بنت السايب الجزء 55

فبيت عند رانياا...كانت كادير ليهاا خنساء أخر اللمسات فلميكاب..لي فضلات انو يكوون خفييف باغاا تبرز ملاميحهاا فقط بلا ماتكترو بااش يطيح عليهاا السر نهار العرس لي مابقا ليه غير اسبوع...دارت ليها مكيااج سامبل مع ايلاينر مجبدة بيه عينيها غير من لقنت خلا عويناتهاا يبانو مجبدين مع ايشادو تورابي فلجفن..خادمة ليهاا بشرتهاا مزيان فلفوندوتان مع كونتوغ خفيف و كتافات بعكر ماط فلغووز بارزة بيه شفايفهاا...شعرهاا ختارت هاد لمرة ماتجمعووش سرحااتو مزيااان و خلاتو مطلوق على طولتووو...فلأكسيسوار دارت لونصومبل تاع الدهب لي جاب ليهاا اسماعيل زينات بيه ودنيها و عنقها و يديهاا مع لباݣ تاع لمغياج فصبعهااا... لابسة قفطاان فلأخضر الملكي ... مطروز و منبت بشوية لحجيرات و محزماه بمضمة رقيقة...اطلالتهاا وخا خفيفة ولكن خلاتهاا تبان فابهى حلة كأنها عروس فيوم عرسهاا...

اما خنساء فكاانت حتا هياا فكامل اناقتهاا لابسة ݣندورة على شكل فراشة قصيرة بحزامها مماخكي لطااي من لوسط ستايل عصري حابسة لعند الركبة وتاتهاا مع لاطاي تاعهاا جاتهاا هيا هاديك.... مع صندالة طالون عالية تغونصباغو من لقداام...كاتباان منورة بلميكااب الناعم لي دايرة مركزة على لعينين من خط رقيق تاع لأيلاينر و رموش اصطناعية ملصقاهم رمشة رمشة لدرجة ماتقدرش تفرقهم على رموشها الحقيقية مع قلم بااج مكحلة بيه من لداخل و مكبرة بيه عيونهاا...الشي لي خلي نضرتهاا ترجع جداابة بمعنى الكلمه و نضرتهااا كادوب...

خنساء سالات من تزياار المضمة لرانيا و قالت: بصحة و راحة ازيين...

رانيا بابتسامة: الله يعطيك الصحة...تبارك الله عليك مكاينش شي حد كتيصرع لميكااب و تصياب الشعر قدك...كاتسيفي لواحد يا ختي هههه

نطقاات وردة كاضحك كانت حتاا هياا معاهم فلبيت لابسة كسورة رومية قصيرة كاتلبس واسعة تخوى كاغ و مقبوطة من ليدين...جامعة شعرهاا لفوق مع ميكاب خفيف فقط شفايف لي متقلة فيهم شوية خادماهم بقلم و عكر ماط فلبوردو مع لبيوضة تاع بشرتهاا جايهاا خطير...

و قالت غامزة رانيا:هههه كاتصرع كلشي تبارك الله عليهااا ... و الله يعطي لعمى لرجاال لي يفرطو فهاد الزين كاامل...

خنساء بعجرفة:هههه لا الحبيبة وردة اناا لي كانقوليهم ݣوود باااي...ماشي هماا لي كايفرطو فيااا...

وردة:انا حااسا داباا تلقااي لي يديرك تاج فوق راسو متسخاي بيه ميسخى بيك...ان شاء الله

خنساء:اميين يااربي لهلا يخطييك....كيف بقات بعدا ركبتك شوية...

وردة: من مور لعملية لحمد الله..هههه نقولو نقزتهااا

قاطعهم صوت لبيبي كايبكي عاد فااق من نعااس...قرباات عندو رانيا بخطوات سريعة و هزااتو كاتبوس فيه محمقهااا....

ناطقة و هياا مبتاسمة متبتة عليه شوفتها:ياااختي يااختي على لفنوون فيقنااه بلحتيت....ويتي و شحااال كاايحمق تبااارك الله...

وردة:هههه غاسكتي داك لفنون مشبعني سهير هاد لاياام مع سنيناات..مدوزهاا عليااا...

رانيا:اناا الى كاان عندي بحاال هاد لفنيكيش..غير يسهرني مااندويييش...(جبداات ليه حنكو بتغنااج و هو حال فيهاا عوينااتو كايرمش ببراءة طفولية) يااا وشحاال مشهياا نااكل هااد لخديداات لي كايحمقوو...

خنساء حتاا هياا قرباات شادة ليه فيدوو كاتبتااسم و تقيس ليه فشعرو بحناان...

نطقاات وردة: باان لياا ارانياا كاتموتي على ليبيبي...هياا دغياا غادي تولدي ليناا شي فنيكيش لسيمحمد...

رانيا بتاسمات ليها بخجل بالعة ريقهاا و قالت بإجاز:اييه..الى بغا الله علاش لا...اشغانتسنااو...

وردة طولات يديهااا و قالت ملي شافتو بدا يبكي تاني:عطيه لياا مبقاش غايسكت ليكم بااغي يرضع.

ستاحبات ليها رانياا و حطااتو بين يديهاا ...حلات لخيط تاع لكسوة من لقدام و عرات على صدرها و بداات كاترضع فيه....

سكتات تواني طلعاات شوفة فرانياا و قالت: ولكن الى سعفتيني..خلي واحد شوية لوقت حتاا تشبعو من بعضيااتكم مزياان و عااد ولدي...مكاين لاش تزيرو راسكم من لول بلولاد راه كايعدبو و كايشطنو...لحياة طويلة قدامكم...تمتعو بعداا عاد فكرو فلولااد...

فلبلاصة رانيا تلوناات و هرباات منهاا الشوفة كادور فعينيهاا معرفات بااش تجاوبهاا اكيد معندهااش الجرئة الكافية باش تقوليهاا راني حااملة...كان الصمت و هو ردهاا الشي لي لاحضاتو خنساء لي نقزات و قالت مجاوبها :ولكن الى جابهم الله و كان مكتب من لول تولد معندهاا مادير ولا لا؟!..شحال من وحدة كاتكون مخططة ماتولد حتا دوز عام و لا عماين و لا كتر ݣاع...حتاا كاتلقايهاا هزاتو فنهاارهااا...

وردة:اييه اختي فهادي عندك الصح...ها دليل قدامك..لا انا لا راجلي كناا كانفكرو فلولاد...كناا معولين و مخطيين لواحد لوقت نولدو فيه...اوى حتاا جااا لبيبي "كميل" كايجري صلى على النبي عليه...هههه خلانااا كاندبووو مفاهمين والو...

خنساء:واايلي بصح مكنتيش بغيتي تولدي؟!!

وردة :وااايه معاك بصح...سي سيد يدور يدور و يقولياا "واهو فلحقيقة مامعولينش" غير يشوفني خنزرت فيه و طلعت لحااحب و يتحنحن و يقول" و ملي كتاااب مرحباا بيه يتربى فعزناا" ههههه

رانيااا وسعااات ضحكتهاا:ههههه نتيي علاام والله..خطييرة مع رااسك...

وردة رجعات بعض من خصلاتها الشقراء ورى ضهرها: وااشنو مالني حملت بيه بوحدي رااه بسباابو.....ولكن غير تزاااد بدل ليناا حيااتناا... سيفغي كااين شوية تمارة و لكن حلاوة الزواج همااا لوليداات...

رانيا: هانتي دابا هضرتي...مكاين مااحسن من لواحد يدير ولادو يكبرو معاه...و يعمروو عليه...لوحدة كاتقنط...راه هماا لي كايضويو عليناا و يخليك تصبر على شحال من حاجة...

وردة بإجااب: داااكشي لي...الله يرزقكم درية الصالحة ياربي و يكمل عليكم بلخير...

رانيا برجاء:امييين يااربي...

خنساء:ويلاه اللالة لعروسة نقاشة راه كاتسناا فيك...يلااه تنزلي خلااص...

بتاسمات ليهاا رانيا و خدودهاا توردو بلحشمة...وردة عوداات سداات على كسوتهاااا و حطاات ولدهاا بعدماا رجع نعس مقاداه فسرير تاع رانيا مدورة ليه لمخاد...و ناضت جمعاات لوقفة...

خنساء سرعات خطاويهاا كاتعيط من دروج لعتيقة بااش طلع لعندهم...غير جااات و نزلو راانياا بصلاة على نبي و زغاريت كااسرين الدنيااا محيحين غاادين بيهاا لصاالون لكبير فين مجموعين الضيااف المعروضين...

كاالسيين البنااات فجهتهم نااااشطين مع بعضياااتهم كاايضحكو بحلتهم الانيقة ... كل مرة ينممو فشي وااحد من الدرااري ... وشادين فرااانياااا لي كل مرة كايغمزهاا سيمو وهي كااتزنك ومعاهم حتى حياة وعتيقة منشطين ليهم الجو وخنساء منسااجمة معاااهم كل مرة لايحة لييهم نووطة ولي عندها شي حبيب من البنااات عااودات ليها علييه كياخدو النصائح والخبرة ... اما فالجهة الاخرى الدراري شادين الستوون مع بعضياااتهم ... عاد نااضت خنسااء طلقاات ليهم الموسيقى ... ونااضت مع جوج دالبناات كايشطحوا ...

عبدو هز عينو فيهااا مخنزر... شاف جهة الولاد لي معااهم كلهم كايتفرجو فيهم مبتااسمين ... زير على قبضة يدو وهي كاتهز وتحط واخا ماشي حداهم ومعاها البناات ولكن هي وسط منهم فحال شي حووتة كاتلواا شطيحهاااا دياال الشيييخاااات ...

سيمو شاف فيهاا حااس بيه مورزز ونطق : هاد الساعة ما عندك عليهاا حكام اسااط ... الصبر الصبر

عبدو مغدد : شوف كيكاتلوا قدام العزاارة ... عاجبهاا رااسهاااا ...

سيمو صحك: وراها البنات كلهم كايشطحو مالها غير هي هههههههه ... ماديرش فبااالك وعاد ياك كاتقول مكاتهمكش ... ايوا ماالك تعصبتي ...

عبدو عاد وعى على راسو ان غيرتو بانت : عار ربي لاما هنيناااا ... راني غير قايلك هاد الايام حيت عريس ايوااا ماتزيدش فيييه ...

سيمو ضحك عارفو كايغلااا من الدااخل غير بووحدوو.... ماكرهش كون نااض شدهااا وكلسهااا بلهلا يطريه ليهااا ولكن مقادرش ...

خنساء شبعاات شطيح ورديح وخلاااتهم مشغولين مع الشعبي منشطة ليهم الجو وطلعات ديريكت لبيت راانيا هازة تليفونها فيدهاا ... دوزات لابيل لعبدو لي كان باقي كاالس وسط الهراج حتى صونا ليه التلفون بانت ليه نمرة خنساء وهز حاجبو ناايض خارج على برااا ... جاوبها : الو ... خنساء !!!

خنساء : شوف مغانطولش معاك فالكلاام اعبدو ... انا كاينة الفوق فبيت راانيا ودابا غانهبط ... عندك جوج اختيارات يا اماا غاتسمح ليا وتخلينا نبداو من اللول ونساو لي فاات يا اما غانهبط دابا قدام هاد الناااس وغادي نطلبها منك قبالتهم ... ومن الفوق غانقولهم شحااال كانبغيك وفكهاا يا من وحلتيها ديك السااعة ...

