بنت السايب الجزء الخامس

شمس سااطعة كاطل على المدينة ... سماء صاافية نوعا ما وطبعا اعشاش طاائر اللقلاق لي مزينة الشواارع الرئيسية ... جو زويين وهدوء كبير كايعم المكا ... يا اما جايب معاه راحة وطمأنينة تخلي الامور تزيان وتحل كاع المشاكل ... او هدوء ما قبل عاصفة لي تقدر تخلي حياة بزااف تغير ... مر شهر طويل بحلوو ومرو تغرو فيه بزاااف خنساء تبدلات من ديك البنت المرحة لي ضاربة الدنيا بركلة لانسانة مهمومة غير كاتفكر فحياتها لي ضاعت ومستقبلها لمجهول لي معارفاش شنو غادي دير فيه من هنا للقدام ... هضرتها قلالت معاهم وكلشي لاحظ التغير لي وقع ليها خصوصا من ناحية الخروج والضوران والزهوا والنشاط ولات غير سادة عليها فبيتها ... مخشية بين ميكياجها وحوايجها وضفارها ... حتى نسرين مابقاتش كاتجاحد معاها وعطاتها نخال لدرجة بعد المرات كاتخليها تدوي بوحدها وتزيد ... ولات هازة الهم غير لراسها وكيفاش تفك من هاد الحريرة لي مزال مالقات ليها حل وكل نعار خوفها كايزيد يكبر ... شهر خلااا امور تزاد وامور تغيب وكل نهار فحيااة اي انسان الا وعندو تأتيرا الا مكانش كبير غايكون بسيط ...

كانت نسرين ݣالسة فلبيت فدارهم مع مهاا شادة معاها لحديت...

نجااة بإبتسامة فرحانة:والله يا بنيتي حتا توحشتك...

نسرين:حتا نتي اماما حشومة عليك،ماتجي طلي ماتجي تشوفيني...وزعما لباب على لباب

نجاة : وااكانبغي نجي،ولكن غير كنتفكر غا لقا لعيشورية وكانشد رجلي عندي، ملي ندخل وهيا طلع فيا وتنزل تقول ݣالسة ليها على عينيهاا ... تقيلة يابنيتي على لقلب حسن عوانك معاهاا

نسرين : وقتماا بغيتي تشوفيني جي مرحباا بيك،حتا عصام راك عزيزة عليه و كايسولني عليك .... وديك خيتي تمشي تنبݣ،مالهاا غاتحيدك ليااا،وزيدون راه مكتكونش سيمانة كاملة،دوك ناس لي كاتمشي عندهم الله يعطيهم ما تمنااو مهنيني منهاا ومن صداعهاا ...(كملات كضحك)ههه كون لقيت انا نخلص ليهم باش يشدوهاا عندهم...

نجاة متسائلة بهتمام:قولي لياا بعداا...كيف داير حالك معاها

نسرين تنهدات : كيف غايكون اماما...راني غير صابرة ليهاا وصافي ... عرفتي غير شافت عصاام مهلي فياا ومكايخسرش ليا ولي بغيتهاا كايجيبها ليا ... وهياا الله يستر لعاافية شاعلة فيهاا،كتقلب غير منين دوز ليا ... هادشي راه عرفتو فيهاا غير فدوك يوماين لي كتجي فيهم...كادير ليا روشارج وتمشي...علم الله اش تاني موجدة ليا هاد سيمانة..هازة ليهاا لهم

نجاة برجااء:والله يهديهاا عليك ابنيتي..غير متجاحديش معاهاا..تيقاار ونخال هو دواهاا

ردت عليها بهدوء:داكشي لي مطبقة معاهاا...كانقتلهاا غير بلبارد...بلا منوض صداع بلا مايسيق راجلي لخبار...

نجاة:واحد خنساء لاباس عليهاا..اش كاتعود

نسرين غوبشات بوجهاا:راها كتاكل وكاتشرب ودردݣ بحال الجمل...مناقصهاا خير... حتى لقراية خرجات منهاا ولات عاطياهاا غير لنعاس ولماكلة...اودي سوليني على حالي أناا..اما ديك تريكة كلهم مسقيين بمغرفة وحدة...حيدي منهم غير عمي لعربي فقط...

نجاة خنزرات فيهاا:اويلي؟؟ عنداااك تقولي لياا قربلتيهاا معاها..

جوباتها بتردد ما كانت عودات ليها والو..حدراات راسهاا ناطقة بإجااز:هياا لي جبداتني..

نجاة بانفعاال :كيفااش هياا لي جبداتني؟؟...زعمااا كنتو صحابات... راس على الراس.. أش طرى وجرى ..وهيا لملحة دودات ملي تخاصمتوو؟؟ إوى قلنا نصيرة مكاين باس هاديك معروف عليها الصداع،ولكن واش حتا خنساء تشاديتي معاها وفشهرك لول؟؟

نسرين :هاديك راه طلعاات واحد شاطا ماطة سامة بخبيزتهاا...كانت قبل منتزوج عاطياني وجه،وملي تزوجت عطاتني وجه اخر...

نجااة : ولاواه لاواه... حتا لخنساء لا...راني كنعرفهاا مزيان كبرات قدام عيني ...تجيها بلخاطر تديها بحوايجهاا ... غير نتي معرفتيش ليهاا ... معرفتك لمن شبهتي سليطة مكاتفاهمي مع حد

ردت عليها بضيق عاقدة حجبانها:لهلا يوريك هاديك اش مخبية...عافية تحت الرماد...تكوي وتبوخ غير بوحدهاا..شتي بنادم ما تعرفو على حقيقتو حتاا تعااشرو...

نجاة : انا ربي كان عالمني بلي هاد زواج غايكونو فيه لمشااكل ... وقلت ليك ݣلسي تبتي حتا يجيب ليك الله شي ولد ناس لي يعيشك وحدك...ويكون حسن من تريكة السايب...ولكن لي فيك ماهناك...غير سمعتي زواج ونتي طيري بحالا رجال كانو تقاداو من دنياا...

نسرين بإبتسامة:حتا دابا موقع والو،راجلي معمر ليا عيني باغاه وقابلة عليه بمشاكل عائلتو وبصدااعهم ... ياك معيشني مزيان وممخصص ليا والو...هما يمشيو فحالهم مهامينيش...يديرو لي بغاو والله مامفيقيني من نعااس

نجااة:واش غنقول ليك .... الله يدير ليك شي تاويل تلخير معاهم ... راني خايفة عليك لايمشيو يديرو ليك شي حااجة..غير انا لي غانوحل ونهز دقتك...

نسرين بنبرة مطمئنة:اماما شتي بنتك فران وقاد بحومة ماكاين لاش تخافي عليا ... دابا غير دعي معايا ياربي يجيب لي يفكني من خنسااء فلقريب

نجاة:اجي دابا ملي ݣلسات من لقراية باينة غايبداو يجيو فيهاا لخطااب؟...(غمزاتها وكملات): مخفاكش هيا عاطية لعين والف واحد يتماناها حارة وحرورة مايغالبهاش الزواج ... مغايفلتوهااش

نسرين : يلاه جاا فيهاا واحد ورضاتو كاتشرط وتختار ... نتمناا ملي يجي شي حد أخر تقبل وتقلع عليا من ديك داار...ولات خانقاني كتر من عمتهاا..

نجاة تنهدات بعمق معجبهااش حال بنتها معاهم متنكرش انها خايفة عليها .. ولكن ماعندها مدير،كانت متوقعة غادي تلقا معاهم لمشااكيل حيت عارفة بنتهاا صعيب طبعهاا وماشي ساهل يتفاهم معاها لواحد...كملو حديتهم مع بعضهم ونجاة كل مرة ترد لنسرين فعقلهاا وتوصي فيهااا وهي لي فراسها فراسها .... من بعد توادعو مع بعضياتهم ورجعات نسرين لداار

خنسااء لبسات عبايتها وهبطات فالدروج تاني طالقة سوالفها وماكياجها ما يخطاهاش كاضرب على الشعاااا ... لقات العربي يللاه دااخل من الظهر ... قربات باست ليه يدو : على السلامة اباااا

العربي : الله يرضي عليك ابنتي ... فين غادة فهاد الكَيالة ...

خنساء : ماقديتش نعجن ونسرين مشات عند مها عاد جات ... غانجيب الخبز باش نحط الغدا

العربي : اااه واخا ابنيتي ... جيبي ليا شي وحدة زرع الله يرضي عليك راه داك الرطب كايقهر ليا المسران

خنساء : واخا ابا ...

جبد الفلوس : وهاكي جيبي معاك شي قرعة الموناضا نهبطوا بيها

خداتهم وحركات راسها بايجاب .. خرجات كاتمختر هي هي فالمشية والعجرفة دايما كتافها مهزورين وكلشي فيها كايترعد ... دايرة الكيت فودنيها متاجهة للمخبزة ... يلاه غاتدخل و تحطات يد على كتفها .... ضارت مفزوعة وقرمات حجبانها مخنزرة فور ما لمحات شكون

دايرة الكيت فودنيها متاجهة للمخبزة ... يلاه غاتدخل و تحطات يد على كتفها .... ضارت مفزوعة وقرمات حجبانها مخنزرة فور ما لمحات شكون .... بعدات يديها بهدوء ونطقات وهي على نفس النظرات : منير ياك لاباس ؟؟؟

منير : نتي لي يااك لاباااس ... فين هاد الغبور ... قلبتي علينا قلبة وحدة درنا ليك شي حاجة اختي ...

خنساء هزات حاجبها : لا مادرتي ليا والو علاااش ؟؟؟

منير : ايوا علاااش وليتي تشوفيني وتقلبي وجهك فحال الا عمرك عرفتيني ... مافهمتش هاد القضية بين ليلة ونهار وليت عدوك

خنساء بايجاز : لا ماعدوياش وفنفس الوقت ماشي صاحبي ... كانت جامعاني بيكم القرايا وحبستها الله يخلف الله يجعل البراكة ... شنو المشكل رانيا لي صاحبتي راني معاها بيخير غيرها راه كان غير خضرة فوق طعام

منير : هه واش خنساء هادي لي كاتدوي ولا وحدة اخرى ... ياك كنا عشران وتقاسمنا الحلوة والمرة وديما كانسول فيك رانيا وكاتقولي راه مابقات باغا حد فحياتها ... ومافهمت حتى وزة

خنساء : شوف امنير باش نجيك نيشان ونسدو هاد السيجي ... انا بغيت نبدل كلشي حتى بنادم لي فحياتي سستو فخطرة وحدة ودرت ميزاجور ... تلاقينا خوت وتفارقنا خوت وانا ماقلبتش عليك غير نتا ... الكليكة كاملة خرجت منها داكشي علاش غير فوتني ...

منير بتفهم : حتى انا اختي مغاديش نبزز عليك انا لي كنت باغي نعرف شنو درت ليك ولا ياكما عندك شي مشكل مني القضية بارادتك ونتي لي اختاريتي هادشي الله يسهل عليك وسمحي ليا ديرونجيتك ...

خنساء تنهدات : هانية ... زادت من تما خلاتو وراها مافاهمش هاد التغيير مادخلش ليه لراسو وحتى اسلوبها معاه ماعجبووش ...

خنساء تنفسات الصعداء مابقات باغا تعرف حتى حاجة على اي واحد يفكرها فلي طرا ولا يفكرها فعبدو وهي باقا غاطسة فالمشاكيل من ساسها ... حاولات تبعد على كاع صحابهم المشتركين من غير رانيا لي كاتعتابرها اقرب وحدة ليها نوعا مااا على الاقل عارفاها تقة واخا هي مكاتقيش حتى فراسها ولكن على الاقل كاتحس بيها مكاتنافقهاش ....

