عنبر الجزء العاشر

- وصلات طوموبيل الروطال بلاصاها ونزل .. كيقلب بعينيه على طارق وعصام وعماد .. بان ليه عصام واقف أشر ليه بيدو .. غير شافو خلا دراري من العائلة وجا لعندو :

تعطلتي أصاحبي مادويتيش مع عماد ؟

- الروطال : سونيت ليه فاش كنت جاي ݣاليا فطريق شكون جا ؟

- عصام ( دوز يدو على لحيتو ) كاين الواليد والواليدة ولكن كيبان ليا مطايفين عاوتاني ..

- الروطال ( دخل يديه فجياب السروال كيسمع لعصام بإهتمام ) :

الواليد مكايجيش وينوضها غير هكاك .. غير منين عماد خوا راه باين العربون

- عصام ( كيظور فعينيه لا يكون شي حد جاي ومرة مرة يلوح إبتسامة لناس لي كيجيو ) : حتى ماجدة نوضاتها معاها الواليدة ..

- الروطال ( غوبش ) : علاش ؟ .. قاطعاتهم ماجدة لي خرجات عندهم .. غير شافها الروطال جرها عنقها .. خاشيها فصدرو بايس راسها بعدها عليها كيشوفيها وببحة رجولية :

الزرق ومعامن جا أش هاد الزين ؟

- ماجدة ( لابسة تكشيطة بلو غوا مع سباط عالي فالأزرق كيبري شعرها جامعاه اللور بوكلي مع مكياج سامبل وراقي ) : وأنا زين وكنشبه لزين لي عندي ( عنقات خوتها بزوج ) ..

- الروطال ( دوز يدو على حنكها ) : مال الحب مقلق شنو كاين ؟

- ماجدة ( تنهدات تنهيدة طويلة) : ماما ماكدويش معايا صايمة ليا الهضرة .. جينا مفارقين جيت انا مع بابا وهي جات فطوموبيلتها بوحدها .. مابغاتش دوي حتى واحد فينا ..

- الروطال ( شاف فخوه ورجع شافيها ) : ومايمكن علاش ؟

- ماجدة ( هزهزات كتافها ) : حيت قاتلي مانتصاحبش مع شيخة .. قاتليك ماشي من مستوى ديالنا ..

- الروطال : شكون هادي لي انت مصاحبة معاها ؟

- ماجدة ( كتشوف فخوتها بزوج وكتشرح بيديها) : عنبر وحياة .. عنبر هي لي اتجي تغني اليوم فالعرس ..

- عصام ( بتساؤل ) : بلاتي واش عنبر لي كانت غنات فالمهرجان دجديدة ؟

- ماجدة ( بحماس ) : سي سي هي .. صاحبتي وكنت مشيت معاهم لواحد العرس وبت عندهم فدارهم ظريفة ديك البنت اون پليس دوسا البنت قارية القانون تبارك الله .. وماما مابغاتش تفهم بلي انا حرة نختار نتصاحب معامن ما بغيت .. خسرات فيا نكون فرحانة وانا جامي كانو عندي صحابات .. قالت بغات تدوي معاك أفاروق باش تبرا مني ..

- الروطال ( جرها حاط راسها على صدرو ) : مديريش فبالك اندوي مع الواليدة .. من حقك ديري صحابات مدام انت مرتاحة هذا المهم ..

- أش كاين تم دايرين تجمع عائلي .. ضارو لعند عماد لي عاد خلط عليهم سلم على خوتو سلام رجولي .. وعنق ختو جابدها عندو ..

- الروطال : عند بالي انلقاك هنا

- عماد : انت راه احدا القاعة انا راه جاي من كازا وزحام بلاما نعاود لك ..

- عصام ( بشوميز بيض وسروال توب بلو مارين مع سباط كلاص فكامل أنتقتو ) : طارق تعطل ..

- فاروق ( مصغر عينيه فطوموبيل داسيا لي وقفات) : شكون هادو ؟

- بلاصة عزيز الطوموبيل نزل لابس سروال دجين كحل مع تريكو طالع بالكول كحل .. وتجاكيط ديال الكوير .. هز عينيه جات نيشان فماجدة دوز عينيه على لي معاها وحدر راسو ..

- ماجدة : هادو البنات لي مع عنبر وعزيز أنمشي نسلم عليهم .. خلاتهم تحت نظرات الاستغراب

- عماد ( بإستفهام ) : شكون هاد عنبر ؟ هادي منين كتعرف هاد الناس ؟

- عصام : انا فخباري كتعرف شي بنات شي 3 شهور هادي ولكن ماكنتش عارف بلي كتعرف السيدة لي غنات نهار المهرجان ..

- عماد : شكون هادي .. ( عاود ليه عصام البلان من الاول ) .. بقات ماجدة واقفة مع ليالي لي كانت لابسة تكشيطة فالموڤ داكن .. شعرها لي كانو فيه خصلات خفاف ديال ليميش والباقي كان مركب .. خرجات عندهم دنيا بتكشيطة فالخزي اما يسرى كانت لابسة تكشيطة فالاورونج وفولار فالموڤ ..

- يسرى ( بإبتسامة ) : مرحبا بيكم دخلو .. تبعوها البنات مع رحيمة .. أما عزيز دخل لطوموبيل كيتسنى فالبقية .. بقات دنيا واقفة مع ماجدة مجمعات .. كيستقبلو الضيوف .. وصلات طوموبيل رونج فالكحل سايݣها طارق لي كان لابس كومبلي فالݣري مع تيشورت كحلة .. رما فاروق عينيه للجهة أخرى .. تبسم خابط يديه منين شاف شكون هابط وتوجه عندهم ..

- خرج شخص من الطوموبيل يكون قد الروطال فسن .. طويل وعامر من المظهر ديالو كتعرفو شخصية عربية خليجية ماشي مغربية .. بلباس خليجي راقي .. ساعة فيدو وتسبيح ريحتو عاطية وحواليه هالة رجولية .. عنق الروطال عناق رجولي ..

- طارق ( كيضحك ) : وهاني جبتو ليك حتى لعندك ..

- الروطال : با راشد صرعتيها منين جيتي

- راشد : ماحضرت للحفلة ݣلت أكيد حبيبي الروطال مضايݣ مني

- الروطال : عارفني اصاحبي ماعنديش مع داك الهيث

- راشد ( ضحك ضحكة رجولية ) : عارف عارف .. ولا يهمك هادشي مابيناتناش أصلا ..

- طارق ( طانز ) : السيد ولا مغربي صافي

- راشد ( شافيه بنص عين ) : يا حبيبي تراني بالمغرب عمر عمر .. 12 سنة مو بساهل

- الروطال : ديك الامارات مخاصكش تحط فيها رجليك مزال ( شاف فطارق ) خاصنا نزوجوه ..

- راشد : يا أخي ديرو خير فهاد اليتيم مسكين تراني وحداني والله ..

- توجهو بزوج عند عصام وعماد لي كانو كيعرفو راشد أعز المعرفة بحكم شريك طارق وفاروق .. وصاحبهم سينين طويلة ..

- خرج أدريس عندهم هو وعبد الخالق .. سلمو على راشد .. بقاو واقفين مع بعضياتهم من بعد دخل راشد وعصام مع إدريس وعبد الخالق .. بقا غير فاروق وطارق وعماد ..

- رجعات دنيا ويسرى وماجدة وقفو معاهم .. عينين عماد لي ماتحركاتش على يسرى كيشوفيها متحسر .. بدورها لي كانت هازة التيليفون وكل مرة كتبسم سونا ليها التيليفون خلاتهم وبعدات باش دوي فتيليفون ..

- ماجدة : كيبان ليا شي عراسية جايا فطريق .. واش يسرى اترجع لمحسن سمعتها لبارح كتدوي معاه ...

- دنيا ( كضحك ) : أه غايرجعو

- طارق ( غوبش ) : كيفاش غايرجعو ... ياك حلفات ماترجع ليه اش كترونو انتوما ؟

- دنيا : طارق السيد الله يعمر ليه دار .. غير ختو لي سامة دخلات بيناتهم طلب منها السماحة الف مرة .. كيبغيو بعضياتهم عادي ..

- طارق ( شاف فعماد لي ملامحو كانت جامدة ) : دابا ولينا دراري صغار ..

- دنيا : كيفاش دراري صغار .. طارق واش من نيتك انت كتقول هكا .. يسرى كتبغي محسن وحتى هو شيطانة دختو دخلات بيناتهم هي بغات ترجع ليه كتبغيه اتقوليها لا ولاواه رجوع لله ..

- ماجدة : عندها الصح ..

- عماد ( شافيه غامزو ) : عندها الصح .. كيبغيو بعضياتهم مافيها حتى عيب يرجعو ..

- طارق ( شافيه بإستغراب ضار عند فاروق هزهز ليه براسو بمعنى ماعندك مدير ) .. رجعات يسرى وقفات معاهم تحت أنظار طارق لي سولها :

شكون سونا عليك ؟

- يسرى ( شافت فيه بإندهاش عمرو سولها ) : سونا اخويا محسن ( ماعمرها كدبات ولا خبات على خوها شيحاجة ) ..

- طارق : هي داكشي لي ݣالت ختك بصح ؟

- يسرى ( بلعات ريقها بتوتر ) : أه أخويا بصح .. غير تمشي ياسمين لدارها ايجي يدوي معاك مع بابا ..

- طارق ( ببرود ) : يفوت العرس وندويو ..

••••••••

- الداخل بلاصة العروسة لي كانت مزينة بأرقى تزيين .. طبالي ديال عائلتها كلهم قراب ليها وديال عائلة العريس .. لي كانو جاو الرجال دالعائلة بأبهى حلة .. مع عيالاتهم لي كل وحدة مزينة يديها بذهبها .. مراقبين العرس بإبتسامة فرحة حيت كان كولشي على حقو وطريقو وفأبهى حلة ..

- فطبلة لي جنب الكلسة دالعروسة كالسة خديجة بكل شياكة .. تكشيطة فالأحمر شعرها جامعاه بمشيطة خفيفة دهبها فيديها وعنقها ودنيها مع كابط راقي مغطية بيه كتافها .. قبالتها كالس أدريس وسط مو رقية وباه علال .. وحداهم عبد الخالق

- القاعة كلها عائلة العروسة عائلة العريس كانو كالسين ف3 الطوابل .. فجهة الاخرى الاوركسترا كيقادو فالماطريال وريݣلاج ديال الصوت .. شاف ايوب فساعة لقا بلي قربو يدخلو .. كل واحد خدا بلاصتو كيتأنسطلاو ..

- دخلو السرباية هازين ميني تاغت والعواصر كيفرقوهم .. كل وحدة شادة تيليفونها كتصور مرة راسها مرة الحلويات لي تحطو لي كتلوحها فأنستغرام ولي كتلوحها فتيك توك ..

- عبد الخالق ( لابس كومبلي فالݣري داكن وشوميز فالبيض نظارات دشوف وساعة رجولية نقرية ) :

مزال متصالحتوش ؟

- أدريس ( لابس جلابة سوسدي فالݣرونة ) : حسن هكا .. عييت اخويا من نݣير وفريع الراس .. انا تهديت وهاد المرة متهداتش .. مرة مرة كانت كتشوفيه ومشاركة الحديث مع عائلة راجلها نرة ضحك وتبين راسها مامسوقاش مرة تقرص فاش تشوفو داخل فخوه وكيدويو ..

- عبد الخالق ( كيضحك ) : كترت الهم كضحك .. جاني أخويا ولاد علال ماعندهمش زهر فالعيالات ..

