محتوى القصة
- رقية : ايـــاه عدك الصح الالة تودة .. لي ݣلبو بيض ربي عمرو يخيبو يلاكيك امع لي ݣليبو صافي بحالك .. ( بتساؤل وفضول ) ماعدكش شي وليدات الالة تودة ؟
- تودة ( بإبتسامة رضا ) : بنتي هي عنبر الالة رقية ، ربيتها منين كان عدها عامين .. كانت مها تمشي للخدمة وتخليها ليا فينما مشيت كنت نديها معايا ، كنت نخدم ونديها معايا لخدمتي حتى دارت 12 عام وفارقاتنا الوقت ورجعنا تلاݣبنا وها بنيتي معايا
- رقية : الله يخليها لك .. ناضت سميرة للكوزينة تشوف البرارد ديال أتاي ، فصالون ديال الرجال كالسين مجموعين أصواتهم الرجالية واصلة للصالون ديال العيالات كيدويو فمواضيع مختلفة ... من بينهم علال لي كان مرتاح فالهضرة مع عبد العالي داويين فكاع المواضيع ديال الحياة بصفة عامة ..
- رشيد ( موجه كلامو للفاروق ) : الله يكمل بالخير .. ختاريتي وعرفتي تختار عنبر راه والله ماتلݣى بحالها ..
- إدريس : عارفين راسنا قصدنا الدار الكبيرة .. حتى انا مانشكرش ليك ولدي
- رشيد : الله اودي اسي إدريس ، السمعة راه كتسبق تبارك الله سمعة ديال سي فاروق راه سابقاه
- فاروق ( بصوتو الرجولي ) : الله يكبر بيك
- عبد العالي : هاديك البنية والله مكاين بحالها .. للقلب الكبير وحنينة عزيزة عليا بحال بنتي ، من نهار حطات رجلها هنا ولات وحدة من ولادي
- عزيز : حاسب راه حنا عائلتها انا ورشيد خوتها ، أودني منك اسي فاروق تقلقها لينا ( كيضحك)
- فاروق ( بإبتسامة خفيفة ) : عمر شيحاجة متقرب ليها ولا ضرها لي يضرها يضرني أنا ..
- عبد العالي ( هزهز براسو ) : الله يجيبنا فصواب ياربي ولهلا يحاشمنا والله يكمل بالخير .. عبد الخالق كان أونفاص مع الباب عينيه مع الكولوار كان باغي يشوفها كيتسنى اللحظة لي دوز فيها .. فاش دخلو خطف شوفة وكانت بزربة ، قرب منو إدريس بهمس :
حدرعينيك اخويا وشاركنا فالهضرة رجوع لله
- عبد الخالق ( بتنهيدة خارجة من قلبو ) : والله ماݣديت اخويا ، حاس براسي ݣالس على جمر بالله المعبود ..
•• إدريس : تبت أخويا حتى يدوز هاد النهار
- عبد الخالق ( هزهز ليها براسو ) : واخا يصاوب الله ..
_________________
- تحطو الصواني ديال أتاي فصالون العيالات وصالون الرجال .. عزيز هو لي تكلف بكبان اتاي ، وفصالون العيالات سميرة هي لي تكلفات بكبان اتاي ، رجعات رجاء للصالون وتيليفون فيديها محنية على ودن تودة :
خالتي الساروت نلوحو ليونس
- تودة ( أشرات ليها براسها ) : راهو عند المرايا .. ، ناضت رجاء هزات السوارت ومشات للبالكو ديال الكوزينة لاحت ليه السوارت .. وقفات عند الدروج كتسناه طالع وفيديه الديسير باس ليها راسها :
ياكما تعطلت ؟
- رجاء : لالا سير دخل عند الرجال ، شدات من عندو الساشية دخلاتها للكوزينة ورجعات للعندهم للصالة ..
- رقية : لالة تودة فين هي عروستنا الغالية ؟
- تودة ( وقفات ) : أنا غانعيط عليها .. وقفات تودة متوجهة لعند عنبر للبيت ، تحت انظار عبد الخالق لي كان متبع معاها العين ، ماكرهش ينوض يݣوليها انا هو فلان واش ماعقلتيش عليا ولكن يديه ورجليه كانو مربوطين ..
- تدق الباب ديال بيت عنبر ودخلات تودة طلات عليهم لقاتهم ݣالسين مجمعين .. :
يلاه ابنتي زيدي .. وقفات عنبر وهي مرعودة وخايفة كتبلع فريقها وكتعݣر فحلقها لي كيوجعها بالخلعة وستريس ..
- ماجدة ( غمزات حياة ) : الصلاة والسلام على رسول الله إلى جاه إلى جا سيدنا محمد الله مع جاه العالي ..
- حياة ( كتعاود من موراها ) : الصلاة والسلام على رسول الله إلى جاه إلى جا سيدنا محمد الله مع جاه العالي ( زغرتو ب3 بيهم ) .. خرجوها وهي حشمانة نزلات عليها واحد الحشمة عمرها حسات بيها لأول مرة كتحس بشي حوايج حقيقيين ولكن كتعيشهم فاللحظة مزيفة وبزواج كولشي فيه مزيف من غير مشاعر بعض الحاظرين لي مكانو عارفين والو ..
- دازت من جهة الصالة الرجالية ولكن فاروق كان من جهة لوخرا مشافهاش مد.. من غير عصام وعماد وطارق لي شافوها ..
- عصام ( نغز عماد ) : كون اݣلبو هاد الزواج للبصح ، والله الى پياسة مخيرة مايلݣاش بحالها الصوت وزين شكون بحالو
- عماد ( خرج فيه عينيه بصرامة ) : هنينا أصاحبي .. دخلات عنبر للصالون ورقية عينيها كان باين فيهم الإعجاب والمحبة كتردد بكلمة وحدة :
تبارك الله تبارك الله .. تحدرات عليها عنبر باست ليها يدها وعنقاتها ، سلمات على دنيا وعلى يسرى بغات توجه لحدا مها تݣلس وهي تأشر ليها رقية لحداها :
أجي ابنيتي حدايا أجي .. ݣلسات عنبر حداها بكل تباتة ونخوة والإبتسامة مزينة وجها ، قلبها كيضرب ويديها كيترعدو عليها ..
- من ورا ماتشرب أتاي وتفرتكو بلاطويات الحلوة .. تكالت الفاكية وهضرو فشلا حوايج جا وقت ااصح والمعقول فالجهة الأخرى عماد حرك راسو للإدريس باش يبدا الكلام .. حنحن إدريس ونطق موجه كلامو لعبد العالي :
سي عبد العالي الحمد لله حنا قصدنا الدار الكبيرة بماليها .. ربي رزقني ب 3 ديال الولاد كيف كتشوف ، والنهار المبارك والمسعود لي يجي ولدك يطلب منك تمشي معاه باش تخطب ليه وهادشي لي جيت اليوم ندير ( فنفس اللحظة وفصالة الأخرى ) ..
- رشيدة ( بتساؤل ) لالة رقية مديريهاش مني قلت الصواب ولكن فين هي ماين ( أم) العريس ؟ شفتها مجاتش معاكم ؟
- رقية ( بلعات ريقها وشافت فماجدة لي بدورها شافت فيها هنا تدخلات ماجدة كانت باغية غير تعتق الموقف ومتحرجش ) :
ماما عيانة شوية داكشي باش ماقداتش تجي ، ولكن إن شاء الله تصح وأتجي حتى لعندكم
- رقية ( غوبشات وشافت فماجدة بنظرات كلها تأنيب .. رجعات شافت فرشيدة وبصوتها الموزون لكلو حكمة ) :
تاعداك أبنتي ، لي نݣولوه ݣدامكم نݣولوه وراكم .. إلى سهل ربي غانولي عائلة وحدة داك الكدوب ماعديش معاه أنا .. مرات ولدي هي او ولدي واݣفين على طلاݣ ، راسها قاصح واحد شوية واخا بنت حاضرة انا مانزوقش الهضرة نجي نيشان ( شافت فماجدة ) بلاما تشوفي فيا
- تودة : الله يحنن القلوب الحاجة
- رقية : أبنيتي القلوب خاصها تصفى باش تحنان .. لي قلبو أبنيتي بحال الݣطران كحل عمر ݣلبو يحن أنا نݣولك .. صفي هذا ( أشرات لقلبها ) تشرب ميها صافي ويدورو بيك أناس للملاح باش بلاما ندرݣو الشمس بالغربال وليدي فاروق منشكروش ليك ولد الجود ودار الكبيرة ، يدير بنتكم فعينيه كيموتو على عائلتو وعلى باه ومو مرضي وليدي حنيني
- رشيدة : الله يخليهم ليك .. أهو الحاجة عنبر فم بلا عار والزواج لي مايكونش فيه الرضا دالواليدين كيكون صعيب
- رقية : عدك الصح والحمد لله الوالدين راضيين ، باه راضي عليه وكلنا راضيين عليه دوك الولاد حاسب انا لي ربيتهم ، والحمد لله زرعنا فيهم المحنة ماعدك مناش تخافي الالة رشيدة وزايدون حفيدي بدارو بخيرو وخميرو ، اتسكن معاه الراس فراس متسمع لا قج لا بج
- تودة ( هزهزات براسها ) : الله يجيبنا فصواب ياربي ؟
- ( فالجهة الأخرى إدريس مكمل كلامو ) : واش ݣلتي أسي عبد العالي ؟
- عبد العالي ( شاف فإدريس ) : حتى انا اسي إدريس راه غانعطيوكم نقرة ونقرة صافية .. عنبر جوهر حر مايتوزن بمال ولا ذهب ، مكايهمنا لا شنو عند ولدنا فاروق ولا شنو ماعندوش يكون أكيخاف الله سبحانه باش يخاف ربي فيها .. يحتارمها ويصونها وعمرو مايعݣرها والله يكمل بالخير نسولو العروسة بعدا أش بان ليك ؟
- علال : ماݣلتي عيب أسي عبد العالي ( شاف فعصام ) عيط على ختك .. وقف عصام عند الباب كيعيط بسميت ماجدة ، خرجات من الصالة وتوجهات عندو
- عصام : تكلمي لجدي .. ( دخلات بحشمة حادرة راسها تحت أنظار عزيز لي مشافتش جيهتو نهائيا ) :
السلام عليكم .. ( توجهات عند جدها ) نعام أجدي ؟
- علال : سيري أبنتي خودي الجواب من العروسة واش قابلة ولالا ؟ .. الحماس بان على ملامح ماجدة لي رجعات عندهم بالخف بصوت مسموع :
جدي قالك واش قابلة تزوجي بخويا ( هزهزات ليها بحجبانها )
- عنبر ( هزات فيها عينيها بإبتسامة وبكل رزانة ) : لي دارها عمي عبد العالي انا موافقة عليها( شافت فتودة ) ياك اماما فاطنة ؟
- تودة : سيري أبنتي ݣوليه الله يجعل كولشي مبارك ومسعود .. رجعات عندهم ماجدة فرحانة ، واخا عارفة زواج خوها غير على الوراق ولكن كانت فرحانة تمنات من كل قلبها كون كان هاد الزواج بصح :
قالت ليكم خالتي فاطنة الله يجعل كولشي مبارك ومسعود ..
- علال : نقراو الفاتحة تكون فاتحة خير علينا أجمعين .. ( على صوتو الوقور التقيل ) الفاتحة العيالات .. قراو جميع الفاتحة وتعلات الزغاريت من العيالات ، وصل وقت المغرب خرجو الرجال يصليوه فجامع وبقاو العيالات
- رقية ( بفضول ) : لالة تودة لا ديريهاش مني قلت الصواب .. ݣبيل ݣاتلك عنبر فاطنة راني فضولية واحد شوية
- تودة ( ضحكات ) : لالا الالة رقية هانية ماعندك موشكيل .. أنا سميتي فاطنة غير هو من شحال هادي جيراني القدام كانو يعيطو عليا تودة وتسمات عليا وبقات
- ماجدة : فين ايركبو العرسان الخواتم ؟
- سميرة ( شافت فتودة ) : الصالة لي كانو فيها الرجال هي لي كبيرة
- تودة ( شافت فحياة ) : سيري مع ماجدة وقادو الكلسة انا انصايب البلاطو ..
