بنت السايب الجزء 49

كانت نسرين غادة جايا فلبيتها...عاضة على شفايفها كاتشوف فتيل ديالها لي هازاه بين يديهاا كارزة عليه...عاودات دخلات لواتساب كادقق ان بصح صفاء شافت لمسيجات تاعها و مجاوبتهااش...متجهلاهم تماماً...

دوزاات نسرين يديها على شعرها بنرفزة و قالت:لا لا مانضلمهااش...غاتكون مزاالة عيانة داكشي علاش مقدراتش تجاوبني...لكوخطاج مساهلش...

بهاد لكليمات لقلال حاولاات تصبر راسها...و تنفي كل ماهو سلبي مفكرة فيه فداك لوقت...

عودات شعلات تيل...و دخلات لوتساب...سيفطات ليها اوديو ناطقة بهدوء وخا كاتغلي من لداخل:سلام صفاء...صاڤا اشخبارك...كيف بقيتي شوية...كانحاول نعيط ليك و مكاتجاوبيش...وحتا لميساجات كانسيفطهم كاتشوفيهم مكاترديش عليا قلت يمكن مزالة عيانة...لمهم الى سمعتي لأديو ديالي جاوبيني...راني بقيت مشوشة عليك بزااف بزاف...

سدات الأديو و نطقاات بقلق:واا على الله تجاوبني هاد لمرة...(عقداات حجباانهاا و قالت) نوغمالمون خاصهاا تجااوب...حتا الى مقدااش تدوي فتيل تسيفط غير ميساج...زعماا تكون طاايحة كاااو حتا لدرجة تشوف ميساج و متجااوبش؟!! مااايمكنش..

باقة كاتهضر مع راسها حتا تسمع صوت عصام من وراها ناطق بستفهام:بسم الله عليك...مالك داوية بوحدك ياك لابااس مامولفااش ليك؟!!...

بلعات ريقهاا بصعوبة لون توجها تخطف...دارت عندو بزربة و قالت بتلعتم:اءءء...ل..لا لا والو...

قرب لعندها بخطوة و قال مصغر فيهاا عينيه بتشكيك:واالو؟!! شوفي وكاان...

نسرين قلبها ضرب بخوف...مامتيقاش واش لهاد الدرجة باينة عليها متوترة...هربات عينيهاا منو و قالت: وقلنا ليك مكااين والو...مالني غانخبي عليك..

عصام:الى كان على تخبية...تخبي علياا و تفوتيها لهيه...(كمل بإصرار) دوي قولي شنو كاين...بيك شي حاجة راك ماعجبتينيش...

تنهدات بحرارة واحلة ليها لبكية فقراجطها...عرفاتو غايبقى محكر عليها و ختارت تسلكها معاه بكدبة باش يفوتها..خايفة يزيرها و تصدق فارشة راسها براسها...

نطقاات بقلق: غير بنت خالتي..سلفتها لحوالق تاعي تدهب مدة هادي و مزال مرجعتهمش ليا...و خفتهاا لاتكون وضراتهم..

خنزر فيها عصام و قال بنبرة قوية: يديك واكلينك؟!! شكون لي قالك عطيهم ليهاا اصلا...

نسرين: واهياا طلباتني ومابغيتش نخسر ليهاا...

رد عليها بنفس النبرة:غا طلباتك تنوضي تهزي لحاجة لغالية عندك تعطيها ليها...معرفتيهاا قادة ترد ليهم لبال وماتفرطش فيهم....ماالك بهلة و مكاتفكرييش مااالك؟!! لي جااا يديرهاا بيك و يكمل طريقو...

نسرين عينيهاا غرغرو...ردت عليه بخنقة شفايفها كايترعدو: وصاافي اعصاام مااتزيدش علياا حتاا نتااا...قلبي طاايب و زيد كمل علييه...

عصام بحدة:شتي هاااد النية العوجة تااعك هيااا لي غاتخرج عليك...فينماا يضحك ليك شي حد ديري فيه تيقة و يديك بحواايجك...مكااتفكرييش...كايبقااو فيك النااس...كايلعبو ليك على لمحنة لي فيك...وعندااااك يبقى فيك رااسك ملي يخدمووك ويضربوو لييك شي دقة صحيحة...عنداااك

غير كمل هضرتوو و هياا تݣلس على سريير دايرة يديها على وجهاا مقدرااش مزال تحبس دموعهاا... عااد بدات كاتحس بلقالب لي طاالع معاهاا و بلي ممكن بصح تكون صحبتهاا دارتهاا بيهاا وطارت ليهاا بلفليسات....

نطقات كاتشهق و تنخصص عليه: اهئ اهئ...وصااافي عفاااك... الله يرحم ليك ميمتك امااا سكتني...راااه ربي بوحدو لي عاالم بيااا...بركة من هااد لهضرة هاا لعاار...

سااط بعصبية و قال مخسر فيها شوفة فاقصاه:يخزييت... هااادشي فااش فاالحة...ديريهاا قد السخط يزلݣ فيهاا جمل و تݣلسي طيحي جووج دمووع لعيين...(كمل مرفع صوتو) وااا بكي دااابااا بكييي و بردي على قلبك حتااا تشبعيهم مزيااان...و على الله.... ياااربي طيير ليك بدووك لحوالق...باااش نييت تربااااااي مزياان عليهاااا و تعرفي لمن كااتعطي حااجتك...

كمل على هضرتو و زاااد خاارج خلفة مع طرييق سااخط راادخ عليهاا لبيت

ضربااات على فخضهاا و هياا مزاالة كاتنخصص بلبكاا عااضة على شفايفهاا بخوف شديد:نااااري عنداااك تكووون بصح دااات لفلوووس و زااادت...ناااري اميمتي اشنووو درت...اهئ اهئ و كوووون غييير كاانو فلوووسي ماااشي فلووسو نكمدهااا و نسكت....(هزاات عينيهاا برجاء ماسحة على خدهاا) ياااربي ماايكونش هاادشي لي جاا فباالي بصح...ياااربي رااني ماانويت بيهم غير لخيير...اهئ اهئ

صباااح جدييد منور ... خنساء واقفة قداام المحااال كاتقااد لي مانكاان لابسة جليليبة فالباااج مخزنية جاتها فنة وجامعة شعرهااا ديل حصاان مرولي من التحت نازل على كتاافهاا ... شافت جهة الشانطي بان ليهااا سيمو وعبدو جاااييين. .. ابتااسماات ليهم .. حتى وقفو حداهاااا ..

خاطبات سيمو : صباح الخير ..

ماعندو خاطر : صباح النور اختي... ( زاد كايحل للمحل ) ...

عبدو سلم عليها : صبااح الخير الزين ديال العالم .

بابتسامة سااحرة : هههههه صباااح النوور ... ( غمزاتو ): باقي طالعة ليه من البارح ؟؟ ...

عبدو بايجاب : لهلا يوريك ... مانعسش ليل كامل وهو يسووط ... حتى عيا وخرج لسطح خيطو غادي جااي فييه ... وااصلة بيه لجدر ... غير الله يصاوب وصافي ...

خنساء : اودي رااه كايقطعوا فالقلب .. رانيا بكترة النحيط لي بكاتو البارح صبحاات كاتوزوز بالسخانة ... ماقداتش تنوض للخدمة ...

عبدو خشا يدو فجيبو : وحتى اسماعيل زاد فيه تااني ... عرفنااه ماباغيش وغير كايقلب على سبة ولاايني ماشي لهاد الدرجة رااه كايضر غا بنتووو ...

خنسااء : الله يصااوب وصاافي ... حتى يبردو بجوج ويحن الله دابا كل واحد شاعل كتر من لاخر وهي وسطهم غاتحماااق ... مغايلقاو حتى حل ..

عبدو : شغانقوليك لا اله الا الله وصافي ... نتي بعدا مزيانة .. فين وصلتي ففراش الدار ... لقيتي شي حاجة مزيانة ؟ ..

خنساء بايجااب : قربت نكملهااا واخا رااني غارقة كريدياات كانخلص من رباح ديال المحل شوية بشوية حتى يحن الله

عبدو : ان شاء الله خير ... ( حك على لحيتو ): شنوو نشوفك هاد العشية ؟؟ ..

خنساء باستغراب: علاااش ؟؟؟ ...

عبدو : واايلي على علاااش بغيت نشوفك نضربو ضورة وزايدون عندي ليك شي هضرة مهمة ...

خنساء : ممممم وشنو هاد الهضرة ؟؟؟ ..

عبدو بنفي : وا حتى نتلاقاو ونقووليك ماتكونيش فضوولية ... شنو قلتي نشوفك ؟؟ ...

خنساء : وا عرفتي شنو خليها لغدا نكون مساالية ونتغدااو بجوج هاد العشية عندي مايدار وعاد راك عارف الخروج بليل مع الداار صعيب ... لاهما النهااار حسن ...

عبدو : صافي حتى هادا نظر ... يلاااه سيري مانلاهيكش كتر على خدمتك ...

خنساء : ولاباس مني فهمتي راااسك ... ههههه الحر بالغمزة والعبد بالديزة ...

عبدو: وانا شكون فيه الحر ولا العبد ههههه ...

خنساء غمزااتوو : شوف نتاااا وفهاامتك ...

عبدو : اودي انا وليييت عبد بين يديك ابنت الساايب زماان هااذااا ... غير الله يحضر السلااااامة وصافي ههههه ...

خنساء حركات راسها بلا حول وزاادت داخلة وهو كمل لمحاالو متشوق ايمتاااا يوصل الصباااح ويهضر معاها فالموضووع ...

نهارجديد ... كانت نسرين ݣالسة فلكافي كاتاكل فݣلاص و كاتسنى فنفس لوقت...شافت فساعتهاا اليدوية بملل..و رجعات كاتاكل فهدوء...

طلعات عينيها و هيا تبان ليهاا وفاء داخلة لعندهاا كاتمختر فمشيتهاا...

قربات لعندهاا سلمات عليها و ݣلسات...

نطقات نسرين بتساؤل:هاادي هياا نص ساعه نكون عندك غير سبقيني؟!! ساعة و اناا منشورة كانتسناا...تعطلتي

ردت عليها كاتقاد بعض لخصلات من شعرها:وااش غاندير...راه بقيت كانتسنى فسي سيد يوصلني...

نسرين: وماالك مااتجي فطااكسي...ضروري تبقااي تسنااي فيه و هو تقل منو مكااين..رجل فدنيا رجل فلاخرة... غا يلا بغا يوجد راسو يبدا يتفتف نص نهار

وفاء هزات حاجبها بعجرفة: و شنوو؟!...نخلي لمرسيديس و نجي مزاحمة فطاكسي...ههه لا لا يااختي مانديرهااش...

نسرين: اييه...تسنااي الالة فلمرسديس و جي مخترة فيهاا و اناا نبقاا نتسنى على قلبي...نتي لي جااات معااك...

وفاء:قولي لياا بعداا لااش بغيتني...صوتك جاني فشكل فتيليفون...ياك لاباس

نسرين حدرات راسهاا... تنهدات بحرقة و قالت بإحباط شديد:غاااااسكتي... وااقلة زبلتهاا...

شافت فيهاا بستغراب و قالت: زبلتيها؟!!مافهمتش؟!!

طلعات فيها راسها و قالت متسائلة بهتمام: واش كاتهضري مع صفاء ولا لا؟!!

