بنت السايب الجزء 41

العربي حقد الشوفة فعصام ونطق ناهض فيه هضرت عتيقة شعلاتو وزنداتو بلمفيد:عجبك الحاال العاايق...ها داكشي لي كنت خاايف منوو وقع...هااا لي كنت كانقوليك عليك من صبااح...ونتاا داير راسك مكااتسمعش

عصام تأفف بغضب وقاال: داباا غاا بغيتو تكبروهاا وسلاام...اشنو فيهاا الى جبتهاا لداار وهياا مريضة...تاعت الله فين لعيب هناياا..راه غا مابغيتش نتقابح مع هاديك ونوض معاها الصدااع...

العربي:واااا صدااع هو لي غاينووض على جدك ملي تسيق مهاا وخوهاا لخباار لي هادشي لي وقع فغيبتهم...مخليبن لبنت فداار حتاا صدقاات بايتة فجيه أخرى...وعند من ؟!!عند هداااك لي راامي عليهاا الطلاق وحالف مايرجعهاا....اويلي ياا عباااد اويلي... خاايبة حتاا لمعودة...فخر يااامي غاايولي فيااا الضحك...

خنساء بان ليها بدا كايشعل وتدخلات باش تهدنو:صافي اباا رخف فيك النفس..خليه يضبر رااسو...

رد عليه عصاام:واااعبااد الله...سيدة لقيتهاا مليوحة فزنقة مريضة مهلوكة..مادوزتش معاهاا لقليل..وااش غاانخليهاا هاكااك ونزيد ماندير واالو...راه ابااا أي واحد بلاصتي غايدير دااكشي لي درتو...

العربي بحدة وكايحرك يديه بعصبية :الى كااان مكلخ عااد يديرهاا...ملي هزتيهاا دوزهاا لدارهم ديك السااع لاااش جاايبهاا لعندك ملي مبقاااش عينيك فيهااا...ادوي؟!!ولا فلحلال خايبة وفلحرام زوينة...ويلاااه فكهااا دابااا...

عصاام بلغواات:واااش نرجعهااا بزز؟!!!

العربي معلي صوتو كتر:وااا ماااسوقيش...هاادشي فكر فيه قبل ماتجيبهااا وتولي قاايس فلحراام وخااطي فلوسخ بلا ماتحس...

جاوبو بنبرة قوية:والله اهديك الوليد...اشجاب دابا لحرام ولا لحلال للهضرة...مالني درت معاها شي حاجة...وزيدون رااك شتي كلشي على عينيك....نعساات فبيت خنساء...شوفة مكملتهااش فيهااا...

رد عليه بصراخ:اهاااه...وناااس لي شافوك مدخلهااا هازهاا بين اديك جاايبهاا لهناا وملي دخلاات ماتلاات عتبات لزنقة...عاارفينهاا فين نعسااات؟!!!يلاااه نووض...سير عند كل واحد فيهم دق عليه وقوليه هااد لهضرة وشوف وااش يتيقك شي حد فيهم...(زااد حمر فيه)اناا لي قتلني وقرب يرݣد لياا ليد مع الرجل...هو ملي طلقتيهاا ومانويش ترجعهااا لااش جاايبهاا لعندك لاااااش...اشغاا يقولو عليهاا النااس...واش تصحااب لهضرة غير عليك...وااش كايسحااب ليك الشرف دياال بناات النااس لعبة...بهااادشي لي درتي رااك قستي فشرفهااا قستيييه...وسمعتهااا حطيتيهاا للارض

عصام غمض عينيه ومسح على جبهتو مقاادرش يتجااوب معااه...زمطوو وحس بهضرتو على صوااب...حيت فعلا هو طلقهاا ومحرمة عليه الى الا عااود ردهاا ودارو لحلال.

كمل العربي بنفس النبرة: وهاادشي غاا مهاا مزاال مفخباارهاا مايتعااود...اما الى سااقت لخباار...غااتجي دردك عليك...توريك شناهياا تجيب بنتهااا تبياتهاا عندك وتردهاا ليهااا بحالا حتاا حاجة ماوقعاات...

عصاام بعصبية:بااا رااك كاتعرفني...مكاايهمني حتاا شي قندووح...ومكاانخاف من حد...انااا راه مدرت واالو..وماسوقي فحد...درت غير لي خااصو يدااار...قصدي شرييف...ولي سمعتوو دوى عليااا ولا عليهااا بربي حتااا نرعفووو...

العربي:هاادشي لي كاندويو عليه اسي...يااا مول لعقل... رااه الحرااام...الحراام كااتعرفو ولا غير داير فيهاا قااري ونتاا مقااري حتاا *رية...غير ݣوليااا دروكا هااد لبنت..الى شديتيهاا لݣيتيهاا مع داك البااب وصيفتيهاا فحاالهاا..كيف غادير تهز الرااس فعائلتهاا وهما مكااينينش...

خنساء ستغلاات الفرصة وقالت كتأكد هضرتو: وييه اباا بصح...مسكينة نسرين والله حتاا بقااات فيااا هياا مديومة ربي بوحدو لي عالم بيهاا وغاتزيد تكمل بهاادشي لي طرى...نااس مكايرحمووش...غااتولي عليهاا غنااية فدرب...لي دازت من حداه ينعت فيهاا...بففف الله يصااوب اوصاافي...

عصاام تلاقااو عليه بجوج...حرك راسو بلا حول حااير شاادو بيديه بجووج...معاارف مايدير

نطق لعربي مخاطب خنساء:لا اببنيتي...حناا مݣادين على دنوب البنت ننساو ݣاع داكشي لي دوزاات معاناا ونتعدااو عليهاا هاكااا...الله ينجينااا...

خنساء قرباات لعند عصاام و دارت يديها فوق كتفو:صافي اخوياا الله يساامح...خلي قلبك كبير...نتاا ماتبغييش لمضرة لنسرين ولا حتاا ليك نتا...

عصاام مزال شاد على راسو و ما خرج حتاا كلمة كايشوف غير فجيهةوحدة ومزير على قبضة يديه حاطها جيهت فموو كايخمم....

خنساء بإقناع: شرف البنات راه بحال البيضة..سااهل يتهرس...وحناا لعيالات راه حساسات بزااف...اقل ردت فعل تقدر تأتر علينااا...وغير شوفة تقدر تجرحنااا...ولا تحييناا من جديد وتخلي قلبناا ينبض...شتي مامشيتي عندهاا لباارح بلا عقل الى ورااك مزاال باغيهاا وكاتفكر فيهاا...(دوزات يديهاا على ضهرو)صافي الله يساامح...

العربي:وكايقولو نااس زماان...الى لواحد دبح لكلب.. لاخر مايسلخووش...الى هياا غلطلت ونتاا طلقتيهاا وعاودي جبتيهاا لهناا مورة الطلااق...حنااا رااه مغانغلطووش ونخليوهاا ترجع لداارهم...نعل الشيطاان الله يرضي عليك...فكر شوية فديك البنت وكيف غايكون بيهاا الى مشاات...

عصام تنهد بحرقة مشتت النضر عليهم بجووج....حاس بحالا تلوى ليه الدرااع...ماضربش لحسااب لهاادشي لي طرى..جهة فعقلو كايقوليه رجعهااا...ونص لاخر كايقووليه لااا خليهاا تعوم بحرهاا حيت دارتهاا قد رااسهااا ومتردهااش...وجهة اخرى وهياا لي مسيطرة عليه كاتقوليه دير بوجه بااك وماتفقصووش...رجعهااا.... ولكن ربيهاا على طريقتك....

بعد مرور يومين...

دنيااا عاامرة فداار السايب...ݣاع الجيران ومالبن الدرب حااضرين للزردة لي داارت خصيصا لرجوع نسرين مرة اخرى لداار ونهاية طلاقهاا مع راجلهاا عصام...لي داار اللازم وعااود رجعهااا...ناعل الشيطان فداكشي لي جرى..وبدرجة اللولة ماباغيش يهرس كلمة الباه ولا يهبط سمعتو للأرض و يخلي نااس تهضر فيهم وتزيد التشفا...

كانت نسرين فبيتهااا بقفيطين فلاخضر الفاتح... مقادة شعرهاا العسلي مزياان جامعة البعض من خصلاتو و مخلية لبعض الأخر مطلوق على رااحتو....كانت واقفة قبالتهاا خنساء لي مكاتقلش عليهاا انااقة...لابسة قفطان فلبلوماغين مطروز جيهت الصدر إڤازي جااي مع لاطااي ديالهاا زاااز مبين فصالتهاا هيااا هاديك...مع ميكاابهاا المصروع لي كاايزيد يبرز ملاميحهاا ويخليهاا تزيد تفتن...مصيبة شعرهاا الطويل الأسود بوكلي ومخليااه مطلوق على طولتو زااد عطاها جماالية و هبة فنفس الوقت...

هزاات لبانسو كاتحاول التبت الهيلايت على خدود نسرين لي نطقاات بملل:اووف واش مزال مساليناش؟! بغيت نشوف رااسي كيف طلعت...

خنساء:مالك خف من رزقك؟!!تبتي شوية راه قربناا نساليو...

نسرين بخوف:ياكما كترتيه ليااا...راه غايبدا يخااسم...

ردت عليها بنفي:درت ليك داكشي عباار على حقو و طريقو معندك ماتقولي فيه...لا نتي لا هو(حطات لبانسو من يديها) صافيي داباا هاحنا ساليناا...دوري تشوفي...

نسرين دارت لمرااية وهيا توسع ابتساامتهاا بإعجااب عاجبهاا راسهاا...رغم انو ميكاب خفيف ولكن كايبان صاروخي مخدوم تحلف عليه مديور لعروسة اروبية...كايبانو ملاميحهاا ناعمة وهاادئة... وعينيها مجبدين و مسحوبين بأيلاينر رقيق ورموش اضافية ..خلى تبان فيهم جادبية من نوع اخر..وشفايف بارزين مديور ليهم غير ݣلوص وردي لاامع...

خنساء:اوى اشبان ليك؟!!طلعتك ولا واالو...

نسرين كاتحلف :اختي معندي منقول...و تقولي ميكااب ارتيست لي مصيبة لياا...عيني تبدلو عليااا شوفي تبارك الله قدااش ولااو...لا لا طلعت طلعت...

خنساء بابتسامة: بصحة ورااحة...وعقلي ابنت نجاة على هااددشي لي كاندير معااك...دوز تاني يومين ودݣي لوتاد وضربيهاا لياا بنكرة وبدااي تعطيني فلقرطااس..عندك تنسااي...

نسرين وسعاات نضرتهاا:اويلي حراام علييك ماالني حمااقيت...نكاار لخير غير ولد لحراام...شتي هادشي لي درتي معاياا غايبقاا مهزوز فوق كتاافي عمرني النسااه...

جاوباتهاا ضاحكة: هااحناا غانشوف...

