محتوى القصة
تحط طاجين ديال الغدا كيتربخ سخون ديال الدجاج بزيتون والحامض مصير .. تجمعو على داك الطاجين بحال ديما
عزيز : الله بنت يدك الواليدة مكاينش بحالها الله يعطيك الصحة
بهيجة : دابا تولي ماجدة توجد ليك ميكلات وطويجنات وتولي تکول طياب مرتي زين ( كضحك ) ..
عزيز ( قهقه بصوت رجولي ) شكون ماجدة والبلدي الله يهديك الواليدة ، ماجدة راه نص فحياتها دوزاتو ففرنسا قرات تماك عاد رجعات للمغرب .. الى وجدات ليك سباكيتي حد ماکالها لحد
عبد العالي ( كيضحك بصوت وقور نطق ) اولدي حتى واحد ماتزاد من كرش مو معلم ، ودابا هادشي ديال الانترنت الى بغات راه تعلم
عزيز : وهاحنا عند الله ، وانا مامالفش بماكلة الزنقة الى ماغلقت مزيان مكنحسش براسي واكل نيت
بهيجة : اشوية ديال الصبر ، انا براسي ماكتش كنتقون الماكل هاباك يݣوليك كان صابر على هبالي مسكين وختك نيت مكانت دير والو هاهي دابا ولات تحط شهد من يديها
عزيز ( حط عظم ديال الزيتون ) فكرتوني ( شافو فيه ) سعاد راه تشدات
بهيجة ( هزات حجبانها ) واش سعاد لي فزنقة اللورانية ؟
عزيز : وشكون من غيرها الوليدة ، شي وحدة فدوك البنات لي كانت شادة ديكلارات بيها لبارح قرقبو عليهم البوليس جمعو كولشي لي تم
عبد العالي ( تنهد ) الله يرض بيها الحومة بعدا غادي تنقى من الوسخ ديالها حسبي الله ونعم الوكيل
بهيجة : صياد نعامة يلݣاها يلݣاها ( عزيز صور الطاجين وسيفطو لماجدة فالواتساب كاتب ليها " بغيتك تبقاي توجدي ليا بحال هاد الطواجن أزين ديالي "
~~~~~~~~~~
مجموعين فدار ديال عبد الخالق ، على الضحك وجموع مرحبين بيامنة ماين تودة وفرحانين بيها خصوصا عنبر لي اخيرا شافت جداتها .. كانت مرة حنينة وظريفة وضحكتها زينة مايتشبعش منها
ماجدة ( وصلها ميساج عزيز وغوبشات ) كيفاش عاوتاني
دنيا ( نغزاتها ) مالك ؟
ماجدة ( شافت فيها ) عزيز مسيفط ليا واحد طاجين قاليك بغا بحالو نوجدو ليه ، انا مابيني وبين الكوزينة الخير ففرنسا كنت مدوزاها غير لازان وݣراتان وسباكيتي
دنيا : ايوا احبيبة علاش عولتي ، مالك اتبقاي طيبي ليه اهادشي راك داخلة على زواج ازين اتوليو تاكلو فزنقة ؟
ماجدة ( سهات وسرحات عاد عاقت بلي راها داخلة على زواج ومسؤولية والحياة القديمة غادي تنساها بنسبة 50 فالمئة وشحال من حاجة غاتبدل ) اويلي وعزيز ماعندوش مع ماكلة الزنقة بعدا كيغادي ندير ليها ؟
دنيا : ساهلة دخلي اليوتيوب شتي مدامك داخلة لكوزينة ومطيبة لازان وسباكيتي فراه الباقي تقدي عليه خاصك أزعامة
ماجدة : باش غانجاوبو ؟
دنيا : كتبيلو يكون خير ، وماحدك مزال فداركم هاد الأيام تعلمي من خالتو سعاد ومن يوتيوب دوزي سطاج ماحدك فداركم حتى الى حرقتي شيحاجة مشافها حد
ماجدة : من غدا إن شاء الله انبدا تهناي ، كملو هضرتهم من بعد تحط الغدا تجمعو عليه دجاج محمر واللحم بالمشماش والأناناس ولوز عاد ديسير والمونادا ..
~~~~~~~~~
فجهة أخرى وبضبط بلغاريا .. مخرجينو من حصص الترويض فوق الكرسي كانت معاه ختو والأم ديالو ، داروهم فطوموبيل وشدو الطريق لدار .. كان مسالم وهادئ من نهار رجع من المغرب شحال من حاجة تبدلات فيه لي وقع ليه هرسو وتهرس ليه ظهرو كان كيحاول مع أمكن يصلح علاقتو مع الله عاد مع نفسو وناس لي ضايرين بيه .. دخلو لدار تلقات ليهم الخدمة ..
.... : على سلامتكم مدام نادية واحد البنت لداخل كتقول بلي هي من طرطف مدموزيل حنان
حنان : اه وي ( شافت فمها ) هادي الفرملية لي غاتولي مكلفة ببدر
بدر ( شافيها بعياء ) ديجا ݣلت ليك مابغيتش شي حد يݣابلني أحنان
حنان ( كانت غير خواتاتو ملامحها زوينة وبريئة ) وخويا الله يهديك دير ليا خاطري ، هاد الفرنلية كاينة عندهنا فلاكلينيك وختاريتها حيتاش عارفاها اتقابلك مزيان غير اجي شوفها بعدا .. دار ليها خاطرها وتوجهو لصالون كانت ݣالسة بنت زوينة ملامحها هادية شعرها عسلي مطلوق بشكل متموج هز فيها راسو تلاقات ليه بإبتسامة على ملامحها ) كنقدم ليكم إسراء سورية وعايشة هنا فالبلغاريا وأحسن فرملية عندنا فالكلينيك
إسراء ( مدات ليه يدها وعلى وجها نفس الإبتسامة ) أهلا وسهلا ..
واقف قدام المرايا كيقاد فراسو .. لابس شوميز فتركواز فيها واحد طرزة فجيب مع سروال توب فالبلو مارين وڤيست فنفس اللون مع سباط فالقهوي صنع إيطالي .. حداه كان نسخة عليه فاللبسة ماشط شعرو وداير ريحة ديال دراري الصغار ريح النقاوة والفريشور
عمران ( بإبتسامة ) بابي انا زيت زوين بزاف
عصام ( هزو باسو ) جيتي بوكوص ولدي حبيبي ( رجع حطو ) .. تدق الباب ودخل الروطال
الروطال : السبع واجد تا اشهاد الأناقة يا أخي
عصام : منتفضلش ݣدامك ( ضار ) كولشي هو هداك ماناقص والو ؟
الروطال : كولشي هو هداك يلاه نزل كولشي كيتسناك التحت وانا غاندي هاد الفن ( هز عمران وخرجو معاه ) .. التحت كانو كيتسناوهم سعاد بجلابة هماوية معاها أدريس بجلابة فالݣرونة .. تودة كانت حتى هي لابسة جلابة فالخضيضر بارد مع الشال وعبد الخالق لابس سروال توب وتريكو ..
- أما عنبر لي كانت لابسة جبادور سروالو وقميجو بحزام مبروم فالغوز هازة فيدها ميكة فيها الحمص كمون وكتاكل .. العائلة كلها كانو واجدين ومتأنقين بلباسهم الراقي الأنيق ، نزل عصام هزو الكادويات لي غايديو والخواتم أما دهاز بقا حتى للنهار ضريب الصداق ..
- فجهة أخرى وفدار أريناس ، الصالة لي كانت مبخرة كيتوسطوها جوج طبالي كبار محطوط عليهم بلاطويات الحلوة والفاكية
أريناس ( خرجات للعند مها طالقة شعرها ودايرة واحد ظفيرة من جهة القدام جايا حتى اللور ومقبوطة بمقبط فذهبي .. أما قفطانها البسيط ديال جوهرة لي فالغوز بانت فيه زوينة مع اكسسوارات بساط ورقاق ) ماما ساليتي ؟
أمينة ( من الكوزينة ) ساليت ابنتي انتي لبستي ( طلات عليها ) تبارك الله الله يرضي عليك ويكمل عليك بالخير ياربي
أريناس ( ݣلسات فوق الكرسي مقابلة مع مها ) عرفتي أماما بعد المرات كنفكر وكنبقى نقول حتى أنا كنت غالطة فلي وقع ليا ، كاينة شي وحدة تقبل بناس مكتعرفهمش ماعرفاتهم منين جاو وشنو أصلهم ولا فصلهم
أمينة ( مسحات يدها ) اييه ابنتي انتي غلطتي وانا كثر منك الله يسمح لينا وصافي ، دابا نساي ربي كبير هاهو غادي يعوضك بولد الناس ديال بصح
أريناس : لهلا يحاشمنا ياربي خايفة غير داكشي لي دزت منو يأتر عليا
أمينة : ماعندو علاش ياتر علك دواك وخديتيه وطبيب وشتيه ، والحمد لله لي ماتقاس منك والو كاينة ابنيتي لي مشات فيها وتوسدات التراب أما حنا نحمدو ربي ونشكروه على نعمتو ..
أريناس ( شافت فساعة ) سيري اماما بدلي راه ايكونو شدو الطريق للهنا سربي ( توجهات أمينة لبيتها بدلات عليها لبسات كندورة زوينة مع شالها دارت واحد دبليج ديالها وخرجات للعند بنتها .. دقايق قليلة سمعو الدقان فالباب أريناس طارت للبيتها وخلات مها تحل الباب ، دخلو اهل عصام مرحبا بيهم ستقبلاتهم فصالون كتعطي لكل واحد صوابو كانت مصوابة وهي مولات التاويل والكلام الزوين لا سعاد لا فاطنة دخلات ليهم للخاطرهم بالبشاشة ديالها ..
سعاد : وفين هي عروستنا الالة أمينة ؟
أمينة : دابا الحبيبة ( بدات كتعيط ) أريناس أريناس .. تحل الباب دالبيت وخرجات منو وهي غارقة فحوايجها وحشمانة مقاداش تهز فيهم راسها ، الرجال الكبار باست ليهم يدهم والعيالات عنقاتهم لا هوما لا البنات من غير طارق وعصام والروطال لي ماتلفتاتش جيهتهم ..
عصام ماهبطش عينيه عليها حاضيها بعينيه ، ماينكرش بلي جات فنة والقفطان وتاها يدياتها البيبضين مع الاكسسوارات والمشطة وشوية دالمكياج لي دارت جاها فن
طارق : وختاريتي وعرفتي ماتختار ابوراس طحتي على همزة مݣمحة وكتݣولينا بغيتها حيت كيبغيها ولدي ، الى ماحركات فيك هادي والو فير سير موت حسن
عصام ( كاعما سمع ليه شافيه ) شتها كاعما سلمات عليا ؟!
