بنت السايب الجزء 22

مع جوايه لعصر عبدو كان جاي مع سيمو كايهضرو ويتمشاو محااسينش بطريق...

نطق سيمو بهدوء:صافي انا غدا غادي نجيب ݣاع السلعة لي بقاات حاصلة فلمحل لقديم...ونحطهاا عندك فلمحال..من هنا لسيمانة ملي تكمل الصباغة ونقادو لأمور نبداو...

عبدو بإجاب:ايه ان شاء الله بينما نيت كملت حتا انا داكشي لي بقا خاص...

سيمو دار يديه فجيبو وجبد التيل ونطق بإجاز:الله يسر... نتمنااو خير... (كمل بنزعااج)تااا وااش هاد مولات لحلوى مزالا بعيداا...

عبدو:مالك اصحبي جوج خطوات عيتي فيهم...هاحنا مابقا لينا والو و نوصلو... دقيقة مكملاش

دارو مع الدريبة وقربو من حدااا لمحل ديال ماماات رانيا باش يجيبو السخرة لي وصاتهم عليها حياة ...كانت رانيا حانية كاتستف الحلوى فطبسيل....

قرب هو وسيمو لي حادر راسو خاشي عينيه فتيل مامسوقش...

ضرب عبدو بيديه على لكنطوار ونطق بمزحة:اري واااحد جوح كيلووو تاع لفقااص وطلقينااا خلااص...

وقفات رانياا وشافت فيه ونطقاات كاضحك:مالك اخويااا على هاد زربة لي زربتي علياا مانخاافوش...غانتا لي غاتشري...

عبدو:ههه بغيناا غا نشدو فيك شوية...لاباس عليك بعدا كلشي مزياان

رانيا:لحمد الله هاد الساعة...

عبدو بتساؤل:عتيقة مكينااش؟! سيفطاتني عندها لوليدة على شي سخرة خلاتهاا عندهاا ولا معرفت شنو...

رانياا:لا لا هيا مكايناش... يلاه مشات عند خالتي وغاتتݣلس عندها وماترجع حتا لعشية...بلحق ماتخافش خلات ليا شنو بغات خالتي حياة....انا غانعطيه ليك

رد عليها مبتاسم:اوى مزياان مكان نيت فياا لي يرجع(هبط عينيه على لڤترينة) تباارك الله هاادشي كاايشهي...وتبدل على اخر مرة شفتو...ممم زدتو حتى لبريوات تاع اللوز...ومايتسالكمش

رانياا بتاسمات وتحنات على طبيسيل وهزاتو مداتو ليه بلباقة باش يهز منو: اي حاجة طلبوها لكليان خاصك تحضرهاا ليهم...هاكا بسم الله دووق بصحة

خداها من عندهاا مبتاسم:ربي يخليك...

شافت فسيمو لي كان مزال مهبط راسو كايشوف فتيل ماهزوش بلمرة ولا شاف شنو قبلاتو... نطقاات بنبرة رقيقة:هاكا أخوياا خود دووق حتا نتااا...

سيمو هز راسو بتتاقل يلاه غايشوفهااا.... ونطق بنبرة جافة:لا مكانكلش لبريوات مقليين مكايتوالموش مع معدتي...وزيدون معنديش مع لحاجة لي فيهاا اللوز...

كمل هضرتو وعاود هبط راسو فتيل...رانيا هزات حاجبهاا مطلعاه ومنزلاه جاتها هضرتو مستفزة...حركات راسها بلإجاب ورجعات طبسيل لبلاصتو وقالت فخطرها"لهلا يدوقو ليك"

دخلاات بزربة لداخل وجابت السخرة لي جاو على ودهاا...

خداهاا من عندهاا عبدو وقال كايشكرها:الله يحفظك اختي رانياا...

رانيا بلطف:هانية الله اودي...

سيمو رد التيل لجيبو طلع عينيه فلڤتريينة عجبو صابلي لي محطوط وعاد طريقة الأنيقة باش مستف كاتزيد تشهيك...

نطق بلا مايشوف فيهاا بتساؤل:شحال دايرين لهاد صابلي ؟!!

رانيا بتاسمات فوق النفس وخا محاملاش تهضرو نطقات بهدوء:مرحباا...هداك 70 درهم لكيلو...انا نوع بغيتي؟!

سيمو كايشير باصبعو:عبري واحد كيلو من هداك لي فجنب...

رانيا هزات لبواطة يلاه بدات باغا تهز تعبر ليه من واحد النوع وهو يوقفها مرفع صوتو:وااا ماشي هدااك قلناا ليك لاااخر لي فجنب...لي بلا شكلااط...

رانيا حبسات طلعات فيه الشوفة وهيا حاسة براسهاا ترتابكاات شوية من هضرتو...

نطق سيمو مبتاسم بستهزاء جاتو شوفاتها فشكل:ههه فهمك قليل ولا؟!

بادلاتو ضحكة صفرة باش تخفي توترهاا ونطقات بتقة: اوى من لول نعت ليا .. وقول "لي فجنب ولي بلا شكلاط" كنت غانمشي ليه نيشان اسي...

قاطعهاا عبدو:سيمو...هدا ولد خالتي...يلاه جا عندنا...

بتاسمات لعبدو محركة راسهاا ودورات الشوفة لعندو وهيا تجمع الضحة ونطقات بجمود:متشرفين اسيمو...ومرحبا بيك عندناا...

سيمو:شكرا...وسربينا عفاك راه حنا معطلين...

رانيا معوداتهاش معاه وهزات عبرات ليه كيلو من الشكل لي بغا بلخف من داخل ديالها محملاهش يبقا واقف عليهاا بغاتو ياخد لي بغا ويدݣ يمشي فحالو...عطاتو لبواطة حازماها بخويط صغير ودارتهاا فساشي ومداتها ليه...خلصهاا وخطف لبواطة من عندهاا بنفضة...

رانياا:اءءء عنداك ماتعاودش تخطف بواطة تاع لحلوى بجهد هاكاا و بلخصوص الى شريتي صابلي راه هشيش ودغياا كايتفرتت...(بتسمات بخفوت)خودو بشوية من عند مولاه وتكايس... انا غاوصيتك

مجوبهااش حرك راسو بلا حول و زير ساشي فيديه ودار غادي فحالو....

نطق عبدو مودعهاا:يلااه بسلامة عليك ارانيا وسلمي على ماماك بزااف حتا نعاود نشوفهاا

رانياا:موبلااغ...الله يعاونك

بقات متبعاهم بطرف عينيهاا و نطقات كاتشوف فجيهتو:ياااه على ماركة كيف دايرة وشحال حاس بجنيبااتو..ومنفووخ غايتفرݣع....(كملات كاتعيب فيه) حقاا لااا معنديش مع اللوز..تاا رااه اللوز لي معندوش معااك...بشار...(شمات ريحة لحراق خارجة لعندهاا...خرجاات عينيهاا وضربات على فخضهاا)ناااري لغريبة مشاات ليووم ليلتي ليلة مع عتيقة وشكوون غايسكتهاا عليهااا...كحلتهاااااا...(مشااات طاايرة لفراان)

عند عبدو كان كايهضر معاه غادين فطريق

ناطق بإعجاب باقي منسم بلبريوة لي كلا:لا زعماا الله يعطيهم الصحة داكشي ناضي عندهم كيف ديماا ..راه سلعتهم هيا لي كاناكلو فداار..وتقول واش كانشريو شي حاجة من لباتسري...

سيمو خسر ملاميحو بنزعااج مفكر رانياا وكيفاش كانت كاتهضر:شتي شحال باسلة ديك ختناا وتقييلة على لقلب دكاااكة...حامضة تصحاب راسهاا كاتبيع الدهب..

عبدو ضحك:ههه شكوون رااانياا...لا لا غير جاب ليك الله...ضريفة الله يعمرها دار غير معرفتيهاش...

سيمو جاوبو فلبلاصة:معرفتهاااش وماابغيتش نعرفهاا هيا الف...معندي ماندير بيهااا...

عبدو وقف وشاف فيه هاز حاجبو كايتسائل:اجي نتا شتك عمرك قلتيها زينة فشي بنت الله يحضر السلامة...(كمل كايضحك) هههه واش معوالش تزوج؟؟! حتا لإمتا غاتبقا عزري ديال راسك

رد عليه مخنزر:مممم قالهااا لي عندو لولااد...زوااج هو لي بقا ليااا...زيد زيد فحالناا زيد...

خنساء دخلات هي وناادية هازين فيدهم ساشيات ديال شي حوايج خاصين فالدااار ... تقدمات نادية جهة الصالون معاودة ليها خنساء على القهوة وحتى هي اتافقات معاها انه مايقدر يأمن حتى واحد من غير مراتو وهي اولى فغياابو ... بالنسبة ليها مافيها حتى عييب الى قابلاتهااا شي يامات حتى يجي ...

شافت فيه كان كياكل شلاضة صايبها لراسو وداير قبالتو فيلم امريكي اكشن كايتفرج فيه ... كلسات حدااه كاتحيد فولارتها ونطقات بطنز : ههههههه الحداكة ... ماعندي مايتسالك ...

المهدي هز فيها عينو مفقوص : هادي كاااع سخرة ... كون غير وجدتو ما ناكل قبل ماتخرجو ...

نادية ضحكات : هههههه انا على ماا بان ليا غير ولف على هاد الحااالة ... ( شافت فخنساء لي خارجة من الكوزينة بعدما حطات التقضية كاضحك ): شي ناس موحااال واش باقي غايدخلو للكوزينة فليل ... واصلا المباتة بلا عشا مزيااانة وكاتنقص الوزن ... ياك اخنساء ...

خنساء انضامات ليهم كاتحيد المونطو ديالها ودارت رجل على رجل : ايييه انادية ... نيت انا تقهرت بكل نهار شهيوة وحدة صباح ووحدة عشية شنو غادي نبقى ديما هاكااا ... كاع النااس الا بقا غدا كايديروه عشا .. بحالنا بحال الناس ...

نادية بتأكيد : ايييه ابنتي تهلكي صحتك ... دقة دقة عليك مالكي اش تابعك ...

هز فيهم حاجبو : تحاميتو دااابااا ... دايرين الراس على الرااس ...

نساء شهقات باصطنااع : هااااااااء حناااا ... لاااا وعلاش غانتحاماو عليك بالسلااامة ...