عبدو خرج عينو : اش كاااتخوري ... حماااقيتي ولا مااااالك .. واش عارفة رااسك اش كاتقولي ...تسطيتي باغاا تفضحينا مع عبااد الله .. وعمتك والواليدة لي تمااا مافكرتيش فيهم ...

خنساء باصراار : انااا ماشي سوقي نتاااا لي خاص تفكر فيهم ... الا ماسمحتيش بربي حتى نهبط قداامهم ونقولها وراك عارفني نفووتهااا ...دابا ختااار يااانتسامحو بيناتناا يااا قدام عباد الله ... اش بان ليك ؟؟؟ ....

عبدو مسح على لحيتووو بتوتر : وااش هبلتي... ماتفلايش عليا بهاد الخوا الخاوي دياالك واش انا دري صغير غاضحكي عليا بهاد جوج كلماات ....

خنساء : ايواا صااافي مني ماتقتيش بياااا شوف بعينيك وعااد تيق .. نتلاقاااو فالصاااالون احيااااتي ...

قطعاات عليه وتماات هاابطة مع الدرووج وهو خرج عينووو فور ما لمحهااا داخلة .. تبعهاا بسرعة لاحق عليهاا ... اتااجهاات ديريكت لوسط الصااالة .. شافت فيه هازة حاجبهاا وهو مخنزر فيهاا باش ماتهورش ودير شي حاجة عواقبها غاترجع عليهم بجوج ...

عبدو خرج عينو فيهااا فور مالمحهااا واقفة قبااالتهم مقصداااهم باغا تدوي قداام كلشي ... رمش عينووو مامتيقش كاايحاول يستوعب واااش ممكن تصرف بديك الطريقة ... هو عارفهااا هبيلة ولكن توصل بيها لهاد الدرجة وماتفكرش فعواقب الموضوع لي غايخرج عليهم بجووج .. ويدي بيهم للهاوية ... بلاااما يشعر لقااا راسو غادي لعندهاا باندفااااع وشدهاا من دراااعهاااا جاارهااا بلاما يبين لناااس اشنو واقع ... لاتمشي دير شي فضيحة تخرج عليهم كاملين ويطيحو فشي مااصل صعيب يخرجو منهااا ... خنساااء وسعااات ابتسااامتهااا ناطقة : عبدو طلقني فين غادي بيا ...

عبدو تحت سنانو : زيدي قداامي غانهضرو فشي بلاااصة اخرى ... باغاا تخرجي علينااااا ... خرج ليك العقل مابقيتيش كافكري بييه

رمشاات بابتسامة عدبااء على شفااايفهااا عرفاتو مستحيل يخليهاا تهضر ... قاريااه مزيااان وعارفة تفكيرو كيف داااير ما قررات تخطى هاد الخطوة حتى عرفاتو مستحيل يخليها تهضر قدامهم .. طلعهااا لسطح ديااال الدااار وطلقهاا مخنزر نااطق بانفعاال : شنو عند بااالك غاديري ... اش هااد التبرهيش اخنسااء... واش تسطيتي ولااا مالك ..

خنساء شافت فيه نطقات بتحدي : وعلاش نتا خليتيلي شي حل اخر ... اي حاجة درتها ما جابت معاك حتى نتيجة ... شنو بغيتي ندير ؟؟؟ ... عيييت مانحاول معااك ووالو راسك قااسح ...

عبدو : ماديري والو الالة .. انا بغيت غير تبعدي عليااا ... وتعيشي حياااتك وتخليني حتى انا نعيش حيااااتي لااا غير ... وكل واحد غايرتاح

خنساء خنزرااات فيه : مغايرتاااح حد ... شنوو بغيتي ندير كتر من هاكا اعبد الله باااش تنسى وااش مااعيتييش ... حتى حاجة ماقضاات معاااك شحفتيني بهاد العناد ديااالك ...

عبدو مسح على لحيتووو: شنوودرتي اخنساااء .. ضنو هادشي لي نتي درتيه على قبلي بغيت غا نعرف ... انا راااه ماباان لياا والو ... الاعتداار هو لخر ماسمعتووش من فمك ... شنو لي غايخليني نبدل رأيي ... ونسااامحك على فعلتك اصلااااا ...

خنساء شافت فيه بتتاقل ناطقة وعينها فعينو : شنوو باغي تسمع متلااا ... ( قربات ليه ): بغيتي تعرف شحال كنبغييك .... بغيتي تعرف شنو نتا بالنسبة لياااا .... اسيدي واخاااا ... انا غانقوليك .. نتاااا اسي عبدو ... هو كلشي فحيااااتي .... نتاااا هو الرااجل لي بغيت نكمل معاااه عمري ... نتا لي بغيت نعيش معااه لي بقا من حيااتي ... نتااا لي بغيت تكون باباو ولاااادي ونشرف حداك ... كنبغيييك وبزااف كاااع ... ( قابلات عينها معااه ): والا ماتيقتينيش انا مستاااعدة نقول هاادشي قدامهم كاامليين ... ياااك نتااا لي منعتيني وماخليتينيش ...

عبدو بلع ريقو قلبو زدح فالتعسيين ... مغاينكرش فرحتو من سماع هاد للهضرة من عندها ولكن خوفو كتر... نطق شادها من دراعهااا بجهد : انا الالة مابغيتكش تعتااارفي ليا بهاادشي قدام بنادم ... مكايهمنيش البشر ... بغيتك تعتارفي لراااسك لقلبك بهااادشي ... بغيتك تسولي رااسك وااش بصح نسيتي لي فااااات ... تسولي راسك وااش غاتقدري تسدي صفحة المااضي ولااا غايجي الوقت لي يساالي فيه هاد الحب لي كادوي علييه وبااغاا ديري ليه الاشهاار وترجعي تفكري فلي طراااا ... ( زير على يدهاا مخفض صوتو ): انا ليوم بغيت ندوي على الغلطة دياالنااا .... على غلطتي معاااك وااش غاتقدري تجاوزيهاااا ... واااش غاتمحييها ولا غاتبقى تابعااك ديمااا .... ( شار لقلبها بصبعوا ): واااش القلب لي هرستوووو مغايلومنيش شي نهااار مرة اخرى ... على داكشي تسببت ليك فييه ... على شنو عشتي بسبابي ... ساااهل نسااامحووو لكن صعيب نساااو وانا مابغيتش غير تبغييني اخنساااء ... انا بغيت تجاوزي لي طرااا واش تقدري تمحيه من دماااغك ... مابغيتش نعيش الحلم لي يجي شي نهااار ونفيق منو بحال ديك المرة ... مابغيتش نزيدو للقدام تاااني ونرجعو من زيرو بسباب لي وقع ...

خنساء بلعاات ريقهاا وعينيهااا عمرو بالدمووع .. رمشاات ناطقة بتلعتم : علاااش كاتفكرناا فشي حااجة داازت حناا ولااد اليوم اعبد الله ... داكشي ماات ومشااا ...

عبدو غمض عينو ناطق بصوت باااح : ماحدك باقا ماقااادرااش تقولي بيلااا صاافي نسيتي لي طرا .. اذن رااه مزاال ماتجاوزتييه ... ( تنهد ): انا ويااك مايمكنش نكملوااا ولا نكونو بجوج ... براااكة من هادشي وتقبلي الوااقع ...

طلقهاااا باغي يمشي وهي تشدو نااطقة ودموعها على خدهاا : بصح نتا غلطتي ... وغلطك معايا كااان صعيب كلفني بزاااف .. ولكن لي معاارفش هو شحااال تخبيت انا من وراا هاد اللومة ديالي ليك ... شحااال بررت لرااسي ومحااسبتووش وانا كانحملك هاد المسؤولية .. لقييت فعتابي ليك الحيط لي غانخبي فييه لومتي لنفسي ... كيفما كان الحال نتااا مابززتي عليا وااالو ... ماتعديتي عليا ماشديتيني بالقوة ... ههه ... خنساااء بنت السااايب لي معروف عليهاا العقل والبديهة والقوة طااحت فالغلط وهادشي لي ماقدرتش نوااجه بيه رااسي ... بصح نتا مشيتي وتخليتي عليا فداك الوقت ولكن شكون فينااا لي معصوم من الغلط ... انا باش نغطي على غلطتي معااك ضريت بزاف دنااس وفكرت فمصلاااحتي غير باش نخرج من ديك الموصييبة ... الانساان اناني بطبعوا ونتا كنتي اناني فمعاملتك معااياال وحتى انا عاملت ناس خرين بنفس الشكل ... ادن شكون انا لي غانحااسبك ولا نبقى شاادة فجيهتك ... على شي حواايج لي انا جرء منهم ويمكن درت كتر باااش مانخسرش ومافكرتش فحتى وااحد غير راسي

عبدو دار لعندهااا مزير على قبضة يدو : كيفما كان الحال كان خاص نتحمل المسؤولية ولكن اختاريت الهروب ...

خنساء مسحات دمعتها : اشمن مسؤولية كنتي غاتحمل وباااش ... ( شدات فيدو بحناان ): انا اعبد الله كانبغيك من قلبي ... وحتى انا راه مادرتش فيك القليل ... شوف غي حالتك كيف ولااات بسباابي ... صحتك هديتها ليك وحتى من المرارة طرطقتها لييك بالفقااايس ... مابغيتش نخسرك مرة اخرى... على الاقل هاد المرة كوون رااجل وماتعطيتيش بالظهر وتمشي ... مابقاااش عندي جهد ديال داك الوقت لي نعااود نوقف من جدييد ونبدااا من لول ... ( من قلبهااا حااسة بقواها صافي تلاشاات وعيات من المكر والتخطيط ): هاد المرة الا مشيتي مغاديش تكون غير خويتي بيا .. غاتدي معاك اي حاجة زوينة وعندها معنى فحياااتي ... الله يخلييك عطي لعلاقتنا فرصة اخرى .. ادينا فبعضيااتنا بينا فيه الكفااية ... خلينا نصلحوااا كااع لي تهدم. ونعااودو من جدييد ... كنا صغاار وطايشين ودابا كبرنااا ... الله يخليك هادشي فحالة الا كنتي باقي كاتحس بشي حاجة من جهتي اما الا مابقيتش كانهمك ....

قااطعهااا بنبرة هادية : انا عمري حسيت بشي حاجة من جهة شي مراة اخرى من غيرك... وعمري غانحس ...

رمشات عينيهااا الفازكين بالدموع : عافااك ماضيعناااش مرة اخرى ... براااكة لي عشت ... تعدبت وتحاسبت على بزاف ديال الحواايج ... انا بغيتك بجنبي ونعيش معااك الحلوة والمرة ... بغيتك نتا لي تنسيني فاي حاجة خايبة داازت ... بغيت نحط راسي على صدرك وانا مغمضة عيني ومرتااحة .... براكة ماتعدب فراسك وفيااا ونتا عارف هادشي مغايوصلنا لوالو حيت انا لولة جربت وماقدرتش ... ( برجااء ): شوف فعيني نتا اكتر واحد كاتعرفني .. واخااا نعياااا نتنوعر كانجي قدامك وكانتفرش ... واش كايبان ليك فعيني اني كانكدب عليييك ... راه اول مرة نكون صادقة مع شي حد بشكل لي مانرد حتى حاجة فقلبي ونخرج كاع لي كانحس بيه بلاما نفكر

عبدو حك على راسو : خنساء نتي عارفة بلاصتك فقلبي قدااش .... عالم بيها غير الله ... واخا ديري لي درتي مكاتغيرش ... ولكن مابغيتش نبدا معااك من جديد وتندمي من بعد ...

