محتوى القصة
- طارق ( قهقه بضحكة رجولية ) :
بحال إلى أنتوما زعمة كتو قصار هي صافي ناويين بحول الله ؟
- أدريس : علاش أنت مناويش تمشي معانا ؟
- طارق ( بنفي ) :
لا الصراحة عدي مايدار أنا جيت اعلى ود داك الفحل الحنصالي يدريسيه ليا فاروق ، نݣد الى ساليت نخلط عليكم
- أدريس : حتى هذا نظر ( كيقلب بعينيه ) فين هو باك ؟
- طارق ( أشر ليه بيدو ) راه هو فين بارك على البرارد ديال اتاي هو وعصام .. طبطب على كتفو وتوجه لعند ولدو وخوه ، وقف عليهم كان ݣالس شخص فطولت أدريس لابس جيلي فالأحمر وسروال دجين داير نظارات ديال الشوف شعرو كيتخللوه شعرات بيضين قلال لحيتو بيضة ولي يشوفو هو وأدريس مايقولش بلي أدريس صغر منو ..
- وخويا كتموت اتاي ظل تسكح فيه
- عبد الخالق ( وقف كيضحك معنقو ) :
البلية صعيبة احبيبي ..
- أدريس ( بجدية شاف فشخص لي وقف باغي يسلم عليه ) :
أنت اجيب حوايجك ورحل لهنا ݣاع شتك دݣيتي الوتد
- ( ضحك بصوت رجولي .. ملامحو كانت هادئة وبريئة إبتسامتو كانت نقبولة بواحد الشكل خطير مكانش شي تشابه بينو وبين ملامح خوتو الحادين ) :
والله مكنسخى الواليد وحتى جدي حالف بحلوفو لا طلقني
- ادريس : وخدمتك ؟
- عصام : ماتخممش كاين لي مݣابلها ، ݣلس أدريس وسط منهم مقابل مع ولدو لي مزال معافر مع داك العود .. حركات العود بقات غادية وكتهدا شوية بشوية نقص من الحدة ديالو حتى بدات خطواتو كتهدن وترجع عادية ..
- دوز عليه بيديه بكل حنان تحنا وباس ليه راسو وبصوت تقيل همس بهدوء :
الرضى هكاك نبغيك .. كاع لي تم عجبهم الحال وفرحانين بحال الى دار إنجاز كبير بدا المجمع كيتفرق اما هو توجه لجهة طارق وقف العود ونقز من فوق غمزو ونطق :
الريپ ديالي عندك ياك ؟
- طارق ( ضحك بصوت عالي ) :
ومكاتفاكش أروطال ؟
- ( تبسم ) : هادشي لي عطا الله أولد العم .. الدم دم والخدمة خدمة أش درنا ؟
- طارق : حسبهم عندك ابا فاروق
- فاروق : دابا عجبتيني ( مد ليه السرج ) نشوفو الواليد لا يكعى علينا( غمزو ) ..
- غادي فإتجاه باه وقف عليه نازل بطولتو باس ليه يدو معنقو :
- على سلامتك الواليد ݣاليا عماد غاتجيب معاك الواليدة ؟
- أدريس : وتا راه لصقات لصقة وحدة ماعدها فين تجي واش حنا غير رجال وهي مرة مجاتش ..
- عصام ( كيضحك) :
تلݣاها كعات كعية وحدة
- أدريس : الله يحس العوان كتحس بالقنطة فاش كتبقى بوحدها ، عصام هاهو نابت هنا عماد كيكون فدار حتى كتلقاه طار لخدمتو فاروق مرة فدار مرة فدارو
- عبد الخالق : هاهو عرس ياسمين تكلف هي والواليدة باش يوجدو ليه إن شاء الله
- أدريس ( كيضحك ) :
فاش كتجمع هي والواليدة فبلاصة وحدة كينوض سكوندار ونيت مزيان تلݣى باش تشغل راسها حتى ماجدة راه قريبة دخل .. قاطعهم حس طوموبيل فالأبيض نوع نيسان حبسات ، عينيهم كلها توجهات ليها كيحققو فطوموبيل لي كانت غريبة عليهم لأول مرة أيشوفوها .. مترقبين لي غادي ينزل منها .. وقف عصام ملامح وجهو تبدلات منين شاف الشخص لي نزل من الطوموبيل .
- نزلات من الطوموبيل بكل أناقة وشياكة ، جلابة فالݣرونة مع القفطان ديالها سباط عالي وساك شعرها مطلوق لونو فالأكاجو ظفارها مصبوغين بنفس لون الجلابة .. مضرقة عينيها بنظرات شمسية نزلات من الباب اللوراني ضارت وحلات الباب نزل دري من ملامح وجهو كان كيبان بلي كيشبه لباه .. تكون عندو ديك 6 سنوات طلق من يدها ومشا كيجري ترما فحضن عصام ، هزو عصام بين يديه معنقو بجهد باسو من وجهو وجبهتو :
لاباس عليك ابابا ؟
- ( بإبتسامة بريئة وطفولية باغي يحيد الكاسكيط لي لابس ) :
صاڤا بابي توحشتك بزاف .. خلطات عليه او وقفات كتشوفيهم ، نطقات ببرود :
سلام عصام لاباس عليك ؟
- عصام ( حط ولدو ) :
الحمد لله ( هزهز ليها براسو ) أش طرا حتى جايا اليوم برجليك ( أشر ليها براسو ) جايا توريني طوموبيلتك جديدة ؟
- ماعنديش علاش نوريها ليك وأنت غارق وسطهم ، جبت ليك عمران يبقى معاك هاد 15 يوم حيت مسافرة أنا وربيع على برا عندو خدمة تم
- عصام : بلاما تعاودي ليا قصة حياتك ، عارفاني غادي للموسم وعارفة بلي كل عام كيخصني نمشي ليك كيفاش بلانك زعمة اهدى ؟
- هدى ( زولات النظاظر ) :
أشمن بلان فالبلانات ؟ ربيع عندو خدمة خاصني نمشي معاه وغانبرك فالاوطيل ، والى بغيت ندي عمران معايا خاصو الباسبور وتسافيرة جاتني على غفلة اما راه نسوني ليك باش تعطيني الموافقة ، ومنقدش نديه لدارنا راك عارف البعد
- عصام : ولدي ݣاد بيه غير مابغيتوش يتعدب معايا وانا غادي للموسم فين هوما حوايجو ؟
- هدى : دابا ينزلهم ليه الشيفور
- عصام ( قهقه بإستهزاء ) :
الشيفور حتى انت ولا عدك شيفور بصحتك وراحتك الالة ..
- هدى : وعلاش لي منديرش الشيفور ربي جزاني على داكشي لي درتي ؟ نسيتي بلي انت لي خنتيني ؟
- عصام ( طبطب على ولدو ) :
سير أولدي عند جدك ( مشا عمران كيجري لعندهم او وقف مقابل معاها مطلعها ومنزلها ببرود ) :
خنتك ومن بعد هادشي دوينا فيه لاش فارعة ليا راسي دابا ؟
هدى ( بإبتسامة باردة حارقاها برودتو ) :
وخويا انت منين مصنوع ؟ واش ماندمتيش والو ؟
عصام ( دور لسانو وسط فمو عاض على باطن حنكو ) الصراحة شوية ( بنوع من الإستهزاء ) كان خاصني نطلقك هو اللول عاد نتبرع كيما بغيت .
- هدى ( بلعات ريقها راضة شعرها اللور بتوتر مابغاتش تطول معاه فالهضرة وتدي وتجيب معاه وتجبدو حيت عارفاه غايجبد ليها العقود الراشية ولي كانت سبب فيهم ولكن ماتسرطاتش ليها يكون مبرد بحال هكا) رض البال لراسك شوية راه عندك ولد وانت غير مݣدم مكاتخافش ؟
- عصام ( هز حجبانو بغرابة ) :
كنت مݣدم à l'époque دابا عندي علاياش نخاف لي هو ولدي مغانتسناكش أنت تجي توصيني .
- تخطاها غادي للجهة طوموبيل ، نزل الشيفور جبد ليه باليزة صغيرة ديال ولدو شدها من عندو وتم راجع متخطيها غادي للجهتهم .. عيطات لولدها جا للعندها
- هدى : مديرش أولدي ليبيتيز لباباك وعمامك وجدودك صافي كون تسنط وانا راه غادي نبقى نسوني ليك عند باباك صافي ؟
- عمران : داكوغ مامي كوني هانية .. باستو وعنقاتو ومشات طلعات للطوموبيل وهو رجع لعند باه .
••••••••••••••••
- تودة : وشنو بان ليك ؟
- يونس ( كيخمم فكلامها ) :
واشغانݣوليك أخالتي والله ماعرفت دوختيني قسما بالله ؟
- تودة : مادوخ ماتدهش انت دورها فدماغك مزيان عدك جوج دالحلول ، ياتبني الأرض واخا تبني اصور ودير بيت وكوزينة ولا داك الكرا ولا تباع الأرض وبفلوسها خود ليك شي بريطما على ݣدك ودير شي بيعة وشرية وتكون حدا مرتك وهادشي لي غايتزاد
- رجاء ( مزال ماستوعباتش كلام تودة ) :
بلات اخالتي على أشمن أرض كدوي عليها با راه عدو 3 الأراضي تبارك الله .. وديك لي كتبليك هي كبيرتهم كيفاش غاتقنعيه يبيع وحدة فيهم ويعطيني فلوسها والله لا بغا ولا بغا راه عاودت ليك لي كاين
- تودة ( دارت رجل على رجل ) :
انا كندوي على هاد الأرض لي كتب ليا هي لي غادة نبيع وهو ماشي شغلو ياك كتبها ليا بسميتي ماعدو حق يݣوليا لا ولا يمنعني
- رجاء ( مازال ماستوعبات ) :
بغيتي تبيعيها وتعطينا فلوسها ؟ ولكن علاش أخالتي راه حقك هداك هو لي كتبو ليك
- تودة ( برزانة ) :
هداك حق ماليه ، حقكم انت أبنتي انا متزوجتش بباك على فلوسو أنا نحية على تزوجت بيه الحمد لله انا قانعة وشابعة قبل حتى منتزوج بيه لي كيهم هو راحة البال ، ديك الارض كتخصك انت وخوك وموك ودابا أنتوما محتاجين ( حدرات رجلها وتقادات فالݣلسة مكملة كلامها )
- راجلك خدمتو على ݣدو خدمة الشوافرية راها صعيبة يدير كروصة يبيع فيها الديسير وحداك ولا كل مرة فقنت اللهم تباع ديك الأرض وفلوسها بغيتو تسكنو فالمدينة شوفو شي دويرة على ݣدكم توما والباقي يدير بيه شي بيعة وشرية وتجمعو بزوج تربيو ديك البنية ولا الوليد لي غايجي إن شاء الله.
- رجاء ( غرغرو عينيها بدموع وقفات وتوجها للعند تودة ݣلسات حداها معنقاها) :
الله يخلي ليك صحيحتك ويطول عمرك ياربي ويريح قلبك ويعطيك مانويتي
- تودة ( تنهدات تنهيدة طويلة كدوز ليها على ظهرها ) :
اللهم آمين أبنتي ويالهبيلة هادشي راه حقك ..