ردت عليها فلبلاصة كاتحرك راسها بنفي: لا مكاندويش معاها...مدة هاادي عمرناا هضرناا...ولكن علاش؟! وشنو علاقة صفاء بلموضوع...بسبابها زبلتيها ولا شنوو؟!!!

نسرين بلعات ريقهاا و شبكاات بين صباعها و قالت: عطيت ليها لفلوس باش دير لكوخطاج...و من ديك ساعة مابقيت سمعت عليها حتاا خبار...

خرجات وفاء عينيهاا للحد بعدم تصديق..وقالت مرفعة صوتها:شنووو...دخلنااا عليك بالله حتااا عطيتهااا جوج تلمليون بااش دير لكوخطاج...لااا كاااتفلااي...

نسرين شافت فجنابها و قالت مخفضة صوتها: هضري بشوية غاتفضحيناا....والله حتاا معاك بصح... بقات فياا و عطيتها لفلوس لي خاصينها...و ملي عطيتهم ليهاا وهياا غاابرة غبرة وحدة...مبقااتش كاتجاوب لا فلواتساب و لا فلفايس...و كانعيط ليها ابيل و مكاتجاوبش بلمرة...

وفاء سكتاات لتواني و ضحكات بستهزاء و قالت:محݣلهاا ماتجاوبش...سيدة ضارباهاا بتسافيرة فاعلة تاركة محيحة فلإنسطاا مع صحيبهاا...و كاتسناهياا تجااوبك... كاتحلمي يا لحبيبة...(كملات بتدكر)واناا كانقول مع راسي منين جاوهاا لفلووس...ساعة تمويل جا من عندك

نسرين بحالا سرفقتيهاا فديك اللحظة من حر الصدمة...شهقاات و قالت ضاربة حنكهاا مطرطقة فيها شوفة :كيفااااش؟!! مساافرة مع صااحب!!!!

تسند سيمو على سرير هاز تيل فيديه و قال بتفسير:وااراانيااا...و لحب ديالي...رااه صبرت بزاااف عليه... بربي حتاا عمرني تخيلت فحيااتي نصبر على شي حد لهااد الدرجة لصبرت فيهاا على باااك عمرنييي...

رانيا بقلق:رااني عاارفاك احبيبي صبرتي عليه..ولكن ملي نفاعلتي بديك طريقة لباارح قالك محتارمتيهش...وبقا فيه لحاال...

سيمو:شنااهوا؟!! ماحتاارمتووش!!!....لي خاصك تعرفي الالة بلي رااه حتاارمتوو بزااايد...و هو يسحااب ليه بكترة هاد لحتراام لي مفرش ليه بلي رااه خاايف منوو...

رانيا: الله يهديك اسيمو اشمن خايف منو...حتاا نتااا زدتيي فيه.. كبرتي لموضوع بلاقيااس ݣااع

سيمو قاطعهاا: و هو مزااادش فيييه لي باغيني نعطي نص مليوون كل شهر فجوج حيووط .. جاااك هادشي عاادي لي بااغي يدير؟!!

رانيا بتفهم:اييه صراحة فهادي وخا بابا نشهد فيه و نقول مدار فيها ما يصلاح...ولكن راه خاصناا نمشيو معاه بسياسة...الى بقينا اية حاجة كايجبدهاا كانوضو لحيحة راه غانجيبوها غير فراسنا...نسايسو معاه عل لأقل غير حتا نتكاتبو...ديك ساعة مايبقا عندو فاش يدوي...

رد عليها هاتف بعدم اقتناع:اوى صافي .. تسنا يا جن حتاا يطيب لحم...نبقاا كانتغدد و نتسمم بتصرفااتو و نبقاا صابر ليه حتاا نتكاتبو...بااش نيت من هناا لتماا اطرطق فياا شي عرق و لا ينوض فياا سكر...اماا الشيب رااه شيبني صاافي

رانيا بنبرة مرتافعة:واااا معندنااش حل أخر اسيمووو...

رد عليها ناطق بتساؤل: واقلة على مضهر لياا من هضرتك حتاا نتي عاجبك ديك الدااار ولا كدبت؟!!

رانيا:معااجبانييش و مغااانكريوهااش غاا تهناا...

سيمو: ساهلة عندك هااد مغانكريوهاااش...الى مكرينهاااش مكاااين زواااج...حيت سي اسمااعيل مغاايقبلش بنتو تعيش فداار قل من مستواهاا...

رانيا:و قلت ليك غاا تهناا...شتي سوارت لواليد عندي...اناا لي كانعرف ليه...و داار لي بغيتي نتاا لي غانكريو...و من موراها مباشرة غانتكااتبو و نتهنااو من هاد لفيلم...

سيمو سكت لتواني و قال بستفهام: شنوو غاديري؟!

رانيا بتاسمات بشر تقادات فلݣلسة و قالت بعزم: و حل ودنيك مزياان و سمعني...

صباح جدييد حل على المديينة .. خنساااء واقفة فبلاصة التتبداال فالبوتيك كااتقااد الميكااب دياالهااا لابسة كسيوة كحلة فايتة الركبة ... دايرة سميطة بييج على خصرهاا ماركات لاطااي وسبيبيط عالي فنفس اللون مكتافية بساعة يدوية سامبل وسنيسلة فعنقهاا ... طالقة شعرها على على كتااافهااا مسرح ... يللاه كااتبت الروج على فمها وهي تسمع الكلاكسون قدام الباب ... دوزاتو بالزربة على شفايفهااا وهزات صاكهاا خااارجة هازة فيدهااا سوااارت ديال المحل .. كان وااقف عبدو بالموطور كايتسنااهااا بتيشورط اسود وسروال سبوور فالكري داير كاسكيط على رااسو ... شافها خارجة كاتسد فالمحل ووسع ابتسامتو من جماالهاا وحلتها الانيقة ...

زادت لجيهتو : اهلاااا ...

عبدو : لله لله على زيين بالكحل ... قنبووولة ابنت الساايب

خنساء ميقات : ايوااا خلاااص شحاال فيك حتى نتااا ... دابا كيف غاندير نركب فالموطور بالكسوة ...

عبدو : ركبي جنب زعماا غاتصعااب علييك ... طلقيناااا يللاااه قبل مايجي شي واحد من تريكتك ونوليو فماهي وما لونها ...

خنساء : باااز ( ركبااات شادة فييه ): يلاااااه ...

ابتااسم وكسييراا متاااجه لوااحد الريسطو زويين حدا البحر خاص بالحووت ... هبطو بجوج بيهم يديهم فيد بعض وهو فرحااان برجووعهم حااس برااسو ملك الدنيا كااملة بشدة فيدها ... حس بالحيااة نوراات وضوات فوجهوو ... اول مرة يحس بهاد الفرحة ويغمروا هاد الاحسااس .. رجع لييه الامل فالحياة وفان مزااال فيها الحواايج الزويينة لي يقد يتمسك بيها من بعد العداب لي دوز فالحبس ... خنساااء حلمووو لي حاس بيه تحقق .. وزواجو منهاا هو هدفوا لي باغي يحققو سنين هاادي ...

تغداو فجو مرح وخنسااء منشطة الجو بكلامها معاااه وقواافيبهاا رجعوا مع بعضياتهم مرااهقيين فديك اللحظة ... بعد المرات كاتنسى رااسها والماضي لي دوزات معااه وكاتولي ديك البنت لي كانت كاتيق فييه وتضحك وتنشط معااه ...

سالاو الغدا ديالهم وخداو ديسير خفيف كلاوه وخرجوا كايتمشااو جنب البحر حفيانين وصبابطهم فيدهم والبحر كاايضرب فييه ...

خنساء كاتشم النسيم ديال البحر : صوت المواااج مزيكا لاهيلا هههه. ...

عبدو ابتاسم وزير على يدها : صوتك لي فودني موسيقى ...

خنساء سبلات عينيها : شتك زدتي نغزة فالتعناب هاد النهار يااك لاااباااس ؟؟ ...

عبدو ضحك : وراني رومانسي غير باقي مكاتعرفينيش .... ههههههه

خنساء : اييه اييه روماانسي ... كدب على شي حد اخر اما انااا رااني عاجنااااك ...

عبدو دار عندها موقفها وعينو فعينها : وااا مني لهاد الدرجة كااتعرفيني ... غاتكوني عارفة نيتي معاك ياااك ؟؟؟ ...

خنساء هزات حاجبها : كيفاش زعما مافهمتش ؟؟ ...

بلع ريقو ونطق وهو كايشوف فيها ديريكت : انا باااغيك لحلااال اخنسااء ... بغيتك تكوني مراتي قدام الله وقدام الناااس ... بغيت نتجمعوا فالحلااال ونكملوا حياتنا بجوج ...

رمشات مخرجة عينيهاا : اءء .. كك..فاا..ش ؟؟ ...

عبدو نيشاان : بغيت نتزوجوا انا وياااك ...

خنسااء بصدمة كاتشوف فيه مبلووكية ... مدة وهي على نفس الحاالة بلا حتى كلمة كاتشوف فيه بنظرات مامفهومااش ...

نطق باستفساار : اش قلتي ؟؟؟ ...

خنساء حولاات ملامحهااا من التفاجئ للاستهزاااااء ... طاالقة ضحكة على حر جهدها : هههههههههههههه .... هههههههههههههههه ... عاود عاااود شنووو قلتي ؟؟؟ ...

عبدو تعجب من ردة فعلهااا كايشوف فيها بعدم فهم ...

خنساااء كملااات على ضحكتهااا ونطقااات ببلاهة : ههههههههههههههههههه ... ههههههههههههههه ... نتزوجواا !!؟؟ ...( كاضحك حتى نزلو دموع من عينيها ): هههههههههههه انا ويااااك .... واااش عارف رااسك اش كاااتقوول !!! ... زعما كاطلب مني الزواج من نيتك هههههههههههههههههه

سيمو وهو كايفكر فشنو قالت ليه رانيا : واله ماعرت ... وزعما غاتقدي تقنعييه هاكا ؟؟ ...

رانيا : واصاافي راه دويت وقلت ليك خليه عليااا ... نتا غير وجد راسك للعرس ...

سيمو : هههههه واخا الالة ... وبحال والو يوليو جوج عراسات ماشي غير وااحد ...

رانيا بعدم فهم : كيفاش ؟؟ ...

سبمو : ايوا الالة عبدو دابا غايكون طلب الزواج من صديقة عمرك ... الا مكانوش ديجا ركبوا الخواااتم ...

رانيا خرجات عينيها بصدمة : اويلي ... كيفاش زعما واش غايدوي مع خنساء على الزوااج ..

سيمو : اييه الالة ... خرجو اليوم بجوج وراه غايدوي معاهااا ..

رانيا تشوكاات ماعرفات تفرح ولا تقلق حيت بان ليها زرب وهي مامتأكداش من مشاعر صاحبتها كل مرة كاتبان ليها فشكل معارفة اش تحت راسها : واش ما بانش زرب شوية ... اويلي على زواج

سيمو بان ليه التوتر فصوتها : علاااش زعمااا .... واش فراسك شي حاجة ؟؟. ..

رانيا : لا لا غير هو جاني زرب ... كون غير تسنى شوية .. راك عارف علاقتهم كيف كانت من قبل ...

