محتوى القصة
شافيهم عماد محرك راسو يمين وشمال :
المكالمة كانت قصيرة مغانݣدوش نعرفوها منين دوات .. عاود تاصل بيها وحاول تبقى شادة معاها الهضرة ..
طارق ( رجع سونا عليها لقا تيليفونها طافي تعصب ) طفاتو .. شاف فالروطال لي غير بارد وݣالس مداير حتى ردة فعل حدو وقف وخرج معارفش فين غادي يعطي الراس كولشي تجمع عليه .. تبعو طارق لقاه واقف قبالت طوموبيلتو معارف مايقدم ومايوخر ) شنو غانديرو ؟
الروطال ( شافيه كيخمم عاض على شفتو ) غادي نعلم دارهم ، هادشي مكايتخباش ..
طارق : حسن نجمعوهم فدار عندنا .. هكا كولشي يكون مجموع الحاجة الى تخبات بزاف كترجع على مولاها بندامة ..
- القرار لي خداه الروطال هو لي طبقو واخا تودة ستغربات فاش جا داهم دخلها الشك تحمعو كاملين فدار عبد الخالق الكل كان مجموع من غير عصام لي مسافر ، ماخداش بزاف دالوقت حتى حط ليهم كولشي خبار طاحت عليهم كاملين بحال الرعدة خصوصا تودة ، ماسكتاتش من نحيط والبكا ..
تودة ( دموعها نازلين ) جيبوليا بنتي هالعار هالعار جيبو ليا بنتي ( عبد الخالق مادواش شاد غير راسو )
أدريس : واش قلبتو عليها مزيان ؟
طارق : كاع لبلايص لي مشات ليهم تبعناها ليهم .. اخر بلاصة كانت فيها واحد سطاسيون كياكلو فيه المسافرين ، لي ݣالو بلي ( شاف فروطال ) كانت كتبكي فواحد الحالة خايبة من وراها تشفر ليها التيليفون ، ومن بعد ركبات هي وحياة فواحد الكاميو ..
أدريس : ماعرفتوش شكون هو ماعرفتوش علاش كانت كتبكي ؟
الروطال ( بنفس الملامح ) غاتكون شافت التصاور ديالي لي داعو ( عاودليها بلان عبلة )
أدريس : هاد الميكروبة شنو درتي معاها ؟
الروطال : نساها عمرها تحط رجلها هنا ، السيد ماعندنا عليه خبار حتى واحد ماعرفو بحالو بحال أي واحد كيجي وياكل ويمشي وصينا سرباي وعطيتو نمرتي إلى شافو يسوني ليا
رشيدة ( كتبكي) الله ياربي فين مشاو هاد البنات مكايخموش مكايفكروش ماعندهمش العقل باش يخمو الناس الى غاسو فشي مشكيل كيجيو لعند حبابهم علم الله بيهم ياربي ماداو حتى حوايجهم
عبد الخالق ( وقف على غفلة ) غانمشي نقلب على بنتي ( فللحظة جاتو الدوخة )
دنيا ( قفزات ) بابا ( شدات فيه كلو عرقان وصفار بدات كتغوت على ياسمين ) كوكا فثلاجة سربي طاح ليه سكر سربي ( ياسمين طارت للكوزينة جابت كوكا عطاتها ليه تكاوه تودة غير كتشوفيه وتبكي )
رقية ( معنقاها ماحيلتها ليها ولا لولدها ولا لحفيدتها ) الله ياربي على بنيتي من وحدة لوحدة الله ياربي
يسرى ( بتقالة ) الى جيتو تشوفو عنبر راه من حقها كاع هادشي لي دارت ( شافو فيها ) بلاما تشوفو فيا حسبو معايا .. والديها ماتو موتى خايبة تعرضات للصدمة فالعيد الكبير ياك قلتو ليا بلي كانت كتسناهم يدوزو العيد حتى جاها خبارهم ماتو بأبشع موتى الله يحفظ .. فكرو غير فصدمة لي وقعات ليها هنا ..
رشيدة ( كتبكي) بصح ابنيتي انا لي شفت حالتها مسكينة كانت غادي تحماق
يسرى : من وراها بان داك الميكروب ديال بدر ، تزوجات بيه ومكانتش عايشة مزيان معاه واخا هكاك عاد لي دار معاها وهموها بموتو 6 شهور وهي عايشة فالإكتئاب
رشيدة : حتى من شعرها قطعاتو طراف طراف اربي لطف ورجع ليها عقلها
يسرى ( كملات كلامها ) وعاد عرفات بلي غدرها ، واحد مطلقها 3 شهور قبل وهمها بلي مكتولدش كان باغي يلعب بيها كيف بغا ومن وراها غاتعرف بلي والديها لي بكات عليهم ماشي والديها وغير سرقوها وبلي مها هي المرأة لي رباتها وباها هو عم راجلها .. واش كيبان ليكم عنبر حجرة راه البنت فهاد الحالة خاصها طبيب نفساني ..
تودة ( شافت فيها ) اويلي ابنيتي ماشي لديك درجة مالها حمقة ؟
يسرى : خالتي طبيب نفساني مكايمشيوش ليها الحمقين .. كيمشي ليه اي واحد عادي بصحتو باغي يرتاح كيبقى يعاود ويفرغ وطبيب كيسمع ليه. كينصحو بشنو خاصو يدير وهادشي لي خاص عنبر لي عاشتو كون انا بلاصتها نحماق ..
عبد الخالق ( بصوت تقيل ) قلبو ليا غير على بنتي دابا
الروطال ( وقف ) لي عليا درتو جمعتكم وعلمتك انا غانمشي
أدريس : لفين ؟
الروطال ( شافيه ) انا براسي معارفش فين ..
~~~~~~~~~~
تحطات الطيارة ونزلو منها ضاربة فيها الشمس الحارة ديال القاهرة الجو كان سخون ، دورات عينيها كتشوف من المغرب للمصر كانت واقفة طوموبيل كتسناهم على برا جا شيفور خدا البالز ديالهم طلعات هي وسيرين وكارمن اللور وشيفور القدام شدو الطريق .. فتحات عنبر السرجم مخرجة راسها كتفرج فالبنيات والناس هادشي كانت كتشوفو غير فالافلام المصرية واليوم هاهي كتعيشو ..
سيرين : راح تعجبك مصر كثير وخصوصا شرم الشيخ راح تحبيها
عنبر( شافت فيها ) أنتي ساكنة فشرم الشيخ ؟
سيرين : أنا شغلي بين القاهرة وشرم بس مستقرة بشرم بحبها كثير مريحة وسياحيي فيها كثير إشيا حيلوي ( حركات ليها عنبر راسها ورجعات كتفرج دازو من حدا بوتيكات كتسمع أغنية القاهرة ونسلها وكل للها وأغانيها ومواويلها أيا جمالها ) تنهدات تنهيدة طويلة مغمضة عينيها ماحساتش بديك 5 سوايع لي دازت حتى وصلو لشرم الشيخ .. مدينة لي غير المدن الاخرى سياحية بإمتياز وقفهم الشيفور قدام واحد الڤيلا نزلو وهي كتشوف فالارجاء بلاصة فيها غير الناس الهاي كلاص .. جات الخدامة عاوناتهم فالبالز سيرين ورات عنبر بيتها أتاث لي كان عصري إطلالة من بيتها لي كانت زوينة مقابلة مع البحر بيتها كان زوين ماصغيرش ومكبيرش بزاف ، فتحات البالكو وخرجات كدور عينيها لي المنظر لي كان كيفتح الشهية غمضات عينيها بإبتسامة مستنشقة الهوى ..
سيرين ( وراها ) عجبك المنظر ؟
عنبر ( فتحات عينيها وضارت عندها ) بزااف ..
بعد عدة أسابيع
- خرجو الناس من المحكمة وهو معاهم الملامح ديال وجهو كانو غير مفهومة .. سونا ليه التيليفون كان باح فتح الخط مكمل طريقو وجاوب
عماد : وي الواليد .. الحمد لله ( فتح للطوموبيل طلع ليها ) تحكم عليها ب 20 عام وعندها الحق فالإستئناف ولكن محال واش ينقصو ليها ( تنهد تنهيدة ) غاندوز عند عصام بغاني وعاد ندوز نجمع حوايجي وندوز عندكم نتعشا معاكم ... لا غدا انشد طريق للرباط عندي تم 20 يوم عاد نزل لأكادير .. واخا إن شاء الله .. ( قطع ديمارا وشد الطريق للعند عصام وصل بلاصة طوموبيل ودخل عندو تلاقى ليه عمران عنقو )
عماد : هاي هاي على عمو ( هزو ) مقاريش ؟
عصام : يلاه جبتو ݣلس ݣلس
عماد ( لاحظ على خوه ملامح العيا ) أش تم ؟ ( طلق عمران مشا كيكمر الرسم ديالو فالبيرو وهوما بقاو ݣالسين
عصام : مو حاملة جاهل الوحم صعيب ، ماحيلتها لراسها ماحيلتها ليه وجابو ليا نقابلو .. غايبقى معايا حتى تولد
عماد ( هزهز راسو كيشوف فيه ) مبروك عليها ( طول فيه الشوفة ) شتك بحال الى ندمتي عليها ؟
عصام ( تبسم بإستهزاء ) ندم عليها هي لي ندمات .. حيت كونما ندماتش مغاتبدلش من راسها وتنجح فزواجها الثاني
عماد : مناويش تݣوليها بلي عمرك خنتيها
عصام : فاش غاينفع ؟ ، صافي لي بيناتنا سالى وهي سباب حتى كذبت لي تخلي دارها موسخة بسيمانة وديما فدارهم ونرجع نشقى وانا عيان مرا .. لي تخلي ولدها بليكوش نهار كامل كنلقاه طايب مسرسط فالبالات والخ** مرة هادي ؟ عييت اصاحبي ندوي ونبح ونجمع من وراها بحال خدامتها ، حتى حقك أصاحبي مهضوم فيه وباش تكملها تولي تبعني للخدمتي مشوهاني سمحليا عمري ندم عليها ، والى كدبت غير باش دير فيها النفس وراها دارتو الله يعاونها مع راجلها براكة عليا أولدي ..
عماد : بلان
عصام : دابا معيط ليك تشوف ليا شي حل .. ماحيلتي لاجونص ولا عمران نجيبو من المدرسة ونطيب ليه خاصني شي مساعدة..
عماد ( بقا كيفكر ) أجي غير هاد سيمانة سونات ليا خالتي امينة على بنتها اريناس نشوف ليها خدمة .. خدمها عندك
عصام ( كيشوفيه بشك ) رجع ليها عقلها ولالا .. راه ولدي هداك أعماد
عماد : البنت مالها حمقة .. درية ضريفة وداخلة سوق راسها ماتلقاش ماحسن منها تأمنها على ولدك ..