المهدي حط الفورشيط لي كان كياكل بيها وشاف فنادية : قالت ليك شنو بغااات تدير ؟؟

نادية : ايييه وعندها الحق شكون غايحضي غيابك كتر منها وزيد عليهااا شكون عرف اش غاتجيب الوقت من هنا للقدام وشنو نتا ديما تبقا متكل على ملاااك ... خليها تجرب وتعلم وراهااا ماقالت ليك عيب غير الا بغيتي تعكس على والو ...

خنساء رمشات بتبوحيط : الله يجيب لي يقول الحق ...

المهدي وقف من بلاصتو مخنزر : اجي نتي لهنااا زيدي ...

تقدم طالع لبيتو وخنساء غمزات نادية بمعنى اقتانع وطلعات تبعاتو كاتجري كاتفرنس ... دخلات وسدات الباب ناطقة : هانااا شنو ؟؟

المهدي شاف فيها و حرك راسو بلا حول : غانوافق بشرط

خنساء وسعات ابتسامتها ونطقات : شنو هو ؟؟؟

المهدي بجدية موجه ليها صبعو بتحدير : الا دوااا معاك شي واحد ولا صدعك نبغيك تعيطي ليا ديك السااعة فالتلفون وتعلميني وبلاما تحاكي مع الباشاار تمااا بزااف واخااا ...

خنساء ضحكات : ههههههه اسيدي كون هاني ونعس على جنب الراااحة ... ( قربات ليه وطبعات قبلة على خدو ): مايكون غير خاطرك ...

المهدي بعدم رضا : راااه غير مابغيتش نخصر ليك امااا راه مكاين بو راحة ...

خنساء بغنج : وا صااافي اشيغييي ... والله مغايوقع والو كلشي غايكون هو هااداااك ...

المهدي بايجاب :ممممم غانشوفوا ...

خنساء عضات على شنايفها باغراء وحطات يدها على صدرو : شنو داباا ... باقي باااغي نسهرو ولا بدلتي رأيك

المهدي مخنزر : مابقات عندي كااانة ... خصرتي ليا المجاااج ...

ضحكات عرفاتو كايتفشش عليها ... حطات يدها على ذقنو وبكل جرأة وانوتة لاقات شفايفها بشفاااهووو ... ودخلااات معااه فقبلة عميييقة نسااااتو فكاااع عصبيتووو و هزاتو لعااالم اااخر .... دوزو ليلة طويييلة مع بعض ناشطييين فيهاااا مخليين الخصومة ديال الصباااح ورااااهم ومستمتعين باللحظة ...

اصبحنا واصبح الملك لله ... خنساااء هبطات من الطااكسي من بعد ما بقات مع مهدي حتا فطر وودعاتو وتمنات ليه السلامة فسفر عاد جات للقهوة...كانت لابسة مونطو طويل فاللون البرتقاالي اوفر مع سروال دجين اسود وبوط واصل للركبة فنفس اللون ... مسرحة شعرهاا البني بالبلاك هابط على كتاافهاااا ... ميكااب هاادئ ديال العمل ... دخلااات للقهوة لي كانت باقا خاوية بكل تقة والخدامة غير شافوهااا وتقدم عندها واحد منهم مهدي علمهم انها هي لي غاتكلف فغيابو ...

العامل بترحيب : مرحبا مادام خنسااء ..

خنساء بوجه بشوش : ميرسي ... ( شافت فالساعة ): شحال باقي باش تحلوا ؟؟

العامل : شي ساعة ونص هاكاااك ...

خنساء بتفكير : ممم ... مزيااان عافاك بغيت الموني نقراه وبغيت نشوف الشاااف لي كايصايب لي كيك ولي كريب ...

العامل بايجاب : واخا مادام اجي معاايااا ...

ابتاسمات وتبعاتو بخطوااات تااابتة والناس خدامين كاينظفوا كيف طل صباح ويقادو الكراسو ويرتبو المكاااان فحال لي موااالفيين ...

فالدرب عند عبدو خارج من المحاال ديال باااه مخلي فيه الصبااغ وشي وحدين كايديرو الاصلاحااات لي غادي يبدلو ....

هاز التلفون فودنو : لا لا انااا خارج داباااا .... كون هاااني مغاديش نتعطل ... غير انا راه ماعرفتش ديك القهوة سيفط ليا لوكاليزاسيون ... فسونطر فيل ياك .... ماعرفتش فين هي بالضبط نتا غير سيفط ليا وانا شوية نكون عندك ... واخا الله يعاون ... تهلااا ....

قطع وتلاقااا مع منير خارج من راس الدرب ... ابتاسم ليه : اهلااا الساط صافااا ؟؟

عبدو زربان : الحمد لله اخويااا ...

منير : شتك مخفف ماالك اش تمااا ؟؟

عبدو : دااير مع واحد السيد غانتفاهم معاه على قبل شي سلعة وخااص نمشي عندو ... حتى للعشية نتلاقااو واخااا ...

منير : الله يسر اخوياااا ...

عبدو شير ليه بمعنى نتقاشعوااا وزااااد من تمااا كايجري شد طااكسي واتاجه لفين غايتلاقااا مع الراجل لي داير معاااه ...

خنساء واقفة مع الشاف فالكوزينة كاتوريه طريقة ديال كريب جداد زادتهم فالقامة فبلاصة وحدين ماعليهمش اقبااال ... وهو متبع معاها بتركيز وكيسمع ليها باصغاء

نطقات بايجاز حاطة بلا خطير قدامها وكريب مصايبهم بيدهاا وبطريقتها الخاصة ... دريساج واااعر كايفتح الشااهية ومتول وراقي ...مخاطباه : رااه سااهل ومافيهش مقادير بزااف

الشاف باعجاب : فصراحة امدام خنساء هادشي زوين بزاااف ... انا بشهادتي خاصني ندير عندك دروس فغيمون عندك طيكنيك وااعرة ...

خنساء ابتاسمات ليه : ذوق وعطيني رأيك

الشاف هز موس وفورشيط كايذوق والابتسامة واسعة كاترسم على محياااه برضى : وااااعر وااااااعر بزاااف ... كانحييك امادام خنساء

خنساء بفرح : ههههههه ياااك بعدااا ... المهم دابا عرفتي كيفاش .. انا غانكلف دراري باش يجيو يصوروه ويحطوه فالصفحة ديال القهوة .... وان شاء الله يلقى اقبال ...

الشاف : غادي يلقااه انا متأكد ... غير كوني هانية ...

خنساء حيدات الطابليي : يلاااه غانمشي نشوف برااا ... نخليك ....

زادت من تما وعلمات الدراري شنو يديرو ودخلاات للبيرو ترتاح شوية ومنها تعيط لمهدي تسولو كيف وصل ... سدات عليها الباب وصونات عليه ...

خنساء بصوت فرحان : اهلا الحبيب ديالي صافا عليك ...

المهدي : الحمد لله حبيبتي نتي صافا ... امورك هانية ...

خنساء بايجاب : كلشي هو هادااك ... كيف وصلتي مزيااان ؟؟

المهدي : وي مزيااان .... الاجواء كي دايرة فالكافي ...

خنساء : صامااااغش ... كانحاول ندير لي قديت عليه باش دغيا نتوالم مع الاجواء

المهدي: مزياان المهم الا احتاجيتي اي معلومة عيطي سوليني ... والحسابات غير خليهم نجي ونشوفهم بلاما تعدبي راسك معاهم ...

خنساء بموافقة : اوك بب ... العائلة لقيتيهم بيخير بعدا !!!

المهدي : فصراحة ماعرفتش ولكن كايبان ليا الجو مكهرب هنااا ... راكي عارفة الخوت غير كايوصلو للورت كايوليو عديان ...

خنساء : اااه المهم مانحتاجش نوصيك بلا ماتجبد صداع معاهم وخلي علاقتك مزيان مع كلشي احياتي ... ودير للما منين يدوز واخا مايعجبكش شنو دارو ميك فكل الاحوال نتا مامحتاجش ديك الارض بلامااا تشري العداوة بسبابها ...

المهدي بتفهم : لا لا ماتخافيش اصلااا لي داروه غانوافق عليه وصافي باغي غير نفك هاد الجرة وخلااص ... ( وسع ضحكتو ): توحشتك ... ماعرفتش كيفاش غاندوز هاد الايام بلا بيك ...

خنساء بصوت حنين : حتا انا اعمري ماتصورش شحااال بقات بلاصتك خااوية ... حاول ترجع فاقرب وقت ...

المهدي : ماكرهتش نجي من دابااا ... ولكن غاندير لي فجهدي باش مانفوتش سيمانة لو ماكس ...

خنساء : هههه صافي مزيااان .... وانا غانبقى نحسب فالسواايع ايمتا دوز وتجي ...

المهدي : هههههه الحب مشتت ... لهلا يخطيك عليا احبيبتي ... المهم انا دابا نخلييك حتى نعيط ليك فليل ...

خنساء : اوك ... بسلامة عليك وتهلا فراسك ...

ودعاتو وخرجات من البيرو تشوف الاوضاع وترقب الامور بعينيهااا ... كل مرة وفاش كاتلاهااا ومقابلة كلشي بتدقيق حتى حاجة مكاتفلت ليهااا ...

فدار الساايب كالسة نصيرة فالمرااح مفرشة زريبية صغيرة حاطة عليهااا القصرية وكاتلوي العجينة ودلك فيهااا ... دخل العربي لقاهاا حانية كاتعجن : الله يعطيك الصحة انصيرة ...

نصيرة : لينا وليك اخويااا ... كانعجن خبز هاد اليوماين قبل مانمشي ... رااه الا عولتو على نسرين ضربكم الخلااا ...

العربي ضحك : هههههه واخا هكاك دايرة جهدها وطيابهااا مرة مرة ولا كايتقاااد المهم كادير لي عليهاا ...

نصيرة حركات راسهاا : احيااااني ... راااه غاتكون غير مها لي كاتجيب ليها الماكلة من لتحت لتحت اما هي الطياااب واخاااا تحفى علييه مايطلعش ليهااا توريني فيهااا انااا ...

العربي : الله يصاوب ... والله ياختي كون جيتي عليا براكة عليك من تماارة ... كون غير كلستي ولي خصاتك على راسي وعيني ...

نصيرة بشكر : عارفة اخويي ولايني مانقدش ... ولفت نخدم ونجري الكلسة فالدار كاتقهرني ... وزايدون راك كاتشوف انا ومرت ولدك فحال المش مع الفار يوماين وكادوز بالكشايف الا كلست معاها ديماااا الشياط غاينوض ...

العربي تنهد : وا نتي تعرفي اختي ... ولايني رااه الواحد غادي لكبر وتمارة راه كاترجع على مولاها ...