الروطال ( جاتو الضحكة عاض على شفتو ) هذا هامو غير ماسلماتش عليه ، مابقا والو وتسلم عليك ماشي غير بيديها
عصام ( شافيه ) هنينا اصاحبي ( قاد كول اقميجة وتقاد كيشوف فباه ويغمز ليه بحجبانو بمعنى دوي ) ..
أدريس ( دور عينيه بمعنى لا حول وشاف فأمينة ) لالة أمينة باش ندخل معاك فالموضوع نيشان حنا اليوم جايين طالبين راغبين فيد بنتنا أريناس لولدي عصام ( فهاد اللحظة عمران نقز من عند باه ومشا لعند أريناس كلس فوق رجليها بايسها )
طارق : ها ولدك دار الواجب حسب راسك أنت لي بستيها ( شاد الضحكة بزز منو )
عصام : والله الى عندو زهر شطون بحالو يبوس دوك الحناك الرطبين
الروطال : أيااااه اوليدي خرج ماعندك .. أمينة كان رد الديالها هو الإيجاب ، متفاهمين على العقد لي ايكون من هنا لسيمانة نيشان وعشا بين العائلة يحضرو ليه الطلبة يقراو ماتيسر من القرآن براكة
عنبر ( كتأشر بيدها ) ربي أخالتي أمينة بغيت ديك الحلوة ديال تمر وديك لي فيها كاوكاو وديك ديال زنجلان
تودة : ماتديش عليها اختي أمينة راها كتوحم
أمينة : الله اودي مرحبا اللهم يكمل عايها بالخير ( حطات ليها الحلوة وهي كاعما مسوقة لشي خطبة منشوية للحلويات هزات راسها فروطال لقاتو مخرج فيها عينيه بمعنى واش هبلتي بشوية ، دارت ليه حركة بمعنى واش مناكلش ) وصل الوقت ديال تركاب الخواتم كلسوهم حدا بعضياتهم ركب ليها الخاتم وهي كذلك ضار عندها كانت الحشمة طاغية عليها نزل بشفايفو على جبهتها ولأول مرة غادي يبوسها ..
- خرجات من دار بكري لابسة اونسابل ديال لولان فالتيركواز مع سبرديلة بيضة وساك فنفس اللون .. فيد شادة سلة صغيرة ويد فيها سوارت طوموبيل حطات السلة فطوموبيلتها وطلعات ديمارات وشدات الطريق .. وصلات لعند دارو نزلات وسونات فالباب كتسنى حتى حل ليها ..
طارق ( باين عاد خارج من الدوش ) مصبحة علينا أختي مالك ( خلا الباب محلول ودخل للدار )
دنيا : صباح الخير ازين الغالي كيصبحتي ، جابك الله كنت كنطلب متكونش على برا فين عز الدين ؟
عز الدين ( نباها من البالكو ) هاهو عز الدين
دنيا ( بإبتسامة طلات عليه ضاربة فيه ريحتها المعشة لي كان فلوغال وبودري فنفس الوقت ) صباح الخير الحمد لله لي لابس مدوش مع راسك باش نيت تكون واجد
عز الدين ( بإستغراب) لاياش واجد ؟
دنيا : اليوم خديتو فري مغانخدمش فيه انخرجو نفطرو على برا ونتغداو ونتعشاو
عز الدين ( غوبش ) لا غير عفيني مافياش لي يخرج ..
دنيا ( خنزرات فيه ) ياكما يحسابليك راسك كنتساور معاك انت راه مكايجيش معاك الخاطر ، انت خاص الواحد يخرج فيك عينيه يحصليك شرف خليت خدمتي وبغيت نخرجو ( كتعيط ) طارق
عز الدين : بغيتي تجيبي الحمية ( وقف عليهم طارق ) شد عليا ختك اصاحبي واش باغية تخرجني بزز
طارق : وشنو فيها ( حاط يديه على جنابو ) خرج فوج بدل الحيوط وانت محبوس ( شافيها ) أنا غانلبس ونجي نعاونك فيه
عز الدين ( بزعاف ) دايرين فيا مابغيتو حيت يدي معطوبة هي ورجلي ياك ( حطات يدها على فمو سداتو ليه قربات وجها من وجها شعرها تلاح على راسو كيناظر عينيها كينقل نظراتو من كل عين الثانية)
دنيا : واش مكتسكتش انت مالك فيك طيكوك ياك لاباس ؟ باغي تبقى ساد عليك راه مكنديرش فيك خير كنديرو فراسي حيت ماجدة عندها مايدار وانا ماعندي معامن نخرج اللهم فيك أنت ( زولات يدها على فمو مسكتاه مرجعة شعرها اللور عاطياه بظهر مخلياه كيشوف فيها تنهد وستسلم ليها بااما يزيد كلمة وحدة ..
جا طارق وخرجوه فالكرسي ، ركبو فطوموبيلتها القدام دارت ليه السمطة وشدات بيه الطريق غادية طالقة الموسيقى وهو كيشوفيها .. هزات تيليفون كتسيلفا ودور الكاميرا كتسيلفا معاه
دنيا : تبسم تبسم دير تشيز ( قلب عينيه داير ليها خاطرها مغلوب وهي ماحبساتش من تصاور ) وقفات جنب البحر وبلاصات حلات الباب عليه والكوفر جبدات منو طبلة حطاتها قدامو وكرسي وديك السلة بدات كتحط كل حاجة فوق طبلة
عز الدين ( مقابلها حتى سلات وݣلسات مقابلة معاه كانت دكية ومخططة لكولشي كيفاش تخليه مرتاح فطوموبيل ماينزل ونفس الوقت اونفاص مع البحر ويستمتع بالمنظر وهي قبالتو ) منين خرجتي ليا ؟
دنيا ( بإبتسامة هزات راسها فيه ) من الجنب
~~~~~~~~~
داير معاه أبيل ڤيديو واحد فدار او واحد خدام ، عماد لي كان فبيروه خدام وداوي مع عصام فنفس الوقت
عصام ( بهدوء كيدوي ويخرج لي فقلبو ) فخبارك برب عمري كنت ظان ولا داير فبالي غانتزوج وشوف سبحان الله هاد بنت الناس ݣلبات كولشي تارا من والبارح فاش رجعنا وانا كنحس بشيحاجة فشكل
عماد ( كيضحك ) حاس بيك ، حيت منين كتبغي شي حد وداكشي لي بيناتكم مكايكملش كتݣول موحال نعاود نحل هاد الݣلب .. حتى كيجي نهار كتلݣى راسك غارق
عصام : والله ياخويا ماكدبتي ( سكت عاد سرات معاه ) أهيا انت شيحاجة مبدلة فيك فشكل أش تم خرج من رونضتك
عماد ( قهقه بصوت رجولي ) من بعد حتى تكون شي حاجة ونتأكد مزيان انت لول نݣولها ليك
عصام ( كيضحك ) صافي باينة ومورقة سير وكان سير تريكة حيدر كلها مغايبقا فيها واحد عزري ( قطع معاه الأتصال مخليه يكمل خدمتو اما هو رجع سونا للأريناس ..
~~~~~~~~~
الروطال ( هز يديه للفوق ) وعلاش كتجري عليا واش هبلتي وعلاش بضبط منرجع حتى ل 8 دليل ؟ باغي نفهم
عنبر ( كدفعو من ظهرو ) راني حاملة والعصاب واعر لولدي ، وصافي سير دابا بدل الساعة بغيتك تخوي دار شيحاجة غاتعجبك
الروطال ( بإبتسامة شيطانية ) شي ليلة زهوانية ( غمزها )
عنبر ( كضحك ) المهم غايعجبك الحال ويلاه سير
الروطال هي لي متعاود ازين برعيني راني شحال هادي وانا صايم مسكين ( جرها من وجها بايسها بجهد وخرج )
عنبر ( غير خرج وبدات كتشطح وتلوي ) لو مكونتش انت دلعني مين حاي دلعني لو مكنتش انت دلعني من حاي دلعني ايو كده دلعني .. ايوا دابا نشوفو اش غانلبسو واشمن لعيبات انلعبو ..
دخلات للكوزينة أول حاجة دارت وجدات واحد الكيك بشكلاط حطاتو على جنب ، جبدات الحوت من الڤريݣو باش ديرو فالفران مع شي سلاد والعصير .. خلات كولشي على جنب وطلعات تجبد شنو غادي تلبس .. يلاه اطلع مع دروج سونا الباب غوبشات بإستغراب رجعات بخطواتها اللور وتوجهات للباب حلاتو .. كانت واقفة الراس فالراس قدام سعاد وفاطنة وجداها مت مها هازين ساشيات ومحملين وهازين واحد زوج سيكان صغار تبسمات وهي كتشوفيهم بإستغراب
عنبر : ماما خالتي سعاد مي مرحبا بيكم ( سلمات عليهم معنقاهم ) دخلو ( بقات كدور فعينيها بإستفهام )
تودة ( بإبتسامة دخلات حطات داكشي من يديها ) جيت انا وخالتك سعاد نقابلوك ابنيتي فاروق كيظل خدام وانت راسك بوحدك ماخيلتك لشقاك ولا لي يصايب لي ماكلة زينة
سعاد ( كتحيد فجلابتها ) إيه ابنيتي يدك بوحدك خاصك ترتاحي فها الشهور اللولة
عنبر ( كتبلع فريقها ودور فعينيها ) فاروق كان ناوي يجيب ليا شي مرة لي تعاوني مسكين غير كان كيقلب على شي وحدة لي ثقة
سعاد : اويلي ابنيتي المرة وجنا موجودات ، حنا لي خاصنا نݣابلوك حمالتك كاملة او ورا حمالتك لاش لايقين انا وموك غير نݣابلوك ونطيبو لك لي تشهات خاطرك .. عنبر غمضات عينيها جاتها الفشلة وداخت كاع لي كانت ناوية عليه تضرب ليها فزيرو ، كتافات هزهزات براسها
عنبر : دار داركم انا نطلع ندوش ونهبط .. خلاتهم وطلعات هزات تيليفونها سونات ليه شداتها العلبة الصوتية سخطات وتعصبات لاحت تيليفونها ودخلات للحمام خدات دوش ماسخونش بزاف دافي وخرجات لبسات واحد البيجامة دافية وشعرها نشفاتو وجمعات رشات من ريحتها ودهنات لحمها ويديها ونزلات للعندهم لقاتهم خشاو داك الحوت فالفران وقادو شلاضة ومجمعين فالكوزينة اما جداها ݣالسة شادة تسبيح ديالها وعينيها مع تلفازة ..