عصام : المهم دوي معاها انت وغيز معاها الامور تجي ونتفاهمو على الصالير وتوقيت انا راه نبغيها غير من 8:30 حتى ل 4:30 وتمشي بحالها العشية انا نتكلف بيه
عماد : صافي انضي معاك هاد لافير حيت خوك شاد طريق غدا
عصام : ماعرفت هاد الانتقال منين خرج لينا ( بلع ريقو محنحن ) كنتي فالمحكمة ؟
عماد : الى غاتسول بشحال حكمو عليها انݣولك ب 20 عام .. والله ماعرفت باش حسيت نكدب علك
عصام ( بلع ريقو مبدل الموضوع ) شي خبار على فاروق سونيت ليه ݣاليا كاين فطنجة
عماد : خوك ربي لي عالم بيه شفتو مابقاش كيقلب على عنبر علم الله لاش كيخطط السكات ديالو ودافن راسو فالخدمة مامرتاحش ليه نكدب عليك ( وقف ) المهم نتلاقاو بليل فدار الواليد انا مشيت
عصام : تا اجي وديك ألماس ؟
عماد : سميتها أريناس غدا قبل منمشي انريݣلك الأمور معاها تهنى ( شاف فعمران ) بسلامة عمو
عمران ( طل عليه ) بسلامة عمو ..
عماد طلع لطوموبيلتو ديمارا وداز للعند دار لالة أمينة يدوي مع أريناس ..
- فالمحل دالعطور .. وصلها اوديو دخلات لداخل سمعاتو فتحات اوديو وجاوبات :
ليالي : حالتها تشفي العدو اصاحبتي غير سوني عليها بعدا ومتبينيش نمرتك الى بغيتي راه حشومة ..
حياة : وماحشوماش عليها هي ، لي خبات على أم بنتها وخبات عليا بلي با جا بغا يشوفني .. ياك كتقولي ليها بلي كنسول فيها غير متفضحينيش وتقولي ليها كندوي معاك من نمرتي جديدة
ليالي : لا كنقوليها كدوي معايا من نمرة پريڤي شي خبار على عنبر كدوي معاها ؟
حياة : كندوي معاها راه لاباس عليها اللبنانية مهلية فيها .. ومتبعة ليها مع واحد الطبيب نفساني كدوي معايا ديما ..
ليالي : سلمي عليها خالتي تودة حالتها تشفي العدا بغات تحماق ، كل نهار باغية تمشي لدوزيم للمختفون قاتلك ندير نداء غير حنا لي ماخليناهاش ..
حياة : عنبر خاصها اترتاح وتلوح هادشي لي وراها وتدوي معاها يلاه انا مشيت ولاد نصرانية جاو بسلامة ..
- تجمعو ديك الليلة كاملين باش يتسيفطو مع عماد من غير الروطال لي مكانش بيناتهم ..
دنيا ( دايرة رجل على رجل ) بابا ماعجبانيش ناكلتو مابقاتش كيف كانت مسكين
ياسمين ( تنهدات ) وراه حسن عوانو راه بنتو غابر ليها الأتر كيفاش بغيتيه يكون أصاحبتي
يسرى : مكاين عليها حتى خبار والو؟
دنيا : والو تقول الارض بلعاتها ، حتى حياة مكاين عليها خبار بدلات نمرتها
يسرى : الله يحنن قلبها على والديها بعدا عاد علينا حنا
عماد ( بهمس ) راه دويت مع لالة امينة على وديت اريناس غدا غادي دوز عندك إن شاء الله
عصام : العز اخويا العزيز ، غدا نريݣل معاها الأمور نتهنا من جهة عمران ( شافت لجهتو كالس فوق رجلين عبد الخالق ) الحمد لله لي جا بعدا غير يفوج على عمي ..
عماد : مسكين كيبقى فيا ( شافيه ) خوك لي خالعني لي برية لا تيليفون
عصام : ماتخافش عليه خليه ، يفكر نيت مزيان فحريرتو ( شافيه ) طارق مزال ماراجع ؟
عماد ( تنهد ) واحد يوماين يكون هنا .. غايدوز لرباط عندي عاد يهبط لهنا .. كملو الحتيت ديالو تعشاو مع بعضياتهم تسيفطو مع عماد لي مشا بحالو اما عصام وعمران بات معاهم ديك الليلة ..
~~~~~~~~~~
سلات الخدمة ديالها بكري وخرجات قبل الوقت مخلية حمزة هو لي يكمل ويسد .. وقفات باش تشد طاكسي حتى وقف قدامها بطوموبيلتو
راشد ( نزل الزاجة ديال السرجم ) ليالي ( شافت فيه ) طلعي ( بقات كتشوف فيه ) طلعي ( تنهدات حدرات راسها وطلعات دارت السمطة ديمارا وشد الطريق ) كيداز نهارك ؟
ليالي ( هزهزات راسها ) الحمد لله داز مزيان ( بتردد ) وأنت ؟
راشد ( تبسم ) الحمد لله منين مشات عبلة الخدمة ضوبلات شوية
ليالي ( خسرات سيفتها ) مشية بلا رجعة هاديك واحد اللفعة .. هي السباب باش عنبر هزات راس ومابقاتش رجعات كونماشي داكشي لي دارت كون عنبر معانا دابا
راشد ( شافيها ) ولكن كون عنبر كتيق ففاروق كانت غادي تسمع ليه ولالا مغاديش تحكم وتغبر
ليالي : اش غادي تيق وحدة قالت ليها بالحرف الواحد بلي هي وفاروق بيناتهم علاقة وبلي فخبارها عنبر خرجات من الدار ومابغيتيش عنبر تيق ، على شكون فخبارو عنبر خرجات من الطريق .. هي قالت ليها بلي راه فاروق قاليها عنبر خوات الدار
راشد ( شاف فليالي ) وانتي شكون ݣالك هادشي ؟
ليالي ( عضات على لسانها ) عرفت وصافي راه باينة ( نتابهات للطريق ) هادي ماشي طريق ديال الدار !!
راشد : نمشيو ناكلو بعدا ونوصلك ( شافيها ) مافيكش الجوع ؟
ليالي : لا فيا ولكن ..
راشد : ايوا صافي هداي ناكلو وغانوصلك ..
يتأَلَّم القلب ولا يَجِد لهُ مُحتَضِن، يَتعب الشعور ولا يسأل عنهُ مُطمَئِن، نَعيشُ الحياة مُشَتتين، ومع أنفُسَنا حائِرين، مع أقرب الناس للإحساسِ خائفين، وبسبب الأقدار والأخطار تائِهين بين همومٍ، ويأسٍ، وأفكار تملأ الرأس، نعيش عُمرنا الحزين، في أَشَدِ احتياجنا لا نَجد عضداً، وفي آلامنا لا نواجِه أحداً، تجتاحَنا الدموع بمذلّةٍ وخضوعٍ، تخنقنا العبرات؛ ولَكِننا نُفَضِل السُكات، ونَعيش أيام الحياة صابرين على كُل معاناة، ولكن ما يُضعِف صَبرَنا قوّةِ المفاجآت. أجمل ما في الأيام الماضية أنّها مضت، وأجمل ما في الأيام الحاضرة أنّها ستمضي، وأجمل ما في الأيام التي ستأتي أنّها لم تأتِ، وأجمل ما في الحياة أنّ هناك أمل يتجدّد ولا ينتهي.
- أجواء العيد كانت باينة بصوت الخرفان .. فينكا دزتي كتلقى ݣراجات عامرين بالحوالا ، كل واحد كيشري على قد جهدو .. العيالات كيتقداو ها شواية هالقطبان هالماعن ، الرجال كيتقداو الفاخر ولي شاري كيتقدا العلف .. البعض كان فرحان بالعيد والبعض كان ساد عليه عاطيها غير البكا وهاد الشخص كان ام ضيعات بنتها عمرها شافت النهار الزوين من نهار ساقت ليها الخبار مشات هادي 3 شهور دابا ..
ليلة العيد دخلات ليالي من الخدمة كانت جايبة معاها واحد جوج پلاطويات ديال الحلوة حطاتهم .. مشات للكوزينة طلات على سميرة كانت فالكوزينة كتطيب البطبوط ..
ليالي ( باستها ) خالتي فين هي خالتي رشيدة وخالتي فاطنة ؟
سميرة : رشيدة مزال مجات من المحال .. اما فاطنة ابنيتي راهي فبيتها مسكينة اسادة عليها قطعات ليا ݣلبي ، هاهو حتى العيد مغانعرفوه منين داز
ليالي : مسكينة الله يحسن عوانها .. اندير هاد الحلوة فوق الثلاجة تبقى مطرفة على دراري ( دارتها فوق الثلاجة ومشات لبيتها تبدا حوايجها )
فبيت فاطنة ݣالسة حدا سرجم فاتحاه وساهية .. دموعها نشفو وعينيها عياو تنهدات تنهيدة طويلة ، بدا تيليفونها كيسوني هزاتو فتحات الخط ..
تودة ( بعياء وصوت باح ) ألو
عنبر ( بصوت رقيق وهادئ ) ماما
تودة ( جمعات الوقفة مغرغرين عينيها بدموع ) عنبر عنبر بنيتي هادي نتي ، والكبيدة والحنينة ( بدات كتبكي وتشهق ) فين مشيتي ابنيتي وخليتي ميمتك فين زدتي ابنيتي
عنبر : ماما ماتخافيش عليا أنا الحمد لله بيخير مخاصني حتى خير
تودة : فينك ابنيتي توحشتك هزيتي راسك .. خليتي كولشي مهول عليك باك غايحماق مرض مسكين العائلة كلها كتقلب عليك راجلك غايحماق باش يلقاك مسكين شوفي ابنيتي
عنبر ( قاطعاتها ) قولي لبابا بلي انا بيخير ماتشوشوش من جيهتي .. انتي غير رتاحي عواشرك مبروكة انا سونيت ليك باش نبارك ليك سمحيليا الى خليتك بلا خبار إن شاء الله نهار نتلاقاو غانحط عليك الراس ونعاود ليك ( قبل لا تدوي تودة ) ماما كنبغيك بزاف ( ساحو دموع تودة سخان وتبسمات ) تهلاي فراسك ( قطعات )
تنهدات تودة تنهيدة طويلة براحة .. لبسات بانطوفتها وخرجات لبرا كتعيط :
ليالي ليالي ( خرجات عندها ) أجي ابنتي شوفيليا هاد نمرة لي يلاه سونات ليا دابا ( مدات ليها التيليفون )
ليالي ( قلبات ) نمرة بريفي أخالتي مبايناش
تودة : سوناتليا بنتي عنبر ( تبسمات براحة ) الحمد لله ( خرجات سميرة )
واش سونات ليك عنبر ؟
تودة : اه سونات ليا الحمد لله ياربي .. واخا مابغاتش تݣوليا فين هي خاص نسوني لباها ( مشات لصالون سونات للعبد الخالق علماتو وسونات حتى لروطال قالتها ليه ) ..
سميرة : الحمد لله امنين دوات راه هاديك هي الدنيا ومافيها
تودة ( هزات كفوفها ) اللهم لك الحمد وشكر ياربي هدا من فضل ربي فهاد الليلة المباركة الحمد لله
~~~~~
فجهة اخرى واقفة حداها كارمن كتشوفيها شنو كدير ، واقفة فالكوزينة لابسة بيجامة بيتوتية الهالات لي كانو تحت عينيها مابقاوش جامعة شعرها صحي كيلمع ..
