محتوى القصة
الروطال ( وقف ) دابا انا صدقت واخد بنت عمي ؟
طارق : تقلقها نخلي دار عشتك أنا نوصيك من هنا .. ماتبقا لا صحبة لا ستة حمص نتلاحو انا وياك من تل ( بإبتسامة ) ديك نص بلاصة صدقات ختي انا وشوفلك أخويا شتي ( ضحك ) ولاهيلة ختي صغيرة برب مابغات دخل ليا لدماغ ..
عبد الخالق ( بإنفعال ) انا دابا ماشي فهادشي اعباد الله .. بنتي حتطينها طعمة هادشي لي ضرني شوفليك ليك مادير اولدي وبعدها من هادشي الله يرضي عليك ، ماشي حتى لهاد النهار لي عرفت بلي ديك البنت ديك البنت لي حيدوها للمها وعدبو مها محنوها فحياتها 26 عام وهي بعيدة عليا .. ماحنيت فيها ماديتها لمدرسة ( تغنغن صوتو. عينيه غرغرو بدموع ) ماكنتش معاها فاش نوضات السنان نهار لول ليها فالمدرسة مكنتش معاها مدافعت عليها .. كون كنت مع بنتي مايضحكوش عليها الشمايت ، متعطيش راسها لداك ولد للحرام يضحك عليها ويعذبها فحياتها ( بدا كيكح ) فاش نلݣاها توقع ليها شي حاجة ديك ساع غير دفنوني حسن ..
دنيا ( كتمسح ليه دموعو ) صافي ابابا الله ينجيك وينجيها
عماد ( بجدية وبهداوة كيحاول يتقبل الفكرة ونفس الوقت كيحاول يقاد الخواطر ويهني القلوب ) عمي أنا قبل كاع منعرف هادشي .. وعطيت العهد لهاد السيدة باش بنتها شعرة وحدة متمس منها واش غير جيت انا وزوجتها للفاروق .. عند بالك انت واش يݣدو على هذا ( أشر للخوه ) واش يݣدو يوصلوها وهي معاه ( هز فيه عمو راسو ) حنا كاملين لي ݣالسين هنا عارفين فاروق اش كيسوى
الروطال : اخويا كدوي عليا بحال الى انا هو برناردو بروفنزانو
عماد ( شافيه بمعنى سكت ولا نشوهك رجع ضار عند عمو ) خلي دابا منين عرفتها بنت عمي ، داكشي لي كنت ناوي عليه غايكون بضوبل راه دمي ولحمي بحالها بحال ختي ماجدة .. نتأدى انا اعمي وهي لا عارفني مزيان الى عطيت الكلمة .. من غير الى ماكتيش كتيق فيا هاديك هضرة خرى ..
عبد الخالق ( تنهد ) حاشا اولدي انا ماݣلتش هادشي ولكن خايف على بنتي مابغيتش شيحاجة خايبة توصلها
عماد : كنقسم ليك برب الكعبة مغاتوصلها شيحاجة .. انا ضابط اموري وعارف شنو كندير راه ݣتلك واش انا غانفرط فبنت عمي حنا كيݣلتي عاد لݣيناها وفرحانين بيها ونفرط فيها راه منݣدش اعمي نرجع دابا اللور الناس دخلو للمغرب على رقبتي بزاف ديال البنات مساكن مشاو فرجلين .. خاصك تشوف منين كتجي الأم عندك تݣولك بنتي غبرات مكايناش ومن ورا مدة تلݣا بنتها ميتة فالغابة محيدين ليها كلاويها باقية بحنتها أعمي راه خرجو على الناس خرجو حتى على دراري زيدوهوم لشي حوايج منݣدش نݣولهم لك إحتراما ليك ..
عبد الخالق ( حيد نظاظرو ماسح عينيه ) ايوا أولدي شنو المعمول ؟
- نزلات للتحت شادها القنطة قبل لا تنزل دازت للعند سهام لبيتها دوات معاها شوية ولعبات مع أمير عاد هبطات لدار التحت .. حطات تيليفونها فوق الطبلة وغادية بشوية عليها للكوزينة ..
وفاء : لا الالة كانو خارجين ولدها كتخليه مع ديك المربية كتبقى معاه النهار كامل فالبيت .. الصراحة حتى لدابا ماشت حتى حاجة كيتعاملو عادي وقبيلات كانو فجردة مجمعين بزوج ..
عنبر ( بإستغراب) معامن كتهضري ؟
وفاء ( تفافات بالعة ريقها مخلوعة زولات التيليفون من يدها) لالة عنبر
عنبر ( كتخنزر فيها ) معامن كتهضري ؟ كتݣولي كانو فجردة مجمعين بجوج ؟
وفاء ( بتوتر ) لا كندوي أمع معي على ختي .. كانت مخاصمة مع راجلها وخرجها لجردة باش يتفاهمو هادشي لي كاين
عنبر : 8 هادي مالفة كتمشي مع 7
وفاء : ستفت شي دجاج فالفريݣو وتعطلت انا لقيتيني نيت غادية .. بقات عنبر كتشوفيها حتى لبسات جلابتها هزات ساكها وخرجات دخليها الشك من جيهتها مادخلاتش ليها لخاطر ومارتاحتش ليها وهادشي لي وقع دابا زاد كمل على شك لي شاكاه ..
- رجعات للصالون سونا الباب ، مشات تحل كتلقى مرة تكون فالأربعينات من عمرها هازة طبسيل كبير والإبتسامة على وجها ..
.... : سلامو عليكم أبنيتي سمحيليا على هاد الدخلة تي هي مرات سي فاروق ياك ؟
عنبر : اه هي انا
.... : انا فوزية مرت حسن عند الحانوت هنا قريب ، سي فاروق عزيز علينا الله يعمر ليه الدار .. كت مسافرة وجيت ݣالو ليا تزوج صايبت هاد الطرح ديال بوشيار وجبتو ليكم
عنبر : سيري الله يكتر خيرك .. ولكن راه هو كاعما كاين ، كاينة غير انا عندو شي شغال وخرج ..
فوزية : الى بغيتي تمشي عدنا مرحبا بيك .. والى بغيتي تاكلي هاد الطرح هنا لي بغيتي مرحبا بيك
عنبر ( بالفرحة ) انا جايا .. دخلات جابت تيليفونها وسوارت لي خلا ليها الروطال عيطات على سهام علماتنا وخرجات مع فوزية فرحانة .. مشات معاها لدارها لي كانت عادية ولكن متولة وزوينة ، كانو عندها 3 البنات دارها مفرشة زوين نقية حاطة الطبلة فيها بوشيار زبدة والعسل والفاكية واتاي ، كانت بوحدها راجلها مكاينش ..
فوزية ( فرحانة ومعارفة فين تحط عنبر ) مرحبا بيك ݣلسي أنا جايا .. راجلي مزال مكايدخل لدار كيتعطل واحد شوية كنبقى غير يا انا وبناتي دار دارك ݣلسي .. ݣلسات عنبر كتشوف فدار وبنات فوزية حداها ضايرين بيها ..
~~~~~~
عماد : مابغيت منكم هاد الساعة غير هادشي لي تݣال يبقى هنا ، هاد الساعة بينما الأمور تحلات وديك الساع إن شاء الله نتحمعو ونکولوها لعنبر
الروطال : نكذبو عليها بغيتي تݣول من نيتك .. الدرية من حقها تعرف اش كتخربق
تودة : لا اولدي الميمة الله يرحم ليك ميمتك متݣول ليها والو ، الى ساقت الخبار راه غادير شيحاجة فراسها عقلتي فاش ساقت لخبار لداك ولد الهم ياك انت اولدي لي لقيتيها حدا البحر واخا ݣاتليك كانت بغات تعوم كون دارت شيحاجة فراسها خلي دابا تعرف بلي لي رباوها سرقوها وهي صغيرة وهوما كانو عزاز عليها وشحال وهي حازنة على موتهم .. واش انا غلبني نݣولها ليها نݣوليها انا مك لي داوك ليا وتحرمت من شوفتك ماغلبنيش ولكن مسبقة بنتي على راسي .. راه الى ݣلناها ليها تتهز راسها لشي قنت يمشيو يأديوها دوك الݣنوس نصدقو واحلين ..
عماد : ها علاش كتليكم خليوها هنا .. حتى بعدا الى تشدو دوك الكيادر نتجمعو وغير بشوية نعاودو ليها بالخاطر صبرتو بزاف مابقا ݣدما فات هاهي معاكم وحداكم غير ديك المحبة فوق القياس متزيدزش فيه شوية أدخلو ليها غير شك ..
عبد الخالق : انا بنتي باغي نشوفها اليوم قبل من غدا كتݣوليا دخلو ليها شك .. اسمحليا هادي مغانديرهاش نصبر على كولشي نسد فمي ومندويش ولكن باش نخبي محبتي على بنتي لا
عماد : ماجدة لي بقات هي وعصام لي مافخبارهمش هاد البلان ، خليوهم ليا ندوي معاهم هادشي خرج من يدي ماكنتش ناوي على هاد الحريرة الله يرحم بيها الوالدين هادسي مايتݣالش قبل مغاتخرجو على ديك البنت أتخرجو عليا حتى أنا معاها .. راه الى خرجتوها على فمكم راه أنت ما لي غاتحطوها فالخطار ماشي أنا .. غاتصدقو خارجين على جوج دناس ..
يسرى : انا والله منخرجها ( تبسمات ببراءة ) الحاجة زوينة هي الحمد لله عندنا ختنا ومرات ولد عمنا
عبد الخالق ( شافيها ) ولد عمك لي مزوج بيها غير على ود خوه ( تبسم بهدوء محرك راسو بلا حولة )
الروطال ( بصرامة وجدية ) هاديك مرتي بشرع وبالقانون .. تحت جناحي لي يضرها يضرني لي يمسها بحال الى شتف عليا اليد لي تحط عليها غايتݣطعو عروقها من جدر أعمي ، ديك بنت الناس كانت امانة فرقبتي دابا بنت عمي فعيني نسد عليها ومنخليش الغبرة تعميها وطوف بيها أباش تكون فبالك .. عبد الخالق رتاح مبدئيا عارف ولاد خوه رجال ومايتخافش عليهم ، وبنتو غاتكون فالحفظ وصون مع ولد خوه .. شاف فتودة لي كانو ملامح وجها باهاين شلا مطارق كانو كيدورو ليه فراسو من بينهم حاجة وحدة لي كان باغي يݣولها للتودة قبل مايعرف بلي عنبر بنتو ودابا جا وقتها باش هكا يبقى قريب منها ونهار تعرفو باها ساهل تقبلو ..
عبد الخالق : خاصنا نتزوجو افاطنة ..
- شافها سكتات كتشوفيه وكيشوفو فيه ولادو وكمل كلامو :
باش نقرب لبنتي خاصنا نكونو مزوجين
تودة ( وقفات وشافت فيه ببرود ) الى بغيتي تقرب من بنتك عطى الله الطرݣان أعبد الخالق .. ماديرنيش ݣنطرة أنا داكشي لي بقا خاصني غير زواج .. ولكن نعدرك الصدمة وهاد الخبار ماخلاتش ليك العقل لي تفكر بيه رجوع لله .. توضى وصلي وحمد ربي وشكرو لي عندك بنت بحال عنبر وحمد ربي مدازش عليك لي داز عليا وتݣرحتي فكبدتك ، داكشي لي كتفكر فيه عمرو مغايكون ، لي كان عندي جيت وݣلتو ومنين تفاهمنا وتفاهمتو الله يمسبكم على خير ..
