محتوى القصة
^ عــيـن الـذيــاب 10 لـيـلا ^
- خرجات هي وياه من الطوموبيل من ورا ماخداو قهوة حتى وصل الوقت .. مدة جلوسهم فالكافي كانت كلها سكات بحال الى كل واحد فيهم كيدوي مع راسو وكيراجع حساباتو .. خرجات من طوموبيل .. وقفات كتحس بالأرض تحت منها بحال شي حد كيدردك كتهز البلاصة كانت كلها ظلام جوج ديال الڤيدورات واقفين .. كيبانو ليها البنات داخلين والأغلبية لي داخل غير الشباب مكاينش حس شي حد كبير ، فاقت من سهوتها بيدو لي جراتها غادي بيها مد ورقة لواحد من الڤيدورات شافيه وشافيها مطلعها من حوايجها ، كانت كتبان بحال شي متشردة بديك تحتية والقبية والبوتيو .. جبد الروطال 200 درهم مدها ليه ، حيد من الطريق وخلاه يدخل .. مع دخلات من داك الباب بحال الى دخلات لعالم ثاني عمرها شافتو ، واقفين دري وبنت شادين مشروب مخشيين فبعضياتهم وكيدويو .. نزلو مع الدروج جارها المحال كان كلو ضواو وصوت الموسيقى عالي بزاف ..
- وصلو لطابق التحتاني تم كانو طوابل كبار مع فوطويات جلدية .. وجهة أخرى لي كانت فالوسط طوابل ضايرين وحداهم كراسو عاليين .. دراري كيسربيو كاين لي واخد عصير وكاين لي واخد مشروب كحولي ، كاع لي تم كانو شباب مكان حتى واحد فيهم كبير ولا بلباس رسمي فرق كبير بين هاد البلاصة لي هي فيها ولوطيل لي كانت كتغني فيه..
- الروطال ( قرب لودنيها ) : نݣلسو تم ولا هنا ؟
- عنبر ( شافت البلاصة لي أشر ليها كانت بعيدة على الناس هزات راسها فيه ) : لا غير خلينا هنا حدا الناس .. شدو طبلة وݣلس فوق الكرسي بأريحية عكسها هي لي مكانتش عارفة تكلس فهاد الكرسي ، جاها بحال الكراسة لي كانو فحصص الفيزياء والعلوم .. عينيها كيديرو كتشوف فالبنات ، كانو عكس البنات لي فالأوطيل البنات لي هنا كان باين عليهم من الطبقة الراقية ، غير من لباسهم شنو لابسين من اكسسوارات والمنظر ديالهم بعيد كل البعد على بنات الأوطيل .. شافت فحالتها ورجعات شافت فيهم وهو مراقبها بعينيه ..
- أنت لي مابغيتيش تلبسي شيحاجة جديدة
- عنبر ( بلامبالاة ) : علاش شنو قلت انا ؟ أصلا ماشي شغلي كل واحد يلبس لي بغا ولي عجبو ويريحو .. جا السرباي قاطعهم حاط ليهم القائمة ديال المشروبات .. هزاتو كتشوف فيه بان ليها موخيتو شافت فروطال :
أنا بغيت هاد موخيتو
- الروطال : بغيتيه بلالكول ولا بلا لالكول
- عنبر ( خرجات فيه عينيها ) :داكشي لي بقا ليا غير لانكول بغيتو عادي .. جا السرباي خدا طلابتهم ومشا ..
- دورات عينيها كتشوف حداها .. حتى واحد مكان كيشوفيها ولا مديها فيها كل واحد مستمتع بالوقت ديالو عايش المود ديالو بوحدو ولا مع صحابو أو لي معاه .. كترت الضواو كانو كيدوخو وقفات الموسيقى وتسمع صوت رجولي ، هزات راسها للفوق بحال البالكو تم كانت بلاصة الديدجي.. كان واحد الشاب فالعشرينات شاد المايك :
بونسواغ الحباب ، بغيت كولشي يهز يديه الفوق نشـــــــوف .. ( كولشي لي تم هزو يديهم ) ودابا بغيتكم ترحبو ليا بديڤا ديالنا ديدجــــــــــي ســــــوكـــــــــــا ( تسمع التصفار والغوات ) .. دخلات بنت واشمة عنقها ويديها شعرها دايرة ليه تقطيعة دكورية .. لابسة تجاكيط كويرة كحلة وضوني قصير معري على كرشها لي كانت حتى هي واشماها ..
- سوكي ( بصوت عالي ) : بونسواغ ميزاموغو .. واش واجديـــــــن ؟
- كولشي كيغوت وكيصفق .. دارت الكاسك ديالها وبدات بأول أغنية .. مهبول أنا غادي فلوتوروت .. بدا كولشي كيغني معاها وغاديين مع الهيث ديالها ، جاب السرباي للعنبر كاس ديال موخيتو ونفسو جابو للروطال .. كان ݣالس على غير الناس لي تم مهدن ، مامحركش من بلاصو .. بعض البنات لي كانت عينيهم عليه كيتوشوشو بعضياتهم ..
- مجموعة ديال الأغاني دازت كولشي نايض يشطح وينقز .. شاف فجهتها بانت ليه اكتشوف مرة مرة لي كتحرك راسها .. بدا تيليفون ديالو كيڤيبري فتجاكيط ديالو ، جبدو كان إتصال من عند طارق ناض هامس ليها :
أنا جاي .. خرج من تم متبعاه بالعين ، رجعات عينيها لناس لي تم ولي كيشطحو مرة مرة كتجغم من العصير ديالها وتحرك راسها يمين وشمال محيدة داك القب من فوق راسها ..
- سوكي ( طپات فالپيسي وفالمايك نطقات ) : اسمع أسمع .. ( موسيقى حماسية ) ..
- بغيتي تعيق عليا طريقك خاوية بصحتك شماتة باش بدلتيني ، ينهار شفتك معاه ضحكتيني يا جامي فحياتك لا نسيتيني أما أنا تفكيت منك وهنيتيني .. عطيتك قيمة وأنت حتى بصلة متساوية يا سايي لقيت انا لي تبغيني كونتي فحياتي غادي تأديني ياربي رزقني لي تواتيني حنايا سبوعة وماشي ماما غاطيني ( موسيقى ) ..
- كولشي كيشطح حتى لي كان ݣالس ناض ، ماشعراتش براسها نهائيا حتى لقات راسها وسط منهم .. كتجدب بشعرها وتنقز مغمضة عينيها غادية مع أنغام الأغنية ..
- دوري تا عياي وتجي عندي باكية ونقولك سير ياختي كيدم لهيه .. مانعطيكش ضراسي عندي لي نبغيه ، سير عند البوهالي لي فرحانة بيه .. أما انا قطع ياسي إسمي غير نسيه .. يالي تعشق الحديد تفوت مصدية يانتوما تعيشو تلت شهور فصيف حنايا نعيشو صيف ربيع شتا وخريف كنجيبوه من فم السبع بسيف عايشين غير بنصيب وسعاية يلاطيف ..
- شطحات ونقزات غايبة على الوعي واش كاين شي حد تم .. كانت كتر من هادوك ليكانو حاضرين شطيحها لي فاهم علم النفس ايعرفها كتفرغ كاع الطاقة السلبية لي كاينة الداخل عندها .. هبط مع الدروج راجع وصل لبلاصتهم مالقاهاش ، دور راسو بزربة كيقلب طاحت عينيه عليها داخلة وسط منهم كتشطح بيديها وبرجليها وبراسها وبشعرها اي خلية فيها كتشطح ..
- تبدل الريتم وتبدلات الأغنية : يا صافي راه ديتو وحسابك ديتيه بغيتي ضحك عليا ضحكتي عليك المغرب كامل ، حبسك أنا ساليتو والى أنتيا عاد بديتيه بجوج تواتيتو حيت هو ماشي راجل .. ( كل كلمة كانت كتغنى كانت كتحسها عليها كتخليها تجهل وتشطح بحال الى دݣو ليها برة ديال الجهالة والغياب على الوعي ) .. مع كل أغنية كتطلق كانت كتشطح معاها ، ضار الضو وتفيكسا عليها .. زولات القبية كدور بيها لايحاها
- ضايرين عليها البنات ودراري كيشطحو معاها بحال الى كيعرفوها ولا من معارفهم .. تبدل الريتم وتحول لأغنية لي خلاتهم كلهم يغنيو مع ديدجي ومعاهم هي :
غادي ويميل باقي ما طاح
ضد الخونة رضاك أ يما سلاح
اللي فيه نداوي فيا كايجرح
واش اللي يآدي فنعاسو كايرتاح
بوبية خوني خايبة تخون الصحة
فراقو ديما فرحة اللي ما دار بحساب الملحة
عطيناهم قيمة بغاو اللعاقة رجعوا سلعة
عارفك غمفقوسة بحال شي كاس كايواسي قرعة
فبحر الرجلة ولدك أ يما عوام
ما تغروا الليام ما تسوقوا مدام
اللي كانوا احبابي را باعوا لي الاوهام
خلاوني وسط الضلام كاتشافي الايام ، شابر طيلي، وكانعيط شكون اللي فاهم حالي
الحصرة معاشرة هبالي، ما فادوني موالي
في من نتيق، سيدي ربي واحبابي زاد هوالي
ما ڭروش بطعامي، ظهري كله ضرابي ..
- كتغني وتشطح ودموعها هابطين ماعرفاتش علاش ، واقف كيشوفيها مخليها على ديك الحالة حتى سلات .. تدخل جارها هز القبية ديالو وهي كتحس براسها عيات وتهدات وبغات غير تحط الراس .. خلص وخرجو من تم فتح الباب طلعت حطات راسها على جاجة مغنضة عينيها سخفانة ماعندها الجهد حتى باش تدوي ، طلع لبلاصتو ديمارا غادي بيها دور راسو لجهتها لقا راسها عواج ودخل بين الكوسان وبين زاجة ديال السرجم ..
- الروطال : عنبر .. مجاوباتوش نهائيا من إنتظام التنفس ديالها والوضعية ديالها عرفها نعسات .. تنهد وقلب الطريق شاد الطريق لي كتدي لبوسكورة .. هز تيليفون ديالو كليكا على نمرة عماد بعد مدة جاوبو خوه :
وي عماد سمع ..
- عماد ( قاطع فيه الهضرة) أصاحبي درت بكلامك مشينا عاودنا لدرية .. بصدمة خرجات ماعرفوها دارهم فين زادت لدابا مزال مادخلات ..
- الروطال ( بهداوة ) : خليني أندوي .. ( شاف فعنبر غارقة نعاس) عنبر راها معايا
- عماد ( ݣلس من بعدما كان واقف ) : كيفاش معاك ؟ أش كدير معاك ؟
- الروطال ( عاود ليه كولشي بتفصيل ) : دابا نعسات ماعرفتش شنو غاندير ؟ واش نديها تبات عندي فدار ولا نديها لدارهم ؟
- عماد ( بحسم ) : لا متديهاش بهاد الحالة .. ديجا دار عامرة عندهم ݣالتها ليا ماجدة خالتها جات هي ولادها ، غايكون كترت الهضرة وكل واحد يسول من جديد وهي عيانة .. ديها لعندك غدا انجي لعندكم
- الروطال ( تنهد ) : واخا .. صافي سير .. ، قطع معاه التيليفون وكمل الطريق لدارو ، وصل حل ليه العساس دخل خرج هو الأول حتى حل الباب ، ورجع لعندها فتح الباب ليها .. محركها كيعيط بسميتها :
عنبر ، عنبر .. ( كانت غارقة فنعاس بالعيا وجهد لي مابقاش عندها جهد جسدي ونفسي ) .. شاف حتى عيا هزها بين يديه بحال الريشة ، سد الباب ودخل لدار طلع بيها لطابق الفوق داخل بيها لبيت ديال الضياف .. بيت بحال بيتو ولكن بطابع عصري .. حطها فوق النموسية مزول ليها البوتيو جر الغطا عليها طفا الصو وخرج من عندها ..
