محتوى القصة
- وقف طوموبيل قدام الموبل لي كاين البيرو ديال العدول .. شوميز فالبيض سروال فالكحل مع صباط فنفس اللون شعرو كان مرجعو اللور على غير العادة من وجهو باين بلي مقاد اللحية ومرازيها ريحة عطرو كتعطي كان باين عليه صفة عريس .. مايكدبش ويقول محاسش بواحد الرهبة غريبة مامالفش كيحس بيها كيسول راسو واش هادو هوما المشاعر لي كيحس بيهم العريس جاه راسو فشكل .. زواج لي مكان ضارب ليه حساب مشاف بنت متعرف عليها معاش معاها قصة حب غير حتى لقا راسو بين ليلة ونهار غايتزوج .. الى كان غايكون أغرب قصة زواج هي ديالو ..
- حبسات طوموبيل ديال رشيد .. نزل هو وتودة ورشيدة هز عينيه سامر على الطوموبيل حتى سبقات رجلها بشربيل ديال الصم وقف حاضيها نازلة من طوموبيل مطلعها من رجليها لجلابة مرورً بشال لي مغطية بيه راسها تبسم معلي حاجبو محرك راسو بالإيجاب .. بدورها كانت كتشوفيه ماتنكرش بلي كولشي فيه زوين طولتو لي كانت باينة واضحة لاي واحد الهالة لي ضايرة بيه الرجولة لي كتفيض منو أناقتو وسامتو ورزانتو
- حياة ( ضرباتها لكتفها مرققة صوتها ومعوجاه) : ماشي ستيل ديالي هادشي غير ماشي ستيلك وباغية تاكليه بعينيك باز
- عنبر ( ضارت شافت فيها ببرود ) عادي منشوفش زوينة هادي غير حيت اول مرة نشوفو بلكلاص
- حياة : علاش نهار الخطبة جا لابس الضراعية ياك جا لابس الكلاص اودي شتي انت وهو نبصم عليها من هنا .. اندوزوها معاكم حو*روبات ابلات تسو*نامي والاعاصير غايتحركو .. سلم على عبد العالي والبقية مدواش معاها كان شاد واحد البوشيط فيدو كحلة سبق تبعو عبد العالي وتودة ورشيدة وعنبر وحياة اللور ..
- ستقبلاتهم المساعدة ݣلسو خدات الوريقات ديالهم دخلاتهم للعدول .. كانت كالسة وكتحس بالبرودة طالعة معاه واحد الخلعة ماحساتش بيها نهار الاول واش حيت كان عقلها خاوي ماعرفاتش علاش ديك الرهبة ورجفة ترجماتها برجليها ليكترعد وعينيها لي كترمش بزاف .. كل شوية كتسوط النفس كيطلع عندها بصعوبة
- عيط عليهم العدول دخل هو وهي موراه ومعاهم عبد العالي .. ݣلسو سول العدول على ولي أمرها
- عنبر : والديا ميتين كاينة غير خالتي وسيدة لي رباتني .. وعمي عبد العالي لي فعوض بابا ، خدا منهم البطاقات ديالهم سولها واش عندها شي شروط قالت بقات كتشوف ماعرفاتش واش هاد الزواج ايكتاب عليها تبقى فيه حياتها كاملة واش ممكن يجي نهار تبغيه فيه بقات كتشوفيه رجعات شافت فالعدول :
يحتارمني وعمرو يغدرني وماحدي مرتو عمرو يشوف فشي وحدة عمرو يخوني ولا يفكر يدير عليا شي مرة أخرى
- العدول : قصدك التعدد ؟ ولكن هداك شرع عطاه ليه الله ابنتي ( كتشوفيها من نظاظرو)
- عنبر : عارفاه حقو وشرع وكيما الشرع حلل ربعة حلل حتى الطلاق .. الى بغا يتزوج يطلقني ( شافت فيه كيشوفيها بكل برود مانطق بكلمة وحدة)
- العدول ( شاف فالروطال) اش كتݣول أولدي ؟
- الروطال ( بنفس البرود وملامح ممسوحة من اي مشاعر ) مكنخلطش ومادياليش .. انا معاها فلي بغاتو خاصها غاتكون ݣد كلمتها ( غمزها) .. مافهماتش كلامو وشنو بغا يقصد
- العدول : بنتي واش ستالمتي الصداق ديالك ؟
- عنبر ( بنفي ) مزال .. فتح الروطال ديك بوشيط ومد ليها جو كبير .. كتب العدول بلي ستالمات الصداق ديالها
- العدول : شحال غادي تحطي فماخر الصداق ؟
- عنبر : لا مابغيتش نحط والو .. ( مافكراتش فيها نهائيا بنسبة ليها حاجة عادية ولكن هو كان عينيه عليها ماينكرش بلي عجبو الحال .. مادوات معاه لا على صداق لا على مأخر الصداق ، وكون شي وحدة غاتحط شي عدد لي كبير حتى الى وقع طلاق ماتخرجش منها بيديها خاوية ولكن هي مدواتش على هادشي نهائيا حتى فدهاز ماتناقشاتش معاه فيه ولا قاتليه زيدني وخاصني وخاصني مخلياه هو يديرلي بغاه ..
- عطاهم سناو بارك ليهم عاطيهم الروسي باست يد عبد العالي وهو باس يدو بدورو خرجو من البيرو كراجل ومراتو .. تلقات ليهم رشيدة كتعنق فيهم تودة لي عينيها مغرغرين سلمات عليه حتى هو
- تودة : بنتي فعينيك عطيتك الروح ( عينيها باكيين) ..
- الروطال ( شد يديها ) عينيا ليها الالة فاطنة .. ضربة نلݣاها ومتلݣاهاش هي
- تودة ( تبسمات) : الله يرضي عليك أولدي الله يحفظكم من شر الخلق .. ( حط يدو على كتفها غادي معاها لبرا )
- داكشي لي وقع مع الواليدة مسحيه فيا
- تودة : انا ماتوصلش ليا بنتي ( بجدية وصرامة ) انا هانية عندي تخرج فيا ولكن بنتي لا اولدي واخا كتبقى مك هاديك ومكناش باغيين هادشي يوقع
- الروطال : عمرو يوقع ( بتأكيد ) نبصم ليك عليها مغاتعاودش
- تودة ( حركات عينيها بانت ليها عنبر كدوي معاهم اللور ) عاودات ليا عنبر على وديت هاد الزواج اولدي .. منكدبش علك انا مكنتش باغية كنخاف على بنتي وماكرهتهاش تنسى هادشي كامل ولكن نهار ݣاتليا بلي بغيتي دخل لهاد الزواج بنية صافية عجبني الحال الله يرحم من رباك وانا بيني وبينك ( نقصات من صوتها) ماكرهتش تبغيك ماتلقاش ماحسن منك وحتى انت ماتلقاش بحالها ماشي حيت بنتي ولكن خبزة يدي عارفاها ..
- الروطال ( هزهز براسو ) فيها خير .. قاطعهم رشيد وعزيز لي تقدمو عندهم باركو ليه وباركو للعنبر، بدا تيليفون تودة كيسوني حلات ساكها وهزات التيليفون جاوبات .. شوية رجعات عندهم :
رشيد ولدي نݣدو ندوزو عند رحيمة هي وليالي نجيبوهم .. السيد لي كان غايديهم خرجات ليه شي سخرة ..
- الروطال : انا غانسبقكم أنا وعنبر .. عنبر شافت فيه وشافت فتودة باش تدوي وتقول لا اخليها معانا ..
- تودة : صافي ابنتي سيري مع راجلك حنة نتبعوكم .. جاتها كلمة راجلك تقيلة وفشكل جاتها الضحكة من ديك الكلمة ..
- الروطال نعت لعزيز ورشيد الفيرما فين جات بضبط وسبق لطوموبيل .. تابعاه هي بخطوات تقيلة كدور تشوف فحياة لي تبسمات ليها وغمزاتها وقفات مأكدة مكايشوفها حد وهي تقلز ليها ضارت لقاتو كيشوفيها هاز حاجب ومنزل الثاني .. حنحنات وطلعات سادة الباب مكورة ..
- واقفة قبالتهم لابسة جلابة فصفر مع ساكها وصابو مخرجة عينيها فيهم :
دويو اتريكة شلاهبية تجمعتو هنا الحرايمي على خوه
- رقية ( وقفات بصوت عالي) حاشاااك جمعي داك الدرݣوم عندك هاجمة ياك شي باس مكاين
- خديجة : دار ولدي نهجم وقتما بغيت .. والهضرة ماشي معاك السم لي فيك ماف حد جاتك على الݣانة بحالك شادين الركنة وزامين داك الفم حشمي اعلى شيبك اشيبة العاصية
- إدريس ( وقف مكشكش) : غاتزمي داك الفم ولا غانهرسو ليك .. طغيتي وتجبرتي تي شكون انت فملك الله انت شنو كتكوني انت ميكروبة الويل الكحل هو انت ندمت على نهار فاش عرفتك فيك الحاجة المزيانة فهاد الزواج هوما دوك الولاد اما انت اميكة ديال الزبل عطات ريحتك
- خديجة ( كترعد ) : ياااك انا وليت ميكة ديال الزبل شحال هادي كنتي تموت عليا ودابا وليت زبل دوي دوي ارويجل ديال لاروب سيادك همة وشان وانت عمرك غاتبقى اللور اللور لي مدرتيه انت داروه ولادك ولادك لي حسن منك بحالك بحال تريكتك سبحان الله العظيم الويل محزم بالويل
- عماد ( خرج عينيه ) : الوالييييدة .. براااكة برااااكة ماكتعيايش مكتهديش مكترتاحيش بحالك بحال الناس ماشتيش راسك عيقتي شوية جريتي على ولادك كاملين بفعايلك جريتي على بنتك مسكينة وحݣرتيها ودابا جايا تنغصيها على ولدك راه حشومة وعيب
- علال ( وقف بصرامة عاقد غوباشتو) غادي تهزي قشك وغاتخرجي من هنا وغاتقيلينا عليك على وجه ولادك وعلى وجه العشرة لي انت مدرتيش بيها ابنتي مغانعطيكش خو جوابك ونزل منك سيري بحالك الله يرض بيك
- خديجة ( كتشوفيهم بنظرات ديال الاحتقار محاملة حتى واحد فيهم كلهم كتشوفيهم شوفة وحدة ) تلويتو عليه وعمرتو ليه راسو يا والله لا بقات فشي حد فيكم انا نقوليكم والله هاد الزواج لا كمل
- دنيا : وغير تهناي شتي اخالتي خديجة هاد الوقت لي انت كتعرعري فيه .. راه وا تكاتبو بغيتي تشوفي .. وقفات التيليفون قبالت وجها مصوراهم حياة فاش كانو كيتكاتبو ) صافي تزوجو ماعندك ماديري مبارك ومسعود ( كتزيد تحكر وتزيد تقلي ليها السم مكاتقدش تخبيها فقلبها مكتحملهاش وعمرها حملاتها حياتها كلها عارفاها خبيثة ومكدوزش الفرصة وتكون وتنقص منها وتسمعها الهضرة وهادشي كيزيد يخليها مكتحملش مرات عمها ..
- إدريس : ماعندك مديري هنا سيري بحالك كنين محاملة حد وقلبك عامر بشر جايا ناوية على خزيت وباغية تفرتكي الشمل سيري بحالك اخديجة سيري وخليني ساكت بلاما نجبد الضواسة القدام وبلاما ندوي ونجرحك واخا انت راه جرحتينا وغلطتي وغرقتي سيري أخديجة ..