سيمو بايجاب : وراه قلتها لييه ... ولكن هو تعكس حلف حتى يطلبهااا ... قالك مابقاش باغي يتسنى... راسو قاسح راكي عارفاه

رانيا : ايوا الله يسهل عليهم وصافي ... يكون خير ان شاء الله

سيمو : امين ياااربي ...

رانيا سمعاات صوت الرجلين جهة الدروج جاي لبيتها ونطقات بزربة : بسلااامة عليك واقيلة بابا طااالع ... نخلييك حتى نعااودو نهضرو

سيمو : واخا يلاااه تهلاااي ...

قطعاات علييه ورمات التلفون تحت مخدتها وتكمشااات ففراااشهاا داايرة رااسهاا ناااعسة مهلووكة و عياااانة ... اسماعيل حل الباب بشوية بانت لييه منشوورة وحالتها حااالة... تنهد بتأسف من حالتها مني طرا المشكل وهي غير سادة عليها مكاتخرج لا تاكل والا تشرب عاطياها غير لنعااس والبكااا ... قطعاات ليه فقلبو ... خرج النفس بعمق ورد الباااب متحصر مخلييها ترتاح ...

وفاء كانت مزال كاتشوف فنسرين لي جمدو دمووع فعينيهاا من حر الصدمة لي تلقاتها...ماقدرااتش تيق نهائيا ان صفاء غدرااتهاا بصح و طارت ليها بلفلوس...دارت فيهاا تيقة و عطاتهم ليهاا باش تهزهاا من مصيبة كانت غاطسة فيهاا ساعة كاان كلشي غير كدووب و تمتيلية محبوكة بااش تاخد منهاا لفلوس غير بلفن...و تصدق هياا لي طيحهاا فمصيبة كبر...ماتقدر تهز منهاا الرااس

نطقات وفااء بتنهد:وهانتي تشوفي...هادي هياا تعيش نهار تسمع خبار...بنت لحرام عرفات كيفااش ديرهاا بييك...مكاانش علييك اصحبتي تيقي فيهاا واخاا معرفت شنو يطرى...

نسرين زيراات على يديهاا و قالت كاتحااول تنفي داكشي لي سمعاات مقادراش تتقبلو نهائيا:لا لاااا...مايمكنش...لااا والله ما يمكن...زعمااا دااكشي كااامل كاان غاا كدووب...محااملة ما حتاا زفتة دارت هكااك غير بااش تااخد لفلوس و تمشي تبرع بيهم مع صااحب...مااااايمكنش...

وفاء رفعات صوتها: واااتي رااه كانقولييك شفتهاا بعيني فإنسطاا لايحة تصاورهاا مساافرة و عاايشة مع رااسهااا...

نسرين بعصبية: كون كاانت بصح لايحة شي حاجة فإنسطاا كاانت غاطلع لياا...اناا مطلع لي واالو و ماااشفت وااالو...

ردت عليها وفاء ضاحكة بجنب بستهزااء:سي نوغماال مايطلع ليك واالو...باينة للعمى غاتكوون بلوكااتك...(حلات صاكهاا كاتجبد منو تيل و قالت) كدبتيني وااخااا ماشي مشكل...انااا غانورييك بااش تأكدي من هضرتي...

دغياا دخلات لإنسطاا و جبداات لبااج ديالها حلاتهاا و مداات ليهاا تيل قابلاتو معاهاا وقالت: هاااكي...سقي عواانتك...شوفي وااش غاتكدبي حتااا هاااد تصااور لي مبينين كلشييي...

طولات نسرين يديهاا بتتاقل لي كاترعد و خداتو من عندهاا...و بداات كادوز فتصااور وحدة مورة وحدة...و ملاميحهاا طغاات عليهم الدهشة و الصدمة كتر و كتر من دااكشي لي شاافو عينيهاا... تواني و دمعة حاارة نزلاات على خدهااا....حتاا انفاسهاا بداات كاتلتاقطهم بصعووبة لخنقة طلعاات معاهااا....عضاات على شفاايفهاا و حطااات تيل.... و دارت يديهاا بجووج على وجهااا و بداات كااتشهق بلبكاااا....فعلااا كلشي وضااح قدامهاا غير الى بغاات تعامى...و دارتهاا بيهاا هاديك لي كان كايصحاب ليهاا صحبتهاا وتاع قلبهاا...ساعة غرسات فيها الشمتة حتاا لجدر....شمتة واخا تعيش حياتها كاملة عمرهاا غاتنساهاا...

وفاء شافت فيهاا بتحسر...عارفة بلي ماشي ساهل عليهاا تبلع الصدمة...وقفات و جرات لكرسي لحدهاا و رجعات ݣلسات بجنبهاا لاوية يديها على كتاافهااا كاتحاول تواسيهاا واخا صعيب لحال...

وفاء:ششش...صافي اصحبتي مادري فخاطرك واالو...داباا يخلفهم الله..و هياا عاقبتهاا و الله ماتخرج ليها على خير على هادشي لي دارت فيك...

رداات عليهاا بحرقة شديدة سدرهاا كايطلع و ينزل بتنخصيص:نااااري قفراتهااا...كحاالت علياا بلكحلااات...غرقت راااسي بيدي...كحلتهاااا كحلتهااا اهئ اهئ...

وفاء:صافي الى مشاااو دوك لفلوس يديو باسهم...مزال ربي يطول لعمر حتاا تجمعي ماكتر منهم وهادشي يبقاا غير تعااويد...

جاوباتهاا بنحيب و دموعهاا كااتسيل مع خدهاا بغزارة:اهئ اهئ اشغانجمع الله يهدييك...اشغاانجمع...مااال دووك لفلوووس لي داات لياا دياااولي...راه رااه دياااول رااجلي....(ندبااات على حنكهاا بشدة) اه‍ئ اهئ...ميمتي وشنووو درت ...الى ساااق لياااا لخبااااار غاايقتلني....غاااايقتلني...

وفااء وسعاات فيهاا نضرتهااا و حطاات يديهاا بعدم تصديق على فمها:اويلي على فلووس راجلك هزيتيهم و عطيتيهم ليهاا...(عضاات على شفايفها و قالت بنفس النبرة) *ودتيهااااا يااالمسخووطة و اشداااك اصݣعة تقيسي ليه ففلوسووو....

نسرين مقدرااتش مزاال تدوي ولا تطلع شي كلمة... وشنو غاتقوول و بااش غاتجااوب؟!!عطاتهاا غير لبكى فديك اللحظة...دنياا ضلامت قدام عينيهااا...مبقات عرفات شنو غادير فلورطة لي ورطات فيهاا راسهاا بيديهاا...و بلأخص شنو غادير مع عصام لي هزات ليه فلوسو بلا خبارو و حطاتهم فيدين وحدة غدارة لي طلعات معاها لقالب بلا ماتحس بيه...

عبدو بلع ريقو وطول فيها شوفة حاس براسو مشوكي من حركاتها واستهزائها ا بالموضوع ماعرفهااش شنو باغا تقصد ولا اش كاتعني بهاد التصرفات ... نطق باستفسار : مافهمتش ... راني داوي معاك بصح ... باغي زواااج ...

خنساء مسحات دموع من جنب عينيها بكترة الضحك : ههههههههههه بلاتي بااااتي عافاك نستوعب ... هههههههههه زواااااج زوااااج .... هههههههههههه

عبدو قرم حجبانو باقي مافاهمش اش واقع : خنساء راه مكانتفلاااش

خنساء هزات فيه عينيها حابسة ضحكتها ... وقلبات شوفاتهااا للطنز : الزوااج اعبدو ههههه ... واش نتا كاتقولها ليا بكامل قوااك العقلية ... هههههه على ما بان ليا تيقتي راسك لاااا ...

عبدو رمش : كيفاش زعما تيقت راسي .. شرحي بلا تفلية ... فرزي هضرتك حيت رااه مافهمتكش ...

خنساء هزات فيه حاجبها وغيرات نظراتها للاحتقار : ايوا مني مافهمتيش اشريف ... حل ودنيك وسمعني مزياااااان ... غاندرج معاااك الهضرة ( شافت فيه باستفزاز ): انا ونتااا عمرنا غانكونوا بجووج ... يعني حناااا ماعمرنا غانتزوجوا ... ولا غانعيشو فدار وحدة كيف كاتحلم ...

خرج فيها عينو بصدمة ونطق بتلعتم وجهوا صفار وهرب فيه لون : ك..فاش ؟؟ ... وهادشي لي بيناتنا ؟؟ ...

خنساء علات ضحكتها وكاتهضر باستمتاع وهي كاتشفي غليلها : بيناتنا !!! ... ههههه انا وياك عمر كانت بيناتنا شي حاجة ... نتا لي حلمتي وتيقتي ... اما انااا .. عمري غانسىا شنو طرا من قبل ... يعني اشرييف هادشي لي كنتي كاتعيش معايااا ... غير تمتيل ولعبت علييك ... باااش نهزك حتى لسما ونردخك دابا ...( غمزاتو ): بكل بساااطة رديت ليك الدقة والسوسة لي درتي ليا اعوااام هادي ولي عمري غانساهااا ... تفلييت عليييك كيف كاتستاااهل

عبدو الهضرة وحلاات ليه والما نزل ليه للركابي مابقااوش هازينوو . .. قلبو كايضرب فالتسعيين وعاطيه الصداع بشكل غريب كأنه تلقى طعنة عمرو توقعها ... مامتيقش اشنو كايسمعوا ودنييه وااش هادشي كلو كان غير خدعة ... واش كانت كاتلعب بمشاعيرو وتضحك عليه هاد المدة غير باس تحقق انتقااامهاااا ... مامتيقش بالمرة ومقادرش يستوعب ...

خنساء قربات جوج خطوات مفيكسيا عينيها فعينيه : نتا مكاتعني ليا وااالو ... شتي واي حاجة قلتها لييك فهاد المدة غير كدووب ... بغيتك تحس بنفس شي لي حسيت بيه نهار طلقتي من يدي .. بغيتك تعدب بحاالي وتبرد العافية لي شعلتيها بفعلتك معايااا ... نتا واااالو بالنسبة ليااا ... هههههه مشيتي بعيييد العشيير ...

هز يدو مقاطعهااا و هو كايرجف وعينيه حمرين معارف باش يرد ولا شنو يقوول ... قلبو كحاال من جيهتها فديك لحظة : شووو براااكة ... ( حمر فيها عينو ): بردتي دابااا ... ارتاحيتي ...

خنساء هزات على كتافها باستهزاء كبير من العافية لي شاعلة فيه والموقف لي حطاتو فييه ... ماعلا بالهااش بحالتو. بالمرة : ااااه ... ارتاحيت ...

عبدو حرك راسو بايجاااب بصدمة بلااا رد غمض عين. ضاااغط على نفسو مايدويش مدخل كلامها وصدمتها ليه لقلبو وكاتمهااا ... معارفش واش تربط ليه اللسان ولا صدمة جاتو. قوية لدرجة تخيط فمو مابقى عارف مايقول واش يسبها ولا يضربهااا تلف فديك اللحظة ...

خنساء شافت فيه : دير فبالك هادوك الاحلام لي فبااالك ... راه غير فدمااااغك ... وماعمروا غايكون فالوااقع ...

