محتوى القصة
× هــدى×
- قطعات التيليفون حطاتو وتنهدات تنهيدة طويلة ( شافت ففؤاد لي كيشوفيها )
فؤاد ( حرك راسو ) شنو تم ؟
هدى : سونا ليا عصام باغي يدي عمران فالعيد يدوزو معاه .. غايمشيو لسوق الأربعاء عند دار جدهم يدوزو العيد تما وبغا يديه
فؤاد : وفين هو المشكيل ؟
هدى ( ݣلسات ) والله ماعرفت أفؤاد .. خايفة يعوجو دري عليا ولا يعمرو ليه راسو ويتقلب عليا دري يولي باغي باه وعائلة باه
فؤاد ( برزانة ) نعلي شيطان اهدى .. كون بغا يݣلب عليك ولدو كون دارها شحال هادي وكون وا ݣلع ليك الولد فاش تزوجتي هنا فين بان المعدن ديالو ..
هدى : ماعرفتش والى كان دارها ليا غير هكاك .. باش يزرع الراحة فبالي وفالأخر يضربني
فؤاد ( برم شفايفو) داكشي مكاينش ، كون بغا يديرها ݣلت لك ايديرها شحال هادي ، أنا براسي دخل ليا شك وجاني عجب بلان الخيانة لي ݣالك واحد بحالو بدوك التصرفات مجانيش يخون
هدى ( شافت فيه ) بحال الى كتقوليا بلي انا كذابة وكذبت عليك أفؤاد ياك ؟
فؤاد ( كيشرح بيديه ) الله يهديك اهدى ماݣلناش هادشي .. ولكن من نهار تزوجنا داك السيد ماشفتش فيه شي عيب ، شاد تيقارو وعاطينا شبر ديال تيساع كيشوف ولدو عمرو مانوض الصداع وكون بغا دري ايديه نهار انا وياك درنا العقد الى بغا ولدو يدوز معاه العيد عادي
هدى : انا شارية لولدي لبيسة دالعيد عوالة يدوزو معايا أنا ماشي معاه هو( بإنفعال )
فؤاد : دابا راه أنتي لي باغية تجبدي الصداع ماشي هو .. كاع الأعياد كيدوزهم معاك ومكايجي يشوف ولدو حتى للغد كيدوز معاه نهار وكيرجع مالك اهدى متكونيش انانية ..
هدى ( كتخنزر فيه مكانتش حاملاه يقوليها هادشي كتحسب ولدها ديالها بوحدها وهي الوحيدة لي عندها الحق عليه ) هاد دري ولدي بوحدي كون بغاه باه مغايمشيش يخون مو وجاي يݣولها ليها فوجها ..
فؤاد ( هاد الموضوع ضرو فراسو ) وعلاش غادي يكون خانك شنو درتي وشنو السباب ؟
هدى ( بلعات ريقها مهربة عينيها من نظراتو )
فؤاد : شتك سكتي ودوي ( خسرات سيفتها وتروعات عليها نفسها جمعات الوقفة ومشات كتجري للحمام كيسمع فيها كترد .. بقات مدة عاد خرجات شادة فكرشها ) هاد الرضة راه بزاف ݣلنا ليك نشوفو طبيب وأنتي سبحان الله العظيم راسك قاصح
هدى ( كدور فعينيها كانت الپيريود معطلة عليها ببزاف ) اتكون المعدة ماشي شيحاجة ( بغات حتى تأكد ..
فؤاد : دابا شنو غاديري مع عصام ؟
هدى ( بعياء ݣلسات ) والله ماعرفت شنو بان ليك ؟
فؤاد : الى كنتي تسمعي مني الله يرضي عليك .. متجبديش الصداع هادشي راه مغايأتر لا عليك انتي لا عليه هو المضرور فهاد المعماعة كاملة هو عمران راه فسن حساسة خاصو يكبر فواحد البيئة نقية ماشي فشد ليا نقطع ليك ..
هدى ( هزهزات راسها وتنهدات ) إن شاء الله ، أنا غادي نوض نرتاح عييت ..
فؤاد : ياكما ندير ليك اللويزة ؟
هدى ( بإبتسامة ) لا بلاش ( وقفات باستو فحنكو ومشات لبيتها ) ..
× رشــيـد ×
- واقف فالبالكو هاز التيليفون كيدوي معاها الإبتسامة على وجهو :
دويتي معاهم بعدا علمتيهم ؟
ماريا ( من الجهة لوخرا ݣالسة فبلاصتها فرحانة بحال الى ملكات الدنيا ومافيها ) ݣلت حتى لغدا وندوي معاهم اليوم جا خويا من بلجيكا يدوز معاهم العيد غدا فاش غانمشي إن شاء الله ندوي معاهم كاملين ..
رشيد : على سلامتو معاش غادي تمشي غدا ؟
ماريا ( شافت جهة نموسية فين كانت محطوطة الباليزة ديالها ) إن شاء الله مع ديك 10 ونص هكاك نخرج من الدار
رشيد : صافي مزيان باش نوصلك
ماريا : لالا غير رتاح ( بابتسامة) انا غادي نشد طاكسي
رشيد : علاش زعمة ؟
ماريا ( بهدوء ) هكاك ارشيد عفاك .. حسن خليني نشد طاكسي واخا ؟
رشيد ( تنهد بإستسلام ) واخا ألالة ماشي موشكيل .. المهم الله يرضي عليك تمشي نضي ليا الأمور مع الدار وعلميني بلي كاين ..
ماريا : إن شاء الله ، أنت ومن غاتجي ؟
رشيد : انا وخويا وعزيز وعمي عبد العالي إن شاء الله .. كون كانو الوالدين بالحياة كون جاو معايا ولكن رجاف الله ..
ماريا : الله يرحمهم ياربي تجمعنا ونديرو عائلة صغيرة ديالنا
رشيد : هادشي لي كنطلبو من عند الله .. الله يكمل علينا ويكمل على هادشي لي ناويين
ماريا : قلتيها لعنبر ؟
رشيد : غانعلمها إن شاء الله .. ولكن مغايقدوش يجيو معايا هي ودارهم هي عاد مزوجة صعيب الحال إن شاء الله فاش نديرو العقد ديال ندير عشا نجمع فيها العائلة ويكونو حاضرين ..
ماريا : إن شاء الله ، يلاه انا انقطع دابا نكمل جميع ونعس باش نفيق شوية بكري
رشيد : واخا تهلاي فراسك إن شاء الله انسوني ليك
ماريا : واخا إن شاء الله تصبح على خير ( قطعات معنقة التيليفون فرحانة ربي ماخيبهاش الإنسان لي كان كيعجبها وبغاتو هاهو باغي يتقدم ليها ويطلبها من عائلتها ) .. ناضت كملات جميع حوايجها قدات باليزتها طفات الضو وتخشات فبلاصتها ..
~~~~~~~
ݣالسة حياة شادة حنكها من جهة .. ورشيدة من جهة لوخرا كتشوف ساهية ، ليالي لي كانو عينيها كيتنقلو بيناتهم ..
تودة ( مغوبشة ) هذا هو خيري ابنتي يا حياة هذا هو منسوى عندك عد بالي بحال ميمتك .. عمري فرقت بينك وبين عنبر نهار جات مك لهنا فتح ليها بابي منويتهاش برانية ولي تقالت عليكم خفافت عليا ودابا كتݣولي للعنبر نكريو ( سمعاتها فاش كانت كدوي معاها فتيليفون )
حياة ( هزات فيها راسها ) أخالتي خيرك عمري نساه فحياتي كونماشي انتي علم الله فين كنا دابا
تودة : كونماشي ربي ومكتابو أما أنا غير سبب سخرني ربي ليكم .. نهار لول ݣلت ليكم هاد دار داركم حتى البيوت فرشناهم على دوقكم كيما بغيتو نتوما ، وݣتليكم مغاتخرجو من هاد الدار غير الى خرجتو لديوركم أبنتي ديك الحساسية ماعديش معاها الدار ابنتي هي دار دايمة أما هادي غير ضياف فيها ( عطاتهم بظهر ومشات لبيتها )
رشيدة ( خنزرات فبنتها ) رتاحيتي دروك بردتي هانتي قلقتيها تي مالك وليتي هوكا مالك .. من نهار تفارقتي مع داك خينا وانت امضيومة مادرتها حتى أنا لي ولدتك مع باك وسمح فيا او دوك دراري لي ناعسين تم لي سمح فيهم باهم ديري عقلك الله يرض بيك ( كتشوفيها وساكتة ) سيري تبعيها طلبي سماحة راه بحالها بحالي انا مك وهي بحال مك يلاه نوضي تݣعدي ..
حياة ( تنهدات وناضت متوجهة لبيت تودة طلب منها السماحة ) ..
•••••••••
دنيا ( كتلعب برجليها ) والله ماكرهت كون كنا ساكنين كاملين مجموعين هاد الليلة ماسخيتش بيها تسالي ( شافت فيه ) تبارك الله عنبر كتعرف تفكر وحتى أنت مطور مع راسك
طارق ( ضحك ) علاش زعمة ؟
دنيا : درتي راسك مكلخ اباش تخليها دوي وتسمع ليها .. وتخليها تندامج معانا ويتطلق لسانها اما انت عمرك مكدخل على شي مشروع معارف عليه والو كاينة ولا مكايناش ؟
طارق ( هزهز راسو ) كاينة بغيت تكون هو رباط بيناتنا نديو ونجيبو فالهضرة فهمتي البلان
دنيا : فهامتك داكشي باش ݣتليك مطور مع راسك ( طارق وقف ) فين غادي ؟
طارق : داري عييت نمشي نرتاح تابعني عرمة دالخدمة ..
دنيا : ايمتا عندك الافتتاح بعدا ؟
طارق : دايرين الى بغا الله سيمانة ورا العيد يلاه ( تحنا باس ليها راسها ) هو هذا تصبحي على خير ..
دنيا ( تنهدت تابعاه من اللور ) تلقى الخير سوݣ بشوية عنداك
طارق : واخا الواليدة ( فتح الباب )
دنيا ( بإبتسامة ) بقا طنز تما ( بقات واقفة متبعاه بالعين حتى مشا عاد سدات الباب طالعة لبيتها ..
وقف لبرهة متأملها من رجليها لراسها البيجامة الدافية لي كانت لابسة فاللون الكحل فيها رسومات ديال الكرز فالأحمر مع البوندو لي فشعرها فالأحمر .. مرورا لشعرها المطلوق والعكر الأحمر لي مزينة بيه شفايفها بلع ريقو مورك على عينيها مدور لسانو وسط فمو .. نظراتو لي حسات بيهم عراوها وتروها كان كيشوفيها شوفات فشكل غير الشوفات لي كان كيدير فيها قبل بلاما تحس برمات شفايفها مدخلاهم وسط فمها لداخل مغطية العكر لي دايرة ..
الروطال : كوليهم ..
عنبر : هممم
الروطال : داك البلان المخري لي درتي ݣبيل ، جايا تعنݣري مرتاحة مخاصك خير واݣفة ليا مع رعواني ...
عنبر ( قلبات عينيها ) سبحان الله العظيم أنتوما الرجال كيعجبكم الحال تجيو تبقاو علينا انا فلانة كانت حاطة عليا العين أنا فلانة كانت باغياني .. انا بنت عمي كانو باغيين يزوجوها ليا وفاش حنا نقولو ليكم شي ناس كانو باغييني مكترضاوش
الروطال : أشريفة راك مزوجة ماشي زوفرية ديال راسك لي تجي تبورضي عاجبك راسك خطبو فيا .. داك الخاتم لاش مشري تحطيه ديكور
عنبر : خفت عليه لا يضيع ليا أفاروق وخبيتو .. قلت زعماكينات حتى ناخود شي واحد دنقرة
الروطال ( بتهديد ) أقسم لك برب العزة شي نهار أنبوشيك من شي قونت انا علمتك ، داك الخاتم مو اديريها فداك الصبع يطيح يݣعد ماشي شغلك انت فين هو ؟
عنبر ( شادة الضحكة بزز ) شنو هو لي فين هو ؟
الروطال : عنبر العواشر هادو فين الويل ؟ ( تقدم جيهتها فاتح المجورة بانت ليه البواطة هزها حلها جابد الخاتم ضارت لعندها جر يدها ملبسو ليها ) هاد الخاتم غايبقى هنا هاد المرة شي خرية تبغي تسولك حدري راسك ورولي أبنادم كتفهمي ولا نزيد نشرح لك ؟
عنبر ( كانت قريبة منو كثر من اي لحظة قبل كتشوف فعينيه لي كانو كيتنقلو بين عينيها وبين شفايفها ريحتو تغلغلات لنيوفها ) وأنت علاش معصب ؟
الروطال ( الطريقة باش ݣالتها فشلاتو مكانش قاد يركز بين الأنوثة ديالها لي كيشوفها بيها فهاد الليلة ولأول مرة غاتبينها ريحتها كيفاش طالقة شعرها وكيفاش جا معاها اللون ) لاش معكرة هاد تعكيرة الحارة بايتة مع حمادشة ؟
عنبر ( قلبات عينيها بدلال حاسة بنغزة أنوثها من نظراتو ليها ) علاش عيب ولا حشومة ياك دايراه فداري ولا حتى هادي ممنوعة ، ياك حنا كلنا هنا عيالات وأنت بوحدك لي معانا راجل وأنت راجلي عادي كاينة ولا مكايناش ؟
الروطال ( كان مزال شاد يدها بلاما يحس ولا هي تݣوليه طلق ) ماتبقايش تحيدي خاتمك من يدك أعنبر ( بالهداوة )
عنبر ( دوزات لسانها على فمها بعفوية ) وشنو خور ؟ ..