- خديجة كتشوفيه بالعة ريقها دماغها نيشان مشا للهدا زمان وشنو قاصد إدريس تنهدات تنهيدة طويلة مهزهزة راسها :
واخا اسي أدريس واخا والله لا بقات فيا غادي نفكرك ..
- إدريس : دابا نشوفو شكون غايفكر الثاني .. سيري الله يعرضك السلامة .. خنزرات فيهم عطاتو بظهر وخرجات كتخبط رجليها مع الارض بعصبية ركبات فطوموبيلتها باغية تنتف راسها وتغوت بحر جهدها ديمارات الطوموبيل ومشات من تم ..
- علال ( ݣلس) أستغفر الله العظيم لا حول ولا قوة إلا بالله العلي العظيم
- رقية ( كتحرك فراسها) كنݣولها ليكم عييت نݣولها هاديك راه شيطانة زلمومية اللفعة
- علال ( شاف فعماد وعصام لي كانو غير ساكتين وكيشوفو ) رقيييية صافي دوينا مشات الله يجل البراكة بلاكة من كترت اللغى نهار ولدنا هدا حشومة وعيب هادشي لي كيوقع ماشي من صوابنا وماشي من ترابينا
- عماد ( وقف وخرج على برا تابعو عصام وطارق ) .. ماجدة غير ساهية هزات راسها فيسرى ودنيا :
شتو شنو كيوقع شتو .. مافهمتش انا ماما مالها وحق الله شنو بغات ولاش باغية توصل ماعرفتش
- يسرى ( كدوز ليها على ظهرها ) بردي مديريش فبالك الله يهديها وصافي
- دنيا ( جاعرة ) عمرها تهدا اتبقى هي هي ( غمزاتها يسرى) متغمزينيش عارفاها مها ولكن كيضرني خاطري اويلي شيطانة جايا تخربها على ولدها هاديك ام هاديك والله ماتستاهل هاد الولاد بالله العظيم بحالها بحال ديك لي ولداتنا ولاحتنا نيت .. ( ناضت من حداهم داخلة للكوزينة معصبة) ..
- يسرى : ماتديهاش على دنيا راكي عارفة كيدايرة لي فقلبها على لسانها خضرة مكتوزنش
- ماجدة : لا راه عندها الصح ماكدباتش ماما راه مافهمتش التركيبة ديالها بعد المرات كنسول راسي واش حنا نيت ولادها والدانا ولكن هي مع كولشي هكا من غير صحاباتها وعائلتها كتولي وحدة اخرى تمنيت كون تعاملنا بحالهم ولكن والو
- يسرى : الله يهديها مديريش فبالك .. تسمع صوت على برا ديال الترحيب .. وقفات ماجدة ويسرى تحل الباب وتمات داخلة تودة ورشيدة رحيمة وليالي عبد العالي وعزيز وبهيجة .. ستقبلهم علال ورقية بالابتسامة لي ترسمات على وجهم لايحين داكشي لي وقع ورا ظهرهم .. عبد الخالق عينيه ونظراتو ليها كانو بحال شي مراهق يلاه فريعان الشباب ديالو واحد الحر**ب كانت فالداخل ديالو جيهادتها ماكرهش يغوت ويقوليها انا هو السيد لي تزوج بيك السيد الاول ليك ولكن خايف ومقاداش يديرها ويخطوي الخطوة اللولة ..
- العيالات ݣلسو كاملين فصالة والرجال كلسو فالصالة الأخرى ..
- تودة : يحسابلي عنبر او ولدي فاروق ايكونو سبقونا ساعة مزال ماوصلوش
- رقية ( كضحك ) ولاد اليوم هوما هادوك دابا منين دارو تكاتيب كاعما يجيوك دابا ابنيتي احيانة على شواطن كان خاصهم ايضربو الكاغيط ..
- تودة ( كضحك) وبصح والله ماكدبتي الالة رقية الله يتاويهم للخير ياربي ..
- الكل : اللهم آمين ..
- مانطقات بكلمة وحدة وهي حداه نزل عليها واحد الصقيل مانزلش عليها حتى فاش كانو كيكونو بزوج قبل ..
- دور راسو شافيها نزل عينيها ليديها لي كيترعدو .. شهقات ونقزات من بلاصتها فاش حسات بيدها تجرات من حجرها وتحطات على پامور حاط عليها يدو وسايݣ
- عنبر ( خرجات عينيها كتشوفيه مصدومة من تصرف لي دار ) اويلي طلق ليا يدي واش هبلتي ولا مالك رجوع لله
- الروطال ( ببرود قات**ل زايد عليه نغزة من الاستمتاع) تركني مالنا داير شيحاجة حرام اشريفة راك مرتي رجوع لله تاشوف هاد الوقيدة الزاندة
- عنبر : فاروووق( كترمش بزربة) واش اتبقى شاد ليا فيدي بحال غانهرب طلق ليا يدي افارووق اويلي على راجل
- الروطال : عند العدول ݣلستي كترطاي تخوني ماتخوني ودابا طلق ريحي لأرض انخرج فمك .. ( خرج فيها عينيه) هاي هاي على الوقيدة تحجبات جيتي بحال المعيلقة ديال الميكة
- عنبر ( مارضاتش ) بزاف عليك ولهلا يحييك ويطول الزمان عليك .. جيت فنة غير السم لي كيدويك وزايدون مادرتوش على قبلك درتو لراسي حيت قالها ليا راسي
- الروطال ( بإبتسامة ) شكون دواك ولا ݣالك شيحاجة ابنتي تي مال مك كطيري بحال الزيت البايتة
- عنبر : ودابا غاطلق يدي
- الروطال ( بنفي البرود ) مابغيتش حتى يݣولها ليا مخي مع مخي مريض كيفتي عليا بلانات خاويين وكيعجبوني كيجيوني على الݣانة بحال دابا ( غمزها) ..
- عنبر : اشايطة عليك ديك العين وتغمز بيها على بنادم كيم داير
- الروطال : حتى تجربي وتحكمي الفنون ( غمزها) .. ، عصبها مجاوباتوش يدها بقات محبوسة ومسجونة فيدو
- الروطال ( شافيها متنغم ومنشوي على خدودها الحمرين وعلى حشوميتها وعصبيتها لي غاتبخ دم كان حاس بيها وعارفها مامرتاحاش ) ومبروك علينا ازينة تبريحة وليتي المدام دابا ( ضارت شافت فيه) كنخمم منين غانبداك دابا
- عنبر ( خرجات فيه عينيها بالعة ريقها ) كيفاش منين غاتبداني اويلي
- الروطال : علاش ؟ ياك مرتي حلالا طيبا كنديرو العيب هنا !!
- عنبر : فاروق ( بجدية ) مابقاش تضحك
- الروطال : تي كيفاش كنضحك او واش بغيتيني على اخر يامي نمشي لصابونة دالكف لا اكبيدة حشومة فحقي وفحقك راجل هذا لي معاك ماشي پوپية
- عنبر ( دوزات لسانها على فمها تعصبات وتخلعات ونفس الوقت غلباتها الضحكة ) واش هترتي ولا مالك
- الروطال : اه هترت وترترت وليت كنبربر ..عاد كنتي تݣولي مابغيتوش يخوني وتعدد وكدا وراه خاصك تلبي ليا حقوقي اعنيبيرتي
- عنبر : هههههههه تفوووو بقى كتحلم انت راه شاكة فيك هبيل والله الى قالك منين غانبداك راه انت فبيت وانا فبيت
- الروطال : وشنو نضيعو فدوك تويشيات لي شريتي هالمخرݣ هاريش استرينݣ حشومة .. راه نعجبك والله ماتسخاي
- عنبر ( نطرات يدها ) دينا لدار دينا راه تعطلنا عليهم انا راه حماقيتي البعابع لاواه .. والله لا حطيتي عليا يدك
- الروطال ( هزهز راسو ) دابا نشوفو العودة ديالي ليام بيناتنا شكون غيجي عد لاخور انا ولا أنتي ( غمزها ) ..
- مكانتش حاملة هاد التصرفات ومعصبها مكايعجبهاش الضحك الباسل وعارفاه مزيان بلي بلعاني كيدير هكا زكارة فيها .. بينها وبين راسها مستحيل تكون شيحاجة بيناتهم مايمكن تفتح قلبها وقلبها مجروح ومضرور راه انورمال تبغي من جديد وهي مزال مطفاتش نار الكية والغدر ( شافت فيه ونطقات بجدية ) فاروق خاصنا ندويو
- الروطال لمح فكلامها الجدية .. دور الطوموبيل او وقفها فجنب الطريق مسكتها ضار شافيها :
دوي ..
- عنبر ( كتحاول توصل ليه الفكرة ) هاد الزواج بجوج بينا فالأول دخلنا ليه اعلى وديت عماد .. ولكن من بعد دخلنا ليه بنية صافية ديال الصح ولكن انا راه منقدش نعطيك شيحاجة .. حيت ديك الحاجة كتكون منين جوج كيكونو كيحسو بشيحاجة بين بعضياتهم وانا وانت مابيناتنا والو أصلا مكنعرف عليك والو مكتعرف عليا والو مكنعرفش الكراكتير ديالك كيفاش كتفكر بزاف دالحوايج وحتى انت هكاك فهمتي
- الروطال ( بنفس الملامح الباردة ) كملي
- عنبر : انا داز عليا العذاب داك بنادم ( بلعات ريقها ) كنت بصح كنبغيه بحال الى قلتي حليت عليه عينيا فاش ماتو والديا وأصعب حاجة توقع لشي واحد هو بين ليلة ونهار يعرف بلي داك بنادم غدرك طلقك وانت معارفاش ودار يدو فيد طبيب وزور شهادة الطبية ويرضك عاݣرة باش يخليك تحسي بنقص هادشي راه والله مساهل ..
- الروطال ( صغر عينيه فيها مسولها سؤال مكانتش ضانة غايسولو ليها ) مزال كتبغيه ؟
- عنبر ( ضحكات بإستهزاء ) نبغيه ودارفيا هادشي كامل .. فاروق انا نهار كنبغي شي حد راه كيبقى يبانليا غير هو واخا تجيب ألف واحد ولكن نهار داك الشخص يغلط فحقي كنحطو سطل بلا تقرقيب نبكي عليه 3 يام ونجمع الوقفة ، وداك بنادم منقدش نحطو سطل بلا تقرقيب ونكمل حياتي عادي بحال الى ماوقع والو حيت ماشي غلط فحقي بشي حاجة عادية لا الغدر خايب راه بحال الى هز موس ورشݣو فظهري ومنبرد حتى نرجعها ليه بضوبل
- الروطال : كملي ..
- عنبر : داكشي باش انا منقدش نكمل عادي ونفتح قلبي وانا قلبي مريض خاص قلبي يبرا باش نقد نبدى صفحة زوينة وجديدة انا عارفة ( بلعت ريقها) بلي انت راجل الى مكنتيش قاد تقدر طلقني الوقت لي بغيتي
- الروطال ( عض على باطن حنكو ) يلاه خارجين من عند العدول وكدوي على الطلاق اشريفة
- عنبر : انا قلت ليك الى مكنتيش قادر تصبر ف ( قاطعها )
- الروطال : ضاحك عليك راسك بلي غانموت الى ما مسيتك .. نفسي عزيزة أبنت الحاج نحكو مع موس ماضي ومايتحطش عليك
- عنبر : فارووق متبقاش تغوت عليا .. انا كندوي معاك بلوجيك داكشي إلى مكانوش جوج كيبغيو بعضياتهم راه ماعندو معنى انا قلت ليك الى مكنتيش قادر تصبر عليا نبرى وقلبي يصفى ونقد نبدى من جديد هادشي لي قصدت وزايدون انا مزال معاشرتك ولا انت عاشرتيني يقدر تكون انت مكتعاشرش
- الروطال ( بنصف إبتسامة ) لا باين العربون شكون لي مكايتعاشر ساليتي البلابلا ديالك
- عنبر ( مارضاتش ) انا حمارة كنتناقش معاك .. ( دورات وجها وهو ديمارا مكسيري للدار ..