مزاالين كايهضرو حتاا دخل عصاام لبيت...لابس سروال دجين فلكحل وقاميجة صيفية مزيرة على عضلاتو فنفس اللون...مع مݣانة فضية فيدو...ناقصو غير خاتمو لي حالف مايعاود يجي فصبعو....طلعات فيه نسرين لعين وبتسامة ساحرة رسماتهاا على ملاميحهاا سر نازل عليهاا...وقف لحركة مفيكسي عينيه عليها باالع ريقو فديك اللحضة ماينكرش انهاا جااتو فنة فهى لتواني كاايدقق فتفاصيلها المنحوتة...الشي لي نتابهت ليه خنساء و عرفاات انو بداا كايرطااب ديال بصح...وخاا يبقاا منفخ حتاا يعيى...غايجي نهاار لي غايحط السلاح...حيت من ديماا نسرين لي كااينة فقلبو ومعمرة عقلو...شوفة بااش كايشوفهاا و كاتبان فعينو...معمرو شاف فيهاا حتاا بنت...

نسرين ستغلاات الفرصة...هزات بواطة لي فيهاا سنسلتهاا و مداتهاا ليه

ناطقة بنبرة عدبااء مقربة خطوة منو.:عصاام عفااك...احم واخاا تلبس لياا هاادي...

عصاام حس براسو داكشي لي مخطط ليه فدماغو دغياا غايتبخر وهو حالف حتاا يشطحهاا على مخيط عااد يرجع ليهاا...

خلا ملاميحو جامدة محاملة حتا تعبير ونطق بنبرة باردة:هاا خنساء تلبسهاا ليك...اناا مامساليش دابا لتخربيق لعيالات...

نسرين بلعات ريقهاا بمرارة ونطقات مصطانعة لإبتسامة: خنساء دارهاا ضفرهاا متقدرش تحلهااا لياا...غير ركبهاا لياا احبيبة مغاتعطلش...

طول فيهاا شوفة لي لحضاات...وبلا مايهتم داز لكوافوز هز تيليفونو لي كان كايشارجاا...وقال بنبرة جافة مامسوقش:حتاا اناا ضفري ضارني ماشكيت عليك...بلا ماتلبسيهاا نتي ݣااع وتهنااي...(شاف فخنسااء) ختي راه صالون عمر رجال جااو...خااصناا نسربيو ليهم اتااي باش نحطو ليهم ياكلو...شوفي مع الطيابة باش ماتعطلش الله يسهل عليك...

خنساء حركاات راسهاا بإجااب:واخاا غير كوني هاني...دابا يوجد...

كمل عصاام على هضرتو و نساحب بهدوء خرج من لبيت كأنو متجاهلهاا...نسرين دورات شوفتهاا لخنساء بضيق وااضح ولااحت ديك السنسلة من يديهاا محاملااش تصرف الجديد لي ولا كايدير معاهاا...بحالا كاتحسو كايعاقب فيهاا بطريقة غير مباشرة...وخاا رجعهاا وتسامحوو قدام عائلتهم...ولكن داكشي مبينو ليهاا غير من برى...اماا من لدااخل هضرة اخرى كااينة...

نطقاات بنرفزة عينيها غرغرو: شتييه يااك شتي شنو كايدير معايا...مرجعني بزز و ليت واقفة ليه فوق عينيه فهااد الداار...لهضرة هيااا اللخرة كاايخرجهاا بلݣرام معايااا...يخخخخ

خنساء تاففاات:راني قلتها ليك ديك المرة وتافقنا عليهااا...قلت نرجعو ليك غانرجعو...ولكن نرجعو كيف كان معااك فهاادشي نتي لي غاتكلفي بييه مااشي انااا...يااك قلناهاا(حركات راسها بإجاب) وياااك قلتي غاتصبري معاه حتا يتقااد معاك وترجعيه لصفك...(عاودات حركات راسهاا بلإجاب وكملات خنساء مرفعة صوتهاا)وماالك داباا كاتغوتي وباغا تروبليهاا وتقربليهاا معاه ونتي حتاا بلااصتك بااقي ماسخنتيهااش...

ردت عليها بإحباط:مااشي هكااك...ولكن حطي راسك بلاصتي...كيفااش نقدر نصبر وهو كايتعامل معايا هاكة وكايفقصني شوية بشوية ومبين لياا بلي مرجعني بزز منو...(كملات بنبرة مخنوقة) راااه كايقهرني هاكة...كااايقهرني...

خنساء غوبشاات بملاميحهاا وقالت: الى بديتي بهاد التعصاب هو لول نقصتيه عليك...غاتكوني حيدت عليك النص تلخدمة...تقلي شوية وترزني...يا بنااادمة خدميهاا بعقلك وبلخااطر رخاهاا الله..كلشي يتقااد...

نسرين:خووك اختيي رااه وااعر...كيف غااندير نبقاا شادة معاه هاد لخاطر بلا مايجعرني...بهاادشي لي ولا دايرو معاياا كايخليني نغلي من لدااخل...

خنساء:خوياا واناا عارفااه...كاايبغيك ولكن لسانو مفافي مايعرفش يعبر ليك عليهاا...ولا يقوليك اااه كانبغيك و داكشي علاش رجعتك وسامحتك بزز مني.... هادشي لي كااين خاصك تقبليهاا...ولخطوة غااتجي من عندك...باااش طلعي دااكشي لي عندو لدااخل...خااصك تكوووني لفعى...ماتجيهش نيشاان..بلعكس خااصك تلوااي علييه...

نسرين ضحكات بستهزااء:ههه كاتفلاي علياا..كيف غاندير مع واحد بحال عصاام...حجرة يالطيف

خنساء بتاسماات:شتي الحبيبة راجل وخا يكون جبل ݣاااع يتهد قداامك ويولي خااتم فصبعك دوريه على جيهة لي بغيتي...غير بلسان لحلو...تمدحيييه (غمزاتها وكملات) تكووني ناااضية بلمفييد واااو بلا ضواااو... غيير بطرف وتلواااز...مااشي بلغوااات وتشدي معااه الزكااير وتجبدي معااه لحبل...حبلك يكوون هو انوتتك لي غااتجريه بيهاا وتخلي موو رااكع بين رجليييك...طلعتي يطلع...هبطتي يهبط...نتي هياا الشيفور دوزيه من طريق لي بغيتي وكيفماا بغيتي...

نسرين بنبرة مخنوووقة:عييت والله حتاا عييت...كايباان لياا محاال ترجع شي حاجة كيف كاانت...مشاا لحاال واقلة...

خنساء:مداام رجع ليك..ادن مفاات لحاال ماواالو..نتي عااد غاتبدااي معااه...بعداا فلوضع لي نتي فيه...نسااي علياا ديك يبغيني كيماا اناا..تتتت غاايبغيك الى كنتي نتي منسياه فݣاع العاالم...الى كنتي كااتخليه يدوووب ويسيح و هو فووق منك...غاايبغييك الى كنتي كااتغرسي ضفارك فضهرو و نتي مجبدة عينيك كاتنيني وتاوهي وتمدحي فيه و فرجولتو...الى نجحتي فهاادي...فرااك غاتخليه ينسى كلشييي...ويبداا معااك صفحه جديدة لي غاايبقاا يتفتف عليهاا خاايفهاا لا تقطع...

نسرين كانت كاتسمعهاا بهتماام كبيبر كاتسجل فهضرتهاا بلحرف... ونطقات بهدوء:اييه زيدي كملي...

خنساء عاودات ݣلساتهاا فوق لكرسي قابلاتها مع لمرااية وقالت:خااصو يلقااك عروسة كاتسناه فكل ليلة كايجي فيهاا مهلووك من لخدمة...غير يشوفك ينسى لعياا كاامل ويرجع كيف لعااود فيه عشرة...لحلاوة خااصهاا تبداا ليك من فمك حتااا لتحتك...ونضمن ليك الى كان كايبغيك و ونتي عاطياه لي بغااا ومامخليااه ناقصااه حتاا شي حاجة...غاايوليو يجيوه لعيالاات كاااملين...غير تخربيقة...غاايحس براسو هو بوحدو لي مزوج...(بتاسمات ليهاا... قربات لعند ودنها وقالت بنبرة تابتة) و ديري فبالك بلي راه قلبو كايبغيك اه مكدبنااش فيهاا...ولكن تحتوو كااايموووووت على طواااااااسلك و هو لي غادي يرجعك و يحطك فقلبو ويسد علييك فييه...

نسرين وسعاات ضحكتهاا جاتها هضرتها على صوااب:هههههه مسخوووطة يااختي مسخوووطة...

خنساء بعجرفة:اوى شنوو عطانا الله لحلال نتمتعو بيه..ونستاغلوووه....(ضرباتها على كتفهاا و كملات بتساؤل)اجي فينهواا بعداا دااكشي علااش تاافقناا...يااكماا نااوية تسرطييه تااني...

نسرين دارت عندهاا و شهقاات بخوف:اويلي علااه اناا نقدر... من بعد اختي لي شفت نتي رااك تقتليني و مايجيب حد خبااري...ابلييييس يحط سلاحو قداامك...(ناضت و مشات لبلاكار جبداتو من سامسونيط ديالهاا) هااهو اختي سلعتك رجعاات ليييك ..

خنساء شدااتو من عندهاا و ديك ساعة ركبااتو فيديهااا...جايهاا كاايحمق بحال كيفما كانت كاتلبسو من قبل

نطقاات مبتاسمة: هههه مزيان ملي بقيتي فكلمتك...(عاودات شافت فيه قالت)شتي الحاجة راه مكاتجي غير مع مولهااا ... ولي كايقول لعكس راه غا كايرݣع...يلاه هاناا نهبط نشوف النااس...كملي توجااد وهبطي

عااونيني....

حركات ليهاا نسرين راسها بمعنى واخا... وخنساء هبطاات كاتمختر فلمشية هازة قفطانهاا واقفة على شغل بيديهاا بحكم ان نصيرة بمكاينااش هاد لمرة لي تعاونهاا...

خنساء هبطاات مع الدروج بطلتها الانيقة كاتلعب بشعرها والموسيقى الخفيفة لي طالقين فالدار كاتسمع وهي كاتدندن معاهااا ... يلاااه غادور مع الكولوار وهو يوقفها بيدو مقفزهااا : سللااام ..... ( طلعها وهبطها بجماالهاا لي كل نهار كايبهرو كتر من لي قبلو ): وتكايسي لينا على القلب ... اش هاد الزين كامل ... البرابول ديالي مابقا كايشد حتى قنات من غيرك

خنساء دورات عينيها لايجي شي حد : انا بان ليا باغي تقلب هاد الفرح لكنازة دابا يجي با ولا عصااام يشوفك ويريب على ضهرك هاد السقف ...

ضحك بهدوء : ايوا الغزاالة راه با العربي شخصيا لي سيفطني عندك ...

خنساء هزات حاجبها : كيفااش ؟؟؟ ..

قاد الكول ديال القاميجة ديالو : قالك عاودي عمري اتاي للرجاال ...

خنساء عاد هبطات عينيها للبسة ديالو ... اول مرا تشوفو لابس الكلاااس .... طولات فيه الشوفة بهدوء ... وهزات عينيها فتفاصيلو لي تبدلات بزاااف واول مرة ترد ليها الباال ... لحيتو مقادة ومطراسية بشكل زويين وشعرو مستف على حقو وطريقو ... عينيه كحلين مشفريين وبشرتو السمراء عاطياه هبة اخرى ... زوين بطريقة غريبة ... ماشي داك الزين الكتير لي يضر فالعين ولكن حروفو جدابين وعاديين ديال اي شاب مغربي عندو حقو فالزين .. خصوصا من بعد ما قطع البلية زروقية فمو وتحت عينو تمحات وحتى صحتو شدهاا ... عظلاااتو ماندويوش عليهم ... من القاميجة محلولة كايبان صدرو مطراسي وباينة مخدووم ... ريحتووو كااتحمق بلاا قياااس ولي استنشقها بلا هواه كايستحلاها ...