- أدريس ( كيضحك ) : الواليدة خاصها تعاود تفوسخنا ..

- علال : ولدتو وليداتكم لي عليهم العمدة الله يجعل شي بركة ..

- أدريس ( غمز خوه ) : حيت انت الواليد عشتي الحب او ولدتي الولاد بجوج ..

- رقية ( هزات كاس بغات تشير عليه ) : الله يمسخك كون تحشم ..

- علال ( شافيها بحب ) : مالو كذب ..

- رقية ( تزنݣات ودورات وجها كضحك ) : باز ..

- أدريس : مزال مغادخلش ياسمين ؟

- عبد الخالق : مزال كاينة لداخل مع النݣافة كتوجدها .. مرة مرة كيمشيو البنات ويرجعو باش يستقبلو السيدة لي اتغني ..

••••••••••

- على برا .. رجعات ماجدة لعندهم من بعدما كانت كتدوي فتيليفون مع عنبر :

هاهوما فدورة ديال القاعة ..

- وقفات دنيا ويسرى على إستعداد لإستقبالهم .. شوية بانو اضواء طوموبيل الكات كات فالكحل لي داخلة سايݣها رشيد لي لابس كومبلي فالكحل .. حداه تودة .. بلاصة الطوموبيل نزلات تودة هي لولة شادة فتكشيطة ديالها توجهات عندها ماجدة معنقاها .. :

خالتي مرحبا بيك جيتي فنة

- تودة ( عنقاتها ) : حتى انت تبارك الله وصلاة على نبي عليك .. ( ضارت عند دنيا ) هادي بنت عمي دنيا وبنت عمي يسرى .. سلمات عليهم .. :

مبروك الله يكمل بالخير ..

- يسرى : اللهم أمين مرحبا بيكم ..

- سلم عليها طارق هو اول واحد .. مرحبا بيها بصوت رجولي .. وراه عماد وكذلك بإبتسامة رجولية .. :

مرحبا بيكم ..

- تودة : ربي يخليك .. واخر واحد كان هو فاروق سلم عليها بكل هبة ورجولة :

مرحبا بيكم .. نزل رشيد لي كذلك سلم على البنات وتوجه للعند الرجال سلم عليهم .. وقفات تودة ضايرة :

عنبر !!

- ماجدة ( كضحك ) : كتلبس فسباطها واش جيتي حفيانة ؟ .. كان كيتسمع غير صوتها ؟

- زير عليا سباطي فطوموبيل ولبست صندالة دلميكة راكي عارفاني .. تحل الباب لاخر ونزلات منو حياة هازة ساكها ...

- ماجدة ( شدات ليها فيدها بإعجاب ) : اش هاد الفنون هذا ؟

- حياة ( جبدات ليها حناكها ) : راه انتي لي اش هاد الفن هذا .. عرفاتها على دنيا وعلى يسرى .. تقدم منها عماد سلم عليها مرحب بيها .. مد ليها طارق يدو مسلم عليها .. جمع غوباشتو كيحقق فيها وهي بدورها تمسحات الإبتسامة من وجها :

انت لي دخلتي فيا داك نهار فالموسم ياك ؟

- طارق ( بصوت رجولي ) : وانتي لي وقيلة مكتشوفيش ودخلتي فيا

- حياة : دابا انا لي قد الصبع اندخل فيك انت لي قد النخلة ؟ ..

- تودة : حياة

- حياة ( نصلات يدها من يدو بزعاف كملات سلامها على روطال او وقفات حدا تودة ..

- ماجدة ( بهمس ) : واش كتعرف حياة ؟

- طارق ( ضار شاف فحياة لي كتخنزر فيه ورجع شاف فماجدة ) : لا

- تقادات عنبر فالوقفة ديالها هزات ساكها وشعرها رضاتو اللور .. وتوجهات وهي على وجها إبتسامة لعند ماجدة لي عنقاتها كتشوفيها بإعجاب ..

- عنبر ( من ورا ماعنقاتها ) : ياكما تعطلنا عليكم ؟

- ماجدة ( كتشوفيها بمحبة ) : بالعكس جيتو فالوقت اصلا ياسمين مزال كتصايب ليها النݣافة اللبسة وعاودو ليها الميكاب من الاول ..

- عنبر : ماعليش ..

- ماجدة : هادي دنيا ويسرى خواتات العروسة وبنات عمي ..

- عنبر ( سلمات عليهم بالوجه ) : مبروك الله يكمل بالخير ..

- دنيا ( كتشوفيها وكتحقق فملامحها ) : اللهم أمين ومرحبا بيك وتبارك الله عليك ..

- يسرى : مرحبا بيك ..

- عنبر : ربي يخليك .. يد هازة بيها تكشيطة وساكها ويد كتسلم بيها .. وقفات قبالت عماد لي كان كيشوفيها ويشوف فبنات عمو ملاحظ الشبه الغريب بيناتهم :

مرحبا بيك ..

- ماجدة : هذا هو خويا عماد

- عنبر : ربي يخليك الله يكمل بالخير .. تقدمات من طارق :

ماجدة : هدا طارق خو العروسة او ولد عمي

- عنبر : مشرفين الله يكمل بالخير

- طارق ( بإبتسامة ) : مرحبا بيك ..

- ماجدة ( بحماس ) : وهذا هو خويا فاروق لي عاودت ليك عليه .. كان مركز معاها من اول خطوة خطواتها برات طوموبيل .. عينيه تفقداتها إبتداءا من شعرها ملامح وجها وضحكتها لي مافرقاتهاش ..

- عنبر ( مدات ليه يدها ) : مشرفين ..

- فاروق ( شد يديها لي كان رقيقة وباردة ورطبة الملمس بين يدو الكبيرة .. ببحة رجولية قوية ) :

مرحبا بيك ..

- عنبر ( طلقات من يدو وبنفس الإبتسامة الخلابة والعيون البنية المتميزة ) : ربي يخليك .. حدرات راسها للصباطها لي ضرها تحدرات قداتو ورجعات وقفات ضاربة بشعرها وعاطياه بظهر مخلية ليه ريحتها فقط لي ضربات فالأنف ديالو ..

- عنبر ( مخاطبة رشيد ) : الدراري تأنسطلاو ؟

- رشيد : وي تأنسطلاو .. سير حطي بعدا ساكك صافي .. عنبر هزهزات راسها وتبعات تودة وحياة تابعين دنيا ويسرى وماجدة للبيت لي فيه البقية دالبنات ... أما رشيد فدخل للقاعة عند الدراري ..

- عماد ( بإستهزاء ) : على اخر يامك أبا طارق وليتي نخلة ..

- طارق ( خنزر فيها ) : ݣاتلك ݣد صبع .. هي كانت كتجري داخلة فيا طول وعرض ..

- فاروق ( طانز عليه ) : وسيدة عندها الصح .. انت لي مغاتشوفهاش اما هي راه غاتشوفك ..

- طارق : ݣالها لي تحلو عينيه فاش شاف عنبر ( شاف فعماد ) السيد شافها مرة وحدة فاش كانت كتغني بقا عاقل على سميتها ..

- عماد ( قهقه بصوت رجولي ) : وايلي وخويا ماعرفتكش

- الروطال ( دور لسانو وسط فمو ) : انا غاندخل .. خلاهم واقفين ودخل توجه للطبلة لي فيها عصام وراشد .. جر الكرسي ݣلس دخل طارق وعماد حتى هوما بدورهم توجهو لنفس الطبلة وݣلسو ..

- دخلات رحيمة وحياة ݣلسو فبلايصهم محطوط زوج بنادر فبلاصتهم .. ݣلسو تحت أنظار طارق لي كانت عينيه على حياة شافيه عصام ونطق :

اجي ماشي هاديك هي البنت لي كتي دخلتي فيها ؟

- طارق ( ببرود ) : اه هي

- عصام ( كيضحك ) : صدقات السيدة كضرب البندير .. كاعما باينة فيها .. مجاوبوش طارق حدو حاضيها كيفاش كتهضر مع رحيمة وكضحك معاها ...

- أدريس ( هز راسو فعبد الخالق لي وقف ) : فين غادي ؟

- عبد الخالق: نشوف غير ياسمين ونرجع ..

- تخطاهم وخرج من الباب الأخر .. فنفس اللحظة دخلات تودة توجهات بشوية ونخوة تحت انظار خديجة لي كطلع وتنزل فيها ولا فبقية البنات .. العينين كاملين كامو عليهم .. والاغلبية كانو عارفين بلي عنبر البنت لي دار الفيديو ديالها بوم هي لي غادي تغني .. كولشي كان مترقب ..

- فنفس اللحظة دخلات عنبر بكل نخوة وانوثة تابعينها ليالي والبنات .. كانت محطوطة واحد الصندوقة صغيرة حداها كمانجة محفور فيها إسم "عــنــبــر " .. وقفات عاطية لناس بظهرها كتشاور مع المراري والبنات وقفو زوج على ليمن وزوج على ليسر ..

- راشد ( مصغر عينيه كيحقق ) : يارب شو هالجمال .. أنا متأكد مراح روح من هاي العرس إلا ومعي عروستي ..

- عصام ( غمز دراري ) : هالي ݣلنا ..

- طارق ( كيضحك مطبطب على ظهرو ) : انت غير نيش وحنا نخطبو ليك أبا راشد ..

- عنبر ( خدات الميكرو ببحة صوتية انثوية وإبتسامة شافت فالناس ) : مرحبا بأهل العروسة واهل العريس سمعونا واحد صلاة .. والسلام ( تبعوها الحاضرين بصلاة على النبي ) على رسول الله إلى جاه إلى جاه سيدنا محمد الله مع الجاه العالي .. ( مدات الميكرو لرحيمة لي زغرتات وزغرت الحضور ) .. التبارك الله عليكم ..

- هزات رجلها حطاتها على الصندوقة الكخلة لابسة كولوم فالبيج تحت التكشيطة .. وزوج كاميرا مان كيسورو مقابلين معاها .. خدات الكمانجة حطاتها على رجلها .. يديها بدات بعزف أولى انغام الاغنية لي اتبدا بيها يديها كانت محترفة كتخلي اي واحد ينتابه معاها .. دخلات دنيا ويسرى بجرى وماجدة باش يحضرو لاولى أغنية ..

- عنبر : أيا مساء الخير عليكم .. تحية لناس لي راهم حاضرين معانا مرحبا بناس ديال القنيطرة الناس ديال سيدي قاسم .. وسوق الأربعاء وسيدي سليمان والقصر الكبير .. ( بإبتسامة كتشوفيهم ) ونرجعو لبليدة والعز تحية لناس ديال سطات او ولاد سي بن داود ودكالة جميعا .. ناس سيدي بنور زمامرة وزاوية وناس اسفي .. بداو الدراري العز غاديين معاها فالعز ديالها ..

- عنبر : كان عليا نزيرو لدار القاضي ندعي باباه .. المحامي لي تخيرو نعطيه الضوبل مايوقفش معاه .. نوريه علاش قادة واش انا بنت حادة .. والى بغا المعاندة والله يابوه لا تفرقت معاه ..

- البنات القدام كانو كيتحركو على الانغام دالموسيقى بجنابهم .. يظيهم كيشاليو بيهم فريتم واحد .. الحاضرين كيصورو مستمتعين مع الاغنية وماجدة ودنيا كيشطحو مستمتعين بصوت عنبر وبالغنا ديالها ..

- رجع عبد الخالق وقف تحنا على مو : ياسمين واحد 20 دقيقة وغاتوجدها النݣافة باش دخل هي ونور الدين مع الدهاز ..