الروطال ( حنحن ببحة رجولية تقيلة ) وهاد المرة الله يرضي عليك مانلݣاكش واݣفة مع البراني .. انتي مرت راجل عيب فحقي
عنبر ( بنفس الهداوة مفيكسية عينيها مع عينيه ) ولكن انا صليت وتبعاتني يلاه كتسول فيا بغيت نجاوبها بلي مزوجة وقف علينا ولدها او عيطي أنت ..
الروطال ( مصغر فيها عينيه حاضي تصرفاتها الغراب وكيفاش كتحلون مافهمهاش لاش باغية توصل واش دايراها بلعاني وقرص نيفها )
عنبر ( تبسمات مغمضة عينيها ) صافي مغاتبقاش لا هي فعلا هكا وهو مكانش كيشوف ولا مكانش قريب باش يشوف ) كتلݣاي ليها ديما تخريجة .. انا دويت هاد المرة مغاندويش ديري عقلك ( على نفس الوضعية والملامح ) واخا ترجع ليا يدي ( نزل عينيه ليدها لي كانت محبوسة فيدو .. حنحنن وطلقها ) بغيتي تسحر دابا ولا نوجد ليك شيحاجة نخليها ليك ؟
الروطال : وانت مغاتسحريش ؟
عنبر : مݣهومة من العشا بغيت نعس الساعة ونفيق نصلي الفجر
الروطال : بلاش عليك رتاحي ، نوجدو راسي ..
- عطاها بظهر وخرج بقات بالعين حتى فاقت من سهوتها حطات يدها علطن سى حناكها كانو سخانين تبسمات )
عنبر : ولد الهم من فعلو عويناتو شحال فنين وضحكتو شحال زوينة ( نفضات راسها ) أعوذ بالله من الشيطان الرجيم رمضان هذا ، وأصلا ياك هو راجلي عادي نشوفيه ويشوفيا مالنا اش درنا مال شوفان حرام ( دوزات على وجها وتوجهات للحمام غاسلة وجها رجعات عمرات الساعة وتكات فبلاصتها باش تفيق للفجر ..
- ݣالسة هي وياها فالكوزينة كيعمرو فخبيزات معمرين ..
سعاد ( بدون سابق انذار) انا وأدريس كنا كنبغيو بعضياتنا شحال هادي ..
عنبر : خالتي الى مابغيتيش تعاودي راه هانية كل واحد وعندو الخصوصية ديالو أنا أصلا ماسمعت والو
سعاد : احيانة عليك اشنيولة امنين ݣلتي هادشي راه سمعتي كولشي
عنبر ( كتدهن الهبيزات بلاصوص بيضة ) وهو راه سمعت منكرش ( تبسمات ) ولكن الى مابغيتيش تقولي هانية اخالتي راه كل واحد فينا عندو حاجة فحياتو مخبيها مكايبغيش يقولها
سعاد : لاواه ابنيتي مكاين مايتخبى ( تنهدات ) انا وادريس كنا كنبغيو بعضياتنا إيييه .. كنا نتلاقاو خزنة على دارنا خليني من هادشي لي ولا دابا ياماتنا كان راجل يحفي عليك صباطو وغير الى شفتي فيه وتبسمتي معاه راه دنيا ومافيها
عنبر ( ضحكات ) كتقولها ليا ماما فاطنة ديما
سعاد : وراه عدها الصح بحال دابا ولات الوحدة هي لي كتكول لراجل اجي تزوج بيا ، كان المرأة عندها قيمة عمك ادريس كان كينوض فيه الشواط اباش نشوفو ولكن ربي عندو حكمة خرى ..
عنبر : حيتاش تزوج ختك ؟ ولكن كيبغيك انتي أخالتي علاش تزوجها هي ؟
سعاد ( كتعمر الحشوة ) ثورية الله يرحمها كانت كتعرف واحد السيد وكانت كتبغيه ، هي كانت فشكل درويشة داخلة سوق راسها متأدي حتى واحد لي ضحك ليها كتݣول راه ضريف ومزيان ، صدق داك السيد اكايتفلا عليها كان خدام عند با الله يرحمو با كانت عندو الطاحونة .. وكان خدام عندو حصل عليه السرقة وجرا عليه وطمع ختي بيه اباش يتفلا عليها ويغطس راس با فالغيس ويخليه ضحكة بين الناس ، وداكشي لي دار كتاب عليها المكتوب مسكينة .. وهداك ولد الحرام مشا كيشيع بيها بين الناس ماخلا لمن ݣالها كولشي بدا ينعت فختي ، با مارضاش هلكها عصا شكا لعمي علال وعمي علال ݣاليه ولدي يتزوج بيها ويسترها من هضرة الناس وفنفس الوقت سمعتها وسمعة با تبقى مزيانة .. حيت مدام غايتزوج بيها ولد سي علال غايكون هذاك غير كيكذب ومنزل عليها الباطل فهمتي ..
عنبر ( مركزة معاها ) أه فهمتك
سعاد : ايوا صافي حتى كالينا با راه ثورية اتزوج بدريس ولد سي علال
عنبر : علاش مزوجهاش للعمي عبد الخالق ؟
سعاد ( تنهدات ) والله أبنتي ماعرفت ، كيبقى مكتاب وصافي
عنبر ( زݣات كتشوفيها بأسف ) وانتي أخالتي باش حسيتي ؟
سعاد ( تنهدات بالعة ريقها ) باش غانحس ابنتي بقا فيا الحال وبكيت وتهديت وكنت نحس بالعافية شاعلة ليا فقلبي ولكن فاش كنشوف فحالة ختي مابقا عدي مندير ..
عنبر : خالتي ياكما فاروق ( قاطعاتها )
سعاد ( كضحك ) لاواه ابنتي .. فاروق ولد أدريس هو فلول مكانش كيقرب من ثورية كانت تعاود ليا بلي مكايقربش منها ، حتى تزوجت انا بحال الى قطع الياس صافي هي موراها كانت حملات ختي ثورية ، موراها انا كنت طلقت وعييت وقلبي كان يضرني بداكشي لي داز عليا شفت واحد الكونطرا ومشيت لبرا تم تزوجت واحد نصراني كان سلم ايوا ختي ثورية اولدات توفات مسكينة وراها تزوج ادريس بخديجة ..
عنبر : علم الله كيفاش عرفها ؟
سعاد ( جرات زيفها بظهر يدها ) كيݣولو تلاݣا معاها فشي إدارة شدات فيه شدة العما .. ومع كان فاروق باقي صغير كان باغي يتزوج على قبلو
عنبر : وقصة عندك اخالتي ( باستها ) ولكن علاش أخالتي متعطيه فرصة مسكين
سعاد : اويلي حيدي عليا حتى كبرنا الهبال
عنبر : أشمن كبرتو مالكم ، والله الى انت بعدا فنة على مزيناتك مايلقاش بحالك ( دخل عليهم الروطال مقاطعهم )
الروطال : أنتوما هنا اش كتصنعو ؟
سعاد : النووي جيتي بكري
الروطال ( جر الكرسي ݣلس ) طرقت المسامر لي عندي جيت رتاح عييت ( عنبر كتشوفيه ) باغية طلبي شيحاجة ديك شوفة ديالك ديال الطليب
عنبر : بغيت نمشي نبات مع دار
الروطال ( بصرامة ) غير نساي
عنبر ( واقفات قدامو بترجي ) هانت دابا مابقى والو غير غدا وبعدو العيد ، عفاك أفاروق نبات معاهم اليوم وغدا راه اتدوز باش تديني ونمشيو مجموعين نشدو الطريق ( شافت فسعاد ) خالتي دوي معاه
سعاد : مافيها باس اولدي دوز هاد العشية معاهم وتفطر معاهم وغدا راه غانمشيو مجموعين
عنبر ( شافت فيه ) ونيت ندوز نجيب الجلابة ديالي ونشوف جلابة خالتي سعاد ( شافت فيها ) راه ايكون وجدها الخياط
الروطال : تحاميتو .. درتي الحمية ياك ؟
عنبر : أصلا اصلا راه خاصك تجيب ليا كادو ( شافت فسعاد ) ياك أخالتي ؟
سعاد : ضروري اول عيد ليكم تفكور دالعيد
الروطال : اشريفة علاش ديك جلابة شكون غايخلصها ؟
عنبر : فين هو ساكها وصندالتها يلاه وفين هو شالها ؟ وبغيت نحني
الروطال : برب لا تحطات فيدك على ديك الحالة لي درتي فيها دايرة ليا الطرز الفاسي
عنبر : دوي معاه أخالتي
سعاد : وصافي حتى انت مالنا منخافوش .. خليها تمشي سير وصلها وجي غدا غاندوزو نديوهم اندوزو ومنها نيت تاخود ليها الساك وصندالة وشال
الروطال : محاميك صحيح الفتيلة ( قلبات عينيها بإبتسامة) سيري لبسي وجدي راسك وݣوليها لسهام انسيفطها معاك باش نديكم كاملين
عنبر : طوموبيل وحدة اتقدنا ؟
الروطال : أنجيب كار وسيري وجدي راسك يا هاد البنت ..
- طارت من حداهم مشات لبسات عليها وجدات راسها عالمة سهام لي وجدات حتى هي راسها .. نزلو لتحت سلمات على سعاد على اساس يتلاقاو غدا طالبة منها سماحة حيت خلاتها تكلف بطياب الخبيزات .. ركبو مع الروطال شد بيهم الطريق وصلهم ..
عنبر : سهام تهبط وتديني نجيب جلابتي ؟ ولا حتى العشية ونمشي مع ماما فاطنة وحياة ؟
الروطال : الى غايكونو حالين نديك
عنبر : عرفتي شنو خلي ورا التراوح نمشي انا وماما وحياة اسير رتاح انت دابا ( نزلات سهام وامير فيدها )
الروطال : بلاما نوصيك اعنبر ( بجدية ) تيليفونك يبقى معاك رضي البال الله يرضي عليك بلاما نعاود ندوي
عنبر : صافي واخا كون هاني ( جبد بزطامو عطاها واحد الكارت )
الروطال : هاكي تيري وخودي لي بغيتي راها بسميتك ( بقات كتشوفيه بإستغراب) وشدي أنباتو هنا
عنبر ( بإبتسامة ) شكرا بزاف ( على شوية كانت اتسلم عليه من الوجه تبسم حيت حسبردة فعلها )
الروطال : يلاه رول متلفتي حتى لجيه ومدويش مع البراني انا كنعاودها لك
عنبر ( ضحكات ) واخا .. فتحات السمطة ونزلات سونات عليهم فالباب نزلات حياة فتحات بقا واقف حتى شافها دخلات عاد مشا .. فجهة أخرى اونفاص مع باب الدار كان واقف مراقبها منين نزلات من طوموبيل حتى دخلات لدار ..
- لقاتهم ݣالسين كيوجدو فالفطور سهام حطات أمير فبيت تودة دورات عليه المخاد وخرجات لعندهم .. كل وحدة فيهم وشنو كدير ..
تودة : انا غانتسناكم انتوما ويلي با .. وااا شفت واحد المحال هنا فدورة خديت جلابة ليا ولرشيدة وخديت لوليداتي الحوايج زينين ..
عنبر : وسعداتهم بيك أماما ( شافت فحياة ) إينا لون خديتي ؟
حياة : الأخضر ملكي حمقني ، راه قلت ورا ترواح نمشي نجيبها عندو
عنبر : حتى انا نيت انمشي نجيب جلابتي ، وخاصني ساك وصندالة ( شافت فسهام ) تمشي معانا باش تشوفي شيحاجة الى عجباتك تاخديها ومنها نيت ناخدو شيحاجة لأمير
سهام ( بإمتنان ) ربي يخليك اختي أنا بلاش ماعنديش مع تقليدي ومكنلبسوش ، الى بغيتي خودي غير لأمير صافي ..