عبدو دار عندها محقد فيها الشوفة ناطق بغليل : الله ياااخد فيك الحق ... ( بلع الريق ): الله ياخد فيك الحق اخنساااء ...

زاد من تمااا حاس بالموت دااخلاااه ... البروودة طلعااات معاااه بواحد الشكل غريييب ... وجهوا مابقاتش فيه قطرة ديال الدم ... وعروق ديال راسو وعنقوا برزوااا بوضووح ... غير غاادي كايتماايل والدنياا دايرة بييه ... كايخطي بلا عقل ... مخليها ورااه حاسة براسها بردات وطفات ولكن مامرتاحاااش من هاد التصرف لي دارت .. قلبهاا كايقولهاا غلطتي وعقلها مأيدها فشنو دااارت ... تمشاات متاجهة لجهة الطاكسياااات ماباغااش تندم بالمرة

عبدو ركب فالمووطوور وهو دااايخ كسيرااااا بالجهد معاارف رااسو فين غاادي زاايد وعقلو تاااالف ... باقي مامستوعبش الصدمة حاس براسو فكااابوووس .... كتاااافووو عاطينو الحرريق بالجهد صايق بيهم غييير بزز ...ووجهدوا ولا فحال القشرة منعادم من اللون ... معدتوووو كاتنتر وقلبووو كاايضرب بالجهد ... معاارفش كيفاااش حتى وصل قدام الباااب ديال الدار حيت رجع بلا عقل ... هبط وراسو مرفووووع مع حط رجلييه على الارض من على المووطوورو وهمااا يخواااو بيه طاااح على وقفتوووو جتة وغيب وعينيه مقلووووبيين والكشاااكش خاارجيبن من فمووو بيضييييين ... كايتهز ويتحط فالارض بصدروواا. ويتركل ..

الدراري مجموعين على عبدو لي طايح قدام الباب كومة ... كايعيطو للاسعاااف مضهشرين من حالتو ... سيمو كان رااجع لدار خاشي يدو فجيبو ... مع الدورة خرج عينو من المنظر لي كايشوف ديال عبدوو منشور فالارض بحال الميت وبنادم داااير بييه... بلااااعقل جرااا لجيهتو ونزل على ركااابيه كانطق مخلوع : عبد الله ... شنو وقع ؟؟؟ ( شااف فدري ): اش طرا ليه ؟؟؟ ...

الدري : غا هبط من الموطور وطاااح ماعرفناش شنو وقع ليه حتى كشكش ...

سيمو كايحاول يفيقوا والخلعة ركباتو من صبع رجليه فور ما شااف البياض خارج من فمو كشاااكش ووجهوا لي مافيهش قطرة ديال الدم صفر فحال القشرة : عبدو ... صحبي ... عبدو خوويااا ...

الدري : رااه عيطنا للاسعاااف ... حسن بلاااما تحركو لااتكون عندو شي دقة فرااس ...

سيموو بلع ريقو محرك ليه راسو بايجاب ... محاول يكالمي راسو ويترجل .. حيت الا غلبو الخوف غاايضهشر ومايعرف باش يعاون ولد خالتو ... وقف وهز تليفونو كايعاد الاتصاال بالاسعااف باش يسربيييو ... يديه بردو علييه من شدة خوفو علييه وشاد فراسو غير بزز ...

رانياا كانت شادة فعتيقة راجعين من السوق بعدمااا خرجاتها بزز يضربها البرد ...

رانيا بعياء : والله حتى حرام عليك غا تعديتي عليا ماعنديش الركاابي ... وكملتي عليا دابا بهاد التقضية. ...

عتيقو بتمياق : باااز لييك ... تبقاي مخشية فداك البيت هانتي طرشك البرد عاد طلعك اللون ...

رانيا يلاااه غاتجاوبهااا وهي تقشع عبدو على الارض وسييمو واقف حداه كايهضر فالتلفون والحومة كلها مجموعة علييهم .... رمااات لي فيدهااا ونطقاات بصوت عاالي :اويييييلي عبدوووو ...

ضربات عليها بجرية لعندهم وعتيقة تبعاااتهااا تاهيااا تخطف فيها اللون ...

رانيا هبطااات عينيهاااا لعبدووو ماقدراتش تشوف فيه من منظرو وهو فحااال الجتة : اءء ... عبد ... الله

عتيقة ضربات على فخاااضها : اوييييييلي على ولد صحيييبتي .... اوييييليييييي ميمتييييي ... (كاتندب)

رانيا شافت فسيمو : شنو وقع ليه ؟؟ ..

سيمو مضهشر : ماعرت جيت لقيتو طايح وبنادم مجموع عليه قالك طاح بوحدو فالارض على طولتووو ..

رانيا دموعها على خدها : عيطتي لومبيلونص ...

سيمو بايجاب : وي غاتوصل داااباااا ... مابقا ليهم وااالو ....

باقي ماكمل كلاامو حتى وصلات الاسعاااف حداااهم وهبطووو الممرضيين هزوه فووق الباااايااص بالخف ركبوووه تماااا ...

خنسااء جاااية من جهة المحطة ديال الطااكسياااات عاااد وصلاااات صغرات عينيهاا من الجقلة والاسعاف لي حدا دار عبدووو ... ديريكت جات فبااالهااا حيااااة طراات ليها شي حااجة .... خرجاات عينيهاااا بصدمة واااقفة وكاتشوف من بعييد

سيمو شاف فعتيقة : شوفي كيف ديري تعلمي خالتي ولحقو عليا واخااا ...

عتيقة : كون هاني اوليدي ... الله يكون معااه ياربي وتحفضو لميمتووو ...

سيمو ركب معاه فالاسعاااف وزاادو ديريكت لكلنيك كيف وصاتو عتيقة انه يديه ديريكت لمستشفى خاااص ...

خنساااء قربات جهة رااانيا ونطقاات بتساؤل : شنو وقع لخالتي حياااة ؟؟ ...

رانيا دموعها على خدها : لاااا ماشي هي ... عبد الله لي دااوه ... كون تشووفيه كيفااش كان طااايح فالارض بحال شي ميت ...

خنساء عينيها خرجو فالبلااااصة ولسااانهااا تربط ماقدرااات تنطق بحتى كلمة ... وكلااام رانيا باقي مابغاااش يدخل لدماااغهااا كايتعااود على مسااامعهاا ولكن مزاال ماستوعبااتوش ...

عتيقة خاطبات بنتها : تبعيني نمشي نشوف فين حيااااة باش تمشي معاها لسبيطااار . .

رانيا حركات راسها بايجااب وهي كاتشوف فصدمة خنسااء ... لي جااتهااا غريبة وااش صدمة من شنو جرااا لييه ولا شي حاجة اخرى واااقعة ...

بلعاات ريقهاا ونطقات مخاطبااها : على الله اصحبتي ماتكونيش سبااب فهاادشي... على الله ...

زادت تبعااات مهاا بجراا وخنسااء بقااات تمااا واااقفة بلااااكة فبللاااصتهاااا كاترمش بلااا حراااااك ...

وصلووو لكلينيك وهبطو الممرضين جارينو كايتجااراااو وسيمو تاابعهم ... غير شااافو طبييب فدقة لولة قلعوا ونطق بعجلة مخااطب لانفيغمييغ : طرطقااات لييه المراارة ... ديريكت لبلووووك ...

اتاجهوا بييه للمستعجلاااات مع الطبيييب والممرض جا عند سيمو : واش نتا من عائلتوو ؟؟ ...

سيمو بتلفة : اناا خوووه ... بغييت نقول ولد خاالتو بحال خووه ..

الممرض : واخا اسيدي كااالم طوااا ... ان شااء الله كلشي غايكون مزيااان ...

سيمو : ان شاء لله ياربي ... قولي اخوياا سمعت الطبيب قال المراارة ... وااش شي حاجة خطييرة ...

الممرض : وي تفضل معايا ونشرح لييك ...

يلاااه غايزيد معااه وهي دخل حيااة مع راانيا كاتغوت لربي لي خلقهاا وضرب على صدرهاا : الله على ولدي حبييييبي ترزييت فييك ... الله على كبييدتييي تشوييت فيييك هءء ( كااضرب وتغوت على حر جهدهاااا ورانيا كاتحاول تهدنها ): الله على عوينة وحدة بااااش كاانشووف وغاتعمااا ليا الله ... اميمتي واااش درت فالدنياااا ... الله ياربي وخدني انا ونجييه هو ....

سيمو قرب ليهاا شاد فيدهاا : خالتي تهدني ... عافاااك ...

عنقااتو كااتبكي فصدرو وضرب بيدها فضهروا : الله على خوووك غايمشي الله ... هءهء... امييمتي على كبيدتيي ... هء هءء ...

سيموو خلااهاا كاتبكي فخااطرهااا حتى بردااات على قلبها : الله يهديك اخااالتي راااك مومنة زعمااا ... ديري املك فالله ومايكون غا الخير ...

كااتبكبي بغصة :ونعم باللله ولاايني رااه العااافية شاااعلة ليا فقلبي امحمد ... العااااافية العاااافية هء هء ... ( كاتبكي وتعطي لقلبها ) ...

الممرض : ماتخافيش اميمتي ان شاء الله ولدك غايخرج صحة سلااام ...

حياة شافت فييه بامل : ان شاء لله اسي طبييب ... ياك وليدي غايولي بيخير ...

الممرض : ان شااء الله الالة ... عارفك عيانة ولكن ضروري تسني ليا على واحد الورقة... باش نبداو العملية فاسرع وقت ...

سيمو : ديالاش اخويا ؟؟ ...

الممرض : خاصنا موافقة احد الاقارب باش نديرو ليه عملية ... وهاد النوع من العمليات كايكونو مستعجلة وخطيرة ...

حيااة ضربااات على فخااضهاا : اويلي بغيتووني نسني على موت ولدي ....

الممرض :لا الحااجة ان شاء الله ولدك غايخرج بيخير من العملية ... ولكن هاد الامور شكلية وقانونية ضروري منهاا ... داكشي علاش ضروري تسني ليا وتدوزو لاكيس تخلصوا العملية ... المرارة طرطقاااات وخاااص نغسلو الامعااء لي تقااصت بزربة

سيمو غايشوف فخاالتو مدمرة وكاتجدب وغاياخد الورقة يسني تمااا : نتوما غير بداو عافااك انا غانمشي نجيب الفلوس دابا ...

الممرض حرك راسو بايجااب وزاااد من تمااا وحياة شافت فسيمو : خوك غايضيييع ... غااايضيييع اويليدي

سيمو : مايكون غا الخير اخاالتي ... ( شاف فرانيا ): خليك معاها نمشي ندوز نسول شحاال و نضبر على الفلووس

يلااه غايزيد وهي تدخل عتيقة هازة فيدهاا جوا فيه الفلووس ... فبحال هاد المواقف مكاتبقاش تسنى .... معروفين مع بعضياتهم فشدة يقضيو الغرااض وعاد يتحااسبو مور الازمة ...

عتيقة مداتهم ليهاا : هاكي ها الفلوس ديال الكلينييك ...

حيااة نزلاات عليها بحال رحمة : الله يخليك ليا اجاارتي ( هبطات بغات تبوس يدها )

وقفاتها عتيقة : الله يهديك اصحيبتي راااه كبدتنا بجوج لي تشوااات ... وليدنا بجوج لي لداااخل ...