~~~~~~~~~~~
حالة عينيها وسط البيسي خدامة .. ونفس الوقت كتسجل فدروس لي فاتوها حتى تحل الباب ودخل بطولتو وتجريدتو هاز واحد الساشية فيدو حطها قدامها تحت أنظارو مراقباه
حياة : مسا الخير ولا صباح الخير ولا شنو غنقولك
طارق ( ݣلس نازل بتقلو على الكرسي مقابل معاها تبسم ونطق ) ݣولي توحشتك أزماني حتى هادي دايزة
حياة ( عضات على شفتها حابسة الضحكة ) باز والله شنو جابك اسي طارق
طارق : سي طارق ( تقابل معاها ) ياكما فاش انكونو انا وأنتي فبيت واحد اتولي تݣولي ليا سي وعطيني سلام بحال العسكري ؟
حياة ( تبسمات ) واش انت هكا باسل راه حشومة هادشي وانا مزال محرمة عليك واصلا مخاصش تكون بيناتنا خلوة حيت مزال مدرناش فطاجين مايتحرݣ
طارق ( كيشوفليها فعينيها وشدة دشهرها والݣلوس لي مزين شفايفها ) وهادشي علاش جايين نداكرو معاك ابوعويدة كولي بعدا وعمري الكرش
حياة ( عاقت بيه بالةصف لي عطاها حيت عندها التحت كبر من الفوق ماحكراتش حلات الساشي لقاتو جايب ليها الكفتة مشوية والخبز ) باش عرفتي كتعجبني الكفتة مشوية. ؟
طارق : ݣالها ليا راسي كولي ماحدها سخونة ونداكرو من بعد بسم الله ..
خرجات من الدار كتسد فالساك ديالها ، هزات راسها فمول الحانوت تبسمات ليه وعطاتو السلام ، طالقة شعرها كلها حيوية ونشاط وفرحة وراحة دايرة ريسيل لشفارها وݣلوس لشفايفها هزات راسها حتى كيبان ليها واقف مقابل معاها ضارت بيها دنيا .. يوماين مادواش معاها ماسيفطش ليها قلبها خبط بين ضلوعها حسات براسها توحشاتو بزاف .. توجهات للعندو وبلامح باردة وقفات عليه ناطقة بصوتها البريء
ليلى : على سلامتك شنو جيتي دير ؟
عماد ( برم شفايفو بإستغراب ) هادي هي لاباس عليك بيخير العجب الالة !!
ليلى : اهاه وانت لي يوماين مادويتي معايا ماسونيتي ماعبرتينيش كاع جاتك ساهلة ياك ؟
عماد ( تبسم بإنتصار ) هي توحشتيني ؟ ( مجاوباتوش قلبات عينيها والحمورية طغات على خدودها ) أنا بعدا توحشتك داكشي باش جيت برجليا ولكن من هادشي لي درتي باين بلي انتي مامسوقاش الالة سمحيلينا برزطناك ( دار نظاظرو وعطاها بظهر غادي )
ليلى ( شافت فيه مدروكة مشات كتجري وقفات قدامو ) فين غادي ؟
عماد : للخدمتي ، شوفي كيفاش كدوي
ليلى ( قربات تبكي ) والله ماقصدت انا حيتاش تشوشت عليك وخفت تكون واقعة ليك شيحاجة وتوحشتك ( بلاما تحس )
عماد ( تبسم كيشوف ليها فعينيها ) وهانتي ݣلتي وعلى مزيناتك مانقص منك والو ، ومالك ماتسونيش خاصني انا لي نسوني
ليلى : خفت نبرزطك ولا شيحاجة
عماد : تبرزيطك راحة ، عمرك تعاودي شفتيني غابر سوني انتي سولي انتي حتى انا كنبغي نحس براسي كاين لي كيفكر فيا وموحشني اخر مرة ( قرصها من نيفها )
ليلى ( تبسمات ليه ) صافي اخر مرة
عماد ( شد ليها فيدها حس بيها كترعد ) شحال من حاجة خاصنا ندويو فيها اليلى ، ولكن ماشي وقتها نوصلك للخدمتك عندي مايدار العشية تسنايني حتى نجي صافي ؟ ( هزهزات ليه براسها بمعنى واخا )
~~~~~~~~
- سلات الماكلة ديالها ، ناضت للحمام غسلات يديها ورجعات عندها كتشوفيه باش يدوي
طارق ( بهدوء وببحة رجولية تقيلة ) كيبان ليامكاين لاش نبقاو كنتسناو ازين .. نديرو خطوبة وفالخطوبة راه اتعرفي عليا مزيان انا راه مكنعضش
حياة ( خرجات فيه عينيها ) طارق قلتيليا انتعرفو مزيان عاد نديرو الخطوبة واش كتضحك عليا ولا كيفاش ؟
طارق : وزين شنو الفرق بين الخطبة وتعارف ، وزايدون اش اتعرفي فيا عارفاني كيداير نموت معاك .. ديري هاه ولا هاه منعقلش عليك
حياة : يعني بغيتي تقوليا بلي أنت عنيف ؟
طارق ( برم شفايفو كيفكر ) وهو الصراحة فايت واحد خيتي ݣالتها ليا ولكن انتي ازين حلالي غانتكايس عليك ماتخميش
حياة : شوف عقاك فين مشا كندوي على شخصيتك عنيفة ، وانت عقلك فيه المسخ
طارق : وراه أصݣعة بغينا نضربو الكحل فالبيض باش المسخ يكون حلالا طيبا وانا لساني ماعندو لجام
حياة : وانا قلت ليك نتعارفو هو الأول ماشي دابا تجي دير ليا راو داو
طارق : انت مال حسك اديري ليا طرونونو ياك قرايتك واتقرايها اش بغيتي مزال ، واش انا فعمري 20 عام نبقى نطول راه فعمري 36 عام أشريفة وزيري معايا
حياة ( وقفات ) وماشي شغلي درتي معايا نتعارفو ومن وراها الخطوبة تفليتي عليا اطارق ، وماشي بعيد نديرو الخطوبة حتى نلقاك جمعتي الوراق وجبتي العدول لقلب الدار هادشي مابقاش عاجبني أنا بناقص
طارق ( وقف كانت كتبان قدامو بحال الفيل ونملة ) وسمعي وندويو فالمفيد ازين ، فكاكة انا مني مابقاتش نسايها باح من نهار جيت لداركم وعطيتي الأوكي سالينا .. ديك القضية ديال لا مابغيتش ماعنديش انا اتهناي ازين
حياة ( كترمش بزربة هزات ساكها ) انت مامعاكش الهضرة انت ضربات فيه غادية
طارق ( تبعها جرها من دراعها ) فين غادية مزال مساليناش الهضرة أبنت رشيدة
حياة : انمشي عند عنبر خليني اطارق الله يرحم باك ( جرها غادي بيها سد البيرو مخرجها زهي كتنطر ) وطلقني اطارق ( حل الطوموبيل ودخلها )
طارق ( ركب حداها ) بغيتي تمشي عند عنبر زيدي انا نديك ( شافيها ونطق بجدية ) انݣوليك جوج ملمات ودوريهم فمخك مزيان ديك تطوال فالعلاقة ولا فالخطبة ماعنديش معاه أنا .. ماشي براني يلاه اتعرفيني راك مدة وانتي عارفاني مومو انا نبقى نتميساجا معاك بحال شي مراهق ( ديمارا الطوموبيل وعفط عفطة وحدة للعند عنبر )
~~~~~~~~~~
ݣالسين مقابلين مع البحر كيشمو الهوا ديالو النقي كيحسو بواحد الإنتعاشة وراحة .. البرد كيضرب ليها فشعرها وكيلعب بيه مخليا على هواه كانت مغمضة عيتيها حتى حلاتهم على غفلة وشافت فيه بتساؤل :
دنيا : علاش أنت زهواني او بو البنات ؟ علاش انتوما رجال مكاتكفيكمش بنت وحدة وكتبقاو من هادي لهادي ؟
عز الدين ( شافيها بإستغراب) هدا واش سؤال ولا هجوم امدموزيل دنيا ؟
دنيا ( هزات بكتافها راضة خصلة من شعرها ورا ودنا ) نقولو بلي فضول ( دارت رجل على رجل ) بغيت نعرف علاش غير عقلي ومݣاليا
عز الدين : ولكن انا ماشي بو لبنات ، ماشي ذنبي الى كنت كنعجب البنات وكنحرك فيهم شيحاجة
دنيا ( صغرات عينيها ميقة فيه ) براكة من الطنز سولتك جاوبني
عز الدين : خاصك تعرفي واحد البلان شتي الراجل نهار يلݣا وحدة تعشش ليه فدماغو وݣلبو وتسكن ليه فعظامو عينيه غايتعماو على شي وحدة خرى .. انا مكنضرب حتى وحدة على يدها ( حك حاجبو مزول نظارات الشمس دايرهم فوق راسو مكمل كلامو ) انا نهار كنتعرف على شي وحدة كنݣولها ليها من ديبار انا متسناي مني والو باغي ندوز وقيتة زوينة ونشط ونبينا عليه السلام بغيتي مرحبا مابغيتيش الله يعاون وكنلݣاها حتى هي طابة فالكاشة باغية اتخرج ودور ودوز الوقت .. أما لي كنشوفها باغية شيحاجة كتر كنعطيها بتيساع مكنهزش ذنوب بنات الناس فهمتي دابا ..
دنيا ( هزات براسها ) همم مزيان فهمتك
عز الدين ( بقا كيشوفيها مدة حتى نطق ) وأنتي ؟ علاش حتى لدابا مكاين زعمة حتى واحد فحياتك ؟
دنيا ( بشكل قاطع ) لا غير الخدمة ( تبسمات ) كانت غاتكون شيحاجة وماكملاتش ( ضحكات ) لقيتو مع صاحبتي حيت هي كانت كلها انوثة وانا ماشي بحالها لي فقلبي على لساني ومكنعرفش نافق بحال تران كيف قال هو .. مغادي ناسبو المنصب ديالو خاصو وحدة بحالها هي ايوا وفسخنا الخطبة وهدا مكان ( شافت فيه كيشوفيها وتبسمات ) عادي حتى انت مزيان الواحد يتعلم بحال هاد الحوايج كيفيقوك وكتلقى عائلتك لي معاك وهوما لي كيبغيوك بعيوبك وبإيجابياتك كيما انت فهمتي ؟
عز الدين ( بلع ريقو ) وي فهمت
دنيا ( وقفات ) نتحركو وقيلة ؟
عز الدين ( بكل هدوء متبعها بالعين ) نتحركو ..
