محتوى القصة
- فالكلينيك متكية فبلاصتها لابسة بيجامة جديدة سخونة عاكفة راسها بزيف حياتي فالبيض ... حداها الكونة فيها وليدها ملبسينو لبيسة شيبية سميرة ݣالسة فالكرسي وتودة واقفة كيشوفو فيها بإبتسامة فرحانين بيها .. تحل الباب ودخلات عنبر بكسوة حجابية أنيقة جايبة الورد والحليب و بواطة فيها الحلوة حطاتهم باست رجاء باركات ليها وطلات على البيبي لي كان صغير عويناتو مغمضين ..
عنبر : على سلامتك وعلى سلامة الكتكوت شنو سميتوه ؟
رجاء : محمد أمين .. يونس لي سماه عجباتو السمية
عنبر : الله يتربى فعزكم ياربي ( توجهات عند مها باستها هي وسميرة ) فين خالتي مجاتش ؟
سميرة مسكينة عندها الجلسة اليوم ديال الطلاق .. راه مشاو الصباح بكري هي وحياة ايجيو من تم لهنا ..
تودة ( كدوز ليها على ظهرها ) كيدايرة ابنيتي ولفتي ؟
عنبر ( هزهزات راسها ) الحمد لله هاحنا غاديين .. انت لي حالك ماعجبنيش تحت عينيك زرق مالكي ؟
تودة : غير مع سهير أبنتي مكاين والو راجلك مجاش معاك ؟
عنبر : غير وصلني ومشا فاش نبغي نرجع نسوني ليه يديني
تودة ( تنهدات ) مزيان أبنتي .. بقاو مجمعين حتى تحل الباب ودخلات حياة ورشيدة معاها وليداتها ، حياة كان باين فيها معصبة ..
سميرة : أكيداز داكشي ؟
رشيدة ( ݣلسات ترتاح ) ولد الحرام جا بوجهو حمر نوضها هو وحياة الله يغبر ليه الشقف ..
حياة : ولد الحرام غير شافني ݣالك باين عليكم الفلوس مابقيتش باغي نطلق .. ولكن عبرات عليه المحامية خرجاتو من عين البرا الله ياخود فيه الحق خلاني كولي كنترعد ..
عنبر : هذاك راه واحد الميكروب الخانز الطماع القمار السكايري ..
حياة ( اشرات لعنبر ) أجي نخرجو على برا تخنقت .. (خرجات هي وياها على برا كيتمشاو ) جواد باغي يشوفني فهاد العشية ماعرفتش كيفاش ندير
عنبر : وانت غير فالخريج والملاقية دابا
حياة ( دبلات عينيها ) توحشتو أصحايبتي والله بغيت نشوفو واخا أساعة دالمݣانة
عنبر : وختي ضبري راسك انت تعرفي .. ديري راسك غادية تقضي شي غرض وسيري تلاقاي معاه ولكن متعطليش .. حضي راسك وتقلي احياة سولك جاوبي على قد السؤال خليه هو يبقى يسول خليك غامضة فهمتي ديك كترت الهضرة راه كتجيب الخسران ..
حياة : بغيتي تقزلي ليا فيا كترت دوي بزاف ياك أعنبر ؟
عنبر : ومالي انخبيها عليك راكي عارفاها فراسك حق .. وهو براسو قالها ليك وديك كترت خيطي بيطي بلاش شافك المرة اللولة وهادي المرة الثانية والله يجعل البركة بغا يقصد الباب مرحبا مابغاش الله يعاون العاونات ..
- رجعو عند رجاء مكملين معاها الجماعة وصل الوقت باش يمشيو .. سونات عنبر على الروطال علماتو هوما شدو طاكسي رجعو لدار وهي جا داها ...
- الإحساس ديال تأنيب الضمير كان كياكل فيها ومعصبها الماكلة مابقاتش كتدوز ليها بحالها بحال الناس ، وهادشي لاحظوه عليها سميرة ورشيدة وزادت كملات لي خاص فاش سميرة مشات تݣلس مع بنتها تقابلها بينما شدات صحتها شوية ..
فالمعاريف واقفة كتشوف فسميتها لي كانت مكتوبة بذهبي MIJOU COSMÉTIQUES لي برودوي نصهم مستف ونص من المحال مزال خاوي التحت كانو 2 ديال العيالات خدامين على لبواطات الجداد .. شافت فساعتها بقا نهار واحد على الإفتتاح وفرحتها كانت كبيرة بزاف أول حاجة غاديرها فحياتها .. بعرقها وبمجهودها الخاص ( هزات تيليفون دورات الخط ) ..
ماجدة : دنيا فينك أصاحبتي ؟ وعولت عليك زعمة مافهمت مالك انت !! صافي واخا صافي انا كنتسناك بسلامة ( قطعات )
الـمـديـريـة
- دق الباب ودخل كان حاط البيسي قدامو هز فيه راسو ورجع لخدمتو ..
يوسف ( ݣلس بعياء فالكرسي ) الصراحة خاصني شي كونجي ونهز ساكي عفطة وحدة لتارودانت نرتاح مع مخي .. ومن تم ندير واحد طليعة لمرزوݣة او ورزازات ندوخ بين جبال ..
عماد ( سد البيسي ) طلع بعدا البني ملال تمتع مع راسك فطبيعة ترتاح .. ولكن انسى الكونجي فهاد الوقت أجمي
يوسف : غاتݣولها ليا أنت ، السيدة لي جات نهار لول ديكلارات سمية بنتها لبنى ..
عماد : خاصنا شيحاجة فيكس ايوسف .. تݣد تكون البنت لي شافها السيد اشي وحدة هاربة من دارهم ولا شي وحدة مريضة فهمتي .. الى مالݣيناش البنت غاتبيقى هادشي غير هضرة خاوية .
يوسف : غدا غانرجع لتم كنت غانمشي اليوم ولكن عندي مايدار ( وقف )
عماد ( هز راسو فيه ) فين غادي ؟
يوسف : الدار خويتها وسوارتها غانعطيهم لمولاها ..
- واقفة قدام المرايا لابسة جلابة هماوية ديال زواجها الفوقي فالبيج وتحتي فالأخضر الملكي ، مع شال مجموع فيه تدرجات الأخضر وتدرجات البيج .. الساعة لي جاب ليها الروطال مع خاتم زواجها .. المكياج كتافات بݣلوس بارد كيكو وماسمارا واخر لمسة رشة من البارفان أنتيردي الحمراء .. هزات ساكها وخرجات من بيتها كان واقف التحت تيشورت فالابيض مع سروال دجين باهت وتريكو دصوف محلول .. سمع الطالون ديالها هز راسو فيها كانت هابطة بشوية مامالفاش على العالي بزاف ، دار يدو فجيابو حاضيها بعينيه حتى وصلات عندو ..
الروطال : على سلامة واش توما دريات كامل بحال هك ؟
عنبر : مالنا ؟
الروطال ( دوز يدو على شعرو ) كتسكنو ݣدام المرايا .. تعطلنا .
مجاوباتوش خرجات راكبة فطوموبيلتو .. طلع حداها مديماري شادين الطريق ..
- قدام المحال داخلين الناس خارجين الداخل محطوط البوفي ، كيدخلو يهزو التمر يشربو الحليب ويدورو فالمحال كاينة لي خدات من نهار الاول .. واقفة ماجدة كل مرة مع وحدة كتشرح ليها على برودوي شكل .. وصلو العائلة باها عمها خواتاتها ورجالهم وخوها ، كانت حياة حتى هي عاد وصلات طوموبيل ديال الروطال بلاصاها ونزل هو وعنبر لي كانت هازة الورد فيدها للماجدة ..
- بانت ليها خارحة من الكوموبيل قلبها تهز تخطات خواتاتها تحت نظراتهم وتوجهات لعندها ستقبلاتها عند الباب ..
دنيا ( بالعة غصة فحلقة ) على سلامتك كنا كنتسناوك غير أنتي ( عنقاتها بجهد حابسة البكية لي مهددة باش تنزل )
عنبر ( بإبتسامة بادلاتها العناق ) أزين تعطلنا عليكم ( بقات دنيا معنقاها وعنبر معنقاها مستغربة هاد الحب والشوق لي بادلاتها بيه دنيا ..
دنيا ( حسات على راسها وبعدات ) دخلي
الروطال : اشريفة انا نملة مابنتش ليك ( سلمات عليه بالوجه )
دنيا : هههه توحشت عنبر اسمحليا وصافي ( عنبر شافت فيه بإبتسامة قالية ليه السم عطاتو بظهر وتوجهات مع دنيا عند ماجدة تبارك ليها ) ..
ياسمين ( بالهمس ) ختك من يمتى طايح حبها على مرات ولد عمها ؟
يسرى ( كضحك) جاتك الغيرة ولا .. عرفتي دنيا الواحد الى دخل لخاطرها راه ماتفرقش عليه والى كرهاتو ماطوفش جيهتو ..
الروطال ( مسلم على طارق ) فين انت
طارق : عماد مجايش رجع تاني لخدمة مغانوليو نشوفوه على عام
الروطال : غانساه هداك بدل .. أش درتي ؟
طارق : المحال دطنجة لا صافي ( هزهز براسو ) مايصلاحش دويت مع راشد ݣالك نحلوه هنا حسن ( بقا ساكت ) انت زعمة والو ماتحطش معانا يدك ؟
الروطال : خويا فوت ليا جنابي داك الهيث دروايح ماعنديش معاه .. بغيتو ديروه نتوما الله يسخر ..
حياة ( بحماس ) البنات انا جايا .. خلاتهم وخرجات كان واقف جواد على برا بعيد شوية قطعات الشانطي وتوجهات لعندو فتحات الطوموبيل وطلعات ..
حياة ( كان غالب عليها ستريس ) عرفتي راه خليتهم كاملين مجموعين وجيت .. مالك شنو واقع عاد البارح تلاقينا ؟
جواد ( بتقالة وبإعجاب ) توحشتك وجيت نشوفك واش فيها شي عيب ؟
حياة ( ضحكات ) لا مافيها حتى عيب ولكن بنت خالتي كاينة وكاين راجلها والعائلة مجموعة مابغيتش يديو عليا شي نظرة ماهياش ..
جواد ( ضار للكرسي لور هز منو واحد ساشي مدو ليها ) هاكي .. عيد ميلاد سعيد بلي تمنيتي إن شاء الله
حياة ( عجبها الحال عند بالها مغايجيبش ليها الكادو ديال عيد ميلادها ) لهلا يخطيك شكرا بزاف علاش عذبتي راسك ..
جواد ( كيشوف فعينيها ) مكاين لا عذاب لا جوج تستاهلي أحياة ( تنهد ونطق ) حياة ( شافت فيه ) فخبارك شحال كتعجبيني وكنرتاح فاش كنكون معاك ؟
حياة ( تزنݣات وغرقات فحوايجها ) لا مافخباريش هههه ..
جواد : براكة من الطنز الشلاهبية .. هادشي راه باين بلاما نبدا نشرح امن دوك التيليفونات وكل نهار باغي نشوفك راه يعطيك الخبار ..
حياة ( بدلع ) ايوا ؟؟
جواد : تا شوف كيكادير ( ضحك ) ولكن واش انا كنعجبك هادي ماعرفناهاش ؟؟
حياة : وصافي اجواد أنت راه عارف شنو كاين ( حدرات راسها حشمانة)
جواد : بغيت ندوي مع الواليدة إن شاء الله ( بجدية ) ..