خنساء زيرات على يدو : مغاندمش ... مغااندمووووووش ... حتى وااحد مغايندم ... ( ابتاسمات فوجهو حاطة يدها على دقنوو): شكوون هادا لي غايبغيني بحاالك ... ندور العالم كلو ومانلقاااهش ... شنو غانبغي كتر ... ( بتحلوين ): وعلاش غاندم وانا عندي احسن رااجل فدنياااا ...

عبدو شاف فيها مطول بللاامااا ينطق بحتى كلمة ... اش بقا عندو مايقول مشااعرووو استسلماات ليهاااا وقلبو كسباااتوو شحااال هااداا وملكااتوو.... مايمكنش يتجاوز هضرتهاااا ويضغط كتر على رااسو حيت كيفماا كان الحااال كاااتبقى ملكة فؤااادووو وحبو وعشقوا الاول والاخير ... ولي مستحييل يبغي شي وحدة فحاالهااا الا ماقلناااش مستحييل يدخل غيرهااا لقلبووو ... جرهاا من دراااعهاااا بلاا حتى كلمة ضاامهاااا وسط صدرو بحاال شي قطيطة. ... وهي وسعااات ابتسااامتهااااا مغمضة عينيها كاتستنشق رائحتو و وعطرووو ... دفء غرييب حساات بييه وهي بين درااعوااا ... احسااس عجييب تسلل ليهاااا ماعمرهاا حساتو مع شي حد ... ماشي غير الحب لاااااا حيت جرباتو من قبل ... هاادشي كبير بزااف على الحب ... الامااااااااان والطمأنينة ... راااحة فشكل كاتحس بيها غير مني كاتكون بين يدين عصاااام ولااا العربي ... هااد الدفء لي جااامع ماابين حناان الاب وخوف الاخ و عشق الحبيب ... هو لي كاتحس بييه ولي خلااهااااا تلاااقي جفووون عينيهااا بللاااما تشعر ... وتستمتع بدفؤو وحبو ليي كاينبض من داخل قلبو بسميتهاااا ...

عبدو بعدهاا بهدوووء وونطق بوعد : كوني متأكدة غانخليك اسعد خنساااء فالدنيا .... وماعمري غانخصر ليك خاطرك ولا نأديك ... غانعيشو بزااف ديال الحوااايج بجووج ...

وسعات ابتساامتهااا ونطقاات بهمس : ايييه راااه مزاال غانديرو بزاااف ديال الحواايج ( غمزااتو ): ولكن بلااا حواايج احبي هههههههه ...

عبدو ضحك محرك راسو بللااا حول : لاااا نتي السطااج الوحش... هربتيني ....

خنسااء مسحات عينيهااا : ايوااا براكة من الدراامااا ويلاااه نهبطووو دابا تشوفهم طاااالعين كايقلبو علينااااا ... من بعد ونهضرو فهادشي على خااطرناا

ماخلااتووش يجااوبهاا وجراااتووو مهبطااه من الدرووج ماطلقاات ليه يدو حتى وصلو للصااالون وابتساامتها على خدهااا غاطير. وهو كتااار منهااا حاس برااسو فحاال شي دري صغيير وصل لشي حاجة شحاال وهو يحلم بييهاااااا وواخييرااا تحققات لييه ...

"" هي قالت وهو قااال وانا نبسطها ليكم بخير الكلاام ... ياااويلك من العااشق الولهاان لي تسبللااات خيوط عروقو بناار الغراام وعشش فقلبو دم مجمد بالهياام ... يدور فالدنيا ويجول تاايه ماايلقى لي يروي عطشو ... غير لي ماالكة عرش فؤاادو و فيديهااا سواارت صياامو ولو على نعشو ... ماهما من حديد ولا فضة ولاااا نحاااس ... هي حروف منظمة من شهدة فمهاا تقطرهاا زهر وتوصلوو قرطااس ... تاخد لروااح وتداوي لجرااح وترد كل ما راح وتعمم الفراااح ..""

فصباح يلاه ضربات تسعوود...عبدو كان كايتقلب فوق سرير طار عليه نعاس بسباب لهضرة لمجهدة لي حاس بيهاا عند ودنو...خسر ملاميحو بنزعااج و نااض معصب و هو مبوق بنعااس....دغيااا دااز لشرجم حلو و طل مخنزر...بانو ليه شي تلاتة من ولاد الدرب جوج خوت توام و معهم صاحبهم فلعشرينات مضاربين بيناتهم على طرف تاع لحشيش...

نطق عبدوو بلغواات :هاااادوك لبراااهش...صبااح الله...حيدو علياا من هناا وسيرو ضاربو فتيسااع....

دغياا خبااو داك طرف لي كانو مضاربين عليهاا...طلع واحد منهم راسو و شافيه و قال:بااا عبدو...لابااس العشير....متفهمناااش غلط كنااا غاكنداكرو على لواحد لمتحان يلاه درنااه...

عبدوو زااد خنزر فيه و قال: اسمع اداااك لميكرووب... كلمة وحدة... يااا غاااا تجر داك لفطوكوبي تااع خوووك وصاحبكم من حدااا دااري و تغبر عليااا كمااارتك و لا غاانزل لييك...

داك خونااا خرج عينيه فيه و هز اديه لفووق و بدااا كايهلل بتشمكيير:نااااري باااغي يحݣر عليااا..ماااتشدووونيش...بربي تاااا ضبر عليهاااا فهاااااد الصبااااح....

عبدووو بتبااات:مباااغيش تمشي يااااك....و تسناااا لصق تما...الى نسميييك راااجل عندااااك تململ من بلااصتك....

ردخ عليهم شرجم هو يسمعهم كاايجريو علقوو بلا مايتلافتو موراهم...رجع حلوو لقاااهم غبروو بحالا نعل شيطاان....حرك راسو بلا حول جابو ليه ضحكة و فنفس الوقت تنهد على حالهم ...شباب فمقتبل العمر و كيفاش كايضيع حياتو بيدو.... فكروه غير براسو ملي كان قدهم...نفس الطيش عقلو هاارب و مكايفكرش فلعواقب حتااا لقا راسو محبوس بين ربعة لحيوط كايخلص ضريبة تصرفاتو...نفض دكرياات لي مبقااتش غاترجع من راسو...الماضي بنسبة ليه بقاا مااضي تعلم منو درس و خلاه يدير عقلو.... و بسباابو رجع راجل تاع زمان يعول عليه...

مشاا لحماام غسل عليه و بدل حوايج النعااس و هبط...لقااا حياااة ݣالسة عند الطبلة يلااه حطاات لفطوور...

قرب باايس على راسها و قال:لحنااانة صباح الخيير...

ردت عليه بإبتسامة:صبااح النور...كيف صبحتي نعستي مزياان...

عبدو: لحمد الله...واخااا فيقووني شي برااهش من نعااس تبوقو و جااو مضاربين عند رااسي...مبان ليهم غا هاد لقنت يبدااو يتناابحو فيه..و على الصبااح

حياة:الله يهديهم على عقلهم ويرد بيهم...(سكتات تواني...هزات كاسهاا تاع اتااي جاغمة منو و قالت متبتة شوفتها عليه) اصلا مابقااش ليناا بزااف و نبعدو عليهم و نتهنااو من صداعهم...واخاا ماسخيناااش...

عبدو هرب عليهاا شوفة و قاال باغي يتلفهاا ماتدويش فلموضوع: احم...كوبي لياا معااك واحد كاس تأتااي مشاا علياا الحاال...

حياة بتاسمات فخااطرهاا عرفااتو كايتهرب منهاا... خنساء حكاات ليهاا كلشي و ساقت لخبار ليلة تاع رجوعو معاها...و لكن بقاا متردد و مقادرش يفاتحهاا فلموضوع خوفاا لا ماتقبلش بيهااا....ختاار يبقاا سااكت حتاا يشوف شي وقت مناسب و يقولها ليهاا...

كبات ليه اتاي و قالت: اوى راه مبقااش ليناا بزااف...عرس ولد خالتك سيمانة لماجية...و نتااا مابقيتي قلتي لياا والو...معرفتش واش نبداا نجمع الرحيل و لا نحبس...نتاا مابقيتي قلتي لياا حتا حاجة...واش لقيتي شي حل لدار لا مزال؟!

عبدو بلع ريقو و رد عليها بتلعتم:اءء..و..واهوا فصراحة الوليدة مزال مالقيت والو...و نيت فصراحة اناااا...

سكت مقادرش يكملهااا...

حيااة رمشاات بستفهام: نتااا شنووو؟!!

عبدو دغياا تراجع على شنو كان غايقول و نطق بهدوء: و انااا ماابغيتش نزرب...كيف كايقولو..لازربا على صلاااح...

حياة بتسمات و قالت: وكايقولو تاني لا تأجل عمل اليوم الى الغد...ولا لا؟!!

عبدو: ياك أمي نتي اصلا باغاانا نتبقااو هناا...علاش دابا بطاا عليك فقااش نمشيو و نخويو؟!!

حياة:حتااا داباا نيت ماابغيتش نخرج من دار لي دوزت فيهاا شبابي كاملو و كبرتك وسطهاا و عشت لحلوة و لمرة فيهااا...ولكن ملي وليتي مخنووق و بغيتي غير فقااش تخرج منهاا قلت ندير لك خاطرك هو لول...حيت اكبيدتي مابغيتش لك لخنيق و ضرورة...صحتك هيا لولة عندي...و ݣاع لي ضرك معندي ماندير بيهاا...

خرج نفسو بصوت مسموع...حك على راسو و هو حاير و قال:اكون خير...ماتعرفي من هنا لغدا شنو يطرى...يدوز لعرس و يحن الله...

حبساات الضحكة بصعوبة بااش ماتفرش قدامو...و ردت عليه:احم...اوى ايكون خير...(سكتات تواني و كملاات بنفس النبرة) غير هو اوليدي ديك بنت السايب فرقهاا عليييك الى بغيتي رضاتي...راه مكايجيو منهاا غا لمشاكيل لهم الله يستر...مانحملهااا ماا نقبلهااا...الى سولوك شكوون عدويااا فهاد لحومة قوليهم هيااا...

باقي ݣاعمة كملات هضرتهاا و هياا توحل ليه...بداا كايكحب بجهد قرب يجيف...ضربات ليه على ضهرو وقالت:حلااال حلااال...اشبغيناها ضكرنا السمن مع لعسل...غاجبدنا سيرتها و نتا تجيف..يالطيف

عبدو شرب كاس تاع لماا و نااض جمع الوقفة...مابقااش باغي يهضر فلموضوع...براسو معارفش علاش مقادرش يدوي معاها عليهاا...غا كايبغي يجبد سمية خنساء قدام مو كاتشدو لقفقافة...عاااد كاتزيد تكمل علييه مليي كاتبداا دوي عليهاا خايب و تقوليه بسع عليهااا ماتصلاحش ليك...متردد بلمزياان و إحساسو كايقولو بلا ماتحاول تجبد معاها لموضوع.. راها غاترفض من لبدية...

