لحن الأمل الجزء 49

ابتسامة تشكلات من ثغرها...ونزلات عينيها مالقات ماتقول ليه...عطاها جواب الي لقاه مناسب ليه باش تعرف علاش اختارها...شنو عجبو فيها...

رجع لجلستو متكي بظهرو عالفوطوي عادي ولا كأنه قال شي حاجة ولا كأنه حشم ديك السيدة الي قدامو...واخا لاحظ انها تزنگات حيت هاد الكلام اول مرة تسمعو من شي واحد هي بدات كاتهتم لأمرو وبدات كاتبادلو احاسيس مشتركة...يمكن هنا فين غادي تحس بحجم المعزة ديال هاد الانسان الي قدامها غير هي ماعارفاش تفسر وراها كاتعيش شي حوايج جداد عليها عندهم طعم زوييين...

مالقات قدامها غير الما هزات الكاس شربات منو كانو حاطين ليهم قراعي الما مع المشروبات الي طلبو...ماعرفاتش كيفاش تصرف حتى صونا تيليفونو نزل عينيه لقاه مصطفى...هز عينيه شاف فالارجاء كايقلب عليه بعينيه وفنفس الوقت طلق الخط مجاوبو...

مصطفى : ضرني البرد هنا ندخل ؟!..

مازن : دخل...

قال ليه كلمة وقطع معاه...عاد بدات كاتنهد بارتياح حيت لقات راسها متوترة بلا قياس ومزيرة باش ماتبينش...لكن هي طاحت مع انسان دقيق الملاحظة قشع توترها غير من حركات ايديها وكيفاش كاتفرك جبهتها وهي كاتسمع ليه...هادشي زوين عجبو فيها واخا مثبتة مافيها باس حتى شوية التوتر يبين الانوثة الي فيها...عندها مزيج زوين فشخصيتها انسانة رزينة وفنفس الوقت كاتبرز انوثتها بطرق اخرى...

شوية وهو يتم داخل مصطفى جاي ويفرك فايديه من البرد برا حيت الفيرما جات تما وسط الطبيعة والخلا وضايرين الجبال الي باقي فيهم الثلج ماذابش مية فالمية وكايتعطل باش يذوب واخا الجو ديال الربيع...

مصطفى : الله...تعطل الغذا..."ضار عند مازن"...

مازن"هز عينيه شاف لهيه ورجع نزلهم كايشوف فتيليفونو" : شوف معاهم..."هز عينيه فمريم"...جعتي ؟!

مريم : لاا ماعليش وقت ما وجدوه...

مصطفى : ولواه يفوت الحال...

يلاه غاينوض يسولهم حتى بانو ليه جايين جايبين الاطباق المرافقة...وصلو لعندهم وطلبو من مازن السماحة على التعطيلة حدو حرك ليهم راسهم زعما ماشي مشكيل وبداو يسربيو فوق الطابلة...حطو الشلايض حطو تكتوكة،، زيتون فزليفات صغار،الهريسة،الفريت،، عمرو جناب الطابلة غير بداكشي عاد المونادا ووالماس الي كايشربها مازن الى غلق فالماكلة خصوصا من بعد الشوا....الشوا الي حطوه فزوج صينيات طوال..الصوصيص كفتة والكوطليط وحتى قطيبات الكبدة..عاد حطو صالاد الي كاياخذ من عندهم ديما...والخبز ديال الدار المخبوز على ايادي نسائية خدامين تما كان خبز التنورت...بخلاصة الطابلة هوروها مزيان كومونداو غذا ملكي الي ياكل ويشيط...هادشي كاتشوف فيه مريم كايزيد يبين ليها هاد الناس قداش عينهم كبيرة وعين الخير...لقات راسها بلا ماتحس رجعو ليها ذكريات ماقدراتش تلجمهم عليها...ذكريات تسللو لراسها...

فلاش باك..

دخلات هي وياه لواحد السناك مازالين يلاه فالشهورة لولة من زواجهم...خذاو اول بلاصة لقاو خاوية...سناك فحي شعبي بامتياز...جا عندهم السرباي...

سواريز : اش عندكم هنا !!..

هو : الي بغيتي اخا عبد الرزاق...طون اومليط ميكست..كاين شاورما وبيتزا...