كارمن : شو عم تعملي عنبر ؟
عنبر ( شافت فيها وتبسمات ) كنوجد فواحد الماسك نديرو لوجهي ..
كارمن : حتى انا بدي
عنبر : انت ماتحتاجيش بشرتك زوينة (خدات زلافة دزاج دارت فيها الما ديال الخيار لي حكات زادت عليه صفار بيضة ومعلقة حمص مطحون ومعلقة روز مطحون وزادت عليه حليب بودرة خلطاتو مزيان وخرجات من الكوزينة ) سيرين ديري الماسك ؟
سيرين : لا حبيبتي مابدي امبارحة عملت سوان بصالون انتي يالي مكان بدك تروحي
عنبر : كان عندي رونديڤو مع الطبيب أصاحبتي
سيرين : بكرا راح نروح لمطعم كثير حلو راح نتعشا هنيك راح يعجبك الجو
عنبر ( بإستغراب) زعمة واخا غدا العيد ؟
سيرين : عادي نحنا راح نروح بالليل مو بنهار ماعندك حصة مع دكتور بكرا ؟
عنبر : لا غدا العيد ( عطاتها بظهر وتوجهات للحمام باش دير الماسك وكارمن تابعاها ) ..
أݣــاديـــر
- بضبط ف Naya Club Agadir وصلها طاكسي قدام الباب .. خلصاتو مشا تنهدات تنهيدة طويلة كتشوف قبالتها ماحملاش هاد البلاصة واخا الخلصة كانت زوينة وحتى واحد مكايقرب لجيهتها .. كلوب معروف فأݣادير كلها وبرات أݣادير كيجيو ليه غير الشخصيات المعروفة ، وكيغنيو فيه غير المغنيين الأجانب نهار خدمات فيه اول مرة حسات براسها بلي مكايناش فالمغرب بلي كاين فدولة اوروبية بداكشي لي شافت فيه .. عمرها شافت الشطيح على الاعمدة بحوايج فاضحة حتى شافتهم هنا .. اما البنات لي كيجيو كانو صنف اخر من الطبقة البرجوازية بقات واقفة ساهية حتى وقف عليها واحد من ليݣارد
.... : ليلى واقعة شيحاجة ؟
ليلى ( عاد فاقت من سهوتها ) لا لا غير سهيت اخويا حكيم ( حدرات راسها ودخلات ) مشات للفيستير حلات المجر ديالها دارت فيه ساكها وهزات اللبسة ديالها سدات مجرها ودخلات بنت فنفس السن ديالها ..
.... : على سلامتك
ليلى : الله يسلمك
.... : العصاب والله عمري شفت شي قنت خدامين حتى ليلة العيد ، هاد بنادم موحال واش كيعيدو الله يستر
ليلى ( بصوت أنثوي بارد ) علاش هوما كيعرفو شي عيد بعدا الله يعفو علينا من هاد الخدمة ديال الذل والله .. الناس ناعسين مرتاحين وحنا كنضربو فالكرفي وكون اشي خدمة زينة
.... : صاليرها يشفع ماعندنا منديرو أصاحبتي الحمد لله لي مول شي مكاينش .. كتكون القضية مرخوفة علينا شوية ( هزات ساكها ) انا مشيت ازين ربي عوينك ( خرجات مخلية ليلى ماحملاش راسها واخا تفكات من الكلوب ديال مراكش لي كان حتى مولاه خانز وكانت كتعرض فيه للتحرش .. ولكن هنا تمارة مضوبلة واخا حد مكايقيســها ولا كيقرب ليها ..
~~~~~~~~~~
داز العيد بتمارتو ريحة تشواط ديال الريوس فدروبة .. وكاع الدراري دالحومة مجموعين ريحة الدخاخن خارجين من السطوحة ديال الشوا .. الصباح كيدوز افدبي**حة وتمارة والعشية كيكون زيارة للحباب
فرباط دوز كثر من ديك 20 يوم لي كان عوال عليها فديك الليلة كان خاصو يجمع حوايجو باش يشد الطريق للأݣادير خرج فديك العشية من ورا ماسونا للعائلة بارك ليهم ݣلس فالقهوة تقهوى بوحديتو داير الكيت فودنيه كيتسنط للعظامو
العيد هاد المرة كان غير على الاعياد الاخرى .. بنت عمو لي مزال غابرة مو لي محكومة ومدوزاه فالحبس .. خوه لي مسافر على برا مامدوزش العيد معاهم ولا غير معصب والخبار لي وصلو من طارق
طارق : فاروق مشا لسبانيا عندو خدمة تما .. السيد ماخلا قنت فين قلب على عنبر بزز باش مشا للسبانيا على ود واحد لافير ديال سبانيولي
عماد : شنو ݣلتي ݣالو راشد ؟
طارق ( عاود ليه ) برب كونما ديك الفلفلة دحياة ماعندهاش باسبور غانݣول خواو المغرب
عماد : لا لا ماعندهمش اصاحبي فلوس السفر خاصهم زبالة دالفلوس .. وهي ماخرجات سانتيم من الكونط لي حليها فاروق ( هاد المحادثة لي دازت بينو وبين طارق دازت فدماغو ناض خلص القهوة وشد الطريق لدار لي كانو عاطيينو ) ..
~~~~~~~
شرم الشيخ
لبسات كسوة طويلة بشالها مدارت والو لوجها هزات ساكها وخرجات مع سيرين وكارمن .. توجهو للمطعم لي كان من المطاعم الفاخرة ديال شرم الشيخ ستقبلو سيرين إستقبال زوين .. الموسيقى كانت مجهدة كانت بنت ديدجي شعرها بحال الدري طالقة الموسيقى والناس منغمين معاها .. شدو الطبلة لي كانو مريزيرڤيين ..
عنبر : هدا واش مطعم ولا كباري ؟
سيرين ( ضحكات ) لا يا عنبر مطعم وفنفس الوقت في موسيقى وفقرات رقص كمانا
عنبر : اويلي على فقرات رقص لا اختي الى كان هك اخلينا اختي نمشيو
سيرين : ماتخافي اليوم مافي ولا فقرة في بس موسيقى ( سكتات ) على فكرة هاي المطعم صاحبو مغربي
عنبر : وايلي ( برمات شفايفها ) مزيان ( دورات عينيها فالمحال كتشوف فديكور ديالو جا السرباي خدا الطلبات ديالهم قبل لا تبدا الماكلة رجعات الكرسي ) أنمشي الحمام وغانرجع ..
سيرين ( هزهزات راسها ) اوكي ..
دخلات لطواليط قضات غرضها وتمات خارجة غاسلة يديها .. خرجات من الحمام وقبل لا تعتب وسط الريسطو وقفات جامدة فبلاصتها كتشوف قبالتها شخص مكانتش متوقعة غادي يجي نهار وترجع وتشوفو كان داخل بكل ثقة وأناقة بمغربية معكلة بالمصرية والعربية سول الشخص لي على الباب
.... : كولشي مزيان ؟
.... : كلو تمام يا حسن بيه
حسن : مزيان ( تبسم كيهزهز راسو للناس لي تم سونا ليه التيليفون جبدو وخرج على برا كيدوي ) ... تسلتات قلبها كيضرب راجعة للطبلة بخوف حتى وقفات على سيرين
عنبر : يلاه نرجعو لدار
سيرين ( بإستفسار ) شوفي عنبر بيكي شي ؟
عنبر ( لون وجها مخطوف ) غير مريضة ناض عليا المصران عاوتاني .. كاع لي كليتو فدار رضيتو مانقدش نبقى والله حاسة براسي ماشي حتى لتم
سيرين ( مافهمات والو ) طيب اوكي
عنبر : انا انسبقك لبرا ( هزات ساكها ومشات زربانة خارجة من تم هزات راسها فسمية المطعم .. وتوجهات للطوموبيل طلعات فيها كتسنى فسيرين حتى جات هي وكارمن
سيرين : نلوح عالمشفى ؟
عنبر : لا بلاش أصلا عندي دوا فدار .. انا كنت أصلا حاسة براسي ماشي مزيانة غير درت ليك الخاطر وخرجت معاكم ( ديمارا الشيفور مرجعهم للدار مابقاش بان ليها حسن الݣزار ستغربات ومن كلامو باين بلي عندو علاقة بالمطعم) ..
~~~~~~
- فجهة أخرى ݣالسة نادية لابسة الأبيض كتبكي .. كتشوفيه قدامها صحتو مهدودة ݣالس فوق كرسي متحرك، نطقات ببحة تعب :
حسبي الله ونعم الوكيل هي سباب فهادشي .. هي سبابك حتى وليتي هكا هي سباب حتى مشى الظهر لي كنت كنتسند ..
بدر ( ببرود شافيها) حتى واحد ماسباب انتي وراجلك لي سباب فهادشي .. باغية ضرݣي الشمس بالغربال كان غايجي نهار وغادي تحصلو واش نشيتو فعايلكم ( شافت فيه ) ماشي انتوما لي كنتو كتبيعو وتشريو فبنادم بحال الى كتشريو فالذبان بحال الى بنادم مساوي عندكم بصلة .. مامسوقينش ݣاع يموت لي بغا يموت ويعيش لي بغا يعيش شتك سكتي وكتشوفي فيا شتي هادشي لي واقع ليا ولي موال غايوقع لينا كاملين نتيجة ديال داكشي لي كنتو كديرو انتي وبا الله يرحمو هادشي الى دار علاش يترحم ..
نادية : ياك اولدي هادشي لي خلسر عليا ؟
بدر : كنݣولك لي كاين ، خلينا نسدو هاد الضوسي ونرجعو بحالنا أنا عييت كنقسم ليك بالله وصلات بيا الحد .. خلينا نجمعو حوايجنا مابقا عندنا مايدار هنا ..( حرك كاروصتو وخرج من الصالة لجردة ) نزلات بنتها ݣلسات ..
نادية : قطعي لين أبنتي باش نرجعو بحالنا ( شافت جهة بدر لي كالس فجردة ) مابقا عندنا مزال منݣلسو نتسناو ( تنهدات تنهيدة طويلة) موحال يجي نهار نرجعو لهاد البلاد مزال ..
~~~~~~
عنبر ( بتساؤل ) سيرين شكون مول الريسطو لي كنا فيه ؟
سيرين ( حاطة قدامها بيسي ) شخص إسمو حسن حسن الزيتوني ، عندو كثير مطاعم وكبريات هون بشرم وبالإمارات كمان ( عنبر سكتات كتفكر وقفات ) وين رايحة ؟
عنبر : الكوزينة .. مشات للكوزينة جبدات تيليفونها من البيجامة بقات واقفة مدة حتى كريات انستغرام جديد توجهات للصفحة ديال عماد وسيفطات ليه ميساج فيه " سلام عماد انا عنبر شوف وصلاتني واحد الخبار حسن الݣزار راه كاين فمصر فشرم الشيخ بضبط المطعم ديالو سميتو عيون حاليا راه مستقر فمصر وصلاتني هاد الخبار وقلت ضروري نعلمك تهلا فراسك "
عنبر (بدات كتعيط عليها سيرين ) واخا بلاتي ( بقات عاصرة على الميساج حتى طلع ليها بلي شافو يلاه بان ليها كيكتب مشات نيشان وديزاكتيفات الكونط خشات تيليفون فجيبها ورجعات للصالون ..