- رقية ( وقفات ) : انا نمشي لعدها وانت سير عند الجوق علمهم باش يديرو بحسابهم ..

- عبد الخالق توجه بخطوات بطيئة للجهة لي كيغنيو فيها .. بإبتسامة قاصد البنت لي كتغني حول عينيه على غفلة للجهة وحدة قبالتو فالجهة الوسطانية بضبط حس براسو ترفع لسابع سما وتخبط مع الأرض .. رجليه تقالو عليه وتحشو البرودة طلعاتو من صبعو الصغير .. دقات قلبو كانو بحال الطبول .. رجع بيه الزمان لهادي 26 سنة اللور مستحيل يخطأ ولا يكذب عينيه من سابع المستحيلات ينسى المرأة الوحيدة لي دوزت معاها فترة قصيرة ولكن بغاها من كل قلبو المرأة الوحيدة لي ستوطنات داتو وعقلو ..

- ويَبقى شيء من عَبق الماضي عالقٌ بنا رُغم الزَمن، شيء تّعجز يد النسيان أن تطاله .. ذكريات حفرناها داخل أعماقنا، وصورٌ حفظناها في عيوننا، حنين عظيم حبسناه داخلنا، والأشواق باتت واضحة بكلماتنا، والحب لا يمكن أن نخفيه فينا.

- مستحيل ينسى هاد الوجه دوك العينين لي كانو كيشوفو فيه بكل حب .. الشعر لي مجموع دابا كان شحال هادي مطلوق بحال شعر العودة .. براءة وجها وجمالها المغربي الأصيلي السيدة لي ف 10 ايام عوضاتو على الحنان لي كان ناقصو .. لقا فيها كاع لي بغاه وكان كيتمناه فمرتو ومالقاهش فيها .. دم عدريتها مزال لحد ساعة قايس قميجتو لي لحد الآن مزال محتافظ بيها وعمرو فرط فيها ..

- فديك اللحظة والموسيقى خدامة سترجع الذكريات نهار وصلو إتصال من عند مو بلي دنيا مريضة وسخانتها طالعة عيات ماتعطيها فدوايات أو والو .. هز ساكو وطار لمكناس ..

فــــلاش بـــاك

- تحل الباب ودخل رجل فثلاثينات من عمرو هاز ساكو باين الخوف على وجهو .. خرجات عندو رقية من البيت لون وجها مخطوف :

ولدي على سلامتك .. والله ماكنت انسوني ليك

- عبد الخالق ( دخل لبيت كانت ناعسة بنت يكون عندها عامين كتبكي وتنين وجها حمر .. مشا لجهتهاتكا حداها كيمس فيها لقاها طايبة ) : سخونة بزاف امي .. ( شاف فمو ) واش ماعيطيش لمها ؟

- رقية ( تنهدات تنهيدة طويلة) : سونيت أولدي .. جاوباتني مها ݣالت ليا نتلاݣاو فالمحكمة .. وبنتي ولادها نهار يكبرو بغاو يشوفوها مرحبا مابغاوش يعومو بحرهم ..

- عبد الخالق ( تعصب قلبو تعصر عينيه غشاوهم الدموع .. هز بنتو ) : مي مدي ليا تريكو ديالها .. مدات ليه تريكو لبسو ليها .. مشات رقية لاحت عليها جلابتها .. خرج طارق من البيت عينيه مسدودين بنعاس :

بابا مالكم فين غاديين ؟

- عبد الخالق : مي خليك انت مع دراري انا غانديها وباشما كان نسوني لك ..( شاف فولدو ) والو اولدي اختك مريضة نديها لطبيب ورجع صافي ..

• خرج طاير من الدار حطها فطوموبيل وداها نيشان للطبيب لي مالف كيدي ولادو ليه .. دوز ليها ومن بعد مدة خرج بتقرير بلي عندها ميكروب .. شيحاجة كلاتها ماهياش لي خلات السخانة ماتنزلش ليها .. دݣ ليها زوج براوات وعطاه الدوا يتبعو ليها ..

- هزها طلعها لطوموبيل ناعسة وجها عامر بدموع .. غطاها ركب طوموبيلتو راجع لدار قبل مايوصل .. طرݣ الحانوت خدا لولادو دانون وسقاطة ورجع ..

• من ورا ما كلات وخدات دوا نعسات .. ݣالس هو ومو الراس فراس تنهد تنهيدة طويلة وهو حاط راسو على رجل مو .. كيحس براسو تهد باغي ايغوت وماقدش ..

- واش ݣاتليك نتلاݣاو فالمحكمة ؟

- رقية ( كدوز يديها على شعرو ) : ياه اولدي .. ݣاتليا بتي غاتزوج .. وخاصها ورݣت طلاݣها بقات كتݣول شي هضور وانا راس لي يسمعها ماعديش .. وݣطعت عليها .

- عبد الخالق ( عقلو مشا لبعيد ورجع لداكشي لي وقع معاه لبارح تبسم بلاما يحس .. تنهد تنهيدة طويلة ونطق ) :

مي فاش كنت فالموسم عرفت واحد السيدة .. حبسات رقية يديها ونطقات :

شكون هادي ؟

- عبد الخالق ( تقاد فالجلسة وتقابل معاها ) : واحد البنت زوينة بزاف .. حنينة وظريفة بنت الوقت وكتبان مرأة ونص ..

- رقية : إلى عجباتك اوليدي جيبها .. تزوج بيها اوليدي تكون ام ولادك وتقوم بيك .. شوف أوليدي حياتك هاديك اللفعة راه مشات تشوف حياتها سمحات فولادها بنتها وماحناتش فيها ..

- عبد الخالق : هادشي لي غادي ندير .. ( بحال الى تفكر شيحاجة ) ولكن لبارح كان لاخر فالموسم .. عنداك غير مانلقاهاش

- رقية ( ضربت فخضها ) : اويلي واش مكتعرفش دارهم ؟

- عبد الخالق ( حرك راسو بلا ) جات امع واحد خالها ومرتو او ولادو .. كانو غير مخيمين ولديها ݣالت بلي فالخميسات لي عارف عليها هو سميتها فاطنة

- رقية : واش تا مخورج في موخك ولا مال طاسيلتك أݣوليا .. تا مالك ماخرجتيش لبوك مطور وݣاوط مالك .. ودابا إلى مالݣيتيها تمشي ديرها فنشرة الأخبار ..

- عبد الخالق ( وقف ) : مي ݣابلي دراري راه دوا عندك وريتك ايمتا تعطيه لدنيا .. خاصني نمشي مرابانا نسيكلها .. ( هز سوارتو وتيليفون وخرج مخلي مو متبعاه بالعين وبدعاويها ) ..

•••••

- عمرو حس بالفشلة قدما حس بيها فهاد الساعة .. أخيب حاجة ممكن توقع ليك هو تلقاها حاجة زوينة وغالية .. ولكن بلا خاطرك كضيع من يديك وهادشي لي وقع ليه .. فين كان عقلو منين ماسولهاش فين ساكنة بضبط شحال من حاجة كان ناوي يدوي معاها فيها كونما جاه الإتصال ديال مو .. المشية ديالو ضيعات كولشي ولكن بلا غرضو بنتو كانت محتاجة ليه بنتو أولى ليه من راسو ومن أي حاجة .. كان باغي يرجع يصلح غلطو يخطبها من دارهم .. ياخود طلاقو ويتزوج بيها يتهلا فيها ويديرها فعينيه كانت هي لي خركات رجولتو من بعد سينين .. خلاتو يحس براسو راجل وعندو قيمة وعندو شعور .. حس بلي الزمان ودنيا كلها ضدو طاحت دمعة من عينو مسحها كاتم الغصة لي فقلبو .. حاجة وحدة لي بقا محتافظ بيها هي دم عدريتها لي بقا فقميجتو ..

الـــحـــــاضــر .. حس بيد بنتو كتحرك فيه بتساؤل شافتو واقف مصدوم .. قربات لودنيه :

بابا مالك ؟

- عبد الخالق ( تدارك الموقف وشاف فيها راسم إبتسامة صفرة على وجهو ) : غير ختك بقا ليها 20 دقيقة وغايدخلوها وبغيت نعلمهم

- دنيا ( باستو وتبسمات حسات بيه متأتر حيت ياسمين تزوجات ) : صافي ابابا رتاح انا انعلمهم .. خلاتو واقف وتوجهات للعند عنبر لي كانت محمية الطرح هي ودراري .. همسات ليها فودنها بلي ياسمين قربات تدخل .. هزهزات ليها براسها ..

- رجع عبد الخالق للكرسي ݣلس فيه وهو مرفوع ماعارف شنو غايدير .. كيشوفيها قبالتو هازة البندير بتبسيمة لي زادتها جمال ماتبدلاتش بزاف من غير أنها زادت زيانت ..

- أدريس ( حركو ) : مالك ؟

- عبد الخالق ( ساهي ) : من بعد ونݣوليك ..

•• فدخلة حطو دراري العمارية باش تدخل ياسمين .. بنات عمها او ولاد عمها كلهم وقفو توجهو للجهة الدخلة .. عائلة العريس حتى هوما بابات العروسة عمها وحتى خديجة باش متبينش كولشي كان واقف .. خرجوها النݣافات بصلات على نبي لابسة تكشيطة فالبيض منبتة بالحجر مع تاج وشعر على شكل ظفيرة الفرحة باينة من عينيها ..

- كاميرا مان شادها من الخرجة ديالها حتى وصلات لجهة العمارية .. راجلها حداها بأناقتو وزينو الرجولي الحرش شاد فيدها .. حبساتهم النݣافة شادة بيدها مدخلاها للعمارية ومݣلساها بشوية فوق الكرسي كتقاد ليها ..

- دخلات ماجدة علمات عنبر ورجعات .. حطات عنبر الكمانجة وهزات غير الميكرو أشرات للدراري براسها .. مع هزو العمارية والعريس القدام بدات الأنغام الموسيقية .. توجهات عنبر لدخلة مقابلة مع العروسة والعائلة قبالتها كولشي ناض :

ها حنايا جينا حلو سراجمكوم لالة العروسة جات وناري يا ناري .. ( كيرضو عليها الدراري ) .. هزات يدها كترش عليها ومبسمة فوجها الدراري لي هازين العروسة كيلعبو فيها وهي كتشير للعائلة ..

- عنبر ( ببحتها الصوتية المتميزة لي كتخلي الكل منتابه ليها وغادي معاها فريتم عاجباه ) :

يا دار البشاوات حلو سراجمكوم لالة زينة البنات وناري يا ناري .. ( ايوا أيوا حركو يديكم معانا ايا حباب العروسة ) .. من بعد جملتها كان كولشي كيشطح وكيتحركو .. دارو بيها دورة شرفية من بعد حطوها خرجاتها .. مدات ليها النݣافة يدها وليد لوخر عطاتها ليها عنبر شدات فيها غادية معاها وكتغني .. حتى وصلاتها لعند نور الدين ݣلسوها حداه ..

- عنبر ( بيديها كتأشر ليهم باش كولشي يتجمع عندها ) : يا عمر الحب ماغلبني وهاد المرة حصلت فيه .. يا عمر الحب أرشيد ماغلبني وهاد المرة حصلت فيه شدني شدة مارحمني بكاني مارضيت بيه شدني شدة مارحمني بكاني مارضيت بيه .. دارت الميكرو تحت باطها كتشطح بيدها لافتة الإنتباه بجمالها وفورمتها وصوتها كولشي عجباتو كولشي غادي معاها وكيشطح ..