خنساء حلات المحل بالخف كاتخرج لي مانكاان كيف العااادة ودوزات تشطيبة خفيفة مع رشااا دياال برودوي فيه الريحة باااش تنتاااعش... مخلية رانيا على راحتها هاد الاياام توجد لعرسها فخاطرهااا كاتجي غير مني كاتكون مسااالية هازة عليها الحمل كااامل باااش تكون مرتااحة وشابعة راحة نهار عرسها ... كملات وطلقات شوية العود كاتحمقهاا ريحتو فمبيخرة اليكتروونية ... شاافت راسها فالمراايا بحلتهااا كيف العادة انيقة لابسة قاميجة دجيين عاااقدااهاا فللحزاااام وصااية مزوقة فالصومو والاسود فاايتة شوية الركبة مع صنيديلة عااالية ... جامعة شعرهااا ديل حصاان مكتافية بحلقات كبار وعقيق خفيف فعنقهااا .... ميكاااب ناااعم بارزة بيه ملااامحهااا كاتبااان كيوووت ...

رسماات ابتساامة عدبااء على ملاامحهااا وتبتااات مرطب على شفايفهاا: احاااي اش هاااد زيين يااسيدي ياااربي ... كاانحمق ...

باقا ماكملاااتهاا حتى سمعاات صوت مبحوح وراهاا نطق باعجاااب : الناااس كايمشيو للمعارض الكباار باش يمتعو عينيهم بجماال اللوحات الفنية وانااا كانصبح علييها كل نهاار قداامي ...

ضحكات ودارت عندو موسعة ضحكتهااا : هههههههه سعدااااتي كانسمع الغزل على الصباااح ...

عبدو غمزها : اش هاد الاناااقة كاااملة ... كاديريهاا بلعااني باش داك سوية العقل لي كانكساااب وبقا عندي طيريه ليااا ... تي راه قلبي تجبد عليك جبدا حتى تلاقى مع الكبدا وهيدا الحب كيبدا ...

خنساء بعجرفة : طيرتو شحاال هادا الحيباااااان ماشي عاد غايبداا ... ولكن كلاامك زويين والتعنااب كايعرفو ليه غير ناسو بحاال حبيبي عبدو لي كي الحليب فكاسو والعسل فتغماسو ...

عبدو بابتساامة : هانااا على الكلاام اللسان لحلو ولمن عطاه الله ...

خنساء باستفسار : مشيتي لرونديفو البارح عند الطبييب .. شنو قاليك ؟

عبدو باسف : وا لهلا يوريك اش قالي .. درت شلااا تحاااليل ...

خنساء بخوف : علااش يااك لاباااس ... دياالاش هاد التحااليل ...

عبدو طانز : درت التحااليل لقلبي اشمن الم حسيتو لقيت حبك هنا فيه بغيتو؛ سولني الطبيب عليك قلت ليه حبيتو؛ عطاني الدوا كبيتوو ؛ نصحني بااش نساااك سبيتووووو ... ( غمزهاا )

خنساء ضحكات : ههههههه باز لوجهك والله مكاتحشم .... جيتي اليوم بكري ماموالفااش ليك ؟؟ ..

عبدو حك على لحيتو : وااا نكدب عليك بقيت غادي جاي فدار غادي جااي وعرفت اليوم كاتجيك السلعة وغاتجي بكري قلت نجي نشوووفك ...

خنساء سبلات فيه عينيها : يشوفك الخييير ... غير هو غايكون حسن الا لقيتي شي حل ودويتي مع الحكووومة باش تبقى تشوفتي مع الحلة دالعيين .... حتى نطلع ليك فراسك ...

عبدو ضحك : وهانتي قلتيهاا رااسك ... واش غير اجي ودوي مع الحكوومة ... تي راااه اجااا ما قنعها ليااا غا خليها على ربي وصافي... انا كون جات عليا من غدا ندق الباااب ولكن رااكي عارفااهااا ....

خنساء عوجات فمهااا باصطنااع متاافقة هي وحياة يدوروه بيناتهم ويخليوه معارف فين يصد ... كل وحدة من جيهتها وهو وسطهم .. نطقاات هازة على كتاافها : علااااش بالسلااامة هاد ماماك ماموااافقااش بالسلاااامة ... غاتلقى ليك حسن مني متللاا ... شوف انااا راااه ماافياا لي يبقى مجرجر معااك .. ماحنااش صغااار اعبد الله ... دوي معااهاااا وقنعهااا واايلي

عبدو ساااط حاااير مفكر الهضرة لي قالت ليه مووو على الصباااح وان خنساء ماداخلاش ليها لمخها بالمرة ... وعااد هي لي مزيراااه باش يدوي معااها فاقرب وقت ... ماكرهش حتى هو يفاريها معاهاااا ويضربو الكحل فالبيض ولكن ماشي بيدو .. حاس براسو وسطهم فحااال دلو الجاامع شي يطلعو شي ينزلو ... نطق محااول يهدنها شاد فيدها : صاافي اخنيستي كوني هاانية ... ايواا طلقي عليا هاد الغوباااشة وضحكي ...

خنسااء ميقااات باغااا طلعها عليه مزياااان كيفما تافقاات مع حياااة : الضحك راه فيا هاد السااااعة... شحال وانا تابعااك كي الهبيلة باااش نفك حريرتك حتى خرجات ليا ماماك عوتاااني ... زعما لي صكر راااه صكع ... ولي ماعندو زهر مايكون حتى فخلاااا دار بوووه ...

عبدو تنهد واصلة بيه لعظم بالهم والتفكير فالموضووع حاس براسو ما بين نارين مزال كاعما فرح برجوعو معاهااا طاح عليه الظيم غير ما باغيش يبين ليها : وا صاافي بلاااما تعصبي رااسك دااابااا ... ماتنديمينيش تاني على الصباااح ... راه قلت لييك يكوون خييير ...

خنساء باصراار : يااااك ... باااز زعماااا لبروودك والله حتى باااز .. هادي هي ال*حوب *حبناه وشي زواج ماشفناااه .... عاافااااك اعبدو لاامااا سير بدل ساااعة باخرى خليني نبرد مع مخي ها العاار ...

ابتاسم بللاا حول عارفهاا على نقشة: انا غانمشي نجيب ليك قهوة من عند مصطفى معصرة على حقهاا وطريقها ترديبيهاا المجاااج ... الناااس معاشريين مع بنااات كايغضبوو كايبكيو ويتخنصصوا وانا مع بوعزة كاايتقطع كاايشعل ...

خنساء خنزرات فيه بلامااا تجااوبو وهو زاد من تما يجيب ليها القهوة كاايفكر حاايرة بييه الدنيا ماعارف منين يبدا مع مو الموضوع لي غير كايجبدو ليهااا كاتشعل فيه كي الوقييدة قبل كاااع مايكمل ... ولااا تعرفوا علاش باغي يدوي كاتقلب عليه الموضووع ...

خنساء غير مشا وهي توسع ابتساامتهاا باستتمتااع : شنو زعما غانتى لي كاتعرف تجرجرني خليييك تحير شوية هههههههههه ... احاااي وشحاااال زوينة فييك الحييرة ... والله اودي الحيبااان وماخرجنا فيك الفول وورقوا ماناااش السااايبة ... ههههههههههه ...

زادت تكمل شغاااالهاااا وهي كاتدندن كاتسناااه يجيب ليها القهوة طاالع ليها المورااال ...

تعاشاات العشية وخنسااء دخلاات للداار ... اتاجهااات لبيت الكلاااس لي سمعات فيه الهضرة لقااات العربي ومعاه عصاام لي شاافهاا وخنزر وحتى هي كاتقولو غير السللاام مكايتشاركوش اللغا كل واحد غضباان على لااخر... نطقااات السلاام ليه فوق النفس وهو كاعما رد حاني راسو على التلفون بالنفخة ودازت باست يد باهااا : اهلا ابا لااباس عليك

العربي بايجاب : الحمد لله ابنتي لله يرضي عليك ..

ابتاسمات ليه باغا تزيد وهو يوقفها : فين غادة ابنيتي ؟؟ ...

خنساء: غانطلع نبدل عليا حواايجي ونهبط .. عيت اليوم فالمحل بوحدي. .

العربي : ايوا زيدي صبري شوية واجي كلسي حدا خوك بغيت ندوي معااكم ...

عصام هز فيه عينو عارفو علااش ناااوي. واكيد مغاديش يزيد يخليهم قاطعين اللغاا على بعضيااتهم كتر من هاكااا ...

خنساء رمشات باغا تهرب : غيرخلي حتال من بعد ابابا والله حتى عياانة ومافيا لي يهضر ...

العربي باصرار : راني قلت ليك كلشي غانهضر معااكم بلاااا مانعاودهاا. ..

خنساء تنهدات وحطات صااكها كاالسة : هاااناا مايكون غا خااطرك ...

شاف فيهم ونطق: واااقلة بجوج بيكم غاتكونو عارفين معزتكم عندي ... نتوماااا هما عويناتي بجوج باش كاانشوف ... مكم قبل ماتموووت وصااتني انا وعمتك على حاجة وحدة هما نتوووماااا ... ونتااا اعصاام غاتكون عاارف مزيااان هااادشي وقاالت لياااا نبغيهم يكونو الراس على الراااس ... عصاام يحن فختووو وهي تحن فيييه ... وانااا دمرت وكاافحت وتعبت وربيت وكبرت وعلمتكم كيفاااش تكونو يد وحدة وحتى حااجة ماتفرقكم ... وحتى حد مايدخل بيناتكم كيفمااا بغااا يكووون ... داكشي علاش اولدي مانبغيكش اليوووم تدوز ختك وتشد فيهااا

عصام بايجااز : عاارف الواليد ولااايني خنساء راه مابقاتش صغيرة ... وراه بعقلهاا يعني ماااشي مرااهقة باااش تولي تراد معااياا ونقول مافيها بااس دابا يفوتها الحااال ... غلطااات حتى عيااات ودوزت ليهاااا اي حااجة دارتهااا وماعمري غضبت عليهاا وهاهي تكدبني ... نغوت عليها ونعصيهااا كااع ومني يبرد فيا الدم نجي لعندهااا وندوي معااهاا ونرد ليها العقل وفوقتماا احتاجتني تلقاني جنبها بحال ظلهااا معاها فاي حاجة سوا غالطة ولا صحيحة كانجي معااهاا ... واي حاااجة حلاات عليهااا فمهااا نقطعهاا من لحمي الواليد ونجيبهااا ليهااا ... كنت كاانقرا الواليد فلافاااك ولاابوغس لي نشد منااخد منها حتى رياااال باش تلبس هي لولة حسن من قراناااتهاااا ... اييه ماعمرك خصصتي لا ليا لا ليهاااا ولكن رااه نتا مكاتشوفش واناااا نعطيهاا من تحت لتحت ... مكاينااش بنت المرااا لي تشري بحااالهاااا ولااا توصل لفشوشهااا .... ومااعمري تشكيت ولاااااستخسرت فيهاا شي حاااجة ... كنت باغي منها حاجة وحدة تحتارمني وتدير ليا القيمة كيفهاا هازهاا فعين كبييرة ... ( شاف فيها): ماااشي ترااد معايا بحال الا قدي قدهاااا ... وتبدا تعطيني الهضرة من التحت لتحت ... راااه واخا هااديك بنت الناااس مراااتي ولكن مانبغيهااش تحضر ليها كاتقلل عليا الاحتراام واناااا قداامهااا كانمجد فيهااا ونقول ليها ختي تحت يدي وماعمرهااا كاتحط فياا لعييب ... تصغرني قداامهاااا ... وا فهمني حتى نتااا ابا رحط راسك فبلاااصتي

خنساء حانية. راااسهااا كاتسمع عاارفة مزياان خووهااا فاشمن مرتبة حااطهااا وكاان دايرهااا امييرة وااخاا صعيب فطبعوا مي محنتو عليهااا كانت بووحدهااا واخا يعيا يغوت كايبغيها ديال المعقووول ... ولكن حتى هو داار ليهاا فلاش لي معاجبهااش

العربي تنهد ونطق مخاطبهاا : ايوا ونتي ابنتي غاتبقااي سااكتة ؟؟ ... مغاتسمعينااش صوتك ...