كان كيجمع فحوايجو فالباليزة هي لي بقات ليه وحدة جنعها قبل وهادي كانت هي الأخرة .. حتى وصلو ميساج من الانستغرام دخل ليه نيشان قرا الميساج غوبش بإستغراب جا يجاوب .. حتى طلعات ليه الصفحة غير موجودة حرك راسو بلا حولة ستغرب منين غايكون جاها الخبار شكون قالها ليها .. ماعندو الوقت لي يغرق فهادشي ديال التقلاب وهو خاص يشد الطريق دور للعميد وعلمو فهادشي لي وصلو ..
رضوان : مزيان أنت خرج سوق هادشي ، انا غادي نتواصل مع السلطات المصرية هوما غادي يتكلفو وديك ساع غايرحلوه لهنا .. جمعتي حوايجك واجد ؟
عماد : وي جمعتهم المهم نخليك دابا ( قطع مع العميد وسونا للروطال فالواتساب والو مكايجاوبش خلا ليه اوديو ) أصاحبي مكاتجاوبش فين غارق بغيت نعرفك غير لاش كتبلاني الله يهديك ( سيفط الاوديو ولاح تيليفون مكمل على الجميع ديالو وجد كاع حوايجو .. كلا شيحاجة خفيفة وتكا ليه شوية معمر الساعة على 4 ديال الصباح ..
- سونات الساعة ناض دوش صلى .. كلا شيحاجة خفيفة هبط شوانطو للطوموبيل سد الدار وداز للخدمة عطاهم السوارت عاد شد الطريق لأݣادير .. غادي طرونكيل دقة دقة حتى صبح الصباح توجه لواحد القهوة ݣلس فطر فيها خدا قهوة باش يفيق مزيان دخل للواتساب الاوديو ديالو ماتقراش .. كمل فطورو خلص وكمل طريقو للأكادير سوس أجواء جديدة حياة جديدة غير الاجواء لي كان عايش فكازا .. اول حاجة دار توجه نيشان للمديرية الأمن ديال أݣادير وجهوه للمكتب العميد دق ودخل كان راجل فأواخر الأربعينات بداية الخمسينات وقف مسلم عليه ..
منعم (باللكنة مراكشية ) مرحبا بيك اسي عماد سي رضوان دوا ليا عليك وخدمتك تبارك الله داوية عليك ..
عماد : شكرا اسيدي
منعم ( مد ليه سوارت ) هادي واحد الأبارتومو ترتاح فيها بينما قلبتي على الكرا إن شاء الله..
عماد ( شدها من عندو ) شكرا أسيدي إيمتا نݣد نبدا ؟
منعم : من غدا ، تابعاك افير كبيرة اسي عماد ( ضحك )
عماد ( هزهز براسو ) وأنا موجود ( منعم هز تيليفون )
منعم : سفيان اجي عندي واحد دقيقة ( شوية تدق الباب ودخل منو شاب تقادة ديال عماد طويل وجهو خالي من اللحية مقبول والجدية كانت باينة غلى ملامح وجهو )
سفيان : نعام أسيدي
منعم : كنقدم ليك المفتش عماد حيدر ( هزهز راسو سفيان ) دابا تݣدو تبداو الخدمة
سفيان : كون هاني أسيدي ( خرج عماد وسفيان من البيرو توجهو للبيرو ديال عماد دخلو ليه .. كان تقريبا بحال البيرو ديالو الأول فالقد) مرحبا بيك
عماد : شكرا ربي يخليك ( سكت مدة ونطق) على اشمن أفير دوا عليها العميد ؟
سفيان ( ݣلس كيضحك ) زربان اصاحبي خليك أحتى ترتاح
عماد ( بملامح بارد وهدوء وصوتو الجوهري ) الخدمة مافيهاش الراحة اسي سفيان
سفيان ( هزهز براسو ) كاينة ، المهم هذا واحد خونا كيݣولو ليه الموس بزناز كبير .. ولد الحرام كيلعبها تحت الدف مكايخليهاش وراه لاباسون عليه عندو واحد ميني بار فمراكش او واحد مولاتي كلوب هنا شحال هذا وحنا كنشمشمو وراه ولكن البق مايزهق .. المهم القصة طويلة ( وقف ) انا مزال ماتغديت نتغداو ونعاود ليك البلان كيما هو ... خرج هو وعماد من المديرية فتجاه واحد السناك كان قريب للخدمة .. ݣلسو دومونداو مكملين هضرتهم ..
- دخلات لدار من الحصة لي دازت مع الطبيب ، من ورا كل حصة كتحس براحة كبيرة دخلات للدار .. حطات ساكها وݣلسات قدام سيرين
سيرين : كيف كانت الحصة ؟
عنبر : الحمد لله دازت مزيانة
سيرين ( بجدية ) عنبر بدي إحكي معك بموضوع كثير مهم .. بدي ياكي تسمعيني للأخر
عنبر : الله يسمعنا خبار الخير
سيرين ( تنهدات تنهيدة طويلة ناضت من بلاصتها وݣلسات قبالتها شدات فيدها ونطقات ) عنبر انا كثير بحبك بمدة 3 شهور حسيتك قريبة مني مثل إختي أي إشي شاركتو معك وأنتي كمان ( عنبر متبعة معاها ) بخصوص البروش يلي عندك وحكيتي فيه معي ( دورات لسانها على شفايفها ) أنا بعرف كارلو وبعرف كمان ماكسيم
عنبر ( غوبشات ) كيفاش كتعرفيهم
سيرين ( تنهدات تنهيدة طويلة (الحوار باللبنانية ) عنبر تقدي تدي عليا نظرة خايبة ولكن مكانش عندي حل أخور كانت الشركة دايزة فواحد الضائقة مالية .. وكارلو هو لي عاوني حتى لقيت راسي خدامة معاهم .. كارلو كيبيع ويشري فالألماس مانقدش ندهل معاك فضيطاي ولكن هادشي لي كاين انا فلول فخباري قضية البروش ولكن مكنتش عارفة بلي كاين عندك نتي ..
عنبر ( مصدومة غير كتشوف نطقات وهي كترمش فعينيها ) دابا انا هربت من واحد وطحت فيك انتي شنو دارا اتعيطي عليه ولا كتوجديني ليه ؟
سيرين ( قاطعاتها ) مالك مريضة تجي فيا ومتجيش فيك .. وحتى حاجة مغادي تمسك ، أصلا انتي هربتي غير هكاك هوما كانو باغيين غير البروش ويمشيو بحالهم ولكن انتي تخلعتي على الخاوي ..
عنبر : هوما لي جايين بحال شي عصابة تابعيني كيفاش بغيتيني نفكر صدمتيني .. وانتي اصاحبتي مامحتاجاش تبقاي معاهم اش دخلك فهادشي ديالهم ..
سيرين : غايجي وقت وخدمتي غادي تسالي معاهم .. انتي ديجا باغية تهناي منو ومعندك بيه غراض أنا غادي نتكلف باش نعطيهم ليه
عنبر ( وقفات ) فعلا ماعندي مندير بيه ( هزات ساكها وطلعات لبيتها حطات ساكها وكتفكر تبسمات .. فكل مرة كيصدمها واحد بحاجة فشكل وهي والو واش بغات تعلم بدلات حوايجها وتنهدات كتخمم بقات مدة واقفة قدام السرجم ساهية .. توجهات للماريو ديالها فتحاتو جبدات منو ديك البواطة حلاتو كتشوفيه .. كيفاش كيلمع والاحجار لي فيه كيجلبو العين
عنبر : اعوذ بالله من الشيطان الرجيم ، اش بغيت ندير بيه فيه غير المشاكل وصداع الراس (لبسات بانطوفتها ونزلات لتحت وقفات قدام سيرين لي كانت فبلاصتها وحطات ليها البواطة ) البروش هاهو عندي ليك طلب واحد
سيرين : مرحبا قولي ليا لي بغيتي غير ماتقلقيش مني وتخسري الصحبة لي بيناتنا
عنبر ( دورزات لسانها على فمها دايرة شعرها ورا ودنها ) بغيتك تكلفي .. بغيت نرجع للمغرب
~~~~~~~~~
أݣادير
- حطهم الشيفور ونزلات هي ودراري زوج عندهم 12 عام زعرين وعينيهم زرقين .. شادين فيها كتدوي معاهم بالإنجليزية كانت شادة فيها على عكس الاول ..
حياة ( بدارجة كتدوي مع راسها ) عمري فحياتي دوزت شي عيد كبير بحال هدا بنادم معرݣها لحم مشوي ومبخر .. وانا كالسة نضرب فالكوطليط صوتي مع زبدة اويلي ياويلي فينك يالبطبوط والكبدة مشوية تفو
.... ( بالإنجليزية ) شنو كتقولي ؟
حياة ( جاوباتو ) لا والو اكندوي مع راسي .. على اخر يامي جايا نضرب البورغر خايبة حتى لمعاودة (بدا تيليفونها كيسوني جبداتو كانت لابيل فالواتساب من عنبر فتحات الخط تم تم ) الحب ديالي توحشتك ... الحمد لله هاحنا الناس ضاربين لحم وانا جايبة البعالك يضربو البورغر ( وقفات مخرجة عينيها كتبسم ) حلفي بالله ياحليلي ( كتنقز وسط الشانطي ) إيمتا ؟ صافي إن شاء الله الله يجيبك على خير موااااح عليك كنبغيك ( قطعات شافت فدراري فرحانة ) انا لي غانخلص عليكم وغاناكلو معاكم .. تمشاو زوج خطوات .. حابسة المشية فاش سمعات صوت رجولي ورا ظهرها كيعيط :
حـيــــــــــــاة ..
ضارت كان شيفور ديال الطوموبيل جاي كيجري هاز بزطامها ..
.... : هاكي بزطامك ( مدو ليها )
حياة ( قلبات ساكها فعلا مكانش ) ماعرفتش كيفاش حتى طاح شكرا بزاف أخويا ( مشا الشيفور وهوما توجهو لفين غياكلو البورݣر وطاكوس )
~~~~~
سيرين رجعات من جهة لابيسين ݣلسات حدا عنبر كتشوفيها :
واش ضروري تمشي اعنبر تخليني وتخلي كارمن ؟ واش وليتي خايفة مني ؟
عنبر ( تنهدات وتاقبلات معاها ) الخوف من الله سبحانه ماشي من العبد اسيرين .. انا بلا داكشي لي قلتي ليا كنت ناوية نرجع بحالي المجية ديالي لهنا كانت غلط فغلط عقلي مكانش معايا كنت محتاجة غير شي حاجة نشد فيها ونهرب الدكتور ساكي كيقول عمر الهروب مكان حل وبلي الواحد خاصو يواجه الازمات ديالو ومشاكلو ماشي يهرب منهم وأنا ماعندي مندير هنا ..
