بنت السايب الجزء 40

رانيا ݣالسة مع سماعيل وعتيقة كايتغداو مع بعضياتهم...

نطق سماعيل بإعجاب مبنن مع راسو:مممم الله وشحاال توحشت طياابك...باقا البنة هياا هيااا الله يعطيك الصحة ويحفض ليك دوك ليديدات...

عتييقة ردت عليه بابتسامة:بصحتك...

رانيا:ياك مغاديش تزرب تاني بحال ديك لمرة؟!!غادي طول معانا واحد الشوية...

سماعيل:وعلى حسااب أبنيتي..الى خرج شي بروجي ملعق راه منقدرش نݣلس ونخليه ونفلتو من بين ادي...

رانيا تنهدات:اوى هياا تاني غاتزرب كيف العادة...وتغبر بلأعوام....بحالا مشناكش ݣااع.....ابابا بغيتك تبقاا معاياا..

رد عليهاا بتسامة:ولكن بغيتي مكلتك...شرابك...مصروفك لبااسك..وحتا لي كادو...او لا لا؟!! وباش نوفر ليك هادشي كامل ومايخصك والو مخاصش نفلت حتا فرصة تجيني..

رانيا خدات نفس معمق ومردات عليه بوالو...فكل مرة كايستعدر ليها بنفس الحاجة...ومكاتعرفش باش تجااوبو...

نطق بتساؤل:فكرتي بعدا مزيان قبل ما دخلي شربكة مع صاحبتك...مخفااكش البيع وشرى رااه صعيب وكايبغي صبر...ماشي فشهر لول يبان ربااح...

رانيا:معلوم مفكرة ومقتاانعة...وفرحانة من لفوق حيت حلينا لمحل وغنبداو بجوج...وزيدون ابابا ماشي غير لبيع وشرى لي كايبغي الصبر...رااه أي خدمة الى مكانش عندك نيت الصبر والله مطول فيهاا...

سماعيل صغر فيها عينيه:واش نيت فاهمة فهاد الضومين ولا غداخلة مساطحة فيه وصافي؟!

ردت عليه بهدوء:شوية...ديجاا تعلمت من عند ماما شحال تاع لأمور فلمحال...

سماعيل:مهم...نتي دابا جربي والى بان ليك داكشي غادي مزيان كملي...بان ليك داكشي فيه غا خسران لفلوس...ضربي دوميتور لحاجة أخرى....(كمل بحدر)وخااصك تردي لباال مزيان لشريكتك...ماشي غير حيت صاحبتك تعمي عينيك و تخليها دير مابغاات...خلي صحبة فطريق..ولخدمة فطريق...ماتخلطيش بيناتهم...

نطقاات عتيقة بنفي:ولاواه حتا نتا ماتزيدش فيه...و رااه حتا هياا حاطة مال جوفهاا تمااا... وعارفه شنو كادير...وزيدون خنساء كانعرفوها مزيان وكبرات معاهاا...وماشي غريبة عليهاا....بنت الناس الله يعمرهاا داار...

سماعيل هز فيها حاجبو:اه الله اودي كانعرفوهاا مزياان حق المعرفة...والحومة كاملة كاتعرفهاا ماسهلاااش وتشطح قبيلة وتجيهااا قليلة...عاد غاتحير فهااد النية لي عندناا...وراه مقلت عيب...ضروري تحاسب معاهاا...درهم الى خرجاات تعرفهاا فين مشاات...وتحااسب ماتبقااش دايرة معاها داك الصوااب الخاوي والتقة العمية لي خرجات على شحال من واحد...انا راه لحسااب نديرو مع خوتي ومي وباا...بااش هاكاا مانتضر لا انا لا هماا...(شااف فرانيا)فهمتي ابنتي...

رانيا عوجات قنوفتهاا بعدم اهتمام...هضرتو على خنساء دخلتها من لودن وخرجت من لخرى... نطقاات بنبرة عادية:ايييه فهمت...أصلا شحال من واحد كايكون رااد لباال وحاال عينوو حتاا لحد..ويلى كتااب الداار بيه رااه كادااار...

سماعيل عرفهاا مغاديرش بهضرتو:اوى الله يهدي مخلق...ربي عطانا عقل كانديرو بيه لخايبة والزينة...(بتاسم)نخاافك غير ترجعي على هضرتي شي نهاار وتجي تبكي علياا...ديك الساعة غادي نفكرك..

عتيقة وسعات نضرنتهاا:اناااري اسماعيل مالك ديمااا كاتسبق لعيب...محناا على فاالك...عرفتي شنو...بركة ماتبقا تهضر غي على لفلووس....كولو عافكم وقلبو عليناا هاد لموضوع...ماتوحلو هشاااي لينااا....

لعشية تعاشات....كانت نسرين فلكوزينة كاتوجد شي حاجة تاكلهاا...نهار كامل مكلات والو....ماماهاا خارجة وخوهاا فلخدمة باقي مجاش...بوحدهاا فداار...خرجاات تنهيدة حارقة من صدرهاا وهياا كاتفكر فمشكلتها لي مزاال ملقاات ليهاا حتاا حل...لوقت كايدوز وكل نهاار كاتقول غاتجيهاا استدعى ديال الطلااق من لمحكمة...مقدرااش تخيل حالتهاا كيف غاتكون فداك نهاار...الى محماقتش ماتقولهاا لحد.... غمضات عينيهاا بتتاقل و محسااتش حتاا زيراات على شفايفها بعصبية ولاحت لموس ليكانت كاتقطع بيه مطوعاااه لڤابو نيشااان بلغدايد...حطااات يديهاا على جبهتهااا و زيراات على ملاميحهاا كاتقاوم رغبتهاا الشديدة فلبكاء...

نطقاات بحرقة:ياااربي تشوف من حاالي..اهئ اهئ...عقلي قرب يخرج... غانحمااق...

شوية وهو يتسمع صوت الدقان فلباب...جمعاات دموعهاا ماسحااهم بصباعهاا مدوزاه على خدودهااا....خدات نفس عميق وزفراتو بمهل ومشات تحل....

مع لحلة وهيااا تبدل ملاميحهاا لتعجب فلبلاصة مطرطقة عينيها ملي شافتها قبالتها...اخر مكانت كاتوقع يجي لعندها...

نطقاات بعدم تصديق:خنساء؟؟!!!...

قدام باب الدار تاع رانيا واقف منير مع مو وبااه ومعاه ختو صغيرة وخوه لكبير....كان مفرنس غير بوحدو...مسكسف على لحالة ومطلع تشويكة...وضارب كوستيم فنواغ بلا كراڤاط...هااز مشموم تاع لورد فيدو...وخوه هاز كرطونة تاع السكر...

قربات عندو ماماه لي كانت لابسة جلابة مخزنية مطروزة فلباج مع شربيل وصاك صغير مع شال فلقهوي.. نطقاات بنرفزة كاتشوفيه قبل مادق:انا مفهمتش لاش هاد الزربة كاملة...كون خليتينا بعدا غير نعلمو الناس...حشومة غير حتا جيناا ودرمناا عليهم...

منير:هانية الوليدة...مزياان مانعلموهومش...باش مانعدبوهمش فتوجاد...(شاف فباه)زيد الوليد دق عليهم زييد....

حرك ليه راسو بلإجاب و تقدم بخطوات ودق...تواني حتاا حلات عليهم عتيقة....غير شافتهم وقشعات منير هاز مشموم تلورد مبين بطريقة مباشرة لااش جااي وشنو غرضو ومقصودو عندهم...عينيهاا خرجو منهم لقلوبة بلفرحة...

ونطقات موسعة إبتساامتهاا:أهلا اهلا...مرحباااا بيكم...

بتاسماات ليهاا مامات منير و قربات عندهاا مسلمة عليهاا...وسعاات ليهم عتيقة لحلة تلبااب... بداو كايدخلو واحد واحد....تحت نضرات سيمو لي كان واقف كايشوف فيهم بستغراب وهما داخلين...مشعرش حتاا بلع ريقو و دور وجهوو لجيهت عبدو لي كان واقف حداه...كأنو كايدوي معاه غير بلعينين...فااهم لبلان مزياان ومقادرش يشرحوو....حااس بشعور فشكاااال..ومعارفش كيفاش يفسرو...

خنساء كلسات فالصالون دايرة رجل على رجل كاتسنى فلالة لبنات ديال نسرين لي حطات ليها اتاي والحلوة وكلسات معااهااا..

نطقات بهدوء ووجها شاحب : مرحباا بيك ...

خنساء دورات ليها الشوفة ملاحظة عينيهااا لي تحت منهم ولا كحل بكترة البكا ووجهها لي صفار بقلة الراحة والماكلة : شكرا ... لاباس عليك نتي ؟؟ ..

ابتاسمات بدبول : هههه الحمد لله هاحنا عايشين وصافي ...

خنساء تنهدات بعمق : الله يصاوب وصافي ... حالتك ولا حالتو تشفي العداا ...

تنهدات : اودي انا عييت ... ( غرغرو عينيهاا ): ندمت ندمت على النهاار لي زغبني الله ومشيت لديك الطريق وخرجت على راسي وزواجي ...

خنساء : ايوا لاااباس بعدا عارفة راك دايراهااا قد رااسك ... مزيان الواحد يشوف فعايلو ويندم عليهاا.... راه كايقوليك مية تخميمة وتخميمة ولا ضربة بمقص.

نسرين عضات على قنوفتها حابسة البكية : وفاش غاتنفعني النداامة .... لي عطا الله عطاه دابااا وخلااياا رااه خديتوو ...

خنساء طولات فيها الشوفة : المهم انا جيت على قبل هادشي وبما انك باغا تصلحي غلطك وعرفتيه مزيان ونادمة عليه ... اذن تقدي ترجعي ليه وتحاولي تخليه يسمح ليك ... حتى دابا باقي الحاال

نسرين دبات شنايفها: وانا كرهت ولا لقيت كيفااش ... كون عندي الحل غاتلقايني هنا شادا حناكي وندب على زهري وميموني وصكوعيني نهار وليل ... وليت بحال الشرويطة بالتخمااام ... وقلبي غايخرج من بلاصتو على فراقو

خنساء طولات فيها الشوفة ونطقات بهدوء : والى قلت ليك انا قادرة نرجع ليك حبيب لقلب حتاا لعندك...(غمزاتهاا وكملات): شنو غاتقولي؟!!

نسرين خرجات عينيهاا فيهاا بلهفة : كيفااش غاديري مافهمتش؟!!

خنساء ضحكاات بعجرفة رجعاات بعض من خصلات شعرها المطلوق ورى كتفها وجاوبتهاا: ما عندك ماتفهمي...سر لمهنة... ولكن الغزالة كل حاجة وتمنهاا...

نسرين وسعات فيها نضراتها بندهااش وقالت بتساؤل :كل حاجة وتمنهاا؟؟؟

خنساء بعجرفة : هاد لهضرة هاادي نتي لي قلتيهاا قبل مني...نهار كانت حاجتي بيك...ودبا تقلبات لأية...

نسرين تنهدات بتدكر : ولكن انا معندي مانعطيك !!

خنساء رادة ليها دقتها : لااااا انااا مابغيت حتا حاجة من عندك...بغيت غير دياالي...(سكتات تواني وبتااسمات) : راك فهمتيني شنو كانقصد..

نسرين بلعات ريقها : لبراسلي!!! ....

