بنت السايب الجزء السابع

من تأليف Jouhaina Elalaoui و Maryam Amouna

فدااار وااسعة مقادة بأتات راقي وكلاااص كاايبين على اختيار مولااه ... كلاسيكي عصري وكلشي متول مقااد فبلاصتو بطريقة انيقة على حقها وطريقها ... كالس عدنان لابس نظارات ديال الشوف كايقرا جوغناال مكونسونطري وحداه كااس ديال العصير بالفوااكه الجافة ولافوكا كيف العاادة موجدوا بيدو ...

سمع الحلاان ديال الباب وهز عينو عرفها ختو لي كا تجي فهاد الوقت ... خديجة قربات عندو مبتااسمة : اوووف سخفت ...

عدنان بهدوء : النهار كامل ونتي تدوري بسيف ما تعياي ... هزي هاد الكاس شربيه بردي بيه ...

خديجة : لا لا غير بصحة غير كايتقل عليااا ...

حط داكشي لي فيدو وحيد النظاظر وشاف فيها بتساؤل : اش درتي ؟؟

خديجة كاتنش الهوا بزيفها : فااااش ؟؟

خنزر فيها : واش غاتبقاي تفلااي ... دويتي مع عائلة البنت ولا لااا؟؟

خديجة : باااقي يلاااه سيفت ليهم عتيقة هي لي غادوي معاهم ... غير يجاوبوها ترد عليااا ...

عدنان : ممممممم مزيااان ...

خديجة : شفتي البنت؟؟؟

عدنان دور راسو : احم لااااا فين غادي نشوفها ؟؟

صغرات فيه عينيها : زعما انا مكانعرفكش ... جيني نيشااان

عدناان : اييه شفتها ... سولت علييها وشفتها فالزنقة البارح مني كانت مسخرة ... بالحق غير من بعيد مابغيتش نعيق ...

خديجة ابتاسمات : كيف جاتك ؟؟؟

عدنان : كيفاش كيف جاتني اش هاد الهضرة .... سيري شوفي الا عندك شي شغل قضيه ...

خديجة تنهدات و بلعات ريقها : على مولانا يصدق ليك هاد الزواااج ... ماتبقاش زوج طلق ... ياااربي

عدنان بتحدير : ردي الباااال مابغيت حتى واحد يعرف هاد الزواج ... بنادم الا تبعك على الحاجة موصيبة

خديجة : ايييه راااه قلت ليييك بناادم لي داير ليك شي حااجة ولاايني هاد المرة بحول الله غادي يتيسر ليك كلشي ... السترة السترة مزياااانة

عدنان : يلااه كملت واحد الدوااا .... ان شاء الله يكون نفعني ... نتمناو خيير

ردت عليه برجااء : ان شااء الله ... (كملات وهيا واقفة) إوى نوض نوجد ليك مااا تاااكل ...

حرك راسو بايجااب وزاادت من تمااا دخلات لكوزينة وهو كمل من جورنال ديالو كايقرااه بتركيز

ماهيا الى دقائق حتاا خرجااات خديجة من الكوزينة كاتفرنس وتصلي على النبي : الصلاااااا والصلاااااام على رسووول الله ... لا جااه الا جااه سيدنا محمد الله مع الجاااي العااالي .... يووويووو يووووويي

قاااطعهااا عدناان مخنزر : اللقوة .... هادي هي سترة سترة ... طالقة حلقك حتى وصل لنص فاولاد اوجيه ...

خديجة قربات كااضحك :مبرووووك ... مبروووووك ... الف مباارك ومسعوود ...

عدنان شد راسو بلا حول : هنينااا ابناادمة ...

خديجة : اسيدي خليني نفرح بيك.. مبارك ومسعود ... رااه واافقوااا ... الله يجعل كلشي مباارك ومسعود ...

عدناان ابتاسم بخفوت : اميين ... شنو قالو ليك ...

خديجة : انا دويت مع عتيقة وقالت ليا رااه وافقواا ... وراه دارو مغانا فلخر دسيماانة ... ان شاء الله

عدنان : ابيه خير ان شاااء الله .... نتي تكلفي بشنو غايخص وماتهزي هم لحتى حاجة ...

خديجة : الله ياودي كون هاني غانحمر ليك الوجه ... ايواا على مولاناا يصدق هاد الزواج حسن من اللولين ...

عدنان عقدهم : يلاااه سيري قضي غرااض

خديجة بخوف وهيا كتشوف فيه متوترة : خاايفة اخويااا يطراا ليك فحال اللولين

خنزر فيها بصرامة مرااضيش :خديجة راه دويت معاااك ...شوفي ليك ماتقضي ...

حركات راسعا بايجاب وزادت معاوداتش الهضرة معااه وهو قارم حجبانو معاجبو حال غير كايفكر شنو ممكن يوقع فليلتو كايولي واحد اخر ومكايحملش راسو

بالصلا والسلاااام على رسول الله هابطة خنساء من الدروج مبتااسمة عينيها للارض لابسة قفطان جوهرة فالبااج ساامبل وانيق حازمااه فوق الخصر بين لاطااي ديالها كاتحمق ... طالقة شعرها على رااحتو مبوكلي ضارب للحزاام ... دايرة ماكيااج كايضرب على الشعاا كيف العااادة ... هابطة كاتماايل بالتقاالة وحداها نسرين لابسة قميص خفيف مطروز فالازرق ... دايرة ماكياج خفيف طالقة بدورهاا شعرهاا القصير و مبتااسمة غاطير بالفرحة...بنسبة ليهاا تزوج خنساء وتمشي عليهاا من الدار كان بمتابة حلم من أحلامها.. وهاهياا كاتشوف فيه تحقق قدام عينيهااا

دخلو للصالون كانوا كالسين فيه الرجااال ومعاهم نصيرة وخديجة ... كاايهضرواا فالمساائل لي كاتخص العرس ... عدنان غير هز عينو فيهااا حوااالوو عينييه مابقاش قدر ينزلهم عليهاا كلشي فبلااصتووو ... طااي حوورية وكل حاجة فيها كاتير ... عينين كبااار باارزيين بالايلاينر والماسكاارااا ... ولي لونتي فالكري كااتبااان كيف الاميراااات ... شعرهاا حريييييير كايخلي لي يشوف فيه هاايم فخصلاتو ... شفاايف منتاافخيين ومع احمر الشفاااه عطاهم حجم وجادبية كتر ...

خنسااء بابتساامة قرباات جهتو مدات يدهاا بلا حشمة كاتشوف فيه .. نطقات بحناان وصوت خاافت كايدوب : مرحباا بيكم ...

السيد تفافا مني سمع الصوت قلبو تزعزع من بلاصتو : شكراا ... ربي يخليك ..

سلماات على صااحبو لي جاا معاهم وزاادت جهة خديجة سلمات عليهاا رحبات بيها وهي كاتشوف باعجااب وكلساات حدا عمتها لي كالسة على قلبها غير بزز باش صابرة ... من اعماقهاا ماحملاهم ما قابلاهم

الرجال كملوا الهضرة ديالهم وطلبو يدها بطريقة تقليدية قرااو الفاتحة بيناتهم ونااضوا مجموعين دخلوا لبيت الكلااس مخليين العيالات على خاطرهم ...

كلسوا مجمعين مع بعضياتهم ....

نطق عدنان بنبرة رجولية : احم... هو فصراحة اسي العربي بغيت نطلب منك شي حاجة الا جات على خاطرك

العربي : اييه على الراس والعين ... اش حب الخاطر

عدنان : بما ان العروسة ماباغاش العرس ... بغات غير العائلة وحفلة خفيفة اش ضهر ليك نديرو العقد السيمانة الجااية ... هاكاا حسن ونضربوا الحديد ماحدوا سخون

عصام هز فيه حااحبو : وعلاش هاد الزربة بالسلامة ؟؟؟

عدنان : حيت من هنا واحد جوج سيمانات غاادي نكون مشغول شوية مع شي خدمة ... وغانوليو تاني فالشهورة ديال الخطبة وماعندها معنى ... وقلت هاكا حسن .. ونتوما تعرفوااا تاني ... الا عندكم مانع نصبروا مافيها بااس

العربي تنهد ماباغييش يطول فالموضوع خصوصا انه مراضيش : اييه ماقلتي عييب ... الله يتمم الباقي على خير ...

عدنان : اميين ...

عصام تنهد مالقى مايقول مور كلام بااه وسكت واخااا معاجبوا حاااال وغير داير الخااطر ... واخا الراجل بعقلوا وباقي شااد فرااسوااا و كايبان معقول ولكن ماراضيش عليه بلمرة...ماشي هادشي لي بغا لختوو ...

خديجة ابتاسماات : ايواا الله يجعل كلشي مبارك ومسعوود ويكمل كلشي بيخيير يااربي ...

نصيرة ضحكات ليهاا بزز ونطقااات من فوق القلب : امين ياربي الله يتاويهم بالخير ...

خديجة : ايواا شنوو مغاديش نديروا الفال ولا كيفاش ...

نسرين على سبة : الله اودي مال خنساء رخيصة علينا ... ( هزات بندير حداها كانت موجداه ): يللاااه .. على بركة الله ...

خديجة : يسري يسري الله يعطيك صحة ...

نسرين ابتاسمات وشافت فخنساء وطلقات حلقها : دور بها ياشيباني دور بها

دور بها تخدم عليك وعليها

ياسرجولي عودي وعطوني ليمة باش تركب عليه لقايضه حليمة

(خنساء غير بدات قرمات حجبانها مخنزرة فيها عارفاها كاتحشي الهضرة وخديجة ابتاسماات سارطااهااا بلا ماتبين )

دور بها ياشيباني دور بها

دور بها تخدم عليك وعليها

سرجولي عودي وعطوني لقاوس باش تركب عليه الالا طاوس

(نصيرة عياات تقرص فيهاا واالو مابغاتش تحشم وهي طالقة حلقها كاطبل )

دور بها ياشيباني دور بها

دور بها تخدم عليك وعليها

سرجولي عودي وعطوني لجامو باش تركب عليه لقايضة طامو

سرجولي عودي وعطوني لامة باش تركب عليه لقايضة طامة

دور بها ياشيباني دور بها

دور بها تخدم عليك وعليها

هنا لهيه هنا حسن من لهيه ياطالع فلعقبة ونار شعلة فيه

ابتاسمااات : ايوااا الله يجعل كلشي مبارك ومسعود ... هانا درت ليكم الفال ( غمزات خنساء ): وبقوااموواا يا لالة ...

نصيرة حدرات عليها مغززة : ايواا الله يعطيك اللقوة فالحلق ...

ماداتهااش فيها : فخاطر لالة خنسااء ... زينة البناااات ... وعمي عدنااان

خنساء خرجات فيها عينيها ... ونصيرة زيراات على ففخضها بقرصة حاارة : الله يعطيك العماااا ... الموصيبة الكحلة ...