عبدو شاف فيها و ابتساام لسهوتها : اسبحان الله ... شفتك سرحتي ...

خنساء عاد استوعات مهربة عينهااا اول مرة دقق فيه من بعد ما خرج من الحبس ... كأنه شخص اخر ماشي لي كان من قبل ... بلعات ريقها ناطقة باغا تقلب عليه : كانتسنااك اشريف تحيد من قدامي باش نعمر اتااي ...

عبدو ضحك جنب : ممممم واخا اللالة ... ( ابتاسم مسرح عينو فجمالها ونطق بصوت ): كاتزياني نهار على نهار ابنت السايب ...

هزات فيه عينيها بعجرفة : ماتحتاجش تقولي اسي عبد الله ... عارفة راسي اية فالجمااال ...

عبدو : وهاد الاية مغايقراهاش من غيري ... سوا دابا ولا من بعد ...

خنساء : تو تو تو ... شتي هاداك الحلم لي عايشو نتا وباغي تحققو ... انا بالنسبة لي بوغطاااط مستحيل يتحقق ... ( باصرار ): واخا تكون على جتتي ...

عبدو ابتاسم ليها : شحال قدك تهربي من داك القلب ... غايجي واحد النهااار ويحن يحن ديريها فبالك ...

خنساء : مستحيل الغزاال دماماه ... وهاد القلب الا مشا حتى حن ليك انا غانعفس عليه ونرميه ماعندي ماندير بييك ولا بيه ... ودابا حيد من طريقي نمشي نقضي شغاالي ...

عبدو حيد من الطريق ناطق بتحدي : غانفكرك فهادشي اخنيفيستي ..

زادت من تما ميقا فييه كااتمختر وهزااات على كتااافهاا بعجرفة مامسوقاش ليه مخلياه وراها ومشات تقضي شغاالهاا ..

فالصاالون عند العيالات كالسة عتيقة وحداها حياااة وعيالات الدرب كااملين مجمعة معااهم نجااة فرحاانة برجوع بنتهاا لداارهاا مقاادااهاا فرحة

حياة نطقات : نجاة مسكينة غاطير بالفرحة حيت رجعات نسرين ... الله يسمح لينا من الواليدين ... واخا ماعرت علاش دابزو ولكن مني ربي جمع شملهم هاذا هو الاهم ... ماعندك ماتسالي عصام مافرطش فمرتو ...

عتيقة دورات عينيها ونطقات بطنز : تي اشمن ... رااه بنت الساايب لي رداتها ليه ... ياختي ديك البنت لي عندو فالدار يتهنى على تريكتو كلهااا ... خوها كان حالف بحلوفو لا رجعاات مرتو وحنتاتو جامعة شملهم ... شي افكار عندها الجن الكحل مايطيحو عليه .... سلااات الشوكة بلا دم الله يحجب ليها داك العقل ...

حياة ضحكات : نهههههه ياختي حتى حاجة مكاتفلت ليك ... ولايني دارت مزية مني رداتها ليه راااه الخير هادااك ... اجي بعدا فين هي كاعما بانت ليا ؟

عتيقة : تي فيه غاتبان ليك رااه واقفة على الشغل من طاق طاق حتى لسلام وعليكم ... دابا راه مع الطيابااات ... كاتشوف واش كلشي هو هاداك بحال الا نصيرة كاينة... ربات وعرفات اش رباات ... حارة بحاالها تبارك الله

حياة: وا نوض نبارك ليها رجوع مرت خوهااا انا راه شوية غانمشي فحالي ...

ناضت من تمااا هازة على قميصهااا كاتقاد فدرتهااا وتوجهاات للكوزينة ... لقاات خنساااء يدها فيد العيااالات لي تمااا متولة ومقاادة وكل حاجة فبلاصتهااا كاتفتن بزين وعاد الحدااكة والتاويل ماخلاتش فيهم ...

خنساء دارت شافتهااا وابتاسمات ليها : خالتي حياة مرحبا بيك ...

حياة سلمات عليها : ترحب بيك الجنة ابنتي ... لاباس علييك ... امورك هانية

خنساء : الحمد لله ربي يخليك .. نتي كي بقيتي شوية ...

حياة : هههه وا هاحنا معديين الصحة مابقاتش ولايني مدببين اش غاديري ...

خنساء : داكشي لي كااين ... الله يدير لي فيها الخير

حياة : مبروك بعدا رجوع نسرين ولاهيلا فرحنا ليهم بحاال وليداتناااا ... دارو مزية مني جمعو شملهم ونعلو الشيطان الله يرضي عليهم ...

خنساء بابتسامة هادية : داكشي لي كاااين ... الله يبارك فيك ...العقبة تفرحي بولاد ولدك ان شااء الله ...

حياء : امين ياربي من فمك لباب السما... ( طولات فيها الشوفة باغا تعرف واش بينها وبين عبدو شي حاجة واا كاتكن ليه شي مشااعر ): احم قالو ليا حليتي محاال جديد الله يكمل بالخير

خنساء : امين ياربي ... ربي يخليك...

حياة : اييه وسمعت بيلاا حدااا محال ولدي يااكي ...

خنساء عارفاهاا فاش كاتفكر وباغا تجر ليها اللسان : مممم وي .. عتيقة لي كراتو تمااا ... والموقع مزيان ديال الخدمة ...

حياة : اييه اييه ... ( يلاه غاتنطق )

وهو يوقف عليهاا عبدووو مقاطعها بلا قصد : الوااليدة ؟! ...

حياة : ياك لاباس اعبد الله ...

عبدو مد لخنساء البلاطو دلما مع الكيسان : هادو خاصهم يعمرو

خنساء خنزرات فيه : ولاش اخويا معدب رااسك ... غير كلس وارتااح راه عصاام كااين الا خصات شي حاجة هو يديرهااا .... ( مقصدة تقمعوا باش تهنى من جيهتها حيااة ): مجااتش نعدبو معانا الضياااف ...

رمات ليه هاد جوج كلمات وزاادت من تمااا مخليااه مشوكي

حيااة ميقات مخنزرة فييه : ايواا خوود على قلبك ... ( شرات ليه للقراعي ): شرب ليك جغيمة باردة دلماا عاد ديه للرجااال .... الرااابوز وبنفسووو ونتاا مالقيتي حتى سوطة منوووو ...

ضربات فيه وزاادت مخلياااه ولا حمر بالفقسة معااجبو حااال مغدد ...

خنساء واقفة جهة الكولوار كاتسنى فرانيا لي باقا ماا جاات تشرف ... عياات تعيط ليها فالتلفون وكاتقولها هانا قريبة ... خنزرات فور ما بانت ليها دااخلة بقميص فالاسود دياال الفرييع محجر بالدوغي كاايحمق قصير شوية مع صنيديلة خفيفة عالية شوية فرجلها وداايرة خلخاال كايبري فليسر ... شعرهااا طاالقاااه مرووولي بطريقة واااعرة ولونو البني كاايضرب فالعيين عاطي منظر خطير لوجهها ... داايرة مكياج نيووود فن ... جا مع وجهها كاايحمق عينيهاا مخدومين مزياااان بالواان هاادية وغوج اليفغ نيوود برز ليها شفاايفهااا ... اكسيسوارااات قليلة مامعيقااش مكتافية فقط بحلقات متوسطين و ساعة فيدهااا ... طاح عليها شي سر غزاااالة وعاطية للعين

خنساء بعتاب : مالكي اصاحبتي على هاد التعطيلة ...

رانيا : وراكي عارفة اكبيدة الكوافورة كيف كاتكون .. وماما صدعات ليا راسي نمشي عندهااا ونقاد راسي على حقو وطريقو ... ( بخفوت ): باغاااا تبين لمات منير زعماا راه بنتها تستاهل ماحسن ... وهاني درت ليها الخاطر ...

خنساء ابتاسمات كاتشوف فيها : فصرااحة بهادشي انا بان ليا غادوخي البشااار كااامل ... وحق رب حتى جيتي كاتحمقي ... ( ضحكات بطنز ): شتي واقلة كون غير خليت عصام يطلق مرتو هننهههه

رانيا ضحكات : خههههعه الله يمسخك ... تسمعك نسرين تريشنا بجوجات ... بصح جيت زوينة ؟؟؟ ..

خنستء : جيتي كاتفتني بزيين ... اليوم صرااحة العينين كلها غاتكون علييك ولاكوب جااتك خطيرة ...

رانيا : ههههه حتى نتي مخااصكش ياختي ... غزالة ما شاء الله ...

باقا ماكملاتهااا حتى وقف سيمو موراهااا لي كان كالس مع عبدو ... كايشوف فخنساء باستفسار ورانيا عاطياه بظهرهااا مابايناش ليه ...

سيمو بتسااؤل : عافاك اختي خنساء فين الحمام ؟؟ ...

قبل ماتجاوبو خنساء حل فمو من الضورة لي دارت رانيا لعندو مبينة ليه وجهها ... شوفة فيها خلاااااتو يتشوووكا بلاماا يشعر وقلبو تهز من بلاااااصتو كاايضرب فالتسعيين وهو لامح وجهها لي كايحمق واطلاالتهاا لي كاتسطي ... عينيه حواااالو وتفيكساو فيها مابقاوش بغااو يتحركو ... بلع ريقو كايدقق فيها النظر ويطلع ويهبط بلاما يحس ... اول مرة يشوفها بميكاب بحال هاداك ولا بالبلدي ... جات خطيرة بشكل لي ماقدش يقااومووو .... سهاا ناسي فين هو ولا معاامن مخلي عينيه يتمتعوا بجماالهااا ... مدة وهو على نفس الحال واقف جااامد وهي جاب ليها الضحكة من شوك لي جاااه ... اما خنساء مبتااسمة عرفاتو حواال واجا ما جمعوااا ...

سيمو ماا حس براسو حتى دازت من حداه واحد المرا قايسااه من دراعو فيقااتو من الغيبوبة لي كان فيهااا ... شاف فيهااا كايبتاسم وعرف راسو عيق ... مابقااش قاد يزييد تماا ... سمح فالحماام ومايجي منوو وزاد رااجع لبلاااصتو وهو باقي مبهوووض ... وهما وراه كايموتو بالضحك على الهربة لي داار كأنه شي واحد خاايف من الزين لي قبااالتوو ...

كلس بين الرجاال كايفرك فيدوو وراسو ماحبسش من التفكير فيهااا بالمرة ... حس براسو طااح ديال المعقول وماعندو هروب ...السيدة ولات كاتسرا ليه مع الدم و الا نكر مشاعرو غايكون غير كايكدب على راااسو وصاافي حيت الامر خرج على سيطرتو وقلبو وعقلو ولاو يهتهتو بيهااا ... صورتها ديماا بين عينيه وفينما كايشوفهاا شعور غريب كاينتاااابو وكايولي واحد اخر معااهااا .. عارف رااسو كايبغيهااا وكايموت عليها كااع ... وحتى لايمتا غايبقى كابت هاد الشعور لداخل ... علاش مايجربش حتى هو ويعطي لراسو فرصة اخرى فالحب

وهو باقي ساهي فتفكيرو جات مسامعو على حواار بات منير داوي مع واحد من جيرانهم ...