دخلات للمخبزة خدات الخبز ودازت للحانوت شرات شنو خصها ورجعات لدارهم حطات الغدا وتغداو مجموعين بعدما جات نصيرة ...

طلعوا لبيتهم مجموعين وخنساء غير سااهية وماشي هناا ....

نصيرة مخاطباها : ولاهيلا هاد اللياام بديت نعيا ... كانكمل السيمانة غير بزز الله يحفض

خنساء مارداتش عليها ماشي فهاد العالم شاردة الذهن

نصيرة خنزرات قارمة حجبانها : ربي واش نتي ضاربك شي جن هاد الايام مالكي غير مهمومة وتخممي وغارقين ليك البابر ...

خنساء : والو اعمتي غير عيانة ....

نصيرة : لا لا نتي حالك ماهواش هاد الليام ... اوووو ... الضحكة مابقيتيش طلعيها شوفي كيف وليتي صفرة وكلها صحتك طاحت .... جيني نيشان وقولي ليا مالكي؟

خنساء ساطت : راه قلت ليك ما عندي والو ساعتو الله اووو ...

هزات حوايجها وخرجات للحمام دوش خلااتهااا غادي تاكل جنابها بالفقصة : لا لا لا ... هاد البنت مااهيااااش .... ويلي حاااي ... نوارة وكاتبدال قدامي نهار على نهار ... ولايني لافوت مني ... انااا لي درتها ليهاا وهي كيف الهبييلة عارفاها خبز ربي فطبكو ... بااينة بنت نجااااة الله يلكَيها ليهاا دغجاتها ولا شوف اش دارت ليهااا .... تريكة السحااارااات ... مافيهااا تقة وهي غير مدرمة فينما كان تزطم ولي لقاتها تتخطاها ....

صغرات عينيهااا كاتنكر وهبطات بلا عكز عليها عند العربي لي كان متكي فالصالة عيااان ... تقابلات معاه : خويي بغيت ندوي معاك

العربي قاد الكلسة : الله يسمعنا خير انصيرة ...

نصيرة بالغدايد : خنساء اخويا هاد ليام مابقات شااي عاجبااني ... ويلي على البنت ولات غير تااايهة ... نهار على نهار كادوب ...

العربي : ايوا اختي راني داير معاها الجهد مدة وانا كانسولها ياكما مريضة بغيتي الطبييب ولاااا عيااانة ... وهي ماباااغاااش تجاوب قالت ليك غير قنطات فالدار وراني مخليها على خاطرها

كاتحرك سبابتها بلا : لا لا لا هادي ماشي دقة المرض اخويي سولني يااانااا ... هادي يا مخطية شي حااجة يااا موكلة ماافيهااا ويلي على بنتي مسكينة ولااات طااافية وصفرة قطرة الدم ماا فوجهها ... والعريس على من الزيناتو هو اللخر رداتو بلا سبب ... ( خفضات صوتها ): هاذا لي داير ليها هادشي دقتو صحيحة وفقيهووو كاايريب الحجر حتى كحل ليها الدنيا والبشاار فعينيهااا ...

العربي قرم حجبانو : الله يهديك انصيرة شكون غايدير ليها شي حاجة ... اصلا انا ماعنديش مع هاد الخورافااات ... بلاماا دخليهم لراسك

نصيرة بفقسة : اويلي على غدااايدي واش نتا تعرف فهااادشي ... انااا لي نعرف العياالااات علااش قااادااات ... يحسبو النجوم فالسما و يعرفوا قطرات الماا فالبحر ...

العربي : فرزي هضرتك بلاما تبقاي ضوري عليا شكون كاتقصدي ؟؟

نصيرة دورات عينيهااا : وشكون غيرهاا ... شكوون زاايد علينااا فالدار ... هااديك العافية الكحلة لي بلانا بيهااا الله ... ديك بنت نجاااة

العربي بنفضة : هبلتي لاااا ... واش نتي تخورجتي انصيرة اش عرف نسرين فداكشي ... وزايدون لااش غادير لخنساء شي حاجة لا لا اختي انا هاد الهضرة مدخلاتش ليااا لراسي ...

نصيرة : اييوا نوووض الله يجيبك على خييير ... ماشفتيش الدقة لي ضربات لولدك حتى طيحاتو فالمصيدة ولا مفافي غير بوحدو غادي ويهترس بسميتها ... ولاااا يغلط لينا فسمياااتنااا يعرف غير نسرين نسرين كي المبووهل ... علاااه بقااات فالصغر رااااهم برهوشاات ويزندوا المجااامر و يحرقوا الخرااقي ويمحيوا الحروزة ...

العربي ماعندوش مع هادشي : الله يهديك انصيرة خرجي هاد الافكار من راسك ... راه مامنها وااالو

نصيرة : شغلي وانا لي نعرف ليه ... خنساء غدا غانديها نزورهااا ... مانخليهاش ضيع مننا وحنااا مربعين يدينااا ...

العربي خنزر فيها بتحدير : ياااا وييلك ياا نصيرة ويزغبك الله وتقربي بنتي لداكشي ... راه تكون اللخرة ليا معاااك ... البنت ماعندها والو بلامااا تحمقينا الله يرحم بيهاا الواليدين

نصيرة دارت صبعها فمها ورشماتو فالحيط : اييه واخااا ... وااغير صبر عليا مني تطيح ليك بنتك دودة حرامية فالفراش اجي قول نصيرة قااالت ... وهاهي فين قلتها ليك ...

ناضت بااغاااا تاكل جنااابهاااا متاكدة ان نسرين لي دارت شي حاجة لخنساء باش ولات فهاد الحااال ... طلعاات نيشان لبيت خنساء وهبطاات حوايجها كاملين كاتقلبهم لاتمشي تكون خاشية ليها شي حاجة بيناتهم ... حتى من الفراش هزاااتوو باغاا تحماااق ... العشية كاملة وهي مع داك البيت خملاتو كاامل فلااتوووو حتى ما لقات والو عاد رجعاتووو ... وبخرات بشوية الشبة والحرمل ... ودارت الفااسوخ للدااار كاااملة مني خرج العربي ... ماا خلااات حتى قنت الشك قاتلهاا وخايفة لدرجة كبييرة على بنت خوها لا توقع ليها شي حاااجة

تعاشات العشية كانت خنساء واقفة قدام الباب مع رانيا مجمعين ...

رانيا : والله ياختي حتى وليتي معكازة منك ما كااان او اصاحبتي واخا تكوني زحافة ....

خنساء ابتاسمات : والله حتى المورال فالحضيض ... ولات عندي الخطوة بقنطاار

رانيا : هههه ولاهيلاااا ضربك الخمول فخطرة وحدة .... ( قربات عندها ): اجي بغيت نسولك ؟؟

خنساء : شنووو ؟؟

رانيا بصوت منخافض : كاتعرفي الفقيه لي غيز الشغل لبنات حفيضة بنت الدويري حتى تزوجوا بناتها متابعات وكل وحدة فين شداات

خنساء : ههههههه قالو ليك عليا كاندير باخا لرجالة ... اش عرفني انااا وزايدون هي كاتقوليك غير سعد وميمون

رانيا عطاتها الصبع : ها السعد ها الميمون ... تي مالكي هبيلة ... واش مكاتعرفيش حفيضة من يام يامها وهي طوطاح بين الشوافااات والسادات ماخلات لا حاحة لا ملاحة ... ولايني هاذا ديال هاد المرة دقتو صحيحة ... كلهم سرسباتهم فعام واحد وكاع طارو برا البلاااد ...

خنساء : ونتي لاش بغيتيه ؟؟؟

رانيا : مي فاضحاني بغات تعرف شكون هو ... بغات تمشي عندو بقيت ليها انا بلا زواج بغات تحيدني من الطريق

خنساء ضحكات : لاااا والو اختي داكشي بيني وبينو غير الخير والاحساان وفصراحة مداخليش للبال

رانيا هزات كتافها : ماتنفعي ماضري ... سيري سيري دخلي با مابقا ليه والو ويدخل للدار ... مايلقانيش يسمعني خل ودني ... تهلاااي ...

خنساء : تهلاااي سلمي على الدار ... ودعاتها ودخلات سدات البااب

دخلات نصيرة للكوزينة لقات نسرين واقفة على لاڤابو دايرة لكيت فودنيهاا كاتغسل فلمعان...

نصيرة بلغواات:وااش نتي مكتعرفييش تشقااي بشوية

نيسرين دارت عندهاا وهزات حاجبهاا محيدة لكيت:نعااام؟؟

نصيرة بعصبية:الله يجعلو ينقبك...بغيت غير نحط راسي نرتااح ومخليتيني بصدااعك نتسنط لعضامي فخااطري...لمعان غا سايرى كاتسايبي فيهم،راه فيا طونسيو أبنادمة...فكل خطرة ضربني لفيقة مفزوعة هاكاا راه غايطرطق فيا شي عرق فرااس...

نسرين بخفوت : من فمك لباب سماا ،غير نتهناا منك...

نصيرة صغرات فيهاا عينيهاا:أشكا تݣمݣمي تم...كوني مرى و سمعيني

نسرين : لا والو،غير قلت ليك انا شقايا هاكاا.. مكنعرفش نشقا بشوية...وزيدون مكايبقى نعاس مورة لعصر...نوضي يضربك فيك لبرد...

نصيرة بلغوات: شتك سايرى تحاسبي معايا...سوقك اختي..نعس مورة لعصر ولا لمغرب ونتي ماللك؟...ناعسة ليك فداارك وأنا مفخباريش...يوماين لي كانرتاح فيهم من نهاار جيتي لهاد الدار مابقيت شفت فيهاا الراحة...دخلتي بعجاجتك يالطييف...

نسرين طلعاتها ونزلاتهاا بعينيهاا..ديك "ناعسة ليك فدارك" دخلات معاها بحال سم.. ونطقات مصطنعة لهدوء: على وجه راجلي لي نهار كامل مشفتوش وقرب يدخل...مابغيتوش يلقاني مصادعة معااك...اما ماجيتيني فوالو نعطيك خو جوابك...ولي يبقى ينغز فيك سيمانة كاملة حتا تعاودي تجي تاني...

خرجات فيهاا عينيهاا : هاكاك دابا ولا عندك هاادشي بلعلالي...

نسرين:نتي لي كتجبديني...حسبيهااا كيفماا بغيتي... ودابا فرقيني عليك وخلي هاد لعشية دوز على خير...

نصيرة ساطت يلاه كانت غاتخرج دوراات عينيهاا لجيهة لبوطة لقات محطوطة عليهاا كوكوط ديال لحريرة...

نطقات بستفزاز : سبحان الله...كون مدورتش عيني منعرفهاا ݣاع واش كطييب...ريحيتها ياربي سلامة مكدوورش ݣااع هنايا...

نسرين خدات نفس عميق محاولة تهدن بيه راسهااا....

مشات نصيرة لجيهت شبكة ديال لمعان وهزات مغرفة وقرباات لجيهت لكوكوط حلاتهااا..وداقتهاا...خسرات ملاميحهاا، و ضحكات باستهزااء و شافت فيهااا

نصيرة :ههه ياودي ياودي على طيااب...لفم ماضي كايقطع ودراع ݣاضي مافيه نفع...تاعت الله واش دوك ليدين حالبة بيهم لحمارة،وتقوووول ياربي سلامة واش تبنان لماكلة فيهم ...

نسرين حساات بلخنقة،أكتر حاجة معقداهاا قاستها فيهااا...مجاوباتهااش وبقات ساكتة...مصبرة راسهاا غير بزز مابغاتش تنوض معاها الصداع...

