا ( خرجات فيها عينيها ) : عرفتي وتخرج من فمك أماجدة قسما بالله لا وجهي مزال تشوفيه ولا دويني أنا ݣلت ليك .. شغالي انا غانقد بيهم من اولهم للأخرهم جتى الى ماصدقش ليا هاد البلان مغانسمع حد كيمنن عليا واخا يكون خويا
- ماجدة : صافي صافي واخا ( مسحات على فمها ) والله لا دويت ولا قلتها لحد ..
___________________
- كان قريب يخرج ولدها من ليكول .. عاد سالات شغالها ودخلات لدوش دوشات خرجات لبيتها لبسات بيجامة سخونة كتدهن فراسها وساهية ، كون شي واحد قاليها غاتبدل مغاتيقوش شكون قال هي تولي طيب وتولي متولة فشقاها وطيابها يضربو بيه المثال وبنقاوتها .. كون طلو عليها شحال هادي يمكن الخبز مكانوش يشدوه من يدها ولكن كان فات الفوت حتى خربات دارها وخلات راجل لي بغاها وبغاتو يخونها واخا كانت هي سبب ولكن بنسبة ليها كون طلقها ومايخونهاش كرامتها تجرحات ومارضاتش تعتارف بغلطها .. فداك الوقت كانت بغات تخدم تحماق وتخدم سامحة فدارها حالتها الى مجات السيدة تجمع دار ماتجمعش تبقى هكاك واش كان إكتئاب ولا شنو بيها مافهماتش ( تنهدات ) نهار تزوجاتو كانت نقية واخا مكانت كتعرف طيبة بيضة وحدة ولكن راسها كانت مهلية فيه حتى رجعات حتى حالتها مكدور بيها ( بهمس) حسبي الله ونعم الوكيل فلي كان حيلة وسباب ( تبسمات فاش تفكرات راجلها فؤاد نعمة عوضها الله بيها كيبغيها ومتفهم وبقا صابر عليها وعلى قبلو تبدلات للأحسن وكيبغي ولدها بحال الى ولدو ) سونا تيليفونها مقاطع تفكيرها ..
- هدى ( حطات لي فيدها وهزات تيليفونها مجاوباه) : وي حبيبي ؟ الحمد لله اكبيدة انا شوية وغانمشي نجيبو ( متفاجأة) وايلي وكون علمتيني شنو غاندير دابا ؟ صافي صافي واخا نجبد اللحم من الفريݣو نخليه يطلق ونمشي نجيب عمران ونجيب معايا لي خاص .. معاياش غايوصلو ؟ صافي مزيانة يلاه احبيبي حتى انا كنبغيك ..
__________________
- ماتقبلاتش خطبة ولدها مابغاتش دوز ليها مايمكنش يتزوج وحدة شيخاها بنسبة ليها ماعندها لا أصل لا مفصل .. عينيها كانو كيطلقو أشرار سمعات بنتها وهي تشكر وراتها التصاور شافتهم شعلات فيها العافية غايديو ليها ولدها بحال شريب الما بنسبة ليها هي داخلين على طمع وضرت بيه وعلم الله شنو عطاتو حتى بغا يتزوج بيها شيخة ومطلقة او بولد .. فتحات دريسينغ ديالها جبدات واحد جلابة هماوية شعرها خلاتو مطلوق دار عليها واحد شال مغطي غير نصو فرجليها لابسة بوتيو هزات ساكها تيليفونها وسوارت طوموبيل والبلاسة فين نعتات ليها ماجدة بلاما تحس من أسىلة مها فعقلها وعارفاها .. خرجات وهي سادة باب دار توجها لطوموبيلتها ركبات فيها وديمارات ..
___________________
- وصل الروطال للمدينة القديمة .. بلاصة طوموبيل وهبط هو وياها متوجهين عند واحد السيد كيدير لحم الراس مبخر مع وصلو لقاو الدنيا مبوربية عندو عامر مكاينش بلاصتك
- الروطال ( بعصبية ) : **** بنادم تݣول كاين عام الجوع
- عنبر ( خنزرات فيه محركة راسها بلاحولة ) : كون امشينا كلينا مقيلة فالمرصا .. حرك ليها راسو بيلاه تبعاتو راجعين للطوموبيل ركبو وشدو الطريق للمرصا ..
- وصلو للمرصا الهوى كان كيحمق الجو لي كيعجبها الشتا خلات الاثار ديالها وداك البرد والجو مغيم كيحمقها وكتفضلو 20 ألف مرة على فصل الصيف .. واخا الصيف كيعجبها بحاجة وحدة فاش كانو والديها عايشين وكتجي خالتها رشيدة عندهم وكيتجمعو ويفرشو حدا واحد الشجرة يتبردو .. هادشي لي كان كيعجبها فصيف ، بلاصة طوموبيل ودخل هو وياها خاشية يديها فجياب المونطو شعرها كيلعب بيه البرد داخلة معاه كتوجهين لواحد القهوة تم ضار عندها :
نݣلسو هنا ولا نݣلسو اونفاص مع البحر ؟
- عنبر ( تفكرات المسلسلات التركية فاش كيشريو الكفتة ويكلسو قراب للبحر ) :
حدا البحر حسن .. توجو للكراسة لي قراب للبحر ، الفلايك ولباركويات بعاد المرصا كانت خاوية جرات الكرسي ݣلسات وهو بقا واقف :
مقيلة ياك ؟ عنبر هزهزات براسها خلاها ومشا وهي ساهية فالبحر وكتنهد .. فين هي وفين كانت شحال هذا وطريق لي غادية فيها وقف عليها جار الكرسي وݣلس
- عنبر ( شافت فيه بنص عين ببرود ناطقة ) : علاش كدير هكا أفاروق ؟
- الروطال ( شافيها بدون فهم ) : أش درت تاني ؟
- عنبر : الساعة لي جايب ساوية الملاين الصحيحة .. دوك الحوايج ديال الخطبة راه بزاف ياك شي باس مكاين
- الروطال : تي مالك كتدوي وانت مبجوغة ؟
- عنبر ( بإستفسار ) : كيفاش مبجوغة ؟
- الروطال ( رجع بظهرو اللور عينيه قانيين عليها ) : بحال إلى ݣلتي مزموتة ياكما القوادس مفرݣعين ليك ( غمزها ) ..
- عنبر ( تحرجات وحمارت طاح ليها على النقطة بحال الى سيد عندو خبرة ) : براكة من البسالة افاروق عيقتي عليا والله مكانتش كنحسابك بحال هكا دوي مقاد
- الروطال ( هزهز براسو ) : واخا غانحزمو ونخليه يمشي على سطر
- عنبر : شنو هدا ثاني ؟
- الروطال : كلامي .. دابا خلينا من تخربيق ديال الهرمونات المݣلوبين ، نكونو غاديين ونشري ليك شكلاطة تقادي بيها مجاجك العودة ( شافيها ) واخا مابينك وبين العودة اداك شعر
- عنبر ( خنزرات فيه ) : شتك بحال الى كتعاير فيا عيني عينك زعمة بلا حشمة بلا حيا بلا موجب شرع ولا قانون مالي كيجيتك بسلامة ؟
- الروطال ( بيدو ) : وقيدة وغاتشعل .. قاطعهم السيد لي حط ليهم اتاي وشلاضة هي الاولى والخبز ورجع بحالو
- عنبر ( دارت رجل على رجل كتبرݣم ) : انا بعدة وقيدة ماشتيش راسك كوينيدي لاخر
- الروطال : راه ݣتلك طوال زمان ولا قصار غانخلي دار عشتك .. لسانك غادي وكيطوال ديري عقلك ياهاد المرة ..
- مجاوباتوش جاب ليهم السيد المقيلات بداو كياكلو بسكات كانت الماكلة بنينة لحسات المقلة وطبسيلها ماخلات فيه والو طرطقات صباعها عاد رجعات فيها الروح .. هز فيها عينيه كيشوفيها .. هزهزات ليه راسها بمعنى علاش كتشوفيا
- الروطال ( بصوتو الرجولي وهاد المرة كانت حاكماه نبرة الجدية والهدوء ) :
خاصنا ندويو اعنبر
- عنبر ( لمسات فملامحو الجدية ) :
فاياش ؟ ياك لي كاين دوينا فيه وتفاهمنا عليه ؟
- الروطال ( ساس يديه مجغم جغمة من كاسو كانت هي الاخرة رجع هز فيها عينيه ونطق بسؤال نجاش لبالها ) :
كتصلي ؟
- عنبر ( بهدوء ) : اه الحمد لله .. هزهز راسو مدوز لسانو وسط فمو وعلى سنانو ) علاش سولتيني ؟
- الروطال : باش نعرفك واش غادي تفهمي هادشي لي غانݣولك ولالا .. الهضرة ديال المعقول ابنت الناس الزواج لي غايدخل ليه خاص تكون نيتو صافي واحد الحاجة لي هي مقدسة خاص الواحد يحتارمها ..