- مجموعين فصالة كلهم ݣالسين وريحة الماكلة عاطية فدار كلها اللمة ديال العائلة كانت مهمة بزاف عند عائلة حيدر الحاج علال ݣالس فالوسط ضايرين بيه ولادو وحفايدو مجموعين على الضحك وتقشاب ݣولها وضحك عليها ..
- أدريس ( بهمس ) :
أش درتي مع المدام ؟
- عبد الخالق ( ببرود) :
ماعندي مندير معاها بغات تحضر لعرس بنتها مرحبا مابغاتش شغلها هداك عيا معاها طارق وتݣول أخويا ديك السيدة واش بغات تهد
- الحاج ( سمع كلامهم او وصلو ) :
وراه حشومة وعيب تخلي بتها نهار فرحها بوحدها تبرد فيها الحر والغدايد
- عبد الخالق : أشمن حر وغدايد الحاج هي لي بغات ( حط كاسو ديال أتاي ) ياك هي لي خلاتهم صغار وطلبات الطلاق ورجعات لدارهم وهزات زنافرها للسما .. مكان حيلتي لتربية ديالهم ولا لخدمتي
- عصام ( هزهز براسو ) :
والصراحة ومتقلقوش مني انا غير على ما كانسمع الروافة شوية صعاب والله وعلم
- الحاج ( شافيه ) :
ماشي هوكاك أوليدي اي قونت فيه الزين وشين ولكن مرت عمك كانت متعنية بزاف بدارهم ماعجباتهاش خدمة عمك حست براسها تقولبات منين ماقبلت بولد خالتها
- عصام ( بإستغراب ) :
ومال خدمة عمي كانت زينة غير أجي وكون مدير الأكاديمية العسكرية الله يهديها حتى دارت دراري عاد بان ليها هادشي ( شاف فطارق ) سمحليا اخويا
- طارق ( كان عاطيها غير لسكات هاد الموضوع مزال كيعاني منو للحد الساعة كبر بلا أم خلاتو صغير هو وخواتاتو ورجعات لدارهم طلقات من باه وعاودات تزوجات بولد خالتها ومشات للألمانيا ) :
مكاين لاش طلب السماحة كتݣول غار لي كاين
- عبد الخالق ( تنهد ) :
ماعجباتهاش السكنة فمكناس ديما نسمع ديك الكاسيطة ديال خواتاتي خوتي ولاد خالاتي ديما نفس الكاسيطة نلقى راحتي فالخدمة ومانلقاهاش فدار
- أدريس : شفنا كولشي بعينينا وداز داكشي ݣدامنا ماشي شيحاجة لي جديدة
- طارق : عييت معاها تحضر لبنتها مابغاتش ( حك على حاجبو ) كاتلك بغات ليها ولد ختها حكيمة لي فهولندا
- عبد الخالق ( شاف فطارق ) :
علاش زعمة حيت نجيب ماشي المقام ديالها حيت كيبيع ويشري هي مكايهمهاش بنتها تكون مرتاحة وفرحانة مع لي بغاتو خاطرها
- طارق ( هزهز بكتافو ) :
لي فجهدي درتو معاها بغات تحضر مرحبا مابغاتش شغاها هداك ( وقف ) أنا جاي
- علال ( هز فيه راسو ) : فين غادي ؟
- طارق : انا نخرج ألهنا ونرجع .. خلاهم ومشا ناض فاروق وتبعو
- أدريس ( تبعو بالعين ) :
طارق مزال مضرور
- عبد الخالق : وهو الكبير راه عاقل على كولشي .. الام لي تمشي وتسمح فكبدتها اش كتسنى منها الله يهديك أخويا انا لي ربيت ولادي ومي مسكينة ، كاتسمح فالواليد وتجي تبرك معايا اودي خليني ساكت
- علال ( تنهد ) :
الله يهدي ماخلق أولدي ، حتى انت كان عليك تزوج تشوف حياتك
- عبد الخالق ( ضحك ) :
أنا عمر داود مابقى يعاود داكشي لي دوزت عليا ونعاودها مالي هبيل .. ربينا الوليدات الحمد لله حتى وصلو برضاة الوالدين وبقدرة الله سبحانه
- عصام ( عنقو من ظهرو ) :
ماعليكش أعمي والله العظيم كنحتارمك شاپو ليك
- عبد الخالق ( كيضحك ) :
وشنو حنا عسكر ولا زمر ..
•••••••••••••••
- شعل ݣارو كيكميه فيه وتفكيرو سارح لبعيد .. سارح لنهار واقف كيشوفيها وهي كتجمع فحوايجها وكيسول فيها " ماما فين غادية " جاوباتو بالحرف " غادية فحالي وانت اتبقى هنا ترض البال لخواتاتك مرة مرة غادي نولي نجي نشوفك " شحال بكا وغوت او والو أخرتها سكت بين احضان باه
- نهار على نهار كان كيتسنى فيها ترجع او والو وفعلا كان حاضن على خواتاتو واخا حتى هو كان محتاج لي يحضن عليه ويطبطب عليه .. باه كان فيه الأم والأب يجي من الخدمة يطيب يراجع معاه إلى مريض يسهر بايت حدا راسو ..
- عاد جداه إيزة لي كانت كتجي تعمر عليهم تخرجهم وتقابلهم .. أما هي لي ولداتهم كان مرة فشحال كتجي فصباح تشوفهم وترجع بحالها حتى نهار علماتهم بلي غاتمشي لبرا مع راجلها ..
- تم ولات كتواصل معاهم غير فتيليفون عاشت حياتها بحال الى مدايرة والو بحال دوك الولاد لي خلات ماشي ولادها غير ذبان اما حتى الحيوان راه كتولفو وصعيب تسمح فيه ..
- حس بيد على كتفو هز راسو ففاروق لي كان واقف حداه .. هز الݣارو سف منو سفة طويلة طالق دخانو لي غطا نظرات عينيه نطق كيشوف بعيد :
انا وباغية تزوجني ݣاتلك ( ضحك بإستهزاء ) حتى لدابا عاد بان ليها الحق علينا وباغية دير فينا شرع يديها فاش خلاتنا ومسات تزوجات وخوات المغرب كتشوفنا أمرة فشحال لا مابناش ليها ..
- فاروق ( حنحن ) :
كاين بعد البشار كيديرها ݣد راسو وعد بالو مغالطش غمزايد فطغيان
- طارق ( شافيه) :.
بحالها هي كتݣولك باك لي غالط حيت الواليد ماقبلش العوين من باها وماقبلش يمشي لبرا ماقبلش المرا تكون حاكماه ( رجع سف من داك الݣارو ولاحو زاطم عليه ) كون الواحد يعتارف بالغلط ديالو لا بنادم دافع جبهة
- فاروق : يديروها الكبار ويحصلو فيها الولاد خاص بنادم ماينوي زواج حتى يشوف شي طبيب يتيستيه واش عدو شي خلل فراسو
- طارق ( جاتو الضحكة )
- فاروق ( كيشوفيه ) :
داوي معاك أصاحبي قسما بالله المعبود غير أجي وتزوج ، ديك ساع تاخود ولد خالها ولا خالتها ولا ماعرت ليه علم الله الپياسة لي بغات تشوفها ليك كيدايرة
- طارق ( خنزر فيه ) :
كتريݣل عليا دابا ولا أش ݣاليك دماغك ؟
- فاروق ( حابس الضحكة ) :
وريفيات أولد العم عرفتي كيدايرات الفن أغمض عينيك وزعم
- طارق ( طلق الضحكة لي كان حابس ) :
لا خويا ماݣاد على حباسات
- فاروق : علاش زواج ولا حبس ؟ تانوض كمل دينك 36 عام راك درتيها
- طارق : تا ريح أشمن أنا دمي سخون تبدا عليا بشي هضرة نصدق مخسر ليها كمارتها نوليو فالحبس خدمتي كولها تضرب فزيرو أخليني هك
- فاروق : أتبقى هك على دوام ؟
- طارق ( طلعو ونزلو ) :
انا غير نساني هاد الساعة نشوفو مع خوك واش مزال مادواش مع الواليد مݣاليه والو ؟
- فاروق ( شاف بعيد ) :
شكون عماد لا مزال مݣالها لحتى واحد الخبار فراسك أنت من نهار دوا معاك على يسرى ماجبد الهضرة لحتى واحد
- طارق : حتى يسرى راه مافخبارها مايتعاود حاولت نجبد ليها لسانها تشوفها زعمة واش كتحس بشيحاجة من جيهتو حدها ݣالت لك عماد ولد عمي عزيز عليا
- فاروق : عرفناه ولد عمها ايوا من بعد ؟ دابا تخايل معايا عماد يعيش حب من طرف واحد ماتبغيهاش لعدوك
- طارق ( كيضحك ) :
بحال الى معارفش خوك واخا متكونش هي باغة ايبقى تابعها حتى تبغي بلهلا يطريه ليها .. ونكذب عليك ختي مابغيتش ليها شي واحد من غير عماد براكة ازواجها الأول داز عليها الويل بغيت شي حد يكون ثقة لي يعوضها
- فاروق ( هزهز براسو ) :
وعماد كان باغيها قبل ماتزوج غير الأرزاق وصافي ، ودابا خلي علينا عماد هداك حريرتو بوحدها كنشوفوك أنت دابا شرفتي ومزال مباغي تجمع راسك
ومالك أخويا ماتزوج أنت لي فايتني بعام
- فاروق ( محرك عنقو يمين وشمال مهزهز براسو ) :
شميت بحال رفيسة لا ، يلاه اخويا جاني جوع ومزال تابعانا الطريق .. دار يديه فجياب السروال دسورڤيت لي لابس وعطاه بظهر داخل
- طارق ( من وراه ) :
القضية منين كيولي فيها انت كضربها بسلتة ولايني بانضي مع راسك ( تبعو من اللور ) .. تحطات القصرية ديال الرفيسة تجمعو عليها كاملين البرود لي كان مكتاسح ملامح طارق مابقات وجات بلاصتو الابتسامة وراحة فاش كيكون مجموع مع عائلتو ..
- كالسين مجموعين على برا كيضرب فيهم الهوى ديال العشية حاطين كاسكروط مجموعين عليه معاهم يونس والمعطي لي كان عقلو غايب مكاينش معاهم ..