حياة ( تصدمات هزات راسها فيه مامتيقاش شنو كيقول ) علاياش ؟
جواد : تي كيفاش علاياش ( كيضحك ) جيتي تالهادي وتكلختي باغي يالالة نجي لداركم .. هاد الملاݣية معاك مابقاتش ݣداني باغي نعمر بيك داري عندك شي مشكيل ؟
حياة ( ضحكات ) لا ماعنديش ( كتشوفيه مامتيقاش بلي إنسان بحال فمستواه قاري خدام واخا عمرها سولات على خدمتو وزوين عمرو تخطى معاها الحدود يبغيها الفرحة كانت كتغلي فالداخل ديالها )
جواد : ندوي مع الواليدة إن شاء الله نديرو خطوبة .. والعقد باش نرجع للألمانيا نݣاد ليك وريقاتك نرجع نديرو عرس خفيف ونمشيو إن شاء الله ..
حياة ( كمشات عينيها الإبتسامة تمسحات من شفايفها ) كيفاش المانيا ؟ علاش انت شنو داك لكندا ؟..
جواد : وانا مستقر فألمانيا تما فين عندي دار وخدمتي تم .. كنجي ندوز كونجي ديالي ونرجع ، هاد المرة طولت راه 3 شهور وأنا فالمغرب ..
حياة ( بلعات ريقها ) ماقلتيهاش ليا
جواد ( ضحك ) وماسولتينيش .. علاش عندك شي مشكيل مالك تخلطو فيك اللوان ..
حياة ( بقات غير كتشوف حسات بالغصة فحلقها شافت فيه ) واش الى تزوجنا ضروري نمشي معاك ؟
جواد : ولاش انا مزوج بيك هبيلة ولا مالك ( سكت كيشوف فلونها لي تخطف ) انوليو نهبطو مرة فالعام تشوفي داركم مغانخطفكش أحياة ..
حياة ( حاسة بالبكية اتشدها ) انا مانقدش نخوي المغرب أجواد .. مانقدش نبعد على مي وعلى خوتي الصغار
جواد : كيفاش زعمة مافهمتش ؟ وهادي هي سنة الحياة علاش زعمة شنو الفرق بين المغرب وتم ؟
حياة : كون كنتي هنا كنا غانتزوجو ونخدم انت خدام وانا خدامة ونتكلف بخوتي
جواد ( بجدية ) انا مانبغيش مرتي تخدم تݣلس فدارها معززة مكرمة
حياة : جواد انا عندي جوج دالخوت باقيين صغار شكون غايصرف عليهم ؟
جواد ( غوبش ) غايصرف عليهم باهم علاش انت غاتصرفي عليهم مافهمتش علاش الواليد ديالك فين كاين ؟
حياة ( مكانتش معاودة ليه ) بابا مطلق ماما فاش كنت أنا صغيرة .. وعاودات تزوجات بواحد السيد ولدات معاه خوتي الصغار لي كيقراو دابا ، ماما طلقات من داك السيد وهو مبري من مصروفهم مغانخليش اجواد ماما وخوتي محتاجيني ونمشي نبعد ونݣلس فدار ..
جواد : ماشي مشكيل نتعاونو معاهم بلي قسم الله
حياة : واش انت اتقد على جوج ديور عليا أنا وأنت .. وعاد خوتي زوج خاصهم كسوتهم وخاصهم قرايتهم واش قاد على هادشي ؟ ( خيم سكوت وسط الطوموبيل جواد كان إنسان خدام مزيان قادر يفتح دار ويأسس أسرة ويدير وليدات ولكن باش يزيد حتى خوتها ومها كان صعيب عليه الحال خصوصا كيبني دارو فالمغرب يعني غايتزير بزاف )
حياة ( بلعات ريقها من سكاتو عطاها الجواب ) المهم جواد خاصني نمشي دابا انتعطل ..
جواد : ودابا شنو ؟
حياة : لي عندي ݣلتو ليك انا مانقدش نخلي المغرب ونمشي للغربة .. اه باغياك وباغية نكمل معاك حياتي واخا ماشي مدة كبيرة باش تعرفنا ولكن لقيت راحتي معاك وربي شاهد ، ولكن خوتي ومي أمانة فظهري هادشي لي نقد نقوليك ( فتحات الباب ونزلات سامحة فساشية ولي فيها سادة الباب ) .. غادية قاطعة الشانطي وعينيها مضببين بدموع وقفات زرا واحد المحال بان ليها مشا .. وعي طلق العنان لدموعها كتشهق حاسة بقلبها غيسكت ودنيا ضايرة بيها ..
- عنبر بالها مع الباب كتشوفيها تعطلات قلبها تشد عليها .. كان بالها مع حياة ودنيا شادة ليها فيدها
ياسمين : وانتي طلقي البنت أويلي تقول مزوجة بيها ..
دنيا ( شافت فيها ) وانت شغلك اويلي غرتي ؟
ياسمين : ماخليتيها تحرك فخاطرها فينما ضارت لاصقة فيها ( شافت فيسرى لي كضحك ) والله ملاحظتيهاش ؟
عنبر ( بإبتسامة ) غير خليها هاديك غير المحبة
دنيا ( باستها ) سمعتيها بيني وبينها ..
عنبر : حياة تعطلات بلاتي نطل عليها .. خلاتهم وخرجات
ياسمين : هاهي هربات عيقتي عليها لي شافكم يقول واش ختك .. وحنا خواتاتك ومكديريش علينا هكا
دنيا ( شافت فيسرى ) دابا هي حيت مكنديرش معاها هكا بقا فيها الحال .. راه اختي راجلك يعنقك ويبوسك باز
- غادية عنبر لجهة لباب .. كان كيدوي مع طارق بانت ليه جايا عينيه تبعاتها خلاهم وتوجه لعندها يلاه اتعتب العتبة دالباب وقف عليها
الروطال : ياك لاباس ؟
عنبر ( ضارت عندو باين القلق على ملامح وجها ) حياة قالت انا جايا مابقاتش جات شوشاتني عليها
الروطال ( عقد حواجبو ) وفين مشات هي ؟
عنبر ( بلعات ريقها ) مشات تجيب غير روشارج وترجع ولكن تعطلات خفت غير لا يكون شي واحد تلقى ليها ..
الروطال ( كلامها مجاهش لوجيك من ملامحها والخوف لي باين فعينيها وريقها لي بلعات دلالة التوتر وبلي كتكذب ) فهاد الوقت ؟ تݣريسة ودنيا عامرة وشمش كتخبط ..
عنبر : والله أعلم بلات غير نطل ( جات تخطاه شدها من دراعها )
الروطال : انا غانطل عليها .. قلبها ضرب خافت لا تكون جايا مع جواد ويشوفها مابغاتوش يشوف بنت خالتها مع شي واحد كانت كتمنى متحطش فهاد الموقف .. فنفس اللحظة دخلات عليهم حياة شافو فيها بجوج عينيها منفوخين بالبكا ..
عنبر ( تخلعات ) حياة ياك لاباس مالكي ( شدات فيها .. كلمة من عنبر كانت كفيلة تخليها تعنقها وتشهق بالبكا ) اويلي مالكي واش تلقى ليك شي واحد ؟
حياة ( بصوت مخنوق ) بغيت نمشي بحالي عفاك مقاداش نهضر ( نظرات طارق توجهو جيهتهم ونظرات البنات .. جات دنيا والبقية كيسولو مالها جملة وحدة لي كتردد بغات تمشي بحالها..
عنبر : فاروق واخا توصلنا عفاك لدار عندنا ؟ ( هزهز ليها براسو هزات ساكها وعتادرات من ماجدة وخرجو شادة فحياة ) ..
~~~~~~~~~~
فالقهوة لي فالحومة ݣالس شاد قهوة وباه شاد براد ديال أتاي ..
عبد العالي ( رشف من كاسو وشاف فولدو بملامح هادئة ) شحال بقا ليك أولدي فديك دويرة ؟
عزيز ( دور لسانو وسط فمو ) واحد جوج بريكات وإن شاء الله نشد السويرتات ديالي
عبد العالي : الله يسر الأمور خاصك تشوف واش خاصها شي صليح ولا والو
عزيز : لا الحمد لله فليتها مزيان .. واحد القنت جا فالكوزينة نضرب ليه شوية دسيما ونصبغو ونوض نايض إن شاء الله..
عبد العالي : الفراش هز داك لي فدار الفوقانية باش تبدا وبيت نعاسك ..
عزيز ( بإبتسامة ) ماتخممش الواليد بيت النعاس ديالي ، الفراش كل مرة نخطف شيحاجة المسائل دالكوزينة غايدوزو على راسو عثمان وياسين ( صحابو )
عبد العالي ( كيضحك ) قرقشتي عليهم
عزيز ( جغم اخر جغمة من قهوتو ) وهوما لي ݣالو غايتكلفو واحد بثلاجة ولاخر بالماعن ، التلفازة غاندي ديالي وديك المكينة دصابون لي لفوق ..
عبد العالي : إن شاء الله اولدي الله يسخر ليك طرق مسمار دار وشوفليك شي بنت الناس عمر دويرتك دير وليداتك
عزيز ( ضحك) الله أ لواليد يلاه ݣلنا بسم الله .. غير بشوية دقة دقة
عبد العالي : وانا أكلت ليك اولدي الله يسهل عليك ..
عزيز : اللهم آمين ..
- دخلو لدار طلعات معاها الفوق .. دخلات معاها للبيت رشيدة فالمراح هي وتودة مافهمو حتى حاجة .. حبساتهم عنبر باش مايسولو حياة والو وتبعاتها هي دخلات معاها للبيت وسدو عليهم حياة غير وصلات لبيتها طلقات العنان لدموعها كتبكي حتى قالت براكة عنبر ماسولاتهاش بقات كالسة حداها كدوز ليها على ظهرها وكتسناها حتى تفش على خاطرها ..
- هزات حياة راسها كتشوف فالفراغ نطقات بصوت مبحوح :
ماعنديش الزهر سبحان الله من صغري ( تبسمات ) البو سمح فيا وانا صغيرة وطلق مي ومشا تزوج .. راجل الأم دوز عليا الدكاكة والعذاب ، وشوفي دابا فاش قلت الدنيا ضحكات ليا هاهي طرشاتني ( نزلو دموعها سخان) واحد العݣدة عندي هنا ﴿ أشرات لحلقها ) قلبي غايسكت عليا اعنبر وحق الله العظيم ..
عنبر : عمرك تقولي هكا أنتي يلاه فالبدية .. ربي راه كيبغي يبتالينا كيدوزنا من بزاف ديال الحوايج خايبين باش يشوفنا واش غادي نصبرو ونرضاو بأمر الله سبحانه ولالا .. مزال الطريق قدامك حتى حاجة متستاهل ديري عليها هكا ( بقات حياة ساكتة وساهية ) واش تخاصمتي مع جواد ؟
حياة ( تنهدات مخرجة نفس سخون من فمها ) كون غير تخاصمنا اعنبر ( شافت فيها ) جواد طلب مني الزواج ..
عنبر : حلفي بالله ( بإبتسامة ) وزواج كيبكيو عليه الناس الحمقة ؟
حياة : كيبكيو عليه الى مكانش كيف باغية نتي كيبكيو عليه .. جواد عايش فألمانيا اعنبر الى غايتزوج ايدي مرتو للتم وانا منقدش نمشي لتم ونسمح فمي وخوتي ..
عنبر ( سكتات حطات يدها على فمها ) ولكن حنا غانبقاو مع خالتي اصاحبتي
حياة ( شافت فيها ببرود ) عنبر خوتي مزال صغار مزال كيقراو مهازينش ريوسهم شكون غايهزهم .. علاش انا كنقرا اللغة دابا وعلاش باغية ندفع للباك العام الجاي غير باش ندفع لشي خديمة ونخدم حتى انا وندير مستقبلي ونخدم على مي وخوتي ..