ݣالسة وسط منهم كيتحتتو وهي غادية معاهم فكلامهم كتسمع لكل وحدة فيهم
تودة : مي عقلتي على بوشعيب العطار لي كان باغي يتزوج بيا وجا خطبني من عند با وجرا عليه
يامنة ( كضحك ) عقلت عليه مسكين ، مو كانت خاطبة ليه وهو بلا حشمة جاي يخطب فيك كلا من عند باك وخوتك ملخة ديال العصا سمح فبلغتو وهرب
سعاد : وسرو نيت جاي يخطب وهو خاطبين ليه الله يمسخو
يامنة : تزوج مزال بديك السيدة لي خطيات ليه مو ، بقا معاها شوية وطلقها ونزل للمدينة وحل محال ديال تاعطارت تماك نيت ورجع تزوج ولادو راه تبارك الله تزوجو او ولدو مو مسكينة ماتت الله يرحمها ، ورجع لدوار فرتكو داك الورث لي بقا ليهم ورجع للمدينة من تم مارجعنا شناه
تودة : ماكنتش كنحملو ياربي تسمح ليا سبحان الله ، أجي ولاد عبد الكبير تزوجو ( خوها)
يامنة : واحد لي تزوج وجوج مشاو لطاليان كاينين تم والبنت كتقرا فرباط على الهندسة يمكن ، ولاد الحسين لي تزوجو كاملين .. أما عبد الله بنتو هي لي طلقت وݣالسة معايا هي وليداتها
تودة ( قلبات عينيها ) أممم مزيان الله يعرضها خير ( شافت فبنتها ) بنتي تكاي شوية ماتبقايش كالسة هكاك ( قاطعهم صوت السونيت ديال الباب ) أكلسي أنا نحل
عنبر : لالا أمانا أكلسي انا نحل ( سبقاتها حلات الباب وجها لوجه طارق وحياة لي دخلات بزعاف طايرة ليها عنبر ماعرفات تضحك ولا تبكي ) تجمعتو كاملين متافقين ؟
طارق ( باس ليها راسها ) كيفاش ؟
عنبر : والو دخل اخويا دخل مالها واش مناݣرين ؟ .. حياة دخلات بسخط لقاتهم مجموعين بنفعال بدات تعاود
حياة : خالتي سعاد خليك شاهدة ، نهار الأول قالي نديرو تعارف حتى نتعرفو مزيان دابا بغانا نديرو خطوبة نيشان زرب عليا
- ݣلسات عنبر وسط منهم كتشوف غكل واحد وساكتة ، مرة مرة كتهز تيليفونها تسوني لروطال والو تيليفونو طافي وترجع تحط تيليفون بزعاف
حياة : ولكن اخالتي فاطنة دار معايا الكلمة الاول دابا تبدل فهضرتو
تودة : وبنتي راه ديك الخطبة وتطوال فيها كيجيب المشاكل وصداع الراس ، واش انتي شايفة فيه شيحاجة خايبة مامزياناش فعايلو خايبين ؟
حياة : لا ولكن ( خسرات سيفتها تعصبات )
سعاد : ايوا ابنيتي منين هكا لاش غاتسناو ، تخافي من شي حد مكتعرفيه ولكن شي واحد كتعرفي أصلو وفصلو ومعاشرة دارهم ومعاشراه وعارفاه ماعندك لاش تخافي منو وتوكلو على الله ... طارق كان كالس وكيسمع ليهم داير رجل على رجل وعاجبو الحال
حياة ( أشرات ليه ) جيتو منو وانا لا حتى واحد مفاهمني ( شافت فعنبر ) دوي اعنبر
عنبر ( شافت فيهم ونطقات ) تشهيت شي ݣلاص ديال الشكلاط والله وشي عصير بارد ( ماعرفو باش تبلاو فاش طرطقات بالبكا كتبكي وتقول مابكات )
فاطنة ( نقزات عندها ) اويلي مالها مالك ابنتي رجوع لله ، هانتوما عصبتوها شتو
حياة ( ضارت لعندها كطبطب عليها ) صافي اختي صافي ندمت كاع علاش جيت ، سكتي اختي ( شافت فطارق ) نوض جيب ليها لاكلاص وانت كالس كتشوفيها نوض ( ناض بلهلا يطريه ليه خرج يجيب ليها لاݣلاص )
شي كيسكت فيها وشي جاب ليها الما ، وهي غير كتبكي كانت عوالة دوز ليلة زوينة معاه وشوف دابا شنو وقع تخلطو عليها المشاعر ولاعبين عليها الهرمونات ، بدات كترجع للهدوء ديالها حتى رجع طارق فيدو 4 ديال كورنيات .. دخل ومدهم ليها هزات واحد كتاكل فيه وتبنن بحال الى عمرها مكانت كتبكي شافت فيهم ونطقات وهي كتاكل وتلدد
عنبر : كملو كملو فين وقتو ( شي شاف فشي وشتتو كلامهم على حوايج اخرين متفاديين يدويو فنفس الموضوع لا يقلقوها ..
بقاو مجمعين على الحتيت وهي مرة تكا مرة تنوض تسوني والو واش جاوب .. دخلو فاطنة وحياة للكوزينة يوجدو كاسكروط وطالق بقا كالس معاهم شوية جاتو أبيل ناض يهضر فتيليفون ..
- تحل الباب بساروت كانت 8 ديال العشية غير سمعات حس ساروت جات خارجة من الكوزينة .. قبل لا تدوي كان هو داخل هاز بواطة فيدو
الروطال ( شافيها وتبسم ) حبيبي شوف زين ديالي شنو جبت ليه ، غافل على صالون لاخر لي فيه سعاد ويامنة .. جبد من البواطة حزام ديال الموزون مكمل كلامو ) ولكن هانتي اتحزمي وتكايسي لوزي غير بشوية وتكاتك مع داك الكولون المعزول وخيري ورزقي كيمشي ويجي ݣدامي ( خرج طارق من الجهة الاخرى وهو كيشوفيه مصدوم عينين كيديو بين الموزون او ودنيه كيسجلو كلام ولد عمو .. فاطنة لي خرجات هازة صينية ديال أتاي حبسات المشي وهي عينيها على راجل بنتها وعلى الموزون لي عرفاتو من طيارة بحال بحال حياة لي هازة طبسيل فيه بوشيار واقفة كترمش بعينيها حابسة الضحكة غير بزز .. الروطال بلع ريقو وضارت بيه دنيا غرق فحوايجو ماعرف واش يرض الحزام للكارطونة ولا يرجع بحالو غير كيبلع فرقو .. أما هي ماعرفات واش تكلس ولا تهرب واخر حاجة فكرات فيها دارتها عطاتهم بظهر وهربات للطواليط مخلياهم منهم ليه ..
الروطال ( بزربة حدر عينيه ) السلام عليكم مرحبا بيكم أنا جاي ( خرج على برا وسد الباب من وراه )
خرج على برا رامي داك الحزام فوسط الطوموبيل غادي جاي دايخ ضايرة بيه الدنيا .. خرجات من الطواليط خارجة من الباب اللوراني للجردة حتى وقفات عليه بغات تبرد فيه جنونها
عنبر ( بإنفعال ) علاش الناس كيديرو التيليفون غير قوليا شحال كنسوني تيليفون طافي ، كون جاوبتي على داك تيليفون كاعما يوقع هادشي ..
الروطال : وطفا وطفا ونسيت شارجور فدار ( دوز يدو فشعرو ) معاش جاو ؟
عنبر : مع أنت خرجتي بنص ساعة جاو .. وغير وجد راسك احبيبي حيت ايكلسو معانا ماما وخالتي سعاد حيت قالك بغاو يقابلوني .. مابقات لا ليلة حمرة لا خنونية
الروطال : مكايعرفوش يعلمو ، وكون دابا انا وانت كنا فشي بلان ماهواش كاين تيليفون الواحد يعلم هاحنا جايين
عنبر : لي وقع وقع ( هزاتو وطلعاتو ) جايب ليا الموزون شيخة أنا .. ودابا داك الموزون ديرو کرافاط ( عطاتو بظهر ورجعات للبيت ) .. تنهد تنهيدة طويلة تحل الباب وخرج عندو طارق من ملامح وجهو كان باين بلي حابس الضحكة
الروطال ( خنزر فيه ) اتزيد تدوي انعطبك
طارق : وصاحبي ختي حاملة وبغيتيها تحزم ليك ماحشمتيش ، خلي اتيلاد يشد بلاصتو ولاهيلة كيبان ليا انزرب على حياة ازواج زين فيه شطيح ورديح
الروطال : وصاحبي كانو يعلمو أو كاين شي حد لي كيجي مدرم ماعرفوك عريان ماعرفوك كتمعشق انت ومرتك على بلان خاري
طارق : وحتى دابا تحزم أنت ( طرطق بضحك )
الروطال : طارق ݣلب على ملتي ان*** معاك السوايع ( بقا ساكت ورجع شافيه ) واصلا لاش غانحشم واحد مع مرتو عادي انتوما لي طايحين على راسي بحال الرعدة .. وأنت جيتي معاهم ؟
طارق : تارا طرا ليا بلان مع حياة ديك نمرودة اتشيبني ، يا نعطبها يتعطبني واحد فجوج راسها قاصح مزود ديال الحرور
الروطال : عي لي تصلح ليك ، طاح الحك وصاب غطاه
طارق ( عاود ليه ) وهذا هو البلان بدات تعرعر جابتني لهنا باش تشكي همها ساعة خالتي فاطنة وخالتي سعاد جاو فصفي ( كيضحك )
الروطال : تا ضرب الحديد ماحدو السخون ، داك كترت تعطال خليه لصحاب العشرين يلاه دير ولادك تا انت تجمع راسك شوية
طارق ( بجدية ) العسكري ݣالو ليا ݣمطوه سيفطوه للسبيطار جابو ليا واحد الخبيرة ݣالك هدا لي طحنو .. خلاه ماهو راجل ماهو مرة
الروطال ( ببرودة أعصاب حك جنب نيفو ) لي كيقلب عليها كيلݣاها
طارق ( كيشوف فيه بعينيه البنية الكبيرة رموشو الطوال المشابكين مع بعضياتهم كيخليو عندو نظرة خاصة ) بحال الى انا مكنعرفكش براني ماشي هو لي كان نازل عندك فلوطيل وتكرفص على البنت ديال الميناج
الروطال ( بنفس البرود ) ومنين عارف لاش كتسول ..