خنساء ببتسامة استفزاز : اييه البراسلي ديااالي ... مني خديتيه حالفة نردو باي طريقة .. وربي جاب الفرصة حتى لعندي .... هاك وارا, ما فيها حزارة اولااا

نسرين حنات راسهاا عاضة على قنوفتهامن ناحية مابغاتش ترد ليها البراسلي لي كاتكساب ولي شحال كانت حاطة عليه العين ومني لقات الفرصة فاش تاخدو بغات تطير بالفرحة ولكن الا كان يقدر يرجع ليها عصاام اكيد مغاديش تعزو فيه... تندهات مخرجة النفس بعمق ونطقات : واخاا الالة جااك ولكن شنو غادي ديري !!! ...( بتفكير ): غير هو راه مانعطيه ليك حتى تقضي ليا الغرااض ...

خنسااء رمشات فيها : ماقلتي عييب انا غاندير فيك التقة وعارفاك ماشي دلمزاح حتى يتقضى غراضك عاد اريه ليا اللالة ...( بتحدير ): ولكن راااه هادي اخر مرة انسرين ديري شي زبلة ونفكك منهااا ... المرة الجااية بربي المعبوود حتى انا لي غادي نبقى ندق ليه فراسو حتى يعطيك برااتك ونجيب ليه المخيرة فالبناات ... ونتيكلعي معااك الصبع

نسرين ساطت : وصاافي رااه قلت ليك ندمت وعمري نعاااود ... هادي والتوبة على *حوب الشرفة ... غير فكي ليا هاد الجرة الله ينقي طريقك من كل شوك

خنساء بتركيز : مزياان ايوا عطيني ودنك امرت خويااا وركزي معاياا مزيااااااان ...

نسرين قربات عندها كاتسمع ليها باصغاء وهي كاتفتي عليهاا الرااي بالتدقييق كاتحاول تشرح ليهااا شنو غااادير بالتفاااصيل باش مايوقع حتى غلط ...وحتى نسرين متبعة معاها دقة بدقة حتى كملااات ليهاا الخطة بديطااي ...

نطقات باستفساار : وزعما غاايصدق لينا هااادشي ... عنداك غير نجيو نفكو جرة ونحصلو فما كفس ...

خنساء : اولااا اناا راه بنت الساايب والا قلت ليك الحااااجة الا وضربت ليها الف حسبة وحسبة ماشي بحااالك نتي وديك لي جااراك لمصايب غير مدرمين وعند بالكم مافحالكم حد فالقفوزية حتى خرجات عليك باينة هي مولات هاد الراي العور نسيتي واقلة راهما تقطع الواد حتى تبان حجارو، وما تمشي في الليل حتى يطلع نهارو، وما تصحب صديق حتى تعرف خبارو... تانياا هادشي غانديرو باااغا نصلح بين جوج واكيد غايتيسر بحول الله ... تالتا واهم حاجة هو انك خاصك ديري لي قلت ليك بالنقطة والفاصلة ماتزيدي ماتنقصي ...

نسرين دوراتها فرااسها مزياان بصمت مالقات حتى حل من غير تسايرها مايمكنش تبقى مربعة يديها حتى تجيها برااتهااا وتندب على يامها سودة : وااخا غانشوفو هادشي واش غايسلك معااه ...

خنساء : ايوااا مزيااان ... المهم مني تعرفي موك وخوك مغاكونوش فدار سيفطي ليااا قبل باااش نتوكلو على الله ...

نسرين بايجاب :واخااا ان شااء الله ...

حسات بالامل بدا يتسلل ليها شوية بشوية وفخاطرها كاطلب ودعي تفك من هاد الموصيبة وترجع لراجلها ودارهاا وعمرهاا دير شي حاجة لي تضرو ولاااا تخليه يغضب عليها ...

دخلو لدار بمرحبا وزيد لقدام من عند عتيقة لي مقداها فرحة....غادة بيهم لصالون...

نطقاات مبتاسمة:دخلو ݣلسو مرحبا بيكم...

ردت عليها حفيظة مامات منير بلطف:ربي يكبر بيك اختي عتيقة وسمحي لينا جينا بلا منعلموك غاحتا هجمنا عليكم...

عتيقة:ههه اويلي ماتقوليش هاكا دار داركم مرحبا فأي وقت...

رانيا كانت فبيتها متكية...سمعات لهضرة وهيا تنوض بفضول تعرف شكون لي جا...هبطات لتحت وهيا تهز حاجبهاا من الصبابط لي قدام باب تصالون وكرطونة تاع السكر محطوطة فلمراح....مافهمات حتا لعبة...

نطقاات عتيقة وباقة لإبتسامة مرسومة على ملاميحها:ونتا اولدي منير لاباس عليك امورك هانية؟!!

رد عليهاا بهدوء داير فيها التباتة:لحمد الله اخالتي...

رانيا ملي سمعات صوتو فدارهم بحالا صرفقتيها...بلعات ريقهاا بصعووبة ودنيهاا بدااو كايصفرو و قلبها ضرب... غمضات عينيهاا وحلاتهم كاتأكد انها ماشي فحلم...وبصح منير ليي جا مع عائلتو لعندهم...

بخطوات شبه سريعة تمشات لجهة الصالون...واقفة عند الباب رجليها مابقااوش باغين يتحركو جمدووو...بلأخص وهيا قاشعة لمشموم محطوط فوق لكوان تاع صالون...يعني باينة لاش جاااو

كلهم دارو شافو فيها فنفس الوقت... عتيقة بانت ليهاا مسمرة فبلاصتها ووجهاا قرب يتسقط من الدم...

ونطقات مبتاسمة: رانيا بنتي قربي سلمي على الناس...(عودات بتأكيد) زيدي دخلي...هه ماتحشميش...

دورات الشوفة لمنير لي كان متبت فيهاا الشوفة وبتاسم غامزهاا بلا مايرد ليه لباال حتاا حد...رجعات كاتغلي من لدااخل مكرهااتش تغوت بأعلى صوتها وتجري عليه و لا تشوهو قدام تريكتو متبتة راسهاا غير بزز...خدات نفس معمق ودخلات داير لخاطر لمها...بلا حتاا تعبير فوجهاا... قربات وسلماات عليهم فوق النفس...محاملة فيهم حتا حد بلخصوص منير

مشات لعند مهاا وقالت عند ودنها بنبرة خفيفة باغة تنهي داكشي لي غايوقع قبل حتا مايبدا: ماما اجي خاصني ندوي معاك....

عتيقه شداتها من يدها مݣلساها حداها ونطقات مخفضة صوتهاا:من بعد من بعد...ݣلسي تبتي حدايا...

سلمات أمرهااا لي الله وعلى وعدهاا وسعدهاا لعور ݣلسات بحالا ݣالسة على جمرة...وهيا مخنوووقة

نطق بات منير:واحد اسماعيل مكااينش...

عتيقة:لقيتوه خرج يصلي المغرب فجامع...شوية ويجي...(باقي مكملاتش هضرتها حتا تسمع الباب تحل)ههه عمرو طويل هاهوا جااا...

سماعيل مع دخل وهو يبدل ملاميحو لتعجب عرف راه كاينين الضياف فداار...

نطق قبل مايكمل خطاويه لقلب الداار كايعيط:عتيقة...

ردت عليه من الصالون مرفعة صوتها:غا زيد اسماعيل دخل...

تمشى بخطوات لجهة الصالون ودخل...شافهم و وسع ابتسامتو بترحيب...

وقال وهو كايسلم على بات منير:اهلا اهلا سي مصطفى نهار كبير هدا...

مصطفى:ربي يخليك...لاباس عليك كلشي بخير...على سلامتك...

اسماعيل:الله يسلمك...و مدة هادي ماتشوفنااا ههه حتا شرفنااا...

رد عليه كايضحك:اوى الدنيا وشغالهاا مكايتقاداوش...الله يخلي همهاا فيهااا...

عتيقة ناضت وقفاات:اناا غانوجد ليكم اتااي...مرحبااا بكم...خودو راحتكم الداار داركم...

خرجات وتبعاتهاا رانيا لكوزينة...قبل ماتنطق قاطعاتها عتيقة كاترد لما يطييب:سربي سربي جبدي كيسان تلبلار من لبلاكاار ولبراد الجدييد....وستفي لحلوة فطبسيل...

رانيا بلا حتا مقدمات نطقاات بصرامة:ماما مباغااهش...ماباااغااااهش...غاياكلو وغايتݣعدو فحاالهم...ماموفقااش...

عتيقة دغياا جمعات ضحكتهاا...هزات فيهاا حاجبهاا وقرباات عندهاا:شنوو..(دوراات سبابتها بشكل دائري) لا لا بلااتي عااودي اشقلتيي؟!!!

رانيا:راني ماشي كانرضع صبعي...عارفا لااش جااو...غير يمشي يدرݣ زلاافتوو...مباغاهش ماغانتزوج بييه...

عتيقة بتحدير:غاتزمي علياا داك لفم من شدان الهضرة ولا نهرسو لييك...سيد جااي قاصد لبااب مافيه مايتعااب وباغا ترضيه تااني..كيفماا رضيتي ݣااع لي سبقوووه...ادوي يلاااه؟!!علااه ماالو ؟

رانياا بدات غير كادور فعينيهاا...تغرغرو بدموع بلا ماتحس...مقدراش تقوليهاا على حاقيقتو وبلي أكبر شماتة عرفاتو فحياتها....كمداتهاا فداخل ديالهاا وبداات كاتفكر فشي تخريجة...مأكدة مليون فلمية انهاا عمرهاا ماتولي لمنير من بعد مداار فيهاا واخاا تنطابق السما مع لأرض...خرج من قلبهاا ونساتو عليهاا فخطرة...بنسبة ليهاا ملي مشاا وخلاهاا...مااات

وجدات عتيقة لضيااف اتااي مع لحلوة مع بعض المكسرات لي كانو متواجدين عندهاا فداك الوقت...

حطات ليهم داكشي...ورانياا غير كملات لحطان وهياا تخرج من الصالون ومن ملاميحهاا بااينة عدم الرضاا تماماً...غير مساعفة حتا تلقاا تخريجة باش تصدرو عليهاا...بتصرفو كان صغير فعينيهااا وزااد صغار حتااا غبر ومابقااش كايباان....يلاه كانت غادة لبيتهاا وهياا ترااجع...ووقفات بعيدة شوية على لباب مرجعة بعض الخصلات ورى ودنهاا كاتصنط....

نطق اسماعيل بترحيب كايكب فأتااي: و لاهيلا زارتنا البركة اسي مصطفى...مرحباا

مصطفى: ترحب بيك الجنة اخوياا...

اسماعيل شاف فمنير:زيد اوليد قرب لطبلة...

منير:الله يحفضك اعمي كلشي قداامي...

عتيقة: وغير قبلو عليناا و خلااص...

ردت عليها حفيظة:الله اودي لخير هداا...نتوما لي سمحو لينا جيناكم بلا مانعلمو...

عتييقة: ههه اويلي حتاا نتي قالك سمحو ليناا...دار داركم...

كبو ليهم اتااي...دردرشو شوية وعااد قررو يدويو فلموضوع لي جااو على قبلو...

مصطفى كايشوف فسماعيل وهو مبتاسم:اوى اشغانقوليك...حنا جاين ليوم طالبين راغبين الى كتب الله فبنتكم لالة رانيا لولدناا منير...