عنبر : زعمة كون كان جواد فالمغرب اديري هادشي ؟
حياة : أه كنت غاندير هادشي كنت انقرا ونكمل قرايتي ونخدم حيت انا مغانبززش على ولد الناس يهز ليا خوتي ومي ديك الساع الى قاليا لا هضرة خرى .. وأصلا جواد قالك مرتي ماتخدمش بقا فيا الحال اعنبر والله
عنبر ( حطات يدها على ظهرها ) كتبغيه ؟
حياة ( تنهدات تنهيدة طويلة) واخا يلاه شهر باش تعارفنا ولكن والله حتى كنحس بشيحاجة من جيهتو هو اول واحد غاندوي معاه اول راجل ليا .. ( هبطو دموعها ) دابا كولشي خسر اعنبر كولشي مشا صافي باح ..
عنبر ( عنقاتها ) الخير فيما ختاره الله شحال من حاجة كنبغيوها ولكن مكتكونش مكتابة لينا وماعندناش فيها الخير .. واخا تكوني كتبغيه وهو كيبغيك ولكن مايصلاحش تكملو مع بعضياتكم وباش عرفتي هادشي لي كتحسي بيه انتي بغو يقد احيت عمرك تعرفتي على شي حد يلاه قلتي بسم الله فدنيا مزال العاطي يعطي .. ( حياة مجاوباتهاش بقات غير ساكتة ومعنقاها ) ..
- بعدات عليها حياة وتكات فبلاصتها .. ناضت عنبر من حداها كان أذن المغرب ، خلاتها فالبيت وخرجات للعندهم كانو ݣالسين على اعصابهم ماعرفو مالها ݣلسات عنبر من ملامح وجها كيبان بلي بقات فيها حياة بزاف ..
رشيدة : أش واقع أبنتي ياك لا باس ؟
عنبر ( عاودات ليهم بلاما دكر ليهم بلي حياة كانت كتلاقى معاه .. قالت ليهم غير بلي عرفها فالخدمة وبغاها للزواج ) ..
رشيد ( بحزن ) مسيكينة بنيتي رافدة ليا الهم وهم خوتها .. الى بغاتو توكل على الله انا الى دارت فاكنة المشروع نخدم معاها ونصرف على وليداتي الحمد لله لي ورقتي قربت نشدها هذا هو الربح ..
عنبر : حياة اخالتي بغات تقرا وتشد الباك ديالها باغية تخدم ودير مستقبالها ومباغياش تبعد عليكم وتمشي لبرا ، هي راه من شحال هادي مكتحملش برا عقلتي فاش مشيت كانت تقوليك اش داها تمشي لبرا وتخلي هنا ..
تودة : شحال من حاجة كنحطو عليها العين ومكيكونش عدنا فيها الخير .. مزال ربي يجيب ليها ولد الناس دير معاه وليداتها ..
عنبر : انا خاصني نمشي يلاه سونا ليا فاروق .. بلاما تفيقوها راه يمكن نعسات ، ومتقولو ليها والو حتى تدوي هي ( باست مها وخالتها ) انا مشيت ..
تودة : سيري ابنتي تهلاي فراسك ..
- سايݣ الطوموبيل وحاضيها بنص عينو ساهية وحاطة يدها على راسها وساهية .. مابغاش يسولها محتارم الخصوصية ديالها مابغاش يتدخل حيت عارف ومتأكد غير من تصرف لي دارت فالمحال بلي من سابع المستحيلات غادي تعاود ليه ، وصلو للدار بلاصة الطوموبيل نزلات بسكات كانت هادئة .. حل باب الدار ودخلات طلعات نيشان للبيتها مكانتش على المود ديالها .. حيدات جلابته وݣلسات ساهية كتماصي جبينها راسها كيضرها وخاطرها مروع عليها .. توجهات للمرايا ديماكيات وجها توجهات للحمام هازة بواطة فيه السدر مطحون هزات شوية منو دارت عليه الما وخلطاتو بيديه مزيان حتى تكون رغوة وغسلات بيه وجها على شكل غاسول ..
- شلالات وجها ونشفاتو دارت كريم للوجها لي مالفة كديرو مرطب من لامارك photo Whit شللات يديها كانت حاسة بشيحاجة ماشي نورمال منين قلبات لقاتها جاتها ستغربات لي جاتها قبل من نهارها ب 6 يام مافهمات والو ..
عنبر : واش نكون شربت شيحاجة سخونة لي هبطاتها عليا .. اويلي وماعندي لا إحتياط لا والو ، بقات كتفكر شنو غادير رجعات لبيتها لبسات بيجامتها سخونة وتوجهات لبيت سهام دقات فتحات ليها ودخلات .. لقاتو فوق نموسية كيلاغي ..
عنبر ( قربات ليه بإبتسامة ) والحبيب الغالي والكبيدة وزين والفن ( كيلعب برجيلاتو ) وياقلبي على العسل ( شافت فسهام ) دومونديت ليه على حوايج من الانترنت كنت شفتهم فالأنستغرام وعجبوني بزاف ..
سهام ( بفرحة ) الله يجازيك بالخير
عنبر ( شافت فيه شادة ليه فيدو ) كيف والو على قبل هاد الزين الفنون ( شافت فسهام ) سهام ختي بغيت واحد الكوشة جاتني وماعنديش الاحتياط
سهام : هههه واخا ( مشات لمجر جراتو وخرجات واحد دلع عطاتو ليها )
عنبر ( تحنات على امير باستو وباست يدياتو) الكبيدة الفن تصبح على خير احبيبي ( شافت فسهام ) تصبحي على خير ..
خرجات من عندهم من البيت سداتو ودخلات لبيتها ، بدلات عليها حيدات البروطيج لاحتو وبدلات السليب بواحد كحل مكانتش عندها الݣانة نهائيا ، هبطات لتحت مكان حتى واحد دخلات للكوزينة فتحات الثلاجة كانت فيها واحد الحلوة ، تشهات الحلاوة هزات مورصو دارتو فطبسيل وطلعات لبيتها سدات عليها ..
- كلات ديك الحلوة ناضت لبيتها حكات سنانها .. رجعات للنموسيتها تكات هازة تيليفونها طالعة هابطة وصلها ميساج فالخاص دخلات ليه كان كونط جديد فيه " سلام " .. مجاوباتش ومامالفاش كتجاوب كونطها مابقاتش فيه أكتيف كيف الاول منين مسحات الفيديوات ديال الغنا ديالها ، كان رشيد دوا مع كاع ليباج لي كانو بارطاجاو فيديواتها والفيديو لي نتاشر ليها الكل مسح لي حاط من غير باج وحدة كان مولاها مزال مامسحش الفيديو .. وهو لي كان خرج منو الفيديو نهار الأول ..
عنبر : هاد الزبل خاص نشوف كيفاش ندير معاه .. ولا نقولها لعماد نيت هو يتكلف ليا ياك هو فالمخزن نسيت مافكرت فيها .. حطات التيليفون طفات الضو وغمضات عينيها كتحاول تنعس ..
- الوقت لي ضرباتها الفيقة مكانتش عارفة شحال فساعة لي فيقها هو الوجع لي كاتحس بيه ، تحت كرشها الحريق وجنبها كيضرها فيقها من نعاسها .. شعلات الضو ونزلات من فراشها كتنين مكانش عندها الفانيد ومكديروش مالفة تودة لي كدير ليها السالمية وكتجيبها ليها لبلاصتها وتدير ليها قرعة فيها الما سخون ..
- حلات الباب دبيتها ونزلات للكوزينة مقاداش تقلب الحريق مخلاهاش .. جاتها البكية ماكرهاتش كون كانت تودة هنا معاها .. حتى وفاء مكايناش مكاتباتش فدار لي توريها فين كدير العشوب ..
- مالك علاياش كتقلبي ؟ ( ضارت على صوتو خلعها )
عنبر ( حابسة البكية بسنانها ) ماعندكمش السالمية ؟
الروطال : شناهو هادشي ( قرب منها ) واش عيانة ؟ حاسة بشيحاجة ؟
عنبر : هلكني الوجع .. ماما مالفة كدير ليا السالمية والما سخون فقرعة جاڤيل كرشي كتقطع
الروطال ( حط يدو على جبتها ) بعدا راسك ماسخونش .. واش مالفة كدير ليك هكا ؟
عنبر : هي مكتجيش بسخانة مالفة كدير ليا هكا ولكن دابا بزاف .. وقيلة حيت كنشرب الحوايج الباردة وغير قبل منعس كليت حلوة من الثلاجة
الروطال : وكتݣوليها بوجهك حمر .. واش كتشربي شي دوا ؟
عنبر : لا ..
الروطال : سيري للصالون ݣلسي انا جاي ..
- تيليفونها كيسوني مابغاش يسكت حاطاه قبالتها كتشوفيه وساهية .. مقاداش تجاوبو ومعارفة شنو غادي تقوليه قطع وسيفط ليها ميساج " حياة جاوبي ندوي معاك مافهمتش هاد الفعايل لي كديري " قرات داك الميساج وتنهدات تنهيدة طويلة ، من وراها سونا وهاد المرة جاوبات صوتها كان باين فيه عيان .
حياة : نعام
جواد : كنسوني من ݣبيل مكتجاوبيش واش مابقيتيش باغية دوي ولا كيفاش ؟
حياة : كنت ناعسة راه يلاه ضرباتني الفيقة
جواد : حياة راه ماشي هكا كيتحلو الأمور راه اكتورني ..
حياة : ياه وكيفاش كيتحلو الأمور ؟
جواد : نݣلسو نحطو كولشي على الطبلة ونلݣاو ليه الحل .. حياة أنا مباغيش نخسرك وربي شاهد عليا عمري شفت فيك شي شوفة ماشي حتى لهيه
حياة : عارفة أجواد .. ولكن راه الحل مكاينش واش انت تݣد تجي المغرب وتستقر فيه ؟
جواد : حياة واش عارفة اش كتݣولي ألمانيا راه سالير ديالي ضوبل ديال هنا ، وزايدون الهضرة ماشي فتيليفون خلينا نتلاݣاو وندويو فهادشي مزيان
حياة : شنو غانݣولو اجواد ؟ لي كاين راه تݣال
جواد : متسديش الباب الله يرضي عليك وكوني تسنطي ، خلينا نݣلسو ندويو كنتي مكتابة ابنت الناس راه واخا طيري اتكوني ليا ماكنتيش مكتابة راه هادشي ديال الله ، المهم هو نݣلسو ندويو دابا نعسي رتاحي غدا نتسناك ورا متخرجي من الحصة ..
حياة ( زفرات بعياء ) واخا إن شاء الله
جواد : يلاه رتاحي تصبحي على خير
حياة : تصبح على خير ..
~~~~~~~~~
- تكات فوق الفوتوي معنقة المخدة ومامرتاحاش .. خرج عندها هاز واحد القرعة بيضة فيها الما سخون .. ويد شاد فيها غراف بيض
الروطال : فين كديريها ؟
عنبر ( كتلوى ) شنو هي ؟
الروطال : القرعة ؟ خداتها من عندو وحطاتها على كرشها ..
الروطال : شربي هذا .. لقيتهم حاطينها فالانترنت كتخفف الوجع
عنبر ( تقادات فالكلسة وخدات الغراف كطل عليه ) شنو فيه ؟
الروطال ( ݣلس ) كاتبين القرفة والعسل وسكينجبير لي مكتوب درتو ليك تم .. شربات منو كان سخون
عنبر : سخون
الروطال : علاش خاصو يكون بارد ( وقف دخل للكوزينة ورجع جايب غراف خور شدو من عندها بردو ورجعو ليها ) شوفي دابا ؟
عنبر ( جغمات منو ) مزيان
الروطال : خاصك طلعي لبيتك تنعسي فيه .. شربيه تم باش يديك النعاس فبلاصتك ، اري القرعة والغراف نشدهم عليك ..