- جر عصام ماجدة ودخلو الوسط كيشطحو حدا عنبر .. وهي كضحك :

عنبر ( رجعات الميكرو لحدا فمها متفاعلة مع الناس لي دوروها ورضوها الوسط ) : أسمع اسمع .. ياك جاني ايليفون ناعسة مابيا ماعليا فقت وماݣلت شكون جاوبت ولقيتو هو ديما فنصاصات ليل يسوني ويعيط عليا شحال ݣالو ليا أماما ..

- الكل مجاوبين عليها : شحال كالو ليا فتيليفون وراك حصلتي .. مشيتي وماݣلتيها ليا ݣوليا واشنو شفتي .. ( همسات ليها ماجدة فودنيها بسمية خوها .. )

- عنبر : فاروق شرابي يداوي العذاب البار يداوي المرار أنت جبتي الخطية واش وكراوك عليا رفاݣتك كانت خسارة اليوم ولات خسارة انت مرضتيني فوتني ماتبقاش تجيني شحال ݣالو ليا ماميا ..

- تقدم بخطوات بطيئة جابد 400 درهم .. وقف قبالتها عينيه فعينيها .. حط ليها ميتين فجنب عنقها و200 فجنب لاخر .. بعد بخطوة وبإبتسامة هزهز ليها راسو ..

- بقات مستمرة فغناها مامسوقاش لمجيتو ولا تعليقة لي علق ليها .. مستمتعة مع العائلة كل مرة كتغني على واحد فيهم وكل واحد يعلق حتى سلات الأغنية ..

- عنبر : اتبارك الله عليكم ونسمعو واحد الصلاة وسلام لاحلى عروسين .. بداو النݣافات كيصليو على النبي .. اما هي رجعات للبلاصتها هزات كلينيكس كتمسح وجها محيدة دوك الفلوس لايحاهم فوق واحد الصدوق حدا رشيد لي ݣالس قريب منهم ..

- خداو وقت ديال الراحة بينما تصورو حباب العريس والعروسة مع العرسان .. خدات عنبر كرسي ݣلسات حدا حياة وتودة .. ورحيمة اما باقي البنات ݣلسو من جهة لوخرا ..

- وقفات ليالي كتقاد فتكشيطها لبسات سباطها .. وهزات جلايلها خارجة من القاعة بخطوات بطيعة مامالفاش بالعالي واخا شحال وهي كتلبسو مزال رجلها موالفتوش .. وقفات على برا كان البرد سولات السرباي على الطواليط وجها ليه مشات نيشان قصداتو .. دخلات قضات غراضها توجهات للمريا كتقاد الروتوشات وتمات خارجة .. هزات راسها وغوبشات فاش شافت شخص من الحاضرين واقف قبالتها بإبتسامة على وجهو ..

- حدرات راسها وحاولات ما امكن تجنبو حتى حبسها بوقفتو وطولتو قدامها .. هزات راسها وعلى وجها علامات استفهام :

راشد : أنا مو متعود اقطع طريق حد .. بس أقسم بالله العظيم رݣصك شݣد حلو ..

- ليالي ( غوبشات ) : أشناهو ؟

- راشد ( ضحك ) : الرقص .. شطحة شطحة ديالك زوينة بزاف

- ليالي ( ببرود ) شكرا واخا ندوز اخويا

- راشد : إذا مافي تݣالة ومشكلة .. ممكن رقمك يعني إذا سويت حفلة نعيط عليكم ..

- ليالي ( بنفس البرود ماعطاتوش وقت نهائيا بحال إلى مكاينش ) : الى بغيتي الرقم راه شوف المنادجير ديالنا رشيد .. وهو غادي يتفاهم معاك اما حنا مكنعطيو نمرتنا لحتى واحد واش دابا نقدر ندوز ..

- راشد ( ماعجبوش الحال .. لاول مرة يتحط فبحال هاد الموقف ) : أوكي انا اسف .. خوا ليها الطريق ضربات فيه ودازت بقا متبعها بالعين حتى دخلات ..

- وتاشوف اصاحبي على بلان .. مالفين البنات يطيحو عليك كي روز وهادي عطاتك النخال ..

- راشد ( شاف فطارق ) : عومري تحطيت فهاي الموݣف .. انا ماشي هكا وانت عارفني مزيان .. ماعرفتش كيفاش حتى درت هادشي ونضت وراها مكانتي عمرها سمحت لي أسوي هاشاي ..

- طارق ( حط يدو على كتفو ) : حيت عجباتك

- راشد ( هزهز كتافو) : إنسى الموضوع .. زيد ندخلو .. رجعو للقاعة ݣلسو بجنب فاروق ، شوية نتضو خداو تصاور مع العرسان ..

- عصام ( نغز عماد ) : شتي خوك ؟

- عماد ( بإستفهام .. مافهموش شنو بغا يݣول ) : مالو ؟

- عصام : علق لسيدة 400 درهم .. ويهزهز ليها براسو مخاصو خير

- عماد ( ببحتو الرجولية محيد لافيزت سخنات عليه ) : عادي ماديرش من الحبة قبو

- عصام : شوف انا عندي نظر بعيد انا نݣولك .. خوك كنعرفو امن عينيه وعينيه ماشي خواتات ..

- عماد : وديك لي معاه أش غايدير معاها .. الروطال ماشي من داك نوع لي يلعب على جوج ..

- عصام : حتى دابا انا ماݣلت والو .. ناضت العروسة باش تبدل اللبسة .. خرجوها بزغاريت ناضت عنبر باش تبدا فقرتها من جديد ..

- هزات كمانجة ديالها وقدات الوقفة ديالها .. بدات باولى أنغام الموسيقى مخلية الكل يعطيها إهتمام ..

- عنبر : وهياوين وهياوين مساك الخليلة .. حبيبك دابا يروح ليلة .. مالي المعبود الله وسيدي وهي سيدي .. ياوعدي الغزال مشات اشيفورات اسيدي .. ماشفتو الغزال يا صيادة ياوين .. ياوعدي ماشتو الخليل يا صحاب الليل ياوين .. رضينا بزين مارضى بينا ياوين .. عندك الوقت يفوت على لي مربوط اياوين .. سمعتو داوي وشريف حداوي ياوين ..

- رقية كتشالي بيديها اما خديجة هازة نشاشة وكتنش .. بداو كيفرقو فأتاي والحلوة على المعروضين .. مع انغام الموسيقى التقيلة انغام العيطة غزال ..

- عنبر ( ضارت شافت فمها وتبسمات رجعات شافت قبالتها جات عينيها فعينيه ) : اها اها سماح الله .. سيرا واهي .. عينيا والى مت سامح ليا بيضاوة مال هواكم مايداوة .. يلالة الفراق صعيب وربطة بزغبية .. عينيه تفيكساو عليها متبع معاها او ودنيه حاضنين صوتها الدباح .. )

- يالالة مرݣم عالي ولا فراق غزالي ..يلالة اينا حومة ساكنين انتوما يلالة اينا دريبة ساكنة الكبيدة ( ضحكات ودورات وجها ضحكة لي كتسلب العقل وتخلي العقال مهبولين وتايهين فيها ) .. اها اها مساك الهوى .. عينيا والى متي سامح ليا سامح ليا بضاض ورشوق بنيا اهاا وكان يسول سير وهيا .. يالة تحت المضمة عاملة شي تما ( كتشوف فالبنات لي كيشطحو كتغني وتبسم ) .. هداي هداي رصاي رصاي هداي هداي عليه يالكاف*رة وتاع ماليه ..

- (أشرات لفين ݣالسين ولاد العائلة بصبعها ) هداي عليه انا عطبتو وأنتيا داوي .. بدلات الريتم وزادت فيه نوضات الناس من جديد كولشي ناض كيشطح حتى من ولاد العائلة من غيرو هو او طارق وراشد لي كيهضرو بيناتهم وكيضحكو ..

- عنبر : انا هانا الحاصول ومافيه .. الحاصيل ومافيه عيشك لالة ربطة زغبية .. ربطة زغبية جينا صباح جينا العشية ..جا يجيبك حبيبي يالفݣعان عليا .. ياركبي فطوبيس خفيف وظريف حدو المعاريف ، شرحم الكية صبغتو خضر خفت. يتوضر سيادي المعاريف ولاد بن علي فيكم الشاريف .. العام الاول العام التاني يامعفاش العالي .. جبدي من جيبي تايبان ليك عيبي ودحيني يارفيع السما بلا عماد وشفيع العباد .. يا فيا قاعيدة نكون ناعسة ونشالي بيديا . اه مو هامو مو هامو الحباب تلمو .. الحباب تلمو عليك الراسي العديان تمو ، عذبتيني ايوا يوا محنتيني يواوا .. ودار ضمانة يامالي تكايسو عليا يالهوى وتعالا تعالى تشوف فراق حبيبي جاني صعيب ..

•• كولشي ناض كيشطح نشطات الأجواء ودازت من طراز الرفيع .. وصل الوقت ودخلات العروسة بلبسة الخضرة مع الطيافر لي فيهم دهازها .. نغماتهم عنبر بأغاني خاصة بهاد اللبسة .. دهازها كان غزال من بعد فرقات على كل واحد لي دغاجي وكموسات الحنة .. حتى عنبر والبنات خداو حقهم ..

- اللبسة الثالثة كانت فالموڤ .. تجمعو على الطبالي والطبلة لي فيها عنبر وفيها المجموعة كاملة بوحدها .. وقفات تودة وتوجهات للباب القاعة غادية للحمام سولات واحد الدري كان واقف لابس لبسة كحلة وجها للبلاصة حمام العيالات .. كان البرد على برا قاصح هازة جلايلها لابسة صابو كحل مريح محيدة داك الصباط العالي لي كانت لابسة ..

- دخلات للحمام من وراها غسلات يديها مسحات بواحد كلينيكس وتمات خارجة .. غير شافها متوجهة لبرات القاعة ناض بزربة تحت أنظار خوها وانظار خديجة الشيطانية .. تبعها بقا واقف متوتر يديها باردين من التور ومن الجوء رجليه كيحس بيهم مهازينوش ..

- بانت ليه خارجة بلع ريقو وتوجه لجهتها وقف قبالتها وإباسامة توتر نطق : السلام عليكم ..

- تودة ( وقفات كتشوف فيه بإستغراب حسات بيه بحال شي شخص لي صورتو كتكون دازت بين عينيك مخطوفة وماعرفتيش فين وفأشمن وقت ) :

وعليكم السلام

- عبد الخالق ( زاد توتر كثر فاش حس بيها ماعرفاتوش ) : سمحليا الالة .. انا بابا العروسة

- تودة ( بإبتسامة عريضة .. إبتسامة خلات قلبو ينبض ويحيا ويتفكر كل لحظة دازت بيناتهم مايمكنش ينسى ضحكتها مستحيل هي فاطنة فتكنة لي واقفة قدامو ) : مبارك ومسعود اسيدي .. الله يكمل عليها بالخير

- عبد الخالق ( تلف مابقاش عارف شنو يݣوليها) الصراحة تبارك الله عليكم .. نشطو العرس بغيت انسولك الله يجازيك بيخير أحيت ماعرفت فين شفتك ..

- تودة ( بإستغراب ) : مرحبا

- عبد الخالق ( بلع ريقو ) س ( قاطعاتهم حياة لي وقفات عليهم ) ..

حياة : خالتي تودة كتقلب عليك عنبر ..

- تودة ( شافت فعبد الخالق) : سمحليا .. تخطاتو ومشات مع حياة مخلياه مستغرب من سمية تودة .. كيسول راسو كيفاش تودة مايمكنش يكون غالط .. هو متأكد بلي فاطنة هادي ماشي تودة .. تكون زعمة كذبات عليه ولكن مايمكنش ..