عتيقه وسعات ضحكتهاا...لجملة لي كانت باغة ومتشوقة تسمعهاا راه سمعاتهااا...لسانهاا كان كايترعد ففمهاا مكرهااتش تزغرت بلفرحة وتسمعهاا لدرب كااامل....رانيااا وجهاا تحقن بدم...حابسة راسهاا غير بزز...اكتر حاجه باغاها هياا دخل وتشنق على منير وتجري عليه وتسد ليه لباب على كمارتو لمقزدرة ودفل عليهاا...زيرات على قبضة يديهاا محاولة تهدن...

سمااعيل سكت تواني وبتاسم وقال:مرحباا...علاه حناا غانلقااو ماحسن منكم لبنتنى؟!!

مصطفى:الله يكبر بيك اسي اسماعيل ويطول لياا عمرك...انا راه غير قالو لياا رانياا قلت ليهم صافي بلا ماتكملو...الى بغااو عائلتها انا منزيدكم غير الله يكمل بلخير...

حفيضة: اوى لبنت راه كانعرفوهاا مزياان كبرات قدام عينينا كانحسبوهاا بحال بنتناا...الله يتاويهم بلخير...

عتيقة:امين يااربي...حتااا حناا اختي راه منلقاوش ماحسن منكم...

اسماعيل:ايه بصح حناا راه كانعرفوكم من زمان...مكانعتبروكمش جيران...راكم بحالا من لعائلة...

مصطفى:الله يكبر بيك كلشي هاكاك...حتاا حنااا...

اسماعيل شاف فمنير ونطق بهدوء:قولياا اولدي...فااش خداام و شنو كادير؟!...

منير بلع ريقو..تحنحن مقاد لكول تاع لقميجة ونطق:احم..هو فلحقيقة دابا انا مخداامش مزال كانقلب...غير كانبريكولي..لمهم مصروفي ديال نهاار كانصورو...

رد عليه مطول هضرتو:ممم كاتبريكولي...قااري؟!!

منير سكت تواني بداا كايتزير:اءءء...خ..خديت لباااك و درت لفاك واحد لعام...ولكن مكملتش...

رد عليه اسماعيل كايحرك فراسو ويهز فحاجبو شوية بشوية:هاكااك؟!! خديتي لبااك و مكملتيش ايه واخاا...وعندك شي داار بعداا ولا ساكن غير مع داركم...

نقز مصطفى داير ضحكة جانبية:ههه سااكن معاناا..وبيتو يجري فيهاا لخيل...وسمحلياا الى قلت ليك واااش فليوم لي نااس ولاو مقاتلين فيه غير على كروشهم...غايقدير يدير شي واحد الداار بحال زماناا حناا...الله يهديك...

اسماعيل بتااسم:وسمحلياا نتاا اسي مصطفي...صغر منو و كنعرفهم ديورهم لي يجري فيهاا لخيل مااشي بيتهم...(كمل بضحك ولكن مقصدها)ههه كون كاان جاامع رااسو مكمل قراايتو...خدام خدمة دياال بصح...كون رااه داارهاا...ولا كدبت....

عتيقة بدات كاتجمع ضحكتهاا وتزير على شفايفهاا لقضية بانت ليهاا بداات كاتحمااض...وراانياا عينيهااا

بدااو كايلمعوو..زاادت قربات بخطوة بااش تزيد تسمع...

نقزات حفيظة ونطقات:شوف...مكايهمش الداار...غااتسكن معاياا...وغانحطهاا فوق رااسي وندير فيهاا بحال بنتي وكتر ݣااع...

اسمااعيل بتاسم ونطق مبرد:ههه لا الالة بنتي راه كبرات فداار فيهاا تلاتة طااج..وبووحدهاا حتا لخوت معندهااش...الى جيتي تسكنيهاا عندك...بااينة غاايوقعو لمشاكيل لي مغاتحدش...حيت مامولفاااش...(عااود شااف فمنير ونطق بضحك)هيااا بلا منسولك على نوع الطموبيل و مشاريعك واهدافك لمستقبلية...بااينة مكااينااش يااك...

منير حس بيه وخاا كايهضر معاه بضحك ولكن مستفزو بطريقة غير مبااشرة...نطق مركز فيه الشوفة:غانجيك من لخر اعمي...انا غير درويش..وعلى قد حاالي...لمهم انا مصروف ديال نهااري كانقورو باشما عطا الله...غير عطيني بنتك وتهناا عليهااا وما تهز حتاا هم من جيهتهااا...

اسماعيل زااد ضحك:هههه اولدي فهمني...شتي درويش ولمسكين ولي على قد حاالو...نااس كايعطيوه الصدقة مااشي بنتهم...

مصطفى وسع نضراتو:وااقلة راك كااتحشي ليناا فلهضرة...ماالناا بناا ليك كانطلبو؟؟!حتا تبدا تهضر لينا على صدقة ولاا كيفاش...

اسماعيل:لا لا حااشة...انا مقصدتش هاد لهضرة....ولكن لولد عندك..باقي مامكونش راسو...(كمل كايضحك)ههه غا هز مشموم تلورد وقوالبو تسكر وجاا لعندناا...لي سولتو عليهاا يقولك مكااينااش...وااش اناا عندي بنت وحدة...وهيااا لعوينة باش كانشوف...وغانهزهاا نلوحهاا؟!!مالهاا رخيصة عندي...

رانيا وسعاات ضحكتهاا حتاا لحد...مقادهاا فرحة...كاتشفى فداخل ديالهاا عاارفة باهاا اشكايسوى....غايبداا يحشي ليه غير بلفن...ملي كاتولي لهضرة على لفلوس...كايزمط لبشااار....غايكرهو فدقيقة لي فكر يجي فيهاا عندهم...

منير بدااو اعصابو كايطلعو نطق بنبرة قوية:تلوحهااا؟!!دابا الى زوجتيهاا لياا غاتلوحهاا؟!!انااا راه كاانبغيهاا اعمي...وااش لفلوس اهم عندك لهاد الدرجة...غير اكون بفلوسوو ولبااقي لهلا يقلبو؟!!!

اسماعيل بهدوء:معلوم...علاه بااش غاتكون بهااد لبنت ...اشغاتوكلهاا؟!!لحب؟!!سمحليااا ولكن واحد بحالك..ماشي زوااج لي خاصو...اخر مخااصو يفكر فيه هو زوااج....دااكشي لي كايوخروه لي فلحالة ديالك...نتاا سبقتيه...

منير حس بلإهاانة فديك اللحضة... نطق مرفع صوتو:مختااريتش نسبقو حتااا وراني قااد بيه...وكانضمن ليك بنتك مغاايخصهاا حتاا خير...وخاا نعرف نحيدهاا من لحمي ونعطيهاا...

اسمااعيل:لا لا اولدي غاا خلي لحمك عندك معندهاا مادير بييه...وضامن هو الله...سير حتاا تكون رااسك...وتبني مستقبلك وتكون منك لكااينة..ورجع لعندي...الى كانت مكتابة ليك راه حتاا حد مايحيدهاا لك...

منير بإصراار:وهانتا ݣاع عطيتهاا لواحد بفلوسو ومكايبغيهااش...ويبداا يتكرفص عليهاا بليل وبنهاار و راحتهاا مغاتكونش..غايعجبك لحال ديك الساعاات...شتي دور لكرة الأرضية كااملة...مغااتلقااش لي يبغيهاا ويخااف عليهاا بحاالي...بنتك راه كاتجري ليااا فدمي....ملي كانبغي نحط راسي على لمخدة ونعس...كانفكر فيهاا غير هيااا...

اسماعيل رد عليه بهدوووء: وكووون كنتي كاتفكر ملي كاتحط راسك على لمخدة كيفااش دير لفلووس...كون رااك مطفرو...وماشي غابنتي لي غاتجيك...ربعة من بنتي لي غايكونو ديالك...غااطبق الشرع على أصولو...

مصطفى ناض غايوقف وقال ناهض فمنير:نوض نوض تݣعد...السيد راه باغي بنتو تعيش فلڤيلا وراجلهاا يكونو عندو لمشااريع...بلا ماتعدب راسك مااهياا ديالك...

اسماعيل حتا هو ناض وقف كايضحك كايهضر مبرد بحالا حتا حاجة مواقعة:ههه مالني غانبغي ليهاا تكرفيص....علاه ماتستاهلش أخوياا الڤيلا..ولا قصر ݣااع...

منير تعصب وبلا مايشعر نطق:وبقااا تسنااا تمااا فهاداا لي عندو لقصر...حتاا ضفر عندك الشيب هنايا...

اسماعيل:لعيب ولعاار الى ضفرااتو فدااركم...ضافرااه فداار الباهااا..لي غاتبقاا فيهاا معززة مكرمة عايشة كيف لقايدة...حتاا يجيب ليهاا الله رزقهاا الصحيح...ملي نعطيهاا نكون مهني عليهااا...

رانياا حساات بيهم خاارجين وهياا طير لكوزينة....كون لقاات طير بلفرحة كون طاارت....منير زير على قبضة يديه...مقدر يرد عليه بحتاا كلمة والى غايولي معاه فلمعاطية وشد ليا نقطع ليك

زااد خرج محااملش راااسو ولا لموقف لي تحط فيه قداام عاائلتو خداا اكبر تبهديلة...وغير بلفن.... مصطفى حتاا هو تعصب مكانش كايضن وااش غاايطرى هاادشي كااامل...عتييقة تمشاات معااهم موصلاهم لباب كاتحصر فدااخل دياالهااا وكاتحلف على سمااعيل لي بقاا فصالون غير بعينيها...

اسماعيل كمل كاسو تاع اتااي فهدوء و هز شوية اللوز كاياكل فيه و خرج من الصالون غادي طاالع لبيتو يبدل عليه...

رانياا ستاغلاات الفرصة ومشات كاتجري لصالون...سمعاات لبااب تسد ومهاا جايا داخلة...دغيااا هزاات داك لمشموم تاع لورد وهياا تحل شرجم مطوعااه عندهم لزنقة...جا فوق راس منير نيشاان....غمض على عينيه حس بقلبوو تخنق...وكرز على سناانو مرااااضيش...

نطق مصطفى كاايشوف فيه كاينعت فلمشموم:هاااا...شوفي حتااا برهوشة تااع بنتو شنوو داارت...هاادو هماا لي بغااني نتنااسب معااهم...وعااائلة زينة هااادي...

منير مسح على وجهوو:صاافي الوليد صاافي...دير بحالا موقع واالو...

مصطفى:هااادشي كااامل وموقع واالو...خااصني عااام بااش نهبط هاااد تبهديلة لي تبهدلت على اخر يااامي...زيد قداامي...الله يخليك بلخلااا نتااا ويااهم....

عتيقه دخلاات شاااعلة يسحااب ليهااا بااقي فصاالون مالقاتوش وقالت كاتساؤل معصبة :فاااين البااااك؟!!!

رانيا هزات واحد صابلي بشكلاط كتاكل فيه بستمتااع حركات شفايفها بستفهاام وقالت: معرفتش....واقلة طلع لبيتو؟!!

نطق سماعيل من وراها:هااهواا باهاا...اشبغيتيه....

عتيقة كاتغوت صاعرة:وااش حمااقيتي...اشهاااد لحاالة درتي لناااس...

رد عليهاا ببرودة:علاه اناا درت شي حاجة...مفخاابريش...على حد عرفي قلت ليهم غير دااكشي لي كااين...ومخرجتش معااهم لعييب...عاادي

عتيقة:لااا عااادي...غير بينتي ليهم بلي درهم هو حياااتك وتمووت عليه....