- الطريق كلها وهوما ساكتين هو عاقد غوباشتو وهي مرة مرة تلوح نص عينها تشوف فيه .. ماقصدات والو كانت باغية تفهمو راه مستحيل تبغي شي حد بين ليلة ونهار وهي داز عليها العذاب جرحها جديد ومايمكنش تعطيه راسها وتخليه يقيسها الى مكان بيناتهم مشاعر ماشي ضروري يوصل للحب أقل حاجة .. يكون واحد التقارب واحد التماس تحس بيه جيهتو ..
- وصلو للفيرما بلاصة طوموبيل نزل هو وهي سد الباب وقبل لا يدخلو وقفها بكلامو ..
- الروطال : با ( علال) ومي متبيني والو ݣدامهم هوما معارفين حتى لعبة من لي واقع الله يرضي عليك .. منبغي حتى بنادم يغلط فحقهم وينغص عليهم الفرحة لي حاسين بيها من جيهتي وجيهتك ..
- عنبر : واش بنت ليك انا بنت الحرام ( بزعاف) وسلاولي شوية عيقتي عليا وزوينة هادي انا بالعكس عزازين عليا عائلتك كلهم عزازين عليا
- الروطال ( بإستهزاء) : حتى ليا أنا .. الباب كان مبسم دفعو مخليها وراه كتغزل فالفقصة لي فقصها وعصبها جاها ماعندوش مع الحوار نهائيا دغية كيسدها ويقمعها ..
- خرجات دنيا من الكوزينة هازة بلاطو فيه زوج كيسان وماجدة هازة بلاطو فيه التمر غير دخل الروطال او وراه عنبر .. نزلات رقية والبقية كلهم كيصليو على النبي :
- الصلاة والسلام على رسول الله الى جاه الى جاه سيدنا محمد الله مع جاه العالي روروروروروروروروروروييييييييييي .. مدو ليه كاس ديال الحليب خداه من عندهم ضار عندها مشربها الحليب وموكلها التمر وهي بدورها شرباتو الحليب او وكلاتو التمر ..
- عنبر ( هزات تمرة وحدة وكلاتها لماجدة وتانية وكلاتها لحياة وثالثة للدنيا لي مزال بلا زواج .. ومن كاسها شربو منو البنات لي مزال مادين يديهم للحنة ..)
- رقية ( بفرحة ) الله يكمل عليكم ابنت بالخير الله يبعد عليكم شر الخلق ويبعد عليكم الغضب وشيطان ..
- عنبر ( عنقاتها ) : اللهم آمين اخالتي رقية
- رقية ( بمزاح ) تي حيدي عليا خالتي ݣولي ليا مي بحالك بحالهم ابنيتي .. ( شافت فيسرى ) عطيني ابنتي ديك البواطة مشات يسرى حدا المرايا جابت بواطة حمرة عطاتها لجداتها تحت انظار الكل فتحاتها وجبدات سلسلة ديال الذهب غليضة وفيها علاقة مشبكة كبيبرة شوية ) ابنتي هاكي ركبيها انا يديا يترعدو
- عنبر ( باست ليها يديها ) الله يخلي ليك صحيحتك أمي رقية .. خدات من عندها السلسلة دارتها ليها ماجدة تحت انظار الروطال لي خلاهم ودخل للصالة عند الرجال باركو ليها وتوجهات معاهم للصالة لي فيها العيالات باركات ليها رحيمة وليالي حطو الحلويات والعصائر الحليب حتى هو والفاكية ..
- مجمعين وجابدين شلا مواضيع منهم زواج يسرى العقد ديالها لي غايكون من هنا ل يوماين أما دبي*حة غاتكون فسوق الاربعاء كان محسن زربان حتى هو ..
- سونا الباب فتحات المساعدة كان راشد لي دخل نيشان عند الرجال
- عصام : عندكم الزهر ياخويا لي ماجيتوش قبل تفرج فروبلا لي ناضت
- عماد ( خنزر فيه ) والو زعمة وتݣول واش تݣد تسد فمك حتى دوز هاد الليلة
- الروطال ( قوس حواجبو ) أشم تم ؟
- عماد : من بعد
- الروطال : دوي أش تم ؟؟
- عصام : جات الواليدة نوضاتها ومشات .. عرقات لينا من طرف حتى لطرف
- الروطال ( تعصب) مابغاتش دير عقلها والو كنݣول دابا دير عقلها وتنعل شيطان والو زعمة مافهمتش ؟ واش حنا ولادها ولا عديانها
- طارق ( خرج فيه عينيه ) صافي اصاحبي ماشي وقتها غيرها
- الروطال دوز يدو على لحيتو تعصب كولشي تخلط عليه كيحس براسو ماشي نورمال .. كيرعد فرجليه بعصبية باغي يبخ الدم مافهمش فين باغية توصل هو باغي يتزوج واش يتزوج بلي بغات هي غير باش تبقى هي مرتاحة واش هاد الكره لي كتحس بيه من جيهة عائلتو اش دارو ليها عمرهم عݣروها ولا قاسوها بشي كلمة ناقصة ..
- باه كان كيدوي مع عبد العالي وعبد الخالق فبزاف ديال الحوايج الفيلا ولات كلها ريحة البخور ناض من تم توجه للعند ماجدة كانت واقفة هي وعنبر
- الروطال : براكة من هاد العجعاجة ديال البخور ولينا فسيد
- عنبر : انا لي قلت ليها تزيدو كتعجبني ريحتو بالعكس مكيدير حساسية مكايخنق
- الروطال ( شافيها ورجع شاف فماجدة ) أجي معايا بغيتك .. تبعاتو ماجدة مخلي عنبر وراه ماعبرها محاشاها ليها مجاوبها بغات تاكل جنابها
- حياة : مالك انت شتك ماشي حتى لتم ؟
- عنبر : والو ماماليش بعد المرات كيقوليا راسي بحال الى تسرعت وقبلت بهاد الزواج وحق الله العظيم
- حياة : اويلي رجوع لله علاش اش واقع عاود ؟
- عنبر : كنقسم لك بالله ماكرهت نزيد لشي قنت انبرد العافية لي شاعلة ليا فقلبي واحد كتدوي معاه بشوية وتحاوري معاه .. وهو عاجبو راسو ونافخ عليا ريشو بناقص كاع ، .. سونا الباب ودخلات رجاء مادة كرشها ويونس دخل للصالة درجال وهي جات لعندهم ..
- رجاء ( عنقات عنبر لي تبسمات إبتسامة باهتة) مبارك ومسعود ازين الله يكمل عليكم بالخير ياربي بدراري والهراري
- عنبر : اللهم آمين ازين الله يبارك فيك
- رجاء ( بفرحة ) يونس خلاني نبات عندكم هاد الليلة .. باش نيت تݣولو ليا شنو خاصني ندير راه مانسيتش
- حياة : كوني هانية وزيدي كلسي ماتبقايش واقفة .. رجعو للصالة ݣلسو تودة مجمعة مع رقية ݣولها وضحك عليها لقاو الغفلة كلسات تعاود ليها على خديجة
- رقية : ايييه ابنيتي ولادي مساكن ماعدهم الزهر فالعيالات وتݣول .. يلاه جات لهنا حيحات جمعاتنا كاملين عايراتني وعايرت ولادها كلهم جمعاتهم
- تودة : انا لي بقات فيا الالة رقية غير ديك البنية دراري مزال راهم رجالة ديك البنية مسكينة لي صعيب عليها الحال .. ماتلݣاش مها فجنبها هادي مالها هبلت انا راه عاودت لك أش دارت فاش جات هاجمة علينا
- رقية : هتديك ابنيتي راها هبيلة فيهم شي عرق ديال الهبل يمكن تريكتهم انا من نهار لول ماحملتها ماقبلتها لا هي لا مرت ولدي عبد الخالق
- تودة : اه كنت سمعت شي تشاش بلي حتى هوما مطلقين يمكن ؟
- رقية : احيانة ابنيتي كية ولدي عبد الخالق فين تبان ديال دريس تزوج بيها كان باغيها مسيكين ماخلا مجاب ليها فالأخر غرقاتو ولاد وسمحات فيه طلبات الطلاق حيت كانت باغية ولد عمتها ولا خالتها ولا ماعرفت لجد بوهم .. ايييه على وليدي عمرو فرح نهار لي ݣال تݣعد ليه الميمون وسعد وبغا واحد العويتقة رجع لݣا غبر ليها الأتر
- تودة ( تنهدات) مسكين ماعندو زهر وربى ولادو بوحدو ؟
- رقية : ايييه ابنيتي بناتو رباهم وكبرهم وكنت انا نمشي لهم نݣابلهم مكان حيلتو للخدمة ولا دار ديك الصغيرة دونيا را كانت غاتموت ليه بسبتها مسيكين مابقى تزوج كان باغي واحد البنت ومسيكين كانت بنيتو مرضات مرضة خايبة ( تنهدات) ايوا رجع يشوف ديك السيدة مابقاش لقاها
- تودة ( كتهزهز فراسها ) مامكتاباش ليه الالة رقية الله يخلي ليه وليداتو مسكين ..
- رقية : اللهم آمين ابنيتي .. بقاو مكملين على جماعتهم تسمع صوت الرجال كثير كانو دخلو الطلبة .. مجاو حتى قرب المغرب عاد جو
- عنبر ( شادة على جنبها ) جاني الجوع أصاحبتي كون جبتي لينا اشوية ديال لاصوص اصاحبتي فالخبز ..
- دنيا : والله حتى نجيبها ليك ( وقفاتها) .. لالا اصاحبتي حشومة بلاتي نمشي معاك انا .. لبسات بلغتها غادية كتسلت هي وياها كتحاول ما أمكن تفادة الصالة ديال الرجال .. صوت القرآن بدا كيتسمع من أصوات جميلة وحنينة أجواء زوينة كانت حاضرة عائلة جامعهم الحب والمودة والاحترام لي بيناتهم كبير ..
- تبعات عنبر دنيا للكوزينة كان بابها مسدود .. حلاتو دنيا ودخلو كانت كوزينة كبيرة بزاف بلدية فيها زوج سراجم للجردة .. زوج ديال الطيابات حاطين طناجر كبار ريحة الدجاج بدغميرة كتحرك الهوايش ..
- .... : هادي هي العروسة ( الطيابة )
- دنيا : هي هادي وجاها جوع جبتها لعندكم ..
