بنت السايب الجزء 19

يوم الخطوبة الرسمية...كلشي مجموع فدار السايب... طبعاً غير المقربين من العائلة لي كانو حااضرين...ومن جيران كانت حاضرة غير عتيقة و بنتهاا رانياا... وطبعاً نجاة ووحدة من صحابات نصيرة...اما من عائلة مهدي كانت حاضرة عائلتو الصغير نادية وسارة...و حتاا خالتو وعمو لكبير..وواحد من صحاابو....ختاارو مايعرضوش على بزاف تاع النااس..بغااو يخليو لخطوبة غير بيناتهم...لعربي كاان ݣالس بلباسو التقليدي مقاداه فرحة لبنتو الوحيدة..يدور يدور ويرحب بنااس ويكبر بيهم...ويضحك معاهم من ديماا معروف بتقشااب ولݣلسة معاه كاتكون نزااهة.....

كاانت خنساء ݣالسة بارزة مع مهدي لي شااد فيديهاا فوسط الصالون الكبيير...كاتبتاسم ابتسامة خفيفة للمدعوين لي كايباركو ليهاا...منورة بقفطاان ميبرة فلموف ...إڤازي منبت بلعقيق فسدر ومطروز حتاا لتحت...قفطاان همااوي ديال لعرايسات فصلاتو عند الخيااط على دوقهاا واتاها وخلى لطااي ديالهاا تباان منحوتة...ختارت ماتلبسش تااج فلخطبة مخلياها حتا لنهار عرسهاا...زينات جبهتهاا بخيط الروح فذهبي كايلمع زاد عطاا السر لوجهاا...وشعرهاا دارت ليه مشيطة خفيفة جامعاه من الور وطالقة بعض من خصلاتو الناعمة جاية نازلة على وجهاا...لي دارت ليه ميكاب ناعم مركزة اكتر على لعوينات لي مزيناهم بعدسات لاصقة فلݣري ومسحوبين برموش مكتفة مع تكحيلة ديال لعروس لي خلات نضرتهاا تباان جداابة اكتر...مع عكر لون نيود فشفايفهاا البارزة....زينات عنقهاا بكولي دهبي مع حلاقاتو فودنيهااا....جاات كاتحمق ومنورة فيوم خطبوتهاا....فجنببهاا كان ݣالس المهدي لي مكايقلش عليها اناقة...لابس كوستيم فلبلو غواا مع قاميجة فلابيض بلا كرافاط...مع ساعة يدوية فنوااغ...كانت طبلة الصالون قبالتهم محطوط عليهاا مشموم تلورد كبيير...و تلاتة الطيافير صغيرة زجاجية...مديرو فيهم هدايا لخنساء لي ختراتهم نادية بعناية...تواب رفيعة بالوانهم الأنيقة محطوط فوقهم بارفان نيسائي فخم ماركة ممتازة...جوج صيكان شيك بصبابطهم...وعاد طيفور اللخر دايرين فيه كموسات تاع الحنة فوق منهاا صينية فضية معمرة بلورد ومريشماات تزهر.... عاد شكلاط بلانواع مع لكراميل مغلفين وتمر معمر...وصندوق صغير جاي مع طيافر محطوطين فيه خواتم الخطوبة للعرساان...كان كلشي فرحان ولموسيقى خدامة فرحاانين مع راسهم وناشطين كايضحكو مستمتعين مع بعضياتهم....شربو لي حاضرين اتااي مع لحلوة وشطحو وردحو...

جاا وقت تركااب لخواتم....وقفو بزووج وحتاا لحاضرين ....حطو قبالتهم صينية مفرشين ليهاا لورد حمر...فوق منهاا لخواتم وجوج كيسان معمرين بلحليب...كل كااس منقوش عليه لحرف الول ديال كل واحد منهم منبتينو بلعقيق ابيض...ولبنات لي حاضرين هازين تيليفوناتهم كايصورو ويوتقو فلحضة....هز مهدي هو لول خاتم ديال خنساء شد فيديهاا بحنان ولبسو ليهااا...بتاسم وهو كايشوف لخاتم فيديهاا وكيفااش جاا معاها كايحمق...بلا مايشعر هزهاا برقة وطبع قبلة عليهااا...الشيئ لي خلاهاا تبتاسم وتحدر راسهاا وتعض شوية على شفايفهاا حشمانة...بدورهااا هزاات لخاتم ديالو ولبساتو ليه...شربها لحليب وهياا كداالك...زغااريت وصلى على النبي كاتعالى وسط الصالون...سلااو وخنسااء قربات بخطواات لعند باها باست ليه على راسو ويديه...وهو كايبارك ليهاا مقاداه دنياا...

لعربي بحنان :الله يرضي عليك ابنتي...و يكمل عليك بلخير...

خنساء بإبتسامة وبنبرة رقيقة:اميين ياربي...الله يحفضك لياا ابااا..

قربات لعند نصيرة و باست على يدها حتاا هيااا ... رضاة عليهاا من قلبهاا وعينينهاا غرغرو بدموع لفرح:الله يسݣم سعدك ابنيتي...ويجعل كلشي مباارك امسعود

خنساء برجااء:اميين اعمتي الله يطول عمرك...

دازت لعند عصام حتا هو لي عنقهاا بحرارة فرحاان لختو كايتمنى ليهاا السعادة فحياتهاا الزوجية...وسلمات حتا على نسرين لي كانت ݣالسة حدااه وحتا هياا باركات ليهااا...

دازت لعند نادية سلمات عليهاا بدورهااا كاتبارك ليهاا فرحاانة لولدهاا...وسلماات حتى على ساارة وعم المهدي وخاالتو لي حاضرين...

مهدي كان تابعهاا من اللور حتى هو سلم عليهم كاملين بإبتساامة لي مافرقااتش وجهوو..فرحاان

سلااو رجعو لبلاصتهم...كاياخدو صور تذكارية مع لعائلة ولموسيقى مجهدة خداامة....مهدي بان ليه كلشي مشغول هالي كايدوي ها لي كايصفق ها لي كايشطح...بتاسم و قرب لعند خنساء لي يسحاب ليهاا بغاا يقوليهاا شي حاجة...زادت قربات لعندو وهو يتحنى لعند ودنهاا وخطف قبلة تحتهاا كايستنشق عطرهاا لي حمقو و خلااه يتتيه... خنساء وسعاات نضرتهاا كان أول مرة غادي يكون قريب ليها بداك الشكل...بعدات شوية بالعة ريقهاا وقلبهاا ضرب..ولحمهاا بوورش عليهااا...مهدي عرفهاا حشماات

نطق بسعاادة...كايهضر بشوية و كايبتاسم :مبرووك عليناا... وأخيراً غادي تولي مرتي ودياالي....ديالي بوحدي....

خنساء رمشات بتتاقل دورات عينيها لايكون شافهم شي حد...ساعة بان ليهاا كلشي مشغوول.... دارت لجيهتو بادلاتو ابتسامة عدباء خلاتو يزيد يدووب فملاميحهاا لي سكنااتو بلا ماتنطق وحدرات رااسهااا...مهدي زاد قرب لعندهاا حتا لاصق دراعهاا مع درااعو وشد فيديهاا شاابكين صبعانهم بجوج مع بعضهم...كل واحد فيهم فرحاان كتر من لااخر...

سارة كانت كالسة مع الجمااعة مستمتعة بالموسيقى لي مطلوقة كاتسفق معااهم فرحااانة لخوهااا وبخنساااء لي دغيااا دخلاات ليهااا لخااطرهااا بصوابها وادابهاااا ... صونا ليها التلفون شافت نمرة بنت خالتهاا ونااضت من تمااا هازة على كسوتهااا لي طويلة وخرجااات براااا على قبل الصداااع باش تهضر فخاااطرهااا ... وقفات فبااب الزنقة وجاوبااات وضحكتها على فمهاا : اهلا اهلاا زارتنا البرااكة يااا الحبيييبة ... عااش من سمع صووتك ...( كاضحك وتلعب بشعرهااا منغامسة فالحديت ): والله ماشيغي غير لوقت ... راكي عارفة القراياا والسيستيم طخو شاغجي .. واون بليس لو ماغياااج دميدو ... ( ضحكااات بصوت عااالي تحت نظرات واحد من ولااد الدرب لي سمر عليهااا مني شااافهااا طاحت لو النقطة فالكاااس ): ان شااء الله ... وااا ضروري نتلاقااو فالعرس ... جيسبييغ تلقااي كيفاااش تجي ... ان شاااء الله ياااربي ..

مع هزاات عينيهااا وهي تقلب كماارتها مخصراااهاااا فيه وهو كايدير فيهااا شوفااات مستفزة ... كايتلوط عليهااا بحركاااتووو ... سااطت بلااا حول وقلبااات الشوفة لجهة اخرى مكملة كلاامهااا ... مع قطعاات لابيل وهي تلقاااه قبااالتهااا ونطق بصوت خشن مدعدع كايضر فالودن منهد : مس الخير ازين ولبوسة بين العينين والتنهيدة من قلبك الحنين ...( هبطها وطلعهاا باعجااب وقاد كصتو بسلوالو نازل حتى لركبتو منظرو كايجيب تقيااا ) : اش سماااك الله امولااات الساالف الكيرلي

سارة دارت فيه نظرااات اشمئزاز كاتكره هاد النوع من الدراري كايجيوهااا لا علاقة ... هزات حاجبهاااا يلاااه غاتدوي وهو ينطق عصااام من وراااهااا بنفضة مخنزر وعاقد غوباشتو : غاتمشي تقلب السيكتووو ولا انااا لي غانفض خويااا ونخلي فصاالتك كييرلي ....

الدري : وااايلي اعصاااام واش فيهااا الا تعرفنااا على الزاااز واللوز ... ماشي حشومة عليك تخصر عليناا هاد اللحظة الرومانسية وحنا عاد باديين ... اولاااا الغزاااالة ... راااه عيبنااا واحد زعمااا اصحبي

عصااام وقف قبالتو وشدو من عنقو مكاااليه بقبضة يدووو وحجبانو مقرونين بانزعاااج ... ناطق تحت سنانو : بربي المعبووود وماقلبتي الضووورة حتى انا لي غانوريييك عيبي ديااال المعقووول ... ( نفضووو طااالقو بنترة ): وااا سير بدل السااعة باخرى قبل مانصدق مخلط خويااا ....

سااارة نساااات الدري لي كااان كايتلوط عليها ونساات فين هي ... ساااهية غيير فداااك زين القلااادي لي قدااامهاااا والحروشية والشهااامة لي قبالتهاااا ... دااابت داابت وريووكهااا سااالو علييه ماقدرااتش تنزل عليه العيين زعزع ليهااا المحاااسيس وبعتر ليهااا الفيزيبلاااات ...

الدري شاااف فيه كايقاد حوايجو : وااا عقل عليهاا اولد السااايب هاهي عندك .... وراااك عاارف ....

خنزر فيه : تلاح قبل مانريب لخوياااا سنااانو قدااامووو .... تريكة الويييل يخخخخ الكلووشااار لي حطك ....

الدري : هاااااهو غااادي ...( شاااف فساارة لي مكايناااش هنااا عقلهاا غايب مع عصااام ) : باااي الزين .... وااا كون غااكنت ناااموسة نشبع غير بوسااان ومصااااان احححححح على الشفااااايف المورديين ...

عصااام خرج فييه عينوو خرج ليها طاي طاي يلاااه غايتبعوااا وهو يفرفر من تمااا هااارب مخلي وراااه الريح ... عصام غمض عينو بلا حول وشاف فسارة لي مزااال ساااهية فييه مشاااات وسااحت ولات فخبر كااان ... غير شاااف فيهااا وهي تضحك ليه بابتسااامة عذبة : شكراااا اعصااام ... لهلا يخطيك ...