- تودة ( موجهة كلامها للمعطي ) :
المعطي بغيت نبيع الأرض ديالي بغيتك تشوفليا شي شاري
- المعطي ( شافيها بإهتمام ) :
تي كيفاش تبيعي الأرض وعلاش غاتبيعيها ؟
- تودة ( بجدية ) :
علاش ماشي من حقي ؟
- المعطي ( تحرج قدامهم مابغاهاش تدوي فهادشي وهوما مجموعين) :
لا من حقك غير هو خليها من بعد الله يرضي علك
- تودة : وعلاش من بعد ( حطات كاسها ديال اتاي ) راك عارف عندي نهار الخميس مشية لمحمدية غانݣلس واحد اليوماين إن شاء الله
- المعطي : ياك عندك انهار ديال العرس ؟
- تودة ( بصرامة ) :
عندي مايدار كونماكانش عدي كاعما نكلس يوماين ، بغيت نطرق هاد المسمار كلت نكولها لك دابا حيت بغيت يونس يشوفليا شاري
- المعطي : وعلاش باغة تبيعيها ؟
- تودة : ايوا طوال الزمان ولا قصار أيجي نهار ونبرك فدار مغانبقاش شيخة على طول الزمان بغيت ندير شي مشيريع لي نݣلس فيه
- المعطي ( عجبو الحال فاش سمع بلي مناوياش تبقى طول حياتها فتاشياخت ) ماݣلتي عيب ديري لي بغيتي الأرض أرضك ( شاف فسميرة ) ولدك ماسوناش ؟
- سميرة : سونا غير هاد الصباح سول فالجميع وصاف
- المعطي ( بتهكم ) :
ماعدوش نمرة باه المسخوط خليه الى طفرو هاوجهي
- تودة : وعلاش لي مايطفروش المعطي ماخدا ليك ورث مابيعك ارض ياك مشا عرا على كتافو درهم ماعطيتيهاش ليه
- المعطي : اودي تي معارفة والو العزيزة ديها فهادو
- تودة ( كتحرك فرجليها وكتحقق فيه ) :
ايوا الله يهدي ماخلق .. ( شافت فيونس ) شوفليا أولدي شي شاري ها عمك يݣولك شحال فيها .. المعطي شافيها وبدا كيعطيه كاع المعلومات على الأرض
- يونس : دابا المشكل هو لي غايشري الأرض ايبغي ياخود حتى دار
- المعطي ( بنفي ) :
لالا الأرض بوحدها كتبدا من داك القنت أما الدار ارضها بوحدها من هاد جيه لتماك
- يونس : ايوا صافي إلى هكا ماعليش
- تودة ( كانت سارحة بخيالها بعيد ماحسات براسها حتى بدات تهلل بصوتها ودندن ) :
ومولاي عبد الله وهي بني مغر ولي شافك كانو شاف جنة بنهار عدو تسع شراجم عدو تسع شراجم .. تلاتة صادين لبحر تلاتة لجرف لصفر تلاتة صادين القبلة ولي هو مولوع اسيادي راه جامع تما ميمتي ميمتي ميمتي ميمتي وطبو القلوب وباه يا با مولاي عبد الله الوالي وراه حنا جينا نزوروك إيـــــه ( شافت فيهم )
- توحشتك الموسم الصراحة تݣال وتوحشت داك الجو ، كانحس براسي فرادية بحال شي طير بلا جنحين
- رجاء ( بشهوة ) :
عمري مشيت فحياتي لي شي موسم تشهيت نمشي ليه وناكل السفنج وناكل شوى شهوتي فيه
- المعطي ( باستهزاء ) :
أش عدك مديري فيه بقا لينا الموسم
- تودة ( ماكرهاتش تمقز عليه تندب ليه حناكو سكتات وشافت فرجاء لي حدرات راسها ) :
والله ابتي ماتبقا فيك صبري عليا نرجع من المحمدية ونمشيو ونݣلسو سيمانة كاملة تم كولي شوا كل نهار حتى تشبعي وتقنعي والله لا بقات فنفسك ولا خليتها .. مالنا شحال انعيشو فيها ( شافت فالمعطي ) بغيتي تديني يامرحبا مابغيتيش يونس يدينا
- يونس ( برحابة صدر ) :
نديكم أخالتي ماعديش ݣرام دالمشكل .. ونيت رجاء تفوج فاش تزوجنا مسافرنا لفين
- المعطي ( بالو أمع مرضو ) :
أسيرو انتوما الله يعرضكم السلامة أنا ماعنديش الوقت شلا مطارق عندي
- تودة ( دارت رجل على رجل ) :
رتاح مع راسك انت نيت ماعدك مع مواسم وماشي من سومك داكشي خليه لينا أحنا نمشيو انا وسميرة ورجاء نفوجو شوية على ݣلوبنا نيت .. ( هزات من كاسها جغمات منو مبسمة عاجبها الحال ) ..
••••••••••••••••
- يد سايݣ بيها ويد مخرجها من الطوموبيل لابس سروال دجين مع تيشورت فالكحل ونظارات شمسية ناقص من الموسيقى لي كانت من نوع العيطة ، شاف فجهة لوخرا لي حداه ݣالس عصام لي كان ساهي ..
- فاروق ( جبد حلوة دفليو لاحها ففمو ونطق بهداوة وعينيه على الطريق ) :
عمران مابقاش يتفاك مع با ( علال)
- عصام ( شافيه ) :
كيحماق على الخيل ، غير شاف داك الصغير لصق لصقة وحدة وݣاع منين لقى ولاد حبيبة داكشي لي بغا ( حبيبة المساعدة )
- فاروق : مو ضاربة حديدة مخيرة
- عصام : جايا تقرا عليا زابورها السيدة تزوجات مابغاتش تسرط ليها بلي خنتها
- فاروق ( كيضحك ) :
مسخوط أنت .. علاش ماݣلتي ليها بلي أكتي طالقها عليها
- عصام : خليها فدار غفلون والله لا سمعاتها من فمي ، حتى نهار يݣولها ليا طانطو دراسي .. على داكشي لي شوفاتني خليها
- فاروق ( كيشوف فالمرايا واش لوخرين مزال تابعينو ) :
المرا راه تقبل كولشي ولكن ضربها بمرا غيرها مكتسرطش ليها
- عصام ( شافيه ) :
حتى انا هادشي علاش طلقتها عليها خليها دوق ياك تزوجات علاش كتقلب على خلا دار عشها .. كنا باغيين با يجي معانا دوماج
- فاروق : الحال سخون غير غايتكرفص أحسن مدار منين بقى ..
- فاروق ( وقف جنب الطريق ) :
جي بلاصتي سوݣ نسيفط ليك عمي وانا نسوݣ بلاصة الواليد نريحوه شوية .. نزل عصام تولى هو السوݣان مخلي فاروق يبدل مع أدريس شد من عندو السوارت نزل عبد الخالق توجه لطوموبيلت فاروق ركب حدا عصام وأدريس تحول لجهة فين كان عبد الخالق مكملين الطريق للجديدة .
- أجواء كانت اول مرة غادي تشهد عليهم فحياتها فالحياة الواقعية ولكن هادشي داز قدامها فالأفلام والمسلسلات لي كانت كتفرج فيهم مرة مرة .. البيت لي ݣالسة فيه ولي غاتبدل فيه كانو عندو سرجم على برا سرجم لي كيخليك تشوف شكون غايدخل للاوطيل وشكون غايخرج منو ، ݣلسات مكايسة على شعرها لي قداتو ليها السيدة لي مكلفة والمكياج بقات ليها غير تكشيطة .. لي غاتخليها حتى تقرب نوبتها على ماسمعات بلي النوبة كانت فشي وحدة أسمها نورة .
- دخلات عليها حياة لي كانت واقفة فالكولوار على برا كتبرݣݣ داخلة مرفوعة كتشالي بيديها ، تلفتات عندها عنبر بان الشك على ملامحها :
مالك ؟
- حياة ( كتهزهز فراسها ) :
لا مامالي والو اويلي ستغفرت الله العظيم تي أش هاد المنكر لي كاين على برا واش شتي البنات لي دخلو ولالا اويلي شتي الكساوي لي لابسات انا يوماين وانا بهاد الجلابة نحيدها ونعاود نخنݣها
- عنبر ( جراتها تقرب ليها كثر ) :
أجي تشوفي هنا البت المباشر نيشان ، قربات حياة كتشوف كتوقف طاكسي حمرة مرة تنزل منها بنت وحدة مرة زوج مرة ثلاثة .. وتقريبا كلهم كانو على نفس الشكل من اللباس كسيوات قصار ولا سروال توب معاهم قويمجات معريين من جهة ليدين وصدر ، مرات كيوقفو طوموبيلات وينزلو منهم رجال .. ولكن الاغلبية ديال الرجال كانو كيبعدو على الانظار دناس وكيدخلو من الباب لي كيتوجه بيهم لريسطو نيشان ..
- حياة ( شافت فعنبر ) :
وشوفيليك ياختي انا هادشي كنت نشوفو أفتلفازة والله العظيم
- عنبر ( بتساؤل ) ؛
دابا هاد البنات شحال تكون عندهم ؟
- حياة : وراه تكون عندهم لاكارط ناسيونال حيت بحال هاد البلايص مايدخلوهمش بلا لاكارط ضروري منها تكون عدهم ديك 18 باينة صغارات ماكباراتش
- عنبر : وكيݣوليك الليل بماليه ودابا مكاتسالي السهرة هنا حتى 12 فكرتيني خاصني ندير وندوز على عينيا وليت نحس بيهم ناشفين ( بدات كضحك)
فاش ݣلت ليك خاصني نصايب لاكارط صباح فاش جيت نحقق لقيت مزال ليها عامين باش تسالي
- حياة : وانا خرجات من بالي بلي مكاتسالي على 10 سنين انا دابا لي خاص نصايبها لي مشات ليا ( تنهدات ) علم الله ميمتي كيدايرة مسكينة مع داك الغول
- عنبر ( قرصاتها من حناكها ) :
دابا نديرو لاباس ونجيبوها عندها هي ودراري إن شاء الله ، أجي ماشتيش شكون ديك خيتي لي غاتغني ؟
- حياة ( وقفات ) :
صبري نبرݣݣ .. مشات كتسلت حلات الباب وخرجات للكولوار الموسيقى كانت واصلة لعندها وكترت الضواو بالألوان وقفات كتشوف بانت ليها وحدة طويلة تكون فأواخر الثلاثينات شعرها طويل كحل مكحلة عينيها بكحل كحل غري وشفايفها معكراهم بالأحمر لابسة كسوة قصيرة فالݣري مع ليبات رقاق كحلين وصباط عالي ..
- رجعات عند عنبر وسدات عليهم الباب :
واحد خيتي ززينة حتى صوتها زوين ولكن كتغني الشرقي كالسة يانا يانا في حبيبي أموت أنا وشي وحدينات تم كيصفقو ، ماكرهتش نشوف لي ݣالسين ونبرݣݣ مزيان اخفت يحصلوني ..
- عنبر : صافي غير ݣلسي ندوزو ليلتنا نمشيو فحالنا عييت فيا أنعاس
- داز شوية دالوقت ومع 10 ونص بضبط دق رشيد وعلمها باش توجد راسها حيت غاتخرج دابا .. هزات ديك التكشيطة لي كان لونها فالأحمر دايرة بحال القفطان ولكن كانت متكونة من زوج قطع لبسات سباط فالكحل عالي وخرجات وراها حياة ..