.... : مرحبا ابنيتي ومبارك ومسعود .. البسطيلة مغانقدش نعطيك منها بغيتي دجاج ولا اللحم ؟
- عنبر ( ضحكات) انا ماكرهتهم بزوج .. جاني جوع ومع البرد كملت لي خاص .. ناضت وحدة فطيابات هزات طبسيل حطات ليها من الدجاج واللحم وعطاتها الخبز
.... ( موجهة كلامها للدنيا ) ابنيتي السرباية جبتوهم ولالا ؟
- دنيا : كاين واحد زوج دراري هوما لي غايتكلفو حيت غير العائلة راكي عارفة
.... : واخا أبنتي اللهم يسر ، هزات عنبر طبسيلها كتقلب فين تمشي تاكل الجردة كاين البرد
- عنبر : دنيا فين غانمشي ناكل ؟
- دنيا : اجي أجي .. خرجو من تم توجهو للدروج طلعو فتحات باب واحد البيت ) دخلي كولي هنا حتى تسالي ونزلي .. خلاتها تم ونزلات هي
- حطات داك الطبسيل فوق ديك الطبلة زولات جلابتها بقات بالقفطان زولات الشال حطاتو وبدات كتاكل وتبنن عاد حسات بالروح رجعات ليها ساطت فداك الطبسيل مرجعة راسها اللور متنهدة تنهيدة طويلة براحة ناضت من تم كتقلب على الحمام لقاتو دخلات ليه كان محطوطين فيه برودويات ديال الرجال .. من شومبوان من كولشي مدات يديها غسلاتهم وشللات فمها مسحات بالفوطة لي لقات تم كانت نقية وحطاتها مدورة عينيها فداك الحمام عاد رضات ليه البال كيفاش داير كبير وموديرن ..
- خرجات من تم عاد سقات عينيها فديكور دالبيت وفراشو .. ديكورو كان خطير جاها الفضول طلعات زوج دريجات متوجهة لسرجم لي كان كلو زاج كطل منو الديكورات لي محطوطين فوق الكوافوز ديال الخشب ..
- عنبر : وبيت هذا واشمن بيت .. ، ݣلسات على نموسية كتزعلل مسرحة فوق منها مبسمة :
نموسية هادي واشمن نموسية ..
- بزربة رجعتي فكلامك ؟!! ..
- قفزات من بلاصتها مخلوعة وجها لوجهو .. واقف كيشوفيها ببرود من راسها لرجليها لشعرها لي كان مطلوق
- عنبر ( بلعات ريقها جامعة الوقفة ) دنيا لي جابتني لهنا كنت بغيت ناكول ودخلاتني لهاد البيت
- الروطال : كليتي خرجي ماشي تبوردي فالبيت كيبغيتي
- عنبر : بيت ديال الذهب راه بيت بحالو بحال كاع البيوت سبحان الله
- الروطال ( بنفس البرود) ساليتي ماكلتك تݣدي تخرجي .. عصبها ونيرڤاها مشات للجلابتها لاحتها عليها وزيفها دارتو مامقاداهش هزات داك الطبسيل وقبل لا تخرج وقفها بكلامو ..
- البيت الثاني غايكون ديالك باش هاد المرة متغلطيش ودخلي لبيوت الناس
- عنبر : انا ماغلطش ( خنزرات فيه ) راه قلت ليك دنيا لي جابتني لهنا وكون عرفت بلي هذا بيتك ماندخلش ليه ومنحط فيه رجلي مامشوݣة لا ليه لا ليك .. خرجات من الباب لي كان محلول مخزفها :
عندو الزهر كاينين الناس اما غانزل عليه بهاد الطبسيل اندمغو نوريه كوينيدي لاخر .
- تحط العشا ديال الرجال بوحدهم والعيالات بوحدهم .. ماكلاتش بزاف فاللحم ولا دجاج حيت كلاتو حتى تحطات البسطيلة عاد كلات منها .. ختموها الطلبة بدعاء للازواج بزوج عاد خرجو مشاو ..
- عبد العالي : ونوضو حنا هو هذا اسي علال
- علال : ݣلسو باتو اسي عبد العالي
- عبد العالي : لا منصيبش اسي علال خاصنا نمشيو إن شاء الله ..
- علال : وإن شاء الله الجمعة مرحبا بيكم عندنا انت والعائلة اسي عبد العالي
- عبد العالي ( وقف) إن شاء الله اسي علال هو هدا اسيادنا الله يجعل كولشي مبارك ومسعود والله يكمل بالخير والله يجعلو فرح دايم .. الكل قال آمين سلم عليهم كاملين وخرج هو وعزيز ورشيد كيعيط بإسم خديجة
- تودة ( وقفات ) هي هادي الالة رقية خاصنا نمشيو ..
- رقية : اويلي مغاتباتوش ؟
- تودة : لاواه الالة رقية حتى حنا تابعنا شحال من حاجة .. راكي عارفة مابقا والو لنهار الجمعة الى بغا الله إن شاء الله
- رقية : وخليو ليا عروستي ( عنقات عنبر لي عنقاتها بدورها )
- تودة : ههههه عرستك ومنكم وبنتكم الالة رقية الله يخلي ليك صحيحتك .. قدات عنبر شالها خرجو كاملين من الصالون سلمات على إدريس وعلى الحاج وعبد الخالق سبقاتهم على برا .. جا عندها عماد لي وقف معاها :
مبارك ومسعود امرت خويا
- عنبر ( شافت فيه بنص عين ) بااز كتريݣل هداك خوك اخرتها انخبطو قبل مانخبط داك الميكروب .. اجي دابا هوما ايمتا غادي يهبطو للمغرب
- عماد : ماعرفتش الصراحة .. بغيت غانعلمك بلي غانجيب ليك أمير نهار الخميس إن شاء الله
- عنبر ( بلعات ريقها ) سميتو امير ؟
- عماد ( هز براسو مدوز يدو على شعرو ) عندو شهر مسيكين .. غادي نجيب ليك واحد السيدة هي لي غاتقابلو
- عنبر : وعلاش ؟ حتى خالتي رقية قبيلات سولات عليه قلت ليها راه بقا المربية ياربي تسمح ليا انا جبتها امن راسي ولكن علاش ؟
- عماد : مديرة ديال الجمعية هدا الشرط ديالها تكون مربية باش هكا يبقاو هانيين من جيهتو .. غير هو ݣدام البشار خاص تبقاي تهزيه تعطيه رضاعتو راكي عارفة المربية غاتوريك كولشي
- عنبر ( تنهدات ) صافي إن شاء الله .. مقابلهم من بعيد كيتحتو توجه لعندهم واقف عليهم
- سبقيني لطوموبيل غانوصلكم
- عنبر : بلاما تعدب راسك غانرجع مع رشيد ولا عزيز ..
- الروطال ( حرك الفك ديالو بعصبية ) مرتي انا وقيلة ماشي مرت رشيد ولا عزيز أشريفة شتك كتنساي راسك
- عنبر : انا مابغيتكش غير تعدب
- الروطال : ماشكيتش عليك همي سيري سبقيني انا جاي .. بقات كتشوفيه حركات راسها بلاحولة وسبقاتو لطوموبيلتو حلاتها وطلعات سادة عليها ..
بانت ليها مها وحياة ورشيدة ركبو مع رشيد فطوموبيلتو والبقية ركبو مع عزيز من غير ليالي ورحيمة ..
- رحيمة : بلاما تعذب راسك اولدي
- راشد : لا مكاين حتى عذاب انا نوصلكم ( كيشوف فليالي لي قالبة وجها هزات حاجبها وشافت فرحيمة )
- ليالي : خالتي هايونس ورجاء ايمشيو بوحدهم نمشيو معاهم ( شافت فيه ) بلاما تعدب راسك اخويا شكرا بزاف ( ببرود ) جرات رحيمة وتوجهو لعند يونس ورجاء ركبو معاهم ..
- راكبة معاه فطوموبيل بوحديتهم الراس فراس .. قالبة وجها شافيها بنص عين :
شفتي بيتك ولالا ؟
- عنبر : لا ماشتوش حتى لمن بعد إن شاء الله
- الروطال : شنو كنتي داوية انت وعماد ؟
- عنبر ( شافت فيه ) والو دوينا غير على الوليد لي غايجيب ليا .. قالي ايجيبو نهار الخميس وغتجي معاه مربية
- الروطال : وعلاش المربية مالك أنتي ؟
- عنبر : وهادشي لي قال .. قالك المديرة كان هذا هو الشرط ديالها باش يديه تكون معاه المربية حيت راه مغادي تيق بطبيعة الحال
- الروطال : ديك النمرة لي عندك عندمن كاينة ؟
- عنبر : عند الدار وعند عزيز ورشيد صافي علاش ؟
- الروطال ( حك جنب نيفو ) حتى نجيب ليك نمرة جديدة .. انت داك تيليفون خليه لبنت خالتك نجيب ليك تيليفون بكارطو
- عنبر ( بإستغراب) ولكن علاش افاروق اتجيب ليا نمرة جديدة .. وعلى هاد الحساب حتى انت دير نمرة جديدة
- الروطال ( هز بكتافو ) درتها ماتسنيتكش انت تݣوليها
- عنبر : انا نمرتي مكاينة عند تاوحد حيت كانت فيها الخدمة صافي
- الروطال ( شافيها بجنب عينو ) وانت ديك الخدمة ناوية تكملي فيها ؟
- عنبر : لا عندي جينيريك انسجلو صافي منقدش نبقى مكملة
- الروطال ( هز حاجب ونزل الثاني) سبحان الله لي شافك شحال هذا مايݣولش تسمحي فيها
- عنبر ( تقادات فالݣلسة كتشوفيه ) فاروق اباش نتفاهمو انا الغنا ماشي انا لي ختاريتو واه كيعجبني وكنت كنسمع للعيوط شحال هذا ولكن انا مابغيتش هاد دومين .. طرات واحد الحاجة خلاتني ندخل ليه كنت انخرج منو انخرج وزدت منين طبيب منع عليا السهير وصوت العالي حيت راسي كيضرني داكشي باش فهمتي دابا ..
- الروطال ( عوج فمو ) مزيان
- عنبر : انا مافهمتكش علاش كدير بحال هكا الحوار ماعندكش والله ماعندك .. كندويو فحاجة وانت هاز عليا قنوفتك الى ماعجبك الحال مزال الحال نبطلو هاد الزواج حنا كاع
- الروطال ( حبس الطوموبيل بجهد جنب الطريق حتى تحبس النفس ديالها مع هاد الحبسة تخلعات شافت فيه شادة على قلبها ) غانخبط مك هاد المرة الى خرجتيها على فمك ..
- عنبر : واش انت حماقيتي واش باغي تقتلنا ولا مالك .. وماتبقاش تعاير
- الروطال : اش بغيتي الق**** فرعتي ليا ك*** رصاي على بلان واحد ماتبقايش ترطاي
- عنبر خرجات فيه عينيها من الكلام لي كيقول .. زولات السمطة وعلى غفلو منو حلات الباب ونزلات .. البرد كيطير غادية غير الخلا وليل عصبها ماكرهاتش دمغو .. تجرات جرة وحدة من دراعها حتى كانت يدها اتحيد من بلاصتها
- الروطال ( صاعر عصباتو العشية كلها وهو متحكم فراسو وزادت كملات ليه لي خاص ) انفرع موك الى مزال عاودتيها برب الجليل هاد القل*** كامل طلع ليا فصحتي متزيديش تكملي على جدي
- عنبر ( غواتو ماتحملاتوش ) وشكون انت لي تبقى تغوت عليا انت شكون .. وتخسر معايا الهضرة انت شكون المرض عطيني بتيساع انمشي بوحدي ..
- الروطال : تزيدي على رجليك ( من تحت سنانو مغزز عليها ) ولا تمشي بلا بيهم
- عنبر ( كلها كترعد كتقلب بعينيها على شي حاجة تهزها تلبقها ليه لراسو مالقات والو ) بغيت ليك العجز الجنسي المصعور لاخور تفوو .. ضربات فيه غادية تبعها بخطوة وحدة مع ݣلسات دار ليها تغمضو ليه عينيه عاض على لسانو
- عاوديها
- عنبر ( ربعات يديها كتشوف قدامها يديها باردين عليها )
- الروطال : عاوديها كتݣولي تفو
.. تماطا للفمها شدو بجغو بيدو مقصحها .. حطات يدها على يدو كتحاول دفعو كتحس بفمها غايتحيد من بلاصتو .. كمش ليها فمها كمشة وحدة بحال الى غايحيدو ليها من بلاصتو .. فنفس اللحظة طار عليها بفمو ملصقو مع شفايفها .. مكانتش بوسة حنينة ولا بوسة طويلة ولا بوسة خفيفة كانت عضة بشفايفو وفمو جامع ليها فمها ولسانها بزوج .. غمضات عينيها صادرة انين ديال الألم ..