نسرين كمدااات لقرصة وسقلاات كادور فعينيهاا..

نصيرة زادت خنزرات فيهااا عارفة نسرين لسانهاا خضر مغاتهنا حتا طلق شي كلمة قدام خديجة..ناضت وقفاات وقالت بنبرة أمرة : نوضي نوضي وجدي معايا الطبلة (قربات لعند ودنهاا وكملاات ضاغطة على هضرتهاا) الله يطيرك ...

نسرين حركات راسها بايجااب : ايييه واخاا هاني تابعااك

خرجاات لكوزينة وناضت نسرين وقفات تابعاهاا...شافت فخنساء وعاودت غمزاتهاا وخرجاات من لبيت غاطير من لداخل بلفرحة حيت غاتهنا منها وحيت لقات منين تشد فيها وتعطيها العصييير .... وتحشي ليها الهضرة ...

شافت خديجة فخنسااء ونطقاات كاضحك: ههه هاد مرت خووك فششكل..شوويطينة مع رااسهااا

خنسااء:ههه سبحاان الله هياا هاكاك مع كلشي...عزيز ضحك وتبسط...

عودات شافت فيهاا خديحة وهاد لمرة بنضرات إعجاب وبتاسمات ليهاا بلطف: تباركلاه شحال غزالة...الله يحفظك من العين

خنساء حدرات راسهاا حشمانة:ربي يخليك..عويناتك لي كايشوفو زين

خديجة بابتسامة:الله يكمل عليكم بلخير...ونتمنااو من الله يرزقكم الدرية الصالحة...لي تفرحو بيها عما قريب

خنساء بلعات ريقها شافت فيها وهربات عينيهاا بتوتر ونطقات بخفوت:أ..أمين ياربي..

خديجة:بعداا فكرتي مزياان فزواجك من عدنان..بلا منحتااج نقوليك راك بيناتكم فرق فلعمر...عندااك غالاا تمشي تزوجي بيه وتندمي من بعد

ردت عليهاا خنساء فلبلاصة:انا الى متزوجتش بعدنان لي غادي ندم

هزات خديجة فيهاا حاجبها بستغراب:كيفااش إلى متزوجتيش بيه غاتندمي..مافهمتش؟؟

خنساء دارت بتساامة جانبية ونطقات بهدوء:اوى هانا ݣاع ديت قدي..واش قاادر يوفر لياا ݣاع داكشي لي بغييت..لا نحلف عليها بلي مغاايقدش...حاجة وحدة لي غايوفر لياا غير لهم وصدااع لخااوي...ونتي راك عارفة شباب ديال دابا..مافيهم غيير كترة لهضرة بلا فاايدة...

خديجة لوات فمهاا بإعجااب:اييه عندك الصح،الله يرضي عليك ماكدبتيش فيها ...انا راه غير بغيت نحيد شك وصافي...ونتأكد بلي راك مغاتندميش..راه زواج هدا..ماشي اللعب

خنسااء:غير تهنااي من ديك ناحية ونعسي على جنب الراحة... انا الراجل عندي هو لي يكون بعقلو ويكون قادر يهز عائلتو ومايخصني معااه والو...معنديش مشكل فلعمر...عاادي واخا يكون كبير علياا(كملات بنبرة حنينة باغة تزيد تبتهاا)وزيدون انا من ديما كنت كانحلم براجل بحال عدنان...متقل و ناضج وشارب عقلو... قادر يهز عائلتو و غادي نعيش معاه مزياان...غايضمن ليا حياتي كيفماا كانحلم بيها وكتر

خديجة زادت عجباتها هضرت خنساء كتر...سيدة كاتدوي متقلة ومتبتا هضرتها موزونة.. عارفة راسهاا شنو كاتقوول

بتاسمات ليها خديحة وقالت باجااب:ما خليتي ليا منقول الله يكملك بعقلك ..و حتا نتي غير تهناي من ديك ناحية..مغايخصك معانا حتاا خير...لي طلبتيها وحليتي عليها فمك غاتحضر...غايدير فيك لالة لعيالات..لحاجة لمخيرة ديالك....ولكن بشرط...تكوني بعقلك...تهزي لهم لراسك ولراجلك...هداكشي ديال لعناد وقسوحية الراس...معندنا منديرو بيه...

خنساء حدرات راسها وردت عليهاا برضى:ان شاء الله..الله يجيبنا فصواب..ولهلاا يحشمنااا...

خديجة برجااء وهيا كتمسح على كتفهاا:امين..الله يكمل عليكم بلخير

تعشااو وسلاو...ركبو لعرسان الخواااتم بزغاريت وصلاة على نبي... متافقين على التفااصيل وموعد العقد لي حددوه من بعد جوج سيمانة بحكم عدنان زربان ... ودعوهم وخرجواا

عدنان ركب فاللوطو ديمارى ونطق بتساؤل مخاطب ختو وهو مركز مع طريق : كيف جاتك البنت؟؟

خديجة : كاتحمق ياخوياا وشي تباتة وشي عقل وشي رزانة والكلاام الموزوون والتقااالة ... اما الزين خلااااص كااتهبل ... ماهي غير ضيامانضة وكاتمشا فالارض

عدنان حتى هو حمقاتو ولكن ماباغيش يبين : ممم حتى عائلتها مزيانين ... ومعقولين ... واخا خوهاا كايباان شوية عصبي ولكن ناااس ديال المعقوول ماعندي مانقول ...

خديجة : ايوااا الله يكمل بالخييير ... اش درتي معاهم فالصداااق ؟؟؟

عدناان : وهو صراحة تقاال هماا ماطلبوا مني والو وقالو شرع الله يتصرف وخلااص والا تهليت فبنتهم هاذاك هو كلشي .. ولاايني ضروري نكبروا بالبنت ...

خديجة بايجاااب : اييه اخويااا البنت عزبة واول زواج ليهاااا صدااقهااا ودهازها يكون على حقو وطريقواااا ... قالك الا كاان حبيبك عسل ماتلعقوش كامل

عدنان : داكشي المهم مانخافش علييك ... المخيرة فالحوايج تجيها ومني تخرجي معاها لي حلات عليها فمها عطيها ليهااا بلا نقاااش ... انا غانوصي الذهايبي صاحبي على السرتلة والخااتم والسنسلة

خديجة : اييه وشي كورمييط زويين صافي ... راه درت معاهم واش تمشي تختار قالو ليك ماشي ضروري ... راك عارف الناس كيف دايرين

حرك راسو بايجااب : واخاا الالة ... المهم نتي تكلفي بالباقي ...

خديجة : كون هاني اخويااا ...

بتاسم ليهاا برضى و كمل على طريقو و هو فرحاان من لدااخل بزواجو بخنسااء..لي حس بيهاا سلبات ليه عقلو من أول نضرة شافهاا بيهااا

دخلات نسرين للكوزينة لي كانت مرونة و مقلوبة سفاها على علاها بلماعن لي تحطو لضياف...لقات نصيرة مݣفضة واقفة كاتستف لحلوة فسوبيرة باش متبردش...مشات لجيهة شبكة جبدات كاس عمرات نصو بلماا وحلات لقرعة تاع الدوى لي كان فيديهاا لاحت كينة فداك لكاس باش تدوب...

نطقات نصيرة بتساؤل:يااك لابااس...مريضة؟؟

نسرين:لا ماشي انا...عصاام لي دارو راسو وحتاا سخانة طلعات ليه خليتوو منشور على سرير كايفوور...ياربي سلامة ملي خرجو دوك ناس وهو لون تبدل فوجهوو... عينيهم حارة يا لطيف دغياا سيفطوها ليه مكمدة...جيت ندوب ليه دوى ونعطيه ليه على الله يفوتو لحال من هنا لصبااح...

نصيرة:إوى مايكوون عندو بااس...متخافيش عليه راه كايكون هكاك مرة مرة

دخلات خنساء بعدماا بدلات عليهاا ولبسات بيجامة قصيرة خفيفة داخلة لكوزينة كتجمع فشعرهااا باش تقادهااا...شافت فلكاس

نطقاات بتسااؤل:ياكما كاين باس...شكون لي مريض...

نسرين:غير خوك ماشكيت عليك دارو رااسو ..يلاه نيت لقيتني كانعاود لعمتك...ملي خرجو ناسك وهو طااح كااو...باينة ضربوه بلعين....

خنسااء عقداتهم فيهاا:نعلي عليك شيطان اشمن عين ولا زبل...تلقاي شمس ديال صباح لي رجعاات عليه...وهيا لي دارت ليه هاكاك

نسرين باغة تقلي ليها سم:لا اختي باينة عوينة هاادي...هو تباركلاه باقي صغير عاطي لعين كايبان بحال سلطان إلى ݣلس بين الرجاال...زين الطلى ودمو حلو دغيا تشد فيه لعين(هزات لكااس ونطقات بعجرفة)إوى اشغاندير نعطيه دوى ونقرى عليه شوية لقرأن...على الله يفوتو لحال...

خنساء فهماتها كدق عليهاا..ميقات فيهاا وقالت برجاء لاوية فمهاا ماباغاش تكتر معاها لهضرة: مايكون عندو بااس...

نسرين: امين ماتشوفي بااس...إوى انا ديت زين و صغر هاني كانخلص دابا...فكل مرة يطيحوه لياا مريض بغيت ليهم لعمى...(كملات بنفس النبرة مبتاسمة بستهزاء باغا تزيد تسممها)هه بصراحة اخنساء والله حتا نتي لي عبرتي...خديتيه مابقا فيه مايتعين...واخا يݣلس فوق لعرش ماتشدش ليك فيه لعين...تهنيتي

خنسااء دارت فيها ديك شوفة ديال منيتك يلاه بغات تجاوبهاا وهيا تنطق نصيرة شاعلة محقدة عينيهاا: أنا بغيت ليك اللقوى..لحلاقم بغيتهم يشدوك مايطلقوك حتى يتردع عندك داك اللساان...وااش مكاتحشمييش؟؟...

نسرين دارت راسهاا متأسفة شاافت فخنسااء ونطقاات بعتداار زائف:نااري سمحيليا والله منويت فيها شي حااجة...عندااك تقلقي...انا هاكا دايرة لي فقلبي على لسااني...متديش علياا

خنساء متهزات فيهاا حتا شعرة بهضرتهااا ومتحرك فيهاا والو بحالا مهضراتش ݣاع نطقات بهدوء:هزي هزي الدوى لراجلك وشوفي ليك ماتقضي حسن منصدق غالطة معااك فهااد ليل ونوريك شنااهيا لي فقلبي على لسااني...

ضحكات نسرين بسخرية طلعات فيهاا ونزلاتهاا..هزات لكاس و تمات خارجة كاتمختر فلمشية

نسرين:يلاه نخليكم الله يعاونكم مع هااد الروينة...تصبحو على خير..