نصيرة بتعالي فنبرة صوتهاا:إوى على سعدي ووعدي نقادهاا ونقومهااا يلقااو بعدا ماياكلو فيهااا...اما إلى حطيتيهااا ليهم هاكا غاتخليهم بلا عشاا

تمشات بشوية عليهااا هزاات لقريعات ديال لعطرية وبداات كتحل فيهم ودردر وحدة مورة وحدة...حركااتهاا وداقتهااا ونقصات ليهاا لعافية...

مدات لنسرين لمغرفة :هاكي شدي...لحريرة كاتبغي تحرااك...حركيهاا مزياان...ومتنسايش...تحراك راه حتا هو بقواعدو... ونديرها ليك فراسك...ملي كايبغيو يطيبو ناس،كايجمعو سوالفهم ويغطيوهم..ويلبسو تزارتهم..ويݣفضو على كمايمهم...(كملات بحدة) : باينة مك ماعلماتك غير لهضور لخاوية،اما لحاجة لمقادة،الله يجيب

خداتها من عندها بزعفة،خرجات نصيرة من لكوزينة وبقاات متبعاهاا نسرين بعينيهاا محسات حتا فزعات ديك لمغرفة بلأعصاب من يديهاا جات نيشان فواحد لكاس طاح تقلب وتشخشخ فلأرض...

نطقات نصيرة من لبيت كتغوت:هرسي،هرررسي ودݣدݣي...ماتقصريش من جهدك...حيت راك مكاتشريش فييهم

نسرين مسحات على وجها:يااربي تصبرنيي...تفووو على بشااار..اففف،فقاش غير دوز هاد ليوماين درق عليا زلافتهاا

حطو العشا وكلسو مجموعين على الطبلة لي كانو حاطين فيها التمر والبيض والحريرة ... كبات ليهم نسرين فالزلااايف .... عصاام ابتااسم وهو كايذوق الحريرة ... من نهار جات نسرين عمرها طيبات شي حاجة بنينة جاتو عجب : الله يعطيك الصحة انسرين ...

ابتاسمات برقة وهي كاتماطي ليهم : اميين بالصحة والراحة

العربي : ولاهيلاا بنينة ... عطاك الله الصحة ...

نسرين : لينا وليك اعمي

نصيرة هزات حاجبها : ربي واش ماحشمتيش ... كون حطيتيها ليهم كيف درتيها كوون حتى واحد ماكمل فيها الجغمة لقيتها باسلة حاسلة مافيها ريحة المذااق كون مازدت ليها العطرية وقومتها كون راه بتو بلا عشا تاني ... فين عمرها دارت شي حاجة بنينة اصلا باش تق ليها ليها هاد المرة ... ولاهيلا قاليك عطاك الله الصحة انسرين

( نسرين بلعات ريقها مقروصة )

عصام : ايوا مافيها باس بحال بحال ... الله يعطيكم الصحة بجوج

نصيرة : خلاااص عليا حتى نتا مكاين ما تخبي ولا تستر ... كولشي عارفها حافية فالطياب غير الله يدير شي تاويل وخلاص

العربي : نصيرة تعشااي تعشاي

نصيرة : ايوا قلت غير الحق يدها باسلين تقول حالفين فيهم ... ولايني قالك قلب البرمة على فمها تطلع البنت لمها ماجابتو من خلا

نسرين كرزات على يديها معصبة داكشي لي خلات فالكوزينة كملاتو ليها هنااا ... حطاات الزلااافة ونااضت من الطبلة غادي تفركع بالفقصة ...

العربي ماعندوش مع الضسارة بالنسبة ليه عيب ينوض الواحد من الطبلة بديك الطريقة نطق بايجاز : اش هاد قلة الادااب ... نسريين ....

نصيرة : ايوا هادشي لي بقااا ... غير تخوي علينااا

عصام ضغط على يدو وناااض تبعهاااا مخزز ... تحت نضرات خنساء لي كاتحرك راسها بلااا حول ومكملة على ماكلتها بلا حتى كلمة

العربي : ربي واش ماتعرفييش تهنينا شوية

نصيرة : ومالي كدبت عليهاااا ولاهيللااا زوينة هادي

دخل عصام لبيت وسد لباب رادخو بجهد ... لقا نسرين ݣالسة على جنب سرير دايرة يديها على خدهاا كتخمم،نطق بانفعاال:نتي شنو داك لفلاش درتي لينا على الطبلة؟؟

نسرين طلعات فيه لعين:اش درت تاني؟؟

عصاام: لا مدرتي والو...غير نايضة على الطبلة منفخة ممعبرانااش وحنا كناكلو..(كمل مرفع صوتو)شهااد قلة الأداب فيك انسرين...حشوومة ،عيب،مكااادارش..واش غانبدا نربي فيك ولا شنوو؟؟

عينيها غرغرو بدموع و ردت عليه بنبرة باكية:نتا شتيني غير انا لي نضت على طبلة..مشتيش هضرة عمتك ليا.. ولسانها لي طالقاه عليا قداامكم...هضرتهاا لي دايرة بحال شي الشوكة ديال السم مكاترتااح حتا كاتغرسهاا فيااا...

كملات هضرتهاا ودارت يديهاا كتبكيي وكتنخصص بصوت مسموع...عصاام غير شافهاا كتبكي دغياا فك تغوبيشة لي كانت على وجهوو ...

قرب لعندهاا ونطق متسااؤل هاز حاجبو بضيبق : كاتبكي ݣااع؟؟

نسرين دوزات يديهاا على خدهاا ماسحة دموع منوو وجوباتو كتنخصص :هء هء..عييت اعصاام والله حتاا عيت...مابقيتش قادرة نصبر...من جيهة عمتك لي كتسنى غير لفرصة باش تسممني بهضرتهاا...ومن جيهة ختك لي ولات هضرة جوج كاتبغي تاكلني... بحالا شيطان محرشهم عليا...علاش كايتعاملو معايا هاكا علااش؟؟ (سكتات شوية كتسترجع أنفاسها و كملات كتشهق بحرقة) : هء..ملي كايصبح الصباح وأنا واقفة على رجل وحدة مكانخليهمش يحطو يديهم فلماا...ختك براسهاا من نهار جيت عمرها غسلات حتا كااس... جفاف براسو ومبقاتش عارفة فين محطوط .... كنوض ونشمر على دراعي ومكنتحااسبش...كنبقى ندمر ونترس عليهم بحال لحماارة ومعمري تشكييت...ولكن صافي حتا لهنا وبركة عييت من هاد لعيشة ديال زبل لي وليت عايشة معاهم...مليييت وعييت..

عصام بقا كايشوف فيهاا كايتسنا تكمل هضرتهاا..ونطق مخنزر فيها: صافي تفرݣعتي فشيتي قلبك...وااخا وشنو لمطلوب مني أناا دابا...اش بغيتي ندير ليك؟؟

ردت عليه مرفعة نبرة صوتهاا:اسيدي انا شحال قدي نبقا صابرة هاكا حتا ينوض فيا شي مرض بسبابهم...ولا يركبو فيا سكر بفقايسهم؟؟...(سكتاات تواني بلعاات ريقهاا تشجعات ونطقاات بتلعتم كدور فعينيهاا)كون كانت عندي داري بوحدي ݣاعمة يوقع ليا هاادشي...

عصاام وسع نضراتو ليهاا : إيااه...وجيني نيشاان وقولي باغا تعزلي عليهم...و تسكني بوحدك..

حركات راسهاا بإجااب بلا متنطق كاتسنى جواابو...

عصاام ضحك باستهزاء: ههه إييه مرحبا مقلتي عيب..وشنو بغيتي ألالة لبنات...اباخطومون...دار كبيرة مستقلة...فيلاا..ولا قصر ݣااع؟؟!شنوو..غير قولي متحشميش

ساطت نسرين بجهد وناضت وقفات تقابلات معااه : دابا كاطنز عليا اعصاام؟؟

عصام : معرفتش شكون كايطنز على لاخر ... واش انا ولا نتي ... بااش اشريفة غاندير ليك هااد الدار لي بديتي كاتوحمي ليا عليهاا تاني ... ياكما بغيتيني نخرج نشفر؟؟

نسرين بعصبية :ياااك..دابا بغيت نرضك شفاار ملي بغيت داري بووحدي ... باش حسن منك هادوك لي مسكنين عيالاتهم بوحدهم ... و شاريين لهنا لراسهم؟؟

‌

‌عصاام : سوقهم هاداك عندهم باش..الله يسهل عليهم،مالني غانتݣاد معاهم،انااا نهاار لول جيتك فاص وقلت ليك غاتسكني مع داارناا ... قبلتي و رضيتي بيهاا...اشجاك داباا..اش تزاد على والديك؟؟

جوباتو بنزعااج : انا ماكنتش عارفة واش غايطرى لياا هادشي معااهم ... وزايدون حتا دابا طاحت وجبرناهاا... نتا تخدم وانا نخدم ونخرجو من هناا ... نمشيو نكريو حتا يسهل الله ونشريو دارناا

عصاام بداا كيتعصب من هضرتهاا رد عليهاا بلغواات : الله وأكبر...قالت ليك تخدم...حركي..حركي الروايض الشريفة ورجعي لطريق راك خرجتي لبيست...غا نساي شي حاجة سميتها لخدمة بلا ماتفكري فيهااا هياا لي مغتكونش ليك...وانا مالي حمق نخلي دار باا من لفوق لتحت واسعة وعريضة ونمشي نتجلوق فديور لكرى قد لبزقة ونعطي عليهم نص خلصتي..باش لالهم نسرين تبقاا على خااطرهااا...افيقي رااك كتحلمي مع راسك...حمدي الله وشكريه وتكمشي...رااه ناس ملقااو حتاا الربع فين عاايشة نتي داابا...صبري وهبطي كواريك شوية..ونتي بنتي ليا باغا طيري

نسرين خدات نفس عميق وحبساتو فداخل ديالها محاولة تهدن بيه، مباغاش تجاحد معاه عارفة راسها غير كتكب لما فرملة...ماغيديرش بهضرتهااا...شافت فيه بعيونهاا الشاعلة ونطقاات بتوعد:صاافي هاناا غاادي نصبر..ولكن والله حتااا من غداا غادي يشوفو من عندي وجه اخر...لي معمرهم ضنو غايشوفوه مني...وهانا فين ݣلتهاا ليك

عصاام مبقااش قادر يستحملهاا شدهاا من شعرهاا جاارهاا منووو لعندوو حتا غمضات عينيهاا بالم ناطق بعصبية: كانقولهاا وكانعاودهاا...شتي نتي كامونية...والله ما دياال لخااطر ....وداباا كنقسم ليك بالرب المعبوود وتنوضي شي صدااع معاااهم حتاا نقسمك على جوج...على رقبتي حتى نهارك غايكون كحل معاياا.... إوى يااربي تجي شي وحدة فيهم تشكاا ليا منك ... يااربي

طلق منهاا بجهد حتا تدفعات على سرير وݣلساات كتبكي وطيح فدموع كتبوحط علييه...

عصاام بنبرة امرة : نوضي غسلي وجهك ونعلي شيطاان ليل هادا ...(شاافهاا متحركااتش وغوت): رااااني هضررت معاااك

مسحات خدهاا زفرات بعصبية وناضت شافت فيه مخنزرة دغيا جمعات دموعها بحالا مكانتش كتبكي...

نطقاات مغددة ناهضة فوجهوو:الله ينعلووو ويخزيييه...

خرجاات من لبيت رادخة عليه لباب وهو بقاا كايشوف فيهاا...زير على قبضة يديه ..يلاه كان غايتبعهاا وهو يتراجع مهدن راسو غير بزز لا يخرج على طوعو...عارف بلي باه مريض وغايكون داه نعااس مابغيش يفيقو بصداعهم ... تنفس بعمق و مسح على وجهو... داز لبلاكار يبدل عليه...مخلي ليل يدوز عليهم بسلاام ...