- عنبر ( شافت فيه بجدية ) : داك نهار خوك كيدوي بالألغاز عتقتيني انت ودابا رجعتي بحالو .. واش هادشي ديال تشويق عندكم فدم مافهمتش
- الروطال ( جابت ليه الضحكة ) : الزواج الى دخلو ليه جوج وكان مزور بيناتهم كيكون حرام فخبارك هادشي ولالا ؟
- عنبر ( مكانتش فبالها اصلا هي يلاه بدات تصلي وتقرا القرآن مزال شحال من حاجة فدينها مكتعرفهاش يلاه غادة شوية بشوية ) : لا مافخباريش حتى قلتيها ليا انت
- الروطال : بمعنى واخا نتزوجو وتسكني معايا فدار وحدة غاتكون حرام ، بحال الى مابيناتنا حتى ورقة فهنتي البلان دابا ولا نزيد نشرح ؟ وتݣدي تسولي شكون ما بغيتي غايݣولك نفس الهضرة
- عنبر ( بقات كتخمم ) : وخوك علاش ماقلبش فهادشي قبل لا يدخلنا فهاد زعلوك هدا .. مدخلنا فهاد البيعة وشرية أهكاك فالصو ( شافت فيه شافيه هاز حواجبو ) ماشي بداك المعنى أفاروق ماديش عليا راه فاش كتكون فيا البيريود كانكون اكنبلز اغير دوزها بجغمة دالما
- الروطال : دوي مݣاد يا هاد المرة ، هو براسو مكان عارف بتلفة ديال خدمتو رونات ليه دماغو
- عنبر : وشنو الحل ؟ واش صافي هادشي مابقا فيه والو ؟
- الروطال ( شافيها بجدية مراقب ملامح وجها وعينيها كيفاش كتشوفيه ) :
هي ندخلو لهاد الزواج بنية مزيانة ماشي بنية ديال انو زواج مامنوش .. ( شتفيها كتشوفيه وباين من عينيها بلي مزال مافهماتش ) يعني غادي نحتارمو هاد الزواج ندخلو ليه بنية راه زواج ديال الصح من الاخر انا مغاتكوني غير انت فحياتي وعمري ندير شيحاجة معاك لي تقلل منك وانت مديري معايا لا هاه لا هاه
- عنبر : زعمة بحال الى حنا تزوجنا دبصح زواج دصح منديرش داكشي لي بغيت ونعيش كيف بغيت وانت كذلك ياك ؟
- الروطال : الرضا زواج دصح فهمتي حلالا طيبا مبارك فيه مكاين لا مزور لا هوم يحزانون
- عنبر : ولكن انا مكنبغيك مكتعجبني !! كيغانديرو ليها ؟ ( جاتو فاص )
- الروطال ( هز حواجبو من صراحتها كتجيه نيشان مكاين لا هك لا هك ) : لا انا غاكنموت على حُبك ، أش جاب هادي لديك تي مالك مطنݣة
- عنبر :هاهو بدا راه اكندويو معاك ابنادم دوي مقاد لا حول ولا قوة الا بالله العلي العظيم دابا قول ؟
- الروطال : حتى قمقوم مݣاليك بغيني بقاي فهمي الهضرة فين غادية وعلاش داويين شكون جبد شي حب ولا ضرك ، حاجة وحدة مزال عند كلمتي فيها حاجتي ماتحاديهاش اعنبر أنا كنݣولك .. نݣطع ليد لي تمد ليا على حاجتي
- عنبر ( بقات ساكتة كتفكر فشي حوايج لي مشاو ليها لبالها هضرتو الاخرة كاعما ركزات فيها كتفكر فحاجة وحدة وبلا ما تحس ولا ضرب حسبة لكلامها ودير للسانها الفران طلقات الكلام لي كانت كتفكر فيه هزات حجبانها ) :
والفراش ياكما غانشركوه ؟
- فالكوزينة حياة كتغسل فالماعن ديال الغدا .. ستفاتهم فشبكة حتى تسقطرو عاد رجعاتهم للبلاصتهم ، سونا الباب وتمات خارجة من الكوزينة كانت رشيدة باغية تفتح الباب :
غير خليك انا غادي نحل الباب .. هبطات مع دروج طالقة يدين بيجامة ديالها لي كانو طالعين ، فتحات الباب كتبان ليه سيدة أنيقة واقفة كتشوفيها بملامح باردة نطقات بصوت بارد بحال ملامحها :
دار ( بغات تقول الشيخة وهي تسكت) عنبر هادي ؟
- حياة ( طلعاتها ونزلاتها فايتة شايفاها وماعقلاتش فين ) اه هي هادي ولكن هي مكايناش ؟
- خديجة ( طلعاتها من رجليها لراسها ) : كاينين دارهم شي واحد فالعائلة ديالها ؟ ( على رشيدة ) :
حياة شكون دق ؟ .. رجعات حياة شافت فسيدة :
اه كاينين ولكن شكون انت ؟
- خديجة ( تبسمات بإستهزاء ) : انا مامات فاروق .. بغيت ندوي مع مها ولا باها ولا شي حد فعائلتها .. خلاتها حياة تدوز وهي حاسة بلي مناوياش على خير من تعابير وجها سدات الباب وطلعات موراها كتشوف فالمشية لي كتمشى بيها بتاويل
- تودة هزات راسها لي كانت عاكفاه بزيف حياتي كان ضارها .. سميرة مكانتش مشات لعند بنتها ورشيدة لي كانت كتشوف فسيدة لي تمات داخلة عليهم
- حياة ( وقفات حداها ) : هادي ماين فاروق خطيب عنبر .. هزات رشيدة حجبانها وناضت بفرحة تسلم عليها
- رشيدة ( سلمات عليها ولوخرا وقفات بلا حراك وببرود مارداتش ليها السلام ) : مرحبا بيك زيدي دخلي ݣلسي .. وقفات تودة كتشوف فردة فعلها ماشي شي وحدة لي داخلة ضاحكة ولا بشوشة الزمان لاقاها مع بزاف ديال الناس داكشي باش كتعرف لي مزيان ولي مغبي الضغينة .. ݣلسات خديجة بلاما تسلم على تودة
- تودة ( شافت فخديجة ) : مرحبا بيك .. زارتنا البراكة ݣالو لينا كتي عيانة الله يشافيك ويعافيك ( شافت فرشيدة ) رشيدة عمري اتاي
- خديجة ( حبستها بيديها وظفارها لي دايرة ليهم لوجيل فالبوردو ) : لا بلاش عليك ماجيتش نضايف جايا باغية ندوي مع دارهم ديال عنبر
- تودة : انا مها وهاديك ( أشرات للرشيدة ) خالتها أش حباا الخاطر ؟
- خديجة ( دارت رجل على رجل بعجرفة ) : ݣالو ليكم بلي كنت مريضة .. كنت عارفاهم مغايجيوكمش للطريق
- تودة ( ببهدوء ورزانة ) : حتى انا حسيت نيت هكاك .. أش حب الخاطر وكان الالة أش سماك الله ؟
- خديجة : خديجة .. كملات تودة كلامها :
أش حب الخاطر الالة خديجة
- خديجة : شوفي لي نطولوه نقصروه انا وادي جا لهما بلا شواري وبلاما يدير ليا قيمة دار لي فراصوة.. ولدي مناشي حمقة نقبل ليه ياخود وحدة شيخة ومطلقة وعندها ولد من الفوق ( رشيدة ضارت شافت فيها فاش سمعات عندها ولد ) ولدي بقيمتو وعندو بلاصة فالبلاد كيعرفو الصغير والكبير خاصو وحدة من مقامو ماشي وحدة لي
- تودة ( حبساتها ) أيوا يوا أديك زعرة المزورة ماشي حيت كالسة فداري تبوردي عليا .. شيخة وقارية وبقيمتها الحمد لله وشكر لله والى كانت مطلقة راها ماشي شيحاجة لي عيب هي بعدا راه طلقات بكري وهي صغيرة كيت لي حتى شاب عاد ولا يوقف فالمحاكم على الطلاق ( كانت عاودات ليهم ماجدة بلي مها واقفة على الطلاق مع راجلها )
- خديجة ( ضحكات بإستهزاء ) : هاشنو قلت دابا ولدي أنا يتناسب مع عائلة وحدة كتدوي بحال هكا .. شوفي بلا كلام طويل وملاغة خاوية ماعندها باش تفيد أحبيبة ، هاد الزواج والله لا كمل واخا تنطابق السما على الارض ولدي لا ديتوه ولا ضرتو عليه
- تودة ( بقات ساكتة فيها ماينوض يشدها ينتفها يخليها كتڤيبري ولكن مابغاتش تبان هي القبيحة .. تبسمات هزات يديها وجبدات نواضرها ونطقات بتأكيد ) : وكنقسم ليك بالله لي خلقني وخلقك .. الى هاد زواج غايكمل او ولدك غايتزوج بنتي مانتسماش فاطنة الكابو الشلحة الخميسية الى ماخليت ولدك يموت عليا ويحماق عليا ونشد ليك البلاصة اجي وشمي ليا ودابا غادي تنوضي وتكركبي مع دروج ولا كنقسم ليك بالله المعبود حتى غانوض نسيفطك من هاد السرجم ماشي حتى من دروج يلا رول ..
- خديجة ( وجها صفار كلها كتىعد وقفات ) : واخا دابا نشوفو تريكة شماكرية تريكة تاشياخت
- حياة ( جراتها من دراعها دفعاتها ) : دردربي عليا لا انا لي غاندير فيك شرع يدي سبسبوة ديال الخلى الخامجة المارجة .. تنطرات منها خديجة هابطة بزعاف خرجات من الباب كترعد خابطة عليها حياة الباب ..
- رشيدة ( بقات ساكتة كتشوف فتودة وهي مبهضة ) : فاطنة أشمن ولد اختي علاش كدوي هادي
- تودة ( بزعاف) : كتخرف شارفة الهارفة .. جيبها فم وݣول اشمن ولد فالولاد حتى أنت أرشيدة طلعي ليا الخ** لراسي عنبر عندها شي ولد شتيه ياك داك الكلب كاليها مكتولد
- رشيدة : الله يعطيها مصيبة تصيبها فصحتها نص بلاصة الخانزة
- تودة ( خنزرات فيها ) : داكشي باش ضرتي ونضتي ليها وأنت بقيتي مبهضة بحال موكة ( ناضت طالع ليها الدم لبيتها سادة عليها
____________________
- عنبر : والفراش ياكما غانشركوه ؟
- الروطال ( عينيه فعينيها ) : متايقاش فراسك ولا خايفة من جنابك ؟
- عنبر ( رمشات بزاف ديال المرات .. كانت فيها عادة من توتر كتبقى ترمش بزاف ديال المرات ) : هاء علاش بسلامة غادي نخاف ولا نتخلع وانا الحمد لله وشكر لله تايقة فراسي
- الروطال ( دوز لسانو على شفايفو ) : ومالك كترطاي أش كاين ؟
- عنبر : فاروق راه خاص نسول فهادشي راه قلتي بلي غاندخلو لهاد الزواج بنية حقيقية ماشي داكشي لي كنا ناويين وانا مكانبغيك مكتعجبني ( طلعاتو ونزلاتو أتكون معمية الى كان كيجيها خايب طولو قلدتو توقفي معاه كتحسي برجولة خارجة منو وأكثر حاجة كتعطيها الرهبة هي الشوفات ديالو وصوتو كيعجيها غير طبيعي )
- الروطال : دوزتي سكانير ديالك مزيان شنو لي مامخليكش تفكري فزواج ؟
- عنبر ( كتلعب بصباع يديها دخلات خصلة ورا ودنها ونطقات ) : عمري كنت كنفكر نتزوج ولا نعاود نربط حياتي بشي واحد فاش مات بدر حيت بصح كنت كنبغيه بزاف .. كنت كنقول بلي عمري نعاود حياتي وغانعيش على الدكريات لي خلى فحياتي
- الروطال ( حك جنب نيفو ) : ودابا ؟
- عنبر ( هزات عينيها فيه من بعدما كانت حادراهم ) : دابا كنقول الدنيا ماواقفاش على شي قمقوم .. من حقي حتى انا نعيش ونبغي مع لي يستاهل
- الروطال : إوا
- عنبر : منقدش نبغي دابا شي واحد ( كتشرح بيديها ) خاص نصفي هنا ( اشرات لقلبها ) هدا خاصو يصفا افاروق إلى ماخديتش حقي راه عمري مغانبرد ولا نقد نبغي شي حد راه الغدر هداك ماشي ساهل
- الروطال : زلݣتي وجيتي على عين ݣفاك
- عنبر : عارفة ولكن جاني فواحد الوقت لي كنت اصلا مهرسة كان بحال داك شومبرير لب كيلوحو ليك فاش كتكوني كتغرقي
- الروطال : صدق غير مغرقك حتى فونداك
- عنبر : هادشي علاش مغانبردش حتى نشوفو ميَّت قدامي .. يتعدب هو اللول وعاد القبر يجمعو فايل على راسو بالموت خليه يموت
- الروطال ( هزهز راسو ) : كتحقدي بزاف
- عنبر : الغدر مايبغيه حد .. مكانحملش لي يخليني حمارة قدامو ويبقى يكذب عليا مكنحملش الكذوب والنفاق كذبة بيضة كتدوزها بجغمة ديال الما ولكن كثرت الكذوب لا
- الروطال : وقيدة وخاصها تشعل
- عنبر ( عوجات فمها مدورة وجها .. رجعات شافت فيه ) : دابا مزال مجاوبتيني
- الروطال : حتى حاجة مابزز من غير إلى بغيتي أنت ( غمزها)
- عنبر ( صغرات عينيها فيه كتخنزر) : عيقتي
- الروطال ( كيعجبو يعصبها ويشد فيها ) : كرهتيه كرهتي ت( سكتاتو)
- عنبر ( بعصبية) فارووووق( وقفات) زيد نمشيو انت راه هترتي
- الروطال ( تنهد ) بزاااااف منعاودش ليك .. حركات راسها بلحولة وسبقاتو لجهة الطوموبيل والحمورية طاغية عليها
- عنبر ( حطات يدها على حناكها ) : إيخان وليت كنحمار بزاف بحال ذي وحدة عندها 15 عام وعمر شي راجل داز فحياتها ، حل ليها الطوموبيل من بعيد حلات الباب طلعات وݣلسات ، كتشوفيه مشا يخلص دورات عينيها فطوموبيل كتقلب وتبقشش واش تلقى شيحاجة هزات عينيها بان ليها جاي وهي تجمع يديها كلامو كيدور فراسها طلع داير السمطة مديماري خارج من المرصة بقات ساكتة وبزاف ديال التساؤلات فبالها .. مكانتش قادة تسكت شافت فيه ونطقات :
أحم فاروق علاش متزوجتيش حتى لدابا ؟
- الروطال ( عينيه على الطريق ) : الزواج مكتاب ورزق مكانش ضارب ليا فمخي نتزوج كان اخر همي .. بالعربية كنت ضارب عليه
- عنبر ( كتشوفيه بنص عين ) : اممم وعلاش بغيتي تزوج دابا ؟
- الروطال ( شافيها ورجع عينيه على الطريق ) : مابغيتش نتقزدر معاك من دابا حتى تولفي عليا
- عنبر ( حمارت وخضارت عرفاتو كان بغا يخرج شيحاجة فيها قلت الحيا ) : كاعما يحسابلي انت هكا والله مبيناش عليك
- الروطال ( بإستهزاء ) : أش كان كيبان ليك الفنون ؟
- عنبر : عرفتي مايجيك مليح الدهاز اناخدو انا وماما فاطنة دابا رجعني غير لدار .. شافيها بنص عين مبسم كيبانو ليه ملامحها معاجبهاش الحال وحشمانة الحشمة ديالها نغماتو وجاتو على ݣانتو وقفا قدام بيم ونزل محيد السمطة ماسولاتو لا شنو باغي ولاش نزلتي ..