طارق ( طلق ضحكة رجولية ) صݣع عطبتي السيد فالمسائل رضيتيه من العسكري لفنيدة ( الروطال شافيه وتبسم إبتسامة لي تحولات لضحكة رجولية عالية
الروطال : ختك هي مولات هاد البلان أقسم لك برب العزة فاش سقت ليها الخبار حاملة ماكنت غاندير فيه يدي ، فاش سولات على بلان الأتوليي لي لتحت وعاودت ليها ݣاتلك لا لي دار علاش عطيه حتى يتزاد لي فكرشها وحبس
طارق ( شافيه بإستغراب كيضحك ) دم واحد وڤيس واحد ( دور لسانو وسط فمو ) دابا اش غاندير مع ديك نص بلاصة ؟
الروطال : انا منك ندير ليها راو داو تلقى راسها سانية على الكاغط ( غمزو ) غادي تغلبك اصاحبي وكيبان ليا عششات ليك فݣلب من نهار الموسم
طارق : ألا اشمن
الروطال : تانبصم عليها بالعشرين ، حتى عششات ليك فدماغ حتى منكونش كنعرفك .. ديك الهضرة دلكيلو ديال اعجباتني أكدة مدوزهاش عليا أمعلم
طارق ( مجاوبوش على كلامو ) دوز دير كاسكروط حشومة تخلي نسيبة لداخل ماتعطيهاش صوابها ..
خرجات من الخدمة مع 9 كيفما قاليها وقفات كتسناه حتى بان ليها جاي بطوموبيلتو وقف فتح ليها الباب ، طلعات وسدات الباب وراها ..
ليلى : كيداز نهارك مزيان ؟
عماد : زاز لوز ( شافيها تبسم ) واخا تمارة ولكن مزيان وانتي كيدوزتي نهارك مزيان ؟
ليلى ( هزهزات راسها ) الحمد لله ، تعشيتي ؟
عماد : مزال الى قبلات لالاهم ليلى نمشيو نضربو واحد كاسكروط ديال السوسيط من داكشي الرفيع أش بان لك ؟
ليلى : واخا أصلا كيعجبني ساندويتش ديال سوسيط ..
بقاو هاضرين على شحال من حاجة حتى وصلو لواحد الشارع بلاصة الطوموبيل ونزل هو وياها .. توجهو لواحد طريطوار كانو مستفين كرارص لي كيدير السردين مقلي ، وكاين لي داير الكبدة وكاين لي كفتة وسوسيط ..
عماد : سيدي واحد زوج ديال سوندويتشات سوسيط ..
.... : هي دابا أسيدي ݣلسو انا نجيبو ليكم ، كلسات هي وياه على كراسة قصار حداهم طبلة صغيرة
عماد : كيجاتك البلاصة ؟
ليلى ( كتشوف فجنابها ) زوينة الصراحة عمري وصلت لهنا حدا الخدمة ودار وسوق الأحد
عماد : الى عجبك السندويتش نولي نجيبك تاكليه الالة ( سكت شافيها وكمل كلامو ) ݣبيل فاش فاش ݣلت ليك خاصنا ندويو على شحال من حاجة ( هزهزات راسها بالإيجاب ) ليلى اباش نكون معاك صريح ونجيك نيشان حيت ماعنديش مع داك دخول والخروج فالهضرة وكيما كنبغي ختي ومانبغيش شي حد يتفلا عليها منبغيهش لبنت الناس ماشي غير انتي هنا بوحدك مامعاك حد نستغل هاد النقيطة ليا لا أنا ماشي هوكا ..
ليلى : وحتى انا عارفاك ماشي هكا داكشي باش تايقة فيك وجيت معاك للهنا
عماد : عارف ولكن الله يرضي عليك هادشي خاصو يكون بقوامو .. انسولك سؤال واحد جاوبي عليه باش نعرف راسي شنو نݣ ندير
ليلى ( مركزة معاه ) كنسمعك !!
عماد ( كيشوفليها فعينيها ) واش كتحسي بشيحاجة من جيهتي ؟ مكندويش على الحب حيت الحب كيجي مع العشرة ، ولكن كاين شي حوايج كثر من الحب الاهتمام الاحترام داك الانسان يكون مهم بنسبة ليك كتوحشو كتخاف عليه فهمتيني شبغيت نوصلك ؟
ليلى : فهمتك ( بلعات ريقها كتشوفيه كيتسنى جوابها ) وانا هادشي لي قلتي هو لي حسيت بيه فاش غبرتي
عماد ( تبسم ) وانا هادشي لي بغيت نسمع ناكلو دابا ونكملو الهضرة ..
سلاو داك كاسكروط لي كان بنين ، خلص عماد خدا ليها كانيط دالمونادا ورجعو لطوموبيل وصلها للحومة ولكن وقف بعيد زول السمطة وضار شافيها ..
عماد : منين خديت جوابك حتى انا أبنت الناس بغيت نݣوليك بلي كتهميني وعندي غالية مغانݣدش نكدب عليك ونݣوليك كنبغيك وكنموت عليك الحب كيجي مع العشرة وكيتبنا فاش زوج دناس كيكونو تحت سقف واحد ( كان كيخضر وهي يديها عرقو وقلبها كيضرب ) ولكن لي نݣد نݣولك هو عششتي هنا ( أشر لراسو ) مغانبقاش نجرجر فيك 32 عام هذا هو العمر ولكن خاصك تعرفي واحد الحاجة باش نكونو مصافين من الأول
ليلى ( بلعات ريقها ) كمل
عماد ( حنحن بصوتو رجولي حاك جنب حاجبو ) الواليدة اليلى مشدودة فالحبس ( ليلى هزات حجبانها بصدمة ) محكوم عليها ب 25 عام ( عاود ليها لافير ديال مو هو كيعاود وهي غرغرو عينيها بدموع حتى نزلو على خدودها ) تي كتبكي لاش كتبكي يا هاد الحمقة عاودت ليك باش تبكي
ليلى : انا هكا دايرة ( مسحات دموعها ) ماعرفتش علاش بكيت ولكن جامي مكاتستاهلوش هادشي لا أنت لا خوتك
عماد : هادشي عادي فأي عائلة كتلݣاي شي حد خارج من جنب ، منكدبش علك فالأول بقا فيا الحال وهذا هو سباب علاش خويت كازا ولكن فيها خير .. الله يهديها ويكون معاها ( بقات ساكتة) ايوا أش ݣلتي ؟
ليلى : دابا واش انت ناوي معايا المعقول ياك اتمشي طلبني من دارنا واخا زعمة مزال ماتباغيناش ؟
عماد ( فهم بلي راها موافقة عليه واخا داكشي لي سمعات ) ومالي انتزوج بيك هنا انمشي لداركم ، أما الحب ديجا دويت وݣلت ليك كايجي مع العشرة
ليلى ( هزات براسها ) فهمتك ( تبسمات ) لهلا يحاشمنا ولهلا يخيبنا والله يقدرني ونكون المرة لي بغيتي ( غرقات فحوايجها من نظراتو ) خاصني نمشي ( حلات سمطة ونزلات كتجري )
عماد : وساكك الحمقة ( رجعات كتجري حيداتو ليه من يدو ومشات هربانة خلاتو متبعها بالعين وكيضحك )
~~~~~~~~~~
من ورا مادوزو نهار زوين مع بعضياتهم داويين فكولشي بحال الصحاب ، رجعاتو حتى لحدا الدار سونات على طارق قاليها بلي مزال عند الروطال
دنيا : طارق مزال عند فاروق ، ماعرفتش شكون ايعاوني فيك
عز الدين ( مرخي على الكرسي كيشوفيها بعينيه ) خلينا هنا حتى يجي مع راسو .. رجعات الكرسي اللور مرجعة ظهرها عليه مخدمة الموسيقى ناقصة
عز الدين ( بدون سابق انذار) زعمة مناوياش تعاودي تجربة تشوفي حياتك ؟
دنيا ( شافت فيه ) ممكن الى لقيت الشخص المناسب علاش لا
عز الدين : وشكون هو هاد الشخص المناسب ؟
دنيا : يبغيني كيما انا ويقبل على هبالي ، ويخليني نكمل خدمتي ويفهمني بلاما ندوي يحس بيا يكون عقلو بحال عقلي ماشيين فطريق وحدة والمهم يخاف الله فيا وماتكونش عينو زايغة ( وركات على ديك زايغة )
عز الدين ( تبسم ) ايوا الى مالقيتيهش ؟
دنيا ( بطنز ) ديك الساع انجيب واحد المشموم دالورد وبواطة دشكلاط ونجي طالبة راغبة فسيادتكم لزواج
عز الدين ( قهقه برجولة ) الله ينجيني حجارك يشدوك الي بغا يتحكم عليه بالمؤبد ياخودك
دنيا : غير خفت نفوت فيك شي ضربة وانت أصلا معطوب ( هزات راسها ) هاهو عمي بوبكر العساس انا نعيط عليه باش ندخلوك .. خرجات كتعيط على العساس وهو مرخي فوق الكرسي متبعها بالعين ..
متكية فنموسية ديالها مسرحة رجليها كترمش بعينيها شعرها مطلوق بارمة شفايفها مقلقة .. خرج من الحمام شعرو فازݣ لابس سروال دلكيطما مع تيشورت لاح عينيه ليها بانت ليه مقلقة وماعجبهاش الحال .. تمشى بهدوء للجهتها وݣلس
الروطال : مال بنت ݣلبي شنو مقلقها ومخسر ليها الخاطر
عنبر ( غرغرو عينيها بدموع ) بقا فيا الحال كنت عوالة على شحال من حاجة وكولشي تضرب ليا فزيرو ، كنت متخيلة هاد الليلة اتكون زوينة وشوف دابا شنو وقع
الروطال ( جر يديها باسهم ) حبيبي هادشي مكايهمش ، وديجا الى جينا نفكرو بالعقل مخاصكش تحركي بزاف داك الشطيح وتلواز خلي حتى تفوت 3 تشهور
عنبر ( شافت فيه ) كنت بغيت نفرحك ونكونو بزوج وندوزو ليلة زوينة
الروطال ( جرها مقبل شفايفها حط جبهتو على جبهتها كيماصي ليها حنكها) انا غير هاد الݣلسة حداك كتفرحني ، وإلى كنت كنبغيك ايخصني نخاف عليك ماشي نرضي راسي انا وشهوتي ونساك انتي
عنبر ( كتشوف فعينيه فشوفاتو ليها تنهدات ونطقات بصوت أنثوي رقيق ) لهاد الدرجة كتبغيني ؟..