نصيرة غطاات العجينة تخمر : ماحدي قادة ماعندي ماندير فالدار ونهار تقلال الصحة راااه بزز مني نكعد ... نوض نطيب الخبر باش نمشي عند حياااة نقوليها على سلامة ولدها ...

العربي بايجاب : اييه مافيهاا بااس .. تلاقيت معااه اليووم فالمحال ديال حسن الله يرحمو .... وراه كايصلحو على ما بان ليا دار عقلو ....

نصيرة برجاء : على الله يهني غير مو شوية رااه قهراتها القفة والتجلويق فالحبااسااات ...

العربي شعل تلفازة : الله يهدي ما خلق ... غير كرصي داك الخبز وخليه انا غانطيبو فالفران الا مجاتش ليه نسرين ...

نصيرة بنفي : لااا لااا انااا بالخف نطيبو وزايدون مكانبغيش نخلي حاجتي ناقصة ... الواحد هو لي يدير شغلو كاامل ...

حرك راسو بايجاب وهي جمعااات داكشي فاش عجنااات عزيز عليه تدلك فالارض باش تحكم العجينة وتطرطق فيدهااا ... عاد نااضت غسلات شي ماااعن وطيبات خبزهااا ولبسات عليهااا جلابيتهاا وخرجااات لعند حيااة ...

دخل عبدو للكافي لي داار معااه فييه الراجل ... شاف فوحدة من الطبالي لي فلجنب كان كالس رجل اربعيني ... ابتاسم وقرب لعندو : اهلا اسيدي لاباس عليك ...

الرجل : الحمد لله ... تبارك الله كبرتي اعبد الله باقي نعقل كنتي تجي عندي نتا وسي حسن الله يرحمو باقي صغييير ...

عبدو : الله يرحمو .... وفصراحة المعرفة دياالك هي لي خلاتني نبغي نكمل على داكشي لي كنتي كادير مع الواليد انا ماكرهتش نكمل فخدمتوو ... وبغيت فصرااحة تعاوني بحالو وتفاهم معايا على السلعة بحال الا هو باقي حي ... وانا كانواعدك غانكون قد كلمتي فحالو ...

الرجل ابتاسم : قبل مانهضرو فهادشي .. نشربو شي حاجة بعدااا ... شنو تااخد ؟؟

عبدو : ههههه سمح ليا زربت عليك ... قهوة نص نص بلا سكر ...

الرجل شار للنادل طلب منو شنو بغااا .... فهاد الاتناااء كانت خنسااء خارجة من الكولواار لي حدا البيرو ديال مهدي كادور عينيها على الكليان وواش كلشي هو هاداك ....

فهاد الاتناااء كانت خنسااء خارجة من الكولواار لي حدا البيرو ديال مهدي ... يللااه غادور لجهة فين كالس عبدو وهو يوقفها واحد من الخدامة مخاطبهاا : مادام خنساء غادي نخرج نجيب شي حوايج خااصين هنااا .... واش بغيتي شي حاجة نجيبهااا معايااا ؟؟

خنساء شافت فيه : اييه عاافااك ... جيب معااك الفخومبواز غانحتاجوه مابقاش بزاف منو ...

العامل : واخاا اماداام ...

ابتاسم ليهاا وزااد من تمااا خارج وهي دارت لجهة عبدو كان عاطيها بالظهر كايدوي مع السيد مارداتش ليه البال بالمرة ... زادت من تمااا دخلاات للبيرو وهو كمل حديتو بهدووء مع الراجل على الخدمة والسلعة والاتمنة ونوعية الزرابي لي بغاااا ... وبحكم معرفتو لبااه داار معااه مزيااان وتفاهم معاه على كلشي ...

شربو قهوتمهم فهدوء عاد ناض الرااجل وعبدو بقا كااالس شوية وطلب من النادل يجيب ليه قهوة اخرى عجباتو البلاصة ....

نصيرة كالسة مع حيااة كايشربو اتااي والحلوة ... بالنسبة ليهااا الجااار مسؤولية وماتقدرش ماتجيش تزور جارتهااا وولدهاا فرج عليه الله هاد العادات عندها فالدم كيف اي مرأة مغربية شعبية ....

حياة بترحيب : والله حتى فرحت مني شفت اختي نصيرة شحال هاذا ماتلاقينا

نصيرة : غير الوقت احياة وراك كاتعرفي تمارة وجري عليا نجري عليك ... يلااااه لقيت الوقت فييه نجي نطل عليك خصوصا مني سمعت عبد الله طلقو سراااحو ارتاح قلبي من جيهتك ...

حياة : الحمد لله ... ولهلا يعطي لشي ام هاادشي ... ويهدي وليداتنا ووليدات المسلمين اجمعين ...

نصيرة : امين ياااربي ... قالي خويا العربي راااه حل المحال ديال بااه ياااك بعدااا بعد على ابلية ومايجي منها ...

حياة تنهدات : هاد الساعة الحمد لله ... ورااه لي داز من داكشي بسيف يدير عقلو الله يصلحوا ...

نصيرة : اييه ايوا لابااس بعدااا لي هدااه الله ...

حياة بفضول : احم ... كيف دايرة نسرين لاباس عليهااا؟؟

نصيرة : الحمد لله بيخييير اش غايخصهااا ... واكلة شاربة ولابسة بيخيير وعندها راجل تحلم بيه اي وحدة غير الا مابغاتش تحمد لله

حياة ضحكات : هههههه الله يجيب راحة البال والهنااا .... الله يسر ليهاااا ويعطيهم شي وليد ولا بنية يفرحهم ..

نصيرة برجاء : امييين ياااربي ... من فمك لباب السمااا ...

حياة : وخنساء بيخير عليهااا ... غبرات حتى هي ... كيف غادة مع الزواج

نصيرة : اييه اييه بيخير عليهااا ... راه متاوية مع راجلهاااا تبارك الله ... وداير ليها كيف المااا القليل الله يحفظهم من عينين الحساد ويبعد علييهم ولاد الحراام ....

حياة ابتاسمات ليها : امين ياربي ...

بقاو كايديو ويجيبو فالهضرة شوية فامور مختالفة عاد نصيرة حطات كاسهاا : الحاصول هو هادااا ... خليك ليك راحة الله احياااة والحمد لله على سلامة كبيدتك مرة اخرى ...

حياة : باقي الحاال مالكي زرباانة ..

نصيرة سلمات عليها بتوديع : كايقوليك لي زار يخفف ... مرة اخرى ان شااء الله ...

حياة : على خاطرك .... وا سلمي ليا بزااف على مالين الدار وقولي للعربي لله يجازيه بالخير رااه الكباص لي سيفط لعبد الله قام بالواجب وكتر كااع ..

نصيرة : بلا جميل الحبيبة ... يللااه الله يعااون ...

ودعاتها وخرجااات من تمااا واخا مكانش عندها مع عبدو حيت كان علاقة مع خنساء و لكن عمرها شافت منو العيب ولا من موو وطبعااا كاتمنى ليهم غير الخييير ... خرجات كادعي الله تكون اخر الاحزان علييهم وتحفظهم وتهني بالها على ولدها ...

عبدو حط الحسااب وخرج من القهوة متاجه راجع فحااالو ... خنسااء طلاات من الشرجم ديال البيرو على براا ... وهو كاان واقف غايشد طااكسي ... هزات حاجبهااا بغرابة مركزة الشوفة مصغرة عينيهاا مكايبانش ليهااا وجهوااا مزيااان ... حلات عينيها ودلاات شناايفهاااا محاولة تدقق فيه النظر ولكن دغيا ركب فالطاكسي وزاااد ماقدراتش تشوف ملامح وجهوا ... حركات راسهااا باستغراب بصح جاها مألوف ولكن ماعطاتش للموضوع اهمية .. دغيا حولات انظارهااا لبلاصة اخرى كاتشوف الناس غاديين جايين ملاهية الوقت ...

صباح جدييد مشمس من بعد اياام مغيمة بالشتااا ... شرقات شميسة خفيفة ضوات المدينة ... خنساء كالسة فالبيرو كاتشوف شي فواتير وتقادهم لمهدي حتى يجي ويراجعهم كيف قال ليهاا ماقرباتش ابدا للحسابااات وخلات ليه كلشي كيف هو ... سالاتهم وخرجات من تمااا للقهوة يلاااه وقفات كادوي شوية مع النادل على شي حاجة وهي دور عينيهااا جهة الباااب وهزاات حاجبهااا باستغرااب ....

ونفس النظرااات مترقبينهاااا حتى هي بخطواات تاابتة ... متقدمة لجيهتهااا وباين السم على وجهها ... وقفات مقاابلة معااهاا ونطقات : خنساااء صبااح الخير ...

خنساء رسمات ابتسامة صفرة على ملامحهاا : صبااح الخير ... ( باستهزاء ): عند بالي باقة مطولة فاجازتك ... شتك ماكملتيش النهار وتوحشتي القهوة ...

ملااك قادات على شعرهااا محاملاهااش : توحشت خدمتي ....

خنساء بتمياق : مزياان فيك هاد حب العمل ... ولكن على ما سمعت ماماك مريضة وكنتي غاتبقاي معاهااا ... نتمنى تكون صحااات وولات بيخييير ...

ملااك بهدوء مصطنع والعافية شاعلة فيها من الداخل مني سمعات انها كاتقابل القهوة النار حسات بيها وسط منها وحلفات ماتخليها تهنى فيها فاول فرصة لقاتها رجعاات : ماما بقات مع خالتي عندها موعد اخر من هنا سيمانة ومابغيتش نبقى غادة بيها جااية ... ( بعجرفة ): وفصراحة ماتهنيتش على القهوة وانا مكاينااش وحتى مهدي غااايب ... كيف كاتعرفي ماشي ساااهل تمشي وتخلي خدمتك واشغالك غير هكاااااك ... ( خفضات صوتها ودوات بطنز ): وبلاااااا رقااااابة ولااا تسيير موتوق ....

خنساء وسعات ابتسامتها وضحكات باستهزااء : شتي بااش كاتعجيبيني ... عندك وااااحد تقة فنفس مضايرااش ... غير هو الحبيبة ديالي كانعتادر منك حيت غادي نفيقك من هاد الاحلام الوردية لي بنيتيهااا فرااسك وغاادي نقوليك عندي شللااا مايدار فقهوة رااجلي ... ( بتقة طلعاتها ومهبطاهاا باحتقار ): ولي هي قهوتي ... وانا دابااا لي مسؤولة عليهااا حيت انا لي الوحيدة لي من حقي نحضي غياابو ... ولي عجبو الحااال مرحبااا بيه ولي مااعجبووش الباااب وسع من كتااافو ...