- نزل التحت ساد الباب محيد القبية ديالو كيحس براسو ضارو .. دخل للكوزينة سخن الما خشا فيه ساشي ديال اللويزة حتى طلق وشربو ، طفا الضواو وطلع لبيتو حل التيليفون ديالو لقا ميساج من عند ماريا :
" سلام فاروق صاڤا ؟ جيسپيغ تكون مزيان .. سونيت ليك ولكن مجاوبتيش ، مهم انا رجعت من الكونجي الى عندك وقيتة بغيت ندوي معاك فواحد الموضوع من الأحسن نتلاقاو حسن من أپيل "
- الروطال ( حك حاجبو غمض عينيه وحلهم بعياء وجاوبها ) :
" على سلامتك وي مرحبا .. غير هو فوتي ليا هاد 3 جوغ حيت ڤغيمو مشارجي بالخدمة نفكها عليا وأنا معاك "
- كانت مزال فايقة فاش وصلها الميساج .. نفخات بقلة صبر ولكن مكان عندها مادير غير تصبر جاوباتو ديك الساع : " صافي واخا يلاه نخليك ترتاح تصبح على خير " .. قرا الميساج دار ليه قلب وحط التيليفون .. مكان فيه مايدوش خلاها حتى للغدا فصباح ويدوش ، زول حوايجو ودخل لفراشو طافي الضو ..
______________
- وصلهم عزيز لدار .. نزل ليهم البالز ، فتحات حياة الباب .. دخلو البليزة غير وصل ليهم البليزة للفوق ونزل كان خاصو يدي طاكسي ويمشي بحالو لدار .. تمات طالعة رشيدة تابعة حياة من اللور او ولادها وراها حتى وصلو الفوق .. دخلات لصالون كانت ݣالسة سميرة ..
- رشيدة ( بإبتسامة ) : السلام عليكم .. ( سلمات عليها سميرة رحبات بيها ) :
على سلامتكم .. ݣلسو رتاحو ، ݣلسات رشيدة او ولادها حداها حشمانة وإبتسامة الخجل على وجها .. :
الله يكبر بيك الالة لهلا يخطيك .. تحل باب الطواليط وخرجات تودة حازمة راسها لي غاينفاجر عليها .. غادية لجهة الصالون حتى دخلات عليهم رامية السلام .. شافتها رشيدة حبس ليها الما فركابي ، بقات مخرجة فيها عينيها مصدومة الرعدة شداتها من صبعها الصغير .. مابقات فهمات والو ماعرفات تبقى كالسة ولا توقف ولا شنو دير شحال هادي مشافتها .. من اخر مرة جات سولاتها على ختها وعلى عنبر ..
- تودة ( وقفات كتشوفيها بإبتسامة كانت باينة فيها مخلوعة ومصدومة ، بصوت طبيعي ) :
رشيدة مرحبا بيك اخويتي غبور هذا .. تقدمات لعندها سلمات عليها ورشيدة رضات عليها السلام بعقل مرفوع
- رشيدة : فاطنة .. سبحان الله العظيم أش كديري هنا ؟ ( شافت فحياة ورجعات شافت ففتودة )
- تودة ( ݣلسات وبنفس الإبتسامة ) : ايوا شتي الدنيا شحال صغيرة أخويتي .. الضوري حتى تعياي وتجيبك الوقت وتلقاي مع الحباب
- حياة : أنا وعنبر ساكنين مع خالتي تودة وخالتي سميرة
- تودة ( كضحك ) : ݣولي ليها أفاطنة لا تخربقي ليها العقيل لي عدها .. هي مكتعرفنيش بتودة , وزايدون ابنيتي انتوما ماشي ساكنين معايا توما راه بنياتي ( شافت فرشيدة ) ..
- رشيدة ( بلعات ريقها ) : وكيدرتو حتى تلاقيتو ؟
- تودة ( تنهدات ) : وتي شوفيليا اختي رشيدة وݣولي سبحان الله العظيم ، كنا فموسم مولاي عبد الله .. الموسم لي كان يمشي ليه سليمان الله يرحمو فهاد النهار .. ايوا وعنبر كانت فيه هي وحياة وتلاقينا ، بنياي الحبيبة عقلات عليا مانساتنيش
- رشيدة ( تقرصات ) : وعلاش لا راك تي لي ربيتيها
- تودة : وايه راه كيݣولك لي يربي كتر من لي يولد ، وانا عنبر بحال الى ولدتها نيت ( عينيها فعينين تودة وهي موركة على أخر كلمة)
- رشيدة ( شافت فحياة ) : وانتوما اش داكم للموسم كاعما ݣلتيها ليا ؟
- حياة ( كان خاصها تقوليها لي كاين ) : أمي عنبر ولا تغني فالعراسات والمهرجانات ..
- رشيدة ( ضربات فخاضها ) : اويلي وحدي ، ياك ݣلتو ليا لقيتو خدمة فشي وزين خدامات بجوج كتي سايرة تكدبي عليا ابنت الهم من فعلك
- حياة ( بإنفعال ) : لي وقع لينا انا وعنبر حتى واحد مايݣد عليه .. وعرفتي بمسبة من مسبة راجلك ، راه نيت خاصك تعرفي لي كاين
- تودة : خليها ابنيتي أحتى ترتاح وعاودي ليها
- حياة ( شافت فتودة ) : لا نعاود ليها دابا نيت باش تعرف .. أجات عنبر وخدمات تغني وانا كنضرب فالبندير
- رشيدة : اويلي أويلي على بنات عندي ولاو شيخات ..
- تودة ( بصوت عالي ) : ومالهم الشيخات أرشيدة .. ياكما كيديرو الحرام ، الحمد لله كنمشيو نغنيو بعزنا نشدو خلاصنا ونرجعو بحالنا لدارنا .. نتوضاو ونصليو ونطلبو ربي يعفو علينا بحال الناس مانسمعو هضرة من عند حد .. ولي يفوت الحد معانا ويبعي ينقز السلك كنتقبوليه بيه عينيه الحبيبة ..
- حياة : زعمة حنا اجينا لهاد كازا لكينا البيبان محلولين وشركات كيتسناو فينا .. راه لي داز علينا ماسيقناش ليك ليه الخبار ، بمسبة راجلك لي سرق لعنبر 50 مليون ..
- رشيدة ( حلات فمها وعقلها ماستوعبش واش بنتها قالت 50 مليون ولا غلطت ) : تي تي كيفاش 50 مليون منين جات هاد 50 مليون ..
- حياة : عطاوها ليها عائلة راجلها .. كانت ادير بيه مشروع وشتي حالتها كيكانت ، داكشي باش خباتهم وراجلك ضربهم ليها وعلم الله فين خسرهم خلا ليها 80 ألف ريال .. نهار جينا لدار بيضا تسرقات لينا فالمحطة .. وتسرق ليا ساكي بحوايجو بتيليفون بلاكارت وهادشي كامل اميمتي ماݣلناهش لك ، كونماشي رشيد وداك ولد الناس دعزيز كون ضربونا الحيوط ولا شدونا الباطرونات يبيعونا لرجال ..
- رشيدة ( بقات شادة حناكها وساهية فكلام حياة مخرجة عينيها ) : هادشي كامل دايرو ولد الحرام الحرامي وانا مافخباريش .. الما دايز من تحتي وأنا مسايقة خبار
- حياة : أجينا حنا وخدمنا فلي كان واجد باش نتسترو ونلقاو ربعة الحيوط يجمعونا من الزنقة .. الحمد لله لي تلاقينا مع خالتي تودة وسكنا معاها ، نهار لي مات راجلها تحولنا كاملين لهنا .. حاسبانا بناتها وكثر من بناتها لا هي لا خالتي سميرة ماخصنا خير ، شاربين واكلين مكسيين ناعسين .. كنسيفط ليك ديك البركة تعاوني بيها وساكتة ..
- تودة ( شافت فحياة ) : نوضي أكبيدتي وجدي صينية ديال أتاي وحطي لي قسم الله خوتك أيكون فيهم الجوع الحتيت خليه لمن بعد ..
- ناضت حياة للكوزينة .. شافت تودة فالوليدات :
نوضو ݣولو لحياة تعطيكم دانون راه فثلاجة .. ناضت جيهان وعمران للعند ختها للكوزينة وبقا تودة وسميرة ورشيدة ..
- تودة ( بجدية شافت فرشيدة لي غير ساهية ) : وشتي سبحان الله العظيم شحال خبيتو .. وبعدتو بنتي عليا وربي جابها ليا حتى لبين يديا ( هزات فيها رشيدة راسها مصدومة بكلامها .. ملامحها تبدلو بانو فوجها كاع ألوان الطيف ) مالك تصدمتي عد بالك مغانعرفش بلي سليمان خطف ليا بنتي وهي مزال لحيمة وداها لختك .. نهار عرفتوني قربت نعرف بلي راها بنتي تافقتو مع بعضياتكم وهربتوها ..
- رشيدة ( بلعات ريقها فشلو عليها جنابها ) : أش سايرة تݣولي أفاطنة رجوع لله
- تودة ( شافت فسميرة لي كتشوفيهم بجوج ) : بغات تنكر وتكذبني ( رجعات شافت فيها ) أسمعي ياه ، مليكة راها حطات راجل ختك بي وجهو .. بلي شرا من عدها بنتي حيدها ليا وهي لحيمة .. ماحشمتوش واش مكتخافوش الله ، وشوف سبحان الله العظيم واخا انا مكنشمت فحد .. ربي كيعاقب كل واحد على نيتو ، حيت كو كتي تحكمي بالحق كتي دوري فراجل ختك وختك باش مايحرمونيش من بنتي .. عقلتي ارويشيدة كنت نجي ونسولك عليك وكتي تنوكري وتسدي عليا الباب ، ودابا جيتي لداري وحليتها فوجهك حيت انا ماشي بت لحرام الحمد لله ودزتي فوجه بنتك او وجه بنتي .. انا مانساش الخير تعاود علك بلي فيقتيها من الغراق لي كانت فيه
- رشيدة ( هبطو دموعها ) : أنا عمري ماحقدت علك ولكن سليمان الله يرحمو .. ݣال بلي ولدتيها من الحرام ، وبلي تي مامزياناش وخايبة وفعلك خايب .. وبلي كاع لي كانو معاكم فجماعة كنتي معاه .. وبلي البنت إلى كبرات معاك غير أتكرفص ، وبقات فيا ختي لي ربات عليها الكبدة هي ماعندها يد فداكشي لي وقع ..
- تودة : عرفناها ماعندها يد وحتى أنا ماعندي يد .. مابغيتش ندعي فالميتين أرشيدة ، اهو اخويتي بنتي بنت الحلال ماشي بنت الحرام .. انا وباها قاريين الفاتحة وبنتي كنت انهزها بسناني وماكتش باغية نعطيها حيدوها من يدي وهموني بلي راها ميتة الله ياخود فيهم الحق ..