عنبر : اويلي وبالعكس التقليدي كيجي هماوي أصاحبتي .. يلاه اتبدلي الجو
سهام : لالا والله العظيم .. أسيرو بصحة انا خليوني اهنا خودي لأمير بحال الى خديتي ليا أنا ، مابغاتش تحكر عليها شافت فتودة
عنبر : خالتي سميرة مغاتجيش مغاتمشيش معانا للسوق الأربعاء ؟
تودة : لا غادوز العيد مع رجاء ولدها غايجي يدوز معاهم العيد وغايدوزوه مجموعين .. كتبغي تجي مكتخليهاش رجاء وحتى يونس كيمشي لخدمتو مهني ..
عنبر : حتى للعيد ونسوني عليهم ندوي معاهم .. كملو التوجاد قرب يوصل المغرب خرجات عنبر من الحمام عاقدة غوباشتها معصبة ..
حياة : مالكي ؟
عنبر : بنت الهم حتى قرب يأذن عاد هي هابطة نهاري مشا هكاك عندك شي اولويزة ولا شي كوشة ؟
حياة : سيري لبيتي اتلقايها اجي ( بهمس ) غاتاخدي ل ليالي جلابة ؟
عنبر : اه تستاهل واصلا البنت ولات وحدة من العائلة بحالها بحالك بينما خدمات او وقفات على رجليها بعدا ..
حياة : الفلوس ديال شوتينغ الأخرة كنت ناوية نشري منهم الحوايج لجيهان وعمران .. وفاش خالتي فاكنة خدات ليهم انا ناخود ليها بيجامة وشي صنيديلة
عنبر ( غمزاتها ) حتى انت راه ربي فرجها من عندو فاروق شافليك خديمة عند طارق فالبيرو ديالو
حياة : الله ياربي الله انا وياه مكانتفاهموش ݣاع بقا انخدم معاه
عنبر : واش انا قلت ليك تزوجي بيه راه الخدمة هاديك .. مافهمتش مالك معاه ظريف عمرنا شفنا فيه شيحاجة خايبة
حياة : سيري ديري اولويزة راه بقات 5 دقايق وغايأذن .. ودن المغرب فطرو مجموعين مرة يدويو مرة عينهم مع السكيتشات لي فتلفازة ، بدا المسلسل الجديد فالاولى لي مغنية الجينيريك عنبر هزو البنات الماعن تعاونو عليهم .. حياة وليالي مشاو لجامع لي حداهم وتودة ورشيدة وسهام صلاو غير فدار .. اما عنبر حطات كاس دالقهوة مع سفوف كتاكل وتفرج سلاو الصلاة جاو البنات ..
- ناضت لاحت عليها عباية ديالها وشالها هزات ساك دارتو جنب البنات بقاو بحوايجهم
عنبر : ماما يلاه
تودة : ياك غاديين بثلاثة بيكم أبنتي بلاش انا مانمشي
عنبر : لا ضروري وحدة فيكم تمشي معانا يا أنتي يا خالتي رشيدة
تودة ( بإستسلام ) واخا .. ناضت لبسات حلابيتها هزات بزطامها وخرجو مجموعين ..
عنبر ( فطريق باش ياخدو طاكسي ) فخباركم رشيد غايخطب سونا عليا قبيلات قالها ليا
حياة : حلفي شكون هادي لي غايخطب ؟
عنبر : شي بنت ساكنة معاه فنفس العمارة ، مغانݣدوش نمشيو كاينين دارهم فجديدة قاليا حتى يديرو العقد وغايدير عشا بين العائلة ونكونو إن شاء الله ..
تودة : والله يكمل عليه بالخير يستاهل ولد الناس وراجل تبارك الله لا هو لا عزيز ديما مسيكين يسوني ليا يسول لا هو لا مو ..
حياة : حتى انا مسكين ديما يسول فعنبر ويسول فدار كاملين .. شدو زوج طاكسيات نيشان لدرب السلطان ، الدنيا كانت عامرة كولشي خارج كيتقظا مخرجين الناس وليداتهم كيشريو ليهم حوايج العيد .. الأجواء ديال العواشر كانو باينين شي كيبارك لشي وشي فرحان لشي ..
- ݣالسة بين العائلة مجموعين كيعاودو على الترتيبات باش غايبداو والحلوة عندمن يكومونديوها ، وهي ساهية وسط منهم فللحظة الفرحة لي كانت كتحس بيها تلاشات فاش كتفكر نهار غايتحمعو وتكون عنبر اكيد غايكون حتى الروطال .. واش غايفضحها واش غايقوليهم كنت معاها واش غايقول بلي عرضت عليها للفيرما وجات للعندي لدار ، واخا ماوقع والو بيناتهم وعمرو حط عليها صبعو ولكن خايفة خايفة لا يخلق ليها مشكيل مع رشيد وهاد الفرحة تهرس .. واش غايكون معاود لعنبر عليها ولالا بزاف ديال الحوايج كيدورو فراسها خلاوها مهانياش خلاو قلبها تقبط خصوصا الموقف لي وقع ليها مع الروطال اخر مرة ..
الأم : وماريا ( شافت فيها ) داويين وانتي غايبة
الأخ : الخلعة ديال الزواج هادي ، كيولي بنادم غير ساهي
الأم : مكاين لا خلعة لا والو مايكون الخير إن شاء الله..
ماريا ( وقفات ) انمشي لطواليط .. خلاتهم مشات لطواليط دخلات سدات عليها كتغسل وجها لي كان سخون حطات يدها على قلبها .. مسحات وجها وخرجات مشات للبيت لي كتنعس فيه حالة السرجم كطل منو مقابلة مع السما ..
ماريا : ياربي ياربي دوز كولشي على خير ياربي لهلا تحاشم ياربي تجمعني مع رشيد بلا مشاكل بلا صداع ياربي تجعل ليا فوسط الضيق طريق ياربي ( تيليفونها كيسوني هزاتو كان هو )
ألو ..
~~~~~~~~~
هازة الساشية فيها جلابتها كيدورو .. ليالي هازة ساشيتها الفرحة باينة فعينيها شادة فدراع حياة مخشية فيها وغاديين كيدورو هوما القدام وعنبر وتودة اللور ..
تودة ( وقفات ) رجلي ضراتني تشهيت اشي كاس درايب
عنبر : نݣلسو فديك المحلبة لي كناكلو فيها ديما .. (توجهو للمحلبة ݣلسو فيها ، دومونداو ) حياة تمشي معايا ؟
حياة : فين ؟
عنبر : وغير يلاه ( غمزاتها وقفات حياة ) ماما هاحما جايين
تودة : متعطلوش باش نمشيو .. خلاوها هي وليالي ورجعو للحوانت لي كانو فيهم ..
عنبر : نشوفو ليالي شي ساك حشومة .. توجهو للحانوت كيقلبو على شي ساك زوين
حياة : بلاتي نجيب روشارج ونرجع ..
عنبر : الى مالقيتيني هنا اتلقايني عند هادو لي حداه ..
- خرجات حياة تجيب الروشارج بقات عنبر كتشوف سيكان ماعجبها حتى واحد خرجات من عند هداك مشات لواحد كان عامر ، دورات عينيها توجهات لواحد فواحد الزنقة دخلات عندو جبد ليها ساك فلون الفوشيا عجبها ايجي مع جلابة ليالي لي كانت فالكحل والفوشيا ..
خلصاتو دارو ليها فساشية خرجات من تم كترجع البزطام للساك سداتو رجعاتو على كتفها .. فاللحظة حسات براسها تجرات من يدها داخلة لزنقة اخرى كانو فيها غير الديور مافيهاش الحوانت .. بغات تغوت ولكن يد رجولية تحطات على فمها شرݣات عينيها من الوجه لي كتشوف قدامها .. وجه تعذبات بسبابو مرضات وضاعت وتغدرات من تحت يدو فاللحظة ضارت بيها الدنيا بلعات ريقها وهي كتشوف فعينيه ، جاتها الرضة وهو قدامها سيناريو حياتها معاه داز قدام عينيها ..
بدر ( بإبتسامة وعينيه مناظرينها ) توحشتك moya te roza ) (وردتي)
قلبات عليها فكاع الحوانت لي تم مالقاتهاش .. هزات تيليفونها كتسوني عليها جاوباتها رشيدة
حياة : الو عنبر .. مي واش نساتو ؟ .. صافي صافي لا والو صافي ( قطعات ) واش تكون رجعات للمحلبة .. مشات للمحلبة لقات تودة وليالي
تودة : فين هي عنبر ؟
حياة ( بلعات ريقها ) واش مجاتش لهنا ؟
تودة : اويلي على جات كدياك كانت معاك ؟
حياة : واه كنا بزوج مشيت ناخود تعبئة ونرجع قاتلي انا اهنا قلبت عليها الحوانت لي تم مالقيتهاش ..
تودة ( طاح ليها الما فركابي ) ياكما تجلات مع الزحام ؟
حياة : ماعرفتش خليك هنا اخالتي لا تجي انا وليالي نقلبو .. مشات حياة راجعة هي وليالي كيقلبو ، ماخلاو بلاصة ولا محال كيقلبو بعينيهم الزحام كان بزاف حياة فكل خطوة كتشدها الرعدة خايفة ..
ليالي : راه هاد القنت جينا ليه 3 ديال المرات اصاحبتي ..
حياة : انا راسي داخ عليا ( جاتها البكية ) خايفة التكون تݣريسات اجي نرجعو للعند خالتي فاطنة لا تكون رجعات عندها .. راجعين وكيتمناو تكون رجعات مالقاوهاش كانت تودة بوحدها
تودة ( اللون هرب من وجها ) مالقيتوهاش ياك ؟ اويلي وحدي فين اتكون مشات واش سونيتو ليها
حياة ( ݣلسات ) سونينا تيليفونها نساتو فدار اش غانديرو دابا اخالتي عندك تكون تݣريسات ولا شيحاجة
ليالي : اختي ماحنا على فالك اتكون اتلفات
تودة : هي عارفة المحلبة الى تلفت تجي ليها نيشان الله ياربي الله ..الله ياربي ودوك ولاد الحرام كاينين هنا ياكما تلقى ليها ؟
حياة ( كملات عليها بالي خاص ) لا اخالتي متقوليهاش الله يرحم الوالدين ( تيليفون تودة كيسوني هزاتو )
تودة : شوفي ليا نمرة شكون ؟
حياة : الله أكبر فاروق هذا وقيلة سونا ليها وجاوباتو مي اش انقولو ليه ..
تودة ( كتفتف ) اري لهنا ( فتحات الخط ) ألو اولدي الحمد لله ( بلعات ريقها ) اه اولدي نساتو فدار ( مقاداش تخبي الخلعة راكباها ) اولدي تلفات لينا فزحام ماعرفناها فين هي عيينا نقلبو مكايناش
الروطال ( فرانة الطوموبيل ) فين انتوما ( غوبش ) واخا انا جاي صافي ( قطع دغية ) عفط عفطة وحدة مكسيري ..
حياة : واش جاي ؟
تودة : اه جاي ( شافت فسيد لي تم ) سمحلينا اولدي واخا نبقاو هنا البنية عندي مزال مارجعات
.... : هانية لالة مرحبا ، ݣلسات ليالي شادين حناكهم كل شوية كيقولو غادي تجي او والو ، ناضو البنات كيقلبو من جديد او والو ..
~~~~~~~~~~
بلعات ريقها متحكمة فأعصابها نزل عليها واحد البرود مكانتش ضاناه غادي ينزل عليها كتشوفيه مجاوباتوش ..
بدر ( كيشوف فعينيها ) عارفك مصدومة ، شتي كتاب ليا عمر جديد احبيبي .. الله يهدي دارنا لي كذبو عليك كانو باغيين يفرقونا بعدوك عليا عرفتي شحال وانا كنقلب عليك وشوفي نهار لقيتك لقيتك انت او ولدنا ( زول يديو من فمها ) شنو هاد اللباس لي لابسة فين مشا شعرك الطويل كنت كنحماق على شعرك عرفتي شحال وانا حامق نشوفو ونشوفك ..