دنيا : بلات اخالتي نوصلك مغاتلقايش طاكسيات فهاد الوقت .. عطاتهم بظهر وخرجات خلاتهم شي كيشوف فشي ..
~~~~~~~~~~
- شبعات وعرݣاتها مع راسها مجمعة مع فوزية ݣولها وضحك عليها حتى وقفات ..
عنبر : الله يصبحكم على خير خاصني نمشي
فوزية : والله ماسخيتا بيك سي فاروق عرف يختار تبارك الله الله يخليكم لبعضياتكم
عنبر : اللهم آمين
فوزية : بلاتي نوجد ليك حق سي فاروق ديه ليه معاك ..
- وجدات ليها بلاطو فيه من كولشي عطاتو ليها .. خرجات معاها لباب مشات وهي دخلات ، وصلات عنبر لدار دخلات سادة الباب حطات البلاطو على الطبلة وݣلسات .. مكاملاش نص ساعة سمعات السوارت ضارو دخل هز راسو فيها او وقف حابس الشوفة فيها بزاف ديال الحوايج كيدورو فراسو ويلاه رض ليهم البال ، الشبه لي بين بنات عمو الطبع الناري لي عندها فاش كيأديها شي واحد ، الدم الغرباوي لي كيجري فعروقها ݣال مع راسو هاد البزقولة الفتيلة الشاعلة بنت عمو تبسم لا إراديا ..
عنبر : أسبحان الله مالك كتفرنس .. دوز دوز تاكل بوشيار سيفطاتو ليك فوزية مرت مول الحانوت
الروطال ( غوبش ) وأنتي منين كتعرفي فوزية ؟
عنبر ( ببرود ) جات لهنا جابت لينا بوشيار ومع قنطت مشيت معاها لدار كليناه تم
الروطال ( دور لسانو وسط فمو ) جات السيدة لهنا وفتحتي ليها ومشيتي معاها ( سكتات كتشوفيه ) عنبر حاجة وحدة داك العقل عندك كتخدميه ولا غير متقلة بيه ؟
عنبر : هاء علاش ؟ غير حيت السيدة مشيت معاها ؟
الروطال ( بإنفعال غوت حتى تفافات من بلاصتها ) أبنادم البشااار كاع داكشي لي وقع ليك ومزال كتيقي فناس واش عندك شي مخ تفكري بيه ولالا ؟ ز*** ديال الخلا كيدور فكازا وأنت حالة فمك ، شكون ݣالك اشريفة مايكون مسيفط ليك شي وحدة ؟
عنبر ( كترمش بزربة بالعة ريقها ) أنا ..
الروطال : أنتي شنو نتي ( بعصبية ) أنت شنو ؟ منكونش فدار متحليش هاد الخرا ديال الباب ، ولا سيري للكوزينة البشار اتلقاي الكاميرا تف شوفي شكون كيدق متجيش درمي وتحلي ( بقات ساكتة كتشوفيه بلعات ريقها مالقات باش تجاوب حيت لقات عندو الصح .. حاول يكالمي راسو ) اخر مرة تحلي لشي قمقوم تأكدي عاد حلي المشقوف ( عطاها بظهر ومشا ) .. تبعاتو بالعين كتفكر مكان عندها حتى جواب تبدل عندها الجو ماعجبهاش الحال ومارضاتش تبان مكلخة قدامو ..
عنبر : تفو كاع لي ضحكتو والبوشيار لي كليت هاهو هجرتو .. حتى انا خاصني العصا بعد المرات مكنعرفش نفكر كاع ( كمشات عينيها او وقفات هزات البلاطو داتو للكوزينة وطلعات لفوق وقفات قدام بيتو كانت بغات تقوليه على وفاء .. ولكن هي معارفهاش معامن كانت كدوي طردات الفكرة من راسها ومشات نيشان للبيتها ) ..
مجموعين بزوج فالبيرو ديال الروطال من خلال الهضرة لي ضايرة بيناتهم كيدويو على الخدمة ..
طارق : انا اصاحبي طنجة كنطلع ليها مرة فشحال .. المحال خاصك تكون مأنسطالي تم فهمتي البلان ؟
الروطال : علاش ناوي ؟
راشد : راه ݣلت ليك علاش ندورو هاد دورة كاملة نحلوه هنا ونتهناو
الروطال : وزعم اجمي مالك ؟ تجيبها مع رمضان نيشان ودير الإفتتاح فنص تجيك مع العيد نيشان ، وإلى بغيتي تصرعها زيد العبايات والبخورات ..
طارق ( شاف فراشد ) شتي علاش خونا فينما كان شي أفير كيكموش عليها
الروطال ( رجع براسو اللور مبسم ) نطيح شي نهار عرف عين هاد بنادم السباب
راشد : ماعرفتيش علاش عبلة مابقاتش جات ؟
طارق : من نهار دوا المنادجير ديالها وعلمنا مابقينا سمعنا عليها شي خبار
راشد ( تبسم كيحك فلحيتو ) اتكون ساقت الخبار للكراش ديالها تزوج مسكينة
الروطال : هاديك واخا تسمعني ولدت إلى عندها بيك الغراض غاتلݣاها هنا ( قاطعهم الباب لي تدق دخلات دلال )
- موسيو فاروق واحد السيد باغي يشوفك
الروطال : شكون هذا ؟
دلال : الصراحة ماعرفتوش .. ݣاليا سميتو براهيم رحمون ( شاف طارق فروطال )
الروطال ( كمش عينيه غوبش شاف فطريق ورجع شاف فدلال ) 5 دقايق ودخليه ( ستأذنات منهم وخرجات ) طارق سير أنت وراشد من بعد وندويو
طارق : تا كيفاش من بعد ، برب لا تحركت من هنا
الروطال ( بصرامة ) طارق دوينا اصاحبي دير عقلك .. ( حرك حجبانو مطلعهم ) طارق تغزف ماكرهش يخرج ويشدو يعطيه قت**لة ديال الوحوش ومتبردش ليه .. هزهز راسو وخرج هو وراشد لي مافهمش شنو ضاير بيناتهم ..
هز الروطال تيليفون دور لعماد علمو ..
عماد : خلي لاپيل دايزة صافي .. حط الروطال تيليفونو مخلي لابيل دايزة دازت 5 دقايق ودخلات دلال براهيم ، هز فيه الروطال راسو سكاناه من المظهر ديالو كان كيبان بورجوازي بحال شي ممثل أمريكي بشعرو الشايب واللباس ديالو الراقي الخاتم دنقرة لي فصبعو الصغير ... عينيه كانو كيبينو شحال هو خبيث الروطال ما وقفش بقا ݣالس كيشوفيه ببرود خرجات دلال وهو أشر ليه بيدو يݣلس ..
براهيم ( ماعجبوش الحال كيفاش ستقبلو مناضش سلم عليه) شحال هادي وانا كنسمع عليك .. واليوم جات الفرصة نتلاݣاو حاجة مزيانة يكون واحد فالعمر ديالك ومغربي السمعة ديالو واصلة حتى لأوروبا ..
الروطال ( متحركات فيه شعرة بملامح خالية من اي إحساس ) لي خدمتو كتكون صافية اسي براهيم كيوصل .. ولكن أنا مكنعرفكش عمرنا تلاݣينا ياك ؟
براهيم ( دار رجل على رجل بإبتسامة ) الصراحة يلاه دخلت للمغرب خدمتي كلها كاينة على برا كنخدم فالعقار ، خويت المغرب شحال هادي ..
الروطال ( هزهز راسو ) مزيان المفيد اسي براهيم
براهيم ( ضحك ) مكتبغيش ضيع وقتك .. برافو الصراحة ماكرهت ولدي كون كان بحالك
الروطال : مافرق ربي ريوس إلا وكل واحد وكيفاش كيفكر .. مزال ماجيتينيش للمفيد إلى كنتي جاي على الخدمة انا خدمتي بعيدة على العقار تݣد تشوف مع ولد عمي ينفعك فهاد البلان ..
براهيم : لالا ماجيتش على ود هادشي ( حك جنب نيفو وشافيه بكل غرور ) سي فاروق مراتك كانت مزوجة بولدي ( الروطال غوبش )
الروطال ( بصرامة ) أش دخل مرتي فهادشي وبأسمن حق اصلا تدوي عليها ولا تجبدها .. والى كانت مزوجة بولدك ومن بعد ياك ولدك مات ؟
براهيم ( بلع ريقو حاك حاجبو كذليل على التوتر ديالو ) ولكن هي ولدات ولد من ولدي ، هداك الدري حفيدي من دمي ولحمي ..
الروطال ( رجع بظهرو كيشوفيه بكل برود ) وباش عرفتيه ولدك .. ديك السيدة مرتي وداك الولد ولدي هاد روينة ماعنديش معاها غاندير بوجه الشيب لي فراسك وغانݣوليك الباب ݣدامك
براهيم : ماشي بحال هكا كيدويو الناس اسي فاروق .. عارفين اشمن شهر كانت حاملة وسبيطار فين ولدات عنبر كانت حاملة قبل متزوج بيك ، بغيت نݣول متزوجات بيك حتى كانت وا حملات ( فجهة أخرى عماد شاف فيوسف وتبسم )
الروطال ( غوبش مقرب منو ) هاد البلابلا ديال العيالات ماعنديش معاها ( غمزو) لخص
براهيم : الولد خاصو يعيش مع عائلة باه .. مو تزوجات شافت حياتها وحتى انت مغاتبغيش تربي ولد راجل خور كانت مرتك مزوجة بيه ..
الروطال ( غمض عينيه كيحاول يكالمي راسو دور راسو يمين وشمال واخد نفس طويل كيحاول يضبط بيه أعصابو مجاوبوش هز التيليفون ويونا لدلال) عيطي لمراد وعثمان لبيرو ديالي ..
براهيم ( وقف ) مايحتاجش ، حفيدي مغانخليهش يتربى بعيد على جدو وجداه اسي فاروق ، انا جيت غير علمتك دابا بالخاطر قبل ما نلتاجئ للقانون ..
الروطال ( بنفس البرود ) مرحبا مزيان نيت نديرو محضر معاكم حتى حنا بلي ولدكم قبل مايموت طلق مرتي ب 3 شهور شنو بان ليك ( غمزو )
براهيم ( بقا كيشوفيه بالع ريقو بخوف ) م ( قاطعو الباب لي تحل ودخلو من رجال الأمن
الروطال ( بكل هيبة تكا على الكرسي ) وصلو السيد لطوموبيلتو .. خرج براهيم وهو محاملش راسو غادي فالكولوار ماعجبوش الحال حتى وصلوه لطوموبيلتو ..
بدر ( كيشوفيه ) أمضرا ؟
المديرية📍
- ضار شاف فيوسف بإبتسامة عينيه كيعبرو على دكائو وقوة افكارو
كلا الطعمة الكامبو
يوسف : بحال هاد خوتنا فالله كتلݣا عندهم واحد البلاصة خاوية فدماغ .. الجليجة لي كيكسابو ملهوطين باغيين غير ياكلو مكايشبعوش
عماد : داكشي لي بغينا وصلنا ليه .. شتي منين جا باه غايكون عارف ولدو مساوي بصلة خامجة خايف لا يغرقو
يوسف : سمعتي خوك فاش ݣاليه على الطلاق ، بقا ساكت حسيت بيه كيݣول هادو منين عرفو
عماد : حيت كاملو كون كان مطور راه باينة منين تسحبات الورقة ديال الطلاق بلي عنبر عرفات بلي خونا طلقها قبل لا يبان بلي مات
يوسف : نشوفو دابا شنو غايدير وعلاش ناوي
عماد : مافيهاش الفار دولدو هاد المرة يخرج لساحة ويبين راسو ، خاص ندير وندوي مع فاروق على هاد البلان يزيد يرض البال ويعلم عنبر ..