- رشيدة ( بتوتر ) : واش عنبر في خبارها ؟
- تودة : لا براكة عليها غير لي هي فيه .. سمعي أرشيدة على وجه بنتي او وجه بنتك او وجه دوك دراري لي ماعدهم ذنب ، لݣيتيني مرة حقانية ومنبغيش اتعادو انا عمري حملت داك الرعواني دراجلك .. كو كتي شي مرة وݣادة كون بقيتي انت وبنتك راس فراس ، ولكن انت اجا داك الحرايمي خديتيه .. سمعي اتكلسي فهاد الدار واكلة شاربة معززة مكرمة حتى يسهل ربي نشوفو شي خديمة ليك تهزي بيها وليداتك وتعاوني ديك البنت .. غاهو بشرط ..
- رشيدة ( مسحات دموعها ) : ݣولي أخيتي كنسمعك ..
- تودة : اتبقاي خالت بنتي كيما كونتي ، متݣولي ليها والو حتى نهار نبغي انا نݣولها ليها .. ومتقجري عليها مادخلي ليها فحياتها وتفرضي عليها شيحاجة ..
- رشيدة ( تنهدات تنهيدة طويلة ) : واخا أختي ماݣلتي عيب الله يجازيك بالخير ، وقفات تحنات ليها على راسها باستو كتبكي
- تودة : صافي أرشيدة صافي نعلي شيطان صافي .. جاو دراري كيجريو ݣلسو هازين دانون وبيمو وراوه لمهم :
ماما شوفي أش عطاتنا حياة ( كيوريوها دانون وبيمو )
- رشيدة ( مسحات دموعها ) : مزيان بصحتكم ومتكلوهش دابا حتى لصباح دابا ليل .. جات حياة حطات الصينية وبلاطو فيه المسمن والبطبوط ، عمرات الطبلة .. تودة عقلها غابر مكاينش معاها كاع كتشوف فساعة كبدتها واكلاها على بنتها كل مرة تشوف فساعة وعقلها غايب مكاينش معاها ..
- سمعو السونيت فالباب ، ناضت حياة الطل رجعات شافت فتودة :
خالتي عماد خو ماجدة ... جمعات تودة النوضة مجاوباتهاش ، هبطات كتجري فدروج حلات ليه الباب :
ياك لاباس اولدي امضرا عدك شي خبار ، ل 11 هادي ديال الليل ومزال مجات ماعرفتها فين هي
- عماد ( حط يدو على دراعها ) : غير تكالماي .. يلاه سونا ليا خويا الكبير ، وݣاليا بلي كاينة معاه
- تودة ( غوبشات بإستغراب) : كيفاش معاه واشداها ليه ؟
- عماد : عنبر كانت حدا البحر .. وخويا كان تما كيجري بانت ليه داخلة بحوايجها وحبسها عند بالو واش باغة دير شيحاجة فراسها.. كاتليه بلي كانت باغية اتعوم راك عارفة لي سمعات ماشي ساهل ، المهم داها وتغداو بجوج .. المهم داها فوجات وبدلات الجو باش ترتاح ، ونعسات ليه فطوموبيل سونا ليا باش يعرف لادريس ديالكم ولكن ماخليتوش ݣالت ليا ماجدة كاينة خالت عنبر
- تودة ( تنفسات براحة عاد رتاحت ) : اه اولدي كاينة حسن نيت ماتشوفهاش فديك الحالة
- عماد : غدا إن شاء الله أنمشي عندهم فصباح وندوي معاها ونجيبها معايا كوني هانية
- تودة : الله يرحم ليك الوالدين أولدي والله يخرج سربيسك على خير ، عذبناك معانا
- عماد ( هزهز ليها براسو ) : مكاين حتى عذاب .. الله يبيتكم فراحة .. عطاها بظهر ركبت طوموبيلتو مشا وهي طلعات لقات حياة كتسناها عند العتبة :
أمضرا أخالتي ؟
- تودة ( عاودات ليها ) زيدي دخلي باش ماتعيقش مك .. دخلو راجعين للصالة
- رشيدة : فين هي عنبر ؟
- تودة : عندها سي خدمة فرباط ماتجي حتى لغدا ( شافت فسميرة او حياة ) سنيرة مادويتيش مع رجاء ؟
- سميرة : دويت معاها أݣبيل .. لاباس عليها داك الحريق مابقاش بعدا
- تودة : إيوا الحمد لله ( تنهدات ) ..
___________________
- طالع مع الدروج عيان .. من ورا ماعيطات ليه حياة طمناتو على عنبر .. وقف قبالت الباب ديال الشقة ديال ختو .. يلاه ايحل الباب حتى تحل الباب لي قبالتو ، ضار كانت ماريا واقفة بپيجامة كاشمير فالأحمر سروال والفوقي ديالو ، شعرها جامعاه ودايرة بوندو .. كتعطي منها رائحة بنوتية خفيفة
- ماريا ( بخجل هازة بلاستيكة ديال الزبل ) : سلام رشيد كيداير لاباس عليك ؟
- رشيد ( طلعها وهبطها ) : أنا الحمد لله اشوية ديال العيا وصافي وأنت لاباس خبار دار ؟
- ماريا ( تنهدات بإبتسامة بريئة ) : الحمد لله .. خرجت الزبل حشاك بغيت نعطيه لعلال
- رشيد : يلاه كتعشاي ؟ كنشم ريحة الطياب
- ماريا ( ضحكات ) : أه تشهيت طاجين ديال الجلبانة ، كنت انتغدا بيه ولكن مساليتش خليتو حتى العشا واخا اناكلو معطلة
- رشيد ( غمض عينيه) : الله كيحمقني طاجين ديال الجلبانة ، بصحة وراحة
- ماريا : أنت تعشيتي ؟
- رشيد ( حرك راسو بنفي ) : لا الصراحة داز عندي النهار مشارجي عييت ديال بصح .. انشوف شي دانون ونعس
- ماريا : اويلي على دانون .. الى بغيتي نحطليك من الطاجين ؟
- رشيد ( ضحك ) : والله منݣوليك لا .. لهلا يخطيك أماريا
- ماريا : الله أودي مابيناتناش .. شكون لي وݣف معايا نهار جيت لهنا من غيرك .. ماينسى الخير غاولد لحرام .. أنا نهبط الزبل لعلال ونحط ليك صافي ؟
- رشيد ( هزهز ليها راسو ) : واخا .. حل الباب ديال الشقة ودخل ، اما هي نزلات فرحانة مقاداها فرحة لعند علال عطاتو الميكة دزبل وطلعات ، مشات لطاجين لي كان كيتربخ حطات منو فطبسيل غطاتو ، هزات الخبز وحطاتهم فبلاطو توجهات للباب حلاتو ، او وقفات قبالت الباب سونات ..متعطلش بزاف حل الباب
- ماريا : كول دابا قبل لا يبرد وغير قبل عليا وعلى طيابي ( ضحكات )
- رشيد ( بتاسم ليها ) : اللهم اودي ريحتو كتعطي باينة البنة امن رويحة
- ماريا ( بحشمة حدرات راسها ) : بصحة وراحة .. عطاتو بظهر بقا واقف حتى دخلات وسدات الباب ، تنهد تنهيدة طويلة دخل لدار حط البلاطو مشا غسل يديه وجا ݣلس .. عرا على الطبسيل طلعات معاه ريحة كتشهي ، هز الخبز وبدا كياكل ويتبنن ..
- رشيد : الله على بنة الله ( حرك راسو يمين وشمال) خاصك تزوج ارشيد خاصك تزوج براكة عليك من تازوفريت صافي هذا هو الحد ..
____________________
- الود بالود يسقي والصدق بالصدق يجزي
ومن كان لنا سكنّا كنا له وطناً ... نحن بسطاء نؤمن بالعفوية والنقاء ونعذر من نسي ونسعد بمن بقي
ومن ساق لنا بالطيب قولا وفعلا سُقنا له بالود والمحبة والاحترام .
- فاق الصباح كيحس بعظامو مدݣدݣين عليه ، زول عليه الغطا وتوجه نيشان للحمام .. خدا دوش سخون واخد فيه راحتو كيحاول يرخي بيه عظامو ، خدا وقتت الكافي من الما سخون هز البينوار لبسو وخرج .. نشف راسو مزيان هاز كيطة فالكحل لابسها مرجع شعرو اللور راش من ريحتو ، لبس ساعتو هز التيليفون كانت الساعة 9 .. نعس كثر من القياس بنسبة ليه كان خاصو يكون فايق ..
- حل الباب تلاقى مع الخدامة قبالتو بإبتسامة :
سي فاروق صباح الخير .. الفطور راه واجد
- الروطال : شفتي البيت ديال الضياف ؟
- ( بإستغراب) اه لقيتو محلول وبحال الى شي حد ناعس فيه .. ولكن مكاين حتى واحد
- الروطال ( غوبش ) : كيفاش مكاين فيه حد !! شفتي فالحمام ؟
- اه قلبت مكان حتى واحد .. قاديتو وسديتو ، تخطاها مغوبش كيدوي مع راسو :
هادي فين مشات ؟ .. هبط مع دروج كيجري حل الباب الكبير مكانتش فجردة ، خرج من الجردة كيقلب .. جاه صوت ديال الغنا من بعيد توجه للجهة لي جاي منها الصوت كلما قرب كيزيد يسمع صوتها الأنثوي الباح لي عارفو مزيان ..
- زرب فالخطوات وقلبو خايف لا يكون داكشي لي فبالو وتكون جهة الخيل وتمشي للدهم تقرب ليه .. وصل لبلاصة الخيل ولي حس بيه هو لي كان الصوت جاي من الباب لي فيه لدهم .. جرا وحبس الجري عند باب عودو واقف حابس أنفاسو كيشوف المنظر لي قبالتو .. كانت واقفة قبالت عودو كتغني وتجدب بشعرها .. نفس حركاتها كان كيطبقهم عودو الأدهم الجهة لي كتجدب عليها كيجدب عليها حتى هو :
وا والبحراوي وسيدي علال والبحراوي واي والبحراوي .. والبحراوي يا علال وانت مالك ماجيتي ويلا بغيتي مليون عنبر من وليدات اليوم شطح رد دبح دبح شطح الردح ياوعاود دردك ياوزيد درك ..
- كانت تغني وتشطح بشعرها وهو كيشطح بشعرو عاجبو الحال كتحسو من نظراتو بحال شي عاشق ولهان ، بحال الى هي لي مولاتو وهي لي مدرباه .. حبسات الغنا واقفة بشعرها كضحك فرحانة وضحكتها الأنثوية الرنانة واصلة لعندو .. تقدمات بخطوات لعندو كتمس ليه شعرو تحك ليه باستو بين عينيه ناطقة بصوتها الخلاب :
أش هاد الزين هذا ماشاء الله .. كيقولو ليك لدهم لي كيحيد الهم والله حتى حيدتي همي حبيتك ( كتشوف فعينيه ) لالا أنا عشقتك صافي تخليني نركب فوق منك ياك .. تحركات هازة على جلايلها يلاه بغا يتدخل الروطال حتى كانت وا طلعات فوق منو .. ما أداها ماطيحها بالعكس تماما ، كيتكشى بيها ويحرك راسو بحال الى كيدندن شي اغنية .. تحنات معنقاه :
أحسن حاجة وقعات ليا هي شفتك هاد الصباح .. خاص نطلب فاروق يخليني نجي نشوفك مرة مرة انا صافي حبيتك حتى انت حبيتيني ياك ؟
- تراجع الروطال باش متشوفوش مصدوم من ردة فعل العود ديالو ، عمرو خلا شي حد قرب ليه ولا حداه بالعكس عنيف مع البراني من غيرو هو حد مكايقرب ليه مافهم والو .. جاتو بحال الغيرة بحال الى عودو خانو وخان عهدو معاه ..