اصبحنا واصبح الملك لله ... فاقت خنساء كاتكسل فبلاصتها على صوت السجالة خدامة على حر جهدها ... خصرات كمارتها وهي معوجة راسها مفقوسة من الصداع ... جمعات شعرها لفوق وخرجات من البيت كاتنكر خاسرة ... هبطات مع الدروج لقاات نسرين كاتشطب الصالون وطالقة الموسيقى ...

خنساء بالغواات : ايييه اييه وا بنادمة ... وا البعر ... واااا الويل .... وااااا ال*رااااا ....

نسرين كاتشطب ماشي فهاد العالم ماشافتهااش اصلا ... تقدماات بخطوات تابتة طفاتهااا ليها

نسرين دارت مخنزرة فيها : مالنا اختي ؟؟

خنساء : مالنا هو نتي ... مصدعانا على الصباح ماعرفتي لي ناعس ما عرفتي لي مريض ... على الاقل نقصي الصوت ونتي فيقتي الجيران تقول عندنا العرس

نسرين : الصباح باقي غير عندك نتي لي كاتخيطي ليل مع النهار ... اما كاع لي فالدار فااق ومشى يقضي شغلواااا ولي خدام راه خدم ولي دار شي حاجة راه دارها والباطرونة ديالنا باقا كاتقلب

خنساء خنزرات هاد الليام لي سكتات ليها بغات تركب عليها : ونتي اش مشا ليك ... اش ضرك اختي ... ياااك سادة عليا بيتي ونااعسة اشمن شوكة دكَيتك بيهااا بالسلامة

نسرين : حتى انا اختى ما قربتش ليك وانا فداري نطلق الموسيقى ولا نجيب العونيات كاااع اش دخل حمارك نتي لي ماعجبو الحال يزدح راسو مع المخير فالحيوط ... بغيتي تنعسي وسط النهار ديري القطن ...

خنساء ضغطات على سنانها ... موجهة صبعها بمعنى عاودي : شنو قلتي دابا ... داااارك ... اييه اختي دااارك الله اودي ... وا زوينة هااادي تاني ... الدار دار بونا وعبيد بونا بغاو يطردونا ... ايوا داكشي لي بقا

نسرين : شتي هاد الموضوع بالضبط مغاديش نتلاج معاك فيه .... عرفتي علاش الغزاالة ... حيت واحد النهار طوال الزمان ولا قصار غادي تجي لهاد الدااار ضيفة وغاتشدي فيها الركنة ... ( شارت لراسها ): وديك الساعة غاتعرفي شكون مولات الدااار

خنساء باستهزااء : ايواااا غير حلمي وزيدي فحلاامك انا هي ديك السارية لي مغاديش تقلع ليك من هنا ... هاداكشي لي نتي كاتعجنيه وتدلكيه ولله لا كرصتيه معايااا ... ماحدي انا مابغيتش داك النهار والله لا كان ليك

نسرين هزات حاجبها : احم ... وشكون قالك الالة غانتسناك نتي تخيري ... اش بان ليك الغزااالة نقول لخوك على طوطيحك فالزناقي والدوران فالدروبة وشوفي ديك الساعة كيفاااش غايهزك بلا حنة ولا دفوع ويزوجك بلول لي غايدق الباب

خنساء حبسات الضحكة : ههههه ربي واش عندك شي عقل ولا ماتكسابيهش .... عند بالك هاد الهضرة واكلة معايا انااا ... الالة الغزااالة الا نتي مافخباركش انا ما طيبت ليك خبزتك مع خوياا حتى حميت الفران ... ( قربات عندها باستفزاز ): عنداك يحسابك زوجتك ليه حبا فيك ولا زينتك فعينيه بالمعزة ... ( مبتاسمة ): تو تو تو تو ... درت هاكا باش غير مني تجي تبغي تباني عليا وتقراي هاد الموااال نقوليك ...( بعجرفة): الدجاجة غسلات رجليها نسات ماداز عليها ... نسيتي يااامك الغزاالة ولا كيفاااش ... هههههه لي تيبيع القرد متيضحكش على اللي شراه ... شوفي شكون فينااا غاتطلع خاسرة الا سخن عليك راسك شي نهار وبغيتي تجبديني على حرف اللساان ... واخليني معاااك زوينة بلاما نخرج معاك للعيب ... ( خنزرات فيها وزادت ): ولاهيلا عند بالها غاتخلعني ... دابا كلينا وشربنا ……ونسينا الحرابل باش سعينا ... تريكة الويل

نسرين حمرات عينيها ... عرفات منين تلوي ليها اليد ... فمها سليط ندمات اصلا لاش جبدات ليها ديك الهضرة : عععععععع ياربي تعطيني الصبر يااااربي اووووف اووووف اووووف ... شي نهااار غادي نخنقها بيدي اللفعة السااامة ...

فالقهوة كالس السحت كايكمي .. مع هز راسو وسع ابتسامتو كان داخل عبدو دايرة كاسكيط فوق راسو .... ضعاف فصحتو نوعا ما

السحت : واااي واااي ... عاش من شافك العشير ...

عبدو : وافين صاافااا ؟؟؟( كلس مقابل معاه)

السحت : وغبرتي اسااط ... عجبتك كازا ولااا ؟؟

عبدو : وا كازا ولافة كاتدخل ليها وتغرق ... ولايني واخا هكاك الهوا ديال هنا فشكل دغيا كاتوحشوا ...

السحت : كاين شي تيتيز ولا غا الفرشي ... الدريات تما حرشين العشييير ... ضبرتي فشي همزة ؟؟

عبدو ضحك : ههههه مكاين لا حرشين لا والو حجر وطوب فينما مشيتي ... تا هنينا تقول مشيت للسويد راه غا كازا علاش داويين ... كيف دايرة الامور هنا ؟؟

السحت : كيف خليتيهااا اصحبي زيرو جديد ...

عبدو جبد كارو : ايوااا مزيااان

السحت بتدقيق : ضعافيتي اصحبي وايلي مالك على حالتك ؟؟؟

عبدو : وا غااا الهم وصافي وحتى البلية كتاكلنا نهار على نهار الله يعفو وصافي

السحت : زدتي فلادوز اصحبي ... وليتي تكمي كتر مني ...

عبدو : الله يعفو علينا اجمعين وصافي ...

السحت يلاه غايجاوبو وهو يبان ليه عصام داخل من الباب ديال قااصدوا مكشكش ... الفار كايبانو خارجين ليه من راسو ..

عبدو دار شاف فيه ونطق بتساؤل : ياااكمااااا ؟؟؟؟

السحت : غير الله يحضر السلاااامة وصااافي ...

عصام قرب ليه وهزو من بلاصتو : طحتي بين يديا الشلااااهبييي ... ( مخزز وعينيه شاعلة فيهم العافية )

السحت بنفضة : مااالك اصحبي اش كاين ؟؟

عبدو قرب مبعدو عليه : تا ريح ابنادم ... مالك اعصام ؟؟؟

عصام خنزر فيه : نتا خرج هاد السووق ولا غانشرك والديكم بجوج ...

السحت : تا غاطلق اصحبي نتفاهموا ... ماااالك ؟؟؟

عصام مخزز : واش دين اصل موك مابغيتيش تحشم شحال من مرة قلت لل*حبة لي حطاتك ماتعاودش تجي للجماعة وتقولهم من طرف عصام ... ولا من طرف ال*لاوي فين كانعرف تريكتك باش تنطق سميتي وتوسط بيا ال*امل

السحت : وا صحبي راه ماقصدت فيها والو راه زعما ولا درب واحد ... اش فيها الا تعاونا ... بغيت ورقة من عندهم وقلت ليهم سميتك باش يتعاملوا معايااا

عصام : واش كايحسابك انا هو الباشا ديال قنيطرة ولا ماال مووك ... منين كانعرف *بون موك انا اصلااا ... السلااام هي اللخرة مكانشركهاش معااك ... فين كاتعرفني اب****

عبدو : اصحبي برد الدم ماالك مصعصع ... هنينا وهضر بالعقل ...

دفعوا : الله ينعل ملتكم كاملين ... ديها ف*رك نتا ولا مغادي يعجبك حااال ال*لاااوي ... ا**** ....

السحت غمض عينو بنفاد صبر : راه بربي اعصام لدابا داير بوجه با السايب مابغيتش نحط عليك يدي ... طلق ولا نلاكَيها معاااك

عصام زيد عليه : وريني هاد الرجلة الخااوية وريني ... ماتخليو حد معااكم بيخير فهاد الدرب ... واش عمرك شفتيني واقف مع ملتك ... منين كانعرفك انا اصلاااا باااش تجبدني فخدمتي باش تقضي حاجة لراسك وتخليني انا نسمع الهضرة ... قالو لوالديك انا هو المقدم ديال الحومة ... باغي تخرج علياااا

السحت تعصب وضربو بكروشي لوجهوا مبعدو : من قبيلة وانا صابر ليك ونتا نافخ عليا ريشك مااال موووك داير فيها الكينغ ديال الدرب ...

عصااام شد حنكو محمر عينيه ... زفر وعاد جمعوا ببونية حتى طيحو فالارض : الله ينعل **** ب ***** ....تا رااا بربي حتى اليوم ن***** ....

عبدو كايحاول يفك فيهم وهما مقاتلين وسط القهوة حلفوا لا تفكوا واحد يعطي لاخر مشادين ... مكاين غير عطيني نعطيك كل واحد وذقتو ...

ناض واحد من الدراري الصغار لي فالقهوة شاف الروينة زادت وهو يمشي للدار ديال عصام كايدق فالباب ... نسرين كانت فالكوزينة .. سمعات الدقان بالجهد : اه ياربي السلاااامة ... طلقات جهة الصالون كانت نصيرة خرجات عند شي صاحبتها ... واتاجهات تحل

نسرين : ياك لاباس مالنا على هاد الدقاان ديال البوليس

_ كاين با العربي ؟؟؟

نسرين : ايه كاين اش بغيتيه .... ياكما كاين باااس ؟؟

_ عصااام مشاد مع فؤاااد فالقهوة ... منوضينها صباط تما

نسرين باستفهام : شكون فؤاد ؟؟

_ فؤاد السحت ...

نسرين فحال الا ضربتيها بطرشة ... قلبها زدح فالتسعين ورجليها خواو بيها ... نطقااات بتلعم : اءء شكون قلتي .... السحت وعصام ....

الدم هرب من وجهها شداتها الدوخة بالخلعة لحاجة الوحيدة لي طاحت فبالها هي انه ساق خبارهم ومشا ليه ونوبتها جايا ... بلااما تشعر غوتات بالجهد : اويلي وحدي .... اناري ... اويلي مشييييت فيهااااا ... اويلي على غدايدي

خنساء كانت خارجة من الحمام سمعاتها غوتات وخرجات : مالنا ؟؟؟

نسرين هزات فيها عينيها : درتيها يااا اللفعة درتيها

خنساء خصرات كمارتها : شنوو ؟؟ اش كتخوري ؟؟؟

_ ختي خنساء راه عصام مقاتل هو والسحت فالقهوة .... جيت باش نعلم با العربي يجي يفك ...

زاد وخلااهم كل وحدة مصدومة كتر من الخرا ... نسرين ركابيها فشلوااا : اويلي اليوم ينحرني اليوووم ... اليوووم يقتلني ويشرب من دمي مافيهاااش اليوووم ...

خنساء شدات على راسها : سكتينا نتي نعرفوا اش واقع ... دخلي للدار ... دخلي ...