اسماعيل ضحك:ههه وشكوون هاداا لي معزيزش عليه الدرهم امرااتي لغزاالة...

ردت عليه بلغووات:الله ياااربي انااا كانغلي من لداااخل وهو مبرد بااارد كااايفقص فيااا...قوليااا حتااا لإمتى غاتبقى مخمر هااد لبنت هنااياا وتبداا تخير ليهاا فلخطاااب...وفييق اسماااعيل فيييق. رااه ݣااع قدهاا تزوجو وراه بولاادهم...

رانيا:ماما بلا ماتعصبي..وااحد بحاال منير راه مانشوفش فيه حتااا الشوفة...ومزيان نيت ملي صدرهم

اسماعيل:لا غاا خليهااا تعصب نيييت..واااش نتي شوية لابااس...واخاا نعرف نلوحهااا فطارو تزبل و مانعطيهااش لواحد بحال هدااك...معند واالديه حتاا رياال...وغاايسكنهااا مع داك لقوم كامل...عااجبك لحاال بنتك تولي تراسااا عليهم وتشد نوبة على طواليط؟!!هاداا هو رزق لي باغة ليهااا...

عتيقه بخنقة:مااشي هاكااك...حتاا اناا راه بنتي ومقطرة ليااا من لعين...ومانبغي ليها غير لخير...ولكن من حقي نشوفهاا عروسة واحد النهاار...

قاطعهااا بحدة:سمعي نقوليك...اناا بنت وحدة لي عندي...مغااديش نفرح بيهاا نهاار...ونحزن عليهاا عمري كاامل...ونقولهاا ليك من هناا...كانحلف ليك بالله...الى مكاانش كامل مكمول يتمنااه أي واحد...بقرااايتو بفلوسو بخدمتو ..والله لا خداهاا...وخااا تكووون هيااا لي باغاااه...غاارتاااحي

رانيا كاانت كاتسد فلمحل كاتسورت فيه...و خنساء حداهاا...

نطقاات مبتاسمة:ولاهيلا عجبني فطاصيلتو...برد لياا لقلب...جاي تايق فراسو قالك...يسحاب ليه اناا شايطة...

خنساء:تي راه كاين بنادم لي مكايحشمش...غزاا فيه عمي سماعيل... انا مكرهتش كون خرݣ عليه ديك لكرطونة فوق راسو وفلقو بدوك لقواالب...

رانيا ضحكات:هههه نتي كاتعرفي بابا عندو لقميع غير بلفن...كايعطي غير بلبارودي...

خنساء طرطقات عنقهاا بعيااء:عرفتي حاسة بواحد لعياا...مشهية غير نهز صطولتي ونمشي لحمام نتنشر فسخون نكمد عضامي...خسارة مشاا لحاال...

رانيا:حتاا نتي...غداا ونسدو بكري ونمشيو مجموعين..(كملات بطلب باغة تستدرجها)اشبان ليك نمشيو لعند مول سندويتشات لي مقابل مع الجردة...تشهيت غير شي سندويتش من عندو...يا ختي ودااك لفرييت مممم....يلاه يلاه...

خنساء:غا خلي لمرة اخرى...تغديت مزيان ليوم...مافيااش ݣاع الجوع..

رانيا جراتها من يديها:وتي غايلااه اشخااسرة...مغانتعطلووش...

خنساء تنهدات بعياء ومشات معاها دايرة ليها لخااطر...وصلو لعند مول سندويتشات لي مكانش بعيد بزاف على لمحاال...عبدو كان مع السيمو كايتسنى على جمرة تماا فجردة فقااش يوصلو...شاد التيل كايلاهي بيه لوقت...

كلساات رانيا وخنساء فوحدة من الطبيلااات لي محطوطين تمااا كايتسناااو فالصوندويتشات دياالهم يوجدو ...

عبدو غير بانو ليه وهو يبتاااسم ونطق مشير لسيمو : هاهما جااو

سيمو ماعندو كانة غير عاقدهم ... اصلا محاملش يتلاقا مع رانيا ولا يشوف فيهاا ومعارفش السبب ولا شنو لي مخليه يتحرق من لداااخل تقول شاعلة فيه العااافية لي مقادرش يطفيهاااا ...

عبدو : زيييد زييد ...

سيمو بنفي : لاااا غير سير نتا قضي غرااضك انا ماعندي ماندير تمااا ...

عبدو هز حاجبو عارفو علاش كااعي واخا مقال ليه والو : راااه الا بغيتي يبرد فيك الدم نووض نفهمو شنوو واااقع ... بغيتي تبقى مربع يديك ودافع كبييير بلا فاااايدة وكاتغلا غاا راااسك ... وريشك منفوووخ سوقك هاداااك ... وديرها فباالك حتى الا مداهاش منييير راااه موجود لي يديهااا ونتاا ديك الساعة شد بولة تسعين ... وخلي كبرياااائك وتعفارك ينعك رااه اشريف لي كايبغي كايتناازل مرة مرة ... تقبلها ولا كاعلاا تفهمها

زاد من تما لجهتهم وخلااه كايسووط مامستاعدش يواجهها بداكشي لي كايحس بيه .... خاايف لا يطيح فتجربة فاشلة مرة اخرى ويندم اشد الندم ... وفنفس الوقت مقادرش يستحمل يشوفها كاضيع من بين يديه بلاما يدير حتى خطوة ...

عبدو وقف عليهم : ااسلااام ... واناا كانقول علاااش الليلة منورة اليوم ...

خنساء خنزرات مني شافتو ولا داير فحال خيالها فيننما مشاات تلقاه : ذكرنا السمن والعسل ... ما هو غا سحت الليل واقف على راسي ...

جر كرسي و كلس حداهاا : مقبولة منك ابنت السايب عارفها ماشي من القلب ... ( شاف فرانيا ): وفين اسراق الزيت ... اش كاتعاودي ؟؟؟ ...

رانيااا ميقات : اش غانعاااود غير الصدااع وفريع الرااس ... خليها على الله وصافي ...

عبدو : مممممم مكاينش لي خطاوه المشااكل ...

خنساء : ربي شكون عرض عليك تجي تكلس معانا واش فينما ماتلقى مادير تجي تفرع ليا مخي ... معارفش راه اللي كايجي بلا عراضة كايكلس بلا فراش...

عبدو بابتسامة : وشكون عندي من غييرك ...

خنساء عوجات ودارت جيهة سيمو شارت ليه يجي يكلس معاهم ... تنهد وجا كلس معاهم مكايشوفش فرانيا بالمرة : سلااااام ...

خنساء : وعليكم السللاام ... مالك جايب شبابك علينا غاالي فحال خيزو فليالي

سيمو ابتاسم : لا لا غير عيااان وصاافي ... نتي مزيااانة ؟؟...

خنساء : بيخييير ... يفرقوني غير شي نااااس ونكون فوق السلك الحمد لله ... ( مسبلة عينيها فعبدو ): خاص غير كحل الراس يفوتك ...

سيمو ابتاسم : هه الهضرة عليك الحادر عينيك

عبدو فهمها وضحك : هههههههه الله يكبر بيك ابنت الساايب ... ولايني رااه لي من عندك سمن وعسل واخا يطون قطران

رانيا بطنز : هههه عيات مات الحمق ما تعض فشاربها . قاليها من جهتي غير قطعيه ... هي دياالكم ههه

خنزرات فيه : مزيااان بعدا مني عارف راسك ... يااالااطيف ... خزيت

رانيا شافت فسيمو لي مدور عليها وجهو حتى الشوفة ماطلعهااش فيهاا متجاهلها كأنها مكاينااش واخا موالف يدابز معاها ولكن كان يقلب غير على سبة لي يكلاشيهااا فيها ويبقاو شد ليا نقع ليك ... ولكن هاد المرة مامسوقش لوجودهاا اصلااا ... يلااه غاتسولو وتستفسر منو وهي تسمع صوت بااهااا بالجهد وراهااا مقفزهاااا قلبها تهز من بلااااصتووو : رااااانيااااااا ....

عبدو طلع عينو فاسماعيل وابتاسم ليه بهدوء: اهلا اسي اسماعيل على السلامة ...

اسماعيل حرك ليه راسو بابتسامة خفيفة واخا معاجبو حال : اهلا اولدي عبد الله لاباس عليك الامور هانية واحد الواليدة ...

عبدو بشكر حاط يدو على صدرو بمجاملة : الحمد لله يسول فيك الخير ...

اسماعيل شاف فرانيا غير بعينيه بمعنى يلاه راني كانتسنى وهي توقف مودعاهم : نخليكم دابا غانمشي ... نشوفكم غدا ...

خنساء : الله يعاونك ...

ودعوها من غير سيمو لي معاودش شااف فيها بالمرة نتجنب تلاقا عين بعينها ....

اسماعيل زاد هو وياها ونطق بعتاب واخا نبرتو باردة فالهضرة : واش ماشفتيش الحال مشااا ولا كيفاش ؟؟ ...

رانيا فهماتو : لاا راه يلاه سدينا المحال وجينا ناكلو هناااا ... وتلاقينا مع عبد الله وكلس معانااا هادشي لي كاين ...

اسماعيل بايجاب : ممممم مزيااان فهمت ولكن كيفما كان الحال مجاتش تكلسي مع جوج عزاراا نتي وصاحبتك فهاد الوقت ...

رانيا تنهدات : ولكن ابابا راني ماكنتش كالسة مع شي حد براني ... عبدو ماشي اي واحد ونتا عارفو بحال خويااا ... ونهار ماكنتيش عمي حسن الله يرحمو هو لي كان راجل على دارهم ودارنا ... وحتى مني ماات رااه عبد الله ماقصرش معاانااا

اسماعيل شاف فيها بتفهم هو كايعرف عبدو مزيان ومتأكد انو داير رانيا بحال ختو وكتر تربا وكبر معاهااا وعمرو يضرها ولكن بحال اي اب كايوصي بنتو وخايف عليها : اييه انا ماقلتش العكس .... عبد الله ولدنااا وبحال خوك عاارف مزياان هادشي ولكن الناس معارفينش .. وكلها وشنو غايقول ... انا ماقلتش ليك ديري الحبس على راسك ولا ماتدويش معااه ... غير هو كل حاجة وحدها ابنتي ... ومانبغي حتى حد ينعت لا فيك والا فيييه حتى هو ... نتمنى تكوني فهمتي...

رانيا حركات راسها بايجاب عارفة باها مني ماشي من النوع لي كايدير ليها الزيار وكايعاتبها غير بالتي هي احسن من ديما كابدوي بارد وفنفس الوقت مكايبغيش الحاجة لي دوا فيها مرة بالسياسة يعاودها ولا تجاهلهاا حيت اكيد غايولي ليه معاها كلام اخر ...

خنسااء كملات ماكلتها بهدوء وعبدو شاف هيها ونطق باستفسار : اليوم كنا جايين وبان لينا منير وعائلتو مقصدين داار راانيااا وااش جاو عل قبلها ..

