محتوى القصة
- وصلت توده لجديده راسها دايخ عليها الكار خسر في الطريق وكانت الشمس حاره زادت على ما بيها الضروره ديال راسها من البكا اوزادتها الشمس حتى هي كتحس بخاطرها مروع عليها والدوخه شداها بغات غير تنعس .. شيرات للطاكسي وقف لها ركبت اعطاتو لادريس شد الطريق وهي مغمضه عينيها حيث الا حلاتهم غادي تجيها الرضا وصلها التاكسي لقدام باب الدار خلصاتو ونزلت مشات نيشان للباب كدق ، مده وهي قدام الباب وحتى واحد محليها عاودات دقات او والو عرفاتهم خرجو جبدات التليفون من الصاك يلاه بغات تصوني وتفكرت باللي ما عندهاش النمره لا ديال يونس ، ولا ديال عنبر مشات لعند مول الحانوت اخذات من عندو قرعه ديال الماء وواحد بيمو واحد رايبي رجعت لقدام باب الدار وجلسات .. حلات هذاك بيمو اكلاتو ودوزت برايبي كتسنى مرابانا يرجعو ..
- حطات راسها على الحيط مغمضة عينيها مدة ماعرفاتش شحال حتى سمعات الحس ديال الطوموبيل وقفات ، نزلات عنبر زربانة جات لعندها كتجري تحنات عليها :
ماما فاطنة مالك ؟ واش عيانة ؟
- تودة ( هزات فيها عينيها بحب عينيها عمرو بدموع جراتها عندها وعنقاتها خاشياها فيها وكتبكي خلعاتها )
- عنبر ( كتدوز ليها على ظهرها ) : ماما ويلي مالكي ياكما شفروك واش هاد تعطيلة تعطلتي صافي شش براكة عليك شوشتيني
- سميرة ( مخلوعة ) : ياك لاباس أختي ياكما تلاقاو ليك الشفارة انا ديك دار بيضة راه كتخلعني
- تودة ( بعدات من عنبر كتمسح دموعها ) : لا غير خسر بينا الكار الحمد لله خرجات لينا طريفة غير الخلعة لعبات عليا
- حياة : على سلامتك اخالتي
- رجاء : على سلامتك اخالتي الحمد لله لي خرجات طريفة
- يونس : بلاتي نحل الباب بعدا تدخل ترتاح وجهو لونو مخطوف .. حل يونس الباب دخلو لدار حيدات جلابتها وشالها كتحاول ترتاح ݣلسات ساهية فعنبر والبكية مزال واحلة ليها فحلقها
- عنبر : شوية دابا ؟ نجيب ليك شيحاجة نوجد ليك شيحاجة
- تودة ( غير مكايزيد قلبها يضرب ) : لا ابنيتي مابغيت والو براكة عليا انشوف فوجهك ..
- حياة : خالتي وجهك لونو مخطوف نوضي ترتاحي حاولي تنعسي شوية انا انوجد ليك واحد صوبة على مزيناتها
- تودة ( بإبتسامة ) : الله يرضي عليك أبنتي داكشي لي غادي ندير نيت .. ناضت كتجر فرجليها دخلات للبيت تبعاتها عنبر قدات ليها بلاصتها ورضات السرجم عليها ..
- تودة ( عيطات عليها ) : عنبر أجي حدايا .. ضارت عندها عنبر وجات لحداها ݣلسات كتسناها تقوليها شنو بغاتها .. جراتها عندها وعنقاتها نطقات بصوت حنين :
عرفتي شحال كنبغيك ؟
- عنبر ( ضحكات ) : لا شحال ؟
- تودة : ݣد دنيا ومافيها نعطيك روحي وعينيا
- عنبر ( شافت فيها بكل حب ) :
حتى انا كنبغيك بزاف والله عمري نسيتك فحياتي كلها ديما مفكراك واخا كبرت وكولشي بقيت مفكراك وقلتها حتى لحياة ، عزيزة عليا بزاف اماما فاطنة واخا كانت عندي ماما ولكن انت كنتي قريبة مني كثر والله ..
- تودة ( دوزات ليها على شعرها ) :
لهلا يخطيك عليا ابنتي الله يخليك ليا ومايحرمني منك ياربي حبيبي حتى نعوض بنيتي على كاع لي داز عليها
- عنبر ( عنقاتها كتحس براحة وهي بين يديها راحة غريبة ) :
نعوضو بعضياتنا إن شاء الله
- تودة : يلاه سيري ابنتي انا نعس نرتاح من طريق حتى نوض وندويو كاين شلا مايتقال
- عنبر : واخا .. ناضت من حداها خلاتها تنعس وخرجات .
•••••••••••
- دخل لدار معطل عيان حتى لاصال ماقدش يمشي ليه دخل لقى مو ݣالسة دايرة رجل على رجل وكتفرج
- عماد باس ليها يدها وݣلس مغمض عينيه كيحس بعضامو كلهم مدݣدݣين عليه
- خديجة : تعشيتي ؟
- عماد : منين يلاه مجيتي من الخدمة غير دابا
- خديجة : دوش عاد تعشى ؟
- عماد : هادشي لي ناوي ندير كنحس براسي عيان مسخسخ
- خديجة : صافي طلع دوش بينما وجدت العشا بغيت ندوي معاك فشيحاجة
- عماد ( بإستغراب شافيها ) :
فاش بغيتي دوي معايا ؟
- خديجة : وغير طلع بعدا دوش وديك ساع ندويو يلاه نوض
- عماد ( وقف ) : واخا ..
- طلع عماد الفوق دخل لبيتو زول حوايجو ودخل للدوش كان محتاج للدوش سخون غير سلام هز البينوار داروا عليه وخرج نشف راسو مزيان والبس سروال ديال الكيطمه وتيشرت وانزل لقى خديجه وجدت الطبله اجلس حداها وبداوا كايتعشاو الجلسه كلها وهما ساكتين سولاتو خديجه :
واش دوا معاك باك ؟
عماد : لا ما دويتش معاه النهار كامل وانا كانجري في الخدمه ما كانش عندي الوقت وانتي مادويتيش معاه ؟
- خديجة : لا دويت معاه راه مع راسو هو واخوه شكون بحالهم مرتاحين ناشطين وانا بوحدي هنا بحال الغولة
- عماد ( شافيها بعتاب ) : الواليده الله يهديك واش هو غادي لشي عرس ولا غادي مسافر راه غادي للموسم غادي هو واخوه واولادو ومعهم البارديه واش يديك انت امرأه نݣولو تبقاي في الدار ولكن فاش غادي يمشيو الموسم راه كاين غير الرجال الله يهديك ما تبقايش تݣولي شي حاجه ما كايناش ..
- خديجة : احيانا انا اللي كانعرف باك غرباوة هكا دايرين يخلي المرأه ف الدار ويمشي هو يزهى عند الشيخات ..
- عماد ( ماعجباتوش هضرتها ) : واش بعقلك الوالده واش هذه الهضره يقولوها للناس زعما انت والوالد عشرة ديال العمر عارفاه مزيان اش كايسوى عمرو ما أداك ولا قال ليك كلمه لي تعݣرك .. ولا قلل منك باش تجمعي كاع الناس وتكولي بحال بحال بعد المرات قسما بالله مكنعرفكش
- خديجة ( ميقات فيه ) : وراه ضروري تجي معه حيت كايبقى باك وكايبقى راجل بحالك بحالو كاع كلكم كاملين كاتجيو معاه عاجبكم يخليني هنا في الدار ويمشي هو يتبورد مع راسو
- عماد : شفتي الوالد الى سمعك ما غاديش يعجبو الحال وغادي تخاصمو ماشي حتى الاخر ايامكم عاد غادي يولي واحد غادي للغرب والاخر غادي للشرق ديري عقلك الواليده وما تخليش الشيطان يلعب بكم من بعد هذا العمر ، راه ما كاين اللي غادي يخرج عليكم قد هاد الشك ديالك والوسواس اللي كايلعب بعقلك .
- خديجة ( كلامو داز كيف ريح على ودنيها ) :
دابا خلينا من هذا الشي عقلتي على زهيره صاحبتي اللي كنت تعرفت عليها في لاصال
- عماد : اش غادي يعرفني انا فصحاباتك اللي كاتعرفي عليهم ما كانعرف حتى شي وحده من صحاباتك راكي شفتيني من الخدمه للدار من الدار الخدمه
- خديجة : اسمعني ماشي مهم تعرفها ولا غادي تعرفك المهم الناس اللي يعمرها دار ورجلها تبارك الله والصلاه عمي عنده واحد لوزين في الخرجه ديال كازا ديال كيسان وبنتو يلاه رجعت من فرنسا وغادي دير بروجي ديالها هنا في المغرب ..
- عماد ( دور لسانو وسط فمو عارفها فين بغات توصل ) :
مالها هاد بنتو ومالو هذا ومال هذا صاحبتك جيني من الاخر وقولي لي شنو كاين حيت عيان بغيت انطلع نعس نرتاح
- خديجة ( بإبتسامة ) : قلت علاش لا منين يرجع باك ندير شي عراضه تكون فاعلة تاركة ونعرض عليهم على زهيرة صاحبتي اللي قلت لك عليها وعلى راجلها وبنتها وتكون انت حاضر في الدار وتعرفوا بيناتكم ا ولدي راه تبارك الله عندك 32 عام واش غادي تبقى بلا زواج وبلا اولاد ..
- في الدار البيضاء بالضبط في المدينه القديمه في واحده من الديور القدام كايتسمع الغوات وصوت ديال البنت كتبكي وكتغوت :
الله ياخذ فيك الحق الحشايشي القمار السكايري يا ربي تعطيك مصيبه يا ربي كون غير متي انت وما ماماتتش ميمتي الحنينه الله ياخذ فيك الحق يا ولد الحرام سرقتي لي رزقي خرجتي علي وخرجتي على حياتي ..
- كان مقابل معها واحد الشاب في 20 من عمره الدار بيديه والسكران عينيه مقلوبين وحمرين هاز موس في يديه وكيغوت :
انا حشيشي لامك اليوم ندوزها لك اليوم نمشي عليك للحبس الق ***
- ( كتغوت والدموع هابطين من عينيها بحال الشتا) زيد دوز علي الا سميتك راجل دوز علي سارقني وديتي لي رزقي ما كاتخليني نجمع الريال كانضرب الكرفي عند العيالات يدية طابو بالصابون وانت النهار ومطال وانت ناعس تسرقني تخرج بالليل تعرݣها حشيش وشراب وفانيد وتنوضها مابحالك حد ..