خداهم من عندها طلع سبقها وهي وراه دخلات لبيتها تخشات فبلاصتها مغطية ، عطاها القرعة حطاتها على كرشها وعطاها الغراف .. شربات منو بقا واقف عليها حاضيها ..
عنبر : صافي غير سير سمحليا عذبتك
الروطال ( عوج فمو ) كمليه وتغطاي تصبحي على خير .. عطاها بظهر وخرج من عندها ، شربات داك الغراف كاملو بدات كتحس بسخونية فداتها كلها ، وترخات طفات الڤيوز لي حداها وغرقات فنعاسها ..
ماعرفاتش شحال دالوقت نعسات ولكن كانت كتحس براحة وغارقة فنعاسها كونماشي الغوات لي كانت كتسمع فيه .. حلات عينيها وتوکضات ناضت بشوية خاشية رجليها فبانطوفة توجهات للبالكو حلاتو كتسمع .. كان صوت رجالي كيغوت بأعلى صوتو ..
- درتيها أولد أدريس كون راجل وخرج عندي .. ضربتيها وتسوخرتي وخرج عندي ( الخبيط فالباب مجهد خلا قلبها يضرب وتنفض فبلاصتها مخلوعة ) ..
- رجعات خطوات اللور هزات بينوار ديالها لباستو ولاحت عليها الشال وخرجات من بيتها .. هابطة مع دروج كتسنط كيبان ليها الباب تحل وصوت الصداع على برا نزلات بزربة كطل كيبال ليها خارج حفيان لابس غير سروال دالكيكة وتيشورت ..
الروطال : مهجم عليا فداري والهاجم كيموت شرع أبا هشام
هشام : انت رعواني وماشي راجل كضرب فالݣفا مكتجيش لبنادم فاص
الروطال ( تبسم ) لا انا كنجي فاص تارعوانيت خليتها ليك انت وز*** دخوك ، الضربة فالݣفا كيعرفو ليها تريكتك .. اتجمع *** وغاترولي ولا كنقسم ليك برب الكعبة العصب درجليك ماتلݣاهم ..
هشام ( كيغوت ) الحاج بسبابك طايح فسبيطار انت مولاها .. والله لا خرجات ليك طريفة اولد أدريس
الروطال : الحاج كان حاج فاش كان مدور بيه ولادو عند بالو ولاد دالݣلب ، ساعة عرف راسو مضور بين أ***** واحد على خوه ( شنق عليه هشام باغي يضربو خوا ليه الروطال دخل ليه بونسة عاطيها ليه لوجه مطيحو ناض لاخور شانق عليه ݣالبينها صباط ) ..
- حطات يدها على وجها مخلوعة ماعرفات مادير .. وفاء كطل كتولول .. عنبر تلفات سهام ماقداتش تنزل من البيت وأمير ناعس ..
عنبر ( خارجة كتغوت ) فاروق بعد منو غاتق**لو بعد منو افاروق اويلي ( كتجر فيه والو واش بغا يتجر ليها بدات كتغوت ) وعتقو الروح اعباد الله عنقو الروح ( دخلات وسط منهم حابساه كدفع فيه ) وبراكة براكة ..
الروطال ( كشاكشو خارجين مكايشوفش قدامو ) دخلي اعنبر لاش خارجة لاش ..
عنبر : واش باغي تقتلو واش هبلتي
هشام ( كيضحك ) الرعواني مخبي ورا مراتك ، مافيدكش الحوات مافيدكش واخا يغلفوك بتوب دالحرير اتبقى حوات
الروطال ( كيبغي يمشي ليه ويديها محطوطين على صدرو مكالياه دافعاه ) حوات وح***** فداك السوق ح**** أنت وخوتك ونزيدك حتى الحانوت لي بعتي انا مولاه كيجيتك ( غمزو)
هشام ( صافي تجنن ) برب العالي ماتفرح بيه نحرݣ بوه ومتفرحش بيه ، ماتسرطاتش ليك المحابسي ( شاف فعنبر ) فخبارك راجلك محابسي داخل لحبس ديتي غير شياطة دالمارشي
عنبر ( خنزرات فيه ) الحبس كيدخلو ليه غير الرجال .. الى بغيتي توصل ليه خاصك تنقز الصور وصور عالي عليك وانت نابت فالأرض ..
هشام : طاح الحك وصاب غطاه شياطة المارشي دات شيخة ، الخنز والعفن كيقلبو على خوتهم ميات عام وكيطيحو فبعضياتهم ..
الروطال جرها من يدها خاشيها وراه باش متجيش فيها الضربة نزل عليه لوجهو حتى طيحو تلاح عليه كيعطيه حتى كان غايسخف بين يديه .. عنبر كتغوت لربي لي خلقها ، جا عمر العساس كيجري شاد ليه يديه كيفرق مانوضو من فوقو غير بزز خلاه شرويطة صدرو كيطلع وكينزل ..
عنبر ( شدات فيدو كتجر وطلب ) صافي هالعار راه غاتقتلو وهو داكشي لي بغا هالعار افاروق الميمة ( كلمة كانت كافية تقولها تخليه يحبس مابقاش حاس على راسو شنو كيدير ) غاتمشي على رجليك ولا يجيو يهزوك لروضة ( شاف فعمر ) الى ݣد يدوي سولو فينا سبيطار ناعس باه يمشي يونسو ..
- جراتو عنبر بحال الى كتجري فشي جدع ديال شي شجرة دخلاتو .. مخليين عمر كينوض فلاخر لي كلا الدق حتى مابقاش قاد يوقف ..
عنبر ( سدات الباب ) واش انت حمق شتي كيدرتي ليه .. راه يلقاها حجة ويديكلاري بيك وفين غانوليو ديك الساعات ؟
الروطال ( دوز يدو فشعرو ) هو لي هاجم ، ديكلاري الكاميرات مسجلين شكون جاي كيفرع فالباب
عنبر : واخا هكاك ( مشات للكوزينة جابت ليه الما مدات ليه الكاس ) هاك شرب .. شد من عندها الكاس شربو كامل حاطو ..
الروطال ( شافيها ) انت مال مك مكاتسنطيش ، لاش هابطة بغيت أنفهم ولاش خارجة البشار ؟
عنبر : المدابزة نايضة وانت كالس كدابز ونبقى انا ݣالسة واخا يكون دمي كيبات فالفريݣو كنديرهاش زوينة هادي
الروطال : عاجبك الميكروب الز*** يسمعك الهضرة خارجة مبندة ليا كمارتك ليه ، انا الالة كاد براسي متخرجيش كون جات فيك شي دقة فين غانوليو بقاي تفكري خدمي عقلك ابنادم ..
عنبر : ولاهيلة عندك الصح انا فهمو ندادي وهو يݣطع فوتادي
الروطال : أستغفر الله العظيم لا حول ولا قوة إلا بالله ..
عنبر ( ماهمهاش حيت غوت عليها ) شكون هذا ؟
الروطال شافيها .. رجع شاف قدامو او وقف غادي ؟
عنبر : فين غادي ؟
الروطال ( ضار عندها ) ندوش .. عطاها بالظهر وطلع لبيتو .. بقات فبلاصتها حاطة يديها على حنكها وقلبها مزال كيخبط ..
- سونا الباب فتحات وفاء كان ليڤرور وصل الحوايج لي دوموندات عليهم عنبر .. كانت ݣالسة فالصالون كتدوي مع تودة قطعات معاها فاش جات وفاء علماتها مشات شدات الأمانة وطلعات عند سهام مداتها ليها ..
- سهام : شكرا بزاف الله يكثر خيركم ياربي
عنبر : اللهم آمين هانية بالعكس مادرنا والو ، يستاهل حبيبي زين لبسيه وخرجو للجردة الجو زوين انا نيت انخرج نݣلس شوية ( تمات خارجة ورجعات ) سهام داكشي لي وقع لبارح
سهام : لا اختي ماوقع والو .. داكشي عادي الصداع كيوقع مرة مرة
عنبر ( بإبتسامة ) صافي وديري وخرجو لجريدة لبسي غير امير مزيان وخرجو .. خلاتنا تبدل ليه ونزلات هي ببيجامة سخونة دارت شالها ودارت قب البينوار دالبيجامة هزات تيليفونها وخرجات للجردة ..
لبارح من دوش نزل خرج مارجع حتى الليل .. كانت فبيتها الوقت لي رجع فيه واليوم خرج بلاما يفطر .. تنهدت وراسها حرقها بالفضول بغات تعرف شكون هداك وكيفاش قضية الحبس لي قاليها راجلك محابسي سمعات صوت الروايض ديال الطوموبيل هزات راسها كانت طوموبيلتو .. نزل منها كان لابس لبسة سبور سد الباب وتم جا حتى بانت ليه ݣالسة قلب الطريق وتوجه لجيهتها تخطاها وݣلس حاط تيليفونو وسوارت الطوموبيل ..
الروطال ( ببرود ) ماباردش هنا عليك ؟
عنبر : لا الشميسة سخونة واخا هكاك الجو زوين تغديتي ؟
الروطال حرك حنكو بمعنى لا
عنبر : كيبقيتي ؟
الروطال : من اشمن نحية ؟
عنبر : داكشي لي وقع لبارح ، خرجتي ماقلتي والو وفاش رجعتي ماشفتكش !!
الروطال ( هز حتجبو بإستغراب ) ضرك راسك ؟
عنبر ( هزهزات راسها ) أه بغيت نعرف ، ءمعتو قال المحابسي
الروطال : وانتي ݣلتي ليه مكايدخلوه غير الرجال
عنبر : ومالي كذبت النص فالحباسة داخلين أ ظلما
الروطال : وانا دوزت فيه عام باطل
عنبر : واش هو لي دخلك ليه ؟
الروطال : تريكتو كاملة ( رجع براسو اللور مغمض عينيه وكيدوي ببحة صوتية رجولية تقيلة ) ماتسرطاتش ليهم ولد 23 عام يتزاحم معاهم فسوق ويولي عليه الزحام ، ولي يجا يسول عليه والى مكاينش حتى قندوح مكايوصلهم ..
عنبر : وراه كل واحد ورزقو والى كانت عندهم السلعة مزيانة راه ايتقداو عندهم الناس .. راه الواحد هو لي كيكون مسؤول على البيعة وشرية لي داير
الروطال : هادشي كتݣوليه انت .. الهضرة لي كدور بيناتهم جات ولد برهوش طحن ليهم السوق ودا ليهم الكليان وخاصهم يمسحوه من المارشي بحال الى عمرو مكاين ( خلاتو كيهضر وهي كتسمع ليه حدر راسو شافيها ) ناضت المطايفة فالمارشي حتى واحد مابغا يدخل يفك كولشي توخر لور مخليين دري كياكل فالعصا .. دخلت نفك غفلوني جاتو دقة بالجنوي شكون لي رفدها هاد العبد لي ݣودامك
عنبر ( تبورشات ) ولكن واش ماشهد حتى واحد ودري لي كلا الضربة علاش مݣالش بلي راه ماشي انت ؟
الروطال ( تبسم بإستهزاء ) الزرقالاف خدمات فديك لافير ( دوز لسانو وسط فمو بحال الى غير لبارح وقعات ) لي ضرب مبانش ولي تضرب ݣاليهم هو
عنبر : ولد الحرام من فعايلو الكيدار .. دير خير مايطرا ليك باس ، هاباش الواحد يولي يدخل سوق راسو مايفك حد كتولي انت لي غادي فرجلين .. وكيفاش خرجتي ؟
الروطال : تكلفو بخونا لي شد الضربة ، ولكن سيطروطار حتى دوزت عام من حياتي غير هكاك ..