خنساء يلااه غاتجاوبو على شنو وقع وهي تهز عينيها فسيمو لي كايشوف فيها بفضول كبيير باغي يعرفها شنو غاتقول بلهفة ... ابتاسمات جنب ونطقاات باغا تخلي دمو يغلااا : مممم ااه وعلامن غايجيو فنظرك ؟؟؟ ... طالبين راغبين فيدهااا ... ( تبسمات وهي كاتشوف فسيمو لي وجهو ولا حمر وعروقو بااانو كارز على قبضة يدو وكملاات ): وراه لي هرب للزواج هرب للطاااعة

عبدو هز حاجبو عارف ان رانيا واخا يوقع لي وقع مايمكنش تقبل بمنير ... شاف فيها مطول ودور وجهو لي سيمو لي باين غايطرق وابتاسم فاهمها لاش باغا توصل ونطق : ههههه بصح الواحد هو لي يضرب الحديد ما حدو سخون ... مايبقاش راخي راسو على الخاويااات ( باغي يخلي سيمو يحس بالخطر ) : الوقت كايمشي وشكون قاليه وغاديش يطير بيها شي حد شي نهار وتفلت من يدو ... حيت بغاها بصح راه قصدهاا ...

خنساء ردات عليه وهي مركزة مع سيمو لي بدا يغزز سنانوو بغيرة باينة وظاهرة ليه على وجهو بحال الشمس فالنهااار عينيه حماارو فالبلاصة : واييه مالها غاتبقى ديما ديال راسها ... ( حابسة الضحكة من حالتو ): يبطر بيهااا قبل مايسبقوه ليهاا تبارك الله عليه ...

سيمو الفار بداو يطلعو ليه من راسو مابقاش قاد يكلس معاهم ولا يسمع فهاد الهضرة لي كاتحمي فيه العااافية فقلبوو ... نااض وااقف باغي يخليهم وهو يشدو عبدو من يدو : شد الارض اصحبي ههههه

خنساء تشتتات بالضحك : هههههههه مايمكنش هههههه .. عار ربي شوف راسك فالمرايا كيف ولااا .. ها العار مالك دافع كبير شنو زعما نتا لول ولا لخر لي غادي تزعط ... اش فيها الا قلتيها ليهاا غاتنقص فيك يد ولا رجل

سيمو مهرب عينو مراضيش : اش كاتخربقي .... مكاين والو من هادشي ...

عبدو : ممممم مكاين وااالو عليها مني عرفتيها غاتخطب النهار كاامل ونتا معبس وكنتي غاطرطق غير بوحدك

خنساء : ايوا اسي غير هني بالك راه ماوفقاتش وحتى باها اصلا مابغااش .. غير برد فيك الدم ...

سيمو بلا ما يحس بدات ترسم ابتسامة على وجهو لي حاول مايببنهاااش دغيا جمعها ... ولكن حس بحال الا هم وتزااح عليه ... نطق مباغيش يبين : وانا مالي فيها اصلاااا ... اش دخلني فهادشي مافهمتش علاش كاتحاجيو ليا عليها ...

خنساء هزات فيه حاجبها : شنو زعما مهامكش!! ... ايوا اسيدي الا بقيتي هاكا ليوم ولا غدا يزوجوها للي حسن منو ولي يرضاو عليه ... وباها راه جا داباا مغايمشي حتى يلقى ليها شي رااجل ... وديك الساعة بقا مخرج عينيك ومصمر بحال التمتاال ...( بتمياق): رااه غاتبقى تستنى فيك حتى تهبط داااك النفخة ديالك ...عيني فيه وماقديت عليه

عبدو : وحق الرب حتى يلاااه قلتها ليه ... عييت معاه وراسو قاسح ... مني بغاها يقصدهااا ويصارحها الا كتابو داكشي لي بغينا ... مي هو لي فراسو فراسو ...

خنساء هزات على كتافها : خليه خليه حتى يفوت الفوت ويشد فبولة تسعين ديك السااعة ...

سيمو خنزر فيهم حس براسو بدا يدخلو ليه الهضرة للراس وكتاكلو فدماغو ... وقف مغدد : شوفو ليكم شي شغل من غيري ... مالقيتو مايداار ...

هز كاسكيطتووو وزااد كم تمااا ساخط معاجبو حاال حااس براسو غايحمااق مابين قلبووو عقلو وملاقيش حل باش يفصل بينااتهم ... رانيا عششات ليه فقلبو وكل نهار كاتزيد تكبر بلاصتها فيه ولكن عقلو مقادرش يتقبل الفكرة وكايرفضهااا ...

خنشاء كملات ماكلتهاا هي وعبدو وناضت : خاصني نمشي تعطلت ...

عبدو : تسنااي نوصلك ...

خنساء بنفي : لا لا بلاش باقي الحال اصلا دنيا عامرة ...

عبدو باصرار : براكة من العناد غانوصلك هي غانوصلك ... بلا كترة الهضرة ...

تنهدات بلا حول عارفاه معكس كتر منهاا ووطلات امرها لله مافيها لي يتغان ... داز خلص داكشي لي كلاااو وتمشى هو وياهااا بخطوات هادية وفصمت تحت الكمرة لي مضوية السمااا ... الجو روماانسي بزااف ونسيم خفيف كاايضرب فشعرهااا وريحتهاا كايستنشهاا بانتعاااش ... حاس بقلبو كل نهاار كايتعلق بيهااا ... حب كبير كايكنو ليهااا وللاسف مقادرش يخرجو حيت اكيد غايتلقى الرفض ... بكترة ماقريب ليهاااا بقوة ماابعيد منهاا وعلى قلبهاا وهادشي لي مخليه كايتقطع على هاد الفرااق ... قربات للزنقة غاضور وهو يشدها من ذراعهااا موقفها : خنساااء ..

دارت عندو منهدة عارفاه شنو باغي يقول : اش كااين ؟؟؟؟ ..

كايشوف فعينيهااا بحب كبييير : واش مغاديش طفااا العافية لي شاعلة فقلبك من جيهتي

خنساء رمشات بهدوء مطولة فيه الشوفة ونطقاات بصوت خاافت : ونتاا قادر تسكت صوت الضمير لي كياكلك من جهتي...( بنبرة مجروحة ): ماحدك مقادش تسكت صوت ضميرك عمر نار قلبي مغااتبرااا ... غير بلاااماا تعدب رااسك ...

زادت من تماا وهووزير على قبضة يدو ونطق بصوت عالي مسمعهاا ليهااا : كااانبغييك اخنساااء ... كانعتارف غلطت فييك ولكن رااه كاانبغيييك ...كانموووت عليك ...( ضرب يدو مع الحيط بقوة مخرج لي فقلبو ): رحميني وااش ماعيتييييييش .. ماعييييتيييش من هادشي ... باقي مابردتي ....

خنساااء بلعات ريقهاا مغمضة عينيهاااا بلااما تضور لعندو ولا تجااوبو ... شعور غريب حاسة بيه معارفاش تفسرو واش كره ولا ندم ولا شفقة .... ولكن لي متأكدة منو انو ماشي حب مستحيل تقبل انها ممكن تبغيه شي نهار واخا يوقع لي وقع ...

عض على فكو بلا حول مزير على سنااانووو وصدرو كايطلع وينزل بقوة مغزز كايسووط ... حيت يديه مكتفين ومقادر يدير والو باش يخليها تنسى لي فات

🖤 شكون فينا ماجربش ولا سمع حرقة ديال بعد الفراق، ?فاش كتكون تالف معارفش باش كتحس .... عارف غير بلي نتا كتألم من الداخل فصمت مقادرش على الفراق ... لكن بسيف عليك تقبلو حيث الطرف لاخر طلبو منك و لا حتى جبرك باش نتا طلبو ، كتكون مشتت و عندك أمل فرجوع و فنفس الوقت كتعرف بلي خاصك تكمل بوحدك حيت اكيد كتاخد غير الرفض وعمر لي كان يرجع ... باغي تبكي و حتى دموع ممساعفينكش واقفين وماباغينش ينزلو ... فاش كتغمض عينك و تنعس على نفس الذكريات كتحلم بها وهي لي مسيطرة على تفكيرك ،الحاجة لي فرحاتك واحد نهار كتولي كابوس بعد الفراق، كتبقا تسول راسك واش هانت عليه العشرة ولا نتا لي درتي علاش تهون ، واش قدر يسمح فيا ولا اصلا عمري كنت مهم عندو ، واش عايش حياتو عادي، وانا فأزمة كنصلي و ندعي الله يعوضني ... كاطلب باش يعطيك القوة تخرج منها، و كتخرج كتشوف الناس فرحانة و نتا ملامحك ذابلة كلشي باسل عندك،و كتقول واش مزال نتجاوز هادشي ولا للاسف غنكمل حياتي مهموم،واش لهاد الدرجة انا خايب باش يوقع ليا هاكا ولا حتى واحد ما كايستاهل يحس براسو مدمر و ينعس وودموعو على خدو، قلب ذنبو أنه حب بصدق و باندفاع ... وكاتولي تقول إلا كان قتل النفس العمد حرام راه لي كيقتل فينا كل حاجة زوينة عاد كيمشي جرمو أكبر من قتل النفس... فحالتو مايقدش يلومها ولا يحملها الذنب حيت هو المذنب الاول فحقها وفحق راسو ... للاسف غلط ومايقدرش يرجع لور يصلح غلطو ... 🖤

كانت خنساء كاتقاد فلغدا فخاطرهاا بحكم مامزروباش تمشي لمحل باش تحل....حيت كان يوم الحد و ختارت تاخدو هيا ورانيا عطلة يرتاحو فيه ويقضيو فيه أغراضهم....

دخل عندهاا عصام و نطق بتساؤل:مزاال مطاب لغدا؟!واش باقي معطل؟!

خنساء:نو غير شوية وصافي...علاش فيك الجوع؟!!

عصام:لا غير غادي خارج و...

يلاه غايكمل هضرتو وهو يقاطعو صوت التيل كايصوني،هزااات سربيتة مسحات بيهاا يديها بزربة و دوزاات لابيل...

خنساء:الو رانيااا نعام...(رفعاات صوتهااا)كيفاااش؟؟؟ نسرين طايحة سخفانة فزنقة؟؟(عصاام وسع نضراتو زغب تاع شعرو وقف فديك اللحضة...ركز فيهاا الشوفة بهتماام كبير و قلبو ضرب على جهدو من خوفو عليهااا...كملات خنساء بقلق)واخاا واخاا صافي هاني غانجي...

غير قطعات عليهاا و هو ينطق عصام بلهفة:شنووو مالهاا؟!!

ردت عليه بضيق مصطنع: معرفتش بضبط...لمهم قالت لياا رانياا بلي راه سخفانة فزنقة حداا دارهم ونااس مضاربين يفيقو فيهااا وهيااا مغيبة...

عصاام خلااهاا كاتهضر مامكملاش كلامهااا معااه وداار عاطيهاا بضهر رجليه سايقينو بلا مايشعر لعندهااا غاادي بلا عقل... خنساء غير ردخ لباب غادي كايجري طاير...وهياا ترسم ابتسامة خفيفة على ملاميحهااا،هزات طرف من لخيار لي كانت كاتقطع فيه باش تصيب شلاضة دارتهاا ففمهاا...وهيااا كاتقطع الباقي بشوية عليهااا مكملة توجاد لغداا...مخلية خطتهاا مسالية راسهاا كاتخدم غير بوحدهاا....

وصل عصام لعندهاا..لقاا مجموعة ديال الناس من الدرب دايرين حلقة ومجموعين عليهاا...زااد سرع فخطواتو و تمشى لعندهم داخل بينااتهم وهو مفزووع...و كيفمااا تخيل...لقاهاا سخفاانة على طولتهاا و حداهاا رانياا كاطبطب على حنكهاا و هي مغيبة مكيناش فهاد العالم...وجهاا شاحب وشفايفهاا مسقوطة من الدم باين انهاا لعقاتهاا ديال بصح وماسخفاات الى وبصح واصلة فيهاا للعضم...

