محتوى القصة
- عماد ( بإبتسامة) تانتي كولشي بوقتو زين كولشي غايوصلهم ( غمزها) انا غانمشي نسبقكم طريق السلامة .. طلع لطوموبيلتو ديمارا مشا بقات واقفة ساهية حتى فيقها صوتو :
سدي الباب .. سبقها للطوموبيل طلعات لظار تأكدات من البوطة واش مسدودة لقاتها مسدودة السراجم مسدودين سدات الباب بساروت وهبطات لباب الجريدة سداتو حتى هو .. طلعات حداه يلاه دارت السمطة وهو يديماري شاد الطريق ..
~~~~~~~~~~~
- فريسطو فعين الذياب وقفات طوموبيل ديالها نازلة طالقة شعرها دايرة نظارات ديال الشمس سروال ديال الثوب فالأخضر ملكي مع ڤيست فنفس اللون وتريكو طالع بالكول دخلات للريسطو بنخوة مشات للطبلة فجهة مقابلة مع البحر .. زولات نظاظرها وحطاتهم فوق الطبلة جا عندها السرباي يشوفها شنو بغات بإبتسامة جاوباتو :
كنتسنى واحد السيدة غير توصل وناخدو .. ستأذن منها ومشا شافت فساعتها المذهبة الرقيقة هزات عينيها عند الباب بانت ليها داخلة بإبتسامة على وجها لابسة بوتيو عالي وطالع حتى لركابيها فالكحل مع كسوة قصيرة فالكحل منفوخة بالخويطات وشوميز فالبيض من التحت وفوق منها دايرة مونطو وساك فالكحل ملامحها كانو زوينين اما شعرها فكانت دايرة ليه كوپ ݣاغصو مع لافخونش .. شافتها وقفات بإبتسامة معنقاها .. حيدات داك المونطو حطاتو جرات الكرسي وݣلسات قبالتها كتشوفيها بحب :
فينما كنتلاقى معاك اطاتي خديجة كتزيدي تزياني
- خديجة ( ضحكات) احيانة عليك ديك حلاوة اللسان لي عندك كتعجبني فيك .. ايوا ماتبقايش تقولي ليا طاتي خليها خوخة افروحتي
- فرح ( ضحكات) مكاينش لي كيدلعني قدك اخوخة ( جا السرباي خدا منهم الطلبات لي بغاو ومشا) خوخة مال زين شتك ماهياش اش واقع ؟
- خديجة : خليها على الله ( تنهدات) قولي شنو ماواقع كولشي خرج من تحت يدي .. انا وإدريس واقفين على الطلاق
- فرح : Nooo c'est pas vrai mais pourquoi ؟؟ ..
- خديجة : فضل عليا عائلتو الخامجة خليه الله يطليه بيهم .. انا كاعما هامني هو داخل ليا من هنا وخارج ليا من هنا .. ولادي لي تبعوه واحد تابع الثاني ؟
- فرح ( كتسمع ليها بإهتمام ) واش حتى ماجدة وعصام ؟
- خديجة : هاديك كيحركوها كيف بغاو تابعة تريكة باها .. عصام من شحال هادي خرج دار دارو بوحدو .. عماد لي تبعو كنت بغيتلو واحد البنت بنت صاحبتي تقلق ولا يعلي فصوتو كان عينو فديك الملقطة ديال بنت عمو جاب الله رجعات لراجلها
- فرح ( تنهدات ) وفاروق ؟
- خديجة ( بعصبية ) هداك هداك افرح هداك لي مرضني ومحني وفقصني وطرطق ليا المرارة ، ماشي راه تزوج
- فرح ( هزات حواجبها بإستغراب) وايلي إيمتى ماوصلني والو شكون هادي ؟
- خديجة : واحد الخانزة واحد الملطقة الموسخة ماعندها لا أصل ولا مفصل فقصني افرح فقصني .. مزوجة ومطلقة وعندها ولد ومن الفوق شيخة شيخة أفرح
- فرح ( حطات يدها على فمها ) نوووو اويلي واش فاروق حماق واش تسطى مايمكنش ؟ شكون هادي بعدا واش شي وحدة معروفة ؟
- خديجة : ماعرفت لجدها كانت غنات فعرس بنت عمو تم يمكن شافها لصق عليها لصقة وحدة .. ماعرفت مندير اليوم راه غاديين لدار جدو دايرين العرس تماك حرام واش خسرو عليا تيليفون واحد يحاشيوها ليا ولا جا يطيب خاطري
- فرح : مشكيلة والله ولكن دابا مابقى عندك مديري تزوجو سيتغوتاغ
- خديجة : ماطروطار والو والله يا مها حتى نوريها الخانزة غير بلات .. الى ماطلقتها منو مانتسناش خديجة
- فرح ( ضحكات) وهادشي لي بغيت نقول ليك .. مامعروفش عليك تشدي يدك اطاتي زعمة راك القدوة ديالي ..
- خديجة ( ضحكات) انا ماكرهتكش ليه انت بنت القاع وبنت الناس وقارية تبارك الله وبخدمتك .. مابقيتيش رجعتي لفرنسا ؟
- فرح ( بنفي ) نو ݣلست هنا مقابلة لوطيل ديال خويا راكي عارفاه قليل فين كيدخل المغرب .. كولشي مني أنا دابا .. الشركة تم خليتها لواحد صاحبتي كنعرفها انولي نمشي نضرب طليلة ونرجع ( قاطعهم السرباي لي جاب ليهم الطلب ديالهم )
- خديجة : مزيان برافو عليك .. الله يرضي عليك
- فرح : الى بغيتي فاش يرجع فاروق نمشي ندوي معاه شنو بان ليك ؟
- خديجة ( بإبتسامة خبث) وي علاش لا سيري .. ولكن ماتمشيش للخدمتو عارفاه مكايحملش شي حد يوصليهم للخدمة سيري عندو لدار نيشان ..
- فرح ( بلعات لقمة لي ففمها بإبتسامة ) اممم بغيتي تقلي ليها السم بيا أنا عقت بيك
- خديجة : خليها تشوف الزين والمكانة ديال بصح تعرف راسها معامن ..
- فرح ( كتفكر ) اممم نشوفو ..
- شادين الطريق فهدوء وسكات .. مد يدو مخدم الموسيقى كانت ساهية فطريق حتى سمعات الموسيقى لي طلق دورات راسها ابشوية كتشوف فالموسيقى وكتشوفيه .. كان مخدم سعيد ولد الحوات :
الا تشكي يا قلبي على لي مايشكي عليك
الا تبكي ياقلبي على لي مايبكي عليك
صحابلكوم اجيابك حبابك هوما والديك صحابلكم اجيابك حبابك هوما والديك ..
- صدمها بالأغاني لي مخدم بقات غير كتشوفيه حال السرجم يد مخرجها ويد كيسوݣ بيها مرجع راسو وكيحركو مع الموسيقى .. من ملامح وجهو كانت عاجباه وجاياه على هواه .. حس بيها مقابلاه دور راسو شابيها لقاها ساهية كتشوفيه حرك راسو
عنبر : شنو ؟
الروطال : انت لي شنو ؟
عنبر : اربي أش هاد الأغاني لي مخدم ؟
الروطال ( ببرود ) : مالهم ؟ كيجاوك ؟
عنبر : جاوني بحال دوك الأغاني ديال صحاب السواق وصحاب جاڤيل
الروطال : دابا سعيد ولد الحوات من صحاب جاڤيل ( حك لحيتو ) وديري لينا الالة شي دويسك ديال صحاب الوقت نشوفو دوقك ..
عنبر : هي لي متعاود وانت داير ليا الكأبة .. تبكي يا قلبي وتشكي مالنا اخويا على البكا وشكا .. ، كانت تيليفونو محطوط مخدم يوتيوب ، هزاتو كتقلب ورجعات حطاتو شايفة فيه بإبتسامة :
ودابا سمع ليا .. ، كيسوݣ وكيتسنى الموسيقى وهاد المرة هو لي شافيها بإستغراب وصدمة جاتو الضحكة لي صدرات من شفايفو مبينة على سنيه المستفين البويض ..
الروطال : واش من نيتك ؟
عنبر ( كضحك) وغير سمع أصاحبي بعدا
الروطال ( شافيها هاز حاجب ومنزل الثاني ) اتبارك الله على عبد المولى مول السرومبق
عنبر : انا دابا عبد المولى ( ببرود)
الروطال : بففف واخا الالة عنبر مزيانة دابا صافي زيدي فصوتو زيدي
عنبر ( حبسات الموسيقى ) اول حاجة بعدا راه كاعما كنت غاندوي معاك .. اخر مرة تعاود تحط عليا يدك فهمتي ولالا ؟
الروطال : تدوي معايا مݣاد ندوي معاك مݣاد .. ديك تفو ودعاوي ديال تحت الواد ماعنديش معاهم مخي مريض انا فهاد التواشا ..
عنبر ( بلعات ريقها ) ولكن راه انت لي بقيتي عليا بدوك الهضور وبتخسار الهضرة
الروطال : ياك دوينا قبل فداكشي ݣلتي لي عندك انا ماشي مكبوت ابنت الناس نشدك بزز ولا نتلاح عليك ( غمزها) الى بغيت نفش نبولتي انت اخر وحدة ندق عليها فهمتي
عنبر : بغيت انفهم حاجة وحدة علاش مكتحملنيش ؟
الروطال : من نيتك ( وقف طوموبيل على الجنب فاتح لاسنتيغ وتقابل معاها) أش بيني وبينك باش منحملكش ؟
عنبر : حيتاش فينما تلاقينا كتبقى تسمعني الهضرة مافهمتش انا ؟
الروطال : وراه هادشي كينطابق عليك انت لولة
عنبر : لكل فعل رد فعل علاش منتعاملش مع عماد بنفس الحاجة
الروطال ( صغر عينيه) عماد اممم .. ماكرهتيش كون كان هو لي تزوج بيك هاد تزويجة ياك ؟
عنبر ( بقات كتشوفيه محركة راسها ) شتي هادشي باش انا وياك مكنتفاهموش انت كتشرق وأنا كنغرب ..
الروطال : ايوا الالة فهميني راه هي هادي دابا ..
عنبر : انا قصدت زعمة عماد كيدوي معايا مقاد كندوي معاه مقاد هادشي لي بغيت نوصل ليك وانت كتفهمني غلط
الروطال ( بجدية) كل واحد وكي تربا وكيكبر ( وقف يدو قدام عينيها) هادو خمسة ديال صباع لاصقين فكف واحد خارجين من يد وحدة وحتى واحد فيهم مكايشبه لخوه هكاك أنا .. انا الالة خضر مكنعرفش ندوي ..