- رجعو لداخل كاملين .. ݣلسو وتحط العشا فالاول حطو اللحم مشوي .. وراها دجاج مشوي وعاد وراها الديسير وتحلية .. داز العرس زوين وفوق المستوى المطلوب .. خرج رشيد يدوي فتيليفون ورجع لعندهم لونو مخطوف والخوف باين فعينيه ..

- وقف عند راس عنبر ... يلاه اتنوض باش تكمل العرس :

عنبر خاصني نمشي دابا .. خويا وقعات ليه واحد لاكسيدو فالمحمدية وسوناو عليا

- عنبر ( غوبشات ) : ياربي سلامة .. ياكما شيحاجة خايبة ؟

- رشيد : ماعرفتش .. شوفي عزيز يوصلكم فوج بفوج صافي .. حيت دراري أصلا أيمشيو مع الماطريال وكاين لي ايمشي فطوموبيلت صاحبو

- عنبر : أنت غير سير ݣاعما تهز الهم .. وباشما كان علمني صافي

- رشيد : كوني هانية ..

•• خرج رشيد كيجري ، علمات عنبر تودة والبقية مابقاش بزاف ديال الوقت ويسالي العرس .. كملات مع العروسة كاع اللبيسات ديالها ، وآخر لبسة هي الكسوة البيضة .. غنات أغنية حنينة بصوتها الحنين ختمات بيها العرس كلو ..

- جا الوقت لي الضياف بداو كيمشيو هزات عنبر ساكها والكاب دارتو على كتافها وخرجات لعند عزيز .. لقاتو واقف كيتسانهم :

عزيز شوف غادي تسبق البنات توصلهم .. وعاد ترجع لينا واش تقد ؟

- عزيز : انا ماعنديش ݣرام دالمشكيل .. تمات جايا عندهم ماجدة كتعيط على عنبر .. هزات راسها ضارت عندها :

نعام ..

- ماجدة ( كدور فراسها ) : فين هو رشيد ؟

- عنبر : مشا خوه دار كسيدة فالمحمدية .. ( ضارت عند عزيز ) هانت وصل انت خالتي رحيمة وليالي ولبنات ورجع عندي انا وماما وحياة

- ماجدة : بلاش أيديهم نوصلوكم انا ودنيا بلاما يتعدب هو يبقى جاي غادي .. راه جبدة ديال الطريق يوصلهم حتى لديورهم ويشد الطريق تاني صعيب الحال ..

- عنبر : صافي توصلونا انت ودنيا ؟

- ماجدة : اه كوني هانية

- عنبر : صافي اخويا عزيز وصلهم هوما .. وحنا انجيو مع ماجدة وبنت عمها صافي

- عزيز : الى كانت شيحاجة سوني ليا صافي ؟

- ماجدة : راه حنا غانوصلوهم كلشي هنا جاي بطوموبيلتو .. غير سير انت

- عزيز طلعها ونزلها بشوفاتو .. دور راسو بقلة صبر كتجيه كتخشي راسها فأي حاجة .. واخا الهضرة ماموجهاش ليها كتخشي فيها راسها ..

- خرجو البنات ركبو مع عزيز شد بيهم الطريق .. وتودة وعنبر وحياة رجعو للقاعة ݣالسات حيت البرد كان على برا .. دنبا ويسرى وباهم مع علال ورقية سيفطو ياسمين فطوموبيلت راجلها تسيفطو معاها مع حباب العريس .. لي حتى هوما مشاو ، خديجة غير سلا العرس ركبات فطوموبيلتها ومشات مادوات مع حد ..

- أدريس ( موجه كلامو للفاروق ) : شتي فعايل مك ؟

- الروطال ( مدوز يدو على لحيتو ماعجبوش التصرف لي دارت جاه ناقص وعيب فحق كاع الحاضرين ) :

شتها الواليد شتها

- أدريس : غير باش إلى درت شيحاجة مايلومني حد .. أنا علمتكم من دابا حيت هادشي طلع فراسي بزاف .. الناس كيكبىو كيبغيو يرتاحو من صداع الراس والمشاكيل وانا عنري مارتاحيت شحال غادي نعيش فهاد الدنيا اللهم قطع الضبرة تبرة سالينا

- فاروق ( حط يدو على ظهر باه ) : حتى حد مغايحاسبك .. وعمر شي حد غايݣوليك علاش درتي .. لي رتاحيتي فيها ديرها

- أدريس هزهز براسو وسكت .. توجه لعند خوه وباهم :

يلاه غاتمشيو ؟

- عبد الخالق ( عينيه كانو على تودة لي ݣالسة .. معارف شنو يدير ماݣدش يرجع عندها وكالسين معاها البنات .. كان خاصو بزاف ديال المعلومات يعرفهم ولكن مكانش وقتها ) واخا يلاه ..

••• طلعو فطوموبيل ديال أدريس مو وباه لور .. وهو حدا خوه ، ديمارا الطوموبيل وشدو الطريق .. توجه الروطال عند خوتو لي واقفين مع راشد وطارق كيشوف فطبلة لي ݣالسين عليها عنبر وتودة وحياة ..

- مالهم ؟

- طارق : المنادجر ديالها مشا حيت خوه دار شي أكسيدو .. اتوصلهم دنيا وماجدة

- الروطال ( خبط على يد عماد ) : أنا غادي .. غدا غانطلع لرباط نتلاقاو من بعد .. كنتسالوك عراضة مانسيناهاش لك

- عماد ( كيضحك ) : دايرها فبالي ماتخممش ..

- الروطال ( شاف فراشد ) : أنت مزال فالمغرب ولا غاتهرب تاني ؟

- راشد : لا شكلني مطول مزال هنا .. هاد الساعة عندي شي خدمة حتى نساليها ..

- الروطال ( شد على كتفو ) : نرجع من رباط نتلاݣاو

- راشد : انا طالع عرباط بعد غدا ..

- الروطال : ايوا صافي خليها حتى ترجع انا مشيت .. ضار هز راسو للجهة لي فيها هوما حدر راسو وتوجه لطوموبيلتو ركب فيها ومشا ..

- وقفات ماجدة على عنبر : يلاه مشينا دنيا كتسنانا على برا

- تودة : سمحولينا ابنتي عذبناكم

- ماجدة : اويلي أخالتي حشومة ݣاع تقولي بحال هكا مابيناتناش .. خرجو على برا وقف ليهم طارق بصوتو الرجولي التقيل :

سمحولينا عذبناكم وتبارك الله عليكم

- عنبر : العفو مادرنا غير الواجب .. الله يكمل بالخير ..

- طارق ( بإبتسامة ) : اللهم أمين .. حدرات راسها عنبر توجهات لطوموبيل وراها تودة .. حياة وقفات قبالتو هازة يدها الصغير فوجهو :

نقص شوي من العلف .. غاتبقا غماغادي وتطوال وتݣضر وتخرج فناس ..

- طارق هز عينيه بصدمة من جرأته وقباحتها .. خلاتو حال فمو ضربات فيه وتوجهات لطوموبيل راكبة فيها ..

- وقف عليه عصام بتساؤل : أش ݣالت لك ؟

- طارق ( متبعة طوموبيل بعينيه .. ماحملش راسو وماحملش تصرفها معاه .. عمر شي وحدة ولا شي واحد تواقح معاه ولا تمادى جاتو برهوشة وخاصها تربى ) : ݣالت الله يخلف والله يعمر ..

- راشد : طارݣ توصلني ولا يوصلني عصام ؟

- طارق : لالا نوصلك انا نيت .. طلع فطوموبيلتو مع راشد .. عصام بدورو ركب فطوموبيل ديالو وعماد حتى هو .. من بعدما كانت القاعة عامرة خوات بقاو غير المكلفين وتريتور كيساليو خدمتهم ..

••••••

- دنيا عينيها على الطريق كتسوݣ بشوية .. شافت فالمرايا :

عرفتي اعنبر ، نهار شفتك قلت ليهم هاد البنت سبحان الله كتدي لينا فالملامح

- عنبر ( فكات رجليها من السباط لي عياها خاشياهم فصندالة الميكة حنيقزة ) : وايلي والله ملاحظتها .. كيقولك يخلق الله من الشبه اربعين ..

- دنيا : دابا انت بقاو ليك 38 شبيه حيت لقيتي زوج شبيهات ديالك انا وياسمين ..

- حياة : اه سبحان الله ختك لوخرى مكتشبهش ليكم زعرة ..

- دنيا : اه كتشبه ل ( ماقداتش تنطقها ولا تخرجها من فهمها بلعات ريقها وببرود ) كتشبه لمها ..

- حياة : واش باباك واخد زوج عيالات ؟

- دنيا ( حركات راسها ب لا ) مزوج غير مرة وحدة ..

- حياة : اه حيت سمعت ݣلتي لمها عد بالي بلي واخد جوج عيالات

- دنيا ( تنهدات تنهيدة طويلة) : لا غير وحدة سمحات فينا وانا عندي عامين ( تبسمات بإنكسار ) داكشي باش اتلاحظو بلي مكانتش فالعرس ..

- حياة سكتات قصحاتها فقلبها .. تودة حطات عليها يدها بصوتها الحنين :

الله يخلي ليكم باكم ابنتي .. باين كيبغيكم مسكين وكبركم وتهلا فيكم

- دنيا ( غرغرو عينيها بدموع ) : بابا اخالتي فنا حياتو على ودنا .. هي مشات شافت حياتها تزوجات ومشات لألمانيا ولكن هو عمرو فكر يتزوج .. كبرنا قرانا وصل كل واحد فينا لداكشي لي بغاه .. هو بانا هو منا هو كولشي ..

- عنبر : الله يخليه ليكم ..

- ماجدة ( عينيها على المرايا لي جيهتها ) : واحد طوموبيل شتها اتابعانا منين شدينا الطريق ..

- دنيا ( هزات عينيها فالمرايا ) : راه شتو ومن قبيل وانا كنخوي ليه باش يدوز مابغاش يدوز .. الضسارة هادي ..

- ماجدة : تلقايه شي ميكروب شارب اليوم راه السبت ..

- دنيا : لا هاد طوموبيل كانت قبيلات فالعرس .. عبد الصمد ولد عم بابا جاب معاه شي دراري صحابو .. كيعرفهم من كازا وجاو يشوفوه

- ماجدة ( شافت فيها ) : وعلاش عارض عليهم .. واش هذا هبيل ؟

- دنيا : وراه أݣاليهم انا فكازا فواحد العرس دالعائلة وجاو .. راه مجاو حتى الأخر حتى قرب يسالي العرس .. خوات ليهم للطريق وهوما حلفو مايتخطاوها ويمشيو كانو حالفين يتبعوها .. كيقربو ليها مكسيريين ويسنيو عليها .. ضارت تودة وعنبر دقة وحدة

- عنبر : مال هاد المكاريب واش مابغاوش يحشمو

- ماجدة : نسوني لعماد خويا

- عنبر : ماتسوني لحد ختي دنيا لوحي ليمن وقفي يرحم باك

- تودة : اويلي واش بغيتي تنزلي ليهم ؟

- عنبر : ومالي لي منزل .. واش بغيتيهم اماما يقلبونا نصدقو فسبيطار .. راسي اصلا باغي يتهرس عليا ( شافت فدنيا ) دنيا لوحي ليمن .. وقفي اختي وقفي ضسارة الخاوية راه ماعنديش معاها انا

- ماجدة : من الأحسن بلاش اصاحبتي حنا العيالات شوف علم الله شكون راكب معاه تم

- عنبر : مالو يخلعني انضرب مو بقرعة نصيفطو يخيط .. وقفي ادنيا وقفي .. حبسات دنيا فجنب الطريق، حلات عنبر الباب وقفات كانو وقفو حتى هوما البرد كيطير وطوموبيلات قلال لي كيدوزو ..