عنبر ( مراقباه دورات لسانها وسط فمها غمضة عينيها ببرود نطقات بصوت خالي من اي مشاعر ) على سلامتك ( ستغرب من ردة فعلها ) مزال الدنيا باغياك ( تبسمات ) قلتي توحشتيني ( هزهز راسو بالإيجاب ) .. قربات لودنيه ونطقات ) وانا بغيت عيشة مولات الواد هي لي توحشك ( كانت عارفة بلي مغايفهم والو ) ودابا لاش جاي ؟
بدر ( غوبش ) كيفاش لاش جاي ؟ حبيبة واش نسيتي راه بيناتنا ولد
عنبر ( قهقهات ) ولد هههههه ياك انا عاݣرة مكنولدش كيدرتي حتى عرفتيه ولدك ؟
بدر : المعجزات كيوقعو أحبيبة
عنبر ( هزاتو وحطاتو بعينيها ) غادي ترجع واحد الخطوة لور هي لول يلاه ( كيشوفيها ) ورجع لور اسي رجع ( رجع ) هكاك سمع الكبيدة نقولك واحد جوج كليمات كنا وكنتو وصرنا وصرتو كنتي راااجلي وكان بيناتنا عشرة ومحبة اه وربي نعم علينا بوليد بكيت عليك وتعدبت وداركم جراو عليا ݣنازتك ماخلاونيش نحضر ليها ولكن ازين اباش يكون فبالك انا شحال هادي عارفاك عايش وعارفاك طلقتيني قبل مدير كسيدة ب 3 شهور ..
بدر ( بإستفهام ) شكون ݣالها ليك ؟
عنبر : صاحبك معاد لي كنتي انت وياه روح بروح فاش كنتي كتجي للمغرب .. الله يكتر خيرو هو لي تلاقيت بيه مسكين دار فيا خير قبل مايمشي للكندا وفيقني من الأحلام دابا جاي تقرا عليا زابورك الوحش ديالك زيدو فيك ..
بدر : حبيبة كبيدة .. والله القسم الى كلهم باغيين يفرقونا خاصك تسمعيني خليني غير نشرح ليك وحكمي بلي بغيتي ( حط يدو على كتفها )
عنبر ( دفعاتو كشاكشها خارجين ) تحط عليا يدك نݣرضها ليك من جدر يا الموسخ ..
وصل للدرب السلطان بلاصة الطوموبيل .. نزل منها مزروب داخل كيجري كيتخطا الناس حتى وصل فين ݣالت ليه تودة ماحسو بيه حتى وقف عليهم ..
الروطال : مبانتش ؟
تودة : لا اولدي والو ( عاودات ليه )
الروطال ( شاف فحياة ) اجي وريني فين كنتو .. تبعاتو حياة كتحاول تجيريه فخطواتو كان سابقها .. وهي تابعاه حتى وقفو قدام المحال لي كانو فيه ، مجاتوش يجبد صورتها يوريها لحوانت ..
الروطال : رجعي أحياة انا غانقلب عليها نجيبها
حياة : مانبقاش معاك ( بخوف )
الروطال : لا احياة سيري .. عطاتو بظهر وتمات راجعة .. بدا من داك المحال وهو كيقلب كاع داك الصف لي تم قلبو محال بمحال قيسارية بقيسارية والو غابر ليها الأثر ..
~~~~~~~~~~~~~
بدر ( ماعجبوش الحال كيفاش تعاملات معاه كيفاش دفعاتو وغوتات عليه مامالفاش ليها ) وعاريتي ( ضحك ) تزوجتي ليا داك الميكروب او وعاريتي .. طيري تنزلي اعنبر خرتك ليا احبيبي بيناتنا ولد واش بغيتي تحرمي ولدك من باه .. باغية ولدي يربيه راجلك
عنبر ( تبسمات ) رااااااجل ( غمضات عينيها ) راااجل وسيد الرجال ومتوصل ليه حتى لديك الخرية لي كيحطها فطواليط ، بفلوسو وبمقامو وبكتافو وكيعرف يتعامل ( غمزاتو ) كيتعامل من جوج جوايه ..
بدر ( قاستو فنقطة ضعفو ) واش نفكرك العيب فيمن كان ؟ فيك انت ازين انت كلك كنتي عايبة نسيتي منين جبتك ؟ جبتك من جنب البحر حدا كروصة ديال البيبوش درت ليك الشان وديتك للبلاد ماكنتيش كتحلمي تحطي رجلك فيها ..
عنبر ( كضحك بصوت عالي ) شلا وشلالي والعراري هاهايو الخبز ومسكة فلايو بلايو .. شلا فين ديتيني الناس كيحمدو الله ويشكروه يزورو مكة الله يوصلنا لداك المقام .. أما بلغاريا باش معروفة لي قلتي ليه بالغاريا يقوليك بناتها خدامين فالمواقع الزرقاء ، العيب انت لي زرعتيه فيا اما انا الحمد لله هاني ولدت دري على مزيناتو سبحان الله مكايشبه ليك ومزال نزيد واحد 2 إن شاء الله من عند سيدك ( بدلات ملامحها ) واشحال كنت حمارة فاش كنت كنبغيك كنت معمية دابا عاد عرفت راسي عايشة سير شوفليك ماماك وباباك يشوفو ليك بنت القاع والباع ..
بدر ( كيحاول يتحكم فراسو ) عنبر عارفك مقلقة وكتݣولي هادشي غير باش تحكيني ( تبسم ) عݣوبتك ترجعي ليا انت او ولدي اليوم ولا غدا راجعة ..
عنبر : ياواخا تزاد من كرش مك من الأول لا رجعت ليك .. واخا تمرمد واخا تجيني من قاع الهامور كتكركب لا رجعت ليك وعاودها لجهة ضاراك ، والى ماعطاتك خو جوابك عاودها لجهة لوخرا ( جات تخطاه جرها زادها مع الحيط حتى توعتات )
عنبر ( كتغوت ) ومتحطش عليا يد الحم**ار ( هزات يدها طرشاتو ) متحطش يدك الموسخة الموسخ ..
بدر ( كيحاول يشد يدها ) هداي هداي
عنبر : وبعد مني الميكروب الموسخ الحي**وان ( كتركل وطرش وفاش ماجاتو ) وعتقوني اعباد الله بغا يتعدا عليا ( نزلات ليه على عنقو عضاتو ) جرها من راسها حتى زيف خسر ليها .. كان فيها واحد الجهد مضوبل كضرب وفينما جاتو خرجو الجيران وشي وحدين من الحوانت ..
- كان فالحومة لوخرا خارج من واحد المحال .. سمع الغوات مشا كيجري وقف كتبات ليه حالتها حالة زيفها خاسرها كتخبط فلي قدامها بحر جهدها ، طار عليه جرو من تجاكيط هز يدو على حرها ونزل عليه لوجهو قبل لا يطيح جرو ونزل عليه بيدو الثانية ..
عنبر ( قلبها كيخبط صدرها كيطلع وينزل ) عطي للكيدار عطي لمو .. الروطال طيحو نزل عليه كيهز يدو وينزل عليه لوجهو كيحاول يدافع على راسو ولكن ماقدش جاه على غفلة وحكمو ..
- دخلو الناس كيفرقو كيجرو فروطال يطلبوه ينعل الشيطان .. وقفو بادر حاجبو مجروح نيفو ومفمو مجروعين ..
الروطال ( صدرو كيطلع زينزل مغيلف مقاشعش قدامو هز يدو بتهديد ) تعاود .. تقرب .. تعاود تقرب لمرتي القو** القرعة نݣلسك عليها برب حتى نعاودلك الطهارة نعطبك ونخروج عليك .. هاد المرة فكوك المرة الجايا دور بيها العصب درجليك نطرضݣهم ..
... : صافي صافي اخويا حشومة العواشر هادي
.... : نعلو الشيطان اولدي حشونة العواشر هادي
الروطال ( بالغوات ) دور بمرتي از**** نخروج عليك نخرج فعودك .. انا هو لبلا لي غيتسلط عليك وديني وما أعبد نخليك كتمشي زحاف الى طفتي بيها ( نفض يدو من دوك الجوج لي كانو شادينو جرها من يدها مخليه وراهم مليوح ) ..
ݣالسة على اعصابها كتسنى وطل بعينيها ، حداها ليالي وحياة حتى بان ليهم جاي وهي معاه ..
تودة ( وقفات بخوف ) الله ابنتي الله فين كنتي ؟
عنبر ( ببرود ) غير تجليت مع زحام دخلت فواحد الزنقة وماعرفتش نخرج
الروطال : تلاݣيتها مجلية وماعارفاش تخرج من الزحام يلاه نوصلكم .. هزو داكشي لي تقداو وخرجو من تم راجعين للدار فسكات حتى وصلو
عنبر ( شافت فتودة ) ماما دي معاك كاع داكشي لي تقديت حتى لشوية وغانرجع .. هزات حياة تقدية لي تقدات عنبر ونزلو من طوموبيل ( شافت عنبر فروطال لي كان كيشوف قدامو كاتم اعصابو ماباغيش يبرد فيها حرو حاس بيها حاس باش كتحس فهاد الساعة ) واخا تدينا للبحر ؟
الروطال مجاوبهاش ديمارا وشد الطريق بلاما ينطق .. كان عندو بزاف مايݣوليها كان غايسبطها على الخرجة بلا تيليفون ولكن مكانش الوقت المناسب لهادشي نهائيا .. حبس فبلاصة خاوية مسجد الحسن الثاني كيبان بعيد مضوي ، واحد الجرف كبير والبحر التحت نزلات من الطوموبيل مبعدة واقفة عاطية وجها للبحر كتستنشق ريحتو تنهدات تنهيدة طويلة ..
الروطال : شنو ݣالك ؟
عنبر ( شافت فيه ورجعات شافت قدامها ) مكايهمش شنو ݣاليا
الروطال : دار ليك شيحاجة ؟
عنبر ( شافت فيه ) لهلا يحييه حتى يدير ليا ( بلعات ريقها مغرغرين عينيها بدموع ) ميكروب
الروطال ( غوبش مصغر عينيه كيشوف فدموعها لي هبطو ) ودابا لاش كتبكي ؟ واش مزال كتحسي بشيحاجة من جيهتو ؟
عنبر ( بإنفعال خنزرات فيه ) نحس من جيهتو هذاك حتى الإحساس من جيهتو مااات .. مكنبكيش عليه هو هو مايستاهل حتى دفلة من فمي تلاح عليه .. كنبكي على راسي أفاروق كنبكي على راسي انا وعلى الشمتة ..
الروطال ( قرب منها ) شنو ݣالك ؟
عنبر ( تقابلات معاه ) قالك بلي غير حيت مقلقة منو ضرت فيه .. وبلي مو وباه هوما لي دارو ديك اللعبة باش يفرقونا وبلي ولدو مابغاهش يبعد عليه وعݣوبتي نرجع ليه انا او ولدي
الروطال ( بملامح خالية من اي شعور ) وباش جاوبتيه انتي ؟
عنبر : بردت فيه سمي واخا نشوفو كيموت ݣدامي عمرو يكون ليا راجل ( مسحات دموعها )
الروطال : ويلا كان هكا لاش هاد البكى بغيت انفهم ؟
عنبر : كنبكي على راسي ( بإنفعال ) راه ݣلت ليك على راسي سمحت فقرايتي لي كنت كنبغي .. كون ماتبعتوش كنت غانكون محامية ولا علم الله كيفاش كنت غانكون صبرت على شي حوايج مايصبروش عليهم الناس افاروق .. كنبكي على راسي انا على الشمتة لي حسيت بيها ( ساحو دموعها ) راه مكنبكيش عليه هو حتى فاش وقف قدامي جاتني الرضة ، كنت هبيلة وخاصني العقل لي تبع واحد زبالة بحال هداك .. ستغلني افاروق ( كتبكي ) ستغل حيت ماعندي عائلة ماعندي حد لي كان يوݣف معايا فداك الوقت ..
الروطال ( جرها معنقها ) صافي شششش براكة ..
عنبر ( حاطة راسها على صدرو كتبكي ) راه لي داز عليا ماشي ساهل صابر مع واحد فالاخر تلقايه دايرك ضحكة وضاحك عليك .. ضيعتي 5 سنين من حياتي كنتي ديري فيها العجب الى بكيت نبكي غير على راسي شي حد خور لا ..
الروطال ( خاشيها فيه كيسكتها بعدها عليه كيشوف فعينيها ) ماوقع والو دابا ، حسبي راسك كنتي ناغسة ديك 5 سنين وعاد فقتي تاديك القرايا لي ماكملتيش نرجعوك ليها مالها غاتغلبنا ..
عنبر ( كتمسح عينيها) أشمن 5 سنين طالعة ف 6 باش خليت لافاك ونرجع نقرا كضحك عليا
الروطال : مريضة انتي لا ، الناس ولاو فعمرهم 60/70 عام ومزال كيقراو مدام عندك العقل لي تخمي وتفكري بيه حتى حاجة مادازت ومتعطلات ، شوفيها من واحد الجيهة ديال ربي عطاك اختبار باش يشوفك واش غاتحمديه عليه ولالا .. والعوض غايكون فالأخر ..