- الباب كانت محلوله خلات الناس يدخلوا كيفكو خايفين عليها من خوها لا يذبحها ولا يدير فيها شيء مصيبه كحله
- وحدة من الجرات كتجر فيها : صافي ا ليالي صافي ابنتي اجي معايا صافي ما تديهاش عليه ما تديهاش فيه مسخوط صيفط مو للقبر وبغى يتبعك ليها
- خرجاتها بزز من الدار داتها معها لدارها دخلاتها كان البيت مفرش بسدادر عاديين والطبله في الوسط فوق منها العشاء محطوط كانوا جالسين جوج ديال الجارات ومعهم رحيمة
- جلسات كتبكي والجاره كاطبطب على ظهرها وكاتصبرها شافت في العيالات وهي تنطق :
ديما خوها كايدير هذا الفعايل مسكينه كاتمشي تخدم عند العيالات كاتصبر ليهم وكاتخمل ليهم وذاك الشي اللي كايعطيوها كاتشري منو اللي قسم الله للدار والباقي كاتخبعوا ولكن خوها كيدوز لها الفلوس وكايديهم كاملين وكايخسرهم على البليه
- رحيمة ( بقات فيها كتشوفيها كانت زوينة شعرها كحل ولون بشرتها خمري عينيها ما كانوش كبار بزاف لونهم حتى هو كحل اما شفايفها كان كبار ومنفوخين فورمتها كانت زوينه كل حاجه في بلاصتها حتى من طولتها كانت زوينة ) :
ايوا الله ياخذ فيه الحق اي واحد كياخذ العرق ديال شي وليه باطل الله ياخذ فيه الحق واخا يكون خوها والدار اللي انتم فيها واش كارينها
- ليالي ( كتمسح فدموعها ) :
لا ما كاينهاش غير واحد خالي ما خلينا فيها وحتى هو الا قالها له راسه غادي يجي شي نهار وغادي يقول لنا خاصكم تخرجوا ما عرفت فين غادي نلݣاها وف اشمن جيهه حتى من البو اللي مشيت نطلبه خرجات لي مرته وقالت لك ما كاينش باللي مسافر واخا انا عارفه كاين غير ما بغاش يخرج يشوفني ولا يمكن مرته اللي ما خلاتوش يخرج يشوفني ما بغيتش نتلاح الزنقه وما بغيتش نخدم في الحرام خدمت ف القهاوي ولكن لا الباطرون لا الكليان كايخليوك فتيقار كيشوفوك بنت بحال إلى شي معزه شافوها الدياب بغاو ينهشوليك ليك لحمك ..
- رحيمة (تنهدات تنهيده طويله) : احيانا هذا الشيء اللي كاتقولي عليه راني عارفاه ودزت فيه قبال منك الحاصول الله يدير ليك اللي فيها الخير
- ليالي ( شافت فجارتها ) : خالتي واش نقد نبقى عندك هاد الليلة ؟
- ( حدرات عينيها ونطقات ) : اش غادي نقوليك ابنتي حتى انايا عندي العزارة ما نقدش نخليك عندي غير سمحي لي وصافي وما ديريهاش مني قلة الصواب ما قداش على المشاكل الدراري ما فيهم الثقه يمشي شي واحد يقرب لك ولا يدير لك شي حاجه ونصدقو ف المشاكل خلي مهدي حتى يخرج وذيك الساعه ادخلي للدار ..
- رحيمة : اويلي اثوريه اختي السيد كايتقرقب كيشرب كايتحشش يمشي يدخل عليها يدير فيها شي حاجه ( شافت فليالي ) اجي معي الدار غير خاويه كاينه غير انا بوحدي مرحبا بك حتى تتلقاي ان شاء الله شي حل لراسك اما اخوك راه ما تجلسيش معاه شي نهار يصبح قات* لك ولا داير فيك شي مصيبه كحله ..
- ليالي ( نزلو دموعها حسات بالحݣرة ودنيا سادة بيبانها فوجها ) :
صافي ماشي مشكل بلا ما نعذبك ونصدع ليك راسك غير خليني نرجع الا بغى يدير فيا شي حاجه غير يديرها اصلا ما بقيتش مسوقه هذا الشيء طلع لي في راسي وعيت وتهديت
- رحيمة : والله لا رجعتي لذيك الدار ما كاين لا صداع العذاب انا اصلا ساكنه بوحدي والسيده اللي كانت ساكنه معايا تزوجت وبقيت غير بوحدي ف الدار انا والحيوط ما كانلقى مع من نهضر ولا مع من نجمع مرحبا بيك عندي الا قبلتي علي
- ليالي ( كتمسح فدموعها ) : لهلا يخطيك الله يكبر بك الله يرحم بيها الوالدين نرجعها لك في ساعة الخير ..
- بالليل وفي البحر دسيدي بوزيد مفرشين يزار حاطين الصينيه فيها براد ديال اتاي والكيسان وحاطين كيكه والخبز الزيت الزبده عسل والفاكيه مقابلين مع البحر الجو كان زوين واحد البرود عكس بالنهار كتكون الشمس حاره شويه والجو مزموت ، كانوا كايدويو وكايتناقشو على الخدمه ديالهم الجديده واعلى التفاصيل ديالها ..
- رجاء : بعد خاصكم تعرفوا بلي البنات اللي غادي يخدموا معاكم راه في كل عرس كايلبسو قفاطن جداد دابا في عرس غادي يلبسوا لون وذاك اللون ما غاديش يعاودو يلبسوه في عرس اخر بحالك انت أعنبر تكشيطه اللي غادي تلبسي في هاد العرس ماشي هي تكشيطه اللي غادي تلبسي في العرس لاخر فهمتيني
- عنبر : وعلى هذا الحساب راه خاصنا غسيل الفندق خاصنا نديرو محل ديال تانݣافت منين غادي نجيبو هاد كثرت القفاطن وكترت تكاشط ؟
- رجاء : دابا ها انت غادي تشوفوا شي وحده اللي كاتكري اللي تكون كاتكري لهذا المغنيات اللي كايغنيوا الشعبي واللي عندهم الشيخات زعما خدامات معاهم الشيخات باش توليو تكريو عندها اما باش تخيطو راه صعيب الحال غادي يخصكم دائما تخيطو حاجه جديدة
- تودة ( كتفكر ) :
هادي حاجه مزيانه انا كانعرف واحد السيده عندها واحد المحل في بوركون المحل غزال عندها غير تكاشط الواعرين والقفاطن الواعرين وتيكريو عندها غير الناس اللوكس غادي نشوف معها ، وراه تيكريو عندها حتى مغنيات معروفات والشيخات كنت خدمت ليها شحال هادي السبوع ديال ولد اختها هذي خليوها عليا
- حياة : دابا بقات في الدراري اللي غادي يخدمو معنا الا كنا غادي نشدو عراسات كبار غادي يخصنا دراري واعرين منين غادي نجيبو هاد الدراري وغادي خصنا حتى الماطريال
- عنبر بقات كتفكر ساهيه شويه وهي تشوف فيهم تبسمات وقالت :
لقيتها غادي نصوني لرشيد حيت كان وصاني الا كنت محتاجه شي حاجه نصوني ليه ونعلمو هو تبارك الله عندو اوطيل قدو قداش واخا ماشي اوتيل ديالو ولكن دازوا فيه مغنيين وغادي يكون كيعرف الدراري اللي كايعرفهم يضربوا على الباتري والدربوكه والجيتار المهم كيعرفوا الالات الموسيقيه وحتى انا غادي يخصني ضروري شي واحد اللي علمني النوطات ديال الشعبي
- توده : هاذيك خليها علي انا خرجك السوق عبد الرحمان كوامانجي حرايفي هو اللي غادي يعلمك انت خرجك السوق من هاذ الناحيه هادي دابا غادي يبقاو لينا غير البنات فين غادي نلقاوهم
- سميره : اعطى الله فين تلقاوهم نيت غير في بن سليمان كاينين بنات شهوه منهم ولا بريو عليهم
- حياة : علاش اللي ما نحطوهاش في الانترنت نديروا ذاك اسميته عليه الاعلان في الفيسبوك ونحطوا المواصفات ونحطوا المدينه واللي بغا يتواصل معنا يهضر معانا نحط النمره ديال التليفون اش بان لكم ؟
- عنبر : فكره مزيانه صافي نصايبو الفيسبوك وندخلوا الانترنت ونحطوا المواصفات وذيك الساعه يكون خير ولا ندخلوا احنا كاع الجروبات ونحطوها فيهم ما تعرفي شي وحده تبغي تخدم وتصيفط لينا
ـ تودة : صافي هذه مزيانه دابا هذه المسمار طرقناه ان شاء الله غير نرجعو ونباليو بيه
- عماد : دابا ما لقيتي ما يدار قلتي اشنو ندير نعرض على هذا الناس ونلاقي بنتهم مع ولدي ونزوجو ياك بحال الا انا باقي صغير يلاه عندي 16 عام انا أميمتي راني راجل وعارف شنو كاندير ما غانحتاجش بحال هذه البلانات الله يرضى عليك باركه علي غير تماره اللي كاندوز ف الخدمه
- خديجه : دابا اش جاب تماره للزواج علاش ماشي مزيان ترجع من الخدمه وتلقى مرتك كاتسناك موجده لك ماكلتك تحتت معاها وتعاود ليها وتعاود ليك وتحطوا الراس على الراس وتدير وليداتك
- عماد : هذا الشي انا عارفو مزيان الواليده ما تحتاجيش تݣولي ليا عليه النهار ان شاء الله اللي غادي نكون واجد ونكون مرتاح ومطرق كاع البيبان ذيك الساعه انا عارف فين غادي نقصد ..
- خديجه ( غوبشات ) كيفاش انا عارف فين غادي نقصد واش كاينه شي وحده ف بالك وانا ما في اخباريش كلكم الله يستر بير غارق ما كاتقولوش شنو كاين وما كاتعاودوش كاتبقاو ساكتين انا شفت لك هذه البنت مخلقه بنت عائلة ماشي بحال ديك خيتي اللي تزوج بها اخوك وصدق مطلق ..
ـ عماد : اطلاق عمره ما كان عيب ولا كان شي مشكل ما مكتابش حرارة العيشة بيناتهم عادي اشنو فيها ما فيها حتى حاجه يݣد يعاود حياتو من جديد من غدا الى بغى
- خديجه : وغير دير لي خاطري وخليني نعرض عليهم وشوف البنت تقدر تعجبك وتدخل لك لدماغك اشنو فيها حتى حاجه غير انت راسك قاصح
- عماد : هذا الشي ما تقديش تݣوليه للروطال حيت عارفاه وعارفة كيف داير وعارفه ما كايبغيش اللي يدخل فيه ولا يحكم فيه ولا يفرض عليه شيحاجة
- خديجه : واش احنا دابا فيك ولا فخوك اجي ياك ما حاط عينك على شي وحده غير قول لي انا راه امك وكانبغي لك الخير وحتى شي واحد فهاد الدنيا ما غاديش ينصحك قدي انا ..