سيرين ( دورات لسانها على شفايفها حابسة البكية ) والفتك الصراحة والله .. عمرتي عليا كنت غير انا وكارمن بوحدنا ماعندناش ناس كنعرفوهم بزاف .. ياك غانبقاو على تواصل مغاديش تسدي عليا ؟
عنبر ( بإبتسامة ) أنا ماشغليش فخدمتك كتبقاي حرة .. ولكن مغاديش نسى وقفتك معايا دخلتيني لدارك وفتحتيها ليا وشفتي ليا الدكتور سامي لي عاوني وماخليتيني مخصوصة من والو ولكن دوك الحوايج منقدش نديهم ..
سيرين ( هزهزات راسها ) متخافيش هادوك الحوايج من فلوسي مالي الحر من شركتي ماشي من داكشي لي كيدور فبالك وحتى باش غادي تمشي وداكشي لي غانعطيك تخليه عندك اتحتاجيه من مالي الخاص ( تنهدات ) فهاد الشهير لي بقا ليك إن شاء الله بينما كملتي حصصك مع طبيب .. شنو بان ليك نمشيو للجيزة تشوفي الاهرمات ونمشيو للنيل منين جيتي هاد زوج بلايص ماشتيهمش ..
عنبر ( تنهدات ) واخا
سيرين ( شدات ليها فيدها ) مزال كتفكري فيه ؟
عنبر ( سرحات ورجعات شافت فيها ) عمري مغادي نساه مكاينش شي حد غاينسى قلبو .. ولكن ماعرفتش والله واش نتيق هضرة حياة ولا عينيا وكلام ديك خيتي .. شكون قالي بلي صاحبو يكون غير دافع عليه ..
سيرين : خاص تسمعي منو ولالا ؟
عنبر ( ببرود تبسمت ) يحن الله إن شاء الله .. الصراحة توحشت المغرب واخا غير 3 شهور هادي والله .. كونما الحصص مع دكتور سامي نمشي من دابا ..
سيرين ( جاتها البكية ) دابا تمشي إن شاء الله مابقى والو ( وقفات وطلعات لبيتها مدمعين عينيها مساخياش بعنبر )
نواحي مدينة تطوان .. فطبيعة والخضورة مفرش واحد الملاية متكي عليها حاط حداه براد ديال اتاي مغطي راسو بواحد الطربوش كبير وداير عود فمو حتى بحس بالغاشي حداه حيد الطربوش شاف لي حداه وتقاد فالݣلسة ..
الراضي : وليدي تا فين كتهروب كنجي نقلب عليك من هنا نلقاك طرتي
الروطال : كنت مجمع مع راسي كنديو ونجيبو انا وياه فالهضرة
الراضي ( رجل فالخمسينات ضحك ) واش ݣالك راسك ؟
الروطال ( بصوتو رجولي الغارق ساهي شافيه وتبسم ) داكشي لي ݣاليا اعمي راضي .. مغاديش يعجبك الى سمعتيه خاصك غير تعرف بنادم بكترت مافيه الزين فيه نقطة خايبة كحلة كتبان فشي وقات بحال هادو لي انا فيهم
الراضي : نوصيك اوليدي تكايس عنداك تظلم عارفاك مكظلم حد .. ولكن تكايس لا تخليش الكحولية تعمي ليك العين الله يرضي عليك ( شافيه الروطال وتنهد بدا تيليفونو كيسوني جبدو من جيبو وناض للبعيد كيدوي قطع ورجع عند الراضي نزل على راسو باسو )
الروطال : جا الوقت نرجع بحالي اعمي راضي تهلا خصاتك شيحاجة عيط ليا ( عطاه بظهر غادي بهيبتو توجه نيشان لطوموبيلتو ركب فيها وشد الطريق )
وصلات لعين الذياب فرحانة .. ولات فينما كتكون غادية للخدمتها كاتحس بللفرحة والحرية ، حلات الكروصة ديالها قدات امورها وبدات الخدمة ديالها بداو الكليان كيجي للعندها وهي كتبيع ..
مابعيدش بزاف عليها خرجو من الطوموبيل .. متوجهين لواحد القهوة تم دخلو شدو قهوة قهوة مقابلين مع البحر
عز الدين ( كيضحك ) الفرخة طارت وخلاتك الله كريم اوليدي ، مزال مالݣيتيش لي يرومبلاصيها ؟
طارق ( مغوبش ) مغانقلبش ومزال غاترجع لديك الخدمة لي خلات وهربات نوريها طيران هاديك انا لي غانحيد منها ديك دودة ..
عز الدين ( شافيه بخبث ) اهي ياكما شبكة تلاحت ؟
طارق ( جغم من قهوتو ) عليها هي ( دار رجل على رجل ) ماعنديش مع طيران وخفت الرجل .. ولكن ماعنديش مشكيل نلوح عليها الشبكة نهني تريكتها من دودة لي راكباها ..
عز الدين ( كيضحك ) عطي تيساع لختي .. دير عقلك ديك جعرة ديالك خليها بعيد أطارق
طارق ( شافيه ) أنت لي خرج هاد السوق أعز الدين .. فبلاصة ماترجع لعقل لختي مشارجياها نهار طيح فيدي وغاتفرج مغايفكها مني حد .. خاص غير دراري يلݣاوها
عز الدين ( بإستغراب) متݣولش ليا مسيفط لي يقلب عليها ؟
طارق ( تبسم بخبث ) ومالي غادي نخليها .. اليوم ولا غدا يجيبو ليا خبارها ( مغزف ) غاتشوف معايا الاخر ديك نص بلاصة ..( بقاو مجمعين سلاو قهوتهم وناضو من تم خارجين )
عز الدين : كاين واحد الكوان هنا واعر فيه واحد المشة كتقمش كتبيع الكريپ واعر
طارق : لا مافياذ اصاحبي
عز الدين ( جرو ) برب حتى تمشي دوق زيد هاهو غير هنا اصاحبي يلاه ..
- منزلة راسها خدامة على واحد الكريپ كتقاد فيه .. غير طابو دارتو فكريطينة دارت عليه الشكلاط .. مع الكنافة وصوص بيستاج وعاد دردرات عليه بيستاج مهرمش .. مداتو للسيدة تخلصات من عندها ومشات ..ضارت كتمسح الجهة دالكروصة حتى سمعات صوت رجولي رما السلام ..
دنيا ( ضارت ) عل( طاح ليها الما فركابي حزات بالبرودة طالعة معاها قلبها كيضرب فتسعين كترعد ..
طارق ( عݣد غوباشتو شفايفو كيترعدو تصدم صدمة عمرو ماعمر كان كيظن بلي غادي يشوف ختو هنا ولا تغدرو او تكذب عليه ..
عز الدين : فين القطة لي كتخبش
طارق ( ضار عندو بالعرض البطيء ناطق من تحت سنانو ) عاود أش ݣلتي ؟
دنيا ( برجاء ) خويا هانت
طارق ( بالغوات حابسها ) انت غاتسدي داك الفم الهضرة ماشي معاك ( شاف فعز الدين ) عاود اش ݣلتي ؟
عز الدين ( كيشوفيه ويشوف فدنيا) واش ختك ؟
طارق ( شنق عليه ) عاود اش ݣلتي .. ختي اعز الدين ختي اصاحبي
عز الدين : طارق واش انا غادي ندور بختك واش من نيتك .. والله ماعمري غلط فيها ولا دويت معاها هي بعدا شكون يݣد يدوي معاها ..
دنيا : انت لي قلتيها ليه .. عرفتيني ختو جبتيه لهنا ياك باغي تزدي ليا السلوكة بيني وبين خويا
طارق ( ماحيلتو ليها ولا لصاحبو ) انتي غاتسدي فمك بغيتي ديري فينا الضحك ( طلق من عز الدين) مخصينك حنا من شيحاجة ؟
دنيا : بغيت نشق طريقي بوحدي مانعتامد على حتى واحد واش انا درت شيحاجة لي هي حرام ولا عيب ؟
طارق ( خبط ديك الكروصة بيدو مشتت داك كاوكاو ولوز وبيستاج ) كروصة كروصة ادنيا ( كيغوت ولي دايز كيشوف ) خواتاتك خدامات بالفور ماشي دايرين الهبال بحالك
دنيا ( بدات كتبكي وكتغوت ) ماشي شغلي فخواتاتي .. خواتاتي بغاوها باردة انا مالي واش شغلي فيهم .. واش انت نهار بديني دخل فيك شي واحد انا بغيت نجيبها بيدي انا فرحانة بهادشي لي كندير وماشي شغل حتى واحد فيا ..
طارق ( جرها من شعرها مغزف عليها ) عاودي أش ݣلتي ؟
دنيا ( دفعاتو ) طلق مني ماشي شغل حد .. بابا مزال فالحياة مالكم دكتاتوريين وكتبغيو تمارسو الرجولة ديالكم على العيالات .. فبلاصة ماتفرح بخدمتي كنغوت عليا بغيتي تشوهني مع الكليان ..
طارق ( بالغوات مجنن وجاهل ) أشمن كليان ولا **** شكون هاديك خت طارق حيدر مريضة انتي ولا مال ملتك .. اشمن خدمة هادي ( خبط ليها لي صوص حتى ترشو على حوايجها نازلين دموعها )
عز الدين ( كيجر فيه ) صاحبي تكالما حشومة
دنيا : كتكوي وتبخ انت لي قلتيها ليه ودابا كتجر فيه ( شافت فخوها ) هرسها هرسها وشتتها وغادي ندير وحدة بحالها والى خرمتي عليا هنا نديرها فقنت خور .. بعد مني انت حݣار واناني انت مكتبغينيش كتبغي اخواتاتك لوخرين ( كتبكي )
طارق ( كيتحلف عليها جارو عز الدين) غانتفاهمو من بعد على هاد تخراج العينين .. مزال غانتفاهمو أبنت عبد الخالق حتى ترجعي ( تنطر من عز الدين غادي بزعاف لطوموبيلتو ) .. مسحات دموعها وبدات كتمسح فداكشي لي تشتت طرفات الدنيا كتحس بالحݣرة والبكية شاداها بسنانها ..
~~~~~~~~~~
فلليل رجعات لدار .. لقاتو كالس كاين مع باها وجدودها مجموعين کالسة معاهم حتى ياسمين ..