- وقف رشيد قدام الناس واخد الميكرو ناطق بإبتسامة :
ضيوفنا الغاليين على قلوبنا لي من دواعي سرورنا يدوزو معانا أجمل الأوقات هاد الليلة موجد ليكم مفاجأة من العيار التقيل احسن صدفة لقيتها نجمة فسماها ماعندها منافس صوت جبار جمال خارق مجموع فيها كولشي الصوت وزين كنقدم ليكم عـــنــبــــر
- بداو التصفيقات كولشي منتاظر دخلات والإبتسامة على وجهو يديها باردين بتوتر مد ليها رشيد الميكرو هزهز ليها براسو بمعنى رتاحي .. تنهدات تنهيدة طويلة وشافت فالموسيقيين وبداو اولى نغمات الأغنية لي غاتغني .. نفسها كانت الأغنية لي غنات فالعرس كاع البنات ناضو كيشطحو أما الرجال لي كانو مبهورين بصوتها وبزينها وقفو كيلوحو عليها فالفلوس
- رشيد كان عاجبو الحال وهو كيشوف الإقبال ديال الناس والفلوس لي كانو كيتلاحو عليها .. عكسها هي لي مكانش عاجبها الحال وماكنتش مرتاحة نهائيا بقات على داك الحال كتهلل بصوتها الجبار حتى ضربات 12 دليل وقفات الموسيقى وتمتمات ب " شكرا " ورجعات للبيت لي كتبدل فيه .. دخلات لقات البيت خاوي و حياة مكايناش ، جرات الكرسي ݣلسات وبدات كتزول فالاكسسوارات ديالها ساهية فشريط حياتها ولفين وصلات وفين غاتمشي بيها هاد الطريق حتى كتحس بيدين كيتحسسو كتافها وظهرها لمسات مثيرة ، تهزات من بلاصتها ضارت بالخف وملامح الصدمة باينة على وجها ، بلعات ريقها ونطقات :
أش كاين الالة ياك لاباس ؟ كانت قبالتها بنت فالتلاثينات من عمرها لابسة كسوة سواري فالبيج كتلمع سباط عالي فالكحل .. شعرها مطلوق من خلال الإبتسامة ديالها كيبان لحم سنانها زرق من الݣارو ، بلعات ريقها وطلعاتها ونظراتها كلهم شهوة :
تبارك الله عليك صوتك غزال ، اول مرة تغني هنا ياك ؟ عمري شتك
- عنبر : أه أول مرة علاش ( طلعاتها ونزلاتها مارتاحتش ليها )
- لا والو فنة ماشاء الله ( جبدات كارت من ساكها ) هاكي هادو نوامر ديالها وحدة پيغسونيل او تانية ديال الخدمة ماكرهتش نوليو صحابات ومعارف ، الى بغيتي أي حاجة سوني ليا ( قربات منها بالخف وطبعات بوسة على حنكها) .. خرجات من عندها خلات الخلعة راكباها من ساسها لراسها .. مافهمات وقلبها تروع عليها حسات بشيحاجة ماشي حتى لتم كملات التبدال ومجات فين تسالي تحياد المكياج حتى دخلات عندها حياة
- عنبر ( ضارت عندها ) :
فين كنتي ؟
- حياة : غير فطواليط مالك ؟
- عنبر ( بدات كتعاود ليها ) :
ماعرفتها منين جات ومخلية ليا نمرتها .. قاطعها الدقان حلات حياة وكان رشيد :
تبارك الله عليك خليتي كولشي فرحان ( مد ليها واحد جوا ) هاكي هادو باش تخرجي انت وحياة غدا فصباح تاخدو شي حوايج حياة تسرق ليها الساك المهم دورو بالحالة وصافي والى خصاتك شيحاجة ݣوليها ليا
- عنبر : علاش انتخلص فنهاري ؟
- رشيد ( بإبتسامة ) :
لا هدي غير تنقيطة يعني الفلوس لي كيعطيو الكليان لداك الشخص لي كيغني فهمتي
- عنبر ( هزهزات راسها ) :
اه ݣول الغرامة راني كنفهم ماشي مكلخة اخويا رشيد
- رشيد ( كيضحك ) :
هاديك ، وراه طاكسي على برا كيتسناكم .. جرات ساكها دارت فيه دوك الفلوس وجرات حياة غادية بيها او رشيد وراهم .. خرجو على برا كيبان ليهم طاكسي أحمر واقف حداه شخص لابس تيشورت فالبيض مع سروال كحل ديال دجين وسبرديلة فنفس اللون .. سلسلة طويلة نازلة من عنقو مع اكسسوارات رجالية فيدو عبارة على عقيق حسانة عادية ولحية مقادة خفيفة ملامح رجولية قاصحة .. شافتو عنبر وتبسمات :
خويا عزيز ..
- عزيز ( بإبتسامة ) :
مبروك عليك اختي عنبر الخدمة الجديدة ياك اموركم مزيانة ؟
- عنبر : الحمد لله أخويا والله إلى فرحت اخويا فاش شفتك واش انت لي اتولي تدينا وتجيبنا؟
- عزيز ( بصوت رزين ) :
أياه أنا لي غانديكم ونجيبكم وإلى بغيتو تمشيو لاي بلاصة غير تسوني ليا نجي نديكم ليها
- رشيد ( وقف عليهم مسام على عزيز سلام رجولي ) :
بلاما نوصيك أعزيز ( طلعات عنبر للقدام وحياة اللور مخليينو كيدوي مع رشيد )
- عزيز : بلاما توصيني أصاحبي
- رشيد ( جبد الفلوس من جيبو مدهم للعزيز ) :
هاك وبلاما تݣوليا ديك الهضرة ديال لا من بعد الخدمة خدمة
- عزيز ( بقا واقف كيشوفيه هزهز براسو شد دوك الفلوس دارهم فجيبو ) منݣولش ليك لا يلاه تهلا ( عطاه سلام بيدو وطلع لبلاصتو ) .. ديمارا وشد الطريق
- حياة حلات السرجم مخرجة راسها كتشوف وتبرݣݣ .. وحتى عنبر بدورها دارت نفس شي لي دارتو حياة
- عزيز : كيجاتك الخدمة ؟
- عنبر ( شافت فيه ) :
أش غانقوليك أخويا مزيانة ومامزياناش مزيانة حيت فيها الفلوس ومامزياناش حيت فيها شي مناظر العفو لله
- عزيز ( ضحك ) :
مزال أختي ماشتي والو شتي هاد الأوطيل نواور خاصك تشوفي لوطيلات لوخرين راسك غايسخن عليك اتولي تݣولي واش انا نيت كاين فالمغرب ولا شي بلاد أخور
- حياة خرجات راسها كتحقق فزوج بنات لي كانو واقفات كيتفاصلو مع واحد موقف طوموبيل ، بكسيوات قصارين معريين كثر مامغطيين .. بقات متبعاهم بالعين حتى كان ايعواج راسها .. :
إلى كانو بحال هاد المناظر لي شفنا دابا أبلاش
- عزيز ( شاف فالمرايا فالجهة لي أشرات فيها ) :
هادشي غير شوية من بزاف ، فيكم لي نضرب بيكم واحد دورة شرفية ولا بغيتو تمشيو نيشان للدار
- عنبر : 10 دقايق الى تعطلاناها ماشي مشكيل .، قلب عزيز الطريق وشد الشارع الكبير غادي بيهم عنبر طانو عينيها مع الطريق والمدينة وكيفاش كتبان بالليل واخا كانت كتقرا فكازا ولكن ماعمرها خرجات فنصاصات الليل وعمرها وصلات لهاد البلايص لي غراب بنسبة ليها ..
- أما حياة كانت فعالم ثاني لأول مرة فحياتها تحط رجليها فمدينة كبيرة حدها سطات وبرشيد ولا ولاد صالح حاطة يد على يد ومخرجة راسها كتمنظر والبرد ديال الليل كيلعب بشعرها ، الليل كان عندو عالم خاص وطابع خاص مايقد عليه غير لي عندو الجبهة وماعندوش ݣرام ديال الخوف .. لي مكايهمو والو وماعندو مايخسر ناسو مقسمين لزوج اقسام لي خارجة بيه الخدمة بحال صحاب طاكسيات والمحالات وليريسطو ولا لي عندو الݣارد بليل فسبيطارات ولا لوزينات وغيرو وغيرو..
- وكاينة لي خدمتو غير بليل وكيسميها هي خدمة وبنسبة ليه ماعندو بديل عليها ولي هي خدمة صحابات الليل وصحاب الليل ولي مقسومين على زوج لي كتصيد ولا لي كيصيد وهاد الناس مقسومين حتى هوما على زوج لي كتقصد البلايص الهاي كلاص وكتمشي غير مع لي كلاص ولا لي كتقصد اي واحد المهم هو تجيب مصروفها ولا مصروف دارهم .. لي بنسبة ليها بهادشي لي كدير راه كتصرف على عائلة ولا على ولادها ولا ولا ولا ..
- كاينة لي جربات تخدمها حلال ولكن ماكفاهاش ولا كاينة لي خدماتها حلال ومقالوهاش كاين لي كتقصاح وكتكمل وكتحل ماتقرب للحاجة حرام وكاين لي كضعاف وكيتغمضو ليها العينين .. وعاد كاينة الفئة لي واخداها غير زهو مخاصها والو بخدمتها بطوموبيلتها ولكن مبلية بسهير الليل وزهو ونشاط ..
- تنهدات عنبر تنهيدة طويلة وهي كتشوف بعينيها أشكال وأنواع ديال عباد الله كدورها فراسها وكتفكر فهادشي وفالأخير كتقول مع راسها كل وحدة وظروفها وكل وحدة وشنو خرجها فهاد الليل كيما هي حكمات عليها الظروف تخدم فريسطو بار لي عمرها فحياتها كانت ناوياها وكون كملات قرايتها اتلقاها دابا محامية شوف فين تلات بيها الوقت ..
- تجربة خلاتها عمرها تحكم على شي حد وهي معارفاش شنو داز عليه ولا من شنو داز لأنو اي وحدة من هادو لي كتشوفيهم دابا لي كل وحدة دايزة بلبسة شكل ولا واقفة مع واحد شكل الى جيتي تسوليها غاتعاود ليك هموم مكايتحسبوش ..
- عزيز فاي بلاصة دازو كيسميها ليهم وحدا أي أوطيل دازو حداه كيعطيهم الاسم والبلاصة لي فين كاينين شنو سميتها .. كانو عبارة على أوطيلات كبار معلقين فيهم راسات ديال عدة دول كيوقفو حداها غير طوموبيل دوبل ڤي كاينين بنات لي كيجيو مرافقين دوك الأشخاص فطوموبيلاتهم وكاين لي كتجيبها طاكسي وكاين لي كتجي هي سايݣة الطوموبيل
- عنبر هادشي لي شافت هاد الليلة هي وحياة خلاهم يتݣهمو خلاهم يسولو راسهم ويسولو عزيز :
واش حنا فالمغرب نيت ؟
- عزيز (ضحك ) :
لا حنا ف le maroc
- عنبر ( حسات براسها داخت وتخنقات ) :
صافي أخويا غير دينا للدار انا تݣهمت مابقى عندي فين نزيد مزال .. ضرب الدورة وشد بيهم الطريق للدار وصلهم وقبل ماينزلو عطا للعنبر نمرتو دارت معاه باش يجي عندهم غدا فصباح باش يخرجو يتقداو تمنى ليهم ليلة سعيدة ومشا ..
- تعشاو وتكاو حدا بعضياتهم فوق النموسية من ورا مادواو مع رشيدة مطمنينها بلي راهم بيخير وعلى خير وبلي بداو الخدمة فواحد لوزين ..