نصيرة رفعات نبرة صوتهاا بداات كطلع ليهاا: أجي لهناا...علاااه بسلامة مغاتجيش تعاونينااا؟؟

نسرين:شنوو نعاونكم؟؟مالكم جايبني خدامة؟؟والله واخا يداودو هاد لماعن لا حطيت فيهم يدي...هاا خنسااء تشمر على درااعهااا ودوز ليهم...انا نهاار لي جيتو تخطبوني..نقيت دنياا غير بوحدي..مخليتش ماما تحط يديهاا فلمااا...منعستش ديك اليلة حتا خليت الدنيا كاتشعل...إوى دير بحالي،راه ممهرسينش ليها ليدين ولا راݣدين عليهاا...

خنسااء بعصبية محمرة فيهاا شوفة مكرهاتش تلاح عليهاا:نسريين...سري قودي من هنااا...راك كاتقلبي علياااا...

نسرين رجعات بعض لخصلات ورى ودنهاا ناطقة بتتاقل وهيا كاتمشى:هاهياا غادة...

خرجاات من لكوزينة كاتمختر مخلياهم مع روينتهم مهازة ليهم حتا كااس ولا طبسيل...

خنسااء دارت عند نصيرة ناطقة بنفعاال:يااك اعمتي جيت نعااونك...مالك محاشياها ليهاا...عجبك لحال دابا ملي طلعتي ليهاا لبعرة...يسحاب ليهاا راسهاا معرفت شنوو..على زين شقاهااا..

نصيرة صغراات حجم عينيهاا كتحلف عليها مغددة:هاادي لعجل لي غاينطحهاا من عندي مزال كايرجع بلوور...مغتهنااا،حتاا نقااد ليهاا شي ضربة جهد لي تهبط ليهاا كوااريهااا كلهم وتحني الراس وتقطع سمهاا فمرة..غير على وجه خوك ماباغاش نحط عليهاا يدي...كون ماهو والله حتاا نوريهاا اشكانسوى...حيت بصح زااادت فيه وبزااف...ولكن غير بلاتي داباا تشوفهااا..ومغاتنساهااش...

طولات خنساء شوفة فجيهت لباب تنهدات مفكرة هضرتهاا و قالت مخاطبة نفسهاا:الله ينعل بو لوقت لي خلات بحال هاد لماركة الخامجة تشفاا وتشمت فياا...ولكن انا لي درتهاا لراسي...أنااا...

صباح جديد فاقت نسرين وجدات الفطور وحطاتو فوق الطبلة كلشي باقي ناعس بسباب العيا ديال اللبارح من غير عصام لي خرج للخدمة ... غطاتو وهزات بزطامها خرجات تجيب الخبز من المخبزة كيف العاادة .... تقدمات جيهتها وبانت ليها رانيا حتى هي واقفة كاتسنى الخبز ... ابتاسمات ليها: اهلا رانياا

رانيا بادلاتها الابتسامة : صباح الخير نسرين صافا لاباس عليك ...

نسرين : الحمد لله يسول فيك الخير ... واحد خالتي عتيقة لاباس عليها

رانيا : بيخير لهلا يوريك باااس ... مبروك ما دارت خنساء الله يكمل عليها بالخير ياربي ويسهل عليها ..

نسرين بابتسامة مصطنعة : اميين ... واخا ماشي داكشي لي بغينا ليها ولايني هي تعرف لراسها

رانيا : ايواااا الخير فيما اختاره الله والمكتاب كايتصرف هاداك هو نصيبها نطلبوا لله غير يسخر ليها فيه ...

نسرين هزات حاجبها الفضول قاتلها : اييه ... احم ... ( بفضول ): اجي بعدا نتي معارفة حتى حاجة ؟؟

رانيا باستغراب : علاايااش ؟؟ ماافهمتش ؟؟

نسرين قربات عندها مخفضة نبرة صوتها : زعما جااك هادشي عاادي ... مكايدخلش الشك

رانيا بنفاد صبر : يا ودي فرزي هضرتك ... شنو باغا تقصدي ...

نسرين الفضول قاتلها : خنساء بين ليلة ونهاار قلبات حياتها كاملة من ساسها لراسهااا ... خرجات من القرايا لي كانت هي المتنفس لي عندها فين كاتجمع وتنشط ... وتفارقات مع عبدو لي كانو فحال جوج فردات مكايتفارقوش غير فالنعاس ومعاشرين سنين ... وسمحات فالرجال بشلاغمهم كل واحد ينسيك فلاخر وفالاخير تزوجات بعدنان قد باهااا .. هادشي مكايدخلش للعقل ... نتي زعما راك صاحبتها معارفة والو مايمكنش

هزات فيها حاجبها بلا حول ونطقات بهدوء : باش مايبقاش ضارك رااسك وتنعسي ليل غانجاوبك ... اولا موضوع القرايا خنساء من شحاااااال هادي مداخلش ليها لمخها بالمرة وشحال هادي طلعات ليها فراسهااا ... تااانيااا عبدو كان بالنسبة ليها نزوة وتضياع الوقت ودايزة ماعندها معنى ( غمزاتها بايجااز ): كيف دوزوهاا كاااع نااااس وكملوا طريقهم من بعد مع شخص اخر مداا ماجاااب فلي فاات ولا لي فوتات

نسرين فهماتها وبلعات ريقها سارطة القمعة : مممممم

رانيا كملات : وتالتا واخيرااا باش تهناي عدنان هو الشخص لي ختارو عقلها ماشي قلبها ... حيت فهاد الوقت الحب مكايوكلش الخبز ... والزواج ماشي هو شوف فيا نشوف فيك اطاجين الحوت ...

نسرين خنزرات فيها مارضاتش تحشي ليها الهضرة : ايوا لي ماوصلش للعنب كايقول خاامج

ضحكات باستهزاء : انا لي كانعرف الشوف مايبرد الجوف ( طلعاتها وهبطاتها ) : والعربوووون راه بااااين الالة البنااات .... خليت ليك راحة الله هاد الساااعة ...( خاطبات مول المخبزة ): عطيني دوك الخبزات عافااك ....

خدات سخرتها وزاادت خلاتهااا غاتفركع مع راااسهااا محااملاااش الهضرة لي قالت ليهااا ... عطاتها جوج كلماات خلاتها تدخل فدوامة شك.. محسات حتا هبطااات عينيها... دخلات ليها شك فحالتها وحوايجهااا ... كرزات على سنانها خدات الخبز وزادت باغا تاكل جنابها

دخل عصاام لدار هااز فيديه ساشيات ديال تقدية لي كانت مزالة ناقصة...بحكم ختارو هو وباه يوجدو ويتقداو للعرس على تيسااع...دوز التقدية لكوزينة وداز من حدا لبيت بانت ليه نسرين ݣالسة قدام الطبلة مدورة بيها لكيسان ديال اتاي ولموناضة لي غايتحطو لضيااف كتمسح فيهم..

عصام بإبتسامة : نتي هنااا

قرب لعندها طبع قبلة على حنكها وݣلس حداهااا...

نسرين طرطقات عنقهاا بعيااء: أووف عييت...من صباح وأنا نجبد و نغسل فلماعن ...يدي ضروني ونملو علياا

عصام:ورتاحي شوية و كملي تااني..مديريش كلشي فخطرة

نسرين:لا صافي ساليت نيت...مابقاش ليا بزااف...

عصام دور عينيه على طبلة ونطق بهدوء:هااد لكيسان بانو ليا قلال مكافينش..مزال غايخصني نزيد وحدين خرين (هز كاس فيديه): ماعرفت واش غالقا بحال هاد لموديل ولا لا...

نسرين هزات فيه حاجبهاا وحيدات ليه لكااس من يديه : لااش وحدين خريين..رااه كاافين..الله يجعل لبركة ... اصلا هي مغاتعرض على حد فنهارها غير قلت نتهنا منهم ونحيدهم بكري

عصام دارو راسو بحالا مسمعهااش ونطق لاوي فمو بتفكيير: واقلة جوج باكيات ولا تلاتة خرين غايكفيو .... حتا نخرج دابا ونقلب عليهم...على الله نلقا بحاالهم

نسرين بإجاز :ضبر الراسك...لي عجبك ديرو

عصاام دار يديه فجيبو وجبد بواطة صغيرة ونطق مبتاسم بتدكر: حقااا شوفي شنو جبت لخنسااء...

شافت فلبواطة،و مدات يديهاا حلاتهاا كانت فيهاا ݣورميطة تاع اليد ذهبية انيقة...دغيا عقدات غوباشتهااا مخسرة فيهاا الشوفة...وقالت متساؤلة بنزعااج:شنو هادي اعصاام؟؟

رد عليهاا وبتسامتو بدات كتلاشى: شنوو غاتكوون...ݣورميط واش مابقيتيش كاتشوفي

نسرين بنبرة مرتفعة : عرفتهاااا ݣووورميط وديال الذهب من لفوق...منين جاااااتك؟؟!

عصاام : دزت من حدا الدهايبي وعيط علييا،قاليا غايخرج لعشور وصدقهاا عليااا....(غوت مخنزر فيهاا) : شريييتهاااا منين غاتكون جااتني؟؟

نسرين شدات لبواطة لاحتهاا فوق الطبلة وهياا شاعلة: جاتك عادية اعصام تاخد حاجة غالية بحال هادي ومتقولهااش ؟؟علااش شريتيهااا بلا متقولها ليااا؟؟بغيت نعرف واش انا مراتك ولا مزوجني غير بلفم...

عصاام: و تي اش غانقوليك فيهاا؟؟ عندي ختي وحدة ... الله يجعلني نجر ليها لمحال كامل بلي فيه،مااشي شغلك...مغانتسناكش حتا تعطيني لوردر عاد نديرهاا...من حقي نفرح بيهااا...وكون لقيت نجيب ليهاا كتر من هاد لݣورميط لي وقفات ليك فلحلق و قربات تجيفك نجيبهاا ليهااا ... حيت تستااهل عندي كتر وكتر.

نسرين بلغواات لعروقة ديال عنقها تنفخو:واااش بغيتي طرطق ليا مرارتي؟؟اسيدي هاد خنسااء راه غير ختك ماشي بنتك لي دير عليهاا هادشي كاامل...دخلنا عليك بالله بااش جاتهااا هاد الݣورميط؟؟واش مكفااكش شحال خسرتي فالخطبة وشنو باقي غاتخسر فالعرس ؟؟ غير ملي جاو ناسها يهضرو فيهاا شحاال جريتي ليهم ... وزايدهاا دابا بلكادو حتا هوا...لخلصا ديال شهرين أعصام طرطقتي والديهاا فسيمانة..حتا لإمتى غاتبقاا دير إيديك فجيبك وتجبد بلاحباساات...وافييق أمولااي فيييق رااه عائلتك كاايكشطووك

عصاام صغر فيهاا عينيه جعراتو هضرتهاا بلمزياان .. سااط بضيق وزير على قبضة يديه مابقا ليه والو ويخلطهاا: بربي مغاتهنااي انسرين حتاا نهرس ليك دااك دلقوش شي نهاار...(زاد فحدة صوتو كايغوو ساااعر):وااش سوق ديلمك؟؟عائلتي هادوك الله يجعلهم يخليوني على الضس مكايهمنييش... ماشي خسارة فيهم... (صغر فيها عينيه لي ولاو حمرين) ولا اجي... ياكماا حطيت يدي فجيبك وبديت كانصرف من فلوسك وانا مفخبااريش؟؟...