- عماد ( باش يفك هادالحريره ويخرج راسو منها ) :
شوفي الواليده نجيك نيشان انا نهار نطرق مسامري ونرتاح في خدمتي واخا خدمتي ما فيهاش الراحة غادي نقصد دار عمي ..
- خديجه( تعصبات وتزاد معها الزايد تصدمات من هضرتو ) : كيفاش دار عمك اجي ياك ما حاط عينك على يسرى ؟
- عماد : علاش مالها يسرا شنو ناقصها ياك ما خاصها رجل ولا يد وزيدون هذيك بنت عمي وعزيزه عليا ما فيها حتى حاجه
- خديجة ( علات صوتها ) : ذاك الشي اللي بقى خاصني غير ولدي العزري ياخذ لي وحده فايته مزوجه ذاك الشيء اللي بقى خاصني امهم سمحت فيهم ومشات تزوجت او وحده حتى دارت 35 عاد غادي تزوج والثانيه مشات تزوجت وما كملاتش في دار راجلها وتمات راجعة والاخرة حتى هي ها هي عندها 28 عام ومازال جالسة ..
- عماد ( وقف ما عجبوش الحال وطلعت ليه هاد الهضره فراسو شاف فيها بواحد النظره عمرو شاف فيها بيها صدماتو هضرتها ) :
قسما بالله العظيم الا صدمتيني فيك عمري كنت كنظن بلي مي غادي تكون كاتفكر بحال هكا ولا غادي تكون كاتشد النميمه في عائلتها وفعمي وفي دار عمي وتعاير فيهم كيحسب لي الناس اللي كايفكروا هكا ما بقاوش ولكن ها هي عندي ف الدار غير بغيت نݣوليك إلي الواليد سمعك قسما بالله ما غادي يعجبو الحال ويقد يتخاصم معاك على هاد الهضره اللي ݣلتي ويقدر يخوي الدار ، حيت خوه كيموت عليه وكايبغيه وما يبغيش لا اللي ينعت فيه ولا اللي ينعت ف بناتو وحتى انا ما غاديش نبغي اللي يدوي على عمي ... ولا على بناتو حيت بناتو بلا يسرى بحال خواتاتي واللي نرضاه على خوتي وعلى راسي وعلى دارنا غادي نرضاه على الناس ، وغير باش ترتاحي الواليده انا الا ما خديتش هذيك بنت الناس ما غاديش نتزوج غير حيدي ذاك الشي اللي كاتفكري فيه من بالك ودابا تصبحي على خير ، دفع الكرسي واطلع لبيتو مخليها متبعاه بالعين ومفقوصة من الداخل ...
- دازت 4 يام وهوما فالجديدة خرجات عنبر وتودة وحياة كان خاصها ضروري تيليفون ، مشاو عند مول تيليفونات ، وراها شحال من موديل فالأخير خدات واحد مزيان فالخدمة وتصوير وخدات واحد للحياة حيت كان تسرق ليها تيليفونها .. حياة لي ماقداتها فرحة كان عندها تيليفون عادي او ولا عندها تيليفون سمارت ضربو دويرة تقداو شيحوايج وخداو ديسير للرجاء ورجعو للدار ..
- العشية كلها دوزوها مع دوك التيليفونات كيتعلمو ليهم أما يونس خدا الدور ديال المعلم ، صايب للعنبر أنستغرام وفيسبوك بسميتها كان خاصها غبر صورة
- عنبر : شوف تقد تكون صفحة ديال أوطيل المامون فالأنستغرام راه يقد تكون صورتي تم تقد تهزها الى كانت
- يونس : أيـــاه بلاتي نقلب .. دخل كيقلب على الصفحة وفعلا لقاها دخل لتصاور وكيف قالت ليه عنبر لقا صورتها كبيرة لابسة تكشيطة زرقة ومبسمة كانت عبارة على فيش فيه توقيت لي كانت كتغني فيه هز الرابط دصورة وداها لواحد البروغرام وتيليشارجاها ..
- هزها ودارها فالبروفيل ديال الفيسبوك وديال الأنستغرام شاف فعنبر وقاليها :
دابا صايبت ليك الفيسبوك والانستغرام الكود خاصك تعقلي عليه وتحفضيه مزيان
- عنبر : لا كون هاني غادي نحفظو ونقيدو عندي باش مايتلف ليا
- يونس : فخبارك دابا خاصك ديري مانادجير لي غايولي يشد ليك خدمتك هو لي كيتكلف بالحفلات والأعراس وبأي حاجة كتخصك ..
- عنبر ( كتخمم فكلامو ) : نسيت هاد القضية هادي ولكن خاص حتى نبداو الخدمة بعدا
- يونس : الفيديوات ديال السهرة لي غنيتي فيها شفتهم لبارح حتى هوما غادي نتيليشارجيهم ونحطهم عندك فالكونط باش كونطك يكون بروفيسيونيل والى بغيتي تجاوبي على الميساجات جاوبي غير البنات حيت دراري فيهم الضسارة
- عنبر : صافي اخويا يونس الله يسهل عليك ..
- بدا تيليفون يونس كيسوني طلعات ليه سمية باه فتيليفون ( شاف فعنبر ) بلات نجاوب على التيليفون :
بعد كيدوي مع باه قطع الاتصال ورجع لعندهم رجاء كانت متكية حدا سميرة كتفرج وتاكل فزريعة وتودة معاهم كالسة وجهة لوخرا عنبر حدا حياة لي مزال كيبقشو فتيليفوناتهم ..
- يونس ( موجه كلامو لسميرة ) : خالتي الواليد يلاه سونا لبا غير دابا
- سميرة ( شافت فيه بشك ) :
ياك لاباس ؟
- يونس : عمي المعطي هزوه لسبيطار لقاه الواليد طايح
- سميرة ( وقفات مخلوعة ) : أويلي مالو ؟ رجاء تقادات فجلستها مغوبشة تودة كتشوفيه بشك :
مالو اش عندو ؟
- يونس : والله ماعرفت كاليا الواليد مشا لعندو لقا الباب محلول دار مترعة وهو طايح هزوه لسبيطار
- سميرة : خاصني نمشي ( مشات كتقلب ) فين هي جلابتي .. تودة وقفات وكلهم تقلبات عندهم الوقت
- تودة : فين غادية بوحدك مابقا عندنا ݣلاس مزال .. ناضو البنات كيجمعو الحوايج دغية أما رجاء غير ݣالسة ومصدومة ، خرجو ركبو فطوموبيل وتودة عطات الساروت للمول الحانوت ..
- تودة : اشمن سبيطار داوه بعدا ؟
- يونس : الشيخ خليفة
- تودة : صافي أولدي وصلنا حنا عندو وغادي نعطيك واحد لادريسة وصل ليها البنات مخاصش مرتك تبقى فسبيطار وهي حاملة
- رجاء : نمشي معاكم
- سميرة : ماعندك فين تمشي انمشي انا وخالتك انت سيري رتاحي راه واعر عليك على لي فكرشك
- رجاء سكتات مابقاتش جاوبات الطريق ماعرفو كيدارو ليها ولا كيف دازت وصلهم يونس لقدام الكلينيك نزلات تودة وسميرة طلعو وهو دا البنات للادريس لي عطاتو تودة بلاصة الطوموبيل وخرج معاهم ..
- وقفو قدام باب الدار دق يونس بقاو كيتسناو حتى تحل الباب وطلات رحيمة شافت فرجاء هي الوحيدة لي عرفاتها :
رجاء ، فين هي تودة ؟ مالكم ؟
- يونس : سمحيلينا الالة على هاد الدخلة ، واخا تخلي البنات معاك سيفطاتهم تودة لعندك
- رحيمة : اويلي علاش فين هي تودة ؟
- يونس : عمي المعطي هزوه للسبيطار هي وخالتي سميرة خليتهم فلكلينيك وجبت ليك البنات ، عفاك رضي البال للرجاء راه حاملة انا خاصني نرجع عندهم ..
- رحيمة : واخا دخلو دخلو مرحبا بيكم .. دخلو البنات ويونس مشا رجع لعندهم للكلينيك ..
- رحيمة : دخلو مرحبا بيكم .. دخلو البنات للبيت ديال السدادر ݣلسو خرجات ليالي من الكوزينة جات لعندهم كتشوفيهم بإستغراب
- رحيمة ( كتحقق فعنبر لي كانت ساكتة ) :
انت عنبر وقيلة ؟
- عنبر ( هزهزات راسها بالإيجاب ) : اه هي انا .. رحيمة بلعات ريقها حبسة دمعة ماتنزلش ليها جراتها لعندها وعنقاتها :
شحال فنة ماشاء الله عليك ، شحال قلبات عليك تودة مسكينة ( بعدات عليها كدوز ليها على شعرها )
- عنبر ( بإبتسامة ) : أنت رحيمة ياك ؟ عاودات ليا ماما فاطنة عليك
- رحيمة ( كدوز ليها على وجها ) : ماما طالعة من فمك بحال النقيطة ديال العسل
- عنبر ( شافت فحياة ) : هادي حياة بنت خالتي
- رحيمة ( بنفس الإبتسامة ) : مرحبا بيك أبنتي مرحبا بيكم كاملين ( شافت فليالي ) هادي ليالي بنت الجيران .. جات ليالي سلمات عليهم وݣلسات ..
••••••••••••••
وقفات تودة وسميرة فالكولوار كيتسناو يخرج عندهم الطبيب .. تحل الباب وخرج عندهم مشات عندو سميرة وتودة وراها :
أمضرا اسيدي كيف بقا ؟
- الطبيب : أش غانݣوليك المرض عندو وصل للمرحلة الثالثة وهاد المرحلة صعيبة بزاف حنا درنا لي علينا وعطيناه مضاضات حيوية ولكن مع تيسير الله وصافي دعيو معاه ..
- تودة ( بتساؤل ) : على اشمن مرض اسيدي علاش هو باش مريض ؟
- علاش مافخباركمش بلي مريض ب syphilis او للاف راه وصل للمرحلة الثالثة
- تودة : اسيدي راه مزال مافهمناكش غير دوي معانا بدارجة الله يرحم بيها الوالدين
- هدا واحد المرض سميتو الزهري كيجي للإنسان على طريق المعاشرة الجنسية الغير شرعية وحتى الى الانسان مس شي ألة حادة ديال شي واحد
- تودة ( شدات على فمها بصدمة ) :
اويلي واش بغيت نݣول السيدا ؟
- الطبيب : لا الالة هو ماشي بحالو ولكن بنفس الخطورة ديالو كون إلى وصل للمراحل الأخيرة ، سي المعطي كون كتاشفو من شحال هادي فالمرحلة الأولى كان ممكن يداوا ولكن دابا مع الاسف وصل للمراحل الأخيرة ..