عنبر : وراه هادشي خطير عندك ( شافيها بإستغراب) وراه خاص تولي تعامل مع الإناث
الروطال ( جاتو الضحكة وحبسها) هذا هو المشكل انا مكنعرفش نتعامل مع العيالات أنا هوكا حياتي كلها كنتعامل مع الرجال فهمتي البلان
عنبر ( خرجات عينيها وحنحنات) وايلي زعمة دابا سمحليا الى دخلت لشبوقات واش ماكنتيش كدير احم ( حكات جبهتها وتزنݣات)
الروطال : زعمة كنتصاحب .. لالا كنت ولكن داكشي اپاصاجي تخربيق شيحاجة ديال صح لا مبغيتش نعلق فيا شي مرضية نصدق داي ذنوبها
عنبر ( حركات راسها بينها وبين نفسها الممسوخ لاخور كان غير كيزها ويفوت أحياتي عليه ) مزيان فهمتك
الروطال ( صغر عينيه فيها ) علم الله أش كيدور ليك فداك دماغ عدك
عنبر : مكايدور والو غير كنسمع ليك وصافي .. ولكن علاش فين تلاقيتيني كندابزو
الروطال : انت دايرة بحال الفتيلة دغية كتشعلي كيعجبني الحال نشد فيك ونعصبك هادشي لي كاين ازينة التبريحة .. مابيني وبينك الخير والإحسان
عنبر ( قلبات شفايفها ) انا مكنتعصبش غير مكايعجبنيش لي يقوليا شنو ندير وشنو منديرش ماولفتهاش فحياتي فهمتي
الروطال ( هزهز راسو ) خاص تولفيها ازين انت دابا مزوجة واخا مكاينش نكاح ( خرجات فيه عينيها) ولكن مزوجة بشرع والقانون ..
عنبر : بغيتي تقوليا بلي اتفرض عليا الحوايج لي انا مامرتاحاش فيهم ياك ؟
الروطال (ببرود تام ) لا حشومة غير هو ديك اللعبة ديال ديري لي عجبك وتمشي فينما عجبك بلا موجب شرع وبلاما تشاوري وتعلمي ماعنديش معاها
عنبر( خرجات فيه عينيها ) وهادشي راه عليك حتى انت ماشي غير أنا إلى فخبارك
الروطال ( بنفس البرود طانز) الله أودي وأنا نقدر .. ساليتي نكملو دابا ؟
عنبر : ماطلبتيش السماحة ( شافت فيه)
الروطال( هز حاجب ونزل الثاني) شناهو السماحة ولا ماضسريش صافي دوينا
عنبر : وراه خاص تعلم دوي مع الأنثى والمرأة
الروطال ( هزهز براسو ) إن شاء الله منين تكون الأنثى ندوي معاها
عنبر : دابا بغيتي تقولي انا ماشي أنثى ياك ؟
الروطال ( طلق إبتسامة طويلة مديناري ) واش لي كتݣول صاحبي وكتقلز أنثى الله يهديك أعنبر .. إن شاء الله من هنا لݣدام انديرك صاحبي عشيري فجنبي ( غمزها ) أش بان لك ؟
عنبر : لهلا يحي( شافيها بمعنى ايوا تخرجيها مايعجبك الحال) لا حول ولا قوة الا بالله العلي العظيم النقاش معاك عويص والله
الروطال : خدمي خدمي داك دويسك نكملوه خدمي ..
عنبر ( شافت فيه بعصبية) انت مايصلاحش ليك هذا انت يصلاح ليك هدا ( خدمات ليه أم كلثوم)
الروطال ( راشق عليها ) دويسك ناضي ديال هاد أم كلثوم كيعجبني عندك الدوق الفنون ..
عنبر : دابا انت كتعجبك أم كلثوم ؟
الروطال : ومالها تغلبنا .. اممم بعيد عندك حياتي عذاب والله الى دويسك خطير عندها
عنبر ( خنزرات فيه مفقوصة دورات وجها جامعة يديها مجاوباتوش )
الروطال : سبحان الله كتشابهو
عنبر ( ضارت شافت فيه) انا كنشبه لأم كلثوم ؟
الروطال ( شاد الضحكة ابزز) لا انت والقنبول ديال عاشور ( طرطق بضحك)
عنبر : كوينيدي لاخر
الروطال : شناهو ؟ ( سكتات مدورة وجها) تي دوي عاوديها ..
- قاطعهم التيليفون ديالو لي كان كيسوني رمات عينيها لتيليفون النمرة طالعة بلا سمية وديال الفيكس .. حبس الموسيقى فاتح الخط :
ألو
.... : موسيو فاروق سمحليا على ديرونجمو
الروطال : أش تم ؟
.... : موسيو فاروق بغيت غير نعلمك بلي مدام عبلة غاتكون فالمغرب فلو 15/2 ( عنبر طالقة ودنيها معاها )
الروطال : ايمتا دوات معاك ؟ مالفة كتعلم طارق ولا راشد !
.... : والله ماعرفت اموسيو يقد تكون سونات للموسيو راشد وماجوبهاش ..تاصلات بيا المساعدة الخاصة ديالها وكان خاص ضروري نعلمك
الروطال : ماݣديتيش تسناي ادلال حتى نرجع زعمة علمت قبل ( حس بيها تزنزلات ) ماعلماتكش بأشمن أوطيل غادي تنزل ؟
دلال : لا الصراحة ماعلماتنيش ولكن قالت ليا فاش غاتقرب غاتعلمني بفين غاتنزل ، بغات تشوفك فأقرب فرصة
الروطال ( حك لحيتو) ماشي مشكيل انشوف مع طارق وراشد واخر مرة نكون مسافر وتسوني ولا تعطي شي رونديڤو لشي حد حتى نرجع
دلال : واخا موسيو سمحيليا عمرها تعاود .. قطع الاتصال مرجع الموسيقى وعنبر ساكتة كتعض فباطن حنكها ساهية وكتسول راسها شكون هاد عبلة لي كيسول فين غاتنزل .. وكيعرفها هو وصاحبو او ولد عمو
الروطال : فين سرحتي عجولك ( فيقها من سهوتها ) فاش كتخمي أمدام ؟
عنبر : ماسرحتهم فين والو غير ساهية وصافي ( سكتات ) غاندوزو ناكلو فشي قنت ولالا ؟
الروطال ( شافيها ورجع شاف فطريق ) فيك جوع ولا ( جابد حلوة من جيبو ديال القهوة لايحها فمو)
عنبر : فطرت بكري وخرجنا بلا غدا اش داكشي كتاكل ؟
الروطال ( جبد حلوة مدها ليها ) شدي .. خداتها عندو حلاتها خشاتها ففمها لايحة القاعط من السرجم ، هبطات المرايا كتقاد فشالها رجعات المرايا لبلاصتها وتكات بظهرها على الكرسي .. شافيها ورجع حط عينيه على الطريق حتى سونا تيليفونو رمات عينيها بزربة لشاشة كانت نمرة طارق ..
الروطال ( فاتح الخط ) وي با طارق أش تم ؟
طارق : عبلة جايا فخبارك ݣالتها لك دلال ؟
الروطال : اممم علماتني لاش جايا تاني ؟
طارق ( كيضحك) عارفها علاش دور دور وتنزل للمغرب الروطال ومداير فالبنات .. الله يرزقها الصبر فاش تعرفك ضربتي الكحل فالبيض
الروطال ( حنحن) تمشي تق** بيناتنا خدمة بحال والو نلوحك أنت تنضي معاه ونبقى فتيساع ( شاف لعند عنبر كانت مظورة راسها كتشوف طالقة ودنيها بحال النمس)
طارق : ياك أخويا تلوحني انا للعافية ماحشمتي .. شكون بايع ليها الخيل أنا ولا انت ؟ وشكون بايع ليها البارطما لي فطنجة انا ولا انت ؟
الروطال : الخيل انا وأنت وراشد شركة اسي محمد شتك نسيتي راسك .. البارطما بقات فارعة ليا **** ( شافت فيه عنبر مخنزرة شافيها محرك راسو بمعنى ماعندي مندير) بغيت بيت يطل على البحر وديك الهضرة المزعلكة ديالها
طارق : وسيدة بغات تبقى قريبة من معشوقها ( معارفوش داير مكبر الصوت وحتى الروطال مخلي الاتصال ماعندو مايخبي لا هي كتبغيه ولا هو مكاين لاش يخبع الاتصال ولا يعلمو )
الروطال : كنݣولك الخدمة مع العيالات لاروب .. ولكن انت وداك الق*** ديال راشد فرعتو ليا راسي بيها حتى تݣدمت معاكم اوجوه الحبس
طارق : ولايني انت واحد( قاطعو الروطال بزربة) ..
فراني امعلم المدام حدايا
طارق ( مصدوم) واش مكبر الصوت أولد العبد ؟ سير مابغيتش نسبك تفو على ميكروب ( قطع عليه ) خلاه كيضحك بحال الى مكاين والو .. عنبر مادواتوش كتبان مكالمية عكس أفكارها وتفكيرها شي كيضرب فشي ضرها راسها تعرف شكون هاد عبلة لي كيدويو عليها ولي باينة حامقة على الروطال .. ماحساتش ايمتا وقف فواحد السطاسيون فيه قهوة حتى فيقها من سهوتها :
مابغياش تعالجي ديك المعدة ؟
فسوق الأربعاء الغرب .. وصلات طوموبيلت رشيد لي هازة تودة ورشيدة وحياة هي الأولى ، كان واقف واحد السيد فشانطي شاف طوموبيل حبسات عرف بلي كتخص الناس نساب دار عائلة علال حيدر .. أشر ليهم بيدو جاي كيجري لعندو لجهة السرجم هبط رشيد الزاج
.... : السلامو عليكم توما جايين عد سي علال؟
رشيد : ايااه اسيدي نسابو ( اشر ليه بيدو باش يتبعو ) ..
.... : مرحبا بيكم زارتنا البركة وبارك ومسعود أجي تبعني زيد زيد .. تبعو بطوموبيل داخل من طريق بيست ضايرين بيها غير الطبيعة وديور بعاد والعيالات دايزين لي غادي بخبزو كل وحدة وشنو كدير والعينين على الطوموبيل كولشي كيشوف .. كتبان ليهم دار بيضاء كبيرة قدها قداش قدامها واقفين شي طوموبيلات بلاصة طوموبيلتو .. خرج عندو عصام هو وسي علال ستقبلوهم مرحبين بيهم ، اول حاجة لاحظوها هو عود طويل مربوطة فيه ربطة ديال النعناع فوق السطح ..
- دخلو للدار الداخل وهنا كانت الدار غير تصدمو فيها خصوصا حياة كدور فعينيها الدار كانت كبيرة بسواري وزليج مغربي قح الصالونات كانو طلامطهم بلديين قحيين ديال الموبرة واحد لي كان فالبيج وصفر وتالي كان فالبيج والأحمر .. والصالون لاخر كان صغر منهم شوية بالخضيضر ودهبي والبيج الصالونات الاولين لي كانو كبار كيتوسطهم 3 ديال طبالي فوق منهم صواني ديال أتاي والفاكية ..
- الريحة ديال الطياب عاطية وصوت الملاغة دالعائلة كانو حاضرين شحال من واحد .. العيالات ستقبلاتهم رقية ودخلو معاها لواحد من الصالونات ورشيد مشا مع علال .. خلطو عليهم سميرة ويونس ورجاء مع رحيمة وليالي ستقبلوهم حتى هوما بحفاوة عاد خلط عليهم عزيز مع مو وباه ..
رقية : لالة تودة هادي فاطمة عمت ولدي فاروق
فاطمة ( عنقاتها بجهد وبكل حب ) مرحبا بيكم والله يجعل كولشي مبارك ومسعود
تودة : الله يبارك فيك الالة اللهم آمين ياربي ..