نسرين زادت عقدات حجبانها كدور فعينيهاا ميسحابش ليها غايتعصب نطقات بتلعتم ولات خايفة يجمعها معااه :د..دابا مالك بديتي كاتشعل معايا ماالك؟؟ واش معنديش لحق نقول حتا كلمة دياال لمعقول

جاوبها بحدة:لاواه الزعتر هادا ماشي لمعقوول؟؟ بغيت نعرف علاش نتي خضرة هاكا و عزيز عليك تخرجي لعييب...(كمل بتأنيب)عمركي قلتي ليا خاصاك شي حاجة وقلت ليك لاا...واش انا مقصر فجيهتك فشي حاجة...عمرني فضلت عائلتي علييك ولحتك لتووش؟؟( شافها حركات راسها بنفي كترمش بزربة و كمل بلغوات ضاغط على هضرتو)دااباا ماال أصل مك كاتحاسبي معااياا؟واش كاتقلبي نحلفهاا فيك وعمرك باقي تشووفي من عندي الساانتيم لكحل هو اللخر

نسرين ضغطات على شفايفهاا... عرفات راسهاا زادت فيه..بلعات ريقهاا بصعوبة عاد عاقت براسهاا زبلاتهاا معااه قرباات حداه وشداات فيديه بتحزار:اناا ماشي ضد انك تعطيهم.. عائلتك هادوك الله يحفضني نكون شيطان بينك وبينهم...ولكن تعطيهم بلقيااس عاوتااني...هادوك لفلوس راك كضرب عليهم تمارة مكتلقاهمش طايحين(كملات هضرتهاا بنبرة رقيقة كتبحلس) ة زعماا بغيت نبان ليك قارية ليك اللهم...ساعة خسرتهاا

عصاام حيد يديه بنفضة ونطق بعصبية: كون كنتي بصح قارية همي ماتبدايش تسمميني بهاد لهضور لخااوية...نتي بهااد التصرفاات راك غير كاطيحي من عيني شوية بشوية...وندير ليك واحد لقضية فبالك...انا ملي تزوجت بيك ماشي قطعت عائلتي من الحالة المدنية ودرت عليهم كروة ودرتك نتي خليفة عليهم...دابا فوقت ما حتاجوني غايلقااوني موجود، بغيتي ولاا كرهتيي... وخنافرك للارض كاتسمعي

نسرين غرغرو عينيهاا:أناا..مااقص..

قااطعهاا محمر فيها شوفة و نااض وقف ناطق بتحدير :ردي البال أنسرين لهاداك لساان عندك...راك مغتصرطيه حتاا يفرتك لينا الشمل شي نهااار...هاني قلتهااا

كمل هضرتو وهز لبواطة سدهاا ردهاا لجيبو ونااض خاارج معصب تبعااتو وشداتو من دراعو قبل مايخرج من لبيت دار شافيهاا مخنزر ونطقات بهدوء:عصاام..مكاين لااش تغضب مني...انا ماكنفكر غير فمصلاحتك...ودابا ملي بينتي ليا بلي هضرتي مكاتسوى عندك والو من ليوم مابقيتش غانجبد معاك هاد لموضوع ولا ندخل فيك...غير هواا عنداك ترجع ندماان حيت مدرتيش بهضرتي شي نهاار...كيف كايقولو وريه وريه وإلى عمى سير وخلييه

نتر درااعو من يديهاا مغوت فوجهااا: أنا بنت المراااا لي تسيرني وتمشيني على هواااها وتقوليااا شنو ندير وشنو منديرش... مزال ماتزادتش..مزااااال

غمضات نسرين عينيهاا بشدة...خنزر فيهاا بعينيه شااعلين وضرب لبااب بيديه مقفزهااا وزااد...يلااه كانت غتعاود تبعو وهيا توقف هزات بديهاا بلا مبالات ونطقات بعصبية مفقوصة منو:سيير،غانبقى نحزر فيك...فينماا نقوليك جوج كلماات تفݣع وتغضب عليا...بغييت غير شي نهاار ديير بهضرتي...غير شي نهاار ... اووووف ..

عبدو دخل للقهوة كان كالس السحت كايكمي ... تقابل معاه فالكلسة : واش العشيير ...

السحت : اهلااا صافا اصحبي ... غبور هادي

عبدو خدا كارو : غير الوقت وخلاااص ... جري عليا نجري عليك ... الهم غاطسين فيه حتى لراسنا

السحت : ههههههه وايلي اصحبي نتا كل نهار نفس المواال ... ماعييتيش منووو ... نساا شوية الهم ... راااه بربي حتى غاتشيب بلا وقت ...

عبدو تنهد : نتا لي غادي تهز عليا البلية السااط الله يهديك ... راااه الواليد قطع عليا المااا وضوو ... الا مابعتش مانكميش والحركة ميتة هاد الساعة ...

السحت : الله يصاوب اصحبي .... عندي ليك وااحد الخباااار ... غادي يهز ليك المورااال ...

عبدو : وااش تمااا ... اااتيني راااه شحاال هادا ماسمعنا شي خبار يفرح القلب ...

السحت : السااطة ديااالك ...

عبدو باستغراب : شكون نرجس ؟؟؟

السحت ضحك : تااا اشمن نرجس اصحبي .... الساااااطة ديااال المعقول خلينا من هاد الخيش بيش ديال دابا ... داوي ليك على الحب والقلب والهوا فالنصاصة دليل ... الاميرة لي معششة فالفؤاااد

عبدو هز حاجبو : خنسااء ؟؟؟؟

السحت : اياااه خنسااء بنت السااايب ... ومن لا يعرفهااا ...

عبدو مكايبغييش يجبدها : اااه ... مالهااا ؟؟

السحت : شتك كااتقولها فوق النفس ماباغيش دوي عليها ولا كيفاش

عبدو : بحااال داكشي ...

السحت بطنز : ااااه المشااعير كايتزعزو ... غير كاتسمعها القلب كايتفافا ... ورااك مربووط اسااط

عبدو : هنينا ابنادم ... ما مرة ما جوج قلت ليك ماتعاودش تجبد ليا هضرتها ... ونتا عزيز عليك تبقى تنبش

السحت : واااايلي الخبااار لي عندي بميكتهاا ... راااه بربي ماتنعس الليل

عبدو : دوي بلا دخول وخروج اش تم ...

السحت طفا الكارو وشاف فيه : محبوبة القلب ... طاااااارت ... فرفرااات ... داهاااا ليك عدنان مول الصااكاااا الكبيرة لي الفوق ...

هز حاجبو قارم حجبانو بعدم فهم وقلبو تهز من بلاصتو :كيفاش ؟؟؟

السحت ابتاسم : بالعربية تاعرااابت ... عدنااان سيد الرجاال غادي يعقد على حمامة القلب ديااالك ... على سنة الله ورسوووله ... اش ضهر لييك ... ( غمزوا )

عبدو هرب الدم من وجهواااا شاف فيه ماقاادرش يستوعب انها غاتزوج وكيفاش غادير اصلا من مور ما وقع لي وقع ... مافاهمش واش غيرتو ليك تحركات ولا فضولو كيفاش دارت ليها لي تلفوااا ... تفافا فبللااصتووو مابقااا قادر ينطق بحتى كلمة

السحت ضحك : وااا الصحبة ... فيق فيق ... عندااك يسكت ليك القلب ... طاارت الحماااامة وفرفرااات ودارت الجناااح ...

عبدو خنزر فيه : واش متاكد ... شكون قاليك هاد الهضرة ؟؟؟

السحت : تااا راااه الحومة كااملة سااقت الخبااار ... البااارح جاااو دواااو فيهااا ... وتاااا راااه خاصك تشوف اش جاب معاااه وكيفااش جااا .. الاناااقة والشيااكة والحديدة المخيرة عندو ديك الميرسيديس لي كايمشي بيهااا غير مرة فالشهر بااااش جاااا ... تااا راه بنت السايب ضبرات على همزة وهو ضبر على قووووقة ياااقوووتة تضوي علييه اخر اياام حياااتووو ...

عبدو خنزر معاودش معااه الهضرة وناااض من تمااا شاااعل رامي الكارو من يدو شي حاجة الداخل تحركااات فيه ماقدرش يتحكم فيهاا ... اتاااجه نيشااان لدااار خنساااء غادي يطرطق ... ولا حمر باللاعصااب وعروق عنقواا برزوو ... يلااااه غايدخل للزنقة وهو يوقف جاامد فبلاااصتووو مخرج عينييه ... بحال الا خويتي على العاافية الماا بااارد ........ بلع ريقو وهو كايشوف فيهااا وااقفة مع عدنان فرحاانة كاايهضرواا حدا اللوطو ديالو ...

ضغط على يديه بعصبية كبييرة محقد عينيه ... يلاااه غايمشي جيهتهم منفااعل ورجع قارم حجبانو : انا شنو كاندير ... حماقيتي لااا ... واش السيدة بغات تبني حياتها وانا باغي ندمرها كتر من قبل ....

خنسااء دورات عينيها وقشعاتو وااقف ماكملاتش فيه الشوفة بالمرة بلاما تحرك جفن وضارت جهة عدنان حطاات يدها على كتفو : مشينااا ؟؟

عندنان بايجاز : وي يلاااه ....

دور يدو جهة خصرهااا وحل ليها باب لوطو بلبااقة حتى ركبات

عبدو تنفس الصعداء كايحاول يتهدن والعافية شاعلة فيه لداخل ... متبع ليهم العين حتى ركبات معااه هي وختو وزاادو ... غمض عينيه عاض شفايفو بانفعاال مقادرش يصبر ... ضرب يدو سااعر مع الحيط : انا ماشي راااجل شماااتة شماااااتة .... عععععععع ...

زاد من تمااا ساااخط معاجبوا حااال محاملش راسو اصلااا ...

خنساء دوزات العشية كاملة فالتقدية من قيسارية لقيسارية ومن سوق لسوق هي وخديجة وعدنان ... لي حلات عليها فمها خداها ليها بلا نقاش وحتى هي كاتشرط بلاما تفرط ... لي عجباتها كادير عليها اليد وماكاتخليهاش فخاطرهاا ... تقيس وتعاود حتى تلقى لي عجبهااا ... مارجعاات حتى جاابت دهااز مطقطق شهوة منو ...

رجعها حتى للباب وصلها ودار معاها غدا يكملوا لي بقااا ... جايا متقلة محملة ومجملة عاجبها الحاااال ...