- تودة : واش نقدو نشوفوه عفاك ؟
- الطبيب : واخا انشوف الفرملية تعطيكم لي باڤيت ودخلو ومتعطلوش الله يخليكم الله يشافي .. مشا وخلاهم وحدة فاهمة او وحدة مفاهمة والو
- سميرة ( شافت فتودة ) : ختي اش ݣال أشمن مرض فيه المعطي عمرو تشكى من شي حاجة
- تودة ( شافت فيها بأسف ) : المعطي اختي مريض بمرض خايب كيجي إلى شي واحد مشا نعس فالحرام .. مع ماليات الحال هو كيعادي حتى الى مش بحال شي زيزوار ولا شيحاجة ولكن المعطي جاتو من الزنقة والله يستر فات الفوت فيه
- سميرة ( شدات على فمها مصدومة ) : اويلي ستغفرت الله العظيم اويلي على هاد الراجل مكايحشم يظل يمشي عند صحابات الحال وانا فدار بحال الخطية
- تودة ( بلعات ريقها وجراتها بصوت كتسمعو غير هي ) :
أجي أختي سميرة واش زعمة شحال هادي ما وصل ليك لفراشك ؟ حيت هادشي راه كيعادي
- سميرة : سينين أختي بكترتهم والله مابقيت عاقلة ݣاع مدة طويلة هادي الى ݣلت ليك منين كانت رجاء صغيرة وأنت ؟
- تودة : لا الحمد لله عمر شيحاجة وقعات بيناتنا ، الله يسمح ليا كت كنشربو السيرو ديال النعاس جاب الله الحمد لله كت كندير هوكا ..
- سميرة : واش اختي دابا فات الفوت يداوا ياكما غايموت؟
- تودة : الاعمار بيد الله الى ربي مكتب عليه الموت راه مكتابة ، وقفات عليهم الفرملية :
هاكو لبسو هادو وأجيو معايا .. دارو الكمامات وتبعوها دارو للكولوار الثاني حلات باب كبير ودخلات بيهم للقسم الإنعاش .. دخلو عندو حبسو فاش شافو حالو بانت على ملامحهم الصدمة فظرف ديك السيمانة ولا بحال الزغبة ديال الراس ، رجليه لي معريين كلهم فيهم دواو حمرين بحال الى مسلوخين يديه وكذلك مسلوخين .. تحت عينيه كحل حالتو حالة الراجل لي كان كيف سبع قلال وضعاف او ولا قد الكمشة ديال اليد ..
- دور عينيه لجهتهم كيشوف فيهم ، دايرين بيه التيوات وصمايم دوز لسانو على شفايفو الناشفين ونطق بتعب وتقالة :
ف فين هي ر رجا ؟
- سميرة ( قربات منو شوية ) : خليناها فدار كيكاتحس شوية ؟
- المعطي ( كيحس براسو ماشي هو هذاك العيا كينهش ليه فصحتو وليباري فداتو كلها والالام فذكورة ديالو ) :
مريض م مريض اسميرة ع عيطي ل ل لكريم و و رجا
- سميرة : واخا غدا إن شاء الله نجيبهم انسوني لكريم ونعلمو
- المعطي : ش شوف و شوف و واش ن نبقى حت حتال لل غدا ( كيتنفس بصعوبة ) م مو س سامي ححة ݣݣولي ل د ر ر اري م مسا م يحة
- سميرة ( دموعها نزلو سخان من عينيها ) : لا تݣولش هكاك اخويي دابا تولي بيخير وترجع لدارك على خير ..
- المعطي ( حرك راسو بنفي وبعياء ) : م مو موحالش م وحالش .. جات الفرملية طلات تشوفو بانت ليها طونسبو طلعات :
خرجو الالة عفاك صافي خليو السيد .. حدرات تودة راسها جارة سميرة وخرجو سميرة ماحبساتش من البكا مدة طويلة وهي كتشوف فيها تودة :
شوف سبحان الله العظيم ، ماخلا مدار فيك ودوز عليك المرار وكتبكي عليه
- سميرة ( كتشهق ) : ولدت معاه جوج وليدات اختي راه عشرت عمري كنت صغيرة واخا تكرفص عليا واخا طاغية واخا كان محرر فيا العيشة وفولادي وتكرفص على ولادي وعلى الناس ، ولكن كيبقى باهم اختي المرض ماتبغيهاش للحد اختي
- تودة ( عنقاتها ) : الله يشافيه ويعافيه إن شاء الله يشافيه ربي يرجع سالم غانم لولادو
- سميرة : أمين اختي أمين .. فديك الساعة دخل يونس او وراه بشوية دخل عبد الكبير خو المعطي عاودات ليهم تودة كولشي ، بانت عليهم الصدمة والحشمة من داكشي لي سمعو عليه كانو عارفينو بلي كيبغي القصاير وينشط ولكن مكانوش حاسبين توصل بيه لهكا ، بقاو مدة وهوما تم حتى قرب الليل يروح جا عهم الطبيب علمهم باش يمشيو حيت ماعندهم مايديرو تم ..
•••••••••••
- ݣالسين فالبيت ديال الݣلاس محطوطة الصينية ديال اتاي حليوات ديال دواز اتاي ، المسمن والبغرير كولشي محطوطين على الطبلة .. تودة كتحرك فراسها تنهدات تنهيدة طويلة :
كل واحد وهمو سبحان الله العظيم لي ماعدو الكثير عدو القليل إيوا اش غانݣولك ابنتي الله يدير ليك لي فيها الخير ..
- ليالي : اللهم آمين ياربي ، كيبقى فيك الحال ضربي تمارة عند العيالات يمسحو فيك رجليهم لي تعطيك نص الثمن ولي تعايرك وكل وحدة وهي وكتقولي تجمعي لدواير الزمان حتى كيصدق الزمان ودوايرو ضايرين عليك ..
- رحيمة : ايوا ابنتي مولاها ربي ، ربي راه مكايسد باب حتى كيفتح بيبان كولشي من الخير ..
- ليالي ( كتشوف فعنبر ) : شفت الفيديو ديالك فالفيسبوك تبارك الله صوت زوين بزاف
- عنبر ( بإبتسامة) : ربي يخليك لهلا يخطيك ..
- تودة : واش أنت من هنا تزاديتي هنا ؟
- ليالي : لا أنا تزاديت فسطات انا وخويا تزاديتا فسطات ، وفاش با طلق مي جينا لكازا وبقينا فكازا
- رحيمة : أش درتو فداكشي لي ناويين عليه ؟
- عنبر : مزال مادرنا والو جاتنا الخبار ديال راجل ماما وجينا طايرين ، يلاه درنا الفيسبوك والانستغرام ويلاه انحطو إعلان فالأنترنت
- رحيمة : راه ݣلتها للتودة خاصكم 4 البنات وعاد دراري لي يخدمو معاكم ولكن دابا راه غايسولوكم على شحال الخلصة ..
- رجاء ( بعياء حاطة راسها على كتف مها ) : شتي امنين غنات عنبر فمهرجان مولاي عبد الله ، ولفيديو ديالها دار بوم راه غاتولي تشد العراسات الكبار وباين ايكون الخلاص مزيان ..
- ليالي : واش بغيتو لي تغني معاكم ؟
- عنبر : لا غادي نديرو اوركسترا إن شاء الله ، ايكونو فيها العيالات وحتى رجال .. 3 العيالات ايكونو كيضربو البندير ماما تودة وخالتي رحيمة وحياة انا لي غانغني أيخصنا 4 ديال البنات لي غادي يشطحو
- ليالي : بغيتو شيخات ؟
- عنبر : أه غير هو ماشي شيخات لي كتشوفي الشيخات لي بغيت انا غايلبسو قفيطنات زوينين وحتى المكياج بغيتو يكون خفيف وزوين دوك الحجبان ديال العفارت والحناك حمرين والعكر كيبان من سعيدية ماعنديش معاه ، ودوك السلاسل ودبالج معمرين العنق وليدين ماعنديش معاهم داك الشعر بحال الكبالة حتى هو لا
- رحيمة ( كضحك ) : اويلي ابنتي وراه كاع الشيخات هوكا
- عنبر : داكشي اخالتي خليه ليهم انا بغيت شيخات معايا موديرن شفتي اخالتي راه المهم هو كيفاش كتشطحي او واش كتقنيه وكيفاش تغني واش كتقنيه وكيفاش كتعزفي او واش كتقنيه .. داك المكياج ديال 2006 راه اكايديروه هكاك علاش الله وعلم ( شافت فيها ) انت نيت اخالتي داك اللون اتحيديه أصلا مجاش معاك
- رحيمة ( شافت فتودة ) : واش سمعتي بنتك اش سايرة تݣول أصحايبتي ؟
- تودة ( تبسمات ) : لي ݣالتو ليك ديريه
- ليالي ( بقات كتخمم مدة ونطقات وهي كتشوفيهم ) : واش تبغيوني نخدم معاكم ؟
- تودة ( شافت فعنبر وشافت فيها ) : واش متيقنة راه فينما سافرنا تسافري وفينما كنا تكوني ، خوك يخليك بعدا ؟
- ليالي : خويا واش كيعرفني أخالتي خويا مقابل البلية عاد غايعقل عليا انا ، ديك دار براسها ايجي خالي يخرجنا منها من غدا نلقى راسي فزنقة الى قبلتو عليا نخدم
- تودة : مرحبا بيك ابنتي راه مايخصك خير معانا ولي يقيس البنات يقيسك انت
- ليالي ( بفرحة ) : لهلا يخطيك اخالتي حتى انا راه لي يمسكم يمسني
- تودة : نحطو الراس على الراس مغاتكونش جامعانة غير الخدمة ، حيت ابنتي خاص القلوب تكون صافية ونية والمحبة باش تكون الخدمة زينة
- ليالي ( تنهدات تنهيدة طويلة) : حتى انا مابقى عندي حد فهاد الدنيا غانحسبكم عائلتي أنا نيت بغيت علامن نحط الراس وظهر نسند عليه
- عنبر ( ضحكات ) : سبحان الله العظيم كاع لي كالسة هنا قلبها مضرور ولاعب عليها الزمان .. ربي لاقانا مع بعضياتنا وجمعنا باش واحد يعوض الثاني ..
- حياة : شنو غانسميو الفرقة ديالنا
- عنبر : بنات تودة
- تودة ( بنفي ) : لا ابنتي مالي انا لي كنغني راه انت لي كتغني ديرو بنات عنبر
- رحيمة : ويلي مجاتش بنات عنبر كون غايخدمو العيالات بوحدهم ودوك دراري نسيتيهم
- رجاء : دير سميتها وكنيتها بحال إكرام العبدية زهيرة رباطية زينة الداودية
- عنبر : شنو ندير عنبر بنشمسي ولا عنبر الحريزية
- تودة ( بصرامة ) : لا الحريزية لاش ( مكانتش بغاتها دير بلاصة عند بالها هي تزادت فيها واخا دوزات فولاد صالح 12 عام ولكن هي ولداتها فأزمور ) أوركسترا عنبر بنشمسي حسن
- عنبر : صافي مزيانة
- سميرة ( عقلها محاضرش شافت فبنتها ) : معاش كاليك خوك غايوصل لهنا ؟
- رجاء : غيركب فتران ديال 8 دصباح فالبراق العشرة يكون هنا إن شاء الله..