مصطفى : ايوا حنا قلنا البنت بنتنا ومانلقاوش حسن منهااا وكبرنا بيهم زعما ... ساعا سي اسمااعيل صرصد الدري عندي ماخلا فيه غير لي نسااا ...

الجار : ايوا خيرها فغيرهاا حتى نتاااا ... دابا يلقى ما حسن ... منير يستاهل ماحسن

مصطفى : وهاد الهضرة سير قولها لييه ... لاصق ليا فيها لصقة العماا فالضلمة قالك منها يخلااق .. وحلف مايخليهاا واخا يوقع لي وقع ... وراك عارف هاد الجيل ماتصيبش تفرض عليه شي حاجة ..

سيمو غير سمع كلامهم عرفهم داويين عليهااا عاقل مزيان على وجه بات منير نهار شافو داخل لدارهم ... زير على قبضة يدو وهو كايفكر ... كيفااش منير رفضوه وماباغيش يتخلا عليهااا وهو مدار حتى خطوة باش يعرف واش مشاعرها من جهتو متبادلة ... والا بقا حتى فات الفوت شكون غايطفي النار لي فقلبو واش هو غايقد يقاوم الم فراقها وغيرتو فشوفتها مع غيرو اكيد لااا ... اذن علاش باقي معااند قلبو ... خدا نفس عميق مخلي عنااادو وكاااع ديك النفخة فجيه مستسلم لقلبوووو ونااض بلا تفكير من بلااصتووو .. كايقلب عليهااا بعينو ما بانتش لييه وهو يشوف خنساء واتاجه عندهااا ناطق بلا مقدمات : مابانتش ليك راانيااا ؟؟؟ ...

خنساء باستفسار : علاااش ؟؟؟ ...

سيمو مابقاش قادر يصبر ولا يزيد يحبس راسو كتر باغي يقةل لي كاين قبل مايتراجع : فين هي عافاك اختي ...

خنساء بان ليها ناوي على شي حاجة وهي تباسم اكيد هاد المرة السيد مقرر : راهااا الفوق فالسطح كادوي فالتلفون ... اء

سيمو ماخلاهاش تكمل بانو ليه الدروج وهو يدرم ليهم طااالع بلا فرانااات كايعفط درجة ويجي جوج ... مصمم ومقرر وناوي يفركع هاد الرمانة باشما كان قبل مايفوت الفوت ...

خنساء شافت جنابها ياكما سمعهم شي حد ولا قشعو شي حد طالع عندها بان ليها كلشي مشغول مامديها فاش عاد ارتاحت

سيمو طلع .. شافهااا واقفة حدا السور داير التلفون فودنهااا ... وهو وراهاا حتى سالات لابيل وداارت لجهتو متفاجئة .. هزات حاجبها باستغراب : سيمو ... اش كادير هنا ؟؟ ..

بلع ريقو : رانياااا ... ( قرب ليها جوج خطوات ): بغيت ندوي معااك ...

رانيا دوزات خصلات مور ودنها باستفسار : وي شنو يااك لابااس ...

السيمو هز النفس وهو كايفرك فيدو بتوتر كبير ... حاس براسو عرقان بلا قياس غير تقابل معااهاااا تلفات ليه الهضرة ومابقا عارف اش يقول ليهاا ولا باش يبدااا ... حس برااسو تلخبط ديال المعقول : فصرااحة ... انااا .... ( شد على راسو ): اووووف ...

رانيا هزات حاجبها : مالك كاتعرق وتنشف غا بوحدك ... واش واقعة شي حاجة ؟؟؟ ....

سيمو عينو فعينهااا كايشوف فيها ولسانو مربوط معارف مايتلي ولا باش يبدااا ... ساط بتأفف تالف : ماعرفت باش نبدا والله ...

رانيا صغرات عينيها بحال الا بدات تفهم ونطقاات بالعة ريقها وقلبها ضرب فالتسعين غير من مجرد التفكير فالموضوع ... نطقات بصوت خافت : غير دوي ... شنوو باقي تقول ...

سيمو غمض عينو وحلها محاول يحارب التوتر ديااالو وهبط يدو ليدها باغي يشدها وهو يتراجع محاول يعرف مشاعرها عاد يقرب : رانيا ... انا عارف بيلا انا وياك من نهار تلاقينا مابديناش مزيااان ... وكنا غير كانتخااصمووو وواحد فوقتما لقا الفرصة يقمع لاخر ...

رانيا صدرها كايطلع وينزل بالجهد من الخلعة والفرحة شعور غريب انتابها ... كاتسمع ليه بلا حتى كلمة ...

سيمو كمل كلامو : انا عارف بيلا ماكنتش كانتصرف معاك مزيااان ويمكن عصبتك مني بزاااف ... ( ابتاسم ): لدرجة مابقيتيش كاتحمليني ... ههههه وخديتي عليا نظرة واحد عاجبو راسو ومنفخ ... هنههههه وفصراحة حتى انا فلول كنت كانشوف فيك بنظرة اخرى ... ماعرفتش ... كنتي كاتجيني فشكل ...

رانيا كاترمش ناطقة : اهااه ودابا ...

سيمو فيكسا فيها الشوفة : دابا مقادرش نخرجك من بااالي بالمرة ... فينما كانبغي نحط راسي على المخدة كاتجيني غير نتي فبالي ... مابقيتش قادر نصبر ( حك على راسو مفافي ): المهم انا مكانعرفش نعبر مزيااان ... ولكن راه بصح سريتي ليا مع الدم ارانياااا ... هبالك وخصامي معاك ولا شي حاجة مهمة فحياااتي وبلاماا نحس لقيت راسي ...

رانيا كاتشوف فيه والابتسانة كاترسم عل وجهها اخر واحد توقعات منو يصارحها بشي حوايج هاكا هو سيمو ... حتى هي كاتحس ببزاف ديال الحوايج من جيهتو ماقدراتش تصارح بيهم نفسهاا حيت كانت كاتشوف انو معمرو يفكر فيهااا وانه واحد عاجبو راسو ومايقدر يبغي حتى وحدة ... بلعات ريقها وهي كاتسنااه يكمل ....

سيمو باعتراف وهو مخرج كلماتو من اعناق قلبو : ماحسيتش براسي حتى لقيت راسي طااايح فييك ... هههههه ماشي غير طااايح ... المهم ماعرفتش شنو كاتحسي نتي .. ولكن انا مابقيتش قاد نخبي هادشي لي كانحس بيه من جهتك ... ( باستفسار ): من شحال هادي وانا باغي ندوي معاك ولكن مكانتش عندي الجرأة ... ولا فالصراحة كنت خايف من راسي .. ومنك حتى نتي ...

شاف فيها وهي ساكتة جامدة بلا حتى كلمة غير كااتشوف فييه ... مباين عليها حتى تعبير من غير الدهشة ... عوج عنقو لجهتها : واش مغاتقولي والو ارانياا ؟؟؟ ...

رانيا عضات على قنوفتها وهي كاتشوف فيه ودغياا جمعات الضحكة وخنزرااات مدلية شنااايفهااا وهزات يدها حتى للفوق وجمعااتهاا معااه بتصرفييييقة على حر جهدهااااااا .... معوجة ليه الحنك....

سيموو خرج عينو بصدمة شااد على خدو لي ولا حمر بتصرفيقتهااا مقادرش يستوعب شنو وقع ... بقا مشوكي للحضات فبللاصتوو كايحااول يستعقل ويفهم شنو دارت وهي باقا كاتشوف فيه محمرة عينيهااا ... رمش مصدوم ماعرف باش تبلاااا وصرط ريقو مفافي مهرب عينو معارف مايقول : اءء .. سمحي ليااا ... ماكنتش قااصد نقولك هاكا ... انا عند بالي ...

رانيا قربات جوج خطوات ناطقة : هادي على قبل كاع دوك القمعات والمعيور لي عطيتيني ... وحتى حيت تعطلتي باش تقول هاد الهضرة ...

سيمو خصر كمارتو : كاتفلاااي ؟؟؟ ... ( شد على راسو ): لا لااا برب حتى هبيلة ... واش نتي تسطيتي ... كاينة شي وحدة كاتصرفق شي حد قالها كانبغيك ...

رانيا ابتاسمات ليه : ههههه الا كااان بحااالك مخاصوش غير التصرفيق ... خاصو الرجم ... علااش ساهل داكشي لي درتي فيا ... دابا عاد برد ليا القلب ...

سيمو مامتيقش هاد التصرف : لا مايمكنش ... مقادرش نستوعب ... ماعندكش غرام دياال العقل برب ... ( قرب شاد يدها ): شنو دابا نفهم ... زعما ماضربتينيش حيت تعصبتي من هضرتي ....

رانيا ضحكات بخجل مدوزة شعرها ورا ودنها: لااا ... احم ... وعلاش غانضربك على قبلها وانا هضرتك عجباتني ...

طول فيها الشوفة : كيفاش ؟؟؟ ... شنو زعما حتى نتي ؟؟ ...

رانيا : وا صافي بلااا ماتحرج فياا اصلا ماشي وقت هادشي دابااا ... غايجي شي حد ...

سيمو ضحك: ممممم واخا اللالة ... ولكن راه باقي ماساليناااش ... خاص ضروري تقولي ليا شنو كاين ...

رانيا بايجاب : وا من بعد نتا مالك زربتي عليا ... خلي ليا شوية الوقت ...

سيمو بعجرفة : الوقت واش بحالي انا كايفكرو فيه النااس ...

خنزرات : وا هاحنا بدينا تاني واش نتا ماتعرفش تهبط زنافرك للارض ... عاد كنتي حلو ...

سيمو ضحك : هههههههههه ... وصاافي غدا نشوفك ونكملو كلااامناا ...

رانيا : وصافي غانهبط دابا غايسولو فياا ...

سيمو : ممممم واخااا ...(كمل بعجرفة) اصلا انا كنت عارفك طايحة فيا من ديك حبيبي ...

رانيا سااطت : اوووف بااااز ... راه سرك نيت التصرفيق ...

زادت من تماا مخلياه وراها كاتفرنس وهو حك على شعرو كايضحك عاجبو الحال واخا كلا تصرفيقة مي دايرة فوجه ضحكتها لي بينات ليه رااه باغاااه ... اكيد غايهضرو فهادشي كتر مني يكونو بجوج ... حيت بالنسبة ليه ضروري يعرف مشاعرها من جهتو ولكن على الاقل حس براحة كبيرة كأنه كان هاز جبل وتحيد من فوق كتاااافوووو ... شااف فالسماا مبتااسم وهو كايستنشق الهوااا اخيراا من بعد مدة لقا انساانة لي تنسيه فجرحو وتعاود تدخل لقلبو من جديد ...