عنبر ( كتشوفيه ) الحمد لله
الروطال : شتي أي حاجة كتوقع لينا فهاد الدنيا من الخير شوفيني أنا .. دوك الكيادر كونما حفرو ليا ودخلوني لحبس ، كنت غانكون مزال فالمارشي فداك المحال نݣد نكونزدت واحد المحال خور ولا جوج .. ولكن كونما دخلت لحبس وخرجت وهزيت راسي لرباط وتعرف على بات راشد وعليه هو وليت نعرف ونفهم فالخيل والبهايم ماكنتش غانوصل لهادشي لي أنا فيه دروك فهمتي البلان ..
عنبر ( مركزة مع هضرتو ) بصح عندك الصح الحمد لله أي حاجة من الخير
الروطال : متبقايش تفكري فهاد فريع الراس وتخربيق نسايه فكري للݣودام فهمتي ؟ ( هزهزات راسها بالإيجاب ..قرب راسها من شفايفو بايسها فجبهتها )
عنبر ( خسرات سيفتها مبعدة عليه ) داير سوڤاج أفاروق ؟
الروطال ( بإستغراب) علاش ؟
عنبر : خايبة كتقهر وقاصحة
الروطال : من نيتك أشريفة ، واش فخبارك هاد الريحة شكادير فالعيالات ولا ؟
عنبر ( طلعاتو ونزلاتو ) فالعيالات اما انا مكنحملهاش .. فاش تكون معايا مديرهاش نهار يكونو دوك العيالات وديرها ..
الروطال ( كيشوفيها ) كون غاكنا دايرين شي لعبة نݣولو راه حاملة انديو التهمة اباطل
عنبر : باسل ( عطاتو بظهر طالعة لطوموبيل )
الروطال : مابقات بياتة فداركم
عنبر : لالا حشومة غادي يشكو أصلا صافي انمشي انتعشا وغادي نعس باش نفيقو شوية بكري ( بقا كيشوفيها ) وصافي الله يرضي عليك ..
الروطال : بلان تيليفون لي خليتيه فداركم غاندويو عليه من بعد اعنبر الهضرة ماشي دابا ( ديمارا ورجع بيها لدار ) ..
رجعها لدار طلعات ، تعشاو مجموعين كيتعاودو على لي وقع حتى دخلات عنبر للبيتها معاها حياة عاودات ليها كاع لي وقع ..
حياة : ولد لحرام مزال عندو الوجه لي جاي يوقف قدامك
عنبر : برد ليا فيه الغدايد شرشمو عرفتي كونما الناس لي فرقوهم كان غايسيفطو لروضة ..
حياة : عبر عليه اماشتوش كون شتفت ليه على ريتو ..
عنبر : ضرني راسي ياختي وحق الله العظيم ، أجي قلتي لليالي على وديت الخدمة ؟
حياة : اه قلتها ليها غير هو ماقلتش ليها بلي المحال داخل فيه شريك حتى الخليجي ديال صاحبهم
عنبر : وعلاش ؟
حياة : ماعندهاش معاه ، قاتليك كان طلب ليها النمرة فالعرس ديال ياسمين عارفة الشوفة لي كيديو عليهم زهوانيين ..
عنبر : مدامو عارفها من طرف ديالنا ، مغايبغيش يخسر بينو وبين فاروق اتحيد داكشي من راسها ماتبقاش تفكر فيه ..
حياة : داكشي لي قلت ليها المهم خليها حتى ترصى فخدمتها وديك الساعات تسيق الخبار ( وقفات ) انا نمشي نعس عييت أختي اليوم ضرني راسي ..
عنبر : حتى انا نيت فيا النعاس .. خرجات حياة من عندها ، طفات الضو يلاه بغات تنعس بدا تيليفونها كيسوني كان هو ) ألو ..
الروطال : نعستي ؟
عنبر : عاد ناوية .. معاش غاتجي غدا تدينا ؟
الروطال : العشرة نلقاكم واجدين .. غايجي معايا طريق باش يدي النص
عنبر : صافي مزيان شحال ندوزو تما بعدا ؟
الروطال : مغانتعطلوش واحد يوماين هكاك عندي الخدمة .. وجايين عندي شي ناس
عنبر : شكون هاد الناس ؟
الروطال : من إيمتا وليتي فضولية ؟
عنبر : عارفني فشي حوايج فضولية قولي شكون هاد الناس ؟
الروطال : واحد السيدة عندي معاها شي خدمة
عنبر : واش عبلة ؟
الروطال ( هز حواجبو بإستغراب ) وانتي منين عرفتي عبلة ؟
عنبر ( حطات يدها على فمها ) وغير داك نهار كنا فطوموبيل وكانت قالت ليك المساعدة بلي غاتجي .. ولكن مابقاتش جات قلت تكون هي
الروطال ( تبسم ) وماعندي مانسالك طالقة سطولاتك معايا ..
عنبر : وراه غير قلت وصافي .. المهم انعس دابا حتى لغدا ( قطعات عليه فوجهو خلاتو كيتبسم ) ..
- الغدا فاقو بكري وجدو راسهم للسفر وصلات العشرة سونا ليها .. نزلو لتحت كانت طوموبيل ديالو واقفة او وراها واقفة طوموبيلت طارق ، كانت كالسة حداه سعاد نزلات سلمات عليهم ركبو النص مع طارق والباقي مع الروطال عاد شدو الطريق ..
- قاد المرايا مقابل معاها .. كانت هازة التيليفون ديالها كدخل واحد الروشارج
الروطال : نرجعو وندير ليك ابونمو بلاما تبقاي تشارجي فكل خطرة
عنبر ( هزات فيه راسها ) فخبارك رشيد غايتزوج ؟
الروطال : شكون ݣالها ليك انتي ؟
عنبر ( خافت يقمعها ) سونا للحياة وكنت معاها غير غايرجع من عند هل العروس ايديرو العقد هنا ايدير عشا وغايعرض علينا
الروطال : انتي باغية تمشي ؟
عنبر : ضروري نمشيو كاملين افاروق حشومة .. واصلا رشيد منساش الوقفة لي وقف معايا
الروطال ( هزهز راسو وبقى مركز مع الطريق حتى سونا ليه عماد ) ألو .. لݣيتينا شادين الطريق أنا شديتي الطريق ولا مزال ؟ .. وايلي على غدا اصاحبي وغدا العيد أو ونهار دالعيد مايعطيوهش لك تجي فصباح وترجع بليل او .. واش داكشي علاياش دوينا لبارح وصافي سير دابا حتى نتقاشعو بسلامة ( قطع ) ..
سعاد : واش حتى لغدا عاد غايشد الطريق ؟
الروطال ( حك حاجبو ) فصباح ويرجع بليل خدمة ديال زبل ..
سعاد : والمخزن اولدي هو هذا ماعندو مايدير ..
- الطرب الاندلسي خدام فقناة الأولى مجهد ليه الصوت .. جوج طبالي كانو عامرين وحدة فيها طبسيل كبير ديال الشعرية مع الزبدة لي دابت فيها بسخونيتها .. الطبلة لوخرا فيها طباسل ديال الحلوة ديال الدار صينية ديال اتاي وعاد ديال القهوة .. طبسيل فيه الملوي والمسمن او واحد فيه بغرير العسل وزبدة وزيت البلدية فطويسات ديالها ..
- فجميع المدن المغربية كيدوز العيد على انغام الطرب الأندلسي أجواء العيد شي كيجي عند شي وشي كيبارك لشي .و وتيليفون مكايسكتش من ليزاپيل أجواء العائلة وهوما مجموعين وفرحانين مع بعضياتهم ..
دنيا : با عطيتيها هي وانا لا حشومة ݣاع ( قلبات وجها بلعاني )
عنبر ( دايرة رجل على رجل لابسة جلابة فالقهوي بالقفطان ديالها مطروز شادة 1000 درهم فيدها كضحك ) ناري على مغيارة
علال : الصبر ابنتي الصبر كطيري ، كل وحدة فيكم غتاخود تضويرتها وحقها
دنيا ( عنقاتو بحب ) أكنضحك معاك أبا بحالي بحال عنبر مكاينش الفرق
تودة ( بهمس ) مسكين شوف اش داير عليها وهادشي مزال ماعرفها حفيدتو
سعاد : إيييه عمي علال والله مامنو جوج .. دابا تشوفي اش يدير عليها وعليك نهار يعرف ، يا والله لا خرجتي تي وعبد الخالق من هنا حتى يكون ضرب عليكم الكاغيط
تودة ( ميقات فيها ) داكشي لي خاصني كولشي قامو خليفة بقا ليا ازواج حتى هو .. تزوجتي اخويتي تي نيت ها ادريس طلق ..
سعاد : علاش ماعرضش عليا زواج وضرت فيه
تودة : وانا باغية تلبقيني لعبد الخالق باز لك .. كملوها بضحك واللعب حتى دخل عصام شاد عمران .. لي طلق منو ومشا كيجري عند علال
علال : اهلا اهلا بولدي ( هزو )
عمران : توحشتك ابا جدي
علال : ويتوحشك الخير وربح أولدي ( مشا عنق رقية وداز عندهم كاملين سلم عليهم ورجع عند جدو ݣلس عندو ) ..
- رقية : واش سونيتو لخوكم هادشي كامل طريق !!
عماد ( جاي من الباب ) هاهو امي ( سلم عليهم مبارك ليهم العواشر ݣلس كيفطر كان جيعان ، سوناو على يسرى وياسمين لي كانو مدوزين العيد مع عائلة رجالهم ..
- على برا واقفين مع عماد كيدويو ..
عماد : اصاحبي اصاحبي واش هادشي علاش تافقنا واش تا مريض ( بعصبية ) لاش ضاربو ابنادم لاش ؟
الروطال ( ببرود ) ياك اشريف نشوفو حاط يدو على مرتي نجي نصفق ليك ، تامالك مريض يحمد ربي لي معاودت لجدو طهارة
عماد : عرفتي اجمي شحال وانا كنتسناه يخرج من الغار ويبان ، جيتي انت جندختيه
عنبر : كونما جندخو هو كنت انا لي انجندخو نهز اشي حجرة نزل بيها على راسو نفرݣعو ليه ولا نخسر ليه كمارتو
الروطال ( دور لسانو وسط فمو مستمتع ) فولة وتقسمات على جوج
عماد ( شد فجنابو ) تبارك الله هادو غير لي وسيط زعمة داوي معاهم قبل وتفاهمنا
عنبر : انا لي قلتي ليا درتو بالحرف ستافويتو كيف وصيتيني وكثر .. خليتو غايحماق ولكن فاش جا يشد فيا ماعقلت حتى شنقت عليه جا فاروق مرمدو عبر عليه انا ماكرهت كون كمل عليه ..
عماد ( كيشوفيهم بزوج ببرود ) أياه ودخلي انتي وهو لحبس مزيانة ؟
عنبر : الواحد كيموت على ولادو وبلادو .. مديرش ماتخافش والهاجم يموت شرع وهو لي هجم علينا عادي واحد هاجم على مرات راجل شنو بغيتي راجلها يجي يضرب رش ويعلق ليه ..
عماد : لا حول ولا قوة إلا بالله العلي العظيم تلاݣيتو برب العالي خاصكم طبيب بجوج ..
عنبر : ياك لي عليه العمدة درتو .. قلتيلي بلي هاد النوع خاصك تبيني ليه بلي مامسوقاش وعايشة حياتك بلا بيه ، وبلي هاد نوع كلما بينتي ليه بلي انت بيخير وفراقو ما أثرش فيك كيبقا تابعك واخا يطير ولا ينزل غايبغيك تولي ليه يدير لي يدير تكوني ليه ياك هادشي لي قلتي ليا ؟
عماد : أياااه ولكن ضرب لا
الروطال : يعاود يديرها انجندخ طواسلو من لاخر .. طير ولا تنزل تبدا تفتي عليا داك الباكور ديالك انسى برب لا تفاكيت معاه وفينما لݣيتو غانسلخو ويجي باه نسلخو ونسلخ تريكتو كاملة ..
عماد ( دار راسو ماسمعوش شاف فعنبر ) ديري فبالك غاترجعي تشوفيه غايولي يخرج فيما كنتي .. هنا بغيتك تلعبي لعبتك لي درنا فهمتي .. ديري عقلك أعنبر الله يرضي عليك قطعنا بزاف بقا لينا غير شوية .. خاصني اشي خويط صغير يكون فيدنا والباقي غايكون ساهل غاديين مزيان دابا مابغيتش شي حاجة لي تخصرنا فهمتي البلان ( قاطعهم تيليفون ديالو جبدو من جيب ) وي يوسف ... ( غوبش ) وايلي اهاه ( تبسم ) الرضا تبعوه انا ( شاف فساعة ) انخرج بكري ديك 10 نكون تم صافي .. بلااااان صافي ( قطع ) ..