- حياة ( ساهية فالأحداث ديال هاد النهار ) :
سبحان الله العظيم شكون ݣال غانعيشو هادشي لي كنعيشو فيه دابا ، انا كنت كازا كنشوفها غير فالأفلام وكنشوف هادشي لي ورا لينا عزيز غير فالمسلسلات عمري شفتو فالواقع
- عنبر ( شافت فيها) :
إيوا كيݣولك هدا هو الليل وهادو هوما ماليه ، داكشي لي كتشوفيه فليل كاعما كتشوفيه بنهار ماشي غير هنا كاع المدن الكبار هوكا ( سهات ) عرفتي انا ماعنديش مشكيل نغني ولكن ماحملتش داك البلان ديال يلوحو عليا الفلوس بحال شي سلعة رخيصة ..
- حياة : حتى أنا مابغيتهاش لك مزال فشي عرس ولا شي سبوع هانية
- عنبر : العراس ولا السبوع هداك هانية راه العائلات كيفرحو بيك وكيعلقو ليك حيت عجبهم الغنا ديالك ماشي كيبقاو يلوحو عليك الفلوس بحال شي سلعة دليلة ماعرفتي واش عجبهم صوتك ولا عجبتيهم انت وبأشمن شوفة كيشوفو فيك
- حياة ( كتخمم ناضت ݣلسات وتقابلات معاها ) :
وشوفي غادي نصبرو واحد سيمانة هكاك انجمعو الغرامة شوفي دابا هاد الليلة شحال عطاك هادو نتكساو بيهم ومن بعد نوليو نجمعو واحد سيمانة هكاك وديك ساعات خرجي نقلبو على الكرا ، وساعات من بعد نشوفو شي وزين ونوصيو حتى عزيز يقلب لينا
- عنبر ( شافت فيها ) :
عزيز صاحبو تخافي غير يمشي يحطنا بوجهنا
- حياة : موحال مبايناش عليه شوفي اكيفاش عتقنا من ديك خيتي
- عنبر ( كتحس بالعيا ) :
إن شاء الله صافي طفي ضو نفيقو شوية بكري غدا باش نمشيو نتقداو .
•••••••••••••••
- من ورا مابدات كتخوى الدنيا فريسطو ، ݣالس فواحد الطبلة حاط قدامو كاس ديال مشروب كحولي وطبسيل فيه لوز والاكاجو وساهي مع الموسيقى لي كانت هادئة ، تجر الكرسي وݣلسات قدامو هز فيها عينيه بإستغراب ونطق بصوت تقيل :
فرح مزال مامشيتيش ؟
- جبدات بكية ديال الݣارو من ساكها خدات منو واحد وحطات البكية فوق الطبلة ، شعلات الݣارو خدات منو نطرة بعينيها الكبار المكحلين البؤبؤ كيبان كحل وسط بياض مخلط بالحمورية ديال المشروب :
منين ضبرتي على ديك الهوتة ؟
- رشيد ( بإستفهام) :
شكون عنبر ؟
- فرح ( هزهزات راسها ) :
پياسة واعرة دويت معاها قبيلات واحد شوية واخا جاتني خوافة وحاضية جنابها
- رشيد ( من تحت سنانو وبتحدير ) :
فرح غادي نسى بلي انت خت مول الشي وغادي نغلط فيك ، داك الوسخ ديالك ديه لبعيد وغادي تقيلي عليك البنت ولا الخبار غادي نوصلها لخوك
- فرح ( ضحكات حتى بانو سنانها لي كان بياضهم غير طبيعي وسط لثة زرقة ) :
هي حاط عليها عينيك الوحش ؟
- رشيد : ماحاط لي عين لا رجل ، البنت ماشي ديال داكشي وغادي تفوتيها وتعطيها تيساع او وسخك مايضورش بساحتها وخليني محتارمك الله يرضي عليك .. وخلي خبارك مستورة
- فرح ( بإستهزاء ) :
هادشي علاش ماعنديش معاكم أنتوما الرجال ، وليتو كثار من العيالات كتهدد فيا أرشيد راه ساهل الى بغيت نقلعك من هنا غير حيت عزيز عليا ( جراتو من حنكو )
- رشيد ( ببرود بعد وجهو منو ) :
وشنو كاتسناي حيديني من هنا ، يحسابليك حسن غادي يخلي ليك المحال هو حافضك وعارفك طابة فالكاشة ماتنفعي ماضري .. انا وصيتك عطي لبنت بتيساع وخلينا مزيانين ( جغم لي بقا فكاسو وناض خلاها بوحدها ) .. تبعاتو بعينيها حتى غبر ونطقات بهمس :
واخا دابا نشوفو ( دورات راسها لجهة واحد السيدة فأواخر الأربعينات دايرة الطبلية وكتجفف ، بصوت مرتافع ) ميلودة .. حطات السيدة ديك المراطة وتمات جايا عندها بصوت باح لي يسمعها يعرف عندها مشكل فالأحبال الصوتية :
نعام الالة فرح
- فرح ( طفات داك الݣارو وهزات ساكها جبدات منو 200 درهم مداتها ليها ) :
هاكي
- ميلودة ( فرحانة ) :
الله يخلف عليك الالة فرح الله يسترها معاك دنيا وأخرة
- فرح : شتي البنت لي جات جديدة لي غنات قبيلات ؟
- ميلودة : أه عنبر اه مالها راها برانية ماشي من هنا
- فرح ( تبسمات ) :
هممم ومنين عرفتي هادشي جري جري داك الكرسي وݣلسي بغيتك ..
[هاتـه المقاطع تـحتـوي عـلـى أحــداث واقـــعــيــة]
- فالمديرية الأمن .. وقدام باب العميد واقف لابس قميجة فالكحل طاوي ليها يديها مع سروال دجين فنفس اللون دق الباب غير سمع الإيجاب وهو يدخل عطا التحية للعميد لي كان فالخمسينات من عمرو وݣلس
- عماد : وي سيادة العميد طلبتيني ؟ فوق من البيرو كانت مكتوبة البضراوي عميد شرطة
- البضراوي : خاصك تشوف واحد التسجيل ( فتح الپيسي ودور الشاشة لجهة عماد ) .. فشاشة كان مطلوق ڤيديو عبارة عن تسجيل شاف فالعميد وسول
- شنو هدا ؟
- البضراوي ( حبس التسجيل وشاف فعماد بجدية ) :
لبارح عناصر الامن فمدينة الداخلة داهمو واحد الريسطو هو ماشي ريسطو بضبط ، حيت مع 12 كيرجع بار وديسكو او وكر للدعارة المشكل هنا ماشي بنات رجال ..
- عماد ( كيحاول يستوعب ) :
بلات اسيادة العميد هههه عفاك سمح ليا مافهمتش كيفاش ؟
- البضراوي ( أشر للفيديو ) :
هدا تسجيل لواحد من الضحايا لي كانو فديك الريسطو ولي كانو شادينو بزز تحت التهديد محيدين ليه البطاقة الوطنية ديالو وراضينو مرة وكيستغلو فيه كيما بغاو .. هاد الولد كاين هنا على برا لبارح جاتني المكالمة بليل أمرتهم باش يرسلوه من الداخلة لهنا فأقرب وقت ممكن .. مع صباح بكري سيفطوه فطيارة ودابا هو كاين على برا
- عماد ( مزال مافهم والو ) :
ولكن باش غادي ينفعنا وكيفاش هادشي مزال كنحاول نستوعب
- البضراوي : غادي يعاونا بزاف ( هز التيليفون ونطق ) جيب ليا السيد .. عدة ثواني تدق الباب ودخل منو حارس الأمن معاه واحد الولد يكون عندو 24 سنة حادر راسو وجهو بيض مدايرش اللحية محسنة لدرجة تقول مكانتش نابتة .. حجبانو مقادين بحال شي بنت خرج الحارس وبقى هو واقف حاني راسو
- البضراوي : زيد اولدي ݣلس .. بخطوات بطيئة ݣلس على الكرسي مقابل مع عماد رجلو كترعد بتوتر وعينيه فالأرض حابس البكية بسنانو
- البضراوي ( بقا كيشوف فيه ) :
وليد ياك ؟
- وليد ( هزهز راسو ) : أه أسيدي ؟
- البضراوي : منين انت اوليد شنو كدير فحياتك عاود ليا
- وليد ( هز فيه راسو ) :
أنا من مراكش خديت الباك وبقيت فدار مكندير والو ؟
- البضراوي : مكدير والو وبانت ليك فهاد الطريق ؟
- وليد ( ساحو دموعو لي كان حابسهم ) :
ماشي انا لي مشيت لهاد الطريق وماشي انا لي ختاريتها نهائيا انا ماشي هكا أنا راه راجل وديما راجل ولكن الظروف كتحكم عليا
- عماد : اش وقع ليك بصبط عاود لينا ، نقدو حنا نعاونوك غير هو ݣول لي كاين الله يرضي عليك
- وليد ( بلع ريقو ) :
حنا عائلة على قد الحال عندي زوج خواتاتي بنات وانا كبر منهم انا عنري عقلت على با حن فيا ولا طبطب عليا مكاين الغوات ونهيض والكلام الخايب عكس مي كانت ديما حنينا مسكينة وتحيد من المصروف ودور معايا حتى خديت الباك ماقديتش نكمل ندير لافاك ولا ندير تكوين بقيت فدار وكنقلب على شي خدمة ولكن والو
- عماد ( كب ليه كاس دالما مدو ليه ) :
هاك شرب وغير بشوية عليك .. خدا من عندو الكاس كيترعد نزل عليه دقة وحدة ورجلو كترعد بوحدها :
واحد نهار دخلت للفيسبوك لقيت واحد الأنڤيت جاتني من عند واحد البنت قبلتها حيت زوينة بقينا كندويو واحد المدة هادشي كانت عندي 18 عام ( شاف فعماد ورجع حدر راسو ) الصراحة وليت كنبغيها كالت ليا بلي عايلتها خانزين فلوس .. ومنين عرفاتني على قد الحال ولات كتسيفط ليا الفلوس
- عماد ( مركز معاه ) :
شحال كانت كتسيفط ليك؟
- وليد : كل مرة وشحال ولكن كانت كتسيفط ليا من 1000 درهم للفوق كانت مبرعاني واخا الواليدة كانت كتسولني منين كيجيوك هاد الفلوس كنت كنغمق عليها وكنݣوليها دراري صحابي ..
- حتى لواحد النهار نسرين هاد البنت لي أنا معاها ݣالت ليا علاش منركبش ونجي لعندها لداخلة ونسكن معاها علاش نبقى مضيع راسي تم وبعاد على بعضياتنا وبلي كتبغيني ومتقدش تبعد عليا
- البضراوي : وعلاش متجيش هي ؟
- وليد ( تنهد وشافيه كيشرح بصباعو ) :
كالت بلي باها لاباس عليه وعندو شي خدمة مع شي حد وديك الخدمة مانجحاتش وهرب باها على برا وهي ممنوع تخرج من الداخلة .. انا تغريت او وافقت وكلتها لدار الواليدة مابغاتش ولكن الواليد جاتوعلى الݣانة حيت كان باغي غير الفلوس .. جمعت حوايجي وسيفطات ليا نسرين 2000 درهم وفعلا ركبت لداخلة وهي لي تلݣات ليا وكانت فرحانة كانت عندها طوموبيل bmw وفعلا كان باين عليها ملعقة فلوس ..