دخلاتها وعيطات على بااهااا علماتو وخرجات هي وياه متاجهين للقهوة ونسرين بقات فالدار شادة على خدهااا كاتبكي وتنوح وتسنى اخرتها معاااه : ميمتي ومشيت فيهاااا مشيييت ... ومنين عرف اميمتي ومنييين .... اليوم يقتلني اليووووم .... اليووووم يصفيهااا لياااا

كاضرب ففخاضها بالغدايد : اليوم شوهتي غاتولي على كل لسااان ... اليووووم ... اويلي على زهري وميموني العور ... كحااالت عليا .... لاااا اليوم يردني ويسيفط ليا براتي هادشي الا ماسيفطنيش للمقابر ...

كلها كاترعد وترجف بالخوووف ... وقلبهااا كايزدح فالتسعييين ...

العربي دخل للقهوة لقا الرجاال فكوهم وعصام باقي كايعرعر وفمو كايسيل بالدم : بااقي ماصفيت حسابي معاااك ... الله يلاقيني معااك فشي طريق ديقا ال*امل

السحت وجهوا كلو عصاا : غير بلاتي عند بالك حااكم العااالم ال*لاوي ... ( بلا شعور ): كون تعرف اش.....

عبدو سمعوا غاينطق ووقفوا مبعدو غرفوا ناوي وي على نسرين : هنينا اصحبي ... ( قرب ليه هضر بشوية ): واش حماقيتي ماشي رجلة تفضح السيدة ... حضر عقلك ماشي فعااايل

السحت مسح على راسو كايتحلف عليه : عقل اعصاام فيمن درتيها

عصام مكشكش شادو العربي : طلقني ابااا نوريه التحلااف ... بربي حتى نخرج فوالديك القديم والجديد

العربي جارو : زيد اولدي الله يرضي عليك ... واش نتا هاد الدم الحامي مايخطاكش فينما مشيتي

عصام شاعل : اباااا راه بنادم مكايقيلكش واش انا نسمع الهضرة على ضهروا ... وعلامن على برهوش ديال الخلااا

خنساء كانت اللور سمعات القضية فيها الخدمة وهي تنفس حيت ماشي على نسرين عرفات ماشي بسبابها

السحت شعل فيه باغي يضربو : سكت ولا نوري خويا البرهوش علاش قاد

العربي : لا ضربو فيدي ضربو واش اوليدي فؤاد ماحشمتيش مني وانا قد بوك

عصام شادينو الدراري : ينعل *ااامل لي حطك .. كاتخيبر عليا قدام الواليد زعمااا .. الله ي**** ا****

عبدو شاد السحت : صافي ابنادم ... دير بوجه با العربي ...

العربي : ديه اولدي بردوا بردو ... الله يرضي عليك ( شد ولدو ): زيد قدامي الله يخليه كنس بالخلا لمن شابه لمن

خنساء زادت : لمن متلاااا ... تبع حرفة بوك لا يغلبوك

عصام خنزر فيها : لاش جايا اعزري الدوار ولا نتي دايرة فيها باطرونة

خنساء : سري انا لي خفت عليك جاية نشوفك سري سري .. زيدني ... ولايني راه مافيكم خييير

العربي : زيدو قدامي شي نهار غاتخرجوا ليا العقل بجوج بيكم ... الله يخليه كنس بالخلااا

بقات نسرين غادة جايا بخطوات سريعة بحال لحنش لي مقطوع ليه الراس...شادهاا لخلعة بلمزيااان

نطقاات كاتحسر :صاافي مشيت فيهاا ..مشييت فيهااا...هادي لخرة لياا معااه...ليووم يقتلني ويصيفطني لدارناا مكفنة...هء هء الله ياربي واشهااد لمكتااب...كحلتهااا كحلتهاااا ليوم يدير فياا شرع يديه ومايحبسو حد

باقا كتهضر مع راسهاا وهو يتحل لباب داخل منو عصاام كايعرعر شادو لعربي وخنساء من وراهم...

عصاام :علااش اباا فكيتني علااش...خليني ديك ساعة مني ليه باااش نوريه شنو كاانسوى..بربي حتا كنت غانخمج ليه وجهووو...شماااتة لااخر...

لعربي:وصاافي اعصاام الله يهديك راه هضرت معااك..هنيناا

دخلو لبيت غير لمحااتو نسرين وقلبهاا ضرب فتسعيين....رجعاات جوج خطواات ونطقاات كترعد: ع..عصاام لميمة بلا ما تقيسني بلا واالو غير خليني نشرح ليك شنو كااين

شاف فيهاا وقرب لعندهاا بعدم فهم:شكاتخربقي؟

نسرين بدات كتبكي:والله حتاا كنت كاانعر...

خنسااء عرفاتهاا فهمات لموضوع غلط وغااتصدق خارجة على راسهاا بفمهاا قربااات بزربة لعندهاا شداتهاا من دراعهااا ضغطات عليهاا:لا انسرين مايمشيش بالك بعيد...راه ضاربو غير بسباب لخدمة (قرصاتهاا فدارعهاا بلا مايرد ليهم لبال)

نسرين سكتات موسعة حجم عينيهاا بالعة ريقهااا...دم قرب يهرب من عروقهاا بلخوف...

عصاام شاف فخنسااء مخنزر : شنووو لي على باالهااا،(شاف فنسرين)دوي نتي شنو كااين ؟؟

نسرين بتلعتم وحلات ليهاا لهضرة:أءءء...لااا..دابااا..ه..هوا فصرااحة...انااا...أنااا(سكتاات حادرة راسهاا حاسة بلبكية معرفات شنو تقوول..لخلعة ممخلياهااش تنطق بحتى حرف)

عصاام بنفاد صبر:أناااا...اناااا...هضري مقاااد مالكي كترعدي علياااا وكادخلي وتخرجي فلهضرة ..شنوو كااين؟؟

خنسااء عرفاتهاا مغاتعرفش تسلكهاا معااه ودخلات مقاطعاهم :لاا راه غير فهمات لموضوع غلط...حيت داباا هياا لباارح عمرات لبوطة ياكااا

عصام مركز فيها شوفة كايسمع:ايااه ...

خنسااء:وومقداتش تهزهاا بوحدهاا تجيبها لداار ..حيت تقيلة...

عصاام غادي معاها فلخط:اهاه ومن بعد...

خنساء : وتلاقاها السحت قدام لحانوت وعااونهاا فيهااا...ويسحااب ليهاا غرتي منو وضاربتي معااه على قبلهاا...فهمات لموضوع غلط وخلاص...

نسرين كانت غير حادرة راسهاا بيناتهم كاتسمع وقلبهاا حاسة بيه غايوقف..ورجليهاا مبقاوش قادين يهزوهااا..تنفساات صعدااء ملي عرفات اناا ماشي داكشي لي على باالهااا....

عصاام شاف فيهاا ونطق بتساؤل :علاه نتي بسلامة ماالقيتي شكون يعااونك غير دااك جلاخة...

نسرين بتلعتم حلقهاا نشف وعينيهاا بداو كيتسدو بوحدهم تشجعات ونطقات بشوية جهد لي بقا عندهاا:ع..عادي هوا قاليا نعاونك وانا قلت ليه مرحباا...ب. باش غانعرف أناا شنو بينك وبينوو...

رد عليهاا بتوعد وعينيه شاعلة: باقي تجيني خبارك خليتيه يعااونك ولا وقفتي معااه مانعرفكش..نهااارك بربي ماغطلع فيه شمس( شاف فخنساء)هداااك نووع بداات سلااام هو اللخر ماتسمعوهااش ليه،هااني علمتكم بجوجاات

كتفى بهااد بهاد لكلماات وخرج من لبيت سااعر

لعربي تنهد:هاد لولد ماغيتهناا حتا يدير شي موصيبة بهاد سخونية الراااس....ياربي تهديه يااربي

خرج وخلاهم ..نسرين شفايفهاا بدااو كايقفقوو...بدات كترمش بتتاقل نفس مابقااتش قادرة طلعهااا بسباب لخلعة لي ركباتهاا وجهاا تخطف منو لون...شدااتهاا سخفة جاات مردوخة على سدااري كتحااول تسترجع انفااسهااا

خنسااء غير شافتهاا على داك لحاال بزربة هزات كاس تاع لماا كان محطوط فوق الطبلة بداات كاترشو ليهاا على وجهاا لي ولاا حمررر...

خنسااء : طلعي النفس ياهااد لموصيبة مابقا ليك والو وتموتي

نسرين تنفساات بعمق وردات عليهااا بنبرة باكية دايرة يديهاا على خدهاا كاتندب : اناااري كنت غانمشي فيهااا...كون فلتات شي كلمة مني علم الله كيف كان غاايكون بيااا..أويلي وحدي شنو كنت غااانديير

خنساء ناضت وقفاات : إوى هاهيا سلكتهاا ليك... وكدبت على خويا فوجهو على قبلك .. على الله تعقلي على لخير

كملات خنساء هضرتهاا ودازت من حداهاا كاتمختر فلمشية بقاات نسرين متبعاهاا بلعين حتا خرجاات...وهياا تسنداات على لمخدة مغمضة عينيهاا بتتاقل،خدات نفس عميق محاولة تهدن بيه راسهااا...حاطة يديهاا على قلبهااا لي كايضرب بشدة...

صباح جديد ... فاقت فيه خنساء بكري وخرجات تتمشى شوية ومنها تونس نصيرة حتى ركبات تمشي لخدمتها عيطو ليها قبل بنهار عندهم شي شغل وبقات على برا كاتشم الهوا وتنفس ... حسات براسها تخنقات بين الحيووط و غملات فبيتها ... الصبااح كامل وهي على برا ... فاق العربي صونا ليها قالت ليه راه خاارجة ... دازت عند رانيا جراتها معاها وفطرو على براا ... عاد مشااو يتسااراااو ويضوروا حتى اذن الظهر وهما على برااا ... عاد رجعوا لديورهم ... مع دخلات جبدات صبايغها وقادات ضفارها وصبغاتهم ولاو يشقشقواا و خرجات تاني عرضات عليها مامات رانيا تغدا معاهم

وقفات نسرين قدام لباب كدق..وحداها صاك وسطولا

دلحمام...

حل عليهاا عصام الباب ونطق بتساؤل:جيتي؟؟...علاش محليتيش بساروت

ردت عليه بعياء:جهد باش نجبدو من الصاك مابقاش عندي...سخفت بلمعقوول

عصام (وسع ليهاا حلة لباب):دخلي بعدا.. دخلي

دخلات لدار وهو تحنا على دوك سطولا وصاك هزهم مدخلهم معااه....

مع دخلة ديال لبيت غير لاحت نسرين شوفة على طبلة بان ليها صباغات ديال ضفار و لقرعة صغيرة ديال لما ديالهاا ولمبرد ولقطن محطوطين فوقها وهيا تخنزر... حيدات زيف على شعرهاا بقات غير بلبوني

نطقات بعصبية: ودابا تاعت الله هادي علااش كتقلب...خليت لبيت مجموعة كتشعل...جيت لقيتها حاطة ليا زبل ديالها هنايا....لحاجة لوحيدة لي كادير هيا تاكل وتزوق وتقاد وتخرج...ولات دايرة فهاد الدار بحال لوطيل...(زادت رفعت نبرة صوتهاا) : مخليا لخدامة من موراها كتجمع ليهاا ولا شنو؟؟؟

رد عليهاا عصام وهو واقف موراهاا : ماالكي عاوتاني كاتنݣري..يلاه كنتي سخفاانة...غير رتاحي بعدااا ترجع فيك نفس وديك ساعة بدااي

دارت شافت فيه بنفعاال : وشكون خلاك شكوون....