- حياة ( وقفات ) : واخا يلاه
- دنيا : بلات أنا نجي معاكم .. ناضت تودة للكوزينة دخلات على غفلة لقات رجاء ݣالسة حاطة فوق الطبلة زلافة كبيرة فيها العنب البيض وكتاكل :
ياهاد البنت براكة علك راه يضرك
- رجاء : كنعشقو ياخالتي طاح وحمي عليه ، وبقيت هكاك الى شفتو نجهل
- تودة : أش ݣالت كبيلة مك باش غانستقبلو العريس فاش يكون راجع ( بتساؤل ) .. دخلات عليهم سميرة للكوزينة
- تودة : جابك الله كي لميكون اش ݣلتي ليا ندير فاش يكون راجع العريس ؟
- سميرة : الحليب زيدي عليه الزهر ومعلقة دالعسل الحر باش إن شاء الله كلامو ديما يكون عسل معاها
- تودة : حتى انت اصحايبتي ، الى غايكون عسل أيكون بلا هادشي
- سميرة ( جبدات الحليب من الثلاجة ) : هادشي لي كنديرو حنا ولقينا والدينا كيديروه
- تودة : داكشي باش المعطي الله يرحمو كان عسل نيت الله يسمح ليا والله يرحمو
- سميرة ( ضحكات ) : مي نسات مدارتوش ليا داكشي باش يمكن كان كلامو كيسم معايا .. الله يرحمو أش بغيناه اختي تودة دجبدي ليا لساني
- تودة : الله يرحمو ويغفر ليه
- سميرة ( وقفات كتشوف فيها ) : سمعتي أش ݣالت على مرات ولدها .. باينة فيها شي وحدة شرانية بحال عدوزت بنتي الله يستر
- تودة : يحسابلك ماعقتش ، راه مجاتش غير على وديت اطلݣ من الراجل .. تاعلا وديتنا حنا بحال هاد النوع تبغي هي تزوج ولدها بشي وحدة خانزة مال
- رجاء ( كتنقب كن العنب ) : وعلاش مالها عنبر أش ناقصها .. لي تلقايه فيها ماتلقايهش فديك لي باغية ليه هي خلاص عليا أخالتي
- سميرة : مدام هلو باغيينها ماعندها بيها كسار .. دور حتى تعيا وغادي تحن ماتبغيش تعادي ولدها ..
•• فصالون الكبير قادو البنات ݣليسة حطو طبلة وبلاطو كانت حياة زيناتو قبل .. حطات فيه البواطات ديال الخواتم كولشي كان واجد كان خاص غير العرسان يتجمعو ويركبو الخواتم ، رجعو الرجال من الجامع طالعين مع دروج كانت واقفة تودة هازة البلاطو لي فيه الحليب كان سابق الروطال هو الأول حتى تفاجئ بيها واقفة ..
- تودة ( بإبتسامة ) : ولدي سمي الله وخود الحليب ، وكمل كاسك كامل ..
- فاروق ( هزهز راسو بإبتسامة ) : مرحبا .. خدا الكاس ونزل عليه كامل كانت فيه اللمطة ديال الزهر وتحرزيزة ديال العسل الحر .. غير شرب الحليب وداز لصالة تابعو الرجال واخر واحد كان هو عبد الخالق هز فيها راسو ونطق :
الله يكمل كولشي بالخير
- تودة ( هزهزات راسها بشوية ) : اللهم آمين حدر راسو وتبعاتو بالعين حتى دخل .. قلبات فمها بإستغراب ، رجعات البلاطو للكوزينة أو وقفات كتفكر حتى دخلات عليها رشيدة :
أمالك أحنينتي ساهية ؟
- تودة : ياختي عم العريس ماعرفت فين شتو .. وجهو بحال الى ماغريبش عليا
- رشيدة : يلاه يلاه باش يركبو الخواتم .. بزاف ديال الناس كتشابه حتى تي .. خرجات رشيدة وتبعاتها تودة داخلين لصالة ديال العيالات ، خرجات رقية لابسة بلغتها هي لولة قاصدة الصالة لي فيها الرجال دخلات رامية السلام كلسات فالقنت ديال الصالة تابعاها بهيجة مرات عبد العالي وبنات عبد الخالق مع سميرة ورجاء .. أما ماجدة فكانت واقفة هازة تيليفونها هي وحياة باغيين يوثقو هاد اللحظة ، بقات عنبر بوحدها لي بخطوات تابتة دخلات تحت انظارو هو لي كانو مفيكسيين عليها كيجلدوها .. حسات بنظراتو كثر من نظرات البقية تودة لي كانت وراها قدات ليها بلاصة حداها وݣلسات حادرة راسها مشافتش فيه ݣاع ..
- رشيدة ( وقفات فبلاصتها كتصلي على النبي ) .. العيالات كيزغرتو ، تقدمات تودة مدات ليه الخاتم هو الأول .. شد عندها البواطة فتحها وجبد منها الخاتم تقابل معاه بملامح غير مفهومة خليط بين الاستمتاع وبين ملامح شيطانية لعوبة ، هزات فيه عينيها فاهمة نظراتو ليها تبسمات بخبث .. كانو بحال شي قرعة وغطاها القرعة عارفة نوع غطاها والغطا عارف القرعة وشنو هازة .. مدات ليه يدها مأشرة ليه براسها لصبعها وبهمس صوت سعو أهو :
بالي ياكما خفتي ؟
- تبسم إبتسامة رجولية .. مركب ليها الخاتم هز يدها لشفايفو وباسها ونظراتو لي كانو بحال إفتراس بنسبة ليها بؤبؤ عينيه مكايتحركش رقصات من نوع أخر راكبين على نظريه ببحة صوتية رجولية ثقيلة نطق جنب ودنها :
خاتمي بحال الوشام فصبعك والوشام صعيب يتحيد ازينة تبريحة ( غمزها ) ..
- مدات ليها مها البواطة محلولة فيها الخاتم ديالو .. هزاتو وخدات الخاتم منو ، مدات لو يدها وبإبتسامة بريئة تبسمات فوجهو .. مد ليها يدو ركبات ليه الخاتم هامسة فودنيه بشوية :
دابا نشوفو اسي روطال واش خاتمك لي ايبقى وشام فصبعي ولا خاتمي لي غايربطك حياتك كلها ( بعدات عليه وهي بنفس الملامح )
- تعلات الزغاريت وقفات عنبر سلمات على مها وعلى خالتها مرورا بباقي العائلة ، أما هو سلم على جدو هو أول واحد عاد باه وعمو
- عنبر ( وقفات قبالت جدو باست ليه يدو ) : مبارك ومسعود أبنتي الله يكمل عليكم بالخير
- عنبر : اللهم آمين يارب .. توجهات للعند إدريس وهاد المرة كانت فاص أفاص قدامو بإبتسامة واسعة :
عمي انت لي كنتي فالموسم كالس حدايا ياك ؟
- إدريس ( هزهز ليها راسو ) : أياه ابنتي شتي على صدفة كيدايرة .. ( باست ليه يدو وباس ليها راسها ) الله يكمل بالخير أبنتي
- عنبر : اللهم آمين يارب ، توجهات عند عبد العالي سلمات عليه باست ليه راسو .. وقفات قبالت عبد الخالق حسات بغصة فحلقها جاتها فجأة وعينيها غرغرو بدموع
- عبد الخالق ( بإبتسامة ) : الناس كيكونو فرحانين فهاد النهار أبنتي مكايبكيوش
- عنبر ( مسحات دموعها بالخف ) : سمحليا أبابا بغيت نقول أعمي .. تفكرت بابا الله يرحمو مديرهاش مني قلت الصواب
- عبد الخالق ( باس ليها راسها ) : الله يرحمو ياربي .. حنا كلنا فمقام باك ابنتي ، فاروق راه بحال ولدي طارق إلى دار ليك شيحاجة ݣوليها ليا
- عنبر ( كضحك ) .. وقف قبالتو فاروق :
كتحرشها من دابا اعمي ؟
- عبد الخالق : وشنو دابا راه عنبر ولات بنتنا كاملين .. رجعو ݣلسو حدا بعضياتهم .. عماد ( ناض من حداهم جاوب على التيليفون ديالو ورجع ) .. وقف طارق لابس سبرديلة ديالو خاشي فيها رجليه عيط على ماجدة :
فين هي طواليط ؟
ماجدة : أجي معايا ... وراتو الطواليط ورجعات ، حنحن علال ونطق :
إن شاء الله هاد الزواج يكون مبارك ومسعود علينا كاملين .. دابا غانوليو عائلة وحدة ولي تقالت عليكم خفافت علينا ، إن شاء الله زواج الدايم بالولاد والبنات يبعد عليكم الله كل ضرر وصبر أوليداتي الصبر هو كولشي لا عليك لا عليها طلع واحد يهبط الثاني ، وكل واحد فيكم يسمع يسمع لاخور داك شد ليا نقطع ليك راه مافيه الفايدة ..
- عبد العالي : داكشي لي كاين أسي علال .. ݣلتي لي كاين كفيتي او وفيتي ، الواحد يسمع يكون راسو خفيف داك الزكير راه مامنو شاي ..
- علال كان كيعطيهم كل أسس الزواج الصالح لا هو لا عبد العالي بحكم هوما الكبار سنا وتجربة وحكمة ، الباقي كان كلو أذان صاغية ليهم حديثهم كان جميل وعندو واحد النكهة خاصة إحتراما ليهم كانو كيسمعو ليهم .. خصوصا رجاء ويونس لي كانو ازواج والمحبة بينهم كان خاصهم بحال هاد الكلام ...
- خرج طارق من الطواليط بإحراج كيقلب على ختو ، خرجات حياة من الكوزينة هازة فيدها طرف ديال الخبز فيه المرقة كتاكل فيه
- طارق ( بصوتو المدعدع ) : عفاك سمحيليا .. ضارت عندو بتساؤل :
مالك ؟
- طارق : لاساش يمكن خسرات .. ( شافت فيه وتوجهات لطواليط طلات بان ليها الما كيشرشر شافت فيه مهزهزة راسها ) كتفي وكنتي غاطيرو ودابا لاساش بوشيتها خويا غير بشوية تعامل ابشوية مخاسر والو ..
- طارق ( دوز يدو على وجهو ) : بديتي تاني شوفي لعيبة الله يرضي علك وأري هادي مخاصش دخلي نعمة للطواليط ( حيد ليها الخبز لي فيديها كلا نصو .. خلاها متبعاه بالعين بملامح الإستغراب وصدمة نطقات ببلاهة :
- كلالية خبزي .. ( من تحت سنانها ) تاكل المحنجر ݣول أميــــن .. ، رجع عندهم للصالة ݣالس حدا عماد ماد ليه النص فالخبز :
دوق البنة دوق .. ، من بعد كلام الكبار توجهو العيالات للصالة لوخرا ومعاهم عنبر تحط الطبق الاول ديال الدجاج محمر ، تجمعو على 4 ديال الدجاجات كلاو حتى شبعو رقية تحل فالدجاج وتحط للعنبر ولبنياتها .. الدجاج كان فيه واحد البنة ديال الدجاج المحمر ديال زمان الطبسيل رجع خاوي ، وراها تحط اللحم بالبرقوق وختموها بديسير ..