- عماد : كمل
- وليد ( بلع ريقو ) :
كلست معاها سيمانة فشقة ديالها وشقة كانت بعيدة على المدينة وفينما كنكوليها نخرجو كتݣوليا لا منقدوش نخرجو وكانت كتبغي تمشي تقدا بوحدها هادشي جاني فشكل
- عماد : كنتي كدير معاها شيحاجة ؟
- وليد ( هزهز براسو ) :
الصراحة اه وديجا مكانتش بنت وحاجة أخرى كانت كادبة عليا فالعمر فالاول كاتليا بلي كدها كدي ولكن من بعد عرفت بلي عندها شي 26 عام
- عماد : شحال وانت معاها فعلاقة عاد مشيتي عندها ؟
- وليد : عامين وانا وياها كندويو
عماد : كمل
- وليد ( توتر بحال لي تفكرو ضرو فخاطرو ) :
حتى لداك النهار لي غادي نفيق فيه وغادي نلقى 3 درجال واقفين ليا عند راسي
••••••••••••••••
- وقف بيهم الطاكسي فدرب السلطان بلاصة عزيز فواحد القنت ونزل معاهم
- عنبر : خويا عزيز غير غادي نعدبوك معانا والله
- عزيز : دوزي من الهضرة انتوما مامخالطينش تمشيو تجلاو ، حلف لا يتفاك معاهم .. دخلو للجهة مالين الحوايج فكل حانوت كيسولو وياخدو السوم باش يعرفو عندمن يتقداو أخرتها وقفو عندو واحد السيد كانو عندو بيجامات زوينين وبتمن مناسب ..
- خداو 3 البيجامات للوحدة خدات عنبر حوايج خفاف لي غايخصوها والاغلبية ديال الحوايج خداتهم للحياة حيت هي لي كانت مخصوصة بساك لي كان مشا ليها ..
- دازو للحانوت ديال العصري خداو كسيوات وشي سروال ديال الدجين وقويمجات تقداو كاع لي كان خاصهم وقلبوها دوران فزناقي دخلو لپارا خداو ايكغو ديال الشمس ، ومن بعد توجهو عند مول مكياج خداو حويجات خفاف من ديوديورو ريحة شومبوان وبنادوش ..
- كاع لي كان خاصهم تقداوه تقداو شوية دالخضرة ودجاج باش ينصبو غداهم ورجعو طلعو مع عزيز فطاكسي ، ضار بيهم دورة شرفية فالمدينة كيوريهم البلايص جابو دورة فالمدينة القديمة لي كانت عارفاها عنبر واخرتها رجعهم للدار
- عنبر : الله يخلي ليك صحيحتك أخويا عزيز شكرا بزاف
- عزيز : هانية اختي مكاين ݣرام دالمشكل إن شاء الله العشرة تلقاوني عندكم هنا
- عنبر ( هزهزات ليه براسها ) :
إن شاء الله ، اشرو ليه عنبر وحياة بيديهم وطلعو للدار .. حياة كانت فرحانة بالحوايج الجداد الدور دور وتقيس
- عنبر : انا غاندخل ندوش
- حياة : سيري دوشي تي وانا انصب الغدا بينما خرجتي ندخل ندوش حتى أنا
- عنبر : وغير خليه حتى نتعاونو عليه بزوج
- حياة ( دفعاتها ) :
سيري سيري مالي تم اندير دجاج المحمر ، راه دغية نرض الطاجين سيري دوشي باش تسالي ندخل حتى أنا
- عنبر ( كضحك ) :
واخا وماتكتريش فيه الما باش يجي معلك
- حياة : كتوصي فيا حتى دوݣيه ودوي .. دخلات عنبر دوش مخلية حياة دخلات الكوزينة باش ترض الغدا ..
••••••••••••••••••
- وليد : ماعرفتهمش شكون هوما حيت اول مرة غادي نشوفهم فحياتي كالو ليا بلي هوما بوليس خداو من عندي لاكارط ناسيونال ربطو ليا يديا وداوني
- عماد : والبنت ؟
- وليد : نسرين مكانتش فدار ، انا عند بالي واش خوتها ولكن فاش كالو ليا البوليس او واحد فيهم لابس اللبسة كلت يمكن واش البنت وباها داخلين فشيحاجة ولا الله أعلم
- عماد : ومن بعد فين داوك ؟
- داوني لواحد العمارة بعيدة على المدينة ، دخلوني لواحد الشقة وتماك فين غادي نتصدم حيت ديك الشقة كانت كبيرة وعامرة برجال ولكن كانو كلهم منتويين لي لابس لباس العيالات ولي كيصبغ كل واحد وهو .. هادوك لي جابوني مابقيتش شفتهم كانو وحدين اخرين تكلفو بيا شدوني وحسنو ليا وانا مفاهم والو ..
- فاش ݣلست بدا واحد كيسول فيا من دوك لي تم كيفاش حتى وصلت لهنا فاش عاودت ليه هنا غادي نكتاشف بلي حتى هو وقع ليه نفس الشي مع نسرين وبلي اي واحد تم وقع ليه بحالي تضحك عليه وحيدو ليه لاكارط وحبسوه وكيعطيوه لباس العيالات وكيرضوه بحال الما
- عماد ( ضاقت عليه نفسو ودمو سخن ) :
علاش ماهربتيش
- وليد ( مسح دمعة من عينو ) :
فين غانهرب وعلى برا واقفين رجال كي الغوال ، تدوي يشبع ك عصا وتصرفيق ماخليت غوت حتى بحيت كيخليوك بجوع ويوكلوك العصا حتى كتولي تحدر الراس كانو فكل ليلة كيقادونا ويلبسونا بحال العيالات وكيديونا لداك البار والحفلة كتبدا مع 12 دليل
- عماد : شنو كان كيوقع تم ؟
- وليد ( كيسترجع الداكرة للور ) :
شلا مكايوقع فداك القنت غير الناس لي لاباس عليهم لي كيدخلو تما كاين فيهم الفنانة مطربين كاع لي يجيك.على البال كان كيجي لداك القنت وكانو كيريزيرڤيو قبل كان لي كيجي يدوز الويكاند وكيمشي كل واحد وهو ..
- فالاول مكتقبلهاش نهائيا ولكن من بعد كتولي جسد بلا روح غير مسيرينك بحال شي مونيكة كتولي كاره حياتك كتبغي الموت ومكتلقاهاش .. 4 سنين دازت من حياتي وانا على داك الحال حتى وقع لي وقع لبارح
- عماد : شنو طرا بضبط ؟
- وليد : واحد خونا كان فالبوليس وكان من الكليان لي كيجيو لتم نوضها مع واحد خونا ماعرفت علاش وخرجوه لڤيدورات ومع كان شارب مشا نيشان بلغ عليهم او وراهم البلاصة فين هي فاش جاو البوليس وجمعو كولشي وجمعوني معاهم وهادشي لي عاودت ليكم هو لي عاودتو ليهم تم ..
- احسن حاجة غادي توقع ليا هي هادي اللهم الحبس ولا نبقى فداك القنت واخا حياتي ضاعت وتلعب عليا وتنصب عليا ولكن دابا حسيت براسي رتاحيت ( مسح دموعو لي نازلين سخان من عينيه ) ..
- عماد : ماعرفتيش شكون هاد الناس عمرك سمعتي شيحاجة ؟
- وليد ( بنفي ) :
لا ماعرفتهمش شكون ، ولكن فاش كنا فداك البار واحد من دوك الرجال لي كان من الكليان لي كيجيو ديما لتم ݣاليه بلي لافير ديال الكلينيك راها سلات وبلي خاصهم يوقفو الخدمة واحد شوية وبلي ماغيبقاوش لاعبين غير على القلب
- عماد ( شاف فالعميد بشك ورجع شاف فوليد ) :
واش عاقل عليه ؟
- وليد : واحد شوية ماشي بزاف
- البضراوي ( سونا فتيليفون ) بعد دقائق جا نفس البوليسي عطاه التحية
- البضراوي : ديه .. تقدم حارس الأمن شدو من يدو وداه ، شاف البضراوي فعماد لي كان ساهي
- البضراوي : فاش كتفكر ؟
- عماد ( بحال الى تفكر شيحاجة ) :
قضية الكلينيكات خرجت ليا من بالي ، وحاجة خرى خدمت فيها مكلخ الى هاد الناس دارو عرس وماعندهمش تصاور ديال هاد العريس وديال مو ، ولكن غايكونو عاقلين مزيان على الملامح ديالو ..
- البضراوي ( سد الپيسي لي قدامو ) :
نوض شوف خدمتك .. وماتنساش تعرض وليد على الخبرة باش يعطيهم الشكل ديال السيد لي دوا عليه
- عماد ( وقف ) :
واخا سيدي ( عطاه التحية وخرج ) مشا بخطوات مزروبة نزل الدروج التحت فتح واحد الباب بجهد ناطق بزربة :
خالد جيب داك دفتر ديالك وأجي معايا
- خالد ( وقف هاز واحد الدفتر كبير وراقيه بيضة وقلم الرصاص ) :
لبيرو ديالك ؟
- عماد ( سابقو ) :
لا عندنا خدمة على برا ..
- ليلة كلها دوزوها فبوسكورة .. عند واحد من معارفهم لي كان غايدي يمشي معاهم للجديدة ، فصباح شدو الطريق البكري مع 8 ديال الصباح مع 9:17 دقيقة كانو فالجديدة توجهو لواحد القهوة يرتاحو فيها ويفطرو عاد ركبو شادين الطريق لمولاي عبد الله أمغار لي كان بعيد على مدينة الجديد ب 15.9 كلم خدا منهم 21 دقيقة ديال الوقت عاد وصلو .
- مع كتوصل كتحس براسك بلي كاين فمدينة ديال الخيام كانت محطوطة 25000 خيمة الدنيا عامرة بالبارضية لي كانو جهد 2200 واحد أما سربات كانو 126 سربة من جميع ربوع المملكة الموسم كان مزال ليه واحد 5 يام ويبدا ولكن كيجيو الناس قبل كيتراصو الخيام بينما تجمعو الناس .. الدنيا كتكون عامرة وعاد الناس لي جايين من مدن أخرى بلا عدد كاين لي كيجيب معاه الݣياطن وكاين لي كيكري باش يحضر فكل نهار يتفرج وبليل تكون الفيجطة فالمهرجان .
- الصحافة حتى هي كتكون باش دير تغطية إعلامية خصوصا الموسم لي كان تحت الرعاية السامية لصاحب الجلالة الملك محمد السادس .. ماشي غير التبوريدة بوحدها ليكانت كانو مسابقات الصقور وعروض موسيقية شعبية .
- وصلو لدار لي كانت دارهم حطو البݣاج ديالهم .. الروطال دخل يدوش هو الأول حدو خرج من الدوش لبس سروال خفيف وتلاح على النموسية نعس عيا مع الطريق .. الدار كانت كبيرة فراشها كلو بلدي نقية حيت جات السيدة قداتها وجمعاتها ، عصام خرج تقدا عمر الثلاجة عاد دخل بدورو يدوش سونا على الدار سول على ولدو هضر معاه عاد مشا يرتاح حتى هو .