رانيا عضات على شفايفهاا وخدات الفلووس مداتهم لسيمو وزادت هي وياه يخلصو ا الكلينيك وللعملية ...

بخطوات تقيلة رجليها غير غاديين بيهاا مامتحكمااش فيهم...بالهاا مشغول و دماغهاا مرفووع...حتا التفكير ماقدراش نهائيا تفكر...حلات باب الدار...و دخلات بنفس الخطوات رجل هنا و رجل لهيه...لقات نصيرة و باها ݣالسين فلبيت دازت عليهم بلا ماتهضر طالعة مع الدرووج و عينيهاا دابلين كايشوفو فجيهة وحدة كاترمش بتتاقل شديد...مشاات ديريكت لحمام حلااتو و دخلات مسورتااه...لاحت الصاك من يديهااا ترمى فلأرض...و حطاات يديهاا بجوج على لاڤابو كاتلتاقط انفاسها و كاطلع راسهاا بشوية حتا تقابلو عينيهاا مع لمرايا...طولات فيهاا النضر لي لحضات بلا ماتغير تعابير وجها...تواني و هيا ترجع صورتو قدام عينيهاا... كيفااش كاان كايباان فرحان عينيه لامعين و هوا كايطلب منها الزواج...فجأة حتاا صدماتو و جرحااتو بكلامها لي كان بحال الموس لي تغرس فيه بلا رحمة...الانتقام عما ليهاا عينيها...و خلى ضميرهاا يغيب و ما يصحى حتى يكوون فاات لفووت...و تكون نتيجة الإسعاف هازاه من دارهم بحال شي جتة جامدة...معرفاتو واش روح مزال كاطلع و لا وصلات لحلقو و مول لأمانة داا امانتو....

دمعة نزلاات على خدهاا كاترجم لحرقة لكبيرة لي حسات بيهاا فداخلهاا من جيهتو...و نداامة كتاكل فيهاا و تعاود...حطاات يديهاا على فمهاا كاتحااول تكتم شهقاتها المتتالية لي جاات وحدة مور وحدة....

و نطقاات بصوت مبحووح مغمضة عينيها كاضرب فجبهتهااا بتأنيب شديد لأول مرة تحس بييه:اشنوووو درت انااا؟!!...اشنووو درت هء هء...

بكااات و فرغااات...بشكل مقدراش تحبس بيه دموعهاا لي نازلين بلا مايطاوعوهااا... اول مرة تحس براسهاا عاجزة باش دير شي حاجة....غسلااات وجهااا...تحنات على صاكها هزاتو كاتحل فيه و خرجات من لحمام غادة لبيتهاا بخطواات سريعة تسول عليه...جبدات التيل و دورات لابيل ل رانياا...

لي دازت تواني حتا جاوباتها ݣالسة فواحد من لكراسة المخصص لعموم كاتسنى فلبلوك نطقاات كاتهضر بشوية :وي خنساء ؟!

ردت عليها متسائلة بهتمام: شنو وقع لعبدو...اشقاليكم طبيب..

رانيا دوزات يديها على وجها: طرطقات ليه لمرارة...على ما قال طبيب كان عندو مشكل فيها وطرا ليه شي شوك ديال الاعصاب ولااا بدل المجهوود وطرطقات...ودابا راااه فلبلوك دخلوه للمستعجلاات...غايديروا ليه عملية...غايغسلو لييه لمصارن لي تقااسو...الا خرج منها سااالم راااه ربي شاف من جيهتو...

خنساء بلعاات ريقهاا بمرارة و عينيهاا مغرغرين بدموع...لهضرة وحلات ليهاا فلحلق مقدراتش تنطق بحتاا كلمة...

نطقات رانيا بتشكيك:غير قول لياا وبلا ماتخبي...وقعاات بيكم شي حاجة يااك...هيا لي وصلاتو لهااد لحالة...

خنساء تنفسات بعمق محاولة تكالماا... و نطقاات كاتقول بصوت باح محاولة تنهي معاها المكالمة:بون رانيا...ملي يخرج من لبلوك علميني...

ردت عليها بإجاب مبغاش تضغط عليها:واخاا غير يخرج غانعلمك...ولكن ملي غانتلقاو غااا نهضرو ( كملات بتاكيد)ضروري...

قطعاات خنساء الخط و عاود طلقات لعناان لدموعهااا لي نزلو شلال من على خدهاا...محملة لراسهاا الحق كامل فكل ماجرى...و هياا سبابو حتاا ولا بين لحياة و لموت....قلبهاا ضرهااا بلا قيااس بحالا هياا لي فبلاصتوو....و كايضرب بشدة و بطريقة غريبة بشكل عمرو ضرب بيهااا...

نطقات بنحيب قوي دايرة يديها بجوج على وجهاا: ياااربي تحفضوو لميمتو يااربي...اهى اهئ....يااربي ماتشويهااش فلولد الوحيد لي عندهاا ياااربي....رااه هو لعوينة بااش كااتشووف اهئ أهئ....يااااربي...

كانت نسرين فبيتهاا ݣالسة وسط السرير...ضامة رجليهاا لعندهاا فجو كئيب...ملي دخلات لدار و هياا سادة عليهاا فبيتهااا...عينيهاا طاابو بلبكاا وولات فيهم حمرة شديدة....كاتعدب و تقطع من لدااخل...مالقيا حتاا جهد لمشكلتها لي حطات فيهاا راسهاا بيديها...

عضاات على شفايفها بشدة و دموع حاارة عاودو نزلو من عينيها من كترة لبكا:أهئ اهئ...ياااسيدي ربي و فين كاان مخبي لياا هادشي....غااادي يدفني حية الى سااق لخباار لفضيحة لي درت....شنووو غاادي نقوليه اهئ اهئ....يدي يقطعهاااا لياااا بلااا مااايرمش...نستااااهل انااا لي حماااارة اناااااا.....اهئ اهئ....

باقااا كاتبكي و كاتنواح وهيا على نفس الوضعية حتااا دخل عصاام مع لباب... شافتو و قفزاات فبلاصتهاا كااتمسح فحناكهاا لي تزنݣو و تخبي وجها بين يديهااا....

قرب لعندهااا كايشوف فيهاا بستغراب...ماينكرش انوو فلأونة الأخيرة مابقى فاهم فيهاا حتاا حاجة...و بدا كايشك فأنو مخبية عليه شي حاجة و خايفة لا تبوح بيها...

هيا بقات حادرة راسهاا مابقا عندها لوجه باش تشوف فيه..

نطق بستفهاام وسع نضراتو: ماالك تااني ؟!!

شافت فيه بقنت عينيها و قالت بنفي: لاا واالو...

رد عليها هااز حاجبو: كيفااش واالو... وااش نتي وجهك تنفخ بلبكا و دوك لعينين هاردااهم بدمووع و كاتݣولي لياا واالو...(كمل بصرامة) هضري مااالك؟!!....

شفاايفهاا ترعدووو و هبطوو دموعهاا بلاماتحس... غمضات على عينيهاا كاتشهق و تشهق

نطق عصاام بنفااد صبر كاارز على سناانو مابقااش مستحمل دموعها:نسرييييين....

بلعات ريقهاا و مسحاات على عينيهاا بااش توضااح الصورة قدامهاا...عرفااتو غاادي يزيرهاااا حتاا تصدق ݣارة ليه بلي كاين و لي مكاين...

نطقات بصوت متقطع كاتنخصص بلبكى:غا...ل..ليووم .. د...درت تيست...

جاوبهاا فلبلاصة: اييه ومن بعد؟!!

ردت عليه كاتنخصص:اهئ اهئ...توجوغ نيݣااتيف...

عصام مسح على وجهوو وقال:لا حول ولا قوه الى بالله...وااش يهااد لمرى حمااقيتي...غاتبقااي كل مرة تعرفي فيهاا راسك محاملاش ديري ݣنااازة....تاعت الله وااش عندك شي عقل ولا ماتكسابيهش

نسرين هبطات عينيهاا لمغرغرين: غا مقدرتش نتقبلها هاد لمرة و صافي... ونتاا عاارف بلي مكااين لي ينفس علياا قد الدموع...كانرتااح بيهم...

شافيهاا للحضات...حرك راسو بلاحول...مباغيش يقوليها شي هضرة لي يصدق مكمل عليهاا بيهاا...

دار عاطيها بضهر ونطق كايحل بلاكاارو: وامتنسايش تهزي عصاك و تنوضي ضاربي مع لي خلقك....حيت ماعطاكش لولاد....

لاح ليها هاد جوج كلماات بدل عليه و خرج من لبييت..

نسرين غير خرج ندبااات على حنكهاا جارااه بشدة عااضة على شفايفهاا لي كايترعدوو بخوف...توااني حتاااا حساات بوجع خفيف شاادهااا تحت كرشهاا غاادي كاايتجهد و غايبدا يقطع فيهااا...حطاات يديهاا على كرشهااا مزيرة عليهااا و حولاات ملاميحهاا لألم...

سيمو غادي جاي فقاعة الانتظاااار فالكلينيك وحياة كالسة كادعي وتعااود ربي ينجي ليهااا ولدها معاااها رانيا ... اما عتيقة مشاااات توجد ليهم ميااكلوو وتجمع الداار ... كتر من ربعة سوايع وهما على نفس الحاالة حتى خرج الطبيب من المستعجلااات ... غير شاافوه ناضو لجيهتو بلهفة...

حياة عينيها مبهوطين فيه : امضراااا اسي طبيب ... كيف بقا ولدي ...

سيمو : كيف دازت العملية ؟؟؟ ...

الطبيب : غير كوني هانية الامور كلها دازت مزياان ... غانقلوه دابا للعنااية ومن بعد ان شاء الله نديوه للغرفة ديالو ...

حياااة تنهدات براحة : الحمد لله ياربي الحمد لله ... سير اسي طبيييب الله يخلي ليك ماعز علييك ....

الطبيب : هاذا واجب الالة ... ممكن تفضلو معايا للبيرو ....

زادو تبعوه للمكتب ديالو ودخلو بجوج كالسين قبالتو كايتسناوه شنو غايقول ...

حياة : ياكما كاين باس ادكتور ؟؟؟ ...

الطبييب : لا ماتخافيش الالة ... ولكن كيف كاتعرفوا ان ولدك كان عندو انفجار ديال المراارة ... وداكشي علاش اضطارينااا نغسلو ونظفوا كاع الاعضاء لي تضررات ولا تقاااست باش نتفاداو اي تفاقمااات ولااا تعفناات ... طبعاا كنا نقدرو نعالجوا لخلل من قبل ويتم الاستئصال ديال المرارة بشكل عادي ولكن للاسف سي عبد الله تهاون على راسو وماكشفش بكري على المرض دياالو ... وهادشي غايكلفوا شوية من هنا للقدام

سيمو : شنو بغيتي تقصد ادكتور واش غاتكون شي اعراض جانبية ؟؟ ...

الطبييب : العملية مكانتش ساااهلة ومني كانقولك غسلنا الامعااء المتضررة وحتى المرارة تم استئصالها .. راه ماشي بالامر الهين ... داكشي عليه من الواجب عليا نأكد عليكم ان النظام الغدائي ديال سي عبد الله مغايبقاش كيف كااان ... مغايقدرش ياكل اي حااجة ... غايخصوا يتبع ريجيييم خااااص ...