فاطمة : ولدي فاروق عزيز عدنا والله العظيم فاش ݣالو ليا تزوج ماݣداتني فرحة ( بصوت عالي زغرتات 3 دزغريتات ) دخلات واحد زوج بنات يكونو فثلاثين من عمرهم وحدة لابسة بينوار شعرها عريان ناقشة يديها معمراهم كلها دهوبات .. وثانية حتى هي بحالها دايرة ليميش باين من شي زغبات خارجين من الشال
رقية : هادو بنياتها إبتسام وأسماء مزوجات إبتسام عدها زوج وليدات وأسماء عندها وليد
تودة ( سلمات عليهم ) تبارك الله وصلاة على النبي
إبتسام : مرحبا بيكم على سلامتكم فين هي عروستنا ؟
تودة : خليتها مع راجلها غاتجي هي وياه
إبتسام : مزيان الله يوصلهم على خير ( شافت فمها) مي سوارت ديال سامسونيط فين هي .. خرجات هي ومها وختها بقات كالسة معاهم
- أسماء : متعدبتوش فطريق ؟
تودة : لالا الحمد لله
أسماء : شكون هاد الزين ( شافت فحياة)
تودة : هادي حياة بنت خالتها ديال عنبر وهادي مها رشيدة وهادي سميرة مرت راجلي الله يرحمو اللولة صاحبتي وختي .. وهادي رحيمة صحايبتي وعشرة عمري وهاد البنت ليالي من العائلة
أسماء ( كتشوفيهم بفضول ومحبة ) مزيان مشرفين مرحبا بيكم الدار داركم ياكما فيكم البرد نجيب ليكم المانط ؟
رشيدة : لاواه ابنتي الله يعطيك صحيحتك الجو زوين هنا
أسماء : كاين واحد الواد هنا ورا الدار هنا كيجيب شوية البرد لهنا دابا تشوفوه إن شاء الله مرحبا بيكم انا شوية ونجي ..
رقية : تي فين غادية يا هاد البنت ؟
أسماء : نشوف أشرف أمي ونرجع ..
- حاط قدامو طاجين ديال الزبيب والبصلة مع دجاج .. وهي حاطة قدامها طاجين ديال اللحم الغنمي بزبيب والبرقوق والبصلة طالع منو الفار مزال سخون مع شبكة فيها الخبز
الروطال : مونادا ولا أتاي ؟
عنبر : لا مونادا ديال الحامض .. أشر للسرباي جا لعندو
الروطال : الپاطرون واحد براد أتاي منعنع .. ومونادا دلحامض .. (مشا السرباي وعنبر حاضية اداك الطاجين لي عاطية ريحتو ) بسم الله ( شافيها )
عنبر : سخون كيترتر ايصلق ليا قنوفتي
الروطال : كيترتر ( حرك راسو ) ياك انت سخونية مكدي منك لا حق لا باطل ؟
عنبر : كتهضر على راسك أفاروق .. كتشوفيه قطع الخبز مجاوبهاش بدا كياكل بلا زواق بلا والو فاش كتجي تقارن مكانتو بتصرفاتو كتلقاه متواضع وطبيعي تفكرات الكتاب لي عطاها رشيد لحد الساعة مزال ماقراتوش تشغلات ببزاف ديال الحوايج ..
الروطال ( هز راسو فيها مدوز لسانو على شفايفو غامزها ) أش تم ؟
عنبر : نسولك ؟
الروطال : كون اخدمتي صحفية حسن كتسولي بزاف ..
عنبر ( قلبات وجها ) بناقص ..
الروطال : وصافي دقيقة جوج تقلبي وجهك مالنا .. يلاه الالة سولي لي بغيتي
عنبر ( شافت فيه ) علاش كيعيطو عليك الروطال ؟ سمعت خوتك كيقولها ليك وحتى ولد عمك كيقولها ليك ؟
الروطال : سماوها عليا منين كنت خدام فالمارشي ألي پوك
عنبر ( هزات حواجبها بلاما تحس بإستغراب) أنت كنتي خدام فالمراشي فاروق بلاكا من تريݣيل
الروطال : علاش غانتريݣل ( كيقطع فالخبز ) علاش مالها الخدمة فالمارشي يحسابلك اجيت ودرت هادشي وايلييي حتى انت .. كلما كنا ولاد باب الله تقاتلنا وديميردينا باش وصلنا لهادشي
عنبر ( حطات يدها على خدها كتشوفيه طالقة ودنيها جاها الفضول تعرف كيفاش بدا ) عاود ليا
الروطال ( محرك راسو كياكل ) باش غايفيدك .. ياك كتݣولي مكنهمكش ؟
عنبر : وعادي نعرف هاء .. غير عاود كيعجبني تعاويد
الروطال : جدك انا نحاجي ليك تي كولي دابا يبرد يولي باسل مافيه مايتكال ..
عنبر : وعاود وانا غاناكل .. وبراكة من الطنز ( قطعات الخبز بدات كتاكل حتى هي قاطعهم السرباي جاب ليهم اتاي والمونادا لعنبر ) ودوي ..
الروطال : والو شديت الباك فاش كانت عندي 18 عام .. وراها خرجت نخدم فلول كنت كنبريكولي هنا وهنا .. مرة مع الحواتة مرة مع الخضارة كل مرة والهيث كيف غادي ..
عنبر ( كتسمع ليه ) ولكن علاش ماكملتيش قرايتك ؟
الروطال : مكانش عندي دماغ ديالها .. كان عينيا نخدم وندير ديالي ومنخدمش عند بنادم يتهز عليا ويتحط وانا نفسي مق**ودة نوضها مع شي قمقوم نصدق داخل عليه للحبس ..
عنبر : كنتي محارب من صغرك واخا زعمة عمي إدريس كان بخيرو
الروطال : الواليد مجاش او ولا وكيل .. راه من وحدة لوحدة كان كيخدم من نيتو راه كنا ساكنين افعين السبع .. وانا ماكنتش باغي نعول عليه باغي نعول على راسي وداكشي لي درت فلول كروسة ديسير من بعد الخضرة من بعد الحوت وراها كريت محال فمارشي سونترال تعامل معايا واحد السيد حيت المحالات تم غاليين ( كب كاس ديال اتاي شرب منو حط الكاس مكمل ماكلتو) ايوا بديناها من تم
عنبر( جغمات من المونادا ديالها) وسميت الروطال ؟
الروطال : كنت كنزل للمرصا وكنجيب الحوت النݣعة وروطال الواعر ( الأخطبوط) الأغلبية ديال الكليان كانو كيجيو على ودو سماوها عليا فالمارشي .. من تم كولشي كيعيط ليا بيها قليل لي كيعيط ليا بسميتي ، وتوشمات معايا فاش وليت نحط يدي على الهوتات كيخلاوها شي وحدين هادشي لي عطا الله
عنبر : شكون سماك فاروق ؟
الروطال ( غادي بدغمة لفمو هز عينيه فيها حيت قوات عليه الأسئلة ) الواليد وأنت ؟
عنبر ( شافت فيه هازة عضم ديال اللحم كتردد فيه ) مالي انا ( كتخبط) دايرين ليا عظم كاعما فيه المخ
الروطال ( شافيها بمعنى لا حول ولا قوة الا بالله العلي العظيم) أش لاحك لشي غنا ؟
- مكانتش باغية دخل فتفاصيل المفصلة عاودات ليه ارشيشات كيفاش حتى ولات كتغني
عنبر : فاش كنت معولة انا وحياة داكشي لي جمعنا نكريو بيه ونقلب على شي خدمة فشي وزين .. خرج الفيديو ديالي كنغني فيه شي وحدين قاليك الشهرة وانا كنسميها الشوهة ..
الروطال ( مسح فمو ويديه ساد الطاجين هز كاسو ديال اتاي مرجع ظهرو مقابل معاها ) ولكن انت كان عاجبك داك الهيث ؟ نهار غنيتي فالموسم داكشي لي بان ليا
عنبر ( شافت فيه متفاجئة ) علاش كنتي تم ؟
الروطال ( هزهز راسو بالإيجاب) كل عام كنحضرو ليه الواليد والعم والإخوان عماد لي مكايجيش ( تݣرع بدون صوت ) خدمتو مكتخليهش
عنبر ( بدات الصورة كتوضاح ليها وعقلات على وجهو ) عقااالت علييييك كنتي انت هو المقدم ديال الصربة داك نهارات راكب فوق عود كحل
الروطال : فين كنتي انتي ؟
عنبر : كنا جينا تفرجنا شوية ومن وراها مشينا .. داك النهار عجبني نغني تم حيت عمرها وقعات ليا ولكن انا مختاريتش نكون تم راه بسباب الفيديو
الروطال ( جاغم أخر جغمة من كاسو) وعلاش ناوية دروك وانت تحجبتي ؟
عنبر : كانت عندي اغنية كملتها داك نهار او وراها واحد الجينيريك ديال واحد المسلسل .. ( شافيها) كيتسمع اصوتي وصافي مابقيتش غانغني مزال الطبيب منع عليا السهير بزاف وداك السوت المجهد ..
الروطال ( بفضول ) علاش أش عندك ؟
عنبر : الراس كيضرني من عرس بنت عمك بداني .. لقا عندي طونسيو طالع ومنع عليا السهير وداك الصداع واصلا بلا راسي كنت غانحبس منين دوا معايا عمي عبد العالي قاليا كاع الفلوس لي صورت من الغنا حرام فحرام خلعني
الروطال ( بجدية ) عندو الصح خيار مدرتي .. واش غاديري بفلوسك ؟
عنبر ( مسحات يديها وفمها ) انفرقهم على الناس لي ماعندهمش ( شافيها مهزهز راسو شوفاتو ليها وتروها هزات كاس دالما شربات منو مكملة كلامها ) كاع لي عندي إن شاء الله ولي انصورو من هاد الأغاني لي صورت نعطيه ليهم لي ماعندو وعندو الناس مراض ..
الروطال : تݣدي تشوفي شي بلاد ماعندهمش البير تبرعي ليهم باش يحفرو بير اش بان لك ؟
عنبر( شافت فيه بحماس ) حلف ماكرهتش والله يولي لي شرب كاس دالميهة يدعي معايا .. خاص غير نعرف شي بلاصة خاصهم يحفرو فيها البير
الروطال : نفكرو هاد العرس نرتاحو ونشوفلك هاد البلان نطرقوه إن شاء الله
عنبر ( بإبتسامة كيشوف ردة فعلها وفرحتها ) صافي إن شاء الله حمستيني
الروطال : ماعندك مديري نيت بشي خدمة .. غانفتح ليك كونط باش الى خصاتك شيحاجة تاخديها
عنبر : لالا أوهو مابغيتش
الروطال : دوينا ( بصرامة) خلينا مكالميين الله يرضي عليك دابا محسوبة مني .. كساتك صباطك لي بغيتيها غاتحط ليك .. وقف مرجع الكرسي اللور معيط على السرباي مخلصو بهاد الحركة بين ليها بلي النقاش سالة ومغايقبلش الرفض ..