سواريز : واحد ميكست الي كاندي ديما...وهي واحد طون...

حرك راسو ومشى وهو ضار شاف شي حاجة فتيليفونو وحطو هو وشي سوارت عندو...ضار هنا وهنا كايحك جنب فمو بظفرو...حتى نطقات...

مريم : ماكانبغيش ديال الطون...شوفلي واحد اخور...

سواريز"شاف فيها" : داكشي مايعجبكش...ماهاز فجيبي الي يقد اش بغيتي عدي بيه...

مريم : غير بلاش ما طلبو لي مابغيتوش...صافي كول غير نتا ونوضو...

سواريز : هاحنا غانبداو فالتقـ_*حبين...كولي وماتفرعيش ليا ز_*بي ثاني...

مريم"وسعات عينيها" : عبد الرزاق مابغيتوش...صافي قولو مايوجدوش...ولا خوذ ليا شاورما انا نخلصها ماعليش..

سواريز : اري دوك الفلوس الي بغيتي تخلصي بيهم شاورما..."سرح ايدو كيقوليها مدي"...

تنهدات وهي تحدر عينيها حلات صاكها وجبدات ليه ثلاثين درهم عطاتها ليه باش يكوموندي ليها اش بغات...شدهم من عندها وناض مخليها تما شي عشرة دقايق وهو غابر حتى تم داخل...حط باكية الكارو وجلس شوية جا السرباي حط ليه اش بغى وحط ليه الفريت وكانيط ديال كوكا وهي حط ليها بوكاديوس ديال الطون والفريت بلا مونادا...خرجت عينيها وشافت فالسرباي...

مريم : خاي انا بدلت الكوموند بغيت شاورما واقيلة نسيتي...

يلاه بغا يهضر وهو يشوف فيه سواريز هز ليه ايدو بمعنى سير...مشى وبقات هي كتشوف وهو يدفع ليها بلاطو ديالها...

سواريز : كولي هذا...

مريم : علاش !! ياك عطيتك الفلوس خوذ ليا الي بغيت..

سواريز : غا عدي بهذا هادوك خرجت شريت بيهم الكارو تقادا ليا...

مريم"تعصبت" : مابغيتوووش واش بغيتي توكلو لي بزز ؟!...ياك عطيتك الفلوس...

ماجات فين تكمل حتى حسات بخبطة لفمها حسات بالضو ضربها تا تسمعات حدا الناس الي ضارو يشوفو...

سواريز : سكتي تقااا*ودي عليا لا نهرس لعدو ر*بك فمك...فرعتي ليا كري بالهضرة...بغيتي تاكلي كولي مابغيتيش زمي عليا فمك...

بقات شادة فمها وعينيها خارجين فيه...ماعندهاش القوة باش تصفيها ليه...واحد اللحظة بانت ليها قرعة الما دالزاج كانت على بونت تشخشخها ليه فوق راسو...غمضات عينيها كاتنفس وتصبررر راسها بزز وهي تحلهم شافت فالبوكاديوس وهي تجرو...بانت ليها ساشية بغات تجمعو...شافها وهو يحط السندويتش ديالو..

سواريز : فين غاديا بيه...

مريم : نديه لماما...

سواريز"جرو ليها من ايدها بزعفة لعندو" : حطيه ولهلا يوكلو لا ليك ولا لمك...

طردات ديك الذكرى الخايبة الي جاتها فراسها بلا ماتحس مابغاتش تقارن ولكن حنا ك انسان فينا هاد القضية تلقائيا كانرجعو لبعض الذكريات فشي وقيتات كايخليونا نتفكروهم...بزربة نفضات هاد الذكرى ورجعات كاتعيش الحاضر والواقع الي هي فيه دابا...حتى سمعات صوتو كاينادي عليها...

مازن : مريم...

مريم"شافت فيه"...

مازن : بسم الله...