- جا العساس كيجري هز فيه الروطال راسو مغوبش .. بصرامة : فين كنتي حتى خليتي تلباب محلول ؟
- عمر : كنت اسيدي أفطواليط .. الباب سديتو يمكن ماتسدش ليا مزيان
- الروطال ( بجدية وصرامة فصوتوو) : اخر مرة اعمر رض البال ... مغانبقاش حاضي معاك هنا سير شوف خدمتك .. عطاه بظهر ومشا معاجبوش الحال للمنظر لي شاف حبسات طوموبيل عماد ، نزل منها وتوجه لعندو :
صباح الخير
- الروطال : صباح الخير
- عماد ( بتساؤل) : فين هي عنبر ؟
- الروطال ( أشر ليه براسو ) : أتلݣاها فالمربط مخشية فلدهم .. عطاه بظهرو ودخل للدار ..
- عماد ماستوعبش كلامو .. توجه للمربط كيقلب بعينيه حتى بانت ليه واقفة كتحك فشعر العود ديال خوه .. حل عينيه على تواسعهم بإستغراب ، شافتو وتبسمات ليه تمات جايا عندو هزهزات ليه براسها :
صباح الخير
- عماد ( بنفس الابتسامة ) : صباح الخير .. كيصبحتي مزيانة ؟
- عنبر ( تنهدات تنهيدة طويلة وبإبتسامة وصوت رقيق ) : الحمد لله حسن من قبل ݣاع
- عماد ( حرك راسو وبإبتسامة جاوبها ) : هادشي لي بغينا .. فخبارك داك العود ماعمر شي حد ركب عليه وعمرو خلا شي حد يقرب ليه من غير الروطال ..
- عنبر ( بالإستفهام) : شكون هاد الروطال ؟
- عماد ( ضحك ) : فاروق قليل فين كنعيطو ليه بهاد السمية ، الأدهم العود لي كنتي حداه ديالو .. حتى واحد فالعائلة مكايقرب ليه من غيرو هو .. المهم نݣدو ندويو ؟
- عنبر ( بالإيجاب) : واخا مرحبا .. خرجو من ديك الجهة كيتمشاو .. عنبر هازة راسها كتشوف فالمنظر لي كان قبالتها مستمتعة بجماليتو
- عماد ( حنحن ) : وقيلة مكانش خاصني نݣولها ليك .. لبارح بقيت مبرزط داركم حالتهم كانت حالة كولشي تربج
- عنبر ( ربعات يديها شعرها كيلعب بيه البرد ) : بالعكس ، واخا جات قاصحة بزاف ولكن فيقاتني من الݣلبة وراتني شحال كنت أكبر حمارة على وجه الكرة الأرضية ..
- عماد ( شافيها ) : بالعكس متݣوليش هكاك .. أنت وحدة من بزاف عماهم الحب ولعب ليهم بحياتهم .. ماشي انت أول وحدة وأخر وحدة تغدر
- عنبر : ولكن الغدر ديالي أنا خايب بزاف .. ولش عرفتي شنو هو تعرفي راسك كنتي مزوجة بميكروب وكتبغيه .. يطلقك وتبقاي عايشة معاه 3 شهور وأنت راه مطلقة ومجايبة لدنيا خبار صعيبة والله ..
- عماد ( وقف وهي وقفات بدورها تقابل معاها ) : الحمد لله لي ماولديتش معاه .. كون ولدتي دوك الولاد هوما لي أيكونو فالعذاب
- عنبر ( تنهدات ) : كنت باغية نحمل وتكون عندي بنية ولا وليد معاه ... ولكن فاش دوزت لقيت راسي مكنولدش
- عماد ( ملامح وجهو تبدلو غوبش) : وايلي ؟ واش مكتولديش واش ميقنة ؟
- عنبر ( تفاجأت من ردة فعلو ) : أه راه هو لي داني عند هاد الطبيب ، قالي بلي طبيب العائلة
- عماد ( ضحك ) : وأنت تيقتيه ؟
- عنبر ( سكتات كتفكر .. تزاد معاها الزايد طلقات يديها وشافت فيه ) : بغيتي تݣوليا لي يطلقك بلا خبارك .. يقد يرشي حتى الطبيب ويكذب عليك باش ماتولديش معاه ياك ؟
- عماد :هانتي بديتي كتخدمي عقلك .. شوفي بحال هاد الناس كيستغلو البنات لي شخصيتهم ضعيفة ولا دايزين من شي صدمة فحياتهم .. مكايمشيوش لوحدة عارفة شنو باغية مغايقدوش حيت غاتفليهم ..
- عنبر ( تنهدات حالفة متنزل دمعة خرى مزال ) : عندك الصح .. انا لقا والديا ماشي بعيد باش كانو ميتين .. دخلني من هاد الباب
- عماد : بحال البنات لي غبر ليهم الأثر .. ستغلو الضعف ديالهم ، ناس على قد الحال كيبان ليها الفلوس طوموبيل كتقبل بلاما تسول .. طحتي مع مافيا اعنبر مافيا ماعندهاش ݣرام ديال الرحمة
- عنبر ( توترات الدم كيغلي فيها ) : ولاد الحرام .. ماكرهتش نشوفو قدامي نشتف عليه برجليا نحيد ليه ريحتو .. ندخل عليه للحبس جمافو
- عماد ( بصوتو الرجولي الهادئ) : لالا الى بغيتي تهلكي عدوك خدمي ليه بسياسة ، عمرك تبيني ليه بلي خلا فيك الأمارة .. ماتسرعيش خدمي عقلك شوية باش ماطيحيش فالغلط لي طحتي فيه قبل
- عنبر : دابا شنو زعمة نهز كفوفي لله .. ونوجهو لمولاي ونقول حسبي الله ونعم الوكيل .. لا سمحليا هادي نديرها على شي حد غلط فيا اشوية ولكن واحد أداني وغدرني وطحني وضيع ليا حياتي وكذب عليا .. مطلقني وعايش معاه كاع الفترة ديال العدة ديالي . ونقول نخليه لله لا سمحليا بزربة مانصيبش
- عماد ( ضحك ) : لالا ماݣلتش ليك هادشي ، اهو قبل بغيت نسولك ؟
- عنبر : واخا
- عماد : إلى ݣلت ليك .. حقك تاخديه منو بضوبل وتريپل ݣاع ، وتكرهيه فحياتو ويتمنى الموت ومايلݣاهاش ولكن بشرط تسنطي ليا ويكون عقلك خفيف ولي ݣلتها ليك تكون أش ݣلتي ؟
- عنبر ( تقابلات معاه بملامح باردة كتحس براسها شيحاجة تهرسات فيها وفنفس الوقت شي حاجة تبدلات إحساس مافهماتوش وجاها غريب ولكن كان خاصها ضروري جلسة مغلقة مع راسها تصلح فيها شحال من حاجة خاصها تصلح) :
تقوليا حيديه ليه ريتو ونجيبها ليك نديرها .. غير تبرد العاف*ية لي شاعلة فقلبي عاد غانرتاح .. شتي أنا نبغي الواحد من قلبي نعطيه عينيا يغلط فحقي نحطو سطل بلا تقرقيب .. ولكن هذا غنفر قبرو بيدي وندفنو وندفل عليه ..
- على الطبلة ديال الفطور .. كمل مسح فمو وناض ضاير كانت داخلة عنبر هي وعماد
- عماد : فاطر مبرد مع راسك وحنا مصارنا تسكحو
- الروطال ( دور لسانو وسط فمو هز بكتافو ) : لي بغا يفطر راه طبلة ݣدامو ( شاف فعنبر ) بغيت نݣوليك واحد جوج كلمات
- عنبر : أياه
- الروطال : الدهم انا مولاه ، ممنوع شي حد يقرب ليه ولا يركب عليه ولا يحاديه .. هادي أخر مرة تقربي لشيحاجة ماليك الله يرضي عليك
- عنبر ( طلعاتو ونزلاتو ) : ركبنا فطيارة ديال الذهب .. سلاولي أحنيني وانت قرب يطرطق فيك شي عرق راه اتجيبها أفراسك .. تخطاتو وتوجهات للطبلة تفكر مامسوقاش نهائيا ليه
- عماد ( حابس ضحكة شاف فخوه لي كان كيشوفيها بملامح باردة .. من عينيه كان باين ماكرهش يشدها يعطيها حتى تقول براكة ) :
غير نفطرو وغانمشيو .. حتى لمن بعد باغي ندوي معاك
- الروطال ( شافيه بعصبية ) : فوت جنابي هاد الساعة .. ضرب فيه وخرج ، جر عماد كرسي ݣلس فيه كيفطر .. غير سالة هو وياها وخرجو ركبات حداه دايرة السمطة مابقاتش شافت الروطال ولا شكراتو .. كانت باغية تشكرو ولكن التصرف لي دار معاها هادي شوية حلفات لا حشاتها ليه ..
_______________
- مجموعين على الطبلة سلاو الفطور ديالهم وݣالسين ، تودة كل مرة تشوف فساعتها قلبها واكلها على بنتها لي مزال مجات .. سونا الباب ناضت حياة منقزة الكرسي شوية ماطيح
- رشيدة : الله ابنتي بشوية .. نزلات كتجري حلاتولباب لقاتها واقفة ، بلاما تدوي ولا تزيد الكلمة جراتها وعنقاتها بكل قوتها .. مدة عاد طلقاتها :
دخلي .. طلعو للدار ، حطات بوتيو ديالها ودخلات ..
- تودة ( نقزات من بلاصتها ) : الله ابنتي الله ( عنقاتها وعنبر بدورها عنقاتها ) شوشتينا عليك كونماشي عماد مسكين لي جا لبارح ݣاليا بتي عد خوه
- عنبر ( بعدات عليها بإبتسامة ) : انا بيخير أماما فاطنة ماتخافيش ( رضات لبال لرشيدة لي كانت كتشوف فحالتها مافهمات والو ) خالتي جيتي ( تحنات عنقاتها بجهد ݣالسة حداها ) إيمتا جيتي ؟
- حياة : لبارح ، داك ولد الحرام دسعيد باع الدار بفراشها وجرا عليها .. سونات ليا مشيت جبتها انا وعزيز ..