حرك راسو بايجاب وغوباشتو باقا على حالهاا ونطق بصوت مبحوح : هاد السيكتور ماشي بحال لي مواافة من الاحسن دخلي ... بنادم خاصو غا فيمن يتلصق ...

ضحكااات ببلاهة وهي كاتمرش فعوينااتهااا سااايحة فيه وحركات راسهااا بايجااب بلا شعوور : داااكوغ خرجت غير على قبل وااحد لابيل ...

عصاام : ممممم الا ساليتي دخلي ...

يللااه غاتجااوبو طاايحة على زناافرهااا وفيقهاا صوت نسرين لي جااية كاتقرقب بطالونهاااا وهي داايرة فساارة شوفات ديال القرطااااس شافتهاا بغات تاكل عصااام بعينيهااا ... وزايدون حسات بالوقفة مااهيااش فالباااب العاافية شعلااات فيهااا ... رسماات ضحكة صفرة على وجهها نااطقة : يااك لاباااس احبيبي ... ( حطات يدهاااا على كتفووو بحنااان بلعاااني كاطلع فسارة وتهبطهااا بمعنى حدي عينيك رااه مرشوم ): ياكمااا ساارة بغاات شي حااجة ...

عصام هز حاجبو لاوي عنقو ... شم ريحة الشياااط لي خاارجة من نسرين وعرفهااا تحسسات ...

سارة كرزاات على سناانهااا كااانت سااهية فيه وجاات فيقااتهاا عوجاات فيهاا قنوفتهااا بضحكة صفرة وشاف فعصااام : ميرسي عصاااام انكووغ فواااا ...

عصام : هاانية ....

نسرين هزات فيهاا حاجبهااا بسم وهي بادلاتهاا نفس النظرااات .... زاد هو وياهااا وبقات سارة وااقفة وهو يدور عندها هاز حاجبو : واش مناويااش دخلي ....

سارة ضحكااات بلا شعووور : وي وي جاغيف ... ( فرنسااات حتى بانو ضراسهاا )

نسرين قرصااااتو مليطاه فدراعو مخااطباااه بصوت خاافت : ونتا مااالك دايرينك عساس عليهاا ... تدخل ولا تكلس اش دخلك ...

عصاام ابتاسم جانبياااا عرفهاااا غاارت ... وقرب ليهاا لودنهااا : يخليلي الحبيبة ديالي لي تغير علياااا انااا ههههههه ...

نسرين ضحكاااات عاجبهااا الحااال وضربااااتو على كتفوو بطنر بلعاااني موريااهااا لساارة لي متبعة ليهم العين كاتقلي ليها السم : هههههههه... باااز ...

ضحك عاجبو الحااال وغمزهااا وزاااد مبتااسم خاشي يدو فجيبو وهي ضارت جهة سارة لي تمات داخلة ...

نسرين بنبرة حنينة مصطنعة : سااارة احبييبة ... الا بغيتي شييي حاجة انااا هنااا غير قوليهاا لي على الرااس والعين ....

سارة عرفاتهاا كاتحشي ليهااا الهضرة بلعاني... زادت بلامااا تجاوبهاا ... ونسرين ميقااات معيباااهااا : نااا ناااا ... وي وي .. دااكوغ جاااغيف ...( بتعيااب كاتقلدهااا ): مييغسي عصااام انكووغ اين فواااا ... عععع ...نااا ...( خصرات كماارتهتاا ): التبعصيص ياااربي السلااامة ... يخخخ الله يخليه كنس بالخلااا ... فوراات ليا دميي السليعفااانة ... مسماار الهندة ... سفووود العواااشر تفووو

سااطت وهزاات على قفطاانهااا ودخلااات كاااتعااير وتسب ماخلات غير لي نسات ...

السوق حامي وسط دار الساايب وكلشي فرحااان محيحيين بالمعقووول .... عاجبهم الحاااال واخااا غير بينااتهم خاالقين الجو بيناتهم ... تعشاااو مع بعض وهماااا مجمعييين كايتعرفوا على بعضيااتهم كتر ... عاجباااهم اللمة والجمااعة ... سالاو وجمعوا الطبالي جوج عيالات جابتهم نصيرة يعاونوهاا

نادية مخااطبة خنساء لي كااالسة متبتة حدااا مهدي : جيتي كاتحمقي ابنتي ...

خنساء ابتاسماات ليها : لهلا يخطيك علياااا ... حتى نتي جيتي غزااالة ....

نادية ضحكات : ههههههه حنااا شرفنااا ...( غمزاتها ): ولاينني الا مشا الزين كابقاااو حروفو يااكي ههه

خنساء : هههههه عندك الحق ... وواخا هكاك باقا غزااالة كاااع مااا باينة فيك والدة هاد الراجل ههههه ....

نادية : يخليك ليلي الحبيبة ...

باقين مجمعين وهما يجيبو الكااطو حطوه قبالة العرساااان مكتوب فيه اسمهم ... جامعهم قلب .... خنسااء ابتاسمات بفرح عاجبهاا الحااال ... شد فيدهااا مهدي ووقفو قطعوا الطاااغط مذوقين بعض هما اللولين تحت تصفيقااات العائلة وهمااا ماشي هناا عينيهم على بعض فرحااانين عاجبهم الحااال ... عاااد وزعوها على الحضوور ...

حتى وصل نص الليل عاد ناضو مودعينهم .... متافقين على التجهيزات لي بقااو للعرس لي ما بقا كايفصلهم علييه غير اسبوووع ... خرجوا نااشطيين وحتى عائلة المهدي لي عاد جاااو حمااقو على العرووسة وعجباتهم عائلتهاا بزاااف ماسخااوش بالجمااعة ... وحتى نجاة وعتيقة مشاو فحالهم بقات غير رانيااا لي غاتبااات مع صاحبتهااا والعياالات لي بقاااو كاايجمعوا الرويينة لي بقااات مع نصييرة مانعسو حتى كلشي ترتب وتقااد وتغسل ورجع لبلاااصتووو ....

خنساء حيدات قفطانهاا كاتكسل ولبسات عليها حوايج خفاف : ياااختي سخف حاااسة بعضاامي كلهم كايضروني ...

رانيااا كاتلبس بيجامتهاا حتى هي : والله ياختي وماتساليني حلوووف حتى صحتي كولهااا عاطياني الحريق تقول غير وااكلة شي هردة ديال العصااا ...

خنساء ضحكااات : عههههه بسيف اختي .. ( صونا تليفونهاا مقاطعهاا وهي تهزو ووسعاات ابتساامتهاا كالسة جنب السرير ... وجاوبات بصوت عذب كايدوب الحجر ): اهلااا مهدي ...

المهدي متكي فبيتو عريان من الفوق : ديري ابيل فيديو توحشتك ...

ضحكاات عاضة على قنوفتهااا شافت فرانيا : ولكن انا ....

رانيا لي حركات راسهااا بابتسامة فاهماها ودارت الكيت فودنهااا طالقة الموسيقى شارت ليهاا بمعنى مكانسمع والو ...

خنساء ضحكااات وشافت بالخف فالمراايااا قادات شعرهااا وطلعاات الكاميرة : هاني اسي... ( سرطاتهاا وهي كاتشوف فيه منشور فوق السرير ملابس والو الفوق ... قلبهاا ضرب فالتسعييين وعينيها خرجو من بلاصتهم علييه ) ...

المهدي عااد وعاا على راسو نساا بيلا راااه معري ... ضحك حتى بانو نيابو عرفهااا مغاترتاحش فالهضرة ... وحط التلفون مخلي لابيل دايزة ودار عليه تيشورط دياالو لاابسو بالخف عااد هز يكمل معااهااا وهي باقا كاترمش صورة صدرو ماحيداتش من عينيهااا ... نطق مفيقهاا : ايوااا احبيبتي ... نتي ماتوحشتينيش زعما ...

خنساء ضحكاات بخجل : ههههه وراه عاد تفاارقنااا زعما...

ضحك بمزح : ههههههه ياااك الالة الله يكبر بييك ... كلااامك حلووو بلا قيااااس ... باااز ..

ضحكااات بطنز : وااا نخاااف ندوبك بكلاامي وتصدق جااي لهنااا فهاد الليل ههههههه ... داكشي علااش كاندير فيك خييير ونقمعك هههه ..

هز فيها حااجبو : يااااك ... ايوااا عندك الحق انااا داباا بلا كلام حلو وماكرهتش نجي ... ولكن مابقا قدمااا فاات وديك الساااعة ماعند والديك فين تهربي بيا ولا بيك ....

خنساء خرجااات عينيهااا وهزات وجهها فرانيااا لي فشلاااات بالضحك عليهم ... خنساء عرفااتهاا كاتسمع .... خنزرااات فيهااا ونطقاات بايجاااز : احم ... جات صاحبتي دابا غانقطع حتى لغدا ونهضرو ...

يلاااه غايرد عليهااا وهي قطعااات حرك رااسو بلااا حول وحط التلفون ناااض يدوش علييه ..

خنساء خنزرات فرانيا : باااز ياختي مكاتحشميش

رانيا ضحكات : ههههههه ختي وانا مامنحقيش نسمع الفاحشة هههههههه ... قالك لي ما شرااا يتنزه .....

خنساء وسعات ابتسامتها : الله يعطيك المسخ ...

ضحكااات وبقاااو مجمعيين مدة عاااد استسلمو للنعااس عيانين ...

دخلات سارة لبيتهاا كاتحس براسهاا كاع مدݣدکة شبعاات شطيح مع لبنات وفوجاات معاهم... عزيز عليها داكشي الشعبي...حيدات الطالون...وتقابلات مع لمرراية زولات لميكاب من وجهااا.... دازت لبلاكار جبدات بينوارهاا..ودخلات تاخد دووش ساخن بااش تحيد لعياا ولعرق...خرجات من دووش لبسات بيجامة بسروال حريرية ديال النعااس...جمعات شعرهاا الكتيف بمقبط صغير لاوياه للفوق...وتخشات فسريرها مغطية...جبدات تيل بدات كاتشوف التصاور ولڤيديوات لي صوراات فلخطبة....خدمات واحد لڤيديو يلاه بدات كاتفرج فيه...وهو يبان ليهاا عصام ݣالس حاني راسو كايشوف فتيل حدا خنساء...بدون شعور دارت بووز لفيديو وسكرينات اللقطة...دخلات لبلاصة تصاور جبدات ليماج وكبرااتها بصباعهاا كاتشوف فيه وتزيد تمعن...سيدة سرحاات وهيا كاتشوف فملاميحو وتفكر كيفااش نهض فدري قدامهااا...

نطقاات مخااطبة راسهااا بإعجااب مطولة هضرتهاا كاتنهد: باينة فيه قااسح وحاس برااسو ...ولكن بصرااحة بوݣووووص ...معمرني تصادفت فطريقي مع شي واحد بحاالو....راجل حرش بكريزماا وشخصيتو قوية...مهيااب...(رجعات لوعيهاا ونطقات بعتااب)مي صافا باا؟؟انا علااش كانفكر فيه وݣالسة كاانهضر عليه...سيد رااه مزووج وقريب غادي يكون عندو ولد ....ومرتو باينة كااتسطى علييه وحتا هو كايبغيهاا ...(تنهدات بتحسر)سعدااتهاا بيه...كون غير يجي حتا انا فطريقي شي وااحد بحاالو...(ضحكات بستهزاء)ههه اكيد كانحلم فينهوا الزهر لي يلاقيني مع واحد بحال هداا..بففف.. (بدات كاتقاد فبلاصتها)نعسي نعسي اسارة باينة لعيا أتر عليك

عضات على شفايفها بنرفزة ومسحاات التصويرة..مباغاش ترجعش ليهاا مرة أخرى باش ماتفكرووش وتمحيه من باالهاا ...طفاات التيل وحطاتو فوق لكوافوز لي فجنبهاا..قدات لوسادة تاعهاا...وتغطات مغمضة عينيهااا مستسلمة لنوم عميييق....