نسرين ݣالسة حدا عصام فلبييت ديال الكلاس ...كايتفرجو فتلفازة و كايهضرو بيناتهم...تسمع لباب تحل ودخلات منو خنسااء...صاك فكتفهاا وهازة ساشيات فيديهاا بجوج..عامرين بداكشي لي تقداات...دازت من حدا لبيت لقاتهم ݣالسين ودخلات عندهم باش تسلم عليهم عاد تكمل طريقهاا لبيتهاا...غير دخلات ونسرين فيكسات عينيهاا فساشيات لي هازة...بداات كاتغلي من لداخل وهيا كاتشوف فيهاا محملة ومجملة ... حطات خنسااء داكشي من يديهاا كان متقل عليهاا ... سلماات عليهم وݣلساات كاترتااح

نطق عصاام بتسااؤل:تعطلتي...فين كنتي حتا لدابا..

خنسااء: يلاه ساليناا..بقينا من بوتيك لبوتيك...خود هاددي قيس هاادي...ولي زاد عطلناا كتر هو دهايبي ... راك عارف العيالات والذهب

نسرين خرجات عينيهاا بعدم تصديق( نغزاات عصاام بصبعهاا فكتفو) : دهاايبي؟؟

خنسااء دوزات شعرها ورا ودنها : اييه عدنان خدا ليا شي حاجات ديال دهب باش نعمر يدي و عنقي...

عصاام بإبتسامة : إوى بصحة ورااحة...

خنساء بمجاملة : الله يعطيك صحة

نطقاات نسرين بتلعتم (ماباغاش تبين لحرقة لي حساات بيهاا بلخصوص انهاا مجاتهاا حتا حاجة ديال دهب فدفوعهاا من غير لخااتم ديال زوااج) : اا..اه...مزياان..اصلا كايقولو دهب كايكون فال زوين الى بداو بيه لعرسان من لول..

خنسااء زادت تسندات على لمخدة : اووف ولاهيلا عييت...وعااد مزال خاصنا نخرجو غدا نكملو شرياان ديال داكشي لي خااصنا ... ( عارفة البوان فيبل ديال نسرين هي الغيرة )

نسرين وسعاات نضرتهاا: وااه غاايعاود يشري ليك حاجاات خريين ..(زادت نغزات عصام وهااد لمرة ففخضو): احم زعمااا براكة هادشي وااقلة كافي؟؟

خنسااء : اشمن كافي هادشي غير شوية من بزااف..عاد باقا شحال من حاجة خااصة و زيد الروايح ولمكيااج...واخاا انا فلحقيقة مابغيتش نقجر عليه ولكن قالك لااا.. هادشي بوحدو مامعمرش ليه لعيين...باغي يكبر بياا الله يكبر بييه

عصاام ماعندو سوق: اييه مافيهاا بااس.. فرحي براسك مالكي اش خااسرة..يااك لفلوس موجودة... تبرعي ليااا راه غير هادشي لي كاتدي من الزواج

خنسااء شافت فنسرين لي حنااكهاا حماارو ..حساات بلخنقة فحلقهاا... وعاودات شافت فعصاام ونطقات عن قصد باغا تغددهاا :بصراحة أخوياا عدنان الله يعمرهاا داار...عمرني شفت بحالو فسخااوة...لي حطيت عليهاا يدي كايشريهاا لياا ..عرفتي غير كايلقاني كانشوف فلحااجة كايقولي خوديهاا...

نسرين كرزاات على شفاايفهااا وعاودات نغزاتو فكتفو ونطقاات بخفوت:سمعتي.. لي شافتهاا كايقوليهاا خوديهااا...

خنسااء صغرات فيهاا عينيهاا:قلتي شي حاجة انسريين؟؟...

ردت عليهاا بنفي:لا لا...احم بصحتك..نتي لي جاات معااك...(تنهداات بعمق)الله يرزقنااا من لي رزقك

خنساء ناضت وقفاات كاتهز فساشيااات ناطقة بإجاز:اميين..ربي راه كايعطي و يرزق لكل وااحد على قد نيتوو...

تمات هياا غادة خارجة ونسرين متبعاهاا بعينيهاا باغة طرطق فبلاصتهاا وهيا كاتشوف فيهاا هازة دوك ساشياات مكرهاتهمش يكونو فملكهاا...بلا متشعر بداات تااني كاتنغز فعصاام...لي خنزر فيهاا و ضرب ليهاا يديهاا بجهد

نطق بنفااد صبر:اشكاااااين من صبااح ونتي كاتنغزي فيااا طيبتي لياا كتفي...واش باغة نطرطق ليك دااك صبع....

ردت عليه بخنقة وهياا كتحك فيديهااا :اناا كانغز فيك بااش تشوف شنو شرى ليهاا رااجلهاا وكيفاش كايتعاامل معااها...هاا دهب..هاا لحواايج بلعراام...وقالت ليك غير تشوف فلحااجة كايشريهاا ليهااا

عصاام بتفسير:ورااه نورماال يتعاامل معاهاا هاكاك...راه باقة عروسة جديدة وخااصو يفرح بيهااا ويكبر بيهاا بين نااس..

نسرين لواات فمهااا:يااااك اسيدي...وماالني اناا مدرتيش لياا بحال هاادشي فعرسي...

عصاام خرج عينيه فيهاا:هاداك دفوع كاامل لي جبت ليك ومدرتليك واالو

ميقاات فيه بعدم رضى: اوى صافي...حتا هاديك لبزقة ديال دفوع لي جبتي لياا كاتسمى دفووع..(رفعاات نبرة صوتهاا كاتشير بيديهاا) : هاااا دفووع كيف كاايكوون...على حقوو وطريقوو...شووف شووف رجاال كيفااش كايتهلاو فعيالاتهمم وكايفشوهم..تعلم تعلم

عصاام غوت ليهاا فوجهاا :رااه اناا لي غادي نفش مو هداك لحنك عندك بشي دقة الى محيدتيش من حدااياا...نوضي تݣعدي عليااا جيبي لياا ماناكل...

ردت عليه معوجة شفايفهاا : هااهياا غادة...الزهر ولمن قاادو سيدي ربي...ولكن ماشي مشكل... لكية كايتي ياناا ...انا لي مولفة من صغري مايكونش عندي زهر...مكاين لاش نقلب عليه دااباا

ناضت زعفاانة من حدااه مفݣوعة كاتصوط عليه بصوت مسموع... شد على رااسو طلعااتهاا ليه بهضراتهاا معاارف شنو يدير معاهاا ناطق مخاطب نفسو بنزعااج:يااربي تصبرني مع هااد لمرى يااربي...صدااع فلخدمة..صدااع فداار،تفووو..

خنسااء كالسة مع نصيرة فلبيت كاتجبد فلحوايج لي شراات كاتوريهم ليهاا...هزات لبواطة تااع سرتلة حلاتهاا ومداتهاا ليهاا:هانتي يلالة..شوفي شنو خدا لياا مع سنسلة...

تنهدات خداتهاا من عندهاا وحطاتهاا فوق لكوافوز..ردت عليهاا بإختصار:مممم..زوينة

خنساء هزات حاجبهاا:مالكي اعمتي من قبايلة وانا كانوري ليك فدفوع ديالي وانتي معاجبك حال...كاتخرجي ليا لهضرة بلعباار...راه خاصك تفرحي بيااا زعمااا...

نصيرة مغددة : شتي هاادشي كاامل لي كاتشوفي فيه شراه ليك...مايسوى والو قدام شبابك لي غاضيعي معااه...كنت غاانفرح بيك ونحس براسي طايرة فسما ومقاداني دنياا كون تزوجتي بشي واحد اخر...إماا هاداا راه غير ݣدمتي رااسك وصاافي

خنسااء زيراات على يديهاا ومسحاات وجهااا ناطقة بنفعاال: عااوتااني نفس لهضرة...بغيت غير نعرف اعمتي فوقااش غاتقتانعي فوقاش..

نصيرة بحدة : ماعمرني غانقتاانع..حيت غايبقاا ديماا فعينياا شاارف...ومااشي ديالك ومايصلاحش ليك....(كملات بنبرة ترجي) : شوفي كيفااش ديري ووقفي هاد زوااج محدك باقة مدرتي معاه فطجين مايتحرق...خليناا نرجعو ليه زبلو ونسايه عليك...رااك ابنيتي غاتندمي...سمعي مني الله يرضي علييك....

خنسااء غمضات عينيهاا وحلاتهم :انا أعمتي ماشي درية صغيرة لي نتفلا على سيد...داباا لي عطا الله عطااه مابقا ليا فين نتراجع....رتااحي را مغاديش ندم الى تزوجت بييه...غير خليني...

نصيرة : الله يهديك على عقلك...راك معارفااش شنو كاديري...وحتا بااك لي كانتسنااه يقول "لا" قبل ليك على هاد لهباال ديالك..

مزالين كاايهضرو حتا دخلات عليهم نسرين...تعيط عليهم يتعشااو

نسرين : يلااه راه حطييت لعش(سكتاات مكملاتهااش ملي لمحاات داكشي محطوط فلبيت...بقاات واقفة مشوكية وعينيهاا قربو يوصلو لعند داكشي لي كاتشوف....صبابط بصيكانهم ديال لفريع...بيجامات تروى بيااس بتوبهم لحريري ديال لعريسات....توااب اخر مكاين فسوق بألوانهم لهادئة كاتهبل....وعاد شوميز دونوي بلأنوااع مقادين فبواطاتهم بطريقة أنيقة كاتحل النفس...تقرصاات باغة تاكل داكشي بعينيهااا)

نصيرة: ماالك كنتي كاتهضري وسقلتي غير بووحدك...

نسرين وهياا كادور عينيهاا فداكشي:غ..غير بغيت نعيط ليكم تجيو تعشااو

خنسااء : لاا انا غا كولو كليت على برى مع عدنان وخديجة...

نسرين زادت دورات عينيهاا وشاافت بوااطة لي فيهاا سرتلة وهياا تفافا...من طبعهاا ديماا عزيز عليهاا دهب...كاتسطاا عليه...قربوها رجليهاا لعندهاا بلى ماتحس....وهزاتهاا كاتتشوف فيهاا بلهفة كبيرة:واااو...سرتلة واشمن سرتلة...عمر عينياا شافو بحالهاا...شحاال غزاالة كااتحمق

نصيرة: قل أعود برب الفلق...كيفماا شتيها تخليها...قولي تباركلااه

دارت راسهاا بحالا مسمعاتهااش :بلاتي بلاتي نقيسهااا نشوف كيف غااتجيني..

يلاه غاتجبدهاا من بلاصتهاا وهياا تخطف ليهااا نصيرة لبوااطة من يديهااا:لااواه قالك تقيسيهااا...ماهو فال... عندنا لعروسة لي خاصها تقيس حاجتهاا هياا لولة...عاد واحد اخر...