عبدو مني قالت ليه خنساء ديك الهضرة سلم على عصام والعربي و زاد فحااالو لداار معاجبو حاال حاس براسو معصب بلا قياس من تصرفها معااه ... تمشى فالشااارع بخطواات تقيلة كايتمشى وهو كايفكر واش هادشي لي كايدير ممكن ينفع معاها شي نهار ولا غير كايعدب راااسووو ... واش غايقد يخليها تسمح ليه شي نهااار ولا غاتبقى كارهااه حياتها كاملة وكاتصرف معاه بنفس الاسلووب ... والاهم واش هو ايكون عندو الصبر لي يقاااوم حتى تسمح لييه ... تنهد هاز على حاجبو وهو كايشوف فلوطو فالاسود فراس الدرب ديااال خنساء واااقفة ... صغر عينو وهو كايلمح انها ديال المهدي ... حرك راسو بلا حول .. اخر حاجة كان كايتوقعهاا هو يكون هاد خيي باقي كايجري ورااهااا ... تأفف بلا مبالات وزادت من تماااا مبدل كاع الطريق باش مايدوزش من حدااه متاحه لدارهم ...

المهدي قشعو فاش خرج من الداار كان مزير على الفولون بيدو معاجبو حاااال ... مخنزر وحجبانو مقرومين : نسااالي مع خنساااء ونتا نوبتك جاية اسيهم عبد الله ... مكاتضيعش الوقت دغيا وليتي باغي دير بلاصتك ... ايواا حساابي معااك من بعد ...

خنزر وبقا مراقب باب الداار كايتسنى خنساء تخرج ساعة والو ...

عبدوو رجع لدار وطلع نيشاان لبيتو...بدل عليه لابس حوايج خفاف باش يرتااح فنعاسو...حس براسو ماشي حتاا لتم...رجليه تقالين و معدتو مروعة عليه...غمض عينيه بتتاقل حاط يديه على راسو حااس بيه كاايزدح...شوية و هو يهز حاجبو حااس بسخانة طالعة ليه...خداا واحد دوليبران دارها فلكااس و هو كايتسناها الدوب...بداا شوية الصداع كايتسلل لمابين كتافو...طرطق عنقو محااول ينسى الألم...قال مع راسو يمكن غير لعيى اولا شي ريح شاادو..ماهتمش بلموضوع بلمرة...خدا الدوى شربو عاادي...وتمدد فوق سريرو... محااول يترخى و ستسلم لنوم عمييق...

سالات الحفلة...تفرتكات الجوقة و كل واحد رجع لداارو...نسرين دخلات لبيتهاا كتماصي عنقهاا كاتحس بشوية لعيا...ݣلساات فوق الكرسي لي مقابل مع مرايتهاا و بدات كاتحيد لمقابط القلال لي كانت متبتة بيهم شعرهاا...فكاتو وبداات كاتدوز صباعهاا وسط كتتحاول تفك خصلاتو...

شوية و هو يدخل عصاام...بلا مايهضر معاهاا دااز ديريكت لبلاكاار...بقااا بنفس لباسو مابدلووش...جبد جاكيط تاعو لبسهاا تحت نضرات نسرين لي مقابلاه من لمراية...طلعات عينيها لمݣانة بانت ليهاا 12 تليل مابقا ليهاا والو وضرب...خدات نفس معمق

نطقات بنبرة هادئة دايرة راسهاا بدات كاتقاد فلميكاب لي فوق لكوافوز:حبيبة؟!!فين غادي؟

رد عليهاا بإجاز:خارج مع صحابي هاد اليلة...علاش كاتسولي؟!

نسرين دارت لعندو و قالت بنفس النبرة:لا غاسولتك وصافي...غير حيت مامولفاش فيك تخرج فهاد اليل داكشيي علاش...

رد عليها بنفخة:وغير ولفي...من ليوم فين ما ترشق لياا ويعيطو ليا صحابي..غانخرج معاهم فليل..نفوج...عولي عليهاا(صغر فيهاا عينيه مقصد...بااغي يستفزهاا) وبلا ماتبقااي تسولي فياا فين غادي و منين جيت...راك ابنت الناس مامخرجانيش من كرشك...

نسرين بتاسمات بجنب بالعة القمعة بمرارة...فيهاا مايطلع معاه كاطرياام و تبداا تعرعر...ولكن تفكرات هضرت خنساء...لعصبية الزايد...مغاتجيب حتا نتيجة...غير مضيعة لجهد والوقت

نطقاات بهدوء مبتاسمة:ههه وعلاش غانسولك اصلا...ياك غادي غير تفوج معاهم...علاه انا غانحبسك ؟!!سير ماتزيدش تعطل ماخليش صحابك يتسنااو...

عصام صغر فيهاا عينه..ماينكرش انو لاحظ نوعا ما واحد التغيير الطفيف...مابغااش يعطي لموضوع اهمية...حرك ليهاا راسو بإجاب بلا مايدوي...هز سوارت تاع السكوتر وتيل تاعو...ودعهاا وخرج من لبيت...

نسرين غمضات عينيهاا بتتاقل وطرطقات عنقهاا كحركة منهاا بااش تهدن اعصاابهاا لي تشحناات من لدااخل بزز باش ضابطاهم....

راجعات ݣلسات و نطقاات مخاطبة راسهاا بعزم:نااافخ علياا ريشك...بااغي تندمني وتبين لياا بلي مرجعني بزز منك...باااااغي تربيني...(بتاسمات بخفووت)واخاا...عنداك اولد الساايب تصدق مربي غير رااسك...هاحناا غانشوفو شحال قدك تبقاا داافع كبير....

ناضت بخطواتهاا تابتة... عرفات راسهاا خاصهاا تسهر و خافت لا لعياا يرجع عليهاا ويخليهاا ماتقدرش ترد نعاسهاا...مشاات لكوزينة وجدات قهوة كحلة بلا سكار نزلاات عليهاا دقة وحدة شرباتهاا...رجعاات لبيتهاا بان ليهاا غايتعطل..هزات الفوطة ديالهاا و تاجهاات لحمام خداات دوش سااخن تحيد بيه لعيى وتمارة تاع لحفلة...

رجعات لبيتهاا طلعاات راسهاا فلمݣانة حساات بيه بداا يقرب يجي...هزات شوميز فلأزرق الملكي حريري قصييير مشبك من جهة الصدر باقي بتيكي تاعو خداتو من عند خنساء يلاه تقداتهم للمحل...قبل ماتلبسو دهناات فلاول لحمهاا كاامل بكريم بريحت الفريز...ورشاات سبرااي منعش بنكهة الڤاني على داتهاا كااملة....شعرهاا كانت مغسلاتوش عوداتو غير بلبلاك لاوية خصلاتو القدامية مخلياهاا هابطة على وجهاا...داارت ميكااب خفيف مكتفة رموشهاا بلماسكرة مزيااان وايلاينر رقيق مجبدة بيه قنت عينهاا...وبرزاات شفاايفهاا بعكر احمر غاامق اللون...وعاد لبساات داك الشوميز باانت طايتهااا متييرة بلمزياان وسطو...مخلي لحمهاا كايضوي...

سمعات باب الدار تحل...عرفااتو هو لي جاا... بتاسمات بشر...هزات حوالق صغاار وبدات كاتبتهم فودنهااا...تواني حتاا دخل لبيت...عند بالو غايلقاها ناعسة...غير قشعها وهو يوقف خطاويه...بداا كاايطلع عينيه فيهاا بتتاقل من رجليهاا وهو غاادي حتاا لفوق...كانت نضراات كلهاا شهوة و كلهاا شوق..كايشوف فتفاصيل لي مدة ماشفهومش....

رمش لعدة مرات و نطق بنبرة خافتة:مزاال منعستيش؟!!

دارت عندو نسرين و قرباات بخطوة لعندو وقالت بهدوء:لقيتني يلاه غانعس...غير كنت مشغولة مع شي تويشيات كانقادهم

كملات على هضرتهاا وداازت لفوق سرير تكسلاات فوقو دايرة واحد النعسة من نوع خااص... عصام مسح على وجهوو وهرب عينيه متجنب تماما يشوف فيهاا محااول يضبط راسو حاس انو غايخرج على سيطرة وݣااع داكشي لي خطط ليه غايتضرب فزيرو...دااز بدل عليه ومشى لجيهة السرير...يلاه تمدد فوقو وهياا تنوض نسرين ݣلساات...دارت ابتسامة إغراء قرباات لعندو تقابلات معاه حتاا طااح صدرهاا على سدروو...مفيكسيا عينينها فعينيه ريحة خطييرة فايحة منهاا خلااتو ييبداا يترفع ويدوووخ بحالا دايرة لو لمغناطيس ... بحركة خفيفة منهاا طولات يديهاا لجهة لكواافوز وطفات ضو لي حدا بلاصتو...

قربات لعند ودنو ونطقات بهمس :تصبح على خير .... احبيبي...

طبعاات قبلة خفيفة بورشااتو زادت كملات عليه ورى ودنوو...

ومن بعد رجعاات تكاات مخليااه بداا كايغزل...تمددات فبلاصتهاا دافعة عليه مؤخرتهاا بإغرااء محيدة عليهاا لغطى معرية و تانية فخض على لفخض ناعسة بشكل مايقدر يقااومهاا بيه حتاا واحد...

كانت كتلة عامرة انوتة كاتناافس مفعول "لفياجرا" فديك اللحضة... بقاا غا كايشوف ويبلع ريقو ويعااود...مامشات حتاا قدرات تحرك غريزتو...توحشهاا بلا قياس...رغبة خطيرة ستولاات على جسمو بلكاامل...الصهدة طلعاات معاه من حر الشهوة لي سيطراات عليه حااس براسو محن بلمعقول...يلاه كان غاايزعم و وهو يترااجع فأخر لحضة..مبااغيش يحنت رااسو...دار خطة خااصو يمشي عليهااا ومايحرقهااش من لأول...نااض علييه وخرج هز فوطة وتااجه نيشاان لحماام يااخد دووش يبرد علييه... مخلي مورااه نسرين كاتنهد...مكرهااتش كون خضع ليهاا فديك اليلة و يرجع ليهاا...صبراات راسهاا بصعوبة كاتدعي الله فخاطرهاا يرجع معاها كيف كان وترجع لأمور تصلح...وخاا حاسة بلي غايدوزهاا عليهاا بلمعقوول...

صبح صبااح جديد....نسرين كانت فالكوزينة حتى سمعاات العربي داخل من الباب وكايدوي بصوت مسموع عرفات معاه شي حد حد ...

العربي : على سللاامتك اختي ولاهيلااا مني عيطتي ليا نجي ليك للمحطة خليت لي فيدي ...

نصيرة تقدمات للصالون : اييه اييه ... لهلا يخطيك اخويااا انا عارفااااك مادوزنييش والا خطيتيني ضربني خلاااا ... الله يطول ليا فعمرك ...

العربي : امين ( طبطب على كتفهاا عارفها مفكوعة ): ويطول فعمرك حتى نتي اختي ...

نسرين كانت جاية لجيهتهم تلاقات مع عصام فالدروج لي نطق بتساؤل : عمتي لي جاات ؟؟ ...

نسرين : اييه غالبا هي ... سمعتهااا كاتراري على باا العربي ... باينة معاجبها حاال حيت ماتسنيناهاش فالقصارة دلبارح ...