- فالجهة لوخرا ديال الرجال .. نطق علال( موجه هضرتو للعبد العالي) بكلام كان بنسبة لعماد وفاروق بحال الطرشة :
سي عبد العالي إن شاء الله الى بغا الله العرس غايكون عندي .. فسوق الأربعاء ..
- عماد ( عقد غوباشتو ) : كيفاش أجدي ؟!..
- علال ( شاف فحفيدو ) : ياك لاباس علاش مالني أش ݣلت
- الروطال : لا اجدي غير كنا عوالين العرس نديروه فالقاعة هنا فكازا
- علال ( بصرامة ) وانا عرس حفيدي الكبير غايكون عدي ويدوز عليه سيمانة كاملة ويحضرو الحباب والعائلة ، هنا مغايجي ليه حد بحال عرس ياسمين قليل لي جا فالعائلة
- عماد ( بلع ريقو ) : سيمانة كلها عرس أجدي الله يهديك نهار واحد براكة
- علال : وأنت شغلك ( بإستغراب) عرسك ولا عرسو جات حتى للعرس ودويتي
- عبد العالي ( ضحك) : هنا ولا لهيه الله يجيب أصحة وسلامة نهار واحد دايز ، حنا ماعندنا ݣرام ديال المشكيل
- الروطال ( بإستسلام) : لي درتيها أجدي حنا معاك فيها خاطرك .. نغزو عماد هامس فودنو :
أصاحبي حنا زربانين عرس العروبية راه فيه سيمانة على ݣدها ماعنديش الوقت أنا
- الروطال : ودوي معاه أنت ولا عاود ليه كاع لي كاين وهني الوقت اصاحبي .. جدك وعارفو كيكايفكر أش غانديرو معاه
- عماد : دوي أنت
- الروطال : لا دوي نيت انت سيمانة مالنا عندنا الموسم 3 يام كاع الى كثرنا سرطها وصبر
- سلاوها متافقين على العرس يكون فسوق الأربعاء وجا الوقت لي غايتفرقو العائلات الساعة كانت 10 ديال الليل .. رقية عنقات عنبر بالمحبة كانت فرحانة وباينة من ملامح وجها بلي عاجبها الحال مشات عنبر للكوزينة حالة البالكو وكطل ، خرج هو أول واحد هاز راسو فالبالكو بانت ليه كطل هزات يدها وشيرات ليه ببسلامة ، تبسم إبتسامة جانبية محرك راسو يمين وشمال ضار جهة طوموبيلتو حال الباب كايتسناهم .. طلع كل واحد فطوموبيل لي جا فيها عزيز دا مو وباه فطاكسي ورشيد ركب فطوموبيلتو مشا ، قبل مايشد الروطال بلاصتو هز راسو فيها غامزها عاد طلع خلاها كضحك ..
- عنبر : مسطي والله حتى ݣرام دالعقل ماعندوش .. مشات لبيتها نيشان حيدات داك القفطان لبسات بيجامتها وحيدات داك المكياج .. بدات حياة كتعيط عليها ..
هاني جايا بلاتي
- حياة : وسربي أجي نشوفو هادشي .. دارت تيليفونها يتشارجا ومشات عندهم للصالون .. ݣلسات وسطهم مقابلة مع الطبلة لي محطوط عليها داكشي لي جابو ليها
- رشيدة : تبارك الله هادي الخطبة وكبرو بيها
- سميرة : تبارك الله بنتي تستاهل ، دخلات عليهم رجاء مخسرة سيفتها كالسة بنرفزة
- تودة : ابشوية ياهاد المفافية على كرشك اويلي تي مال هادي مغبنة وعاقدة علينا تسعود
- رجاء : طلبت يونس نبات معاكم مباغش ، كالك مايباتش بوحدو تكول غانرضعو
- حياة : ومالك علاش مكترضعيهش ( ضرباتها مها لكتفها ) :
الله يمسخك تي مال بوك ماتحشميش تقزدرتي وزوينة هادي
- حياة : ومالي قلت شيحاجة دالعيب ياك راجلها حلالها هداك
- عنبر ( ضحكات) : ومالكم بغيتو ترجعو الحلال كذوب وعيب عندها صح
- سميرة : لا حول ولا قوة إلا بالله العلي العظيم تي هاد الجيل راه والله مابقى عندو غرام ديال الحشمة والو
- عنبر ( شافت فرجاء ) : تاعداك حلالك هداك راري بيه ورضعيه هانية قبل لا يجي ولدك ولا بنتك ياخدو ليه حقو
- رجاء ( مافاهمة والو ) : كيفاش نرضعو مافهمتش ؟
- حياة ( شافت فعنبر ) : أويييييلي هادي وقيلة كيلعبو پيسو فظلام ( شافت فيها ) واش مكتلبسيش ليه شوميزات وسترينغ وديري ليه العشاء الرومانسي وتشطحي ليه وتلبسي الخلخال
- رجاء ( بنفي ) : لا فدهاز كاعما جابو ليا هادشي ، كاع هادشي لي كتقولي عمرنا درناه الصراحة
- عنبر ( ميقات فيها ) : انتي منين جايا منين هالعار وهالعار .. اويلي حارمة السيد وحارمة راسك وعاي شوية راه بنات اليوم ولاو ياكلو من العينين وانت بقاي حالة فمك بحال بهابانة
- تودة وسميرة ورشيدة حالات فمهم فالبنات مابقاو عارفين راسهم من رجليهم .. نطقات تودة بإستغراب :
وانتوما منين جبتو هادشي ومنين عرفتوه .. نݣولو هتدي فايت فيها الزواج إيوا وانت أعود السبسي ؟
- حياة : الله يهديك اخالتي واش دابا حتى تجربي عاد تكوني تعرفي ، وزايدون هاد الفورمة راه كيحماقو ليها النصارة
- رشيدة ( جراتها من شعرها ) : ادوي المدودة ولسانك طوال وخرجو رجليك شواري مابقيتي تحشمي ولا ترمشي
- حياة : وماما ضريتيني ( وعتاتها ) اويلي هادشي راه عادي انتوما جيلكم جيل وانا جيلنا بوحدو ( طلقات منها نقزات من حداها وتقابلات معاها هازة مخدة عنقاتها وكتشرح ) تاعنداك اختي والله حتى داوية معاك بصح راه خاصك تعلمي وتاخدي دروس
- رجاء : وفين اناخد هاد دروس؟
- تودة : ماݣدك كاع هاد الباطرونات لي قدامك .. لالا هاد الجيل حامي ياخويتي
- عنبر : شوفي خلي نهار ندير العقد انتجمعو كاملين ياك ، وغانطلبو يونس تباتي معانا ونشرحو ليك انا وحياة بديطاي شوفي انعطيوك دروس لي مايعطيهم ليك وحتى الى بغا يعطيهم لك بالفلوس الكبيدة انا وحياة نعطيوهم ليك فابور ( غمزاتها )
- قاطعهم يونس كيسربي فرجاء تنوض .. ناضت لبسات جلابتها وهزات ساكها سلمات عليهم :
صافي نهار العقد انبات عندكم وندويو باش توريوني شنو ندير
- حياة : ويلي انا وعنبر فدمة كوني هانية نرجعوك خـــــــــــيبرة (ضحكات خابطة يدها مع يد عنبر ) ..
- نزلات معاها عنبر وحياة حتى لباب غير مشات هي ويونس وهوما تمو طالعين .. ضحكات حياة على راسها شافت فعنبر لي وراها :
زبلتها قدام خالتي وماما ناري بعد المرات كيخصني الهدم لهاد الفم أزلق فمي جيبها وقول
- عنبر ( كضحك ) : وانا تبعتك فهواك ياختي بعد المرات انت دايرة بحال مبطلات الصيام سبحان الله العظيم .. كديريها تجرني معاك شكوى بيك لله
- حياة ( كتحلف ) والله ياختي عمرها وقعات ليا وحتى فاش كنت مع مي فولاد صالح عمري خرجت شي كلمة على فمي
- عنبر : اجيتي لكازا وليتي تبرولي بلا فران ولي تقيسي اصاحبتي احتى نكونو بعدا مع بعضياتنا ، حتى انا عقلي ماعرفت فين كان ولكن الصح خاصها تفقه شوية .. وصلو لصالون كلسو عينين تودة ورشيدة عليهم
- حياة ( كتدبل فعينيها ) : والله أماما ماحسيت عارفاني مبلوزة كنبقا انبرول واش انا يديو عليا الناس
- رشيدة : مالك كتشالي عريانة وتشيري بالحجر وهالبهلان مخلية الباب محلول وتݣولك منين جاني البرد هي هادي
- عنبر : ولكن اخالتي راه بصح رجاء خاصها تݣاد من حالتها براكة أمسكينة مداز عليها
- سميرة ( تنهدات دايرة يد على يد ) : أحيانة ابنتي أش داز على بنيتي مسيكينة الحوايج كنا نتكساو من عامين ل 3 سنين وشوف تشوف كونما بنات الجارات وبنات العايلة لي كانو يلقطو من شراوطهم لقدام ويعطيوها تيليفون مكانش عدها
- عنبر : وشتي هاعلاش دوينا دابا راه جات للمدينة كبيرة دنيا عامرة ومخلطة تحيد عليها بوشرويط وتشري حوايج جداد راه يلاه عندها 25 اويلي لا هي لا راجلها باقيين صغار
- سميرة : تاديك المجحومة ديال مرات عمها شراوط لي جابت ليها فدهاز تحشمي تشوفيهم انا مها وكبر من عمري ، لا كومبليزوات بحال البنات لا بيجامات لا جلابة زينة لا والو حتى داكشي لي يديرو البنات لوجهم مجابوهش ليها ريحة 400 دريال مساوموها بيها
- حياة ( تغزفات) : لا حول كون كنت نشتف على مها بنت الحرام ، وراجلها أش دار؟
- سميرة : نهار خدا ليها ريحة داخل لدار مو قلباتو ، كاتليه ياكمنا كنو نريحو حوايجنا ابلكافور وندوزو المسوك ونوضو نايضين ، فاش مداهاش فيها طلعات لبيت فاش كانت حياة فكوزينة وهرساتها ليها حنا والواد ماشتهاش
- عنبر ( ببرود ) : شتي انا هادي نخبطها ندخل على جدها لحبس والله العظيم مانشعر
- تودة : انت كلمة جوج تخبطي ؟
- رشيدة : عاد غاتعرفيها أفاطنة راها من صغرها وهي هك شحال كانت كتجيب فتبريات نسيتي ؟
- تودة ( كضحك) : كدابز هي وتغرقنا حنى نوليو واحلين مع موات دراري والبنات لي كانت كتهرمك فيهم ، انا عند بالي تهدات ساع هي هي
- رشيدة : تهدات امن موت المرحومة والمرحوم الله يرحمهم اما دابا راها رجعت كيكانت الله يستر امتكون زادت نغزة
- عنبر : شادين فيا النميمة وانا حداكم خليوني احتى نضرق جنابي وݣرضوني كيف بغيتو واش انا كنت كنظلم شي واحد ؟ كاع لي سلخت هوما كانو يجبدنو
- رشيدة ( تفكرات واحد ذكرى وبدات كضحك) : عقلتي افاطنة على بنت القايد ؟
- تودة : اويييلييي ربيعة عقلت عليها شداتها عطاتها طرحها وجراتها فالغيس وجابت الروث ديال البݣر وطلساتو ليها لكمارتها ، ودخل للبنت فعينيها جراو بيها لمدينة عند طبيب العينين
- رشيدة ( تقادات فالكلسة ) : بدينا نزاوݣو ومشينا دينا سكر لدارهم نطلبو ونرغبو بالكشايف ، البنت راه صغيرة كان عندها 8 سنين داك الساع
- عنبر ( ببرود بحال الى عمرها دارت شيحاجة ) : هي لي كنت نخرج من المدرسة وكانت كتخلي حتى يتجمعو البنات وتبقى تعيط عليا المبروصة ، كتبان ليهم يدي ملونة وسماتها عليا كتقولهم مبروصة ليد وشعر
- سميرة : اويلييي واش جاب الشعر لهضور ؟
- عنبر ( قلبات ليها ودنها تحت خصلات من شعرها الاسود كانت ضورة بيضة بحال 4 دريال )
- سميرة : سبحانك يا عظيم وهادشي ديال ربي سبحانه اويلي عبرات عليهم تاعنداك ابنيتي هاد الزمان الواحد يدوي على حقو تحني راس ياكلك دياب ( تنهدت )
- عنبر : تاعنداك اخالتي ماكنت نتعدا على حد ولكن كان لي يجبدني يلݣاني ماعنديش مع كوتوكوتو بزاف كنتعصب لساني كيطوال ويدي كتصبقني
- رشيدة : وكون لقفتي اديك العݣوزة ديال داك الهبيل لي كتي واخدة
- عنبر : مكانتش كتنزل لداك المستوى واخا هكاك كانت كتنخنزر والكلام تلوحو لولدها فاش كتكون معاه دايرة فيها كلاص وهي وتريكتها ديݣولاص
- حياة ( باغية تبدل ليهم المود ) : شدينا الحتيت ونسينا الكاديات ماحليناهم نبداهم انا ولا تبدايهم أنت ؟
- عنبر : حلي حلي ..