•••••••••••••••
- وصلات العشرة ديال الليل ، سونا عزيز على عنبر نزلات عندو هي او حياة هزهم داهم وصلهم وقبل ماينزلو وقفهم بكلامو :
- رضو الباب لراسكم الى تبسل عليكم شي حد كولوها ليا واخا عارف رشيد غايرض ليكم البال ولكن عارف هاد البلاصة ماشي ديالكم الصراحة
- عنبر ( هزهزات راسها ) :
والله اخويا الى عارفين ومامرتاحينش كاع ولكن نديپانيو بعدا بيما لقينا ماحسن
- عزيز : المهم سيرو انا انمشي نعالج المعدة فيا جوع 12 تلݣاوني عدكم .. سدو الباب دخلو للوطيل وهو مشا دخلات نيشان للبيت لي كانت فيه البارح كانت هاد الخدمة عليها غير زبل زبل
- دخلات البنت لي مكلفة ليها بمكياجها ولباسها بدات كتقاد ليها وحياة كالسة مقابلة السرجم
- عنبر ( كتشوف فالمرايا ) :
بلاش عفاك داك العكر الأحمر كيبان من بعيد ديري ليا أشيحاجة خفيفة
- ( البنت ) : ولكن هدا هو المكياج لي كندير لكاع لي كيغنيو هنا
- عنبر : أختي البنات بنات وانا انا ، هاد كترت شخبط شخابيط ماعديش معاه تكول كابة عليا كيلو دصباغة اختي خفيف ضريف الله يرحم بيها الوالدين ولا عطيني نصاوب راسي ونتهناو
- صافي واخا اختي .. قدات ليها مكياج خفيف وعطاتها قفطان تلبسو كان فالأزرق ملكي حدرات راسها كتشوفيه وكتشوف فالبنت :
شنو هادشي ؟
- البنت : قفطان
- عنبر : راه عرفتو قفطان ( أشرات بصبعها للفتحة لي كانت طويلة للجهة الفخض ) هاد الفتحة هادي واش الخياط سالى ليه التوب ولا كيفاش واش انا انطلع نغني بقفطان فخاضي عريانين
- البنت ( تعصبت ) :
وراه كاع لي كيغني هنا هدا لباسو انت مزال كتلبسي البلدي هوما راه كيلبسو العصري ولبسة خاصها تكون على حسب الاوطيل وناسو
- عنبر ( بإنفعال ) :
يلبسو حتى دوبياس يطلعو يغنيو بيهم ماشغليش انا فيهم ياكما اختي بنت ليك سميتي جاكلين راه اعنبر هادي من ولاد صالح حريزية على بويا وجدي ماشي يلاه حطاتني الطيارة باش نعري انا فخاضي لي يسوى ولي مايسواش وها قلت العراض ..
- البنت : انا انعيط لسي رشيد اما انا كندير اخدمتي
- حياة ( وقفات ) :
عيطي حتى للقايد كاع ماشي ارشيد .. خرجات البنت وبقات حياة مع عنبر
- عنبر : داكشي لي بقى غير نلبس قفطان ولحمي عريان براكة اديك الغرامة لي كيلوحو عليا بحال السلعة نجي دابا نعري فخضي شوية نعري صدري شوية يكوليك عري بلايص خرين بناقص كاع
- دخل رشيد وعلى ملامحو علامات إستفهام :
عنبر ياك لاباس ؟
- عنبر ( بصرامة وتحدي باين فعينيها البنيين ) :
نهار الاول كتليك انخدم معاك نحتارم راسي وحد مايقلل عليا العفة ، الغرامة وناس يلوحو عليا الفلوس سرطناها بجغمة دالما ولكن باش نلبس قفطان نعري فخضي حتى لهادي لا ، يا نلبس تحت منو كولون يابناقص كاع من هاد زعلوك كامل
- رشيد ( كيهدن فيها بإبتسامة ) :
صافي صافي غير تكالماي لبسي الالة لي بغيتي ، لبسي تحت منو كولون ماشي مشكيل غير ماتعصبيش الله يرضي عليك ..
- عنبر : وانا غير قلت ليك وصافي .. أشر للبنت باش دير ليها لي بغات وداكشي لي كان لبسات كولون تحت القفطان عاد خرجات للصالة ، كانو الناس كيتسناوها وجايين مخصوصين على قبلها .
- عطات الاشارة للموسيقيين وبدات كتغني العينين كولشي عليها والغرامة كطيح عليها من اول اغنية بدات بيها بنت كانت ݣالسة بعيد هازة تيليفونها وكتصور فيها من اول اغنية بدات تغنيها لاخر وحدة كولشي كان فرحان وعينيه عليها حامقين على صوتها ، وفينما كملات من شي اغنية كطيح عليها التصفيقات بحال الشتا .
- كملات الفقرة ديالها وخرجات من تم لقات حياة كتسنى فيها دخلات لبيتها بدلات عليها هزات ساكها حتى دق رشيد ودخل ..
- كان هاز فيدو جوا بحال ديال البارح مدو ليها ) هاكي هذا حقك فالغرامة لهاد الليلة .. تبارك الله اليوم كثر من البارح كاع الناس عجبتيهم .
- عنبر ( شداتو عندو دارتو فساكها ) :
هادي خدمتي اخويا رشيد انا غير الاحترام ومايقيسني حد ندير خدمتي كيما هي
- رشيد ( بإطمئنان كيحقق فعينيها ) :
مكاين حتى واحد غايقلل عليك الاحترام اعنبر وأنا هنا غير رتاحي ، لي قلل عليك العفة بحال الى غلط فيا ( حنحن ) أجي تشوفي واحد المفاجأة ..
- عنبر ( بإستغراب) :
إن مفاجاة ؟
- رشيد : وأجي بعدا وتعرفي ... سبقهم شافت فحياة وتبعاتو وحياة وراها خرجو على برا ضار ماشر ليها بيديه هزات راسها كتبان ليها صورتها كبيرة مع سميتها بذهبي حتى هي كبيرة .. مكتوب كل ليلة على الساعة العاشرة ونصف
- رشيد : كيجاتك ؟
- عنبر ( هزهزات براسها ) :
زوينة جات مزيانة ، وقف عزيز الطاكسي ونزل جا للعندهم هز راسو فديك لافيش سلم على البنات وعلى رشيد بسلام رجولي
- عنبر طلعات هي وحياة للطاكسي وخلاو عزيز مع رشيد كيدوي معاه
- عزيز ( بإنفعال ) :
واش هادي مريضة ولا اش ݣاليها راسها الموسخ ؟
- رشيد : ضرت فيها ولكن فرح الى مشات حتى حطات شي حد فبالها مكاتقيلوش
- عزيز : ݣلتها ليك ارشيد البنات ماشي ديال هاد البلاصة هادي عارفينها اصاحبي
- رشيد : ولكن ماتنساش شحال من واحد معروف فالغنا داز من هاد البلاصة هي الاولى ، يݣد يشوفها شي منتج يبغي يظير ليها شي ألبوم ماتعرف
- عزيز ( داير يديه على جنابو ) :
مايجي هاد المنتج حتى ديك زلمومية دير للبنت شي فعلة ، البنت ماشي بلاصتها هادي وباش نجيك نيشان وحق الله والذي لا رب سواه نلݣى ليهم الخدمة فشي قنت لا ضربو عندك الضربة هنا انا نݣولك
- رشيد : ياك اعزيز اخويا هادي هي العشرة ؟
- عزيز : الصحبة صحبة ابا رشيد .. والبنت شتيها عدنا وكونماشي انا لي عرضتك كاعما تشوفها ولا تسمعها نهائيا أنا نݣوليك .. دوك دريات حسبتهم خواتاتي وحسبت راسي واصي عليهم وسلات الهضرة السلام عليكم .
- عطاه بالظهر وطلع لطاكسي ديمارا ومشا خلاه غير ساهي .
•••••••••••••••
- فبن سليمان ، فاقت بكري جامعة شانطة صغيرة فيها زوج تبديلات وقفطانها ديال الخدمة هزات ساكها فيه وراقيها واي حاجة كتخصها ضارت للجهتو كيبان ليها ناعس بقات كتحقق فيه مدة وهي تخرج من البيت ..
- كولشي كان ناعس خرجات على برا بانت ليه طوموبيلة عبد الرحمان واقفة ومع رحيمة شيرات ليها نزل عبد الرحمان خدا من عندها الشانطة دارها فطوموبيل وهي طلعات اللور مع رحيمة
- تودة : فين البقية ؟
- رحيمة : سبقونا نلݣاوهم فالقهوة لي عد سطاسيون تي اش داكشي لي ݣلتي ليا فتيليفون ؟ مافهمت والو أخويتي ؟
- تودة ( عينيها على عبد الرحمان لي ركب وديمارا عاد قربات من رحيمة بصوت كيسمعوه غير هوما بزوج) :
كتليك السيرو دنعاس سالى ليا ونسيت ماشريتو ، كنت نتسنى فراجل يجي يقرب ليا كت باغة ندير العكر بشيحاجة امايوصلنيش السيد طلع لناموسية باس ليا راسي ودار رݣد مݣال ليا لا طابت لا تحرݣت مافهمت والو ..
- رحيمة : واي وراه مزيانة هادي اصحايبتي ، أش بغيتي بغيتيه يقرب ليك ياك جاتك مخيرة ݣاع
- تودة : وراه جاتني مخيرة ماشي مجاتنيش ولكن دخلني الشك ، السيد اساهي ويخمم وجامي بحال الى ضعاف وتحت عينيه زرݣ بيه شيحاجة ، ݣالتها ليا سميرة وانا مارضيتش ليه البال
- رحيمة : ايوا الى مريض الله يشافيه واخا مايسواش مانتشفاش فيه
- تودة : علم الله بحالو واخا كي ݣلتي مايسوى ريال ظالم ولكن ربي فوق من كل واحد ..
- الطريق خدات ليهم 38 دقيقة وصلو للقهوة كانت حدا واحد سطاسيون لقاو رباعة كاينة تم ، سلمات عليهم تودة وݣلسو فطبلة حداهم خداو الفطور فطرو رتاحو شوية ..
- وعاد شدو الطريق للدار العريس لي كانت بعيدة شوية على المدينة فالخرجة .
••••••••••
- سخسخاتو الخدمة وجري سونا ليه التيليفون هزو لقاها 8 ديال الصباح خسر سيفتو ماكرهش يشد شي كونجي ولكن مدام مزال ماتحلات هاد القضية ماعندو فين يشدو .. ناض دوش عليه لبس سروال ديال دجين سامبل مع سبرديلة وشوميز فالأخضر معلي ليها الكمايم شعرو مشكو اللور رش من ريحتو دار ساعتو وهز سوارت الطوموبيل وتيليفونو ..
- هبط بزربة كان السقيل فدار مو مزال مفاقتش والمساعدة مكتجي حتى ل 9 خرج ركب فطوموبيلتو والوجهة ديالو كانت هي واحد المحلبة كيعجبو يفطر فيها .. حدات مقلة ديال البيض بالخليع وبراد ديال أتاي فطر خلص السيد وشد الطريق للخدمة .