- ناضت هازة ساكها دخلات لطواليط كانت مزيرة .. قضات حاجتها غسلات يديها ومسحاتهم وخرجات من تم .. كان كيتسناها هازة ساشية فيدو غير شافها جايا طلع لطوموبيلتو حتى طلعات وتقادات فبلاصة مد ليها ساشية
الروطال : باش دوزي الطريق .. الساشية كان فيها بيمويات وشكالط طاح ليها على النقطة لي كتعجبها ديمارا مكمل الطريق .. شافيها حاك جنب نيفو ) واحد البلان بغيت ندوي معاك فيه
عنبر : شنو هو ؟
الروطال : اباش تعرفي الناس لي غاتشوفي دابا ماشي هوما لي سبق وتلاݣيتي معاهم ناس عفويين لي فقلوبهم على لسانهم .. كاين لي مكايوزنش وكاين لي يخرج الهضرة بلاما يحس لي سمعتيها دوزيها
عنبر : لالا ( كتحل واحد بيمو) غير كون هاني من ديك النحية .. سكت مكمل السوݣان عينيه على الطريق كان فيها الفضول تعرف شكون ديك عبلة لي دواو عليها ولكن مجاتهاس تسول ومارضاتش خايفة من شي قمعة كمداتها فقلبها وسكتات غاتعرف من بعد غاتعرف .. ضرها راسها ماشي حبا فيه ولا حيت كتحس بشيحاجة ولكن كانت باغية تعرف ) وانا علاش كنسول ونبرر راسي الله يستر
الروطال : أسبحان الله
عنبر ( شافت فيه ) كنت غير كنستغفر مزيان تستغفر 100 مرة فنهار .. حرك راسو ميك عليها ماباغيش يحكر وهو سامعها شنو ݣالت ..
~~~~~~~~~~~~~~~
- فدار سي علال الروطال بوحدو لي مزال ماوصلش سونا ليه باه علمو بلي دخلو للقنيطرة مزال ليهم 70 كلم باش يوصلو .. الدراري الصغار كيجريو ويلعبو شي شاد الخبز شي شاد البطبوط شي شاد بيمو ياكل فيه .. صوت الرجال وصوت العيالات وضحك أجواء عائلية بإمتياز .. رقية ݣالسة لابسة تشامير بالكروشي شال لايحاه على راسها ونصاص ديال الذهب فودنيها مع دبالج ديال الذهب مزينين يديها ..
- دخلات إبتسام جارة بنتها من يدها ) أجي ݣلسي حدا مي أجي .. ݣلساتها حدا رقية وتحنات على رقية كتوشوش ليها فودنيها ..
رقية ( غوبشات ) واش هي ومها ولا وحدها ؟
إبتسام ( بإستسلام ) هي ومها ويديها عامرين شي حاجة مغلفاها وقيلة جايبة الكادو ..
رقية ( وقفات معاجبهاش الحال ) هادو لاش جايين وشكون عيط ليهم ؟ ..
- خرجات رقية على برا كانت واقفة فاطمة بنتها مع واحد السيدة ومعاهم بنت لابسة عباية فالكحل منبتة بالحجر وطالقة شعرها شاداه بقراصة فذهبي .. وقفات عليهم سلمات عليها البنت ومها
.... : ياك اخالتي عرس ولد ولد خالتي وماعلمتيناش ماشي حشومة عليك ؟
رقية ( ببرود كتخنزر فيها ) ايوا أنت وبنتك مابقيتو توصلونا ولا تحاديونا دابا بقا فيكم الحال لي ماعرضناكمش .. ياك ݣلتو هاد الدار ضربتو عليها وعمركم تحطو فيها الرجل ..
.... : ايوا حتى انتوما درتو معانا العيب ( شافت فبنتها) عند بنتي ماقبلتوش بيها ومابغيتوهاش تكون ليه ودابا جايبين البرانية
رقية : هادشي علاش جايا أربيعة تجبدي العقود الراشية الزواج مكتاب واش نزوجو الدري بزز لبنتك ( شافت فبنتها) ربي مزال يرزقها بولد الناس لي يستاهلها ..
ربيعة : وعلاش لي ماتبززو عليه علاش مالو .. علاش مالي انا جيت وخديت الراجل اهوكاك
فاطمة : اويلي اربيعة تي نعلي شيطان .. مالنا حنى لي زوجناك ليهو .. اويلي ستغفرت الله العظيم الرجوع لله زوينة هادي
ربيعة : ومالكم ماوݣفتو معايا داك الوقت ومالكم ماݣلتو لبا الله يرحمو لا تزوجهاش .. هاني تزوجت ودرت ولادي وكبرو مالو ضاع فيا النص ..
إبتسام ( بنت فاطمة ) وختي منين مضاع فيك النص لاش جايا منغصاها علينا .. جمعي وطوي جيانا علاش منزوجوش ليك ولد عمي وزوينة هادي وليتي باغية تبيعي وتشري فبنتك بطايطاي
ربيعة : اجمعي فمك أبتسام الهضرة ماشي معاك كع خالتي ( شافت فرقية ) خليتو البراني يدخل للعائلة ومن فوݣها شيخة..
إبتسام : شيخة وبصحتها ولا حيت تي مقروصة من شيخات حيت بوجمعة كان يظل يهبط لسواق يخسر فلوسو فالقصاير من شيخة لشيخة .. حنا شييييخة وعاجباناااا تشبعنا اعيوط نݣادو بيهم المجاج ماشي دور وتنكدها علينا وسيري لحݣي خيمتكم
فاطمة (خنزرات فبنتها ) بتسام سيري شوفي ولادك ..
ربيعة : سمعتيها اخالتي ( شافت فاطمة) سمعتيها يابنت خالتي سري جايبة الكادو وجايا عدكم
إبتسام : وداك الكوڤرلي لي جايبة زيديه فراسك .. سيري تغطاي بيه وديري خير فراسك فهاد البرد ، نهار با علال كان مريض وصل فيها لسبيطار وتݣول واش طليتو عليه لا تي لا ولادك ودابا جايا تحلي علينا كابينتك .. وسيري جمعي بناتك وانت دايرة بحال دلالت الخيام الله يخليها قاعيدة
فاطمة : وسيري ابتسام سيري ( بنهيض ) .. غوبشات إبتسام ورجعات لدار رقية بقات كتشوف فبنت ختها وفبنتها لي جايباها معاها غير دور بيها .. تنهدات وعطاتها بظهر
ربيعة : أخالتي مغاندخلوش ؟
رقية ( وقفت ضارت عندها ) المعروض فنهارو يبقى فدارو أبنيتي .. صداع الراس وكترة الملاغة ماعديش معاها الله يعرضك السلامة
ربيعة : وعقلي فيها اخالتي عقلي سري انا نيت .. ( شافت فبنتها ) هزي انت داك الكادو وتبعيني مايستاهلوهش .. خارجة هي وبنتها كتبغم
- رجعو للظاخل وفاطمة تحل على بنتها وعلى لسانها طويل .. مداتهاش فيها عند راسها مدارت والو فاروق او ولاد عمها عزاز عليها ومكتبغيش لي يخسر خاطرهم ولا يغلط فجداها وجدها ..
- سونا عماد للروطال سولو فين وصل .. قالو بلي راه دخل لسوق الاربعاء اما عماد عاد خرج من الرباط كان عندو غرض تم قضاه داكشي باش خلاه يدير روطار .. إدريس سونا لولدو علمو بلي راه وصلو وبدورو هو علمهم .. وجدو الحليب وتمر او وقفو قدام الباب كيتسناو حتى بانت ليهم طوموبيلتو داخلة ..
- عنبر شدها ستريس واحد الخلعة عمرها حسات بيها فحياتها .. حبس طوموبيل كيشوفيها
مالك ؟
عنبر ( بلاما تحس شدات فيدو كطلع النفس بصعوبة ) الخلعة فيا افاروق قلبي غايسكت عليا .. غوبش من يدها لي فلحظة ولات جامدة بحال الى كانت فالفريݣو
الروطال ( بإطمئنان ) بشوية عليك مواقع والو ( خدا يديها بين يديه كيحك عليهم باش يسخنو ويبعت فيها الطمأنينة ) حتى واحد ما براني وبالعكس غايعجبوك وغاترتاحي ومتسخايش تمشي من هنا ..
عنبر ( شافت فيه) عمر وقع ليا هكا اصلا انا مادزتش فبحال هاد تجربة زواجي الأول راه ماوقع فيه حتى حاجة من هادشي لا عرس لا خطبة لا عائلة لا والو ( طلقاتها واخا مامالفاش تعاود لشيحد براني عليها ) ..
الروطال ( ببرود ) ايوا الالة حسبي راسك عمرك تزوجتي وهادي لولة ليك .. يلاه نزلي حشومة كيتسناو ..
- نزلات من الطوموبيل كتڤيبري بغات طيح .. جات عندها ماجدة ودنيا دارو بيها معنقينها .. قلبها كتحس بيه بغا يخرج من بلاصتو ..
- الصلاة والسلام على راسول الله إلــــى جاه الى جا سيدنا محمد الله مع جاه العالي ( تعاودات 3 المرات مع الزغاريت ) .. خلعتها خلاتها تخشا فرقية لي كانت مستقبلاها معنقاها عزيزة عليها
رقية ( كتشوفيها ) الله الله على بنيتي باردة مالكي ؟
عنبر : الخلعة امي رقية .. عطاوها الحليب وتمر مسلمة على فاطمة عمة الروطال وعلى بناتهم لي ستقبلوها بحب الجيران حاضرين كيشوفو وطيابات كيطالو باش يشوفو عروسة حفيد دار حيدر ..
- إبتسام ( معنقة الروطال من ظهرو ) وزين ماختاريتي اولدي عمي أحيانة عليك العفريت
الروطال ( تبسم إلتسامة عريضة معنقها من كتفها ) تي اش كتعرفي على خوك مكاين النضا
- إبتسام : أحيانة عليك يا لمعدب الدريات هاه .. ديك اللفيعة ديال ربيعة جات ݣبيل هي وبنتها
أسماء : مكتسكتيش ياختي خليه أيكلس يسخن بلاصتو وصلتيها ليه سخونة
إبتسام : ودخلي سوق راسك انا او ولد عمي وانت مالك وزوينة هادي .. ( شافت فروطال ) ولكن ماتخافش على بنت عمتك ماخليت ليها الي نسات دردبات وجرات عليها مي حتى هي
الروطال ( كيضحك ) عارفك نمرة واشمن نمرة هاعلاش ݣلت ليهم إبتسام تكون حاضرة ولا بناقس من هاد العرس ݣاع
إبتسام ( ضحكات) واش انا نخلي خويي حبيبي بوحدو هاي هاي .. شفت مرتك اكتشوفينا دابا تغير يا صݣع هههه سير ݣوليها راه حنا مراضعين واخا تا فايتني بعام( عنبر كتشوفيهم بإستغراب مامالفاش كتشوفو هكا مبشور ومبسم او معنق بنت عمتو تقول هزيتي واحد وحطيتي واحد) ..
الروطال ( شاف جيهتها وهي دور وجها ) المدام عندي مافيهاش دوك نواعر اتهناي .. خلاهم يدخلو وهو دخل لصالون عند الرجال فين مجموعين كاملين دايرينو الوسط .. أما هي دخلوها لداخل مع العيالات
رقية : إبتسام ( كتعيط ) وبتسام .. جات بزربة لعندها طلات عليها من الباب
- أمي
رقية : جيبي ابنتي واحد المانطة الدرية كلها باردة لا تمرض .. وشوفي ديري ليا واحد جوج فاخرات وجيبي ليا شوية شبيبة وحريميلة نبخرها وهي صفرة بسم الله الرحمن الرحيم .. مشات إبتسام ورقية ضارت عند عنبر كدوز ليها على راسها وتقرا عليها ..
تودة : باش كتحسي ابنيتي ياكما دختي مع الطريق ؟
عنبر ( بنفي ) لا جاتني الخلعة ودهشة وتبوريشة ماعرفتش وقيلة حيت هادشي مفايتش عليا ..