تبسمات وحركات راسها وبدات تاكل...الشوا كان شهي الطابلة تفتح النفس وتحل العين على الماكلة...كاتاكل وخالها يكحز ليها ويسولها شنو بغات اخور حتى جابو ليهم طاجين صغير ديال المعزي بالبرقوق واللوز...حيد ليه الغطا...كمل مازن القدر الي بغى من صالاد ديالو وهز الخبز سمى الله وبدا ياكل منو...ماكلتو ثقييلة...حتى هز عينيه شاف فمريم...وهو يكحز الطاجين جيهتها شافت فيه وحرك ليها راسو بمعنى كولي من هنا...لقات راسها وسط طابلة ديال العيد ههه...حركات ليه راسها حتى هي وهزات من الخبز سمات الله وشركت معاه الطعام فداك الطويجين...مصطفى خاشي راسو فالشوا ويهز من هنا وهنا ممساليش...وقبل مايبداو الماكلة صور الطابلة صورة وهو يصيفطها شمهروش للجن الكبير ديال طه والمارد الصغير ديال ادم...دقة وحدة ودار صيلونص للتيليفون...ماكاملاش زوج دقايق بان ليه التيليفون كايطفى ويشعل بالميساجات...دارو فجيبو وخلاهم يتركلو ليه تما وسمى الله وبدا ياكل وينتش ها صوصيص ها كفتة ها كوطليط...ويضحك مع مريم اما مازن ماكيدوزش جيهتو حيت ملي كايبدا ياكل كايتمر ههه...

مولاي يعقوب...

وقف السيارة فالباركينغ تما ونزل هو وياها توجهو للدار قبل مايدقو حلات خديجة الباب بابتسامتها مستقبلاهم...سلمات عليهم ودخلو للدار...

خديجة : لقيتيني وحدي جيتي تحيدي عليا القنط ههه...

مينة : هههه مشات عليك مريم...

خديجة : وايه...طه دخل اولدي...

طه : كاين شي غذا...

مينة : سيير جيبو...

خديجة : الا موجود لقيتوني يلاه طفيت عليه...

طه : وتغذاو بصحتكم...يلاه هو هذا هاني مشيت...

خديجة : لواه فين غادي ؟..بلاتي تا تغذا...

طه : والله ماكرهت مزير بالخدمة جايين عندي شي ناس وخاصني نضرب تال لافاك فين قريت نشوف واحد السيد..."باس راسها" تهلاي فالواليدة...

خديجة : واخا هههه الله يرضي عليك..

مينة : سير اكبيدتي الله يديك فالنجا...

باس راسها ومشى تيسر...وهي مشات ديريكت للبيت حيدات جلابيتها وشالها...قادت بيجامتها ودارت زيف حياتي على راسها وخرجات لعند خديجة لقاتها جايبة الطاجين حطاتو فوق الطابلة...

خديجة : زيدي بسم الله...

مينة : بيه فيه هههه ايييه ريحتو عاطية...الله يعطيك صحيحتك...

جابت الخبز والما وجلسو على داك الطاجين تغذاو بيه غير هما بزوجات كايهضرو فاي حاجة باقي لحد الساعة ماجبدووش الموضوع وخديجة كاتسنى مينة الي تدوي...اما طه ملي خرج شد الطريق راجع لخدمتو...كايدندن مع الاغنية الي طالق فالسيارة حتى وصلو ميساج نزل عينيه للتيليفون غايشوف من الشاشة مايدخلش حيت كايسوق بانو ليه عرام الميساجات والفوق كاين ميساج من خالو مصيفط ليه صورة...

طه : خالي بلاتي ونشوف اش مصيفط راني كانسوگ..

يلاه غايلوح التيليفون وهو يتراجع وزغبو الله ودخل لداك الميساج حتى بانت ليه الطابلة ياااا سلااام سلم هاربة من الجنة...وسع عينيه على جهد جهدهم...

طه : خالي لا خاااالي لااااا...اااااححح... "كمش عينيه وحط ايدو على كرشو"...وا ينعلللل...

عض لسانو كان بغى يربرب عليه وهو يبدا يصيفط ليه ميساج تابع لاخور وادم يصيفط لطه ولباه شوية ولا طه يربرب لادم وادم يعاير فيه تشابكت القضية وخلاو مصطفى وولاو يسبو فبعضياتهم...ومصطفى رااا فينهو خاااشي تيليفون فجيبو والمطايفة نايضة...طه شاف تا عيا لقى راسو تفقص وهو يطلق سينيال جنب الطريق هز تيليفونو...ودخل لعند خالو وعاااوتاني ضرب ليه احسن بلوك فيك يا فاس...ومشى لعند ادم الي فرع ليه راسو تاهو وبلوكاه...