حيااة : اييه اوليدي نديرو ليه الريجيم ... غير هو شحال ديال الوقت غايخصو باش يداوااا ...

الطبيب : فصراحة الالة مايمكنش يرجع نظامو الغظائي طبيعي بشكل جدري ... يعني غايكون ريجيم لمدةطوييلة بحكم ان المرارة مابقاتش وحناا اي حااجة كناكلوها كاتصفيها المرارة ضونك المصران خاص يتعوض على عدم وجودها وهادشي غياخد شوية الوقت ... حفااظااا على السلااامة ديالو ... وباش مانوقعوش فشي اختلالات فالامعاء ولا الجهاز الهضمي ...

سيمو حك على لحيتوو: اه واخا ادكتور ولكن شنو طبيعة هاد الريجيم ...

الطبيب : غايبعد على الدهنياات بشكل نهاائي وغايحاااول ياكل غير المبخر ... واي حاجة طاايبة فاليدام ولا العطرية ممنوعة ... تقدر توصل لعام ولا كتر ديال ريجيم على حساب التجاوب ديال الجهاز الهضمي دياالو .. وديك السااعة بشوية بشوية غانحاولو نقصو من الريجيم ولكن ديما غايبقى عندو اشكال ديال النظام الغداائي ولي خاااص مايستهترش بيه ... هاد المدة غايتغدا غير على السوائل ... يبعد على الخبز واللحم ... يحااول ياكل غير الشربات السخونة ولي تكون معطرة غير بالكامون وشوية الملح لا غير وخصوصا الملون لااااا ...يكتر من الخضر والعوااصر الطبيعية ويبعد بشكل كلي على المعلبااات كيفما كان نوعهااا ... وعاد خاص يشرب دوا ديالو بانتظاام ويتبع المواعيد لي غانعطيه باااش نراقبو الحالة ديالو ... هادشي غايكلفو شوية من الطاقة الجسمية والعضلية ديالو لي تقد تراجع وينقص فالوزن بشكل كبير ولكن ان شاء الله يكون خير

سيمو :واخا ادكتوور وايمتا غايقدر يفيق ونشوفوه

الطبيب : من العملية كل واحد والمدة لي كايستغرب باش يفيق ولكن مغايفوتش ربعة ولا خمسة سواايع نديرو لي اناليز اللازمة وديك الساعة طمنو عليه .... ولكن غايكلس واحد تلت يام معانا ومن بعد ويقدر يخرج ان شاء الله ...

عطاهم الطبيب كاع المعلومات لي خاصاهم وشرح ليهم ااحاالة بالديطااي والخطورة ديال اي استهتاار من طرفهم ولا طرفوا ... ولي تقدر توصلو لشي كرييز غايكونو عندهااا نتائج خاايبة ...

تعاشات العشية وراانياااا مشات لدار وصلااات حياة تبدل عليها وترتاح شوية وخلات معاها عتيقة وخرجااات ديريكت مشات لعند خنساااء ... حلات ليها نصيرة وطلعااات للبيت حلاااات لقاتها مجبدة فوق السرييير ... شافتهااا وكلساات : اهلا رانيااا ...

رانيا كلساات حداها: صافا علييك ؟؟ ...

خنساااء جمعات شعرها لي كانت طالقاه : بيخييير راسي لي ضارني شوية ... كيف دازت الامور داوه للبيت ولا باقي ...

رانيا : لا لا باقي فالعناااية ... خلينا غير سيمو تمااا وجيت انا وخالتي حياة تاهي تشرب دوااهاااا مسكينة حالتها تقطع فالقلب

خنساء : الله يكون فعوانها مسكينة ... شنو قاليهم الطبيييب ياك بعدا كلشي عندو مزيان ؟ ...

رانيا : شكليا راه كلشي مزياان ولكن مسكيين غايتبع ريجيم خاص مدة طوييلة وعاد حياتو كلها وهو راد البال لماكلتو ... تضررو لييه الامعااء داكشي علاااش الطبيب فرض علييه مياكلش اي حااجة ... وااشمن مياكلش اي حااجة بحال الا قطع عليه كلشييي فهاد المدة مابقاش يقد ياكل لا يدام لا عطرية غييير دااكشي لي باسل حاااسل مصلوق ولا مبخر فيه غير الملح وحتى هي مايكترش منهااا

خنساء بلعات ريقها : يااربي السلاااامة ... ( شدات على راسها ): بففففف ..

رانيا طولات فيها الشوفة : ودابا عاودي ليا شنو وقع بالتفصيييل ... شنو طرااا بيناتكم وماتقوليليش وااالو حيت كانعرفك مزياااان اصحييبتي ...

خنساء تنهداااات قلبهااا باقي مزير عليهاا وضميرهااا قاهرهاااا من هادشي لي وصلاااتو لييه محملة راسهاا كامل لمسؤولية فكاع لي طراااا ... شداات شعرها مرجعاااه ورااا وذنها ونطقاات بحصرة : انااا سباااااب ..... انااا سباااااب فهادشي كاامل ...

رانيا شافت فيها : شنووو وقع ؟؟ ...

خنسااء نزلوا تاني دموعها على خدهاااا كاتعاااود ليهااا كاتشهق والندم غادي يقتل فيها من فعلتها ... انتقاامهااا والمهاا عماهاا وخلااا ضميرهااا يموووت وتصرف بلاماااا تفكر فالعواااقب ولااات انسااانة مكااتحسش ... شنو استااافداات من هادشي من غير الندااامة ومرضاتو هو ووصلاتو لماصل خايبة ...

رانيااا تنهدات بلا حول : ولكن علاش اصحبتي درتي هاد الفعاايل .... مني ما باغاااهش علااش عطيتيه امل ... من ايمتاا ولاو مشاعر الناس بالنسبة ليك لعبة ...

خنساااء بتحصر : ماتزيديش علياااا حتى نتي عافاااك ... لي فيا كااافيني .

رانيا : مادرتي فيها مايصلاااح اصحبتي .... اشداك لهادشي اصلااااا ... من لول قلبي عليييه الا محاملاااهش لااش هاد التبرهييش كاامل ... السيد كااانت واصلة بيه لعظم شحال ديال المشاكل والرويينة ومرض غير بمسبتهم وجيتي نتي لعبتي علييه وكملتي مابقا حتى جبتي ليه التمااام ... لهاد الدرجة مابقااش عندك شوية الانسانية ... واش اخنساااء عارفة شنو درت واخا كاع مايطراش ليه هاكا مكانش خاص تصرفي معاه بديك الطريقة ... واخا يكون ماعرت شنو دار ليك هاد السيد

خنساء وقفااات جااعرة كاتعاتب راسها : اوووف اوووف عااارفة ... انا مانسواااش... عاارفة راااسي حمااارة وتبرهشت ...ايييه عاارفة هادو ماااشي خصااايل ولكن والله ماكنت عارفة هاادشي غاادي يوصل حتى لهااد الدرجة .... اووووووووووووف ... انااااا حماااارة حماااااارة... مااانسوااااااااااش ... مانسواااااااااش

رانيا تنهدااات بلا حول وقربات عندهااا بمواساااة : صااافي دابا لي عطا الله عطااه ... غير الله يفك هاد الجرة على خير وصافي ... يصح هو بعداا ويرجع لميمتو ونشوفو كيفاش نفاريوها ديك السااعة ...

نسرين ضرباتها بنعسة محاولة تناسا الوجع لي تسلط عليها فاقت كاتكسل باقا كاتحس بمغض خفيف وقفاات كاتحرك يديهاا على كرشها بشوية بااش تخفف الوجع لي حاسة بيه..دوخة شداتهاا و حسات بردة طالعة معاها غير حبساتها.....مشات جيهت الشرجم حلااتو و بداات كاتدخل النفس و تخرجو من فمها بااش ترخى...حركة كاانت فعالة بااش تخلي الألم لي حاسة بيه يخف فلبلاصة و داك التشنج لي شادها فأسفل بطنهاا يمشي...

خدات التيل و خرجات لحماام بخطواات تقيلة...دخلات ليه و غسلاات وجهاا لي لونو تبدل من كترة الدموع و لحزن لي طغاو على ملاميحهاا....

هزات التيل بين يديها...فكرات و فكراات...و مالقاتش من غير هاد لقرار المصيري لي خدات...حاسة بغصة فقلبها كأنها كاتلعب اوراقها الأخيرة فتخاد قرارتها...عارفة غاتبدل شحال من حاجة و ممكن يزيد يحقد عليهاا عصام كتر و كتر...و لكن ماعندهاش نهائيا حل اخر....عارفة شخصيتها ضعيفة و هشيشة على انهاا تواجهو...أكيد مغاتقدرش... لاهما تمشي حتى تبرد القضية ويعرف لي طرا وديك الساعة تشوف شنو الحل

دخلات لوتساب و سيفطات ميساج لوفاء كاتقول فيه

"صاافي غدا فصباح غير يخرج لخدمة غادي نجمع حوايجي...لهروووب هو لحل لي بقا ليااا حيت الا عرف لي درت وانا هنا غايصفيها ليا ...الى شفتي لميساج ديالي قولي ليا فين غاتسنايني"

سيفطااتو و مسحاتو فلبلاصة من عندهاا مامخايلياش لي طخاص ابدا...

خدات نفس معمق حبسااتو فداخل ديالهاا و خرجات من لحمام راجعة لبيتها... لقات عصام متكي فوق سرير شااد تيل...طولات فيه الشوفة متبتاها عليه...عمرهاا ضنات واش غايجي نهار لي غاتخليه فيه و تقرر تمشي...بنسبة ليها هو لهوى لي كاتنفسو...و لكن تجري الرياح بما لاتشتهي السفن...دارت غلطة كبيرة بسباب طيشهاا و نية الزايدة لي فيها...و باش تخلص هاد لغلطة غايكلفهاا تفارق مع اعز انسان عرفاتو فحياتها و تعلقات بيه... غمضات عينيهاا بتتاقل كتحاول تقاوم رغبتهاا فلبكااء مرة اخرى...

عصام طلع فيهاا عينيه لتواني...كاتسالي معاه ملي كاتبكي...بتاسم بخفوت و قال بإجاز حال دراعو:أجي قربي لعندي...

سرعات خطواتتهاا بحال شي بنت صغيرة و مشات تخشات فحضنو حااطة راسهاا على صدرو كاتشم فريحتو كانها كاتستنشقهاا لي أخر مرة...

نطق عصاام بنبرة هادىة ماسح على شعرها بحنان طابع قبلة عليه:ماديري فخااطرك واالو...مزاال ربي غادي يفرحناا...مغاينسنااش...

خرجات تنهيدة حارقة من أعماقهااا...و نطقاات بلا ماتحس بنبرة باكية: سمحلياا بزااف اعصاام...عفااك اما سمحلياا...

جاوبها على نيتو اسحاب ليه على لولاد:الله يهديك..واش غانسمح ليك على شي حاجة ماشي بيدك...