ملااك كرزات على سنانها : اييه ولكن انا داباا جيت وغادي نتكلف بالباقي ... مكاين لااش تبقاي معدبة راسك هنا على واالو ... من ديما انا لي كانقابل الخدمة اعوااام وسنين هاادي وحتى داباااا انا لي مسؤولة

خنساء هزات فيها حاجبهااا وهاد المرة مخنزة :، سمعي الغزاالة غانقوليك جوج كلمااات ومغاديش نعاودهم ... انا هنااا حيت راجلي لي عطاني هاد الصلاااحية ومكاين لااش نبرر ليك علاش غانبقى حتى يرجع .... هادي من جهة ... من جهة اخرى نتمنى تخلي هاد الايام تمر بسلااام وتشوفي خدمتك كيف هي لا اقل ولا اكتر ... ( بتأكيد ): غير خدمتك لااااغيييير ... ومامطلوب منك حتى حاجة من غير لي انا غانقوليييك بلا زيادة ولا نقصاان .... مفهوووم ... ولا راااه الطااكسي لي جاابك يردك حتى يجي مول شي وشوفي معااه

خنزرات فيهااا زادت من تمااا لبيرو مخلياااهااا وراهااا كاتغلااا وتفوور ... خنساء سدات عليها باب البيرو ونطقات بتوعد : والله يابنتي يا ملاااك كون ماجيتيني فبلاصة ماباغا فيهاا صدااع كون ركبت ليك شي مونتيف ماتخرجيش منووو .... ولاايني غييير بلااتي حسابي معااك غايكون من بعد ... باقي الياام طوييلة بينااتنااا

حياة كانت كاتجمع فالبيت ديال عبدو وتنكر : يااربي ايمتااا هاد الولد يدير عقلو ... بفففف لي فييه مايخطاااه كل مرة وفين لايح حوايجو ...

تنهداات كاتسوط وهزات حوايج الوسخ ديالو كاتجمعهم فالشبكة تصبنهم ونقيين رداتهم ليه لبلاكارو ... جمعاات بقايا الكاارو رمااتهم فساشي ... هزات شي ورااق ديال المحال كانو محطوطين تمااا ... غاتخشيهم فالمجر ... مع حلاتو باان ليهاا جوااا اصفر فيه طابع استوديو ديال الصور باقي جديد ... هزاات حاجبهااا : اش هاذااا ؟؟؟

هزاتو بين يدها وحلااتووو مخرجة عينيهااا كانو فيه تصاور عبدو وخنساء مني كانو مع بعض وشي تصاور دياالهااا بوحدهااا هازهم من الفايس والانسطا دياالهااا وخرجهم ... وعاد لي كانو فبورطابلو حتى هما خرجهم ... جواااا عااامر بالتصاااور زردة ... حطااات يدها على فمهاا مصدومة مكانتش متوقعة غايكون متعلق بيها لهاد الدرجة ... شدات على رااسهااا بتلفة : الله ياربي لولد غايحماااق ... هاد البنت غاتخرج ليه العقل مافيهاااش .... انا عااد قلت رجع لياااا وغانرتاح من جهتوو .... الله ياربي واش غاندير معاااه ... غايحمقني ماافيهاااش .... مغايمشي حتى توقع ليه شي حاجة بسبااب بنت الساايب وهي مهنية مع رااسهااا ....

غمضاات عينيهااا وجمعات دوك التصاااور حتى همااا دارتهم فساشي لي غادي ترمي وكملاااات التقلااااب حالفة حتى تجمع اي حاجة كاتخصهااا وترميهااا خايفة على ولدهااا وشنو ممكن يطرا ليه من ورااا هاد الحمااق لي كايدير ....

ملاااك كانت مقابلة خدمتهاا وكاتحسب شي فلوس فلاكييس ... هزات حاجبهاا فور ما لمحاات واحد من السرباااية هااز فيديه بلاااا ديال الكريب لي وصات عليه خنساء يزيدوه فالقائمة غادي بيه لواحد الكلياان وقفاتو بامر : يحيى اجي هناااا ...

قرب عندها : نعام امادموزيل !!!!

خرجات من لاكيس ووقفات قبالتو مخنزرة : اش هادشي ؟؟؟

يحيى : هادو كريب جدااد زادتهم مدام خنساء فالقائمة وهي لي ورات لشااف كيفاش يقادهم ... لقاو اقبال كبير فهاد يوماااين ...

خرجات عينيهاا وزيرات على قبضة يديهاا ... هاد المسائل هي لي كاتقوم بيهم ومستحيل تقبل اي تغيير فالموني ولا سيستيم لي غادة بيه القهوة خصوصا بلااا خباارهااا .. شارت ليه الفار خارجين من راسهاا : صاافي سير نتااا ... شوف شغلك

كرزات على سناانهاا غاتطرطق اول مرة يطرا ليها بلان بحال هاذا ولا يوقعو شي مستجدات فالقهوة بلا اذنها وهي اول وحدة كانت تسيق لخباار لاي حاجة قبل ماطرااا ... جات خنسااء بغااات تدير ليها خاوية فعاامرة وتضرب ليها خدمة اعوام عرض الحائط ... حمرااات عينيهاا وزادت شاااعلة متاجهة للبيرو ... حلاات عليهااا البااب بنفضة مدرمة بلا دقان بلا جوج هاجمة عليهاا ....

خنسااء قفزاات وهزات فيها عينيهااا بغضب : ياااك لااباااس .... دااخلة لزريبة ولاااا مااالك .. ماعلموكش دقي الباب قبل مادخلي باحترااام !! ... غاجي ودخلي مالنااا مانخااافوش !!...

ملااك عينيهااا حمرين بالاعصااب مجاوباتهااا بحتى كلمة كاتسوط وتبوخ غير راسها

خنساء بهدوء : نتمنى هاد الهجمة لي درتي ليااا ... تكون لسبب مهم ويستااهل .. اش كاااين ؟؟

ملاك قربات ليهااا وزدحاات يدها مع البيرو بالجهد : شكووون عطاااك الحق ديري تغير فالموني بلاما تشاااوري معاايااا ...

خنساء ببلاهة كاطنز : نعااام الشاااف !!! ... اشنو لخطأ لي درت !!! ....

ملااك بنفاد صبر : اواقيلة الشريفة انا رااه جيغو فهاد القهوة من مدة وزماان ... كيفاااش يتبدل الموني ويتزادو فيه حواايج جداااد وانا اخر من يعلم ... وشكوون نتي اصللااااا باااش تخشي رااسك فخدمتي وشغلي !!!! ...

خنساء فهماتها دوات على لي كريب جداد لي زادت ... دلات شنايفهااا بعدم اهتماام ودارت رجل على رجل كادور بالكرسي بعجرفة : قالهاا لي راسي وبغيت نزيدهم فالقائمة ( حطات يدها على خدهاا باستهزاء ): ولا يااكمااا كان خااصني نشاااورك وناخد رأيك وانا مافخباريش !!! ...

ملاااك خنزرات فيهااا : على ما بااان ليااا نتي تيقتي راااك مديرة هناااا وعجبك داك الكرسي لي كاالسة علييه لدرجة مابقيتيش قادة تنوضي منو ... وعند بالك حتى واحد ميقد عليك

خنسااء كاتجاوبها ببرود ماعلا بالهااش بهضرتها قادات كلستهااا مزيااان : ماتصوريش شحااال زويين .... وزايدون جااا معااياااا .... ( بسم ): حيت اصلااا انا المديرة هناااا داباااا ... يعني انااا لا بااطخوون دياالك ... وانا نقدر ندير لي بغييت ولي باان ليا مناااسب وبلاما نااخد رأيك حيت ماعندو حتى قيمة عندي ... وبما ان هاد التغيير جاني فصالح القهوة راااه درتو سيتوو ... وحمدي الله راني باقا غير فتغيير الموني ومادزتش للاشخاااص ...حيت حتى هما باان ليا خاصهم ميزااجوور 😉😉

ملاااك حمراات فيها : الا مافراسكش امادام خنساء ... ان اي تغيير كايوقع كاندرسووه مزياان ... وكانشوفو الميزاانية والاربااح والخسااائر وبشحاال غاتقاام السلعة مكانجيوش ونحطووه حنا ماخدامينش هنااا عشواائيين ... كون جينا على هاد السيستيم كون شحاال هاداا سديناا وجمعنا وطوينااا وخرجنا يد لور ويد القداام

خنساء سمعات عشوائيين والدخان طلع ليها لراسهاا ... قرمات حجباانها ونطقات بصرامة : اول حاجة تعلمي تهضري باداب واحترااام ... باش مانوليش انا وياااك فشي امور مغاتعجب حد .. تانيااا انااا عارفة مزياان اش كاندير ... وقبل مانحط هاد الكريب شفت الميزانية دياالو ودرستها مع الشيف ... وحطينااه فبلاصة وااحد الكريب السلعة ديالو كاتبقى شهر غير غااملة وحتى حد مكاياااخدو .... وطبعااا هادشي مكاين لااش نشرحو لييك ولكن بمااا انك باغا تعرفي سيري شوفي لائحة المقاادييير وراجعيهم ... وديك الساعة اجي ناقشو الا كان شي خلل ...

ملااك بانفعاال : هااد الامور مكاتمشيش هااكة امااداام ...

خنساء طلعات ليهاا الدم : دابا علااش كاتقلبي مافهمتش ... مول شي خلاني هنااا مسؤولة بخبارو وارادتو ونتي مااالك !!! ... كاتخلصي شي حاجة من جيبك متلا ( ضغرات فيها عينيها ): لااااش هازة هاد الهم كاامل بالسلاامة ولا غير ضد فيااا

ملاااك : هادي هي خدمتي ومانسمح لحتى وااحد يدخل فيهااا ولا يدير تغيير بلا خبااري ...

خنساء بايجاز : خدمتك هي تسمعي الهضرة وديري لي قلت ليك لاغييير ... وهاد النقااش نبغيه يسالي هنااا حيت غانبقاو ندورو فحلقة خاااوية ... ولي اصلااا ماعندها معنى ...

يلاااه غاتجاوب وهي تقاطعهاااا خنساء هازة يدها بمعنى سالينا ونطقات : الا كان هادشي لاش جااية تقدري تمشي ورجعي لخدمتك ... واخر مرة تدخلي هاكا مدرمة عندي كاتسمعي ... ( بحدة ): سيري شوفي شغلك مضيعة ليا وقتي غير هكااك لاسباب تافهة وكاعما مفهومة فالاصل...