طه : تريييكة كحلة...

رجع كسيرا وشد الطريق لخدمتو...قبل مايمشي للصيدلية مشى تقدا الغذا داه معاه...اما عند مينة وخديجة كملوو غذاهم وجمعو الطابلة وردات خديجة الما يطيب عمرات براد اتاي مسوس...مدات لمينة كاسها..

مينة : وطويجين هو الله يعطيك الصحة...

خديجة : بصحتك اخيتي...

مينة : ماعندكش الخدمة فالمحل...

خديجة : لا بعت كلشي الصباح...كانت عندي شي كوموند كثيرة حيدتها الصباح"تنهدات"...وليت كانعيا الجهد تقادا غاديين ونكبرو ههه..

مينة : غا بغيتي اخويتي اما براكة عليك...عطي الراحة لراسك تباتي فايقة تعجني تال ثلاثة صباح تنعسي وتفيقي بكري تاني وتمشي تحني ظهرك لعجينة تسرحيها وتلگي وجهك لعافية المقلة...فين غادية بصحتك فين...

خديجة"بابتسامة" : واش ندير طرف الخبز هذا باش عشت هاد السنين...

مينة : كنتي صغيرة باقي شادة فصحتك دابا راك كبرتي براكة عليك...

خديجة : دابا نشوف...

مينة : ماعندك ماتشوفي...لا ساعفتيني كملي الشهر وعطي السوارت لمول المحل واجي عيشي معايا...مع خوك را حنا مجموعين فديك الدار ديالنا كلنا...مريم الي تعولي عليها هاهي دابا تجوج "تبسمات" وغاتجي حداها..

خديجة"شافت فيها باستفهام لاش بغات توصل وهي تضحك مينة بخفوت ونزلات عينيها ورجعات هزاتهم كاتحرك فراسها"...

مينة : هههه ايه هانتي شوفي النصيب لمن...لمريم هاهي لا بغى الله غاتكتاب لولدي مازن الي ربيتي واحد الوقت وخرجتي من الدار ونتي حاملة بمريم...

تبسمات خديجة حتى ضحكت...كانت كاتسناها هي تجبد الموضوع...فاللول استغربات علاش ماهضراتش معاها من البارح لكن ملي دوات مينة دابا عرفات بلي كانت باغية حتى تجي ويهضرو وجه لوجه...واخا تبسمات خديجة حسات بقلبها تكمش احساس فشكل...حيت ماكانتش متوقعة ان الاختيار غايوقع على بنتها مريم...هي الي كانت كاتخطط مع مينة باش يقربو ليه جيهان ويزعموه يبدل فكرة الزواج الي كان ساد عليها بمرة...ماكانتش عارفة ان بنتها جات بكل بساطة بدلات ليه الفكرة وبغاها...ماتنكرش انه فرحات بزاااف ورتاحت الي ربي جاب لبنتها نصيب والي كان مازن ولد ختها الي بعدات عليها...ولكن فنفس الوقت مابغاتش تعاود الغلط الي دارت دخلات ليها فكرة الزواج حتى زرفاتها فيه وعاشت ابشع سنين حياتها باقي لدابا كاتخلص ضريبتهم...

مينة"حطات اديها على ايد خديجة" : شفتي المكتاب ؟...ملي قالها ليا مانكذبش عليك صدمني وماتوقعتهاش...

خديجة"شافت فيها"...

مينة : مريم يتمناها اي واحد ليه وتمناها اي عگوزة لولدها...ونتمناها انا نيت غير مادرتهاش فبالي حيت شفتها حالفة بحلوفها على جواج ومايجي منو...عندها مشاكيل غارقة فيهم...

خديجة"تنهدات" : كانت مكرهة حتى جات لعندي ولباارح قالت ليا شنو كاين وخذات شواري..."شافت فيها".. مانكذبش عليك اختي ماقديت نقوليها والو ماقدرتش نزعمها حدي شكرت ليها مازن الي نعرفو من صغرو وعارفة المعدن ديال ولادك وترابيهم...والباقي خليتها على خاطرها...فايت مني زعمتها وتزرفات...اما لا جات عليا بالفرحات مازن راجل يحلفو بيه الرجال ونتي ختي ماعمرنا نشوفو منك العيب عارفاك قلبك حليب وكبدتك حلوة على كلشي ولسانك عسل مع الناس...ماعمرني شفت منك العيب وولادك وقفو معانا وقفة الرجال وحلو لينا بيبان الخير وهزو بينا ودارو لينا الشان...شكون هادي الي تكره بنتها تكون عروستهم ونكون مامزياناش لا قولت لا على مازن...