- بدات حياة كتحل فالكاديوات .. كانو 4 دالميجامات كيحمقو مقطنين وسخان حينو كان شهر 1 البرد وشتياني .. الثلج لي طايح فبني ملال وأزيلال وإفران ونواحي عاطي واحد البرودة قاصحة للݣاع المدن ، جلابة فالبوردو أنيقة ساك فنفس لونها وصباطها ، عاد 4 سيكان اخرين وسبابطهم ، بواطة كبيرة حلاتها كان فيها براسي وساعة روليكس هزاتها حياة مبهورة :
زعمة تكون دوريجين هادي العار ؟ سكتات عنبر هازة البواطة قلباتها كان فيها واحد لاكارط فيه إسم روليكس مع واحد سيري ، هزات داك سيري دارتو فكوكل وطلعات ليها ساعة وثمنها تشوكات شافت فحياة ونطقات :
يا جدك ولاهيلة أصلية العار شوفي لحسك الثمن شحال .. حياة خرجو عينيها نطقات بلاما تشعر :
هادشي غابلعاني واش جاب
- رشيدة ( قرنت حواجبها ) : كيفاش بلعاني ؟
- حياة ( عضات على لسانها متداركة الموقف ) : زعمة هادي أخطبة وشنو جاب خلي فدهاز
- رشيدة : ومال عنبر رخيصة السيد مسك عليه سيدي ربي خليه يبرع مرتو بصحتك وراحتك ابنتي تلبسيهم بالهنا .. تودة كانت غاكتشوف وساكتة متحصرة على هاد تزويجة لي بنسبة ليها ملاوطة ، باقي الكادويات كانو كريمات وجوج عطور أصلية وحدة لانتيغدي الݣرونة وثانية لابيل ديال جون بول .. ماعجبهاش الحال من هاد الكادويات الكثيرة وكلهم ماركات واعرين جاها زاد فيه وغير بدخ على الخاوي ، جمعات هي وحياة دوك الكادويات داتهم لبيتها دازت للكوزينة سخنات شوية ديال الدغميرة مع دجاج حطاتهم كلات دخلت للحمام غسلات سنانها ودخلات لبيتها ..
- دخلات عليها حياة يلاه باغية دوي بدا تيليفون عنبر كيسوني طلعات ليها نمرتو فتحات الخط ونطقات بصوتها الأنثوي :
علاش درتي بحال هكا ؟
- الروطال : حتى انا توحشتك جيتي زوينة اليوم
- عنبر : براكة من الطنز أفاروق لاش جايب ليا ساعة كدير زبالة دالفلوس ودوك كثرت الكاديوات
- الروطال : واش أنت هبيلة ولا مالك ؟ وقيلة راه جدودي مافخبارهم مايتعاود هوما وعمي .. شنو بغيتي نجيب ليك ؟
- عنبر ( تأفأفات ) : جيب ولكن هادشي ديال دوريجين لا .. هبط لدرب السلطان كاينة العجب ورخيص ساعة روليكس ميطاسيو ب 150 درهم
- الروطال ( بجدية ) : هادشي لي خاص مرات حيدر لابسة المدرح عجبك ماعجبك الحيط ݣدامك
- عنبر : جهلتي انت واش شادها زكارة معايا ضد فيا منشوياك ؟
- الروطال : طريفة دالحشيش انت تنشويني ؟ غدا غاندوز نديك تقداي لي عجبك
- عنبر ( عوجات فمها بحال الى كيشوفيها ) : مامسلياش يلاه انجمع وراقية ( قاطعها ) :
غدا السبت أشريفة خلينا نكملو هاد سيرك وهني الوقت ( كيبان ليه يخرج ليها من تيليفون يمرمقها معاها ويبرد ولكن عمرو حط يدو على شي مرة )
- عنبر : اووووف مكانوضش بكري
- الروطال : ورا العصر اندوز نديك برب المعبود ديري معايا هاه ولا هاه بلابز عينيك ( مشات صوتو ورجع) نحيدهم ومنحنش فيك ( قطع عليها )
- حياة ( كتشوفيها كتشوف فتيليفون مصدومة ) : أش قالك مالكي ؟ ( مجاوباتهاش وقفات ومشات لعندها كتحرك فيها ) تي اش ݣالك دوي
- عنبر ( شافت فيها كترمش حالة فمها ) : قاليا بزازلك نحيدهم ليك ومنحنش فيك
- حياة ( جاتها الضحكة شداتها بزز ) : اويلييييييي كيفاش بزازلك واش سمعتيه مزيان مايمكنش وعلاش ؟
- عنبر ( بعصبية ودنيها كيصفرو نفاعلات ) : واش انا صمكة قالك بغا غدا يجي يديني .. كلت ليه مافياش كالك الى درتي هاه ولا هاه بزازلك نحيدهم ليك ( حياة بقات صابرة حتى عيات ماقداتش تصبر تكرشخات بضحك .. كضحك شادة على كرشها حتى دموعها ساحو
- عنبر : ضحكي انا هجرتو ولد الحرام من فعلو غزفني الكيدار لاخور مناخرو بحال واحد مقسوم على واحد الكوينيدي لاخر
- حياة : ولاواه لاواه نيفو منݣاد تبارك وزين زيييييييييييين أختي ورجووولة أما العرض خلاص ويلي اصحايبتي أما واحد الطولة تبارك الله وصلات على نبي كيحني راسو عاد كيدخل
- عنبر : راه ݣلت ليك كوينيدي
- حياة : اش هادي عاوتاني ؟؟
- عنبر : دخلي لكوكل وقلبي عليها وتعرفي ونوضي ترݣدي وخليني حتى انا نرݣد
- حياة ( تنهدات ) : فخبارك والله ماكرهت نسافر
- عنبر : مابقا والو نطلعو للغرب وتفوجي مع راسك ماتعرفي تلقاي شي غرباوي بوݣوص فبلاصة منديرو عرس واحد نديرو زوج
- حياة ( خيبت سيفتها غادية جيهت الباب ) : فالك مفلول أختي تصبحي على خير .. خلاتها وخرجات لبيتها حتى هي تنعس ..
- صباح فاقت بكري خلاتهم ناعسين عيانين من الخطبة ديال البارح دخلات للكوزينة حطات طبسيل فيه زيت واحد فيه الكوفيتير عمرات اتاي بشيبة حطاتو هزات الخبز مابغاتش تسخنو كيعجبها تاكل خبز الدار بارد سلات الفطور ديالها غزلات الكاس رضاتو للشبكة طرفات الكوزينة عاد توجهات للبيتها دارت ليكغو ديالها مع ماسكارا وݣلوص ، لبسات سروال ديال الدجين واسع من التحت مع سبرديلة بوليرو ديال الصوف بحزامو شعرها جمعاتو سفنجة هزات ساك تيليفونها وفلوس الطاكسي .. خرجات من بيتها تلاقات مع رشيدة يلاه فايقة كتعكف راسها بزيف حياتي .. شافت فيها مغوبشة بإستفهام :
فين غادية على صباح ؟
- حياة : راه كلت ليكم لبارح عندي شوتينغ مع واحد النݣافة
- رشيدة ( مافهماتش أش قالت ) : أش هاد سوتينغ تاني ولا عبو ريح ؟
- حياة : واحد النكافة غاتلبسني لباسي وتقادني وكتصورني بحال اشهار وكتحطهم عندها باش تجيب الكليان فهمتي ، كانو شافو الاشهار لي درت لشومبوان وعيطو عليا وراه علمتكم لبارح
- رشيدة ( طلعتها ونزلتها ) : وعداك تعطلي هاديك هاه
- حياة : غانتعطل واش انسكن اماما نسالي نكمل ( تمشات وعاودت رجعت) راه دويت انا وعنبر مع رشيد على قبل المحامي شاف واحد كيعرفو مزيان وحتى الثمن غايدير معانا مزيان ، غير يعلمنا بنهار باش نمشيو عندو
- رشيدة تنهدت ساقلة حدها هزهزات براسها ، بنتها خرجات وناضت كتجر فرجليها للحمام وهي كتفكر دوز عليها سعيد العذاب عمرها دوات كتعرفو كيخونها وكيموت على القصاير وكل ليلة يجيها رجليه كيلعبو لاماليف وسكتات وصبرات حيت ماعندها فين تصد ولا تحط الراس وكملها وجملها باع الدار وهوما فيها وجرا عليها هي او ولادها ، خرجات من الحمام ماسحة وجها بالفوطة وتوجهات للكوزينة نشراتها فالبالكو عاد بدات توجد الفطور .. فاقت تودة طلات عليها فالكوزينة :
صباح الخير
- رشيدة : صباح الخير .. دخلات تودة لحمام وخرجات داخلة عندها للكوزينة لقات وجها مغير وساهية جبدات شي مسمن من الفريݣو دارت المقلة فوق البوطة حاطة فيها المسمن ، هزات راسها فيها مسولاها :
مالكي ماشي من عوايدك تبقاي حانية راس وساكة ؟
- رشيدة ( فاقت من سهوتها هازة راسها فتودة ) :
حياة عاد خرجت ماعرت شنو عدها مع واحد النكافة قبل لا تخرج كاتليا بلي هي وعنبر دواو مع رشيد على شي محامي
- تودة ( ميقات فيها ) : ياكما حنيتي ارويشيدة ؟
• رشيدة ( جاوبتها بلاما تفكر ) : اويلي نحن هداك واخا نشوفو كيتشوى ففران ݣادي منحن فيه أفاطنة على مدوز عليا ودوز على بنتي لكن اختي بقات فيا القهرة وتمارة لي دوز عليا فنيت عمري اختي 46 عام فعمري ومابيناش عليا بحال الى عدي 60 عام
- فاطنة : شوفي أرشيدة اختي انت لي درتيها راسك ورضيتي بالقهرة وتمارة والحݣرة عيينا معاك حسبتينا غير غايرين منك كنا باغيين ليك الخير اختي ولكن انت درتي لي فراسك
- رشيدة ( حطات صينية ) : ندمت اختي ندمت كاملنا كنديرو الغلاط ماكانش عندي العقل عد بالي ندير راجل فكتافي يسخنهم ليا ويكون باين بنتي
- فاطنة : تي أشمن باين بنتك .. باها راه مفطح فسطات عمرو سول عليها ولا خسر عليها درهم واحد معارفها حتى شحال عدها من عام
- رشيدة ( كتشقلب فأتاي ) : أودي هداك حريرتو بوحدها المرة دايرة ليه الراو داو حموسو يدويو ولا يتفافا ݣدامها ماتعقلش عليه هداك حسبناه بحال الى مات
- فاطنة : يصاوب الله حتى دابا الحمد لله ماوقع والو المعروضة من الخير لي دازت على الراس مزيانة .. هاهي جامعة راسها وخدامة على راسها الحمد لله الله يسهل عليها بشي نقرة فاش يغبر نحاسها
- رشيدة : اللهم آمين ياربي
- فاطنة : بغيت انفطر ونمشي نطل على رحيمة عيانة لبارح مجاتش للخطبة تمشي معايا تسرحي رجليك شوية ؟
- رشيدة : واخا ندي دراري يسرحو رجليهم شوية قنطو مساكن .. حطات تودة المسمن فاقت سميرة حتى هي تجمعو على الطبلة وعنبر خلاوها ناعسة حتى تفيق على خاطرها ..