عصاام تنهد : وا ياك قالت ليك مكاينش المركوب ...

نسرين : بحال الا نتا مكاتعرفش عمتك كيف داااايرة على نقشة ... واصلاااا راه واخا قالت ليناا غير بلاما تأجلو عرفتهااا غادير فيها اليدين والرجلين

عصاام : ايوااا راه حنا درنا معاها البارح ومول الكار لي زرفها... ونتي عارفة تما كيف داااير المركوب قليل ... شنو نردو الناس فاخر لحظة ... مافيدنا مانديرو

نسرين : ايوا زيد اليوم نسمعو من المنقي خياارو ...

تقدمو للصالون يلااه عتبو الباااب وهي تخرج نسرين عينيهااا من دااكشي لي كااتشوف قدااامهاااا ... بلعاات رييقهااا شاادة على رااسهااا ونااطقة تحت منها : الله ياربي اله ماقدوه فيل زادوه فيلة ... انا يلااااه قلت رجعت لداري غاتهنااا صدقت بروصي على بروصي ... الله ياربي وعلى زهري المكوز...

دارت ضحكة صفرة : مرحباااا مرحباااا بلي جا وجاااب اءءء ... مرحبااا بيك انصيرة ... ( دورات وجهها لجنبها): وحتى نتي ااحلااااام زارتنا البراااكة ....

كانت كالسة حدا نصيرة بنت عشرينية بشرتها حنطية وشعرها طوييل مسرح على راااحتوو لونو بني غااامق كاتدي شوية للعربي ونصيرة فالملاامح ... عوينااتهااا متوسطيين كحلين وحجبانهااا عاامرين لاابسة علييها جليليبة زوينة فالموووف ايفاازي جاتها مع طايتهاا وباينة فيهاا ذواااقة رغم ملامحها البلديين ...

احلاام جاوبااتهااا بابتسااامة مسلمة عليها : الله يسلمك الحبييبة ... زيااانيتي انسرين ...

خرجااات عينيهااا ناطقة تحت منهاا : قل اعود برب الفلق ياربي السللاامة كيما شتيني تخليني ... (بضحكة صفرة ): يزين يامك الغزالة نتي لي فنة ...( مطواااهاااااا) وعويناااااااااااااااااااتك لي زوينين

عصام ابتاسم ليها : الفنكووشة لاباااس عليك اش خباارك ... امورك هاانية ومالين الدار ؟؟ ..

سلمات عليه : الحمد لله اخوياا عصاام لهلا يخطييك .... كلشي هو هاداك ...

نسرين سلمات على نصيرة لي قالبة عليها كمارتها مادواتهااااش كيف دارت لعصاام هازة فخاطرها من جيهتهم ...

يلاه غاتكلس نسرين وهي تحس بظهرها تكوااانسا ليها بلااا شعور نطقااات بالم : الله ياربي الله ... ( شدات ظهرها ) ...

عصام : ياك لاباس ؟؟؟ ...

نسرين ترخفاات : لا غير كلاكااج يمكن ( شافت فاحلاام كاتكمكم تحت منهااا ): ها العربون باان من داباا ... الله ياربي ...

نصيرة : ايوا على سلامتك بعدااا رجوعك ... واخا كنتو تسنااوني اش فيها كون زدتووو نهااار حتى جيت نحضر معااكم ...ولا ماعندكم بيا غراض

عصام : وراه اعمتي عند بالنا غاتجي الباارح فالصباااح مني عيطتي قلتي راه مول الكار مغايجي حتى لليوم مالقينا مانديرو ... كنا عالمين الناااس ...

نصيرة حركات راسها : ايييه احياااني ... ماعندكم بيااا غرااض كوون كنت فالبااال كوون شفتي كي دير ليا ولايني زايدة نااقصة ...

عصام: الله يهديك اعمتي ... راه نتي هي كلشي ولايني مالقيت جهد ...

نصيرة ميقات فيه : ممممم لقيتي الجهد غير باش ترد لالة العيااالااات ... بلاماا تقول ليا اصلا علاش سيفطتيها فحالاتهاا ...

العربي تنحنح باغي يقلب الموضوع حيت وصااهم مايدكروش ليها سبب طلااق قالهم قولو ليها تخاصمو وصافي حيت الا عرفاات بيلا مسات لشوافة غاتحلف بحلوفها لا رجعاتهاا واخااا تكون على موتهااا وهي اصلا كاتقلب ليها غير على السبة ... فضل مايدخلهااش عارفها كيف دايرة : الله يهديك ا ختي لي فات ماعندنا مانديرو بيه الحمد لله دابا رجعات الامور مزيااانة راكي عارفة شيطان الله ينعلو كايحضر فوقت الغضب ... ( باغي يراضيها ): ونتي الا بغيتي ندير ليك شي زردة فاعلة تااركة نعاودو بابااها مالها تغلبني ... وماتغلااش على ختي العزيزة ...

نصيرة : الله يكبر بيك اخويااا ... ايوا مافيها باااس ... لي غلب يعف وخلاااص

نسرين مدورة وجهها مادواتهاااش عارفاهاا غاتشعل فيهاا لاهما تخليهم بيناتهم ...

العربي : ايوا ابنتي احلااام كيف داايرة .. واحد خويا ولا شوية ...

احلام :، الحمد لله اعمي لابااس راه غير صح رجع يدمر فلارض ... راك عارفو كي داير ..

العربي : ايوااا مزياااان الحمد لله غا مني ولا بيخير ... خليه يتلاها فيها رااه هي دواااه ...

نصيرة : نوض اعصام دخل دوك الشاانطاات راه بقاو فالعتبة ... ديك ديااال احلاام رااه تقيلة هرساات لينا الظهر عافا ولدي دخلهم ...

نسرين سمعات تقيلة وهي ضور وجهها فيها بالعة ريقها عرفات القضية شاخدة والسيدة جايااا مطولة عندهم وموحال واش غاتمشي ... غاتنبت عندهم ... نعلااات نصيرة ومايجي منها فخاااطرهاااا كانت هازة هم لمجيتها زادتها بهم كتر منوو ... بقات كادعي فخاطرها مغددة وكاتشوا غير راسهااا بالغداايد

كانت خنساء فلمحل شادة ستيلو كاتحسب فمصاريف تاع شي سلعة و حداهاا رانياا كاتقااد فواحد لكسيوة على لمنكان...وفنفس الوقت كاتعااود لخنساء على داكشي لي وقع ليهاا فلحفلة و اعتراف السيموو لي مازال مامتيقاااش بلي صارحهاا بمشاعرو تجااهها...

نطقاات خنساء كاتضحك:هههه اختي عمرني شفت بحالك...مع عتارف ليك نيشان جمعتيهاا معااه بتصرفيقة ماينسهاااش حيااتو كااملة...

رانياا:اوى شنوو...نهاار لول يمووت المش هههه...ولكن بصرااحة فرحت بزااف ملي قالي على شنو كايحس من جيهتي...(بتاسمات بخجل وخدودها توردو)احم ليل كامل واناا كانفكر فيه...

خنساء:هااي هاااي وعلى لبنت بداات كاتحب تااني والقلب بداا كايفرفر ويخرج على طووع...

ردت عليها موسعة ضحكتهاا:هههههه اختي هاادشي لي عطاا الله....(غمزاتهاا)ولقلب خرج على طووع شحاال هداا...

خنساء وسعات نضرتها:اويلي ماتقوليش لياا كنتي مزعوطة فيه ونتوماا ملي عقلت عليكم بحاال لقط مع الفاار...

رانيا:ههه صرااحة مااشي شي زعطة... ولكن دااك التعفاار ديالو وتجاويب جااني يااختي على لݣاانة....

خنساء برجااء:اوى اختي على الله هاد لعلاقة طول ودوز مزياان وتسااليوهاا بشي عرااسية فااعلة تااركة تفقصي لياا بهاا دااك الشمااتة...

رانيا هزات يديهاا برجاء:امييين اختي ...(كملاات بجدية)اناا راني معولة...غير نتواافقو اناا ويااه و نتفااهمو...نقوليه الى نااوي شي معقوول قصد الداار عند سي اسمااعيل...اماا بااش نبقاا انا ويااه خيطي بيطي نخيطو فزنااقي الاااا وتقوول...حاالفة يااختي بحولفي مانعااود نفس الغلط...

خنساء:و هو فلحقيقة سيمو كايبان فيه ولد نااس داخل سوق رااسو ماشي ديال التفلية...ولكن كيفماا قلتي غير ترصي معاه لأمور وتبتيه مزيااان و ديك ساع حطي نقاط على لحرووف...رجااال راه ماافيهم تييقة...

رانيا بإجاب:اييه بصح...وزيدون شتي تصااحيب بلا فاايدة والله حتاا كايبساال..لا علاقة...

تسمع صوت رجولي من موراها:شنو هدا لي لا علاقة؟!!

من صوت عرفات شكون...دارت لعندو مبتاسمة وقالت:ههه ونتاا لااش بااغي تعرف؟!!

سيمو بإجاز:غير فضوول وصاافي...(غمزهاا وكمل)عرفتي شنو حتاا لطريق و عاودي لياا...مشيناااا؟!!

رانيا بنبرة خافتة:ولكن راه درنااا لخمسة اسيموو دابا يلاه الربعة...راني خدامة...

نقزات خنساء:اه واش خاارجين؟!!لا لا غير سيري ماشي مشكل...

رانياا؟!!بصح...يااك هانية واخاا نمشي؟؟!

خنساء:الالة دنياا هانياا غير سيري خرجي فوجي مع راسك بصحة وراحة...

رانياا بتاسمات ليهاا:شكرا بزااف احبيبة...نعوضهاا ليك مرة اخرى...

خنساء:ان شاء الله...

خداات رانيا صاكهاا وهزات نضراتهاا الشمسية لبساتهم و خرجات من لمحاال هياا و سيمو... فرحانة غادة وضحك عااجبهاا الحال...بقاات واقفة خنساء عند باب لمحل كاتشوفيهم غااديين وبلا شعور لقات راسهاا كاتبتااسم...

شوية وهو ينطق عبدو من موراهاا:اوى هااهوماا جوج فريخاات طاارو من لعش..لعقبة للي بقااا..

دارت لعندو بملاميح جامدة...وقالت:هاادوك لفرااخ لي بقااو كلهاا وعشو...وجنااوح بااش يطيرو لعند بعضياتهم...مبقاااوش عندهم من شحاال هادي...

لاحت ليه هاد لجملة وزادت... هو بقاا متبعهاا بنضرااتو... شوية و هو يحس تااني بمعدتو كااتدرو عليه و بدات كاتروع...خسر ملاميحو بإنزااعاج من هااد لأعراض لي ولاو كايجيوه ومعاارفش منااش...خداا نفس معمق ورجع لمحل دياالو...محااول يتلاها بلخدمة و ينسى...

جهة الصخر فمهدية كاالسين مقااابليين مع البحر وهي كاتلعب بخصلات شعرها بتوتر نوعا ما لاول خرجة ليهم بجوج واخا مرتاحة معاه ولكن باقي ماولفات الوضع رغم انها باغا تكون معاه على طبيعتها ... مستمتعين بصوت الامواااج ونسيم الهواااء وغروب الشمس لي بدا كايباااان ... منظر رائع رومانسي كايفتح النفس ... صمت طويل وهما على نفس الحالة فقط كايتعرفوا على انفااس بعض وريحتهم ...