عنبر : فاش خرجتي رجعتي للمارشي ؟
الروطال ( بنفي ) لا واحد السيد كنعرفو شاف ليا واحد الخديمة فالفيرما ديال بات راشد صاحبي ، تم فين تعلمت كيفاش نروض الخيل وليت كنعرفو واش مقلق واش فرحان واش مريض ، وليت انا لي كنداويه .. تم فين وليت انا وراشد صحاب ومن تما بدات
عنبر ( عجباتها الݣلسة والهضرة معاه كانت باغية مزال تزيد تسمع مابغاتش تقرا الكتاب وتعرف عليه شي حوايج منو بغات تسمعها منو هو ) من تما وليتي كتبيع وتشرب فالخيل ؟
الروطال ( هزهز راسو مسرح رجليه ) لا بديناها بالبهايم انا او واحد السيد ، كنضربو الهوتات فالعيد دورنا مصيريف ودرنا واحد رزيق خديت بيه واحد الفيرمة من البهايم دزنا الدجاج والبيض ، طارق عجبو الضومين كان داير هادشي دالعمران عجبو الهيث ودخل ليه ..
عنبر : واش هو لي داخل معاك ولا أنت ؟
- خارجة من المدرسة جامعة شعرها سفنجة لابسة تريكو فالبيض فالبيج وصايا ديال الجلد فالكحل مع بوتيو .. كان واقف بطوموبيلتو كيتسناها توجهات لعندو حل ليها الباب وطلعات سلمات عليه بليد .. ملامح وجها كانو دابلين هادشي لي لاحظ فاش طلعات ، ديمارا بلاما يدوي معاها شدو الطريق لواحد الكافي ضار عندها :
فيك الجوع ؟
حياة ( بنفي ) لا مافياش .. بلاصة طوموبيل وهبطو بجوج ختار بلاصة بعيدة وكالم باش يدويو على راحتهم ، من بعدما خدا السرباي الطلب ديالهم ..
جواد : رتاحيتي شوية ؟
حياة ( تنهدات ) الحمد لله ياربي بيخير
جواد : علاش لبارح مكتجاوبيش أحياة واش بحال هكا كيتحلو الأمور
حياة : انا لبارح امشيت نعست داكشي باش ماسمعتش التيليفون
جواد ( تنهد ) ماشي مشكيل ( سكت كيشوفيها ) حياة واش كتبغيني ؟
حياة ( شافت فيه بزربة كتحرك فيديها وصباعها ) جواد شوف انا هادشي معارفاهش واش حب ولالا .. ولكن كنكون مرتاحة فاش كنكون معاك وفرحانة وكنتوحشك الصراحة تقال منقدش نقوليك بلي هذا راه بغو ( تبسم ) حيت انا عمري جربتو هادشي لي كاين ..
جواد : وشنو واقع احياة .. مالك على هاد الحالة كاملة ؟
حياة : وانت كتبغيني ؟
جواد ( بجدية ) حياة الحب كيجي مع العشرة .. منݣدش نݣوليك انا كنبغيك الحب مزال ، ولكن كنلقى معاك راحتي بنت الناس قلبك زوين كتخرجي الحاجة بلاما ضربي ليها الحساب تلوحيها لبنادم سوا بغاها ولالا داكشي لي باغي فمرتي فيك انتي ، هادشي علاش جيتك نيشان أنا هوكا ..
حياة : جواد انا راه لي قلتو ليك هو لي كاين باش نخوي المغرب ونبعد على دارنا منديرهاش .. انا كنقرا العام جاي اندفع للباك نشدو باش نخدم
جواد : الى تزوجنا مغاتحتاجيش لهادشي احياة
حياة : مي وخوتي مسؤولين مني أجواد راه قلتها ليك لبارح الله يهديك .. واش غانبقى نعاودها ليك ، انت باغي وحدة ماتخدمش تكلس فدار هادشي لي كتقول مزيان كون كنت مأمنة على دارنا ولكن انا فواح المرحلة صعيبة خاص انا نوقف معاهم ..
جواد : ومتزوجيش تبقاي حياتك كلها هكا .. انا كنحتارم الراي ديالك بالعكس زدتي كبرتي فعينيا ولكن حتى ليمتا ؟
حياة : حتى نهار يحن الله .. جواد شحال من حاجة كنبغيوها ولكن يمكن مكايكونش عندنا الخير فيها انا أوروبا مكتعجبنيش ومنقدش نبعد على دارنا ونخلي مي لي محتاجة لي وخوتي ، جا واحد الوقت خلاها با لا انا لا هي ونجي نخليها دابا لا اجواد ..
جواد ( تنهد ) ولاو على حساب راسك ؟
حياة : اه ولاو على حساب راسي ( حابسة البكية ) مزال اجواد ايجيب ليك الله بنت الناس حسن مني تستاهل كل خير وربي شاهد .. كنتي أحسن حاجة وقعات ليا فحياتي ( وقفات مامخلياش ليه الفرصة يدوي ) حسن مانبقاوش ندويو تهلا فراسك ( خلاتو كالس وخرجات عينيها مغرغرين بدموع ..
- الروطال ( حك جنب نيفو ) طارق فلول كان داخل لضومين دالعمران ، من ورا مادرت بلاصتي داك الوقت فتحت واحد الشركة صغيرة نصها بعتها ليه ولينا دايرين نصوصي بجوج صافي ݣلبت انا لهادشي ديال لزوطيل بعدت من هادشي واخا مزال يدي تم ولكن بقا هو لي مكلف .. كان محتاج سينياتير ديالي شي بيعة وشرية صحيحة كنحط يدي تم
عنبر ( بإبتسامة ) دابا البيض لي كناكلو جاي من عندكم ؟
الروطال : جاي من دجاجة لي كتبيضو وتقرق غليه ماشي من عندي
عنبر ( ميقات فيه ) جوابك على نابك علاش زعمة ماخليتيش داركم يعاونوك داير فيها عزة نفسي ؟
الروطال : الكروصة باش بديت الواليد هو لي شراها ليا .. كنت كنبيع فيها ديسير كيمشي عند صحابو فالخدمة كينيش ليهم فين داير الكروصة كيݣوليهم ولدي عاد بادي شريو من عندو
عنبر : مسكين
الروطال : انا كنت عايق بالبلان ، حيت صحابو كنشوفهم معاه ، وصحابو كيسيفطو عيالاتهم مسكين كان كيدير هادشي بلا خبار الواليدة ..
عنبر : اتخاصم عليه ؟
الروطال : اتبقى دوي بزاف .. وتسمعني الهضرة علاش مكملتيش قرايتك تخرج بحال باك ، وانا نكذب عليك الهيث دالمخزن ماعديش معاه ، كنت حاط حاجة بين عينيا نوصل ليها والحمد لله ربي مكايخيبش خاص اتكون مرضي وهذا صافي ( أشر لقلبو ) حتى حاجة ماتخصك .. الواليد فاش كيݣولها لصحابو ولا فاش كنتجمعو كتشوفي فعينيه بلي عاجبو الحال كيݣولها وهو مفتاخر ..
عنبر : وراه بطبيعة الحال يفتاخر انا يكونو دارنا مسك عليهم ربي او ولدي باغي يبدا من زيرو راه ندير البوق ونݣولها لكاع الناس سعداتو بيك والله الله يرزقني بشي ولد بحالك ( بقا كيشوفيها وساكت ساهي فالهضرة لي ݣالت تبسم بلا يحس ) فخبارك عزيز عليا باباك ظريف والله مسكين ..
الروطال : هو الساس ، شتي فاش كتلݣاي لي يدفعك يوݣف معاك فداكشي لي انت باغي كولشي كيسهال ..
عنبر : واش كان كيعجبك تبيع فالحوت ؟
الروطال : كان كيبان ليا فيه الفلوس .. داك الوقت كنت تالف ماكنتش عارف راسي شنو باغي .. الواحد حتى كيكبر ويتعكل ويوݣف عاد كيعرف هو شنو باغي .. اتبقاي تسولي بزاف كان خاصك تقراي على الصحافة انتي ..
عنبر ( ضحكات) عادي اصاحبي كنديو ونجيبو فالهضرة وصافي ( وقفات ) جاني جوع فيك مياكل ؟
الروطال ( شافيها ) فيك متخرجي ولا طيبي انت ؟
عنبر : نلبس عليا ونرجع ..
الروطال : ستغيلالية انتي
عنبر : وراه خاصك تخلصني على هاد الݣلسة لي ݣلست معاك راه بالفلوس ( عطاتو بظهر طلعات لبيتها لبسات عليها كيطمة طويلة مع سبرديلة دارت الشال ديالها كتافات غير بليكغو وݣلوس هزات ساكها دارو على جنب دارت فيه تيليفونها وخرجات ) توجهات للعند سهام علماتها بلي خارجين ونزلات خارجة من الباب تحت انظار وفاء .. لقاتو كيتسناها طلعات حداه دايرة السمطة ديمارا وشد الطريق ..
~~~ فــجهــة أخرى خرجات من الدار لابسة جلابتها وزيفها .. شيرات للطاكسي وقف ليها طلعات عاطياه العنوان .. يديها باردين بالخوف مزيرة على ساكها ساهية حتى فيقها مول الطاكسي من سهوتها ، فتحات ساكها جبدات بزطامها خلصاتو ونزلات واقفة مقابلة مع دار كتسول راسها واش هادشي لي كدير فيه هو لي خاصو يدار ولالا .. رجل كترجع للور ورجل كترجعها للقدام بلعات ريقها وتقدمات حطات يدها على السرسار سونات .. ثانية ورجعات سونات كتعض على شفتها والبرد كيلعب بجلابتها تسمعو خطوات جايين هزات راسها فالباب لي تحل ..
دنيا ( بإستغراب) خالتي تودة ..
- بلعات تودة ريقها كتنفس بصعوبة دورات لسانها وسط فمها ونطقات بصوت مرعود :
كاين باك ؟
دنيا ( بالإيجاب ) يااه كاين واش بغيتيه دخلي بعدا .. دخلات تودة سدات دنيا الباب ، وقفات ضايرة عندها :
خوتك كاينين ؟
دنيا : اه كاينين ، ياسمين غاتمشي مع راجلها لمراكش ايتحولو لتم داكشي باش كولشي مجموع علاش أخالتي ؟
تودة ( بلعات ريقها ) صافي مزيان .. تمات داخلة تودة او حداها دنيا لي مكانت فاهمة والو ، دخلات للدار مداتها لا فديكور لا فدار لا فوالو مزير على ساكها وداخلة .. كتسمع الهضرة جايا من الصالون حتى وقفات عليهم كولشي دار لجيهتها متفاجئين بالمجية ديالها خصوصا عبد الخالق ..
ياسمين : خالتي تودة مرحبا بيك ..
تودة ( سلمات عليها وسلمات عليها يسرى ) ربي يخليك أبنتي .. إدريس كيشوف فخوه بإستغراب ، وقف طارق سلم عليها :
دخلي الالة تودة ݣلسي .. ݣلسات تودة وكولشي كان كيشوفيها بإستغراب هزات راسها فدنيا ونكقات بصوت مرتجف :
بنتي الله يرضي عليك شريبة ديال الما .. طارت دنيا للكوزينة جابت ليها الما خدات الكاس من عندها برجفة شرباتو كامل حاطة الكاس فوق الطبلة ..
طارق ( عکد حجبانو بإستفهام من ملامح وجها ولونها المخطوف ) لالة تودة ياك لاباس واش واقعة شيحاجة ..