(قربات لجيهت طبلة وضربات دوك صبايغ بيديهاا حتا تقلبو وݣلساات كتحرك يديها عند وجهاا باش تبرد) بحلوفي حتا هادشي لمرة جاية غتلقاه مليوح فطارو...تجي تجمعو منو ديك سااعة

عصام قرب وݣلس حداها : وصافي هنينا...راه غاتكون غير خرجات مزروبة ونساتهم محطوطين هناا..مدارتهاش بلعاني ...ماتزيديش فيه

نسرين شافت فيه مخنزرة:ومزاال كداافع عليهاا...(هزات كفوفهاا لسماا وكملات) : يااربي إمتى يجي شي راجل يهنيني منهااا فلقريب يااربي...

عصاام رد عليهاا وهو كايضحك:ههه واقلة دعوتك تقبلات قبل ما دعيهااا...

سكتات تواني قبل متنطق بتساؤل مصغرة فيه عينيها: كيفاش....مفهمتش؟؟.

عصام:إوى الالة خنسااء راه جاو فيهاا لخطااب...

نسرين بعدم تصديق:وااايلي...حلف بالله..(كملات بشغف)يااك يااك مكتكدبش..كاتهضر بصح؟؟

عصاام:وعلاش غا نكدب..واش منيتك كادوي؟؟مولف كنكدب علييك...

نسرين دارت بتساامة عريضة وتلاحت علييه معنقااه فرحاانة: والله مقاادرا نتيياق...وأخييررااا غااتزوج....الله على خباار (بعدااات عليه) : وشكون هادا...واش شي حد من عائلتكم ولا كتعرفوو...

عصام : واحد دري صاحبي كانعرفو..كان شافهاا معايا واحد نهاار ملي كنا خارجين...وبقاا حاط عليهاا لعين...ودابا عيط ليا بغا يجي يخطبهاا..ناوي معاها لمعقول

نسرين بهتماام : إييه...وقولياا بعدا...كيفاش داير هاد راجل؟؟؟

رد عليها بطنز:ممم...مزوق وراشين عليه لكوك من لفووق...كيف غايكون؟؟رااجل بحال ݣاع الرجاال...

‌نسرين:ولا مافهمتينيش..؟زعماا واش خدام؟عندو دارو..شنو كايدير فحياتو...

‌جاوبها بهدوء : وهو الصراحة السيد معقول مافيه مايتعااب ...هاز لهم لراسو...كان قرى معايا فلافاك و كمل قرايتو و خدم فبنكة،وترسم فيهاا...ويلاه شرى دار وفرشهاا..وبغاا يكمل دينو و يتزوج..وجا طلب يديهاا مني

نسرين لوات فمهاا بإعجااب :هاكداك...هانتا تشوف الزهر...ولكن واخا هكاك عزيزة علياا والله محسدتهاا ... حتا هيا زوينة تباكلاه وعاطيا لعين....تستاهل شي واحد بحاالو...

عصام تنهد ونطق برجاء : إوى نتمناو تقبل هاد لمرة...

نسرين :عرفتي شنو نوض جيب لينا لغداا راك شتيني دوزت صباح كامل فلحمام مطيبت والو وهي مشات عند رانيا شوية تشوفها جات هما كاتغداو بكري ... بيدما دخلات غانقول ليهاا هادشي...ونحااول نقنعهااا راك عارف راسهاا قااسح تقدر متبغيهش وترفض تاني....

عصاام(ناض وقف):وعليهاا.. يلاه أنا شوية ونجي راه نقدر نتعطل غانجيب لغدا من الصونطر السناكات ديال هنا فالصو

حركات راسها بايجاب ... ابتاسماات ليه وبقاات ݣالسة فلبيت كترتااح وفنفس لوقت كاتسنا على أحر من الجمر فخنساء إمتا تجي ... باش تقوليها لخبار

خنساء دخلااات للدار ... بانت ليها نسرين كالسة فالبيت : سلااام

نسرين ابتاسمات : اهلااا زين ديال الداار ... على السلامة

خنساء هزات حاجبها باستغراب : الله يسلمك ... ياك لاباس كاتباني ليا ناشطة ...

نسرين : ايوااا انا ناشطة وان شاء الله حتى نتي غاتنشطي عن قريب ... سيري بدلي عليك وارتاحي وهبطي بغيت ندوي معاك فواحد الموضوع مهم

خنساء : الله يسمعنا خير ياك لاباس ؟؟؟

نسرين كاتقلب اتاي : واغير سيري بدلي وهبطي نهضروا على هاد الدكة ... ونقرقبو شوية الناب

خنساء بتعجب : اياااه الله يجعلو خير ...

نسرين : مكاين غير الخير الحمد لله ... كيف خليتي رانيا وماماها بعدا

خنساء : الحمد لله ... انا غانطلع نبدل ونهبط نشوف هاد الموضوع المهم ...

نسرين : سيري احبيبة سيري ...

خنساء هزات حاجبها وزادت مادخلش ليها لراسها هادشي عارفة طبع نسرين بحلاسة وبوحاطية الا بغات شي حاجة كاتقلب المود على حساب رغبتها ومبتاغاها ... طلعات طرفات وبدلات عليها لبسات بيجامة خفيفة وهبطاات طالقة سالفها كاتمختر .... كلساات مقابلة معاها : ايواا اش تم ؟؟

نسرين مدات ليها اتاي : هاكي هاد الكاس بعدا ردي المجاج ... فراسك باقا بلاا غدا عاد خرج عصام يجيب شي حاجة ...

خنساء الفضول قاتلها : تي دوي بلا ملااغة شنو باغا تقولي ليا ؟؟؟

نسرين بجدية قادات الكلسة : ايواا مني زربانة تعرفي ... غاندخل بلا مقدمات ... الالة خنسااء جاو فيك الخطااب ( غمزاتها كاضحك)

خنساء خرجات عينيها وقلبها تزعزع من بلاصتو غير كاتهضر فهاد الموضوع كاتا كلها ترجف والخوف كياكلها :اءء .. كيفاش الخطاب تاني ... واش كادوي على خونا لي قال ليا عليه الواليد

نسرين ضحكات : لا الالة ... هاذاا واحد اخر ... ناااس عليهم الطلب ... الخطاب كل شهر واحد شكون فحالك

خنساء بلعات ريقها : بلاتي بلاتي عافاك .. دقة دقة ... شكون هاد الخطاب وايمتا جاو وشكون قالها ليك اصلااا

نسرين : واحد صااحب خووك الالة ... خدام فواحد البنكة قاااري ابنتي وبدارو بوحدوا .. عجبتييه وقالها لييه .. ايوااا ولي هرب للزواج هرب للطاعة وطبعا مايلقاش حسن من لالة البنات خنساء الزين والقلدة والعقل ... دغيا ضربتيه على الشعااا

خنساء هزات فيها حاجبها : اييه ومن بعد ؟؟

نسرين : كيفاش ومن بعد ... السيد راه جاي طالب راغب فيديك نتي مغاتقولي والو ...

خنساء زيرات على قلبها تبقى هادية ونطقات بنبرة حادة : ممممم ... دابا نتي هي مرسال الحب لي سيفطو خويا باش يتشاور معايا

نسرين : ايوااا خوك وراكي عارفااه ... مايعرفش يدوي فهادي ... والعيالات حسن ... احم اش قلتي ؟؟

خنساء جمعات قوتها : واش غانعاودها ليكم ميتين مرة انا الالة ماباغااا زواااج ماااباغااا راااجل ... مامدخلاش هاد الفكرة لراسي بلاما تعدبو راسكم ...

نسرين فالبلاصة قرمات حجبانها : واش نتي حمقة ولا مااالك ... غير ما قال ليك راسك لااا

خنساء خنزرات : اييه ما باغاش ... ونتي اش مشا ليك ؟؟ كالسة ليك فوق راسك .. اش دخلك ؟؟؟

نسرين بردات كاتحاول تقنعها : اييه ... انا عارفة الموضوع كايخصك نتي ... وهاد الموضوع نتي لي غاتقرري فيه ولكن راه ما جاتش تقولي لا على اي واحد دق الباب ... وا دابا غير باش نكونوا واقعيين ... علاش ما باغاااش تزوجي وتديري دارك حتى نتي فحال البنات ؟؟؟

خنساء غمضات عينيها كاطلع النفس : هكاك فكرة الزواج مداخلاليش لراسي

نسرين مرطبة معاها : دابا غير جيني نيشان كاين شي واحد فحياتك ؟؟ ... زعما واااش كاتسنااي شي حد مواعدك بشي حاجة ؟؟

خنساء خصرات فيها كمارتها : واش نتي مريضة ولا ماالك ... اش كاتخربقي ... فين عمري كنت من النوع لي يتسنى شي حد ولا يبني مستقبلو على اساس بنادم

نسرين صبرها بدا ينفد : ايوااا قولي لياااا علاش ... كل مرة جاك شي حد لا لا لا لا ...بلا سبب وبلا حتى ما تسولي عليه ولا تعرفي عليه ... الحماااق هاذا

خنساء وقفات : شوفي غانقوليك جوج كلمات مغاديش نعاودهم ... انا ماباغااا زواااج هاد الساااعة ... مااااباااااغااااش ... دخلوهااا لمخكم ... مابااغااااش نتزوج فهموهاااا ... نهار نبغي انا غانقولها ليكم وانا نختار لي يناسبني ... ( ضاغطة عليها ): داااابااااااا ماباغااااااش نتزوج

زدحات الكاااس فوق الطبلة وزادت طالعة شادة على صدرها لي كايطلع وينزل هاد المرة متأكدة انهم مستحيل يدوزوها ليهااا حيت ماعندها حتى سبب يخليها ترفض

نسرين زيرات على يدها بعصبية : سيري انا بغيت ليك الجربة وقلة الظفااار كيفما فاقساني وبلعاني باغا تبقاي لاصقة ليا ف*ري وحدا *كي انا بغيت ليك المرض وقلة الصحة ياااربي ... اويلي على البرهوشة حاالفة ماتقلع ليا من الدااار ... باغا تبقى عليا كي التابعة ... اش فالراجل مايتعااااب .... اويلي اويلي ... الصفريطة كاتتعزل ليا وتختار فالرجالة ... ولي دق الباب تردو تقول هي ميس سويسرااا ... ولااايني السعد لمن عطاااه الله ... الفول كاعطيه الله غير لي ماعندو ضراااس ... كون مكان يسول فيها حد كون راها مهاوشة على الرجالة ولكن دابا عليها الطلب كاتخير وتختار وتعزل ليا هي لي جات معااهااا ... ( هزات ديك الصينية مقفوصة باغا تاكل جنااابهااا مشااات للكوزينة غاتفركع ) ...

خنساء طلعات لبيتها غادة جاية فحال تران كتاكل ظفارها : الله ياربي واشمن موصيبة حطيت فيها راسي .... اش غادي نقوليه مني يجي ... وبااا مني يعرف مغاديش يدوزها ليا هاد المرة ... ياربي شنو غاندير فهاد الحصلة ياربي ...

بقات كاتمشي وتجي فحال الهبيلة كلها كاترعد وتفتف غير بوحديتها ... مدة وهي على دااك الحاال كاتحاول تكالمي راسهاااا ... هزات تليفونها ودارت شوية الموسيقى فودنيها كاتبرد بيها وتنضم افكارهااا والو مالقات حتى حل يخرجها هاد المرة

دخل عصام لدار وداز دريكت لكوزينة وهو هاز معاه ساشيات لي فيهم سندويتشات وفريت وموناضات باش يتغدااو ...لقاا نسرين كاتصايب فشلاضة باش تحطهاا معااهم...

شافت فيه وبداات كتبقشش فدوك ساشياات:قلتي ليه يدير لحاار ياك؟؟

عصاام:كلشي لي بغيتي دارو..

نسرين:صافي غير نكمل هاد شلاضة بزربة ونحطهم...

رد عليها متساؤل بهدوء:جاات خنسااء؟؟

تنهدات وجاوباتو:اه جاات...