عصام خاطرو ضياق عليه...شافيهااا بتحصر و بلا مايفكر جوج تلمرات...هزهاا بين يديه مستحمل طولتهااا وتماا غادي بيهاا لداار...

وصل عصام لداار و نسرين بين يدو مغيبة و بعض لخصلات من شعرهاا مليوحة على وجهاا مغطية نصو...تقدماات رانياا بخطواات سريعة كادق على خنساء بجهد بااش تحل...تواني حتااا جات كاتجري لجيهة الباب باش تحل...مع لحلة وهياا تخرج عينيهاا دايرة فيهاا مصدومة من لمنضر...كاتشوف متبتة الأنضاار على نسرين... عصام وسع لحلة تااع لباب برجليه مطلعهاا لبيتهم نيشان... خنساء شافت فرانياا لي غمزاتهاا بمعنى الأمور غادة مزيان...و كملو على خطاويهم تابعين عصام من لور...

حطهاا فوق السرير بشوية وهز واحد من ليبخفان لي كانو فوق لكوافوز رشهاا فضهر تاع يديه وقربهااا لعندهاا شامهاا ليه...ماهياا الى لحضات حتاا بدات كاتحل عينيهاا بتتاقل...وأول مجات عليهاا نضراتهااا هو عصاام...لي تبتات عليه الشوفة موحشاه لأقصى درجة بلخصوص و هو قريب منهاا بداك الشكل وحاط يديه على خدهاا....تمنات زمن يوقف وتبقاا معاه فديك الوضعية لي كانت مشتاقة ليهاا بلا قياس...

عصام بلع ريقو و هو كايشوف...ماينكرش بلي حتا هو موحشهاا بزااف...ومن اعماقو...مكرهش ينهي لخصاام وينسى فعلتهاا فحقو....ولكن مقادرش...شي حاجة فداخل ديالو مانعاه...

دغيا ستعقل عافط على قلبو...قرم حجبانو ورجع تخنزيرتو المعتادة ونطق بنبرة جافة:صافا؟!!

غمضات عينيهاا كاتصطانع الألم...وتسلات منو...حركات راسهاا بلإجاب حاطة يديها على جبهتها وقالت:أه صافا..شوية غير راسي كايحرقني...

عصام ناض من حداها و وقف مقابل معاهاا:نوضي نديك تشوفي الطبيب...

دغياا حلات عينيهاا ناطقة بنفي مقنع:لا لا بلاش...غير طونسيو لي دارت لياا هاد الحالة....فهاد لأياام ولات كاطيح ليا بزاف...

عصام نطق بإجاز مامكترش معاها لهضرة:واخا لي بان ليك...مايكون باس....

كمل على هضرتو و خرج فحالو من لبيت ..نسرين تنهدات بحرقة عينيهاا غرغرو...لإحباط سيطر على ملاميحهاا...

خنساء حركات ليهاا عينيهاا وقالت ليهاا غير بلإشارة باش تهدن ومادير حتا ردت فعل لي غاتصدق خارجة عليهم كاملين...عارفة نسرين صبرهاا قليل ودغياا كاتزبلهااا لواحد مايعولش عليهاا...

قربات لعندعاا ونطقات عند ودنهاا بخفووت:شوفي كلشي غادي مزيان... داباا خاصناا ندوزو لميطا التانية...واخاا؟!!

شافت خنساء فرانيا و نطقات بصوت خافت:ياكما نسيتي الطباشير؟!!

رانيا دورات عينيها لجهة الباب رادة البال...دارت يديها فجيبها وجبداتو منو عاطياه ليها...

رانيا:لا لا مانستوش...

مشات بخطوات سريعة لجهة لكوافوز جبدات هزاات منو كاس تاع لماا...هرسات داك الطباشير على جوج ودوبااتو فيه...

مداتو لنسرين وقالت:هاكي..شدي نزلي عليه كاامل شربيه...

نسرين خسرات ملاميحهاا لنزعااج وهياا كاتشوف فداك لكاس...طولات يديهاا واخداه من عندهاا يلاه غاتحطو ففمهاا وهيااا تراجع مغمضة عينيهاا:يعععع..لا مغانشربووش...

خنساء حمرات فيها الشوفة:شربيه قالاك...رااه هو لي غايطلع ليك السخاانة...

نسرين:لا لا كاانعيف...مابغيتووش...جيبي لياا شي حاجة اخرى...

خنساء رفعاات صوتها رادة لكاس لعندهاا :شتك بااركة كاتشرطي عليااا...واخليك عايفة...وخلي عصام يبقاا يشوف فيك هاد الشوفة الباردة.. ولوقت كايدوز وغايصيفط ليك برااتك...ويشوف من غيرك...وخليك نتي احبيبة دافعة الشيكي...

نسرين غير كملات هضرتهاا وهيا تخرج عينيهاا قلبهاا ضرب بخوف...خطفات من يديهاا الكااس بزربة..يلاه غاتشربو وهياا تبعدو من فمهاا

نطقاات خنساء بنفااد صبر:شنووو تاااني...

نسرين عينيهاا عمرو بدموع...ردت عليهاا بصوت مخنوق:الى مت قولو لعصام بلي كانبغيه...ودرت هادشي كامل غير على قبلو...اصلا كانموت مية مرة فنهار وهو بعيد عليااا...

خنساء:تي مالك دايرة ليناا فيهاا مسلسل هندي؟! داباا طباشير هو لي غايقتلك؟؟ كاتفقصي ياااختي كاااتفقصي...(يلاه بغات نسرين دوي وهياااا تنطق بعصبية)شربييي دغياااا...

بدون تردد خدات نسرين داك لكاس ونزلات عليه كامل..وجهااا رجع حمر قرباات تجيف خاطرهاا تروعاات....

خنساء بتاسماات و شدات من عندهاا الكااس:وادابا مزيان...مغاتجي فين تكملي لابيل لي تافقنا عليها حتاا طلع ليك السخاانة...

نسرين حركات ليهاا راسهاا بلإجاب ودعاتهم رانيااا ودعات معاها باش كلشي يمشي هو هدااك و خطتهم تنجح ومشات لدارهم...

عتيقة كالسة فالصالون كاتشرب اتاي مع حيااة وكاتعاود ليها على بلان ااخطبة وشنو دار ليها اسماعيل مع الضياف باغا تاكل جنابها من الفقسة ...

حياة كاترشف من كاسها : وا ختي الا جيتي تشوفي عندو الحق .... الولد عارفين مو قبح منها ما كااين وعندو سرب ديال الخووت باقين معاهم ولا خدمة مرسمة لا وااالو فين باغا تلوحي هاد البنت ...

عتيقة تنهدات : رااه ماقلتش العكس .. وا ندير ياالالة هاد منير مصالحش واخا راه فحالو داوهم ناس غامكحطين وجمعوهم وولاو بيخير ... ماعلينااا ايوااا ولي سبقووه وكل مرة ترد ليا وااحد لا هاذا قصير لا هاذا نيفو كبيرر لا هاذاا عوج لا هاذا عندو القنووفة ... وااش ماشي الغدايد هااادو اناا يااختي حرت ماابقيت عارفة ماندير مع هاد البنت وباهاا زااااد ليهاا فيييه باغي يبورها لياا تمااا ...

حيااة بلا حول : شغاانقولك .. كون مامجربااش هادشي غانقوليك غير زدتي فيه ولكن كيتك راني مكوية بيها حتى يانا .. مانلومكش اصحيبتي ...

عتيقة : اودي هاد الجيل ديال دابا ولاو يطيييرو يطييرو يطيييرو... حناا شحال هاذا العريس ماتشوفيه حتى لدخلة وماتقدي تهزي فيه العين ولي داروها واليديك بالسمع والطااعة ماتعاوديهااش ... وحتى الرجالة كانو يزوجوهم واليديهم ولي تحط عليها مو العين يقولها هي لي كااينة ...

حياة : احياااني فين هو داك الوقت ... دابا يالالة باغين يتخيرو ويتشرطو ولي مافيه لولة يجبدووهااا ... سوليني يااانااا راه مشيبني وحلف بحلوفو لا بغا يدك ليا الوتاد مع شي وحدة ...

عتيقة : شنو زعما مابغاش يهديه الله ... والو كاااع ...

حياة خرجات النفس بعمق: احياااني ... وتقوول يااختي واش بغا يشوف ليا فشي بنت المرااا ... تقول مسحوور ...

عتيقة خفضات صوتها دايرة يدها حدا فمها : وعنداك بصح تكون مديورة ليه شي حاجة عليهااا كحلين ليه كاع العيالات فعينووو...

حيااة ميقااات : لاا من ناحية مديور لييه مديووووووور نييت .. غير هو مديور من عند سيدي ربي ... ومديور ليه فالقلب مادارو ليه حد ظارها لراسو .... ( شدات راسها ): لاصق ليا لصقة العما فالضلمة فبنت السايب ... يبات يهترس بيها تقوول مدغجااا لييه كوون ما عرفتها ما باغاهش نقوول غااا شاعلة عليه المجاامر ... ولايني مانديش دنوبهااا هو لي دايرها لراسو ومعمرو بيها ...

عتيقة : وباش عرفتيها نتي ماباغاش ؟ ...

حياة : علاه انا يخفى عليا ولد كرشي ... شتي كون بغااتو كوون نهار رما عليها راجلهااا طلااق داني نخطبها ليه من الساايب على هو يتسنى ولايني راه هي لي جافياااه وقاطعة ليه ليااس .... كون جات عليه هو كون هوا ضرب عليها العقد ...

عتيقة : ومالها ياختي بنت السايب الزين والهمة والشاان والحداكة وحاارة نفسهاا فنيفهااا ... ومراة ديال الزماان بخيرهااا وحطيها على الجرح يبرى فينمااا درتيهااا لقيتيها قادة وقدود ... الف وحدة تمناهاا تكون عروسها ومن نصيب ولدهاا ... واخا هي قبيحة ولايني غير مع لي ضلمهاا لي ماجبد بااسهاا مايوصلو نحاسها ...

حياة تنهدات : ايييه عرفنااهاا لالة ومولاتي .. وماقلنااش حرة بنت غرة ... مافيها ماايتعاااب الصرااحة ... ولايني اختي مصالحاااش لولدي ... ماشي ديالو ...

عتيقة : وعلاااش مالهاا ؟؟ ...

حياة : كيفااش علااش !! ... السيدة راه مطلقة جوج مراااات ... بغيتيني نعطيهاا لولدي لي باقي عزري مزال ما شاف ماتشوف ... هادشي لي بغيتي ليه ...

عتيقة بتفكير : ايه فصراحة فهادي عندك الحق ... مجااتش ... مكاينش لي تبغي تعطي ولدها عزري لوحدة ضارباها بجوج تطليقاات ... واخا الصرااحة هادشي رااه مايبغيه لا ربي لا عبدو غير هو تربا فينا يا ربي السلامة ...

حياة : وهانتي قلتيهاا تربا فيناااا ... وكبرونا عليه جدودنااا ... نعيااو نبغيو نديرو فيهااا عاقلات ونسايرو الوقت بحال هادشي مكايدخلش لراسنااا ... وانا اختي ماكرهتش ليه شي عويتقة باقا يلاه مادة يديها للحنة تنسيه فخنساااء ولا فغييرهااا ... اما هي لاا اختي

عتيقة : والله يهديه ... هادشي لي غانقول ويهديهم كاملين ...

حياة : امين ياربي ... لله يهديه على راسو ...