خنساء رمشات وشافت فعصام مخاطبااه : واخاا اخويا ونتا ماسولتيش راسك اش قلت لهاد البنت لي عمرها صغراااتني علاااش دارت فيااا واش جرحتها ولا لاا ... ندوزو اسيدي ان مرتك رمات لياااا روايحي ونتا مادرتي لا. بيدك لا برجلك ... وحتى انكم درتو فيا كااامليين ... ايوا نتااا لي كاتقولي شحااال دايرييين واش انااا وليت كانغرم فييك .. من ايمتااااا اخويااا كانقوليك رد ليااا الفلوس .. ولااا كااانحسب ليهم حسااب معااك

عصام بعتاب: علاااش بالسلااااامة شنو كنتي باغاني ندير ... نتي كاتغوتي لربي لي خلقك بااش نبردك قلت نشريهم لييك .. ماقصدتش فيها شي حاجة دياال العييب ... يمكن نتي فهمتيها فشكل مي انا بغيت غير نبرد القضية بيناتكم ...

خنساء : ايوا هاديك الهضرة مكااتقااالش اصلاااا ... بحال اللا اناهاميني فلوس الريحة وماشي هاكا غاتصلحهاا راه كايقوليك المتل لي بغااا يدفع البلا يتوضا للصلاا مااشي يخلي الما كايغلاااا ... نتا عارفني حاجتي عزييزة علياااا وطبعا غا نتعصب على فعاايل مراااتك ... شنو خاصني نصفق ليها متلااا ...

عصام تنهد بلا حول :واخا الالة انا لي جيت نكحلها وعميتهاا ولكن هاني غلطت معاك فالهضرة بلاااا قصد تجي تحشي ليا الهضرة بديك الطريقة ...

خنساء بتأسف : وا نتا عارفني مني كانتعصب كانوولي غير ندي بللااا فراانااات .... ( شافت فيه باعتداار صعيب عليها تعيش وخوها غاضب عليهاا ): سمح لياااا الا قلقتك

العربي ابتااسم : ايوا شتي باش مزيااان الواحد يدوي ويحل الامور بالهدنى رااه حتى حاجة ماا تستاهل نعاديو بعضيااتنا عليها ... الخااوة رااه حدها الدنيااا ... ونتومااا الحومة كلهاا كاضرب المتل بخاوتكم وكايقولو ولاااد الساايب داايرين بحاال الفردااات ... تجيو حتاال للخر وتعورووهااا ... وانا زعمااا عوال عليكم تبقااو يد وحدة من مور ما نموووت ...

عصام : بطول عمرك الوالييد ...

خنسااء باست على يدو : الله ينجييك ... ويخليك لينااا يااربي ...

العربي : ايوااا الموت والحياا هادي كلنا ليهااا وطريقنا هااديك وانا بغيت نكون مهني علييكم ... نتي اخنيسة تعتابريهم فمقااامي وتحتارميه .. وخصوصا نتا اعصاام بغيتك دييمااا توقف فجنب ختك وتكون ليها عوين ..

عصاام تنهد وحط يدو على كتفهااا : وعلااه شحال عندي منهااا انااا ... واخا نكعاا عليهاا راه عزيزة البرهوشة ... غيرالله ينعل الشيطان وصاافي

ضحكات ليه حاطة راسهاا على كتفووو : واااخاا اسي عصاام مقبوولة منك ... ههههههههههه

قال عز وجل " سَنَشُدُّ عَضُدَكَ بِأَخِيكَ". ❣

فليل...كانت ݣالسة خنساء قدام لكواافوز تاعهاا كاتمشط فشعرهاا...و حداها نصيرة ݣالسة على طرف السرير كاتطوي فشي حوايج عاد نزلاتهم من السطح...

طلعات فيها الشوفة و نطقاات بحنان: خنساء بنيتي....

هزات على حاجبهاا و شافت فيها من لمراية : غااا كاتقولي ليا هاد "خنساء بنيتي" و لحنان كايتزاد نغزة عندك قبل ماتبداي تهضري كانعرفك باغا شي حاجة...

ميقات فيهاا و قاالت: مااال نيتك ديما نااقصة...(رجعت كاتطوي و قالت) غا نسرين...

قبل ماتكملهاا قاطعااتها خنساء بصرامة: ماابغيت نعرف عليهاا واالو...تمشي تبعد من سااحتي لا ندير فيها شي كاريتة و هيا والحلة فروحها...لحد داباا غا متاقية فيها وجه الله...

ردت عليها بتنهد: مالك على قصوحية الراس كااملة...نعلي شيطاان على مرت خوك راه ماشي لخاطرهاا دارت ليك ديك الفعلة...عدريهااا...واش معندك قلب معندك كبدة مكاتحسيش بناااس...

خنساء هزات على كتفها بعدم اهتماام: لا اناا عندي غير رييح كاايدور بين لفاااد....تمشي تخرى...

نصيرة: الله يهديك...مسيكينة هياا لي طلبااتني نجي عندك باش تسمحي ليهاا...سيمانة هادي و نتي مكادويهااش و حادرة عليهاا لعين... حشومة كاتسممي فدرية غير بااطل...اشنوو ݣااع داارت لييك...

خنساء سااطت:عمتي الله يرحم لك الواليدين قلبي علياا هااد الديسك راه كايجعرني....و قولي لهااديك لمسيكينة كوون مااخفت نرزي عصااام تاني... قسماا بالله حتااا نفرشخ دااك التليفوون لي كاتسطاا عليه قداامهاا...ولكن غا حشمت.. حيت ماغتجي تاني غاا فخويااا....

نصيرة خرجات عينها:هاااااديك لفليفلة...راه كاانعرفك...هاااودني ديريهااااا....لولد يالاه رزااتو فجوج تلمليوون...زيدي كملي عليه حتاا نتيو حيديو ليه الجلدة بفاعيلكم...حتااا مايبقاا ليه والو و يخرج يشفر....

خنساء خسرات ملاميحهاا بنزعااج و قالت:واش انااا مكلخة بحالهااا مكانفكرش؟!!

نصيرة جمعات لوقفة مبقاتش باغا تزيد طول معاها لحديت عارفا راسها عاصي و الى قالت لا هياا لاا...هزات لحوايج لي طواات ستفاتهم فلبلاكار...و هو يعيط ليها العرربي بااش تݣلس معاه شوية فلبيت لݣلاس و يتفرجو...

تسمع صوت تيليفونها كايصوني...شافت شكون و هيا تلقاا عبدوو هو لي مصوني ليهاا...

بتاسمات ناضت ردات عليها الباب بشوية بلا ماتسدو و رجعاات تمددات فوق السرير...

دوزاات الخط...و بنبرة عدبااء جوباتو: الو حبيبي...

رد عليها هاتف بهدوء:خنيفيستي...توحشتك ...

لوات فمهاا بإبتسامة و قالت: حتاا اناا توحشتك...

عبدو: ماتكونيش قدي...

خنساء:حتااا نتاا ماتكونش قدي

ضحك و جاوبهاا: انا قولي توحشتك قد النجووم فسمااا...

ردات عليه فلبلاصة: و أنااا قول توحشتك قد لحووت فلمااا....

عبدو: و شكون لي كتر... لحوت ولا نجووم...

خنساء سكتاات تواني و نطقاات برقة: حبي ليك لي كتر احيااتي...

كانت مكالمة هادئة بيناتهم...غالب عليهاا لهيااام و لغزل وااحد يمدح فلاخر لحب و لهوى كايتشااير... حتاا تجبد لموضوع تاع حيااة...و لي تعمداات خنسااء هياا لي تجبدوو...

نطقاات بقلق زائف: داااباا شنووو...غير فوقااش غااتجبد معاها لهضرة...وااش غانبقااو نتسنااو حتااا تمشي تخطب ليك...هادشي علاش كاتقلب؟!

عبدو: مالك زرباانة...خايفاني لا مندويش معاها ولا ؟!!

خنساء: مااشي هكاك...و لكن جيتيني غا كاتماطل بلا فايدة...

رد عليها بمزح: قريب قريب اخنيفستي...غير دابا انا باقي مع لمفاوضاات مع دمااغي...

خنساء: منيتك؟!! نتااا هو وزير الخارجية بوريطة غاتفاوض لياا فالقمة العربية؟!!

عبدو وسع ضحكتو:هههههه الااا....ولكن غاافهمي رااه لمشكلة فعلاقتكم بجوج لي معقدة...نتي وياهاا راه بحال لما مع ضوو...داكشي عندكم مزعزع كتر من الصرااع لي كااين على نظام الحكم الداتي...

خنساء: يااااك اسي؟!!

جاوبها هاتف بإجاب مطلعها عليها:واايه كيف كاتسمعي...نتوما راه خاصكم لاهااي تفصل بيناتكم...اما انا صعيب عليا لحاال...

خنساء: وشنوو داباا حناا غانبقااو معلقين هاكاا؟! حتاا لإمتااا؟؟شوف فياا نشوفيك اطاجين الحوت حتاا توافق ليناا لالة حياة على خاطرهاا؟!!

عبدو حك على لحيتو و قال برجاء: اكون خير...

ردت عليه بنفاد صبر: نتا فينما ندوي معاك تبدا علياا اكون خير اكون خير و شي خيير ماشتو...(يلاه سمعاتو غايدوي و قاطعاتو) وغاباش نكونو واضحين ونصيحة من عندي.... راااه يا طير بيا ياا غايطيروني لييك...

عبدو وسع نضراتو:هياا بغيتي يطير ليا لفريخ؟!ونبداا ندور فزنايق وانا كانهضر بووحدي

خنساء تنهدات و قالت: حس بياا عفااك...انا راه بطا علياا غير فقااش نتجمعو انا وياك فداار وحدة اعبدو...

جملتهااا الأخير مجاات غير فودن عصاام لي كان دايز من حدا لبيت و سمعهاا...تشوكااا فبلاصتوو و ودنييه صفروو...مشاات داكيرتو نيشاان لنهاار لي لقاا فيها تصويرتها عندو...و جاا تصرعى منهاا و تبرى حتاا حلقو بغاا يخرج و رغم دالك مدارت غير لي فراسهاا و بقاات لاصقة فيه...طرطق عنقوو بنفعاال مغمض على عينوو....زير على قبضة يدووو حتاا تبرزو لعرووق وسطهاا من برى....بلا مايفكر جوج خطرااات...مشااا ديريكت لبيتو هز جااكيط منو بنفضة..لبس فرجليه و هبط صااعر مع درووج مبقاااش كااايشووف قدااامو....غاادي معمي بلأعصااب لي ملكووه و تاجه مقصدوو نيشااان ناااوي على خزييت معااه فديك اليلة...