رقية : ݣالت ليا ابنيتي تودة بلي زواجك اللول مادرتي عرس لا خطبة لا والو ودري كان فبرا بحال نصارة ( شافت عنبر فمها بمعنى حطيتيها ليها سخونة ) شوفي ابنيتي داكشي نسايه دابا انت بنتنا حنا والله ابنيتي انديرو ليك عرس مدارتو بنت المرة وحنا شحال عندنا من فاروق وشحال عندنا منك ( باستها ) ..
عنبر (عنقاتها مخشية فصدرها فيها واحد الريحة زوينة ريحة دغدغات أحاسيسها وجابت ليها البكية ) لهلا يخطيك عليا مي رقية .. حسات بالخنقة واحد الاحساس غريب شدها ماعرفاتش مالو النفس تقطع فيها نزلو دموعها دموع لي فاللحظة تحولو لشهقات ..
فاطمة : بسم الله عليك ابنيتي بسم الله عليك.. وقفات حياة قبالتها مخلوعة :
اويلي مالها عنبر ختي بسم الله عليك .. ( تبكي تبكي وتقول واش بغات تسكت كتحاول تحكم فدموعها والو )
رشيدة ( مخلوعة ) جيبي ليها الما ولا الما وسكار بسم الله عليها
أسماء ( جات تجري ) اويلي مالها مالك احبيبتي بسم الله عليك ياربي سلامة عوينة صحيحة هادي .. تفووو منين شفت ربيعة وبنتها عرفت نهار مغايدوز هو هداك
رقية ( خنزرات فيها) سيري شوفي ختك تجيب ليا الشبة والحرمل .. ( شافت لعند عنبر لي حرام واش بغات تسكت ) صافي ابنتي صافي اعوذ بالله من الشيطان الرجيم .. جات إبتسام فيديها المبيخرة طلقات فيها الشبة والحرمل كتبخر فيها وهي دموعها هابطين ..
- ( وحدة فجارات ) اويلي ياكما مركوبة البنت ؟( خنزرات فيها تودة لي ماحيلتها لبنتها ماعرفات مالها ولا الجارات لي عينيهم حارين
رقية : لا حول ولا قوة إلا بالله العلي العظيم .. عيطي على فاروق ولا على جدك .. مشات إبتسام جرية وحدة عيطات عليه من بعيد علماتو دخل على العيالات بزربة متخطيهم
الروطال ( مغوبش ) اش هاد الريحة اصاحبي اتخنقوها .. بعدات تودة وݣلس وهي غير تبكي مغمضة عينيها وتنين بحال شي وحدة مغيبة ..
الروطال ( كيحاول يفيقها ) عنبر عنبر .. بسم الله عليك عنبر حلو داك السرجم ولا بلات ( رجع وقف هزها بين يديه وهي مغيبة خارج بيها ومها تابعاها هي ورقية وحياة لي ماعرفات تطلع تبعو ولا تبقى خافت عليها .. مالقات راسها غير تابعاها طلعها لواحد البيت حلو كان فيه البالكو مصبوغ بالبيج بارد .. حطها فوق فوق النموسية كيحاول يفيقها وهي حدها غير كتنين ودموعها نازلين ..
- دخل عليه علال بعكازو مغوبش وإدريس وراه عبد الخالق ..
- علال : مالها اولدي ؟
الروطال : والله ماعرفت اتاعبطات ليا بتسام لݣيتها تبكي ومغيبة ..
عبد الخالق ( توجه لعندها ) بلات اولدي بلات .. وقف الروطال وݣلس عبد الخالق جنبها ( شاف فمو ) الواليدة مزال عندك داك المسك الاسود ؟
رقية : ياه نجيبو ليك دروك ..
- تودة رجليها مابقاوش هازينها مخلوعة قريبة من بنتها مفاهمات والو وحياة كطل من قنت الباب عليهم .. رجعات رقية فيدها قرعة مغطايتها مذهبة فيها سائلة كحل .. مداتها للعبد الخالق خدا منها شوية دهن ليها فاماكن النبض وفنيفها شد يدها خشاها فيدو .. وبصوت جميـــــل وحنين بدا كيتلي أيات قرآنية بصوتو العذب ..
- كان كيجود القرآن بصوت حنين كيبورش وكيخليك تبقى تسمع ليه .. فاللحظة زادت الوثيرة ديال البكا ديالها والروطال عند راسها مفاهم والو كيشوفيها ويشوف فعمو لي شاد ليها يدها بيد ويد حاطها على راسها وكيجود فالقرآن .. فاللحظة التنفس ديالها تنظم وشهقاتو قلو حتى مبقاوش تودة ݣلسات على واحد الكرسي بلاما تحس حيت عيات ورجليها مابقاوش هازينها .. بقات هكاك حتى سكتات يدها مزيرة على يد عبد الخالق بقا معاها حتى عرفها نعسات عاد ختم بسورة الفلق ..
- بشوية ملص يدو من يدها لي كانت مزيرة عليها .. ناض بشوية من عندها شاف فولد خوه وبشوية نطق :
جيب المانطة غطيها راه نعسات .. فتح الروطال الماريو خدا مانطة غليضة ديال مزافيل غطاها
رقية : صافي خليوها تنعس سد اولدي داك البالكو
تودة : وقيلة نبقى معاها
الروطال : انزلي اخالتي ترتاحي راها فالامان الحمد لله انا انبقى نطل عليها .. سد البالكو ونزل الخامية خرجو من عندها بقا غير الروطال ..
تودة ( موجهة كلامها لعبد الخالق ) الله يرحم الوالدين اسي عبد الخالق
عبد الخالق ( كيشوفيها بحسرة .. كون عرفات شكون هو موحال توجه ليه كلمة لاخرة ) مادرت والو راها بحال بنتي .. غير الخلعة لي دارتها ليها داكشي باش اتولي بيخير فاش تفيق
تودة ( كتحس بشيحاجة فشكل فاش كتشوفو للمرة الثانية يوقع ليها هكا ) إن شاء الله ( تنهدات وهبطات راجعة للصالة .. علال نزل رجع عند الرجال باش مايخليش المجمع خاوي بلا بيه واخا كاين راجل بنتو ورجال العائلة كل واحد منين جاي وكل واحد شنو كيجيه لي من جيرانو ولي من صحابو ولي من الحباب البعاد ولا القراب ..
إدريس : تا هبط عينيك أخويا .. عينيك ايفضحوك ويجيبو ليك الكلام
عبد الخالق : خاصني ندوي معاها أخويا .. بغيت ايفوت العرس وغاندوي معاها مغانبقاش انا بحال هكا منكدبش عليك ( مقاد نظاظرو )
رقية : توما علاياش سايرين دويو شكون هادي لي غادوي معاها أنت ؟
عبد الخالق ( بصوت هادئ وتقيل موزون ) مكاين والو أمي غير خوي راسك وزيدي تݣلسي ماتبقايش واقفة عييتي ..
رقية : خلعاتني البنت مسكينة ( سكتات ورجعات دوات بحال الى تفكرات شيحاجة) تا أجي ملاحظتيش ݣداش كتشبه لدونيا وياسمين ؟
عبد الخالق : شكون ؟
رقية : ياويلي على شكون عنبر شكون غايكون .. توما مالكم كاملين مخوطرين خاصكم شي مجمر حامي يفوسخكم حيد عليا وكان نهبط .. خلاتهم ونزلات
- إدريس ( كلامو كان كيخرج بحكمة وتقالة بحالو بحال خوه وباه ) حتى انا لاحظتها الصراحة تݣال .. كونماشي البنت والديها ماتو والسيدة كانت مربياها غانݣوليك ياكما البنت بنتك ..
عبد الخالق ( كيتدكر وجها وتشابه ) بصح ملاحظتهاش حتى ݣلتوها .. وربي راه خلق من الشبه أربعين .. كي ݣلتي كون كانت بنت فاكنة غانشك تكون بنتي ولكن البنت والديها ماتو مسكينة الله يرحمهم ..
إدريس : علا زعمة فاطنة متزوجاتش بكري وماولداتش ؟
عبد الخالق : زعمى تكون مزال كتبغيني وعمرها نساتني ؟
إدريس ( جاتو الضحكة ) هادي هي ديال حتى شاب وعلقو ليه حجاب مزال كدوي على الحب أولد ميمتي ..
- عبد الخالق ( نازلين فدروج ) وعلاش لي مندويش عليه .. نفكرك اخويا ولا بلاش أنت براسك عمرك نسيتي ( مجاوبوش بقا ساكت ) ولا كيبان ليا يمكن لا نسيتي بحال والو تحضر
إدريس ( شافيه عينيه ضواو ونفس الوقت واحد اللمعة فعينو طفات وتغيرو ملامح وجهو ) :
زعمة تجي ؟ ..
عبد الخالق ( طبطب على ظهرو ) وا ولد اخويا ݣالك الى مكانت مايكون عرس ..
إدريس : زعمة تلحݣ ؟
- عبد الخالق : تلحݣ تلحݣ ..
- بقا ݣالس حداها كيشوفيها كيفاش ناعسة تنهد .. ماعرفش مالها ومافهمش كانت بيخير هي منين ايخرجو من طوموبيل جاتها الرعدة ، حل البالكو وسدو وراه واقف مقابل مع ديك الخضورية الدنيا كلها خضرة ومغسولة بشتا لي كانت صبات فدوك الأيام .. هز التيليفون ديالو دوز واحد النمرة وبقا كيتسنى حتى تحل الخط
الروطال ( بحشرجة رجولية) العزيزة فين وصلتي ؟ واش مزال معطلة ولا شنو ياكما نجي نجيبك ؟ نسيفط ليك عصام ؟ وايلي حتى العشا صافي إن شاء الله طريق السلامة ( تبسم ) حتى أنا والله العظيم توحشتك بضوبل بسلامة .. ( خشا تيليفون فجيبو ورجع لداخل ساد البالكو وراه .. ݣلس من الجهة لوخرا ديال النموسية حاط ظهرو على المخدة وسارح بتخمامو للبعيد
- التحت حطو الغدا العيالات بوحدهم ورجال بوحدهم .. رقية عيطات على ابتسام لي جات لعندها
رقية : داك العلام لي الفوق شوفي صلاح يحيدو ( واحد من ولاد جيران) حتى لغدا ورا دبيحة إن شاء الله ونعاود نعلݣو شكون لي علݣو قبل أݣولي ليا
إبتسام : وراه ݣلتها ليهم ݣبيل معلݣينو قبل الوقت مايكون اشي حد فدراري تالف .. مشات من تم تجمعو العيالات على طبالي كل طبلة ومجموعين عليها 10 ديال العيالات دارو ليهم اللحم بالبرقوق والسفة مرحبين بيهم ، الماكلة كانت بنينة بزاف كلاو وشبعو .. وكل وحدة شدات القنت حياة هزات تيليفونها وخرجات على برا كدوي فتيليفون ..
جواد : وبنادم سافر وݣلب علينا وجهو
حياة ( كضحك) متقولش هكاك علاش حنا شحال عندنا من جواد ( عضت على شفتها كدور فعينيها )
جواد ( تبسم ) شكون نتوما باش نعرف ؟
حياة : وصافي بلاما تبقى تحكر ( كتشوف فناس داخلين خارجين زادت بعد شوية على الدار ) مشيتي لرباط مزال ؟
جواد ( حنحن ) لا الله يسمح ليا مافيا لي يتلاݣى بالواليدة وغاتبدا عليا داك ديسك دزواج اللهم بلاش ..