ملااك صدرهاا ولا كايطلع وينزل بالجهد بالفقصة والغدايد وجهها حمااار ومالقااات بااش تجااوب مهدي خلاا ليهااا الصلااحياات ومشاااا ومابقات عندها هي حتى كلمة ... الدموع تجمعوا فعينيهاااا زادت من تمااا مكشكشة وزدحااات الباب بالجهد ..

خنساء ابتاسماات : الهرس نشاء الله .... ( بمكر ): نتي لااش جييت هنااا ... هاد السيمانة لي غادي دوزي هي اكفس سيمانة فحياااتك ... انا لي غانعااود ليك الترابي ونوريك بلااصتك فيين باش ماتبقاليش تعلقي فين تفلقي وتعرفي حدودك ... بيا ولا بيك املاااك ... الااا ما خرجت فيك الشيب بالفقصة مانتسمااش انا خنسااء بنت السااايب .... ولاهيلا قالت ليك باشمن حق ... الدار دار بونا وعبيد بونا بغاو يطردونا زوينة هادي

ملاااك خرجااات تلاااقات مع يحيى هاز فيدو شي فواتير وهي تخنزر : وهادو بالسلاامة لمن غادي بيهم ؟؟

يحيى : مادام خنساء لي طلبات شي سلعة كانت نااقصة وجبت ليهااا البونات ...

ملاااك عوجات فيه معيبااه : ^مادااام خنساااء ^... ارااا هادشي وسير شوف شغلك ...

يحية برفض : سمحي ليا امادموزيل قالت ليا اي فاتورة نعطيها ليها من يدي ليدهااا ...

خرجات فيه عينيهااا : اياااااه ... واخااا اسيدي زيييد حسابي معااك من بعد ....

خنزرات وزادت من تمااا وهو نطق : ياربي السلاامة شحااال صفريطة .... غاتنفاجر غير بوحدهااا .... بفففف ...

تقدم من تمااا لعند خنسااء عطاهاااا الورااق ورجع لخدمتووو ...

عبدو حل الباب بالساروت ودخل للدار حط الجاكيط ديالو معلقهااا ... تقدم كايغوت بصوت مسموع : الواليدة ... الوااليدة ...

مالقا حتى رد وطلع فالدروج كايسمع التقرقيب فالبيت عرفها هي لي غاتكون كاتجمعوا ... كاانت جابدة كااع حوايجو كاتعاود ليهم الطي ...

هز حاجبو : مالكي على حالتك الواليدة ... خليهم من بعد ونقادهم ....

حياة مخنزرة طالعة ليها : الا تسناوك بقاو هناااا ...

عبدو حرك راسو بايجاب ونزل عينو للساشي ... غير لمح شنو وسط منو قرم حجبانو وتحنا بلا شعوور علييه جاا الجوااا لي وسط منو ... نطق بانفعاال : الوااليدة اش هاادشي !!! ...

خنزرات ووقفات شااعلة : نتااا لي شنووو هااادشي !!! ....

عبدو صخط وشتتهم فوق السرير : اش داك لحوايجي اميييي !!! .... ياااك كانقوليك ماتقربيش ليهم !!!!

ردات عليه بصرامة : اش هااد الهبااال ... واش حماقيتي ولااا مااالك ؟؟ ... اش كادير بهااااد التصاور ولاش مخليهم عندك مافهمتش لاش باغي توصل بهادشي !!! ...

حنا راسو كايجمعهم فالجواا : مابغيت نوصل لوالو ... غير عافاااك الواليدة فرقي حاجتي انا عاااارف لرااسي ...

حياة شدات على راسها ونطقاات بفقصة : واش غاتفني عمرك ونتا مابين تصاورهااا وذكرايااتهااا خرج من هادشي لي عايش فيه ... راااه ماعندو فين يوصلك .... البنت راه مزوجة وماعمرها غاتكون لييك ... حتى لايمتا غاتبقى على هاد الحااال ... حاول تفييق شوية ...

عبدو جمعهم فالجوااا رجعهم للمجر وشاف فيهااا بجدية : انا مرتااح هاكاا الوااليدة ... مكانضر حد مكانأدي حد ... بيخيير وعاجبني هاااد الحااال ومباغيش نخرج منوووو ...

حيااة بتأكيد : راااك كاضر رااسك ... كتآدي راااسك ... الا نتااا عاجبك حااالك انااا معاجبنيش ... ماباغاااش نشوفك هاااكاااا ...

عبدو تعصب وعينيه حماارو ونطق بالغوااات عروقو بارزين : واااش باغااا نعرفي اش هاادشي ... هااادو امييي جوانااات والشقوووفااا لي كنت كانضرب ... هادو رااااه الكينااات والكيسااان لي كنت كناااخد ... هادشي لي كاايكااالميني ويخليني مرتااااح ... مرتاااااااااح بييين تصاااوهااااااا .... فهميييني امييييي مرتااااااح ... مرتااااااااح

حياة بصدمة : هادا رااه الحماااق والهباال ... المرض هادااااا ... نساااا نسااا اولدي وشوف القدام

عبدو بحصرة فقلبو : كيفااش بغيتيني نسااا وانااا دخلتها معاايااا مابين ربعة الحيوط ... سكنتها فبالي وذكراياااتي مكانتش كاتخطاني وكاطلبي مني ننسااا .... ومني نخرج نخرجها من باالي بحال الا ماكانتش ... كيفااش غاااندييير

حيااة : راااك غير كاتخربق اولدي ... عطا الله بنات الناااس ... شوف غيرهااا وبدااا حياااتك من جدييد .. نسااهااا وخرجهااا من بااالك ... اش داز بيناتكم بالسلااامة اصلاااا ... درتو وتساريتو فالصغر وكلشي ساالااا وفرتكتوها والسلااام ... فيق شوية علاا رااسك وعطي لرااسك فرصة اخرى ... وعييش حياااتك بلا هاد الهباال ... اخرتك تبقى مدفون بين تصااورهااا وعمرك تزيد القداام غير بمسبتهااا ... هااادشي لي نتااا فييه ماعندو حتى معنى

ضربات فيه وزاادت بخوف شديد على ولدهااا وحاالتووو كاتحس بيه مقسح من جيهتهااا وصعيب يتجااوزهاا ... ولا ينساهااا بسهوولة

عبدو غمض عينيه بالع ريقوو خاشي وجهو بين يديه .... مقادرش يخرجهااا من بااللو نهااار على نهااار وحبها فقلبو كايزيد يكبر ولو مكايشوفهاااش ... دخل للحبس وهي فقلبو وكانت ديما فخيالو كاتواسيه وعمرهاا خرجات منوو ... كانت الحاجة الوحيدة لي مصبراه على عذاب الحبس ... ومنسياااه فهمووو وجرحهااا وحرقتهااا فقلبوو مزااال فااتلة ونارهاا كاتشويه

أعرف أن حبى لك ممنوع....

نعم أعرف..

حاولت الإبتعاد....

لكني دومآ أعود....

إلى نقطة الرجوع....

إحتار قلبي بين الرفض....

والخضوع....

إنه القلب حين يعشق.....

فليس له رجوع....

ف الذنب ليس ذنبي.....

بل ذنب قلبي❤️

حين رآك وحين أحبك...فهو.....

الذي وقع في العشق الممنوع.....

️🌹 ️🌹

💔💔💔💔💔💔لكني أحبك وسأبقي علي حبك$

دون رجوع...

نهار جدييد .... وقف عصام السكوتر قدام كافي مهدي..نزلات منو نسرين كاتقاد فشعرها المطلوق لي تخربق مع لبرد ديال الطريق...بلاصا السكوتر ديالو ودخل هو وياها...وهياا خاشية يديها فدراعو كاتعجبهاا بزاف لقهوة ديال مهدي...فكل مرة كاتلقا لوجيبة عند عصام ملي كايكون ݣالس فلويكاند كايجيو ليها يبدلو لجو...كلسو فطبلة

نطقات نسرين كادور فعينيهاا بحالا كاتقلب على شي حد:فيناهيا خنساء...ݣاعما بانت ليا؟!

عصام:باينة غاتكون لفوق فلبيرو ديال مهدي...

نسرين وسعات عينيها:هااكدااك ناس ولااو فلبيرو...(كملات بلهفة)عفاااك عفاك يلاه نطلعو نشوفوها نيت شحال وانا باغا نشوف لبيرو تاع مهدي كيف دااير من لداخل...

عصام خنزر فيهاا:بيرووه مزووق..تي تبتي شوية وبركة من طيران...غانعيط عليها تنزل عندنا...مكاين مانديرو لفووق...

عوجاات شفايفها مغوبشة معاوداش معاه لهضرة...هزات لموني كاتختار فيه شنو بغات مسندة ضهرهاا على لكرسي...عصام جبد تيل ديال دوز لابيل لخنساء علمها بلي هما لتحت وماهيا الى تواني معدودة حتا نزلات كاتمختر فلمشية بخطوات معبورة...شافت فين ݣالسين وقربات لعندهم مبتاسمة بشكل خفيف...

نسرين شافت فيها ووسعات اببتسامتهاا:هااا الشافة الجديدة هبطاات لعندنااا...

خنساء سلمات عليهم وݣلسات فلكرسي لي بيناتهم ونطقات بهدوء:لاباس عليكم بعدا كلشي بخير...

عصام:لحمد الله ونتي كيف غادة مع لمنصب لجديد هههه

خنساء ضحكاات:صافا..كانحاول ندير لي قديت عليه ونعوض بلاصة مهدي قدماا قدرت...وخااا المسؤولية صعيبة شوية...

نسرين بمزحة:هاي هاي ناس والمسؤولية...ههه شتك تيقتي راسك ازين بلي وليتي مولاات القهوة...

خنساء ردت عليها بتقة:اوى الحبيبة متنسايش راه هاد لقهوة ديالي مند زمااان حيت أي حاجة ديال راجلي راه ديالي... واي حاجة متعلقة بيه وكاتخصو...راه كاتخصني حتا أنا...

نسرين عوجات شنوفتها:اختي سعداتك الله يسقينا ملي سقااك...حتا حنا شي نهار نشدو شي بيرو دايزو لكلام واخا غير بضحك...

خنساء:ان شاء الله علاش لا ...(شافت فعصاام)هياا خرجتو تساراو ليووم؟!!...