- سميرة : الله يجيبو على خير ويشافي باك ويعافيه وصافي واخا حالتو مكاتبشر بالخير نطلبو ربي يدير شي تاويل دالخير
- رجاء تنهدات تنهيدة طويلة إحساسها كان بارد وكان فارغ حاولات يبقى فيها الحال وتبكي ولكن والو كتحس بفراغ ماخلاش ليها فين تحزن عليه ولا تبكي عليه ستنزف مشاعرها وطاقتها ..كتحس براسها تايهة ومعارفاش فين هي واش خاصك تبكي ولالا كتحس بضياع لاباسها .
- في هذه الحيَاة نحنُ دائمًا علىٰ سَفَرٍ..؛ فَـ اليَوم نَحنُ هُنا تُعانِقُ أنفاسُنا نبضَ الحيَاة..، ونَمضِي معَ أقدارِنا حيثُ شِئنا بِـ إرَادةِ اللَّـه..!! وغدًّا قد لا يَکونُ لنَا علىٰ صَفحةِ الوجُودِ تَارِيخٌ..، ولن تَحمِلَ الگلِماتُ عن وجُودِنَا ذِکرىٰ أو خَبر..، ومَا بينَ اليَومِ وغَدٍّ إمنَح لِکُلِّ مَا في الوجُودِ مَحبَّتِگ..؛ لِـ يَّظلَّ لگ بِـ ذَاکرةِ القُلوبِ نبضٌ وعلىٰ دُروبِها لگ أثَر... أمَّابعد رِحلتُنا في هذه الحيَاة ذِهَابٌ بِـ لا عَودة بِـ مَقاعدٍ مُنفَرِدة..، مهمَا ٱستَوحشتَ الطَّريق ومهمَا ٱستَأنستَ بِِـ رَفِيق..؛ هو مِثلُگ لا يَملِکُ مِن الأمرِ شَيئًا سَـ يمضِي بينَ الدُّروبِ وحدُه..؛ رجَاؤنَا الوحِيد أن تُختَم بِـ طَيبِ الذَّکر وحُسنِ الأثَرِ سَفرتُنَا ..
- " الـدار الـبـيـضـاء 10:30 صـبـاحـا مـديـريـة الأمـن 📍"
- فواحد السبورة بيضة معلقين صور رسومات واقف يوسف وعماد ومعاهم ضابط أخر
- عماد : هادو هوما العرسان لي عطاونا المواصفات ديالهم أسر الضحايا المشكل هنا هو عندنا غير 4 ديال البنات واخا انا عارف بلي كاين كثر من 4
- يوسف : هاد العائلات لي ديكلاراو ماعندهم سوق فناس وخايفين على بناتهم اما البقية مغايبغيوش يدويو ايخافو من الشوهة بين العائلة والجيران
- ربيع ( ضابط فنفس الفرقة ) كيختارو يبكيو ويسكتو وماتشوهوش بين الناس وينعتو فيهم وهادي حاجة خايبة اصاحبي
- عماد : عندنا جثة وحدة والباقية مزال مبانوش
- ربيع : الى الجثث لوخرين ختارو يحرق**وهم راه ماعندك فين تلقاهم من غير الى زهقات ليهم شيحاجة لي تخلينا نلقاو أثر ولو بسيط
- يوسف : دابا من خلال التصاور لي عندنا راه البنات ماشي غادي يتزعجو ويطيحو على خنافرهم ايطيحو على ودنيهم
- ربيع ( ݣلس ) : كيجيبو واحد بالمواصفات لي كتبغي البنت ، بوݣوص طولة لاباس عليه أيو وحدة اتشوف واحد بهاد المواصفات غاتقبل عليه واخا متسولش عليه
- يوسف : والوالدين كيشوفوه عريس مكاينش بحالو كيبغيو يزربو عليه ماعندهمش الوقت هوما باش يسولو
- ربيع : وهكا كيطيحو فالغلط وفنص والإحتيال ، بحال خونا لي كنا شدينا عقلتي السيد لا الام مو لا الاب باه حتى المعروضين ماشي عائلتو غير كريهم جاب الله البنت تعتقات فدقيقة 90
- يوسف : شفتي شحال هادي كان البو الى جا شي حد يخطب بنتو واخا يكون جاي من قندهار كيركب ويشد الطريق ويسول على داك العريس يفلي جار بجار ويسول والى سمع عليه قد راس صبع كيرضو
- ربيع : حتى انت اصاحبي كتقارن دابا مع داك الوقت ترا كولشي تبدل
- يوسف : وهادشي علاش كتر الطلاق كتشوفو من برا نوارة كتعاشرو كتلݣاه ضرݣة من الشوك
- عماد ( كيخمم ) : قلبنا وماعطاناش حتى واحد بسمية مصطفى رحمون يݣد يكون إسم شهرة
- ربيع ( بحال الى تفكر شيحاجة ) : بلات حنا قلبنا غير على مصطفى رحمون واش عندو نشاطات فالمغرب وبرات المغرب مالقيناش حيت يݣد تكون هاد السمية ديال باه ولا ديال شي حد عزيز عليه ..
- عماد ( وقف راجع للبيرو هز بيسي ديالو ) :
بلات انا غادي نشوف
- فكلينيك خليفة ݣالسة تودة هي وسميرة فوق الكرسي ومعاهم رجاء متكية براسها على الحيط يونس كان واقف على برا وقفات طاكسي حمراء ونزل منها شاب فاواخر العشرينات لابس سروال دجين مع سبرديلة فالكحل وتيشورت هاز سكادو على ظهرو خلص مول الطاكسي وطلع فدروج ديال الكلينيك شافو يونس خشا تيليفون فجيبو وعنقو :
على سلامتك اخويا كريم الله يشافي الواليد
- كريم ( طبطب على كتفو ) :
اللهم آمين أخويا ، ربي يخليك .. دخل هو وياه مشا عند مو نيشان تحنا عليها معنقها بجهد عنقاتو كتبكي بالوحش لي توحشاتو وحتى على مرض باه
- كريم ( بعد وجهو دموعو نازلين باس ليها راسها ) :
كيبقيتي اميمتي شوية ؟
- سميرة ( بإبتسامة باهتة ) : أنا اولدي أمنين شتك راني بيخير .. ضار عند ختو لي غير شافتو عينيها نفاجرو بدموع بحال شي واد كان مسدود وعليتي عليه كاع لي كانت كاتماه خرجاتو
- معنقها كيسكت فيها وهي مخشية فصدرو كتشهق بقات مدة وهي هكاك بعدها بشوية بايس ليها يديها وراسها بصوت رجولي هادئ :
ݣالو ليا غادي نولي خال هههه مبروك عليك اختي الله يكمل عليك بالخير
- رجاء : الله يبارك فيك اخويا الله يحفظك ليا .. بعد عليها وقف ضار عند تودة
- سميرة : تودة اولدي مرات باك لي ݣلت ليك عليها .. قرب منها باس ليها راسها :
مشرفين اخالتي
- تودة ( بإبتسامة ) : الله يحفظك اولدي على سلامتك
- كريم : الله يسلمك ( شاف فيونس ) عمي مكاينش ؟
- يونس : كان لبارح هنا ورجع اليوم غايجي ولكن كاليا حتى لورا الغدا
- كريم : مجاش عندكم الطبيب ؟
- يونس : مزال .. خرج الطبيب من لاسانسور مشا عندو كريم كيجري :
دكتور عفاك سمحليا أمضرا كيبقى الواليد ؟
- شكون ؟
- كريم : المعطي الشاوي كيبقى عفاك ؟
- الدكتور : شنو غانݣوليك دعيو معاه حنا درنا لي علينا
- كريم ( بلع ريقو بصعوبة ) :
واخا نشوفوه انا وختي عفاك لبارح كان طلب يشوفنة وكنت مسافر يلاه جيت
- الدكتور : واخا بلاتي تعطيكم الفرملية ليباڤيت ودخلو عندو غير مطولوش الله يخليك
- كريم : واخا .. جا الفرملية عطاتهم ليباڤيت تبعوها دخلاتهم عندو رجاء شافتو حبسات الوقفة تخلعات من شوفتو تقبط عليها قلبها وجاتها البكية دموعها ساحو بلا هواها .. بحالها بحال خوها لي ماظنش يشوفو فهاد الحالة ، تقربو منو حل عينيه شافهم وتبسم بعياء :
ك كوت خايف ي يديني ربي ومنشوفكم
- كريم ( كيحاول يسيطر على راسو دار فيه العيب ومارحموش عمرو حن عليه وبسبابو خوا ومشا بحالو يقلب على راسو ولكن ماقدش يصبر كيبقى باه ) :
الواليد كيبقيتي شوية دابا تبرا إن شاء الله وترجع لدارك
- المعطي ( الكلمة كيخرجها بمشقة الأنفس ) : مابقى ر ر رجوع أو أولدي ( بلع ريقو ) س س محوليا الى أديتكم إلى نكريتكم .. د د اكشي ل لي كيكبرونا عليه والدينا ، ك كنصرفوه ف ف ولادنا
- كريم : المسامحة ابا حنا مسامحينك دنيا واخرة
- رجاء ( دموعها نازلين بحال شتا ) :
واش حتى حملت انا وبغينا نتصالحو عاد انت باغي تخلينا متݣولش هكاك
- المعطي : ب با أبنتي علمنا ن نكونو قاصحين ، ك كان يݣوليا م مخاصش تحن ك كت الى ظرت شيحاجة ينعسني فالكوري .. لي لي زرعو فينا زرعتو ف فولادي ( بدا كيكح ) م ما ماعقنا به هادشي ح حتى فات الفوت ..
- رجاء : حنا مسامحينك ابا دنيا واخرة دابا ارتاح عفاك .. جات الفرملية خرجاتهم خارجين شادين فبعضياتهم ربي عالمعلى مابيهم ، ݣلسو حدا مهم حاطين عليها الراس حالتو مكانتش كتبشرش بالخير نهائيا ..
- بقاو ݣالسين مدة كايتسناو أي تطور فالحالة ديالو غير أمل ولو بسيط الإنسان لي جرحهم وماخلى مدار ليهم .. عذب الام ديالهم تكرفص عليها وبهدل بيها ماخلا معيور ماخلا ضرب ماخلا قهرة حاجة زوينة وحيدة لي كان كيدير هي الماكلة حتى من القرايا خرج رجاء من تاسعة وكان ايدير نفس الحاجة مع كريم كونماشي عمو لي كمل ليه القراية حتى شد الباك ديالو ..