- بعد عليها مخليها شفايفها كيوزوزو ونقطة صغيرة ديال الدم فطرف شفايفها عينيها دمعو ويديها بجوج حطاتهم على شفايفهم كتحاول تبرد الحر ديال العضة .. كتشوفيه شوفة العما فظلمة بعد منها ساد الباب .. بصوتو الرجولي وبتهديد :
هاد المرة خرجات سالكة .. المرة الجايا انحيدو لمك من جدر ( ديمارا تحت أنظارها وكسيرا ) ..
- حبس الطوموبيل قدام باب دارهم .. زولات السمكة قبل لا يهضر حلات الباب ونزلات خابطة الباب خبطة ديال الغدايد خلاتو عاض على لسانو مبرد فيه الحر فتحات الباب وخبطاتو .. حرك راسو بلاحولة ديمارا ومشا ..
- طلعات مع الدروج كتبغم .. تلقات ليها حيات بإستفسار :
أمالك على ديك الخبطة احنينتي ياك لاباس ؟ .. تخطاتها ودخلات لبيتها رامية الساك ديالها بزعاف والبلغة .. تبعاتها حياة سادة الباب وراها كتشوفيها بإستفهام رمات عينيها لوجها لمحدور كتزول فديك الجلابة مجننة .. هزات بيجامتها لباستها محيدة داك الخاتم دايراه فبواطو دورات راسها كتشوف فحياة بعصبية أشرات ليها لفمها :
شوفي الحمار الكيدار اش دارليا المصعور الهماج .. شدات حياة على فمها مصدومة خرجات عينيها :
واش ضربك ؟
- عنبر : حاسب بحال الى ضربني نيت .. هضني جلافاج بغيت ليه الݣرض فدوك اليدين الهماجي المصعور
- حياة ( جراتها تكلس ) دوي أبشوية لا يسمعوك يتمو كاملين جايين يسولو ورجاء كاينة هنا هضري بشوية
- عنبر ( كتحاول تهدن راسها ) العصاب وحق الله المعبود عصبني غزفني والله لا بقات فيه
- حياة : ولكن علاش هادشي كامل .. أصلا انا شفتك ماكنتيش هي هاديك
- عنبر ( عاودات ليها ) فهمتي دابا ماعجبوش الحال انا فاش عصبني قلت ليه تفو .. بقات حياة ساكتة كتشوفيها هزات فيها عنبر راسهل محركة راسها بمعنى شنو دوي
- حياة : شوفي شتي فهادشي لي عاودتي ليا بجوج بيكم غالطين .. أنت غلطتي ياك فاللول دويتي معاه وشرحتي ليه ماتبقايش كل شوية تعاوديها ليه اتباني برهوشة اصاحبتي ..
- عنبر : وسيد نقز معايا سطر وكيلمح خاصني نفهمو بلي مايكون والو .. راه اصاحبتي منقدش انا ݣرحتي جديدة ونعيش الغرام فوق نموسية
- حياة : ومن داكشي لي كتعاودي ليا عليه باين كان اكيطنز عليك وباغي يعصبك حتى انت خاص تبردي وطنزي .. ماشي كل شوية طلقني طلقني راه بنات 17 عام ومكايديرو هكا اصحيبة
- عنبر ( ربعات رجليها) دابا انا لي غالطة ياك ؟ انا لي برهوشة ولا لي مصعورة ؟
- حياة : لا هو لي مصعور ومكانش عليه يدير هكا .. ولكن انتوما فالاول دويتو لاش ركبتو فطوموبيل وجبدتيه .. شفتيه معصب ماتسوقيش لاش باغية تعرفيه علاش معصب ولا مامعصب ياك مكايهمك مكيعجبك والواحد لي مكنحسو بجيهتو والو مكايهمناش سوا معصب سوا فرحان كنخليوه على هواك وراه منين دويتيه بينتي بلي نيت عاجبك
- عنبر ( خنزرات فيها ) وليتي اكترݣعي قسما بالله العظيم .. هو مكايعرفش يتحاور ولا يدوي كيعرف ايتعصب ويخسر الهضرة
- حياة : انا بعدا تفهمتو .. مو ماحضرات ليه جات حيحات نوضات سطوندار فدار
- عنبر : وايلي ايمتا ؟
- حياة : فاش كنا معاك عند العدول .. سمعت خالتي رقية كتعاود لخالتي فاطنة جات حيحات كتغوت وعايرات راجلها او ولادها وعايرات خالتي رقية ماخلات ليهم غير لي نسات يلاطيف
- عنبر : مريضة الله يبعد بلاها على بلايا .. ولكن واخا هكاك يبرد فيا انا غدايدو لا
- حياة : صافي الالة تفادايه طريق لي تجيبو متجيبك .. مالنا على هاد القرع نمشطو ليه كعلالتو انت فمك حامي وهو فمو حامي بجوجكم بحال بحال من الأخر راه بجوجكم غالطين وبلاما تبقاي تشوفي فيا
- عنبر ( حطات يديها على عينيها ) اوووف عيييت والله وعماد قاليا الخميس غايجيب ليا البيبي وغاتجي معاه مربية ..
- حياة : مسيكين علم الله شكون والديه لي سمحو فيه ..
- عنبر ( جمعات شعرها بزيف حياتي) قاليك مو ماتت الله يرحمها باه والله ماعرفت .. قاطعهم الدقان ، حلات حياة كانت رجاء :
خليتوني بوحدي وسديتو عليكم هنا انا عندمن جايا ؟
- عنبر : الا راه غير دخلت نبدل وبقينا مجمعين
- رجاء : وكون سحابلي هكا كون بت فداري منين غاتجمعو بزوج
- حياة ( هزات حجبانها لعنبر لا تقول شي كلمة عارفة رجاء لاعبين عليها الهرمونات ديال الحمالة ) :
اويلي أصاحبتي نعلي شيطان كنا يلاه نايضين للعندك اكنا كنبرݣݣو وكندويو على ماين العريس .. سمعتي اش كالو جات حيحات قبل لا نجيو
- رجاء ( كلسات) اه سمعتهم قبيلات داويين .. حر العدوزة سوليني عليه بعدت عليها وصهد ديالها مزال واصلني ݣالك بعدت عليها ولدها العروسة جديدة خرجات ليها من الجنب
- حياة : واش ديك الأستادة لي خطبو لداك ولدها لي جا من برا ؟
- رجاء : اه هي حلفات لا سكنات ليه معاهم مشا كرا ليها .. وفاش مشات لعندهم ضيفة كتمشي لخدمتها كترجع ودخل تنعس وتخليها كالسة بوحدها .. بغات تحماق بغات تسطى كيعاود ليا يونس
- عنبر : داكشي لي دارت ليك هاهو خرج منها .. انت بعدا راه سكتي انا منقدش نسكت والله منقد تزيد تحݣر عليا نتكركبو انا وياها من دروج
- حياة ( كضحك) الحمد لله لي عدوزتك مغاتسكن معاك ..
- عنبر : على داكشي لي عاودتو ليا نسيفطها للسبيطار ولا القبر وانا ندوزها حبس كولشي ندوزو حتى للحݣرة لا
- حياة : ودابا فرضنا مثلا كون كنتي فاروق كتبغيه وتموتي عليه اديري فيها يدك ؟
عنبر ( عوجات شفايفها ) الصراحة ماعرفتش ماجربتش باش نعرف
- رجاء : علاش انتوما مكتبغاوش ؟
- عنبر ( تكات بظهرها على الحيط ) لا زواج تقليدي ختو صاحبتي وداك التخربيق .. حتى انت الحب كيجي من بعد نغزت حياة بصبعها باش تبقى تعرف اش كتخرج من فمها ..
- رجاء : عادي حتى انا ويونس نهار الاول مكان بيناتنا لا حب لا والو داكشي كيجي مع العشرة وصافي اشوية ديال الصبر .. ولكن اصاحبتي الصراحة دارو غزالة تبارك الله كولشي متول وباينة فيه تقيل ومرزن ..
- حياة : غاتجي عنبر غاتقلب ليا حياتو سفاها على علاها ..
- عنبر ( ميقات فيها ) علاش بسلامة ؟
- حياة : انا مغانقول والو دابا مغاندوي حتى يولي يصبح على هبالك وبليتك الصعيبة ( ضحكات)
- رجاء : اشمن بلية ( بفضول)
- حياة ( شافت فعنبر ) نعاود ليها نشوهك هههه
- عنبر ( قلبات وجها ) باااز عاودي ليها مالني كنشفر ولا كنخطف كل واحد وشنو كيعجبو وكل واحد فاش كيرتاح .. دخلات عليهم تودة مقاطعاهم :
مالكم تخشيتو هنا علاش متجيو تݣلسو معانا ؟
- عنبر : وغير بقينا مجمعين اماما وصافي .. مكايناش شيحاجة حلوة فثلاجة ؟
- حياة : وقيلة مزال من ديك الحلوة لي جبتو لبارح معاكم .. ناضت عنبر من حداهم دخلات للكوزينة دخلات عليها تودة
- نوصيك ابنتي واحد الوصية تهلاي فراجلك وتهلاي فهلو باين عزيزة عليهم شوفي جداه الكادو لي جابت ليك مسكينة
- عنبر ( شافت فيها ) ماما أنت عارفة نهار الاول علاش قبلت انا بهاد الزواج .. ودخلنا ليه بشرع والقانون باش الخلوة لي بيناتنا تكون حلال
- تودة ( جراتها من ودنها ) تي مالكي كطيري مالك ياك لاباس ؟
- عنبر : احح وماما حشومة عليك وشنو درت انا اقلت ليك
- تودة : تلقاي بحالو داخلت عليك بالله ابنتي .. اما حسن هو ولا داك بوبريص ديال داك بدر ؟
- عنبر ( حلات الثلاجة ) تفوو مالقيتي شكون تجبدي .. ( حطات حلوة دلاكريم ديال الشكلاط فطبسيل ) ومنكروش هو تهلا فيا لا من دهاز لا من الصداق كبر بيا الصراحة ديال الله ولكن
- تودة ( كتشوفيها بنص عين ) ولكن أش ابنت فاكنة أش وتي جمعي نوضة هداك الف وحدة تبغيه .. ربي جاب ليك لݣمة سخونة وزينة كوليها وسرطيها وحمدي مولاك عليها ياك اداك نهاريات ݣلتي مزال ربي يعوضني وهاهو ربي عوضك انتي لي معمية
- عنبر ( جرات الكرسي ݣلسات) شفتك بحال الى وليتي كتبغيه وعز عليك !
- تودة ( كلسات مقابلة معاها ) وصراحة ابنيتي فللول كنت خايفة منكدبشاي .. مدخلياش داكشي راسي ومزال مداخلش ومزال مخلوعة غير مكمداها فݣلبي ومسايراك فهواك .. ولكن منكدبوش الناس الله يعمر ليهم الدار دار الكبرانية وكبرو بينا الله يجازيهم بالخير وحتى هو ولد الناس تبارك الله متختاري من العزارة غاهو ..