حياة : لا أجواد حشومة هاديك كتبقى الواليدة ديالك الى حكرات عليك غير حيت بغات ليك مصلاحتك ماشي على شيحاجة ( ماعجبهاش الحال يدوي هكاك على ماماه )
جواد : وعرفنا غاهو داك سيجي غانبقاو ندويو عليه بزاف كيحماض .. كنبغي نمشي نكلس معاها نشوفها ولكن فينما مشيت تجبد دزواج شوف فلانة شوف بنت فلانة
حياة : فهمها بلاتي هي أحسن .. راه غايجي واحد الوقت غانبغيو غير كلمة منهم غير دعوة ومغاديش نلقاوهم وانتفكرو دوك دعيوات وكلامهم وانتحسرو عليه ..
جواد : وناري صافي الالة غدا غانمشي نشوفها إن شاء الله تهنيتي دروك .. الدنيا عامرة تم ؟
حياة ( مربعة يدها ) واياااه عامرة الدنيا الاجواء هنايا فشيشكل ولكن زوين
جواد : بحال والو يلصق فيك شي غرباوي
حياة ( ضحكات باغية تقلي ليه السمو) وبحال والو يطيرو بهاد الفن
جواد : وكتݣوليها فوجهي والله يا مك تانجبد ليك مصارنك
حياة ( قهقهات بأنوثة عاجبها الحال ) مغاينفعوك بوالو كون كانو ابنان تعمرهم بلحم ديربيهم سوسيط تعاود فيه البيع
جواد : والله يعميها ليك
حياة : علاش شنو درت مال الزواج عيب .. انت مابغيتيش تزوج تحرمها عليا أنا ( كتحاول تجس نبضو)
جواد : بالعكس كنفكر فالزواج غاهو بلي بغاها خاطري .. ماشي لي بغاوها الناس ( مجاوب لي حداه ) لا ݣوليه غير نص نص ( رجع للخط ) سمعتيني امو عوينات
حياة ( الفراشات كيلعبو فكرشها ) ايوا الله يجيب ليك لي بغاتها خاطرك
جواد : أمييييين .. خاص انعرف واش فيها شي لعيبات عاجبيني وغانقصد الباب
حياة : مزيان ( بإبتسامة )
جواد : مو عوينات انقطع دابا صاحبي جاي مجاتش نبقى داوي معاك حداه .. ورضي الباب لتيليفون نمشي لدار نرجع نسوني ليك وحضي راسك
حياة : واخا تهلا فراسك ( قطع ) عنقات تيليفونها ورجعات لدار لداخل ..
- أذن المغرب ولي خرج للجامع خرج ..بحكم ماتغداوش بكري كسكروط تحط معكل بوشيار غاطس فالعسل وزبدة برقان القهوة وأتاي بلاطزيلت الحلوة الملوي وبغرير والبيض المصلوق .. الفاكية والكيكة كولشي فوق الطبالي .. الزيت البلدية وزبدة البلدية والعسل
تودة : عنبر نعسات بزاف وقيلة نطلع نفيقها
رقية ( شدت فيدها ) الا ويلي راجلها راه مزال معاها .. يمكن عياو من الطريق داكشي باش باقيين ناعسين ..
تودة : الدنيا عندكم زينة الالة رقية
رقية : وهادشي باش مكنسخاش بداري ( تبسمت ) كنمشي لدار البيضا كيطيب عليا يمتا نجي
تودة : حتى أنا نهار جيت لدار بيضا ماقديتش نوالف على شحال عاد والفت
رقية ( بمحبة ) شحال عزيزة عليا تيا والله كتجيني على ݣانتي وزدتي عزيتي عليا منين عاودات ليا ضرتك اش درتي مع ولادها ومعاها ..
تودة ( شافت فسميرة لي شادة الهضرة مع رشيدة) حتى سميرة الله يعمر ليها الدار وانا حقانية منبغيش نضيع شي حد الالة رقية ..
رقية : انت صبارة ابنتي صبارة ربي نصرك وغلبك علامن عداك وجزاك بحالك لي كنت باغية لولادي كون طاوعوني ولكن رجاف الله ..
تودة : المكاتيب الالة رقية
رقية : تي حيدي عليا ديك لالة مالك شرفتي ݣولي ليا مي رقية ولا خالتي رقية لالا خالتي مكنحملهاش كانت تکولها ليا ديك اللفعة دخديجة ..
تودة ( كضحك) واخا امي رقية
رقية : وكولي كولي .. ودوك العيالات ( بصوت عالي ) وتوما زيدو تاكلو براكة من الحتيت هاويلي ( هزات راسها للباب كتشوف واش جات ولا مزال وترجع تدوي مع لي حداها ومع تودة ) ..
~~~~~~~~~~~
- الفوق بدات كتحل عينيها بشوية كضربها الفيقة .. كتشم ريحة رجولية مخلطة مع ربحة المسك لي فنيفها .. كيبان ليها راسها مخشي فصدر ويد محطوطة عليها هزات راسها بشوية لقاتو ناعسة مديكالي حداها معوج وهي مخشي راسها وسط صدرو معنقها بيد ويد تحت راسو ضارب فيهم الضو ديال البوطويات لي على برا هزات عينيها كتسكاني فوجهو رموشو الطوال الحرشين المخبلين فبعضياتهم نيفو المنݣاد العظام ديال حناكو لي خلاو ملامحو منحوتين .. شفايفو لي كانو مرسومين خلاوها تنهد ناعلة شيطان ومستغفرة الله ماتنكرش بلي كان زينو سبيسيال عندو زين رجولي لي يخلي اي وحدة يعجبها وتبغيه يكون ليها حجبانو العراض واحد الضربة بقى الأثار ديالها حدا حاجبو او وحدة خفيفة بزاف مابين ودنو وفكو مغطية باللحية .. تفكرات كلام طارق على عبلة لي باغياه ورجع ليها الفضول تعرف شكون ..
عنبر ( مع راسها ) لااا لااا أعنبر رجوع لله هبطي عينيك الراجل كليتيه بعينيك .. ولكن راه زوين الصراحة ( تفكرات بدر ) لالا لا وجه للمقارنة بينو وبين بدر ( نزلات عينيها للفمو لي كان من النوع لي كيأتيري ماشي غوز وماشي زرق لونو كان غادي على لون سموريتو ( هزات عينيها لعينيه كان كيشوف فيها كيفاش كتشوف فيه ) .. بلعات ريقها كانت فموقف خايب حيت حصلات ..
- جرها لعندو خاشيها فيه كثر وكثر .. كترمش فعينيها بسرعة بغات تدوي ماقداتش دقات قلبها كيتسارعو .. مدواش معاها ومانطق بحتى كلمة ماطنز عليها ماتنمر عينيها كانو كيناظرو عينيها ، الى زاد قرب كثر وكثر غايسمع قلبها لي كيخبط باغي يخرج .. نزل بنظراتو لعينيها كانت حاسة بلي غاتوقع شيحاجة وتوقعها كان صحيح نزل بشفايفو حاط فمو على فمها غارق هو وياها فبوسة طويلة .. يديها لي قربوها ليه كثر وكثر خاشيها فيه أما يديها كانو جمدو وتصلبو فبلاصتهم كتحس بالبوسة ديالو مستمرة بوسة محترف .. حسات براسها بحال الى أول مرة شي راجل غايبوسها كانت بوسة غير ماشي كيف كان كيبوسها بدر كيزرب عليها وكتحس بالبوسة ديالو باردة .. الروطال كان كيعطي لكل شفة حقها يديها بردو عليها حسات براسها داخت بوستو دوخاتنا كان مغمض عينيه مستمتع بكل ثانية ، فالأول كانت متجاوبة معاه كتحس بلسانو تايدوز على كل سنت ففمها كتحاول تجيريه فحركتها فاللحظة عاقت براسها خطفات راسها بالخف .. كتنفس بصعوبة نقزات من فوق النموسية .. كتشوفيه كيفاش كيشوفيها عينيه نايمين دورات وجها بان ليها ساروت الضو مشات ليه شعلاتو كتشوفيه كانو حناكها حمرين
الروطال ( دوز لسانو على شفايفو وعلى وجهو نظرات إستمتاع ) فمك حلو أبنت فاطنة علم الله انت كيغاتكوني ..
- بلعات ريقها محاملاش الإبتسامة لي على وجهو كان باين عاجبو الحال ..
عنبر : واش بستيني ؟
الروطال ( طلق ضحكتو الرجولية راشق عليها ) لا أزين غير شقمتك ..
عنبر ( كتنفس بصعوبة ) هادشي ماتفقناش عليه أفاروق ماقلناش تبوسني وتعنق
الروطال ( تقاد فالݣلسة ) وعلاياش تافقنا ؟
عنبر : ماتقرب ليا ماتحاديني راه حشومة وعيب هادشي مايبغيه لا ربي لا عبدو هادشي راه كيعاقب عليه القانون
الروطال ( طرطق بضحك ) ههههه القانون كاع أمجينينة ودعيني سيري لمحكمة ݣولي ليهم راجلي باسني بغيت ندعيه ( غمزها )
عنبر ( ماكرهات تزف عليه بشيحاجة تمسح ديك الضحكة على وجهو ) ماسخ انت والله حتى ممسوخ راه غتاصبتي أنوثي
الروطال ( هز حواجبو ) غتاصبت ݣاع وكون ادرتها بصح نتشدو على صحيح باغية تغرقيني ابنت العبد ..
عنبر : عمرك تعاود افاروق حتارمني شوية وحتارم خصوصيتي مدرعني بدراعك وخاشيني فيك .. راه حشومة والله حتى حشومة ( حدرات راسها تالفة )
الروطال : فين غادية أدرية ؟
عنبر : نمشي نغسل وجهي وعمرك تعاود
الروطال : ومالك مادفعتيني ؟ كملتي معايا تشلقيمة تاتيا كدوري لسان ماعندي مانسالك كتعلمي دغية ..
عنبر : فاروووق ( بصرامة ) انا راه كيحسابليا أكنحلم ..
الروطال : سبحان الله العظيم.. حتى الحليم فيه تشلقيم كيدرتي ليها ؟
عنبر : النعاس خو الموت
الروطال : اااه الحليم كيخلي الواحد يحل عينيك ويسكانيه ويحنزز فيه يبغي ياكلو
عنبر ( خرجات عينيها حرجها ضارت بيها دنيا) فين هو الحمام الله يرحم الوالدين باسل والله .. اخر مرة تحط عليا يديك فين طواليط ؟
الروطال ( راشقة ليه تأتيرو بان عليها خلاه يزيد برشوقو عليها ) خرجي على يدك ليمن اول باب ( عطاتو بظهر علاين تعطر ) ابشوية عليك مزال باغيين نطلعوك ( وقفات كتخنزر فيه ) فالعمارية عقلك كثااار منك ..
- مداتهاش فيه خرجات من البيت دخلات للحمام سادة عليها ضارت كتشوف راسها فالمرايا .. وجها حمر وسخون الفولار خاسر ليها بعض الخصلات خارجين ليها جهة الݣصة .. شدات على فمها فتحات الروبيني غسللت وجها الما بارد مقارنة مع سخونية حناكها سدات الما كتخمم..