أحب تلك العلاقة المريحة التي لايتحدث عنها كثيراً طرفاها ، لايقرران شكلها ومحتواها ، فهي رائعة بما يكفي وكيفما تجري ، هما فقط مشغولان بعيشها والاستمتاع بكل مافيها ..
وكأنها رقصة شاعرية يتناغمان فيها ، يستند كل طرف على الآخر في لحظة وينفصلان في أخرى بحسب ما تجري به النغمة ..
فوحدة من الأحياء الشعبية واقفة طوموبيل فالكحل زاج فيمي .. عماد من الجهة لي فيها الشيفور ويوسف من الجهة لوخرا ..
عماد ( شاف فيوسف ) واش ميقن أصاحبي بلي دخل لخربتهم من صباح وحنا عاسين حد ماخرج
يوسف : هاد الوقيتة كيخرج من دارهم شوية دصبر أصاحبي أو ( بإنفعال ) هاهو هاهو ..
عماد ( شاف فيوسف ) يوسف هاد البلان يخرج انا وياك عمرنا نحلمو نضربو ضربة فهاد الخدمة ..
يوسف : ودابا اعفط لا يمشي ..
فتح عماد الباب بقا قاني عليه حتى بان ليه قرب للطوموبيل ، ستغل الفرصة ديال الدنيا خاوية ومكاين حتى واحد وليل .. خرج من طوموبيل شانق على شاب فثلاثينات من عمرو سد ليه فمو مركبو فطوموبيل اللور يوسف نزل وطلع حداها داير ليه المينوط .. طلع عماد القدام وديمارا ..
~~~~~~
- فواحد الݣاراج من الݣاراج فوسط بلاصة مهجورة .. محطوط كرسي كالس عليه نفس الشخص لي شدوه رابطين ليه بديه ورجليه .. كيشوفيهم بترجي باغيهم يطلقوهم ..
عماد ( مقابل معاه غادي جاي داير يديه ورا ظهرو ) دابا والو زعمة ماباغيش تݣر هءا هو جوابك ؟
.... : والله مادرت شيحاجة قسما بالله مادرت شيحاجة انا مافهمتش علاش رابطيني شنو درت ؟
يوسف : سولناك فشهر 7 شنو كنتي كديري ف عين السبع ؟ فسيدي عثمان فالحي المحمدي والحي الحسني .. وسباتة سيدي مومن درب السلطان ودرب الكبير هاد الاحياء كاملين كنتي كتعصر عليهم وكتعصر على ماليهم ..
.... : عادي ( بلع ريقو ) واش ممنوع ندور فمدينتي مافهمتش ؟
عماد : سبحان الله أشريف كل مرة عاصر فدرب عاصر على ماليه وكتسول على ديور لي ماليهم عندهم البنات ( شنق عليه ) تا واش يحاسبليك حنا واكلين مخ الضبع
.... ( كيشوفيهم بخوف ) واش انتوما البوليس ؟
يوسف ( تبسم ) واش بان لك انت ( غمزو )
.... ( عاد حس بالخوف ديال بصح ) والله أشاف أنا مادرت شيحاجة بالله العظيم
عماد ( تقابل معاه حاط يديه على جناب الكرسي ) واش فخبارك امعلم بلي كاع الديور لي سولتي على بناتهم .. دوك البنات طارو ماسماو وبالعربية ماتو لا نسيت بغيت نݣول تق**تلو وأنت لي غاتمشي فرجلين ..
.... : علاش انا مالي أش درت ؟
يوسف : انت لي كنتي فديك الحومة وانت لي كنتي عاصر ومالين الحوانت شاهدين .. يعطيو الشهادة فيك برب العالي لا طلعتي منها بلقليلة المؤبد وشوف تشوف الى ماحكمو عليك بالإع*دام
.... : والله القسم مادرت حاجة ( الخوف بان على عينيه حابس البكية ) والله ما أنا ..
يوسف : وشكون ؟
.... : انا غير تسخرت أشاف ، سيفطوني نجيب الخبار عطاوني فلوس شديتهم وجبت ليهم الخبار ولادريسات ..
فصالون لابسة بيجامة دافية الفوقي قصير شوية عازلها والسروال كان مبين فورمتها طالقة شعرها على طولتو شاداه بقراصة سلسلة ديال الذهب لي هداتها رقية نازلة من عنقها .. حاطين بلاطو فيه الديسير وكيتفرجو ..
سعاد : ايمتا عندو الليلة ؟
عنبر ( كتنقب فزريعة البيضة ) نهار الجمعة غادي يديرو العقد فصباح والعشية عندهم العشا وطلبة .. داك نهار قلتها لفاروق شفتو بحال الى ماعجبوش الحال ..
سعاد ( دايرة نظاظرها ديال الشوف عاكفة راسها كتقطع فالبوعويد ) هذاك اهبيل ايجي نتفاهم معاك نمشيو علاش منمشيو بغينا انفوجو نيت ..
عنبر : وسيد بحال خويا وفمقام خويا .. راه هو وعزيز لي وقفو معايا نهار حطيت رجلي هنا ، ونهار عرسي جا معانا نجي دابا ونقلب عليه لا
الروطال : شكون هذا ؟ ( هبط من الفوق بلا ما يدير الحس طلعها ونزلها من المنظر ديالها قلب عينيه محاول يتفادا الشوفة فيها )
سعاد : رشيد داك الولد مسكين الله يعمر ليه الدار عدو ضريب الصداق نهار الجمعة غانمشيو نباركو ليه ..
الروطال : سيري انتي وياها نعطيكم تديو الكادو انا مافياش ( ݣلس حدا سعاد حاط راسو على فخاضها متكي )
عنبر : فاروق ماتبقاش دير بحال هكا .. هو فعرسنا جا وحضر حتى حنا انحضرو كاملين ونكبرو بيه .. مسكين ماعندوش والديه عندو خو واحد راه فالخطبة دا غير عزيز ..
سعاد ( نغزاتو ) تا مال حسك ، كتصنع ليا تما الصوارخ نباركو ليه ونكبرو بيه ويلي حشومة ماشي عوايدك
الروطال ( كمش عينيه ) صافي صافي
سعاد : السيمانة الجايا عمي علال هو وخالتي رقية غايهبطو لهنا لعند عبد الخالق ، غانمشي لعندهم نݣد نݣلس شي يامات
عنبر ( بفرحة ) نمشي معاك حتى انا نفوج شوية
الروطال ( شافيها بنص عين ) ماعندك فين تمشي ، اتبقاي نابتة فبلاصتك ..
سعاد : تا خلي البنت تفوج
الروطال : تفوج مالها غادية لبين الويدان .. بغات تمشي تشوفهم نديها ماعنديش ݣرام دالمشكل البياتة لا ..
عنبر ( كتغنزر فيه ) الكوينيدي لاخور ( قلبات عينيها)
سعاد : هدا على البنت اويلي ستغفرت الله العظيم ( سكتات ورجعات دوات ) مامشيتيش شفتي خديجة ؟
الروطال ( غمض عينيها مباغيش يدوي فداك الموضوع من ورا ماطرا ورا العيد ) غاݣلبي على هاد الهضرة الله يحفظك مراشقاش ليا عليها .. ماصي ماصي ..
سعاد حطات يدها وسط شعرو كتلعب فيه وهو حاط يد على كرشو ويد على جبهتو مرخي .. رجع بتفكيرو فاش مشا باغي يشوفها ..
فـــلاش_بــــاك
خديجة ( فتحات الباب هزات فيه عينيها مغوبشة ) لاش جاي ؟ يلاه طلقاتك الخانزة ديال مراتك ؟
الروطال ( كيحاول يكالمي راسو ومايغلطش فيها ) جاي نشوفك مجايش ندوي على مرتي خليها فتيقار الواليدة ..
خديجة ( ضحكات ) نخليها فتيقار ، ديك اللفعة الزلمومية لي قلباتك عليا مزال حسابها معايا على تقيل .. لا يحسابليها قطعات الواد ونشفو رجليها
الروطال : مكتعيايش ( مطول فيها الشوفة ) واش مكتهديش والو زعمة ، مكتݣلسيش مع راسك وتراجعيه وتشوفي راسك وصلتي لحدك خسرتي راجلك خسرتي ولادك
خديجة ( ݣلسات على سداري لابسة تيشورت وسروال كالصو صندالة دصبع مع صباغة فرجليها ويديها كحلة ) الى كانو غير بحال خوتك الله يݣطعهم ماعدي ماندير بيهم .. لي فضلو باهم عليا الولاد هوما لي يوݣفو مع مهم لي كتبغي ليهم الخيروباغية تشوفهم الفوق
الروطال ( ݣلس مقابل معاها ) دايرة هاد الحالة على وديت حتى واحد فيهم ماتبعك فريك .. باغية تمشيهم كي بغيتي هادوك راه ولادك ماشي بوكيمونات .. نݣولو أنا ماشي من دمك ولحمك لي عيشتيني نجغمو بجغيمة دالما ونبرد بيه الحر وهوما ..
خديجة : نكار الخير ، سبحان الله العظيم كنت نݣولها لباك كنت نݣوليه موحال واش هداك ولدك ؟ ( صغر عينيه بإستفهام ) واش مزال باك مخبي عليك كيفاش حتى تزوج مك ؟
الروطال ( تعصب ) بديتي تاني كتندميني على زطمة لي كنزطم عندك برب المعبود
خديجة ( ضحكات ) باك كان ميت على خالتك حامق يديها ، ولكن داك الشارف ديال جدك هو لي خرج عليهم زوج باك بزز بمك ݣالوها ليك ولالا .. باش تعرف بلي انا لي كنخاف عليك ديما كنجيك لطريق ونلوحها ليك فالوجه .. فخبارك مك ضحك عليها شي واحد تكرفص عليها داكسي باش تزوجها باك ؟
- الروطال ( وقف ) انا نيت حمار لي سامح فخدمتي وجاي نطل عليك نسول واش خاصاك شيحاجة .. باغية غير فين تبخي سمك ، مكترتاحيش تشوفي بنادم فرحان مرتاح لا بحال سوسة خاصك توسوسي ..
خديجة : كبرتي وليتي تعرف دوي ، كنتي ظل دخل عليا خانز بريحة الحوت نسيتي يامك أنا لي ربيتك المرضي
الروطال : مرضي الحمد لله مرضي با مرضي عائلتي وناسي .. انا لي ربيت راسي براسي أما انتي كنتي عاطياني نص بيت فدار با وكتمني عليا حتى الماكلة مكنتش ناكل بحال الناس حضرة راني واكل غبت راني بايت بجوعي .. بلاما نجبدو الكلاسورات القدام شتي دري الصغير كيعقل على شادة والفادة الضربة بدمها والكلمة بسمها كتبقى تحفر فيك حتى تكبر فخبارك واحد البلان قسما برب المعبود كتبقاي فيا نفرتي منك ولادك وغاتبقاي بين ربعة ديال الحيوط عتقي الى كاين مايتعتق ( عطاها بظهر باغي يخرج ) ..
خديجة ( تابعاه ) وسير سول على اصلك وفصلك يا ولد الأصل بحال والو تكون هاز ديك الكنية غير باطر .. سير سول باك على مك لي سيرتها كانت بين الفام فسوق الأربعاء كونما سترها وتزوج بيها ، لي ولاداتو ديك الكرش شكون غايدي غاشيخة بحال مو .. ( مداهاش فيها نزل مع دروج كيجري مخليها كتغلي وتغوت راسها ) قسما بالله حتى نفرتك لجدكم الشمل غير بلات ..
نــهــايـة الفــلاش بــاك
~~~~~~~~~~
عماد كان مزال مقابل معاه .. حاكمو مركز مع عينيه وقف جر كرسي قابلو معاك وݣلس عليه بشكل عكسي
شكون هادو لي سيفطوك ؟
.... : شاف كنقسم ليك بالله ، الى ݣلت شيحاجة غير نحفر قبري بيدي انا غير سخار انا راه مدرت حتى حاجة أصلا انا ماعرفتذ علاش بغاو هاد لادريسات حتى فاش سولت ضارو فيا
عماد : دابا غير خرج لي عندك .. عاود ليا بضيطاي ، انا نضمن لك حتى ولد المرا مغايقيصك نضبر لجمي فخديمة تبدل المدينة حتى واحد مغايشوفك ولا غايعرف عليك شي خبار
.... ( نزلو دموعو دموع الذل ودموع الحݣرة ) عندي الإجازة وعييت مانقلب على شي خدمة مالقيت .. شي خدمة لي نخدم فيها بقرايتي بيتي عامر بديبلومات وفلاخر كتلقاني كنعاون الخضارة ونعاون من والى أباش مندخلش لدار وانا زيرو درهم .. ونعاون حتى لواليد لي صحتو على قدو ، حتى جاني هاد السيد تعرفت عليه غير فالقهوة كنت كنسيري لدوك الرجال لي باينة فيها ملعقين السبابط .. ݣاليا واش نبغي نخدم معاه ويتهلا فيا مزيان فاللول ماتيقتوش ولكن منين دور معايا من ديبار فرحت ݣلت رزيق جابو ليا الله ، وصاني نعصر فالحومات لي فيهم الناس على قد الحال ولي عندهم البنات ونعرف ليهم واش البنات مخطوبين قاريين ولالا ، وداكشي لي درت فللول سولت وضار فيا من بعد ݣلت وانا مالي يݣدو بغاوها فشيحاجة ولكن برب الجليل مجاتني لبالي شيحاجة خايبة ..