الروطال ( تبسم ) الطريݣ ليك كانت صعيبة وماشي ݣاع الطرݣان كانو كيوصّْلُو ليك ولكن لي ماعرفاش انتي بلي دوك الطرݣان انا لي كنت كنخليوهم ملويين باش دغية نوصل ليك ( غمزها )
عنبر ( فهمات قصدو مزيان عرفاتو عنا بلي تقلابو عليها فالوقت لي كانت خارجة من دار ايبينو ليها قداش هو كيبغيها .. كحازت حداه وعنقاتو بيديها بزوج من عنقو ) الله يخليك ليا
الروطال ( تنهد ) وليا ..
~~~~~~~~~~~~
من بعد أسبوع ݣالسين على الطبلة ديال الفطور .. فاطرة معاهم عنبر كيناقشو ويدويو فشحال من حاجة ..
عبد الخالق : دويت أفاطنة غايجي يخطبها مني من هنا ، فبحال هاد النهار البنت كتبغي باها يكون معاها والبنت ماعندها حد حتى الخو لي يكون فجنبها راه محبوس
تودة : الله يحفظك وينجيك ولهلا يخطيك علينا مسكينة حتى هي تستاهل وبنيتنا الله يفرحها
حياة : مسكين راشد زربان قاليها ماديرو والو انا نديرو كولشي من عندي ظريف مسكين
طارق ( هز عينيه فيها مصغر عين متبع معاها حط لي فيديه ونطق بصوت رجولي تقيل ) وانتي باش عرفتيه ظريف عاشرتيه ؟
حياة ( دورات راسها شافت فيه ) قلت لي كنشوف واش ضروري نعاشرو ( شافت فعبد الخالق ) عمي راه هادشي لي كيخليني نخاف منو وكنقول نفاريو هادشي لي بيناتنا
عبد الخالق : طارق ( بصرامة ) واش اتبقاو شد ليا نقطع ليك ؟
طارق : واش مشافتش راسها هادي ثاني مرة كتشكر فيه راه راجل لي ݣدامك هذا الالة ماشي مشوش ديال الورد
حياة : كون اخويا اكنتي مشموم تطلق بعدا اريحة الزينة ، وانت بحال ضرݣة دالهندي كتسيفط أشوك ..
تودة : حياة ولاواه ابنتي لاتزيديش فيه ، حتى هو مݣالك عيب
حياة : شافت فيها كدافعي عليه أخالتي
عنبر : معلوم دافع عليه راه ولات كتموت عليه ، قلتها ليك نهار الأول قلت ليك ماعندك ماديري بيه ولكن انت لي حالة فمك ( كتعيبها ) بحال باهبنا وقلتي واخا وشدي دابا هدا خاصو شي بوكسورة يلاه يلاه تفاهم معاه ( شافيها طارق ) وشوفيا مزيان حنزز مزيان نعطيك تصويرتي بنادم
طارق ( شاف فباه ) بنتك مغاتولد حتى اتسيفطني لبويا عمر لا هي لا هاد سودانية لي حداها
عبد الخالق ( غمزو ) صافي اولدي ميك
الخدامة واقفين على قدم وساق فالمݣازة الكبيرة لي قريبة اتولي كافي .. كان واقف معاهم حاضي خدمتهم
الروطال : هداك اللون لي درتي تم جامي مغلوق كثر من اللون لي فالحيط لاخور
.... : لا راه الكوش الاول درتو مغلوق عاد نعاود تاني بكوش مفتوح حتى الحيط لاخور درت لو بحال هوكا ..
الروطال : صافي مزيان اعلى قبل الزواقة ديال اللوݣو مع غاتكون فونصي خاص الكوش تحتي يكون بارد
.... : كون هاني اسي فاروق إن شاء الله داكشي لي بغيتي غايكون ، كملو الخدمة ديالهم وهو واقف عليهم سونا عليه التيليفون ، فتح الخط وجاوب
الروطال : وي سلام عليكم .. مزيان تجي دابا نعلݣوها انا نيت كاين فالمحال دابا ، أيااه صافي اسيدي نتسناك ( قطع معاه ) شوف هداك الحيط غير خليه هكاك بيض حيت غادي يتعلق فيه واحد الطابلو .. رجع بخطوات اللور مصور الخدمة وسيفطها ليها فالواتساب سونات عليه تم تم كاميرا ..
عنبر : وصيتيهم على داك الحيط مايقيسوهش ؟
الروطال ( بعد عليهم شوية داير الكيت فودنيه بصرامة وبصوت متحجر عاݣد غوباشتو ) كنݣوليك منين تبغي تسوني علمي مانبغيش شي قمقوم يسمع صوتك
عنبر : وصافي راه نسيت وقوليا الحيط مايقيسوهش ..
الروطال : کلناها ليهم ، مول البلاكة غايجي شوية هدا باش نعلݣوها
عنبر : دويتي مع السيد على وديت الفيترينات ؟
الروطال : راه ݣلت ليك خرجي هاد السوق انتي ديك افصحتك وراحتك وهلي ليا هادشي ، شنو درتو ؟
عنبر : والو فخبارك راشد غايخطب ليالي من عند بابا ؟
الروطال : وي فخباري ݣالها ليا
عنبر : ماما من صباح وهي فالكوزينة ماخرجاتش ، واخا ݣاليها رابا بلب غايجيب كولشي من برا وحتى راشد قاليهم بلي غايجيب معاه مايرفدو هم
الروطال : الى خصاكم شي حاجة علميني صافي
عنبر : اه خاصها واحد البلاطو يكون ديال الشكلاط والمكسرات عرفتي داك الشكلاط
الروطال : داك الشكلاط باغياه أنتي بعدي على الحلاوة الله يهديك لا هي لا الملحة
عنبر : ايمتا غادي تجيب ليا المشة ؟
الروطال : تشغلت مع المحال والخدمة نلݣى وقيت وانا معاك يلاه سيري وتكايسي على راسك ، خاصة شيحاجة سوني
عنبر : واخا الله يعاونك ( قطعات ) ..
كانت بحال شي أميرة ݣالسة جنبو بقفيطين فالبيج ، شعرها مجموع الفوق على شكل ظفيرة مزينة عنقها بالاكسسوارات ويدها بساعة .. الحشمة وسر نازل عليها .. حداها هو لي كان بحال شي أمير بجلابة فنفس لون قفطانها بكل هبة ورجولة بين ليها بلي فعلا كيبغيها وبلي نهار دوا معاها أول مرة فعرس ياسمين مكانش باغي يتفلا عليها كيما كانت حاسبة ..
كانت كالسة وسط مجمع عائلي كبير عمرها مكانت كتحلم بيه نهائيا .. عبد الخالق وأدريس والعائلة كلها مجموعة سميرة ورشيدة العائلة لي مكانتش عندها شي نهار هاهي عندها دابا زادو غرغرو دموعها فاش عبد الخالق كبر بيها دوا بحال باها عطاها قيمة وعطاها بلاصة وسط العائلة اما رشيدة لي واخا كانت قاصحة مع حياة كانت واقفة مع ليالي وماخلاتهاش لا هي لا تودة
كانو حاطين الخواتم وبيسي ، دارو تركاب الخواتم قدام ختو لي كان داير معاها ابيل فيديو
الروطال ( كيقلب بعينيه حياة خارجة من الكوزينة هازة بلاطو فيه العصير ) ماشتيش عنبر ؟
حياة ( بنفي ) لا ماشفتهاش ياك كانت معاكم ؟!!