ياسمين ( غير شافتها وقفات ) واش انتي مكتحشميش بغيتي ديري فينا الشوهة دايرة كروصة فعين الذياب ربي كون دازو معارفنا من تم ولا دار نور الدين ؟
دنيا : نور الدين مزوج بيك انتي ولا بيا انا .. مالهم شغلهم فيا كل واحد كيدير لي يريحو والى شوهتك اختي متقوليش ليهم ختي قولي ليهم مربيينها
طارق ( وقف ) واش انتي مكتحشميش واش دايراها ݣدها کد راسك ودافعا الجبهة تي مال ملتك ؟
دنيا ( غرغرو دموعها ) مادرت والو مالك فين لقيتيني .. خدامة فرحانة بخدمتي عندي كلياني كيبغيو خدمتي الحمد لله كل واحد يدير لي بغا
ياسمين : كروصة بغيتي تخدمي ديري مشروعك .. بابا يعاونك انا ولا طارق هادي راه الشوهة
عبد الخالق ( بأمر ) هنيونا ( شافو فيه خصوصا دنيا كتسناه يݣوليها شيحاجة كلها كترعد فمها كيترعد ودموعها نازلين كتشوفيه واقف وجاي قبالتها حتى وقف قدامها ) علاش ماݣلتيهاش ليا ؟
دنيا ( نزلو دموعها ) كنتي مشغور ابابا مع هادشي ديال عنبر وكنت جامعة واحد البركة .. كنت غانقولها ليك بغيت غير المشروع يتمشى
عبد الخالق ( تنهد ) انتي مرتاحة هاد الخدمة عاجباك ( هزهزات ليه راسها ماسحة دموعها ) الله يسهل عليك أبنتي فلي بغيتيه ومرتاحة فيه برافو عليك كبرتي فعينيا
ياسمين ( مصدومة ) بابا
عبد الخالق ( شافيها ) دخلي سوق راسك وديها فدارك وفراجلك وخرجي سوق ختك .. فتاخري بختك باش تولي ضربي ليا الحساب لعائلة راجلك من دابا وتخافي راك غادية فالخسران ابنتي راجعي راسك حسن بنتي مفتاخر عليها .. وانا بالحياة حتى واحد فيكم ماعندو الحق يدوي معاها سوى انتي ( شاف فولدو ) سوا انت انا مزال عايش ماشغل حد فبنتي ( ياسمين ماعجبهاش الحال هزات ساكها ومشات دنيا تنهدات وتبسمات معنقة باها مخليين طارق شافيهم وخرج ) ..
كلمة حلوة وكلمتين ..حلوة يا بلدي ، غنوة حلوة وغنوتين ،حلوة يا بلدي املي دايما كان يا بلدي اني ارجعلك يا بلدي .. و احسن دايما جنبك على طول وذكريات كل اللى فات .. فاكرة يا بلدي قلبي مليان بحكايات فاكرة يا بلدي اول حب كان فى بلدي مش ممكن انساه يا بلدي فين ايام زمان قبل الوداع كنا بنقول اني الفراق ده مستحيل ..وكل دمعة على الخدين كانت بتسيل مليانة بأمل أن احنا نبقى موجودين .. فى بحر الحب على الشطين .
بعد مرور 4أسابيع
راكبة فباطو خاص لسهرات بالليل .. الهوى كيلعب بالكسوة ديالها عمرها ظنات شي نهار غادي تشوف النيل ولا تزور هاد البلاد أصلا تنهدات تنهيدة طويلة مابقاش ليها بزاف وترجع للمغرب بزاف تساؤلات فبالها شنو لي غادير ؟ ولكن عندها بزاف دالخطط تبسمات فاش فكراتهم أحلام كانت نساتهم ودابا رجعو حياو عندها طاقة كبيرة باش ترجع تحققهم ..
- دوزو زوج ديال الليالي فالقاهرة .. الغد ليه فاقت جمعات حوايجها باش ترجع مع سيرين للشرم الشيخ تجمع لي بقا فحوايجها وتسيفط مع الطبيب ديالها ..( تدق الباب ودخلات عندها سيرين )
سيرين ( شافت فالبيت وفيها كانت هازة فيدها ورقة ) جمعتي حوايجك غانمشيو من الجيزة لشرم نيشان
عنبر ( كانت كتعامل معاها بكل حدر ) اه جمعتهم بقا ليا غير الحوايج لي لهيه ..
سيرين ( الحوار باللبنانية ) مابغيتك تقولي والو لكارمن .. حتى تمشي وانا غانقولها ليها بطريقتي ( مدات ليها الورقة ) هادي البيي ديالك ديال الطيارة خليه عندك عنداك توضريه ( تبسمات )
عنبر ( شداتو عندها ) معاش غادي تعطي لخونا البروش ؟
سيرين : اليوم غانعطيه ليه فاش نكونو تم فالأهرمات .. انتي ماديريش فبالك المهم ، انا خليت واحد السيد خدام معايا فالمغرب فتح ليك كونط وحط ليك فلوس تماك .. هو لي غاتلقايه كيتسناك فالمطار غايعطيك لاكارط ويوصلك فينما بغيتي ( بغات تدوي عنبر ) ماتخافيش اعنبر هادوك فلوسي وأنتي تستاهلي ماكثر .. غير باش تعاوني راسك الى بغيتي ديري شيحاجة غادي يعاونوك بزاف ( طبطبات ليها على كتفها بالعة ريقها حابسة بكيتها وخرجات من عندها ) ..
- جمعات حوايجها قدات زيفها هزات واحد الطربوش ديالها وخرجات من البيت جارة باليزتها تلقات ليها كارمن عنقاتها .. هبطو لتحت مخليين لي خدام فلوطيل يتكلف بالباليزات ..
~~~~~~
- شادة ليد كارمن كدور فالاهرمات وكتصور .. هازة راسها مبهورة بلي قدامها كانت غير هي وكارمن بوحدهم ..
فجهة اخرى .. واقفة حتى شافتو جاي قبالتها مبسم وقف اونفاص معاها داير يديه فجياب سروالوو
ماكسيم : ماعندي مانسالك .. أنا حفات ليا وعييت باش نجيب البروش وانتي فدقيقة جبتيه كيفاش حتى عطاتو ليك ؟
سيرين : ماعندها مادير بيه فيه غير صداع الراس .. وكون جيتيها بالخاطر كون عطاتو ليك ، كتبغي تبين راسك راه انت واعر طوموبيل ورجال يحسابليك راسك كتمتل ففيلم ميريكاني على هاد زربة ديالك شي نهار كارلو يسوسك
ماكسيم ( ببرود ) براكة من كترت الهضرة بزاف عطيني البروش ( فتحات ساكها ومداتو ليه )
سيرين : هاهو وعطيو للبنت تيساع لي عندها هاهو شديتو .. نشم ريحتك كدور بيها غانجبد ليك عروقك القدام انا كنقولك
ماكسيم ( خنزر فيها ) ماعندي مندير بيها .. بمسبتها تحرم عليا نحط رجلي فالمغرب ، كنت باغي غير البروش هي لي مرعودة بوحدها
سيرين : وداكشي لي قلتي ليها فلاݣار راه عاوداتو ليا ..
ماكسيم : بغيت انضحك معاها .. كون بغيت وحدة بحالها حدايا بلا عدد لي كيهمني هو البروش ( عطاها السلام ) تهلاي ( بقات حاضياه حتى ركب فطوموبيل كحلة ومشا تنهدات براحة ورجعات عند عنبر وبنتها )
عنبر ( شافت فيها ) عطيتيه ليه ؟
سيرين ( هزهزات راسها ) تقدي ترجعي للمغرب وأنتي مرتاحة دابا ..
~~~~~~~~~~
وقفات بإبتسامة كسوة فالبيض وشال فالأورونج .. مدات يدها للشخص لي قدامها وبإبتسامة :
شكرا بزاف على كولشي ادكتور سامي إن شاء الله غادي نكمل الحصص ولكن ماشي هنا ..
سامي ( شاب فثلاثينات مقبول وبشوش ، غوبش وبإستغراب سولها ) موش فاهم أنتي تقصدي إيه هو انتي مش مرتاحة معانا ولا إيه ؟
عنبر ( ضحكات ) لا ماشي هكاك ولكن إن شاء الله غادي نرجع فحالي داكشي باش ..
سامي( تصدم وحس بإحساس خايب ) بتتكلمي جد فجائتيني الصراحة مش عارف اقولك إيه ، بس أنا بتمنى لك كل خير وزي ماتكلمنا أي حاجة بنعشها فيها خير لينا ولازم مانهربش من مشاكلنا بالعكس لازم نواجه ماشي يا نونو ؟
عنبر ( ضحكات ) كون هاني ومرحبا بيك إلى بغيتي تزورنا شي نهار شكرا بزاف حيت عاونتيني وريتي شحال من حوايج كنت غالطة فيهم تهلا فراسك ( هزات ساكها وخرجات عندو تنهدات تنهيدة طويلة وركبات مع الشيفور راجعة للدار ومن تم للمطار ..
خرجات من المحال ديالها لون شعرها كيبري ضاربة فيه الشمس ديال الظهر .. طلعات لطوموبيلتها تيليفونها كيسوني كان خوها .
ماجدة : وي عصومي .. كيدايرين لاباس عليكم ؟ أنا الحمد لله بابا فالقهوة مع عمي بحال ديما ( تنهدات ) وسبحان الله العظيم هاد العام حتى واحد فيهم مامشى للموسم من غيرك أنت .. حتى فاروق مامشاش من غير دراري لي قالي بابا مشاو متلوه هاد العام أما هو كاعما تسوق .. مكاين عليه حتى خبار كيدوي مع بابا غير فتيليفون ومابغاش يحكر عليه ويسولو فين هو ولا يقجر عليه دارو مكايعمرهاش قول ماوصلها من نهار خواتها عنبر .. ( ديمارات ) ايوا الحمد لله ياربي على كل حال كيداير عمران ؟ عجبو الحال فجديدة ؟ .. أريناس مامشات معاكم ؟
عصام : داوية من نيتك لاش غاتمشي ؟
ماجدة : وغير سولتك سلامة ياربي .. لا غادية مغدية عند دار عمي عبد العالي عيطو عليا ، مالفين كيعيطو ليا مكنمشيش قلت نمشي اليوم .. يلاه اخويا بسلامة ( قطعات )
سايݣة بشوية عليها غادية حتى وصلات للحومة .. ضارت للجهة فين ساكنين كيبان ليها واقف قدام واحد المحال خاشي يديه فسروال ديال بيجامة واقف مع واحد البنت شعرها مطلوق لابسة عباية .. بلاصات الطوموبيل ونزلات عينيها عليهم بقات واقف بلعات ريقها كتحس بإحساس غريب ماعجبهاش الحال ماكرهاتش تدفل عليه وتعايرو .. رض ليها البال حدرات راسها وتمات جايا .. تفارق مع ديك البنت وضار عندها ..
عزيز : اهلا اهلا زارتنا البركة لاباس عليك ؟
ماجدة : الحمد لله ، انت بلاما نسولك حيت باينة فيك لاباس عليك ( طلات براسها ) مبارك ومسعود المحال الجديد
عزيز : الله يبارك فيك .. دخلي الواليدة كتسناك ( عطاتو بظهر مخلياه مبسم كيحك فحاجبو دخلات كان الباب محلول وسداتو على وجهو ) تاشوف هاد المكركبة حتى هي كتسد عليا الباب واخا لالة ..
~~~~~~~~
خدامة واقفة غير بزز باغية طيح على طولتها السخانة ورواح .. نيوفها جايين بالما بغات غير تنعس
حمزة : ليالي سيري لدار شوفي حالك كيدايرة
ليالي : مابغيتش نغيب نسمع شي هضرة ولا شيحاجة ..