عصام بعيااء:وبالله وماتساليني حلوف كنت باغي غير نعس عيت هاد السمانة بلخدمة ولكن مخلاتنيش...واالو نوض ديني لقهوة مهدي ناكلو لكريب مشهياه ونشوفو خنسااء...نووض نمشيو ونتا ديما كاتعكس ومكاتبغيش تخرجني...صدعاتني بلمزياان...وانا ندير ليها خاطرها

خنساء:ههه مافيها باس..نيت تبدلو لجو....مممم مشهية تاكلي لكريب(غمزاتها) : صافي هادي ماتكون غير دقة لوحم...

نسرين شهقاات موسعة نضرتها:ااوووه،قدااش قلتيهاا...من فمك لباب السماا...(تنهداات بأسى)ولكن هاد ساعة باقي كاتنتسنااو مكاين والو...نتمناو تجي شي حاجة فلقريب...

خنساء برجاء:مازال ربي يرزقكم بشي وليد ولا بنيتا ماتقطعوش رجاكم فالله(بغات تبدل لموضوع): بون شنو تبغييو تااكلو؟!...

نسرين بدات كاتصفح الموني كاتهضر وتشوف فيه:ليوم غادي نتبرع مع رااسي...كلشي على حساب لوستي لغزاالة...

بداو كايختارو شنو بغاااو...وفنفس الوقت كايهضرو...كانت ملاك نازلة كادير جولة على لخدامة لي لتحت وكاتراقب الشغل كيف غادي...مع الدورة لي غادي غادي دور وهيا تقشعهم...مكاانتش من لعاݣزين مشاات بخطوات سريعة لعندهم قربات

قالت كاتضحك:اهلا اهلا..ههه مرحبا بسي عصام وحرمه...

نسرين ميقات فيهاا وكحلات بلعما ملي شافتها حتا هياا معندهااش معاها وكتير الشي ملي كاتشوفها مع عصام و كيفاش كا تولي تعامل معاه بطلااقة وزعامة الزايدة مكايعجبهااش لحال بتاتا...

عصام بإبتسامة:افين املااك صافا اشخبارك؟!

ملاك:لحمد الله ربي يخليك(شافت فنسرين لي رجعو ملاميحهاا جامدة ونطقات بإبتسامة جانبية)ونتي انسرين هانية لاباس عليك؟!

نسرين بتاسماات ليها فوق النفس دايرة معاها الصواب بزز: نحمدو الله ونشكروه هااد السااعة....

ملاك حركات ليها راسهاا...فينما كايجي عندهم عصام عزيز عليها تشد معاه لحديت...قربات وجرات واحد لكرسي وݣلساات حداا عصام...نسرين شافت فيهاا بنظراات ديال منيتك كاطلع فيها وتنزل محملاهاااش نهائيا تݣلس معاهم تقول ݣالسة ليها على قلبهاا ولا هازة عليها السيف..مكالمية راسهاا غير بزز...

نطقات ملاك موجهة هضرتهاا لعصام كاتساؤل:اوى كيف غادي مع شي خدمة؟!

جاوبها ناطق بملل:هااحنا كانعديو وصافي...مسايرين مع لوقت... ونتي؟!

ملاك :بحالي بحالك...عيينا بروتين لي ديما كايتعااود...

عصام: عرفتي بعض لمرات كانقول كون غير يرجع لوقت لي كنت غا كانقرا معندي لا تابع لا متبووع..كنت مهنييي مع راسي...

ملاك بإجاب مشاطراه الرأي:ويييه كلنااا كانقولو هكااك...شحال من مرة كاتعياا من لخدمة ومشاكيلهاا وكتبغي ترجع غير لأيام لقراية...هههه كان همناا لوحيد هما لمتحانات...

عصام:ههه عندك الحق بصح...

ملاك بتدكر: مزاال تعقل على أياام الليسي وشحال دوزنا دياال لمغمراات مكانخاافوش...هههه اجي مزال عاقل على ديك لأستادة ديال لونݣلي وداك لبلان لي طرى لينا معاهاا ملي كنا فسيزيام...

عصام ضحك:هههه وانا نقدر ننساا...عااقل على ݣااع تنوعير وتحرمياات لي دوزنا...

خنساء ضحكاات ونطقات بستفهاام موجهة هضرتها لعصام:هيااا كنتو مقربلينهاا وسلاام...شنو درتو عند هاد لأستادة؟...

نقزات ملاك كاتعاود:كان عندنا متحان عندهاا...وقبل بتلت يام هاكاك...مشات عندها لمكلفة ديال لقسم دات ليها لملف ديال لغياب باش تسيني فيه...وقفات كاتسناهاا ولأستادة كانت كاتهضر فتيل وعاطياها بضهرها لشرجم...وديك لبنت هبطات عينيهاا لبيرو وبانو ليها وراق لمتحان دياال لݣرووب ديالنا يلاه طبعو...هههه مكانتش من لعاݣزيين...وهزات العفريتة كوبي منهم دارتها فجيبها...اوى وصدق لامتحان فخباار لقسم كاامل..كلشي ولا عاارف شنو غايتحط ومشاا خرجو فداار...

خنساء وسعات نضرتهاا:ايه وشنو وقع تحط نفس لمتحان نيت؟!

عصام كمل كايضحك من نيتو:هههه نهار لمتحان غير فرقات علينا لوراق..وكان هو لفرض لمعلوم...وبان ليك كلشي تكا على لورقة ونزل عليها نزلة وحدة معاودش هز الرااس...تقول ناس يلاه حطاتهم الطيارة من نيويورك...وماكملا حتا نص ساعة كلشي سالا....اوى وسيدة جاها لعجب وهياا طل على لوراق قراتهم و بان ليهاا داكشي ماشي هو هداك باينة شي حد وصل لينا لمتحان داكشي كااان مفرووش راه مخدوم من قبل...

ملاك:هههه وحلفات لينا حتا غاتعاودو متحاان اخر ودابااا ... قالت ليناا باينة مناقلين لياا هنايا... بقينا عليها لا استادة وحشومة عليك وحنا غير جانا لفرض ساهل وكداا..بغينا نقنعوهاا زعماا...ساعة وكنا غانضيعو فلوقت لي زايد فينا...جبدات وراق تاع لفرض ديال قسم وحد أخر وقالت الى كنتو تايقين فريوسكم غاتخدمو هاد لفرض كيفما خدمتو لاخر..راه سهل من هداا لي عطيتكم..يلاه وريوني علاش قاديين وحنتوني...ولي مابغاش يخرجو غانحط ليه زيرو...

خنساء ردت عليهاا ضااحكة:هههه ناااري كنت بغيتو ديروهاا بيهاا ساعة هياا لي دارتهاا بيكم

عصام: تي راااه الصدمة حنسراتنا بنت الهم ... ولمشكل حتا واحد محافظ شي حاجة لقسم كاامل خدم غير دااك لفرض لي تسرب وعول علييه....(زااد ضحك حتا تسدو عينيه)نهااار النقاااط وأجي تفرجي...مكااين غااشفنج كايتسااراا فلقسم ناقصنا غير شي براد ...

ملااك ضرباات ليه على يديه مقدرااش تهضر من كترة الضحكة لي شاداهاا ونسرين مخسرة فيها الشوفة ولعفارت سليمانية كايشطحو فوق رااسهاا وهيا كاتشوفيهم منساجمين وكايضحكووو...ممهضراهمش نهائيا ولا ضحكاات...مقندشة وعاقداهم...ݣالسة على جمرة

ملااك:ههههه لمخير موااصلش لخمسة...حناا مقفرة عليناا وزاادت زيراات معانا فتصحييح... نااري زعما شي بلانات دوزناهم كانتفكرهم وخا كاتكون طالعة ليا كانبقاا نضحك بدموع غير رااسي

خنساء شادة معاهم لخط:هههه وبعداا مايتسالكمش كنتو كاتقرااو وتفوجوو مع ريوسكم...

ملاك عاوداات شافت فعصاام:وتعقل ملي كنا كانلعبو لباسكيط مجموعين ... وكاع البنات يتسناوك تلعب

هنا نسرين خرجات نفس بصوت مسمووع مابقاتش قادرة تصبر بغاتها تنوض تݣعد من حداها.. نطقات كارزة على سنانها بصوت شبه مسموع:اوى صافي..السيدة ولات دايرة لينا نولسطالجيا هنايا...وݣالسة تكركر بحالا معندها خدمة تابعاها...

خنساء كانت قريبة منها وسمعاتهاا حسات بيها تقرصات ومابغاتش ملاك تبقى ݣالسة معاهم تحسسات من وجودها...خافت لاينوض بيناتهم شي مشكل بلخصوص نسرين مكتقدرش تحكم فأعصابهااا...

نطقات موجهة هضرتها لملاك بلطف وبلباقة منها:اااا ملاك...قاليا يحيى خاصاه شي سلعة ونسيت ماشفتش معاه...وخا تمشي تشوفي شنو خاصو...

ملاك زيرات على يديهاا...فهماتها على انهاا مبغاتهاش تݣلس معاهم...ناضت وقفات كاتشوف فيهاا بنضرات غير مفهومة ووجهاا طلعات معاه لحموورة ماارضاااتش تنوضهاا وقفاات ليهاا هضرتهاا فلحلق ماتسرطاتش ليهااا...

نطقاات بنفضة:وخا انا غادة...نيت نخليكم على خاطركم...

كملات هضرتها ومشات فحالها شااعلة محقدة عينيهاا...مقالت لعصام حتا بسلامة غادة مفݣوعة و مبينة راها تقلقات بلعلالي...

عصام شاف فخنسااء وخنزر:تي مال لخدمة غاتهرب..كون غاخليتيها تبقى ݣالسة معانا شوية مزال مافيها والو

يالله غاتجاوبو وهيااا تقاطعها نسرين موسعة نضرتها بعدم تصديق... نطقاات مرفعة نبرة صوتهاا:يااك اسي...هيااا مكرهتيش تبقا ݣالسة معاك وتبقااو نتا وياها شادين لحديت وتكركرو...

عصام هز فيهاا حاجبو ونطق بنزعااج:عاوتااني فهمتيهاا عوجة؟!!

نسرين محمرة فيه الشوفة:وكيفاش مانفهمهااش عااوجة؟!!...نوض نوض اش كاتسناا كلمهاا راه غاتكون باقا موصلاتش...ولا عرفتي شنو انا لي غادي نوض نخليكم على خاطركم غايكون حسن...وبقا نتا وياها هنا حتا صباح ف قولها وضحك عليهااا....