عصاااام مشااا ديريكت خارج من الدرب للحومة وبالضبط فالقهوة لي كايكلس فيها عبدو قبل مايدخل للدار من مور مايساالي من المحل والخدمة ... مع وصل لرااس الزنقة وهو يبااان لييه خاارج من القهوة غاادي فاتجااه الدااار ... زير على يدو وسرع خطواااتو غااادي لعندو يللااااه غايدخل لدرب وهو يغوت عليه بصوت عااالي بااح : عبد الله ....

عبدو. دار عندو واااقف مع تقابل معاه نطق بتساؤل : خويا عصااام صاافااا علييك ...

عصاام عينو حمريين طالعو ليه القردة كارز على سناانو نطق بانفعال :اش بينك وبين ختي؟؟؟ ...

عبدو جاه على غفلة مافكرش فالجواب ونطق بلاما يحس: اءء... انااا ( شافو مخرج فيه عينيه وهو يتفافا ناطق ): كانبغيهااا ...

عصام خرج عينو مكنزز وعروقو تبرزوو ... مخنزر فيه بنظراات كون كانوو عينوو قرطاس كون تيرا فيه بيهم ...

عبدو عااد عرف راسو اش قال بتلفة والغفلة لي داار لييه ماعرف اش كايخرج من فمو : لا مكانبغيهااش ( غمض عينو محاول يصلح ): لااا لااا راه بصح كانبغيهااا

عصاام قاااطعوو بنهضة صاااعر حاك على لحيتو محاول ماينوضهاش معااه ويعطيه فرصة يدوي ويشرح ليه : شوووف اعبد الله رااه بربي ما باغي نحط علييك يدي ... وراك عارفني خااسر ومكانسوااش ... مباغيش نوض معاك الفضييحة قداام الدرب ... راه غير متحكم فرااسي وداير بوجه الجورة ...

عبدو تنهد :واانا اخويا واخا تنحرني مغانردش علييك ... وختك راه قسما بالله حتى ناوي معاها غا الخيير ... نيتي مزيااانة ومناويش نقز من الشرجم باغي نقصد البااب ....

عصام هز حاجبو مجول فيه الشووفة ونطق باهتماام : متاكد ... ناوي الزواااج ؟؟؟ ...

عبدو بايجاب : وحق ربي حتى بااغي نطلب يدها على سنة الله ورسولوو ...

عصاام بايجاز :واخا ... ماقلتي عييب ولكن عندك يوووماااااااين ... ( بتأكيد ): يومااين بالحساااب الا ماجيتيش لدااار وعرفتك باقي كادور بسااحتهااا .... وديني .. ودييني اعبدو حتى غانسااا رااك ولد الدرب ونسا العشرة وغاتشوف مني الفاااس لاااخر ...

عبدو بلع ريقو مفكر انه مزال ما دااوي مع موو وباقي ماواافقااات لييه ... سكت بلاااا حتى رد ...

عصام طول فيه الشووفة : اش قلتي اسي عبدو ... قاد عليهااااا ...

عبدو حرك راسو بايجاب : كوون هاني اخوياااا ... مايكون غير خااطرك انا غانجيب الواليدة ونجييو حتى لعندكم ان شاء الله....

عصام بايجااب : واخاااا ... علم خنساء النهار لي غاتجيو فيه ... وبلااما تسيق الخباار راني دويت معاااك ...

عبدو بموافقة : اييه واخاااا ... كون هاني غاتبقى بينااتنااا ...

عصاام شاف فيه بتأكيد شاير بصبعواا بجوج : يووماااين ... وا ديرهااا فبااالك ....

عبدو ابتاسم ليه هاز نفس غير بزز ... وعصاام ضرب على كتفوو وزااد من تمااا غاادي فحااالو مخليه كايسووط ... مالقا حتى حل من غير يوافق على يوماين والا عمرو يحلم بخنساء حيت عصام مستحيل يخليهم على علاااقة بللااا موجب شرع وهو عاارف ... اكيد مغايبغي حد ينعت فيه ولا فختووو وحقو الطبيعي ...

زدح رجلة مع الارض معصب : اجاا ما فكهااا مع الواليدة دابااا .. بففففق ...

خشا يدو فجياابو طاالعة لييه واتااجه لداارهم راسو هايم كايفكر كيفاش غايفاتح مو فالموضوع وهو مابقاش عندو الوقت ... وعصام انساان مكايتفاااكش والا قال لكلمة مايبغيش يرجع فيها كيفما مايبغيش لي يخوي بييه ... ولا يقولو الحاجة ومايديرش بهااا ...

صباح جديد عبدو فااق بكري منبر ... توضا وصلااا وبدل علييه عااد هبط مع الدروج ... دور عينو فالداار مابانتش ليه موو عرفها غاتكون باقا فبيتهاا .. تقدم لجيهتو لقا الباب محلول وهي كاتصلي ... كلس على السرير كايحك فليحيتو كايخطط كيفاش غايفاتحها فالموضوع حيت مايمكنش يزيد يتسنى كتر ويرجع فكلامو وهو دار مع السيد ..

حياااة سااالاااات وهو قرب لعندها بايس على راسها : الله يقبل الواليدة ...بيخير

حياة بابتسامة :. الحمد لله ... الله يرضي عليك اولدي .. فقتي بكري ليوم ماشي من عوايدك ..

عبدو هز يدو : اودي حتى نكون نعست بعداااا .. راااه ماشفتش غمضة دياال النعاااس حتى صبح الصبااااح ...

حياة هزات حاجبهاا : علاش اوليدي ياااك لاابااااس ... مالك اش لي خلاك بلا نعاس ..

عبدو تنفس بعمق مخاطبها بلا ضوران فالهضرة : شوووفي امي غانجيك نيشااان ومن اللخر... انااا باغي نتزوج ونكمل ديني ...

حياة بابتسامة عارفاه اش غايقول : ايوا اوليدي هاداك هو النهار الكبير عندي لي نفرح بيك ...

عبدو كمل كلامو : شوفي امي... انااا راه من خنساء نخلاااق ... ماباغيش نتزوج بغيرهااااا والاااا ناخد وحدة اخرى.. كانبغيهااا بالمعقوول وهي لي باغي نكمل معاها حيااتي ... عارفك محاملااهااش وماموافقاش عليهااا ولكن الواليدة الله يحن علييك الا كنت عزيز عندك غاترضااي عليااا وتوقفي جنبي...

حياة الضحكة حابساها من الدااخل وكاتشوف فيه بلاماا تقول حتى كلمة ...

عبدو : الله يرحم بيها الواليدين امي ... ديري ليا خااطري يااك انا ولدك الوحييد وتبغي لياااا ناخد شي وحدة ماباغيش ... ونكون فجيه وقلبي فجييه ... يلااه معايا برضاك نخطبوها هاد اليوماين

حياااة قاطعاتو بصرامة مخنزرة : سكت ... سكت ...

عبدو : وا الواليدة الله يحن عليك...

حياة مقاطعاااه : رااني قلت ليك مانسمعش حسك ..

ساط بنفوور وهي هزات تليفوونهاا مدوزة نمرة خنسااء لي كااانت يلاااه فايقة من النعااس كالشة قدام المرااياا كادوز مكعباات ديال التلج بماء ورد على بشرتهااا ... شافت النمرة وجااوبااات مكملة داكشي لي فيدها : اهلااا خااالتي حيااة ...

عبدو غير سمع صوتهااا تشوووكاااا مخرج عينوووو ماعارف باش تبلااا ...

حيااة مجهدة ليه الصوت : اهلا بنتي خنساء اش خبااارك لاباس عليك ..

خنسااء بايجاب : ولله الحمد اخالتي نتي مزياانة كيف بقيتي ؟؟ ..

عبدو مصدووم مافااهم والو كاايسمع فالحوار لي بيناتهم وكيفاش كايهضرة حال فمو ...

حياة : وا الحمد لله هاحنا كانعديو .. ياا بنيتي تسنيتك الباارح تجي عندي تشربي معايا اتااي ماجيتيش ...

خنساء : والله اخالتي حتى كنت ناااوية ودايراك فبالي ولايني راااه مالقيتش الوقت لي نحك فيه راسي تعطلت فالخدمة وعييت ... ولكن ضروري ندوز عندك ...

عبدو باقي على نفس الحاااالة مشوكي من كلامهم وكيفاش كايدويو مامتيقش ودنو وشنو كايسمع بالمرة ... كايرمش وهو مخرج عينو ...

حياة ابتاسمات : ايوا ابنتي مافيها بااااس ... ولا عرفتي شنو ... خلي هاد البراد نشربوه مجموعين عندكم فالدار ان شاء الله...

خنساء بعدم فهم : اءء .. كيفاش ياك تافقنا .. ولكن انا راه باقا كاعمااا دويت مع عبد الله ... مسكين خليتو الباارح غايطرطق معارف فين يصد ماحيلتو ليك ماحيلتو لياا ههههههههه ....

عبدو عاد فهم البلاان وبيلاااا كانو مدورينو بيناااتهم وهو ما جايب لدنياا خباار شد على راسو بلااا حول ... زي الاطرش في الزفةة

حيااة : ايوا ابنتي كاعما تعدبي رااسك هاهو كايسمع فيك اصلااا ههههه...

خنساء طاح ليها التلج من يدهامخرجة عينيها : اءء لاااا ماتقوليهااش .... واايلي حراام علييك ...

عبدو نطق مخاطبهم : لااا بزاااف بزااااف هاادشي ... اناا متاايب لله معااكم نتوووماااا يخاف منكم الوااحد ... دابا عاد تأكدت راه بصح كيدكن عظيم .. العفووو ...

خنساء ضحكات : ههههههههه وا غير باش تعرف اش باقي تابعك فالمستقبل ههههههه هادشي غير نبدة من شنو غاتعيش ... ولكن واخا هكاك اخالتي حياااة كنت باقا باغا نزيد نطلعهاا عليه ... وندخلو من عين البرا ونخرجو عين المخييط ...

عبدو بلا حول: زعما الكمارة علاش تحشمي راه ماتكسابيهااش. ..ولكن الهضرة ماشي دابااااحتى نشوفك وحسابي معاك هو لخر ..

خنساء بطنز : ههههه ايوااا خااص تشكر ماماك لي تاقات فيك وجه الله اما انا مزاال مابردليش القلب ههههه

حياة : ايوا انا ابنتي انا كبيدتي هشيشة ... ماقديتش نزيد نخليه مهموووم هنههه .. كيشتي الولد عندي مسكيين خاصو غير السبة ويدخل فاكتئاب ههههه...

عبدو خنزر فيها وااقف : وااااا اناااهزيت يدي معااكم برب ... نتومااا قسما بالله حتى ابليس يخاااف منكم ...

زاد من تمااا كايسووط حاس بالشمتة حيت ضحكو عليه ولكن فنفس الوقت مرتاح حيت لقا مو اصلاا مفاهمة مع خنساااء ... هم وتزااح على ضهرو كان متقل علييه ..

فاليوم التالي... عصام كان دااخل مع نسرين يلاه جااو من عند الطبيبة لي مشرفة على الحمل ديالهااا...

نطقاات مبتاسمة و هياا طايرة بلفرحة:ناااري صوتو دقات قلبو مباغااش تحيد من ودني...سمعتي شحال كاان كاايضرب بجهد تبارك الله...

جاوبها بإجاب مبادلها نفس الإبتسامة: معلوووم ... الله يحفظو و يكتب لينااا نشوفوه...