رانيا بهدوء :متأكد اسيمو من هاد القرار لي خديتي ... مجابش ليك الله غاتزرب ولا تندم ...

ابتاسم كايشوف ليها فعينيها ودوز يدو بحنان جنب خدها لامس خصلاتها بورشها وحسات بقلبها ضرب فتسعين : لي باغي نعرف هو واش نتي مستعدة تكملي معايا حياااتك ... الا كنتي موافقة انا مافيا مانزيد نتسنى ... وفصراحة مكانفكرش اصلا نبقى عاطيها لدوراان فزناقي بلا موجب شرع ... ومكانضنش حنا باقين مراهقيين لهادشي ...

رانيا ضحكات بفرح مني كايفكر بحالها : وا هو مانكدبش عليك انا براسي كنت باغا نقولك نفس الهضرة ... ماكرهتش نديرو خطوبة هي لولة عاد نقدرو نتعرفوا على بعضياتنا كتر فديك الفترة ... هاكا حسن مانبقااو مخبيين وخايفين ...

سيمو هز يدها بهدوء سرحها وباس على كفها خلاها تحمار بالحشمة مزنكة : وانا من غدا مستعد نجي لداركم ونخطبك ... مادويت معاك الا ومتأكد من مشاعري جيهتك ... وفكرت مزيااان ... واصلااا راكي عارفة ولد خالتي حاسبك ختو مغايبغيناش نبقاااو نطوطحو هكااك ... وانا براسي مانرضاهاش ليك ... غايكون حسن تكون فخبار العائلات وبموافاقتهم وديك الساعة الزواج وقتما غايناسبنا

رانيا بايجاب : ايواا صافي اسيدي مني هاكا حتى انا موااافقة ... فوقتما جاك الوقت مناسب علمني واجيو ...

سيمو هز حاجبو : ايوا وداكشي لي تافقنا علييه ؟؟..

رانيا بستفساار : شنو هو ؟؟؟

سيمو قرب هامس فودنها : ماقلتيش ليا واش كاتبغيني ؟...

رانيا ميقات : ايواا باز وفنظرك الا مكانبغيكش اش كاندير معاك دااابااا ...

سيمو بنفي : لااا انا باغي نسمعها من فمك ... بغيت تشوفي فعيني وتقوليهااااا ... وهاد المرة بلا مدايزة ولا غوااات وطيرااان ... يللااه ...

رانيا عضات على شنايفهااا بالعة ريقهاا وتنهدات مغمضة عينيهااا وحلاتهم لاقاتهم مع عينيه : كانبغيك امحمد ... كاانبغي فيك بسالتك ونفختك ومدابزتك معاايااا وحتى العجرفة ديااالك ... بغيت هادشي كامل بلاااماا نحس ... كنت كانلقى فدبازي معاك متعة لي عند بالي راها شي حاجة خايبة ... بلاما نفهم انهااا غير مشاعر زوينة من جيهتك ... كانبغيك ديال بصح ...

وسع ابتساامتووو عاجبو كلاامهااا : وانا كانتوفاا عليك افليفلة ديااالي ههههههههه ... ( ضرب على نيفها بصبعو ): قباحتك حلوة ...

رانيا : ههههههههه زعما ماتقدش تعنب بلا سبااان ...

سيمو :لاااا مانصيبش ... ( بتساؤل ): جاك جوووع ؟؟؟ ...

رانيا : مممم صراحة مافياش الجوع ولكن بغيت شي كلااااس نبرد بيه ...

قرب يدو ليدهاا وشدها جارهااا : ايواا يلااااه ناخدو هاد الكلااس اللالة ... باش نرجعوا قبل مايظلام الحااال ... ( غمزها ): باااش تشدي فيا تاني ديك الشدة دياالك مني نكونو راكبيين ...( بطنز) زيري عليا مزيااااااااااااان ههههههه ...

ضرباااتو على كتفو : وراااااه نتا كاتسوك بزربة ....

جرهاا : زيدي زيدي الخوااافة فيك غير الهضرة الفم فيه ميترو وتخراح العينين نتي لولة ... شي حاجة اخرى وااالو ... بلا فايدة

ضحكات بتفرنيس وزادت هي وياااه لعند مول الكلاس ياخدووه وهي فرحاانة ... شافت فيه انسان اخر مكانتش عارفاه من قبل ... حنين وضريف واخا تعبيرو خضر ولكن كاتحس بكلامو صاااادق بلاما يتصنع ... واي حاجة جات فبالو كايقولها نيشااان ... مناكشااتهم ولات كاتبااان ليهااا بحلاااوتهاا وهي لي مزينة شخصيااتهم بجوج وجامعااهم ... اسحاااس بالامان لقاتو معاااه عمرها حساتو مع شي حد ... سي فغي جربات تبغي ولكن سيمو خلااهاا تشوفو بطريقة اخرى .. كاتحس بيه راجل يعول عليه معااهاا ولقات رااسهاا اصلا طايحة فيه من زماان غييير مكانتش معتارفة بيهااا ... حبو صادق وبريء والاهم انو ناوي المعقوول من اللول وماباغيش الامور تطواال فالخوا الخاوي ..

ليل وصل... وخنساء هازة لكالكول مزاال مضاربة مع لحسابات كاتحااول ضبطهم ومادير فيهم حتاا غلط...بلخصوص كايتعتابرو من الحسابات الأولية... ضروري تجنب فيهم الاخطاء ما امكن...

عبدو سد لمحال تاعو بإحكاام بعدماا دخل زرابي لداخل...هز حاجبو ملي بان ليه ضو مزال شاعل عند خنساء...تمشى بخطوات يضرب طلة...كايسحاب ليه وااش باقين معاهاا لكلياان معطلينهاااا...هز حاجبو ملي لقاهاا بوحدهاا...قرب بخطواات دخل لمانكات لي كانو على برى لعندهاا الدااخل ونطق متساؤل:مزاال مسااليتيش؟!!

خنساء مزالة مركزة مع لورااق:ونتااا ماالك؟!!نسالي ولا منساليش دااكشي كايخصني بوحدي و معندك دخل فيه...

عبدو:اناا غاادي..زيدي يلاه نوصلك معايا ماتمشيش بوحدك...وحتاا رانيا لي تجي معااك مكااينااش...

خنساء طلعاات فيه عينيهااا:لا غاسير... مزال ليا شي حسابات خاصني نقادهم...وزيدون راني غير هناا مغادة فين..ودرناا راه قريبة...

عبدو:وخلي داكشي لي بقاا ليك حتاا لغدة وكمليه ماالو غايهرب؟!!

خنساء:الى خليت حتاا لغداا غايتلف لياا لحساب...وانا ماافياا لي يعااود من لول...غير سير وخليني عليك...

عبدو مبغااش يزيد يحكر عليهااا...ودعهاا وبخطواات تابتة خرج من لمحال..

خنساء بقاات منغامسة خدامة فدوك لحسابات حتاا كملاتهم وغيزات الأمور..من طبعهاا دائماا تبداا الحااجة خااصهاا تكملهاا....جمعاات لي خاصو يتجمع...وسدات لمحال مهبطة الريدو...داارت يديهاا فجيابهاا وتمشات فطريقهاا لداارهاا...

شوية وهياا غادة...سمعاات شي حد كايكلاكسوني عليهاا من اللور باللوطو...مابغااتش الدور وكملاات على طريقهاا فهدوء...شوية وهي تسمعو كايعيط: خنساء وقفي نهضر معاااك... خنساااااااء

قلبهاا ضرب فديك اللحضة مبغااش تشووف كمراتو نهاائياا...محااملاهاش ... سرعاات على خطااويهاا وهو يقرب بجهد لعندهاا معوج الروايض جاياا اللوطو مقاابلة معاهاا حاابسة عليهاا الطريق...

نطقاات كاارزة على سنانهاا بعصبية مخاطبة نفسهاا جااعرة:تفووو...ل*رى اشباااغي...

هبط مهدي من اللوطو وقرب لعندهاا ناطق بلهفة:وقفي وسمعيني غير شنو غانقوول...دقيقة مانفوتهااش...

خنساء حقداات فيه الشوفة مخنزرة فيه للحد وقالت:غاااتحيد من طريقي ولا مايعجبك حااال...

مهدي بإلحااح:اشغااتخسري الى وقفتي...عفاااك غااسمعيني شنوو بغيت نقوول...

خنساء:واااا مبغييت نسمع من عندك وااالو...وااا بسع مني عطيني بتيسااع..ياااك لي بيناتنا فرقااناه..ورووول سير فحاالك علياااا...

عااود نطق برجاء شديد:عفااااك راااه غير غاانهضرو...مغاانعطلكش...

خنساء:وااامعندي فااش نهضر معاااك....تفرف علياااا

يلااه كااانت غااادوور وهو يشدهاا من درااعهاا مرجعهااا لعندو صحة وبزز..

وهو يتسمع صوت عبدوو من ورااه نااطق بنبرة قوية:راااه اشريف يمكن قالت ليك تفرق علييهاااا...مااعندهاا فااش تهضرووو....

مهدي هز فيه عينو مخنزر ونطق عاقدهم : وياكما نتا ضارب بيها الكاغيط وانا مافراسيش ...

عبدو خشا يدو فجيبو ونطق بهدوء : انا غانضرب بالكلب تاع بوك شي حيط الا ماطلقتيش درية وهزيتي كرويلتك وزدتي خلفة ...

خنساء عضات على شفايفها خايفة يديرو ليها شي فضيحة وسط الدرب وتولي فما هي وما لونها

نطقات مخاطبة عبدو : صافي غير سير بلا صداااع الله يرحم بيها الواليدين ....

مهدي ابتاسم : راه قالت ليك غير سيييير ... بغات تبقى مع راجلها رااس فراااس مزيانة ليك هادي ... وشكووون نتااا اصللا لي دخل بيناتنا

عبدو قرب جوج خطوات لعندو مقابل معاااه ونطق وحجبانو مقرونين عينو فعينو كايهضر تحت سنانو : بان ليا نتا شوية لاباس لاااا ... واقلة نسيتي ولا نفكرك بيلاااااا داااك العقد لي بيناتكم قطعتوه ... وهاادي ابناادم بنت دربي وماحدها مابغااتش تهضر معاااك مغاتبززش عليهااا ... ودابا اشريف ماحدي باقي معاااك كلااس قلب ستة تسعود وخلي عليك الدرية فتيسااع ( ضاغط عليها ): ولا بربي المعبووود اليوم خبااارك يجيبوها لخرين واخا نعرف نرجع على واااالدين موووك لسيلووول ...

المهدي ابتااااسم وطلق من خنساااء مقااد على الكول ديالو : لااا بان ليااا عاجباك صحتك .... وريني علاش قاااد ارويجل ...ا

باقي كاعما كملهااا حتى جاااه طييط لنيفو مرعفوو بلااا مايتحرك عبدو من بللاااصتووو زدحو براسو خلاااااه داااايخ شاااد على نيفووو ماعرف دقة منين جاتو غفلو ...