- رشيدة : ݣالو ليا كتي فرباط .. ودابا مبان ليا عليك حالة الرباط ابنتي ، اش هاد الحالة هادي لي انت فيها ، شعرك طالع لسما وبيجامة ددار
- عنبر ( شافت فحياة ) : ماعودتوش ليها ؟
- تودة : لا جات عيانة ولي فيها كافيها .. مابغيناش نزيدو عليها ݣلنا حتى تجي بعداكين وديك ساعات نݣولوها ليها
- رشيدة : توما أش واقع ؟ ( كتشوفيهم)
- حياة ( عودات ليها كولشي ) : هادشي علاش ماݣلنا ليك والو
- رشيدة : ولد الحرام الله يلݣيها ليه كحلة زحلة .. اويلي ستغفرت الله العظيم ربي بغاك أبنيتي ربي بغاك لي مدارو فيك شيحاجة خايبة
- تودة : الحمد لله لي خرجات طريفة .. امنين جات فهادشي وماوقع ليها والو ، دوك الناس راه ݣاطعين يدهم من رحمة سيدي ربي
- رشيدة ( تنهدات ) : ݣلتها ليها ݣلت ليها زربتي ، ولكن كولشي من الخير .. كاع لي كيدوز علينا ربي داير فيه سبب
- عنبر ( رجعات براسها اللور ) : دوزت نهار طويل .. ولكن الصراحة والله حتى رتاحيت .. هاداك السام العقروش ديال فاروق واخا مسموم ولكن الصراحة نفعني كيفاش دار ليها ولكن والله حتى خرجني من ديك الحالة
- حياة : فين تلاقيتو ؟
- عنبر : كنت بغيت نعوم فالبحر .. ماكنتش حاسة براسي ، وجا هو عند بالو بلي بغيت نتاحر ، داني كليت شوا ومشيت لعبت ودخلني لبواط
- تودة ( بإستغراب) : اش هاديك الاخرة ؟
- عنبر : واحد القهوة فيها الغنا .. المهم رتاحيت ومع العيا نعست داكشي باش داني لدارو( شافت فيهم ) بغيت نقول الڤيلا ديالو وربي العالي على بلاصة كيدايرة فيرما قدها قداش .. والڤيلا بلاپيسين والخيل عاد واحد 2 طوموبيلات كيدايرين .. ( كتفكر ) البيت لي نعس فيه كيداير الدار فراشها كيهبل عمري شفت شي ڤيلا بحال ديك الڤيلا ، حسن من ديك لي كان فيها لي مايتسنى هادي راقية وكتحسي براحة فيها ..
- حياة : يلاه قلتي مسموم ..
- عنبر ( شافت فيها ) : شحال فيك ديال تحكار ياختي .. انا غادي نوض ندوش ونعس شوية ، كنحس بالعيا والله
- سميرة : حقك ديال الرفيسة راه فثلاجة خليتو ليك ..
- عنبر ( وقفات تحنات ليها على راسها باستو ) : لهلا يخطيك عليا اخالتي سميرة .. ( شافت فيهم ) لهلا يخطيكم عليا كاملين
- تودة : ياكما نوجد ليك حوايجك ؟
- عنبر : لا اماما ارتاحي انا انجبدهم .. دخلات لبيتها جبدات حوايجها حطاتهم ، دخلات للحمام طلقاتو تخشاتو تحتو كينزل سخون يديها خدامين كيغسلو فشعرها وعقلها غايب سارح فهادشي لي عاشتو هاد يوماين ..
- سالات الدوش لوات عليها البينوار وخرجات ، دخلا لبيتها لبسات بيجامة سخونة بسروالها فالبيض فيها تصاور ديال حب الملوك فالأحمر ، دارت لشعرها السيروم جمعاتو وعكفاتو بزيف حياتي ..
- بان ليها تيليفونها محطوط .. هزاتو كان طافي دارتو فلاشارج حطاتو سدات السرجم توجهات لنموسيتها تكات فيها كتخمم كتحرك فرجلها وكتشوف فسقف ..
- شحال من حاجة لقات راسها غالطة فيها كان خاصها ضروري تبدل شحال من حاجة فراسها وفشخصيتها بضبط تبسمات ببلاهة من داكشي لي كانت كدير على بدر ، حبها ليه الكبير البكا لي بكاتو على قبلو والكأبة لي عاشت فيها فاش يحسابليها مات .. تخمامها خلاها تغمض عينيها ومتعقلش على راسها حتى نعسات ..
______________________
- الـــنــاظــور 📍 ..
•• فپتيت ڤيلا .. أتاتها مقتاسم للمغربي أصيل وعصري ، نزلات سيدة فالخميسات من عمرها .. لابسة فراشة منبتة مع زيف خارج منو بعض الخصلات الزعرين .. عينيها كانو خضرين وبياضها كان واضح لأي واحد .. عيطات بصوت رقيق :
مريم مريم .. خرجات واحد البنت من جهة الكوزينة تكون فاواسط العشرينات :
نعام الالة
- الغدا واجد ولالا .. ولدي غادي يكون هنا من هنا لواحد الساعة ديال المݣانة ، الله يرضي عليك نبغي كولشي يكون متول
- تهناي الالة راه كولشي واجد .. خاصو غير يجي إن شاء الله .. حدرات راسها ومشات ، توجهات للصالون كان ݣالس راجل فستين من عمرو داير رجل على رجل شاد كتاب كيقرا فيه ، غير شافها وتبسم ليها :
الزاز عاود الالة ثورية
- ثورية ( ݣلسات بغرور والإبتسامة مزينة وجها ) : راك عارفني الحاج .. ماشي شيحاجة لي جديدة عليا ولالا ( ضحكات)
- الحاج : واش خلاني نبغيك هذا شحال ومارتاحيت حتى ديتك ، ݣولي لي طارق معاش غايوصل ؟
- ثورية ( شافت فساعتها الرقيقة الذهبية ) : واحد سويعة غايكون هنا إن شاء الله ..
- الحاج ( سد الكتاب وحطو حاط معاه نظاظرو ) : غير هو الله يرضي عليك سايسي معاه ومدخليهش دخلة خايبة غير بالهداوة
- ثورية : كون هاني واش مكتعرفنيش .. الى بغيت شيحاجة راه نوصل ليها
- الحاج : هادشي لي بغيت إلى مشا حتى بغا .. انطلعو درجات هوما ماشي غير دريجة وحدة .. خاص امايكون راسو قاصح
- ثورية ( عوجات فمها معلية حاجبها ) : بنتي خرجات من طوعي ودارت لي بغات .. وحدة نافراني ومكدوينيش ، لوهرا تخسر عليا تيليفون مرة مرة شبهو لباهم .. طارق مزال كنحس بيه حنين شوية وماشي بحالهم .. وزايدون شكون لي يرفض بنت الإسماعيلي الحاج
- الحاج ( تنهد ) : إيوا كنتمناو .. سونات عليا لمياء قبيل هاد السيمانة غادي تكون هنا
- ثورية : ايوا هي نشد طارق يبقى معانا يشوف نيت ختو ..
- الحاج ( هزهز براسو ) : إيهيه فكرة مزيانة .. على مولانا ..
- "ويبقى أفضل شُعور هو التجاوز، تجاوز الظنون، وتجاوز المشاعر، تجاوز الفترات والمواقِف، وحتى تجاوز الأشخاص، أشخاص كانوا بيوم كُل شيء بالنسبة لك، ولكنك تجاوزتهم كأعمِدة إنارة مُنطفئة بنهارٍ مُضيء، شعور مُريح ومُطمئن ."
بـعـد مــرور أســبــوع
- فالمكتب الخاص للعميد .. ݣالس قبالتو عماد حاط ليه جميع الملفات .. كيشرح ليه كل حاجة بوحدها ، والعميد كيسمع ليه وكيشوف دوك الملفات كيأشر ليه لكل صورة ، سد الملف وشاف فعماد بإهتمام كيسمع لكل حاجة كيقولها وكيخرجها من فمو ..
- عماد (بجدية ) : شنو بان ليك أسيدي ؟
- العميد ( حرك يدو بتساؤل ) : كنتيق فيك أعماد .. عارفك تݣد عليها مغاديش ندخل معاك فتفاصيل .. غير هو الله يرضي عليك الصح يدوز فسرية تامة الدق وسكات ، طولنا فهاد لافير بزاف دابا راه عاطيين اراحة حيتاش عارفين بالبوليس عايق بيهم .. مابغيناش يدور العام وحنا مزال كندورو فبلاصتنا ونبقاو غاديين فالخسران ..
- عماد : هادشي لي ݣلت ليك شحال هادي وأنا كنفكر فيه ولكن ماعنديش ليه طريق .. كانت خصاني الورقة الرابحة لي نݣاد لعب بيها وخاص الأوردر من عندك أسيدي
- العميد : مابغيتش الغلط أعماد .. الݣرام ديال الغلط مابغيتوش ، إلى مشيتي حتى غلطي فهادي غير نسى هاد الضومين حسن .. هذا تحدي ليك حتى أنت الكرة بيدك لوردر هانت خديتيه .. الباقي عليك دير لي عليك راك عارف تميز بين الصح والغلط ، أنا ماتسالني غير نعاونك ونأيدك ولكن تزلق ماتعرفني مانعرفك المهم عندي هاد لافير ( ضرب على المكتب ) تسد ونتهناو .
- عماد ( وقف عاطيه التحية ) : كون هاني أسيدي .. وإلى وقعات شيحاجة اتكون عليا .. أنا لي غادي نتحاسب وإلى غلط غبر ندفن راسي حسن
- العميد : وعليه تݣد تمشي .. خرج عماد من عندو توجه للمكتب ديالو ، هز التيليفون ديالو وسوارت الطوموبيل وخرج ..
___________________
- حياة ( فرحانة مقاداها فرحة ) : عرفتي الفيديو شحال ضرب فاليوتيوب أصاحبتي نهار واحد 2 ديال المليون واعر بجهد ..
- تودة : انا على مبان ليا ابنيتي الفلوس لي ايجيوك منو ديري ليك شي مشيريع
- سميرة : ولاهيلة دبصح سمعتي طبيب اش ݣاليها ، راه طونسيو مامعاهش اللعب .. الله يستر تولي داوي عليه وتي باقي صغيرة
- عنبر ( متكية فوق سداري ) : واييه ݣاليا بلي داك الصداع ديال البيفان وسهير ، هو لي كيضرني فراسي وكيعطيني الصداع .. ولقا طونسيو طالع ليا قاليا نتبع اريجيم ونبعد على الصداع وستريس الراحة ونتفادة اي حاجة كتعصب
- تودة : وهادشي علاش ݣتلك كو هادرتي شي مشيريع ابنيتي والله
- رشيدة : عدها الصح .. أش بغيتي بشي غنا وسهير ديال العراسات راه ماشي ساهل ابنيتي ، مزال هادشي دالفيدوات ولا ماعرت ليه ماشي بحال العراسات والعيا وسهيرو
- حياة (ݣلسات ) : انت نيت اخالتي فاطنة ياك ݣلتي كتي عوالة نتكري شي محال .. وديري شي بيعة وشرية ؟
•• تودة ( تنهدات ) : هادشي فاياش لقيتيني كنفكر مزال ماعرفت شنو غاندير
- سميرة : علاش ماتحليش شي محال ديال تانݣافت ؟
- عنبر : ولاهيلة بصح علاش مديريهاش ؟
- تودة : واش انا باغية نتهنى من العراسات نتم غادية نبري بحلقي حتى يبح لاواه . زايدون الماطريال كيكون غالي خاصني بالقليلة واحد 100 مليون
- حياة : مديريش هادشي ديال نݣافات لا .. انت ديري بحال نجاة ولي تكري تكاشط .. وقسمي المحال على جوج ديري فيه الخياطة والكرا وشرا
- عنبر : خدمي معاك خالتي سميرة وخالتي رشيدة .. راه عندها الصنعة فيدها منها نيت تعاون راسها وتحرك
- حياة : خاصها اتشد براتها من عد داك المنطيح .. فخباركم حقا ( بإبتسامة عريضة) سيفطو ليا فأنستغرام ندير إشهار لواحد شومبوان هو پاك على قدو اندير ليهم الاشهار
- عنبر : ايوا شتي هنية عليك .. راه الاشهارات فيهم الفلوس خاص اتعرفي معامن شوفي رشيد ، باش مايضحكو عليك ..