إدريس : ياك شي باس مكاين الالة فاطنة ( هزات فيه راسها فاش نطق سميتها شافت فعبد الخالق ونطقات ببرود )
تودة : بغيت نݣوليك شي هضرة ، وداكشي لي بغيت نݣول حسن تسمعوه كاملين باش ماشبدي كل نوبة واحد يسيق الخبار
عبد الخالق : الله يسمعنا خبار الخير
تودة ( وركات على ركابيها ) ݣلتي لولادك على السيدة لي كتي بغيتيها شحال هادي وتلاݣيتيها فالموسم ( دنيا فوق الكرسي شادة على يدها بتوتر ) ..
عبد الخالق ( شاف فولادو لي كانو نظراتهم كيتنقلو منو ليها ) واه فخبارهم
تودة : ݣلتي ليهم بلي ديك السيدة هي انا ولا مزال ؟
طارق ( بدهشة ) شناهو ؟!!
يسرى ( بإستغراب ) كيفاش ( شافت فباها ) بابا واش خالتي تودة هي السيدة لي كنتي عاودتيلينا عليها شحال هذا ؟
عبد الخالق ( هزهز راسو مزال على نفس الوضعية والهدوء ) يااه هي ، شتها نهار عرس ياسمين ولكن هي ماعقلاتش عليا وماعرفاتنيش ..
تودة ( كتحاول تشد راسها قلبها غايخرج من بلاصتو ) ماعرفتو بلي هو حتى لعرس عنبر نهار لي سخفت .. تم فين عرفت بلي السيد لي تزوجت بيه بالفاتحة هو عبد الخالق عم راجل بنتي عنبر ..
- الدهشة وصدمة بانت على ملامح يسرى وياسمين وطارق مافهمو والو ستغربو .. اللسان باش ينطق مابقاش عندهم
إدريس : حكم سيدي ربي الالة فاطنة ( برزانة ) ربي منين كيبغي للحاجة توقع راه فديك الساعة ، ربي كان مكتبر عنبر تزوج بولدي وكان مكتاب طيح فالعاىلة ديال السيد لي تزوجتي بيه واحد النهار ..
تودة ( بلعات ريقها وعينيها مغرغرين بدموع ) انا داز عليا العذاب الكحل لي ( شافت فعبد الخالق) تكرفصت تكرفصت وكنت بوحدي لا حنين ولا رحيم ربي فوق مني ..
يسرى : حتى بابا اخالتي تعذب .. حتى بابا داز عليه العذاب وتعذب معانا وكبرنا إلى بغيتي تلوميه راه هو عيا وهو كيقلب عليك وهاهوما شاهدين .. حنا منين عاود لينا عليك وهو كيقلب عليك ولكن مالقاكش كنا بغينا نتعرفو على سيدة لي بغا بابا مرابانا تكون حنينة فينا وتحن فيه وتبغيه حيت والله حتى يستاهل ، هو متخلاش عليك ولا خلاك هو رجع على وديت ختي دنيا ..
تودة ( شافت فيها ) انا مجاياش ابنيتي باش نحط اللومة على شي حد جيت نخوي ݣلبي ونرتاح .. الحمل تقال وعيا ليا كتافي مابقيتش ݣادة نهزو بوحدي صافي ( دوزات لسانها على شفتها وشافت فيه ) لي غانݣول ونخرج من فمي يبقى هنا مانبغيهش يخرج ماشي دابا غايجي نهار ويخرج ولكن ماشي دابا الله يرحم الوالدين ..
عبد الخالق ( غوبش وبان القلق على ملامح وجهو ) أش تم أفاطنة دوي ؟
تودة ( هبطو دموعها سخان ) بغيت نݣولك حتى انا كءبت عليك اعبد الخالق ، فاش جيت انا وخالي للموسم ماجيتش باش نفوج جيت باش نخدم ( سكتات وتنهدات تنهيدة طويلة) انا كنت شيخة ( كمش عينيه فيها كيسمع ) ماݣديتش نݣولها لك حيت عارفة لي كيسمع شيخة كيݣول هادي شي وحدة سايبة مامزياناش ماعندها اصل ولا مفصل ، فاش كانت عندي 16 عام با بغا يزوجني بزز بواحد السيد كبير انا مابغيتش هربت للعند خالي ومن وراها خدمت فتاشياخت درت بلاصتي ولا كولشي كيجيبني لعراساتو فاش تلاݣيت بيك ماݣديتش نݣولها ليك ..
عبد الخالق : هادشي لي كتݣولي مكان غايبدل حتى شيحاجة أفاطنة ؟
تودة : هادشي لي عطا الله الخلعة دارتها ليا ( مسحات دموعها ) اول مرة فحياتي نبغي شي حد ويدخول ليا شي راجل لحياتي .. وراها فاش وقع لي وقع ومشيتي ورجعت بحالي كان عد بالي ضحكتي عليا ومشيتي ، خشيت راسي فالخدمة فينما كان شي سبوع شي عرس كت نمشي ليه حتى نهار لي غانعرف راسي حاملة ( الصدمة لي بانت على ملامح وجهم كنت كثر من لي شدوها فاش عرفو تودة هي لي كانت مع باهم طارق غوبش تݣاد فالݣلسة ربع يديه مركز مع هضرتها )
ياسمين ( داخت ) كنتي حاملة ؟
تودة ( هزهزات راسها ) أه كنت حاملة .. عبد الخالق كيشوف فيها شاد على يدو كن نهار قالت ليه ولدو مات وهو مكاينعسش ، ملامح وجهو تبدلو شاد راسو غير بزز باش متنزل دمعتو ..
تودة ( شافت فيه ) كذبت عليك فسوق الاربعاء وݣتلك بلي ولدك مات ، كنت بغيتك تعذب كيما تعذبت انا وتكرفصت ..
عبد الخالق ( شهق ) بغيتي تݣولي بلي الولد لي كتي حاملة بيه ماماتش ياك أفاطنة ؟
تودة : دازت عليا فالحمالة وكولشي كان كيشير ليا كيݣولو حملات من زنقة حيت انا براسي ماكتش تايقة فداك الزواج دالفاتحة ، دويت مع مي خوتي ݣالو ليا ترجعي ندفنوك حية أنت ( دموعها نزلو كتشهق بالبكا ) ݣالو ليا ندفنوك انت ولي فكرشك ، خالي الله يرحمو كان مشا ديك ساع لبرا هو ومرتو بقيت بوحدي لا حنين لا رحيم ساكنة فبيت نهار كناكل ونهار لا ( يسرى غرغرو عينيها بدموع شافت فدنيا لي دموعها كانو هابطين متأثرة بكلام تودة واخا كانت عاودات ليها ) واحد السيد معانا كوامانجي كان مزوج وربي مجابش ليه الولاد طلبني لي زلدتو نعطيه ليه ( بإنفعال مخرجة عينيها ) ولكن انا مابغيتش ݣتليه ولدي انا لي انربيه وداكشي علاياش كت ناوية .. ( حسات بسخفة )
طارق وقف كب ليها الما مد ليها الكاس .. شداتو من عندو برجفة شربات منو ورجعاتو ليه ، تنهدات تنهيدة طويلة مكملة كلامها ..
- كنت ناوية نولد نخوي البلاد ونمشي لشي قنت نبدا فيه من جديد انا وتيلاد لي كان فكرشي ، تكرفصت والخدمة كلست منها ولاو غير الناس لي كيجيبو ليا مناكل .. ( مسحات دموعها ) حتى لنهار لي غادي يشدني فيه الوجع ( تبدلو ملامحها عينيها تابتين مكترمش ، كتبان مضرورة الدكرى مزال بين عينيها ) جات السيدة لي كنت خدامة معاها فتاشياخت هي وجوج عيالات هوما لي ولدوني ( شافت فيه ) ولدوني وفاش ولدت وفقت ݣالت ليا مليكة سيدة لي ولداتني راه بنتي ماتت الله يرحمها .. بكيييت وشكيييت وجدبت بغيتهم يوريوني فين دفنوها مابغاوش ، موراها خويت ومشيت لبرشيد تعرفت على واحد السيدة وقفات معايا ومن برشيد لولاد صالح وتما سكنت وتعرفت على واحد السيدة .. حورية كانت خدامة وكتخلي معايا بنتها لي عندها عامين كنت كنمشي نخدم ونديها معايا ( بلعات ريقها ) وحيت انا بنتي ماتت كنت كنحن فيها كانت عزيزة عليا بزاف سبحان الله كت نݣول هاد البنت كتشبه ليا مكتشبهش لمها ، تما ( خرجات عينيها ) بدا الشك كيلعب ليا فمخي فاش كيوصل وقت الشهدية ويديها كيوليو ريالات حمرين فحمالتي كنت توحمت على شهدية ومكانش عندي باش نشريها ( البنات ب 3 كانو كيبكيو .. عبد الخالق إحساسو كان خايب كان مصبر راسو غير بزز ) ..
طارق لي كان مركز معاها رجلو كترعد بوحدها عاض على جوج صباع ومتوتر .. إحساس خايب كان كيحس بيه الداخل
تودة : كنت كنعل الشيطان وكنݣول وااا فاكنة اي نعلي شيطان بنتك ماتت الله يرحمها ، وبقيت هكاك 12 عام وفهاد الوقت كاملو عمري شفت باها حتى لنهار لي غانشوفها جايا هي وياه شاد ليها فيديها ، لݣيتو سليمان لي كان بغاني نبيع ليه كبدتي .. تفكرت بلي مرتو كانت عاݣرة تم هزيت راسي انا ورحيمة ومشيت نقلب على مليكة نسولها لقيتها رحلات ، لݣيت السيدة لي كانت معاها فاش ولداتني .. تم ݣاتليا بلي البنت لي ولدت ماماتش بلي مزال عايشة ولكن ماعرفاتش مليكة لمن عطاتها ( بدات تبكي ) رجعت لولاد صالح كنت بغيت ندير تحليلة ونسول سليمان لݣيتو هز بنتي هزها وهز مرتو ورحلو حتى واحد مابغا يوريني فين مشاو ( شهقات ) 13 عام وانا كنقلب على بنتي ( خرجات عينيها ) 13 عام دالعذاب مكفاهش سرق ليا بنتي غبرها عليا .. تزوجت بالمعطي ( تنفسات بصعوبة ) باش نݣد نلقاها ومالݣيتهاش حتى للنهار لي غانمشي فيه للموسم وغانحضر ( سكتات ) وغانشوف بنتي ݣدام عينيا واقفة كتغني قبالتي ..
طارق (بدون سابق إنذار بصوت رجولي تقيل ) عنبر ياك ؟ عنبر هي ختي ؟
- ݣالسة هي وياه عند مول شواية فالجميعة .. كيتسناو الماكلة تجيهم ، تحط ليهم الطبسيل كبير فيه الطيحان معمر ومشوي فوق الفاخر
عنبر : يا بسم الله فيا الجوع ديال عام .. بدا كيقطع بالموس وكيحط ليها فطبسيلها ، قرب ليها الملحة والكامون هز خبزة حطها ليها هزات فيه عينيها بإبتسامة قطعات من الخبز كتاكل ..
عنبر ( فمها عامر ) بنين كيعجبني واخا كيقولو كيخنز البيطان ( وحلات ليه كيكح ) حلال حلال ( هزات يدها خبطاتو لݣرفادتو كابة الما عاطياه ليه ) تشرݣ لعمتك خت بوك .. الروطال هز حواجبو فيها كيشرب
عنبر ( عضات على لسانها ) الله ينجيها خالتي فاطمة ضريفة مسكينة ..