- تدق الباب ودخل البوليسي لي على الباب عطاه التحية :
واحد السيد على برا باغي يشوفك اسيدي
عماد : ݣوليه يدخل .. رجع البوليسي مخلي السيد يدخل ، كان من حوايجو كيبان إنسان بسيط
.... : السلام عليكم اسيدي
عماد : وعليكم السلام ݣلس (توجه للكرسي حادر راسو ݣلس ) أش حب الخاطر أسيدي ؟
.... ( هز فيه راسو ) أسيدي انا كانت عندي واحد الارض صغيرة ايوا كنت فيما جمعت شيحاجة كنبني بيها حيط ، حتى دورت واحد الصور ݣلت زعمة نبني واحد دويرة لوليدات .. ولكن فواحد الوقت حبست مكانوش عدي الفلوس حتى لمواخرا عاد كملت دويرتي
عماد ( بكل تركيز ) كمل أسيدي
.... : مواخرا أسيدي ولينا نشمو واحد الريحة ماهياش فالبيت ريحة خانزة ، بحال ريحة الجيفة كانت المرا عدي كتݣولها ليا وانا ماكنتش كنشم حيت هي لي كانت كتنعس فديك الجهة لي فيها الريحة .. وسيدي هاد الريحة زادت تجهدات حتى البنية عدي مسيكينة مرضات بديك الريحة ..
عماد : يݣد يكون عندكم شي قادوس كيعطي الريحة مافهمتش انا اش دخل الريحة بالمجية ديالك هنا ؟
.... : أسيدي الريحة ماشي ريحة القوادس ، الريحة بحال ريحة شي حد ميت وخناز ، ماعرفتش اسيدي كنت بغيت نحفر نشوف ولكن اسيدي خفت نلݣى شيحاجة ماهياش ݣلت نجي نعلم البوليس ..
عماد ( شاف فيوسف مكمش عينيه ورجع شاف فسيد ) أش سماك الله أسيدي ؟
.... : أسماعيل أسيدي
عماد : أسماعيل شحال داز ديال الوقت عاد كملتي دار ؟
أسماعيل : وسيدي راه مدة راه شي 7 شهور هكاك حتى شديت واحد رزيق وكملتها
عماد : واخا مزيان ( شاف فيوسف) وجد ليا دراري أيوسف ( شاف فأسماعيل ) أجي معانا ..
~~~~~~~
- الشميشة سخونة الجو ربيعي زوين .. ݣالسين فجردة عند عنبر مجموعين تودة ورشيدة حياة ، ومعاهم ليالي وعنبر ..
عنبر : خالتي رحيمة خلات بلاصتها مسكينة
ليالي : ووالله اختي ماكذبتي ولفتها انا بعدا كونماشي هي لي حلات ليا باب دارها كوراني مزال مدابزة مع خويا .. كوراه فوت فيا شي ضربة ولا سيفطني لروضة ..
تودة : ربي كيدير غير لي فيها الخير أبنتي ربي كبير .. نهار نتوحشوها نمشيو عندها مراكش مابعيداش
عنبر : راه ݣلت لفاروق بلي غانعلمكم على وديت المشية لجديدة إن شاء الله ديرو بحسابكم غانمشيو كاملين للفيرما ديال عمي أدريس ..
تودة : كون ابنيتي اخليتوني رمضان بسلامة بقات ليه 15 يوم بغيت نصايب شوية ديال السفوف وشباكية
عنبر : وندوي كولشي لتم ونتعاونو ونݣادو نيت بالكثرة نجيب معايا حتى انا حقي لدار ، راه دارهم غاديين كاملين ، غدا غاتجي خالتو إن شاء الله تبقى معانا فدار
رشيدة : مافيها باس ابنتي مزيان نيت تونسك ماتبقايش بوحدك ، وليدو بعدا راه كيكبر تبارك الله على مزويناتو ..
عنبر ( شافت فمها وفحياة لي كانت غير ساكتة ومهدنة ) اه مسيكين كيكبر ( شافت فحياة ) فين وصلتي ؟
حياة ( تنهدات ) الحمد لله انا غادية .. شهر 7 عندي الإمتحان مكنحكش راسي ݣاع
عنبر : مزيان الله يسخر
تودة : عنبر مكرهتش أبنتي تݣولي لراجلك يشوف شي خديمة لحياة وليالي الله يرضي عليك
عنبر ( شافت فحياة ) ومالك متݣوليها فمك محني ؟
حياة : غير تلهيت بالقراية .. بغيت نخدم ونفس الوقت نقرا حتى يوصل إن شاء الله الوقت لي ندفع فيه لباك ليبر منها انا كنقرا ومنها كنصور مصيريف ..
عنبر : صافي إن شاء الله انا غادي ندوي معاه .. مهم ديرو فبالكم السبت تكونو واجدين غاندوزو سيمانة إن شاء الله تماك ونرجعو ..
تودة : إن شاء الله .. دوزو معاها ديك العشية حتى جا الروطال لقاهم تم رحب بيهم فرجعة سيفطهم مع عمر يوصلهم ..
*** فجهة أخرى واقفين البوليس على برا .. لومبيلونص واقفة وشرطة العلمية حتى هي ، واقفة مرات أسماعيل وهو دايرين يديهم على نيفهم ربي عالم بحالتهم اخر حاجة كانو كيتوقعوها هي بنادم يكون مدفون عندهم فدار ..
عماد ( مغوبش شاد التيليفون ديالو كيدوي فيه قطع منين تمات جايا عندو البوليسية ) داكشي لي ݣلت ليك هو لي كاين ؟
.... : مع الأسف أه ولكن الفرق المرة لولة خلاو الكسدة مجموعة ، أما دابا فصلوها بحال الحولي بلاصة الكلاوي الخاوية والحنة لي فاليدين ورجلين هي لي عاطيانا راس الخيط ..
يوسف : علم الله شكون هادي فالبنات ؟
عماد : غادي يتعطل التشريح ولا غاتزربي عليه أأستاذة ؟
.... ( بإبتسامة ) كون هاني أسي عماد هاد النرة غايكون فوق البيرو ديالك قبل الوقت
عماد ( تنهد بعصبية ) مزيان ..
~~~~~~~~~~~~~
- ݣالسين كيتفرجو ، عنبر ساهية كتفكر من داكشي لي عاود ليها .. كانت مبردة بحال الى ماشي براهيم لي كانشيخها هو لي زار الروطال ستغرب من ردة فعلها وكيفاش تصرفات هو كيفكر فردة فعلها وهي كتفكر ضارت عندو مسولاه سؤال غريب :
فاروق واش أنت لي سيفطي خو داك خونا لي جا حيح هنا للحبس ؟
الروطال ( ضار شافيها ) أش جاك حتى كتسولي دابا ؟
عنبر : والو غير سولتك وصافي
الروطال ( تقاد فتكية ) كون وقع ليك ما وقع ليا ، ولبقو ليك تهمة باطلة عمرك ركبتي فالواشمة حتى ركبوك فيها مينطينك ضاربينك بعام دالحبس شنو كنتي غاديري ؟
عنبر ( بقات ساكتة كتخايل فالموقف تبسمات ببرود ) نلبق ليه شي مونتيف مايهزش الراس منو نخليه كيدور بجنابو بحال الحمق .. الى تحكم عليا انا بعام يحكمو عليه هو بالمؤبد ..
الروطال ( تبسم من تفكيرها ) وهانتي جاوبتي راسك براسك ( دور راسو لتلفازة )
عنبر : فاروق بغيت نطلب الى جات على خاطرك وبغيتي زعماكينات
الروطال ( شافيها ) دوي أزعماكينات
عنبر : بغيتك تشوف لحياة وليالي شي خدمة .. حياة دابا كتقرا الانجليزية والعام جاي ادير باك ليبر بغات فين تخدم وليالي راك عارف المجمع لي كان جامعنا والغنا فرتكناه ودابا هي ݣالسة فدار مع ماما فاطنة وبغات تخدم
الروطال ( حك لحيتو ) ليالي تالاش قارية كتعرف للحساب ولا والو ؟
عنبر : لالا كتعرف ماعندهاش الباك حدها سيزيام
الروطال ( كيخمم ) ݣوليها تصبر واحد شوية إن شاء الله يكون خير ، لا هي لا حياة ..
عنبر ( بإبتسامة) واخا شكرا .. شافيها ورجع أنظارو للتلفازة ..
شدو الطريق للجديدة الجو كان زوين الخضورية فكل بلاصة ، كانو متحمسين يبدلو الجو وهوما فطريق مخدم الموسيقى مخرج يدو من السرجم مركز مع الطريق ..
عنبر : فاروق
الروطال : هممم
عنبر : خاصك ترض البال من ديك وفاء ( شافيها بإستفهام ) كندوي معاك بصح شحال هادي سمعتها كتدوي فتيليفون ولكن ماعرفتش معامن سمعتها كتقول راه كانو اليوم ݣالسين فجردة انا ميقنة كانت كتهضر علينا فاش كنا مجمعين فالجردة ..
الروطال : وانتي دويتي معاها ؟
عنبر : سولتها بدات دخل وتخرج فالهضرة وتصفار وتحمار ، بدات تكذب لبسات جلابتها وخرجات وفينما كيجيو دارنا كنحصلها ورا الباب طالقة سطولاتها ..
الروطال ( هزهز راسو ) يكون خير ..
- وصلو للجديدة .. كانو عائلتو تم سابقين نزلو كاملين عبد الخالق كان على برا عينيه كيبريو كيشوف فعنبر بشوق ومحبة
عبد الخالق ( عنقها قلبو كيرجف ) مرحبا بيكم أبنتي
عنبر ( باست ليه يدو ) ربي يخليك أعمي .. سلمات على أدريس ، خرجات دنيا بفرحة عنقاتها
دنيا : تعطلتو
عنبر : يلاه دزنا عند ماما جبناهم ( مشات دنيا سلمات على حياة) من بعد كلهم دخلو للدار كانت كبيرة وبلدية ضايرة بيها الطبيعة ، العيالات كلسو فجيهة مجموعين والرجال تجمعو فجهة
سعاد : خاصانا غير سميرة مسكينة
تودة : وياه مسكينة .. كنشوفوها مرة مرة هازة تربية مع بنتها على الوليد
سعاد : ايوا اختي الأم مسكينة هكا دايرة ( تنهدات ) واخا ربي ماكتبش عليا الولاد ولكن وليدات الناس كنحس بيهم وليداتي ..
رشيدة : اودي اختي لا لي عندهم الولاد مرتاحين ولا لي ماعندهم مرتاحين الحمد لله على كل حال ..
سعاد ( محاولة تبدل الجو ) غاتوجدو شيحاجة لرمضان إن شاء الله
تودة : ضروري الله اودي ، راه ݣلنا نشريو تقاوت ونݣادهم هنا ونݣادو كولشي مع بعضياتنا ونديوهم معانا
سعاد : ولاهيلة عدك الصح اختي ، نبدلو نيت الجو مع بعضياتنا ..