خنساااء خرجااات عينيهاااا بخوف من انه يرد عليه وهي عارفة مهدي دمو حامي وعبدو قاليه ماتعرفش .... طااارت على عبدو لي باغي يعاااودووو شادة على يدو ناطقة برجاااء : هااااا العااار لامااا برااااكة مقاادة على شووهةة ... المييمة دياالك لامااا صافي

عبدو مغدد : هااااد ال*لاااوي عمر ال*اااامل مغااايتربااااا ... خليني نوري لوالديه يترجل على العيااالااات ...

المهدي كرز على سنااانووو وجمع قبضة يدو غايعااودو بديريكت وهي توقف خنساااء مغطية على عبدو قبالتو : ضربني انا عااااد قيسو الشمااااتة ... يلاااااه .... وريني رجلتك وبينهاا عليااا كيف درتي من قبل ... ماشي جديدة علييك ... ضرب يلاااااه

عبدو كايحاول يبعدهااا : خنسااااء حيدي سيري فحااالك ...

واقفة عصااا : نتااا غييير سكت ...( مخاطبة مهدي ): والله ومااااتحركتي من هنااا حتى ندير صبعي فودني ونجمع عليك الجيراااان كااامليين ونقولهم باغي يتعدي عليااا ... وفكها مع ولاد الدرب كاملين ديك السااعة ماشي غير هادا

مهدي زير على يدو : ياك اخنسااء كاداافعي على هاااد ميخي ...( غزز سنانو حيت عرفها مغاتحيدش من قلالتو ،): وااخاا اللالة ... هااهو غااادي ... ( شير لعبدو ): ولايني نتااا بربي المعبود ما تبقى فييك ... مزاال مسالينااش...

عبدو باستهزااء : غانكون كانتسنااااك ... فوقتماا بغيتي انا موجوووود وجيب معاك تلج غاتحتاااجو ...

المهدي طلع سااخط للوطو وزدح الباب فيه مايدير يدو فيدو وينوضها معااه ولكن الا دار شي فضيحة معاه غايتزرف فيها غير هو ويجبد على راسو نحل كتر وعاد غايزيد يكره فيه خنساااء وعائلتها وهادشي ماشي فصاالحووو .... ديماراا وكسيرااا حالفها فعبدو على دقة لي عطااه مزاال غايوريه شغلو مزياات ...

خنساء شافتو مشا ودارت عند عبدو لي يلاه غايدوي سكتاتو بصبعهااا : ااااااخر مرة ... ااااااخر مرة تدخل ... الا غير الجعرة والرجلة بالعصاا خليهااا عندك اسي عبدوووو .... البغاااال راااه كايعرفو يتناطحو ماشي غير نتاااا

زادت من تمااا ضارب فييه غاطرطق بالفقسة وعبدو زير على كفووو مغدد ومعاجبو حااااال ولكن واخا هكااك مزاد من تمااا حتى بانت ليه خنساء دخلااات للدار ... خنزر فشي وحدين كانو فالشرجم وزاد فحاالو لدااارهم جاااعر وضاربة فيه لعظم ..

كلشي كاان مجموع فطبلة تاع لعشاا...كاياكلو ويدويو مع نصيرة لي توحشوهاا بزااف بلخصوص خنساء...وفنفس الوقت كايدردشو مع احلاام لي ملي ݣلسات وهياا تعاود لخنساء وعصاام على دواار وشنو طاري فيه..بحكم مدة طويلة بزاف مسافروش ليه...

نطق العربي بتساؤل: و واحد خوك اشمزال كايدير...باقي مالقاا واالو...

احلام كاتمضغ:نااشفة عندو لقضية اعمي...ولا عاطيهاا غير لصريط و لمريط وشي مايشيط...ياكول ويرݣد..سعداتو جنابو مكايطيبوش عليه...

نطقاات نصيرة بهدوء:كوون سعفني بااك كون غير داار ليه شي حوالا يكسبهم...حسن ليه ماايبقاا غاا ݣاالس كاايخمر فديك لبيت...

ردت عليها: الله يهديك اعمتي هدااك كسب حتااا لعقل بقاو ليه غير لحوالا...داك بنادم مغاايدير واالو غاايبقاا هكااك...اخرتو يولي خمااس عند سيادو يحرتو علييه..ولكن سرو والله مايبقاا فيااا...

نصيرة:الله يهديه على عقلو...(بتاسمات مقطعة ليهاا لخبز)كولي ابنيتي كولي...مرحباا بيك ماتحشميش داار داارك..

ردت عليها احلام بمجاملة:ربي يخليك راه كلشي قداامي...

نصيرة شافت فعصام:ونتااا رحب بلبنت راه زعماا شحاال هاادي مجاات عندناا...

نسرين دوراات عينيهاا لجيهتهاا ميقاات فيها صارطة الدغمة بزز...

قال عصام مبتااسم:والداار دارهاا مرحبا بيهاا فأي وقت....

بقااو كايهضرو مع بعضياتهم هضرة تجبد هضرة حتاا كلااو لعشاا...العربي طلب من نصيرة توجد ليه كاس تأتاي مشحر توحش يشربو من يديهااا..وداكشي لي كاان،صيبوو برااد كبير يشربوه مجموعين...بقاات نسرين فلكوزينة كاتقاد لكيسان فصينية... ورجعات نصيرة لبيت مشااركة معااهم لحديت..دور دور وترحب بأحلام وتكبر بيهااا..

عصام بتساؤل:اجي عمي مزاال كايصيد ولا قطعهاا؟!!

احلام:اتاا الله يجيبك على خير...صيادة تصيفط معاها شحاال هادي...

خنساء بستفهاام:علااش؟!!ياك كانت عزيزة عليه؟!!

احلام:وحكاية هيااا...فلخريف تاع هاد لعام كان كاايصيد حداا الوااد...صيد واحد الحجلة وطااحت ليه فلوااد نيشااان...ومشاا تلااح تبعهااا....

خنساء خرجت عينيهاا:اناااااري على صݣع...

احلام:وييه هيااا غادة وهو تابعهاا حتاا شوية مدااه الوااد...شاف الموت بعينيه منجى منهاا غير بلكشاايف...الله كتب ليه عمر جديد...من تم حلف على الصيادة مايعااود يقرب ليهاا...

عصام بتاسف:خساارة كاان صياااد نيييت مايقد عليه حد...

احلام:عيناا معااه يرجع ومبغاااش..قالك لا مابقاش فيهاا لخير

دخلااات نسرين حطاات صينية اتااي قداام عصام وجاات ݣلسات حدااه...

نطق بتساؤل قبل مايخويه:رااجعتييه؟!!!

ردت عليه بإجااب:مقااااد غير كبووو...

عصام بداا كايخوي فلكساان...

وهياا تقول احلام مبتااسمة مفيكسية عينيهاا فيديه:ههه يااخوياا يااعصاام باقة عندك لكبة هياا لكبة...ونتاا هااز لبرااد كاااتجينيي غير جدة هازة لعلاام فشي عرس...

مع كملاات هضرتهاا وهياا تحرقو جنب اليد تاع البراااد فيديه نيشاان محسش حتاا حطو بجهد فووق الصينية...

نسرين قفزاات بخوف عليه:بسم الله الرحمن الرحيم...نتااا في عاار الله و النبي..

نطق صااعر كايشوفيهااا:ياااك كانقووليك ملي تحطي لياا صينية حطي لياا معاها سربيتة بااش نخوي اتااي... ماالك ديما نااسية...

نسرين بنزعااج:وداباا انا مالي شنو درت ليك حتاا تغوت علياا...(كملات بخفوت)يااربي السلامة لا ينزل عليناا السقف هاد اليلة...

العربي تدخل بلطف:لا ابنيتي متديش عليه .. راه غا لحر كاايجعر...

عصام يلاه بغاا يهز لبرااد وهو يعااود يتحرق تااني...نطق بعصبية ناهض فيهاا:نووضي تكعدي علياا جيبي لياا سربيتاا ولا نوض نجيبهاا لرااسي...

نسرين خنزراات فيه ونااضت:هاهياا غادة بلا غووات...

نطقاات احلام كاتضحك كاتهضر مع خنساء:هههه وهااد جوج كيف لماا مع الضو...كلمة مني كلمة منك...

نسرين سمعااتهاا ونطقات مخااطبة نفسهاا:على الله تقوسي عليناا فهاادي...عينيهاا هاازين لباارود الله يستر...(دفلات فسدرهاا وزادت)

خنساء:هياا احلاام جيتي تشوفي قنيطرة تااني...ههه ومعرفت كيف داار عمي رداد حتاا خلااك...كون راه ملي ݣلتيهاا ليه وهو ينݣر..

احلام:لا لا هااد لمرة دغياا بغاا...عمتي مخلاتش ليه فين يدوي...

نصيرة:معلووم...البنت صغيرة تبقاا دافنة راسهاا فداك الدواار حتاا يفووتهاا التراان...ݣرانهاا هنااا رااه خداامين على ريوسهم ولا كايقرااو...

عصام بتساؤل:هياا جيتي لهناا بااش تخدمي ولا تقرااي؟!!

احلام:لي كاان اخوياا...لقيت لخدمة غانخدم..لقيت صنعة غاندخل نتعلمهاا...لقيت قراية غانقرى...لمهم لي كااان...

نصيرة:حتااا الى جااب ليهاا الله زمانهاا هناا وتزوج ودير محالهاا ووليداتهاا رااه مزياان...

احلام بنفي:لا لا معندي ماندير بشي زوااج داباا...نعمر بعداا جيبي وندير شي حاجة فيهاا الفايدة وديك ساعة نشوفو الزوااج

لتحقاات بيهم نسرين وݣلساات بعدماا حطات سربيتة لعصام بزعفة فوق صينية بلا ماتمدها ليه دايرة فيهاا مفݣوعة زعماا..

نطقاات نصيرة بابتسامة موجهة لخطاب لعصام:تبارك الله احلااام بعقلهااا...جامعة ماابين الزين واللعقل الله يحجبهااا ماشي بحال داك لفنيان دياال خوهاا..الطفلة حطهاا على جرج يبرى...مااضية من جوج جواايه...

عصام بتاسم شايف فيهاا بلا مايدوي...ونسرين بدات كاطلع حاجبهاا شوية بشوية شايفة نصيرة كاتشكر فيهاا وتعااود مفهمااش علااش...

احلام حدرات راسهاا دايرة فيها حشمانة:الله يحفظك لياا اعمتي ربي يخليك...

نصيرة دوراات يديهاا على كتفهاا كادوز يديها على دراعهاا:اناا مقلت غير صرااحة ابنيتي...(ضحكات وكملات كاتشوف فعصام)هههه شتي تباارك الله شحاال مصواابة...وكبراات ياااك وزياانت...مية وااحد يتمنااهاا...

عصام ضحك على نيتو:ههه ايه تباارك الله..اوى الله يصااوب ليهاا...ويكمل عليهاا بلخيير

نسرين فديك اللحضة دخاان خرج ليهاا من ودنيهاا لي رجعو كايصفرو...زيراات على يديهاا بغضب و حقداات شوفة فنصيرة بغيض...وحطاات كااس تااع اتااي من يديهاا رادخااه على طبلة...وناضت وقفاات وهياا مفقوصة...وقالت مغوبشة:تصبحو على خير...

يتبع...