- هزات جلايل تكشيطها خشاتها فالحزام خرجات بالحنيقزة لايحة الكاب ديالها فبلاصتها ، جامعة شعرها وتوجهات نيشان لعندهم .. كانو شي قراعي مليوحين ديال مشروب البيرة كانيطة وديال قراعي دزاج .. توجهات لعندهم نزل الزاج ديال الطوموبيل .. مخرج راسو لابس لباس رسمي فالمحل سلسلة ديال الذهب فعنقو شفايفو غوزيين كيبريو وعينيه حمرين .. جوج ديال دراري ݣالسين اللور او واحد حداه ..

- عنبر ( تحدرات عندو كتشوفيه بعصبية ) : ياك لاباس اشرف .. ضارب جوج باردات وبنا ليك فالبلان ولا كيفاش ؟

- طلعاها ونزلها بإبتسامة .. مدوز لسانو على شفايفو كيضحك : عرفتي فاش كيتجمع الصوت والزين والفورمة والقصوحية .. عرفتي كيعطيو النݣعة .. حشومة ݣاع تابعينكم ومابغيتوش تواضعو وتدويو ياك لاباس ؟

- حطات عليها دنيا يدها بتساؤل : اش كاين ياك لاباس ؟

- عنبر : لا والو غير شي قلالين الاصل وتربية خاص لي يربيهم ..

- خرج الشخص لي ضاير حداه .. عينيه حمرين عاقد غوباشتو .. جاي قاصدهم كيعلي فصوتو :

تي مال مك اش يحسابلك ك.... تي اش كتكوني كاع أ ق .... ، مفرعنة عدك الزهر يساومك شي حد

- عنبر تجمع عليها السهير والعيا وصداع لي فراسها كيهرس .. ودنيها كتحس فيهم الصداع مكتقشعش قدامها .. ماعندهاش مع الملاجة فالهضرة ، حدرات راسها بانت ليها قرعة مرمية هزاتها مع القصدة لي جاي لعندها مع نزلات عليه بيها لجبهتو هرساتها عليه ... غوتات دنيا لربي لي خلقها نزلات تودة كتجري وماجدة وحياة .. كيشوفو داك المنظر لي قدامهم القرعة مهرسة فيدها وراس السيد كلها دمايات كيغوت ..

- تحل باب الطوموبيل ونزل لي سايك ، نزلو الدراري .. درة الخوف مكانتش فيها كتشوفيهم ببرود تقدر تغاضى على شحال من حاجة ولكن باش ينعتها شي حد بشي كلمة طايحة كايحضرو فيها ليدين .. صدرها كيطلع ويهبط كلها كترعد

- تودة كتغوت وتضرب فخاضها : اويلي اويلي اش درتي ابنتي اويلي عيطو لابيلانص عيطو لشي حد ..

- اقسم بربك الكعبة حتى ليلة تباتي تݣلاصاي الق ... هز تيليفونو كيعيط للبوليس ، ومن كلامو كان باين فيه بوليسي حتى حتى

- عنبر : عيط حتى للامم المتحدة عند بالك أتخلعني ، ميكروب دالمكاريب افلبوليس انخاف عيط حتى على الاتحاد الأوروبي الى بغيتي

- ماجدة ( هزات تيليفونها كتبكي سونات لعماد ) : الو وي عماد فينك ؟ شوف .. خويا راه ( بدات كتعاود ليه كان فطريق قريب ليهم بانو ليه واقفين ) .. وقف طوموبيل ونزل كيجري قاصدهم .. بان ليه داك المنظر ماعرف باش تبلى

- عماد : اش كاين هنا ؟

- ماجدة ( كان شوية وتسخف اللون مخطوف من وجها والخلعة لابساها ) : تبسلو علينا وتابعينا .. ونزلات ليهم عنبر هاد خونا عايرها وضرباتو ..

- برب حتى تبات تݣلاصة هاد الليلة نوريها انا ضسارة ..

- عماد ( جاه فاص كيخنزر فيه بصوت رجولي قوي ) : انت براسك خاصك تبات تݣلاصة .. مبسل على البنات وفوق منها شارب

- وانت مالك اش مشا لك ؟

- عماد : دابا نيت غانوريك مالي .. ( هز التيليفون سونا على يوسف ) سيفط ليا الدراري انسيفط ليك لوكاليزاسيو ..

- يوسف : اش تم ؟

- عماد : يوسف سيفط ليا دراري من بعد .. قطع معاه طل وسط الطوموبيل كيبانو ليه دراري اخرين .. لاخر كلس طايح شاد على راسو غادي بدماياتو .. أما هي كانت واقفة بكل برودة شادة لي بقا من القرعة فيدها .. تودة ݣلسات على الحديدة لي فطريق كتبكي وتحرك براسها .. أما حياة كانت غير مصدومة وكتشوف بعينيها بقا ليها شوية وتسخف بالخلعة ..

- دنيا : أصلا هوما لي بداو منين خرجنا من القاعة وهوما تابعينا .. جاو عند عبد الصمد ولد عم بابا عييت نخوي ليهم فطريق حلفو واش ينعلو الشيطان .. هبطات عنبر تدوي معاهم خسرو معاها الهضرة راه هوما لي جبدو

- دابا نفاريوها عقلو مزيان على هاد الكمارة

- عماد ( ضار عندها شدو من الكول ديال القميجة .. من تحت سنانو ) عاود اش ݣلتي ؟ إلي كنتي راجل ومختن عاود اش ݣلتي ..

- لاخر شنق عليه بدورو .. نزل عليه عماد بروسية لنيفو رعفو خلى نيفو غادي بدمايات .. البنات حماوه الغوت ، وتودة كانت فواحد صدقات فزوج مابقاتش قادة تحمل كتحس بقلبها غايخرج .. الليل والبرد والجو مغيم ديال الشتا ..

- بعد مدة وقفات زوج سطافيطات ولوبيلونص هزات دوك الزوج وسطافيط دات دراري .. وراهم طوموبيلت البنات ..

- ݣالس ادريس هو وعبد الخالق .. فجردة على برا والديهم نعسو .. وهوما بقاو فجردة كيهضرو

- ادريس : واش مأكد بلي هي ؟

- عبد الخالق : واش اخويا انا شرفت لهاد الدرجة باش نساها الله يهديك كنݣوليك هي هي واش انا تخفى عليا

- أدريس : عاد ݣلتي بلي عيطات ليها تودة ماشي فاطنة

- عبد الخالق : ماعرفتش انا هادشي لي ضارني فراسي .. ݣلبي ضرني وجاتني الفشلة ماعرفت منݣول ليها

- أدريس : كان عليك دوي معاها تسولها

- عبد الخالق ( شافيه بحصرة ) : أش غانݣوليها أخويا أݣوليا .. انا لي سمحت فيك وخليتك ذنبها فرقبتي الى يوم الدين

- أدريس : ولكن انت مادرتيش معاها شيحاجة لي هي حرام ..

- عبد الخالق ( تنهد ) : واخا هكاك أدريس زواج الفاتحة مواكلش

- أدريس : شحال هادي كان .. ياك ݣلتي ليا مشيتي انت وياها وخالها عند فقيه الجامع عاودتي ليه بينك وبينو بلي قريب الطلق وباغي ديك السيدة ولكن ماباغيش تقرب ليها فالحرام .. وجمع ليكم 12 شاهد وقريتو الفاتحة .. هادي كتسمى حلال مكاتسماش عاشرتيها فالحرام .. وكونما جات المرضة دبنتك كنتي ناوي طلبها من دارهم وغير تشد ورقتك دطلاق وتجهر بزواجك وتكاتبو عند العدول ..

- عبد الخالق : ولاو كان خاصني حتى نشد ورقت طلاق ونطلبها من دارهم معززة مكرمة .. وندير لازم هو فالاول فاش شفتها تحركات شيحاجة فيا منكدبش .. وهي مابغاتش وكانت خايفة مني ولكن انا لي عطيتها داك الحل ديال الفاتحة .. ولكن كنت مرضت فاش جات عندي لدار وقع لي وقع ، مكانش فبالي غانلݣاها بنت الصراحة تݣال ..

- أدريس : المهم كيتسمى زواج كتسمعى علاقة شرعية .. العيب والعار كونما كان بيناتكم والو ، انݣوليك داكشي لي درتو حرام .. ولكن انتوما قريتو الفاتحة بشهود فجامع يعني راها علاقة شرعية كاملة مكمولة .. وانت ماشتيش لاكارط ديالها داك ساع

- عبد الخالق : مكانتش عندها .. ݣالت ليا متݣدش ترجع لدوارهم فالخميسات تجيب عقد الازدياد كانت خايفة من باها داكشي باش مصايباتهاش ..

- أدريس : شوف عبد الخالق .. انا اخويا مكنجيش عليك أنݣولك الهضرة نيشان فوجهك .. منكدبوش انت غلطي عارف داكشي لي دزاي منو وماكتيش صايب الحنان مع مرتك .. سمحات فيك وخوات وطلبات الطلاق ، وسيدة بانت فالوقت لي انت كنتي ضعيف ومهرس مافكرتيش مزيان انت قاري وخدمتي مكلخ .. تعرفتي على سيدة ف 10 يام زربتي عليها واخا حتى هي عدها 25 عام والعقل مكاينش ..

- عبد الخالق ( رجع بيه عقلو اللور ) : ماشي عقلها مكاينش .. البنت مداز عليها والو داك الساع .. قارية غافجامع عمرها دخلات للمدرسة ولا عرفاتها خوتها كانو قامعينها باها بغا يزوجها على 16 عام هربات وسكنات مع خالها فالعروبية .. أودي انت معارف والو وماشتي والو تعمات ليها البصيرة راه السيدة عمرها بغات وعمر شي راجل قاسها .. انا الله يسمح ليا فالاول متيقتش منكدبش علك من البلان لي وقع مع مت الولاد .. فخبارك البلان كامل بلي مالقيتهاش بنت وسرها ليومنا هذا معارفو غير انا وانت ، هادشي لي خلاني منتيقش بفاطنة واش عنر شي حد قاسها ولكن حتى انا بغيتها اتݣوليا كيفاش ف 10 يام انكولك الله اعلم .. حسيت معاها لي عمري حسيتو البنت حنينة كانت ظريفة تدوي معاها تحمار كانت نية نية بهاد المفهوم عمرك شتي وحدة عندها 24 عام ونية وراه كانت نية أدريس راني راجل ومدوز البنات كانت نية .. تخايل معايا قرينا الفاتحة وكتݣوليا واش دابا هذا هو الزواج مدايز عليها والو راه انا مانسواش ..

- أدريس : راه ݣلنا ليك درتي غلط وكان عليك حتى تاخود براتك وتزوج بيها عند العدول بالوتائق ديالك ، ولكن راه داكشي لي وقع بينك وبينها راه ماشي حرام راه 12 شاهد لي شهدو عليكم وقريتو الفاتحة .. كتسمى حلال فهمها حلال كان خاص اتوتقوه عند العدول اه زواج الفاتحة ماواكلش ولكن هو اقل ضرر بعدا من الزنا ..