اصبحنا واصبح الملك لله ... كالسين فقهوة كاطل على شاطئ المهدية ضايرة بالزاااج ومنظر فيهااا رااائع .... خنساء حاطة قبالتهااا عصير افوكاا كاتحمااق عليه منسم ببعض الفواكه الجاافة وحلوة خفيفة ... ومهدي قهوة بلا سكااار ...

المهدي بابتساامة : ايوا فين تبغي ندوزو شهر العسل ؟؟

خنساء خرجات عينيها : ههههه اويلي بلاااش ماشي ضروري ...

هز فيها حاجبو : وعلاش بلااااش هههه .... فين باغا تمشي اللالة غير دوي ماتحشميش ...

خنساء عضات شفايفها بتفكير : اش بان ليك فالسعيدية .... مدينة زوينة مشيت ليها مرة وحدة وحمقاتني

ضحك : ههههههه اييه نمشيو ليهااا عللالش لااا .... نتي غير شدي معايا الخط .... وندي الحبيبة ديالي حتى للمالديف

خنساء فهماتو داوي على الطلب لي قالت ليه : هااااء علااش مااالي مايلة على السطر ...

المهدي ضحك : وا مااانعرف ضور ليك فالخوااا وتخليني حتى للعرس وديري ليا وعليكم السلام كانت هنااا ... راني عارفك حال واحواال ... يخرج لك تاني داك الراس شي عجب ... ويبان ليك شرط اخر ولا تقلبي عليا هههه

خنساء شافت فيه بنظرات حنينة كاتدوب :وعلاش انا غانلقى حسن منك ؟؟

المهدي ضحك حتى تغرسوا نيابو على شفايفوا وحط يدو على كفها : وحتى انا مغاديش نلقى بحالك ... ولكن على ما بان ليا نتي باغا ديري لينا العصا فالرويضة ومابغيتيناش نبنيو عائلة حتى حنا ( غمزها )

دوزات يدها الاخرى على خصلات شعرها بعجرفة : انا قلت غير الواقع وماطلبتش منك شي حاجة مستحيلة ... مافيها باااس وماشي خسارة فياااا ( هزات حجبانها ): ولا انا غالطة ؟؟

المهدي حك على دقنو بحيرة : لا مغالطااش الله اودي ... واخا الالة نديرو انا وافقت زعما ماغاديش ديري شي حجة اخرى وتزيدي تعكسي لينا كتر ....

ردات عليه بابتسامة عذباء :لا مغاديش نتعكس( سبلات فيه عينيها بنظرات ساحرة ونبرة هادية ): عرفتي علاش ؟؟؟

المهدي باستفهام متبعها : علاااش ؟؟؟

خنساء عضات على شفايفها : حيت حتا انا بغيت نكون معاك عائلة ونعيشو فتبات ونبات ونولدو الصبيان والبنات

المهدي حرك راسو بلا حول وقرب طابع قبلة خفيفة على يدهااا : انا هاد اللسان هوو لي جايب ليا التمااام ....

خنساء ابتاسماات ليه مابقاش هامها واش يوافق على البقعة ولا لا بغات تعيش غير اللحظة وتنسى الماضي ... قررات تخلي اي حاجة غاتمرضها فحيااتهااا وتفكر غير فزواجهاا وحبهاا لمهدي .... نطقات وهي مزيرة على يديه : شنو زعما كاااع هاذاا حب ... واخا عمرك قلتيها لي ...

المهدي : شنو زعما باغا تسمعيهااا ؟؟ ...

خنساء بايجااب كاتفرنس حطات يدها على حنكهاا بانتظار : ماكرهتش صراااحة ...

المهدي شاف فعينيهاا مفيكسيهم فيهااا ونطق متيم فملامحهااا ... وبصوت دافي : كنبغيك اخنساء ... كنبغيك ديال بصح ماشي غير حيت بغيتي تسمعيها هههههه

السيدة الموريااات دياال قلبها تخلبطو من كلماتو حساات براسهاا كلهااا كاتفرفر وفراشاااات كرشهااا ناشطين ... ضحكات بخجل حسات براسهاا فشكل وشعور غريب داخلهااا عمرهاا عاشتو الا معاااه ...

المهدي هز فيها حاجبو : تهنيتي دابا ؟؟ ...

خنساء ضحكات وشافت فيه بعجرفة : ماعنديش فيها شك اصلاااا .... اش بان ليك نتمشاو شوية حدا البحر ...

المهدي : القوالب هاادو ... واخا الالة حتى ترشق ليك ونسمعهااا من عندك نتي ... نتمشاااو ولكن قربي عندي بعدااا ...

قربات وجهها باستفهااام : علاااش ؟؟؟

هز موشوار حطو على شفايفهااا بهدوووء كايمحي العكر لي دايرة ونطق : هاكا حسن ...

خنساء بتعجب : واش مكانش زوين ولا شنو ؟؟.... ماعجبكش

ضحك بطنز : راه حيت زوين بزاااف محيتووو ... ( غمزهااا ونااض كايضحك) ...

حرمات راسهااا بلا حول ضاحكة وناضت تابعااه ... خلصوا القهوة وهبطوا لحدا البحر بجوج بيهم مشبكين يديهم ومستمتعين بديك اللحظة الرومانسية لي عايشين ... وبنسيم الشااطئ الهاادي

تعاشاات العشية وخنساء ومهدي باقين على برااا كايتسااراااو فمهدية مستمتعين بنهارهم بحكم عصام هو لي عطا لمهدي الاذن يخرجوا بجوج هاد النهااار ... كانو كالسين فالرملة والغرووب كايبان رائع فالبحر .... صونا تلفون مهدي وهز حاجبو فور ما قرا سمية ملاك لي ردات ليها خنساء لبال وعوجات وجهها ...

جاوب بهدوء : وي ملاااك ...

ملااك الغواات حداهااا نايضة ليها القربااالة فالقهوة شي كليااان مضاربين والخبيط مالئ المكان وهي كلها كاترعد : مهدي عتق راااه مقربلينهاا واحد جوج فالقهوة ... ماعرفت ماندير حلفو لا خرجو ليا من هناااا ... ماعرفت واش نعيط للبوليس ولا شنو ندير تلفت

قرم حجبانو : وفين مشاو الدراري واش مكاين حد ولا كيفاااش وعلاش مضاربين ؟؟؟ ...

خنساء قلشات ودنيهااا معاه كاتصنت لشنو كاتقول متبعة معااهم ...

ملاك تالفة : ماعرفتش امهدي وحتى الدراري ماقدروش عليهم هما بزاااف شي كليكة نوضوها بيناتهم ... واش نعيط للبوليس ولا شنو ندير ...

المهدي : واااش منوضينهااا بزاااف مابغااوش يتفكواا ....

ملااك : واااش امهدي كانقوليك راااهم مقربلينهااا هناااا ... كون بغاو يتفكوا كاعما نصوني لييك ... دابا شنو ندييير ...

المهدي خنزر : عيطي للبوليس يجمع الزبل عليا من تمااا انااا جاااي الا سبقوني تكلفي نتي ...

ملاك بايجااب : واااخا واااخااا ... ماتعطلش عافاك ..

قطع عليهاا ووقف : خنسااء واقع واحد المشكل بين شي كليان فالقهوة ... ومضاربين تمااا خاصني نمشي ضروري ...

خنسااء بايجاب : اااه واخااا غير سير انا غانشد طااكسي ونرجع فحاالي للدار ..

المهدي بنفي : لا مغانخليكش هناا مغاتلقايش فين تجي الطاكسي بعييد علييك وزايدون قليل ... يلااه نشوف شنو واقع ونردك يك السااعة للدار اصلااا بااقي الحاال

خنساء وقفات كاتنفض حوايجهاا : واخا لي بااان ليك ... يلااااه نمشيو ...

زادو من تماا وهي كادعي فملاااك من خاطرهاا لي خصرااات عليهااا نهاارهااا وكاتحلف عليهاااا من داك النهاار وهي محاملاهااش ودابااا زادت كرهاااتهاااا ... ركبو فاللوطو واتاجهوااا للقهوة ....

مسااافة الطريق حتى وصلوا قدام باب القهوة ... كااانو الدراري كايجمعوا الروينة والكيسااان لي مهرسين وكايقادو الكراسااا ... هبطو وتقدموا داخليين بجوج بيهم ومهدي عاقد غوبااشتووو هاز شوكتو للسما ... كانت ملاااك وااقفة تمااا كاتعااون الدراري يجمعوا القربااالة والقهوة كلهااا خااوية بحكم الكليااان مشااو مني شافو المضاربة ... غير شافت خنسااء داخلة مع الباااب وهي تكحل بالعمااا ميقااات ...

المهدي بتسااؤل : اش وقع ؟؟

ملااك تنهدات : جاو البوليس داوهم و مشاااو ... وقالو الا كاان شي خسارة تقدر تمشي للكوميسارية وتابعهم تطلب تعويض من دوك الدراري ...

المهدي حك على لحيتووو معصب وزدح على الطبلة بيدو منرفز : اشمن خساااااارة ... وشكون غايعوض خسارة الكليااان لي دارو لياااا ...

ملااك مارضاتش ينهض فيها : وشنو كنتي باغيني ندير ليهم اناااا ... راااه بحالي بحااالك ... حتى انااا راااه كنت فالبيرو حتى سمعت القربالة ناايضة ندخل بيناتهم متلا ...

المهدي ساااط بانزعاااج ماعندوش مع الاعذار واخا عارفهااا ماذنبهاا والو ولكن بالنسبة ليه السمعة ديال القهوة هي كلشي ... ومكايبغيهااش تزعزع ليه بالمرة ... نطق بعصبية : انا مافهمتش نتومااا شنو كنتو كاديروووو .... ولا غير زايدين هنااا ( نهض فالخدامة ): ولااات السيبة عندي هنااا لي بغااا يدير الروينة يديرهاااا ونتوما كاتفرجو ...

ملااك : شنو كنتي باغيهم يديرو امهدي ... حاولو يفكوهم وماقدروش وزاايدوون ماشي مسؤوليتنا حنااا الا همااا ضاربو بيناتهم ...

المهدي دار فيهااا : انا كاندوي معااهم املاااك ... ممكن تسكتي لاااا ...

خنساااء عضات على شفاايفهااا ماتنكرش عجباتها القمعة لي دار لملاك ولكن فنفس الوقت بقاو فيها دوك الخداامة حيت ماذنبهم وااالو ..

المهدي بصراامة : فنظركم الشرفااااا هاد الكليااان لي شافو هاادشي هناا غايعاودو يرجعوا لهاد القهوة .... واااش عند بالكم هادشي عاادي لي وقع ..

النادل : ولكن اسي مهدي حناااا راااه مادرنااا والو وزايدون راهم ضاربو مع بعضياتهم وحتى وااحد مكان غايعرف هاادشي ...شنو كان بامكانااا نديرو ...

خنزر : كون كنتو كاديرو خدمتكم وتعرفوا لي كايدخل ويخرج وشنو الاشكاال لي كايجيو غاتبقااو رادين البااال كاع مغاي يطرا هاكة ... ولا البلباالة ساااهلة عندكم ...