عصام:هضرتي معااها فداكشي...

جوباتو بإجااز:اه هضرت معااها

عصام بهتماام:إوى؟؟؟

نسرين:إوى يوى...(هزات فريتة دارتهاا ففمهاا وكملات كتمضغ) : مبغااتش أسيدي...قبل حتا من كمل هضرتي معاها...قالت مقاابلااش

عصاام سكت تواني قبل مينطق وهو كايسوط: عوتاااااني مقبلاااش...

يلاه غاتجااوبو وهو يخرج من لكوزينة معصب غادي لعندهااا صااعر...ونسرين تابعااه من لور محاولة تهدنو...حل لبيت بجهد لقاها متكية هازة تيل...

خنسااء هازة حاجبها بستغراب : اشكااين مالك مدرم عليا هكااا فبيتي بلا دقان بلا واالو...

رد عليهاا مخنزر:بصح هاادشي لي سمعت؟؟؟

ناضت عندو خدات نفس عميق عرفات نسرين وصلات ليه لخباار...ردت عليه بهدوء:اه بصح...كيف كتسمع مابغييتش نتزوج...رااافضة....بغيتي نقولها ليك بلغة خرى بااش تفهمهاا

عصاام بلغواات:وعلااااش ألالة رافضة؟؟

نطقات ببرود وهياا كتشوف فتيل لي فيديهاا:هااكدااك...مبغييتش

برودها وعدم هتمامهاا ستفزو وزاد جعرو ...ضرب ليهااا يدهاا بجهد حتاا طاح تيل لي كانت هازة فلأرض...ونطق بعصبية: شوفي فيااا ملي نكوون كاانهضر معااك...وحايدي عليا هااد لخرى من قدامي....(كمل بتكرار ضاغط على هضرتو)علاااش رافضة...علاااش؟؟!!

جوبااتو بنفعاال:قلت ليكم مية مرة مبغاااش نتزوج ومكنفكرش فزواااج....واش باغين تزوجوني بزز ولا شنوو؟؟

عصاام:رااجل جابو ليك الله...الف وحدة تمنااه...(بدا كايحسب بصباعو)قااري...خداام...بداارو...غاتعيشي معااه فووق سلك...علااياش كتقلبي مزاال....واش غاتبقااي تعزلي وتخيري ليناا فهاد لخطااب حتا يفوتك تراان ولا شنوو؟؟...

خنسااء بإصرار: أسيدي مشغلكش فيااا ...نعزل ونتخير..باقا صغيرة جات معاياا...صافي مابغيتوش..مامنااسبنيش،نقطة سديناا لموضووع...أويلي واش زواج ولا بسيف؟؟

قربات لعندهاا نسرين محاولة تقنعهاا لأخر مرة:اخنساء الله يهديك...راه خوك مباغي ليك غير مصلاحتك...وكون مشافش هاد الراجل مناسب ليك...مغايقولش ليك هاكااا...راه راجل كامل مكمول مافيه مايتعااب...غير فكري شوية

خنساء بنبرة مخنوقة:مصلاحتي هيا يخليني عليه فتيقاار....نهاار لي نبغي نتزوج..انا لي غانختاار راجل لي بغيت ورتاحيت ليه...ماشي جايبينو ليااا... ومبزينو عليا من لفوق

عصاام قااطعهاا:شنااهوااا عاودي شݣلتي؟؟....نتسنااوك نتي تجيبي ليناا الراجل..فين عمركي شتي هادي...افيقي ابنتي شوية راك معايشاش فسويد...راه الراجل لي كايجي لعند لبنت ...ماشي لبنت لي كاتمشي عندووو...

خنسااء غمضات عينيهاا وحلاتهم عارفاه مغيتفاكش معااها،ونطقاات بنبرة هادئة باغة تسد معاه لموضوع وتصدرو: غانجيك من لخر أعصاام بلا متبقا تحفي معايا فلحجرة بلا فايدة...هداك السيد الله يجيب ليه شي بنت الناس لي تستااهلو انااا راه مغاانتزوجش بيه...

عصاام وسع نضراتو ليها : ونتي ماالكي...شنو ناقصك؟؟علااش متستااهليهش؟؟؟

خنساء ملقات باش تجااوبو حسات بغصة فحلقهااا غرغرو عينيهاا بدمووع ونطقات محاولة ماتبين ليه والو:مكانش كايسحااب ليا وااش انا لهاد الدرجة متقلة عليكم بغيتو غير فقاش تفكو منيي

عصام ( مسح على وجهوو محاول يهدن معاها راسو ويشد معاها لخااطر بزز) : كيفاش متقلة عليناا...راه مهضراش هادي كتݣولي فيهاا... حنا مابغينا ليك غير لخير...(سكت تواني وكمل بهدوء)واخا ماشي مشكل..انا غانعطيك شوية لوقت شي تلت يام فحال هاكاك فكري فيهم تقدري تبدلي رأيك ...صاافي

ردت عليه بلغواات: واش مكتفهمش؟؟؟ مغانفكر لا فتلت ياام...ولا فتلت سنين...ماابغيتوش هياا مابغيتوش..وزيدووون اناا مزالة صغيرة على زوااج لي مصدعين لياا بيه مخي...

عصاام مبقااش قادر يضبط أعصابو معااهاا.. عروق جبهتو بانو...قرب لعندهاا وشدهاا من دراعهااا بجهد مزير عليهاا...ونطق بنبرة قوية:لااا لااا نتي ماعجبتينيش....بربي ماعجبتيني....هاااد لااا ولأعدار لخاوية لي كتحججي بيها فكل مرة كيجيك فيهااا شي عريس...ما كايتقبلهاااش لعقل...(زااد ضغط عليهااا)يااكمااا يابنت لحرام كاتمشي مع شي واحد واكل ليك دمااغ ومتلفك على لقبلة...راني كنقسم ليك بالله حتاا نقتلك ونشرب من دمك...

خنسااء بلعات ريقها بخوف و بداا قلبهاا كايضرب...ورجليهاا كايترعدو...خاافت لا يعيق بشي حااجة...ملقااتش خياار اخر باش تسلكهاا معاه إلى تبداا تبكي وتغبن عليه..ودير فيهاا مضلومة...عارفاه كايضعاف قدام دمووعهااا

خنسااء:ءه ءه...حرام عليك اخوياا...انا شنو درت باش دير معايا بحال هاكاا...(بدات كتحاول تنتر يديهاا منو)طلق لياا من يدي راك ضريتيني... طلق

نسرين شداات فيديه محااولة تفكو منهاا: اويلي اعصاام نعل شيطاان وطلق منهاا...اشهااد لهضرة كتقول..إن بعد الضن إتم... الله يهديك مضلمهااش

طلق منهااا وشاف فيهاا بعيونو لي ولاات حمرة:لحد دابا اخنسااء بااقي مبرد معاااك...وداير عين ميكة و راخي ليك لحبل...ومييك عليك ديال بصح...ولكن برب المعبوود ونمشي حتا نحصل عليك شي حااجة واخا تكوون غير صغيرة...داكشي لي نديرو ليك والله منعااودو ليك...بربي مغايتنساا ليك..هاد لهضرة ماركيهاا عندك سطري عليهاا متنسيهااش...و الله يعميهاا ليك... شتي من مور هادشي عولي على خزيييت عيني عليك ابنت ميمتي ...

كتفى بهاد لكلماات كايتوعد بيهم عليهاا...ودااز خاارج ضارب باب لبيت برجلو...ومن تماا مشاا حل باب الداار خرج و سدو رادخو بجهد حتا قفزهم بجوجاات...

خنساء ݣلسات على سرير وشداات رااسهااا بيديهاا بجوج كتخمم ودموع محجرين فعينيهاا...حاسة براسهاا وحلات بلمعقول...خوفها لول كان مع عصام لي بدا كايشك فيهااا...عارفاه انه مغايتفاكش معاهاا... وغايبقا تابعهاا بحال ضلهاا...وخوفهاا تاني إلى جا شي خطيب اخر اشنو غاتعاود تقوليهم...ماشي فصااليحهاا تعااود ترفض....حيت غاتزيد شكوك عليهاا ومحاال واش تسلك منهم هاد لمرة....فديك ساعة دماغها الشيطاني اتوماتيكيا بدا كايخدم .... وكايخطط لشي تخريجة لي تخرج منهاا فهااد لوحلة...لي دخلات ليها بلا متحس ... راسها خدااام بالمعقول كاتفكر فشنو يقدر يسلكها ... هزات حاجبها وعينيها والابتسامة كاترسم بشكل خفيف على شفايفها وهي كاتبلاني و تنسج وتخيط ... ضربات يد على يد : علااااش مافكرتش فيهااا علاااااش ... فين كااان عقلي .... مكاينش شي حل غايفكني من غير هااذااا .... ( الضحكة خرجات من قلبها والامل تسلل ليها ): سير اعقلي الله يحجبك ليا وخلاااص ...

عصام تنهد : انا عييت معاها ابا ... الا زدت حكرت غانفلت فيها شي دقة ونصدقوا فلا حول ... غير هضرت معاها بدات تغبن عليا لقاتها مسلكاها

العربي كايحك لحيتو : لا انا هاد البنت غاتحمقني مافيهاش ... اش غادي ندير معاهااا ... الا زوجتها بسيف غانولي خايب والا خليتها على هواها بشوية بشوية غاتخرج على طوعي

نسرين : ايوا راه قالوها زمان اعمي ربط تلقى ما طلق كون كانت دير لحساب ليكم كون راه على الاقل فكرات ولا سمعات الهضرة ولكن هي ماعندها غرض فحد المهم دير لي فراسها

العربي : لا حول ولا قوة الا بالله ... عيييت عيييت فالخاااطر ... ولايني انا لي ضسرتها حتى ركبات ليا فوق راسي ... اما من اللول نردعها ونوريها الحكام كيف داير ولايني قلت مانربيهاش تربية الحمير ونسايس معاها حيت خلاتها مها صغيرة ... ولكن راه لي مجابتو محبة ماتجيبو حزارة

عصام شتف باه غايتعصب عليها وهو واخا هكاك مكايبغيش يقلقها واخا كاينفاعل عليها : وا دابا ابا ماعندك مادير ... اييه خنساء صعيبة شوية فطبعها ولايني ماجاتش تخنقها تاني واخا راه مادارات فيها مايصلاح هاد المرة ... غانشوفو كيف نديرو نردعوها بالعقل

نسرين هزات فيه حاجبها : ياك اخويا وا لي سمعك دابا مايقولش هاذا هو السيد لي عاد نوضها معاها كاطريام

عصام حمر فيها عارف باه الا شد معاها الزكير غادي يخرج فيها القديم والجديد : سكتي نتي

العربي : واخا اسيدي مني مابغاتش الزواج ورافضااه غاتشوف مني وجه اخر نوريهااا ماباغااش كيف داايرة ياك بغات تبقى هنا خليهاااا ... عليا باليمين يا ديك السيبة لي عاجباها لابقاات ...

عصام ساط : الله يهديها ابااا ...

خنساء دوراتها فراسها مزيااان وعجناتها حتى عرفات منين تبدا وشنو راس الخيط ولبسات عليها عبايتها باغا تخرج ... العربي هز عينو بانت ليه مدرمة وقرم حجبانو : اديك لالة البنات فين صادة تاني ..

ابتاسمات : غير عند رانيا اباااا بغيتها فشي حاجة ...

العربي بصرامة : ياااك الالة عند رانيا ... سيري حيدي ديك الجلابية لي مابقيتيش تحيديها فوق جلدك ودوزي تريحي ... رانيا عاد جيتي من عندها اش غاتخركي بيها فهاد الكَيالة يبرد الحال وسيري عندها ...