خنساء دخلات بيناتهم محاولة تلطف الجو لاينوض شي صدااع:صافي انسرين ماوقع واالو..جيتو باش تبدلو لجو..صافي ماتخليو والو يخسر ليكم النهاار...

نسرين بنفس النبرة منفاعلة:وشكوون لي خلااك شكوون...سيد كالس كايرجع الدكريات ويضحك معاها قدامي ويتراشقو بليدين مداير ليا حتا عتباار...وملي نااضت بارك عليك كون غير خليتيها مال لخدمة غاتهرب؟!!...(شاافت فيه وكملات بعصبية)معااارفش امولاي بلي كاانغير؟!

عصاام بحدة وبنبرتو القوية:هاادي راه ماسميتهااش لغيرة..هادي راه تسطية وخرجاان لعقل..مالكي بسلامة اشفتيني كاندير معاهااا...حتا ديري هاد لحالة كاملة ياك غاكنهضرو عاادي وقداامك من لفووق...

نسرين:رااه هدا هو لمشكل..شوف غير قدامي وشنو طرى..اماا من موراياا علم الله(عاودات بتكرار)علم الله شنو كاادير مع كل وحدة كاتشوفهاا ولا خدامة معاك...

عصام(خرج نفسو بضيف):ففف زعماا نتوماا لعيالات لعفوو معااكم...كيفما دار معاكم بنادم وحلة...

نسرين:وااانتووماا رجاال لي فيكم المشكل...غير كاتشوفو لاطااي وشعوراات وزوااق عينيكم كادلااو وريوݣݣم كايطييحو....كاتنسااو ديك المرى لي مزوجين بيهاا ولي صابرة معاكم.....كاتنساااو كلشي الله يستر....

خنساء ضحكاات:هههه نعلي شيطاان انسرين...صافي بدلي لموضوع غاتصدقي غاجبدا شي صداع تاني وتبداي تبكي...

عصام بعصبية:وعلاه هيا تقدر...مغاتسد داك لفم حتا تخبط مها مع هاد الطبلة وقداام النااس عااد تحشم وترجع لطريق...بلحق سري انا لي مخرجهاا...عقلي امراتي لعزيزة على هادشي... لويكاند الجاي تجي تاني تبلحسي باش تخرجي راه نفكرك فهااد لهضرة كاملة...

نسرين ميقاات فيه وعاودات هزات لموني ونطقاات كادور صفحااتو بعنف:مممم جملينا فتحلااف...كلمة لحق مكيبغيهاا حد...اودي الى كنتي غادير ليا بحال هاكا بناااقص منها خرجة ݣااع...

عصام حرك راسو بلا حول عارفهاا كاتشد لهضرة وتحلف ماطلقهاا حتا كاتشحفوو... خنساء غمزاتو باش ينهي النقاش ويسد لموضوع...وفعلا داكشي لي كان طلبو لي بغاو...وبقات معاهم حتا كلاو مجموعين...ونسوها فديك لعشية...مشاو فحالهم لدار..وهياا رجعاات لبيرو تكمل وتقضي داكشي لي كان باقي ماتقضا...

فاقت خنساء مع صباح مخسرة ملاميحهاا على على صوت لغيڤيي صونيط عند راسهااا...هزات تيل حالة عين وسادة عين...شوية حلات عينيها بجووج ملي قشعات ميساج مهدي فلوات كاتب فيه:

"خلينا ليك شغل نهار ندمتينا😒"

عاد شافت ليزابيل ديالو المتتالية وحدة مورة وحدة...فعلا تقلق ملي مجاوباتوش...بسباب لعيا وحيت فاقت بكري جاها نعااس تقيل مقدراتش تقاومو...طاحت كاااو مفاقت حتا لصباح...حطاات تيل و ناضت من بلاصتها..حلات شرجم ديال بيتهاا محيدة عليه الستار...بان ليهاا لجو مغيم وشمس طافية....جبدات يديهاا مع بعضهم ودازت لبلاكار خدات فوطة ودخلات لحمام..خدات دوش خفيف بااش تصحصح...خرجاات من لحمام،جبدات لحوايج لي غاتلبس حطاتهم فوق سرير..و دازت لمراية قداات ميكاب صباحي مكتافية ببيبي كريم فبشرتهاا مع برونزر خفيف فعضمة خدودها...وأيلاينر رقيق مجبدة بيه عينيها مع ماسكارا مكتفة رموشها..وغوج اليڤغ غوز باارد فشفايفهاا...سرحات شعرها و جمعاتو لفوق ...مع ديبوكل فضيين فودنها... لبسات سروال دجين لاصق فلون الأبيض مع بودي كولو طالع مع عنقهاا فنفس اللون..وڤيسط قصيرة شوية فموڤ فااتح من فوق و صاك متوسط لحجم بسنسلة فنفس لون لاڤيسط مع صباط طالون فنواغ...هزات التيل ودوزات ابيل ڤيديو لمهدي..لي كان يلاه فااق ݣالس فلهواء الطلق لخضورة قدامو حاطين ليه فطور بلدي فوق الطبلة...شاف لابيل ديال خنساء وقطع عليهاا فلبلاصة ماباغيش يرد...

خنساء هزات حاجبهاا بنزعااج عارفاه مفݣوع و منفخ عليها حيت موجباتوش بليل...مولف التحزار وهيا معندهااش لوقت...سيفطات ليه ميساج بلخف كاتبة فيه:

"ميدو جااوب مخاصنيش نزيد نتعطل راني مزروبة"

قرى ميساجهاا فلبلاصة...وهو لي دار ابيل ڤيديو هاد لمرة...دوزاتو خنساء

نطقاات كاتبتااسم شافة فين ݣالس:هااي هااي..مصبح ليوم فطبيعة...بصحة وراحة اسيدي...

مهدي كان بغا يخاسم ويقوليهاا علاش مكنتيش كاتجاوبيني وقولي ليا راك غاتنعسي ماتخلينيش معلق و هاد لخدمة باينة غاتجبد ليناا غير لمشاكيل و كداا ..مهم موجد ليهاا جريد معول يقراها عليهاا...ولكن غير شافهاا وهو يسقل الساكتة شدااتو...بقاا مفيكسي عينيه عليهاا وساهي..كاتبان منورة...الندم تسلل ليه فانه عطاها الادن باش تعوض غيابو فلقهوة وتلاقاا مع رجال اشكال وانواع وغايشوفو جمالهاا و جسدهاا المتناسق وغايشاركوه النضر فيهاا...غير هو لي راجلهاا وكيفاش كايبقى حال فيها فمو فما بالك بالبراني...كرز على شفاايفو مكرهش يقوليهاا ݣلسي لأرض ماتمشيش معندك ماديري تم...ولكن تراجع فأخر لحضة ومبغاش يمنعهاا حابس راسو غير بزز صابر ونااار الغيرة كاتحرق فيه من لدااخل...

خنساء فيقاتو من سهوتو مرفعة نبرة صوتها:مهدي كااتسمعني ولا واقلة انا داوية غير بووحدي...

تنهد غمض عينيه وحلهم ونطق بهدوء:وي كانسمعك..صافا لاباس عليك...كيف صبحتي...

خنساء:لحمد الله احبيبي.. سمحليا لبارح مشفتش لابيل ديالك داتني عيني...

مهدي سكت تواني كايحقق فيهاا:ماشي مشكل..هيا يلاه غادة؟!..

خنساء:اه يلاه غاادة..ههه ياكما تعطلت؟!

مهدي:نو..حتا الى بغيتي تبقاي حتا لعشية وتمشي نتي حرة...مكاين حتا مشكل...

خنساء:لا لا غانمشي دابا...اصلاا وجدت وكلشي مانقدرش نݣلس...

مهدي:واخا صافي لي بغيتي..احم...هبطي لكام نشوف البسة...

خنساء بتاسمات وهبطات لكاام كاتوريه فلبسة وكاتدوي:هاهياا اللبسة...كيف جيت..

مهدي مصغر فيها عينية مقربهم لتيل.:مممم زوينة...غير هو سدي ديك لاڤيست ماتخليهااش محلولة هكااك..صدرك بان مزير مع لبودي...

خنساء فهماتو راه بدا ناقوص الغيرة كايدق عندو تاني نطقات بإجاب:اه واخا غانسدهاا...

مهدي:وحتاا داك لغوج اليڤغ نوقصي منو شوية رااه اوڤر...ومجاش اصلا معا اللبسة

خنساء غوبشاات:مهدي راه لونو نيود وكاعما باين منين جاه أوڤر؟!

رد عليهاا مخنزر:هيا دابا انا مابقيتش كانشوف مزياان...صافي على خاطرك عجبك خليه اشغانقولك...

حركات راسهاا بلا حول..دازت لكوافوز حلات لانجيت وهزات منها..ومسحااتو قدامو وهو كايشوف فيهاا

خنساء بإبتسامة جانبية باغا ترضيه:هاهوا اسيدي مسحناه...خاطرك نديروه ليك...(هزات بوماليڤغ طبقاتو على شفايفها)وهادا راه تخونص بااغو غير كايرطب وصاافي...لا تقول حتا هو خاصو يتمسح...

مهدي بتاسم:نو صيبو دابا مزياان...

خنساء شافتو مزال باغي يدوي ومابغاتش تقطع عليه وتمشي..ݣلسات فجنب السرير و نطقات بإجاز:فطرتي؟!

مهدي:يلاه كملت فطووري...(دور ليها لكام)هانتي داكشي نااضي ديال لبلااد...

خنساء بإعجااب:مممم والله الى بصحتك..شهيتني فجبن لبلدي مع لبطبوط سخون هههه

مهدي:نتي مزالة مفطرتيش؟!

خنساء بنفي:نو حتا نمشي لقهوة ونفطر...مابغيتش نبدا نقرقب لماعن على نادية ونفيقهاا مزال لحاال...

مهدي: ااه واخاا على خاطرك...علمتي بعدا الطاكسي يجي يديك؟!

خنساء:وي علمتو لبارح ملي وصلني لدار ودرت معاه لوقت قالي غايجي بلا مانحتاج نعيط ليه...واحد خمسة الدقايق يكون عندي

مهدي:اه اوى صافي مزياان..(ناض وقف)يلاه بااي شيغي...نخليك دابا حتا نعاود نعيط ليك..

خنساء صيفطات ليه قبلة:واخاا ابب بسلامة علييك.....