الروطال : لا مكايناش طارت ماسمات ( خلاها ومشا كيقلب عليها طلع الفوق لبيوت مكايناش سونا عليها والو مكتجاوبش ، نزل كيجري مع دروج خرج من الباب ديال الزنقة للجردة كيسمع تهمهيم .. زاد كيقرب تحت الشجرة دالليمون كتبان ليه ݣالسة وحاطة طبسيل فيه الحلويات وشكلاط وكتاكل وتبنن ) واش مكتحشميش
عنبر ( طارت من بلاصتها ماسحة على فمها ) ف فاروق
الروطال : الويل الكحل هذا ماشي فاروق ، واش انتي مكتحشميش مكديريش بوجه داكشي لي فكرشك واش عارفة بلي المرة الحاملة كتكون مهددة بسكر دالحمالة ولالا
عنبر ( طاح عليها الضيم وقفات كتسوس حوايجها ) عارفة ولكن والله مكنحس راه شهوتي فحلوة التمر مكنقدش
الروطال : مالك درية صغيرة مومو ݣغا ، عنبر راك واعية ماشي وحدة برهوشة اتولي أم ايوليو عندك مسؤوليات والمسؤولية ديال لي فكرشك عليك أنتي بوحدك .. تݣابلي ماكلتك شنو خاصك تاكلي وعلاياش خاصك تبعدي نهار تولدي وتسالي وكولي لي بغيتي الله يرضي عليك
عنبر : واخا
الروطال ( جرها من يدها معنقها ) انا مكنغوتش عليك باغي ليك مصلاحتك الله يرضي لا انتي لا لي فكرشك مسؤولييتي نݣابلكم ونرد ليكم البال صافي ( بعدها عليه باس ليها راسها ودخلو للدار )
الخطوبة دازت زوينة بقا فدار غير الروطال وعنبر معاهم أما ليالي ورشيدة وسميرة داهم راشد يوصلهم
طارق : ماحدها زاهية خطبة وعراسات والله ماكرهت نديرو الخطوبة ورا ضريب صداق دعصام
حياة : شفتك أخويا زربان
طارق ( شافيها ورجع شاف فباه ) أش کلني الواليد بلاما نبقاو نطولو البنت عاطية للعين ، كتكون خارجة كولشي يشوفيها خاصها خاتمي فصبعها اش ݣلتي ( عبد الخالق جاتو الضحكة ) داوي معاك الواليد اش ݣلتي ؟
عبد الخالق ( برم شفايفو ) واش غانݣولك أولدي ، شوفو انتوما مع بعضياتكم
حياة ( وقفات غمزاتو) طارق اجي على برا شوية بغيتك ( سبقاتو وخلاتو ناض تبعها )
عنبر ( كتاكل فكاوكاو ) انا بغيتها تملخو على هاز زربة لي فيه
الروطال ( خنزر فيها ) دخلي سوق راسك ، وخلي درية تزوج انتي تزوجتي تبعيها هي جمعي راسك شوية
تودة : عندو الصح انتي مالك خوك هداك ولا عدوك كولي وسكتي ( قلبات عينيها حيت كولشي ضار فيها )
حياة ( على برا بإنفعال ) درتيها بلعاني ياك بلعاني جبتيني حتى لقدامهم وحرجتيني بغيتي تحشمني معاهم ، راه خاصك تشاور معايا انا لولة
طارق ( ببرود داير يديه فجيابو ) وانا تشاورت معاك وانتي منين راسك قاصح نتشاورو مع الكبار
حياة : طارق ( عضات على شفايفها ماكرهات تغزو ) شهر 12 خاصني ندفع لباك ليبر ، الله يهديك خاصني نركز مع قرايتي واش انا ماحيلتي لزواج ولا القراية واش هبلتي وعاد الامتحان ديال اللغة
طارق : هانية ازين نعاونك على قرايتك ماعنديش مشكيل ، الزواج مغايكونش عصى اتعكل ليك الرويضة كاين شيحاجة أخرى
حياة ( كتحاول تبرد اعصابها ) انا راه شوف خاص تفهمني ( بلعات ريقها ) انا مريضة وخاصني مدة باش نداوا
طارق : اش مرضك ياك لاباس سلامة ياربي ياكما فيك الهشاشة ؟
حياة : لا ولكن انا معقدة فهمتي ومكنحملش الرجال وباردة
طارق ( ضحك ضحكة رجوليا من قلبو ) وايلي على برادة ( قرب منها ) وبعدا البوسة لي بستك بينات العكس حسيت بيه بحال ديك زبدة لي كانت مجموعة وساحت .. خاص انقيسك طردݣي بحال الحراقية
حياة ( وصلات بيها لافان ) انت ممسوخ وماعندكش الوجه علاش تحشم وانا مكنحملكش واصلا انت بززتي عليا هاد الخطبة
طارق ( جبد خصلة من شعرها بعدات راسها عليه ) شوفي ازين شتي هاد طيران ديالك وهاد الطاقة خسريها على راسك شي ماسكات للجسم والوجه ولشعب ، سيري دخلي لشي كروب تعلمي دوك الحركات والأتاويش وتشقليبات والالعاب الزوجية .. حيت عولي ازين انكركبك من بيت النعاس للكوزينة السطح يا مك وغايشهد فينا .. حيت مابقاش بزاف وتكوني ليا ويغنيو داها وداها والله يما هلاها داتو داتو والله يما خلاتو ( ضحك ضحكة عالية ستافزاتها عطاها بظهر غادي )
حياة بلاما تحس مشات كتجري ونقزات ليه على ظهرو بحال القردة تعلقات فيه وغوتات بحجر جهدها خاشية راسها فعنقو حاتية عليه بعضة
طارق ( غوت كيحاول يحيدها ) هبطي هبطي
حياة ( شداتو من شعرو الطويل لي شادو بباندة صغيرة كحلة ) كتعصبني كتجنني ابو سوالف كتجنني بغيتي اتزوج بيا وتنقز بيا من نموسية للكوزينة الممسوخ ابو سوالف ( كتدي ليه راسو وتجيبو لاصقة على ظهرو كيحاول يحيدها والو لصقات لصقة وحدة )
طارق (جرها من ظهرو طيحها كيحاول يشد ليها يدها ) هداي هداي دابا شنو لمك شنو
حياة ( طارت على يدو عظاتها ونقاز من تحتو راكبة على ظهرو من جديد حاطة يدها على عينو مغمضاها ورجعات عظاتو بحر جهدها شعرها طلع لسما وشعرو تطلق )
- خرجو كيجريو من لداخل منين سمعو الغوات لقاو داك المنظر وديك الحالة ، ماجا الروطال فين يفرقهم حتى تكركبو للجهة لابيسين طايحين بزوج
عبد الخالق ( بالغوات ) أش هاد الحالة اش هاد الشوهة واش انتوما دراري الصغار ( دنيا وتودة شادين على فمهم مصدومين اما عنبر ميتة بضحك )
طارق تم طالع كولو كيقطر اما هي مقادتش طلع حتى طلعها هو واخا داكشي لي دارت وقفات كتحاول تسترجع أنفاسها
عبد الخالق ( خرج فيهم عينيه ) واش انتوما ميقنين بلي غاتزوجو هادي ولات ح**رب ماشي زواج اش هاد قلة العفة ( شافيها ) شوفي ابنتي الى مابغيتيهش ومابقيتيش بغيتي هاد زواج نفاريوها دابا من هاد البهلان دابا ݣولي لي كاين
حياة ( كتحاول ترتاح ) كنا اكندويو اعمي وعصبني
عبد الخالق : واش هكا كيدويو الناس ، يتناتفو وجيىان يسمعونا ولاواه هذا راه ولا التخربيق
حياة ( حدرات راسها ) سمحليا أعمي ماقصدتش عمرها تعاود
طارق : حتى حاجة مغاتفارا الواليد ( خنزر فيها ) ماديش عليها مرة مرة كيهف عليها غير ماتفاهمناش فواحد العيبة ياك احياة
حياة ( عضات على شفتها ) أه أعمي
طارق : ديجا نيت تفاهمنا ورا ضريب الصداق دعصاب بسيمانة نديرو الخكبة الكبيرة ونبداو نحمعو الوريقات ديالنا ( كيشوف فيها شوفات بمعنى تدوي نحس ليك كابي )
حياة : إن شاء الله الله يكمل علينا بالخير ( تودة وعبد الخالق حركو ريوسهم بلحولة ودخلو )
الروطال ( خنزر فيها وجر عنبر ) تريكة الحماق
فجردة الصقيل ݣالسة فوق الكرسي وساهية سيناريو حياتها داز من قدام عينيها ، كيفاش عاشت من تكركيبة هي مها من سطات لولاد صالح تكرفيص لي تكرفصات مع سعيد راجل مها مشات الداكرة ديالها نيشان فاش كانت عندها 17 عام ..
فـــلاش بـــاك
سعيد ( داخل كيغوت ويهلل ) فين هي ديك الصلݣوطة ديال بنتك ؟
رشيدة ( خرجات من الكوزينة كتمسح يديها فطبلية ) اويلي تا مالك احنيني ياك لاباس ؟
سعيد : الراجل لي جبت ليها مشات عايراتو راجل باغي ايدوي معاها ويدور معاها وهي عايراتو ودفلات عليه وجها ديالو ( تمات داخلة حياة غير شافها جرها من زيف دشعرها ) أجي أبنت الحرام الحاج محمد دفلب عليه وتعايريه بغيت ندير ليك الهمة وشان تبرعي ونتبرعو معاك ولكن انتي وجهك وجه الخنز
حياة ( كتبكي من حر الشدة لي شادها ) واش انا شكيت عليك واش باغي تزوجني واحد قد جدي راه فعمري ا 17 عام ( شافت فرشيدة كتغوت ) مي دوي امي راه كان باغي يتبسل عليا امي والله معايرتو أهكاك ..
رشيدة : وسعيد عفاك يعيشك اخويا البنت راها صغيرة وماعارفاش
حياة ( كتشوفيها بصدمة ) كيفاش معارفاش امي واش عاجبك هادشي واش باغيين تبيعوني
سعيد ( كشاكشو خارجة ) الى مكانتش عارفة انا نعرف بوها الكلب ( جرها وهي كتغوت لربي لي خلقها غادي بيها للبيت الخزين ورشيدة تابعاه كطلب فيه دخلها لاحها .. كان بيت فيه غير دقيق وخاوي غير ضس ضار عند رشيدة وبالغوات ) والله ودخلي حتى نجمعك معاها ( دخل للعند حياة ݣالع السمطة ديالو غير شافتو جاي جيهتها تخشات فواحد القنت مكالية على وجها وكتغوت وترجى فرشيدة تعتقها )
حياة ( جاتها اشحطة لولة دسمطة فيديها ) مي ميييي عفاااك ومييييي ( كيهز يدو حتى لسما وكينزل عليها دموعها نازلين بحال الشلال كتشهق قلبها بغا يسكت خايفة الدقة تجيها فيدها فلحظة غفلات وجاتها ضربة ديال البزيم لجهة عينها حتى ساح حاجبها بدمياتو خلاها مجبدة كتنين غايبة من حر ضرب لي ضربها ) ..
الـــــواقــع
وجها كان فازݣ بدموع وصباع يدها مشاو نيشان لأثار الضربة لي بقات محفورة .. تحطات يد على كتفها هزات راسها كان عبد الخالق لي ݣلس حداها شايف حالتها ودموعها
حياة ( بلعات ريقها وبصوت حنين ) سمحليا اعمي على لي وقع قبيلات والله ماعرفت كيفاش درت هكاك
عبد الخالق : ماديريش فبالك أبنتي ( هز راسو فيها وفيكسا عينيه مع عينيها ) علاش ابنتي مابغيتيش طارق عاودي ليا ماتخبي عليا والو حسبيني بحال باك وفقامو ربي لي عالم بمعزتك عندي
حياة ( تبسمات بعياء ) كون أكان با بحالك أعمي ، كون غير كان عندي با كنت كاعما نتكرفص ويتحطو عليا اليدين
عبد الخالق ( شد يديها ) الى باك مكاين انا كاين ماشي حيت طارق ولدي نجي من جيهتو ، وكنقسم ليك ابنتي بالله الى مابغيتيش حتى نوقف معاك انتي اعودي ليا
حياة ( تنهدات ) أنا اعمي لي فيا المشكيل انا لي خايفة نرتابط انا عندي فوبيا من الارتباط ، فاش كتوصل لصح كنولي خايفة كنبقى نقول مع راسي واش هاد السيد ايكون مزيان معايا ياكما شي نهار يتبدل ويولي يعنفني ولا يخوني ولا يخليني كيما خلا با مي وكيما سعيد كان كيضربني ومرة مرة كان يهز يدو على مي ولكن انا لي كنت كناكل العصا ( شافت فيه كتدوي بحرقة ) كان كيخليني ب 3 يام فبيت الخزين بلا ماكلة احيتاش ماكنتش كنبغي نتزوج برجال لي كيجيب ليا كانو شارفين أعمي كانو بولادهم وحفايدهم وكيبغي يدور الحركة على ظهري ( تنهدات ) شفتي هاد الجرحة لي عندي هنا كان جاب ليا واحد الحاج وداني للعندو للدار بزز مني باش زعمة نشوف دار لي انتزوج فيها واخا انا والله مكنت انوافق وخلانا ومشا وداك الحاج كان ( عضات على شفتها فمها كيترعد ) المهم فاش عايرتو وهربت سد عليا سيمانة فبيت الخزين بلا ماكلة وماخلاش مي دخل عندي كانت كتلوح ليا الخبز من واحد سرجم صغير بحال البهيمة راه اعمي ماشي اطارق لي كان طلبني لزواج ولكن كنجي لصح وكنخاف كنفشل كنمرض كنتخلع يقد طارق مكايعرفش كيفاش يدوي وماعندوش مع الحوار وتعامل وهادشي لي كيزيد يخلعني
عبد الخالق ( بقات فيه تنهد تنهيدة طويلة) يكون خير أبنتي ولكن علاش ݣبيل ݣلتي بلي موافقة ؟
حياة : مابغيتش نحرجك ونبان برهوشة وعاد هو مابغاش يتحاور ماخلاش ليا فين ندوي ونتفاهمو ، كولشي عندو بزز
عبد الخالق : انا غاندوي معاه وحسبي راسك هاد الخطبة مابقاتش وانتي حرة مانبغيكش ديري شيحاجة لي ضرك ، حيتاش قبل مادخلي على شي حياة خرى خاصك بعدا تبراي من الداخل وانتي مزال مابريتي
حياة : مامقلقش مني أعمي ياك ؟
عبد الخالق : بالعكس ، ديري فبالك بلي انا معاك وبجنبك وحتى حاجة مغادي ضرك ولي حتاجيتيها أنا معاك فيها ( وقف وراهم كانت واقفة تودة ودنيت بزوج شافهم حرك ليهم راسو ومشا )
- وصل بطوموبيلتو قدام القهوة ديال باه وعمو بلاصة ونزل داير نظاظر ديال الشمس دخل نيشان للقهوة حيد نظاظرو باس يد باه وݣلس حط التيليفون ونظاظر فوق الطبلة ..