عنبر : اويلي تحليت ليه وسحت بحال زبدة ( سكتات كتفكر لبوسة ) ولد الحرام من فعلو كيعرف وفمو شحال زوين ( تبسمات ورجعات دغية جمعات الضحكة ) هدا غير الجفاف العاطفي لي خلاني نتحمس كتر من القياس مكاين ما ولكن ... دخلات لطواليط قدات حاجتها كانت باغية توضى وتصلي صلاتها لي فاتها ..
- خرجات من طواليط ماعرفات ترجع للبيت ولا شنو دير فالأخر بانو ليها الدروج هبطات منهم بان ليها واقف حدا العتبة دصال .. ضار عندها غمزها محرك راسو ب " شنو " عطاتو النخال ودخلات للصالة عند العيالات ..
- رقية ( كدوز ليها على ظهرها ) رتاحيتي ابنتي خلعتينا عليك
عنبر : الحمد لله امي رقية .. ماعرفت اش وقع ليا والله ماعقلت ݣاع حتى فقت عينيا كنحس بيهم عياو ..
إبتسام : بسيف احبيبتي بكيتي حتى شبعتي
رقية ( شافت فإبتسام ) غدا فاش تفوت الدبيحة سيقو بداك الما ديال الحلبة
إبتسام : داكشي لي غاندير إن شاء الله ( شافت فعنبر ) بلات أزين الغدا ديالك كيسخن انت كنتي ناعسة ماكليتيش خلينا ليك حقك
رقية : وتعݣبا بعدا وغداها تعشا بيه ( شافت فعنبر ) كولي ابنيتي فاطمة كبي ليها القهوة
تودة : كون بدلتي عليك أبنتي بعدا تبقاي هكا بجلابتك والبرد ؟ دهازك راه فبيت مك رقية سدات عليه تم .. وباليزتك راه مع حوايجي
عنبر ( شافتهم بدلو حوايجهم ) نمشي نبدل عليا ونرجع ناكل اتوسخ الجلابة
ماجدة : يلاه معايا نديك لبيت دخالتي فاطنة .. مشاو للبيت لي عطاو لفاطنة تنعس فيه هي وسميرة دخلو لقات باليزتها حلاتها جبدات بيجامة سخونة وطويلة شوية بالبينوار ديالها .. لبساتها هي او بينوار ودارت شالها بدا الادان دالعشا كيأذن
عنبر : ماجدة بغيت نتوضى كاعما صليت .. نصلي عاد ناكل
ماجدة : هاد البيت راه فيه الحمام دخلي توضاي راه زرق بارد والأحمر سخون .. دخلات عنبر للحمام كان زوين مصبوغ بالبيض فيه برودويات ديال العومان توضات ورجعات خرجات
عنبر : ماعرفت باش غانصلي ؟
ماجدة ( وقفات ) انا جايا نجيب ليك باش تصلي .. خرجات من البيت ورجعات ليها بلبسة ديال الصلاة وصلاية .. صلاة جميع الصلاوات لي كيتسالوها وماحدة كتشوفيها ساهية فيها
عنبر ( سلمات وستغفرات ودعات وقفات جمعات الصلاية شافت فماجدة ) أنتي مكتصليش ؟
ماجدة ( حركات راسها بلا )
عنبر : وشنو كتسناي أصاحبتي الصلاة راه ركن من أركان الإسلام هي الخيط بينك وبين الله حتى انا مكنتش كنصلي دابا فاش ولفتها مانقدش نقطعها
ماجدة : صافي نولي نصلي معاك إن شاء الله ماحدنا هنا غانبداها من غدا ومنها نيت تعلميني ونسول حتى مي ..
عنبر : إن شاء الله الله يتبتك .. خرجو من تم نزلو رجعات كلسات فبلاصتها كتاكل والعائلة مجموعة من غير الجيران لي مشاو الرجال بداو كيدخلو من برا كانو فجامع .. طاحت فالماكلة عمية كان فيها الجوع ..
حياة : تي خلي بلاصة لسفة ولحم
عنبر : حلفي دارو لحم بالبرقوق وسفة .. اللحم هانية كليتو فالغدا انقوليها تسخن ليا السفة لي مشهياها
حياة : سونا ليا جواد قبيلات
عنبر : هاي هاي القلوب كيخرجو من عينيك وزيري اصاحبتي عنداك
حياة : لالا تهناي انجرو لباب الدار ولا ملاعبينش
عنبر : وهكاك .. بقاو على للجماعة هزات راسها بان ليها غادي خارج زربان هاز تيليفون فيدو كيدوي
- على برا وقف الطاكسي نزلات منو مخلصاه هبط مول طاكسي هبط ليها الباليزة ديالها .. كانت مرة فوسط الخمسين لابسة جلابة شعرها جامعاه بقراص لايحة عليه الشال ساعة فيدها بدهبي وخاتم ديال الذهب ليد لوخرا دايرة فيها براصليات وهازة ساك .. ملامح وجها بشوشة وعينيها كانو مكحلين عسليين ديمارا الطاكسي مشا يلاه كتقاد فشالها حتى حسات بتعنيقة قوية من ظهرها
.... : عادتك هي عادتك أوليدي
الروطال ( معنقها بجهد دورها عندو بايس ليها راسها ويديها مدخلها فيه بجهد ) عرفتي كونما جيتي كنت غانتفاهم معاك
.... ( شافت فيه بحب ) وأنا نݣد احبيبي الله يكمل عليك بالخير
الروطال ( جر الباليزة) حيدي من البرد ( غادي معاها معنقها ) ..
- إدريس كان مقابل مع الباب قلبو كيضرب يديه بردو عليه حتى بانت ليه داخلة تزاد معاه الزايد .. مشافتوش خرجو عندها كيسلمو عليها إبتسام وأسماء فاطنة ماجدة ودنيا ويسرى .. كولشي سلم عليها تفرقات من الروطال وتوجها لصالون من ورا ماسولات على رقية .. تحنات عندها عنقاتها وباست ليها راسها بالمحبة كان كولشي باين كيبغيها ، شافت للعند عنبر وتبسمات :
باينة عروستنا زينة هادي أجي حبيني أكبيدتي ( وقفات عنبر عنقاتها ) ماعرفاتهاش شكون هي
.... : تبارك الله وصلاة على النبي ولدي ختار زينة البنات
عنبر ( حشمات ) ربي يخليك اخالتي لهلا يخطيك .. سلمات على تودة ورجاء لي متكية ترتاح .. على ليالي وسميرة ورحيمة وݣاع لي فالبيت سلمات عليهم وحدة وحدة ..
رقية ( لتودة وللبقية من ورا ماسلمات عليهم ) هادي سعاد خالت فاروق .. عنبر ستغربات لا هي لا تودة ..جاتهم عجب ماحضراتش ومابغياش هاد الزواج وخالتو كان باين عليها فرحانة حيدات سعاد جلابتها وݣلسات حدى عنبر كتشوفيها بحب كولشي كيسولها كيوصلات كتجاوب كل وحدة بوحدها .. وعلى مافهمات عنبر من هضرتهم بلي كانت فالغربة وبضبط فطاليان ..
تودة ( للرقية بهمس ) تبارك الله خالتو كتبان ظريفة ماشي بحال ختها ديك السوسة ياربي تسمح ليا
رقية : ياتي لا سعاد ماشي خوت خديجة ..
( سعاد شادة جماعة مع فاطمة خت إدريس وإبتسام هزات البراد تعاود تعمر أتاي)
سعاد ( شافت لعند إبتسام ) ديري ليا اكاس واحد أبنتي يدوزني راسي مع الطريق دخت ( رجعات مكملة الجماعة مع فاطنة لي كتسول فيها أما إبتسام مشات للكوزينة تعمر أتاي وتسخن العشا تحط للرجال)..
تودة : ياك ݣلتي ليا خالتو امي رقية ؟!!
رقية ( قربات ليها بصوت كيسمعوه اهوما ) ويااه راها خااالتووو خوت مو لي ولداتو خديجة راها أرباتو ..
- تودة ستغربات من الكلام ديال رقية بقات غير كتشوف وتقرق فعينيها
رقية : علاش مݣالهاش للعنبر ؟
تودة : لا مافخبارهاش يمكن مجابتهاش الوقت .. ومنين ماشي مو لاش دارت ديك الحالة ؟ وجايا محيحة علينا فقلب دارنا
رقية : ايوا راه كتݣولك راها مو لي رباتو .. واخا كانت مدوزة عليه الحر فصغرو مسكين أحيانا على وليدي مو كانت درويشة الله يرحمها حطيها على الجرح يبرا ..
تودة : الله يرحمها مسكينة باش ماتت ؟
رقية : جاتها الولادة صعيبة مسيكينة غير ولدات وليدي سماتو ودا مول الأمانة أمانتو طونسيو طلع ليها ..
تودة : داك طونسيو خايب ولد الهم مافرحات كاع بوليدها الله يرحمها ..
رقية ( تفكراتها وتنهدات تنهيدة طويلة) الحاج كان عندو صاحبو سيمتو عبد الرحمان الله يرحمو فهاد النهار .. كانو عدو جوج بنيات الكبيرة زهرة والصغيرة هي سعاد ..
تودة : وبغيت هانعرف كيدار حتى تزوج ديك اللفعة ديال خديجة ؟
رقية : لا تفكرينيش ابتي ياتودة لا تفكرينيش .. ديك ساعات فاش ماتت زهرة ماكرهتوش كون تزوج سعاد ختها هي بعدا درويشة وكنعرفو والديها .. ولكن كانت مزوجة داك الوقت .. وسبحان الله العظيم حتى تزوج خديجة ورجعت سعاد طلقات بقات شحال هنا دفعات يمكن لشي كونطرا ولا ماعرفت اش يݣولو ليها ومشات لطاليان كانت دات شي نصراني سلم ولكن دوزات معاه مدة وعرفات بلي رجع لدين*و وطلقات وبقات تم من داك الوقت
تودة ( شافت فسعاد لي مجمعة مع العيالات ومرة تشرك عنبر فالكلام تبسم وتشوفيها بمحبة ) ماعندهاش وليدات ؟
رقية : لاواه ماعندهاش مسكينة أودي القصة طويلة من بعد ونعاود ليك دابا معانا الغاشي ..
- تخطاو ديك الهضرة سادين على الموضوع .. المربية عطاوها بيت مع أمير نعساتو وبقات معاه جابو ليها العشا ديالها حيت مابغاتش تخليه بوحدو .. فصالون الرجال بقاو مجمعين من غير إدريس لي ساهي عقلو مابقاش معاه عاد حس بداكشي لي داز منو خوه .. دخل رشيد من برا مرجع تيليفون لجيبو ݣلس حدا عزيز لي كان حاضيه
عزيز ( كيشوفيه ) أش تم عينيك كيبريو بحال شي واحد فتحضيري ..
رشيد : أنت غاحضيني وتبعني فوتني أصاحبي
عزيز ( كيضحك ) شتي بهاد الهضرة كنقسم ليك بالله البلان فيه شي فراشة ( غمزو) علامن حاط العين ؟
رشيد ( كيضحك ) لا حول ولا قوة الا بالله العلي العظيم .. فوتني اصاحبي شوفلك فاش تلهى
عزيز : انا هادالساعة عندي انت .. راشقة عليا عليك نعرف اش تحت راسك دور وتفرنس ، السيد ولا يسمع لأم كلثوم ݣاع
رشيد ( شافيها ) كالتها ليك النمسة دحياة .. والو واش تسكت ديك درية
عزيز : وراه ودني هاديك ودنين خوها مالك مريض .. دابا خرج من رونضتك أش تم
رشيد : الحاجة المستورة كيسخر فيها الله من بعد ونعاود لك ..