خنسااء تنهدااات ونطقاات بهدوء : ولكن امهدي شنو فجهدهم يديرو ... نتا كون كنتي براسك ماعندك مادير ... وزايدون واش هماا غايبداو يفليو فالكلياااان لي داخل ولي خااارج ... هادشي راااه كايوقع ... الا كانت شي مسؤولية رااه غليتحملوهاا لي ضااربو امااا همااا ماعندهم علااقة ... راااه ماعندها معنى تحملهم مسؤولية غلط ماشي ديالهم

المهدي دار عندهااا كان معصب ولكن جابت ليه الضحكة كيفاش دوات بحرقة بحال الا هي لي دار فيهاا حس بحال شي محاامية كاترافع فوسط المحكمة ... ضحك بلا شعووور : ياااك ادفااع المتهم عندك ما ضيفي ... هههههه

خنسااء ضحكااات والعمال حتى هما ضحكووو بلاماا يحسو اما ملاااك عقدات غوباشتهاا كيفاش بكلمة منهاا خلاتو يبرد ويضحك من الفووق حسااات براسهاا غاتفركع ...

المهدي بعصبيتو مافكرش فانهم ماعندهم ذنب فلي وقع اصلااا هو كان همو غير الصورة ديال القهوة ... تنهد ونطق باعتدار : غير سمحو ليا الدراري راكم عارفين دمي دغيا كايفوور

النادل بابتسامة : هانية اسي مهدي ... ماوقع والو

المهدي : سيرو كملو هاد الروينة وغير سدو براكة عليكم هاد النهار ...

خنساء ابتاسمات كانت خايفة يضور فيها حتى هي حيت مامنحقهاش دخل ولكن ماتقدرش تصبر وهي كاتشوف شي حد كايتظلم قدامهااا ... ملااك كرزااات على سنانها مغززة معاجبهاا حاال ...

المهدي بايجاز : غير سمحي ليا املاك ضرت فيك ...

شافت فيه دايرة ضحكة صفرة : هانية ماوقع والو ...

المهدي شاف فخنساء : ايواااا المحامية ديالنا نمشيو هههههه ...

خنساء شدات فيدو : ههههههه نمشيييو المدير الصارم الظالم ...

ملااك بلا شعور نطقاات : ومغاديش دير تعويض فالكوميسارية ...

المهدي بطنز : غايعوضو ليا جوج كيسان وكرسي الله يهديك ... صافي خلي النم غير المرة الجاية ردو بالكم مابغيتش هادشي يتعاااود ...

ملاك حركات راسهاا بايجاب مفقوسة : ايه واخا ..

حرك راسو بمعنى مزيان وزاد هو وخنساء لي طلعاااتهااا وهبطاتهاا بنظرات مستفزة وظارت ليها ضحكة ديال الغداايد خلااتهااا كاتغلااا وراهااا ...

صبح صبااح جديد...عصاام كان قداام لمراية كايسد الصدايف تليد تاع قاميجتو...

نطق كايعيط:وطلقينااا خلااص انسرين راه مغانتسنااكش تااني نص نهاار....

نسرين جات لعندو كانت لابسة وموجدة راسهاا باش تخرج:هاني هاني غير كنت كانوجد شي تخربيقات فلكوزينة....

عصاام كايقاد فكول قاميجتو ونطق عاقد حجبانو بنزعاج :انا مافهمتش اشهااد الزربة فيك..باقي للعرس سيمانة ونتي غاتبداي تختاري شنو تلبسي من دابا( دار شاف فيهاا)اجي...مهداكش ديري واحد لقضية...عفيني و سيري بوحدك ختاري تكشيطة لي غاتلبسي فلعرس...بلا مانمشي معااك...

نسرين ميقات فيه وعوجات شفايفها:ياااك اسيدي...باش تاني ملي نلبسهاا تبدا تنݣر علياا...لا مزيرة..لا سدرك غايبان... فين كان عقلك حتا ختاريتيهاا..لا لونهاا مشعشع وكايبينك من بعيد كلشي غايبدا يشوفيك وياكلوك بعينيه...شتي ديك لهضرة ديالك انا حفضتهاا...رجلي برجلك خطوة وحدة حتاا لعند لخياطة...ختاار معايا..(كملات بإبتسامة)وزيدون دابا بغيت نلبس فهاد لعرس على دوقك...

عصام ضحك:ههه واخاا الالة غير طلقيناا خلااص راه تابعني مايداار..

نسرين:انا غانمشي نطفي على اتاي ونحطو فوق الطبلة باش الى جا عمي يلقاه وااجد....

حرك ليها راسو بلإجاب وهيا مشات لكوزينة تقضي شغالهاا....صونا تيل ديال عصاام وهز باش يجاوب...هز حاجبو وهو كايشوف نمرة تااع نجااة طاالعة ليه فشاشة...دوز لابيل ونطق: اهلا خالتي..لابااس....(بدل ملاميحوو لدهشة)كيفااش نتي فصبيطاار...حاولي تهضري بشوية وبلا ماتبكي باش نقدر نفهمك..مال يعقوب؟!..لا لااا ماحداياش نسرين غير هضري...(خرج عينيه بعدم تصديق)شنووو!!! داار كسيدة...

باقي مكملهااش حتااا سمع صوت نسرين من مورااه وااقفة عند لباب مصدوومة حالة فمهاا من تأتير أخر جملة قالهااا... نطقات بلغوااات:خوياااا.....خوياااا شنووو وقع لييه...

عصاام داار عندهاا وسع نضرااتو بدهشة مكانش عارف راه غااتسمعوو...قربات لعندو بخطواات سريعة وخطفاات ليه تيليفوون:الوو مامااا ماال يعقووب...ماماا هضري علاااش كااتبكي...قولي لياا ماالو شنوو وقع لييه...

عصاام دغياا جر تيل من يديهاا وقطع لابيل...ونطق باغي يهدنهاا:غاا تكلمتاي مااوقع ليه واالو

نسرين بداات كاتحرك رااسهاا بنفي وبشكل هيستيري وعينيهاا دغياا داازو بدمووع: لاااا لااا كااتكدب...نتااا كاتخبي عليااا هء هء...يعقوب وقعاات ليه شي حاجة غير قوول مااتخبيش علياا عفاااك....

عصااام شد فكتاافهاا بجووج :الله يهديك انسرين قلت ليك ماوقع ليه والو...غير وااحد لكسيدة وخفيف...

نسرين زاادت خرجاات عينيهااا ورفعاات نبرة صوتهااا كااتندب مقاطعة هضرتو:اويلييي على كسيدة...الله خويااا ماات..خويااا مشااا فيهاااااا مشااا فيهاااا

عصاام بحدة:وقلت ليك ماوقع لييه واللو مزاال عاايش غير حادت بسييط تيقني والله مكانكدب عليييك.....بلا مااتشطني رخفي فيك نفس...

نسرين بنبرة باكية كاضربوليه على سدرو:نتااااا كاااتخبي علياا...اناا سمعت ماماا كيفااش كاانت كاتبكي فتيليفوون...باينة يعقووب وقعاات ليه شي مصييبة مااافيهااااش...

عصااام بنفااد صبر:واااا عبااد الله وااش مكاتسمعييش... رجوع الله تهدني شوية رااه بخيير..مقصح غير شي شوية

نسرين بدات كاتجر فيه بجهد مباغااش هضرتو دخليهاا لرااس...حااسة براسهاا غاتحمااق وخاايفة بلاا قيااس على خوهاا

نطقاات بلهفة:ديني داابااا لعندوو..دااابااا بغييت نشووفوو..هءهء..علم الله بخوياااا مسكيين كيف غاايكوون حاالو...يلااه ديني لع.....(سكتااات تواني ضربهاا ضو تحت من كرشهااا...لوون ديال وجهااا تبدل فلبلااصة غمضاات عينيهاا بألم شديد وحااد كاايقطع فيهاا لدااخل...شداات فيد عصاام بشدة مزيرة عليهاااا....و غوتااات على حر جهدهااا)ااااااااااه كرشييي...اااااربيييي

عصاام قلبو ضرب بجهد وخرج عينو...معرف بااش تبلى...وهو كاايشوف فيهاا قداامو كااتلوى بلحرييق كاتغوت لربي لي خلقهاا من لحر لي كاتحس بيه تحت كرشهااا

زااد شد فيديهاا ونطق مخلووع: بشوية عليييك..بشوية...بااش كااتحسي....

نسرين كاتهضر بصعوووبة ولاات حمرة كااتلهت واقفة وتانية ركاببهاا مغمضة عينيهاا بشدة:لحريييق فكرشييي لحريييق....أااااااي كااانتقققطع...بااينة لووولد وقعااات ليييه شيي حاااجة....ااااااه

عصام شدهاا وكلسهاا فوق سرير بزربة كايحاول يضبط راسو باش يعرف يتصرف:لا لااا مااغاوقع لييه واالو... تكاالماااي(رفع نبرة صوتو كااايعيط)خنساااااء...خنساااء...(شااف فنسرين لي مغمضة عينيها من لوجع ماابقاتش قاادرة تهضر)حااولي دخلي النفس وترخااااي....(زااد غوت)خنسااااااااء...

خنساء كانت فبيتهاا سمعاات عصام كايغوت بسميتهااا...وهياا تلبس عليهاا فرجليهاا بزربة ومشاات لعندو كاااتجري....دخلاات لبيييت وهيياا تشدهاا الصدمة...كاتشوف نسرين قداامهاا ݣالسة على سرير كااتوجع ووجهاا حمر بشدة بحالا شي حد قاجهاا... وعصاام كايحااول يسكت فيهاا وهيا حامياها لغواات

نسريين شادة على كرشهاااا ودمووووع فعينييهااا كااتلهت غااتسطااا بلحريق لي غااادي وكايتجهد:كااانتقطع اخنساااء كااانتقطع....هء هء....ولدي غااايمششييي غااايمشيي هء هء...اربيييييي

خنساء ضمااتهااا لعندهاا كااتسكت فيهاااا:شششش ان شااء الله مغاايوقع لييه والو لا نتي لااا هواااا...غير صبري شوية..صبري...

عصاام جاا طااير بعدماا ضبر على اللوطو عند واحد من صحابو لي فدرب.... طلع لعند نسرين كاايجري فدروووج...ݣعدهاا بشوية وهيااا عينيهااا بدااو كايتقلبووو...هزهااا دغيااا وهبطهاا بااش يديهاا لكلينيك...

تبعااتو خنسااء كاتجري من موراه ونطقات بصوت مرتافع باش يسمعهاا:تسنى هااني جاايا غاانمشي معااك....

بلخف دازت لبيتهااا.... جمعاات شعرهااا و هزات جاكيط كوير من لبلاكاار لبساتهااا على سورفيط لي كانت لابسة...لبساات بزربة سبرديلة فرجلهاا وهبطاات كاتجري مع الدروج لقاتو يلاه ݣلس نسرين فلور تاع اللوطو وديماارة...حلات لباب وݣلساات حداهااا حااطة جنب وجه نسرين لي باقا كاتنين من شدة الألم على كتفهاا...صااݣ عصااام طااير بلا عقل متااجه لكلينيك...

نسرين بألم شديد:أااااااااي...أرررربييي.....

نطق عصام كاايشوف فيهاا من لمراية: غير صبري شوية غاا شوية...قربناااا نوصلوو....

نسرين بصوت خاافت ولاات سخونة بزااف ولعرق كاينزل من جبهتهاا بغزاارة:ك كاانتقطع اع عصاام مقادراش نتنفس مزااال...كاانتق....(بااقي مكملااتش هضرتهااا حتااا سداات عينيهااا وغاابت عن الوعي)

خنساء بداات كااتضرب فحنااكهاا بشوية:لااا نسريين ماتغمضييش عينيبك...نسريييين...(شاافت فعصاام بخوف ونزعااج قوي)ناااري سخفات...