__________________________
- بلاكة كبيرة مكتوبة فيها نݣافة لاسويس ، محال كبير أنيق خدامين فيه زوج بنات الأثاث مبورة فالڤيغ كنار وذهبي طبلة كبيرة دزاج فيها فوقها مجلات تكاشط وقفاطن أشكال أنواع معلقين ..
- دخلات حياة ستقبلوها البنات أحسن إستقبال ، حطو ليها القهوة وشوكولا .. عاد جات مولات الشي سلمات عليها مرحبا بيها عطاتها للبنت لي مكلفة بشعر والمكياج قادو ليها وجها وشعرها جمالها بان وطغا ومع كحولية عينيها وشعرها جات بحال الأميرة ، لبسوها تكشيطة فالموڤ بارد مع التاج والڤوال .. خرجات للصالة الكبيرة فين كان المصور كيتسناها
- أمينة : حبيبة أجي معايا .. هزات على تكشيطة ديالها بغات تبعها تحل الباب وتسمع صوت رجزلي ناطق :
لالة أمينة ..
- دخل شاب طويل لابس سروال ديال الدجين تريكو طالع بالكول فالݣري مع مونطو ، ملامح وجهو زعرين وعينيه زرقين بحال لون السما الصافية .. إبتسامة خلابة على وجهو كان كيبان بحال شي ريفي بديك الزعورية بقات غير مبهوضة وكتشوفيه رجعات عندو أمينة معنقاه ..
- أمينة : زارتنا البركة احبيبي طولتي علينا الغيبة .. ، حياة حدرات راسها تابعة البنت لي دوات معاها باش يتوجهو للبلاصة فين غايكون تصوير بداو الجلسة وحياة كدير داكشي لي تطلب منها حتى سلاو باللبسة الاولى ودازو لثانية ولثالثة ، كملات اللباسي سلات ولبسات حوايجها
- البنت : تغسلي وجهك ؟
- حياة ( بنفي ) : لا كنغسل وجهي بواحد صابونة ماجبتهاش معايا ( ضحكات) إلى كانو غير لانجيت نمسح وجهي بيهم
- البنت : أه واخا ..
• مشات وتمات راجعة فيديها لانجيت عطاتهم ليها مسحات وجها حتى رجع صافي من المكياج هزات ساكها وبقات واقفة مقابلة مع سرجم ديال الزاج لي كان كيشوف لشارع الدنيا تغيمات وقطيرات خفاف ديال الشتا بداو كينزلو .. تحل الباب ودخلات أمينة وإبتسامة عريضة على وجها كان باين عليها التاويل ومن لكنة ديال كلامها كانت باينة ماشي من كازا :
تبارك الله عليك ازين ماشاء الله تصيورات جاو كيحمقو مانيفيك ، إن شاء الله مغايكونش اخر تعامل بيناتنا
- حياة : إن شاء الله مرحبا ( مدات ليها أمينة جوا ماقلباتوش دارتو فساكها نيشان ) خليت ليك الراحة نمشي قبل لتجهد الشتا .. سلمات عليها من الحناك نزلات و أمينة تابعاها لقات داك السيد كالس داير رجل على رجل وشاد تيليفونو هز راسو فيهم او ولا نزلو .. حياة كادور فراسها وتساءل شكون هدا باين صغيرة على أمينة هو ف30 وهي كان يكون عندها ديك 47 عام ( دابا راه ولاو صغار كيموتو على السيدات لي كبار عليهم فالعمر وانا شغلي ) يلاه وصلات عند الباب وأمينة وراها حتى بدات الشتا كطيح خيط من السما بحال شي نفورة كانت حابسة ونفاجرات
- حياة : الله اكبر مجايبة معايا حتى مظل زهر زين هدا
- أمينة : دخلي ݣلسي حتى تسحى وسيري ( ترددات حياة فالاول ولكن مكان عندها حتى حل اخر ضارت وتوجهات للفوتوي ݣلسات معنقة رجليها وكدور فعينيها )
- أمينة ﴿ ݣلسات مقابلة مع سيد قريبة ليه ) : شي خبار على أية ؟
... ( بلامبالاة ) : فضينا شركة
- أمينة : وايلي وكنتو مواتيين تبارك الله كان بقا ليكم غير واحد شهير وديرو لاكط أش وقع ؟
.... : كترطا بزاف ديك خيتي معنديش مع داك تبوزيق الخاوي يدي غاتغفلني نصدقك مخمج ليها كمارتها اللهم حبااااس
- أمينة ( شافت فين بنص عين وحياة طالقة ودنيها ) : ويلي أجواد رجوع لله ولاواه حشومة والبنيتة موال صغيرة دير عقلك وحيد منك هاد نبايز
- جواد ( تبسم نصف إبتسامة ) : صغيرة على فم جمل واش انا باغي نتزوج نتهنا مع دماغي ولا نبدا نربي الله يهدي ختك لي غمساتنا فهاد المرقة الباسلة
- أمينة ( بصرامة ) : جواااد ولاواه عاود هي محطاتش ليك السيف على عنقك وقاتلك خودها ، هي اوراتها ليك ورجعات اللور
- جواد ( خشا تيليفونو فجيب ديال المونطو ) : درت ليها الخاطر وبقيت انا بلا خاطر ، طارت نزلت قاتلك والو تديها من الرباط عينها فرباطية متجيبهاش من شي قنت خور الى مكانت رباطية
- أمينة ( دارت رجل على رجل مسندة يدها لي مزينة ببالبراسليات ) : باين سيييغ حيت كيبقى الأصور ديالنا وفين تزادينا معلوم اتبغيك تاخدها رباطية
- جواد ( بلامبالاة ) : انا كنت باغي نستقر ندير داري وليداتي 34 عام راه درناها واخا نجيبها من الموزمبيق المهم نكون مرتاح .. فالاخر جايبة ليا برهوشة كل ليلة هاهي مع صحاباتها قاتلك باغية دوز شهر الغسل فميامي لاواه البعابع ظل شادة داكشي ديال المصاحبة وبغات طبقو ليا مالي على فريع ( حبس الهضرة ) نبقاو نݣولو شيحاجة مخاصهاش تݣال اخالتي خليني صاقر
- أمينة ( حركات راسها بلاحولة وشافت فحياة لي ساهية ) : كبيدة حياة سمحيليا نسيتك ، انا هكا مع هاد الجنيِّن فينما كيجي عندي كانسى راسي
- حياة : لالا مكاين حتى مشكيل خودي راحتك ( شافيها ورجع شاف بعيد ) انا خاصني نمشي تعطلت على الدار الصراحة
- أمينة : ولكن راه مزال ماسحاتش الشتا ، طاكسيات راه مغايبغيوش يوقفو ليك ( وقف حتى هو ) فين غادي انت عاود ؟
- جواد : خاصني نمشي جيت انطل عليك باش ماتكعايش
- أمينة ( بترجي ) : تقدر توصل هاد البنيتة معاك الله يرضي عليك ، الشتا ومغاتلقاش طاكسي
- حياة : لالا والله انا نشد طاكسي ماعليش
- أمينة : لا حشومة ويلي ( شافت فيه ) توصلها ؟
- جواد ( هزهز راسو ) : ماعنديش مشكيل خرج على برا وحياة تبعاتو محرجة من الموقف لي حطاتها فيه أمينة عمرها تجرأت تركب مع شي براني وهي بوحدها طان غالب عليها الخوف وتوتر مزيرة على ساكها .. ركب فطوموبيل لي كانت قدام المحل مبلاصيها كانت من نوع ميرسيديس بقا كيشوفيها حتى طلعات حداه سادة الباب وشادة على ساكها بتوتر
- جواد : عفاك واخا ديري السمطة ؟
- حياة : اه واخا جبدات السمطة دارتها وشدات ساكها حاطة عليه يديها بزوج ، شافيها بنص عين كانت من ݣلستها مامرتاحاش شافيها بملامح عادية :..
واخا تعطيني لادريس ؟
- حياة ( فتات عليه لادريس ) عرفتيها ؟
- جواد ( هزهز راسو وديمارا شاد الطريق ) .. خدم موسيقى فطوموبيل وغادي بكل هدوء على وديت الزلݣ وشتا لي كتصب شافت فيه بنص عين ورجعات شافت فشاشة لي قدامها كانو خطان غير متوازيان بين الموسيقى لي مخدم ديال العيطة وبي شكل ديالو كيبان راقي ، وباين لاباس عليه من طوموبيل وحالتو ..
- جواد ( بدون سابق إنذار ) : فين كتعرفي أمينة؟
- حياة : واش خالتك أول مرة نخدم معاها
- جواد ( شافيها وتبسم ) : كنتي مهيتة معانا
- حياة : كيفاش مهيتة مافهمتش ؟
- جواد ( تبسم ماسح تحت نيفو ) : طالقة پرابولاتك زعمة ودنيك طالقاهم
- حياة : لابا انتوما كنتو كتدويو بجهد وانا سمعت ( مارضاتش )
- جواد : فاش خدمتي معاها ؟
- حياة ( عرفاتو قصد خالتو ) : شوتينغ .. هزهز براسو لايح عينو لواحد المحال ( شافيها )
- جواد : واخا نوقفو واحد 5 دقايق ؟ هزهزات ليه براسها بلاصة محيد السمكة ونزل سد الباب ورجع حلو :
فيك الجوع ؟
- حياة : لا مافياش .. رجع سد الباب وتوجه لواحد المحال بان ليها بحال سناك بقات كتسنى فيه ، حتى تم راجع هاز واحد ساشية فيديه حل الباب ودخل سادو فتح الساشية وجبد واحد الخنيشة مدها ليها :
شدي
- حياة ( شافت فديك الخنيشة ) : لا راه مافياش الجوع
- جواد ( أشر ليدو ) : خودي ، دوݣي وعاد حكمي .. شدات ديك الخنيشة بتردد كان سخونة ، شافت فيه هو جبد من خنشتو واحد البريوة كبيرة فتحات ديالها لقات فيها زوج بريوات كبار .. بدا كياكل وهو مامسوقلهاش شافيها كتعض فالبريوة بشوية بقا مركز معاها حتى فيقها بصوتو الرجولي :
كيجاتك ؟
- حياة ( شافت فيه مهزهزة راسها كتبنن كانت عامرة بالحوت والڤيرميسيل ) : واعرة
- جواد : فينما دزت من هاد البلاصة كندوز ناخود من عندهم .. كيديرو داكشي واعر وديال الدار
- حياة : دايرة بحال البسطيلة ديال الحوت
- جواد : كتعرفي ديريها ولا غير تاكليها ؟
- حياة ( تبسمات ) : بجوج بيهم
- جواد : حادݣة مع راسك
- حياة ( بلعات الدغمة لي ففمها ) : ماشي شاف ولكن الحمد لله كنسلكوها
- جواد : مزيان الالة براڤو ليك انت ماشي بنت كازا باينة من لاكسو ديالك
- حياة ( حركات راسها ب لا ) : لا ماشي بنت كازا ماشي بعيد باش ستاقرينا هنا
- جواد : شحال ديال الوقت ؟
- حياة ( كانت بغات دور فيه ولكن حشمات مع راسها حشومة هاد الزين وتبوݣيصة يدور فيه الواحد ) : شي 6 شهور دابا
- جواد : عجباتك كازا ؟
- حياة ( حركات شفايفها ) : الصراحة كازا هي زوينة غير شوية كتخلعني ( ضحكات )
- جواد ( هز حاجب ونزل الثاني ) : علاش غاتخلعك شنو فيها مايخلع ؟ زعمة حيت كبيرة ولا شنو ؟
- حياة : اه حيت كبيرة بزاف وأول مرة نحط رجلي فيها مامالفاش على دنيا عامرة داكشي باش
- جواد ( سالة ماكلتو هز ديك الساشية حطها اللور حتى يدير ويلوحها .. ديمارا الطوموبيل سايݣ غير بشوية ) : هي جيتي من مدينة صغيرة على حساب كلامك
- حياة ( مكتستعرش نهائيا تقول جات من دوار بكل إفتخار ولكنة ديال دفاع تدفقات من كلامها ) : ولاد صالح واحد دوار قريب لبرشيد دوار زوين طبيعة وناس ظريفين ( شافيها بإبتسامة ) :
بحالك ؟
- حياة : باش عرفتيني ظريفة ؟
- جواد ( هز قرعة دالما شرب منها عاد جاوبها ) : الكتاب كيبان من اخر صفحة
- حياة ( ضحكات ) : مابقاش من اول صفحة ولا من اخر صفحة سبحانك يا عظيم
- جواد : بعد المرات العنوان كيظلم الكتاب وكيظلم الأسلوب وسرد ديال الكاتب وديال داك الكتاب ولا الرواية ، وكيخليك كاتزعمش تقراه وكتصدق مضيع كتاب زوين والعكس صحيح فهمتي ( شافيها )
- حياة : لا مزال مافهمتش كنحاول نفهم ( مكانش عندها إشكال تقول مافهمتش أو ماعرفتش )
- جواد : بون انا نشرح ليك ..