- عنبر ( تبعاتو بالعين ) : تفو على بشار مكايحشم مكايرمش كوينيدي لاخر هدا الى تزوجت بيه علم الله .. وقاليك ندخلو لهاد الزواج بنية ديال الصح وشرع القانون والله لا مس مني شعرة وحدة ولا شركت فراشو وسخنتو ليه .. يتشد داك الكيدار ونطلب الطلاق شحال من وحدة كطلق مرة وجوج وثلاثة ( سكتات كتفكر ) أصلا ماشي ستيلي تنفضات من بلاصتها فاش طل عليها من السرجم ) بسم الله الرحمان الرحيم
- الروطال : منين تكون طوموبيل واقفة سدي شرجم البشار يدوز شي حد يلوح عليك شيحاجة ولا يݣريسيك شدي ( حط ليها ساشية فوق رجليها عامرة بسقاطة ) .. ضار راكب
- عنبر : ماتبقاش تغوت عليا الله يرحم الوالدين مامزوج بيا ماكاتب عليا بزنطيط مغرف ( شافيها كن الكلمة لي خرجت عاد عاقت براسها شنو قالت بلعات ريقها كترمش عينيها بزىبة محرجة ) أنت لي عصبتيني هادشي مزال متزوجنا وشنو درتي خلي الى تزوجنا شوية دالاحترام عفاك راني أنثى
- الروطال ( هزها وحطها بشوفاتو لي كيوتروها ) : أنثى لا راه باينة امن داك زنطيط أنثى نيت صبر من عندك ياربي العالي .. ديمارا الطوموبيل شاد الطريق للدارهم وقف الطومبيل قدام الباب محيد السمطة وضاير كيشوفيها :
عنبر هضرة وحدة غانݣولها مغانعاودهاش ديريها فودنيك وحفظيها الله يرضي على بنتي ..( بقات ساكتة كتشوفيه كتسناه شنو باغي يݣول) نسوني غاتولي تجاوبي تم تم .. صادة لشي قنت غاتسيفطي وتعلمي داخلة على زواج نكون عاجبك ماعاجبك كيتسمى زواج بشرع وبالقانون بغيتي تراجعي ومابقيتيش باغية من دابا أبنت الناس نفاريوها تهناي انت ونتهنى انا وبيييخير عندي
- عنبر ( مافهماتوش علاش كيقول هكا ) : علاش كتقول هادشي دابا حتى تخطبنا ولي عطا الله عطاه ؟..
- الروطال : فاش تخطبنا كانت نيتك شكل اما انا حسابي فراسي داكشي علاش جبتك اليوم ودويت معاك .. كنبغي بنادم نجيه فاص ويجيني فاص داك تنقاز ديال سطوحة ماعنديش معاه مخري فدماغي من الاخر تدخلي لهاد الزواج تحتارميه تحتارميني اي حاجة ديريني لين عينيك شادة والفادة نعرفها واخا تكون حزقة نعرفها
- عنبر ( مامالفاش على هادشي وعلى هاد الحكام والهضرة .. باها كان مخلي ليها الحرية بعدات عليهم قرات فكازا وهوما فالمحمدية وحتى بدر فاش تزوجات بيه عمرها حسات بيه كيغير عليها بالعكس كان عاطيها الحرية حتى لباس كان كيبغيها تلبس المعري هي لي مكتبغيش ) :
انا مامالفاش نعطي تقرير بدخولي وخروجي وبشنو كندير انت باغي تخنقني
- الروطال : انا دويت ( بصرامة ) مغانبقاش كنتلاج معاك انا ماشي پوكيمون مزوجة بيه .. نعرفك فين داخلة وفين خارجة .. تسخري نعرفها الله يرضي عليك هذا زواج حسبيه كيما بغيتي تكوني فدارك بيني وبينك ضبري محاينك انت صومي ليا الهضرة ݣاع ترضيني قرد ݣدام الناس لا مانبغيش ليك تشوفي ضوبل فاص ازينة تبريحة ( غمزها ) ..
- عنبر ( بلعات ريقها كتخنزر فيه زولات السمطة حلات الباب وخبطاتو فوجهو ) .. عض على لسانو غمض عينيه بالع عصبيتو مدوز يديو على وجهو .. ديمارا ومشا بقات متبعة ليه العين :
قاليك نولي نعلمو الخ** لي غانعلم السيد متيق راسو راجلي زوينة هادي واخا دابا تشوف الى علمتك اجي وشم ليا بالحرݣوز .. دخلات الساروت فالباب ودخلات وهي كتنݣر ..
- دخلات ماجدة للدار عيانة النهار كامل وهي على برا مع دنيا لقات خديجة ݣالسة كتدزي فتيليفون غير شافتها وقطعات واقفة مغزفة :
شتي خوك ومداير واخد ليا وحدة ملقطة .. شيخة وعائلتها هيطوكيين لا مستوى لا اداب لا والو انا شاكة فيهم ساحرين ليه
- ماجدة ( عيات من هاد الحوار ) : أنا قسما بالله أماما إلى عييت من هاد الهضرة واش ماعييتيش اش جبد عائلة عنبر وانت فين شتيهم ( بدات كتستوعب مخرجة عينيها ) متقوليش ليا مشيتي لدارهم واش دويتي مع خالتو فاطنة
- خديجة ( خسرات سيفتها ) : خالتو فاطنة( كتعيبها ) الله يخوي ليك جناب إن شاء الله.. الام كيدايرة علم الله البنت على عائلة فاش حط خوك راسو هادو دارو ليه شيحاجة ولكن والله لاكانت ليه انا غانوريه كيفاش يديها بلا موجب شرع
- ماجدة ( تجننات وتفقصات تعصبات) : أنا مليت وعييت من هاد العيشة واش انت مكتبدليش مكاتعيايش والو انت هي انت تقرهت كولشي مشا بقيت انا لي واحلة حاولي عليا هالعار
- خديجة : وليتي ترضي عليا الهضرة ( مخرجة عينيها فيها ) تبارك الله وصلاة على نبي قري او ولدي ويهزو عليك الكلام ويديرو لي بغاو ولكن بسيف .. لي مصاحبة مع شيخة ملقطة اش نتسنى منها
- ماجدة : ديك الشيخة وعائلتها لقيت فيهم الحنان والخير لي مالقيتوش فيك أنت لي ماما ( نزلات عليها بطرشة لوجها .. بقات شادة حنكها كلها كترعد ودموعها ناولين شافت فيه بغل ) عمرك فحياتك سوليتيني شنو ضارني واش محتاجة شيحاجة ولا شنو بغيت ندير فحياتي كيهمك غير راسك ونتبعوك الوالدين مقدسين ولكن حتى الولاد عندهم حقوق المحنة لي لقيت فالبراني وفجدودي عمري لقيتو فيك ( ضربات فيها وطلعات كتبكي ) ..
- خلاتها كتغلي .. دخلات لبيتها مشات للماريو ديالها كتبكي وتشهق حنكها واجعها من طرشة لي خدات .. جبدات باليزتها دارت فيها حوايجها سداتها ونزلات بخطوات سريعة كانت مها مزال التحت غير شافتها وقفات نخرجة عينيها :
فين غادية اديك سايبة مابقا عليك حكام المسخوطة المرعودة ، قراناتك دارو مشاريعهم ماشي غير مشروع واحد وانت تابعة ليا الخوا الخاوي من صغرك والناس حسن منك وانت غير مضبعة حالة فمك عمرك طفريه ولا ديري شيحاجة فحياتك يالمسخوطة
- ماجدة خرجات كتجري منهارة من كلام مها ماضناتش توصل بيها لهاد درجة تعايرها حسات بقلبها غايتفرݣع وغاطيح خرجات لبرا كان البرد كيطير والحال ظلام هزات تيليفونها ويديها كيترعدو مبانت ليها غير نمرة عماد سونات ليه مجاوبهاش تفأفأت وسونات لدنيا لي جاوباتها ( بصوت مغنغن بالبكا) :
وي دنيا .. عفاك اجي ديني .. انا على برا حدا دارنا ، وصافي حتى تجي عفاك سربي جي عندي .. يلاه واخا ، قطعات معاها وكتسناها وكلام مها كيتردد فودنيها ..