ضرررب بجهد على الڤولون بعصبية..وزاااد فسرعة كايصوݣ بجنوون و كاايتخطى عشراات اشاارة المروور مهامينووش...عقلوو وباالو كلو معااهاا خاايف لااتوقع ليهاا شي مصيبة....

وصلو لكلينيك...عصاام هبط من اللوطو بلا مايسكتهاا...كاايجري وقلبو كاايضرب بخوف شديد على نسرين ولبيبي فنفس الوقت...داز لجيهت لباب اللور حلو وهزهاا بين يديه...نطق مخااطب خنسااء وهو غاادي:سكتي طموبيل وسديهاا....

حركات ليه راسهاا بلإجاب وهو مشااا بخطواات سرييعة دخل من الباب الرئيسي تااع لكلينيك...

عصاام بلغوااات:شي واااحد يجي لعندي عفااااكم....

كانو شي ممرضين كايتحتو غير شاافوه دااخل كايستنجد وهماا يمشيو يجرييو لعندووو عرفو لحالة مستعجلة...جاا واحد منهم جاار سرير الطبي وقفو قبالتو ومد ليه يديه:بلااا مااتخلع...عطيهااا ليااا..

عصاام خنزر فيه ونطق بحدة:حيد يديك راني واقلة عارف كيفاش نحطهاا....

لممرض معاودش معاه لهضرة وزااد قرب لعندو السرير...حطهاا فيه عصاام وهياا مكاينااش فهاد لعاالم..غايبة على لوعي تماماً...شد فيديهاا وتمااا غاادي معااهم كايجريو باش يعتقوهاا... خنسااء دخلاات لكلينيك ولقاتهم يلاه غااديين بيها وهياا تبعهم...بقااو غاادين حتاا لغرفة العمليات وهياا توقفهم الممرضة:لاا ممنوع دخلو لداخل...يمكن ليكم تسنااو هناياا...

سلاات هضرتهاا ودخلاات سادة عليهم لباااب....عصااام مسح على وجهووو وغمض عينيه وحلهم بنرفزة...صورتهااا وهياا كاتألم وتوجع ولحالة لي وصلاات ليهاا ماباغااش تحيد لييه من عينيييه.... خاايف بلااقيااس ....خنساااء تنهداات وقرباات لعندوو قطع ليهاا قلبهاا ولكن مالقات ليه جهد.. نطقاات بترجي كاتحاول تواسيه:ان شاء الله غادي تكون بخير ومغايوقع ليهاا واالو لا ليهاا ولا لبيبي...غير هني باالك

عصام حاط يديه على راسو حااس بييه كاايزدح:كيفااااش غادي نهني باالي كيفاااااش وهيااا لدااخل معرفتهااا وااش حيا ولا ميتاا...ولولد وااش مزاال عاايش ولا ماات...(ضرب يديه مع لحيط)غاااانحمااااق...

بااقي كاايهضر حتااا جاا الدكتور لكبيير كاايقااد فكمامتو غاايدخل عندهااا...وقفو عصاام بترجي:دكتوووور...عفااك اماا ديير جهدك..راهااا حااملة...

قرب لعندو ونطق بنبرة مطمئنة:مااتخاافش...غاانديروو لي فجهدناا بااش نقدووها...ان شااء الله ماايكوون غيير لخير....

كمل هضرتو و وتخطاهم داخل مستعجل لغرفة لعمليات...وعصاام عض على صبعو مغززو بعنف...حاس بيديه مربووطين باااغي وماكرهش بديير شحاال من حاجة ولكن مقاادرش....ݣلس فوق من واحد من لكراسة لي محطوطين قبالت لغرفة...كايحس براااسو فشل ورجليه مابقاوش هاازينوو....

عصاام عقد حجباانو بتدكر وق بعصبية:تفووو كووون عرفت ݣااعمة نجاااوب على دييك لابيل تااع زفت....هيااا لي سباب هاد لبلا كااامل...

خنساء قربات وكلسات لعندو ونطقات بتساؤل محاولة تستفسر:قوليااا شنوو طرى راني لحد دابا مافهماا والوو؟؟؟

عصام شاف فيهاا:عيطات عليا نجاة وقالت ليا يعقوب ضرباتو طوموبيل وتقصح فيديه واقلة تهرسات...مكانش كايسحاب ليا وااش نسرين كاتسمعني كاندوي معاها...ملي ساقت لخباار تصدماات ومقدرااتش تصبر على خوهااا...تخلعاات عليه..ولخلغة هيا لي لعبات عليهاا حتاا شدهاا لوجع....(مسح على وجهوو كاايحاول يتهدن وحط عليه يديه بجووج)ماااعرفتش فين كاان مخبي لينااا هاادشي....يااربي غاا مايوقع ليهم وااالو...

خنساء بتأسف دوزاات يديهاا على ضهرو كاتصبر فييه:يكوون خيير...تفاائل...ربي معاهاا...

خنساء كانت كالسة حدا عصام لي منتاظر على احر من الجمر حاس براسو مخنوق غايحماااق ماخرج عندو حد مني دخلوهااا بالو مشطون معارف اش واقع ... شافت فيه باسف وحطات يدها على كتفوا بمواسات حاسة بالتوتر ديالو لي ظاهر عليه بالجهد ... صونا تليفونهاا شافت النمرة ووقفااات من حداه مجاوبة بهدوء : الو مهدي

المهدي حل الباب ديال اللوطو : فين الحبيبة ديالي واجدة انا راه شوية نكون عندك ...

خنساء تنهدات باسف كانت دايرة معاه يخرجوا : انا امهدي ماشي فالدار ... فصراحة نسرين عيانة شوية وجبناها للكلينيك ...

المهدي : اءء يااك لاباااس شنو عندها مسكينة ؟؟؟

خنساء باسى : غالبا عندها نزيف ... جاها الوجع بزااف ودابا راه دخلوها للبلوك ...

المهدي ركب بزربة : ياربي السلامة ان شاء الله يكون خييير ... سيفطي لي لوكاليزاسيون ديال الكلينيك انا جااي دابااا عندكم ...

خنساء بايجاب : داكوغ شكرا ... قطعااات معااه وسيفطات ليه العنوان ديال الكلينيك لي هما فييه ...

مساافة الطريق حتى دخل مهدي كايجري وباينة فيه مشطون ومهول بزاف على حاال نسرين وصاحبو عصااام ... شافهم فالكولوار ديال البلوك ... خنساء شافتو جاي يلاااه غاتدوي معاه وهو يخرج الطبيب من البلوك وكلهم اتاجهوا لعندو بترقب

عصااام بتساؤل وخلعة : امضرا ادكتور كيف بقااات؟؟؟

خنسااء حتى هي اللون مخطوف فوجهها : كيف بقات ادكتور ؟؟؟

الطبيب : ماتخافوش المريضة بيخير وعلى خير الحمد لله ... دابا راه ناعسة كاترتاح

عصاام شد فالحيط براحة نسبية مطمن من جيهتها كان غايسكت ليه القلب وعاد هز فيه راسو باستفسار : والبيبي ادكتور

الطبيب بتأسف : للاسف كاقدرناش نعتقوا الجنين الله يعوضكم اولدي ...

عصام رمش بعدم تصديق مشوكي من شنو كايسمع حس برجليه خواو عليه وكلس على الكرسي خاشي وجهوا وسط يدو بدهشة حط يدو على فمو كايحرك راسو بلا و قلبو كايتقطع ... خنساء تحجروا الدموع فعينيهااا حسات بقلبها ضرهااا على ولد خوهااا بلا قياااس كانت متحمسة غاتولي عمة ... عضات على شفايفهااا حاسة بالخنقة وهي كاتشوف خوهااا مشوكي وباين على وجهوا حزن شديد وضياااع ... الطبيب زاد من تماااا ومهدي بقا واقف مفيكسي فبلاصتوو مكايتحركش مقادر يدير حتى رد فعل ودنيه بداو كايصفروا وذاكرتو كاترجع بيه اللور ... نهاار كاانت هدى مراتو كادير اجهاض فكل مرة كانو كايبنيو امل انه غايكون عندهم وليد كانت هاد الاحلام كاتحطم مني كايخرج الطبيب ويقولهم خسرات الجنين ديالها وكاع جبل السعادة كاينزل على ظهورهم وخيبة الامل كاتكسرهم ... هادشي تكرر عليه بزاف ديال المرات لدرجة مابقاش كايقد يتحمل هاد المواقف ولو تكون ماشي ليه ... حس بالنفس تقطعات ليه وبدا كايحل الصدفة ديال الشوميز ديالو بزربة كأنه مابقاش قادر يتنفس ... تحت انظار خنساء لي نسبيا فهمات انه تذكر موقف فحال هاذا وقع ليه ... شرب شوية الماا كايحاول يتكالما وشاف جهة عصام لي بااقي مجمد فوق الكرسي ... تنهد وقرب لجيهتو كلس حداه وحط يدو على ظهرو : الله يعوضكم اخويا عصاام ... بغااه الله ...

عصام ساط بنفس عميق مخرجو من اعماق قلبو وهز فيه راسو ونطق بيقين : الحمد لله ... الحمد لله ...الحمد لله ...

خنسااء الدمووع نزلو ليهااا ماقدراتش تحمل المنظر ديال خوهااا قطع ليها فقلبهاا بلا قيااااس ... حاطة يدهاا على فمهاا حابسة شهقاتهاا بزز

المهدي : الله يصبركم اخويا ... عارف الموقف صعيب ولكن خاصك تأمن بقدر الله ومكتاابو ..

عصام حرك راسو بايجاب : الحمد لله مني هي ما وقع ليها والو ... الله بغااه ودااه ماعندنا مانديرو ... ( غمض عينو مأمن بقدر الله رغم صعوبتو ):، مكانش ولد الدنيااا ...لي بغاها الله مرحبا بيهاا

خنساء قربات محنية على ركابيها : الله يعوضكم اخوياا ... صبر راسك باش تكون مع مرااتك ونتوما راه باقين صغااار ان شاء الله يرزقكم ربي مرة اخرى ... خلي ايمانك قوي بالله ..

عصام بايجاب : ونعم بالله .. انا هاز الهم غير كيفاش غانقولها ليهاا ... غادي تحمااااق فيهااا ...

المهدي تنهد : غير نتا كون قوي باش تشد بيدهاا اكيد هي فلول غاتصدم ولكن غاتولف وتقبل الوضع ... ولي دارها ربي مرحبا بيها ..

عصام هاز فقلبو جبل ما عالم بيه غير الله حاس براسو مكتف وتالف ... نطق بايجاز : نتوما غير سيرو دابا للدار ماحد مهدي هنا يوصلك بااا غايكون مشطون من جيهتنا ... وزايدون ليل طااح وحنا ماعرفناش ايمتا غاتفيق انا غانبقى هنا واخا ...

خنساء : واخا اخويا انا الصباح غانوجد ليها حوايجهااا ونجيبهم معايا ... مايكون عندها باااس ...

حرك راسو بلا رد وهي بقا فيها بزاااف عارفة الحال صعيب عليه بلا قياس ... شاف فيها مهدي بمعنى غير يلاااه ...

المهدي زير على كتفو : مايكون باس اعصااام ... زاد هو وياهااا خارجين من السبيطار ... ركبو فاللوطو ومهدي تكااا على الكرسي كايتنهد شاد راسو ...