- حياة : داكشي كنت باغية ندير .. ( بدا تيليفون عنبر كيسوني )
- عنبر ( فتحات الخط ) : ألو ماجدة .. الحمد لله وأنت فين غابرة أختي ؟ اااه إيوا مزيان ( بإبتسامة ) الله يبارك فيك .. ( كتسمع ليها ) أيوا ولا مايحتاجش وحق الله العظيم أصاحب ( قاطعاتها ماجدة )... بقات ساكتة كتسمع ليها ) .. الله اختي علاش متكونش فداركم ؟
- عنبر ( شافت فيهم ) واخا صافي أنا غادي نݣولها لحياة تجي معايا .. واخا معاش بعدا ؟ صافي واخا إن شاء الله يلاه سيري ( قطعات معاها )
- حياة : فين غادية بيا ؟
- عنبر : عارضة علينا ماجدة .. على وديت زعمة الاغنية ، فالفيرما ديال خوها
- تودة : سيري أبنتي فوجو شوية أنتوما سيمانة غارقين فدار سادين عليكم سيرو بدلو الجو
- حياة : خلينا اختي نمشيو نفوجو مالكي .. انا جاتني الغمة على قلبي شحال هادي ماخرجت ..
- عنبر : وشوفلك هاد الدواحة مولات الخيام .. مابغيتهاش تعدب راسها ولكن ماخلاتليش الوقت فين نقول لا
- رشيدة : مافيها باس أبنيتي .. أنتوما مزال صغار تفوجو شفتها مسكينة ديك نهار دريويشة
- عنبر : وياه ظريفة .. ( وقفات ) انوض ندوش نحيد هاد الزيت من شعكاكتي .. تخطات الطبلة متوجهة لدوش .. مخلياهم يكملو كلامهم على المشروع
_____________
- ماجدة (كتدوي فتيليفون) : صافي راه قاديت معاها الوقت .. ولكن شكون غايوصلني انا راه مكنسوݣش ؟
- عماد ( فطريقو للعند فاروق ) : اندوي مع طارق نݣولو يدوز يديك لعندهم ويجيبكم كاملين .. يلاه سيري ..
- ماجدة : ريزيريڤيتي بعدا على الماكلة ولا اتلصقها فيا عاود ؟ هاد العراضة ماعرفت منين خرجات مافهمت فيك والو
- عماد ( سيفط ليها بوسة ) : عاوني خوك أزينة دخوها .. ريزيرڤي داكشي يكون مأنتك مانخافش علك .. يلاه سيري دابا نتشاوفو فالعشية
_______________
- فالأتوليي منزلي ديالو .. هاد مسمار طويل ومطرقة منغامس مع القطعة الخشبية لي قدامو كينحت فيها ، المتحف ديالو لي كيلقا فيه راحتو وكينسى فيه راسو .. منحوتات خشبية خدمهم هو بيدو فين كيفرغ طاقتو وكيخرج كاع الطاقة السلبية لي عندو ، حط لي فيديه كيدور فراسو وعنقو مسح يديه وطلع دوك الدريجات ساد الباب وراه .. توجه للصالون الصغير لي كانت فيه تلفازة پلازما وفوتويات جلدية .. هز التيليفون لقا ميساج منها " فاروق درنا نتلاقاو ورا سيمانة شفتك ماعيطيش واش مزال مساليتيش خدمتك " زفر بقوة وجاوبها " غدا غادي ندوز عندك ونمشيو نتغداو " لاح تيليفونو كيجر فرجليه حفيان .. حط رجلو على درجة الاولى وهو يسوني الباب ..
- وقف ضاير خارجة الخدامة تحل وقفها بيدو رجعات .. نزل ديك درجة وتوجه للباب حلو هز عينو فيه مخلي ليه الباب وضار :
مامالفاش ليك هاد المشي والمجي عندي
- عماد : بازراه الخدمة لي كتشدني عليك .. لبس صندالتك اصاحبي راه البرد ..
- الروطال ( دخل لصالون وݣلس ) : واش انا مرة حاملة ايطلع معايا البرد .. أش تم ؟ الواليد دوا معايا على ود الواليد ݣالك باغي يدفع لطلاق
- عماد ( ݣالس برجولة وبصوت غالبة عليه البحة الرجولية الجدية ) : دابا خلينا من بلان الواليد والواليدة .. هداك بوحدو دابا بغيتك فواحد لافير إلى ماعونتيني انت مكاين لي غايعاوني .. ودير فبالك اخويا خدمة خوك فوق السلك الى زلݣت اندير فراشة ونبيع الربيع والثومة
- الروطال ( طلعو ونزلو بعينيه ونظراتو لي كانتو بحال شي صياد بغا يطير على الفريسة ديالو ) : الصراحة تجي معاك .. تبيع امع البنات دوي
- عماد ( دور لسانو وسط فمو حاك على لحيتو .. حنحن بجدية ونطق عينيه فعينين خوه ) : بغيتك تزوج بعنبر ..
- رجع بظهرو لور داير رجل على رجل كيشوف فيه .. حاط صباعو على فمو كيلعبو بشفايفو ببرود .. عينيه على خوه كيحقق فيه ، عماد يحسابليه مغايدويش ..
- الروطال : باغي تفتح شي سونتر تولي تزوج الناس .. بنت ليك فالبلان ؟
- عماد ( بنفس الجدية ) : داوي معاك أصاحبي
الروطال ( بنفس الملامح ونظرات مكايحركش البؤبؤ ديال عينيه مركز مع خوه ) : راه كيݣولوها أخويا كيݣولك لي كيطول فالمخزن كيتفربل .. انت كيبان ليا تفربيل بداك بكري
- عماد ( تقاد فݣلستو كيشوفليه فعينيه كيحاول يوصل ليه شنو باغي يدير) : شوف راه ماشي زواج زواج .. ݣدام الناس راكم مزوجين غاديرو عرس بحال أيتها الناس واخا راكم فدار وحدة كل واحد عندو حياتو ..
- الروطال ( تحنا بيديه على ركابيه مركز معاه بنظراتو لي متزعزعوش ) : كتريݣل أعماد ؟ ماناعسش يمكن ؟؟
- عماد ( بجدية كثر كيحاول يفهمو ) : غير سمع الله يرحم الوالدين ماتعصبنيش أفاروق خليني ندوي .. وديك ساع حكم أصاحبي وبراكة من داك الطنز الخاوي ديالك ..
- الروطال ( شافيه بجدية مصغر عينيه كيتسناه يخرج لي عندو) : كتجبد لاستيك بزاف .. خرج لي عندك
- عماد ( كان كيحاول ما أمن يوصل ليه كاع داكشي لي كان كيفكر فيه ولي باغي يوصل ليه .. دقة دقة شرح ليه كولشي بتفصيل ماخلا حتى حاجة فبالو مݣالهاش من داكشي لي ناقشو مع العميد ومع يوسف ) : هادشي لي كاين ..
- الروطال : وبنت ليك غير أنا فالبلان .. شوف شي حد منكم ولا شوف خوك يديرها ويفوتها لهيه ولا شوف مع طارق
- عماد : من نيتك نݣولها لعصام ، أنت شوية ڤن .. عصام لا يعول عليه صايط ليه البرد باغي ايضحك ويخلق السعادة براكة عليه اولدو .. طارق باقي مضرور من فعايل مو أنا خاصني شي حد لي تقيل عندو بلاصة فهاد البلاد لي مايقدر حد يضرو .. خصوصا انت
- الروطال : ݣراندايزر أنا .. ماخممتيش لديك البنا لي أنا معاها ماݣلتيش خويا باغيها لزواج شنو غادير ؟
- عماد ( هز حاجبو بإستهزاء) : مديرهاش عليا .. عارفك أنت وياها بحال المقص ديال الظفار .. الى ماوركتي عليه مايقطع ظفرك ، الخدمة منگدش نريسكي الخبار فراسك بلاما نبقا داوي بزاف
- الروطال : فبلاصة منتزوج دصح نولد ولادي نݣلس نمثل على أخر يامي .. وعرس دبصح واش انت مفربل ، سير اخويا تعالج ولا شوفلك شي حد لي يݣاد معاك هاد الهبال
- عماد ( بخيبة أمل ) : والواليد كيݣوليا خوك يوݣف معاك .. فاروق يغمض عينيه ويديرها ، خوك معزتكم كبيرة عندو ماعندو سوق يزطم معاك .. يجي يسمع الخو الكبير أش كيݣول
- الروطال ( شافيه بنص عين ) : كدق عليا أوليدي .. ترشيني بجوج كلمات ، ونݣولو كاع حنا غمضنا عينينا على هاد تسطية وزطمنا معاك .. هي غاتقبلك بعدا ؟
- عماد ( تنهد ) : ماعرفتش ؟ ولكن هي باغية تاخود حقها من داك الميكروب .. ماعندهاش سوق كيفاش المهم ترجع دقتها
- الروطال : دابا انا نخسر ملاين صحاح لي نݣد نفرقهم على شحال من واحد محتاج .. على عرس مزور تا واش ضاربك شي حد فصغرك ولا زالݣ على عين ݣفاك ؟
- عماد : شتي العرس من قاعتو من ماكلتو من حوايجو من كولشي ماترفد ليه الهم .. ضارب حسابي راسي ( حنحن ) من غير دهاز والخاتم لي عليك
- الروطال ( دوز يدو فشعرو كيتمتم ) : استغفر الله العظيم وأتوب إليه ( شافيه ) هادشي مابغاش يدخليا لطانطو دراسي .. أصلا السيدة خفيفة خليتها فالبيت رݣيتها راكبة ليا على عودي
- عماد ( بجدية ) : الدم لي بيناتنا والخاوة .. وݣف معايا راه انت لي عندي ، ماشي غاتعاوني غير أنا راه كاين عائلات مساكن ضاعو فبناتهم .. ( هز التيليفون ديالو ومشا لبلاصة التصاور جبد صورة او وراها ليه) هاك شوف بنت عندها 21 عام لي لݣيناها ميتة .. باها من ورا ماسمع الخبار وشاف الجثة ديال بنتو حيت عندو لاطونسيو جاتو جلطة دماغية .. وهادي غبر وحدة لي لݣينا علم الله بلي مزال مالݣيناهم .. حط راسك بلاصت هاد الناس تكون عندك بنت ويوقع ليها هادشي ..