- السطح كان مقسم جهة فيها بيت ديال الصابون وجهة فيها ݣلسة مسقفة فيها سدادر وطبلة ، ݣالسة عنبر وحياة ملويات فالمانط حاطين ديك السقاطة وزريعة كيقشقشو فيها ويتعاودو
- حياة : دابا واش بصح زعمة الروطال مكايعجبكش ؟
- عنبر : ماشي ستيلي أحياة عصبي وجايني متشدد وكيحكم بزاف لسانو مبري منو ( شافت فيها حياة بمعنى وانت جايا تسعايه ) انا كنبغي راجل يكون حنين ويكون ظريف وكيعرف يتناقش غير بالخاطر ومايقجنيش ماشي نعطيه لاليست بشنو ندير ولا منديرش هدا راه كلمة جوج كنوضوها انا مكنقدش نسكت وهو قماع وطناز ومقزدر
- حياة ( كضحك ) : ولكن اجي ملاحظتيش واحد الحاجة بلي الكراكتير ديالكم بزوج كيتشابه غير فولة وتقسمات على زوج
- عنبر ( عوجات فمها قالبة عينيها)
- حياة : قسما بالله كتشابهو انتوما بحال بحال فالكراكطير جربي ماتعرفي اصاحبتي
- عنبر : يلاه قلتي كانتشابهو وراه خاص كل واحد تكون عندو شخصية متفردة .. لي ناقصني يكون عندو وهو لي ناقصو يكون عندك انا فاروق ماشي ستيلي احياة يا غادي نخبطو يا غادي يخبطني هو مكايعجبوش داكشي لي كنقول وانا هكاك هو صعيب اويلي سيد باغي يخنقني أحياة
- حياة ( مكانتش كدير فران لكلامها ) : اش قضيتيه اعنبر بواحد حنين ظريف مخلي ليك الحرية .. داك الكيدار عقلتي اش كان داير معاك الديوثي لي حطو وكون غير بالفايدة مفالح لا فزواج ولا ففراش
- عنبر : كندم علاش كنعاود ليك ( خنزرات فيها )
- حياة : مالي كذبت عليك الراجل لي يقول لمرتو تلبس العريان راجل .. لي يبغيتي تلبس المايو فالبحر تر*** عريانة راجل هذا ماعندو سوق نسيتي فاش خونا فالقهوة تزلل عليك قليها ليه باش جاوبك ( كتعيبو ) هانية حبيبة راه حيت انا واخد الزين هذا هو الراجل عندك انت ؟
- عنبر : انا راه مغاندخلش شي حد ولا نبغيه وانا قلبي مزال ماصفاش من بدر الدين الى ماخديتش حقي راه مغاديش نبرد وحتى الى بغيت فاروق موحال نبغيه راه انا وياه بحال المش مع الفار انا كنشرق وهو كيغرب اصلا مغايصبرش عليا نعطيه شهر يرضني لدارنا
- حياة : ودابا هو جاك نيشان وهاد زواج داخل ليه بنيتو ماشي بضحك ولا لعب .. يعني عولي عليها ابيبي والله لا فلتي منها سوا اليوم سوا غدا يقنتك فشي قنت ( شافت فيها عنبر ) ماتبقايش تشوفي فيا مالو سميتو فنيدة راه راجل احنينتي ألف وحدة تمناه يبقا يشوفيك حداه هانتي لابسة هانتي مدوشة من غير الى كان مكاي*** هادي هضرة خرى
- عنبر ( عصبها الموضوع ) : لاحولة ياربي انا فين وهي فين .. اصلا هو خيرني الى مابقيتش بغيت نفرتكو هاد المجمع
- حياة : ايوا وانت باش جاوبتي ؟
- عنبر ( زفرات ) : مجاوبتش سديت عليه الباب وزدت مع الطريق راسي ضرني بهادسي والله ، كنعرف الزواج زوج كيتعرفو كيبغيو بعضهم ماشي هادشي كنا داخلين عليه باش نقضيو غراض صدق بغا يقلبو صح
- حياة : وسيد كيخاف الله اصحايبتي راه اتكون خلوة بيناتكم واخا مايقرب ليك ... عندو الصح انا بعدا كبر فعينيا ، شوفي بغيتي المفيد أكميشتي دخلي بنيتك لهاد تزويجة متعرفي شنو غايكون عطي راسك وقت فاش يتشد داك الضبع شوفي واش قادة تكملي مع سيد ولالا راه متعرفي ربي اش خازن ليك
- عنبر ( كتخمم) : يصاوب الله وصافي نوضي نهبطو البرد قاصح وانا جمدت
- حياة ( كتجمع فقشور الزريعة ) : فخبارك مو جات عندنا قبيلات ونوضاتها مع خالتي فاطنة
- عنبر ( خرجات عينيها ) : وايلي أش قالت ؟
** عند إدريس **
- ݣالس فبيتو شاد واحد التصويرة كيشوف فيها بكل حصرة تنهد تنهيدة طويلة باسها ورضها للبزطامو ، تحل عليه الباب على غفلة داخلة ماجدة كتبكي
بابا ( تلاحت بين يديه كتشهق بالبكا )
- إدريس ( مافهم والو هز راسو فدنيا لي واقف هي وعبد الخالق ) : مالها ؟
- دنيا ( دايرة يديجا فجيابها ) : ضرباتها خالتي خديجة .. بدا تيليفونو كيسوني كانت خديجة مسح على وجهو بالعصاب هاد السيدة مغايتفارق معاها حتى غاتسيفطو لسبيطار وتكره ولادها ݣاع فيها .. خلاها كتسوني وبعد عليه بنتو لي عينيها حمرين بالبكا كانت حالو وقمشة خفيفة فوجها دوز على شعرها بحنان وصوتو الرجولي المهدن الوقور :
أش وقع ابنت دريس ( أحسن كلمة عندها هي فاش كيعيطو ليها بنت دريس ) عاودي ليا وغير بشوية وبلا بكا ..
- تودة ( كتخمم فالكلام لي عاودات ليها عنبر هي وياخا الراس فراس فالبيت ) : وبنتي أش غانݣولك هو السيد مݣال كلام العيب عدو الصح .. شتي باش مزيان الواحد يعرف لدينو ويتفقه ويعرف لي ليه ولي عليه حنا غامݣدمين الله يسمح لنا
- عنبر ( تنهدات كتحس براسها دايخة ) : ماما انا راه منݣدش ندخل شيحد لدماغي وداك الميكروب كيضور هو وتريكتو ومدارو فيا راه والله مانساها ولا نجغمها
- تودة ( مكانتذ حاملة هاد القضية ديال ترد دقتها كانت خايفة عليها ونفس الوقت عارفة عنبر راسها قاصح والى دارت الحاجة فبالها ديرها ديرها واخا تعرفها غالطة المهم خاصها ديرها ومن بعد ممكن تندم عليها ) :
ايوا ابنيتي الى لݣيتيه ولد الناس وفصفك وراجل يتعول عليه اش فيها تولدي وليداتك حتى انت واش غاتبقاي هوك والعمر كيفوت
- عنبر ( مشا بالها لولاد كانت محيداهم من بالها شحال بكات وعاشت الاكتئاب نهار قالها طبيب مكتولدش دارت مندبة وسدات على راسها تفكرات دوك الايام كيفاش هو كان عادي فرحان كيمارس روتينو العادي وهي لي كانت سادة عليها ودايرة مناحة ) ..
فــــلاش بـــــــاك
- خارجين من عند الطبيب وهي عقلها غايب البكية حابساها بسنانها .. كايهضر معاها وهي مكايناش هنا مشات نيشان للطوموبيل حلات الباب وطلعات دايرة السمطة بعقل غايب
- بدر ( ضار عندها ) : سويتي ماديريش فبالك عادي واش انا مزوجك على الولاد عادي من الأحسن نبقاو خفاف الولاد غير كيشدو ( هزات فيه راسها كتشوفيه) نسافرو وقت لي بغينا ونرجعو وقت لي بغينا
- عنبر : من نيتك أبدر واش داوي بصح ولا كتريݣل عليا .. كيفاش الولاد كيشدو راه نورمال أي جوج كيبغيو بعضياتهم كيتمناو يكون عندهم بيبي
- بدر : والى مابغاش الله شنو نديرو الله يهديك واش الولاد هوما محور الكون
- عنبر ( كتشوف فيه ) : وانت درتي التحاليل ديجا المشكل لي عندك أبدر ( خنزر فيها بنظرات شيطانية ) كندوي معاك
- بدر ( بتهديد ) : اخر مرة تجبدي معايا هاد الهضرة منعاودش نسمعها منك .. الحمد لله انا بيخير مامعيوب من حتى بلاصة ( شافت فيه بنضرة من نيتك ) اي واحد سبيسيال بشيحاجة
- عنبر ( هزهزات راسها) : اه سبيسيال سبحان الله العظيم ( بلعات ريقها كان خاصها شوية وغاتنفاجر عليه جاب الله كتبغيه حنانو كان معوضها على بزاف مجاتش تشكا من شيحاجة الى عاوداتها لشي حد ايقولو مدودة مغايفهموهاش) : بغيت نرجع للدار الله يرحم الوالدين
- بدر ( شد يدها بحنان ) : كبيدة وصافي ماتبقايش مقلقة
- عنبر : بدر راه خاصنا ندويو فشحال من حاجة .. راه ( كتحاول تشرح وهو كيشوفيها) راه انورمال هادشي واش جاتك عادي انا وياك 5 سنين ديال زواج ماحسيتش بداكشي لي كيحسو بيه العيالات كتزرب عليا وانت فرحان ومرتاح وانا شنو خشبة تبوس ليا راسي وتنوض وتقولي غدا نعوضك احبيبة وهادشي الى عوضتيني وقربتي ليا اصلا
- بدر ( ببرود ) : انت لي مطلقيش راسك انت لي خاص تعالجي راسك براسك .. يمكن انتي باردة شنو غاندير ليك انا ؟
- عنبر ( بقات كتشوفيه حالة فمها فطريقتو فالحوار وتواصل ) : دابا انا لي وليت باردة ( تفرݣعات عليه ) ندوي نيت حيت هادشي راه بزاف عليا عييت صابرة وكنرجع لخاطري حتى وليت دابا كنسمع الهضرة شكون لي كتقاد راسها وتصايب وتخرج تلقاك مكوخ ناعس حال فمك شكون لي كتبغي تعنقك وتبوسك وترضها وتقولها خدام أحبيبة شكون لي تفيق وتلقا فراشها بارد ومكاينش حداها .. الى جيت نحسب فخاد الخمس سنين لي فاتو غايكون شي 20 مرة لي نعسنا أنا وياك فيها وكون شي بنت الحرام ما مأصلاش كون واخرجات كتخون فيك بلاما ندوي على العيب لي انا قابلة بيه وسادة فمي ومكندويش .. ( مكانتش باغية توصل معاه لهادشي ولكن عصبها وخلاها تخرج لي عندها ) ودابا كترد ليا اللومة انا انا راه مراة مرأة باغية نحس بالأنوثة ديالي راه مابقاتش فالفلوس والجاه والمال وتبراع راه بقات تحسسني براسي انا عييت ابدر عييت ( دارت يديها على وجها كتبكي ) .. جرها لعندو معنقها كيدوز على ظهرها
- بدر : شششش أكبيدة ششش كولشي غايكون مزيان غير شوية ديال صبر
- عنبر ( شافت فيه ) : ديما كندويو فنفس الحاجة وكتقولي شوية دصبر .. عمرك حاولتي تعرف المشكل منين ولا انت مباغيش ولا ماعندك سوق
- بدر ( دار السمطة مديماري) : العشية كاينة واحد الحفلة دايرها عدنان ( صاحبو ) عارض علينا بغيت الكبيدة ديالي تكون أحسن وحدة تم ( شافت فيه مصدومة كواتها فقلبها وقلبات وجها لجهة السرجم ..