- كانو يتامى من جهة الاب وهو على بالحياة الظلم لي تعرضو ليه منو كون شي حد فبلاصتهم مايشوفوش فيه ولكن حكم فيه القلب السميح لي زرعاتو سميرة فيهم تربيتها والحنان ديالها هي لي خلاتهم اليوم هنا باغيين باهم يبرا ..
تسمع بصوت مجهد صوت أنثوي كيقول :
دكتور المخلوفي مطلوب فالغرفة 116 دكتور المخلوفي مطلوب فالغرفة 116 .. مشا الطبيب بخطوات سريعة عينيهم كانت عليه الخلعة شداهم من صبعهم صغير رجليهم كيترعدو وقلبهم دقاتو كيتسمعو دازت 10 دقايق بضبط خرج الطبيب جاي قاصدهم وعلى ملامحو علامات الحزن .. وقف قبالتهم وببالغ الأسى نطق :
البركة فراسكم ..
••••••••••••••••
- ݣلس يوسف وربيع مقابلين مع الپيسي والصفحة لي فشاشة طاپا إسم مصطفى رحمون لرابع مرة ولكن ماعطاتو والو ..
- يوسف : راه مغاديش تعطيك مكاين حتى واحد بهاد السمية
- عماد : بلاتي صبر ( حيد داك الإسم وكتب فالفرنسية Rehmon) خرجات ليها إسم عريض رحمون للعقار إيطاليا ..
- يوسف : دخل دخل .. ، دخل عماد للسيت لقاه خاص بشركة خاص للعقار متواجدة فإيطاليا كيقرا ومتبع المعلومات
- ربيع ( مغوبش ) : شكون هاد براهيم ريحمون للعقار هاد الكنية قريبة للرحمون ولكن جاتني ريحمون بحال الى لاتينية ولا يونانية
- عماد ( بإهتمام ) : شوف شوف قرا .. براهيم ريحمون رجل الأعمال المغربي هاجر من المغرب سنة 1976 أسس شركة ريحمون للعقار بإيطاليا ولديع فرع أخر بفرنسا
- ربيع : شوف واش عندو شي تصاور ولا حاجين فين ساكن ؟
- عماد بدا كيقلب كثر وكثر خرجات ليه صورة عائلية تخادت من حفلة فيها رجل طويل كيبان من طبقة الأرستقراطية شعرو بيض طويل ولحيتو بيضة كيتخللها شعر كحل حداه مراة فنفس العمر ديالو لابسة كسوة جنبو 3 البنات وجنب الأم إبن أسمر كيشبه ليها .. عماد كيقرا بصوت مرتفع :
رجال الأعمال إبراهيم ريحمون مع عائلة الصغيرة زوجته نادية وبناته و وريثه بدر الدين ريحمون ..
- فبن سليمان ريحة ديال البخور عاطية فدار كلها صوت القرآن خدام فتلفازة ، الصالة اللولة مجموعين فيها عدد قليل من الرجال معاهم كريم ويونس وعبد الكبير .. وفالصالة ديال العيالات مجموعين عنبر حياة رحيمة وليالي رجاء وعدوزتها وسميرة وتودة لي كانو لابسات البيض ، طابلة محطوطة فيها صينية كبيرة ديال أتاي والفاكية او بيمو الناس قلال كيدخلو يعزيو فالكوزيمة الفوق العيالات كيطيبو فكسكيو على قبل الصدقة لي غاتكون ورا صلاة العشاء ..
- سميرة لي كانو عينيها حمرين بالبكا لا هي لا رجاء كاينة لي كتجي تعزي وتمشي وكاينة لي كاتݣلس ياتجمع يا تشد النميمة ..
- المرأة 1 ( بهمس ) : ݣاليا راجلي مامشا معاه حتى واحد فدفين غير شي 7 ديال الناس على نسيبو او ولدو
- المرأة 2 : ايوا الله يسمح ليه ويغفر ليه ماخلاش بلاصتو زينة مكانش يدير مزيان مع الناس كان طاغي وكيحݣر بنادم بسيف مايمشي معاه حد
- ايوا الله يرحمو ويغفر ليه ، شفتي مرتو الثانية كيبان فيها كاعما بقا فيها الحال مزال سميرة مسكينة باينة مشوية
- ايوا راه ݣالو داتو على فلوسو وعلاما سمعت كتب ليها الدار والارض من غدا تجري ليه على ولادو وعلى سميرة مسكينة
- ايوا الله يدير ليهم شي تاويل ديال الخير
- تودة ( كتشوفيهم ) : كولو الصدقة العيالات رته كيݣولك اليوم عندنا وغدا عندكم وسعدات لي نقص من النميمة والهضرة فناس ولجم لسانو .
- العيالات تقرصو جمعو الوقفة وخرجو ، هزهزات تودة براسها تنهدات تنهيدة طويلة وحطات راسها على الحيط كتخمم
- راضية ( لي كانت جايا بحال الى جايا العرس جلابة جديدة وسباط مع خاتم ديال الذهب وزوج ديال الدبالج شافت فرجاء ونطقات من تحت سنانها ) :
الى سالة العزو ديال باك رجعي بحالك الوحدة راه الى تزوجات كتبقى فدار راجلها مكاتبقاش توطح فديورات الناس
- رجاء ( شافت فيها ببرود ) : هادي دار با ماشي ديور الناس أخالتي
- راضية : ايوا دار باك راه 15 يوم هادي وأنت مخيخة فيها ماتسحلايهاش ماشي الݣيتي داك راجل دمدومة وبغيتي تركبي ليه على ظهرو براكة جمعي حوايجك ورجعي ، وزايدون يدي بوحدي فدار واش انا زوجت هداك الولد باش يحطك ديكور
- رجاء ( وصلات بيها الحد ديالها خنزرات فيها مغلغلة عيتيها عامرين بدموع ) :
واش انت مكاتخافيش الله واش مدايراش بحساب القبر يحسابليك اتبقاي كالسة فيها جايا العزو وانت مزرزرة دهوبات بحال الى ماخصك خير واش انت مريضة الى كنتي مريضة سيري دواي ليك .. ( راضية تصدمات منها وكاع لي تم كيشوفو فيها بإستفهام ) واش فطموك عليا وسيري تقاي الله والى بغيتي خدامة جيبيها من الموقف تخدم عليك وخطيني انا ، راه جوجي وادك وجيبي مرتو تخدم عليك ونزيدك انا ديك دار مراجعاش ليها وانا وراجلي انسكنو بوحدنا وانت المخير فحميرك سرجيه وركبي عليه وتبورضي عليه فهمتيني وعطيني تيساع وحسبي الله ونعم الوكيل الله ياخود فيك الحق ( وقفات كتغوت وكتبكي وقفات تودة وسميرة كيسكتو فيها حلفات لا بغات تسكت )
- راضية : شهدو عليها المجنونة فقايصها بغات تسبهم فيا
- تودة : وسيري خافي الله وانت مكتعرفي لا ربي لا لي خلقو شوفي غير حالتك تعطيك الخبار ، جا يونس كيجري هو وكريم
- يونس : أش واقع؟ رجاء مالك ؟
- راضية : مرتك تهجمات عليا كلت ليها جمعي راجلك ورجعو لدار واش اتبقاو محيوزين عند النسيبة
- يونس : بإنفعال ) واش الوقت ديال هاد الهضرة وزايدون حنا ماعندنا فين نرجعو وديك دار مغانرجع ليها لا أنا لا مرتي ، ياك طلعتينا للعشة لي فوق سطح صافي حنا خلينا ليك ديك دار براكة تعطيها غير لتوفيق الواليدة الله يربحكم ببعضياتكم ..
- راضية ( بإنفعال ) : صافي شارجاتك عمراتك صافي وليتي تعز صوتك على مك وا عبد الكبير اجي تشوف ولدك اش كيݣول ..
- يونس : دابا عاد عرفتيني منين تحشي ليا الهضرة وتسمعيني الهضرة ودايراني بحال الحمار عمري سمعت منك الله يرضي عليك واخا نشعل ليك صباعي كامل بشمع توفيق فسما توفيق فالأرض
- تدخل عبد الكبير وشي كيفك فشي وشي كيسكت فشي البنات داو رجاء للبيت ديالهم كيهدنوها أما راضية داها عبد الكبير رجعها للدار ... الناس داو الخبار وداو مايعاودو ، وصلات العشية غير صلاو الناس العشا وجاو الرجال بوحدهم معاهم الطلبة والعيالات بوحدهم تحطو الݣصاعي ديال كسكسو كاين لي ياكل ويقول الله يرحمو وكاين لي ياكل وشاد الجماعة والحتيت فلي وقع ..
- سلات الصدقة وكل واحد قصد دارو تجمعو العيالات وغسلو الماعن طرفو الدنيا خداو حسابهم ومشاو بحالهم موصلهم يونس كل وحدة لدارها ..
•••••••••••••
- الدار البيضاء ، المعاريف 📍..
فمحال خاص بشوكولاتة وبجميع أنواع التمور المعمرة بالمكسرات والمفندة بشوكولاتة ، وكل مكايخص الحلويات المعمولة بشوكولاتة .. ݣالسة بنت حدا لاكيس لابسة اونسومبل بالبيج دافي بالكمايم مع شال فاللون الأخضر جمالها كان باين لكاع الناس بلون بشرتها الابيض وعينيها لي كيحكيو على فصل الربيع بخضوريتهم شفايفها الرقاق وملامحها البريئة يد كتكب بيها فالبيسي ويد اخرى حطاها مركبة مسبحة فصبعها وخدامة ..
- قربات منها بنت رقيقة فالعشرينات من عمرها لابسة تيشورت شعرها جامعاه على شكل ديل حصان :
يسرا أنا غانمشي للحانوت ونرجع داكوغ ؟
- يسرى ( شافت فيها ) : واخا سيري
- كملات خدمتها حل تحل الباب هزات راسها وتبسمات ناضت من بلاصتها ضايرة ورا الكونتوار :
خالتي خديجة زارتنا البراكة .. ( عنقاتها )
- خديجة ( بإبتسامة صفرة ) : أحياني عليك العفريتة ماتجي متزورينا ماتقولي نشوف عمي ومرت عمي او ولاد عمي زعمة راكم خوت وتربيتو كاملين محموعين ..
- يسرى جرات الكرسي باش تݣلس وݣلسات قبالتها :
والله أخالتي مكانسالي انا راه ادار المحال صافي أنت اش كتعاودي كتبقاي فدار حتى كتزياني
- خديجة ( ضحكات بغرور ) : أحياني عليك انا غير دار عمك مشا الموسم ومزال مجاش
- يسرى : أه فخباري أمضرا ماجدة إيمتا غاتجي ؟
- خديجة : هاد سيمانة إن شاء الله توحشتها كنتسناها غير ترجع أما دراري كل واحد والهيث ديالو مخرجين فيا شيب ومرضيني فصحتي
- يسرى ( كضحك ) : وعلاش ؟
- خديجة : ايوا عصام قلبل فين كيعمر الدار فاروق راكي عارفاه وأصلا كيعمر بزاف مع طارق خوك ، ايوا وعماد الخدمة واخدة ليه وقتو بغيت انعرفو على واحد بنت صاحبتي مابغاش ليا
- يسرى : وايلي وعلاش ؟ أش فيها ؟
- خديجة : هانتي تشوفي عييت معاه قاليك لا مابغيتش البنت بنت عائلة وتبارك الله يلاه راجعة من فرنسا بغات دير مشروعها هنا ولكن معامن كتهضري ..