طارق ( بإستغراب) الواليد هانية ، ياك لاباس ؟
عبد الخالق ( رشف من قهوتو وشاف فولدو ) مغاتشرب والو ؟
طارق : لا عندي مزال مايدار أش تما ؟
عبد الخالق ( شافيه بإهتمام ) بغيت ندوي معاك على حياة ( غوبش طارق كيتسناه اش غايݣول ) ديك الخطبة مغاديش تكون ومغاديش تكمل البنت ماباغياش کالتها ليا بفمها مغاديش تبزز عليها .. بالخصوص طريقتك كيفاش كدوي مع البنت وكيفاش مبزز عليها تزوج بيك واش هكا ربيتك أشريف ..
طارق ( ببرود ) علاش مال طريقتي فالهضرة ، وشكون کالك مبايغياش واش حنا كنلعبو هنا ؟
عبد الخالق ( بصرامة ) طارق دويت مع البنت .. ماتصلاحش للهاد الخطبة البنت خاصها داوا تبرا من الداخل مكرفصين عليها فصغرها
طارق ( بإهتمام ) كيفاش مكرفصين عليها ؟
عبد الخالق : مايمشيش بالك بعيد ( عاود ليه لي قالت ليه حياة بالحرف ) البنت خايفة تزوج وترتابط بشي حد وانت الله يهديك دغية كلمة زوج كيوليو فيك جوج ، كيما هي خاصها تصلح راسها حتى انت خاصك تعرف تعامل حتى حاجة مابزز .. مجاتش تبزز عليها راسك اولدي الله يهديك متكونش أناني فالمعاملة انت ماشي هكا وعمرك كتي هك
طارق ( كيدور لسانو وسط فمو تنهد وقف هز سوارتو وشاف فباه ) يكون خير ( دار نظاظرو وخرج من تم )
~~~~~~~~
فجخة أخرى مقابلين مع البحر ݣالسين فالقهوة الراس فراس
دنيا : رتاحيتي شوية ؟
حياة ( تنهدات ) الحمد لله مزيانة ( شافت فيها ) دنيا واش زعمة الى مشيت عندو مايقولوش عليا حمقة ؟
دنيا : واش انت هبيلة راه اي واحد فينا خاصو طبيب يتبع معاه واي واحد مشا عندو مكايتسماش حمق واش حماقيتي بالعكس اترتاحي شوفي غير ماجدة كيف تبدلات ومابقاتش كيف كانت
حياة : اه ماجدة تبدلات حتى سوݣان ولات كتسوݣ ( تبسمات ) مامقلقاش مني ياك ؟ على قبل الخطبة ؟
دنيا ( بإطمئنان ) بالعكس شوفي انتي عزيزة عليا وحتى طارق خويا وعزيز عليا ، طارق ظريف وحنين وحاجتو والله ماديالو هو اه مرات كيولي خضر ومكايعرفش يدوي وكونما كانش باغيك وعاجباه والله مايخطبك ولكن حتى انت خاص تكوني مرتاحة الى كنتو مكتابين راه حد مايفرقكم والى مامكتابين راه من الخير
حياة : الحمد لله ريحتيني
دنيا : دابا اش بان ليك ناخود ليك رانديڤو؟ ( حياة هزهزات ليها راسها بالإيجاب ) صافي مزيان والله حتى ترتاحي وحياتك غادي تبدل وكاع لي داز عليك غادي تنسايه والحمد لله حنا معاك دابا
حياة ( تبسمات بإستهزاء ) ماما عيطات عليا صباح قالت ليها خالتي فاطنة بلي الخطبة تفسخات ماعجبهاش الحال ولكن فالأخر شفتها تكالمات قاتلي ديري لي يسلكك دخلي العجب فيها
دنيا : تلقايها حتى هي كتحاول تصلح من راسك وبالخصوص معاك انتي
حياة ( تنهدات ) يصاوب الله ..
الخدمة فالمحال ديال عنبر كانت غادية مزيان وقرب يكون واجد .. العائلة كلها كانت مشغولة مع تحضيرات ديال عصام وزواج .. عنبر كتبقى كاع الاوقات فدار مع سهاد وفاطنة وجداها وزادت تشغلات كثر مع المشة لي جاب ليها الروطال فالبيض وصفر مزغبة وعلى مزيناتها دخلات عليها البهجة والفرحة والجو ولا مبدل عندها غير حاضياها وحامقة عليها ..
الدار ديال أدريس الدار الكبيرة لي بحال كل مناسبة كتكون ياعندو يا عند خوه ولا فدار الوالدين ، هاد المرة كانت حاضرة رقية واحاج علال علاش لا واليوم نهار كبير نهار ضريب الصداق ديال ولدهم ..
فجهة اخرى كانو خارجين من عند العدول لابسة جلابة فالبيج مع شال لايحاه على شعرها بالبيج وذهبي .. قلبها كيضرب خارجة معاها مها وهو خارج معاه باه وخوه الكبير
أمينة ( أوصلات لبرا طلقاتها بتزغريتة خلات الكل يشوف ) الله يكمل عليكم بالخير أولدي الله يتبت الغرس
عصام ( باس ليها راسها ) اللهم أمين امي مينة
أمينة ( تبسمات عجباتها ديك الكلمة دمي ) الله يرضي عليك اوليدي تهلا ليا فالعوينة لي عندي هي باش كنشوف
عصام ( شاف فأريناس لي طايح عليها السر وشعرها الرطب لي خارج من الشال ) فعينيا ماتوصينيش عليها وصيها هي ( هزات فيه أريناس راسها
أمينة : كون هاني اوليدي عارفة شنو ربيت الله يرضي عليكم
الروطال ( عنقو ) مبارك ومسعود
عصام : الله يبارك فيك ( عنق باه باس ليه راسو )
أدريس : مبارك ومسعود أولدي ( جات أريناس باست ليه يدو ) مبروك ابنتي الله يكمل عليكم بالخير
أريناس : الله يبارك فيك اعمي ( مدات يدها لروطال بارك ليها حتى هو بدورو )
أدريس : لالة أمينة يلاه معانا كيتسناونا نخليو العرسان يخلطو علينا .. أمينة ركبات مع الروطال وأدريس أما أريناس ركبات مع عصام
عصام : واش النقاشة اتجيك اليوم ؟
أريناس : أه هادشي لي قالت ليا خالتي سعاد ، حتى يمشيو الطلبة. نبقاو غير حنا وأتجي تحني ليا وناخدو تصيورات مع العائلة
عصام ( هزهز براسو ) مزيان باش تنعسي ترتاحي غدا غادي نسافرو إن شاء الله
أريناس ( شافت فيه ) بصح لفين ؟
عصام ( برم شفايفو ) كنت سمعتك ݣلتي للعمران بلي باغية تمشي للطنجة وعمرك مامشيتي ليها ݣلت ندوزو تم واحد سويمينة بينما خرج ليك الباسبور
أريناس ( قلبها كيضرب ) باسبور واش انمشيو لشي بلاصة أخرى ؟
عصام : وجدي راسك يالالة
أريناس : ولفين ؟
عصام ( قلب عينيه مبسم ) لاش باغية تعرفي حتى نمشيو وتشوفي بعويناتك
أريناس ( بترجي وصوتها الحنين وملامحها البريئة ) عفاك أعصام
عصام ( أول مرة تنطق سميتو من شفايفها تنهد تنهيدة طويلة طريقة باش قالتها خلات رجفة تمشا فعروقو وبين عظامو ) الله على عصام وكي طالعة من داك الفم عاوديها
أريناس ( تزنکات ) وصافي
عصام : والله حتى تعاوديها
أريناس : عصام ( تبسمات وحدرات راسها )
عصام ( عض على شفايفو ) برب العالي تا كنت حمار وخاصني الودنين مع حترماتي للحمار منين كنت انكلس معاك فدار وحدة بحال الخوت مريض خاصني إعادة الهيكلة أنا
أريناس ( طلقات ضحكة أنثوية رنانة ) وصافي
عصام ( كيدور فراسو ) وبغيت انغوت ( رجع شافيها ) تي فين كانو مخبيينك أخضرة العينين فين .. يالالة غانمشيو لتايلاند رتاحيتي
أريناس ( الفرحة بانت من عينيها ) لهلا يخطيك ذكرا بزاف والله
عصام ( تنهد وشد ليها يدها طلعها لشفايفو باسها قلبها كيضرب ويدها ترعدات وسط يدو ) ديك شكرا ماتبقايش تݣوليها حنا مزوجين دابا أنتي مسؤولة عليا ماكنتش بغيت نݣولها ليك .. ولكن شوفي راسك ادابا وخليتيني نݣولك علم الله من بعد خليها على الله وصافي .. ( خلاها كتضحك فرحة تسللات لقلبها حاسة بلي أيامها الجايا غاتكون زوينة وغادي يعوضها ربي خير على مداز عليها ) ..
يتبع...
اووف علاش حياة فسخات الخطوبة 😭كانوا كابلز زوين