نسرين تقرصاات فديك اللحضة..لون هرب ليهاا من وجهاا..زيرات على يديهاا ورجعاتهاا لعندها عاضة على شفايفهاا بعصبية...كاتحاول دوز لقمعة

خنسااء:لا اعمتي غير خليهاا راه قيستهاا عند دهاايبي...

نصيرة حركات راسها:اه وملي هكاك...(شافت فنسرين مداتهاا ليهاا): شدي لبسيهااا

نسرين خنزرات فيهااا:خليهاا عندك غير بصحة...ملي بغيتيهاا ماعطيتيهااش لياا خطفتيهاا لياا من يدي بحالا غانكلهاا...غايكون ماعندي نفس الى لبستهااا

خنسااء طلعاات ليهاا لقردة ...جرات لبواطة عندهاا و سدااتهاا بنرفزة :إوى صاافي بلااش..لهلاا... مالناا غانبدااو نحزرو فيك..أبنااااقص

طلعاات فيهاا نسرين عينيهاا بحقد و خسراات ملاميحهاا فيهااا.. وهيا كاتنفخ وتفش غير بوحدهاا...دارت ضرباات فواحد صاك كان محطوط فلأرض برجليهاا..وكملات على طريق مفقوصة..بدموع محجرين فعينيهااا....حاسة بيهم حݣروهاا مامسروطش ليها نهائيا تعاملهم معاهاا...

نصيرة غوتات مسمعاها ليهاا:ماتنسااايش تصطحي رااسك مع لحيط...راه مقابل معااك...

خنسااء:صافي اعمتي خلي عليك الزبل...لاينوض تاني شي صدااع... راه عافية

نصيرة : انا جاية نجيب شوية لملحة نرشو على هاادشي...ياربي سلامة هياا قربات طير منو لبركة بعينيهااا...

حيداات نصيرة تووب كانت حاطاه على فخضهااا من عليهااا ونااضت...وخنسااء كملاات كااتجمع..ومرة مرة تقيس حاجة تشوف كيف جااتهااا كاتحماااق على الجوايج والذهوباااات كااتسطى عليهم ...

☀️☀️ صباح صباح ماليه الملحة والسر عليه ...صبااح لعرس ونشااط عند عائلة السايب....

كالسة خنساء فجهة فالصالون وحداها رانيا ...

نطقات خنساء بنبرة راجية مادة يدها للبنت كاتقاد ضفارها وشادة شعرها كاتصايبو ليها بنت اخرى : ياربي دوز هادشي على خير ...شاداني الرعدة

بتاسمات ليهاا رانيا وردت عليهاا وهيااا كاتماكي : ان شاء الله كلشي غايدوز على خيير غير تهنااي ...

☀️☀️ صباح صباح ماليه الملحة والسر عليه ... كالسة خنساء فجهة فالصالون وحداها رانيا حتى هيااا ... خنساء مادة يدها للبنت كاتقاد ضفارها وشادة شعرها كاتصايبو ليها بنت اخرى : ياربي دوز هادشي على خير ...شاداني الرعدة

رانياا كاتماكي : ان شاء الله كلشي غايدوز على خيير غير تهنااي ...

خنساء تنهدات : ياربي ياربي تيسر ... خايفة توقع شي فضيحة فهاد العرس زهري وانا عارفاه

رانيا : ياختي ماهو فالك اشمن فضيحة غاتوقع ....الله يهديك ... ياك غير حنا بيناتنا فالدار اش عندو مايوقع ... غير هني باالك كلشي غايدوز فامان الله وحفظه ... ماتعمريش راسك بالخوا الخاوي

خنساء : على مولاناا ... اجي قولي لياا ديك صاحبتك لي غادي تلبسني هضرتي معاها ؟؟

رانيا : ياودي كوني هانية لي سمعك يقول غادي تلبسي سبعة يااك غير وحدة للحضور ولبسة بااش تمشي الله يهديك حتى نتي

خنساء : واخااا ... دارت جهة المرايا كاتشوف الميكااب وخصرات كمارتها : اويلي استغفر الله ... واش هاذا ميكاب عروسة ...كانكون غادة غير للمدرسة وندير كتر منو .... قادي قادي ليا العينين اختي انا الا مبانوش من ستة ميترو مطرطقين مكانرتاحش ...

البنت ضحكات : هههه هي اللولة اخنساء مايكون غير خاطرك ...

خنساء : يخليك ليلي ... وعفاااك شعري ماتكتريش ليا فيه كترة المقابط والروينة مني نجي نحلهم ندم ... غير شي حاجة خفيفة وصافي ... ركزي ليا اختى على الماكيااج هو المهم

رانيا ضحكات : لي فيك ماهناك اصحبتي ...انا بعدا بغيت ندير داكسي خفيف .... الملح والسر على العظاام

خنساء عصاتها الصبع : ها الملح ها السر ... تي سيري داكسي ديال شفايف منفوخين من الله وعينين قد الكيسان بلا ماكياج وحناك ورديين بلا زواق رااه كاين غير فالاحلااام والافلام ... الواحد هو لي يعطي لراسو فرصة ولا غير وقت يقاد فيه ويفرح فيه براسو مالنا غانعيشو فيها ديمااا ...

رانيا : ههههههه يااختي توبة توبة ... كملي ليهاااا راه تما بقيتي ... السيدة راه مهاوشة على البرودوياات

بقاو كايكملوا شغاالهم على خاطرهم جاو بكري باش مايتزيروش حيت خنساء عارفة راسها كاتعطل ...

دخل عصاام لبيت نعااس...لقاا نسرين لابسة جلابيتهاا غاتخرج تلحق على خنسااء لصالون...

شافت فيه ونطقاات بضيق: عرفتي شحال وانا كانسنااك...تعطلتي علياا...

جوابها بعيااء:وماشي لخاطري..من صباح وانا كانجري..عااد ساليت...جبدتي ليا بعدا لحوايج لي قلت ليك

نسرين:اه اه جبدتهم و صلحتهم وعلقتهم ليك فلماريو...

رد بهدووء:صافي مزياان...دوزي نوصلك معايا لصالون بااش متزيديش تعطلي عليهم

نسرين...هزاات تيل وبزطاامهاا وشافت فيه برجااء:اجي اجي قبل منمشيو...احم كحوب بعداا...راه خاصيني فلوس لمكياج ولخلاص تاع لكوافورة لي غاتصيب ليا شعري..وعاد تكشيطة لي كريت عند مولاتهاا يلاه عطيت فيهاا نص وباقي خاصني نكمل ليهاا نص لاخر..وو..

خسر ملاميحو بنزعااج و قاطعهااا بتساؤل عارفهاا مغاتساليش:شحاال شحاال خصك؟؟

نسرين بتاسماات كتشوف فيه ببراءة:نتاا وجهدك احبيبي...غير الى بغيتي نحمر ليك وجهك فعرس ختك ونبان قدام عائلتك...راه غاينعتوك غير نتا ويقولو مهلي فيهااا

رد عليها وهو كايجبد لبزطاام من جيبو لوراني:حمري لياا وجهي وخوي لياا جيبي..

حلو جبد منو 200 درهم مدهاا ليهااا بتاسماات ليه وباستو فحنكوو و خداتها.... مدات ليه يديهاا مرة اخرى كاتحرك صبعانهاا بمعني "زيد مزاال" شافيهاا و تنهد وجبد ليهاا 200 درهم اخرى...وبدون تردد باستو فلحنك لاخر وعاوداات خداتهااا...يلاه غايسد بزطاامو وهياا تبان ليهاا باقة فيه واحد100 درهم وهياا طيرهاا ليه..يلاه غايخطفهاا من يديهاا وهيا تبعدهاا وقرباات بزربة لفموو باستو فيه مطولة لقبلة لي لحضاات متلفااه بيهاا..

بعدات عليه لقاتو مشوكي هاز حاجبو فيهااا..نطقاات فرحاانة كاضحك :ههه واشنو بغيتي؟؟ يبقى لحال فشفايفك حيت مابستهومش...لااا ماجااتش

جابت ليه ضحكة ..رجع لبزطاام لجيبوو قرصهاا فحنكهااا ورد عليهاا:هه ولعفوو معااك...شحال كاتعرفي تزربي علياا ملي كاتبغي حاجتك عندي...

بتاسماات لييه ودارت دوك لفلووس فبزطاامهااا : دابا خليناا من كترت لهضرة و زيد وصلني راني معطلة غالقاهم سلااو

حرك ليهاا راسو بلإجااب خرجو مع بعضياتهم ...لقاتو كرى اللوطو باش يجيب خنساء من صالون ملي تسالي...وباش يدوز لعرس...ركبوو وتوجهو عند لخياطة هيا اللولة خدات من عندهاا التكشيطة ووصاتو يوصلهاا ليهاا لداار...وكملو طريقهم لصالون حطهاا وزااد يقضي شغل لي باقي ماتقضى

فدار عدنان واقف قدام المرايا كايقاد الكرافاط ديالو بتركيز .... حتى دخلات عليه خديجة بعجاجتها هازة فيدها مجيمر صغير كاتشير بيه وتقرااا فالمعوذتين : بسم الله الرحمن الرحيم .... قُلْ أَعُوذُ بِرَبِّ الْفَلَقِ (1) مِنْ شَرِّ مَا خَلَقَ (2) وَمِنْ شَرِّ غَاسِقٍ إِذَا وَقَبَ (3) وَمِنْ شَرِّ النَّفَّاثَاتِ فِي الْعُقَدِ (4) وَمِنْ شَرِّ حَاسِدٍ إِذَا حَسَدَ (5)

قُلْ أَعُوذُ بِرَبِّ النَّاسِ (1) مَلِكِ النَّاسِ (2) إِلَهِ النَّاسِ (3) مِنْ شَرِّ الْوَسْوَاسِ الْخَنَّاسِ (4) الَّذِي يُوَسْوِسُ فِي صُدُورِ النَّاسِ (5) مِنَ الْجِنَّةِ وَالنَّاسِ (6.)

عدنان خصر كمارتو كايكحب من الريحة : بففففف لاش هاد الزمر حبسي .... واش كاين شي واحد كايقرا القرأن بالمجمر ... استغفر الله

خديجة كادوزوا عليه : هنينااا اخويااا انا لي نعرف الصواالح ... نتاا غير تهنااا ....

حيدوا ليها من يدها بعصبية مخرجو من بيتو : اولااا هادشي مانعاودش نشوفك دخلتيه لبيتي ... تانيااا الناس راه كايقراو القرأن بالخشوع ماشي بالمجمر ... تالتاا راااه ريحة هاد الزبل اجا ما خرجها ليااا من حوايجي دابا

خديجة تقدمات حلات الشرجم : بفففف راك عارفني علاش دايرة هادشي ... راااه داكشي مديور ليك فالبيت هناااااااا فالركاني ... علاه ماشي نتا لي قلتي بيلااااا هادشي لي كايوقع ليك مع العيالات سبابو بنادم وااش ضرتي فكلامك دروك ...