الــــحـــاضــر
( تنهدات وشافت فمها ) شكون كره الولاد أماما .. نهار الاثنين غانمشي عند واحد طبيبة غاندوز باش نعرف شنو كاين واش فعلا كيف قال هداك مكنولد ولا حتى هي طلع معايا القالب فيها
- تودة ( دوزات على ظهرها ) : إن شاء الله أنا نيت نمشي معاك منخليكش بوحدك
- عنبر ( بغات تبدل الهضرة ) : خالتي رحيمة شكون هدا لي باغيها لزواج ؟
- تودة ( ضحكات ) : عقلتي على العرس ديال رويني لي كنا دوزناه فعين السبع ؟
- عنبر : اه عقلت عليه
- تودة : خوهم الكبير مزوج ومطلق عندو 3 الولاد تبارك الله عزارة كاينين على برا .. مرتو تزوجات شحال هذا وهو بقى بلاش خواتاتو حماقو على رحيمة وحتى هو عجباتو عندو واحد الݣرو كبير بخيرو ودارو ولكن راه فرض عليها تحجب وماتبقاش تخدم تݣلس فدارها
- عنبر : ماعندها مادير بشي خدمة انا نيت غدا لاخر ليا فهاد دومين إلى بغا سيدي ربي ، كاينة واحد الأغنية غانسجلها والله يخلف الله يعمر مابقاش كيصلاح ليا السهير والغوات ولا كيضرني راسي
- تودة : يونس نيت راه كال لسميرة على وديت داك المحال لي قريب للداك الݣرو لي كيبيعو هادشي ديال الحلوة
- عنبر : واش هداك لي قريب للحي الحسني لي اونفاص مع الحمام ؟
- تودة : تي أشمن حي حسني داك الݣرو لي كين هنا فالولفة لي مقابل مع الحمام
- عنبر : ايوا اش بقا ليه للحي الحسني راه حدا حدا .. اينا محال راه خاص شي واحد يكون كبير نيت أماما ماشي شي واحد قد القجر
- تودة : لا راه انا عالمة يونس قبل عاودت ليه بغيتو يكون واسع على وديت تانݣافت على مݣال هو راه تبارك الله المحال كبير وسيد مولاه كيجي عدو يتقدى يدير معانا ثمن مزيان
- عنبر : ايوا على مولانا أجي وليالي شنو غادي الى تزوجات خالتي رحيمة تبقى فديك دار بوحدها اماما وديك الحومة واخا هكاك ماهياش وهي بنت
- تودة : والله ابنتي ماعرفت مندير حرت ، ( شافت فبنتها ) واحد الراس كيݣوليا نجيبها لهنا البنت ماعندها حد تبقى تم يجيها شي نهار داك شمكار ديال خوها يدير فيها شي مصيبة هو راه شاداه ارحيمة لي معاها فدار
- عنبر ( بالإيجاب ) : بصح حسن الدار الحمد لله كبيرة .. انا إلى تزوجت راه غانمشي ( شافت فيها تودة بالعة ريقها يلاه لقاتها وهاهي اتبعد عليها ) بيتي ايبقى خاوي تجي تݣلس هنا حتى يحن الله
- تودة ( وقفات) : إن شاء الله حتى ندوي مع رحيمة رتاحي دابا أبنتي .. خرجات تودة من عندها وخلاتها كتخمم فلي داز ولي جاي سونا عليها التيليفون هزاتو كان هو عوجات فمها وخلاتو كيسوني حالفة لا جاوباتو ..
_________________________
- فوحدة من الديور لي كيتواجدو فالخرجة ديال كازا كانت يلاه سلات من البني كان مزال ليها الصباغة الأتاث ديالها كان على قد الحال .. فالكوزينة واقفة سيدة ببيجامة طويلة دارة دري صغير تكون عندي ديك عام فظهرها وكتغسل فالماعن سلات مسحات يديها فالطبلية .. هبطات الخامية على الباب ديال الكوزينة كان راجلها متكي فالمراح
- .... ( ݣلسات حداه ) : وݣوليا تا يمتى ناوي دوز الصباغة على دار ؟
- ..... : شوية دصبر لي كان عدي راه كملنا بيه السطح .. خاص نجمع واحد شوية وديك الساع نبداو فصباغة الى سهل ربي الحمد لله لي لݣينا هاد الحيوط ساترينا
- .... : الحمد لله قهرونا ياخويا دار الكرا الحمد لله كيݣلتي لكينا هاد دار ساترانا ( حلات الحمال كان ولدها ناعس ) انا نوض نحط مروان ونرتاح حتى يانا عييت من 7 وانا واݣفة انت ممغاتنوضش تنعس ؟
- .... : لالا نايض أبلات نكمل هاد الفيلم ونخلط عليك .. خلاتو كيتفرج ودخلات للبيت لي حتى هو كانت فيه السيما مكانش كاع مصبوغ حطات ولدها فبلاصتو البيت مكانش فيه النموسية كان مفرشات ابلپونجات حيداا عليها ديك بيجامة وبقات ابواحد التريكو وكولون وتقاشر جابدات الغطا لاحت مانطة فبلاصة راجلها .. وعاد ديالها تكات حدا ولدها قدات ليه غطاتو على البرد وبقات تخمم كتشوف فسقف هزات نيفها مخسرة سيفتها كتحرك راسها وكتشمشم ..
- دخل راجلها زول حوايجو شاف لجيهتها كانت مخسرة سيفتها وكتشمشم :
تي مالك تشمشمي بحال داك السلوݣي
- .... : سماعيل اخويا كنشم ريحة خانزة بزاف بحال ريحة شي لحم خانز ولا ريحة الجيفة
- سماعيل : ݣلتيها ليا داك النهار وقلبنا ومالݣينا شاي الله يهديك أنا بعدا ماشميت والو انت لي كتشمي
- .... : وحق مولانا الى ريحة الخنز فهاد جيه وجهة هاد الحيط هذا ، اجي نتبادلو نعس انت هنا وانا هنا وتشوف راه فهاد الحيط هذا
- سماعيل : حَبيبة فيا النعاس والله مافيا لي يبقى يݣلب فالفراش .. مداهاش فيها مشا لبلاصتو طافي الضو ونعس ، اما هي غطات وجها من ديك الريحة المجهدة ونعسات ..
- صبح النهار الأحد الشتا باتت كطيح الليل كامل وصبحات الدنيا مغسولة ومكهرة حتى القلوب معاها .. دايرة تخرج مع مها وفبالها ماخداتش منو الفلوس ديال الدهاز حلفات لا سونات ولا دوات معاه وكبرات ليه شان ديجا صابحة عيانة من لبارح وداكشي لي تفكراتو هو لي أتر عليها غير فطرات جمعو دار ودارو روتينهم الصباحي دخلات للبيتها مجموع عليها كلشي يمكن حيت داك نهار مافرغاتش كولشي ولا حيت تفكرات وحسات قداش هي مشموتة كانت باغية تعاود وتفرغ تقول شنو كاين الداخل فيها ساحو دموعها سخان دخلات عليها حياة راضة الباب بزربة فاش شافتها كتبكي دوزات الساروت وجات حداها بزربة :
اويلي مالكي كتبكي ياك لاباس؟
- عنبر : واحد العقدة عندي هنا ( أشرات لحلقها) كنتفكر لي داز عليا أحياة كنحس براسي كنت حمارة عرفتي شنو هي دار بيك أصاحبتي
- حياة : دابا غير بشوية شرحي ليا
- عنبر ( كتحاول تاخود نفس ) : عقلتي كيف كنت كان قمقوم مايديرهاش بيا كنت دايرة العز لراسي ، جا بدر الدين دارني جفاف ستغل الفرصة ستغل الوقت لي كنت انا ماشي فوعيي ومحتاجة صدر حنين نحط عليه راسي ( شهقات ) لبارح ليل كامل مانعستش حتى قال طالب الله اكبر وانا كنتفكر داكشي لي كنت صابرة عليه حيت كنت كنبغيه
- حياة : دابا لاش كتلومي راسك راه هو لي مايسواش الديوثي لي حطو كان كيلعبها عليك بالمزيان
- عنبر : انت فخبارك العيب لي كان عندو ( مسحات دموعها ) كنت عاودت ليك ماقديتش نعاود لخالتي وحتى لماما فاكنة منقدش نعاود ليها اتجيني عيب ولكن انت عاودت ليك
- حياة : أه على قضية العبار ودوك جوج تق** ياك هادشي
- عنبر ( بهدوء عيات بالبكا وكتحس بعياء نفسي عقلها سرح ) : حتى المعاشرة احياة مرة فشحال ( ماعرفاتش كيفاش تشرح وحشمات تشرح ولكن الى بقات خازنة اتنفاجر واخا هادشي مكايتعاودش بنسبة ليها ولكن كون كان انسان مزيان اه فاش تفكرات بلي غدار مايسواش سرسبات ليها كولشي ) كان الأغلبية كيعاشرني غير فوق الحوايج
- حياة ( خرجات عينيها ) : اويلي ستغفرت الله بحال شي حد مصاحب معاك ماشي راجلك أش هاد البهلان هذا
- عنبر : كنت نتقاد ونتصايب كيسكتني ببوسة ويقولي عيان وهو راه مكدير والو حدو الدار وخدمتو من البيسي اشمن عيا مافهمتش وكنكمدها لقلبي ونسكت ونبقى نبكي حيت كنبغي نحس بأنوثي احياة حنا راه بشر وهادي طبيعة .. انا ماشي شي وحدة مدودة ولكن راه حقي
- حياة : وياختي الى ماشبعت من راجلي انا وتكركب معاه من كوزينة لسطح اش بغيت ندير بيه مالي مراضعة معاه وزوينة هادي .. وكان عليها تحبسيها وانت صبرتي
- عنبر ( شافت فيها ) : يحسابليك ماكنتش كنبغي .. كيبدا يبكي تخايلي كيقولي حيت انا معيوب كديري هكا وانا كنبغيك وكنموت عليه وبلي داكشي ماشي هو كولشي وكيقلب عليا القفة كيحسسني بلي انا مامزياناش ، وبلي انا ماشي صبارة وكيرضني انا لي غالطة تخايلي معايا كنولي انا لي نطلب منو السماحة
- حياة ( مغزفة ) : ولد الحرام النرجسي لاخور الله يعطيه الغراق بغيت انفهم كيدار حتى صبحك
- عنبر ( تفكرات صباحها لي دوز فيه 3 يام عاد صبحات كرفصها ) : وهادشي كامل خلا نهار درنا تحاليل ديال الحمالة قالك انا لي باردة شوية بدا بالحنان والحب ويطلب سماحة يبوس ويعنق هي فاش جاب ليا داك البروش لي وريتك
- حياة : جابو ليك قبل الطلاق .. ثمن ديال داكشي لي دار معاك الزلمومي لاخور بغيت ليه البرود كثر من هداك لي فيه ( جراتها عنقاتها ) نساي هادشي اعنبر غير غايمرضك شتي راه مزيان هادشي يوقع لينا عرفتي علاش ؟
- عنبر ( بعدات عليها كتحرك راسها بلا ) : علاش ؟
- حياة : حيت بحال هادشي غايزيد يعلمك اصاحبتي فهمتي راه مزيان الواحد مرة مرة يتصرفق باش يتوݣض مايبقاش غافل يكذب عليك الكذاب شي حد مدارتش بيه واخا يكون اكبر قافز وطولانطي
- عنبر : حارة احياة والله العظيم الى حارة بزاف
- حياة : كمديها ودوزي واش لي خلقو خلق غيرو .. أصلا مافيه لا زين لا مجي بكرية داير بحال الخر** ديال شي حد واكل الكرموس ( عنبر ضحكات) ربي اش جاب هداك للفاروق
- عنبر ( قلبات وجها ) دابا اش جبد فاروق للهضرة
- حياة ( وقفات ) : انا غير قلت ليك وصافي ، سونا عليا جواد لبارح مجاوباتوش .. سونا صباح والو تاني هههه
- عنبر : عبرتي عليه .. دابا غانخرجو وانا فاروق ماعطانيش كاع فلوس الدهاز كيفاش غاندير ليها سونا ليا لبارح مجاوبتوش
- حياة ( عطاتها الصبع ) : عيقتي والله العظيم ، نمشي نصلي راه ادن الظهر .. خلاتها راجعة براسها اللور هزات تيليفون دايرة مع رشيد مع 6 ادوز عندو مع مها وحياة من ورا مايساليو تقدية ، خرج ليها فيديو ديال واحد المؤثرة فرحانة بالحجاب لي دارت .. تنهدات ومشا بالها لإيمتا اتبقى شعرها عريان هاهي دابا كتصلي شنو لي مانعها تحجب حسات بواحد الضيق فصدرها زاد كمل على مابيها وقفات فاتحة الماريو ديالها حوايجها واخا كانو مستورين ولكن ماشي ديال شي وحدة لي محجبة
- فكرة كدور ليها فراسها من نهار بدات صلاتها .. وهي كتسول علاش اعنبر مديريش الحجاب شنو مانعك ؟ مكتلقا ليه تصريفة ولا جواب قاطع تفكيرها صوت تيليفونها كان هو خدات نفس طويل وفتحات الخط بصوت انثوي :
وي
- الروطال ( بصوتو الرهيب الثقيل ) : لاش الناس كيديرو ديك الخرشاشة غير باش يجاوبو فيها
- عنبر ( بإبتسامة ) : اه واش على الأبيل دالبارح نعست كنت عيانة
- الروطال : دوك القوالب أنا لي غانحدهم ليك هبطي التحت كنتسناك
- عنبر : فاروق حنا راه غير مخطوبين ماشي مزوجين باش نبقى داخلة خارجة معاك
- الروطال ( بصرامة ) : دايز عندي صباح مق** متزيديش عليا الله يرحم جدك نزلي ولا نطلع ݣدام مك أش ݣلتي ( قطع عليها )
- عنبر ( كتشوف فالخط لي تقطع ) : هدا يا ندفنو يا يدفني واحد فجوج .. هزات عباية لاحتها عليها هي او واحد الزيف جرات البانطوفة وتمات خارجة وقفات عند الصالة :
ماما انا لتحت فاروق كيتسناني انرجع .. عطاتها بظهر وتمات نازلة فتحات الباب كانت طوموبيلتو واقفة حلات الباب وطلعات شافت فيه كان باين فيه معصب من ملامح وجهو عمرها شافتو فهاد الحالة واخا مكايتلاقاوش بزاف .. غير المرات لي شافتو كيكون مبرد
- الروطال ( بتهديد ) : نبقى نسوني جاوبي ولا نهرس مو ونجيب ليك واحد عظم دوي بيه
- عنبر : عيقتي عليا شوية لا راه مزال مادرنا فطاجين مايتحرق ماتبقاش تغوت عليا
- الروطال ( عاض على حنكو مبرد فيه الحر دايز صباحو بحال زفت ومباغيش يغلط فيها ) : ياربي ترحمنا برحمتك ( جبد واحد الجوا مدو ليها ) شدي باش تشري دهازك تمشي لي لشرواط جوج دريال ديال شينوة غانحرݣ مهم ونخلي مك عريانة دوري ...