- يسرى ( كضحك ) : الله يهديه عماد حتى هو ، مافيها والو يتلاقاو ويدويو وإلى عجباتو مالها
- خديجة ( عجبها الحال ) :
الله يهديه ابنتي كون غير دوي معاه أنت بحال ختو يقد يسمع ليك
- يسرى : دويت معاه نيت غير والبارح على قبل لاكارط ديالي بغيت نبدلها وخاص نمشي نجيب ورقتي ديال الطلاق
- خديجة ( ميقات فيها ) : حتى أنت أبنتي ماعندك زهر 6 شهور ديال زواج خايبة حتى لمعاودة
- يسرى ( تنهدات تنهيدة طويلة) :
ماشي مني أخالتي راكي عارفة ختو شنو دار لينا حتى خربقاتها بيناتنا هو تاق بختو ومتاقش بيا .. حيت كتبحلس ومبايناش عليها النفاق كيجري ليها فدم ديالها
- خديجة : ايوا جا طلب منك السماحة وانت مابغيتيش وكونما ديتيه كون حماقيتي
- يسرى ( بحزن ) : واخا جا براكة الشوهة لي دارت ليا ختو كان خاصو يتيق بيا نهار الأول ماشي حتى دخلو البوليس او سمعوه التسجيل عاد جاي يطلب السماحة كرامتي اخالتي
- خديجة ( غمزاتها ) : مزال كتبغيه غير ݣري ؟
- يسرى ( تنهدات تنهيدة طويلة) :
كنت كنبغيه بزاف الحب الأول صعيب تنسايه أخالتي وهكاك انا واخا وقع لي وقع مغانقدش نساه داكشي باش ضربت على الزواج ولي يجي منو هكا حسن ليا ..
- خديجة ( وقفات ) : إلى لقيتي مايتصلح أبنتي صلحيه .. ماضيعيش راجل شهوة منو غاهو زيريه مزيان علاش لا يخطبك من جديد ويعرس بيك الى كان كيبغيك وزايدون راه من حقو واش واحد كيسوني ليه وكيسيفط ليه تصاورك بلا فولار وبحوايج الدار وكيقولو مرتك كتبغيني وكنبغيها بسيف مايفور دمو ختو لعباتها مزيان عليه
- يسرى ( كتخمم ) : الله يدير لي فيها الخير فين واقفة فين غادية ؟
- خديجة ( دارت نظاراتها ديال الشمس ) : خاصني نمشي أحبيبة ديالي ومتنسايش تدوي مع عماد ورضي ليه عقلو الله يرضي عليك صافي وبلاما تقولي ليه انا طلبتك
- يسرى : كوني هانية ..
- خديجة : أجي ياسمين كتوجد شيحاجة ولا مزال ݣاليا عمك بغاني نطلع لعند جداك باش نوجدو معاها واخا انا ماعنديش مع الحاجة راكي عارفاها معايا
- يسرى ( ضحكات ) : عارفة لي كاين ، كانو عوالين على على شهر 9 ولكن أجلوه حتى لراس العام خوه مغايشد الكونجي حتى لراس العام وغايجي هو ومراتو او ولادو ..
- خديجة : ايوا صافي مزيان نيت توجد على خاطر خاطرها ، ماماك غاتحضر ليها ولالا ؟
- يسرى ( تقرصات ) : موحال أخالتي ماباغياش هاد الزواج بغات ياسمين لولد خالتي وياسمين مابغاتش ..
- خديجة : سلامة من هاد موك لي دارتو هي بغات ديرو للبنتها يلاه احبيبة خليت ليك الراحة .. سلمات عليها وخرجات وهي مبسمة وراشقة ليها ..
- هزات يسرى التيليفون وسونات لعماد :
وي فينك ؟ أجي تقد دوز عندي للمحال بغيتك فشيحاجة إلى كنتي مسالي ( شافت فساعتها ) صافي واخا صافي اوك .. قطعات معاه ورجعات للخدمتها على موعد تلاقى معاه من وراء الظهر ..
•••••••••••
- مجموعين فصالون ، رجاء حاجة المخدة ومتكية نعيمة فالكوزينة دخلات عندها سميرة خلصاتها فحسابها ورجعات للصالون ..
- يونس : علاياش ناويين دابا شنو غادي ديرو ؟
- سميرة ( شافت فتودة وتنهدات تنهيدة طويلة) : هاد الدار اولدي كتبها المرحوم للتودة هي والأرض لي كانت ناوية تبيع وتعطيكم فلوسها ، وعاد الارض لوخرا لي خلا هاديك غاتجي فحق الدراري
- يونس : أنت اكريم أتبقى هنا ولا اترجع لطنجة ؟
- كريم ( شافيه ) : أنا اخويا ماعندي منݣلس ندير هنا ، خدمتي كاينة فطنجة
- تودة ( كتخمم خرجات تنهيدة طويلة وشافت فيهم ) :
أنا مغانبقاش فبن سليمان إلى بغا الله بغيت نرجع للكازا انا وبنتي عنبر وحياة ، هاد الدار أختي سميرة غادي نكتبها فسميتك انت اولا بيها عليا انا أنا مكانتسال فيها شاي انت لي صبري وضربتي تمارة هاد دار من حقك انت وليداتك
- سميرة ( غرغرو عينيها بدموع ) : ياك اختي كريم بغا يرجع لطنجة بنتي اخرتها مع راجلها وانا تخليوني بين ربعة ديال الحيوط وانا لي ݣلت نحط عليك الراس وتحطي عليا الراس ونعمرو على بعضياتنا
- تودة : نكذب عليك اختي انا والله ما والفت هنا ، ودابا مع الخدمة كازا حسن لينا وانا ولفتها
- يونس : الى كنتو مفاهمين وبغيتو تݣلسو مع بعضياتكم وماعندكم لين على بعضياتكم أنا كنݣول بيعو هاد الدار على الارض لي خلا المرحوم لخالتي تودة ، وشريو شي شقة ولا شي دويرة واخا يكون فيها غير التحت فكازا ورحلو لتم ..
- كريم ( شاف فمو ) : يونس عندو الصح الواليدة ، ماعندكم ماتݣلسو ديرو هنا بيعو كولشي وسيرو ، ديك الأرض نبيعوها ونقسموها أنا ورجاء تشوف هي اش دير بيها وانا نشوف ندير شي بيعة وشرية ديالي وطنجة مابعيداش التران يوصلني للعندكم
- سميرة ( بقات كتخمم فكلامهم شافت فتودة وبتساؤل ) :
أش ݣلتي فهادشي اتودة ؟
- قدام عمارة عالية فمدينة الدار البيضاء بلاكة كبيرة مدهبة مكتوبة " someday " وقفات طوموبيل من نوع فيات 500 /2023 فاللون الأحمر نزلات منها شابة فأواخر العشرينات من عمرها طويلة شعرها طالقاه عسلي لون بشرتها سمراء عينيها دايرة ليهم تلبيسة بليلونتي فالأخضر .. ايلاينر كحل وعكر فالݣرونة .. لابسة كسوة فالابيض لاصقة عليها مبينة منحنيات جسمها الأنثوية مع صندالة عالية فنفس اللون هزات ساكها من طوموبيل سدات الباب وطلعات الدريجات وقفات قدام لاسنسور ضغطات على الزر رقم 2 .. داها نيشان للطابق لي بغات خرجات من لاسنسور للشركة كبيرة مصبوغة بالأبيض الافتة لي كانت على برا كانت كبيرة الداخل الموظفين غاديين جايين لي كتلاقى معاه كتبسم ليه وتحييه ، وصلات لواحد البيرو وطلات براسها :
مريم موسيو وليد رجع ولا مزال ؟
- مريم : رجع قاليا إلى جات ماريا نقوليك دخلي لعندو .. هزهزات ليها براسها وقفات قدام الباب قدات شعرها دقات على الباب دورات الپوانيي ودخلات
- البيرو ديالو كان كبير عندو طابع رجولي ، هز راسو شافها وتبسم بصوت رجولي بشوش :
هادشي كامل غدا أمدموزيل ؟
- ماريا ( حطات ساكها وݣلسات ) : والله ماتعطلت تغديت بالخف ورجعت سبقتك انت عاد نمشي نكمل خدمتي ..
- وليد : ماشي مشكيل حيت انت كوميرسيال واعرة فشاركة ولي حطيتي عليها يدك كتنجح غادي نغمض عينيها على هاد الروطار
- ماريا ( ضحكات ) : واخا اموسيو وليد مقبولة قالت ليا مريم بغيتيني ؟؟
- وليد ( بجدية ) : وي لاسومين پغوشين غادي يكون عندنا واحد الرونديڤو مع واحد السيد الى مشينا حتى سنينا معاه العقد غادي نطلعو 5 درجات الفوق .. وهاد رونديڤو خاصك تشديه كيفما كان
- ماريا ( دارت رجل على رجل ) : وايلي لهاد الدرجة ݣاع هي شي واحد معروف ؟
- وليد ( رجع بظهرو اللور ) : ومن نحية معروف فراه معروف ، بلاما ندويو على الخلفية العائلية ديالو ولكن عندو بزاف ديال لي زافير اول حاجة هو لي كيفرق البيض على جميع المدن لي متواجدة بالمغرب ، داخل شريك مع ولد عمو وكيبيعو فالخيل دتيرين ليبيزنيس ديالهم غير مع رجال اعمال من الخليج ..
- ماريا : تبارك الله شكون هذا ؟
- وليد ( شافيها بجدية ) : كتسمعي بسلسلة فنادق حيدر ؟
- ماريا ( صغرات عينيها وشافت فيه بدهشة ) : واش فاروق حيدر الروطال ؟
- وليد : إݣزاكتومو هو هداك
- ماريا : ماعندوش غير ليزوطيل عندو حتى مخبزات وعاد خدا واحد المحال فالمعاريف
- وليد : باش عرفتيها ؟
- ماريا : غير شوية هدا فاش كنت كنتغدا سمعت واحد زوج كانو ݣالسين ورايا كيدويو عليه ( رجعات بداكرتها اللور وهي كتسمع فزوج درجال كيدويو عليه ) ..
فخبارك الجديد ؟
- ( هزهز الشخص براسو بنفي ) لا ؟
- ( تبسم حابس الماكلة ونطق بكل هدوء قاصد يوتر ويخصر الجو ديال شخص لي قدامو ) المحال ديال المعاريف تباع ..