نسرين هزات كفوفها بجوج برجاء:اميين يااربي...عرفتي ملي سمعت قلبو هكاك كايضرب واحد لإحسااس فشكل اول مرة نحسو......اوووف فقاااش غير غادووز هاد ست شهوور لي بقااات خلاااص باش نشوف ولدي...جااايني الحال باااقي بعيييد بزاااف....

عصام:مااابعيد وااالو...سدي عينك حليهااا هااهيا داازت...

نسرين ضحكات و سدات عينيها و حلاتهم...هزات حاجبها و قالت بطنز:هاناا سديتهم و حليتهم ومازال مداازتش...

عصام ضرب فيهاا و دااز كاايقول: جمعي عليااا تااني دااك تبرهيش ديالك معندي ليه ݣاانة...

ردت عليه نسرين تابعااه كاتضحك: ههههه واااش معندييش لحق نضحك مع رااجلي...ماالك معقول بزاااف هاكااا ماالك...

باقا كاتهضر معااه وتضحك عينيهاا كايلمعو بفرحة حتاا داازو من حداا لكوزينة لقااو خنساء عاد سالات من توجاد لغداا بحكم صباح محلاتش رانيا لي تكلفات بلمحل و هيا بقات فدار وجدات لغداا و جمعاات حيت نصيرة صباح كامل دوزااتو فلحماام...

قرباات عندهم و بتاسمات غير لعصاام بلا ماتشوف فنسرين نهائيا...

نسرين عرفاتها مغادويهااش بتاسمات ليهاا و قالت: اهلا خنساء كيف داز صباحك....

خنساء مااعبراتهااش عطااتهاا لعين الناقصة بلاصة الجوااب...

شافت فعصاام و قالت بطلب:عصاام مسالي بغيت ندوي معااك عفااك....

نسرين دغياا جمعاات بتساامتهاا...خرجاات نفسهاا بنزعااج و حدراات راسهاا طالعة لبيتهاا فاقصااهاا....

عصام طلع حاجبو وقاال: اجي نتي واش مزاال هازا شوكتك على مرااتي...

خنساء:تستااهل و لا ضلمتهاا؟!!

عصام: بركة نعلي شيطاان....واااا بحلوفي حتااا بكيتها داك نهاار عليهم و سمعتهاا لي مايتسمع...وصاافي الله يهديك رجعي لميااه لمجريهاا و نتي مبقا ليك غاا تيري فيهااا...

جوباتو بعناااد: مغنرجع لميااه لمجريهاا حتاا يقولهاا لياا مخي...

عصام عقدهم فيهاا و نطق مباغيش يبقا يتجاحد معاها لايصدق تاني مقربلها عليها: دوي شنووو بغيتيني؟!! راني زرباان تابعاني لخدمة غير ساالت ليهم هاد صباااح...

بما ان لموضوع مهم فمجاتش داكر معاه فيه فلكوزينة و هما واقفين.... جراتو من يدوو و دخلاتو لبيت لݣلااس...

فركات صباعها بتوتر ملحوظ...بلعات ريقهااا و شافت فيه مبتاسمة بخفووت و قالت:احم...هو فلحقيقة اخوياا...انااا(سكتاات مقدرااش تكملهااا دارت يديها ورى عنقهاا كاتحك فيه و هياا حشماانة)...

عصام عرف علاياش باغا دوي و زيد عليهاا كان منتاضر امتاا غاتفاتحو فلموضوع حيت تيقتو فعبدو كبيرة و عارفو راجل و عندو كلمة تاع رجاال و غاايقصد البااب.... و لكن مبغاا يقول واالو حتاا تجي لمبادرة منهاا و تحكي ليه...

نطق بإنزعااج مصطنع: شنووو و اش غاتبقااي تمدغي فلعضرة طلقينااا...

خنساء خداات نفس عميق تشجعاات و قالت:ع.. عبدالله ولد دربنااا...

عصام حرك راسو حابس الضحكة غابزز لايتفرش و نطق بنبرة تابتة:مااالو...

خنساء:بغاا يجي يخطبني عند باا غداا ان شاء الله الى كتاااب...

عصاام سكت لتواني معدودة و قال مبتاسم:ااه فخبااري غايجي يخطبك..و بيوماين قبل...

خنساء بحالا صرفقتيهاا فديك اللحضة مافهماات واالو... وسعاات فيه نضراتهاا و رمشاات فيه لعدة مرات كاتحااول تستوعب شنووو قال...لفجأة حلقهاا نشف...تبتاات فيه الشوفة و نطقاات بتلعتم و هيا مشوكية فبلاصتهاا لونها تخطف:اءءءء...ف...فخباارك غايجي يخطبني....ولكن؟!! كيفاااش!!! من امتاااا....

عصام تسند براحة على لحيد مربع يدو لعندو و رد عليها: لمهم عرفتو غاايجي...كيفااش و قتااش و معاااش.... دااكشي مكايهمكش...

خنساء هزاات فيه حجابنها بجوج دايرة فيه نضرات تاع من نيتك كاتدوي و عاوداات قاالت بنبرة ستفهاام: كيفااش مكايهمنيش واش كاتعلم لغيب؟!؛؛غاافهمني كيف عرفتي رااني مفااهمة واالووو؟!!

عصام بتاسم و جاوبهاا مخربق ليهاا شعرها: بلاا متحااولي تفهمي الغزاالة د خوهاا ... غير غاايضرك رااسك...انااا من جيهتي ملي بغاك هاد ولد ناااس و قصد البااب...الله يكمل بلخير....

خنساء عاارفة عصاام الى مبغااش يبوح بشي حاجة مستحيل يبووح بيهااا واخاا تعوااج مغااتدي منو حتااا كلمة راسوو قااسح...مبغااتش تحكر علييه...بلخصوص ان عندهااا طرقهاا الخاصة بااش تعرف الى بغاات يكفي تخدم جزء صغير من عقلهااا و غاتقلع من طيرى كيف سااق لخباار....

مكاان عندهاا مادير ديك ساعه الى تبتااسم حادرة على راسها متبتة عوينتهاا فلأرض...

نطق عصاام بجدية: بعداا واش نتي مرتااحة لهااد زوااج....هااد السيد راضية عليه و عااحبك؟!! ولا غير بغيتي تزوجي بيه بااش تسمااي مزوجة فعينين النااس؟!!

خنساء:اناا معمر همووني نااس و لا فيقوني من نعااسي...اخر حااجة كانفكر فيهاا هياا هضرتهم و كيفااش كانباان فعينيهم...عبدو راجل مزياان و الله يعمرها داار...بغاني لحلال و رتااحيت ليه...(بتاسماات و كملاات خدودهاا موردين بخجل )و نجيك نيشااان اخوياا...مغانكونش كانكدب الى قلت ليك...نقدر ندور دنياا بطول و بلعرض...و ماالقااش لي غايبغيني بحاالوو...رااجل الله يعمرهاا الداار و ماجيتش غير هكاك و قبلتو يتزوجني...ولكن حتااا عرفتو رااجل دياال زماان و مغانلقااش بحاالو...

عصام بتااسم بجنب و قال:و حتاا هو راه واخا يدور دنيا كاملة مغايلقااش بحالك...(سكت لبرهة و عاود سول بهتمام) ولكن اختي غير واحد القضية....

خنساء حركات ليه راسها بمعنى "شنو"؟!!

عصام: زعماا بنسبة لموو...واش معندهااش مشكل...حيت زعمااا...(سكت ممكملهااش)

هياا فهمااتو شنو بغاا يقصد..قاطعاتو وقالت:حيت زعماا هو عزري و اناا فايت فياا زوااج جوج خطراات؟!!

عصام: اوى حيت نتي عارفة ولد واحد لي عندهاا و يمكن صعيب تقبل... حيااة مااشي من دااك نووع لي عقليتو متفتحة...غااتجيني عجب الى قلتي ليااا معندهاا حتاا تحفظ

خنساء: و هو فصراحة و بلا كدوب..هياا فعلا تحفضاات فلول على لموضووع...و لكن من بعد قبلات...ولد واحد لي عندهاا و ملي بغااني مقدراااتش تخسر لييه...

طبطب على كتفهاا و بتاسم ليهاا برضاء و قال:و ملي هاااكاااا مبقاا عندي مانقول الله يكمل بلخييير....و يتبت غرسك هااد لمرة

ردت عليه برجااء: أمين يارب...

بااقين كاايهضروو حتااا تسمع باب تاع داار تحل و دخل منوو العربي....

نطق عصاام قبل مايوصل لعندهم: باغا تدوي معاه داباا...

قلبهاا ضرب و هياا كاتحرك راسهاا بلإجااب....

دخل لعندهم العربي..باسو ليه على راسو...و ݣلس بجنبهم..دردشو معااه شوية و عااد قررو يفااتحوه فلموضووع

نطق عصاام بهدوء: و هو بصرااحة الوليد...بنتك باغا دوي معااك فشي حاجة..

العربي بتاسم على نيتو...و قال: اييه..دوي اخنيستي الله يسمعناا خباار الخير...

خنساء بلعات ريقهاا و حدرات راسها تاني مقدرااش تشوفيه....مطولة يديها لعندهاا كاتمسح فحنكهاا محاولة تخفي توترهاا.....فعلا كايتحدو ليهاا فهااد لأمور...ديك الجبهة و تخرااج العينين و الشجااعة مكااتعرفهاا فين كااطير...غاايتوصل للمعقول الطلامس و الضباابة كاتجي على عينيها...شاافهاا عصاام طولاات سكووتهاا...فهم انهاا مقدرااش تهضر بمعنى حشماات....

بتااسم و قال:هههه لمهم الوليد وجد ليناا رااسك...راه غايجيو شي نااس..طالبين و راغين فيد خنساء من عندك....

لعربي و سع نضرااتو فيه...لهضرة تحبساات ليه...حل فمو بندهااش غير مسبوق...دغيااا دور شوفة فخنسااء و بلا مايشعر نطق: عااااوتاااني؟!!!

عصام رد فعل باه جاب ليه الضحكة نطق بشرح: هههههه عاودتالت الوالييد ... هههههه

خنساء ميقات فيه : وليت ليكم طنزة اناااا ... بااز لوجهك نتااا كاضحك ...

عصام : هههههه وا شنوو نحبسهاااا ... هادشي لي عطا الله اختي هههههه

العربي بجدية : واخا ابنتي غا دوي مكاينش لي يطنز عليك .. غير هو شرحو ليا كيفاش هادشي وشكون هاد السيد ..

خنساء دلاات شنايفهااا : وا هو فصراحة ابابا .. نتا كاتعرفوا مزياان ...( سكتااات )

عصاام حرك راسو بلا حول : شحال فيك ديال مضيغ الهضرة كاتحشمي زعمااا .. باينة الحشمة على وجه الطراح ايوا بااز ( خاطب العربي ): اسيدي عبد الله ولد با حسن الله يرحمو هو لي جاي طالب راغب فيد بنتك على سنة الله ورسولو ...

العربي رمش ونطق : عبد الله ... هكااك ... ايواا ودوا معاك نتاااا ايمتااا هادشي ؟؟...

خنساء حدرات راسها عارفة عصام غايحطهاا بوجهها قدام باها ...

عصام شاف فخنسااء لي كاتفرك فيدها : هو دواااا مع مولااات شي اما انا غاجيت فالطريق ...