- جواد ( ضار على رومبوا مكمل الطريق ) : بعد المرات كتشوفي كتاب الغلاف ديالو واعر مفيك والعنوان كيجيك فشكااال وكتبغي تقرايه ولكن فاش كتقرايه كيجيك لا علاقة تافه فهمتي ؟
- حياة( حركا راسها بأه ) كمل كلامو :
وبعد المرات العنوان كيكون والغلاف حتى هو نورمال زلكن فاش كتقرايه كيجيدك كتبغي تزيدي تقراي وتمتعي
- حياة : وعلاش قلتي الكتاب باين من آخر صفحة ؟
- جواد : حيت بعد المرات الكاتب ولا الكاتبة كيكونو غاديين مزيانين كيجيو حتى لاخر لقطة وكيعݣروها وكيديرو شي نهاية مافمها مايتشاف وهنا غير كورو وزعلكوها هاباش ݣتلك الكتاب كيبان من اخر صفحة كتعرف واش القصة كملات مزيان ولا كانت غادية وكعوروهاا فالأخر
- حياة ( بإبتسامة ) فهمتك ( جاها واعي وقاري مزيان وعقلو عامر دماغ عكسها هي لي عمرها قرات كتاب من نهار ݣلسات من القراية
- جواد ( شافيها كتشوفيه غير حصلها دورات وجها كتشوف قدامها حسات براسها داك التوتر بدا كيمشي منها قاطع تفكيرها ) : شنو سميتك ؟
- حياة ( شافت فيه ) : حياة
- جواد ( هزهز براسو ) : أنا جواد مزال غاترجعي عند امينة ؟
- حياة ( مامالفاش ليها تهضر بهاد الأسلوب كانت لي يسولها ومتعرفو ضور فيه بينها وبين راسها : واش هاد زريقة يضورو فيه الناس ويفلتوه الله يربي الله أحياة فين عمري شفتي الخوخ الأوربي هاهو قدامك مغربي ) :
الصراحة اليوم سالينا الخدمة تقدر تجي شي خدمة من بعد ولكن حاليا لا
- جواد ( شافيها محرك راسو بقا ساكت مدة ورجع هضر ) : ضرتي كازا ولا والو ؟
- حياة : شوية ماشيش بزاف
- جواد : مشيتي للمول ؟
- حياة ( حركات راسها بلا بالعة ريقها ) : لا الصراحة ماعمري مشيت ليه قليل فين كنخرج
- جواد : هي ماشتي والو ( شافيها بإبتسامة) إلى عندك شيحاجة هاد الويكاند الجاي أنا عارض عليك ، إلى بغيتي ؟ ( رجع شافيها )
- حياة ( غانكون أكبر بغلة الى قلت ليك لا ) : والله ماعرفت بنت خالتي قربات دير لاكت ماعرفت واش غانسالي معاها ولالا
- جواد : صافي إلى كنتي مسالية نتلاقاو ماكنتيش ماعليش نقد ناخود نمرتك ؟
- حياة ( هزهزات راسها بأه ) : واخا .. جبد من جيبو تيليفون iphone 15 pro max فتحو ومدو ليها ، هزاتو بين يديها كتبات ليه نمرتها ورجعاتو ليه قيد فيه حياة وسونا عليها تم تم
- جواد : سجليها ( هزات ليه راسها بواخا ) .. وصلو لفين ساكنة حياة وقف حيدات السمطة وشافت فيه :
شكرا بزاف على البريوات وعلى توصيلة وسمحلي إلى برزطك
- جواد : بإبتسامة ) انا لي كنت داوي بزاف انت كنتي غير حالة ودنيك وكتسمعي ، الالة بصحة وراحة ماشي شيحاجة الى عجبوك نولي ناخود ليك معايا
- حياة ( ساحت فعينيه لي حمقوها وعطرو لي مخلط بريحتو الرجولية حدرات عينيها وتبسمات ) :
ربي يخليك انا مشيت .. حرك ليها براسو نزلات من الطوموبيل كانت شتا مزال كتصب ولكن ماشي بجهد لي كانت قبل ، خرجات السوارت من ساكها ودخلات ضارت كان مزال واقف حتى سدات الباب عاد مشا
- حياة ( شدات على قلبها كتفرنس ) : ياربي حبيبي واش انا فحلم ولا علم واش هاد زين الفتان وصلني أنا تقول غير خارج من شي فيلم تركي ضحك ليك الميمون وسعد أبنت رويشيدة .. حدرات راسها حالة باب ديال الدار لداخل سداتو وتمات طالعة حطات البوط ديالها فدروج وخشات رجليها فبانطوفتها ..
- الدار كانت نقية ومجففة ، الكوكوت خدامة فالكوزينة دخلات لصالون لقات عنبر ݣالسة فالصالون كتصبغ فظفارها مغوبشها وعاكفة راسها بزيف حياتي فوق طبلة محطوط الما وبكية ديال الفانيد كان ديال الوجع ..
- حياة : يحسابلي أنلقاك ناعسة
- عنبر ( هزات فيها راسها ) : وعليكم السلام ورحمة الله
- حياة ( تبسمات كتزول فالمونطو ) : من الفانيد وجوابك باينة لعبات عندك
- عنبر ( زفرات ) : الخ*** ليل مانعستوش بالوجع وصابحة فيا ولاخور داير معايا يجي يديني وانا ماكرهت نتلوى فمانطة نضرب شي زلافة البيبوش ونعس والبرد هذا وشتياني ماعرفت فين باغي يسوݣ بيا
- فقهوة خارجة على كازا بلدية الديكور كان مغربي بلدي قح معروفة بأتاي فقط والحلويات المغربية القديمة .. حط السكوتر ديالو مزول الكاسك لابس سروال كحلة ديال الكيطة وقبية كحلة مكتوبة بالبيض ، مع سبرديلة فلون البيض ريحتو الرجولية عاطية دخل للقهوة رامي عينيه كان طارق وعماد وعصام ݣالسين مشا لجيهتهم جر الكرسي وݣلس ..
- عماد : الوقت هو الوقت
- الروطال ( من ديما مالفين مرة فشهر كيديرو ݣلسو رجالية فهاد القهوة بعيد على الناس يتناقشو ويرتاحو) من دار لعندكم ( أشر لسرباي طلب براد أتاي والفقاص )
- عصام ( شاف فيه ) : ولد عمك مو بغات تزوجو .. طارق شافيه بمعنى من نيتك
- الروطال : مالو مومو كيرضع صبعو تزوجو ( شاف فطارق ) ايمتا وقع معاك انت هاد البلان
- طارق ( جغم من كاسو دأتاي) : نهار كان العشا عندك من ناظور لعندك نيشان .. كنت غانعاود لك حتى لقيت الدعوة مخلطة وانا نݣلب
- عماد : داكشي باش معيطة علك ؟
- الروطال : مالها غاتعيط ليه حبا فيه نكونو واقعيين اصاحبي
- طارق ( بعصبية ) : داك الق*** ديال راجلها باغي يركب ليا فوق ظهري .. كيعرف شي واحد باغي يدهل كعاه شركة وعندو شي بنت
- الروطال ( تعصب ) : تاشوفلك الميكروب .. باغي فيمن يلبقها باش يربح منك أنت
- عماد : ومك اش ݣالت ؟
- طارق : وهي علاش معيطة غير ود راجلها .. معمرة طبلة وتمثيل اصاحبي أش كيديرو ليه عشرة لضس سمعتهم ليها نايض يدافع عليها عاد مفكراني
- الروطال : كلها كيضرب على **** حتى واحد ماه هم خور ماعندها سوق وحدة سامحة فولادها اش كتوقع منها حتى انت مباغيش دير عقلك ومزال عندك داك الݣلب مو كيحن مرة مرة
- طارق : مجاتش لبالي توصل لهاد المواصل ، يحسابلي بغات تصلح العلاقة بيناتنا وتسول على بناتها
- عصام : كون بغات تصلح اتصلح زمان ماشي بنات ولاو عزبات .. قاطعهم السرباي حط الصينية فيها براد وجوج كيسان قدام الروطال وطبسيل صغير فيه الفقاص .. كيما كل واحد فيهم قدامو صينية غير الحلوة لي كانت مختلفة من واحد لواحد
- الروطال ( شاف فعماد ) : ماخدمتيش ؟ ( كيشقلب فأتاي )
- عماد : عندي الليل .. ايمتا غاتخرج انت وعنبر على ود الدهاز ؟
- الروطال ( ببرود ) : حتى دهاز خاصنا نتشاورو فيه معاك ولا كيفاش امعلم ؟
- عماد : سولت
- الروطال : داكشي لي خاصك تعرف مزال مالحݣناش لي ، هاد التخربيق مكايدويوش فيه الناس ( غمزو) .. عماد سكت مابقاش جبد الموضوع
- طارق ( جغم جغمة من كاسو ) : ݣالو ليا منعم سافر على برا يمكن باغي يفلاشي وجهو بشي جلدة يضرݣ الرايا دجمايكا لي تغيزت فكمارتو
- عصام ( كيضحك ) : ولكن اصاحبي هذا لي ضربو راه بدل ليه لافيشور ديال كمارتو ، عين السيد مشات عندو زهر لي ماتفرݣعاتش ليه
- عماد ( كيشوف فخوه لي مهدن شاد كاسو وكيقشقش فداك الفقاص بالهداوة منشوي عليه ) :
العجب لي مقدمش شكاية بهذا لي دار ليه هاد الحالة
- عصام : ولد عمو جا عندي لاجونص كان حاط عينو على واحد كليو عطا فيها العربون .. ݣلسنا كنقرقبو الناب ݣالك غفلو كان ليل مشافوش ݣاع بان ليه اخيال كحل هاجم عليه
- الروطال ( بملامح خالية من أي مشاعر ) : باين داير شيحاجة أصلا داك خونا مصافيش سمعتو سابقاه .. نصاب مساويش حاس براسو هاهو جابها ف ****
- عماد ( كملو كاسو كيهزهز برجليه ) : لي قلب على البلا يلݣاه .. شي نهار يݣ**** على قرعة بفعايلو السيد راه ديجو عندو واحد ديكلاراصيو بتهمة التحرش من عند موظفة
- الروطال ( تبسم بإستهزاء ) : وهدا لي فرشخو كان عليه يݣل*** عليها نيت توصل ليه للعمود الفقري ، باش يتعلم يدور ببنات الناس الشماتة لاخر
- عماد : الواحد امايدخلش راسو فالمشاكل وفريع الراس لا يجيبها فراسو ( غمزو )
- الروطال : كل واحد يضبر لمحاينو .. حتى واحد ماصغير وكيرضع صبعو .. عصام وطارق عارفين الحوار فين غادي شافين وساكتين ..