حمزة : انتي غير سيري انا نسوني لسي راشد ولا سي طارق نعلم واحد فيهم
راشد ( دخل ) اش واقع شنو باغي تݣول
حمزة : ليالي مريضة واقفة غير بزز ݣلت ليها تمشي حسن ليها ( توجه راشد لعندها وقف قبالتها حناكها حمرين ونيفها باينة حالتها )
راشد : عيانة بزاف كيبانليا ( شافت فيه بعينيها مدمعين ) زيدي نوصلك ( هزات راسها جهة حمزة كان مكمل خدمتو تحرجات ) ويلاه انباتو هنا حطي لي فيديك ويلاه ( بلعات ريقها حطات لي فيدها هزات ساكها وخرجات ركبات معاه فطوموبيل حاطة راسها على الزاج مادواتش معاه كاع بان ليها وقف قدام فارمسيان .. نزل من طوموبيل دخل للفارمسيان ورجع فيدو ساشية ) هاكي هاهو دوا خوديه راه فيه معاش تستعمليه ومتجيش حتى تولي مزيان صافي ( مكانش عندها القوة لي تقولو لا شداتو من عندو وهزهزات راسها .. ديمارا وماوقف حتى لدار نزلات من طوموبيل جبدات سوارت حلات ودخلات عاد ديمارا ومشا ) ..
× جهة أخرى ×
وصلات طوموبيل جيپ فالكحل .. بقا واقف مبلاصي كضرب فيه الشمس ديال أݣادير ، معالم حتى واحد من خوه وجبد كيضرب بيدو على الڤولون ساهي فخاتم زواجو لي فيه سميتها تدق الزاج شاف لجهتو وحل الباب .. طلع شخص قصير شوية ورقيق
الروطال : أمضرا ؟
.... : الشك ديالك كان فبلاصتو مكانتش فالمغرب كانت فمصر .. ولكن راه مابقاتش رجعات غير لبارح غاتكون مزال هنا ..
الروطال ( دور لسانو وسط فمو عاض بقوة على باطن حنكو هزهز راسو جابد جوا من جيب تجاكيط مدو ليه ) هاك بصحتك ..
قدام لاپيسسن محطوطة صينية فيها براد اتاي وطبسيل فيه حلويات مشكلين .. ݣالسة دايرة رجل على رجل لابسة صندالة فالكحل مع جلابة فالݣرونة وزيف ديالها ساهية مشا بالها لبارح لي وصلات وتبسمات فاش تفكرات حياة ..
فلاش باك
نزلات من الطيارة دازت من جميع الإجراءات .. جرات الباليزة ديالها ةو واحد الباليزة صغيرة ميني شنطة .. خرجات على برا كان واقف واحد السيد كيتسناها بطوموبيل توجه عندها عرفها من صورة لي وراتو سيرين ..
.... : لالة عنبر انا حسام وصاتني عليك مدام سيرين باش نوصلك لفينما بغيتي وباش نعطيك هادي ( مد ليها لاكارت ݣيشي )
عنبر ( شداتها عندو ) شكرا أخويا بزاف .. ولكن انا جايا ختي غادي تديني راه دويت مع مدام سيرين وقلتها ليها .. تقد تمشي ( هزهز راسو ورجع لطوموبيل لي خرج منها ومشا بقات واقفة حتى بانت ليها واحد طوموبيل وقفات ونزلات منها حياة كتجري )
حياة ( بصوت عالي ) عنبـــــــــر ( تلاحت عليها كتعنق فيها وتبوس ) توحشتك بزاف أختي والله العظيم
عنبر ( كتضحك ) وغير بشوية يا هاد الهبيلة راه ا 4 شهور ماشي عام ( جراتها خشاتها فيها ) توحشتك بزاف والله العظيم توحشت جماعة وحماقنا
حياة ( جرات الباليزة بيد ويد لوخرا معنقاها بيها ) يلاه نحيدو من هنا بعدا زيدي ( طلعو لطوموبيل ديمارا الشيفور وشدو الطريق للفيلا ديال النصرانية لي خدامة عندها حياة )
الـــواقــــع
جات حياة لعندها لابسة كسوة صيفية وصندالة بسماطي مريحة .. حيدات واحد المخدة وݣلسات
حياة : صافي جمعت حوايجي ساليتهم نكملو الفطور ونمشيو
عنبر ( حطات كاس ديال اتاي من يدها ) لا ماشي دابا الى ركبنا دروك غانوصلو بليل فهمتيني .. أصلا مغايخرج الكار من المحطة حتى لديك 7:30
حياة : صافي مزيان عرفتي سونات لي ديك البنت لي تعرفت عليها ( شافت فيها عنبر بإستغراب) وصاحبتي لي تعرفت عليها فداك الكروب ديال الماسكات والوصفات .. قاتلي كاينة واحد دويرة الى مشينا غاتمشي معانا نشوفوها
عنبر : وهاد البنت بعدا ثقة ؟ من ايمتا وأنتي كتعرفيها راه الثقة مكايناش أثاحبتي شفتي شحال من حاجة وقعات لينا
حياة : لالا البنت ظريفة بنت دارهم وبخدمة ديالها وداخلة سوق راسها .. وحنا راه عينا ميزانا الى ماعجباتنا دويرة نشوفو غيرها .. جمعت واحد البركة وحتى المدام دورات معايا فوق صالير ديالي مسكينة ..
عنبر : الله يجازيها بيخير .. بقاو ݣالسين مجموعين ، جات السيدة لي خدامة عندها حياة خرجو تغداو ورجعو بقاو حتى وصل الوقت ، وصلهم الشيفور لمحطة المسيرة دخلات خدات الوريقات خلصات ورجعات عند حياة كالسين كيتسناو فالكار يدخل ..
فمديرية أمن أݣادير .. ݣالس فالبيرو ديالو قدامو بزاف الوراق وتصاور قبالتو كان ݣالس سفيان
سفيان : هدا هو ديپو لي كايخرج منو السلعة .. معارفينش بضبط معاش كتخرج ، طحنا على ديبو غير بالكشايف .. وهدا هو الكلوپ من الداخل
عماد ( وقف نازل بطولتو على البيرو كيحقق فدوك التصاور ) بابابابا هادشي كامل أصاحبي نيويورك صافي ..
سفيان : هادشي غير شوية من بزاف.. داكشي باش خاصنا نعرفو شنو كنديرو حيت هاد الكوان كيجيو ليه غير هوما هوما .. تزلݣ فيها مشيتي يا حبيبي
عماد : دابا هادشي كاع لي ݣدامي مافيه حتى راس الخيط من غير هاد الديپو .. خاصنا نطيحو على خيط صحيح هدا غير راشي خاصنا نشوفو شي حد لي نزرعوه ليه فالكلوب
سفيان : فكرنا فيها ولكن المشكيل هو خونا السيستيم ديالو دالخدمة قاصح .. هو لي كيجيب الخدامة براسو مكايتيق فحتى واحد وكاع لي خدامين عندو يا جايبهم ولا طرف خور مدخل فهمتي ..
عماد : وكيفاش البلان ( بقا كيفكر ) فخبارك طاح عليا واحد البلان ( بقا سفيان كيشوفيه ) شكون الضعيف فنظرك انت ولي ساهل يطيح فليد ويبدا غير جيبها فم وݣول يعاود لي كاين ولي مكاين الرجال ولا العيالات ؟
سفيان ( تبسم ) العيالات بحال الى فهمتك ولكن كمل ..
عماد : السربايات لي تم بغيتهم هنا .. كيفاش خليني نضرب واحد دكيكة ديال اتاي تفتح ليا المجاج وغانشوف بلانها ..
~~~~~~~~~~~~
وصلو مع 8 ديال الصباح للمحطة ديال القنيطرة .. نزلو من الكار خداو البالز ديالهم وخرجو على برا .. كيتمشاو سولو واحد الكريسون على محلبة وراها ليهم دخلو ليها ، خداو كيسان ديال القهوة والكرشة مع الفرماج ..
حياة : بغيت انغسل وجهي الموت ديال الصهد أصاحبتي
عنبر : حتى انا كنحس براسي بحال البيضة مع منعستش أنتي مزال نعستي ، نفطرو ونشوفو شي أوطيل نݣلسو فيه هاد الليلة غير بينما وراتنا البنت دار ..
حياة : صافي إن شاء الله .. فطرو وسولو على شي أوطيل مشاو ليه نيشان فطاكسي عطاو لاكارط ديالهم وطلعو للبيوتهم رتاحو دوشو نعسو شوية عاد خرجو يتلاقاو بالبنت
عنبر : واش زوينة بعدا ولالا ؟ فين جات ؟
.... : وهي الصراحة جات فبلاصة شعبية فالقصبة قريبة للبحر .. ولكن نفس الوقت راه نقية مافيهاش الشماكرية ولا تخافي من شيحاجة هي كاينة الفوق فسطح وعاد ݣليسة فسطح انتوما ساكنين ومفججين .. حنا نشدو طاكسي وتشوفيها بعينيك ، خداو طاكسي وشدو الطريق وقبل لا يوصلو المهدية حدا القصبة وقفهم الطاكسي كان كيتسناهم واحد السيد تم مول الدار .. سلمو عليه ومشاو ليها الدار جات فواحد الحومة فيها حانوت واحد مول دروݣري واحد المحلبة الدار كانت نقية ومفينية فيها 3 ديال الطبقات .. طلعو للفوق فتح السيد الباب الدار كانت زوينة بالݣبص فسقف الكوزينة كبيبرة مع الطواليط البيت كانت كبير يهز 3 السدادر ..
.... : الدار هاهي وهدا هو السطح كيكاتشوفو ، الثمن راه ݣالتو ليكم السيدة وأنتوما ولي بغيتو
حياة : اش بان ليك ؟
عنبر ( كدور فالدار عجباتها وعجبها السطح خصوصا كتشمي ريحة البحر وكيبان ليك من بعيد ) حتى انا عجباتني واخا بانت ليا بعيدة على المدينة ولكن الموقع عجبني حيت غايجي فيه داكشي لي ناويين ديرو ..
.... : هي نتوكلو على الله
عنبر ( بإبتسامة ) مرحبا ..
فديك اللحظة بضبط بدا كيتسمع الغوات التحت والمخاصمة وغوات مراة حلقها غايتحيد بالغوات هبط داك الراجل مول الدار كيجري تبعوه البنات .. لقاو الكاري لي لتحت شتف على مرتو خرجو لزنقة الناس كاين لي باغي يفك كاين لي ماقدش يفك ..