- عنبر : واش باغي دخل ليا حتى فلباسي واش هبلتي فاروق ( قاطعها )
- الروطال : عنبر تقاي شري وهبطي .. حسن ليا وليك سيري لبوتيكات فيهم سلعة مزيانة تمشي لمدرح دوك شراوط انحرݣ مهم
- عنبر : انت خايف باش يتحطو فطيافر ويبانو داكشي باش ياك ؟
- الروطال : الرضا شني شحال كتكوني زوينة فاش كتخدمي عقلك .. غاتجي عندك ماجدة تمشي معاك ومنين نسوني عليك جاوبي أبنادم مغانعاودهاش جوج دالمرات
- عنبر ( كتشوفيه ساكتة ) : ساليتي نمشي
- الروطال : تكركبي .. خنزرات فيه ماكرهاتش تدفل عليه ولا تشدو تنتفو من ديك الشعكاكة لي عاجباه قبل لا تنزل سولها :
غاديري خير كبير تغطي راسك لاش كطلقي دوك جوج زغبات ؟
- عنبر : سير دخل سوق راسك وعاودها لراسك ( خبطات عليه الباب خلاتو كيغلي ماكرهش يعطيها لمسا** حتى يݣول براكة خبطات باب الدار وطلعات سامعاه بجغ على الروايض ومشا
- ولاهيلة قالك نغطي راسي انا اصلا كنفكر فيها ماشي هو لي غايقولها ليا .. دابا الى درتو ايحسابليه درتو على قبلو وحنيت راسي ليه والله لا كانت ( كانت مقررة تغطي راسها فاش يخرجو وتشري حويجات دالمحجبات دابا حلفات حتى تخرج وهي معرياه غاديرو غاديرو ولكن ماشي اليوم يقول راه كيأثر فيها ) ..
- حلات الجوا كان فيه 3 ديال البريكات هي 3 المليون ماظناتهاش يعطيها هادشي كامل باش تشري دهاز تعجبات :
اصلا فاش جاتو تبارك الله راه بخيرو وخميرو ومنها نيت ناخود كاع لي خاصني .. وصلها ميساج من عندو " الى ماݣدوك نزيدك الوقيدة " بلعات ريقها كيبغي يستفزها بلعاني .. حطات داك الجوا وناضت لعند مها باش تعلمها ..
••••••••••••••••• فجهة أخرى وبضبط فڤيلا عبد الخالق .. المساعدة فالكوزينة كتوجد الغدا للضياف لي جايين يسرى فبيتها كتلبس مخلوعة بحال الى اول مرة غاتلاقى بمحسن .. لبسات لبيسة بلدية وعصرية فنفس الوقت كانت معاها ماجدة لي مغيرة ودنيا كتقاد ليها المكياج .. التحت فصالون كان كالس طارق وعبد الخالق مع إدريس سونا الباب مشات المساعدة حلات دخل الروطال من ملامح وجهو كان باين واصلة فيه لطوب ديال الأعصاب دخل مسلم على عمو وباه غامز طارق باش يتبعو .. ناض طارق لعندو واقفين جهة الجردة
- طارق : أش تم ؟
- الروطال : داك الق*** بجغني وهز الراس ..
- طارق ( بإستفهام من حالتو باينة شيحاجة كبيرة مامالفاش ليه ) .. شكون اصاحبي دوي ..
- طارق ( كيحاول يفهم منو شنو واقع ) : تكالمة أصاحبي شكون هذا ؟
- الروطال ( مكايشوفش ݣدامو ) : الكريمي الق*** لي مسيفط ليا ولدو .. وادو لي لعبها صحيح ومسيفط ليا ديك الق*** لي معاه ساني معاه كونطرا على وديت داك الخ*** ماشي شكلاط
- طارق : تكالما دابا خلينا ندويو راه لحد الساعة مافهمت حتى زفتة ( جبد الروطال التيليفون مدو ليه ) كان مكتوب بلي مخبزة حيدر كتبيع حلويات ومخبوزات بشكلاط غامل وبثمن طالع ( شافيه طارق ) متݣولهاش
- الروطال : دابا انا على اخر يامي نولي نتعامل بشكلاط ديال 20 درهم ؟ ولد ال*** كمت حاس اصاحبي باغيين يبيعوني العجل ولاد الكلاب
- طارق ( عارفو الى مشا حتى تعصب قفارت ) : علاياش ناوي ؟ فاروق صاحبي بالقانون
- الروطال ( خنزر فيه ) : مكاين لا قانون لا ***** شرع يدي غانديرو باغيينو يبجغوني ولاد الكلبة هزاتو النفس على باه حيت ماكملتش معاه ، وديك الق*** عندي معاها حساب
- طارق : ماتظلمش تلݣاها ماعندها يد فهادشي وغير لاحوها لساحة وتسوخرو لور باش انت تيق .. انت براسك ݣلتي بلي درستيها مزيان وعرفتي بلي ماعندها يد ولا رجل فهادشي
- الروطال ( خبط ليه على كتفو ) : انت خرجها أجمي .. أنا عارف شنو غاندير هاهو هذا خلاه وخرج .. بغا يتبعو ماقدرش طليق ختو جاي وخاصو ضروري يكون رجع لعندهم سولو إدريس :
مالو جاي جاهل ياك لاباس؟
- طارق ( ݣلس ) : الكريمي ماتسرطاتش ليه البلان ديال المعمل دسكار كان سيفط ولدو فخبارك البلان ؟
- إدريس : عاود ليا وݣاليا سنا شي كونطرا مع ولدو وبلي ولدو بعيد على باه وشكلاط مزيان والأمور عندو مضبوطة
- طارق : غير ضحك عليه .. الدفعة لولة كانت مزيانة مامغشوشاش وشكلاط كان مخير ولكن من بعد لعبها مسيفط ليه شكلاط غامل وصحافة دخلات على الخط
- عبد الخالق : علاش مامالف كيوقف على السلعة بيدو ؟
- طارق : ديما ولكن المرة الأخرة السلعة نيشان تفرقات على المخبازات مكانش هو وخدمو بيها ، لي ضرني فراسي هو الصحافة كيفاش عرفات حتى كتبو عليه غايكون شي حد سيفطهم ولا عطاهم راپور مايكون نيت غير داك ولد الكلب ديال الكريمي
- عبد الخالق : وكون تبعتيه أولدي يمشي يدير شيحاجة ماهياش عارف ولد عمك إلى تعصب كيتغمضو ليه عينيه
- طارق : شادني هاد خونا لي جاي خاصني نسمعو واحد جوج كلمات يديهم فعضامو على ود ختي اما راه ماتشوفنيش هنا
- إدريس : شتي غير ولدي غايخليه يمشي معاه .. يݣوليه زيد تبعني يخوي عليه باش مايتبعو عول تشوفها فشي صفحة بلي لݣاوه مفصل
- عبد الخالق ( حرك راسو بلا ) : لالا ولدي فاروق ماينزلش لداك المستوى
- إدريس : توريني فيه اخويا انا لي كنعرفو من دون خوتو هداك هو لي خارج ليا من جنب الله يكون معاه والله يحفظو
- عبد الخالق : آمـــيـــن .. ، سونا الباب مشا طارق حل كان محسن معاه باه او واحد خوه سلم عليهم طارق ببرود خلاهم يدخلو جايب معاه الورد وشكلاط او واحد ساشي كبيبرة شوية ، سلمو الرجال على بعضياتهم وتوجهو لصالة لداخل ..
______________________
- شادين الطوبيس حاطة راسها على الزاجة كيعجبها تركب فطوبيس وتبقى تفرج ماكرهاتش تخلصو يدورها كازا كاملة .. وصلو لدرب السلطان نزلو من طوبيس شادة فمها وحياة شادة فرشيدة مخليين عمران وجيهان مع سميرة فدار غاديين وكيدورو ويساومو دخلو لواحد المحال كيبيع البيجامات ديال تركيا زوينين .. عجبوها 3 خداتهم وكولونات مع ديباردورات حتى هوما خداتهم خلاصات خرجو من تم كيدورو دازو لمحال اخور كانو فيه بيجامات عصريين زوينين خدات منهم حتى هوما كاع البيجامات لي غايجيو معاه عاد خدات بانطوفات 3 ..