- عبد الخالق : راسي غايتفاجر عليا أخويا .. بغيت نعرف أش وقع ليها أش وصلها حتى ولات شيخة تغني .. ( شافيه ) ماعرفتش واش تزوجات واش عندها الولاد .. تخايل تكون هزات مني تخايل تكون حملات مني

- أدريس : وهدا عليا أخويا العلم لله .. هاباش ݣلت لك خسرتيها وݣاديتيها .. حتى لوكان كاع تكون هزات وحملات منك بعدا مايتسماش ولد الحرام .. باه ومو كان بيناتهم الفاتحة وشهود وخالها حاضر..

- عبد الخالق : راسي دايخ عليا تجمع عليا دق ديال ݣاع الجوايه .. معارف فين نصد كيفاش انشوفها من بعد خاص نعرف شحال من حاجة أخويا مرضت فصحتي .. ولي مرضني السيدة ماعقلاتش عليا ݣاع زعمة تكون كتمتل؟

- أدريس : الا داكشي لي عاودتي عليها اتكون تصدمات فاش مالݣاتكش .. ياك ݣلتي جات وراك وسولات مول الحانوت وݣالها لك

- عبد الخالق : أه بصح عندك الصح .. والى تزوجات واش ايكون حلال عليها راجلها واخا قريت عليها الفاتحة ..

- أدريس : واش انت مخليها 26 عام أصاحبي وكتݣوليا واش واش حلال عليها راجلها .. راه كتسمى هجرتيها اشريف هادشي فاش كتفكر انت دابا غافهادشي ..

- عبد الخالق ( تنهد تنهيدة طويلة) : حريرة قسما بالله العظيم الى حريرة هادي .. ( رجع بظهرو اللور ) تخيل تكون حملات مني .. مغايكونش ولدي ولد الحرام ياك اخويا

- أدريس ( عصبو ) : واش انت نيت قاري او واعي وكنتي مدير أكاديمية لا انا غالط .. راه ݣلنا ليك ألف مرة .. الى كان بصح حملات منك داكشي لي ولدات ماشي ولد زنا وماشي من علاقة غير شرعية حيت انتوما بزوج مزوجين بالفاتحة .. ( وقف ) انا اخويا أندخل نعس عييت والله حتى عييت ..

- دخل لدار وخلاه فوق الكرسي غارق فأفكارو كيقلب على الحلول كيفاش يشوف فاطنة ويدوي معاها .. ولا كيفاش يعرف عليها اي حاجة وشنو وقع معاها ...

••••••••••••••••

- ݣالسة تودة على برا .. هي وماجدة وحياة ودنيا كيتسناو فعنبر لي كانت لداخل ، دخلات واحد السيدة كتبكي حدا فمها حمر وتحت عينها زرق .. ݣلسات حدا تودة ، هزات راسها فيها كتشوفيها .. ضارو عندها البنات كيشوفو فيها بإستغراب ..

- تودة ( كتشوفيها قلبها واكلها على بنتها ونفس الوقت فضولها ماخلاها تسكت ) : مالك ابنتي ياك لاباس ؟

- ( بصوت منغنغ كتبكي ) : ديما كيجي حتى لفجر سكران .. كتبان ليه فيا كيهلكمي عصا عييت كل مرة كنديكلاري ويطلب وندير ليه التنازل

- ماجدة : واش راجلك ؟

- (هزات براسها ) : أه راجلي وعندي معاه زوج وليدات ..

- تودة : ومالك ابنتي على هاد الذل .. انت لي فطحتيه ديكلاري وتخرجيه ، خلي بوه فالحبس وسيري طلقي وخدمي على دوك الوليدات

- ( شافت فيها بيأس وإنكسار ) : منݣدش أخالتي

- تودة : اويلي على متݣديش .. كاع هذا حب فيه يجندغك شي نهار يقت**لك ومتݣديش

- ( تنهدات كتمسح فدموعها ) : ماشي هكاك .. وليداتي مازال صغار وانا وياه مدايرينش الكاغيط .. مزوجين غير بالفاتحة ولادي خاصهم يتحطو فالحالة المدنية .. كيفاش ايطلقني والكاغط ماعديش معاه ..

تودة ( بلعات ريقها وبإستفهام ) : دابا ݣولي ليا واش هاد الفاتحة نيت زواج .. ولا كيديروها أطريݣ باش يلحس ليك مخك ويدي لي بغا منك

- دنيا ( سمعاتها ) : نو أخالتي هو كيتعتابر زواج .. واخا غير معترف بيه قانونيا .. حيت ضروري يتوتق عند العدول .. ولكن كيكونو فيه الشهود 12 شاهد حتى الى وقعات شيحاجة بين زوج مكايطونش زنا وكتعتابر علاقة شرعية ..

- تودة ( يديها بردو عليها .. كتحاول تفهم ) : دابا أبنيتي نسولك حيت انا معارفاش .. دابا هاد الوليدات واش زعمة ماشي ولاد الحرام ( شافت فسيدة ) سمحيليا ابنيتي ومديرهاش مني قلت الصواب

- دنيا : لا أخالتي ماشي ولاد الحرام .. حيت مزوجة بالفاتحة كيف ݣلت ليك فالقانون مكايعتارفوش بهاد زواج علاش حيت المرة مكايكون عندها حتى حقوق .. بحال دابا سيدة مسكينة متقدش طلق منو خاصو حتى يتكاتب معاها عند العدول باش دير لوليداتها الحالة المدنية ..

- تودة ( دوزات لسانها على فمها لي نشف قلبها كيضرب فالمية .. تخلطات عليها صدمة وفرحة ) : هكاك دابا منين كتعاشري راجل بيناتكم الفاتحة واخا كيف ݣولتي القانون مكايعتارفش بيها .. ولكن ماشي فساد ياك ماشي ولادها ولاد الحرام

- دنيا : لا أخالتي ولاد الحلال .. اهو خاص راجلها يوتق زواجهم عند العدول .. علاش انت يحسابليك زواج الفاتحة ماشي زواج؟

- تودة ( تنهدات ) : انا ابنيتي مقارياش ومعارفاش .. يحسابليا هادشي كيديروه الرجال اهكاك .. باش يلحسو عقل الوحدة ويديو منها لي بغاو

- دنيا : نو اخالتي .. ولكن ضروري يوتق زواجهم .. حيت زواج الفاتحة كان هذا شحال هادسي مابقاش .. البنت كتضيع مكايكون عندها حقوق ولادها متقد تسجلهم فحالة مدنية ما والو .. وساهل يهرب عليها الراجل ويخليها معلقة .. ضروري تكاتيب عند العدول بشرع والقانون ..

- تودة ( تنهدات تنهيدة طويلة) : عدك الصح ابنيتي .. ماكدبتيش أحيانة .. ( شافت فيها مبسمة مزروعة فيها بصيص أمل صغير .. كانت مقهورة من جهة بنتها دابا حتى الى جابتها الصدفة وجا نهار و عرفاتها مها مغاتكونش بنت الحرام ولا بنت علاقة غير شرعية .. كانت غادية مدفݣة .. رجعات شافت فدنيا ) القراية زينة أبنيتي الله يرحم من قراك ورباك الله يخليه ليك .. فاش مكتكونيش قارية كيكون ساهل دار بيك ..

- دنيا : خاص الوعي والقراية بجوج أخالتي .. الواحد خاص يكون عارف شنو كيدير

- ( تنهدات السيدة ) كانت عندي 17 عام وكنت كنبغيه عقل الصغر .. جا خطبني والديا مابغاوش ݣالو ليا شمكار ونضت وهربت معاه .. وتزوجنا بالفاتحة حيت مكانش عندو ݣاليك فلوس العدول ، وهادي دابا عندي 23 عام بزوج وليدات بلا ورقة بلا زوج وضرب من الفوق ..

- تودة : ونوضي جمعي راسك وشوفي مديري لراسك هادشي أبنيتي راه ماواكل .. مكاين لي مضسرو ݣد كل مرة مخرجاه .. هاد المرة الى شدوه ديري معاه شرط يكتب عليك عند العدول وديري الحالة المدنية لوليداتك .. باش يخرج ويدير ليك تعهد عمرو يمسك ..

- خسرت حتى العلاقة بيني وبين والديا .. مابقاوش بغاو يشوفوني ديت ليهم الوليدات وجراو عليا ( كتبكي) لا حنين لا رحيم يحن فيا

- تودة : الوالدين ݣدما فات يحنو فيك يحنو اشوية ديال الصبر وصافي ... مايكون الخير ابنيتي دابا تشوفي ..

_____________

- فالمكتب ديالو هو وربيع .. عطاه شي وراق يديهم .. للمكتب المفتش ..

- عماد : وصلك شي خبار على هادوك ؟

- ربيع : ماشي حاجة خايبة السيد خيطو ليه جبهتو ماعندو والو .. لا هو لي الكيدار لي معاه ، صدق واحد الخاسر مامنو زوج .. خدام فالكوميسارية ديال عين السبع .. دراري غايتكلفو ويجيبوهم .. اما لوخرين مزال فالمكتب ديال عادل ..

- تحل الباب ودخل يوسف هاز ملف فيدو شافيها بجدية ناطق :

خاصني ندوي معاك ..

••••••••••••••

- ݣالسة فوق الكرسي معصبة كتلعب برجليها .. كتعامل ببرود مع الموقف لي محطوطة فيه ، تجمع عليها العيا وسهير وراسها لي غاينفاجر كتحس بواحد الصداع غير طبيعي .. ورا عنقها بحال الى مجبد ضارها .. دوزات يدها على عنقها كتحس بيه سخون .. عينيها مشاو لوراق لي مشتتين فوق من البيرو مرسومين .. قربات ليها بشوية شدها الفضول قربات راسها مغوبشة كتحقق فيهم ، كانو لعدة أشخاص ، حطات يديها عليهم كدوز وحدة بوحدة .. طلعات ليها صورة لي صدماتها ديال شيخها .. ستغربات ومافهمات والو الصورة لي وراها كانت للنادية وبناتها .. واخر صورة لفتات إنتباها من كاع تصاور لي شافت هزاتها كتحقق فيها عاقدة غوباشتها بإستغراب وعلامات الإستفهام على وجها والشك لي تزرع لداهل ديالها، تحل الباب ودخل لابس لباس رسمي هزات فيه عينيها كان عماد .. طاحو عينيه عليها وعلى الورقة لي فيديها .. بإستفهام سولاتو :

هاد التصويرة ديال راجلي الله يرحمو شنو كدير عندكم هنا ؟

إنّنا أحياناً قد نعتاد الحزن حتى يُصبح جزءاً منا ونصير جزءاً منه، وفي بعض الأحيان تعتاد عين الإنسان على بعض الألوان ويفقد القدرة على أن يرى غيرها، ولو أنّه حاول أن يرى ما حوله لاكتشف أنّ اللون الأسود جميل، ولكن الأبيض أجمل منه، وأنّ لون السماء الرمادي يُحرك المشاعر والخيال، ولكن لون السماء أصفى في زرقته، فابحث عن الصفاء ولو كان لحظة، وابحث عن الوفاء ولو كان متعِباً وشاقاً وانسَ غدرهم، وتمسك بخيوط الشمس حتى ولو كانت بعيدة، ولا تترك قلبك ومشاعرك وأيامك لأشياء ضاع زمانها.

- تقدم بخطوات بطيئة لجهة البيرو .. هاز الملف لي عطاه يوسف .. مدوز لسانو على فمو معارفش هاد اللحظة شنو ممكن يݣوليها ولا يسولها .. مزال كلام يوسف فدماغو :

- لقينا سمية السيدة لي كان مزوج بيها .. سميتها عنبر بنشمسي تزادت نهار 10/11/1998 بولاد صالح .. الوالدين ديالها توفاو فأكسيدو خايبة فطريق المحمدية .. كانت كتقرا فكلية الحقوق لي فعين الشق .. ولكن ماكملاتش فديك الفترة كانت تزوجات ببدر رحمون ف 2019 الصراحة ماعنديش فكرة كيفاش حتى تعرفات عليه .. لي كنعرف هو دخلات للمغرب هادشي 10 شهور ..