- على برا غاديين كيتمشاو دنيا وعنبر وحياة وليالي كيشمو الهوى ويسرحو فرجليهم
دنيا : وصافي اصاحبتي مافيهش الخير ليك كون كان فيه الخير كون تزوجتي بيه ( بإبتسامة ) بلاما تكعاي انا نزوجك خويا طارق ( ضحكات )
حياة ( شافت فيها ) شكيكو اختي الله ينجيني واخا يبقى اهو منديه
دنيا ( بإستغراب) علاش اختي مالو كيجاك خويا ، الزين وطولة وكولشي عندو ألف وحدة تمناه
حياة : لالا أختي انا مكنتمناهش ، اول مرة تلاقينا داز فيا بحال التران لالا ماعنديش مع هاد النوع درجال لي كيكونو ݣد الباب طول والعرض مالي عليها ..
عنبر : هادي راه هبيلة ديها فيها
حياة : أه اختي انا مابقيتش موال بغيت ندوي مع شيحد اخليني أختي هكا بيخير وعلى خير ..
عنبر ( موجهة كلامها لدنيا )سمعت فاروق كيدوي معاها باغي يفتح شي مخال ياكي ؟
دنيا : أه هو وصاحبهم راشد داك الإمراتي ، حيتاش ناوي يستقر فالمغرب هنا صافي
عنبر : غايخدم على جوج جوايه ؟
دنيا : اه تم كاين لي مقابلو ليه وغايبقى هنا .. هو راه قديم فالمغرب عاود ليك فاروق عليه وعلى باه ، من داك الوقت وهوما صحاب وحتى هو الله يعمر ليه الدار الصراحة ..
حياة : علاش جواد مكانش يݣد يحول خدمتو لهنا حتى هو
عنبر : لا حول ولا قوة الا بالله العلي العظيم ، واش جواد هو راشد واش يسمح فخدمتو لي ضرب عليها تمارة ويجي لهنا كبري عقلك أحياة ونساي ..
حياة ( تنهدات ) نسييت اعنبر نسيييت أصلا تلݣايه دابا تعرف على شي وحدة خرى الله يسهل عليه يستاهل كل خير ..
~~~~~~~~~~~~~
ف 11 Rue Chenier, Off Place Nations Unies, الدار البيضاء ، وبضبط فبار مولين غوج moulin rouge .. الصالة عمرات بالكليان ، دخلات وحدة من السربايات للبلاصة فين كيبدلو حيدات الطبلية هزات الساك ديالها وتمات خارجة ، فالخرجة كانت داخلة بنت فأواسط العشرينات ، جامعة شعرها لي كان لونو عسري كيتخللوه خصلات من ليميش ، دايرة ساكها على جتب لابسة الكخل معصمها مزيناه بساعة ..
.... : تعطلتي عليا أصاحبتي مالفة كتجي فالوقت
.... ( تنهدت ) طاكسي دار بيا روطار ياكما سولو عليا ؟
.... : ماسول عليك حتى واحد دخلي قبل مايجي مايلقاكش اصاحبتي وانتي عارفاه كيداير أجا مايفكك معاه ( هزهزات ليها راسها بملامح باردة ) دخلات للفيستير بدلات عليها دايرة طبليتها ، توجها لعند واحد الكليان عاد دخل :
أش حب الخاطر أسيدي ؟
كانت ݣالسة فجردة مستمتعة بالجو الربيعي النجوم فسما مضويين .. هضرتهم وضحكم واصل لعندها تنهدات تنهيدة طويلة كتفكر فهاد العائلة لي عطاها الله .. كتسول راسها واش هادشي غايدوم ولا يقد يجي النهار لي تفارق مع الروطال ومع عائلتو تنهدات تنهيدة طويلة ، حتى بانت ليها طوموبيل كحلة داخلة .. بلاصات ونزل منها عماد جاي قاصدها ..
عماد ( سلم عليها بليد كان باغي يعنقها كيف مالف مع بنات عمو ولكن ماقدش خايف يفرش راسو حيت عمرها كانت ليه معاها .. جر الكرسي وݣلس ) شتك بوحدك !!
عنبر : خليهم الداخل مجموعين وخرجت يضربني البرد شوية ( سكتات وكملات كلامها ) قاليك فاروق بلي جا عندو براهيم ؟
عماد ( هزهز راسو ) كنت معاه فأبيل فاش جا لعندو سمعت كولشي .. ݣتليك الفيران ايخرجو من الغار ديالهم ، دابا خاصك تزيدي ترضي البال منين باه بان المرة جايا يبان هو .. ولا يݣدو يسيفطو شي حد خور كولشي توقعيه حتى لراس بنادم متعرفي شنو كيدور فيه ..
عنبر ( بعدم إهتمام ) غير يبان باش نشبع والديه سبان نيت نبرد فيه جنوني الموسخ ..
عماد ( جاتو الضحكة) شوف سبحان الله ، نهار لول كيفاش كنتي كدوي عليه ودابا كيفاش كدوي عليه مغزفة ..
عنبر : داكشي كان فلول اعماد فاش كنت هبيلة وسايط ليا البرد فمخي ، واحد دار فيا هاد الفعايل وغانحن فيه مزال ݣلبي برد من جيهتو سبحان الله بحال الى عمرو كان فحياتي .. ولا كيجيني بحال ديك الدبانة لي كتكون كتݣجݣج على الوسخ هكاك هو ..
الروطال ( خرج عندهم ) إيمتا جيتي انت ؟
عماد : يلاه دابا داز عندي نهار مشارجي وماتبغيهش لعدوك خرجت شوية بكري عفط عفطة وحدة لهنا .. غدا عندي ليل ݣلت ندوز معاكم وقيت نسي مشافت العين
الروطال ( ݣلس ) شي مونتيف ؟
عماد ( كمش عينيه ) مونتيف وسكتي .. جا واحد السيد ليوم ( عاود ليهم ) أصاحبي على منظر البنت مفصلة بحال شي صݣيطة دلحم بحنتها هكاك فيديها ورجليها واحد الحالة متکدش تشوفها ..
عنبر : شتي هادو راه والله مخاصهم الحبس أنا نݣوليهم تشدهم وتربطهم ( كيشوفو فيها ) ومنين تربطهم تشد الحبل وتغطسو فالما حتى يتقال وتبقى تعطيهم حتى يݣولو براكة ومنين تسالي ، دخل عليهم دوك الطوبات دالقوادس وتعريهم وتخلي الطوبات يديرو خدمتهم لي بقى عايش يدوز مابقا ليه فالحبس بعاهة مستديمة ولي مات الله يرحمو ..
عماد ( شاف فروطال ) عندها شي أفكار سلامة ياربي ..
الروطال ( مفرق رجليه راخي تقلو على الكرسي ) كظل تفرج فالقنوات ديال الجرائم وكتعلم ..
عنبر : كندوي معاكم حطو راسكم بلاصة الوالدين ديال ديك البنت مسكينة باش غادي تحسو ؟
عماد : هادشي لي ضارني فمخي
عنبر : أجي نقوليك مافكرتيش منين كيطيحو على هاد البنات ؟ منين كيجيبو خبارهم ؟ ملاحظتيش بلي كيمشيو غير للحومات لي فيهم الناس على قد الحال لي بنتها خرجات من القرايا وماكملاتش ولا لي كدير شي صنعة علاش مكايمشيوش لديور الكبار ؟
عماد ( حك حاجبو لاوي فمو ) لافير ديال كيمشيو غير لناس لي بسطاء فكرت فيها ولكن كيفاش كيطيحو عليهم مجاتنيش لدماغي ، كترت المطارق وسلوكة ضروري يفلت ليك شي قنت ..
عنبر : كيمشيو غير لبنات العشرينات مرة عين السبع مرة سيدي عثمان كيف ݣلتي ليا .. غادي تكون عندهم شي عين طالقينها كيجيب ليهم الخبارات ماشي شي واحد من برات المغرب لا شي واحد هنا فالمدينة عارف مزيان الأحياء الشعبية وشكون فيهم كيجيب ليهم التقرير من لول حتى الأخر ..
عماد ( تبسم عجبو تحليلها شاف فخوه لي كان كيشوف فيها بتركيز ) وباش غادي نعرفو حنا شكون هذا لي كيجيب ليهم الخبارات ؟ راه ماعندنا حتى راس دالخيط
عنبر ( بتركيز كتشرح ليه بيديها ) هانت ضروري شي واحد فجيران ولا مول الحانوت مغايكون لاحظ شي واحد جديد فالحومة شتي مالين الحوانت برݣاݣين ، ايمتا وقع لي وقع اول مرة زعمة إيمتا جاتكم الخبار اول مرة ؟
عماد ( كح ) فشهر 7 فاش داز العيد الكبير بشي سيمانة هكاك
عنبر : هااا وداك الوقت كانو كاع الحوانت سادين ، حيت الأغلبية ديال مالين الحوانت كيكونو مشاو للبلاد عند عائلاتهم ( شافت فروطال ) ياك بعدا ؟ ( هزهز راسو بالإيجاب مركز مع كلامها رجعات شافت فعماد ) هداك لي كيدي ليهم الخبار غايكون جا قبااال سول وشمشم عارف ورا العيد الكبير اتخوى دنيا حتى الى جيتو سولتو اتلقاو ايديكم وريح ..
عماد ( شاف فخوه وشافيها ) انت خاص دفعي لبوليس أنتي
عنبر ( ضحكات ) سمع لي غادير هو ترجعو للحومات لي جاكم منهم ديكلاراصيو وترجعو تسولو مالين الحوانت نبصم عليها بالعشرة حتى غادي تلقاو شيحاجة .. ونزيدك حاجة أخرى
عماد : شنو هي ؟
عنبر : سربو الخبار توصل لصحافة ، هذا هو الحل باش توقفو هادشي يزيد يكثر الى وصلات لصحافة غادي يخافو على ريوسهم ويخافو يزيدو يصفيوها لبنات .. وحتى العائلات لي ماديكلاروش الى شافو الخبار ايجيو يديكلاريو مغايبقى هامهم لا هضرة الناس لا حتى شي ݣنس حيت الواحد راه مايقدش يعرف كبدتو ميتة والله علم الله شنو بيها ويبقى ساكت ..
عماد : الصحافة الى مشات حتى عرفات الروينة غادي تنوض عندنا وغانتزيرو كثر ماحنا مزيرين فهمتي البلان ؟
- الــربــاط 📍
ففيرما كبيرة .. كتوسطها ڤيلا بطراز راقي فالبيج ، خرج من الدوش كيمسح شعرو لبس كيطمة سخونة وتوجه للبيرو ديالو حل الپيسي ديالو كيشوف فشاشة كيسول راسو بزاف ديال الأسئلة وأولهم علاش دار صورتها فشاشة ديال الپيسي ، واش هو مراهق لي يدير هاد التصرف ؟ كانت صورتها موخودة من صورة كبيرة مع البنات لي خدامة معاهم قطعها وصفاها وحتافظ بيها .. كيسول راسو واش عاجباه هي ولا زينها ولا فورمتها لي أصلا بانت ليه فورمة مفبركة من اخر مرة شافها .. سونا ليه التيليفون هزو طلعات ليه إسم عبلة فتح الخط محنحن بصوتو الرجولي :
راشد : الو عبلة .. الحمد لله بخير .. إيه كلمني طارق وݣالي أجلتي السفرة ( قلبها دارجة ) أيااه تزوج إيخ إيه الخبر صحيح تزوج ( كمش عينيه ) عبلة داك الحماق ديالك مديريهش عليا الله يرحم باك وها تسطية واش عمرو واعدك بشيحاجة ( تعصب حيت كلام كتفهمو وكلام لا ) فاروق عمرو ماوعدك بأي إشي يا عبلة لا تستهبلين الله يرضى عليك .. إعجابك من راسك وبس الى بينك وبينو كان مجرد شغل لا أكثر ولا أقل سوالف الحريم مالي دخل فيهم .. ( عض على شفتو ) إن شاء الله تصبحي على خير ( قطع ) .. رجع لبيسي داخل لواحد للسيت كيقلب فيه مركز مع الشاشة هز التيليفون دور لنمرة ديال طارق ..