الروطال ( بلع اللقمة ) مكاتفرانيش والو ؟
عنبر : وصافي افاروق راه غير زلقات ليا
الروطال : غايسة فصابون هي ديما زالݣة .. كولي قبل لا يبرد ، بدات كتاكل ودوز بأتاي كدور فعينيها مستمتعة باللحظة حتى عرݣاتها مسحات فمها بكلينيكس مرجعة راسها
عنبر : الحمد لله
الروطال : تزيدي شيحاجة ؟
عنبر : لا ( شافت فيه بكل براءة ) فاروق
الروطال ( هز حاجبو نظراتها كانو نظرات شي واحد باغي يطلب شيحاجة ) هممم
عنبر : ديني للمارشي لي كنتي خدام فيه
الروطال : أش غاتصنعي فيه ؟
عنبر : بغيت غير نشوفو ومنها نيت بغيت ناخود واحد نوع دالحوت بغيتو لدوا
الروطال : خلي من بعد ونديك عندي مايدار دابا
عنبر : يااااك وعقل فيها اكوينيدي ديرها فين تجيك .. مجاوبهاش ناض خلص لقاها سبقاتو لطوموبيل ، طلع بلاما يدوي معاها دورات راسها عند الزاج منفخة عليه .. حرك راسو بلا حول حنحن :
أشمن حوت بغيتي ؟
عنبر ( بلاما تشوفيه ) بلاش مابغيتوش
الروطال ( بصرامة ) ودوي
عنبر : كنت بغيت حرتوكة وبغيت دغيميسة ديك الكرة لي فيها الشوك .. مزيانة للبرد ( جبد تيليفون من جيب تجاكيط مدوز نمرة )
- وي سفيان ݣوليا كاينة تم شي حرتوكة والݣنفود ؟ هكاك صافي واخا الله يعاون ( قطع شافيها ) مكايناش نهار الثلاث الجاي غايكون الحوت فريش فالمارشي ونجيبك تشوفي وخودي لي بغيتي صافي ؟ ..
عنبر ( هزهزات راسها ) واخا ..
تودة ( بتنهيدة طويلة ) أه عنبر ، ياسمين حطات يدها على فمها مامتيقاش عبد الخالق ماحسش حتى هبطو دموعو .. شافيه إدريس بصدمة ورجع شاف فتودة طارق لصق يديه حطهم على فمو بتوتر كولشي تجمع عليهم الصدمة ورهبة ..
عبد الخالق ( دوز لسانو على فمو ) دنيا الما ابنتي ( طارت دنيا جابت ليه الما حس بضيق فنفس ديالو )
يسرى : حلي سرجم .. حلات دنيا السرجم باش يتنفس مزيان شرب الما ويدو كترعد زول نظاظرو حطهم كيشد على عينيه حس بيهم كيتقرقشو ..
دنيا ( بخوف ) بابا ياك لاباس ؟
عبد الخالق ( هز يدو ) الحمد لله الحمد لله .. (حل عينيه مزيان شاف فتودة ) عن ( ماݣدش يصبر شهق نازلين دموعو هاز يديه ) بهاد ليدين قريت عليها القرآن بهاد اليدين شدي راسها بستو بنتي ( شاف فخوه ) بنتي اخويا ݣدامي مشينا نخطبو بنتي أدريس مشينا خطبنا بنتي ( ماݣدش يصبر بدا يبكي ) .. قربات منو دنيا عنقاتو كتبكي ..
ياسمين ( كتمسح دموعها ) كنتي عارفة ياكي ؟ داكشي باش داك نهار كنتي كتعنقي فيها وتبوسيها ولاصقة فيها ؟
دنيا ( معنقة باها كتبكي معاه ) سمعتهم كيدويو فدار با ، وشكيت من الشبه لي كتشبه لينا أنا وياك مشيت لعند خالتي فاطنة سولتها وهي عاودات ليا كولشي .. ماخلاتنيش نݣولها
طارق ( بإنفعال ) هادشي مخاصوش السكات ، واش هذا الضحك واللعب لي تسكتو عليه .. الواليد عندو بنت أشرفة وكتݣولي ليا مخاصنيش نݣولها ..
يسرى : بشوية اطارق بلاما تبقى تغوت
طارق ( وقف ) كيفاش مخاصنيش نغوت .. اشريفة راكي داوية على ختي دمي ولحمي واش هادشي فيه السكات
يسرى : وراه عنبر براسها مافخبارهاش ، تكالما تكمل خالتي هضرتها تعود من الشيطان (طارق شد على راسو غادي جاي متوتر ) كملي اخالتي سمحيلينا ولكن راه هادشي تلاح علينا بحال الرعدة والله .. من ورا سينين تعرفي بلي عندك ختك وحداك وكانت معاك وماكنتيش عارفة صعيب الحال ..
تودة ( تنهدات ) عارفة ابنتي ، حتى انا نهار عرفت هكا وقع ليا ماتيقتش .. انا وصيت دنيا تسكت حيت خايفة على بنتي
إدريس ( كان تابت وهادئ بصوتو الرجولي الموزون ) مناش الخوف الالة فاطنة ؟ عنبر الناس لي رباوها ماتو الى عرفات بلي والديها لي ولدوها عايشين راه حاجة زوينة ولالا ؟
تودة : كنت عاودت ليها على هادشي لي وقع معايا ولكن ݣلت ليها وقع لواحد السيدة .. ݣالت ليا كون انا لي وقع معايا هادشي نحماق خايفة على بنتي اسي أدريس سليمان وحورية كانت كتبغيهم وتعدبات فاش ماتو ، الى عرفات بلي باها لي رباها سرقها وهي لحيمة تحماق ليا ..
أدريس : بالعقل ندويو معاها .. لا انت لا باها ماعندكم يد فهادشي
تودة : خايفة لا طج أسي أدريس ، ودابا داك الميكروب ديال راجلها القديم دخل هو وباه للمغرب ..
أدريس ( هز حواجبو ) رحمون دخل للمغرب ؟
عبد الخالق ( شافيه بتساؤل ) شكون هاد رحمون ؟
تودة : شيخ عنبر باين راجلها الأول .. عنبر كانت شحال هادي مزوجة بواحد خونا كانت كتبغيه بزاف تزوجات بيه ومشات معاه لبرا ، كذب عليها وضحك عليها طلقها ب 3 شهور وهي مافخبارهاش دار راسو مات وسيفطوها دارهم للمغرب وهو راه مامات ما والو .. غير كذب ودار راسو ميت بلعاني باش يسوسها ..
طارق ( شاد راسو غابزز مخزف) هداك أنا انا لي غانق**تل جدو حتى الى تݣالت مات غايموت ديال صح
أدريس : طااارق ( بصرامة )
تودة : عنبر يلاه عرفات بلي كذب عليها .. وضحك عليها ورشى طبيب لي ضحك عليها بلي مكتولدش ، ودابا صدقو عائلتو لا باه ولا مو دايرين عصابة كيشدو البنات يحيدو ليهم كلاويهم ودوك الاعضاء ديالهم كيبيعوهم دايرينها بيعة وشرية .. ودابا البوليس كيقلبو عليهم ..
ياسمين ( بخوف ) انا راسي غايحبس وحق الله .. وعلاش البوليس مايشدوهمش ؟
أدريس : بنتي ماشي غير أجي وشد .. هاد الناس يدهم واصلة كيضربو ضربتهم تحت الدف ، ضروري خاص الحجة والبرهان باش يتشدو فهمتي
يسرى : عمي واش انت كتعرفهم ( ببراءة )
أدريس ( حك نيفو ) كنت سمعت واحد تنقنيقة على شي بنات ديكلاراو والديهم ، غبر لهم الأثر فنهار الثاني ديال زواج وتجبدات سميتة هاد خونا هذا هو مولاها ماشي مولاها ولكن هو لي كايتعطا ليه لوردر من عند شي حد .. دابا البوليس خدامين على هاد لونكيط ..
تودة ( بترجي ) عنبر الى عرفات تݣد تهز راسها لشي قنت وانا خايفة عليها .. خايفة يتلݣا ليها هداك ولد الحرام ويديرو فيها شيحاجة هوما مكايخافوش الله شوف غير أش دارو فهاد بنات الناس خلي بنتي أنا ..
عبد الخالق : ݣلتي ليا داك الكلب خلى طبيب يكذب عليها بلي مكتولدش
تودة : اه مكانش باغيها تحمل منو باش يݣد يكركبها من بعد ( طارق كل مكايزيد يسمع وسيناريو كيدوز قدامو وبلي ختو هي لي وقع ليها هادشي عينيه تعماو مكايشوف والو ݣدامو ) ..
يسرى : ولكن ياك عنبر عندها ولد مافهمتش !!
عنبر ( ضارت عندو ) واخا توقف عند بيم ؟
الروطال : بغيتي شيحاجة نجيبها ليك ؟
عنبر : لا انا انجيب بلاما تنزل .. خاصني شيحاجة ليا أنا .. ( حبس الطوموبيل قدام بيم ) .. نزلات من طوموبيل ودخلات للبيم ، مشات نيشان خدات أولويز بانت ليها السقاطة خداتها حتى هي ، مع ضارت بان ليها وراها رامي عينو لشنو خدات ..
الروطال : ومالك على هاد الحالة بحال الى سارقة .. مجاوباتوش حدرات راسها ومشات لاكيس ، دارو ليها لي خدات فساشي وقبل لا تخلص كان خلص هو خرجو من بيم .. شادين الطريق للدار وصلو نزلات من طوموبيل طلعات نيشان لبيتها بدلات عليها لبسات بيجامتها وغسلات وجها وسونات على حياة ..
•••••••
فالجهة أخرى تودة كانت ساكتة .. ماعرفات باش غادي تجاوبهم ، كتشوف فطارق وفإدريس ودنيا حيت هوما الوحيدين لي عارفين شنو كاين .. نظراتها بحال الى كتستنجد بيهم ..
إدريس : داك الوليد ماشي ولد عنبر ( شافو فيه بإستفهام خصوصا عبد الخالق لي كانت شادة فيدو دنيا عاطياه القوة بحال عادتها ) هداك الوليد جابوه من واحد الجمعية يبقى مع عنبر بحال الى ولدها ..
عبد الخالق : أش هاد روينة واش اخويا عارف شيحاجة حنا معارفينهاش جاني بحال الى مضورينا ..
إدريس : حنا مامضورين حد أعبد الخالق .. كون يصلاح نݣولو شيحاجة كون تݣالت شحال هذا لونكيت لي دويت ليكم عليها خدام عليها عماد ( بدا كيعاود ليهم )
عبد الخالق : ياك المرضي وهز بنتي حطها وسط الغابة باش تصيد ليه الحناش ؟
طارق : داكشي علاش طلب من فاروق يتزوج بيها .. حيت مايݣدوش يأديوها وهي معاه
ياسمين : اويلييي حتى انت فخبارك وشكون فخبارو خور ؟
طارق ( تنهد ) عصام وماجدة وحياة
دنيا ( هزات يدها ) وانا قالتها ليا خالتي فاطنة سيمانة هادي فاش عاودات ليا كولشي ..
عبد الخالق ( بإنفعال ) عيط على ولاد عمامك يجيو ..