- ݣالس هو ويوسف فالبيرو حاط رسومات قدامو وساهي فيهم مرة مرة كيجغم من كاسو ديال القهوة ويخمم
- يوسف : راه نورمال أصاحبي مغايكونش نفس الشخص حتى كاع الى كان شي واحد لي منوض هاد البلبالة غادي يكون عندو بزاف درجال كيسيفطهم هدا ماشي هو هدا
- عماد ( تنهد تنهيدة طويلة) :
حتى كنݣول لقيت راس الخيط وكنرجع للنقكة الصفر من جديد .. حتى المواصفات لي عطانا الضحية وليد مباينينش مزيان مابقاش عاقل بزاف
- يوسف : هداك مخاصك تاخود عندو المواصفات حتى يدوز عند شي طبيب نفساني واش سهلتي لي داز عليه
- عماد ( كيفكر ) :
عندك الصح يݣد الى داز عند طبيب نفساني يعاود يتفكر اش بان ليك واصلا دري خاص لي يعاونو مسكين
- يوسف : دابا أجي نسولك هاد عريس الغفلة واش هو لي كيفتح للهاد البنات ولا كيكون شي حد معاه ؟
- عماد ( جغم من كاسو دالقهوة ) :
الطريقة لي ياخدو بيها الأعضاء مامقيوسين مزال فريش هي البنج هادي هي ساهلة ، حيت مايݣدش يخنقها ولا يتعدا عليها خاصها تكون بيخير مامقيوسة من حتى قنت .. كيبنجوها كيفتحو ليها كياخدو لي بغاو كيديروها فثلاجة خاصة بالاعضاء باش توصل لماليها كيما تحيدات ..
- يوسف : وهادشي راه مايديرو غير طبيب ولا لي قاري الطب ، ولكن دياولنا مغاديش تكون عندهم الجرأة يديرو هاد المسايل
- عماد ( رجع بظهرو اللور ) :
غادي يكونو جايبين واحد مختص معاهم من برا .. دابا المشكل هو لقينا غير جث**ة وحدة او وحدة محيدين ليها الكلاوي والقلب علم الله البقية شنو غايكونو محيدين ليها
- يوسف : على حسب الطلب ، كيخدمو على قبل شنو مطلوب منهم واش مطلوب القلب كلاوي كبدة عينين والقائمة طويلة ، وماشي بعيد من هنا للغدا يجيك تيليفون لقاو شي وحدة مليوحة فشي قنت عندنا زهر لي لقينا هادي لي تقد توصلنا لشي باب ، الفضيحة هي الى حرق**وها وماعندك حتى دليل .
- عماد بقا كيفكر ويلعب بالكرسي ديالو ، شاف فيوسف بحال الى تفكر شيحاجة :
أجي عقلتي هادي واحد عامين كانت تنشر واحد الڤيديو ديال واحد خونا داير ماسك كان دار بوم فواحد القناة كانت سميتها روبي ڤيريدجو ؟
- يوسف ( غوبش ) :
اه عقلت ولكن واحد للمدة ومابقاتش ، كانت كتفضح دوك المخلوضين الى مزال عاقل علاش ؟
- عماد : عقلتي نهار دوات على واحد خونا سميتو رضوان السعودي كان عندو واحد الكلينيك كيديرو فيها عمليات مشبوهة ؟
- يوسف ( كيحاول يتفكر شاف فعماد بإهتمام ) :
بحال الى عرفتك فاش كتفكر ، ولكن هو دابا راه مشدود
- عماد : مشدود وعمرو مغايخرج حيت القضية ديالو تقيلة بزاف .. وبحال هاد النوع لي كيكون عارف راسو عمرو غايخرج كيبغي يدخل صحابو معاه ويعتارف عليهم واحد واحد ( تبسم )
- يوسف : زعمة يبغي يتعاون ؟
- عماد ( وقف ) :
اندوي مع سي العميد ضروري غايبغي يتعاون والى مابغاوش نخليوه يبغي ساهلة ..
•••••••••••••••••
- عالم الأنترنت عالم لي صعيب أي حاجة كتخص الافادة صعيب تنجح الى مكانو عندك امكانيات ولكن الى كنتي كتنشر التفاهة بحال الى شعلتي الفتيلة دغية ديك العافية كتشد فأي حاجة وفدقايق تحر**ق الدنيا ومافيها هكاك التفاهة وصناع التفاهة ..
- منهم صحابات روتيني اليومي وغيرهم وغيرهم ونهار الكحل عندك الى درتي شيحاجة وصورك شيحد وانت معارفش راسك كتصور وتلقى راسك تصاورك ولا الفيديوات ديالك كيدورو فالانترنت يا كتعود عليك بفضيخة ولا بنفع ..
- يوماين بضبط لي دازت على الليلة لي غنات فيها عنبر وتصورات بلاما تحس .. كانت كتجي للخدمتها بحال العادة دوز الفقرة ديالها وترجع حتى لنهار الثالث وقع معاها كيما وقع مع إكرام العبدية وعثمان مولين مول البندير .. ڤيديو ديالها ولا ترند فاليوتيوب وفصفحات كلها لا الانستغرام لا الفيسبوك كولشي كيدوي عليها وكيدويو على صوتها والبحة ديالو وعلى زينها ..
- كاين لي كيكتب " الله يعفو عليها صوتها زوين كون ستخدماتو فتجويد حسن ليها " وكاين لي كيكتب " كثرو هاد الشيخات غير العاهرات والوسخ " وكاين لي كيكتب " فين كاين هاد الزين نمشيو نشوفوه " وكاين لي كيكتب " هاد البلاد كينجحو فيها الشيخات "
- وتعاليق كثيرة هوما لي عجباتو ولي ماعجباتو ولي كيسول فين جا الاوطيل الفيديو وصل لكاع الناس من غير لي ماعندوش مع مواقع التواصل ، فديك الليلة نزلات هي وحياة لقات عزيز كيتسناها ..
- عنبر : ياكما تعطلنا عليك أعزيز ؟
- عزيز ( كيضحك ) :
لا تعطلي كيما بغيتي الله أودي على الفنانة ديالنا عندك اديري لاباس وتنساي خوك ..
- عنبر ( كضحك ) :
لاباس كاع سيمانة الى كترت اخويا وانخرج بحالي امضرا مزال مبان ليك والو ؟
- عزيز ( شافيها ) :
واش ماشتيش يوتيوب والفيسبوك ؟
- عنبر : ماعنديش عندي اتيليفون عادي مابغيتش نخسر فلوسي ونشريه بغينا نخبيو باش نكريو ، علاش اش واقع ؟
- عزيز ( جبد تيليفون خدمو او وراه ليها ) :
هاكي شوفي انت كاعما جايبة لدنيا خبار ، الفيديو ديالك داير بوم فالانترنت ..
- حياة ( بصدمة ) :
اويلي أشمن ڤيديو اري نشوف ؟
- عنبر خرجو عينيها وتصدمات ماقراتش كاع التعاليق ولا شافتهم نهائيا مشاو عينيها غير للڤيديو ديالها لي كان طالع الترند رقم 2 فاليوتيوب كان مليوح هادي 3 يام فليلة لي كانت غنات فديك الساعة فهاد المدة كان ضارب 3 المليون ديال المشاهدات ..
- فالفيسبوك وكذلك كان طالع وصفحات فالأنستغرام تحت أسماء اول مرة تشوفهم ولكن كانو صفحات كبيرة لي فيها مليون أبوني ولي فيها 700 أبوني كلهم لايحين الفيديو وكاتبين صوت جبار .. " فنانة جديدة صاعدة " صوت متميز " فنانة تحيي أغاني البطولة الشعبية " صوت جديد يحيي العيطة "
- كل ڤيديو وكان عنوان ديالو خاص بديك الصفحة دخل ليها عزيز لتيك توك وحتى هو نفس الشي فيديو ديالها مبارطاجي تعاليق عبارة على " فين هنا " " فين كتغني هاد البنت ؟ كولشي كيسول وكاين لي كيجاوب كاين لي لا
- عنبر تشوكات مافهمات والو وتخربقات شيحاجة لي عمرها نواتها ، ناوية تخرج من الخدمة وتكمل حياتها عادي حتى لقات راسها بين ليلة ونهار فيديو ديالها داير بوم حتى الى بغات تخرج الناس مغايقيلوهاش غادي يعرفوها ..
- عنبر ( شافت فعزيز ) :
بغيت نعرف اشكون هاد الميكروبة لي دارت ليا هكا وفضحاتني هاد الفضيحة هادي ، دابا حتى الى بغيت نخرج من الخدمة الناس مغايقيلونيش كولشي عرف سميتي عنبر اعباد الله راه شوهة
- حياة : اويلي جاب الله مي ماعندهاش تيليفون هي وداك الكيدار ديال سعيد كوراه يضرب لينا الطر
- عنبر : الى ماعندوش تيليفون راه كاين لي يوريه ليه ساهلة
- حياة : وباش غايعرفوك انت هي بنت خت مراتو مالها مكتوبة فجبهتك ؟
- عنبر ( حلات الزاجة ) :
انا واحد المتعوسة مامنيش زوج حتى كنكول هاهي غاتسݣد وكتعواج من شي قنت
- عزيز : ومتعرفي ربي بغاليك تشهري
- عنبر ( شافت فيه ) :
ربي مكايبغيش هاد الشوهة لعبادو اعزيز ، راه بنادم لي ماعندو مايدار اشاد هاد المشقوف ويصور
- عزيز ( وصلهم قريب للجهة الاوطيل ) :
ودابا راه خرج قانون جديد الى حصلتي شي حد كيصور فيك راه دعيه واي واحد صور شي حد بلا موجب شرع كيتعاقب
- عنبر : فين انشوف انا لي صورني ولا لي صوراتني خاص نشوف مولات هاد الكونط لي لايحاه فيوتيوب ولا هادو ندوي معاهم
- عزيز : والله حتى راك هبيلة هادو ماعندك ماتصوري منهم اشربي الما وسكتي الفيديو ايجي نهار ويتنسى وتجي فضيحة خرى وهي غادية ..
- نزلو من الطاكسي دخلو للأوطيل جميع للانظار كانو عليها من سرباية للخدامة .. دخلات للشومبر ديالها كتجري سدات عليها الباب.
- حياة : شتي على حريرة هادي دابا ؟
- عنبر : اسكتي احياة لي فيا كافيني قسما بالله العظيم .. تدق الباب ودخل رشيد الفرحة باينة على وجهو :
عنبر عنبر عنبر راه كتليك انت وجه السعد عرفتي الصالة غاطرطق كولشي جاي على ودك ، واش شتي الفيديو ديالك دار بوم عرفتي دابا مكاين للعروض كتلاح بحال الورق من شجر
- عنبر ( ببرود كتخنزر فيه ) :
فرحان مرتاح عاجبك الحال زعمة هاديك راه الشوهة ماشي الشهرة الشوهة رشيد سير اخويا بدل الساعة هالعار راه بدات القردة كطلع تشقلب فوق دماغي ومغانبقاش عارفة شنو كنݣول ..
- رشيد ( كيضحك ) :
ديكالم ازين ديالي انا انمشي دابا نخليك توجدي راسك صافي .. خرج وخلاها كتخنزر فيه شافت فحياة :
سمعتيه كال زين ديالي وها زعامة الخاوية ديال والو انا راه بديت كنتعصب وهادشي مابقاش كيعجبني الى مشيت حتى وصلات ليا العظم راه اندير شيحاجة خايبة وعارفة راسي غاندم عليها
- حياة ( كبات ليها كاس ديال الما ) :
صافي بردي وجدي راسك وندويو من بعد ..
يتبع...
التعليقات
لا توجد تعليقات بعد، كن أول من يعلق.