راشد : وي طارق لݣيت لوكال ، المحال كبير ( مركز مع الشاشة كيشوف فالمحال ) لالا اصاحبي كبير غايكونو فيه جوج جوايه شوف کدامي تصاور غانسيفطهم ليك فلابواط إيميل ديالك شوفو ورض عليا الخبار صافي .. يلاه بسلامة ( قطع مسيفط ليه المحال تصاور وڤيديو )
- مدة كيتسنى حتى جاه ميساج من عندو فيه " زطم "
~~~~~~~~~~~
عنبر : وراه اعماد الى بغيتي تربح حاجة خاصك ضحي بحاجة .. انتوما خدمتكم دايرينها ودايرين فوق الجهد اتزيرو شوية ياه ولكن الله تزيرو شوية ولا كل مرة تلقاو وحدة مليوحة فقنت ..
عماد ( هزهز راسو ) على مولانا ..
عنبر ( وقفات ) أنا غاندخل عند البنات .. خلاتهم ودخلات
عماد : صدماتني أصاحبي عندها واحد العقل مامنوش جوج
الروطال : طالعة لولاد عمها ماشي للبراني .. بقاو مجمعين خرج عندهم طارق هاز پيسي ديالو وکلس معاهم موريهم المحال عجبهم وحتى الموقع ديالو كان مزيان وجا فبلاصة زوينة وغايكون عليها الرواج ..
- دوزو سيمانة زوينة ياكيكونو خارجين مع بعضياتهم للتم ولا محمعين على الضحك وتقشاب ، بنهار كيفرشو على برا فطبيعة كينقيو الزرارع البلقي فالأيام دازو غير فطحين وتوجاد لشباكية اخر نهار ليهم .. زوج سطولة داتهم تودة واحد فيه الشباكية والثاني فيه السفوف عنبر حتى هي دات حقها وحتى دنيا خدات الحق ديالهم ..
دنيا ( واقفة حدا باها ) هاد العام اندوزو رمضان غير انا وبابا اتخوى علينا الدار
عنبر : علاش طارق مكايدوزش معاكم رمضان ؟
دنيا : لا هو دارو بوحدو مرة مرة فاش كيجي يدوز يفطر معانا .. كنا قلنا عمي يدوز معانا رمضان هو وماجدة ولكن بحال والو غايدوزوه عندهم فدار
عنبر : ورمضان هو الجماعة الصراحة تقال
عبد الخالق ( غير كيشوفيها ومبسم ) عندك الصح ابنتي رمضان هو الجماعة
عنبر ( بإبتسامة ) إن شاء الله نوليو مرة مرة نفطرو عند واحد مرة تجيو عندنا مرة نجيو عندكم مرة نمشيو عند ماما فاطنة هكا تحلى اللمة
عبد الخالق : إن شاء الله أبنتي مرحبا بيكم فأي وقت .. وقف عليهم الروطال حط يدو ورا ظهر عنبر وحيدها :
مشينا ( شاف فعمو ) مغاديينش ؟
عبد الخالق : دابا نيت نتسناو أباك ونمشيو
الروطال : وهو هذا ( سلم على عمو ) عنبر سلمات عليه عنقها لقلبو بجهد .. عنقات دنيا وتوجهات للطوموبيل مخلية سعاد تركب القدام بإصرار منها وهي ركبات اللور مع سهام وأمير ..
قبل مايخرج بطوموبيلتو بانت ليه طوموبيلت باه داخلة .. وقف طوموبيلتو نزل منها قتصد باه لي خرج من طوموبيلتو عينو على سعاد لي راكبة القدام بدورها شافت فيه تنهدات ودورات راسها
الروطال ( حط يدو على كتف باه ) الواليد أمضرا ؟
أدريس : انا ومك فضينا كل واحد قصد خروب بلادو .. واحد الروينة دارت ليا فالمحكمة شوهاتني خلات كاع لي تم كيتفرج كونما البوليسي خرجها
الروطال ( عوج فمو بقا فيه باه بقا فيه الحالة لي وصل ليها سينين من الصبر والحرمان ) الصبر الحمد لله دازت على خير ماديرش فبالك ( سكت كيفكر ) اش بان ليك دوز معانا رمضان ؟
أدريس ( برفض ) لا اولدي .. مك دابا غاتمشي للدار ديال المعاريف ، انرجع أنا وختك لدار
الروطال : ماجدة غاتكون خدامة غادوز نهارك بوحدك الواليد رمضان كيبغي الجماعة ، جي انت وماجدة دوزوه معانا كاين غير انا وعنبر وخالتي
أدريس : نجيو شي نهار نفطرو معاكم .. نهاري غاندوزو مع عمك عطا الله مايدار كيبان ليا راه ناوي يفتح شي قهوة وقيلة وقيلة غادي ندخل معاه شريك حسن من الكلسة فدار كترشي العظم
الروطال : الى درتوها غاتكون مخيرة تعمر وقتك انت وياه حسن ليكم الى كانت شيحاجة ݣولها ليا ، والى بغيتي تدوزو معانا رمضان دارك الواليد متفكرش جوج مرات
أدريس ( بإبتسامة طبطبط على كتفو وعينو مع سعاد ) الله يرضي عليك مديرش فبالك .. غانرݣبو عليكم مرة مرة سير أولدي يلاه توصل المغرب هذا
الروطال ( باس ليه راسو ) تهلا فراسك ومتبقاش تفكر بزاف لوح وراك .. تيليفون بيناتنا ( عطاه بظهر راجع لطوموبيلتو ديمارا وشد الطريق )
~~~~~~~~~~
- فبيتها مجننة فاتحة بالزها كتجمع فيهم حوايجها ، كتهز من الماريو وكتلوح
خديجة : العروبي الخانز غير بلاتي على جدك انا غانوريك ولاهيلة مجري عليا نسا يامو .. كملات الجميع حتى جمعات كاع الحوايج ديالها هزات ساكها داليد دارت فيه شي وراق ديالها بكية ديال الݣارو لونها فالغوز وبريكة سوارت وسداتو ، عيطات على المساعدة نزلات معاها البالز رجعات البيت جرات مجر وجبدات منو مقص كبير ..
خديجة : والله يا تريكة غرباوة حتى نخرج فعودكم ( بدات تقطع فالكوڤرلي وفالخامية رضاتهم كاملين بحال شراوط ) .. نزلات بداك المقص للصالون ودازت على رواقات كاملين والخديات وطلامط المساعدة كانت كتشوف من بعيد حاطة يدها على فمها بصدمة وخوف منها ..
- من الصالون دازت للكوزينة كتجبد فالماعن وتهرس حتى شخشخاتهم كاملين ، صدرها كيطلع وكيهبط عينيها حمرين وجها حمر كلها كترعد ماتسرطاتش ليها ومابغاتش تسرط كيفاش يجري عليها من الفيلا وتسكن فشقة .. واخا شقتها كانت راقية ولكن مقارنة مع الفيلا كانت كتبان ليها والو ، مغاترضاش قدام صحاباتها ومعارفها لي كتعرف
خديجة ( بالغوات ) عندكم الزهر ماحرقتهاش وانتوما فيها ، غادي تندمو على نهار لي تزاديتو فيه ولي ماعندو خديجة يعلقها فالحيط عندو ( لاحت داك المقص وخرجات ) ..
المساعدة ( عاسة عليها حتى مشات هزات تيليفونها مخلوعة كترعد ) ألو ختي ماجدة جي دابا لدار اختي ، لا مكايناش أختي جمعات حوايجها ومشات .. صافي واخا اختي ( قطعات ) ..
× وصلو للدار نزل الروطال وسعاد وعنبر بغات تعاونو فالسطولة
الروطال : غيري سيري انتي انا غاندخلهم .. دخلات عنبر للدار هي وسعاد يرتاحو ، سهام طلعات أمير للبيت كان ناعس ... دخل الروطال السطولة للكوزينة ورجع جايب البالز ديالهم
عنبر ( وقفات ) أنا غادي نطلع لبيتي نبدل عليا
سعاد : سيري أبنتي ( طلعات عنبر لبيتها ) شحال عزيزة عليا هاد البنت وشوفليك اولدي سبحان الله شكون ݣال تصدق بنت عمك
الروطال ( ݣلس يرتاح ) الدنيا صغيرة ( شافيها ) الواليد اليوم خرج ليه الطلاق
سعاد ( بلعات ريقها ) إيوا اولدي الله يصاوب ليه .. كيبقى ( قاطعهم صوت الغوات )
عنبر : فاااارووووووووق
الروطال قفز من بلاصتو كيجري درجة اه درجة لا .. تابعاه سعاد مخلوعة كتردد :
أش هذا ياربي سلامة ..
- طلع كيجري وصل عندها لوسط البيت مخلوع لقاها واقفة كتشوف فوق الكوافوز كلها كترعد ، مشافت فيه كتأشر لفوق الكوافوز بصبعها اللون مخطوف من وجها .. قرب للكوافوز كيشوف فديك كرة الثلج لي كانت فلون الكحل وسطها كوبل معانقين حداهم برج إيفل هزها كيقلب فيها دور راسو كيشوفيها اللون مخطوف من وجها عينيها كيترعدو شافت فيه ببرود مقاداش تخرج الكلام من شفايفها ..
عنبر ( بصعوبة ) ك كان هنا افاروق دخل لبيتي وحطها .. هادي هادي كانت لهيه أش جابها لهنا ؟
الروطال ( حطها وجرها بيدو معنقها ) ششش ما وقع والو ( سكتات مجاوباتوش صدرها كيطلع وكيهبط بعدات عليه شافت فيه )
عنبر : هاد الكرة شراها هو شحال هذا ليا انا خليتها تم ماجبتهاش معايا أش جابها لبيتي ، فاروق راه دخل لدار دخل ليا لبيتي
فاروق ( كيدوز على كتفها ) صافي اعنبر ماوقع والو ( شاف فسعاد ) خالتي خليك معاها
سعاد : واخا أولدي ( هز ديك الكرة وخرج من بيتها مغدد )
فاروق ( كيعيط بصوت عالي ) وفااااء وفااااء ( جات كتجري من الكوزينة )
وفاء : نعام اسي فاروق ( بتوتر )
الروطال : شكون جا لهنا ؟
وفاء ( بلعات ريقها ) مجا حتى واحد اسيدي .. انا كنجي كندير خدمتي وكنمشي
الروطال ( تبسم ببرود ) وعلاش غاتجي ؟ سولتك شكون جا باش نسمعك كتݣولي الله وعلم حيت فاش كنا هنا ݣتليك سيري لداركم بلاما تجي ݣلتها ولا ماݣلتهاش ؟
وفاء ( ضارت بيها الدنيا ) والله اسي فاروق ماجيت .. انا غير لبارح لي جيت کلت نشوف واش كولشي كاين فالكوزينة .. باش منين تجيو نوجد ليكم شيحاجة
وفاء ( دور لسانو وسط فمو عاض على باطن حنكو ) سيري لبسي حوايج وحيدي عليا ديك طبلية ( عطاها بظهر خلاها كتشوف حابسة البكية خايفة من داكشي لي كتفكر فيه يصدق ، مشا لبلاصة الكاميرات خدمهم .. كيتفرج عاقد غوباشتو ، بانت ليه وفاء دخلات لدار 4 المرات فاش مشاو وقف عند اخر مرة دخلات خلات الباب محلول ب 15 دقيقة كيبان ليه شخص لابس الكحل كويرة وكاسكيط داير عليها القب هاز ساشي فيدو بيضة .. بقا مركز معاه حتى دخل مدة 10 دقايق خرج حادر راسو بنفس الساشية .. بقا مركز مع الكاميرات كتبان ليه وفاء خارجة وسادة الباب وقفات دوات مع عنر العساس ومشات .. الكاميرا ماعطاتو جتى راس خيط باش يعرف شكون هذا واش وفاء لي حلات ليه وبلعاني خلات ليه الباب محلول ولا غير نسات الباب وهو ستغل الفرصة دخل وخرج بلاما يشوفو شي حد خصوصا مكاين حتى واحد وعمر كيكون فجهة لوخرا ..