- عنبر ( قلبات عينيها ) حتى انا فنة وعلى مزيناتي ..
- تودة : راه غانوض نخبط والديك .. زريمقة ماقرصتكش ابنيتي خاصك القريص من جدر
- عنبر ( كضحك) ومالني كدبت الفنون .. مالني مازيناش على مزيناتي اماما
- تودة ( تنهدات ) ابنتي تبعي الراي لي يبكيك ماشي لي يضحكك .. متفلتيش هاد الفرصة راه تايݣولك لولة عسيلة وتانية سمينة وتالتة حصيلة وانت ديك الحصيلة هي لي سبقتي ودابا ربي جاب ليك زمان مسݣم شحال من وحدة تبغيه
- عنبر ( كتاكل فالحلوة فمها عامر ) صدقتي طميميعة افيطينة شتي الفيرما بغيتي تلوحيني ( طارت ليها على يدها قرصاتها جتى غوتات ) اييي وغير كنضحك اكنضحك اماما حرام عليك
- رشيدة ( جات كطل عليهم مخلوعة) امالكم ؟
- تودة : والو اهاد الخانزة لسانها سابقها .. نمشي نصلي العشا مزال كاعما صليتو
- عنبر : والله يتقبل ( بصوت عالي) رجاء بغيتي مورصو دالحلوة ؟
- رجاء : اه جيبي ليا معاك
- حياة : حتى انا
- عنبر : رجاء وحاملة متقلة وانت مالك محنية نوضي حطيها راسك هاي هاي .. حطات مورصو فطبسيل وزادت لراسها حطات طرف لحياة خلاتو ليها فوق الطبلة خرجات من كوزينة هازة دوك جوج طباسل ) راه خليت ليك طبسيلك فوق الطبلة
- حياة ( خشات رجليها فصندالة ) باز حلفات متجيب ليا معاها باغية اتنوضيني
- عنبر : أصلا كنت انوضك ݣالسة ليا فبلاصتي .. مدات لرجاء طبسيلها رجعات عندهم حياة راضين عليهم الباب
- رجاء ( كتبنن فالحلوة ) ودابا عاودوليا شنو خاصني ندير ؟
- حياة ( غمزاتها) السيدة حامية باغية تعرف الزهوانية
- رجاء ( ضحكات حشمانة ) ماشي هكاك غير زعمة بغيت نبدل مانبقاوش غاديين على حاجة وحدة ياك راجلي فالحلال
- حياة : تاعداك اختي بصحتك وراحتك ( شافت فعنبر) نبدا انا ولا انت؟
- عنبر ' أبداي انت انا كناكل خاص نعرف الحلوة منين دايزة ..
- فالڤيلا دالروطال مجموعين الرجال بوحدهم .. جابدين الهضرة مع بعضيتهم فبزاف ديال الحوايج ..
- عصام ( كيضحك) بغيتك تشوف كيدارت ليه اصاحبتي .. شافت فيه بحال هكا وݣاتليه صافي اخويا شكرا انمشيو مع يونس هههه تا عرفتي كيولا وجهو مارضاش ..
- عماد ( كيضحك) جمع وطوي أصاحبي صافي براكة علك الدرية مباغاش دويك ݣلب
- راشد : عجباتني وبغيت اندوي معاها راسها قصح من الحجر يا أخي والله مافهمت من شو تركيبتها هاي البنت
- الروطال ( داير رجل على رجل كيسمع للهضرة ضايرة بيناتهم ) بعد اراشد درية ماشي اشيخة تبغي تلعب لا احبيبي سيكتور دالمدام فوتو
- راشد ( هز حواجبو فيه ) انا مالف نلعب أفاروق ؟
- الروطال : لا غير مرة مرة كدير حفلة وكتزهيها شتك نسيتي راسك الباشا
- راشد : يا اخي يا اخي البنت عاجبتني اريد أتعرف عليها .. واش فيها شي عيب ؟
- الروطال : باش عجباتك انت شتي الطرف كيرولي حليتي فمك .. باش عجباتك هاد البنت ؟
- راشد : البنت جميلة ماشي على ود الشطيح ولا جسدها يا فاروق الله يرضي عليك يا اخي .. أقسم لك بالله انا مو راشد إلي كان يسوي حفلات وعزايم .. هاد المرة مدرت حتى حفلة
- طارق : لا بصح داوي هاد المرة مكاين لا حفلة لا لعب وكول .. عقلتي على الحفلة لي ݣتلك كان داير مابقاش منها
- راشد : سمع على ودنيك
- الروطال : انا أعلمتك خلينا مزيانين .. نيتك مزيانة منزيدك الخير داك الضحك الباسل فوت سيكتور دالمدام وتشقلب كيبغيتي ..
- عصام ( هزهز راسو ) اييييه الروطال ولا يدوي على المدام شكون ݣال سبحانك يا عظيم
- راشد ( غمزو) وانت مناويش تعاود ؟
- عصام ( هز يديه ) لا انا أعفيوني اخوتي الزواج خليتو ليكم .. ضݣتو وݣهمني وضرني فالمعدة الريجيم زين أغيروها ..
- عماد : كلكم كتݣولو هكا كتجي شي وحدة تݣلب ليكم لافيشور ديال المخيخ ديالكم كتوليو باغيين تزوجو اليوم قبل غدا
- راشد ( قهقه بضحكة رجولية ) كيمعني عليك أخويا ( شاف فروطال)
- الروطال ( كيضحك بساكت ) مكانش ضارب ليا فدماغ .. ولكن جابتها الوقت 37 درناها اش بقا لينا مزال
- راشد : العرس إيمتا ؟
- عماد : الجمعة غير غايتجمعو تم ياك ؟ داكشي لي ݣال با ؟
- عصام : داكشي لي سمعتو كيعاود لسي عبد العالي .. الصراحة داك الراجل الله يعمر ليه الدار
- راشد : داك رشيد شكون هو ؟
- عماد : مدير أعمال عنبر ( الروطال وقف ) فين غادي ؟
- الروطال ( أشر ليه ) باغيك فواحد البلان ( شافيهم ) الإخوان لنا عودة .. سبقا عماد لي تبعو خرجو للجردة بعاد عليهم
- الروطال : اش درتي ؟
- عماد ( دار يديه فجيابو ) السيد مغرقها حتى لريوس .. القليلة عندهم واحد 20 عام ديال الحبس هادي بالقليلة
- الروطال : خاصو قطيع الر**اس الحبس ورحمة ليه ..
- عماد ( ببرود ) براكة غير الراس لي كنتي غاطيرو ليه ... واش انت مريض واش ماباغيش دير عقلك
- الروطال ( بنفي البرود ) نخلي الشمايت يتناقزو عليا قردة انا .. حقي وخديتو وسلام عليكم
- عماد : كاين القانون أفاروق القانون
- الروطال ( ضحك بإستهزاء ) تا اشمن قانون .. كون كان شي قانون مغانتشدش فيها عام ظلما وعدوانا
- عماد ( تنهد حاك على لحيتو) داكشي داز وخرجتي منها براءة
- الروطال : براءة عندك انت .. انا مكنساش مانساش الشمايت والقالب لي داروه معايا ، كل قو** كياخود حسابو النقي سالينا ..
- عماد : دابا انت لي دار معاك الفالطة تخلي دار عشتو ولا كيفاش بلانك ؟ وعلى هاد الحساب مانسيتيهاش ليهم ومزال دايرهم فراسك ؟
- حياة ( كتشوفليها فعينيها بتركيز ) خاصط تشري شوميزات ديال النعاس قلتي ليا ماعندكش مشراوهومش ليك فدهاز؟
- رجاء : لا أش كنعاود ليك انا هو خدمتو كيخليه يكون غايب عطاهم باش يشريو ليا دهاز الى وريتو ليك أختي اتبقاي يابسة .. بلعاني مشات شرات ليا دوك التحاتة ديال العيالات وبيجامات طوال دهاز تݣولي ديال وحدة عندها 60 عام ماشي وحدة عندها 24 عام
- عنبر : بنت الهم من فعلها بلعاني .. وديك ساعات فاش سكنتو بزوج بداي تشري اويلي اصاحبتي
- رجاء : وخرجات ليا بالي مع جينا هنا ورحيل والمحال لي حل والحمالة جا كولشي متابع راه شتو الوحم جامي صعيب
- حياة : المهم شري شوميزات جداد وبيجامات جداد صدقي داكشي لاخر ومكياج جديد
- عنبر : شوفي عندي واح زوج بيجامات مزال جداد بميكتهم انا خديت لدهازي لي غايكفيني هادوك انعطيهم ليك .. وأنعطيك شي كسيوات دابا درت الحجاب مغانبقاش لبسهم لبسيهم انتي حتى هوما جداد والله ماملبوسين .. وانعطيك مكياج لي كان عندي وشي كريمات عمري مسيتهم او واحد جوج روايح حتى هوما كنت شريتهم ومع دوك لي جابو ليا ولي كانت خدات ليا ماما فعيد ميلادي مابقيتش مسيتهم انعطيهم ليك ..
- رجاء ( بفرحة ) الله يفرحك اختي ويكمل عليك بالخير
- عنبر : اويلي مابيناتناش متقوليش هكاك .. زيدي شي جوج بيجامات اخرين حتى الى ماقاداش تخرجي دوموندي عليهم من الانترنت كاينة واحد باج فنة فيها بيجامات كاليتي واعرة دابا نعطيها ليك ..
- حياة : وحتى شوميزات راه كاين فالانترنت بلاما تخرجي ويوصلوك حتى للدار تعطي اقياسك
- عنبر : وصايبي مخمرية فدار خودي اشي حليب ولا كريم وحكي فيه المسك دالحامض اتلقايه اعند العطار لي فدورة ديال دار كناخدو عندو .. ولا شوفي داك السيد الاخواني لي فدورة دالحمام وحكيه فداك الكريم وزيدي روح ريحة عطا الله سكوندال عطا الله روايح الواعرين وخلطيهم فبواطة وبقاي دهني للجسم ديالك وعنقك وتشوفي ريحة لي اتكون فيك كتهبل
- رجاء : خاص هادشي تقوليه ليا فأوديو مغانعقلش عليه
- حياة : نهار فسيمانة سمعي ( غمزاتها) نهار فسيمانة ديريه ديالك أنتي بوحديتك
- عنبر ( كملات الحلوة حطات طبسيل مقوسة حواجبها ) كيفاش هاد نهار فسيمانة ؟
- حياة ( كتشرح بيدها ) دابا فنهارات كامل الراجل لي كيدير المبادرة بيسة من هن تعنيقة من هن هي هاد نهار غايكون ديالها هي لي غادير فيه كولشي فهمتي ؟
- عنبر ( كتشوفيها بشك ) أنت اختي وليت شاكة فيك مدوزة طاشمة درجالة على هادشي لي كتقولي انا لي كنت مزوجة ومكانش فخباري هاد اللعيبات ..
- رجاء ( كضحك شادة على كرشها) وناري ركلني أبنات الهم ضحكتوني
- عنبر ( خرجو عينيها ) حلفي انمس العار نمس
- رجاء ( عرات على كريشتها جرات يد عنبر وحطات عليها) بلات انضحك واتحسي بيه ماعرفتو دري ولا بنية ولكن ركيل ( ضحكات) ااااححح حسيتي
- عنبر ( بغات طير من بلاصتها دمعو عينيها ) يا حليلي والله حتى تحركات كرشها يا ربي حبيبي .. نزلات بفمها باست ليها كريشتها بعينين مغرغرين ) الله يعطيك وقفة ساهلة ياربي
- رجاء : اللهم امين ( بتأثر) الله يفرحكم زيكمل عليكم بلي بغات خاطركم
- عنبر وحياة : اميييييييين ياربي .. كملات ليهم حياة الكلام
- رجاء : وتعلمي حتى انت مايفيدك .. طلقات عنبر ودنيها هي ورجاء وحياة كتكمل ليهم :
دابا اتختاري نهار فسويمينة يكون ديالك الى كان يجيك لدار بكري صدريه .. يخرج للقهوة ولا شي بلاصة وداك نهار وجدي شي عشيوة تكون زوينة شيحاجة متكونش فيها الريحة فهمتي ..