مينة كاتسمع ليها وكاتشدها التبوريشة من كلامها الي كان شهادة زوينة فحقها هي ومازن وولادها...كايزيد قلبها يتكمش وتخاف لا يوقع شي غيار بين مازن ومريم ولا مايتفاهموش...من عند الله جاتها واحد السلبية وخوف لا يتفرق الشمل بينها وبين ختها...

مينة"عينيها غرغرو..طبطبات على ايدها" : ومريم مانلقاوش ما حسن منها...انا بالفرحات عليا ولدي حن عليه الله وحيد ليا العقدة على يد بنتك...ونحمد الله جات فبنت ختي يقربني منها كثر...جي عيشي معايا براكة من الفراق اختي براكة را قلبي طاااب ملي كنتي بعيدة وانا خمسة ستة دموع للعين كل ليلة ونقول صباح نصيفط تاني مازن يقلب ليا ولا مصطفى يسول..

مانطقات خديجة بحتى حرف وهي تلاح عليها عنقاتها ونزلو دموعها على كتف ختها الكبيرة الحنينة...كاتبكييي حتى بدا يتسمع صوتها كثر ومينة كطبطب عليها مبتاسمة...تنهدات مينة بحزن تا نزلو دموعها وهزات عينيها للسما كادعي ربي يخلي هاد الشمل مجموع ولهلا يفرقو...

الفيرما...

كلاو حتى شبعو وتجمعات الطابلة خلاو غير قرعة والماس لمازن الي كب منها كاس وشربو دقة وحدة وناض مخليهم مشى للطواليط يغسل ايديه حيت مسحو غير بالمشاور ولكن ماقنعهمش وغسلو ايديهم بالصابون...

مصطفى : عمرنا الكرش تا تگهمنا..."كايدير ايدو على فمو ويتگرع..كمش حجبانو"...خزيييت...

مريم : كترتي ههه..

مصطفى : جهلت الله يستر...

ضار جيهة السربايا وهز ايدو طرطق صباعو وتم جاي واحد السرباي شافو تا وقف عليهم...

مصطفى : واحد نص ساعة وجيب ليا قهيوة كحلة...ونتي...

مريم"وسعات عينيها" : لا لا مابقى لي فاين نزيد اوعدي...

مصطفى : ياكما تتخمتي نكب ليك والماس..

مريم : لا لا مزيانة...الحمد لله...

حرك راسو وضار عند سرباي وصاه حتى على قهوة لمازن الي تم جاي من بعد ما غسل ايديه وفمو...ريح فبلاصتو تسند بظهرو لور شوية وحط رجل فوق رجل ودار دراعو فوق راسو...شاف فمريم...

مازن"شير ليها بصبعو" : بغيتي شي حاجة...

مريم"شافت فيه بابتسامة خافتة" : لا الحمد لله شبعت...الله يقوي الخير ويجعلها نعمة دايمة...

مازن"ضار جيهة الشرجم كايشوف ويحرك فراسو بثقالة" : بصحتك...

مصطفى"تقاد فجلستو" : والله الى تفويجة من داكشي..."ضار جيهة مريم" دزنا فوجهك اودا مريم ههه..

مازن"عينيه على برا ونطق بنبرة ثقيلة هادية" : عمر الشمش ماشرقت..

مصطفى : وانا ديما ناكرك نوض دعيني اسعادة العميد الاقليمي...ولا هبطني لبنيقة واحد اليومين...

مازن : البنيقة غا مسالية ليك...

كاينطق بشوااايا بواحد الطريقة كايستفز مصطفى بالرييط ههه مريم جاتها الضحكة وضارت عند مصطفى الي ضار شاف فيها...

مصطفى : شتي بيمن غاتجوجي ؟!..

مريم"تبسمات وضارت جيهة شرجم حشمات"...