طلعات فيه عينيها لي عمرو بدموع... قربات ليه و طبعات قبلة خفيفة على شفايفو و نطقاات بنبرة صادقة نابعة من اعماقهاا لي كاتقطع :كانبغيك...و غااانبقى ديما كانبغيك...وخاا يوقع لي يوقع...(كملاات بتأكييد)كااانبغييييك

فصباح بكري...نسرين كاانت كاتسنى على جمرة عصام فوقاش يخرج من لخدمة...ليل كامل و هيا تفصل و تخيط فدامغهاا نوم مزارش عينيها نهائيا.... ناضت من سرير بعدما تاكدت ان كلشي خاارج و سقييل فداار... الى خنساء لي كانت مزالة ناعسة فبيتهاا...جمعاات شعرهاا و دازت لحمام غسلات و جهاا و داازت لبلاكار حلاتو جبداات صاك متوسط لحجم و جمعات فيه حوايجهاا ضروريين فقط يلا ماتكتر عليها...كاتجمع و دمووع ناازلة على خدهاا مبااغينش يتحبسو...عمرهاا ضناات واش غايجي نهار لي غاتخرج هااربة فيه من داارهاا... تخلي كلشي موراها و تمشي....ولكن بااش غاتواجه عصام؟!حتاا لوجه بااش تشوفيه مابقاش عندهاا...كيفاش غاتشرح..و كيف غاتبرر لكارتة لي داارت...حاسبهاا كيف رااسو و بين ليلة و نهاار تخون تيقتو؟! تمناات كون يديهاا تقطعاات و لا مداتهاا على فلوسو...لي بسبابهم و صلات لهاد لماصل كااملة...بنسبة ليهاا تهرب حتاا يعرف لفضيحة لي دارت و يتفش على خاطرو...خير ليهاا من انو يعرف و هياا معااه...حيت متأكدة اناا ردت فيعلو مستحيل تكون عاادية...بلخصوص مع واحد بحال عصام لي يديه سابقينو كايدوي بيهم و مكايبقاش يتحكم فيهم ملي كايتعصب....

لبساات عليهاا و هزات صااك و خرجات كاتودع لمكاان بعينيها...لمكاان لي شتاقت ليه قبل حتاا ماتخرج منو...رغم بعض المشاكل لقلال لي كاانو كايوقعو ليها فيه ولكن ماتنكرش ان حتااا خير مانقصها فيه..عايشة فيهاا لعيشة لي تمناها أي وحدة..

كتمات شهقاتهاا و هياا كاتلعن فداخل ديالهاا طيبوبة و نية الزايدة لي فيهاا...كاارهة راسهاا بمعنى الكلمه...عاد عرفات قلة عقلهاا شحال كاتسوى...و عاد عرفات ملي كان كايقوليها عصام "هاد الزواج الى ماكملش غاتكوني نتي سبابو"....مكانش كايقولهاا من فراغ...ولكن هزها و حطهاا و عارفهاا سايط ليها الريح فدماغ و لي جا كايديرهاا بيها....و اكيد غايجي نهار لي غاتمشي بزاوجهم للهاوية...و هاهو جاا نهاار...

خداات نفس عميق و خرجات بخطواات سادة لباب من مورااها...بحكم كان صباح بكري لغاشي قليل حتاا حد من جيران مرد ليهاا لباال...

سرعات خطواتتهاا و هياا غادة للبلاصة لي متافقة فيها مع وفاء...دقائق قليلة حتاا وصلات لعندهاا...كانت راكبة فلمرسديس و حداهاا سيد لي كاتعرفو...شارت ليها بيديها باش تركب... طلعات فلوطو و دموعهاا فعينيهاا...ديماارة و كسيرى بيهم فتجاه المجهول....

عصام نزل من سكوتر ديالو محيد لكاسك راجع من لخدمة شوية بكري...

دخل لدار لقاا نصيرة فلكوزينة...سلم عليهاا و طلع لبيتو...حل لباب و دخل كايبان ليه لفراش فوق السرير باقي كيفما فاقو فيه مامجموعش على غير العادة...رمش بستغراب مع غايدور وجهو غايبان ليه لبلاكار محلول...قرب لجيهتو و هو يلقا نص من حوايج نسرين مهزوزين من بلاصتهم...و حتا صاك لي كايحطوه تحت لبلاكار مع لڤاليز مكاينش...فعلا بقاا كايدقق لتواني مفاهم واالو...قراها فسماا و جااتو شي حاجة واقعة و لأمور ماشي عادية ابدا...داار ايدو فجيبوو جبد تيل...دوز لابيل لعندها لقا تيل تاعهاا طاافي مكاتجاوبش...

خرج من لبيت نازل فدروج بخطوات سريعة كايعيط:عمتي...واا عمتي...

خرجات عندو نصيرة من لكوزينة كاتمسح فيديهاا:هاااني... نعاام شنو بغيتي؟!!

عصام بتساؤل:فين مشاات نسرين؟!!

نصيرة حركات فمها بعدم معرفة و قالت: مشفتهااش ݣاع ليوم...خرجت فصباح بكري خليتها ناعسة..و ملي جيت لقيتهاا خرجات..قلت يمكن مشاات للفاك...

عصام:اشمن لفااك راه حبساات شحال هاادي...

نصيرة:تلقاايهاا مشات غير عند مهاا دابا تبان ليك داخلة....حتا نتاا غير تغبر عليك دقيقه تبداا تقلب بحال لحمق...

عصام بتفسير: أعمتي..واش غاتمشي تشوف مهاا و تجر نص فحوايجهاا....دابا ملي طلعت لبيت لقيت حوايجهاا نصهم مكاينش...جاك هادشي عاادي

نصيرة وسعات نضرتها بتعجب و ردت عليه بستفهام مرفعة صوتهاا: حوايجهاا نصهم مكااينش...تاا اشكاتݣول...

زفر بضيق و قال مصغر فيهاا عينيه:تخاسمتو اعمتي تاني لاا؟!! داكشي علاش هزاات شطايطهاا و زادت تاني غضبانة لدارهم...

نصيرة شهقات بصوت مسموع...ضربات على صدرهاا و قالت:بلعمااا يااوليدي وااش شفت ݣااع خليقتهاا عهدي بيهاا من لباارح...حتا لعشا راك شفتيها ݣاعمة تعشات معانا...و كيفما ݣلت ليك...ليوم فصباح كيف فقت و فطرت خرجت..و ملي رجعت مالقيتهااش...ابدااا وااش شافوها عيني...(كملات بتساؤل) صونيتي ليها؟!!

عصام:عيطت تليفونها طاافي...(عاود هز تيل و قال)اناا نعيط لمهاا نشوف واش عندهاا...

دغياا دوز نمرتهاا معيط ليهاا...مرت تواني قليلة حتاا جاوباتو و نطق بهدوء:سلام خالتي نجاة لابااس عليك كلشي مزيان...لحمد الله و نتي...هاحناا لحمد الله سول فيك لخير...ههه ولاهيلا مغبراني غير لخدمة نلقا شي وقت و ندوز نشوفك...اييه ان شاء الله...قولي ليا جيت دابا لدار مالقيتش نسرين كاينة عندكم؟!!(شاف فنصيرة و كمل مطول لهضرة) اااااه مجااتش ݣاع عندك...لا لا غاتكون غير خرجاات تقدا شي حاجة و نسات تاني راسها فزنقة...صافي غير تجي لداار نعيط ليك كوني هانية...

قطع عليها لخط كاايسوط و يمسح فوجهو دمااغو بداا كايعطيه عرام تلأسئلة لي ملاقي ليهم حتاا جوااب

وقال بستغراب شديد:فين غااتكون مشاات هاادي؟!...لاا شي حاجة ماشي حتاا لهيه...مايمكنش تهز حوايجهاا غير هكاك و تزيد خلفة...(بتأكيد) مااايمكنش ماايمكنش...

نصيرة:و لعجب...مامولفااش ليهاا ݣااع...

عصام: اجي خنساء فيناهيا؟!!

جاوباتو بإجاز:مشاات لمحل كيف لعادة...

نطق و هو غاادي:اناا غاانمشي نشوف وااش شافتهاا..باينة غاتكون تصادفات معاها على صباح...

كمل على هضرتو و زاد خارج من داار غاادي ديريكت لعند خنساء..دمااغو ترفع فعلا واخاا باقة حتا حاجة مابينا ولكن ملي لقا حوايجهاا مكاينينش و طافية تيل غابر ليها لأتر بداا كايتشطن عليهاا...

نصيرة بقاات متبعاه بعينيها كاتشوفيه بتحسر...غير خرج نطقاات بضيق:وسير يااوليدي....ونتاا عندك ديك لمرى بحال خنشة سيمة كل مرة و كيف مخلطة...علم الله تااني شنوو دايرة...ومغاتجي فيك دقة غير نتااا....الله يحضر سلامة و صافي...

فالكلينيك فوحدة من لي شومبر كان متكي عبدو بعدما خرجوه من العنااااية ودارو ليه الفحوصااات وفااق من البنج ... كالس حداه سيمو وحيااة لي فرحاانة بنجاتو ليهااا مقاداها فرحة حيت رجعوا ليها الله ...

سيمو : خلعتينا عليك اصحبي....

عبدو رمش ليه بابتساامة وجهوا صفر وفمووو بيض بانت علييه المرضة بالبيان بحال الا رجع من المووت ... مقادش يدوي بحكم الفتحة بااقاااا جدييدة بزااف وحتى الجهد ماعندوش من مور العملية والبنج ...

حيااة : انااا راااه فينماا درت شي حسنة وقفات ليا اليوم مع وليدي... حمدتك ياربي وشكرتك لي رجعتيه ليا وماحرمتينيش منو ...

عبدو غير كايرمش ويبلع ريقو ما قاد يخرج حتى كلمة ... عينييه داابليين وصحتو كلهااا مهدودة علييه حااس برااسووو واخا فاايق باااقي جسمو كلو مخدر ... عقلو غااايب فراسو ديسك واحد باقي كايتعااااود هو لحوار لي داز بينو وبين خنساااء فاق عليه ديريكت ... كايطلع النفس ويهبطهاااا متكي حدااهم ولكن عقلو ماشي تماااا ...

سيمو : انا اخاالتي غانمشي نجيب رانيا ليل هاذا حيت مشاات تجيب الحوايج لعبد الله ونجي .... ياكما محتاجين شي حاجة نجيبها معاياا

حيااة : قولها عاافااك ماتنسااش لييه واحد الكااشة فوق الماريو سخووونة هادي لي دارو ليه خفيفة وفجوايه الصباح كايتحرك البرد ...

سيمو : واخا اخالتي..

يلاااه غايزيد وهي تردو ناطقة بصوت خافت : وفكرها لا تنسى لييه حوايج التحت بينك وبينهااا واخا...

سيمو ابتاسم : واخا كوني هاانية ... يلاااه خليك ليكم الراحة ...

حيااة هزات يد عبدو وباستهااا حامدة ربي وشاكرااه : الله عليك اوليدي وشحال خلعتيني ... كنت غانموت فيها

عبدو دور عينو لجيهتهااا وزير شوية على يدهااا مرمش لييهااا وراسم ابتسامة داابلة على وجهوو غير بزز باش ماتبقاااش مخلوعة علييه ... كايشوف فيهااا وكيفاااش يقدر يسمح لراسو يمرضهااا ويخلعها عليه بهاد الطريقة ... حااس باللوم على رااسو حيت عمرو هناها فحيااتهاا ديمااا داير ليها الرعب ومخليهاا خاايفة عليه ... من نهار عقل على راسو وهو مشيبهااااا .. تنهد مغمض عينووو حااس براسو تقييل علييه وعاود غفاااا بلاامااا يحس براااسو ...