خنساء تمشات بخطوات بطيئة كاطل على عصام من الباب ديال بيت العربي بان ليها كايمشط شعرو باينة غادي يخرج ... تستلات بالبلاطو لي فيدهاااا وبالخف سيفطات ميساج لنسرين علمااتهااا ... وتمشات لجهتو لصقات فيه البلاطو يديه ليهااا وبقات تابعاه من اللور ... يلاه غايحل وهو يقفو الكلام لي سمع كايتصنت على نسرين لي جبدات تليفونها على اساس مدوزة النمرة لماماها وكاتدوي معاهااا ... شاف خنساء جاية وهو يشير ليها تسكت حتى هي معاوداتهاش قطعات الزي وجات حداه طالقة ودنيها ... قرم حجباانو وهو كايستارق السمع للمكالمة لي دايرة نسرين

نسرين مدبلة عينيهاااا ودايرة فيها مضيومة كاتشكي وحلقها مخنوق : اودي انا دابا بيخير امي غير تهناي عليااا ... واكون جات غير على المرض هانية .. كية عصااام امي لي بقات فياااا حلفاات لا برات الشوفة اليوم هي لخرة ماطلعهااش فيا (تأفأفات ): وراني عاارفة اش درت جيت نداويهاا وعورتهااا .. مشيييت على قبل العكس ديال الولاد صدقت فحال الا باغا نسحر ليه ...

عصام حاط ودنو كايسمع باصغاااء ويتنهد فخااطرو وهو كايحاول يفهم

نسرين كملات على بحوطها : وا هاناا صدقت مطلقة داباا وخسرت راجلي وداري حيت بغيت يكونو عندنا وليداات ... وحيت حمارة بللاصة مانقوليه ها اش كاين خفتو يتعصب عليااا صدقت قايلة ليه رااني مشيت باش نعرف معاامن كاتخوني ... هادي هيا ديااال جات ترقعهااا وتقبااتهااا .. ( طلقات عينيهاا للشهيق ): اييه هء هء راني عارفة امي ويل ويل ...ولااايني راااه غريزة الامومة لي وصلاتني لهااد المااصل كااملة ... اووف اوووف ... اناا امي مابقيتش قاادرة على هادشي غاندير شي حاجة فراسي ماانقدرش نعيش بلااا عصاام مايمكنش ليا ... لي كحل الليام رااه كحل وانا مرادي كان الولااد صدقت منغصاها على راسي ... ومالقيت باش نفكهااا

عصام زير على قبضة يدو واخا فهم انها دارت هادشي على قبل الولاد وعارفها فهاد الموضوع حساسة وكاتدرم ولكن هادشي مكايبررش انها ارتاكبات غلط كبير فحق لي خلقها هو لول وفحق راسها وفحق علاقتهم كاااملة ...

تنهد ماد للبلاطو لخنسااء محاملش يزيد يسمع حيت حالتها كاتخليه يحن و فنفس الوقت غلطهااا الفادح مخليه مقسح قلبو ...

خنساء تنهدات عرفاتو باقي ماقتانعش باينة فيه وهادشي كانت متوقعااه ... حيت اكيد راه واخا تمشي على الولاد غلط غلط .. ولكن كان هدفهاا تخليه يحن من جيهتها شوية ويعرف انها ماقصداتش تآدييه ...

دخلااات عندها سادة الباب وراها نسرين شاافتهاا ونطقات بتساؤل كاتمسح فالدموع لي هبطات : شنو طرااا ؟؟ ...

خنساء حطات ليها البلاطو : كيف توقعنا باقي كااعي ...

نسرين دبلات شفايفهاا بخيبة : ياك قلتها ليك راه ويل ويل ... عمرو غايسمح ليا

خنساء بتمياق : وااو زعما انا معارفااش ... صبري على رزقك ونتي باغا طيري ... حنا دابا حننا قلبو شوية وبردنا العافية لي الداخل ولي بقاااا دابااا عليااا وعلى با العربي وبلان عتيقة وهاحنا فكيناهاا

نسرين : ايه ولايني با العربي كي غادي تقنعيه ...

خنساء : باك ااعربي مامحتاجاش نقنعو ... حيت من نهار خرجتي وهو كاينكر ليه على راسو يردك ... يعني غير غانلوح ليه الكرة وهو غايقوم بالواجب ... وعتيقة غدا تشوفيها جاات على الصباح كيف قلت ليها وديك السااعة ماااعند عصام فين يفلت ...

نسرين : على ربي ... الله يدوز هاد الطرح بسلام وصافي ...

خنساء :المهم نتي دابا خليك متكية وانا غانعلمك مني نبغيك ديري فيها غاتمشي فحاالك ... باش نقنعو يشدك تباتي

نسرين : واخاااا ... غانتسناااك ... شتي الا صدق هادشي اخنساء خيرك عمري نساه ...

خنساء : انا لي مابغيتكش تنساي هو هادشي لي طرا ليك باش ماتعاوديش تزبليها كيف ديمااا .... والخير ديريه فراسك وفراجلك ...

رمات ليها هاد جوج كلمات وزادت من حداهااا غادة لبيت لعند عصاام تكمل لي بدات ...

كان كالس فالبيت شاد على راسو باينة واااصلة بيه للعظم وتايه فالتفكير مقادرش يتبت على حتى شي قراار ...

خنساء حلات الباب منهدة ودخلات قربات حدااه : صافا اعصام ...

خرج النفس بعمق : حرت اختي مانكدبش عليك ... حاس براسي غانحمااق ...

خنساء باسى : وعلاش اخويا ماطفيش هاد الغضب وتهني راسك كااع ... البنت غلطات ايااه ولكن رااه سمعتيها مدارتش هادشي باش تضرك ... دارت هادشي حيت محروقة من جهة الوليدات ... وشكون هادي لي مكاتكوااتش بيهم ...

عصام شاف فيها بصرامة : شنو زعمااا دارت المزية رااه ويل ويل ... عصااات لي خلقهاا ومشااات فطريق مكاتخرجش ... الولاد اختي الله لي كايكتبهم اما دوك الشوافااات ماعندهم فاش ينفعو ...

خنساء : ايه عندم الحق اخويا رااني عارفة وهادشي مكايتغفرش ولي درتيها انا معاك فيها ومكاين لي يلومك ولكن الله وكايساامح عبدو وهي باينة فيهاا ندماات .. اش فيها الا درتي للما منين يدوز ... راه المشكل مانتا فخير ما هي فييه ... بجوج بيكم معدبين ونتوما بعاااد ...

عصام بحيرة بالع ريقو من ناحية ماكرهش يسامحها ويرجع ليهاا ويدير بحال الا ما طرا والو ويتبع قلبو ... ولكن عقلو مامطاوعوش ومامخليهش يتجاوز ...

خنساء محاولة تلين قلبو حطات يدها على كتفو : راك كاتبغيها اخويا واخا تعيا تقسح فقلبك ... والا بغيتي رايي ... ردهااا وربيها عندك ... دير ليها باش تردع غير بالسياااسة وبالتي هي احسن ... وان شاء الله مايكون غير الخير ...

عصاام بقااا ساكت بلا ماا يرد وكلامها كايدور ليه فرااسو باقي مامقتانش او بالاحرى مباغيش يقتااانع ... ناضت من تما مخليااه هو ومخوو يفكر ...

دخلات لبيتهااا بدلات عليهااا حسات بالصهد بالحوايج لي لابسة يللاه غاتهز التلفون دياالها تكونيكطا شوية وهي تفكر ان هادا هو الوقت لي تكمل فيه البلاان ... سيفطات ميسااج لنسرين بالخف وخرجات وتسنات شوية عاد خرجات من البيت لعندهااا لقااتهااا كاتجمع فشعرهااا باغا تمشي فحاالهاا ...

خنساء دايرة فيها مصدومة كاتدوي بنبرة عالية : اويلي فين غادة ونتي فهاد الحالة ...

نسرين مذبلة دوك العينين ودوك الشفااايف ناااشفيين تقول ميتة ديال بصح ... كاتعقد فولارا على راسها : غانمشي اختي .... مابقا عندي ماندير هنا ...

خنساء شداتها مكلساها : اويلي على تمشي حماقيتي لاااا ... فين غاتمشي بهااد الحااالة ؟؟ ... ( نطقاات مغوتة ): عصااااام ... عصااااااام ...

عصام غير سمعها عيطات ليه جا بخطوات سريعة ماعرف اش طاري : ياك لاباس!؟ ...

خنساء بعتاب : نسرين بغات تمشي فحالها قالك ليك وحالتها حااالة ... حتى خالتي نجاة ولا يعقوب مكاينينش ...

عصام شاف فيها بلا حتى كلمة مقادرش يقولها كلسي او بالاحرى مراضيش ... بقا مسمر بلاااصتو غير كايشوف ...

نسرين شافتو ماهضرهاش وعضات على شفايفها نااايضة وهي دير يدها على راسها بحال الا جاتها دوخة كانت غاطيح كون ماشداتهاش خنساء ...

نطقات : الله اهديك انسرين فين غاتمشي ونتي الوقفة مكاتقديش توقفيهاا ... (قااست جبهتهاا و طرطقات عينيهاا) نااري عصاام طالعة ليهاا السخاانة بزااف....

هو ماشعرش حتاا حط يديه على جبهتهاا...وفعلاا لقاهااا سخونة...رجع يديه لعندو بزربة...ومنطق بحتا كلمة...خاطرو ماانعو نهائيا باش يخليهاا تمشي وهيا فديك الحالة...

نسرين طلعات النفس بعمق : غير خليني اختي ... بلااماا نتقل على حد ... ماما غدا وتجي غانبات فالدار وصافي

يلااه غاتزيد بخطوات بطيئة دايرة فيها موتة حماار كاتبوحط وهو ينطق بنبرة امرة : ماعندك فين تمشي حتى تولي لاباس وتجي ماماك وسيري ديك السااع مكان لي شدك ...

نسرين هزات فيه عينيها مغرغرين : غير بللااااش ...

خنساء عضااات على قنووفتها كاتخنزر فيها زعما واش باغا تخرجي علينااا ...

عصام عاقدهم : راني قلت ليك كلسي بلا عنااااد وهضرة خاااوية ...

كمل كلامو وزاد من تمااا لبس عليه سبرديلتو وخرج يبدل ساعة باخرى ...

خنساء ابتاسمات : ايواا داباا ارتاحي ليا مع رااسك ... مابقااش بزااف

نسرين عضات على قنوفتها كاضحك بلا شعور : بدا يرطاب يااك ...

خنساء : كانلعبو حناا ... المهم نتي خليك شادة الدور من هنا لصباااح والباقي سااهل ...

نسرين هازة يدها : ياااختي ابليس مايقدش على فعاايلك ...

خنساء هزات فيها حاجبها : شنو دابااا عاوناك بديتي تعايري فيناا ... هنيناا ودعي الله كلشي يتيسر ... غير يتراجع على الطلااق وديك السااعة الباقي ديااالك ... نتي لي غاتعرفي ليه ...

نسرين بايجاب : كوني هانية غير نرجع لداري بعدااا وعصام انا لي نعرف ليه ...

خنساء : واخا ... المهم انا خليت ليك الغدا فالكوزينة الا جاك الجوع ... وحتاا دوليبران راه كاين تم شربيه يهبط ليك السخانة...غانمشي نعس شوياااا راه العظم الصحيح مابقاش عندي ...