- رشيدة ( جراتهم ) : تعالي تشوفي هاد المحال شوفي شوفي .. كان محال خاص باللباس الداخلي شوميزات ديال النعاس ودوبياسات
- عنبر : اويلي اخالتي أش بغيت انا بهادشي ( بلعات ريقها )
- رشيدة ( شافت فتودة ) واش سمعتيها اش سايرة تݣول اويلي مال راجلك اش غاتلبسي ليه هاد بوشرويط دخلي ݣلاك .. جراتها وحياة كتكركر حداها ..
- عنبر : فرحانة وعاجبك الحال باز
- حياة : ومالها راه قالت الصح خودي خودي .. ماشي زعمة على وديت تلبسيه ليه داكشي خليه للوقت انت لبسيه غير فبيتك أصاحبتي زواجك اللول ماشريتي دهاز ماتبرعتي بيه تطلقي شوية وتبرعي ياك تهلا فيك بالفلوس ماتخليهاش فنفسك لبسيه ابينك وبين راسك
- عنبر ( سكتات ) .. دخلو لداك البوتيك لي كان كبير الشوميزات أشكال انواع المشبك لي بريش القصير وطويل دوبياسات غير الواعرين كيشهيو تلبسيهم هزات راسها كتفرج ماتنكرش بلي حمقوها وماكرهاتش تلبسهم بينها وبين راسها ..
- حياة كدور وتهز من هدا وداك اي شوميز كان مثير وكيأتيري ويخربق لاميموار ديال العقل جبداتو ، كانت عارفة عبار عنبر حيت بحالها بحال عبارها هي كيلبسو واحد حطاتهم لسيدة قدام انظار عنبر
- عنبر : واش هبلتي مالي بغيت ندير عرض الازياء ؟
- حياة : سيري تزمري الى بغيتي شوفي ليك دوبياسات وسربينا باش يلاه نجيبوها مع 6 شفت ماجدة مابقاتش جات ؟
- عنبر : سونات ليا عيانة ومغاتقدش تجي .. براكة احياة اويلي ( شافتها هزات شوميز اخور فالأخضر ملكي)
- حياة : ختاري دوبياس ولا نختارو أنا ( عوجات فيها عينيها كتقلي ليها السم ) ..
- من ورا ماتغداو ݣلسو مجموعين كيدويو هضرة فوسط هضرة من ورا كلام محسن لي طلب السماحة من الكل وخصوصا عبد الخالق دوا باه ودوا خوه هنا تدخل طارق بجدية وحزم :
سمع أمحسن خويا .. ختي الحمد لله انا مساخيش بيها وباش نكون معاك صريح انا ضد ترجع ليك
- عبد الخالق : طــــارق
- طارق ( شاف فباه ) : مكنݣولش شيحاجة مكايناش انا جيتو نيشان العذاب لي دازت منو ختي لا هو لا ختو عالمين بيه الضرر النفسي لي زرعوه فيها نموت مانساه .. ختك أداتها واداتنا كاملين انا كون ساعفاتني ختي تطوي ديك الصفحة وتكلس فظارهم معززة مكرمة
- محسن ( بهدوء عارف بلي طارق كيقول الصح ) : خويا طارق مغانݣولش ليك راك غالط عندك الصح عارف لي وقع ماينساه حد .. ولكن اخويا حتى أنا غير ضحية شتي كون غير شي حد كان كيبين ليك وجهو الخبيث من ديپار ادير منو اطونسيو وتجمع راسك ولكن اخويا راه ختك لي كنتي تحن فيها وتحن فيك هي ديك المشة ديال دار لي عمرك ضنيتي يجي نهار طعنك ختك الى تهرسات مرة انا راه تهرست على جوج من جهة يسرى ومن جيهة ختي راه اخيب بلان ممكن يوقع للواحد هو لي وقع ليا انا ..
- أب محسن : أولدي حنا راه ضررنا كاملين .. من جهة بنتنا يسرى ومن جهة بنتي مكناش ضانين راه مدة وانا فسبيطار راه وصلت فيها للموت
- أخ محسن : يسرى عمرنا شفنا فيها شي عيب كانت ختي ماشي غير مرت خويا وها محسن يعاود ليك أنا راه غير حيدو ليا من يدي ديك ( سكت ) أما كنت غاندخل عليها للحبس ، الواليد مسكين كان غايمشي فيها راه ماشتتاتش محسن ويسرى شتتاتنا كاملين وهرساتنا مابقيناش كي كنا أخويا
- محسن : خويا طارق انا عارفك خايف على يسرى ولكن اخويا كنقسم ليك برب الكعبة الى كنبغيها مكنتخيلش حياتي بلا بيها نموت ولا ضيع مني براكة العذاب لي عشت فيه وهي بعيدة من داكشي لي وقع انا مابقيتش انا لا فحياتي لا فخدمتي ربي كبير خلقنا وخلقك وكيغفر ويسامح خلي حنا البشار ..
- طارق من ورا كلامهم بقى ساكت كيشوف فيه .. كان عارف ومتأكد بلي محسن كيبغي ختو باينة ليه فعينيه ومن تجاربو فالحياة عارف مزيان بلي هاد السيد مكايكذبش :
الى بغيتي ترجعها كيما خديتيها نهار الاول غاتخدها دابا تدب**ح عليها ترضها معززة مكرمة ختي منبغيهاش ترجع للطنجة
- محسن ( حس بيه قصح معاه ) : ولكن اخويا طارق خدمتي كاينة فطنجة كيفاش غادي ندير ؟
- طارق : لي كنعرف انا خدمتك انت مولاها ماخدام عند حد ݣاد تحولها لأي مدينة بغيتي ختي مغانتيقش ترجع للبلاصة فين شافت الويل من ختك وترجع لديك الدار وجيران يحلو فمهم ويدويو
- محسن : نبدل الدار ماعنديش ݣرام دالمشكل ولكن نحول خدمتي شوية صعيبة غايخصني نبدا أزيرو من دا وجديد
- طارق ( ماخلاش باه يدوي ) : نعاونك انا ماتخممش .. بيع ديك دار وجي لهنا نشوف ليك دار مخيرة فين تبان هاديك مغانخدش حسابي بحال الى غانعاون ختي حتى خدمتك نعاونك فيها نلݣا ليك موبل فين تحل لاجونص ديالك أش ݣلتي ؟
- محسن ( وحل شاف فباه لي حرك ليه حجبانو بمعنى شوف لي بغيتي دور وجهو للعند طارق بانت ليه يسرى كطل من القنت تنهد تنهيدة طويلة ) :
واخا اخويا طارق لي درتيها انا معاك فيها
- طارق : بغيتي كاع تبعد على كازا نشوفليك فالمحمدية كاينين ديور واعرين بثمن مناسب .. الى ماعندكش مع البارطمات ومع كترت الجيران انت غير ريݣل امورك فطنجة وأنا معاك
- محسن : واخا خويا ويسرى ايمتا نديرو انا وياها العقد ؟
- عبد الخالق : هاد السيمانة ولد عمها عندو العقد وموراها غانطلعو كاملين لسوق الأربعاء على وديت العرس
- محسن : منݣدش نتسنى انا هاد الوقت كامل ( خرجات ليه بلاما يشعر ) حتى حنا نحمعو وراقينا ونديرو العقد ديالنا ودبي**حة نجيبها لتم نيت فرح واحد يكونو جوج أش بان ليك أعمي ؟
- عبد الخالق ( شاف فولدو ) أش بان ليك اولدي ؟
- طارق : مزيان يجمعو وراقيهم يديرو العقد ديالهم داك دخول والخروج والهضرة فتيليفونات مكاين لاش ..
- محسن ( عاد رتاح وتبسم جس بروح رجعات ليه ) : الله يكبر بيك اخويا .. صافي انا من غدا نجمع وريقاتي وتجمع وراقيها ونديرو العقد ديالنا
- أب محسن : والله يجعل كولشي مبارك ومسعود الله يتاويهم الخير .. ويجعلها من الصالحات ياربي ويبعد عليهم شر الخلق
- الكل : امـــــــــــــيـــــن ..
^^^^^^^^^^^^^^^^^
- تقداو علاش قدو والباقي أجلوه حتى للغدا حيت مغايبقاش ليهم الوقت وعياو .. دازو للستوديو عند رشيد منها رشيدة وتودة يرتاحو وعنبر تكمل التسجيل .. سلات اخر التسجيلات ديال الأغنية كملاتهم عاد رتاحت وصلهم رشيد للدار طلعو هوما وهي بقات معاه فطوموبيل
- رشيد : متيقنة من هادشي لي غاديري ؟
- عنبر ( بالإيجاب ) : الصحة اخويا هي كولشي .. مابقاش هادشي كيجي معايا جوج ديال العراسات دوزتهم راه شتي كنجي راسي غاينفاجر واخر واحد ديال ياسمين تزاد عليا الحال فيه ديك الضرورة عمري نساها
- رشيد : هي غير نرض الناس لي كانو باغيينك على واحد لافير فيها الفلوس
- عنبر ( بتساؤل ) : أشمن افير ماݣلتي ليا والو ؟
- رشيد : جينيريك ديال واحد المسلسل غايكون فرمضان إن شاء الله غايدوز فالأولى كانو بغاوك على وديت الجينيريك .. دوا معايا المخرج غير صباح
- عنبر ( بإبتسامة ) : وايلي ( سكتات كتخمم) نديروه ماشي مشكيل يكون ختامها مسك غير العراس لا صافي أرشيد مابقيتش قادة
- رشيد : لا عراس لا كليپات ياك ؟
- عنبر : لا صاف براكة .. هاد الجينيريك والله يخلف الله يعمر براكة .. أجي غدا غاتمشي مع خالتي على وديت المحامي غانمشي حتى انا عندي رونديڤو مع طبيبة
- رشيد : ياك شي باس مكاين ؟
- قدام الموبل لي كاينة فيه الشركة ديال الكريمي واقف بعيد بسكوتر ديالو قاني عليها تخرج .. كيبان ليه وليد خرج ركب فطوموبيلتو ورك على يديه بعصبية مخليه هو اخر واحد دابا مغايدويش ومغايديرش شيحاجة ماهياش لي يندم عليها مكايزطم حتى كيعرف فين .. خرجو كاع الموظفين حتى ليها هي مكايناش بقى مدة وهو قاني حتى مابقى حد زاد كيتسنى او والو ديمارا السكوتر متوجه للدارها ..
** لابسة بيجامة ديالها سدات على طاجين جامعة شعرها سفنجة .. من ملامح وجها باينة مقلقة وباهتة ماشي بحال عوايدها .. حلات الثلاجة زفرات كان خاصها المونادا توجهات لبيتها هزات بزطامها لاحت عليها المونطو ديالها لبسات بانطوفتها هزات سوارت الدار وخرجات هبطات كان واقف علال الكونسييرج رمات ليه السلام وتوجهات للحانوت ..
- ماريا : مولاي عفاك واحد لاسيݣون ( كدور فراسها ) عطيني زريعة البيضة والكحلة وݣرملو عفاك ( كتشوف شنو خاصها مزال ) هاذ شيپس وعطيني هذا ( وراتو واحد بيمو ) وعطيني هاد الشكلاط ، عطاها مول الحانوت داكشي لي بغات دارهم ليها فساشية خلاصاتو تمات راجعة كترجع الصرف للبزطامها كتحس براسها تجرات وتخبطات مع الحيط حتى طاحت ليها ساشية من يدها كلها كترعد عند بالها غادي تݣريسة ..