خنساء شافت فيه باسف : عصام مسكين عالم بيه غير الله . . واخا مكايبينش ولكن انا عارفااه مزيااان قلبو محروق من الداااخل ... القوة لي باينة فيه على برااا هي لي العافية لي كاتحرقوا من لداخل

المهدي شاف فيهاا : بسيف بسيييف ... احساس صعيب بزااااف وصعيب يتحملوا اي اب .... بصح الام كايبقى فيها الحال وكاتعدب حيت فقدات طرف منهاا ولكن الراجل كايكون عندو الم مضوبل ... كايشوف الولد لي حلم بيه ضاااع منو ومراتو قدامو كاتعدب وكاتحرق وهو عاجز ... عاجز انه يدير شي حاجة على قبلهااا من غير يواسيهااا ...مقادر يدير والو حيت مافيدوش ... قلبك كايتقطع عليهااا وعلى شنو خسرتي

خنساء حنات راسها بالعة ريقهاا : غاتكون تعدبتي بزااف مني طاح لبيبي امراتك اللولة ...

رمش بتتاقل : انا عشت هاد الشعور تلاتة المرااات ... وكل مرة كان الامر كايصعاب على لي قبل ... كل مرة كاتشبت بامل جديد وكاتصدم تاني ... حتى حاجة مايمكن تكون صعب من انك تفقد شي واحد باقي كاع ما شفتيه ولا فرحتي بيه ...

خنساء شافت فيه : وااش امهدي كون مكانش موضوع الولاد كنتي غاتبقى مع مراتك ... يعني ماكنتوش غاتفارقوا ..

المهدي حس بانه يمكن جرحها بهضرتو رغم انه دوا بعفوية ومراعاش لمشاعرهااا حيت كيف كان الحال كاتبقى مرأة ... نطق باعتدار : شوفي اخنساء مابغيتش تفهمي الموضوع بالمقلوب ... هادشي لي وقع لخوك ومراتو فكرني فشنو داااز علينا انا وهدى ... اناا هضرت غير على قبل الوضعية دياالهم ... اما موضوع فراقي انا وياهاا فراااه مكتاب ومقدر بالولاد ولا بلاااش وحتى كون مكانش هاد المشكل كنا غادي نتفارقو بطريقة اخرى حيت مامكتابينش نكملو ...

خنساء ابتاسمات : لا انا مافهمتكش غلط ... غير مني دويتي عليهااا مااعرفت المهم ....

ضحك شاد فيدهااا : انا دابا قلبي معاك نتي بوحدك ... والمااضي طويت صفحتو شحاال هادي ... غير تهناي من هاد الناحية ... كوني متأكدة ان هضرتي اليوم غير بدافع الانسانية وماعندها علاقة بمشاعيري ...

حطات يدها فوق يدو : انااا فاهمة هاادشي ... وعارفة بيلااا الموضوع صعيب ... ماديرش فبالك ...

المهدي ديمارا اللوطو : نمشيووو ؟؟؟

خنساء بايجاب : اييه يللاه راااه بااا غايكون مهول ...

كسيراا واتاجهوااا للداار وقلبهم بجوج ضارهم من جهة عصااام ونسرين لي فقدو نطفة منهم ... واكيد غايكون الموضوع صعيب بزااف عليهم

قد ‏نلتقي بأرواح ولا يكتب لنا رؤية ملامحها

و نحب كلمات مسّت قلوبنا دون ان نعرف كاتبها

قد نبكي مع عيون لم تراها أعيننا و قد نفرح لفرح قلوب نثرت بسمتها أحرفا و يبقى احترام الروح أسمى عناوين المحبة الطاهرة... الف سلام ورحمة على روحك الطيبة وجنة الفردوس مقرك ايتهاا الروح الطاهرة ... يا ملاك الاخرة دون ان ترى عيونك عذاب الدنيا 💔💔

عصام ݣالس فلكرسي مسند عليه ضهروو و مربع يديه...قبالتو كاانت نسرين ممدة على سرير الطبي..مبدلين ليهاا الممرضات و ملبسين ليهاا حوايج لمرضى ومغطيينهاا بإزار بيض خفيف...وإبرة السيروم متبتة فيديهااا...كاان ݣالس كايرمش بتتاقل كاايشوف فيهااا وهياا غايبة تماما عن الوعي...كايتسنااهاا تفييق... تنهد بحرارة،حااس بحرقة فقلبوو...وبحالا شي جبل تحط فووق ضهروو فجأة متقل عليه معرفش كيفاش يدير يحطوو....مصيبة ونزلات عليه بلا مايضرب ليهاا لحسااب....خداا نفس عميق وخرجوو بمهل...غمض عينيه سهى و بداا شوية النعااس كاايديه...عيااا بلااقيااس والإرهااق سيطر عليه...من الصبااح وهو كايجري ومن هادي لهاادي ودماغو ماحبسش من التفكيير....

نسرين بداات كاتسترجع وعيهاا...حلاات عينيهااا ببطئ...فلول كانت الرؤية مضببة ليهاا...شوية بشوية بداات كاتوضاح الصورة قدامهاا...كاتحس براسهاا تقييل...وداكرتهاا مامسعفهااش تتدكر حتاا حاجة...دورات عينيهاا على لمكاان كاتحاول تستكشفو بأنضارهاا...هزات يديهاا لي عليهاا ابرة سيروم طولات فيهاا شوفة لي لحضات وهيا مافهما والو...

داارت لجيهة فين ݣالس عصام لمحاتو ونطقاات بصوت خاافت:ع...عصااام...

عصاام غير سمع صوتهاا وهوا يحل عينيه بزربة...بتاسم بخفوت و قرب لعندهااا وحط يديه هلى شعرهاا:على سلاامتك..فقتي...

نسرين تحركات بشوية عليهاا من لبلاصة وخسرات ملاميحهاا من ضو لي ضربها تحتهاا..

عصاام بإمتنااع:بشوية عليك،ماتحااوليش تحركي بزااف...رتااحي...

ردت عليه كاتهضر بتتاقل:ش..شنو كااندير هناااا...شنوو وقع لياا؟؟!

عصاام بقاا سااكت كايدوز يديه على شعرهاا معرفش كيفااش يجبد معاهاا لموضوع...مااهيا الى تواني معدودة وهوا يجي السيناريو كاامل دياال صبااح فداكرة نسرين...بلعات ريقهاا وحطاات يديهاا لي بدات كااترعد على كرشهاا ونطقات بتلعتم:وو..ولدي...ولدي بخيير يااك...

عصام زير على قبضة يديه....لسانو تربط بمعنة الكلمة مقدرش ينطق...اول مرة يحس برااسو ضعييف ومقادر حتاا يتصرف كيف المعتااد...

نسرين بتكراار:عصااام هضر...قولياا ولدي بخيير...هو مزاالو معانا....يااك ماوقع لييه واالو

عصام سكت تواني...وشد فيديهاا ناطق بهدوء:ولدنا انسرين بغاه الله وخدااه مناا... نتي درتي إجهااض...قدرو يعتقوك نتي ولكن لبيبي مشا عند الله...

نسرين دمووع تحجروو فعينيهاا وزمن توقف بيهااا.... بداات كاتدخل النفس بصوت مسموع مقادرااش تنطق..الدم قرب يجمد فعروقهاا من تأتير الصدمة وابشع خبر سمعااتو...لولد لي كانت فرحانة بيه لدرجة كبيرة وكاتوجد ليه وتحسب الدقايق وساعاات مشتااقة بااش تشوفو وتحضنو وضمو لسدرهاا...هااهيا دابا جايهاا خباار انه مابقااش معااه...خداه منهاا الله لي رزقهاا بيه نهاار اللول..خبر مساهلش بلمرة تتقبلو ولا حتى تستوعبو....

وسعاات لحلة تااع عينييهااا..وغوتااات على حر جهدهااا كااتبكيي:لاااااااا....كااااتكدب...ولدي مزاااالو معااااياااا....نتاااا كاتكدب عليااااا.....ولدي مااامشااش...لااا ماايمكنش يممشييي ويخليينييي....أهئ أهئ واااالدي...

بداات كااتنتر فبلااصتهااا...وتفرك فرجليهااا..سدرهاا كايطلع وينزل من تأتير شهقاااتهاا المتتالية....ودمووع كاينزلوو من عينيهااا شلاال خاارجيبن من اعمااقهااا لي تحرق بناار الفرااق...

عصاام نااض من بلااصتو بلخف وشد فدرااعهاا بجوج كايحااول يهدن فيهاا وهياا هاايجة منهااارة كليااا:نسرييين رجووع الله....ماااتديريش هاكا فرااسك....ربي ليي داااه معندنااا ماانديروو...عفاك احبيبتي تهدني...

نسريين كاتحااول تفك منوو دراعهااا وكااتبكي بصووت مسموووع:أهئ أهئ انااااا شنووو دررت حتااا نستااهل هااادشي....اشنووو درت حتاا يمشي ليااا ولدي كبدتي وانااا بااقي كااعمة شفتووو...أهئ أه‍ئ....واالدي..بغيييت وااالدي

الطبيب وشي ممرضات كاانو كاايديروو جولة ليلية على لمرضى سمعووو غواااتهااا وجااو كاايجريو...لقااو عصااام مزاالو كاايشد فيهااا دااير جهدو وفوق من جهدو معاها بااش يهدنهااا...وهياا عقلهااا غاايخرج...طبيب عرف راه جاهاا نهياار عصبي...مشااا بزربة جاااب إبرة مهدئ ورجع لعندهاا لقااهم كاايشدوو فيهااا وهيااا كااتغوت ماصبرااتش نهائياا:طلقوووو منيييي... بعدووو علياااا....بغييييت ولدي...

بعد الطبيب عصام من عليهااا وتبت ابرة المهدئ فسيرووم...تواااني حتاااا عطا المهدئ المفعول ديالو....ترخااات و بدااات كااتغمض عينيهاا بتتاقل ونتاقلات لعالم لااا وعي....

عصاام شااف فطبيب ونطق بحزن وهو منزعج :واااش مغتديش تهدن...غاتبق كاتبكي هاكاا ا دكتور...مكااينش شي حل؟؟!

الطبيب:ضروري تجيهاا نوبة عصبية فليامات لولة...ولكن بشوية بشوية ومع لمدة غاتبداا تعاايش مع لوضع وتنسى...ديماا لامامو مكاتقدرش تصبر الى دارت اجهااض...وسي نوغماال راه طرف منهااا هدااك لي ضااع(كمل برجااء غادي خاارج)مايكون باااس...

قادو ليهاا لممرضات راسهاا على لوسادة وغطااوهاا مخلينهاا ترتااح...عصاام تنهد بعمق ورجع ݣلس فبلااصتو محطم بمعنى الكلمة..كااابوس وكايتمنى يفييق منووو فأقرب وقت....شااف فنسرين بتحسر و قرب يديه بشوية لعند وجهاا الشااحب وبداا كايحيد بعض الخصلات من شعرهاا على جبهتهااا...قرب وجهوو لعندهاا وطبع قبلة مطولة على جبينهاا بحناان وبقاا فنفس الوضعية مغمض عينيه...بلا مايشعر وبشكل غير مسبووق عمرو عينيه بدمووع وغرغرو...شي حاجة فوق من طاقتوو ومبقاش قادر يستحمل...كان فديك اللحضة بحال الطير لي بلا جنحين...مكسر كليااا...كايعاني لأمرين...من جهة مرتو لي بقاات فيه لأقصى درجة كايشوفهاا كاتعدب وتقطع قدامو وومعندو مايدير ليهاااا....و من جهة ولدو لي ضااع وهو مزال مافرح بييه ولا حتااا شاافو...ماحليتو لا هاادي ولا لديك...محطووط فموقف صعب مايحسدوو عليه حد...