.... : لا حول ولا قوة إلا بالله العلي العظيم الله ياخود فيه الحق ، ديما معدي على هاد المرة ومنوضها
.... : وحنا منوض فينا الخلعة ، شوية تلقاي خوتها جايين ليه بجناوة الله يخرج هاد النهار على خير
.... : نكذب علك أنا كرهت هاد الزنقة بمسبتهم تفو .. ( كان هذا كلام بعد الجارات لي سمعاتو عنبر هي وحياة تسلتو بالمهل هوما والبنت لي معاهوم هاربين )
عنبر ( كتزرب فالخطوات ديالها ) يحسابليه غير مفيني الدار ومقادها بنادم ايبقى صابر ليه فوسط الصداع والمشاكل
حياة : لي شاف النقاوة يقول هنا نبات ، كون شفنا شي سمسار حسن لينا نوصيوه نعطيوه ديك 200 درهم بجمافو
.... : سمحوليا البنات انا السيد لي وراها ليا ماكنتش عارفة غادي تكون بحال هكا
عنبر ( وقفات شافت فيها ) زعمة ماعارفاش بلي هاد القنت ماشيش حتى لتم جايبانا ليه وحنا بنات اختي .. علاش شكون بنات هنا حنا ولا أنتي ؟ .. البنت سكتات عرفاتها فراسها حق رجعو فطاكسي لمدينة واول حاجة سولو على السمسار ومشاو لعندو نيشان .. دخلو للعندو ݣلسو
.... : اش حب الخاطر الالة ؟
عنبر : عفاك بغينا شي دويرة على قدنا تكون غير ݣارسونيير تكفينا حنا بزوج
.... : بغيتو بلاصة مزيانة ولا شعبية ؟ البلايص الشعبيين بحال المسيرة وكاين لابيطا كاين الساكنية وكاين جهة العلامة عاد كاينة الخبازة هاد الكوانات شعبيين .. وكاين ولاد وجيه وكاين الصياد حتى هو هادو واخا شعبيين ولكن نقيين والى بغيتي الثمن طالع كاين لاڤيل على حسب لي بغيتي ..
عنبر : حنا جوج بنات مكنݣدوش على المشاكل وصداع بغينا شي بلاصة مغالياش ونفس الوقت تكون نقية الله يسهل عليك
.... ( بقا مدة كيفكر شافيهم ) كاينة واحد دويرة فصياد مولاها واحد الراجل صاحبي نمشيو نشوفوها الى عجباتكم
عنبر : ولكن اسيدي شحال الثمن ؟
.... : نشوفوها بعدا ويحن الله ( ناضو من تم خداو طاكسي غير هي وحياة اما البنت لوخرا مشات بحالها )
وصلو للصياد نزلو من طاكسي تابعين السمسار ، توجهو لواحد الزنقة دخلو ليها ..وقفو قدام واحد دار فتح الباب ديالها ..
.... ( اشر لواحد الدار ) هادي ساكنة فيها واحد السيدة هي وبنتها البنت خدامة موظفة .. طرونكيل مافيهم لا صداع ماتسمعش الحس ديالهم .. داخلين سوق راسهم ( تمو طالعين الطاج الثالث ) هنا ساكن واحد السيد موظف حتى هو داخل سوق راسو مافيهش تبرزيط ( تم طالع وهوما تابعينو قربو للباب السطح فتح واحد الباب ودخلو تابعينو الدار كانت عبارة على صالة كبيرة كلها زليج .. السطح بالݣبط .. عاد كاين بيت صغير وكوزينة وطواليط
.... هادي هي الدار راها مشمشة ( فتح السراجم ديالها سرجم على الزنقة او واحد على السطح ) أجيو تشوفو السطح
- خرجو تبعوه لسطح كان كبير جهة فيها الحوايج منشورين وجهة فيها ݣليسة زوينة .
.... : هاد الجهة لي كينشرو فيها الناس حوايجهم وهاد الجهة محسوبة على الدار لي وريتكم ايوا كولشي ݣدامكم وانتوما عينكم ميزانكم .. بداو كيدورو فدار البلاصة زوينة وحتى دار النقية
عنبر ( شافت فيه ) واش هاد البلاصة نقيقية ياك ؟
.... : ابنتي راه بحال الى غانكري لبناتي ربي شاهد عليا
عنبر : الله يجازيك بيخير شحال الثمن عفاك ؟
.... : 1700 درهم بالما وضو ديالها
عنبر : ماشي بزاف شوية حنا يلاه باديين الصراحة قاصحة شوية
.... : هاد الثمن راه والله ماتلقايه فشي بلاصة أخرى .. وانا مزال غاندير معاكم المزيان حيت السيد كنعرفو .. مغانݣولكش سبقي ليا شهرين
عنبر ( بقات كتشوف ساهية شافت فحياة تنهدات ورجعات شافت فسيد ) واخا اسيدي مرحبا .. واخا نݣدو نطرقو المسمار ديال الوريقة اليوم باش هكا نتحولو دغية حيت كان باتو غير فلوطيل ..
.... : مرحبا ابنتي يلاه .. خرجو من تم توجهو لعند الكاتب عمومي تكتابو خلصاتو عنبر وخدات السوارت سولاتو على شي بلاصة كيبيعو فيها الحوايج المستعملة بحال الفراش وغيرو .. وراهم وسما ليهم البلاصة
عنبر : سي العربي نسولك عفاك دابا شي حد الى بغى يدير شي بيعة وشرية فين يقد يبيع ؟
العربي : وبنتي عطا الله ، كاين المسيرة ولكن بعيدة وكاين الخبازات حتى هي بعيدة عليكم شوية .. وكاين الواد بلاصة زوينة ونقية وتم فين كاين صحاب الكرارص كيبيعو الكلية والسوندويتشات والبيبوش وغيرو .. وكاين حتى واحد البليصة هنا نيت ولكن البلاصة لي فيها الرواج هي جهة الواد
عنبر : الله يجازيك بيخير اسي العربي ( بغات دور معاه حلف لا شد من عندها شيحاجة )
توجهو لواحد السناك كلاو فيه ومن تم شدو الطريق للوطيل يرتاحو ..
~~~~~~~~~
دازو 3 يام حسات براسها رتاحت ورجعات للخدمتها .. كانت خدامة كتسربي واحد الكليان شادة معاه الخاطر
ليالي : ههههه لا لا ماشي ديال الاحناس بزوج هادي راه غير ديال العيالات بوحديتهم غير حيت قاصحة شوية
.... : واش نݣد نشوف هاديك لوخرا الى ممكن ( جبدات ليه وحدة فتحاتها وراشتها فيدها )
ليالي : هانت شم هادي ( مدات ليه يده خدا يدها شدها كيشم حسات بالاحراج ومابغاتش تقمعو
( صوت رجولي ) أسي منين كنبغيو نشمو مكنشدوش يد البنت هبط يدك ( لاخور هبط يدو ماعجبوش الحال ) ماعندنا روايح لبيع سير فحالك خوي عليا محالي يلاه ( بإمر وإنفعال .. لاخور مزادش معاه الهضرة وخرج بحالو رجع شاف فليالي ونطق ) أنتي شتك عاجبك الحال مادة ليه يدك
ليالي ( تصدمات من ردة فعلو ) سي راشد انا كندير غير خدمتي
راشد ( بامر ) خدمتك امدموزيل بينك وبين الكليان الاحترام ماشي مادة ليه يدك .. اخر مرة يتعاود هاد البلان انا نݣولك ( ضرب فيها ودخل لداخل تحت انظارها الغير مفهومة ) ..
الدار لي كانت خاوية هاهي دابا مفرشة بسديدرات حصيرة او طبلة .. واحد تلفازة اوكازيو خداوها بحال الى جديدة .. فلوس سيرين نفعوها ومزال شاطو ليها على لي ناوية الكوزينة حتى هي عمروها بلي قسم الله من ميعنات واحد تلاجة صغيرة لقاوها هوتة فسوق .. كانت كالسة هي وحياة فسطح حاطين أتاي مع جواي ديك 7 برد الحال شوية وغابت الشمس الحارة ..
عنبر ( ساهية شافت فحياة ) بغيت غير نطرق القضية ديال الكروصة إن شاء الله.. وتسجيل على قبل القرايا
حياة : ايمتا غادي تسجلي ؟
عنبر : غاندخل للسيت نتسجل إن شاء الله وديك ساعات عاد نطلع للافاك نولي ناخود البوليكوبات ونحفظ من دار إن شاء الله.. حتى انت خاصك دفعي لباك ليبر نسيتيه ؟
حياة : لا مانسيتوش دايراه فبالي
عنبر : وهكاك ... المهم انا غير نحيد قضية القرايا عليا وختص نسوني للفاروق خاصنا نتفاهمو على الطلاق
حياة ( شافت فيها ) واش مزال دايرة الطلاق فراسك واخا داكشي لي قلت ليك ؟
عنبر : حياة عبلة راه بفمها قالت ليا بلي كانو بزوج وبلي مع بعضياتهم .. باش عرفاتني انا خويت الدار احياة هادي راه اتحمقني وانا وياه بوحديتنا لي عارفينها والعائلة متقوليش ليا مابينهم والو ومكانش معاها فاش انا هربت .. اه نتقبل انو يقد يكون داكشي قديم وغير خدمة كانت بينهم وتصورو نتيق هادي .. اهاه وقضية خويان دار الى مقالهاش ليها هو شكون ايعلمها ..
حياة : والله ماعرفت بالله راسي داخ عليا حتى انا ماعرفتش كيفاش حتى عرفات المهم سيدة خوات المغرب .. عمرها مغادي ترجع ليه فحياتها
عنبر : شحال وانا هاربة جا الوقت باش نتفاهمو انا وياه على هادشي .. وكل واحد يقصد بلادو ويرتاح الى بغاها يمشي عندها سوا تكون هنا ولا لهيه أصلا انا بوحديتي لي تضريت فهاد المعماعة كلها انا لي خؤجت خاسرة من هاد زواج خاسرة قلبي وخاطري انا لي بغيتو وربي عالم ( غرغرو عينيها بدموع ) دا قلبي معاه صافي ولكن هانية عمري مزال نطوف برجال ولا بشي حب نديها فقرايتي وخدمتي وغادي نتهنى ندمت على نهار لي فتح فيه قلبي لشي واحد الحب غير العذاب قسما بالله ..
حياة : وباش عرفتيه هو مكايبغيكش ؟
عنبر ( تبسمات ) هههه كيبغيني كون كيبغيني كون لقاني كون قلب عليا .. واحد بحالو واصل زعمة صعيب عليه يلقاني نقولو كاع انا ماعندي عقل وهربت نقولو انا طجيت من هنا وسخن عليا راسي ايوا وهو ؟ حياة خلي داك الجمل ناعس حسن ..
~~~~~~~
من بعد أسبوع جهة الواد .. 📌
قدام كروصة فيها كاميلة كبيرة ديال البيبوش واقفة بجليليبة صيفية وشال .. الابتسامة على وجها حداها كانت واقفة حياة قدامها طبلة فيها القهوة معطرة وكيسان ، بداو الناس كيجيو لعندها كاين لي ياخود البيبوش ولي ياخود القهوة ..
.... : ختي بنين عندك البيبوش على مزيناتو شهوة منو
عنبر ( فرحانة ) بصحة وراحة
.... : شوفي انا عندي صفحة فتيك توك طالعة وفالأنستغرام واش واخا ندير ستوري متعرفو يجيو الناس وتشهري شنو بان ليك ؟
يتبع...
التعليقات
لا توجد تعليقات بعد، كن أول من يعلق.