ليل وصل وطاح الضلاام...فضو خافت كانت خنساء فبيتهاا متكية على السرير شادة التيل كاتكونيكطا...وفسرير ديال نصيرة لي حداهاا كانت نسرين منشورة فوقو مغطية بغطى خفيف ناعسة فسابع نومة...اول يوم تحس بشوية الراحة من داك نهار لي طرى فيه المشكل وترمى عليهاا الطلاق...

تسمع دقان خفيف فلباب...طلعات خنساء عينيها لجيهتو وبان ليهاا عصام داخل...مشى ديريكت عند نسرين...تحنى على ركابيه ...قاس حرارتهاا لقاها بردات ونطق بصوت خفيف باش مايفيقهااش: كيف بقات شوية؟!!

خنساء: شربات الدوى...كون مكانتش شوية مغاديش يديهاا النعااس...

سكت تواني ونطق مطول فيهاا الشوفة وهو متنهد:يااه..لي شافهاا ناعسة هاكاا يقول ماتحركش الدجاجة على بيضهاا...ساعة هياا عافية كاتضرب غا من لتحت...

خنساء بضيق:الله يهديك اعصام...الله وكايسامح...راهاا غلطات وعرفات غلطهاا مزيان وخدات منو درس لي مايتنسااش...نعل الشيطان اخويا ودير الما منين يدوز...

رد عليهاا مغووبش: شيطان مدار حتا زفتة...بنادم لي كايديرها كحلة زحلة بلا مايخدم عقلو...

خنساء خرجت نفسها بضيق...عارفاه شاد بزاف فخاطرو من جيهتهاا وصعيب يسامحهاا...اه كايبغيهاا و مولفها بلا قياس و من نهار طلقها وهو لور لور مايقدرش ينكر هادشي...ولكن فعلتها باقة مرسومة قدام عينيه محاول ينساها و مقادرش....

نسرين وهياا باقة ناعسة حيدات عليها لغطا...كانت لابسة غير سميطات لاصق على لحمهاا لي باين بيض صافي كايشقشق وسدر مبندر بارز فرقتو كاتباان عاطياه شكل مغري... عصام بلع ريقو بصعوبة وفيكساا عينيه فيهاا للحضات ... موحش يقيس هاد الجسد لي كان غير من مدة قليلة ملكو...جمع يديه على شكل قبضة...وجهو رجع حمر وصهدة طلعات معااه وهو مزاال كايشوف...ناض من حداهاا بزربة ستعقل حاس براسو مابقا ليه واالو ويخطي فلحرام...تحنحن بخجل و خررج..تحت نضرات خنساء لي كانت حابسة الضحكة فخاطرهاا...عارفة بلي اي راجل كيفما بغا يكون...غير كايشوف الطرف و كايتلف...تبعاتو بخطواات سريعة سادة لباب من موراها بشوية لا تفيق نسرين لي واخا تهز رحيلك حداها ماتفيقش ليك من نعاس...

لقاتو واقف ورى الباب داير يديه فوق جبهتو كايتخيل لمنضر....نطقاات موقفااه بهضرتها:واش مشتيش مسكينة حالتها كيف ولات...عينيهاا طابو بلبكا...واش لهاد الدرجة قلبك قصااح من جيهتهاا...

دار لعندهاا و رد عليها بعصبية:تبكي على يامهاا واناا مالي...سوقي فيهاا...طلااق وطلقتهاا وحلفت مانرجعهااش...بلا ماتبقااي مصدعة معايا دماغك وتحفيه راه هضرة وحدة قلتها...

خنساء بإصرار: راه حناا كناا بشاار...وكلناا كانغلطو شكون فيناا لي مكايغلطش غا قوليااا...وزيدون راك سمعتي كلشي بودنيك دارت داكشي كامل على قبل لولااد...ماشي شي حاجة خايبة...صاافي الله يساامح...ماشتيتش كيف رجعتي وهيا بعيدة عليك...بحالا هزيتي واحد وحطيتي واحد اخر...(زادت قربات بخطوة وقالت)ماشتيش كيف خرجتي كاتجري ملي سمعتيها سخفانة؟!!خاارج بلا هوااك غادي لعندهاا خايف وناسي كلشي...

عصام سكت تواني ونطق بملاميح حزينة:شي حاجة هنا(كايشير لصدرو بلا مايشعر)مامخليانيش نحقد عليهاا واخا ݣاع لي دارت...شتي كون دارو معايا شي حد أخر من غيرهاا واخاا يعاود يخرج من كرش مو ويتولد من جديد بربي مانعقل عليه...ولكن هيااا لا...معرفتش علااش

خنساء ردت عليه وبنبرة موجزة كاتبتاسم :حيت كاتبغيهاا...

عصام بقاا كايشوف فيهاا لي لحضات و هضرتها اللخرة كاتعاود فمساميعو بتكراار..بغاا يتهرب وقال ضاحك بستهزاء:ههه واقلة السهير قلب ليك الطبسيل؟! سيري تنعسي سيري..تصبحي على على خير...

خنساء.تنهداات مخلياه فخاطرو..حاسة بيه بدا يرطاب ومابغااش تزيد تضغط عليه:واخاا اخويا تصبح على خير...

صبح صبااح جديد...كان العربي ݣالس مع عصام فطبلة و خنساء كاتحط ليهم فلفطور...نسرين كانت باقة ناعسة عندهم مزال مامشاتش..

نطق لعربي وهو معاجبو حال:واش باقا ماولات شوية؟!

خنساء حطات لبلاطو وقالت:مزالة ناعسة.... معرفتش كيف بقات

العريي:وراه البنت خاصها تمشي لدارهم...هيا راه مطلقة...وجات باااتت هناا عواض ماتديوها لعند مها...

خنساء:شحاال من مرة قلت ليك ابا. بلي معا مكايناش فدار...كون كانت راه مغانخليوهااش تݣلس عندناا...

العربي خنزر وشاف فعصام موجه ليه لهضرة:لا باين لياا شي نااس طالبين عليهاا...

عصام هز حاجبو بستفهاام:الوليد جيني نيشان اشبغتي تقول...

رد عليه بجدية:قصدي راك عارفو...مكانش خاصك تجيب لبنت لهناا...الى ساقو مالين درب لخبار ماحنا فخير...وراه مقادين على هضرة حد...بنادم خاصو غير فيمن يدوي...

مزالين كايهضرو حتا تسمع الدقان فلباب...مشات خنساء بزربة تحل...كانت عتيقة لي جاية مبكرة عليهم على الصباح...

سلمات عليهاا خنساء ودخلات لقلب الدار...سلمات على عصام والعربي وݣلسات...

عتيقة:اوى كيف صبحتو..ياك مزيان...!؟

العربي بشكر:لحمد الله سول فيك لخير...

عتيقة:انا جيت غير نسول على ديك الزغبية تاع نسرين كيف بقاات...

خنساء:بعدا الحمد لله هبطات ليهاا السخانة مابقاتش كيف كانت...

عتيقة:اوى مزيان (شافت فعصام مبتاسمة) مزيان بعداا اوليدي ملي رديتي مرتك عندك ورجعتيهاا تحت جناحك مرة أخرى...شتي راه الصلح خير...

عصام دار فيها النضرات تاع من نيتك كاتدوي ونطق بتساؤل:اش رجعت مفهمتش؟!!

خنساء تنهدات بضيق زائف:لا اخالتي يمكن فهمتي لموضوع غلط...مزالين مخاسمين ماتصالحوش...

عتيقة طرطقات فيهم عينيهاا:اويلي تي اشسايرة تݣولي كيفااش مرجعووش...(قربات يديها لجهت فمها شاهقة بلعاني)الله ينعلك يا شيطاان...تي يااك ناس شافوه هازهاا جاي بيهاا لدارو وبااتت هنااا عندكم...

العربي حرك راسو بلا حول و عصام نطق بإجاب:ايه جبتها حيت مريضة ومهاا مكايناش باتت هنااا مع خنساء (ورك عليها) فبيتها...ولكن راه مرجعنااش

عتيقة كاتحرك يديها بنفي مطولة هضرتها:لاااااا عييب...حشووومة...ملي مافعينكش ترجع الدرية...لاش جايبهاا لداركم تباات فيهاا...ملي بلاك الله بلاااك...خليهاا حتاا تفيق وديهاا لدارهم ولا سيفط ختك تبات عندهاا....(شافت فالعربي)وغا قولياا واش قلت شي حاجة ماهياش...ملي ديك الساعة مابغيش يرجعهاا...لاش جايبهاا مبيتهاا هنااا...(وسعات نضراتها)سي العربي واقلة باب تلحرام بداا كايتحل...

خنساء بتاسماات بخفوت عاجبهاا لحاال...عرفاات عتيقة غاادي تقاد ليهاا الضربة و تكمل على داكشي لي بداتو...

عصام قاطعهاا عصباتو:تي اشمن حراام.. لباطل لكحل هداا..

العربي رد عليه بلغواات:نتااا غااتسكت...دايرها قد راسك ومزال كاتدوي....

عصام:تااا اناا شنو درت؟!!!

عتيقة دايرة فيهاا بقاا فيهاا لحال وضارباها النفس على ننت جيرانهم:سول راسك شنو مادرتيش....امااا راك درتيهااا يزلق فيها جمل...قبل ماتهزهاا بحال الريشة فيديك وݣااع ناااس يشوفوك مدخلهاا لعندك...فكر بعداا فهاادشي...راااه مجااتش سيدة رامي عليها الطلاق وقريب تسيفط ليها براتها وتجيبهاا تݣلسهاا عندك وتبيتها من لفووق...تتتت مكاادارش.... راها حااارمة عليك اوليدي...

عصام سكت مامجاوبها بوالو... عتيقة شافت فلعربي وقالت بنفس النبرة: وزعماا نتا مول لعقل..كيفااش قبلتي بهاادشي...

جاوبهاا مغدد: علاه لي ولد غايخليو ليه شي عقل...(هزيدو فوق راسو)هادا الله معاهم...قهروني...وراه ماتساليني حلوف هادشي لي مابغيتوش يوقع..وراه وقع...

عتيقة:وا مهاا و خوهاا الى ساقو لخبار وسمعو لهضرة كادور على بنتهم مغايعجبهم حاال...حتا سمعتهم غاتقااس..فين غاتوليو ديك السااع...لا لااا خاصكم تلقااو شي حل قبل ماتولي سيرتكم على كل لسان...

عصام زاد على فيها حاجبو وقال:كيفاش غانلقاو شي حل...كيف غايكون هاد لحل بسلامة...

عتيقة ناضت وقفات:اوى رااه كلشي باين...ملي بيتيهاا عندكم لبارح جاات حشومة وعيب ترجعهاا لدارهم و تسيفط ليها براتها بحاالا حتا حاجة ماقعاات...(سكتاات تواني ونطقات كاتشوف فالعربي) وااش تبغيهاا لبنتك اسي العربي؟!!

العربي بقاا غا كيشوف كاارز على يديه...ديك "واش تبغيها لبنت" دخلات مع عضامو بحاال السم...اكيد نسرين كايعتبرها بحال بنتو عزيزة عليه...و مايبغيش ليهاا الخايبة...ولا شي واحد يحل عليهاا فمو...

كملات عتيقة هضرتهاا عارفة راسهاا بلي تبتاتو بكلماتهاا...ودعااتهم غامزة خنساء بلا مايردو ليها البال لي وصلاتها الباب مخلياهاا غادة فحالهاا... ورجعات تاني لعندهم...

يتبع...