عزيز : هي شي عراسية جايا فطريق ؟
رشيد : لالا صداع الراس ماعنديش معاها حفيلة بين العائلة والله يخلف أنا درويش أخويا ودرية حتى هي هكاك وسالينا
عزيز ( هزهز براسو ) والله يسخر ... سلاو الهضرة وجماعة وضحك بقاو مدة وهوما مجمعين ، كاين لي عيا وناض باش ينعس وكاين لي مزال باغي يݣلس رشيد وعزيز وعبد العالي مع طريق عياو .. داهم طريق وراهم فين غاينعسو كانو موجدين ليهم البيوت والمانط قبل ..
- أما عند العيالات كانو مزال مجمعين مسرحين رجليهم ..
سعاد : ݣالو ليا كتغني أعنبر ؟
عنبر ( تزنݣات كانو بقاو العائلة ) أه ولكن دابا حبست
إبتسام ( شادة بنتها ناعسة حاطة راسها على رجليها ) واش داك بوراس دفاروق لي ݣلسك من الغنا ؟
عنبر : لا الصراحة هو ماقليا والو .. ولكن براكة ديك الحرفة دخلناها ابلغلط اتالقينا راسنا كنغنيو انا مديالها وهي ماديالي ..
تودة ( مسديقات فبنتها ) علاش تاشياخت عيب باز .. الي كتغني كيبصمو عليها راها مامزياناش راه شيخات دابا لي طيحو البق على هاد الخدمة
عنبر : انا ماقلتش هكا اماما خاص تفهمي .. انا عارفة بلي شحال هدا كانو الشيخات ݣادات وكانو كيغنيو ويوصلو ميساج من تحت الدف بغناهم بحال خربوشة وغيرها ..
تودة : يعايروها ويجيبوها لفروحاتهم فهم تحماق مع هاد القوم
.... ( وحدة فالعائلة ) ولكن اخويا راه حرام راه المرا لي تعلي صوتها وسط الرجال حرام .. الوحدة تبقى فدارها معززة مكرمة
تودة ( شافت فيها ) ايوا لي ماعندها والدين مقارية ما واعية ماعدها صنعة شنو دير ؟
.... : الله يكون فعون كل واحد ( شافت فعنبر ) الله يكملك بعقلك ابنيتي أحسن مادرتي .. وحتى ولدنا مغايخليك مخصوصة من شاي تݣلسي فدارك ديري وليداتك ..
عنبر ( شافت فمها ) داكشي لي كاين .. الوحدة بعد المرات اخالتي كيحطوها ليام فبحال هاد الحوايج وربي راه كيجيب ليك ماحسن وكيسهل عليك وكيعوضك خير ..
سعاد : ابنيتي لس ماعندو الكثير عندو القليل .. كل واحد فهاد دنيا دازت عليه ݣد الجبل وربي غفور رحيم وكبييير الحمد لله سعداتنا بيه الحمد لله عمرنا تعجبنا ولا نتعتنا فالوليات ولا نيشنا فشي حد لي يتعجب يتبلا ابنيتي .
عنبر : داكشي لي كاين اخالتي الحمد لله .
- دخلو للبيت هي ومها بغات تهز بومادا دوجها من الباليزة لي فبيتها ..
تودة : تي أجي نݣوليك ݣلسي ( ݣلسات ) راجلك ماݣالكس بلي خديجة امرات باه ؟
عنبر ( هزات حواجبها بإستغراب مصدومة ) وايلي على مرات باه شكون قاليك هادشي ؟
تودة : جداه سعاد راه خالتو خالت مو لي ولداتو
عنبر : والله مافخباري ݣاع مقالهاش ليا ومالها تغوت ومابغاتوش يتزوج بيا
تودة : وراه كتبقى هي لي رباتو منين كان صغير .. مو اولداتو وماتت مسكينة بقا فيا
عنبر : معاوداتش ليك كيفاش حتى تزوج بخديجة ؟
تودة : لا مكانتش بغات تعاود كدام الناس .. ݣبيل كانو جيران ݣاتليا حتى يمشي الغاشي وتعاود ليا مابقيناش دوينا
عنبر : هاديك سعاد كتبان ظريفة من هضرتها .. شتيها كيفاش كتعامل
تودة : كانت فطاليان .. وقيلة شبخك تزوج بختها زواج ديال المعرفة حيت باها كان صاحب باه
عنبر : كل واحد عندو حوايج مخبيهم قد الجبل ( شافت فتودة ) زعمة ماعندكش شي سر مخبياه عليا الحب ( بإبتسامة غمزاتها )
تودة ( ضاق نفسها وتوترات) أش غانخبي عليك أبنتي حنا بالله وبشراع
عنبر : اشوفي وكان هههه ماعنديش مع ديك خبي خبي ودوك الأسرار انا مافهمتش الواحد علاش كيخبي .. شنو فيها يعاود لي عندو ويجي لبنادم وجه لوجه ..
تودة ( تأزمات وقلبها تعصر تنهدات ونطقات بهداوة) كاين ابنتي شي حوايج مكايتݣالوش يݣدو يجرحو الواحد ولا يضروه .. وكاين شي حوايج كيطيحو عليهم الرواح الواحد كيخصو يسكت حيت كيخاف على داك لي معاه ..
عنبر ( برمات شفايفها ) والله ماعرفت اماما فاطنة حيت عمري تحطيت فشي موقف بحال هكا .. يقد الى تحطيت نفهم ولكن والله ماعرفت ..
تودة ( حنحنات ) شحال هادي فالبلاد عدنا كانت واحد السيدة كنعرفوها كاملين الله يعمر ليها دار ومسكينة كتاب عليها المكتاب وحملات .. داك لي حملات منو كان تزوجها بالفاتحة وبين ليلة ونهار غبر ليه الأثر ( عنبر متبعة معاها ) ومسكينة داز عليها العذاب فحمالتها ..
عنبر : مسكينة حسن عوانها
تودة : فاش جاها الوجه ولداتها واحد خيتي وحيدات ليها التيلاد وباعتو لواحد الراجل مرتو مكتولدش .. وهي كدبو عليها ݣالو ليها راه داكشي لي ولدتي راه مات بغات تشوف اقبرو ماخلاوها ݣالو ليها غير اتعدبي ومع هي معارفة والو ماحكراتش ..
عنبر : الله أكبر ولاد الحرام وهادا لي شرا التيلاد مكايخافش الله محيدو لمو ؟
تودة ( تأترات ) كان طلبها فلول تعطيهم داكشي لي غاتولد مابغاتش هوما يحسابلهم بلي حملها شي حد فالحرام .. ولكن هي كانت مزوجة على سنة الله ورسوله بالفاتحة
عنبر : ومالو متزوجها زواج عند العدول ؟
تودة : عقل الصغر وكان هو كيطلق كان كيبغيها ولا هتدشي لي يحسابليها هي .. ولكن هي كانت تبغيه زغبية ( سهات ) كان هذاك هو بضاض لول ليها
عنبر ( تفكرات نهار بغات بدر ) مكاين لي كيخرج على الواحد قد هادشي ديال الحب وزعلوك وحق الله العظيم ( شافت فيها ) كملي ليا ..
تودة : ايوا دازو ابنيتي سينين وعاد عرفات داكشي لي دارو ليها هادوك خياتنا وعرفات لي ولداتو حي
عنبر : مامشاتش تشوف بنتها ولا ولدها ؟
تودة : وهاعلاش ݣتليك ابنتي شي حوايج راه يطيحو عليهم الرواح .. عرفتي شنو سنين تجي تعرفي بدوك لي والدينك ماشي والدينك وشافرينك لمك
عنبر ( ضربات فالخشب ديال النموسية ) الله يستر ياربي مانتمناها لحتى واحد خايبة لمعاودة انا بلاصتها ولا بلاصتو نحماق ناري الله يستر
تودة ( كتشوفيها كلامها زاد كمل على مابيها ) وهاعلاش ݣتليك كاين شي حوايج مكايتݣالوش
عنبر : واخا هكاك خاصها تݣولها حشومة تبقى حياتها كاملة محرومة من كبدتها راه كبدتها هاديك خاصها تݣولها من حقها واخا يبغيها ولا مايبغيهاش خاص تݣولها ..
تودة : ايوا يصاوب الله نوضي نعسي رتاحي .. هاد الايام ديالك ابنيتي .. ( ناضت عنبر باستها خارجة من عندها من البيت اهي خرجات تودة طرطقات بالبكا )..
- دخلات عليها سميرة تخلعات سدات البلب وقصداتها كتسول :
تودة مالكي اختي ياك لاباس ؟
- بحال كل دار كيكون فيها عرس كينوضو ماليها بكري .. يوجدو الماكلة لناس لي جايين ومنهم يقادو أمورهم ولي مزال خاصهم .. من ورا الفطور المربية جابت أمير وفطرات معاهم فصالة كاع لي تم يهزو يبوس فيه ويصلي على النبي .. كان بزاف ديال التساؤلات فين باه وعلاش طلقو وكيفاش ورا شهر من الولادة مو غاتزوج هادو كامل كانو تساؤلات من الأقارب من غير عمة العريس وبناتها تربيتهم كانت غير كل واحد داخل سوق راسو مكايسولش كافيهم ولد إدريس يكون فرحان ..
- الحاجة لي لاحظو حباب عنبر هي محبة العائلة للفاروق كانو كيعزو ولاد إدريس كاملين زلكن فاروق كان زايد نغزة عند العائلة كانت محبة خاصة ومكانة خاصة بزاف .. من البارح مشافتوش ومبانش ليها وهادشي كان مريحها حيت غادي تفادة الإحراج والحشمة البوسة ديال البارح كانت مزال كتحس بطعم ديالها فوق شفافيها ملمس الشفايفو كانت مزال حاسة بيه ..
- إبتسام : الدريات الى بغيتو طلعو للسطح تشوفو الدبي**حة .. وتشوفو مي منين غاتعلݣ العلام
حياة ( بحماس ) باغية نشوف هادشي ( شافت فعنبر ) نطلعو
رجاء : انا بغيت ولكن مافيا لي يطلع فدروج تقلت ( ضحكات)
إبتسام : كلسي تي لأرض تمشي تولدي لينا ( كضحك ) يلاه البنات ..
ناضت عنبر وحياة ومعاهم ليالي وبنات العائلة .. أما دنيا ويسرى وماجدة كانو على برا كيتسناو ياسمين لي كانت شادة الطريق للعندهم .. طلعو للفوق الدار حمقاتهم من شكلها وكبوريتها كتبرد القلب واخا تكون مهموم تفاجى ..
طلعو للسطح الفوق فين كان كيبان كولشي .. كانو مقابلين مع واحد الوسعة علال ݣالس وإدريس وعبد الخالق ورجال العائلة الكبار ݣالسين حداه .. موقفين عجل ورقية حتى هي كانت ݣالسة من بعيد ، عصام وعماد وطارق لي كان واقف هاز الجن*اوة كيمضي فيهم ومن المنظر ديالو كان هو لي باين غايدب**ح
يتبع...
التعليقات
لا توجد تعليقات بعد، كن أول من يعلق.