- رجاء ( شافت فعنبر ) وسمعي ليك يترو ليك ماكتعرفي والو
- حياة : وسمعي المهم شيحاجة متكونش فيها الريحة شي ݣراتان خفيف وشلاظة وجدي داكشي عاد دخلي دوشي دوزي عليك اصويبينة ديال لوكس دوك باندوشات ريحتهم كتبقى فالدوش .. وخرجي وطرفي ليا راسك ودهني ليا الجسم وشعرك الى رطب اخليه سارد كان واقف دوزي على بوه بالپلاك ولا شري ديك المشطة لي كتصايب وتهناي انت
- عنبر ( بتركيز ) كملي كملي أأستادة مايا
- حياة : ايوا يلالة ديري ليا شي مسك من الامساك ( كتشرح بيدها وتغمز بعينها ) وضربي ليا شي كسوة بحال شكل ديال سواريات انت لبسي بوها فدار
- عنبر : تلبسها ليه بهاد الكرش ؟
- حياة : مال حسك كاين لي كتكون مقبوطة من الكرش ومن تحت واسعة عطا الله الكساوي فجوطيا ..
- عنبر : شحال هادي مامشينا خاصنا نيت نمشيو كيكونو شي بياسات ناضيين ولاهيلة
- رجاء : كملييي
- حياة : المهم لبسيها وديري مكياج اخفيف شفتي اكحيلة فالعين وشي عكر حمر ونوضي مع شي رويحة وخليخيل فرجل .. وجدي ليه هو حوايجو باش ايجي يدخل يدوش ايدخل تبعيه قولي ليه خاصك اراجلي شي مساج تكا تكيه وبداي المساج ومن المساج ايولي مساجات هوما والكمالة من عندك .. تساليو دخلو دوشو بزوج ( خرجات فيها رجاء عينيها ) وخرجي فيا عينيك راه راجلك هداك حلالك عادي دوشي معاه اويلي على المرة
- رجاء ( حكات على حاجبها ) نحاول كمليي
- حياة : وجدي شي شوميز زوين ولا شي بيجامة خفيفة قصيرة باش اتخرجي من دوش تلبسيها .. خليه هو يكمل لباس وسيري حطي العشا تعشاو اتكونو جيعانين فداك الوقت ( ضحكات)
- عنبر : مقزدرة انت زيغ صدمتيني مساهلاش السيدة ..
- حياة : والله حتى نسكت ..
- رجاء ( شافت فعنبر) سكتي انت كملي كملي ..
- الروطال ( دوز لسانو وسط فمو عاض على باطن حنكو شاف فخوه ناطق مغزف) ماشي انت اشريف لي جاوك داوك من وسط داركم بحال الإر***ها**بي ماشي انت لي جيرانكم نعتو ورا ظهرك وشدو بيك أتاي لي داز على هاد عبدو ربه مدازش عليك تلت ديالو ..
- عماد ( بإنفعال ) داكشي داز عليه أصاحبي 17 عام الحمد ربي عوضك داكشي ديباصي صافي ساليتيه .. مغاتبقاش تابعو خرجتي براءة الصلاة على نبي ماتبقاش تنبش
- الروطال ( كلامو كيدخل من ودن وكيخرج من ودن ) نساه غا انت انا مغانساش .. حفرة كحلة دازت فحياتي معمرها غاتنسى اݣلب عليا الله يرحم جدك أعماد هاد البلابلا الحامضة فرعتي ليا راسي بيها ..
- عماد : ماشي بلابلا باغي ليك الخير حيت خويا .. كنشوفك كدير شي حوايج ناسي راسك اساط
- الروطال ( غمزو بدوز يدو على موستاجو) اخليني غادي غلط وبرب الجليل يا وليدي يا عماد .. لا بقات فيا ولا بردت حتى نݣلسهم على القرعة واحد بواحد فالغباقي ..
- عماد : عرفتيهم شكون هوما ؟
- الروطال ( هزهز براسو ساهي ) واااه ..
فــــــلاش بـــــاك
- فدار من ديور المتواجدين فعين السبع وقف الموطور ديالو قدام دار عالية كان شاب فالعشرينات من عمر و لابس كيطة فالكحل مع سبرديلة البنية الجسمية ديالو ضعيفة داير كاسكيطة على راسو جبد السوارت من جيب السروال فتح الباب لي كان ديال الحديد ودخل خلى الموطور فالكولوار وسد الباب .. طلع مع دروج نيشان كان الباب ديال الطبقة الاولى محلول .. كيعيط بسوط عالي :
الواليدة الواليدة .. خرجات من الكوزينة لابسة بيجامة ديال الدار عاقدة غوباشتها :
بشوية خوك كيحفظ فبيتو واش هبلتي ( خسرات سيفتها ) ناري ناري ناري اش هاد الريحة دخل دخل دوش بعدا حيد عليك ريحة الحوت والخنز
- فاروق ( محرك راسو حالف مغاطفي فرحتو) فين هو الواليد ؟
- خديجة ( مضورة وجها راجعة للكوزينة ) كيصلي سير دوش ماتبقاش دور عليا فدار بهاد الريحة الخانزة ( غمض عينيه متنهد كاتم عصبيتو ) .. طلع للطبقة الثانية فين كان بيتو حيد حوايجو خلاهم فبيتو حتى يدوزهم من بعد .. دخل لدوش دوش عليه توضى وصلى عاد نزل لقى باه فبيت الݣلاس كيتفرج ..
- إدريس : على سلامتك أولدي عطيني البشارة ..
- فاروق ( ضحك) كريتو .. عرفتي الواليد واحد الحمل تحيد فوق الكتف منعاودش لك
- إدريس : مبارك ومسعود الله يدخلو عليك بصحة وسلامة ( دخلات خديجة حطات الطاجين) علاياش داويين ؟
- إدريس : المحال لي فمارشي سونترال كراه فاروق
- خديجة ( ݣلسات بلامح باردة ) أمم ومنين جاوه الفلوس .. الحوانت فداك المارشي كيكونو غاليين وانت يلاه مكافي مع مصاريف القراية ديال دراري
- فاروق ( بالع ريقو ببرود ) كنت جامع الواليدة ديك الكروصة لي كت ندور بيها فزناقي الحمد لله كانت كدخل ليا مصيريف ..
- خديجة ( قلبات فمها ) ماعت أش عجبك فهاد الحوت وهاد الخنز دفع للبوليس وكون بحال باك
- فاروق : هاد ديسك حفا الواليدة .. كل واحد كيخطط لحياتو كيما بغا وبالهيت لي بغا
- إدريس ( دار راسو ماسمعش كلام مرتو ) مزيان اولدي الله يسر ليك وبشحال خلاه ليك واش بنفس تمن نيت ؟
- فاروق ( هزهز راسو مقطع الخبز ليهم ) بنفس الثمن ولكن الحاج مسكين لي وقف معايا الله يسهل عليك هو لي كيعرف مولاه بقا معايا حتى نضينا الأمور ..
- خرجات من البيت بنت فعمرها 7 سنين توجهات نيشان عند فاروق عنقاتو وݣلسات بينو وبين إدريس ، البيت لاخور خرجو منو جوج دراري واحد يكون عندو 15 وتاني 13 ..
- خديجة : دوزو تعشاو براكة من تجمعات ..
- عماد ( طفل ف 15 سنة ) خويا فاروق واش بصح كريتي شي محال ؟
- فاروق ( بضحكة فخر ) وياااه حتى ندير ونديكم تشوفوه إن شاء الله
- خديجة : عماد خاصو يحفظ عندو الفروض هاد العام إن شاء الله .. ينجح فسانكيام باش سيزيام يكون واجد ليه والباك يشدو بحسن جدا يدخل للبوليس بحال باه ..
- فاروق ( هبط الدغمة لي فمو متنهد محرك راسو بلاحولة مداهاش فكلامها ضار شاف فباه ) غدا صباح بكري غانزل للمرصا نشوف الدلالة .. دابا راه غايحطو عليا البياعة وشراية حيت داخل جديد مغايبغيوش الزحام
- إدريس : أولدي بعد من الصداع وخا هوما يبغيو يجبدوك متديها فحد ديها فراسك وخدمتك الله يرضي عليك ..
- فاروق ( بصرامة) انا نديها فسوق راسي ابنادم مايحكش عليا باش منحكش عليه ..
- إدريس : اولدي التجارة كتبغي الصبر ماشي كولشي غايبغيك دير فبالك يشوفو عليك الكليان ايبداو ينبشو عليك ..
- فاروق : ينبشو عليا يلݣاوني
- خديجة : معامن كدوي راسو يابس اكتخوي الما فرملة .. ( فاروق وقف )
- أنت مديرش فبالك الواليد ( باس ليه على راسو ) الله يخلف انمشي نعس غدا فايق بكري بتصبحو على خير ..
الــحــاضــر .. حياة كملات ليهم كلامها بضيطاي كتوريهم :
- المهم منين تعشاو وتساليو وتجمعي ديك طبلة بالخف وجدي شي بلاطو فيه التقاوت .. زريعة كاوكاو لويزات كريكيعات شيبس صايبيها فدارك حسن الى بغيتي .. المهم داكشي وديريه فبلاطو وشكلاط وحطيه وݣلسي انت وياه كولو وتفرجو باش تعاودو الماتش الثاني .
- عنبر ( كتحرك فراسها ) أمسمعاتك خالتي رشيدة وتفرجي توريك الماتش الثاني ..
- حياة : انا هادشي راه قارياه بعويناتي وشفت البنات لي جربو أش كانو كيقولو كنعطيكم المفيد هادشي راه الناس كيخلصو عليه الفلوس
- عنبر : المهيم تكوني نقية فدارك نقاوة انت ساكنة بوحدك راس فراس تقادي ولبسي ماشي اعلى قبلو هو على قبلك انت .. لبسي وتريحي وتقادي على قبل انت ماعلى حتى واحد راه فاش دوشي وتلبسي وتقادي كتحسي براحة
- رجاء : والله الى عندك الصح .. عطيوني دوك صفحات لي قلتو ليا نختار على دوك البيجامات لي اتعطيني
- عنبر : ومتنسايش الماسكات .. ليديك ورجليك او وجهك دهني ازين دهني وديري ليا كريم ديال ترطيب راه واحد فن كيدير ا 8 دراهم عند ماليك مكياج وفبيم ..
- رجاء : صافي انشري هادشي إن شاء الله ..( تجبدات عنبر فبلاصتها غالبها النعاس ) ونوضي مسحي وجهك ولا غسليه وانت عينيك بداو يتلاصقو
- عنبر : والله ماقديت النوض هانية الى ماغسلتوش اليوم حتى للغدا وندير ليه شي سوان أفدار أما دابا فيا النعاس والله ( تكات على جنبها موسدة يدها )
- حياة ( وقفات) صبري نغطيك .. جبدات المانطة غطاتها .. خرجو من عندها هي ورجاء طافيين عليها الضو حياة دخلات لبيتها كان جواد كيسوني ليها ورجاء مشات للبلاصتها لي فرشات ليها سميرة ..