- الروطال ( مدليه التيليفون وشافيه بجدية وصرامة بصوتو الثقيل لي كان نوعا ما مهدن ) : بنتي مغانعطيهاش لمن والا .. بنتي انمشي نسول على الأصل والفصل ديال والدين السيد لي جاي يخطبها وعلى فصلو وأصلو هو .. بنتي ماشي سلعة لي عطا كثر نعطيها ليه بنتي أمانة عندي يانتهلا فالأمانة ولا منولدهاش ݣاع
- عماد : متافق معاك .. ولكن بعد المرات الوالدين عد بالهم بلي باغيين الخير لولادهم وهوما كيأديوهم وكاين لي كيحارب على ود ولادو ويهزهم بسنانو بحال عمك وباك نيت ، الواليد على ودنا صبر على المعاملة دالواليدة .. وعمي حياتو كاملة عاش بوحدو على ود ولادو الناس ماشي بحال بحال كل واحد وكيعاش وكيكبر وكيتربى ، واحد ناشط مع قبو مرتاح فرحان كيݣزر فناس من ݣاع النواحي وداخلين ليه الفلوس طاغي يبقى هك لا حسيب لا رقيب
- الروطال ( كيدوز يدو على موستاجو وكيسمع ليه ، هز عينيه فيه ناطق بتساؤل ) : وإلى هادشي لي غادير ماربحتي منو والو ؟ خوياي الما فرملة وغرقتي فيها ؟
- عماد : إلى مشات كيما بغيت وبلانيت ليها برب العالي ، والذي لا رب سواه حتى غانستفهم كيف سردين فالعباقي واحد حدا واحد يحيدو الݣمل لبعضياتهم ، أنت غير عطيني يدك وغيس معايا
- الروطال ( وقف ) : شوفها هي بعدا أش غاتݣول ..
- عماد : أنا عارفها غاتبغي ، إلى بغات انت غاتبغي ؟
- الروطال ( خلاه طالع ) : وحتى تبغي
- وصل طارق لدار ديال مو .. دخل ستقبلاتو بحفاوة لأول مرة غادي تستقبلو وترحب بيه بحال هاد الترحيب دخلو العجب جاتو فشكل .. الداخل ديالو حس بواحد الفرحة وبصيص أمل صغير .. قال مع راسو يمكن تبدلات وندمات على لي داز وبغات تصلح العلاقة معاه ومع خواتاتو ، الطبلة ديال الغدا مكانت ناقصة من والو كولشي متول وعلى حقو وطريقو .. ݣلس راجلها على راس الطبلة حداه مرتو من ليمن وطارق من ليسر ، كيتغداو ويدويو فالخدمة وبزاف ديال المواضيع ..
- طارق ( هز عينيه فيها بدفىء فصوتو ) : ماكرهتش كون عيطي لياسمين .. سمعيها كليمة زوينة بلاصتك بقات ناقصة فالعرس
- ثورية ( حاولات تبدل الموضوع ) : ماكرهتش تبقى معانا هاد سيمانة كاملة .. لمياء جايا وبغيتك تشوفها ومنها نيت تقربو من بعضياتكم .. إن شاء الله الصيف الى بغا الله غادي دير العرس ، خطبها واحد الولد تبارك الله ولد عائلة معروفة ففاس مهندس دولة ماشاء الله عليه
- طارق ( جمع فمو واحلة ليه اللقمة فحلقو .. هزهز براسو ورجع شافيها بنفس الملامح الباردة لي كانت عندو قبل ) : الله يكمل عليها بالخير .. منݣدش نخلي خدمتي سيمانة جيت ندوز معاك النهار نشوفك ونرجع بحالي خدمتي مكتسناش
- الحاج : ولاواه كتجي مرة فشحال طل وتمشي خليك ..
- طارق ( شافيه عاطيه إبتسامة صفرة ) : منݣدش مرة أخرى إن شاء الله
- ثورية ( بإبتسامة شافت فراجلها ورجعات شافت فطريق .. حطات لي فيدها وبصوت رقيق كتحاول تدوي بحب معاه ) : وأنت أولدي مجاش الوقت لي دير فيها دارك حتى انت ؟
- طارق ( حس بشيحاجة تحرمات فالمعدة ديالو .. مود عدم الراحة ركبو من معدتو نتاشر فجميع أنحاء الجسم ديالو .. دور راسو هاز عينيه فعينين مو ) :
لا هاد الساعة خاطيني الزواج وصداع الراس .. صولو ديال راسي وعاد نتكافى معاه
- الحاج : لاواه لاواه الواحد ضروري خاصو يتزوج .. يشوف شي بنت الناس تكون جنبو معنويا وماديا
- طارق ( خرج لسانو مدوزو على فمو خارجة من إبتسامة إستهزاء .. دور لسانو على قنات فمو دور راسو شاف فراجل مو ) : وقيلة الحاج معارفنيش شكون انا وشنو عندي ؟ ومعامن كنتعامل مغانختاجش لشي وحدة لي تعاوني ماديا هي إلى بغات لي يعاونها انا نعاونها ونفوتها لهيه ..
- ثورية ( شافت فالحاج ورجعات شافت فولدها بنفس الابتسامة لي راسمة على وجها ) : الحاج بغا يقوليك اولدي زعمة خاصك شي بنت الناس تكون بنت عائلة كبيرة .. الواحد واخا يكون لاباس عليه كيبغي يضوبل فلوسو ويزيد بخدمتو للقدام
- طارق ( بنفس البرود ) : لالا مايحتاجش .. انا هكا مرتاح مع دماغي
- ثورية : كاين واحد السيد كيقولو لو الإسماعيلي إلى كتسمع بهاد العائلة ماشاء الله عليهم .. عندهم البيزنيس ديالهم هنا فالمغرب وفهولندا وألماميا ، عرفتي أولدي بنتهم غزالة ماشاء الله عليها .. شنو بان ليك ..
- طارق ( ساس يديه وشاف فيها بجدية ) : الواليدة .. عندي 36 عام راجل ماشي بوكيمون لي تبغي تمشيه على هواك .. أنا مغاديش نتزوج وماباغيش نتزوج لا دابا لا من بعد
- ثورية ( بإنفعال ) : الله يهديك اطارق .. واش بغيتي حتى تلصق فيك شي وحدة ماشي من مقامك ودير مدارت ختك ؟
- طارق ( كيخبط سنانو مع بعضياتهم بعصبية .. وقف وشافيها ) : أكبر كامبو هو انا عند بالي باغية تصلحي مادرتي هذا شحال .. ولكن انت نسيتي خاص لي يفكرك يمكن
- الحاج ( بصرامة ) : طارق ماتدويش مع مك بهاد الأسلوب حشومة
- طارق ( شافيه هاز حاجب ومنزل الثاني كيحاول يسيطر على أعصابو ) : أنا مداويش معاك .. داوي مع لي ولداتني وسمحات فيا .. لي نهار مرضلت بنتها الصغيرة وصلات للموت وعندها عامين .. وسونينا ليها نعلموها مها كتݣولينا نساو بنتي ونتلاݣاو فالمحكمة ( شاف فمو ) نسيتي ولا نفكرك .. مزال ݣاعما طلقتي من الواليد وبغيتي تزوجي ، سمحتي فينا ومشيتي لألمانيا مع راجلك .. ياك امرة فشحـــــــال عاد كتيولي فينا وبغيتي دابا نجيو نتسنطو ليك ونديرو برايك .. راه الحمد لله لي أنا كنعض فصبر وكنجي نشوفك أما راه بحالي مايتلفتش فيك ݣاع ..
- ݣاع المرض لي دوزنا با هو لي كان حدا راسنا ومي الله يخلي ليها صحيحتها .. أنت كنتي عايشة الحياة كدوري مع راسك فالبلدان .. ودرتي ولاد جداد وعطيتيهم المحنة لي ماعطيتيهاش لينا ولا حيت حنا ولاد عبد الخالق ، بغيتي تزوجي زوجي ولدك لي ݣالس على لالة ومالي وتقرقيب السطالي فطاليان .. منين بغيتو واحد فالمقام ݣلتو أجيو نلعبو على طارق الكامبو ياك ؟
- ثورية ( كلها كترعد الدموع وحلو لبها فحلقها ) : ماخليتكمش فزنقة خليتكم مع باكم .. كاينة لي كتلوح ولادها فزنقة وانت داير ليا هاد الحالة براكة اهزيتكم 9 شهور فكرشي
- طارق ( تنهد بعياء ) : كون غير ماهزيتيناش .. كون غير ماحملتيش بينا وماجبتينا كاع لهاد الدنيا ، بغيت انسولك ..
- (شافها مجاوباتش وهو يكمل كلامو ) : علاش تزوجتي الواليد .. كنتي تݣدي تدي ولد خالتك من لول بلا هاد العذاب كامل .. وݣاع نݣولو تزوجتيه وعرفتي راسك غلطي علاش حملتي بينا ؟ .. ونݣولو غلطي عاوتاني ولدي اواحد لاش زايدة 3 خرين ، حنا شنو الذنب ديالنا من هاد الويل كامل ؟ واش عمرك ݣلستي مع راسك وسولتيه وانبتي راسك براسك ، ݣلتي كاين لي سمح فولادو فزنقة .. قسما بالله كون سمحتي فيا فزنقة وعارف عندك العذر وبلي ماعندكش وبلي تطريتي تحطينا .. برب الجليل مايبقى فيا الحال ..
- ثورية ( دموعها نازلة كتنفس بصعوبة ) : قلبك عامر
- طارق ( ضحك بعصبية ) : علاش بغيتيه يكون خاوي .. راه خاصك تعرفي الرضى راه ماشي أمن الوالدين راه حتى من الولاد .. وربي راه كيحاسب وشحال صعيب تݣول هاد الهضرة لمك الأم الأم لي لا رضاة من غير رضاتها ولي رسول وصى عليها .. ولكن انتي أنتي واش كتستاهلي ولالا ݣلسي مع راسك وخممي مزيان فهاد الهضرة ( شاف فالحاج ) وأنت إلى بغيتي شي حيط تنقز عليه ولا شي باب ديال الرباح راه عندك ولادك .. ( رجع الكرسي وخرج من عندهم مخليهم متبعينو بالعين ) .
________________
- حدا ڤيلا إدريس واقفة .. لابسة سروال دجين واسع من التحت مع تريكو سخون وجيلي جلد من برا كحل ومن الداخل صوف بيج .. بوتيو دومي طالو شعرها جامعاه سفنجة هازة ساكها وكتسنى .. بانت ليها طوموبيلت خوها من نوع ميرسيدس g-class فالكحل ، وقف ليها حلات الباب وطلعات كدير السمطة ..
- عصام ( لابس تريكو طالع بالكول فالكحل مع سروال دجين كحل وݣاط ) : أختي حاولي تسوݣي مديريناش شوافرية معاك الله يحفظك او
- ماجدة ( خنزرات فيه ) : راه كنت بغيت طارق يوصلني ساعة قالي راه كاين فناظور .. أما ݣاع مانحزرك أنا
- عصام ( ديمارا ) وݣاع هاد الناس لي كيسوݣو فكازا ماعجبينك .. أنتي لي عندك فوبيا من سوݣان شوفيليك شيفور نوليو نخلصوه
- ماجدة ( شافت فيها هزات يدها قدامو ) : دابا ابغيتك تقدي معايا الغراض اتسمعني الهضرة وصافي أعصام زدتي فيه .. ( سكتات ورجعات شافت فيه ) الى ساقت ليك ماما الخبار جيتي لهنا ومادخلتيش قفرتيها .. هي بلا هادشي باغة تحماق حيت خوات عليها الدار
- عصام ( عينيه مع الطريق ) : براكة عليا أمشاكيلي ماعندي فين نزيد .. مغانزيدش مشكل الدار ومشاكيلي وليت لاݣي الراحة فداري كثر
- ماجدة ( تنهدات تنهيدة طويلة ) : واش فخبارك غادي يطلقو ؟
- عصام ( هزهز راسو بالإيجاب ) : وي فخباري .. دوا معايا الواليد ݣالها ليا ، وسونا ليا حتى فاروق ݣالها ليا .. حنا هاداك بانا وهاديك منا واخا الله يهديها مجهدة وفور ݣاع ولكن ماعندنا منديرو ، هي عندها حق علينا وهو عندو حق نبقاو حياديين ..