عماد ( كيشوف فعينيه من ملامح وجهو كان باين فيه بلي كيݣول الصح ومكايكذبش ) عارف سميتو فين كيسكن ؟
.... : لا سميتو كان ݣاليا مهدي ولكن واش سميتو دبصح الله اعلم فين كيسكن معارفش ولكن ، ديما عاصر فواحد القهوة كتكون فالمعاريف هاديك فين كنت انا كنسيري لناس ، وكنت كنشوفو ديما فيها حتى نهار لي دواني فيه ..
عماد : عاقل على وجهو تعرفو ؟
.... : اه عاقل عليه ولكن الله يرحم بيها الوالدين منبانش فصورة ، عندي خواتات اشاف وعندي ميمتي هي كولشي عندي ، راه هو براسو ݣالي هاد الخدمة تسيق خبارها لشي حد ينحيني ..
عماد ( ببرود ) أش سماك الله ؟
.... : محمد
عماد : محمد عطيتك كلمة درجال .. تخدم معايا راجل نكون معاك بات راجل تخدم معايا القوالب أحسن بلاصة فيك يا عكاشة تكون ديالك ..
محمد : قسما برب الكعبة كاع لي عندي ݣلتو ليك .. ندير لي بغيتي اشاف غير منتشدش والله حتى دارنا يمشيو فيها .. وانا مداير لا بيدي لا برجلي ..
عماد ( وقف ) هاحنا غانشوفو ( أشر ليوسف براسو باش يفكو وخرج من الݣراج كيتسناهم ..
~~~~~~~~~~
عنبر ( وقفات ) انشوف داك الديسير واش برد ونجيبو معايا ( شافت فيه متكي ) ولا تجيبو انت نيت ..
الروطال ( حل فيها عينيه ) شناهو بعدا نعرفو راسنا واش غانوقفو على الخاوي ولا على صحيح
عنبر ( شافت فسعاد لي عينيه مع تلفازة عرفاتها مدات مجابت ) بلاطو فيه ديسير منين يوجد نعيط عليك للكوزينة تجي تهزو وتجيبو تحطو فوق الطبلة فهمتي دابا ؟
الروطال ( غمزها ) فهمنا ازينة تبريحة
عنبر ( غادية كتبغم ) الماسخ لاخر ( متبعها بالعين كيفاش كتعوج فالبيجامة تنهد تنهيدة طويلة مغمض عينيه طاتم إحساسو الرجولي ) .. دخلات للكوزينة كتشوف طويسات ديال ديسير واش شدو فراسهم ..
الروطال : الواليدة
سعاد : أ ولدي ؟
الروطال ( هز راسو فيها ) واش بصح الواليدة الله يرحمها تكرفص عليها شي واحد ؟ داكشي باش الواليد تزوج بيها ؟
سعاد ( غوبشات ) شكون ݣالها ليك انت ؟
الروطال : هي البلان صحيح واش أنا ( قاطعاتو )
سعاد : ولد أدريس أولدي ، ماحملات بيك حتى داز عام على زواجها بباك ولي عمر ليك راسها الله ياخود فيه الحق فهاد الليلة ..
الروطال : خوي راسك من هاد تخربيق ماصي ماصي .. فالكوزينة كانت كترش الكاكاو على الديسير دايرة تيليفونها فجيبها حتى سمعاتو سونا .. هزاتو كانت نوتيفيكاسيو من الأنستغرام ديال ميساج دخلات لقات ميساج من نفس الكونط لي كان كيسيفط ليها قرات محتواه خرجات عينيها عاضة على شفتها " moya te roza ) (وردتي) "
- واقفة فالكوزينة بوحدها .. سهام كانت الفوق مع أمير فطرو مجموعين سعاد مشات للدار عبد الخالق ، وروطال خرج يقضي غرض خفيف ويرجع ..
سونا تيليفونها فتحات الخط ودارت مكبر الصوت
حياة : فين ابنتي فين غابرة ؟
عنبر : غير فدار العشية جايا ديك البرنسيسة الإماراتية
حياة : حلفي ( ضحكات ) ناري يا صاحبتي خاصك توجدي راسك بشي لبسة تكون أمپرنيييي
عنبر : علاش زعمة مالها جايا تخطب فيا ( كترجع الماعن لبلاصتهم لابسة كولون لاصق توبو بحال جلد الأفعى لاصق عليها مع تيشورت فالبيض مكرود من الكرش مبين كرشها والخالة لي كطل منو من الظهر كان مشبك ومن جهة العنق كان مبين شوية من صدرها ) تمشي تعاود لراسها حتى انتي كاعما كتهمني ..
حياة : أممم مكاتهمك واخا الالة تيقتك ، أجي كنقلب على الكونط ديالك ديال الأنستغرام مالقيتوش !!
عنبر : حيدتو داك ولد الحرام كيسيفط ليا فيه مابغاش يحشم .. سولت عماد عطيتو المودباص وخليتو هو يتكلف راه حيدو قولي ليا ليالي مشات الخدمة ؟
حياة : أه مشات صباح مع العشرة .. مزال للحد الساعة مافخبارهاش بلي خونا شريك ديال طارق ( ضحكات )
عنبر : وياااه حيتاش مكاينش هنا ماحضرش كاع الإفتتاح هادشي لي سمعت من فاروق وحتى هوما مداروش شي إفتتاح داز داكشي عادي ..
حياة : غدا كاين ضريب الصداق عند راشيد غادي تحضرو ياك ؟
عنبر : ضروري إن شاء الله
حياة : مي صباح شدات الورقة ديال الطلاق الحمد لله غمة وتحيدات على القلب
عنبر : وااا قالتها ليا ماما فاطنة.. كانت دوات معابا علماتني بلي دوات مع السيد مول المحال ونهار الإثنين غادي تكاتب معاه ، غايكون معاها عزيز يوقف معاها ..
حياة : انا نيت دابا ايخصني نخرج من المدرسة وندوز للبيرو ديال طارق .. دار معايا اليوم يوريني شيحاجة فالخدمة وكيفاش كتمشى قاليا حتى نشد راسي فيها وديك ساعات يولي يخليني مني للخدمتي ..
عنبر : ايوا سيري خليني ندير روتيني اليومي
حياة : مجابش ليك شي وحدة تعاونك ؟
عنبر : أحتي مابغيت حد هاد الساعة مخاصناش نغامرو نجيبو شي حد .. السيدة لي كتخمل وتسيق وتݣاد راه كتجي تجمع وتمشي الماعن كاينة الغسالة كاينة العجانة الصابون كتكلف بيه هي وكتمشي بحالها مالفة كتجي من بكري سيدة كبيرة الله يعمر ليها دار وطياب راه حالو ساهل ..
حياة : مزال مادرتي ليه شي بسطيلة ولا شي رفيسة ؟
عنبر : رفيسة درتها راسي .. هاد الساعة مراشقاش ليا على شهيوات حتى لنهر يقولها ليا راسي كل مرة شيحاجة خفيفة حتى ماكلتو هو قليلة وفاش كانت خالتي سعاد مابقيت كاع كنطيب هي مسكينة لي كطيب كيموت على طيابها وطواجنها ..
حياة ( ضحكات ) نهار يدوق بنت يديك دصح اينسى خالتو وطيابها يلاه سيري انا وصلت للمدرسة ( قطعات معاها ودخلات للمدرسة ) ..
- قطعات مع حياة خرجات من الكوزينة جايبة الباف حطاتو قريب ليها فالكوزينة لي كانت حالة سراجمها .. مشهية تشوف الأدهم ولكن مكانتش مسالية باغية تقاد شيحاجة خفيفة للغدا ليها وللسهام حتى الى رجع بكري يتغدا معاهم مارجع تغدا هي وسهام .. فتحات البلوتوث وبرونشات التيليفون مع الباف توجهات نيشان لليوتيوب مشات لبلاصة الروشيرش وكتبات " ولد عايشة " اول اغنية طلقاتها وجهدات الصوت ..
- بدات الموسيقى ( هزات بواطة صغيرة ديال المسكة هزات منها زوج لاحتهم فمها كتحرك فراسها مع الموسيقى ) .. بدات كتوجد والباف مزعزع الدار التحتانية
عنبر ( بصوت عالي كتغني ) مݣواني لا نسكر على غدايدك هذا زهري هذا مكتوبي عطيني حبي نبرد ݣلبي هذا زهري هذا مكتوبي عطيني حبي نبرد ݣلبي .. ولي كنت نهواها وعليها نغير بدلاتني بين ليلة ونهار وينعل بو الوقت الحݣار ..
- وصلات طوموبيلتو نزل من الطوموبيل وقف ، صوت الموسيقى واصل لعندو غوبش طالق ودنيه .. سد الطوموبيل وتم طالع فدروج .. خشا الساروت فالباب ودخل الدار التحت مهزوزة بالموسيقى هز عينو الفوق جاب الله الصوت مكايوصلش للدار الفوق ..
الروطال : هادشي أش كتصنع ؟
- وقفات طوموبيلت دنيا قدام وحدة من البراتمات نزلات هي ومعاها ماجدة .. دخلو للعمارة راكبين فلاسانسور لي طلعهم لطبق الثالث دخلو للعيادة كانو الناس مشات ماجدة ݣلسات ودنيا توجهات للإستقبال سولاتها على الطبيب دوات معاها ورجعات ݣلسات حدا ماجدة ..
ماجدة ( كترعد رجلها ) شداني الخلعة
دنيا : حتى انا نهار الاول وقع ليا بحال هكا متخافي والو كولشي غايكون مزيان ..
ماجدة : واش غادي دخلي معايا ؟
دنيا : لا ادخلي بوحدك مخاصني ندخل معاك تسالي الحصة وغادي يعطيك الرونديڤو الجاي ..
- ماجدة تنهدات تنهيدة طويلة .. كتشوف فدوك الناس لي تم مكانش كيبان عليهم نهائيا بلي مامرتاحينش نفسيا .. تما فهمات كلام دنيا بلي ماشي عيب تزوري طبيب نفساني باش ترتاحي نفسيا فحياتك وتمشي مزيان ..
- جاها ميساج فتيليفونها فتحاتو .. مشات للواتساب كان ميساج من عند عزيز " نسيتي واحد الساشي ديالك فتاكسي والبارح سونيت ليك ومجاوبتيش سيفط ليك ميساج ومجاوبتيش مالك قالبة وجهك ؟ "..
ماجدة : " مقالباش وجهي غير ماكنتش مسالية وتيليفون ماشفتوش الى قديتي عفى خويا دوزو ليا للمحال فالعشية غانكون تم مع العصر الى بغيتي " .. مدة عاد جاوبها " مرحبا ختي " .. قرات ميساجو قلبات عينيها وخشات تيليفونها فساكها .. بقاو مدة حتى وصلات نوبتها عيطات عليها المساعدة .. شافت فدنيا لي شافت فيها شوفة ديال التشجيع تنهدات وتوجها لفين كانت واقف المساعدة دقات وحلات الباب دخلات سادة الباب موراها ..
- ضارت لعند الطبيب لي كان ݣالس فالبيرو ديالو شخص كان فأواسط الثلاثينات نوعا ما كان وسيم او بالأحرى كان جذاب ريحة العطر ديالو كانت طاغية على البيرو ..
.... : مرحبا مدموزيل ماجدة تفضلي ( أشر للكرسي ) ..