كانت نسرين ݣالسة فوق السرير فبيتهااا...دمووع ماتحبسوش من عينيهاا...ملي جات من لكلينيك وهياا كاتبكي وتنخصص مصابراش....دموعهاا كانو كاينزلو حاارين على خدهاا...مابقاش عندهاا الجهد بااش تغوت...كانت كااتبكي بصوت بااح...قلبهاا كايتمزق من حر الصدمة....مزال كلماات عصام ملي قاليهاا "درتي إجهااض" محفورين فدماغهاا مقادراش تنسى ديك اللحضة...

كانت نجااة كالسة بجنبهاا متأترة كاتصبر فيهااا وهياا براسهاا ربي لي عالم بيهاا غير مكابرة وصافي...ونسرين حالفة ماتسكت...عصام ݣالس حداهاا حتاا هوا كايسايس معاهاا باش تهدن وشاد معاها لخاطر لأقصى لحدوود...مابغيش يشوفها نهائيا فديك لحالة..خاطرو ضاارو من جيهتهاا

نجااة بملامح حزينة وعينيها مغرغرين :وصاافي ابينتي..الله يرضي عليك..شوفي حالتك كيف ولاات...وااش بغيتي تقتلي رااسك...صبري راه قدر الله هدا...

نسرين بنبرة بكااء:وااا ولدي اماما...أهئ أهئ...ولدي مشاا ومعمرني غانشوفو...مشاا وخلا حرقة فقلبي عمرهاا ماتبرى...

عصام تنهد ومسح على دراعهاا:كلناااا بقا فيناا وقطعناا من لدااخل...ولكن خاصناا نصبرو...ربي مكاايدير الى لي فيهاا لخير...

نجاة:ايه ابنتي سمعي من راجلك عندوو الصح...ربي مكاايدير غير لي فيهاا لخير...ما عرفتي هاد لولد ياكماا كان غايخرج شي دري صعييب ومكايسمعش لهضرة..وربي خداه لعندو باش يعوضكم خيير منو...

نسرين كاتمسح على حنكهاا:أااه وماعرفتي كاان غاايخرج شي طبيب ولاا مهندييس....الله على كبيدتي... أهئ أهئ الله على ولدي ومشاا علياا وانا باقا حتاا مافرحت بييه...

عصاام بنزعااج:والله يهديك انسرين ستغفري لمولااك...رااكي مومنة زعمااا...واش باغا تبقااي طعني فراسك بحال هاكا ونتي مريضة حتاا تبعيه...الله سبحان وتعالى بغااه خدااه صاافي واش غاترضيه بلبكاا؟!!

نسرين دارت يديهاا على عينيهاا كااتبكي وتشهق بحرقة...

نجااة برجااء:عااار هاداك لي رضعتي مني إماا براكة علييك ابينتي... راك طيبتي ليا خااطري بدموعك...ولدك راه طير من طيور الجنة داباا...غداا يشفع ليك قداام الله....صبري الله يرضي عليك....

نسرين كاتشوف فلفراغ ونطقاات بتنهد:شحااال وانا كانتسنى نحمل...شحااال وانا كانترجى يطيح فكرشي...شحااال وانا كانتسنى نشوفو قدام عيني نهزوو ونفرح بييه...(غمضاات عينيهاا كاتهبط الدموع لي حجبو عليهاا الرؤية)داباا مابقااش...مااابقاااش...نتوماا محااسينش بيااا...فرااق ولدي حرق لياا قلبي بحاال الجمرة...

نجااة ماصبراتش ونزلو دمووعهاا حتاا هياا...جاتها صعيبة بزاف تشوف بنتهاا هكاك...

عصاام خرج تنهيدة حارقة من صدروو..وضمهاا ليه حااط راسهاا على كتفوو:نسريين...نتي الى كنتي كااتعااني حيت ولدناا مشاا...اناا كانعاني على قبلكم بجووج...هوا لي ضاع ومشاا عند الله...ومن جهة نتي لي كااتقطعي هااكا واناا مقاادر ندير ليك واللو...كانعااني كتر منك بدرجااات...ولكن شنو غااندير؟؟! نݣلس نبقا نطعن فراسي ونقتلو؟؟!شنوو غانستاافد؟!نطرطق متلا؟هادي هيا لحيااة.... مرة معانا مرة ضدناا...ماشي ديماا كاتعطيناا لحوايج الزوينين...ضروري من لإبتلااء...ربي كايمتاحن صبرناا...واش راضيين بقدروو ولا لاا..(سكت تواني وطبع قبلة على جنب جبينهاا)ومن بعد كايعوض...واناا متأكد غااضي يعوضنااا...

نجااة مسحاات على درااعهاا:بصح...نتوماا مزاالين صغاار...مزاال قدامكم وقت طوييل...الى بقااا لعمر ان شاء الله...مزال تولدي ولاد و بناات...(ضحكات بشكل خفيف)ههه حتاا تولي تجي عندي وتقوولي لياا..ومامااا ولاادي عيااوني...

عصام بإبتسامة خفيفة:هه ومع نسرين صبرهاا قليل ودغياا كاتعصب..غاتجمعني حتا انا معاهم وتقولياا...قرهتوني نتاا ولادك غانخرج بحاالي ماتعرفوني فين زدت...

محسات نسرين حتا بتاسمات بجنب و بعدات شوية عليه ومسحات دمعة من عينهاا وردت عليهم بصووت مبحوح:لا لا والله مانقولهاا؟؟!اناا ماانقدرش نتفارق معاكم وخاا معرفت شنو يوقع...على طير كايتقلو عليه جنااوحو...

عصام:غير كانضحكوو...ان شاء الله غادي نربيوهم اناا وياااك ونتعاونو عليهم بجوج...وصافي فكي هاد تغوبيشة...مكاتجيش معاااك...

قاطعااتهم خطواات نصيرة جاايااا هازة بلاطو دايرة فيه زلافة فيهاا حسوة الشعير وواحد كاس تاع لحليب بحب الرشاد...

ملي ساقت لخباار لمشكل لي وقع لنسرين ولبيبي لي نزل..جات من لخدمة طايرة...بقاا فيها لحال بزااف...حتا هياا كانت فرحاانة بيه فرحة قدها قدااااش...وتصدماات ملي ساقت لخباار..

نجاة شافت فيهاا وقفات واخدة من عندهاا لبلاطو:ربي يخليك أختي نصيرة...عدبناك معاناا...

نصيرة بنفي:واش زلافة لحسوة وكويس تلحيب غاتعدبيني عليهاا..على الله غير تبغي تشربهم...

عصاام ناض وقف:هاني غادي خارج...(شاف فنسرين ومسح على خدهاا بحنان)وصاافي بركة...

كمل هضرتوو ومشاا خرج من لبيت... نسرين هزات لعين فنصيرة وهياا تزيد تحصر... وتأنيب الضمير بدا كايحيط بيهااا...مفكرة نهاار قالت ليهاا "مامجرباش لحماالة مغاتحسيش بيااا"....هيا مقصدات فيهاا والو..كانت منفاعلة ومعارفاش شنو كاتخرج من على فمها فلحضة لغضب...ولكن تقدر تكون جرحاتهااا بلا ماتحس...

نطقات بلا ماتشعر بنبرة مخنوقة:دنوبك انصيرة هما لي خرجو فياا...داك نهار ملي قلت ليك على لحماالة.... انا والله ماقصدت نجرحك...

نصيرة وسعاات نضرتهاا و قربات لعندهاا:اويلييي نتي مزالك شادة فديك لهضرة...معندك عقل...شتي اناا نسييتهاا كون مافكرتيني فيها دابا ݣاعمة نتفكرهاا...وزايدون ياك تسامحناا انا وياك ولخواطر صفاات...

نسرين حدرات راسها :وخا هكاك..باينة بقيتي شاادة من جيهتي...وربي خداا ليا ولدي وخلاني بلاش بااش نحس بييك...

نصيرة:ماتقوليش هاكاا..هداك سميتو لمكتاااب...سوى قلتي ليا ديك لهضرة ولا مقلتيهااش...كان مكتاب الله غايتصرف...

نجاة نطقات مخاطبة نسرين بجدية مكانتش عارفة واش قالت ليهاا ديك لهضرة:لولاد ابنيتي قسمة ونصيب...معمرك تهيني شي واحد بيهم...حيت ماشي بيديك ولا بيدهاا...بيدين الله..هوا لي كايعطيهم..وهوا لي كاايخدهم الى بغااا

نسرين كاتنخصص بحرقة:أهئ أهئ..معمرني بااقي نعااود...

نصيرة شتتات ليها قلبهاا..هياا من ديما واخا طبعهاا صعيب وقاسح...ولكن حنينة ودغياا كاتأتر وتسامح.. نطقاات بهدوء:صاافي نسااي انا والله ماشادة من جيهتك...خودي دابا كولي ليك شوية وبركة عليك من لبكاا راك غاتقرصي...

نسرين:لا مابغيت واالو...مقاداش نااكل...غير ديه

نجااة:لوااه خاصك تاكلي شي حاجة واخاا غير شوية..راك مواكلة والو من لبارح...

خدات نجاة لبلاطو وحطاتو على فخضهاا وبدات كاتهز بلمعلقة وتوكلهاا بيديهااا...

نصيرة بتساؤل:كيف بقا ولدك بعدا..مع تلفة وهاد لمشاكل كاعمة سولتك عليه....

نجاة:شوية و صافي...راه حتاا هوا زادني بهمو...تهرس من يديه ودارو ليه لݣبص...خليتو دابا يلاه شرب الدوى ونعس...(خرجاات نفسهاا بحزن وعينيهاا غرغرو)تشويت فيهم بجووج دقة وحدة...عوينة وطرطقات لياا فولاادي...لحمد الله

نصيرة برجاء:مايكون بااس...غمامة ودايزة...الله يجعلهاا مغفرة الدنووب...

نجااة:اميين...الله يخلي ليك صحيحتك و ماتشوفي بااس

عطاات لنسرين تااكل...وبقاو معاها بطليب ورغيب حتاا كملاات زلافتهاا وشربات شوية تلحليب...سالات وحسات براسهاا ترخفاات شوية...غطااوهاا وخلاوهاا ناعسة فبيتهاا كاترتااح...ونجاة كادعى معاها باش تصبر وتستحمل هادشي لي جرى ليهاا...

خنساء هزات الصينية ديال اتااي واتاجهاات لبيت الكلااس كان العربي كايتفرج فالاخبار كيف العاادة ... حطاتها ليه فوق الطبلة

العربي : الله يرضي عليك ابنتي ... كبي ليا شي كاااس ...

خنساء كلسات حداه كاتكب ليه اتاي ماداه ليه : هاكا ابااا ...

شد عليها : شكرا ابنتي لهلا يخطيك عليااا ...

خنساء تنهدات : فصراحة ابااا عيط ليا دابا مهدي ... وقررت انا وياه نأجلوا العرس حتى يدوز هادشي وتنسا نسرين شوية ...

العربي حط الكاس ديال اتااي : لاااا يااا بنيتي مكاين تأجاااال ... الولد مشا عند مولاااه ربي بغاااه وداااه ... والحزن رااه مامزيااانش مكايبغيه لا ربي لا عبدو ... العرس غايبقى فوقتووو ومكتاب مولانا راااه تصرف ....

خنساء : ولكن اباا واش مكاتشوفش حالة عصام ونسرين كيف دايرة وهاداك راه كبدتهم لي مشاااا واش هما حازنين عليه وانا نعرس بحال الا ماوقع والو ... مانقدرش ابااا ...

العربي تنهد : سمعي اخنساااء ... الولد رااه مشا ويلا اجلتي العرس راه مغاديش ترضيه ... وزايدون نتوما موجدين كلشي وعاطيين عرابنكم وفلوسكم ... ومرت خوك راااه بسيف عليهااا تقبل مكتاب ربي واخا صعييب ...