قطعات لابيل...وهزات رشات شوية من عطرهاا على عنقها وبين يديها..لبسات لباگ تاع لمغيااج وساعة يدوية من ساعاتها...تواني حتاا وصل الطاكسي ووقف قدام لباب كايتسناها...فينما كاتبغي تمشي لشي بلاصة مهدي داير ليهاا طاكسي خاااص هو لي كايخصهاا تركب فيه...مكاتخد حتا شي واحد اخر من غيرو...خرجاات لعندو سادة لباب بشوية باش ماتفيقش نادية لي مزالة ناعسة..وركباات اللور متاجهة للكافي....

رانيا خرجات من دارهم لابسة كيطمااا سخوونة مع مونطو طويل مع بامنطوفة وهازة فيدهاا مظل خايفة تصب الشتااا ... تقدمات نيشان لراس الدرب كان واقف منير مسند على الحيط تاني رجل عليه ... شافها وابتاسم مقرب لعندهااا وسلم عليها من الوجه : صباح الهندي تزلق تجي عندي ... الحيبااان نص ساعة باش تخرجي اووو !!! ..

رانيا تنهدات : راه ماخرجت حتى صايبت الكرص لعتيقة باش تديه للمحاال ... عند بالك الخروج ساهل بحالك ...

قرب ليهاا جار ليها شعرها : المهم جيتي هاذا هو الاساس .. توحشتك الشهدة ديالي ...

بعدات عليه شعرها : مممم بااينة فيك موحشني الله يعطينا وجهك ...

ابتاسم ليها وبنبرة تعناب خاطبهاا : مواالف نكدب عليط انااا العسيلة دياالي .... نتي راااك الشكلااطة لي عليهااا نتلاااكلاطااااا

ميقات فيه مبتاسمة جنب : زيد زيد ولااا غانعطيك للراس ... حادك غير فالهضرة

منير تمشااا جارهااا: نتي رااااه واخا تعطيني وتحلاااي لي فعينيي ... شحااال عندي منك اناااا ....

ضحكاات بلاا حول زاايدة معااه كايهضرو ويتحتتو ويدردشو ... حتى دازت من حداهم واااحد العظمة ... طول وقامة وعرض وهاامة ... اشمنك يااازين وااش منك ياااصدر واش منك يااا مؤخرة ... مهبرة نييييت ... كلهااا كاتفتن بفورمتهاااا وضاربة لييك وااحد سيرفيط دياال النمر وتعكييرة بالحمر كااضرب على الشعاااا ....

منير غير شاافهااا وفهااا بقااا متبعهااا بعينييه لي غادي يطيحو علييهااا .... ريووكوو ساالو وعنقو عوااج بكترة ماابقااا حااضيهااا ... نسااا رااسووو وعينيه حوااالو عليهااا ...

رانيااا شافت فيه وقرماات حجبانهاا ضاربااه لكتفو : كوولهااا نتتاااا حسن ... انااري نتااا شفتي اللحم وتهااوشتي مااحشمتيش ...

تلف ضهشراتو : اءء كيفااش ... !!!

خنزرات فيه : سير جيب عينيك رااه داتهم معااهااا !! ...

منير عاد عاق براسو وشاف فيها مصغر عينوو : هااحنااا على الغييرة تاني ودااكشي ....

رانيا بنفخة : الزعتر ماشي الغيرة هاادي ... ونتااا مومو دعينيك لصق فيهاا

منير بغاا يكالميها : وااش من نيتك احبي ... نتي عارفة هااديك مااشي ستيلي!!

شافت فيه بلا حول : ماشي ستيلك ... لواااه قرعة سانسيلك ... زييد عافااك قبل مانصدق مخصرة هاد الخرجة ديال ال*راااا ...

عرفهاا كعاات ولبدهاا سكت اتااجهواا للشااريع كايتمشااو وهي كاتجاوبو بالميزاان طاالعة ليهااا دايرة فيهاا الغضبة زعمااا ... وصلو قدام محاال عبدو وهوو ينطق بتساؤل : ماشي مشكل ندخلو نشوفو عبدو وناخد واحد السخرة بالخف ...

حركات راسهاا بايجاب : مممم واخاا ....

تبعااتوو وتقدموا للمحاال كان وااقف سيمو على سلوم صغيير كايركب شي فيساات مكونصونطري وعبدو كايغلف شي زرابااا باش مايتكرفصووش ...

نطق منير : اهلااا اصحبي ... صافااا ؟؟

عبدو حط داكشي لي فيدو وقرب بترحيب : وافيين العشيير ... زارتنا البركة اصحبي ...

سلم عليه بشكل رجولي وداز لرانيا مبتاسم : سراق زيت ديال الدرب صافا عليك ...

مدات ليه يدها بمصافحة : الحمد لله اخويا ونتا بيخير (دورات عينيهاا فالمحال ):، وراك غادي مابقا ليك والو وتسالي ...

عبدو بايجاب : واييه بقاو غير شي توشاات خفااف ... راه معاونين عليهم انا وسيمو ...

هزات فيه عينيهاا ونزلاتهاا ماحملاتوش من داك النهار ومدازش ليها بالمرة ... وحتى هو مدارش جهتهم اصلا فحال الا مكاينش بالمرة حدو لمحهم وكمل على شغلو بلاما يعيرهم اهتمام ...

منير : ايواا اللهم يسر بلاماا نعطلك ... عطيني ديك الامانة نديهاا للواليد راه سول فيهااا وكمل شغلك ...

عبدو بايجاب : اييه واخااا ...( مد ليه واحد العلبة فيها شونيور كان محتاجو وخداه من عندو ): هاكا الله يحفظك ...

منير : مابيناتناش ... يلاااه نخليك حتى نتقاشعواا ...

عبدو : ان شاء الله ( وجه الكلام لرانيا ): بسلامة ارانيا ..

ردات عليه : تهلا اخويااا ...

زادو من تما خرجواا وهو ينطق سيمو باستهزاء : هادي هي الضريفة لي قلتي لياا ... كالسة كاتجلوق مع هاد خينا فالزنقة ...

عبدو شاف فيه محاول مايخصرش صورتهااا ومايبغي حتى واحد يهضر فيها ولا يشوف فيها شوفة ناقصة كاتبقى بنت دربو وعزيزة عليه ولو يكون سيمو ولد خالتو ... نطق بنفي محاول يبدل ليه نظرتو عليها : من نيتك !!! ... راه ولاد درب واحد وكبرنا بحال الخوت ... غايكونو غير تلاقاو فالطريق وراجعين بجوج ...

سيمو : موالداهش ليها مهااا ماشي خوهااا هادشي لي كانعرف ...

عبدو : وفين كاتعرفهااا باش تدوي عليهاا اصلاا ... كمل خدمتك ونتااا تموت فالكريتيك ....

سيمو دلا شنايفو بعدم اهتمام وكمل شغلو لي فيدو كايحاولو يساليو الاصلاحاات فاقرب وقت بااش يعمرو السلعة ويحلووااا المحاال ...

خنساء كانت كالسة فالبيرو محنية على الفلوس ديال ديك يوماين كاتحسب فيهم وتعااود بااش تريكل امورهاا ... تسمع الدقااان فالباب ونطقات وهي محنية :دخوووول ...

ملااك دخلات هازة فيدها فاتورة الماا والضو ... غير شافتهاا كاتحسب الفلوس وهي تهز حاجبهاا بتفكير وابتاسمات جنب ... تقدمات جهتهاا بهدوء مصطنع : خنساء هادي لا فاكتيغ ديال الضو دهاد الشهر ... حطيها مع الوراق حتى نبغي نخلصها

خنساء هزات فيها عينيهااا بايجاب : واخا غير حطيها تمااا ... انا غانشوفهاا ...

ملااك حطاتها قبالتهاا وعضات على شنايفهااا كاتبلاني ونطقاات بادب : كاتفيريفيي المدخول ديال هاد دوجوغ ...

خنساء بايجاب مكونسونطرية : وي وكانحاول نحيد منو تمن السلعة ... حتى يجي مهدي ويشوف شنو يدير فيهم ...

ملاك : وي مي راااه انا لي كنت مكلفة بهادشي ... تقدري تعطيهم ليااا ... اون بليس ماشي هاكة كانقسموا هادشي ( حاولات تقرب متلفاهاا): هادو بوحدهم سلعة وهادو بوحدهم لواحد من دراري كايتخلص لسيمانة ... وعاد هاادو كايمشيو للكونط وهادو كايبقاو يتجمعوا بوحدهم هنااا ...

خنساء هزات حاجبهاا كترات عليها الحسابات وكاع داكشي لي كانت دايرة خربقاتو ليهاا ودوخات ليها المخ ... و استغربات هادي مالهااا ولات تبحلس عليهاا وكادوي معاها بادب ...

خنساء : مممممم واخا غير خليهم حتى يجي مهدي وهو يعرف لحسابو راسو ...

ملااك بلطافة زايدة : نوو انا لا جيغو وانا لي كانتلف ... الا بغيتي نتي سجلي ليااا لي فاكتير وانا غانخدهم من عندك ونقاد كل حاجة فبلاصتهاا كيف ديمااا ...

خنسااء شافت فيهااا : مممم اطط نشوف مع مهدي ...

ملااك ابتاسمات بايجااب : دااكوغ ... من حقك ...

هزات خنساء تليفونها قدامهااا وعيطات لمهدي سولاتو واش تعطي لملااك المدخول وحتى هو قالهاا غير قيدي ليهاا كلشي فورقة وعطيه ليهااا هي غاتحطهم فالكونط ويبقاو عندها الوراق لي حسبتي نتي ... سالات معااه وهزات ورقة كتبات ليها فيهااا شحال عطااتهااا وكلشي ومداتها ليها مع الفلوس ...

خنساء : المهم نتي تكلفي بالكونط وانا فكل نهار غانسجل ليك شحال دخل وشحال خرج ونعطيهم ليك ...

ملااك وسعات ابتسانتهاا : داكوووغ ... كوني هاانية ...

خنساء حركات راسهااا بايجااب وعطاتها الوراق والفلوس كيف قال ليهااا ....

خرجات ملااك وسداات الباب مبتاسمة كاتشوف فداكشي لي فيدهااا موسعة ضحتهااا بمكر ... ونطقاات بحقد : طحتي بين يدياااا اخنسااء ... هاد المرة مغاديش تخرجي منهااا .... جنيتي على رااسك الهبيييلة ههههه ... غير بيااا ولا بيك و غانشوفوا شكون القافزة فينا

زادت من تمااا كاتمختر فرحااانة وراسهاا خداام كاايبلاني لشنو ناوية دير باش تعطي لخنسااء دقة فين ماتعاودش تهز قدامها الراس ...

يتبع...