ماجدة ( بإبتسامة ) شكرا ( حسدات ساكها وݣلسات بتوتر )
..... : صاڤا كيغادي صباحك ؟
ماجدة ( تنهدات ) الحمد لله مزيان .. كتشوفيه جبد كرة ومدها ليها
.... : خليها فيدك داكوغ ( شداتها عنو رامية عينيها للإسم لي معلق فطبلية ديالو كان سميتو خالد
خالد : ݣولي ليا ماجدة ؟ شحال فعمرك شنو كديري فحياتك ؟ كيكايدوز نهار عندك صحاب كيفاش كتعيشي حياتك ؟
~~~~~~~~~~~
- كالس فالقهوة ساهي حتى حط عليه يدو هز راسو فيه
عزيز : تعطلتي أساط
رشيد : وهي هادي اخويا شنو غاندير جري من هنا ومن لهيه وهادي هي دخلة ديالي من أسفي
عزيز : جات المدام ولا مزال ؟
رشيد ( تبسم جا السرباي عندهم ) شي براد دأتاي امحسن الله يسهل علك ( مشا السرباي ) العشية غاتكون هنا هي ودارهم
عزيز : مزيان أسيدي الله يجعل كولشي مبارك ومسعود
رشيد ( خبط على ظهرو ) العݣوبة ليك أصديقي
عزيز : لا مزال واحد شوية يا اخي .. عندي واحد البلان فراسي على مولانا يصدق دعي معايا
رشيد ( غمزو ) أش تم ؟
عزيز : الݣاراج لي كان داير فيه الواليد النجارة بغيت نعاود نحلو إلى بغا الله .. مسدود غير كيضيع اللهم نستغلو اش بان ليك ؟
رشيد ( برم فمو ) بلاااان ادير فيه النجارة نيت ؟
عزيز ( رشف من كاسو ديال القهوة ) لالا ماعنديش مع داك الصداع ديال الماكن .. وديجا بلان الحساسية اخويا مايصلاحش ليا ..
رشيد : أش فدماغك ؟
عزيز : غادي ندير حانوت ديال المواد الغدائية داكسي يكون نقيقي ويكون ناضي خصوصا الحومة مافيهاش حانوت لي غايخص الناس غايكون فالمحال ونتهنى مع مخي من طاكسي وداك العذاب اخويا طاكسي كتلاݣي مع شي كمامر ديال الشر وعارف دمي كيداير شي نهار نصدق مخلط شي حد اخويا والأفات كتوقع ..
رشيد : بصح اخويا عندك الصح .. وبالي والى كانت شيخاجة انا معاك خوك
عزيز : الا انت تابعك مسؤولية بلاني فراسي إن شاء الله غير نفك الدار ونبالي بيه ..
رشيد : ودوينا اصاحبي ، الزواج ضارب ليه حسابو انت غير ݣوليا شنو خاصك وانا معاك
عزيز ( تبسم ) المهم ندور البلان فراسي ونشوف منين غانبداه .. دابا كندوي مع واحد السيد عندو واحد سوبير مارشي كنشوف معاه كيوريني شي لعيبات وديك ساع يصاوب الله ..
رشيد : ايوا على مولانا . .
- توجه بخطوات هادئة للجهة الكوزينة وقف عند الباب ، تكوانسة فبلاصتو مم المنظر لي كان قدامو .. هازة شعرها للفوق كوتشوڤال شاداه بواحد التوب صغير رقيق ديال الموسلين منمر لطعة بيضة كانت باينة ورا ودنها مهزوزة مع شعرها حاجة طاجين وكتوجد وتغني .. بقا واقف مكواني وهي قدامو مرة تݣرض مرة تشطج وتلوي فالمؤخرة ديالها وهو حاضيها غافلة على عينيه حتى سلات الأغنية ..
عنبر : وكيضحكو ليا على بليتي ماعرفينش بلي كلها طاقة كيوليو فيا عشرة بحال ݣراندايزر ( مسحات يديها فالفوطة لي حداها وهزات تيليفونها كتكب ديسك أخور رجعات حطات التيليفون وبدا الديسك الثاني ) ..
تسمعات الموسيقى مجهدة " حنايا نحوسو ونتوما دوسو يانبغيو الخرجات كل خطرة ويجات .. مزال صغيرة ونقضي بارتو دوموندي .. يبغيوني شابين شاراكم حاسبين تيليفوني يسوني لاخر يكلاكصوني .. "
- حيدات الموس من يديها وبدات كتشطح الشطيح ديال المريولات ناسية راسها .. دور فراسها ويديها تنزل بمؤخرتها وتشطح منساجمة مع الموسيقى وكتردد مع الكليمات ..
الروطال ( حابس الضحكة بزز شوكاتو ) شميكيرة المريولة بلااااان نييييت .. زول التجيكيط لاحها ناصل سبرديلة بقا بسوفيطمو كحلة وسروال دجين كحل مع سمطة كحلة بزيمها كبير ..
دخل عليها كيحرك يديه وراسو بشطحة رجولية .. ضارت على غفلة شافتو داخل كيتمايل مع الأغنية تبسمات .. مكملة على شطيحها شد ليها فيديها كيدور فيها وهي كتشطح بين يديه خالقين السعادة ..
عنبر ( حطات يديها على صدرو كتشطح وتغني ) شكون لي ݣالك راني باغية زواج وها موتو موتو .. يا هادي حياتي نبغي لاليبيرتي مايحكموش فيا هاكةدا راني باغية .. جرها من يدها خابطها مع صدرو كتمايل معاه ملاصقين حاط يدي تانية على كرشها لي كانت عريانة .. كدور تلصق ظهرها مع صدرو وكرشو تهبط بحركات دائرية ورجع لبين يديه كيلعب بيها كيف بغا ..
- كيرجع يبعد منها يضرب ليها الرش مناظرها بعينيه متبع معاها .. وهي مسمتعمة بحال شي واحد كانت غايبة على الوعي ديالها ، طول 4 دقايق ديال الاغنية وهوما غالقينها فالكوزينة .. كيحط يديها عليها فينما جات مكانتش مانعاه بالعكس كان عاجبها الحال غادية مع الهيث دالموسيقى حفيانة وهو حفيانة .. تحط يديها على عنقو وتقرب ليه راسها تلصقو مع راسو وتبعد كتشطح حتى سلات الاغنية .. لقات راسها بين يديه كتلهت يدو فوق كرش وليد لوخرا ورا ظهرها مقربها ليه ..
بلعات ريقها مداركة الموقف لي كانت معاه فيه .. قلبها كيتخبط بين ضلوعها يدو الباردة لي كانت شادة فكرشها بورشاتها وجابت ليها السخفة ..
الروطال ( بالهمس ) مساهلاش الفتيلة هادشي كولشي فيك ( حاك نيفو مع حنكها ) .. جاتها اللقوة لا هي قادة تبعد ولا هي قادة تبقى ، هزات فيه راسها كتشوف فعينيه .. بعد كيشوفيها عينيه كانو كبار عسليين ومعسلين اتكون اكبر عمية الى مشافت اللهفة لي فعينيه .. بحال اي رجل كانت تحركات فيه رجولتو من جيهتها تارتو بالجسد ديالها الغرائز ديالو كلهم فاقو ..
الروطال ( قرب لودنها عضها عضيضة صغيرة حاط نيفو ورا ودنها مستنشق عطرها ) شتك تكوانسيتي قاسك الضو أزين ؟
عنبر ( تداركات الموقف بعدات يديه ورجعات اللور قلبها كيضرب صدرها كيطلع وبنزل ) وغير وغير كنشطحو
الروطال ( مراقب حراكتها تبسم مستمتع بردة الفعل ديالها من قربو ليها نغماتو .. حس برجولتو تأثيرو وقربو ليها بان كانت بحال شي وحدة عمر شي راجل قرب ليها بحال الى اول مرة تكون مع الجنس الخشن وهادشي زاد خلاه يستمتع كثر ) مافيديكيش أزينة تبريحة غانبقاو صايمين معاك
عنبر ( بلعات ريقها عاطياه بظهر كتحاول تركز على طاجين طافية ديك الموسيقى ) رمضان راه داز اشمن صيام واش باغي تصوم الأجر ؟ أنا نيت خاص نصوم نرجع دين لي عليا ..
الروطال : وشوفي غير هاد الدين لي كنتسالك انا بعدا وشوفي دين ديال رمضان
عنبر ( كمشات عينيها عاضة فشفتها كتحس براسها مشي هي ) أشمن دين كتسالني .. واش غاتغدا هنا بعدا ندير بحاسبك ( كتسناه يجاوبها حتى حسات بتقل زدحها مع البوطاجي ملصقها معاه وهو وراها لاصق داتو سخونة ونفسو سخون .. كتحس برجولتو لاصقة عليها تشوكات مخرجة عينيها بصدمة ماعرفاتش دور دفعو خافت دور يدير شيحاجة طلقات الموس من يدها كتشوف حاسة بنفسو على عنقها ناطق بهمس كيبورش ) ..
الروطال ( حاط فمو على ودنها ) هاد الساعة كيبان ليا نغمسك فالعسل ونبدا بيك انتي عاد نشوفو الغدا .. النفس تشهاتك وحركتي الساكن وناعس ..
عنبر ( تشوكات السخفة شداتها كتحس بيدو على كرشها كيتحسس فيها يدو تخشات تحت تيشورت باغية تسارى وتسيح .. على غفلة منو دفعاتو هاربة ضارت عندو من بعيد ) و و و
الروطال ( تقابل معاها جامع يديه ورجليه كيشوفيها مبسم ) باباغيو اتبقاي تعاوديها بزاف وووو واش أش ..
عنبر : وا واعيقتي اويلي رجوع لله سير سير كب عليك شي سطل دالما راه هبلتي ..
الروطال ( كيطلع ويهبطها هز تفاحة حداح عضها ) هبلت نيت لي مزال كنتراض معاك .. والله يا مك عݣوبتك غاتكون تحت مني لݣيتيني عندي مايدار ، (تم غادي وقف حداها ) هاد الحالة غانخلي مك فركة بلاتي حتى نتوالاك ..
عنبر ( طلعاتو وهبطاتو ضحكات ضحكة رنانة أنثوية ) واخا غاݣلس تماك تحلم بالألوان .. الى وصلني ودنك عضها ( عطاتو بظهر راجعة لطاجين جاتها ضربة للمؤخرة ديالها شدات عليها مقصحة ضايرة عندو مخنزرة ) واش هبلتي انت هاد النهار ولا مالك أش واكل ؟
الروطال ( غمزها ) وراك هازة الموسمة
عنبر : ماتبقاش تقيصني ولا تحاديني ضساريتي انت كاع هاي هاي على البسالة .. رجوع لله وزوينة هادي خرج كاع من كوزينة سير قضي حاجة بينما جاو ضيافك ..
الروطال : فكرتيني فيها نيت نمشي نشوفها واش وصلات ولالا ( غمزها وخرج ) ..
عنبر ( مخنزرة ) تفو على باسل ..
الروطال ( بصوت عالي ) شي نهار غاهندم لجدك داك الدرݣوم على دبك تفو .. قلبات عينيها مكملة توجاد حبسات فاللحظة كتفكرالقرب ديالهم تبسمات بلاما تحس ..
عنبر : لالا أنا غير هاد الݣلسة فدار بلا شغل بلا مشغلة خلاوني نبقى نتخيل شي حوايج مكاينينش خاص نقلب على شيحاجة نديرها نشغل بيها راسي حتى أنا ..
- وجدات الغدا طاب حطاتو .. طلعات لبيتها لبسات عليها بالخف ونزلات هي وسهام الروطال لي نزل باكمل أناقتو بالكلاص فالكحل وشوميز فالابيض فيه عقيدات كحلين ) :
تغداو أنتوما بصحة انا عندي مايدار حتى نرجع .. خرج داير معاها يرجع قبل متجي الضيفة تغدات هي وسهام تغسلو الماعن بخرات الدار وعطراتها .. طلعات لبيتها دخلات دوشات عليها تكات ليها واحد الساعة وناضت باش توجد راسها ، قدات وجها بمكياج خفيف لبسات قفطان خفيف فالبيج دارت عليه كيمونو مفتوح فالبيج ومطروز .. مع الاكسسوارات ديالها وخاتمها دزواج شال راقي ورشات من أحسن عطر عندها ..
- صندالة عالية فرجليها .. سوناو السربايا لي جايبين الماكلة ولي هوما ايكونو مكلفين يحطو العشا .. سونا تيليفونها كان هو ..
عنبر : ألو .. اهاه جاي معاها ( هزات حاجب ونزلات الثاني ) اممم مزيان أه واجدة .. حتى هوما جاو واخا صافي بسلامة ( قطعات ) قبيلات جاي تحك عليا بحال بوجنيبة .. ݣااس عليا عندي مايدار وغانرجع قبل لا تجي السيدة ودابا أنت لي غادي تجيبها وجاي معاها .. مزال طوف بيا وطوف من جيهتي نوريك خيزو ماحلاه الكذاب المنافق ..
يتبع...
التعليقات
لا توجد تعليقات بعد، كن أول من يعلق.