مازن يلاه ضار كايشوف فيها ويشوف ديك التزنيگة الي تزنگات حتى صونا ليه تيليفونو فوق الطابلة نزل عينيه ليه وهو يبان ليه رقم خاص...هزو ودارو فوذنيه مادوا ماتكلم بقى دايرو فوذنيه كايسمع حتى قطع وهو يتگعد مكررره...دوز على وجهو بايديه وشعرو وهو يهز السوارت والتيليفون وناض تا هزو ريوسهم...

مصطفى : ياك لباس ؟!...

مازن : عندي مايدار..."شاف فساعتو وشاف فمريم"...خالي يلحگك..هانية ؟!..

مريم"حركات رايها" : اه ماعليش...

مازن"شاف فخالو" : تهلى.."شير ليه بعينيه لمريم"…

مصطفى : صافي تهنى...

خلاهم ومشى طالع ليه الخز...الخدمة عندو ماكتعرفش الوقت ديال الراحة الى خرج شي مشكيل كايخص يعرفو...

مصطفى"ضار عند مريم وهز حجبانو" : شتييي هادشي عولي عليه ملي تعيشي نتي وياه تحت سقف واحد..

طبيعة خدمة مازن معروووفة...وهي را شافت هادشي ملي كانت عايشة معاهم واحد الفترة...وحضرات لمعانات مينة معاه ملي كايجي معطل...شافت فيه وتبسمات بخفوت محركة راسها زعما عرفت...هز حجبانو ونزلهم بمعنى هادشي الي عطى الله...ولا لغى طلبية قهوة مازن واكتفى غير بقهيوة ليه هو...بقاو جالسين تما كايهضرو...حتى وصل الوقت وهي تنطق مريم...

مريم : واقيلة نمشيو...بغيت نلحق نشوف خالتي قبل ماترجع...

مصطفى : غا عولي عليها بايتة گالت ليا يقدر نجلس معاهم يومين...

حركات راسها وهما ينوضو...هزات صاكها وخرجات سبقات خلاتو هو مشى لاكيس بغى يخلص القهوة الي شد لقا مازن خلصها مع الغذا كامل خرج كايدعي معاه ويعاود...ركبو فالسيارة وخرجو من الفيرما بنفس مبدل وتفويجة جابها ليهم الله دايزها الكلام وكان اول موعد بين مريم ومازن...وهما شادين الطريق صونا تيليفون مريم الي جبداتو من الصاك لقات زيد الي كايصوني...

مريم : الو خويا زيد...

زيد : ختي مريم لباس ؟!..

مريم : الحمد لله ونتا كيف عامل...

زيد : جمعي كلشي وقولي لباس...ياك هانية مزيانة مرتاحة ؟!..

مريم : هه الحمد لله علاش....

زيد : غير بغيت نسول فيك...لا تكوني مخلوعة من الجلسة ديال بعد غذا...غير رتاحي الي كانت يكون ليها الله...راني داير فوق جهدي اختي والله شاهد...

مريم : عارفة الي كاين...انا مهنية ومرتاحة عارفة شكوون معايا...

زيد : تهناي ورتاحي وديري كلشي فبالك...انا من الي وقع ليا معاك فداك السراح اللول دخلت سوق راسي ههه وشوفي محامي ليا سنييين هادي وليت نخاف...

مريم : الله يسمح ليا منك اخويا ههه...ياك بلا مانحضر..

زيد : بلاش باش ماكان نعلمك اش كاين ضروري...مهم غا عيطت نسول فيك حيت شاد ضوصي ديالك كنشوف فيه...تهلاي فراسك وسلمي على داك خالي قولي ليه تانا بلوكيتك...

مريم"شافت فخالها وضحكات...قطع معاها وهي تنهد واحد التنهيدة طوييييلة كاتحس فيها بواحد الراحة فشكل احساسها ايجابي حاسة بكلشي غايسالي وهاد التعب الي لازمها قرابة العام هاهو غايتفك...هما على مشارف رمضان وكلشي غايكون مزيان...وصلو لمولاي يعقوب والعشية تعاشات ريحة الطياب عاطية من المحلات القهاوي وريحة الشباكية كاتوجد...

حلات الباب ودخلات هي وياه تا بداو يشمو فريحة العطرية والقوام ديال الشباكية...