العربي فهم :ممممم ... هكاااك ... ونتي ابنتي اش بان ليك فهاادشي ...

عصام : تا كيفاش اش بان ليك الواليد ... راه هي لي جايبة العريس هههههه عاد كاتسولهااا ...

خنساء خنزرات فيه ضاربة على كتفو : وااااا البشاار زعما راه جبتك باش تعاوني ماشي باش تغرقني عولنا عليك بكري ...

العربي ابتاسم : وعلااش غايغرقك ابنتي مالكي دايرة العيب ... فهاد الوقت قليل لي ولا كايتسنى رزقو يجي حتال لعندو ومافيها باس الا كان ديال المعقول ... كل وقت ووقتو وعادي الانسان يتعرف دابا على السيد لي باغي يشارك معاه حياااتو المهم هو النية تكون مزيانة ... غير هو ابنتي وقبل ماندويو على السيد خاص نشوفوك نتي واش نتي متاكدة من هاد القرار ... زعما واش مستاعدة تعاودي تدخلي فشي علاااقة جديدة مرة اخرى ...

خنساء شافت فيه : ايوا ابااا انا مدايرة حتى حاجة لي تخليني نسد على راسي ... تزوجت جوج مراات وماكتاابش يكملو ... وعااد غير الا مانجحتش فواحد جوج تجارب نبقى بلاااش... حتى انا باغا ندير داري ووليداتي وكيفما سيدي ربي حلل الزواج حلل الطلااق مانيش دايرة الحراام ...

العربي بتخوف حيت طبعاا راه اب ومايبغيش بنتو تتاخد قرار غلط مرة اخرى لي ممكن يكلفها كتير : حتى انا ابنتي ماقلتش العكس ... غير هو خاصك تعرفي انك تزوجي جوج مرات وتطلقي ماشي سااهلة.. والا بغيتي تدخلي هاد المرة تاني فتزويجة اخرى انا مانبغي ليك فيها غير الخير ولكن خاص تصبري وتكابري باش سيدي ربي يتبت ليك الغرس ... وتكون عارفة مزيان فين غاتزطمي ..

خنساء : مايكون غيرالخير ابابا ... التالتة تاابتة ان شاء الله هههههه ..

العربي ضحك من سابع المستحيلات يوقف قدام سعد بنتو ولا يمنعهاا خصوصا انها كاتباان فرحاانة : واخااا الالة انا مانزيدك غير الخير وعبد الله دري ضريف وكانعرفوه مزيااان ... طااش فصغرو حتى عيااا ومن بعد دار عقلو ... راجل ديال المعقول وانا من ديما عزيز علياااا ... وعاد نتي ويااه تربيتو فحومة وحدة وكل واحد فيكم كايعرف معدن لاااخر ...

عصام طول فيها الشووفة : اييه اباااا كاايعرفوووو بعضيااتهم الله اودي حق المعرفة كااع ..

خنساء رمشات ماباغااش تشوف فييه عاارفاااه داوي على يامات الصغر وشحاال شحفاتو هي وياااه كانو كي الفردااات ... نطقات مخاطبة بااهاا : وا فصراحة ابااا نتا عارفني مكانخبي عليك واالو ... السيد دويت معااه وتكلمناا ماشي عااد مدة هادي ... وعاد هو محالو حداياا فالخدمة راك عارف يعني كانعرفو مزياان وزيد قرا معايااا فالصغر ... كانعرفو حق المعرفة كيف قلتي ... وارتاحيت لييه ومني خطا هاد الخطوة وبغا يتقدم درت النية ... وبغيت رضاتك علينااا الا كمل الله

العربي بايجاب : حتى هادا كلاام ابنتي ماقلتي عييب وانا رااه مانزيدك غا الخير وهو لي نبغي ليك ... ديرو معاااه شي وقت يجي هو ولالة حيااة نتكلموا فالموضوع والا تفااهمناا اناا مانزيدكم غا دعيوااتي يكمل عليكم الله ويهل عليكم ...

خنساء باست على يدو :لهلا يخطيك عليا اباااا ... رااه غايجيو غدا ان شاء الله غير تكلمو بينااتكم ...

العربي ضحك حيت بانت ليه زرباانة .. نطق بموافقة :والا علييه خير البر عاجله ... حتى هادا نظر مرحبا بيهم غدا ان شاء الله ...

خنساء وسعات ابتساامتهاا وعصاام خربق على شعرهااا : مابقااا ليك وااالو وتكملي الشرع ههههههه ...

خنسااء بعجرفة : الشرع غير اجي وكملوا ههههه ... خاص تقد علييه ولاهيلا قالك تكملي الشرع ... كرهتي نتاااا

عصام بلا حول : باااز ... انا واحل غير مع لي عندي عاد نزييد فوق منهاا بغيتي ليا 36 ... لا اختي غير بصحتك ..

خنساء : ايوااا سكت راااه لي ماوصلش لعنب كاايقووول خااامج ... ( وقفااات ): نوض نوجد راااااسي بحرااا نلحق ههههههههه ... راااه جاااييين فيااا الخطااااااب ....

فقلب داار الساايب....كاانت نصيرة غادة جااياا لابسة عليهاا قفطاان خفييف فلباج مشمرة على دراعهاا...كااتجري و تقول ماجريت ... كا تقااد هناا ولهييه محااولة دير جهدهاا كامل باش ماتنسا حتاا حاجة للخطااب لي مابقاا ليهم غير ساعات قليله و يحضرو...دنياا مطرفة و معطرة داكشي كامل لي موجدة لضيافهاا على حقو و طريقو معند الواحد مايقول فيه...واخاا خطبة غير صغيرة تاع تعارف فقط و لكن ختارت دير كلشي متول و مقااد ديال تحميرة لوجه..مكبرة ببنت خوهاا الوحيدة باغا تدير لناسهاا فدخلتهم اللولة لعندهم احسن استقبال و ضيافة دايزها لكلام قايمة بشغلهاا على احسن وجه...

تقدمااات للكوزينة لقااات نسرين باقا واقفة كاديكوري فطبااسل لكبااار لي غايدريسا فيهم لحم لمبخر لي كان مزال كايطيب فخاطرو...مفرشة ليهم الخص و مدورة بيهم الخضرة مصلوقة بمختلف انواعهاا من جنااب مزوقاها بليصوص و الماييص منضرهاا كايشهي...

دخلاات عندهاا نصيرة ضرباات طلة على طبسيل اللول لي زوقاتو و خلاتو على جنب بان ليهاا مغيز هو هداك مالقات ماتقول فيه..من ديماا نسرين عندهاا مع زوااق و البروتوكول فلماكلة غير البنة لي خايناهاا فيديهاا...

مشاات نصيرة حلاات على طنجرة و هياا توسع نضراتهاا:ناااري اميمتي كاينة فلكوزينة بحالا مكااينااش....شوية و يكمل دجاااج طيابو...شحاال وصيتك بااش تنقصي عليه ملي يوصل لنص طيبة...عااجيك الحاال الى هزيتو وكلو يتفرتت فيدي ؟!!

نسرين بعدم اهتمام مركزة مع دريساج: رااه واقلة نقصت ليه مبانش لييك...

نصيرة بعصبية: معامن كانهضر...مع وحدة الطيااب بااري منهاااا...اناااا لي خاصني لعصاا خليتوو لييك...خلاهاا مولاهاا...لي دوي عليه جريييه...

نسرين: عوض ماتبقااي واقفة كاتنݣري علياا حيديه لا يزيد يفووت فيه الطياااب...حيت لي عطاا الله داباا عطااه غاا عتقي لا لقيتي ماتعتقي...

نصيرة خنزرات فيهاا و خرجاات لاطة من لفراان...حطاات فيهاا دجااج مستفاه فيهاا على ضهرو...دهنااتو و دخلاتو لفراان يتحمر....

شافت فلمونضا لي مزال محطوطة وقالت مرفعة صوتهاا:ديك لموناضة يااك قلت ليك حتا هياا حطييهاا فتلاااجة علاش محطيتيهااش ...وااش نااس غاايتوضااو بيهاا و لا غايشربوها تݣرعهم؟!! يااااا نسرييين الى سولو شكووون لي كاايفقص هزي صبعك...

نسرين بزربة هزااتهاا حلات تلاجة بزربة كاتستف فيهاا...

نصيرة جبداات ديسير تبداا تغسل فيه...ردخاات شبكة فوق لبوطاجي و قالت: زعمااا شحفة لي كانشحفهاا معاااك ملي كانزيديك تعاونيني فلكوزينة مكايشحفهااش الصايم فلحاال سخوون....

نسرين:و صافي هاني ستفتهم..وحتاا طباسل قاديتهم خااص غاا لحم يوجد...

نصييرة دورات عينيهاا للفورنو: دابا لي بغيت منك هو...

نسرين قاطعاتها:ما بغيتي مني واالو..اناا غانطلع نبدل علياا نااس مابقاا ليهم والو و يجيو يلقاوني ببيجامتي...راه ملي فقت واناا واقفة فلكوزينة...بركة..

نصيرة ساطت و كملات داكشي لي فيديهاا مخلياهاا تمشي تبدل عليهااا....طلعاات نسرين لبيتهااا حلاات شعرهااا لي كانت مصيبااه من قبل خلاتو مطلوق...كتفاات بميكاب سامبل فوجهاا خفات بعض لهالات بلونتيسيغن مع لبودرة من بعد دارت ماسكرة لرومشهاا و ݣلوص وردي لامع لشفايفها مع فغااجو لحناكهاا...لبساات جوهرة فزرق بحزامهاا جات لاصقة معاهاا بلخصوص انهاا مع لحمل تزاد الوزن ديالهاا و ولا البلدي كايجيهاا خطير.. دارت اكسيسوارات بسيطة من باݣ تاع لمغياج فصبعهاا و مݣانة فيديهاا و ديبوكل كبار فودنهاا...

خرجات من لبيت و هياا دوز من حداا بيت خنساء لي يلاه سالات تحضيرات..ضربات طلة بانت ليهاا قبالت لمراية كادير اخر اللمساات...كاتبان فرحانة بزااف و عيونهاا كايلمعو بسعاادة و هيا فأبهى حلة....بقفطان فلحمر مغلوق بتوب رومي و فصالتو عصرية مبين طايتهاا بومبة و كل حاجه فبلاصتهاا...عليه رشيمات خفااف و محزمااه بحزاام رقيق عاقداه فجنب...دايرة ميكاب سامبل بارزة بيه ملاميحهاا و محددة بيه عيوننهاا فقط...حاولات ما امكن ماتكترش...اصلا بشرتهاا تهلات فيها نهار قبل بسوان فاعل تارك فصاالون الشي لي خلى وجهاا يبان منور و طايح عليه سر....زينهاا حر بمكيااج كتير ولا قليل كتبان كاتهبل....شعرهاا سرحاتو مزيان بلبلاك رشات عليه سبراي منعش و نفخااتو مزياان و لواتو من لتحت بلبابيليز فارقاه من لوسط بين وجهااا عامر و بان كتيف و عاطي لعيين...لبسات كوغميط تاع دهب بخاتمهاا فيديهاا....و ساعة دهبية راقية فليد اليسرى مع حلقاات فودنهاا و كولي دهبي رقيق فعنقهاا....

قربات لعندهاا نسرين بخطوة و نطقاات بإعجااب:مشاء الله شحال جيتي كاتحمقي...

يتبع...