طارق : الواليد يهديك الله
عبد الخالق ( على صوتو ) ݣتليك عيط لولاد عمامك .. ( هز طارق تيليفون سونا على فاروق )
- فين .. مسالي
عبد الخالق : يكون مسالي ولا مامساليش يجي
طارق : حتى تجي وتعرف حنا مجموعين الواليد بغاك .. دابا أفاروق الله يرضي علك ( قطع معاه دور لعماد ) وييي خدام ؟ وبلاما تمشي نيشان لدار دوز عندنا الواليد باغيك حتى تجي ( قطع )
عبد الخالق : دايرينا ضحكة .. البراهش ولاو دايرينا ضحكة ياكما اسي غير فتو العتبة ديال تلاتين درتو الكتاف زعمة وليتو تخططو وضحكو علينا ، العائلة كلها ضحكتو عليها عند بالنا الدري باغي يكمل دينو فرحانين معاه وانتوما دايرينا ضحكة .. ( شاف فخوه ) حتى انت امول العقل ؟
إدريس : مكاين حتى حل اعبد الخالق واش حنا كنا عارفين عنبر بنتك ؟ هي براسها كانت باغية هادشي هي براسها ݣالت لعماد أنا معاك باش ترجع دقتها
عبد الخالق : كيفاش ترجع دقتها واش كاينة سيبة ، والى اداوها ماشتيهاش كتݣوليا بفمك ( بإنفعال ) كيضحكو على بنات الناس ويفصلوهم واش بغيتي شي نهار تجينا خبار تا أش كترون ( شاف فتودة ) وأنت علاش ماخليتيهاش ياك معاك فدار ؟
تودة ( خرجات فيه عينيها ) ماشي انت لي غاتوريني شنو ندير ، ديك البنت راه ربيتها 12 عام وهي معايا وراضة ليها البال .. بنتك راسها قاصح لي ݣالها ليها راسها كديرها خرجات فيا عينيا وبفمها ݣاتلك الى مارجعات دقتها مغاديش تبرد ، بغات تشوفهم كاملين فالحبس عايشة مع واحد 3 شهور وهو ضاحك عليها ومطلقها بغيتيها تسرطها بجغمة ديال الما وتݣلس .. هي هوكا خاصها ترجع دقتها
يسرى : كيجري فيها دم غرباوة ( شافو فيها ) مالكم كدبت كتشبه للطارق وفاروق ودنيا فوطو كوبي ديالهم ..
أدريس : طالعين لبا فيامو مزال دابا راه تهد حيت كبر ( شاف فخوه ) ديك البنت ماتخافش عليها ݣادة براسها
دنيا ( بإبتسامة ) نهار عرس ياسمين كانو تبعونا شي وحدين بطوموبيل .. وقفاتنا فنص الطريق وخرجات لداك لي سايݣ والله ماحركو فيها شعرة ولا خلعوها واخا رجال هزات قرعة ونزلات على واحد لراسو ..
طارق ( بفخر ) خت خوها .. ( واحد الاحساس كان كيحس بيه غريب ماكرهش يطير من بلاصتو يمشي لعندها يعنقها يخشيها فيه يعوضها على كل عام وساعة ودقيقة كانت بعيدة عليهم يعوضها على حنان الخو لي مكانش عندها )
عبد الخالق ( شد راسو ) لا حول ولا قوة الا بالله العلي العظيم .. لا حول ولا قوة الا بالله العلي العظيم ( شاف فدنيا ) بنتي كاس دالما ( رجع شد فراسو مهبط وكيخمم كولشي تلاح ليه على راسو داخ وماعرف شنو غايدير تلف ..
- ݣالسة شادة التيليفون كتشوف فتصاورها معاه .. فينما كانو كيخرجو كانو كيتصورو تنهدات تنهيدة طويلة .. ضرها قلبها وهي كتمسح فيهم وحدة بوحدة ، طلعات ليها نمرتو فتيليفونها كيسوني عليها قطعات عليه رجع سونا المرة اللولة والثانية مجاوباتوش ..
- ناضت من بلاصتها لاحت عليها المونطو فوق البيجامة جرات بانطوفتها وبزطامها وخرجات من بيتها .. رشيدة كانت فالمراح شافتها غادية جهة الدروج نباتها :
حياة فين غادية ؟
حياة : غادي نمشي غير للحانوت ونرجع خاصاك شيحاجة ؟
جيهان ( ختها ) ختي نمشي معاكي ؟
حياة : يلاه ( شافت فعمران ) أجي حتى انت .. بالفرحة لبسو بانطوفاتهم ومشاو معاها ، كل واحد شادها من قنت وصلو للحانوت ) شنو بغيتو ؟
جيهان ( طلعات فيها عينيها الكبار بفرحة ) ختي واخا ناخود شيبس ؟
حياة : خودي لي بغيتي ولكن شيبس بلاش خايب وكيضر فالمصارن .. خدات جيهان بيموات ورايبي ، وعمران بحالها خلصات مول الحانوت .. ودازت للواحد الساكة
حياة : عفاك بغيت كارطة نمرة إتصالات
.... : جبتي لاكارط ناسيونال ؟
حياة : علاش ؟
.... : ضروري أختي لاكارط باش نسجل المعلومات ديالك إينوي وأورنج لي مافيهاش هاد القضية
حياة : صافي اخويا عطيني أورونج .. عطاها كارطة جديدة أورونج خلصاتو وتمو راجعين للدار
جيهان ( بحب ) شكرا بزاف أختي الله يخليك لينا .. جملة من ختها كانت كفيلة تحرك فيها بزاف ديال الحوايج وتوريها بلي داكسي لي دارت هو الصح
حياة : الى عجباتك شيحاجة ݣوليها ليا وفاش تشدو العطلة انديكم لواحد البلاصة زوينة سميتها سندباد نمشيو نلعبو
عمران ( فرحان ) بصااااح انمشيو نلعبو فطوموبيلات؟
حياة ( لعبات ليه فشعرو ) ياااه فلي بغيتو .. طلعو لدار مشاو هوما للصالون كيوريو رشيدة شنو شرات ليهم حياة .. أما هي حيدات ديك الكارطة القديمة هرساتها وركبات جديدة مبدلة نمرة الواتساب ..
•••••••••
- عنبر ( كتسجل أوديو ) وايلي واش بدلتيها ؟ صافي حسن ليك نيت تبدليها وحاولي تݣلسي مع خالتي ونسيها تونسك ماتبقايش سادة عليك فالبيت ..
حياة : غادي نحاول اعنبر والله مساهلة بالله .. ماعرفتش واش اتفهموني ولالا ولكن راه صعيب انا لي حاسة جواد منين رجعت وهو كيسوني وكيسيفط ليا فالواتساب ..
عنبر : وهو السيد مافيه مايتعاب الصراحة باينة فيه ولد الناس من داكسي لي عاودتي ليا
حياة : ولد الناس ومأدب وعمرو قلل علية العفة ولكن مامكتابش ( تنهدات ) شحال من حاجة كنبغيوها ومكايكون عندنا فيها الزهر
عنبر : شتي والله واخا طيري الى ربي بغاه ليك راه هو لي تاخدي اريحي بالك ..
حياة : المهم انا غانخرج نݣلس مع ماما انتي شنو كديري ؟
عنبر ( واقفة حدا البالكو ) والو كنا على برا راه قلتها ليك قبيلات .. فاروق خرج قبيلات سهام فالبيت مع امير وانا بوحدي ياختي قنطت والله مالفة جماعة
حياة : سيري ݣلسي شدي ليك شي فيلم أصاحبتي تفرجي ولا شي مسلسل تفرجي فيه ..
عنبر : داكشي لي غاندير واش ماما فاطنة مزال مجاتش ؟
حياة : لا مزال خرجات قبيلات راه خرجات بنهار
عنبر ( غوبشات ) وايلي والمغرب أذن ومزال مارجعات ماسونيتوش ليها ؟
حياة : سونات ليها مي قالت ليها راه كاينة عند رحيمة فدار وغادي تعطل .. حيت قربات تزوج وبحال والو غاتبدل المدينة
عنبر : مسكينة ايوا صافي سيري خرجي عند خالتي ݣلسي معاها .. حطات التيليفون هزات بينوارها لبساتو ، دارت واحد البوندو لشعرها هزات التيليفون وهبطات لتحت ..
تلاقاو بزوج قدام باب الڤيلا .. بلاصاو الطوموبيل ونزلو بزوج ..
الروطال : ياكما كيفرقو الورث ومعيطين علينا نكونو شهود ؟
عماد ( ضحك ) صݣع ، هادي شي عراسية جايا فطريق أساط .. سونا عماد وهاد المرة المساعدة لي حلات الباب ، سبق عماد او وراه الروطال دخلو الكل كانو مجموعين كيشوفو فيهم بنظرات باردة دور الروطال راسو بانت ليه تودة ݣالسة حس بلي شيحاجة داخلة فيها عنبر ..
عماد : السلام عليكم .. بالإيجاب جاوبوه ، ݣلس الروطال وهو كيشوف فعينيهم إحساسو ماخيبوش منين دوا عبد الخالق ..
أش هادشي اولدي .. وليتو دايرينا ضحكة مضورينا بحال القرود لي فجامع الفنا ، غلى أخر يامنا ضحكو علينا ..
عماد ( كمش عينيه ) أش كاين أعمي ؟
عبد الخالق : مزوج خوك بعنبر على ود لونكيت لي شاد اولدي ، ضحكتي على العائلة بكبيرها وصغيرها على جدك وجداك العاىلة جايين من حد الدنيا باش يفرحو معانا ومكبرين بينا وانتوما ضاحكين علينا ؟
عماد ( كمش يدو ) شكون ݣالها ليك ؟ ( شاف فأدريس وطارق وتودة ) وصيتكم باغيين تخرجو عليا ؟
طارق : بلاما تشوفيا ماخرجاتش من فمي
أدريس : انا لي عاودت ليهم لافير .. عرف بعدا علاش ݣلتها ودوي
عماد ( بإنفعال ) الواليد راه خدمتي هاديك حطيتيها فوق سلك رقيق ، راه مخاصنيش اصلا نخرجها داكشي دالخدمة كيبقى فالخدمة ، انا وسيدة تفاهمنا دوزناها عطيت العهد لمها مغايقرب ليها حد لاش جابدين هادشي لاش دويتو فيه ؟
عبد الخالق ( بإنفعال ) اشريف راه بنتي هاديك .. راه بنتي
الروطال ( غوبش ) هههه كيفاش اعمي بنتك ؟ جايبينا دايرين لينا شي برانك ولا كيفاش البلان ؟
تودة : عنبر بنتي من دمي ولحمي وبنت عبد الخالق
عماد ( شافيهم ) توما أش هاد الروينة تاني ؟
تودة ( بدات كتعاود ليهم كاع داكسي لي عاودات لوخرين ) .. الروطال جمد فبلاصتو عاݣد غوباشتو اللسان لي غاينطق بيه مابقاش عندو .. داخ عمرو كان غايتوقعها ولا تجي لبالو المرأة لي يكون مزوج بيها تكون بنت عمو ..
عماد ( كيعض على شفتو كيخمم ماعرف يدوي ولا يسكت يوقف ولا يكلس ) كنت حاس بشيحاجة ماهياش من الشبه لي كتشبه لدنيا ولكن ݣلت غير صدفة هادي وصافي ..
دنيا : حتى انا شكيت وفاش سمعت بابا كيدوي مع خالتي فاطنة فاش كنا فالعرس دخل ليا شك ، مشيت عندها وعاودات ليا كولشي ..
الروطال ( حرك راسو يمين وشمال ) دابا بيناتنا ماشي شي كاميرا خفية هادي حامضة بحال ديال رمضان ؟
طارق : اصاحبي غانجيبوكم هنا نبسطو معاكم من نيتك أجمي .. بقا الروطال ساكت وكلام تودة كيدور ليه فدماغو بقات فيه وفنفس الوقت مزال مادخلات ليه راسو كان عارف عمو كان مع شي وحدة وبغاها ولكن ماكتابش يلݣاها ويكمل معاها حياتو ولكن باش تكون ديك السيدة هي تودة ماتخيلهاش ..
يتبع...
التعليقات
لا توجد تعليقات بعد، كن أول من يعلق.