- خرج من البيت لي كانت فيه شاشة كبيرة فيها كاع جوايه القدام ديال الڤيلا ومن الجهة الأخرى .. فتح الباب وتوجه لعند عمر لقاه ݣالس فالبيت ديالو حاط اتاي وراديو وشاد التيليفون ديالو
الروطال ( بصوت تقيل غالبة عليه حشرجة رجولية ) عمر
عمر ( وقف خرج عندو ) نعام اسي فاروق
الروطال ( مغوبش ) والبارح شفتي شي واحد كيدور هنا ؟
عمر ( بنفي ) لا اسيدي تلاقيت مع وفاء خارجة من الدار .. مع بان ليا الباب محلول كنت جاي نشوف حتى خرجات سولتها علاش خلات الباب محلول ݣالت ليا جات غير تشوف واش خاصة شيحاجة فالكوزينة ونساتو ..
الروطال : مبانت ليك حتى شيحاجة فشكل ؟ والو ؟
عمر : لا اسيدي انا كندور مرة فصباح ومرة بنهار ومرة بليل كنجيب دورة هنا وكنرجع
الروطال ( هزهز براسو ) شد عليا هاد زبل دݣدݣ مها ولوح عليا الزبل
عمر : واخا .. عطاها بظهرو ورجع لقا وفاء واقفة مشا للبيرو ديالو دخل جبد واحد الجوا كان فيه الصالير ديالها كان ناوي يخلصها حتى للغد رجع عندها مدو ليها
الروطال : خلاصك عمر رجلك تعتب هاد الباب
وفاء ( جاتها البكية ) علاش اسيدي حشومة عليك .. عارفني انا لي كنصرف على دارنا و( قاطعها )
الروطال : الغدر أوفاء دم سناني حمدي مولاك جيتي مرة ومدرتش فيك شرع يدي ، رولي يلاه توصلي
وفاء ( بقات واقفة كتبكي )
الروطال ( بالغوات ) ويلاه اشريفة انباتو هنا .. تفعفعات حدرات راسها وخرجات ، هزات تيليفونها كتسوني
وفاء ( كتبكي ) الو مدام خديجة .. جرا عليا سي فاروق ماعرفتش علاش مافهمت والو .. وقيلة الله ياخود فيها الحق .. واخا الالة ( كتمسح دموعها ) واخا الله يخلف عليك لهلا يخطيك ( قطعات ) ..
واقفات فالكوزينة كيوجدو العشا .. سعاد كتوجد فطاجين وعنبر كتوجد فديسير لي غايتسحرو بيه
سعاد : مديريش فبالك أبنيتي هذاك أرعواني منين دار هاد الفعايل والله مراجل
عنبر : الله ياخود فيه الحق انا بغيتو غير يبان ليا نعطيه علاياش كيقلب ، نوريه وجهو فݣفاه خاصو ايوقف قبالتي ..
الروطال ( على برا حاط تيليفون على ودنو ) ماتفرعش ليا راسي اعماد هرستها وسالينا مافكرتش فيها واش ݣالو ليك كنت فالبوليس
عماد : وصاحبي وصاحبي خمم اشوية انت كيتغمضو ليك العينيك راسك مكتبقاش عاقل عليه .. ضيعتيني كون عيطي وعلمتي كون جيت ديتها البصمات أصاحبي كنا غادي نعرفو شكون جابها ..
الروطال : نفختي ليا مخي الله يرحم جدك فوتني هاد الساعة من بعد ( قطع ) متوجه للعندهم للكوزينة
سعاد : وبنتي حتى واحد ماعندو ورقة بيضا فحياتو .. كاملنا كنغلطو ماشي ملائكة
عنبر : ندمت على النهار لي شفت فيه كمارتو .. كون سحابلي هادشي يوقع نهار جا ياكل البيبوش نݣوليه مكاينش ميكروب تفو ( قاطعهم صوت تيليفون سعاد مسحات يديها فالفوطة هزات التيليفون كمشات عينيها مغوبشة )
سعاد : انا جايا ابنتي ( خرجات من الباب الثاني دالكوزينة لي كيدي لجردة مشافتش الروطال لي كان واقف فباب الكوزينة الأول) ..
الروطال ( مراضش البال لملامح سعاد لي تبدلو عينيه على عنبر لي عاطياه بظهر حتى ݣمزها بصوتو ) سبحان الله العظيم ، لي سمعك داك نهار كتحصري عليه مايݣولش انت لي كدوي ( كان معصب من لاپيل لي دازت بينو وبين عماد بلاما يحس خرج الكلام لي خرج من عنبر)
عنبر ( شافت فيه مكمشة عينيها ) إيمتا تحصرت عليه انا ؟
الروطال ( دار يديه فجياب السروال دالكيطما ) نساي
عنبر ( تقابلات معاه ) كيفاش نساي ؟ بديتي الهضرة كملها ايمتا تحصرت انا على داك بوزبال ؟
الروطال : ياك ݣلتي لمك ماكرهتيش كون كملتي حياتك مع راجلك الاول وداكشي لي كنتي كتوجدي ليه فدماغك كون وصلتي ليه معاه ..
عنبر ( تبسمات بإستهزاء تفكرات الهضرة لي كانت ضارت بينها وبين مها ) وكون وقفتي وكملتي الهضرة متسمعش غير النص كون سمعتيني ݣلت ليها داكشي كنت بغيتو شحال هادي .. وكون سمعتي على ودنيك بلي مكنحس بوالو من جيهتو حتى وجهو تنسيت عليه وحتى داك الإحساس ديال منحملوش بزاف عليه ولكن هذا هو سر لي كيسمع نص الهضرة ..
الروطال ( مجاوبهاش بقا ساكت رجعات سعاد )
سعاد : انت هنا ابوراس .. موجدة ليك واحد الطاجين من طواجني
الروطال : توحشتهم نيت اخالتي بنة يديك مامنهاش جوج ( شاف فعنبر لي عطاتو بظهر خرج وخلاهم )
طاب العشا تعشاو مجموعين معاهم سهام .. جمعات عنبر الطبلة حطات الماعن فالغسالة ، خرجات لعند سعاد ݣااسة حداها كيتفرجو شادة تيليفونها كدوي مع حياة .. دورات سعاد للقناة الاولى كيدوزو برامج رمضان هزات عنبر عينيها لتلفازة فاش سمعات صوتها ..
الروطال ( من وراهم ) صوتك هذا لا ؟
عنبر ( ببرود ) أه
سعاد : تبارك الله صوتو غزال وحنين
عنبر ( بإبتسامة ) لهلا يخطيك أخالتي ، هادي اخر أغنية درت ورجعت اللور
سعاد ( شافت فالروطال ) ݣولي الصوت لي دوخك أشلاهبي أحيانا عليك ( كضحك ) تبسم مدوز يدو فشعرو فتح الباب ديال برا وخرج ..
رجعات خشات وجها فتيليفون جاها ميساج من عند حياة " حاطين تصويرتك فالأنستغرام فواحد الصفحة مع الأغنية ديال المسلسل لي غايديرو فرمضان هاكي شوفي " ( سيفطات ليها الرابط ) ..
- دخلات لرابط كانت محطوطة صورتها بالحجاب وصورة غلاف المسلسل الجديد مكتوب " اخر عمل للفنانة المعتزلة عنبر بن شمسي " البوسط تحت الصورة .. مدازش بزاف ديال الوقت على الشهرة ديالها فالأغنية الشعبية مسحات كاع تصاورها والڤيديوات ديالها ، تحجبات وبعدات على الغنا وعلى السوشيل ميديا .. حتى كتفاجئنا بأغنية تتر للمسلسل الرمضاني " قفطان الباتول " ستيل جديد بعيد على الشعبي ليصرح مدير أعمالها بلي هاد التتر كان هو اخر ماغنات ، من وراها غاتقرر الفنانة الشعبية عنبر الإعتزال والأبتعاد عن ساحة الفن ..
- دخلات كتقرا التعاليق .. كل واحد وشنو كان كيقول " الله يتبتها ومتكونش باغية دير البوز " 2 " دابا شوية تحيد الحجاب بحال لي سبقوها " 3 " السيدة بعدات من الغنا كان عليها حتى هاد تتر مديروش " 4 " واش انتوما مراض مدامها سنات على الأغنية راه مخاصها تراجع السيدة ياك عتازلات وديزها فراسكم شوية " 5 " متخليو لي بغا يعتازل ولا يتوب الله يستر كتبقاو غير تابعينو فعظامو ودخلو سوق راسكم البشار " ... التعاليق كان شي كيشرق شي كيغرب حركات راسها بلاحولة كانت عارفة هادشي ايجي نهار ويخرج كيما كانت عارفة بلي رشيد غايقوم بالواجب ويجاوب هاد الصفحات الحاجة لي كتحمد عليها الله هي الڤيديو الأول ديالها تمسح من الصفحة لي كانت مسؤولة على الإنتشار ديالو تنهدات تنهيدة طويلة سدات الكونيكسيو او وقفات
عنبر : خالتي انا انطلع نصلي ونقرا شوية ديال القرآن..
سعاد : سيري ابنتي الله يقبل حتى انا داكشي لي غادي ندير نيت ..
- فتحات المحال ديالها فصباح دايرة مع السيد لي وجد ليها الكلامط دوز عندو مع العصر .. صونا ليها باها يعلمها بلاما دوز عند مول النوامس حيت جاب نموسية وخواميها ..
ماجدة : صافي أبابا انا غاندوز غير عند مول الكلامط ، ݣلت حتى لورا التراوح إن شاء الله نمشيو للرمضان نشوفو الماعن لي بقاو خاصين .. صافي واخا إن شاء الله لالا مغاديش نتعطل .. صافي نجيبهم معايا انت أش مشهي ؟ ... صافي داكوغ آمين ابابا ( تنهدات تنهيدة طويلة كان فالداخل ديالها فجوة وحزن أول رمضان غادوزو غير هي وباها ومها مكايناش )
دنيا : الزين صباح الخير
ماجدة ( بهدوء ) صباح النور .. جابك الله قنطانة ياختي كنحس بالمورال ديالي ماشي هو هداك
دنيا ( ݣلسات حداها ) أش واقع ؟
ماجدة ( كتحاول تشرح ) هذا اول رمضان يدوز بلا ماما أدنيا واحد الاحساس فشكل والله العظيم .. واخا مكاينش فرق فاش كانت ولا مكانت أصلا الحلاوة ديال المناسبات مكنحسوش بيهم ديما تغوت ديما حتى حاجة معاجباهاش الغوات وصداع ونهيض ( شافت فدنيا ) فخبارك عمري شفت ماما صلات عمرها قاتلي ماجدة خاصك تصلي ولا جا الوقت تحجبي ولا عمرها عرفتي شكون علمني الصلاة عنبر ( تبسمات ) سبحان الله من نهار تعرفنا تبدلات فيا شحال من حاجة بحال الى الدم حن وهي لي نبهاتني لصلاة او وراتني كيفاش نتوضى ونصلي ..