- جواد : خاصنا نهار باش تجاوبينا أمولات العوينات ؟
- حياة ( كضحك) راه عاودت ليك بلي اليوم كان عند بنت خالتي ضريب الصداق واش نسيتي ؟
- جواد ( برزانة ) مانسيتش الالة حياة ولكن نورمالمو لقيتي لاپيل ديالي خلي ليا ميساج ولا دافعة شبابك غالي ؟
- حياة ( فتحات السرجم ) والله مكاين لا شبابي لا والو .. من عند العدول نيشان لدار العريس كانو دايرين الطلبة تعشينا ومادخلنا للدار حتى ل 10 عاد دخلنا
- جواد : اممم واخا الالة مبروك عليها والعݣوبة ليك ..
- حياة ( الإبتسامة مرسومة على وجها ) اللهم آمين وليك حتى أنت
- جواد ( حك حاجبو ݣالس فالبالكو كيكمي ݣارو ) أميييين .. الواليدة راه ݣالبة ليا الراس بتزوج تزوج
- حياة ( قهقهات بأنوثة ) ايوا دير ليها خاطرها راه بغات ليك الخير مسكينة ..
- جواد ( طفا لي بقا من الݣارو فطفاية ) وشوفي اي ام فهاد الكون كتبغي الخير للولدها وكتبغي تشوفو فدارو بوليداتو
- حياة ( تفكرات أم الروطال ) ااه بصح خاص الواحد يعرف فين غادي يحط راسو وصافي
- جواد : انا باغي البنت لي تكون معايا انا لي نختارها فهمتي البلان .. مباغيش نطيح فداك المشكيل ديال تزوج وطلق ماعنديش دماغ لشد ليا نقطع ليك فهمتي ..
- حياة : اااه فهمتك إيوا الله يسهل عليك ..
- جواد : اللهم آمين ايوا كيدوزتي النهار ؟
- بقات كتعاود ليه على الاجواء وهو كيسمع ليها كان كيعجبو هضرتها وكيفاش كتعاود بعفوية .. وفاش كيتناقش معاها كتبقى تسمع ليه ماشي من النوع لي كتقاطعو وتبغي تدوي هي لا .. كانت مستمعة مزيانة وكتسنط وماشي من نوع لي دغية تقلق وتسد لا وهادشي كيخليه مساخيش يقطع معاها لابيل ..
- جاها النعاس وستأدنات منو باش يقطع .. تمنى ليها أحلام سعيدة وقطع تكات فبلاصتها فرحانة بهاد البداية الزوينة لي كانت بيناتهم كتمنى فنفسها تدوم وتزيد تكبر حيت فعلا بدا كيعجبها ويدخل لدماغها ..
- صبح صباح الجديد .. الجو كان مزال بارد ولكن كانت فيه الشميشة فطرو مجموعين يونس سونا على رجاء لي طلباتو باش تغدا معاهم وتخرج معاهم وترجع للدار .. وصاها ترض البال لراسها ومتجهدش نفسها ..
- العشية هبطو لدرب السلطان باش عنبر تقدا الكادويات للرقية وعلال وإدريس كانت باغية تاخود حتى لمو ولكن مو عمرها شافتها ومغاتحضرش للعرس ديالهم دخلو لمحال كبير خاص بالحوايج تقليديين ديال الرجال خدات جوج جلالب هماويين ديال الرجال .. خرجات على برا كتدوي مع ماجدة يولاتها على شحال كيلبس جدها وباها عطاتها العبار .. ورجعات للمحال الداخل وراها شي بلاغي ختارت جوج كل جلابة وبلغتها دارتهم فبوشيط ..
- دازو للمحال ديال العيالات خاص بالتقليدي خدات للرقية جلابة كترعرع فالبلو سييل هماوية مطروزة .. وخدات ليها تفصيلة ديال تكسيطة دوبياس حتى هي راقية فنة وبلغة ديال الصم ، ولماجدة خدات ليها جلابة دوبياس ديال تقادة ديالها كانت فنة ..
- دخلو لواحد الباتيسري كلاو فيه كانت رجاء مشهية الرايب البلدي .. كلاو تم ورجعو خرجو مكملين التقدية ديالهم خدات رجاء زوج بيجامات عجبوها ودوبياسات مع زوج سوميجات ، مابغاتش تاخود اونلين حتى لمن بعد دارتها حجة وزيارة تسرح رجليها معاهم .. رجعو لدار وصلو رجاء هي لولة عاد هوما مشاو لدار ..
- ماسوناش ليها النهار كامل ومدواش معاها .. دخلها العجب مالف كيسوني ليها ، كتسول راسها وتجاوب :
غاتكون ماجدة وصلات ليه الخبار بلي خرجنا .. شنو زعمة يكون عطاني نيت تيساع كيما قلت ليه واصلا انا لي خاص يبقى فيا الحال ماشيش هو. .. راه انا لي كمش ليا فمي وعضني المصعور والله منحاشيها ليه خليه يبخ دم ... لاحت تيليفون فوق النموسية ومشات كتستف الحوايج لي بقاو ليها فالباليزة ديالها والمكياج فالباليزة الصغيرة ..
- خرجات من الكوزينة كانت داوية مع دنيا عينيها ضاويين بالفرحة :
إيوا مبروك عليها الله يكمل عليها بالخير ... داكشي باش كنتو غابرين اجنيات لبارح ، لا صافي وجدت راسي وانتوما وجدتو راسكم .. أجي ومي رقية وبا علال ... ااااه واش لبارح مشاو صافي صافي فهمت ههههه ... صافي ازين واخا نتشاوفو تما تهلاي فراسك اجي ختك ياسمين اتجي ؟ لبارح صافي إن شاء الله احبيبة يلاه تهلاي فراسك .. ( قطعات معاها التيليفون ودخلات عندهم للصالون حاطين بالزهم ) يسرى لبارح دارت العقد هي وطليقها
- تودة : والله يتبت الغرس .. غايجي راجلك يديك ؟
- عنبر ( ببرود) أه .. ( يوماين مادواها ماكلمها حتى لصباح مسيفط ليها وجدي راسك باش نجي نديك انت ودار ) ..
- عنبر ( جاوباتو) مالين دار نص ايمشي مع رشيد ونص مع يونس راجل رجاء .. (طلع ليها الفي ومجاوبهاش ) داير ليا فيها عزة نفسي كوينيدي لاخر والله لا بقيت حاشيتها ليك ..
- وصل رشيد هو الأول هز بالز رشيدة وتودة وحياة دارهم فالكوفر طلعات تودة حداه .. ورشيدة او وليداتها وحياة اللور ، بقات سميرة جات من موراها رجاء هي ويونس طارݣين رحيمة وليالي فطريقهم ..من غيرها هي لي بقات كتسنى فيه يجي مدة سمعات حس طوموبيل وقفات مشات لسرجم الطل كتبان ليها طوموبيلت عماد هبط منها وشي وحدة كتبان اللور .. كان دار معاها على شان لبارح يجيب ليها البيبي ولكن تعكسات ليهم شي ورقة داكشي باش جابو ليها اليوم ..
- سونا الباب .. هبطات مع الدروج متوترة وفيها واحد الرهبة فشكل كان واقف قدامها بإبتسامة :
عنبر مزيانة أمورك هانية ؟
- عنبر ( هزهزات براسها ) الحمد لله وأنت كيغادي مع الخدمة مزيان ؟
- عماد ( جاتو ضحكة) عنبر عندي كونجي اختي فيه 15 يوم نسيتي ؟
- عنبر ( حطات يدها على فمها كضحك ) والله حتى نسيت العقل عامر وتلفت .. وقفات طوموبيلت الروطال ورا طوموبيلت خوه خرج من الطوموبيل بملامح باردة سروال دجين مريح لونو باحت مع تريكو ديال الصوف فالبيج طالع بالكول وكاسكيطة .. خاتم ديال زواج فيد وخاتم اخر فيه حجرة كحلة فيد أخرى مع ݣورميط دنقرة واسعة شوية وليد لوخرا فيها ساعة رجولية نقرية .. شافت فيه وبعدات عينيها وقف عليهم ببحتو الرجولية المميزة :
السلام عليكم ( شاف فخوه ) يحسابلي غاتسبق انت وعصام ؟
- عماد : جبت أمير والمربية .. بغيت عنبر تشوفو غادي نديه معايا الطوموبيل غادي بيها خاوية ( ضار الروطال لجهة الطوموبيل ) .. توجه عماد للطوموبيل حلها ، خرجات المربية كانت فأواخر الثلاثينات من عمرها لابسة تريكو طويل سروال دجين وجامعة شعرها سفنجة كان باين عليها الثقالة ورزانة .. هازة فيدها مانطة فالبيج طلعات درجة ديال الطريطوار وقفات عندهم الروطال كيطل براسو ، كيبان ليه وجه ملائكي فاتح عويناتو شعيرات رطبين كحلين خارجين من طريبيش ديال اللبسة لي لابس ..
- عنبر ( كطل عليه براسها غوبشات بحب بارمة شفايفها ) ياقلبي واخا نهزو ( شافت فيها )
- سهام ( المربية ) مرحبا ( مداتو ليها ) .. هزاتو بين يديها كتراري بيه حمقها عويناتو وبياضو شعر الكحل لي كان خارج من طريبيش ديالو
- عنبر : كيفاش كيعطيهم قلبهم يسمحو فولادهم ( شافت فيهم ) انا مشة إلى ربيتها والله مانسمح فيها واخا يوقع لي بغا يوقع
- سهام : قليل لي كيفكر بحالك وكاين لي الظروف كتحكم عليه .. حتى واحد مكيعلم بيه غير الله بحال دابا أمير ماشي مو لي سمحات فيه ، مو ماتت فاش كانت كتولدو او والدين مو مابغاوش يتحملو مسؤوليتو وباه ماعرفناهش شكون ..
- عنبر ( كتشوفيها كيشوفيها ) ياحبيبي يالفن يالكبيدة ( بلاما تحس) فاروق ربي شوف شحال فن هاك هزو هاك ..
- الروطال ( خرج عينيه ) الا الا هداي منݣدش صغير غانطيحو
- عنبر ( ميقات فيه ) اويلي على غاطيحو تا شد هزو
- الروطال ( تحشاها ) بالزك الفوف انطلع نهبطهم .. خلاهم هي وعماد وطلع يجيب البالز .. هبطات بشفايفها باست جبهتو ورجعاتو للسهام
- سهام : انا غانرجع لطوموبيل حيت كاين البرد عليه .. رجعات للطوموبيل وبقات عنبر مع عماد
- عنبر ( بجدية ) مكاين حتى خبار على داك بوزبال وتريكتو ؟
- عماد ( داير يديه فجيابو ) هاد الساعة خدامين على برا شابكينها غبرة وحشيش
- عنبر : ولاد الحرام وعلاش لي مايشدوهمش تم ؟ ( نزل الروطال هاز زوج بالز جرهم طلعهم للطوموبيل رامي عينيه على عماد وعنبر ببرود مدواهمش راجع يجيب الثالثة )
- عماد : عنبر راه ماشي غير كنجيو ونشدو بنادم .. الى جيتي دوي خاصك الپروڤ بلا بيه راه متݣدي ديري حتى لعبة فهمتي البلان ؟
- عنبر ( هزهزات راسها ) فهمتك ولاد الحرام الله يغرق ليهم الشقف ودابا باش غايعروفني تزوجت ويعرفو بلي عندي ولد ؟
يتبع...
التعليقات
لا توجد تعليقات بعد، كن أول من يعلق.