- ( لون وجهو تخطف ) كيفاش تباع اش كتخربق ياك حتى واحد مكان سايق ليه الخبار بلي مولاه باغي يبيعو غير أنا وأنت ؟!
- عرفتي شكون شراه ( شافيه كيتسنى الجواب ) الروطال هو لي شراه
- ( بعصبية ) واش هدا مسكون ؟ منين كيشم الخبار ؟
- إيوا أصديقي أنت كتعرفو الحاجة لي كيعرف بلي غايربح منها كيحط يدو عليها ، لي عندو راه عندو ولي ماعندوش عندو النص فيها خيرها فغيرها حتى أنت ..
- زاد فيه بزاف عندو شي برݣاݣ صحيح مخدمو معاه ..
- السيد الله يعمر ليه الدار ، شاد تيقار راسو ماعندوش مع المشاكل عمري فحياتي شتو تعصب وݣاع دوك لي كيقربو ليه وكيكونو ناويين على خزيت معاه كاتوصلهم الدقة كيفاش الله وعلم ، يمكن مخدم معاه شي فقيه كيجيب ليه حقو ماتعرف ..
- بحال هاد النوع كيموتو على تشعويد ، مابقاتش غير المرا لي كتشعود دابا حتى رجال .. الله يبعد بلانا على بلاه ..
- واياه عندك الصح دابا راه كاع رجال الأعمال ولاو مخدمين معاهم فقهة صحاح حتى انت مديرش فبالك لي دار محال واحد راه يدير ألف محال ..
(الرجوع للحاضر )
- كنسمع فيهم مغلغلين وماعجبهمش الحال قاليك السيدة كيخدم الشعودة تفكيرهم محدود مساكن
- وليد : ماريا غادي نعول عليك فهاد لافير ، بغينا الروطال يولي يتعامل مع الشركة ديالنا انت احسن وحدة فشركة بغيتك تخليه يقتانع بلي شوكولا ديالنا هو أحسن نوعية فالمغرب كامل
- ماريا : وراه فعلا شوكولا ديالنا احسن نوعية مغاديش نقنعو بشيحاجة لي هي كذوب شيحاجة لي بصح وملموسة وكونماشي بصح مانوصلوش لهاد البلاصة ولالا ؟
- وليد ( بإبتسامة ) : وي complètement
- ماريا ( بتحدي ) : صافي هادي عندي
- وليد : سوني لاسوكريتير ديالو وخودي رونديڤو ضروري تلقى ليك الوقت حيت غادي تݣوليك بلي راه عامر عندو ولا مامساليش المهم عندي تقنعيهم يعطيوك رونديڤو منين تشديه الباقي عليك اماريا نعول عليك ..
- ماريا ( وقفات وبإبتسامة وصوت انثوي كلو تحدي ) :
خليها عليا ..
- فمطعم فحي المعاريف مابعيدش على المحال ديال يسرى .. حاجة حداها طبسيل فيه سباكيتي بفغوي دميغ وهو قدامو حاج بيتزا
- يسرى ( مستمتعة بالماكلة لي قدامها ) : تبارك الله كيديرو الماكلة زوينة
- عماد ( مقابلها بعينيه لي كانو كيبريو ساهي فتفاصيلها عينيها شفايفها كلامها ملامح زجها البريئة ) :
وي ماكلتهم بنينة واش مالفة كتجي لهنا انا اول مرة ؟
- يسرى : وي مالفة مرات مع ياسمين ومرات مع دنيا وبعد المرات مع صاحبتي كتعجبني الماكلة عندهم ونقيين
- عماد : وي بنينة والمحال عندهم نقي
- يسرى ( شافت فيه وفالبيتزا لي كينقب منها ) :
واش ماعجباتكش اويلي شفتك يلاه كليتي جوج ديال الطروفة
- عماد ( قلبو كيقوليها براكة عليا أنت قدامي كنشوفيك ولكن مقادش ينطقها ) :
وراه سخونة واش انت مريضة ناكلها تصلق ليا لساني ، واجي انت بعدا جايباني وانا عندي عرمة دالخدمة اش تم ؟
- يسرى ( بإبتسامة خلابة) :
أجي انت مناويش تزوج زعمة دير لينا شي عراسية فاعلة تاركة ؟
- عماد ( هز حجبانو بإستغراب تبسم بإستهزاء ) :
لا كنتسناك حتى تبراي ونتزوج بيك
- يسرى : عماد براكة من تريݣيل والهبال كندوي معاك بصح خالتي خديجة راه مشطونة من جيهتك ..
- عماد ( غوبش ) : خالتك خديجة أش جابها الهضرة فين شتيها ؟
- يسرى ( مسحات فمها ) :
زارتني اليوم فالمحال دوينا شوية ودينا وجبنا فالهضرة ، قالت ليا على ديك البنت لي بغات تشوفليك وانت مابغيتيش
- عماد ( تعصب ) : واش هي لي ݣالت ليك تدوي معايا ؟
- يسرى : لا ماكالت ليا والو عاودات ليا وكلت ندوي معاك شنو فيها الى مكانت فحياتك حتى وحدة زعم ..
- عماد ( ماعجبوش الحال ) : مامساليش انا لهاد التخربيق الخاوي يلاه نتكافى غير مع خدمتي لي ݣالبة ليا راسي
- يسرى : واش انت اتبقى غير الخدمة دار الدار الخدمة رخف فيك النفس حتى زواج مهم تكون شي بنت فحياتك تبغيها وتبغيك
- عماد ( شافيها ساكت ونطق من تحت سنانو ) :
وانت فرحانة عاجبك الحال نتزوج ؟
- يسرى ( كضحك ) :
أويلي وعلاش لي مغاديش يعجبني الحال ، بالعكس غادي نفرح ليك عارف معزتك عندي راه بحالك بحال طارق بحال فاروق وعصام كلكم مرتبة وحدة وكلكم خوتي ..
- عماد ( حس بالعافية شاعلة ليه فقلبو او وصلات لحلقو يديه بردو عليه مابقاش حامل يكمل الݣلسة ) :
يسرى بدلي ساعة بخرى ، انا الالة ماباغيش نتزوج انبقى هكا حتى نشرف ونشد التقاعد مزيانة دابا ؟ اعدى حاجة عندي شي حد يدخليا فحياتي ..
- يسرى : حنا مادخلناش ليك فحياتك حنا بغينا ليك غير الخير وفالاخر انت حر دير لي بغيتي ؟
- عماد : ايوا الله يرضي عليك هانتي ݣلتيها دير لي بغيتي ، وأنا حر لا أنتي لا الواليدة لا حتى واحد مغادي يݣيدني بداكشي لي هو باغي هادشي لي ݣالت ليك الواليدة ؟
- يسرى : هادشي ودوينا على ياسمين حيت اجلات العرس حتى لشهر 12 يا غاديرو ورا راس العام ولا قبل راس العام حيت لوسها يلاه ايجي من برا وخطيبها خاصو خوه ضروري يكون .. ودوينا على طلاقي
- عماد : علاش أش ݣاتلك ؟
- يسرى : والو ݣالت ليا نحاول نرجع لراجلي الى بغا يرجعني
- عماد ( تزاد معاه الزايد ) : الطلاق لعبة نسات أش دارت ليك ختو هداك اشماتة نسايه
- يسرى ( غوبشات ) : من حقو اعماد اي واحد وقع معاه لي وقع راه ايدير نفس التصرف قبل مايوقع داكشي كان كيبغيني وكيتهلا فيا
- عماد ( صعر ) : لي كيبغي مكايشكش فهداك لي كيبغيه واخا يشوف تصاورو واخا يكون لي بغا يكون الى مشافها ݣدام عينيه
- يسرى ( بإنفعال ) : عماد راه السيد سونا ليه وراه تصاوري وانا بلا حجاب مسيفط ليه نمرتي وميساجات بحال الى انا لي مسيفطاهم راه اي واحد اينفاعل اي واحد ايتيق ومغايشكش فختو وكونما البوليس لي دخلو وطيحو مول نمرة وعتارف بلي ختو مصاحبة معاه زمان وهي لي طلباتو يدير هاد البلان كوراني مزال متاهمة بالخيانة الزوجية الله يهديك ..
- عماد : شتك كدافعي عليه بحال الى مزال كتبغيه ؟
- يسرى : أه مزال وأنت أش مشى ليك وزوينة هادي انت الناس مايدخلوش فيك وانت دخل فناس ..
- عماد ( وقف كيهس بدمو كيفور مايقدش يزيد دقيقة وحدة ) :
ضبري لمحاينك أنت تعرفي .. مغاندخل فيك الالة مادخلي فيا ( عطاها بظهر وداز لاكيس خلص ومشا ) ..
•••••••••••••••
- بعيد على المغرب وبضبط .. بـلــغـاريـا ، فوحدة من المتاحف البلغارية داخل مع الباب لابس شوميز نص كم بالبيض مع سروال بيض نظارات شمسية رجالية .. بجنبو بنت فأوائل العشرينات من عمرها شعرها كحل غري لون بشرتها أسمر لابسة كسوة قصيرة فلون الابيض مموجة من التحت فيها وريدات صغار حمرين ، هازة ساك ف
- الأحمر معنقاه من ظهرو وهو معنقها من كتفها كيدورو بين أروقة المتحف مرة مرة كيسرق منها قبلة خفيفة وهي فرحانة عينيها كيبريو بالحب ..
- خرجو من المتحف توجهو لواحد من المطاعم المعروفة فبلغاريا خداو طبلة فالقنت شدو لي بغاو وتغداو فجو رومانسي ، بدا تيليفونو كيسوني هزو شاف النمرة غوبش حطو بزعاف وكمل غداه سلاو الغدا ديالهم ناض غلص ركبو فطوموبيلتو لي كانت من نوع لامبرݣيني فالݣري وشدو الطريق مسافة متوسطة ..
- تحلات بوابة الڤيلا الكبيرة الأعمدة ديالها الطويلة لي مصبوغين برمادي لاپيسين لي لونو كيضوي بلاصة طوموبيلتو ونزل هو وياها مشادين ليدين .. طلعو بخطوات سريعة فدروج وقفو قدام الباب سونا جوج سونيات ثواني معدودة وتحل الباب .. دخل جارها من يدها لصالون كانت ݣالسة مراة فعقدها الستين بلباس كلاص فاللون الأحمر طالقة شعرها القصير الكحل ملامحها سمراء كتشبه ليه وحداها راجل طويل قدها فسن هاز الپيسي ديالو غير شافت الشخص لي دخل ولي معاه وقفات حالة يديها والإبتسامة منورة وجها بصوت أنثوي وقور :
بدر ولدي على سلامتك أحبيبي ..
يتبع...
التعليقات
لا توجد تعليقات بعد، كن أول من يعلق.