خنساء : لا ابااا انا مانقدرش نضرب فخويااا وهو مافرحاانش ...

قاطعهاا عصام لي سمعهم : وشكون قالك مغاديش نفرح ... وحنا نيت خاصنا لي ينسينا فهادشي ومانلقاوش حسن من فرحك ... لي عطا الله عطاااه ... غير خلي كلشي فوقتو ... انا غانتقلق منك الا اجلتي عرسك ...

خنساء : ونسرين ؟؟؟

عصام : الله يهديك بحال الا مكاتعرفيش نسرين ... هي راااه بالعكس بالفرحات عليها تلقى فاش تلاها ورا هادشي لي طرااا ليهااا ... ومن هنا للويكاند ان شاء الله غاتكون ولات بيخييير غير تهناي من جيهتها وكملي شغلك فين خليتيه ...

العربي بتأكيد : خوك عندو الحق ابنيتي ... حتى حد مايقدر يبدل قدر الله ... وراه لي مكتب علينا غانشوفوه ... العرس ماعندو مايغير من غير نرتاحو شوي حتى حنا ونساااو خسارتناا ...

خنساء مالقات ماتقول : واخا لي بان ليكم ... ايوااا نوض نعلم المهدي باش مايلغي والو ونشوف عمتي الا مسالية تمشي معايااا نشري شي حاجات ...

العربي : اييه نوضي ابنتي بطري بشغلك راه ما بقا وااالو وقضي غراضك .... والفلوس راااه عند عمتك لي خصاتك خوديهااا

ابتاسمات ليه : لهلا يخطيكم عليا ...

عصام : الله يسر ليك ... ناضت من حداهم طالعة تعلم نصيرة وطل على نسرين تراضيها حتى هي باش ماتاخدش موقف حيت غادير العرس وهي فديك الحالة ...

العربي : كيف بقات نسرين ؟؟

عصام تنهد : واخاا هكاااك مصبرة راسهااا ... انا كنت خااايف لاااا تحمااق سااعة شدات فرااسهااا شوية ... واخا رااه بقا فيها الحااال ولايني ماعندنا مانديرو ....

العربي : شد بيدهااا رااه هاد الليام صعيبة ... وان شاء الله من بعد يعوضكم سيدي ربي فيها خييير ...

عصام بايمان : ونعم بالله ابااا ... انااا غانوض نطل عليهااا ....

العربي حرك راسو بايجاب وكمل تفراجو فالاخبااار وعصام طلع لبيتو ....

يالا يا البنات قولو لجيرانا ... يجيبو الزغراتات الليلة ليلة الحنا

يالا يا البنات قولو لجيرانا ... يجيبو الزغراتاات الليلة ليلة الحنا

حبيبي غدا يجيبلي هدية ... دفوع بعيساوة ودقايقية ...

حبيبي غدا يجيبلي هدية ... دفوع بعيساوة ودقايقية ...

كلشي يفرح معايا وانا فالعمارية ...

فرحة عمري هاهيا ربي حققها ليا

عريسي بارز حداية لبسني لخاتم فيدية

يالا يالبنات قولو لجيرانا يجيبو زغرتات الليلة ليلة لحنة

نكافة دوري بية لبسة شلحة وفاسية

شمالية وصحراوية و لكاطو بصوارية

يالا يالبنات قولو لجيرانا يجيبو زغرتات الليلة ليلة لحنة

حبيبي غدا يجيب هدية دفوع بعيساوة ودقيقية

كلشي يفرح معايا وأنا فلعمارية

بارزة بقفطاان ابيض مطروز بالاخضر تقليدي ديال الحنة ومضمة ذهبية حازمااه بيهااا ... طالقة شعرهااا على راااحتو وميكيااج عرائسي رااائع ... مجوهرات خطيرة محلقة بيهم .... فرحااانة عاجبهااا راسهاا فابهى حلة ... دايرة بيها كلسة ديال الحنة بلدية على اصولهااا ... مجموعين فيها غير البنااات ديال الدرب و فتيات العائلة لي باقين عزبااات .... دايرين برزة كاتحمق فسداري وسط الصالون الكبيير مزين بيزااار ديال الحنة ومخيدات فالجناااب ... والطبلة محطوط عليهااا كموساااات ديال الحنة والورد والمبيخراااات دايرين على الصاااالون كااامل ريحتو واااعرة ... وحلوة فيها فقط جوج الوان الاخضر والابيض خصيصا لهاد المناسبة والصواني اتاااي .... مع طيافر صغااار جنب الصاالون عامرين بالحنة ورق ومزينين فوق منهم بشرائط توب كايحمقوا للبنااات لي حاضرين .... وعاد طبيلة صغيرة جنب خنسااء عليهااا زلافة ديال الحنة وشميعااات ديال الريحة حداااهم ... حاطة عليهاا مخدة فاللون الاخضر دايرة عليهااا يدهااا لي مزينة بخاتمها ديال الماريااج ومقادة ضفيراتهاا كايسطيو ... ماداها للحنايااا كاتنقش ليهااا ... وعاد جوج مساعدات كاينقشو للبنااات لي باغين يحنيو ...

رانيا دايرة صبيع فيدها ليسر خفيف مع قفطااان فالاخضر كايبري فرحااانة كاتشطح على الموسيقى .... ومعاها نسرين حتى هي بنفس القفطاان كأنهم اشبيلات العروسة كاتحرك بشوية بحكم باقا عيانة واخا دااازت ايااام ولكن كاتحاول على راسهاا ... وجاها الفرح فوقتو نساها فلي طرا

رانياا مخاطبة النقااشة لي كاتنقش لخنساء : ديري ليهاا غير صبيعاات خفاف خلي رجليهااا حتى نساليو باقين باغين نشطحو ... ياك اخنسااء ؟؟

خنساء ابتاسمات : ايييه باقين باغين نحيحوا احبيبة ديري لي غير صبيع براكة اصلاااا مابغيتش نكتر ..

النقااشة : هي اللولة اخنساااء ...

نسرين بتأكيد : غير هو المياء مغاتمشي حتى تنقشي ليا انا ليدين والرجليين ... شحال وانا مشهية نقش عندك وجابك الله لهنا...

النقاشة : الله اودي كوني هاانية ... غير نسالي ليها وانا معاك

خنساء هزات التلفون باليد لي مزال مدايراش فيها الحنة : شفت سارة تعطلااات اولااا

نسرين : دابا تشوفيهاا جااات اصلا هاديك ماتفلتش هاد النهار ههههه ...

رانيا بنشاااط : ايوااا يلاااه البنااات نوضو نشطحوااا ... نوضواااا ...

ناضوا معاهااا كايتمايلوا على ايقاعات الاغنية وخنسااء كاضحك ليهم عااجبهاا الحاال باغاا غير ايمتااا تسالي ليهااا يديها وتنوض تشاركهم فالشطييح ...

وقفااات اللوطو ديال مهدي قدااام الباااب ... هبطااات منهااا ساارة لابسة قفيطين خفيف ديال جوهرة مبتاااسمة وعاجبهاا الحااال وهازة فيدهااا صينية صغيرة محجرة عليها توب اخضر ... محطوط عليهااا الكموسات ديال الحنة والورد وواحد جوج حوالق ديال الذهب فبواطتهم سيفطاتهم نادية كهدية للحنااا ديال خنساااء ... شافت جهة الباب لور وهزات حاجبهااا هبطااات منو ملاااك بجلااابة متولة على حقهاا وطريقهااا مطروزة فلبو غوا ... وصباااط علي مخلية شعرها مسبسب على ضهرهااا ... هابطة راسمة ابتساامة مصطنعة على وجهها وهازة فيدهاا صااكهااا والكادو فاليد لوخرااا كاتشوف فيه وتبتاسم بشر عاجبها راسهاا

المهدي : مني تساليو عيطو ليا نرجع ليكم ...

سارة بايجااب : داكوغ ميدو ... ( شافت فملاك ونطقات فوق النفس محاملاهاش ): يلااه ...

ملاااك حركات راسهاا بايجاب وشافت فمهدي : ميرسي مهدي ..

ابتاسم ليها : افيك بليزييغ ... ركب وزاد ديمارااا وهي كادور عينيهاا فالدرب هازة حجبانهااا وتبعاات ساارة لي سبقاتهاا كان باب الدار محلول بحكم شي خارج وشي داخل .... تقدمواا جهة الصاالون وملاك هازة خنافرهااا لسماا حاسبة راسهاا ماعرت فين ... دخلات سارة لي غير شافتهااا خنساء ووسعات ابتساامتهااا : ساااااارة على سلااامتك يلاه كنت.غا.... ( حبساتها فور ما لمحااات ملاااك ورااهااا كحلات بالعمااا )...

سارة قربات عندها باستها : اهلا مرات خويا الحبيبة ... ( شافت فيها باعجاب ): اوووو جيتي كاتحمقي ما شيغي ...

خنساء ضحكات وعينها على ملاك : ربي يخليك ازين ديالي حتى نتي جيتي فنة ... ( عنقاتها ودوات فودنها بشوية ): هاد السكوليط اش جابها هنا ؟؟،

سارة ضحكات وجاوباتها بهمس : ماما حلفات حتى نجيبها معايااا ... ايوااا ومالقيت ماندير وجبتها ...

خنساء : دعي الله اسااارة دعي الله ماترجعش مهرسة من شي رجل ولا يد ...

سارة : ههههههه من عندي عطيتك لوردر ... غير خودي راحتك هههه ...

بعدو على بعضياتهم كايضحكو وسارة كلسات حداهاا ... تقدمات ملاك جهتها هازة حاجبها كاطلعها وتهبطها بنظرات قرطاس ...

خنساء بصواب مصطنع : مرحبا بيك ا...( على اساس نسات للاسم )..

سارة ضحكات : ملااااك ملاااااك ...

خنساء كملات باستفزاز : اييه الله يفكرك فالشهاادة ... مرحبا بيك املاااك ... زارتنا البراكة نهار كبير هاذاا

ملاك فوق النفس : الله يكبر بيك ... مبروك عليكم والله يكمل لي بقا على خير ...

خنساء : امين ياااربي ... الله يتمم الباقي على خير ويحيد علينااا عينين الحسااااد يااااااااربي ...

ملاك ميقات : اميين ... ( كلسات تما فالجنب دايرة رجل على رجل العافية شاعلة فيهااا كاتشوف فخنساء غير بنص عين محاملاهااش ) ...

رانيا تخشات فخنساء : شكون هاد عود الند ... ( بتذكر ): ماشي هي لي خدامة عند المهدي شفتها واحد النهار الا ماخفت نكدب ...

خنساء تمطقات : هي هي ... واحد السفريطة منها ماااكااان ... عينيها غير كايدورو نحلف عليهاا كانت عينها فالمهدي ...

رانيا كاطلع فيها : يااربي السلااامة السم مقطر ليها من العينين .. غير ردي معاها البال بحال هاد النوع يدير كلشي ...

خنساء ابتاسمات : غير تهناااي عليا ... انا جاااب ليا ربي باااش نتلااهااا حسيت بالملل نيييت نلقى فااش ندوز الوقت فحياتي الجديدة ... مزاال خبزتهاا طييب على يدي ... بالمهل كايتكال بودنجاال

رانيا ضحكات : على ما باان ليا توحشتي الشيطااان لي فرااسك شحال وهو شااد كونجي ...

خنساء بعجرفة : وعلاااه انا حاطاه ينعس راه غير كان مرتاح ملاقي لمن يخطط .. غير بلاتي بيا ولا بيها غانوريهاا بنت السايب شكون ...

رانيا : هاكاا نبغييك هههه .... ضحكوو مع بعض وكملوا الجموع مع سااارة فرحانين

يتبع....