شد على راسو : حتى دابا ماقلناش العكس اللالة ولكن راه الشبة والحرمل وهاد التخربيق ماعندو فاش ينفع ... خلينا نتوكلوا على الله هاد المرة ماتعرفي ونساي عليا هادشي ... انا عارف راسي اش كانديير

خديجة ساطت : الله ياخويااا عدنان وماعندك زهر ... ( هزات كفوفها للسما ): انا بغييت لليد لي دارت ليك هادشي تقطع من الجدر ... سير انا بغيت كيما ضيعوك فرزقك بغيت ربي يضيعهم فلي عزيز عليهم ... انا بغيت ليهم تكركيبة فالعقبة مايعاودوا يهزا الراااس

سكتها : هنينا دابا براكة من الدعاوي فعيباد الله ... واجي قادي ليا هاد الكرافاط تعكسات ... ( نفضها )

قربات خداتها كاتعاونو يقادها : عنداك تنسى تشرب دواك فالوقت ... ماتفلتوش اليوووم ... رد البااال البنت راه باينة مجهدة راااك عاارف .... باقا صغيرة وتبارك الله والصلاة على النبي باينة فيها ...

عرفها غاتزبلها ساط بنفور مقاطعها : واش مغاديش تسالي من هاد ديسك اهاد المرأة ... قادي وسيري شوفي شغلك طبختي ليا راسي بالهضرة الخاوية ... سووور سوووور مكاتقاضااايش

خديجة هزات كتافها : اييه سري ... هاك افمي ...

صاوباتها ليه وزادت من تما توجد راسها هي ... حل المجر ديالو ... جبد منو الدوا مدة وهو كايشوف فييه ... خدا حبة وطرطقها ففمو كايتنفس الصعدااء ... عاد كمل لباسو فخاطروااا ... كايوجد راسو للعرس وليلتو الحمراء مع لالة البنات خنساء 😉

وقفات خنساء قدام لمراية لكبيرة ديال الصالون كاتأمل فملاميحهااا بعدماا سالات ليهاا لكوافورة لميكاب وشعر وجميع لمسائل لي كايخليو لعروسة تبان فأبهى حلة فيوم عرسهااا... تنهدات بعمق وهياا كاتشوف راسهاا فلمراية..جات كاتحمق وأقل مايمكن ان يقال عنهاا بحال شي تحفة فنية منحوتة...لعينين مكحلين بطريقة دقيقة مع السحبة ديال الأيلاينر عطات لنضرتهاا جادبية خااصة...لخدود موردة زادوها وساامة...وشفايف بارزة و مرسومة... لميكاااب زادهاا جمال على جماال...لي شافهاا يحلف عليهاا ݣمرة مضوية وسط سماا مضلمة...زينهاا فتان...جات فنهارهاا وردة مفتحة وبلارة لي شافهاا تعجبوو...طولات شوفة فلمراية...وهياا كاتفكر...بزينهاا وجمالهاا كانت قادرة تجيب بإشارة منهاا سيد الرجاال..يجي طايح على ركابيه محني لعندهاا...ولكن لقدر كان قاسي معاهاا...وبتهورهاا خلى نصيبهاا يكون هو عدناان..بلى متحس غرغرو عينيهاا بدمووع...دغياا قشعااتهاا رانياا وهيا دورهاا لعندهاا..

ناطقة بنفي:لااااا عنداااك تبكي..ويااك

خداات نفس معمق وطلعاات عينيهاا لفوق كاتحاول تقاوم رغبتهاا الشديدة فلبكااء ..

دارت بتساامة جانبية:لا لا...متخاافيش مغاانبكيش

رانياا بنضرات إعجااب:بصرااحة جيتي كاتحمقي والله...ماشاء الله

ردت عليهاا بمجااملة:ربي يخليك...

جابت نسرين الزيف و قداتو على شعر خنساء..وغطات ليهاا بيه حتا وجهااا...كيفما وصاتهاا نصيرة ديرو ليهاا دارتوو

خرجووهاا من الصالون لقاو عصاام كايتسنااهم...ركبات خنساء اللور مع رانياا..وجات نسرين ركباات حدااه...

بتاسم وداار عندهااا هز حاجبو وهو كايشوف فيهاا مغطياا ومكايبانش وجهاا:كفااش زعماا...مانشوفش كيف طلعاات ختي ولا شنووو؟؟

ردت عليه نسرين بإمتنااع:لا لا نصيرة وصاتني وقالت ليا مخاصش يشوفها حد حتا تبرز...الى عرات وجهاا دابا غادي يطيح ليهاا زينهااا

عصام خنزر فيهاا: شهاد تخرييق...كيفااش غايطيح ليهاا زينهاا مالو منشوور فحبل..

رانياا:اه راه عندها الصح...ممزيانش ليهاا يشوفها شي حد دابااا

عصاام داير راسو زاعف:ياك اخنسااء... حتا نتي معااهم...مغاتخليش خوك يشوفك؟؟

ردت عليه كاضحك:ههه ماكرهتش ليك ولكن لأوامر جاية من لفووق...ماعندي ماندير..

عصاام بتاسم بلاحول مابغيش داكشي يدخل ليه لدمااغو...جبد لبواطة لي فيهاا لݣورميط لي شرى ليهاا...جبدهاا منهاا تحت انضاارهم... وشد فيد خنسااء وركبهاا ليهاا بلطف...جاتهاا مع يديهاا وضفار لمصبوغين بطريقة ناعمة...كاتحمق...

عصاام مبتاسم :هاانتي لا تقولي خوياا مامهليش فيااا...على مولاناا تعجبك

نطقاات نسرين وهيا كاتشوف ليهاا فيديهاا:وعلااش ماتعجبهااش؟؟...كاين شي حد مكايعجبووش الذهب...

خنسااء حدارت راسهاا كاتمعن فيهااا

ردت عليه بنبرة حنينة:ونتاا تقدر تجيب ليا شي حاجة وماتعجبنيش...زويينة بزااف أخويا...الله يحفضك ويخليك ليااا

رانياا شافت فعصاام ونطقات بإعجااب: ههه كاتحمق..ماعندي منقوول..مايتساالكش راك عندك الدووق أعصاام

بتاسم ليها يلاه غايرد عليهاا وهياا تقااطعو نسرين متعمدة تحط يديهاا على عنقو كاتحسس لحيتو بلطف مجاوباهاا فبلاصتوو: معلووم لحبيب ديالي عندو الدوق(غمزاتهاا وشارت لنفسهاا وكملات بغرور)وفكلشييي..يااربي تحفضو ليااا...

دارت ليهاا رانياا ضحكة صفرة ومجاوباتهاا بوالو وهربات عينيهاا منهم...تنحنح عصام بخجل وحيد ليهاا يديهاا من علييه....ديماارة اللوطوو...ومشاااو لداار

مرت دقائق حتا وصلو وبداا كايكلاكصووني كايعلمهم ان لعروسة وصلاات من صاالون...تواني حتا خرجو لبناات من عائلتهم حلو لبااب باش يستقبلووهاا...وجيراان كايطلوو من شراجم باش يشوفو حتا همااا...هبطاات نسرين ورانياا هما اللولين و عاد تبعااتهم خنسااء...غير هبطاات وبداات زغااريت وصلااة على النبي كاتعاالا فرحانين بيهااا وبخطواتهاا تقيلة دخلاات لداار..مطلعينهاا ديريكت لبيتها لقات نݣافة كاتسناا فيهاا...سدو عليهم مخلينهاا كاتوجد راسهاا باش تبرز...

لبساتها قفطات فالاخضر ملكي مطروز بالدوغي كايحمق ديال الموبرة ومنبت بالحجر عااامر كايبري ديال العرايساات وصباااط عالي فنفس اللون ديال الطرز زادها طول عل طولها ودارت ليها فواال خفيف فوق راسها مع تااج كاايشعل محجر واكسيسوارات مزينة اللبسة لي طلعات بيها عرووس مغربية على حقها وطريقها بينات ليها لاطااي حوتة كل حاجة فبلاصتهااا ... البلدي كايبينها بطابع ااخر وبحلة اخرى كاتخليك تفهى فيها بلاما تشعر .... سلااو التجهيز وتجمعوا العائلة لي معروضة كانو غير الناس القراب وشي وحدين من عائلة عدنان ... هبطوها بالصلاااة والسلااام على النبي للصالون لي مجموعين فيه العياالاااات والبرزة متوسطة المكااان متولة على حقها وطريقها بكلشي ليهااا ... وهي مهبطة عينيهااا لللارض حشماانة والسر كايدردر عليهاااا ... حسات براسهاا متوترة بلا قياااس لدرجة مكانتش متخيلاهاا بالمرة

حسن جار عبدو من باب الداار مخرجوا من عنقوا جااهل : خرج عليا السكايري ديال الخلاااا .... الله ينعل الولاد الا كانوااا بحااالك السلكووط الكلووشاار ...

عبدو سكراان جايب الكااو كايتماايل : تاااااا سييييير ... اشمن ولاااد ولا *لااوي ... بربي وماخليتيني ندخل .... حتى نهرس على *** هااد الدار ونريبها فوووق ريوووسكم ....

حياة كاتندب شاداه : سكت اهاد المسخووط وسير بدل ساعة باخرى واش بااغي تشوهني فالحومة .... هادشي لي بقا ليك غير السكرة ...

تنفض منها : شووووو الواليدة مادويتش معااااك ... نتي هء... على راسي ... وعيني ... خليني مزي...ااان معاااك ...

حسن عينيه حمرين : سير الله يغبر ليك الشقف ... مانتا ولدي ما انا باااك ... اناا ساااخط عليك دنياا واخرة ... ماتعاودش تعتب فبااب داري ... مانعاودش نشوفك ... الله يلكيها لييك

( كلشي مجموع فالحومة كايتفرج .. ها لي من الشراجم هالي دايز ووقف ... حتى واحد ما خااص تفلتو شي حاجة )

عبدوو شاد راسو غير بزز : تااا اشمن داار ولا زبل ... حتى هادي يسميوها ناس دااار .... بقااات فاللحية والقبلة ونتا ماعمرك حنيتي حتى .... فولدك من لحمك ولا عرفتي شنو خاصوااا ... زعمااا غير ما عطاني مشيت للبلية ... نتااااا سباااب ... بحاااالك ... نتااا هماا لي كاايخرجوا على ولاادهم ... مكبرينهم بالعصاا فحال الكلااااب بسيييف مايخرجوا ليكم الدراري من الجنب ... شنو بغيتيهم ... يخرجوا متلاااا

حيااة كاتسكتو : شووو الله يرضي عليك اولدي .... سير حتى تسحا واجي ... هااا البزيزيلة ولي ربيت فيك لامااا بدل السااعة ... هااا العاااار

حسن جهل : ماعندي ماندير بيييه ... من اليوم ماعندي ولد ... الاااا غير سكايري ديال الخلاا انا مبري منو دنيا واخرة يعطيني غير التيقاااار ... صبرناا ليه على البلية والجوانات والحشيش ... ولكن حتاااال هنا وبراكة يجيني سكرااان للدااار داكشي لي بقاااا شي نهار يهز جنوي ينحرنا شكون عرف ... السالهلة فعمايلوااا

حياااة : نعل الشيطان احسن راه نااس كايتفرجواا وااش باغين طيحوني بالعظاام ...