ففيرما خارجة على المدينة جواايه سيدي قاسم دايرة بالشجر والخضااار كاتحمق وسط منهااا دااار مبنية على جوج طاج كبيييرة من الشوفة ...كالسة وفااء ونسرين ومعااهم داك الشارف الهارف لي مصاحبة معااه فالصالون لي كان كبييير يجري فييه الخييل مفرش بالبلدي .. وديزااين تقليدي غزااال ديال الجبص ... الصباغة ديال الفريييع يباان فيها وجهك بكترة مكاتبري وتلمع ... الداار كاتبااان كبيرة وعامرة بالبيوت كاتلف ...

وفاء قربات لنسرين : ارتاحيتي شوية بعدا ؟؟ ...

نسرين : لاباس بعداا ... غير وصلنا ورجعاات فيا النفس قبيلة كاان غايسكت كانقول دابا يوصل علينا دابا يشوفني شي حد ... القفقاافة كانت قاتلاني ...

وفاء بايجاز : ايوا هنا راه ماعندو فين يلقااك ... خليك حتى تبرد القضية وعيطي لمك سوليهااا وديك الساعة يحن الله ...

نسرين : لهلا يخطييك اختي والله مانسى ليك هاد الخير ..

وفاء : الله اودي مابيناتناش اصحبتي ...

وسط هاد الحديت كان كالس الشارف كايشووف فنسرين ويطلع ويهبط بنظرات اعجااب كبيير ... كلاهااا بعينووو ماخلااااش فييهاااا ... عينو مزاكيينش كاايغليييو ...

نسرين قربات بهمس لوفاء : هاااد البركة لي عندو هاد الخير كامل زعمااا مايبغيش يسلفني دوك الفلوس نفك بيهم الحريرة ...

وفااء : اودي لهلا يوريك ... راه واخا تشوفيه هاكااا البق مايزهق .. زقراااااااام من درجة ضابط ... وعااد نتي دابا خويتي دار وراجلك غاتكون فراسو ولي عطا الله عطاه ماعندو فاش يفيدك ..

نسرين تفكرات عصاام وعينيهاا غرغرو : غير سكتي ماتفكرنيش ....

قاطعهم الشاارف بصوت باح : اشنو بغيتي تاكلي انسرين ... قولي ليا ماتحشمييش ...

دورات فيه وفاء عينيهااا مخنزرة وهي كاتشوف فيه كايتبسم ويدور فعينيه بلا فرانااات ...

نسرين : لا مافياش الجووع ... شكرااا ...

الشارف : ماتحشميش الداار داارك .. خودي راحتك فييهااا وعاد راها كااالم ومفوجة مغاديش تقنطي هنااا .... والا خصاتك شيحاجة انا نعطيك نمرتي وصوني عليا فاي وقت ...

وفااءقرمات حجبانها بانفعال : علااش بالسلاامة غاتعطيها نمرتك انا فيا الكفااية والا خصاتها شي حاجة انا غانجيبها ليهاا ...

نسرين استادنات منهم ونااضت مدخلة حوايجها للبيت لي وراتها وفااء تبدل عليهااا ... بقااا الشارف كالس على الجمر عينيه على باب البيت باغيها غير ايمتا تخرج ... اما وفااااء العافية شعلات فيها لدرجة بدات تدخلها الندامة علاش جابتها اصلااا .... حسات بالهمزة ديالها فحال الا كاطير من يدهاا ... خصوصا غير خرجات نسرين لابسة بيجامتهااا وعينيه مشااو. لعندهاحوااال ديال المعقووول ... وهو كايشوف فطايتها المنحووتة ... وفصالتهااا لبلدية داك النوع لي كايعجبو ماحيدش عليها العين بالمرة ...

وفااء ناضت فيها البيضة ونطقات :ايوا صاافي البنت غاتبغي ترتاح يلاه نمشييو ...

جاوبها : اءء مالكي زربانة باقي الحال خلينا مونسين السيدة غاتبقى غا بوحدها هنااا ... شوية وعاد نمشييو ...

وفااء غززات سنانها ودورات وجهها معاجبها حااال كاالسة على عينيهاااا ...

نطق بتساؤل : شحاال فعمرك انسرين ..

جاوبات ببلاهة : 24 عااام ...

وفااء سااطت ووقفاات بتجنديرة دايرة فيه : نووض نووض يلاااه ماما كاتسناني غانتعطل عليهااا ...

نسرين : واعنداك ماترجعيش اصحبتي راني غير بوحدي هنا

وفاء : كوني هانية غانرجع .... وعاد ماعندك مناش تخافي كاينة السيدة لي مقابلة الفيرما غير هنااا حداااك غاتبقى تجي طل عليك وتجيب ليك تاكليي ... الدنيا مأمنة هناااا غيير تهناي ...

نسرين عنقاتها : لهلا يخطيك ... سلمي على داار ...

وفااء ودعااتهااا وخرجات هي وصحيبهااا وعينو بقااو ورااه ماسخااش يمشي فخطرة ...

كاان عصاام فلمحل عند خنساء واقف كاايمشي و يجي حاط يدو على راسو دماغو غايسكت بكترة تخمام تالف بلمعقول...

عاود شاف فخنسااء لي مسندة على لكنطوار مربعة يديها و نطق: وااش غانضتي فطرتي و خرجتي...ماشفتيهااش نهائيا...

خنساء تنهدات بملل و قالت:واعصام...دابا مولف فيا لكدووب..راه قلت ليك مشفتهااش... كون كنت عارفة شي حاجة غانخليك كاتحرݣ هكاا بلا مانقولهاا ليك....حتا انا بحالي بحال عمتي من لبارح مشفتهاا...

عصام زير على قبضة يديه ونطق كاارز على سناانو كايحاول يضبط اعصابوو لي بداات كاتشنج:فييين غاتكوون مشاات هاادي فييين.؟؟!...

خنساء سكتاات تواني...مشات بيهاا داكرتهاا لنهار لي طلبات منهاا نسرين لفلوس بغرض تعطيهم للبنت لي مريضة فعائلتهم...

نطقاات بتدكر:بلاتي بلاتي...(شافيها عصام بهتماام و قرب لعندها) اجي...ماتكونش طرات شي حاجة لديك لبنت لي مريضة من عائلتهاا و مشات عندهاا...

عصام هز على حاجبو بعدم فهم و قال:اشكااتروني... إناا بنت دااوية عليهاا؟!!...

خنساء: ومانعرف اخويا...انا مرتك مكانفهم فيهاا حتا لعبة... داك نهار جات عندي مفشكلة و طلبات مني نسلفهاا شي فلوس بغاات تعطيهم لواحد لبنت مريضة فعائلتهم غادير عملية..لقاتني يلاه كانفرش داري مزيرة و معطيتهااش...

عصام شافيها بتعجب و قال: اناا مفرااسي حتاا شي بنت عندهم مريضة...و هيااا كاتعاود لياا كلشي مكاتخبي علياا والو...

خنساء بتأكيد: وراني قلت ليهااا تقولهاا ليك و لونهاا تبدل فلبلاصة...حسيت بيهاا ماهيااش بحالا مابغاتكش تعرف...شتي غاتكوون غبراات غير عند هااد لبنت...

عصام مسح على وجهوو وقال:لااا...ماتݣوليش ليا...نسريين انا لي كانعرفهاا...مايمكنش تهز رجل لشي بلاصة بلا ماتعلمني و تشاورني و حتاا نݣوليها سيري عااد تمشي...

ردت عليه خنساء بهدوء: ومعرفتي تكون لخباار جاتهاا على غفلة و مشاات.. ونتا عارف...هياا راه بعض لمراات كاتخدم بلا عقل...

سكت للحضات مدورهاا فدمااغو...و نطق مصغر فيها عينو:تقدر تكون هضرتك بصح....عرفتي شغاندير...اناا غانمشي لعند مهاا و نشوف قضية هاد لبنت...توريناا فين كاينة نمشي لعندهاا....

نطقات خنساء هاازة سوارت لمحل بين يديها و صاكها:بلاااتي نمشي معااك...

دغياا طرقاات لمحل و مشااات معااه لعند نجااة...غير وصلو و قالو ليها لي كاين بحكم مايقدروش يخبيو عليهاا ان نسرين غابر ليها لأتر...طاحت ليهم بلبكااا و نحييط ولاو بغااوهاا غير تسكت حلفاات ماتسكت...كبدتهاا فلبلاصة تحرقات على بنتهاا لي معرفات شنو طااري فيها...

نطقات بنحيييب قوي كاضرب ففخضهاا و تنوااح:هء هء..الله على بنيتي فين مشااات و اشمن طرييق شدااات...الله على كبيدتيي و فين غاانقلب عليييك...هء هء...بنية و حدة لي عندي و ترزيت فيهااا و هياا باقة نواارة مفتحة مشاافت متشوفااات...هء هء

نطق يعقووب بنزعااج:الله يهديك أمي سكتي و حضري لإيماان...حنااا داباا بااقي معرفنااا وااالو...

خنساء شافت فيهاا و تنهداات بقاات فيهااا عارفة ماشي ساهل عليهاا تعرف بلي بنتهاا لوحيدة ختفاات و معليها حتا خباار...

عصام بتساؤل:قولي ليا اخالتي نجاة...عندكم فلعائلة شي بنت مريضة وخاصها دير عمليه؟!!

ردت عليه بنبرة باكية:لا اوليدي عائلتنا كلهاا صحة سلااام مكااينة حتاا شي بنت مريضة...علاااش كااتسول؟!!

عصاام خرج نفسو بصوت مسموع شاايف فخنسااء بخيبة امل...لخيط لوحيد لي كان عندهم باش يلقاوها صدق مامنو واالو...

جبد يعقوب تيليفونو كايصوني عليهاا ونطق:حتااا تليفونهاا طافيااه...

نجاة زاادت كاتغوت: نوووض ݣعدني نشوووف ختك فين مشااات...غانقلب عليهاا درب بدرب...(هبطوو دموعهاا و كملات كاتنخصص) واااقعة ليهاا شي حاجة خااطري عاالمني...اهئ اهئ الله على بنيتي و معرفتك حية ولا ميتة...واكلة و لا جيعاانة....و فييين مشيتي و خليتيني كااانتقطع فييين...

قرب لعندهاا يعقووب مدور يديه على كتاافهااا كاايهدن فيهاا:صاافي امي صااافي...مغاايكون طااري ليهاا والوو..هااحناا غانقلبو عليهاا و نجيبوهاا ليك ليووم مزاال...

عصام نااض وقف:انااا غانمشي نعلم لبوليس..هماا غايعرفو يتصرفو حسن منااا...هااد لوقت لي كاانضيعوو زاايد فينااا...

ناض يعقوب و قف و قال:بلاتي نلبس حوايجي و نمشي معااكم...

عصام:نتاا غاابقاا مع لوليدة راهاا عياانة...انااا غانشوف معااهم و باشماا كاان نعلمك....

نجاااة: اناااا مزاااوݣة فيييك مااترجعش حتااا تجيبب بنتي فيديييك....عندااااك ترجع بلا بيهاااا....

عصام قرب و بااس على راسها:غاا تهنااي و ماا يكوون غير لخير ان شاء الله...

يتبع...