- حياة : وانت عارفاه باين غايديك لشي بلاصة زوينة .. غير على هاد العصبية لي فيك الله يستر وصافي فتيلة وغاتشعل
- عنبر ( شافت فيها مغززة ) : بحال الى كتقولي ليا انت لفعة وهو هو ديك دجاجة لي مكتنوضش على بيضها .. ماعرفت شكون لي لبارح خسر معايا الهضرة وقايلها يغرق فيها جمل
- حياة : انا والله ماضنيت فاروق يقوليك هكاك .. يمكن ماسمعتيهش ، ياك والبارح قلتيليا ودنك ضاراك وكتسمعي الماج
- عنبر : كدافعي عليه أحياة تقول واش خوك من الرضاعة .. هداك راه واحد نمس كوينيدي لاخر مفربل فمخو بعد مرات راه كيكون زان زان
- حياة : ربي علاش كتقولي هكا .. السيد كيحمق بزين باينة فيه راجل ديال بصح علم الله شحال من وحدة بغات اكلمة منو همة وشان ، غير خدمتو تحنتك أش لي جاك فيه زانزان
- عنبر : السيد كنضحك معاه .. حيت كيطنز عليا وحتى انا هكاك كنخلقها معاه بضحك ، قتليه خاتمك طبع فيه سميتي مشا دارها بصح واش هدا ماشي هبيل ، راه غير اندخل جبهة فهاد التزويجة الملاوطة .. باغيين نجيبو بدر وتريكتو حتى نصدق مصفية ليا من عند هاد الهبيل يكون شي مزعزع
- حياة ( حركات راسها بلحولة ) : ماخليتيني حتى نعاود ليك اش طرا ليا ومعامن تلاقيت وشكون وصلني
- عنبر ( كتسد قرعة ديال الصباغة وشافت فيها ) : القضية فيها توصال كاع خرجو رجليك شواري
- حياة ( كتقلب بعينيها ) : فين هي مي بعدا ؟
- عنبر : فقت لقيتهم مشاو هي ماما فاطنة لعند رحيمة كانت عيانة ، وخالتي سميرة راها فسطح كتصبن ( كان عندهم بيت فسطح داروه بيت ديال الصابون ) دوي أش تم ؟
- حياة : كنت عند النݣافة امينة لي قلت ليك عليها على وديت شوتينغ
- عنبر ( هزات طبسيل صغير دايرة فيه ما دالبطاطا وشوية ديال دقيق الفورص وشوية دنشا ماسك لوجها .. خدات مرايا صغيرة وبدات تأپليكي على وجها ) : ايوا
- حياة : دخل واحد زين الفتان واحد العوينات زورق وشعر رطب زعر والبياض كيحمق ياختي كيحمق ، فهمت من كلامو مع النكافة بلي ولد ختها .. ومع كانت شتا كثيرة طلباتو يوصلني سميتو جواد فن يا عنبر فن
- عنبر ( مطلعة وجها شوية منزلة لماسك لجهة عنقها ) : كملي وانت كتقطري الهضرة دخلي فالمفيد
- حياة ( بتنهيدة طويلة) : طلب ليا نمرة عارضني فالويطاند يديني لموروكو مول .. قلت ليه بلي بنت خالتي عندها العقد وغانبقى نوجد معاها وممأكداش واش نقد ولالا
- عنبر ( كملات من الماسك بقا شوية حطاتو قدامها باش دير حتى هي ) : مويان منين قلتي ليه حتى تفكري .. مايقولش هادي فريفرة قبلات من الاول حاولي دفعي كبير والى سونا ماتجاوبيش حتى لسونيط تالتة قولو كنت دايرة سيلونس ومنتابهتش ليه .. تقلي تلقاي ماتبيعي
- حياة : راكي عارفاني ، واخا كبرت فولاد صالح ولكن حافظة سوارية منخليش شي قمقوم يلعبها عليا واخا كنبان ليك خوافة ولكن هادشي ديال الرجال وتصاحيب مقرصاني فيه رشيدة واخا هي كان خاص لي قرسها مع داك المنطيح
- عنبر : انا غاوصيتك عارفاك اش ساوية .. كون كنتي شي زويزويا كون وا خديتي شي مخموج من دوك لي كان كيجيب ليك داك صفر الكمارة
- حياة ( عينيها كيلمعو ) : ولكن عرفتي والله حتى فن السيد ودماغو عامر القرايا ياختي زينة .. انا من نهار قريت ماهزيت كتاب
- عنبر : انت مابغيتيش اصاحبتي .. كولشي فالأنترنت غير إلى مابغيتي ݣالسة فدار وكتقراي
- حياة : كنتسنى ماجدة تديني لداك المركز ديال اللغات نتسجل إن شاء الله ، قاتلي 4 يام فسيمانة غانتعلم للإنجليزية إن شاء الله الفرنسية قلت نتعلم غير فدار نزيدها فوق الحساب
- عنبر ( بفرح ) الله يرضي عليك هكاك نبغيك دابا سكتي مدوينيش ينشف الماسك يولي يتفرتت ، هزات حياة داك الماسك دخلات لبيتها بدلات عاد خرجات غسلات وجها هو الاول نشفاتو عاد دارت الماسك وجات تكات حدا عنبر ..
_______________
- فتحات سيرى الباب دخلات هازة ساكها على كتفها لابسة عباية ولايحة عليها الشال .. حطات الساك هو وسوارت الدار وطوموبيل ديالها دنيا مكانتش مشات كتقلب على باها جدودها مشاو بكري رجعو للسوق الأربعاء ويرجعو للعقد ، مشات كتقلب على باها لقاتو فواحد الصالون صغير فيه واحد المكتبة ݣالس عبد الخالق هو وإدريس كيدويو كانت كتحاول متسمعش ودير الحس ماشي من تربيتها تسمع لورا لبيبان .. سمعو الحس وقطعو الكلام حتى دقات وطلات براسها :
بابا عمي .. ياكما مشغولين ؟
- عبد الخالق : لا ابنتي دخلي .. ( دخلات ݣلسان حشمانة ) بابا بغيت ندوي معاك ( بلعات ريقها ) محسن بغا يجي يدوي معاك
- عبد الخالق ( بجدية ) : مزال ناوية ابنتي ؟ واش تايقة فيه لهاد الدرجة ؟
- بلاصات دنيا طوموبيل ديالها من نوع فيات فالݣرونة .. نزلات منها هي وماجدة الشتا كانت سحات قطعو الشانطي وقفو قدام واحد المكتب مكتوب في سمسار دخلو كان مكتب صغير فيه بيرو ومصبوغ بالبيض وقف رجل فالأربعينات مد ليهم يدو :
مرحبا بيكم .. ݣلسو ، كلسات دنيا وماجدة لي بادرات بالكلام :
جيت على ود المحال لي قلتي ليا باش نمشيو نشوفوه
.... : ايااه مرحبا بلات ادري يجيب ليا السويرتات .. المحال راه جا فالمعاريف فكوان على شارع باين الغادي وجاي عليه
- ماجدة : المهم يكون كبير ومتيسع حيت باغية نقسمو يكون الداخل وعاد برا
.... : لالا كبير تبارك الله ومايكون غير خاطرك حتى الثمن راه مناسب ، سي إدريس عندو بلاصتو عندنا
- ماجدة هزهزات ليه راسها بإبتسامة ، تم داخل واحد دريس فالعشرين من عمرو مد ليه سوارت ورجع بحالو وقف السمسار :
نمشيو نشوفو المحال ناخدو طاكسي
- دنيا : لا مايحتاجش كاينة طوموبيل .. سد السيد المحال ديالو وتوجهو لطوموبيل ركب هو اللور وهوما القدام متوجهين للعنوان لي عطاهم .. وصلو بلاصات دنيا وخرجو من طوموبيل تابعين السمسار حتى وقف قدام واحد المحال هابط الفدريش الكبير لي كان مصبوغ بالݣري حل السيد القفولة هاد داك الفدريش .. كانو عندو زوج بيبان كبار ديال الزاج الپوانيي ديالهم كحل فتحو دخل وهوما وراه ..
- المحال فعلا كان كبير مصبوغ بالبيض خاصو روتوشات فقط
.... : المحال راه فيه هنا وفيه التحت أجي تشوفي ، تبعاتو فعلا المحال كان الفوق وعاد كاين دروج كينزلو لتحت كدور هي ودنيا عجبها بزاف وبلانات ليه فدماغها ، تجيب للعيالات يخدمو هنا لتحت والفوق يكون البيع
.... : كيف جاك ، كيف ݣلت ليك المحال راه كبير كيما بغيتي هوتة ماتلقايش بحالها السيد كاين على برا .. عندك الزهر لقيتيه هنا ، التحت راه يلاه فيناه وصبغو الفوق لب خاصو شي لعيبات حالهم ساهل
- ماجدة ( كدور عينيها مجاوباتوش طلعو الفوق مابغاتش تبين بيه راه عجبها باش يرفق معاها فالثمن ) : هو مابيهش ماشي كيف بغيتو ... ولكن مافياش لي يبقى مزال يقلب ويدور ضيعت بزاف ديال الوقت ..
.... : السيد راه ماتلقايش معاه ݣرام ديال المشكيل ، فلوسو غايوليو يدوزو ليه للكونط ديالو نيشان سيد معقول ونيشان مافيهش التلاوي وحتى بحال هاد المحال وهاد الثمان ماتلݣايش فشي قنت خور
- ماجدة ( كدور براسها وعينيها شافت فيه ) : واخا السيد ايمتا نتلاقاو معاه ولكن ماشيش اليوم .. بغيت حتى يكون معايا خويا ونقادو أمورنا
.... : صافي الإثنين إن شاء الله باش الى تفاهمتو يكونو الإدارات حالين الله يسخر
- ماجدة : اللهم آمين شكرا .. خرجو كيتسناوه حتى سد المحال ) ياكما نوصلوك ؟
.... : لالا براك الله فيك المهم الاثنين إن شاء الله غانسوني ليك ونتلاقاو كاملين وتفاهمي مع السيد نيشان
- ماجدة ( مدات ليه يدها سلمات عليه ) : إن شاء الله اللهم يسر .. سلمات عليه دنيا وتوجهو لطوموبيل ركبو
- دنيا : نمشيو نتغداو فيا جوع ( كدير السمطة )
- ماجدة : شهوتي فمقيلة مع العدس فالمرصا دينا الله يحفظك
- دنيا ( مديماريا ) : هي لي ماتعاود ونيت عندي واحد الحاجة بغيت نعاودها ليك ..