خنساء بتأفف : ولكن ابا رانيي ...

قاطعها وعينيه حاميين : مكاين ما ولكن ... هاداك خيطي بيطي ديالك طلع ليا فراسي ... شدي لارض وتبتي ونتي مابقيتيش تعرفي ترسي فدار كيف البنات ... نقصي شوية من داك الضوران وتخياط الدروبة راك مابقيتيش صغيرة ... قرانك راه بولادهم

خنساء عرفاتو كايحشي ليها الهضرة دورات عينيها لجهة عصام عرفاتو هو لي عمرو عليها وقال ليها على الزواج ... خنزرات فيه

عصام حس بشوفاتها : كوليني بعينيك راني مزوق

ضغطات على شفايفها الدموع تحجرو فعينيها ... ضغطات على فمها ونطقات بخنقة : واخا انا غانطلع لبيتي

يلاه غاتزيد ووقفها العربي بالغوات : دوزي غسلي دوك الماعن لي تغدينا فيهم ... نسرين عاد جاية من الحمام عيانة ... ونتي النهار وماطال ناعسة ناشرة رجليك تقول جايباها خدامة عليك ... راه قالك الا كان صاحبك عسل ماتلعقوش كامل ونتي راك عيقتي ابنتي ... ومنها نيت تخرجي شوية من دوك جوج حيوط لي كاتضلي غاطسة فيهم .. من اليوم غاتولي تكلسي معانا فحال الناااس راك ماشي كارية تهبطي تهبطي وقت الماكلة وطلعي

خنساء حبسات البكية غير بزز ... ماتقدرش تجابه مع باها : ايه هي اللولة واخا ابا شي اوامر اخرى

العربي خنزر : هي لا تحركتي دابا وجمعتي ديك الكوزينة ...

بلعات ريقهااا بالفقصة وزادت من تما تحت انظارهم غاتاكل جنابهاا ... مبردة راسها غير بزز باش مايشدش معاها الزكير فالعشية ويخليها تخرج ... بالنسبة ليها الموضوع مهم وماتقدرش تغامر وتاجلوا للغد ليه ... دخلات للكوزينة شمرات على ذراعها جمعاتها كاملة ومسحات الماعن ديال البلاكار كاملين بالفقسة كاتبرد فيهم الغدايد و نقات التلاجة وضربات تجفيفة ديال المعقول خلات الكوزينة كاضوي بالنقا .... سالات وطلعاات ضرباتها بتحميمة تحيد العيااا باش تخرج من بعد ...

عبدو باقي مخبوط بالنعاااس النهار كامل وهو منشور دخل معطل من الزنقة حتى صبح الصبااح ... دخلاات مو قارمة حجبانها من الريحة لي كاتشم كاتسوط وتعاااود وتسد فنيفها ... حلات عليه الشرجم لي كان خارج لجهة السطح تهوي انيا لي مخنووقة ... خصر كمارتو على اتر الشمس دخلاااات مديرونجياااه فالنعاس ... نطق بصوت مبحوح مخصر حال عين وساد الاخرى : الواليدة ... سدي داك الشرجم الصباح هاذااا وااايلي ...

حياة : الويل ماشي الصباح هاذا العاصر ودن زمان ونتا مجايب خبار .... يوك يوك ا ش هاد الريحة فهاد البيت اوووف اووووف اووووف ... داخل البارح حتى صبح الحال وناعس النهار كااامل فين كنتي المسخوووط ؟؟

عبدو شد راسو قالبو النعاس : ماتبدايش تاني امي الله يهديك

حياة بالغوات : الله يهديك هو نتا على راسك ... اش ساير دير فالنصايص ديال الليل فالزناقي لي داخل عندي حتال الصباح ... ولا ياكما ساليتي من داك الويل ديال الكماية ووليتي تشرب وتسكر ...

عبدو : اووووف الواليدة اوووف واااش حنا مانرتاحوش فهاد الدار ... واش مناوياش تسالي من هاد الموال داكشي لي خلا بااا كمليه نتي

حياة بتحدير : هاودني منك اهاد المسخوووط راه شي نهار غاتجيبها فراااسك ... مغاتهنا حتى دير شي مووصيبة نطيحو فيها كاملين .... هاد الحالة لي وليتي فيها مابقاتش تعجب ... راااه غادي لور لوووور وغاتغرق غرقة وحدة

عبدو : الواالييدة هنينااا

حياة : اشمن هنا خليتي ليا ونتا كل نهار عاطيها لالة ومالي وتقرقيب السطالي مابقيت عارفاك معاش دخلتي ولا معاش خرجتي ... مابقيتي تحتارم وحد ولا ضارب لشي واحد الحساااب ... ( وجهات ليه صبعها ): سمع نقوليك ... راه عليا بليمين لا باقي خبيت عليك ولا غطيييت ... شتي كاااع ديك الضسارة بااك هو لي يعرف ليهااا .... كاااع دوك الكدوب لي كنت نتستر بيهم عليك سااالاااو .... مابقيتش نكدب عليه وديك الساااعة منك ليييه هو لي يعرف ليك ... انااا هزيت يدي هاذااا الجهد ... عيييت نضرق ونغطي ولايني كانجيبها غير فصحتي وشي ماقضيتو معاااك

عبدو وقف بتأفف خرج للسطح قرب للروبيني غسل وجهواااا : انا غاتبعوني حتى نبات ما نصبح ليكم فهاد الدار ...راني ماشي دري صغير تبداي تحاجي ليا هكااا الواليدة ...

حياة: دروووك وليت نحاااجي ( بللات صبها بريقها طابعاها فالحيط): ايواااا هاهي وغاتقول مي قالتهاااا ... ياااومااا ندمتي على هادشي لي ساير دير فراااسك اجي حتى لوجهي ودفل ... دابااا دايرني هبيلة وكانخربق ... ولايني مزااال ترجع على كلامي وماتنفعك ندااامة يا وليدي يا عبد الله ... غير عقل علييها ... عقاااااااال على كلاااااامي راااه دور دووووور وترجع تفكرووو وديك ساعااا تلقى ترااان هوااااا فاااتك

زادت من تمااا خلاااتووو كاايسووط ويبوخ ... غسل علييه وبدل حوااايجواااا لي كانو كايقلبو بريحة الشراااب ... وخرج للقهوة حتى ليسي مابقاش كايمشي ليييه من نهار سااافر ما عتب لييه ولا ضار بساحتو ...

وصلات قدام باب رانيا كاتنهج حيت كانت زرباانة ... صونات فالباااب وهبطات عندها معجبة : خنسااء ؟؟

كاترد النفس : لبسي عليك نخرجوا شوية بغيتك

رانيا : هاااء مالكي ياك لاابااس بعدا ؟؟

خنساء : تي لبسي وخرجي عندي بغيتك لواحد البلااان ...

رانيا : واخا واخا تسناي ندير عليا جلابيتي ... حركات راسها بايجاب ودخلات لبسات عليها وخرجااات هي وياهااا للجردة ... كلسو فواحد من الكراساااا

رانيا بتساؤل : اش تم ماموالفاش ليك تجي عندي فهاد الوقت ؟؟

خنساء قارمة على قنوفتها : هاد المرة واقفة عليك ... وبغيتك معايا مراة ونص

رانيا هزات حاجبها : اش تم ؟؟؟

خنساء : داك خينا لي قلتي طلبك للزواج ومابغيتيش

رانيا ضحكات : هههههه ربي شكون كدب عليك ... ايمتا طلبني انا شي حد للزواج ومن الفوق مابغيتوش انا كون لقيتو نشدو بسناني مانطلقوش

خنساء ساطت : تي حضري مغايا عقلك اصحبتي ... الشارف مول الصاكا

راانيا : اااااه عدنان مالو ؟؟؟ اش فكرك فيه اهاد العفريتة ؟

خنساء بتركيز : لقا شي عروسة ولا مزااال ؟؟؟

رانيا بعدم فهم : على ما قالت ليا ماما باقي وختو قالت ليها الا مابغاتش بنتك شوفي ليه شي وحدة بالحق راكي عارفة شنو قلت ليك عليه داكشي عندو لاوي مابغات تدي ذنوب حتى ولية

خنساء بتفكير : ايييه مزياااان ... كاتعرفي دارو فين جاات ؟؟؟

رانيا : تي مالكي زربتي عليا هاكااا لاش كاتسولي بعدا ؟؟

خنساء ساطت : مال دين موك كاتجاوبي سؤال بسؤال ... جاوبيني على قدي كلامي ... كاتعرفي دارو ولا لا ؟...

رانيا : اييه راه كايسكن غير قريب لينا ... عرفتي مولات المسمن لي فالدروة ديالنا

خنساء : ايييه اييه عرفتها ...

رانياا : ايوااا راه فوق منها هاديك راه دارو ... كارية عندو ...

خنسااء عاضة على قنوفتها : قولي ليا واش متأكدة من الهضرة لي قلتي ليا علييه ؟؟... احم زعما بصح ميت ليه الحوت ؟؟

رانيا : ايييه متأكدة السيدة لي جابت لماما الخباار قريبة لييه وقالت لييك الالة كل شهر كايمشي عند طبيب اختصاصي متبع حالتو

خنساء : وهي فين شاافتو ؟؟؟

رانيا : كيشتي حتى هي راجلها عياااا وداكشي لوااا ليييه ... ايوا ومتبع عند نفس الطبيييب ... ولقاتو تما ماهي مرة ماهي جوج ...

خنساء كاتلوي شعرها بتفكيير : امممم وهاد الخبر عارفها شي حد ولا غي نتوما زعمااا واش ناس عارفين عيبووو

رانيااا : لااااا كيشتي دابا كلشي عند بالو العيالات لي فيهم ديفو مع هو ولد الحرااام كل مرة واش مخرج فيهم غير لي عيا منها يطلقهاااا ....فلول حتى حنا كناا نتيقو بييه ولايني من بعد هادشي لي سمعنا عرفنا البلان كيف دااااير ... ومرااااضيييش بمشكلتوو حيت راكي عارفة الرجال مع هاد الموضووع خصوصا الا كان شي واحد نفسو فنيفو ... مايقدش يقول راني ناااقص ولا مقااادش ماايرضاهاااش قدام عائلتو وصحابوو

خنسااء : اممممم واخا يتوب عليك ... مزال غانحتااجك احبي ... عندي واحد البلان فراسي نتأكد منو وانا معااك ...

رانيا : شتي نتي هاداك الشيطان لي ساكنك فاق وااقيلة .... وكاتنوعري شي تنوعريرة موحال تخرجي منها سالكة ودابا واخا نبقا نسولك حتى للصباح مغاتعطينيش راس الخييط ...

خنساااء ابتاسمات : ايييه هادشي باش كاتعجبيني كاتفهمي راسك احبي ماعندي مايتسالك ... من بعد غانشرح ليك كلشي دقة دقة علييك

رانيا : ايوااا نتسنااو ... شنو دابا غاتمشي ؟؟

خنساء وقفات : ايييه غدا فايقة بكري ( غمزاتها ): عندي غرض مهم خاصني نقضيه ...

رانيا : اياااه الله يتبت العمل ... نمشي انا ن*ود فحالي ...

خنساء : هي لا حسبتيهم ... تهلاااي ...

رانيا : بااااي ...

اتاجهات لدارهم راسها خدام وعقلها شيطاني كايفتي عليها النوااعر والبلانات ... دخلاات نيشان لبيتها كاتبلاني وتلاقي فراسها وتفصل وتخيط مع مخهاااا ... حسات شوبة بالراحة مني طاحت عليها هاد الفكرة على الاقل عطاتها امل ... واخا مزال مامتأكداش ولكن غير فكرة ممكن تخرج راسها بهادشي مريحاها

يتبع...