مصطفى : ممم ريحة شعبان ههه...

خديجة : على سلامتكم هه...

مينة : ورا الخميس الجاي النص فشعبان...

مصطفى : الله يجيب الصحة والسلامة...

مريم سلمات على خالتها وحاسة بارتباك ومينة كاتسلم عليها ومبتاسمة...بقى معاهم مصطفى حتى دار معاهم گوتي وخرج فحالو مخلي مينة معاهم...خرجات مريم من الطواليط موضية ومشات للصالون لبسات لباس الصلاة فرشات صلايتها وصلات العشا وتبعاتو الشفع والوتر....يلاه سالات كاتسبح وهي تدخل مينة لعندها جلسات فالسداري كاتشوف فيها تا كملات وضارت مريم بابتسامتها الحنينة...نطقات بهدوء...

مريم : ياكما بغيتي تصلي شي ركيعات عاود...

مينة : لا بلاتي تانبغي نعس ونصليهم..

حركات مريم راسها وضارت بغات تنوض حتى حسات بيها نزلات من السداري وجلسات حداها...شدات ليها فايدها وشافت فيها لقاتها كاتشوف فيها بابتسامة...

مينة : عارفاني فاش باغية ندوي ؟!..

مريم"تبسمات وحركات راسها"...

مينة : ماكانت طيح ليا على بالي يجي التيسير على يدك...كان ساد الباب ومزكرم عليه...كل وجيبة نقوليه حل داك الباب اولدي خليني نشوفك تاني بمرتك خليني نتهنى عليك...ماحدي باقي شادة شوية فصحتي نرتاح تانا من الهم...لا نتا لاخوتك ونشوف ولادكم نهزهم بين ايدي...والو ماكانش يبغي...شفت ليه بنت الناس مابغاهاش...على انا طاح فبالي ابنتي يبغيك نتي وكون يطيح بالفرحات نسبقك نتي عليهم..راني ندي حتى الوجيبة تقرب ختي مني...وليني ماطاحش فبالي حيت ملي عرفتك ونتي سادة الباب كتر منو وحالفة ماتخطوي فالجواج على ماداز عليك...وعلى المشاكيل الي عندك...ملي قالها ليا صدمني وزاد خلاني نهار كلو وانا نخمم...

مريم : حتى انا اخالتي نهار قالهالي ماثيقتش...حيت من نهار شفتو وانا عيني ماكنهزهاش فيه وكانقيل نقولو خويا مازن...مانكذبش عليك حتى انا قولت ليه الله يسهل عليك ببنت الناس حسن مني انا عامرة مشاكيل...قالي بغيتك بيهم...حتى انا فكرت ليه وانا براسي سادة داك الباب...مهمومة وعامرة بالغبينة...نتي بغيتي ليه الي تقوم بيه وتخليه يرتاح ملي يرجع لدارو...بغيتي تشوفي ولادو...

مينة"تبسمات وعينيها لامعين فيها" : مانلقاش ماحسن منك ابنتي...كلنا دوزنا حقنا من المشاكيل...ملي بغاك ماعندي منقول...ونقوليك بلا كذوب خفت ابنتي يوقعو مشاكيل بيناتكم ويتفرتك الشمل...

مريم"بقات تشووف فيها وهي تحط ايدها فوق ايد مينة وطبطبات عليها" : شفنا منكم الخير وعيبكم بعيييد...وانا وحيدة ماما ربات فيا الخير ورباتني الوقت والزمان الي يخليني مانكونش بنت لحرام نفرق الشمل...واخا يوقع الغيار عمر ختك ماتسد عليك بابها والى بغات انا مانخليهاش..."باست ليها ايدها"...نتي والدة الرجال ومازن الكبير فيهم...

تبسمات مينة براحة باستها ورضات عليها وناضو خرجو من الصالون مينة مشات لكوزينة ومريم سمعات تيليفونها كايصوني...لقاتو هو كايعيط ليها ضارت جيهة الباب سداتو وهي تطلق الخط وقالت..

"..مريم : السلام عليكم خويا مازن.."نسات...

مازن"جمع غوباشتو..اصلا جاي مخزز من الخدمة" : مشاركين كرش وحدة الشريفة ولا كيفاش ؟!...كيفاش هاد خوك مازن ؟!...

يتبع...