- هزات راسها لقاتو هو تصدمات ماتوقعاتهاش .. كتشوف فعينيه بحال الى اول مرة غاتشوفو
- ماريا : ف فاروق ( كلها كترعد ) م مالك اش كدير ؟
- الروطال : دوي الق*** دورتوني رضيتوني قرد ، جايا تبورضي عليا دايرة فيها الشريفة العفيفة انت وداك الز*** لي مسيفطك
- ماريا ( زير ليها على فكها ضرها ) : علاياش كدوي انا والله مافهمت شيحاجة ضريتيني افاروق يهديك الله
- الروطال ( زاد مدخلها فالحيط مغزف عليها ) : داك الق*** لي سيفطك ياك .. مضوريني ارباعت الق*** عند بالك غاديروها بيا جاو قبل منكم وݣلسناهم على القراعي وف****م
- ماريا ( غرغرو عينيها بدموع ) : قسما بالله حتى ضريتيني ؟ فاروق انا والله مادرت شيحاجة قسما بالله مافهمتش اشنو واقع
- الروطال : تحشيو ليا شكلاط غامل اولاد ***** تهرسوني ضربو ليا لي درت سينين هادي فزيرو لاعبينها معاملمية بيناتكم دوي ابنت *****
- ماريا : انا راه مابقيتش خدامة ( كتبكي) جرا عليا وليد بلا موجب شرع جيت فصباح لقيتو عاطيني حسابي سيمانة دابا وانا فدار بلا خدمة
- الروطال ( من تحت سنانو بصوت مخليها كلها كترعد ) : غاتاكليني بهاد جوج كلمات .. الطر غانضربو ليك لا انت لا هو
- ماريا : وحق الله معارفة شيحاجة انا قسما بالله .. سيمانة وانا كالسة فدار الى متقتيش سول صوفيا لبنا لي خدامة معايا ولا عمي علال الكونسييرج هو يقوليك سيمانة وانا فدار راه جرا عليا وحق الله مكنكدب( كتشهق) وغلاوة والديا عندي معارفة شيحاجة ومدايرة والو ..
- طلق يدو كيشوفيها جيفها كتكح وتمسح فدموعها حسات بالفشلة البولة بغات تطلقها ، كيشوفيها بملامح خالية من اي إحساس :
اش كتعرفي على داك **** ؟
- ماريا ( هزات فيه راسها كتحاول تسترجع انفاسها اول مرة تشوفو هكا خلعها وزادها لتخسار الهضرة عمرها ضنات يوصل معاها لهاد المستوى) :
سيمانة هادي كنت خدامة عادي .. واخا نابقاش بيناتنا داك تعامل ديال شحال هادي الاثنين لي داز جيت ( قاطعها )
ختاصري متعاوديش ليا قصة حياتك
- ماريا : نهار الاثنين لقيتو حاط ليا حسابي وقالي ساليت الخدمة معاهم .. حتى انا مافهمت والو
- الروطال : عندهم شي وزين من غير هذاك ؟
- ماريا ( زفرات بخوف ) : اه عندهم كاين ديال برشيد وعاد لاخور كاين فطريق بوسكورة
- الروطال ( قرب يدخل فيها صاعر ) : كتريݣلي عليا .. بوسكورة عطا الله الوزينات فيها نيشي فين تزيݣزاݣي عليا نفسك
- ماريا ( حسات بالفشلة ) : من ورا الديبو الكبير ديال الصافي .. هادشي لي عارفة انا وسمعتو هو وباه كيعاودو عليه شيحاجة أخرى والله معارفاها ولا عالمة عليها شيحاجة
- الروطال ( بتحدير ) : أقسم لك برب العزة أماريا تخرجيها وتبلابلي غانفصل أصلك .. عطاها بظهر راكب فسكوتر ديالو وزاد بقات متبعاه بالعين رجليها كيترعدو مقاداش تحرك هزات ديك ساشية لي طاحت وتمات غادية لدارها قلبها بغا يسكت ، طلعات لدارها باغية تحل الباب يديها فشلو عليها فتح رشيد باب دارو كتبان ليه واقفة باغية تحل الباب ومقاداش
- رشيد : ماريا .. ضارت عندو غير هزات راسها فيه طرطقات بالبكا مرمية بين يديه كتبكي ( كيدوز على ظهرها متفاجئ من ردة الفعل ديالها ) شششش براكة من البكا وصافي أماريا .. بقا كيسكتها حتى بدات كتهدن بعدها عليه كيشوفيها ) مالك أش بكاك ؟
- ماريا ( كتحاول تجمع راسها ) : والو غير شي مشاكل سمحليا .. ( عطاتو بظهر بغات تحل الباب يدها كترعد تحيد ليها الساروت من يدها حل ليها الباب دخلات ودخل هو وراها :
مامالفاش ليك واش عندك شي مشكيل عاودي ليا أنا كنسمعك ..
** عندو هو لي من عندها عفط نيشان للقنت واحد حي مولاي رشيد وقف فواحد القنت هاز تيليفون من غير تيليفونو .. كان تيليفون عضم عادي ، بعد على الحومة مخشي تحت واحد الشجرة كيدور عينيه ركب النمرة كيتسنى .. حتى جاه الرد من الجهة لوخرا
- الروطال : حبيبي فين هاني .. الحمد لله يخطيك البشري تكون فوݣ فيݣيݣ ( داير يدو فجيب تجاكيط ) مسالي .. باغيك فواحد البلان تغيزو ليا وبحلاوتك .. أنا حدا الݣولڤازور .. هو هداك صافي سير عالله ..
- ݣالسين فالبالكو ديال الكوزينة حاطين الزريعة بحال العادة .. كانت ستفات دهازها فالماريو من ورا ماوراتو للسميرة بدا تيليفون حياة كيسوني كانت نمرتو شافت فعنبر لي حركات ليها راسها بشكون
- حياة ( رضات باب البالكو وأشرات ليها باش تسكت ) : ألو
- جواد : نهار كبير هذا امدموزيل منين حن قلبك تجاوبي
- حياة ( بإبتسامة وصوت طاغية عليه لكنة البراءة ) : نو والله ماهكاك مكانساليش ݣاع
- جواد : لالة حياة عندها شركات وحنا مافخبارناش ولا كيفاش ؟
- حياة ( ضحكات بأنوثة ) : لا غير حيت بنت خالتي قرب عندها ضريب الصداق ومكانساليش
- جواد : ولكن على الاقل لقيتي الابيل ديالي فاش تسالي أبيل موا ولالا
- حياة : كنبغي نسوني وكتجي حاجة وكنسى ( كتشوفيها عنبر وتحرك ليها راسها بأحياني عليك )
- جواد : واخا الالة مقبولة انت هي هاديك ؟
- حياة : الحمد لله وأنت شي خبار على أمينة ؟
- جواد ( بصوتو الرجولي ) : مسوني باش نسول فيك ولا ندويو على أمينة ؟
- حياة ( ضحكات ) : لا اغير سولت من صواب وصافي ..
- جواد : أش درنا السبت نتلاقاو نتغداو أونصومبل ومن بعد نضربو دويرة فالمول شنو بان ليك ؟
- حياة ( شافت فعنبر ) : انا غانحاول
- جواد : ضريب الصداق كيكون الاثنين أحياة ماشي السبت حنى غانتلاقاو عادي أصدقاء مايمشيش بالك بعيد الله يرضي عليك
- حياة : لالا والله مامشى بالي بعيد انا غير ( قاطعها )
السبت غانجي نديك من البلاصة لي هزيتك منها أحياة وهاد المرة نسوني جاوبي الله يرضي عليك صافي .. يلاه تهلاي فراسك رتاحي ( قطع)
- عنبر ( شافت فيها مصدومة ) : أش تم ؟
- حياة : قالك والو السبت نتلاقاو نتغداو ونديرو دويرة فالمول وبلاما نتحجج
- عنبر : وانت سيري وحضي راسك ( زفرات بقوة ) أنا هازة الهم غير لطبيبة غدا تخايلي تقولي مافيا والو وبلي انا بيخير وعلى خير خايبة حتى لمعاودة أحياة
- حياة : ديك الساعات خاصك ديري الزردة .. حيت غايكون داك جلاڤاج ضحك عليك ورضك انت لي عايبة وهو لي معيوب
- عنبر : زعمة يدير ليا ديك اللعيبة ديال انا معيوبة وانت صابرة عليا وانت عايبة وهاني صابر عليك ( كمشة بيدها على سروالها ) ناري يا حياة كنتفكر كنبغي ناكل جنابي راه مغاتسرطش ليا كنت بهلة حتى لهاد الدرجة
- حياة : دنيا هي هادي ( تنهدات ) كنتعلمو منها شلا وشلالي .. حطات راسها على الحيط ساهية وبالها غير مع غدا
==========
- واقفين هو او واحد الشخص لابس سروال دجين مقطع مع تجاكيط كويرة كان ضعيف وقصير عليه مخشيين تحت واحد الشجرة وكيدويو .. جبد الروطال من جيبو جوا مدو ليه :
هادي باش تحرك من بعدا غاتاخود الضوبل ديالهم خاصك غاتغيز معايا الامور وتكون مريݣلة ماتنقص متزيد
- .... : كون هاني أخويا الروطال بحال ديما لي دخلتها مكنخرج منها حتى نفاريها انت أكون معايا على القرص
- الروطال : العز اجمي الو بيناتنا .. لاخر مشا والروطال ركب فسكوتر ديالو وشد الطريق ماوقف حتى لولفة بلاصة سكوتر ديالو وسونا للعماد :
فين امعلم .. انا لتحت تحت دارك .. وايلي ولاد الحرام انتوما تحت الدف ... يلاه سير .. تحل الباب اوتوماتيك دخل سكوتر ديالو فالكولوار وسد الباب طلع مع دروج فتح ليه عماد ودخل كان طارق وعصام وراشد مجموعين
- الروطال : كتغفلو الاوباش وغير علمو
- عصام : يلاه دخلنا درنا ليه هجوم شامل
- طارق ( هز التيليفون ) : يلاه غانسوني ليك هانت سونيتي عمرك طويل
- عماد : ݣاع هادي محبة فيكم أولاد العبد مكركبين عليا ؟
- طارق : هذا راه متجيوش عندو
- الروطال ( مزول تجاكيط لايحها ) : با راشد أش تم شتك دݣيتي الوتد
- راشد : هاهو بدا تاني فضحكو الفاضي ( مرة كتفلت ليه كلمات بلهجتو الأصلية ) ݣلنا ليك غانطول هنا هاد المرة وتابعكم حتى لسوق الاربعاء ..
- الروطال (غمزهم) : هذا باغي يدي شي غرباوية المليح اسيدي
- عصام ( طانز) : المليح راه طلب ليه النمرة ومعبروش أصاحبي وعطاه واحد البونت قاصح ماتبغيهش العدوك
- الروطال ( ضحك ضحكة رجولية طويلة تقيلة ) : شكون هاد البرݣية ؟
- عصام ( غمز راشد ) : أش بانلك نبيع بيك ونحط وراقيك ؟
يتبع..
التعليقات
لا توجد تعليقات بعد، كن أول من يعلق.