- عماد ( حط يديه بزوج على البيرو كيشوف فالملف لي عطاه كانو فيه شي زوج تصاور .. فيهم عنبر معاه ) :

دابا انا تخربقت .. علاش رجعات زعمة تكون طلقات منو ؟

- يوسف ( حرك راسو بلا ) : ماعنديش حتى معلومة .. هادشي لي وصلت ليه لحد الساعة شيحاجة أخرى مكايناش ..

الـــــحـــاضـــر

- دار جهة البيرو جر الكرسي وݣلس .. كتشوفيه مزال كتسنى فيه يجاوبها على السؤال ديالها ..

- عماد : فخبارك هادشي لي درتي دابا راه كيعاقب عليه القانون .. ممنوع تمسي شيحاجة كتخص السلطات أمدام عنبر

- عنبر : مادرتهاش بلعاني .. غير جات عيني عليهم وصافي

- عماد : بغيتي تݣولي الفضول ؟

- عنبر ( هزات كتافها ) : يقدر يكون فضول ولكن بغيت انعرف .. شنو كدير تصوية راجلي الله يرحمو وعائلتو عندكم

- عماد ( غوبش شاك واش سمعها مزيان ولالا ) : أش ݣلتي راجلك الله يرحمو علامن كدوي ؟

- عنبر ( هزات الصورة وقفاتها قبالتو ) هذا بدر الدين راجلي الله يرحمو

- عماد ( نزد عليه راسو ) : الله يرحمو علاش هو ميت ؟

- عنبر ( بالإيجاب ) : اه مات هادي 10 شهور بكسيدة ..

- عماد ( بفضول كثر ) : شكون ݣالها ليك أنت ؟

- عنبر ( بتوتر ) : كيفاش شكون قالها ليا راه راجلي هذا ... كنت عايشة معاه واش وحدة مزوجة بواحد مغاتعرف عليه والو مايمكن ..

- عماد ( بإستهزاء ) : اه بصح عندك الصح نيت .. ( حدر راسو ورجع شافيها ) كيفاش حتى تعرفتي عليه ؟

- عنبر ( بإستفهام ) : وخاصني نعرف بعدا شنو كدير تصويرتو هنا ؟!!

- عماد ( حك على راسو ) : منݣدش نݣوليك هاد الساعة والو .. خاصني نعرف بعدا كيفاش تزوجتي بيه ..

- عنبر ( بقات كتشوفيه مدة ) : كنا تلاقينا فعين الذياب تم تعرفنا

- عماد ( بإستفسار ) : عاودي ليا بديطاي ..

- عنبر : خاصني نعرف بعدا شنو كاين .. باش نعرف علاياش كتسولني هاد الأسئلة هادي .. حيت اصلا المجية ديالي لهنا على قبل هداك خونا لي خبط ليه راسو ماشي باش تسولني على راجلي ..

- عماد ( هزهز راسو ) : قارية القانون ياك ؟

- عنبر ( بالإيجاب ) : اه قريت 3 سنين فكلية الحقوق ولكن ماكملتش ..

- عماد ( رجع بظهرو لور ) : عنبر نݣد نسولك

- عنبر : مرحبا ..

- عماد : فاش كان خدام بات راجلك ؟

- عنبر ( عوجات فمها ) : عندو جوج شركات ديال العقار وحدة فسبانيا او وحدة فإيطاليا

- عماد ( مكانش باغي يݣوليها والو حتى يزيد يتأكد ) : وراجلك ؟

- عنبر : بدر كان خدام من الدار .. كيشري حوايج قدام اونيك كيعاود فيهم البيع

- عماد : نهار مات واش شتي الجثة ديالو زعمة واش حضرتي لدفين ؟

- عنبر ( بنفي ) : لا دارو ݣنازة غير فدار .. حضرو ناس قلال ماشي بزاف .. ماحضرتش لدفين ݣاليك بلي فعائلتهم المرة مكتحضرش لدفين ديال الراجل ..

- عماد ( تقابل معاها ) : واه واش حتى سبيطار مامشيتيش ليه ؟ مايمكنش راجلك دار كسيدة ماحضرتي ليه فسبيطار ماحضرتي ليه لدفين كيدرتي ليها ؟

- عنبر ( كتشرح ليه بيديها ) : ماعطاونيش فرصة اصلا .. سمعت الغوات فدار فاش سولتهم قالو ليا بلي بدر كان راكب مع صاحبو ودارو كسيدة .. وبلي صاحبو دخل فغيبوبة وبدر مات .. فاش قلت ليهم نشوفو قالو ليا بلي من الاحسن منشوفوش حيت وجهو كان خاسر وبلي حتى مو وباه منعوهم يشوفوه ..

- عماد ( كان عارف ومتأكد من تعابير وجها بلي مكتكذبش وكتݣول لي كاين ) : واخا اعنبر تقدي تمشي دابا .. ديجا مشا الحال

- عنبر : واش مغاتقولش ليا شنو واقع ؟

- عماد : كاين شي حوايج كنحاولو نتاكدو منهم .. دابا سيري ترتاحي غير الله يرضي عليك هاد الايام ماتمشي فين

- عنبر : وعلاش ؟

- عماد ( أشر ليها لباب ) : عنبر تݣدي تمشي دابا .. بقات كتشوفيه مافهمات والو .. هزات جلايلها وتمات خارجة وراسها ضارها مافهمات والو ..

••• غير شافوها البنات وتودة ناضو عندها بجرا

- تودة : امضرا ابنتي ؟

- عنبر ( هزات فيها راسها ) : قاليا سيري بحالك

- ماجدة ( كضحك فرحانة ) : شفتي قلتها ليكم .. راه مغايشدوهاش مدارت والو ..

- تودة : ومالك ابنيتي لون وجهك مخطوف ؟

- عنبر ( بنفي ) : مكاين والو غير العيا وراسي غايتهرس .. بغيت غير نعس ..

- دنيا : يلاه نوصلكم .. توجهو كاملين للخرجة ديال الباب حتى وقف ماجدة عماد :

ماجدة اجي وسيري ... مشات عندو ماجدة دخلات عندو ..

- نعام

- عماد : كتبي ليا لادريس ديال عنبر ..

- ماجدة ( بإبتسامة ) : وعلاش ؟

- عماد ( بجدية ) : بلاما تبقاي ديري ديك ضحكة ديالك .. كتبي لادريس ديالها وسيري لداركم براكة من تجلويق

- ماجدة : واخا .. كتبات ليه لادريس ، وخرجات لعند البنات كانو ركبو شدو الطريق لدار دعنبر وصلوها هي وتودة .. ومن وراها توجهو لدار عبد الخالق ..

*********

- على طبلة ديال الفطور .. ݣالسة عاكفة راسها بزيف حياتي .. دايرة زوج دواور دالبطاطا فنواظرها تحت عينيها كحل بالهالات ديال العيا وسهير .. كتفطر كل دغمة كدير فيها دقيقة عاد كتسرطها ..

- تودة ( هزات راسها فسميرة لي حطات تيليفون من يدها ) : كيبقات ؟

- سميرة ( تنهدات ) : يلاه جابها يونس من عند الطبيب .. ݣاتليها طبيبة ماتفورصيش على راسها ، داك الشقا الكثير مديروش تعطي راحة راسها ..

- تودة : الله يهدي ديك البنت عدك .. والله مكتحشم واش هبلت اويلي عاهدي بالوحم كيبقى فالوحدة اربعشهر وهي شد فيها ..

- حياة : لا أخالتي .. كاين لي كيبقى فيها حتى كتولد .. راه كل وحدة وهي داكشي على حساب الهرمونات..

- تودة : وتبقى خانقة السيد وهاتيلاد لي فكرشها حتى هو كانت تخرج عليه .. تسطية والهبال

- سميرة : هانتي تشوفي هاد العجب .. انا بعدا نهار لي كنت نتوحم المعطي الله يرحمو ماكنت نحمل فيه الشعرة .. عمري شت شي وحدة جاها الوحم على راجل ظل تابعاه من هن لهن ..

- تودة : تسطية والهبال .. السيد باغي يبيع ويشري ݣالسة ليه فالحانوت .. وها البهلان اتجيبها فصحتها بداك الطيران ..

- سميرة ( شافت فعنبر ) : دازك راسك ابنيتي ؟ ياكما ندير ليك اللويزة ..

- عنبر ( الصمت )

- تودة ( شافت فيها ) : وعنبر وبنيتي ؟

- عنبر ( هزات فيها راسها فايقة من سهوتها ) : أش قلتي اماما ؟

- تودة : امالك ابنيتي من صبيحي وانت ساهية .. داك الخبز ݣلستي فيه عام ..

- عنبر ( تنهدات تنهيدة طويلة )

حياة ( كتشوفيها بشك ) اهياتا .. ياكما ݣاليك البوليسي بلي اتشدي ومخبية علينا ؟

- تودة : الله يابنتي اش هاد الفال برات الباس عليها ..

- حياة : وراه من لبارح وهي ساهية على هاد الحال .. دخلات ليا شك لراسي ..

- سميرة ( ناضت ) : نخليكم نمشي نرض الغدا

- عنبر ( حبساتها ) : ݣلسي اخالتي .. مالفة تنصبي الغدا دروك .. راكي بحالك بحال ماما فاطنة لا فرق ( رجعات تنهدات حايرة ) لبارح فالبيرو ديال خو ماجدة لقيت تصويرة بدر الدين وعائلتو

- تودة ( بإستفهام ) : واش بدر راجلك الله يرحمو ؟

- عنبر : إيه هو .. سولتو شنو كيديرو عندو مابغاش يقوليا كلس كيسولني ايمتا تعرفت عليه .. وفين عرفتو عائلتو فاش خدامين وهو .. وفاللخر قاليا سيري بحالك ترتاحي وماتسافريس لشي قنت ..

- حياة ( كتاكل فزيتون وتشوف فيها ) : انا اصلا نهار عاودتي ليا على عائلتو مارتاحيتش .. ياك ݣولت ليك بحال والو ختو تكون خدامة فالافلام الإباحية

- تودة ( شافت فيها ) : اش ؟

- حياة : بحال اخالتي الى قلتي الفساد كيصوروه افلام ويبيعهم بالفلوس ..

- تودة : اويلي ستغفرت الله العظيم

- عنبر : ديها فهادي اماما راه اهبيلة وقالو ليها زغرتي .. ضرني راسي نعرف اش كيديرو تصاورهم عند البوليس

- تودة : وبنتي الله اعلم .. متعرفي شنو كاين يقد يكونو عندهم شي خدمة معاهم انا ماعرفت مكنفهمش فهادشي ..

- حياة : واش مغاديش تمشي لأستوديو تسجلي ؟

- عنبر ( رضات راسها على الحيط مغمضة عينيها ) : والله مافيا لي يمشي راسي غايتهرس عليا .. هاد زوج عراسات الأخرين ولا راسي كيضرني ..

- حياة : رشيد دوا معاك ؟

- عنبر ( كحزات زيف على جبهتها ) : اه خوه بعدا ماعندوش حاجة خايبة تهرس فيدو وتجرح فجبهتو ..

- تودة : الحمد لله على سلامتو .. نوضي رجعي نعسي شوية راكي ماشبعاش نعاس ..

- عنبر ( وقفات ) : داكشي لي غادي ندير ..

يتبع...