- ماجدة ( بعياء وقلة حيلة ) : أنا لي وحلة وحلة .. انا لي بقيت مع ماما فدار راس فراس .. خاصها اتشوفني لابسة وخارجة قفرتها قسما بالله مشروعي مزال مابديت فيه كاع ابسباب الضغط عييت
- عصام ( شافيها مطبطب على يدها ) : ديري لي يريحك اختي وشوفي مستقبلك ماتبقايش ݣالسة ..
- ماجدة ( هزات يديها كتشرح بإنفعال ) : كنحس بواحد الضغط أخويا وحق الله .. راه بسباب ماما ماعنديش صحابات الصاحبة لي كندير كتهرب مني بسبابها من صغري ، ودابا كل مرة كتسمعني الهضرة على عنبر وحياة .. شي نهار انهز راسي نزيد لشي قنت .. عارفة ماما هاديك وخاص نحتارمها ونقدرها ولكن راه كندير فوق الجهد كنبين ليها قداش كنبغيها ولكن والو ..
- عصام ( وقف قدام واحد المحال كبير ) ديري مشروعك وݣفيه بعدا نجحي فيه عطيه طاقتك كلها .. نجحي فيه وفحياتك وديري لي يريحك أنت باش ماتلݣايش راسك ورا الكرسي مݣابلة الناس من بعيد ..
- ماجدة ( عنقاتو باستو فحنكو ) : لهلا يخطيك عليا أخويا .. هبطات هي وياه ياخدو الحلويات وتمور لي دوموندات عليهم .. عاد يدوزو للمحال لي اياخدو منو الماكلة ..
- ستفو البلاطويات فالكوفر .. وركبو للمحال لي كان خاص بواحد تريتور معروف فكازا بالماكلة لي كيدير ، خداو 3 البساطل ديال الحوت كبار .. ودجاج مشوي مع الخضرو سوطي وصلاد جاغدان .. كان كولشي مغلف ومقاد باش مايخسرش ..
- عصام ( سد الباب ) : هادشي خاصو يوصل دغية ..
- ماجدة ( كتقاد السمطة ) : نديو البنات ونشدو الطريق نيشان .. أصلا الجو بارد ديجا كون الحال سخون هنا فين غايكون الپخوبليم ..
- عصام : داكوغ عطيني لادريس .. عطاتو لادريس وشدو الطريق لدار عنبر ..
- خرجات من بيتها .. كدخل التريكو ديالها لي طالع بالكول فالأبيض وسط السروال ديال الدجين ( بدات كتعيط ) :
حياة عفاك ديك السمطة ديالها الكحلة .. خرجات حياة من بيتها كتعقد الحزام ديال المونطو ديالها ، مدات ليها السمطة وتقابلات مع المرايا كتقاد فشعرها .. رجعات عنبر للبيت دارت السمطة ديالها هزات مونطو ديال الدان فلون القهوي بارد مفتوح .. لبسات بوتيو فنفس اللون طالون ديالو قصير ومريح .. تقابلات مع المرايا كتوضع اخر اللمسات ديال المكياج .. ماسكارا مع عكر فالبوردو هزات زيت الأساس ديال شوكو مسك دارتو ورا ودنيها وفأماكن النبض .. رجعات هزات ريحتها " نبراس " لي كانو فيها دينوط ديال الشوكولا والفانيلا ، وختماتها بريحة خاصة بنفي لينوط ديال شعر .. هزات ساكها وتيليفونها وخرجات للعند حياة لي كانت واقفة كتسناها ..
- حياة ( كتشوفيها بكل حب ) : جاتك اللبسة غزالة ماشاء الله عليك ابنت خالتي الفنة
- عنبر ( ضحكات ) : حتى انت ياختي واتاتك البيرية الحمرة زيانيتي العفريتة فين كتي مخبية هادشي ..
- حياة ( ضحكات ضحكة رقيقة خاصة .. عينيها الكحلين كيبريو كترمش بشفارها لي طالعين بالماسكارا .. شفايفها لي كيلمعو بالݣلوس الخفيف الزهري ) : واش اختي الهنا وراحة البال هي المشاكل وتمارة والفقايص والمحاين لي كت عايشة فيهم ..
- سونا تيليفون عنبر ، خرجاتو من ساكها طلعات ليها إسم ماجدة فتحات الخط :
وي ماجودتي .. كاينة التحت صافي واخا ازين هاحنا نازلين .. ( قطعات معاها متوجهين للصالة فين كانت كالسة تودة ورشيدة وسميرة ودراري ) ماما هاحنا انمشيو
- تودة : صافي ابنتي بصحتكم .. نزلو مع دروج سدو الباب طلعو بزوج اللور راميين السلام على ماجدة وعلى عصام ..
- ماجدة(ضارت ماجدة بزربة كتشوفيهم بزوج ) : شكون فيكم دايرة واحد ريحة غزالة ..
- عصام ( عينو مع الطريق ) : نيفك بحال الضوبيرمان أكتشمشمي ..
- ماجدة ( خنزرات فيه ) : بزاف عليك حاشاك وباشاك وماشاك ..
- عصام ( كيضحك ) : شكون علمك هاد 3 الكلمات ؟
- حياة ( كضحك حتى تغمضو عينيها ) : حنا ماليها فورماطيناها ..
- عصام ( كيحرك راسو كيضحك ) : وانا كنݣول مالها تسرح ليها اللسان ..
- ماجدة ( مداتهاش فيه رجعات شافت فيهم ) : شي ريحة فنة .. بحال شي طارت ݣلاصي بشوكولا
- عنبر ( رجعات شعرها ورا ودنها معرية على الحلقات الضايرين السامبل لي دايرة ) : أنا انا مولاتها سميتها نِبراس
- ماجدة : حتى توريني منين خديتيها باش ناخود بحالها حمقاتني .. ( رجعات كتشوف قدامها ) .. ساكتين حتى دوات حياة :
ماجدة فكرت فلي ݣلتي ليا .. غاندير بكلامك وندفع لباك ليبر
- ماجدة ( بحماس ) : نووو سي ڤغي .. أحسن مغاديري والله العظيم انا نعاونك فكولشي .. فدروس وكولشي كوني هانية
- عنبر ( شافت فحياة ) : ماݣلتيهاش ليا البعلوكة وشوفلك هاد عينين بوعبولة
- حياة ( شافت فيها شادة فيدها مابغاتهاش تقلق عليها ) : مع داكشي لي وقع اجلتها حتى تولي مزيانة وتكوني مرتاحة وندوي معاك ..
- عصام ( مركز مع الطريق او ودنيه معاهم ) : ولكن دابا شهر 1 هذا كان علك دفعي قبل لا ؟
- حياة ( بإستغراب) : وايلي واش بصح ؟
- عصام ( بالإيجاب ) :اه كان خاص دفعي الملف ديالك فشهر 12 .. تجمعي الوراق ديالك فيه شهادة مدرسية .. راه دخلي غير لݣوݣل ايعطيوك شنو خاصك تجمعي ودفعي الملف ديالك ، دابا معادا الى أدفعي المرة الجايا
- ماجدة : ماشي مشكيل .. ماضيعش هاد العام غير هكاك تعلم فيه اللغة
- عنبر : بصح .. تدخل لشي سونطر تعلم فيه اللغة ومايمشيش ليها هكاك اينفعها الى ادفع للباك
- عصام : فكرة مخيرة ݣاع .. الواحد مايضيعش الوقت غير هكاك يستغل وقتو
- حياة ( بإبتسامة حماس ) : إن شاء الله داكشي لي غادي ندير
- ماجدة ( ضارت شافت فيها ) : انا معاك مانتفاكش معاك .. Ne t'inquiète pas pour ça ..
__________________
- شعلو الأضواء فدخلة ديال الڤيلا .. السما كان فيها واحد اللون جميل وغريب .. بين الموڤ والأسود النجوم واضحة واخا كان البرد قاصح ولكن السما كانت صافية ..فتح العساس الباب الكبير دخلات طوموبيلت عصام بلاصة بجنب طوموبيلت عماد وطوموبيلت الروطال .. نزلات ماجدة سونات فالباب مخلية عنبر وحياة لي غير نزلات من طوموبيل دورات راسها فالأرجاء منباهرة من الفيلا والمنظر لي ضاير بيها حمقها .. أول مرة تشوف بحال هاد المنظر قبالتها فاص ..
- حلات الخدامة وخرج عندهم عماد مستقبلهم .. دخلات عنبر وحياة بهداوة للڤيلا .. مسلمين على عصام مخليين عنبر وعصام والخدامة كيدخلو فالعشا لي جابو .. هاد المرة عنبر ركزات مع الڤيلا من داخل الصالونات لي كان صالون واحد لي عصري أغلبية الصالونات مغربية بلبسة بسيطة عصرية .. السراجم الكبار لي كلهم زاج ضاير بيهم خوامي بنفس ألوان الصالون .. واحد لي كان فيه الشيبي والبيج والصالون الثاني لي كان خليط بين الاخضر الملكي والبيج وذهبي ، أما الاخر العصري فكان فاللون الأحمر والاسود .. الثرية الكبيرة لي كانت نازلة من السقف لي منقوش بدقة وإتقان كل جزء من الڤيلا كان فيه ديكورات من الخشب
- حيدات عنبر المونطو ديالها هي وحياة عاوها للخدامة داتو علقاتو .. ݣلسو كاملين فصالون الكبير .. حياة كانت حاسة برهبة او حشمة فنفس الوقت .. غير كدور فعينيها وكتبلع فريقها ، عنبر مكانش كيحساب ليها بلي غايكون حتى عماد عند بالها غايكونو غير هوما البنات ، سونا الباب ومشات الخدامة تحل .. تم داخل طارق عاقد غوباشتو باين العيا على وجهو .. داخل بطولتو حبس المشية فاش شافهم كاملين مجموعين .. ماتوقعش ايكونو الضياف عند الروطال ..
- طارق : السلام عليكم
- حياة ( خرجات نفس طويل متمتمة بكلمات بينها وبين راسها ) : صباحاتو لله .. الكل رد عليه السلام
- ماجدة : قلتيلي اتبات فناظور ؟
- طارق ( ݣلس كيرتاح ) : كنت ناوي نبات ضارت ليا فالخوى وانا نرجع بحالي ..
- طارق ( قرب من عماد بهمس ) : أش تم؟
- عماد : عراضة ديراها ماجدة للبنات .. جابتها الوجيبة تلاݣات معانا كاملين مجموعين عند ولد عمك
- طارق ( شافيه بشك ) : عينيك ماخواتاتش أولد عمي أش تم ؟
- عماد ( غمزو ) : من بعد أصاحبي ..
- تسمعو خطوات فدروج .. نازل بكل هيبة وقوة ورجولة هالة وكاريزما ضايرة بيه .. شعرو راضو اللور بخطواتو خصلات كيتحركو ويجيو لعينيه برطوبية شعرو .. سروال توب فلبلومارين مع تريكو محلول فنفس اللون وتيشورت من التحت فالأبيض .. وقف عليهم بشبه إبتسامة رجولية وصوت جوهري رجولي تقيل وغارق :
السلام عليكم ..
يتبع...
التعليقات
لا توجد تعليقات بعد، كن أول من يعلق.