يسرى ( براحة تامة حاسة بواحد الفرحة رجعات ليها غريبة ) : اه ابابا متيقنة محسن كان الله يعمرها دار معايا وانت شتيه وعرفتيه .. ولكن ختو ابابا لي شيطانة وشتي بنادم الخبيث الى دارك فراسو كيشتت العشوش وكيخرب البيوت ويفرتك المجمع وداكشي لي بغات دارتو او وصلات ليه
- عبد الخالق ( بتبات وتقالة ) : ربي كيخلص كل واحد على داكشي لي دارت ابنتي سوا زين سوا خايب ، وانت نهار جا طلب السماحة مابغيتيش علاش حتى لدابا ؟
- يسرى : حسيت بكرامتي تجرحات ابابا .. راه ماشي ساهل لي وقع مايمكنش نرجع ليه فداك الوقت كانت شيحاجة فيا مهرسة وحتى دابا راه غانرجع ليه ولكن بشروط ماشي غير أجي ورجع .. خاص يدب*ح عليا ويخطبني من دا وجديد
- عبد الخالق ( حط يدو على ركبتو ) : واشغانݣولك أبنتي لي درتي حنا معاك .. اتكوني فرحانة ومرتاحة ، إيمتا بغا يجي ؟
- يسرى : هو بغا غدا ولكن انا قلت ليه يأحلها لإثنين ..( قاطعها باها )
لالا خليها نيت غدا نهار الإثنين عندي شي شغال فالجديدة ..( شافيه إدريس )
أش عندك فجديدة ؟
- عبد الخالق : ولد خالتك البشير باغي يشري واحد الارض بغاني نمشي معاه .. طلبني ماݣديت ندور عليه الوجه نمشي معاه فصباح ونرجع فالعشية إن شاء الله
- يسرى ( وقفات ) : صافي نسوني ليه نعلمو معاش ابابا نقوليه ؟
- عبد الخالق ( حك على حاجبو كيفكر ) الى يصيب يجي زقت الغدا ويتغدا معانا نيت .. هزهزات راسها ومشات ضار لعند إدريس مكملين هضرتهم ) إيمتا غادفع ؟
- إدريس : راه دفعت الإستدعاء غاتوصل ليها نهار الإثنين إن شاء الله .. مغايتعطلش بزاف من غير الى عكسات هي
- عبد الخالق ( تنهد ) : الله يصاوب لك أخويا وصاف
________________
- لبسات كولون سخون فالكحل عندو 2 فاص .. مع كسوتها الطويلة كحلة سخونة ديال الصوف مع واحد لا سانتيغ فالقهوي .. دارت كاشكول فعنقها ولاحت عليها المونطو ديالها شعرها خلاتو مطلوق باش يسخنها .. دارت ساكها فالكحل فيه لطيعات ديال النمر رشات من پارفان لي جاب ليها فالخطوبة لانتيردي البوردو ريحتو كانت شتوية وكتحمق .. دارت ساعتها لي جاب ليها وخاتمها وخرجات على برا كانو كالسين حياة شادة تيليكومند كتفرج فمسلسل أنا أم دايرين ليه الإعادة
- تودة : معاياش غاترجعي ؟
- عنبر ( كتلبس فالبوتيو ديالها كان پلا فالكحل وطالع حتى لركبة ) : ماعرفتش أماما غاندوزو نشوفو النص دالحوايج بعدا نحيدوهم علينا
- تودة : وهادشي خاصو العيالات ، خاص تخرجي انت وانا ومو
- عنبر : كاين اماما لي كتخرج اهي وراجل يتقداو ، نتقدا بعدا بيجامات وداكشي ديال تفاصل وجلابة نكونو انا وانت وتمشي معانا خالتي وخالتي سميرة إن شاء الله ( سكتات تودة ) طيفبقات خالتي رحيمة ؟
- تودة ( شافت فرشيدة وتبسمو ) : خالتك رحيمة جاو فيها الخطاب
- حياة ( تقادات فالكلسة) : حلفي بالله شكون ؟ .. قاطعهم تيليفون عنبر لي كيسوني كان هو فتحات الخط مجاوبة :
ألو .. اه واجدة ، صافي واخا انا هابطة ( وقفات شافت فيهم ) عرفتو وتكملو تبركيك بلا بيا ما انا بنتكم منتوما عائلتي حتى نرجع وندويو
- رشيدة : سيري يالهبيلة سيري تموتي على الخبير .. هزات ساكها نزلات فتحات الباب واقف كيتسناها بنيسان ديالو الكحلة ، فتحات باب الطوموبيل مخنزرة ضربات فيها ريحتو سدات الباب ودارت السمطة كيشوفيها بنص عين :
معشي معاك مكتسلميش ؟
- عنبر ( شافت فيه ) : وراه كنتي معشي عندنا نيت ولا بداو علامات زهايمر كيبانو ليك ( مدات ليه يدها ) السلام عليكم
- الروطال ( طلعها ونزلها كيشوف فيدها ) : هكا كيسلمو العيالات على رجلاتهم ؟
- عنبر ( جمعت يدها ) : رجالاتهم هانت قلتيها حتى هاد اليد مخاصها ݣاع تمد وتحط فيدك
- الروطال ( دور لسانو على فمو ) : غاتبقاي حتى تجيبيها فعظامك أنا ݣلت لك ( ديمارا مكسيري)
- عنبر ( ماتسوقاتش لديك الجرة لي جر الطوموبيل ) : وليتي تهددني البارح مخسر معايا الهضرة واليوم كتهدد فيا بالعلالي ..
- الروطال ( شافيها عاقد غوباشتو ) : أنا خسرت معاك الهضرة واش انت طايحة فصغرك على شي ضرݣة دشوك ولا مالك
- عنبر ( خرجات فيه عينيها ) : كتنكر فاش دويتي معايا ولا نسيتي .. فاروق ماتفوتش الحد معايا الله يرضي عليك البسالة أوهو
- الروطال ( جابت ليه الشحكة وفنفس الوقت صادماه ) : يا هاد المرة انا إيمتا خسرت معاك الهضرة فكريني شنو ݣلت ؟
- عنبر ( شافت قدامها بالها ريقها الحمورية طغات على خدودها ) : شوف انت
- الروطال ( صوتو الثقيل غالبة عليه نبرة الأمر ) : ودابا دوي مغانعاودهاش جوج دالمرات شنو ݣلت ؟..
- سونا ليها التيليفون كانت ديارة ليه الڤيبرور ، هزاتو طلعات ليها نمرتو تبسمات ورجعات حطاتو مابغاتش تجاوب كيف قرصاتها عنبر ..
" فالمرصا وعند قهوة لي كانت عادية مصبوغة بزرق محطوطين كراسة ديال الخشب .. الدنيا كانت خاوية ومع كانت صابة الشتا واحد الجو زوين من غير صوت النورس لي كيتسمع .. ݣالسين فطبيلة ديالهم كيتسناو لكموند ديالهم توجد
- ماجدة : علاياش بغيتي دوي معايا ؟
- دنيا ( كتشوف بعينيها بعيد رجعات شافت فماجدة وزفرات ) : خرجت من الصالون
- ماجدة : بلاتي علاش انت مكانش صالون ديالك ؟
- دنيا ( ضحكات ) : من نيتك أشمن كنت اخدامة عند واحد سيدة وخرجت تزايدت مع واحد الجروة .. بالغدايد خليت ليه الصباغة فشعرها حتى داز الوقت نص شعرها مشا
- ماجدة : c'est pas vrai أدنيا واش هبلتي ومالك اختي على هاد الخدمة .. علاش لي متحليش صالون ديالك
- دنيا : باش غانحل الصالون ديالي بودنيا ؟
- ماجدة : أنا مافهمتش وانت حمقة .. عمي ماشاء الله بخيرو وطارق من غدا يفتح ليك أحسن صالون فيك يا كازا
- دنيا : حتى انت اماجدة انا مابغيت نعول على حتى واحد .. شغلي بغيت نديرو راسي بوحديتي مانعول على تاواحد
- ماجدة : وانت قارية وبديبلوماتك وشواهد ديالك علاش متخدميش بيهم شحال من شركة غاتبغي تخدمي معاهم بالفرحات عليهم
- دنيا ( حركات راسها ب لا ) : مكنبغيش شي حد لي يتأمر عليا ولا يقولي ديري ولا مديريش انصدق أمنوضاها معاهم ، أنا صالون خدمت فيه احيت ديال صاحبت صاحبتي وكنعرفها ودارت معايا صالير زوين باش نجمع فليسات
- ماجدة : والله مافهمت فيك شيحاجة .. عائلتك مسك عليهم الله وانت باغية تخدمي عند الناس بجوج دريال
- دنيا : دوك جوج دريال ( شافت فيها ) هوما لي كنت نجمع حتى شريت دوك طويميبيلة .. وفرحانة ومرتاحة الحمد لله كل واحد فعائلتي أسس راسو براسو وهادشي لي وصل ليه وصل ليه بعرق كتافو
- ماجدة : وها يسرى عمي وطارق دارو ليها مشروع ديالها مالها هي ؟ ..
قاطعهم السيد لي حط ليهم جوج مقيلات فيهم البيض مع الكروڤيت وجوج طبيسلات فيهم زيتون وجوج أخرين فيهم عدس مع الخبز وأتاي
- دنيا ( شافت فيه بإبتسامة) : شكرا أعمي محمد
- بصحة وراحة أبنتي .. هزات اتاي كتشقلب فيه حطات كاس لماجدة او واحد ليها ( كملات ليها الكلام )
يسرى هي لي بغات .. كل وحدة وكيفاش كتفكر وعقلها كيف داير يسرى من زمان مكتبغيش دير مجهود .. قرات صافي دارو ليها مشروعها خدامة بيه مرتاحة مكتبغي تخمم ولا تفكر ولا تبلاني انا لا
- ماجدة ( بلعات اللقمة لي فمها ) : واخا علاياش ناوية ؟
- دنيا ( بلعات ريقها هزات فيها عينيها عارفة هادشي لي غاتقول مغاتقبلوش ومغايتقبلو حتى واحد ولكن هي لي فراسها فراسها وربي كبير ) :
كنفكر ندير كروصة فعين دياب ..
_____________________
- عنبر ( شافت فيه ) : لبارح كتهدد فيا واش نسيتي افاروق ؟
- الروطال ( كانت اول مرة يسمعها قالت سميتو ولا يمكن قالتها وعمرو رض البال ) : فاش ݣلت لك غانحيد ليك بلابز عينيك ؟
- عنبر ( خرجات فيه عينيها ) : علاش انت ݣلتي بلابز ؟
- الروطال ( تبسم بخبث ) : وعلاش اش كيحسابلك ݣلت ؟
- عنبر ( تحرجات والحمورية طغات على حناكها ومن حالتها عرفها سمعات بالمقلوب جابت ليه الضحك ) :
لا والو
- الروطال : وعلى حساب واش عندك مايتجبد ولالا ؟ .. خنزرات فيه :
شتي ضسارة وقلت الاحترام دابا هي هادي
- الروطال : دابا مالك جدك جايا شاعلة ياك لاباس دايرة بحال طرف دتوب لي غارق فزيت خاصك اتشعلو
- عنبر : انا دابا طرف ديال التوب ؟ شوف انت لي جيتيني فشكل واش كامي شيحاجة ؟
- الروطال : مامبليش ( باس يدو ) الحمد لله فيك الجوع ؟
- عنبر : علاش مغانمشيوش نتقداو ؟
- الروطال : مكنݣدش ندير شيحاجة حتى كنعالج كرشي وافيها وحفظيها مزيان
- عنبر : سير فينما بغيتي ماتمشيش غير لبلايص ديال صحاب الفشوش .. دور طوموبيلتو ومشا للمدينة القديمة ..
يتبع...
التعليقات
لا توجد تعليقات بعد، كن أول من يعلق.