منير جا كايجري جروو من يدو : يلاااه اعبدو زييد ... واش حماقيتي

حيااة : ديه اولدي الله يرضي علييك فيقوااا ... الله يحن عليك ...

عبدو شاار بيدو جهة حسن : ديرها فين تجييك ... وااااعقل الشااارف .... عقااااااال عليهااا ( كايشير ليه بتحدير مواعيش على راسو بالمرة )

منير جرو : يلاااه اصحبي زيد ... جروووو وزاد بيه من تما شوية ويطييح ... واقف غير بزز ...

منير : واش تسطيتي اصحبي داير فراسك هاد الحاالة .... اش وصلك لهادشي ..

عبدو دايخ شاف فيه باسى : خنساااء اصحبي ... خنساااء اليوم غاتزوج بداك الشاارف الهاارف .... انا سبااااب اناااااا ... اليوم غايعقد عليها

منير : الله يكمل عليها اصحبي ... نتوما اصلا عارفين هادشي كان غايوقع ... ماشي عااد ... ياك كل واحد شد طريق اش باقي باغي ... نسااهاا علييك

بعد منو بنفرة مكالي راسو مع الحيط : لااااا ... مغاانساااهااااش .... تااا بربي مانسااهاااا ... خنساااء ديالي وغااتبقى دياااالي وكاااينش ولد المرااا لي يديهاا لياااا ... مكاااااينش ... كااتفهم ... لاااا عدنااان لاااغيييروووو ... ( كيصرب صدرو ): خنساااااء ديااالي انااااا ... اناااا

منير : واش تسطيتي ولا مالك ... اصلا خنساء محاتك من حياتها اش باقي باغي منها ... ياك قلتي وقع بيناتكم نقاش كبير وطويتي صفحتها فين هي هاد الهضرة ... ولا دابا شفتيها فرفرات عاد بانت ليك

عبدو : تاا بربي المعبود لا فرح بيهاا ... اليوم نفرتك لوالديهم داك العرس ... ماعمروا يحلم بيها ... مغانخليهاش لييه

( بغا يزيد لجيهتهم وهو يشدو منير ) : واش نتا مرييض ... باغي تخرج على الدرية فنهار عرسها دير عقلك وحضر دماغك ... تبغي لي يديرها لختك ... تفرتك ليها الشمل فنهارها ... راه الحمااق هاذا ... السيدة بدات حياتها من لول وعارفة مصلاحتها فين .. واش هي عمرها اذااتك بشي حاجة باش تجي نتا تخرج عليها ....

تنهد ضارب يدو مع لحيط : ادااتني ااااه ... اداااتني وبزاااف كاااع ...

منير : اش دارت ليك هاد البنت بالسلااامة ...

ضرب على قلبو جاعر : هناااااا اذاااتني ... هناااااا اخويااااا ... قسحاتني هنااا ... مقادرش نخرجها اصحبي بالمرة ... بغيت ووالله ماقدرت نخرجها ...

منير شد على راسو : ايييه انا عارف ... وقلتها ليك قبل مايفوت الفوت ... ولكن نتا مابغيتيش تيق بيا ... من ديما كنت كانقوليك نتا راك طايح فيها ... حاول تخليها قريبة ليك ولكن نتااا حتى ضاعت منك عاد بانت ليك ... داباا مابقى عندك مادير غير تبعد منها وتخليها تعيش حيااتها ... الا بصح عزيزة عندك غاتبعد منها ... حيت الا مشيتي عندها دابااا غادي تكون سباب باش تخرج عليها ... فكر مزيااان اصحبي ...

عبدو غمض عينو بالع ريقو وطاح فالارض : اناا سباب فهادشي ... ماعمري غانسمح لراسي على هادشي ... ذنب خنساء غايبقى على رقبتي حياتي كاملة ...

منير باستفهام : اشمن ذنب ؟؟؟

عبدو شد راسو وحاول يوقف عاد وعا على راسو شنو كان غايقول : يلاااه فحالناا ... زيد

منير عاونو وزاد هو ويااه جهة دار منير دقة دقة حتى وصلوا للدار ودخلوا للدوش خلااه يغسل على راحتو ويتوكض

خديجة وقفات كادور فعينيها مابانتش ليها نصيرة وناضت جهة خنساء لي كانت كاتدوي مع رانيا مجمعة هي وياها ... حنات عليها : واش العدول باقي مغادي يوصل ؟؟

خنساء هزات فيها عينيها باستغراب : ماعرفتش صراحة ... عصام لي مكلف غايجيبو ...

خديجة بايجاز : اييه اييه غير مالقيتش كيف ندير ندخل عندو كاين الرجاال

خنساء لوات فمهاا: اييه بصح ... هانتي غير قوليها لعمتي نصيرة راه تلقايها فالكوزينة وهي غاتعرف كيف دير تسولوا

ابتاسمات ليها : واخا احبيبة ... ( حطات يدها على شعرها ): جيتي كاتحمقي تبارك الله ... ( خفضات صوتها ): ديري معاك شي كموسة ديال الشبة والحرمل بين صدرك راااه العين علينا حق

رانيا : كوني هانية قضينا الغرض ... كاعما تهزي الهم

جبدات ليها حنكها : احياني عليك نتي يا شيطانة كاطيري فكلشي قااافزة يعول عليك الواحد ... واردي البال لصاحبتك راه نهارها اليوم ...

رانيا : لا توصي يتيم على بكاا فوق راسي وعيني

خنساء بإبتساامة: يخليكم ليلي ...

خديجة هزات على جلايلها وخرجات من الصالون متاجهة للكوزينة ... لقات نصيرة كاتستف الحلوة مع السيدة لي كاطيب

خديجة : انصيرة الله يهديك ... فين هاد العدوول .. راه العروسة خاصها تحني

نصيرة مقابلة طباسلها ما عزيزش عليها لي يعطيها الاوامر : غير تهناي راااه علاين يوصل وكوني هانية من هاد الناحية مقومين شلاااا عراسااات وحضوراات على هاد الكتاف والحمد لله عمري تحاشمت مع شي حد وعرس بنت خويا كاعما تهزي ليه الهم ونعسي على جنب الراحة كلشي غايكون فوقتو ..

خديجة : اييه رااني عارفاااك قاادة وقدود تبارك الله ... غير وكان حيت جات النقاشة قلت نبطروا بالعقد وتحني فخاطرها ...

تسمع صوت عصام فالدروج كايعيط :عمتيي ... عمتيي نصييييرة ...

نصيرة شارت ليها : هاااهو وصل ... غير سيري علمي خنساء بااش يدخلوا للبيت الفوق يعقدو عاد تهبط

خديجة : اهاااه واخا ... زادت من تمااا ونصيرة اتاجهات عند عصام لي كان واقف مع العدول ..

ابتاسمات ليه نصيرة بلباقة : مرحبا مرحبا اسيدي ... زيد تفضل ...(قربات لعند عصام) سير اعصام علم باك وعدنان الله يرضا عليك ...

حرك راسو بايجاب وزاد يدير لي قالت ليه وهي وصلات العدول للبيت فين غادي يديرو العقد ... دقائق قليلة حتى جات خنساء وخديجة ونصيرة دخلوا للبيت لي تجمع فيه عصام والعربي و عدنان والعادل ... نسرين ورانيا بقاو مع الضياف مقابلينهم

كلسات جنب باها وعصام مد لاكارط ديالها وعدنان حط لاكارط ديالو حتى هو

هز فيها العدول عينو بعدما زمم كلشي فالكناش ديالو ... ونطق بتساؤل : قولي ليا ابنتي واش توصلتي بالصداق ديالك كامل ؟؟

خنساء حركات راسها بايجاب : ايه اسيدي كامل

العدول : مزياان ... على بركة الله ... خنساء بنت العربي واش نتي قابلة تزوجي بالسي عدنان البقالي على سنة الله ورسوله وبكل صدر رحب ...

خنساء حنات راسها مبتاسمة وشافت فخوها محرك راسها بايجاب بلاما تنطق ...

عصام قرب ليها : راه خاص العدول يسمع الموافقة ديالك بلاما ماديري فيها حشمانة ...

هزات فيه حاجبها وشافت فالعدول لي نطق : اش قلتي ابنتي ...

تنفسات الصعداء ماباغاش تنطقها خرجاتها غير بزز : احم اه موافقة ...

العدول : ونتا اسي عدنان البقالي قابل تزوج بخنساء بنت العربي على سنة الله ورسوله وتشارك معاها فالسراء والضراء ...

عدنان بلا تردد : وي قابل ...

كمل العدول المراسم فجو هادئ ...فرحانين لبنتهم لي غادي تمشي عليهم ودير دارها حتى هي ... سنااو وتتموا العقد وعدنان خرج بعدما علم العربي انه غادي يجيب الدفوع قرروا مايدخلوه حتى يتجمعوا الناس باش كلشي يدي مايعاود ... وخنساء رجعات للبرزة مع العيالات

ݣلساات خنسااء بارزة فبلاصتهاا...كاتوجد بااش تنقش وترشم إيديهاا كيف أي عروسة فنهاارهاا...قباالتهاا كانو محطوطين فوق طبلة الصاالون لكببيرة لي كانو مغلفينهاا "بنااب" فلون الأخضر صينياات مدهبة كل صينياا وأشنو مستف فوقهاا...كموسااات ديال لحنة ورق انيقة فلون الأخضر متوسطاهم خميسة...براسلياات ديال تووب لي غايتعطااو لبنات لي غاينقشو مع لعرووسة....وبلاطو زجاجي محطوط فيه شمع منبت بلعقيق... وقالب تاع سكر حتاا هو مزين بلعقيق خضر ومدهب...وزلافة مخلطة فيهاا الحنة للعروسة حتا هياا مرشوومة...جات نقااشة وقرباات عند خنسااء...هزاات مخدة صغيرة مغلفة بلون الأخضر ومطرووزة فجنااب ..حطاات عليهاا يد لعروسة وبداات كتنقش ليهاا بشوية وبتركييز...ختاارت خنسااء تنقش غير صبيع فيدهاا ليمنة مباغاش تكتر الحنة...تقادات اللعابة فلݣلسة من بعد مداارت تسخيناات مع رباعتهااا...وطلقاات لييك حلقهاا كاتمدح وتغني على لعرووسة.. وصووت لبنادر وطعاارج ودربووكة.... كااصر الدنياااا....