دنيا ( حطات يدها على يد ماجدة ) متبقايش تفكري فهادشي عمرك تشوفي النص الخاوي من الكاس شوفي الكاس العامر .. الحمد لله هانتي درتي مشروعك وغادية مزيان فيه شتي هادشي لي كتقولي حاسة بيه وبكثر منو انتي مزال اماجدة ماماك كانت حداك انا راه ماشتهاش حتى نهار وقفات قدامي ، وكون غير كانت جايا طلب السماحة سمحات فيا وانا صغيرة حتى كبرت عاد بغاتني نمشي معاها ..
ماجدة : المهم رباك عمي .. ماشي بحالي انا كانو ممنوعين عليا الصحابات انا عمري عرضت على شي بنت لدارنا كان ممنوع عليا كنت كندير غير لي بغات ماما كنلقى راحتي امعاكم انتوما ومع خوتي وبابا وهادشي ومكانش عاجبها ( غرغرو عينيها بدموع ) ياك شتي هادشي كامل لي دارت لبارح مشيت عندها بلاما يعرف بابا ( بلعات ريقها )
دنيا : جرات عليك ؟
ماجدة : كون غير جرات وصافي .. ماخلات ليا غير لي نسات شي حوايج مافياش ادنيا ( كتبكي ) نعتاتني بحوايج خايبين وبلي عمري مغادي نطفرو وبلي مسخوط ومانسواش وشابهة لتريكة بابا وبلي عمر شي حد غايشوف فيا ولا يساومني ( مسحات دموعها ) لي صدمتي وضرني ومدانيش نعاس عليه الدار كلها فيها ريحة الݣارو .. وكان محطوط فوق طبلة أدنيا ( كتشهق ) وتصدمت تصدمت مكنتش كنتوقعها ماما تكمي ادنيا راه انحماق ..
دنيا ( سكتات كانت عارفة شافتها واحد المرة ݣالسة فكافي مع واحد السيدة وكانت هازة ݣارو ولكن عمرها خرجاتها على فمها ) بحال والو تكون غير شي صاحبتها كانت معاها فدار كتكمي ونساتو عندها
ماجدة : دنيا واش انا مكلخة الݣارو ريحتو كتعطي منها كتدوي معايا وريحتو عاطية من فمها ، وماقديتش نقولها لبابا
دنيا : واش انت درتي لي عليك مشيتي عندها هي جرات عليك .. صافي أنتي لي عليك راه كديريه الواجب ديالك معاها دايراه واخا تجري عليك الف مرة ديري لي عليك وماتبقايش تأتري بالهضرة ديالها خليها تقول لي بغات ، مشكلتك أماجدة كون كنتي كتيقي فراسك وفخدمتك ماكنتيش غادي تأتري بالهضرة ديالها ولا الهضرة ديال شي واحد ، ولكن انت لي قالت ليك كتبقاي دمعي أصاحبتي عالجي راسك من هضرة الناس باش ماتبقايش تسوقي
ماجدة : شنو خاصني ندير ؟
دنيا : علاش متشوفيش مع طبيب نفساني ( شافت فيها ماجدة ) كنهضر معاك انا شكون نفعني غير هو تبعت مع واحد الطبيب غزاال والله العظيم اشوفة فيه كتحل شهية ( ضحكات ماجدة ) وهكاك ضحكي أصاحبتي ، شوفي ناخود ليك رونديڤو راه ماشي عيب عادي أي واحد فينا محتاج لطبيب فحياتو لي يعاود ليه ويشكي عليه ويعاونو أش بان ليك ؟
ماجدة ( مسحات وجها فاش دخلو الكليان ) واخا صافي انا نشوف الناس ( خلاتها ݣالسة ومشات تشوف الكليان لي دخل ) ..
دنيا ( صونا تيليفونها ) الو سلام عليكم ( كتسمع) وأنا عجباتني الصراحة ولكن اسيدي راه الثمن لي درتي معايا بزاف عليها .. ( كتسمع لكلامو ) لالا انا الثمن لي درت معاك هو لي عندي مانزيدك عليه والو راه غانعاودها من الأول غادي نخسر عليها ... لالا أخويا والله بغيتي مرحبا نجي عندك دابا نديها مابغيتيش الله يسر ليك فشاري ماحسن مني ( كتسمع لهضرتو تبسمت او وقفت ) صافي الله يسر .. لالا فين كاين أنت نجي لعندك .. واخا الله يعاون أسيدي ( هزات تيليفون وسوارت طوموبيلتها وقفات حدا ماجدة ) ماجدة عندي مايدار التيليفون بيناتها ..
ماجدة : واخا .. خرجات من عندها ركبات فطوموبيلتها ومشات ..
بحال العادة كتفيق تصلي الظهر تقرا القرآن .. تخرج تمشى هي وسعاد فالفيرما ويرجعو باش يبداو توجاد ديال الفطور .. كتكلف بالماعن ديرهم فالمكينة وتستفهم فبلايصهم كيخرج الروطال لجامع لي كاين تم ويبقاو هوما كيصليو فدار
- ݣالسة شادة القرآن كملات القرايا وحطاتو محيدة شالها حتى سونا تيليفونها .. غمضات عينيها بقلة حيلة وتنهدات فتحات الخط
سعاد : أدريس هادشي لي ساير دير فيه ديال البراهش .. راك كبرتي على هاد البهلان الله يهديك رجوع لله ..
أدريس ( بهداوة ) مكندير حتى حاجة عيب ولا خارجة القانون اسعاد .. الزواج ماشي حرام ولا عيب الله يرضي عليك
سعاد : الزواج فهاد العمر واش هبلتي حتى شاب عاد يعلقو ليه حجاب ولاواه ، دراري ولاو كول منك وبغيتي تزوج
أدريس : من حقي بشرع وبالقانون من حقي .. براكة غير لي داز عليا أسعاد ، كنا صغار وحرموني منك جاني خبار زواج ربي علم بحالتي بوحدو ولادي كبرو وكل واحد فيهم دار حياتو وشاف راسو مغانبقاش تابعهم جا الوقت لي نشوفيه راسي الهضرة فراسك فكري فيها يدوز رمضان عطيني خو جوابي السلام عليكم .. ( قطع )
سعاد : لا حول ولا قوة الا بالله العلي العظيم ..
× لـيــلـة 27 ×
فطرو مجموعين بحال ديما تعاملو كان عادي معاها على عكسها هي لي كان تعاملها معاه كلو برود ، جمعو الطبلة بحال ديما .. طلعات بزربة لبيتها توجد راسها لبسات جلابة واسعة مع شالو طويل ليبات وصابو فرجليها هزات ياكها ، وخرجات من بيتها ساداه هابطة للتحت كانت سعاد واجدة هي وسهام وأمير .. نزل من بيتو لابس ݣندورة وصندالة مع ساعة رجالية وخاتمو ديال الزواج .. سبقات سهام وعنبر وجراتو سعاد بالهمس :
تا إيمتا اتشوف طبيب لداك الشخير اولدي راه مامزيانش انت مرتك كل واحد ناعس فبيت ( هادي هي الحجة لي عطاها للنعاسو المفرق مع عنبر )
الروطال : يفوت رمضان الواليدة ونمشي
سعاد ( تبسمات ) ݣلتيلي الواليدة هههه مابقاتش خديجة ؟
الروطال ( باس ليها راسها ) بجوج بيكم هي رباتني واخا داكشي لي كانت كدير معايا داز الله يسامح كتبقى رباتني .. وأنت كنشوفيك مي الله يرحمها
سعاد ( غرغرو دموعها ) الله يرضي عليك اولدي والله ينقي طريقك من الشوك ويكملك بعقلك ( خرجو معانقين ركبات هي حداه وعنبر راكبة اللور مع سهام ) ..
- وصلو للدار باه كانو دايرين العشا تما غايتعشاو مجموعين .. نزلات سعاد وسهام ، نزلات هي همسات للسعاد بشيحاجة عطاتها سعاد بظهر وعنبر رجعات لعندو
الروطال ( كيشوفيها بإستغراب ) أش تم ؟
عنبر ( بصوت رقيق أنثوي ) بغيت نمشي معاك
الروطال ( بلع ريقو ) فين غاتمشي معايا غادي لجامع أعنبر .. مالفة كتصلي فدار
عنبر : بغيت حتى انا نمشي لجامع حشونة عليك وحق الله العظيم ، ديما كنطلبك مكتبغيش ودابا فهاد الليلة العظيمة باغي تنكريني وتخسر ليا خاطري ؟
الروطال : حتى واحد مغادي كاع البنات غايصليو فدار حتى ليك أنتي
عنبر : والله ومتديني انخليك حتى تمشي ونشوف شي جامع قريب نمشي نصلي فيه وأنا علمتك
الروطال ( دوز يدو على لحيتو بنفاد صبر ) الصبر ياربي الحبيب .. ديمارا وشد الطريق تبسمات عاجبها الحال توجهو للجامع لي كان داير مع باه وعمو وطارق وعصام يتلاقاو فيه على عكس عماد لي كان غارق فالخدمة حبس الطوموبيل نزلو غادية فجنبو ..
الروطال : سيري من داك الباب فين كيدخلو العيالات ، خرجتي قبل مني ݣلسي تسنايني حتى نخروج صافي ؟
عنبر ( ببرود ) كون هاني ( عطاتو بظهر ومشات ) .. داز من الجهة لوخرا كانو كيتسناوه سلم عليهم ودخلو للجامع مجموعين ..
- سمات الله ودخلات الجامع كان كبير مفرش بزرابي حسات بواحد الرهبة وراحة والفرحة كولشي تجمع عليها .. لأول مرة غادي دخل للجامع أذن العشا .. صلاوه كلما كتحط جبهتها كدعي كتحس براحة غريبة عمرها ماحسات بيها فحياتها .. بداو كيصليو التراوح ..
- من ورا التراوح ݣلسات كتقرا القرآن واحد السيدة حداها مرة مرة كدوي معاها كتجاوبها عنبر وترجع تكمل القراية ديالها حتى سلات ، هزات ساكها وناضت لبسات صابوها وتمات خارجة تابعاها السيدة لي معاها ..
.... : سمحيليا ابنتي نسولك الله يرضي عليك
عنبر : مرحبا اخالتي
.... : انت من هنا ؟
عنبر : أه تقريبا من هنا علاش ؟
.... : مزوجة ؟ مديريهاش مني قلت الصواب تبارك الله ماشاء الله فنة .. عندي ولد واحد بقا ليا مزال بلا زواج كاين نيت فجامع ..
- الواليدة ( وقف عليهم شاب فتلاثين من عمرو مقبول ومبشور ) تعطلتي
.... : كنت واقفة مع هاد البنيتة ( شافت فعنبر ) هذا ولدي أشرف هو لي قلت ليك عليه
أشرف ( تبسم ) أش ݣلتي ليها .. من بعيد تسم صوت رجولي قوي عيط بسميتها
عــنـبـــر .. ( ضارت بان ليها واقف كيخنزر فيها )
عنبر : سمحيليا أخالتي خاصني نمشي راجلي كيعيط تشرفت بمعرفتك سمحوليا .. خلاتهم متبعينها بالعين الام متحصرة حيت صدقات مزوجة
الروطال ( وصلات عندو ) شكون دوك بنادم لي كنتي شادة جماعة معاهم ؟
عنبر ( هزات كتافها ببرود ) اواحد السيدة صلاة معايا وخرجنا بقينا كنهضرو ( ضحكات ) عرفتي اش قالت ليا ( الروطال هزهز براسو بشنو على بعيد واقف باه وعمو وعصام كيتسناوهم ) سولاتني واش مزوجة .. كانت بغاتني لداك ولدها لي كان واقف معانا
الروطال ( كمش عينيه عقد غوباشتو مدوز لسانو على سنانو عاض على شفتو رما عينيه ليديها جرها بصلابة وصوتو القوي ) خاتمك فين هو ؟
عنبر ( برمات شفايفها ) تقيل كنخاف يطيح ليا وانا نحيدو حتى ندير ناخود شي واحد دنقرة يبقى فصبعي ديما ( شافت فجهة باه وعمو) كاعما شفت عمي ادريس وعمي عبد الخالق نمشي نسلم عليهم ..
الروطال ( شد يدها مقرب من ودنيها ) الهضرة ماشي هنا امدام ( بإبتسامة باردة شافت فيه بكل هدوء زولات يدها من يدو ومشات عندهم ) ..
العشا كلها وهي متجاهلاه مكتشوفش جيهتو .. إحساس زوين كتحس بيه وهي متوسطة عبد الخالق وأدريس واحد فليمن ديالها ولاخر فليسر ديالها
عنبر ( عاطية الإنتباه ديالها للأدريس ) وكيفاش حتى شديتوه مزال ؟
أدريس : ربي فضحو ابنتي غير بالقفطان ديال مرتو .. كان شي عرس فالحومة عندهم ومرتو معروضة للعرس ولابسة القفطان ديال السيدة
عنبر : اويلي هادي مكلخة راجلها قا**تل وشافر حوايج المرة ولابساهم
أدريس : ربي الى بغا يبين الحق أبنتي على حاجة بسيطة ، ايوا المعروضات شافو القفطان بظاو يتغامزو هذا قفطان فلان .. جاو ݣالو لي كاين ايوا تشد ومرتو تشدات معاه الولاد داتهم جداهم
عنبر : الطمع طاعون الله يستر .. أجي عمي كون ادرتي شي قناة دابا انت تقاعدتي دير قناة بحال الخراز بقا تعاود فيها ..
طارق ( كيضحك ) لقات ليك بريكول
عنبر ( شافت فيه ) كندوي معاه بصح عرفتي شحال غايولي يدخل وغير فشهر ايولي يتشوفي 4 حتى ل 5 دالمليون
طارق ( هز حواجبو ) زعمة ؟
عنبر ( أشرات بصباعها ) القضية فيها الفلوس صحيحة أنا نقوليك لا تبغي تقلب الحرفة
طارق : متيقنة بالمعقول ندخل هاد الثمن ؟
عنبر : وكثر توصل حتى ل 10 المليون .. واش مكتشوفش صحابات السوشيل ميديا فظرف 6 شهور كدير ليه رونج روڤر اخر مكاين ودار ݣداش ( شافت فأدريس ) أش بان ليك أعمي ( شافت فعبد الخالق) ديرها أنت وعمي عبد الخالق توليو دخلو كثر مغادخل ليكم القهوة ..
عبد الخالق ( متبع معاها كيضحك وفرحان ) تولي المنادجر ديالنا ؟
عنبر : الله اودي شحال غادي ديرو ليا فالخلصة ؟ واخا انتوما عائلتي ولكن الخدمة خدمة
أدريس ( كيضحك ) خطااار أنتي الالة كولشي ديالك
دنيا ( كضحك ) فكرة واعرة هادي الصراحة
عنبر ( شافت فماجدة ) انت براسك خاصك ديري باج فتيك توك تولي طلقي لايڤات .. تبيعي اونلين
الروطال ( متبعها بالعين شاف فطارق غامزو ) ݣتليك الى بغيتي تشوف بلان الروايح شوف معاها .. هادشي ديال تبزنيز خطار فيه
عنبر : بغيتي تولي تبيع وتشري فروايح ؟
طارق : وراه قربنا نديرو الإفتتاح ݣاع .. كنا عوالين على النص فشهر درمضان ولكن تعكلنا .. لوكال كاين كولشي كاين بقات غير السلعة دخل ولكن قبل مغاندخلوها بغينا نعرفو شنو كاين فسوق ولي كيتمشى فهمتي البلان ..
عنبر ( هزهزات راسها ) فهمتك شوف العيالات بصفة عامة مقسومين لبزاف .. لي مراهقة ولي ناضجة ولي كبيرة وكاين لي خدامة وكاينة لي ݣالسة فدار ولي خدامات حتى هوما مقسومين كاين لي فالادارت وكيبغيو روايح عملية وكاين لي كيبغيو روايح لي خفاف انتوما خاص تستهدفو كاع هاد الفئات .. وروايح مقسومين روايح فلوغال وروايح سوكري حلوي وروايح سپايسي وروايح فخويتي وعاد روايح العود ..
طارق ( شاف فروطال بتعجب ورجع شاف فعنبر ) تبارك الله عليك ماعندي منݣول .. ايوا وكيغاندير نعرف هاد البلانات ؟
الروطال : أخويا مكتعرفش لروايح أش داك ليهم
عنبر : اتقلب فلينوط .. مثلا نعطيك مثال كاينة واحد الريحة أسمها شفق هي من شركة أرض الزعفران كتكتب سميتها وتعرف لي نوط ديالها .. هي فيها الكوك وفيها الڤاني وفيها الكراميل وهاد لينوط حلوين .. وكاين حتى ديپ ديال الأوريجينال العطور الفرنسية كاين ديپ ديالهم راه حتى واحد متزاد معلم خاص غير تقلب وغادي تلقى كاين فيديوات فيوتيوب ديال اختصاصيين فالعطور ..
الروطال : ݣلتي ليا غاتخصكم شي بنت ؟
طارق ( بالإيجاب ) غيكونو جوج فالمحال .. فالجهة ديال الروايح دالعيالات غايكون واحد دري شافو راشد بقات جهة لي غايكونو فيها الروايح ديال الرجال
الروطال ( شاف فعنبر ) ديك البنت لي ݣلتي ليا ليالي تبغي تخدم ؟
عنبر : تبغي تبغي .. مزيانة
الروطال : صافي حتى لنهار الإفتتاح نكونو تم وتجي ، دويو معاها وتفاهمو معاها على الصالير وعلى الوقت ..
طارق : مرحبا ( سكت ) وانا براسي خصاني شي وحدة للبيرو لي فبورݣون
الروطال ( بإستفهام ) علاش لي كانت فيه فين مشات ؟
طارق ( ببرود ) عطيتها حسابها وقلعات .. السيدة مكتلݣى حد وانا قليل فين كندوز ولات دايرة مابغات ..
الروطال ( حك لحيتو ) كاينة حياة كتقلب على خدمة .. اللهم فالقريب كنعرفوه ولا البعيد
عبد الخالق : عندو الصح لي كتعرفو حسن من لي مكتعرفوش
الروطال : عطيها غير الوقت لي كتمشي تقرا فيه ( شاف فعنبر ) معاش كتقرا ؟
عنبر : كتمشي من 1:30 ل 3:30
طارق ( هزهز براسو ) صافي دوز عندي ونشوف معاها يكون خير .. كملو الجماعة ديالهم وجا الوقت باش بمشيو خارجين سعاد هزات ساكها حتى حبيها أدريس
- أش ݣلتي أسعاد ؟
سعاد : أدريس سير نعل شيطان واش هبلتي دابا يسمعك شي حد .. داكشي لي كان بيناتنا راه سالى يهديك الله
أدريس : داكشي عمرو يسالي أسعاد انا نهار لول كت باغيك انت وانت باغياني وكونماشي المكتاب لي كتاب على المرحومة الله يرحمها كورانا مزوجين دروك ..
سعاد : هانت ݣلتيها كونماشي المكتاب لي كتاب .. وحتى داك المكتاب هو لي كتاب علينا انا وياك وفرقنا مغانجيوش دابا نديرو ضحك فريوسنا (وقفات عليهم عنبر ) نسيت عير تيليفوني ( حدرات راسها حشمانة هزات تيليفونها وخرجات سعاد مزادتش معاه الهضرة حتى هي خرجات تابعاها ) ..
شدو الطريق لدار .. وصلو لباب الكبير كانو زوج ديال الرجال مكبارش فالعمر طول بعرض عاد العساس فتح الباب من الداخل .. من نهار وقع لي وقع جاب جوج درجال وعاد عساس خلاه حدا الباب وجوج رجال من الجهة لوخرى .. وصلو هزات سهام أمير كان ناعس طلعات نيشان للبيتها فين كاينة معاه ، سعاد طلعات لبيتها عنبر هزات التيليفون سونات لحياة علماتها على قبلها وعلى قبل ليالي
عنبر : فاش غانعرف الوقت ديال الافتتاح غادي نقولها ليها .. وتكوني انتي نيت تدوي مع طارق على الخدمة وتوقيت بلاما تمشي حتى للبيرو .. وياااه عرفت دابا رمضان مكتساليش بين القرايا ودار صافي واخا .. وشوفي قولي لماما دير ليك دوك العشوب لي كانت كدير لشعري .. وراه داك لالاك وداك تخربيق لي كانو كيديرو ليك فداك الشوتينغ هو لي خرج عليه .. وصافي الى دار ليك صالير مزيان ماعندك مديري بديك الروينة ودابا ماما ذافت المحال إن شاء الله تعمرو الى خدمات معاها خالتي رشيدة راه كافيكم منين مكاين لا كرا لا والو ..( غوبشات ) حياة براكة من هاد تخربيق الخاوي ديالك ..
حياة ( فالجهة لوخرا ) وشحال قدنا أصاحبتي نبقاو هنا مع خالتي تودة .. حشومة خاص نشوفو الكرا
عنبر : عاوديها راسك براكة من هاد البهلان وهاد الحساسية الزايدة لي فيك ، بعد المرات كتبقاي اتروني والله وتسيق ماما الخبار لهاد الهضرة وتشوفي توريك وجهك فالمرايا محسوسة امن جنابك
حياة : وأنا اقلت طليتيني
عنبر : تستاهلي سيري صلي ليك وطلبي ربي يسهل عليك ويغفر ليك على هاد الهضرة ( قطعات عليها وطلعات كتبغم فدروج ) .. دخلات لبيتها زولات جلابتها وشالها لبسات بيجامتها مشات للمريا كتمسح وجها جرات المجر كانو مستفين عكوراتها شي وحدين عمرها مساتهم .. هزات واحد فاللون الأحمر مدات شفايفها عكرات تعكيرة من طرف لطرف نشف وزادت واحد ..
عنبر ( تبسمات ) والله العظيم الى جيت فنة كيجي معايا الحمر ( هزات ريحتها رشات منها قدات شعرها هزات بوندو فاللون الأحمر دارتو ) بومبا صافي .. تدق الباب وتحل بزربة كان واقف وسط بيتها ..
عنبر : أسبحان الله ..
يتبع...
التعليقات
لا توجد تعليقات بعد، كن أول من يعلق.